Compilada par Vicente Costalago
Esta obra es ance disponable como pdf.
La istoria de Espania envolve tota la poplas e nasiones de la penisola iberian e la paises Espania, Andora, Portugal e Jibraltar. Lo estende de la Iberia preistorial, tra la asende e la declina de un impero global, asta la istoria resente de Espania como membro de la Uni European.
La umanas moderna ia entra a la Penisola Iberian ante 32 000 anios. Poplas e cultures diversa ia segue tra la milenios, incluinte la iberianes, tartesicas, celtas e celtiberianes, fenisianes, elinicas, punicas, romanes, suebas e visigotos.
En 711, la moros, un armada de berberes e arabis, ia invade e ia concista cuasi tota la penisola. En la 750 anios seguente, statos muslim autonom ia es constituida, e la area intera de controla muslim ia es conoseda como Al-Andalus.
Entretempo, la renas cristian en la norde ia comensa la recovre longa e lenta de la penisola, un prosede nomida la Reconcista, cual ia es concluida en 1492 con la cade de Granada.
La Rena de Espania ia es creada en 1492 con la uni de la Rena de Castelia e la Rena de Aragon. La viaja prima de Cristoforo Colombo a la Mundo Nova ia susede en la mesma anio, comensante la developa de la Impero Espaniol. La Incuisisio ia es instituida e la iudistes e la muslimes ci ia refusa converti ia es escluida de la pais.
En la tre sentenios seguente, Espania ia es la potia colonial la plu importante de mundo. Lo ia es la stato la plu potiosa en Europa e la potia global la plu importante en la sentenio 16 e en parte grande de la sentenio 17. La leteratur espaniol e artes bela e filosofia ia flori en esta tempo. Espania ia institui un impero vasta en America, estendente de California a Patagonia, e colonias en la Pasifica ueste.
Partal finansiada par la tesoros de la teritorios ultramar, Espania ia deveni envolveda en la geras relijial de Europa, perdente sua posesedas en Nederland, Italia, Frans e Deutxland, e engranada en geras contra Frans, England, Sveria e la Impero Osmanli en la Mediteraneo e en Africa norde. La geras de Espania en Europa ia gida a dana economial, e en la parte ultima de la sentenio 17 on ia esperia un declina gradal de potia su un dinastia Habsburg plu descurante e torpe. La declina ia culmina en la Gera de Erita de Espania, cual ia fini con la retrosede de Espania de un state de potia gidante ueste a un suordinada, an si lo ia resta (con Rusia) la potia colonial inisial.
Bison en la Cava de Altamira.
La presentia de ominidos en la Penisola Iberian orijina a minima de 1,3 o 1,2 miliones de anios pasada, datida de un mandibula trovada en la Sima del elefante, un de la situas en la Siera de Atapuerca (provinse Burgos). Lo coresponde a un Homo ancora nondeterminada, prosima a Homo african la plu primitiva e la om Dmanisi ma con alga cualias derivada propre. De esta eda ta es ance la situa de Fuente Nueva, en la basin Guadix-Baza (provinse Granada).
De 900 000 anios ante aora es la restas de la conserveria de la Gran Dolina, ance en Atapuerca, cual defini un spesie xef per comprende la evolui umana, nomida Homo antecessor. En la descovre seguente, de 430 000 anios, on trova restas de la Homo heidelbergensis (spesie presedente a la Homo neanderthalensis.
En la Paleolitica media on situa la presentia de la neandertal, de ci sua restas (de 60 000 anios) es trovada en Jibraltar. En la Cova de Nerja (Malaga) on trova alga restas organica liada a depintas de focas cual ta pote es la obra prima de arte conoseda en la istoria de umania.
La Homo sapiens ia ariva a la penisola en la Paleolitica superior, a 35 000 anios ante aora. On sabe esta par causa de alga restas trovada en Cantabria. Los ia coabita con la neandertales en la penisola, asta la estingui de esta ultimas 27 000 anios ante nun. A 16 000 anios ante aora, la cultur madalenian ia es presente en Asturias, Cantabria e parte de Euscadi, de ci sua contribui la plu notable es la depintas de la Cavas de Altamira.
La Neolitica ia comensa en la penisola Iberian en 5600/5700 AEC. Sirca la anio 5000 AEC la cultur megalital ia apare en la parte ueste de la penisola.
La cultures ci ia usa la metales ia apare en la penisola entre la anios 3000 e 2500 AEC.
La Dama de Elig.
