La teoria de evolui es probable la idea la plu disturbante de la sentenio 1800, e nos no ia vide ancora sua efetos. Lo ia deveni la funda de biolojia e, seguente, psicolojia. Asi es la nara de sua comensa.
Charles Darwin (1809–1882) ia nase en Shrewsbury, England, a 2 febrero 1809. Sua padre ia es Robert Waring Darwin, un mediciste e fio de Erasmus Darwin, ance un mediciste e un scrivor e naturiste multe respetada. Sua madre ia es Susannah Wedgwood Darwin. El ia mori cuando Charles ia ave 8 anios.
Charles ia es educada en la scola local, enseniada par Dr Samuel Butler. En 1825, Charles ia vade a Edinburgh, Scotland, per studia medica, ma el ia comprende pronto ce el no ave un stomaco forte per lo. Donce, el ia cambia sua universia, movente a Cambridge, suposada per deveni un eglesor. El ia es vera plu interesada par entomolojia – spesial scarabes – e par la xasa. El ia gradua de la Scola de Cristo de Cambridge en 1831.
Algas ia dise ce, an cuando el ia es un om joven, el ia ave un mente pasiente e abrida, e ce el ia spende multe oras coliente esemplos de un tipo o un otra e pensante sur ideas nova. La idea de evolui ia es multe en la aira en esta eda: Lo ia es cresente clar a naturistes ce spesies cambia, e ia es cambiante tra multe milenios. La demanda cual resta ia es: Como esta cambias aveni?
Un de sua instruores, John Henslow, ia coraji el a aplica per la posto (nonpaiada) de naturiste en un mision de jeometre sur la barcon aora famosa, Beagle, su la comanda de capitan Robert Fitz-Roy. Charles ia parti de England a la ves prima en sua vive a 27 desembre 1831. El no ia reveni asta 2 otobre 1836.
La parte la plu grande de la viaja de la barcon ia es spendeda en mesura la costa de America Sude e isolas prosima, ma lo ia visita ance isolas variosa en la Pasifica, e Zeland Nova e Australia. La Isolas Galapagos ia es lo cual ia impresa Darwin la plu. Ala el ia trova pinsones cual ia evolui un varia de becos – cada beco conveninte a un comeda spesifada. Varia natural ia es elejeda en cualce modo per cabe a la nix ecolojial disponable sur la isolas peti.
Cuando el ia reveni a England, Darwin ia scrive alga libros fundida sur sua rexerca sur jeolojia e la spesies de plantas e animales cual el ia oserva e colie. El ia publici ance sua jornal con la nom Jornal de un naturaliste. El ia nota ce el ia es la plu impresada par la modos en cual animales simil ia ajusta a ecolojias diferente.
De un tempo temprana, Darwin ia reconose ce eleje ia es la prinsipe cual umanas ia usa tan susedosa en eleva animales. Lo cual el ia nesesa aora ia es un idea sur como natur pote fa acel taxe sin la aida de intelijentia!
En 1838, el ia leje un libro par Malthus nomida Un esajo sur la prinsipe de popla. Malthus ia introdui la idea ce la compete per recursos limitada manteni stable la cuantia de viventes en natur. El ia averti ance ce la cuantia de persones, si lo ta tensa la recursos, ta sufri ance!
A 29 janero 1839, Darwin ia sposi Emma Wedgwood, un cusina. Los ia abita en London per alga anios, ante move a la vila Down, a 15 milias estra London, do los ia vive per la resta de sua vives. Darwin ia comensa sufri de un maladia cual el ia developa probable de un morde de un inseto en la Andes a multe anios a ante. Francis, sua fio, no ia pote parla sufisinte sur la dedica de sua madre cual ia aida la bonstate de sua padre. Sin el, Darwin ia ta es multe min produinte. Darwin e Emma ia continua e ia jenita du fias e sinco fios.
Darwin ia scrive un contorni de sua teoria en 1842. En 1844, el ia scrive un letera cual dise: “Final, la brilias de lus ia veni, e me es cuasi convinseda (multe contra la opina con cual me ia comensa) ce spesies no es nonmutable (lo es como confesa un mata).”
Sirca la dui de un esposa completa de sua ideas ia es scriveda, cuando el ia reseta un esajo de A. R. Wallace con un demanda per comentas. La esajo ia contorni un teoria de eleje natural! Wallace ia leje ance Malthus e, en 1858, malada con febre, la idea completa ia veni a el en un flax. Darwin, con sua esita, ia pospone revela sua ideas a la publici siensal per 20 anios.
