LA ISTORIA DE PSICOLOJIA

La posfreudianes

Carl Jung

Carl Jung

Freud ia dise ce la gol de terapia es consensi la suconsensa. Lo ia es serta la gol de sua labora como un teoriste. An tal, el ia developa un idea multe nonplasente de la suconsensia, a la min. Lo es un calderon de desiras turbante, un cava sin fondo de desiras pervertida e insestal, un tomba per esperias asustante cual reveni per infesta nosa sonias. Franca, lo no sona como alga cosa cual on ta desira per sua consensia.

Un asosior joven de Freud, nomida Carl Jung, ia adota la esplora de esta “spasio interna” per sua labora de vive. El ia ave un educa en teoria freudian, natural, e un sabe parente nonfinita sur mitolojia, relijio, e filosofia. Jung ia es spesial sabosa sur la simbolisme de tradisiones mistica complicada como gnosticisme, alcimica, cabala, e tradisiones simil en induisme e budisme. Si cualcun ta pote investiga la suconsensia e sua abitua de revela se sola en formas simbolin, el ta es Carl Jung.

El ia ave, en ajunta, un capasia per sonia clar e, a veses, revelas mistica (o alusinas). En la autono de 1913, el ia ave un revela de un inonda monstrin sumerjinte la plu de Europa, e lecante a la montanias de sua propre pais, Suiz. El ia vide miles de persones afocante e sivilia ruinada. Alora, la acuas ia cambia a sangue. Esta revela ia es segueda, en la semanas seguente, par sonias de invernos eterna e rios de sangue. El ia teme ce el deveni psicosica.

Ma a 1 agosto de acel anio, la Gera Mundal Prima ia comensa. Jung ia senti un lia de alga spesie entre sua sonia e la gera, e entre se como un individua e la umanas jeneral, cual no pote es esplicada a via. De alora asta 1928, el ia vade tra un prosede dolosa de autoesplora cual ia formi la funda de tota de sua teorias plu tarda.

El ia recorda atendente sua sonias, fantasia, e revelas, e ia desinia, depinta, e sculta los ance. El ia trova ce sua esperias tende formi se como persones, comensante con un om vea e saja e sua acompanior, un xica peti. La om vea e saja ia evolui, tra un cuantia de sonias, a un tipo de guru spirital. La xica peti ia deveni “anima”, la spirito fema, ci ia servi como sua media xef de comunica con la aspetas plu basa de sua suconsensia.

Un nano brun e cuorin ia mostra se, gardante la entra a la suconsensia. El ia es la “ombra”, un acompanior primitiva per la ego de Jung. Jung ia sonia ce el e la nano mata un joven blonde e bela, ci Jung ia nomi Siegfried. Per Jung, esta ia representa un averti contra la peril de la adora de gloria e eroisme cual va causa pronto tan multe tristia tra tota Europa – e contra la peril de alga de sua propre tendes a adora de eroes, pd: de Sigmund Freud!

Jung ia sonia multe sur la mores, la pais de la mores, e la leva de la mores. Estas ia representa la suconsensia mesma – no la suconsensia personal “peti” cual Freud ia regarda como un cosa tan spesial, ma un suconsensia nova, coletiva, de umania mesma, un suconsensia cual pote conteni tota la mores, no sola nosa fantasmas personal. Jung ia comensa vide la dementes como persones infestada par esta fantasmas, en un eda en cual lo no ia es conveninte ce on crede a los. Si nos ta pote recatura nosa mitolojias, nos ta comprende esta fantasmas, deveni plu comfortosa con la mores, e remedia nosa maladias mental.

Criticores ia sujesta ce, multe simple, Jung mesma ia es malada cuando tota de esta ia aveni. Ma Jung ia senti ce, si on vole comprende la jungla, on no pote es contentida par naviga ala e asi prosima a la costa. On debe vade a en, e lo no importa ce lo pare tan strana e asustante.

Biografia

Carl Gustav Jung ia nase a 26 julio 1875, en la vileta suiz Kessewil. Sua padre ia es Paul Jung, un eglesor de la campania, e sua madre ia es Emilie Preiswerk Jung. Carl ia es ensircada par un familia estendeda alga bon educada, incluinte eglesores e persones alga strana.

Sua padre ia fa ce Carl comensa aprende latina cuando el ia ave ses anios, e esta ia comensa ance un interesa longa sur lingua e leteratur – spesial leteratur antica. Estra la plu linguas moderna de Europa, Jung ia pote leje alga linguas antica, incluinte sanscrito, la lingua de la libros santa orijinal de induisme.