La eda de fero comensa en la penisola Iberian con la penetra de poplas e influes cultural indoeuropean de la comensa de la 1 milenio AEC, determinante la identia etnico e linguistica celta de la plu de la poplas nativa de la zonas norde, ueste e sentro, con alga esetas: lusitanianes e vetones, ance indoeuropean, es clasida como “precelta” contra ce la euscaras es clasida como “preindoeuropeanes”. An con la similia de sua formas de vive a acel de otra poplas de la zona norde (galecos, astures e cantabrianes), on crede ce sua lingua (la protoeuscara) es simil a los parlada en la zona este de la penisola; los de la iberianes, de un developa economial plu alta. La fontes clasica ia nomi celtiberianes a la grupo de poplas situada en un zona media (jeografial).
La costa penisolal sude e la area de Tartesos (con sentro de la vale de Guadalquivir, Turdetania, e con projeta asta zonas multe distante, de la boca de la rio Tajo a la boca de la rio Segura), la plu rica en metales e con la plu developa economial e sosial, ia deveni profonda influeda par la coloni fenisian. La funda mital de Gadir (Cadiz) ave la data 1104 AEC, an si on ave no funda arceolojial per susta un tal cronolojia asta alga sentenios plu tarda. En la sentenio 8 AEC on ave indicas de un grupo grande de fabricerias e colonias fenisian, como Malaka (Málaga), Sexi (Almuñécar) e Abdera (Adra).
La colonias elinica ia instala se plu en la norde, en Akra Leuké (Alicante), Hemeroskopion (Denia), Emporion (Ampurias) e Rhodes (Rosas). Sua contata con la iberianes ia fa ce estas ia reseta referes en la scrivedas de acel poplas. Fontes elinica indica ce la navigores elinica ia institui contatas con la “rena” de Tartessos e con sua “re” Argantonio, ci ia ta dona a los arjento sufisinte como per construi murones contra la atacas persian. An tal, acel contatas nos ia fruti.
Batalias de Anibal contra la poplas de la
Plano Alta Sentral (Meseta Central).
Cartago e Roma ia entra a fini en un serie de geras (Geras punica) per la ejemonia en la Mediteraneo ueste. Pos la defeta en la Gera Punica Un, Cartago ia aumenta sua domina en Iberia pos perde Sisilia, Sardinia e Corse.
Amilcar Barca, Anibal e otra jenerales cartagan ia comensa controla la colonias fenisian de Andalusia e Levante e, a pos, ia comensa estende sua area de influe sur la poplas nativa. A fini de la sentenio 3 AEC, la plu de la sites e poplas a sude de la rios Duero e Ebro, como ance la Isolas Balear, ia reconose la domina cartagan. Los ia fundi Qart Hadasht (Cartagena), cual ia deveni rapida un base naval importante, par causa de interesa a controla la ricia jenerada par la minas de arjento de Cartagena.
Con la arjento de acel minas los ia paia a sua mersenarios e, cuando los ia perde la site en 209 AEC, Anibal no ia pote resiste la romanes, donce la perde de Cartagena ia deside ance la gera de Anibal.
En la anio 219 AEC Anibal ia ataca Roma, concistante Iberia per usa lo como base de operas e incluinte un persento grande de poplas nativas en sua armada.
Lo es en esta prosede ce los ia atenta concista la colonia elinica de Sagunto, situada a sude de la frontera acordada de la rio Ebro ma aliada con Roma. Esta ia comensa la Gera Punica Du, cual ia fini con la asorbe de de la parte sivilida (iberian) de la penisola a la Republica Roman.
La divide provinsal prima de Hispania par la
romanes.
Pos la Gera Punica Du entre 218 AEC e 201 AEC, on pote considera la penisola Iberian su controla de Roma. La batalia per ocupa, pos la espulsa cartagan, ia es rapida, estra a interna (Numantia) e la popla cantabrian ci ia resiste asta la ariva de Augusto en la comensa de la Impero Roman.
En 197 AEC la romanes ia divide la teritorio iberian en du zonas: Hispania Citerior e Hispania Ulterior.
La concista total de la penisola ia aveni en 19 AEC (pos la fini de la geras cantabrian). A pos, la teritorio es divideda en tre provinses: Baetica, Tarraconense e Lusitania, un organiza cual ia dura asta la Impero Basa, cuando la teritorio ia es divideda en Betica, Cathaginense, Gallaecia, Lusitania e Tarraconensis.
La prosede de romani, comprendeda como asorbe de la lingua, la costumes, e la economia roman, ia comensa en la anio 110 AEC e ia dura asta la dui de la sentenio 3 ec.
