Lo surprende comun studiantes ce psiciatria – cual sinifia la aida medical de la mente – no ia es inventada par Sigmund Freud. Psicoanalise – un tipo spesifada e importante de psiciatria – ia es la bebe de Sigmund Freud. Psiciatristes ia esiste ante Freud, e la plu de psiciatristes oji no es freudian.
La terma psiciatria ia es introduida en 1808 par la mediciste deutx Johann Reil (1759–1813), e lo ia recambia lenta la terma plu vea alieniste. La respeta nova sinialida par la nom nova ia es fundida sur alga bonis importante en la cura de maladas mental en la dui du de la sentenio de 1700.
(Reil, un mediciste multe amirable, ia proposa, an tal, ce la usa de un “piano de gatos” pote aida trae la atende de scizofrenicas catatonica. Un piano de gatos es esata lo cual la espresa sujesta: un strumento ipotesal en cual un serie de gatos restrinjeda, con crias diferente, ta es stimulada par tiras a sua codas. Reil ia dise ce la sona e vide de esta aparato ta trae la atende de la sposa de Lot en la Biblia.)
On ave tre persones cual merita atende como presedentes importante de psicoanalise: Franz Anton Mesmer, ci ia descovre ipnose; Philippe Pinel, ci ia cambia la modo en cual nos considera e trata la maladas mental; e Jean-Martin Charcot, ci es comun videda como la padre de neurolojia.
Franz Anton Mesmer (1734–1815) ia nase a 23 maio 1734 en Iznang, Deutxland, prosima a la lago Bodensee. El ia reseta sua diploma de dotor medical de la Universia de Wien en 1766. Sua tese dotoral ia conserna la idea ce la planetas influe nosa sania sur tera. El ia sujesta ce la gravita de la planetas pote cambia la distribui de nosa spiritos animal. Plu tarda, el ia cambia sua teoria per asentua magnetia en loca de gravita, e el ia introdui la terma magnetia animal. Pronto, lo ia es conoseda como mesmerisme.
El ia es capas, en fato, de causa ce persones entra a states de transe, an con convulsas, par brandi baras magnetida supra la person. Sua presentas dramosa ia es multe popular per un tempo, an si el ia crede ce cualcun pote ateni la mesma resultas. Vera, alga de sua pasientes ia reseta un grado de lejeri de sua sintomes – un resulta cual ia es investigada par otras.
Cuando el ia es acusada de froda par otra medicistes en Wien, el ia vade a Paris. En 1784, la re de Frans, Louis 16, ia asinia un comite, cual ia inclui Benjamin Franklin, per investiga Mesmer e sua praticas. Los ia conclui ce sua resultas ia es causada par no cosa plu ca sujesta.
An con condena par multe de la elites educada, mesmerisme ia deveni un moda popular en la salones de Europa. Per servi la multe persones povre ci ia veni a el per aida, el ia desinia un tipo de banio en cual los pote senta e mesma teni la baras magnetida. Ultima, el ia crea un organiza per instrui otra mesmeristes.
Mesmer ia mori a 5 marto 1815 en Meersburg, ance prosima a la lago Bodensee, Deutxland.
Un mediciste engles, James Braid (1795–1860), un rexercor multe plu atendente de la fenomeno de Mesmer, ia nomi lo ipnose. Desasosiada de Mesmer, ipnose ia continua vive longa (si controversa) tra la sentenio de 1900.
====Philippe Pinel====
Philippe Pinel (1745–1826) ia nase a 20 april 1745, en la vileta San Andre. Sua padre ia es e un capelor e un sirurjiste, un combina comun en acel eda, car ambos careras ia nesesa un mano stable con un lama. Sua madre ia es ance de un linia longa de medicistes.
Philippe ia comensa sua studias con plu interesa a leteratur – spesial a Jean-Jacques Rousseau – ca a medica. Ma, pos alga anios de studia teolojia, el ia comensa la studia de medica, e el ia reseta sua diploma dotoral de la Universia de Toulouse en 1773.
Pinel ia move a Montpellier en 1774, do el ia servi como un ensenior privata per studiantes rica sur anatomia e matematica. El ia es asetada a la Sosia Real de Siensas de Montpellier pos presenta du paperes sur la usa de matematica en studias anatomial. El ia move a Paris en 1778, do el ia encontra un cuantia de la siensistes e filosofistes onorada de la eda (incluinte Benjamin Franklin), e el ia deveni familial con la ideas nova de John Locke e la sensalistes franses. An si el no ia pote pratica en Paris, el ia deveni un scrivor medical bon respetada, spesial conoseda per sua studias atendente e completa de casos.
