Empiricalisme ia continua asta la dia presente. Lo ia deveni sempre plu materialiste en la filosofia franses, culminante en la reduisme de Auguste Comte (1798–1857), en cual tota esperia umana es reduida a biolojia, cimica, e fisica. Razonalisme ia continua ance asta la dia presente, e ia ateni sua culmina en la idealisme de la Asoluta de George Hegel (1770–1831). Hegel ia crede ce tota ativia umana es no plu ca la funsiona de la universo en cuando lo progresa lenta e nonevitable a Divinia ultima.
En e empiricalisme e razonalisme (e materialisme e idealisme), la umana, spesial la person umana individua, deveni perdeda – o entre la colides infinita de atomes o en la scema grande de crea Dio. Nosa pensas e emosias no importa. Nos es no plu ca moleculas de carbon o la spasmas de eternia.
Alga filosofistes ia es stonada par esta tende, e ante e pos Comte e Hegel. Los ia senti ce, per umanas, nosa vive dial es la sentro de nosa xerca per veria. Razona e la atesta de nosa sensas es importante, sin duta, ma los sinifia no cosa a nos estra ce los toca nosa nesesas e emosias. Sola alora los reseta sinifia. Esta “sinifia” es lo cual conserna la promove romantica.
Nos va foca a alga filosofistes cual ia fa la plu influe a psicolojia. Prima es Jean-Jacques Rousseau, ci es comun videda como la padre de romanticisme. E la final es Friedrich Nietzsche, ci es videda a veses como la romantica la plu grande. A pos, nos va esamina la cosas comun entre esta filosofistes cual permete ce nos parla de un promove romantica.
No istoria de psicolojia es completa sin un discute de Jean-Jacques Rousseau (1712–1778). El ia influe educa asta aora, filosofia (Kant, Schopenhauer, etc), teoria political (la Revolui Franses, Karl Marx, etc), e el ia inspira la promove romantica en filosofia, cual a sua turno ia influe tota de estas, e psicolojia, denova.
Plu, el es un de la persones la plu colorosa de istoria e, como un regala, el ia dona a nos un autobiografia multe revelante, La confesas.
El ia nase en Genève, Suiz, en 1712 a Isaac Rousseau, un orolojor, e sua sposa Suzanne Bernard Rousseau. An si el ia es calviniste, Isaac ia es alga nonstable, e ia abandona sua sposa e fio prima, ante reveni per jenita Jean-Jacques, e alora parti denova. La madre de Jean-Jacques ia mori a un semana pos la nase de Jean-Jacques, e el ia es elevada par sua tio e tia.
Los ia envia el a un scola abitada en la campania do, el ia dise, el ia aprende “tota la dejetada nonsinifiante cual ia oteni la nom de educa”. Ma la esperia ia servi como la comensa de sua caso de ama con la vive campanial.
Con 12 anios, el ia reveni a sua tio e tia. Ala el ia es un stajior per un orolojor, en cuando el ia developa du otra cualias personal: La bates constante de sua mestre (en ajunta a los cual el ia reseta a scola) ia causa sua tende de menti e sua pigria; e sua adolese ia resulta un developa bizara de romanticia. El ia spende multe de sua vive en cade en ama.
Con 16 anios, el ia fuji de sua casa con no mone e no poseses. Un prete ia gida el a baronesa Madame de Warens, un bela de 29 anios ci ia ave un cor mol per perdores e convertores posible. Sua influe ia condui el a converti a catolicisme, an si el no ia es preparada per abandona sua esibisme e sua desira per es palmida par femes bela. El ia entra a un seminario en 1729, ma ia es pronto rejetada. El ia developa ultima un relata fisical sempre pausante e recomensante con la bela Mme Warens.
Entretempo, el ia pasea tra la campania, frecuente per distantias longa. El ia ama la bosces, montes, e la natur mesma. El ia servi de ves a ves como un ensenior privata de musica e otra sujetos, ma ia spende multe de sua tempo lejente autores de la Lumina. La obras de Voltaire ia introdui el a un adora de Natur multe conveninte a sua personalia.
En 1742, cuando el ia ave 30 anios, el ia parti per Paris. El ia amini pronto la scrivor political Diderot, ci ia aida el a es empleada como un secretor a la Embasia Franses en Venezia. El ia es enviada a via par causa de sua natur egosa.
En 1746, el ia encontra e cade en ama con Thérèse Levasseur, un lavor e cosor de mente simple. La du ia jenita cuatro enfantes, de ci tota ia es enviada a orfanerias. Recorda ce esta ia es un responde comun a povria en acel eda – de la cade de Roma asta la Gera Mundal 2! El ia repenti plu tarda esta, ma ia confesa ce el ia ta es un padre multe mal. Nun duta el sur esta.
