Psicolojia, como nos conose oji lo, no ia apare subita sur la sena inteletal. On no pote dise esata cuando lo ia comensa, o ci ia es la fundor. En loca, nos pote sola indica un cuantia de corentes cual ia porta nos de filosofia e siensas natural a alga cosa reconosable como psicolojia. Esta capitol va esamina du de esta corentes “primeval”: asosisme como la comensa de un teoria cognisial, e la introdui de cuanti en la formas de psicofisica e la proba de intelijentia.
Asosisme es la teoria ce la mente es composada de elementos, comun nomida sensas e ideas, cual es organizada par asosias variosa. An si la idea orijinal pote es trovada en Platon, lo es Aristotele ci reseta la onora per developa lo. Aristotele ia ave cuatro leges de asosia cuando el ia esamina la prosedes de rejistra e recorda:
Asosia, seguente Aristotele, aveni en la “sensa comun”. Lo es en la sensa comun ce la apare, la trama, la odor e sabor de un poma, per esemplo, ia junta con lunlotra e ia deveni la idea de un poma.
Tra du mil anios, esta cuatro leges ia es suposada como vera. San Tomaso de Aquino ia aseta completa los. Ma nun ia pare es multe interesada par asosia. Lo ia es videda sola como un descrive simple de un aveni comun. Lo ia es videda como la ativia de razona pasiva. La astrati de prinsipes o esenses – multe plu sinifiante per filosofistes – ia es la domina de razona ativa.
En la Lumina, filosofistes ia comensa deveni denova interesada par la idea de asosia, como un parte de sua studias de vide e sua interesa a epistemolojia. Hobbes ia comprende esperias complicada como asosias de esperias simple, cual es asosias de sensas. La metodo de asosia, seguente Hobbes, es coere (prosimia), e la fator fundal de fortia de asosia es repete (frecuentia).
John Locke, ci ia rejeta la posiblia de ideas inata, ia fa ce sua sistem depende de un asosia de sensas a ideas simple. Ma el ia distingui entre ideas de sensas e ideas de refleta, cual sinifia razona ativa. Sola par ajunta ideas simple de refleta a ideas simple de sensa, on pote deriva ideas complicada. El ia sujesta ance ce emosias complicada ia deriva de dole e plase (ideas simple) asosiada con otra ideas.
David Hume ia trata zelosa la asosia. Recorda ce el ia vide tota esperias como con no realia sustantial su los. Donce, cualce coere cual la mundo (o la ego) pare ave es un caso de la aplica simple de esta leges natural de asosia. El ia lista tre:
David Hartley (1705–1757) ia es la mediciste engles ci ia populari la idea de asosisme, spesial en un libro nomida Oservas de umanas. Sua asentua ia es a la lege de prosimi (en spasio e tempo) e la lege de frecuentia. Ma el ia ajunta un idea cual el ia trae de Isaac Newton: Esta asosia ia es un caso de “vibras” ajustada en la nervos! Esta ideas fundal es multe simil a los de D. O. Hebb en la sentenio de 1900.
Ance James Mill (1773–1836) ia ajunta detalias a la asosisme de Hume. El ia vide la mente como funsionante en modo pasiva par la lege de prosimi, con ce la lege de frecuentia e la lege de vivinia “impresa” la asosia. Sua asentua a la lege de frecuentia como la clave de aprende ia fa ce sua ideas es multe simil a la conduistes de la sentenio de 1900. Ma el es la plu famosa per sua rol como padre de John Stuart Mill.
“Ce aora tan poca persones osa es noncomun, lo marca la peril xef de la eda.”
John Stuart Mill ia nase a 20 maio 1806 en London. Sua padre ia es James Mill, un istoriste, filosofiste, e teoriste sosial. Sua madre ia es Harriet Barrow, e lo pare ce el ia ave cuasi no influe a John. Sua padre ia deside ce el va usa la prinsipes de utilitarisme e asosisme (con la consulta de sua bon ami, Jeremy Bentham) per educa John en modo “siensal”.
Lo ia pare prosede bon: John ia comensa aprende elinica a tre anios, latina a oto anios. A 14 anios, el ia studia franses, matematica, e cimica en Frans. A 16 anios, el ia comensa labora como un notario per sua padre a Casa India, la xeferia de la Compania de India Este. Ja a 18 anios, John ia es publicinte articles sur la filosofia de utilitarisme.
