LA ISTORIA DE PSICOLOJIA

Sur la vole libre

La conseta de vole libre es resente no tan popular. La susede clar de siensa, e la suposas materialiste, deterministe, e reduiste cual acompania tipal lo, ia fa ce la vole libre pare de moda pasada, plu asosiada con teolojistes antica ca persones moderna. Ma on no pote iniora la conseta.

On debe comensa par esplica cual la vole libre es, e cual lo no es. La vole libre no es la mesma como libria de ata. Libria de ata refere a cosas cual preveni un ata voleda de deveni realida. Per esemplo, si on es prisonida, esta sinifia ce on no es libre per vade a la site per bevi con sua amis. Si on es en un camison de restrinje, on no es libre per tricota un xarpe. Si on es paraliseda, on no es libre per move sua membros. Ma estas no es casos de vole libre. La vole libre sinifia ce on es libre per atenta evade prison, tricota un sueter, o move sua membros. La vole libre sinifia ance ce on es libre per no atenta esta atas.

La vole libre es ance no la mesma como libria political o sosial. An si on pote es esecutada pos maldise la tirano de la momento, esta no sinifia ce on no es libre per atenta lo o an libre per fa lo (o libre per no atenta lo). Seguentes fisical, como esecuta, no es aplicable.

A la otra lado de la debate, on debe nota ce determinisme no es la mesma cosa como destina, predestina, o predeterminisme. Determinisme sinifia ce la situa a un momento es la resulta de la situa a la momento presedente. Lo sinifia ce cada efeto ave sua causa, e cada causa ave sua efeto. Lo sinifia ce no cosa, an la vole, es escluida. Ma lo no sinifia ce la futur es ja serta.

La vole libre es un caso de intende: La prosedes de persepi, pensa, e emosia en cual nos partisipa cuando nos fasa un eleje resulta un intende per fa alga atas (o nonatas) spesifada. Per esemplo, me ave ante me un tarte con pomas e un tarte con peras. Me regarda los, me ensofla sua odores, me considera esperias pasada con estas, me senti bon sur ambos posibles, e alora me eleje la un o la otra. A acel momento, me intende come la un o la otra. Esce me es libre per come lo, o esce me pote espeta un puni sever pos come lo – lo no es importante: me ia deside!

Nos debe regarda la razonas cual suporta la vole libre, segueda par la respondes de un deterministe. Car la person ci suporta la vole libre es presentante un declara, la carga de demostra es sur el.

Prima, on ave la razona de esperia. Me esperia alga cosa en me cual me comprende como la deside de elejes, e ce acel desides no es determinada par cualce cosa estra me mesma.

La deterministe ta responde ce me es simple no consensa de la causas de mea desides, e me ia nomi acel iniora “la vole libre”. On ave, sin duta, neurones enviante sua siniales e cimicales volante tra sinapses, etc, e tota esta ativia resulta en modo deterministe ce me eleje la tarte de pomas.

La volelibriste pote sujesta ce la crede es un parte esensal de la vole libre. Si on ta pone me ante la du tartes, sabente ce me tende eleje tartes de pomas, on ta pote serta dise ce la resulta es determinada. Ma si me ta sabe ce on atenta demostra mea determinisme, me ta deside simple sur la tarte de peras, o no tarte de cualce tipo.

La deterministe ta dise ce esta plu pico de sabe – ce on atenta truci me – ia sustitui per mea fatores causal plu comun. En loca, me reata, multe mecanical, a un menasa contra mea credes.

Posible, dise la volelibriste. Ma on debe aseta ce me pote ata multe acaso a veses. Me pote subita lansa me de mea seja e clama multe forte: “Tippecanoe e Tyler ance!” Me defia ce on predise alga cosa como acel!

La deterministe ta responde ce nondeterminisme no es la mesma como vole libre. Si acel es la intera de vole libre, alora un rota de roleta es plu capas a lo ca un person.

