LA ISTORIA DE PSICOLOJIA

Medica e fisiolojia temprana

Sempre un parte de filosofia, psicolojia ave ance lias prosima a biolojia, spesial fisiolojia umana e medica. Tra cuando la mente es juntada en alga modo a la corpo, esta es nonevitable. Ma, como tu sabe, un bon cuantia de leveri ia es nesesada per libri la mente de sua lia relijiosa con un spirito nonmortal ante cuando acel lia intima ia es asetada!

La anticas

“La mediciste prima”, a la min cuanto la elinicas ia sabe, ia es Asclepio. El ia inisia un sosia o corpora cuasi mistica de medicistes cual ia ave un influe tra multe sentenios seguente. En acel tempo, el ia gania la prestijia de un dio. An Socrate, cuando el ia reposa morinte pos un supradosa de conio, ia comanda sua studiante Criton a sacrifia un gal per Asclepio, suposada per grasia el per un mori fasil.

Plu clar istorial es Acmeon de Croton (nase 435 aec) en Italia sude. Un pitagorian en sua filosofia, el ia es conoseda per sua studias anatomial. El es la person prima de ci nos ave un rejistra, ci ia disesioni la oio e ia descovre la nervo otical. Sua teoria de mente ia inclui la idea ce la serebro es la loca de persepi e pensa, e ce on ave lias de tota sensas a la serebro. El ia crede ce pneuma, sinifiante la respira o la spiritos animal, core tra la corpo como siniales neuronal.

Maladia, el ia teori, es a la min partal la resulta de un perde de ecuilibra en la corpo. El ia proposa un colie de oposantes, spesial caldia e fria, moia e secia, e amargia e dulsia, cual nos nesesa ecuilibra per manteni nosa sania, par controla nosa temperatur, nuri, etc.

Hipocrate Hipocrate (nase 460 aec) de Cos en Anatolia, es plu bon conoseda. El ia es un Asclepiade, pd: un membro de la corpora medical, e ia es la scrivor de la Jura Hipocratal (ma nota ce, contra crede popular, poca medicistes es obligada a jura esta o cualce otra promete!). Contra sua eleva, el ia prefere evita interpretes mistica e ia resta prosima a la atestas empirical. Per esemplo, en un tese nomida Sur la maladia santa (epilesia), e ia rejeta la teoria comun de posese par demones, e ia sujesta ce lo es un maladia eritada de la serebro.

El es ance conoseda per sua teoria de umores. Seguente tradisiones elinica, on ave cuatro sustantias fundal: tera, acua, aira, e foco. Cada de estas ave un umor corespondente (un licuida biolojial) en la corpo: bile negra, muco, sangue, e bile jala, en acel ordina.

Esta umores, como la cuatro sustantias fundal, varia longo du dimensiones, calda – fria, moiada – seca, como esta:

moiada seca
calda aira / sangue foco / bile jala
fria acua / muco tera / bile jala

Como Acmeon ia dise, la taxe de la mediciste es la restora de ecuilibra cuando la proportios relativa de esta umores es disturbada. Hipocrate ia nota ance alga lias emosial a esta umores.

On debe nota ce, estra la teoria strana de umores, Hipocrate e, con el, Platon ia reconose coreta la importa de la serebro. A alga tempo plu tarda, sirca 280 aec, Erasistrato de Cios ia disesioni la serebro e separa la partes variosa.

Per la plu, natural, medica en esta sentenios, e en multe sentenios seguente, ia e composada de un misca de aida prima – la repara de osos, per esemplo – e remedias erbal, con ance un cuantia de prea a la dios per interveni miraclosa!

Galen

Galen En la Impero Roman, un otra mediciste ia gania fama cual ia dura tra la eda medieval. Galen ia nase en 130 ec en Pergamon en Anatolia – un sentro major de instrui a acel tempo. El ia vade a Alexandria – la sentro la plu major de instrui! – per studia anatomia. En la Impero Roman la disesioni de umanas no ia es permeteda, fundida, natural, sur la teme superstisiosa de venja par la spiritos, e no sur cualce sentis de dinia umana! Donce, Galen ia studia la primates grande en loca de umanas.

Con 28 anios, el ia reveni a sua propre pais per un periodo per servi como un sirurjiste per la gladiatores. Sua fama ia sperde, e el ia vade a Roma.

