@@ 8 junio 2025 (12:29 UTC)
@G aora
@O Aora Oji
@T Discutes va aveni entre la oposores en Sudan Sude
@L aora_oji/2013/discutes_va_aveni_entre_la_oposores_en_sudan_sude
@A Simon Davies
@D 2013
====== Discutes va aveni entre la oposores en Sudan Sude ======
31 desembre 2013
La governa de Sudan Sude va comensa discutes con rebelores en Itiopia, esperante ateni un acorda sur la sesa de gera.
La discutes es la primas de pos du semanas ante aora, cuando batalias ia esplode entre la fortes fidosa de presidente Salva Kiir e los de Riek Machar, sua suordinada desempleada.
A la min 1000 persones ia mori, e on crede ce plu ca 121 600 ia fuji de sua casas.
A lundi, la presidente de Uganda, Yoweri Museveni, ia menasa la rebelores con atas militar si, ante la fini de martedi, los no acorda un sesaspara e comensa discutes.
@T Frans anunsia un redui grande de soldatos en Mali
@L aora_oji/2013/frans_anunsia_un_redui_grande_de_soldatos_en_mali
====== Frans anunsia un redui grande de soldatos en Mali ======
31 desembre 2013
Jean-Yves Le Drian ia dise ce, tra la tre menses veninte, Frans va redui sua cuantia de soldatos en Mali par 60%.
Frans ia interveni militar en janero per estrae gerores islamiste ci ia ocupa la norde de la pais. A la punto la plu sever de la crise, Frans ia ave sirca 4500 soldatos en sua colonia pasada.
Mil soldatos va resta en Mali per aida a batalia la grupos relatada a al-Qaidah ci ataca ancora la deserto vasta norde.
@T La state de Michael Schumacher boni pico
@L aora_oji/2013/la_state_de_michael_schumacher_boni_pico
====== La state de Michael Schumacher boni pico ======
31 desembre 2013
Sirurjistes ia opera sur Michael Schumacher per lejeri la presa a sua serebro. Sua state ia boni pico como resulta.
Un scane en la note ia indica ce el es "plu bon ca oji", an si el es ancora "no estra peril".
La xampion pasada de corsa de autos ia sufri feris de testa a soldi en un asidente de sci en la Alpes franses. El es aora en un coma medical induida en un ospital en Grenoble.
@T On destesti enfantes en la Republica de Africa Sentral
@L aora_oji/2013/on_destesti_enfantes_en_la_republica_de_africa_sentral
====== On destesti enfantes en la Republica de Africa Sentral ======
31 desembre 2013
La Nasiones Unida ia dise ce on ia destesti a la min du enfantes en Bangui, la capital de la Republica de Africa Sentral. Ala, la violentia ia ateni un "punto basa nova de cruelia".
Sirca 16 enfantes es matada en Bangui de pos 5 desembre, e on enscrive un cuantia cresente de los a grupos armada.
Per la plu, la violentia aveni entre fortes militar cristian e muslim. Ante marto, la Republica ia es governada par presidente François Bozizé de la majoria cristian de la popla.
En marto, la potia ia es saisida par Michel Djotodia, un gidor pasada de rebelores muslim. Bozizé ia es obligada a fuji como un escluida.
La NU ia dise ce enfantes es direta atacada par venjores.
@T On prosede un dotor xines per contrabanda de bebetas
@L aora_oji/2013/on_prosede_un_dotor_xines_per_contrabanda_de_bebetas
====== On prosede un dotor xines per contrabanda de bebetas ======
31 desembre 2013
On prosede Zhang Shuxia, un ostetriciste xines, ci ia fura sete bebetas per vende los a contrabandores de enfantes.
Pos informa la jenitores ce sua enfantes es malada, seniora Zhang ia convinse los a sede la bebes.
El ia confesa en un corte en Fuping, en la provinse Shaanxi.
La caso ia comensa cuando du jenitores ia vade a la polisia, suspetante ce Zhang ia saisi sua bebeta.
Zhang ia vende sete bebes a contrabandores entre novembre 2011 e julio 2013, incluinte un duple de jemelos. On ia salva ses de los, ma un bebeta fema ia mori.
@T On vide la vagador xines a la surfas de la luna
@L aora_oji/2013/on_vide_la_vagador_xines_a_la_surfas_de_la_luna
====== On vide la vagador xines a la surfas de la luna ======
31 desembre 2013
Un satelite american ia imaji Yutu, la vagador xines, a la surfas de la luna.
La veculo, cual ave 150 sentimetres de largia, apare como un pixel en la pitures de la Orbitador de Oserva Lunal de NASA. Ance vidable es la aterador par cual Yutu ia ariva sur la Mar de Pluves a 14 de desembre.
La satelite orbita a un altia de 150 kilometres. Lo no ia es bon posada per imaji la atera mesma.
Ambos aparatos brilia contra la surfas oscur de la luna, e los crea ombras longa. Per esta razona, on ia reconose fasil los en imajes de ante e pos la atera.
Yutu sinifia "coneo de jada". Lo es la mision prima de Xina cual atera sur la Luna.
Pos desende a la surfas longo un rampa, la vagador ia viaja en sirculo afin la siensistes serti ce sua sistemes opera bon. Aora lo dormi tra la note longa de la Luna, cual dura tra du de nosa semanas. Pos velia, Yutu va esplora la jeolojia de la tereno sirca se.
@T Plu inondas es prevideda en Britan
@L aora_oji/2013/plu_inondas_es_prevideda_en_britan
====== Plu inondas es prevideda en Britan ======
31 desembre 2013
Meteorolojistes predise pluves e ventas forte tra England e Cimri en la dia prima de 2014. Los averti sur un menasa continuante de inondas.
Sentuples de familias recovre ancora pos tempestas cual ia inonda sua casas e ia rompe la eletrica a natal.
Frontinte la prevides nova, organizas local autoriosa prepara abitadas de crise.
On ia sorti sirca 150 persones de sua casas pos pluve deluviante a lundi, spesial en partes de Scotland.
@T Sete mori en un onda de caldia en Arjentina
@L aora_oji/2013/sete_mori_en_un_onda_de_caldia_en_arjentina
====== Sete mori en un onda de caldia en Arjentina ======
31 desembre 2013
En la semana pasada, un onda de caldia en Arjentina ia mata sete persones. La plu de los ia es vea.
La caldia es malida par rompes de eletrica cual ia impedi multe persones de usa frescadores.
En la provinses norde, la temperatur ia asende a ultra 45°C. Meteorolojistes dise ce esta es la onda de caldia la plu estrema en la area de pos la comensa de arcivos en 1906.
@T Uigures xines es librida de campa Guantanamo
@L aora_oji/2013/uigures_xines_es_librida_de_campa_guantanamo
====== Uigures xines es librida de campa Guantanamo ======
31 desembre 2013
La SUA ia libri la tre finales de la uigures muslim xines ci ia es prisonida a sua campa de prisoni militar a Baia Guantanamo en Cuba, descrivente la aveni como un "ateni importante".
On ia vola los a Bratislava, la capital de Slovensco. Nun de los es suspetada como teroristes.
Campa Guantanamo conteni aora 155 prisonidas, reduida de plu ca 750. Multe es ja ala tra plu ca un desenio, e desuples de los ia es desculpada a alga anios ante aora.
La SUA refusa renativi prisonidas uigur a Xina, temente ce los ta es maltratada. Xina reata sever contra uigures ci oposa es governada par Beijing.
@T Un anio nova comensa
@L aora_oji/2013/un_anio_nova_comensa
====== Un anio nova comensa ======
31 desembre 2013
Tra la mundo, on selebra la ariva de 2014.
En Zeland Nova, la anio nova ia comensa ja a la ora 11 de UTC. En Australia, folas espeta la presenta famosa de focos de arte en Sydney.
En Japan, pretes xinto asembla a santerias per bonveni la anio nova.
Dubai va atenta presenta focos de arte en cuantia recordo. La organizores dise ce la presenta va estende longo 48 cilometres de la borda de mar, e ce la focos la plu alta va asende tra plu ca un cilometre.
Natural, on va selebra ance con focos de arte en multe otra sites de la mundo.
@T Un barcon de salva deveni fisada en jelo
@L aora_oji/2013/un_barcon_de_salva_deveni_fisada_en_jelo
====== Un barcon de salva deveni fisada en jelo ======
31 desembre 2013
En Antartica, lo es posible ce un barcon de salva ia deveni mesma trapida.
La barcon de rexerca Akademik Shokalskiy es ja fisada en jelo tra cuasi un semana. Lo conteni 74 persones. Los dise ce los ave un bon cuantia de comedas e ce los no es en peril.
Cuando la clima permete, on ia vole usa un elicotor de la barcon xines Xue Long per estrae sincodes-du pasajores e cuatro ecipores. Ma la barcon xines ia move apena en 24 oras, e on teme ce lo ia deveni ance fisada en la jelo.
Xue Long es un de du rompejelos en la area visina. La otra es un barcon australian, Aurora Australis. Pos la elicotor, on ia intende usa ance un barco per move la persones de la barcon xines a la barcon australian.
@T Un pato enorme creve en Taiuan
@L aora_oji/2013/un_pato_enorme_creve_en_taiuan
====== Un pato enorme creve en Taiuan ======
31 desembre 2013
En Taiuan, un pato jala e jigante de plastica ia creve per un razona nonclar.
La pato inflada ia ave un altia de 18 metres. Lo ia colasa subita a la dia 11 de cuando on ia esibi lo en la porto de Kelang. Cisa lo ia es atacada par agilas.
Florentijn Hofman, un artiste nederlandes, ia desinia lo como un varia enorme de un jueta popular de banio.
En novembre, un otra pato simil en Taiuan ia es deflada par un fali eletrical causada par un trematera. E en setembre, on ia move un pato tre de sur la mar per evita ce lo deveni danada par un siclon.
@T Volgograd vijila pos bombas umana
@L aora_oji/2013/volgograd_vijila_pos_bombas_umana
====== Volgograd vijila pos bombas umana ======
31 desembre 2013
En Volgograd en Rusia sude, pos du atacas par bombas umana, miles de polisiores patrulia aora la sistemes de transporta publica e esamina la trafica privata.
La cuantia de persones matada par la bombas ia ateni 34, e 60 persones es ferida. On no sabe esce la cuantia de matadas inclui la bombores. Los ia ataca la stasion de ferovia a soldi e un trambus a lundi.
On ia entera la vitim prima, un polisior matada a la stasion.
En sua comenta publica prima sur la atacas, presidente Vladimir Putin ia dise: "Nos basi nosa testas ante la vitimes de la atas asustante de teror. Nos va continua ferose e coerente la batalia contra teroristes asta cuando los es completa eliminada."
Investigores crede ce la du atacas es relatada, ma no grupo ia proclama se como culpable. La atacas es simil a presedentes nondistinguinte fada par gerores islamiste de Caucaso norde.
@T 2013
@L aora_oji/2013/xef
====== 2013 ======
Aora oji ia comensa como un blog a la dia final de 2013.
@T 128 es arestada per violentia a un protesta contra la Copa Mundal
@L aora_oji/2014/128_es_arestada_per_violentia_a_un_protesta_contra_la_copa_mundal
@D 2014
====== 128 es arestada per violentia a un protesta contra la Copa Mundal ======
26 janero 2014
La polisia en la site brasilera de São Paulo ia aresta 128 persones en scaramuxas pos un protesta contra la Copa Mundal de futbal.
On ia ensende un auto, e ia dana ance botecas, bancos, e un veculo de polisia.
La violentia ia obliga la autoriosas a cansela alga de la selebras intendeda per la aniversario 460 de la site.
2500 persones ia protesta en la strada sur la costa de ospita la Copa Mundal en Brasil.
@T 12 gidores xerpa mori en un avalanxa sur Sagarmata
@L aora_oji/2014/12_gidores_xerpa_mori_en_un_avalanxa_sur_sagarmata
====== 12 gidores xerpa mori en un avalanxa sur Sagarmata ======
19 april 2014
A la min 12 gidores local ia mori pos un avalanxa sur la inclinas de Monte Sagarmata (Everest). On crede ce esta es la trajedia la plu matante de istoria sur la monte.
La avalanxa ia aveni a sirca 06:45 de ora local en un area nomida la "campo de popcorn", no multe plu alta ca la campa de base a 5800 metres.
On ia salva alga trepores, ma otras manca ancora.
La gidores xerpa ia asende la inclina en la temprana de la matina, per fisa cordas e prepara la via per trepores, cuando la avalanxa ia colpa.
On no ia revela ofisial la identias de la mores e mancantes. Un opera de xerca e salva aveni aora, e on ia envia tre elicotores a la area. On ia transporta alga trepores ferida a la campa de base.
La asidente indica la riscas cual la gidores emprende en prepara la monte per trepores visitante. Lo ia aveni a media de la periodo de april e maio, la menses major de trepa. Sentos de trepores ia converje a la campa de base, esperante asende a la culmina.
En 1996, oto trepores ia mori en un tempesta, un desastre cual ia formi la funda de un libro bonvendeda.
Plu ca 3000 persones ia asende la monte pos sua concista prima par Edmund Hillary and Tenzing Norgay en 1953, ma ance multe ia mori atentante.
Situada entre Nepal e Xina, la monte la plu alta de mundo ave un altia de 8848 metres.
@T 15 persones mori en un asidente de bus en Tai
@L aora_oji/2014/15_persones_mori_en_un_asidente_de_bus_en_tai
====== 15 persones mori en un asidente de bus en Tai ======
28 febrero 2014
Un asidente de bus en Tai este ia mata 15 persones, cisa plu, entre ci 13 ia es studiantes.
La bus ia es viajante a Pattaya, un vila costal a sirca 150 cilometres a sude-este de Bangkok, cuando lo ia colpa un camion.
Des-tre studiantes e du enseniores ia mori, e plu ca 30 ia es ferida.
Asidentes de trafica es comun en Tai. Normas basa de securia e stradas folida es cualias contribuinte.
@T 18 mori en un fola funeral en India
@L aora_oji/2014/18_mori_en_un_fola_funeral_en_india
====== 18 mori en un fola funeral en India ======
18 janero 2014
En India, a la min 18 persones ia es matada e plu ca 40 ia es ferida en un fola tro densa en la site ueste de Mumbai.
Miles de lamentores ia colie a la casa de un gidor spirital muslim, Syedna Mohammed Burhanuddin, ci ia mori en venerdi.
Reportas sujesta ce persones ia es craseda cuando on ia manteni cluida la portetas de la casa.
La gidor de la comunia Dawudi Bohra ia mori a la eda de 102.
@T 2013 ia es la anio la plu calda en Australia
@L aora_oji/2014/2013_ia_es_la_anio_la_plu_calda_en_australia
====== 2013 ia es la anio la plu calda en Australia ======
3 janero 2014
Australia ia esperia sua anio la plu calda rejistrada en 2013.
La temperatures ia es plu alta par 1,2° ca la promedia durante. Los ia es la plu caldas de pos la comensa de arcivos en 1910.
La anio ia conteni ance un inverno recordo calda cual ia causa focos la plu ruinante en Sydney de pos 1968.
La caldi en Australia coere con tendes de clima globa, en cual gases invernerial influe la alti de temperatur.
La Ofisia de Meteorolojia en Australia ia dise ce la temperatures en nove de la des anios la plu resente ia es plu calda ca la promedia.
@T 20 persones es cotelida a un liseo en Pennsylvania
@L aora_oji/2014/20_persones_es_cotelida_a_un_liseo_en_pennsylvania
====== 20 persones es cotelida a un liseo en Pennsylvania ======
10 april 2014
Un adolesente armada con du coteles ia fa un ataca a un liseo en la stato Pennsylvania en la SUA. El ia feri 19 studiantes e un gardor de securia. La studiante, ci ave 16 anios, ia es arestada.
Alga persones ia reseta feris grave de cotel a sua troncos, e ia nesesa sirurjia en ospital. Alga ia ave no plu ca 14 anios. An tal, on previde ce tota va survive.
Algun, cisa un studiante, ia sona un alarma de focon pos vide la cotelis prima. La studiantes ia panica e ia freta en fola per sorti de la construida, en cuando la polisia ia ariva per xerca la atacor. Alga persones ia deveni ferida par la caos de la fola.
La polisia no ia descovre un motiva, ma on esplora reportas de un telefoni menasante entre la suspetada e un otra studiante a la note presedente.
La scola va es cluida en la dias seguente, afin investigores labora plu a la sena de la crimin.
@T 21 es matada par bombas en Baghdad
@L aora_oji/2014/21_es_matada_par_bombas_en_baghdad
====== 21 es matada par bombas en Baghdad ======
20 janero 2014
A la min 21 persones ia es matada par un serie de bombas tra Baghdad, la capital de Irac.
40 persones, cisa plu, ia es ferida en la esplodes.
La ataca la plu matante, en cual a la min sete ia mori, ia colpa un mercato en la sude de la site.
En un aumenta de violentia, a la min 759 persones ia mori sola en desembre, e plu ca 650 ia mori asta aora en esta mense.
@T 25 anios pos la cade de la Mur de Berlin
@L aora_oji/2014/25_anios_pos_la_cade_de_la_mur_de_berlin
====== 25 anios pos la cade de la Mur de Berlin ======
9 novembre 2014
Selebras aveni en Deutxland per onora la aniversario 25 de la cade de la Mur de Berlin.
On presenta consertas e esibis en la site, e canselor Angela Merkel va vade a un selebra enorme su sielo a la Porton de Brandenburg. On va relasa balones blanca longo do un parte de la mur ia sta, per simboli sua desapare.
La Mur de Berlin ia es construida en 1961 per preveni fujis de Deutxland Este, un pais comuniste, a la ueste. Sua cade en 1989 ia deveni un simbol forte de la fini de la Gera Fria.
Merkel va es acompaniada a la selebra par Lech Wałęsa, un organizor pasada de sindicatos polsce, e par Mihail Gorbatxov, la gidor soviet final.
La mur ia estende tra 155 cilometres de Berlin, ma oji sola sirca tre cilometres de lo sta ancora. En min ca un anio pos sua cade, Deutxland -- divideda pos sua defeta en la Gera Mundal Du -- ia es reunida.
Plu ca milion visitores ia ariva en Berlin per un fini de semana selebrosa cual va culmina plu tarda oji a la Porton de Brandenburg.
Ier, persones ia posa se per fotos ante la poca partes restante de la mur grafitosa, o ia leje paneles de informa sur la vive en Berlin divideda. Otras ia amira un presenta artal de cuasi 7000 balones blanca, liada a la tera e serpente longo 15 cilometres de la curso de la mur.
Ma Gorbatxov ia fa ier un comenta sombre ce la mundo sta a punto de un Gera Fria nova. El ia dise ce la Ueste, e spesial la Statos Unida de America, ia deveni tro autosasiada sur sua atenis pos la colasa de la Uni Soviet en 1991. Per esta razona, el ia dise, la potias global ia fali maneja la problemes en Iugoslavia, Asia sude-ueste, e aora Ucraina.
Gorbatxov ia gida la Uni Soviet en la parte tarda de la desenio de 1980. On atribui a el la rearmoni con la Ueste, e la crea de un atmosfera plu libriste cual ia causa final la cade de renas comuniste en Europe este en 1989.
@T 26 mafiores es arestada en la SUA e Italia
@L aora_oji/2014/26_mafiores_es_arestada_en_la_sua_e_italia
====== 26 mafiores es arestada en la SUA e Italia ======
12 febrero 2014
La polisia en Italia e la SUA ia aresta 26 persones en un ataca juntada contra un via nova de contrabanda de drogas, manejada par mafia.
La opera ia impedi un scema de transporta drogas e armas de America Sude a la porto de Gioia Tauro en Calabria.
La atacas ia ave du familias de mafia per brincos. Ajentes FBI ia viaja a Italia per partisipa.
La investiga de du anios ia preveni la emporta a Italia de sentos de cilogrames de cocaina ascondeda en cocos e ananases, e ance de eroina e mariuana.
@T 300 politicistes tai va es acusada sur atas nonconstitual
@L aora_oji/2014/300_politicistes_tai_va_es_acusada_sur_atas_nonconstitual
====== 300 politicistes tai va es acusada sur atas nonconstitual ======
8 janero 2014
En Tai, la autoriosa antifroda dise ce lo va acusa plu ca 300 politicistes, xef de la partito governante, sur sua atentas de cambia la constitui.
Un corte en novembre ia judi ce la atenta de fa ce la Senato deveni intera elejeda es nonconstitual.
On ia dise ce Yingluck Shinawatra, la ministro xef, no va es acusada.
Un vota jeneral va aveni en Tai a 2 febrero. Seniora Shinawatra ia anunsia la vota en desembre, esperante fini la protestas de suportores oposante en Bangkok.
@T 3,7 milion en Sudan Sude nesesa urjente comeda
@L aora_oji/2014/3_7_milion_en_sudan_sude_nesesa_urjente_comeda
====== 3,7 milion en Sudan Sude nesesa urjente comeda ======
2 febrero 2014
La Nasiones Unida ia dise ce lo estima ce 3,7 milion persones en Sudan Sude es en nesesa estrema de comeda, como resulta de la gera interna.
Toby Lanzer, la Coordinor Umaniste de la NU, ia dise ce on nesesa $1,3 mil milion per trata la crise. El ia clari ance la efeto profonda de la gera a la economia de la pais.
"Xef car la mercatos es disturbada," el ia dise, "on vive ala su presa enorme -- on no pote move como normal."
El ia ajunta: "A media de desembre, nun ia ta previde la grandia de la crise cual fronti aora nos. Nos fa tota posibles per evita un desastre."
@T 43 persones es matada en cuatro dias par violentia en Bangui
@L aora_oji/2014/43_persones_es_matada_en_cuatro_dias_par_violentia_en_bangui
====== 43 persones es matada en cuatro dias par violentia en Bangui ======
1 febrero 2014
Batalias en la Bangui, la capital de la Republica de Africa Sentral, ia lasa 43 persones mor en cuatro dias.
La violentia ia lasa ance 71 feridas.
On ia reporta multe atacas venjante en cuando combatores xef muslim retira de la site.
La batalias ia continua an pos la indui de un gidor nova, plu temprana en esta mense, como parte de atentas de crea un pas pos menses de anarcia.
@T 500 leones-de-mar mor es trovada en Peru
@L aora_oji/2014/500_leones-de-mar_mor_es_trovada_en_peru
====== 500 leones-de-mar mor es trovada en Peru ======
24 novembre 2014
Peru investiga la moris de sirca 500 leones de mar ci on ia trova sur un plaia de sua costa norde.
La governor local ia acusa pexores de veneni la mamales, ci prosimi comun a la costa per xerca comeda.
Ma la polisia ambientiste de Peru esplora otra causas posible de la moris, incluinte un maladia e la come nonintendeda de plastica.
La corpos putrinte ia es trovada sur la plaia de Anconcillo en la area Ancash. La corpos ia es de animales joven e vea.
On ia deside ce los es un peril de sania e ia sutrae rapida los de la plaia, a 400 cilometres a norde de Lima, la capital peruan.
Plu temprana en esta mense, un situa simil ia aveni plu norde, prosima a Piura, cuando la corpos de cuasi 200 leones de mar, delfines, tortugas, e pelicanes ia es deponeda sur un plaia.
Ofisiores investiga ancora la causas de acel moris.
En 2012, on ia trova sentos de delfines mor longo un estende de la costa peruan. La grupo ambientiste Orca ia judi ce acel mores ia es causada par ruidos e ondas de presa creada par esplodes relatada a la xerca de petrolio en la area.
Ma un reporta governal par la Instituida Maral ia elimina la xerca de petrolio, e ance infetas de virus or baterias, como causas de la moris de la delfines.
La reporta ia culpa causas natural.
@T 70 anios ante un scola prima per tota
@L aora_oji/2014/70_anios_ante_un_scola_prima_per_tota
====== 70 anios ante un scola prima per tota ======
30 janero 2014
Un reporta de Unesco dise ce plu ca 70 anios va pasa ante cuando tota enfantes pote vade a un scola prima.
Ma gidores nasional ia promete ce on va reali esta ante 2015.
La reporta dise ce 57 milion resta sin scola, e ce, a la rapidia presente de cambia, xicas povre en la campania de Africa no va vade a un scola prima ante 2086.
On descrive la manca de ensenia per tota e la cualia basa de multe scolas en paises povre como "un crise global de aprende".
@T 80% de catalanes suporta autonomia de Catalunia
@L aora_oji/2014/80_de_catalanes_suporta_autonomia_de_catalunia
====== 80% de catalanes suporta autonomia de Catalunia ======
10 novembre 2014
Un vota nonformal sur autonomia completa per Catalunia, en la norde-este de Espania, ia indica ce plu ca 80% de persones favore lo.
La vota nonobligante ia aveni pos cuando la corte constitual de Espania ia deside contra un referendo formal.
Plu ca du milion votores (de 5,4 milion ci ia ave la direto de vota) ia partisipa.
Artur Mas, la presidente catalan, ia bonveni la vota como "un susede grande", disente ce lo debe gida aora a un referendo obligante. "Nos ia gania la direto a un referendo," el ia dise a suportores aclamante. "Denova, Catalunia ia mostra ce lo vole governa se mesma."
El ia ajunta: "Me demanda a la persones de la mundo, me demanda a la jornalistes, e me demanda ance a la governas democrata de la mundo ce los aida la popla catalan a deside sua futur political."
La vota ia aveni an si lo ia es forte oposada par la governa espaniol.
Parlante a ante, Rafael Catalá, la ministro espaniol de justia, ia descrive la eserse como "futil e nonusosa". En un declara formal, el ia scrive: "La governa considera ce esta es un dia de propaganda political, organizada par fortes proautonomia e con no spesie de validia democrata."
On ia presenta du demandas a votores -- esce los desira ce Catalunia deveni un stato, e esce los desira ce acel stato es autonom.
Joana Ortega, la vispresidente de Catalunia, ia dise ce plu ca du milion persones ia partisipa en "un consulta de sitadanes", e ce, pos la conta de cuasi tota votas, 80,72% ia responde "si" a ambos demandas.
El ia clari ce pico plu ca 10% ia vota "si" a la demanda prima e "no" a la otra. Sirca 4,5% ia responde "no" a ambos demandas.
Otra sondas sujesta ce cisa 80% de catalanes desira un referendo ofisial sur la demanda de la state de Catalunia, e ce 50% favore autonomia completa.
Partitos unidiste razona ce, car la vota ia es organizada par grupos proautonomia, on no pote interprete ofisial lo como la desira de la area intera.
Plu ca 40 mil bonvolores ia aida organiza e esecuta la eserse nonformal.
La grupo Asembla Catalan Nasional ia colie suscrives a voterias sur un apela formal cual on va envia a la Nasiones Unida e la Comision European, demandante aida per convinse Espania a permete un referendo ofisial.
Nasionalisme en Catalunia es nurida par cexas economial e cultural. Esta area rica de 7,5 milion persones contribui plu a la economia espaniol ca lo reseta de la reservas de la governa sentral.
@T 98% suporta la constitui nova en Egipte
@L aora_oji/2014/98_suporta_la_constitui_nova_en_egipte
====== 98% suporta la constitui nova en Egipte ======
19 janero 2014
98,1% de los ci ia vota en un referendo en Egipte ia suporta la constitui nova.
38,6% de la 53 milion votores posible ia partisipa.
La constitui proposada sustitui per un cual Mohammed Morsi, la presidente islamiste, ia introdui ante sua despone.
On vide la referendo como un vota sur la legalia de sua sutrae e de la armada, cual la despone el en julio 2013.
@T Abitores de un parte de Benghazi parti ante un opera militar
@L aora_oji/2014/abitores_de_un_parte_de_benghazi_parti_ante_un_opera_militar
====== Abitores de un parte de Benghazi parti ante un opera militar ======
3 novembre 2014
La armada de Libia ia demanda ce abitores parti de un distrito sentral de la site Benghazi ante un opera major militar contra islamistes.
Plu ca 200 persones ia es matada en la site de porto pos la comensa de un atenta nova par la armada per recatura la loca de militias islamiste en la mense pasada.
La campania es gidada par Khalifa Haftar, un jeneral pasada, sur ci on reporta ce el es ance suportada par la armada.
A soldi, un portavose de la armada ia demanda ce abitores de la distrito Sabiri parti ante mediadia de oji.
Libia es en un state de nonstablia de pos la despone de Qaddafi en 2011.
La pais, rica con petrolio, es divideda entre du governas oposada, e tribus de rebelores, militias, e partitos political diversa combate per la potia.
La governa nova elejeda e internasional reconoseda ia es obligada a fuji a la site Tobruk en la este estrema, prosima a la frontera con Misre, pos deveni forsada a via de Tripoli cuando militias enemin ia ataca la capital en julio.
Grupos islamiste, incluinte Ansar al-Sharia, listada par paises ueste como un organiza teroriste, ia declara un califia en Derna, un site costal.
La governa escluida ia perde la tre sites xef en la crise political:
-- En Tripoli, la parlamento nova -- la Congresa Nasional Jeneral -- ia continua consenta. Lo ia crea an sua propre governa alternativa.
-- Benghazi, la site du e la sentro de la revolui de 2011, es xef ocupada par combatores islamiste, de cual alga es liada a al-Qaidah. Ofisiores, jornalistes, e ativistes sosial es asasinada a cada dia.
-- Misrata, la site tre e la porto xef, es ance fidosa a la autoriosas de Tripoli. Sua militias es lo cual permete ce la autoriosas resta.
@T Abitores japanes es iritada par nozas malodorinte
@L aora_oji/2014/abitores_japanes_es_iritada_par_nozas_malodorinte
====== Abitores japanes es iritada par nozas malodorinte ======
25 novembre 2014
La belia de la vista autonal de arbores ginco en Japan es ruinada par la odor repulsante de la nozas sur tera.
Alga abitores en sites japanes cexa sur la apesta de la frutas cual ia cade, e governas local atenta trova modos de solve la problem.
Cuando los es fresca, nozas de ginco es regardada como un parte valuosa de la cultur japanes de comeda. Ma la asida butirica en la pulpa cual ensirca la noza crea un odor simil a bur putrida, vomita, o un ceso estrema forte.
La problem es malida par la bolevares vasta de gincos plantada en sites japanes per sua tetos jala spetaculin en autono.
On ia planta sirca 570 mil tal arbores tra la pais.
An si sola gincos fema produi nozas, la distingui entre arbores mas e arbores fema es difisil cuando los es ancora joven. Per esta razona, en un de la locas de ginco la plu bon conoseda en Osaka, sola un cuatri es fema.
Empleadas labora tra la note per secute la arbores e cade la nozas per distribui a abitores local. En Kawasaki, empleadas de la governa ia dona la nozas sin custa a un aveni munisipal.
An tal, la odor resta un problem. Un ofisior ia dise ce la apesta es final mera un cosa cual on debe tolera: "Nos ia aseta sempre lo como un situa contra cual nos pote fa no cosa."
@T Abortas en la SUA aveni la min frecuente de pos legali
@L aora_oji/2014/abortas_en_la_sua_aveni_la_min_frecuente_de_pos_legali
====== Abortas en la SUA aveni la min frecuente de pos legali ======
4 febrero 2014
En la SUA, la cuantia de abortas de femes ia cade entre 2008 e 2011 a la nivel la plu basa de pos la legali de aborta en 1973.
La Instituida Guttmacher, cual suporta diretos de aborta, ia reporta ance ce la cuantia intera de abortas ia diminui par 13%.
Rexercores ia comenta ce la redui ia coaveni con un cuantia desendente de ensentias e con la usa plu comun de contraconsepales.
Los ia dise ce la redui ia aveni ante la adota resente par statos de leges cual restrinje la asede a aborta.
@T Adidas para la vende de camisetas ofendente a Brasil
@L aora_oji/2014/adidas_para_la_vende_de_camisetas_ofendente_a_brasil
====== Adidas para la vende de camisetas ofendente a Brasil ======
27 febrero 2014
Adidas, un compania grande de vestes de sporte, retira la vende de alga camisetas de Copa Mundal pos un cexa par Brasil ce los sesali la persepi de la pais.
Un ia mostra la demanda "Tu vole fa un gol?" a lado de un fem poca vestida. Un otra ia porta un cor en forma de un posterior en bicini, con la declara "Me ama Brasil".
Embratur, la corpo de turisme brasilera, oposa forte cualce produida cual lia la persepi de la pais a la atrae sesal.
Adidas furni la bales de la Copa Mundal, e es un de la sponsores xef de la aveni.
@T Afganistan va libri prisonidas contra la vole de la SUA
@L aora_oji/2014/afganistan_va_libri_prisonidas_contra_la_vole_de_la_sua
====== Afganistan va libri prisonidas contra la vole de la SUA ======
10 janero 2014
Afganistan va libri deses de prisonidas ci la SUA regarda como menasas de securia.
La ofisia de presidente Hamid Karzai ia dise ce la atestas no sufisi contra 72 de 88 prisonidas ci la SUA ia teni en la pasada.
On previde ce esta va tensa plu la relatas con la SUA. La du paises disputa la refusa par Karzai de suscrive un acorda de securia con Washington.
La SUA oposa forte la libris, disente ce la prisonidas ia es envolveda en feri o mata soldatos de la SUA e OTAN.
@T Aida ateni final un campa asejada en Dimashq
@L aora_oji/2014/aida_ateni_final_un_campa_asejada_en_dimashq
====== Aida ateni final un campa asejada en Dimashq ======
19 janero 2014
Aida ia ateni Yarmuk, un campa asejada en Dimashq, la capital de Suria, a la ves prima en alga menses.
18 000 refujadas filastini en la campa ia reseta no aida de pos julio.
Lo no es clar cuanto aida on ia permete aora en la campa.
Reportas de interna dise ce alga en la campa ia mori par causa de famia e manca de aida medical.
@T Aida e sortis continua en Homs
@L aora_oji/2014/aida_e_sortis_continua_en_homs
====== Aida e sortis continua en Homs ======
12 febrero 2014
En Suria, en la site asejada de Homs, on ia continua la parti de siviles e la furni de aida.
Cuasi 200 pacos conteninte farina, ris, olio vejetal, e otra comedas ia entra, en cuando plu ca 200 perones ia sorti. Los va junta se a la sentos a ci on ia permete la sorti pos un acorda de sesaspara en venerdi.
Ma consernas resta sur la fortuna de omes de eda militar ci va es interogada par la autoriosas suri.
Plu, sentos de siviles es ancora trapida en la site.
@T Airolinias stranjer pote cisa vola en Brasil tra la Copa de Mundo
@L aora_oji/2014/airolinias_stranjer_pote_cisa_vola_en_brasil_tra_la_copa_de_mundo
====== Airolinias stranjer pote cisa vola en Brasil tra la Copa de Mundo ======
6 janero 2014
La governa brasilera ia dise ce lo es posible ce airolinias stranjer va pote opera volas interna tra la Copa de Mundo de futbal, en junio e julio de esta anio.
Gleisi Hoffmann, la xef de la ecipo presidental, ia dise ce presidente Dilma Rousseff considera abri la mercato interna per preveni aumentas esplotante de preso.
Diferes grande esiste entre la presos de vola demandada par airolinias diversa.
Seguente la constitui brasilera, la presidente ave la potia de fa comandas direta en situas spesial.
Brasil espeta ce 600 000 turistes stranjer va viaja a la pais per la aveni.
@T Airoportos reabri sur Djava pos la volcan
@L aora_oji/2014/airoportos_reabri_sur_djava_pos_la_volcan
====== Airoportos reabri sur Djava pos la volcan ======
16 febrero 2014
Sur la isola indonesian de Djava, alga airoportos ia reabri pos es obligada de clui cuando un volcan ia eruta.
On reporta ce la cualia de aira ia boni aora tra Djava, ma sites e viletas es ancora covreda su un strato de polvo e sene.
Deses de miles de persones resta aora en refujas. On esperia un manca de medisin e covreletos.
Monte Kelud, en la este de Djava, ia eruta en venerdi, matante tre persones. La volan ia ronca tra alga semanas presedente.
@T Airoportos SUA vijila contra la virus Ebola
@L aora_oji/2014/airoportos_sua_vijila_contra_la_virus_ebola
====== Airoportos SUA vijila contra la virus Ebola ======
11 otobre 2014
La airoporto JFK en New York comensa probas medical per atenta para la aveni de Ebola cual ia mata plu ca 4000 persones.
Pasajores de la paises la plu forte afetada va debe responde a un serie de demandas e permete ce on mesura sua temperatures.
Probas simil a cuatro otra airoportos major en la SUA va comensa en la dias veninte.
Esta segue la mori prima de algun par la virus en Texas a mercurdi.
On va dona a viajores pajes informante sur la sintomes de Ebola, instruinte ce on debe vide un dotor si on deveni malada en tre semanas.
90% de viajores ci ariva en la SUA par avion veni a JFK o un de la cuatro otra airoportos. A cada dia, asta 160 persones entra de la tre paises la plu afetada.
La statistica la plu resente de la Organiza de Sania Mundal indica ce la cuantia de moris atribuable a la febre emorajal ia ateni 4033. Tota de estas, estra 9, ia aveni en Liberia, Siera Leon, e Gine, nasiones de Africa ueste.
La governa magribi ia demanda ce on pospone la torneo de futbal Copa de Africa de Nasiones de la anio veninte, par causa de la virus.
On ia pospone ja la elejes de senatores en Liberia a la semana veninte, per redui la risca ce votores va sperde la virus.
A la ves prima, la crise ia ativi la Constitui Internasinal sur Desastres Spasial o Major. En sua rol normal, lo furni imajes de satelite per crea mapas de dana e peril.
Per controla esce la sistemes de New York es sufisinte preparada, persones ci finje la sintomes de la virus -- nomida "pasientes simulada" -- ia presenta se a ospitales.
@T Aiti onora la aniversario de sua trematera
@L aora_oji/2014/aiti_onora_la_aniversario_de_sua_trematera
====== Aiti onora la aniversario de sua trematera ======
13 janero 2014
La popla de Aiti ia recorda la vitimes de un trematera ruinante cual ia colpa la pais a cuatro anios ante aora. La desastre ia mata plu ca un cuatri de milion persones.
Tra la pais, persones ia vade a rituos relijiosa spesial.
La presidente, Michel Martelly, ia pone un garlanda a un tomba coletiva en Saint Christophe, do on ia entera multe vitimes.
150 000 persones es ancora en abitadas tempora.
La governa ia declara ce 12 janero es un dia de recorda e refleta.
@T Al-Xabab forsa un codigo de vestes a femes somali
@L aora_oji/2014/al-xabab_forsa_un_codigo_de_vestes_a_femes_somali
====== Al-Xabab forsa un codigo de vestes a femes somali ======
14 junio 2014
En Somalia, ativistes de al-Xabab ia aresta 100 femes e informa los ce si los no segue un lege muslim de vestes, los risca es flajelida.
La femes ia es arestada en Buale, a sirca 300 cilometres a sude-ueste de la capital, Mogadixu.
Al-Xabab es un grupo liada con al-Qaidah. Sua nom sinifia "la jovenes". Lo no fa comun tal arestas coletiva. La grupo controla multe partes sude e sentral de la pais.
La femes ia es prendeda de la mercato, avisada, e relasada. Car esta ia es sua ofende prima, on no ia puni los, ma los pote es publica flajelida si on aresta denova los.
La temperatur pote ateni 35° en esta parte de la anio, donce multe femes prefere porta vestes tradisional ma plu lejera ca los cual al-Xabab aproba.
On ia comanda ce la femes porta un nicab, cual covre tota sua corpo e fas, lasante sola un fesur peti per sua oios.
Al-Xabab recomenda un varia sever de Islam. Los ia mata persones acusada de adultera par bombarda los con petras, e los ia amputa la manos de furores.
Un governa suportada de la Nasiones Unida e aidada par soldatos de la Uni African, ia susede ejeta al-Xabab de la sites xef de Somalia, ma la grupo continua fa atacas matante ala.
@T Alegas ce avocatos turces ia escuta secreta telefonis
@L aora_oji/2014/alegas_ce_avocatos_turces_ia_escuta_secreta_telefonis
====== Alegas ce avocatos turces ia escuta secreta telefonis ======
25 febrero 2014
En Turcia, on alega ce un grupo de avocatos prosedente e antigovernal ia escuta secreta la telefonis de miles de persones importante.
La blancos ia inclui ministros de governa e gidores de comersia.
La avocatos ia nega la acusas. On dise ce los es fidosa a Fethullah Gulen, un eglesor en la SUA.
On ia acusa ce Gulen dirije un "stato paralel" en Turcia, controlante grupos de polisia, avocatos, e polisiores. El nega esta.
@T Alga es ferida en un batalia de fusil en Bangkok
@L aora_oji/2014/alga_es_ferida_en_un_batalia_de_fusil_en_bangkok
====== Alga es ferida en un batalia de fusil en Bangkok ======
2 febrero 2014
A la min ses persones ia sufri feris de fusili en Bangkok, la capital de Tai, en combates antigovernal ante votas en soldi.
Violentia ia comensa a un fronti entre suportores e oposores de Yingluck Shinawatra, la ministro xef.
On ia fusili en cuando protestores ia bloci ancora un construida do on teni paperes de vota, per impedi sua distribui.
La protestores vole un consilia de popla, nonelejeda, en loca de la governa presente.
@T Alga refujadas de Fukushima revade a sua casas
@L aora_oji/2014/alga_refujadas_de_fukushima_revade_a_sua_casas
====== Alga refujadas de Fukushima revade a sua casas ======
1 april 2014
La grupo prima de refujadas de Fukushima ia revade a sua casas, a tre anios pos la desastre grande a la sentro de eletrica nucleal.
On ia permete ce sirca 350 abitores reveni a la distrito Miyakoji en la site Tamura, cual es en la raio de 20 cilometres cual defini la zona de esclui. La autoriosas dise ce la cuantia de radia en la area es aora tan basa ce on pote abita ala, ma multe abitores esita.
On ia sorti 80 mil persones pos la crise. A 11 marto 2011, un trematera e la tsunami seguente ia destrui la sistemes frinte de la reatadores a la sentro Fukushima Dai-ichi, fondente la reatadores e librinte radia.
Abitores de la zona de esclui es aora permeteda de revade permanente a casa. Otra partes de la area ia deveni vacua e descurada en cuando sua abitores resta en casas tempora o con sua relatadas.
On no sabe cuanto de la abitores va reveni. Kimiko Koyama, ci ave 69 anios, ia dise: "Multe de nosa amis e visinas no va reveni. No emplea esiste asi. La situa es nonoportun, e la jovenes teme la radia."
An tal, otras es zelosa per reveni. Yutaro Aoki, un abitor ci supravide la recovre de la site, ia dise: "Persones vole revade e fa vives normal, vives de un spesie en cual los senti denova ancorida a la tera."
Lo resta nonclar cuando -- o an esce -- on va permete la reveni a casa de otra grupos de refujadas. On fa un taxe vasta de descontamina, ma probable alga areas va resta tro perilosa per abita tra anios.
@T American Hustle gania tre Globos de Oro
@L aora_oji/2014/american_hustle_gania_tre_globos_de_oro
====== American Hustle gania tre Globos de Oro ======
14 janero 2014
American Hustle (Froda american), un filma de aventur criminal, ia gania tre Globos de Oro, incluinte como la comedia o teatral de musica la plu bon.
Sua stelas fema, Amy Adams e Jennifer Lawrence, ia reseta ance premios de ator fema la plu bon per sua roles en la filma.
La nara de la filma aveni en la desenio de 1970. Laxe fundida sur un opera vera de trapi par engana, fada par la FBI, lo mostra frodores enscriveda per despone un politiciste frodante.
La filma 12 Anios de Sclavia, dirijeda par Steve McQueen, ia reseta la premio suprema de la note, como la drama filmada la plu bon.
@T Amnestia Internasional descrive la violentia egiptian como sin presedente
@L aora_oji/2014/amnestia_internasional_descrive_la_violentia_egiptian_como_sin_presedente
====== Amnestia Internasional descrive la violentia egiptian como sin presedente ======
24 janero 2014
Amnestia Internasional dise ce Egipte ia esperia violentia "a un scala sin presedente" pos la despone de la presidente islamiste Mohammed Morsi par la armada en julio 2013.
Lo ia acusa ce la fortes de securia maltrata comun la popla, e ce diretos e librias en Egipte deveni erodeda.
La organiza de diretos umana publici sua reporta a du dias ante la aniversario tre de la revolta cual ia obliga la resinia de presidente Hosni Mubarak.
Entretempo, un studiante favorente Morsi ia mori en batalia con la polisia en la site Alexandria.
@T Angela Merkel dise ce reformi la Uni European no va es fasil
@L aora_oji/2014/angela_merkel_dise_ce_reformi_la_uni_european_no_va_es_fasil
====== Angela Merkel dise ce reformi la Uni European no va es fasil ======
28 febrero 2014
Angela Merkel, la canselor deux, ia dise ce el pote labora con la Rena Unida per reformi la Uni European, ma ce la taxe no va es fasil.
Pos un encontra en Downing Street con David Cameron, la ministro xef de la RU, el ia comenta ce ambos paises pote introdui leges per restrinje la migras de persones ci vole sola reseta aida sosial.
Cameron ia dise ce cambias a la UE es "posible, atenable, e realable".
Merkel ia parla ance a la parlamento brites e ia bevi te con la Rea.
@T Angela Merkel rompe sua pelvis en un cade de sci
@L aora_oji/2014/angela_merkel_rompe_sua_pelvis_en_un_cade_de_sci
====== Angela Merkel rompe sua pelvis en un cade de sci ======
7 janero 2014
Angela Merkel, la canselor deutx, ia frati un oso en sua pelvis en un asidente de sci de distantia longa en Suiz este.
El va debe reposa reclinante tan multe como posible tra la tre semanas veninte, e alga de sua visitas va es canselada.
El ia sufri ance contusas sever en la asidente. El no ia es rapida scinte.
La asidente ia aveni en desembre, en sua vacanse de natal. Direta pos lo, Merkel no ia es consensa ce un parte de sua pelvis ia rompe. La feri ia es revelada en un visita a sua dotor en venerdi.
Merkel intende ancora preside un encontra de governa a mercurdi. El pasea aora con aida de muletas.
@T Aora oji
@L aora_oji/2014/aora_oji
====== Aora oji ======
10 april 2014
Esta blog va recomensa pos alga dias.
@T Apple nomi furnores ci prende cisa minerales de zonas de gera
@L aora_oji/2014/apple_nomi_furnores_ci_prende_cisa_minerales_de_zonas_de_gera
====== Apple nomi furnores ci prende cisa minerales de zonas de gera ======
14 febrero 2014
Apple ia comensa publici informas sur cual de sua furnores prende sua minerales de zonas de gera.
Tal minerales es minada en areas de batalia o de maltratas de diretos umana, como la Republica Democrata de Congo.
La lista detalia 104 furnores sur ci no garantia ofisial esiste ce los segue regulas etical.
La plu aparatos eletronical conteni o oro, o tantalo, o stanio, o uolframio. La colie de esta materias cru es comun controlada par militias violente ci pote profita multe de la ativia.
@T Apple va repaia a jenitores sur compras enlinia par enfantes
@L aora_oji/2014/apple_va_repaia_a_jenitores_sur_compras_enlinia_par_enfantes
====== Apple va repaia a jenitores sur compras enlinia par enfantes ======
16 janero 2014
Apple va repaia a clientes a la min $32,5 milion pos un acorda con la Comision Federal de Comersia en la SUA.
La acorda silenti cexas durante sur compras enlinia fada par enfantes sin la sabe de sua jenitores.
Apple debe ance cambia sua prosedes per serti ce clientes ia acorda vera, ante fatura los per compras enlinia.
La compania ia dise ce el ia fa la acorda en loca de emprende un batalia longa en corte.
@T Arceolojistes mapa un site medieval sin escava lo
@L aora_oji/2014/arceolojistes_mapa_un_site_medieval_sin_escava_lo
====== Arceolojistes mapa un site medieval sin escava lo ======
3 desembre 2014
Arceolojistes ia produi un mapa detaliosa de un site medieval en England sin fa escavas a la loca.
Los ia usa la tecnicas la plu resente de scane per revela un rede de construidas a Old Sarum, un loca de la sentenio 11.
La resultas inclui un serie de strutures grande, cisa per defende, cual ave areas de tera noncovreda pos se, cisa per asembla persones o recursos.
Old Sarum -- nomida Sorviodunum en latina -- ia es la loca orijinal de la site Salisbury, situada a distantia de 3 cilometres, en England sude-ueste.
Lo ia comensa como un fortres de eda de fero, fundida sirca 400 AEC e ocupada par la romanes pos sua concista de Britan en 43 EC.
Esta esplora la plu resente de la loca ia es fada par la Universia de Southampton. Lo ia consentra sur la ensircas interna e esterna de lo cual ia es probable la fortres.
La tecnicas moderna usada per la jeometre ia inclui la magnetometria, mesuras de la resiste eletrical de la tera, la radar de penetra la tera, e la tomografia de resiste eletrical, cual usa eletrodos per esamina su la tera.
Kristian Strutt, la dirijor de servis tecnolojial arceolojial a la universia, ia dise: "Arceolojistes e istoristes sabe ja tra sentenios ce un site medieval esiste a Old Sarum, ma asta aora, on no ia ave un bon mapa de la loca.
"Nosa esplora indica do construidas individua es situada, e de esta nos pote composa un imaje detaliosa de la organiza munisipal entre la mures de la site."
@T Ariel Sharon deveni multe malada
@L aora_oji/2014/ariel_sharon_deveni_multe_malada
====== Ariel Sharon deveni multe malada ======
1 janero 2014
La state de sania de Ariel Sharon, la ministro xef pasada de Israel, ci ia spende cuasi oto anios en un coma, ia dejenera grave. On reporta ce sua renes ia fali.
Sharon ave aora 85 anios. El ia deveni la ministro xef en 2001, ma en desembre 2005 el ia sufri un ataca serebral minor. En 2006, el ia sufri un plu ataca serebral major en 2006, cual ia lasa el en un coma permanente.
Pos batalia en tre geras de Asia sude-ueste, Sharon es amirada par multe israelis como un gidor militar grande, ma el es despetada par filastinis.
@T Ariel Sharon mori
@L aora_oji/2014/ariel_sharon_mori
====== Ariel Sharon mori ======
12 janero 2014
Ariel Sharon, la ministro xef pasada de Israel, ia mori a la eda de 85. El ia pasa oto anios en coma, pos un ataca serebral.
La xef de la Sentro Medical de Sheba, prosima a Tel Aviv, ia dise ce Sharon ia mori a la posmedia de saturdi par fali de cor.
Sharon ia es un jigante en la stadios militar e political de Israel, ma el ia es ance controversa tra sua carera longa.
La presidente, Shimon Peres, ia dise ce Sharon ia construi Israel. Par contrasta, Mustafa Barghouti, un filastini importante, ia dise ce el ia segue un via de gera e ataca.
@T Arvind Kejriwal sesa sua protesta en Delhi
@L aora_oji/2014/arvind_kejriwal_sesa_sua_protesta_en_delhi
====== Arvind Kejriwal sesa sua protesta en Delhi ======
22 janero 2014
La ministro xef de Delhi, Arvind Kejriwal, ia sesa sua protesta en la sentro de la site sur la controla de la polisia de Delhi.
Kejriwal ia spende la note de lundi su la sielo, e ia labora con membros de la governa en la strada.
Sua ecipo ia acusa la polisia de fali reata a un sirculo alegada de drogas e prostitui. La polisia ia nega la alega.
Kejriwal dise ce el ia gania comprometes de la governa sentral.
@T Asiones asian diminui pos un vende coletiva en la SUA
@L aora_oji/2014/asiones_asian_diminui_pos_un_vende_coletiva_en_la_sua
====== Asiones asian diminui pos un vende coletiva en la SUA ======
4 febrero 2014
La valua de asiones asian ia diminui, seguente un vende coletiva en la SUA. On teme ce la recovre economial lenti en la SUA, e ce la crese lenti en economias emerjinte.
La indise Nikkei 225 en Japan ia diminui par 2,6%, la Hang Seng de Hongkong ia cade par 2,3%, e la indise Kospi de Corea Sude ia desende par 1,6%.
Esta segue cades par plu ca 2% en la indises Dow Jones e S&P 500 en la SUA a lundi.
La autofida de investores ia es danada par novas sur un debili de fabrica en no sola la SUA ma ance Xina -- la du economias la plu grande de mundo.
@T Asiones diminui sur la valua de mone en paises emerjinte
@L aora_oji/2014/asiones_diminui_sur_la_valua_de_mone_en_paises_emerjinte
====== Asiones diminui sur la valua de mone en paises emerjinte ======
25 janero 2014
En Wall Street, asiones ia diminui multe en venerdi par causa de ansia en mercatos emerjinte.
En New York, la indise Dow Jones ia cade par 318,24 puntos, donce par cuasi 2%. Ance NASDAQ e la indise S&P 500 ia cade par 2%, fininte a 4130,44 e 1790,31 en acel ordina.
En jovedi, Arjentina ia abandona sua atentas de defende la peso, e acel mone ia diminui par 11% en relata a la dolar.
Otra mones en paises emerjinte ia cade ance, e un ansia ia ateni asionerias european en venerdi.
@T Assad dise ce on no va discute la posible de sua resinia
@L aora_oji/2014/assad_dise_ce_on_no_va_discute_la_posible_de_sua_resinia
====== Assad dise ce on no va discute la posible de sua resinia ======
20 janero 2014
On reporta ce Bashar al-Assad, la presidente suri, ia dise ce el ave no intende de resinia, e ce on no va discute esta a la consenta de pas en la semana veninte.
"Si nos ta vole sede, nos ia ta sede de la comensa," Assad ia dise a parlamentores rusce en Dimashq.
An tal, sua ecipo ia clari plu tarda ce la comentas es nonesata reportada, sin dona plu detalias.
La governa, grupos oposante, e diplomatas ueste va partisipa en discutes de pas en Suiz de mercurdi.
@T Associated Press sutrae fotos dijital alterada de Fidel Castro
@L aora_oji/2014/associated_press_sutrae_fotos_dijital_alterada_de_fidel_castro
====== Associated Press sutrae fotos dijital alterada de Fidel Castro ======
11 febrero 2014
Associated Press, un ajenteria de novas, ia dise ce lo sutrae de sua arcivos sete fotos dijital alterada de Fidel Castro, la gidor jubilada de Cuba.
Lo ia clari ce en la imajes, resente publicida par un ajenteria de stato, un aidaoio ia es dijital sutraeda.
Lo ia debe elimina la fotos car los viole sua normas. La governa cuban no ia reata.
Castro ia gida Cuba tra cuasi 50 anios ante dona la potia a sua frate, Raul, en 2006 per razonas de sania.
@T Atacas en Nijeria mata deses
@L aora_oji/2014/atacas_en_nijeria_mata_deses
====== Atacas en Nijeria mata deses ======
28 janero 2014
Gerores islamiste suspetada ia ataca du viletas en Nijeria norde-este, lasante 74 persones mor.
Los ia ataca la vileta Kawuri en la stato de Borno a la clui de un mercato folida a soldi. Los ia usa esplodentes e ia ensende casas.
Atestores ia dise ce 52 persones ia es matada en acel ataca. 22 ia mori en un otra ataca a un servi de eglesa en Waga Chakawa en la stato de Adamawa en la mesma dia.
On culpa la grupo Boko Haram per la atacas.
@T Atacores colpa la campa de protesta en Bangkok
@L aora_oji/2014/atacores_colpa_la_campa_de_protesta_en_bangkok
====== Atacores colpa la campa de protesta en Bangkok ======
19 janero 2014
Atacores ia lansa esplodentes a protestores antigovernal en Bangkok, ferinte a la min 28 persones.
La esplodes ia colpa ativistes ci vole clui la capital de Tai e forsa ce la governa resinia.
Un gidor de la protesta ia dise ce on ia xasa la atacores, ma ce los ia evade sur bisicles de motor pos xuta a sua seguores.
En venerdi, un ataca simil ia lasa un person mor.
La protestores acusa ce la governa es ancora dirijeda par Thaksin Shinawatra, la gidor pasada e escluida.
@T Atacores mata un prete en Brasil
@L aora_oji/2014/atacores_mata_un_prete_en_brasil
====== Atacores mata un prete en Brasil ======
11 janero 2014
En Brasil, du fusilores ia mata un prete evanjelial a sua eglesa en la site Belo Horizonte.
Los ia entra a la Eglesa Universal de la Rena de Dio, e la fusili la testa de Charles Vidal de Souza ante fuji par auto.
La prete ia mori pronto pos ariva a ospital. El ia ave 34 anios.
On no sabe esce la fusilores ia intende ataca el. La polisia ia trova no indica ce la omes ia es rubores.
Belo Horizonte es la capital de la stato de Minas Gerais. Lo es a sirca 700 cilometres sude-este de Brasilia.
@T Ativistes enlinia menasa la Copa Mundal
@L aora_oji/2014/ativistes_enlinia_menasa_la_copa_mundal
====== Ativistes enlinia menasa la Copa Mundal ======
27 febrero 2014
Ativistes enlinia en Brasil menasa disturba la Copa Mundal de futbal de esta anio.
Un grupo parteninte a Anonim, un coletiva laxe, ia dise ce lo va ataca pajerias ofisial.
On ia fa protestas major en la pais contra lo cual alga ia descrive como un spende estravagante.
La armada brasilera ia confesa ce lo no pote furni un proteje completa, ma ia insiste ce lo va responde a la menasas la plu probable.
@T Atletas cenian menasa boicota sur impostas
@L aora_oji/2014/atletas_cenian_menasa_boicota_sur_impostas
====== Atletas cenian menasa boicota sur impostas ======
24 janero 2014
Alga de la atletas xef de Cenia ia menasa para representa sua nasion a competes internasional como la Juas Olimpial, par causa de leges nova sur imposta.
Wesley Korir, un parlamentor e un ganior pasada de la maraton de Boston, ia dise ce atletas va paia imposta a du veses, car los paia ja un imposta sur sua ganias stranjer.
Parlante a un foro de atletas en Eldoret, el ia clari ce atletas reteni aora no plu ca sirca 15% de sua ganias.
El ia averti ce la lege nova pote causa ce multe atletas cambia sua nasionalia.
@T Australia aproba atacas contra la Stato Islamiste
@L aora_oji/2014/australia_aproba_atacas_contra_la_stato_islamiste
====== Australia aproba atacas contra la Stato Islamiste ======
3 otobre 2014
La governa australian ia aproba ce sua jetos de combate junta se a la ativia militar, gidada par la SUA, contra blancos de la Stato Islamiste en Irac.
Tony Abbott, la ministro xef, ia dise ce la Stato Islamiste es "un culto de mata" cual ia "declara gera contra la mundo" e cual on debe para.
Lo controla aora un teritorio grande en un estende sin frontera de Suria e Irac.
La SUA e sua aliadas arabi ia bombi blancos de la Stato Islamiste en acel du paises tra la du semanas pasada. Paises european ia ataca sola locas iraci.
Ier, la parlamento turces ia suporta un proposa cual permete ce sua soldatos entra a Irac e Suria per junta se a la campania.
Soldatos de la Stato Islamiste ia avansa resente a prosima a la frontera con Turcia, provocante ce miles de refujadas curdi traversa la frontera. Turcia ospita ja plu ca milion refujadas suri.
La Nasiones Unida dise ce la islamistes combatosa ia fa "un cuantia stonante" de maltratas de diretos umana.
Abbott ia dise ce on no projeta ce la partisipa australian va estende a Suria, e ance no ce soldatos va deveni envolveda en combate sur tera.
Australia ia envia ja 400 membros de sua forte de aira, 200 membros de sua forte spesial, e ses aviones de gera a un base SUA en la Amirias Arabi Unida.
La deside de partisipa en la ativia militar -- per cual la governa no ia nesesa un aproba parlamental -- ia aveni entre consernas cresente sur la cuantia de australianes liada a la Stato Islamiste.
La governa crede ce 60 australianes, cisa plu, batalia con grupos teroriste en Asia sude-ueste, e ce a la min 100 en Australia mesma suporta ativa los.
En setembre, la polisia ia invade alga casas en Sydney, seguente reportas ce estremistes islamiste projeta matas acaso en la pais. Pos esta invades, usante 800 ofisiores forte armada, on ia aresta 15 persones.
@T Australia negosia vende uranio a Barat
@L aora_oji/2014/australia_negosia_vende_uranio_a_barat
====== Australia negosia vende uranio a Barat ======
4 setembre 2014
Tony Abbott, la ministro xef de Australia, ia ariva en Barat per un visita de du dias. El vole negosia sur la vende de uranio.
Abbott va pausa prima en Mumbai ante encontra Narendra Modi, la ministro xef nova elejeda de Barat, a venerdi.
El dise ce el "espera suscrive" un acorda cual va permete la esporta de uranio australian a Barat.
Australia posese sirca 40% de la uranio en la mundo, e esporta ja lo a Xina, Japan, Taiuan e la SUA.
La pais no ia vende uranio a Barat en la pasada car lo no ia suscrive la Trata Contra Crese Nucleal.
Ma la du nasiones ia comensa discutes en 2012 pos cuando la governa presedente ia cansela sua proibi longa.
Plu temprana en esta semana, Andrew Robb, la ministro de comersia, ia comenta ce Australia crede ce medios sufisinte esiste ja per serti ce on va usa la uranio sola per goles nonmilitar.
India depende forte de carbon per enerjia. Ma lo ave ance un campo peti de enerjia nucleal, per cual lo projeta un crese grande en la futur.
Ante la ariva de Abbott, Sanjay Bhattacharya, la ministro juntada de esternas barati, ia dise: "Per nos, Australia es un furnor major de recursos, spesial de la enerjia nesesada per nosa developa."
@T Australia va investiga la bonstate de enfantes migrante prisonida
@L aora_oji/2014/australia_va_investiga_la_bonstate_de_enfantes_migrante_prisonida
====== Australia va investiga la bonstate de enfantes migrante prisonida ======
3 febrero 2014
La Comision de Diretos Umana en Australia ia anunsia un investiga sur la nonlibria enforsada de enfantes ci xerca refuja.
On va investiga la bonstate, sania, e developa de la enfantes.
Plu ca mil enfantes es aora en sentros prisonal en Australia.
Esta inclui plu ca sento en Nauru, un sentro costal cual la NU e grupos de diretos ia condena per sua cualias povre.
@T Australia xerca pardona de Indonesia pos un viole de teritorio maral
@L aora_oji/2014/australia_xerca_pardona_de_indonesia_pos_un_viole_de_teritorio_maral
====== Australia xerca pardona de Indonesia pos un viole de teritorio maral ======
17 janero 2014
Australia ia demanda la pardona de Indonesia pos cuando barcones de sua marina ia entra acuas indonesian "sin intende", en taxe de para la ariva de refujadas.
Scott Morrison, la ministro per migra, ia dise ce Australia regrete profonda la aveni, ajuntante ce la ministro de relatas stranjer va ofre "un espresa de regrete nonrestrinjeda".
On reporta ce cisa la marina australian ia atenta forsa la revade de barcos de refujadas a Indonesia.
Relatas entre Jakarta e Canberra es ja tensada par causa de un disputa sur spia.
@T Australianes protesta contra un projeta de mata selacos
@L aora_oji/2014/australianes_protesta_contra_un_projeta_de_mata_selacos
====== Australianes protesta contra un projeta de mata selacos ======
5 janero 2014
Miles de persones ia partisipa en protestas en Australia contra un projeta de mata selacos grande.
La governa de Australia Ueste intende instala oncas tentante, prosima a la plaias popular de Perth, en responde a sete atacas matante par selacos en tre anios.
On va dona la taxe de manteni e patrulia estas a pexores comersial en la dias veninte. Cualce selaco con plu ca tre metres de longia va es xutada e dejetada.
Ma la protestores dise ce mata la selacos no es la bon responde, e ce lo va fa no plu ca dana la ecosistem delicata de la mar.
A mera un de la plaias, plu ca 4000 persones ia asembla per protesta.
@T Autor Binyavanga Wainaina anunsia sua omosesalia
@L aora_oji/2014/autor_binyavanga_wainaina_anunsia_sua_omosesalia
====== Autor Binyavanga Wainaina anunsia sua omosesalia ======
22 janero 2014
A sua aniversario 43, Binyavanga Wainaina, un autor major de Cenia, ia revela ce el es ge.
El es un de la africanes la plu bon conoseda ci ia fa un tal anunsia.
Atas omosesal es nonlegal en Cenia e multe otra paises african.
Nijeria ia adota resente un lege cual aumenta restrinjes a grupos ge, ma la presidente de Uganda ia impedi un lege simil.
@T Autos va flota en Israel
@L aora_oji/2014/autos_va_flota_en_israel
====== Autos va flota en Israel ======
25 junio 2014
On va construi un rede de autos flotante en Tel Aviv. Un anelo de 500 metres va es construida a la compleso de Industrias Airospasial de Israel.
Veculos per du persones va es suspendeda de cursos alta e magnetal, furninte un alternativa de stradas conjestada.
On previde ce la sistem inisial va funsiona ante la fini de 2015, e va gida a un rede comersial.
La intende es permete ce un pasajor usa sua telefoneta per comanda ce un veculo encontra el a un stasion spesifada, e vade alora direta a sua destina.
La veculos inisial va ateni un rapidia de asta 70 cilometres per ora, ma on previde la esiste de veculos multe plu rapida en la fase comersial.
On projeta ance otra sistemes simil tra la mundo, incluinte en Barat e la SUA, ma estas va depende de la susede de la sistem israeli.
La sistem SkyTran ave sua base a la parce rexercal de NASA en California, e on espera ce lo revolui la transporta publica.
@T Aviones cenian ataca islamistes somali
@L aora_oji/2014/aviones_cenian_ataca_islamistes_somali
====== Aviones cenian ataca islamistes somali ======
10 janero 2014
Cenia dise ce lo ia fa un ataca airal contra un campo islamiste en Somalia. 30 gerores ia es matada, incluinte comandores de al-Shabab, un grupo liada a al-Qaidah.
La ataca ia aveni en Garbarahey, prosima a la frontera con Cenia e Itiopia.
Reportas local dise ce multe construidas es aora destruida.
Cenia ave miles de soldatos en Somalia. Los aida la governa, cual es suportada par la Nasiones Unida, a combate al-Shabab.
@T Aviones pacistani bombi locas de la Taliban
@L aora_oji/2014/aviones_pacistani_bombi_locas_de_la_taliban
====== Aviones pacistani bombi locas de la Taliban ======
21 janero 2014
Aviones militar de Pacistan ia bombi locas suspetada de la Taliban en Waziristan Norde, pos un serie de atacas contra fortes de securia.
Un ofisior ia dise ce 25 gerores ia es matada par la bombardas en la area tribal, cual borda Afganistan.
En soldi, 20 soldatos pacistani ia es matada en un embosce a un convoia militar.
La Taliban de Pacistan ia promete aumenta sua atacas pos la mori de sua gidor en un ataca par avion autonom.
@T Avocatos per Morsi retira se de la prosede
@L aora_oji/2014/avocatos_per_morsi_retira_se_de_la_prosede
====== Avocatos per Morsi retira se de la prosede ======
17 febrero 2014
Avocatos per Mohammed Morsi, la presidente desponeda de Egipte, ia abandona sua prosede, do on acusa el de spia e conspira sur atas de teror.
Los ia retira se per protesta contra la fato ce Morsi e otra acusadas es restrinjeda en un caje de vitro acustical isolida.
On ia pospone aora la prosede asta 23 febrero.
La gidor pasada fronti cuatro prosedes diversa, de cual tre ia comensa ja.
@T Balenores japanes "desrespeta" Zeland Nova
@L aora_oji/2014/balenores_japanes_desrespeta_zeland_nova
====== Balenores japanes "desrespeta" Zeland Nova ======
10 febrero 2014
Un barcon de la marina japanes de xasa balenas ia entra a la Zona Economial Escluinte de Zeland Nova. La pais ia descrive esta como "profonda nonrespetosa".
La barcon ia es seguente un barco parteninte a Sea Shepherd (Pastor de Mar), un grupo ativiste, en la tarda de la semana pasada.
Diplomatas de Zeland Nova "ia espresa multe clar" ce la barcon japanes no es bonvenida.
La barcon ia iniora esta, provocante un protesta ofisial.
@T Ban Ki-moon parla sur la situa tensada en Gaza
@L aora_oji/2014/ban_ki-moon_parla_sur_la_situa_tensada_en_gaza
====== Ban Ki-moon parla sur la situa tensada en Gaza ======
10 julio 2014
Ban Ki-moon, la secretario jeneral de la Nasiones Unida, ia dise ce la situa en Gaza es estrema perilosa, e ia recomenda forte ce Israel e combatosas filastini sesa batalia.
El ia averti ce la area "no pote tolera un plu gera completa".
Israel ia dise ce Hamas ia xuta deses de rocetos a sites israeli en la note de mercurdi, seguente atacas de aira en Gaza par israelis.
Plu ca 60 filastinis ia mori de pos martedi en tal atacas contra combatosas. Ofisiores medical en Gaza dise ce un dui de la mores ia es siviles, incluinte femes e enfantes.
Oto filastinis ia es matada en un ataca de aira contra un casa prosima a Khan Younis, un vila sude, temprana a jovedi.
Un portavose militar israeli ia descrive la mores como "un trajedia -- no intendeda par nos", car persones ia revade tro pronto a la construida pos un averti telefonida.
Nove plu persones ia es matada en un ataca contra un cafe en la mesma vila.
La situa ia tensa en la semana pasada, cuando tre israelis joven ia es matada en la Riva Ueste ocupada, e un adolesente filastini ia es matada en Ieruxalim. Israel alega ce Hamas ia saisi e mata la tre jovenes. Hama nega lo.
A la dia pos la funerales de la tre jovenes, la filastini ia es saisida en Ieruxalim este e matada. La polisia ia aresta ses suspetadas iudi e dise ce lo pare ce la adolesente, de 16 anios, ia es matada par causa de sua nasionalia.
Ban Ki-moon ia dise: "La situa dejenerante gida a un spiral desendente de cual on ta pote rapida perde la controla. La risca ce la violentia va crese an plu es real."
El ia esije ce combatosas de Hamas para xuta rocetos, e ia recomenda forte ce la governa israeli restrinje sua e respeta obligas internasional de proteje persones nonmilitar.
La Consilio de Securia NU va consenta per discutes urjente sur la crise, plu tarda en jovedi.
@T Bangladex esperia un rompe major de eletrica
@L aora_oji/2014/bangladex_esperia_un_rompe_major_de_eletrica
====== Bangladex esperia un rompe major de eletrica ======
2 novembre 2014
On ia restora eletrica a la plu de Bangladex pos un rompe de potia tra la pais intera ier.
Injeniores ia susede repara sentros cual furni eletrica a sirca 70% de usores, e los espera reopera la otras oji.
Aclamas forte ia es oiada en la capital, Dhaka, cuando lus ia reveni par grado.
La rompe eletrical ia es la plu mal en Bangladex pos 2007, cuando un siclon ia dana la rede nasional per alga oras.
Per la rompe ier, autoriosas ia culpa la malfunsiona de un linia de transmete, cual ia causa ce sentros e susentros eletrical sesa opera.
La corda de tensa alta cual ia malfunsiona vade de Baharampur en Bangla ueste en Barat a Bheramara en Bangladex sude-ueste.
La rompe ia comensa sirca mediadia en ora local a saturdi, e ia afeta tota partes de la pais cual es liada a la rede nasional.
La ospitales e airoporto internasional de Dhaka ia usa jeneradores de crise per continua funsiona, ma multe ofisias ia debe envia sua empleadas a casa.
Furnis de acua ia es ance grave colpada, car multe de la pompas cual leva acua de su tera no ia pote opera.
Bangladex ia comensa emporta eletrica de Barat en otobre de la anio pasada.
@T Baratis protesta contra un crimin de odia contra un studiante
@L aora_oji/2014/baratis_protesta_contra_un_crimin_de_odia_contra_un_studiante
====== Baratis protesta contra un crimin de odia contra un studiante ======
2 febrero 2014
En Delhi, sentos de persones ia protesta contra la bate e mori de un studiante de universia ci ia veni de Barat norde-este.
Nido Tania ia ave 21 anios. El ia es bateda en mercurdi par botecores ci ia burla sua aspeta. El ia mori en la dia seguente.
On ia aresta du persones.
La caso ia lumina un disposa raziste e prejudosa contra membros de un minoria nativa de la norde-este de la pais.
@T Barcones de Xina e Vietnam colpa mutua
@L aora_oji/2014/barcones_de_xina_e_vietnam_colpa_mutua
====== Barcones de Xina e Vietnam colpa mutua ======
8 maio 2014
Barcones viet e xines ia colpa la un la otra en la Mar de Xina Sude, cuando la marina viet ia atenta impedi la xineses de institui un plataforma de petrolio en un area reclamada par ambos nasiones.
No fusiles ia es usada, ma ofisiores viet ia dise ce on ia usa canones de acua contra sua barcones. Alga marinores ia es ferida.
Esta es la aveni maral la plu grave entre la du paises en multe anios, e deses de barcos es aora en la area.
La vietes ia dise ce la barcones xines ia puxa sua barcones con intende, e ce esta es la ves tre de un tal xoca de pos 3 maio.
Ofisiores xines ia dise ce la plataforma es situada en la acuas teritorial de Xina.
