Istoria arcivida es plenida con descrives de sustantias psicofarmacolojial, ma alga ia es estracomun. Alcol ia es cuasi universal en sua usa, e ia es ja presentante se como un problem entre la elinicas e romanes antica. On ave reportas de la usa de canaba en Asia sude-ueste antica. Opio ia es conoseda par la anticas, ma lo pare es restrinjeda a usas medisinal. Conio ia es serta conoseda: Socrate ia es matada par un tas de conio.
Sustantias plu esotica ia es ance otenable. Un estrae de la planta beladona nomida atropina ia es usada de Roma a India como un venena – e como un sustantia de cosmetica: femes ia pone a veses un gota de disolve debil en sua oios per dilata sua pupiles, car lo ia crea un sinia de interesa sesal. Lo es usada oji per diagnose par oftalmolojiste.
Un otra favoreda ia es la estraeda de la planta dijitale, ance nomida dijitale. Un venena potiosa, lo ia es ance usada per trata maladias variosa.
E xampiniones e otra fungos ia furni a multe de nosa asendentes esperias interesante de alusina (e maladias grave). Alga rexercores crede ce la bevida santa de la indoiranianes antica notada en la Vedas – soma – ia es un prepara cual inclui xampiniones.
Alcol ia continua es usada con multe zelo en la eda medieval en Europa. Sirca 1250, europeanes ia developa la prosede de distila e ia ajunta coniac o otra distiladas a la vino e bir ja popular. La terma jeneral per esta produis distilada ia es aqua vitae – la acua de vive.
Temprana en la eda medieval, mercatores e gerores arabi ia introdui la usa de la papavera, e sua opio, a India e Xina. En Xina, lo ia es xef usada como un medisin. Ma en India, lo ia deveni un abitua vasta sperdeda de la ricas, e soldatos ia usa lo per boni sua spirito de batalia. A esta eda, opio ia es xef usada como un bevida; a veses lo ia es comeda.
En la sentenio 16, alcol ia developa a un problem sosial seria. Grandes de Martin Luther a Re James 1 de England ia condena enebria. Ma ancora la sosia jeneral ia continua vide alcol como un donada de Dio. Atentas per controla sua usa ia fali sempre, e autorias ia es limitada a regula lo e imposta sua vende.
Sirca 1650, un salta nova ia es fada par Nederland en la forma de un gran distilada barata e saborida con la bacas de la arboreta juniper, cual los ia nomi genever. Lo ia es un susede pronto en England su la nom jin.
Formas nova de sustantias psicoativa ia veni a Europa de tota la mundo. Cafe, per esemplo, ia es introduida a Europa de Arabia, do on ia inventa la rosta de la bacas de la arboreta, ance nomida cafe, a sentenios a ante. An si autorias relijiosa en la mundo muslim ia condena lo, lo ia es tan popular entre muslimes como un sustitui per alcol (cual ia es proibida par Muhammad) ce lo ia es nomida “la vino de la arabis”.
Cafe ia es videda par e europeanes e arabis como saninte. Lo ia deveni la foca de un institui sosial nova, la casa de cafe, acc. la caferia. Lo ia es spesial lodada como un sustitui, longa xercada, per la males de alcol.
En la parte tarda de esta eda, la Compania de India Este e otra companias comersial ia comensa importa te de Xina e India. Lo, ance, ia es lodada como un bevida medisinal, ma lo no ia compete con cafe asta pos multe plu anios.
Un de la cosas prima cual Colombo e sua imitores ia descovre, pos descovre America mesma, ia es tabaco. La semes prima ia es traeda a Europa par un aventuror franses nomida André Thevet. Lo ia es reputada como un medisin potiosa, bon per multe maladias, spesial los cual envolve la pulmones, par dotor Jean Nicot de Frans – de ci sua nom es aora usada per la sustantia tan abituante, nicotina.
Semes per tabaco ia veni a England pos des plu anios, e la usa ia es sperdeda tra la clases alta par la vendoria de Walter Raleigh. Lo ia es lodada como un sanitota, e ia deveni un cultiva major per la colonistes de Virginia e otra locas en la Americas. En un atenta per controla sua usa, lo ia es sever impostada.
La fuma de tabaco ia sperde ance tra Asia, de Turcia a Xina. La responde ia es multe plu negativa ca en Europa: la vende de tabaco ia es punida par destesti en Xina, per esemplo, e la puni de mori en la Impero Osmanian. En Rusia, on ia pote es torturada e escluida pos usa lo. E la pape ia comanda ce eglesores ci ia developa la abitua es punida par esclui.
Zero de esta punis, natural, ia susede.
Un otra droga cual ia entra a la mundo ueste en esta periodo ia es coca. Folias de la arbor coca ia es masticada per miles de anios en America Sude, spesial entre la incas. Pos cuando Pizarro ia destrui la Impero Inca en 1553, un aventuror espaniol nomida Monardes ia trae la planta a Europa, ma lo ia fali deveni popular – a acel punto.