El ia labora como un secretor per aristocratas diversa, e ia spende multe tempo en composa musica. El ia rescrive an un opereta par Voltaire e ia scrive a el. Un concurso de leteratur con un premio de mone ia catura sua atende e, en 1750, el ia gania lo con sua esajo Discours sur les arts e les sciences, un ataca multe potiosa contra sivilia.
Esta ia es la tempo prima cuando nos pote vide sua ideas sur la bonia natural de umanas. E an si nos regarda el como un pensor de la Lumina, esta tese es vera contra la Lumina, contra filosofia, contra razona, contra Voltaire, e an contra primadores! La bon vive, el ia dise, es la vive simple de la campaniores. Esta conseta de “revade a natur” ia inclui, serta, un idea romanticida de natur, e pote es sever contrastada con la natur de junglas e desertos!
1752 ia es un plu anio ativa. El ia scrive sua comedia Narcisse. Sua opereta Le devin du village ia es susedosa presentada a la re. Nonfortunosa, sua maladia – el ia sufri de un varia de problemes dolosa e vergoniante de la vesica – ia preveni el de es introduida a la re, e el ia perde sua pension.
En 1753, un plu compete ia es anunsiada. La esajo par Rousseau, Discourse sur l’origine et les fondements de l’inégalité parmi les hommes, ia gania la premio e ia es primida pos du plu anios.
En esta peso, el ia aseta la nonegalias biolojial, ma ia razona ce on no ave un funda natural per otra nonegalias – economial, political, sosial, o moral! Estas, el ia dise, es la resulta de la esiste de propria privata e la nesesa de defende lo par forsa. Umanas es bon, el ia razona, ma sosia, cual no es multe plu ca la reali de avaria, mali tota de nos.
El ia aseta ce lo no es plu posible ce nos ta abandona aora la sosia sivilida. Lo ia deveni, en fato, un parte de nosa natur! La plu bon cual nos pote fa es segue vives plu simple, con min lusosia e gidada par la moralia simple de la evanjelios.
En sua article sur economica per la Ensiclopedia, el ia sujesta ce lo ta es aidosa si nos ta ave un imposta gradal de revenu, un imposta de cosas lusosa (e no imposta de nesesadas), e un educa publica nasional sin custa.
En 1756, el ia move con Thérèse e sua madre vea a “la Hermitage”, un casa peti prestada a el par Madame d’Épinay. Ala el ia scrive un novela (o “romanse”) nomida Julie, ou la nouvelle Héloise, referente a la Héloise famosa, la amada de Abelard. Lo ia deveni, posible, la novela la plu famosa de la sentenio de 1700.
A la mal lado, el ia aliena sua amis par leteras nonplasente e sua noncortesia a sua beneficor Madame d’Épinay. An sua ami la plu vea, Diderot, ia dise ce Rousseau es demente. Iritada, el ia parti de la Hermitage.
En 1762, Rousseau ia publici Émile e La contrata sosial. La linia prima de La contrata sosial es la plu famosa: “Umanas nase libre, ma es a tota locas en cadenas.” La intende de la resta de la libro ia es la descrive de un sosia en cual libria ta es retenida.
La contrata sosial es un contrata, asetada como mitolojial, entre persones per sede alga de sua libria per garantia un comunia cual respeta la individua e, en esta modo, reteni tan multe libria como posible. Esta idea, combinada con la pensas de Locke sur governa, ia inspira la padres fundinte de la SUA joven.
Ma on debe nota ce, a la fini de la libro, Rousseau sujesta ce mori debe es la puni per cualcun ci, par sua atas, mostra ce el no teni la valuas comun de la comunia! La Revolui Franses ta mostra plu clar ca la Revolui American ce un filosofia como lo de Rousseau pote es un spada con du lados.
Émile ia es plu calma. Lo es un tese sur la eleva de enfantes, de un om ci ia envia sua cuatro enfantes a la orfaneria! An tal, lo ia surprende sua lejores con alga bon sujestas.
Rousseau ia condena tota formas de educa cual usa forsa. En loca, el ia promove educa cual eleva la desplia natural de la potensia de la enfante. Nota ce el ia dona esta ideas en un eda cuando la plu de persones ia pensa ce, si on no ta bate sua enfantes con un basto bon grande, los ta deveni mal o, a la min, tro regalada. Natur, Rousseau ia dise, es la ensenior xef per la enfante, e libria per esplora es la metodo xef de ensenia.
El ia dise ce la enfante aprende par ajusta gradal a nesesadas, e par imita los sirca el. La educa debe es xef moral asta cuando la enfante ave 12 anios, e alora on pote comensa la educa inteletal. La educa relijiosa no es presentada asta 18 anios. En esta modo, la enfante pote developa credes relijiosa razonada, en loca de aseta sin pensa la mitolojia e miracles de otras.
