Ce ≠ cual

Ambos esta paroletas introdui un frase minor, ma sua sinifias no es la mesma. Cual es multe simil a ci (ci = cual per persones), ma multe diferente de ce.

• Con cual (e ci), la frase minor condui como un ajetivo, descrivente la nom presedente en la frase major. Cual representa acel nom en la frase minor.
• Con ce, la frase minor condui como un nom, espresante la contenida de un fato, crede, desira o simil pos un verbo como dise, vole, opina, descovre, etc.

Aprende:

• Me vide ce la can come.
• La can come la jornal cual reposa sur la sofa.
• La can come la jornal cual me ia vole leje.

Compara:

• Me crede la informa ce la can ia come.
  • (Algun ia dise a me: “La can ia come.” Me crede la dise.)
• Me crede la informa cual la can ia come.
  • (Me crede un informa, ma la can ia come lo. Cisa la informa ia es scriveda sur un paper.)

Pos un preposada

Ambos paroletas pote es presededa par un preposada. Alora, con ce, la intera de la frase minor es la ojeto de la preposada, ma con cual, la ojeto es mera la parola cual, denova representante la nom cual presede lo:

• Me va traversa la ponte sin ce lo va rompe.
  • (En traversa la ponte, me no va rompe lo.)
• Me va traversa la ponte sin cual me no va sorti de la foresta.
  • (Si me no va traversa la ponte, me no va sorti.)

Ma on tende cambia ce a cuando si on refere a un tempo:

• Me ia trova la caxa en cuando [o, plu rara, en ce] me ia asconde la clave.
  • (Me ia asconde la clave. A la mesma tempo, me ia trova la caxa.)
• Me ia trova la caxa en cual me ia asconde la clave.
  • (La clave ia es ascondeda en un caxa. Me ia trova acel caxa.)