LA ISTORIA DE PSICOLOJIA

Psicolojia de condui

Conduisme es la teoria filosofial cual dise ce psicolojia, per es un siensa, debe foca sua atende a lo cual es oservable – la ambiente e condui – e no a lo cual es sola esperiada par la individua – persepis, pensas, imajes, emosias, etc. Estas es sujetal e nonmesurable e donce pote nunca gida a un siensa ojetal.

La conduistes prima ia es rusce. La prima ia es Ivan M. Sechenov (1829–1905). El ia es un fisiolojiste ci ia studia a la Universia de Berlin con siensistes famosa como Muller, Du Bois-Reymond, e Helmholtz. Dedicada a un fusa de asosisme e materialisme, el ia conclui ce tota condui es causada par stimulas.

En 1863, el ia scrive Reflexes de la serebro. En esta libro importante, el ia introdui la idea ce on ave no sola prosedes stimulante en la sistem de nervos, ma ance prosedes inibinte.

Vladimir M. Bekhterev (1857–1927) es un otra conduiste rusce temprana. El ia gradua en 1878 de la Academia Medical Militar en San Peterburg, a un anio ante la ariva de Pavlov ala. El ia reseta sua diploma de dotor medical en 1881 con sola 24 anios, e alora ia vade per studia con Du Bois-Reymond e Wundt en Berlin, e Charcot en Frans.

El ia fundi la laboreria prima de psicolojia en Rusia a la Universia de Kazan en 1885, ante reveni a la Academia Medical Militar en 1893. En 1904, el ia publici un paper titulida Psicolojia ojetal, cual el ia estende plu tarda a tre volumes.

El ia nomi sua teoria “reflexolojia”, e ia defini lo como la studia ojetal de lias de stimulas e respondes. On ia debe discute sola la ambiente e la condui! E el ia descovre lo cual el ia nomi la reflexe asosiada – cual Pavlov va nomi la reflexe condisionada.

Ivan Pavlov

Ivan Pavlov

Esta gida nos a la rexercor la plu famosa de Rusia, Ivan Petrovich Pavlov (1849–1936). Pos studia per deveni un prete, como sua padre, el ia cambia sua studias a medica en 1870 a la Academia Medical Militar en San Peterburg. On debe nota ce el ia pasea de sua casa en Ryazan, prosima a Moscva, tra sentos de miles asta San Peterburg!

En 1879, el ia reseta sua diploma en siensas natural, e en 1883, sua diploma medical. El ia vade per studia a la Universia de Leipzig en Deutxland. En 1890, on ia ofre a el un posto como profesor de fisiolojia a sua universia orijinal, do el ia spende la resta de sua vive. Lo ia es en 1900 ce el ia comensa studia reflexes, spesial la responde salival.

En 1904, el ia reseta la Premio Nobel en fisiolojia per sua labora sur dijesta, e en 1921, la Premio de la Eroe de la Revolui ia es donada a el par Lenin mesma.

Condisiona pavlovian (o clasica) es fundida sur reflexes: On comensa con un stimula noncondisionada e un responde noncondisionada – pd: un reflexe. Alora, on asosia un stimula neutra con la reflexe par presenta lo con la stimula noncondisionada. Con alga repetes, la stimula neutra solitar va evoca la responde.

Per vide la idea como Pavlov ia vide lo con sua canes: alga polvo de carne sur la lingua causa ce un can saliva. Toca un campana a la mesma momento, e pos alga repetes, la can va saliva cuando lo oia la campana solitar, sin ce on dona polvo de carne a el.

Pavlov ia acorda con Sechenov ce on ave inibis en ajunta a stimulas. Cuando la campana es tocada a multe veses sin la polvo de carne, la can va sesa saliva a la sona de la campana. Acel es nomida estingui. Ma si on dona polvo de carne a un plu ves, lo es como si la responde ia es nunca estinguida: el recomensa saliva a la tono de la campana. La recovre spontan sujesta forte ce la abitua ia es ancora presente tra la periodo sin la polvo de carne. La can ia aprende mera inibi sua responde.

Pavlov, clar, ia pote condisiona no sola stimulas ma ance inibis. On pote instrui un can ce el no va reseta carne, tan fasil como on pote instrui el ce el va reseta serta lo. Per esemplo, un campana pote indica la ariva de la come, e un otra pote indica ce la come es finida. Si la campanas ia es tro simil, o si los ia sona simultan, multe canes ia esperia alga cosa simil a un crise mental, cual Pavlov ia nomi un neurose esperimental.