En ajunta a un cuantia grande de bon consela concreta, el ia teori ce tota vive es fundida sur pneuma o spirito. Plantas ia ave un “spirito natural”, cual causa crese. Animales ave un “spirito vivosa”, cual permete move. E umanas ave un “spirito animal”, de la parola anima, sinifiante la spirito mesma, cual es la funda de pensa. El ia crede ce la licuida serebrospinal es la spirito animal, e el ia nota ce lo es trovada no sola en la corda spinal, ma ance en la vesiculas de la serebro. El ia crede ce lo viaja tra la nervos a la musculos, e ance de la organos de la sensas a la serebro. No mal!

Galen ia es el ci ia ajunta la idea de temperas a la cuatro umores:

sangue otimiste (“sanguin”)
muco nonajitable (“flegmatica”)
bile jala coler (“colerica”)
bile negra triste (“melancolica”)

Nota ce multe linguas usa ancora alga de esta parolas entre sinias de sita, e usa termas como “el ave un bon umor”, “el ave un mal tempera” (como en “temperatur”), “el ave un umor seca”, e “el es un testa calda”. Disturbas entre esta states psicolojial, Galen ia crede, es causas partal de maladias. Natural, esta ia es la tipolojia psicolojial prima! Lo ia ave alga influe sur psicolojistes tan diversa como Alfred Adler, Ivan Pavlov, e Hans Eysenck. Los no ia crede leteral a la umores, ma los ia nota ce la tipos ave un realia.

La renase de medica

Sola pos multe sentenios nos pote vide alga progresa real en medica e fisiolojia. En 1316, Mondino de Luzzi ia publici la prima testo european sur anatomia, conveninte nomida Anatomia. Temprana en la sentenio de 1500, Leonardo da Vinci, ia crea multe desinias de cranios e serebros (e otra partes de la corpo), e an un moldida de la ventriculos. En 1561, Gabriele Fallopio ia publici Oservas anatomial, en cual el descrive, entre multe otra cosas, la nervos cranial e, natural, la tubos falopian (la trompas de utero).

Progresa real no ia aveni asta la inventa de la microscopio par Zacharias Jansen de Middleburg, Nederland, en 1595 (o par sua padre, Hans). Lo ia es refinada par Antonie van Leeuwenhoek en Nederland, Galileo en Italia, e Robert Hooke en England. (Nota ce, prosima a pos, en 1608, un visina de Jansen, un om deutx nomida Hans Lippersberg, ia inventa la telescopio.)

Un otra aveni major ia es la esplica par William Harvey (1578–1657) de la sirculi de la sangue en 1628. La plu medicistes, ancora usante la testo de Galen, ia crede ce la sangue esflue e enflue como un marea tra la corpo intera!

Sentros de educa medical ia developa en la universias a Padua, Italia e Leyden, Nederland. Asi, studiantes ia studia anatomia, ia fa operas pos mori, e ia toca an lo cual nos nomi aora patolojia. Los ia fa studias atendente de casos, con mesuras detaliosa.

Neurofisiolojia ia developa paralel a tota otra developas medical e fisiolojial. On pote indica la descrive anatomial de la serebro par Thomas Willis en 1664 como la paso major prima. Sua libro ia es imajida par Christopher Wren, la artiste e arciteta engles multe famosa. Willis ia crea la terma “neurolojia” en 1681. La sirculo de Willis – un sirculo de arterias su la serebro – ia es descovreda par el e es nomida per el.

Un contribuor sinifiante a la developa de nosa comprende de la serebro ia es no otra ca nosa ami vea, René Descartes. El ia proposa un sistem dualiste con un mente/spirito interatante con la serebro/corpo par un media de spiritos animal (pneuma). La vole (un aspeta de nosa spiritos) entra a la serebro como spiritos animal tra la glande pineal, interata con la organiza de la nervos cual representa abituas instituida, e corsa tra la nervos (videda como tubos pico) a la musculos, do lo causa ce los contrae e donce produi un condui! En la mesma modo, atas sur la neurones sensal presa sur la spiritos animal, cual corsa tra la nervos a la serebro, influente la strutur de la serebro par repete, e pasante a la spirito como persepis.

