Falasias
Falasias es razonas cual pote sona lojical, ma no es tal. Cuando on regarda alga de la esemplos a su, on pote vide alga con concluis con cual on acorda, ma alga con cual on no acorda. Ma la veria, en la sensa empirical, no es la punto: Lo cual esta esemplos conserna es la razona lojical. Tota de esta esemplos es nonlojical e es fundida sur falasias.
Un esemplo es nomida la jenerali esedente. Algun pote razona: “Acel es la soreria la plu rica; Susana es un membro de acel soreria; donce Susana es un de la femes la plu rica en la universia.” Lo es serta posible ce Susana es vera un de la plu ricas, ma el pote ance es un de la plu povres. Lo no importa esce la conclui es vera o no en la sensa leteral. La razona es nonlojical. Lo sinifia tota no cosa per dise ce, si un grupo ave alga cualia, alora un membro de la grupo debe ave acel cualia ance.
Probable, tota persones es culpable de usa un falasia sin intende. La plu persones es vitimes de falasias an si los sabe plu bon. E on ave alga persones (propagandistes, anunsiores, e multe politicistes) ci usa los sempre. Lo ta es saja ce on deveni familial con la falasias afin on proteje se de la persones nonmoral. Ma, per favore, nota bon: esta lista no es intendeda per coraji algun a usa los!
Afirma de la seguente
“A implica B; B es vera; donce A es vera.” Esta es confusante, a veses, car lo pare tan multe como bon lojica: “A implica B: A es vera; donce B es vera”, conoseda como modus ponens o “afirma de la presedente”, es un de la silojismes (esemplos de razona) la plu fundal valida. Ma la afirma de la seguente es un razona falsa cual pare mera simil a la afirma de la presedente:
- “Si la suconsensa colieda cual Jung ia proposa ta es real, alora nos ta trova ce la mitolojias de tota cultures de la mundo ave similes profonda; empirical, mitos ave serta multe similes; donce, la suconsensa colieda es real.” – Ma no: on ave multe otra razonas per la similes entre mitos.
Esta es la conversa de la nega de la presedente (vide a su).
Converti la dependente
Un varia peti de afirma la seguente es converti la dependente: “Si A, B; donce, si B, A.” Esta razona falsa es simil a la afirma de la seguente, ma es espresada como un frase dependente.
- “Cuando la normas de educa es basida, la cualia de programes televisada mali. Donce, si nos ta oserva ce televide deveni plu mal tra alga anios seguente, nos ta sabe ce la normas de educa es ancora cadente.” No: la mali de televide pote ave otra causas.
- “Si la medisines la plu nova susede, nos va vide un boni grande en sania mental. Donce, si sania mental boni, nos va sabe ce esta medisines es efetosa.” No, denova: Sania mental pote boni per otra razonas ca esta medisines.
Nega de la presedente
“A implica B; A es falsa; donce B es falsa.” Esta es la conversa de la falasia de afirma de la seguente. Lo pare ance como bon lojica: “A implica B; B es falsa; donce A es falsa,” cual es nomida modus tollens o la nega de la seguente. Nega de la presedente, a la otra lado, es nonlojical.
- “Si la Dio de la Biblia ta apare a me mesma, acel ta demostra serta ce Cristiania es vera. Ma Dio ia apare nunca a me. Donce la Biblia es no plu ca un nara falsa.” No: Dio pote no apare a tu an si la Biblia es vera. Posible el no gusta tu.
- “Si la esiste de la invia de penis cual Freud sujesta ta es un cosa real, nos ta espeta ce femes es plu jentil con sua fios ca con sua fias. Ma la invia de penis es, serta, nonreal. Donce, natural, femes no trata plu bon sua fios ca sua fias.” No. Los pote ancora trata plu bon los, ma simple per otra razonas.
On ave ance un varia cual dise: “Si A, B; donce, si no A, no B.”
- “Si tu ave un diploma dotoral, tu debe es multe sabosa de psicolojia. Donce, si tu no ave un diploma dotoral, tu debe es spesial nonsabosa de psicolojia.” No: Un diploma pote sinifia ce on ave un grado de sabe, ma sabe depende apena de la posese de un diploma.
Falasia de composa
Falasia de composa es la idea ce un cualia compartida par un cuantia de cosas individual es ance compartida par un colie de acel cosas, o ce un cualia de la partes de un cosa debe ance es un cualia de la cosa completa.
