Per conose la istoria de persones famosa
Scriveda par Vicente Costalago
Coretida par Simon Davies
Esta obra es ance disponable como un fix pdf.
Alo xices! Como lo vade? Vos ave con vos un libro multe interesante. Esta libro es un libro de biografias, per dise, un libro con la istoria de la vive de persones importante.
Asi, vos va aprende sur multe persones famosa, ci ia fa cosas variosa: algas ia es musicistes, otras ia scrive libros multe conoseda, otras es conoseda per sua depintas cual oji nos pote vide en museos.
Nos espera ce esta istorias inspira vos e ce vos pote trova esemplos cual, en la futur, pote inspira vos.
Alexandro la Grande ia es un prinse de Macedonia. El ia nase en la anio 336 aec e ia es la fio de Filipo de Macedonia e sua sposa Olimpia. Sua padre ia ensenia a el tota sur gera e como governa un pais. Plu, la filosofiste Aristotele ia es sua mestre e ia ensenia a el la istorias elinica de la pasada. Alexandro ia deveni oseseda par Acile, un eroe elinica e ia vole deveni como el. Sua madre ia dise sempre ce sua padre no ia es Filipo ma la dio elinica Zeus e Alexandro ia crede sempre esta.
El ia deveni re de Macedonia con des-du anios e ia comensa sua luta contra la persianes. Los ia es enemis de la elinicas de multe tempo a ante. Tal Alexandro ia comensa sua viaja de des-un anios en cual el va concista la Impero Persian.
En la comensa de sua concista la re persian nomida Dario ia es asasinada, cual ia fasili multe la concista de la teritorio. Sua fama ia ariva a Egipte, do el ia es resetada como un dio e el ia reseta la titulo de faraon.
Alexandro la Grande ia crea multe vias de comersia, ia estende la cultur elinica tra la impero e ia crea lias entre le este e la ueste.
A un note, en cuando el ia es selebrante un banceta, el ia deveni malada. Pos des-un dias de febre, el ia mori en 323 aec, con 32 anios.
Cleopatra ia nase en la eda de la faraones. El ia ave asendentes elinica, donce sua lingua nativa ia es elinica ma, car el ia es multe intelijente, el ia aprende egiptian antica e totas ia crede ce el desende de un familia de Egipte.
Sua belia no ia pasa nonpersepida. Sua vose dulse, sua oios grande verdin, sua manos delicata, tota en el ia es sofisticada e, seguente cual on ia dise, lo ia es perce el ia bani en lete de asino fema.
Cuando el e sua frate Ptolomeo ia crese, esta ia prende la trono e ia espulsa sua sore, ci ia vade a Alexandria. Ala, el ia enama Julio Cesar, a ci el ia nara cual ia aveni ja. Alora, Julio Cesar ia aida el par espulsa Ptolomeo de Egipte e, tal, Cleopatra ia rena con Cesarion pos la asasina de Julio Cesar.
Pico a pos Cleopatra ia conose Marco Antonio, ma el ia es sposida. La frate de sua fem, Otavio, cuando ia vide ce Marco Antonio ia abandona sua sore per un otra fem, ia declara gera contra ambos.
Como el ia sabe cuanto enamada los ia es, Otavio ia prisoni Cleopatra e ia envia un letera a Marco Antonio disente ce el ia mori. Marco Antonio ia suiside. Cuando Cleopatra ia descovre esta, el ia parti e un vipera morde el.
Julio Cesar ia nase en la anio 100 aec en Roma. El ia reseta un educa eselente e ia deveni interesada en politica. El ia comensa suveni festas e obras publica e ia ave postos importante.
El ia sposi Cornelia, fia de un gidor importante de la partito popular, ma Sila ia deveni tirano e Julio Cesar ia debe fuji a Asia car Sila ia vole sua testa.
Cuando Sila ia mori, Cesar ia reveni a Roma en 78 aec per oteni potia. Car el no ia pote ateni lo, el ia vade a Rodo per studia politica e ia reveni a Roma en 73 aec, do el ia uni a Craso e Pompeio per crea un truple, per dise, un governa de tre persones.
