De cuando Darwin ia introdui sua teoria de evolui, persones – incluinte Darwin mesma – ia divina sur nosa conduis sosial (e emosias, disposas, etc) e como los pote es afetada par evolui. Serta, si la modo en cual nosa corpos aspeta e opera como viventes pote es plu bon comprendeda par usa la ideas de evolui, perce no ance la cosas cual nos fa con esta corpos?
La entomolojiste E. O. Wilson ia es la prima ci ia presenta formal la idea ce on pote usa evolui per esplica la condui sosial, e el ia nomi sua teorias sosiobiolojia. Prima, lo ia gania la interesa sola de biolojistes – e an los ia inclui criticores forte. Cuando lo ia deveni familiar a sosiolojistes e psicolojistes, la controversia ia comensa seria. A acel tempo, sosiolojia ia es, per la plu, strutural-funsional, con alga marxistes e femistes. Psicolojia ia es ancora dominada par la teorias de aprende conduiste, con umanisme comensante. Zero de esta teorias ave multe spasio per la idea ce nos, como umanas, pote es tan forte determinada par la biolojia de evolui.
Tra tempo, la sosiobiolojia de Wilson ia trova plu e plu suportores entre biolojistes, psicolojistes, e an antropolojistes. Sola sosiolojia ia resta relativa nonafetada.
Nos pote comensa con un esemplo de condui instintosa en animales: la Gasterosteus aculeatus, plu bon conoseda como la spinosa. Lo es un pex de sirca 2,5 cm cual on trova en la rios e lagos de Europa. La primavera es, como on pote espeta, la saison de cortea per la spinosa, e un tempo perfeta per vide alga de sua instintos.
Alga cambias aveni en sua aspetas: La mas, normal blanda, deveni roja supra la media. El crea un teritorio per se, de cual el va xasa cualce mas con colores simil, e construi un nido par sperde malerbas en un caveta e alora corsa tra los repetente per crea un tunel. Tota esta conduis es inata. Mases ci ia crese solitar fa la mesma. Nos vide, en fato, ce la mas, en la saison de cortea, va atenta xasa otra mases de sua teritorio, e an otra cosas, incluinte la refleta camiones roja pasante en la vitro de la acueria.
La fema cambia ance: Normal blanda como la mas, el deveni inflada par sua multe ovos e developa un brilia arjentin cual, lo pare, no spinosa mas pote resiste. Cuando la mas vide la fema, el va nada en la dirije de la fema en un modo zigzagante. La fema responde alora par nada a la mas con sua testa levada. La mas responde par nada rapida a sua nido, mostrante la entra. La fema entra a la nido, con sua testa estendeda estra un lado de la nido, e sua coda estra la otra lado. La mas responde par puia ritmosa a la funda de la coda de la fema. El relasa sua ovos e sorti de la nido. La mas entra e fertili la ovos, e alora (un sesiste a la cor) xasa la fema a via, e comensa espeta un fema nova.
Lo cual opera asi es un serie de stimulas sinial e atas fisada: La dansa zigzagante es un responde a la aseta de la fema, cual deveni un stimula per la fema a responde, etc. Posible la seguente es un salta tro longa, ma esce esta no remente on a la cortea de nosa rituos de cortea como umanas? Serta, lo no es tan automata, ma la conduis cuasi fisada pote formi un funda per nosa conduis plu complicada e aprendeda.
Etolojistes – siensistes ci studia la condui de animales en situas natural – ia studia conduis como los de la spinosa tra plu ca un sentenio. Un, Konrad Lorenz, ia developa un model idraulical de instintos. Nos ave un cuantia de enerjia dedicada a un sistem spesifada de instinto, como un reserva de acua. On ave un aparato neurolojial cual permete la relasa de alga o tota de acel enerjia cuando un stimula sinial apare – un valva. On ave plu aparatos – neurolojial, motor, ormonal – cual tradui la enerjia a respondes fisada. Oji, nos pote sujesta otra metafores plu bon e tradui la sistem a un model informatical. Ma la descrive ancora sona bon.
On ave du campos de condui, estra seso, cual pote es posible jeneralida a umanas:
Alga modos de condui, trovada en la plu spesies de animales, envolve la proteje e promove de la animal mesma e la xerca per prestijia o potia, de cual la esemplo la plu bon es atas agresiva. On pote nomi esta la instinto agresiva.
