Wilhelm Wundt e William James es videda como la padres de psicolojia par la plu de istoristes de psicolojia, e ance como la fundores de la du “scolas” grande prima de la campo. An si los ia es omes multe diferente, on ave alga paraleles. Sua vives es supraponeda: Wundt ia nase en 1832 e ia mori en 1920, e James ia nase a des anios plu tarda e ia mori a des anios plu temprana; Ambos pote reclama fundi la laboreria psicolojial prima en 1875; E ambos no ia nomi sua scola. On va vide ce los ave otra cosas comun ance, personal e filosofial.
Lo es serta posible ce no pensores de sua influe ia aveni a pos.
Wilhelm Wundt ia nase en la vileta Neckerau en Baden, Deutxland a 16 agosto 1832. La fio de un pastor luteran, el ia es un xico solitar e studiante. El ia coabita e ia es educada par la aidor de sua padre, la parocior de la eglesa. El ia es enviada a un scola abitada cuando el ia ave 13 anios, e a la universia con 19 anios.
El ia studia medica a Tübingen, Heidelberg, e Berlin, an si el ia es plu interesada par la aspeta siensal ca par un carera en medica. En 1857, on ia asinia a el la rol de Dozent (instruor) a Heidelberg, do el ia presenta psicolojia. De 1858 a 1864 el ia servi ance como un aidor a Helmholtz, un fisiolojiste famosa, e ia studia la stimula neurolojial e cimical de musculos.
En 1864, el ia deveni un profesor aidante a Heidelberg. Pos tre anios, el ia comensa un curso cual el ia nomi psicolojia fisiolojial, cual ia foca a la borda entre fisiolojia e psicolojia, pd: la sensas e reatas – un interesa inspirada par la obras de Ernst Weber e Gustav Fechner. Sua notas de lesones ia ultima deveni sua obra major, la Prinsipes de psicolojia fisiolojial (Grundzüge der physiologischen Psychologie), cual ia es publicida en 1873 e 1874.
Como Fechner e multe otras a la periodo, Wundt ia aseta la idea de Spinoza de paralelisme psicofisical: Tota avenis fisical ave un lado mental, e tota avenis mental ave un lado fisical. E el crede, como Fechner, ce la disponablia de stimulas e respondes mesurable pote resulta la abri de avenis psicolojial a alga cosa simil a metodolojia esperimental, en un modo cual filosofistes plu temprana, como Kant, ia crede como nonposible.
La metodo cual Wundt ia developa es un tipo de introspeta esperimental: La rexercor debe oserva multe atendente un aveni simple – un cual pote es mesurada per cualia, intensia, o dura – e rejistra sua respondes a varias de esta avenis. (Nota ce, en filosofia deutx alora, sensas ia es videda como avenis psicolojial, e donce interna a la mente, an si la sensa es de alga cosa estra la mente. Alora, lo cual nos ta nomi cisa la oserva ia es nomida la introspeta par Wundt!)
Wundt ia progresa per deveni la xef de “psicolojia induida” a Zürich en 1874, e alora deveni profesor de filosofia a Leipzig en 1875. Ala el ia abita e labora per la 45 anios seguente.
En 1875, un sala ia es dedicada per demostras de lo cual nos nomi aora sensa e persepi. Esta ia es la mesma anio en cual William James ia institui un laboreria simil a Harvard. Nos pote selebra acel anio como la funda de psicolojia esperimental.
En 1875, Wundt ia aida sua studiante graduada prima a rexerca psicolojial vera – un otra paso monumentin. En 1881, el ia inisia la Jornal de studias filosofiste. En 1883, el ia comensa la curso prima titulida psicolojia esperimental. E en 1894, sua laboras ia es recompensada con la crea ofisial de un “Instituida per Psicolojia Esperimental” a Leipzig – la prima en la mundo.
Wundt ia es conoseda par tota como un rexercor cuieta e un rexercor metodolojial ci labora forte, e un presentor de lesones multe bon. La normas de alora ia es diferente de los de aora: El ia parla per oras con un vose cuieta, sin notas o aparatos audiovideo, e sin pausa per demandas. Sua studiantes ia ama el, ma nos, sin duta, ta critica el per no es sufisinte divertinte!
