Verbos

Un verbo tipal indica la aveni o la sesa de un ata (core, para), un relata (ave, perde), o un state (sta, fonde). En elefen, verbos no cambia per indica cosas como tempo o moda. En loca, on usa averbos – spesial la tre preverbos ia, va e ta. On pote usa cada verbo sin cambia como un nom.

Tempo

La tempo futur es indicada par va (un parola de orijina franses). La tempo pasada (incluinte la pasada e presente perfeta) es indicada par ia (de xavacano). Estas es averbos spesial cual presede la verbo. On no marca la tempo presente:

• Me canta.
• Me va canta.
• Me ia canta.

Naras descrive comun avenis en la pasada, un pasada imajinada, o un tempo cual no importa a la lejor. En esta casos, on pote lasa ia cade.

Elefen no distingui entre la modas perfeta e nonperfeta de la verbo. Ma on pote clari la segue de tempo de du atas par marca la ata plu temprana con ja:

• Cuando tu ia encontra nos, nos ia come ja.
• Si tu reveni doman, me va fini ja la labora.
• Sempre cuando me ateni la fini de un capitol, me oblida ja la titulo.

Elefen ave otra metodos per clari la segue tempal:

• Me ia come ante aora.
• Me ia come plu temprana.
• Me ia fini come.
• Me va come pronto.
• Me comensa come.
• Me va come pos acel.
• Me va come plu tarda.
• Me ia abitua come en la note.
• Me ia come abitual en la note.

Elefen ave ance ta, un parola elejable (de orijina en creol aitian), cual indica un moda nonreal, per esemplo cuando un situa es imajinal, dutada, desirada, o sola posible. Un frase con ta parla sur un mundo alternativa. En un tal frase con si, on inclui ta en la proposa xef, ma on omete normal lo en la proposa de si – ma sua inclui no es proibida. Ta pote sujesta un futur min probable ca lo de va. On pote ance usa ta per indica un demanda cortes. On usa lo en situas diversa do multe linguas usa un moda dependente o sujuntiva:

• Si me ta rena la mundo, cada dia ta es la dia prima de primavera.
• Si lo no esiste, on ta debe inventa lo.
• Si tu canta, me va escuta.
• Si tu va canta, me va escuta.
• Si tu canta, me ta escuta.
• Si tu ta canta, me ta escuta.
• Me duta ce tu ta dise acel.
• Tu ta dona la sal, per favore?

Jeneral, on pote usa sola un de va, ia e ta con un verbo. Un eseta es ia ta, cual sinifia lo cual la linguas romanica indica par la moda dependente en la pasada, e lo cual engles indica par “would have”. Un esemplo es un declara divertinte par Richard Nixon:

• Me ia ta es un bon pape. – “I would have made a good pope.”

Cuando on reporta la parla, on reteni la tempo de la dise orijinal:

• El ia dise ce la sala es fria. = El ia dise: “Oji, la sala es fria.”
• El ia demanda esce la sala es fria. = El ia demanda: “Esce la sala es fria?”
• El ia pensa ce la sala ia es fria. = El ia pensa: “Ier, la sala ia es fria.”

Comandas

On no marca la forma de verbos per un comanda. Lo difere de la tempo presente sola par la asentia de la sujeto. La sujeto ta es normal tu o vos – la person o persones a cual on dona la comanda. On usa ta ce si on nesesa inclui la sujeto:

• Para!
• Pardona me.
• Toca la tecla de spasio per continua.
• Vade a via, per favore!
• Ta ce tua rena veni!
• Ta ce nos dansa!

Negas

On nega un verbo con la averbo no, cual presede e la preverbos e la verbo:

• Me no labora oji, e me no va labora doman.
• El no ia pensa ce algun es asi.
• No traversa la strada sin regarda.