- “Esta camion nova es completa fabricada de composantes de aluminio lejera, e es donce multe lejera.” No: un camion, an si composada de tan multe partes lejera, no debe mesma es lejera.
- “Un cilogram de plumas debe pesa min ca un cilogram de plomo.” No. En fato, los pesa la mesma: un cilogram. Serta, tu no ia fali esta!
- “Car neurones es o stimulante o inibinte, la serebro mesma debe ave states stimulante o inibinte.”
La falasia jenetical
Un varia de la falasia de composa es la falasia jenetical: On veni a un conclui sur la bonia o malia de alga cosa sur la funda de la orijina de la cosa. (Esta no es la mesma como la falasia ad hominem – vide a su – ma es comun listada ala.)
- “La medisin derivada de acel planta debe es venenosa, car la planta es venenosa.”
- “La labora umaniste cual nos fa veni probable de nosa nesesa per pare bon cuando nos fasa otra persones. Donce, labora umaniste es fundal egoiste!”
La falasia de divide
La oposa de la falasia de composa es la falasia de divide, pd. on suposa ce un cualia de alga cosa debe es aplicada a sua partes, o ce un cualia de un colie de cosas es compartida par cada de los.
- “Umanas es consensa e es composada de selulas; donce, cada selula es consensa.”
- “Tu studia a un universia rica; donce tu es rica.”
- “Car la ecipo ia es capas de solve tan fasil la problem, me suposa ce cada membro de la ecipo ta pote fa tan bon, solitar.”
Un plu falasia confusa partes e interas, la falasia de la media nondistribuida: On sujesta ce cosas es simil en cualce modo, ma on no indica como. A es un tipo de C; B es un tipo de C; donce A es B.
- “Gatos es un tipo de animal fundida sur la cimica de carbon; canes es ance un tipo de animal fundida sur la cimica de carbon; donce nos pote conclui ce canes e gatos es fundal identica.”
- “Ambos de los es studiantes, donce me pote espeta la mesma labora de ambos.”
- “Car tota de los es scizofrenicas, tota de los pote ave la mesma reata a esta medisin nova.”
Jenerali esedente
(acc. dicto simpliciter)
La aplica de un regula jeneral a un caso spesial. Un regula jeneral es aplicada a un situa spesial, ma la cualias de la situa indica ce la regula no es aplicable.
- “Jeneral, cristianes no gusta ateistes. Tu es un cristian, donce ance tu debe no gusta ateistes.”
Jenerali esedente inclui un malcomprende comun de la natur de statistica:
- “La majoria de persones en esta nasion mori en ospitales; donce vade nunca a un ospital!”
- “Omes es, statistical, plu violente ca femes. Donce, me, un mas, debe es plu violente ca tu, un fema.”
Jenerali fretante
Jenerali fretante es la conversa de jenerali esedente: On usa un caso spesial como la funda de un regula jeneral. Un regula jeneral es creada par esamina sola alga poca casos spesifada cual no representa tota casos posible.
- “Me conose un representor de un sindicato e el es un person criminal. Me no ta fida cualce de los.”
- “Xavier ia es un cristian nonsinsera. Donce, tota cristianes es nonsinsera.”
- “Esta scizofrenica ave deludes paranoica. Lo es razonable ce tota de los ave deludes de acel tipo.”
La statistica de cuantias peti
Jenerali fretante inclui un otra malcomprende comun de statistica, nomida la statistica de cuantias peti:
- “Mea jenitores ia fumi tra sua vives intera e los no ia developa canser…”
- “La sinco sujetos en nosa esperimenta ia responde bon a nosa interveni. Nos pote, donce, recomenda la prosede a cadun.”
Eleje de oservas
Un otra varia es nomida eleje de oservas: on indica situas favorente e iniora la situas nonfavorente. Per esemplo, a cualce loca de aposta, tota la atende vade a los ci gania, e los ci perde es cuieta corajida a sorti tra la porte retro. En esta modo, la gania pare multe plu posible ca lo es. Recorda: La casino gania sempre!
- “Tota de esta persones ci ia prea per un remedia ia survive sua maladia. On debe serta recomenda la prea!”
Atesta racontada
Eleje de oservas es la plu bon mostrada par atesta racontada:
- “A sola la semana presedente, me ia leje sur un xica morinte de canser. Tota sua familia ia vade a la eglesa e ia prea per el, e aora el no ave an un pico de canser. Esta demostra clar la potia de prea!”