A la mesma tempo, la polisia pilipina ia saisi un barco xines de pexa, e ia aresta sua 11 ecipores en un otra parte disputada de la Mar de Xina Sude. La ministeria de esternas xines ia descrive esta ata como provocante, e ia esije ce on libri direta la pexores, ci on ia prende ia un porto pilipina.
Xina reclama partes grande de acel mar, incluinte resifes e paradores de arena prosima a la costa de la Pilipinas. Tota de Vietnam, la Pilipinas, Brune, Malaisa, Xina, e Taiuan es en compete sur la posese de la area.
@T Barcones irani prosimi a la fronteras maral de la SUA
@L aora_oji/2014/barcones_irani_prosimi_a_la_fronteras_maral_de_la_sua
====== Barcones irani prosimi a la fronteras maral de la SUA ======
10 febrero 2014
A la ves prima, barcones irani de gera en la Mar Atlantica va naviga prosima a la fronteras maral de la SUA.
Esta es un responde de la presentia de barcones american en la Golfo Farsi.
La marina conteni un xasatorpedo e un barcon de furnis cual porta un elicotor.
La barcones ia comensa sua viaja en la mense pasada, e ia entra a la Atlantica tra acuas sudafrican.
@T Barcones revade de Suria sin armas cimical
@L aora_oji/2014/barcones_revade_de_suria_sin_armas_cimical
====== Barcones revade de Suria sin armas cimical ======
1 janero 2014
Barcones norsce e dansce, enviada per estrae la armas cimical de Suria, revade a porto en Cipros.
Esta indica ce Suria no va presenta sua cimicales ante la limita de tempo. Suria culpa un clima mal, stradas cluida, e linias cambiante de batalia.
Esta paso ia es intendeda como la ateni prima en un acorda per elimina la armas cimical de Suria ante la media de 2014.
La SUA e Rusia ia fa la acorda pos cuando on ia dirije rocetos plen de sarin, un gas nerval, a tre vilas en la zona cultival sirca Dimashq a 21 agosto, matante sentos de persones.
La potias ueste ia dise ce la ataca es fada par la fortes de la governa suri, ma presidente Bashar al-Assad ia culpa rebelores.
@T Barnaby Jack ia supradosa con drogas
@L aora_oji/2014/barnaby_jack_ia_supradosa_con_drogas
====== Barnaby Jack ia supradosa con drogas ======
4 janero 2014
Un reporta autopsial indica ce un pirata famosa de rede, ci ia mori en julio en San Francisco, ia supradosa con un misca de eroina, cocaina, e otra drogas.
Barnaby Jack, ci ia nase en Zeland Nova, ia es mor cuando on ia trova el en sua leto, a un semana ante cuando el ia intende fa un presenta publica.
Jack ia deveni famosa pos un demostra en 2010 en cual el ia pirati un automata de banco, tal ce lo ia distribui mone.
On ia conose el ance como un esperta major sur problemes trovable en la tecnolojia medical.
@T Batalias entre rebelores estende en la norde de Suria
@L aora_oji/2014/batalias_entre_rebelores_estende_en_la_norde_de_suria
====== Batalias entre rebelores estende en la norde de Suria ======
7 janero 2014
La batalia en Suria norde entre grupos competente de rebelores ia ateni la site Raqqa. La grupo potiosa ISIL (Stato Muslim de Irac e la Mediteraneo Este) ia es atacada a sua xeferia en la note.
On acusa ce la grupo ia tortura e esecuta publica alga persones, e ce lo ia prisoni sentos de jornalistes e ativistes en sua xeferia.
Un uni de moderadas e otra islamistes batalia per despone presidente Bashar al-Assad, e los oposa ISIL en alga partes de Suria norde.
La uni inclui rebelores de la Fronte Nusra, cual es ance fidosa a al-Qaidah. La Fronte Nusra e ISIL ia segue la mesma gidores de al-Qaidah ante sua separa.
Ma ante aora, on ia crede ce la Fronte Nusra ia atenta resta neutral en la batalia contra ISIL.
Raqqa, saisida par ISIL en la anio pasada, ia es la capital provinsal prima cual rebelores ia controla intera.
@T Beijing sufri en un nebla fumosa
@L aora_oji/2014/beijing_sufri_en_un_nebla_fumosa
====== Beijing sufri en un nebla fumosa ======
16 janero 2014
En Xina, on ia recomenda ce abitores de la capital, Beijing, es cauta pos un crese subita de contamina de aira.
Indicas en jovedi ia rejistra un cuantia plu alta, a plu ca 20 veses, ca la nivel de esposa recomendada par la Organiza Mundal de Sania.
Nebla densa fumosa ia redui la capasia de vide a sola alga sentos de metres. Rascasielos ia deveni velida, e un odor amarga ia pleni la aira.
Ofisiores ia recomenda la porta de un masca protejente si on debe vade a estra, e ia avisa ce enfantes e vea ta resta plu bon en casa.
@T Beljia aseta un lege de eutanasia per enfantes
@L aora_oji/2014/beljia_aseta_un_lege_de_eutanasia_per_enfantes
====== Beljia aseta un lege de eutanasia per enfantes ======
13 febrero 2014
La parlamento de Beljia ia aseta un lege cual permete eutanasia per enfantes con maladias matante, sin limita de eda.
86 votas ia favore la lege, e 44 ia rejeta lo. 12 persones ia asteni.
Cuando la re suscrive la lege, Beljia va deveni la pais prima en la mundo sin limita de eda per eutanasia.
Enfantes con maladias matante ci es en dole estrema va pote demanda eutanasia si sua jenitores acorda.
@T Berlusconi debe servi la comunia como puni per froda
@L aora_oji/2014/berlusconi_debe_servi_la_comunia_como_puni_per_froda
====== Berlusconi debe servi la comunia como puni per froda ======
16 april 2014
Un corte en Milan ia judi ce Silvio Berlusconi, la ministro xef pasada de Italia, debe servi la comunia per un anio en un casa de cura persones vea. La puni segue sua condena en 2013 per froda liada a la compra de diretos televisal par sua compania Mediaset en la desenio de 1990.
Sua avocatos ia dise ce los es "sasiada" ce la puni va permete ce el resta political ativa.
Berlusconi, ci ave 77 anios e es un bilionor, ia es envolveda en un serie de casos de corte. En la caso de Mediaset, on no ia prisoni el, car la sistem legal en Italia es pardonosa a persones con plu ca 70 anios.
La alternativa de servi la comunia ta es ce el abita como un prisonida en sua propre casa.
La jornalisme italian dise ce Berlusconi va labora probable per un dui de dia per semana a un casa de persones vea e descapasida, prosima a sua imobila estra Milan.
El va debe obedi un ora de retira e va es proibida de encontra persones con condenas criminal. Esta proibi aplica a un, e cisa plu, de sua asosiores. Ma el va es libre de viaja a Roma entre martedi e jovedi de cada semana.
El es ancora la gidor de Forza Italia, la alia conserviste cual es la oposa political xef, an si on proibi el de presenta se per eleje en la votas european cual va aveni en maio.
@T Berlusconi es prosededa per soborna
@L aora_oji/2014/berlusconi_es_prosededa_per_soborna
====== Berlusconi es prosededa per soborna ======
12 febrero 2014
Silvio Berlusconi, la ministro xef pasada de Italia, es prosededa en Napoli, su alega ce el ia soborna la junta de un senator a sua partito en 2006.
On alega ce la intende de acel ia es destabli la governa media-sinistriste cual ia ave la potia a la tempo.
Berlusconi ia perde sua imunia parlamental en 2013 cuando on ia esclui el de la Senato sur un condena de froda de imposta.
El no va es presente a la escuta, car la lege italian no obliga acel.
@T Berlusconi reveni con un acorda sur reformas
@L aora_oji/2014/berlusconi_reveni_con_un_acorda_sur_reformas
====== Berlusconi reveni con un acorda sur reformas ======
20 janero 2014
Silvio Berlusconi, la ministro xef pasada e controversa de Italia, ia revade a la sena political. El ia fa un acorda de reforma con un competor.
On ia esclui el de la parlamento en 2013 pos un condena per froda de imposta.
Ma el es ancora la gidor de Forza Italia, un partito oposante. El ia fa discutes longa con Matteo Renzi, la gidor de la Partito Democrata, asta tarda en saturdi.
La acorda va suporta proposas elejal e constitual per fa ce Italia deveni plu governable. La sistem presente ia lasa la pais con un serie de alias bambolante.
@T Boeing crea un telefoneta capas de autodestrui
@L aora_oji/2014/boeing_crea_un_telefoneta_capas_de_autodestrui
====== Boeing crea un telefoneta capas de autodestrui ======
28 febrero 2014
Boeing ia developa un telefoneta intelijente per comunicas secreta.
Si algun interfere con la telefon, lo sutrae automata tota datos e deveni nonusable.
La compania, plu bon conoseda per sua aviones, ia clari ce lo vole aida organizas a "reali sua misiones" con datos fidable.
La aparato es nomida Black ("Negra"). Alga otra telefonetas de securia alta apare ance en la mercato aora.
@T Boko Haram masacra un vileta nijerian
@L aora_oji/2014/boko_haram_masacra_un_vileta_nijerian
====== Boko Haram masacra un vileta nijerian ======
17 febrero 2014
En Nijeria, ativistes islamiste suspetada ia ataca un vileta e ia mata deses de persones.
La atacores ia asembla un grupo de omes en Izghe e ia fusili los. A pos, los ia visita casas, matante cadun ci los ia trova.
Ofisiores ia dise ce los suspeta la grupo Boko Haram, un grupo malfamosa per viole estrema e atacas nondistinguinte.
Boko Haram declara ce lo batalia per crea un stato muslim en Nijeria norde.
@T Bolivia va construi sua reatador nucleal prima
@L aora_oji/2014/bolivia_va_construi_sua_reatador_nucleal_prima
====== Bolivia va construi sua reatador nucleal prima ======
24 janero 2014
Evo Morales, la presidente de Bolivia, ia anunsia un projeta de construi la reatador nucleal prima en la pais.
Morales ia dise ce la developa de tecnolojia nucleal con intendes pasosa ia deveni stratejial importante per Bolivia.
Parlante a membros de la Congresa Bolivian, el ia dise ce Iran, Frans, e Arjentina ia ofre se como bonvolores per aida con la projeta.
En America Latina, la sola tre paises con sentros nucleal de eletrica es Brasil, Arjentina, e Mexico.
@T Bombas de baril mata deses de siviles en Suria
@L aora_oji/2014/bombas_de_baril_mata_deses_de_siviles_en_suria
====== Bombas de baril mata deses de siviles en Suria ======
3 febrero 2014
La fortes de la governa suri ia mata deses de siviles en atacas de aira en Aleppo, un site norde.
La Oserveria Suri per Diretos Umana dise ce sirca 90 persones -- de cual la majoria es siviles -- ia mori cuando elicotores ia cade bombas de baril en saturdi.
Aleppo es la sentro de batalias sever entre rebelores e la fortes de presidente Bashar al-Assad.
Entretempo, on reporta ce gerores liada a al-Qaidah ia mata ala la gidor de un militia islamiste competente.
@T Bombas jemelo en Beirut mata cuatro persones
@L aora_oji/2014/bombas_jemelo_en_beirut_mata_cuatro_persones
====== Bombas jemelo en Beirut mata cuatro persones ======
20 febrero 2014
A la min cuatro persones ia es matada, e deses ia es ferida, en un ataca con du bombas en la sude de Beirut, la capital de Lubnan.
Du bombas umana, usante un auto e un motosicle, ia esplode se en prosimia de un sentro cultural irani.
La esplodes ia causa multe dana a botecas e construidas, e ia ensende veculos.
Esta es la plu resente en un serie de atacas en la suburbes sude de Beirut, do Hezbollah ave un presentia forte.
@T Bombis de auto mata 14 en Baghdad
@L aora_oji/2014/bombis_de_auto_mata_14_en_baghdad
====== Bombis de auto mata 14 en Baghdad ======
4 febrero 2014
A la min 14 persones ia es matada en un serie de bombis de auto en e sirca Baghdad.
Bombas ia esplode en la distritos Hurriya e Baladiyat de la capital iraci. Du otras ia esplode en la vila prosima Mahmoudiya.
En Baghdad ueste, on ia trova ance cuatro corpos, de cual tota ia es fusilida a testa e ia mostra indicas de tortura.
La violentia setal ia aumenta tra Irac en la anio pasada. Lo ia ateni un nivel no videda de pos 2007.
@T Bombis en Baghdad mata 26 persones
@L aora_oji/2014/bombis_en_baghdad_mata_26_persones
====== Bombis en Baghdad mata 26 persones ======
27 febrero 2014
A la min 26 persones ia es matada en bombis sirca Baghdad, la capital de Irac.
17 ia es matada en un sola esplode a un mercato de motosicles usada en la distrito este de Site Sadr.
Lo pare ce acel bomba, cual ia feri 38 otras, ia es locada en un motosicle.
Ance en Site Sadr, sinco persones ia es matada e 14 ia es ferida par la esplode de un bomba fisada a un minibus.
@T Bor es recaturada de rebelores en Sudan Sude
@L aora_oji/2014/bor_es_recaturada_de_rebelores_en_sudan_sude
====== Bor es recaturada de rebelores en Sudan Sude ======
19 janero 2014
La militaria de Sudan Sude dise ce lo ia regania Bor, un vila stratejial, de fortes rebelante.
La armada ugandan ia dise ce lo ia aida en la opera.
Un portavose per la rebelores ia dise ce sua soldatos ia retira per razonas tatical.
Bor es la capital de la stato de Jonglei. En la batalia, cual ia dura tra un mense, lo ia pasa de un lado a la otra a alga veses.
En Itiopia, discutes per negosia un sesaspara continua.
@T Brahimi demanda pardona per manca de progresa sur Suria
@L aora_oji/2014/brahimi_demanda_pardona_per_manca_de_progresa_sur_suria
====== Brahimi demanda pardona per manca de progresa sur Suria ======
15 febrero 2014
Lakhdar Brahimi, la reconsilior de la Nasiones Unida, ia demanda pardona de la popla suri, pos la fini de discutes de pas en Genève sin progresa.
El ia fa discutes final con ambos lados, en un atenta ultima de fa alga progresa entre la governa e oposa suri.
Brahimi ia clari ce un problem importante ia es la refusa par la governa de discute la posible de un governa tempora.
On no ia fisa un data per un serie tre de discutes.
@T Brasil relasa moscitos per combate la denge
@L aora_oji/2014/brasil_relasa_moscitos_per_combate_la_denge
====== Brasil relasa moscitos per combate la denge ======
25 setembre 2014
Rexercores en Rio de Janeiro ia libri miles de moscitos infetada con un bateria cual supresa la maladia denge.
On espera ce los va reprodui se e deveni la majoria de moscitos, tal reduinte casos de la maladia. La bateria interselulal cual on introdui no pote es comunicada a umanas.
La stratejia es un parte de un projeta cual aveni ance en Australia, Vietnam, e Indonesia.
La program ia comensa en 2012. On va relasa 10 mil moscitos a cada mense per cuatro menses. La relasa prima ia aveni en Tubiacanga, en la norde de Rio.
La bateria, Wolbachia, es trovada en 60% de insetos. Lo condui como un vasin per la moscito de denge, preveninte ce la virus multipli en sua corpo.
Wolbachia ave ance un efeto a la reprodui. Si un mas contaminada fertili la ovos de un fema ci no ave la bateria, esta ovos no deveni larvas. Si ambos la mas e fema es contaminada, o si sola un fema ave la bateria, tota jeneras futur de moscito va porta la bateria.
En Australia, on ia trova ce la moscitos con Wolbachia ia deveni la majoria pos 10 semanas per promedia, sin ce rexercores nesesa constante relasa plu insetos contaminada.
La rexerca ia comensa a la Universia de Monash en Australia en 2008. La siensistes ia permete ce la moscitos nuri se de sua propre brasos tra sinco anios, par causa de temes ce la bateria ta pote infeta umanas e animales de casa.
La denge ia reapare en Brasil en 1981 pos un asentia de plu ca 20 anios. En la 30 anios seguente, on ia reporta 7 milion casos. Brasil ave aora la plu de casos de denge en la mundo: en la 5 anios pasada, 3,2 milion casos e 800 moris ia es reportada.
@T Brasil rompe un gang ci destrui la foresta
@L aora_oji/2014/brasil_rompe_un_gang_ci_destrui_la_foresta
====== Brasil rompe un gang ci destrui la foresta ======
28 agosto 2014
Autoriosas en Brasil dise ce los ia desasembla un organiza criminal sur cual los crede ce lo ia es la destruor la plu grande de la foresta de la Amazon.
On acusa ce la gang ia invade, talia, e arde areas grande de tera publica e ia vende nonlegal los per cultiva, e per come a pasto.
Seguente la Polisia Federal Brasilera, la grupo ia fa crimines con valua de plu ca $220 milion.
Un judor federal ia fa 14 comandas de aresta per membros alegada de la gang. On ia fa ance 22 comandas de xerca, e on interoga cuatro suspetadas.
La opera polisial covre cuatro statos de Brasil, incluinte São Paulo. On ia aresta ja sinco omes e un fem en la stato Pará en la norde de la pais.
La detalias es ancora nonclar, partal car la opera es focada sur un de la partes la plu distante e nonasedable de la foresta.
Froda par politicistes e polisiores resta comun en la interna de Brasil. Par esta causa, e ance par causa de problemes funsional en la governa federal, taliores de arbores e escavores pote labora sin es punida.
La membros de la gang pote reseta condenas de asta 50 anios en prison, an si 30 anios es la periodo la plu longa cual la leges brasilera permete ce un person resta en prison.
En la anio pasada, la governa brasilera ia dise ce la rapidia de desforesti en la Amazon ia crese denova par 28% entre agosto 2012 e julio 2013, pos anios de redui. En 2009 lo ia promete redui la desforesti par 80% ante 2020.
Brasil conteni la area la plu grande de la foresta Amazon. Esta es un area vasta do on trova un desi de tota spesies conoseda de animal e un dui de la forestas tropical de la planeta.
@T Brasileras eleje sua presidente
@L aora_oji/2014/brasileras_eleje_sua_presidente
====== Brasileras eleje sua presidente ======
26 otobre 2014
Miliones de brasileras va vota oji per un presidente nova en lo cual on descrive como la eleje la plu prosima en la pais en alga desenios.
La presidente esistente, Dilma Rousseff, de la Partito de Laborores (sinistriste) fronti Aécio Neves de la Partito Brasilera de Democratia Sosial (sentriste) en la fase du de la vota.
Ambos aspirores ia promete reinisia la economia la plu grande de America Latina e fa ce lo deveni plu competosa.
La sondas la plu resente ia mostra Rousseff con un vantaje pico supra la aspiror oposante, favoreda par la 52% o 53% de la sondadas, contra 47% o 48% ci favore Neves. Ma esta sondas conteni un marjin de era de plu o min 2%.
Brasileras povre, spesial en la norde-este, resta fidosa a Rousseff con grasias a la programes de aida sosial de sua partito.
El ia reseta ala sua suporta la plu grande en la fase prima de la eleje, a 5 otobre, recoliente cuasi 60% de la votas.
Ma brasileras rica, ci oposa tal politicas economial interveninte como impostas alta e controlas de la custa de gasolina, favore Aécio Neves ci bonveni la comersia.
En la mercatos finansial, on regarda el como capas de refresci la economia, pos cuatro anios de crese minima cual, tecnical, ia pone la pais a un state retrosededa.
Plu ca 140 milion brasileras va vota oji, ma multe va depende de lo ci gania la votas de la clase media en la sude-este industrialida.
@T California declara un state de secia
@L aora_oji/2014/california_declara_un_state_de_secia
====== California declara un state de secia ======
18 janero 2014
La governor de California ia declara un state de secia tra la stato. El ia recomenda ce abitores conserva acua en un anio cual va es cisa la nunca plu seca en la stato.
Par causa de la declara par Jerry Brown, cultivores va reseta aida, e on va emplea plu pompores.
La governor ia es presada a declara la secia, car la lagos de reserva ia deveni recordo basa.
On culpa la state seca per un focon de foresta cual ia destrui sinco casas a norde-este de Losa Angeles en jovedi.
@T California es tan seca ce lo risca no pote furni acua a abitores
@L aora_oji/2014/california_es_tan_seca_ce_lo_risca_no_pote_furni_acua_a_abitores
====== California es tan seca ce lo risca no pote furni acua a abitores ======
2 febrero 2014
En California, la departe de acua ia anunsia ce, a la ves prima, lo es posible ce lo no va pote furni acua.
Du tris de la abitores, e plu ca 400 000 ectares de tera cultivada, reseta alga o tota de sua acua de bevi e iriga de la departe.
En janero, on ia declara un state de secia tra la stato. La lagos de reserva ia diminui a niveles recordo basa.
Meteorolojistes ia averti ce 2014 pote es la anio la plu vea de pos la comensas de arcivos en California.
@T Calmia reveni en Missouri pos dias de protestas violente
@L aora_oji/2014/calmia_reveni_en_missouri_pos_dias_de_protestas_violente
====== Calmia reveni en Missouri pos dias de protestas violente ======
20 agosto 2014
Folas de protestores ia marxa pasosa tra Ferguson, la vila en la SUA cual ia esperia dias de scaramuxas sur la fusili de un adolesente negra par la polisia.
Sentos de polisiores ia es sur la stradas, ma los no ia envolve se.
La vila, en la stato Missouri, ia deveni denova calma pos dias de violentia en cual polisiores ia xuta gas lacrimojen e alga protestores ia lansa bombas de Molotov.
A 9 agosto, un polisior ia fusili e mata Michael Brown, ci ia ave 18 anios e no ia porta un arma. Atestores dise ce Brown ia es fusilida cuando el ia leva sua manos en posa de sede, ma suportores de Wilson dise ce el ia fusili en media de un combate con Brown.
La aveni ia crea coleria e frustra entre abitores local, de cual multe es convinseda ce on no ia puni ja la polisior, Darren Wilson. On ia dona a el un periodo ofisial de asentia de labora.
Multe protestores ia apare a cada note tra plu ca un semana. La polisia ia responde par pleni la vila con sentos de polisiores protejeda contra tumultas, e on ia critica esta como un responde tro forte.
La polisia ia aresta deses de persones, e protestas ia aveni en otra locas tra la pais.
Gidores political ia recomenda ce abitores resta en sua casas per permete ce un state pasosa deveni denova normal.
Ier, un otra om negra ia es fusilida en Missouri. Multe ia teme ce esta va mali la tensa en Ferguson. Ma la calmia ia reveni.
Oji, atestas contra Wilson va es presentada a un juria ci va deside esce on debe acusa el sur un crimin.
@T Canaba es legal vendeda en Colorado
@L aora_oji/2014/canaba_es_legal_vendeda_en_colorado
====== Canaba es legal vendeda en Colorado ======
2 janero 2014
Colorado deveni la stato prima en la SUA cual permete ce botecas vende canaba.
De 1 janero, 30 botecas en la stato comensa vende la droga per usas recreal. On nomi la dia "Mercurdi Verde".
En novembre 2012, Colorado e la stato Washington ia vota per legali la usa e posese de canaba par persones con plu ca 21 anios.
Washington no va permete la vende de la droga asta plu tarda en 2014.
Colorado e Washington es entre 20 statos cual ia aproba la usa medical de mariuana. La droga es ancora nonlegal par lege federal.
@T Canada ia spia sur pasajores en un airoporto
@L aora_oji/2014/canada_ia_spia_sur_pasajores_en_un_airoporto
====== Canada ia spia sur pasajores en un airoporto ======
1 febrero 2014
On reporta ce la departe de securia eletronical de Canada ia colie datos de viajores pasante tra un airoporto major.
Tra du semanas, la departe ia usa la sistem sin custa de rede sin filo en la airporto per catura informas de aparatos de pasajores nonsuspetante.
La revela ia veni de documentos esposada par Edward Snowden.
La mision xef de la departe es intersepi telefonis e trafica de rede estra la pais. Lo es proibida par lege de colie datos de cualcun en Canada sin un comanda spesial.
@T Canada mapa la fondo de mar artica
@L aora_oji/2014/canada_mapa_la_fondo_de_mar_artica
====== Canada mapa la fondo de mar artica ======
9 agosto 2014
Canada ia comensa un mision de mapa la fondo de la mar artica, per suporta sua intende de estende sua teritorio asta la Polo Norde.
La mision de ses semanas aveni entre reclamas competente de otra paises, incluinte Rusia.
Du rompejelos vade aora de Tera Nova (Newfoundland) per colie datos de un dorso su mar cual comensa prosima a la Insula Ellesmere e continua asta la polo. On crede ce la area inclui reservas grande de petrolio e gas.
En desembre 2013, Canada ia rejistra ofisial con la Nasiones Unida sua intende de crese multe sua frontera atlantica.
Rusia e Danmarc ia fa ance reclamas sur un area enorme de la fondo de mar sirca la Dorso Lomonosov.
Tota tre paises xerca un demostra siensal ce la dorso es un estende su mar de sua propre plano continental.
On estima ce la area conteni 13% de la petrolio nondescovreda de la mundo, e ance asta 30% de sua reservas ascondeda de gas natural.
Su la regulas de la NU, un nasion costal pote reclama la direto economial escluinte a recursos natural sur o su la fondo de mar, asta 200 milias maral (370 cilometres) ultra sua teritorio teral.
Ma si la plano continental estende ultra acel distantia, la pais debe furni datos a un comision NU cual ta fa alora recomendas sur la defini de un limita esterna.
@T Canada proposa cambias sur sitadania
@L aora_oji/2014/canada_proposa_cambias_sur_sitadania
====== Canada proposa cambias sur sitadania ======
7 febrero 2014
La governa canadian ia proposa cambias radisal a sua regulas sur sitadania.
Su la proposa, Canada ta pote cansela la sitadania de un person con nasionalia duple ci on ia condena de terorisme, spia, o tradi.
Aspirores de sitadania ta debe ance susede en un esamina de sabes pertinente, e es capas de parla o engles o franses.
Chris Alexander, la Ministro de Migra ia dise ce la sivitizania debe no es mera "un pasaporte oportun".
@T Canales de bus en Britan resta confusante indicada
@L aora_oji/2014/canales_de_bus_en_britan_resta_confusante_indicada
====== Canales de bus en Britan resta confusante indicada ======
2 febrero 2014
En la Rena Unida, alga comites de vila refusa clari sua indicadores de canales de bus, an si motoristes ia apela susedosa contra multas.
On introdui plu canales de bus per serti ce veculos publica es puntual. La autoriosas dise ce la multas preveni malusas de la sistem.
Ma motoristes dise ce la indicadores es tan confusante ce on pote entra a un canal de bus sin intende. En 2013, cuasi milion persones en England e Scotland ia es multada per esta.
Un apelor susedente ia comenta: "Cuando un canal fini a sinistra, un otra pote comensa cuasi direta a destra -- la sistem es simil a un embosce."
@T Cenia descovre paias a miles de laborores nonesistente
@L aora_oji/2014/cenia_descovre_paias_a_miles_de_laborores_nonesistente
====== Cenia descovre paias a miles de laborores nonesistente ======
21 novembre 2014
La governa de Cenia ia comanda un investiga pos descovre plu ca 12 mil nomes falsa en sua lista de empleadas.
La nomes inventada ia es trovada en setembre cuando autoriosas ia comensa rejistra biometrial tota ofisiores publica.
La consilio governal ia demanda ce du comisiones antifroda inisia esploras.
Detetores de la Departe de Investigas Criminal ia reseta ance la taxe de investiga ofisiores sur esta descovres.
Un esamina plu temprana en esta anio ia trova ce milion dolares, cisa plu, es perdeda a cada mense en paias a "laborores fantasmin", entre otra finansiales nonormal.
La governa suspeta ce empleadas pasada ia continua reseta salarios an pos sesa labora.
Plu ca 12 500 nomes de empleadas de la governa ci no ia presenta sua per la rejistra biometrial ia es sutraeda de la lista a la comensa de esta mense.
Uhuru Kenyatta, la presidente, la promete combate froda en la campo publica pos emprende sua posto en april de la anio pasada.
@T Chicago contra la carpas
@L aora_oji/2014/chicago_contra_la_carpas
====== Chicago contra la carpas ======
19 febrero 2014
La site Chicago en la SUA considera medios estrema per preveni ce pexes jigante infesta la Lagos Grande de America Norde.
Autoriosas esplora la idea de bloci la sistem de canales en la site, per impedi la entra de carpas asian a Lago Michigan.
La projeta ta pote custa asta $18 mil milion e ta disturba enorme la economia de la site.
On esamina ance posibles min custosa, incluinte crea amburgeres de la pexes e come los asta sua estingui.
@T Cimri Sude Nova anunsia leges nova contra violentia enebriada
@L aora_oji/2014/cimri_sude_nova_anunsia_leges_nova_contra_violentia_enebriada
====== Cimri Sude Nova anunsia leges nova contra violentia enebriada ======
21 janero 2014
En Australia, la stato de Cimri Sude Nova va introdui leges nova per severi la punis per violentia enebriada.
La medios inclui un condena minima de oto anios per atacas matante con un sola colpa de punio, influeda par drogas o alcol.
Botecas de alcol va clui plu temprana, e beverias en partes de Sydney va debe sesa servi bevidas a 03:00.
Esta segue la mori de un om de 18 anios ci ia es atacada en Sydney.
@T Claudio Abbado, xef de orcestra, mori a 80 anios
@L aora_oji/2014/claudio_abbado_xef_de_orcestra_mori_a_80_anios
====== Claudio Abbado, xef de orcestra, mori a 80 anios ======
20 janero 2014
Claudio Abbado, un xef italian de orcestra, ia mori a la eda de 80.
Sua carera ia comensa en La Scala, la teatro de opera en Milan, e el ia labora ala como dirijor musical asta 1986.
El ia mori en Bologna pos un maladia longa, per cual el ia debe cansela alga apares resente.
La gidor de la club de fanes de Abbado en Milan ia dise: "Esta es un momento tan dolosa. Me no pote parla."
@T Coleria contra Erdoğan pos un desastre de mina turces
@L aora_oji/2014/coleria_contra_erdogan_pos_un_desastre_de_mina_turces
====== Coleria contra Erdoğan pos un desastre de mina turces ======
15 maio 2014
Pos un desastre matante en un mina de carbon en la vila Soma en la ueste de Turcia, la popla ia coleri contra sua governa.
Persones en la vila ia cria insultas en cuando los ia ensirca la auto de Recep Tayyip Erdoğan, ci ia visita la sena. Protestores ia combate con la polisia en Istanbul e Ankara.
Un esplode a martedi ia causa la colasa de la mina, matante a la min 245 laborores.
Salvores xerca ancora deses de minores mancante, sur ci on teme ce los ia mori. On ia salva cuasi 450 laborores, ma la trova de survivores nova ia sesa, e la state de plu ca 100 es ancora nonconoseda. On ia trata otodes de la salvadas per sua feris, cual no ia es grave.
La tera sirca la ospital es ocupada par la familias de la minores. Sua espeta ia deveni un vijila. Alga de los senta con regarda fisada a la tera. Otras plora. De tempo a tempo, paramedicistes porta a via algun ci ia desmaia.
Protestores ia pedi la auto de Erdoğan, clamante per sua resinia, pos cuando el ia fa un confere jornaliste sur la desastre. Cuando el ia emerji, el ia debe refuja sua en un boteca, ensircada par sua gardacorpos.
On ia critica sua calosia pos cuando el ia defende sua governa par refere a multe otra asidentes de mina tra la mundo. El ia promete un investiga plen.
Entretempo, polisia en la capital, Ankara, ia xuta gas lacrimojen a sirca 800 protestores ci ia atenta marxa de un universia a la ministreria de enerjia. Protestas ia aveni ance en Istanbul, estra la xeferia de la compania cual posese la mina.
@T Colombia permete un posmedia libre afin on regarda la futbal
@L aora_oji/2014/colombia_permete_un_posmedia_libre_afin_on_regarda_la_futbal
====== Colombia permete un posmedia libre afin on regarda la futbal ======
4 julio 2014
Juan Manuel Santos, la presidente de Colombia, ia permete ce laborores governal sesa labora a la posmedia de venerdi per pote vide la ecipo nasional jua contra Brasil, en un max de la nivel du ante la final de la Copa Mundal de futbal.
El mesma va vola a Brasil per regarda la max, cual va es juada en Fortaleza.
Colombia ia ateni nunca esta grado de la torneo a ante, e sua susede en esta anio ia crea un senti de joia tra la pais. Ma on va proibi vendes de alcol a la dia de la max, car violes familial ia crese subita pos la vinse prima de Colombia.
Angelino Garzón, la vispresidente, ia recomenda ance ce ofisias de governa local permete un posmedia libre a sua empleadas. La maior de Cali -- la site tre de la plu grandes de la pais, e conoseda per sua selebras -- ia dise ce el va dona la mesma permete.
Colombia ia gania tota de la cuatro maxes cual lo ia jua en esta Copa Mundal. Ma la polisia ia es clamada a cuasi 5000 veses en e pos la max prima a 14 junio, cuando Colombia ia vinse Elas. En sola acel note, nove persones ia es matada en combates en Bogotá, la capital.
En responde, multe sites ia proibi vendes de alcol a dias de max. Esta ia redui notable la cuantia de avenis violente. Posesores de bares e tavernas ia protesta ce la proibi priva los de revenu.
En alga sites, la autoriosas ia proibi ance ce persones porta publica farina e crema de rasa, car la lansa de ambos en selebras ia gatili multe combates.
Si Colombia vinse a venerdi, los va jua contra o Deutxland o Frans en la antefinal.
@T Colombia recorda sua autor la plu selebrada
@L aora_oji/2014/colombia_recorda_sua_autor_la_plu_selebrada
====== Colombia recorda sua autor la plu selebrada ======
23 april 2014
Colombia onora sua autor la plu selebrada, Gabriel García Márquez, la premior Nobel ci ia mori a jovedi a la eda de 87 anios.
La presidente, Juan Manuel Santos, ia gida un rituo en la catedral de Bogotá, do la sores e otra membros de la familia de la autor ia es presente.
A lundi, on ia fa un onora formal de García Márquez en la Site Mexico, do la autor ia abita.
On ia seni el en un rituo privata de familia en Mexico en la semana pasada. La familia ancora no ia revela lo cual los intende fa con sua senes. On ia sujesta ce cisa los va es divideda entre sua pais de nase e Mexico, sua pais de abita tra alga desenios.
Organizores de la aveni en catedral de Bogotá ia dise ce lo no va ave un natur relijiosa. An tal, lo ia comensa con preas gidada par Rubén Salazar Gómez, la arcibispo de Bogotá.
La Orcestra Simfonial Nasional de Colombia e la Sosia Coral de Santa Sesilia ia jua alora la Misa de Moria de Mozart. La rituo ia es direta difusada par la televisa e radio nasional, e ance sur scermos jigante estra la catedral.
A martedi, per coaveni con la Dia Mundal de Libro, colombianes va recorda plu García Márquez par organiza lejes de sua noveleta "Nun scrive a la coronel" a plu ca 1000 bibliotecas, parces, scolas, e universias.
@T Colombia va litiga empleadas de un compania SUA de carbon
@L aora_oji/2014/colombia_va_litiga_empleadas_de_un_compania_sua_de_carbon
====== Colombia va litiga empleadas de un compania SUA de carbon ======
1 febrero 2014
Eduardo Montealegre, la avocato prosedente xef de Colombia, ia dise ce el va litiga ses empleadas de Drummond, un compania de mina de carbon, sur un desastre de ambiente en janero 2013.
La compania, de la SUA, ia malversa sentos de tones de carbon en la mar a Santa Marta, a la costa caribean de Colombia, en atenta salva un barcasa afondante.
Drummond ia dise ce lo regrete la aveni, descrivente lo como "un asidente industrial".
On ia comanda ja ce la compania paia un multa de $3,5 milion.
@T Comentas ofendente sur autonomia scotes
@L aora_oji/2014/comentas_ofendente_sur_autonomia_scotes
====== Comentas ofendente sur autonomia scotes ======
17 agosto 2014
La ministro xef de Scotland ia dise ce comentas par la ministro xef de Australia sur autonomia scotes es "fol, ipocrita, e ofendente".
Alex Salmond ia reata pos cuando Tony Abbott ia informa un jornal ce "on no vide fasil como la mundo ta es aidada par un Scotland autonom".
Abbott ia comenta ance ce los ci vole divide la Rena Unida "no es la amis de justia e libria", e ce "la paises ci ta aclama la idea no es los de ci on ta desira sua acompania".
Salmond ia dise ce esta ofende la popla scotes, e ce la comentas es ipocrita car Australia mesma es autonom e susedosa.
Votores en Scotland va vota a 18 setembre sur la demanda "Esce Scotland debe es pais autonom?".
La governa scotes crede ce la uni de 300 anios no conveni plu. Ma la governa de la RU oposa la cambia, disente ce Britan es entre la unis la plu susedosa de mundo.
La presidente de la SUA, Barack Obama, e la ministro xef de Xina, Li Keqiang, ia indica ja ce los suporta reteni la Rena Unida.
En sua visita a London en la semana pasada, Abbott ia discute ance con Philip Hammond, ministro brites de esternas, sur la crise en Ucraina e la cade de avion MH17 ala.
@T Comores es salvada de un restorante subita inondada
@L aora_oji/2014/comores_es_salvada_de_un_restorante_subita_inondada
====== Comores es salvada de un restorante subita inondada ======
16 febrero 2014
En la sude de England, la armada e servis de crise ia salva 32 persones ci ia deveni trapida par un ondon inondante en un restorante sur plaia.
La fenetras de la restorante ia es ance rompeda par calculos lansada par ventas ferose en la note de venerdi.
Un comor ia dise ce la esperia "ia es alga simil a la Titanic".
Un portavose de la gardacosta ia descrive la clima como "estrema perilosa".
@T Conjesta estrema entre Arabia Saudi e Barain
@L aora_oji/2014/conjesta_estrema_entre_arabia_saudi_e_barain
====== Conjesta estrema entre Arabia Saudi e Barain ======
26 febrero 2014
Miles de viajores dial fronti conjestas de trafica de oto oras per traversa un via levada de 26 cilometres entre Arabia Saudi e la isola de Barain.
La filos dura asta tarda en la note.
La cuantia de duanores a la frontera no sufisi per maneja la deses de miles de persones ci vole traversa a cada dia.
La departes de trafica e de pasportas culpa la un la otra per la conjesta estrema.
@T Consentas separada ma prosima de la governas de Scotland e la Rena Unida
@L aora_oji/2014/consentas_separada_ma_prosima_de_la_governas_de_scotland_e_la_rena_unida
====== Consentas separada ma prosima de la governas de Scotland e la Rena Unida ======
23 febrero 2014
En lundi, ministros de Scotland e la Rena Unida va fa consentas separada en la norde-este de Scotland, ante un referendo sur autonomia scotes.
La consentas va aveni a un distantia de min ca 16 cilometres la un de la otra, en Aberdeen e un vila prosima.
Esta va es sola la ves du en plu ca 90 anios do la consilio completa de ministros de la RU ia consenta en Scotland.
La norde-este es la sentro de la industria de petrolio e gas de la pais. On previde ce ambos governas va fa anunsias en relata a acel campo.
@T Consilias ofisial per trata xoca en enfantes es matante
@L aora_oji/2014/consilias_ofisial_per_trata_xoca_en_enfantes_es_matante
====== Consilias ofisial per trata xoca en enfantes es matante ======
15 janero 2014
Lo es posible ce miles de enfantes mori en cada anio car la Organiza Mundal de Sania no ia refresci sua consilias per trata los ci sufri de xoca.
Rexercores dise ce un consilia de dona cuantias grande de licuida pote mata.
La regulas ia es refrescida en 2013, ma los no recomenda un cambia. La rexercores descrive la situa como "deludente e confondente".
La OMS dise ce lo debes es "multe vijilante" cuando lo ajusta sua regulas gidante. Lo labora per refresci denova los ante la media de 2015.
@T Construidas colasa en Barat
@L aora_oji/2014/construidas_colasa_en_barat
====== Construidas colasa en Barat ======
30 junio 2014
On teme ce plu ca 100 persones es ancora trapida pos la colasa de un construida en Barat sude.
A la min nove ia mori e alga otras ia es ferida a saturdi cuando la construida de 12 niveles, ancora no completida, ia cade en Chennai, en un pluve forte.
A mera alga oras plu temprana, un construida de cuatro niveles ia colasa en Delhi, la capital. Esta ia mata 10 persones, de cual sinco ia es enfantes.
Colasas de construidas no es noncomun en Barat. Per multe de los, on culpa un nivel laxe de securia e la usa de materias de cualia basa.
On ia aresta a la min du ofisiores de la compania de construi en relata a la colasa en Chennai, en la stato sude Tamil Nadu.
Ecipos de salvores, usante palas e utiles de talia, continua xerca survivores. Sirca 130 laborores es ancora su la detrito.
On ia salva plu ca 25 persones asta aora, e la polisia ia comensa un investiga.
@T Contrabandores envia cocaina a supramercatos par era
@L aora_oji/2014/contrabandores_envia_cocaina_a_supramercatos_par_era
====== Contrabandores envia cocaina a supramercatos par era ======
8 janero 2014
En Deutxland, la polisia en Berlin ia trova 140 cilogrames de cocaina ascondeda en caxas de bananas, cual contrabandores ia envia par era a supramercatos.
La cocaina ave la valua de $8,2 milion, e ia es enviada a sinco botecas de Aldi-Nord.
On crede ce la drogas ia ariva en Hamburg pos traversa la mar de Colombia, e ce on ia transporta los par camion a Berlin.
Esta es la saisi la plu grande de cocaina en Berlin en multe anios.
@T Corea Norde aresta un misionor australian
@L aora_oji/2014/corea_norde_aresta_un_misionor_australian
====== Corea Norde aresta un misionor australian ======
20 febrero 2014
Corea Norde ia aresta un misionor australian, en dise de sua sposa.
John Short ave 75 anios. El ia fa sua visita du a Corea Norde con un grupo de turisme cuando on ia aresta el en Pyongyang.
Sua sposa ia clari a jornalistes ce sua sposo no ia atenta asconde sua labora, e ce el ia porta materia relijiosa en tradui corean.
Un portavose per la ministro de esternas australian ia comenta ce la governa es consensa de la aresta.
@T Corea Norde averti sur reunis con Corea Sude
@L aora_oji/2014/corea_norde_averti_sur_reunis_con_corea_sude
====== Corea Norde averti sur reunis con Corea Sude ======
7 febrero 2014
Corea Norde ia menasa cansela reunis de familia con la Sude, a la dia pos acorda organiza los.
Sua autoriosa militar xef ia declara ce lo va reconsidera la acorda si eserses militar juntada de Corea Sude e la SUA aveni.
La anunsia ia dise ce "dialoga e eserses de gera" no pote vade con mano en mano.
La du Coreas ia fa reunis per familias divideda en 2010, e la seguentes es projetada per 20 febrero.
@T Corea Norde demanda reconsilia con la Sude
@L aora_oji/2014/corea_norde_demanda_reconsilia_con_la_sude
====== Corea Norde demanda reconsilia con la Sude ======
24 janero 2014
Corea Norde ia envia un letera publica a la Sude, demandante reconsilia e un sesa de "atas militar enemin".
La letera ia es publicida en la jornalisme nasional de Corea Norde, a alga semanas ante cuando Corea Sude va fa eserses militar en junta con la SUA.
Corea Sude ia iniora la letera, disente ce lo ave "un motiva ascondeda".
Lo es tradisional ce tensas sur la penisola corean aumenta ante la eserses anial. Pyongyang ia condena la eserses como provocante.
@T Corea Norde no nega un siberataca contra un filma
@L aora_oji/2014/corea_norde_no_nega_un_siberataca_contra_un_filma
====== Corea Norde no nega un siberataca contra un filma ======
2 desembre 2014
Corea Norde ia refusa nega un envolve en un siberataca contra Sony Pictures cual ia presede la publici de un filma sur la gidor Kim Jong-un.
Sony investiga pos cuando sua computadores ia es atacada e filmas nonpublicida ia deveni disponable en la interede.
En junio, Corea Norde ia cexa a la Nasiones Unida e la SUA sur la filma comedial La intervisa.
En la filma, Seth Rogen e James Franco ata como du reportores a ci on permete un conversa con Kim Jong-un. La CIA enscrive alora la du per asasina el.
Corea Norde ia descrive la filma como un ata de gera e "un sponsori nondesemblada de terorisme", e ia recomenda ce la SUA e la Nasiones Unida impedi lo.
La sistem de computadores a Sony Pictures, con base en California, ia fali en la semana pasada, e piratas de rede ia pone alora un cuantia de filmas ancora nonpublicida a locas de descarga enlinia.
Entre la titulos es un varia nova de la filma clasica Annie, cual on no ia intende publici ante 19 desembre.
Cuando on ia demanda esce la governa de Corea Norde ia es envolveda en la ataca, un portavose ia responde: "La fortes enemin relata tota a Corea Norde. Me consela jentil ce vos espeta mera e vide."
A lundi, Sony Pictures ia dise ce lo ia restora alga servis importante cual lo ia debe descomuta pos la ataca.
Lo ia dise ance ce lo labora con polisiores per investiga la ataca, ma ia fa no referes a Corea Norde.
La FBI ia confirma ce lo investiga. Lo ia averti ance otra comersias SUA ce piratas nonconoseda ia lansa un siberataca con programes vil destruosa.
@T Corea Norde viole un frontera maral de la Sude
@L aora_oji/2014/corea_norde_viole_un_frontera_maral_de_la_sude
====== Corea Norde viole un frontera maral de la Sude ======
25 febrero 2014
Un barcon patruliante de Corea Norde ia viole un frontera maral de la Sude a plu ca un ves en la tarda de lundi.
La barcon ia spende alga oras a sude de la frontera, prosiminte a un isola de Corea Sude. Pos avisas repeteda de la Sude, lo ia revade.
Corea Norde disputa la frontera maral e sua barcos ia traversa lo en la pasada.
Esta aveni a media de eserses juntada entre la armadas de la SUA e Corea Sude, cual Pyongyang oposa.
@T Corea Sude projeta dupli la custa de sigaretas
@L aora_oji/2014/corea_sude_projeta_dupli_la_custa_de_sigaretas
====== Corea Sude projeta dupli la custa de sigaretas ======
12 setembre 2014
La governa de Corea Sude ia proposa un dupli cuasi de la custa de sigaretas, per atenta redui la cuantia de fumores en la pais.
Lo intende alti la custa promedia per paceta a 4500 uon ($4,35), no plu tarda ca la comensa de la anio veninte. La custa presente es 2500 uon.
Ma la proposa es forte oposada, e va es cisa cambiada en parlamento.
Sirca 41% de omes fumi en Corea Sude. Esta es entre la proportios la plu alta en la mundo developada. La proportio intera de fumores en la pais es 23%.
La custa de sigaretas no ia alti de pos 2004, cuando lo ia crese par 500 uon. Acel ia redui la cuantia de fumores par 15%.
Ance su la proposa, fabricores de sigaretas ta debe primi avertis con imajes sur sua produidas, e alga spesies de anunsia tabaco ta es proibida.
La governa espera ance ce la cambia va jenera 2,8 milion milion uon par impostas.
La oposores descrive la cambia como "enganosa". Los dise ce persones de revenu basa ta paia final plu, car plu de los fumi ca en otra grupos.
@T Corea Sude reteni sua ministro xef pos la desastre de naveta
@L aora_oji/2014/corea_sude_reteni_sua_ministro_xef_pos_la_desastre_de_naveta
====== Corea Sude reteni sua ministro xef pos la desastre de naveta ======
26 junio 2014
Chung Hong-won, la ministro xef de Core Sude ci ia ofre resinia en april sur la desastre de la naveta Sewol, va reteni sua posto.
La presidente, Park Geun-hye, ia anunsia ce el va reteni Chung, en un deside cual el ia descrive como "angusosa".
Du aspirores ci el mesma ia eleje ia atrae controversia, obligante los a retira sua proposas.
La governa ia deveni forte criticada per la afonda de la naveta a 16 april, en cual sirca 300 persones ia mori.
Criticistes regarda la governa como prosedable sur la taxes urjente de responde e salva: alga persones crede ce estas no ia sufisi e ia pote salva plu vives.
La barcon ia porta 476 pasajores, de ci la plu ia es scolores.
Park ia reorganiza ja sua consilio e recambia alga ministros. El ia promete ance reformi la burocratia per elimina froda e perosia.
La person prima ci Park ia proposa per la ministro xef nova ia es Ahn Dai-hee, un judor pasada de la Corte Suprema. Ma el ia es criticada sur la cuantia de mone cual el gania en la campo privata pos sua jubila.
Park ia eleje alora Moon Chang-keuk, un jornaliste pasada. Ma alga persones ia acusa ce el ia favore tro Japan en sua articles e comentas.
@T Corea Sude va crea utiles de siberataca
@L aora_oji/2014/corea_sude_va_crea_utiles_de_siberataca
====== Corea Sude va crea utiles de siberataca ======
21 febrero 2014
Corea Sude intende developa utiles de siberataca per atenta dana complesos nucleal de Corea Norde.
La ministreria de defende vole crea armas simil a Stuxnet, la program desiniada per ataca complesos de rici nucleal en Iran.
On ia dise ce soldatos de Corea Sude va fa misiones usante la utiles.
Un esperta sur securia de computadores ia dise ce la usa de tal armas pote es "multe perilosa".
@T Coreanes sude ariva en Corea Norde per reunis
@L aora_oji/2014/coreanes_sude_ariva_en_corea_norde_per_reunis
====== Coreanes sude ariva en Corea Norde per reunis ======
20 febrero 2014
Plu ca sento coreanes sude ia ariva en Corea Norde per reunis con sua relatadas -- la tal avenis prima de pos 2010.
La reunis segue un clama par Corea Norde per boni relatas entre la du lados. Los va aveni entre 20 e 25 febrero.
Los pertine a familias ci ia deveni separada pos la Gera Corean. La relatadas no ia vide la un la otra tra desenios.
La reunis presede eserses militar projetada par la SUA e Corea Sude, cual va comensa en lundi.
@T Cosinores franses oposa fotos de sua comedas
@L aora_oji/2014/cosinores_franses_oposa_fotos_de_sua_comedas
====== Cosinores franses oposa fotos de sua comedas ======
15 febrero 2014
Du xefes de cosina franses, ci ia reseta stelas de Michelin, oposa clientes ci fa fotos de sua comedas.
Gilles Goujon maneja la restorante L'auberge du vieux puits ("La otel de la poso vea") en Frans sude. El dise lo es noncortes si on fa fotos de comeda.
Plu importante per el, sempre cuando fotos de sua creadas apare en redes sosial, esta "sutrae la surprende, e un pico de mea propria inteletal".
Un otra xef, Alexandre Gauthier de la restorante Grenouillère en Frans norde, ia ajunta an un simbol de "no cameras" a sua menu.
@T Cuasi 50 persones es matada par bombas de auto en Irac
@L aora_oji/2014/cuasi_50_persones_es_matada_par_bombas_de_auto_en_irac
====== Cuasi 50 persones es matada par bombas de auto en Irac ======
19 febrero 2014
En Irac, a la min 49 persones ia es matada en un serie de bombas de auto en la sites de Baghdad e Hilla.
La esplodes veni a un dia pos cuando 23 persones, cisa plu, ia es matada par bombas en la capital.
En la mense pasada, plu ca mil persones ia mori en tal atacas, xef contra blancos xia e governal.
No organiza ia declara sua culpablia, ma grupos combatosa suni ia ataca ja areas xia en la pasada.
@T Cuasi milion persones es deslocada par la batalias en RAS
@L aora_oji/2014/cuasi_milion_persones_es_deslocada_par_la_batalias_en_ras
====== Cuasi milion persones es deslocada par la batalias en RAS ======
4 janero 2014
La cuantia de persones deslocada en la Republica de Africa Sentral ia aumenta plu ca duplinte de pos desembre. La cuantia es aora 935 000.
Sola en la capital, Bangui, sirca 500 000 ia fuji de sua casas. Acel es cuasi un dui de la popla de la site. 60% de la deslocadas es enfantes.
La violentia cresente, entre gerores cristian e muslim, impedi laboras per ateni los cual nesesa urjente la aida.
Multe governas stranjer ia comensa ja sorti sua sitadanes.
@T Cuatro persones es matada a un sinagoga en Ieruxalim
@L aora_oji/2014/cuatro_persones_es_matada_a_un_sinagoga_en_ieruxalim
====== Cuatro persones es matada a un sinagoga en Ieruxalim ======
18 novembre 2014
A la min cuatro israelis ia es matada e oto ia es ferida cuando du omes con pistoles, coteles e axas ia ataca a un sinagoga en la ueste de Ieruxalim.
La atacores ia es filastinis de Ieruxalim Este, e la polisia ia mata los par fusili.
Ieruxalim ia esperia un aumenta de tensa entre filastinis e israelis, en un serie de atacas matante con relata a un santeria disputada.
La ministro xef de Israel, Benjamin Netanyahu, ia promete responde "con mano forte a la omiside savaje".
El ia declara: "Esta es un resulta direta de provoca gidada par Hamas e Abu Mazen [= Mahmoud Abbas, la presidente filastini] cual la comunia internasional iniora nonsaja."
Plu temprana en esta anio, Hamas e la partito Fatah de Abbas ia acorda formi un governa unida. Israel ia denunsia acel.
Hamas e Jihad Muslim, un otra grupo filastini de combatosas islamiste, ia loda la ataca. Israel ia eticeti ambos grupos como organizas teroriste. Abbas ancora no ia comenta.
La atacas ia aveni a un loca de seminario relijial en un area xef ortodox de la parte Har Nof de la site.
Imajes postada a la rede par un portavose per la militaria israeli mostra un axeta sanguosa de carnor, parente usada en la ataca, en la construida. On vide ance un om ferida ci porta ancora sua xal de prea.
La polisia ia clui la area. La ses adorores e du polisiores ferida es tratada en ospitales de Ieruxalim. On reporta ce cuatro es en un state grave.
En semanas resente, combatosas filastini ia fa du atacas matante contra paseores en la site, entre anunsias ce Israel intende construi plu casas en Ieruxalim este.
En otobre, un rabi major ia es ferida par fusil par un filastini a un compleso relijial importante en la site.
La compleso, conoseda a iudis como la Monte de Templo, e a muslimes como al-Haram al-Sharif, es la loca la plu santa de iudisme, e la mascita al-Aqsa es la loca tre de la plu santas de Islam.
Campaniores iudi ortodox en Israel oposa un proibi durante contra prea par iudis en la compleso.
Filastinis desira Ieruxalim Este per la capital de un pais futur, ma Israel ocupa ja lo de pos 1967.
@T Cubanes es xocada par la presos de autos stranjer
@L aora_oji/2014/cubanes_es_xocada_par_la_presos_de_autos_stranjer
====== Cubanes es xocada par la presos de autos stranjer ======
4 janero 2014
Autos fabricada en otra paises es aora vendeda en Cuba a la ves prima de pos la revolta en 1959. Ma cubanes es xocada par la presos asurda.
La governa monopoli autos nova, e lo aumenta la presos par 400% o plu.
Un Peugeot 508 es comprable en Cuba per $262 000, ma la salario promedia es sirca $20 per mense.
La governa razona ce lo va ajunta la profitas a un reserva spesial per developa la sistem de transporta publica, cual es aora comun en un state ruinada.
On ia aboli ance la nesesa de un lisensa per compra veculos nova.
En pasada, on ia dona lisensas a alga artistes, atletas, o medicistes ci labora stranjer, afin los compra un auto per un preso relatada a sua ganias de mone stranjer. Contra $5000, los ia pote usual oteni un bon auto usada, regarda como un paia ajuntada per servis a la pais.
@T Delhi comensa un servi de telefon contra froda governal
@L aora_oji/2014/delhi_comensa_un_servi_de_telefon_contra_froda_governal
====== Delhi comensa un servi de telefon contra froda governal ======
10 janero 2014
La governa en Delhi, la capital de India, ia abri un numero de telefon per aida persones a trata esijes de soborna par ofisiores governal.
La numero es un stratejia nova de la partito Umana Comun cual governa Delhi, suportada par la partito de Congresa.
Lo ia comensa funsiona en lundi, e es abrida tra 12 oras per dia. On intende ce un ofisior va retelefoni a cada usor, ofrente conselas sur trucos per trapi la sobornada.
@T Delhi dise ce on pote progresa en la disputa sur un diplomata arestada
@L aora_oji/2014/delhi_dise_ce_on_pote_progresa_en_la_disputa_sur_un_diplomata_arestada
====== Delhi dise ce on pote progresa en la disputa sur un diplomata arestada ======
12 janero 2014
En India, Salman Khurshid, la ministro de relatas stranjer, ia atenta desasentua un disputa con Washington sur un diplomata indian ci on ia aresta en la SUA.
A reportores en Delhi, el ia dise ce lo no es vera ce la negosias ia deveni noncapas de progresa. El ia predise ce problemes va es solveda.
La disputa ia comensa cuando on ia aresta la diplomata, Devyani Khobragade, en New York e ia acusa el sur froda de visa e sur paia nonsufisinte a sua manejor de casa.
El ia reveni aora a India pos lo cual ia pare es un acorda con la SUA.
@T Delhi usa imitores per asusta simias
@L aora_oji/2014/delhi_usa_imitores_per_asusta_simias
====== Delhi usa imitores per asusta simias ======
2 agosto 2014
On emplea cuatrodes omes barati ci imita simias, per asusta la simias vera a via de la parlamento e otra construidas governal en Delhi.
La omes fa ruidos xiliante, simil a los de langures de fas negra, per asusta la macacas de fas roja.
Miles de macacas vaga en la stradas de la capital, destruinte jardines e ofisias, e atacante persones per reseta comedas.
Ma la animales es regardada como santa par indus, ci nuri frecuente los, corajinte los a resta.
A ante, la autorias de Delhi ia usa langures vera per teni simias a distantia de la compleso parlamental.
Ma on ia debe abandona esta pratica pos protestas par ativistes sur diretos de animales. Un corte ia judi ance ce la teni de simias caturada es un ata cruel.
Aora, un grupo talentosa de omes asconde pos arbores e imita la crias e abaias de langures.
La popla grande de simias vagante es ja un problem tra tempo longa en Delhi. On ia trova los en trenes de metro o vagante tra parlamento. Los ia invade an la ofisia de la ministro xef.
@T Dennis Rodman canta "Bon aniversario" a Kim Jong-un
@L aora_oji/2014/dennis_rodman_canta_bon_aniversario_a_kim_jong-un
====== Dennis Rodman canta "Bon aniversario" a Kim Jong-un ======
9 janero 2014
En Pyongyang, Dennis Rodman, un bascetbalor famosa american, ia canta "Bon aniversario" a Kim Jong-un, la gidor de Corea Norde, ante un fola de miles.
Kim Jong-un ia es entre la vidores a un stadio, con sua sposa e otra ofisiores major. Rodman ia dise ce el es sua ami la plu bon.
Rodman visita Corea Norde a la ves cuatro, per onora la aniversario de Kim Jong-un con un max de bascetbal.
El ia defende coler sua visita pos criticas de organizas de diretos umana. La SUA ia dise ce el no representa sua pais.
@T Des-cuatro persones mori en un panica en un mascita xines
@L aora_oji/2014/des-cuatro_persones_mori_en_un_panica_en_un_mascita_xines
====== Des-cuatro persones mori en un panica en un mascita xines ======
6 janero 2014
Des-cuatro persones ia es matada, e des ia es ferida, en un panica de fola a un mascita en la area Ningxia de Xina norde-ueste. Cuatro de la feridas es en un state de crise.
Lo ia aveni cuando on ia distribui comedas tradisional a un onora de un gidor relijiosa.
On investiga la causa de la panica en la vila Xiji, a 60 cilometres a ueste de la site Guyuan.
Fotos de la loca pos la panica mostra vestes e sapatos sperdeda sur la tera.
@T Deses es ferida en un atera urjente en Madinah
@L aora_oji/2014/deses_es_ferida_en_un_atera_urjente_en_madinah
====== Deses es ferida en un atera urjente en Madinah ======
5 janero 2014
Un Boeing 767 de la airolinia Saudia ia atera urjente en la site santa de Madinah, ferinte 29 persones. 3 persones es grave ferida.
La avion ia ariva de la site irani de Mashhad, e ia porta 299 pasajores e un ecipo de 16. La xasi retro destra ia fali deveni engranada.
On reporta ce on ia lua la avion per transporta peregrinores a la site Madinah.
La avion ia atenta nonsusedosa atera a du veses ante atera urjente.
Imajes enlinia mostra lo sur la atereria con dana en sua ala destra.
@T Deses es matada par bombis en Irac
@L aora_oji/2014/deses_es_matada_par_bombis_en_irac
====== Deses es matada par bombis en Irac ======
15 janero 2014
A la min 73 persones ia es matada en un serie de bombis en Irac sentral.
Des-ses ia mori en un ataca a la funera de un geror suni en un vileta a sude de Baquba, la capital de la provinse de Diyala.
Entretempo, nove bombas de auto ia esplode tra Baghdad, matante no min ca 37 persones e ferinte multe otras.
La violentia setal ia crese en Irac en la anio pasada, ateninte un cuantia no videda de pos 2007.
@T Deses manca pos inondas en la Isolas Solomon
@L aora_oji/2014/deses_manca_pos_inondas_en_la_isolas_solomon
====== Deses manca pos inondas en la Isolas Solomon ======
5 april 2014
En la Isolas Solomon, sirca 30 persones manca ancora pos inondas subita en jovedi. La inondas ia mata a la min 12 persones e ia lasa 10 mil persones sin casa.
Miles de persones ia vade a refujas cuando multe de la capital, Honiara, ia deveni inondada. On ia declara un state de crise, con consernas sur furnis de comeda e acua, e sur infrastrutur danada.
La rio xef de Honiara, la Matanikau, ia supraflue en la tempesta, destruinte casas e pontes, e inondante la sentro de la site.
Joanne Zoleveke, la Secretor Jeneral de la Crus Roja en la Isolas Solomon, ia descrive la inondas como "un trajedia cual nun de nos ia previde". El ia dise: "Nos ia monitori la rio, ma nos no ia suposa ce lo pote crese tan rapida. Lo ia surprende nos. Per esta razona, persones ia mori."
On ia crea des-un sentros de refuja a scolas e a la airoporto internasional. La airoporto interna es inondada, e on teme la estende de maladias pos la desapare de la acua. Otra partes de la provinse capital ia declara ance zonas de desastre.
Fontes de acua limpa es contaminada, recursos de ijien es destruida, e medisines manca per cura persones malada. La polisia ave la taxe nonplasente de trova corpos en detrito longo la rio e la borda de la mar.
La grado de dana estra Honiara es ancora nonclar, car ambos pontes cual sorti de la site ia deveni nonusable. Ma miles de casas en la site mesma ia es completa eliminada.
@T Detalias de miliones de cartas de credito es furada en Corea Sude
@L aora_oji/2014/detalias_de_miliones_de_cartas_de_credito_es_furada_en_corea_sude
====== Detalias de miliones de cartas de credito es furada en Corea Sude ======
21 janero 2014
On ia fura la detalias de cartas de credito de cuasi un dui de tota la popla de Corea Sude, e ia vende los a companias mercatiste.
La datos ia es furada par un spesialiste de computadores, laborante per un compania nomida la Departe de Credito de Corea cual calcula riscas de credito personal.
La laboror ia copia la nomes, numeros de identia, e detalias de carta de 20 milion coreanes sude.
La estende de la fura ia deveni clar pos cuando on ia aresta la laboror a la sentro de la crimin.
@T Deutxland redona a Polsca un depinta furada par la nazis
@L aora_oji/2014/deutxland_redona_a_polsca_un_depinta_furada_par_la_nazis
====== Deutxland redona a Polsca un depinta furada par la nazis ======
1 april 2014
Deutxland ia redona un depinta de la desenio des-oto cual la nazis ia fura de la Museo Nasional de Polsca en 1939. Frank-Walter Steinmeier, la ministro deutx de esternas, ia dona la obra a Radosław Sikorski, sua corespondente polsce, a un presenta formal en lundi.
La obra, "Scalera de Palasio", par Francesco Guardi, un artiste venezian, ia es saisida a un tempo corta pos la invade deutx. Lo mostra aristocrates parlante a la scalera grande de la Palasio de la Doje en Venezia.
Pos la Gera Mundal Du, la depinta ia vade a la Universia de Heidelberg e a pos a la Galeria de Stato de Baden-Württemberg.
On ia reconose ce lo parteni a Polsce en la tarda de la desenio de 1990. Ma on ia nesesa un tempo longa per ateni un acorda, par esiste de diferes political entre Warszawa e Berlin sur la problem jeneral de obras de arte perdeda en la gera.
Polsca xerca ancora miles de obras furada de sua museos e colies privata en la gera. Ma on crede ce multe ojetos ia es destruida a acel tempo.
Deutxland xerca la redona de 300 mil libros, desinias, e manoscritos -- la colie Berlinka -- de Polsca. La colie inclui partitures musical sciveda par mano par Mozart, Beethoven e Bach, cual la nazis ia move a Polsca per securi los contra bombas.
Abandonada par soldatos retirante en lo cual es aora Polsca, multe de esta ojetos es aora en la Universia Jagielloński en Kraków.
@T Discutes comensa per para la batalias en Sudan Sude
@L aora_oji/2014/discutes_comensa_per_para_la_batalias_en_sudan_sude
====== Discutes comensa per para la batalias en Sudan Sude ======
3 janero 2014
En Addis Ababa, la capital de Itiopia, on ia comensa discutes per para la batalias en Sudan Sude. Negosiores per la governa e per la rebelores ia encontra reconsiliores, ma ancora no la un la otra.
A la min mil persones ia mori de cuando batalias ia comensa en la mense pasada entre suportores de presidente Salva Kiir e los de Riek Machar, sua suordinada desempleada.
Plu ca 180 000 persones es deslocada. Multe abita sin teto, sin acua limpa, e sin ijien.
Lo cual ia comensa como un luta per potia entre Kiir e Machar ia deveni simil a un spesie de gera etnical.
Delegadas de ambos lados ia comensa ariva en Addis Ababa en mercurdi, ma on ia pospone la discutes asta la ariva de tota la negosiores.
@T Discutes de pas comensa con la Taliban pacistani
@L aora_oji/2014/discutes_de_pas_comensa_con_la_taliban_pacistani
====== Discutes de pas comensa con la Taliban pacistani ======
4 febrero 2014
Discutes inisial de pas entre la governa pacistani e la Taliban va comensa oji en la capital, Islamabad.
A sua consenta prima, la Taliban de la pais e negosiores nomida par la governa va prepara un "mapa de via" per dialoga.
Gerores de la Taliban ia rebela ala de pos 2007.
En la semana pasada, Nawaz Sharif, la ministro xef, ia anunsia ce la discutes va aveni, an pos un serie de atacas.
@T Discutes de pas suri va recomensa en Genève
@L aora_oji/2014/discutes_de_pas_suri_va_recomensa_en_geneve
====== Discutes de pas suri va recomensa en Genève ======
10 febrero 2014
Un serie du de discutes de pas entre la governa suri e representores de la oposa va comensa oji en Genève.
La serie prima ia fini en janero con no acordas firma, e con intercambias de insultas entre la du lados.
An tal, Lakhdar Brahimi, la reconsilior de la Nasiones Unida, ia dise alora ce on ia acorda sur alga cosas.
La discutes segue la sorti de sentos de persones de Homs, la site asejada, su un sesaspara de tre dias.
@T Discutes de reuni ciprica va recomensa
@L aora_oji/2014/discutes_de_reuni_ciprica_va_recomensa
====== Discutes de reuni ciprica va recomensa ======
8 febrero 2014
On va renovi discutes sur la reuni de Cipros, pos un acorda entre cipricas turces e elinica sur un projeta de negosia.
La gidores de la cipricas turces ia dise ce esta "declara comun" permete la recomensa de discutes, probable en la semana veninte.
La gidor de la cipricas elinica ia dise ce la acorda defini parametres per ambos lados.
Cipros ia separa pos un colpa de stato en 1974, con intende de uni la isola con Elinica, ma con resulat de un invade turces a la norde de la isola.
@T Discutes sur la program nucleal de Iran comensa en Wien
@L aora_oji/2014/discutes_sur_la_program_nucleal_de_iran_comensa_en_wien
====== Discutes sur la program nucleal de Iran comensa en Wien ======
18 febrero 2014
Iran e ses potias global comensa la serie prima de discutes sur un acorda durante sur la program nucleal controversa de Tehran.
La discutes en Wien en Austria intende ajunta a un resulta tempora de novembre, en cual Iran ia acorda restrinje sua rici de uranio en intercambia per un lejeri partal de punis internasional.
Ante la consenta, ambos Iran e la SUA ia desasentua esperas de un solve rapida.
La Ueste suspeta ce Iran atenta construi armas nucleal. Tehran nega esta.
@T Discutes sur reconsilia colasa en Barain
@L aora_oji/2014/discutes_sur_reconsilia_colasa_en_barain
====== Discutes sur reconsilia colasa en Barain ======
10 janero 2014
La governa de Barain ia suspende ofisial discutes sur reconsilia nasional. La grupo xef oposante ia boicota ja la discutes.
La governa suni ia dise ce lo ia fa la deside car grupos de la majoria xia en la pais ia refusa partisipa en la discutes.
On ia intende ce la discutes va destensa la situa pos la represa de protestas coletiva par la governa en 2011. En acel tumultas, deses ia es matada e multe suportores ia es prisonida.
@T Discutes sur Sudan Sude move a un loca de note
@L aora_oji/2014/discutes_sur_sudan_sude_move_a_un_loca_de_note
====== Discutes sur Sudan Sude move a un loca de note ======
15 janero 2014
En Itopia, on ia cambia la loca per negosia un sesaspara per Sudan Sude, iritante alga delegadas.
La ecipos de la governa e la rebelores ia move a la danseria de un loca major de note, en un otel en Addis Ababa.
On ia eleje la loca Gaslight pos trova ce un sala ja usada en la otel Sheraton es aora reservada per un delega japanes.
Alga delegadas es noncontente con la lus povre e la aumenta de ruido.
@T Docores txilan fini sua greve
@L aora_oji/2014/docores_txilan_fini_sua_greve
====== Docores txilan fini sua greve ======
26 janero 2014
En Txile, laborores de doca ia acorda fini un greve danante sur salario.
Un portavose per la docores ia dise ce los va recomensa labora a soldi, pos suscrive un acorda con la dirijores de la porto.
Los ia acorda un paia spesial per pausas de come, de un dui de ora, cual ia resta nonpaiada de pos 2005.
La greve ia comensa a alga portos a 3 janero. Lo ia custa miliones de dolares a la campo de esporta frutas e vejetales en Txile.
@T Dotores estrae plu ca 200 dentes de un boca
@L aora_oji/2014/dotores_estrae_plu_ca_200_dentes_de_un_boca
====== Dotores estrae plu ca 200 dentes de un boca ======
24 julio 2014
En un opera de sete oras, dotores en Barat ia estrae 232 dentes de la boca de un xico de 17 anios.
Ashik Gavai ia es ospitalida con sua mandibula destra en un state inflada. El ia sufri tra 18 menses, e ia viaja a la site de sua vileta cuando sua dotores local no ia susede trova la causa de la problem.
Sua esperia ia es descriveda como "multe rara" e "un recordo de mundo".
Sua maladia ia es un odontoma, un spesie de tumor nonosiva. Un jenjiva ia formi tro multe dentes.
La dotores ia debe comensa par usa un martel e sisel per estrae la odontoma. Cuando los ia abri la tumor, dentes peti e perlin ia sorti, la un pos la otra.
La opera ia es fada par du sirurjistes e du aidores. Ashik ave aora 28 dentes.
@T Dotores perde espera sur la survive de Ariel Sharon
@L aora_oji/2014/dotores_perde_espera_sur_la_survive_de_ariel_sharon
====== Dotores perde espera sur la survive de Ariel Sharon ======
5 janero 2014
Dotores ci trata Ariel Sharon, la minstro xef pasada de Israel, dise ce los perde sua espera ce el va survive sua dejenera presente.
Sharon ave 85 anios. El es comosa de pos 2006, ma sua state ia dejenera en la semana pasada. Alga de sua organos, incluinte la renes, ia fali.
En la note, on ia stabli sua cor e presa de sangue, ma sua vive es ancora en peril direta.
@T Dotores prepara sorti Schumacher de sua coma
@L aora_oji/2014/dotores_prepara_sorti_schumacher_de_sua_coma
====== Dotores prepara sorti Schumacher de sua coma ======
31 janero 2014
Dotores franses redui la drogas calminte a Michael Schumacher en prepara sorti el de un coma.
Ma lo es posible ce sua velia va ocupa un tempo longa.
La campion deutx de corsa de autos a sete veses ia sufri un feri grave de testa en un asidente de sci en la Alpes franses a 29 desembre.
Pos operas per sutrae coagulas de sangue de sua serebro, dotores ia manteni el en un dormi per aida sua recovre.
@T Dotores recomenda no desasentua la combate de malaria en Africa
@L aora_oji/2014/dotores_recomenda_no_desasentua_la_combate_de_malaria_en_africa
====== Dotores recomenda no desasentua la combate de malaria en Africa ======
20 febrero 2014
Dotores ia averti ce, an si la combate de malaria en Africa ia fa susedes grande, la mundo debe "no move sua pede de sur la aselerador".
