“La vive nonesaminada no merita es viveda.” – Socrate
Cuando nos pensa sur Elas antica, nos pensa direta a Atina. Alga de la filosofistes cual nos ia discute ja ia pensa ce Atina ta es la culmina en sua careras si los ta pote presenta sua ideas en esta site grande.
Ma Atina no ia es sempre grande. Lo ia comensa como un colie de viletas en alga de la tera la plu povre per cultiva en Elas. Sola uvos e olivas, curante cultivada, ia dona un modo de susta Atina vea, e ance comersia.
Ultima, la distantia entre la avores – la familias aristocrata, rica de comersia, cual rena Atina – e la povres – laborores, campanianes, e sclavos – ia deveni tan grande ce la site ia pare destinada a ruina.
En 594 AEC, la xefes de la clase media ia enscrive un mercator nomida Solon per aseta la taxe de gida la site e restora alga pas e ricia. El ia comensa par cansela tota detas e libri tota persones ci ia es sclavida par causa de sua detas. Alora, el ia crea un constitui en cual la popla ia es divideda entre cuatro clases fundida sur sua valua economial, con ce la plu altas reteni la plu potia, ma la plu basas es esentada de taxes.
Pos un traversa multe difisil, la democratia prima en la mundo ia es fundida su la xefia de Clistene en 507 AEC, cuando el ia anunsia ce tota omes libre va es permeteda a vota. Esta, natural, no ia es un democratia completa, ma no judi los tro sever: Sclavia no ia es proibida asta 1814, cuando Mexico ia deveni la nasion prima ci ia fini permanente lo. La SUA no ia libri sua sclavos asta 1865. E femes no ia pote vota asta 1893, cuando Zeland Nova ia dona la vota a los. La SUA no ia permete ce femes vota asta 1919.
Nonfortunosa, a la mesma tempo ce la esperimenta democrata ia comensa, la Impero Persian ia deside ce lo vole estende se a, prima, Ionia, e alora Elas propre. Ma en 490 AEC, 20 000 elinicas ia vinse 100 000 soldatos de Persia a la vila de Maraton, a norde de Atina. Un mesajor nomida Fidipide ia core la 26 milias – 42.195 km – a Atina per dona la bon novas. Esta es la orijina de la sporte de core maraton.
En 481, la imperor persian Xerxes ia envia un armada de plu ca 2 milion soldatos, aidada par un marina de 1200 barcones, per ataca Elas denova. La armada ia ruina Elas norde e ia prepara per ataca Atina. Los ia trova la site abandonada. Ma la marina persian ia trova la marina elinica espetante lo en la baia de Salamis. La elinicas ia vinse contra tota prevides. A 479 AEC, la persianes ia es forsada a retro a Asia.
Si esta pare como un peso minor de istoria, recorda: Esta vinse ia permete ce la aventura elinica continua produi la tipo de pensa cual ia domina Europa e la Mediteraneo tra la 2 milenios seguente.
En esta periodo de tempo en esta capital, Atina ia ave cuasi 300 000 persones, e ia es un de la sites la plu grande en la mundo. Sirca un dui ia es libre, un tri ia es sclavos, e un sesi ia es stranjeres. Sirca 50 000 – omes adulte e libre – ia pote vota.
Socrate (470–399) ia es la fio de un scultor e un comadre, e ia servi con merita en la armada atinan en la gera entre Atina e Sparta. El ia sposi, ma ia tende deveni enamada par omes joven e bela, spesial un soldato joven nomida Alcibiade. On ia dise ce Socrate ia es corta e alga obesa, no ia cura multe sua aspeta, e ia ama vino e conversa. Sua studiante la plu famosa – Platon – ia dise ce el es “la plu saja, la plu justa, e la plu bon de tota omes ci me ia conose sempre” (Fedon).
El ia es iritada par la sofistes e par la tende de los a ensenia lojica como un modo de ateni finis sasiante, e an plu par sua promove de la idea ce tota cosas es relativa. La veria ia es lo cual el ia ama, desira, e crede.