Darwin ia envia la esajo a sua ami, Charles Lyell de la Sosia Jeolojial, como Wallace ia demanda. Lyell ia envia la esajo, con un esajo par Darwin, per un presenta a un confere siensal.
La idea ia es clar: Como persones pote esajera esta o acel varia minor par eleje canes o boves per reprodui, natur pote eleje varias simil, par permete ce sola la varias la plu susedente survive e reprodui en la luta per recursos limitada. An si la cambias ia es peti e lenta, la milenios ia permete la diversia clar de natur! Darwin ia nomi esta la “eleje natural”.
En 1859, Darwin ia publici final sua obra mestral: La orijina de spesies par la modo de eleje natural. La libro ia es direta un susede. On ia ave ance, serta, multe debates, la plu consernante la contrasta entre eleje natural e la esplicas de relijio tradisional.
La eleje natural ia es comun confusada con un idea plu temprana de la naturaliste franses, Lamarck. El ia sujesta ce la cualias developada en la vive de un animal es pasada a sua enfantes. La esemplo famosa es como la estende repeteda de la colo de un jirafa, tra multe jeneras, ta esplica la apare strana de la animal. Esta teoria – lamarcisme – ia es la competor de eleje natural per desenios de plu.
En 1868, Darwin ia publici La varia de animales e plantas domada. Alora, en 1871, el ia publici La desende de umanas, e eleje en relata a seso. Esta ia es vera du libros en un. La parte du es sur eleje sesal. Esta esplica, per esemplo, la colores briliante en multe avias mas. E la color de la mas e la atrae a la color par la fema en cortea es elejeda car esta varias benefica la enfantes: En la nido, la fema es cuasi nonvidable par predores, ma predores es atraeda par la mas. Donce, la ovos e enfantes, protejeda par la fema, survive per reprodui plu.
La parte de la libro La desende de umanas es un introdui corta a la idea ce nos es ance la resultas de eleje natural. Esta parte ia provoca multe desacordas furiosa!
En 1872, La espresa de emosia ia es publicida. A esta ves, Darwin ia discute la evolui de la siniales cual animales usa per comunica – e el ia relata esta siniales a la espresa de emosia en umanas. Esta es la paso prima a lo cual nos nomi aora sosiobiolojia (e psicolojia evolual).
En ajunta a esta libros influente, Darwin ia joia ance studia e scrive sur plantas. En 1862, el ia scrive Fertili de orcideas. En 1875, el ia publici Plantas trepante e Plantas insetivor. En 1877, Formas diferente de flores sur plantas de la mesma spesies ia veni. En 1880, el ia scrive, con sua fio Francis, La potia de move en plantas. E en 1881, el ia publici la libro famosa, La formi de mofo vejetal par la ativia de vermes!
Charles Darwin ia mori a 19 april 1882. El ia es enterada en la Abaderia de Westminster. El ia es reportada como un om jentil e compatiosa, amada par sua familia e amis. Estra sua viaja sur Beagle, el ia parti rara de sua casa en Down. Esitante, el ia sede sua credes relijiosa e ia abitua se a un agnosticisme cual no ia preveni el de partisipa con sua parocia en laboras de carita.
Alfred Wallace ia nase en 1823 en la vila Usk en Monmouthshire, England. Sua posibles ia es limitada car sua padre ia mori cuando Alfred ia es ancora un om joven. Donce, esplotante un talento natural, el ia deveni un ensenior de desinia.
El ia vade en un mision a America Sude con sua ami Henry Bates. El ia spende cuatro anios en la junglas de Brasil. En sua reveni a England, la barcon ia ensende e afonda – con sua cuatro anios de notas e colies de spesies. La ecipo e pasajores ia es salvada, fortunosa, par un barcon pasante. Esta aventuras ia es la funda de Viajas sur la Amazona e la Rio Negra, publicida en 1853.
Corta a pos, el ia parti en un viaja du, a esta ves a Malaisia. Esta ia dura tra oto anios. En esta mision, el, malada con febre, ia ave la idea de eleje natural, e en du dias el ia scrive un esajo sur la tema e ia envia lo a Darwin. Pos sua reveni de Malaisia, el ia publici La arcipelago Malaisia, un jornal detaliosa sur la plantas, animales, e popla de la isolas.
El ia mori a 7 novembre 1913. An si on ia ofre a el un loca en la Abaderia de Westminster, sua familia ia prefere ce el es enterada prosima a sua propre casa. Sua entera es marcada, conveninte, par un tronco de un arbor petrida.