Partisipios

Un partisipio es un verbo usada como un ajetivo o averbo. On crea un partisipio ativa par ajunta -nte a la verbo, e un partisipio pasiva par ajunta -da a la verbo. Estas es ajetivos, ma los es egal bon usable como averbos o nomes. La partisipio ativa implica un ata continuante, e la partisipio pasiva sujesta ce la ata aveni en la pasada:

• Un ruido asustante ia veni de la armario. (ajetivo)
• La om creante scultas es amirable. (ajetivo; = la om ci crea scultas)
• El ia sta tremante en la porte. (averbo)
• Nos ia colie tota de la composantes. (nom)
• Per favore, no senta sur la seja rompeda. (ajetivo)
• El ia leje xocada la reporta. (averbo)
• Sua novela va es un bonvendeda. (nom)

La partisipio ativa pote ave un ojeto. Ance, lo pote es usada como un completinte de la verbo es per indica la moda continuante:

• Me es lenta asorbente la informa.
• Me no ia disturba tu, car tu ia es laborante.

Ma un construi con un partisipio es frecuente nonesesada. On ave otra metodos per espresa esta sinifia:

• Me asorbe lenta la informa.
• Vade a via, me labora.
• Me continua come.
• Me come continual.
• Me come tra la dia intera.

On pote usa la partisipio pasiva como la completinte de la verbos es o deveni, per produi un sinifia pasiva. On pote inclui par si on vole indica la sujeto orijinal:

• Esta sala ia es pintida par un bufon.
• La sala deveni pintida.
• Acel ponte ia es desiniada par un injenior famosa.
• Lo ia deveni conoseda ce el ia es un om perilosa.

Comun, on usa on o algun como la sujeto de un frase ativa en loca de un frase pasiva:

• On pinti la sala.
• On no sabe cuanto persones teme aranias.
• Algun ia come lo.

La partisipio ativa de es es esente:

• Esente un bufon, el ia senta sur la seja rompeda.

Transitivia

Un verbo transitiva es un verbo cual pote es direta segueda par un sintagma nomin (un ojeto), sin un preposada interveninte. Un verbo nontransitiva no ave un ojeto. Per esemplo:

• Me senta. (senta es nontransitiva)
• La patatas coce. (coce es nontransitiva)
• El usa un computador. (usa es transitiva)
• Los come bananas. (come es transitiva)

Transitivia es ajustable en elefen. Per esemplo, si on ajunta un ojeto pos un verbo nontransitiva, la verbo deveni transitiva. La ojeto coresponde semantical a la sujeto nontransitiva, e la verbo sinifia aora “causa ce (la ojeto) …”:

• Me senta la enfantes. (= Me causa ce la enfantes senta)
• Me coce la patatas. (= Me causa ce la patatas coce)

On pote omete la ojeto de un verbo transitiva si lo es ja evidente par la situa o la contesto:

• El canta un melodia. > El canta. (= El canta alga cosa)

Cuando la ojeto e la sujeto de un verbo es la mesma cosa, on pote usa un pronom refletante per la ojeto:

• Me senta me. (= Me deveni sentante)
• La porte abri se. (= La porte abri – ma con asentua ce lo pare ce nun abri lo; lo pare ce lo abri se mesma)

E on pote clari ce on usa un verbo en un modo transitiva par usa espresas con fa o causa:

• Me fa ce la enfantes senta. (= Me senta la enfantes)
• Me causa ce la fango adere a mea botas. (= Me adere la fango a mea botas)

En alga linguas, la ojeto de un verbo transitiva pote ave un completinte. Elefen usa otra construis en loca:

• Los ia eleje el a presidente. (preposada de state resultante)
• Me ia pinti la casa a blanca. (preposada de state resultante)
• Me ia fa ce el es felis. (proposa nomin)
• El ia dise ce me es stupida. (proposa nomin)

La eseta unica es la verbo nomi. On regarda esta como un esemplo de aposa.

• La esplorores ia nomi la rio la Amazon. (= los ia dona la nom “la Amazon” a la rio)

Verbos con sujetos pupetin

Cada verbo finitiva en elefen ave un sujeto, an si lo es no plu ca un teniloca.

En alga linguas, on omete la sujetos de verbos cual refere a la clima o a la ambiente jeneral. En elefen, on usa lo:

• Lo neva.
• Lo va pluve.
• Lo es tro calda en esta sala.
• Lo es bon.