Filosofia, la ama de sajia, ia es per Socrate un via santa, un xerca santa – no un jua divertinte. El ia crede (o el ia dise ce el crede, en la conversa Menon) a la reincarne de un spirito eterna cual conteni tota comprende. Nonfortunosa, el ia dise, nos perde la conose de acel comprende a cada nase, e donce nos nesesa es rementeda a lo cual nos sabe ja (en loca de aprende alga cosa nova).
Donce, el ia dise ce el no ensenia, ma servi en loca, como sua madre, como un comadre ci aida pari un veria ja presente en nos. La usa de demandas e respondes per remente sua studiantes a la sabe en los es nomida maieutica (comadria), dialetica, o la metodo socratal.
Un esemplo de sua efeto sur filosofia es trovable en la conversa Eutifron. El ia sujesta ce lo cual nos considera como un ata bon no es bon car la dios dise lo, ma car lo es usosa per nos en nosa atentas per es persones plu bon e plu felis. Esta sinifia ce etica no es plu un caso de demanda a la dios o scrivedas santa per la natur de bonia o malia, ma un caso de pensa sur vive. El ia loca an la consensa individua supra la lege – un idea multe perilosa en cualce sosia!
Socrate mesma ia scrive nunca cualce de sua ideas, ma en loca ia engrana sua studiantes – omes joven e rica de Atina – en conversas sin fini. Per recompensa el per sua instrui, los ia manteni sua vive. Car el ia dise ce el ia ave poca nesesas, el ia prende poca – cual ia causa angusa per sua sposa Xantipe.
Platon ia reconstrui esta discutes en un colie grande de scrives conoseda como la Conversas. Lo es difisil ce nos distingui lo cual es de Socrate e lo cual es de Platon en esta scrives. Donce nos va discute los combinada a su.
Socrate no ia es amada par tota atinanes. Sua ideas nonortodox sur politica e relijio ia dona a la sitadanes xef de Atina la escusa cual los ia nesesa per condena el a mori par causa de mali la morales de la jovenes de la site. En 399, el ia es comandada a bevi un prepara de conio venenosa, cual el ia fa con la acompania de sua studiantes. La aveni es rejistrada en la Apolojia, par Platon.
Sua parolas final ia es: “Criton, nos debe un gal a Ascelpio [la dio de medica]. Paia lo e no descura lo.”
Platon (437–347) ia es la studiante la plu valuada par Socrate. De un familia rica e potiosa, sua nom vera ia es Aristocle. Platon ia es un nometa cual refere a la largia de sua spalas. Cuando el ia ave sirca 20 anios, el ia es encantada par Socrate e ia deside dedica sua vive a filosofia. Ferida par la mori de Socrate, el ia vaga sirca Elas e la Mediteraneo e ia es caturada par piratas. Sua amis ia colie la mone nesesada per rescati el de sclavia, ma cuando el ia es librida sin paia, sua amis ia compra un propria peti per fundi un scola – la Academia, fundida en 386 AEC.
La Academia ia es plu como la comunia de Pitagoro: un tipo de fratia cuasi relijiosa, do omes joven e rica pote studia matematica, astronomia, lege, e, natural, filosofia. La scola ia es sin costa e ia depende sola de donadas libre. Seguente sua ideales, Platon ia permete ance ce femes pote studia ala! La Academia ia deveni la sentro de aprende elinica tra cuasi un milenio.
On pote comprende Platon como idealiste e razonaliste, simil a Pitagora ma min mistica. El ia divide realia entre du: A un lado, on ave ontos, la idea o ideal. Esta es la realia ultima, permanente, eterna, spirital. A la otra lado, on ave fenomenos, cual es un apare de la ideal. Fenomenos es cosas como los pare a nos, e es asosiada con materia, tempo, e spasio.