Un analise detaliosa de la maladia, publicida en The Lancet ("La bisturi"), mostra ce 184 milion persones abita ancora en areas do plu ca un dui de enfantes esibi sintomes de infeta malarial.
Los dise ance ce on debe ancora fa multe plu en areas de risca alta.
Tra la mundo, 627 000 persones mori de malaria en cada anio. La plu es en Africa.
@T Drogi de serebro es plu popular en sporte ca drogi de corpo
@L aora_oji/2014/drogi_de_serebro_es_plu_popular_en_sporte_ca_drogi_de_corpo
====== Drogi de serebro es plu popular en sporte ca drogi de corpo ======
16 janero 2014
On ia trova ce, entre atletas nonprofesal, la usa de sustantias cual forti la serebro es plu popular ca la usa de drogas cual aumenta la corpo.
Rexercores en Deutxland ia descovre ce 15% de triatlonores recreal confesa ce los drogi sua serebro par medisines prescriveda cual boni la capasia de atende.
13% de competores ia reporta la usa de drogas de corpo, como steroides o ormones de crese.
La siensistes dise ce la drogi de serebro es plu popular car multe de la sustantias usada no es proibida.
@T Du laborores de la metro de Moscva es arestada
@L aora_oji/2014/du_laborores_de_la_metro_de_moscva_es_arestada
====== Du laborores de la metro de Moscva es arestada ======
17 julio 2014
Investigores rusce ia anunsia la aresta de du laborores de la metro de Moscva per nonsegues de regulas de securia. Un tren ia salta de la reles a martedi, matante 21 persones.
La comite investigante suspeta ce la supravidor de reles e sua aidor ia usa un spesie debil de filo eletrical en laboras sur la ferovia en maio. La filo ia rompe.
On ia interoga la du omes, e on previde ce on va acusa los pos un tempo corta.
La investigores crede ce un ondon de eletrica ia causa la xoca, cual ia feri ance 162 persones.
Criticistes cexa ce la autoriosas ia spende tro multe sur estende la sistem de metro, e no sufisinte sur manteni la partes esistente.
La tren ia salta entre la stasiones Bolevar Slaviansci e Parce de Vinse, en la ueste de la site. Parce de Vinse es la stasion la plu profonda en Moscva, causante ce la opera de salva ia es spesial difisil.
Martedi ia es ofisial un dia de lamenta en la capital rusce.
La metro de Moscva es un de la plu folidas en la mundo. Lo es un arteria esensal de transporta per la site, movente plu ca nove milion persones su la stradas en cada dia de labora.
@T Du ministros fema resinia en Japan
@L aora_oji/2014/du_ministros_fema_resinia_en_japan
====== Du ministros fema resinia en Japan ======
20 otobre 2014
Midori Matsushima, la ministro de justia de Japan, ia resinia, a oras pos la resinia de Yuko Obuchi, la ministro de comersia e industria.
La partito oposante ia acusa ce Matsushima ia viole leges de vota par malusa mone de sua grupos de suporta political.
La resinia de du femes es un problem grande per la ministro xef, Shinzo Abe, ci vole ce plu femes opera a la nivel la plu alta de governa.
Abe ia dise ce el aseta ce el ia asinia la postos a ambos femes, e ce ministros sustitua va es nomida pos un dia. Ambos es membros de la Partito Democrata Liberal.
Obuchi ia es un de sinco femes ci Abe ia eleje a sua consilio en setembre. Alga persones ia regarda el como un ministro xef futur.
Ma en la semana pasada, alegas ia apare ce sua empleadas ia malusa miles de dolares de reservas de campania political.
Obuchi no ia confesa ce el ia fa mal a grado personal, ma a un confere jornaliste televisada oji, el ia dise ce el resinia car "nos no pote permete la stania de la politica sur economia e enerjia ... par causa de mea problemes".
A oras plu tarda, Abe ia anunsia la resinia ance de Matsushima. El ia distribui ventadores de paper cual ia mostra sua imaje e sua politicas a un carnaval en sua distrito de vota.
La partito oposante ia acusa el de crimin a venerdi, esijente sua resinia, e disente ce esta viole la regulas sur la usa de mone political.
En la periodo prima de Abe mesma como ministro xef en 2006 e 2007, un otra serie de scandales entre sua ministros ia causa final sua propre resinia, per razonas de sania, pos mera un anio en la posto.
@T Du omes completi la viaja polal la plu longa par pede
@L aora_oji/2014/du_omes_completi_la_viaja_polal_la_plu_longa_par_pede
====== Du omes completi la viaja polal la plu longa par pede ======
8 febrero 2014
Un aventuror brites e un juor pasada franses de rugbi ia crea un recordo de mundo per "la viaja polal la plu longa par pede en istoria".
Ben Saunders, ci ave 36 anios, e Tarka L'Herpiniere, ci ave 32, ia pasea 2889 cilometres en Antartica per completi la mision maldestinada de Capitan Scott.
La duple ia tolera un temperatur de -46°C en sua viaja de 105 dias.
Saunders es la plu joven de sola tre persones ci ia sci solitar a la Polo Norde. El ia fa acel a la eda de 26.
@T Du partitos oposante fusa en Sudafrica
@L aora_oji/2014/du_partitos_oposante_fusa_en_sudafrica
====== Du partitos oposante fusa en Sudafrica ======
29 janero 2014
La partito xef oposante de Sudafrica ia anunsia ce Mamphela Ramphele va es sua aspiror presidental en esta anio.
Ramphele es un ativiste antiapartait, e ia formi sua propre partito, Agang, en 2013. El ia es la acompanior de Steve Biko, un gidor de consensia negra ci es aora mor.
Helen Zille, la gidor de la Alia Democrata, ia dise ce on ave "no person plu bon" ca Ramphele per gida sua campania.
Analistes dise ce la move intende forsa a via acusas ce la AD es "tro blanca" per vinse.
@T Du persones mori en protestas antigovernal en Venezuela
@L aora_oji/2014/du_persones_mori_en_protestas_antigovernal_en_venezuela
====== Du persones mori en protestas antigovernal en Venezuela ======
13 febrero 2014
En Caracas, la capital de Venezuela, on ia mata a la min du persones par fusili a un protesta de studiantes.
Un ativiste per la governa e un studiante, cisa plu, ia es matada.
On reporta ce 23 persones ia es ferida en protestas tra la pais.
Nicolás Maduro, la presidente, es sempre plu criticada per la problemes economial e la violentia alta en la pais.
@T Du persones mori en un ataca a un corte en Frankfurt
@L aora_oji/2014/du_persones_mori_en_un_ataca_a_un_corte_en_frankfurt
====== Du persones mori en un ataca a un corte en Frankfurt ======
25 janero 2014
En Deutxland, du omes ia es matada en un ataca de fusili e coteli a un compleso de corte en Frankfurt.
La atacor suspetada ia core de la sena, ma on ia aresta el en la area prosima.
La ataca ia aveni a sirca 08:45 de ora local, a la corte de stato en la capital finansial deutx.
La du vitimes ia ave 45 e 50 anios. Un de los ia mori a la sena, e la otra ia mori plu tarda en ospital.
@T Du pretes e un monce es saisida en Camerun
@L aora_oji/2014/du_pretes_e_un_monce_es_saisida_en_camerun
====== Du pretes e un monce es saisida en Camerun ======
5 april 2014
En Camerun, du pretes italian e un monce fema de Canada ia es saisida par fusilores nonidentifiada. La fusilores ia saca un construida en la norde-ueste de la pais ante prende la ostajes.
La area es prosima a un fortres de Boko Haram, un grupo combatosa nijerian. La ataca ia segue a tre menses pos cuando la grupo ia libri un prete franses ci los ia saisi en la mesma area e ia teni en Nijeria.
La ataca nova ia aveni en la distrito Maroua en la oras temprana de la matina de saturdi. On reporta ce la fusilores ia ariva par auto a sirca 02:00 de ora local (01:00 UTC) ante entra a la construida do la pretes e monce ia es reposante.
La du pretes veni de la area Vicenza de Italia. La ministreria italian de esternas dise ce lo ia formi un ecipo de crise ci va labora per la libri de la pretes.
Un de la pretes es ja en Camerun tra plu ca ses anios. La otra ia aveni a sirca un anio ante aora.
En la anio pasada, sete membros (de ci cuatro ia es enfantes) de la familia Moulin-Fournier ia es saisida par Boko Haram en Camerun norde e tenida como ostajes tra du menses.
@T Du protestores mori en scaramuxas en Kiev
@L aora_oji/2014/du_protestores_mori_en_scaramuxas_en_kiev
====== Du protestores mori en scaramuxas en Kiev ======
23 janero 2014
Du protestores ia es matada en combates con la polisia en Kiev, la capital de Ucraina.
Prosedores ia confirma ce los ia mori par feris de baleta. Los es la matadas prima de pos la comensa de protestas antigovernal en novembre.
La scaramuxas en mercurdi ia comensa cuando la polisia ia invade per desasembla un campa de protesta.
Pos discutes con presidente Viktor Yanukovych, un xef oposante, Vitali Klitschko, ia menasa gida protestores "en un ataca".
@T Du reatadores nucleal en Japan es aprobada per reinisia
@L aora_oji/2014/du_reatadores_nucleal_en_japan_es_aprobada_per_reinisia
====== Du reatadores nucleal en Japan es aprobada per reinisia ======
10 setembre 2014
La organiza autoriosa japanes sur potia nucleal ia permete formal la reinisia de du reatadores a un sentro nucleal en la sude de Japan.
En junio, la sentro a Sendai ia oteni un aproba dependente per la reinisia. Aora lo ia fini un periodo de consulta publica.
La autoriosa dise ce la reatadores sasia la normas nova cual on ia introdui pos la desastre de Fukushima. Los es la du reatadores prima cual ia reseta esta permete.
Aora la reinisia de la sentro, en la sude de la isola Kyushu, debe es aprobada par autoriosas local. On previde ce los va suporta lo.
Lo debe ance susede en esaminas funsional sur loca. Lo no es probable ce la reatadores va comensa opera ante desembre.
Tota 48 reatadores de Japan es presente nonfunsionante, ma la ministro xef, Shinzo Abe, ia recomenda reinisias do estas es posible.
La popla japanes ia adota un opina contra la potia nucleal pos la fondes a la planta a Fukushima en 2011.
Ante acel aveni, causada par un tsunami cual ia segue un trematera grande, sentros nucleal ia furni sirca 30% de la eletrica de Japan. Ma pos alora, on ia clui la sentros, o per manteni normal los o temente sur sua securia.
La reatador a Ohi en Japan ueste, ia es la final cual on ia desativi, en setembre de 2013.
A presente, Japan depende de importas ajuntada de carbon e gas per jenera sua eletrica.
@T Du rocones cadente dana un cultiveria italian
@L aora_oji/2014/du_rocones_cadente_dana_un_cultiveria_italian
====== Du rocones cadente dana un cultiveria italian ======
31 janero 2014
Fotos dramosa mostra la destrui causada par un rocon jigante cual ia rola tra un cultiveria en Italia Norde. Lo ia deveni desfisada de la monte visina par un lisca de tera en 21 janero.
La rocon ia evita apena un casa, ia destrui un graneria, e ia para en un viteria.
Ance un rocon du ia desfisa se en la lisca. Lo ia para direta pos la casa e ia evita apena crase un auto.
La familia cual abita la cultiveria no ia es ferida.
@T Duvalier, renor malfamosa de Aiti, mori
@L aora_oji/2014/duvalier_renor_malfamosa_de_aiti_mori
====== Duvalier, renor malfamosa de Aiti, mori ======
5 otobre 2014
Jean-Claude Duvalier, la renor pasada de Aiti, ia mori de un ataca de cor en Port-au-Prince a la eda de 63.
En 1971, el ia ave mera 19 anios cuando el ia erita la titulo "presidente de vive intera" de sua padre, la malfamosa François Duvalier.
On ia acusa el de froda, maltratas de diretos umana, e represa en sua rena, cual ia fini en un revolta en 1986.
Pos anios de esclui en Frans, el ia revade a Aiti en 2011.
Sua mori ia es anunsiada par la ministro aitian de sania, e sua avocato ia confirma ce el ia mori a casa a saturdi.
A la tempo de sua inaugura, Duvalier ia es la presidente la plu joven de mundo.
Prima, lo ia pare ce el va move a via de la stilo sever de governa de sua padre, cual ia es suportada par la polisia secreta de Aiti, la Tontons Macoutes.
El ia prosimi plu a la SUA, de cual sua padre ia stranjeri se. Comersias SUA ia entra a Aiti, e el ia permete un libria limitada de jornalisme.
Ma Duvalier ia vive lusosa. Sua sposi en 1980, finansiada par la pais, ia custa sinco milion dolares en cuando la plu de aitianes ia sufri la povria la plu mal de la emisfera ueste.
On alega plu ce miles de prisonidas political ia es torturada o matada su sua governa.
Cuando el ia revade a Aiti, en la anio pos cuando la pais ia es ruinada par un trematera major, el ia descrive sua reveni como un jesto de unia a la nasion.
Ma on ia aresta e acusa el. An si on ia libri el a pos, el ia apare final en corte en febrero de la anio pasada, do, ante alga de sua vitimes alegada, el ia nega sua culpablia per maltratas fada en sua tempo como presidente.
@T Egipte condena 26 persones a mori sur terorisme
@L aora_oji/2014/egipte_condena_26_persones_a_mori_sur_terorisme
====== Egipte condena 26 persones a mori sur terorisme ======
27 febrero 2014
Un corte egiptian ia condena 26 persones a mori per fundi un "grupo de teror" con intende de ataca barcones en la Canal de Suez.
Judores ia dise ce la omes ia es ance acusada de fabrica misiles e esplodentes.
On ia prosede la acusadas en sua asentia.
La condenas aveni a la dia pos cuando Ibrahim Mahlab, la ministro xef nova, ia promete "crase terorisme en tota la angulos de la pais".
@T Egipte considera un esije ultima contra turistes
@L aora_oji/2014/egipte_considera_un_esije_ultima_contra_turistes
====== Egipte considera un esije ultima contra turistes ======
19 febrero 2014
La governa egiptian ia dise ce lo reata seria a un esije ultima de 48 oras par un grupo combatosa islamiste, cual xerca ce tota turistes parti de Egipte.
On ia fa la menasa en un conta privata de Twitter cual parteni a la grupo.
La grupo ia nega posese cualce conta de rede sosial, ma Reuters, un ajenteria de novas, declara ce acel conta ia conteni informas coreta en la pasada.
La governa de Egipte luta contra un crese de ativisme combatosa en la penisola Sina.
@T Egipte desculpa protestores contra la despone de Morsi
@L aora_oji/2014/egipte_desculpa_protestores_contra_la_despone_de_morsi
====== Egipte desculpa protestores contra la despone de Morsi ======
3 febrero 2014
Un corte en Egipte ia desculpa plu ca 60 suportores de Mohammed Morsi, la presidente desponeda, ci on ia aresta en un protesta violente en la anio pasada.
Judores ia desculpa ance un filmor ci ia es laborante per la difusante Al-Jazeera.
La plu de la omes ave lias a la Fratia Muslim, un organiza proibida. On ia acusa los de omiside atentada e de tumulta, pos combates matante en Cairo.
Los ia protesta contra la despone de Morsi par la militaria en julio 2013.
@T Egipte va comensa prosede 20 jornalistes a 20 febrero
@L aora_oji/2014/egipte_va_comensa_prosede_20_jornalistes_a_20_febrero
====== Egipte va comensa prosede 20 jornalistes a 20 febrero ======
12 febrero 2014
La autoriosas de corte en Egipte dise ce un prosede de 20 jornalistes, incluinte cuatro stranjeres, va comensa en la semana veninte.
Los es acusada de aida e junta se a un organiza teroriste, e de perili la securia nasional.
Oto acusadas es aora prisonidas, incluinte Adel Fahmy, la xef egiptian-canadian de la ofisia de Al-Jazeera en Cairo, e Peter Greste, un australian ci ia es un reportor de la BBC.
La otras va es prosededa en sua asentia.
@T Elas es fasinada par la descovre de un tomba enorme antica
@L aora_oji/2014/elas_es_fasinada_par_la_descovre_de_un_tomba_enorme_antica
====== Elas es fasinada par la descovre de un tomba enorme antica ======
23 setembre 2014
Elinicas es zelosa sur la descovre de un tomba enorme en Elas norde, cual veni de la eda de Alesandro la Grande.
En la temprana de agosto, un ecipo de arceolojistes gidada par Katerina Peristeri ia desentera lo cual ofisiores descrive como la loca de entera la plu grande en la pais.
La colineta es en Amfipoli, un site major antica de la rena macedonsce, a 100 cilometres a este de Tessaloniki, la site du de Elas moderna.
La strutur ia es construida en la parte tarda de la sentenio 4 AEC. Sua mur ensircante ave un perimetre de 500 metres, multe plu grande ca la loca de entera de Filipo 2, la padre de Alesandro, a ueste de Tessaloniki.
En la tomba, arceolojistes ia trova du cariatides merveliosa. Cada de esta figures fema scultada ave un braso estendeda, suposable per descoraji intruores de entra a la camera xef de la tomba.
La corespondentes moderna de la cariatides senta en un auto polisial, a 200 metres de la entra de la tomba. Du polisiores proteje la loca tra la 24 oras de cada dia. Los debe teni a via la multe jornalistes e turistes ci ariva sur un rua serpente de Mesolakkia, un vileta prosima.
La arceolojistes en la ecipo ia fa no declara sur la identia de la ocupor de la tomba. Ma multe otra persones divina.
On acorda ce la gloria de la tomba indica ce lo ia es construida per un person importante, cisa un membro de la familia direta de Alesandro -- cisa sua madre Olimpias, o sua sposa Roxana, o alga otra macedonsce nobil.
Otras sujesta ce la tomba pote es vacua.
Ma sola la ecipo escavante pote furni la responde concluinte, e sua progresa ia lenti pos descovre un camera tre cual es a punto de colasa.
La abitores de la viletas prosima crede forte ce la person enterada en la tomba de mures de marmo es nun otra ca Alesandro la Grande.
Arceolojistes e la ministreria elinica de cultur avisa contra tal divinas, car on sabe ja ce Alesandro la Grande ia es enterada en Misre.
An tal, la descovre ia causa un onda de orgulo e patriotisme elinica, aidante la nasion a iniora tempora sua mal situa economial.
@T Elas preside la Uni European
@L aora_oji/2014/elas_preside_la_uni_european
====== Elas preside la Uni European ======
9 janero 2014
Elas ia emprende la presidentia de la Uni European.
La pais declara ce lo es a punto de benefica de sua laboras per recovre pos ses anios de retrosede economial e pos du salvas grande finansial.
Ministros elinica va preside encontras de la UE per la menses seguente, ante la elejes european en maio.
@T Elvis canta per pas en Belfast
@L aora_oji/2014/elvis_canta_per_pas_en_belfast
====== Elvis canta per pas en Belfast ======
23 febrero 2014
En Er Norde, un eglesor vestida como Elvis Presley ia pasea cantante tra Belfast. El vole promove pas e laboras de reconsilia.
Andy Kelso es un imitor profesal de Elvis en sua tempo libre, cuando el no labora per la Eglesa Anglican.
El ia traversa de Strada Falls -- un de la areas republiciste la plu bon conoseda de la site -- a Strada Shankill, un parte forte unidiste de Belfast ueste.
A pos, el ia fa un conserta carital.
@T Enferno jela su la vortis polal en la SUA
@L aora_oji/2014/enferno_jela_su_la_vortis_polal_en_la_sua
====== Enferno jela su la vortis polal en la SUA ======
9 janero 2014
Recordos de clima ia es rompeda tra America Norde. Tota la statos de la SUA ia esperia temperatures jelante.
La frias estrema ia afeta cuasi 190 milion persones. On culpa un sistem de clima nomida un vortis polal.
En la stato de Kentucky, un prisonida evadente ia revade a prison per evita la fria.
En alga partes de la norde sentral, la temperatur ia ateni -26°C, tan basa como la costa antartica en inverno, e multe plu fria ca la interna de un jelador de casa.
En un vila peti nomida Hell ("Enferno"), en Michigan, la temperatur ia ateni -17°C. On ia broma ce an enferno ia jela.
La temperatur la plu basa ia aveni en Embarrass, en Minnesota, en martedi: -37°C, plu fria ca resente rejistrada sur la planeta Marte.
@T Erdogan favore un reprosede de ofisiores militar turces
@L aora_oji/2014/erdogan_favore_un_reprosede_de_ofisiores_militar_turces
====== Erdogan favore un reprosede de ofisiores militar turces ======
6 janero 2014
La ministro xef de Turcia, Recep Tayyip Erdogan, dise ce el favore aora la prosede nova de sentos de ofisiores militar, ci on ia condena per conspira de despone la governa.
A ante, sua conselor major ia sujesta ce la polisia e judores ia altera la atesta contra la ofisiores.
La politica turces es tensada sur froda alegada en la governa. Erdogan ia acusa ce la polisia e judores ia organiza un investiga cual ia obliga sua ministros a resinia.
La partito renante es radisida en Islam political, e ia ata per redui la potia de la militaria turces, cual regarda se como gardor de la stato secular moderna fundida par Mustafa Kemal Ataturk.
@T Escavores sudafrican emerji de un duto colasada
@L aora_oji/2014/escavores_sudafrican_emerji_de_un_duto_colasada
====== Escavores sudafrican emerji de un duto colasada ======
17 febrero 2014
Escavores nonlegal de oro ia comensa emerji, pos es trapida par un colasa en un duto abandonada prosima a Johannesburg.
Salvores sudafrican dise ce los comunica con un grupo de 30 escavores ci es trapida par rocones cadeda, prosima a la entra de la mineria.
Acel escavores ia sujesta ce cisa 200 plu persones es ancora trapida a su.
On crede ce los ia deveni trapida en la matina de saturdi. On no ia reporta feridas.
@T Escavores sudafrican es trapida pos un foco
@L aora_oji/2014/escavores_sudafrican_es_trapida_pos_un_foco
====== Escavores sudafrican es trapida pos un foco ======
6 febrero 2014
Laborores de salva en Sudafrica atenta libri nove escavores ci es trapida su tera pos un foco a la mina de oro en Doornkop, a ueste de Johannesburg.
On ia susede reveni oto otra escavores a la surfas.
La foco ia comensa en la sera de martedi, a sirca 1700 metres su la tera.
Un portavose ia clari ce la salvores luta per ateni la area afetada, par causa de fuma e rocas cadeda.
@T Eserses militar comensa de Corea Sude e la SUA
@L aora_oji/2014/eserses_militar_comensa_de_corea_sude_e_la_sua
====== Eserses militar comensa de Corea Sude e la SUA ======
24 febrero 2014
Eserses militar juntada entre Corea Sude e la SUA ia comensa, a la mesma tempo como reunis rara de relatadas separada tra desenios par la divide entre la du Coreas.
La eserses va dura asta 18 april.
Pyongyang oposa los, e a ante ia menasa cansela la reunis si los aveni.
La eserses va envolve plu ca 12 500 soldatos american.
@T Espania discute sur la crese de la Canal de Panama
@L aora_oji/2014/espania_discute_sur_la_crese_de_la_canal_de_panama
====== Espania discute sur la crese de la Canal de Panama ======
4 janero 2014
La governa espaniol discute con Panama per atenta solve un disputa sur la grandi de la Canal de Panama.
Ana Pastor, la ministro espaniol per obras publica va vola a Panama a esta fini de semana, pos un encontra entre diplomatas a venerdi.
La canal es multe importante per barcones. On ia comensa labora sur sua crese en 2009, ma la projeta ia esede la spendes prevideda par $1.6 bilion.
La grupo manejante la projeta, gidada par la compania espaniol Sacyr, ia menasa para labora si on no paia la mone restante.
@T Espania refusa un referendo sur autonomia catalan
@L aora_oji/2014/espania_refusa_un_referendo_sur_autonomia_catalan
====== Espania refusa un referendo sur autonomia catalan ======
9 april 2014
Parlamentores espaniol ia eleje forte rejeta un demanda par la autoriosas catalan ce los fa un referendo sur autonomia a 9 novembre. Pos sete oras de debate, 299 membros de parlamento ia vota contra la proposa. Sola 47 votas ia favore lo, e un ia asteni.
Mariano Rajoy, la ministro xef espaniol, ia averti plu temprana ce un referendo ta es "un desastre economial", no sola per Espania ma ance per Catalunia.
La idea de permete ce la popla de acel area este separa de Espania ia causa menses de debate constitual. Catalunia ave ja un grado alta de autonomia, ma la crise resente de economia en Espania ia nuri la nasionalisme catalan.
Tota la partitos major de Espania, incluinte la conservistes de Rajoy e la oposa sosialiste, ia rejeta la demanda. Sola partitos nasionaliste de Catalunia e Euscaleria ia vota favorente.
Rajoy ia repete sua razona ce on ta regarda un referendo como nonlegal car, su leges espaniol, referendos sur autonomia debe aveni nasional, no rejional.
"Juntada, tota de nos gania, ma separada, tota de nos perde. Esta no es mera un demanda de lege, ma de senti... Me no pote imajina Espania sin Catalunia, o Catalunia estra Europa," el ia dise a parlamento en un debate ante la vota.
An tal, parlante pos la conta de votas, Artur Mas, la presidente catalan, ia dise ce sua governa rejional va continua con la projeta de un referendo en novembre. El ia dise: "Alga ta vole presenta esta como la fini de la cosa, ma, como presidente de Catalunia, me dise a los ce lo no es la fini."
@T Espanioles protesta contra un lege de restrinje la aborta
@L aora_oji/2014/espanioles_protesta_contra_un_lege_de_restrinje_la_aborta
====== Espanioles protesta contra un lege de restrinje la aborta ======
2 febrero 2014
En Madrid, miles de espanioles ia protesta contra un lege proposada, e suportada par la governa, cual ta restrinje la direto de aborta.
Ativistes ia porta banderas con la frases "Permete ce madres deside" e "La deside libri nos".
La lege ta limita la aborta a casos de viole sesal, e a situas do la sania de la madre es grave menasada.
Su la lege presente, cualce fem ave la direto de aborta en sua 14 semanas prima de ensentia.
@T Esta blog publici 1000 articles en du menses
@L aora_oji/2014/esta_blog_publici_1000_articles_en_du_menses
====== Esta blog publici 1000 articles en du menses ======
1 marto 2014
Aora oji ia publici 1000 articles corta de novas, sin pausa, de pos sua comensa a la dia ultima de la anio presedente. Esta article es la numero 1001.
La blog ia es creada como un manera nova de trova vocabulo ancora mancante en Lingua Franca Nova. On ia ajunta ja multe espresas a la disionario de la lingua.
Alga visitores ia ariva tra un lia en la article sur Lingua Franca Nova en la Wikipedia engles.
La blog va reposa aora per un mense, ma lo va recomensa en april.
@T Estremistes saisi plu vilas iraci longo la Eufrates
@L aora_oji/2014/estremistes_saisi_plu_vilas_iraci_longo_la_eufrates
====== Estremistes saisi plu vilas iraci longo la Eufrates ======
22 junio 2014
En Irac ueste, estremistes suni dise ce los ia saisi un crusa de frontera e du vilas longo la rio Eufrates.
La crusa de frontera a Suria, prosima a la vila Qiam, es stratejial importante. Ativistes ia saisi lo pos batalia tra un dia, matante 30 soldatos.
La rebelores ia catura ance la vilas Rawa e Aneh.
Analistes dise ce un tal campania longo la rio pote gida final a un ataca contra Baghdad de la ueste. La saisi de la crusa a Qaim pote aida la grupo estremiste ISIS (Stato Muslim de Irac e Suria) a transporta armas e otra aparatos a otra campos de batalia.
Combatosas suni ia catura areas grande de tera tra tota Irac en dias resente.
Los ia declara sua catura de partes de la refineria de petrolio a Baiji, la plu grande en la pais. Los ia saisi ance un fabriceria desusada de armas cimical en Muthanna, a sirca 70 cilometres norde-ueste de Baghdad.
A saturdi, la governa ia nega denova ce estremistes ia susede asede partes de la refineria a Baiji. An tal, los ia confesa ce la armada fronti "atacas violente" par fusilores.
@T Eta pone alga armas ultra capasia de usa
@L aora_oji/2014/eta_pone_alga_armas_ultra_capasia_de_usa
====== Eta pone alga armas ultra capasia de usa ======
22 febrero 2014
Esaminores internasional dise ce Eta, la grupo separadiste euscara, ia pone alga de sua armas "ultra capasia de usa".
La Comision Internasional de Serti, en la site euscara de Bilbao, dise ce un parte peti de la armeria de Eta es aora selida a via.
La governa espaniol ia refusa negosia con Eta, e lo ia rejeta la desarma como un move "teatral".
Eta ia declara un fini de sua campania armada en 2011. Lo ia mata plu ca 800 sentos en cuatro desenios.
@T Etihad es en la fase final de negosia un investi en Alitalia
@L aora_oji/2014/etihad_es_en_la_fase_final_de_negosia_un_investi_en_alitalia
====== Etihad es en la fase final de negosia un investi en Alitalia ======
3 febrero 2014
La airolinias Etihad e Alitalia prosimi a acorda un investi par la prima, de la Amirias Arabi Unida, en la otra, un compania problemosa de Italia.
Los ia dise ce los es en "la fase final" de negosias, de cual sua completi pote ocupa ancora 30 dias.
Ambos lados ia refusa revela la grandia de la investi posible, ma on ia reporta ce Etihad pote prende asta 40%.
Lo ia prende ja partes de Air Berlin, Aer Lingus, e Virgin Australia. Pos acorda con Alitalia, lo ta partisipa en un de la mercatos de viaja la plu grande de Europa.
@T Europa esperia mal climas
@L aora_oji/2014/europa_esperia_mal_climas
====== Europa esperia mal climas ======
2 febrero 2014
Pluves forte ia crea un caos en partes de Europa. En alga areas de Italia e Frans, on prepara contra inondas.
Sentos de persones ia debe abandona sua casas en la site Pisa en Italia, car la rio Arno ia menasa supraflue en venerdi.
On previde ce mares alta va causa un inonda vasta longo la costa atlantica de Frans.
Entretempo, en Serbia, deses de persones ia deveni trapida par dunas profonda de neva.
@T Facebook compra Whatsapp
@L aora_oji/2014/facebook_compra_whatsapp
====== Facebook compra Whatsapp ======
21 febrero 2014
Facebook ia compra la compania de Whatsapp, un program de mesaje, en un acorda con valua de $19 mil milion.
Esta es la compra la plu grande asta aora de la compania jigante de rede sosial.
WhatsApp ave plu ca 450 milion usores mensal, e es popular entre los ci vole evita paia per envia mesajetas.
Lo permete ce on envia direta mesajetas tra la interede. La compania dise ce lo gania milion usores per dia.
@T Facebook permete personali de jenero
@L aora_oji/2014/facebook_permete_personali_de_jenero
====== Facebook permete personali de jenero ======
14 febrero 2014
Facebook ia anunsia ce lo va permete ce usores personali sua jenero, pos consulta con grupos de defende ge e transjenero.
Sirca 50 posibles, incluinte "bijenero", "transjenero", "androjine", e "transesal", va permete ce on "espresa sua identia en un modo vera".
Un usor de ci sua lingua es engles american pote ance eleje esce el vole ce on refere a el como "he" (elo), "she" (ela), o "they" (el).
En la SUA, la promove de diretos transjenero influe sempre plu, xercante diretos sivil simil a los de la comunia ge.
@T Familias de MH370 reseta paias compensante
@L aora_oji/2014/familias_de_mh370_reseta_paias_compensante
====== Familias de MH370 reseta paias compensante ======
13 junio 2014
La familias de pasajores sur la avion malaisian mancante ia comensa reseta paias compensante de $50 mil.
Asta aora, ses familias malaisian e un familia xines ia reseta la mone, e asecurores evalua la reclamas de 40 plu familias xines. Cada relatada de la 239 pasajores mancante pote reclama asta $175 mil.
La jeto MH370 ia desapare a 8 marto en vola de Kuala Lumpur a Beijing. On ia trova no trasa de lo.
Hamzah Zainudin, la visministro malaisian de esternas, ia asentua ce la governa ancora no ia declara ce la avion es perdeda.
Ance multe de la familias refusa aseta ce sua relatadas pote es mor. Un grupo de familias ia colie $5 milion per investiga la desapare de la avion e per coraji la parla de cualcun ci pote informa.
Un taxe jigante de xerca, fada en mares a un distantia vasta de cualce tera, ia fali trova detrito de la jeto.
Espertas continua sonda la fondo de mar, e introdui aora aparatos spesial. Los crede ce la avion ia fini sua viaja en la Mar Indian, a sentos de cilometres a norde-ueste de Perth, un site a la costa sude-ueste de Australia.
@T Famosas partisipa en un video de lodas de sposi
@L aora_oji/2014/famosas_partisipa_en_un_video_de_lodas_de_sposi
====== Famosas partisipa en un video de lodas de sposi ======
23 febrero 2014
Con aida de Twitter, Steven Williams ia crea un video de lodas per selebra sua sposi a Ceri en la mense pasada.
La video ia es spesial car lo ia conteni multe mesajes de persones famosa en Britan.
Steven, ci ave 29 anios e veni de Cimri, ia segue la tuitas de la famosas e ia demanda mesajes video de los.
La video dura tra 12 minutos e ia atrae plu ca 4000 regardas en YouTube.
@T Fanes de futbal de Gana xerca refuja en Brasil
@L aora_oji/2014/fanes_de_futbal_de_gana_xerca_refuja_en_brasil
====== Fanes de futbal de Gana xerca refuja en Brasil ======
11 julio 2014
La polisia federal de Brasil dise ce sirca 200 ganaianes ia demanda refuja pos entra a la pais con visas de turiste per regarda la Copa Mundal.
La ganaianes dise ce los es muslimes ci fuji de combates relijiosa en sua propre pais.
Los ia rejistra se en Caxias do Sul, un site sude, en un de la areas la plu rica de Brasil.
On previde ce mil plu ganaianes va demanda deveni refujadas pos la fini de la torneo.
La autoriosas brasilera crede ce multe de la ganaianes xerca la direto de labora legal en la pais. Leges en Brasil permete ce refujadas futur labora legal en la pais direta pos rejistra se.
La xef de la polisia federal ia dise ce la area atrae aora multe laborores stranjer. "On vade sur la stradas e on vide multe aitianes e senegaleses ci vende CDs piratida e orolojetas. La area es suprafolida."
Caxias do Sul es situada a plu ca 1600 cilometres de la locas do la ecipo ganaian ia jua: la sites Natal e Fortaleza en la norde-este, e la capital, Brasilia.
La ecipo, nomida la Stelas Negra, ia perde du maxes a la SUA e Portugal, ma ia fa un egal contra Deutxland. Los ia fali progresa a la niveles de elimina direta en la compete.
La plu de la ganaianes en Caxias do Sul es refujada par eglesas catolica local.
@T Fatah e Hamas anunsia un reconsilia
@L aora_oji/2014/fatah_e_hamas_anunsia_un_reconsilia
====== Fatah e Hamas anunsia un reconsilia ======
24 april 2014
Fatah e Hamas, partitos filastini oposante, ia anunsia un acorda de reconsilia. Los ia dise ce los intende formi un governa unida en la sinco semanas veninte.
Esta aveni a un tempo cuando la negosias de pas entre presidente Mahmoud Abbas e Israel es prosima a colasa.
Hamas e Fatah ia separa violente en 2007, e acordas presedente de reconsilia ia es nunca realida. Israel, la SUA, e la UE regarda Hamas como un organiza teroriste.
Benjamin Netanyahu, la ministro xef de Israel ia averti ce Abbas va debe eleje entre pas con Israel e pas con Hamas. "On pote ave la un ma no la otra. Me espera ce el va eleje pas. Asta aora, el no ia fa esta."
Ofisiores filastini ia responde par dise ce la reconsilia es un cosa interna, e ce la uni de la popla filastini va forti la pas.
Plu temprana en esta semana, Abbas ia envia un delega de sua partito Fatah a Gaza per discutes de reconsilia.
La anunsia ia es fada a martedi, a un confere jornaliste con representores de Fatah e de Hamas. La partitos ia dise ce los vole fa un vota parlamental en la ses menses seguente.
Ismail Haniyeh, ministro xef de la governa en Gaza, gidada par Hamas, ia dise: "Estas es la bon novas cual nos reporta a nos popla. La eda de divide es finida."
Pos oia la novas, miles de filastinis ia veni sur la stradas de la Site Gaza per selebra.
@T Fiat va compra la resta de Chrysler
@L aora_oji/2014/fiat_va_compra_la_resta_de_chrysler
====== Fiat va compra la resta de Chrysler ======
2 janero 2014
Fiat, la compania italian cual fabrica autos, ia acorda per compra de Chrysler la 41% restante cual lo no posese ja. La compra va crea la compania de autos sete la plu grande en la mundo.
Fiat posese la parte major de la compania american de pos 2009.
La acorda fini negosias longa con la posesores presente, un fidusia de aida medical cual parteni a la sindicato United Auto Workers.
Chrysler e Fiat va paia inisial a la fidusia $3,65 bilion. A pos, Chrysler va paia ancora $700 milion a Fiat.
La alia entre la du companias ia aveni en la restruturi grande de la industria de autos american pos la crise finansial a la fini de la desenio pasada.
@T Fidel Castro fa un apare publica rara
@L aora_oji/2014/fidel_castro_fa_un_apare_publica_rara
====== Fidel Castro fa un apare publica rara ======
10 janero 2014
Fidel Castro, la presidente pasada de Cuba, ia apare publica a la ves prima en nove menses. El ave 87 anios.
El ia visita la abri de un studio de arte en la capital, Havana, a la sera de mercurdi.
Fotos mostra el en aspeta frajil, paseante con basto e regardante obras artal.
Castro ia gida Cuba tra cuasi un dui de sentenio. En 2006, el ia dona la potia a sua frate, Raul, par causa de sua mal sania.
@T FIFA menasa Curitiba sur rapidia de construi
@L aora_oji/2014/fifa_menasa_curitiba_sur_rapidia_de_construi
====== FIFA menasa Curitiba sur rapidia de construi ======
22 janero 2014
FIFA ia avisa Curitiba, un site brasilera cual intende ospita la Copa Mundal de 2014, ce lo risca deveni escluida si la labora no rapidi.
La secretor jeneral de FIFA, Jérôme Valcke, ia dise ce la progresa de laboras a la stadion Arena de Baixada es grave retardada.
A 18 febrero, on va anunsia esce Curitiba, en Brasil sude, va resta un site ospitante.
A min ca sinco menses ante la comensa de la torneo, ses de la 12 stadiones es ancora noncompletida.
@T Fifa no ia deside sur la datas de la Copa Mundal en 2022
@L aora_oji/2014/fifa_no_ia_deside_sur_la_datas_de_la_copa_mundal_en_2022
====== Fifa no ia deside sur la datas de la Copa Mundal en 2022 ======
9 janero 2014
Fifa ia ata rapida per redui la efeto de un informa de sua propre secretor jeneral ce la Copa Mundal en Catar en 2022 no va aveni en la estate.
La autoriosa de futbal ia asentua ce on no va fa un deside final asta pos la Copa de 2014, e pos multe consulta.
Jerome Valcke ia dise a Radio Frans: "La datas per la Copa Mundal no va es junio e julio." El ia sujesta ce lo pote aveni entre 15 novembre e 15 janero.
Sepp Blatter, la presidente de Fifa, ia dise ja ce la torneo va aveni en novembre o desembre, ma la organizores catari espera ancora junio e julio.
@T FIFA permete ce la stadion de Curitiba partisipa en la Copa Mundal
@L aora_oji/2014/fifa_permete_ce_la_stadion_de_curitiba_partisipa_en_la_copa_mundal
====== FIFA permete ce la stadion de Curitiba partisipa en la Copa Mundal ======
19 febrero 2014
La site Curitiba en Brasil va resta un loca de la Copa Mundal de futbal de esta anio. Ma FIFA, la asosia autoriosa de la sporte, ia insiste ce la preparas debe continua con rapidia masima.
La stadion Arena da Baixada en la sude de la pais ia es un de ses locas cual no ia es preparada ante un limita inisial de 31 desembre.
Organizores ia introdui plu sentos de laborores per sasia la esijes de construi, e per evita deveni la loca prima abandonada de un Copa Mundal.
La stadion de 40 000 persones va ospita cuatro maxes de la torneo.
@T Focos savaje en Australia sude
@L aora_oji/2014/focos_savaje_en_australia_sude
====== Focos savaje en Australia sude ======
10 febrero 2014
Deses de focos savaje traversa la sude de Australia, malida par clima calda e ventas forte.
Ofisiores dise ce casas ia es destruida en cuantia nonsabeda, e un pompor ia es ferida en la stato Victoria. On ia comanda ce alga abitores parti.
Flamas ia ateni an la suburbes esterna de Melbourne, la site du la plu grande de Australia.
La focos en Victoria es la plu mal de pos 2009.
@T Fortes iraci batalia gerores en Anbar
@L aora_oji/2014/fortes_iraci_batalia_gerores_en_anbar
====== Fortes iraci batalia gerores en Anbar ======
3 janero 2014
Fortes spesial en Irac batalia gerores jihadiste ci ocupa partes grande de du sites, Fallujah e Ramadi.
Ambos sites es en la provinse de Anbar, do atas par gerores suni ia deveni resente plu comun.
Un bomba de auto en la vila Baladruz, a 73 cilometres norde-este de Baghdad, ia mata a la min 12 persones.
La gerores representa la Stato Muslim de Irac e la Mediteraneo Este, un grupo cual es ativa sur la frontera entre Irac e Suria, e en la partes suni de ambos paises.
En Irac, la rompe largi entre la governa xia e la minoria suni. Sunis iraci acusa ce la governa es prejudosa contra los. Ma la xias no gusta la presentia de al-Qaidah en areas suni como Anbar, car al-Qaidah despeta sua crede e regarda los como atacables valida.
@T Fortes rusce bloci airoportos en Crim
@L aora_oji/2014/fortes_rusce_bloci_airoportos_en_crim
====== Fortes rusce bloci airoportos en Crim ======
28 febrero 2014
Fortes militar de Rusia bloci la airoporto de Sevastopol en Crim, un area de Ucraina.
Arsen Avakov, la ministro de internas de Ucraina, ia descrive sua presentia como "un invade armada".
Omes armada ia saisi ance Simferopol, la otra airoporto xef de Crim, en la matina de venerdi.
Relatas entre Rusia e Ucraina ia deveni tensa pos la despone de Viktor Yanukovych, ci es aora en Rusia. La situa ia es spesial tensa en Crim, la sola parte de Ucraina con majoria rusce.
@T François Hollande ataca alegas sur un relata de ama
@L aora_oji/2014/francois_hollande_ataca_alegas_sur_un_relata_de_ama
====== François Hollande ataca alegas sur un relata de ama ======
10 janero 2014
François Hollande, la presidente de Frans, dise ce el considera litiga un jornal cual ia alega ce el adultera con un ator.
Hollande ia descrive la reportas como un ataca a sua direto de privatia, ma el no ia nega la alegas.
La numero presente de la jornal Closer conteni sete pajes de revelas e fotos sur sua relata de ama con Julie Gayet.
Gayet es un ator conoseda de televisa e sinema. El ia apare en plu ca 50 filmas, e en un de la anunsias televisada per la campania de eleje Hollande.
Rumores sur sua relata ia sirculi en la rede tra multe menses.
@T François Hollande recomenda proibi presentas par Dieudonné
@L aora_oji/2014/francois_hollande_recomenda_proibi_presentas_par_dieudonne
====== François Hollande recomenda proibi presentas par Dieudonné ======
7 janero 2014
François Hollande, la presidente de Frans, ia recomenda forte ce ofisiores segue un comanda per proibi presentas par la comediste controversa Dieudonné.
On dise ce la presenta comica "La Mur" conteni bromas antiiudiste.
Dieudonné dise ce el va apela contra la proibi, usante la leges potiosa cual defende la libria de parla en Frans.
El es ja condenada a ses veses per parla odiosa contra iudis. El ia broma sur salas de gasi, e on acusa ce el burla la survivores e vitimes de la Olocausto.
El nega ce un jesto cual el fa comun es un saluta nazi inversada.
@T Frans acusa un airolinia iamani sur un cade matante en 2009
@L aora_oji/2014/frans_acusa_un_airolinia_iamani_sur_un_cade_matante_en_2009
====== Frans acusa un airolinia iamani sur un cade matante en 2009 ======
30 janero 2014
Frans ia acusa Yemenia, un airolinia iamani, con mata nonintendeda pos un cade de avion cual ia mata 152 persones en 2009.
Lo ia cade prosima a Comori en la Canal de Mosambic.
Autoriosas franses dise ce la Airbus A310 ia comensa de la capital de Iaman, ma ce on no ia debe permete ce lo vola.
La plu de la persones matada ia es sitadanes franses ci ia vola a Comori per visita relatadas. Sola un person ia survive: un xica adolesente ci on ia salva de la mar.
@T Frans e la Rena Unida culpa la governa suri per nonprogresa
@L aora_oji/2014/frans_e_la_rena_unida_culpa_la_governa_suri_per_nonprogresa
====== Frans e la Rena Unida culpa la governa suri per nonprogresa ======
16 febrero 2014
Frans e la Rena Unida ia colpa la governa suri per la colasa de discutes de pas con la oposa en Genève.
William Hague, la ministro de esternas de la RU, ia comenta: "La culpablia reposa intera con la governa de Assad."
Sua corespondente franses, Laurent Fabius, ia dise ce la governa ia "bloci cualce progresa".
La consenta final ia dura tra no plu ca 27 minutos a la matina de saturdi, la dia ses de la serie du de discutes.
@T Frans negosia un sesaspara partal en Bangui
@L aora_oji/2014/frans_negosia_un_sesaspara_partal_en_bangui
====== Frans negosia un sesaspara partal en Bangui ======
13 janero 2014
Gerores mutua oposante ia abrasa la un la otra en un distrito de Bangui, la capital de la Republica de Africa Sentral, pos cuando la militaria franses ia susede negosia un sesaspara.
Fusilores ia desprende sua armas en la distrito sude de Bimbo, pos dias de batalia violente entre grupos cristian e muslim.
La site es aora multe plu calma, an si on combate ancora en otra locas.
En lundi, on va comensa discutes sur eleje un presidente tempora nova.
@T Frans no partisipa en la aniversario de la jenoside ruanda
@L aora_oji/2014/frans_no_partisipa_en_la_aniversario_de_la_jenoside_ruanda
====== Frans no partisipa en la aniversario de la jenoside ruanda ======
7 april 2014
La governa franses ia anunsia ce lo retira sua de la onoras a lundi per la aniversario 20 de la jenoside ruanda. La deside segue un acusa par Paul Kagame, la presidente de Ruanda, ce Frans ia partisipa en la matas coletiva en 1994.
Kagame ia fa alegas simil a ante, e Frans ia nega sempre los. La ministreria franses de esternas dise ce la comentas oposa laboras de reconsilia entre la du paises.
Christiane Taubira, la ministro franses de justia, ia cansela sua intende de vade a la avenis en Kigali a lundi.
Kagame ia parla a un jornal semanal de novas en la lingua franses. El ia denunsia "la rol direta de Beljia e Frans en la prepara political per la jenoside". Ruanda ia es un colonia beljes asta 1962.
La intervisa ia es publicida a soldi, ma ia es fada a 27 marto. En lo, Kagame dise ce, pos 20 anios, "la sola critica credable en la oios de Frans es ce los no ia fa sufisinte per salva vives en la tempo de jenoside".
Ruanda prepara per onora la aniversario de la jenoside cual ia mata a la min 800 mil persones en sirca 100 dias. La matadas ia es xef tutsis e hutus moderada.
La violentia ia es gatilida par la mori de presidente Juvenal Habyarimana, un hutu ci ia es matada en un cade de avion a 6 april 1994. La jenoside ia fini cuando la Fronte Patriota Ruanda, la grupo rebelante tutsi de Kagame, ia vinse la soldatos de governa en julio de acel anio.
@T Frans va envia plu soldatos a la RAS
@L aora_oji/2014/frans_va_envia_plu_soldatos_a_la_ras
====== Frans va envia plu soldatos a la RAS ======
14 febrero 2014
Frans va envia 400 plu soldatos a la Republica de Africa Sentral, aumentante sua cuantia intera de soldatos ala a 2000.
La militaria franses ia labora con 5500 soldatos de paises african per fini plu ca un anio de violentia setal matante.
La presidente, François Hollande, ia recomenda ce la Nasiones Unida aselera la envia de mantenores de pas a la pais.
Deses de miles de muslimes ia fuji ja, en cuando militias cristian aumenta sua atacas en semanas resente.
@T Frans va estradi un maniate cazac frodante
@L aora_oji/2014/frans_va_estradi_un_maniate_cazac_frodante
====== Frans va estradi un maniate cazac frodante ======
10 janero 2014
Un corte franses ia judi ce Mukhtar Ablyazov, un maniate oposante casac, debe es estradida a Rusia o Ucraina per fronti acusas de froda.
On acusa ce el ia fura miles de miliones de dolares de un banco casac, cual opera ance en Rusia e Ucraina.
On ia aresta el a la costa sude de Frans en julio 2013. El nega la acusas.
Sua enfantes dise ce la vive de sua padre va es perilida si on move el a Cazacstan.
@T Furores ruba un banco barati par escava un tunel
@L aora_oji/2014/furores_ruba_un_banco_barati_par_escava_un_tunel
====== Furores ruba un banco barati par escava un tunel ======
29 otobre 2014
La polisia en Barat norde xerca furores ci ia ruba un banco par escava un tunel de 40 metres, direta a la sala securida, en la media de la note.
La furores ia prende mone, joalas, e otra cosas con valua de sentos de miles de dolares, de un departe de la Banco Nasional Pandjabi en Haryana.
La tunel ia comensa en un casa vacua prosima.
Lo pare ce la furores ia es inspirada par Dhoom, un filma popular hindi cual mostra un ruba simil.
A matina de lundi, ofisiores de la banco governal en la vila Gohana ia es stonada en descovre la buco grande en la tera.
La polisia crede ce la fura ia aveni en la note de saturdi. La rubores ia vacui 77 de plu ca 350 caxas securida.
On ia asembla un ecipo spesial per investiga la fura, ma on ia fa ancora no arestas.
Ofisiores de banco ia dise ce la valua esata de la cosas furada ancora no es calculada.
Devender Malik, la manejor de la banco, ia comenta: "Lo pare ce la fura ia es esecutada pos un scema atendosa par la rubores cual ia estende cisa tra alga dias."
@T Fusilis nova a la airoporto internasional de Karachi
@L aora_oji/2014/fusilis_nova_a_la_airoporto_internasional_de_karachi
====== Fusilis nova a la airoporto internasional de Karachi ======
9 junio 2014
Fusilis ia recomensa a la airoporto la plu grande de Pacistan. Esta segue un ataca par fusilores a la note de soldi, cual ia lasa a la min 23 persones mor.
La ataca ia aveni en la airoporto internasional de Karachi, a un termina usada per volas de carga e persones importante. Multe de la matadas ia es empleadas de la airoporto.
Violentia nova ia comensa a mera oras pos un declara par la armada ce lo ia regania controla e ce tota 10 atacores ia es matada.
La Taliban de Pacistan ia dise ce los ia fa la ataca. Un de sua portavoses ia dise: "Esta es un mesaje a la governa pacistani ce nos vive ancora per reata contra la matas de persones nonculpable en atacas de bomba contra sua viletas."
Tota aviones es diverjeda a otra airoportos.
Analistes dise ce la ataca sumina plu la atenta par Nawaz Sharif, la ministro xef, a inisia discutes de pas con la Taliban.
La negosias ia progresa apena de pos febrero. Oposores teme ce la tempo de discute pote permete ce la ativistes regrupi e gania fortia.
@T Fusilores ataca un asembla antigovernal en Tai
@L aora_oji/2014/fusilores_ataca_un_asembla_antigovernal_en_tai
====== Fusilores ataca un asembla antigovernal en Tai ======
23 febrero 2014
Fusilores ia xuta a un asembla antigovernal en Tai este. Los ia mata un xica de sinco anios, e ia feri deses de otra persones.
La atacores ia lansa esplodentes e ia fusili a protestores a la asembla, cual ia es clamada par la Comite Poplal de Reformi Democrata.
La asembla ia es aveninte a un mercato de note en la distrito Khao Saming de la provinse Trat, en la tarda de saturdi.
Tensas tra Tai ia aumenta de pos novembre, cuando un serie de protestas antigovernal ia comensa.
@T Fusilores mata cuatro persones en Tunis
@L aora_oji/2014/fusilores_mata_cuatro_persones_en_tunis
====== Fusilores mata cuatro persones en Tunis ======
17 febrero 2014
Fusilores en Tunis ueste ia mata cuatro persones, incluinte du polisiores, pos bloci un strada e xuta a autos.
Un patrulia de polisia ia es enviada a la area Jendouba per investiga reportas ce du persones ia es fusilida.
La atacores ia fusili alora la auto de polisia, matante la du ofisiores a interna.
Fortes de securia en la pais ia fa un campania longa contra ativistes violente islamiste tra la du anios pasada.
@T Fusilores mata oto persones en Karachi
@L aora_oji/2014/fusilores_mata_oto_persones_en_karachi
====== Fusilores mata oto persones en Karachi ======
10 febrero 2014
En Karachi, un site de porto en Pacistan sude, fusilores sur motosicles ia mata oto persones, incluinte un xica de oto anios e sua padre, a la casa de un sanor spirital.
12 otra persones, cisa plu, ia es ferida en la fusili. Deses ia es espetante per vide la eglesor sufi.
Karachi es la site la plu grande de Pacistan, e ave sirca 18 milion abitores.
Lo ave ja un problem de violentia setal, etnical, e political tra anios.
@T Fusilores saisi construidas de governa en Crim
@L aora_oji/2014/fusilores_saisi_construidas_de_governa_en_crim
====== Fusilores saisi construidas de governa en Crim ======
27 febrero 2014
Fortes de securia en Ucraina es vijilante pos la saisi de construidas de governa par omes armada en Crimea, un area con majoria rusce.
On ia leva la bandera rusce supra de construidas en Simferopol, la capital.
La governa local ia dise ce lo negosia con la fusilores.
La saisi de la construidas aveni a la dia pos frontis entre separadistes favorente Rusia e suportores de la gidores nova de Ucraina.
@T Futbalor Eusebio mori a 71 anios
@L aora_oji/2014/futbalor_eusebio_mori_a_71_anios
====== Futbalor Eusebio mori a 71 anios ======
5 janero 2014
La futbalor lejendin Eusebio, ci ia fa la plu goles en la Copa de Mundo de 1966, ia mori a la eda de 71 anios. El ia es tratada en ospital a alga veses tra la anio pasada par causa de problemes de cor e respira.
Eusebio da Silva Ferreira ia nase en 1942 en Mosambic cuando lo ia es ancora un colonia portuges.
En 745 maxes profesal, el ia fa 733 goles. El ia jua a 64 veses per la ecipo nasional de Portugal, e ia fa alora 41 goles.
On regarda el como un de la juores la plu bon de cualce tempo. El ia es conoseda per sua aselera stonante e sua capasia impresante de dribla.
En 1965, el ia es nomida como la Futbalor European de la Anio.
@T Futbalores Ribery e Benzema es prosededa sur un prostituida minor
@L aora_oji/2014/futbalores_ribery_e_benzema_es_prosededa_sur_un_prostituida_minor
====== Futbalores Ribery e Benzema es prosededa sur un prostituida minor ======
21 janero 2014
En Paris, on ia comensa la prosede de Franck Ribery e Karim Benzema, du futbalores acusada de copula con un prostituida de eda minor.
Ribery, un alor de Bayern München ci ave 30 anios, e Benzema, un atacor de Real Madrid ci ave 26 anios, nega ce los ia paia intendente per seso con Zahia Dehar cuando el ia ave min ca 18 anios.
Cada fronti asta tre anios en prison e multas de asta 45 000 euros ($55 000).
Ambos ia es asente de corte, representada par sua avocatos. Ance Dehar, ci ave aora 21 anios, no ia es presente.
@T Gana proibi un parola de jergo en parlamento
@L aora_oji/2014/gana_proibi_un_parola_de_jergo_en_parlamento
====== Gana proibi un parola de jergo en parlamento ======
21 febrero 2014
La parlamento ganaian ia proibi un parola de jergo popular, pos cuando sua usa ia disturba la prosegues.
La parola "tweaa" espresa desaproba en acan, la lingua xef de Gana. On ia usa lo a multe veses en debates parlamental, tal ce Edward Doe Adjaho, la presidente de la parlamento, ia proibi intera lo.
Criticistes dise ce la regula nova ia ariva a esata la bon momento per proibi politicistes de cria "tweaa" a presidente John Mahama en sua parla anial en la semana veninte.
La parola ia deveni popular pos la sperde virusin de un video en cual un ofisior dise coler "Ci ia dise 'tweaa'?" pos un interompe de sua parla estra un ospital.
@T Ganges ensende buses en Brasil
@L aora_oji/2014/ganges_ensende_buses_en_brasil
====== Ganges ensende buses en Brasil ======
5 janero 2014
En Brasil norde-este, ganges criminal ia ensende cuatro buses e ia ataca un ofisia de polisia en la site São Luís.
La comanda per ataca ia veni de gidores de gang ci on ia aresta a la prison Pedrinhas, do a la min 59 prisonidas ia mori en la anio pasada.
La governa ia dise ce la atacas reata contra medios resente per para la violentia en prisones.
Un xica de ses anios, ci ia es en un de buses, ia sufri scaldas sever. Tre otra persones ia es ance ferida.
@T Gardores pacistani es matada en acompania un sicliste espaniol
@L aora_oji/2014/gardores_pacistani_es_matada_en_acompania_un_sicliste_espaniol
====== Gardores pacistani es matada en acompania un sicliste espaniol ======
23 janero 2014
En la provinse de Balochistan en Pacistan, fusilores ia mata a la min ses gardores ci ia acompania un sicliste espaniol.
On ia embosce los a 50 cilometres a ueste de Quetta, la capital provinsal.
Javier Colorado ia es pico ferida pos cade de sua bisicle.
En un mesaje en Facebook, el ia dise ce el intende continua sua viaja de Europa a Asia e la mundo restante.
@T Gayet litiga sur fotos alegada de sua relata con Hollande
@L aora_oji/2014/gayet_litiga_sur_fotos_alegada_de_sua_relata_con_hollande
====== Gayet litiga sur fotos alegada de sua relata con Hollande ======
17 janero 2014
Julie Gayet, la ator liada a François Hollande, la presidente franses, litiga la jornal cual ia publici fotos de sua relata alegada de ama.
En la semana pasada, Hollande mesma ia dise ce el considera litiga la jornal.
La fotos ia pone la presidentia en un crise cual ia ospitali Valérie Trierweiler, la acompanior presente de Hollande.
Gayet xerca 50 000 euros ($68 000) en compensa, e 4 000 euros per custas legal. Si el vinse, la jornal Closer va debe publici la deside sur sua paje fronte.
@T GE comanda $4000m de aviones de Boeing
@L aora_oji/2014/ge_comanda_4000m_de_aviones_de_boeing
====== GE comanda $4000m de aviones de Boeing ======
21 janero 2014
GECAS, la ramo de la compania General Electric cual lua aviones a airolinias, ia confirma ce lo ia comanda 40 aviones de Boeing con valua de $4000 milion.
La comanda inclui 20 aviones 737 MAX 8 e 20 jetos 737NG-800.
La comanda ia es fada en 2013, ma asta aora Boeing atribui lo a un cliente nonidentifiada.
GE Capital Aviation Services ia dise ce la aviones nova va aida lo a sasia la esije cresente de clientes per aviones min perosa de carburante.
@T Gerores suni controla tota de Fallujah
@L aora_oji/2014/gerores_suni_controla_tota_de_fallujah
====== Gerores suni controla tota de Fallujah ======
5 janero 2014
La governa iraci ia perde controla de la site stratejial de Fallujah, a ueste de Baghdad.
Gerores liada a al-Qaidah controla aora la sude de la site, e membros de tribus suni ocupa la resta.
Batalias ia comensa ala pos cuando soldatos ia sperde un campa de protesta de arabis suni en la site Ramadi en lundi. Los ia acusa la governa xia de marjinali la sunis.
Arabis suni local es colerida par lo cual los persepi como prejudis par la governa de ministro xef Nouri Maliki.
Los dise ance ce sua comunia de minoria es danada par medios antiteroriste cual on ia introdui per para la crese de violentia setal.
@T Ghani es inaugurada como presidente afgani
@L aora_oji/2014/ghani_es_inaugurada_como_presidente_afgani
====== Ghani es inaugurada como presidente afgani ======
29 setembre 2014
On ia inaugura Ashraf Ghani como presidente de Afganistan en un rituo a la palasio presidental en Kabul.
Esta segue ses menses de nonprogresa en un disputa sur froda elejal e un reconta de votas.
Su un acorda negosiada par la SUA, Ghani emprende la posto de presidente, en cuando la suvinsor Abdullah Abdullah pote proposa algun per posto de ministro xef.
La taliban ia descrive la acorda como "un finje dirijeda par la SUA", ma Ghani ia bonveni lo como "un vinse grande".
A sua rituo inaugural, a cual asta 100 ofisiores alta ia es presente, Ghani ia jura obedi la constitui e otra leges.
El ia loda "la move prima democrata de potia" de la pais, e ia parla amin sur Abdullah, sua oposor e aora asosior en governa.
Abdullah, ci emprende un rol nova creada, ia dise ce la du gidores va colabora "per un futur plu bon con fida e onestia".
Parlante a comensa de la rituo, Hamid Karzai, la presidente partinte, ia recomenda ce la popla suporta la governa nova. Karzai ia gida la pais de pos la despone de la governa taliban en 2001.
La ata prima cual on previde par la governa nova es la suscrive de un acorda par cual soldatos SUA va resta en Afganistan pos la fini de esta anio. Karzai ia oposa esta.
Securia en Kabul es forte oji. Poca persones es sur la stradas, e botecas es cluida. Un bomba ia esplode sur la strada a la airoporto, ma nun ia es ferida.
A venerdi, la taliban ia invade un distrito stratejial en Ghazni, un provinse este, asentuante la defias cual Ghani e sua fortes va fronti.
@T Gidores de la mundo asembla en Australia
@L aora_oji/2014/gidores_de_la_mundo_asembla_en_australia
====== Gidores de la mundo asembla en Australia ======
14 novembre 2014
Gidores de la mundo ariva en Australia per un confere de G20 a esta fini de semana en la site Brisbane en Queensland.
La confere de du dias va consentra sur temas economial. La gidores va discute la crea de emplea, la identifia de frodores de imposta, e la forti de la economia global.
Relatas tensada con Rusia sur Ucraina va atrae ance la atende, e campaniores vole ce la gidores discute la cambia de clima.
En Brisbane, laborores de governa local ave un dia de vacanse par causa de la cuantia de restrinjes de viaja. Des-tre gidores va ariva ala oji.
6000 polisiores va manteni la securia. Dudes-sete grupos diversa ia reseta permetes de protesta a areas indicada, e on previde ce miles de persones va protesta tra la fini de semana.
Lo es probable ce la gidores va ajunta a un projeta ja acordada a un consenta de ministros de finansia en febrero, per aumenta la crese economial global par 2% en sinco anios.
Ma Australia ia resiste ajunta la cambia de clima a la temas per discute.
Plu temprana en esta semana, la SUA e Xina ia fa prometes importante sur emetes contaminante. La SUA ia promete reduis plu grande, e, a la ves prima, Xina ia declara un data ante cual sua emetes va culmina.
An tal, la governa australian de Tony Abbott fronti criticas sur sua politica de clima. Lo ia abandona un imposta de carbon e goles per la usa de enerjia renovable, preferente paia a contaminores per redui sua emetes en loca.
Ier, plu ca 200 protestores ia asconde sua testas en la arena sur la Plaia de Bondi, en un protesta simbolin contra la nonreata political a la cambia de clima.
La atende va es ance dirijeda a Vladimir Putin, la presidente rusce, en relata a Ucraina. Alga australianes ia demanda ce on impedi el de la confere par causa de la cade de avion MH17 de Malaysia Airlines.
Tredes-oto australianes ia es entre la 298 persones ci ia mori cuando la avion ia cade sur la parte este de Ucraina cual es ocupada par rebelores. Paises ueste crede ce la misil ia es furnida par Rusia, ma Rusia nega esta.
@T Goles nova per enerjia en la Uni European ante 2030
@L aora_oji/2014/goles_nova_per_enerjia_en_la_uni_european_ante_2030
====== Goles nova per enerjia en la Uni European ante 2030 ======
23 janero 2014
La Comision European ia descrive sua intendes per politica de clima e enerjia asta 2030.
Los vole un gol obligada de redui emetes de carbon par 40% de sua cuantia en 1990. 27% de enerjia european va debe es renovable en o ante 2030, ma on no va dona goles obligada a la statos membros individua.
La proposas va es revisada par ministros xef.
Grupos verde ia dise ce la goles nova no es sufisinte aspirante, e ce la redui de emetes par 40% es "perilosa basa".
@T Google compra tecnolojia de identifia par ondas de sona
@L aora_oji/2014/google_compra_tecnolojia_de_identifia_par_ondas_de_sona
====== Google compra tecnolojia de identifia par ondas de sona ======
17 febrero 2014
Google ia compra SlickLogin -- un comersia nova de Israel cual furni la tecnolojia cual permete ce un pajeria serti la identia de un usor par usa ondas de sona.
La tecnica envia un sona unica jenerada e cuasi silente tra la parladores de la computador. La sona es oiada par un program en la telefoneta de la usor.
La program analise la sona e reenvia un sinial per confirma la identia.
On pote usa la tecnolojia como sustitua per un parola secreta, o como un strato ajuntada de securia.
@T Google debe move un barcasa misteriosa
@L aora_oji/2014/google_debe_move_un_barcasa_misteriosa
====== Google debe move un barcasa misteriosa ======
5 febrero 2014
On ia comanda Google a move un barcasa enorme cual lo ia ancori a la Baia de San Francisco, par manca de permetes valida.
Un ofisior ia dise ce la compania pote move la barcasa a un sentro prosima de construi, cual ave la permetes nesesada.
La apare de la barcasa, e de un simil a la costa este de la SUA, en la anio pasada ia confonde multe persones. Google ia dise poca sur los.
En un anunsia en novembre, la compania ia dise sola ce lo "usa la barcasa como un spasio de interata, do persones pote aprende sur tecnolojia".
@T Google revela un telefoneta con sensadores 3D
@L aora_oji/2014/google_revela_un_telefoneta_con_sensadores_3d
====== Google revela un telefoneta con sensadores 3D ======
21 febrero 2014
Google ia revela un telefoneta intelijente con aparatos e programes con cual lo pote crea mapas de tre dimensiones sur la ambiente de un usor.
La sensadores de la aparato permete ce lo fa plu ca 250 000 mesuras en cada secondo, e refresci sua consensia de sua loca en tempo real.
Google ia comenta ce aplicas posible inclui juas, la crea de mapas de spasios interna, e aida persones ci no vide bon a traversa salas nonconoseda.
Lo ia ofre 200 modeles prototipal a developores ci desira scrive programes per la aparato.
@T Google va compra un fabricor de termostatos intelijente
@L aora_oji/2014/google_va_compra_un_fabricor_de_termostatos_intelijente
====== Google va compra un fabricor de termostatos intelijente ======
14 janero 2014
La compania Google ia anunsia ce lo intende compra Nest Labs, un fabricor de termostatos, per $3,2 mil milion. Esta continua un serie de compras resente.
Google ia dise ce on va completi la acorda en la menses veninte.
Nest Labs ave sua base en California. Lo ia es fundida par du dirijores pasada de Apple.
Lo produi un termostato capas de aprende la condui de usores e de deside esce un construida es ocupada o no. La aparato usa sensadores de temperatur, umidia, ativia, e lus.
@T Google va fa cambias per evita un multa grande
@L aora_oji/2014/google_va_fa_cambias_per_evita_un_multa_grande
====== Google va fa cambias per evita un multa grande ======
6 febrero 2014
Google ia promete fa cambias major a la modo de presenta sua competores en sua resultas de xerca, en un atenta de evita un multa de multe biliones de euros.
La cambias debe sufisi per fini un investiga de tre anios sur la compania de xerca, par la Uni European.
On ia acusa Google de favore tro sua propre produidas en sua resultas.
La compania ia dise ce lo espeta felis dirije se a la problem.
@T Google vende Motorola Mobility a Lenovo
@L aora_oji/2014/google_vende_motorola_mobility_a_lenovo
====== Google vende Motorola Mobility a Lenovo ======
30 janero 2014
En un move nonprevideda, Google ia vende Motorola Mobility, un compania american de telefoneta, a Lenovo, un compania xines cual fabrica computadores, per $2,91 mil milion.
Google ia paia $12,5 mil milion per la compania a min ca du anios ante aora.
Lenova intende forti sua departe de telefonetas intelijente par esta compra, cual va compensa cisa per sua comersia desaselerante de computadores personal.
An tal, Google va reteni la plu de la patentas profitosa de Motorola, incluinte un per programes de Androide.
@T Hollande confirma sua separa de Trierweiler
@L aora_oji/2014/hollande_confirma_sua_separa_de_trierweiler
====== Hollande confirma sua separa de Trierweiler ======
26 janero 2014
La presidente de Frans, François Hollande, ia confirma sua separa de sua acompanior Valérie Trierweiler. El ia informa un ajenteria de novas franses ce sua vive compartida ia fini.
Ma plu temprana, sua ofisia a la Palasio de Elisio ia dise ancora ce "rumores falsa" sirculi en la jornalisme franses.
A du semanas ante aora, un jornal ia publici fotos cual ia pare mostra Hollande en un relata de ama con Julie Gayet, un ator.
Trierweiler ia pasa un semana en ospital pos la revelas.
@T Hollande e Obama demanda juntada un acorda sur cambia de clima
@L aora_oji/2014/hollande_e_obama_demanda_juntada_un_acorda_sur_cambia_de_clima
====== Hollande e Obama demanda juntada un acorda sur cambia de clima ======
11 febrero 2014
La presidente franses, François Hollande, e sua corepondente SUA, Barack Obama, ia demanda juntada un acorda global "aspirante" sur cambia de clima.
Los ia publici un article en la jornales Washington Post e Le Monde.
La du presidentes ia xerca suporta per un acorda, a un confere de clima en Paris en 2015, de redui emetes de gas invernerial "par atas concreta".
Hollande va comensa un visita ofisial a la SUA en lundi.
@T Hollande evita un demanda sur sua vive privata
@L aora_oji/2014/hollande_evita_un_demanda_sur_sua_vive_privata
====== Hollande evita un demanda sur sua vive privata ======
14 janero 2014
François Hollande, la presidente franses, ia dise ce el esperia "un momento difisil" en sua vive privata, pos alegas de un relata de ama con Julie Gayet, un ator de filmas.
Ma el ia refusa responde a demandas sur la alega, disente ce "cosas privata debe es privata tratada".
Hollande ia parla a sua confere prima de jornalistes de pos la alegas en la jornal Closer en la semana pasada.
El ia dise ce el va clari esce Valérie Trierweiler es ancora la dama prima, ante cuando el viaja a Washington a 11 febrero.
@T Homs espeta la ariva de comeda e medisin
@L aora_oji/2014/homs_espeta_la_ariva_de_comeda_e_medisin
====== Homs espeta la ariva de comeda e medisin ======
8 febrero 2014
En Suria, la Nasiones Unida e ajenterias de aida espera trae comedas e medisin a 3000 siviles trapida en Homs.
La convoias de aida va entra a la site en saturdi, la dia du de un sesaspara tempora entre rebelores e fortes de governa.
En venerdi, on ia sorti plu ca 80 persones de areas ocupada par rebelores -- areas asejada tra 18 menses.
Multe de la sortidas ia aspeta frajil e fatigada. Alga ia dise ce los no ia come pan tra 5 menses.
@T Hongkong mata miles de galetas par causa de gripe avial
@L aora_oji/2014/hongkong_mata_miles_de_galetas_par_causa_de_gripe_avial
====== Hongkong mata miles de galetas par causa de gripe avial ======
29 janero 2014
Hongkong ia comensa mata 20 000 galetas pos descovre la virus H7N9 de gripe avial en avias emportada de la parte xef de Xina.
On ia fa la descovre a un mercato per vendores major. La governa ia dise ce on debe destrui tota galetas a la mercato.
La governa ia proibi ance la emporta de galetas vivente de la parte xef de Xina per tre semanas.
H7N9 ia move de infeta galetas e patos a infeta umanas en la periodo temprana de 2013.
@T Ienas perili persones sin casa en Itiopia
@L aora_oji/2014/ienas_perili_persones_sin_casa_en_itiopia
====== Ienas perili persones sin casa en Itiopia ======
23 febrero 2014
Ienas urban deveni un problem perilosa en Addis Ababa, la capital de Itiopia, do los ataca persones ci dormi sin casa.
En 2011, la autoriosas de la airoporto ia debe clama xasores per xuta un manada de ienas cual ia menasa la atera e enaira de aviones.