A veses, la atas de la sensas resulta respondes cuasi direta par la musculos. Estas ia es nomida reflexes par un paisan de Descartes, Jean Astruc, e los ia es definida como sicles de ata cual no nesesa la interveni de la mente o spirito. Descartes ia inclui como reflexes alga conduis multe plu complicada ca nos inclui oji.

Pasiones (cual nos ta nomi emosias) veni ance de estra la corpo, esensal como sensas. Los gida a un varia de cambias fisiolojial en ajunta a reflexes: On vide un urso, on core a via! En animales, esta pasiones es no plu ca sensas e reflexes. Ma nos esperia los con nosa mente/spirito como mervelia, ama, odia, desira, joia, e tristia, e sentis de combinas.

Esta ideas de Descartes, con eseta de la spirito, ia es promoveda par Julien Offay de la Mettrie (1709–1751) en un libro multe influente nomida Umanas como macinas (1748). Robert Whytt (1714–1766) ia ordina plu tarda la fundas neurolojial de la reflexe, e ia introdui la termas stimula e responde. En 1791, Luigi Galvani ia reali esta consetas con sua esperimentas famosa de stimula par eletrica la nervos de la gamas de ranas.

Sirca 1721, Dama Mary Montegu ia introdui un pratica medical strana cual el ia vide cuando el ia visita Turcia: la vasini. En loca de permete ce un caso sever de variola dana sua pel, femes joven ia usa un pico de pus de algun con un caso minor e ia injeta lo su sua pel. No rie! Oji, persones ia injeta la venena botox a se per redui plietas de sua pel. Edward Jenner, plu tarda, ia comensa vasini persones contra la variola par usa un varia boval de esta maladia. La anticorpos produida pos la vasini ia imuni la person contra variola en ajunta a plu casos de la varia boval.

La sentenio de 1800

Louis Pasteur Medica ia reseta sua impulsa la plu grande en la sentenios de 1800, spesial pos cuando Louis Pasteur (1822–1895) ia ariva a la teoria ce maladias es causada par microorganismes. La campo nova de bateriolojia ia continua con un ami de Pasteur, Joseph Lister (1827–1912), ci ia introdui la idea nova de un ambiente antisepsica en sirurjia – spesial par la lava de manos! Pasteur ia dona sua nom a la pasteuri de lete; Lister ia dona sua nom a la antisepsica Listerine, developada en 1879 par Joseph Lawrence en San Louis, Missouri.

Charles Bell (1774–1855) e François Magendie (1783–1855) ia clari, nondependente de lunlotra, la distingui entre la nervos de sensas e ata. Los ia nota ce la fibres sensal entre la radises posterior de la corda spinal, e la fibres de ata, sorti de la radises anterior. Bell es ance la person prima ci ia descrive la paralise de la fas cual nos nomi aora paralise de Bell. E Magendie ia es la prima ci proba la funsiona de la serebreta.

Franz Joseph Gall (1758–1828) de Wien, e plu tarda de Paris, ia studia la formas de cranios e ia conclui ce la bultos e cavetas peti en la testa de cada person relata a alga cualias de personalia. Esta ia deveni multe popular su la nom frenolojia, an si siensistes seria como Bell e Flourens ia pensa ce lo es asurda.

Marie-Jean-Pierre Flourens (1794–1867) ia conclui ce la serebro es la fonte de pensa e vole, e ce lo opera oliste – no como Gall ia sujesta. El ia nota ce la otra partes – serebreta, medula, etc – ave sua funsionas diferente, ma ce cada de los opera ance oliste en se mesma. Lo ia es Flourens ci ia introdui la estrae de texeda de un serebro de un animal per studia la lia entre la partes de la serebro e condui.

Ma cosas es nunca tan simple. Paul Broca (1824–1880), un sirurjiste franses, ia ave un pasiente ci ia perde sua capasia de parla, la resulta de un lesion en lo cual es aora nomida la area de Broca. Un otra sirurjiste, Carl Wernicke, ia publici un libro sur afasia en 1874. Natural, el ia descovre la sinifia de la area de Wernicke par condui un autopsia de un pasiente ci ia perde sua capasia de comprende parla.

En 1870, du rexercores, Gustav Fritsch e Eduard Hitzig, ia usa stimula eletrical direta a la serebro en un can per descovre, entre otra cosas, la cortexes de sensa e ata. Pos cuatro anios, Robert Bartholow ia fa la mesma con un serebro de un person. Sua laboras ia demostra ce on ave serta alga grado de locali de funsiona – ma lo ave no relata a la bultos e cavetas peti sur la testo.

