Dao de jing

1

Un Dau cual es parlada no es la Dau constante.
Un nom cual es nomida no es la nom constante.

La nonesiste nomi la orijin de sielo e tera.
La esiste nomi la madre de tota cosas.
Oserva la nonesiste si tu vole vide se esense.
Oserva la esiste si tu vole vide se aspeta.

Esta du ave orijin comun
An si los ave nomes diferente.

Dise ce ambos es profonda,
Ancora plu profonda,
La porton a tota misterio.

2

Cuando tuta la mundo vide belia como belia
Ave fea ance.
Cuando tuta vide amablia como amablia
Ave basia ance.

Donce es ce la esiste e la nonesiste veni juntada.
Difisil e fasil completi la un la otra.
Longa e corta formi la un la otra.
Alta e basa inclina la un a la otra.
Sona e musica armonios la un con la otra.
Ante e pos acompania la un la orta.

Donce es ce sajas fa sin fa
E instrui sin parla.

Tota esentes nase en la presente,
E non es refusada.
Los es nurida ma no poseseda
E aidada ma no fideda.

Merita es atenida ma no declarada.
Car no es declarada, no es perdeda.

3

No loda la talentos
Serti ce nun va luta.
No valua tesoros rara
Serti ce nun va fura.
No mostra cual persones desira
Serti ce los cores no va es confusada.

Sajas prefere vacui cores e pleni ventres,
Debili aspiras e forti osos.
Los gida nos a no sabe e no vole.
E donce la persones astuta no osa ata.

Ata sin ata e ordina domina.

4

Dau es vacua, e usa no va consuma el.
El es tan profonda ce el aspeta es la asendente de tota esentes.

El desagi la agu e laxi la maraniada.
El moli la brilia e uni con la polvo.

El es tan profonda ce el aspeta eterna.
Me no sabe de ci el es la enfante.
El aspeta es la orijinal.

5

Sielo e tera no es bonvolente.
Los regarda cada cosa como un can de palia.
Sajas no es bonvolente.
Los regarda cadun como un can de palia.

Esce la spasio entre sielo e tera es
Como un soflador?
An si el es vacua,
Plu on usa el, plu el dona.

Parla de el es poca valuada.
Plu bon ta es oserva la cor interna.

6

La spirito de la vale no mori.
On nomi el la fema misterios.

On nomi la porton de la fema misterios
La radis de sielo e tera.

El pare es sempre presenta.
On no nesesa fortia per usa el.

7

Sielo permane e tera dura.
Los permane e dura car
Los no vive per se.
Donce los permane per sempre.

Sajas abandona ego e trova se a ante.
On manteni la ego estra la ego.

Esce es car los no ave ego ce se ego es realida?

8

La bon la plu alta es como acua.
Acua benefica cada esente sin luta.
El ocupa la locas cual on maltrata.
Tal el semble Dau.

En abita el valua la tera.
En senti el valua la profonda.
En dona el valua la vera.
En parla el valua fida.
En gida el valua ordina.
En labora el valua capasia.
En ata el valua la tempo.

Cuando nun luta,
Nun es culpada.

9

Pleni e pleni?
Es plu bon sesi a la bon tempo.
Bate e agi?
Agia no pote dura.

Pleni un sala per oro e jada?
On no pote proteje el.
Orgulo en ricia e fama?
Como tu ia fali ja.

Completi tu taxe e alora retira.
Ave asi la natur de Dau.

10

Esce la consensia pote abrasa unia con no separa?
Esce la enerjia pote ateni la suavia de un bebeta?
Esce la vide pote es profonda e abrida e sin falta?
Esce la ama e la governa de persones pote prosede sin artifisia?
Esce la porton de sielo abri e clui par atas femin?
Esce la vide clar pote es atenida par nonconose?

El produi e nuri,
Produi sin posese,
Ata sin espeta,
E alti sin emprende controla.

On nomi esta la virtua profonda.

11

Tredes raios comparti un sentra,
De cual se vacuia fa la caro es usos.

Moldi arjila a un bol.
La vacuia fa la bol es usos.

Talia portes e fenetras per fa un sala.
La spasios vacua fa la sala es usos.

Tota cual esiste es beneficos car
Vacuia lasa el opera.

12

La sinco colores sieci la oio.
La sinco tonos sordi la orea.
La sinco sabores desagi la palato.
Corsa e xasa dementi la cor.
Benes rara impedi la avansa.

Donce sajas ata de la ventre e no la oio,
Refusa acel, aseta esta.

13

La favore e la desonora es egal asustante.
Considera altia e mal fortuna es la ego.

Per ce on dise ce la favore e la desonora es egal asustante?
La favore implica un cade.
La gania de favore es tan asustante
Como la perde de el.
Donce on dise ce la favore e la desonora
Es egal asustante.

