Pos la eda medieval, la situa en Europa ia deveni plu bon: la economia ia boni; on ia ave un reveni a construi, catedrales, universias, sites; un reveni a “lusosia”, como paper, teatro, musica, la artes jeneral; un reveni a inventa, como la busola e primi; un reveni a esplora – Africa, America, la Pasifica. Lo ia es la Renase, cual on dati, aprosima, de 1400 a 1600. La eda ia es enerjiosa, interesante, e perilosa.
La aristocratas ia gania la potia supra la monarcias avietin e an la mano sever de la eglesa, a min per esta periodo. Donce, on ia ave colies grande de esta persones de la clase alta, comun rica, e amante la idea de se mesma. Pensores, relijiosa e secular, ia es librida, a un grado, de la autoria sentral e potiosa de la eglesa, per crea sua propre filosofias relijiosa – a veses razonante e a veses completa nonrazonante. E mercatores ia descovre ce mone pote compra cuasi tota cosas, incluinte la respeta tradisional cual la aristocratas ia reseta. Vera, un titulo aristocrata e la ricia de un mercator ia es un combina perfeta per un bon sposi.
Esta aristocratas e mercatores ia crede ce umania es perfetable: Nos pote deveni umanas plu bon. Plu importante, nos pote deveni plu potiosa e rica – plu aristocrata. Multe atende ia es mostrada a la gol de condui como un cavalor o dama, como refletada, per esemplo, en la libro gidante per condui sofisticada par Baldesar Castiglione, La libro de la person de la corte.
Esta persones ia es pratical, interesada par avenis real e persones real en la mundo real. Los ia es individualiste e competosa, e ia crede tipal a la idea ce la mundo es un caso de “can come can”, e los ia gusta sua politica e ia gusta jua bruta.
Ma, los ia es ance contra la inteleto e an orgulosa en sua nonsabe. Los ia tende vide la eruditas como seca e nonpratical, ci ia pote posible predise eclises, ma no ia pote probable lia sua propre sapatos, e serta no ia es capas de gania ricas o maneja imobilas.
E los ia es superstisiosa, spiritiste, fasinada par astrolojia, Egipte antica, la cabala, alcimica, majia – sua varia de nosa promove de la “eda nova”.
Du avenis es spesial representante de la Renase: La prima ia es primi. Johann Gutenberg (sirca 1400–1467) de Mainz ia inventa la primador e tipos movable, e alora ia primi, en 1455, la Biblia de Gutenberg.
La aveni du ia es la descovre de la “mundo nova”, cual ia sinifia cuantias grande de oro e arjento e un economia internasional ensendeda, e un modo de evade per persones nonfelis con la vive en Europa – cual alga deutxes ia nomi Lebensraum – spasio per vive). Esta es comun atribuida a Cristoforo Colombo (1451–1506), ma lo inclui tota de la esplorores (o esplotores) no studiada en scola.
Un otra aspeta de la Renase ia es umanisme, cual sinifia un interesa o foca a umanas e sua bonstate, asi e aora, e no a Dio e la vive pos mori, o la ativias de santas e eroes de la Biblia de anios pasada. Petrarca (1304–1374), per esemplo, ia scrive istoria con un asentua a personalia, e es comun videda como la umaniste prima, a min pos la filosofistes de anticia.
On ave alga filosofistes en la temprana de la Renase ci ia espresa plu clar esta idea de umanisme. Giovanni Pico della Mirandola (1463–1494), per esemplo, ia crede ce la filosofistes (per dise, Platon e Aristotele) e cristiania acorda a la funda. El ia debate per un vole libre e ia vide umania como un lia entre la mundo fisical e la mundo spirital.
Desiderius Erasmus de Rotterdam (1467–1536) ia recomenda un compromete entre fida e umanisme, e ia atenta preveni la esedes de la reformi par e la catolicas e la protestantes. Un credor forte a vole libre, el ia scrive contra la conseta de geras justa, e ia demanda ce sua lejores eserse tolera, compata, e jentilia.