Otra modos de condui trovada en multe spesies envolve la cura de algun otra ca se, esemplida en la cura de sua enfantes par un madre. On pote nomi esta la instinto nurinte.
La fundas de evolui es simple: Prima, tota animales tende reprodui plu ca nesesada, e algas produi miles de desendentes en un vive. Ma la poplas de animales tende resta multe stable tra la jeneras. Clar, alga de la projenia no survive (o no reprodui).
Du, on ave alga varia en cualce spesie. Multe de la varia es fundida sur jenetica e es pasada de un jenera a la seguente. Incluida en esta varia es cualias cual aida alga individuas a survive e reprodui, e otra cualias cual nonvantaji los.
Combina la du ideas, e on ave la eleje natural: Natur coraji la reprodui de la cualias positiva e descoraji la reprodui de la cualias negativa. Tra cuando la varia continua es creada par recombina sesal e muta, e la recursos per vive resta limitada, la evolui va continua.
Un sosiobiolojiste, David Barash, ia sujesta un demanda gidante per comprende la radises posible de cualce evolui de condui: “Perce zucar es dulse?” – pd: perce lo es atraente a nos? Un ipotese es ce nosa asendentes ia come frutas per sasia sua nesesas de nuri. Frutas es la plu nurinte cuando los es matur. Cuando frutas es matur, los es plenida con zucar. Si cualce asendente ia prefere la sabor de zucar, lo es alga plu probable ce el ia come la frutas matur. Sua bon sania resultante ia causa ce el deveni plu forte e plu atraente a posible sposes. El ia pote produi enfantes ci ia erita sua gusta per fruta matur e ia survive plu probable asta la eda per reprodui, etc. Un forma plu jeneral de la demanda: “Como acel condui pote aida la survive e reprodui?”
Un nota strana sur la esemplo: Oji, nos ave zucar refinada, un cosa no otenable per nosa asendentes. Lo es clar ce un atrae a zucar no servi plu nosa survive e reprodui. En loca, nos deveni plu lenta e debil, e min atraente a sposes posible. Ma cultur aveni multe plu rapida ca evolui: Miliones de anios ia es nesesada per evolui nosa gusta sana per zucar; sola miles de anios ia es nesesada per suverti lo.
Nos pote comensa par regarda la eleje de otras per copula. Lo es clar ce nos es atraeda a alga persones plu ca a otras. Sosiobiolojistes ave la mesma esplica per esta como los ave per otra casos, fundida sur la demanda fundal: Nos debe es atraeda a otras de ci sua cualias ta masimi nosa susede jenetical, pd: cualias cual dona multe enfantes ci es sana, vive longa, e es fertil.
Nos debe trova ce sania es atraosa e, contrastada, ce maladia es nonatraosa. Nos debe trova aspetas “perfeta” como atraosa, e malformidas como nonatraosa. Nos debe trova ce vivosia, fortia, e ativia es atraosa, e no pigria, debilia, e torpia. Nos debe trova la “promedia” como atraosa – no tro corta e no tro alta, no tro spesa e no tro magra, etc. Quasimodo, an si el ia es un bon om, ia ave difisiles en atrae un spos.
Nos es ance atraeda a alga persones per razonas min “lojical”, como la grado a cual los ave cualias forte mas o fema – cualias fisical e de condui. Femes prefere jeneral omes ci es plu alta, con spalas larga, un fas plu longa, musculos (ma no tro), etc. Omes prefere femas ci es plu corta ca se, plu ronda (ma no tro), plu mol, plu joven, etc.
Esta diferes entre la sesos es nomida dimorfia sesal, e la prosede cual gida a los es nomida eleje sesal. Diferes peti e funsional entre la sesos pote deveni diferes grande e nonfunsional tra multe jeneras. Si avias fema es instintosa atraeda a mases colorosa – posible car mases colorosa ia servi per distrae predores de femas ensinta e sua avietas – alora un mas ci es plu colorosa va susede probable plu bon, e la fema con un atrae plu forte a mases colorosa va susede probable plu bon, e sua enfantes va ave la colores o la atrae, etc. Esta pote continua asta cuando la colores e la atraes no es plu un benefica ma un descapasia, como un de la avias de paradiso. Alga mases an no pote vola su la pesa de sua plumas!
Umanas es sola pico dimorfe. Ma nos es serta consensa de la dimorfias!
