Psice e Eros

“Lo cual on ia nomi la psice o papilio es jenerada par erugas cual nuri se con folias verde, xef con la folias de theraphanus, cual alga nomi col. A prima, lo es min ca un gran de milio; alora lo crese a un larva peti; e en tre dias, lo es un eruga peti. Pos esta, lo crese e crese e ultima deveni inerta e cambia sua forma, e es aora nomida un crisalida. La casca esterna es dur, e la crisalida move si on toca lo. Lo afisa se par fibres como los de la rede de un arania, ma es sin un boca o cualce otra organo. Pos un tempo peti, la covre esterna esplode intera, e un vivente con alas vola a estra, cual nos nomi la psice o papilio.”
— Aristotele, La Istoria de Animales, 551a.1

Psice ia es un de tre sores, prinsesas en un rena elinica. Tota tre ia es bela, ma Psice ia es la plu bela. Afrodite, la diva de ama e belia, ia regarda Psice e sua sores e ia es jelosa de tota la atende cual Psice ia reseta. Alora el ia clama sua fio Eros e ia suplica el a encanta Psice. Sempre obedinte, Eros ia vola a tera con du boteletas de preparas. Nonvidable, el ia duxi Psice con la prepara cual causa ce omes evita el cuando los pensa de sposi. Par malfortuna, Eros ia pica Psice con un de sua flexas (cual causa ce algun deveni direta amosa) e el velia surprendeda. La belia de Psice, alora, ia surprende Eros, e el ia pica ance se, par malfortuna. Car Eros ia regrete sua atas, el ia duxi alora el con la otra prepara, cual va furni el con joia en sua vive.

Como on ta espeta, Psice, an si ancora bela, no ia pote trova un sposo. Sua jenitores, temente ce los ia ofende la dios en alga modo, ia demanda ce un oraculo revela la sposo futur de Psice. La oraculo ia dise ce, an si no om ta vole sposi el, on ave un vivente sur la culmina de un monte ci ta sposi el.

Sedente a la nonevitable, Psice ia comensa en via a la monte. Cuando el ia veni prosima, el ia es levada par un venta dulse e ia es portada a la culmina. Cuando el ia ariva, el ia vide ce sua abitada nova es, en fato, un palasio rica e bela. Sua sposo nova no ia permete ce Psice vide el, ma el ia mostra ce el es un amor vera e jentil. El ia es, natural, Eros mesma!

Pos alga tempo, Psice ia deveni anelosa de sua familia, e el ia demanda esce el pote es permeteda a reseta sua sores per un visita. Cuando los ia vide como bela es la casa nova de Psice, los ia deveni jelosa. Los ia vade a el e ia consela el a no oblida ce sua sposo es un tipo de monstro, e ce, sin duta, sua sposo es sola pleninte el per come el. Los ia sujesta ce el asconde un lampa e un cotel prosima a sua leto, afin, a la ves seguente cuando sua sposo ta visita el, el ta pote vide esce el es vera un monstro, e destesti el si lo es vera.

La sores ia convinse el ce esta es la idea la plu bon, donce, a la ves seguente cuando sua sposo ia veni per visita el, el ia ave un lampa e cotel oportun. Cuando Psice ia leva la lampa, el ia vide ce sua sposo no es un monstro, ma es Eros! Surprendeda, Eros ia core a la fenetra e ia vola a via. Psice ia salta a estra per el, ma ia cade a la tera e ia resta ala, nonconsensa.

Cuando Psice ia velia, la palasio ia desapare ja, e el ia trova se en un campo prosima a sua casa vea. El ia vade a la templo de Afrodite e ia prea per aida. Afrodite ia responde par dona a el un serie de cuatro taxes per completi – taxes sur cual Afrodite ia crede ce la fia no pote completi los.

La prima ia es un caso de organiza un monton grande de granes miscada a pilas separada. Psice ia regarda la monton e ia despera, ma Eros ia organiza secreta ce un armada de formicas separa la pilas. Afrodite, reveninte a la matina seguente, ia acusa Psice de es aidada, como es vera.

La taxe seguente ia es composada de prende un talieta de lana de oro de cada de un manada spesial de oveas ci abita ultra un rio prosima. La dio de la rio ia consela ce Psice espeta asta cuando la oveas xerca ombras de la sol de mediadia. Alora, los va deveni dormosa e no va ataca el. Cuando Psice ia presenta la lana a Afrodite, la diva ia acusa denova ce Psice ia es aidada.

La taxe tre cual Afrodite ia pone ante Psice ia es ce el prende un tas de acua de la rio Stix, do lo cascade a su de un altia marveliosa. Psice ia pensa ce sua esperas ia es perdeda, asta cuando un agila ia aida el par porta la tas a la culmina de la monte e reveni con la acua. Afrodite ia es furiosa, clar sabente ce Psice mesma no ia pote ateni esta gol!

La taxe seguente per Psice ia es ce el vade a enferno per demanda de Persefone, sposa de Hades, per un caxa de macia majiosa. Pensante ce el es ruinada, Psice ia deside fini sua vive par salta de un presipe. Ma un vose ia comanda el a no fa lo, e ia instrui el como el pote vade a enferno per prende la casa. “Ma,” la vose ia averti, “no regarda en la caxa en cualce caso!”

Alora, Psice ia reseta la caxa de Persefone e ia reveni a sua casa. Ma, seguente sua natur, el no ia es capas per restrinje se de videta a en. El ia es surprendeda par vide no cosa a interna, otra ca oscuria, cual ia causa ce el dormi profonda. Eros no ia pote restrinje ance se e ia velia Psice. Eros ia comanda el a trae la caxa a Afrodite, e ce el va fa la resta.

Eros ia vade a la sielo e ia demanda de Zeus per interveni. El ia parla tan bonparlante sur sua ama per Psice ce Zeus ia es emosiada a dona sua espera a el. Eros ia trae Psice a Zeus, ci ia dona a el un tas de ambrosia, la bevida de nonmortalia. Alora, Zeus ia lia Psice e Eros en sposi eterna. Plu tarda, los ia ave un fia, ci los ia nomi Plaser.