- “Tio Josef ia cura sua maladia reumatica par bevi sua propre urina!”
Bon esemplos pote es trovada entre “mitos urban”.
Dicotomia falsa
(negra o blanca, media escluida)
La suposa ce un distingui es de la spesie “o esta o acel”. On sujesta ce on ave sola du alternativas, cuando otra alternativas esiste o pote esiste. En loca de negra o blanca, nos pote ave tinjes de gris… o an un arco de sielo de colores!
- “Nos debe eleje entre securia e libria. E lo es la natur de tota bon sitadanes ce los eleje la risca de libria!” Esce nos debe eleje? Nos no pote ave ambos? O un compromete?
- “Un pasiente o deveni sana o el no deveni sana.”
- “Dise a me: esce el es o no es bipolal?”
Un otra forma de dicotomia falsa es considera sola la estremas:
- “El es culpable o no culpable.”
Conclui en premisa
(petitio principii)
On suposa como un premisa la conclui cual on desira ateni. En loca de ofre un demostra real, on pote simple reespresa la conclui cual on desira, e espera ce la escutor no nota esta.
- “La posese par la governa de servis publica es perilosa, car lo es sosialiste.” Ma la posese par la governa de servis publica es sosialisme. On ia dise a tu ce lo es perilosa car lo es lo cual lo es.
- “Metodos cualial ave no valua car los no inclui mesura o statistica.” Vera: acel es la sinifia de metodos cualial, e donce los mesma no pote indica un valua.
Razona sirculo
(la sicle vil, circulus in demonstrando)
La forma la plu evidente de conclui en premisa es la razona sirculo: On declara en sua demostra lo cual on debe demostra.
- “Nos sabe ce Dio esiste, car la Biblia dise lo; e nos sabe ce la Biblia es vera car lo es la parola de Dio.”
- “Tua razona contra Freud es la resulta de tua desacorda suconsensa cual tu no ia solve.”
- “Tua razona contra esistentialisme es la resulta de tua nonautenticia.”
Apela a fida
On ave ance la apela a fida: fida, par sua defini, depende de un crede cual no depende de lojica o atesta. Fida depende de pensa nonlojical.
- “Si tu ta aseta la Dio, tu ta comprende!”
- “Si tu ta aseta Maslow, tu ta comprende sua ideas!” etc.
Eticetas cargada
La modo la plu comun per pone la conclui en la premisa es par usa eticetas cargada (parolas cargada, parla emosial), pd. redise la conclui, ma usante parolas “calda”:
- “Esta criminor es acusada de la crimin la plu savaje conoseda par umanas.” Esce esta demostra cualce cosa, o causa sola la flue de la sangue?
Razona ad hoc
Frecuente difisil per identifia (e donce multe perilosa) es la razona ad hoc: On dona pos un aveni un esplica cual no aplica a otra situas.
- — “Me vide ce la canser de Joan es remeteda.”
— “Si, nosa preas ia susede!”
— “Ma esce tu no ia prea per Susana ance? Vide cual ia aveni a el.”
— “Me es serta ce Dio ia ave un razona spesial per permete ce el mori.” – Esta punto final es la razona ad hoc.
- “La persones ci no segue la model espetada de madre forte / padre debil, gidante a omosesalia, asconde sua orienta vera, sin duta!”
Es vijilante cuando persones dise “tota ave un razona” o “Dio ave un intende per cadun” o “la veria es ascondeda”.
La demanda complicada
(demanda cargada, demanda trucosa, falasia de interoga, falasia de presuposa)
La demanda complicada es la forma demandante de conclui en premisa. On fa un demanda cual gida otras a crede ce un demanda presedente es ja respondeda en un modo spesifada.
- “Responde si o no: Esce tu ia sesa condui mal?” Si on dise “si”, on confesa ce on ia condui mal a ante; si on dise “no”, on confesa ce on condui ancora mal!
- “Esce tu ia sesa colpa tua sposa?”
- “Dise a me: esce tu es ge, o simple negante? E cuando tu va anunsia lo?”
La falasia de multe demandas
(plurium interrogationum)
Un varia de la demanda complicada es la falasia de multe demandas. Esta falasia aveni cuando algun esije un responde simple a un demanda complicada:
- “Si o no: Esce democratia es ultima la sistem la plu bon de governa?”
