LA ISTORIA DE PSICOLOJIA

Fenomenolojia e esistentialisme

Fenomenolojia es un tecnica de rexerca cual envolve la descrive atendente de aspetas de vive umana como los es viveda; Esistentialisme, derivante sua intuis de fenomenolojia, es la disposa filosofial cual regarda la vive umana de la interna, en loca de finje comprende lo de la perspetiva esterna e “ojetal”. Esistentialisme fenomenolojial, como un filosofia e psicolojia, no es un sistem sever definida; ma sua aderores es fasil identifiable par sua asentua de la importa de individuas e sua libria per partisipa en sua propre crea. Lo es un psicolojia cual asentua nosa prosedes creosa plu ca nosa adere a leges umana, natural, o divin.

Franz Brentano

Franz Brentano

Franz Brentano ia nase a 16 janero 1838 en Marienberg, Deutxland. El ia deveni un prete en 1864 e pos du plu anios ia comensa como un ensenior a la Universia de Würzburg. Dutas relijiosa ia resulta, e el ia parti de la pretia e ia resinia de sua posto de ensenior en 1873.

En la anio seguente, el ia scrive Psicolojia de un perspetiva empirical. En esta libro, el ia introdui la conseta cual es la plu asosiada con el: intensionalia (acc: “ojetalia inerente”). Esta es la idea ce lo cual marca la mente como diferente de cosas es ce atas mental es sempre dirijeda a alga cosa ultra la mente: La vide implica alga cosa videda, la vole implica alga cosa voleda, la imajina implica alga cosa imajinada, la judi implica alga cosa judida. Intensionalia lia la sujeto e la ojeto en un modo potiosa. El ia reseta pronto un posto como profesor a la Universia de Wien.

En 1880, el ia atenta sposi, ma sua sposi ia es proibida par la governa osteraices, cual ia continua vide el como un prete. El ia parti de sua profesoria e ia move a Leipzig per sposi. En la anio seguente, el ia es permeteda a reveni a la Universia de Wien, como un lesonor.

El ia es popular con la studiantes. Entre los ia es Carl Stumpf e Edmund Husserl, la fundores de fenomenolojia, e Sigmund Freud. Brentano ia jubila en 1895, ma ia continua scrive asta sua mori a 17 marto 1917, en Zürich.

Carl Stumpf

Carl Stumpf ia nase a 21 april 1884 en Wiesentheid en Baiern. El ia es forte influeda par Brentano. Como un lesonor a la Universia de Göttingen, el ia publici La orijinas psicolojial de persepi de spasio en 1870. En 1873, el ia deveni un profesor a la Universia de Wurzburg. Sua obra mestral, Psicolojia de tono, ia es completida tra un serie de profesorias a Praha, Halle, e München.

El ia deveni un profesor e la dirijor de la Instituida de Psicolojia Esperimental a la Universio Friedrich-Wilhelm en Berlin en 1894, do el ia continua sua labora sur la psicolojia de musica, ia produi un jornal sur la sujeto, e ia comensa la arcivo de musica primitiva.

Stumpf ia jubila en 1921, e ia continua sua laboras asta sua mori a 15 desembre 1936 en Berlin. Con Husserl, el es comun videda como un cofundor de fenomenolojia e ia es spesial un inspira a la psicolojistes de gestaltes.

Edmund Husserl

Edmund Husserl ia nase a 8 april 1859 en Prossnitz, Moravia. El ia studia filosofia, matematica, e fisica a Leipzig, Berlin, e Wien. (Nota ce studiantes en Deutxland move comun de un universia a un otra, per studia su sua idoles en sua campo.) El ia reseta sua diploma dotoral de la Universia de Wien en 1882 en matematica. En la anio seguente, el ia comensa studia su Franz Brentano.

Husserl, naseda en un familia iudi, ia converti a luteranisme en 1886, e ia sposi Malvine Steinschneider en 1887, ci ia es ance un convertida. Los ia ave tre enfantes. En esta mesma anios, el ia vade per studia con Carl Stumpf a la Universia de Halle e ia deveni un lesonor ala. Los ia deveni bon amis e ia intercambia sua ideas.

Cuando a Halle, el ia es angusada sur la lia entre matematica e la natur de la mente. El ia reconose ce sua ideas orijinal, cual ia envolve la idea ce matematica deriva de psicolojia, es malgidada. Alora, el ia comensa la developa de sua tipo de fenomenolojia como un modo de investiga la natur de esperia mesma. Esta ia resulta la publici de Investigas lojical en 1900.