Per ce on dise ce altia e mal fortuna es la ego?
Me crede ce altia e mal fortuna
Es avenis de la ego.
Si me no ta ave ego,
Me ta ave cual tipo de mal fortuna?

Donce valua e regarda tota atas sur la tera como tu propres,
E tota la tera pote depende de tu.

Ama e regarda tota atas sur la tera como tu propres,
E tota la tera pote es confidada a tu.

14

On no vide el par regarda.
Nomi el nonvidable.
On no oia el par escuta.
Nomi el nonoiable.
On no teni el par saisi.
Nomi el nonpalpable.

On no pote comprende esta tre.
Los misca en un.
No briliante a supra,
No oscur a su,
Per sempre sin nom,
El reveni al nonesiste.
Nomi el forma sin forma,
La imaje de nonesiste.
Nomi el neblos e ombral,
Con no fas per vide e no dorso per segue.
Teni la Dau antica per palpa la presente
E segue la fibre de Dau a la fonte.

15

Ateni vacuia completa.
Manteni un calmia constante.
Tota cosas emerji la un con la otra.
E me oserva los reveni.
Cada de la multia reveni a la radis.

Reveni a la radis trae calmia.
Es nomida reveni a la real.
Reveni a la real mostra la constante.
Vide la constante sinifia claria,
E no vide la constante invita mal fortuna.
Vide la constante es aseta.

On ci aseta es ance justa.
On ci es justa es ance intera.
On ci es intera es ance natural.
On ci es natural teni la Dau.
On ci teni la Dau va dura.

Cuando ego mori, peril mori ance.

16

La sajas antica ci ia cultiva destros Dau
Ia es sutil e misterios, abrida e profonda,
Profonda ultra comprende.
Car on no ia pote comprende los,
On pote simple reconta como los ia apare.

Atendente como si traversante un rieta en inverno.
Vijilante como si suspetos de se visinas.
Respetos como un visitor invitada.
Jeneros como jelo fondente.
Simple como un bloco nonsiselida.
Grande como un vale.
Confusada como acua fangos.

Ci pote lasa fangosia calmi lenta?
Ci pote lasa esta lentia deveni vivente?
Los ci garda esta Dau desira no suprapasa.
Desirante no suprapasa,
Los no es gastada
Ma es renovida en loca.

17

La gidores la plu bon es apena conoseda.
La gidores min bon es amada e lodada.
La gidores an min bon es temeda.
E la min bones es despetada.

Si tu no fida sufisinte, on no va fida tu.
Si tu es saja e considera tu parolas,
Cuando tu taxe es completa
E tu labora es finida,
On va dise
Ce el ia reali se mesma.

18

Cuando la Dau grande es oblidada
La credes de la umania e la virtua emerji.

Cuando sajia e intelijentia apare
La finje grande comensa.

Cuando no ave pas en la familia
La obliga e la promete segue rapida.

Cuando la pais es confusada e caosos
Ministros fidos abunda.

19

Abandona sajia e desprende sabe.
Cadun gania a sento veses.

Abandona bonvole e desprende judi.
On reveni a respeta e amosia.

Abandona astutia e desprende gania.
Furores e banditos sesa esiste.

Esta tre es aidos ma no es sufisinte.
Alga cosa plu es nesesada.

Vide la comun e abrasa la simple.
Redui la me e diminui desira.

20

Abandona aprende, e tu ave no ansia.
Entre si e oce,
Como grande es la difere?
Amirable e ofendente.
Como diferente es estas?
On teme cual on debe teme.
Tan cru e nonsentral!

Otras pare tan briliante e bonumoros,
Como si los gusta un banceta grande
O asende un teraza en primavera.
Sola me es calma, donante no indica,
Como un bebeta ci no ia surie,
Fatigada e sin espera, como algun con no casa.
Otras ave plu ce nesesada.
Sola me pare manca.
Me es un tal fol!
Otras es tan briliante e bonumoros.
Sola me es oscur e muda.
Otras es tan agu e atendente.
Sola me es oscur e muda,
Cuieta como la mar,
Nondirijeda como la venta.

Tota otras ave se ojetos.
Sola me es ostinos e basa.
Sola me, diferente de la otras,
Valua susta de la fonte.

21

Virtua grande veni par segue sola Dau
Dau pare evitante e neblos.
El pare neblos e evitante,
Ma el conteni tota cual apare.
El pare neblos e evitante
Ma el conteni tota cual vive.
El pare cuieta e oscur
Ma el conteni tota esense.

Esta esense es profonda real .
Demonstra es a se sentra.
De la pasada distante a la dia presente,
Se nom no es oblidada.
Usa el per vide la asendente de tota.

Como me conose la asendente de tota?
Sola par esta!

22

Sede e deveni intera.
Curvi e deveni reta.
Vacui e deveni plen.
Senese es renovi.
Ave poca es gania.
Ave multe e es confusada.

Sajas abrasa unia
E deveni la esemplo per cadun.

