LA ISTORIA DE PSICOLOJIA

Psicolojia de gestaltes

La psicolojia de gestaltes, fundida par Max Wertheimer, ia es cuasi un rebela contra la reduisme de la program per psicolojia de Wundt, en simpatia con multe otras en sua eda, incluinte William James. En fato, la parola Gestalt es deutx per un forma intera unida e sinifiante, cual debe es la foca de studia psicolojial.

Lo ia ave sua radises en alga filosofistes e psicolojistes plu temprana:

Ernst Mach (1838–1916) ia introdui la consetas de formas spasial e formas tempal. Nos vide un cubo como un cubo si lo es grande o peti, roja o blu, en contorno o tecnicolor… Esta es un forma spasial. Simil, nos persepi un melodia como reconosable, an si nos cambia la tonalia en un tal modo ce zero de la notas es la mesma.

Christian von Ehrenfels (1859–1932), ci ia studia con Brentano en Wien, es la orijina vera de la terma gestalt como la psicolojistes de gestaltes ia usa lo. En 1890 el ia scrive un libro nomida Sur cualias de gestalt. Un de sua studiantes ia es Wertheimer.

Oswald Külpe (1862–1915) ia es un studiante de G. E. Müller a Göttingen e ia reseta sua diploma dotoral a Leipzig. El ia studia ance con Wundt, e ia servi como la aidor per Wundt tra multe anios. El ia labora la plu cuando a la Universia de Wurzburg, entre 1894 e 1909. El ia supravide la tese dotoral de Max Wertheimer.

El ia es plu conoseda per sua idea de pensa sin imajes. Contra la seguores de Wundt, el ia mostra ce alga ativia mental, como judis e dutas, pote aveni sin imajes. La “pesos” de la psice cual Wundt ia proposa – sensas, imajes, e emosias – no ia sufisi per esplica tota cual aveni en la mente.

Max Wertheimer

Max Wertheimer

Max Wertheimer ia nase en Praha a 15 april 1880. Sua padre ia es un instruor e dirijor a un scola de comersia. Max ia studia lege per plu ca du anios, ma ia deside ce el prefere filosofia. El ia parti per studia en Berlin, do el ia ave clases de Stumpf, e ia reseta sua diploma dotoral (con loda masima) de Külpe e la Universia de Würzburg en 1904.

En 1910, el ia vade a la Instituida Psicolojial de la Universia de Frankfurt. Cuando el ia viaja a vacanse en la mesma anio, el ia deveni interesada a la persepis cual el ia esperia sur la tren. Cuando el ia para a la stasion, el ia compra un stroboscopio juetin – un tambur jirante con ranures tra cual on ia regarda e depintas a la intera, un tipo de macineta per filmas, ma multe primitiva.

A Frankfurt, sua ensenior pasada Friedrich Schumann, ci ia es asi ance, ia dona a el la usa de un tacistoscopio per studia la efeto. Sua sujetos prima ia es du aidores joven, Wolfgang Köhler e Kurt Koffka. Los ia deveni sua asosiores de sua vive intera.

El ia publici sua paper influente en 1912: Studias esperimental de la persepi de move. En acel anio, on ia ofre a el un posto a la Universia de Frankfurt. En 1916, el ia move a Berlin, e en 1922 ia ateni la posto de profesor aidante. En 1925, el ia reveni a Frankfurt, aora como un profesor plen.

En 1933, el ia move a la SUA per evade la turba en Deutxland. En la anio seguente, el ia comensa instrui a la Scola per Rexerca Sosial de New York. Cuando ala, el ia scrive sua libro la plu bon conoseda, Pensa produosa, cual ia es publicida pos sua mori par sua fio Michael Wertheimer, ance un psicolojiste susedosa. El ia mori a 12 otobre 1943 de un ataca de cor a sua casa en New York.