Un punto de cambia en sua vive ia veni en 1785, cuando un de sua amis ia developa un maladia mental cual ia causa sua mori. Pinel ia deveni dedicada a la studia de maladias mental, e ia deveni la xef de la refujeria per omes demente a Bicêtre en Paris en 1792. En acel anio, el ia sposi Jeanne Vincent, con ci el ia ave tre fios.
Lo ia es a Bicêtre ce el ia ateni sua rol en istoria. Ante cuando el ia veni a Bicêtre, la omes ia es retenida en cadenas, tratada en manera odiable, e presentada como un demostra dial a la publica como divertis. En 1793, Pinel ia institui un program nova de cura umana, cual el ia nomi terapia moral. La omes ia reseta abitadas limpa e comfortable, e ia es instruida en laboras simple ma produosa.
En 1795, el ia es asiniada la rol de mediciste xef a la ospital famosa tra la mundo a Salpêtrière. Asi, ance, el ia furni sua tratas luminada a la maladas mental. En la mesma anio, el ia deveni profesor de patolojia medical a Paris. En 1801, Pinel ia introdui la testo prima sur terapia moral a la mundo.
Pinel es ance recordada per rejeta completa la teoria ce maladia mental es la posese par demones, e per elimina tratas como sangui de sua ospital. El ia introdui ance otra cosas nova a sua ospital, como vasines e la usa de la stetoscopio. El ia es un mediciste per Napoleon e ia es nomida un cavalor de la Légion d’Honneur en 1804. El ia mori en Paris a 25 otobre 1826.
La inovas de Pinel ia es pronto imitada en otra nasiones, par tal notables como William Tuke en England, Vincenzo Chiarugi en Firenze, e Dorothea Dix en la SUA.
Jean-Martin Charcot (1825–1893) ia nase en Paris a 29 novembre 1825. El ia reseta sua diploma medical a la Universia de Paris en 1853. En 1860 el ia deveni un profesor a la mesma universia. Pos du plu anios, el ia comensa labora ance a la Ospital de Salpêtrière. En 1882, el ia abri un clinica de neurolojia a la ospital. Lo, e el, ia deveni conoseda tra Europa, e studiantes ia veni de Frans e de otra paises de Europa, per studia la campo nova con Charcot. Entre acel studiantes ia es Alfred Binet e Sigmund Freud la joven.
En medica, Charcot es bon conoseda per sua studias de la neurolojia de disturbas de move, la maladias resultante, aneurismes, e la loci de funsionas de la serebro. El es videda como la padre de neurolojia moderna, e la person prima ci ia diagnose sclerose multiple.
En psicolojia, el es la plu conoseda per sua usa de ipnose per trata susedosa femes ci sufri de la sindrom psicolojial alora nomida “isteria”. Aora nomida la sindrom de converti, isteria envolve un perde de alga funsiona fisiolojial como vide, parla, la sensa de toca, move, etc, ma cual no es fundida sur dana real neurolojial.
Charcot ia crede ce isteria es la resulta de un sistem de nervos debil par erita, combinada con la efetos de un esperia traumal. Cuando el ia ipnose esta pasientes, los ia developa un state simil a la isteria mesma. El ia trova ce, en alga casos, la sintomes descrese pos ipnose – an si el ia es sola interesada per studia isteria, no per remedia lo! Otras ia usa ipnose plu tarda como un parte de remedia la problem.
Charcot ia mori en Morvan, Frans, a 16 agosto 1893.
La conseta de la suconsensia, forte asosiada con psicoanalise, ia es prima notada en la discute de “persepis peti” par Leibniz. Par esta nom, el ia intende alga stimulas de un intensia multe debil cual pote entra a la mente sin la consensia de la person. Oji, on ta nomi los “mesajes suliminal”. La realia de tal cosas es multe dutada oji.
Johann Friedrich Herbart (1776–1841) ia es la autor de un testo sur psicolojia, publicida en 1816. Ma, seguente Kant, el no ia crede ce psicolojia pote deveni un siensa. El ia prende la consetas de la asosistes e ia fusa los con la dinamicas de la monades de Leibniz. Ideas ave un propre enerjia, el ia dise, e pote forsa se sur la mente consensa par esede un borda spesifada. Cuando ideas no acorda con lunlotra, la un o la otra es represada, pd. forsada su la borda e en la suconsensia. Esta debe remente on a la ideas de Freud, estra ce Herbart ia introdui los a un sentenio plu temprana!
Schopenhauer es frecuente videda como la orijina de la suconsensia, e el ia parla multe sur instintos e la natur nonrazonante de umanas, e ia usa libre parolas como represa, resiste, e suliminal! Nietzsche ia parla ance sur la suconsensia. Un de sua dises la plu famosa es: “Mea memoria dise ce me ia fa lo. Mea orgulo dise ce me no ia pote fa lo. Ultima, mea memoria sede.”