Un otra varia de esta falasia es la solisita de un esplica de alga cosa cual es nonvera o ancora no demostrada:
- “Como tu ta esplica la esiste de estrateranes sur nosa planeta?”
Causa falsa
(non causa pro causa, non sequitur)
Alga cosa es indicada como la causa de un aveni, ma lo no ia es vera demostrada como la causa. Per esemplo:
- “Me ia prende un aspirina e ia prea a Dio, e mea dole de testa ia desapare! Dio ia remedia mea dole de testa!”
- “Artistes sufri comun de depresa cuando los adolese. Donce, si tu vole ce tua enfante deveni un artiste grande, no dona Prozac a el!”
Pos hoc ergo propter hoc
La forma la plu comun de causa falsa es nomida pos hoc ergo propter hoc: Un conclui cual no segue de premisas o atestas demostrada. On suposa lias causal cual no es ja demostrada. La frase latina sinifia “pos esta, donce par causa de esta”.
- “Tu debe vade a la Universia Harvard, car graduadas de Harvard reseta plu mone.” O posible los ia ave plu mone an ante vade a Harvard.
- “El ia es malada pos visita Xina; donce alga cosa en Xina ia causa la maladia.” O posible el ia ave la maladia ante parti per Xina, o en sua vola de Xina.
- “La cuantia de nases ia crese a la luna plen. Donce, lunas plen causa un alti de la frecuentia de nases.”
Cum hoc ergo propter hoc
Un varia peti de esta es cum hoc ergo propter hoc: On dise ce, car du cosas aveni con lunlotra, los debe es causal relatada. Lo es un falasia car lo iniora la otra causas posible de la avenis.
- “La cuantia de persones alfabetiste ia descrese pos la introdui de televide. Lo es clar ce la televide impedi la aprende.”
- “El ia comensa usa drogas a la mesma tempo cuando el ia comensa visita acel xica. Me ia sabe ce acel xica es un mal influe!”
Confusa de corelata e causa
Un varia statistical comun de esta es la confusa de corelata e causa: corelata no pote indica la dirije de causa. Si X es forte corelatada con Y, X pote es la causa de Y, o Y pote es la causa de X, o (la plu probable) alga otra cosa es la causa de ambos. E posible la relata es tota acaso.
- “Plu juores de xace es omes; donce, omes es xacores plu bon ca femes”.
- “Multe plu femes sufri de depresa ca omes. Nos pote alora conclui ce depresa es causada par alga cosa pertinente a la fisiolojia de femes.”
Esta es frecuente segueda par un razona ad hoc:
- “La xacores-mestres fema debe es lesbianes.”
- “La omes con depresa debe es femin.”
La arenge roja
(tese nonrelatada, ignoratio elenchi, conclui nonrelatada, iniora la problem, nebli la tema, diverje, punto mancada, etc)
On demostra un punto otra ca la esaminada; on diverje de la tema par cambia lo. En England elizabetan, prisonidas ci ia evade prison ia frota se con un arenge “roja” (vera, un brun-roja), pd. putrida, per distrae la canes de la odor.
- “Me no pote vide perce on considera la xasa de animales como cruel, cuando lo dona multe plaser a multe persones, e emplea an plu.” Donce ta ce nos sesa discute sur cruelia e comensa parla sur plaser e emplea?
- “Cristiania es la sola relijio vera: Lo ia furni clar un aida enorme a multe persones.” Lo es nonimportante ce el espresa tan multe e tan bon cuanto lo ia aida persones – el no ia demostra ce cristiania es la sola relijio vera.
- “Lo es clar ce nos prescrive opioides a persones ci no nesesa vera los. Nos debe proibi esta drogas en tota casos!”
La asustavia
(om de palia)
Un esemplo de la arenge roja es la asustavia: On crea un sena falsa e alora ataca lo; on malrepresenta la posa de un otra per ataca plu fasil lo.
- “Evoluistes pensa ce tota cosas ia aveni par acaso. Como esta es posible?” La plu de evoluistes pensa de eleje natural, cual pote inclui multe elementos acaso, ma no depende intera sur avenis acaso. El ci depinta sua oposor con colores falsa fa no plu ca redirije la intende de la debate.
- “Per resoma Freud, el ia crede ce tota problemes refleta problemes sesal. Permete ce me demostra perce Freud es donce plen de caca!”