Como el e Pompeio ia ave ideas diferente, sua enemia ia comensa e un gera interna ia aveni. Pompeio ia es asasinada en Egipte e Cesar ia deveni governor de Roma.
El ia aida Cleopatra a deveni rea de Egipte, fini la revoltas en Anatolia, ia sutrae la sistem de impostas frodante e ia estende la sitadania roman.
Cuando sua sposa ia mori, el ia sposi Calpurnia, con ci el ia ave no fio mas. Par esta, cuando el ia mori asasinada en 44 aec, sua sobrin Otavio ia segue el.
Constantino 1 o Constantino la Grande ia nase entre la anios 270 e 288 (on no sabe sua data de nase). Fio de Constantio Cloro e sua sposa Elena. Sua padre ia comensa governa la media de la impero (la otra media ia es governada par Galerio). En acel eda, la Impero Roman ia es divideda. Pos multe geras, Constantino ia deveni la governor de la Impero Roman Ueste. Ma la otra governores no ia vole reconose el e Constantino ia debe luta contra Maximiano e, a pos, contra Maxentio per controla la teritorio.
Sua batalia contra Maxentio es multe importante car, cuando el ia vade a la loca do los va luta, el ia vide un ci-ro en la sielo. Un crismon es un sinia formida par du leteras elinica chi (X) e rho (P), cual es la du leteras prima de la nom de Cristo en elinica (Χριστός). Ensircante lo ia es la parola “in hoc signo vinces” (con esta sinia tu va vinse). El ia fa esta e ia vinse Maxentio.
Constantino ia es la imperor cristian prima. Lo cual es importante de sua governa es ce la cristianes ia sesa es persegueda e la pretes ia comensa es escutada en la Senato.
En 11 maio 330 el ia indui un capital nova per la Impero, nomida Constantinopoli.
El ia mori en 337.
Rodrigo Díaz de Vivar, conoseda en espaniol como El Cid Campeador, ia nase en 1048.
El ia perde sua padres e ia es educada con la Sancho, la fio de la re Fernando 1 de Castilla e Leon.
El ia luta contra la cavalor Jimeno Garcés en 1066 per deside ci domina alga casteles entre Castilla e Navara. El ia gania e de alora ia es nomida “Campeador”, cual sinifia “geror de multe valua”.
El ia partisipa en la geras entre Sancho e sua frate Alfonso. Ma en 1072 Sancho ia mori en la aseja de Zamora (un site en la Rena de Leon) e sua frate ia deveni la re.
Rodrigo ia sposi Jimena, sobrina de Alfonso en 1074, ma cuando el ia vade a un mision sin la permete de la re, el ia es escluida.
Rodrigo ia comensa servi la re muslim de Zaragoza al-Muqtadir. Cuando Rodrigo ia vinse a la re de Lerida, el ia reseta la nometa “Sidi” cual sinifia senior en arabi.
En 1086 sua senior antica Alfonso de Castilla e Leon ia es vinseda e ia demanda per sua aida. Rodrigo ia aseta e ia concista multe sites per la re. An tal, el ia ave un luta con la re e ia deside mesma concista Valencia, sin servi alga senior.
El ia mori en 1099.
On pote leje sur sua vive en la Poesia de Mea Cid.
Napoléon Bonaparte ia nase a 15 agosto 1756 en Corsica (Frans). El de multe peti ia es multe bon en matemática e par esta el ia ateni entra en la Scola Militar de Brienne. Con 17 anios el ia es suteninte. El ia deveni multe importante como militar en la Revolui Franses cual ia comensa en Paris en 1789, cuando la popla ia deside revolta contra la re.
Des anios pos la Revolui, Napoléon ia deveni imperor de Frans. El ia concista paises variosa de Europa ma sua fali ia comensa cuando el ia atenta concista Rusia e Espania. El ia es vinseda en la batalia de Waterloo par la engleses e sua aliadas. El ia fini cluida en la isola San Helena, en la Mar Atlantica.
On crede ce Pitagora ia nase en 572 aec en la isola Samo, en Elas, do el ia vive asta cuando el ia debe abandona lo par causa ce la tirano Policrate ia vole mata el.
El ia vade a Mileto, Fenisia e Egipto per studia misticisme, jeometria e astronomia.