Un plu prefreudian debe es notada: Karl Eduard von Hartmann (1842–1906). El ia misca la ideas de Schopenhauer con misticisme iudi (la cabala) e ia scrive la Filosofia de la suconsensia en 1869, a la bon momento per influe un neurolojiste joven nomida Sigmund Freud.
On debe comprende ce on ave multe teoristes con poca o no usa per la conseta de la suconsensia. Brentano, la avo de fenomenolojia e esistentialisme, no ia crede ce lo esiste. William James, ance, no ia crede a lo. Ance no la psicolojistes de Gestalt. Memorias, per esemplo, pote es comprendeda como retenida en alga state fisical, posible como trasas en la serebro. Cuando stimulada, nos recorda. Ma los no es en la mente – consensa o suconsensa – asta stimulada.
En ajunta a la conseta de la suconsensia, un otra monumento temprana de psiciatria ia es la introdui de la diagnose cauta de maladas mental, comensante con la labora de Emil Kraepelin (1856–1926). La clasi prima ia es de lo cual el ia nomi dementia praecox, cual sinifia la dementia de adolese. Kraepelin ia inventa la termas neurose e psicose, e ia nomi la sindrom de Alzheimer per Alois Alzheimer, ci prima ia descrive lo. On debe ance nota Eugen Bleuler, ci ia crea la terma scizofrenia per recambia dementia praecox en 1911.
La nara de Freud, como los de la plu persones, ia comensa con otras. En esta caso, acel otras ia es sua mestre, Joseph Breuer, e un pasiente de Breuer con la nom falsa Anna O.
Anna O ia es un pasiente de Joseph Breuer de 1880 asta 1882. Con 21 anios, Anna ia spende la plu de sua tempo en cura sua padre malada. Anna ia developa un mal tose cual no ia ave un causa fisical. El ia developa alga difisiles de parla, ia deveni muda, e a pos ia comensa parla sola en engles, en loca de sua deutx normal.
Cuando sua padre ia mori, el ia comensa refusa comedas, e ia developa un colie strana de problemes. El ia perde la senti de toca en sua manos e pedes, ia developa alga paralise, e ia comensa ave spasmas nonvolente. El ia ave ance alusinas vidal e vide tunelin. Ma cuando spesialistes ia es consultada, no causas fisical per esta problemes ia pote es trovada.
Si tota de esta no sufisi, el ia ave fantasias simil a naras de fes, pendulis de umor, e ia atenta suiside a alga veses. La diagnose par Breuer ia es ce el sufri de lo cual es alora nomida “isteria” (aora nomida la sindrom de converti), cual sinifia ce el ia ave sintomes cual pare como fisical, ma no es fisical.
En la seras, Anna ia sumerji en states de cual Breuer ia nomi “ipnose spontan”, o cual Anna ia nomi “nubes”. Breuer ia trova ce, en esta states transin, el pote esplica sua fantasias e otra esperias de la dia pasada, e ce el senti plu bon a pos. Anna ia nomi esta episodios “scopi la ximine” e “la remedia de parla”.
A veses de “scopi la ximine”, alga aveni emosiosa ia es recordada cual ia dona sinifia a alga sintom spesifada. La esemplo prima ia veni pronto pos cuando el ia refusa bevi per un periodo. El ia recorda, en sua “nubes”, vide un fem bevinte de un vitro de cual un can ia veni de bevi. Recordante esta, el ia esperia sentis forte de repulsa… e alora ia bevi un vitro de acua! En otra parolas, sua sintom – la evita de acua – ia desapare direta cuando el ia recorda la aveni radisal, e ia esperia la emosia forte cual ia es propre a acel aveni. Breuer ia nomi esta prosede catarse, de la parola elinica per “limpi”.
Pos des-un plu anios, Breuer e sua aidor, Sigmund Freud, ia scrive un libro sur isteria. En lo, los ia esplica sua teoria: Cada isteria es la resulta de un esperia traumal, un cual no pote es integrada en la comprende de la mundo de la person. La emosias propre a la trauma no es espresada en cualce modo direta, ma no vapori simple: Los espresa se en condui cual, en un modo debil e vagante, ofre un responde a la trauma. Esta sintomes es, en otra parolas, sinifiante. Cuando la pasiente pote deveni consensa de la sinifias de sua sintomes (par ipnose, per esemplo), alora la emosias nonespresada es relasada e no nesesa plu espresa se como sintomes. Lo es analoja a bisturi un aseseta o drena un infeta.
En esta modo, Anna ia pote sutrae un serie de sintomes. Ma on debe nota ce el ia nesesa Breuer per fa esta: Cuando el ia es en un de sua states ipnosal, el ia debe toca sua manos per serti ce Breuer es ala, ante parla. E triste, problemes nova ia continua aveni.