Reali falsa
Un otra esemplo es la reali falsa: On trata un conseta astrata o un construi ipotesal como si lo representa un aveni concreta o un cosa fisical. Un esemplo es la modo en cual la resultas de esaminas de intelijentia es comun presentada como mesuras real de intelijentia.
- “Cual es consensia? On no pote trova lo en cualce loca en la serebro umana, donce nos debe rejeta la conseta.” Esta es un falasia multe comun entre materialistes.
La demanda sin sinifia
Un otra esemplo es la demanda sin sinifia:
- “Como alta es a supra?” Nota ce “a supra” es un dirije, no un cosa mesurable.
- “Esce cualce cosa esiste vera?”
- “Como nos pote esperia direta la suconsensia coletiva?”
Apela a lojica
Un varia multe astuta de la arenge roja es un apela a lojica (argumentum ad logicam): Esta es la “falasia falasial” de sujesta ce un proposa es falsa car on ia presenta lo como la conclui de un razona falsa. On debe nota ce un razona falasiosa pote ariva a un conclui vera!
- “Regarda la frato 16/64. Aora, par sutrae la ses alta e la ses basa, nos trova ce 16/64 = 1/4.”
“Pausa per un momento! Tu no pote simple sutrae la du seses! Tua matematica es noncoreta. 16/64 no es egal a 1/4.” Ma on debe nota ce, an si la matematica es noncoreta, 16/64 es vera egal a 1/4!
Atesta supresada
Multe comun es atesta supresada: Un declara, comun usada per engana, cual no inclui alga de la fatos nesesada per un esplica esata.
- “Esta persones ia traversa la borda sin permete. Donce los es criminores.”
Analojia falsa
Un de la varias la plu mal de arenge roja es la analojia falsa: Un analojia o metafor mostra un paralel per esplica plu, ma lo demostra no cosa:
- “La americanes orijinal ia debe abri la via per sivilia ueste; cadun comprende ce on no pote prepara un omeleta sin rompe alga ovos.” Ma esce la vives e cultures de miliones de persones es comparable a ovos? E como la prepara de omeletas pertine a istoria e moralia?
- “Car la mente es esensal un computador mol, nosa taxe es descovre como nos ta programi la plu efetosa lo.”
Apela spesial
On ave multe falasias cual inclui la malusa de parolas: Un esemplo comun es nomida apela spesial, cual es la usa de parolas spesial per la un e la otra:
- “La taticas sin compatia de la enemi, sua atacas savaje e suisidal, ia es rompeda par la desides difisil de nosa comandores e la autosacrifia corajosa de nosa soldatos.” Esce taticas sin compatia es multe diferente, en realia, de desides difisil? Esce atacas savaje suisidal es multe diferente de autosacrifia corajosa? Esta es un falasia usada multe par jornalistes, politicistes, e jenerales.
- “La forma de terapia sujestada par Ellis es autoritariste e combatosa!”
- “La forma de terapia sujestada par Rogers es laissez-faire, e an pigra!”
La falasia de vasila
Esta no es tan distante de la falasia de vasila, o la usa de parolas ambigua. Un parola clavin es usada con du o plu sinifias diferente en la mesma razona – la desloca de sinifias.
- “Cual cosa ta pote es plu barata ca programes libre per tua computador? Ma per serti ce los resta libre, ce usores pote usa la programes como los desira, nos debe pone un lisensa a los per serti ce los va es sempre libre redistribuable!” Un metodo per evita esta falasia es per eleje termas con atende ante comensa la razona, e evita parolas como “libre” cual ave multe sinifias.
La falasia de “no om vera scotes”
Un falasia con un nom divertinte es la falasia de “no om vera scotes”: Suposa ce me ta sujesta ce no om scotes usa zucar sur sua gaxa. Tu responde par indica ce tua ami Angus gusta zucar sur sua gaxa. Alora me dise: “A, si, ma no om vera scotes usa zucar sur sua gaxa!” Par sujesta ce Angus no es un om scotes con documentos ofisial, me ia limita la sinifia de la espresa “om scotes”.
- “Como el pote fa acel a sua sposa si el ama el?”
“A, ma acel no es ama vera, vide?”
- “No terapiste compatiosa ta usa tal metodos!”
- “No siensiste bon educada ta ariva a acel concluis!”
- “Cristianes ofre la otra jena cuando on ataca los.”
“Me me ia vide alga cristianes ci responde a violentia con violentia.”
“Serta, ma los no es bon cristianes. Los no es cristianes real en cualce modo!”
