La sermon sur la monte

La bondises

1 Cuando El ia vide la multe, El ia vade a la monte. E, pos cuando El ia reposa, sua seguores ia veni a el.

2 E El ia abri sua boca e ia instrui los, disente:

3 Bondiseda es los ci es povre en la spirito, car la rena de sielo es la sua.

4 Bondiseda es los ci lamenta, car los va es comfortada.

5 Bondiseda es los ci es umil, car los va erita la tera.

6 Bondiseda es los ci es fame e side per justia, car los va es sasiada.

7 Bondiseda es los ci pardona, car los va es pardonada.

8 Bondiseda es los ci es pura en sua cores, car los va vide Dio.

9 Bondiseda es los ci oteni pas, car los va es clamada la enfantes de Dio.

10 Bondiseda es los ci es perseguida per la causa de justia, car la rena de sielo es la sua.

11 Bondiseda es vos cuando personas maltrata vos e persegui vos e dise multe formas de malia contra vos per causa de me.

12 Selebra e es multe joiosa, car vosa recompensa en sielo es grande, car la profetas ante vos ia es perseguida en esta modo ance.

Regulas nova

13 Vos es la sal de la tera, ma si la sal ia perde sua sabor, como lo deveni denova salida? Alora, lo no ta es bon per cualce cosa, ma es refusada e craseda su la pedes.

14 Vos es la lus de la mundo. Un site cual es funda sur un colina no pote es ascondeda.

15 On no ensende un candela e pone lo su un sesto, ma sur un portacandela, afin lo ta dona lus a tota persones en la casa.

16 Lasa vosa lus lumina per otras, afin los pote vide vosa bon operas, e per glori vosa Padre ci es en la sielo.

17 No pensa ce me veni per destrui la lege de la profetas. Me no veni per destrui lo, ma per reali lo.

18 Car me disa vera a vos: Asta la siela e la tera desaperi, no un punta e no un vergula va desapari de la lege asta tota es realida.

19 Donce, algun ci va desobedi la plu peti de esta comandas e va instrui otras ance en esta modo, el va es clamada la plu peti en la rena de sielo; ma algun ci va obedi e ensenia esta comandas, el va es clamada grande en la rena de sielo.

20 Car me dise a vos ce, sin ce vosa virtua es plu grande ca la virtua de la scrivores e la fariseas, vera, vos no va entre la renia de sielo.

21 Vos ia oia la anticas dise: “Tu debe no mata,” e “Algun ci mata es en peril de judi.”

22 Ma me dise a vos, algun ci es coler a sua frate sin causa va es en peril de judi; e algun ci dise a sua frate “pigra” va es en peril de la consilia; ma el ci disa “stupida” va es en peril de la focos de inferno.

23 Donce, si tu trae tua donadas a la altar e ala recorda ce tua frate ave un problem con tu,

24 Lasa tua donada ante la altar e vade a via. Prima, es reconsiliada con tua frate e alora reveni e dona tua donada.

25 Reconsilia rapida con tua enemi cuando tu es a la via con el, afin a alga ora tua enemi no trae tu a la judor, e la judor trae tu a la polis, e tu es poneda en la prison.

26 Me dise vera a tu, tu no va veni de ala asta la ora en cual tu paia la sentim final.

27 Vos ia oia la anticas dise: “Tu debe no adultera.”

28 Ma me dise a vos, algun ci regarda un fem con libido ia adultera ja en sua cor.

29 E si tu oio destra fala tu, estrae lo e lansa lo de tu; car tu profita plu si un de tua membros mori, ca si tua corpo completa es lansada en la enferno.

30 E si tu mano destra fali tu, corti lo e lansa lo de tu; car tu profita plu si un de tua membros mori, ca si tua corpo completa es lansada en la enferno.

31 Lo es diseda: “Algun ci envia sua sposa a via, debe dona un contrata de divorsa a el.”

32 Ma me dise a vos, algun ci envia sua sposa a via, eseta per nonfidelia, causa ce el adultera; e algun ci va sposi on ci es divorsada, adultera ance.

