LA ISTORIA DE PSICOLOJIA

La Lumina

La sentenio de 1600 ia es un de la tempos la plu stimulante pos Atina antica. An si la potia de relijio ia es ancora enorme, on pote vide poxes de tolera en locas diferente a tempos diferente, do un mente grande ia pote vera vola. England ia es alga tolerante, si sola par causa de sua diversia. Nederland ia es la loca la plu bon: Un pais peti, combatente contra atacas militar e economial, de cada lado, ia nesesa tota la suporta cual lo ia pote reseta, de persones con cualce relijio, seta, o an eresia.

La problemes sentral ia es la mesmas como los de la elinica antica: De cual es la mundo construida? Como nos pote sabe cualce cosa con sertia? Cual es la difere entre bonia e malia? Ma aora los ia es informada par sentenios de siensa, leteratur, istoria, esperias multicultural, e, natural, filosofia scriveda. Posible on debe aseta ce la filosofistes ia esplica mera plu sur la funda de la elinicas antica. Ma la esplicas ia es merveliosa! Esce Rembrandt ia desinieta mera?

Nos va prosimi a esta eda con un filosofiste pos un otra, per mostra la “batalias” entre materialisme (pe: Hobbes) e idealisme (pe: Berkeley), entre empiricalisme (Locke) e razonalisme (Spinoza), e entre fida (Leibniz) e ateisme (Bayle).

Thomas Hobbes

Thomas Hobbes Thomas Hobbes ia nase a 5 april 1588. Sua padre, un eglesor anglican, ia abandona la familia cuando Thomas ia es ancora joven. Fortunosa, sua frate plu vea ia susede finansial, e ia envia Thomas a Oxford. El ia servi per un periodo como la secretor per Francis Bacon. Viajante tra Europa, el ia visita Galileo. El ia spende des-un anios en Paris, e ia es la ensenior privata per la prinse escluida de Cimri (ci ia deveni Charles 2).

En 1651, el ia scrive La leviatan, un libro sur cual on suposa ce lo conserna politica, ma cual covre ance multe otra cosas. La libro es nomida per un monstro de mar en la libro Job en la Biblia. Lo ia es intendeda como un simbol de la potia de Dio, ma Hobbes ia usa lo per simboli la stato.

Hobbes ia vide se como un siensiste, ma el ia es vera plu un razonaliste: Veria pote es atenida sola si nos serti ce nos defini bon nosa termas e razona con lojica! Ma sua concluis ia es empiricaliste: No cosa es en la mente cual no es prima en la sensas. Esta ia condui el alora a un materialisme pur: Tota cualias es vera materia movente. Cosas “de la mente”, como memorias e imajina, es no plu ca imajes dejenerante de la sensas, e tota de los ave la forma de materia movente en la serebro.

La vole es, per Hobbes, sola la desira final cual on senti ante cuando on ata – donce, vole libre es asurda. Tota motiva es egoiste e ultima liada a survive. La emosia fundal negativa es teme, la emosia fundal positiva es la desira per potia. Bonia e malia es pur cosas sujetal. En esta modo, Hobbes ia vade ultra Descartes: No sola animales es macinas, nos es ance. La psicolojiste moderna B. F. Skinner ia es un amiror de Hobbes.

Car bonia e malia es sujetal e nos es egoiste motivada, nos va fa cualce cosa cual nos nesesa per sasia nosa nesesas. Sosia debe alora controla la individua si nos vole ave cualce pas! Donce, sosia developa sistemes de recompensas e punis, aproba sosial e condena sosial. Leviatan – la governa – es acel mal nesesada.

Premostrante Rousseau, Hobbes ia sujesta ce nos sede a sosia afin nos pote evita un vive pur primitiva, cual el ia descrive como “repulsante, savaje, e corta”. Ma, contrastante con Rousseau, el ia crede ce sosia es un acorda entre renor e renada, no entre egales. Ultima, la re debe ave potia asoluta per la survive de sivilia. Democratia, el ia dise, es sola rena par retoricistes e demagogos ci manipula fasil la manada.

Relijio, ance, es un metodo per manteni la pas. Lo es no plu ca un teme de potias nonvidable cual la manada ia aseta como real. Superstisio es la mesma cosa, sola no tan asetada como real. On debe nota ce Hobbes no ia es un ateiste: El ia es un deiste, cual sinifia ce el ia ave un crede a un creor, un movor prima intelijente ci ia inisia tota de esta mundo, ma ci no nesesa interveni pos cuando sua leges mecanical de natur ave sua efeto.

