Pos ≠ pos cuando ≠ a pos

Pos es un preposada. Lo presede un nom (o alga cosa nomin):

• Los ave un jardin peti pos sua casa.
• Me va reveni pos un semana.

La “cosa nomin” pote es un verbo infinitiva:

• Ma va reposa pos pinti la sofito.

O lo pote es un frase minor, introduida par cuando:

• La auto ia malfunsiona pos cuando nos ia reveni de la lago.

No dise esta:

• La auto ia malfunsiona pos nos ia reveni de la lago.

Esta ta es confusante (a la min en scrive) car la lejor ta vide inisial pos nos como un unia e ta es alora surprendeda par ia reveni.

Pos es un preposada, no un averbo. Un preposada presede un nom; un averbo sta sola. Per converti pos a un averbo, dise a pos:

• Los ave un casa bela con un jardin peti a pos. (pos la casa)
• Probable me no va reveni a pos. (pos la ata pertinente)
• La motor ia fa un ruido strana. A pos, lo ia es silente. (pos la ruido)

A veses rara, a pos es ance un preposada, o, plu esata, un combina de du preposadas, indicante ce alga cosa move en dirije a la loca pos un otra cosa:

• Mea gato tende core a pos la sofa cuando un visitor apare.

En multe situas (incluinte la esemplo a supra, vera), core pos la sofa es sufisinte clar sin a.

Tota preposadas funsiona como pos, per esemplo ante:

• Los ave un jardin peti ante sua casa.
• Me va reposa ante pinti la mures.
• La auto ia malfunsiona ante cuando nos ia ariva a la lago.
• Los ave un casa bela con un jardin peti a ante.
• Me no ia visita esta museo a ante. (en la pasada)
• La motor ia es silente. A ante, lo ia es ruidosa.

E en:

• Los ave un cosina bela en sua casa.
• Me no va reposa en pinti la sala.
• La auto ia malfunsiona en cuando nos ia viaja sirca la lago.
• Los ave un casa peti con un cosina bela a en.
• Prende esta envelopa. Multe secretas es ascondeda a en.

Si tu es confusada par esta, cisa la table en la paje sur sintatica va lumina la sistem.