Diseda par Freud, Breuer ia reconose ce Anna ia deveni enamada par el, e ce el deveni enamada par Anna. Plu, Anna ia reporta a cadun ce el es ensinta con la enfante de Breuer. On pote dise ce el ia desira tan forte lo ce sua mente ia informa sua corpo ce lo es vera, e el ia developa un ensintia isterica. Breuer, un om sposida en la eda victorian, ia sesa subita la encontras clinical con Anna, e ia perde tota interesa a isteria. Per favore, comprende ce rexercas resente sujesta ce multe de esta avenis, incluinte la ensintia isterica e la retira rapida par Breuer, ia es probable esajeras o estendes de realia par Freud!
Lo ia es Freud ci ia ajunta plu tarda lo cual Breuer no ia aseta en publica – ce desiras sesal secreta reposa a la funda de tota de esta neuroses isterica.
Per completi sua nara, Anna ia spende tempo en un ospitaleta. Plu tarda, el ia deveni un person ativa e bon respetada – la aidor sosial prima en Deutxland – su sua nom vera, Bertha Pappenheim. El ia mori en 1936. El va es recordada, no sola per sua propre atenis, ma como la inspira per la teoria de personalia la plu influente de la sentenio 1900.
Sigmund Freud ia nase a 6 maio 1856 en un vileta peti – Freiburg – en Moravia. Sua padre ia es un mercator de lana con un mente agu e un umor bon. Sua madre ia es un fem vivosa, la sposa du de sua sposo e plu joven par 20 anios ca el. El ia ave 21 anios cuando el ia pari sua fio prima, sua cara, Sigmund. Sigmund ia ave du duifrates plu vea e ses conasedas plu joven. Cuando el ia ave 4 o 5 anios – el no ia es serta – la familia ia move a Wien, do el ia abita per la plu de sua vive.
Un enfante briliante, sempre la plu alta de sua clase, el ia vade a universia per studia medica, un de la poca elejes per un xico iudi en Wien en acel dias. Ala, el ia deveni envolveda en rexerca su la dirije de un profesor de fisiolojia nomida Ernst Brücke. Brücke ia crede a lo cual ia es alora un idea popular an si radisal, cual nos nomi aora reduisme: “No otra forsas, estra la forsas fisical e cimical comun, es ativa en la organisme.” Freud ia spende multe anios en atenta “redui” personalia a neurolojia, un idea cual el ia abandona plu tarda.
Freud ia es multe bon a sua rexerca, consentrante sur neurofisiolojia, an inventante un tecnica spesial per tinje selulas. Ma sola un cuantia limitada de postos ia es disponable, e otras ia presede el. Brücke ia aida el a oteni suporta per studia, prima con la psiciatriste grande Charcot en Paris, e a pos con sua competor Bernheim en Nancy, Frans. Ambos de esta siensistes ia es investigante la usa de ipnose con istericas.
Pos spende un tempo corta como un mediciste abitante sur neurolojia e la dirijor de un departe per enfantes en un ospital en Berlin, el ia reveni a Wien, ia sposi sua prometeda pasiente Martha Bernays, e ia comensa sua pratica en neuropsiciatria con la aida de un ami, Joseph Breuer.
Lo es vera ce Freud ia esperimenta con cocaina, ia coraji Martha e sua amis a proba lo, e ia scrive sur sua potias de restora. Plu tarda, el ia regrete sua zelo per la droga e ia retira sua suporta.
La libros cual el ia scrive e la lesones cual el ia presenta ia dona a el un fama, ma ance un esclui par la comunia medical. El ia trae sirca se alga suportores multe intelijente ci ia deveni la cor de la promove psicoanalisal. Triste, Freud ia ave un tende per rejeta persones ci no ia acorda completa con el. Algas ia separa de el como amis; otras ia vade a via per crea scolas de pensa competente.
Freud ia migra a England apena ante la comensa de la Gera Mundal 2, cuando Wien ia deveni un loca sempre plu perilosa per iudis, spesial per los tan famosa como Freud. Pos no multe plu tempo, el ia mori de la canser de la boca e mandibula cual el ia sufri tra la 20 anios final de sua vive.
Freud no ia inventa, esata, la ideas de la mente consensa e suconsensa, ma serta el ia populari los. La mente consensa es lo cual on esperia a cualce momento, persepis presente, memorias, pensas, fantasias, emosias, etc. Operante a lado con la mente consensa es lo cual Freud ia nomi la preconsensia, simil a lo cual nos ta nomi oji la memoria disponable: cualce cosa cual no es consensa, ma pote deveni consensa, la memorias sur cual on no pensa a esta momento, ma cual on pote recorda fasil. Nun ave un problem con esta du stratos de mente. Ma Freud ia sujesta ce estas es la stratos la plu peti!