Thomas Huxley ia nase a 4 maio 1825, la fio de George Huxley, un ensenior de scola, e Rachel Huxley. El ia reseta du anios de educa formal a la scola de sua padre, e ia es, per la resta de sua vive, autoinstruida.
An si el ia es elevada como un anglican, el ia deveni interesada par unitarianisme e sua pensas naturiste. Esta interesa ia gida el a comensa studia biolojia con sua frate par sposi. Sua studias ia resulta un suveni per studia a la ospital de Charing Cross en London, do el ia gania premios en fisiolojia e cimica organica.
El ia servi como un sirurjiste aidante sur la barcon HMS Rattlesnake, cual ia jeometre la acuas sirca Australia e Gine Nova. Per pasa la tempo, el ia comensa investiga la formas variosa de viventes de mar.
Huxley ia encontra e deveni enamada par Nettie Heathorn en Sydney en 1847. El ia continua alora sua rexerca biolojial en acel parte de la mundo. Pos reveni a England, el ia es elejeda a la Sosia Real en 1850, ma no ia pote trova un posto academial. Depresada e coler, el ia comensa suporta ideas controversa – incluinte la nega de la varia cristian de jeolojia.
En 1854, el ia comensa instrui a la Scola Governal de Minas. Final fundida como un senior, el ia trae Nettie la pasiente a England e los ia sposi en 1855.
Huxley ia encontra Darwin en 1856, e los ia developa un amia longa e intima. El ia comensa un campania per la teoria de Darwin, cual ia gania per el la nometa “la buldog de Darwin”. Spesial, el ia combate contra la eglesa e per la conseta ce umanas ia evolui de primates. En la mesma periodo, el ia es un promovor grande de siensa jeneral e spesial de educa siensal.
Huxley ia es la fonte de multe rexerca, de sua labora orijinal sur viventes de la mar a sua labora plu tarda sur la evolui de vertebratos. El ia developa ance la idea de agnosticisme – par cual el ia intende la crede ce la realia ultima va es sempre ultra la ateni de umanas. E el ia es la orijinor de la opina metafisical nomida epifenomenalisme.
En 1882, sua fia ia deveni demente. El ia mori pos sinco plu anios su la cura de Jean-Martin Charcot, la psiciatriste franses. Huxley ia deveni multe depresada e ia jubila de sua rol como profesor. Per un periodo, el ia promove un idea nomida darwinisme sosial (vide a su), ma pos alga anios el ia retira se per dise, con Darwin, ce on servi la plu bon la umilia par promove etica en loca de instintos.
El ia mori de un ataca de cor a media de un parla, 29 junio 1895.
Herbert Spencer ia nase a 27 april 1820, en Derby, England. Sua padre ia es un ensenior de scola, e ambos sua jenitores ia es “disentores” (pd. nonconformistes relijial). Spencer ia es clar talentosa e ia es, per la plu, autoinstruida.
Un scrivor eselente, el ia scrive articles sur problemes sosial per jornales variosa de la eda e ia deveni an un editor de La economiste per alga anios. En 1855, el ia publici La prinsipes de psicolojia. Esta ia deveni un parte de un serie de libros, cual el ia nomi La filosofia sinteseda, cual ia inclui biolojia e sosiolojia en ajunta a psicolojia.
Orijinal, el ia crede a la erita de cualias aprendeda (lamarcisme), ma el ia deveni un seguor de la teoria de Darwin. Lo ia es, vera, Spencer ci ia introdui la espresa “la survive de la plu bon cabentes”. Ma el ia cambia ance la teoria a un teoria sosial, nomida darwinisme sosial, cual ia coraji individualisme estrema e politicas economial libraliste (pd. mercatos libre de governa).
Fundal, la idea de la survive de la plu bon cabentes ia es aplicada a persones competente contra otra persones, e el ia implica ce lo es un debe sosial ce on aseta ce alga persones deveni rica e algas deveni povre – e ce on no debe disturba la efetos de povria. An sosias intera – como England – ia es en un luta per survive cual no permete debilia de vole o tro multe compatia.
Darwinisme sosial es en no modo un cosa cual Darwin ta aproba. Lo conteni la falasia de analojia falsa: Sosia umana no es un paralel bela de la mundo biolojia de nonumanas. Triste, darwinisme sosial pare es presente per sempre, e on vide lo en projetas faxiste, conservaliste, e libertariste, e en filosofias personal como lo de Ayn Rand.
An tal, Spencer es videda como un de la pensores la plu produosa de sua eda. El ia mori a 8 desembre 1903, en Brighton, Sussex.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:42 UTC).