Ma, a 20 anios, el ia sufri un crise mental, cual el ia descrive en sua autobiografia (1873). El ia atribui la crise, coreta sin duta, a sua educa rijida.
En 1830, el ia encontra Harriet Taylor, un fem sposida. El ia resta fidosa a el asta la mori de sua sposo pos 21 plu anios, cuando los ia sposi final. Triste, Taylor ia mori pos sola sete plu anios.
En esta periodo, el ia servi como un esaminor per la Compania de India Este. El ia servi ance como un membro libraliste de parlamento de 1865 a 1868. El ia dise: “Conservalistes no es stupida par nesesa, ma la plu de persones stupida es conservalistes.” El ia mori a sua casa en Avignon, Frans, a 8 maio 1873.
Sua obra la plu conoseda es Sur libria, publicida en 1859. Sua obra la plu importante sur siensa e psicolojia es Un sistem de lojica, prima primida en 1843 e continuante con multe plu publicis tra la resta de la sentenio de 1800.
El ia comensa con la fundas instituida par Hume, sua padre James Mill, e otras:
Ma el ajunta ce asosias pote es plu ca la soma simple de sua partes. Los pote ave cualias o atribuis diferente de la partes, en la mesma modo como acua ave cualias diferente de la idrojen e osijen cual composa lo. Donce, J. S. Mill ia developa un asosisme cual es plu un “cimica mental” ca un “soma mental”.
J. S. Mill acorda con Hume ce tota cual nos pote sabe sur nosa mundo e nosa ego es lo cual nos esperia, ma el nota ce la jenerali permete ce nos parla con alga confida sur cosas estra esperia. E el ia crede ce on ave causas real per fenomenos coerente.
Esta es frecuente nomida fenomenalisme. El ia defini materia, per esemplo, como “la posiblia permanente de sensa”. Esta perspetiva ia ave efetos profonda a positivistes lojical de la sentenio de 1900 (pd. Wittgenstein, Ayer, Schlick, Carnap, e otras) ci ia furni la funda filosofial per la plu de conduistes.
El ia promove un metodo siensal cual foca a indui: Jeneralis de esperias gida nos a teoria, de cual nos pote alora developa ipoteses alternativa; Nos vade plu per proba esta ipoteses par oserva e esperimenta, de cual sua resultas permete ce nos boni la teoria, etc. Esta idea sirculo de progresa siensal es conoseda como la metodo de ipotese e dedui. En esta modo, nos pote lenta construi leges de natur cual nos pote fida sempre plu. Esta metodo ia es multe popular entre la siensistes de sua eda.
Plu spesifada, el introdui sinco prosedes per mostra causa. La prosedes plu simple es estas:
Regardante psicolojia, el ia razona ce lo pote, en tempo, deveni serta un siensa, ma probable no un siensa esata. Predise la condui de umanas va es cisa sempre ultra nosa capasias, e donce nos debe limita nos a parla sur tendes.
Sua utilitarisme ia reconose ce felisia no es restrinjeda a plaser fisical (o la evita de dole), ce on pote ave tipos o cualias diferente de felisia. “Lo es plu bon ce on es Socrate nonsasiada ca ce on es un fol sasiada.” Donce, an si nos pote serta comensa como un vivente simple cual xerca plaser, tra tempo nos pote developa motivas multe plu umaniste. Ultima, esta sinifia ce valuas moral alta pote es enseniada, e no depende sola de cualias de carater inata.
Cuando el regarda casos sosial, J. S. Mill ia aplica sua utilitarisme estendeda: Esce un institui spesifada ajunta a la bonstate umana? O esce nos ave alternativas plu bon? El razona, per esemplo, ce on debe permete ce femes vota car la interesas de femes pote ajunta un ecuilibra a la interesas de omes, e pote resulta un sosia plu bon. El ia razona ce libria personal ta permete individuas creosa a contribui plu fasil a sosia. E el ia nota ce capitalisme de la mercato libre tende causa nonegalia e povria, e ce nos ta es plu bon servida par un forma de sosialisme.