La strato la plu grande es la suconsensia. Lo inclui tota cosas cual no es fasil otenable par consensia, incluinte multe cosas cual ave ala sua orijinas, como nosa instintos o desiras fisical, e cosas cual es poneda ala car nos no pote regarda los, como memorias e emosias asosiada con trauma.
Diseda par Freud, la suconsensia es la fonte de nosa motivas, incluinte la nesesas simple per comedas o seso, compulsas neurosica, o la motivas de un artiste o siensiste. An tal, nos es frecuente forsada a nega o resiste deveni consensa de esta motivas, e los es comun disponable a nos sola en un forma desemblante.
Realia psicolojial, seguente Freud, comensa con la mundo, plen de ojetos. Entre los es un ojeto multe spesial, la organisme. La organisme es spesial car lo ata per survive e reprodui, e es gidada a esta goles par sua desiras fisiolojial: famia, sidia, la evita de dole, e seso.
Un parte multe importante de la organisme es la sistem de nervos, cual ave como un de sua cualias un sensosia per la desiras de la organisme. A nase, esta sistem de nervos es no multe plu ca lo de cualce otra animal, cual Freud ia nomi la Es en deutx, en latina la id – pd. la “lo” – un cosa plu animal ca umana. La sistem de nervos, como un id, tradui la nesesadas de la organisme a fortias motivante nomida, en deutx, Trieben, cual es traduida como instintos o desiras. Freud ia nomi los ance desiras. Esta tradui de nesesadas a desiras es nomida la prosede prima.
La id opera par la prinsipe de plaser, cual on pote comprende como un comanda per atende pronto la nesesadas. Imajina un enfante fame, xiliante. El no “sabe” lo cual el desira en cualce forma adulte; el sabe sola ce el nesesa lo e el nesesa lo aora. La enfante, en la vista freudian, es id cuasi pur. E la id es no plu ca la representor mental de biolojia.
Nonfortunosa, an si un desira per comedas, como la imaje de un amburger, pote es sufisinte per sasia la id, lo no es sufisinte per sasia la organisme. La nesesa deveni plu forte, e la esperas continua. Cisa tu ia nota ce, cuando tu no ia sasia un nesesada, lo comensa comanda plu e plu de tua atende, asta cuando tu ariva a un punto do tu no pote pensa a cualce otra cosa. Esta es la desira forsante sua entra a la consensia.
Fortunosa per la organisme, on ave un parte peti de la mente, la consensia, cual es liada a la mundo par la sensas. Sirca esta parte peti de consensia, en la anio prima de la vive de un enfante, alga de la “lo” deveni “me” (Ich en deutx), alga de la id deveni “ego”. La ego relata la organisme a realia par consensia, e lo xerca ojetos per sasia la desiras cual la id ia crea per representa la nesesadas de la organisme. Esta ativia desiniada per solve esta problemes es nomida la prosede du.
La ego, no como la id, opera longo la prinsipe de realia, cual dise “sasia un nesesa direta cuando on trova un ojeto conveninte”. La ego representa realia e, a un grado notable, razona.
Ma, en cuando la ego atenta manteni la felisia de la id (e ultima la organisme), la ego encontra ostaculos en la mundo. Lo encontra a veses ance ojetos cual aida lo en ateni sua goles. E lo reteni un arcivo de esta ostaculos e aidas. Spesial, lo rejistra la recompensas e punis presentada par du de la ojetos la plu influente en la mundo de la enfante: mama e papa. Esta arcivo, de cosas per evita e de taticas la plu bon per sasia la organisme, deveni la supraego (Überich en deutx). Lo no es completida asta sirca sete anios. En alga persones, lo es nunca completida.
On ave du aspetas de la supraego: Un es la consiensa, cual es un interni de punis e avertis. La otra es nomida la ego ideal, cual deriva de la recompensas e modeles positiva presentada a la enfante. La consiensa e ego ideal comunica sua esijes a la ego par sentis como orgulo, vergonia, e culpablia.
Lo es como si nos oteni, en enfantia, un colie nova de nesesas e desiras, a esta ves de orijinas sosial en loca de biolojiales. Nonfortunosa, esta esperas nova pote desacorda con los de la id. On debe nota ce la supraego representa sosia, e sosia desira frecuente no cosa plu ca ce nos sasia nunca nosa nesesas!
Freud ia nota ce, a tempos diversa en nosa vives, partes diferente de nosa pel dona a nos nosa plaser la plu grande. Teoristes plu tarda ia nomi estas la zonas erojen. Lo ia pare a Freud ce la bebe trova sua plaser la plu grande en suca, spesial a la teta. En fato, bebes ave un tende forte de toca cuasi tota cosas en sua ambiente par sua boca. A alga tempo plu tarda, la enfante foca a la plaser anal de reteni e espulsa sua feces. Cuando lo ave tre o cuatro anios, la enfante descovre cisa la plaser de toca o frota sua jenitales. Sola plu tarda, en nosa maturia sesal, nos trova nosa plaser la plu grande en copula. En esta oservas, Freud ia ave la ingredientes per un teoria de fases de developa psicosesal.
