Capitol 20

1. En la dia prima de la semana, a la leva de sol, cuando lo ia es ance oscur, Maria de Magadala ia vade a la tomba e ia vide ce la petra ia es sutraeda.
2. El ia vade a Simon Pedro e la otra disiplo ci Jesus ia ama, e el ia dise a los: “On ia prende la Senior de la tomba e on no sabe do on ia pone el.”
3. Pedro e la otra disiplo ia sorti e ia vade a la tomba.
4. Ambos ia core, ma la otra disiplo ia core plu rapida ca Pedro e ia ariva a ante.
5. Curvinte ante la tomba, el ia vide la vestes de entera, ma el no ia entra.
6. A pos Simon Pedro ia ariva, ci ia segue el, e ia entra en la tomba; el ia vide la vestes de entera sur la solo,
7. e ance la velo cual ia covre ja sua testa; esta no ia es con la veste de entera, ma enrolada en un loca separada.
8. A pos la otra disiplo, ci ia ariva ante a la tomba, ia entra ance: el ia vide e ia crede.
9. Ancora los no ia comprende ce, seguente la Scrivedas Santa, Jesus debe revive de entre la mores.
10. Pos alora, la disiplos ia reveni a sua casa.
11. Maria ia resta a estra, plorante prosima a la tomba. En cuando el ia plora, el ia curvi ante la tomba
12. e el ia vide du anjeles vestida en blanca, la un sentante a la testa e la otra a la pedes de la loca do la corpo de Jesus ia es poneda.
13. Los ia dise a el: “Fem, perce tu plora?” Maria ia responde: “Perce on ia prende mea Senior e me no sabe do on ia pone el.”
14. Pos dise esta el ia turna e ia vide Jesus, ci ia es ala, ma el no ia reconose el.
15. Jesus ia demanda el: “Fem, perce tu plora? Ci tu xerca?” El, pensante ce el es la curor de la jardin, ia responde a el: “Senior, si tu ia prende el, dise a me do tu ia pone el, e me va vade per xerca el.”
16. Jesus ia dise: “Maria!” El ia reconose Jesus, e ia dise a el en ivri: “Rabuni!”, esta es “Mestre!”
17. Jesus ia dise a el: “No teni me, car me ancora no ia asende a la Padre. Vade per dise a mea frates: ‘Me asende a mea Padre, vosa Padre; a mea Dio, vosa Dio.’
18. Maria de Magdala ia vade per anunsia a la disiplos ce el ia vide la Senior, e ce Jesus ia dise acel parolas.
19. En la sera de acel dia, la prima de la semana, con la portes cluida de la loca do la disiplos ia es, par teme de la iudis, Jesus ia ariva e, situante se en media de los, el ia dise: “Ta ce la pas es con vos!”
20. En cuando el ia dise esta, el ia mostra sua manos e sua lado. La disiplos ia pleni de joia cuando los ia vide la Senior.
21. Jesus ia dise denova a los: “Ta ce la pas es con vos! Como la Padre ia envia me, ance me envia vos.”
22. Pos dise esta, el ia sofla sur los e ia ajunta: “Reseta la Spirito Santa.
23. La pecas va es pardonada de los ci vos pardona, e va es retenida de los ci vos no pardona!”
24. Tomas, un de la Dudes, nomida la Jemelo, no ia es con los cuando Jesus ia ariva.
25. La otras disiplos ia dise a el: “Nos ia vide la Senior!” El ia responde a los: “Si me no vide la marca de la clos en sua manos, si me no pone mea dito en la loca de la clos en la mano e sua lado, me no va crede.”
26. A oto dias plu tarda, la disiplos ia es asemblada denova en la casa, e Tomas ia es con los. Alora Jesus ia apare, con la portes cluida, el ia situa se en media de los e ia dise a los: “Ta ce la pas es con vos!”
27. A pos el ia dise a Tomas: “Pone asi tua dito: asi es mea manos. Prosimi tua mano: pone lo en mea lado, e no es noncredente, ma fida.”
28. Tomas ia responde: “Senior e Dio mea!”
29. Jesus ia dise a el: “Aora tu crede, car tu ia vide me. Bondiseda es los ci crede sin vide!”
30. Jesus ia reali multe otra sinias en presentia de sua disiplos, cual no es rejistrada en esta Libro.
31. Estas ia es scriveda afin vos crede ce Jesus es la Maxia, la Fio de Dio, e credente, vos ave vive par sua nom.