Carl ia es un adolesente alga solitar, ci no ia gusta multe la scola, e spesial no ia pote tolera la compete. El ia vade a un scola abitada en Basel, Suiz, do el ia trova ce el es la ojeto de multe menasas jelosa. El ia comensa usa maladia como un escusa, e ia developa un tende embarasante de desmaia su presa.

An si sua eleje prima de carera ia es arceolojia, el ia continua sua educa par studia medica a la Universia de Basel. Laborante su la neurolojiste famosa Krafft-Ebing, el ia deside eleje psiciatria como sua carera.

Pos gradua, el ia prende un posto a la Ospital Mental Burghöltzli en Zürich, su Eugene Bleuler, un esperta sur (e la person ci ia nomi) scizofrenia. En 1903, el ia sposi Emma Rauschenbach. El ia ensenia clases a la Universia de Zürich, ia ave un clinica privata, e ia inventa la asosia de parolas a esta periodo.

Un amiror de Freud, el ia encontra el en Wien en 1907. La nara es ce, pos sua encontra, Freud ia cansela tota sua otra encontras per la dia, e los ia parla tra 13 oras continuante. Tal ia es la efeto de la encontra de esta du mentes grande! Ultima, Freud ia vide Jung como la “prinse erital” de psicoanalise, e sua propre eritor ance.

Ma Jung no ia aseta completa la teoria de Freud. Sua relata ia comensa fri en 1909, en un viaja a America. Los ia es divertinte par analise la sonias de lunlotra (plu divertinte, lo pare, ca xufelborda), cuando Freud ia pare mostra un esede de resiste a la atentas de analise par Jung. Freud ia dise final ce los debe para, car el ia teme ce el va perde sua autoria! Jung ia senti insultada.

La Gera Mundal Prima ia es un periodo de autoesplora dolosa per Jung. Ma lo ia es ance la comensa de un de la teorias la plu interesante de personalia cual la mundo ia vide a cualce tempo.

Pos la gera, Jung ia viaja vasta, visitante, per esemplo, poplas tribal en Africa, America, e India. El ia jubila en 1946, e ia comensa retira se de la atende publica pos la mori de sua sposa en 1955. El ia mori a 6 junio 1961, en Zürich.

Ego, la suconsensia personal, e la suconsensia coletiva

La teoria de Jung divide la mente en tre partes. Prima es la ego, cual Jung ia identifia con la mente consensa. Prosima relatada es la suconsensia personal, cual inclui cualce cosa cual no es aora en la consensia ma pote apare ala. La suconsensia personal es como la comprende cual la plu persones ave de la suconsensia car lo inclui memorias cual es fasil traeda a consensia e los cual ia es supresada per alga razona. Ma lo no inclui la instintos cual Freud ia inclui.

Ma alora, Jung ia ajunta la parte de la psice cual fa ce sua teoria difere de tota otras: la suconsensia coletiva. On pote nomi lo sua “erita psical”. Lo es la reserva de nosa esperias como un spesie, un tipo de sabe cual tota de nos ave de nase. Ma nos es nunca direta consensa de lo. Lo influe tota de nosa esperias e conduis, spesial la esperias e conduis emosial, ma nos pote conose lo sola nondireta, par esamina la influes.

On ave alga esperias cual mostra plu clar ca otras la efetos de la suconsensia coletiva: la esperias de deveni enamada a la vide prima, de la senti de “ja videda” (la senti ce on ia es ja en esta situa), e la reconose direta de alga simboles e la sinifias de alga mitos – on pote comprende tota como la junta subita de nosa realia esterna e la realia interna de la suconsensia coletiva. Esemplos plu grande es la esperias de crea compartida par artistes e musicistes tra la mundo e en tota edas, o la esperias spirital de misticas de tota relijios, o la paraleles en sonias, fantasias, mitolojias, naretas per enfantes, e leteratur.

Un bon esemplo es lo cual ia es multe resente discuteda: la esperia prosima a mori. Lo pare ce multe persones de multe cultures diferente trova ce los ave recordas multe simil cuando on revive los de un encontra con moria. Los descrive parti de sua corpos, vide multe clar sua corpos e la avenis sirca los, deveni tirada tra un tunel longa en dirije a un lus briliante, vide relatadas mor o figures relijiosa ci espeta los, e sua delude cuando los debe parti de esta sena felis per reveni a sua corpos. Posible, tota de nos es (jenetical) “construida” per esperia mori en esta modo o modos simil.