Fenomenos es iludes cual dejenera e mori; ideales es noncambiante e perfeta. Fenomenos es serta inferior ca ideales. La idea de un triangulo – la matematica cual defini lo, la forma o esense de lo – es eterna. Cualce triangulo individua, la triangulos de la mundo dial de esperia, es nunca perfeta: Los pote es alga vagante, o la linias pico spesa, o la angulos no tota coreta. Los pote sola prosimi a acel triangulo perfeta, la triangulo ideal.
Si lo pare strana ce on parla sur ideas o ideales como plu real en alga modo ca la mundo de nosa esperias, considera siensa. La lege de gravita, 1 + 1 = 2, “magnetes atrae fero”, E = mc², etc – estas es universales, no vera per un dia en un loca pico, ma vera sempre e en tota locas. Si on crede ce la universo ave ordina, ce natur ave leges, on aseta ideales.
Ideas es disponable a nos par pensa, ma fenomenos es disponable a nos par nosa sensas. Donce, natural, pensa es un modo multe plu bon per ariva a la veria. Esta es lo cual indica ce la epistemolojia de Platon es razonaliste, e no empiriciste.
Sentis pote sola furni informa sur la mundo nonperfeta e sempre cambiante de fenomenos, e donce pote sola furni implicas sur realia ultima, e no realia mesma. Razona vade direta a la idea. On “recorda” la veria, reconose lo par intui, como Socrate ia sujesta en la conversa Meno.
Longo Platon, la mundo fenomenal aspira deveni ideal, perfeta, completa. Ideales es, en esta modo, un forsa motivante. En fato, el ia identifia la ideal con Dio e bonia perfeta. Dio ia crea la mundo de materia e formi lo seguente sua “scema” o “sianogram” – ideas o la ideal. Si la mundo no es perfeta, esta no es car Dio o la ideales fali, ma car la materia cru no es perfeta. Me opina ce tu pote vide perce la eglesa cristian antica ia trata Platon como un cristian onoral, an si el ia mori a tre e un dui sentenios ante Cristo!
Platon ia aplica la mesma duplisme a umanas: On ave un corpo, cual es material, mortal, e “moveda” (pd. un vitim de causa). E on ave un spirito, cual es ideal, nonmortal, e “nonmoveda” (capas de vole libre).
La spirito inclui razona, natural, e autoconsensia e la senti de moralia. Platon ia dise ce la spirito va eleje sempre fa bon, si lo reconose lo cual es bon. Esta es un conseta de bonia e malia simil a lo de la budistes: En loca de la idea ce la mal es un peca, lo es videda como un caso de nonsabe. Donce, algun ci fa un mal cosa nesesa es instruida, no punida.
La spirito es traeda a la bon, la ideal, e donce lo es traeda a Dio. Nos move gradal plu prosima a Dio en nosa vive individua e par reincarne. Nosa gol etical en vive es deveni plu como Dio, move a la mundo pur de ideas e ideal, libri nos de materia, tempo, spasio, e deveni plu real en esta sinifia plu profonda. Nosa gol, en otra parolas, es autoreali.
Platon ia parla de tre niveles de plaser. Prima es plaser fisical, de cual la seso es un bon esemplo. La nivel du es plaser estetica, per esemplo par amira la belia de un person o arte, o joia lunlotra en un bon sposi. La nivel tre, la plu alta, es plaser ideal, pd. la plaseres de la mente. Asi, la esemplo ta es ama platonal, ama inteletal per un otra person, nonsusida par la fisical.
Paralel a esta tre niveles de plaser es la tre spiritos. Nos ave un spirito nomida apetito, cual es mortal e veni de la ventre. La spirito du es nomida zelo o coraje. Lo es ance mortal, e vive en la cor. La spirito tre es razona. Lo es nonmortal e vive en la serebro. La tre es cadenida par la canal serebrospinal.
Platon ia gusta analojias. Apetito, el ia dise, es como un cavalo savaje, ci es multe potiosa ma es difisil controlada. Coraje es como un cavalo bon domada, ci ave potia refinada e dirijeda. E razona es la caror, dirijeda par sua goles, dirijente ambos cavalos en acorda con sua vole.