En esta epoca, la hispanes ia deveni un parte importante de la Impero Roman, contribuinte con figures importante como la imperores Trajano, Adriano, Marco Aurelio e Teodosio, la filosofiste Seneca, la teolojistes Paulo Orosio o Prisciliano, la retoriciste Quintiliano, la poetas Martial, Lucano o Prudentio, la agronomiste Columela, la jeografiste Pomponio Mela o la politicistes Marco Annio Vero o Lucio Cornelio Balbo.
Provinse Spania en la anio 560.
En la penisola Iberian, como en otra provinses, la Impero roman ia cade gradal, con otra prosedes cuasi simultan de “desromani” de la Impero en Hispania, pd. un debili de la autoria sentral en la sentenios 3, 4 e 5, e de la “romani” de la tribus germanica, per esemplo, la adota de la lege roman cual es evidente en la Lex Gothorum, la converti a cristianisme, e la simpatia de alga res con latina, asta composa poesia en esta lingua.
An con tota, entre la sentenio 6 e 7 e grasias a la xerca de Justiniano 1 la Grande de reinstitui la potia de la Impero Roman de la Ueste, lo ia fa ce el ia concista la banda sude de la penisola Iberian, cual el ia nomina provinse Spania. Esta teritorio visigoto ia es donada a la Impero Bizantian a pos es destruida par la vandales e, ance, a pos un partito de la gera sivil entre Agila e Atanagildo ia demanda sua aida. Sua capital ia es Carthago Spartaria, oji Cartagena.
En la inverno de 406, profitante la conjela de la rio Rin, la vandales, suebas e alanes ia invade la impero con fortia. Pos tre anios, los ia traversa la Montes Pirineo e ia ariva a la penisola Iberian, e los ia divide se a la partes ueste, cual coresponde a lo cual oji es Portugal e Espania ueste asta Madrid. Entretempo, la visigotos, ci ia concista ja Roma a du anios a ante, ia ariva a la rejion en 412, fundinte la rena Toulouse (en Frans sude), e ia estende sua influe gradal en la penisola, deslocante la vandales e alanes a norde de Africa[¹]. A pos, pos la concista de Toulouse par la francos e la perde de la plu teritorios en lo cual es oji Frans, los ia move sua capital a Toledo.
On no conose con esatia la cuantia de visigotos ci ia migra a la penisola ma lo es posible ce sirca 5% de la popla de la penisola ia es visigoto. Esta implica ce los ia es la elite dominante, e ce los ia es nunca un parte importante de la popla. Par esta la relijio arian e la lingua visigoto no ia ave un efeto dominante sur la popla.
An si la nobiles ia es arian, esta relijio no ia es popular en la popla hispano-roman de la penisola, fidosa a catolicisme. De la monarcia visigoto, spesial de la anio 597, la re Recaredo 1, ja convertida a catolicisme, ia atenta reconsilia la ierarcia arian con la catolica, ma con poca susede. A fini, la relijio catolica ia es enforsada, par priva a la eglesa arian de sua benes.
En 711 la armadas muslim ia entra en la
penisola tra la Streta Jibraltar, los ia concista
lo en poca anios, en compara con la prosede
longa cual ia es la Reconcista.
La concista muslim de Espania pote resoma en un cronolojia corta:
Roderico, ci ia es lutante contra la revolta de la euscaras, cuando el ia sabe sur la invade muslim, ia vade con sua armada. El ia es vinseda en la batalia de Guadalete par la tradosia de la suportores de Uitiza. Con sua mori e la armada goto vinseda, la muslimes ia deside continua la concista.
Tariq ibn Ziyad ia concista Toledo e ia ariva asta León; Muza ibn Nusair ia concista Sevilla e ia ariva asta Merida (712). Los ia uni sua fortias a pos per concista Zaragoza. La fio de Muza ia fini la concista de la penisola, estra la zonas de montanias cantabrian e de la Pirineos (716), pasante a teritorio franco. Carlos Martel ia para la avansa muslim en Poitiers en 732, e de alora la muslimes ia consentra en la penisola.
En 756 Abderraman 1 ia proclama la amiria de Cordoba, fante la penisola nondependente de la resta de la mundo muslim, an si la contatas cultural e comersial ia continua. En 929 Abderaman 3 ia proclama la califia de Cordoba, cual ia sinifia la separa final de la califia de Bagdad. En la anio 1031 la califia de Cordoba ia divide se, forminte se la renas de taifas, cual ia es enemis de lunlotra.
