GRAMATICA
Spele e pronunsia ·
Frases ·
Nomes ·
Determinantes ·
Pronomes ·
Ajetivos ·
Averbos ·
Verbos ·
Preposadas ·
Juntas ·
Demandas ·
Proposas ·
Numeros ·
Crea de parolas ·
Cortis ·
Puntua ·
Sintatica
Sintatica es la regulas per la strutur de frases, e per la ordina de parolas.
En elefen, la sintatica es multe importante, car la forma de la parolas mesma cambia apena – elefen ave cuasi no morfolojia. Cuando on parla o scrive en elefen, on debe atende ce on no copia sieca la sintatica de un otra lingua, car tal frases pote ave sinifias otra ca la intende, o los pote confonde persones ci no conose acel otra lingua.
Fortunosa, la sintatica en elefen es ance simple. La regulas xef per la ordina de parolas es:
La resta de esta paje esplica la teoria de esta e ofre alga conselas pratical. Plu detalias es trovable en cuasi tota pajes de esta gramatica.
Cada frase ave un strutur ierarcial de composantes. Un composante pote conteni un sola parola; o lo pote es un sintagma (un grupo de parolas con sua propre strutur interna de sucomposantes). Tal, on pote presenta la strutur de un frase como un arbor:
Cada composante parteni a un categoria sintatical. Per la parolas individua, la categorias xef, con esemplos, es:
Estas coresponde partal a la sinifias de la parolas: multe nomes refere a persones e cosas; multe verbos refere a atas; multe ajetivos refere a cualias. Ma vera los es sintatical: on categori un parola par considera la locas cual lo pote ocupa en la strutur de un frase.
La disionario indica la categoria de cada parola, incluinte los cual es derivada par ajunta un sufisa. La plu de la sufisas cambia la categoria. Plu, ajetivos e verbos es direta usable como nomes, e ajetivos como averbos, sin cualce ajunta, si on segue la regulas de sintatica.
La sintatica de elefen depende forte de la categorias de la parolas. On debe evita deveni malinflueda en esta relata par cualias strana de alga otra linguas.
Un esemplo: eseta en elefen es un verbo; ma comensores ci conose ja la lingua engles, do “except” es ance un preposada comun, tende malusa eseta como un preposada, en loca de dise esetante o con eseta de o simple estra.
Un otra: defeta en elefen es sola un nom; la verbo corespondente es vinse.
La categorias xef de sintagma es:
On clasi la composantes ance par sua roles o funsionas en la strutur.
Cada sintagma ave un composante xef, con la rol nucleo. Multe sintagmas ave ance un o plu satelites. Per esemplo, la nucleo de un sintagma nomin es un nom (o un pronom), e la satelites es la elementos cual descrive la nom, como determinantes, ajetivos, e sintagmas de preposada.
Simil, la nucleo de un sintagma verbin es un verbo, e la satelites es averbos e (denova) sintagmas de preposada. Cada frase normal conteni un sintagma verbin.
La du sintagmas nomin la plu importante ave la roles sujeto e ojeto. Estas es termas tecnical – los no refleta la usa comun de sujeto per un tema de discute o studia, o de ojeto per cualce cosa fisical tocable. Semantical, lo cual es la sujeto o ojeto de un verbo depende intera de la sinifia de la verbo elejeda – ma on pote dise laxe ce la sujeto es la person o cosa cual fa la ata de la verbo, e la ojeto es la person o cosa direta afetada par la ata.
En elefen, la sujeto (S) presede e la ojeto (O) segue sempre la verbo. La ordina es SVO:
En alga casos, per stilo o asentua, on desira forte ce la ojeto apare a la comensa de la frase. En esta casos, pone un virgula pos la ojeto, e ajunta un pronom referente a lo pos la verbo:
La plu verbos nesesa un sujeto, ma multe no nesesa un ojeto. Cada verbo es fundal o nontransitiva (sin ojeto) o transitiva, como indicada en la disionario, ma on pote ajunta un ojeto pos cualce verbo fundal nontransitiva e cambia tal la “dirije” de la sinifia – la ojeto coresponde alora a la sujeto de la verbo nontransitiva:
Elefen ave multe tal verbos. En alga linguas (per esemplo la romanicas), los es comun transitiva, e on dise “mea braso estende se tra la fenetra”. Ma en elefen, car estende es ja fundal nontransitiva, estende se sujesta ce la braso move autonom, sin la intende de la person a ci lo parteni.
Un otra composante comun de frases es la predicativa (P) o completinte. Esta es un descrive ajuntada de la sujeto, e lo pote segue verbos como es, deveni, pare, e resta:
Alga linguas permete ce ance la ojeto ave un predicativa, como en *“los ia eleje el presidente”. Esta spesie de predicativa no esiste en elefen: en loca, on usa un preposada per clari la rol de acel parte de la frase:
Un plu composante comun de frases es la sintagma de preposada (SP). Sua strutur es un preposada ante un sintagma nomin. Sintagmas de preposada apare a la fini de sintagmas nomin o verbin, ajuntante detalias a la nucleo presedente, o a la frase intera:
En un sintagma de preposada, on pote dise ce la nucleo es la preposada, e ce la sintagma nomin es la ojeto.