Thomas Brown (1778–1820) de la Scola Scotes ia dona la detalias final a asosisme: Sua leges de sujesta (sua nom per asosia) ia es sembla, contrasta, e prosimi en spasio e tempo, la mesma como los de Aristotele. El ia ajunta un colie de leges minor – dura, vivosia, frecuentia, e resentia – cual ia forti sujestas. Alora el ia considera ance la grados de coesiste con otra asosias, diferes fisical de mente o tempera, situas diferente de la momento, la state de sania o efetosia de la corpo, e abituas pasada. Final, el ia comprende asosia como un prosede ativa en un mente ativa e oliste.
Alexander Bain (1818–1903), un ami de vive intera de J. S. Mill, ia lia asosia con fisiolojia. Asetante la lege de prosimi, similia, e frecuentia, el ia vide los, como David Hartley, como neurolojial. El ia ajunta la lege de asosia composada, cual dise ce la plu de asosias es entre grupos intera de otra asosias. E el ia ajunta la lege de asosia construinte, cual dise ce nos mesma pote ance ajunta, ativa, creante, a nosa asosias.
Un de la prinsipes fundal de Bain es la prinsipe Spencer–Bain: La frecuentia o probablia de un ata crese si lo es segueda par un aveni plasente, e descrese si lo es segueda par un aveni dolente. Esta es, natural, la mesma prinsipe cual la conduistes ia developa pos un plu sentenio.
Bain ia ave un rol an plu grande en la istoria de psicolojia. Prima, el es comun onorada per scrive du de la testos de psicolojia la plu temprana – La sensas e la inteleto (1855) e Emosias e la vole (1859), de cual ambos ia estende tra multe publicis, e ia es usada, per esemplo, par William James. El ia fundi ance la jornal psicolojial prima en engles, nomida Mind (Mente), en janero 1876.
La persones presedente ia es vera filosofistes, no siensistes. La psicolojiste ci ia atenta prima studia la asosia siensal ia es Hermann Ebbinghaus.
Hermann Ebbinghaus ia nase a 23 janero 1850, en Barmen, Deutxland. Sua padre ia es un mercator rica, ci ia coraji sua fio a studia. Hermann ia vade a la Universia de Halle e la Universia de Berlin, e ia reseta sua diploma dotoral de la Universia de Bonn en 1873. Cuando el ia es viajante tra Europa, el ia vide un copia de Elementos de psicofisica par Fechner, cual ia influe el a studia psicolojia.
Ebbinghaus ia comensa sua rexerca a sua casa en Berlin, e ia publici un libro nomida Sur memoria: un investiga en psicolojia esperimental en 1885. Sua rexerca ia envolve la memori de silabas sin sinifias, composada de un consonante, un vocal, e un otra consonante. El ia eleje 12 parolas, e ia atenta alora memori la lista. El ia recorda la cuantia de atentas nesesada, e la efetos de varias como la reaprende de listas vea, o esce la silabas sujesta un sinifia. La resultas ia es confirmada e es ancora valida oji.
El ia scrive ance la article prima sur la esamina de intelijentia de enfantes en scola, e ia crea un esamina de completi frases cual ia deveni un parte de la esamina Binet–Simon. El ia publici ance testos sur psicolojia en 1897 e 1902 cual ia es popular tra multe anios. Ebbinghaus ia mori en 1909, un presedor clar de la promove cognisial de oji.
La leges de asosia ia continua fa un influe potiosa en psicolojia. La conduistes ia foca a asosias de stimula-stimula e stimula-responde. La psicolojistes de Gestalt ia developa la asosias variosa cual los ia nomi la leges de Prägnanz (consisia). Entre la psicolojistes cognisial, on ave teorias variosa de asosia semantica. E la psicolojistes fisiolojial parla sur la funda neurolojial de asosia. Lo pare ce la idea va resta con nos per sempre. An tal, como la filosofistes elinica e medieval ia sabe, asosia es mera un descrive simple de un aveni comun!
Repetente, filosofistes ia dise sin duta ce psicolojia no pote es un siensa. On no pote mesura la ativias e contenidas de la mente, e donce un empiricalia como lo atenida par fisica e cimica es nonasedable. Psicolojia va resta sempre sujetal.
Esta ia cambia final en la temprana de la sentenio de 1800. Ernst Weber (1795–1878) ia nase a 24 junio en Wittemburg, Deutxland, la numero tre de 13 enfantes. El ia reseta sua diploma dotoral de la Universia de Leipzig en 1815, en fisiolojia. El ia comensa ensenia ala direta pos gradua, e ia continua asta sua jubila en 1871.