Ma me es nonpredisable, dise la volelibriste.

La deterministe ta indica ce acel es sola un problem de pratica, no de filosofia. La realia ce nos no pote indica la loca e rapidia esata, per esemplo, de tota particulas en la universo, no sinifia ce nos no es determinada par los. En fato, an si acel ta es nonposible (como sujestada par la prinsipe de nonsertia de Heisenberg), lo sinifia sola ce nos no pote predise, no ce nos ave la vole libre!

La volelibriste pote indica ce, sin vole libre, moralia ave no sinifia. Tota la cosas la plu bon de umanas – jenerosia, coraje, compatia – ta ave no sinifia. Si nos es tan determinada como brices cadente, alora Adolf Hitler no pote es plu culpable per sua mal atas ca Madre Teresa pote es lodada per sua bon atas. Cual ta es nosa mundo alora?

Simple, la deterministe dise. Nos ta debe vive sin moralia. Multe persones es ja relativistes moral, o an nihilistes moral. Nosa sosias vade bon con leges e prosedes de judi e prisones, usante no plu ca tradision, egoisme de la majoria, resiprocia, e la pratica de “proteje sua propre dorso”. Posible esta es tota cual moralia ia es sempre!

Un otra razona cual un volelibriste pote usa es ce nos ave un capasia unica per para e pensa sur un situa de eleje. Nos pote sorti de la flue de causa e efeto per un momento. Nos pausa ante come multe calorias per considera la beneficas de lo. Animales no fa esta: Si un leon fame ave un antilope ante se, el come. E nos pote pospone un deside per tan longa como nos gusta. An si la deside es determinada, la longia de nosa espeta no es determinada.

No? dise la deterministe. Cual ia causa ce tu pausa per esata un minuto ante deside? O cual ia causa ce tu para tua pausa e comensa ata a esata acel momento? An tal, esce esta pausa es no plu ca un caso de un sircuito corta en la prosede normal, fada par du fortes egal?

Jean-Paul Sartre, la filosofiste franses, ia presenta un razona interesante per vole libre. El ia dise ce nos pote iniora alga cosa real e nos pote finje alga cosa nonreal. Per esemplo, me pote imajina ce me no ave un tarte ante me – un imajina cual me nesesa fa comun en la servi de dieta. O me pote imajina larvas de moscas en la tarte. Esta imajina es un cosa potiosa! Ma la deterministe ta dise ce imajina es no plu ca un plu macina neurolojial, esplicable par prinsipes deterministe.

On debe nota ce, an si la volelibriste ia gania no puntos en la debate asta aora, la deterministe ia pone se en un posa plu defendente. Alga de la “carga de demostra” move a la lado de la deterministe. Per esemplo, el ia dise ce imajina es un cosa fisical. Esta es un declara cual nos no debe simple aseta: Nos pote defia ce el demostra la validia de sua declara.

Un otra funda posible per la vole libre es la creosia. Me pote crea un posible nova. Me no nesesa resta con un eleje entre du tipos de tarte. Me pote pone los en la baldon e come un saco de bastetas de ceso. O me pote crea un tarte nova. O me pote combina la du como un tarte miscada.

Natural, la deterministe, ci deveni aora alga iritante, ta dise ce “creosia” es mera un parola cual nos usa per la avenis neuronal nonconsensa cual surprende an nos mesma – un acaso. Si algun ta sta sur la tarte sin intende, nun ta dise ce la gaxa sur sua sapato es un crea nova.

(Serta, la deterministe declara aora ce la creosia es mecanical – un declara sur cual on ta pote defia ce el defende lo.)

Posible on pote difere entre causas e razonas? Cuando me vade a la boteca per compra un amburger, esce la mecanica de causa e efeto es lo cual gida me ala? Esce la ronci en mea stomaco forsa me en mea auto, esce la vide de la boteca fa ce me turna mea volante? O posible me nota mea apetito e developa alora un projeta: Esamina mea lista de comedas favoreda, deside per un amburger, gida mea auto con intende a la boteca, e demanda per un amburger? Esce me, en otra parolas, es “puxada de pos” par causas, o esce me segue mea razonas?

