con respondes par C. George Boeree
orijinal scriveda en engles sirca la anio 2000
Lingua franca ia es un pijin o lingua de comersia cual ia flori en la Mediteraneo de cisa tan temprana como la sentenio des-cuatro asta cisa tan tarda como la sentenio des-nove. Lo ia es un misca de italian, provensal (o ositan, la lingua de Frans sude) e catalan (la lingua de la costa este de Espania). Lo ia ave ance tinjes de espaniol, portuges, corvatsce, elinica, turces e arabi.
Sua gramatica ia es estrema reduida. On ia ave no jeneros, no sufisa plural, no sufisas personal per verbos, no forma posesal o ojetal separada per pronomes… La sola sufisa gramatical cual ia survive ia es -to per la tempo pasada! Nos pote vide gramaticas simil en pijines e creoles moderna, como pisin en Melanesia e la creol franses de Aiti.
Per aprende plu, vade a la Gloseria de Lingua Franca par Alan Corré.
Fundal, lo ia pertine a inspira. Me ia comensa la prosede de crea lingua franca nova en 1965. A acel tempo, me ia pote asede no informa sur lingua franca estra alga linias par Molière. La lingua franca orijinal ia es plu analisal (pd. plu simil a otra creoles e pijines, o como xines) ca elefen, ma a grado mera peti. Lo ia es desiniada per comunicas rapida e fasil entre marores e mercatores, no per la intende plu larga de furni un util de comunica internasional per la sentenio dudes-un!
Car me ia eleje un colie simil de linguas, e car me ia es ance interesada par developa un gramatica simple e coerente, elefen e lingua franca ave comun coavenis, spesial de vocabulo. Ma esta no ia es intendeda.
Un creol es un lingua cual ia comensa como un atenta de comunica entre du grupos de persones, e con tempo ia deveni sua propre lingua. La studia de linguas creol tra la mundo ia mostra ce los ave similes notable de gramatica, cisa refletante la universales en tota linguas. La plu parolas en creoles, per esemplo, es nonvariante, e la gramatica tende es indicada par paroletas simple e la ordina de parolas.
On debe comprende ce linguas creol no es varias bebe de linguas major. Kreyòl en Aiti, papiamentu en Aruba o pisin en Papua Gine Nova es linguas plen plumida, capas de espresa cualce cosa cual pote es espresada en franses, espaniol o engles.
Elefen es fundida en franses, italian, portuges, espaniol e catalan. Otra linguas romanica ia es considerada ma ometeda per razonas variosa, tipal par causa de la poplas limitada de parlores e, en caso de romanian, la influe forte de visinas nonromanica. Catalan ia es incluida per sua sentralia, e fisical e lingual.
Onesta, me no ia senti ce los es nesesada: la plu de la vocabulo internasional de engles veni de franses o latina, e la vocabulo de la linguas romanica mesma es derivada de latina.
Latina e elinica, natural, ia furni parolas siensal noncontable a nos. Elefen usa la derivas romanica de parolas latina, con varias fonetical de termas e afisas tecnical de elinica, en un modo multe simil a italian o espaniol.
No, en fato. Me ia usa no otra lingua construida per gida o la gramatica o la vocabulo. Si multe de la otra linguas ave un colie simil de linguas de fonte e la gol de gramatica simple e coerente, natural on va ave cualias simil.
Ma esta ia es vera un emprende separada – un comensa nova.
Per favore, comprende ce me amira tota la atentas indicada, e me espera ce a alga dia nos va adota un de los – la eleje es cuasi nonimportante! Entre la linguas indicada, me pensa ce la mea es la plu seria en relata a spele fonetical, a cual me crede multe forte. Lo es ance multe plu coerente ca interlingua, ma plu “natural” ca esperanto. En ajunta, lo es la sola cual ia es desiniada con considera spesial de estetica!
