La Eda Medieval ia es multe plu ativa en siensa, filosofia, arte, etc, ca multe persones crede. Ma nos debe comensa con la eda a ante, un eda “oscur”:
Pos la cade de Roma, la edas oscur ia aveni. La plu de Europa ia es desentrida, campanial, e parocial. La vive ia es reduida a la “leges de natur”: La potiosas ia rena, e los sin potia ia atenta sola survive. On no ave un senti de istoria o progresa. Superstisio e predeterminisme ia domina la mentes de la popla, rica e povre. La crede a la prosimia de la fini de la mundo ia es comun en cada sentenio. On pote ave un aprosimi a la vive european en la eda oscur e la eda medieval temprana par oserva la nasiones povre de la mundo, an si on ta debe sutrae tota sinias de la milenio pasada de developa tecnical!
Alcuin de York (735–804) – la scolor xef de Carlo la Grande – es un de la poca nomes cual ia es pasada a nos de esta periodo. Estra sua cristianisme, un vista peti de sua realia pote es videda en esta sita: “Cual es la om? La sclavo de moria, un vagor pasante. Como es la om poneda? Como un lampa en la venta.”
An tal, Carlo la Grande (768–814) ia furni un unia political en la forma de la Impero Franco, e la Pape ia furni un unia relijiosa, e un eda nova ia comensa lenta. Ultima, la eglesa ia domina Europa, e la Pape ia sustitui per la imperor como la person la plu importante. Ante la fini de 1200, la Eglesa ia posese un tri de la area de Europa! La potia de la Eglesa e sua crede comun ia crea presas enorme per conforma, suportada par la teme de punis supranatural. Ma a la lado positiva, la papia ia aida crea stablia e, ultima, ricia.
Aora, nos dirije nos a la eda medieval propre, aprosima de 1000 a 1400 ec.
Universias ia developa de la scolas de moncerias e catedrales – scolas cual nos ta vide como scolas prima, ma do adolesentes ia es instruida par monces e pretes. La universia prima ia es en Bologna, fundida en 1088.
En esta scolas e universias, studiantes ia comensa (con la menasa sempre presente de flajeli!) con la trivium (“tre vias”) – gramatica (la arte de leje e scrive, con foca a la salmos e otra partes de la Biblia, e la leteratur latina clasica), retorica (pd: la arte de parla), e lojica. Trivium es, natural, la orijina de la parola “trivia” – la cosas cual comensores debe aprende.
Ultra la trivium, los ia studia la quadrivium (“cuatro vias”) – aritmetica, jeometria, musica, e astronomia. La trivium con la quadrivium ia composa la sete artes libral. La parola libral ia refere a la om libre, la om con alga propria, e la artes libral ia es contrastada a la artes pratical de la povres laborante (e tota femes).
La problem major de filosofia de la eda ia es la natur de universales. Esta refere a la sinifia de un parola, pd: a cual, en la mundo real, la parola refere? Esta es fasil solveda con nomes propre: Per esemplo, Jorj refere a la person ci scrive esta testo, pd: me mesma. Ma a cual la parolas plu comun refere? A cual, per esemplo, la parola gato refere? Esta no ia es un problem nova en istoria, ma la filosofistes de la eda medieval ia comensa sin la vantaje de bon testos elinica.
San Anselmo de Canterbury (1033–1109) ia es un neoplatoniste, e el es la plu bon conoseda per sua laboras per developa un demostra de la esiste de Dio. El ofre la demostra ontolojial: car nos pote pensa a un esente perfeta, el debe esiste, car perfetia implica la esiste.
Regardante la problem de universales, el ia es un suportor de realisme. On debe no confusa esta con la sinifia moderna de realisme (pd: ce on ave un persepi clar de realia). Realisme ia es la perspetiva de Platon: On ave un universal real o ideal (a alga loca) a cual un parola refere. Normal, esta acorda bon con cristianisme: Si umania ave un realia ultra la colie de umanas individua, nos pote parla sur la natur de umanas en tota, incluinte, per esemplo, la idea de peca orijinal (pd: la nonobedi par Adam e Eva cual ia es transmeteda a tota umanas).
