Farfulias

Lingua

I

Me ia proba la netar de linguas diversa,
me ia ave con los conversas,
me ia jua con otra parolas,
lo ia es plu fasil ave sua controla,
me ia versi, me ia scrive
ma, an tal, mea vive
ia resta vacua,
lo sembla ce me nesesa tu como acua
car, de cuando me ia abandona tu
mea cor ia resta vacua.

E me vade e me reveni,
ma lo sempre aveni
ce cuando me crede ce me ia oblida
me trova me mesma isolida,
par esta me reveni a tua disionario
car es sin tu, lo es como es en la Calvario.

II

Me ia viaja tra la mundo
de linguas artifis,
me ia proba totas,
an tal, me resta asi.

Pos tan multe pasea,
a fini, me ia reveni,
como cuando la abea
reapare en sua aberia,
e esta es cual ia aveni,
me ia xerca tua miel
en otra parolas,
ma sola tu, Elefen,
ave, de mea cor, la controla.

Me es fatigada ja par tan multe viaja,
cisa me ia deveni plu vea,
cisa me ia deveni plu saja,
ma, como lo ta pensa, la abea,
on ave no loca plu bon
ca nosa casa.

Ama

I

Cria a la venta,
me vole cria a la venta,
e dise cuanto me ama tu;
esta es un dole lenta,
cisa la sielo va escuta mea lamenta.

Me ta vole pote vola,
e vade con tu per trova consola,
tu es la unica ci controla
esta cor ce no trova la parola
per espresa la ama cual me ave,
tu sabe, si!, tu sabe,
ce, de esta cor, tu ave la clave,
tu abri lo con tua labios suave.

Me ta vole para la tempo,
ta ce lo es eterna acel momento!
me no ave talento per jua un strumento,
ma me scrive asi mea sentas per tu.

Me sonia con es a tua lado,
me besa tua labios en mea notes solitar,
me ta vole canta a tu con un gitar,
(cisa ance con un sitar).

Me parla con la luna,
me dise a el ce tu es mea fortuna,
tu es la causa de mea locia,
tu es la causa de mea folia,
e mea cria a la venta,
car me vole atenta
ateni tua cor,
deveni, en el, un abitor.

II

Me pensa en tu a cada minuto,
me xerca tua besas a cada matina,
tua labios es mea cafina,

con tua caresas tu domina me,
con tua rejeta tu asasina me,
con tua surie, tu lumina me,

me sabe ce tu ia es mea destina,
con tu, a cada momento, me alusina,
me xerca tua regarda divina.

Me pensa en tu a cada ora,
me sabe ce esta ama no es tempora,
ta ce nos en junta, esta senta, esplora.

III

Me es fol,
me es enebriada sin alcol

car me afonda en tua oios,
me perde en tua labios,

e me desira abrasa tua taie,
ma me manca la coraje,

e me nos sabe como convinse
tu ce me es tua prinse.

Me sabe ce me es fol,
ma me nesesa tu como la sol,

tu es la pluve cual calmi mea side,
es per sempre con tu es mea deside,

cisa me es fol, cisa me es lo,
me es mareada cuando tu dise: “Alo”.