Femas tende es plu esijente sur deside con ci los ta copula. Los es plu sensosa a indicas ce un mas spesifada va contribui a sua susede jenetical. Un esemplo clar es la atende de multe animales fema a la grandia e fortia de mases, e la developa de concursos spesialida, como la batalias de animales con cornos, per mostra lo.
On ave ance alga cosas min clar. En alga animales, mases debe mostra no sola fortia, ma la capasia per furni comedas. Esta es spesial vera en cualce spesies en cual la mas furni comedas per la fema en sua ensintia e developa temprana de la enfantes – como umanas! Sosiobiolojistes ia sujesta ce, cuando omes es atraeda a jovenia e la forma fisical de un fem como importante, femes tende xerca indicas de susede. Los nota ce, en multe sosias, la om tende dona cosas a la fem, e femes espeta esta. Lo es serta la resulta de cultur e eleva, ma posible lo ave instintos a la funda.
Plu, los sujesta, femes pote trova ce los es plu interesada par la om “matur”, car el ia demostra ja sua grado de susede, e min interesada par la om “nonmatur”, ci representa un risca. Sola femes multe joven prefere la “mal xico”, con sua condui riscosa. E femes aseta, en multe cultures, la esiste de otra femes en la vive de un om, como la esiste de polijinia, concubinas, etc. Comparti un om susedosa es plu bon en alga casos ca ave un falor per sola se. Nota ce polijinia es plu comun ca monogamia (en cuantia de cultures), ma poliandria (un fem con plu ca un sposo) es trovada en posible du cultures (un en Tibet e un en Africa), e en ambos casos, lo envolve du frates ci “comparti” un fem per no rompe la proprias eritada pico.
De la otra dirije, omes tolera jeneral la nonfida min ca femes. Femes “sabe” ce sua enfantes es vera sua enfantes; omes sabe nunca serta. Jenetical, lo no es tan importante ce omes ave multe “esperia” (pd: ia copula con multe femes). E, serta, la plu de cultures es multe plu sever contra femes ca omes en relata con adultera. E en la plu de cultures, la fem move per abita con la familia de sua sposo – posible afin on manteni un oio sur la venis e vades de la fem.
De la perspetiva de nosa cultur sur ama e sposi, on nota con interesa ce en la plu de cultures, un fali de copula en un sposi es un razona per divorsa o nega de la sposi. En nosa cultur, nonfertilia o nonpotentia es causas comun de divorsa. Lo pare ce la reprodui es plu importante ca nos prefere aseta.
Natural, on ave un limita de la estende a cual nos pote jenerali de animales a umanas (o an de cualce spesies a un otra), e esta es spesial vera en relata con seso. Umanas es animales multe sesosa: La plu de animales restrinje sua ativia sesal a periodos definida, ma nos ave seso tra la mense intera e tra tota la anio. Nos no sabe perce. Posible, lo es un resulta de la fato ce nosa enfantes es tan debil e sin defende per un tempo longa. Posible esta es un modo per manteni la lias familial: developa la posible de seso continuante, incluinte la orgasma fema, cual teni serta la om en sua propre casa.
Nos tende es atraeda a nosa enfantes, e los tende es atraeda a nos. Adultes de multe spesies tende trova ce representores peti de sua spesies, con sua brasos e gamas corta, testas grande, fases plata, e oios grande e ronda, es adorable – “dulse”, como la sosiobiolojistes dise. Lo es multe razonable sur evolui ce, en animales con enfantes relativa debil, la adultes es atraeda a sua enfantes.
Ance la enfantes pare es atraeda a alga cosas. Gansetas, como cadun sabe, deveni liada a la ojeto prima grande e movente cual los encontra en la du dias prima de sua vive – plu comun la ganso-madre (e a veses Konrad Lorenz o otra etolojistes). Esta es nomida “impresa”. Enfantes umana responde a duples de oios, voses fema, e toca suave.
La gansetas reata a sua stimula sinial con la responde de segue, leteral seguente acel ojeto grande e movente. Enfantes umana, natural, no es capas de segue, donce los adota un engana: la rieta vasta, plen, sin dentes cual jenitores trova inondante atraosa.