Thomas More (1478–1535), un ami de Erasmus e canselor per la re malfamosa, Henry 8, ia scrive un nara nomida Utopia, en cual el ia descrive un sosia perfeta multe simil a la compromete par Erasmus entre fida e umanisme. Cuando el ia refusa reconose sua re como la xef de la eglesa engles (e no la pape en Roma), esta re Henry 8 ia comanda la destesti de Thomas. La eglesa catolica ia santi el, alora.
Niccolo Machiavelli (1460–1527) ia ave un vista diferente ca esta filosofistes – ma ancora umaniste. El ia scrive sur politica bruta en un libro nomida La prinse en 1513. Sua reputa ia deveni tan negativa ce “Nico Vea” (de “Niccolo”) ia deveni un nometa per la diablo mesma. Ma poca persones reconose ce el ia segue La prinse con La discute, en cual el discute democratia como la sistem cual el ta prefere. Algas crede ce el merita la titulo de la psicolojiste sosial prima.
E esta ia es spesial la eda de artistes e autores. Entre la artistes ia es Leonardo da Vinci (1452–1519) e Michelangelo (1475–1564) en Italia, e Albrecht Dürer (1471–1528) en Deutxland. Plu tarda en la Renase, on ia ave El Greco (1541–1614) en Espania e Rembrandt van Rijn (1606–1669) en Nederland. Entre la scrivores, on ia ave Montaigne (1533–1592) en Frans, Cervantes (1547–1616) en Espania, e William Shakespeare (1564–1616) en England. On ia ave multe otras.
En la eda medieval, la autoria ultima ia es clar la Dio, e la pape ia es sua parlador. Eresia ia es comun, natural, ma esclui e prisoni moncal ia es la punis major. Alora, en 1215, la incuisisio ia veni, e eresia ia deveni punable par mori. Espania, spesial, ia es un pais de estremistes relijiosa. Torquemada, la incuisisior grande de Espania de 1483 a 1498, ia fa famosa la incuisisio espaniol.
Martin Luther (1483–1546) ia cloi sua 95 teses (puntos de nonacorda con la condui de la eglesa) sur la porte de la eglesa de la castel de Wittemburg. Sua teses ia foca a la vende de favores – documentos cual escusa pecas – par la eglesa, e ia nega la primia de la pape. El ia asentua la idea ce nos nase como pecores (un erita de la peca orijinal de Adam e Eva), la asentia de vole libre, e nosa nesesa asoluta per la pardona de la Dio. Luther ia tradui la biblia a deutx, e sua dialeto de deutx ia deveni la funda de la deutx de educa e leteratur asta aora. El ia scrive ance alga sujestas multe negativa condenante la povres e la iudis.
Jean Calvin (1509–1564) de Frans norde ia deveni protestante e ia es forsada a fuji a Suiz. Ala, el ia predica obedi sin restrinje a Dio e la prinsipe de predestina, cual dise ce, car Dio es omnisiente, El sabe ja ci va vade a sielo e ci va vade a enferno. Par gania potia political en ajunta a potia spirital, el ia rena la site de Genève como un tirania, simil a alga tiranos relijiosa de oji: no alcol, no dansa, no aposta; no icones, no candelas, no insenso en la eglesas; la obliga de vade a eglesa per tota. El ia condena la unitarian espaniol Michael Servetus, ci ia veni a Calvin per proteje, a arde vivente per eresia. (Un unitarian es algun ci no crede a la Trinia – la eresia la plu mal; an oji, la eglesas protestante de la SUA no aseta unitarianes como cristianes, an si la Trinia no es notada a cualce loca en la Biblia.)
La re Henry 8 ia rena England de 1509 a 1547. Car el ia ave difisiles en consepi un eritor, el ia divorsa (e esecuta) un sposa pos un otra. La problem, natural, no ia pote es en la corpo de la re! Cuando la pape ia refusa ofre un divorsa fasil de Catalina de Aragon, el ia declara se como la xef de la eglesa engles e ia prende tota propria moncal a sua tesoreria. Ma la prinsipes de sua eglesa ia resta catolica, per la plu. An si videda como protestante, la eglesa engles e sua fie, la eglesa episcopalian, manteni bon relatas con la eglesa catolica asta oji.