Se ego no mostra se, e donce el es clar.
Se ego no es serta, e donce el apare.
Se ego no declara, e donce el produi.
Se ego no vanta, e donce el survive.

Car los no luta
Nun en la mundo luta con los.

La diseda vea es
Sede e es intera.
Esce estas es parolas vacua?

Es serta ce interia va es restorada.

23

Parla poca es natural.

Un tempesta de venta no dura tra la matina.
Un pluvon no dura tra la dia.
Ce causa estas?
Sielo e tera.
An sielo e tera no pote fa los dura.
Como un person ta pote?

Si tu segue Dau, tu uni con Dau.
Si tu valua virtua, tu uni con virtua.
Si tu aseta la perde, tu uni con la perde.

Uni con Dau, e Dau bonveni tu.
Uni con virtua, e virtua bonveni tu.
Uni con la perde, e la perde bonveni tu.

No fidante sufisinte, tu no es fidada.

24

Sur la ditos de se pedes, on bambola.
Rapida paseante, on fa no paso.

Mostrante se, on no es clar.
Fidante se, on no es videda.
Declarante se, on ave no merita.
Orgulos de se, on no dura.

Los con Dau nomi estas
Tro multe comeda e fortia nonusos,
Cosas cual cadun deplora.
Los con Dau evita los.

25

Alga cosa esiste sin forma e completa
Ante la nase de sielo e tera.
Silente e vacua,
El sta solitar e no move.
Aveninte a cada loca e en no peril,
On pote considera el como la madre de sielo e tera.

Me no conose se nom.
Nesesante un parola, me nomi el Dau.
Nesesante un nom, me nomi el grande.

Grande sinifia continua.
Continua sinifia vade distante.
Vade distante sinifia revade.

Donce, Dau es grande.
Sielo es grande
Tera es grande.
Persones es grande ance.

En nos mundo es cuatro cosas grande,
E persones es un de estas.
Persones atende la modos de tera.
Tera atende la modos de sielo.
Sielo atende la modos de Dau.
Dau atende se modo propre .

26

Pesos es la radis de lejeria.
Calma es la mestre de freta.

Donce sajas vaga tra la tota dia
Sin parti de se furni.
An si la vistas es bela,
Los resta ultra estas.

Ce aveni cuando un mestre de des mil carones
Valua lejera la ego en la mundo?

Lejeria perde se radis,
E freta sede comanda.

27

Bon paseores lasa no trasa.
Bon parlores fa no eras.
Bon calculores nesesa no contadores.
Bon cluores no visi la porton,

Ma on no pote abri el.
Bon liores no lia la corda,
Ma on no pote laxi el.

Donce sajas esele a aida otras
Ma rejeta nun,
E esele a salva situas
Ma rejeta no cosa.

Nomi esta la pratica de carita.

Los con esta capasia es esemplos a los de cual el manca.
E los sin esta capasia es aidos a los ci ave el.
Si tu no valua tu esemplo o ama tu aida,
An si tu es astuta, tu es multe confusada.

Nomi esta un misterio profonda.

28

Conosente la mas,
Gardante la fema,
Es como un rio a tota la mundo.
Como un rio a la mundo,
Virtua es constante e no parti.
Reveni a bebia.

Conosente la blanca,
Gardante la negra,
Es un model per la mundo.
Como un model per tota la mundo,
Virtua es constante e no vasila.
Reveni a la infinita.

Conosente la onoros,
Gardante la nonrespetable,
Es un vale per tota la mundo.
Como un vale per tota la mundo,
Virtua es constante e sempre bastante.
Reveni a la bloco nonsiselida.

Siseli la bloco fa la utiles
Cual sajas usa per gida.
Ma la governa no divide.

29

Alga vole muta la mundo.
Me vide ce on no pote fa esta.
La mundo es un aveni santa,
E on no pote dirije el.
Interfere e tu mali el.
Saisi e tu perde el.

Alga gida e alga segue.
Alga sofla dur e alga respira dulse.
Alga es forte e alga es jentil.
Alga construi e alga destrui.

Donce sajas evita la estrema,
Evita la estravagante,
Evita la suprafluente.

30

Ci usa Dau per aida un renor
No usa armas per fa gera contra la mundo.
Tal atas tende rebondi.

Un armada produi un recolie de rubos.
Un batalia produi un anio de famia.

Los ci ave capasia ateni se gol e alora para,
No osante considera usa fortia.

Los reali ma no selebra.
Los reali ma no declara.
Los reali ma no vanta.
Los reali ma no loda se.
Los reali ma no obliga otras.

Normal, fortia deveni gastada.

Esta no es Dau,
E no esente Dau,
El fini pronto.

31

An armas la plu bon es
Utiles de malia,
Vil cosas si on posese los.
Un ci ave Dau no tolera los.