Cuando el ia reveni a England, el ia trova se frontida par multe criticores. Fortunosa per Hobbes, sua studiante pasada, aora re Charles 2, ia permete el en sua casas e ia furni un bon pension. El ia mori a 4 desembre 1679, con eda de 91 anios.

Baruch de Spinoza

Baruch de Spinoza Baruch de Spinoza ia nase en Amsterdam a 24 novembre 1632. Sua jenitores ia es iudis portuges ci ia evade la persegue cual los ia sufri en sua propre pais. Triste, sua madre ia mori cuando Baruch ia ave sola ses anios.

El ia reseta un educa relijiosa, ma sua padre ia instrui el en sujetos secular variosa, esperante ce Baruch va entra un carera en comersia. Baruch ia deveni fluente en multe linguas, e el ia ave un ama spesial en matematica, spesial jeometria. Sua padre ia mori en 1654, cuando Baruch ia ave 22 anios.

En discute sua credes con sua amis, el ia confesa ce el duta multe de sua credes relijiosa tradisional, como la realia de un vive pos mori. Los ia reporta el a la sinagoga pronto pos sua conversa. Pos cuando los ia atenta convinse Baruch a reteni privata sua opinas, la rabis ia esclui el de la sinagoga en 1656. A acel tempo, esclui (iudi o cristian) ia inclui la pratica de evita – pd: nun en la comunia ia pote parla o coresponde con el en cualce modo.

Ma Baruch – aora nomida Benedictus (“bondiseda”, la parola latina per la parola ivri baruch) – ia ave multe amis estra la comunia iudi, e los ia proteje el tra sua vive. Ma en alga caso, el ia es forsada a move a Rijnsburg, un vila peti, en 1660 pos un menasa de mata, e denova en 1663 a Voorburg, prosima a la Haag, e final a la Haag mesma.

El ia suporta se tra tota como un fabricor de lentes. A esta eda, acel ocupa ia inclui no sola la fabrica de oculos, ma ance lentes per telescopios e microscopios – la cosas la plu nova en tecnolojia. El ia condui un varia de esperimentas ance. Nonfortunosa, la esposa constante a la polvo de la vitro ia dana sua pulmones.

Benedictus ia publica, anonim, la Trata sur teolojia e politica en 1670. Esta ia es un critica ruinante de leteralisme biblial, e ia es pronto condenada par la comunia relijiosa de Nederland.

Sua obra la plu importante, Etica, ia es comensada a multe anios a ante, en 1662. El ia atenta publici lo en 1675, ma ia es asustada par rumores ce sua vive ta es perilida si el ta fa lo. El ia mori de tuberculose a du anios a pos, a 20 febrero 1677, con eda de 45 anios. Sua amis ia publici sua Etica e otra obras nonpublicida en sua onora en la mesma anio.

La titulo completa de la libro ia es Etica, demostrada en la modo de jeometria, car el ia presenta sua razona en la mesma modo como un matematiciste ta presenta un demostra jeometrial. Esta es serta un modo sever de scrive filosofiste, e lo no es fasil per leje. (Dagobert Runes ia edita Etica en 1957 per fasili la leje per studiantes moderna, sin omete cualce cosa.)

Seguente Spinoza, la sustantia (cual fundi tota realia, acc: la esiste, o la es) ave du atribuidas (lados o aspetas). Si on regarda realia de un angulo, tra la sensas, on vide lo como materia. Ma si on regarda realia de un otra lado, como a interna de nos, nos vide lo como pensa. El ia sujesta ce on ave un cuantia infinita de aspetas, ma estas es la sola du cual es evidente per umanas.

Donce, la corpo (o serebro) e la mente (o spirito) es un sola mesma cosa videda de du perspetivas diferente. Do on ave ativia material, on ave ance pensa. Do on ave pensa, on ave ativia material. No tota pensa es otenable a lo cual me persepi como me mesma. Multe resta nonconsensa. Ma lo continua an tal.

Esta “aspetisme duple”, como nos nomi lo aora, pare multe bon, ma lo pote gida nos a panpsicisme. Panpsicisme es la idea ce cada cosa material ave un lado mental, e la reversa. Persones ave mentes, animales ave mentes, plantas ave mentes, an rocas e casas ave mentes. La Tera mesma ave un mente. Natural cuando nos retira de persones, esta mentes es plu e plu nonconsensa e sin un senti de se mesma, ma an tal…

Lo ance gida nos a la conseta la plu famosa de Spinoza, la conseta sur cual la resta de sua teoria es fundida: Dio e Natur es la mesma cosa, e la mesma con tota cual esiste, mental e fisical. Dio es la mente de la universo; la universo es la corpo de Dio. Esta es nomida panteisme – Dio es a cada loca e en cada cosa – ma en la eda de Spinoza, lo ia ave un otra nom: ateisme.

