En la sentenio de 1800, anatomia ia ateni un grado de sofistica cual ia permete artistes medical a crea desinias tan detaliosa ce sirurjistes moderna pote ancora usa los. Ma los ia ave un limita: On pote talia fasil un serebro mor, ma vide la opera de un serebro vivente no es tan simple. De la tarda de la sentenio de 1800 tra la sentenio de 1900, on pote vide alga atentas notable per esplora la serebro sin estrae lo de sua posesor: Prima, Wilhelm Konrad Roentgen ia inventa la radiograf en 1895. Un util eselente per medicistes e rexercores, lo es min usosa per vide la texedas mol de la serebro. En 1972, Godfrey Hounsfield ia ajunta un computador a la radiograf e ia developa tomografia computada, cual soma multe fotos per crea un imaje tridimensional.
En un modo multe diferente, Hans Berger ia developa la eletroensefalogram (EEG) en 1929. En 1932, Jan Friedrich Tonnies ia crea la forma moderna, con sua paper movente e penes vibrante. La EEG rejistra la pulsas eletrical coordinada e multe peti de un cuantia grande de neurones a la surfas de la cortex. Nonevitable, pos alga tempo, rexercores ia ajunta computadores a la sistem.
En 1981, la ecipo de Phelps, Hoffman, e TerPogossian ia developa la tomografia par emete de positrones (plu comun, PET, de la corti engles). Lo opera como esta: La dotor injeta glucosa radioativa (en acua) en la sistem de sangue de la pasiente. La aparato deteta alora la nivel relativa de ativia, indicada par la usa de la glucosa, en areas diferente de la serebro. La computador jenera un imaje cual permete ce la rexercor vide cual partes de la serebro es la plu ativa cuando on fa operas mental variosa, como vide alga cosa, conta en sua testo, imajina alga cosa, o escuta musica.
En 1937, Isidor I. Rabi, un profesor a la Universia de Columbia, ia nota ce atomes revela se par emete ondas de radio pos deveni esposada a un campo magnetal potiosa. El ia nomi esta la resona magnetal nucleal (RMN). Lo ia es pronto usada par siensistes per identifia sustantias cimical en la laboreria. Sola a multe anios plu tarda, un Raymond Damadian ia reconose la potensia de RMN per medica.
Damadian es un person interesante e controversa. El ia nase en New York City en 1936. Cuando el ia ave sola 8 anios, el ia es asetada a la Scola de Musica Juilliard. El ia es suvenida per studia a la Universia de Wisconsin a Madison, e ia vade a pos a la scola de medica a la Universia de Yeshiva en la Bronx. El ia reseta sua diploma dotoral en 1960 cuando el ia ave 24 anios. De ala, el ia comensa rexerca medical a la Sentro Medical de Brooklyn.
Cuando el ia investiga tumores en ratas, el ia nota ce la siniales de RMN de tumores canserosa ia es notable diferente de la siniales de ratas sana. El ia ipotese ce la razona es la cuantia plu grande de moleculas de acua (e donce de atomes de idrojen) en esta tumores. Sua descovres ia es publicida en la jornal Science en 1971.
Comprendente ce esta es la funda per un modo nonsirurjial de deteta canser, el ia ave un idea per un aparato RMN plu grande cual ta pote rejistra la ondas de radio veninte de tota atomes en un umana. On ta debe mera crea un campo magnetal sufisinte grande.
En 1977, Raymond Damadian e sua studiantes ia construi un prototipo de la IRM (imaji par resona magnetal) cual los ia nomi la “Nondominable”. El ia atenta usa lo a se, sin susede, e a pos a Larry Minkoff, un studiante graduada. La resulta ia es 106 puntos de datos (prima rejistrada con lapises colorida) cual descrive la texedas en la peto de Minkoff. La Nondominable es aora en la Museo Smithsonian en Washington.
La nara de Damadian ia continua con sua rejistra de un patenta e anios de litiga en cual el ia combate companias como Hitachi e General Electric, ci ia disputa sua patenta. El ia causa ance alga controversia par suporta la labora de “siensistes de crea” (ci ia es en realia no plu ca cristianes ci reteni la crede ce Dio ia crea la universo en ses dias).
Otra siensistes ci ia studia RMN ia es movente en la mesma dirije como Damadian. Un person spesifada ci ave un reclama legal de la descovre es Paul Lautenbur. El ia developa la idea de usa gradientes peti de RMN per mapa la corpo cuando el ia es a la Universia de New York a Stony Brook. En 1973, el ia usa sua tecnica a un tubo de proba, plen de acua, e a pos a un bivalvo. Sua labora ia es publicida en la jornal Nature, e sua tecnica es lo cual on favore oji. Lautenbur e Peter Mansfield, un rexercor brites, ia gania la Premio de Nobel en 2003.