Cuando un frase conteni un sintagma nomin cual es no un sujeto, no un ojeto, no predicativa, e no vocativa (un refere direta a la person o persones a ci on parla, pe. sua nom), on nesesa normal ajunta un preposada per clari la rol:
Alga sintagmas de preposada pare comensa en un modo plu complicada:
En fato, los ave la strutur simple – un preposada ante un sintagma nomin – ma sua sintagma nomin mesma conteni un plu sintagma de preposada (de la note, a la mar, de la tempesta) como un sucomposante.
Alga preposadas ave usas costumal cual on debe segue. De es usada per formi nomes composada como cuxin de testa e vaso de cafe.
Esta ave ance un relata prosima a la transitivia de verbos. Per esemplo, on furni un cosa a un person; on no *“furni un person con un cosa” – lo cual es furnida es la cosa, no la person. On pote trova conselas sur la tal usa de preposadas con verbos en la disionario.
La esemplos a supra es simple, ma multe frases ave un strutur plu complicada, usante juntas per combina du strutures.
La conjuntas lia du composantes cual ave la mesma pesa en la strutur. Si la composantes es frases, on nomi los proposas coordinada:
Cuando la sujeto de la proposa du es la mesma como la sujeto de la proposa prima, on pote omete lo si on prefere:
On ave ance proposas suordinada, o suproposas, cual funsiona como satelites en un composante plu grande. Los es introduida par sujuntas diversa, e los parteni a tre categorias sintatical:
Un suproposa nomin ocupa un loca en la strutur cual ta pote es egal ocupada par un sintagma nomin (per esemplo, la parola lo):
Simil, suproposas ajetivin – nomida “suproposas relativa” en alga linguas – ocupa la locas de sintagmas ajetivin, e un suproposa averbin apare en loca de un sintagma averbin:
Un suproposa ajetivin usa un “pronom-sujunta” (tipal ci o cual) per refere a un nom presedente – un sintagma nomin en la proposa major. En la esemplo asi, ci refere a la can: la suproposa descrive la can.
En casos complicada, un suproposa ajetivin pote conteni un suproposa nomin, e la refere a la nom presedente apare no en la prima ma en la otra, pd. plu profonda en la strutur.
Esta no es permeteda en elefen: on rejeta la frase *“El no gusta ideas cual el senti ce es superstisio.”
La solve la plu fasil es ajunta sur ante ci o cual, e usa un pronom como el o lo o los en la suproposa nomin:
En suproposas, on omete nunca la sujeto, an si lo es la mesma como la sujeto de la proposa major: on dise el crede ce el ia perde, e no *“el crede ce ia perde”.
Ma elefen ave ance verbos infinitiva, cual ofre un modo plu corta de espresa alga cosa simil a un suproposa nomin:
An si en alga linguas on reconose un verbo infinitiva par sua forma spesial, la verbo en elefen ave sempre la mesma forma. Par causa de sua morfolojia, alga linguas pote usa infinitivas en strutures complicada cual es tipal tro nonclar en elefen. Per esemplo, *“lo es nesesada ajusta la macina” e *“nos ave alga ideas con cual labora” es frases confusante si la lejor no sabe tradui los en sua mente a un lingua cual usa la infinitiva en un tal manera. En elefen, on prefere dise:
La partisipios ativa (-nte) pote es usada en modo verbin en un tipo de composante cual es simil a un suproposa averbin. La sujeto de la partisipio es sempre la mesma como la sujeto de la frase conteninte:
On no pote misca esta usa con un suproposa averbin vera. Per esemplo, la frase seguente es noncoreta: *“En cuando esperimentante con polvo negra, el ia destrui sua casa.” Usa un de la seguentes en loca:
Alga linguas permete ance un strutur “asoluta”, en cual la partisipio ave un sujeto diferente. Esta no es posible en elefen. En loca de scrive *“Esente elefen un creol, on no ave multe morfolojia” o *“Caturada la site, Enea ia fuji”, on debe eleje un otra sintatica, per esemplo:
Alga preposadas de spasio, como a, en, tra, asta, ante e pos, ave ance sinifias tempal. Alora los pote introdui un suproposa cual comensa con la parola cuando:
En efeto, ante cuando es un sujunta.
Plu, on pote converti cualce preposada a un averbo par presede lo con a:
La table seguente mostra la sistem de ante e pos con traduis en engles, espaniol e esperanto. La otra preposadas segue la mesma model:
| elefen | categoria | engles | espaniol | esperanto |
|---|---|---|---|---|
| tempal | ||||
| ante | preposada | before + nom | antes de | antaŭ |
| pos | preposada | after + nom | después de | post |
| a ante | averbo | before(hand) | antes | antaŭe |
| a pos | averbo | after(wards) | después | poste |
| ante cuando | sujunta | before + frase | antes de que | antaŭ ol |
| pos cuando | sujunta | after + frase | después de que | post kiam |
| spasial | ||||
| ante | preposada | in front of | delante de | antaŭ |
| pos | preposada | behind | detrás de | malantaŭ |
| a ante | averbo | in front | delante | antaŭe |
| a pos | averbo | behind | detrás | malantaŭe |
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 12 otobre 2024 (16:16 UTC).