“Cua Deutxland erita de Marx?”
“La este ave la Declara de comuniste, la ueste ave la Capital.”[¹]
“Esce comunisme es un siensa?”
“No. Si lo es un siensa, on ia ta prima esperimenta sur lo con canes.”
“Cua es la difere entre matematica e comunisme siensal?”
“En matematica, on ave alga cosas cual es demostrada en la pasada e alga cosas cual nesesa demostra. Ma en comunisme siensal, tota cosas es demostrada e no cosa es furnida a nos.”
“Si tota cosas es bon, perce tota cosas es mal?”
“On aplica la lege dialetical de la unia de oposadas asi.”
“Cua es nonsufisi, de un punto de vista marxiste?”
“Lo es un realia ojetal cual nos no debe sensa.”
“Esce mone va esiste en un sosia comunisme?”
“La revisores de Iugoslavia declara ce lo va esiste. La dogmistes de Jonguo declara ce lo no va esiste. Nos pote responde esta demanda en modo dialetical: alga persones va ave mone, e otra persones no va ave mone.”
“Cua es la similias e diferes entre materialisme e materialisme dialetical?”
“Cadun comprende materialisme, ma los finje ce los no comprende. Cadun no comprende materialisme dialetical, ma los finje ce los comprende. Ambos es armas potiosa en la manos de la proletaria.”
“Khrushchev ia trae cual cosa nova per comunisme siensal?”
“Un cambia de ‘e’ a ‘o’, per dise, comunismo.”[²]
“Cua es la eletrici de la pais intera?”
“Lo es egal a comunisme min potia soviet.”
“Como Khrushchev cambia la formula de comunisme par Lenin?”
“Comunisme es egal a potia soviet plu maises en la pais intera.”
Comunisme es egal a potia soviet plu la eletrici de la pais intera.
– Vladimir Lenin
“Comunisme ia vade a Txescoslovensco pos la entre de la armada soviet. Lo es vera?”
“Vera, car Txescoslovensco ia ateni ja eletrici tra longa.”
Karl Marx vole parla a la radio de la URSS.
“Fode tu e la fundor comuniste,” – Brezhnev dise a el – “Me no pote trata un problem tan importante par sola me mesma. Nos ave un gida coletiva.”
“Me ta parla sola un frase!” Pos alora, Brezhnev lasa ce el parla a sua propre respondosia. Marx vade a la microfon, e cria:
“Proletaria de la mundo, pardona me!”
[¹] La Capital, deutx: Das Kapital, es ance un libro par Marx e Engels.
[²] Esta es un broma de parolas alga nontraduable. En la testo orijinal, un letera “ь” es ajuntada pos la “з”, cual crea un malspele de “коммунизьм”. La tradui elefen usa “comunismo” car on pote fabrica lo par “cosmo” + “muni” :P
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2024 (08:56 UTC).