Persones ci abita prosima a un semetero publica ia cexa ce la bestias escava e come la corpos de povres ci es enterada en tombas multe profonda.
La ienas tende xasa en grupos. A un note, un gardor a un ambasada ia vide un linia de 40 corente longo la serca retro de la compleso.
@T India cansela un comanda enorme de elicotores
@L aora_oji/2014/india_cansela_un_comanda_enorme_de_elicotores
====== India cansela un comanda enorme de elicotores ======
1 janero 2014
India ia cansela un acorda de paia $753 milion per elicotores lusosa a Finmeccanica, un compania grande italian.
La acorda ia es per 12 elicotores per transporta la presidente, la ministro xef, e persones simil importante. On ia suscrive lo en febrero 2010 pos cuando la compania ia vinse competores rusce e american.
India ia pausa sua paias en febrero 2013 pos un alega ce AgustaWestland, un ramo anglo-italian de la compania, ia fa sobornas per gania la negosia.
La elicotores es construida en Britan. On ia trae ja tre de los a India, e la intende ia es trae la restantes ante la media de 2014.
@T Indonesia suprapasa Brasil en rapidia de desforesti
@L aora_oji/2014/indonesia_suprapasa_brasil_en_rapidia_de_desforesti
====== Indonesia suprapasa Brasil en rapidia de desforesti ======
1 julio 2014
Un studia nova mostra ce, tra un periodo de 12 anios, Indonesia ia perde sirca 60 mil cilometres cuadrida de foresta, un area prosima a la grandia de Island.
La desforesti ia deveni tan rapida ce, a la ves prima, Indonesia ia esede Brasil en la rapidia de sua elimina de forestas tropical.
Siensistes ia oserva la crese de tera desforestida en Indonesia entre 2000 e 2012, usante satelites. Los dise ce la tera ia es vacuida per crea spasio per cultiverias, incluinte los de olio de palma.
En 2012, Indonesia ia perde 8400 cilometres cuadrida de foresta, en cuando Brasil ia perde 4600.
La rexercores dise ce la desforesti causa un aumenta de emetes de gas invernerial, e un redui de biodiversia.
Indonesia ave 10% de la plantas e 12% de la mamales de la mundo. Lo es bon conoseda per la diversia de sua animales, incluinte orangutanes e tigres sumateran.
La governa ia suscrive un proibi de desforesti en 2011, intendente lenti la prosede.
Ma ambientistes dise ce politicistes frodante tende ancora vende areas vasta de foresta per profita. Los recomenda plu monitoris e punis per preveni ce Indonesia perde tota sua forestas.
En la anio pasada, on ia crea focos savaje e enorme en Indonesia per sutrae arbores. Estas ia envia un nebla fumosa a Malaisia e Singapor, provocante consernas sur sania en acel paises visina.
Noria ia paia cuasi 50 milion dolares a Indonesia per aida crea instituidas nova per redui la desforesti. La pais scandinavian ia promete mil milion plu dolares si Indonesia pote demostra un intende seria de para la prosede.
@T Infla en la eurozona desende a 0,8%
@L aora_oji/2014/infla_en_la_eurozona_desende_a_0_8
====== Infla en la eurozona desende a 0,8% ======
7 janero 2014
En la eurozona, la taso de infla ia redui a 0,8% en desembre. Lo ia es 0,9% en novembre.
La proportio distanti plu de la gol de la Banco Sentral European, cual es pico su 2%.
En novembre, la Banco ia redui sua taso fundal de interesa a la recordo basa de 0,25%, per refleta prevides de infla basa.
La Banco va fa un encontra en esta semana, ma on no espeta un cambia de sua politica.
La redui de infla indica cisa ce la eurozona risca un periodo de defla, en cual consumores pospone sua compras en espeta ce presos va desende an plu.
@T Inondas longo la Rio Thames
@L aora_oji/2014/inondas_longo_la_rio_thames
====== Inondas longo la Rio Thames ======
11 febrero 2014
Profondias recordo ia es mesurada a la Rio Thames en England, car inondas continua mali.
On ia avisa sur inondas sever longo un parte de la rio en la contias Berkshire e Surrey. 2500 casas es perilida.
La Ajenteria de Ambiente averti ance sur acua levante en la Plano de Somerset en England sude-ueste.
Meteorolojistes ia dise ce lundi va es la dia la plu seca de la semana, ma ce rios pote continua crese en cuando la flue de pluves presedente ariva.
@T Inondas mata multe en la capital de Burundi
@L aora_oji/2014/inondas_mata_multe_en_la_capital_de_burundi
====== Inondas mata multe en la capital de Burundi ======
11 febrero 2014
A la min 50 persones ia mori cuando Bujumbura, la capital de Burundi, ia es colpada par inondas e liscas de tera.
On ancora no pote furni un cuantia esata, car corpos pote es ascondeda en la fango o su detrito.
Un om ia dise ce el ia perde nove relatadas.
La moreria de la ospital xef es plen, e dotores trata pasientes a estra.
@T Intercambias amarga a la confere de pas en Geneve
@L aora_oji/2014/intercambias_amarga_a_la_confere_de_pas_en_geneve
====== Intercambias amarga a la confere de pas en Geneve ======
23 janero 2014
En la dia prima de un confere major de pas en Suiz, la governa suri e sua oposores political major ia intercambia acusas amarga.
La oposante e la SUA ia dise ce presidente Bashar al-Assad ave no validia, e ce el debe renunsia sua potia.
La ministro suri de relatas stranjer ia fa un intercambia brusca con Ban Ki-moon de la NU sur la longia de sua parla. El ia dise ance ce sola suris pote deside la fortuna de Assad.
La confere en Geneve discute un documento cual proposa un scema de cambia political per Suria.
@T Iran comensa redui la rici de uranio
@L aora_oji/2014/iran_comensa_redui_la_rici_de_uranio
====== Iran comensa redui la rici de uranio ======
20 janero 2014
Iran ia comensa redui sua rici de uranio, su un acorda cual va diminui ance la medios de puni internasional la pais.
La acorda ia es fada con la SUA, Rusia, Xina, e potias european en novembre.
La Departe Internasional de Enerjia Atomal, un gardor sur cosas nucleal, va confirma ce Tehran ia limita sua rici.
La suspende partal de medios puninte par la UE e SUA va permete ce Iran recomensa sua esportas de petrocimicales e sua comersia sur oro.
@T Iran va revela informas sur gatilios nucleal
@L aora_oji/2014/iran_va_revela_informas_sur_gatilios_nucleal
====== Iran va revela informas sur gatilios nucleal ======
10 febrero 2014
La governa irani ia promete furni informas sur gatilios en un de sete pasos intendeda per calmi temes sur sua program nucleal.
Lo ia ateni un acorda pos du dias de negosias con la Ajenteria Internasional de Enerjia Atomal, un gardor de NU, en sua capital, Tehran.
Tota la sete medios prometeda debe es completida ante 15 maio.
La AIEA investiga cualias posible militar de la labora nucleal de Iran, un alega negada par la pais.
@T Island prepara per un eruta volcanal
@L aora_oji/2014/island_prepara_per_un_eruta_volcanal
====== Island prepara per un eruta volcanal ======
19 agosto 2014
La risca de un eruta a la volcan Bárðarbunga en Island ia aumenta. Lo mostra indicas de moves continuante de magma.
La ofisia meteorolojial de la pais ia dise ce lo ia alti la risca a aviones a la nivel orania, supra cual sola la nivel roja es plu perilosa.
Cualce eruta ta pote causa inondas o emetes de gas.
La volcan Eyjafjallajökull ia eruta en 2010, produinte un nube de sene cual ia disturba multe la usa de aviones en Europa e ia restrinje la viajas de sentos de miles de pasajores.
La sistem de Bárðarbunga es situada su la area norde-ueste de la glasia Vatnajökull.
Un ativia sismica intensa ia comensa en la volcan a saturdi. En la oras temprana de lundi, la area ia esperia sua trematera la plu forte de pos 1996.
La nivel orania indica ce un volcan mostra "un turba grandinte con posibles aumentada de eruta" o ce lo eruta ja, ma sin emetes major de sene volcanal.
La nivel roja sinifia ce un eruta es a punto de aveni, o ce lo aveni ja "con emetes notable de sene volcanal a la atmosfera".
@T Isolas recrese en la sentenio pos un siclon
@L aora_oji/2014/isolas_recrese_en_la_sentenio_pos_un_siclon
====== Isolas recrese en la sentenio pos un siclon ======
21 febrero 2014
Lo pare ce un serie de isolas Pasifica ia "recrese" pos es ruinada par un siclon a un sentenio ante aora.
Un tempesta potiosa en 1905 ia mata cuasi tota abitores de la Atol Nadikdik -- un parte de la Isolas Majel -- e ia lava la plu de la isolas a via.
Ma parente la isolas ia recrea se. La un es aora denova covreda con plantas stable, e otra isolas plu peti ia repare e deveni un sola masa de tera.
On esplica ce la tempesta ia colie un cuantia enorme coral a sur la isolas, e esta ia aida los a reorganiza se.
@T Israel aproba plu ca 500 abitadas nova en Ieruxalim este
@L aora_oji/2014/israel_aproba_plu_ca_500_abitadas_nova_en_ieruxalim_este
====== Israel aproba plu ca 500 abitadas nova en Ieruxalim este ======
6 febrero 2014
Ofisiores israeli ia dona sua aproba final de 558 apartes nova en colonias iudi en Ieruxalim este.
La consilia de la site ia dise ce sua comite sur construidas ia aproba permetes de construi en tre visinerias.
La apartes va es creada sur tera cual Israel ia catura en la gera de Asia sude-ueste de 1967, un adota cual on no reconose internasional.
La lege internasional judi ce abitadas ala construida es nonlegal, ma Israel disputa esta.
@T Israel aresta tre membros de al-Qaidah en Ieruxalim
@L aora_oji/2014/israel_aresta_tre_membros_de_al-qaidah_en_ieruxalim
====== Israel aresta tre membros de al-Qaidah en Ieruxalim ======
24 janero 2014
Shabak, la departe de securia interna de Israel, ia aresta tre membros alegada de un selula de al-Qaidah.
Un portavose de la ministro xef ia dise ce la omes ia intende ataca locas incluinte la ambasada de la SUA.
Shabak ia dise ce la omes ia es enscriveda par un ajente de al-Qaidah en la Banda de Gaza. Un sentro grande de confere en Ieruxalim ia es ance un blanco.
La promove Hamas, cual governa la Banda de Gaza, ia nega la alegas.
@T Israel aseta un proposa de sesaspara
@L aora_oji/2014/israel_aseta_un_proposa_de_sesaspara
====== Israel aseta un proposa de sesaspara ======
15 julio 2014
Israel ia aseta un proposa egiptian per un sesaspara en la gera en Gaza.
Hamas, cual controla Gaza, no ia responde formal. Ma sua ala armada ia rejeta la proposa como "un sede".
La proposa recomenda la comensa direta de un sesaspara, segueda par un serie de consentas en Cairo con delegas alta de ambos lados.
Ofisiores filastini dise ce a la min 192 persones ia es matada par atacas airal israeli, lansada a oto dias ante aora per preveni ce ativistes xuta rocetos a Israel.
La NU estima ce plu ca tre cuatris de estas ia es persones nonmilitar.
On estima ce 1400 filastinis ia deveni ferida.
A la min cuatro israelis ia es grave ferida de pos la eruta de la violentia, ma nun ia es matada.
@T Israel cexa contra prejudis filastini de la Uni European
@L aora_oji/2014/israel_cexa_contra_prejudis_filastini_de_la_uni_european
====== Israel cexa contra prejudis filastini de la Uni European ======
18 janero 2014
Israel ia demanda un encontra con la ambasadores de Britan, Frans, Italia, e Espania, acusante sua paises sur un prejudi per la filastinis.
La Ministreria de Relatas Stranjer ia dise ce on va informa la diplomatas ce sua "disposa continuante uniladal" es nonasetable.
En jovedi, la cuatro paises ia demanda un encontra de ambasadores israeli per protesta contra un projeta de grandi colonias a la Riva Ueste.
Benjamin Netanyahu, la ministro xef de Israel, ia dise ce la tempo ia veni per "para esta ipocritia" e "injeta alga ecuilibra e justia a la discute".
@T Israel e Filastin acorda un sesaspara permanente
@L aora_oji/2014/israel_e_filastin_acorda_un_sesaspara_permanente
====== Israel e Filastin acorda un sesaspara permanente ======
27 agosto 2014
On ia acorda un sesaspara permanente entre militiores israeli e filastini en la Banda de Gaza.
La acorda fini sete semanas de batalia cual ia mata plu ca 2200 persones. Lo ia es negosiada par Misre e ia comensa a 19:00 de ora local (16:00 en Tempo Universal Coordinada).
Moussa Abu Marzouk, la visgidor political de Hamas, ia dise ce la acorda representa "un vinse per la rebelores".
Ofisiores de la governa israeli ia dise ce Israel va redui sua blocis de vias a Gaza per permete ce on entra con aida e materias de construi.
Discutes nondireta sur temas plu controversa, incluinte un desira par Israel ce grupos militial en Gaza ta desarma se, va comensa en Cairo pos min ca un mense.
La avansa grande ia aveni en cuando ambos lados ia continua intercambia xutas Un vola final de cartuxes de mortero de Gaza ia mata un nonmilitar israeli e ia feri ses otras.
Plu temprana en martedi, a la min ses filastinis ia es matada en un serie de atacas airal en Gaza par Israel.
La sesaspara esije un fini permanente de atacas, la abri direta de la frontera de Gaza con Israel e Misre, e un estende de la zona de pexa de la teritorio en la Mediteraneo.
Pos un mense, la du partitos va discute la construi de un airoporto e un porto de mar en Gaza, e la libri de sirca 100 prisonidas ci on ia libri ja en 2011 ma ci on ia rearesta resente.
Israel e Ejipte esije ance un garantia ce on no va contrabanda armas a Gaza.
La anunsia ia es salutada con sparas selebrante en la stradas de la Site Gaza.
@T Israel prisoni un antisioniste per intende de tradi
@L aora_oji/2014/israel_prisoni_un_antisioniste_per_intende_de_tradi
====== Israel prisoni un antisioniste per intende de tradi ======
29 janero 2014
Un corte en Ieruxalim ia condena un om israeli a cuatro anios e un dui en prison per ofre spia per Iran.
Yitzhak Bergel, de 46 anios, ia confesa sua culpablia de contata un ajente stranjer, de intende de tradi, e de atenta aida un enemi de Israel.
Ma la judi de la corte ia nota ce "no dana ia es fada a la pais".
Bergel parteni a un seta iudi ultraortodox cual es forte oposada a la esiste de la Stato de Israel.
@T Israel recomenda calmia pos la mata de un adolesente filastini
@L aora_oji/2014/israel_recomenda_calmia_pos_la_mata_de_un_adolesente_filastini
====== Israel recomenda calmia pos la mata de un adolesente filastini ======
3 julio 2014
Gidores israeli ia apela per calmia, pos cuando la descovre de la corpo de un adolesente filastini saisida ia causa scaramuxas en Ieruxalim Este.
Mohammed Abu Khdair ia ave 17 anios. On ia vide el forsada a entra en un auto a un ora temprana a martedi.
Benjamin Netanyahu, la ministro xef de Israel, ia condena la "omiside despetable", e la maior de Ieruxalim ia recomenda forte ce persones restrinje sua sentis de reata.
Gidores filastini ia dise ce los regarda Israel como culpable per la mata, entre alegas ce lo ia aveni en venja per la mata de tre adolesentes israeli.
On previde ce la rituo funeral de la adolesente filastini va aveni en jovedi, e ce lo va es un causa nova de tensa.
La polisia israeli investiga ancora la motivas posible per la mori.
Netanyahu ia clari ce el ia comanda la polisia a labora "tan rapida como posible per trova ci ia organiza la omiside odiable de la joven". El ia apela ance a ambos lados ce los no reata en modo nonlegal.
@T Israel sutrae un campa de protesta filastini
@L aora_oji/2014/israel_sutrae_un_campa_de_protesta_filastini
====== Israel sutrae un campa de protesta filastini ======
8 febrero 2014
En un ataca subita, soldatos israeli ia estrae ativistes filastini ci ia protesta a un vileta abandonada en la Riva Ueste.
Deses de protestores ia spende un semana en campa a Ein Hijleh en la Vale de la Jordan.
La state final de la area es un punto major de disputa en la discutes de pas con Israel, reconsiliada par la SUA.
A la mesma tempo, ajenterias de aida ia espresa sua alarma a un crese en la cuantia de casas filastini destruida par israelis en la area.
@T Italia retira sua ambasador de India en disputa sur un prosede de marinores
@L aora_oji/2014/italia_retira_sua_ambasador_de_india_en_disputa_sur_un_prosede_de_marinores
====== Italia retira sua ambasador de India en disputa sur un prosede de marinores ======
19 febrero 2014
Italia ia retira sua ambasador de India en un disputa continuante con Delhi sur du marinores italian ci on acusa de mata du pexores indian.
La ministreria de esternas ia dise ce Daniele Mancini va vola direta a Roma, par causa de "un plu pospone nonasetable e intendeda" en la cortes.
La Corte Suprema ia es a punto de escuta la caso en martedi, ma on ia pospone lo.
Italia ia es ja colerida par un deside indian de prosede la du omes, su un lege contra piratia, per la matas en 2012.
@T Italia salva plu ca mil migrores arivante en barcos
@L aora_oji/2014/italia_salva_plu_ca_mil_migrores_arivante_en_barcos
====== Italia salva plu ca mil migrores arivante en barcos ======
4 janero 2014
En 24 oras, barcones de la marina e gardacosta italian ia salva plu ca 1000 migrores, prosima a la isola pico de Lampedusa.
En jovedi, on ia prende 823 migrores de cuatro barcos coxeante e tro folida. La migrores ia veni xef de Egipte, Tunis, Irac, e Pacistan.
En mercurdi, 233 migrores ia es salvada en un taxe diferente. Los ia veni de Pacistan e paises diversa en Africa. Lampedusa es la teritorio italian la plu prosima a Africa norde.
La isola ia esperia difisiles en maneja la miles de migrores arivante. On ia prende la arivores la plu resente a Sisilia.
En otobre, plu ca 400 persones ia afoca prosima a Lampedusa, en du ruinas de barco.
@T Jaguar anunsia vendes recordo
@L aora_oji/2014/jaguar_anunsia_vendes_recordo
====== Jaguar anunsia vendes recordo ======
12 janero 2014
Jaguar Land Rover, un fabricor de autos, ia anunsia un cuantia recordo de vendes en 2013. Lo ia vende cuasi un dui de milion autos tra la mundo.
Plu ca 80% de la vendes ia es de autos de la marca Land Rover, engranada a cuatro rotas.
La mercatos la plu rapida cresente per la fabricor es aora la SUA, Deutxland, e India.
Jaguar Land Rover es un sucompania de Tata Motors, un grupo indian.
Jeneral, la mercato de veculos pare revive en cuando la economia recovre pos sua retrosede.
@T Jane Campion va preside la juria a la Carnaval de Filma en Cannes
@L aora_oji/2014/jane_campion_va_preside_la_juria_a_la_carnaval_de_filma_en_cannes
====== Jane Campion va preside la juria a la Carnaval de Filma en Cannes ======
7 janero 2014
La sinemiste Jane Campion va es la xef de la juria de esta anio a la Carnaval de Filma en Cannes, en Frans.
La zelandes es bon conoseda per sua filma "La Piano", per cual el ia deveni la ganior prima (e sola, asta aora) de la premio Palma Oro en 1993.
Campion ia dise ce el es "vera onorada" ce on ia ofre la rol a el. El va segue Steven Spielberg como xef de juria.
La Carnaval de Filma va aveni de 14 maio a 25 maio.
@T Japan critica un monumento xines per un asasinor
@L aora_oji/2014/japan_critica_un_monumento_xines_per_un_asasinor
====== Japan critica un monumento xines per un asasinor ======
21 janero 2014
Japan ia critica un monumento construida en Xina per onora un ativiste de autonomia de Corea, ci ia asasina un statiste japanes importante en 1909.
Ahn Jung-geun ia mata par fusili Hirobumi Ito, la ministro xef de Japan a cuatro veses, e la governor abitante prima de Corea. A acel tempo, Corea ia es renada par Japan.
Un portavose per la governa japanes ia eticeti el como un "teroriste" cuando la salon de recorda ia abri en la site xines de Harbin, do Ito ia es matada.
En Corea, on regarda Ahn como un eroe.
@T Japan e Xina critica mutua sua politicas african
@L aora_oji/2014/japan_e_xina_critica_mutua_sua_politicas_african
====== Japan e Xina critica mutua sua politicas african ======
11 janero 2014
Xina e Japan critica la politicas la un de la otra sur Africa. Cada pais promete sempre plu mone per la continente.
Japan ia alega ce Xina soborna gidores african con donadas lusosa.
A la mesma tempo, Xina acusa Japan de xerca la suporta african per un loca a la Consilio de Securia de la Nasiones Unida.
Shinzo Abe, la ministro xef de Japan, turi tre paises en Africa. Esta es la visita prima a Africa par un gidor japanes en oto anios.
@T Japan es colpada par tempesta de neva
@L aora_oji/2014/japan_es_colpada_par_tempesta_de_neva
====== Japan es colpada par tempesta de neva ======
17 febrero 2014
11 persones, cisa plu, ia es matada par un tempesta recordo de neva en Japan.
Sentos ia parti de sua casas, e plu sentos ia es ferida. Plu ca un metre de neva ia cade en alga areas.
La clima ia clui stradas e ia obliga airoportos a cansela volas.
Meteorolojistes averti ce ventones de neva e avalanxas pote aveni. La tempesta move norde, en dirije a Hokkaido.
@T Japan revisa manuales scolal per clari sua teritorio
@L aora_oji/2014/japan_revisa_manuales_scolal_per_clari_sua_teritorio
====== Japan revisa manuales scolal per clari sua teritorio ======
28 janero 2014
En Japan, la ministreria de ensenia dise ce lo revisa manuales per instruores afin on clari sua posese de isolas disputada.
Hakubun Shimomura, la ministro, ia dise ce Japan vole ensenia sua enfantes "sur partes integral de sua teritorio".
La teritorio disputada inclui isolas en la Mar de Xina Este cual Japan controla ma cual Xina reclama ance, e alga isolas controlada par Corea Sude.
La disputas ia tensa la relatas entre Japan e la du paises.
@T Japan va revista un declara pasada sur sclavos sesal
@L aora_oji/2014/japan_va_revista_un_declara_pasada_sur_sclavos_sesal
====== Japan va revista un declara pasada sur sclavos sesal ======
28 febrero 2014
Japan va formi un ecipo per esamina la avenis gidante a un declara en 1993 cual ia reconose sua usa de sclavos sesal en la Gera Mundal Du.
La declara, ce la militaria nasional ia sabe ce on ia obliga femes a deveni sclavos, ia es regardada como un demanda de pardona.
Un gidor pasada ia dise ce cualce revista de esta declara de Kono ta es "asurda".
On estima ce 200 000 femes ia es obligada a deveni sclavos sesal per soldatos en teritorios ocupada par Japan. Multe de los ia veni de Xina e Corea Sude. Alga ia veni de la Pilipinas, Indonesia, e Taiuan.
@T Japan va xasa balenas pasifica en la semana veninte
@L aora_oji/2014/japan_va_xasa_balenas_pasifica_en_la_semana_veninte
====== Japan va xasa balenas pasifica en la semana veninte ======
20 april 2014
Japan dise ce lo va comensa xasa balenas en la Mar Pasifica en la semana veninte, pos cansela sua xasas antartica per segue un judi de la Corte Internasional de Justia. En marto, la corte ia deside ce la xasas antartica par Japan es comersial, e no siensal como Tokyo ia declara.
Ambientistes es colerida par la defia japanes contra un proibi mundal de la xasa de balenas.
Yoshimasa Hayashi, la ministro de pexerias, ia dise ce on intende catura 210 balenas pasifica en la xasa veninte, un cuantia reduida.
El ia clari: "Nos politica fundal es con la continua de xasa de balenas per rexerca. Esta es un modo de xerca un via de sorti de la proibi presente par colie datos siensal. Donce nos intende recomensa la xasas comersial tan pronto como posible, par fa xasas per rexerca."
La Corte Internasional de Justia es un autoriosa de la Nasiones Unida. Sua judi en la mense pasada ia acorda con Australia, cual ia prosede Japan en maio 2010. La corte ia esije ce Japan reesamina sua politica intera de balenas, e ia dise ce la pais ia fali esplica perce lo nesesa mata tan multe balenas sola per rexerca.
La proibi internasional de xasa de balenas esiste ja de pos 1986. En la anio seguente, Japan ia comensa lo cual lo ia nomi xasas siensal.
La carne de la balenas matada es comersial vendeda en Japan.
Hayashi ia dise ce Japan intende "proposa un program nova de rexerca a la Comision Internasional de Xasa de Balenas, no plu tarda ca esta autono, cual va refleta la criterios listada en la deside" de la corte.
@T Jennifer Lauren apare en corte per malcondui en un avion
@L aora_oji/2014/jennifer_lauren_apare_en_corte_per_malcondui_en_un_avion
====== Jennifer Lauren apare en corte per malcondui en un avion ======
8 janero 2014
Jennifer Lauren, la sobrina de Ralph Lauren, un desinior de moda, ia apare en corte. On acusa ce el ia es enebriada e insultante en un avion.
On ia debe diverje la avion de Airolinia Delta a la airoporto de Shannon en la ueste de Er.
On ia fa la corte en un beveria car no construida ofisial de corte ia es prosima situada. On ia usa un sala grande sosial de la beveria.
On ia aresta Lauren a la airoporto en lundi, e ia prisoni tempora el tra la note.
@T Jetos israeli ataca Lubnan este
@L aora_oji/2014/jetos_israeli_ataca_lubnan_este
====== Jetos israeli ataca Lubnan este ======
25 febrero 2014
Jetos israeli ia fa atacas airal en Lubnan este, prosima a la frontera con Suria.
La militaria de Israel no ia comenta, ma on ia reporta ce un fonte de securia israeli ia refere a "ativia par fortes de aira en la norde".
La ajenteria nasional de novas en Lubnan ia dise ce la atacas ia aveni prosima a la vileta de Nabi Shayth en la Vale Beqaa.
Hezbollah, un grupo combatosa lubnani, es forte en la vale.
@T "Jihad Jane" es condenada a des anios en prison
@L aora_oji/2014/jihad_jane_es_condenada_a_des_anios_en_prison
====== "Jihad Jane" es condenada a des anios en prison ======
7 janero 2014
On ia condena a des anios en prison un fem de la SUA ci ia partisipa en un conspira per mata un artiste svensce, de ci un de sua cartunes ia ofende muslimes.
Colleen LaRose, ci ave 50 anios e ia nomi se "Jihad Jane", ia confesa en 2011 ce el ia scema per mata Lars Vilks, e ia enscrive otras a la promove.
El ia risca es condenada a spende la resta de sua vive en prison, ma un judor ia corti sua periodo de puni, partal car el ia coopera con investigores.
Lars Vilks ia deveni menasada pos desinia un cartun mostrante la Profeta Muhammad como un can. Gerores islamiste en Irac ia ofre un premio de $100 000 per sua asasina, ma el ia es nunca atacada.
@T Jihadistes saisi la site du de Irac
@L aora_oji/2014/jihadistes_saisi_la_site_du_de_irac
====== Jihadistes saisi la site du de Irac ======
11 junio 2014
La ministro xef de Irac ia demanda ce la parlamento declara un state de crise pos cuando ativistes islamiste ia prende controla de Mosul.
Nouri Maliki ia confirma ce los ia saisi "areas esensal" de la site du la plu grande de la pais.
En la note, sentos de omes armada ia saisi la ofisias de governa e polisia local, ante catura la airoporto e la xeferia de la armada.
On crede ce sirca 150 mil persones ia fuji de la site. Los ia vade a tre vilas en Curdistan, un area prosima, do autoriosas ia crea campas per los.
Nechirvan Barzani, la ministro xef de Curdistan, ia apela ce la ajenteria refujal de la Nasiones Unida aida la fujintes de Mosul.
Ance en Irac, en Baqubah, un vila sentral, un ataca con bombas ia mata a la min 20 persones. La esplodes ia colpa un prosegue funeral e ia feri ance 28 persones.
En la semana pasada, la aliadas de la Stato Muslim de Irac e la Mediteraneo Este, un organiza jihadiste, ia ataca sites e vilas en Irac ueste e norde, matante deses de persones.
La organiza controla ja multe de la provinse Ninawa tra menses, esijente mone de ofisiores local e per la moves de benes. Pos sinco dias de batalia, los ia prende controla de la construidas xef en Mosul, cual ave sirca 1,8 milion abitores.
@T Jihadistes suri forsa constrinjes a cristianes
@L aora_oji/2014/jihadistes_suri_forsa_constrinjes_a_cristianes
====== Jihadistes suri forsa constrinjes a cristianes ======
27 febrero 2014
Un grupo jihadiste en Suria ia esije ce cristianes en Raqqa, un site norde, paia un imposta en oro e aseta restrinjes a sua atas relijiosa, o risca es matada.
La Stato Muslim de Irac e la Mediteraneo Este ia dise ce lo va furni "proteje" a abitores cristian si los acorda la lista de constrinjes.
On ia fa la anunsia en un declara enlinia.
La grupo atenta reali un interprete estrema de lege muslim en areas cual lo controla.
@T Jinastas de sirco es ferida en un asidente
@L aora_oji/2014/jinastas_de_sirco_es_ferida_en_un_asidente
====== Jinastas de sirco es ferida en un asidente ======
5 maio 2014
Des-un persones ia es ferida cuando un grupo de jinastas fema ia cade de un plataforma a un sirco en la state Rhode Island de la SUA. Un person es en un state grave.
La oto jinastas ia cade tra sirca 10 metres pos la colasa subita de la strutur cual ia suporta los.
Los ia es en la media de un presenta, pendente par sua capeles, en un "candelabro umana". La presenta ia envolve ance motosicles.
Seguente la pajeria de la sirco, la grupo es capas de "jira, pende de anelos, e desende sedas, en cuando los es suspendeda sola par sua capeles".
On ia lansa un investiga sur la asidente.
@T John Kerry dona patatas a la ministro stranjer de Rusia
@L aora_oji/2014/john_kerry_dona_patatas_a_la_ministro_stranjer_de_rusia
====== John Kerry dona patatas a la ministro stranjer de Rusia ======
14 janero 2014
John Kerry, la secretor de stato de la SUA, ia dona du patatas de Idaho a Sergei Lavrov, sua corespondente rusce, a un encontra en Paris.
Kerry ia dise ce, a sua encontra la plu resente, Lavrov ia refere a la esportada la plu famosa de Idaho.
La ministro stranjer de Rusia ia pare grasiosa per la donada, comentante ce los es "impresante".
La du omes es en Frans per negosia detalias de un confere de pas sur Suria, projetada per 22 janero.
@T John Kerry recomenda ata global contra cambia de clima
@L aora_oji/2014/john_kerry_recomenda_ata_global_contra_cambia_de_clima
====== John Kerry recomenda ata global contra cambia de clima ======
16 febrero 2014
John Kerry, la secretor de stato de la SUA, va fa un parla recomendante ce la comunia global reata contra cambia de clima. El visita Indonesia.
El va dise ce on ave demostras siensal ce cambia de clima menasa no sola la ambiente, ma ance la economia de mundo.
Kerry va fa sua parla a soldi, en Jakarta, la capital, como parte de un turi de la area.
La SUA e Xina, es la emetor la plu grande de gases invernerial.
@T Jornaliste Komla Dumor mori subita
@L aora_oji/2014/jornaliste_komla_dumor_mori_subita
====== Jornaliste Komla Dumor mori subita ======
19 janero 2014
Komla Dumor, un presentor en la canal de Novas Mundal de la BBC, ia mori subita a sua casa en London.
El ia nase en Gana, e ia ave 41 anios.
El ia es entre la plu bon conosedas de la jornalistes ganaian. Pos un desenio de jornalisme en Gana, el ia comensa difusa per la radio BBC en 2007.
John Dramani Mahama, la presidente de Gana, ia dise en Twitter ce sua pais ia perde un de sua ambasadores la plu eselente.
@T Jornalistes de Al-Jazeera nega acusas de terorisme a sua prosede
@L aora_oji/2014/jornalistes_de_al-jazeera_nega_acusas_de_terorisme_a_sua_prosede
====== Jornalistes de Al-Jazeera nega acusas de terorisme a sua prosede ======
21 febrero 2014
Tre jornalistes de Al-Jazeera ia nega tota alegas a la comensa de un prosede en Cairo. La prosede ia provoca consernas sur libria de espresa en Egipte.
On ia refusa libri Mohamed Fahmy, un egiptian-canadian, Peter Greste, un reportor australian, Baher Mohamed, un produor egiptian, e sinco otras su cautia. La caso ia es alora posponeda asta 5 marto.
Los es entre 20 persones ci es acusada de aida o junta se a la Fratia Muslim, un organiza teroriste.
On prosede la otras en sua asentia.
@T Jornalistes es acusada en Egipte
@L aora_oji/2014/jornalistes_es_acusada_en_egipte
====== Jornalistes es acusada en Egipte ======
30 janero 2014
Dudes jornalistes fronti acusas en Egipte.
Des ses es egiptianes acusada de parteni a un organiza teroriste, e la otra cuatro es stranjeres acusada de aida la mesma organiza o de difusa novas falsa.
La stranjeres es un australian, du briteses, e un nederlandes.
Plu temprana, redes internasional de novas ia demanda la libri de sinco jornalistes de al-Jazirah.
@T JP Morgan Chase va paia a vitimes de la froda par Madoff
@L aora_oji/2014/jp_morgan_chase_va_paia_a_vitimes_de_la_froda_par_madoff
====== JP Morgan Chase va paia a vitimes de la froda par Madoff ======
8 janero 2014
JP Morgan Chase, un banco american, ia acorda paia $1,7 mil milion a vitimes de la froda par Bernard Madoff.
La acorda aveni pos acusas par prosedores federal ce la banco ia iniora indicas avertinte sur la crimines de Madoff.
Un portavose per la compania ia dise ce lo ia ta pote trata plu bon la situa.
La banco ia acorda ance boni sua sistemes de validi.
@T Judores turces protesta contra un scema de reformi
@L aora_oji/2014/judores_turces_protesta_contra_un_scema_de_reformi
====== Judores turces protesta contra un scema de reformi ======
10 janero 2014
La judores suprema de Turcia ia protesta contra un scema par la governa de reformi lo. Los dise ce la reformi es nonconstitual.
La Comite Suprema de Judores e Prosedores ia dise ce sua autonomia va desapare si on ta move lo a su controla par la ministreria de justia.
On debate la reforma en la parlamento turces.
@T Kalashnikov ia teme ce el es culpable per moris par sua fusil
@L aora_oji/2014/kalashnikov_ia_teme_ce_el_es_culpable_per_moris_par_sua_fusil
====== Kalashnikov ia teme ce el es culpable per moris par sua fusil ======
14 janero 2014
Lo pare ce la inventor de la fusil Kalashnikov ia scrive a la xef de la Eglesa Ortodox Rusce ante sua mori, espresante un teme ce el ia es moral culpable per la matas fada par la fusil.
Mikhail Kalashnikov, ci ia mori en la mense pasada a la eda de 94, ia scrive un letera longa e emosiosa a Padron Kirill en maio 2012.
El ia dise ce el sufri de "dole spirital" sur la multe moris cual la fusil ia causa.
A ante, Kalashnikov ia refusa aseta cualce culpablia per la matadas.
@T Karadžić e Mladić va apare en junta a un prosede
@L aora_oji/2014/karadzic_e_mladic_va_apare_en_junta_a_un_prosede
====== Karadžić e Mladić va apare en junta a un prosede ======
28 janero 2014
Du de la figures la plu potiosa de la gera en Bosnia de la desenio de 1990 va apare publica en junta a la ves prima de pos la fini de la gera.
Radovan Karadžić, la gidor pasada de serbsces bosansce, ia clama Ratko Mladić per atesta a la prosede de la NU en Den Haag sur crimines de gera iugoslavian.
Karadžić fronti 11 acusas, incluinte jenoside en relata a la masacra de Srebrenica en julio 1995.
Ambos omes es prosededa. Los nega crimines de gera e crimines contra umania.
@T Karzai comanda cambias a un lege sur atesta de viole familial
@L aora_oji/2014/karzai_comanda_cambias_a_un_lege_sur_atesta_de_viole_familial
====== Karzai comanda cambias a un lege sur atesta de viole familial ======
18 febrero 2014
Hamid Karzai, la presidente de Afganistan, ia comanda alteras a leges projetada sur cual on ia critica ce los va restrinje sever la justia per vitimes de viole familial.
Un portavose ia clari ce el va insiste ce on fa "cambias nesesada".
La projeta -- asetada par la parlamento en la anio pasada -- proibi ce relatadas atesta contra maltratores alegada.
Grupos de diretos umana ia comenta ce, su la lege, un condena ta es cuasi nonposible en un caso de viole contra femes.
@T Kasparov atenta deveni la presidente de xace internasional
@L aora_oji/2014/kasparov_atenta_deveni_la_presidente_de_xace_internasional
====== Kasparov atenta deveni la presidente de xace internasional ======
11 agosto 2014
Garry Kasparov, un campion pasada de xace, va atenta prende la posto xef de la jua de Kirsan Ilyumzhinov, un multimilionor ci dise ce el ia viaja con estrateranes.
La luta political entre la du rusces va aveni a lado de la Olimpiada de Xace en Tromsø, un site norsce artica.
Ilyumzhinov es ja la presidente de la Federa Internasional de Xace tra 19 anios. Sua criticas acusa ce el es un pupetin de la Kremlin, e ce el ia cultiva relatas con Saddam Hussein e Muammar Gaddafi.
Kasparov, ci ave 51 anios, es notada como un campanior de diretos umana e un oposor de la presidente de Rusia, Vladimir Putin.
El acusa Ilyumzhinov sur un prosimia esedente con Putin, e dise ce sua presidentia de la Federa de Xace ia es manxada par "maltratas e prejudis".
El ia ajunta: "Tota ambasada rusce en la mundo es ativida per suporta ce Ilyumzhinov resta en sua posto. Xace no es la tema. Esta batalia es intera political."
Ilyumzhinov ave 52 anios. El alega ce, a un ves pasada, el ia es caturada par estrateranes ci ia comunica telepatica e ia prende el a un otra planeta en un barcon spasial jigante.
Sua criticas dise ce tal declaras ia forsa sponsores a via de la jua.
@T Khamenei dise ce Iran va abandona nunca sua program nucleal
@L aora_oji/2014/khamenei_dise_ce_iran_va_abandona_nunca_sua_program_nucleal
====== Khamenei dise ce Iran va abandona nunca sua program nucleal ======
9 april 2014
Aiatola Ali Khamenei, la gidor suprema de Iran, ia suporta discutes con la potias de la mundo, ma el ia averti ce Tehran va abandona nunca sua program nucleal. El ia dise ce Iran ia acorda la discutes per "rompe la atmosfera enemin" con la comunia internasional.
Iran e ses potias labora per fa un acorda sustituable per un negosia entretempal cual va espira en julio.
Javad Zarif, la ministro irani de esternas, ia dise ce la du lados acorda ja sur 60% de cosas pos la discutes la plu resente en Wien, Austria.
Un ofisior major de la SUA ia pare min otimiste, disente mera ce ambos lados va continua ostinosa sua atentas de acorda.
La SUA, Rusia, Xina, Britan, Frans, e Deutxland vole ce Iran redui sua ricis de uranio, sur cual los teme ce on va pote usa lo per crea un bomba nucleal. Tehran dise ce sua laboras nucleal es intera pasosa, e espera fa un acorda en intercambia per la sutrae permanente de la punis internasional cual esiste aora contra lo.
Khamenei ia clari a un asembla de siensistes nucleal ce Tehran ia acorda la discutes per mostra a la comunia internasional ce lo no desira construi armas nucleal.
Su un acorda tempora, fada en janero, Iran ia pausa alga de ativia nucleal per ses menses en intercambia per un sutrae partal de punis. La potias global vole aora ce la pais acorda redui permanente la estende de sua program de rici uranio, e ce lo permete plu capasia de supravide a esaminores de la Nasiones Unida.
Asta aora, la ses potias ia es unida en sua negosias. Ma la saisi de Crim par Rusia en marto ia crea tensas entre Moscva e la Ueste. On dise ce Rusia e Iran negosia un intercambia de petrolio e benes, con valua de asta $20 mil milion. La SUA dise ce esta ta sumina la discutes nucleal.
@T Khodorkovsky ariva en Suiz
@L aora_oji/2014/khodorkovsky_ariva_en_suiz
====== Khodorkovsky ariva en Suiz ======
6 janero 2014
Mikhail Khodorkovsky, un maniate pasada de petrolio, ci on ia libri de un prison rusce en la mense pasada, ia ariva en Suiz. On ia dona a el un visa de tre menses ala.
El e sua sposa ia viaja par tren de Deutxland per acompania sua du fios, ci revade a sua scola suiz.
Khodorkovsky ia vola a Deutxland pos sua libri a 20 desembre.
El ia es prisonida tra des anios per froda e evita de imposta, ma insiste ce sua condena ia es political motivada.
@T Kim Jong-un es publica asente tra plu ca un mense
@L aora_oji/2014/kim_jong-un_es_publica_asente_tra_plu_ca_un_mense
====== Kim Jong-un es publica asente tra plu ca un mense ======
10 otobre 2014
Kim Jong-un, la gidor de Corea Norde, no ia es presente a un rituo importante de aniversario political.
En venerdi, sua nom no ia apare en un lista de los ci ia visita Palasio Kumsusan, la mausoleo de la du gidores Kim Il-sung e Kim Jong-il, per selebra la aniversario 69 de la Partito de Laborores.
Nun ia vide Kim en publica de pos 3 setembre. Esta es sua asentia la plu longa pos la comensa de sua rena en 2011.
El ia pasa 21 dias sin es publica videda en marte 2012, e 24 dias en junio de la mesma anio. En janero 2013 el ia es asente tra 18 dias.
En setembre, la televisa nasional ia dise ce el ave "un state fisical noncomfortosa", e ia mostra el con coxea.
Corea Sude ia comenta ce lo crede ce Kim resta en controla de la stato comuniste, ma sua asentia provoca divinas sur sua sania e sua capasia de governa.
Jornalistes de Corea Sude sujesta ce el sufri de la artrite inflamante nomida gota. El ave 31 anios e es tro pesosa.
Apares de la visgidor Hwang Pyong-so, e ance alegas resente de un ofisior pasada de Corea Norde, ia provoca sujestas ce cisa on ia despone Kim de sua posto.
Hwang ia gida un delega de ofisiores de Corea Norde a Seul per la rituo cluinte de la Juas Asian, en un visita regardada como un momento rara per discutes alta entre la Norde e la Sude.
On pote confirma no parte de la divinas.
@T Kim Jong-un loda la esecuta de sua tio
@L aora_oji/2014/kim_jong-un_loda_la_esecuta_de_sua_tio
====== Kim Jong-un loda la esecuta de sua tio ======
1 janero 2014
Kim Jong-un, la renor de Corea Norde, ia refere a la "elimina de mugre antipartito", parlante sur la esecuta de sua tio potiosa en desembre.
En sua mesaje de anio nova, difusada par la televisa nasional, el ia dise ce "atas nonvasilante" ia forti la unia de la pais "a 100 veses".
Corea Norde ia anunsia a 13 desembre ce lo ia esecuta Chang Song-thaek pos condena lo per "atas de tradi".
La mesajes de anio nova de la pais es atendente esaminada par Corea Sude e otra potias de la area per trova indicas sur la goles political de Pyongyang.
@T La Abrida Australian es parada par la caldia
@L aora_oji/2014/la_abrida_australian_es_parada_par_la_caldia
====== La Abrida Australian es parada par la caldia ======
16 janero 2014
Temperatures altinte ia para maxes a la torneo Abrida Australian de tenis. On avisa ce la pais va esperia ondas de caldia an plu estrema.
La torneo aveni en Melbourne. La site ia esperia un dia tre en segue con un caldia de plu ca 40°C. On ia rejistra 41,7°C en jovedi.
La Consilio Climal de Australia dise ce la cuantia de dias calda en la pais ia "alti plu ca duplinte".
Lo atribui la fenomeno a la cambia de clima causada par gases invernerial.
@T La airoporto de Tripoli pasa de un militia a un otra
@L aora_oji/2014/la_airoporto_de_tripoli_pasa_de_un_militia_a_un_otra
====== La airoporto de Tripoli pasa de un militia a un otra ======
24 agosto 2014
La parlamento nova elejeda de Libia ia condena como teroristes la alia de militias cual dise ce lo ia catura la airoporto internasional de Tripoli.
Parlamentores ia dise ce la alia es aora un blanco valida per la fortes armada.
La alia inclui islamistes e combatores de la site Misrata. Un portovose per los ia comenta ce la parlamento nova es nonlegal, e ia recomenda la reveni de la governa presedente de la pais, la Consilia Nasional Jeneral, xef islamiste.
On reporta ce batalias continua entre grupos armada oposante a la esternas de la site, e ce esplodes es oiada.
La pais esperia batalias entre militias diversa cual ia gida la revolta de 2011 contra Muammar Gaddafi. Sentos de persones ia mori en un aumenta resente de la situa.
La alia ia anunsia sua controla de la airoporto an pos es airal atacada a du veses en la semana pasada.
La saisi de la airoporto es un problem per un otra militia de la site Zintan, aliadas de Jeneral Khalifa Haftar ci, plu temprana en esta anio, ia comensa un campania contra la Consilia Nasional Jeneral. Esta militia ia controla la airoporto tra cuasi tre anios.
La parlamento es situada en Tobruk, un site este, car Tripoli e Benghazi es apena controlada par la governa.
@T La Alpes de Osteraic esperia un cambia major de clima
@L aora_oji/2014/la_alpes_de_osteraic_esperia_un_cambia_major_de_clima
====== La Alpes de Osteraic esperia un cambia major de clima ======
18 setembre 2014
Un esplora major conclui ce Osteraic, con sua areas delicata alpal, ia es spesial forte colpada par la clima cambiante.
La Reporta per Evalua la Cambia de Clima Osteraices 2014 dise ce la temperatur promedia en la pais ia alti par cuasi 2°C de pos 1880. Global, en la mesma periodo, la temperatur ia alti par mera 0,85°C.
La documento dise ce la plu de la cambia de temperatur es artifisial, e causada par emetes de gases invernerial.
La reporta ia es preparada par plu ca 200 siensistes e presentada en Wien par la ministro de ambiente.
Un de la siensistes ia esplica: "Nos es un area continental, cual dona un alti plu grande de temperatur. E nos es en un area montaniosa, do la redui de covre con neve intensi la prosede de caldi."
La reporta dise ce, en la 130 anios pasada, la brilia de sol en la Alpes ia crese par sirca 20%. Lo dise ce la neve covrente, spesial a altias media, ia diminui, e ce la area surfasal de la glasias de la pais ia deveni clar min grande.
Lo indica ance ce la altis de temperatur ia aselera de pos 1980. "Notes fria ia deveni plu rara, ma dias calda ia deveni plu comun."
La reporta avisa ce "sin plu atentas de ajusta a la clima cambiante, la risca a Osteraic va crese", spesial en tal areas como la cultiva de campos, la cultiva de forestas, e la turisme invernal.
Organizas nongovernal en la pais ia recomenda un reata rapida.
@T La ambasador SUA a Xina recomenda bonis sur diretos umana
@L aora_oji/2014/la_ambasador_sua_a_xina_recomenda_bonis_sur_diretos_umana
====== La ambasador SUA a Xina recomenda bonis sur diretos umana ======
28 febrero 2014
Gary Locke, partinte como la ambasador SUA a Xina, ia recomenda forte ce Beijing boni sua nivel de diretos umana e labora con Japan per destensa relatas en la Mar de Xina Este.
En sua parla final en la rol, Locke ia espresa sua conserna a la crese resente de la cuantia de arestas de jornalistes e ativistes ci protesta pasosa.
El ia dise ance ce ambos Xina e Japan debe evita atas regardable como provocante sur isolas disputada.
Locke ave 63 anios, e es la xines-american prima ci ia servi en la posto.
@T La aniversario 75 de calsas de nilon
@L aora_oji/2014/la_aniversario_75_de_calsas_de_nilon
====== La aniversario 75 de calsas de nilon ======
18 febrero 2014
Un veste cual ia cambia la mundo de moda per sempre ia es comersial produida a la ves prima a 75 anios ante aora.
La calsas de nilon de DuPont, fada de la fibro nova "miraclin", ia es multe comprada cuando on ia comensa vende los en la SUA en 1940, la anio seguente.
Los ia es developada par la ecipo de dotor Wallace Carothers.
Calsas de nilon ia es durante, barata, e plu diafana ca la corespondentes de seda.
@T La aniversario setedes de la invade de Normandia
@L aora_oji/2014/la_aniversario_setedes_de_la_invade_de_normandia
====== La aniversario setedes de la invade de Normandia ======
7 junio 2014
Onorante la sacrifias de los ci ia combate a la Dia D, François Hollande ia recomenda forte ce on combate la menasas moderna a la pas con un inspira e coraje egal.
La presidente franses ia parla a la gidores de la mundo e a cuasi 2000 veteranes en Normandia, a la aniversario 70 de la mision esensal de la Gera Mundal Du.
Hollande ia dise ce la menasas moderna inclui la terorisme, la caldi global, e la nonemplea coletiva.
La rituo xef ia aveni sur la costa norde de Frans a Sword Beach, la nom codigal per un de la sinco puntos do la Aliadas ia atera. Pos la parla, on ia recrea senas de la invade.
La ateras en 1944 ia es la paso prima de la invade de Europa cuando lo ia es ocupada par la nazis. A la fini de la "Dia D" (6 junio 1944), la Aliadas ia susede institui se en Frans, en un aveni cual ia aida ultima fini la gera.
156 000 soldatos brites, canadian, e SUA ia partisipa. Plu ca 4000 de los ia mori en la dia prima de la batalia.
En jovedi, un veteran brites de 89 anios ia desapare de sua casa de veas, sin dise do el vade. En fato, el ia viaja a Frans per partisipa la rituos de recorda.
@T La armada de Colombia mata rebelores de FARC
@L aora_oji/2014/la_armada_de_colombia_mata_rebelores_de_farc
====== La armada de Colombia mata rebelores de FARC ======
21 janero 2014
Soldatos colombian ia mata 14 rebelores en un opera en la norde-este de la pais.
La mores ia parteni a la FARC (Fortes Armada Revoluinte de Colombia), la grupo xef de rebelores colombian. Los ia sabota instalas de petrolio en la provinse de Arauca.
La governa colombian e la rebelores sinistriste fa ja discutes de pas en Cuba tra plu ca un anio. Ma la combate ia continua, an con demandas repeteda par la FARC per un sesaspara tempora.
La governa dise ce un sesa de ativia militar ta permete ce la rebelores rearma se.
@T La armada egiptian suporta Sisi como elejable per presidente
@L aora_oji/2014/la_armada_egiptian_suporta_sisi_como_elejable_per_presidente
====== La armada egiptian suporta Sisi como elejable per presidente ======
27 janero 2014
La autoriosa militar xef de Egipte ia aproba ce la Abdul Fattah al-Sisi, la xef de la armada, deveni elejable per presidente.
En julio 2013, Sisi la gida la despone de Mohammed Morsi, la presidente prima de Egipte ci on ia eleje democrata.
On previde ce el va aseta la proposa de la Consilia Suprema per Fortes Armada e resinia sua posto militar en la dias veninte.
Plu temprana, la presidente tempora ia leva Sisi de la grado de jeneral a marexal de campo.
@T La Armada Eletronical de Suria ataca Skype
@L aora_oji/2014/la_armada_eletronical_de_suria_ataca_skype
====== La Armada Eletronical de Suria ataca Skype ======
2 janero 2014
La redes sosial de Skype ia es atacada par un grupo cual nomi se la Armada Eletronical de Suria.
La piratas ia ajunta mesajes contra monitori. Un mesaje ia recomenda ce on no usa la servis e-postal de Microsoft, la compania cual posese Skype.
La piratas ia dise ce "los monitori vosa contas e vende la datos a governas".
Esta ia aveni pos revelas resente sur sistemes de monitori par ajenterias secreta en la SUA.
Skype ia reconose la ataca, ma ia dise ce no informas de usores ia es perilida.
@T La Armada Suri Libre recambia sua xef
@L aora_oji/2014/la_armada_suri_libre_recambia_sua_xef
====== La Armada Suri Libre recambia sua xef ======
18 febrero 2014
La gidor de la Armada Suri Libre (ASL), suportada par la ueste e la statos de Golfo Farsi, ia es desempleada. On ia sustitui un comandor plu esperiosa.
Coronel Abdul-Ilah al-Bashir va segue Brigador Jeneral Salim Idris como la xef de la Consilio Militar Suprema de la ASL.
Un portavose ia dise ce on ia fa la deside par causa de la "nonproduosia" de la comanda pasada e un nesesa de "restruturi".
Tra la anio pasada, la Consilio ia perde influe a grupos de rebelores islamiste, de cual alga es liada a al-Qaidah.
@T La armada tai no va interveni en la crise
@L aora_oji/2014/la_armada_tai_no_va_interveni_en_la_crise
====== La armada tai no va interveni en la crise ======
24 febrero 2014
La xef de la armada de Tai dise ce la militaria no va interveni en la crise de la pais.
En soldi, un esplode parente de granada, prosima a un loca de protesta antigovernal, ia mata un fem e un xico de cuatro anios.
Dotores ia dise ce la sore de la xico ia mori ance, plu tarda, par causa de feris serebral.
Dudes du persones ia es ferida par la esplode, incluinte un xico de nove anios ci reseta aora cura intensa en ospital.
@T La armas cimical prima de Suria parti en barcon
@L aora_oji/2014/la_armas_cimical_prima_de_suria_parti_en_barcon
====== La armas cimical prima de Suria parti en barcon ======
8 janero 2014
La consinia prima de materias de armas cimical suri ia parti de la pais en un barcon dansce.
La barcon ia sorti de la porto de Latakia en Suria norde en martedi, acompaniada par barcones rusce e xines de gera.
La estrae de la cimicales la plu perilinte es la paso prima de un acorda, aprobada par la Nasiones Unida, de elimina tota la armas cimical de Suria.
On va prende la carga a Italia, do on va move lo a un barcon de la marina de la SUA. Esta va transporta lo a un parte internasional de la mar. Ala, on va destrui la cimicales en un tance de titanio, spesial construida.
@T La asteroide Ceres emete vapor de acua
@L aora_oji/2014/la_asteroide_ceres_emete_vapor_de_acua
====== La asteroide Ceres emete vapor de acua ======
23 janero 2014
Oservas de la asteroide la plu grande en la sistem solal sujesta ce lo emete plumones de vapor de acua.
Tra un tempo longa, on crede ja ce Ceres conteni cuantias sustantial de jelo, ma esta es la ves prima de deteta tal relasas.
La descovre ia es fada par Herschel, un telescopio infraroja european en orbita, e reportada en la jornal Nature.
Siensistes crede ce la vapor veni de areas de color oscur sur la surfas de Ceres. Cisa la jelo deveni caldida par la Sol e muta direta a gas.
@T La ator Hoffman ia posese multe eroina cuando el ia mori
@L aora_oji/2014/la_ator_hoffman_ia_posese_multe_eroina_cuando_el_ia_mori
====== La ator Hoffman ia posese multe eroina cuando el ia mori ======
4 febrero 2014
En la Site New York, en la casa de la ator Philip Seymour Hoffman, a la dia pos sua mori, la polisia ia descovre asta 70 sacos de eroina suspetada.
La stela e ganior de Oscares ia ave 46 anios. El ia es mor cuando on ia trova el a sua casa en soldi, con un siringa en sua braso.
On previde un autopsia en lundi. La polisia suspeta ce Hoffman ia mori par supradosa.
Ante la descovre, on ia intende oscuri la lampas estra la teatros sur la strada Broadway a mercurdi, per onora la ator mor.
@T La ator James Avery mori
@L aora_oji/2014/la_ator_james_avery_mori
====== La ator James Avery mori ======
2 janero 2014
James Avery, un ator american, ia mori a la eda de 65. Sua rol la plu bon conoseda ia es "Tio Phil" en The Fresh Prince of Bel-Air, un comedia de situas en televisa en la desenio de 1990.
El ia apare en 141 episodios de la program, con Will Smith en la rol titulal de sua sobrino. A un aveni carital a du anios ante aora, el ia es reunida con la plu de la otra atores de la serie.
El ia apare ance en multe ora filmas e series televisada, incluinte Gray's Anatomy, Star Trek: Enterprise, e Happy Gilmore.
@T La ator Maximilian Schell mori con 83 anios
@L aora_oji/2014/la_ator_maximilian_schell_mori_con_83_anios
====== La ator Maximilian Schell mori con 83 anios ======
2 febrero 2014
Maximilian Schell, un ator austrian ci ia gania un Oscar per sua rol en la filma Judi a Nuremberg de 1961, ia mori a la eda de 83.
El ia es un de la atores deutx parlante la plu bon conoseda en la mundo.
El ia mori en la note a un clinica en la site Innsbruck, pos un pneumonia subita.
Schell ia es laborante sur un filma en Austria cuando el ia maladi a la saturdi de la semana ante esta.
@T La automata prima de banco abri en Somalia
@L aora_oji/2014/la_automata_prima_de_banco_abri_en_somalia
====== La automata prima de banco abri en Somalia ======
8 otobre 2014
On ia instala la automata prima de banco en Somalia en la capital, Mogadishu.
Alga persones ia pare confusada sur lo, car los ia usa nunca un tal automata.
La macina ia es poneda par Banco Salaam Somali en un otel superior, e lo permete ce clientes retira dolares SUA.
La campo bancal en Somalia es multe nondevelopada, impedida par plu ca du desenios de gera entre clanes e grupos relijial combatosa. Multe persones depende de envias de mone de estra la pais.
La unia ofisial de mone en la pais, la xiling, es cuasi sin valua, donce multe comersiores e stranjeres usa dolares en loca.
La automata nova permete ce on retira mone de sua conta internasional de banco, usante tal cartas como Visa, MasterCard, e American Express.
Un portavose ia clari ce on pote retira sola dolares SUA. "Cisa nos va ajunta otra mones internasional en la futur. Persones de la popla sperdeda e stranjeres ia bonveni zelosa la idea. Nos intende instala plu automatas de banco en Mogadishu."
Un visitor stranjer, stante en la filo ante la automata, ia descrive la instala como "un avansa grande" per Somalia. "Me abita ja plu longa en Mogadishu ca me ia intende orijinal, donce me ia consuma mea mone fisical. Me ia es stonada par mea bon fortuna cuando on ia informa me sur la automata nova."
@T La balon de un xines cade en la mar
@L aora_oji/2014/la_balon_de_un_xines_cade_en_la_mar
====== La balon de un xines cade en la mar ======
2 janero 2014
La gardacosta japanes ia salva un xines pos cuando sua balon de aira calda ia cade.
La om, ci ia dise ce el es un cosinor, ia intende atera sur un de la isolas en un cadena controlada par Japan, en la Mar de Xina Este. La isolas es prosima a reservas posible de petrolio e gas, e es un fonte de tensa entre la du paises.
La om e sua balon ia es trovada a sirca 20 cilometres de la isolas. La om, ci ave 35 anios, no ia es ferida.
El ia es en acuas japanes, ma on ia deside no prosede el, car on no ia pote sabe la loca esata do el ia atera.
@T La Banco Mundal pospone un presta a Uganda
@L aora_oji/2014/la_banco_mundal_pospone_un_presta_a_uganda
====== La Banco Mundal pospone un presta a Uganda ======
28 febrero 2014
La Banco Mundal ia pospone un presta de $90 milion a Uganda par causa de sua lege nova sever contra omosesalia. On ia critica la lege sirca la mundo.
Ofisiores de la banco ia clari ce los vole serti ce la projetas cual la presta suporta no va es malafetada par la lege nova.
La presta ia es intendeda per boni la servis de sania en Uganda.
La lege nova, realida en lundi, forti regulas ja sever sur persones omosesal en la pais.
@T La Banco Mundal promete aida Burma
@L aora_oji/2014/la_banco_mundal_promete_aida_burma
====== La Banco Mundal promete aida Burma ======
27 janero 2014
La Banco Mundal ia promete $2000 milion en aida de developa a Burma, per projetas cual inclui la furni de enerjia e la aida medical.
Jim Yong Kim, la presidente de la banco, ia fa esta anunsia en sua visita prima a la pais.
Burma, ance conoseda como Miama, ia es cluida a multe de la mundo esterna tra multe anios. Lo luta per reconstrui sua economia.
La banco ia sesa presta a Burma a cuasi tre desenios ante aora, cuando la junta militar renante ia fali repaia.
@T La banco sentral de la SUA redui sua compra de obligas
@L aora_oji/2014/la_banco_sentral_de_la_sua_redui_sua_compra_de_obligas
====== La banco sentral de la SUA redui sua compra de obligas ======
30 janero 2014
En la SUA, la Sistem de Reserva Federal ia anunsia ce lo redui sua compras mensal de obligas finansial par $10 000 milion a $65 000 milion.
La banco sentral ia es comprante obligas per atenta manteni basa la tasos de interesa e stimula la crese.
Lo ia declara ce "la crese en ativia economial ia boni" de pos sua consenta la plu resente en desembre.
On ia previde la deside, ma asiones american ia debili par 200 puntos a la anunsia, an tal.
@T La Beethoven de Japan confesa ce el finje
@L aora_oji/2014/la_beethoven_de_japan_confesa_ce_el_finje
====== La Beethoven de Japan confesa ce el finje ======
6 febrero 2014
Un composor sorda ci on ia nomi "la Beethoven de Japan" ia confesa ce el ia emplea un otra person per scrive sua musica tra cuasi du desenios.
Mamoru Samuragochi ia deveni rapida famosa a media de la desenio de 1990. El es la plu conoseda per sua Simfonia Numero 1 de Hiroshima, dedicada a la matadas en la esplode atomal de 1945.
La musiciste, ci ave 50 anios, ia dise aora ce el no ia composa sua propre musica de pos 1996.
On no ia nomi ofisial la composor vera de sua obras resente.
@T La Beethoven de Japan no es sorda
@L aora_oji/2014/la_beethoven_de_japan_no_es_sorda
====== La Beethoven de Japan no es sorda ======
13 febrero 2014
Un composor nomida "la Beethoven de Japan" ia confesa ce el no es intera sorda, en ja un scandal sur sua usa de un scrivor ombral.
Mamoru Samuragochi ia declara ce el ia regania alga de sua capasia de oia a tre anios ante aora.
El ia deveni famosa en la desenio de 1990, e es la plu bon conoseda per sua Simfonia de Hiroshima, dedicada a los matada par la bomba atomal en 1945.
Ma, en la semana pasada, Takashi Niigaki, un instruo de musica, ia dise ce el ia composa musica per Samuragochi, incluinte acel simfonia, tra cuasi dudes anios. El ia comenta ance ce el ia vide no indica ce Samuragochi es sorda.
@T La besa de parti de un rubor permete identifia el
@L aora_oji/2014/la_besa_de_parti_de_un_rubor_permete_identifia_el
====== La besa de parti de un rubor permete identifia el ======
6 febrero 2014
Un rubor alegada de un joaleria, ci ia besa un ostaje, compatiante el en parti, ia es identifiada par sua ADN.
On reporta ce el e un otra om ia saisi un empleada de la boteca en Paris en april 2013, ostajinte el en sua propre casa.
Pos lia el, los ia versa acua sur el, disente ce lo ia es gasolina, e ia menasa arde el si el no colabora.
Plu tarda, detetores ia segue la trasa de la ADN sur la jena de la fem.
@T La capitan de la Costa Concordia visita la ruina
@L aora_oji/2014/la_capitan_de_la_costa_concordia_visita_la_ruina
====== La capitan de la Costa Concordia visita la ruina ======
27 febrero 2014
Francesco Schettino, la capitan de la barcon de turi Costa Concordia, ia revade a la ruina en jovedi.
Esta ia es sua ves prima de visita la barcon pos sua colpa de un resife prosima a la isola Giglio en janero 2012. Lo ia inversa, matante 32 persones.
La visita ia es un parte de un investiga a sua prosede, do on acusa el de mata sin intende e de abandona sua barcon.
El nega la acusas, ma si on judi ce el es culpable, el risca spende asta 20 anios en prison.
@T La Casa Blanca bonveni la presidente de Frans
@L aora_oji/2014/la_casa_blanca_bonveni_la_presidente_de_frans
====== La Casa Blanca bonveni la presidente de Frans ======
12 febrero 2014
Barack Obama, la presidente SUA, ia bonveni François Hollande, la presidente franses, a la Casa Blanca ante un come ofisial e grandiosa.
La visitor ia es bonvenida par un garda de onora militar, un bande de strumentos metal de venta, e un saluta de 21 fusiles en la jardin sude.
La viaja segue la separa de Hollande de sua acompanior entre reportas sur un relata de ama con un ator fema.
La visita forti un eda nova de relatas SUA-franses, cual ia afonda sur la gera iraci a un desenio ante aora.
@T La caso prima de poliomielite en Kabul de pos 2001
@L aora_oji/2014/la_caso_prima_de_poliomielite_en_kabul_de_pos_2001
====== La caso prima de poliomielite en Kabul de pos 2001 ======
11 febrero 2014
On ia diagnose un xica afgani con poliomielite en Kabul. Esta es la caso prima en la capital de pos la despone de la Taliban en 2001.
La ministro de sania ia comanda un campania de vasinis tra la capital pos la diagnose a la xica de tre anios.
Poliomielite resta endemica en Afganistan, Pacistan, e Nijeria norde, ma on ia elimina cisa lo tra la mundo restante.
En tota tre paises, estremistes muslim ia bloci laborores de sania, impedinte campanias contra la maladia.
@T La caxon de Ariel Sharon reposa publica tra soldi
@L aora_oji/2014/la_caxon_de_ariel_sharon_reposa_publica_tra_soldi
====== La caxon de Ariel Sharon reposa publica tra soldi ======
12 janero 2014
Israelis comensa un periodo corta de lamenta per Ariel Sharon, la ministro xef pasada, ci ia mori a la eda de 85 anios pos oto anios en coma.
La popla va mostra sua respeta cuando sua caxon funeral reposa publica en soldi, ante un entera privata en lundi.
Persones major de Israel e la mundo ia parla tribuinte a un om ci ia combate en cuatro geras major ante emprende un rol political.
Ma filastinis ci ia regarda el como un enemi ia senti poca tristia.
Un de sua du fios ia dise: "El ia parti cuando el ia deside parti."
@T La colie de alio es proibida sirca Sochi
@L aora_oji/2014/la_colie_de_alio_es_proibida_sirca_sochi
====== La colie de alio es proibida sirca Sochi ======
28 janero 2014
Parente, on ia proibi abitores de alga partes de Txetxnia en Inguxetia de colie alio savaje tra la periodo de la Olimpiales Invernal.
La reporta ia apare sur un pajeria jihadiste: "La seculares e nonrelijiosas no ia esplica en cual modo la colie de alio savaje en la forestas pote perili la Olimpiales de Sochi."
En alga operas de securia en anios resente, persones coliente alio en partes de la Caucaso Norde ia es matada o ferida car on ia malpersepi los como rebelores.
La pajeria sita fontes anonim ce la proibi va dura de 23 janero a 23 marto.
@T La comandor de al-Qaidah en Lubnan mori
@L aora_oji/2014/la_comandor_de_al-qaidah_en_lubnan_mori
====== La comandor de al-Qaidah en Lubnan mori ======
4 janero 2014
Majid al-Majid, la comandor de al-Qaidah en Lubnan, ia mori prisonida en un ospital en Bayrut. El ia mori pos fali de renes.
On ia aresta resente el en Lubnan. El ia gida la Brigadas de Abdullah Azzam, e ia es en la lista de la teroristes saudi cual on ia vole forte catura.
La grupo ia fa atacas tra Asia sude-ueste, e dise ce lo ia bombi la ambasada irani en Bayrut en novembre, matante 23 persones, incluinte la diplomata cultural de Iran.
@T La Concurso Eurovision va esclui paises frodante
@L aora_oji/2014/la_concurso_eurovision_va_esclui_paises_frodante
====== La Concurso Eurovision va esclui paises frodante ======
8 febrero 2014
La organizores de la Concurso Eurovision de Canta ia anunsia ce, si on trova ce un pais ia froda la vota, lo va risca deveni escluida de la compete tra asta tre anios.
Esta segue un investiga sur atentas de influe la vota per favore Azerbaijan en la concurso de 2013.
La organizores ia confirma ce sua sistemes de securia ia deteta atentas de froda la vota, ma on ia desvalidi acel votas.
Los ia ajunta ce los ave no atesta cual lia difusores azerbaijani a la ativia.
@T La Coneo de Jada es mor sur la Luna
@L aora_oji/2014/la_coneo_de_jada_es_mor_sur_la_luna
====== La Coneo de Jada es mor sur la Luna ======
13 febrero 2014
On ia declara ce la vagador xines "Coneo de Jada" es mor sur la surfas de la Luna.
La robot ia sufri un problem macinal grave en janero. Ofisiores ia clari ce on no pote restora lo a funsiona completa.
La Coneo de Jada, nomida Yutu en xines, ia es poneda a la surfas lunal a 15 desembre.
Acel ia es la atera prima nondanada sur la Luna de pos 1976.
@T La construi de un canal grande en Nicaragua es posponeda
@L aora_oji/2014/la_construi_de_un_canal_grande_en_nicaragua_es_posponeda
====== La construi de un canal grande en Nicaragua es posponeda ======
5 janero 2014
On ia pospone la construi de un canal en Nicaragua par un anio asta 2015. La canal va lia la Mar Atlantica a la Mar Pasifica. On ia intende comensa lo en maio de 2014.
La xef de la autoriosa de canal, Manuel Coronel Kautz, dise ce on nesesa plu tempo per studia la realablia de la projeta e per eleje un via per la canal.
On estima ce la canal, un alternativa de lo de Panama, va custa $40 bilion.
Nicaragua es un de la nasiones la plu povre en la area. Daniel Ortega, sua presidente, dise ce la projeta va dona a la pais sua autonomia economial.
Ma ambientistes dise ce la canal va trae un peril permanente a la area.
@T La Coreas acorda reunis de familias en febrero
@L aora_oji/2014/la_coreas_acorda_reunis_de_familias_en_febrero
====== La Coreas acorda reunis de familias en febrero ======
5 febrero 2014
Corea Norde a Sude ia acorda organiza reunis per familias separada pos la Gera Corean. Esta segue atentas par Pyongyang de boni relatas.
La reunis es projetada per esta mense. Si los aveni, los va es la primas de pos 2010.
En setembre, la Norde ia cansela un reuni projetada, culpante un "enemia" de la Sude.
La anunsia presede eserses militar anial par la SUA e Corea Sude, plu tarda en febrero. On predise ce estas va coleri la Norde.
@T La costa este de la SUA esperia un tempesta invernal
@L aora_oji/2014/la_costa_este_de_la_sua_esperia_un_tempesta_invernal
====== La costa este de la SUA esperia un tempesta invernal ======
22 janero 2014
La costa este de la SUA esperia la tempesta major du de esta anio. On previde asta 30 sentimetres de neva, un venta forte, e un fria estrema.
An ante la cade de la flocos prima, on ia clui ofisias de governa en Washington e scolas en alga statos.
En New York, neva ia comensa cade ja ante la viaja a labora, e autoriosas ia averti sur un state perilosa sur la stradas.
Plu ca 2500 volas es ja canselada en la pais.
@T La crese economial de Xina es plu lenta ca en 14 anios
@L aora_oji/2014/la_crese_economial_de_xina_es_plu_lenta_ca_en_14_anios
====== La crese economial de Xina es plu lenta ca en 14 anios ======
20 janero 2014
En 2013, la economia de Xina, la numero du la plu grande de mundo, ia crese la plu lenta en 14 anios.
Sua produida intera bruta ia crese par 7.7% anial entre otobre e desembre. En la cuatri presedente, la proportio ia es 7,8%.
La cuantia resente ia es ancora plu alta ca la 7,5% intendeda par la governa.
La datos asentua la defia cual politicistes fronti en susta la crese economial alta de Xina, en cuando los atenta reecuilibra la sistem.
@T La cuantia crese de matas e feris sivil en Afganistan
@L aora_oji/2014/la_cuantia_crese_de_matas_e_feris_sivil_en_afganistan
====== La cuantia crese de matas e feris sivil en Afganistan ======
9 febrero 2014
La cuantia de siviles matada e ferida en la gera en Afganistan ia crese par 14% en la anio pasada, seguente un reporta de la NU.
En 2013, cuasi 3000 siviles ia mori e plu ca 5600 ia es ferida.
La reporta ia clari ce la retira gradal de soldatos stranjer ia lasa la fortes de governa afgani en un state plu atacable par rebelores.
Esta ia gida a un intensi de batalia, contribuinte a la crese de moris sivil, spesial de femes e enfantes.