Ultima, no. A alga dia (cisa), enfantes va aprende la lingua internasional en la scola prima, a lado de sua propre, e va dona no pensa a la naturalia o manca de esta en lo. Ma longo la via, lo fa un efeto notable: multe miliones de adultes va nesesa e desira aprende la lingua, e va resiste lo cual pare artifis a lo. Par fundi elefen en la linguas romanica, me atrae un cuantia multe grande de persones ci o parla acel linguas o conose los – incluinte la plu europeanes, americanes norde e sude, australianes, e multe persones en Africa e Asia.
Car par ajunta parolas e otra cosas de multe otra linguas nonrelatada, me ta ajunta poca a la aprendablia de elefen per la popla de Xina, etc, ma me ta redui multe la aprendablia per los ci conose la linguas romanica.
Ta ce me fa un punto peti political: la Uni European es la organiza la plu probable cual va xerca e adota un lingua construida, e la Uni European es lo cual ave la potia economial e cultural per fa ce lo es tan atraosa ce otras tra la mundo intera va aprende lo!
A un grado notable, si.
Ma engles ave du problemes cual impedi lo. Prima, lo ave un de la sistemes de spele la plu mal de cualce lingua cual usa un alfabeta ueste. Estra si lo ta altera radisal sua sistem de spele – no un aveni probable – lo va continua confonde los ci aprende lo como un lingua du, sin oblida sua propre parlores de nase!
Du, engles representa aora un tradision cultural spesifada. An si on ave multe diferes entre persones brites, esuan, canadian, australian, sudafrican, zelandes, etc, los ave multe cultur comun, incluinte sosia industrial, comersialisme, orienta a mercato libre, individualisme, medias publica dominante, e istorias colonial regretable. No tota esta cosas es sempre mal (e es imitada, en fato), ma no tota persones trova ce los es atraosa, spesial en paises do on senti ce sua tradisiones cultural lisca a via su la bombarda de la lingua engles en filmas, radio, televisa, musica, produidas, e aora la interede.
En regarda un serie de parolas con un radis latina comun, me ia adota usual un varia conservante – pd. un cual ia reteni tan multe de la radis latina como mea prinsipes fonetical ia permete. Per esta razona, per esemplo, consonantes segueda par -l (como retenida par franses e catalan) ia es plu probable ca la simplis diversa cual on trova en italian, espaniol e portuges. Simil, vocales simple ia es plu probable ca la semivocales variosa (uo-, ia-, etc).
A la otra lado, fonetica la comanda ce, an si alga grupos consonante inisial ia es retenida per sua valua de reconose internasional, silabas ia pote fini sola con un vocal, un fricante sin vose (-f, -s, -x), un nasal (-m, -n), o con -l o -r. Esta ia produi plu consonantes final e grupos medial complicada ca on permete en italian, ma min ca en franses, portuges o espaniol. An si, jeneral, elefen remente plu a espaniol, lo reseta a veses un sabor italian par evita grupos medial como -ct o -pt, o par no permete -c, -p o -t final.
On ave, natural, no jenero en elefen, donce un demanda ia es esce me ta prende formas masin o femin de ajetivos e otra alterantes. Jeneral, me ia usa formas femin de ajetivos, estra do la parola pote fini con un consonante.
A es la plu sentral de la vocales elefen (car on ave no xva – la vocal de the en engles o le en franses), donce lo ia pare conveninte per la codas nonasentuada de ajetivos, como ance la article de defini, etc. La vocales final de verbos ia es simple la singulares la plu comun de la person tre de la tempo presente: -a, -e o -i.
Un parte de la prosede de eleje ia es la disposa de prefere parolas corta ca la longas, parolas fasil pronunsiable ca la difisiles, parolas internasional reconosable ca la noncomunes. La evita de omonimes ia es ance un considera. De ves a ves, estetica simple ia fa la eleje entre un forma e un otra. Me regarda lo como un obra minor de arte. Ma, diferente de La Gioconda, lo no importa si otras cambia lo o ajunta a lo per sasia sua nesesas. Regarda lo como como un crea continuante!