A casa persones de merita favore la sinistra.
A gera los favore la destra.
Utiles de gera es utiles de mal indica,
No conveninte per persones de merita.

Do on debe usa utiles de gera
La plu bon es si on es calma e cauta
Vinse no es bela.
Si on trova el es bela
On deleta en mata.
On ci deleta en mata
No gania se goles en esta mundo.

Bon fortuna favore la sinistra.
Mal fortuna favore la destra.
Comandores plu basa ocupa la sinistra.
Comandores plu alta ocupa la destra.
Esta es protocol per un funera.

La mata de un multia
Esije tristia e plora.
Oserva un vinse como un funera.

32

Dau es sempre sin nom.
El es simple e comun,
E nun pote supresa el.

Si gidores e renores ta garda el,
Tota esentes ta segue natural.
Sielo e tera ta pluve rosio dulse.
Sin ce on demanda a los, persones ta vive en ecuilibra.

Regulas emerji e la nomi comensa.
Cuando la nomi emerji, on debe sesa.
Par sabe cuando on debe sesa, on preveni peril.
La presentia de Dau es un esemplo per tota,
Como vales de rios cual flue a la mar.

33

Ci conose otras, el ave sabe.
Ci conose se, el ave intui.
Ci susta otras, el es capas.
Ci susta se, el es forte.

Ci ave sasia, el es rica.
Ci ave un vista, el avansa.
Ci permane, el dura.
Ci mori sin mori, el vive longa.

34

La Dau grande superabunda,
Vadente a sinistra e vadente a destra.
Cada cosas depende de el per vive,
E nunca el deverji.

El labora e susede
Ma nunca reclama onora.
El vesti e nuri
Ma no dona un vantaje a se.

Car el ave no desiras,
On pote nomi el comun.

Cada cosas revade a el,
An si el no forsa la revade.

On pote nomi el eselente.
Car el no declara se esele,
Se esele es sertida.

35

Teni la imaje grande e tota veni a casa.
Se ariva trae no dole,
Sola pas, completa, e sasia.

Musica e comeda atrae la pasor,
Ma sabor manca cuando on discute Dau.

Atenta regarda el, e el no es videda.
Atenta escuta el, e el no es oiada.
Ma usa el, e el es nunca consumada.

36

Per es diminuida, on debe es ja inflada.
Per es debilida, on debe es ja fortia.
Per es abolida, on debe es ja fundida.
Per es negada, on debe ave ja dona.
Nomi estas comprendes sutil.

La moles e debiles vinse la dures e fortes.

Pexes debe resta en acua profonda
E armas debe resta ultra vista.

37

Dau fa no cosa, e tota cosas es fada.

Si gidores e renores ta pote garda esta,
Tota esentes ta crese par se mesma.

Si los crese e alora vole compete,
Me va freni los con simplia sin nom,
E los va vole no plu.

Cuando on sese desira, on gania pas
E ordina natural en la mundo.

38

Virtua alta no es virtua, donce el ave virtua.
Virtua comun teni virtua, donce el manca virtua.
Virtua alta no ata no considera ata.
Virtua comun ata e considera cada ata.
Bonvole alta ata ma no considera se ata.
Cortesia alta ata e considera cada ata.
Rituo alta ata, e oteni no responde,
Nudi la brasos e lansa colpas.

Perde Dau e virtua resta.
Perde virtua e bonvole resta.
Perde bonvole e moralia resta.
Perde moralia e rituo resta.

Ritua sinifia ce fida e serti es magra
E confusa ia comensa ja.
Sertia rapida es la flor de Dau
E la comensa de folia.

Per esta razonas sajas
Sta con la cor e no la surfas,
Sta con la esense e no la flor.

Los refusa acel e aseta esta.

39

De tempos la plu vea estos ia uni ja.
Sielo ia uni e deveni clar.
Tera ia uni e deveni calma.
Spirito ia uni e comensa persepi.
Vales ia uni e deveni abundante.
La des mil esentes ia uni e deveni produos.
Gidores e renores ia uni e deveni autonomia.
Tota estas ia ateni ja.

Si sielo no ta es clar, cisa el ta fende.
Si tera no ta es calma, cisa el ta luta.
Si spirito no ta es persepinte, cisa el ta mori.
Si la vales no ta es abundante, cisa los ta plieta.
Si la des mil esentes no ta es vivos, cisa los ta mori.

La alta ave se radis en la basa.
La importante ave se funda en la umil.

Donce gidores e renores dise ce los es
Orfanida, solitar, e no valuada.
Esce tota de los vide la radis comun?
Divide un caron e el no es un caron.

Prefere la clace de petra
Supra la brilia de jada.

40

La revade es la move de Dau.
La sede es la via de Dau.

Tota esentes su la sielo veni de esiste.
La esiste veni de nonesiste.

41

Persones agu oia de Dau
E aplica el seria.
Persones comun oia de Dau
E atende el de tempo a tempo.
Persones nonagu oia de Dau
E rie a vose.
Si los no ta rie
Dau no ta es Dau.