@T La cuantia de drogas saisida en Paraguai aumenta
@L aora_oji/2014/la_cuantia_de_drogas_saisida_en_paraguai_aumenta
====== La cuantia de drogas saisida en Paraguai aumenta ======
1 janero 2014
Ofisiores en Paraguai dise ce los ia saisi 39% plu drogas en 2013 ca en la anio presedente.
461 tones de mariuana e 3,3 tones de cocaina ia es saisida en la anio pasada. Un cuantia recordo de plantas mariuana ia es ance eliminada.
Paraguai es la produor la plu grande de canaba en America Sude. Multe de lo es contrabandada a Brasil.
En desembre, Uruguai, un otra nasion de America Sude, ia deveni la pais prima de la mundo cual ia legali la comersia de mariuana. Suportores de la cambia ia dise ce los atenta evita la aumenta de crese e contrabanda de drogas cual aveni en Paraguai.
@T La cuantia de fumores en la mundo prosimi a bilion
@L aora_oji/2014/la_cuantia_de_fumores_en_la_mundo_prosimi_a_bilion
====== La cuantia de fumores en la mundo prosimi a bilion ======
9 janero 2014
An si la fumi deveni min popular en multe partes de la mundo, la cuantia intera de fumores en la mundo deveni plu grande.
En 2012, 967 milion persones ia fumi a cada dia, comparada con 721 milion en 1980, seguente datos de 187 paises.
La grandi es relatada a la crese de popla. En la 50 anios pasada, la popla de la Tera ia deveni plu ca duplida, ateninte sete bilion. Plu persones esiste aora ci pote comensa fumi.
Par contrasta, la proportio de fumores en la popla mundal ia diminui. Aora, 31% de omes e 6% de femes fumi dial. En 1970, la persentos ia es 41% de omes e 10% de femes.
Timor Este ave la proportio la plu alta. 61% de sua popla fumi a cada dia. Antigua e Barbuda ave la proportio la plu basa.
@T La Dama Prima de Frans es en ospital
@L aora_oji/2014/la_dama_prima_de_frans_es_en_ospital
====== La Dama Prima de Frans es en ospital ======
13 janero 2014
Valérie Trierweiler, la Dama Prima de Frans, es en ospital pos reportas de un relata de ama cual envolve sua acompanior nonsposida, presidente François Hollande.
Sua ofisia ia dise ce el ia es ospitalida en venerdi "per reposa e alga esaminas".
La gidor franses no ia nega ce el ia visita secreta Julie Gayet, un ator, a un aparte prosima a la Palasio de Élysée. Ma el ia protesta contra la invade de sua privatia.
@T La David de Michelangelo es perilida par sua talos
@L aora_oji/2014/la_david_de_michelangelo_es_perilida_par_sua_talos
====== La David de Michelangelo es perilida par sua talos ======
2 maio 2014
La sculta de David par Michelangelo risca colasa su sua propre pesa, par causa de tensa a sua talos debil.
La sculta, cual sta en la site italian Firenze, ave un pesa de 5,5 tones e un altia de 5 metres. Lo mostra indicas de fratos pico en sua gamas.
La plu de la pesa es suportada par un trunca de arbor siselida, pos la gama destra de David, ma ance esta pote conteni fesures. On ia covre los con jeso tra la anios, ma los tende sempre reapare.
On ia descovre locas debil en la talos de la sculta orijinal pos un serie de probas par sentrifuga a copias fada de jeso. Rexercores suspeta ce esta ia developa en cuando David ia sta tra plu ca tre sentenios en la plaza xef de Firenze, apoiante a ante a un angulo perilosa.
La sculta ia es ja frajil par causa de la grado povre de marmo cual Michelangelo ia eleje per sua obra mestral.
On ia sujesta ce un trematera, o an reparas de strada, ta pote fa ce lo cade. On ia recomenda move David a un sala secur contra tremas, o a un loca nova estra la site.
@T La descarga fluente de musica crese en la SUA
@L aora_oji/2014/la_descarga_fluente_de_musica_crese_en_la_sua
====== La descarga fluente de musica crese en la SUA ======
9 janero 2014
En la SUA, la descarga fluente de musica, tra tal locas de rede como Spotify e YouTube, ia crese par 32% en 2013.
On reporta ce plu ca 118 mil milion flues ia aveni.
En la mesma periodo, la vendes de albumes fisical ia diminui par cuasi 14%. La vendes dijital ia esperia no cambia importante.
La cuantia de albumes comprada en disco de fonograf ia crese par 33%.
@T La dia prima completa de discutes suri va comensa en Suiz
@L aora_oji/2014/la_dia_prima_completa_de_discutes_suri_va_comensa_en_suiz
====== La dia prima completa de discutes suri va comensa en Suiz ======
24 janero 2014
La dia prima completa de discutes sur pas entre la governa e oposante suri va comensa en Geneve.
En jovedi, Lakhdar Brahimi, un reconsilior de la NU, ia move navetin de un lado a la otra per evalua la desira de consenta juntada.
La dia abrinte de la confere ia es ospitada en la site suiz de Montreux. Parolas amarga ia es intercambiada par la delegas competente.
La NU dise ce la gera de tre anios en Suria ia mata multe plu ca un desi de milion vives.
@T La discutes de pas suri fini con insultas
@L aora_oji/2014/la_discutes_de_pas_suri_fini_con_insultas
====== La discutes de pas suri fini con insultas ======
31 janero 2014
La governa suri e la partito oposante ia intercambia insultas a la fini de un semana de discutes de pas en Geneve. La confere no ia ateni un acorda firma.
Walid Muallem, la ministro de esternas, ia descrive la membros de la oposante como nonmatur. Louay Safi de la oposante ia dise ce la governa no desira para la versa de sangue.
An tal, Lakhdar Brahimi, la reconsilior de la NU, ia dise ce el ia vide alga opinas comun, e el ia projeta plu discutes per 10 febrero.
La oposante ia acorda partisipa, ma Muallem ia refusa promete.
@T La discutes sur pas suri fa no progresa sur move de potia
@L aora_oji/2014/la_discutes_sur_pas_suri_fa_no_progresa_sur_move_de_potia
====== La discutes sur pas suri fa no progresa sur move de potia ======
27 janero 2014
La discutes de pas en Geneve ia fa no progresa sur la tema controversa de move la potia a un governa tempora.
La ecipo de la governa ia presenta un "declara de prinsipes" cual ia conteni no refere a un move de potia, e la oposante ia rejeta lo.
La lados no pote acorda la rol futur de presidente Bashar al-Assad.
Un avisor de la presidente ia dise a jornalistes ce la discutes va continua an tal.
@T La divide entre la jeneros redui global
@L aora_oji/2014/la_divide_entre_la_jeneros_redui_global
====== La divide entre la jeneros redui global ======
28 otobre 2014
La Foro Economial Mundal ia dise ce asedes bonida per femes a politica e labora ia redui la divide global entre la jeneros en la 10 anios pasada.
Sua sonda anial sur jenero ia confirma "cambias radisal" en multe paises. 105 paises ia deveni plu egal de pos 2005.
Island ocupa la loca prima en la lista per la anio ses en segue, e Iaman es en la loca la plu basa.
La sonda ia esplora fatores de economia, sania, instrui, e partisipa political en 142 paises.
Sola ses nasiones -- Srilanca, Mali, Corvatsca, Macedonia, Urdun, e Tunis -- ia vide un largi de sua divide de jenero en la mesma periodo.
Un de la razonas per la susede de Island es sua popla relativa peti. Iaman luta contra un frecuentia altida de mori e un cuantia altida de xicas entre ses e 14 anios ci no vade a scola.
Tota la paises scandinavian ia apare a la apico de la lista: Suomi, Noria, e Sveria ia segue Island en la sinco locas la plu alta.
Ruanda ia entra a la lista a la ves prima, arivante a la loca sete e tal deveninte la economia african la plu alta en la lista. Sua susede refleta la fato ce cuasi tan multe femes como omes labora ala -- e en la ofisias dirijal de la pais -- e no par causa de asedes bonida a sania e instrui.
Nicaragua ia asende de numero des a numero ses de la plu bones per femes. La Pilipinas ia resta la pais la plu alta gradida de Asia, ma ia cade de numero sinco a numero nove.
@T La dotor de Michael Jackson perde sua apela
@L aora_oji/2014/la_dotor_de_michael_jackson_perde_sua_apela
====== La dotor de Michael Jackson perde sua apela ======
17 janero 2014
Un corte ia refusa la apela de Conrad Murray ce on ta sutrae sua condena per mata Michael Jackson sin intende.
La corte en Los Angeles ia judi ce atestas sustantial de culpablia ia es presentada a sua prosede en 2011.
On ia condena Murray a cuatro anios en prison, ma ia libri el en otobre 2013, pos du anios de sua periodo.
La mediciste pasada ia es condenada de dona un dosa matante de un droga anestesente a la cantor en 2009.
@T La du Coreas acorda fa un discute rara
@L aora_oji/2014/la_du_coreas_acorda_fa_un_discute_rara
====== La du Coreas acorda fa un discute rara ======
12 febrero 2014
Seoul ia anunsia ce ofisiores de Corea Norde e Sude va fa discutes rara de nivel alta en mercurdi. Esta presede reunis familial cual es projetada per plu tarda en febrero.
La consenta va aveni a la vileta abandonada de Panmunjom, sur la frontera.
No ordina de discute ia es fisada, ma on previde ce la du lados va discute la reunis.
La acorda ia segue un proposa de Corea Norde per fa la discutes. La invita ia ariva sin averti, e ia surprende la governa de Corea Sude.
@T La economia franses evita retrosede
@L aora_oji/2014/la_economia_franses_evita_retrosede
====== La economia franses evita retrosede ======
14 febrero 2014
La economia franses ia crese par 0,3% en la tre menses final de la anio pasada.
A la mesma tempo, un otra ofisia ia reporta ce la crese ia es zero en la cuatri tre de 2013. Esta zero es plu alta ca la estima inisial de un diminui par 0,1%.
La statisticas indica ce la economia sinco la plu grande de mundo ia evade recade en retrosede.
Tra la anio intera, la economia Franses ia crese par 0,3%.
@T La economia global va crese plu forte en esta anio
@L aora_oji/2014/la_economia_global_va_crese_plu_forte_en_esta_anio
====== La economia global va crese plu forte en esta anio ======
16 janero 2014
La Banco Mundal ia dise ce la economia global ia ariva a un punto de cambia. La Banco previde un crese plu forte en 2014.
En sua reporta anial sur la economia de la mundo, lo ia dise ce paises plu rica pare "verje final sur la curva" pos la crise finansial.
On predise ce esta va suporta un crese aumentada en economias developante.
Ma lo ia averti ce la prevides "resta danable" par la efeto de la retira de stimulas economial en la SUA.
@T La economia japanes deveni retrosedente
@L aora_oji/2014/la_economia_japanes_deveni_retrosedente
====== La economia japanes deveni retrosedente ======
17 novembre 2014
La economia de Japan ia diminui, nonprevideda, a la cuatri du en segue. Esta indica tecnical un retrosede en la economia tre de la plu grandes de mundo.
La produi interna bruta ia cade par 1,6% per anio entre julio e setembre, en contrasta con prevides de un aumenta par 2,1%.
Esta ia segue un cade par 7,3% en la cuatri du de la anio, la cade la plu grande pos la trematera e tsunami de marto 2011.
On previde jeneral ce la ministro xef, Shinzo Abe, va anunsia un vota subita per oteni la autoria de pospone leva la imposta de vende a 10%, como on ia intende fa en 2015.
La aumenta de imposta ia es legida en 2012 par la governa presedente per redui la deta publica de Japan, cual es la plu alta entre nasiones developada.
La fase prima de la aumenta de imposta de vende, de 5% a 8%, ia aveni ja en april. Lo ia afeta la crese en la cuatri du e pare ancora afeta la state de la economia.
La datos mostra ance ce la crese en consuma privata, cual representa sirca 60% de la economia, ia es multe plu debil ca on ia previde.
Otra indicas economial resente ia mostra ance un economia caracolin e ia sujesta ja ce la aumenta veninte de imposta no pote aveni.
Abe ia entra a sua posto a mera du anios ante aora. Jornalistes japanes reporta aora ce el pote anunsia tan pronto como doman un eleje political a 14 desembre.
An si sua popularia ia diminui tra sua periodo de ofisia, Abe va vinse probable si el anunsia un tal vota, car la partito oposante resta divideda e confusada.
@T La eglesa catolica polsce fronti sua litiga prima sur maltrata de enfantes
@L aora_oji/2014/la_eglesa_catolica_polsce_fronti_sua_litiga_prima_sur_maltrata_de_enfantes
====== La eglesa catolica polsce fronti sua litiga prima sur maltrata de enfantes ======
7 febrero 2014
Un om polsce, ci ia es maltrada par un prete cuando el ia es un enfante, litiga la eglesa catolica de la pais. Esta es la tal litiga prima en Polsca.
La om, ci ave 25 anios e de ci sua nom no ia es publicida, esije 47 500 euros en compensa.
La prete ia es condenada, e spende aora du anios en prison.
En 2013, la gidores de la eglesa la demanda pardona de tota vitimes de maltrata de enfantes. Ma lo ia insiste ce lo no va paia compensa per la crimines de eglesores individua.
@T La eleje presidental de Brasil no es desideda
@L aora_oji/2014/la_eleje_presidental_de_brasil_no_es_desideda
====== La eleje presidental de Brasil no es desideda ======
6 otobre 2014
Dilma Rousseff, la presidente presente de Brasil, ia gania la plu votas en la eleje presidental de la pais, sin susede vinse completa.
El ia reseta sirca 42% de la votas, e debe partisipa en un eleje du contra Aécio Neves, sua oposor media destriste, ci ia gania 34%.
Analistes previde ce la eleje du, a 26 otobre, va es de marjin minima.
Rousseff ia dise ce la popla ia espresa sua rejeta de "la fantasmas de la pasada: retrosede e nonemplea", e ia promete continua labora per cambia.
"Me ia comprende clar la mesaje de la stradas e de la caxas de vota," el ia dise. "La majoria de brasileras vole ce nos rapidi la Brasil cual nos construi."
Marina Silva, la aspiror de la partitio sosialiste e un ambientiste importante, ia surprende par fini en loca tre con 21%, e no va partisipa plu en la eleje.
Neves, un governor pasada de la stato Minas Gerais, ia recomenda ce la suportores de Silva move sua suporta a el, disente ce el representa "espera per cambia".
Silva ia dise ce el e otra gidores sosialiste va consenta en la dias veninte per discute cualce tal cosas. "Brasil ia siniali clar ce lo no desira la state presente," el ia dise.
Plu ca 142 milion persones ia ave la potia de vota a soldi, e 80% de los ia usa lo. Los de entre 18 e 70 anios debe vota.
Brasileras ia eleje ance congresores e governores rejional a la mesma tempo.
@T La enemis suri consenta per discute a du veses
@L aora_oji/2014/la_enemis_suri_consenta_per_discute_a_du_veses
====== La enemis suri consenta per discute a du veses ======
26 janero 2014
La governa e partito oposante de Suria ia consenta a du veses en lo cual Lakhdar Brahimi de la NU ia descrive como "un bon comensa" a discutes de pas.
Brahimi, la reconsilior, ia confesa ce la du lados "no ia ateni multe", ma el ia dise ce el atenta forti la relatas par leva prima temas umaniste.
El ia clari ce on ia discute la entra de un convoia de aida a Homs, e ce on va discute prisonidas en soldi.
La delegadas en Geneve xerca sedes peti, no un acorda de pas completa.
@T La enemis suri va parla la un a la otra en Geneve en saturdi
@L aora_oji/2014/la_enemis_suri_va_parla_la_un_a_la_otra_en_geneve_en_saturdi
====== La enemis suri va parla la un a la otra en Geneve en saturdi ======
25 janero 2014
La governa e partito oposante de Suria va consenta en la mesma sala en Geneve en saturdi. La dia prima de la confere de pas ia fini sin discutes direta.
Lakhdar Brahimi, la ambasador de la NU, ia discute separada con ambos lados en venerdi. El ia dise ce ambos comprende ce la confere atenta "salva Suria".
La du lados ia colpa la un la otra per la manca de progresa.
Diplomatas dise ce los espera aora sedes peti, como sesasparas local, en loca de un acorda de pas jeneral.
@T La enflue de migrores a Italia es "nonsesante e vasta"
@L aora_oji/2014/la_enflue_de_migrores_a_italia_es_nonsesante_e_vasta
====== La enflue de migrores a Italia es "nonsesante e vasta" ======
5 febrero 2014
Plu ca 2000 migrores ia atera sur la costas de Italia en janero, comparada con no plu ca 217 en la mesma mense de la anio pasada.
Filippo Bubbico, la ministro suordinada de internas, ia dise ce la pais ia reseta "un enflue nonsesante e vasta de migrores" en 2013.
El ia clari ce 42 925 migrores ia ateni Italia par mar en 2013, un cuantia plu grande par 325% ca en 2012.
Esta statisticas no inclui migrores ci ia mori en la traversa perilosa de mar.
@T La FBI averti botecas sur furas eletronical
@L aora_oji/2014/la_fbi_averti_botecas_sur_furas_eletronical
====== La FBI averti botecas sur furas eletronical ======
25 janero 2014
La FBI ia avisa botecas american ce los nesesa forti sua defendes contra siberfurores.
La departe de securia ia inclui sua averti en un reporta privata a vendores grande cual Reuters, la ajenteria jornaliste, ia oteni.
La FBI ia dise ce botecas debe spesial reconose la tipo de program vil cual on ia usa per fura miliones de detalias de carta de credito de comprores a la compania Target.
En 2013, la departe ia vide sirca 20 casos de fura de datos par la mesma spesie de codigo malvolente.
@T La fia de un maniate de Hongkong defende sua sesia en letera publica
@L aora_oji/2014/la_fia_de_un_maniate_de_hongkong_defende_sua_sesia_en_letera_publica
====== La fia de un maniate de Hongkong defende sua sesia en letera publica ======
30 janero 2014
La fia de un maniate de Hongkong ia scrive un letera publica per demanda forte ce sua padre aseta ce el es lesbian.
Gigi Chao dise ce sua padre Cecil debe aseta sua acompanior e "trata el como un umana normal e diniosa". Seniora Chao ave 33 anios, e ia sposi Sean Eav en 2012.
En la semana pasada, senior Chao ia proposa dupli sua ofre de $65 milion en 2012 per trova un sposo per sua fia.
Hongkong no reconose sposis de la mesma seso, an si omosesalia ia es descriminalida ala en 1991.
@T La filma de Superman e Batman es posponeda asta 2016
@L aora_oji/2014/la_filma_de_superman_e_batman_es_posponeda_asta_2016
====== La filma de Superman e Batman es posponeda asta 2016 ======
20 janero 2014
Warner Bros ia confirma ce on ia pospone un filma conteninte ambos Superman e Batman par cuasi un anio.
Orijinal intendeda per julio 2015, aora la filma va apare en 6 maio 2016.
La filma ancora no ave un titulo, ma Ben Affleck va fa la rol de Batman, a lado de Henry Cavill en la rol de Superman. Gal Gadot va apare como Wonder Woman.
On ia reporta ce la pospone es causada par un feri de gama de Affleck, ma la studio ia nega esta. Los dise en loca ce la pospone "permete ce la sinemistes reali completa sua ideas".
@T La final de la Copa Mundal va aveni
@L aora_oji/2014/la_final_de_la_copa_mundal_va_aveni
====== La final de la Copa Mundal va aveni ======
13 julio 2014
Deutxland e Arjentina va compete oji en la max final de la Copa Mundal de 2014, ante un fola televidente de probable plu ca mil milion.
Si Deutxland gania a la ves prima de pos 1990, los ta deveni la ecipo european prima ci gania la torneo en America Sude. Si Arjentina gania, esta ta es sua ves prima de pos 1986, cuando los ia vinse Deutxland Ueste.
Deutxland ia gania la Copa a tre veses presedente. Sua ecipo ia vinse forte Brasil, la ecipo ospitante, con 7-1 en la semifinales. Arjentina ia gania ja a du veses, e -- pos un max egal de zero goles -- ia vinse Nederland con 4-2 par xutas de la punto punal.
Rio prepara lo cual sua autoriosas descrive como "la opera la plu grande de securia en la istoria de la site". Plu ca 25 mil persones es envolveda.
La areas xef preocupante es terorisme, scaramuxas entre fanes, la presentia de 15 membros de governas stranjer, e la securia de Dilma Rousseff, la presidente brasilera.
La max de soldi va es la culmina de un torneo cual la popla brasilera regarda como un susede enorme. On ia teme protestas publica vasta, simil a los cual ia manxa la Copa de Federas de FIFA en la estate pasada, ma estas no ia aveni.
692 mil turistes de 203 paises ia entra a Brasil en la mense de torneo.
@T La fio de Bhutto demanda atas militar contra la Taliban
@L aora_oji/2014/la_fio_de_bhutto_demanda_atas_militar_contra_la_taliban
====== La fio de Bhutto demanda atas militar contra la Taliban ======
28 janero 2014
La fio de Benazir Bhutto, la ministro xef asasinada de Pacistan, ia demanda ce la autoriosas de la pais fa atas militar contra grupos de gerores.
Bilawal Bhutto Zardari ia dise ce politicistes debe comprende la menasa de tal grupos armada como la Taliban.
La governa fa discutes urjente sur modos de trata violentia aumentante.
Bhutto, ci ave 25 anios, ia dise ce el considera deveni elejable en elejes prevideda per 2018.
@T La flamingo la plu vea de mundo mori con 83 anios
@L aora_oji/2014/la_flamingo_la_plu_vea_de_mundo_mori_con_83_anios
====== La flamingo la plu vea de mundo mori con 83 anios ======
1 febrero 2014
Un flamingo ia mori en Australia a la eda de 83. On crede ce el ia es la plu vea de sua spesie en la mundo.
On ia mata el con drogas en venerdi. Lo ia sufri de artrite e maladias de eda matur.
La flamingo ia es nomida Greater, pos "greater flamingo", la nom engles de sua spesie Phoenicopterus roseus.
El ia ariva a la zo de Adelaide en 1933, e ia deveni un atrae popular. Flamingos savaje vive multe min longa.
@T La frato la plu vea de la crosta de la Tera
@L aora_oji/2014/la_frato_la_plu_vea_de_la_crosta_de_la_tera
====== La frato la plu vea de la crosta de la Tera ======
25 febrero 2014
Un cristal pico, con eda de 4,4 mil milion anios, ia es confirmada como la frato la plu vea de la crosta de la Tera. On ia trova la peso de zircon en arenito en un area nomida Jack Hills en Australia Ueste.
Siensistes ia dati lo par studia sua atomes de uranio e plomo. Uranio dejenera estrema lenta a plomo, tal ce on pote usa lo como un orolojo.
La implica es ce la Tera ia formi un crosta solida a un tempo multe plu temprana ca on ia crede, pos sua formi a 4,6 mil milion anios ante aora.
La crosta ia apare multe rapida pos la colpa grande cual ia produi la Luna a sola alga deses de miliones de anios pos la formi de nos planeta.
@T La fria impedi la xerca per survivores de un focon en Québec
@L aora_oji/2014/la_fria_impedi_la_xerca_per_survivores_de_un_focon_en_quebec
====== La fria impedi la xerca per survivores de un focon en Québec ======
25 janero 2014
Un fria amarga impedi la xerca per asta 30 canadianes vea e debil ci manca pos un focon cual ia destrui un casa de veas en Québec.
Xercores luta en un temperatur de -21°C en L'Isle-Verte, a la dia pos la focon. Sinco persones ia mori en la arde.
La ruinas de la casa ia colasa, e es aora covreda con un strato spesa de jelo pos la usa de mangetas par la pompores.
Multe de la persones mancante ia depende de sejas rolante e aidapaseas.
@T La froda tra Europa es stonante
@L aora_oji/2014/la_froda_tra_europa_es_stonante
====== La froda tra Europa es stonante ======
3 febrero 2014
La Comision European dise ce la grado de froda en Europa es "stonante", e ce lo custa 120 mil milion euros, cisa plu, a la economia de la UE en cada anio.
Cecilia Malmström, la Comisionor de Relatas Interna, ia presenta un reporta completa sur la problem.
El ia dise ce la custa vera de froda es "probable multe plu alta" ca 120 mil milion.
Tre cuatris de la europeanes cual on ia sonda per la studia ia responde ce la froda es vasta, e plu ca un dui ia dise ce la nivel ia crese.
@T La funera de Ronnie Biggs aveni
@L aora_oji/2014/la_funera_de_ronnie_biggs_aveni
====== La funera de Ronnie Biggs aveni ======
4 janero 2014
En London, la funera ia aveni de Ronnie Biggs, ci es famosa per sua fuji de prison en 1965 pos sua partisipa en un ruba grande de un tren postal en 1963.
Ante la rituo, la caxon de Biggs ia viaja a la seneria, acompaniada par 13 motosiclistes.
Biggs ia resta como un fujor tra 36 anios, e ia mori en desembre a la eda de 84.
A sua apare publica final, a la funera de un otra rubor de la tren, Biggs ia leva du ditos a jornalistes en un jesto insultante.
La veculo funeral ia conteni un posa de flores en la forma de acel jesto. La caxon mesma ia es covreda con un scarfa de futbal, un bandera de la Rena Unida, e un bandera de Brasil, do el ia pasa multe anios como fujor.
@T La gases invernerial crese la plu rapida de pos 1984
@L aora_oji/2014/la_gases_invernerial_crese_la_plu_rapida_de_pos_1984
====== La gases invernerial crese la plu rapida de pos 1984 ======
9 setembre 2014
La cuantia de gases invernerial en la atmosfera ia ateni un nivel recordo en 2013, par causa de un aumenta de CO₂ (diosido de carbono).
La cuantia atmosferal de CO₂ ia crese la plu rapida de pos 1984. La Organiza Meteorolojial Mundal dise ce esta asentua ce on nesesa un trata global de clima.
La informas anial publicida par la organiza no mesura emetes de ximines de sentros eletrical. En loca, los rejistra la cuantia de gases caldinte cual resta en la atmosfera pos la interatas complicada cual aveni entre la aira, la tera, e la mar.
Sirca un dui de tota emetes es asorbeda par mares, arbores, e viventes.
Seguente la informas nova, la cuantia global promedia de CO₂ en la atmosfera ia ateni 396 partes per milion en 2013, un crese de cuasi 3 partes per milion de pos la anio presedente.
La atmosfera conteni aora 142% de la cuantia de CO₂ cual lo ia conteni en 1750, ante la comensa de la revolui industrial.
An tal, car la temperatur global promedia no ia crese paralel a la aumenta de CO₂, alga persones sujesta ce la caldi global ia pausa.
La informas nova sujesta ce en 2013, la aumenta de CO₂ ia es causada no sola par plu emetes, ma ance par un redui de la cuantia de carbono asorbeda par la biosfera de la Tera.
La siensistes a la Organiza Meteorolojial Mundal es confondeda par esta. La tal redui la plu resente de la capasia de asorbe carbono ia aveni en 1998, cuando multe biomasa ia es ardeda tra la mundo, e cuando la clima ia esperia la state El Niño de mares plu calda.
Oksana Tarasova, la xef de la departe de rexerca atmosferal a la organiza, ia dise: "En 2013, on ia vide no danas evidente a la biosfera. Nos no comprende esce la esta mesura es tempora o un state permanente, e nos es alga ansiosa sur lo. Cisa la biosfera ia ateni sua limita, ma nos no pote sabe acel a esta momento."
A la ves prima, la publici par la organiza meteorolojial inclui datos sur la asidi de la mares, causada par diosido de carbono.
A cada dia, la mares asorbe sirca cuatro cilogrames de CO₂ per person. On crede ce la rapidia presente de asidi ave no presedente en la 300 milion anios pasada.
@T La gidor de ISIS apare en video
@L aora_oji/2014/la_gidor_de_isis_apare_en_video
====== La gidor de ISIS apare en video ======
6 julio 2014
Abu Bakr al-Baghdadi, la gidor de la grupo estremiste ISIS, ia demanda ce muslimes obedi el, en sua predica video prima.
El ia es nomida como califa par la grupo jihadiste, ci ia saisi aora areas grande de Irac e Suria.
Lo pare ce on ia filma la video a venerdi, en un predica a la mascita Al-Nouri en Mosul, en Irac norde. La filma ia es publicida a saturdi, entre reportas ce Baghdadi ia es ja matada o ferida en un ataca de aira iraci.
En la predica, a la monumento la plu famosa de Mosul, Baghdadi ia loda la institui de "la stato muslim" cual ISIS ia declara a soldi pasada.
La gidor no ia apare en video a ante, e on ia ave sola alga fotos de el.
El ia dise ce el no ia xerca la posto de califa, descrivente esta como "un carga".
Sutitulos en la video ia refere a el como "Califa Ibrahim", un nom cual el ia usa de cuando la estremistes ia declara el como la gidor de sua stato.
Plu temprana a saturdi, Nouri al-Maliki, la ministro xef de Irac, ia desemplea du de sua xefes de securia, seguente la colasa de la armada iraci en la norde de la pais en junio.
Entretempo, estremistes gidada par ISIS ia destrui a la min des santerias en la provinse Nineveh en Irac norde. Los ia destrui locas xia, suni, e cristian, e ia publici imajes de la atas en redes sosial.
Plu ca milion persones ia fuji par causa de la situa, e cuasi 2500 ia es matada en la mense pasada.
@T La gidor de la RAS dise ce la caos es finida
@L aora_oji/2014/la_gidor_de_la_ras_dise_ce_la_caos_es_finida
====== La gidor de la RAS dise ce la caos es finida ======
14 janero 2014
Un calmia relativa ia reveni a la stradas de Bangui, la capital de la Republica de Africa Sentral, pos semanas de scaramuxas setal. Bancos, ofisias, e mercatos ia reabri.
Alexandre-Ferdinand Nguendet, la gidor tempora de la pais, ia dise ce la dias de atacas venjante e de furas de benes ia fini.
Sirca un sinci de la 4,6 milion abitores de la pais ia fuji de sua casas, entre avertis de un desastre umaniste.
Tra la site, la popla senti aora sufisinte secur per sorti de sua casas.
@T La gidor de la tren en un asidente ia sufri de apnea de dormi
@L aora_oji/2014/la_gidor_de_la_tren_en_un_asidente_ia_sufri_de_apnea_de_dormi
====== La gidor de la tren en un asidente ia sufri de apnea de dormi ======
8 april 2014
Investigores ia revela ce la gidor de un tren plen de viajores dial cual ia salta de la reles en desembre, matante cuatro persones, sufri de un maladia grave de dormi.
On ia descovre ce William Rockefeller sufri de apnea de dormi, ma on no ia clari esce esta ia contribui a la desastre.
Cuando la tren ia salta, lo ia es viajante sur un curva agu a 132 cilometres per ora -- cuasi la truple de la limita de rapidia per acel curva. Plu ca 60 persones ia es ferida en la asidente. La tren ia para a un distantia corta de la Rio Harlem en la distrito Bronx de New York.
La Funda Nasional de Dormi dise ce plu ca 18 milion adultes american esperia apnea de dormi, un state medical en cual la respira de la dormor es interompeda a veses corta ma repeteda.
La avocato de Rockefeller e la gidor de sua sindicato ia sujesta ja ce el ia adormi en cuando el ia es controlante la tren.
La Comite Nasional de Securia Transportal va publici sua concluis sur la causa de la asidente en un reporta plu tarda.
@T La gidor de Nijeria defende la rol de la armada contra Boko Haram
@L aora_oji/2014/la_gidor_de_nijeria_defende_la_rol_de_la_armada_contra_boko_haram
====== La gidor de Nijeria defende la rol de la armada contra Boko Haram ======
25 febrero 2014
La presidente de Nijeria ia defende la laboras de la armada contra combatosas islamiste en la norde, pos la moris de plu ca 200 siviles en atacas en la semana pasada.
Respondente a criticas resente, Goodluck Jonathan ia dise ce la batalia contra Boko Haram "va boni".
Esta segue un demanda par la governor de Borno, la stato la plu afetada, per un envia de plu soldatos a la area.
Boko Haram ia fa un campania violente tra cuatro anios per esije un rena muslim en Nijeria norde.
@T La gidor nova de la RAS xerca plu soldatos
@L aora_oji/2014/la_gidor_nova_de_la_ras_xerca_plu_soldatos
====== La gidor nova de la RAS xerca plu soldatos ======
22 janero 2014
Catherine Samba-Panza, la gidor nova de la Republica de Africa Sentral, ia demanda ce paises european e african envia plu soldatos per aida restora la ordina.
La maior pasada de la capital, Bangui, ia es elejeda par la parlamento tempora en lundi. El ave 59 anios.
Sirca milion persones -- 20% de la popla -- ia fuji de sua casas tra menses de violentia relijiosa.
Entretempo, la ministro franses de defende dise ce on ia descovre un tomba coletiva nova, estra Bangui, con 15 corpos.
@T La gidor oposante en Venezuela presenta se per aresta
@L aora_oji/2014/la_gidor_oposante_en_venezuela_presenta_se_per_aresta
====== La gidor oposante en Venezuela presenta se per aresta ======
19 febrero 2014
Leopoldo López, la gidor oposante en Venezuela, ia presenta se a la polisia pos parla a miles de sua suportores.
El ia dise ce el ia espera ce sua aresta va consensi la pais sur sua "justia nonjusta".
A la mesma tempo, alga miles de suportores e oposores de la governa ia partisipa en asemblas tensada e competente en la capital, Caracas.
López ia es acusada de provoca violentia en protestas resente en cual cuatro persones, cisa plu, ia mori.
@T La gidor oposante en Zambia nomi la presidente un patata
@L aora_oji/2014/la_gidor_oposante_en_zambia_nomi_la_presidente_un_patata
====== La gidor oposante en Zambia nomi la presidente un patata ======
8 janero 2014
On ia aresta un politiciste oposante en Zambia sur malacusa, pos cuando el ia compara la presidente a un patata.
On dise ce Frank Bwalya ia descrive presidente Michael Sata como "chumbu mushololwa" en radio en lundi.
Acel espresa en la lingua bemba indica un patata dulse cual rompe cuando on flexe lo. Como metafor, lo descrive un person ci no escuta conselas.
Bwalya va es prisonida per asta sinco anios si on condena el.
En pasada, el ia es un prete e un suportor de Sata. Aora, el gida la partito oposante, Alia per un Zambia Plu Bon.
@T La gidores de Tai es acusada de represa
@L aora_oji/2014/la_gidores_de_tai_es_acusada_de_represa
====== La gidores de Tai es acusada de represa ======
11 setembre 2014
Amnestia Internasional dise ce la governa militar de Tai ia viole diretos umana a grado vasta de pos sua colpa de stato en maio.
Como esemplos, lo lista arestas acaso, restrinjes sever de parla libre, alegas de bates, e prosedes nonjusta.
En un reporta, la organiza de promove diretos umana ia recomenda ce la junta "fini esta abitua disturbante de represa".
La militaria ia saisi la potia a 22 maio pos menses de protestas contra la governa. Lo ia promete restabli la pais.
A la min 27 persones ia mori en la campania protestante de ses menses per despone la gidor Yingluck Shinawatra.
La junta ia descrive sua atas como nesesada e proportial a la esije de manteni la securia.
La reporta ia dise ce 665 tais ia es arestada o comandada a presenta formal se par la autoriosas de pos la colpa de stato.
Estas ia inclui politicistes, profesores, ativistes, e jornalistes. On ia prisoni alga de los tra asta un semana sin acusa o prosede, e en acel tempo on no ia permete ce los contata un avocato o sua familia.
Amnestia Internasional dise ce on ia teni la persones con "razonas neblosa e debil", per esemplo afin los pote "descoleri" o "ajusta sua disposa".
La organiza ia oia reportas de alga de la prisonidas ce on ia tortura los. Kritsuda Khunasen, un ativiste political, dise ce on ia bate el e asfixia el con un saco plastica si el no ia responde sasiante a la demandas de sua interogores.
Amnestia ia dise ce la junta militar ia impedi plu ca 200 locas de rede, ia clui alga stasiones de televide e radio, e ia sesa tolera protestas pasosa.
La organiza ia ajunta ce alga persones nonmilitar ia es prosededa en cortes militar, sin direto de apela.
Respondente a la reporta, la governa tai ia dise ce Amnestia ia "fali reconose la esijes urjente de renormali la state de crise a acel tempo", e ce la plu de tais ia senti plu secur de pos la colpa de stato.
@T La governa de Sudan Sude recatura Bentiu
@L aora_oji/2014/la_governa_de_sudan_sude_recatura_bentiu
====== La governa de Sudan Sude recatura Bentiu ======
11 janero 2014
Fortes de la governa de Sudan Sude ia recatura la site Bentiu de rebeliores.
Soldatos ia vinse a la resista final -- un tance cual ia proteje un ponte a la site -- a 14:30 de ora local.
La batalias ia mata multe plu ca 1000 persones de pos 15 desembre.
Entretempo, discutes sur un sesaspara ia fali en Itiopia.
@T La governa mexican dise ce patruliores no es la blanco
@L aora_oji/2014/la_governa_mexican_dise_ce_patruliores_no_es_la_blanco
====== La governa mexican dise ce patruliores no es la blanco ======
18 janero 2014
La governa mexican ia atenta calmi patruliores nonlegal en la state ueste de Michoacan par clari ce los no es la blanco de un opera corente de securia.
On ia envia sentos de soldatos a la area per restora la ordina, pos scaramuxas entre grupos de patruliores e membros de un cartel de drogas.
Multe de la grupos de autodefende ia refusa atende la clama par la governa a desprende armas.
Un ministro ia dise ce la fortes de securia ia identifia la tre gidores xef de la cartel Knights Templar, e xasa aora los.
@T La governa nova de Italia es induida
@L aora_oji/2014/la_governa_nova_de_italia_es_induida
====== La governa nova de Italia es induida ======
23 febrero 2014
En Italia, on ia indui un governa nova, gidada par Matteo Renzi, un politiciste sinistriste sentral.
Con sola 39 anios, Renzi es la ministro xef la plu joven en la istoria de la pais, e un de la min esperiosas.
El ia asende a importa como la maior de Firenze, ma on ia eleje nunca el a parlamento, e el ia labora nunca en un governa nasional.
El ia eleje un consilio de ministros relativa joven. Sirca un dui de los es femes.
@T La governa suri ofre un intercambia de prisonidas
@L aora_oji/2014/la_governa_suri_ofre_un_intercambia_de_prisonidas
====== La governa suri ofre un intercambia de prisonidas ======
18 janero 2014
La ministro suri de relatas stranjer ia dise ce Dimashq es preparada per ofre un intercambia de prisonidas con rebelores.
Parlante en Moscva, Walid Muallem ia dise ance ce el ia presenta un projeta de sesaspara per Aleppo, la site du, a sua corespondente rusce, Sergei Lavrov.
La Alia Nasional Suri consenta en Istanbul per deside esce lo va vade a la confere de pas en la semana veninte.
La ueste presa la fusa a partisipa en la discutes en Geneve, ma multe de la membros ia retira ja se.
@T La governa tempora de Egipte resinia nonprevideda
@L aora_oji/2014/la_governa_tempora_de_egipte_resinia_nonprevideda
====== La governa tempora de Egipte resinia nonprevideda ======
25 febrero 2014
04:17
Hazem Beblawi, la ministro xef tempora de Egipte, ia anunsia subita la resinia de sua governa.
El ia dise ce la deside ia es fada "en considera la situa presente cual la pais esperia".
Esta ia aveni a media de un serie de greves, incluinte un par laborores de la campo publica e coliores de dejetadas. On ave ance un manca sever de gas de coce.
On ia asinia Beblawi en julio pos la despone militar de Mohammed Morsi, seguente protestas coletiva.
@T La invade de la cason de Kim Dotcom en 2012 ia es legal
@L aora_oji/2014/la_invade_de_la_cason_de_kim_dotcom_en_2012_ia_es_legal
====== La invade de la cason de Kim Dotcom en 2012 ia es legal ======
20 febrero 2014
Un corte en Zeland Nova ia judi ce un invade de la cason de Kim Dotcom, un maniate de interede, ia es legal.
En janero 2012, on ia xerca tra la casa de Dotcom e ia saisi ojetos, comandada par autoriosas SUA ci acusa el de piratia de obras.
La deside pote alti la probablia ce on va estradi Dotcom a la SUA.
An tal, la corte ia acorda ce la clone de atestas eletronical par la investigores ia es nonlegal.
@T La investiga de froda en la governa turces continua
@L aora_oji/2014/la_investiga_de_froda_en_la_governa_turces_continua
====== La investiga de froda en la governa turces continua ======
7 janero 2014
Turcia ia sutrae 350 polisiores de sua postos en la capital, Ankara, pos cuando un investiga de froda ia esamina persones prosima a la governa.
Esta es la cambia la plu grande de pos alga arestas subita par la polisia en desembre. Tre membros de la governa ia resinia pos cuando sua fios ia es arestada.
La ministro xef acusa la polisia e judores de "un conspira susia".
La autoriosa suprema de judores en Turcia dise ce lo va investiga ance la malcondui posible de ofisiores major ci supravide la esplora.
@T La jenitores de Ashya King es librida en Espania
@L aora_oji/2014/la_jenitores_de_ashya_king_es_librida_en_espania
====== La jenitores de Ashya King es librida en Espania ======
3 setembre 2014
On ia libri la jenitores de Ashya King de prison en Espania pos cuando avocatos prosedente ia retira un comanda european de aresta.
Brett e Naghemeh King ia es tenida pos prende sua fio de sinco anios, ci ave un tumor de serebro, de un ospital en Southampton, England contra la consela de dotores.
La avocatos ia dise ce los ia deveni sasiada ce la risca a la vive de Ashya "no es tan grande o direta" como los ia crede orijinal.
An si on ia libri los, la jenitores ancora no ia parti de prison.
Ashya es aora tratada en un ospital en Malaga. Sua desapare a jovedi ia causa xercas en Frans e Espania.
Sua frate Danny ia comenta ce sua jenitores es xocada par sua esperias, ma multe felis ce los pote aora visita Ashya.
Los no ia comprende perce tan multe reportores espeta a estra, car pos sua aresta los no ia pote regarda la novas televisada.
La avocatos ia reconsidera la caso e ia deside ce la atesta no sufisi per reali un condena per cualce crimin.
@T La jenitores de un xica violeda indian xerca la justia
@L aora_oji/2014/la_jenitores_de_un_xica_violeda_indian_xerca_la_justia
====== La jenitores de un xica violeda indian xerca la justia ======
4 janero 2014
La jenitores de un xica de 16 anios, ci ia mori pos es violeda par un gang e ensendeda a foco en la site indian de Kolkata, ia jura ce los va batalia per justia.
On ia aresta oto omes en relata a la caso.
Protestores es colerida par, alegada, la malmaneja de la caso par la polisia. Los esije ce on trata forte la atacores.
La caso ia deveni conoseda pos la revela ce la xica no ia suiside, ma ia es ensendeda con intende. On alega ce el ia es ensendeda par persones prosima a la violores.
En la televisa indian, un disputa ia aveni entre la polisia e la jenitores de la xica, sur la maneja de la funera. La familia ia acusa ce la polisia ia vole asconde la caso.
@T La Jornal de Anne Frank es laserada en bibliotecas japanes
@L aora_oji/2014/la_jornal_de_anne_frank_es_laserada_en_bibliotecas_japanes
====== La Jornal de Anne Frank es laserada en bibliotecas japanes ======
22 febrero 2014
On ia dana plu ca 100 copias de la Jornal de un xica joven par Anne Frank, en bibliotecas publica en la capital de Japan.
Pajes ia es laserada de 265 copias, cisa plu, de la Jornal e otra libros relatada.
On no sabe ci ia fa la vandalisme. Un grupo SUA de diretos iudi ia demanda un investiga par polisia.
Anne Frank ia scrive sua jornal en la Gera Mundal Du, en cuando el ia asconde de la nazis en Amsterdam ocupada.
@T La justia nuda en Hainan
@L aora_oji/2014/la_justia_nuda_en_hainan
====== La justia nuda en Hainan ======
11 febrero 2014
La isola tropical de Hainan es ja longa un vacanseria popular per turistes xines ci vole bani su sol en la inverno.
Ma baniores nuda sur la isola provoca aora medios sever.
La gidor de la isola, un membro de la partito comuniste, ia denunsia la nudisme como "nonsivilida" e "nonxines".
On ia comanda ce la polisia fa patrulias constante. Con parladores, los averti baniores nuda ce, si los no covre se, los risca des dias de "instrui par prisoni".
@T La limita de tempo prosimi en discutes sur la program nucleal de Iran
@L aora_oji/2014/la_limita_de_tempo_prosimi_en_discutes_sur_la_program_nucleal_de_iran
====== La limita de tempo prosimi en discutes sur la program nucleal de Iran ======
23 novembre 2014
On comensa sempre plu duta ce discutes en Wien, Austria va ateni un acorda sur la program nucleal controversa de Iran ante un limita de tempo a fini de lundi.
Ambos Deutxland e la SUA ia dise ce la du lados labora per clui "bucos grande", e alga ia sujesta ce on pote estende la limita de tempo.
Ses potias global vole ce Iran restrinje sua program nucleal par intercambia afin la Nasiones Unida sutrae sua punis.
Iran rejeta la alega ce lo atenta construi armas nucleal. Lo dise ce sua program es intera pasosa, e intende usa lo per produi enerjia.
Representores de la grupo nomida P5+1 -- Britan, Frans, Rusia, la SUA, e Xina, con Deutxland -- partisipa en la negosias con Iran en la capital austrian.
John Kerry, la ministro de esternas de la SUA, ia pospone un viaja a Paris per encontra sua corespondente irani, Mohammad Javad Zarif, a la ves cuatro en sola tre dias.
La ministro de esternas deutx, Frank-Walter Steinmeier, ia descrive la discutes asta aora como "aidosa", ma ia ajunta: "Esta debe no masci ce un buco grande esiste ancora entre nos en multe aspetas."
On ave multe per discute, car un acorda ta pote cambia la politica en Asia sude-ueste. An tal, lo es ancora nonclar esce la du lados pote reali sufisinte rapida la desides political difisil.
On ia reporta un fonte european ci ia dise ce on ia fa "no progresa sinifiosa" e ce "la probablia de reali un acorda es alga reduida". Un ofisior major de la SUA ia dise ce la gol resta ce on ateni un acorda ante la fini de lundi, "ma nos discute e interna e con nosa aliadas posibles diversa."
A la mesma tempo, un fonte irani ia dise ce la ecipo resta serta ce un acorda completa es ancora posible, sujestante ce on pote estende la limita par un o du dias.
Un conserna major de la SUA es preveni ce Iran produi un bomba a locas nucleal cual es secreta e nondetetada. Un partisipor de la discutes ia dise ce la gol es fa ce la linguaje deveni "tan nonpermeable como posible" per permete esaminas multe intruosa.
La grupo P5+1 e Iran ia ateni un acorda tempora a un anio ante aora. Ma la du lados ia fali crea un acorda durante ante julio, como prima desideda, e donce ia estende la limita asta 24 novembre.
Iran resiste ja atentas de redui sua program nucleal tra cuasi un desenio.
@T La logo de Google per la Olimpiales suporta diretos ge
@L aora_oji/2014/la_logo_de_google_per_la_olimpiales_suporta_diretos_ge
====== La logo de Google per la Olimpiales suporta diretos ge ======
7 febrero 2014
Google ia junta se a otra companias SUA ci critica un lege rusce cual restrinje ativias sur diretos ge.
Lo ia ajusta sua logo per la dia per inclui imajes de atletas sur un fondo con la colores de un arco de sielo -- un simbol de la promove de diretos ge.
La Juas Olimpial ia abri oji en Sochi.
Rusia ia proibi la promove de sesalia "nontradisional" en la anio pasada. La furni de informas sur omosesalia a persones con min ca 18 anios es aora un crimin ala, punable par multa.
@T La maior de New York ataca un canion de nonegalia
@L aora_oji/2014/la_maior_de_new_york_ataca_un_canion_de_nonegalia
====== La maior de New York ataca un canion de nonegalia ======
11 febrero 2014
Bill de Blasio, la maior de la Site New York, ia promete alti la salario minima e dona paperes de identia a migrores nondocumentida.
Presentante la politicas de la dirijores nova, el ia ataca la canion vasta de nonegalia en la site.
La maior, ci ave 52 anios, vole ance alti impostas de persones rica per finansia programes prescolal per tota enfantes.
Elejeda en novembre, el es la maior democrata prima de New York en du desenios.
@T La maior de Toronto retira se de la eleje
@L aora_oji/2014/la_maior_de_toronto_retira_se_de_la_eleje
====== La maior de Toronto retira se de la eleje ======
13 setembre 2014
En Canada, Rob Ford, la maior de Toronto, ia retira se de la eleje maioral a 27 otobre, car on ia diagnose el con tumor adomenal.
La maior, ci ave 45 anios, ia defia recomendas ce el resinia pos cuando el ia confesa en la anio pasada ce el ia usa cocaina en sua periodo maioral.
El ia es ospitalida a mercurdi pos sufri menses de dole adomenal.
Documentos ofisial mostra ce sua frate, Doug Ford, ia sustitui per el en la vota.
Sua retira segue cuatro anios como maior en cuando on ia acusa el de ebria publica, peri de recursos ofisial, e usa de drogas.
En 2013, jornalistes ia reporta ce los ia regarda videos de Ford en cual el pare fumi crac. En novembre, Ford ia confesa compra e usa la droga en lo cual el ia descrive como un stupor enebriada.
An si la comite de la site Toronto ia sutrae de el la plu de sua diretos maioral, Ford ia refusa resinia, e ia anunsia el como aspiror per es reelejeda.
El ia spende un mense en resani, e ia revade a sua posto en junio.
Sua retira de la eleje lasa aora Olivia Chow, un parlamentor pasada de la Partito Democrata Nova, e John Tory, un comersior e membro conserviste pasada de la parlamento de Ontario, como la vinsores la plu probable de la eleje.
@T La maior desempleada de Bogota prepara un protesta permanente
@L aora_oji/2014/la_maior_desempleada_de_bogota_prepara_un_protesta_permanente
====== La maior desempleada de Bogota prepara un protesta permanente ======
12 janero 2014
La maior de Bogota, la capital de Colombia, ia avisa ce el va organiza sua suportores a un ocupa permanente de plazas publica si on confirma sua desemplea resente e controversa.
Gustavo Petro, un sinistriste major, ia parla a deses de miles de suportores en la plaza xef.
El ia es desempleada en la mense pasada pos alegas ce el ia malmaneja la servi de recolie dejetadas en la capital.
El ia apela contra la deside.
@T La mar depone un caxalote a la costa scotes
@L aora_oji/2014/la_mar_depone_un_caxalote_a_la_costa_scotes
====== La mar depone un caxalote a la costa scotes ======
12 janero 2014
Un caxalote mor ia es deponeda prosima a un plaia en Edinburgh en Scotland.
Un asosia carital sur la bonstate de animales ia es avertida sur la aveni a sirca 05:15 en saturdi.
Reportas inisial ia dise ce la bestia es un setorino. Ma espertas ia confirma ce los crede ce lo es un caxalote.
Un biolojiste de mar va prende samples de la balena ante cuando on estrae lo de la acua o repuia lo a la mar. La Consilio de Edinburgo es encargada con la estrae.
@T La maraton de Boston onora vitimes de bomba
@L aora_oji/2014/la_maraton_de_boston_onora_vitimes_de_bomba
====== La maraton de Boston onora vitimes de bomba ======
22 april 2014
En la SUA, miles de maratonores ia core sur la stradas de Boston, pos cuando la site ia onora la tre persones matada e plu ca 260 ferida par un ataca de bomba a un anio ante aora.
Tota ia resta silente per un momento ante la comensa en via de 36 000 corores -- 9000 plu ca normal.
Ofisiores ia fa un opera enorme de securia cual inclui postos de controla e un proibi de bolsones. On ia previde ce un dui de milion persones va regarda la maraton. La polisia de Boston ia erije 8000 paradores de aser, 1200 plu ca en la anio pasada.
Atletas descapasida ia es la prima competores, comensante a 08:50 de ora local (12:50 UTC).
La corsa de atletas profesal fema ia comensa a 09:32. La atletas profesal mas ia comensa pos un dui de ora, e los ia es segueda par miles de otra corores.
La corsa de omes ia es ganiada par Meb Keflizighi, un atleta SUA, e la corsa de femes ia es ganiada par Rita Jeptoo de Cenia. Keflizighi ia completi la distantia de 42,2 cilometres en 2 oras, 8 minutos, e 37 secondos, deveninte la ganior SUA prima de pos 1985.
Jeptoo ia traversa la linia de fini en 2 oras, 18 minutos, e 57 secondos, un tempo recordo. Esta es sua vinse tre en la compete.
@T La marina angolan xerca piratas suspetada
@L aora_oji/2014/la_marina_angolan_xerca_piratas_suspetada
====== La marina angolan xerca piratas suspetada ======
24 janero 2014
La marina e forte de aira angolan xerca piratas suspetada pos la desapare de un barcon de petrolio en sua acuas. La barcon Kerala es elinica e ave 75 000 tones.
Capitan Augusto Alfredo de la marina ia dise ce on ia vide un barcon nonconoseda en la visinia de Kerala cuando lo ia es ancorida prosima a la porto de Luanda.
El no ia pote confirma un ataca par piratas. Lo ta es la prima tal ataca en acuas angolan.
Angola es entre la produores la plu grande de petrolio en la mundo.
@T La marina italian salva plu ca mil migrores de barcones
@L aora_oji/2014/la_marina_italian_salva_plu_ca_mil_migrores_de_barcones
====== La marina italian salva plu ca mil migrores de barcones ======
6 febrero 2014
La marina de Italia ia salva 1123 persones de barcones inflada en 24 oras. Migras secreta de Africa Norde ia ateni un nivel recordo.
La migrores la plu resente ia es trovada en oto barcones e un barcasa a sirca 222 cilometres a sude-este de Lampedusa.
Los ia inclui 47 femes, de ci cuatro ia es ensinta, e 50 enfantes. Tota ia veni probable de Africa susaharan.
Entretempo, a la min sete migrores ia afoca en atenta ateni Ceuta, un enclave espaniol en Africa Norde.
@T La metano de boves esplode sua cabana
@L aora_oji/2014/la_metano_de_boves_esplode_sua_cabana
====== La metano de boves esplode sua cabana ======
29 janero 2014
La metano relasada par boves de leteria ia causa un esplode en un cabana de boves en Rasdorf, en Deutxland sentral.
La teto ia es danada, e un de la boves ia es ferida.
Cuantias grande de la gas ia colie en la cabana par causa de la rutas e petas de la 90 boves en lo.
On crede ce un bove es capas de emete 500 litres de metano per dia.
@T La militaria SUA ia atenta libri James Foley sin susede
@L aora_oji/2014/la_militaria_sua_ia_atenta_libri_james_foley_sin_susede
====== La militaria SUA ia atenta libri James Foley sin susede ======
21 agosto 2014
La SUA ia declara ce lo ia fa ja un mision secreta militar per atenta libri la reportor James Foley e otra ostajes en Suria. La mision ia fali, car la ostajes no ia es presente a la loca pertinente.
La revela segue la publici a martedi de un video de la destesti de Foley par ativistes de la Stato Muslim, ci ia dise ce sua mori es un venja per atacas airal par la SUA contra sua bataliores en Irac.
Presidente Barack Obama ia condena la mata de Foley como "un ata de violentia cual xoca la consiensa de la mundo intera".
El ia compara la Stato Muslim, ci controla aora partes grande de Suria e Irac, a "un canser", e ia descrive la ideolojia de la grupo como "bancarota".
La Nasiones Unida, Rena Unida, e otras ia espresa ance sua repulsa a la video.
Diane Foley, la madre de la matada, ia dise: "El ia sacrifia sua vive en atenta esposa a la mundo la sufri de la popla suri."
La Comite de Proteje Jornalistes ia dise ce lo es "estrema consernada per tota jornalistes" ancora tenida par la Stato Muslim, descrivente Suria como "la plu perilosa loca de mundo per un reportor".
La declara par la SUA no ia spesifa esce la mision ia intende salva Foley, ci ia deveni saisida en Suria en novembre 2012. Ma ofisiores xef de la governa, parlante con anonimia, ia confirma esta.
@T La militaria SUA proba fusiles intelijente
@L aora_oji/2014/la_militaria_sua_proba_fusiles_intelijente
====== La militaria SUA proba fusiles intelijente ======
13 febrero 2014
La armada SUA proba "fusiles intelijente" cual pote boni la esatia de xutas.
La tecnolojia permete pone un eticeta virtual a un blanco oservada tra la vidador de la arma.
Cuando on presa la gatilio, la fusil xuta sola si lo es coreta aliniada.
Esta preveni tal eras como aranca de gatilio, malcalcula de distantia, e xuta sin intende.
@T La militaria turces esije prosedes nova
@L aora_oji/2014/la_militaria_turces_esije_prosedes_nova
====== La militaria turces esije prosedes nova ======
3 janero 2014
La comandores de la armada turces ia esije ce on prosede denova deses de ofisiores militar ci on ia condena de conspira per cade la governa. Los ia acusa ce la judores e polisia ia manipula e inventa atestas.
On ia regarda la casos como un defia a la tradisiones secular de la Turcia moderna.
La xef pasada de la armada, Gen Ilker Basbug, ia es entre deses de persones ci on ia condena a prisonis longa en agosto 2013.
On ia condena legores, politicistes, e jornalistes, e ance multe ofisiores militar.
@T La ministro de justia ucrainsce menasa un state de crise
@L aora_oji/2014/la_ministro_de_justia_ucrainsce_menasa_un_state_de_crise
====== La ministro de justia ucrainsce menasa un state de crise ======
27 janero 2014
En Ucraina, la ministro de justia ia avisa protestores antigovernal ci ocupa sua ofisia ce el va demanda un state de crise si los no parti.
Olena Lukash ia informa jornalistes local ce el va demanda esta de la Consilia Nasional de Securia e Defende.
Protestores ia saisi la construida en Kiev a un ora tarda de soldi, e ia crea paradores con sacos de neva per impedi entra.
Un turba estende tra la pais. Ativistes ocupa construidas munisipal en asta des sites.
@T La ministro egiptian pasada de casas va formi un governa nova
@L aora_oji/2014/la_ministro_egiptian_pasada_de_casas_va_formi_un_governa_nova
====== La ministro egiptian pasada de casas va formi un governa nova ======
26 febrero 2014
La presidente de Egipte ia demanda ce Ibrahim Mahlab, la ministro direta pasada de casas, formi un governa nova, a la dia pos la resinia nonespetada de la governa tempora.
Hazem Beblawi, la ministro xef tempora, no ia dona un razona clar per la resinia coletiva en lundi.
Mahlab ia esplica a jornalistes ce el va foca sua labora a trova metodos de preveni greves, aumenta emplea e produi, e restora calmia a la pais.
On previde un indui de la governa nova en saturdi.
@T La ministro xef de Australia defende sua politica sur refujadas
@L aora_oji/2014/la_ministro_xef_de_australia_defende_sua_politica_sur_refujadas
====== La ministro xef de Australia defende sua politica sur refujadas ======
9 janero 2014
Tony Abbott, la ministro xef de Australia, ia defende lo cual on ia critica como un secretia governal sur la politica de refuja.
En dias resente, ofisiores ia refusa comenta sur reportas ce fortes de la marina australian ia diverje a la min un barco a Indonesia.
On alega ance ce empleadas de la marina ia maltrata xercores de refuja.
Abbott ia promete reata dur contra la problem de refuja cuando el ia emprende sua posto. El ia dise aora ce la restrinje de informas permete ce la marina fa plu susedosa la taxe de preveni la ariva de barcos.
@T La ministro xef de Delhi resinia
@L aora_oji/2014/la_ministro_xef_de_delhi_resinia
====== La ministro xef de Delhi resinia ======
14 febrero 2014
Arvind Kejriwal, la ministro xef de Delhi, ia resinia pos la impedi par la asembla de stato de un projeta legal contra froda.
Politicistes oposante ia bloci la projeta, cual ta crea un autoriosa autonom con potia de investiga politicistes e ofisiores publica ci on suspeta de froda.
Los ia dise ce on ta ata nonlegal si on ta introdui un lege nonaprobada par la governa federal.
La partitio contra froda de Kejriwal ia fa un comensa eselente en un vota resente.
@T La ministro xef de Frans resinia sur la economia
@L aora_oji/2014/la_ministro_xef_de_frans_resinia_sur_la_economia
====== La ministro xef de Frans resinia sur la economia ======
25 agosto 2014
Manuel Valls, la ministro xef de Frans, ia presenta la resinia de la governa a Presidente François Hollande, ci ia demanda ce el formi un consilio nova en loca.
La governa ia es grave secuteda a soldi par criticas par Arnaud Montebourg, la ministro economial, sur sua maneja de la economia.
A momentos pos la resinia de Valls, Hollande ia declara ce el ia demanda ce Valls asembla un consilio nova, "coerente con la dirije cual Hollande ia deside per la pais".
La ministro xef ia acusa ja ce Montebourg ia "traversa un linia jala" pos cuando la ministro sur economia ia ataca medios sever cual el ia descrive como strangulante la crese de Frans.
Montebourg ia informa un asembla de sosialistes en Frans este ce esta es la bon momento per furni "un resista justa e sana" a "la oseses esedente de la conservistes de Deuxtland".
A saturdi, el ia dise a un jornal nasional ce Deutxland es trapida en un politica sever cual el ia obliga tra Europa.
Valls ia deveni la ministro xef en marto pos cuando la partito sosialiste de Hollande no ia susede bon en elejes local.
Plu temprana en esta mense, la governa ia confesa ce lo no pote ateni un crese de 1%, como lo ia previde a ante.
@T La ministro xef de India va jubila
@L aora_oji/2014/la_ministro_xef_de_india_va_jubila
====== La ministro xef de India va jubila ======
3 janero 2014
Manmohan Singh, la ministro xef de India, ia anunsia ce el no va resta en la posto si sua partito, la Congresa Nasional India, gania la eleje veninte en la estate.
Singh ave 81 anios e es ja la ministro xef tra un desenio.
El ia dise ce lo ta es un "desastre per la pais" si on ta eleje la gidor oposante, Narendra Modi.
Modi gida la Partito de Popla Indian, cual ia vinse resente la Congresa en elejes en cuatro statos political importante.
@T La ministro xef de Italia batalia per survive political
@L aora_oji/2014/la_ministro_xef_de_italia_batalia_per_survive_political
====== La ministro xef de Italia batalia per survive political ======
13 febrero 2014
Enrico Letta, la ministro xef de Italia, ia fa discutes con Matteo Renzi, la gidor de un otra partito, entre divinas ce sua competor plu joven va sustitui per el.
Renzi, la maior de Firenze, ci ave 39 anios, ia es elejeda como gidor de la Partito Democrata en desembre.
Letta ave 47 anios. El ia formi un alia en april pos un vota nonconcluinte. Renzi ia critica publica el.
On previde ce el va presenta la program reforminte de la governa an con la dutas sur sua destina political.
@T La ministro xef de Italia va resinia
@L aora_oji/2014/la_ministro_xef_de_italia_va_resinia
====== La ministro xef de Italia va resinia ======
14 febrero 2014
La ministro xef de Italia, Enrico Letta, ia dise ce el va resinia en venerdi. Sua Partito Democrata ia suporta un clama per un dirijor nova.
Plu temprana, Matteo Renzi, la gidor de la partito ia demanda un cambia de governa a un asembla de partito. El ia comenta ce la pais no pote continua en "nonsertia".
On divina ce Renzi desira deveni mesma la ministro xef.
El es plu joven ca Letta par oto anios. On ia eleje el como gidor de partito en desembre.
@T La ministro xef de Japan recomenda un restrinje de militaria en Asia
@L aora_oji/2014/la_ministro_xef_de_japan_recomenda_un_restrinje_de_militaria_en_asia
====== La ministro xef de Japan recomenda un restrinje de militaria en Asia ======
23 janero 2014
Shinzo Abe, la ministro xef de Japan, ia informa un fola a la Foro Economial Mundal en Davos ce on debe restrinje la crese militar en Asia.
On crede ce sua comentas refere a Xina, cual es envolveda en disputas teritorial con sua visinas.
El ia compara la relatas con Xina a los entre la Rena Unida e Deutxland direta ane la comensa de la Gera Mundal Prima.
El ia dise: "Japan ia jura ce lo va fa nunca denova un gera. Nos va continua desira ce la mundo es pasosa."
@T La ministro xef de Tai nega un alega de froda
@L aora_oji/2014/la_ministro_xef_de_tai_nega_un_alega_de_froda
====== La ministro xef de Tai nega un alega de froda ======
20 febrero 2014
Yingluck Shinawatra, la ministro xef de Tai, ia publici un declara en cual el nega alegas de froda en relata a un scema controversa de compra ris.
En martedi, la comision antifroda de Tai ia dise ce lo va prosede el per sua rol en la scema.
Si on judi ce el es culpable, el va pote es obligada de resinia.
Entretempo, protestores contra la governa ia continua sua campania de despone seniora Yingluck.
@T La ministro xef de Ucraina resinia
@L aora_oji/2014/la_ministro_xef_de_ucraina_resinia
====== La ministro xef de Ucraina resinia ======
29 janero 2014
Viktor Yanukovych, la presidente de Ucraina, ia aseta la resinia de la ministro xef e sua ecipo, entre protestas continuante contra la governa.
Mykola Azarov ia ofre resinia como ministro xef per crea "un compromete sosial e political".
La parlamento ucrainsce ia acorda cuasi unida per cansela un lege controversa contra protestas.
En dias resente, protestas ia estende tra la pais, ateninte an la fortres de la presidente en la este.
@T La ministro xef de Ungaria declara sua vinse pos un vota
@L aora_oji/2014/la_ministro_xef_de_ungaria_declara_sua_vinse_pos_un_vota
====== La ministro xef de Ungaria declara sua vinse pos un vota ======
7 april 2014
Viktor Orbán, la ministro xef de Ungaria, ia declara un vinse en la eleje parlamental cual ia aveni a soldi. Como resulta, el va governa per un periodo du en segue.
Sua partito sentral destriste ia reseta 45% de la votas, pos la conta de la plu de los. On predise ce lo va gania final 135 de la 199 sejas de parlamento. Un alia oposante sentral sinistriste ia reseta 25%, e un partito estrema destriste ia gania 21%.
La sinistristes ungarian no ia recovre vera pos sua defeta grande en la eleje de 2010, cuando Orbán ia comensa governa con un majoria forte de du tris. La eleje resente ia pertine xef a la state de la economia.
A un asembla de sua suportores en Budapest, la capital, Orbán ia dise: "Sin duta nos ia vinse. Esta no ia es mera un vinse acaso. Nos ia gania un vinse tan completa, de cual nos ancora no pote comprende intera sua sinifia a esta sera."
El ia dise ce la resulta de la eleje mostra ce ungarianes vole resta en la Uni European, ma con un governa nasional forte. "Me va labora a cada dia afin Ungaria deveni un loca merveliosa," el ia declara.
Lo pare probable ce la destristes estrema va es la partito du la plu grande en parlamento, car, an si la oposa sosialiste ia reseta plu votas, la sinco partitos en acel alia intende reformi sua propre partitos pos la eleje.
Oservores dise ce la destristes estrema ia susede par adota un imaje min sever. Un sonda resente de opinas ia trova ce Gábor Vona, la gidor de acel partito, es la plu popular entre la politicistes oposante en la pais.
Suportores de Orbán dise ce sua vinse refleta sua capasia de gida. Ma tra la campania intera, partitos oposante ia acusa la ministro xef de sumina la democratia ungarian, de restrinje librias personal, e de impedi la libria de espresa.
La partito governante ia insiste ce un reforma ia es nesesada per completi la taxe de elimina la restantes de comunisme en la pais, e per redui la salda negativa a su 3% de la produi interna bruta, como esijeda par la Uni European.
@T La ministro xef nova de Delhi fronti polisiores
@L aora_oji/2014/la_ministro_xef_nova_de_delhi_fronti_polisiores
====== La ministro xef nova de Delhi fronti polisiores ======
21 janero 2014
Arvind Kejriwal, la ministro xef de Delhi, ia fronti polisiores sur un strada ocupada de la site, pos cuando on ia preveni el de fa un protesta a la ofisia de la ministro de relatas interna.
La polisia ia para Kejriwal prosima a la Porton de India, e ia bloci la stradas cual gida a la ofisia de Sushil Kumar Shinde.
Kejriwal dise ce el protesta sur la refusa par la polisa de fa medios contra un sirculo de drogas e prostitui. La polisia nega esta.
El ia deveni la ministro xef en esta mense, cuando sua partito ia gania 28 de la 70 sejas en elejes resente, prometente combate la froda e limpi la politica.
@T La ministro xef nova de Italia vole reformi multe
@L aora_oji/2014/la_ministro_xef_nova_de_italia_vole_reformi_multe
====== La ministro xef nova de Italia vole reformi multe ======
25 febrero 2014
Matteo Renzi, la ministro xef nova induida de Italia, ia clari sua ideas de reformi, a alga oras ante gania un vota importante de fida sur sua governa nova.
Renzi ia proposa cambia la leges de vota, redui impostas, e investi sur empleas, en responde a la economia malada de la pais.
La gidor democrata ia clari ance ce el vole aboli la Senato como un autoriosa capas de crea leges.
Temprana en martedi, sua alia ia gania un vota de fida par la Senato. 169 membros ia favore, e 139 ia oposa.
@T La ministro xef pasada de Romania es condenada a prison
@L aora_oji/2014/la_ministro_xef_pasada_de_romania_es_condenada_a_prison
====== La ministro xef pasada de Romania es condenada a prison ======
7 janero 2014
La corte suprema de Romania ia condena Adrian Nastase, la ministro xef, a cuatro anios en prison per aseta sobornas.
On ia condena el ance a tre anios per estorse, ma el va fa sua du periodos en prison a la mesma tempo.
La caso ia conserna favores relatada a benes xines e imobila romanian entre 2001 e 2004.
Sua sposa, Dana Nastase, ia es condenada a tre anios de libria oservada, per sua coopera.
En 2012, senior Nastase is survive un atenta de suiside, no longa pos es condenada a du anios en prison, en un otra caso.
@T La mision antartica salvada de jelo ariva a base
@L aora_oji/2014/la_mision_antartica_salvada_de_jelo_ariva_a_base
====== La mision antartica salvada de jelo ariva a base ======
8 janero 2014
La Mision Antartica Australasian ia ariva a la base Casey a la costa de Antartica este.
Cuando sua barcon, la Aurora Australis, ia cade sua ancor, on ia reporta ce sua barcones, cual el ia lasa fisada en jelo a tre dias a ante, ia susede final libri se.
E la barcon rusce Akademik Shokalskiy e la rompejelo xines Xue Long move aora en dirije a mar min jelada.
La mision va pausa sola corta a Casey ante vade a Hobart en Tasmania. La 52 siensistes e turistes de la mision no va desembarca.
@T La Nasiones Unida es ansiosa sur suris asejada
@L aora_oji/2014/la_nasiones_unida_es_ansiosa_sur_suris_asejada
====== La Nasiones Unida es ansiosa sur suris asejada ======
13 janero 2014
Valerie Amos, ia xef de relatas umaniste de la Nasiones Unida, ia espresa un conserna profonda per comunias isolida en Suria par menses de combate entre rebelores e la fortes de la governa.
El ia dise ce el ia oia reportas ce persones ia mori cuasi de famia, an en la capital, Dimashq.
El ia parla a la governa suri sur la posible de furni de aida umaniste.
La situa en la pais cambia a cada dia, ma un documento de la Nasiones Unida, cual ia deveni esposada a la fini de desembre, ia dise ce un cuatri de milion suris es trapida en "areas asejada o apena asedable".
@T La Nasiones Unida uni sur aida umaniste en Suria
@L aora_oji/2014/la_nasiones_unida_uni_sur_aida_umaniste_en_suria
====== La Nasiones Unida uni sur aida umaniste en Suria ======
23 febrero 2014
La Consilio de Securia de la NU ia aproba unida un deside sur asede a aida umaniste en Suria.
Esta es la ves prima cuando lo ia acorda unida sur la problem. Rusia e Xina, cual ia rejeta desides simil en la pasada, ia vota favorente.
La deside dise ce la fortes de la governa e la oposa debe permete ce convoias de aida ateni siviles tra la pais.
La testo acordada no menasa punis, ma averti sur "pasos ajuntada" si la lados no segue la deside.
@T La nonemplea franses es recorda alta
@L aora_oji/2014/la_nonemplea_franses_es_recorda_alta
====== La nonemplea franses es recorda alta ======
28 janero 2014
La nonemplea franses ia ateni un punto recordo alta. Plu ca 3,3 milion persones es aora enscriveda como nonempleada.
En desembre, 10 200 plu persones ia es enscriveda. Esta ia rompe un promete par presidente François Hollande ce la nonemplea va redui ante la fini de 2013.
La proportio de nonempleadas en Frans es aora 11,1%. Lo ia crese par 5,7% en 2013, e par 0,3% en desembre.
En un visita a Turcia, Hollande ia dise: "Un stabli, cual nos ia ateni, no sufisi."
@T La NSA developa un computador cuantal
@L aora_oji/2014/la_nsa_developa_un_computador_cuantal
====== La NSA developa un computador cuantal ======
3 janero 2014
On reporta ce la Agenteria de Securia Nasional (NSA) en la SUA construi un computador cuantal per rompe la sifris cual securi mesajes.