El ia es invitada per un profesoria a la Universia de Göttingen en 1901, do la studiantes ia comensa formi un ronda sirca el e sua obras. El ia developa ance un amia con Wilhelm Dilthey, e ia es influeda par sua ideas sur la contesto istorial de siensa.

En 1916, el ia vade a la Universia de Freiburg. Ala, el ia scrive Filosofia prima (1923–1924), cual resoma sua crede ce fenomenolojia ofre un modo a la developa de moralia e un mundo plu bon. El ia reseta multe onoras e ia dona lesones invitada a la Universia de London, la Universia de Amsterdam, e la Sorbonne en Paris, resultante ce sua ideas ia deveni otenable a multe plu escutores nova.

El ia jubila en 1928. Martin Heidegger, con la suporta forte de Husserl, ia es asiniada per sua seguor. Cuando la laboras de Heidegger ia developa a un funda de esistentialisme, Husserl ia distanti se de esta ideas nova.

Cuando la nazis ia comensa domina en 1933, Husserl, car el ia nase como un iudi, ia es escluida de la universia. An tal, el ia continua furni suporta a sua amis en la resiste. El ia parla sur la crise european en Wien en 1935, an si el ia es su un regula de silentia. El ia parla ance a la Universia de Praha en acel anio, do sua manoscritos nonpublicida ia es colieda e catalogida.

Sua obra final, La crise de siensas european e fenomenolojia transendente (1936) ia introdui la conseta de Lebenswelt. En la anio seguente, el ia deveni malada e, a 27 april 1938, el ia mori.

Fenomenolojia

Fenomenolojia es un atenta de boni nosa comprende de nos mesma e nosa mundo par la descrive atendosa de esperia. A la surfas, lo pare no plu ca la oserva natural e introspeta. Esamina lo alga plu prosima, e on pote vide ce la suposadas fundal es multe diferente de los de la siensas umana orientada a esperimentas: Per fa fenomenolojia, on debe atenta descrive fenomenos sin redui acel fenomenos a “non-fenomenos” ci es suposada como ojetal. En loca de apela a ojetalia per validi, on apela a acorda intersujetal, pd: otra descrives par otra fenomenolojistes. On pote ance investiga la similes e diferes de descrives de sua esperias entre persones estra academia.

Fenomenolojia comensa con fenomenos – apares, lo cual nos esperia, lo cual es donada – e no vade a via de los. Lo no judi un esperia par regarda esce lo es cualida per es un esperia. En loca, par prende un disposa fenomenolojial, on demanda ce esperia dise a nos lo cual lo es.

La tipo de fenomenolojia la plu fundal es la descrive de un fenomeno spesifada como un aveni de un momento, un cosa, o an un person, pd: alga cosa plen de sua cualias unica. Herbert Spiegelberg (1965) descrive tre fases:

  1. Intui – On esperia o recorda la fenomeno, teni lo en sua consensia, o vive en lo, partisipa en lo, abitua en lo o sur lo. Nota ce, en psicolojia deutx, la parola “intui” inclui no sola avenis mental, ma la avenis como nos esperia los. On pote intui un pensa o un tas.
  2. Analise – On esamina la fenomeno, xercante…
    • la pesos, partes, en la aspeta spasial;
    • la episodios e segues, en la aspeta tempal;
    • la cualias e dimensiones de la fenomeno;
    • la situa, ambiente;
    • la nesesadas e efetos en tempo;
    • la perspetivas o prosimis cual on pote prende;
    • cores o focas e franjes o orizones;
    • la apare e desapare de la fenomeno;
    • la claria de la fenomeno.
      E on investiga esta multe aspetas en sua formas esterna – ojetos, atas, otras – e en sua forma interna – pensas, imajes, e emosias.
  • Descrive – On rejistra sua descrive. On scrive lo como si la lejor ia ave nunca esta esperia. On gida el tra sua intui e analise.