La prende de nomes de ajetivos sin cambia es comun: la ajetivo bela deveni la belas (los cual es bela) en multe linguas. En engles, la ajetivo tal usada como un nom ave comun un sinifa astrata – como en good e the Good. En elefen, the Good es la bonia, usante la sufisa -ia cual crea nomes consetal de tota ajetivos e nomes.
La prende de nomes de verbos sin cambia es ance alga comun: la verbo dansa deveni la dansas (avenis en cual on dansa). Ma estra un colie limitada de esta esemplos, on ave multe plu cual usa sufisas como -ion e -tion (e otras!) en la plu linguas romanica, como ance en engles.
Per simpli la situa, me ia usa la metodo de dansa per tota nomes derivada de verbos per refere a un sinifia concretida de la verbo (un ata individua, la resultas direta de la ata, o la prosede de un ata). En engles, esta es comun espresada par usa -ing (the dancing was wonderful “la dansa ia es merveliosa”). En elefen, la sufisa corespondente, -nte, es sola usada per cambia verbos a ajetivos (e de ala a nomes, como con bela!).
Prejudi de jenero es un problem real en esta mundo, e me crede ce cisa la evita de pronomes de jenero va aida pico. Tal, cuando nos parla sur lo cual “persones” fa, nos no dise sutil a xicas e femes ce “persones” no inclui los.
La sola difisil cual me pote previde es cuando un situa complicada apare e nos discute un xica e un xico e ance alga otra cosas. Prima, nos pote refere a la xica como la xica e la xico como la xico en loca de usa pronomes. E nos pote usa esta (la cosa asi), esa “esta/acel” e acel (la cosa ala) per refere a ojetos variosa – spesial esa, cual me ia reteni spesial per usa como un alternativa per refere a cosas.
[Nota: nos ia dejeta esa, ma ia senti sua manca. Plu tarda, nos ia ajunta lo como la pronom per cosas.]
Nos debe confesa ce elefen ancora no ave la popularia de un esperanto o un interlingua, o an un ido, un novial o un glosa! Ma nos comensa deveni malfamosa, e nos ia tradui alga testos, como la raconta par Hemingway Colinas como elefantes blanca, la scriveda santa budiste Metta Sutta, un parte de la Evanjelio de San Joan, e un pico de otra pesetas. Nos es mera a la comensa!
[Nota: pos la scrive orijinal de esta paje sirca la anio 2000, elefen ia cumula multe plu traduis e obras de leteratur orijinal.]
Ma “nun” no es intera vera. Nos ave un comunia de parlores en Facebook e Telegram, e un vici vivosa de persones ci contribui bonis a la leteratur e la pajes de consulta.
En ajunta a acel, tu va trova no entra plu simple a la mundo de linguas fundida en latina. E en plu ajunta, aprende elefen es divertinte – vera! Proba esta curso corta.
Cuando me ia introdui prima elefen a la interede (su la nom LFN), lo ia atrae un bon cuantia de atende. Bjorn Madsen ia developa un grupo Yahoo! per lo (cual esiste ancora, an si lo es notable plu cuieta aora!) e multe persones ia fa sujestas per boni elefen. Par causa de la multe sujestas, nos ia comensa un grupo du (con la nom “europijin”) per persones interesada a continua bonis en dirije a pijines e creoles.
Con la pasa de tempo, Bjorn e me e otras de la du grupos ia acorda ce en fato alga de esta sujestas ta boni elefen, e ultima nos ia adota los. La plu notables es:
Nos ia fa ance ajustas minor en la vocabulo. A la otra lado, nosa atentas de opera sin un sufisa plural (usante la determinantes li e di en loca) ia pare torpe, donce la -s plural resta como la vestijio vera final de afisa gramatical en elefen.