Donce la disedas vea:
Dau briliante pare oscur.
Dau avansada pare retirada.
Dau comun pare ru.
Virtua alta pare vacua.
Claria grande pare opaca.
Virtua bastante pare nonsufisinte.
Virtua demostrada pare frodante.
Veria natural pare volatil.

La cuadro grande ave no angulos.
La contenador grande maturi tarda.
La tono grande es rara oiada.
La imaje grande ave no forma.

Dau es ascondeda e sin nom.
Car Dau aseta, el completi ance.

42

Dau jenita un.
Un jenita du.
Du jenita tre.
Tre jenita la des mil esentes.
Tota esta esentes porta iin sur la spalas
E abrasa iang en la brasos.
Esta enerjias fusa en armonia.

Persones ave causa per odi
Es orfanida, solitar, e povre,
Ma gidores e renores nomi se per esta titulos.
Donce on pote gania par perde
O perde par gania.
La cosas cual otras ia instrui
Me instrui ance estas.
Los ci vive par violentia
No va trova un fini natural.
Me va fa de esta me crede xef.

43

En esta mundo la moda de vive la plu mol
Vinse rapida la plu dur,
E asentia vade do ave no spasio.
Donce me sabe la valua de no ata.

La leson de no parla
E la valua de no ata
Es rara realida en esta mundo.

44

Nom o ego, cual es plu prosima?
Ego o ricia, cual sinifia plu?
Gania o perde, cual feri?

Adere veni con costa grande.
Posese trae un perde pesos.

Conose de sufisi elimina desonor.
Conose de limita elimina peril.
Ave asi la via a un vive longa.

45

Ateni grande pare nonsufisinte.
Ma se usa no es descapasida.

Plenia grande pare vacua,
Ma se usa no es consumada.

Onestia grande pare vagante.
Capasia grande pare torpe.
Bonparla grande pare esitante.

Ativia vinse fria,
Ma calmia vinse caldia.

Calma e clar es la norma de la mundo.

46

Con Dau en la mundo
Cavalos de curso fa sterco per la campos.
Sin Dau en la mundo
Cavalos de gera reprodui sur la cultiverias.

No desastre esede la nonsabe de cuanto es sufisinte.
No fali esede la desira per gania.

Ci sabe cuanto sufisi serta ave sufisinte.

47

Without going out the door,
Sin sorti tra la porte

One knows the world.
On conose la mundo.

Without looking out the window,
Sin regarda tra la fenetra

One sees the nature of Dao.
On vide la natura de Dau.

The farther one goes,
La plu distante ce on vade
On vade plu distante,

The less one knows.
On conose min.

Seers don’t go out, yet they perceive.
Sajas no sorti, ma los persepi.

They don’t appear, Yet they are clear.
Los no apare, ma los es clar.

They don’t act, yet they achieve.
Los no ata, ma los reali.

48

En la xasa per sabe on gania dial.
En la xasa per Dau on perde dial,
Perde e perde tra fa no cosa
An si on fa no cosa,
Tota cosas es fada.

Forsa per gania la mundo
Sempre es estende tro distante.
No forsa es sufisinte per esta.

49

Sajas no ave un cor coerente.
Los emprende la cores de tota persones.

Me es amable a la amables.
Me es amable a la basas ance.
Virtua es amable.

Me fida los ci es fidable.
Me fida los ci no es fidable.
Virtua fida.

Sajas ata per uni la mundo.
Los fusa se cores con la cores de otras.

La plu persones tensa se per oia e vide.
Sajas oia e vide en la modo de enfantes.

50

Vive emerji liada a mori.
Los ci teni a vive es tre entre des.
Los ci teni mori es tre entre des.
Los ci ave vives
En via a la domina de mori
Es ance tre entre des.

Per ce esta es vera?
Car los vive tro envolveda en vive.

On oia ce alga maneja bon se vives.
Los encontra no rinoseros o tigres en se viajas.
Los porta no armur o armas per un batalia.
La corno de la rinosero trova no loca per penetra.
La gara de la tigre trova no loca per saisi.
La lama de un arma trova no loca per colpa.

Per ce esta es vera?
Los ave no loca do mori ta pote entra.

51

Dau jenita los.
Virtua nuri los.
Esiste formi los.
Situa completi los.
Donce aveni ce tota esentes
Onora Dau e ama virtua.

La onora de Dau e la ama de virtua
Aveni natural, sin obliga.

Dau anima los.
Virtua eleva los,
Nuri los,
Refuja e sani los,
Alti e proteje los.

Anima e fa no reclama,
Ata sin espetas,
Gida sin regulas:
On nomi esta la virtua profonda.

52

La orijin de tota la mundo es nomida la madre.
Trova la madre es conose la enfantes.
Conose la enfantes es reveni a la madre.
Peril fini cuando ego fini.

