Fa

Multe linguas ave un verbo simil a fa (faire, hacer, machen, etc) cual pote ave o un ata o un cosa per sua ojeto. Cuando la ojeto es un cosa, la sinifia es ce on crea o prepara lo.

En elefen, nos prefere usa verbos plu spesifante ca fa cuando la ojeto es un cosa, e nos reserva fa per la idea jeneral de esecuta un ata:

• El fa tro multe eras per es fidable.
  • (El era tro multe.)
• Los ia fa un canta longa e triste.
  • (Los ia canta.)
• Me va fa un pasea rapida sirca la vila per recaldi me.
  • (Me va pasea.)
• Esce tu no ia fa un duxi a esta matina?
  • (Tu no ia duxi tu?)
• Me ia fa un sonia tan strana!
  • (Me ia sonia.)

Nota ce on fa duxis, sonias, paseas, etc; on no ave los, e serta on no prende los. (A do?)

Compara:

• Caramel es composada de bur e zucar.
• Vide, me ia crea un barco peti de la casca de un ovo.
• La cabana de utiles es fabricada de brices.
• Me ia es an tro fatigada per ordina la leto.
• El ia vade a la cosina per prepara la cafe.

On ave ance la espresa importante fa ce, un modo consisa per dise ce un ata causa un otra ata o cambia de state:

• La detrito ia fa ce me tropeza.
  • (Me ia tropeza en pasea tra la detrito.)
• Esta libro va fa ce tu cambia tua stilo de vive.
  • (Tu va cambia tua vive par causa de leje la libro.)

On dise ance causa ce, ma lo es plu pesosa e pote torpi la stilo si lo pare tro comun.