Arcetipos

La contenidas de la suconsensia coletiva es nomida arcetipos. Jung ia nomi los ance dominantes, imagos, imajes mitolojial o primeval, e alga otra nomes, ma lo pare ce “arcetipos” ia vinse contra estas. Un arcetipo es un tende nonaprendeda per esperia cosas en un modo spesifada.

La arcetipo no ave sua propre forma, ma lo ata como un “prinsipe organizante” a la cosas cual nos vide o fa. Lo opera en la modo en cual instintos opera en la teoria de Freud. Prima, la bebe desira sola alga cosa per come, sin sabe cual comeda el desira. El ave un anela alga nondefinida cual pote es sasiada par alga cosas e no par otras. Plu tarda, con plu esperia, la enfante comensa anela alga cosa plu spesifada cuando el fami – un botela de lete, un biscoto, un omaro grilida, un peso de piza en la stilo de New York.

La arcetipo es como un buco negra en spasio: On pote sabe ce lo esiste sola car lo tira materia e lus a en se.

Un de multe desinias en la Libro Roja par Jung

La arcetipo de madre es un esemplo spesial bon. Tota de nosa asendentes ia ave madres. Nos ia evolui en un ambiente cual ia inclui un madre o un sustitua per un madre. Nos ia ta survive nunca sin nosa lia a algun curante en nosa periodos como enfantes sin defende. Lo es razonable ce nos es “construida” en un modo cual refleta nosa ambiente de evolui: A esta mundo nos veni preparada per nesesa la madre, per xerca el, per reconose el, per interata con el.

La arcetipo de madre es nosa capasia inerente per reconose un relata spesial, lo de “madria”. Jung ia dise ce esta es alga astrata, e nos debe projeta la arcetipo a la mundo e a un person spesifada, plu comun nosa propre madre. An si la arcetipo no ave un person real spesifada, nos tende personi la arcetipo, cual es per dise: cambia lo a un carater mitolojial. Esta carater simboli la arcetipo.

La arcetipo de madre es simbolida par la madre primeval, la “Madre Tera” de mitolojia, par Eva e Maria en tradisiones cristian, e par simboles min personal como la eglesa, la nasion, un foresta, o la mar. Seguente Jung, algun de ci sua madre no ia sasia la esijes de la arcetipo pote deveni un ci spende sua vive en xerca comforta en la eglesa, o en identifia se con la “pais madrin”, o en medita sur la figur de Maria, o en un vive a mar.

De la arcetipos plu importante, nos ave la ombra, cual representa nosa asendentes animal, e es comun la loca de nosa consernas sur malia e nosa propre “lado oscur”; la anima, representante la lado fema en omes, e la animo, representantee la lado mas de femes; e la “persona”, cual es la personalia surfasal, la parte de nos sur cual nos permete ce otras vide lo.

Otra arcetipos inclui padre, enfante, familia, eroe, virjin, animal, la saja vea, la androjine, Dio, e la om prima.

La se

La gol de vive es reali la se. La se es un arcetipo cual representa la transende de tota oposas, afin cada aspeta de sua personalia es egal espresada. On es alora zero e ambos de mas e fema, de ego e ombra, de bon o mal, de consensia e suconsensia, de un individua e la tota de creada. An tal, con no oposas, on ave no enerjia, e on sesa ata. Natural, on no nesesa plu ata.

Afin nos no deveni tro mistica, pensa a lo como un sentro nova, un posa plu ecuilibrada, per la psice. Cuando on es joven, on foca a la ego e es ansiosa sur la trivia de la personalia. Cuando on es plu vea (si on ia developa como on debe), on foca alga plu profonda, sur la se, e deveni plu prosima a tota persones, tota viventes, an la universo mesma. La person autorealida es min egoiste.

La esamina de Myers-Briggs

Katharine Briggs e sua fia Isabel Briggs Myers ia trova ce la ideas de Jung sur personalias es tan compulsante ce los ia deside developa un esamina par paper e lapis. Esta idea ia deveni la Indicador de Tipos Myers-Briggs, e es un de la esaminas la plu popular, e la plu studiada.