La libro es bela scriveda, ma multe ta dise ce lo es idealiste, cuasi naive. Lo ia deveni un influe grande en Europa, e plu tarda en la SUA. Maria Montessori en Italia, per esemplo, ia fundi multe de sua ideas sur Rousseau. John Dewey en la SUA ia fa la mesma. Lo cual nos nomi aora la educa progresante e la aprende par ata es derivada de Émile.
La filosofistes grande de sua eda ia burla el – ma la eglesores ia es scandalida! La amis de Rousseau ia averti el e ia coraji el a fuji. En 1762, la parlamento franses ia comanda ce tota copias de Émile es confiscada e ardeda. Rousseau ia fuji a Suiz, sola per vide ambos sua libros ardeda en la Génève calvaniste.
El ia suplica Friedrich la Grande per refuja en Neuchâtel. Ala el ia vive, an plu strana ca a ante. Ma el ia es alora la idol de femes tra la mundo, e sua publicores ia solisita plu libros. El ia dona plu, xef en la forma de esajos o leteras a sua criticores.
Ma la ministros local en Neuchâtel ia es ance turbada par la scrives, e un sermon local ia provoca un ataca contra la casa de Rousseau. El e Thérèse ia move denova, a un caseta sur un isola peti en un lago en Suiz. Ma el ia es comandada a parti, cual el ia fa, prima a Strasbourg, alora a England a la invita de David Hume en 1766.
En London, el ia es la tema de parla de la site, e cadun ia vole es introduida a el. Ma el ia deveni pronto fatigada par esta e ia demanda ce Hume trova per el un casa en la campania. Ala, Rousseau, Thérèse, e sua can Sultan ia carga la pasientia de sua ospitor.
Rousseau ia comensa leje articles critical en la jornales brites. Ja alga paranoica, el ia reata a los como si on ta ave un conspira contra el, e ia acusa an Hume de partisipa en lo. El e Thérèse ia “evade” de England, revadente a Frans.
An si, tecnical, el ia es ancora menasada par aresta en Frans, el ia joia la reseta cual sua fanes ia dona. Ma el ia teme ancora sur sua vive, e donce ia fuji a la campania per vaga anonim. En 1768, el ia sposi, pos tota esta tempo, sua Thérèse.
Thérèse ia suplica el per revade a Paris, e alora los ia move ancora (con nomes falsa). Ala, el ia copia musica per sua mone, e ance ia completi final, en 1770, sua autobiografia.
El ia continua scrive, alga de sua obras la plu bela, e ance alga de sua plu paranoicas, asta 1778. El ia move a un caseta ofreda par la marci de Girardin, do el ia studia felis la flores local, cuando el ia sufri un ataca serebral. Thérèse ia atenta move el a sua leto, ma el ia cade denova e ia talia sua testa. Cuando la marci ia ariva, el ia es ja mor.
El ia es enterada a la compleso de la marci, e sua tomba ia deveni un loca de peregrinas. Plu tarda, on ia move el a la Panthéon en Paris, e ia reposa el no distante de Voltaire.
Nos no nesesa visita un dementeria per trova mentes desordinada; nosa planeta es la dementeria de la universo. – Goethe (1749–1832)
Goethe ia nase en 1749 en Frankfurt-am-Main en Deutxland, la plu vea de ses enfantes, ma sola el e un sore ia survive asta adultia. Sua padre, Johann Kaspar Goethe, ia es un avocato rica e un erudita-amator, ma el no ia susede en politica e ia ave un tempera nonplasente. Sua madre, Katharina Elisabeth Textor, ia es multe plu plasente e ia es la fia de la bürgermeister (maior) de Frankfurt.
Goethe la joven ia es bela e talentosa. El ia aprende fasil la linguas e ia ave interesas a musica e arte. El ia entra a la Universia de Leipzig per studia lege, ma un delude en ama ia resulta maladia e depresa, e el ia abandona la scola. Ma en 1777, el ia reseta sua diploma per lege de la Universia de Strasbourg.
Sua leje de la Disionario de Bayle ia gida el a renunsia sua cristiania cuando el ia es un adolesente, e el ia deveni un ateiste. El ia deseveri alga plu tarda, e ia adota un panteisme modelida longo lo de Spinoza.
En 1774, el ia scrive Die Leiden des jungen Werthers (La tristias de Werther la joven), un nara de ama trajedin cual, an si no gustada par la criticores, ia es multe susedosa, spesial entre inteletos romanica joven. La libro conclui con un suiside cual ia es imitada, nonfortunosa, par un cuantia de lejores ci mesma ia es sufrinte de un cor rompeda. Como multe de sua obras, la nara asentua la tensas entre la natur de la individua e la restrinjes de la sosia.