En fato, Pavlov ia clasi sua canes en cuatro personalias diferente, como la elinicas antica: a la canes ci ia deveni coler el ia dona la nom “colerica”, los ci ia comensa dormi ia es “flegmatica”, los ci ia cexa ia es “melancolica”, e la poca ci ia manteni sua bon umor ia es “sanguin”. La esplicas ia es la fortias relativa de la capasias de la canes per ativi sua sistem de nervos e cuieti denova lo. Esta esplicas ia es plu tarda usada par Hans Eysenck per comprende la diferes entra introvertidas e estrovertidas.

Un otra grupo de termas cual veni de Pavlov es la sistem prima e la sistem du de siniales. La sistem prima es cuando la stimula condisionada ata como un sinial ce un aveni importante va aveni. La sistem du es cuando simboles acaso comensa representa la stimula, como parolas en linguas umana.

Edward Lee Thorndike

Edward Lee Thorndike

Ance en America, cosas ia es aveninte. Edward Lee Thorndike, an si tecnical un funsionaliste, ia es developante un varia american de conduisme rusce. Thorndike ia reseta sua diploma laural de la Universia Wesleyan en Connecticut en 1895, e sua diploma mestral de Harvard en 1897. Cuando el ia es ala, el ia ave James como un instruor, e los ia deveni bon amis. El ia reseta un posto suportada a Columbia, e sua diploma dotoral en 1898. El ia resta a Columbia asta sua jubila en 1940.

El va es sempre recordada per sua gatos e sua caxas-rompetestas mal construida. Esta caxas ia ave aparatos per evade con complicas variosa cual ia nesesa ce la gatos fa plu ca un condui en serie. De sua rexerca, el ia conclui ce on ave du leges de aprende:

  1. La lege de eserse, cual es fundal la mesma como la lege de frecuentia de Aristotele. Plu frecuente on usa un asosia (o un lia neuronal), plu forte la lia deveni. Natural, min on usa la lia, plu debil lo deveni. Esta du ia es nomida la lege de usa e desusa.
  2. La lege de efeto. Cuando un asosia es segueda par un “situa sasiante”, la lia es fortida. E simil, cuando un asosia es segueda par un “situa nonsasiante”, lo es debilida. Estra la parolas mentaliste (“sasia” no es un condui o un aspeta de la ambiente), esta es la mesma cosa como la condisiona operante de B. F. Skinner.

En 1929, sua rexerca ia gida el a abandona tota la leges a supra, estra la parte prima de la lege du, cual nos nomi aora reforti.

Thorndike es ance conoseda per sua studia de transfere de instrui. On ia crede en sua eda (e multe persones oji crede ancora) ce si on studia sujetos difisil – an si on usa nunca los – esta aida on par “forti” sua mente, como eserse la musculos. La idea ia es usada per justi forsa enfantes a aprende latina (como on usa oji esta idea per justi forsa enfantes a aprende calculo). El ia trova ce sola la similia de la sujeto du a la sujeto prima pote aida aprende la sujeto du. Donce, latina pote aida aprende italian, o aljebra pote aida aprende calculo, ma latina no va aida aprende calculo, etc.

John Broadus Watson

John B. Watson

John Watson ia nase a 9 janero 1878 en un vileta estra Greenville, Carolina Sude. El ia es elevada a un cultiveria par un madre estrema relijiosa e un padre ci ia gusta alcol e femes. Cuando John ia ave 12 anios, los ia move a Greenville, ma pos un plu anio, sua padre ia abandona la familia. John ia deveni un joven problemosa e ia fini apena la scola.

Cuando el ia ave 16 anios, el ia comensa vade a la Universia Furman, ance en Greenville, e el ia gradua a 22 con sua diploma mestral. El ia vade alora a la Universia de Chicago per studia su John Dewey. El ia trova ce Dewey es “noncomprendable” e ia cambia sua interesas de filosofia a psicolojia e neurofisiolojia. Multe povre, el ia labora como un servor a un restorante, scopinte la solo de la laboreria de psicolojia, e nurinte la ratas per paia per sua studias.

En 1902, el ia sufri un crise mental, cual on ia pote espeta. El ia sufri de un teme intensa de oscuria ja de sua enfantia – la resulta de naras cual el ia oia en enfantia sur la diablo laborante en la note – e esta ia mali a depresa.

Ma, pos alga reposa, el ia completi sua studias dotoral en la anio seguente, ia reseta un aida finansial con sua profesor, la funsionaliste respetada James Angell, e ia sposi un studiante en sua clase introduinte a psicolojia, Mary Ickes. Los ia ave du enfantes (e la ator Mariette Hartley es sua neta).

En la anio seguente, el ia deveni un instruor. El ia developa un laboreria de animales bon operada, do el ia usa ratas, simias, e sternas como sujetos de sua esperimentas. La Universia de Johns Hopkins ia ofre a el un posto como un profesor plen e un laboreria en 1908, pos cuando la profesor presedente ia es trovada en un bordel.