La batalia de Navas de Tolosa en 1212
ia marca la comensa de la fini de la
renas muslim en Espania.
Al-Andalus ia coaveni con la “Convivencia”, un epoca de tolera relijial relativa, e con la eda orosa de la cultur iudi en la penisola Iberian.
La interesa muslim en la penisola ia reveni con forsa en la anio 1000, cuando Al-Mansur[³] ia saca Barselona (985). Longo sua fio, otra sites cristian ia sufri ance multe atacas.
Pos la mori de sua fio, la califia ia comensa un gera interna e ia divide en la “Renas de Taifas”. La res de la taifas ia compete contra lunlotra no sola en la gera, ma ance en proteje de artes e cultur, cual ia fa un reforti corta. La renas de taifas ia perde ja teras contra la cristianes de la norde, e pos la perde de Toledo en 1085, la governores muslim de Al-Andalus ia invita nonvolente la almoravides, ci ia invade Al-Andalus de la norde de Africa e ia institui un impero nova. En la sentenio 12, la impero almoravide ia rompe denova, per deveni concistada par la invade almohade, ci ia es vinseda en la batalia desidente de las Navas de Tolosa en 1212.
La Espania medieval ia es un sena de gera cuasi constante entre cristianes e muslimes. La almohades, ci ia controla ja la Magrib, la almoravides e la teras andalusian en la anio 1147, ia es plu fundaliste ca la almoravides, e ia trata la dhimmis con severia. La trata a la iudis ia varia ja entre la renas diferente muslim e cristian. La amiria de Granada de la dui de la sentenio 13 ia es la sola rena nondependente muslim en Espania, cual ia dura asta 1492.
En esta tempo, la res de Aragon ia governa teritorios cual no ia es sola la Rena de Aragon, ma ance la Prinsia Catalunia, e plu tarda la Isolas Balear, la Rena Valensia, Sisilia, Napoli e Sardinia. La companyia catalana ia ocupa la duxia de Atina, cual ia es poneda su la proteje de un prinse de la Casa de Aragon, ci ia governa lo asta 1379.
Sculta de Sir Pelaio en Covadonga.
Sirca la anio 722, un grupo de soldatos muslim ia es vinseda par un grupo de refujadas cristian en la forestas de Covadonga (Asturias) en la batalia omonim. Sir Pelaio, probable un nobil goto, ia es nomida re. La corte prima ia es instituida en Cangas de Onís. Pelaio ia mori en 737. A du anios plu tarda (739) sua fio par sposi, Alfonso 1, fio de Pedro de Cantabria, profitante la lutas entre la arabis e la berberes, ia dona un impulsa nova a la reconcista, arivante a Rioja e la Rio Duero. Ma el no ia pote repopla lo, donce ala un deserto stratejial ia resta, un tera de nun en la plano alta norde.
Entre la anios 718 e 1230 la nucleos cristian xef ia converti se en la renas de Asturias, Navara, Leon, Galisia, Portugal, Aragon e Castelia.
En la sentenio 13 on ia vide un avansa grande cristian, la estende de la Corona de Aragon tra la Mediteraneo e la uni de Castelia con Leon.
Atera de Colombo en la isola Guanahani en 1492.
En 1469, con la sposi de Isabel e Fernando, prinse erital de Aragon, la uni dinastial de la renas de Castelia e Aragon ia es completida, an si ambos teritorios ia manteni sua propre lejes e instituidas asta 1707[⁴] ma su la comanda de la mesma re.
Ante esta, entre 1474 (anio de la mori de Enrique 4) e 1479, un gera interna ia comensa per la susede de la corona de Castelia entre la suportores de Isabel e aceles de Juana la Beltraneja, estrasore e fia legal de Enrique 4, sposida con la re de Portugal.
La Reconcista fini en 1492 con la concista de Granada par la Res Catolica. En acel anio la iudis es espulsada e America es descovreda cuando la mision de La Pinta, La Niña e La Santa María, comandada par Cristoforo Colombo e finansiada para la corona de Castelia, ia ariva a la isola Gunahani en venerdi 12 otobre 1492.
En la sentenios 15 e 16, la popla de la penisola Iberian ia es consentrada en la teritorios de la Corona de Castelia, xef en la vale de Duero, Andalusia e la Manxa. La popla de la Corona de Castelia ia crese de 3,4 miliones en 1400 a 4,5 miliones en 1530 e 6,5 miliones en 1590. De la comensa de la sentenio 15, la buma de la lana merino castelian ia aveni, cual – con grasias a la developa de tecnicas nova de fili – ia ateni un difusa internasional grande e ia deveni la materia prima xef de la texedas fada en Flandre. La comersiores castelian ia abita en la sites xef de Europa ueste e ia introdui tecnicas comersial como prometes de paia e asecuras maral.
