Capitol 6

1. Pos esta, Jesus ia traversa la mar de Galilea, nomida Tiberiades.
2. Un fola grande ia segue el, pos vide la sinias cual el ia fa saninte maladas.
3. Jesus ia asende la monte e ia senta ala con sua disiplos.
4. La Pascua, la festa de la iudis, ia prosimi.
5. Pos leva sua oios, Jesus ia vide ce un fola grande veni a el e el ia dise a Filipe: “Do nos va compra pan per dona a los per come?”
6. El ia dise esta per proba el, car el ia sabe bon lo cual el ia va fa.
7. Felipe ia responde a el: “Dusento denarios no ta sufisi afin cadun come un pico de pan.”
8. Un de la disiplos, Andres, frate de Simon Pedro, ia dise a el:
9. “Asi on ave un xico ci ave sinco panes de orzo e du pexes, ma cua es esta per tan multe persones?”
10. Jesus ia dise: “Fa ce los senta.” On ia ave multe erba en acel loca. Totas ia senta e los ia es sincomil omes.
11. Jesus ia prende la panes, ia grasia e ia distribui los a la persones sentante. El ia fa la mesma con la pexes, donante tota cual los ia vole.
12. Cuando totas ia resta sasiada, Jesus ia dise a sua disiplos: “Colie la fratos cual resta, afin no cosa es perida.”
13. Los ia colie los e los ia pleni des-du sestos con la fratos cual ia resta de la sinco panes de orzo.
14. Pos vide la sinia cual Jesus ia es a fini de fa, la persones ia dise: “Esta es, vera, la Profeta ci debe veni a la mundo.”
15. Jesus, sabente ce los vole prende el per obliga el a deveni re, ia retira se a la monte a un plu ves.
16. A la reposa de sol, sua disiplos ia desende a la costa de la lago
17. e los ia embarca, per vade a Cafarnaum, cual es sur la otra costa. Lo ia es ja note e Jesus no ia reuni con los.
18. La lago ia es ajitada, car un venta forte ia sofla.
19. Cuando los ia remi tra sirca sinco cilometres, los ia vide Jesus prosiminte a la barco, paseante sur la acua, e los ia es asustada.
20. El ia dise a los: “Lo es me, no teme.”
21. Volente, los ia aseta el en la barco, e lo ia ariva direta a la loca a do los ia es vadente.
22. A la dia seguente, la fola ci ia resta sur la otra costa ia vide ce Jesus no ia entra con sua disiplos en la sola barco cual ia es ala, ma ce los ia parti sola.
23. Entretempo, alga barcos de Tiberiades ia ariva prosima a la loca do los ia come la pan, pos ce la Senior ia pronunsia la ata de grasias.
24. Cuando la fola ia comprende ce Jesus e sua disiplos no es ala, los ia entra a la barcos e ia vade a Cafarnaum per xerca Jesus.
25. E cuando los ia trova el sur la otra costa, los ia demanda a el: “Mestre, cuando tu ia ariva?.”
26. Jesus ia responde a los: “Me serti vos ce vos xerca me, no car vos ia vide sinias, ma car vos ia come la pan asta es sasiada.
27. Labora, no per la comable putrable, ma per cual resta asta la vive eterna, cual la Fio de la Om va dona a vos; car el es el ci Dio, la Padre, ia marca con sua selo.”
28. Los ia demanda: “Cua nos debe fa per reali la taxe comandada par Dio?”
29. Jesus ia responde: “La taxe de Dio es ce vos crede a el ci el ia envia.”
30. E los ia demanda a el denova: “Cual sinias tu fa afin nos vide e crede a tu? Cua tu pote fa?
31. Nosa asendentes ia come la mana en la deserto, como la Scrivedas Santa dise: El ia dona a los pan de la sielo per come.”
32. Jesus ia responde: “Me serti vos ce lo no es Moxe ci ia dona la pan de la sielo; mea Padre dona a vos la pan vera de la sielo;
33. car la pan de Dio es lo cual desende de la sielo e dona Vive al mundo.”