Lo es un nota interesante ce en esta periodo multe ocupada, el ia publici cuatro libros en filosofia! Recorda ce, en esta periodo, psicolojia no ia es videda como separada de filosofia. Vera, Wundt ia rejeta la idea cuando algun ia sujesta lo a el.
La studias cual ia es fada par Wundt e sua studiantes – aora multe – ia es xef sur sensa e persepi, e de los, la plu ia es sur vide. En ajunta, on ave multe studias sur tempo de reata, atende, emosias, e asosias. En soma, el ia supravide 186 teses dotoral, la plu en psicolojia.
Entre sua studiantes plu reconoseda ia es Oswald Külpe e Hugo Munsterberg (ci ia es invitada per ensenia a Harvard par James), la conduistes rusce Vladimir Behterev e Ivan Pavlov, e studiantes american como G. Stanley Hall (“padre” de psicolojia de developa en la SUA), James McKeen Cattell, Lightner Witmer (fundor de la clinica psicolojial prima en la SUA, a la Universia de Pennsylvania), e la interpretor xef de Wundt per la mundo engles, E. B. Titchener. Nonfortunosa, Titchener es spesial culpable per malinterprete Wundt.
Plu tarda en sua carera, Wundt ia deveni interesada par psicolojia sosial o cultural. Contra lo cual multe sabe, Wundt no ia pensa ce la studia esperimental de sensas es tota de psicolojia! Vera, el ia crede ce lo es sola la surfas, e ce la plu de psicolojia no es capas de usa metodos esperimental.
En loca, el ia pensa ce nos debe prosimi psicolojia cultural tra la produidas cual lo produi – mitolojia, per esemplo, praticas e rituos cultural, leteratur e arte… El ia scrive un obra de des volumes nomida Völkerpsychologie (psicolojia etnical), cual ia es publicida entre 1900 e 1920 e ia inclui la idea de pasos de developa cultural, de la primitiva a la eda de totemes, tra la eda de eroes e dios, a la eda de umanas moderna.
En 1920, el ia scrive Erlebtes und Erkanntes (esperias e reconoses), sua autobiografia. Pos un tempo corta, a 31 agosto 1920, el ia mori.
William James ia nase en New York City a 11 janero 1842. Sua padre ia es un om rica ci ia spende sua tempo en ospita la inteletos de la eda e en discute la misticisme relijiosa de Swedenborg. Esta ambiente merveliosa per un xico joven e briliante ia es debeda a sua ava, un migrante de Er con un capasia per investi en proprias. William ia es pronto acompaniada par un frate plu joven, Henry James, ci ia deveni un de la novelistes grande american. Tota la enfantes James ia es enviada a scolas abitada european e ia viaja tra tota la capitales grande de Europa.
Con 19 anios, pos un periodo como un studiante de arte, James ia enscrive se a Harvard per cimica, cual el ia cambia pronto a medica. El no ia es vera interesada par un carera en medica, ma el ia vole studia la siensa cual acompania lo.
En 1865, el ia usa un oportun grande per viaja tra la basin de la Rio Amazona con la biolojiste Louis Agassiz, per colie esemplos de spesies nova descovreda. Cuando ala, el ia comensa sufri de un varia de problemes en sua sania. En 1867, el ia vade a Deutxland per studia fisiolojia su Helmholtz e otras. El ia amini alga psicolojistes temprana e notable, incluinte Carl Stumpf. A la otra lado, el no ia ave multe respeta per Herbert Spencer, Wilhelm Wundt, G. E. Muller, e otras.
En Deutxland, el ia comensa sufri de depresa seria, acompaniada par ideas de suiside. Plu, el ia developa dole de la dorso, insonia, e dispepsia. En 1869, el ia reveni a la SUA per completi sua diploma de dotor de medica, ma el ia continua sufri de depresa. El ia leje un libro par un filosofiste franses nomida Charles Renouvier, cual ia convinse el sur la potia de vole libre. El ia deside aplica esta idea a sua propre problemes, e ia pare boni.