Sosiobiolojistes predise ance ce un madre va cura sua enfantes plu ca la padre, car el ia investi plu a los, e es plu serta ce el es la madre de esta enfantes. Los predise ce madres plu vea cura plu ca madres joven, car los ave min oportunes per plu reprodui. Lo predise ce nos tende dona plu conserna a nosa enfantes cuando nos ave sola poca enfantes ca cuando nos ave multe. Los predise ce nos crese nosa conserna per nosa enfantes cuando los deveni plu vea, car los ia demostra sua capasia per survive. E los predise ce nos tende puia nosa enfantes a sposi e ave enfantes, car nos vole garantia la survive de nosa jenom per plu ca sola un o du jeneras. Clar, an si otra siensistes insiste ce sosiobiolojia no pote es un siensa, la sosiobiolojistes ia introdui ipoteses derivada de la teoria, e ia trova metodos per suporta los con oservas.
Aida, cura, compatia, etc, es plu comun cuando lo envolve nosa enfantes, jenitores, sposes, o otra relatadas o amis prosima. Lo es min e min probable cuando lo envolve cusines o visinas nonrelatada o distante. Lo es tan noncomun cuando lo envolve stranjeres o persones de otra cultures e razas ce nos recorda un nara – “la bon samaritan” – pos cuasi 2000 anios.
Sosiobiolojistes predise ce aida descrese con la distantia de relata familial. En fato, lo debe aveni sola cuando la sacrifia es min pesosa ca la vantaje cual la sacrifia furni per la jenes cual on comparti con esta relatadas. La jeneticiste J. B. S. Haldane ia dise: “Me ta dona felis mea vive per 3 de mea frates, 5 de mea sobrines, 9 de mea cusinas, etc.” Esta es nomida eleje de relatadas. Lo es altruisme fundida sur egoisme jenetical.
Un tipo de condui aidante es la manada. Alga animales pare desira es prosima, e en situas perilosa an plu prosima, a otras. Lo ave bon razona: Si on asembla en un manada, lo es min probable ce on, como un individua, va es atacada par un predor. Serta, a veses, on pote trova se estra la manada, ma la probablia es bon ce a la ves seguente, on va es a la interna nidin.
Un otra tipo es nomida altruisme resiproca. Un can-de-prado ci vide un predor va comensa cria forte, per esemplo. Esta averti la resta de sua comunia, an si lo trae la atende de la predor a el ci cria.
La manada e la aida resiproca susede per la mesma razona ce la eleje de relatas susede: Los contribui a un susede incluinte: Un redui peti de la probablia de mea propre survive es plu ca ecuilibrada par la survive de relatadas cuasi prosima. Alga animales aida an cualce membro de sua spesies, con la “comprende” instintosa ce el mesma pote es la beneficada a la ves seguente.
Robert Trivers ia sujesta ce umanas partisipa en un forma plu sofisticada de aida resiproca, compartida con poca otra viventes avansada. On ta vole sacrifia per un otra person, si lo es comprendeda ce acel otra person spesifada ta fa la mesma per on, o ta resiproci en alga otra modo – “esta per acel”. Clar, esta nesesa ce on ave la capasia per reconose individuas e per recorda detas (e per onora esta detas)!
Otra jeneticistes ia sujesta ce, si on ave un funda jenetical per la aida resiproca, on ave ance alga individuas ci froda par permete ce otras aida los sin onora sua propre obligas. En fato, dependente de la vantajes cual altruisme resiproca furni a on, e de la tende de altruistes per ataca frodores, on va trova frodores en cualce popla. Otra studias ia mostra ce “sosiopatia” – la iniora de costumes sin senti culpable – es trovada en un parte notable de la popla umana.
On ave, serta, no nesesa ce un person es intera altruiste o frodor. La plu de nos (o posible tota de nos), an si nos deveni coler contra frodores, es vera capas de froda cuando la nesesa aveni. Nos senti culpable, ma nos pote froda. Un parte grande de la mente de umanas pare es donada a la calcula de nosa probablia de susede o fali en tal manobras nononesta. Un idea simil es la “analise de custas e beneficas” de economistes.
Como multe consetas en psicolojia sosial, agresivia ave multe definis, e multe evaluas. Algas pensa ce agresivia es un virtua grande (per esemplo, la comersior agresiva), e otras vide agresivia como un sintom de un maladia mental.
La fato ce nos reteni la mesma parola per ambos sujesta ce on ave un comparti: Agresivia, e positiva e negativa, servi per avansa la ego. La varia positiva, cual nos pote nomi autofida o sertia, es condui en un modo cual boni la ego, sin la implica ce nos debe feri un otra. La varia negativa, cual nos pote nomi viole o combatosia, foca plu a la mali de otras como un modo de boni se mesma.