Esta es un teoria vera de fases, sinifiante ce freudianes crede ce tota de nos viaja tra esta fases, en esta ordina, e plu o min a esta edas.
Cada fase ave alga taxes difisil asosiada con se, do problemes ariva plu comun. Per la fase bocal, esta es desteti. Per la fase anal, lo es la developa de bon abituas de urini e feci. Per la fase falal, lo es la crise edipal, nomida per Re Edipo de la naras de Elas antica, ci ia mata sua padre (ci el no ia conose) e ia sposi sua madre (ci el no ia conose ance).
Asi es como la crise edipal opera: La ojeto prima de ama per tota de nos es nosa madre. Nos desira sua atende, sua ama, sua caresas; nos desira el, en un modo cuasi sesal. Ma la xico ave un competor per la ama de sua madre: sua padre! Sua padre es plu grande, plu forte, plu intelijente, e el dormi con la madre, en cuando la enfante peti anela en sua leto peti e solitar. Papa es la enemi.
A sirca la tempo cuando la xico peti reconose esta situa arcetipal, el deveni ja consensa de alga de la diferes plu sutil entre xicos e xicas, plu ca la longia de capeles e stilos de vesti. De sua perspetiva naive, la difere es ce el ave un penis, e xicas no ave un. A esta paso en la vive, lo pare a la enfante ce posese un cosa es infinita plu bon ca no posese un cosa, e donce, el es felis con esta situa.
Ma ultima, la demanda aveni: do es la penis de la xica? Posible el ia perde lo en alga modo. Posible lo ia es taliada a via. Posible esta pote aveni a la xico! Esta es la comensa de ansia de castra, un nom pico nonclar per la teme de perde sua penis.
Donce, car la xico reconose la superioria de sua padre, e teme la perde de sua penis, el comensa usa alga defendes per sua ego: El desloca sua desiras sesal de sua madre a xicas, e plu tarda, a femes; e el identifia con la “atacor”, sua padre, e comensa ata plu e plu simil a el, cual es per dise, como un om matur. Pos alga anios en la periodo ascondeda, el entra a adolese e la mundo demente de eterosesalia matur. (Recorda ce omosesalia no es “matur”, seguente Freud.)
La xica peti comensa ance sua vive en ama sua madre, donce nos ave un plu problem: como el pote desloca sua desiras a sua padre afin el pote prosede tra la crise edipal? Freud esplica esta con la idea de invia de penis: Ance la xica ia nota la difere entre xicos e xicas e senti ce el, en alga modo, no es tan bon como xicos. El desira un penis ance, e tota la potia asosiada con lo. A la minima, el ta gusta un sustitua per un penis, como un bebe. Como tota enfantes reconose, per crea un bebe on nesesa un padre en ajunta a un madre, e donce la xica comensa desira sua padre.
Papa, natural, ave ja un amor. La fem joven desloca alora sua desiras de la padre a xicos e, plu tarda, a omes, e identifia con sua madre, la fem ci ave la om ci la xica ia desira. Nota ce un cosa manca asi: La xica no pote sufri de la motiva potiosa de ansia de castra, car el no pote perde lo cual el no posese. Freud ia crede ce la asentia de esta teme grande es la causa de la fato (como el vide lo) ce femes es min forte eterosesal ca omes, e alga min moral.
Ante cuando la lejor deveni tro disturbada par esta esplica min ca adulante de la sesalia de femes, on debe nota ce multe persones ia responde ja a lo. Nos va trata lo en la discute plu tarda.
La terapia cual Freud ia developa ia es plu influente ca cualce otra, e plu influente ca cualce otra parte de sua teoria. Asi es alga de la puntos major:
Un atmosfera destensada. La pasiente debe senti libre per espresa cualce cosa. La situa de terapia es, en fato, un situa sosial unica, do on no debe teme es sosial judida o espulsada. En terapia, la terapiste debe desapare cuasi. E per ajunta a la destensa, lampos oscurida, mures cual impedi sona, e un sofa per reposa completi la sena.
Asosia libre. La pasiente pote parla sur cualce cosa. La teoria dise ce, con destensa, la disputa suconsensa va veni ultima a la surfas. Lo no es tro erante si on vide un similia entre la terapia freudian e sonias. Ma, en terapia, on ave la terapiste, ci es educada per reconose alga indicas de problemes e sua solves ce la pasiente no ta nota.