33 Ancora, tu ia oia la anticas dise: “Tu debe no jura, estra ce tu juras a la Senior.”

34 Ma me dise a vos, no jura en tota casos, no a sielo, car lo es la trono de Dio;

35 No a la tera, car lo es Sua reposapedes; no a Jerusalem, car lo es la site de la Re grande.

36 E tu debe no jura a tua testa, car tu no pote cambia un capela blanca o negra.

37 Ma dise “si, si” o “no, no;” car alga cosa plu ca estas veni de malia.

38 E vos ia oia la dise, “Un oio per un oio, e un dente per un dente.”

39 Ma me dise a vos: No resista malia, ma si un person colpa tu a tua jena destra, presenta la otra jena ance a el.

40 E si un person suplica tu en la lege e prende tua jaca, dona a el tua capa ance.

41 E si un person forsa ce tu vade un milia, vade du milia con el.

42 Dona a el ci demanda de tu, e no evita el ci vole presta de tu.

43 Vos ia oia la dise: “Tu debe ama tua visina e odi tua enemi.”

44 Ma me dise a vos, ama tua enemis, bondise los ci maldise tu, fa bon a los ci odi tu, e prea per los ci usa tu con odia e persegui tu,

45 Afin vos pote es la enfantes de vos Padre ci es en sielo. Car El causa la sol brilia mesma per la mal e la bon, e El envia la pluva mesma a la justa e la nonjusta.

46 Car, si vos ama los ci ama vos, cual cosa tu gania? La coliores de impostas fa la mesma, no?

47 E si tu saluta sola tua frates, cual cosa tu fa plu ca otras? La coliores de impostas fa la mesma, no?

48 Donce, ta ce tu es perfeta, mesma como tua Padre ci es en sielo es perfeta.

Mateo 6

1 Es atendente ce vos no mostra carita ante otra persones per es videda par los; car alora vos no va reseta tua recompensa de vosa Padre ci es in sielo.

2 Donce, cuando tu mostra carita, no sona un trompeta ante tu, como la ipocrites en la sinagoga e en la ruas, per reseta la gloria de umanas. Vera me dise a vos, los va ave sua recompensa.

3 Ma cuanto tu mostra carita, no permete ce tua mano sinistra sabe lo cual tua mano destra fa,

4 Car tua carita debe es en secreta; e tu Padre ci vide en secreta, El va recompensa tu en abria.

5 E cuando tu prea, no es como la ipocrites. Los gusta prea stante en la sinagogas e a la cantos de la ruas, per es videda par otras. Vera me dise a vos, los va ave sua recompensa.

6 Ma cuando tu prea, entra tua saleta e, cuando tu ia clui la porta, prea a tua Padre en secreta; e tua Padre ci vide tu en secreta va recompensa tu en abria.

7 Ma cuando tu prea, no usa repetas vanos como la paganes, car los pensa ce los es oiada cuando los parla multe.

8 Donce no es como los, car tua Padre sabe cual cosas tu nesesa ante cuando tu demanda los de El.

La prea de la Senior

9 En esta modo prea: Nosa Padre, ci es en sielo, santa es tua nom.

10 Ta ce tua rena veni. Ta ce tua vole es fada, en tera como en sielo.

11 Dona oji nos pan dial a nos.

12 Pardona nos per nosa detas, como nos pardona nosa detores.

13 E no condui nos a tenta, ma proteje nos de malia. Car la tua es la rena, e la potia, e la gloria per tota tempo. Amen.

14 Car, si vos pardona otras per sua ofendes, vos Padre en sielo va pardona vos ance.

15 Ma si vos no pardona otras per sua ofendes, vos Padre no va pardona vos.

16 Plu, cuando tu juna, no mostra un fas triste, como la ipocritas. Car los malforma sua fases per apare juna a otras. Vera me dise a tu, los va ave sua recompensa.

17 Ma tu, cuando tu juna, pone unguento a tua testa e lava tua fas,

18 Car tu no nesesa apare juna a otras, ma a tua Padre en secreta; e tua Padre, ci vide en secreta, va recompensa tu en abria.

De ricia

19 No reserva tesoros per vos mesma en la tera, do la papilios de note e la osida ta ruina los, e do la furores ta entra e fura los;

20 Ma reserva tesoros per vos mesma en sielo, do no papilios de note e no osida ta ruina los, e do la furores no ta entra e no fura los.

21 Car do vosa tesoro es, do es vosa cor ance.

22 La lus de la corpo es la oio. Donce, si tua oio es bon, tua corpo completa va es plen de lus.

23 Ma si tua oio es mal, tua corpo completa va es plen de oscuria. Donce, si la lus cual es en tu es oscurida, como grande es la oscuria!

24 No person pote servi du mestres; car el va odi la un e ama la otra, o el va teni la un e desprende la otra. Vos no pote servi e Dio e Mamon (pd. ricia).