    Lo cual fa ce esta tre pasos simple deveni tan difisil es la disposa mental cual on debe manteni cuando on presenta los. Prima, on debe ave un tipo de respeta per la fenomeno. On debe es atendosa ce on intui plen lo, de tota “angulos” posible, fisical e mental, e omete no cosa estra la analise cual parteni ala. Herbert Spiegelberg ia dise ce “La vole sinsera per sabe nesesa un spirito de jenerosia e no lo de economia…”[¹]

    Incluida en esta “jenerosia” es un respeta per avenis publica e privata, la “ojetal” e la “sujetal”. Un de la ideas la plu fundal en fenomenolojia es “intende”, cual refere a la interelata o mutualia de la sujeto e la ojeto en esperia: Tota fenomenos envolve e un ata intendente e un ojeto intendeda. Tradisional, nos ia asentua la valua de la polo de la ojeto e ia desvalua la polo de la sujeto. Ma, per sita Spiegelberg denova: “An fenomenos mera privata es fatos sur cual nos no ave la direto de iniora los. Un siensa cual refusa inclui tal los es culpable de supresa evidentes e va fini con un universo truncada.”

    A la otra lado, nos debe ance vijila contra inclui cosas en nosa descrives cual no parteni ala. Esta es la funsiona de braseti: nos debe puia a lado tota prejudis cual nos pote ave sur la fenomeno. Cuando on ave un prejudi contra un person, on va vide lo cual on espeta, e no lo cual es vera ala. La mesma aplica jeneral a fenomenos: on debe prosimi a los sin teorias, ipoteses, suposas metafisical, credes relijiosa, o an consetas de “sensa comun”. Ultima, braseti sinifia la suspende de judi sur la “natur vera” o la “realia ultima” de la esperia – an si lo esiste o no.

    An si la descrive mesma de fenomenos individua es interesante – e cuando lo envolve persones o cultures, un emprende masosa – nos veni comun a la punto do nos vole dise alga cosa sur la clase en cual la fenomeno es incluida. En fenomenolojia, on parla de xerca la esense o strutur de alga cosa. Posible on vole investiga la esense de triangulos, o de piza, o coler, o de la natur de esiste como un om o fem. Nos pote an vole xerca la esense de esiste como un umana, cual es la sujeto de la esistentialistes fenomenolojial.

    Husserl ia sujesta un metodo nomida “varia imajinada libre”: Cuando on senti ce on ave un descrive de la cualias esensal de un categoria de fenomenos, ta ce on demanda de se: “Cual me pote cambia o no inclui sin perde la fenomeno? Si me cambia la color de la triangulo a blu, o construi lo de lenio de Brasil, esce lo es ancora un triangulo? Si me oblida un angulo o curvi la lados, esce lo es ancora un triangulo?” Esta pote pare trivial e fasil, ma considera aora la fenomeno de “esiste como un umana”: Esce la corpo de un person morida es un umana? Esce un spirito sin un corpo fisical es un umana? Esce un person en un coma permanente es un umana? Esce un fosena con intelijentia e personalia es un umana? Un ovo apena fertilida? Un feto de ses menses? Demandas multe difisil!

    Con fenomenolojia, la mundo regania alga parte de sua solidia, la mente es denova permeteda un propre realia, e per un seticisme alga paranoica on sustitui un curiosia plu jenerosa e ultima plu sasiante. Par reveni, como Husserl dise, a la “cosas mesma” o a la “mundo como viveda” (Lebenswelt), nos ave un oportun plu bon per developa un comprende vera de nosa esiste como umanas.

    Martin Heidegger

    Martin Heidegger

    Martin Heidegger ia nase a 26 setembre 1889, en Messkirch, Deutxland. Sua padre ia es la mantenor de la eglesa local, e Heidegger ia segue par junta se a la jesuitas. El ia studia la filosofia e teolojia de la edas medieval, e ance alga obras plu resente, como los de Franz Brentano.

    El ia studia con Heinrich Rickert, un kantian bon conoseda, e con Husserl. El ia reseta sua diploma dotoral en 1914, e ia comensa instrui a la Universia de Freiburg en la anio seguente. An si el ia es forte influeda par la fenomenolojia de Husserl, sua interesas ia es plu en la sinifia de esiste mesma.

    En 1923, el ia deveni un profesor a la Universia de Marburg, e en 1927, el ia publici sua obra mestral “Esiste e tempo” (“Sein und Zeit”). Influeda par la elinicas antica en ajunta a Kierkegaard, Nietzsche, e Dilthey, lo ia es un esplora de la verbo “es”, spesial de la perspetiva de un person en tempo. An si scriveda en un modo densa e oscurida, lo ia es bon resetada tra Europa, ma no en la mundo de parlores engles.