La projeta ia es descovreda en documentos donada a la jornal Washington Post par la denunsior Edward Snowden.
La agenteria espera usa la cualias spesial de computadores cuantal per aselera sua laboras de desifri. On crede ce lo ia spende sirca $80 milion sur la projeta, ma lo ancora no ia produi un macina funsionante.
Multe grupos de rexercores tra la mundo ave la gol de crea un computador cuantal, ma la atentas developada asta aora no es capas de esecuta la algoritmos nesesada per rompe sifris contempora.
Un computador cuantal esplota cualias fisical cual, en alga situas, permete ce la macina fa estrema multe calculas a la mesma tempo. Con esta tecnica, on pote proba tota la claves par cual un mesaje ia es cisa sifrida.
@T La NSA es capas de spiona sur computadores estralinia
@L aora_oji/2014/la_nsa_es_capas_de_spiona_sur_computadores_estralinia
====== La NSA es capas de spiona sur computadores estralinia ======
16 janero 2014
On reporta ce la Departe de Securia Nasional de la SUA ia usa tecnolojia secreta per spia sur computadores cual no ia es an liada a la interede.
Sitante documentos de la denunsior Edward Snowden, la jornal dial New York Times ia dise ce on ia ajunta aparatos pico a 100 000 macinas.
La aparatos emete ondas de radio. On ia pone los en computadores de la militaria xines e rusce, e de carteles de droga.
On previde ce Barack Obama va parla en venerdi, dirijeda a la consernas sur la ativia de la Departe.
@T La NU debe ata direta per serti aida a Suria
@L aora_oji/2014/la_nu_debe_ata_direta_per_serti_aida_a_suria
====== La NU debe ata direta per serti aida a Suria ======
14 febrero 2014
Valerie Amos, la xef umaniste de la Nasiones Unida, ia recomenda forte ce la Consilio de Securia ata direta per serti plu asedes umaniste a Suria.
Demandante un deside, el ia dise ce lo es "nonasetable" ce ambos la governa e la rebelores continua viole leges umaniste.
La consilio es en un rua sin sorti sur furnis de aida a Suria, do miliones de persones ia debe fuji de sua casas.
Entretempo, soldatos suri ia recomensa sua ataca a un vila importante de rebelores.
@T La NU demanda per un sesaspara sin restrinje en Gaza
@L aora_oji/2014/la_nu_demanda_un_sesaspara_sin_restrinje_en_gaza
====== La NU demanda per un sesaspara sin restrinje en Gaza ======
28 julio 2014
La Consilio de Securia de la Nasiones Unida ia demanda per "un sesaspara umaniste, direta e sin restrinje" en la Banda de Gaza.
Un consenta de crise ia suporta un declara demandante per un sesaspara a la fini de Ramadan "e continuante".
Ambos la ambasadores filastini e israeli a la NU ia critica la declara, ma per razonas diferente.
La fini de semana ia es puntuada par sesasparas corta ofreda par ambos lados, ma la operas militar israeli e la xutas de rocetos par Hamas ia continua.
Plu ca 1030 filastinis ia mori, de cual la plu ia es nonmilitar, e 45 israelis ia es matada, de cual 43 ia es soldatos. Un tai en Israel ia mori ance.
A soldi, la ministreria de sania de Gaza ia redui la cuantia declarada de mores filastini par 30, pos cuando alga relatadas ia retrova membros de sua familias.
Oji, la militares de israel ia reporta un ataca nova par roceto en la matina, disente ce lo ia colpa un area de Israel sin construidas.
En la note, la batalia en la Banda de Gaza ia pausa, e la plu de la abitores ia bonveni la reposa pos tre semanas de gera.
Ma con tan multe moris e tan multe destrui, Gaza ave poca per selebra a la festa de Eid a fini de Ramadan.
@T La NU dise ce la Vatican debe desemplea maltratores de enfantes
@L aora_oji/2014/la_nu_dise_ce_la_vatican_debe_desemplea_maltratores_de_enfantes
====== La NU dise ce la Vatican debe desemplea maltratores de enfantes ======
6 febrero 2014
La Nasiones Unida ia dise ce la Vatican debe "desemplea direta" tota eglesores ci es conoseda o suspetada como maltratores de enfantes.
La organiza gardante per diretos de enfante ia denunsia la Vatican per sua politica cual permete ce pretes maltrata sesal miles de enfantes.
En un reporta, lo ia critica ance la disposa de la Vatican a omosesalia, contraconsepi, e aborta.
La Vatican ia responde par dise ce lo va studia la reporta, ma lo ia acusa ance sua autores de interfere.
@T La NU invita Iran a discutes de pas suri
@L aora_oji/2014/la_nu_invita_iran_a_discutes_de_pas_suri
====== La NU invita Iran a discutes de pas suri ======
20 janero 2014
Ban Ki-moon, la gidor de la Nasiones Unida, ia invita Iran a partisipa en la discutes de pas suri en Suiz en esta semana. Iran ia aseta.
Ban ia dise ce on ia serti el ce la pais va fa un rol positiva en organiza un governa tempora.
Ma la grupo xef oposante de Suria ia dise ce lo va retira se de la negosias, estra si on cansela la ofre a Iran.
La SUA ia dise ce la ofre debe depende de suporta par Iran per la acorda de 2012 sur la muta de Suria.
@T La NU recomenda la libri de prisonidas political en Sudan Sude
@L aora_oji/2014/la_nu_recomenda_la_libri_de_prisonidas_political_en_sudan_sude
====== La NU recomenda la libri de prisonidas political en Sudan Sude ======
12 janero 2014
La Consilio de Securia de la Nasiones Unida ia recomenda forte ce Salva Kiir, la presidente de Sudan Sude, libri alga prisonidas political, per aida reali un fini de la batalias ala.
Riek Machar, la gidor de la rebelores, desira la libri de 11 persones ante cuando el va acorda un pas.
Lo pare ce la fortes de Machar es en un situa nonvantajosa pos sua perde de la vila Bentiu a fortes de la governa en venerdi.
La governa dise ce lo prepara miles de soldatos per recatura Bor, la ultima de la vilas major cual la fortes de Machar controla.
@T La NU recomenda no paia rescatas a teroristes
@L aora_oji/2014/la_nu_recomenda_no_paia_rescatas_a_teroristes
====== La NU recomenda no paia rescatas a teroristes ======
28 janero 2014
La Consilia de Securia de la Nasiones Unida ia aproba un deside cual recomenda ce paises sesa paia rescatas a grupos teroriste.
On intende ce la deside va presa governas.
La ambasador brites de la NU ia dise ce grupos liada a al-Qaidah ia gania $105 milion, cisa plu, par rescata ostajas en tre anios e un dui.
La deside no introdui obligas legal nova, car, su un acorda adotada en 2001, paises debe ja no paia rescatas per persones furada.
@T La NU recomenda plu labora per combate la crese ce CO2
@L aora_oji/2014/la_nu_recomenda_plu_labora_per_combate_la_crese_ce_co2
====== La NU recomenda plu labora per combate la crese ce CO2 ======
17 janero 2014
Un reporta esposada de la Nasiones Unida averti ce la cuantia de gases invernerial crese rapida, e ce laboras multe plu grande es nesesada tra la mundo per combate la problem.
La reporta es scriveda par la Comite Intergovernal sur Cambia de Clima. Lo dise ce on va nesesa un tecnolojia de custa estrema si la situa presente continua.
Lo dise ce la cuantia de diosido de carbono ia crese promedia par 2,2% per anio entre 2000 e 2010. Acel proportio es cuasi la duple de la corespondente entre 1970 e 2000.
On labora ancora sur la reporta, cual va es vera publicida en april.
@T La NU suplica mone per combate Ebola
@L aora_oji/2014/la_nu_suplica_mone_per_combate_ebola
====== La NU suplica mone per combate Ebola ======
17 otobre 2014
Ban Ki-moon ia inisia un suplica nova per mone per aida combate la virus Ebola, car un otra colie de reservas no ia ateni sua gol.
La secretor jeneral de la NU ia dise ce un reserva fidusial cual el ia inisia en setembre ia reseta sola $100 mil asta aora.
Un coro cresente de gidores mundal critica aora la reata global per combate la virus. La maladia ia mata ja 4500 persones, xef en Liberia, Gine, e Siera Leon.
Donores ia furni cuasi $400 milion direta a otra departes de la NU e otra organizas de aida, ma la fidusial, intendeda per servi como un reserva de spende variosa, ia reseta prometes de sola $20 milion.
De acel paises cual ia promete mone a lo, sola Colombia ia paia, donante $100 mil.
Ban ia dise ce la momento es aora bon ce la paises "ci ave vera la capasia" ta furni suporta finansial e lojistical.
Comentas simil ia veni en dias resente ance de Barack Obama, la presidente de la SUA, de David Cameron, la ministro xef de la Rena Unida, e de Jim Yong Kim, la presidente de la Banco Mundal.
Kofi Annan, la secretor jeneral presedente de la NU ia descrive se como "amarga deludeda" par la responde de la comunia internasional.
"Si la crise ia colpa alga otra area, probable on ia ta maneja lo en modo multe diferente," el ia dise. "Cuando on regarda la evolui de la crise, la comunia internasional ia velia vera cuando la maladia ia ateni America e Europa."
La Organiza de Sania Mundal ia dise ce lo aselera sua laboras per preveni la estende de Ebola ultra la tre paises la plu colpada.
On foca la aida a 15 paises african, e spesial a la cuatro cual borda direta la areas afetada -- Costa Ivor, Gine-Bisau, Mali, e Senegal.
Entretempo, Obama ia aproba la envia de soldatos reservada SUA a Africa ueste si nesesada. Los ta junta se a la 4000 soldatos SUA ja enviada a la area.
Sua conselores major sur sania ia es sever criticada pos la infeta de du ospitalores en Texas par un pasiente ci ia mori con la virus a pos.
On crede aora ce un de la ospitalores ia es cisa malada e ja comunicante la maladia tra cuatro dias, en cual el ia vola en du aviones, ante deveni diagnoseda.
@T La NU va nesesa envia 10 000 soldatos a la RAS
@L aora_oji/2014/la_nu_va_nesesa_envia_10_000_soldatos_a_la_ras
====== La NU va nesesa envia 10 000 soldatos a la RAS ======
29 janero 2014
La NU crede ce on va nesesa envia 10 000 soldatos, cisa plu, per fini la turbas en la Republica de Africa Sentral.
Gérard Araud, un ambasador franses, ia descrive la situa en la pais como "multe multe grave".
La Consilia de Securia ia aproba ja un deside cual permete la usa de forsa par soldatos european en la RAS.
Sirca milion persones -- 20% de la popla -- ia fuji de sua casas en menses de violentia relijiosa.
@T La NU vole punis per crimines sistemosa de Corea Norde
@L aora_oji/2014/la_nu_vole_punis_per_crimines_sistemosa_de_corea_norde
====== La NU vole punis per crimines sistemosa de Corea Norde ======
17 febrero 2014
La Nasiones Unida es a punto de publici un investiga de un anio sur maltratas de diretos en Corea Norde. On previde ce lo va recomenda punis per violes sistemosa par acel stato.
Un comite de espertas, con autoria de la Consilio de Diretos Umana de la NU, ia dise ce coreanes norde ia sufri "cruelias nonespresable".
La comite ia oia atestas de tortura, sclavi, viole sesal, represa political sever, e otra crimines.
On previde un recomenda de investiga par un corte o judores internasional.
@T La obesia cuatrupli en la mundo developante
@L aora_oji/2014/la_obesia_cuatrupli_en_la_mundo_developante
====== La obesia cuatrupli en la mundo developante ======
3 janero 2014
En la mundo developante, la cuantia de adultes obesa o tro pesosa ia cuatrupli cuasi a sirca mil milion de pos 1980.
Tra la mundo, un person en cada truple es aora tro pesos, e risca sufri atacas de cor, atacas serebral, e diabete.
Global, la cuantia persental de adultes obesa o tro pesosa -- per dise: los ci ave un indise de masa corpal cual es min ca 25 -- ia grandi de 23% a 34% entre 1980 e 2008.
La majoria de esta aumenta ia aveni en la mundo developante, spesial en paises do revenus deveni plu grande, como Egipte e Mexico.
On dise ce esta es causada par cambias de dieta. On come min granes e plu gras, zucar, olio, e produidas animal.
904 milion persones en paises developante es aora obesa o tro pesosa. En 1980, la cuantia ia es 250 milion. Ma en la mesma periodo, la popla de la mundo ia dupli cuasi.
@T La ofisias de Yanukovych es nongardada
@L aora_oji/2014/la_ofisias_de_yanukovych_es_nongardada
====== La ofisias de Yanukovych es nongardada ======
22 febrero 2014
La ofisias en Kiev de Viktor Yanukovych, la presidente ucrainsce, es aora nongardada.
Lo pare ce protestores oposante controla intera la distrito de governa.
La gidores oposante dise ce Yanukovych, de ci on no sabe sua loca presente, debe resinia sin pospone.
Los esije un vota ante 25 maio -- no la fini de desembre, como projetada en la acorda de pas de venerdi.
@T La Olimpiales abri en Sochi
@L aora_oji/2014/la_olimpiales_abri_en_sochi
====== La Olimpiales abri en Sochi ======
8 febrero 2014
La Juas Olimpial 22 de Inverno ia abri con un spetaculo grande en la site Sochi en Rusia.
Atletas de 87 nasiones ia parada ante 40 000 persones en la Stadion Fisht, ante cuando presidente Vladimir Putin ia declara ce la Juas es abrida.
La flama olimpial ia es ensendeda par Vladislav Tretiak e Irina Rodnina, resetores de medalias de oro a tre veses pasada. Focos de arte ia lumina la sielo de note.
La Juas en Sochi es la Olimpiales la plu custosa en istoria.
@T La Olimpiales Invernal clui con un broma
@L aora_oji/2014/la_olimpiales_invernal_clui_con_un_broma
====== La Olimpiales Invernal clui con un broma ======
25 febrero 2014
La Juas Olimpiales de Sochi ia clui con un burla par Rusia a se mesma.
A la rituo abrinte, un fali tecnical ia causa ce un de la anelos olimpial en un efeto spesial ia refusa abri.
Ma, a la rituo cluinte, sentos de dansores ia formi la anelos e, inisial, la anelo sinco ia fali abri.
La umor ia es un surprende: a la rituo abrinte, la televisa rusce ia atenta asconde la problem par difusa imajes ja rejistrada en un presenta de eserse.
@T La om la plu vea de Tokyo ia mori a desenios ante aora
@L aora_oji/2014/la_om_la_plu_vea_de_tokyo_ia_mori_a_desenios_ante_aora
====== La om la plu vea de Tokyo ia mori a desenios ante aora ======
6 junio 2014
On ia crede ce Sogen Kato es la om la plu vea en Tokyo, ma cuando ofisiores ia vade per loda el a sua aniversario 111, los ia descovre sola restas sceletal e momida en sua leto.
Autoriosas en Japan dise ce cisa Kato ia mori a 30 anios ante aora.
La ofisiores ia deveni suspetosa cuando los ia visita la casa de Kato, ma sua neta ia informa los ce la om vea "desira vide nun". Los ia demanda la aida de la polisia, ci ia entra a la casa par forsa en mercurdi.
La polisia ia descovre un corpo momida, sur ci los crede ce el es Kato, reposante en leto, vestida en un pijama, su un covreleto.
Aora, la polisia investiga la familia sur alegas de froda.
Sua relatadas ia dise a la polisia ce Kato "ia restrinje se a sua sala a plu ca 30 anios ante aora, e ia deveni un buda vivente". An tal, la familia ia reseta 9,5 milion ienes ($109 mil) como pension de vidua tra la conta de banco de Kato, pos la mori de sua sposa a ses anios ante aora. Alga de la mone ia es resente retirada.
La compania de pension no ia susede contata Kato tra un tempo longa.
@T La OMS averti sur un tsunami futur de canser
@L aora_oji/2014/la_oms_averti_sur_un_tsunami_futur_de_canser
====== La OMS averti sur un tsunami futur de canser ======
4 febrero 2014
Siensistes de la Organiza Mundal de Sania dise ce la mundo fronti un "tsunami" de canser, e ce on nesesa considera restrinjes sur alcol e zucar.
Lo predise ce la cuantia de casos de canser va ateni 24 milion per anio ante 2035, ma ce un dui va pote es prevenida.
La organiza ia dise ce on nesesa aora consentra sur preveni de canser par trata fumi, obesia, e bevi.
La Reserva Mundal per Rexerca sur Canser ia dise ce la nivel de naivia sur la rol de dieta en canser es "alarmante".
@T La oposante ucrainsce es setica sur discutes
@L aora_oji/2014/la_oposante_ucrainsce_es_setica_sur_discutes
====== La oposante ucrainsce es setica sur discutes ======
24 janero 2014
Protestores en Ucraina ia dise ce los no crede ce discutes entre un gidor oposante e presidente Viktor Yanukovych pote ateni un progresa.
Alga en la capital, Kiev, ia cria "Vergonia!" e ia sibila en cuando Oleg Tyagnybok ia informa la folas ce la discutes va redui la versa de sangue.
On reporta ce otras ia ensende numaticos prosima a paradores de la oposante.
Un otra gidor oposante, Vitaly Klitschko, ia dise ce la presidente ia fa no sedes en la discutes.
@T La oposante ucrainse rejeta un ofre de Yanukovych
@L aora_oji/2014/la_oposante_ucrainse_rejeta_un_ofre_de_yanukovych
====== La oposante ucrainse rejeta un ofre de Yanukovych ======
26 janero 2014
En Ucraina, Arseniy Yatsenyuk, la gidor oposante, ia dise ce protestas va continua. El ia rejeta un ofre par presidente Viktor Yanukovych de nomi el como ministro xef de la pais.
Yatsenyuk ia dise ce la oposante es jeneral preparada de aseta un gidor nova, ma ce alga esijes importante debe es sasiada a ante, incluinte elejes nova.
Scaramuxas ia continua tra la note. En Kiev, ativistes ia ataca un construida de polisiores.
En la sentro de la site, per selebra sua sposi nova, un duple ia trepa a la culmina de un parador de protesta.
@T La paises G20 proposa un crese economial de 2%
@L aora_oji/2014/la_paises_g20_proposa_un_crese_economial_de_2
====== La paises G20 proposa un crese economial de 2% ======
24 febrero 2014
Gidores finansial de la 20 economias la plu grande ia proposa la gol de ajunta $2 milion milion a sua esflues en la sinco anios veninte.
En acel periodo, los vole aumenta la produi interna bruta de la paises G20 par 2% plu ca la nivel aora prevideda.
Los espera ce la cambia de politica va crea miliones de empleas nova.
La gol ia es anunsiada a un consenta de la Grupo de 20 en Sydney. La encontra xef va aveni en Brisbane en novembre.
@T La palasio presidental en Mogadishu es atacada
@L aora_oji/2014/la_palasio_presidental_en_mogadishu_es_atacada
====== La palasio presidental en Mogadishu es atacada ======
22 febrero 2014
Un bomba enorme de auto ia crea un buco en la mur de la palasio de la presidente de Somalia. Un batalia ferose de fusiles ia segue a interna.
A la min du ofisiores senior e nove atacores es mor, ma la ministro de securia ia dise ce la situa es "controlada".
La presidente, Hassan Sheikh Mohamud, ia informa la ambasador de la Nasiones Unida ce el no ia es ferida.
La grupo al-Shabab, liada a al-Qaidah, ia dise ce lo ia fa la ataca.
@T La Pape crea un departe nova per supravide finansia
@L aora_oji/2014/la_pape_crea_un_departe_nova_per_supravide_finansia
====== La Pape crea un departe nova per supravide finansia ======
25 febrero 2014
Pape Francisco ia crea un departe en la Vatican per supravide la finansia, pos scandales a la instituida.
La ministreria nova va studia "la problemes organizal e economial de la Seja Santa".
Plu, un esaminor va oserva la ativia de la departe.
En janero, un eglesor major italian ia es acusada de blanci miliones de mone tra la banco de Vatican.
@T La pape denunsia la aborta como "xocante"
@L aora_oji/2014/la_pape_denunsia_la_aborta_como_xocante
====== La pape denunsia la aborta como "xocante" ======
14 janero 2014
Pape Fransisco ia fa sua denunsia la plu forte asta aora sur aborta. El ia nomi lo un sintom "xocante" de un "cultur desprendente" cual valua tro poca la vive umana.
El ia dise ce pensa sur abortas temprana de ensintia es "asustante".
De pos sua eleje en marto, la pape no ia condena tan sever la aborta como sua presedores.
El ia fa sua comentas en sua parla anial sur la "State de la Mundo" a diplomatas asosiada con la Site Vatican.
@T La pape onora martires catolica de Corea Sude
@L aora_oji/2014/la_pape_onora_martires_catolica_de_corea_sude
====== La pape onora martires catolica de Corea Sude ======
16 agosto 2014
En Seoul, Pape Fransisco ia fa un misa grande su sielo per beatifia 124 de la catolicas prima de Corea Sude. Un tal declara es un paso nesesada ante la santi completa de la person.
El ia loda la coreanes ci ia mori per sua crede en la sentenios 18 e 19. Sentos de miles de persones ia es presente a la rituo, cual ia aveni en la plaza do, istorial, on ia esibi catolicas nonrepentinte ante mata publica los.
La catolicas corean prima ia es unica, car los no ia es convertida par misionores veninte a Corea. En loca, los mesma ia aprende sur catolicisme e ia retrae libros a sua pais per atenta estende la relijio.
La rituo ia ocupa la dia tre de la visita de la pape a Corea Sude, como un parte de sua viaja prima a Asia pos emprende la posto en marto 2013.
La pape ia encontra survivores de la desastre de la naveta Sewol, e ia fa sua misa prima publica en la area en venerdi, en un stadion de futbal.
El ia averti catolicas sur "un canser de despera" en sosias material oseseda, disente ce materialisme estende como un deserto spirital tra la mundo rica. El ia recomenda ance ce coreanes sude prea per un uni con Corea Norde.
La pape spende sinco dias en Corea Sude, do la Eglesa Catolica crese. Lo ave aora pico plu ca 5,4 milion membros -- plu ca 10% de la popla.
En via a ala, el ia telegrafi sua bondises a la governa de Xina, como el fa tradisional sempre cuando el vola supra un pais. Ma la governa no ia reseta la mesaje. (On ia envia denova lo de la ambasada italian en Beijing, a pos.)
Esta ia es la ves prima cuando Xina ia permete la usa de sua spasio airal a un pape. La Vatican e Xina ia ave no relatas formal pos la comensa de la rena de la partito comuniste en 1949.
@T La pape surprende monces espaniol par un telefoni
@L aora_oji/2014/la_pape_surprende_monces_espaniol_par_un_telefoni
====== La pape surprende monces espaniol par un telefoni ======
5 janero 2014
Monces fema en un monceria en Espania sude ia es surprendeda par un mesaje lasada par Pape Fransisco a sua respondador de telefon en 31 desembre.
La pape ia es arcibispo de Buenos Aires, e ia conose alga de la monces, car los veni ance de Arjentina.
La monces ia es preante cuando la pape ia telefoni.
El la lasa esta mesaje: "Cual ocupa la monces si los no pote responde? Pape Fransisco parla. Me ia vole dise alo a vos a la fini de la anio. Me va vide esce me pote telefoni a vos denova plu tarda. Ta ce Dio bondise vos."
Pos emprende sua posto en la anio pasada, Pape Fransisco ia adota un disposa min formal ca sua presedor, asentuante sua reputa de simplia e umilia.
@T La Pape va institui 19 cardinales nova
@L aora_oji/2014/la_pape_va_institui_19_cardinales_nova
====== La Pape va institui 19 cardinales nova ======
13 janero 2014
Pape Fransisco va nomi 19 cardinales nova en la mense veninte. Los va inclui eglesores de Aiti e Burcina Faso, refletante sua promete a la paises povre.
Cardinales porta xapos e robas roja. Esta la pape, los es la eglesores la plu importante en la Eglesa Catolica de Roma.
Des-ses de la nomidas ave min ca 80 anios, donce los va pote entra a un conclave per eleje la pape seguente.
La cardinales nova va es formal instituida a un rituo en 22 febrero.
@T La Pape visita locas santa en Ieruxalim
@L aora_oji/2014/la_pape_visita_locas_santa_en_ieruxalim
====== La Pape visita locas santa en Ieruxalim ======
27 maio 2014
En la dia final de sua turi de Asia sude-ueste, Pape Fransisco ia visita la locas santa la plu importante per muslimes e iudis en la Site Vea de Ieruxalim.
A la compleso de la mascita al-Aqsa, el ia recomenda forte ce persones de tota relijios "labora juntada per justia e pas". A pos, el ia prea a la Mur Ueste, situada direta su la mascita, basinte sua testa en cuando el ia toca la petras.
La pape ia es selebrada par Israel e la filastinis, e el ia invita sua presidentes a la Vatican. Ambos de Shimon Peres de Israel e Mahmoud Abbas de la filastinis ia responde positiva.
Pape Fransisco ia desapone sua sapatos per entra a la Cupola de la Roca, de do la tradision muslim dise ce la Profeta Muhammed ia asende a la sielo. La pape ia pasea alora a la mascita prosima.
Parlante a la Mufti Grande de Ieruxalim, la Pape ia devia de sua comentas preparada per espresa la desira ce cristianes, iudis, e muslimes "ta ama la un la otras como frates e sores".
"Ta ce nos aprende comprende la sufri de otras," el ia dise. "Ta ce nun malusa la nom de Dio en violentia."
El ia lasa ance un prea scriveda en un fesur en la petras antica de la Mur Ueste, ante abrasa du amis prosima de Arjentina (se pais de nase): un imam e un rabi ci ia viaja con el.
A pos, la Pape ia visita un semetero, do el ia pone un garlanda a la tomba de Theodor Herzl, la fundor de sionisme moderna. A la demanda de Benjamin Netanyahu, la ministro xef de Israel, el ia para ance nonprevideda a un monumento per siviles israeli matada en atacas filastini.
El ia partisipa en un rituo seria a Yad Vashem, la loca ofisial nasional de recorda la vitimes iudi de la Olocausto, e ia fa un conversa privata con Presidente Peres, de ci el ia demanda la garantia ce peregrinores va pote asede libre la locas santa de la site.
@T La Parlamento European proposa un lia video con Edward Snowden
@L aora_oji/2014/la_parlamento_european_proposa_un_lia_video_con_edward_snowden
====== La Parlamento European proposa un lia video con Edward Snowden ======
10 janero 2014
Membros de la Parlamento European ia acorda invita Edward Snowden, la denunsior fujinte american, a presenta atestas tra un lia video enlinia a un investiga parlamental sur monitori.
Snowden es en Rusia. El es xercada par la SUA sur sua revelas sur atas monitorinte fada par la Departe de Securia Nasional.
La proposa de la Comite sur Librias de Sitadanes ia es asetada con 36 votas favorente, 2 oposante, e un asteninte.
On ancora no ia deside un data.
@T La parti coletiva de la RAS pote colasa la economia
@L aora_oji/2014/la_parti_coletiva_de_la_ras_pote_colasa_la_economia
====== La parti coletiva de la RAS pote colasa la economia ======
12 febrero 2014
Organizas aidante ia averti ce la parti continuante de muslimes de la Republica de Africa Sentral pote causa un colasa economial desastrosa.
Oxfam e Action Against Hunger (Ata Contra Famia) dise ce min ca des vendores major resta en Bangui, la capital, e ce multe an de los considera parti.
Como resulta, furnis de comedas major pote desapare, e presos pote alti.
La Nasiones Unida estima ce 90% de la popla fa sola un come per dia, on teme ce la situa pote mali.
@T La periodo tempora de refuja rusce fini per Edward Snowden
@L aora_oji/2014/la_periodo_tempora_de_refuja_rusce_fini_per_edward_snowden
====== La periodo tempora de refuja rusce fini per Edward Snowden ======
1 agosto 2014
La permete a Edward Snowden de resta per un anio en Rusia ia fini, con no confirma ce on va estende plu lo. Snowden ia publici la atas de la departe de securia SUA a un anio ante aora.
Sua avocato e portavose, Anatoly Kucherena, ia dise ce el va resta cisa en la pais tra cuando on trata sua demanda per un estende de periodo.
On sabe poca sur la ativia de Snowden en Rusia. Per esemplo, on no sabe do el abita e esce el labora.
An tal, el ia provoca grande la interesa publica en april, cuando el ia apare en un mesaje rejistrada en la consenta anial televisada de Presidente Vladimir Putin. Sua demanda alora ia es esce Rusia spia contra sua sitadanes.
En un intervisa a TV rusce en jovedi, sua avocato ia asentua ce sua cliente ia reseta "un permete tempora per resta" en Rusia, e no "un refuja political".
Snowden ia fuji a Rusia, corta pos revela detalias de un opera internasional par la Ajenteria de Securia Nasional de la SUA cual monitori e escuta telefonis.
Un avocato SUA ci ia consela Snowden ia dise ce probable el va continua resta en Rusia.
A la fini de maio, John Kerry, la ministro SUA de internas, ia recomenda forte ce Snowden reveni a sua propre pais per es legal prosededa.
@T La pesta mata 40 persones sur Madagasicara
@L aora_oji/2014/la_pesta_mata_40_persones_sur_madagasicara
====== La pesta mata 40 persones sur Madagasicara ======
22 novembre 2014
Un aveni de pesta sur la isola Madagasicara, a este de Africa sude-este, ia mata 40 persones e ia infeta sirca 80 otras.
La Organiza Mundal de Sania ia averti sur la periles de "un sperde rapida" de la maladia en la capital, Antananarivo.
La situa es malida par un grado alta de resiste par pulgas contra un insetiside popular.
Usual, umanas developa la forma bubonal de la pesta pos es mordeda par un pulga infetada cual ia es portada par un rodente. Si on diagnose temprana lo, on pote trata la pesta bubonal con antimicrobios.
Ma 2% de la casos en Madagasicara es la forma pulmonal de la maladia, cual es plu perilosa e pote es sperdeda de un person a un otra en tose.
La caso prima conoseda de la aveni ia es un om en la vileta Soamahatamana en la distrito Tsiroanomandidy, a sirca 200 cilometres a ueste de Antananarivo, a la fini de agosto.
On ia reporta du casos confirmada en la capital, de cual un ia mori.
La OMS ia declara: "On ave aora un risca de un sperde rapida de la maladia, par causa de la densia alta de abitores en la site e la debilia de la sistem de aida medical."
Un forte de taxe ia ativi per maneja la pesta.
En la anio pasada, espertas ia averti ce la isola fronti un epidemica si lo no lenti la sperde de la maladia. Lo ia indica ce prisonidas es spesial perilida, car la prisones de Madagasicara es infestada con ratas.
@T La Pilipinas acorda sur pas con rebelores muslim
@L aora_oji/2014/la_pilipinas_acorda_sur_pas_con_rebelores_muslim
====== La Pilipinas acorda sur pas con rebelores muslim ======
26 janero 2014
La Pilipinas ia acorda la parte final de un acorda de pas con rebelores muslim ci batalia en un rebela durante en la sude de la pais.
Lo es la parte cuatro de un projeta de pas con la Fronte Moro de Libri Muslim cual on ia comensa en otobre 2012.
La acorda detalia como la rebelores va sede sua armas en intercambia per autonomia en partes de la sude.
La acorda, realida en Kuala Lumpur, va gida a un trata de pas final e completa.
@T La Pilipinas grasia la mundo per sua aida pos siclon
@L aora_oji/2014/la_pilipinas_grasia_la_mundo_per_sua_aida_pos_siclon
====== La Pilipinas grasia la mundo per sua aida pos siclon ======
8 febrero 2014
La Pilipinas ia lua paneles de poster en alga de la locas major de mundo, per grasia la publica per sua aida pos Siclon Haiyan.
En venerdi, a esata tre menses pos la colpa de la siclon, on ia esibi posteres en Times Square de New York, Piccadilly Circus de London, e ses otra locas.
La siclon ia mata plu ca 6000 persones. 1800 manca ancora.
Plu persones ia perde sua casas par causa de lo ca par la tsunami en la Mar Indian en 2004.
@T La Pilipinas onora la aniversario prima de un siclon ruinante
@L aora_oji/2014/la_pilipinas_onora_la_aniversario_prima_de_un_siclon_ruinante
====== La Pilipinas onora la aniversario prima de un siclon ruinante ======
8 novembre 2014
Miles de persones ia partisipa en un pasea de recorda a la aniversario de Siclon Hai-ian, cual ia ruina partes sentral de la Pilipinas a un anio ante aora.
Folas ia marxa tra la site Tacloban, e claxones e campanas ia sona a la ora esata de la colpa de la tempesta.
On ia fa ance protestas antigovernal sur lo cual alga vide como un reconstrui nonsufisinte rapida. La presidente, Benigno Aquino, ia nega ce la reconstrui es tro lenta.
La siclon, nomida Yolanda en la Pilipinas, ia colpa a 8 novembre 2003, enviante ondas enorme a areas interna e destruinte partes grande de la sentro de la pais.
Plu ca 7000 persones ia es matada en la desastre, e plu ca cuatro milion ia es deslocada. Multe de los abita ancora refujas tempora.
On ia fa rituos de recorda a saturdi a tombas coletiva en Tacloban, do alga miles de la vitimes es enterada.
A leva de sol, miles ia marxa en lus de candelas tra la site, pasante tra areas ruinada par la siclon. Asemblante a la tombas, lamentores ia scrive la nomes de amadas sur cruses blanca, plantada en modo simbolin per representa vitimes nonidentifiada.
La protestores ia arde un pupa de la presidente en la media de Tacloban. On ia acusa Aquino de no reconose ce la nesesa de reconstrui es urjente, en cuando projetas de construi casas nova e de trova tera secur distante de la costa deveni retardada.
Aquino no ia veni a Tacloban per onora la aniversario, ma el la visita ier la provinse Samar Este, colpada par la tempesta.
Tacloban es un fortres de la enemis political de la presidente. La dama prima pasada Imelda Marcos ia nase ala.
@T La piratia maral diminui, spesial en Somalia
@L aora_oji/2014/la_piratia_maral_diminui_spesial_en_somalia
====== La piratia maral diminui, spesial en Somalia ======
16 janero 2014
La piratia maral es a sua nivel la plu basa en ses anios, con 264 atacas rejistrada en 2013.
La cuantia ia diminui par 40% de pos la zenito de piratia somali en 2011.
Sola 15 atacas ia aveni a la costa de Somalia en la anio pasada. La cuantia ia es 75 en 2012, e 237 en 2011.
La piratas es impedida par gardores armada sur barcones, par patrulias de marinas internasional, e par la influe stablinte de la governa somali.
@T La poesiste Juan Gelman mori en Mexico
@L aora_oji/2014/la_poesiste_juan_gelman_mori_en_mexico
====== La poesiste Juan Gelman mori en Mexico ======
15 janero 2014
Juan Gelman, un poesiste arjentina, ia mori a la eda de 83 en Site Mexico.
On regarda el como un de la autores la plu major en espaniol. El ia reseta la Premio Cervantes en 2007.
Gelman ia es un ativiste sinistriste e un gerilia en Arjentina en la desenios de 1960 e 1970.
El ia abita en Mexico tra 20 anios, e ia scrive plu ca 20 libros e colonas durante per jornales dial.
Sua fio e sua fia par sposi ia mori pos cuando la governa militar ia saisi los en la desenio de 1970.
@T La polisia australian investiga un paia a Schapelle Corby per un intervisa
@L aora_oji/2014/la_polisia_australian_investiga_un_paia_a_schapelle_corby_per_un_intervisa
====== La polisia australian investiga un paia a Schapelle Corby per un intervisa ======
19 febrero 2014
La polisia en Australia ia invade la ofisias de un rede de televisa, alegante ce lo intende paia a Schapelle Corby, condenada per contrabanda de drogas, per un intervisa.
Corby ia es prisonida per 20 anios en 2005 per trae mariuana a Bali. On ia libri el su cautia, plu temprana en esta mense.
La invade par la polisia es relatada a la Ata de Revenu de Crimin, cual proibi ce criminales profita de sua crimines.
La rede ia denunsia la atacas, disente ce lo no ia acorda un paia con Corby.
@T La polisia australian libri un om nuda de un lavaveste
@L aora_oji/2014/la_polisia_australian_libri_un_om_nuda_de_un_lavaveste
====== La polisia australian libri un om nuda de un lavaveste ======
6 janero 2014
En Australia, la polisia ia salva un om nuda ci ia deveni trapida en un lavaveste en un jua de asconde.
On reporta ce el ia asconde en la macina per surprende sua acompanior.
Salvores ia spende 20 minutos en desfisa el, usante olio de oliva como lubricante.
On ia clama ance la aida de pompores, paramedicistes, e un ecipo de xerca e salva.
@T La polisia de Albania batalia contra cultivores de canaba
@L aora_oji/2014/la_polisia_de_albania_batalia_contra_cultivores_de_canaba
====== La polisia de Albania batalia contra cultivores de canaba ======
19 junio 2014
La polisia albanian ia saisi plu ca 10 tones de mariuana en un opera major contra cultivores de canaba en Lazarat, un vileta sude. 800 polisiores ia es usada per controla la plu de la vileta ante la fini de la sera de mercurdi.
Un polisior e du siviles ia es ferida en fusilis intercambiada.
Lazarat produi 900 tones de canaba en cada anio, con valua de 4,5 mil milion euros ($6,1 mil milion), egal a cuasi un dui de la produi interna bruta de Albania.
De pos lundi, polisiores ia aseja la vileta, cual es situada a 230 cilometres a sude de la capital, Tirana. Los ia encontra omes forte armada ci ia xuta granadas e morteros par roceto.
On ia vide fuma levante supra la vileta. Alga atestores ia opina ce esta ia es causada par la arde de plantas de mariuana par persones local ante la ariva de la polisia.
La opera continua ancora. La gidor alegada de la grupo ia sede, e des otra membros es ancora encluida en un casa.
Saimir Tahiri, la ministro de internas, ia dise ce la opera va continua asta cuando "cada sentimetre cuadro en Lazarat es controlada par la stato".
La esta opera ia aveni como parte de un campania par la governa sosialiste nova per elimina la comersia de mariuana, en atenta ce Albania deveni un membro de la Uni European.
@T La polisia de Hongkong xerca un depinta valuosa dejetada
@L aora_oji/2014/la_polisia_de_hongkong_xerca_un_depinta_valuosa_dejetada
====== La polisia de Hongkong xerca un depinta valuosa dejetada ======
10 april 2014
La polisia en Hongkong investiga un depinta con valua de $3,7 milion, cual ia desapare de un otel. Reportas sujesta ce on ia dejeta acaso lo.
On crede ce lo es Monte Nevosa, un obra de inca par Cui Ruzhuo, un artiste xines.
La subasteria Poly Auction ia reporta lo como mancante a martedi, pos vende lo a la dia presedente.
Lo es posible ce limpores a la otel Grand Hyatt ia malpersepi la depinta como dejetada. Video de un camera vijilante mostra ce un gardor de securia pedi la depinta pacida a traversa la solo en dirije a un monton de dejetadas.
La polisia dise ce on ia vide ance limpores ci prepara la dejetadas per transporta a via, e ce on ia prende ja los a un dejeteria.
La otel ia anunsia ce lo labora con investigores: "Car la organizores ia lua nos salon per esta subasta, Grand Hyatt Hongkong fa la plu bon cual lo pote per ofre aida a Poly Auction, incluinte permete ce la polisia regarda la videos vijilante a lado de nosa propre ecipo de securia."
Ma la otel ia dise ce la subasteria es encargada per la ojetos cual lo vende.
La polisia ia trova no trasa de la depinta. Lo ia deveni cisa un de la dejetadas la plu valuosa de istoria.
@T La polisia e protestores scaramuxa en Tai
@L aora_oji/2014/la_polisia_e_protestores_scaramuxa_en_tai
====== La polisia e protestores scaramuxa en Tai ======
18 febrero 2014
La polisia tai ia fronti protestores en Bangkok sentral. Alga persones ia es ferida, e un polisior ia es matada.
La protestores ia bloci locas e construidas ofisial, e la polisia ia atenta reprende los.
Plu temprana en martedi, los ia aresta sirca 100 protestores estra un construida de ministreria.
Tai es en un crise political profonda de pos la comensa de protestas contra la governa en novembre.
@T La polisia en Xinjiang mata 13 atacores de sua ofisia
@L aora_oji/2014/la_polisia_en_xinjiang_mata_13_atacores_de_sua_ofisia
====== La polisia en Xinjiang mata 13 atacores de sua ofisia ======
21 junio 2014
En Xinjiang, un provinse ueste de Xina, des-tre atacores ia es matada en un ataca contra un ofisia de polisia. Los ia gida un auto a en la ofisia e ia usa esplodentes a la matina de saturdi.
Tre polisiores ia sufri feris minor, ma no siviles ia es ferida. La polisia ia mata la atacores par fusili.
La autoriosas xines culpa uigures muslim de Xinjiang per un cuantia cresente de atacas en la provinse.
En menses resente, la securia ia es aumentada en la provinse, e a lundi, des-tre persones ala ia es esecutada per lo cual Xina ia descrive como "atacas teroriste".
On ia condena ance tre omes -- sur ci on crede ce los es uigures -- sur un xoca matante de auto en Beijing en la anio pasada.
Sinco persones ia es matada e deses ia es ferida cuando un auto ia entra a un fola en la Plaza Tiananmen en otobre de la anio pasada.
Gidores uighur nega ce los maneja un campania teroriste. Ativistes ia acusa ce Beijing ia esajera la menasa de separadistes uigur per justi restrinjes sever aplicada a la librias relijiosa e cultural de la uigures.
@T La polisia franses esamina la casas de Dieudonné
@L aora_oji/2014/la_polisia_franses_esamina_la_casas_de_dieudonne
====== La polisia franses esamina la casas de Dieudonné ======
29 janero 2014
En Frans, la polisia ia invade casas liada a la comediste controversa Dieudonné M'Bala M'Bala.
Los ia entra subita a alga imobilas poseseda par Dieudonné, e ance a la teatro Main d'Or (Mano de Oro) en Paris, do el ia reali alga de sua presentas.
On suspeta ce el ia fa un declara frodante de bancarotia, ia lava mone, e ia malusa la ativas de un compania.
La governa ia jura ce el va paia ance multas per parla odiosa.
@T La polisia franses interoga Serge Dassault
@L aora_oji/2014/la_polisia_franses_interoga_serge_dassault
====== La polisia franses interoga Serge Dassault ======
19 febrero 2014
Serge Dassault, un bilionor industrialiste e senator franses, ia es tenida per interoga sur alegas ce el ia compra votas en un suburbe de Paris.
La polisia interoga el sur sua ativias en Corbeil-Essonnes, do el ia es maior entre 1995 e 2009.
On ia sutrae sua imunia parlamental a 12 febrero.
Dassault ave 88 anios e posese un compania major cual produi jetos.
@T La polisia investiga un alega ce Justin Bieber ia lansa ovos
@L aora_oji/2014/la_polisia_investiga_un_alega_ce_justin_bieber_ia_lansa_ovos
====== La polisia investiga un alega ce Justin Bieber ia lansa ovos ======
15 janero 2014
La polisia ia esamina la casa de Justin Bieber, un stela canadian de pop, pos alegas ce el ia lansa ovos contra la casa de sua visina.
Ofisiores no ia clari cual atestas los ia prende de la casa, ma los ia aresta un membro de la ecipo de la cantor sur un alega de posese cocaina.
Parente, la ovos ia causa un dana major a la casa visina en la suburbe de Calabasas en Los Angeles.
La polisia ia dise ce Bieber, ci ave 19 anios, "no ia es arestada, ma no ia es desculpada".
@T La polisia italian aresta 90 mafiores
@L aora_oji/2014/la_polisia_italian_aresta_90_mafiores
====== La polisia italian aresta 90 mafiores ======
23 janero 2014
En Italia, la polisia ia fa 90 arestas en un opera major contra un grupo potiosa de mafia.
Los ia saisi propria con valua de multe plu ca 222 milion euros ($300 milion) en atacas ante lus prima a membros de la clan Contini.
Acel clan es un parte de la Camorra, un rede criminal potiosa en la area de Napoli.
On ia aresta persones en Napoli, Roma, e Firenze.
@T La polisia rompe un grupo pedofil de interede
@L aora_oji/2014/la_polisia_rompe_un_grupo_pedofil_de_interede
====== La polisia rompe un grupo pedofil de interede ======
16 janero 2014
On ia rompe un grupo pedofil cual ia usa la interede per difusa direta la maltrata de enfantes pilipina, pos un opera par la polisia en la Rena Unida, Australia, e la SUA.
La Departe Nasional de Crimin de la Rena Unida dise ce 17 briteses ia es arestada en la taxe, cual ia covre 14 paises.
On ia comensa ance tre otra investigas sur omes ci paia per regarda maltratas con camera de ueb. 139 briteses es entre 733 suspetadas.
La Departe dise ce esta es un "menasa emerjinte", spesial en paises developante.
@T La polisia srilanca identifia la atacores de un eglesa
@L aora_oji/2014/la_polisia_srilanca_identifia_la_atacores_de_un_eglesa
====== La polisia srilanca identifia la atacores de un eglesa ======
14 janero 2014
La polisia en Srilanca dise ce los ia identifia e intende aresta 24 persones, incluinte oto monces budiste, sur partisipa en atacas a du eglesas a soldi.
On ia reporta no feridas, ma un prete ia dise ce la atacores ia menasa el con mori.
Videos de la vila sude de Hikkaduwa ia mostra monces lansante petras e brices. Polisiores a la sena ia fali preveni la atacas.
Un politiciste oposante ia recomenda forte ce la governa investiga la atacas.
@T La polisia tai reprende alga locas de protesta
@L aora_oji/2014/la_polisia_tai_reprende_alga_locas_de_protesta
====== La polisia tai reprende alga locas de protesta ======
14 febrero 2014
En Bangkok, on ia envia polisiores per reprende alga locas ocupada par protestores de pos la comensa de sua campania antigovernal en novembre.
La polisia ia entra a un de la stradas xef en la parte reial de la capital, e ia encontra poca resiste.
Ma los ia debe retira de un otra campa de protesta, a un compleso de governa, car violentia ia pare probable.
La protestores, ci desira la resinia de la governa, ia fundi campas a juntas importante de via e a ofisias governal.
@T La preparas per la Olimpiales de Rio no vade bon
@L aora_oji/2014/la_preparas_per_la_olimpiales_de_rio_no_vade_bon
====== La preparas per la Olimpiales de Rio no vade bon ======
30 april 2014
John Coates, la vispresidente de la Comite Internasional Olimpial, ia dise ce la preparas per la juas en Rio en 2016 es la plu males de istoria.
La australian, ci ia aida organiza la Olimpiales de 2000 en Sydney, ia clari ce la CIO ia reata sin presedente par ajunta espertas a la comite local organizante, per serti ce la juas va aveni.
La novas veni en cuando Brasil luta ance per prepara se per la Copa Mundal de futbal, cual va comensa pos no plu ca ses semanas.
Coates ia comenta ce, en sua opina, la situa es plu mal ca en 2004, cuando on ia es ansiosa sur preparas per la juas en Atinai. Ala, la laboras ia es colpada par retardas en construi e en furni de servis, ma on ia susede ultima completi tota locas e infrastrutur a la tempo coreta.
La vispresidente ia dise ce on no ia comensa an construi alga de la locas de sporte en Rio. La infrastrutur esperia retardas major, e la site ave "problemes sosial cual on debe fronti".
El ia ajunta ce la organizores de Rio ave 600 empleadas, la mesma cuantia como London a esta grado de sua preparas per la Olimpiales de 2012. Ma la organizores no ave la esperias nesesada.
Entre la paises de America Sude, Rio va es la ospitor prima de la Olimpiales.
@T La presidente aljeri va presenta denova se per la posto
@L aora_oji/2014/la_presidente_aljeri_va_presenta_denova_se_per_la_posto
====== La presidente aljeri va presenta denova se per la posto ======
23 febrero 2014
La presidente de Aljeria, ci no ia parla publica a la pais en cuasi tre anios, va presenta se como aspiror de un periodo cuatro de presidentia en april.
Abdelaziz Bouteflika ave 76 anios. El ia sufri un ataca serebral en la anio pasada, e criticistes dise ce el es tro malada per governa.
La ministro xef, Abdelmalek Sellal, ia fa la anunsia, declarante ce an si la presidente no ia recovre intera fisical, el posese ancora tota sua capasias inteletal.
Bouteflika ia comensa governa en 1999. El es un de poca veteranes survivente de la gera de autonomia contra Frans.
@T La presidente arjentina parla publica pos sirurjia de serebro
@L aora_oji/2014/la_presidente_arjentina_parla_publica_pos_sirurjia_de_serebro
====== La presidente arjentina parla publica pos sirurjia de serebro ======
23 janero 2014
Cristina Fernandez de Kirchner, la presidente de Arjentina, ia fa sua parla publica prima en ses semanas. Esta fini un silentia longa cual ia leva demandas sur sua sania pos sirurjia de serebro.
Fernandez ia es bonvenida par sentos de suportores a la palasio presidental en Buenos Aires.
En un parla televisada, el ia anunsia un scema de aida jovenes nonempleada. El ia critica la jornalistes arjentina per sua divinas sur sua sania.
On ia opera sur el a 8 otobre per sutrae un coagula de sangue de sua serebro. El ia recomensa labora a 18 novembre.
@T La presidente cazac sujesta renomi sua pais
@L aora_oji/2014/la_presidente_cazac_sujesta_renomi_sua_pais
====== La presidente cazac sujesta renomi sua pais ======
8 febrero 2014
La presidente de Cazacstan ia sujesta, parente, un cambia de la nom de sua pais. El ia dise ce la sufisa -stan descoraji turistes e investores.
Presidente Nursultan Nazarbayev ia sujesta Kazak Eli (cual sinifia "Nasion Cazac") como un alternativa posible.
Parlante a un asembla de inteletosas, el ia dise: "Stranjeres mostra interesa sur Mongol, de cual sua popla es sola du milion persones, e sua nom no ave la sufisa -stan."
En 1993, on ia cambia la nom de la capital, Alma Ata, a Almaty. Pos cuatro plu anios, on ia move la capital a un loca intera diferente, nomida Akmola. E en 1998, on ia cambia la nom de acel site a Astana.
@T La presidente de Burcina Faso va resta per ancora un anio
@L aora_oji/2014/la_presidente_de_burcina_faso_va_resta_per_ancora_un_anio
====== La presidente de Burcina Faso va resta per ancora un anio ======
31 otobre 2014
Pos un dia de protestas violente per esije la resinia de Blaise Compaoré, la presidente de Burcina Faso, el ia dise ce el va resta en potia per un anio su un governa traversante.
El va retira un lege controversa cual ta permete ce el aspira un periodo nova de ofisia a la fini de sua periodo presente en 2015. El governa ja tra 27 anios.
A jovedi, protestores coler ia ensende la parlamento e alga construidas de governa. Los vole ce el resinia direta.
La crea de un governa traversante ia es anunsiada a jovedi par jeneral Honoré Traoré, la xef de la armada, ci ia declara ance la fini de parlamento.
Mohamed Ibn Chambas, la ambasador spesial per Africa ueste de Ban Ki-moon, la xef de la Nasiones Unida, va vade oji a Burcina Faso per atenta lejeri la crise.
En un mesaje difusada par TV local pos la declara par la jeneral, Compaoré ia bonveni la "atas patriota" de la militaria.
A la min un person ia es matada en la protestas en la capital, Ouagadougou. La gidor xef oposante, Zéphirin Diabré, ia dise ce deses de protestores ia es matada tra la pais par la fortes de securia en "un aumenta barbar de violentia".
La militaria ia xuta baletas cargada per atenta sperde la protestores ci ia ocupa la parlamento. Protestores ia avansa ance contra la palasio presidental, e un elicotor governal ia xuta gas lacrimojen a los.
Deses de soldatos ia junta se a la protesta en la plaza xef, incluinte un ministro pasada de defende, jeneral Kouamé Lougué. La protestores ia esije ce on instala el como presidente.
Los ia arde ance la ofisia de site, la casas de parlamentores, e un otel superior.
Protestas simil ia colpa ance Bobo-Dioulasso, un site sude-ueste, e otra vilas. La televisa nasional ia sesa difusa cuando la protestores ia saca sua construida.
Compaoré, un soldato pasada, ia saisi la potia par colpa de stato en 1987, e ia gania cuatro elejes disputada a pos. El ia fronti avenis de violentia a alga veses, incluinte un rebela militar en 2011.
El ia susede sempre resta en potia par un combina de tecnicas pasinte e la usa moderada de fortia. Ma la tensas presente crese ja tra alga menses, e lo no es clar esce el pote survive a esta ves.
Compaoré es un aliada forte de la SUA e Frans, cual usa Burcina Faso como un base per operas militar contra islamistes combatosa en la area Sahel.
Ma la pais es entre la plu povres de Africa ueste, e lo es sin defende contra cambias en la custas mundal de coton, la funda economial de multe burcinabes.
Plu tarda en la dia: Compaoré ia resinia como presidente, recomendante un vota en la 90 dias veninte. Traoré ia emprende tempora la governa.
@T La presidente de Colombia espera la pas
@L aora_oji/2014/la_presidente_de_colombia_espera_la_pas
====== La presidente de Colombia espera la pas ======
25 janero 2014
Juan Manuel Santos, la presidente de Colombia, ia dise ce el espera suscrive un acorda de pas con rebelores sinistriste en esta anio, per fini un disputa de 50 anios.
El ia dise ce on ia debili la rebelores de FARC, e ce la securia en Colombia ia boni.
Ma el ia defende sua oposa a un sesaspara, clarinte ce, per fini rapida la gera, on va nesesa no sola discutes de pas ma ance la prema militar.
La du lados negosia ja en Cuba de pos novembre 2012.
@T La presidente de Jazair ia es ospitalida en Frans
@L aora_oji/2014/la_presidente_de_jazair_ia_es_ospitalida_en_frans
====== La presidente de Jazair ia es ospitalida en Frans ======
16 novembre 2014
La presidente jazairi, Abdelaziz Bouteflika, ia revade par avion a Jazair pos spende du dias en un ospital franses.
La gidor vea, ci ia sufri un ataca serebral en 2013, ia es ospitalida en Grenoble a jovedi.
On no sabe ancora la razona de sua ospitali, e la governa jazairi ia fa no comenta sur la tema.
Bouteflika ave 77 anios e ia gida la pais de pos 1999. On ia vide rara el en publica pos sua reeleje a sua periodo cuatro de ofisia en April.
La jornal rejional franses Le Dauphiné libéré [La delfinia librida] ia reporta a venerdi ce Bouteflika ia entra a la departe cardiolojial de un clinica privata en la vila en la sude-este de Frans.
La jornal ia dise ce un nivel intera de la ospital es reservada per crea un loca tan secur como posible.
Bouteflika es un veteran de la gera de autonomia jazairi de Frans, cual ia fini en 1962. On ia eleje el a presidente en 1999, a la fini de un desenio en cual la pais ia esperia un gera interna e sanguosa.
Sua vinse la plu resente en esta anio ia es criticada par la partitos oposante, ci ia dise ce la votas no ia es coreta rejistrada e ce Bouteflika no conveni como aspiror par causa de sua problemes de sania.
Consernas sur sua sania ia comensa en 2005, cuando Bouteflika ia es ospitalida en Paris con un ulsera de stomaco.
@T La presidente de la RAS declara gera contra militias cristian
@L aora_oji/2014/la_presidente_de_la_ras_declara_gera_contra_militias_cristian
====== La presidente de la RAS declara gera contra militias cristian ======
12 febrero 2014
Catherine Samba-Panza, la presidente de la Republica de Africa Sentral, ia dise ce el va "vade a gera" contra militias cristian ci mata muslimes.
El ia dise ce la militias ia "perde sua senti de mision" e ia deveni "los ci mata, ci saca, ci es violente".
La militias declara ce los venja atas cruel par muslimes en la anio pasada.
Deses de miles de muslimes ia fuji a Camerun e Txad, e multe plu abita campas en la RAS.
@T La presidente de Ruanda averti tradores
@L aora_oji/2014/la_presidente_de_ruanda_averti_tradores
====== La presidente de Ruanda averti tradores ======
14 janero 2014
Paul Kagame, la presidente de Ruanda, ia avisa ce los ci tradi la pais va fronti "resultas".
El ia parla a min ca du semanas pos la descovre en Sudafrica de la corpo de Patrick Karegeya, la xef pasada de securia esterna.
Lo ia pare ce Karegeya ia es asasinada. El ia disputa con la gidores de Ruanda e ia fundi un partito oposante.
Sua aliadas ia dise ce ajentes de la governa ia mata el, ma esta ia es negada par la ambasador de Sudafrica.
@T La presidente de Sudan Sude denunsia la NU
@L aora_oji/2014/la_presidente_de_sudan_sude_denunsia_la_nu
====== La presidente de Sudan Sude denunsia la NU ======
22 janero 2014
Salva Kiir, la presidente de Sudan Sude, ia acusa ce la mision de pas par la Nasiones Unida condui como un "governa paralel" en sua pais.
El ia fa sua comentas pos alegas par sua governa ce la NU asconde rebelores e fusiles en sua bases. La NU nega esta.
Plu ca 70 000 siviles xerca refuja en bases de la NU tra Sudan Sude.
La NU dise ce ambos la rebelores e la soldatos de la governa ia fa atas cruel en un de la paises la plu povre de mundo.
@T La presidente de Uganda bloci un lege contra ges
@L aora_oji/2014/la_presidente_de_uganda_bloci_un_lege_contra_ges
====== La presidente de Uganda bloci un lege contra ges ======
17 janero 2014
Yoweri Museveni, la presidente de Uganda, ia refusa aproba un lege projetada e controversa cual ta severi la punis per omosesales.
El ia scrive a la presidente de la parlamento, criticante ce acel ia aseta lo en desembre sin cuorum.
En sua letera, el ia dise ce omosesales es "nonormal" o tal per "razonas finansial", e ce on pote "salva" los.
La lege projetada inclui prisoni tra vive per atas omosesal. La fali de reporta persones ge, e an cualce refere a omosesalia sin condena lo, ta deveni ance crimines.
@T La presidente de Xina visita Barat
@L aora_oji/2014/la_presidente_de_xina_visita_barat
====== La presidente de Xina visita Barat ======
17 setembre 2014
Xi Jinping, la presidente de Xina, fa sua visita ofisial prima a Barat, con foca a boni lias comersial e a solve un disputa de desenios sur areas fronteral.
Xina es un de la asosiores comersial xef de Barat, e la du paises es la plu poplida de mundo.
Los desacorda sur alga fronteras en Himalaia, e ia fa un gera corta sur esta en 1962. La tensa sur la tema es ancora ensendeda de tempo a tempo.
Beijing e Delhi ia fa multe discutes sur la fronteras, ma tota ia fali asta aora.
La relatas entre la du paises ia es aumentada par Narendra Modi, la ministro xef nova de Barat, ci ia promete reforti la economia e profondi lias con Xina en sua periodo de posto.
En julio, la du gidores ia consenta a lado de un confere alta en Brasil, e ia asentua la nesesa de boni biladal la relatas.
Ante la visita de Xi, Modi ia tuita: "Cimica unica entre Barat e Xina pote scrive istoria e crea un doman plu bon per la umania intera."
Xi va comensa sua visita de tre dias en Gujarat, un stato ueste, do el va vade a un bonveni formal e un program cultural.
Modi ia es la ministro xef de Gujarat tra plu ca un desenio, ante gida sua partito a un vinse forte en la vota de maio.
An si la comersia entre Barat e Xina ia prosimi a $70 mil milion, la salda negativa de Barat ia crese de $1 mil milion en 2001--2002 a plu ca $40 mil milion, seguente declaras ofisial barati.
On reporta ce, en la visita de Xi, Xina pote promete miles de miliones de dolares a projetas fabrical e infrastrutural en Barat, incluinte a suporta la ferovias vea.
Plu temprana en esta mense, on ia vide un viaja de sinco dias par Modi a Japan como un atenta par Barat e Japan a ecuilibra la pesa de Xina en Asia.
@T La presidente e protestores ucrainsce acorda un vota temprana
@L aora_oji/2014/la_presidente_e_protestores_ucrainsce_acorda_un_vota_temprana
====== La presidente e protestores ucrainsce acorda un vota temprana ======
21 febrero 2014
Viktor Yanukovych, la presidente ucrainsce, e protestores oposante ia acorda un vota temprana de presidentia, ante la fini de la anio.
Esta un parte de un acorda per fini la crise political en la pais.
On no ia publici ja la detalias, ma Yanukovych ia refere a un governa de unia nasional e a cambias constitual per redui la potia presidental.
La compromete ia es atenida pos oras de negosias, arbitrada par tre ministros european de esternas.
La ministros deutx e polsce ia encontra protestores en la Plaza de Autonomia de Kiev, ante anunsia ce sua gidores suporta la acorda.
@T La presidente muslim de la RAS resinia
@L aora_oji/2014/la_presidente_muslim_de_la_ras_resinia
====== La presidente muslim de la RAS resinia ======
11 janero 2014
Michel Djotodia, la presidente tempora de la Republica de Africa Sentral ia resinia a un confere alta con intende de fini la violentia cual ia saisi la pais.
La ministro xef, Nicolas Tiengaye, ia resinia ance a la confere en Txad.
Miles de persones ia sorti sur la stradas en la capital, Bangui. La plu de los ia bonveni joiosa la anunsia.
Djotodia ia es la gidor muslim prima de la RAS. El ia saisi la potia en la anio pasada. De alora, 20% de la popla ia fuji de la batalias entre gerores cristian e muslim.
@T La presidente tempora de Ucraina averti sur separadisme
@L aora_oji/2014/la_presidente_tempora_de_ucraina_averti_sur_separadisme
====== La presidente tempora de Ucraina averti sur separadisme ======
26 febrero 2014
Olexander Turchynov, la presidente tempora de Ucraina ia averti sur la periles de separadisme pos la despone de Viktor Yanukovych.
El ia fa sua comentas en cuando areas ucrainsce de lingua rusce continua sua oposa de la governa nova en Kiev.
On ia pospone la formi de un governa unida asta jovedi.
Entretempo, on reporta ce Andriy Kliuyev, un de la aidores pasada de Yanukovych, ia es ferida par un fusilor.
@T La presidente ucrainsce ofre la posto de ministro xef a un oposor
@L aora_oji/2014/la_presidente_ucrainsce_ofre_la_posto_de_ministro_xef_a_un_oposor
====== La presidente ucrainsce ofre la posto de ministro xef a un oposor ======
26 janero 2014
Viktor Yanukovych, la presidente de Ucraina, ia ofre la posto de ministro xef a Arseniy Yatsenyuk, un gidor oposante.
Yatsenyuk es un aliada de Yulia Tymoshenko, la ministro xef pasada prisonida.
La ofre ia segue discutes en saturdi con gidores oposante, en un atenta nova de fini la turba cresente cual ia estende tra la pais.
Plu temprana, la ministro de relatas interna ia dise ce laboras per solve pasosa la crise es futil.
@T La profita de cuatri de Samsung diminui
@L aora_oji/2014/la_profita_de_cuatri_de_samsung_diminui
====== La profita de cuatri de Samsung diminui ======
24 janero 2014
Samsung Electronics, la fabricor la plu grande de mundo de telefonetas e televisadores, ia reporta un redui de profita de cuatri, a la ves prima en du anios.
Sua profita neta en la periodo de otobre a desembre ia es 7300 mil milion uones ($6800 milion). Acel es min ca la cuatri presedente par 11%.
La revenu de la compania ia es afetada par un diminui de profitas par 18% entre la du cuatris en sua departe de telefoneta.
Un paia spesial e flutuas de valua de mone ia dana ance sua ganias.
@T La proibi sur Dieudonné es canselada e denova restorada
@L aora_oji/2014/la_proibi_sur_dieudonne_es_canselada_e_denova_restorada
====== La proibi sur Dieudonné es canselada e denova restorada ======
10 janero 2014
La corte suprema en Frans ia repone un proibi a un presenta par la comediste controversa Dieudonné, cuando lo ia es a punto de comensa.
Manuel Valls, la ministro de relatas interna, ia apela a la Consela de Stato per un interveni pos cuando un judor en la site Nantes ia cansela la proibi.
La comediste ia ariva ja a la teatro en Nantes, do plu ca 5000 persones ia espeta regarda la presenta.
Polisiores ia es enviada a la teatro per proteje.
@T La proportio de moris de laborores indian en Catar es normal
@L aora_oji/2014/la_proportio_de_moris_de_laborores_indian_en_catar_es_normal
====== La proportio de moris de laborores indian en Catar es normal ======
20 febrero 2014
Ofisiores indian e catari ia insiste ce la proportio de moris entre laborores indian en Catar es normal.
En lundi, la ambasada indian en Doha ia revela ce 455 indianes ia mori en 2012 e 2013, provocante espresas de conserna de organizas de laborores.
Ma un portavose per la ministreria de esternas indian ia dise ce la majoria grande de moris ia ave causas natural.
La amiria ia trova se su presa per boni la state de vive per laborores migrante.
@T La prosede de Mohammed Morsi es denova posponeda
@L aora_oji/2014/la_prosede_de_mohammed_morsi_es_denova_posponeda
====== La prosede de Mohammed Morsi es denova posponeda ======
8 janero 2014
On ia pospone denova la prosede de la Mohammed Morsi, la presidente desponeda de Egipte, car un clima mal ia impedi la enaira de sua elicotor.
El e 14 otra membros de la Fratia Muslim es acusada de provoca la mata de protestores estra la palasio presidental en desembre 2012.
La armada ia despone Morsi en julio 2013, pos protestas contra sua governa. Sua suportores ia fa periodal protestas per demanda ce on repone el.
En venerdi pasada, a la min 11 persones ia mori tra Egipte en combates entre la polisia e protestores per la Fratia Muslim.
@T La re de Tai cansela sua apare publica a sua aniversario
@L aora_oji/2014/la_re_de_tai_cansela_sua_apare_publica_a_sua_aniversario
====== La re de Tai cansela sua apare publica a sua aniversario ======
5 desembre 2014
Bhumibol Adulyadej, la re de Tai, ia cansela un apare publica a sua aniversario 87, seguente conselas medical.
La anunsia aveni entre consernas cresente sur la sania de la re, ci es adorada par tais.
Miles de persones ia veni a la capital, Bangkok, esperante vide el a la Palasio Reial. On ia organiza avenis ance tra la pais intera, cual es ancora militar governada pos cuando la armada ia despone la governa en maio.
En un declara oji publicida, la ofisia de la re ia informa ce dotores ia esamina el e ia "acorda ce el no es en state conveninte per resetas formal, donce los ia recomenda ce el cansela sua ativia reial."
Bhumibol, la monarca la plu durante de mundo, ia es publica videda en novembre. El ia spende la menses pasada en ospital, e on ia opera resente sur el per sutrae sua vesica bilal.
Folas de suportores ia asembla ja estra la ospital, vestida en jala, la color de la monarcia, per envia sua bon desiras.
Un de los ia comenta: "Lo no importa esce el apare publica o no. Me es mera felis ce me es asi per mostra mea fida a el. Me es felis si el es en cualce loca."
En Tai, on senti un ama profonda a la re, ma la pais es ance governada par leges sever cual puni cualce critica de la monarcia con asta 15 anios en prison.
La eritor de Bhumibol es Prinse Vajiralongkorn, ma par causa de la leges, cualce discute de la pasa de rena es un tema estrema delicata, e on no pote reporta multe partes de lo en la pais mesma.
En la tarde de novembre, on ia descovre ce la prinse ia demanda ce la governa sutrae la nom reial donada de la familia de sua sposa. On previde ce esta ia es la paso prima ante divorsa. On ia sabe ja ce la duple no coabita plu.
La comanda par la prinse ia segue la aresta de sete de la relatadas prosima de la prinsesa, en un elimina de ofisiores acusada de froda.
@T La retira de un glasia antartica es aora nonreversable
@L aora_oji/2014/la_retira_de_un_glasia_antartica_es_aora_nonreversable
====== La retira de un glasia antartica es aora nonreversable ======
15 janero 2014
Lo es aora multe probable ce la Glasia de Pine Island, un glasia enorme en Antartica, retira se en un modo autosustante.
Esta es la conclui de tre ecipos ci ia modeli sua condui.
An si la area ta esperia un clima multe plu fria, la retira ta continua. La resulta es ce la glasia va contribui an plu major a la alti global de la nivel de mar.
La glasia covre plu ca 160 000 cilometres cuadrida. Lo drena sirca 20% de tota la jelo cual flue de sur la ueste de Antartica.
@T La risca de leucemia per enfantes no relata plu a linias eletrical
@L aora_oji/2014/la_risca_de_leucemia_per_enfantes_no_relata_plu_a_linias_eletrical
====== La risca de leucemia per enfantes no relata plu a linias eletrical ======
7 febrero 2014
Un studia ia conclui ce enfantes ci abita prosima a linias eletrical airal no es aora plu en risca de developa leucemia.
On ia analise datos sur 16 500 enfantes ci ia developa la maladia en Britan entre 1962 e 2008.
La rexerca ia trova no risca aumentada de leucemia per abitores prosima a linias eletrical en e pos la desenio de 1980. Ma on ia descovre ce un risca plu alta ia esiste vera en la desenios de 1960 e 1970.
La rexercores ia descrive la trovas como "calminte", ma ia dise ce on continua labora per comprende plu bon la motifes istorial.
@T La saco furada de un coror carital es trovada
@L aora_oji/2014/la_saco_furada_de_un_coror_carital_es_trovada
====== La saco furada de un coror carital es trovada ======
2 janero 2014
Un recolior brites de reservas, ci ia es atacada e rubada en fa un core carital en Canada, ia reoteni sua propria.
En marte, Jamie McDonald, ci ave 27 anios, ia comensa core de la costa este de Canada a la costa ueste. La distantia es simil a 200 maratones.
El ia es atacada en la vila Banff, en Alberta, a media de la selebras de la anio nova. La rubor ia fura sua saco, cual conteni no sola mone e cartas de credito, ma ance videos de sua viaja.
McDonald ia usa la redes sosial per demanda ce on redona la saco, e on ia trova lo en un loca prosima a la ataca. Bonvolores ia responde par dona mone a la asosias carital per enfantes cual el suporta.
@T La sania mali de la mexican perdeda a mar
@L aora_oji/2014/la_sania_mali_de_la_mexican_perdeda_a_mar
====== La sania mali de la mexican perdeda a mar ======
7 febrero 2014
La sania de la perdeda a mar, ci dise ce el ia spende plu ca un anio vagante en la Pasifica, ia mali, posponente sua renativi.
José Salvador Alvarenga es tro desidratada per viaja a Mexico. El ia revade a ospital en la Isolas Majel, do on ia trova el a un semana ante aora.
El dise ce el ia lasa Mexico en desembre 2012 per un turi de barcon, con un ami ci ia mori en la viaja longa.
La familia de sua ami vole parla con el per descovre plu sur la mori de sua fio.
@T La sentro iudi en Mumbai reabri a ses anios pos un ataca
@L aora_oji/2014/la_sentro_iudi_en_mumbai_reabri_a_ses_anios_pos_un_ataca
====== La sentro iudi en Mumbai reabri a ses anios pos un ataca ======
26 agosto 2014
Un sentro iudi en la site barati Mumbai va reabri, a cuasi ses anios pos cuando fusilores teroriste ia ataca lo.
Ses iudis ia mori a la sentro, cual ia es un de alga locas atacada en novembre 2008.
Soldatos barati ia regania ultima la controla de la sentro e ia mata alga fusilores.
La atacas -- contra un stasion de ferovia, oteles lusosa, e la sentro -- ia prende 166 vives. Nove fusilores ia es ance matada.
Rabi Gavriel Holtzberg e sua sposa Rivkah, ci ia maneja la sentro cultural iudi ia es matada, ma sua fio de du anios ia survive.
El ia es trovada plorante a lado de sua corpos par sua enfantor barati, ci ia asconde se en un armario en la ataca, ma ia emerji per salva la enfante pos la moris de sua jenitores.
25 rabis de Asia intera va asembla oji a la sentro renovida. Los va anunsia un projeta per un museo en la construida.
La sentro conteni aora un sinagoga, ofisias, salas per visitores, un restorante, un cosina comersial, e salas de securia.
Rabi Moshe Kotlarsky, un membro xef de la promove ci ia organiza la reconstrui ia dise: "On pote vinse defias, an la plu asustantes. On pote e debe reconstrui, e esta projeta opera como un faro de lus e espera ce malia no va domina."
En 2012, Barat ia esecuta Mohammad Ajmal Amir Qasab, la sola fusilor ci ia survive. El ia es un parte de un unia forte armada de 10 persones ci ia ateni Mumbia par mar a 26 novembre 2008.
La omes ia divide en grupos per ataca blancos diversa tra plu ca du dias.
@T La serebro de un simia controla la moves de un otra
@L aora_oji/2014/la_serebro_de_un_simia_controla_la_moves_de_un_otra
====== La serebro de un simia controla la moves de un otra ======
19 febrero 2014
On ia usa la serebro de un simia per controla la moves de un otra.
Par scane la serebro, on ia pote leje la mente de la simia prima, e stimula eletrical la medula spinal de la otra -- nomida la "avatar", calmida par drogas.