Si on bloci la coredores e
Clui la portes,
Tra tota la vive ave no luta.

Si on abri la coredores e
Deveni envolveda en consernas,
Tra tota la vive ave no aida.

Vide la comun es nomida claria.
Manteni la ajustable es nomida fortia.
Par causa de esta,
On reveni a claria
E impedi desastre.

Nomi esta la pratica de la constante.

53

Si me persepi e pratica la Dau grande,
Me sola teme es devia de el.
An si la Dau grande es comun e evidente,
La plu multe persones prefere la vias a lado.

Cuando la cortes es dividada,
La campos crese malerbas
E la granerias es vacua.
Alga vesti se en vestes ornos,
Porta spadas agu,
Come e bevi tro multe,
E ave valuoses plu ce nesesada.

Esta es fura e vanta
E multe distante de Dau.

54

Cada cual es bon fundida no va es desradisida.
Cada cual es bon abrasada no va es perdeda.
Cada jenera va aida e onora el.

Pratica esta en vive,
E tu virtua es real.
Pratica el en la familia,
E tu virtua es abundante.
Pratica el en la comunia,
E tu virtua es durante.

Pratica el en la pais,
E tu virtua es abundante.
Pratica el en la mundo,
E tu virtua es a cada loca.

On vide se par la se
E familia par la familia.
On vide un comunia par la comunia
E un pais par la pais.
On vide la mundo par la mundo.

Como me persepi la natur de la mundo?

Par esta.

55

Teni la interia de virtua,
On sembla un bebeta.
Insetos venenos no pica.
Bestas savaje no ataca.
Avias xasante no colpa.
An con osos debil e musculos mol,
El teni firma.
No consensa de mas e fema,
Se interia es evidente.
Se vivosia es completa.
Se pote cria tra la dia e no deveni roncin.
Armonia es a se culmine.

Persepi armonia es vide la constante.
Vide la constante es conose claria.
Boni la vive es encontra bon fortuna.

An si on pote considera ce vive par la vole es fortia,
Cuando cosas deveni forte,
Alora los deveni vea.

Esta no es Dau.
Cual no es Dau mori pronto.

56

Los ci sabe no parla.
Los ci parla no sabe.

Bari la coredores.
Clui la portes.
Desagi la agia.
Laxi la maraniada.
Suave la brilia.
Uni con la polvo.

Nomi esta la unia orijinal.

On no pote usa el per move plu prosima o plu distante.
On no pote usa el per gania o per feri.
On no pote usa el per onora o per umili.

Donce la mundo considera ce el es alta.

57

On usa prinsipes per governa un pais
E surprende per gida un batalia,
Ma tota no fortia per gania la mundo.

Como me sabe ce esta es vera?
Par esta!

Con tan multe restrinjes en la mundo,
An tal, la persones deveni povre.
La persones ave utiles produos,
Ma la pais e se popla es confusada.

La persones es astuta e rusos,
Ma situas strana aveni an plu.
La leges es sempre plu difusada,
Ma banditos e furores abunda.

Donce la sajas declara:

Me resta calma, e cadun coreti se.
Me no interfere, e cadun rici se.
Me renunsia desira, e cadun simpli se.

58

Cuando la governa es cuieta e noiante,
La persones es onesta e sinsera.
Cuando la governa es capable e xercante,
La persones es sin espera e posese.

Desastre depende sur bon fortuna,
E bon fortuna asconde disastre.
Ci sabe do el va fini?

Si no ave justia,
Ordina deveni descapasida,
E benefica deveni desastre.
De tempo vea la persones es ja confusada.

Donce la sajas dise:

Defini ma no divide.
Esije ma no dana.
Dirije ma no forsa.
Brilia ma no sieci.

59

Per governa persones e servi sielo,
Ave no cosa como frugalia,
Car sola frugalia indica un promete puntual,
E con promete puntual virtua abunda veni.

Con virtua abunda, tota es posible,
E cuando tota es posible, on sabe no limitas.
El ci conose no limitas pote conteni la pais.
El ci pote reteni la madre de la pais va dura sempre.

Dise ce esta ave radises profonda e firma
En un vista durante de Dau.

60

Governa un pais grande como tu coce un pex peti.

Cuando la mundo es ajustada a Dau,
Voles enemi ave no potia.

Los ave no sola no potia,
Ma se potia no feri otras.

Simil, sajas no feri otras,
E plu, los fa no cosa cual feri.

Car no la un e no la otra feri,
Virtua reveni a ambos.

61

Un pais grande move con la flue
A do tota la mundo es juntada con
La fem de la mundo
Sempre, la fema usa calma
E vinse la mas.
On usa calmia per basa se.

Donce un pais grande basa se
Per atrae la pais peti,
E un pais peti resta basa
Per atrae la pais grande.

A esta modo la un vinse par sede,
E la otra sede e vinse.