A pos, el ia vade a Crotona, do el ia fundi sua scola: la scola pitagoran. Sua ensenias ia es secreta. On crede ce el ia ensenia musica, matematica, jeometria e otras. De acel eda on ave la teorem de Pitagora.
La scola de Pitagora ia ave como ojeto la puri spirital, cual on ateni con musica, matematica e otra sabes.
On crede ce Pitagora ia converti matematica a un ensenia libraliste, per dise, sin un usosia fisada, cual ia es aprendeda sola per la sasia de solve problemes.
Como la scola ia deveni un comunia, la governa ia vide lo como un problem e Pitagora ia es escluida a un colonia elinica nomida Metaponto, en Italia, do el ia mori en 497 aec.
Socrate ia nase en Atina en 469 aec. El es considerada como la padre de filosofia ueste. El ia dedica sua vive a esamina la veria de opinas popular.
Pos erita un monton de mone de sua padre, el ia dedica tempo plen a filosofia e a ensenia. El ia crede ce sabe ia veni de descovre definis universal e consetas xef como virtua.
On conose no obra scriveda par el e on depende de otra scrivores como Jenofonte per conose sua vive e obras. On ave ance sua dialogos prima con sua studiante Platon, ci ia atenta mostra la metodos e ensenias de sua mestre.
La dialogos socratiste es conversas longa con studiantes con la ojeto de comprende e ateni virtua.
Socrates ia dise ce sabe e virtua es unida e, par esta, no person pote fa mal cuando el sabe ce el fa lo.
Alga frases sur cual on crede ce Socrate ia dise los: “Conose tu”, “La sola cual me sabe es ce me sabe no cosa” e “Nonsabe es la sola mal”.
El es la fundor de la “metodo socratiste”, cual atenta trova veria par demanda e responde.
Socrate ia es acusada de dejenera la jovenes atinan e ia es condenada a mori.
El ia mori en 399 aec pos bevi conio.
Platon ia nase en Atina en 427 aec, do el ia abita tra tota sua vive, an si el ia viaja a Sisilia e a Italia sude. Car el ia nase en un familia nobil, el ia reseta un educa multe bon.
El ia dedica se a politica e a scrive trajedias (presentas teatral cual fini con mori e tristia).
Cuando el ia conose Socrate, el ia deveni sua disiplo. Cuando el ia mori en 399 aec, Platon ia viaja tra Elas, Italia e Egipte, do el ia reseta la influe de la seguores de Pitagora.
Platon ia fundi sua Academia en 380 aec, un sentro per aprende e investiga. Aristotele ia es un scolor ala.
Platon ia crede ce on ave verias noncambiable sur tota e ce la taxe de un filosofiste es abri la oios de la persones a veria. El ia crede ance ce on ave un mundo nonvidable do on ia ave modeles perfeta de tota sur la Tera.
Aristotele ia nase en 384 aec en Stagira, un colonia elinica. Sua padre, Nicomaco, ia es la dotor medical de la re de Macedonia. Esta ia es importante car Aristotele ia deveni la mestre de Alexandro la Grande, la prinse de Macedonia.
Cuando Aristotele ia es peti sua padre ia mori e el ia vade a Atina per fini sua educa. Ala, el ia vade a la Academia de Platon e ia aprende per des-du anios asta cuando el ia comensa ensenia retorica.
Cuando Platon ia mori en 347 aec, Aristotele ia vade a Atarnea, do el ia vive per tre anios con la nobiles. Pico a pos la persianes ia invade la teritorio e ia mata la re, donce Aristotele ia fuji e ia reveni a Macedonia. El ia aseta es la mestre de Alexandro e per sinco anos el ia ensenia arte, leteratur e politica a la joven.
Cuando la re Filipo ia mori e Alexandro ia deveni re, Aristotele ia vade a Atina. Jenocrate ia es la dirijor de la Academia de Platon e platonisme ia es la filosofia de la site. Donce, el ia deside fundi sua propre Academia, cual el ia nomi “la Liseo”.
Sua forma de ensenia ia es pasea longo la vias de Atina segueda par sua studiantes. Par esta, los ia es nomida “peripatetica”, per la parola elinica peripatein “pasea”.