Nosa reali major ia es la developa de traduis de la Introdui per espaniol, portuges, franses, italian, deutx, nederlandes e dansce, e la disionarios bidirijal de 1700 parolas per cada de acel linguas. Ultima, los ia es combinada en un disionario de nove linguas. Entretempo, la disionario formal (elefen-engles) ia crese a sua longia presente. Mea grasias a cadun ci ia partisipa!
La labora la plu resente veni de Stefan Fisahn, ci ia developa un vici do usores de elefen pote contribui traduis, scrivedas orijinal, etc. El ia es ance multe aidosa en developa plu la curso elefen “Presenta LFN!”. La plu resente, el ia developa un prototipo de disionario xercable.
On ave ancora multe labora per fa. Serta, lo ta es bela si nos ta pote reensende un interesa per conversa vera (e ance tradui) en elefen mesma en la grupo Yahoo! Nos ave, natural, un cuantia de parlores multe min grande ca esperanto e interlingua, ma nos ia fa alga efeto en la interede como la “euroclone” la plu creolin de mundo. Nos previde felis fa multe plu!
En aprosima la anio pasada, Simon Davies ia crea un disionario nova elefen-engles cual es merveliosa per usa e bela per regarda. Simon e alga otra membros ia ajunta sentos de parolas e espresas a la disionario, e a esta punto lo ave cuasi 10 000 mil entradas elefen (e a la min la cuantia duple en relata a parolas engles).
Nos ia prosede ance per refina la gramatica de la lingua, no cambiante lo a la radises, ma esaminante la problemes peti cual nos pote repara per fa ce elefen es plu coerente, plu fasil per usa o plu lojical. La sola cambia major, pos discutes sin fini, ia es la introdui de car e afin, car la usa de per ce per ambos de estas e ance per la demanda perce? ia es evidente confusante!
Interatas estra la disionario ia manca triste, ma mesajes de ves a ves de membros vea e nova manteni nosa espera.
La aveni la plu importante de la anio pasada es ce nos ia reseta la reconose ofisial (e la corti multe importante de ISO-639 – “lfn”, natural!) de SIL. [Nota: Triste, an tal, Vicipedia ia rejeta nosa aspira per nosa propre varia de Vicipedia, an pos dise orijinal ce la reconose de SIL es la sola cosa nesesada. A pos, on ia vide un atenta alga forte per sutrae an la articles sur linguas construida otra ca la plu famosas. Ma nos ia persiste!]
Alga anios ia pasa pos mea comentas la plu resente sur la progresa de nosa projeta elefen. Asi es la novas per 2013:
Denova, Simon ia fa un labora eselente de inova pertinente a la disionario, e lo comensa inclui cosas como definis e traduis otra ca engles.
On ave alga traduis nova de naras (par Simon, Sunido e Krzysztof), e un cuantia peti de articles nova de vici. E Guido ia continua ajunta sua “pensas per la dia”, frecuente divertinte. Nonfortunosa, on no ave tan multe ativia como a un ves pasada.
Multe ajuntas ia es fada a la disionario, cuasi intera de parolas derivada e no de radises nova, e esta es, natural, un bon situa. Nos trova ce nos pote espresa la plu cosas en modo multe bon con la vocabulo cual nos ave.
Alga cambias relativa peti ia aveni a la gramatica:
En vista longa, lo es interesante cuando on regarda como alga cosas ia evolui.
Elefen ia deveni pico min “creolin” con la pasa de tempo. Per esemplo, la afisas ia deveni multe plu jeneral ca orijinal intendeda. Orijinal, -or ia es per laborores, ma es aora usada per cuasi cualce person atante, en loca de -nte; -eria ia estende multe ultra sua usa orijinal como un loca de comersia, como un boteca; e -ador es no plu sola per utiles. En reversa, la usa de preposadas con definis larga ia diminui. Me suspeta ce esta tendes es la efeto de nosa linguas natural e, probable, la usa estendosa de afisas en esperanto, cual es un lingua du per la plu de nosa ecipo.