En la anio seguente, el ia es invitada a la corte de la duxe de Sasonia-Weimar. A la comensa, el ia es no plu ca un “orna” ala, ma plu tarda el ia ave cargas political real e variosa, incluinte inspetas de minerias e la institui de oserverias de clima.
En 1782, el ia es induida a la nobilia, cual ia permete ce el ajunta “von” a sua nom. Par resulta de sua fama e prestijia en Weimar, el ia encontra e ia amini alga poesistes joven, incluinte Schiller e Herder.
De sua adolese, Goethe ia tende cade en ama, ma no ia es capas de dedica se a un fem o a sposia. Sua relata la plu longa e intensa ia comensa sirca 1775 con Charlotte von Schardt, un fem sposida ci ia ave sete enfantes (an si sola cuatro ia survive). El ia scrive leteras longa e romanica a Charlotte tra la plu de sua vive.
El ia comensa sua propre casa con un fem joven de la clase de laborores nomida Christiane Vulpius. El ia pari un enfante a natal en 1789.
En 1801, Goethe ia deveni malada, e sua sani ia ocupa multe anios. A la fini de sua maladia, Napoleon ia vinse la prusenes a Jena e ia entra marxante en Weimar. Sua soldatos ia atenta prende la casa de Goethe, e Christiane ia proteje fisical el. Goethe ia sposi el pronto pos esta.
Goethe ia es un amiror de Napoleon, e ia visita el en 1808 a la invita de la imperor. Goethe ia visita ance Beethoven en 1812.
La obra la plu grande de Goethe es Faust, sua presenta teatral en du partes. El ia comensa scrive lo en 1773, ma no ia fini lo asta 1831. On pote comprende la parte prima como un intera, e lo ia es completida en 1808. La tema ia es la libria umana e la potia de pasion, cual Faust descovre pos aposta sua spirito en un negosia con la diablo Mephistopheles.
(En un aveni ladal, Faust ia crea un om artifisial en sua laboreria. Esta ia influe un fem nomida Mary Shelley, autor de Frankenstein – posible la novel prima de naras siensal. El ia pone sua nara en un castel de la sentenio 13 cual el ia vide, cual ia parteni a la familia deutx vea (e colorosa) Frankenstein, un castel cual ia es ance familiar a Goethe.)
En ajunta a sua poesia, noveles, e presentas teatral, Goethe ia spende multe tempo sur siensa. El ia studia medica, anatomia, fisica, cimica, botanica, e meteorolojia.
En 1792, el ia completi sua Beitrage zur Optik (Contribuis a optica) en du partes, e en 1810 Zur Farbenlehre (Sur la teoria de colores). El ia crede vera ce esta obras va es sua contribuis la plu grande. Ma poca siensistes ia aproba los, e los ia fa poca efeto notable a la campo. Sua obras ia fa un impresa plu grande a artistes variosa, incluinte Turner, Klee, e Kandinsky. Sua metodos ia es vera plu fenomenolojial ca esperimental, e sua obras ia considera plu la esperias sujetal de color e lus ca sua fisica.
El ia scrive ance un libro nomida La muta de plantas, cual ia sujesta ce tota plantas es sola varias de un planta primitiva cual el ia nomi Urpflanze. El ia introdui la terma “morfolojia” e ia mostra la relata de umanas e animales par sua descovre de la oso intermasilal (supra la dentes superior), en la mesma loca como en animales.
Sua sposa Christiane ia mori en 1816. Sua amada Charlotte ia mori en 1827. La duxe ia mori en la anio seguente. E la sola enfante restante de Goethe ia mori en 1830. Sufrinte de maladia e depresa, Goethe mesma ia mori, a 22 marte 1832, a un anio pos completi la dui du de sua obra mestral Faust.
Arthur Schopenhauer (1788–1860) ia nase a 22 febrero 1788 en Danzig, Prusen (aora Gdansk en Polsca). Sua padre ia es un comersior susedosa, e sua madre ia es un noveliste. Arthur la joven ia es moveda sirca Europa multe veses, cual ia permete ce el deveni fluente en multe linguas, e ce el developa un ama profonda de natur.
En 1805, sua padre ia mori, e el ia atenta un carera comersial. El ia abita con sua madre per un periodo en Weimar, e el ia introdui Schopenhauer a Goethe. El ia continua per studia medica a la Universia de Göttingen e filosofia a la Universia e Berlin, e ia reseta ultima sua diploma dotoral de la Universia de Jena en 1813. Plu tarda, el ia labora con Goethe sur sua studias sur color.