Aristotele ia dedica sua vive a clasi la siensas cual ia esiste e ia ensenia en la matina a la studiantes la plu avansada e en la posmedia a los ci ia prefere sabes jeneral.
El ia mori en la anio 322 aec.
Cristoforo Colombo ia nase en Genoa en 1446. Sua contatas prima con la mar ia es par naviga con intendes mercataliste. Plu tarda el ia aprende desinia mapas e linguas clasica, pd: latina e elinica antica.
Colombo ia oia ce la tera ia es un sfera, e ce el ta pote ariva a Asia navigante a la ueste en loca de vade a la este (car la arabis ia controla la via par tera) o a sude (la portugeses ia atenta crea un via nova bordante Africa).
El ia presenta sua projeta a la re portuges ma el no ia aseta lo. La Rena Isabel la Catolica ia aseta la projeta de Colombo e ia suscrive la Trata de Santa Fe, par causa de cual Colombo ia reseta la mone nesesada per sua mision. Con esta mone el ia prepara tre caravelas: La Pinta, La Niña e la Santa María.
Colon e sua flotila ia naviga de Palos (Huelva, Espania) asta la Isolas Canario. De ala los ia spende 72 dias asta ariva a la isola Guanahani cual los ia nomi San Salvador (oji en la Bahamas). El ia descovre ance Cuba e Santo Domingo. Los ia pensa ce los ia ariva a la Indias e no ia sabe ce los ia descovre un continente nova! Colombo ia reveni a tre plu veses a America e ia porta a Espania produidas como la tomate, la patata, la mais e la cacau. El ia porta a America trigo e animales nonconoseda ala como la cavalo e la porco.
Leonardo da Vinci ia nase en Firenze (Italia), en la sentenio 15, cuando on ia ave no televisa, no interede, no nomes familial. Vinci ia es la vileta do el ia nase. El ia es la om prima de la Renase, per dise: el ia sabe multe. Totas ia sabe sur el e el ia es tan conoseda ce la plu potiosa ia vole ce el labora per los. Contes, duxes e res ia vole el en sua casteles e palasios. Sua arma xef ia es la brosa. El ia depinta multe e alga de sua depintas es conoseda an oji, como “La come de sera ultima” o “La Gioconda”.
Sua susede ia aveni car el ia es un bon oservor. El ia oserva tota cual ia ensirca el e ia studia como lo move per depinta lo a pos. El ia inventa un tecnica per depinta, conoseda como “sfumato”. El ia gusta oserva la pasaros e ia desinia macinas per vola (en acel eda, on ia ave no aviones, no elicotores). El ia es no sola un depintor, ma ance un inventor. El ia inventa multe macinas, spesial macinas de gera (car en acel eda, gera ia es alga comun).
El ia ama studia e sabes, e ia deveni un filosofiste, scrivor, musiciste, poesiste…
Nicolas Copernico ia es un astronomiste, matematiciste e economiste polsce ci ia developa la teoria eliosentriste (cual dise ce la Sol es en la media de la Sistem Solal).
El ia nase en 1473 en Polsca. El ia entra a la Universia de Krakow en 1491 do el ia descovre astronomia. Pos cuatro anios, el ia vade a Italia per studia lege e medica en la universias de Bolonia e Padova. En Ferrara el ia conose Domenico Maria Novara de Ferrara, un astronomiste conoseda, de ci el ia deveni un disiplo.
El ia fa oservas e calculas astronomial tra sua vive e en 1514 ia dona a sua amis un testo en cual el ia parla sur sua teoria eliosentriste.
Esta teoria ia dise ce la Sol es en la sentro de la Sistem Solal (en acel eda, los ia crede ce la Tera ia es en la sentro de la Sistem Solal, pd: los ia segue la teoria jeosentriste).
Esta teoria es un de la descovres la plu importante de istoria e sua teoria ia es publicida en 1543 (anio de sua mori) en la libro “Sur la revoluis de la sferas sielal”.
Galileo Galilei ia nase en 1564 en Italia. El mesma ia comensa studia fisica e con 25 anios el ia deveni profesor de matematica en universia.