Sua rexerca ia es xef sur la sensas de toca e cinestesia (la esperia de posa e move de musculos). El ia es la person prima ci ia demostra clar la esiste de cinestesia, e el ia mostra ce toca es vera un colie de sensas, composada de sensas per presa, temperatur, e dole.
Sua interesas ia dirije el a alga tecnicas: Prima, on ave la limita de du puntos, cual inclui la mesura de la distantia la plu peti cual on pote persepi par toca a partes variosa de la corpo. Per esemplo, la lingua ia ave la limita la plu peti (1 mm), e la dorso la plu grande (60 mm).
Un otra tecnica usa cinestesia: La difere apena persepable es la difere la plu peti de pesa cual un person pote persepi cuando el teni du cosas. El ia descovre ce la difere apena persepable es un frato de la pesas usada. Si on teni un pesa de 40 kg en un mano, on pote reconose ce un pesa de 41 kg en la otra es diferente. Ma si lo es un peso de 20 kg, on pote reconose un difere de sola un dui de cilogram. En otra parolas, nos pote reconose un difere de 1/40, con cualce pesa.
Esta es nomida la lege de Weber, e es la lege prima cual ia relata un stimulo fisical con un esperia mental.
Gustav Fechner ia nase a 1 april 1801. Sua padre, un pastor de un vileta, ia mori temprana en la enfantia de Gustav, donce el, con sua madre e frate, ia vade per abita con sua tio. En 1817, con 16 anios, el ia vade a via per studia medica a la Universia de Leipzig (Weber ia es plu interesada par ensenia). El ia reseta sua diploma de dotor medical en 1822 con 21 anios.
Ma sua interesas ia move a fisica e matematica, e el ia gania sua mone par ensenia privata, par tradui, e a veses par fa parlas instruinte. Pos scrive un paper importante sur eletrica en 1831, el ia es invitada a deveni un profesor de fisica a Leipzig. Ala, el ia amini alga persones, incluinte Wilhelm Wundt, e sua interesas ia move denova, a esta ves a psicolojia, e spesial la vide.
En 1840, el ia sufri un crise mental e ia debe resinia sua posto par resulta de depresa sever. En sua state la plu mal, el ia resta solitar en sua salas, evitante lus, cual ia dole sua oios, e ia pinti an negra sua sala. Reposante en leto a un matina, 22 otobre 1850, el ia comprende subita ce on pote vera lia la mundo fisical e mesurable con la mundo mental, suposada como nonabrida a investiga siensal! Cuando sua disturba ia boni, el ia reveni a scrive e esperimenta, usante se mesma como un sujeto.
Como multe otras de sua eda, el ia es convinseda par la aspetisme duple de Spinoza e ia trova en panspicisme un cosa simil a un relijio personal. Su la nometa Dr Mises, el ia scrive alga satiras sur medica e filosofia. Ma el ia usa la nom ance per comunica, tipal en un modo comica, sua perspetiva spirital. Como un panpsiciste, el ia crede ce tota natur es vivente e capas de consensia de un grado o un otra. An la planeta mesma, el ia crede, ave un spirito. El ia nomi esta la opina de dia, e ia contrasta lo a la opina de note de materialisme.
El ia sujesta ce nosa vive aveni en tre pasos: la vive fetal, la vive comun, e la vive pos mori. Cuando nos mori, nosa spirito junta se a otra spiritos como parte de un spirito suprema.
Aspetisme duple ia es lo cual ia gida el a studia (e nomi) psicofisica, cual el ia defini como la studia de la relatas sistemal entre avenis fisical e mental. En 1860, el ia culmina sua carera par publici La elementos de psicofisica.
En esta libro, el ia introdui un espresa matematical de la lege de Weber. La espresa aspeta como esta:
*R / R = k
cual sinifia ce la proportio de la cambia minima (*R) cual on pote deteta en un stimula a la fortia de la stimula (R) es un constante (k). (R es per la parola deutx Reiz, cual sinifia stimula.) O:
S = k log R
en cual S es la sensa esperiada.
Fechner ia mori a 28 novembre 1887.