Otra analojias abunda, spesial en sua obra la plu grande: la Republica. En esta obra, Platon desinia (usante la vose de Socrate) un sosia como un modo per descovre la sinifia de justia. El ia compara la elementos de sua sosia (un utopia, elinica per “no loca”) a la tre spiritos: La laborores e campaniores es la funda de la sosia. Los cultiva e produi benes per sasia la apetitos fundal de la sosia. La gerores representa la zelo e coraje de la sosia. E la res-filosofistes gida la sosia, como razona gida nosa vives.
Ante cuando tu suposa ce nos esamina un varia elinica de la sistem de caste en India, nota per favore: La enfantes de tota sitadanes es elevada con lunlotra, e sua parteni en un de la tre niveles de sosia es fundida sur talentos, e no sur la niveles de sua jenitores. E Platon ia inclui femes como la egales de omes en sua sistem.
Alga sitas:
“Mervelia es la senti de un filosofiste, e filosofia comensa en mervelia.”
“… Si on demanda cual es jeneral la valua de instrui, la responde es fasil: ce instrui crea bon omes, e bon omes ata nobil.”
“Nosa gol en la construi de la stato es la felisia la plu grande de la intera, e no de cualce clase individua.”
Aristotele (384–322) ia nase en Stagira, un colonia elinica peti en Tracia. Sua padre ia es un mediciste ci ia atende la avo de Alesandro la grande. Lo es suposada ce sua padre ia instrui Aristotele en la studia de natur.
El ia es la studiante la plu valuada de Platon, an si el no ia acorda con Platon sur multe ideas. Cuando Platon ia mori, Aristotele ia resta per un tempo corta con un otra studiante de Platon ci ia deveni ja un tirano en Anatolia minor. Aristotele ia sposi sua fia, Pitia. Los ia move a Lesbos, do Pitia ia mori en pari sua sola enfante, un fio. An si Aristotele ia sposi denova, sua ama per Pitia no ia mori, e el ia demanda ce on entera los a lado de lunlotra.
Per cuatro anios, Aristotele ia es la ensenior de Alesandro, la fio de Filipe de Macedonia, ci ia ave des anios a la comensa de sua instrui. En 334, Aristotele ia reveni a Atina e ia fundi sua scola de filosofia en un construida nomida la Liseo (de un nom per Apolon). La jardines bela e paserias covreda (peripatoi) ia es perfeta per paseas e discutes estendeda, e donce la studiantes ia es nomida la peripatetikoi.
Prima, on debe comprende ce Aristotele ia es un siensiste tan multe como el ia es un filosofiste. El ia es fasinada sin fini par natur, e ia clasi multe de la plantas e animales de Elas. El ia es egal interesada par la anatomias de animales e sua condui savaje.
Aristotele ia inventa lojica. Estra la simboles, lo es esensal la mesma como lojica moderna.
Ta ce nos comensa con metafisica: Platon ia separa la mundo sempre cambiante de fenomenos e la realia ideal e eterna, ma Aristotele ia sujesta ce la ideal es trovada “en” la fenomenos, la universales “en” la individua.
Lo cual Platon ia nomi idea o ideal, Aristotele ia nomi esense, e sua oposada materia. Materia es sin forma o usa intendeda. Lo es la posible sin realia. Esense furni la forma o usa intendeda a materia. Esense es perfeta, completa, ma lo ave no sustantia. Esense e materia nesesa lunlotra. Esense reali materia. Esta prosede, la move de materia sin forma a un esente completa es nomida entelecia.
On ave cuatro causas cual contribui a la move de entelecia. Los es la respondes a la demanda “perce?” o “cual es la esplica de esta?”