En 1819, el ia publici sua obra la plu grande, Die Welt als Wille und Vorstellung (La mundo como vole e idea).
Per Schopenhauer, la mundo fenomenal es fundal un ilude. La realia vera, la “cosa mesma” de Kant, es nomida par el la Vole. La Vole, posible un terma strana per nos oji, es plu como la Dau en filosofia xines: de la Vole tota cosas deriva. Ma lo ave plu la cualias de un forte, e puxa e propulsa lo cual nos persepi como la mundo fenomenal.
La Vole es, on pote dise, la natur interna de tota cosas. Donce, si on desira comprende la natur interna de alga cosa – o algun – on debe mera regarda en se mesma. La Vole ance motiva nos, tra nosa instintos. Esta conseta ia influe Sigmund Freud la joven a un jenera plu tarda.
Schopenhauer, profonda influeda par sua leje de leteratur budiste, ia vide vive como esensal dolosa. Nos es forsada par nosa natures, nosa instintos, a vive, reprodui, sufri, e mori. Schopenhauer es comun descriveda como “la pesimiste grande”.
Car la mundo es enferno, e umanas es, a un lado, la spiritos tormentada e, a la otra lado, la diablos en lo… Si tu imajina… la suma de angusa, dole, e sufri de cada spesie sur cual la sol brilia en sua curso, tu ta debe acorda ce lo ta es multe plu bon si la sol ta es capas de stimula la fenomeno de vive tan poca sur tera como sur la luna….
A nosa stona, nos esiste subita, pos milenios nonlimitada de no esiste; en un tempo corta nos denova no va esiste, ance per milenios nonlimitada. Esta no pote es vera, la cor dise.
La demanda es, natural, como on pote pote survive tra esta sufri? Un modo cual el sujesta es la salva estetical – vide la belia en alga cosa, o algun. Cuando nos fa esta, nos regarda vera la cosa universal o esensal su la vista, cual dirije nos a la sujeto universal en nos mesma. Esta cuieti la vole cual forsa nos a la mundo fenomenal. Schopenhauer ia crede ce musica es la arte la plu pur – a sola un paso de la Vole. Un modo du per transende la sufri es par salva etical – compatia. Asi, ance, lo es la reconose de se-en-otras e otras-en-se cual gida nos a un cuieti de la Vole.
Ma estas, el ia crede, es sola respondes partal. La responde completa nesesa la salva relijiosa – asteni, la cuieti direta de tota desiras par un vive de nega-de-ego e medita. Sin la Vole, sola noncosia resta, cual es Nirvana.
Schopenhauer ia vive tra multe anios de sua vive como un om amarga e solitar, no capas de aseta sua nonsusede en vive. El ia comensa publici sua obras denova en 1836, e inteletosas tra Europa ia comensa developa un interesa a el. Triste, Schopenhauer ia developa problemes con sua cor e, a 21 setembre 1860, el ia mori. Pos sua mori, el ia influe forte alga notables como la composor Richard Wagner, la filosofiste Friedrich Nietzsche, la autor Thomas Mann, e multe otras.
On ave, como es conoseda, insetos cual mori en la momento de fertili. Tal lo es con tota joia: la momentos de vive la plu alta, plu merveliosa de joia, es acompaniada par moria. – Kierkegaard
Søren Kierkegaard (1813–1855) ia nase en København a 5 maio 1813, la plu joven de sete enfantes. Sua padre, Michael Pedersen Kierkegaard, ia es en la comersia de calsas. El ia es un om forte ci ia segue un tipo de cristiania, oseseda par culpablia sur un aveni en cual el ia blasfema contra Dio. Sua madre ia es Ane Sørensdatter Lund, un servinte de la familia Kierkegaard.
Du frates de Søren e du sores ia mori. En 1834, sua madre ia mori ance, e Kierkegaard ia deveni tan depresada como sua padre. El ia perde sua fida e ia comensa un stilo de vive edoniste. Ma el ia ave un esperia relijiosa en 1838. El ia reseta sua diploma en teolojia en 1840, e ia proposa a Regine Olsen, fia de un ofisior importante de la governa en København.
Nun sabe esata perce, ma en la tarda de 1841 el ia desprende sua promete de sposi, cual ia causa mal anunsias sosial. Lo pare ce esta ia es un crise sentral en sua vive, e el ia parti subita a Berlin per studia.
Cuando el ia reveni, el ia completi un manoscrito sur cual el ia labora, e en 1843, el ia publici O la un, o la otra. Lo ia ave la forma de un debate sur como on debe vive, entre un om “estetical” e un om “etical”, probable refletante du aspetas de sua propre spirito.
