Per ≠ par

No dise per en loca de par!

A veses, parlores de espaniol e portuges encontra difisilia en distingui per e par, car la usa de la parolas corespondente en acel linguas (“por” e “para”) es multe idiomal.

En elefen, per e par regarda en dirijes oposada. Per pertine a intendes e efetos desirada; par pertine a causas e metodos usada:

Me usa un martel per sutrae la jelo de mea jelador.
- Me usa lo per esta razona (= con esta intende).
Me sutrae la jelo par usa (o simple par) un martel.
- Me sutrae lo par esta metodo (= con esta metodo de causa la sutrae).

Cisa un parte de la confusa aveni car on tende grupi intendes e causas en la conseta jeneral de razonas. An tal, la parola razona refere vera a ativia mental, a pensas, intendes, desides, etc.

Per esta razona e par esta causa es espresas fisada:

Me ia rompe la fenetra per esta razona.
- (Me ia intende rompe lo.)
La fenetra ia rompe par esta causa.
- (La rompe ia aveni, con o sin intende, ma serta con un causa.)

Nota la seguentes con per:

Me ia paia tre euros per esta cafe.
- (Car me ia intende ave lo e bevi lo.)
Me ia vade a la campania per un semana.
- (Car me ia intende pasa un semana ala.)
Me ia vesti me per un intervisa.
- (Car me ia intende vade a la intervisa e fa un bon impresa.)
Me va vade a la botecas per tu.
- (Car me intende aida tu.)
Per esemplo, la sofito gotea, la sofa apesta e la jelador es plen de jelo.
- (Me lista estas car me intende dona esemplos de mea problemes.)

E la seguentes con par:

Me es stonada par tua confesa.
- (Tua confesa es la causa de mea stona.)
Me es umilida par confesa.
- (Me ia confesa, e esta es la causa de mea umili.)
La prinse peti es un raconta par Saint-Exupéry.
- (El ia es la causa, la autor, de la raconta.)

Par es ance multe usada con verbos pasiva (es -da), per presenta la person o cosa cual ta es la faor de la ata si la verbo ta es ativa:

La prinse peti ia es lejeda par miliones de enfantes.
- (Miliones de enfantes ia leje lo.)
La castel es ensircada par un foso.
- (Un foso ensirca la castel.)

La conseta de faor no es esata la mesma como la conseta de causa. An tal, la faor es multe plu simil a la causa par cual la ata aveni ca a la efeto per cual lo es fada.