Paises grande vole sola uni
E nuri la persones.
Paises plu peti vole sola ajunta
E servi a la persones.

Ambos va ateni cual los vole
Cuando la pais grande es vera umil.

62

Dau es la profondia de tota esentes,
Un tesoro de la capases,
Un refuja per la noncapases.

On pote usa parolas bela per troca.
On pote usa atas nobil per construi fama.
Ma si la persones manca capasia,
Per ce on ta rejeta se esiste?

Cuando un gidor es instituida
E la tre ministros es instalada,
Donadas de discos grande de jada
Cual es tirada par cuatro cavalos
No es tan bon como senta cuieta e estende Dau.

Por ce los de la dias vea valua esta Dau?
Esce no es vera ce on ia declara ce xercores va trova
E falis va es pardonada?

Donce el es valuada par tota la mundo.

63

Ata sin ata.
Labora sin labora.
Sabori sin sabori.

Grandia es comun, e multe es poca.
Responde a culpa con virtua.
Projeta cosas difisil cuando los es ancora fasil.
Ateni cosas grande cuando los es ancora peti.

En esta mundo, serta, cosas difisil
Emerji de cosas fasil.
En esta mundo, cosas grande
Serta emerji de cosas peti.

Sajas es completa sin ata grande.
Donce los ateni se grandia.
Prometes fasil stimula poca fida,
E tro multe fasilia premostra multe turba.

Donce sajas espeta turbas,
Ma a fini turbas no ariva!

64

Es fasil teni cual es calma.
Acel cual no es comensada es fasil per projeta.
Acel cual es frajil es fasil rompeda .
Acel cual es pico es fasil sperdeda.
Ata de acel cual no esiste.
Fa ordina de acel cual no es confusada.

Un arbor tan grande como tu abrasa
Crese de un jermeta.
Un tore de nove niveles
Leva de un monton de tera.
Un viaja de mil milias
Comensa su tu pedes.

Ata e tu mali el.
Saisi e tu perde el.
Sajas fa no cosa e mali no cosa,
Saisi no cosa e perde no cosa.

Frecuente, persones mali cosas ante la fini,
Con atende a la comensa e la fini,
Cosas no es malida.

Donce sajas desira no desiras
E no valua benes rara.
Los aprende sin studia
E reveni a acel cual otras no trova.

Los aida cadun trova se natures propre,
Ma los no interfere.

65

La anticas ia es capas a segue Dau,
No per fa persones brilia,
Ma afin los resta simple.
Persones es difisil per governa
Cuando los es tro astuta.

Si on usa astutia per governa,
Esta es la ruina de un pais.
Si on no usa astutia per governa,
Esta es la benefica de un pais.

Sabe esta du es ance
Studia la desinia.
Studia constante la desinia
Es nomida virtua profonda.
Virtua profonda es vera profonda e distante!

Tota esentes reversa completa
E a esta modo gania la acorda grande.

66

Rios e mares pote comanda sento vales
Car los es destros a resta basa.
Donce los comanda sento vales.

Si on vole es supra otras,
On resta su los.
Si on vole es ante otras,
On resta pos los.

Tal, sajas resta supra
Ma no carga otras,
Resta ante otras ma no feri los.

Tota la mundo susta felis los
E es nunca noiada par el.
Car los no luta
Nun pote luta con los.

67

Tota la mundo dise me Dau es grande.
Ave no cosa como el.
El es grande car el ave no simil.
Serta, si el ta ave un simil
El ta es ja diluida en la pasada distante.

Me ave tre tesoros.
La prima es compati.
La du es frugalia.
La tre es umilia.

Compati permete coraje.
Frugalia permete jenerosia.
Umilia permete capasia durante.

Coraje sin compati,
Frugalia sin jenerosia,
Gida sin umilia,
Serta, estas es matante!

On usa compati per vinse otras
E defende se mesma.

Cual sielo susta
El proteje con compati.

68

Gerores capas no es atacos.
Bataliores capas no es coler.
Vinsores capas batalia con no enemi.
Gidores capas resta a su.

Nomi esta la virtua de no luta.
Nomi el la usa de la potia de otras.
Nomi el la uni con la fini orijinal de natur.

69

Ave un diseda en tempos de gera:
Nos no osa prende la rol de ospitor,
Ma prefere ata como la invitada.
En loca de avansa un diton,
Nos retira un pede.

Nomi esta un avansa sin marxa,
Un catura sin armas,
Un suverti sin combate,
E un saisi sin utiles de gera.

Ave no desastre plu grande como suvalua la enemi.
Suvalua la enemi pote causa la perde de nos tesoro.

Cuando oposores encontra se,
La vinse vade a la lado cual lamenta.

70

Me parolas es multe fasil comprendeda
E ance es multe fasil aplicada.
Ma nun en la mundo pote comprende los.
Nun pote aplica los.