A la otra lado, Filipe 2 de Espania (rena 1556–1598) ia desira restora catolicisme a sua gloria presedente. Sua politica nasional ia es composada de coraji la incuisisio – cual ia causa la arde coletiva de ereses e la opresa sever de la moros e iudis restante en Espania.
Felipe ia es spesial iritada par la gera, fada par protestantes, per la autonomi de Nederland de Espania. Elizabeth 1 de England (rena 1558–1603), ci el ia cortea, ia coraji secreta piratia contra la flotilas espaniol, cual ia es portante montes de arjento de la mundo nova. La enemia ia culmina en la destrui de sua Armada Grande en 1588.
La Reformi ia gida la eglesa catolica a reformi se, ma no ante mata un cuantia grande de protestantes per eresia. E la protestantes ia mata ance catolicas e otra protestantes (protestantes ia formi nunca un corpo acordante). Catolica o protestante, esta no ia es bon dias per relijio.
En matematica, un cuantia de avansas ia aveni: Francés Pellos de Nice ia scrive La compendio de la abaco, e ia inventa la separador desimal en 1492. Thomas Harrior, la astronomiste ci ia descovre la manxas solal, ia crea la simboles cual nos usa aora en aljebra. John Napier de Scotland ia inventa logaritmos, cual ia permete ce William Oughtred developa la regla de calcula – cual on pote vide como un computador analoja simple – en 1622. E René Descartes mesma ia inventa jeometria analisal.
Biolojia e medica ia ave ance alga descovres: Peracelso (1493–1541 – Theophrastus Bombastus von Hohenheim ia es sua nom vera!) ia reconose ce vive ave sua funda en cimica e fisica, e debe es esplicada en esta modo. En 1553, Michael Serveta – la mesma person ci Calvin ia arde a pira en Genève – ia descovre la sirculi de sangue en la pulmones. William Harvey (1578–1657), mediciste per re James 1 e re Charles 1 de England (e Francis Bacon, discuteda a su), ia esplica la sirculi de sangue. El ia promove ance la idea ce tota animales veni de un ovo (en un eda en cual la jenera spontan de moscas ia es la crede de la plu de persones).
Strumentos ia propulsa la multe progresa en siensa. La microscopio composada ia es inventada en 1595 par Zacharias Janssen de Middelburg en Nederland. La telescopio ia es inventada par sua visina, un om deutx nomida Hans Lippershey en 1608. Galileo ia inventa la termometre en 1603, e sua studiante Evangelista Torricelli ia inventa la barometre en 1643.
(Un nota: lentes de vitro ia esiste ja tra sentenios a ante. “Petras de leje” (lupas) ia esiste de 1000 ec en Venezia. Roger Bacon ia sujesta la idea de oculos per leje en 1264, e la oculos prima ia aveni en Firenze, Italia, sirca 1280. Un aristocrata nomida Amati es sujestada como un inventor posible. Los ia es videda como cuasi un miracle par la veas de la eda. A la otra lado, oculos per la miopes (ci nesesa aida per vide distante) ia aveni sola en la sentenio de 1500 (sur la nas de Pape Leo), e bifocales no ia es inventada asta Benjamin Franklin en la desenio de 1780.)
Alora, on ave la astronomistes grande. Nicolas Copernico de Polsca (1473–1543) ia introdui la sistem solal eliosentral. La eglesa ia demanda, natural, perce Dio no pote nos – sua crea spesial – en la sentro? Como on pote reconsilia esta con la Biblia? E esce esta no desacorda con esperia direta? Johannes Kepler (1571–1630) ia ajunta la leges de la move de planetas, pd: ce los ave vias elise, no sirculo. Esta ia sujesta ce la Dio es an plu nonperfeta ca la sujesta de Copernico!