La om estetical es fundal un edoniste e un ateiste. An si el es depintada como un om refinada, sua partes de la libro es vagante, cual sujesta ce sua vive es simil sin foca. La om etical es un judor, e sua razonas es multe plu ordinada e bonparlada: El spende multe tempo analisente la imperor Nero de Roma antica e sua states mental.
Ance en 1843, el ia publici sua libro famosa Teme e trema, cual redise la nara de Abraham e sua cuasisacrifia de sua fio. A esta ves, Kierkegaard ia compara la responde etical con la fida de Abraham a sua Dio.
En sua libros variosa, Kierkegaard ia developa sua tre “fases” o filosofias de vive competente: la person estetical, ci vive en la momento e no pote dedica se a cualce cosa; la person etical, ci es dedicada a sua ideales; e la person relijiosa, ci reconose la natur transendente de sua ideales vera. Nota la similia con Schopenhauer, an si, per Schopenhauer, “estetica” refere a un ama de arte e siensa, no a edonisme.
En tota sua obras, el ia es consernada par pasiones. El ia defini ansia, per esemplo, como “la vertije de libria”. Despera es lo cual la edoniste senti cuando el reconose final la vacuia de sua vive. Culpablia es lo cual un om etical senti cuando el descovre nonevitable sua noncapasia per pardona se. Esta definis ia influe profonda multe filosofistes e scrivores plu tarda.
En 1849, el ia publici Maladia asta mori, cual ia es sua clama la plu forte a la cristianes normal de København ce los ta fa lo cual Kierkegaard ia nomi “un salta de fida” a un tipo plu personal de relijio. Ma sua comunia no ia es preparada per esta tipo de cristiania pasional, e el ia es sever criticada par la potiosas relijiosa de Danmarc.
Kierkegaard es frecuente videda como la esistentialiste, xef per sua usa de la parola “esiste”. El ia dise ce Dio no esiste car El es eterna. Sola persones esiste, car los es sempre un produi noncompleta. E la natur de esiste es, prima, ce lo es la domina de la individua, e du, ce la individua debe prende culpablia per sua propre crea.
Ma Kierkegaard ia nota ce sua filosofia no es un “sistem” de filosofia. La esiste umana es un prosede continuante de crese, e no pote es ensircada par cualce “sistem”. Esta ia es un tema sentral en esistentialisme pos alora.
Kierkegaard ia mori a 2 otobre 1855 de paralise spinal. El ia refusa la eucaristia e el ia demanda ce no eglesores partisipa en sua funera. Sua enscrive de tomba dise “La individua”.
Me teme ce animales vide umanas como viventes de sua propre tipo, cual ia perde, en un modo multe perilosa, sua capasia animal e sana de razona – como la animal demente, la animal riente, la animal plorante, la animal nonfelis. – Nietzsche
Como la filosofiste du, pos sola Rousseau, en sua influe sur psicolojia, Friedrich Wilhelm Nietzsche (1844–1900) ia nase en Rocken en Sasonia Prusen, a 15 otobre 1844, nomida per Friedrich Wilhelm 4, re de Prusen, ci ia ave la mesma aniversario de nase. Sua padre ia es un eglesor, un de multe en sua familia, ci ia es un ensenior privata per alga membros de la familia real. Sua madre ia es un fem-de-casa puritaniste.
Cuando Friedrich ia ave 18 anios, el ia perde sua crede, cual ia resta un cosa sentral per la resta de sua vive. E el ia dise ce sua vive ia cambia ance par sua leje de Schopenhauer a alga anios plu tarda cuando el ia es studiante a la Universia de Leipzig.
A 23 anios, el ia es enscriveda en la armada prusen, ma el ia cade de sua cavalo, ia feri sua peto, e ia es relasada de la armada.
El ia reseta un emplea como un profesor de filolojia (linguas e leteratur clasica) a la Universia de Basil cuando el ia ave 24 anios, a un anio ante reseta sua diploma dotoral. Prosima a Basel, Richard Wagner, la composor famosa, ia abita, e Nietzsche ia es invitada a la come de natal en 1869. La operas grandiosa e romantica de Wagner ia influe la vista de vive de Nietzsche per multe anios seguente.
El ia servi per un periodo corta como un aidor volente de medica en la Gera Franco-Prusen, en cuando el ia developa difteria e disenteria, cual ia dana permanente sua sania.
Pos reveni a Basel, el ia publici sua libro prima en 1872, inspirada par Wagner, nomida La nase de trajedia par la spirito de musica. En esta libro, el ia introdui la contrasta entre la dionisian e la apolonian. Dioniso ia es la dio de vino e selebra, vivente per la momento. Apolon ia es la dio de pas, ordina, e arte. La un tipo no ave disiplina, e la otra no ave pasion.