    En 1928, el ia reveni a Freiburg como la seguor de Husserl. En la desenio de 1930, la nazis ia comensa presa la universias deutx per desemplea sua profesores iudi. La parocior a Freiburg ia resinia en protesta, e Heidegger ia es elejeda per prende sua posto. An si el ia coraji studiantes e profesores a manteni sua xerca per veria, el ia coraji ance ce los resta fidosa a Hitler. El ia junta se an a la partito nazi. Multe persones, incluinte la amirores de sua pensas, no ia pardona el per esta.

    Per es justa, el ia resinia de sua posto como parocior en 1934, e pos la gera el ia parla sur nazisme como un sintom de la maladia de sosia moderna. El ia sesa ensenia en 1944, e pos la gera, la militar aliada ia preveni el de ensenia plu. Ma plu tarda, los ia restora sua direto de ensenia car sua suporta de Hitler ia es pasiva, e no ativa. El ia mori en Messkirch a 26 maio 1976.

    Heidegger ia spende sua vive intera en fa un demanda: Cual es “esiste”? Pos tota nosa vives dial, e an pos tota nosa investigas de acel vive filosofial e siensal, perce nos “es” en cualce modo?

    Fenomenolojia descovre la modos en cual nos “es”. La ostaculo prima es nosa contrasta tradisional entre sujeto e ojeto, cual distingui umanas como sabores e sua ambiente como la sabeda. Ma en la disposa fenomenolojial, esperia no mostra esta distingui. Sabor e sabeda es ambos liada nonestrable a lunlotra. En loca, lo pare ce la distingui de sujeto e ojeto es un cosa cual nos ia developa tarda en istoria, spesial con la aveni de siensa moderna.

    La problemes de la mundo moderna veni de la “cade” de pensa ueste: En loca de un conserna con la developa de nos mesma como umanas, nos ia permete ce tecnolojia e tecnica rena sur nosa vives e gida nos a un modo falsa de “es”. Esta aliena de nosa natur vera es nomida nonautenticia.

    Multe de lo cual es difisil en leje Heidegger es ce el ia atenta redescovre la tipo de “es” cual ia esiste ante la distingui de sujeto e ojeto par investiga la orijinas de parolas, spesial de parolas elinica. Car (la pensa vade) la elinicas antica ia es min alienada de se e sua mundo, sua lingua debe ofre a nos indicas de sua relata a “es”.

    Heidegger ia dise ce nos ave un relata spesial con la mundo, a cual el ia refere par nomi la esiste umana Dasein. Dasein sinifia “es ala”, e lo asentua ce nos es sumerjida completa en la mundo, ma nos protende ance a estra lo (ex-siste). Nos es alga nonsentral, on pote dise, nunca vera stable, sempre movente e cambiante, sempre deveninte.

    Un parte grande de nosa natur strana es ce nos ave libria. (Vide ance la capitol sur vole; nota ce nos pote usa la sinifia tradisional de vole, o un sinifia min nondeterministe, como lo de Bandura, cual el ia nomi “self-determination” en engles, en elefen “autodetermina”, cual es la libria de la avenis en esta momento cual resulta de ce nos ave un “se” sempre developante, cual deveni plu e plu tra tempo un determina partal estra la mundo.) Esta libria, Heidegger dise, es dolosa, e nos esperia la vive como plen de ansia. Nosa potensia per libria suplica nos a es autentica, par ansia.

    Un de la fontes sentral de ansia es la reconose ce nos debe mori. Nosa tempo limitada asi sur tera fa ce nosa desides es multe plu sinifiante, e la nesesa ce nos deside es autentica deveni urjente. Nos es, el dise, un esente-dirijeda-a-mori (Sein-zum-Tode). Esta ia es revisitada par Freud, Otto Rank, e otras, como la “instinto de mori”.

    Tro frecuente, nos sede a fas de ansia e mori, un situa cual Heidegger nomi “cade”. Nos deveni das Man – “la on, la cualcun”, no person spesial o spesifada, la om anonim, un de la fola o la manada.

    Du cualias de das Man es parla sin sinifia e curiosia sin sinifia: parleta, sperde rumor, interata en un modo basa; desira per diverti o distrae, xerca la nova, interfere con la vives de otras. Per es persones vera, nos debe es abrida a lunlotra, con un capasia per mervelia. Nos deveni autentica par pensa sur “es”, par fasa direta ansia e mori. Asi, el dise, on pote trova joia.