Simil, si Dio es un universal real, donce on no ave un noncoere lojical cuando on dise ce el es Padre, Fio, e Spirito Santa – tre esentes en un esente.
Sua razona no es sin problemes. Per esemplo, la universal ultima – Tota – es lojical plu grande ca Dio, car Tota debe inclui Dio e tota sua creadas. Ma cristianisme dise ce Dio e la creadas es separada e fundal diferente.
La slogan de Anselmo ia es lo de Augustino: “Me crede afin me comprende” (credo ut intelligam): La crede es la nesesada asoluta, e es la funda de tota pensa. Veria es revelada par Dio; donce, on debe sede se a la eglesa.
Roselin de Compiegne (1050–1121) ia es la fundor de nominalisme, un otra opina sur universales. Un universal, el ia dise, es no plu ca un flatus vocis (un sona vosal, pd: un parola). Sola individuas esiste vera. Parolas, e la ideas cual los representa, refere a no cosa. Esta es multe acordante con materialisme e empiricalisme, ma no con cristianisme.
Ance nominalisme no es sin problemes. Si parolas es no cosa ca aira, donce razona (e filosofia), cual es la manipula de parolas, es no cosa ca sofla de aira (como multe studiantes crede!). E acel inclui, natural, la razona cual on ia usa per ariva a la conclui nominaliste.
Per la Eglesa, nominalisme sinifia ce lo es no plu ca la persones ci composa lo, e relijio es sola lo cual individuas pensa. E, si Dio es Padre, Fio, e Spirito Santa, donce nos no pote es monoteistes.
Pierre Abelard (1079–1142) ia es un studiante de e Anselmo e Roselin. Un pensor briliante e un parlor e un canon (prete regulada) de la Catedral de Nosa Dama, el ia deveni un instruor popular a la Universia de Paris.
En 1117, el (de 38 anios) ia encontra un xica de 16 anios nomida Heloise. Un orfan, la xica ia es elevada par sua tio Fulbert. El ia es spesial intelijente, e ance bela, e donce sua tio ia demanda de Abelard ce el ta ensenia el per un sala e comes. Abelard mesma ia comenta ce esta situa es como confida un oveta a un lupo!
La instrui ia sufri alga. Abelard ia es plu probable composante poesias de ama ca lesones. Ma Heloise ia deveni ensinta e ia pari un fio cual el e Abelard ia nomi Astrolabe (astrolabio, un strumento per mesura la loca de stelas). Sua tio ia es multe coler, ma Abelard ia promete sposi Heloise, si Fulbert ta manteni la sposi como un secreta. La sola modo en cual el ta pote deveni un prete cuando sposida ia es si Heloise ta deveni un monce fema, un situa cual ia es nonasetable a ambos. Heloise ia vole deveni sua concubina, ma Abelard ia convinse el a sposi secreta.
Alora, tio Fulbert ia resta disturbada par esta, e ultima el ia envia alga omes per ensenia un leson a Abelard: Los ia talia sua jenitales! La popla de Paris (ci ia es franses, an en la eda medieval) ia compatia sua eroe Abelard, ma Abelard mesma ia es multe embarasada. Heloise e Abelard ia deveni monces per paia per sua pecas. Los ia intercambia leteras tra multe anios.
Abelard ia es convinseda a continua instrui e scrive. Per esemplo, el ia razona ce la Trinia refere no a la Padre, Fio, e Spirito Santa, ma a la potia, sajia, e ama de Dio. Con ideas como esta, el ia comensa irita alga de la persones con potia en la Eglesa. La Pape ia condena Abelard a silentia eterna e restrinje en un monceria (la puni normal per eresia en esta eda). En cuando Abelard ia viaja a Roma per defende se, el ia mori a 63 anios. Heloise ia convinse sua abade a entera Abelard a sua monceria propre. Pos 12 plu anios, Heloise ia mori e ia es enterada a lado de el. Los es ancora con lunlotra a la semetero Père Lachaise en Paris.