Wolfgang Köhler

Wolfgang Köhler

Wolfgang Köhler ia nase a 21 janero 1887, en Reval, Esti. El ia reseta sua diploma dotoral en 1908 de la Universia de Berlin. Alora, el ia deveni un aidor a la Instituida Psicolojial en Frankfurt, do el ia encontra e labora con Max Wertheimer.

En 1913, el ia es asiniada a studia a la Stasion de Antropoides a Tenerife en la Isolas Canario, e ia resta ala asta 1920. En 1917, el ia scrive sua libro la plu famosa, La mente de primates.

En 1922, Köhler ia deveni la xef e dirijor de la laboreria de psicolojia a la Universia de Berlin, do el ia resta asta 1935. En esta tempo, el ia scrive Psicolojia de gestalt. En 1935, el ia move a la SUA, do el ia ensenia a Swarthmore asta sua jubila. El ia mori a 11 junio 1967 en New Hampshire.

Kurt Koffka

Kurt Koffka

Kurt Koffka ia nase a 18 marto 1886 en Berlin. El ia reseta sua diploma dotoral de la Universia de Berlin en 1909 e, como Köhler, ia deveni un aidor a Frankfurt.

En 1911, el ia move a la Universia de Giessen, do el ia instrui asta 1927. Cuando ala, el ia scrive La crese de la mente: Un introdui a la psicolojia de la enfante, publicida en 1921. En 1922, el ia scrive un article per la Revisteta Psicolojial cual ia introdui la ideas de gestalt a lejores en la SUA.

En 1927, el vade a la SUA per instrui a la Universia Smith. El ia publici Prinsipes de psicolojia de gestalt en 1935. El ia mori en 1941.

La teoria

La psicolojia de gestaltes es fundida sur la oserva ce nos esperia comun cosas cual no es un parte de nosa sensas simple. La oserva orijinal ia es de Wertheimer, cuando el ia nota ce nos persepi move cuando on ave no plu ca un segue rapida de avenis sensal individua. Esta es lo cual el ia vide en la stroboscopio juetin cual el ia compra a la stasion de la ferovia, e lo cual el ia vide en sua laboreria cuando el ia esperimenta con bulbos de lus flaxinte en segue rapida (como la luses de natal cual pare corsa sirca la arbor, o la sinias de neon en Las Vegas cual pare move). La efeto es nomida “move parente”, e lo es un prinsipe fundal de la filmas de sinema.

Si lo cual nos vide no es vera ala, cual es lo cual nos vide? On pote nomi lo un ilude, ma lo no es un alusina. Wertheimer ia esplica ce nos vide un efeto de la aveni intera, no contenida en la soma de sua partes. Nos vide un serie de luses cual pare corsa, an si sola un lus flaxi a un ves, car la aveni intera conteni relatas entre la luses individua cual nos esperia ance.

Plu, la psicolojistes de gestaltes dise, nos es construida per esperia la intera struturida, como ance la sensas individua. E nos ave no sola la capasia de fa lo, ma un tende forte per fa lo. Nos ajunta an strutur a avenis cual no ave cualias strutural de gestaltes.

En persepi, on ave multe prinsipes de organiza nomida leges de gestalt. La esemplo la plu jeneral es nomida la lege de Prägnanz. Prägnanz es deutx per “ensintia”, ma ensinta con sinifia, no con un enfante. Esta lege dise ce nos es inata impulsada per esperia cosas con un gestalt tan bon como posible. “Bon” asi pote sinifia multe cosas como “regulada”, “ordinada”, “simple”, “simetre”, etc, cual indica la leges plu spesifada.

Per esemplo, un colie de puntos cual contorni la forma de un stela es probable persepida como un stela, e no un colie de puntos. Nos tende completi la forma, fa ce lo es como lo “debe” es, fini lo. Lo es tan natural ce nos vide un sirculo e un retangulo en la imaje a su, multe plu fasil ca un colie de linias. Esta es la lege de clui.