34. Los ia dise a el: “Senior, dona a nos sempre acel pan.”
35. Jesus ia responde: “Me es la pan de Vive. Cualcun ci veni a me va fami nunca; cualcun ci crede a me va sidi nunca.
36. Ma me ia dise a vos: vos ia vide me e, an tal, vos no crede.
37. Tota cual la Padre dona a me veni a me, e me no va rejeta cualcun ci veni a me,
38. car me ia desende de la sielo, no per fa mea vole, ma lo de el ci ia envia me.
39. La vole de el ci ia envia me es ce me perde nun de la persones ci el ia dona a me, ma ce me revive los en la dia ultima.
40. Esta es la vole de mea Padre: ce el ci vide la Fio e crede a el, ave vive eterna e ce me revive el en la dia ultima.”
41. La iudis ia cexeta sur el, car el ia dise ja: “Me es la pan desendeda de la sielo.”
42. E los ia dise: “Esce esta no es Jesus, la fio de Jose? Nos conose sua padre e sua madre. Como el pote dise aora: ‘Me ia desende de la sielo?’”
43. Jesus ia responde a los disente: “No cexeta entre vos.
44. Nun pote veni a me, si la Padre ci ia envia me no atrae el; e me va revive lo en la dia ultima.
45. Lo es scriveda en la libro de la Profetas: ‘Tota va es instruida par Dio.’ Tota ci ia escuta la Padre e reseta sua instrui, veni a me.
46. Nun ia vide nunca la Padre, ma el ci veni de Dio: sola el ia vide ja la Padre.
47. Me serti vos ce el ci crede, ave Vive eterna.
48. Me es la pan de Vive.
49. Vosa padres, en la deserto, ia come la mana e ia mori.
50. Ma esta es la pan cual desende de la sielo, afin acel ci come lo no mori.
51. Me es la pan vive desendeda de la sielo. Cualcun ci come de esta pan va vive eterna, e la pan cual me va dona es mea carne per la Vive de la mundo.”
52. La iudis ia discute entre lunlotra, disente: “Como esta om pote dona a nos sua carne per come?”
53. Jesus ia responde a los: “Me serti vos ce si vos no come la carne de la Fio de la om e no bevi sua sangue, vos no va ave Vive en vos.
54. Cualcun ci come mea carne e bevi mea sangue ave Vive eterna, e me va revive el en la dia ultima.
55. Car mea carne es la come vera e mea sangue es la bevida vera.
56. Cualcun ci come mea carne e bevi mea sangue resta en me e me en el.
57. Tal como la Padre vivente ia envia me e me ave vive par causa de la Padre, ance el ci come de me va ave Vive par causa de me.
58. Esta es la pan desendeda de la sielo; no como lo cual vosa asendentes ia come: los ia mori. Cualcun ci come esta pan va vive eterna.”
59. Jesus ia ensenia tota esta en la sinagoga de Cafarnaum.
60. Pos escuta lo, multe de sua disiplos ia dise: “Esta ensenia es dur! Ci pote aseta lo?”
61. Jesus, sabente lo cual sua disiplos murmura, ia dise a los: “Esce esta xoca vos?
62. Cua va aveni alora, cuando vos vide la Fio de la om asende a do el ia es a ante?
63. La Spirito dona Vive, la carne servi a no cosa. La parolas cual me ia dise es Spirito e Vive.
64. Ma on ave entre vos algun ci no crede.” Jesus ia sabe de la momento prima ci es el ci no ia crede e ci es el ci va tradi el.
65. E el ia ajunta: “Par esta me ia dise ce nun pote veni a me, estra si la Padre aseta el.”
66. De acel momento, multe de sua disiplos ia reveni a sua forma vea de vive e no acompania el plu.
67. Jesus ia demanda alora a la Des-du: “Esce ance vos vole abandona?”
68. Simon Pedro ia responde a el: “Senior, a ci nos va vade? Tu ave la parolas de Vive eterna.
69. Nos ia crede e sabe ce tu es la Santa de Dio.”
70. Jesus ia continua: “Esce me no es el ci ia eleje vos, la Des-du? An tal, un de vos es un diablo.”
71. Jesus ia parla de Judas, fio de Simon Iscariote, ci ia es un de la Des-du, ci va tradi el.