La ecipo espera ce los pote refina la metodo per permete ce persones paraliseda regania la controla de sua propre corpos.
On descrive la resulta como un avansa importante.
@T La sesaspara dura en Ucraina
@L aora_oji/2014/la_sesaspara_dura_en_ucraina
====== La sesaspara dura en Ucraina ======
6 setembre 2014
Lo pare ce on obedi un sesaspara acordada par la governa ucrainsce e rebelores prorusce.
Pos la acorda a venerdi en Minsk, la capital de Bielarus, on ia confirma no reportas de combate en la note. Alga ia reporta bombardas de locas militar ucrainsce prosima a la airoporto de Donetsk, ma estas no ia es confirmada.
Petro Poroshenko, la presidente de Ucraina, recomenda aora ce on discute un solve permanente de la gera, cual ia mata sirca 2600 persones.
An tal, la rebelores ia comenta ce la sesaspara no ia cambia sua politica de vole separa de Ucraina.
La discutes ia es arbitrada par la Organiza per Securia e Colabora en Europa (OSCE). Los ia envolve Leonid Kuchma (un presidente pasada de Ucraina), gidores de la rebelores prorusce, e Mikhail Zurabov (la ambasador rusce a Ucraina).
Ambos lados ia promete retira tan pronto como posible sua armas pesosa de la campos de batalia. Rusia ia acorda ce lo va recomensa aidas umaniste a la este de Ucraina. OSCE dise ce lo va monitori la sesaspara.
Poroshenko ia esplica ce la acorda es fundida sur un lista de 12 puntos cual inclui un libri de ostajes, probable oji.
La rebela prorusce ia comensa en april en Donetsk e Luhansk, du sites de Ucraina este, provocada par la saisi par Rusia de Crim, un penisola ucrainsce, a alga semanas ante alora. Soldatos ucrainsce ia pare es ganiante contra la rebelores, ma la prorusces ia fa avansas nova de pos la parte tarda de agosto.
La sesaspara ia validi ier a 15:00 (de ora universal). La batalias ia continua asta acel momento.
Atestores estra Mariupol, un site sude, ia dise ce los ia vide la reveni de tances ucrainsce de la batalia.
La Ueste acusa ce Rusia envia armas e soldatos per suporta la rebelores, e Rusia nega esta alegas.
Ma an cuando la sesaspara ia es comensante, ambasadores de la Uni European ia ajunta plu nomes a un lista de individuas rusce e prorusce ci lo intende puni par comandas legal. La lista inclui aora la gidores nova en Ucraina este, la governa crimsce, e alga desidores e oligarcas rusce.
La punis va es formal adotada a lundi. Ma alga diplomatas ia comenta ce on va suspende cisa los si la sesaspara continua bon e si Rusia retira sua soldatos de Ucraina.
La crise en Ucraina ia es resente la tema de un confere alta de OTAN, do la statos membros ia acorda formi un corpo multinasional e rapida reatante.
@T La sistem bancal de Balgaria es atacada
@L aora_oji/2014/la_sistem_bancal_de_balgaria_es_atacada
====== La sistem bancal de Balgaria es atacada ======
28 junio 2014
La banco sentral de Balgaria ia dise ce on ia fa un atenta metodosa de destabli la pais par ataca la sistem bancal. Lo ia promete usa tota sua potias per proteje la reservas de sitadanes.
Asiones en bancos balgarsce ia diminui forte en la dia du en segue.
On imajina ce la esije subita per retira mone de Banco Comersial Corporada, la banco cuatro de la plu grandes de la pais, pote estende a otras.
La banco sentral ia emprende la maneja ce la Banco Comersial Corporada en la semana pasada, comentante ce sua problemes es isolida.
Ance economistes ia desasentua la risca ce la problem va deveni vasta, e bancos stranjer cual ave sucompanias en Balgaria ia insiste ce sua operas es secur.
Ma a jovedi, un suordinada de la partito governante ia dise ce cisa un otra banco va sufri un fortuna simil. Esta ia redui la fida, e investores ia freta per desprende sua asiones de bancos balgarsce.
La banco sentral ia recomenda forte ce tota instituidas de stato ta colabora per proteje la stablia finansial, e ta fa prosedes legal contra los ci difusa "rumores falsa e malintendosa" sur la sania de la bancos en la pais.
En un developa separada, on ia anunsia 5 otobe como la data per un vota parlamental en Balgaria. Plu temprana en junio, la governa minorial de Plamen Orexarsci ia acorda resinia, pos cuando la partito sosialiste -- la plu grande en la uni governante -- ia fali sever en la elejes european de maio.
@T La sistem de combate focones ia es descomutada en Dukezong
@L aora_oji/2014/la_sistem_de_combate_focones_ia_es_descomutada_en_dukezong
====== La sistem de combate focones ia es descomutada en Dukezong ======
13 janero 2014
La sistem de combate focones ia es descomutada a la tempo de la focon cual ia destrui Dukezong, un vila antica tibetan en Xina, a saturdi.
Pompores local ia dise ce on ia clui la aparatos per impedi un creve de tubos en la temperatur min ca jelante.
Cuasi 300 casas, xef de lenio, ia es ruinada par la focon.
Un botecor ia dise ce la abitores va reconstrui probable lo cual los ia perde, car turisme es la sola industria en la loca.
@T La sposa de Shashi Tharoor ia mori cisa par supradosa
@L aora_oji/2014/la_sposa_de_shashi_tharoor_ia_mori_cisa_par_supradosa
====== La sposa de Shashi Tharoor ia mori cisa par supradosa ======
21 janero 2014
Dotores dise ce la mori de la sposa de Shashi Tharoor, un ministro indian, ia es cisa causada par un supradosa de drogas.
On ia trova la corpo Sunanda Pushkar en un sala de otel en Delhi en venerdi.
La duple ia deveni la tema de un disputa en mercurdi cuando mesajes en Twitter ia sujesta ce la sposo fa un relata de ama.
La autopsia ia descovre ance "marcas de feri" sur la corpo, ma on no ia dise esce los es relatada a sua mori.
@T La sposa de un ministro indian alegada adulterante es mor
@L aora_oji/2014/la_sposa_de_un_ministro_indian_alegada_adulterante_es_mor
====== La sposa de un ministro indian alegada adulterante es mor ======
18 janero 2014
La sposa de Shashi Tharoor, un ministro indian, es mor, pos alegas ce sua sposo ia fa un relata de ama.
On ia descovre la corpo de Sunanda Pushkar a un otel en Delhi.
La duple ia deveni maraniada en controversia sur un serie de mesajes en Twitter a mercurdi, cual ia pare revela ce la ministro adultera con un jornaliste pacistani.
Plu tarda, ambos ia insiste ce sua sposia es felis. Los ia descrive la tuitas como "nonautorida".
@T La Stasion Spasial Internasional pote vive per plu anios
@L aora_oji/2014/la_stasion_spasial_internasional_pote_vive_per_plu_anios
====== La Stasion Spasial Internasional pote vive per plu anios ======
9 janero 2014
NASA ia gania la suporta de la Casa Blanca per estende la vive de la Stasion Spasial Internasional tra cuatro plu anios, asta 2024.
On ia comensa construi la Stasion en 1998. Lo es un projeta comun de la SUA, Rusia, Canada, Japan, e statos en la Departe Spasial European. Esta colaborores debe suporta la estende, o on no va reali lo.
Multe injeniores crede ce la Stasion es capas de labora secur asta 2028, a la min.
@T La SUA aresta du lavores de bitcoines
@L aora_oji/2014/la_sua_aresta_du_lavores_de_bitcoines
====== La SUA aresta du lavores de bitcoines ======
28 janero 2014
La manejores de du locas de intercambia per bitcoin, un mone virtual, ia es arestada en la SUA.
La Departe de Justia ia dise ce Robert Faiella e Charlie Shrem es acusada sur lava de mone.
La autoriosas ia clari ce la du ia emprende un scema de vende plu ca un milion dolares de bitcoines a usores de la Silk Road (Via de Seda), un mercato enlinia de drogas.
On ia clui la Via de Seda en otobre de la anio pasada, e ia aresta sua posesor alegada.
@T La SUA averti Rusia sur un risca de bombas en pasta de dente
@L aora_oji/2014/la_sua_averti_rusia_sur_un_risca_de_bombas_en_pasta_de_dente
====== La SUA averti Rusia sur un risca de bombas en pasta de dente ======
6 febrero 2014
La SUA ia avisa airolinias cual vola direta a Rusia sur un risca de esplodentes ascondeda en tubos de pasta de dente.
La avisa de la Departe de Securia Interna veni a la dia ante la rituo abrinte de la Olimpiales Invernal en Sochi en Rusia.
Lo ia dise ce lo comparti informas pertinente con otras "par causa de un abunda de cautia".
On reporta ce ofisiores ia clari ce on pote usa tubos de pasta de dente per porta secreta esplodentes a un avion, e usa los per crea un bomba -- o en vola, o pos ariva a la Juas.
@T La SUA avisa sur securia en relata a volas de Guiana
@L aora_oji/2014/la_sua_avisa_sur_securia_en_relata_a_volas_de_guiana
====== La SUA avisa sur securia en relata a volas de Guiana ======
10 febrero 2014
La SUA ia avisa sua sitadanes sur un "menasa nonconfirmada" a volas de Guiana.
La ambasada american en Georgetown ia declara ce la menasa relata a volas de Airolinia Caribean a la SUA entre lundi e mercurdi.
"Con abunda de cautia" lo ia consela sitadanes american ci ia intende viaja en acel aviones a organiza alternativa sua viajas.
Un portavose per la airolinia ia dise ce on ia aumenta la securia de pos venerdi.
@T La SUA descrive regulas de pexa xines como provocante
@L aora_oji/2014/la_sua_descrive_regulas_de_pexa_xines_como_provocante
====== La SUA descrive regulas de pexa xines como provocante ======
10 janero 2014
La SUA ia reata a regulas nova xines sur la permete de pexores a areas disputada de la Mar de Xina Sude, descrivente los como "provocante e posible perilosa".
A 1 janero, regulas ia comensa funsiona, aprobada par la provinse Hainan, esijente ce barcones stranjer de pexa demanda permete de entra a sua acuas.
Xina reclama un area con forma U de la Mar de Xina Sude, e pone lo su la autoria de Hainan.
La area inclui partal areas cual alga otra nasiones de Asia sude-este reclama ance.
@T La SUA envia un barcon de gera a la Golfo
@L aora_oji/2014/la_sua_envia_un_barcon_de_gera_a_la_golfo
====== La SUA envia un barcon de gera a la Golfo ======
15 junio 2014
La SUA envia un barcon major de gera a la Golfo Farsi per ave un capasia militar si lo aveni ce la situa en Irac mali plu.
La barcon, cual porta deses de jetos de combate, ia es moveda de la Mar Arabi Norde.
Entretempo, Iran dise ce lo considera labora con la SUA per batalia rebelores suni en Irac ci ia saisi alga sites e menasa aora Baghdad, la capital.
Bataliante su la nom de la Stato Muslim de Irac e la Mediteraneo Este, la rebelores regarda la majoria xia de Irac como ereses.
Ma soldatos iraci, fortida par un cuantia cresente de militiores xia e curdi, pare resiste aora la avansa de gerores suni a norde de Baghdad. Los ia recatura alga vilas cual la rebelores ia saisi.
En la vila Ishaq, soldatos ia trova la corpos ardeda de des-du polisiores.
La fortes de la governa asembla en la site Samarra, parente en prepara de un contrataca per forsa rebelores a via de Tikrit, la vila de nase de Saddam Hussein, a la norde.
Soldatos de governa e militiores xia ia desprende rebelores ance de du vilas en la provinse Diyala, a norde-este de Baghdad. Ma un bombarda de aira a la vila Jalawla ia mata sete combatores curdi par era. Los ia adota plu tremprana locas cual la rebelores suni ia vacui.
@T La SUA es consernada sur la retarda de sutrae armas cimical de Suria
@L aora_oji/2014/la_sua_es_consernada_sur_la_retarda_de_sutrae_armas_cimical_de_suria
====== La SUA es consernada sur la retarda de sutrae armas cimical de Suria ======
30 janero 2014
La SUA dise ce on ia sutrae sola sirca 4% de la armas cimical declarada par la governa suri.
Chuck Hagel, la secretor de defende, ia dise ce el es consernada ce la scema de sutrae la armas es retardada.
El ia informa reportores en Polsca ce Dimashq "debe aseta la encarga de reali sua promete".
En Geneve, delegadas de la governa suri e la partito oposante ia partisipa en un dia ses de discutes de pas.
@T La SUA es "multe abrida" a relatas nova con Cuba
@L aora_oji/2014/la_sua_es_multe_abrida_a_relatas_nova_con_cuba
====== La SUA es "multe abrida" a relatas nova con Cuba ======
11 janero 2014
Un ofisior senior american ia dise ce la Statos Unida es "multe abrida" a construi un relata nova con Cuba.
Ma Edward Alex Lee de la departe de stato ia asentua ce cualce bonis debe es acompaniada par plu libria political sur la isola comuniste.
El ia dise ce la du paises ia fa discutes "multe construosa" sur migra e otra temas a esta semana.
El ia refusa furni detalias de lo cual el ia nomi "un progresa sustantial".
@T La SUA es ofendeda par un comenta par un ministro israeli
@L aora_oji/2014/la_sua_es_ofendeda_par_un_comenta_par_un_ministro_israeli
====== La SUA es ofendeda par un comenta par un ministro israeli ======
15 janero 2014
La SUA ia condena como "ofendente" un comenta, par la ministro israeli de defende, sur la proposas de John Kerry sur pas en Asia sude-ueste.
Un portavose ia dise ce la comentas, alegada fada par Moshe Yaalon, es "nonconveninte" cuando on considera la suporta par la SUA a la securia de Israel.
Esta ia es un reproxa rara de la SUA a sua aliada.
Un jornal israeli ia reporta ce Yaalon ia dise ce Kerry, la secretor de stato american, ata par causa de "un osese malocada e un zelo maxial".
@T La SUA esplora esce la SI ia saisi armas intendeda per aida defendores
@L aora_oji/2014/la_sua_esplora_esce_la_si_ia_saisi_armas_intendeda_per_aida_defendores
====== La SUA esplora esce la SI ia saisi armas intendeda per aida defendores ======
22 otobre 2014
La departe de defende SUA ia dise ce lo esamina un video de Stato Islamiste cual pare mostra la violentes en controla de armas american intendeda per defendores curdi en Suria.
A lundi, la SUA ia cade 27 faxos con armas de calibre peti, munis, e otra armas per militias ci defende la vila Kobane contra la SI.
Un portavose per la SUA ia dise ce la majoria grande ia ateni sua goles intendeda. Un declara plu tarda ia clari ce un faxo ia devia, ma on ia destrui lo per preveni ce la enemi reseta lo. Tota la otra faxos ia ariva secur.
Ma un video poneda a interede par un grupo jornaliste favorente la Stato Islamiste ia mostra un reserva de armas, parente cadeda par la SUA, en la manos de la violentes.
Fortes curdi controla la plu de la vila, ma la Stato Islamiste resta menasante.
Ativistes ia lansa un ataca ferose en Kobane a lundi, pos du dias de calmia relativa en cuando lo ia pare ce la defendores de la vila ia forsa los a via.
30 atacores SI e 11 defendores curdi ia es matada a martedi, ma la islamistes ajunta fortes nova.
Kobane, a la frontera turces, es ja atacada par la SI tra alga semanas. La plu de sua abitores ia es obligada a parti.
La combate nova ia aveni pos cuando Turcia ia dise ce lo va permete ce soldatos curdi iraci traversa a Suria per aida defende contra SI. An tal, un ofisial curdi local ia dise ce el no sabe cuando esta va aveni.
La avansa de SI en Suria aveni sur fondo de la gera interna. Atacas airal, gidada, par la SUA, aveni ala sin permete de presidente Bashar al-Assad, sur ci la Ueste desira ce el sede sua potia.
En Irac, la atacas airal es suportada par la governa. Plu temprana en esta anio, la SI ala ia avansa a locas prosima a la capital, Baghdad. La SI menasa ancora la site, e ia ocupa la plu de Anbar, la provinse ueste, en semanas resente.
On crede ce un serie de bombis en Baghdad en la dias pasada, matante deses de persones, ia es fada par la SI.
A martedi, a la min 12 persones ia es matada en un ataca duple par bomba de auto en la distrito Talibiya, xef xia, de Baghdad este.
@T La SUA estende diretos legal per sposidas ge
@L aora_oji/2014/la_sua_estende_diretos_legal_per_sposidas_ge
====== La SUA estende diretos legal per sposidas ge ======
9 febrero 2014
La SUA va ajusta sua sistem de justia per dona plu reconose legal a sposis omosesal.
En un parla a un aveni de diretos ge en New York, Eric Holder, la avocato jeneral, ia dise ce la Departe de Justia fa un rol en "fronti la prejudi".
Duples va es esentada de debe atesta la un contra la otra en corte, e va ave diretos egal de visitas en prisones federal.
Sposis ge es corente legal en 17 statos e en la capital. Otra statos dona alga beneficas sposal a tal duples, ma otras ia proibi intera la sposi ge.
@T La SUA informa OTAN sur un rompe rusce de un acorda nucleal
@L aora_oji/2014/la_sua_informa_otan_sur_un_rompe_rusce_de_un_acorda_nucleal
====== La SUA informa OTAN sur un rompe rusce de un acorda nucleal ======
31 janero 2014
La SUA ia acusa Rusia de no segue un trata importante de controla de armas, cual proibi misiles nucleal de estende media.
On reporta ce ofisiores american ia dise ce, de 2008, Rusia ia fa probas de vola de un misil lansada de tera.
Un tal proba ta es proibida par la acorda.
La SUA no ia anunsia publica ce Rusia ia rompe la acorda, ma lo ia informa sua aliadas en OTAN sur la tema.
@T La SUA intende retira tota sua soldatos de Afganistan
@L aora_oji/2014/la_sua_intende_retira_tota_sua_soldatos_de_afganistan
====== La SUA intende retira tota sua soldatos de Afganistan ======
25 febrero 2014
Presidente Barack Obama ia averti Hamid Karzai, sua corespondente afgani, ce la SUA va cisa retira tota sua soldatos de Afganistan ante la fini de esta anio.
Obama ia dona la mesaje en un telefoni a Karzai, ci ia refusa suscrive un acorda de securia.
La SUA insiste ce esta acorda debe esiste ante cuando lo va promete lasa alga soldatos en la pais per combate rebelores e per instrui otras.
La SUA ave soldatos en Afganistan de pos 2001, cuando lo ia despone la Taliban.
@T La SUA jela denova
@L aora_oji/2014/la_sua_jela_denova
====== La SUA jela denova ======
29 janero 2014
Multe de la Statos Unida de America esperia denova un clima estrema fria. On previde neva an en la Sude Profonda.
La tempesta invernal va estende de Mississippi a Carolina Sude en la dias veninte.
On ia declara un state de crise en Louisiana, do la governor ia avisa abitores de resta en sua casas.
On ia clui multe scolas, e sirca 3000 aviones no ia pote vole en martedi.
@T La SUA loda la deside de discute pas par la Alia Nasional Suri
@L aora_oji/2014/la_sua_loda_la_deside_de_discute_pas_par_la_alia_nasional_suri
====== La SUA loda la deside de discute pas par la Alia Nasional Suri ======
19 janero 2014
John Kerry, la secretor de stato de la SUA, ia bonveni la deside par la grupo xef oposante de Suria ce los va vade a la discutes de pas en Suiz en la semana veninte.
Sua lodas per la move "corajosa" de la Alia Nasional Suri ia es repeteda par Frans e la Rena Unida.
La discutes va aveni en Montreux. Los intende comensa la taxe de institui un governa tempora per fini la gera en Suria. La gera ia mata plu ca 100 000 persones en tre anios.
On estima ce du milion persones ia fuji de Suria, e ce 6,5 milion es deslocada ma resta en la pais.
@T La SUA no vole ce Iran partisipa en discutes de pas suri
@L aora_oji/2014/la_sua_no_vole_ce_iran_partisipa_en_discutes_de_pas_suri
====== La SUA no vole ce Iran partisipa en discutes de pas suri ======
21 janero 2014
La SUA ia recomenda forte ce la NU retira sua invita ce Iran junta se a la discutes de pas suri cual va comensa pos du dias.
Ofisiores american ia acusa Iran de fali suporta la intende de la discutes, cual es fundi un governa tempora en Suria.
Iran es un aliada importante de la governa suri. Lo ia dise ce lo no va aseta constrinjes a sua partisipa.
Ban Ki-moon, la xef de la Nasiones Unida, ia dise ce el es "deludeda" a la disputa, e ce el reconsidera la moves posible per la NU.
@T La SUA previde un temperatur recordo basa
@L aora_oji/2014/la_sua_previde_un_temperatur_recordo_basa
====== La SUA previde un temperatur recordo basa ======
5 janero 2014
Partes de la SUA prepara per temperatures cisa recordo basa.
Un tempesta de inverno ia covre ja partes de Canada e la SUA norde-este su asta 60 sentimetres de neva. On culpa lo per 16 moris e per la cansela de plu ca 5000 aviones de pos mercurdi.
Meteorolojistes dise ce la efeto de la venta va cisa fa ce la temperatur en la norde sentral de la SUA pare tan basa como -50°.
On recomenda ce tota resta en sua casas o otra construidas, no sola per sua propre securia, ma ance afin la stradas resta vacua per permete la sutrae de neva.
En Canada, deses de miles de persones sur la isola Newfoundland resta sin corente eletrical, pos cuando la neva ia causa un foco a un mutador.
@T La SUA protesta contra un imposta xines sur importadas
@L aora_oji/2014/la_sua_protesta_contra_un_imposta_xines_sur_importadas
====== La SUA protesta contra un imposta xines sur importadas ======
14 janero 2014
La SUA ia acusa ce Xina ia fali segue un comanda de la Organiza Mundal de Comersia cual insiste ce lo cansela impostas sur alga importadas tecnolojial.
La autoriosa sur comersia ia arbitra un disputa entre la du nasiones en 2012. Lo ia trova ce Xina ia pone tarifas nonjusta a produidas de aser de la SUA.
Washington dise ce la impostas ia custa plu ca $250 milion a companias american esportante.
Xina dise ce lo ia redui la tarifas de importa, ma la SUA insiste ce esta no sufisi.
@T La SUA redona scultas furada a India
@L aora_oji/2014/la_sua_redona_scultas_furada_a_india
====== La SUA redona scultas furada a India ======
15 janero 2014
La SUA ia redona a India tre scultas antica cual ia es contrabandada a America.
Esta segue un mense de relatas tensada pos un disputa sur un diplomata indian ci on ia aresta en la SUA.
Dnyaneshwar Mulay, la consul jeneral de India en New York, ia refusa reconose cualce lia entre acel disputa e la redona de la anticas, ma el ia espresa sua grasia a la SUA.
La scultas, fada de petra arenito, ia es furada de temples en India e ofreda en America par vendores de arte e sua aidores.
@T La SUA suporta Irac ma no va envia soldatos
@L aora_oji/2014/la_sua_suporta_irac_ma_no_va_envia_soldatos
====== La SUA suporta Irac ma no va envia soldatos ======
6 janero 2014
John Kerry, la secretor de stato de la SUA, ia dise ce la SUA va aida Irac a batalia gerores liada a al-Qaidah, ma ce lo no intende envia denova soldatos a la pais.
El ia dise ce fida ce la governa de Nouri Maliki, la ministro xef iraci, pote vinse la gerores.
Plu temprana, la governa iraci ia perde controla de Fallujah, un site importante a ueste de Baghdad.
En un aveni separada a soldi, bombas en la capital, Baghdad, ia mata a la min 19 persones. La ataca la plu sever, cual ia mata nove e ia feri 25, ia es en la distrito xia de Shaab.
@T La SUA va redui la grandia de sua fortes armada
@L aora_oji/2014/la_sua_va_redui_la_grandia_de_sua_fortes_armada
====== La SUA va redui la grandia de sua fortes armada ======
25 febrero 2014
La Pentagon va anunsia un projeta de redui la armada nasional de la SUA a sua grado la plu peti de ante la Gera Mundal Du.
On previde ce un clase intera de jetos atacante va es abolida cuando Chuck Hagel, la ministro de defende, anunsia sua proposas finansial per 2015.
Probable el va proposa redui la armada ativa a entre 440 e 450 mil persones.
La militaria SUA senti un presa per redui, pos du geras stranjer e custosa.
@T La SUA xerca un puni de mori per la bombor de Boston
@L aora_oji/2014/la_sua_xerca_un_puni_de_mori_per_la_bombor_de_boston
====== La SUA xerca un puni de mori per la bombor de Boston ======
31 janero 2014
La governa de la SUA dise ce lo va demanda un puni de mori per Dzhokhar Tsarnaev, la suspetada per la bombis de la maraton de Boston.
Eric Holder, la avocato jeneral, ia dise: "La natur de la condui consernada e la dana resultante obliga esta deside."
17 de la 30 acusas contra la om de 20 anios permete la puni de mori, incluinte la usa de un arma de destrui coletiva per mata.
La bombis, en april 2013, ia mata tre persones e ia feri plu ca 260.
@T La subasta de un selo postal rara pote crea un recordo nova
@L aora_oji/2014/la_subasta_de_un_selo_postal_rara_pote_crea_un_recordo_nova
====== La subasta de un selo postal rara pote crea un recordo nova ======
15 febrero 2014
On predise ce un selo postal de Guiana Brites en la sentenio 19 va es vendeda per un soma recordo en New York en junio.
Sotheby's, la subasteria, dise ce la selo Majenta de un sentim, de 1856, pote es vendeda per asta $20 milion. Coliores regarda lo como la selo rara la plu famosa de mundo.
La recordo presente per un selo subastada es $2,3 milion. Esta selo ia crea un recordo nova a cada de la tre veses pasada cuando on ia subasta lo.
A la plu resente, lo ia es comprada par un milionor, John du Pont. On ia prisoni el per mata un lutor olimpial en 1996, e el mesma ia mori en 2010.
@T La suordinada de la governor de New Jersey fronti alegas
@L aora_oji/2014/la_suordinada_de_la_governor_de_new_jersey_fronti_alegas
====== La suordinada de la governor de New Jersey fronti alegas ======
21 janero 2014
En la SUA, la suordinada de Chris Christie, la governor de New Jersey, ia nega alegas ce los ia menasa reteni mone intendeda per aida un site colpada par Siclon Sandy en 2012.
Kim Guadagno ia informa reportores ce la acusa es "intera e completa falsa".
La maior de la site Hoboken alega ce on ia dise a el ce sua site risca no reseta mone federal, si el no suporta un projeta de imobila cual Christie favore.
Esta es un alega nova de froda contra la governor republican. Plu temprana en esta mense, on ia sujesta ce sua ecipo ia causa un conjesta grande en un retalia political.
@T La survivente la plu vea de la Olocausto mori con 110 anios
@L aora_oji/2014/la_survivente_la_plu_vea_de_la_olocausto_mori_con_110_anios
====== La survivente la plu vea de la Olocausto mori con 110 anios ======
24 febrero 2014
Alice Herz-Sommer, la survivente la plu vea conoseda de la Olocausto Nazi, ia mori en London a la eda de 110.
El ia nase en un familia iudi en Prague en 1903. El ia spende du anios en un campa nazi de consentra en Terezín.
El ia es multe capas como pianiste e ensenior de musica. El ia instrui a la Scola de Musica en Ieruxalim asta 1986, cuando el ia move a London.
On ia nomi un filma sur sua vive per la premio de filma atestante la plu bon a la premios Oscar de la mense veninte.
@T La Taliban afgani ataca un base de OTAN
@L aora_oji/2014/la_taliban_afgani_ataca_un_base_de_otan
====== La Taliban afgani ataca un base de OTAN ======
21 janero 2014
Ofisiores de OTAN en Afganistan dise ce un de sua soldatos ia es matada cuando rebelores ia ataca un base en la provinse sude de Kandahar.
La atacores ia esplode un bomba de auto a la entra de la base Zhari a sude de la site Kandahar. A pos, otra gerores ia comensa fusili.
Nove fusilores ia partisipa, e tota ia es matada.
Soldatos de batalia, gidada par OTAN, va parti de Afganistan a la fini de 2014, pos 13 anios de combate la Taliban.
@T La Taliban afgani catura un can
@L aora_oji/2014/la_taliban_afgani_catura_un_can
====== La Taliban afgani catura un can ======
7 febrero 2014
En Afganistan, ofisiores de la Forte Internasional de Aida e Securia ia confirma ce un can militar ia desapare en un mision en desembre pasada.
La militaria SUA dise ce la can ia parteni a un aliada.
Plu temprana, la Taliban ia publici un video de un can ci, en sua descrive, los ia catura de soldatos american.
Los ia dise ce la can, parente nomida Colonel, ia porta un aparato de jeolocali, un lampa de pox, e un camera peti.
@T La Taliban ataca un posto de controla en Afganistan
@L aora_oji/2014/la_taliban_ataca_un_posto_de_controla_en_afganistan
====== La Taliban ataca un posto de controla en Afganistan ======
23 febrero 2014
Combatores de la Taliban ia mata a la min 20 soldatos afgani en un ataca contra un posto de controla en la provinse de Kunar, prosima a la frontera entre Afganistan e Pacistan.
A la min un de la atacores ia es matada, e la Taliban ia dise ce los ia catura sete soldatos.
Par causa de la ataca, Hamid Karzai, la presidente de Afganistan, ia pospone un visita projetada a Srilanca en soldi.
La violentia presede un vota presidental cual va aveni en marto.
@T La Taliban nomi Imran Khan per discutes de pas
@L aora_oji/2014/la_taliban_nomi_imran_khan_per_discutes_de_pas
====== La Taliban nomi Imran Khan per discutes de pas ======
3 febrero 2014
En Pacistan, la Taliban ia nomi Imran Khan, un cricetor pasada e politiciste, como un membro de un ecipo de sinco persones per fa discutes de pas con la governa.
La partito de Khan favore forte la negosias, ma el ia anunsia ce el va prefere probable fa un otra rol en aida la pas.
Nawaz Sharif, la ministro xef, ia reveni a potia en maio 2013, prometente negosias con la Taliban.
Atacas matante ia continua, e Sharif ia dise resente ce el va fa un atenta ultima de pas par nomi un tal ecipo.
@T La taso de nonemplea en la SUA desende
@L aora_oji/2014/la_taso_de_nonemplea_en_la_sua_desende
====== La taso de nonemplea en la SUA desende ======
11 janero 2014
En la SUA, la taso de nonemplea ia desende a 6,7%, la plu basa de sinco anios, en desembre. Companias ia crea 74 000 postos nova.
An tal, la cuantia de postos creada ia es la plu basa de tre anios, e multe min ca un dui de la cuantia prevideda par analisores.
Cisa la clima mal en desembre ia pospone projetas de emplea.
La desende de la taso es partal un refleta de la fato ce persones sesa labora. La governa trata un person como nonempleada sola si el dise ce el xerca labora.
@T La telescopio Kepler descovre multe planetas nova
@L aora_oji/2014/la_telescopio_kepler_descovre_multe_planetas_nova
====== La telescopio Kepler descovre multe planetas nova ======
27 febrero 2014
La siensistes ci esplora datos de la telescopio Kepler de NASA dise ce lo ia identifia 715 planetas nova ultra nosa sistem solal.
En cuasi du desenios de pos la descovre de la prima "esoplaneta", rexercores ia deteta apena plu ca 1000 mundos nova.
La recolie la plu resente de Kepler es planetas en orbita sirca sola 305 stelas. Esta implica ce tota de los es en sistemes multiplaneta.
95% de los es plu peti ca Netuno, de cual sua raio es la cuatruple de lo de la Tera.
@T La tera engoli autos rara en un museo american
@L aora_oji/2014/la_tera_engoli_autos_rara_en_un_museo_american
====== La tera engoli autos rara en un museo american ======
13 febrero 2014
En Kentucky en la SUA, un dolina ia engoli oto automobiles rara a un museo de autos de sporte.
Nun ia es ferida cuando la tera ia colasa a la Museo Nasional de Corvette en la site Bowling Green, en la oras temprana de mercurdi.
La buco es larga de 12 metres e profonda de 9. An con lo, partes de la museo resta abrida.
Bowling Green es la sola loca do la compania General Motors fabrica autos Corvette.
@T La UE acorda negosia con Cuba
@L aora_oji/2014/la_ue_acorda_negosia_con_cuba
====== La UE acorda negosia con Cuba ======
11 febrero 2014
La Uni European ia acorda comensa negosias con Cuba, con intende de restora completa relatas biladal con la isola comuniste.
La discutes pote comensa cisa an en la mense veninte. Los va atenta forti la comersia e la investi, e va inclui un discute de diretos umana.
De pos 1996, la UE ia restrinje sua lias con Cuba per coraji democratia multipartito e un progresa sur diretos umana.
La UE es la asosior de comersia du la plu grande de Cuba, pos Venezuela.
@T La UE demanda perce Espania ia xuta a migrores
@L aora_oji/2014/la_ue_demanda_perce_espania_ia_xuta_a_migrores
====== La UE demanda perce Espania ia xuta a migrores ======
15 febrero 2014
Ofisiores de la Uni European va demanda un esplica de Espania sur perce polisiores ia xuta baletas de cauxo a migrores ci ia atenta nada a Ceuta, un teritorio espaniol.
Espania ia confesa ce on ia usa tal baletas, ma ia dise ce nun ia es ferida.
14 persones, cisa plu, ia afoca en 6 febrero, cuando sentos de migrores ia atenta nada de Maroco a la enclave sur la costa de Africa norde.
Ceuta e Melilla -- un otra enclave espaniol -- ave la sola fronteras de tera de la UE con Africa.
@T La UE e SUA disputa con Rusia sur Ucraina
@L aora_oji/2014/la_ue_e_sua_disputa_con_rusia_sur_ucraina
====== La UE e SUA disputa con Rusia sur Ucraina ======
2 febrero 2014
A un confere alta en München, on ia fa intercambias coler sur la futur de Ucraina.
Herman Van Rompuy, la presidente de la Consilia European, ia dise ce la futur de la pais debe es como membro de la Uni European.
John Kerry, la ministro de esternas de la SUA, ia dise ce sua pais suporta la batalia per democratia en Ucraina.
Sergei Lavrov, la ministro rusce de esternas, ia acusa paises ueste de un moralia noncoerente sur la protestas violente.
@T La UE lansa un satelite per monitori la state de la Tera
@L aora_oji/2014/la_ue_lansa_un_satelite_per_monitori_la_state_de_la_tera
====== La UE lansa un satelite per monitori la state de la Tera ======
4 april 2014
On ia lansa un roceto de Guian Franses con la satelite prima en un program nova de la Uni European per monitori la Tera. La veculo Sentinel-1a orbita aora en un mision per mapa la surfas de nosa planeta con radar. Un flotila de otra satelites, ance nomida Sentineles, va segue lo en la sinco anios seguente.
Bruxelles descrive sua program "Copernicus" como la atenta la plu grande de istoria per oserva nosa mundo. Cuando la sistem intera opera, lo va produi oto terabaites de datos en cada dia, detaliante la state de la surfas, la mares, e la atmosfera de la Tera.
Nasiones european ia dona 7,5 mil milion euros ($10,3 mil milion) a la projeta. Ma on intende ce la program va sesa nunca. Cada satelite Sentinel va es recambiada a la fini de sua mision, sertinte ce on ave informas continuante tra esta sentenio.
José Manuel Barroso, la Presidente de la Comision European, ia dise: "Esta investi va permete ce Europa institui se a la fronte de rexerca e inova en un campo estrema moderna -- la spasio. On ia crea multe postos per persones capas, e multe plu va veni futur."
La roceto Soyuz cual ia porta la oservador prima ia asende de la lanseria a la costa guianes a 18:02 de ora local (21:02 UTC). Sua viaja a la altia de 699 cilometres ia ocupa 23 minuts. Pronto a pos, on ia reseta un sinial confirmante ce Sentinel-1a ia separa bon de la roceto.
A la sentro de opera de la Departe Spasial European en Darmstadt en Deutxland, controlores ia comensa par inisia la satelite. Los ia spende la oras prima en envia comandas a lo afin lo despaci sua alas solal e la paneles de sua strumento de radar. Estas ia es pliada per pote senta en la roceto.
On previde ce la satelite va comensa formal sua servi pos sirca tre menses. An tal, probable lo va comensa imaji la Tera an en la semana veninte, per comensa la prosede de ajusta sua strumentos.
Radar ave multe usas, incluinte la monitori de vias de barcon per contamina o isberges, e la mapa de surfases teral per segue la desforesti o la produi de ris. Ma Sentinel-1a va es estrema usosa ance en responde a desastres. Radar es spesial bon per deteta la estende de acuas de inonda, e on emplea comun lo ance pos tremateras major per evalua danas a infrastrutur.
@T La UE pote aumenta sua punis contra Rusia pos un semana
@L aora_oji/2014/la_ue_pote_aumenta_sua_punis_contra_rusia_pos_un_semana
====== La UE pote aumenta sua punis contra Rusia pos un semana ======
31 agosto 2014
La Uni European ia dise ce si Rusia no reversa sua curso en Ucraina en la semana veninte, lo va es plu punida.
Herman Van Rompuy, la presidente de la Consilio European, ia dise ce la UE labora urjente sur plu medios restrinjente.
Plu temprana, Petro Poroshenko, la presidente de Ucraina, ia comenta ce sua pais es "prosima a un punto de nonreveni -- un gera vera" con Rusia.
Rusia nega acusas par la Ueste ce sua soldatos ia traversa nonlegal a en Ucraina per suporta ala separadistes.
Rebelores prorusce ia progresa contra soldatos ucrainsce en dias resente en Donetsk e Luhansk, areas este. Sirca 2600 persones ia mori en la combates.
La disputa en la este ia eruta en april pos cuando Rusia ia ajunta a se la penisola Crim en la sude de Ucraina en marto.
Gidores ueste dise ce on ave atestas clar ce unias normal de la militaria rusce opera en Ucraina con armas forte.
Parlante pos un confere alta en Bruxelles, Van Rompuy ia dise ce la UE "sta preparada per fa plu pasos major, en considera la evolui de la situa". El ia continua: "Cadun es intera consensa ce nos debe ata rapida."
El no ia spesifa la spesie de la punis ajuntable, ma ia dise ce la proposas va es ja preparada pos un semana.
@T La UE sutrae restrinjes de Romania e Balgaria
@L aora_oji/2014/la_ue_sutrae_restrinjes_de_romania_e_balgaria
====== La UE sutrae restrinjes de Romania e Balgaria ======
1 janero 2014
De martedi, sitadanes de Romania e Balgaria va pote labora tra la Uni European sin restrinje.
La du paises es la plu povres en la alia. Cuando la UE ia aseta los en 2007, alga statos membros ia insiste ce, per la sete anios prima, on limita sua diretos de labora e de reseta suportas finansial.
Alga persones en nasiones ueste plu rica teme un migra coletiva de la du paises.
Sur un tema relatada, a la comensa de 2014, Latvia ia adota la euro per sua mone. Lo ia deveni la pais 18 cual usa euros.
@T La UE vota per aboli paias vagante de telefoneta
@L aora_oji/2014/la_ue_vota_per_aboli_paias_vagante_de_telefoneta
====== La UE vota per aboli paias vagante de telefoneta ======
4 april 2014
La Parlamento European ia vota per aboli paias ajuntada per usa un telefoneta cuando on es estra sua propre pais. Pos esta reforma grande de telecomunica, la custa de un telefoni o de descarga datos de interede en un otra pais de la UE va es la mesma como en la propre pais.
La cambia va reali a 15 desembre 2015, si la governas de la UE aproba lo.
Alga consumores ia reseta faturas enorme pos deveni caturada par la custas presente alta per la usa vagante de telefonetas.
En anios resente, la UE ia fa leges per redui la custas, obligante companias de telecomunica a pone un limita masima a esta paias. En 2013, la limita per surfa la ueb ia es reduida de €0,70 per megabait a €0,45.
Un sonda par la Comision European en febrero ia sujesta ce 94% de europeanes restrinje sua usa de la rede cuando los viaja en Europa, par causa de la custa de vaga.
La Parlamento ia adota la proposa con 534 votas favorente e sola 25 en oposa.
Neelie Kroes, la Comisionor UE per la Futur Dijital, ia dise ce "consumores no va tolera plu la custas estrema".
La regulas nova ariva a un tempo cuando usores consuma sempre plu datos par sua telefonetas e tabletines. On previde ce, cuando redes de jenera cuatro ofre descargas an plu rapida, la consuma de datos va crese esponente.
@T La vagador Curiosia va traversa un duna grande
@L aora_oji/2014/la_vagador_curiosia_va_traversa_un_duna_grande
====== La vagador Curiosia va traversa un duna grande ======
5 febrero 2014
Sur Marte, la vagador Curiosia va atenta traversa un duna alta de un metre.
La inclina de arena impedi aora la entra de la robot a un vale peti, sur un via con min de la rocas agu cual ia crea resente indentes grande en sua rotas de aluminio.
Ma la injeniores de NASA no va emprende riscas. Los va comensa par comanda ce la robot asende sola un parte de la duna, per vide cuanto lo susede.
La ecipo recorda bon la perde de Spirito, un de sua vagadores plu temprana, en arena en 2009.
@T La vagador lunal xines esperia un problem
@L aora_oji/2014/la_vagador_lunal_xines_esperia_un_problem
====== La vagador lunal xines esperia un problem ======
27 janero 2014
Yutu (la Coneo de Jada), un vagador xines, ia esperia un fali de controla macinal.
La veculo esplora la luna, ma lo ia encontra problemes causada par lo cual siensistes ofisial ia descrive como "la ambiente complicada de la surfas lunal".
La vagador ia atera en desembre como un parte de la mision Chang'e-3: la atera prima nondanada sur la Luna de pos 1976.
On ia previde ce Yutu va funsiona per sirca tre menses.
@T La valua de bitcoin esede denova $1000
@L aora_oji/2014/la_valua_de_bitcoin_esede_denova_1000
====== La valua de bitcoin esede denova $1000 ======
6 janero 2014
La valua de la mone virtual bitcoin ia esede denova $1000 pos cuando Zynga, un compania de juas video sosial, ia dise ce lo va aseta paias en acel mone.
Zynga es cisa la compania la plu grande de juas video cual aseta bitcoines.
La mone virtual ia deveni plu popular, ma sua valua ia es estrema volatil en semanas resente.
Lo ia culmina a $1250 en novembre, ma ia desende rapida en desembre pos cuando Xina ia restrinje la comersia con lo.
Suportores de bitcoin, cual no es suportada par un banco sentral, presa afin on usa plu comun lo.
@T La vinsores de Sochi va reseta medalias de meteorite
@L aora_oji/2014/la_vinsores_de_sochi_va_reseta_medalias_de_meteorite
====== La vinsores de Sochi va reseta medalias de meteorite ======
1 febrero 2014
Rusia ia pone pesos de la meteor de Chelyabinsk en medalias cual on va dona, como ajuntadas spesial, a la ganiores de medalias oro de la Olimpiales en Sochi a 15 febrero.
Los va reseta sua medalias spesial a esata un anio pos la cade de un roca de spasio a Lago Chebarkul, en la montania Ural de Rusia sentral.
Plu tarda, on ia tira la roca de la lago. Lo ia ave un longia de un metre e dui.
On va vende cuasi 40 plu de la medalias de meteorite a coliores privata.
@T La violentia continua en Gaza
@L aora_oji/2014/la_violentia_continua_en_gaza
====== La violentia continua en Gaza ======
20 julio 2014
Un familia filastini e un padre badaui israeli ia es entre la matadas a saturdi, cuando la cuantia de persones matada par atacas israeli sur tera e atacas con roceto de Gaza ia suprapasa 300.
La badaui ia mori, e membros de sua familia ia es ferida, cuando un roceto ia colpa sua camperia en Israel sude. La familia de oto filastinis ia es entre 30 persones matada, cisa plu.
Ban Ki-moon, la secretario jeneral de la Nasiones Unida, vade a la area per aida laboras de reconsilia.
Sua visita intende aida israelis e filastinis a "fini la violentia e trova un modo de progresa".
A venerdi, la presidente SUA Barack Obama ia dise ce el es "profonda consernada" sur moris nonmilitar en la gera.
Israel ia comensa atacas sur tera en Gaza pos cuando 10 dias de atacas par avion ia fali para ce Hamas xuta rocetos a ultra la frontera.
@T La voses de la papes apare en un arcivo enlinia
@L aora_oji/2014/la_voses_de_la_papes_apare_en_un_arcivo_enlinia
====== La voses de la papes apare en un arcivo enlinia ======
2 april 2014
La Vatican ia anunsia ce on va pote escuta rejistras audio, conteninte la voses de papes de pos 1884, en un arcivo dijital nova. Esta va abri a la publica a 27 april, como un parte de la santi de Papes Ioannes Paulus 2 (1978-2005) e Ioannes 23 (1958-63).
Un portavose ia dise ce la arcivo va aida conserva la rejistras: "En esta modo, la papes resta entre nos, par sua voses."
La colie enlinia es composada de plu ca 8000 rejistras istorial de Radio Vatican. Acel organiza ia cumula rejistras de pos sua inisia su Pape Pius 11 en 1931. Ma lo posese ance otra rejistras, como la ensiclica Humanum Genus cual Pape Leo 13 ia rejistra par ditador en 1884.
La arcivo, "Voses de la Papes", catura momentos istorial como la apela de Pius 12 en agosto 1939, direta ante la comensa de la Gera Mundal Du, en cual el ia dise: "La peril prosimi, ma tempo es ancora disponable. On perde no cosa con pas, on pote perde tota con gera."
Lo conteni ance la "Parla a la Luna" improvisada par Ioannes 23 en 1962, cuando el ia dise a la fola en la Plaza de San Pietro: "Cuando vos vade a casa, trova vosa enfantes. Abrasa e besa vosa enfantes e dise a los: 'Esta es la abrasa e besa de la Pape'."
Ance en la arcivo es la parolas de Paulus 6 pos la fura e asasina de Aldo Moro, la ministro xef de Italia en 1978, e la ataca emosiosa par Ioannes Paulus 2 en 1993 contra la "cultur de moria" de la mafia pos un serie de matas major.
De plu resente, on trova la parla de renunsia par Benedictus 16 en 2013, en cual el ia dise ce el "va es simple un peregrinor ci comensa la fase final de sua peregrina sur esta Tera".
@T La vota jeneral en Tai es disturbada par protestores
@L aora_oji/2014/la_vota_jeneral_en_tai_es_disturbada_par_protestores
====== La vota jeneral en Tai es disturbada par protestores ======
3 febrero 2014
Protestas ia disturba la vota jeneral en Tai, cluinte voterias en partes de Bangkok e la sude. Ma ofisiores dise ce 89% de voterias ia funsiona normal.
La cluis ia afeta ses milion votores rejistrada.
La ministro xef, Yingluck Shinawatra, ia clama la vota per atenta para semanas de protestas coletiva.
On crede ce sua partito va gania cuasi serta, ma cisa un limbo political va es causada par defias legal e un manca de cuorum de parlamentores.
@T La xef de Delhi eleje un casa min grande
@L aora_oji/2014/la_xef_de_delhi_eleje_un_casa_min_grande
====== La xef de Delhi eleje un casa min grande ======
5 janero 2014
En India, la ministro xef nova de Delhi ia abandona sua intende de reloca se a la abitada ofisial, pos cuando on ia critica vasta la idea.
En venerdi, Arvind Kejriwal, ci ave 45 anios, ia defende sua move a la du apartes spasiosa de sinco salas de dormi, e de usa un de la apartes como sua ofisia.
Ma sua oposores ia dise ce esta contradise la prometes cual el ia fa e per cual on ia eleje el. Sua partito Person Comun ia gania la elejes en la mense pasada, prometente batalia la froda.
En saturdi, Kejriwal ia confesa ce sua oposores no ia es la solas ci ia oposa la reloca.
@T La xef de la armada egiptian va xerca cisa la presidentia
@L aora_oji/2014/la_xef_de_la_armada_egiptian_va_xerca_cisa_la_presidentia
====== La xef de la armada egiptian va xerca cisa la presidentia ======
12 janero 2014
Abdel Fattah al-Sisi, la xef de la armada de Egipte, va presenta se como aspiror per presidente si la popla demanda lo, e si la militar suporta lo.
La jeneral senti ce el no ta pote iniora la situa si un cuantia sufisinte de la popla ta desira el como presidente.
Pos alga dias, Egipte va fa un referendo sur un constitui nova. La referendo va es la prima en un serie.
La governa, militar instalada, dise ce la referendos va restora un governa elejeda, pos la despone de Mohammed Morsi, la presidente islamiste, en julio 2013.
@T La xef de la fortes armada ucrainsce es desempleada
@L aora_oji/2014/la_xef_de_la_fortes_armada_ucrainsce_es_desempleada
====== La xef de la fortes armada ucrainsce es desempleada ======
20 febrero 2014
La presidente de Ucraina, Viktor Yanukovych, ia desemplea la xef de la fortes armada, coronel jeneral Volodymyr Zamana.
Esta segue la violentia la plu intensa en la crise de tre menses, cual ia altera Kiev a un campo de batalia.
Plu temprana, la servi de securia ia anunsia ce lo lansa un campania antiteroriste tra la pais, per combate un "menasa estremiste" cresente.
On ia sujesta ce on pote introdui fortes aramda a la situa a la ves prima.
@T La xef de NHK parla sur sclavos sesal en la Gera Mundal Du
@L aora_oji/2014/la_xef_de_nhk_parla_sur_sclavos_sesal_en_la_gera_mundal_du
====== La xef de NHK parla sur sclavos sesal en la Gera Mundal Du ======
27 janero 2014
En Japan, la xef nova de NHK, la organiza difusante nasional, ia causa un controversa par desasentua la usa de sclavos sesal -- conoseda como "femes de comforta" -- par la militaria en la Gera Mundal Du.
A sola alga dias pos emprende sua posto nova, Katsuto Momii ia dise ce la pratica ia es comun en cualce pais en gera.
El ia dise ance ce NHK debe suporta la governa japanes en sua disputa teritorial con Xina.
Como un difusante publica finansiada, NHK debe es political neutral.
@T La xef de polisia en Kabul resinia entre atacas taliban
@L aora_oji/2014/la_xef_de_polisia_en_kabul_resinia_entre_atacas_taliban
====== La xef de polisia en Kabul resinia entre atacas taliban ======
1 desembre 2014
La xef de polisia en Kabul ia resinia, pos un crese de atacas par combatosas afgani contra stranjeres en la site tra la du semanas pasada.
Jeneral Zahir Zahir ia dona no razona per sua resinia.
Tre sudafricanes ia es matada a saturdi en un ataca taliban contra un compleso usada par un asosia carital con base en la SUA. Esta ia es la tal ataca tre en 10 dias.
Presidente Ashraf Ghani, ci ia emprende sua posto en setembre, ia promete reali un pas pos desenios de disputa.
Zahir mesma ia es la blanco de un ataca en la temprana de novembre, cuando un bomba umana ia infiltra sua ofisias, sur cual on ia crede ce los es un de la construidas la plu secur en Kabul. Zahir no ia es presente, ma la atacor ia mata sua suordinada.
En un serie de atacas en Kabul en esta semana, du soldatos american ia es matada a lundi, e du laborores de la ambasada brites ia es matada a jovedi.
Deses de afganis ia es ance matada o ferida.
La ataca a saturdi ia es contra un construida usada par un organiza peti american de instrui. La organiza ia reporta ce tre de sua empleadas ia es matada e alga otras ia es ferida en un ataca par fusilores, de ci un ia detona un bomba.
Kabul esperia comun bombis par la Taliban, ci intende ataca ofisiores militar, polisial, e governal.
En la semana pasada, combatosas taliban ia ataca ance un campa en la provinse Helmand, a un mense pos cuando fortes brites ia parti de lo.
La Taliban ia aumenta sua atacas en Afganistan en cuando la plu de soldatos stranjer de combate prepara parti de la pais en desembre.
Como parte de un acorda sur la retira de esta soldatos, sirca 12 mil soldatos de OTAN va resta per instrui e consela securiores afgani, comensante a 1 janero.
@T La xef de Total mori en avion en Moscva
@L aora_oji/2014/la_xef_de_total_mori_en_avion_en_moscva
====== La xef de Total mori en avion en Moscva ======
21 otobre 2014
Christophe de Margerie, la dirijor xef de Total, un compania franses de petrolio, ia mori en un xoca de avion en Moscva.
Sua jeto companial ia colpa un scopineva e ia es engolida par flamas. Tota cuatro persones en la avion ia es matada.
Investigores rusce dise ce la gidor de la scopineva ia es enebriada.
De Margerie, ci ia ave 63 anios, ia deveni la dirijor xef de la compania tre de la plu grandes en Europa en 2007.
El ia junta se a Grupo Total pos gradua de la Scola Alta de Comersia en Paris en 1964. El ia spende sua carera intera a la compania, do el ia reseta la nometa "Mustax Grande".
Jornales rusce reporta ce el ia encontra Dmitry Medvedev, la ministro xef de Rusia, a sua casa en la campania prosima a Moscva per discute investis stranjer en Rusia.
Total es un juor importante en la mercato rusce de enerjia, e de Margerie ia es un defendor forte de manteni relatas, an entre punis ueste contra Moscva sur sua atas en Ucraina.
La compania es un de la investores stranjer la plu grande en Rusia, e intende dupli sua esflue de la pais ante 2020. Lo labora sur la projeta Yamal per estrae gas natural en Siberia norde-ueste.
En sua tempo a la timon de Total, de Margerie ia susede defende la compania contra alegas de froda en relata a la program de la Nasiones Unida de intercambia petrolio per comedas en Irac.
@T La xef de un banco suiz regrete ce sua bancores ia rompe leges de imposta
@L aora_oji/2014/la_xef_de_un_banco_suiz_regrete_ce_sua_bancores_ia_rompe_leges_de_imposta
====== La xef de un banco suiz regrete ce sua bancores ia rompe leges de imposta ======
27 febrero 2014
La xef de Credit Suiss, un banco suiz, ia dise ce el "regrete profonda" ce alga de sua bancores ia rompe leges SUA de imposta.
An tal, Brady Dougan ia declara a un comite de la Senato SUA ce on ave sola "atestas sperdeda" de malcondui.
La Senato ia alega ce la banco ia aida clientes american a asconde biliones de dolares de la autoriosas de imposta.
Dougan ia confesa ce alga bancores privata ia aida americanes a asconde revenu e ativas, per evita impostas en modo nonlegal.
@T La xerca la plu defiante en istoria per un avion
@L aora_oji/2014/la_xerca_la_plu_defiante_en_istoria_per_un_avion
====== La xerca la plu defiante en istoria per un avion ======
1 april 2014
La xerca per la avion mancante MH370 de Airolinia Malaisia es "la plu defiante" en istoria, e pote dura tra semanas, seguente Angus Houston, ci organiza la opera de Australia.
La avion ia desapare a 8 marto en viaja de Kuala Lumpur a Beijing, portante 239 persones. Ecipos esplora la sude de la Mar Indian per trasas de lo. Pos studia datos de satelite, la autoriosas malaisian ia conclui ce lo ia cade ala.
On ave no informa sur la altia cual la avion ia ateni pos sua desapare de radar. An un cambia relativa peti ia ta pote altera la rapidia e consuma de carburante de la avion, e pos sete oras esta ia ta cambia enorme la locas posible de cade.
Multe relatadas de la pasajores ia esije un demostra ce la avion ia cade. Los ia espresa sua coleria sur lo cual los persepi como un manca de informa de la autoriosas. 153 pasajores ia es xines, e duples de sua relatadas ia viaja a Kuala Lumpur per xerca respondes.
Tarda a lundi, ofisiores malaisian ia publici un varia nova de la comunica final entre la controlores de trafica airal e la pilotes de la avion. A ante, los ia reporta ce la parolas ultima de la avion ia es "oce, bon note", ma los dise aora ce los ia es "bon note, malaisian tre sete zero". On no sabe la razona per la revisa.
Membros de la familias de la pasajores acusa ofisiores de malmaneja la xerca. Esta revisa la plu resente pote ajunta a sua desfida de la autoriosas malaisian.
@T La xerca per la avion mancante trova un sinial prometosa
@L aora_oji/2014/la_xerca_per_la_avion_mancante_trova_un_sinial_prometosa
====== La xerca per la avion mancante trova un sinial prometosa ======
7 april 2014
Un barcon australian cual xerca la avion mancante de Airolina Malaisian ia deteta siniales coerente con los de un rejistrador de vola (ance nomida "un caxa negra"). La barcon Ocean Shield ia oia la sinial a du veses.
Marexal Xef de Aira Angus Houston, ci gida la xerca, ia nomi esta "la trasa la plu prometosa" asta aora. Ma el ia ajunta: "Nos ancora no ia trova la avion, e nos nesesa plu confirmas."
La avion, portante 239 persones, ia es en vola de Kuala Lumpur a Beijing cuando lo ia desapare a 8 marto. On ia trova an no un peso ruinada de lo, ma, pos esamina datos de satelite, ofisiores malaisian ia conclui ce lo ia cade en la Mar Indian sude, a ueste de la site australian Perth. On no sabe perce lo ia perde la contata con controlores de trafica airal e ia fini tan distante de sua via intendeda.
Cuando la barcon ia deteta la sinial, lo ia continua oia lo tra du oras e dudes minutos ante perde lo. A pos, la barcon ia turna e retraversa la mesma area, e ia oia denova la sinial tra 13 minutos. A esta ves, lo ia distingui du siniales separada, coerente con la esiste de la du caxas negra: un cual rejistra la voses de la pilotes e un cual nota informas tecnical de vola.
La barcon ia resta en la area, ma no ia susede deteta la siniales a un ves tre. On nesesa determina la loca esata de la siniales. A pos, on va pote basi un veculo autonom per atenta trova ruinas sur la fondo de mar. Ma la sinial ia es detetada en acua con profondia de 4500 metres, cual es sirca la limita de la capasia de la veculo.
Houston ia clari: "Cisa alga dias va pasa ante cuando nos ave la informa per sabe esce nos pote confirma ce esta detetas veni de MH370. En acua multe profonda de mar, no cosa aveni rapida."
La xerca corsa contra la tempo, car la pilas de la caxas negra no va dura multe plu longa, e la rejistradores va sesa emete sua siniales.
Un barcon xines de xerca, Haixun 01, ia dise ance ce lo ia oia siniales tra un tempo corta en un area diferente a la fini de semana. On investiga ance estas.
@T La zona Sahel de Africa fronti un crise de comeda
@L aora_oji/2014/la_zona_sahel_de_africa_fronti_un_crise_de_comeda
====== La zona Sahel de Africa fronti un crise de comeda ======
4 febrero 2014
La Nasiones Unida ia apela per plu ca $2000 milion per trata 20 milion persones "sin securia de comeda" tra la zona Sahel de Africa, un area povre cual inclui Sudan e la Republica de Africa Sentral.
La Ofisia per la Coordina de Relatas Umaniste dise ce, como resulta de geras en esta paises e otra locas, la situa per multe persones resta grave.
La zona es un area partal desertal cual estende de la Atlantica en la este a la Mar Roja.
Donores ia furni pico plu ca 60% de la $1700 milion per cual la NU ia apela per Sahel en 2013.
@T Laborores carital fuji a la savana en Sudan Sude
@L aora_oji/2014/laborores_carital_fuji_a_la_savana_en_sudan_sude
====== Laborores carital fuji a la savana en Sudan Sude ======
1 febrero 2014
La asosia carital Medicistes Sin Fronteras dise ce 240 de sua empleadas ia es obligada de fuji a la savana en Sudan Sude, par causa de nonsecuria continuante.
La laborores ia es entre miles de persones ci ia atenta evade la batalias entre rebelores e fortes de governa en la stato Unity.
Violentia en la stato la plu nova de mundo ia comensa a 15 desembre, inisial como un combate entre partitos competente de la armada.
Miles de persones es aora mor e sirca 700 000 es deslocada.
@T Laborores en la Eurotunel es venenida con monosido de carbono
@L aora_oji/2014/laborores_en_la_eurotunel_es_venenida_con_monosido_de_carbono
====== Laborores en la Eurotunel es venenida con monosido de carbono ======
27 janero 2014
19 laborores ia esperia veneni con monosido de carbono cuando los ia labora tra la note en la Eurotunel. Un de los es en un state grave.
60 laborores ia es cambiante la reles en la linia entre Calais en Frans e Folkestone en England.
Un soldor ia maladi en la oras temprana de soldi, e on ia diagnose veneni par monosido de carbono.
Trafica en la tunel no ia es afetada.
@T Laborores en un fabriceria franses prisoni sua manejores
@L aora_oji/2014/laborores_en_un_fabriceria_franses_prisoni_sua_manejores
====== Laborores en un fabriceria franses prisoni sua manejores ======
7 janero 2014
Laborores de numaticos Goodyear en Frans norde teni du manejores como prisonidas en un disputa sur un projeta de clui sua fabriceria.
Los no ia permete ce Michel Dheilly, la dirijor de produi a la fabriceria en Amiens, e Bernard Glaser, la xef de recursos umana, parti de la loca.
La laborores e manejores ia negosia tra anios sur maneras de trata la fabriceria, cual no es profitosa.
La sindicato presa per un projeta de desemplea gradal, con paias plu jenerosa a la desempleadas.
On dise ce la umor en la fabriceria es "calma".
@T Laborores grevente es matada par la polisia en Camputxa
@L aora_oji/2014/laborores_grevente_es_matada_par_la_polisia_en_camputxa
====== Laborores grevente es matada par la polisia en Camputxa ======
3 janero 2014
Polisiores ia fusili contra vestores grevente en Camputxa, matante tre persones e ferinte alga otras.
La laborores ia bari un strada a sude de la capital, Phnom Penh, e ia scaramuxa con la polisia. Los protesta per esije ce on dupli la salario minima.
Camputxa ave sirca 500 000 laborores en la industria de vestes, cual es un fonte esensal de revenu nasional.
Los esije un salario minima de $160 per mense. La governa ia ofre sola un aumenta a sirca $100.
@T Laborores SUA de Volkswagen vota contra sindicati
@L aora_oji/2014/laborores_sua_de_volkswagen_vota_contra_sindicati
====== Laborores SUA de Volkswagen vota contra sindicati ======
16 febrero 2014
En un move surprendente, laborores SUA ia vota contra junta se a un sindicato a un fabriceria de autos de Volkswagen, en la stato Tennessee.
La vota impedi atentas par la sindicato Laborores Unida de Auto per organiza fabricerias de posese stranjer en la SUA sude.
Espertas ia previde ce la vota ta favore la sindicati, pos implica de suporta par Volkswagen per la idea.
La vota ia fronti un resiste par politicistes republiciste, ci ia razona ce lo va retarda la crese economial.
@T Laborores sudafrican de platino greve sur paia
@L aora_oji/2014/laborores_sudafrican_de_platino_greve_sur_paia
====== Laborores sudafrican de platino greve sur paia ======
24 janero 2014
La sindicato la plu grande en la campo de platino de Sudafrica ia clama un greve sur paia.
La greve es la plu grande en la campo, de pos un greve en Marikana en 2012 cual ia deveni un masacra. 34 escavores ci ia partisipa en un protesta nonlegal sur salarios ia es fusilida par la polisia.
La greve en jovedi va para la produi par la tre companias xef de platino en la mundo.
Pos un judi de corte, on ia pospone un greve diferente en la campo de oro, ance intendeda per jovedi.
@T Lampo causa un esplode matante de armas en RD Congo
@L aora_oji/2014/lampo_causa_un_esplode_matante_de_armas_en_rd_congo
====== Lampo causa un esplode matante de armas en RD Congo ======
27 janero 2014
En la Republica Democrata de Congo, un esplode a un reserva de armas ia mata a la min 20 persones.
La esplode ia aveni a venerdi cuando un raio de lampo ia causa un focon a un base de armada en la site Mbuji-Mayi.
Plu ca 50 persones ia es ance ferida, e casas ia es destruida.
La pais luta per recovre de un gera cual ia mata miliones entre 1998 e 2003. Lo ave recursos enorme de mineral, ma la majoria de sua popla es povre.
@T Lampo mata tre arjentinas
@L aora_oji/2014/lampo_mata_tre_arjentinas
====== Lampo mata tre arjentinas ======
10 janero 2014
Un colpa de lampo ia mata tre persones e ia feri plu ca 20 otras en Arjentina.
La vitimes ia es protejente se de un tempesta sur la plaia a Villa Gesell, un vila a sude-este de Buenos Aires, cuando la lampo ia colpa.
Atestores descrive un "ruido asustante", disente ce alga persones ia es lansada tra la aira par la fenomeno.
Multe de la feridas ia es scaldada. Du femes ia es sever scaldada.
@T Legores ungarian aproba un acorda nucleal con Rusia
@L aora_oji/2014/legores_ungarian_aproba_un_acorda_nucleal_con_rusia
====== Legores ungarian aproba un acorda nucleal con Rusia ======
7 febrero 2014
Parlamentores ungarian ia aproba un scema controversa, finansiada par Rusce, per construi du reatadores nova a la sola sentro nucleal en la pais.
Su la acorda, Rusia va presta asta 10 mil milion euros a Ungaria per construi la reatadores en la site Paks.
Ministros dise ce la projeta -- cual on ia aseta con 256 votas contra 29 -- va redui la depende de fontes stranjer.
Ma criticistes razona ce lo va fa ce Ungaria depende completa de Rusia, cual es ja sua furnor xef de petrolio e gas.
@T Lemures pote es salvada par turisme
@L aora_oji/2014/lemures_pote_es_salvada_par_turisme
====== Lemures pote es salvada par turisme ======
22 febrero 2014
Conservores de natur dise ce la lemures de Madagasicara, la primates la plu perilida de mundo, pote es salvada de estingui par ecoturisme.
La animales es peluxetin e ave oios grande. Los parteni unica a la isola, ma sua cuantia ia diminui estrema en anios resente.
Rexercores ia desveli un projeta cual combina turisme con laboras aumentada de conserva. La projeta va custa $7,6 milion.
La siensa conose plu ca sento spesies de lemur. La majoria esiste en cuantias perilinte basa, xef pos perde sua abitadas par causa de esplota nonlegal de forestas.
@T Leones risca estingui en Africa ueste
@L aora_oji/2014/leones_risca_estingui_en_africa_ueste
====== Leones risca estingui en Africa ueste ======
15 janero 2014
La cuantia de leones en Africa ueste ia diminui desastrosa. Un esamina nova ia trova ce sola sirca 400 resta en la area.
Car min ca 250 leones matur esiste, on es consernada ce la popla intera pote desapare.
La rexerca ia es fada tra plu ca ses anios par un organiza nonprofitante en 17 paises, de Senegal a Nijeria.
Leones de Africa ueste es jenetical distinguida de otras en la continente.
@T Liberia isoli se par causa de Ebola
@L aora_oji/2014/liberia_isoli_se_par_causa_de_ebola
====== Liberia isoli se par causa de Ebola ======
29 julio 2014
La plu de locas do on pote traversa la frontera en Liberia ia es cluida. Comunias atacada par la virus Ebola va es isolida per atenta para la estende de la maladia.
On prepara ance sentros de esamina a la poca locas major de entra cual va resta abrida, per esemplo la airoporto xef.
Entretempo, Arik Air, la compania la plu grande de volas en Nijeria, ia pospone tota aviones a Liberia e Siera Leon pos la vola de un om con Ebola a la airoporto de Lagos en Nijeria en la semana pasada.
La virus ia mata a la min 660 persones en Africa Ueste de pos febrero 2013.
La aveni ia comensa en Gine sude, de do lo ia estende a Liberia e Siera Leon. Lo es la plu matante de mundo asta aora.
Tota locas de entra a Nijeria es aora estrema vijilante.
@T Libia ia destrui tota sua armas cimical
@L aora_oji/2014/libia_ia_destrui_tota_sua_armas_cimical
====== Libia ia destrui tota sua armas cimical ======
5 febrero 2014
La ministro de esternas de Libia ia anunsia ce la pais ia destrui tota sua armas cimical a 26 janero.
Mohamed Abdelaziz ia dise ce esta inclui bombas e cartuxes plenida con gas mostardin.
En 2004, Libia ia dise ce lo ave 25 tones de sulfur mostardin, e alga miles de bombas vacua per usa con recursos de gera cimical.
Tripoli ia promete aboli tota sua armas cimical cuando lo ia suscrive la Acorda de Armas Cimical.
@T Libia recomensa un campa de petrolio pos protestas
@L aora_oji/2014/libia_recomensa_un_campa_de_petrolio_pos_protestas
====== Libia recomensa un campa de petrolio pos protestas ======
6 janero 2014
Libia ia recomensa produi petrolio a El Sharara en la sude de la pais, pos la fini de un bloci par protestores.
La Corpora Nasional de Petrolio dise ce la campo produi un cuantia corespondente a 60 mil bariles per dia. Lo espera ateni la capasia masima de esflue, de sirca 340 mil bariles per dia, pos tre dias.
De pos julio, blocos de stasiones de petrolio ia restrinje sever la esportas de petrolio, la fonte xef de revenu libi.
Esta aveni en cuando un governa elejeda sentral atenta vinse asta 1700 grupos diversa de gerores armada, de cual cada ave sua propre goles, pos la revolta e despone de Muammar Gaddafi en 2011.
@T Lo es un mito falsa ce povres no pote susede en scola
@L aora_oji/2014/lo_es_un_mito_falsa_ce_povres_no_pote_susede_en_scola
====== Lo es un mito falsa ce povres no pote susede en scola ======
4 febrero 2014
Un analise de esaminas scolal par Andreas Schleicher, de la Organiza per Colabora e Developa Economial, ia mostra ce lo no es nonevitable ce studiantes plu povre es min susedosa en scola.
Schleicher ia dise ce la resultas alta par enfantes privada en alga paises asian mostra lo cual on pote ateni.
En matematica, la studiantes la min vantajosa en Shanghai ia ave resultas egal a los de studiantes rica en la Rena Unida.
Schleicher ia comenta ce esta "esposa como falsa la mito ce la povria es la destina".
@T Lo pare ce India ia elimina sua poliomielite
@L aora_oji/2014/lo_pare_ce_india_ia_elimina_sua_poliomielite
====== Lo pare ce India ia elimina sua poliomielite ======
14 janero 2014
En India, tre anios ia pasa de pos la caso de poliomielite la plu resente reportada. Esta es un ateni importante en la batalia global contra la maladia.
On regarda lo como confirmante un de la susedes la plu grande de sania publica en India, realida par un program vasta e sustada de imuni.
En 2012, la Organiza Mundal de Sania ia sutrae India de sua lista de paises do la virus es endemica e sirculi libre. Pacistan, Afganistan e Nijeria resta en la lista.
An con la susede en India, espertas teme un crese nova de poliomielite en otra partes de la mundo.
@T Lubnan aresta un gidor jihadiste
@L aora_oji/2014/lubnan_aresta_un_gidor_jihadiste
====== Lubnan aresta un gidor jihadiste ======
1 janero 2014
Autoriosas lubnani ia aresta Majid al-Majid, la gidor de un grupo jihadiste saudi cual ia indica sua culpablia per la bombi umana de la ambasada de Iran en novembre.
La ataca ia mata 23 persones, incluinte la diplomata cultural de Iran.
Investigores ia identifia la du bombores como un lubnani liada a grupos suni noncomprometente, e un filastini liada a xec Ahmed al-Assir, un prete suni ci ia fuji.
@T Lubnan ave un governa nova pos menses de negosias
@L aora_oji/2014/lubnan_ave_un_governa_nova_pos_menses_de_negosias
====== Lubnan ave un governa nova pos menses de negosias ======
15 febrero 2014
En Lubnan, un governa nova ia es formida pos des menses de negosias.
Tammam Salam, la ministro xef, va gida un consilio egal divideda entre du partitos oposante: un grupo favorente Suria, gidada par Hezbollah, e la promove "14 Marto", gidada par Saad Hariri, cual favore la ueste.
Oto otra ministros es proposada par presidente Michel Suleiman, ci ave un opina media.
Lubnan ia es colpada par violentia causada par la gera en Suria, cual envolve ambos lados.
@T Madonna demanda pardona pos usa un parola raziste
@L aora_oji/2014/madonna_demanda_pardona_pos_usa_un_parola_raziste
====== Madonna demanda pardona pos usa un parola raziste ======
20 janero 2014
Madonna, la stela de pop, ia demanda pardona pos usa un parola raziste en refere a sua fio, en un ajunta a Instagram.
La cantor ia ajunta un foto de Rocco Ritchie, sua fio de 13 anios, en ata de boxe en la note de venerdi. El ia usa la descrive ofendente en un parola-eticeta cual ia acompania la imaje.
El ia dise: "Me no ia intende un ofende raziste. Me no es un raziste. On no pote defende la usa de la parola."
El ia sutrae rapida la foto, ma ia reajunta lo con un testo nova cual ia conteni otra parolas ofendente. Final, el ia sutrae intera la cosa, e ia demanda pardona.
@T Maduro invita Obama a discutes sur relatas
@L aora_oji/2014/maduro_invita_obama_a_discutes_sur_relatas
====== Maduro invita Obama a discutes sur relatas ======
22 febrero 2014
Nicolás Maduro, la gidor de Venezuela, ia invita Barack Obama, la presidente de la SUA, a partisipa en discutes intendeda per solve la problemes entre la du paises.