La concista de la isolas Canario par la Corona de Castelia ia aveni entre 1402 (concista de Lanzarote) e 1496 (concista de Tenerife). On pote distingui du periodos:
Lo no ia es un concista militar fasil par causa de la resiste nativa en alga isolas. Lo ance no ia es fasil de un punto de vista political, car lo ia asembla la interesas de la nobiles (ci ia vole forti sua potia economial e politica per la concista de la isolas) e la statos, spesial Castelia, en media de un fase de estende teritorial e en un prosede de forti de la Corona contra la nobiles.
Impero Espaniol pos la proclama de
Felipe 2, re de Espania e Portugal
(1580-1640).
La Impero Espaniol ia es un de la imperos mundal moderna prima e un de la imperos la plu grande de la istoria, esente considerada la impero mundal global, car lo ia es la ves prima a cual un impero ia estende tra tota la continentes (eseta Antartica), sin comunica par tera entre los.
En la sentenio 15, la corona espaniol ia xerca la abri de vias comersial nova tra la mares. En 1492 la Res Catolica ia finansia la projeta de Cristoforo Colombo per xerca un via comersial a Asia tra la Atlantica. La ariva a la Mundo Nova e la concista de America ia es la nase de un impero nova.
En la sentenio seguente, Espania ia es la potensia prima de la mundo ueste e la prima de la mundo, an si en 1650 el ia comensa sua descrese. La concistores espaniol ia ariva a teritorios diversa en America, Asia, Africa e Oseania. La ajunta de la Rena de Portugal en 1580 ia suposa la momento de estende masima formal de la Impero Espaniol.
La area de influe de Espania ia estende, deveninte la potensia economial la plu grande en la mundo en la sentenio 16, la comersia ia flori tra la Atlantica entre la penisola Iberian e America, e en la Pasifica de Asia este e Pilipinas asta Mexico, e en la aspeta militar, en sentenios variosa la Impero Espaniol ia domina la mares con sua armada e la campos de batalia con sua enfanteria de la tercios. An tal, de la sentenio 17 sua potia e influe en la sentro de Europa e Italia ia es atacada.
En sua apojeo economial, la impero ia ave un prestijia cultural importante e influe militar. Multe cosas cual ia veni de Espania ia es imitada. La espresas artal la plu cultivada en Espania ia es la leteratur, la artes plastica, la musica e la arciteta, en cuando conose ia cumula e ia es enseniada par universias prestijiosa como Salamanca e Alcala de Henares. An tal, la siensa no ia ave un renase tan multe forte.
La imperor Carlos 1 en Mühlberg, par Tiziano.
Con Carlos 1 la rena comensa de la dinastia Habsburg, o Casa de Osteraic, en cual Espania ia conose sua estende teritorial la plu grande, con grasias a la concista de teritorios en America e otra locas ultramar. Plu, la re Carlos 1 ia es coronida como imperor de la Impero Roman Santa como Carlos 5, cual ia ajunta teritorios estendosa a la Corona e, a pos, Felipe 2 ia aumenta la teritorios en America e ia oteni la corona de Portugal con sua teritorios ultramar, comensante un periodo (1580-1640) en cual la dominas de la Monarca Catolica ia deveni la potia economial e militar la plu grande de la mundo.
Pos la gera de Susede, Espania ia perde sua importa militar en Europa, an si lo ia segue esente la potia economial la plu grande de la mundo e ia conserva la domina de la mares asta la fini de la sentenio 18.
On pote divide esta periodo seguente la monarcas ci ia rena en:
La dinastia Bourbon ia comensa rena en Espania en la anio 1700, con la coroni de Felipe 5. Pico a pos, en 1702, la Gera de Susede Espaniol ia comensa, con la de partisipa Aragon, ma no de la provinses euscara e Navara cual, como parte de Castelia, ia resta fidosa. El ia fa reformis manejal per prosimi sua rena nova a la forma sentrida de sua pais de orijina, Frans.
On conose como Lumina political en Espania la periodo de la rena de la dinastia Bourbon de Felipe 5 en 1700 asta Carlos 4, ci ia fini sua rena en 1808, prendente la promove de la sentenio de la lumina cual ia comensa en Frans e ia gida a la Revolui Franses.
