LA ISTORIA DE PSICOLOJIA

Eresias de cristianisme temprana

Un eresia es un crede cual devia de alga crede ofisial o normal. Cuando autoriosas deside ce un crede es erese, los atenta elimina acel crede, comun incluinte la sutrae de la credores ofendente (par esclui o un otra modo an plu mal). Natural, la ortodoxia de un person es la eresia de un otra.

La plu de eresias cristian conserna la du problemes de la natur de la Trinia e, plu spesifada, la natur de Jesus Cristo. La crede ofisial per esta du problemes (longo tota eglesas catolica, ortodox, e protestante) es como esta: Dio es un trinia, tre persones ma sola un esense; Jesus Cristo ia es un person, umana (Jesus) e divin (Cristo) a la mesma tempo. La fato ce esta du declaras no es multe razonada ia es videda como nonimportante. La Trinia ia es videda como misteriosa e un caso de fida, no razona.

Lo cual segue es oto eresias, estendente de setas cual vide Jesus Cristo como pur divin, a otras cual vide el como pur umana.

Sabelianisme: Esta eresia es nomida per sua fundor Sabelio (sentenio du). A veses, lo es nomida monarcisme modal. La padre, fio, e spirito santa es tre modos, roles, o fases de un person unica, Dio. Esta, natural, implica ce Jesus Cristo ia es pur divin, sin umania, e donce ce el no ia pote sufri e mori vera.

Docetisme: La nom deriva de un parola elinica “dokesis”, cual sinifia “pare”. Seguente la mesma linias como sabelianisme, docetisme dise ce Cristo no ia es un umana vera e no ia ave un corpo umana real. El pare sola como un umana a nos. Per corti…

sola Cristo (no Jesus)

Monofisitisme: Esta nom deriva de parolas elinica cual sinifia “un corpo”. Esta eresia dise ce Jesus Cristo ia es un junta de la Logos eterna (pd: Dio) con la person umana Jesus, cual ia aveni a la tempo de incarne. El es donce du natures juntada en un corpo. Monofisitisme es ancora un crede vivente en alga setas en Egipte e Asia sude-ueste. Per corti…

Logos + Jesus → Jesus Cristo

Adotisme: Adotisme dise ce Jesus ia es un umana ci ia es “adotada” par Dio a sua consepi en la utero de Maria, a cual momento el ia developa un natur divin. Varias plu tarda a veses sujesta ce el ia es adotada a un tempo plu tarda, per esemplo, cuando el ia es batizada par Joan la Batiste. Per corti:

Jesus → Cristo

Nestorianisme: Suposada, Nestorio, patriarca de Antiocia (sirca 410), ia crede ce Jesus Cristo ave du natures – om e Dio – cual resta separada tra sua vive sur tera. Esta no es vera lo cual Nestorio ia dise (an si el ia nega la idea de consepi virjin), ma la nom ia es retenida. On pote ancora trova alga eglesas nestorianiste en Iran. Per corti…

Jesus…
Cristo…

Apolinarisme: Nomida per Apollinaris de Laodicea (sirca 350), esta eresia dise ce Jesus Cristo no ia es un umana vera, ma ance no ia es tota divin. Apolinaristes ia sujesta ce el ia ave un corpo umana e un spirito umana, ma ce sua mente ia es prendeda par la Logos eterna (Dio). Per corti…

Je(Cristo)sus

Arianisme: Esta eresia es nomida per Ario (sirca 250–336), un prete en Alexandria. Arianisme es videda como la eresia la plu grave. Jesus Cristo ia es videda como un cosa spesial, creada par Dio per la salva de umanas. Arianisme ia es la forma de cristianisme cual la gotos ia pratica, e lo ia es popular en tota rejiones cual los ia concista, incluinte Italia, Espania, e Africa norde.

Sosianisme: Un varia de arianisme es nomida sosianisme (de la parola latina socius, cual sinifia “acompanior”), e dise simple ce Jesus ia es un umana estracomun. Esta eresia vive ancora en du formas multe diferente: la unitarianes e la atestores de Iaue. Per corti…

sola Jesus (no Cristo)

Otra eresias

No tota eresias ia foca a la problemes de la Trinia e la natur de Jesus Cristo. Asi es la esemplos la plu importante:

Donatisme: Nomida per sua xef, la teolojiste Donato la Grande (mori: 355), donatisme ia inclui un grupo de setas estrema, la plu comun en Africa norde, cual ia asentua la importa de asteni sever. Los ia valua martiria, ia vide falis moral como nonescusable (an si la person ia sufri tortura o menasas de mata), e ia crede ce la reali de rituos santa nesesa un prete pur.