En 1609, un de sua aprendores ia parla a el sur un inventa nova: la telescopio. El ia es interesada per esta e el mesma ia construi un. Esta construi ia trae fama a el ma el ia es interesada en usa lo.
Con sua telescopio, Galileo ia oserva stelas e la universo e ia descovre ce la Tera no es la sentro de la universo. La Sol es la sentro e la planetas jira sirca lo, como Copernico ia dise. El ia publici sua descovres en un libro nomida “La mesajor stelosa” ma el ia es arestada e obligada a jura ce lo ia es un menti.
El ia mori en 1642 en Firenze.
Marie ia es un xica multe intelijente, curiosa e con capasia per studia. Cuando el ia reveni de scola, el ia abri la libros e ia comensa studia, sempre demandante a sua padre:
– Papa, cual es fisica? – el ia demanda a sua padre a un dia. El ia es un fisiciste e matematiciste.
– La fisica es un ramo de siensa cual studia la proprias de spasio, tempo, materia e enerjia – el ia responde a el.
– Cual es enerjia? – la xica ia demanda a sua avo, ci ia es ance un fisiciste.
– Enerjia es la forsa cual pote jenera un ata o labora – el ia responde.
– Cual es la usa de un dinamometre? – el ia demanda a sua madre, ci ia es ensenior.
– La dinamometre es un instrumento usada per mesura forsas e pesa ojetos.
E tal la dias ia pasa, Marie ia demanda a cada momento e sua familia ia responde a sua demandas.
– Me vole vade a universia! – el ia dise cuando el ia fini sua studias.
– Lo va es multe difisil, fia mea. Tu sabe ce on ave sola omes en universia – sua padre ia responde.
An con tota la difisilias, el ia pote vade a un universia secreta do femes ia es asetada.
Con la aida de sua padre e sua labora como mestre, el ia pote garda alga mone e el ia vade a Paris per continua sua studias. Pos un anio, el ia sposi un siensiste nomida Pierre. El ia fa sua tese sur investiga de sustantias radioativa.
Marie e Pierre ia continua studia radioativia, e pos cuatro anios, los ia anunsia ce los ia descovre du elementos nova: radio e polonio, plu radioativa ca uranio.
Tota sua labora ia es reconoseda, e el ia es la fem prima ci ia reseta la Premio Nobel de Fisica, per sua laboras sur radioativia.
Pos alga anios, el ia reseta la Premio Nobel de Cimica.
Albert Einstein ia nase en 1879 en lo cual oji es Deutxland (en acel eda, lo ia es la Impero Deutx). El ia es alga pigra e no ia gusta studia. A un dia, cuando el ia es malada, sua padre ia porta un busola a el.
El ia es curiosa e ia vole sabe perce la flexa ia indica sempre la mesma punto: la norde.
De acel dia el ia comensa es interesada sur siensa ma sola cuando un mestre nova ia ariva el ia comensa ama matematica e fisica.
A un dia, sua padre ia ensenia a el cual es eletrica, e de acel momento, el ia deveni tan interesada ce el ia comensa demanda a se sur spasio e lus e ia deveni un siensiste.
El ia deveni famosa par sua teoria sur relativia, cual dise ce tota aveni depende de la punto de vide de la oservor.
Miguel de Cervantes Saavedra ia nase en un vileta nomida Alcalá de Henares (Espania) en 1547. An con la problemes economial de sua familia de sete frates, sua jenitores ia es sempre preocupada per sua educa e Miguel de Cervantes ia entra a un scola jesuita con 8 anios. El ia ama leje, spesial teatro, e aprende. Cuando el ia es acusada de feri un otra person en un duel, el ia vade a Italia. Ala, el ia leje la epicas de Ludovico Ariosto. El ia reveni a Espania ma sua barcon ia es atacada par turceses. El ia deveni un sclavo en Arjelia (Africa), per sinco anios. Par causa de a un rescate el ia es librida.
Con 22 anios el ia deveni un soldato e ia luta en la batalia de Lepanto, do el ia es ferida en sua mano sinistra. El ia comensa scrive con esta eda. El ia cambia sua labora en cuando el ia comensa scrive sua obra La nobil ingeniosa Don Quijote de La Mancha, cual ia es publicida en 1605 (cuando el ia ave 58 anios). La parte du ia es publicida cuando el ia ave 68 anios, cuando el ia mori.