Nos ia vide un bon cuantia de traduis nova en la vici. An plu importante, nos ave un colie grande de poesia orijinal par Guido Crufio. La aveni la plu stimulante de la anio pasada ia es la publici de la libro tota prima en elefen: la tradui par Simon Davies de La aventuras de Alisia en la pais de mervelias par Lewis Carroll.
Me mesma fa un rol sempre min grande en elefen, par causa de problemes de consentra e memoria. C’est la vie. Me ave vera no idea como on ta fa ce elefen deveni plu popular o an persepable en la mundo “real”. Me luta an per manteni la informa disponable sur elefen en Vicipedia, entre tormentas repeteda par burocratas. Me espera ce algun con un capasia “political” plu bon ca mea va presenta se a alga punto. Nos va vide.
Lo pare ce nos va ave no plu cambias gramatical, cambias de spele o pronunsia, o cambias en la usa de afisas. Tota funsiona multe bon, tan bon como cualce lingua natural o artifis pote. Nos continua ajunta parolas a la disionario, e espera ajunta ance plu definis e otra linguas a lo. On ia crea alga plu articles e traduis en la anio pasada, ma la ativia ia lenti. Me mesma desira foca xef a la disionario.
Un cosa nova es la crea de un domina nova e paje xef per elefen – elefen.org. Lo conteni alga introduis e documentos fundal de aprende, e nos va ajunta a lo con la pasa de tempo. La pajeria vea es ance liada a la loca nova. Nos espera ce la paje nova va atrae alga atende.
Final, como la nom de domina mostra, nos ia deside usa la nom alternativa “elefen” per la lingua. Multe seguores ia opina ce “Lingua Franca Nova” es torpe e ce “LFN” es blanda. Donce “elefen” ia nase, e si lo remente on a elefantes (bestias merveliosa e intelijente) o a alga cosa de La senior de la anelos, alora an plu bon!
La lingua es ancora vivente! Nos ia continua ajunta parolas a la disionario, e ia defini tota radises e multe otra parolas. E aora la disionario ave multe imajes! Lo es multe bela!
Con multe, multe esita, me ia acorda con la plu de elefenistes cual partisipa en la discutes: Nos ave aora un colie de determinantes de posese cual difere de la pronomes personal relatada:
Estas permete ce nos evita alga problemes peti cual ia irita nos tra multe anios. Multe grasias a tota ci ia aida me en esta deside!
Alga plu corentis importante:
La Vicipedia elefen ia es final aprobada en la tarda de 2017 pos un anio de incuba, e ia deveni publica en 2018. Multe grasias a Vicente Costalago per sua laboras en promove esta gol!
En 2017, Simon Davies ia pasa multe de sua tempo libre en prepara la disionario elefen per publici en forma de libro, par Evertype en 2018. La resulta, Disionario de Lingua Franca Nova: Elefen-Engles, Engles-Elefen, pote es comprada de Amazon en la SUA e Britan.
La vici de elefen ia move de sua ospita presedente en Wikia/Fandom a un casa nova en la servador de elefen en 2019.
Un xercador tota nova de disionario ia es revelada en 2020. Multe plu rapida e fasil per usa ca la vea, on ia dona a lo la nometa “Xercan” par causa de sua rapidia tigrin!
Multe tristinte, George Boeree ia mori en janero. La comunia ia eleje 21 marto como un dia de elefen anial.
En la dui prima de esta anio, nos ia fa du ajustas peti a la lingua:
Nos ia desofisiali la usa de la alfabeta cirilica per scrive elefen. La coesiste de du alfabetas en un lingua aidante no ia pare final multe aidante.
E nos ia permete un spele alternativa per alga parolas de orijina nonromanica cual es internasional plu bon conoseda con y e w: en loca de ioga, on pote aora scrive yoga, e simil per iin-iang/yin-yang, ueb/web, sueter/sweter, e sirca sento otras.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 setembre 2024 (12:35 UTC).