Pelagianisme: Un otra grupo de setas, trovada en Galia, Britan, e Er, es asosiada con la monce eres Pelagio (sirca 410). El ia crede ce la peca orijinal (la come de la poma par Adam e Eva) no ia es transmeteda a sua enfantes (e donce a nos). La batiza no ia es videda como nesesada, e un person pote es salvada par sua propre labora, cual es per dise: los no debe nesesa la grasia de Dio. Multe cristianes moderna libriste acorda con Pelagio.

Gnosticisme: An si lo no es sola un seta de cristianisme, gnosticisme ia contribui multe ideas. Lo ajunta a la fundas de cristianisme ideas de relijios plu vea, cual inclui interpretes mistica, con multe derivada de neoplatonisme. Gnosticisme no ia desapare completa, e pote es videda en la tradisiones de alcimica e astrolojia, e an en la obras de Carl Jung.

Manisme: Manisme es en realia un relijio separada cual fusa cristianisme con gnosticisme, mitraisme, neoplatonisme, e an budisme. An si lo ia es videda como un eresia grave par la cristianisme antica, lo ia survive asta e an ultra la edas medieval. Lo ia influe forte la bogomiles en la Balcanes e la catares en Frans sude.

La eresias balgarsce

Esta eresia merita alga plu paragrafes.

En la sentenio des, un eresia gnostica ia comensa en Balgaria, atribuida a un prete nomida Bogomil. La credes de la bogomiles, como los ia es nomida, ia es adotiste, pd: los ia vide Jesus como adotada par Dio a la ora de sua batiza, ma no ia vide ce Jesus es un parte de la Trinia. E los no ia vide Maria como la madre de Dio en cualce modo.

La simplia e la adere sever ia es cualias de sua praticas, con pretes elejeda de sua propre grupos, e la congregas ia reuni en sua casas e no en la eglesas. Los no ia pratica la batiza de enfantes, la sposi no ia es videda como un rituo santa, e santas ia es considerada como idoles falsa.

La eresia ia ave un sabor forte de Manisme. Los ia crede ce Dio ia ave du fios, Micael e Satan. Satan ia crea la mundo material e ia atenta crea Adam, ma no ia pote crea un spirito per Adam. Dio ia ajunta la spirito a Adam, ma umanas ia es liada en servi a Satan. Micael ia veni a tera en la forma de la spirito santa, cual ia entra a Jesus. Como Cristo, el ia rompe la acorda orijinal cual lia umanas a Satan. Ma Satan ia orcestri la crusi, e el es ancora laborante per reprende umanas par media de la otra eglesas de la mundo.

La ideas fundal de esta eresia ia sperde rapida a la ueste, tra Italia norde e Frans norde a Frans sude e Espania norde. Ala, la credores ia nomi se catares, de la elinica per “pur”. Otras ia nomi los albigensianes, per la vila Albi, o Bougres, per la balgarsces. Esta nom final es la orijin de la parola engles bugger (“sodomia”), car otras ia acusa los de esta.

An plu sever ca la bogomiles, la catares ia atenta vive en un modo simple e model, e la credores la plu sever ia restrinje se de seso e otra plaseres fisical. Multe ia adota veganisme sever. Los ia ave sola un rituo santa, la consolamentum, cual ia es simil a un rituo de mori en cual pecas ia es estraeda.

La catares ia crede ce la Dio de la Atesta Vea ia es vera Satan, e ce el ia es la creor de la mundo material. Jesus ia es donce pur spirito (pd: dosetisme), car el ta deveni nonpur si el ta posese un corpo real. Par vive pur, cualcun ia pote espulsa la corpo fisical e velia en la sielo o paradiso. La nonpures ia es condenada a reincarne en esta mundo fisical, un idea trovada en budisme. Un efeto interesante de esta crede ia es ce femes ia es tratada como la egales de omes, car tota de nos ia es omes o femes a alga veses en nosa vives pasada.

La bogomiles e la catares ia es sever persegueda par la eglesa ortodox en la este e la eglesa catolica en la ueste. Ante la sentenio 14, la balgarsces ia es asorbeda par la Impero Otoman e islam. La catares ia es cuasi eliminada par la crusadas e la incuisisio. Ma los ia construi la fundas per la reformi.

Per multe plu detalias sur esta e otra eresias (an si tra la oios de la eglesa catolica), vide la Ensiclopedia Catolica enlinia.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).