Scriveda par Vicente Costalago
Coretida par Simon Davies
Esta obra es ance disponable como un fix pdf.
Tota la imajes veni de Wikimedia Commons.
On ave multe clases de animales, cual ia es clasida par la siensistes.
Cada clase ave animales con cualias comun.
La divide xef de la animales es: vertebrato (los cual ave colona vertebral) e nonvertebrato (los ci no ave lo).
Esta du grupos ave otra sugrupos.
Un mamal es un animal cual suca la lete de sua madre.
La plu de los ave un corpo con pelo per proteje contra caldia.
Alga mamales xasa otra animales per come, los es carnivores.
Otra mamales come plantas, los es erbivores.
Otra mamales vive en grupos, nomida manadas, como la lupo, cual vive en manadas de asta 40 membros. Los xasa juntada per ave plu posibles de oteni nuri. La gnus vive ance en manadas, los fa esta per proteje lunlotra.
La felidos ave un capasia multe bon de vide, oia e ole cual aida los a xasa. Alga felidos es la leon, la tigre, la gato e la gepardo.
La marsupiales ave pox do la desendentes resta pos nase car los es multe peti. Alga marsupiales es la cangaru, la oposum e la coala.
On ave ance mamiferos cual pote vola, los es la ciroteros.
Sua ditos longa, unida par pele, formi sua alas.
Esta animales pote emete ultrasona, cual los usa per deteta ojetos en oscuria. Tal los no colpa rocas o arbores e pote trova sua come.
Cuasi tota dormi en la dia e xasa en la note. Totas estra la plu grande come insetos. Aceles come frutas.
Tota avias ave plumas e la plu vola.
Per vola, la avias move sua alas en aira.
La avias produi ovos, de do sua projenia nase. Los es poneda en nidos, per es plu protejeda. Cuando la avietas rompe la ovo, on nomi esta la sorti de casca.
Avias ave no dentes, ma un beco. Esta es diferente seguente lo cual la avias come.
Per esemplo, la agilas ave un beco forte per xasa otra animales en cuando la pelicanes ave un beco con un forma cual permete los a pexa.
An si la plu avias vola, on ave esetas, como la astruzo, cual es la avia la plu grande.
Alga avias xasa en la note, como la tito.
Otra avias vive en acua, como la pinguines, la patos e la sinies.
La retiles es animales con sangue fria e, par esta, los debe xerca la sol per caldi. Cuasi tota la retiles abita en paises calda.
Los ave un pel con scamas.
La plu de retiles pone ovos.
La camaleon es un retil cual vive en la arbores e xasa insetos par usa sua lingua aderente. Esta animal pote cambia sua color.
Serpentes es animales carnivor, los come sua predas sin mastica.
Alga serpentes, como la cobra, es venenosa e injeta sua venena par morde sua preda.
Otras, como la piton o la boa, strangula sua predas par enrola a sirca los.
La crocodiles abita en rios de paises calda. Los xasa la animales cual bevi sur la riva de la rio par trapi los e afonda los en la rio.
On ave multe tipos de tortugas. Alga vive en la mar e sorti a la plaia per pone sua ovos.
Otras vive sur tera, e los es la animales cual vive la plu longa… alga tortugas pote vive asta no min ca 150 anios!
La amfibios es animales cual vive en acua dulse. Los pone ovos en la acua, de do la ranetas nase.
La ranas e sapos cuaci per clama la femas, ci va pone sua ovos en la acua. Cuando los nase, la ranetas respira como la pexes, ma pico a pos va developa pulmones.
Alga ranas vive en la arbores e usa sua ditos per adere a la ramos.
Otra tipos de amfibios es la tritones e la salamandras.
La pexes vive sempre en la acua. La plu de los es covreda par scamas e move par usa sua pinas.
La pexes ance respira osijen, cual entra par la boca e pasa par la brancias, cual asorbe la osijen. La acua sorti par la brancias.
La pexes pone ovos de pex.
On ave pexes variosa, como la pirania o la selaco, cual come otra pexes. Otra pexes es la salmon, la eglefin e la gado.
On ave multe clases de nonvertebratos como la moluscos. Alga moluscos es la bivalvos, la caracoles e la polpos.
La aranias es un otra clase de nonvertebratos. Los ave oto pedetas.
La aranias crea redes de arania per xasa sua predas, cual adere a lo. La arania evita adere par la olio cual lo ave en sua pedetas.Un otra clase es la crustaseos, cual ave un conca como la crabes o la langostas.
Un otra grupo de nonvertebratos es la insetos, cual ave ses pedetas e la plu de los pote vola. Alga esemplos de insetos es la marieta, la papilio e la abeas.
Esta paje es presentada con la lisensa CC Attribution-Share Alike 4.0 International.
Lo ia es automata jenerada de la paje corespondente en la Vici de Elefen a 24 setembre 2025 (23:34 UTC).