En 1879, resultante de sua sania seria malida, el ia es forsada a jubila de ensenia. El ia publici Umana, vera tro umana, un analise de emosia, en partes de 1878 tra 1880. Ance en esta periodo, el ia cade en ama, an si per un tempo corta, con Lou Salome, un sofisticada famosa – e plu tarda un confidada de Sigmund Freud!
Con cor rompeda, e posible reconosente ce el es destinada a un vive nonsposida, el ia retira se a alta en la Alpes per scrive sua obra mestral Tal Zoroastra parla, publicida de 1883 asta 1885. Asi, el ia fa un atenta eroin per responde a la pesimisme de Schopenhauer. Nietzsche ia crede ce relijio ia fali misera furni sinifia a umanas. Donce, car Dio es “mor”, nos nesesa sesa xerca en la sielo e comensa mesma furni acel sinifia mancante. A la persones ci el ia vide como susedente en esta cambia el ia doni la nom Über-menschen, comun traduida a engles como supermen, o a elefen como “umanas superior”. Ma, el nota, la umanas superior no ia ariva ja, e nos debe es sasiada en servi como un ponte a acel futur.
La libro es un obra mestral par cualce norma, ma Nietzsche ia resta nonconoseda. Sua sania ia continua mali e el ia es atendeda par sua sore, Lisbeth Forster-Nietzsche. Ma el ia sposi un om antiiudiste ci Nietzsche ia odia e ci ia move a un comunia de cameradas con ideas simil en Paraguay.
Nietzsche ia vive alora en oteletas en multe locas en Italia e Suiz. Sua capasia de vide ia mali plu, e doles de testo ia inonda el. El ia sesa scrive libros e, en loca, ia comensa scrive aforismes (comentas corta), cual el ia colie alora en libros.
Ultra bonia e malia (la introdui la plu bon a sua ideas) ia es publicida en 1886, e La jenealojia de morales en 1887. En esta libros, el ia clari sua distingui grande entre Herren-moral e Herden-moral, cual es per dise, la moralia de renores e la moralia de la manada.
La moralia de la manada es como el refere a la moralia iudi-cristian tradisional: Lo es, el ia dise, un etica de los ci teme e es sin defende. Con esta moralia, nos controla persones potiosas e talentosas par apela a virtuas como altruisme e egalisme. Lo es, como tota motivas, un “vole a potia” – ma un modo rusosa e manipulante. Nos cria: “Me es plu debil ca tu, ma me es ancora plu bon ca tu!”
La moralia de renores, a la otra lado, es fundida sur la virtuas mas de coraje, onora, potia, e la ama de peril. Lo es pagan, ueste, germanica. La sola regula, el ia dise, es ce on no tradi un ami.
An si el no ia es antiiudiste, sua eleje de parolas ia condui la nazis a usa alga de los en modos cual el no ia intende, a multe anios pos sua mori. Demanda a tu sur la manadas enorme de persones clamante “Heil Hitler!” e la atas de asembla persones de minorias en campas per labora los e, final, mata los: esce estas fa ce tu pensa a coraje e onora?
La contrasta entre esta du moralias es produosa:
Herden-moral
burgesia
democratia
aida sosial
sosialisme
egalisme
diretos umana
compatia
comforta
dejenera
Herren-moral
aristocratia
laissez-faire
merita
libria
onestia
intende
Nietzsche ia deveni plu malada e amarga, sieca e paranoica. En Torino en janero 1889, el ia atenta proteje un cavalo ci algun ia es flajelinte, cuando el ia sufri un ataca serebral (como Rousseau) cual ia envia el a un dementeria. Algas crede ce sua colasa ia es la resulta de sifilis, ma lo ia pote es egal la resulta de anios de medisin. Sua madre ia salva el e ia atende el asta sua propre mori en 1897, cuando sua sore, aora denova en Deutxland, ia recomensa sua cura.
El ia es rara consensa pos acel. El ia mori a 25 agosto 1900 con 55 anios, de atacas serebral e pneumonia.
Un cuantia de sua obras ia es publicida pos sua colasa, incluinte La vole a potia en 1889, cual ia es un colie de aforismes trovada en sua jornales personal, e un autobiografia Ecce homo (Regarda la umana) en 1908. Ecce homo mostra e sua brilia e sua dementia multe dramosa. Freud ia nomi el la psicolojiste la plu briliante de tota tempo.
Su tota la varias representada par la romanicistes es un tema comun: pasion. La empiricalistes ia es consernada par datos de la sensas, e la razonalistes ia es consernada par razona, ma la romanicas ia regarda la consensia e ia vide prima e xef sua dinamica, intendes, atentas, desiras… pasion!
Goethe ia fa ce Faust dise “Gefühl ist alles” – emosia es tota!