Esta falasias inclui comun la usa de asentua, la cambia de vose en un frase per cambia la sinifia. En engles, per esemplo, la parola “men” pote sinifia o omes o persones:
- “All men are created equal…” sujesta ce femes no es creada como egales.
- All men are created equal…” sujesta ce los es tal creada, ma no fini egal.
(Nota ance ce la parola equal (“egal”) es multe ambigua. La intende ia es ce tota persones es egal en la lege, e no en ricia, belia, intelijentia, etc.)
Un otra forma de malusa de parolas es amfibolia – la usa de frases ambigua:
- “Du pizas a un custa spesial.” Esce on intende du per un? O ambos a la mesma custa “spesial”?
Ataca personal
(argumentum ad hominem)
On ataca la person en loca de la razona. En la ataca personal, nos demanda ce la escutor no considera la razona, ma considera en loca la person de cual lo veni:
- “Esta teoria sur un remedia nova per canser ia es introduida par un om con simpatias marxiste. Me no vide perce nos debe estende a el la cortesia de nosa atende.”
- “Tu no pote fida Freud – el ia usa cocaina!”
- “Tu no pote fida Adler – el ia es un sosialiste!”
- “Tu no pote fida Horney – el ia sufri de depresa!”
Ma marxistes, usores de cocaina, sosialistes, persones depresada, an stupidas, pote es coreta!
Alora on ave la forma maltratante de la ataca personal:
- “Tu sujesta ce ateistes pote es moral – ma me sabe ce tu ia abandona tua sposa e enfantes.”
- “Tu no acorda con esperimentas? Me ia leje ce tu no ia es capas de publici tua propre rexerca!”
Pico plu astuta es la forma situal de ataca personal:
- “Lo es tota asetable ce on mata animales per come. Car tu porta sapatos de cuoro, me es serta ce tu no desacorda.”
- “Tu no acorda con Rogers – ma me nota ce tu usa sua tecnica de refleta en tua propre pratica.”
Veneni la poso
Multe danante es veneni la poso: La ataca personal pote es usada como un escusa per rejeta un conclui spesifada, como cuando on alega ce algun esplica un conclui per razonas egoiste. On ia “veneni la poso” car, de aora, persones va tende duta sua razona.
- “Natural tu sujesta ce ata afirmante es un idea mal: tu es blanca!” Ma persones blanca pote aproba cosas cual no benefica se.
Nota ce si algun es un mentor conoseda, acel fato va redui cuanto on fida el como un atestor. Ma lo no va demostra ce sua atesta es falsa en esta caso. Mentores pote dise la vera!
- “No atende a sua criticas de esistentialisme – el es un materialiste!”
Tu quoque
Cada adolesente conose bon la razona nomida tu quoque, latina per “tu ance!” o “vide ci parla!”
- “Si tu crede ce abita en un cibuts es un idea tan bon, perce tu no abita en un cibuts?”
- “Si psicolojia es tan eselente, perce tu ave tan multe problemes mental?”
- “Si fumi es tan mal, perce tu fumi ancora?” – Ma an un fumor pote sabe ce lo no es bon per sua pulmones!
Apela a la fola
(argumentum ad populum)
Esta envolve suplicas teatral a nosa instintos la plu basa, como egoisme, avaria, jelosia, vania, en loca de usa fatos e razona:
- “Car vos escuta como membros de la universia, me sabe ce me pote parla seria a vos sur temas difisil.” – O, alora, multe grasias; per favore, continua!
Un esemplo de apela a la fola es la falasia de moda (consensus gentium, argumentum ad numerum): On conclui ce un idea ave merita sola car multe persones crede lo o pratica lo.
- “La plu de persones crede a Dio; donce, lo debe es vera.”
- “Me dise sola ce miliones de persones crede a astrolojia, donce lo debe ave alga realia, no?”
- “La popularia enorme de libros sur la analise de sonias sujesta sua validia!”
La razona de omnisientia
Un varia de la presedente cual dise, esensal, ce “tota persones” acorda:
- “Tota persones sabe ce omes e femes es la mesma en sua psicolojia!”
- “Cadun es interesada par inteleto artifis – lo debe ave alga realia!”
Garda se contra parolas como “tota”, “cadun”, “cada cosa”, etc.