Abelard ia inventa sic et non – si e no, afirma e nega – en un libro con la mesma nom. Sic e non es un metodo socratal cual lista la razonas de du opinas oposada, a lado de lunlotra, per compara. Abelard ia es vera un razonaliste, e ia prende la slogan “me comprende per crede” (intelligo ut credam). El ia crede ce la veria de fida e razona debe acorda, como sua instruores, ma plu ce la razona es plu importante. Fida debe ajusta, pd: la Eglesa debe reesamina la sinifia de sua instruis cuando los no adere a la razona.
Per Abelard, etica es un caso de condui inspirada par un bon cor, bon vole, bon intendes. Si on ave un bon consiensa, on no pote fa mal (pd: peca). On pote es no plu ca erante. El ia dise, per esemplo, ce, cuando la romanes ia mata cristianes (incluinte Cristo mesma), los ia ata sola seguente sua consiensa, e donce los no ia es culpable de peca!
El es la plu bon conoseda per consetalisme, sua atenta per sintese nominalisme e realisme. An si la cosa e sua nom ave un realia propre, universales esiste en la mente como ideas, el ia dise, cual refere a grupos o cosas e es representada par parolas. La mente crea astratas de cosas real par deteta similes. Donce la sinifia de la parola gato es la astrata mental cual nos crea par regarda gatos individua e nota ce tota ave cuatro gamas, pelo, oreas puntida, du oios con pupiles strana, ce los miaui, etc, etc. Esta teoria es ancora importante en la psicolojia cognisial moderna.
Esta responde a la demanda de universales es ancora no sin problemes. Nota ce nos suposa ce nos pote usa parolas como gamas, oreas, oios, etc. Ma a cual los refere? Los pote sola refere a la astratas mental cual nos fabrica de gamas, oreas, oios individua. E como nos pote sabe ce nos regarda un gama? Oce, lo es un astrata mental cual nos fabrica de carne con un anca, un jeno, e un pede a la fini. E como es un jeno? Oce, lo es…. A cual punto nos ariva a un cosa unica?
[Personal: Me crede ce esta astratas o cualias es fundida sur eras, pd: situas en cual cosas individua es fasil confusada con lunlotra.]
La restas de la Impero Roman en Asia sude-ueste e Africa norde ia cade tan profonda ca cualce otra partes. Muhammad (570–632) ia trae Islam (“sede a Allah”) a la mundo, e lo ia sperde como un focon savaje, e par la spada e par convinse. Donce, con Islam e la reuni su un serie de califias arabi, la eda oscur ia fini alga plu temprana ala. En Baghdad, Damashq, Qahirah, e an Sevilla en Espania, la filosofistes ia turna a la elinicas antica e ia comensa denova razona e oserva. La securia, stablia, ricia, e tolera relativa de sua sosia ia inspira los a produi leteratur, incluinte filosofia, cual, a la cambia de milenio, ia prosimi a la atenis de Elas antica.
Ibn Sina (980–1037) ia es un de esta pensores grande. El ia conose Aristotele, ma el ia resta un neoplatoniste e un gnostica, como lo pare ce tota filosofistes muslim debe es per resta ance muslim. Jeneral, el ia crede ce razona e crede no pote desacorda, como ance la pensores cristian ia conclui. Ma el ia indiceta un eresia par sujesta ce tal cosas de crede como la paradiso fisical pos mori cual Muhammad ia promete a sua seguores es nesesada per gania la popla simple, ma es no plu ca fables per la credor matur.
Ibn Rushd (1126–1198) ia es la plu grande de la filosofistes muslim. El ia comensa como un avocato e ia es la judor xef de Sevilla, e plu tarda de Cordoba. El ia es ance un mediciste, e ia servi como la mediciste de la corte en Murrakush. El ia es la person prima ci ia reconose ce, si un person survive variola, el va es imune a pos. El ia descrive prima la usa de la retina. E el ia scrive un ensiclopedia de medica usada en universias e muslim e cristian.
Ibn Rushd ia comensa, natural, con Dio. Dio es lo cual susta realia. Dio es la ordina de la universo. Ma, el ia dise ance ce la crea de la mundo es sola un mito. La universo ia esiste sempre, e va esiste sempre.