De 1871 a 1872, James ia es un membro de la “Club Metafisical”, un asosia de graduadas de Harvard ci ia congrega en Boston per discute la avenis de la dia. Incluida en la asosia ia es la filosofiste Charles Peirce, Oliver Wendell Holmes, e Chauncey Wright. Wright ia introdui la idea de combina la conseta de Alexander Bain ce credes es tendes a condui, con la conseta de Darwin de la survive de la plu conveninte: Ideas debe compete con lunlotra, e la plu bon va dura. Esta es simil a la idea plu resente de “memes”.
Peirce, a la otra lado, ia prende la idea de Kant ce nos pote nunca vera sabe la veria – ce tota nosa credes es mera “posibles” – e ia cambia lo a la funda de praticalisme. Esta es multe simil a la filosofia de “como si” (en deutx als ob, engles as if) de Hans Vaihinger (1852–1933) cual ia influe tan Alfred Adler e George Kelly, plu tarda.
En 1872, on ia asinia a James la posto de instruor de fisiolojia a Harvard. En 1875, el ia presenta sua curso prima en psicolojia (o “psicolojia fisiolojial”) e ia institui un laboreria de demostra, en la mesma anio en cual Wundt ia institui la sua a Leipzig. En 1876, el ia deveni un profesor aidante de fisiolojia.
En 1878, el ia sposi Alice Gibbons, un ensenior de Boston. El ia cura James e sua depresa ia diminui. An con sua natur delicata, el e Alice ia susede eleva sinco enfantes.
En la mesma anio, el ia contrata con la publicor Holt per scrive un libro de aprende psicolojia. El ia intende completa lo en du anios – ma el ia nesesa 12.
En 1880, sua titulo ia cambia a profesor asosiada de filosofia, cual ia es la campo a cual psicolojia ia parteni vera en acel dias. En 1885, el ia deveni plen un profesor de filosofia.
An con sua batalias contra depresa, el ia es bon amada par sua studiantes e conoseda per sua bon senti de umor. An sua libro ia ave alga grado de lejeria cual on no trova comun en libros de aprende. Ensenia ia pare plase a el. A la otra lado, el no ia gusta rexerca, no ia rexerca multe, e ia dise ce laborerias es un malspende de recursos.
En 1889, sua titulo ia cambia ancora, a profesor de psicolojia! En la anio seguente, sua libro ia es final publicida, en du volumes, como La prinsipes de psicolojia. En 1892, el ia produi un varia plu corta, La curso plu corta, cual studiantes per la 50 anios seguente ia nomi la “Jimmy” (un nometa engles per “James”). Ambos de estas ia es obras mestral de prosa e multe popular entre studiantes de psicolojia e ance lejores casual.
An con sua odia de rexerca, el ia recolie la mone per un laboreria nova e estendeda a Harvard, ma ia organiza pronto emplea un studiante de Wundt, Hugo Munsterberg, como la dirijor. James no ia supravide multe graduadas, ma alga ia deveni multe susedosa.
James ia comparti sempre la interesa de sua padre a misticisme e an fenomenos psicica. Esta ia redui sua prestijia entre siensistes dogmosa en la comunia de psicolojistes. Ma lo ia causa ce otras ama plu el. En 1897, el ia publici La vole per crede, e en 1902 La varias de esperia relijiosa.
James ia es nunca tota comfortosa con sua rol como un psicolojiste, e ia prefere pensa de se como un filosofiste. El es, en fato, considerada como la filosofiste la plu grande de America, en ajunta a sua rol como la “padre” de psicolojia american.
El ia es profonda influeda par la filosofiste Charles Sanders Peirce, ci ia fundi la filosofia de praticalisme. Praticalisme dise ce ideas no pote es completa demostrada como vera o falsa. En loca, nos debe xerca como usosa es un idea – como pratical, como produosa. James ia nomi lo la “cash value” (valua en mone) de un idea. El ia populari praticalisme en libros como Pragmatisme en 1907 e La sinifia de veria en 1909. En 1909, el ia ance scrive Un universo pluraliste, cual ia es partal praticalisme e partal un espresa de sua propre credes, cual no ia es tan diferente de la panteisme de Spinoza.