1. La causa material: Lo de cual un cosa es composada. (Perce la sculta de bronze? La metal de cual lo ia es fabricada.) Oji, nos vide un asentua a causa material en reduisme, cual esplica, per esemplo, pensas e emosias como la natur de ormones e neurones. Nos vade comun a un nivel plu basa cuando nos no pote esplica alga cosa a sua propre nivel.
2. La causa efetal: La move o enerjia cual cambia materia. (Perce la sculta? La forsas nesesada per crea la sculta, la martel e la caldia de la forno nesesada per fabrica lo de bronze sin forma.) Esta causa es lo a cual siensa moderna tende foca, e multe persones vide lo como la defini de “causa”. Nota ce psicolojia moderna depende comun sur reduisme per trova causas efetal. Ma esta no es sempre tal: Freud ia parla de enerjia psicosesal e Skinner ia parla de stimula e responde, sin discute materia.
3. La causa formal: La forma o esense de alga cosa. (Perce la sculta? Posible la scultor ia ave un desinia per la bronze, la forma de la sculta.) En psicolojia, nos vide ce alga teoristes foca a strutur – Piaget e sua scemas, per esemplo. Otras parla de la strutur en la codigo jenetical, o de senarios conosal.
4. La causa final: La razona, intende, usa de alga cosa. (Perce la sculta? La usa intendeda par la scultor o sua padrones.) Esta ia es popular con la scolores medieval: Los ia xerca la causa ultima, la intende per la universo, cual los ia nomi (natural) Dio. Nota ce, estra la siensas “dur” (fisica, cimica, etc), esta causa es comun la tipo a cual nos ave la plu interesa. Perce el fa lo? Cual el intende? Per esemplo, en lege, la baleta es posible la causa efetal de un mata, ma la intende de la person ci tira la gatilio es lo cual conserna nos. Cuando nos parla de goles o valuas, nos parla de causas final.
Aristotele ia scrive la libro prima sur psicolojia (como un sujeto separada de la resta de filosofia). La libro ia ave la nom conveninte Peri Psices, elinica per “sur la mente o spirito”. Lo es ance conoseda par sua nom latina, De Anima. En esta libro, nos trova la referes prima de multe ideas fundal per psicolojia oji, como la leges de asosia.
En esta libro, el dise ce la mente o spirito es la entelecia prima de la corpo, la causa e prinsipe de la corpo. Nos pote dise lo como esta: La mente es la opera intendente de la sistem de nervos.
Como Platon, el ia proposa tre tipos de spiritos, an si el ia defini los en un modo alga diferente. On ave un spirito vejetal, de cual la esense es nuri. Alora, on ave un spirito animal, cual conteni la sensas fundal, desira, dole e plaser, e la capasia de causa move. E final, on ave la spirito umana. La esense de la spirito umana es, natural, razona. El ia sujesta ce, posible, esta spirito final es capas de survive separada de la corpo, como un capitan pote survive la ruina de sua barcon.
El ia premostra multe de la consetas cual ia deveni popular pos sola du mil anios. Libido, per esemplo: “En tota animales… la funsiona la plu natural es pari un otra vivente simil a se… afin los pote ateni, tan multe como posible, la nonmortal e divin… Esta es la causa final de la vive natural de cada vivente.”
E la luta entre id e ego: “On ave du potias en la spirito cual es parente la forsas de move: desira e razona. Ma desira stimula atas cual viole razona… desira… pote es falsa.”
E la prinsipe de plaser e la prinsipe de realia: “An si desiras aveni cual es oposada a lunlotra, como en la caso cuando razona e apetito es oposada, lo aveni sola en viventes con un sensa de tempo. Car la razona, vidente la futur, dise ce nos debe resiste, ma la desira vide sola la presente; la plasente momental pare a lo como la plasente asoluta e bon asoluta, car lo no pote vide la futur.”
E, final, autoreali: Nos comensa en la utero como materia sin forma, e tra anios de developa e aprende, nos deveni adultes matur, sempre atentante ateni perfetia. “Donce, la bon ia es bon esplicada como lo a cual tota cosas punta.”
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).