Pos Platon e Aristotele, la interesas de la filosofistes ia move plu distante de metafisica, epistemolojia, e alga cosa cual sembla siensa moderna, e plu prosima a la ideas cual ia conserna la plu la elinicas antica: etica. Como on es virtuosa, ave carater de cualia, vive un bon vive, ave arete (nobilia)?
Antistene (445–365) ia es la fio de un sitadan atinan e un sclavo fema de Tracia. Pos fundi sua propre scola, Antistene ia comensa comprende ce Socrate es plu saja ca el. El ia pone se su la mestre, con studiantes ance.
El ia es la fundor de sinicisme. La parola veni de la parola elinica per “can”, orijinal car Antistene ia ensenia a un jinasteria nomida la Cynosarges (“can blanca”), cual ia es construida per la povres de Atina.
Sinicisme recomenda ce on abitua se a un vive simple, afin la spirito pote es librida. Lo es un filosofia de “reveni a natur”, en la modo de San Francesco de Assisi o la monces sever de India. Par elimina sua nesesas e posesedas, on pote consentra plu bon a un vive de filosofia.
Sinicisme dise ce la sola bonia e sola felisia vera es virtua. On no pote controla la mundo e la levas e cades de vive, donce on debe controla se. “Me ta prefere dementi ca senti plaser!” Antistene ia dise. Sinicistes ia rejeta sivilia, e ia tende retira se de sosia, an vivente en la deserto. En esta, los ia influe posible la monces iudi e cristian temprana.
Sinicisme no ia es tota negativa (de la vista de la valuas de oji): Los ia coraji forte individuisme, ia crede ce tota omes es frates, no ia aseta la nesesa de gera o sclavia, e ia crede a la parla libre. Los ia crede ance ce suiside es asetable e, strana, a seso libre!
La siniciste la plu famosa ia es un studiante de Antistene, nomida Diogene. El ia vide se como un sitadan de la mundo (un “cosmopolitan”), ma, per un periodo, ia abita un amfora grande dejetada. On ave un nara famosa en cual Alexandro la Grande, trovante Diogene dorminte en la sol, ia declara: “Me es Alexandro, la re grande!” Diogene ia responde: “Me es Diogene, la can!” Alexandro ia demanda esce el pote aida el en alga modo. Diogene ia responde par demanda ce Alexandro move car el preveni ce la sol brilia plu sur el.
Aristipo (435–355) ia es ance un studiante de Socrate. Orijinal de Cirene a la costa norde de Africa, el ia reveni ala per fundi sua propre scola, do el ia ensenia la filosofia de edonisme (de la parola elinica per “plaser”). Edonisme es multe simple: Cual nos ta fa, nos fa lo per gania plaser o evita dole. Plaser es la sola bon, e la ateni de plaser es la sola virtua. Moralia es sola un caso de cultur, costumes, e leges, alga cosa cual nos nomi oji relativisme etical. Plu, siensa, arte, e sivilia jeneral es bon sola si los es usosa per produi plaser.
Ma nota ce Aristipo ia ensenia ance ce alga plaseres es plu alta ca otras, e ce nos debe no es sclavos a cualce. El ia es egal bonumorosa en bon tempos e en povria, e el ia despeta mostras vana de ricia.
El e sua studiantes ia vive como un parte de un scola-comunia, do tota ia pratica lo cual los ia predica, incluinte seso libre, a plu ca 2000 anios ante Woodstock. Femes ia es la egales de omes, e no sola en un modo ipotesal: Sua fia Arete ia segue el como la xef de la scola-comunia, ia scrive 40 libros, e ia es onorada par la site de Cirene con la titulo “Lus de Elas”.
Seticisme es oji videda como un cosa bon – “no aseta cualce cosa sola par fida” pote es la slogan per multe filosofistes famosa. Ma orijinal, lo ia es alga plu estrema. Piron de Elis (365–275) es comun videda como la fundor de la scola de seticisme. On crede ce el ia viaja a India e ia studia con la “gimnosofistes” (amantes nuda de sajia), cual ia pote es cualce de multe setas indian. De ala, el ia retrae la idea ce no cosa pote es serta sabeda. La sensas es fasil trucida, e razona segue tro fasil nosa desiras.
