Capitol 21

1. Pos esta, Jesus ia apare denova a la disiplos sur la borda de la mar de Tiberiades. Lo ia aveni tal:
2. ala ia es Simon Pedro, Tomas, nomida la Jemelo, Natanael, de Canaan de Galilea, la fios de Zebedeo e du otra disiplos.
3. Simon Pedro ia dise a los: “Me va pexa.” Los ia responde a el: “Nos veni ance.” Los ia sorti e ia entra a la barco. Ma en acel note los ia catura no pexes.
4. A la leva de sol, Jesus ia es sur la borda, an si la disiplos no ia sabe ce esta es el.
5. Jesus ia dise a los: “Xicos, esce vos ave alga per come?” Los ia responde: “No.”
6. El ia dise a los: “Lansa la rede a la destra de la barco e vos va trova. Los ia lansa lo e lo ia pleni con tan multe de pexes ce los no ia pote tira lo.
7. La disiplo ci Jesus ia ama ia dise a Pedro: “Esta es la Senior!” Cuando Simon Pedro ia oia ce esta ia es la Senior, el ia apone sua tunica cual el ia desapone ja, e ia salta a en la acua.
8. La otra disiplos ia segue en la barco, tirante la rede con la pexes, car los ia es a sola sirca sento metres de la borda.
9. Pos atera los ia vide ce un foco es preparada, con pexes sur la brasas e pan.
10. Jesus ia dise a los: “Trae alga de la pexes cual vos veni de catura.”
11. Simon Pedro ia entra a la barco e ia estrae la rede a tera, plenida con pexes grande: los ia es sento sincodes e tres, ma an si los ia es tan multe, la rede no ia rompe.
12. Jesus ia dise a los: “Veni per come.” Nun de la disiplos ia osa demanda a el: “Ci tu es?”, car los ia sabe ce el es la Senior.
13. Jesus ia prosimi, ia prende la pan e ia dona lo a los, e el ia fa la mesma con la pex.
14. Esta ia es la ves tre cuando Jesus reviveda ia apare a sua disiplos.
15. Pos come, Jesus ia dise a Simon Pedro: “Simon, fio de Joan, esce tu ama me plu ca estas?” El ia responde: “Si, Senior, tu sabe ce me ama tu.” Jesus ia dise: “Nuri mea ovetas.”
16. El ia dise denova: “Simon, fio de Joan, esce tu ama me?” El ia responde a el: “Si, Senior, tu sabe ce me ama tu.” Jesus ia dise: “Cura mea oveas.”
17. El ia demanda a un ves tre: “Simon, fio de Joan, esce tu ama me?” Pedro ia tristi car Jesus ia demanda a tre veses esce el ama el, e el ia dise: “Senior, tu sabe tota cosas; tu sabe ce me ama tu.” Jesus ia dise: “Nuri mea oveas.
18. Me serti tu ce cuando tu ia es joven tu mesma ia vesti tu e ia vade do tu ia vole. Ma cuando tu va es vea, tu va estende tua brasos, e un otra va vesti tu e va porta tu do tu no vole.”
19. Tal, el ia indica con cual mori Pedro va debe glori Dio. E pos parla tal, el ia dise: “Segue me.”
20. Pedro, turnante se, ia vide ce la disiplo ci Jesus ia ama ia segue el, la mesma ci en la come de sera ia reclina a Jesus e ia demanda a el: “Senior, ci va tradi tu?”
21. Cuando Pedro ia vide el, el ia demanda a Jesus: “Senior, cua va aveni a esta?”
22. Jesus ia responde: “Si me vole ce el resta asta mea veni, esta no conserna tu. Tu debe segue me.”
23. Alora entre la frates la rumor ia sperde ce acel disiplo no va mori, ma Jesus no ia dise a Pedro: “El no va mori”, ma: “Si me vole ce el resta asta mea veni, esta no conserna tu.”
24. Esta mesma disiplo es el ci atesta sur esta cosas e ci ia scrive los, e nos sabe ce sua atesta es vera.
25. Jesus ia fa ance multe otra cosas. Si on ta scrive la detalias de los, me crede ce tota la mundo no ta sufisi per conteni la libros cual ta es scriveda.