IRM opera como esta: On crea un campo magnetal multe forte cual core tra la person, de testo a pede. Esta causa ce la atomes jirante de idrojen en la corpo alinia con la campo magnetal. Alora, on envia ondas de radio a un frecuentia spesial cual causa ce la protones de idrojen jira en un otra dirije. Cuando on descomuta la ondas de radio, la protones reveni a sua alinia con la campo magnetal, e los relasa la enerjia ajuntada cual los ia asorbe de la ondas de radio. Acel enerjia es sensada par la mesma spiral cual ia produi la enerjia, aora conduinte como un antena de tre dimensiones. Car texedas diferente conteni cuantias de idrojen diferente, los dona densias diferente de siniales de enerjia, cual la computador organiza en un imaje detaliosa en tre dimensiones. Esta imaje es cuasi tan detaliosa como un foto anatomial.
A la lado la plu ativa, la stimula eletrical direta de la serebro de un person vivente ia deveni un arte bela en la sentenio de 1900. En 1909, Harvey Cushing ia mapa la cortex somatosensal. En 1954, James Olds ia produi reatas dramosa de jornalistes cuando el ia descovre la “sentro de plaser” de la ipotalamo. A la fini de la sentenio, la areas spesialida de la serebro ia es ja bon mapada.
Sirurjia de la serebro ia deveni ance plu efetosa. En prosede de atenta lejeri epilesia estrema par sirurjia, on ia descovre ce la talia de la corpo calo, cual junta la du emisferas de la cortex serebral, boni multe la state de la pasiente. Roger Sperry ia pote alora descovre la diferes variosa entre la emisferas destra e sinistra en alga de la studias la plu interesante. El ia reseta la Premio Nobel per sua obras en 1981.
La otra aspeta de tecnolojia es sua usa en la atenta per remedia la sufri de persones con maladias mental. An si lo es multe controversa oji, la atestas sujesta ce terapia par eletroxoca (acc. terapia eletroconvulsal), prima usada par Ugo Cerletti e Lucino Bini en 1938, pote es efetosa en la cura de pasientes multe depresada. Eletroxoca envolve envia un corente eletrical forte tra la serebro de un pasiente anesteseda. Cuando la pasiente velia, el no pote recorda alga oras de tempo ante la prosede, ma el senti ance multe min depresada. Nos no es serta perce lo ave sua efetos.
Min efetosa e multe plu estrema es la lobotomia, prima usada a umanas par Antonio Egaz Moniz de la Universia de Lisbon, ci ia gania la Premio Nobel en 1949. La lobotomia ia deveni un tecnica de produi en serie pos Walter Freeman, ci ia completi la lobotomia prima en la SUA en 1936.
En la sentenio de 1800, la prinsipes fundal de la sistem de nervos ia es lenta descovreda par rexercores como Galvani en Italia e Helmholtz en Deutxland. A la fini de la sentenio, biolojistes ia prosimi a un comprende de la detalias. Spesial, Camillo Golgi (ci ia crede ce la sistem de nervos es un cosa singular) ia inventa un tecnica de tinje cual ia permete ce Santiago Ramon y Cajal demostra ce la sistem de nervos es vera composada de neurones individual. La du reseta la Premio Nobel en 1906.
La biolojiste brites Charles Sherrington ia nomi ja lo cual Ramon y Cajal ia vide: la sinapse. El ia gania la Premio Nobel per sua rexerca sur neurones con Edgar Douglas Adrian.
En 1921, la biolojiste deutx Otto Leowi ia completi la sena par descovre asetilcolina e la idea de la neurotransmetador. Per sua descovre, el ia reseta la Premio Nobel, en comparti con Henry Hallett Dale. Interesante, asetilcolina es un relata de muscarina – la ingrediente ativa en alga de la xampiniones cual alga de nosa asendentes ia gusta tan multe. En 1946, un otra biolojiste, Ulf von Euler, ia descovre norepinefrina e ia gania la Premio Nobel. E, en 1950, Eugene Roberts e J. Awapara ia descovre la neurotransmetador gaba.