Si on pote nunca sabe serta, ta ce nos suspende nosa judi, para disputa sur lo cual va es nunca solveda, e atenta trova alga pas e calmia en esta vive. El ia nomi esta pas e calmia ataraxia. Nota ce, an si on pote sabe serta no cosa, on pote sabe sufisinte multe cosas per vive. La sol va o no va leva doman – ma la probablia es bon ce lo va leva, e como usosa es ansia, an tal?
Simil, si no sistem es ultima suportable, per manteni pas, on pote adota simple cualce sistem cual es la plu comun do on abita aora. Piron ia vive adorante la dios de Elis, an si el ia aseta nunca ce los es plu probable ca cualce otra dios, o an ca no dios. Un seticiste pote aseta multe ideas per oportunia, an si on ave no demostra ultima.
An si, cuando prima videda, esta pare positiva, un de mea studiantes, Annie Lam, ia dise esta:
Si on ta usa la razona de Piron, sclavia ta esiste ancora oji, car afroamericanes ta debe aseta sua rol como propria per manteni pas en la comunia. La plu de sosias ordina se en sistemes ierarcial, donce acel grupos de individuas ci es plu basa en la ierarcia esperia tipal opresa, e en alga esemplos estrema es cisa desumanida e savajida. Me acorda con la idea ce no cosa pote es serta sabeda; ma per esta razona, me crede ce disputas e debate debe aveni e no es descorajida como Piron dise. Sola con la intercambia libre e respetosa de ideas, persones pote developa sua valuas e credes personal en un modo instruida. Me opina ce, si nos ta sacrifia esta intercambia per ateni ataraxia, nos ta sacrifia ance nosa capasia per developa un identia vera, car autorefleta – judi de se e otras – no ta es corajida.
Seticistes plu tarda ia deveni comun entre la studiantes en la academia de Platon. Un de los, Carneade de Cirene (214–129) ia es malfamosa per razona oji a un lado de un tema oji e doman a un otra. El ia dise: “On ave asoluta no criterio per veria. Razona, la sensas, ideas, o cualce otras cual pote esiste – tota de los engana.”
“Sola la instruidas es libre.” – Epicteto
La fundor de stoicisme es Zenon de Cition (333–262) en Cipros. Lo es posible ce Zenon ia es fenisian o partal fenisian. El ia es un studiante de la sinicistes, ma ia es ance influeda par Socrate. Sua filosofia ia es simil a lo de Antistene, ma ia es moderada par razona. Fundal, el ia crede a es virtuosa, e ce virtua es un caso de sede a la vole de Dio. Como otra elinicas ci ia ave sola un dio, Zeno no ia distingui multe entre Dio e natur. Donce, “sede a la vole de Dio” es no otra ca “vive longo natur” (Zen cata fisin).
La scola ia deriva sua nom de la Portico Pintida (stoa poikile) en Atina, do Zeno ia studia. Paseante tra la coredores abrida, el ia instrui sua studiantes sur la valua de apatea, la asentia de pasion, un idea no multe diferente de la idea budiste de nonteni. Par “pasion”, Zeno ia intende la emosia noncontrolada, spesial la desira fisical. Sola par adota esta disposa, el ia crede, nos pote developa sajia e la capasia de aplica lo.
“Permete ce nun rompe tua vole!” el ia dise. Persones concista la mundo par concista se. Comensa par developa un disposa noncurante a dole e plaser, par medita. Sajia aveni cuando razona controla pasion; malia aveni cuando pasion controla nos.
Un otra aspeta de stoicisme es sua crede a la developa de un stato universal, en cual tota persones es frates e sores. Stoicistes ia crede a alga “diretos natural”, un conseta cual on no ia vide denova asta la sentenio 18. Los ia crede ance a la direto per suiside – un parte importante de la tradisiones cultural de la romanes.
La presenta la plu bon de stoicisme es lo par la sclavo elinica Epicteto (50–138 ec), ci ia scrive en la eda roman. On ave ance un libro peti, Meditas, par la imperor roman Marco Aurelio (121–180 ec).