En esta periodo, on ave la renas seguente:
Felipe 5 ia firma Proclamas de Nueva Planta variosa entre 1707 e 1715, lejes nova cual ia fini con la plu de la diretos istorial e vantajes de la renas diferentes cual ia formi de la Corona espaniol, spesial de la Corona de Aragon, uninte los su la lejes de Castelia, do la Cortes ia es plu resetante a la vole reial. Espania ia deveni un seguor cultural e political de la Frans asolutiste. Felipe 5 ia fa reformis en la governa e ia forti la autoria sentral en relata a la provinses. La reformis comensada par la bourbon un ia culmina con otras multe plu importante de Carlos 3. La economia, jeneral, ia boni longo la sentenio 18 en relata con la depresa de la dui du de la sentenio 17, con plu produosia e min famiones e epidemicas.
La carga de la mamluces, par Goya.
On conose como Ses Anios Democrata la periodo de la vinse de la revolui de setembre 1868 asta la proclama de desembre 1874 cual ia es la comensa de la Restora.
Pos la revolui de 1868 un monarcia constituinte ia es proclamada. On ave un difisilia inerente a la cambia de governa, pd. como on trova un re ci vole aseta la ofisia. A fini, a 16 novembre 1870, con la suporta de la progresistes en la Cortes, Amadeo de Savoie ia es elejeda como re, con la nom de Amadeo 1 de Espania, seguente Isabel 2.
Amadeo ia ave multe difisilia par causa de la nonstablia de la politicistes espaniol, la conspiras republiciste, la revoltas carliste, la separadisme de Cuba, la disputas entre sua propre aliadas, e atentas de asasina. El ia renunsia par sua propre inisia a 11 febrero 1873. Pos esta, la Republica Espaniol Un ia es proclamada.
La Republica Espaniol Prima ia es proclamada a 11 de febrero 1873 par la Cortes Jeneral, tufante la nasion en un nonstablia profonda en cual cuatro presidentes ia segue lunlotra: Figueras, Pi y Margall, Salmerón, e Castelar, en des-un menses. La debilia con cual el ia nase ia provoca la restora bourbon direta per razonas variosa, incluinte la revoltas carliste e la manca de burjesia, funda sosial e tradision cual ia suporta lo.
On conose como Restora Bourbon la periodo de la proclama de la jeneral Martinez Campos en 19874 asta la proclama de la Republica Espaniol Du en 1931. La periodo es distinguida par la stablia de la instituidas, la formi de la model libraliste de la Stato e la corpora de promoves sosial e political variosa, naseda de la revolui industrial. Lo comensa sua dejenera con la autocratia de Miguel Primo de Rivera en 1923.
La esplode de la USS Maine (provocada par
la esuanes) ia es la escusa per comensa la gera
contra Espania en 1898.
Espania ia perde Cuba, Pilipinas e Porto Rica: Cuba ia revolta contra Espania en la comensa de la Gera de Des Anios en 1868, cual ia ave como resulta la fini de sclavia la teritorios espaniol en la Mundo Nova. La interesas esuan en la isola, juntada a la preocupas de la popla de Cuba, ia mali la relatas entre ambos paises. La esplode de la USS Maine ia comensa la gera de Cuba en 1898, en cual Espania ia sufri un defeta importante. Cuba ia oteni sua nondepende e Espania ia perde sua teritorios ultima en la Mundo Nova: Porto Rica, Guam e Pilipinas ia es sededa a la Statos Unida per 20 miliones de dolares. En 1899, Espania ia vende sua partisipa restante en la isolas de la Pasifica: la isolas Mariana Norde, la isolas Carolinas, e Belau, a Deutxland, e la poseses colonial espaniol ia es reduida a la Maroco espaniol, la Sahara espaniol, e la Gine espaniol, totas en Africa. La “desastre” de 1898 ia crea la generación del 98, un grupo de statistes e inteletales espaniol ci ia esije la cambia libraliste de la governa nova.
La neutria de Espania en la Gera Mundal Prima ia permete lo a deveni un furnor de material per la competores, cual ia provoca un bola economial en la anios de la gera. La Gera de Rif, la eruta de la gripe de 1918 en Espania e otra locas, juntada a un declina economial importante en la periodo posgeral, ia situa la pais en crise. Atentante vinse esta situa, la re Alfonso 13 ia deside suporta la autocratia de la jeneral Miguel Primo de Rivera.
La re Alfonso 13 e Miguel
Primo de Rivera en 1930.