El ia jubila de ensenia en 1907 car sua cor no ia es tan sana como en la pasada, pos un ataca peti en 1898 cuando el ia trepa en New York norde. El ia encontra Freud cuando Freud ia veni per visita Boston en 1909, e ia es multe impresada. En la anio seguente, el ia vade a Europa per sua sania e per visita sua frate Henry, ma el ia reveni pronto a sua propre casa en New Hampshire. Pos du plu dias, a 26 agosto 1910, el ia mori en la abrasa de sua sposa Alice.
Alga de sua libros ia es publicida pos mori, incluinte Alga problemes en filosofia en 1911, e la Esajos en empiricalisme radisal en 1912. La studiantes la plu famosa de James inclui John Dewey, la filosofiste comun nomida la padre de educa moderna american; Edward Thorndike, de ci sua esperimentas con gatos ia abri la porte per la conduistes; e Mary Calkins.
Mary Whiton Calkins (1863–1930) ia es un de la studiantes fema prima de psicolojia, e la fundor de la program de psicolojia a Wellesley. El ia studia su James e Munsterberg a Harvard, ma no ia reseta la diploma dotoral cual el ia merita – car el ia es un fem. Plu tarda, el ia deveni la presidente fema prima de la Asosia de Psicolojia American e la Asosia de Filosofia American. Pos sua mori, studiantes ia demanda ce Harvard dona la diploma a el pos mori. La universia ia refusa denova.
Wundt esperia un revive de popularia, su la nom “struturalisme” – an si el ia prefere “voluntisme”. A plu ca 100 anios pos sua laboras, nos ia ateni final sua nivel. Vera, el ia es grave malrepresentada par la studiantes american con sua capasia povre de deutx, e spesial par Titchener, un studiante engles ci ia es propulsada par sua ego grande. Wundt ia reconose esta, e ia atenta avisa persones sur la problem. Ma Boring – la istoriste de psicolojia american xef per multe anios – ia conose Wundt sola par leje Titchener.
Un malcomprende conserna la titulo de un obra major: Psicolojia fisiolojial. Ma la parola “fisiolojial” ia sinifia orijinal “esperimental”, pd: usante la metodos de fisiolojia (ma no la metodos esperimental de la conduistes de la sentenio de 1900).
Wundt e sua studiantes ia usa un varia esperimental de introspeta – la oserva atendosa de persepis – e ia developa alga detalias spesifada per la metodo:
1. La oservor debe sabe cuando la esperia comensa e fini.
2. La oservor debe manteni un “atende tensada”.
3. La fenomeno debe es capas de repete.
4. La fenomeno debe es capas de varia – per dise: esperimenta.
Per esemplo, en la caso de sensas, lo ia es concluida ce on ave sete “cualias” de sensas: vide, oia, ole, proba (de sabor), toca, cinestesia, e organal. Alga de estas ave plu aspetas. Vide, per esemplo, ave tinje, satura, e valua. E cualias pote varia en intensia, dura, brilia, e (per vide e toca) estende.
La laborerias de Wundt ia es multe produosa, descrivente cosas como la atende focada, la memoria de dura corta, etc – an incluinte la fato famosa ce la memoria de dura corta es limitada a sirca sete “pesos” de informa, cual on no ia nota denova asta la desenio de 1970.
Un de la cosas cual ia causa ce la obras de Wundt pare tan strana a psicolojistes american ia es lo cual el ia nomi la prinsipe de realia: El ia dise ce consensia es, en fato, un realia, e ce lo es la sujeto de studia de psicolojia. Esta es, serta, vera – ma nos ia iniora lo per sirca 80 anios en cuando conduisme ia rena la mundo academial en la SUA, Britan, e Rusia.
Prosedes mental es un ativia de la serebro, e no materia. Wundt ia aseta la metafisica de aspetisme duple de Spinoza e ia spende multe labora en refuta reduisme. El ia crede ce consensia e sua ativias no conveni a la modeles de siensa fisical, an si psicolojia emerji de biolojia, cimica, e fisica. Con acel emerji, consensia ia gania un capasia per sintese creosa – un otra conseta clavin de Wundt.