En 1913, el ia scrive un article nomida Psicolojia como un conduiste vide lo per la Revista Psicolojial. Asi, el ia descrive un program conduiste. Esta ia es segueda en la anio seguente par la libro Conduisme: Un introdui a psicolojia comparante. En esta libro, el ia promove la studia de ratas como un model usosa per comprende umanas. E, ja en 1915, el ia asorbe la labora de Pavlov e Behterev sur reflexes condisionada, e ia inclui los en sua paco conduiste.

En 1917, el ia es clamada a servi en la armada, cual el ia fa asta 1919. En acel anio, el ia produi la libro Psicolojia de la punto de vista de un conduiste, fundal un estende de sua article orijinal.

A esta tempo, el ia estende sua labora per inclui enfantes umana. Sua esperimenta la plu bon conoseda ia es fada en 1920 con la aida de sua aidor de laboreria, Rosalie Rayner. “Peti Albert”, un enfante de 9 menses, ia es condisionada per teme un rata blanca par asosia lo a 7 veses con un ruido forte, produida par colpa un bara de aser con un martel. Sua teme ia jenerali rapida a un coneo, un jacon de pelo, un masca de Santa Claus, e an coton. Albert no ia es “descondisionada” car sua madre e el ia move a via. Ma lo ia es clar ce la condisiona ia tende desapare (estingui) alga rapida, e donce nos suposa ce Albert ia vinse sua teme. Esta sujesta ce teme condisionada no es vera la mesma como un fobia. Plu tarda, un otra enfante de 3 anios, nomida Peter, ia es condisionada e alora descondisionada par asosia gradal sua teme de un coneo con lete e biscotos e otra cosas positiva.

En acel anio, sua adultera con Rosalie Rayner ia es descovreda, e sua sposa ia divorsa el. La dirijores a Johns Hopkins ia esije sua resinia. El ia sposi pronto Rosalie e ia comensa xerca oportunes comersial.

El ia trova se laborante per la ajenteria de anunsia V. Walter Thompson. El ia teni un varia grande de postos en la compania, e ia deveni la vispresidente en 1924. Par la normas de sua eda, el ia es multe susedosa e rica. El ia crese la vende de cosas como la crema de belia “Ponds”, la cafe de “Maxwell House”, e la polvo per bebes “Johnsons”, e on crede ce el ia inventa la slogan “LSMFT – Lucky Strikes Means Fine Tobacco” (Lucky Strikes sinifia bon tabaco).

El ia publici sua libro Conduisme, desiniada per la lejor comun, en 1925, e ia revisa lo en 1930. Lo ia es sua esplica final de sua pensa.

Psicolojia, seguente Watson, es un siensa de stimulas e respondes. Nos comensa con reflexes e, par condisiona, nos developa respondes aprendeda. Prosedes en la serebro no importa (el ia nomi la serebro un “caxa misteriosa”). Emosias es sola respondes fisical a stimulas. Pensa es parla suvosal. Consensia es no cosa.

Plu importante, el ia nega la esiste de cualce instintos umana, capasias o talentos eritada, o temperas. Esta ambientisme radisal es refletada en lo cual es posible sua sita la plu bon conoseda:

Dona des-du enfantes sana, bon formida, e mea propre mundo spesifada en cual me ta eleva los, e me garantia prende acaso cualcun e condisiona el a deveni cualce tipo de spesialiste cual me ta eleje – dotor, legiste, artiste, mercator-xef, e, si, an un mendicor o furor, sin considera sua talentos, tendes, capasias, inspiras, e la raza de sua asendentes. (en Conduisme, 1930)

En ajunta a scrive articles popular per jornales como McCall’s, Harper’s, Collier’s, etc, el ia publici Cura psicolojial de la bebe e enfante en 1928. Entre otra ideas, el ia crede ce lo es plu probable ca no ce jenitores va ruina la developa sana de sua enfante, e ia disputa multe forte contra tro multe abrasas e otra mostras de ama.

En 1936, el ia es empleada como la vispresidente de un otra ajentia, William Esty e Compania. El ia dedica se a comersia asta jubila a des anios a pos. El ia mori en New York Site a 25 setembre 1958.

William McDougall

William McDougall

William McDougall no conveni vera en esta capitol. Ma sua odia de la tipo de conduisme de Watson sujesta ce nos ta inclui el. El ia nase a 22 junio 1871 en Lancashire, England. El ia entra a la Universia de Manchester con 15 anios, e ia reseta sua diploma medical de la Hospital de San Tomas en London en 1897. El ia refere la plu comun a se como un antropolojiste, spesial pos un mision de un anio per la Universia de Cambridge per visita la tribus de Borneo sentral.