La mente umana ave du aspetas: On ave la inteleto pasiva, cual es composada de la posiblia de pensa e inclui la detalias cual causa ce un personalia difere de un otra, psicolojial e fisical. Lo es un parte de la corpo e va mori con la corpo. On ave ance un inteleto ativa, cual enerji la inteleto pasiva. Lo es real la mesma en tota persones, e es la sola parte cual survive la mori e es, en fato, Dio.
Ma la abri a filosofia par islam no dura. La amir de Baghdad ia comanda ce la libros par Ibn Rushd es ardeda, e sua esemplo ia es segueda par otra xefes tra tota la distantia a Espania, la propre pais de Ibn Rushd. La mundo de islam ia ateni lo cual la mundo cristian ia fali ateni: la domina completa par relijio.
Par la media de Espania e Sisilia muslim, Ibn Sina e Ibn Rushd e otras ia inspira, en sua turno, la filosofistes e siensistes cristian de la universias nova de Europa.
En la tarda de la eda medieval (pd: la sentenio de 1200), Aristotele ia stimula multe pensa en la monces e filosofistes de la universias. Esta neoaristotelistes ia es nomida scolales, sinifiante “eruditas”. Par studia Aristotele e sua comentores muslim e iudi, los ia aprende pensa plu lojical, ma sua intendes ia es ancora teolojial. La “scolal” la plu grande ia es San Tomaso de Aquino (1225–1274).
De un familia de orijinas deutx, el ia es la fio de la conte de Aquino, un vila entre Roma e Napoli. El ia vade a la Universia de Napoli, do on ia ave un interesa grande a filosofistes muslim e iudi e, natural, Aristotele. El ia deveni un monce de la ordina dominican e ia vade a Paris per studia.
Sua madre ia es tan disturbada par sua deside ce el ia envia sua frates per saisi el e trae el a casa. Oposada a lo cual on ta suposa, familias no ia es comun felis cuando sua fios e fias ia vade a via per deveni monces. Los ia lamenta comun los como si los ta mori! Ma Tomaso ia evade los e ia continua sua studias en Paris e otra locas.
El ia es conoseda como un om relijiosa e umil, con no aspiras per altis en la eglesa (no como Abelard, la multe aspirante!). El ia scrive multe, ma es la plu bon conoseda per Summa Theologiae (“soma de teolojia”), comun nomida simple la Summa, un obra de 21 volumes en cual el usa la metodo de Abelard de sic e non per reconsilia Aristotele e cristianisme.
Tomaso ia crede ce la spirito es la forma de la corpo, como Aristotele ia dise, e dona vive e enerjia a lo. Ma la spirito e la corpo es intera liada con lunlotra. Esta no acorda con la ideas platoniste e neoplatoniste de la Padres de la Eglesa, e ia irita la plu la monces fransiscan mistica.
Tomaso ia ajunta ce la spirito sin la corpo no ta ave un personalia, car personalia veni de materia, no de spirito, cual representa la universal en nos. Per esta razona, la revive de la corpo es esensal en la idea de nonmortalia personal. La idea de Ibn Rushd ce sola un spirito nonpersonal survive mori ia es, per dise tal, un era.
Tomaso ia proposa sinco capasias de la spirito:
Per San Tomaso, la razona es la tesoro la plu bon de umania, lo cual leva el supra la animales. Seguente consetalisme, el ia pensa ce la inteleto es lo cual astrati la idea (forma o universal) de sua apare individua, donce an si esperia dial pote informa nos sur la detalias de realia, sola la razona o inteleto pote gida nos a la leges universal de la mundo fisical o an umana.
Ultima, nos nesesa conose direta e intuosa Dio. La razona depende de esperia sensal, e esperia sensal es de materia, no de spirito. Donce razona, como tota cosas umana, es nonperfeta e no pote comprende la perfetia cual es Dio. Fida es nosa refuja. Ma, el ia insiste, fida e razona no desacorda, car Dio no ta crea un mundo cual no coere ultima con la veria revelada.