An si consensia opera “en” e “tra” la serebro fisical, sua ativias no pote es descriveda en termas de cimica o fisica. La color blu, la sona de un acorda de E minor, la sabor de salmon fumida, la sinifia de un frase… tota es avenis psicolojial e sujetal, con no esplicas fisical simple. Cuando acel longia de onda de lus, acel ativia en la retina, acel inisia de un neuron, etc, deveni “blu”?
Wundt ia premostra ance la psicolojistes de Gestalt en rejeta la asosisme de Locke e Hume: Strutures psicolojial es plu ca mera la soma de sua partes.
El e sua studiantes ia conclui ce consensia es composada de du partes: Prima, on ave un consensia con un capasia grande, nomida la Blickfeld (“campo de vide”). E ance, on ave un consensia plu streta, nomida Apperception, cual nos pote tradui como la atende focada, cual es su la controla de vole e move en la Blickfeld. Esta idea de atende focada ia deveni multe influente. Lo ia gida, entre otra cosas, a la teoria de scizofrenia de Kraepelin, cual vide lo como un rompe de la prosedes de atende.
Un otra aspeta de la psicolojia de Wundt ia es sua psicolinguistica, cual ocupa la du libros prima de Völkerpsychologie. Wundt ia sujesta ce la unia fundal de lingua es la frase – no la parola o la sona. El ia identifia la frase no sola con un segue de parolas e sonas, ma como un state mental spesial. Sonas, parolas, la regulas de gramatica, etc, tota ave sua sinifia sola en relata a la frase mental a su.
Wundt ia inventa la grafica arborin de sintatica con cual tota de nos es familial en testos linguistica. Lingua comensa con la S (frase, de engles “sentence”) a la culmina, e par atende focada on pote separa la sujeto (foca o figur) e la predica (la fondo), etc, en contrasta con la conseta asosiste popular cual progresa de la basa a la alta, cual ia es proposada par la conduistes. Esta ideas de Wundt es aora la norma – an si nun recorda ce los ia es orijinal la suas!
Regardante la lingua de enfantes, Wundt e sua seguores ia proposa ce lingua ave sua orijinas en sonas e jestis emosiosa – un otra teoria cual es reveninte a popularia.
Seguente Wundt, nos es prima viventes de emosias. Tota de nosa ativias mental inclui emosia. E emosia presede pensa! El ia es serta un romanticiste (en la sinifia filosofial).
El ia usa termas variosa: Sentis es lo cual el ia nomi la esperias fundal e corta. Umores ia es la varias plu longa. Emosia ia es la esperias plu complicada. E motivas ia es la varias plu presada cual gida a condui.
Wundt no ia acorda con William James e la teoria James–Lange de emosias. James ia crede ce nos responde prima a un situa, e nos esperia la emosia a pos. Wundt ia indica ce introspeta mostra clar ce la emosia veni prima, e la fisiolojia e condui segue sola a pos.
El ia crede ce nos no pote ariva a un lista ordinada de emosias: Los misca e fusa con lunlotra tro multe. Ma nos pote determina alga dimensiones de cualias con cual nos pote descrive los, e tre dimensiones spesial:
1. Plase e desplase
2. Inspira alta e inspira basa
3. Atende tensada (pd: controlada) e atende destensada
Wundt ia crede ce atas de vole, eleje e deside es tan sinifiante per comprende psicolojia ce el ia nomi sua teoria “psicolojia voliste”.
La vole es vera la motiva, e la ata voleda es la condui motivada. Lo veni de un sintese creosa de otra cualias emosial. Studiantes de psicolojia oia tipal sur la esperimentas sur tempo de reata cuando los studia la contribuis de Wundt. Wundt ia vide los como studias de volunta.
La rexerca en sua laborerias sur volunta ia influe la fenomenolojiste beljes Albert Michotte, ci ia influe alora psicolojistes como Fritz Heider, Kurt Lewin, e Leon Festinger, ci ia es multe influente en la spesiali nova nomida psicolojia sosial.