Un otra caso es cuando la sujeto vera es la proposa nomin cual segue la verbo. Car acel es posponeda, on usa lo como un sujeto pupetin:

• Lo pare ce tu es coreta.
• Lo es importante ce me no oblida esta.

Simil, con la verbo es, cuando la sujeto es un pronom (tipal el, lo, o los) segueda par un proposa ajetivin, on pote move la sujeto a la fini de la frase e usa lo como un pupetin:

• Lo es me ci ama Maria. = El ci ama Maria es me.
• Lo es Maria ci me ama. = El ci me ama es Maria.
• Lo es la bal blu cual me ia perde. = Lo cual me ia perde es la bal blu. = La bal blu es lo cual me ia perde.

On usa on ave per indica ce alga cosa esiste o es presente:

• On ave un serpente en la rua.
• On no ave pexes en esta lago.
• On ave multe persones asi oji.

Verbos como nomes

Elefen ave du modos per usa verbos como nomes: la infinitiva e la nom verbal. Ambos usa la verbo sin altera.

La infinitiva introdui un tipo spesial de suproposa nomin, nomida un “suproposa infinitiva”, con sinifia simil a un suproposa introduida par ce. La infinitiva es ancora vera un verbo, capas de aseta averbos e un ojeto pos se, e de es negada par la parola no ante se. Importante, lo no aseta un sujeto o un indicante de tempo o modo. On comprende estas par la contesto.

La usa la plu comun de un suproposa infinitiva es como la ojeto de un otra verbo. La sujetos de ambos verbos es usual la mesma, ma los pote difere si la sinifia sujesta tal, como en la esemplo con proibi come a su:

• Me espera ariva ante tua parti.
• Me ia gusta multe escuta oji mea musica.
• On pote nunca spele coreta mea nom.
• El teme no velia en la matina.
• La empleor proibi come sanduitxes en la ofisia.

Infinitivas apare comun ance pos preposadas, do los pote aseta ancora no ante se, e averbos e un ojeto pos se:

• Me viaja per vide la mundo.
• El ia mori pos nomi sua susedor.
• El ia abri la noza par colpa lo forte con un martel.
• On no pote pasea tra la mundo sin lasa impresas de pede.

Contrastada, la nom verbal es simple un nom, e es normal presededa par la o un otra determinante. La nom sinifia o un aveni de la ata de la verbo o sua resulta direta. Lo pote es descriveda par ajetivos, ma on debe usa un preposada (frecuente de) si on vole inclui un ojeto:

• Sua condui ia es vera xocante.
• El ia destrui sua labora intera.
• La valsa e la samba es dansas.
• Esta va es un ajunta bela a la ragu.
• Me ia prepara du traduis de la testo.
• Tu ave no comprende de la problemes.
• “Elefen” es un corti de “Lingua Franca Nova”.
• La universo ia es estrema peti a la momento de sua crea.

Con un verbo como ajunta, la difere entre un ajunta e un ajuntada es minima. Ma la traduida es la testo orijinal de cual on jenera la tradui, e un crea es un ata cual produi la creada. Esta segue de la sinifias de la ojetos de la verbos mesma: -da refere sempre a la ojeto. Con crea, la ojeto es ance la resulta de la ata; ma con tradui, la ojeto e la resulta es du cosas diferente. Con un pico de verbos, per esemplo dansa, do la ojeto e la ata es la mesma cosa, on parla de un dansa, no un dansada.

Un suproposa infinitiva pote es usada como la sujeto de un frase:

• Nada es un eserse gustable.
• Nada en fango no es un eserse gustable.
• Scrive la novela ia aida el a boni sua stilo.

Ma, en scrive, si un suproposa infinitiva es longa, la lejor risca cisa malcomprende la verbo infinitiva como un comanda, ante cuando el ateni la verbo xef de la frase. On pote evita esta confusa par cambia la infinitiva a un nom verbal par ajunta la o un otra determinante ante lo, o par usa la plural:

• La nada en fango no es un eserse gustable.
• La scrive de la novela ia aida el a boni sua stilo.
• Eras es umana, pardonas es divin.