An si la vive de animales pare frecuente alga sanguosa, nos debe nota ce predoria – la xasa e mata de otra animales per come – no es la mesma como agresivia. La predoria en spesies carnivor es plu simil a la come a pasto en spesies vejetaliste ca la violentia entre membros de la mesma spesie. Regarda la gato de tua visineria cuando lo xasa un mus: El es composada e fria, no loco e calda. En termas umana, la xasa no ave la corelata emosial de coleria cual on vide en violentia. La gato fa no plu ca sua comersia.
Sin estas, on ave vera poca agresivia en la mundo de animales. Ma lo resta: La plu comun, nos trova lo en situas de compete sur un recurso. Esta recurso debe es importante per la survive e reprodui, e restrinjeda en cuantia. Animales no compete per aira, ma pote compete per acua, comedas, locas per nidos, e sposes.
La compete per sposes es la plu importante per agresivia en mamales. E la mases es los ci es la plu notada per esta. Como on ia dise plu temprana, femas investi tan multe a cualce ata de copula – tan multe menses de ensintia, la nesesa per plu nuris, la difisiles de pari, la abri a ataca, la carga de leti – ce los es aidada a survive e reprodui par es plu esijente cuando los xerca un spos. Si femas es esijente, mases debe es ostentante: La mas debe demostra ce el ave la cualias cual servi la survive e reprodui de la fema, per securi sua propre survive e reprodui. Servos es un bon esemplo. Nota ce esta no nesesa es consensa o aprendeda; probable, esta es multe instintosa en la plu de mamales. Lo pote ance ave alga fundas instintosa en nos.
Alga de la agresivia de la om pote es esplicada par testosterona, la ormon “mas” (nota ce femas ave lo ance, ma multe min). Si on injeta testosterona en muses fema, la limina de condui agresiva deveni plu basa. Si on sutrae testosterona de muses mas (par castra la povres), sua limina alti. Ma nota ce testosterona no causa agresivia: lo basi mera la limina de lo.
Ma femas en multe spesies pote es multe agresiva (pe: cavias), e femas en cualce spesie pote es estrema agresiva en alga situas (como cuando los fasa un menasa a sua enfantes). En sosias umana, la statisticas sosiolojial es clar: la plu de crimines violente es fada par omes. Ma nos ia nota ja ce, con ce femes susede gania sua diretos per partisipa plen en la mundo sosial e economial, la statisticas cambia, sujestante ce a la min un parte de agresivia es aprendeda.
An tal, mases partisipa en un cuantia grande de colpas par testa. Ma on debe nota ce esta competes “per” femes no fini tipal en moris o an feris grave en la plu de spesies. Esta es car esta competes es esata tal: competes. Los es un caso de mostras de virtuas e inclui tipal atas cual servi como stimulas sinial a la oposor ce la compete es finida: siniales de sede. La combate continuante ave poca vantaje per o la vinsor o la vinseda. An crotales no morde lunlotra.
(Nota ce, en realia, la femes eleje la mas; la mas no prende la fema! La tradisiones en multe cultures de “fura” o an viole un sposa es un condui aprendeda, no instintal. Nos ia inventa un colie grande de “escusas” per viole sesal, incluinte la razona bizara ce femes gusta lo! A la plu, alga femes gusta un om forte, posible per proteje el de otra omes en nosa mundo umana desjuntada de la lojica de instintos.)
La posese de teritorio e la ierarcias de domina – regardada en la pasada como focas major de condui agresiva – pare es relativa min importante. Animales tende respeta declaras de teritorio e domina, min ca disputa los. Lo es sola cuando la situa, o natural o artifis, es estra la normal, ce nos vide multe agresivia. E la manca de comedas sufisinte no es la causa de multe agresivia. Southwick, en sua studias de macacas resus en la Zo de London, ia trova ce redui la cuantia de comedas par 25% ia fa no efeto a la cuantia de condui agresiva, e redui la cuantia par 50% ia descrese lo! Nos trova la mesma entre persones de tribus “primitiva”, ma no tan multe pos “sivili” – un mundo aprendeda a alga miles de anios pasada.
