Capitol 13

1. Ante la festa de Pascua, cuando Jesus ia sabe ce sua ora de pasa de esta mundo a la Padre ia ariva, el, ci ia ama ja la suas ci ia resta en la mundo, ia ama los asta la fini.
2. En la Come de Sera, cuando la diablo ia inspira ja Judas Iscariote, fio de Simon, per tradi el,
3. Jesus, sabente ce la Padre ia pone tota en sua manos e ce el ia veni de Dio e va reveni a Dio,
4. ia leva se de la table, ia desapone sua vestes esterna, e, prendente un tela, ia pone lo sirca sua taie.
5. A pos, el ia versa acua en un basin e ia comensa lava la pedes de sua disiplos e seci los con la tela cual el ia ave sirca la taie.
6. El ia prosimi a Simon Pedro, ci ia dise a el: “Tu, Senior, va lava mea pedes?”
7. Jesus ia responde: “Tu no pote comprende aora lo cual me fa, ma a pos tu va comprende lo.”
8. “No,” Pedro ia dise a el, “tu va lava nunca mea pedes!” Jesus ia responde: “Si me no lava tu, tu no va pote comparti mea erita.”
9. “Alora, Senior,” Simon Pedro ia dise a el, “no sola la pedes, ma ance la manos e la testa!”
10. Jesus ia dise a el: “Cualcun ci ia bani se, no nesesa lava plu ca la pedes, car el es completa limpa. Vos ance es limpa, an si no totas.”
11. El ia sabe ci va tradi el, e per esta razona el ia dise: “No tota de vos es limpa.”
12. Pos lava lora pedes, el ia apone denova sua vestes, ia reveni a la table e ia dise: “Esce vos comprende lo cual me ia fa per vos?
13. Vos nomi me Mestre e Senior, e esta es coreta, car vera me es tal.
14. Si me, ci es la Senior e la Mestre, ia lava vosa pedes, ance vos debe lava la pedes de lunlotra.
15. Me ia dona la esemplo a vos, afin vos mesma fa como me ia fa per vos.
16. Me serti vos ce la servor no es plu grande ca sua senior, e la enviada no es plu grande ca el ci envia el.
17. Vos va es bondiseda si, sabente esta cosas, vos pratica los.
18. Me no refere a tota de vos; me conose los ci me ia eleje. Ma lo es nesesada ce la Santa Scriveda es completida, cual dise: ‘El ci ia comparti mea pan, ia turna contra me.’
19. Me dise esta a vos aora, ante ce lo aveni, afin cuando lo aveni, vos crede ce Me Es.
20. Me serti vos ce cualcun ci reseta el ci me envia, va reseta me, e cualcun ci reseta me, va reseta el ci ia envia me.”
21. Pos dise esta, Jesus ia es turbada e ia atesta clar: “Me serti vos ce un de vos va tradi me.”
22. La disiplos ia regarda lunlotra, no sabente a ci el refere.
23. Un de los – la disiplo ci Jesus ia ama – ia reclina multe prosima a Jesus.
24. Simon Pedro ia fa un sinia a esta e ia dise: “Demanda a el a ci el refere.”
25. El ia reclina en dirije a Jesus e ia demanda a el: “Senior, ci el es?”
26. Jesus ia responde: “Lo es acel a ci me va dona la peso de pan cual me va sumerji en la plato.” E sumerjinte un peso, el ia dona lo a Judas, fio de Simon Iscariote.
27. Pos cuando el ia reseta la peso, Satan ia entra en el. Jesus ia dise a el: “Fa pronto lo cual tu debe fa.”
28. Ma nun de la persones ala ia comprende perce el ia dise esta a el.
29. Car Judas ia es encargada con la mone comun, algas ia pensa ce Jesus ia vole dise a el: “Compra lo cual es nesesada per la festa”, o ce el ia comanda el a dona alga cosa a la povres.
30. Direta pos reseta la peso, Judas ia sorti. E lo ia es note.
31. Pos cuando Judas ia sorti, Jesus ia dise: “Aora la Fio de la Om es glorida, e Dio es glorida en el.
32. Si Dio ia es glorida en el, ance Dio va glori la Fio en el mesma, e el va fa multe pronto lo.
33. Mea fios, me va es plu con vos per sola poca tempo. Vos va xerca me, ma me dise aora a vos la mesma cual me ia dise a la iudis: “Do me vade, vos no va pote veni.”
34. Me dona a vos un comanda nova: ama lunlotra. Tal como me ia ama vos, ta ce vos ama ance lunlotra.
35. En esta totas va reconose ce vos es mea disiplos: en la ama cual vos ave per lunlotra.”
36. Simon Pedro ia dise: “Senior, do tu vade?” Jesus ia responde: “Do me vade, tu no pote segue me aora, ma plu tarda, tu va segue me.”
37. Pedro ia demanda el: “Perce me no pote segue tu aora? Me va dona mea vive per tu.”
38. Jesus ia responde a el: “Esce tu va dona tua vive per me? Me serti tu ce ante la canta de la gal mas, tu va nega me a tre veses.”