Dependente de sua responde a sirca 125 demandas, un person es poneda en un de 16 tipos, con la comprende ce alga persones pote trova se a un loca entre du o tre tipos. La tipo dise multe sur un person – sua gustas e sua odias, sua elejes de carera, sua conveni con otras, etc. Persones ci ia usa la esamina tende gusta lo. Entre esaminas de personalia lo ave la cualia noncomun ce lo no es tro judinte: No tipo es multe negativa, no tipo es tro positiva. E, en loca de evalua como “demente” un person es, Myers-Briggs sola abri sua personalia per esplora.

La esamina ave cuatro scalas. Estrovertinte-Introvertinte (E-I) es la plu importante. Rexercores ia trova ce sirca 75% de persones es estrovertinte. Estrovertintes dirije sua atende a estra, e tende prefere la compania de otras. Introvertintes dirije sua atende a en, a sua pensas e imajina. Los es plu comfortosa en solitaria o con poca otras en un ambiente alga pasosa.

A pos on ave Sensante-Intuinte (S-N), con ce sirca 75% de persones es sensante. Persones sensante depende de sua sensas per informa sur la mundo, e los fida sua sensas. La intuintes depende plu de “sensas interna” o intuis per comprende cosas. Sensantes tende restrinje se a la surfas de persones e cosas; intuintes tende xerca comprende plu profonda e min vasta.

Seguente es Pensante-Sentinte (T-F). Pensantes valua pensa, natural, razona e lojica. Sentintes valua senti, emosias. An si estas es egal distribuida tra la popla, rexercores ia trova ce du tris de omes es pensante, e du tris de femes es sentinte. Posible esta pare tro stereotipal, ma nota ce Pensante e Sentinte es egal valuada par jungianes, e ce un tri de omes es sentinte e un tri de femes es pensante. Car sosia valua pensa e senti como diferentes, omes sentinte e femes pensante trova comun difisiles con la espetas stereotipal de otras. Pensantes tende vide sentintes como tro emosial e nonrazonante, e sentintes vide pensantes como tro fria e noncurante.

La final es Judinte-Persepinte (J-P), cual es un ajunta par Myers e Briggs a la sistem orijinal de Jung. Jeneral, persones judinte es plu curante, posible inibida en sua vives. Persones persepinte es plu spontan, a veses nonatendente.

Si on es un estrovertinte e un judinte, on es o un pensante o un sentinte, dependente de lo cual es plu forte. Si estrovertinte e persepinte, on es o un sensante o un intuinte. Ma un introvertinte judinte es o sentinte o intuinte, e un introvertinte persepinte es un pensante o sentinte. Judinte e Persepinte es egal distribuida en la popla.

Discute

Multe persones trova ce Jung ave multe per dise a los. Esta persones inclui spesial autores, artistes, musicistes, produores de filmas, teolojistes, relijiosas, e studiantes de mitolojia. Esemplos inclui la mitolojiste Joseph Campbell, la produor de filmas George Lucas, e la autor de naras siensal Ursula K. Le Guin. Cualcun con un interesa a creosia, spiritalia, fenomenos psicica, la universal, etc, ta trova un spirito familial en Jung.

Ma siensistes, incluinte la plu de psicolojistes, no es tan comfortosa con Jung. Jung suporta intera la vista teleolojial (como multe teoristes de personalia), e el fa un plu paso per parla de la interlia mistica de sincroni (ce du avenis pote es liada, no en la mundo material, par causa e efeto, ma en la suconsensia coletiva). El proposa un suconsensia do cosas no es fasil disponable a la oio empirical, e el vade plu e proposa un suconsensia coletiva, cual ia es nunca, e va es nunca, consensa.

Vera, Jung prende un metodo cual es en esense la reversa de la reduisme de psicolojia materialiste: Jung comensa a la niveles la plu alta, e deriva de los la niveles plu basa de psicolojia e fisiolojia.

An psicolojistes ci loda sua teleolojia e posa antireduiste pote no es comfortosa con el. Como Freud, Jung atenta trae tota cosas a sua sistem. El ave poca spasio per acaso o situa. Personalia – e la vive jeneral – pare “supraesplicada” en sua teoria.

Alfred Adler

Alfred Adler

Alfred Adler ia nase en la suburbes de Wien a 7 febrero 1870, la enfante tre, fio du, de un mercator iudi de gran e sua sposa. Cuando un enfante, Alfred ia developa racite, cual ia preveni el de pasea asta cuatro anios. A sinco anios, el ia prosimi a mori de pneumonia. A esta eda, el ia deside deveni un mediciste.

