Nota bon: La titulo de esta capitol es un parafrase popular en Rusia de un dise en la Biblia:
Es sobre, e vijila, car tua enemi la plu mal, la diablo, vaga como un leon rujinte e xerca per ci el ta devora.
— 1 Petro, 5:8
Ajente 007 serti ce tota la vijilores es nonprosima, e vade a usa la vason en la stasion de ferovia. El estrae un papereta de sua pox e comensa memori la taxes de spia scriveda sur lo. Poi el dejeta la papereta a pesos, desprende los a en la vason, e descarga … Ma instante, el recolie la pesos con teror: aora la oios de Major Pronin[¹] regarda el de en la vason, investigosa, pico fatigada.
Khrushchev es a un banceta en Barat, con un dansor nuda partal e encantante sentante a lado de el. Khrushchev caresa sua jeno de su la table. La dansor apoia a el e xuxa –
“Camerada Khrushchev, pone tua mano plu alta – no cambia tua espresa de fas! Major Pronin de la Ministreria de Securia Statal, reporta par esta.”
Cuando Brezhnev ia fa un parla, on ia aresta un om en la asembleria. Lo es descovreda ce acel om es un spior.
“Como tu ia reconose la enemi?” – Brezhnev demanda a Major Pronin.
“Par la instrui cual tu ia dise en la reporta: ‘Tua enemi no dormi!’”
“Vovochka, perce tu es escluida de la clase?”
“Me es un enemi de clase!”
“Como la Departe de Informas Brites ia susede catura un ajente soviet en London? Tal taxe ta debe es difisil, no?”
“Longo la comanda, nos catura cualce omes ci sorti de la saleta privata, pasea e botoni sua zipe a la mesma tempo.”
Car la BBC pote conose la secretas de la URSS tro rapida, lo es desideda ce nun es permeteda a sorti la asembleria cuando la consenta seguente de la Ofisia Political. Subita, Alexei Kosygin teni sua stomaco e demanda per sorti. Los no permete. Pos alga minutos, la porte es batetada. Un limpor sta sur la borda con un balde – “La BBC veni de reporta ce Alexei ia deveni mugre!”
Esuanes spende ja multe anios per prepara un ajente ci pote abita en la URSS. Sua profil falsa es scriveda en modo briliante. Final, el es lansada de un avion a la teritorio de la Uni Soviet, e el vade ultra un foresta vestinte en un jaca cuxinida e un xapeta. Poi el entra la patio de un cabana e demanda per distiladas.
“O tu, cara, tu es un spior, no?”
“Cua trae tal impresa a tu, ava?”
“Si, car nunca de sempre nos vide un person negra en esta rejion!”
Un ajente ia desembla como un trunca de arbor e vade a la foresta per oia secreta. A pos, el revela se e esplica a sua superiores –
“Camerada Major! Cuando los ia senta se sur me, me ia tolera. Cuando los ia fa la ama sur me, me ia es silenta. Ma me no plu pote fa la taxe cuando los ia comensa siseli la leteras inisial de sua nomes a me!”
“Escutores cara! Nos es la Radio Armenian! Nos ia oia ce la casas en la vileta olimpial de Moscva es construida con ‘microbeton’. Informa nos sur esta materia de construi nova, per favore.”
“Reportor respondente. La microbeton es composada de 10% de beton e 90% de microfon.”
[¹] Un detetor e ajente imajinal famosa en Rusia, como James Bond en Britan.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2024 (08:56 UTC).