Resiste. Un de esta indicas es resiste. Cuando un pasiente atenta cambia la discute, no pote continua, comensa dormi, ariva tarda, o oblida completa un encontra, la terapiste dise “aha!” Esta resistes sujesta ce la pasiente es prosiminte a alga cosa en sua asosias libre cual el regarda – suconsensa, natural – como menasante.
Analise de sonias. En dormi, nos resiste alga min nosa suconsensia, e nos permete ce alga cosas – en un forma simbolin, natural – leva a consensia. Esta desiras de la id furni plu indicas a la terapiste e pasiente. Multe formas de terapia usa sonias, ma la interprete freudian es distinguida par sua tende de xerca sinifias sesal.
Liscas de parla. Estas es comun nomida liscas freudian o eretas de parla. Freud ia crede ce los es ance indicas de desacorda suconsensa. Freud ia es ance interesada par la bromas cual sua pasientes presenta. Vera, Freud ia pensa ce cuasi tota cosas ave cuasi sempre un sinifia – un era de numero a la telefon, un verje noncoreta, un parola malspeleda ia es ojetos de studia seria per el. Ma el mesma ia nota, en un responde a un studiante ci ia demanda cual cosa sua sigar (Freud ia fuma los sin sesa) simboli, ce “a veses, un sigar es no plu ca un sigar”. (Vera?)
Otra freudianes ia deveni interesada par probas de projeta, como la esamina de Rorschach (manxas de inca). La teoria su esta probas es ce, cuando un stimula es ambigua, la pasiente pleni lo par sua propre temas suconsensa. Denova, estas pote furni indicas a la terapiste.
“Transfere” aveni cuando un pasiente projeta a la terapiste emosias cual es plu valida asosiada con alga otra importantes. Freud ia crede ce transfere es nesesada en terapia per trae a la surfas la emosias represada cual ia pesta tan longa la pasiente. On no pote senti vera coler, per esemplo, sin un person real contra ci on coleri. La relata entre la pasiente e la terapiste, oposante la imajes popular, es multe intima en terapia freudian, an si on debe comprende ce lo ave limitas.
“Purga” (o catarse) es la versa subita e dramosa de emosia cual aveni cuando la trama es reviveda. La caxa de teletas sur la table no es ala per decora.
“Intui” refere a consensia sur la fonte de la emosia, sur la aveni traumal orijinal. La parte major de terapia es completida cuando purga e intui es esperiada. Lo cual ia debe aveni a multe anios pasada – ma no ia aveni car on ia es tro joven per trata lo, o su tro multe presas desacordante – aveni aora, e on es en via a deveni un person plu felis.
Freud ia dise ce la gol de terapia es simple “fa ce la suconsensa deveni consensa”.
La sola cosa plu comun ca la amira sieca de Freud pare es la odia egal sieca de el. Serta, la disposa la plu coreta es a alga loca entre esta estremas. Prima on debe esplora alga defetos en sua teoria.
La parte la min popular de la teoria de Freud es la crise edipal e la ideas asosiada, como la ansia de castra e la invia de penis. Cual es la realia su esta consetas? Lo es vera ce alga enfantes es multe fisada a sua jenitor de la seso oposante, e multe competente contra la jenitor de la mesma seso. Lo es vera ce alga xicos es ansiosa sur la diferes entre omes e femes, e an teme ce algun va talia sua penis. Lo es vera ce alga xicas es ance ansiosa, e desira un penis. E lo es vera ce alga de esta enfantes reteni esta desiras, temes, e intendes en adultia.
La plu de teoristes vide esta esemplos como devias e no universales, esetas e no regulas. Los aveni en familias cual no funsiona tan bon como los debe, do la jenitores no es felis con lunlotra e usa sua enfantes contra lunlotra. Los aveni en familias en cual jenitores desvalua leteral sua fias car los es fema, e parla sur talia la penis de un fio ostinante. Los aveni spesial en visinerias en cual informas coreta sur an la plu simple de fatos sesal no es otenable, e enfantes aprende ideas erante de otra enfantes.
Si on vide la crise edipal, la ansia de castra, e la invia de penis en un modo plu metafor e min leteral, los es consetas multe usosa: Nos ama vera nosa madres e padres, e ance compete contra los. Enfantes aprende jeneral la condui normal de eterosesalia par imita la jenitor de la mesma seso e los pratica a la jenitor de la otra seso. En un sosia dominada par omes, la posese de un penis – pd. masia – es plu bon ca no, e la perde de acel prestijia como un mas provoca ansia. E desira de la prestijia, la vantajes, de un om (no la desira de un penis) es un cosa cual razonable on pote espeta en un xica con aspiras. Ma Freud no ia intende ce nos vide esta consetas como metafores. Alga de sua seguores ia fa lo, an tal.