De 1898, McDougall ia teni postos de ensenia a Cambridge e Oxford. Sua reputa ia developa en England con la publici de alga testos, incluinte Introdui a psicolojia sosial en 1908 e Corpo e mente en 1911. En 1912, el ia es elejeda como un membro de la Sosia Real.

En la Gera Mundal 1, el ia servi en la corpo medical, e ia trata soldatos sufrinte de “xoca de cartux”, cual nos nomi aora la sindrom de stresa postraumal. Pos la gera, el mesma ia reseta terapia de Carl Jung.

El ia reseta un posto como profesor de psicolojia a Harvard en 1920. El ia vide se como un seguor de William James, donce el ia vide esta como un onora grande. En la mesma anio, el ia publici La mente de la grupo, segueda en 1923 par la Resoma de Psicolojia.

En 1924, el ia partisipa en La batalia de conduisme (publicida en 1929). Esta ia es un debate con John Watson a la asembla de la Club de Psicolojia en Washington DC en acel anio. La escutores ia vota (apena!) ce McDougall es la vinsor, ma Watson ia es el ci ia gania la favore de psicolojia american per multe anios a pos.

McDougall ia resinia de sua posto como xef de psicolojia a Harvard en 1926, e ia comensa instrui a Universia Duke en 1927. On debe nota ce el ia ave un relata forte con sua sposa, e en 1927, el ia dedica sua libro Carater e la condui de vive a el con la parolas “A mea sposa, de ci a sua comprende intuosa me debe cualce comprende de la natur umana cual me ia oteni”. El ia mori en 1938.

McDougall ia es un eritiste asta sua mori, promovente un psicolojia fundida sur instintos. El mesma ia refere a sua teorias como psicolojia de evolui. Plu, el ia es la criticor xef de conduisme de sua eda. El ia odia spesial la materialisme tro simple de Watson.

McDougall no ia es bon gustada par sua studiantes o colaborores. La jornales american (spesial la New York Times) ia es spesial antagoniste contra el. La razonas ia es clar: McDougall ia adota sua posa eritiste a un tempo cuando la teorias ambientiste ia rena en la opina popular e psicolojia american. El ia nomi se un “elitiste democrata” e ia vide la aristocratia inteletosa de un nasion como un tesoro cual on debe proteje. Plu, el ia crede a la natur eritada de diferes entre grupos, nasional e razal, e ia proposa la institui de programes de eujenetica. Per defende el, on debe nota ce el ia ave no simpatia con nazisme e sua varia de eujenetica!

McDougall es aora, per la plu, oblidada – asta resente, cuando jenetica e psicolojia evolual ia deveni popular.

McDougall ia vide instintos como avente tre composantes:

Nota ce instintos es intendeda, pd: dirijeda a goles. Esta no es un conduisme de stimulas e respondes.

Asi es un lista de instintos e sua emosias asosiada:

Clark Hull

Clark Hull

Clark Leonard Hull ia nase a 24 maio 1884, prosima a Akron, New York, en un familia povre e campanian. El ia es educada en un scola de un sala, e ia ensenia an ala per un anio cuando el ia ave sola 17 anios. Cuando el ia es un studiante, el ia sufri grave de febre tifoide.

El ia vade a la Universia Alma en Michigan per studia injenia de minas. El ia labora per un compania de minas tra du menses cuando el ia developa poliomielite. Esta ia obliga el a xerca un carera min stresante. Per du anios, el ia es la xef de la mesma scola cual el ia atende como un enfante – aora composada de du salas. El ia leje la obras de William James e ia salva sua mone per vade a la Universia de Michigan.

Pos sua gradua, el ia ensenia per un tempo, e ia vade alora a la Universia de Wisconsin. El ia reseta sua diploma dotoral en 1918 e ia resta ala per ensenia asta 1929. Esta es do sua ideas su un psicolojia conduiste ia es formida.

En 1929, el ia deveni un profesor de psicolojia a Yale. En 1936, el ia es elejeda como presidente de la Asosia Psicolojial American. El ia publici sua obra mestral, Prinsipes de condui, en 1943. En 1948, el ia sufri un ataca de cor major. El ia pote completi un libro du, Un sistem de condui, en la mesma anio. El ia mori de un plu ataca de cor a 10 maio 1952.

La teoria de Hull es marcada par un restrinje sever de variables como prosedes esperimental, e par un descrive multe matematical. Asi es la variables cual Hull ia regarda cuando el ia condisiona sua ratas:

Variables nondependente:

La variables interveninte:

La variable interveninte xef, sEr, nomida potensia de stimula, resulta de tota la variables a supra:

La variables dependente:

Tota de estas es mesuras de R, la responde, cual es un funsiona de sEr.

La esense de la teoria pote es resomada par dise ce la responde es un funsiona de la fortia de la abitua multiplida par la fortia de la motiva.