Vole e atas de vole pote estende de impulsas e atas automata e cuasi reflexe, a desides e atas complicada cual nesesa multe fortia. Multe atas controlada deveni automata tra tempo, cual libri alora nos per fa laboras de vole an plu complicada. En fato, la developa de pensa lojical ia es lo cual Wundt ia vide como la forma de vole la plu alta de cual umanas es capas. El ia es multe otimiste sur nosa potensia!
Funsionalisme como un psicolojia ia developa de praticalisme como un filosofia: Per trova la sinifia de un idea, on debe regarda sua seguentes (vide a do lo gida). Donce, veria es lo cual es usosa, pratical, pragmatical. Esta ia gida James e sua studiantes a un asentua sur causa e efeto, predise e controla, oserva de la ambiente e la condui, plu ca la introspeta atendosa de la struturalistes.
Praticalisme ia fusa fasil con darwinisme: Per comprende un idea, demanda: “Per cual lo es bon?” Cual es sua funsiona en la organisme, cual es sua intende en un ecosistem, como lo ajunta a la posible de survive e reprodui de la animal?
Alga aspetas de funsionalisme ia es clar no plu ca “antistruturalisme” – refletante, posible, ce James ia es nonpasiente con detalias e ia comprende povre la lingua deutx. Spesial, el ia senti ce la struturalistes iniora la intera e dona tro multe atende a la pesetas. La antistruturalisme de la funsionalistes plu tarda ia es plu fundida sur la maltradui de Wundt par Titchener ca sur la obras mesma de Wundt.
Un esemplo de pensa funsionaliste pote es trovada en la opina sur emosias de James:
“Nosa modo natural de pensa sur esta emosias normal es ce la persepi mental de alga fato stimula la senti mental nomida emosia, e ce esta state de mente resulta un espresa corpal. Mea tese es, a contra, ce la cambias corpal segue direta de la persepi de la fato stimulante, e ce nosa senti de esta cambias cuando los aveni es la emosia. La sensa comun dise ce nos perde nosa fortuna, nos senti triste, e nos plora; nos encontra la urso, nos teme, e nos fuji; nos es insultada par un competor, nos deveni coler, e nos colpa. La ipotese asi cual debe es defendeda dise ce esta ordina de segues no es coreta, ce la un state mental no es pronto induida par la otra, ce la mostras corpal debe prima es poneda a entre, e ce la declara plu razonante es ce nos senti triste car nos plora, coler car nos colpa, temente car nos trema; e no ce nos plora, colpa, o trema car nos es triste, coler, o temente, como la caso aveni. Sin ce states corpal segue la persepi, la sentis ta es de un forma pur conosal, pal, sin color, povre de caldia emosial. Nos ta vide alora la urso, e ta deside ce la reata la plu bon es ce nos fuji, ta reseta la insulta e deside ce lo ta es coreta ce nos colpa; ma nos no ta senti vera teme o coler….
“Per comensa, lejores de la Jornal no nesesa es rementeda ce la sistem de nervos de cada vivente es no plu ca un colie de tendes per ata en un modo spesifada cuando contatada par cualias spesifada de la ambiente. Como la adomen de la crabe eremita depende de la esiste de concas vacua de busino trovable en alga loca, ance la neurones de ole de la can depende de la esiste, a un lado, de la pedes de la servo o volpe, e a la otra lado, de la tende per segue la trasas de los. La macina neuronal es sola un ifen entre ordinas de materia determinada estra la corpo, e impulsas de inibi o descarga en sua organos. Cuando un gal vide un ojeto oval e blanca sur la tera, el no pote parti de lo; el debe senta sur lo e reveni a lo, asta cuando, ultima, sua cambia a un masa peti de peluxeta movente e piante ta trae de sua macina un colie de atas tota nova. La ama de un om per un fem, o de un madre per sua bebe, nosa coleria a un serpente e nosa teme de presipes, tota pote es simil descriveda, como esemplos de la modo en cual pesos spesial formida de la mobilas de la mundo va clama nonevitable la reatas mental e corpal multe spesifada, ante, e comun en oposa direta a, la deside de nosa razona desidente en relata a los. La laboras de Darwin e sua susedores es sola comensante revela la parasitisme universal de cada vivente sur otra cosas spesial, e la modo en cual cada vivente trae con se a la sena la sinia de sua relatas spesial primida sur sua sistem de nervos…
“Sibila per manteni coraje no es mera un espresa comun. A la otra lado, si on senti tra la dia en un posa depresada, suspira, e responde a cada cosa con un vose triste, la melancolia continua. On ave no prinsipe plu valuosa en educa moral ca esta, como tota ci ave alga esperias sabe: si nos vole concista tendes emosial nondesirada en nos mesma, nos debe vade asidua, e con sangue fria a la comensa, tra la moves esterna de acel tendes oposante cual nos prefere cultiva. La recompensa de persiste va veni sin fali, en la pali de nosa mal umor o depresa, e la aveni de felisia e compatia real en sua loca. Lisi la fronte, brilia la oios, contrae la aspeta dorsal de la corpo en loca de la aspeta ventral, parla en un tonalia major, dona un loda amin, e la cor debe es serta jelida si lo no dejela gradal!”
