======Un istoria corta de la lobotomia======
La idea de fa sirurjia a la serebro per boni la sania mental ia comensa sirca 1890, cuando Friedrich Golz, un rexercor deutx, ia estrae partes de la lobes tempal de sua canes, e ia trova ce los ia deveni plu calma e min combatosa. Esta ia es pronto segueda par Gottlieb Burkhardt, la xef de un instituida per dementes en Suiz, ci ia atenta sirurjias simil a ses de sua pasientes scizofrenica. Cuatro ia deveni plu calma; du ia mori.
On ta pensa ce esta ia es la fini de la idea. Ma en 1935, Carlyle Jacobsen de la universia de Yale ia atenta lobotomias frontal e prefrontal a ximpanzes, e ia trova ce los ia deveni plu calma. Sua colaboror a Yale, John Fulton, ia atenta indui un “neurose esperimental” en sua ximpanzes lobotomida par presenta a los siniales contradisente. El ia trova ce los es cuasi imune a la prosede.
Per la paso final, un dotor portuges a la Scola de Medica a la Universia de Lisbon, Antonio Egaz Moniz, ia es nesesada. El ia es un rexercor multe produosa e ia inventa multe bonis importante de la tecnicas de radiogrames per la serebro ante sua rexerca sur lobotomia. El ia servi ance como la ministro de esternas e la ambasador a Espania. El ia es an un de la suscrivores de la Trata de Versailles, cual ia marca la fini de la Gera Mundal Prima.
El ia descovre ce, si on talia la nervos cual pasa de la cortex frontal a la talamo en pasientes psicotica ci sufri de pensas repeteda, on fa un “sircuito corta” a la problem. Con sua asosior Almeida Lima, el ia developa un tecnica cual envolve la fora de du bucos peti a cada lado de la fronte, la inserta de un cotel sirurjial spesial, e la talia de la cortex prefrontal a via de la resta de la serebro. Lo ia dona bon resultas en la vives de alga de sua pasientes. El ia nomi lo la leucotomia, ma aora lo es nomida la lobotomia.
Alga de sua pasientes ia deveni plu calma, alga no. Moniz ia consela cautia estrema en la usa de la lobotomia, e ia senti ce lo debe es usada sola en casos en cual cada otra metodo ia es ja atentada. El ia gania la Premio Nobel per sua labora sur la lobotomia en 1949. El ia jubila temprana pos cuando un pasiente vea ia paralise el par xuta a sua dorso.
Walter Freeman, un mediciste american, con sua colaboror James Watts, ia atenta sua lobotomia prima en 1936. El ia es tan sasiada par la resultas ce el ia comensa fa multe miles de plu. En fato, el ia comensa un campania de propaganda per promove la usa de lobotomias. El ia es ance famosa per inventa lo cual es nomida la lobotomia par picajelo. Nonpasiente con la metodos sirurjial difisil developada par Moniz, el ia trova ce el pote inserta un cotel simil a un picajelo supra cada oio de un pasiente, con sola anestese local, forsa lo tra la oso magra par un colpeta de marteleta, pasa la picajelo de un lado a la otra como un frotador de paraventa, e – ta-da! – un pasiente ci ia es difisil ier ia es pasiva oji.
Freeman ia recomenda la prosede per tota problemes de psicose a depresa, e de neurose a criminalia. El ia developa lo cual otras ia nomi la lobotomia de produi en serie, movente de un pasiente a la seguente con sua picajelo orida, an demandante ce sua aidores mesura sua rapidia per vide esce el pote rompe recordos de rapidia per lobotomias. Lo pare ce alga sirurjistes esperiosa ia desmaia, e an Watts ia pensa ce Freeman ia esede la liminas de razona.
Entre 1939 e 1951, plu ca 18 000 lobotomias ia es fada en la la SUA, e multe plu en otra nasiones. Lo ia es comun usada a prisonidas, e en Japan, lo ia es recomendada per usa a enfantes “difisil”. On ave ancora nasiones moderna cual permete la usa de la lobotomia, an si la usa de lo ia descrese dramosa. Interesante, tan temprana como 1950, la Uni Soviet vea ia proibi lo, car lo ia es videda como nonmoral.
En la desenio de 1950, persones ia comensa deveni turbada par la frecuentia de lobotomias. Protestas ia comensa, e rexercas seria ia suporta la protestores. La statistica ia mostra ce sirca un tri de pasientes ia boni, un tri ia resta la mesma, e un tri ia deveni plu mal!
On ave alga casos famosa tra la anios. Per esemplo, Rosemary Kennedy, la sore de John, Robert, e Edward Kennedy, ia es lobotomida cuando sua padre ia cexa a dotores sur la interesa a xicos, nova e embarasante, cual la xica alga retardada ia comensa mostra. Sua padre ia informa nunca la resta de la familia sur lo cual el ia fa. Rosemary ia vive en un instituida en Wisconsin e ia mori a 7 janero 2005 con 86 anios. Sua sore, Eunice Kennedy Shriver, ia fundi la Olimpiales Spesial en sua onora en 1968.
Per aprende plu sur lobotomia, vide estas:
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).