Hull ia es la conduiste la plu influente de la desenios de 1940 e 1950. Sua studiante, Kenneth W. Spence, ia manteni acel popularia tra multe de la desenio de 1960. Ma la teoria, asetable en sua forma cortida, ia es tro masosa en la opina de otra conduistes, e lo no ia pote es fasil jeneralida de esperimentas multe controlada sur ratas a la complicas de vive umana. Lo es aora no plu ca un nota istorial.

E. C. Tolman

E. C. Tolman

Un teoria multe diferente ia ave alga popularia ante cuando conduisme ia sede la sena esperimental a la cognisialistes: la conduisme cognisial de Edward Chase Tolman.

Edward ia nase a 14 april 1886 en Newton, Massachusetts. Sua padre ia es un comersior, sua madre un fem de casa e cuecer zelosa. Edward e sua frate plu vea ia vade a MIT (la Instituida de Tecnolojia de Massachusetts). Sua frate ia deveni un fisiciste famosa.

Tolman ia es influeda par leje la obras de William James, e ia vade alora a Harvard en 1911. En acel tempo, el ia spende un estate en Deutxland studiante con Kurt Koffka, la psicolojiste de gestalt. El ia reseta sua diploma dotoral en 1915.

El ia vade seguente per instrui a Universia Northwestern. Ma el ia es un ensenior timida, e un pasiste en la Gera Mundal Prima, e la universia ia desemplea el en 1918. El ia comensa ensenia a la Universia de California a Berkeley. El ia servi ance en la Ofisia de Servis Stratejial per du anios en la Gera Mundal Du.

La Universia de California ia esije de sua profesores un jura de fida a la nasion, un esije inspirada par Joe McCarthy e la “panica roja” – teme de comunistes. Tolman ia fa protestas e ia es pronto desempleada. En 1959, el ia jubila, e ia reseta un diploma dotoral onoral de la mesma universia! Triste, el ia mori en la mesma anio, a 19 novembre.

An si el ia gusta la proposa par conduistes de crea un psicolojia como un siensa vera ojetal, el ia senti ce Watson e otras ia deveni tro estrema:

  1. La conduisme de Watson ia es un studia de “spasmas” – la model de stimula-responde es tro minima. On debe studia conduis intera e sinifiosa.
  2. Watson ia vide sola causa e efeto simple en sua animales. Tolman ia vide condui intendente, dirijeda a goles.
  3. Watson ia regarda sua animales como macinas stupida. Tolman ia vide los como creante e probante ipoteses fundida sur esperia presedente.
  4. Watson ia ave no usa per prosedes internal o “mentaliste”. Tolman ia demostra ce sua ratas es capas de un varia de prosedes cognisial.

Un animal, en la prosede de esplora sua ambiente, developa un mapa cognisial de la ambiente. Esta prosede es nomida “aprende ascondeda”, pd: aprende en la asentia de recompensas o punis. La animal developa espetas (ipoteses) cual es suportada o no par plu esperia. Recompensas (o punis) deveni importante cuando los motiva un condui ja aprendeda, no como causas de aprende mesma.

El mesma ia reconose ce sua conduisme es plu simil a psicolojia gestalt ca a la conduisme de Watson. De nosa perspetiva oji, el pote es videda como un de la asendentes de teoristes como Gardner Murphy.

B. F. Skinner

B. F. Skinner

Burrhus Frederic Skinner ia nase a 20 marto 1904 en Susquehanna, un vila peti en Pennsylvania. Sua padre ia es un avocato, e sua madre un fem de casa forte e intelijente. Sua eleva ia es tradisional e laborosa.

Burrhus ia es un xico ativa e sosial, ci ia ama natur e construi cosas, e el ia joia scola. Sua vive no ia es sin trajedia: sua frate ia mori con 16 anios de un aneurisme serebral.

Burrhus ia reseta sua diploma laural de la Universia a Hamilton en New York norde. El no ia ajusta bon ala, e no ia joia la selebras de sua frateria o la juas de futbal. El ia scrive per la jornal de la scola, incluinte articles cual ia critica la scola, la profesores, e an Phi Beta Kappa (un sosia de onora). Plu, el ia es un ateiste, en un scola cual ia esije ce on vade dial a la eglesa.

El ia intende deveni un scrivor e ia atenta lo, enviante poesias e naras corta a publicores. Cuando el ia gradua, el ia construi un studio en la suteto de la casa de sua jenitores per foca a sua scrive, ma lo no ia aida.

Ultima, el ia renunsia se a scrive articles per la jornal dial sur problemes de la sindicatos local, e ia trova un abitada en Greenwich Village en New York City como un “boemian” o bitnic. Pos alga viaja, el ia deside reveni a scola, a esta ves a Harvard. El ia reseta sua diploma mestral en psicolojia en 1930, e sua diploma dotoral en 1931, e ia resta ala per continua sua rexerca asta 1936.