Alfred ia es un studiante promedia, e ia prefere jua estra casa plu ca es caxida en scola. El ia es sosial, popular, e ativa, e ia es conoseda per sua atentas a suprapasa sua frate plu vea, Sigmund.

El ia reseta sua diploma medical de la Universia de Wien en 1895. En sua anios en universia, el ia deveni un membro de un grupo de studiantes sosialiste, entre ci el ia trova sua sposa futur, Raissa Timofeyewna Epstein. El ia es un inteletosa e un ativiste sosial ci ia veni de Rusia per studia en Wien. Los ia sposi en 1897 e ultima ia ave cuatro enfantes, de ci du ia deveni psiciatristes.

El ia comensa sua carera medical como un oftalmolojiste, ma el ia cambia pronto a pratica jeneral, e ia institui sua ofisia en un parte de Wien de la clase plu basa, fasante la Prader, un combina de un parce de divertis e un sirco. Sua pasientes ia inclui persones de la sirco, e lo ia es sujestada (Furtmuller 1964) ce la fortias e debilias noncomun de la presentores ia condui el a sua intuis de inferioria e compensa.

El ia turna a psiciatria, e en 1907 ia es invitada per deveni un membro de la grupo de discute de Freud. Pos scrive paperes sur inferioria organal, cual ia es armoniosa con la opinas de Freud, el ia scrive prima un paper consernante un instinto de combate, cual Freud no ia aproba, segueda par un paper sur la sentis de inferioria de enfantes, cual ia sujesta ce on debe vide la ideas de sesalia de Freud en modo metafor e no leteral.

An tal, Freud ia eleje Adler per la presidente de la Sosia de Analise de Wien e la coeditor de la revisteta de la organiza. Ma Adler no ia para sua critica. Un debate entre suportores de Adler e de Freud ia es organizada, ma lo ia fa ce Adler, con nove otra membros de la asosia, resinia per formi la Asosia de Psicoanalise Libre en 1911. Esta asosia ia deveni la Asosia per Psicolojia Individua en la anio seguente.

En la Gera Mundal 1, Adler ia servi como un mediciste en la armada de Osteraic, prima a la fronte rusce, e plu tarda a un ospital per enfantes. El ia vide personal la dana cual gera causa, e sua pensas ia verje cresente a la conseta de interesa sosial. El ia senti ce, si umanas ta survive, los ta debe cambia sua modo de vive!

Pos la gera, el ia es envolveda en projetas variosa, incluinte clinicas liada a scolas nasional e la instrui de enseniores. En 1926, el ia vade a la SUA per parla, e el ia aseta un posto visitante a la Universia de Medica de Long Island. En 1934, el e sua familia ia parti de Wien. A 28 maio 1937, en un serie de parlas a la Universia de Aberdeen, el ia mori de un ataca de cor.

Emprende

Alfred Adler ia proposa un forte solitar de motiva su tota de nosa condui e esperia. Cuando sua teoria ia prende ja sua forma la plu matur, el ia nomi la forte “la emprende per perfetia”. Lo es la desira cual nos ave per pleni nosa potensias, per vade plu e plu prosima a nosa ideal. Lo es multe simil a la idea oji popular de autoreali.

“Perfetia” e “ideal” es parolas problemosa. A un lado, los es goles multe positiva. Esce nos no atenta ateni la ideal? Ma, en psicolojia, los reseta frecuente un conota negativa. Perfetia e la ideal es, par sua definis, cosas cual on no pote ateni. Multe persones, en fato, ave vives multe triste e dolosa en sua atentas per ateni perfetia! Otra teoristes, como Karen Horney e Carl Rogers, ia asentua esta problem. Adler ia parla sur lo ance, ma el ia vide esta tipo de idealisme negativa como un perverti de un comprende plu positiva de idealisme.

“Emprende per perfetia” no ia es la espresa prima cual Adler ia usa per refere a esta forte solitar. Sua espresa la plu temprana ia es la “forte agresiva”, cual refere a la reata cual nos ave cuando otra fortes es frustrada, como nosa nesesa per come, per es sesal sasiada, ateni goles dial, es amada, etc. Lo ta es plu bon si el ia ta nomi lo la forte de sertia, si on vide agresivia como fisical e negativa. Ma esta ia es la idea cual ia causa prima alga frica entre el e Freud. Freud ia teme ce lo va diminui la rol esensal de la desira per seso en sua teoria psicoanalisal. An si Freud no ia gusta la idea, el mesma ia introdui un cosa simil plu tarda en sua vive: la instinto per mori.