En la paragraf prima, nota la idea oliste ce emosia no esiste sin la corpo. En la paragraf du, el indica ce emosia ave un gol en evolui. E en la paragraf tre, James asentua un aplica pratical de sua teoria.
De un perspetiva istorial, la asentua a abitua par James es lo cual ia inisia la interesa de sua seguores, e ia pave la via per la developa de conduisme american. Denova, asi es James en sua propre parolas:
“Cuando nos regarda tota viventes de un punto esterna, un de la cosas prima cual mostra se a nos es ce los es pacos de abituas. En animales savaje, la segue tipal de condui dial pare es un nesesa incluida a nase; en animales domada, e spesial en umanas, lo pare, a un grado grande, como la resulta de educa. La abituas a cual on ave un tende inata es nomida instintos; alga de los cual resulta de educa ta es nomida atas de razona par la plu de persones. En esta modo, lo pare ce abitua covre un parte grande de vive, e ce un person ci studia la mostras ojetal de mente es serta obligada an a la comensa a defini esata cual sua limitas es…
“No casa es plu fasil imajinada ce, cuando un corente ia traversa un via, lo ta traversa plu fasil lo a un ves du. Ma cual ia causa ce lo traversa lo a la ves prima? Per responde a esta demanda, nos nesesa sola reveni a nosa conseta jeneral de un sistem de nervos como un masa de materia de cual la partes, mantenida constante en states de tensa diferente, es tan constante tendente per egali sua states. La egali entre cualce du puntos aveni tra cualce via cual es la plu permeable a acel momento. Ma, car un punto spesifada de la sistem pote parteni, real o potensial, a multe vias diferente, e car la rol de nuri es forsada par cambias acaso, blocos pote aveni, a veses, cual causa ce corentes lansa se longo linias nondesirada. Un tal linia nondesirada ta es un via nova creada, cual si lo ta es traversada a veses repeteda, ta deveni la comensa de un arco de reflexe nova. Tota de esta es neblosa a la grado minima, e deveni no plu ca dise ce un via nova pote es formida par la tipo de acasos cual, en la materia de nervos, va aveni probable. Ma, an si lo es tan neblosa, lo es vera la parola final de nosa sabe sur esta caso…
“Abitua es, donce, la rota de inertia enorme de sosia, sua ajente conservante la plu importante. Lo es la sola cual manteni tota de nos en la bordas de proclamas de lege, e cual salva la enfantes de bon fortuna de la rebelas inviosa de la povres. Lo es la sola cual preveni la modos de vive la plu difisil e repulsante de deveni abandonada par los elevada per pasa sua vives ala. Lo manteni a mar la pexor e la laboror a teto de barco tra la inverno; lo teni la escavor en sua oscuria, e cloi la campanior en sua cabana de troncos e sua cultiveria solitar tra tota la menses de neva; lo proteje nos de invade par la nativas de la deserto e la zona jelada. Lo destina nos a luta la batalia de vive en la modo de nosa eleva o nosa desides temprana, e per atenta la plu bon nosa carera cual no conveni, car on ave no otra a cual nos cabe, e lo es tro tarda per recomensa. Lo preveni ce la stratos sosial diferente misca. Ja con sola 25 anios, on pote vide la maneras de profesa comensante en la viajor joven de comersia, en la dotor joven, en la eglesor joven, en la avocato joven. On pote vide la linias pico de fendes corente tra la personalia, la trucos de pensa, la prejudis, la modos de la ‘fabriceria’, cual cada person pote ultima evade no plu ca ce la manga de sua jacon ta cade en un colie nova de plias. Jeneral, lo es plu bon ce el no evade. Lo es bon per la mundo ce, en la plu de nos, ja a 30 anios, la personalia es firma como jeso e va moli nunca denova.