Ance en acel anio, el ia move a Minneapolis per instrui a la Universia de Minnesota. Ala, el ia encontra e sposi Yvonne Blue. Los ia ave du fias, de ci la fia du ia deveni la enfante prima ci ia es elevada en un de la inventas de Skinner, la “leteta airal”. An si lo no ia es plu ca un combina de un leteta e un ensirca con lados de vitro e un frescador, lo ia pare tro simil a teni un bebe en un acueria per deveni popular.

En 1945, el ia deveni la xef de la departe de psicolojia a la Universia de Indiana. En 1948, el ia es invitada per veni a Harvard do el ia continua asta sua mori. El ia es un om multe ativa, rexercante, gidante sentos de aspirores dotoral, e scrivente ance multe libros. An si el no ia deveni susedosa par scrive naras e poesias, el ia deveni un scrivor susedosa de psicolojia, incluinte la libro Walden 2, un reporta imajinal de un comunia cual opera par prinsipes conduiste.

A 18 agosto 1990, B. F. Skinner ia mori de leucemia pos deveni cisa la psicolojiste la plu famosa pos Freud.

Teoria

La sistem intera de Skinner es fundida sur condisiona operante. La organisme es en la prosede de “opera” a la ambiente, cual sinifia en parolas plu comun ce la animal (o person) es bondinte en sua caje (o vila), fante lo cual lo (o el) fa normal. En esta opera, la organisme encontra un stimula spesial, nomida un stimula refortinte o, plu simple, un reforti. Esta stimula spesial ave la efeto de crese la “operante”, pd: la condui cual aveni direta ante la reforti. Esta es condisiona operante: “La condui es segueda par un efeto, e la natur de la efeto altera la tende per repete la condui en la futur.”

Imajina un rata en un caje. Esta es un caje spesial (nomida un “caxa de Skinner”) cual ave un bara o pedal a un mur cual, cuando presada, causa un macina peti a relasa un gran de comeda. La rata es bondinte en sua caje, fante lo cual ratas fa, cuando, acaso, el presa la bara e – ta-da! – un gran de comeda cade en la caje! La operante es la condui direta ante la reforti, cual es la gran de comeda, natural. Pos alga repetes, la rata pedali furiosa a la bara, cumulante sua monton de granes en un angulo de la caje.

Un condui segueda par un stimula refortinte crese la probablia ce la condui va aveni en la futur.

Cual aveni si on no dona plu granes a la rata? Lo pare ce la rata no es un fol, e pos alga atentas futil, el para sua condui de presa la bara. Esta es nomida la estingui de la condui operante.

Un condui no plu segueda par un stimula refortinte descrese la probablia ce la condui va aveni en la futur.

Alora, si on engrana denova la macina de granes de comeda, afin la presa de la bara furni denova la granes a la rata, la condui de presa la bara va reveni como si par majia, multe plu rapida ca la tempo nesesada afin la rata aprende la condui a la ves prima. Esta es car la reveni de la reforti aveni en la contesto de un istoria de reforti cual estende a retro asta la ves prima cuando la rata ia es refortida par presa la bara.

Skinner ia gusta raconta como el ia ariva “acaso” (pd: operante) a sua descovres variosa. Per esemplo, el ia parla sur cuando el no ia ave granes sufisinte de comeda en la media de un prosede. En acel tempo, on no ia ave comedas spesial per ratas como nos ave oji, e donce Skinner ia debe mesma fabrica la granes, cual ia es un taxe iritante. A esta ves, el ia deside redui la cuantia de refortis cual el ia usa per la condui cual el ia atenta condisiona, e el ia es surprendeda ce la ratas ia continua sua conduis condisionada, e a un frecuentia stable! Esta es la modo en cual Skinner ia descovre la scemas de reforti.

Scemas de reforti

La prosede orijinal es nomida reforti continuante: a cada ves cuando la rata fa la condui (pe: presa la bara), el reseta un regala.

  1. La scema de la proportio fisada ia es la prima cual el ia descovre: si la rata presa la bara, per esemplo a tre veses, el reseta un regala. O a sinco veses, dudes veses, o x veses. On ave un proportio fisada entre la conduis e la refortis.
  2. La scema de la interval fisada usa un aparato de cronometri de alga tipo. Si la rata presa la bara a minima un ves en un estende fisada de tempo (pe: 20 secondos), el reseta un regala. Si el fali, el no reseta un regala. Ma an si el presa la bara a 100 veses en acel 20 secondos, el reseta sola un regala. Un cosa strana cual aveni es ce la ratas tende cambia sua rapidia de responde: los lenti la frecuentia direta pos la reforti, e aselera cuando la tempo per un reforti deveni plu prosima.