Si astronomistes ia ave un tempo difisil con la eglesa, on debe prea ce on no ta developa la ideas de Copernici o Kepler! Giordano Bruno (1548–1600) de Nola, prosima a Napoli, ia crede a un universo infinita e sin sentro, con teras noncontable viajante sirca soles noncontable, cada con plantas e animales e persones. Plu, el ia es un panteiste. Panteisme es la crede ce Dio es trovada tra tota natur, ce El es, vera, identica con la universo. Cuando persones dise oji “Dio es en tota cosas e tota persones”, los dise en fato alga cosa cual un panteiste ta dise, e per cual on ia pote es ardeda a pira o pendeda de un arbor asta multe resente. Ma esta ideas ia ave un efeto potiosa a Spinoza, ci va es discuteda en un otra article.
Pos un tempo corta como un monce dominican, Bruno ia viaja tra la sites de Europa asta cuando un aristocrata de Venezia ia invita el a reveni. Esta mesma aristocrata ia transfere el a la incuisisio en 1592. Bruno ia es prisonida per oto anios, ma ia refusa retira sua ideas. Final, a 17 febrero 1600, el ia es ardeda a pira en la Plaza de Flores en Roma, nuda e con un clo tra sua lingua. En 1889, un sculta de el ia es erijeda en la mesma plaza, e sua mori es onorada par pensores libre tra la mundo a cada anio.
Francis Bacon (1561–1626) ia nase a 22 janero 1561. Sua padre ia es la “senior de manteni la selo real” su Elizabeth 1 (simil a la secretor de la tesoreria su la presidente de la SUA oji). Cuando sua padre ia mori temprana, el ia resta sin imobila, e donce ia comensa studia la lege.
A la eda de 23 anios, el ia es elejeda a parlamento, do el ia es un promovor forte de tolera de relijios, e sua fortunas ia comensa boni. En 1607, re James 1 ia eleje el per la rol de solisitor jeneral; en 1613, la avocato jeneral; e en 1617, la senior de manteni la sela real, como sua padre. En la anio seguente, la re ia declara ce el es un baron e la senior canselor, pd: la ministro prima.
Sua ama vera, an tal, ia es siensa e filosofia. El ia scrive Novum Organum de 1620, cual ia refina la arte de pensa lojical, e ia proposa un “metodo nova” per siensa. Bacon ia sujesta ce nos ta usa indui – move de fatos a teoria (e no de la teoria – o la Biblia – a la “fatos”). El ia es cauta sur ipoteses – sur cual el senti ce los es plu probable superstisio o pensa esperante ca cualce otra cosa – ma ia sujesta vera lo cual nos nomi aora la proba de ipoteses, en la forma de un prosede de elimina esplicas alternativa.
En 1621, pronto pos cuando la re ia leva el a visconte, la parlamento ia acusa el de aseta sobornas. El ia prende serta multe sobornas, ma tota persones en sua situa ia aseta los ance, e la acusa ia es vera un colpa political a la re.
Ma, car el no ia ave alora un rol political, el ia pote continua seria la siensa e filosofia cual el ia ama. El ia comensa un projeta, con la aida de la re, nomida “la renovi grande”, cual ia es un revisa de tota la siensas. Fundal, la renovi grande ia envolve la purga de nos mesma, e spesial de nosa inteletos, de prejudis cual el ia nomi “idoles”. El ia discute cuatro:
En 1624, el ia publici La Atlantida nova, un nara utopian sur un isola en la Pasifica sude renada par siensistes. Los abita un loca simil a un universia nomida la Casa de Salomon (nomida per sua fundor), e ia es elejeda per sua roles par esaminas de sua meritas, como la filosofistes-res en la La republica par Platon. Esta ia es posible la model per la Sosia Real (de siensistes) en England. En La Atlantida nova, el ia previde multe inventas moderna, incluinte autos, aviones, radios, e anesteses.
Bacon ia mori en 1626, a la eda de 65 anios, pos developa la gripe en cuando el ia esperimenta con conserva gal par jela. El es videda par multe como la padre de filosofia brites, e la inteletosas de Frans ia dedica sua Encyclopédie monumental a el en 1751.