25 Donce me dise a vos, no pensa de vosa vive, de cual tu va come, o cual tu va beve, no ance de tua corpo o cual vestes tu va porta. Esce la viva no es plu ca carne, e la corpo no es plu ca vestes?

26 Vide la avias de la aira: los no seme e no recolie; e ancora tua Padre en sielo nuri los. Esce vos no plu bon ca los?

27 Ci de vos, par pensa, pote junta un codo de longia a vosa altia?

28 E perce vos pensa de vestas? Considera la liles de la campo, como los crese. Los no labora e no tese,

29 Ma vera me dise a tu ce no ance Solomon en tota sua gloria ia es vestida tan bela como un de los.

30 Donce, si Dio en esta modo vesti la erbas de la campo, cual es oji asi e es lansada doman en la forno, esce El no vesti vos multe plu, vos de fide peti?

31 Donce no pensa “Cual nos va come?” o “Cual nos va beve?” o “Cual nos va porta?”

32 La paganes xerca per tota esta cosas. Tua padre en sielo sabe ce vos nesesa tota esta cosas.

33 Ma xerca prima la renia de Dio e Sua virtua, e tota esta cosas va es donada a vos.

34 No pensa de doman; doman va pensa de se mesma. Sufisinte per cada dia es la mal de la dia.

Mateo 7

La avisas

1 No judi, afin vos no va es judida.

2 Car la judi ce vos dona es la judi per cual vos va es judida; e la mesura tu usa va es la mesura con cual vos va es mesurada.

3 Perce tu regarda la particula en la oio de tua frate, ma no considera la faxon en tua propre oio?

4 Como tu pote dise a tua frate “Permite ce me estrae la particula de tua oio” cuando tu ave un faxon en tua propre oio?

5 Ipocrita! Prima estrae la faxon de tua oio propre, e alora tu va vide sufisinte clar per estrae la particula de la oio de tua frate.

6 Vos debe no dona cosas santa a canes, e no lansa vos perlas ante porcos, afin los no va crase los su pedes e alora reveni e lasera tu.

7 Demanda, e vos va reseta; xerca, e vos va trova; toca, e la porta va es abrida per vos.

8 Per cadun ci demanda va reseta; e el ci xerca va trova; e per el ci toca, la porta va es abrida.

9 Cual person entre vos, si sua fio demanda per pan, ta dona un petra a el?

10 O si el demanda per un pex, ta dona un serpente a el?

11 Donce, si vos, ci es mal, sabe como dona bon donadas a tua enfantes, cuanto plu tua Padre en sielo va dona bon cosas a on ci demanda los de El?

12 Donce, la modo en cual vos desira ce otras trata vos, vos debe trata ance los; car esta es la lege e la profetas.

13 Entra tra la porta streta, car la porta larga e la via grande vade a destrui, e multe entra ala.

14 Streta es la porta e la via cual vade a vive, e poca trova el.

15 Es cauta per profetas falsa, ci veni a vos en la vestes de oveas, ma es lupos perilos a en.

16 Vos va reconose los par sua frutas. Esce persones colie uvas de spinas o figas de cardos?

17 Ance, cada bon arbor dona bon fruta, ma un mal arbor dona mal fruta.

18 Un bon arbor no pote dona mal fruta, e un mal arbor no pote dona bon fruta.

19 Un arbor cual no dona bon fruta es cortida e lansada en la foco.

20 Donce, vos pote conose los par sua frutas.

21 No cadun ci dise a me “Senior! Senior!” va entra a la rena de sielo, esetante el ci fa la vole de mea Padre en sielo.

22 Multe va dise a me en acel dia “Senior! Senior! Esce nos no ia profeta en tua nom, e ia estrae demones en tua nom, e fa multe operas stonante en tua nom?”

23 E donce me va profesa a los “Nunca me ia conose vos; vade de me, vos ci fa nonjustia.”

24 Donce, cadun ci oia esta dises de me e reali los, me va compare el a un person saja, ci ia construi sua casa sur roca.

25 An si la pluve cade, e la deluvia veni, e la venta sofla e colpa a esta casa, la casa no va cade, car el ia es fundada sur roca.

26 E cadun ci oia esta dises de me e no reali los, me va compara a un person fol, ci construi sua casa sur arena.

27 E cuando la pluva cada, e la deluvia veni, e la venta sofla e colpa a esta casa, la casa va cade, e la cade va es grande.”

28 E final, cuando Jesus ia fini esta dises, la persones ia es stonada par Sua dotrina;

29 Car El instrui los como algun con autoria, e no como la scrivores.