Vera, struturalisme e funsionalisme ia es plu simil a lunlotra e plu diferente de psicolojia moderna popular, car ambos ia es volelibriste e antimaterialiste, e ambos ia consepi ce la propre sujeto de psicolojia es la mente:
Wundt:
“‘Mente’, ‘inteleto’, ‘razona’, ‘comprende”, etc, es consetas… cual ia esiste ante la comensa de cualce psicolojia siensal. La fato ce la consensa naive ia indica sempre e en tota locas la esperia interna como un fonte spesial de sabe pote, donce, es asetada per aora como atesta sufisinte per la direto de psicolojia como un siensa… “Mente” ta es conveninte la sujeto a cual nos atribui tota la fatos separada de oserva interna como predicas. La sujeto mesma es determinada intera e escluinte par sua predicas.”
James:
“On ave sola un materia o sustantia fundal en la mundo, la materia de cual tota cosa es composada, e… nos nomi acel materia la ‘esperia pur’”.
Wundt e James ia es empiricaliste, e ia vide sua psicolojias como esperimental. Nun ia gusta la sistemes razonaliste comun en la filosofia de sua eda – como la sistem grande developada par Hegel. Ma nun ia es en cualce modo simil a lo cual la plu de persones comprende como esperimentores oji, car nun de los ia es materialistes o reduistes.
Wundt sur materialisme:
“Si nos ta pote vide cada rota en la macina fisical de cual sua opera es acompaniada par la prosedes mental, nos ta trova ancora no plu ca un cadena de moves, mostrante no trasa en cualce modo de sua sinifia per mente… (Tota) cual es valuada en nosa vive mental resta ancora a la lado psical.”
Peirce, la ami e ensenior de James sur materialisme:
“La crede materialiste pare a me tan repulsante a lojica siensal como lo es a sensa comun; car lo nesesa ce nos suposa ce un tipo spesifada de macina va senti, cual es un ipotese asoluta no reduable a razona – un normalia ultima nonesplicable; ma la sola justi posible de cualce teoria es ce lo debe fa ce cosas es clar e razonable.”
E Mary Calkins, la studiante de James, sur sua ideas de introspeta:
“De introspeta, el deriva la materias per psicolojia. ‘La oserva introspetante,’ el atesta clar, ‘es lo de cual nos debe depende prima e xef e sempre…’”
Regardante la diferes de influe istorial entre Wundt e James: Wundt ia foca a la introspeta de consensia, e James ia foca a condui en ambiente. Esta foca ia deveni la funda per un conduisme cual James no ta reconose. Cuasi un sentenio ia pasa ante cuando rexerca psicolojial ia reveni de un visita estendeda en la mundo de metodos materialiste, reduiste, cuantial, fisiolojial, conduiste e ia deveni alga cosa cual la du omes ta reconose como psicolojia.
Blumenthal, Arthur L. (2001). “A Wundt Primer: The Operating Characteristics of Consciousness.” Capitol 4 en Reiber, Robert W. e Robinson, David K. Wilhelm, Wundt in History: The Making of a Scientific Psychology. Kluwer Academic Publishing.
James, William (1890). The Principles of Psychology. Presentada en Classics in the History of Psychology, un recurso de interede developada par Christopher D. Green de York University, Toronto, Ontario.
Calkins, Mary W. “Autobiography of Mary Whiton Calkins”, en Murchison, Carl. (Ed.) (1930) History of Psychology in Autobiography (Vol. 1, pp. 31–61). Worcester, MA: Clark University Press. [sitante James, Principles of Psychology, Vol. 1, pp. 225 e seguentes].
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).