An con sua brilia clar, San Tomaso (como tota filosofistes en tota edas) ia es un om de sua eda. Per esemplo, el ia es tan sesiste como cualce de sua presedores en relata a femes: El ia vide femes como inferior par natur (e par la desinia de Dio), e ia vide los como un menasa seria a la progresa moral de omes. El ia ance dedica un parte sinifiante de la Summa a anjeles e demones, ci el ia regarda como tan real como umanas e animales. Entre otra cosas, el ia crede ce la anjeles move la planetas, ce los no ave corpos, ce los pote move instante, e ce cada person ave sua propre anjel gardante.
Sua ideas ia menasa multe en la Eglesa, spesial la fransiscanes. Sua obras ia asentua tro multe la razona e tro poca la fida. El ia depende tro multe de paganes como Aristotele e Ibn Rushd. E el ia ensenia ce la spirito e la corpo ia es unida! Pos sua mori (a 49 anios), la fransiscanes ia convinse la Pape a condena el e sua scrives. Ma la dominicanes ia defende el, e en 1323 Tomaso ia es santida.
En 1879, Pape Leo 13 ia anunsia ce tomisme va es la filosofia ofisial de la Eglesa Catolica. Tomisme ia deveni, con marxisme, positivisme, e esistentialisme, un de la cuatro filosofias la plu influente de la sentenio 20. Nun sabe cual filosofias va es la plu importante de la sentenio presente!
La fransiscanes, como me ia dise, ia es la criticores prima de San Tomaso. Roger Bacon (1214–1294), un siensiste e monce fransiscan, ia sujesta ce la razona no pote opera par se mesma, ma nesesa la esperia per ave alga cosa como sua sujeto – un indiceta de empiricalisme en la Eda Medieval!
Ma la criticor la plu sever ia es John Duns Scotus (1265–1308), un monce fransiscan e profesor a Oxford, Paris, e Köln. El ia crede ce la autoria de la Eglesa es completa. La vole es suprema e la inteleto es suordinada a lo. An si el ia es un consetaliste (como Tomaso), el ia crede ce, entre la cosa, la idea, e la nom, la cosa individua es la plu real.
Sua studiante William de Ockham en England (1280–1347), ance un monce fransiscan, ia crede ance ce, sin contata sensal con cosas, la universal no es consetable. Vera, el ia dise, universales es no plu ca la nomes cual nos dona a grupos de cosas – un reveni a la nominalisme de Roselin.
William es la plu bon conoseda per la prinsipe cual es nomida per el: la rasador de Ockham. “No multipli causas si on no nesesa” es plu comun interpreteda como “la esplica la plu simple es la esplica la plu bon”. Plu tarda en la istoria de filosofia e siensa, esta ia comensa sinifia “si on no nesesa un esplica supranatural (pe: Dio), no usa lo!”
La resulta ultima de la pensas de William es seticisme: Sin universales, on no pote ave jeneralis, clasis, teorias, leges de natur, etc. On pote ave sola un colie de fatos sur cosas individua. Nos va vide esta denova en la filosofia de David Hume.
William de Occam, an si el ia es un cristian fidosa, es comun videda como la punto de diverje de la opina relijiosa de la Eda Medieval a la opina de siensa de la Renase e la eda moderna.
On pote dise ce filosofia ia reposa per un periodo a esta punto, no car ideas ia manca ma car plu ca 100 anios de Turbas ia aveni. La popla ia sufri un famion grande de 1315 a 1317. La economia ia jira a su e la bancos ia colasa en la desenios prima de la sentenio de 1300. La Gera de 100 Anios ia comensa en 1337 e ia dura tra 120 anios (no 100!). La Pesta Negra, portada par la pulgas sur ratas, ia veni de Asia sude-ueste e ia mata plu ca un tri de la popla entre 1347 e 1352. Revoltas par campanianes en England, Frans, e otra locas ia es cruel supresada entre 1378 e 1382. La Eglesa, cual ia manteni la unia de Europa tra sentenios, ia es fendeda entre du papes, un en Roma e un en Avignon, entre 1378 e 1417.
Ma esta avenis tan xocante ia fini ultima, e un esplode an plu grande de ativia inteletal ia comensa!
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 17 marto 2021 (11:46 UTC).