Entra ≠ entra a

No dise entra la sala per entra a la sala!
No dise sorti la sala per sorti de la sala!

Entra e sorti es fundal verbos nontransitiva, sinifiante “vade a la interna” e “vade a la esterna”.

Como tota verbos nontransitiva en elefen, si on usa los con un ojeto direta, la dirije de la sinifia es reversada: la ojeto transitiva es lo cual ta es la sujeto nontransitiva.

Donce entra la sala ave un sinifia bizara: causa ce la sala entra (a alga otra loca). La espresa coreta es entra a la sala.
La situa es simil per sorti la sala, cual sinifia causa ce la sala sorti – de sua construida?! La bon espresa es sorti de la sala.

An tal, on pote usa entra e sorti con un ojeto direta en casos do la sinifia conveni:

Mea bileta no ia entra me a la metro.
- (Lo no ia permete ce me entra a la metro.)
La jenitores vole entra sua enfantes a la scola la plu bon.
- (Los vole enscrive los per studia a acel scola.)
Me debe entra multe nomes a la computador.
- (Me debe tape los o scane los per ave los en la computador.)
La pompores ia sorti tota la empleadas de la construida.
- (Los ia evacua la empleadas.)
Mea bileta enfernin ance no ia sorti me de la metro.
- (Lo no ia permete ce me sorti.)