Lo cual Weber e Fechner ia mostra, cual fa ce los es multe plu importante ca sola la lege de Weber, es ce avenis psicolojial es vera liada a avenis fisical e mesurable en un modo sistemal, sur cual tota persones ia crede ce lo es nonposible. Psicolojia pote es un siensa!
La inova du de cuantia ia es la mesura de alga cosa multe plu complicada, e multe plu psicolojial: intelijentia. Nos debe onora du mentes grande: Francis Galton en England, e Alfred Binet en Frans.
Francis Galton ia nase a 16 febrero 1822, prosima a Birmingham, England. El ia es la plu joven de sete enfantes, e la cusin de Charles Darwin. Sua padre, un bancor rica, ia insiste educa Francis a casa, spesial car Francis ia pote leje cuando el ia ave no plu ca du anios e un dui!
Plu tarda en enfantia, el ia es enviada a scola abitada, cual el ia despeta e ia critica an en adultia. A 16 anios, el ia vade per studia medica a King’s College a Oxford. El ia fini sua diploma a Cambridge en 1843, con 21 anios.
Sua padre ia mori, lasante Galton como un aristocrata joven rica. El ia viaja multe e ia deveni un membro de la Sosia Jeografial Real, per cual el ia developa mapas de teritorios nova e racontas de sua aventuras. El ia deveni presidente de acel institui en 1856.
Galton ia ave un tende per mesura tota cosas – estendente an a la mesura de la gluteos de la femes ci el ia encontra en sua viajas en Africa (natural, un cosa cual el ia debe fa a un distantia, par trianguli). Esta interesa a mesura ia gida a sua inventa de la mapa de clima (incluinte la altas, basas, e frontes – termas cual el ia introdui) e a sua sujesta de la usa de impresas de ditos a Scotland Yard (la polisia sentral de Britan).
Sua osese ia gida ultima a sua atentas per mesura intelijentia. En 1869, el ia publici Jenio eritada: un investiga de sua leges e segues, en cual el ia demostra ce la enfantes de jenios tende mesma es jenios.
En 1874, el ia produi Omes engles de siensa: sua natur e eleva, fundida sur leteras longa de sonda, enviada a miles de siensistes reconoseda. En esta volum, el ia nota ce, an si la potensia per intelijentia alta es ancora clar eritada, on nesesa nuri lo per developa sua plen grandia. Spesial, la educa vasta e libral, furnida par la sistem de scolas en Scotland, ia es demostrada como multe plu superior ca la sistem de England cual el ia odia tan multe.
En 1883, el ia scrive Rexercas en la capasia umana e sua developa. Esta ia es la ves prima cuando algun ia compara jemelos identica e fratal, un metodo aora videda como ideal cuando on investiga casos de natur contra eleva.
En 1888, el ia publici Corelatas e sua mesura, xef de datos antropometrial. Como la titulo sujesta, Galton ia es el ci ia inventa corelata, e ance graficas de sperde e la regresa a la promedia. Plu tarda, Karl Pearson (1857–1936) ia descovre la formula matematical de corelata.
Francis Galton ia mori en 1911, pos un vive estrema produinte.
Naseda a 11 julio 1851 en Nice, Frans, Alfred ia es un enfante solitar. Sua madre, un artiste, ia eleva el sin aida pos un divorsa de sua padre, un mediciste.
El ia comensa studia medica, ma ia deside studia psicolojia sin instruor. Car el ia es autonom rica, el ia es libre per fa como el ia gusta! El ia labora con la psiciatriste Charcot a la dementeria a La Salpetrière, do el ia studia ipnose.
En 1891, el ia move a Paris per studia a la laboreria de psicolojia fisolojial a La Sorbonne, do el ia developa un varia de interesas en rexerca, spesial los cual envolve diferes individua. En 1899, el e sua studiante graduada, Théodore Simon (1873–1961), ia es encargada par la governa de Frans per studia retarda en la scolas franses, e per crea un esamina per distingui enfantes normal e enfantes retardada.
Pos sposi, el ia comensa studia sua du fias, esaminante los con taxes simil a los creada par Piaget e otra modos. Esta ia resulta la publici de La studia esperimental de intelijentia en 1903.
En 1905, Binet e Simon ia produi la scala de intelijentia de Binet–Simon, la esamina prima cual ia permete la esamina direta de intelijentia. Los ia estende la esamina a enfantes normal en 1908, e a adultes en 1911.