Skinner ia regarda ance scemas variante. “Proportio variante” sinifia ce on cambia la x con cada responde – prima, per esemplo, la rata debe presa a 3 veses per reseta un regala, alora 10, alora 1, alora 7, etc. “Interval variante” sinifia ce on cambia la longia de la interval – prima 20 secondos, per esemplo, alora 5, alora 35, alora 10, etc.

En ambos formas de la scemas variante, la ratas tende atende plu. Con la scema de la interval variante, los no reposa plu en un estende de tempo, car los no pote developa un “ritmo” entre condui e reforti. Plu importante, esta scemas es multe resistente contra estingui. Esta es razonable, car lo pare sempre posible ce sola un plu presa va sufisi per produi la reforti, e si lo no aveni, sola un plu presa, etc.

Esta, seguente Skinner, es la macina de juas de aposta: on no gania a cada ves, ma on sabe nunca cuando on va gania denova. Lo pote aveni a la ves seguente, e si on no aposta aora, on pote perde la gania de la sentenio!

Formi

Un demanda a cual Skinner ia debe responde comun ia es como nos pote developa tipos plu complicada de conduis. El ia responde par introdui la idea de formi, o “la metodo de aprosimas serial”. Fundal, esta envolve prima reforti un condui cual es sola neblosa simil a la desirada. Cuando esta es condisionada, on xerca varias cual es plu prosima a lo cual on desira, e continua alora en esta modo. Skinner e sua studiantes ia es multe susedosa en instrui animales simple a fa atas estracomun, per esemplo en condisiona pijones a aprende boling.

Ultra esta esemplos simple, formi esplica ance la conduis multe complicada. On no deveni un sirurjiste de serebros par entra acaso a un sala de operas, talia la testo de algun, susede estrae un tumor de sua serebro, e final deveni refortida con prestijia e un bon salario, en la modo de un rata en un caxa de Skinner. En loca, on es jentil formida par sua ambiente, incluinte familia, amis, colaborores, etc, per gusta alga ativias, susede en scola, esperia alga clases en biolojia, vide presentas televisada sur dotores, ave un bon esperia a un ospital, vade a universia per studia medica, es corajida per move a sirurjia de serebro como un spesiali, etc. Esta pote es alga cosa cual la familia atenta, simil a un rata en un caje, ma lo es multe plu probable ce lo es un cosa multe min intendeda.

Stimulas negativa

Un stimula negativa es la oposada de un stimula reforti, alga cosa cual on pote esperia como nonplasente o dolosa. Un condui segueda par un stimula negativa resulta un descrese de la probablia ce acel condui va aveni en la futur.

Esta defini un stimula negativa e descrive la forma de condisiona conoseda como puni. Si on xoca un rata si el fa la condui x, el fa min la condui x. Si on colpa Joni si el lansa sua juetas a sua sore, el va lansa min sua juetas (cisa).

Si on sutrae un stimula negativa pos cuando un rata o Joni fa un condui spesifada, on usa la reforti negativa. Si on sesa xoca la pedes de un rata cuando el sta sur sua pedes anterior, el va sta plu. Si tu sesa tua tormenta de me cuando me prende la dejetadas a via, esta ata va es plu probable (cisa). On pote dise ce, cuando la stimula negativa sesa, lo “senti tan bon” ce esta servi como un reforti: Un condui segueda par la sutrae de un stimula negativa resulta un crese de la probablia ce acel condui va aveni en la futur.

Nota como la distingui pote es difisil entre alga formas de reforti negativa e reforti positiva: si me causa ce tu fami, esce la comeda cual me dona a tu cuando tu segue mea desiras es positiva, pd: un reforti? O esce esta es un esemplo de reforti negativa, pd: la sutrae de la stimula negativa de famia?

Skinner (contra alga stereotipos de conduistes) no suporta la usa de stimulas negativa. Ma no car los dole sua sentis de moralia, ma car los no opera multe bon. Nota ce me ia dise ce Joni va sesa lansa sua juetas a sua sore – cisa. Esta es car lo cual ia reforti la mal conduis no es sutraeda, como en estingui. Esta reforti es sola “ascondeda” par un stimula negativa e desacordante. Donce, serta, a veses, la enfante va condui plu bon, ma el senti ancora bon cuando el lansa acel juetas. Si Joni pote restrinje se asta cuando sua jenitores sorti de la sala, o si el pote trova un modo per evade la puni, el va continua sua lansa de juetas. Plu, car aora Joni pote joia sua reforti (la joia de lansa juetas) sola a alga veses, el es alora en un scema de reforti variante, e el va es an plu resistente contra estingui ca a ante!