La lege de similia dise ce nos tende grupi cosas simil a lunlotra con lunlotra, e vide los como forminte un gestalt. A su, nos tende vide un linia de sirculos blanca e un linia de sirculos negra, e no un colie acaso o an colonas de sirculos blanca e negra alternante con lunlotra.

Un otra lege es la lege de prosimia. Cosas cual es prosima a lunlotra es videda como parteninte a lunlotra. On vide multe plu probable un bloco de sirculos a la sinistra, e tre blocos de sirculos a la destra:

Seguente, on ave la lege de simetria. An si on ave un presa de prosimia per grupi la duples de brasetas con lunlotra, la lege de simetria forsa ce nos persepi los como duples de brasetas ensircante la spasios blanca entre los:

Un otra lege es la lege de continua. En esta imaje a su, un de la claves es videda como su la otra, car la lege de continua gida nos a persepi la linias de la clave a su como estendente “su” la linias (e la area vacua encluida par los) de la clave a supra.

Un de la imajes la plu familiar de psicolojia de gestaltes es lo de “figur-fondo”. Lo ia es prima introduida par la fenomenolojiste dansce Edgar Rubin (1886–1951). Esta esemplo ia deveni la simbol de gestalt e an de psicolojia:

Nos ave un tende inata de persepi un aspeta de un aveni como la figur anterior, e la otra como la fondo posterior. On ave sola un imaje asi, con sola du dimensiones; ma, par cambia no otra cosa ca nosa disposa o atende, nos pote vide du cosas diferente. Vide ambos a la mesma momento es multe difisil. (Si on consentra a la idea ce esta es sola du dimensiones, on pote susede. Esta es un de la oservas cual suporta la idea ce nos ia evolui per persepi tre dimensiones, e nos ave alga difisiles cuando nos vide cosas de du dimensiones, como un depinta o desinia.)

La prinsipes de gestalt no es restrinjeda a persepi – estas es mera la formas prima notada. Per esemplo, memoria: esta pare opera par esta leges ance. Si tu vide un figur nonordinada, lo es probable ce tua memoria va ordina alga lo per tu. O si tu esperia alga cosa cual no ave un sinifia per tu, tu va tende recorda lo como con un sinifia cual tu no ia nota a ante. Un bon esemplo es sonias: Oserva tu a un ves cuando tu descrive un sonia a algun, e vide esce tu no trova ce tu altera alga la sonia per forsa ce lo ave sinifia!

Aprende es un cosa cual ia interesa multe la psicolojistes de gestaltes. Los ia nota pronto ce nos aprende frecuente no la cosas leteral ante nos, ma la relatas entre los. Per esemplo, gales pote es instruida a pica la plu pal de du cartas gris. Cuando on dona a los du otra cartas, de cual un es la plu pal de la du cartas prima e la otra es un carta an plu pal, los pica no lo cual los ia pica a ante, ma la plu pal. An alga cosa tan stupida como un gal “comprende” la idea de palia e oscuria relativa.

La teoria de gestalt es bon conoseda per sua conseta de aprende par intui. Persones tende malcomprende lo cual on sujesta con esta terma: La gestaltistes no ia refere a flaxes de intui, ma a solve un problem par la reconose de un gestalt o prinsipe de organiza.

La esemplo la plu famosa de aprende par intui envolve un ximpanze nomida Sultan. On ia presenta a el multe problemes pratical (de cual la plu ia envolve atenta ateni un banana estra la estende de sua brasos, en un caje, o su un caxa). Cuando, per esemplo, el ia es permeteda a jua con bastetas capas de es liada con lunlotra como un basto de pexa, el ia comensa regarda multe focada la sena de la banana e sua problemes, en un modo multe umanin. E alora, multe subita, el ia sta, ia asembla la bastetas, e ia ateni la banana.

Un esemplo simil ia envolve un xica de sinco anios, a ci on ia presenta un problem de jeografia cual es normal donada a enfantes plu vea: Como on pote calcula la area de esta paralelogram? El ia pensa, e ia demanda subita per un sisor. El ia tali un triangulo de un lado e ia move lo a la otra lado, cambiante la paralelogram a un retangulo simple. Wertheimer ia nomi esta la pensa produosa. (Me nomi lo un xica intelijente!)