Como Hobbes, Spinoza es un mecaniciste. El crede sola a determinisme, no a la vole libre. Per nos como umanas, esta determinisme veni en la forma de desiras, cual deriva de nosa nesesa de survive. Tota cosas, el ia dise, ave la motiva de autoconserva, tota cosas es “egoiste”.

El ia dise ce nos atenta crese nosa potia, pe: nosa capasia de conserva nos mesma. Alora, el identifia esta potia con virtua! Donce, la bon es definida como lo cual es usosa per nos, e la mal es lo cual es danante per nos. Bonia avansa nosa bonstate, malia descrese nosa bonstate. Bonia es persepida como plaser, malia es persepida como dole.

Ma nos ave multe desiras. Normal, un es plu forte ca la otras, e nos fa lo cual nos desira la plu. Ma comun, los desacorda. Esta desacorda mesma descrese nosa bonstate, e donce es dolosa. Como nos pote diminui la dole de nosa vives, alora?

Sosia pote aida a alga grado. Par furni recompensas e punis, loda e culpa, lo ajunta cosas nova a nosa lista de desiras cual pote posible es plu potiosa ca alga desiras e min ca otras. Ultima, la sosia fundi un consiensa en la plu de nos. Spinoza ia vide consiensa como aprendeda, no inata.

Ultima, nos debe depende de nos mesma: Prima, Spinoza ia dise, nos debe gania alga controla de nosa desiras. Cuando los es ultra nosa controla, cuando los controla nos, el nomi los pasiones. Los es ultra nosa controla car los opera nonconsensa e donce no es asedable par razona. Par developa un “idea clar” de los, on pote cambia pasiones a emosias simple, cual es influable par razona. Sigmund Freud ia dise, a tre sentenios plu tarda, ce nos debe “fa ce la nonconsensa deveni consensa”.

Un modo per cambia un pasion a un emosia es par trasa sua radises. Si on pote vide de do lo veni, sua ativias deveni clar – consensa – e on pote trata plu bon los. Un idea sentral a multe varias de psicoterapia.

Un otra modo per trata pasiones es par vide la nesesa de cosas. Natur es lo cual lo es, Dio vole lo cual el vole, e nun pote cambia esta. Sede a la nonevitable e on va es multe plu pasosa, a la min. Un person saja, per esemplo, pote vide ce deveni coler contra persones nonplasente no resulta ce los deveni plu plasente. En fato, la atenta fa no plu ca dole on. La ama e compati, a la otra lado, es tipal recompensada, e lo no dana on tan multe. Con Buda e Jesus, Spinoza ia dise ce ama pote concista odia.

El ia dise ance ce persones saja “desira no cosa per se mesma cual nos no desira ance per la resta de umania” (Etica, iv, 48). Esta presede la comanda categorial de Immanuel Kant par un sentenio.

Ma sola un emosia pote vinse un otra emosia. Donce, razona mesma debe deveni un emosia, e un emosia potiosa, afin lo pote vinse la otras. El ia nomi esta emosia “la ama de la inteleto per Dio”, cual sinifia ance la ama de natur, natural. Lo inclui ance la aseta de la vole de Dio, e de la leges natural. Sabe de Dio/Natur es la virtua ultima, e la plaser ultima.

Rejetada par la engleses como un ateiste e par la franseses como tro relijiosa, Spinoza ia ave un influe grande sur la filosofistes deutx veninte, incluinte Goethe, Hegel, Schopenhauer, e Nietzsche. E Deutxland es do psicolojia ia flori.

John Locke

John Locke Algas vide John Locke como “la padre de la lumina”. El ia nase a 29 agosto 1632, la mesma anio como Spinoza. Sua padre ia es un avocato e un puritan, ci ia ensenia a sua fio la valua de representa e libria relijiosa. La padre de John ia mori de tuberculose cuando John ia ave 29 anios, e el ia lasa un erita peti a John.

John ia vade a Oxford, ia reseta sua diploma mestral, e ia instrui ala. Plu tarda, el ia studia medica e ia deveni la dotor personal per la dux de Shaftsbury (avo de la filosofiste con la mesma titulo).