Galileo Galilei (1564–1642) ia nase en Pisa, Italia a 18 febrero 1564, la mesma anio en cual William Shakespeare ia nase, e la mesma dia en cual Michelangelo ia mori. Cuando el ia ave 18 anios, el ia descovre la prinsipe de la pendulo. A 22, el ia inventa la balansa idrostatical. Pos perfeti sua telescopios, el ia descovre, en 1610, cuatro de la nove lunas de Jupiter (cual nos conose aora como la lunas galilean), e la anelos de Saturno, e la fases de Venus.
El es la plu famosa per sua lege de gravita, cual dise ce du cosas de la mesma grandia e forma, ma de pesas diferente, ta cade a la mesma rapidia tra la mesma media. Ce el ia mostra esta par cade cosas de la tore apoiante de Pisa es probable un mito – ma ci sabe?
En filosofia, el ia es la person prima ci ia distingui entre cualias prima e cualias du, cual ia deveni tan importante en filosofia engles. La cualias prima es la cualias fisical de materia cual on pote mesura, e donce pote es la sujeto de analise siensal. Cualias du, a la otra lado, es cosas cual nesesa la presentia de un vivente consensa: sabores, colores, sonas… El ia crede ce estas pote deveni la sujetos de siensa sola si los pote es cambiada a cualias prima.
Galileo ia suposa ce la teoria de Copernico es un fato demostrada, e ia ensenia tal lo. Ma la eglesa, spesial la jesuitas, ia aseta lo sola si on presenta como un ipotese, en la mesma modo como alga fundalistes oji tolera la ensenia de evolui sola si on presenta lo como no plu ca un teoria entre multe.
Galileo ia indica a sua criticores ce la biblia no debe es lejeda en modo leteral. Si on leje tal lo, on fini con un cuantia enorme de asurdas e contradises. Lo es intendeda per es lejeda como metafor. On pote vide ce Galileo ia ave problemes con la potias de la eglesa. A su es alga sitas de un letera cual el ia scrive a la duxesa grande Christina de Toscana en 1615:
… No cosa fisical cual la esperia de la sensas pone ante nosa oios, o cual demostras nesesada mostra a nos, debe es dutada (e an plu condenada) par la atesta de linias de la Biblia cual pote ave alga sinifia diferente su sua parolas. … Me no senti obligada a crede ce la mesma Dio ci ia dona a nos nosa sensas, razona, e inteleto ia intende ce nos no usa esta donadas.
— De paje 607 de The Age of Reason Begins par Will Durant, orijinal de Discoveries and Opinions par Galileo e editada par Stillman Drake, pajes 177 and 183.)
En 1616, la incuisisio ia comanda ce Galileo debe sesa ensenia la teoria de Copernicus, e, plu, ia condena tota publicidas e libros, par cualce autor, cual fa lo. Galileo, probable recordante la fortuna de Bruno a sola 16 anios plu temprana, ia cuieti sua lesones. Un esajo par un studiante ia causa ce cosas deveni turbante denova, donce Galileo ia parla a la pape mesma. La pape no ia sede.
El ia completi sua libro sur la teoria de Copernico an tal, ma ia presenta lo como no plu ca un ipotese, an ponente lo en la forma de un dialoga entre suportores e desaprobores. Natural, la fato ce la parlor contra Copernico ia es nomida “Stupida” no ia aida la caso de Galileo con la jesuitas. La jesuitas ia ataca la libro, an disente ce Galileo ia es un peril plu grande per la eglesa ca Luther e Calvin. (Plu prosima a nosa eda, esta ia es probable coreta.)
Cuando el ia ave 68 anios, tra cuatro interogas, el ia es menasada con tortura (ma nunca torturada), e comandada a retira sua credes. El ia refusa, pico min forte a cada ves. Los ia declara ce el es culpable de eresia. Ultima, el ia es restrinjeda a sua propre casa, ma libre per ensenia e scrive. El ia es multe fortunosa.
