Un joven ia cortea sua xica de cor en un restorante. La servor ia demanda repetente cual cosa los vole come, ma los no ia comanda cualce cosa.
Cuando la servor ia prosimi denova a la du, el ia escuta la joven xuxante a sua ami: “Me ama tu tan multe ce me desira come tu asi!”
Iritada ma sempre cortes, la servor ia dise: “Cuando tu ia fini come tua ami, esce tu va desira un deser?”
Jon: Papa, me vole sposi Susan, nosa visina.
Padre: Nunca! Car me ia fa un relata de ama con sua madre. El es tua sore!
Jon: Donce me ta sposi Mary, nosa otra visina.
Padre: A no modo! Ance me ia fa un relata de ama con sua madre. Regretable, el es ance tua sore!
Jon ia vade a sua madre, e dise triste: “Papa ia refusa mea sposi con Mary o Susan car los es mea sores.”
Madre: Es felis! Tu pote sposi cualcun de los. Car en fato, papa no es tua padre!
Me ia come ier con Stefan, e el ia dise ce sua cor es rompeda par la nonfida de sua sposa. Me ia comenta ce sua apetito no pare diminuida. El ia clari ce sua stomaco no es rompeda.
Si on lasa un peso de fero estra casa, lo osidi. Si on lasa un peso de oro estra casa, on fura lo.
Un om es morinte, e sua sposa sta plorante a sua leto. La om dise: “Afin me mori felis, promete ce tu no va sposi Marco pos mea mori.” El responde: “Tu pote mori felis, car me ia promete ja me a Federico.”
Un om e sua sposa ia regarda un program televisada sur “emosias miscada”: la posiblia de senti felis e triste a la mesma ves.
La om dise: “Esta es riable! Me aposta ce tu no pote dise alga cosa ce fa me senti e felis e triste.”
Sua sposa dise: “De tota tu amis, tu ave la penis la plu longa.”
Cisa esta es la broma la plu mal en la mundo:
Demanda: Como Papa Natal difere de un bote de gaxa de favas?
Responde: Ambos no ave un barba, con eseta de Papa Natal.
Un om vade a sua dotor. El ave un carota en un orea, seleri en la otra, e spageti pende de sua nas. La dotor sujesta ce el debe come plu bon.
Ali es videda con du sigaretas en sua boca. Sua ami demanda perce. Ali dise: “Me fumi un sigareta per me mesma e la otra per mea frate ci es aora en la prison.”
Pos alga dias, cuando la ami vide Ali con sola un sigareta en boca, el dise: “Felisis a tu! Un sigareta ta sinifia ce tua frate es libre de la prison.”
Triste, Ali dise: “No, ma me ia abandona la fumi.”
Demanda: Perce la dias en estate es plu longa ca la dias en inverno?
Responde: Car cosas diminui en la fria.
Un om con sua sposa visita un dotor, e dise: “Nos vole un remedia contraconsepinte cual es susedosa a 100%.”
Dotor: Un tal no esiste, car cadun ta fali a alga veses. Ma veni pos tre dias, cuando me ia gugli e consulta mea amis.
Pos tre dias los reveni a la clinica, e demanda sur la contraconsepinte:
Dotor: Me ia trova lo. Cadun de vos ta come un poma.
Sposo: Ante o pos la copula?
Dotor: Vos debe come lo en loca!
Un om es sin labora e povre, ma ama tro fa la seso con sua sposa. A un dia, el pasea en la strada e vide un boteca de aparatos eletrical. El dise a la vendor: “Me prea a tu, me no ave mone ma ave un potia sesal grande. Si me pote ecuilibra esta radio peti sur mea penis erijeda, tu pote dona la radio sin custa?”
La vendor dise riente: “Ha ha! Lo es nonposible. Oce! Prende lo si tu susede.” El erije sua penis e porta bon la radio sur lo. La vendor dona a el la radio. En casa, sua sposa povre es felis.
Ma pos tre menses, el sesa la copula con sua sposa. Sua fem demanda: “Perce?”
El informa el como el ia gania la radio, e como el deside aora: “Me ia reserva mea potia per gania un friador grande par ecuilibra sur mea penis!”
Un psiciatriste esamina tre foles, Ali, Oli e Ili, per vide ci ia deveni mental sana. Ali e Oli fa rituos relijiosa, criante a vose alta. Ma Ili senta bon e reposante.
La dotor demanda a Ali: “Cual es tua nom”?
Ali: “Me es la profeto santa Cristo!”
La dotor demanda a Oli: “Cual es tu labora?”
El dise: “Me es la profeto santa Moxe!”
La dotor nota ce la fol tre, Ili, pare cuieta. La dotor pensa felis a se: “A! Me judi ce Ili es intera normal.” El demanda a Ili: “Felisis, tua pensa es multe plu bon ca tua du amis!”
Ili: “Natural, grasias a tu, mea dotor cara! Ma crede me, nunca me ia envia los per la poplas como profetos! Ambos es mentores finjente, e me va condena los a enferno eterna!”
La dotor pensa: “O no no! Ili considera ce el es como Dio!”
Un psiciatriste vade en sua ospital. Ala el vide sua visina Ali entre la foles. Con surprende, el dise: “Mea ami Ali! Tu! Asi!”
Ali dise triste: “Si. Ier, nos ia parla en familia sur vestes e sapatos. Me ia dise ce me ta prefere la sapato ca la bota. Per esta, mea familia intera ia cria “tu es fol” e ia entra me a esta ospital!”
Dotor: Ma tua dise es vera lojical! Me mesma prefere la sapato ca la bota.
Ali: Ma esce tu prefere la sapato fritada o bolida?
Un psiciatriste ia es paseante tra sua ospital. El ia vide un pasiente urini de un balcon supra la jardin. Oli, un otra pasiente, ia cria: “Fol! Para esta ata demente aora!”
La dotor ia dise a Oli: “Multe bon! Lo pare ce tu deveni plu sana! Esce tu pote dise a me perce tua ami no debe urini de la balcon?
Oli responde: “Si. Algun pote tira el a tera par sua flue de urina!”
Mestre: Ci es la profeta ci ia pote parla a animales?
Studiante nonsabente: Nosa Santa Profeta Tarzan!
Un jornaliste ia scrive un reporta sur la roles de femes en Kabul a alga anios ante la gera ala. El ia nota ce femes, par costum, ia pasea a sinco pasos pos sua sposos. Plu resente, el ia reveni a Kabul e ia nota ce la femes ancora pasea pos sua sposos. Lo ia pare ce, an si la rena opresante de la taliban ia es destruida en Kabul, la costum antica ia continua.
La jornaliste ia vade a un de la femes afgani e ia demanda: “Perce vos continua esta costum antica cual vos ia vole cambia tan desperante en anios pasada?”
La fem afgani ia regarda la jornaliste direta en la oios e ia dise, sin esita: “Bombetas.”
(La leson de esta narada: pos alga om grande es un fem intelijente.)
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 9 janero 2022 (11:54 UTC).