Binet ia crede ce intelijentia es complicada, con multe fatores, e no un cosa simple o singular. El no ia gusta la usa de un numero singular, como lo developada par William Stern en 1911, nomida la intelijentia proportial (engles: intelligence quotient o IQ). El ia crede ance ce, an si jenetica limita cisa la intelijentia, la plu de nos ave multe capasia de boni si nos reseta la tipo conveninte de educa.
El ia averti ce sua esaminas debe es usada con restrinje: An un enfante de du anios su sua nivel de eda pote plu tarda mostra se como plu briliante ca la plu! El ia teme ce la intelijentia proportial va crea prejudis en enseniores e jenitores, e ce persones va tende vide lo como fisada e para prematur suporta sua enfantes con numero basa.
El ia sujesta alga cosa cual el ia nomi ortopedia mental: eserses en atende e pensa cual pote aida enfantes nonvantajida a “aprende como on aprende”. El ia mori en 1911, un om multe plu avansada ca sua sosia, e plu saja ca la plu.
La temes cual Binet ia espresa ia es bon fundida. Per esemplo, Charles Spearman (1863–1945) ia introdui la idea ce “intelijentia jeneral” (g) es real, unial, e eritada.
Multe plu mal ia es la atas de Henry Goddard (1866–1957). El ia tradui la esamina Binet–Simon a engles. El ia studia un familia en Jersey Nova ci el ia nomi la familia Kallikak. Algas de los ia es normal, ma multe ia es feebleminded (“con mente debil”, sua propre terma). El ia trasa la jenealojia de los per suporta la idea de erita de intelijentia. Car el ia crede ce on ave un lia forte entre mentes debil e crimin, el ia sujesta ce statos institui programes de sterili persones con mentes debil. 20 statos ia crea leges per esta.
Goddard ia esamina ance migrores entrante a la SUA, solisitada par la Servi de Migra. Sua esaminores ia trova ce entre 40% e 50% de migrores ave mentes debil, e los ia es pronto deportada. El ia sujesta ance ce nasiones spesifada ave plu mentes debil ca otras. Nota bon ce esta migrores ia es rara capas de parla multe engles, e ia es esaminada a media de la prosede misera de pasa tra la burocratia de Isola Ellis, pos un viaja longa a traversa de la Atlantica en salas peti e folida (e con odor de vomita).
Un otra terma sujestada par Galton es eujenetica. Lo es la politica de fa ce persones reprodui seguente alga norma de intelijentia (e otra cualias), e la sterili de los ci no ateni esta normas. Lo ia es instituida como un cosa real en 1907, cuando la legeria de Indiana ia crea un lege permetente la sterili de “defetosas” posible. Un Ofisia de Arcivos per Eujenetica ia es instituida en Cold Spring Harbor, e sua legores ia desinia leges en 1914 cual ia es promoveda como modeles per la nasion intera.
Virginia ia adota un tal lege en 1924. Emma Buck, sua fia Carrie e neta enfante Vivian, ia es judida como defetosa, e sua caso (Buck contra Bell) ia es enviada a la Corte Suprema. La corte, su Oliver Wendell Holmes, ia suporta la leges de sterili. Holmes ia dise:
“Lo es plu bon per la mundo si, en loca de espeta esecuta la projenia dejenerada par causa de crimines, o de permete ce los fami par causa de sua stupidia, la sosia pote preveni los ci es clar nonconveninte de continua sua tipo. La prinsipe cual susta la vasini compulsada es sufisinte vasta per covre la talia de la trompas de utero. Tre jeneras de stupidas es sufisinte.”
An si siensistes ia disputa la razona per la leges de sterili, 33 statos ia adota los, e sirca 65 000 sitadanes american ia es sterilida. La nazis ia fundi sua leges de eujenetica sur la leges american e ia sterili 350 000. Eujenetica ia deveni gradal nonpopular cuando la teror de Deutxland nazi ia deveni publica, e lo ia sesa gradal en la desenio de 1940. Ma la Corte Suprema no ia reversa sua opina sur la caso.
Persones ci leje sur eujenetica e la leges de sterili pensa tipal ce esta es un esemplo eselente de la nonmoralia cual siensistes pote ave. En realia, la leges ia es fundida sur linias de la biblia cual dise ce “simil veni de simil”, la mesma linias usada oji par creistes.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).