    Jean-Paul Sartre

    Jean-Paul Sartre

    “Un umana es un pasion nonusable. Lo es sin sinifia ce nos vive, e lo es sin sinifia ce nos mori.”

    Sartre es probable la esistentialiste la plu bon conoseda, e el monta la linia entre filosofiste e psicolojiste (e ativiste sosial). Jean-Paul Sartre ia nase a 21 junio 1905, en Paris, la sola enfante de Jean-Baptiste Sartre e sua sposa Anne-Marie. Sua padre ia mori a un anio a ante de colite, e sua madre ia prende el per vive con sua duavo Carl Schweitzer, un profesor deutx a la Sorbonne, e la tio de la misionor-filosofiste famosa, Albert Schweitzer.

    No comfortosa en la casa disiplinante de sua avo, Anne-Marie e sua fio peti ma multe intelijente ia deveni prosima. Un maladia de enfantia ia causa ce Sartre deveni sieca en un oio, cual ia lisca a supra e a lado, e el ia pare como el es regardante a via. Solitar, el ia comensa scrive naras e presentas teatral como un evade.

    Anne-Marie ia fuji de la casa de sua avo par sposi cuando Jean-Paul ia ave 12 anios. Jean-Paul ia deveni rebelante e nonmanejable, e donce el ia es enviada a un scola abitante. Ala, el ia continua sua tende a disturba la pas, e frecuente ia spende tempo detenida.

    Pos liseo, Sarte ia vade a la École Normal Supérieure a la Sorbonne. Briliante ma desorganizada e nonatendente, el ia es a la basa de 50 studiantes en sua esaminas de gradua. En la anio seguente, el ia studia con un fem joven nomida Simone de Beauvoir, e el ia gradua en 1929. Los ia es la plu altas de sua clase. Simone e Jean-Paul ia ave un ama forte, ma abrida, asta sua moris.

    Pos gradua, Sartre ia ensenia a un serie de liseos tra multe anios. El ia spende un anio en Berlin, escutante lesones par Edmund Husserl. Fenomenolojia ia deveni un parte importante en alga de sua obras filosofial, incluinte Imajina (1936), Desinia per un teoria de emosia (1939), e La psicolojia de imajina (1940).

    En 1938, Sartre ia publici sua novela prima Nausea. En esta novela, el ia scrive sur la nausea cual sua carater senti cuando el contempla la “spesia” de la mundo material, incluinte otra persones e sua propre corpo. La novela es strana, ma la descrives es eselente, e Sartre ia comensa crea un reputa per se.

    En 1939, Sartre ia es enscriveda en la armada. El ia es prendeda como un prisonida en 1940 e relasada a un anio a pos. Sua esperias como un partisipor en la resiste ia colori multe de sua obras plu tarda. En junio de 1943, sua presenta teatral La moscas ia abri en Paris. An si lo ia es clar antinazi, la presenta ia es regardada a veses par ofisiores nazi.

    Ance en 1943, el ia publici sua obra mestral, L’être et le néant (“La es e la noncosia”). En esta libro grande e difisil, el ia trasa sua teoria ce la consensia umana es un tipo de “noncosia”, ensircada par la spesa de “es”. Como un “noncosia”, la consensa umana es libre de determinisme, cual resulta la situa difisil ce nos es ultima culpable per nosa vives. “Umanas es condenada a es libre.” A la otra lado, sin un “esense” per furni dirije, la consensia umana es ance ultima sin sinifia. “Tota cosas esistente nase per no razona, continua par debilia, e mori par acaso.”

    Posible sua idea filosofiste la plu bon conoseda es ce “la esiste presede la esense”. En la caso de cosas nonumana, un esense es alga cosa cual aveni ante la esiste de la cosa. La esense de un table es en la intendes de sua creor o usor per lo, como la ave de un forma, partes, e un funsiona. La esense de un monax es sua erita jenetical, sua instintos, la detalias de sua ambiente. Sua vive intera es simil a la prosede de un program en un computador. Ma un umana, seguente Sartre, no ave un esense vera. Serta, nos ave nosa forma jeneral, nosa jeneticas, nosa detalias de eleva, etc. Ma los no determina nosa vives, los ordina mera la stadio. Nos mesma formi nosa vives. Nos es los ci eleje lo cual nos va fa con la materias cual natur ia furni a nos. Nos crea nos mesma. E nosa “esense” es sola clar cuando nosa vives intera es completida. Un otra modo per espresa esta es ce nosa “esense” es nosa asentia de esense, o ce nosa “esense” es nosa libria.