En 1859, Dr Pablo Mantegazzo ia isoli cocaina de la folia de la coca e ia scrive sur sua potias merveliosa per combate fatiga, depresa, e nonpotentia. Pos alga plu desenios, un mediciste de Wien con la nom Sigmund Freud ia loda la potias de cocaina como un anestesente e restorante. Con esta e multe otra suportores, cocaina ia deveni multe popular. Lo ia deveni an un parte de la formula per un bevida preparada en la SUA nomida Coca-Cola. Asta 1903, lo ia conteni 60 miligrames de cocaina per un tas tipal de 8 onsas. Pos causa alga moris par supradosa, lo ia es proibida par lege en 1914. Lo resta un droga multe popular oji.
Un problem plu grave en la sentenio de 1800 ia es opio. En 1820, la xineses, en un atenta per para la sperde de la abitua de opio, ia proibi la importa de opio. La briteses – ci ia prende la rol de la vil en multe de esta situas – ia declara un gera contra Xina per proteje sua comersia profitosa de opio. Los ia fini con sua mercato en bon forma, e un pesa de Xina nomida Hongkong.
La usa de opio ia es recomendada par la dotores medical en Europa e America, e poca ia defia los. La problem ia es malida par un cuantia de novetas: Friedrick Serturner ia descovre morfina, un derivada de opio, en 1803; la pratica de fuma opio ia deveni plu comun ca bevi o come lo; e la ago ipodermal ia es inventada en 1853.
Opio e sua derivadas ia comensa reseta alga atende negativa bon meritada cuando la autor brites De Quincy ia scrive sua libro multe popular, Confesas de un usor engles de opio en 1822. A esta tempo, opio ia es otenable en la forma de sentos de medisines diferente cual no ia nesesa un prescrive, e ia es multe popular entre la clases alta e laborante.
En 1874, eroina ia es sinteseda de opio, e ia es declarada como min perilosa ca opio e morfina. La nom, en fato, refere a sua potiosa suposada como la eroe de medisines. En 1896, la Compania Bayer ia comensa vende eroina.
Alga otra drogas ia deveni otenable a la popla european e american en la sentenio de 1800. Laborores de India ia porta sua ganja a Jamaica, cual nos nomi aora canaba (o “mariajoana”). La Comite de Drogas de Canaba Indian ia pone sua marca de aproba a canaba, disente ce sua usa ave cuasi no segues negativa, e la droga ia sperde entre la clase basa de Jamaica. Lo ia es otenable en la SUA e Europa, ma no ia deveni popular asta la sentenio seguente.
Amfetaminas, la droga sinteseda major prima, ia es descovreda en 1887. Sua usa como un stimulante ia sperde rapida. Lo ia es usada en la Gera Mundal 2 per stimula soldatos e laborores en industria.
Plu temprana, en la sentenio de 1700, on ia descovre eter. Cuando sua efetosa como un anestese ia deveni conoseda en la desenio de 1840, enspira lo o misca alga gotas en acua ia deveni popular entre la jovenes de la clase alta en la SUA e Europa. Lo ia sperde plu tarda a la povres de Er e otra paises como un alternativa barata de alcol.
Final, Claude Bernard ia comensa esperimenta en 1856 con un venena de la junglas de la Amazona de America Sude nomida curare. Lo es usada aora en sirurjia a la cor.
Drogas alusinal, o alusinojenes, ia es conoseda de la edas antica, como notada a supra, ma no asta la sentenio de 1900, e spesial la desenio de 1960, cuando los ia deveni multe popular. Esta es un lista partal:
Scopolamina, un droga anticolinerjical, es trovada en Atropa belladonna (beladona), Datura stramonium (stramonio), e Mandragora officinarum (mandragora).
Un cuantia grande de drogas moderna ave efetos simil a catecolaminas. La plu vea es peote (de la Lophophora williamsii), usada par la americanes orijinal de Mexico. Mescalina es derivada de peote. On ave du drogas, myristina e elemisina, cual es trovada en muscada e masis. E on ave la metamfetaminas con sua inisiales sin fini (DOM, MDA, DMA, TMA, MDE, MDMA… la final es plu bon conoseda como “estasia”).
Posible la alusinojenes la plu famosa es la drogas simil a serotonina. Alga ave orijinas antica: psilosibina e psilosina es derivada de la xampinion Psilocybe mexicana; ololiugui ia es usada par americanes orijinal de America Sentral e Sude, e es plu bon conoseda como la semes de la ipomea; harmina deriva de la planta de Asia sude-ueste nomida Peganum harmala; e bufotenina deriva de la secretes de la pel de la sapo bufo de America Sude.
En 1938, tota de estas ia comensa pali en compara con la descovre par Albert Hofman, un cimiciste suiz, de un deriva de ergote (un fungo de segal) cual el ia nomi dietilamido de asida liserjica, plu bon conoseda como sua inisiales deutx – LSD – o mera “asida”.
E final, nos ave la drogas anestesente alusinojen multe perilosa como fensiclidina, descovreda en 1956, e plu bon conoseda como PCP o la polvo de anjeles. Plu resente es cetamina, descovreda en 1962 e orijinal usada como un bon anestese en la Gera de Vietnam, ma cual es multe perilosa cuando usada estra la cura de un dotor. Ance, en 1960 on ia descovre la droga fentanil. Un opioide sinteseda, lo ia es orijinal usada como un anestesente per persones con dole sever de canser. Lo es ance usada aora como un droga alusinojen. Plu ca la dui de la moris par supradosa par opioides es causada par fentanil.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).