Apela a autoria
(argumentum ad verecundiam)
Esta es cuando nos introdui persones famosa, grupos autoriosa, siensa, tradision, relijio, universales…
- “Mea profesor ia dise ce la psicolojia de condui es stupida.” An si un figur de autoria dise alga cosa, esta no nesesa sinifia ce lo es coreta (estra, natural, si acel autoria es me mesma).
La filosofiste grande Santayana ia dise: “Los ci resta nonsabente de istoria es destinada a repete lo.” Ma Henry Ford ia dise: “Istoria es asurda!” Alora, ci es coreta?
- “Freud ia dise… – e esce nos ave la direto de debate con un jenio de sua calibre?”
Esta inclui la tecnica famosa de mercatistes nomida apela clasiste:
- “Jinas de Laboretas. Los no es per cadun!”
- “Chez Merderia – la vino per la conosor vera!”
- “Cadun ci pote compra lo prefere la terapia freudian!”
Apela a tradision
Varias inclui un apela a tradision (argumentum ad antiquitatem): Esta es la falasia de dise ce alga cosa es bon o coreta sola car lo es vea, o car “esta es como sempre”. Ma an si persones ave un tradision, esta dise nunca sur esce lo es vera (o bon). Vide, per esemplo, razonas per astrolojia, sclavia, superstisio, sacrifia de umanas…
- “Psicolojistes ia acorda sempre ce….”
Apela a novia
Simil es la apela a novia (argumentum ad novitatem): La falasia de declara ce alga cosa es plu bon o coreta sola car lo es nova, o plu nova ca alga otra cosa.
- “Lo es la idea la plu resente!” Ma la studias la plu resente es ance los cual ave la min posiblia de es demostrada como erante!
- “Windows 387 es multe plu bon ca la varia plu vea de la sistem Windows. Serta lo debe es plu bon, arivante pos tan multe anios de susede!”
Apela a ricia
(argumentum ad crumenam)
La falasia de crede ce mone es un criterio de coretia; ce los ci ave plu mone es plu probable coreta; o ce alga cosa cual custa plu es donce plu bon.
- “Produidas de Microsoft es sin duta superior; perce tu pensa ce Bill Gates ia deveni tan rica?”
- “Lo custa duple plu – lo debe es duple tan bon!”
- “On reseta lo per cual on paia!” Vera?
- “Me fida psiciatristes plu ca psicolojistes: Los custa plu!”
Apela a povria
Natural, on ave ance la apela a povria (argumentum ad lazarum): La falasia de suposa ce algun povre es plu virtuosa e fidable ca algun ci es plu rica, o ce alga cosa plu barata o simple es plu bon ca alga cosa plu cara o complicada. Per esemplo:
- “Monces posese plu probable un intui per la sinifia de vive, car los ia rejeta la distraes de ricia.”
- “Un pan simple, preparada par mano – cual cosa ta pote es plu bon?”
- “Car Joan fa tan multe de sua labora pro bono (sin custa), el debe es un terapiste plu onesta.”
Apela a natur
Un falasia comun, e multe perilosa, es la apela a natur (o la falasia de lege natural): On razona ce, car umanas es produidas de la mundo natural, nos debe imita la condui videda en la mundo natural, e ce fa diferente es “nonatural”. On pote trova esta spesial frecuente en politica e relijio, e en produidas de autoremedia.
- “La mundo natural es conoseda per compete; animales luta contra lunlotra per posese de recursos limitada. Capitalisme, la luta per posese de capital, es simple un parte nonevitable de natur umana. Esta es la modo en cual la mundo natural opera.”
- “Sin duta, omosesalia es nonatural. Cuando tu ia vide du animales de la mesma seso ci copula?” En realia, acel es plu comun ca on pensa: Plu ca 500 spesies ia mostra acel condui! Ma nota bon: Lo cual es vera per otra animales no nesesa es vera per nos.
- “Nosa atrae a persones bela es paralel a la instintos de avias e mamales. Ama, donce, es no plu ca un instinto!”
Apela a compatia
(argumentum ad misericordiam)
Esta es un apela a tua emosias amin, tua compatia. Escuta, si tu pote tolera, cualce suplica per donadas par enfantes malada. O escuta anunsias cual atenta vende computadores cara a jenitores.
- “Tu no ta vole ce tua enfantes es nonvantajida par sua nonsabe de computadores, si? Cual tipo de jenitor tu ta es en acel caso?”
- “Me no ia mata mea madre e padre con un axa! Per favore, no dise ce me es culpable! Me sufri ja sufisinte par es un orfan.”