Galileo ia mori a 8 janero 1642. Siensa ia sufri un colpa grande en la paises catolica, con ce multe siensistes ia teme mostra sua ideas. Esta ia move la sentro de descovre siensal a la paises norde, no car protestantisme ia es plu tolerante de siensa, ma car la eglesas de esta paises ia ave min autoria legal. En 1835, la eglesa ia sutrae la libros de Galileo de sua lista de libros proibida. E la eglesa ia demanda per pardona en 1999.
René Descartes (1596–1650) ia nase a 31 marto 1596 en La Haye, Frans, la fio de un avocato rica. Triste, sua madre ia reseta tuberculose a poca dias pos sua nase e ia mori. La enfante ia mori cuasi ance, e René ia resta como un enfante debil.
Pos un bon educa par la jesuitas, con 17 anios el ia comensa vaga tra Europa, incluinte a un ves en la armada de Baiern. En 1628, el ia move a Nederland, do el ia resta per la plu de sua vive. René ia sposi nunca, ma el ia ave un concubina e un fia, ci ia mori con sola sinco anios.
Sua contribui xef, per cual el va es eterna conoseda como la padre de filosofia moderna, es la metodo de duta. En sua libro Meditas, el ia deside comensa filosofia de la comensa, par duta cada cosa posible – cosas, Dio, ego, la eglesa, Aristotele… – asta cuando el ta trova alga cosa cual el no pote duta e de cual el pote construi un filosofia nova.
Sua conclui ia es, serta, ce on ave sola un cosa cual el no pote duta: La fato ce el es ala, dutante! Cogito ergo sum – me pensa, donce me es. De ala, el ia continua a conclui ce on ave alga otra cosas egal serta: Dio, tempo e spasio, la mundo, matematica. Esta cosas, el ia dise, es inata de la comensa de vive en la mente. On deriva los, no de esperia, ma de la natur de sua mente mesma.
Ma on ave plu en Descartes: El ia es un matematiciste ance, e el ia descovre un varia de cosas matematical, spesial la analise jeometrial (la aplica de aljebra a jeometria, como la coordinas cartesian), cual el ia trova, on suposa, cuando el ia es en lo cual el ia nomi un “stufa” – posible un sauna. El ia es ance un siensiste, e ia fa alga inovas en mecanica e otica ance. E el ia es la siensiste prima ci ia nota la idea de la reflexe.
La idea ce alga de nosa atas es reflexes condui nonevitable a la posible ce tota atas es reflexes. Descartes ia teori ce animales (a la min) no nesesa ave un spirito: Los es automatas. Car el ia es un bon catolica, el ia esclui umanas: Nos ave un spirito, an si el ia aseta ce el no sabe como la spirito e la corpo interata.
En istoria, persones usa lo cual es la plu interesante sirca se per teori sur otra cosas, spesial se mesma. Oji, cadun parla de cosas psicolojial par usa analojas de computadores e modeles de la prosede de informa. En la eda de Descartes, lo ia es la mecanica de orolojos e sistemes idraulical cual ia es a la fronte de tecnolojia. Donce, el e otras ia sujesta fundal ce la vive – incluinte a la min un parte grande de la vive umana – es mecanical, pd: lo opera par la mesma leges natural como cosas fisical.
Descartes ia fa un paso plu: El ia fa la ipotese deiste. El ia sujesta ce (estra la spirito umana e la vole libre) tota de la crea opera mecanical, e ce Dio ia desinia lo e ia causa ce tota comensa – ma serta El no ia nesesa entre a la prosedes de la mundo, car El es perfeta e sabe tota. Natural, esta sujesta ce Dio no nesesa usa miracles, ce Cristo no ia es un interveni en la curso de istoria, e ce preas ave vera no efeto. Esta ia es un problem.
La teolojistes calviniste de Nederland ia ataca el: En ajunta a sua idea nontradisional de deisme e un universo mecanical, Descartes, la bon catolica, ia crede ance a vole libre, cual no conveni bon a la idea calviniste de predestina (la idea ce Dio sabe esata ci va vade a enferno o sielo). Sua amis, fortunosa, ia interveni per Descartes.