Un otra parola cual Adler ia usa per motiva fundal ia es “compensa”, o la emprende per vinse. Car tota de nos ave problemes, debiles, inferiorias de un tipo o un otra, Adler ia senti, temprana en sua scrives, ce nosa personalias pote es esplicada par la modos en cual nos vinse o compensa per – o no vinse o compensa per – esta problemes. La idea ia continua ave un rol importante en sua teoria, ma el ia rejeta la eticeta per la motiva car lo sujesta ce la problemes es lo cual fa ce un person deveni lo cual el es.

Un otra espresa temprana ia es “protesta masin”. El ia nota un cosa multe evidente en sua cultur (e en no modo asente de la nosa): Xicos es respetada plu ca xicas. Xicos desira, frecuente desperante, es videda como forte, agresiva, serta – pd: “masin” – e no debil, pasiva, o dependente – pd: “femin”. La punto, natural, ia es ce omes es en alga modo fundal plu bon ca femes. Los ave clar la potia, la educa, e (parente) la talento e motiva nesesada per fa “cosas grandes”, no como femes.

On pote ancora oia esta en la tipos de comentas cual persones plu vea ave sur enfantes: Si un bebe mas esije sua propre desiras (la protesta mas), los dise ce el es un xico natural. Si un bebe fema es cuieta e timida, el es lodada per sua feminia. Ma, si la xico es cuieta e timida, los deveni ansiosa ce el pote crese per deveni un xico femin, o an un om ge. O, si la xica es autofidante e demanda sasia, los nomi el un xica masin o an plu mal, e los atenta calmi la jenitores par dise ce el va cambia pos alga anios.

Ma Adler no ia vide la sertia e susedes de omes como la resulta de un superioria inata. El ia vide lo como un refleta de la fato ce omes ia es corajida per deveni serta en vive, e femes ia es descorajida. Ambos ia comensa sua vive con la capasia per “protesta”. Car tan multe lejores ia malcomprende sua intendes, Adler ia restrinje sua usa de la idea e la espresa.

La espresa final cual el ia usa, ante cambia a “emprende per perfetia”, ia es “emprende per superioria”. Sua usa de esta espresa refleta un de la radises filosofial de sua ideas: Friedrich Nietzsche ia developa un filosofia cual ia vide la vole per potia como la motiva fundal de la vive umana. An si emprende per superioria refere clar a la desira per deveni plu bon, lo conteni ance la idea ce nos vole es plu bon ca otras, en loca de vole es plu bon en modo personal. Plu tarda, Adler ia tende usa esta espresa plu per refere a un emprende nonsana o neurosica.

Stilo de vive

Multe de esta jua con parolas refleta un xerca per un teoria de personalia vera diferente ca lo representada par lo de Freud. La teoria de Freud ia es lo cual nos ta nomi aora un teoria reduiste: El ia atenta redui tota de sua ideas a la nivel fisiolojial. Plu, Freud ia tende atenta talia la person en partes teorial plu peti – pe: id, ego, supraego.

Adler ia es influeda par la scrives de Jan Smuts, un politiciste e filosofiste de Sudafrica. Smuts ia pensa ce, per comprende persones, on debe comprende los plu como interas unida, en loca de un colie de pesos, e on debe comprende los en la contesto de sua ambiente, fisical e sosial. Esta es nomida olisme, e Adler ia aseta completa lo.

Prima, per refleta la idea ce nos debe vide persones como interas, e no partes, el ia deside nomi sua teoria “psicolojia individua”. La parola “individua” sinifia leteral “nondivideda”.

Plu, en loca de parla sur la personalia de un person, con la sinifia tradisional de cualias interna, strutures, dinamicas, desacordas, etc, el ia prefere parla sur la stilo de vive. La stilo de vive refere a como on vive, como on maneja sua problemes e relatas interpersonal. El ia dise: “La stilo de vive de un arbor es la individualia de un arbor cual espresa se e formi se en un ambiente. Nos reconose un stilo cuando nos vide lo contra un fondo de un ambiente diferente de lo cual nos espeta, car alora nos comprende ce cada arbor ave un motif de vive e no es sola un reata macinal a la ambiente.