Johannes Müller (1801–1858), laborante en Berlin, ia developa la prinsipe de enerjia spesifada de nervos. Cada nervo, cuando stimulada, gida a sola un esperia sensal, an si lo es stimulada en un otra modo ca normal. Un esemplo simple es la lampis cual on vide cuando on presa sua oios. Esta ia resulta un crede creseda a realisme nondireta, pd: ce nos no esperia vera la mundo en modo direta, e an min en modo esata.

Hermann von Helmholtz

Hermann van Helmholtz Hermann von Helmholtz es posible la siensiste deutx la plu famosa de la sentenio 1800. El ia nase en 1821 en Potsdam, Deutxland, a Caroline e August Helmholtz. Sua padre, un ensenior e un ofisior en la armada Prus, ia comensa educa Hermann a sua propre casa, par causa de sua maladas. El ia vade a jinasio (pd: liseo) de 9 a 17 anios de eda. El ia desira studia fisica, ma ia entra a la universia per studia medica en Berlin en 1838. Sua jenitores no ia pote paia la custa sin la suveni per studiantes medical ci promete servi en la armada pos gradua.

Helmholtz ia deveni la ami de alga otra omes joven ci ia es studiantes de Johannes Müller a la Universia de Berlin, prosima. De sua amis, Emil du Bois-Reymond ia descovre plu tarda la potensia de ata, e un otra, Ernst Brücke, ia ave un aidor de rexerca nomida Sigmund Freud. Esta studiantes de Müller, contrastante con sua profesor, ia jura un promete seria per evita vitalisme, la crede ce on ave alga cosa unica sirca materia vivente, oposada a materia nonvivente: “No otra fortes ca la fortes fisical e cimical comun, es ativa en la organisme.” Ance Helmholtz ia adota sua promete.

En 1842, el ia deveni un sirurjiste militar a Potsdam, e ia continua studia solitar matematica e fisica. En 1847, el ia presenta un paper a la Sosia de Fisica de Berlin, sur la conserva de enerjia. Si el ta ave no otra ideas, sola esta ta gania per el un loca onorada en istoria.

Corta a pos, el ia deveni un profesor asosiada de fisiolojia a Königsberg e ia sposi. En esta periodo de sua vive, el ia mesura la rapidia de la impulsa neuronal. Ante esta, on ia pensa ce lo es o infinita o la rapidia de lus. El ia trova ce lo es entre 24,6 e 38,4 metres per secondo. Esta ia pone la ativia neurolojial bon entre la limitas de la siensas de fisica e cimica normal. En pasa, en 1851, el ia inventa la oftalmoscopio – la aparato cual dotores usa per vide en oios.

En 1855, el ia move a Bonn per es un profesor de anatomia e fisiolojia. Asi el ia comensa sua rexerca sur vide e oia. En 1856, el ia publici la prima de sua tre volumes nomida la Manual de otica fisiolojial.

El ia move denova en 1858, a esta ves como profesor de fisiolojia. En esta periodo, sua sposa ia mori. Ma plu tarda el ia sposi un fem de mundo. Sua labora filosofial ia foca a epistemolojia, e el ia continua sua rexerca sur vide e oia. Sua esplica de vide color – ce lo es fundida sur tre conos sensosa a roja, verde, e violeta – es ancora recordada como la teoria de Young–Helmholtz (Thomas Young de England ia sujesta lo a la mesma tempo).

En 1870, on ia ofre a el la seja de fisica (sua ama prima) en la Universia de Berlin. En ajunta a un salario grande, on ia ofre a el un aparte e un institui nova de fisica. El ia publici alga paperes sur jeometria, spesial la tipo noneuclidean cual ia deveni tan importante a persones como Albert Einstein en la sentenio de 2000. Sua foca major ia es a fisica, natural, e un de sua studiantes spesial ia es Heinrich Hertz, ci en 1888 ia deveni la person prima ci ia jenera ondas de radio.

Helmholtz ia viaja a la SUA en 1893 como la representor deutx a la Feria Mundal en Chicago. Un mal cade sur la barcon ia menasa grave sua sania. El ia mori de un emoraje serebral en setembre de 1894.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).