En psicolojia, esta es nomida teleolojia (no esata la mesma en filosofia). En loca de reata a un stimula, nos projeta un situa futur cual nos aseta como un gol. La lia entre causa e efeto es la nesesa. Ma on ave no nesesa en intendes. Los pote es atenida – o no.

Ma la deterministe ta responde con la mesma razonas cual el ia usa per imajina e creosia: Nosa persepis e pensas e emosias, nosa esperias pasada, gida nonevitable nos a nosa pensa a un gol e a nosa atas per ateni lo. Mera, lo pare a nos ce nos es libre de nesesa.

Un atenta final per vole libre: Posible, cuando nos developa de bebes a adultes, nos separa de la mundo. Nosa prosedes causal deveni sempre plu autonom de la prosedes causal estra nos, spesial en la mente. Un fesur developa, cual permete ce nos es influeda par la situas esterna, ma no ce nos es determinada par los. Esta fesur es simil a un om a la otra riva de un rio ci clama a nos, brandi sua mano, fa siniales, etc, sin afeta direta nos. Ma nos pote escuta el o interprete sua siniales e trata sua atas como informa ajuntable a tota la informa cual nos ia colie tra nosa vives, e usa acel informa per gida nosa desides – influeda, ma no causada.

La bebe comensa sua vive cuasi tan intima liada con sua mundo como en la utero. A la fini de vive, alga de nos es nonpermeable a lo cual otras pensa sur nos, pote leva nos supra cualce menasa o promete seduinte, pote iniora cuasi cualce urje o dole. En un grado, nos es ancora determinada – determinada par acel person developante ci nos es, determinada par nos mesma. Ma no otra cosa en nosa situa presente, o an en nosa enfantia pasada a la ves prima cuando la fesur ia es intera realida, es plu ca informa per usa en desides.

Serta, la deterministe pote responde ance a esta idea. Ma aora el es tan defendente se ca la volelibriste. Posible, la escutor ci no ia deside va comensa conclui ce la declara deterministe – “no cosa es libre!” – es la declara plu estrema, min razonada.

Conclui

La debate entre la vole libre e determinisme es, a un grado, un debate falsa. Ambos ia es reduida a “asustavias” (razonas fasil destruable) par simplis tro estrema. Per esemplo, la vole libre no es la libria per iniora la leges de natur, e determinisme no sinifia ce tota es serta. Posible nos pote developa un conseta nova cual aseta la complica de la person e sua interata con la mundo. En loca de vole libre contra determinisme, nos pote adota la espresa usada par Albert Bandura: autodetermina.

Un adulte ave multe anios de esperias – la esperias de enfantia, la erita cultural, la libros lejeda, conversas con amis, pensas solitar – tota cual ia construi la person asi oji. Tota esta es en ajunta a la jenetica unica e otra realias fisical de ci on es. La avenis cual on esperia aora es esperiada tra esta masa de unicia, e sua respondes depende, no sola de la situa presente, ma de tota cual on es. Esta no es “la vole libre” asoluta, ma lo es serta la autodetermina.

Si nos posese esta libria (alga limitada), nos posese ance un culpablia (alga limitada) per nosa atas. Per la plu de adultes, on pote dise ce ci on es inclui la consetas moral fundal e un respeta razonante per la leges donada a nos par nosa jenitores e otras. Esta cosas es un parte de ci nos es, e es disponable a nos cuando nos deside ata en un modo o un otra. Nos es donce culpable si nos iniora esta consetas. En la tradisiones de lege, on debe determina esce un person sabe vera la difere entre bon e mal, e esce la person ave la maturia o la capasia mental per eleje bon en loca de mal.

En otra parolas, nos no debe es supra la mundo natural per ave un grado de libria en acel mundo.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).