Comensante en 1675, Locke ia studia en Frans. Cuando el ia reveni a England, el ia trova ce la clima political su re James 2 ia deveni min ca bonveninte, e donce ia move a Nederland. Ala el ia scrive sua obra grande de psicolojia, Esajo sur comprende umana.

En 1689, el ia reveni a England pos cuando William e Mary ia prende la trono de James 2. Ala el ia publici sua obras – la Esajo, sua du Tratas sur governa, e du leteras consernante la nesesa de tolera relijial. En 1691, el ia retira a un cason de un ami, e ia mori en 1704 con 72 anios.

Sua Tratas solitar ta garantia a el un de la locas la plu alta en istoria prosima. En los, el ia trasa la fundas de governa representante, inclui diretos natural, la acorda de la governada, la proteje de propria, tolera relijial, separa de eglesa e stato, e la sertis e ecuilibra entre la ramos esecutante e legal. Sua ideas ia deveni la funda de la Declara de autonomia, la constitui american, spesial la Declara de diretos, e la Declara de la diretos de umanas de Frans. No mal.

Contra Hobbes, Locke ia vide persones como avente un natur positiva, cual conteni instintos per la bon sosial e la capasia de razona. Car nosa natur es positiva, nos debe permete a nos e otras la libria per developa acel natur. Per esta razona, cada de nos debe sede alga grado de libria afin otras pote es simil libre per developa sua potensias.

Leges ia es creada, no per restrinje nos de destrui lunlotra, ma per permete ce nos espresa nosa natures positiva e razonante. E donce un governa es asetable sola si sua leges promove lo cual es nosa natur – libria e razona. E lo pote fa esta sola si lo es fundida sur la acorda de la governada. Si Hobbes remente tu a Skinner, Locke debe remente tu a Carl Rogers.

Sua Esajo sur comprende umana ia ataca un otra idea popular de sua eda: Multe eruditas ia crede ce la idea de Dio e la ideas de bonia e malia es plantada en nosa mentes a nase, posible par Dio mesma. Ma cuando Locke ia regarda la varia grande de credes, noncredes, e moralias, el ia conclui ce esta cosas no pote posible es inata.

El ia aseta, natural, ce on ave reflexes e instintos e simil, ma estas es no plu ca segues fisiolojial de move, no ideas. On ave alga ideas, aprendeda par esperia, cual es tan temprana aprendeda e tan coerente refortida ce los ave la pare de inata. Ma lo es sola un pare!

En la curso de razona ce on ave no ideas inata, el ia construi ance la stadio per du razonas futur, prendeda par Berkeley e Hume. Prima, el ia nota ce, si nos atenta trova materia, nos vide no cosa ma cualias cual nos atribui a materia – e nunca materia mesma. La idea de materia no es empirical! Esta ia es esplicada par Berkeley.

Punto du, el ia nota ce si nos atenta trova mente, nos vide no cosa ma la cualias cual nos atribui a mente. Nos vide nunca, empirical, un mente! Esta ia es esplicada par Hume.

Locke no fa la saltas cual Berkeley e Huma va fa. El es tro pratical per esta. El dise ce nos es, sin duta, coreta en crede a materia e mente. Vive no pote es razonable sin los. Ma ancora, los no es empirical sertida. A veses, on nomi el un agnostica metafisical: El crede ce on ave mente e materia (e ce los interata, en un modo nonconoseda), ma nun pote demostra sua esiste.

La ideas cual Locke ia introdui ia es zelosa adotada par filosofistes franses e ance la pensores engles e american. Los ia tradui el a un revoluiste, e sua filosofia de natur umana a sensisme e mecanicisme. En fa esta, los ia perde multe de la profondia de Locke.

George Berkeley

George Berkeley George Berkeley ia nase a 12 marto 1685 a Castel Dysert en Er. El ia vade a la Universia de la Trinia en Dublin, do, entre otra cosas, el ia studia John Locke.

En 1709, el ia scrive Un esajo a un teoria nova de vide. El ia demanda, si un om ci ia nase sieca ta gania la capasia de vide, cual cosa el ta vide? Berkeley ia razona ce el ta vide un misca de cualias sin sinifia, cual el ta interprete como en sua mente, e serta sin estende plu ca sua oios. Sola un lia repeteda entre lo cual el vide e la mesma ojetos tocada ta gida el a la aprende de formas, distantias, etc. Operas futur cual ia revive la sensa de vide en persones ci ia nase sieca ia suporta sua teoria.