Altera de condui

Altera de condui (en engles: behavior modification, o “B-mod”) es la tecnica de terapia fundida sur la obras de Skinner. Lo es multe direta: On estingui la condui nondesirable (par sutrae la reforti) e recambia lo a un condui desirable, par reforti. Lo ia es usada per multe tipos de problemes psicolojial – abituas a drogas, neuroses, timidia, autisme, e an scizofrenia – e lo opera spesial bon con enfantes. On ave esemplos de psicosicas ci no ia comunica con otras tra anios ci ia es condisionada per condui en modos desirable e cuasi normal, como come con un cotel e force, atende sua propre nesesas de ijenia, vesti se mesma, etc.

On ave un developa de esta, nomida la economia de fixes. Esta es xef usada en instituidas como ospitales de psiciatria, casas per jovenes problemosa, e prisones. Regulas es clar indicada en la instituida, e si on condui en un modo desirable, on es recompensada con un fix (biletas, fixes de pocer, mone falsa, etc). Alga conduis videda como nondesirable es comun segueda par un sutrae de esta fixes. La fixes pote es intercambiada per cosas desirada, como confetos, sigaretas, filmas, periodos estra la instituida, etc. Esta ia es usada con bon efeto en manteni ordina en esta instituidas frecuente difisil per maneja.

On ave un problem con la economia de fixes: cuando un abitor parti de un de esta instituidas, el reveni a un ambiente cual reforti la tipos de condui cual ia causa sua envia inisial a la instituida. La familia de la psicosica pote es multe malfunsionante. La ofendor joven pote vade denova a la visineria do nun dona fixes a el cuando el come cortes. La sola refortis es cisa la atende desirada per malcondui, o alga gloria en la gang per ruba un boteca. En otra parolas, la ambiente no viaja bon.

Walden 2

Skinner ia comensa sua carera par studia la leteratur engles, scrivente poesias e naras. Serta, el ia scrive un cuantia grande de paperes e libros sur conduisme. Ma el es probable xef recordada par la lejor tipal per Walden 2, en cual el ia descrive un comunia utopin cual usa sua prinsipes.

Alga persones, spesial la relijiosas, ia critica la libro forte. Los ia dise ce sua ideas sutrae nosa libria e dinia como umanas. El ia responde a esta mar de criticas con un otra libro (ance un de sua scrives la plu bon) nomida Ultra libria e dinia. El ia demanda: Cual nos intende cuando nos dise ce nos vole es libre? Tipal, nos intende ce nos no desira es un parte de un sosia cual puni nos cuando nos fa lo cual nos desira fa. Oce – stimulas negativa no opera bon en cualce caso, donce pone los a via! En loca, nos va usa sola refortis per “controla” sosia. E si nos eleje la refortis coreta, tota de nos va senti libre, car nos va fa lo cual nos senti un desira per fa.

La mesma per dinia. Cuando nos dise “el ia mori con dinia”, cual es nosa intende? Nos intende ce el ia continua mostra sua bon condui an sin cualce motivas clar estra un desira per condui bon. En fato, el ia reteni sua dinia car sua istoria de reforti ia gida el a vide la tal condui “diniosa” como plu refortinte ca la crea de problemes per otras.

La mal cual nos fa es causada par la fato ce la mal es refortida. La bon cual nos fa es car la bon es refortida. En nosa sosia presente, nosa refortis per condui bon e mal es caososa e estra nosa controla – lo es un caso de ave bon o mal fortuna en nosa “eleje” de jenitores, instruores, amis, o otra influes. En loca, nos debe prende controla, como un sosia, e desinia nosa cultur en un modo en cual la bon es compensada e la mal es estinguida. Con la tecnicas coreta, nos pote desinia nosa cultur.

Libria e dinia es esemplos de lo cual Skinner nomi construis mentaliste – no oservable e donce no usosa per un psicolojia siensal. Otra esemplos inclui modos de defende, la suconsensia, arcetipos, finalisme imajinal, stratejias per ajusta, autoreali, consensia, an cosas como famia e sidia. La esemplo la plu importante es lo cual el nomi la homunculus – latina per “umana peti” – cual (nos suposa) esiste en nos e es usada per esplica nosa condui, ideas como la spirito, la mente, la vole, la ego, la se, e, natural, la personalia.

En loca, Skinner sujesta ce psicolojistes ta foca a oservables, cual es per dise: la ambiente e nosa condui en lo.

Skinner ia ave un popularia grande en la desenio de 1960 e plu. Ma la promove umaniste en la campo de terapia, como ance la promove cognisial en la campo de esperimentas, ia comensa rapida combate sua conduisme. Ante sua mori, el ia lamenta ce la mundo ia fali aprende de sua ideas.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).