Me parolas ave un asendente.
Me atas ave un regula.
Cuando on no comprende esta,
On no comprende me.
El ci comprende me es rara,
E el es valuos a me.

Donce sajas vesti se con vestes ru
E asconde jada en se interna.

71

La plu bon es comprende ce on no comprende.
Si on no comprende esta, on sufri un ilude.

On fini la ilude cuando on es noiada par el.

Sajas no es malada
Car los es malada de la ilude.

Donce los no es iludeda.

72

Cuando persones no teme potia,
Potia plu grande ariva pronto.

Nunca restrinje los en se casas.
Nunca carga se vives.
Los senti no carga
Sola cuando tu no carga los.

Donce sajas persepi la se
Sin mostra la se.
Los respeta la se
Sin consuma la se.

Los refusa acel e aseta esta.

73

Coraje con osa gida a mori.
Coraje sin osa gida a vive.
De la du, la un feri e la otra benefica.
Sielo rejeta la un, e ci sabe per ce?
Donce sajas espeta difisilia.

La Dau de sielo domina sin compete,
Responde sin parla,
Atrae sin clama,
E projeta osios.

La rede de sielo es vasta e larga.
Se filos es laxe,
Ma no cosa cade tra los.

74

Si persones no teme mori,
Per ce usa mori per menasa los?

Suposa los ta es sempre teme de mori
E ancora causa disturba.
Nos ta pote teni los e mata los,
Ma ci ta osa?

Sempre, ave esecuta xef per fa la mata.
Prende la rol de la esecutor en mata
Sembla a teni la rol de carpenta xef en siseli.
Prende la rol de la carpenta xef,
No multe fali coteli se mano.

75

La persones fami
Cuando se gidores imposta tro.
Per esta los fami.

La persones es difisil per gida
Cuando se gidores interfere.
Per esta los es difisil a gidor.

La persones considera lejera se mori
Cuando se gidores anela la tesoros de vive.
Per esta los considera lejera se mori.

Sola si on no xasa la vive,
On valua bon la vive.

76

Persones nase suave e debil.
Los mori rijida e firma.
Plantas e arbores es suave e flexable en vive
Ma seca e frajil en mori.
Donce la rijida e firma es amis de mori,
E la flexable e suave es amis de vive.

Per esta razona, armadas forte no vinse,
E arbores forte es taliada.

La fortes e la grandes trova se a su.
La suave e la debil conveni a supra.

77

La Dau de sielo sembla la curvi de un arco.
Cual es alta es basida.
Cual es basa es altida.

Do ave tro multe, el es diminuida.
Do ave no sufisinte, el es aumentada.

La Dau de sielo prende de do ave tro multe
E dona a do ave no sufisinte.

La dau de umania no sembla esta.
El prende do ave no sufisinte
E dona a do ave abunda.

Ci pote estende se suprapasa a la mundo?
Sola los ci ave Dau.

Par esta razona, sajas ata ma no demanda
E susede ma no osese con el.
Los no desira mostra se valua.

78

No cosa en la mundo es tan suave e sedente como acua.
Ma per ataca la rijida e forte,
El no es suprapasada.
Esta es serta no fasil.

La debil vinse la forte.
La suave vinse la rijida.
Cadun sabe esta,
Ma nun aplica el.

Donce la sajas dise:

Aseta la umili de la pais
Per deveni un mestre de la tera e recolie.
Aseta la mal fortuna de la pais
Per aveni un gidor de la mundo.

Parolas vera pare esata la reversa.

79

Cuando batalias grande es desideda,
Alga enemia debe resta.
Como on ta considera esta es bon?

Per esta, sajas prende la rol de un detor
E fa no esijes contra otras.
Los con virtua onora la contrata.
Los sin virtua declara se reclama.

La Dau de natur no ave favoredas
Ma favore sempre persones con capasias.

80

Paises peti con alga persones!
An si los ave sentos de utiles,
No un de los es usada.
An si los sabe ce mori veni,
Los no vaga de se loca.
An si los ave barcos e caros,
Los ave no nesesa de usa los.
An si los ave armas e armor,
Los ave no nesesa de mostra los.

Lasa la persones revade a cordas nodada
Per conta.
Lasa los sabori se comeda,
Amira se vestes,
Gusta se abitas,
E es deletada en se vives.

An si paises visina es tan prosima
Ce on pote oia se canes e gales,
Ala, persones deveni vea e mori
E nunca visita la un la otra.

81

Parolas vera es rara bonparlada.
Parolas bonparlada es rara vera.
Persones valuada disputa rara.
Los ci disputa es rara valuada.
Persones persepinte es rara instruida.
Persones instruida es rara persepinte.

Sajas no cumula.
Plu tu aida otras, plu tu gania.
Plu tu susta otras, plu tu ave.

La Dau de natur aida sin feri.
La Dau de sajas ata sin luta.