    En 1944, el ia produi un de sua presentas teatral la plu famosa, Huis clos (“Sin sorti”). Esta presenta, e alga otras, presenta la problem de vive con otra persones, e los es multe pesimiste. “Enferno es otra persones” es un sita famosa de Sin sorti.

    Pos la gera, Sartre ia deveni plu consernada par la caso de culpablia sosial. El ia sujesta ce la state de libria sinifia no sola ce on es culpable per sua propre vive, ma ce on es culpable per la vives de tota umanas. El ia descrive esta idea en Esistentialisme e umanisme (1946), e la novela La vias de libria (1945, nunca completida).

    Ma si la esiste presede vera la esense, umanas es culpable per lo cual los es. Donce, la move prima de esistentialisme es fa ce cada om es consensa de lo cual el es, e per fa ce la culpablia plen de sua esiste resta sur el. E cuando nos dise ce un umana es culpable per se, nos no sola intende ce el es culpable per sua propre individualia, ma ce el es culpable per tota umanas.

    Sartre ia scrive ance esaminas psicolojial profonda de scrivores franses famosa: Baudelaire (1947), Jean Genet (1952), e Flaubert (du de tre volumes ia es completida en 1971 e 1972). En estas, el esamina esta scrivores de la perspetivas esistentialiste, psicoanalisal, e marxiste, en un atenta per crea depintas fenomenolojial la plu completa. Nonfortunosa, esta libros es cuasi nonlejable!

    Sartre ia es un amiror de la scrives de Karl Marx, e de la Uni Soviet. Sua suporta de comunisme rusce ia fini en 1956, cuando la armada rusce ia marxa en Budapest per para la laboras de la magiares per ateni autonomia. Ancora esperante, el ia scrive un analise criticante de marxisme en 1960. Lo ia suporta la ideas fundal de Marx, ma ia critica la forma rusce.

    En 1963, el ia publici sua autobiografia Les mots (“La parolas”). El ia es elejeda per la Premio de Nobel en la anio seguente, ma el ia refusa lo per razonas political. Asi es un esemplo de sua stilo evocante:

    “Me es un can. Me balia, la larmas rola desendente mea jena, me senti los. Me es un arbor, la venta deveni caturada en mea ramos e secute neblosa los. Me es un mosca, me trepa asendente la vitro de un fenetra, me cade, me comensa trepa denova. De ves a ves, me senti la caresa de tempo cuando lo pasa. A otra tempos, la plu comun, me senti ce lo resta sin move. Minutos tremante cade a su, inonda me, e mori tra un tempo longa. Bambolante, ma ancora vivente, los es scopida a via. Los es recambiada par otras cual es plu fresca ma egal futil. Esta repulsa es nomida felisia.”

    A la fini de la desenio de 1979, la sania de Sartre ia comensa dejenera. Sua mal abituas ia inclui fumi du pacetas de sigaretas franses sin filtros, multe bevi de alcol, e la usa de amfetaminas per aida manteni sua velia per scrive. El ia mori a 15 april 1980 de canser de la pulmones. Simone de Beauvoir ia atenta resta con sua corpo, e atendores ia debe trae el a via de la caxon. Sua prosede funeral ia es oservada par plu ca 50 mil lamentores.

    Esta filosofia de esistentialisme, an si tan difisil per esplica e vive, ia ave un efeto grande a multe pensores en la sentenio dudes. Entre los es filosofistes como Simone de Beauvoir, Albert Camus, Martin Buber, Ortega y Gassett, Gabriel Marcel, Paul Tillich, Merleau-Ponty, psicolojistes como Ludwig Binswanger, Medard Boss, Erich Fromm, Rollo May, e Viktor Frankl, e an la eroes de posmodernisme, Foucault e Derrida. Min direta, esistentialisme ia influe psicolojistes american como Carl Rogers. La influe continua asta oji.


    [¹] Spiegelberg, Herbert (1965). The Phenomenological Movement. The Hague: Martinus Nijhoff.

  • Esta paje es presentada con la lisensa CC Attribution-Share Alike 4.0 International.
    Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).