En 1649, Descartes ia es invitada par rea Cristina de Sveria per instrui sua altia. Nonfortunosa, el ia desira ce el veni a la castel a la ora sinco en la matina, a tre dias per semana, tra pluve, neva, e jela. Descartes ia developa pneumonia e ia mori en 1650, con 54 anios.
On debe ajunta un nota sur educa en esta eda mareante. En la sentenio de 1600, an con tota la siensistes e filosofistes grande, sirca 80% de la popla ia es nonalfabetiste – no la “nonalfabetiste funsional” moderna, cual sinifia ce on no leje e scrive multe bon, ma intera noncapas de leje e scrive. Ma cambias ia es veninte. Per esemplo, en 1619, la dux de Saxe-Weimar (Deutxland) ia comanda un educa obligada per tota enfantes entre ses e des-du anios, con un mense de “vacanse” a la tempo de recolie afin los pote labora a la cultiveria – simil a la sistem cual nos ave oji. La parte “obligada” es car, si no, la jenitores ta espeta ce la enfantes labora tra la anio intera.
Jan Komenski (o Comenio, 1592–1670), un bispo de la Frates Moravian, ia scrive la libro-de-aprende prima primida (con desinias!), cual ia es usada tra 250 anios. En la Didactica Magna (“Arte grande de instrui”), el ia presenta prinsipes de educa cual ta pote es usada par cualce scola oji:
“No sola la enfantes de la ricas o potiosas, ma tota enfantes, xicos e xicas, nobiles e nonobiles, ricas e povres, en tota sites, vilas, e viletas, debe es enviada a scola.”
“La educa coreta de enfantes no es composada de pleni sua testas con un masa de parolas, frases, e ideas tirada con lunlotra de autores variosa, ma de abri sua comprende a la mundo esterna, afin un rio vivente pote flue de sua propre mentes, como folias, flores, e fruta salta de la broto sur un arbor.”
“En jua, on pote aprende multe cual va es usosa, plu tarda, cuando la situa nesesa lo.”
“Tota de nos es sitadanes de un mundo, tota de nos es de un sangue. La odia a un om car el ia nase en un otra pais, car el parla un lingua diferente, o car el ave un opina diferente sur esta sujeto o acel, es un folia grande. Sesa, me suplica tu, car tota de nos es egal umana… Ta ce nos ave un gol, la bonstate de umania; e ta ce nos pone a via tota egosia en casos de lingua, nasionalia, o relijio.”
Ma nota, an con tota la reformi relijiosa e progresa siensal, plu ca un milion persones, de ci la plu ia es femes vea, ia es matada como sorsores, de la eda de la Proclama papal sur sorsores de 1484 asta la fini de la sentenio de 1700. On ave an un manual de xasa sorsores, prima publicida en 1486, nomida la Malleus Maleficarum (“la martel de sorsores”): como on pote reconose los, como on debe tortura los per confesa, como on pote efetosa mata los… Femes continua es maltratada oji, serta, ma nos pare deveni plu consensa con ce la mundo entra a la milenio du. A la otra lado, nos ave multe nasiones an oji en cual femes es ancora maltratada en modos egal asustante.
Tortura ia continua en la Renase, e lo no ia desapare de la mundo de oji, en nasiones povre e rica. Serta, tiranos e estremistes relijiosa ave no problem con la usa de tortura. La Olocausto es un esemplo asustante e repulsante. Nos ia ave ance resente an un presidente de la SUA ci ia promove la usa de tortura!
Nota ance ce sclavia, cual ia es un caso minor en la eda media (car serfos ia es tan oportun) ia releva sua testa fea en la concista par la espanioles e portugeses de areas vasta de Africa e la Americas. Multe persones en Espania a la tempo ia crede ce no cristian brava debe labora con sua manos! Nasiones protestante e sua colonias ia trova ce la usa de sclavos es egal profitosa. An si sclavia esiste ancora en alga nasiones povre (e, en la forma de trafica umana, en nasiones rica), lo no es multe comun en la plu de la mundo, xef car la revolui industrial ia fa ce sclavia es tro cara, no car nos es ofendeda par la pratica.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 14 janero 2022 (17:23 UTC).