Perce nos vide tan multe condui agresiva en umanas? Un posible es ce nos ave tan multe restrinjes biolojial. Sosiobiolojistes sujesta ce animales cual no es bon furnida per combate ave min siniales de sede. Umanas, los sujesta, es un de esta animales. Ma nos ia developa tecnolojia, incluinte la tecnolojia de destrui, e esta tecnolojia ia “evolui” tan rapida ce nosa evolui biolojial no ia pote furni restrinjes compensante a nos. Esperia mostra a nos ce fusiles es plu perilosa ca coteles (contra la insiste par amores de fusiles), an si ambos es aparatos efetosa per mata, car un fusil es plu rapida e furni min tempo per reconsidera nosa atas razonante (la sola restrinje cual resta per nos).
Un otra problem es ce nos vive, no sola en la mundo “real”, ma ance en un mundo simbolin. Un leon deveni agresiva sur alga cosa asi e aora. Persones deveni agresiva sur cosas cual ia aveni en la pasada distante, cosas sur cual los pensa ce los va aveni a alga dia en la futur, cosas cual nos ia oia de otras. Un leon deveni coler sur cosas multe fisical; si on maldise el, lo no irita el.
Un leon deveni coler sur alga cosa cual aveni personal a el. Nos deveni coler sur cosas cual aveni a nosa autos, nosa casas, nosa comunias, nosa nasiones, nosa instituidas relijiosa, etc. Nos ia estende nosa “egos” distante de nos e nosa amadas a multe cosas simbolin. La responde a la arde de un bandera es un esemplo: Lo es un peso de stofa, no plu; perce la coler?
En animales como la pex peti, la spinosa, on vide un stimula per condui agresiva, pe: la ariva de un otra mas roja. Ma si on revade a la idea de compete como un funda de agresivia, on pote nota ce frustra ta es un bon posible. On ave du persones ci desira la mesma cosa: Si la un saisi lo, la otra no ave lo e es triste; donce, el saisi lo, e alora la otra es triste, etc (un jua de soma de zero). Un condui dirijeda a un gol ia es blocida, e acel es frustrante.
Varias de esta tema es multe: Nos pote es frustrada cuando un condui continuante es interompeda (pe: tropeza algun); nos pote es frustrada par un retarda de ateni un gol (move ante algun cuando on sta en un filo a la mercato); o nos pote es frustrada par la disturba de abituas (bevi la copa final de cafe e regarda la reata de otra amores de cafe). Nos es viventes flexable.
Ma nos debe es gardante asi: Otra cosas ca frustra pote gida nos a condui agresiva (como boxores ci es paiada per combate – o esce esta no es un esemplo de agresivia?) e frustra pote gida nos a otra cosas ca agresivia (como un senti de nonpotia sosial resulta comun un depresa).
Multe psicolojistes, sosiolojistes, antropolojistes, e otras es cauta a la esplicas – an si los pote es tan convinsente – de la sosiobiolojistes: Per cada esplica sosiobiolojial, on pote trova un esplica cultural. Pos tota, la cultur opera par la mesma prinsipes como la evolui: On ave multe modos diferente per fa un taxe, ma en la contesto de un ambiente fisical spesifada e un cultur spesifada, alga modos de ata opera plu bon ca otras. Estas es plu probable capas de pasa de un jenera a la seguente, a esta ves par aprende.
Cultures nesesa fa alga cosa si los desira survive. Los debe usa la recursos natural efetosa, per esemplo, cual pote envolve la aprende de multe tipos de conduis teritorial e agresiva, simil a los en la esplicas sosiobiolojial. E los debe serti un grado de coopera, cual pote envolve la aprende de conduis altruiste, regulas per comparti recursos e per otra relatas sosial, como en la esplicas sosiobiolojial. E los debe serti ce la popla continua, cual pote envolve alga ordinas de cortea e sposi, conduis de nuri, etc, como en esplicas sosiobiolojial.
Si un sosia vole survive – e cualce sosia esistente ia survive asta aora – lo debe solve la mesma problemes cual jenetica debe solve. E, car aprende es multe plu flexable e rapida ca ajusta par evolui, nos debe depende de aprende per solve problemes si evolui no ia solve ja los. Ma nota ce la avansa de sosia pote gida nos a estingui.
Alora, esce nos ave instintos? Si instintos es definida como lias automata, como reflexes, probable no. Ma si nos defini instintos como “tendes forte e inata a alga conduis en alga situas” – si, nos probable ave los. La punto importante es ce nos (diferente de otra animales) pote dise “no” a nosa conduis instintosa, en la mesma modo como nos pote dise “no” a nosa conduis aprendeda.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).