Spasio (estende), donce, es un construi mental, un caso de coordina la relatas entre lo cual nos vide e lo cual nos esperia tra toca. On pote vide esta idea de spasio como un cosa mental denova en la filosofia de Kant.

En 1710, el ia scrive La prinsipes de sabe umana. Si, como Locke ia dise, tota sabe veni tra la sensas, alora nos pote sabe no cosa cual no veni tra la sensas. Estende en spasio, la formas de cosas, sua resiste a toca, sua colores, sabores, odores, tota de estas debe veni tra la sensas. Ma cuando materia veni tra la sensas? Cuando on vide materia, o toca lo, o proba lo? Tota cual on esperia tra la sensas es cualias, e nunca un sustantia material.

Materia es donce un teoria sin atesta. Car la ateisme de la eda de Berkeley ia depende multe de materialisme, el ia crede ce el ia fa un colpa matante!

Natural, no sola ateistes crede a materia – cuasi cadun crede a lo. Lo es “sensa comun”. Dr Samuel Johnson ia pensa ce el ia dona la refuta perfeta de la idea de Berkeley cuando el ia pedi un roca, tan forte como el pote: On no ia pote duta la dole cual la roca ia causa a el! Ma Berkeley ia nota ce la sola cual cualcun pote sabe sur la roca es sua forma, loca, color, pd: informas de la sensas, incluinte la sensa de dole, si on ta es tan stupida ce on ta pedi lo.

Esse est percipi, Berkeley ia dise: “esiste es persepi”.

Alora, cual aveni a la cosas cuando nos no es persepinte los, vidente los, tocante los, o pedinte los? Esce los desapare sempre cuando nos turna a via? Berkeley ia dise: serta no! Cosas – como colies de cualias – resta sempre, ma en la mente de Dio, cual inclui tota.

Cuando un arbor cade en la bosce, e nun es ala per oia lo, esce lo produi un sona? Berkeley ta dise: “Si, lo fa un sona, car Dio oia lo.” Esta es posible la varia de idealisme la plu pur e la plu bon espresada de tota tempo. Sola en budisme mahaiana nos pote trova un idea simil, en la filosofia de “mente sola”. En acel caso, on refere no a Dio ma a Buda-mente.

El ia deveni la bispo (anglican) de Cloyne, Er en 1734. El ia mori a Oxford en 1753 con 68 anios. La universia de California a Berkeley ia es nomida per el.

Gottfried Leibniz

Gottfried Leibniz Gottfried Leibniz ia nase a 21 junio 1646. Sua padre ia es un profesor de filosofia a la Universia de Leipzig. Gottfried peti ia es un jenio joven, natural, e ia reseta sua diploma dotoral a la eda de 20 anios. El ia spende alga tempo en viaja sirca Europa, probante cuasi cada filosofia cual la continente ia pote ofre el.

En 1672, el ia vade a Frans como un diplomata. Ala, el ia comensa inventa calculo e un calculador cual pote multipli e divide. En 1676, el ia visita Spinoza en Nederland (do el ia leje la manoscrito per Etica), e ia vade a pos a Hanover per servi la prinse ala. En 1700, el ia fundi la Academia de Berlin.

La projeta major de sua vive ia es la reconsilia de catolicisme e protestantisme. El ia fali, clar. Lo va nesesa multe plu ca jenio per reconsilia acel du!

Sua obra major en la rena de psicolojia, es Esajos nova sur comprende umana, un refuta de Locke, scriveda en 1703 ma no publicida asta 1765.

Sua punto fundal ia es ce mente no es un tabula rasa, un tableta limpa pasiva sur cual la esperias scrive, como Locke (e Aristotele) ia sujesta. La mente es un cosa complicada cual opera sur e muta la esperias. “No cosa es en la mente cual no ia es en la sensa” el ia dise, parafrasente Locke, “estra la mente mesma”. Esta ia inspira Kant e multe psicolojistes en tempos plu resente.

Leibniz ia sujesta ance ce cuando nos es vivente, la mente es nunca intera reposante, an en dormi profonda. En fato, lo funsiona frecuente an cuando nos no es consensa de lo. Esta conseta de la nonconsensa ia influe multe Schopenhauer e, plu tarda, Freud.