A 13 setembre 1923, la capitan jeneral de Catalunia, Miguel Primo de Rivera, ia revolta contra la governa e ia fa un colpa de stato con la suporta de la plu de la militares. La causa de esta revolta ia es la reuni prevideda per la Cortes Jeneral per analise la problem de Maroco e la rol de la armada en la gera. A esta situa ia es ajuntada un crise importante de la sistem monarcal cual no ia fini sua ajusta en la sentenio 20 marcada par la revolui industrial aselerada, un rol no reconoseda de la burjesia, la tensas nasionaliste e la partitos political tradisional noncapas de fronti un governa democrata plen.
Pos la crise economial de 1927, asentuada en 1929, la represa violente de laborores e inteletales e la manca de armonia entre la burjesia e la autocratia, la monarcia (complis) ia es dutada par la uni de tota la oposores en agosto 1930 en la Pacto de San Sebastián. La governas de Dámaso Berenguer, nomida “dictablanda”, e de Juan Bautista Aznar-Cabañas, ia fa no plu ca longi la declina. Pos la vota munisipal de 1931, a 14 april la Republica Espaniol Du ia es proclamada, tal fininte la restora bourbon de Espania.
La vinse elejal de la republicistes en la sites ia cade la monarcia. La cambia de governa ia es fada sin versa de sangue a 14 april 1931, pos la proclama de la Republica en Madrid, Barcelona e otra capitales espaniol. Convinseda ce la vota munisipal ia es un mostra nasional contra la monarcia, la conte de Romanones, ministro de stato, ia recomenda ce la re abandona Espania e ia negosia con la comite revoluinte sur la transfere de governa. Cuando la jeneral Sanjurjo, xef de la Guardia Civil, ia fa ce on sabe ce sua omes no va luta favorente la monarcia, Alfonso 13 ia esclui se.
La zelo republiciste ia sorti de marjines e ia concista ja multe partes moderada de la clases media urban, ci ia es los ci ia es importante en politica asta acel momento. En la plu de la capitales, la resulta elejal ia es selebrada con demostras pasosa joiosa.
On pote divide la Republica Espaniol Du en tre partes:
Sinistristes espaniol xutante a la sculta de la
Cor Santa en la Cerro de los Angeles en 1936.
La atacas de la sinistristes a relijio e
relijiosas ia es un de la causas de la gera
interna espaniol.
La gera interna espaniol (17 julio 1936 – 1 april 1939) es considerada, con la Gera Xines-Japanes, como la preambul de la Gera Mundal Du.
A 17 julio 1936, la jeneral Francisco Franco ia comanda la Armada Espaniol de Africa en dirije a la penisola, en cuando un otra armada de la norde, comandada par la jeneral Mola, ia move a sude de Navara. La unias militar ia asembla ance en otra locas per controla la instituidas governal. La move de Franco ia ave la intende de concista la potia direta, ma la resiste de la republicistes en locas como Madrid, Barcelona, Valencia, Malaga e Euscadi ia sinifia la comensa de la gera interna. En poca tempo, la plu de la sude e ueste ia es su controla nasional, de ci sua soldatos de Africa ia es la plu profesales de la gera. Ambos partes ia reseta aida stranjer: la nasionales de Deutxland nazi, Italia faxiste e la autocratia de Portugal, en cuando la armada de la Republica ia es aidada par la Uni de Republicas Sosialiste Soviet, Mexico gidada par Lazaro Cardenas del Rio, presidente de la Partito de la Revolui Mexican, e la Brigadas Internasional, formida par sosialistes, comunistes e anarcistes ci ia ariva de tota partes de la mundo.
La aseja de la Alcazar de Toledo en la comensa de la gera ia es importante: la republiciste ia resiste en Madrid, an con la ataca nasional en novembre 1936, e ia impedi atacas plu tarda en la batalias de Jarama e de Guadalajara en 1937.
An tal, la nasionales ia comensa entra en teritorio republiciste en la zona este. La norde ia es ocupada a fini de 1937 e la resiste republiciste ia cade en Aragon pico a pos. La bombarda de Gernika, fada par la Lejion Condor de la Luftwaffe deutx, ia es la ataca airal la plu cruel de la gera.
La batalia de Ebro en julio e novembre 1938 ia es la atenta ultima de la republicistes per cambia la dirije de la gera. Cuando Barcelona ia es concistada par la nasionales en la comensa de 1939, la gera ia es desideda. La otra resistes republiciste ia cade e Madrid ia es concistada en marto 1939.
La gera ia es ferose en ambos lados. Pos la gera, multe republicistes ia es represada o prisonida, e multe ia es escluida.