Teleolojia

La idea ce la stilo de vive es “no sola un reata macinal” es un modo du en cual Adler difere de Freud. Per Freud, tota cosas cual ia aveni en la pasada, como traumas en enfantia, determina lo cual on deveni en la presente. Adler ia vide motiva como un caso de move a la futur, en loca de es propulsada par la pasada. Nos es tirada a nosa goles, intendes, ideales. Esta es teleolojia.

La move de cosas de la pasada a la futur ave efetos dramosa. Car la futur no es ja asi, un teoria teleolojial sur motiva sutrae la nesesa de cosas. En un teoria tradisional e macinal, causas resulta efetos: Si A, B, e C aveni, alora X, Y, e Z debe aveni, nesesada. Ma on no debe ateni sua goles o sua ideales, e los pote cambia tra tempo. Teleolojia aseta ce la vive pote es difisil e nonserta, ma lo ave sempre la posible de cambia.

Un otra influe a la pensa de Adler ia es la filosofiste Hans Vaihinger, ci ia scrive un libro nomida “La filosofia de ‘como si’”. Vaihinger ia crede ce la veria ultima va es sempre ultra nosa sabe, ma ce, per intendes pratical, nos nesesa crea verias partal. Sua interesa major ia es siensa, donce el ia usa esemplos como la verias partal de protones e eletrones, ondas de lus, gravita como la contorse de spasio, etc. Contrastante con lo cual multe nonsiensistes tende suposa, estas no es cosas sur cual cualcun ia vide o demostra ce los esiste: Los es construidas usosa. Los opera per la momento, los permete ce nos partisipa en siensa, e nos espera ce los va condui nos a construidas plu bon e plu usosa. Nos usa los “como si” los ta es vera. El ia nomi esta verias partal “nützliche Fiktionen”, o imajinas usosa.

Vaihinger, e Adler, ia nota ce nos usa esta imajinas en nosa vive dial. Nos condui como si nos sabe ce la mundo va es asi doman, como si nos es serta de la sinifias de bon e mal, como si tota cual nos vide es como nos vide lo, etc. Adler ia nomi esta idea “finalisme imajinal”. On pote comprende la plu fasil esta espresa si on pensa a un esemplo: Multe persones condui como si un sielo o un enferno ta esiste en sua futur personal. La plu persones oji no pensa a estas como fatos demostrada, ma si los es real o imajinada, los gida nosa condui. E “finalisme” refere a la teleolojia de esta: La imajinas es (posible) en la futur, ma pote influe nosa condui oji.

Adler ia ajunta ce, a la sentro de cada stilo de vive, on ave un de esta imajinas, un imajina importante sur ci nos es e a do nos viaja.

Discute

Criticas de Adler tende envolve la demanda esce sua teoria es un siensa, o a cual grado. La corente dominante de psicolojia oji es esperimental, cual sinifia, entre otra cosas, ce la consetas cual un teoria usa debe es mesurable e manipulable. Alora, esta sinifia ce un orienta esperimental prefere variables fisical. Adler ia usa consetas fundal cual es distante de la fisical: Emprende per perfetia? Como on pote mesura lo? O compensa? O sentis de inferioria? O interesa sosial?

La metodo de esperimenta ave ance un suposa fundal: ce tota cosas opera seguente la regulas de causa e efeto. Adler ta acorda serta ce cosas fisical segue los, ma el ta rejeta ce umanas segue los! En loca, el vade longo la via teleolojial, ce persones es “determinada” par sua ideales, goles, valuas, “imajinas final”. Teleolojia sutrae la nesesa de cosas: un person no nesesa responde en un sola modo a un situa; un person deside sur elejes; un person crea sua propre personalia o stilo de vive. De la perspetiva esperimental, esta cosas es iludes cual un siensiste, an un teoriste de personalia, no osa aseta.

On ave multe otra psiciatristes e psicoanalistes e terapistes con otra teorias. On no pote asentua tro multe ce esta persones, incluinte Freud, ia ave un efeto sur psicolojia, e spesial sur psicolojia clinical. Seguente e ofrente sua propre ideas ia es Anna Freud, Heinz Hartman, Erik Erikson, Otto Rank, Sandor Ferenczi, Karen Horney, Erich Fromm, Harry Stack Sullivan, Henry Murray, Gordon Allport, Gardner Murphy, George Kelly, Carl Rogers, Ludwig Binswanger, e multe otras.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).