Leibniz ia ave un metafisica multe noncomun. El ia comensa con la mesma tipo de seticisme como Descartes. Ma el ia fini con un metafisica idealiste cual el nomi monadolojia, cual vade plu ca an la metafisica de Berkeley. Monadas es spiritos individua. Cada spirito conteni en se la “persepi” de la universo intera. La idea no es ce on ave un universo intera estra nosa spiritos cual tota de nos persepi como un ojeto – spiritos es tota cual esiste! Nos esperia comun nos mesma como interatante con otras – “monada a monada”, on pote dise. Ma Leibniz esplica ce nos interata sola parente, e cada de nos es en sua universo interna. Monadas, el ia dise, es “sin fenetra”.

Nos persepi consensosa sola un peso peti de esta universo interna – nosa “punto de vista”. Me no es consensa de la aspeta de la interna de mea stomaco, o de la pensas de un otra, o de lo cual aveni sur alga planeta jirante sirca Alfa de la Sentauro. Tota esta e plu es “en” me, ma es sola nonconsensa persepida.

An si cada spirito ave sua propre “punto de vista”, tota spiritos conteni la mesma persepi de la universo. Esta es lo cual el ia nomi armonia. Ma alga spiritos ave un vista plu clar, plu completa, plu consensa ca otras. Sola un spirito singular es intera consensa, e conteni tota “puntos de vista”. Acel spirito es Dio.

Leibniz ia deveni plu e plu isolida e povre tra tempo, car el no ave un sponsor political. El ia mori en 1716, e sola sua secretor ia vade a sua funera.

Pierre Bayle

Pierre Bayle Pierre Bayle ia nase a 18 novembre 1647, la fio de un eglesor protestante – pd: un ugonote – en Frans sude. El ia es enviada a un universia jesuita per reseta la educa la plu bon, e ia es convertida a catolicisme ala. Cuando el ia reveni, el ia converti a protestantisme. La resulta ia es ce el ia deveni un erese recorente, un cosa multe perilosa en sua eda.

Alora sua padre ia envia el a Geneva per studia, do el ia descovre Descartes. Bayle ia ensenia per un tempo en Frans, ma ia trova alora ce el nesesa fuji a Rotterdam, en Nederland, do el ia deveni ultima un profesor. El ia sufri de doles de testa e depresa, e ia sposi nunca.

En 1682, el ia publici anonim Pensas diversa sur la cometa. Referente a un cometa resente cual ia interesa cadun, el ia scrive contra la superstisios variosa de sua eda e la crede a miracles. En la libro, el ia nota ce, consernante atas e moralia, el no ia pote vide un difere entre catolicas e protestantes, e entre cristianes, iudis, muslimes, paganes, e an ateistes! (Nota ce George Washington ia dise alga cosa multe simil.)

En Amsterdam en 1684, el ia crea un jornal nomida Novas de la republica de leteras. El mesma ia scrive tota la articles. Entretempo, sua jenitores e sua frate ia es matada en la persegue de la ugonotes. Donce el ia scrive un libro sur tolera. Ma tolera ance no ia es sur la ajenda de la protestantes, e el ia perde sua profesoria. “Ta ce Dio salva nos de la incuisisio protestante!” el ia scrive.

Sua obra major ia es La disionario, cual ia es plu simil a un ensiclopedia de filosofia, relijio, leteratur, etc. Scrivente tra 14 oras per dia, el ia scrive 2600 pajes. En esta obra masosa, el ia “desconstrui” (como nos ta dise oji) un cuantia grande de naras biblial, credes relijiosa, teorias filosofial, incluinte tal pesetas como la credes de la peca orijinal e la Trinia. El ia sujesta an ce, si Dio e Satan esiste vera, Satan es ganiante! El ia ajunta sempre, pos dise esta estremas, ce natural, no bon cristian ta crede un tal cosa.

Pos multe anios de condena par la potias relijiosa, el ia mori de tuberculose a 28 desembre 1706. Ma La disionario ia deveni multe popular entre la inteletosas de Europa, e ia ave un influe grande a pensores tra plu ca un sentenio.

Cuando on entra a la sentenio de 1700, on trova relijio perdente un batalia contra la fortias de razona e siensa. An si persones promedia ia vade ancora a sua eglesas, ia batiza sua bebes, e ia prea per pardona, la elites educada ia vade a deisme, panteisme, e an ateisme. Estas ia inclui la inteletosas de Frans catolica, e la “padres fundinte” en America colonial: Benjamin Franklin, Thomas Jefferson, James Madison, e an George Washington ia es deistes, e John Adams ia es un unitarian. Descovres siensal e inventas ia crase la sosia tradisional en la 300 anios seguente. Psicolojia ia atenta segue, ma sola en modo lenta per alga tempo.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).