En la parte temprana de la sentenio de 1900, nos vide la comensa de psicofarmacolojia como un siensa medical, con la usa de bromido e idrato de cloral como calmintes. Fenobarbital ia ariva en 1912 como la barbiturica prima. En la dui du de la sentenio, pos la comprende de la mecanica fundal de la sinapse, la developa de drogas psicoativa ia crese multe. Per esemplo:
La progresa de psicofarmacolojia ia es multe aidada par la crese de sabe sur la ativias a la nivel de la sinapse. John Eccles, Alan Lloyd Hodgkin, e Andre Fielding Huxley ia comparti la Premio Novel en 1963 per sua studias de la membrana de la neuron. E en 1973, Solomon Snyder e Candace Pert de la Universia Johns Hopkins ia descovre endorfina (“morfina interna”), e la teoria de securador e clave, la mecanicisme fundal de drogas psicoativa, ia es confirmada.
En 1974, David T. Wong, a la laborerias de Eli Lilly, ia descovre fluoxetina – prozac – e sua efetos antidepresante. Lo ia es aprobada par la governa de la SUA en 1987. Esta sustantia e otras simil (inibadores spesifada de recatura serotonina, o ISRS) ia cambia dramosa la cura de persones con depresa, la sindrom de osese-compulsa, ansia sosial, e otra problemes.
En la desenio de 1990, on ia developa drogas antipsicosica nova como clozapina cual trata plu completa la scizofrenia ca drogas plu vea como clorpromazina, e con min efetos ladal.
E como la futur aspeta, regardante psicofarmacolojia? Algas sujesta ce la avansas major no va continua, e on ave aora no plu ca un caso de produi varias plu bon. Ma esta es ja diseda a multe veses. Biocimica es ancora progresante, e cada anio introdui alga novas. Nos pote sola espera ce medisines plu e plu efetosa va es trovada.
La siensa de jenetica comensa en la jardin de un monce osteraices nomida Gregor Mendel. En 1866, el ia publici la resultas de sua labora, sujestante la esiste de “fatores” – cual nos ta nomi jenes – cual es la orijina de la cualias fisical de organismes.
Un profesor a la Universia Columbia, Thomas Morgan, ia furni la paso seguente en 1910 par descovre ce acel jenes es, en fato, portada en la strutures nomida cromosomas. E en 1926, Hermann J. Muller ia descovre ce el pote crea mutas en drosofilas (moscas peti cual gusta fruta) par esposa los a radia con raios X.
Final, en 1953, Rosalind Franklin e, autonom, James D. Watson e Francis Crick, ia descrive la strutur de la molecula ADN (asida desosiribonucleal). E Sydney Brenner ia completi la sena par descovre ARN (asida ribonucleal) e la prosedes fundal de la construi de protena.
La fase seguente de jenetica envolve la mapa de ADN: Cual es la serie de bases (A, T, G, e C) cual composa ADN, e como esta serie relata a protenas e ultima a la cualias de organismes vivente? Du rexercores, Frederick Sanger e Walter Gilbert, ia descovre separada un tecnica per “leje” efetosa la bases, e en 1977, un virus bateriofaje ia es la vivente prima de cual on ia descrive sua jenom.
En la desenio de 1980, la Departe de Enerjia de la SUA ia revela un projeta per colie rexercores de tota la mundo per revela la jenom intera de umanas! La Instituida Nasional de Sania ia partisipa, elejente James Watson como la dirijor de la Ofisia de Rexerca de la Jenom Umana.
En 1995, Hamilton Smith e J. Craig Venter ia leje la jenom de un bateria. En 1998, rexercores ia publici la jenom de un animal, un nematodo (verme ronda). En 2000, on ia ave la jenom de la drosofila. E en la mesma anio, rexercores ia leje la jenom de un planta.
En junio 2000, a un selebra a la Casa Blanca en Washington, ospitada par presidente Clinton, du grupos de rexercores – la Projeta de la Jenom Umana e la compania privata Jenomica Celera – ia anunsia ce los ave la comensas de descrives de la jenom umana. En febrero 2001, la Projeta ia publici sua paper inisial en Nature, e Celera ia publici sua paper inisial en Science. Los ia descrive sirca 90% de la jenom, an si siensistes sabe la funsiona de min ca 50% de la jenes descovreda.
On ave alga surprendes: An si la jenom umana es composada de plu ca 3 bilion bases, esta es sola un tri de la grandia ca siensistes ia predise. E lo es sola la duple de la grandia de lo de la verme ronda. On ia descovre ance ce 99,9% de la series es esata la mesma per tota umanas. Nos no es tan individua spesial como nos gusta pensa.
La descrive de la jenom umana no es sola un eserse inteletal: Sabe nosa jenetica va permete ce nos trata maladias jenetical, desinia medisines par comanda, coreti mutas, trata plu efetosa e an cura canser, e plu. Esta es un susede cual suprapasa an la ateras a la Luna.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).