Un critica plu jeneral de la teoria de Freud es sua asentua de sesalia. Tota, bon e mal, pare como la resulta de la espresa o represa de la motiva sesal. Multe persones ia duta esta, e ia demanda esce cualce otra fortes labora. Freud mesma ia ajunta plu tarda la instinto per mori, ma acel ia deveni un otra de sua ideas min popular.
Prima, on debe nota ce, en fato, un cuantia grande de nosa atas es en alga modo motivada par seso. Si on regarda seria nosa sosia moderna, on trova ce la plu de anunsias usa imajes sesal, ce filmas e televisa no deveni comun popular si los no inclui alga “titila”, ce la industria de moda es continuante fundida sur un jua de asconde sesal, e ce tota de nos spende un parte notable de cada dia en fa la “jua de cortea”. Ma ancora nos no senti ce tota la vive es sesal.
(Nota ce la clases plu basa – cual inclui la plu de persones – ia es completa consensa de seso, con la majoria de omes. Ma femes joven de la clase alta ia es la pasientes cual Freud ia encontra cuasi sempre!)
Lo es un bon atribuida per Freud ce el ia pote leva supra la disposas sesal de sua cultur. An sua mestre, Breuer, e Charcot la briliante no ia pote aseta completa la natur sesal de la problemes de sua pasientes. La era cual Freud ia fa es plu un caso de jenerali tro multe, e de no nota la cambia de cultur cual ia aveni ja. Lo es ironiosa ce multe de la cambia de cultur en disposas sesal ia es, en fato, la resulta de la laboras de Freud!
Un conseta final cual es comun criticada es la suconsensia. On no disputa ce alga cosa como la suconsensia es la causa de alga de nosa condui, ma la cuantia e la natur esata de la bestia.
Conduistes, umanistes, esistentialistes – tota crede ce (a) la motivas e problemes cual pote es atribuida a la suconsensia es multe min ca cuanto Freud ia suposa, e (b) la suconsensia no es la calderon grande de ativia turbante como el ia insiste. La plu de psicolojistes oji vide la suconsensia como lo cual nos no nesesa o desira vide. Alga teoristes no usa la conseta en cualce modo.
A la otra lado, a la min un teoriste – Carl Jung – ia proposa un suconsensia cual fa ce la suconsensia de Freud pare pico. Nos va dise plu sur Jung, plu tarda.
Persones ave la tende nonfortunosa de “dejeta la bebe con la acua de banio”. Si los no acorda con ideas A, B, e C, los pensa ce ance X, Y, e Z debe es falsa. Ma Freud ia ave alga bon ideas, tan bon ce los ia es incluida en multe otra teorias, a tal grado ce nos oblida dona a el la lodas.
Prima, Freud ia fa ce nos deveni consensa de du fortias enorme e sua esijes de nos. Cuando tota ia crede ce persones es fundal razonante, el ia mostra como multe de nosa condui es fundida sur biolojia. Cuando tota ia conseta persones como culpable como individuas per sua atas, el ia mostra la fortia de sosia. Cuando tota ia vide “mas” e “fema” como roles determinada par natur o Dio, el ia mostra cuanto los depende de la dinamica familial. La id e la supraego – la espresas mental de biolojia e sosia – va es sempre con nos en alga forma o un otra.
La contribui du es la teoria fundal, orijinante con Breuer, de alga sintomes neurosica causada par traumas psicolojial. An si la plu de teoristes no crede plu ce on pote esplica tota neuroses en esta modo, o ce on nesesa revive la trauma per deveni plu sana, lo ia deveni un comprende comun ce un enfantia plen de descura, maltrata, e trajedia tende produi un adulte nonfelis.
La contribui tre es la idea de defendes de la ego. An si on no es comfortosa con la idea de Freud sur la suconsensia, lo es clar ce nos partisipa en manipulas peti de realia e de nosa memorias de acel realia per conveni a nosa propre nesesas, spesial cuando esta nesesas es forte. Aprende como on reconose esta defendes: Tu va trova ce la posese de nomes per los va aida tu a nota los en otras e en tu mesma.
E final, la forma fundal de terapia ia es, jeneral, fisada par Freud. Estra alga terapias de conduisme, la plu de terapia es ancora “la remedia de parla”, e inclui ancora un ambiente fisical e sosial destensada. E, an si otra teoristes no gusta la idea de transfere, la natur multe intima de la relata terapial es jeneral asetada como importante per susede.
Alga de la ideas de Freud es clar liada a sua cultur e eda. Otra ideas no es fasil demostrada. Alga pote es la resulta de la personalia e esperias de Freud mesma. Ma Freud ia es un oservor eselente de la natur de vive de umanas, e tan multe de lo cual el ia dise es ancora pertinente oji ce el va es un parte de libros de aprende sur personalia per multe anios de aora. An cuando teoristes ariva a ideas multe diferente de Freud, los compara sua ideas con los de Freud.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).