Francisco Franco ia governa Espania
entre 1939 e 1975.
La tempo de la autocratia de Franco es divideda en du partes: la primer franquismo entre 1939 e 1959, e la segundo franquismo entre 1959 e 1975, cual inclui la tardofranquismo entre 1969 e 1975.
Jeneral, con Francisco Franco, Espania ia deveni la potia du en la setor tre, la potia 9 en industria (en 1975, industria ia es la 36% de pib.), e la economia ia es produosa, distante de la mercato finansial. Su sua governa la pais ia es reconstruida, con la construi de plu ca 4 miliones de casa entre 1961 e 1975 (fada par la Instituto Nacional de Vivienda), e la construi de 515 lagos de reserva en tota Espania.
El ia aproba multe lejes como: la Ley del Subsidio familiar, la Ley del Subsidio de Vejez, la Ley de Descanso dominical y días festivos, la Seguro Obligatorio de enfermedad, la Paga extraordinaria de Navidad, la Paga extraordinaria del 18 de julio, la Seguro de Desempleo e la Ley de Bases de la Seguridad Social, entre otras.
A 20 novembre 1975, Francisco Franco ia mori e Juan Carlos 1 ia es coronida re de Espania.
La cambia a democratia (transición) ia es la cambia de la autocratia de Franco a un stato democrata. Lo ia comensa con la mori de Franco a 20 novembre 1975 e ia fini con la vinse de la PSOE a 28 otobre 1982 en la votas nasional. Entre 1978 e 1981 Espania ia es gidada par la governa de Adolfo Suarez, la presidente un de la Governa, de la partito Unión de Centro Democrático (UCD). En 1981, on ia ave un atenta de colpa de stato de Antonio Tejero, membro de la Guardia Civil, nomida 23-F per la data en cual ia aveni, la 23 de febrero. La colpa de stato ia fali con grasias a la re Juan Carlos 1.
Espania ia entra en la Organiza de la Trata de la Atlantica Norde (OTAN) forsada par la Statos Unida. A pos, Felipe González ia entra en la governa tra cuatro periodos.
La re Juan Carlos 1 e sua fio, ci ia erita
la trono en 2014.
A 1 janero 1983, Espania ia entra en la Comunia Economial European. En 1992 la Juas Olimpial ia aveni en Barcelona e la Exposición Universal en Sevilla, e Madrid ia es la Capital Europan de Cultur.
En 1996, Jose Maria Aznar, de la Partido Popular, ia deveni la presidente.
En 2003, la governa de Aznar ia suporta la gera de Irac promoveda par la Statos Unida e la Reno Unida.
A 11 marto 2004 Espania ia esperia la ataca teroriste la plu grave en sua istoria. La esplodes de des bombas en cuatro trenes en Madrid ia causa 192 moris e plu ca 1500 feridas. Pico a pos, Jose Luis Rodriguez Zapatero, de la Partido Socialista Obrero Español (PSOE), ia vinse en la elejes nasional.
En 2008 la crise economial espaniol ia comensa e, en 2011 aveni la 15-M e la Spanish Revolution, con protestas en 58 sites espaniol contra la crise economial e sosial.
A 2 junio 2014, la re Juan Carlos 1 ia comunica televisada sua deside de renunsia e a 19 junio sua fio Felipe 6 ia es proclamada como re de Espania en la Cortes Jeneral.
A 1 otobre 2017, la governa de Catalunia de Carles Puigdemont, ia organiza un referendo nonlegal per la nondepende de Catalunia e, a 10 otobre, el ia declara la nondepende de Catalunia, ma ia demanda ce on suspende sua efetos en la mesma ata. A 27 otobre, la Parlamento de Catalunia ia declara la nondepende de Catalunia e la Senato ia aproba la aplica de la article 155 de la Constitui per controla la comunia autonom. La membros de la governa catalan o fuji a Beljia o es prisonida.
En 2020, un state de alarma ia es declarada sur la pandemica de COVID-19, e la move de persones es restrinjeda. En 2021, la presidente de la governa, la sosialiste Pedro Sanchez, ia aproba la pardona a la condenadas par la prosede catalan cual ia fini con la proclama de nondepende catalan.
[¹] Esta du poplas no ia lasa multe influe en la cultur iberian.
[²] El ia es conoseda en la istoriografia espaniol como don Rodrigo.
[³] Conoseda como Almanzor.
[⁴] Con la Proclamas de Nueva Planta.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 setembre 2024 (12:31 UTC).