En fato, los ia vide pasion en tota la vive, como un categoria fundal: la vive como un luta darwiniste, no sola per survive, ma per susede. Como esta, lo pote es nomida instinto; ma en umania, lo vade plu, e envolve un vinse de natur mesma.
Nietzsche ia dise: “La sola realia es esta: La vole de cada sentro de potia per deveni plu forte – no autoconserva, ma la desira per propri, per deveni mestre, per deveni plu, per deveni plu forte.”
Sua ama de pasion ia es acompaniada par un nonpasientia, o an repulsa, contra la mediocres, la debiles, la nonfidables, la nonpasionosas.
La vista de la romanticas es un refleta de sua vista de umania: La mundo es rica, plen de cualias – color, sona, sabor, senti – “densa”, on pote dise, e no la cosa magra, gris, e vacuida cual siensa moderna imajina. Los tende iniora la divina metafisical como un jua inteletal. E per Schopenhauer, pasion ia deveni la forma fundal de tota realia: un universo presante per deveni real.
Un metafisica pasionosa nesesa un epistemolojia pasionosa (oposada a un epistemolojia empirical o inteletal). Prima, on ave un prefere per intui. Como Pascal ia dise: “La cor ave razonas cual la razona conose nunca.” Un comprende oliste es plu sasiante ca esplicas lojical, analisal, o esperimental. La mundo es tro grande per estas, e debe es abrasada e no disesionida.
E la importa de la sujetal es asentuada. Tota esperia es sujetal, e no sola ojetal. Esta es un forma de la “prinsipe de nonsertia” cual aplica a tota siensas, e filosofia, e serta a psicolojia. Ojetalia es un gol sin sinifia. Donce, sujetalia no es un cosa per elimina, ma per comprende.
Donce nos debe reveni a vive como lo es viveda, la Lebenswelt, la mundo viveda. Nos deve studia esperias intera e sinifiante. Posible nos pote revade a persones comun, enfantes o poplas primitiva, per comprende la mundo viveda, ante cuando lo es manxada par nosa inteleti constante. Esta tendes ia gida final a fenomenolojia e metodos relatada.
Final, nos debe ave un moralia pasionosa. La romanticas ia tende amira eroinia, la fa de un posa contra natur, contra la mediocre, contra noncosia o nonsinifa. A alga grado, eroinia es prosima liada a futilia: Lo es comun Quijotin o nonortodox, pd. respetante la strana o nontradisional.
Moralia romantica es plu stoical ca epicuriste. Sinifia, como espresada par virtua, intende, e coraje, es la valua la plu alta, no la plaser o felisia como nosa conseta normal de estas.
Alga romanticas suspeta la filosofia asian cuanto lo representa la sede. Nietzsche, entre los, ia vide an la tradision iudi-cristian como “asian” e debil. Sua suspeta no es completa coreta: En tradisiones como daoisme e budisme zen, la “sede” es valuada esata per la fortia cual lo dona, como fisical mostrada par judo (“la via jentil”) e otra formas de artes militar. Schopenhauer ia comprende esta, e sua labora es clar colorida par budisme.
Un moralia pasionosa nesesa libria, cual Goethe ia considera como la felisia la plu grande, e cual ia es rapida desaparente de la filosofias empiricaliste, razonaliste, e an relijiosa. On debe es libre per fa acel posa corajosa; si on es determinada, on es no cosa.
Un pico de budisme entra cuando Nietzsche parla sur amor fati, la ama de destina: Cuando elejes es sutraeda, on pote ancora concista la momento par sua disposa mental.
Nietzsche ia dise “Dio es mor!” Aora, cualce cosa vade. On nesesa fa no cosa. Es cortes? Perce? Es egoiste? Perce? Como la esistentialiste la plu resente, Sartre, ia dise, nos es “condenada” a libria. An si nos eleje permete ce nos es determinada, esta es nosa eleje. An Kierkegaard ia demanda ce nos fa un salta de fida cual ave no esplica. Donce, nos ave no cosa sur cual nos pote reposa, no muleta per suporta nos, no “opiato”, no escusas.
Libria sinifia encarga. Nos crea nos mesma, o plu bon, nos vinse nos mesma, o a min nos ta debe. Otras fa no plu ca presenta sua “programes”. Libria nesesa ce nos es vera consensa. Lo nesesa ce nos es plen sensosa, ce nos no nega nosa pasion ma esperia lo en loca. Lo nesesa ce nos es ativa e partisipante.
Libria sinifia crea, e la romantica prefere la artiste ca la siensiste o filosofiste. Esta ideas es la funda per la conseta de autoreali. La eritores de la romanticas es la fenomenolojistes, esistentialistes, e umanistes de oji.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).