William Shakespeare ia nase en 1564 en England. El ia vade a London en 1588 do el ia comensa sua carera como scrivor, ator e poesiste.
El ia comensa scrive sua propre presentas teatral e ia interprete los. El ia susede con sua obras. Alga la plu conosedas es Romeo e Julieta, e Hamlet.
Henry Wriothesley, un conte de Southampton (un site en la sude de England), ia aida el economial. Pos oteni multe mone e fama, el ia retira a la vileta do el ia nase, nomida Stratford-upon-Avon, do el ia mori en 23 april 1616.
William Shakespeare es multe importante per la lingua engles, car el ia crea multe parolas e espresas cual an oji es usada en acel lingua.
Wolfgang Amadeus Mozart ia nase en 1756 en Salzburg (Osteraic). De multe joven el ia mostra talento per musica. Par esta, sua padre Leopold ia abandona cuasi tota sua laboras profesal per ensenia el e sua sore Nannerl.
Con sinco anios, el ia pote jua la violin e ia fa ja mesma alga composas e con 13 anios el ia deveni la mestre de consertas de la arcibispo de Salzburg.
En sua adolese e eda adulte, el ia composa e Josef 2 de Habsburg ia ofre a el un posto como composor. An tal, el ia ave problemes economial en tota sua vive e ia ave enemia con la musiciste Antonio Salieri, ci ia es jelosa de Mozart e ia difusa mentis sur el.
Mozart ia mori en Wien en 1791, con 35 anios. Alga de sua obras la plu conoseda ia es La flauta majiosa, Misa de moria e La sposi de Figaro.
Ludwig van Beethoven ia nase en Bonn (Deutxland) en 1770. Sua padre ia es un musiciste. Cuando el ia es peti, el no ia gusta musica ma sua padre ia descovre sua potensia e ia forsa el a pratica.
Con 7 anios el ia ata publica a la ves prima e con nove anios el ia publici sua composada prima.
Con 17 anios el ia vade a Wien per studia con Mozart ma en acel anio (1787) sua madre ia mori e sua padre ia deveni un enebriada. En alga anios el ia deveni famosa en Wien par sua capasia con la piano.
An tal, de cuando el ia es joven, el ia comensa ave problemes per oia. Con 46 anios el ia es cuasi sorda. An si el ia es sorda, el ia composa multe sonatas cual el ia recorda e imajina en sua testa.
Un de sua obras la plu conoseda es la Simfonia numero 9.
Francisco de Goya ia nase en Espania en 1746. El ia comensa aprende depinta con 14 anios en sua vileta asta cuando el ia vade en 1763 a Madrid per studia en la Academia de San Fernando ma el no ia pote entra. El ia comensa studia con un artiste nomida Francisco Beyeu.
En 1790 la re Carlos 4 de Espania ia converti el a la depintor ofisial de la palasio. Como el ia labora per la monarcia, multe de sua obras es oji en la Museo del Prado en Madrid (Espania).
Entre sua obras on pote nota un serie de depintas nomida “La desastre de la gera”, fundida sur la gera de nondepende espaniol. En los el ia atenta mostra la sosia de acel eda e como la gera ia es en Espania. On nota ance “2 maio 1808”.
Diego Velázquez ia nase en 1599 en Espania. El ia comensa studia depinta con 10 anios. El ia aprende la stilo baroca, cual es marcada par sua detalias ornosa.
El ia deveni famosa e la re Felipe 4 ia demanda per sua servis.
Ante labora per la re, el ia depinta sur ativias dial, cual on pote vide en sua depintas como “Fem vea fritante ovos”. En sua periodo en cual el ia labora per la re, el ia depinta sua obra la plu conoseda “Las Meninas”.
El ia mori en 1660.
Esta paje es presentada con la lisensa CC Attribution-Share Alike 4.0 International.
Lo ia es automata jenerada de la paje corespondente en la Vici de Elefen a 23 setembre 2025 (16:19 UTC).