La idea su esta esemplos, e un parte grande de la esplica de cosas par gestaltistes, es ce la mundo de nosa esperia es organizada en un modo sinifiante, a alga grado a la min. Cuando nos aprende o solve problemes, nos reconose esensal la sinifia cual es ala, en la esperia, per la “des-covre”.

La plu de lo cual nos ia esamina asi ia es asorbeda par psicolojia “corente” – a tal grado ce multe persones oblida dona lodas a la persones ci ia descovre esta prinsipes. On ave un plu parte de sua teoria cual ia ave min aseta: isomorfisme.

Isomorfisme sujesta ce on ave alga similia clar en la organiza de stimulas como gestaltes e la ativia en la serebro cuando nos persepi los. On ave un “mapa” de la esperia con la mesma ordina strutural como la esperia mesma, an si lo es “construida” de materias multe diferente. Esta ia es notada par psicolojistes plu resente como George Kelly. Ma nos ancora no pote “vide” cual forma un esperia crea en la serebro. Ta ce nos resta pasiente!

Kurt Lewin

Kurt Lewin

La psicolojia de gestaltes, an si lo no ia survive como un teoria autonom, ia ave un efeto enorme. Du persones spesifada ia introdui lo en otra aspetas de psicolojia: Kurt Goldstein e Kurt Lewin.

Kurt Lewin ia nase a 9 setembre 1890 en Mogilno, Polsca. El ia reseta sua diploma dotoral de la Universia de Berlin, pos studia con Stumpf. Pos servi militar, el ia reveni a Berlin do el ia labora con Wertheimer, Koffka, e Köhler.

El ia vade a la SUA como un lesonor visitante a Stanford e Cornell, e ia gania un posto a la Universia de Iowa en 1935. En 1944, el ia crea e dirije la Sentro de Rexerca per Dinamicas de Grupos, a MIT. El ia mori en 1947, no longa pos comensa labora ala.

Lewin ia crea un teoria topolojial cual espresa la dinamicas umana en la forma de un mapa representante la “spasio de vive” de la person. La mapa es modelida con la nesesas, desiras, e goles de la person, e vetores o flexas indicante la dirijes e fortes de estas – tota opera como un gestalt.

Esta teoria ia inspira multe psicolojistes en la SUA, spesial los en psicolojia sosial. Entre la influedas ia es Muzafer Sherif, Solomon Asch, e Leon Festinger.

Kurt Goldstein

Kurt Goldstein

La otra person ia es Kurt Goldstein. El ia nase en 1878 e ia reseta sua diploma medical de la Universia de Breslau en 1903. El ia instrui a la Instituida Neurolojial de la Universia de Frankfurt, do el ia encontra la fundores de psicolojia de gestaltes.

El ia vade a Berlin per deveni ala un profesor plen, e ia vade a pos a la Site New York en 1935. Ala, el ia scrive La organisme en 1939, e Natur umana su la lus de patolojia en 1963. El ia mori en 1965.

Goldstein ia developa un crede oliste sur la funsiona de la serebro, fundida sur rexerca cual ia mostra ce persones con dana a la serebro pote aprende usa otra partes de sua serebro en compensa. El ia estende sua olisme a la organisme intera, e ia proposa ce on ave sola un motiva en la funsiona umana, cual el ia nomi “autoreali” (“self-actualization” en engles). Goldstein ia dise ce la autoconserva – pd: la survive de la organisme, la motiva usual proposada como sentral – es es en realia patolojial! Vive es plu ca survive.

Goldstein e sua idea de autoreali ia influe multe teoristes de personalia e terapistes. Entre los ia es Gordon Allport, Carl Rogers, e Abraham Maslow, la fundores de la promove de psicolojia umaniste american.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).