- “Metodos cualial es usada par un grupo peti de rexercores dedicada, laborante en un ambiente enemin de esperimentores.”
Apela a nonsabe
(argumentum ad ignorantiam, argumentum de silentio)
Un otra falasia multe comun es la apela a nonsabe: On razona ce alga cosa debe es vera, simple car lo no ia es demostrada como falsa. O on razona ce alga cosa es falsa car lo no ia es demostrada como vera. Per dise: mea ideas es coreta car on ave no atesta contra los. O tua ideas es falsa car on ave no atesta per los.
- “Nos no ave atesta ce Dio no esiste. Donce, el debe esiste.”
- “On ave viventes intelijente sur otra planetas, car nun ia es capas de demostra ce los no esiste.”
Vera, on no pote demostra la nonesiste de alga cosa. An si on ia xerca multe bon, me pote dise sempre ce on no ia xerca sufisinte. Atenta: demostra a me ce unicornos no esiste! La carga de demostra es sempre sur el ci razona ce cualce cosa esiste vera!
- “Nos no sabe esce medisines oliste pote vera aida maladias psicolojial, donce nos debe usa los asta cuando la rexerca ta es fada.”
Esta es comun segueda par un apela a compatia:
- “Tu ta preveni ce persones ave la posible de remedia, sola car tu no ave atesta? Tu es un monstro!”
Carga de demostra
Un acompaniante comun de la apela a nonsabe es la desloca de la carga de demostra: La carga de demostra es sempre sur la person ci declara alga cosa. Desloca la carga de demostra es la falasia de pone la carga sur la person ci nega o no fida la declara. Tal, cuando un debator no furni la atestas nesesada per sua declaras, el defia sua oposor a demostra ce el ia era.
- “Demostra ce Dio no esiste, si tu es tan serta!”
- “Demostra ce OVNes no es real, alora!”
- “Me crede ce omosesalia es fundida sur diferes biolojial – me defia tu a demostra ce me era!”
Apela a teme
(argumentum a baculum)
No debate con me – lo es perilosa!
- “Si tu no condena esta mator, posible un de vos ta es sua vitim seguente.”
- “Usa esta desodorinte, o tu va ave no amis.”
- “Si tu no crede a Dio, tu va arde en enferno!”
- “Tu debe aprende tua statisticas, o tu va ateni nunca tua diploma dotoral.”
Razona de la efeto negativa e la inclinada liscosa
Pico plu sutil es la razona de la efeto negativa:
- “La person acusada debe es enviada a prison; si no, otras va atenta crimines simil.”
E un varia comun es la inclinada liscosa (la efeto de dominos, la bal de neva): On sujesta ce un cambia de prosede, lege, o otra ata va causa un efeto negativa:
- “Dona un dito e on fura la braso.”
- La espresa arabi: “Si la camel entra sua nas a tua tenda, sua corpo intera va entra pronto!”
- “Si on ta suporta diretos egal per femes, pronto a pos, nos ta debe usa banios unisesal!”
- “Si nos ta legali canaba, alora plu persones ta comensa usa eroina e cocaina, e nos ta debe legali ance los. No multe plu tarda, nos ta ave un nasion plen de drogamanicas suportada par la governa.”
- “Si on dona Prozac a persones depresada, los va deveni dependente de lo, e alora de drogas jeneral, e los va pote nunca trata mesma sua problemes!”
Nota ce un inclinada liscosa no nesesa segue sola car nos cambia cosas! Esta falasia es comun usada par los ci no gusta la suiside aidada o la rejistra de armas.
Argumentum ad nauseam
La falasia la plu usada par anunsiores e politicistes: la argumentum ad nauseam, pd. “repete asta cuando on vomiti”. Esta es la crede noncoreta ce un declara es plu probable vera (e plu probable asetada como vera) si on oia plu frecuente lo, donce on debe repete constante lo. Vide cualce anunsia, o vide la pratica de forsa ce enfantes memori sua lesones o sitas de la Biblia.
- “La condisiona clasica debe es a la radis de tota aprende – lo ia es martelida en mea testa a universia!”
- “Tra tota mea vive, persones ia dise a me ce un om debe nunca mostra debilia!”
La esemplo final: en la eda temprana de televisa, la suportores de programes ia repete sua anunsias a un ves en cada pico de minutos: “bevi Coca Cola… bevi Coca Cola… bevi Coca Cola…”