“La dios no debe es temeda; mori no pote es sentida; la bon pote es ganiada; tota cual nos teme pote es vinseda.” – Epicuro
Epicuro (341–270) ia nase sur la isola Samo en Ionia. Cuando el ia ave 19 anios, el ia vade a Atina per studia a la Academia. Ma lo pare ce el ia gusta plu bon la filosofia de Democrito. La scola cual Epicuro ia fundi ia es spesial egaliste e ia aseta e femes e sclavos. Epicuro, lo es suposada, ia scrive 300 libros. Triste, sola pesetas survive.
Epicuro no ia ave multe pasientia per relijio, cual el ia vide como un forma de nonsabe. El ia es spesial zelosa per aida persones a perde sua teme de la dios. Ma el ia dise ance ce la dios esiste, an si los vive a un distantia grande en spasio e no ave multe interesa sur la popla de la tera. Ateisme, on debe comprende, ia es ancora nonlegal en Atina!
Un de la problemes la plu persistente en la crede a un dio es la problem de malia. La esplica de Epicuro es ancora convinsente:
“Esce Dio vole preveni malia, ma no es capas? Alora, el no es omnipotente; Esce el es capas, ma no vole? Alora, el es malvolente; Esce el es e capas e volente? Alora, de do malia veni? Esce el es no capas e no volente? Alora, perce on nomi el Dio?”
Epicuro ia crede ce debate sur metafisica no es usosa, ce un spirito cual survive mori no esiste, ce nos ariva a nosa state presente par evolui, e ce nos ave la capasia de vole libre.
On pote vide, cuasi, un materialisme moderna asi: Tota cosas – incluinte mentes – es composada de atomes e segue la leges natural; Tota sabe deriva de la sensas; Pensas e memorias es no plu ca sensas debil.
Per Epicuro, virtua ia es un via a un gol. La gol es felisia. Lo es bon ce on senti plaser e evita dole, ma on debe aplica razona a sua vive. A alga veses, dole es nesesada per gania felisia. A otra veses, plaser indui nos a plu sufri ca lo merita.
Ance, on ave niveles de dole e plaser, felisias peti e grande. Amia, per esemplo, es un de la plaseres la plu grande. “Un saja ama sua amis como el ama se,” el ia dise, e: “Dona es plu bon ca reseta.” E: “La vive plasente no es posible si on no vive con sajia, onora, e justia; e la vive con sajia, onora, e justia no es posible si on no vive plasente.” El remente me a Benjamin Franklin!
En epicurisme, sosia es videda como nesesada: Lo proteje on de nonjustas. El ia predise utilitarisme par sujesta ce un sosia debe es ordinada per furni la felisia masima a la plu de persones.
Ma la felisia ultima es pas, e Epicuro empresta la parola de Piron per calmia: ataraxia. Sua slogan ia es lathe biosas – vive sin atrae atende. El pote es considerada como la umaniste vera prima, como atestada par esta sita: “Filosofia es un ativia cual usa razona e debate sever per promove la flori de umania.”
La resoma la plu bon de epicurisme es la poesia epica Sur la natur de cosas par la roman Lucretio (95–52).
Nota la similes pratical entre stoicisme e epicurisme, an con sua diferes teorial. Ambos ia es popular en la eda roman, stoicisme en la anios temprana de Roma e entre la sitadanes comun, e epicurisme (an edonisme) en privatia, spesial a la niveles la plu alta de la impero plu tarda.
Alexandro la Grande ia introdui la periodo de istoria nomida “eliniste”: Sua impero ia porta ideas, arte, lingua, e abituas elinica a “la mundo”, tan distante a este como India e a sude como Egipte. Ma, pos sua mori (con sola 33 anios), sua impero ia comensa rompe, con sua jenerales dividente lo entre lunlotra, e la nasiones noncompleta concistada ia reclama sua autonomia. E un popla nova ia comensa domina la Mediteraneo: La romanes.
La influe de la elinicas ia estende plu ca la impero de Alexandro, sua colasa, e an la romanes. Ma la mundo ia deveni un loca diferente, un loca de potiosas grande manobrante entre se, autoriosas sentrida simil a los en Asia, agregas enorme de comersia e mercatos, comun prosima liada a esta autoriosas. Un mundo como esta no es vera un bon loca per pensa e oserva individua.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).