Maduro ia dise ce le consenta ta aida "esposa la veria a sur la table".
El ia acusa conservistes SUA e organizas jornaliste de conspira per suverti sua governa.
Plu temprana en venerdi, Venezuela ia cansela la permetes de reportores de CNN ci analise la crise de la pais. Oto persones ia mori en protestas resente.
@T Maliki resinia per fini la crise political en Irac
@L aora_oji/2014/maliki_resinia_per_fini_la_crise_political_en_irac
====== Maliki resinia per fini la crise political en Irac ======
15 agosto 2014
Nouri Maliki, la ministro xef de Irac, ia resinia pos oto anios de potia. On espera ce esta va fini un crise political en Baghdad. La NU e la SUA ia bonveni sua resinia.
On ia culpa sua refusa plu temprana de resinia per la profondi de la crise.
La governa no ia susede para ce gerores de la Stato Muslim saisi areas vasta en Irac norde. Esta ia causa un crise de securia e ia forsa cisa 1,2 milion iracis de sua casas.
Aparente en la televisa nasional con otra politicistes de la majoria xia, Maliki ia parla sur la menasa "teroriste" grave, e ia anunsia alora sua parti.
A ante, el ia insiste ce el debe reteni la direto de formi la governa, car el gida la partito la plu grande en parlamento.
Sua oto anios de potia ia es frecuente dividente, car on ia acusa ce sua governa ia favore la majoria xia. Oposores dise ce sua politicas setal ia provoca la crise presente.
En otra novas relatada, ministros de la UE en Brusseles va xerca un aproba per la transporta de armas a curdis iraci ci batalia la Stato Muslim. E la Consilio de Securia de la NU va vota sur un deside ru cual ta puni la enscrive e la finansia de combatores stranjer a la Stato Muslim.
@T Mandela lasa un propria de 46 milion randes
@L aora_oji/2014/mandela_lasa_un_propria_de_46_milion_randes
====== Mandela lasa un propria de 46 milion randes ======
4 febrero 2014
Nelson Mandela, la presidente pasada de Sudafrica, ia lasa un propria inisial valuada a 46 milion randes ($4,13 milion).
La fidusia de sua familia va reseta $130 000, con paias par direto de autor. Otras ci va benefica inclui la Congresa Nasional African, empleadas personal, e alga scolas.
La esecutores de la atesta ia dise ce probable la sposa tre de Mandela, Graca Machel, no va reclama sua parte de la propria, an si el merita un dui de lo.
Mandela ia mori en desembre, a la eda de 95.
@T Maria von Trapp mori
@L aora_oji/2014/maria_von_trapp_mori
====== Maria von Trapp mori ======
23 febrero 2014
La membro ultima survivente de la Cantores de la Familia Trapp ia mori a la eda de 99.
Maria von Trapp ia mori a sua casa en Vermont en martedi. Sua frate ia descrive el como "un fem merveliosa ci ia es un de la poca persones vera bon."
La familia ia fuji de la ocupa nazi en Austria en 1938, e ia presenta cantas tra la SUA.
Sua esperias ia inspira La sona de Musica, cual ia es un teatral musical de 1959 e un filma multe susedosa de 1965.
@T Marit Bjørgen gania sua medalia ses de oro
@L aora_oji/2014/marit_bjorgen_gania_sua_medalia_ses_de_oro
====== Marit Bjørgen gania sua medalia ses de oro ======
23 febrero 2014
En la Olimpiales Invernal, Marit Bjørgen, un corsor norsce de sci, ia gania la corsa coletiva fema de 30 cilometres.
El ia deveni aora la atleta fema con la plu medalias de Olimpiales Invernal de sempre. El ave 33 anios.
Esta ia es sua medalia ses de oro, e la medalia des de sua colie intera.
El ia fini la corsa en un ora, 11 minutos, e 5,2 secondos. La du sucampiones, Therese Johaug e Kristin Størmer Steira, es ance norsce.
@T Matteo Renzi nomi sua ministros
@L aora_oji/2014/matteo_renzi_nomi_sua_ministros
====== Matteo Renzi nomi sua ministros ======
22 febrero 2014
Matteo Renzi, la gidor de la Partito Democrata italian, ia aseta formal la gida de un governa nova, e ia nomi la membros de sua consilio.
Con sola 39 anios, Renzi va es la ministro xef la plu joven de Italia. On va indui el en saturdi.
El gida un partito sinistriste sentral, ma el ia spende alga dias en negosia con otra partitos per organiza sua alia.
Renzi ia despone sua colaboror de partito Enrico Letta, ci ia gida Italia tra no plu ca 10 menses.
@T Matteo Renzi va deveni la ministro xef nova de Italia
@L aora_oji/2014/matteo_renzi_va_deveni_la_ministro_xef_nova_de_italia
====== Matteo Renzi va deveni la ministro xef nova de Italia ======
17 febrero 2014
Giorgio Napolitano, la presidente de Italia, ia demanda ce Matteo Renzi, la maior de Firenze, formi un governa nova.
Enrico Letta ia resinia como ministro xef en venerdi, pos es desponeda par un vota clamada par Renzi a un asembla de sua Partito Democrata.
Renzi ia es nunca elejeda como un parlamentor. El va debe aora fa un acorda con la membros de la alia pasada de Letta.
El va comensa discutes en martedi, e pote es induida en jovedi.
@T Membros de Pussy Riot es librida en Sochi
@L aora_oji/2014/membros_de_pussy_riot_es_librida_en_sochi
====== Membros de Pussy Riot es librida en Sochi ======
19 febrero 2014
On ia libri du membros de Pussy Riot, un bande protestante rusce, ci ia es arestada en lundi, prosima a la site Sochi.
Maria Alyokhina e Nadezhda Tolokonnikova ia es tenida car on ia suspeta los de fura.
La duple ia es condenada per protesta contra presidente Putin en 2012.
Los ia fa sua protesta con otra membros de la bande en la catedral la plu grande de Moscva. On ia libri los de prison en desembre.
@T Membros de un tribu nativa en Brasil es arestada per omiside
@L aora_oji/2014/membros_de_un_tribu_nativa_en_brasil_es_arestada_per_omiside
====== Membros de un tribu nativa en Brasil es arestada per omiside ======
1 febrero 2014
La polisia en la area de Amazonas en Brasil ia aresta sinco membros nativa de la tribu Tenharim. Los es acusada de mata tre contratores ci manca ja de la media de desembre.
La tribu nega un envolve en la desapare de la tre omes.
Grupos local ia alega ce la tribu ia mata la tre laborores de governa en retalia per la mata de Ivan Tenharim, la gidor de la tribu, craseda par auto en 3 desembre.
La aveni ia causa tumultas en Humaita, un site prosima.
@T Membros pasada de Eta regrete sua atas de gera
@L aora_oji/2014/membros_pasada_de_eta_regrete_sua_atas_de_gera
====== Membros pasada de Eta regrete sua atas de gera ======
5 janero 2014
Gerores pasada de Eta, la grupo separiste euscara, ia espresa regrete per sua atas de violentia.
La sirca 70 prisonidas resente librida ia dise ce los es consensa de la sufri e dana cual los ia causa, e ce los aseta la culpablia intera per la resultas de la violentia.
On ia leje la declara a la encontra prima a cual la prisonidas pasada ia apare como un grupo.
La governa ia condena la reuni, descrivente lo como un "asembla de sorsores".
@T Merkel condena un insulta par la SUA a la UE
@L aora_oji/2014/merkel_condena_un_insulta_par_la_sua_a_la_ue
====== Merkel condena un insulta par la SUA a la UE ======
8 febrero 2014
Angela Merkel, la canselor de Deutxland, ia descrive como "intera nonasetable" un insulta parente par un ofisior SUA sur atentas de la Uni European per reconsilia la crise en Ucraina.
Victoria Nuland ia demanda pardona pos refere despetante a la rol de la UE en un conversa privata con la ambasador SUA a Ucraina.
On ia publici enlinia un rejistra de la conversa. La SUA ia fa indicetas ce Rusia ia es envolveda en escuta e esposa lo.
La UE e la SUA partisipa en discutes per fini menses de turba en Ucraina.
@T Merkel dise ce combate antisemitisme es un debe deutx
@L aora_oji/2014/merkel_dise_ce_combate_antisemitisme_es_un_debe_deutx
====== Merkel dise ce combate antisemitisme es un debe deutx ======
15 setembre 2014
Angela Merkel, la canselor de Deutxland, ia informa un asembla en Berlin ce combate antisemitisme es la debe de cada person deutx.
La protesta contra antisemitisme ia aveni a 75 anios pos la comensa de la Gera Mundal Du, en cual ses milion iudis ia es matada par Deutxland Nazi.
Reatante a un aumenta de atacas contra persones iudi, Merkel ia dise ce "la tolera" es la mesaje coreta per Deuxtland e la mundo.
La asembla ia aveni a la Porton Brandenburg, su la bandera "Steh auf! Nie wieder Judenhass!" ("Sta! Nunca denova un odia contra iudis!"). Lo ia aveni a la mesma tempo como un confere de la Congresa Iudi Mundal en la capital.
Merkel ia comensa sua parla par descrive la sento mil iudis abitante Deutxland como "un tesoro nasinonal". El ia dise a un fola de sirca 5000 persones: "Amis, visinas e colaborores iudi, senti ce vos es a casa asi."
Ma el ia dise ce aora la pais conteni "an no un instituida iudi" cual no nesesa es protejeda par la polisia en la clima presente.
"La critica valida de la atas political de un governa -- o lo de nos, o lo de la stato Israel -- es bon. Ma si on usa lo sola per capi sua odia contra un otra popla, sua odia contra persones iudi, alora lo es un malusa de nosa diretos fundal de libria de opina e asembla."
La crese de antisemitisme segue la gera en Gaza. A media de la bombarda de Gaza par Israel en julio, la comunia iudi de Deutxland ia condena "un esplode de malvole e odia violente contra iudis" a asemblas profilastini.
En la semana pasada, on ia trova un suastica e la parolas "Iudis" e "Sieg Heil" (un slogan nazi) jetada en pinta sur la construida de un jornal local en Cottbus, un site este.
@T Merkel proposa un rede european de comunica
@L aora_oji/2014/merkel_proposa_un_rede_european_de_comunica
====== Merkel proposa un rede european de comunica ======
16 febrero 2014
Angela Merkel, la canselor de Deutxland, ia proposa construi un rede de comunica european per aida boni la proteje de datos.
Esta ta evita ce e-postas e otra datos pasa automata tra la Statos Unida de America.
En sua podcasta semanal, el ia dise ce el va leva la idea a mercurdi con François Hollande, la presidente franses.
Multe en Europa ia deveni estrema consernada par revelas de monitori coletiva par la Ajenteria de Securia Nasional de la SUA.
@T Mexico aresta un gidor de un cartel de drogas
@L aora_oji/2014/mexico_aresta_un_gidor_de_un_cartel_de_drogas
====== Mexico aresta un gidor de un cartel de drogas ======
31 janero 2014
Fortes de securia mexican ia aresta un de la gidores de la Jenera Nova de Jalisco, un cartel de drogas.
On crede ce Ruben Oseguera Gonzalez es la gidor suordinada en la organiza criminal cual sua padre gida.
El ia es arestada en un opera major cual ia envolve deses de soldatos.
La cartel es liada a la contrabanda vasta de drogas longo la costa pasifica de Mexico.
@T Mexico protesta contra la desapare de studiantes
@L aora_oji/2014/mexico_protesta_contra_la_desapare_de_studiantes
====== Mexico protesta contra la desapare de studiantes ======
9 otobre 2014
En sites tra Mexico, miles de persones ia fa protestas contra la desapare de studiantes en Iguala, un vila sude, en setembre.
La studiantes ia scaramuxa con polisiores en sua propre protesta, e on no ia vide los pos cuando los ia es prendeda a via en autos de polisia.
Sentos de patruliores estralegal ia junta se a la xerca, disente ce los va xerca en cada casa.
Entretempo, on fa probas siensal a deses de corpos trovada en tombas nonprofonda, prosima a la vila en la semana pasada. On teme ce la corpos es de la studiantes.
En la Site Mexico, membros de la familias ia gida un prosegue, portante fotografis de la mancantes. Protestas ia aveni ance en multe otra sites, incluinte un marxa silente par la Zapatistas, un grupo rebelante nativa.
La desapare e la situa ambiente ia causa un xoca en la pais.
La studiantes, de un scola de enseniores en Ayotzinapa en la stato Guerrero, ia viaja a la vila prosima Iguala per protesta contra lo cual los ia persepi como metodos prejudosa de lua enseniores.
Pos un dia de protestas, los ia vole revade a sua scola. Membros de la uni de studiantes dise ce los ia embarca tre buses local, ma la polisia dise ce la studiantes ia saisi la buses.
En la oras seguente, ses persones ia mori cuando omes armada ia fusili contra la tre buses e la bus de un ecipo de futbal. Tre studiantes, un futbalor, la gidor de un de la buses, e un fem en un taxi ia es matada par la xutas. Multe plu ia es ferida.
La polisia munisipal ia xasa la studiantes, e on crede ce los ia fusili contra los. On ia teni dudes-du ofisiores en relata a esta.
Pos esta avenis a la note de 26 setembre, on ia reporta ce 57 studiantes manca. A 30 setembre, on ia anunsia ce 13 de los ia reveni. On ia trova ce un nom apare en la lista a du veses, donce 43 studiantes resta ancora mancante.
A 4 otobre, avocatos prosedente ia anunsia la descovre de ses tombas basa cual conteni la restas de 28 persones, cisa plu. La corpos es tan ardeda ce on ancora no ia pote identifia los.
La scola de la studiantes ave un istoria de ativia sinistriste, ma on no sabe esce la studiantes ia es atacada per sua credes political.
Alga pensa ce los ia coleri un gang local de drogas par refusa paia mone de estorse.
Otras suspeta ce los ia es atacada par teme ce los pote disturba un parla a ofisiores major local par María de los Ángeles Pineda Villa, la sposa de la maior de Iguala.
On no ia vide el e sua sposo, José Luis Abarca Velázquez, de pos 26 setembre. La polisia xerca los.
@T Miama libri 3000 prisonidas per pas e stablia
@L aora_oji/2014/miama_libri_3000_prisonidas_per_pas_e_stablia
====== Miama libri 3000 prisonidas per pas e stablia ======
7 otobre 2014
La governa de Miama ia anunsia ce lo libri plu ca 3000 prisonidas.
Un mesaje a la paje de Facebook de Ye Htut, la ministro de informa, ia dise ce presidente Thein Sein ia pardona los per pas e stablia.
On crede ce alga de la prisonidas es ofisiores pasada de securia militar. Ma la plu de los ia es condenada per crimines minor.
La plu de prisonidas political en Miama (ance conoseda como Burma) ia es ja librida como parte de la prosede de reformi.
Grupos de diretos umana estima ce on teni ancora alga sentos.
Thein Sein ia promete libri tota prisonidas political. El ia deveni presidente en 2010 en un eleje cual ia causa la sustitui de un governa nonmilitar (ma militar suportada) per la rena militar pasada.
En anios resente, Miama ia destensa ance sua restrinjes a jornalistes, e partitos oposante ia rejunta se a la prosede political. En responde, la comunia internasional ia reposa la plu de sua punis contra la pais.
An tal, ativistes per diretos umana ia insiste ce on debe libri cada prisonida political. On no sabe esata cuanto tal persones resta en prison.
@T Miama para la labora de Dotores Sin Fronteras en Rakhine
@L aora_oji/2014/miama_para_la_labora_de_dotores_sin_fronteras_en_rakhine
====== Miama para la labora de Dotores Sin Fronteras en Rakhine ======
28 febrero 2014
La governa miama ia suspende la operas de un de la ajenterias de aida cual labora en la stato Rakhine, do multe violentia aveni.
Un portavose de la presidente ia alega ce Médecins Sans Frontières (Dotores Sin Fronteras) ia es prejudosa e favore la minoria muslim, la rohingias.
La asosia carital es un de la furnores major de aida medical en Rakhine.
Lo ofre aida urjente a deses de miles de persones rohingia deslocada par violentia resente.
@T Microsoft compra la compania de la jua Minecraft
@L aora_oji/2014/microsoft_compra_la_compania_de_la_jua_minecraft
====== Microsoft compra la compania de la jua Minecraft ======
16 setembre 2014
Microsoft ia compra Mojang, la compania svensce cual crea Minecraft, un jua video popular, per $2500 milion.
La jua ia vende ja plu ca 54 milion copias. Juores construi strutures con blocos simil a los de Lego, esplora un mapa grande, e batalia otras.
La tre fundores de Mojang va parti de la compania, cual ia serti fanes ce "tota va vade bon" an tal.
Alga analistes divina ce la compra es intendeda per atrae plu usores a la aparatos Windows Phone de Microsoft. A un anio ante aora, Microsoft ia compra Nokia, un compania suomi de telefonetas.
Minecraft es un de la programes la plu bon vendeda no sola en la boteca iOS de Apple ma ance en Google Play per Android. Resente, on ia aumenta plu la cuantia de vendes par publici la jua ance per Xbox One e PlayStation 4.
En la mense pasada, lo ia es la numero tre de la juas de consol la plu popular.
La compania Mojang ia es fundida en 2009. Lo emplea sirca 40 persones e ia fa un profita de plu ca $100 milion en 2013.
Microsoft ia dise ce la empleadas de Mojang va membri en sua propre studio de juas.
En la pasada, Markus Persson, la fundor prima de Mojang, ia critica Microsoft e ia comenta ce la mercato per telefonetas Windows es tan pico ce lo no merita la labora de developa programes per lo.
Minecraft ave un culto grande e zelosa. Multe de sua fanes ia reata coler a lo cual los regarda como un saisi corporal de un compania nondependente e de spirito comunial.
Un fan ia dise: "La jua no va custa sola plu mone: lo va custa ance la empleas de persones. Multe persones jua Minecraft e publici esta en YouTube como sua carera, ma si Microsoft rena lo, on va encontra serta problemes de diretos de autor."
Ma alga fanes ia responde ce Microsoft pote dedica recursos plu grande a renovi e crese la jua.
@T Microsoft nomi Satya Nadella como la xef nova
@L aora_oji/2014/microsoft_nomi_satya_nadella_como_la_xef_nova
====== Microsoft nomi Satya Nadella como la xef nova ======
5 febrero 2014
Microsoft ia anunsia ce sua dirijor xef seguente va es Satya Nadella.
Nadella, ci ia nase en India, es presente la gidor de la departe de Nube e Emprende, do on construi plataformas de computa e utiles de developa.
El segue Steve Ballmer, ci ia anunsia sua intende de resinia en la anio pasada.
Bill Gates, la fundor de la compania, ia dise ce on ave "no person plu bon per gida Microsoft". El mesma va resinia como presidente, ma va aseta un rol nova como avisor sur tecnolojia.
@T Migrantes a Elas afoca cuando sua barcos inversa
@L aora_oji/2014/migrantes_a_elas_afoca_cuando_sua_barcos_inversa
====== Migrantes a Elas afoca cuando sua barcos inversa ======
6 maio 2014
La gardacosta elinica dise ce du barcos portante migrantes ia inversa en la Mar Ejean. A la min 22 persones ia afoca, e sete otras manca. On ia salva 36 survivores de la mar, e la xerca continua.
Elas es un porton major per migrantes e refujadas ci atenta ateni la Uni European. Multe traversa la mar de Turcia, e asidentes aveni frecuente.
La trafica maral de refujadas ia crese agu en la anio pasada, par causa de controlas plu sever a la frontera teral entre Elas e Turcia a la norde. La gera continuante en Suria ia es ance un causa contribuinte.
En esta caso, la du barcos ia afonda a lundi, a un distantia de sirca milias maral de la isola elinica Samos, prosima a la costa turces. On ancora no sabe la nasionalia de la migrantes.
Barcos de gardacosta, barcos de pexa, du elicotores de xerca e salva, e un barcon de turi aida la xerca per survivores.
Elas, Italia, e Malta ia demanda repeteda ce la otra paises en la UE fa plu per aida los a maneja la cuantias grande de migrantes cual ariva a sua costas. La barcos es usual suprafolida e organizada par traficores en Turcia ci fatura miles de dolares per la traversa perilosa.
Elas ia aumenta la securia de sua frontera con Turcia en agosto 2012.
La UE dise ce lo investa a plu patrulias maral, pos cuando plu ca 400 persones ia afoca en du ruinas de barco a Lampedusa, un isola italian, en otobre 2013.
@T Migrores african invade un enclave espaniol
@L aora_oji/2014/migrores_african_invade_un_enclave_espaniol
====== Migrores african invade un enclave espaniol ======
28 febrero 2014
Plu ca 200 migrores de Africa susaharan ia entra par forsa a la enclave espaniol de Melilla, en Africa norde, par trepa a traversa de la serca fronteral.
Esta es un de la arivas la plu grande de migrores a Melilla en anios resente.
Multe de la arivores ia sufri talias en trepa. Los ia lansa petras, bastos, e botelas a polisiores.
En esta mense, cosas simil ia aveni ja en Melilla e Ceuta, un otra site espaniol en la area.
@T Migrores african protesta en Israel
@L aora_oji/2014/migrores_african_protesta_en_israel
====== Migrores african protesta en Israel ======
6 janero 2014
Miles de migrores african ia marxa pasosa en la site Tel Aviv per protesta contra sua trata par la governa israeli.
La protestores, xef ertri e sudani, es coler sur un lege cual permete ce on prisoni migrores nonlegal tra un anio sen prosede. Los esije la direto de labora legal, e ce on trata sua demandas de refuja.
Los ia cria "Tota de nos es refujadas" e "Libria, si! Prison, no!"
Alga de la migrores es ja en Israel tra anios, e ia aseta postos de paia basa. Los ia fuji de persegue e batalia en sua paises de nase.
@T Migrores african scaramuxa en Calais
@L aora_oji/2014/migrores_african_scaramuxa_en_calais
====== Migrores african scaramuxa en Calais ======
6 agosto 2014
En Calais, un site de Frans norde, scaramuxas entre migrores african ia lasa plu ca 50 feridas.
Un combate ia comensa a la sera de lundi a un sentro de distribui comedas. Polisia ia para lo, ma lo ia continua a pos tra la note.
Sentos de migrores abita en campas nonformal en la porto Calais, de do los atenta traversa nonlegal la Manga per ateni Britan.
La polisia ia spende menses en atenta elimina la campas, ma la migrores dise ce los ave no otra loca per vive.
Esta combate la plu resente ia aveni entre migrores sudani e ertri. On ia envia polisiores de tumulta per para lo a la ves du.
Un aveni simil ia es esperiada a soldi. Sirca 13 persones ia es alora ferida.
En maio, pos un judi de corte, la autoriosas ia atenta sorti la migrores de la campas prosima a la porto. Ma multe de los ia move simple a areas diferente en la site.
@T Migrores ci no vole revade a Italia es suportada par corte brites
@L aora_oji/2014/migrores_ci_no_vole_revade_a_italia_es_suportada_par_corte_brites
====== Migrores ci no vole revade a Italia es suportada par corte brites ======
20 febrero 2014
Cuatro xercores de refuja, ci defia sua deporta a Italia par regulas de Uni European, ia reseta un suporta de la Corte Suprema de la Rena Unida.
La corte ia judi ce on debe reesamina la caso, car on teme ce los risca sufri tratas "nonumana".
La cuatro -- un irani e tre ertris -- ia ariva en la Rena Unida par via de Italia.
La lege de la UE dise ce los debe revade a Italia, do los ia xerca prima sua refuja, afin on trata sua xercas.
@T Migrores mori, tirada par la gardacosta elinica
@L aora_oji/2014/migrores_mori_tirada_par_la_gardacosta_elinica
====== Migrores mori, tirada par la gardacosta elinica ======
23 janero 2014
La Nasiones Unida ia demanda per un investiga pos cuando un barco de migrores ia inversa, tirada par un barcon de la gardacosta elinica. Asta des du persones ia mori.
On ia trova du corpos, ma 10 plu persones ia manca pos la aveni prosima a la isola Farmakonisi en lundi. On ia salva 16 persones.
La gardacosta dise ce, en clima mal, migrores es plu secur si on no move los de sua propre barco.
Ofisiores elinica ia dise ce migrores panicante ia causa mesma la inversa de sua barco.
@T Migrores salvada refusa desembarca a Cipros
@L aora_oji/2014/migrores_salvada_refusa_desembarca_a_cipros
====== Migrores salvada refusa desembarca a Cipros ======
26 setembre 2014
Sirca 300 persones, sur ci on crede ce los es refujadas suri, refusa desembarca un barcon de turi cual ia salva los prosima a la costa de Cipros. Los insiste ce on prende los a Italia.
La departe ciprica de defende ia dise ce 52 enfantes ia es sur un barco peti de pexa cual ia envia un sinial de radio per aida.
De la 345 migrores estraeda de la mar, sirca 65 ia desembarca volente a Lemesos, e on ia prende los par bus a la campa Kokkinotrimithia, prosima a Nicosia.
La barcon Salamis Filoxenia es aora en la porto de Lemesos, e negosias con los ci refusa parti continua oji.
Entretempo, 300 pasajores rusce ci ia intende continua sua turi a Haifa en Israel ia trova ce sua viaja es canselada. On ia move los a oteles en Lemesos.
Aidores ia dise ce oto de la salvadas ia desidrata alga, e otras esperia problemes minor de sania.
On ia descovre la barco de pexa en mar turbosa a 100 cilometres a sude de la vila Paphos.
En esta anio, on ia vide un aumenta grande en la cuantia de migrores ci traversa la Mediteraneo en barcos suprafolida -- spesial persones ci fuji de la gera en Suria. La majoria ia dirije se a Italia e Malta.
@T Miles marxa tra Caracas e per suporta e per oposa la presidente
@L aora_oji/2014/miles_marxa_tra_caracas_e_per_suporta_e_per_oposa_la_presidente
====== Miles marxa tra Caracas e per suporta e per oposa la presidente ======
16 febrero 2014
En Caracas, la capital de Venezuela, suportores e oposores de Nicolás Maduro, la presidente, ia marxa tra la stradas en du protestas competente.
La tensa political crese en la pais.
Tre persones ia es matada en protestas antigovernal en mercurdi, e on ia aresta 100 studiantes.
Maduro ia acusa la oposa de provoca turbas como parte de projeta un colpa de stato. El ia recomenda ce sua suportores marxa per pas a saturdi.
@T Milion refujadas suri ia rejistra se en Lubnan
@L aora_oji/2014/milion_refujadas_suri_ia_rejistra_se_en_lubnan
====== Milion refujadas suri ia rejistra se en Lubnan ======
3 april 2014
La Nasiones Unida dise ce la cuantia de refujadas ci ia fuji de Suria e rejistra se en Lubnan ia suprapasa un milion. Lubnan ave aora la consentra la plu alta de refujadas per person, de mundo. Lubnan es un nasion peti con multe propre problemes, e la efeto a lo es enorme.
Cuasi un dui de la popla de Suria, sirca 9,5 milion persones, ia fuji de sua casas de pos la comensa de la gera interna ala, entre rebelores con gidores suni e la governa de Bashar al-Assad.
Plu ca 2,5 milion ia fuji de la pais. Cuantias grande ia vade a Turcia, Jordan, Irac, e Egipte, entre otras. Ma Lubnan ia reseta un cuantia egal a un cuatri de la cuantia de abitores local. En la mense pasada, la ministro lubnani de esternas ia comenta ce la crise "menasa la esiste" de sua pais.
António Manuel de Oliveira Guterres, la ambasador NU per refujadas, ia dise: "La popla lubnani ia mostra un jenerosia notable, ma la maneja de la influe es difisil" -- per los e per organizas internasional de aida.
Sua departe nota ce la influe de refujadas aselera an. En cada dia en Lubnan, lo rejistra 2500 refujadas nova: plu ca un person en cada minuto. Lo ia reseta sola 14% de la $6,5 mil milion euros de suporta finansial cual lo nesesa.
La problemes cual fronti multe refujadas ia es dramosa indicada en la semana pasada, cuando un madre con sposo malada e cuatro enfantes ia ensende se en protesta contra la manca de aida. El ia es grave ferida.
La gera en Suria ia turba la tensa setal ance en Lubnan, de cual sua popla muslim -- suni e xia -- es grande. Sentos de persones en Beirut e otra partes de la pais ia es matada en violentia entre oposores e suportores de Presidente Assad.
@T Miliones de parolas secreta es furada en Deutxland
@L aora_oji/2014/miliones_de_parolas_secreta_es_furada_en_deutxland
====== Miliones de parolas secreta es furada en Deutxland ======
22 janero 2014
On ia fura la parolas secreta e otra detalias de 16 milion usores de e-posta en Deutxland.
La Ofisia Federal per Securia ia dise ce criminales ia infeta computadores con programes cual permete la recolie de adirijes de e-posta e parolas secreta de contas.
La ajenteria no ia dise esce lo ia identifia la atacores. Lo ia crea un loca de rede do on pote controla esce on es un vitim.
La ataca es tan grande ce cuasi un sinci de la popla deutx pote es vitimes.
@T Ministros de UE va discute en Kiev
@L aora_oji/2014/ministros_de_ue_va_discute_en_kiev
====== Ministros de UE va discute en Kiev ======
20 febrero 2014
Ministros de esternas de Frans, Deutxland, e Polsca va fa discutes de crise en Kiev, seguente la combates matante ala de esta semana.
La governa e oposa va partisipa ance en la discutes.
Esta va presede un consenta de la Uni European en Bruxelles per deside esce on debe introdui punis political contra Ucraina.
26 persones, cisa plu, ia mori ja en esta semana en combates en Kiev.
@T Misiles american ataca un gidor de al-Shabab en Somalia
@L aora_oji/2014/misiles_american_ataca_un_gidor_de_al-shabab_en_somalia
====== Misiles american ataca un gidor de al-Shabab en Somalia ======
27 janero 2014
La militaria de la SUA ia fa un ataca con misiles en Somalia, contra un gidor suspetada de gerores relatada a al-Qaidah e al-Shabab.
Ofisiores de defende american dise ce los atenta descovre esce la colpa ia mata la blanco, de ci los no ia revela sua identia.
La ataca ia es dirijeda a un veculo en un area distante de Somalia sude, prosima a la vila Barawe.
Al-Shabab es la grupo xef en Africa este cual ave lias a al-Qaidah.
@T Mladić refusa atesta per Karadžić
@L aora_oji/2014/mladic_refusa_atesta_per_karadzic
====== Mladić refusa atesta per Karadžić ======
29 janero 2014
A la prosede en Den Haag de Radovan Karadžić, la gidor pasada de la serbsces bosance, Ratko Mladić, la xef pasada de la armada bosance, ia refusa atesta per la defende.
El ia denunsia la prosede de la NU como "diablosa", e ia dise ce el ta dana sua propre caso si el ta atesta.
Ambos omes nega acusas de crimines de gera e contra umania. Los ia intercambia salutas amin en sua apare publica prima de pos la fini de la gera bosansce de la desenio de 1990.
En sorti de la corte, Mladić ia dise: "Multe grasias, Radovan. Pardona, esta foles no ia permete ce me parla. Los defende bombas de OTAN."
@T Modi anunsia la vinse forte de sua partito en Barat
@L aora_oji/2014/modi_anunsia_la_vinse_forte_de_sua_partito_en_barat
====== Modi anunsia la vinse forte de sua partito en Barat ======
17 maio 2014
Narendra Modi, la minstro xef futur de Barat, ia anunsia un vinse "monumental" par sua partito, la BJP, en la vota nasional.
Grasiante suportores en sua propre stato de Gujarat, Modi ia dise ce los ia scrive un capitol nova en la istoria de la pais.
La conta de votas asta aora sujesta ce la BJP va fa la vinse la plu forte par cualce partito en 30 anios, desponente la Partitio de Congresa.
La gidor controversa ia campania sur prometes de revive la economia. Ma multe baratis es ancora profonda consernada par alegas ce el ia fa poca per para tumultas publica en Gujarat en 2002, cuando el ia es la ministro prima de acel stato. A la min mil persones ia mori, de cual la plu ia es muslim. Modi ia nega sempre la alegas.
Cuando lo ia deveni clar ce la BJP ia vinse, Modi ia tuita: "Barat ia gania -- bon dias es a punto de ariva". Esta ia deveni la tuita la plu reenviada en la istoria de la pais.
Disente ce el va rena per tota baratis, el ia descrive la noncomunia de la vinse a sua suportores: "En la istoria de 60 anios de autonomia barati, me ia vide nunca en la medios publica lo cual vos ia fa en nosa pais." Sua suportores ia cria sua nom a multe veses.
@T Modi visita la glasia Siachen
@L aora_oji/2014/modi_visita_la_glasia_siachen
====== Modi visita la glasia Siachen ======
23 otobre 2014
Narendra Modi, la ministro xef de Barat, ia fa un visita corta a la glasia Siachen. El ia es en via a la parte barati de Caxmir per spende la festa Diwali en regarda la dana causada par inondas en setembre.
La glasia es reclamada e par Barat e par Pacistan, e es conoseda como la campo de batalia la plu alta de mundo.
Modi ia tuita ce el vade a Siachen per "pasa tempo con nosa soldatos forte a esta dia spesial".
El es sola la ministro xef du, pos Manmohan Singh, ci ia visita la loca disputada. Singh ia visita la glasia en junio 2005, disente ce lo debe deveni "un monte de pas" entre la du paises.
Plu soldatos ia es matada par la clima sever de Siachen ca par combate. On ia posa ala soldatos asta 6700 metres supra la nivel de mar.
Soldatos barati ia saisi controla de la glasia, en Caxmir norde, en april 1984, vinsente apena Pacistan. Pos tre desenios, la du lados resta aora fisada en un state de nonprogresa.
Modi va viaja plu tarda a Caxmir, do inondas en la mense pasada ia mata 281 persones e ia lasa la site Srinagar su acua. Plu ca milion persones ia es deslocada. El ia descrive la deluvia como "un desastre nasional".
La inondas ia dana 180 mil casas. Multe persones abita ancora en campas de aida.
On previde ce Modi va esamina la sistem de aida, visita un campa per vitimes de la inondas, e anunsia un aida spesial per la afetadas.
Sua visita aveni a Diwali, la plu grande de la festas indu, e on regarda lo como un jesto de unia e aida a la persones colpada par la inondas.
An si alga persones ia bonveni la visita, disente ce los espera ce Modi va anunsia plu aida per la stato, separadistes caxmiri ia recomenda un protesta contra la visita.
Los ci abita en la campas tende opina ce Modi debe furni plu aida a la afetadas. Un ia dise: "Nos comprende ce senior Modi sacrifia sua festa per partisipa en nosa lamenta. Ma esta no sufisi. El ta fa un servi grande si el ta serti la recapasi rapida de la descasidas."
@T Morgan Stanley va paia $1,25 mil milion per fini un litiga
@L aora_oji/2014/morgan_stanley_va_paia_1_25_mil_milion_per_fini_un_litiga
====== Morgan Stanley va paia $1,25 mil milion per fini un litiga ======
5 febrero 2014
Morgan Stanley, un banco grande en la SUA, ia acorda paia $1,25 mil milion per fini un litiga sur la vende de titulos finansial suportada par ipotecas.
Lo va paia la mone a un regulante cual supravide du emprendes de garantia ipotecas.
Como paiores de imposta, la popla comun ia salva la du emprendes en 2008, a media de la crise finansial.
Morgan Stanley junta se a otra bancos, incluinte JP Morgan Chase e Deutsche Bank, en un tal acorda con la regulante.
@T Moris par Ebola esede 100 en Gine
@L aora_oji/2014/moris_par_ebola_esede_100_en_gine
====== Moris par Ebola esede 100 en Gine ======
9 april 2014
La Organiza Mundal de Sania dise ce plu ca 100 persones ia es aora matada par la virus Ebola en Gine. Esta aveni de la virus es un de la plu difisiles de istoria. On va nesesa cisa cuatro plu menses per supresa lo.
La virus ia mata 101 persones en Gine e 10 en Liberia. Lo es estendeda par contata prosima, e lo mata entre 25% e 90% de sua vitimes. Multe paises en Africa ueste ave fronteras porosa, e persones viaja frecuente entre la paises.
Gine sude es a la sentro de la maladias. La caso prima ia es reportada ala en marto.
La estende jeografial de la virus continua aumenta la difisilia estrema de conteni lo. Avenis pasada ia envolve areas multe min grande.
On ia rejistra 157 casos suspetada en Gine, incluinte 20 en Conakry, la capital. On ia confirma 67 de los como Ebola. En Liberia, un pais visina, 21 casos es reportada, de cual sinco es confirmada como Ebola.
Mali ia reporta nove casos suspetada, ma esaminas medical ia mostra ce du de los no ave la virus. En la semana pasada, Mali ia dise ce lo va severi sua controlas fronteral, temente la estende de Ebola.
Esta aveni de Ebola es la prima conoseda en Gine. La plu de casos resente ia aveni a distantias de miles de cilometres, en Uganda e la Republica Democrata de Congo.
On conose no cura o vasin per esta virus tropical. Lo gida a febre emorajal, cual causa dole de musculos, debilia, vomita, diarea, e, en casos sever, falis de organos e sanguis nonparable.
@T Moris pascual causa protestas prosima a Rio
@L aora_oji/2014/moris_pascual_causa_protestas_prosima_a_rio
====== Moris pascual causa protestas prosima a Rio ======
21 april 2014
En Brasil, abitores de un visineria povre, prosima a la site Rio de Janeiro, ia ensende veculos en protesta contra la moris de du persones en avenis cual ia envolve la polisia.
Un de la vitimes ia es estra un eglesa con sua familia a venerdi santa cuando un baleta deviante ia colpa el. El ia es trapida en un fusili entre polisiores e persones suspetada de vende drogas.
Amnestia Internasional dise ce sirca 2000 persones mori en cada anio en Brasil, par causa de atas nonatendente e violente par la polisia.
Abitores de Caramujo, un visineria de lata, ia esije justia en cuando los ia ensende cuatro buses e tre autos.
La mori de Anderson Santos Silva, ci ia ave 21 anios, cuando el ia es a punto de vade a un rituo spesial de pascua, ia coleri la comunia. La eglesa catolica local ia dise: "El ia mori en atenta proteje sua madre e sore."
La vitim du, identifiada como Emanoel Gomes, ia mori a la note de venerdi cuando sua motosicle ia xoca un veculo blindada de polisia en un area prosima.
Consernas sur securia en Brasil esiste ante la Copa Mundal de futbal, cual va aveni entre 12 junio e 13 julio. E la site Rio de Janeiro va ospita ance la Juas Olimpial en 2016.
Plu temprana en esta mense, cuasi 3000 soldatos e polisiores ia saisi la compleso Mare, un de la vilas de lata la plu perilosa de Rio, prosima a la airoporto xef internasional. Tra desenios, lo ia es controlada par alga de la padrones de drogas la plu malfamosa e violente.
On espeta ce soldatos va resta en la area asta la fini de la Copa Mundal.
@T Morsi ariva a corte per un prosede sur evade de prison
@L aora_oji/2014/morsi_ariva_a_corte_per_un_prosede_sur_evade_de_prison
====== Morsi ariva a corte per un prosede sur evade de prison ======
28 janero 2014
Mohammed Morsi, la presidente islamiste pasada de Egipte, ia ariva a un corte en Qahira (Cairo) per es prosededa sur sua evade de prison en 2011.
On ia prende el a la corte par elicotor de un prison en Alexandria.
Morsi ia es un presidente libre elejeda, la prima en Egipte, ma la militaria ia despone el en julio 2013 pos protestas coletiva contra sua governa.
El debe apare en cuatro prosedes separada sur acusas de crimines diversa.
@T Morsi va es prosededa a un ves cuatro
@L aora_oji/2014/morsi_va_es_prosededa_a_un_ves_cuatro
====== Morsi va es prosededa a un ves cuatro ======
20 janero 2014
Mohammed Morsi, la presidente desponeda de Egipte, fronti un prosede cuatro. On acusa de el ia insulta la judores.
On va prosede la gidor islamiste e 24 ora politicistes, carateres de la medios, ativisets, e avocatos sur la acusas nova.
On ia despone Morsi en julio, e sua Fratia Muslim ia es declarada como un organiza teroriste.
Plu temprana en esta mense, sua prosede prima ia es posponeda. La prosede nova indica ce la militaria no intende abandona sua oposa de la Fratia Muslim.
@T Morsi va es prosededa sur spia e atas de teror
@L aora_oji/2014/morsi_va_es_prosededa_sur_spia_e_atas_de_teror
====== Morsi va es prosededa sur spia e atas de teror ======
16 febrero 2014
Mohammed Morsi, la presidente desponeda de Egipte, es a punto de es denova prosededa, acusada sur spia e conspira de fa atas de teror.
El e 35 otras es acusada de labora con grupos lubnani e filastini per fa atacas en Egipte.
La acusas es un de cuatro prosedes legal cual la gidor islamiste pasada fronti aora.
Morsi ia es desponeda par la militaria en julio de la anio pasada, pos protestas coletiva contra sua rena.
@T Motoristes en Miami salva un bebe
@L aora_oji/2014/motoristes_en_miami_salva_un_bebe
====== Motoristes en Miami salva un bebe ======
22 febrero 2014
En Miami en la SUA, un bebe de sinco menses ci ia sesa respira ia survive pos es aidada par motoristes trapida en conjesta sur un autovia.
En jovedi, Pamela Rauseo, ci ave 37 anios, ia lasa sua veculo, criante per aida, en cuando sua sobrino Sebastian ia comensa deveni blu.
Un fem ia aida direta Rauseo a fa la reanima cardiopulmonal, en cuando un fotojornaliste ia trova un polisior en un veculo prosima.
Sebastian ia survive e ia es un state stable en ospital a un ora tarda de jovedi.
@T Mozilla projeta un telefoneta de $25 per la mundo developante
@L aora_oji/2014/mozilla_projeta_un_telefoneta_de_25_per_la_mundo_developante
====== Mozilla projeta un telefoneta de $25 per la mundo developante ======
24 febrero 2014
Mozilla is esibi un prototipo de un telefoneta intelijente, con preso de sola $25, intendeda per la mundo developante.
La compania es la plu bon conoseda per sua surfador Firefox. Per esta projeta, lo ia asosia con Spreadtrum, un fabricor xines de microtelias barata.
La aparato no va es tan potiosa como modeles plu custosa, ma lo va suporta programes e va usa la interede sin filo.
Analistes ia comenta ce lo va atrae persones ci compra aora telefonetas barata de un spesie partal intelijente.
@T Mugabe selebra sua aniversario 90
@L aora_oji/2014/mugabe_selebra_sua_aniversario_90
====== Mugabe selebra sua aniversario 90 ======
24 febrero 2014
Miles de zimbabueanes ia vade a un selebra ofisial de la aniversario 90 de presidente Robert Mugabe.
La gidor vea, ci rena ja de pos 1980, ia relasa 90 balones en la aira a un stadion a este de Harara, la capital.
El ia ateni la eda de 90 anios en venerdi, cuando el ia es en Singapor per sirurjia de oio.
Multe scolores ia es en la fola, brandinte banderas e cantante la nom de clan de Mugabe.
@T Multe manca ancora pos un focon en un casa de veas en Canada
@L aora_oji/2014/multe_manca_ancora_pos_un_focon_en_un_casa_de_veas_en_canada
====== Multe manca ancora pos un focon en un casa de veas en Canada ======
26 janero 2014
Ecipos ia trova du plu corpos a la dia tre de xerca a la ruina de un casa de veas en Québec, destruida par foco.
On ia confirma ce des persones es mor pos la focon en jovedi. 22 manca ancora.
Xercores ia introdui aparatos nova, intendeda per dejela barcones, car la temperatur ia resta sirca -10°C.
La polisia investiga un teoria ce la focon ia es comensada par un sigareta.
@T Multe neva cade en la SUA norde-este
@L aora_oji/2014/multe_neva_cade_en_la_sua_norde-este
====== Multe neva cade en la SUA norde-este ======
3 janero 2014
La norde-este de la SUA es colpada par un tempesta major. On ia rejistra 53 sentimetres de neva en un vila en Massachusetts.
On ia cansela miles de aviones en cuando la neva ia move a este de la statos norde sentral. Multe scolas e ofisias comersial ia clui ance.
La governores de New York e New Jersey ia anunsia un state de crise, e ia recomenda ce persones resta en construidas.
On averti ce la tempesta va deveni plu sever en la note.
@T Muqtada al-Sadr retira de politica
@L aora_oji/2014/muqtada_al-sadr_retira_de_politica
====== Muqtada al-Sadr retira de politica ======
16 febrero 2014
Muqtada al-Sadr, un eglesor xia estremiste de Irac, ia anunsia ce el retira se de politica.
La declara, scriveda par mano en sua loca de rede, ia dise ce el no va ocupa plu postos governante o ave representores en parlamento.
Sadr e sua militia, la Armada Mehdi, ia deveni conoseda pos la invade de Irac, gidada par la SUA, en 2003.
Ma la om de 40 anios ia perde sua influe en anios plu resente, pos un disputa con Nouri al-Maliki, la ministro xef.
@T Musharraf apare en corte a la ves prima
@L aora_oji/2014/musharraf_apare_en_corte_a_la_ves_prima
====== Musharraf apare en corte a la ves prima ======
19 febrero 2014
Pervez Musharraf, la renor militar pasada de Pacistan, ia apare en corte a la ves prima, acusada de tradi.
Consernas de securia e sania ia impedi sua presentia en escutas plu temprana. El ia spende plu ca un mense en ospital.
On acusa el de suspende nonlegal la constitui e de institui un rena de crise en 2007.
El es la prima de la renores militar pasada ci on prosede en Pacistan, e el risca la puni de mori.
@T Musharraf sufri un problem de cor ante sua prosede
@L aora_oji/2014/musharraf_sufri_un_problem_de_cor_ante_sua_prosede
====== Musharraf sufri un problem de cor ante sua prosede ======
2 janero 2014
On ia move Pervez Musharraf, la renor militar pasada de Pacistan, a ospital, suspetante un problem de cor. El ia es en via a corte per sua prosede de tradi. El ave 70 anios.
La acusas conserna sua deside en 2007 de interompe la constitui e forsa un rena de crise. Musharraf nega la acusas, disente ce los es political motivada.
Entre la renores militar pasada de Pacistan, el es la prima ci on prosede per tradi. Si on judi ce el es culpable, on pote condena el a mori, o a spende la resta de sua vive en prison.
@T Muslimes rohingia ia mori cisa en violentia en Burma
@L aora_oji/2014/muslimes_rohingia_ia_mori_cisa_en_violentia_en_burma
====== Muslimes rohingia ia mori cisa en violentia en Burma ======
18 janero 2014
Ativistes en Burma dise ce oto muslimes rohingia ia es matada par la polisia en violentia nova en la state de Rakhine.
Detalias varia multe entre reportas. On dise ce la situa ia aveni en la semana pasada, prosima a la vila Maungdaw.
On reporta ance ce scaramuxas con la polisia ia comensa pos la despare de un polisior a un vileta rohingia.
La governa de Burma dise ce informas manca, ma autoriosas local ia nega ce cualce matas ia aveni.
@T NASA proba sua capsula de Marte
@L aora_oji/2014/nasa_proba_sua_capsula_de_marte
====== NASA proba sua capsula de Marte ======
4 desembre 2014
Un capsula spasial cual ta pote aida umanas a ateni Marte va fa oji sua vola prima.
Orion va es lansada de Capo Canaveral en Florida sur un roceto Delta, per un viaja corta supra la Tera per proba alga partes importante de sua tecnolojia.
La capsula cono ave un aspeta simil a la barcones Apollo en cual persones ia viaja a la Luna en la desenios de 1960 e 1970, ma lo es plu grande e conteni sistemes estrema moderna.
Car esta es sua viaja prima, lo no va porta pasajores. An tal, NASA, la ajenteria spasial SUA, descrive la proba como un aveni major.
On previde ce la enaira va aveni a 07:05 de ora local (12:05 UTC), dependente de la clima e de la bon state de tota preparas.
On developa Orion a lado de un roceto nova potiosa cual va es mesma inisiada en 2017 o 2018. En junta, la du va furni la capasias esensal nesesada per envia umanas ultra la Stasion Spasial Internasional a tal destinas como la planeta roja.
Oji, un otra roceto va envia Orion sirca la globo a du veses, lansante la capsula a la altia de sirca 6000 cilometres.
Esta va inisia un cade rapida a la Tera, e un reentra a la atmosfera con rapidia prosima a 30 mil cilometres per ora, cuasi tan alta como on ta previde per un capsula cual reveni de la Luna.
Injeniores va pote esamina la capasia de la scermo termal de Orion, cual va esperia probable temperatures plu ca 2000°C.
Los va oserva ance la ativi de la paracades cual va permete ce la capsula desende lenta a la Mar Pasifica, prosima a la penisola Baja California de Mexico.
La mision oji es sola un paso peti en un program multe longa de developa. Sin la recursos finansial de la eda de Apollo, NASA debe segue un curso pasiente en loca.
An si Orion ta es aora completa funsionante con sua propre roceto dedicada, NASA no ta pote fa un mision a un otra planeta, car on ancora no ia produi la tecnolojia nesesada per esecuta taxes a la surfas.
@T Nazis ia rexerca la usa de moscitos como armas
@L aora_oji/2014/nazis_ia_rexerca_la_usa_de_moscitos_como_armas
====== Nazis ia rexerca la usa de moscitos como armas ======
14 febrero 2014
Un rexercor dise ce siensistes deutx en la campa de consentra a Dachau ia studia la usa posible de moscitos infetada con malaria como armas en la Gera Mundal Du.
Dotor Klaus Reinhardt de la Universia ia esamina la arcivos de la Instituida Entomolojial a Dachau.
El ia trova ce biolojistes ia rexerca cual moscitos va es cisa la plu capas de survive estra sua abitada natural.
El divina ce on ia considera cade tal insetos sur teritorios de enemi.
@T Neandertalanes ia dona jenes de maladia a nos
@L aora_oji/2014/neandertalanes_ia_dona_jenes_de_maladia_a_nos
====== Neandertalanes ia dona jenes de maladia a nos ======
30 janero 2014
Jenes cual influe maladia en umanas oji ia es otenida par reprodui con neandertalanes, en opina de un esplora major en la jornal Nature.
La neandertalanes ia dona varias de jene relatada a diabete de tipo 2, a la maladia de Crohn, e, strana, a la mania de fumi.
Studias de jenom revela ce nosa spesie (Homo sapiens) ia copula con neandertalanes pos parti de Africa.
Ma a ante, la funsiona de esta ADN neandertalan no ia es clar, e on no ia sabe esce lo es liada a la sania umana.
@T Nepal va abri un ofisia de securia sur Monte Everest
@L aora_oji/2014/nepal_va_abri_un_ofisia_de_securia_sur_monte_everest
====== Nepal va abri un ofisia de securia sur Monte Everest ======
21 febrero 2014
Nepal ia deside envia un ecipo de ofisiores de securia a la campa de base de Monte Everest, per atenta preveni disputas entre trepores.
En april pasada, un combate ia aveni entre trepores european e un grupo de xerpas a la altia de 7470 metres.
Acel disputa ia es ultima solveda, ma on dise ce la inclinas de la monte deveni sempre plu folida.
Un ofisia con soldatos e polisiores va abri en april a la campa, a la comensa de la saison de trepa.
@T Netanyahu anunsia ce la gera en Gaza va continua
@L aora_oji/2014/netanyahu_anunsia_ce_la_gera_en_gaza_va_continua
====== Netanyahu anunsia ce la gera en Gaza va continua ======
3 agosto 2014
Benjamin Netanyahu, la ministro xef de Israel, ia dise ce la operas militar israeli en Gaza va continua, an pos la destrui de tota tuneles de Hamas, asta cuando sitadanes israeli es denova secur.
El ia dise ce Hamas va paia "un custa nontolerable" per sua atacas contra Israel.
Sua parolas ia veni en cuando esperas ia pali sur la discutes en Misre sur un sesaspara.
La sesaspara la plu resente ia colasa corta pos cuando on ia declara lo a venerdi, car un soldato israeli, Hadar Goldin, ia deveni caturada par Hamas. A pos, on ia descovre ce el es mor.
1655 filastinis, de cual la plu ia es persones nonmilitar, e 65 israelis, de cual sola du no ia es soldatos, ia mori ja de pos la comensa de la gera a plu ca tre semanas ante aora.
Ance un laboror tai ia es matada en Israel, e 8900 filastinis ia es ferida.
Israel ia comensa sua campania de bombarda a 8 julio, con intende de para atacas par roceto veninte de Gaza. A pos, lo ia comensa operas militar sur tera, contra lanserias de roceto e contra la tuneles usada par Hamas per entra secreta a Israel.
On ia fa atentas diversa de organiza sesasparas, ma tota ia fali. Ambos lados ia acusa ce la otra ia rompe la acordas de sesaspara.
@T Neva en Japan disturba la transporta
@L aora_oji/2014/neva_en_japan_disturba_la_transporta
====== Neva en Japan disturba la transporta ======
8 febrero 2014
En Tokyo, la capital de Japan, on ia averti sur un tempesta sever de neva. On recomenda ce abitores no vade a estra.
On dise ce esta es la prima de tal avertis per la site en 13 anios.
Sentos de volas es canselada, stradas es cluida, e alga servis de tren es suspendeda.
43 persones, cisa plu, ia es ferida en asidentes relatada a neva. On ia rejistra cuatro sentimetres de neva en Tokyo en la matina de saturdi.
@T Neva sutrae eletrica de cuasi un dui de milion casas irani
@L aora_oji/2014/neva_sutrae_eletrica_de_cuasi_un_dui_de_milion_casas_irani
====== Neva sutrae eletrica de cuasi un dui de milion casas irani ======
4 febrero 2014
Un neva profonda en Iran norde ia lasa sirca 480 000 casas sin eletrica. Alga vilas e viletas ia deveni isolida.
Un ofisior en la provinse Mazandaran, a la Mar Caspian, ia dise ce esta tempestas invernal es la plu severes en 50 anios. Du metres de neva ia cade en alga areas de pos la fini de semana.
Tota scolas en Mazandarna va es cluida en martedi.
La xef de la Cresente Roja en Iran ia dise ce on ia salva sirca 11 000 persones ci ia deveni trapida en la neva.
@T New York ave un maior democrata
@L aora_oji/2014/new_york_ave_un_maior_democrata
====== New York ave un maior democrata ======
1 janero 2014
Site New York ave un maior nova, la democrata prima en plu ca du desenios.
Bill de Blasio ia leje un jura estra sua casa, a un pico de minutos pos la comensa de la anio, seguente la tradision. Un rituo plu grande va aveni plu tarda a la ofisia de site.
De Blasio segue la bilionor Michael Bloomberg. El ia gania la eleje en novembre par un marjin recordo, prometente governa en modo libriste.
De Blasio ia dise ce la anios de Bloomberg ia largi la distantia entre la povres e la ricas. Suportores de Bloomberg ia responde ce sua 12 anios de ofisia ia lasa New York como un loca renovida, plu secur e sana.
@T New York va destensa sua lege de mariuana
@L aora_oji/2014/new_york_va_destensa_sua_lege_de_mariuana
====== New York va destensa sua lege de mariuana ======
5 janero 2014
En la SUA, la stato de New York intende destensa sua leges de mariuana per permete ce pasientes grave malada usa lo. Dudes otra statos ia fa ja la mesma deside.
En mercurdi, Colorado ia deveni la prima stato de la SUA cual permete ce botecas vende canaba per usas recreal. On previde ce, plu tarda en 2014, la stato de Washington va permete ance la vende de la droga.
La droga es ancora nonlegal par lege federal.
On previde ce la politica nova de New York va es multe plu sever ca en California o Colorado. En California, sufrores de maladias minor pote oteni prescrives per canaba.
En New York, la droga va es disponable en sola 20 ospitales, per persones con canser, glaucoma, o otra maladias grave.
@T Nijeria acorda un sesaspara con Boko Haram
@L aora_oji/2014/nijeria_acorda_un_sesaspara_con_boko_haram
====== Nijeria acorda un sesaspara con Boko Haram ======
18 otobre 2014
La militaria de Nijeria dise ce lo ia acorda un sesaspara con Boko Haram, un grupo de islamistes combatosa, e ce la grupo va libri la xicas cual lo ia saisi.
La sesaspara ia es anunsiada par Alex Badeh, la ofisior militar la plu alta de Nijeria. Boko Haram no ia fa un declara publica.
La grupo rebela ja de pos 2009, matante sirca 2000 siviles en esta anio.
Boko Haram ia coleri la mundo a ses menses ante aora cuando lo ia saisi plu ca 200 xicas de scola como ostajes.
Los ia es prendeda en Chibok, un vila norde-este en la stato Borno. Sua prisonia continuante ia provoca criticas de la laboras par la governa nijerian per libri los.
Como parte de la negosias, un delega de la governa ia encontra representores de Boko Haram a du veses.
On va fini organiza la libri de la ostajes a un plu consenta en Ndjamena, la capital de Txad, en la semana veninte.
On crede ce la grupo ia move los a la foresta vasta Sambisa, cual sta longo la frontera entre Nijeria e Camerun.
@T Nijeria clui scolas per securi un confere
@L aora_oji/2014/nijeria_clui_scolas_per_securi_un_confere
====== Nijeria clui scolas per securi un confere ======
4 maio 2014
La governa de Nijeria va clui scolas e ofisias de governa tra la capital Abuja per la aveni de un confere major en la semana veninte.
On promete un securia forte per proteje plu ca 1000 delegadas a la consenta de tre dias, pos du bombis matante en la capital.
Un esplode en la tarda de jovedi ia mata 19 persones, e un bombi prosima ia lasa 75 mores a du semanas a ante. On culpa Boko Haram, un grupo combatosa islamiste, per la violentia. La nom de la grupo sinifia "instruis ueste es proibida" en hausa.
On crede ce la mesma grupo ia organiza la saisi de plu ca 200 xicas adolesente de sua scola en la state Borno en la norde-este de la pais, a plu ca du semanas ante aora.
Boko Haram ia fa un serie de atacas en Nijeria norde en la anios resente, matante sirca 1500 persones en mera esta anio.
La governa de presidente Goodluck Jonathan dise ce 5000 polisiores e soldatos va garda la Foro Economial Mundal sur Africa, cual va comensa a martedi. La ministro xef de Xina, Li Keqiang, va partisipa a la confere, como ance la presidentes de Ruanda, Senegal, e Cenia.
La razona ofisial per la clui es serti un flue lisca de trafica, ma lo es multe probable ce on vole ance aumenta la nivel de securia. Con min veculos sur la stradas, xercas pote es plu atendosa, e la cuantia de blancos posible per bombis nova va es reduida.
@T "No cosa sustantial" va resulta de la discutes suri
@L aora_oji/2014/no_cosa_sustantial_va_resulta_de_la_discutes_suri
====== "No cosa sustantial" va resulta de la discutes suri ======
29 janero 2014
Lakhdar Brahimi, la reconsilior de la NU en Geneve, ia dise ce el previde ateni "no cosa sustantial" en la serie prima de discutes suri. La discutes va fini en venerdi.
El ia dise ce el "no es deludeda" e ce "la jelo rompe lenta".
El ia clari ance ce la NU negosia ancora con la governa suri sur la posible de envia un convoia de aida umaniste a Homs, un site asejada.
El ia informa ce la distantia entre la du lados resta "alga grande", ma ce ambos vole continua discute.
@T No mal intende ia es envolveda en la asidente de Schumacher
@L aora_oji/2014/no_mal_intende_ia_es_envolveda_en_la_asidente_de_schumacher
====== No mal intende ia es envolveda en la asidente de Schumacher ======
18 febrero 2014
La avocato prosedente franses ci investiga la asidente de sci de Michael Schumacher ia trova no atesta de mal intende, e ia clui la investiga.
Patrick Quincy ia dise ce la indicadores e informas a la scieria Meribel, do la asidente ia aveni, conforma a leges franses.
La famosa deutx de Formula 1, ci ave 45 anios, es medical curada de pos sua asidente a 29 desembre.
El ia sci sur un inclina savaje cuando el ia cade e colpa sua testa a un roca.
@T Noria es la loca la plu bon per senese
@L aora_oji/2014/noria_es_la_loca_la_plu_bon_per_senese
====== Noria es la loca la plu bon per senese ======
1 otobre 2014
Noria es la loca la plu bon per senese, si on crede un indise de la cualia de vive vea en 96 paises.
Publicida a la Dia Internasional NU de Persones Plu Vea, lo mesura la bonstate sosial e economial de persones con plu ca 60 anios.
Lo gradi alta Australia, Europa ueste e America Norde, e pone Afganistan a la grado la plu basa. Sveria apare direta pos Noria en la lista, e Suiz, Canada, e Deutxland segue.
Lo predise ce, en 2050, 21% de la popla de la mundo va ave plu ca 60 anios, e ce 40 paises en la lista va ave poplas en cual 30% de persones ave un tal eda.
La indise mesura cuatro cualias -- securia de revenu, sania, capasia personal, e esce on abita en un "ambiente capasinte".
Alga paises de America latina, spesial Mexico e Peru, ia asende rapida la lista par causa de sua promete de serti "pensiones sosial" a la persones vea la plu povre.
Esta pensiones es noncontribuida, ma finansiada par impostas, e los garantia un revenu fundal per la plu povres. En Mexico, cuasi 90% de persones con 65 anios o plu reseta un tal pension.
Par esta causa, Mexico apare a numero 30 en la lista, suprapasante Brasil, Rusia, Barat, Xina, e Sudafrica.
Peru ia reali un program nomida "Pension 65", cual dona 250 soles nova ($86) a veas a cada duple de menses.
@T Nove mori en un combate con fusiles en un prison mexican
@L aora_oji/2014/nove_mori_en_un_combate_con_fusiles_en_un_prison_mexican
====== Nove mori en un combate con fusiles en un prison mexican ======
4 janero 2014
La armada mexican ia saisi un prison en la sude-ueste de la pais, pos un combate cual ia mata nove persones.
La avocatos prosedente dise ce un gang de ses fusilores ia entra a la prison en Iguala, finjente ce los es ofisiores publica ci introdui un prisonor.
A interna, los ia xuta a un grupo de prisonidas, matante cuatro. A pos, los ia dirije sua armas a la gardores sur un tore de securia, ma sinco de la gang ia mori cuando la gardores mesma ia fusili.
La autoriosas local dise ce la matadas ia es prisonida pos contrabanda de drogas e fura de persones.
On ancora no sabe la motiva de la matas, ma ganges de droga reali comun sua oposas mutua par combates en prisones.
@T Nubes de sene volcanal cansela volas en Australia
@L aora_oji/2014/nubes_de_sene_volcanal_cansela_volas_en_australia
====== Nubes de sene volcanal cansela volas en Australia ======
1 junio 2014
Nubes enorme de sene, ejetada par un volcan indonesian, ia obliga la cansela de tota aviones a e de la site Darwin en Australia norde.
La program de volas entre Australia e la isola Bali es ance disturbada, e otra airoportos pote es afetada en la dias veninte. Sentos de pasajores es caturada sin posible de viaja.
Monte Sangeang Api ia comensa eruta a venerdi, e plumones de sene ia move a sude en dirije a Australia. On no pote predise fasil lo cual la volcan va fa aora. La venta e otra fatores climal pote aida o impedi la situa.
La sene volcanal pote es estrema perilosa per aviones, car sua particulas pico pote dana motores.
Warren Truss, la visministro xef de Australia, ia dise ce lo es posible ce alga dias va pasa ante cuando la volas en la pais reveni a normalia.
La isola Sangeang Api ave no abitores permanente. Tota ia parti pos un eruta en 1988. On ia demanda ce cultivores parti aora de la area prosima.
Indonesia es situada sur un serie de falias jeolojial. Lo esperia multe tremateras e erutas de volcanes, de cual lo conteni sirca 130 ativas.
@T Obama anunsia un projeta de aida mases joven de minorias
@L aora_oji/2014/obama_anunsia_un_projeta_de_aida_mases_joven_de_minorias
====== Obama anunsia un projeta de aida mases joven de minorias ======
28 febrero 2014
Barack Obama, la presidente de la SUA, ia demanda un campania nasional per boni la situa de xicos e jovenes negra o latina.
En jovedi, el ia anunsia un projeta nomida "Gardor de mea frate", intendeda per vinse la state sosioeconomial cual impedi tal persones de flori.
La Casa Blanca ia clari ce comersias ia promete $150 milion per promove la projeta.
Obama ia disce ce lo es "scandalosa" ce omes negra e latina en la SUA susede tan min ca blancas.
@T Obama anunsia un Stratejia de Calmi European
@L aora_oji/2014/obama_anunsia_un_stratejia_de_calmi_european
====== Obama anunsia un Stratejia de Calmi European ======
4 junio 2014
En un visita a Polsca, presidente Barack Obama ia anunsia sua intende de crea un reserva de mil milion dolares per aumenta envias de soldatos SUA a Europa.
Obama, ci va encontra gidores de OTAN entre consernas sur la crise ucrainsce, ia dise ce la securia de la aliadas european de la SUA es "nonviolable".
En april, 150 soldatos SUA ia es enviada a Polsca per eserses militar a media de un situa tensinte con Rusia.
Obama va visita ance Beljia e Frans en sua turi.
Entretempo, ministros de defende de OTAN va consenta en Bruxelles per discute la atas par Rusia sur Ucraina, en relata a sua implicas per securia durante.
La governa rusce nega la alegas ueste ce lo suporta separadistes en Ucraina este.
@T Obama comanda atacas airal contra la gerores de Stato Muslim
@L aora_oji/2014/obama_comanda_atacas_airal_contra_la_gerores_de_stato_muslim
====== Obama comanda atacas airal contra la gerores de Stato Muslim ======
8 agosto 2014
Barack Obama, la presidente de la Statos Unida de Amercia, ia dise ce el ia comanda atacas airal contra militaristes muslim en Irac norde, ma ce el no intende reenvia sua soldatos a la pais.
El ia clari ce la SUA va ataca gerores de la Stato Muslim per preveni la masacra de minorias relijiosa, o si la gerores perili interesas american.
On ia fa ancora no colpas, ma la SUA ia cade pacos de avion per aida iracis ci es menasada par la gerores.
La Stato Muslim ia saisi Qaraqosh, la vila cristian la plu grande de Irac, obligante la abitores a fuji.
Parlante en la Casa Blanca en la sera de jovedi, pos consentas con sua conselores de securia nasional, Obama ia dise ce aviones militar ia distribui comedas e acua a membros de la comunia relijiosa iezidi ci la militaristes ia trapi sur Monte Sinjar.
Ofisiores ia averti ce la iezidis va mori de famia e desidrata si los resta sur la montania, ma ce los va es matada par la Stato Muslim si los fuji.
Obama ia dise: "La SUA no pote e no debe interveni sempre cuando un crise aveni en la mundo." Ma el ia esplica ce la SUA no pote iniora la previde de violentia "a grado xocante", spesial cuando la governa iraci ia demanda un aida.
El ia continua: "Nos pote ata, atendosa e fidable, per preveni un ata posible de jenoside. Oji, America veni per aida."
@T Obama comanda restrinjes sur la usa de datos par departes de securia
@L aora_oji/2014/obama_comanda_restrinjes_sur_la_usa_de_datos_par_departes_de_securia
====== Obama comanda restrinjes sur la usa de datos par departes de securia ======
18 janero 2014
Barack Obama ia comanda restrinjes sur la usa de datos coletiva colieda par departes de securia en la SUA. La presidente ia dise ce on debe respeta la librias sivil.
Obama ia clari ce tal datos ia impedi atacas teroriste en e estra la SUA, ma ce la governa risca atenta plu ca la posible en responde a menasas.
An tal, promoves de librias sivil ia dise ce la cambias no es sufisinte profonda.
La anunia segue coleria tra la mundo pos la esposa de detalias de la labora de departes de securia american.
@T Obama dise ce la spia debe no dana relatas con Deutxland
@L aora_oji/2014/obama_dise_ce_la_spia_debe_no_dana_relatas_con_deutxland
====== Obama dise ce la spia debe no dana relatas con Deutxland ======
19 janero 2014
Barack Obama, la presidente de la SUA, ia dise ce el no va permete ce la monitori controversa par departes de securia american dana la relatas entre Washington e Deutxland.
Parlante a un stasion de televisa deutx, el ia indica ce la monitori secreta de la telefoneta de Angela Merkel, la canselor de Deutxland, ia es un era cual no va reaveni.
Pos la disputa sur acel en 2013, Merkel ia acusa ce la Statos Unida ia fa un rompe nonasetable de fida.
En venerdi, Obama ia comanda controlas sur modos de spia.
@T Obama proposa restrinjes de fusiles per mental maladas
@L aora_oji/2014/obama_proposa_restrinjes_de_fusiles_per_mental_maladas
====== Obama proposa restrinjes de fusiles per mental maladas ======
4 janero 2014
La ecipo de Barack Obama, la presidente de la SUA, ia anunsia proposas per restrinje la disponablia de fusiles a los ci es mental malada.
La cambias clari alga regulas ambigua, e permete ce ospitales furni plu informas afin on pote esamina la pasadas de persones.
On proposa la cambias pos la aniversario prima de un masacra en un scola en Newtown, Connecticut, en desembre 2012. Alora, 20 enfantes e ses empleadas ia es matada. On crede ce la fusilor ia sufri de problemes sever de sania mental a la tempo de sua crimin.
Obama ia proposa alga cambias de controla de fusiles pos la masacra, incluinte severi la sistem de esamina pasadas personal afin criminales no compra tan fasil fusiles.
Ma la Congresa ia deside fa no cambias, su presa intensa de la promove per fusiles.
@T Obama surprende soldatos par un visita a Afganistan
@L aora_oji/2014/obama_surprende_soldatos_par_un_visita_a_afganistan
====== Obama surprende soldatos par un visita a Afganistan ======
26 maio 2014
Barack Obama, la presidente de la SUA, ia fa un visita nonanunsiada a sua fortes militar en Afganistan.
Obama ia vola tra la note de Washington a la campo de avion a Bagram, prosima a Kabul, do el ia parla a soldatos.
Sua visita ia aveni a la dia ante la Dia de Memoria, cuando persones en la SUA recorda soldatos mor.
En esta visita Obama no ia encontra la presidente afgan, Hamid Karzai.
La plu de soldatos stranjer va retira se de la pais ante la fini de esta anio, ma la SUA espera reteni ala un cuantia peti de soldatos tra un tempo plu longa, per instrui fortes de securia afgani.
An tal, la esta espera depende de la presidente veninte de Afganistan, ci on va eleje en junio. El va debe suscrive un acorda biladal de securia, cual Karzai ia refusa.
La Taliban ia aumenta sua atacas ante la retira de fortes de OTAN e la SUA.
@T Obama va ospita la Dalai-Lama a la Casa Blanca
@L aora_oji/2014/obama_va_ospita_la_dalai-lama_a_la_casa_blanca
====== Obama va ospita la Dalai-Lama a la Casa Blanca ======
21 febrero 2014
Barack Obama, la presidente de la SUA, va encontra oji la Dalai-Lama, la gidor spirital de Tibet.
Xina ia recomenda forte ce la SUA cansela la encontra, disente ce lo va "dana seria" la relatas entre Xina e la SUA.
Xina regarda la Dalai-Lama como un separadiste, ma el mesma dise ce el promove mera autonomia plu grande per Tibet, no autonomia completa.
La SUA dise ce lo no suporta la autonomia completa de Tibet, ma lo es consernada sur diretos umana en Xina.
@T Ocupores nonlegal en Barcelona combate la polisia
@L aora_oji/2014/ocupores_nonlegal_en_barcelona_combate_la_polisia
====== Ocupores nonlegal en Barcelona combate la polisia ======
30 maio 2014
En Espania, la polisia en la site Barcelona ia scaramuxa con ganges de jovenes con capetas, en la note tre de violentia causada par la proposa de destrui un casa de ocupores nonlegal.
A la min 25 persones ia es arestada cuando sirca 2000 protestores ia fronti la polisia. La protestores ia lansa botelas e petras a la polisiores.
En lundi, on ia ejeta ocupores nonlegal de Can Vies, un construida publica cual estremistes sinistriste ia ocupa tra 16 anios.
Un portavose de la polisia ia dise ce polisiores elmida ia core atacante contra la protestores pos cuando estas ia penetra un linia de securia. La protestores ia responde par cade baldones, rompe fenetras, e lansa misiles.
La protestores ia usa taticas simil en notes presedente, cuando los ia ataca ance furgones de polisia e bancas.
La construida Can Vies es situada en Sants, un visineria de clase laborante cual es poseseda par la autoriosa transportal de Barcelona. En 1997, ativistes ia saisi lo e ia usa lo per consertas, cursos, e otra avenis. La autoriosa vole destrui lo per redevelopa la area.
La polisia ia responde a un comanda de corte per vacui la construida. La comanda ia es donada pos la fali de discutes entre la ocupores e la autoriosa.
@T On abandona un max serbsce-albanian pos scaramuxas political
@L aora_oji/2014/on_abandona_un_max_serbsce-albanian_pos_scaramuxas_political
====== On abandona un max serbsce-albanian pos scaramuxas political ======
15 otobre 2014
Un max de futbal entre Serbia e Albania ia es abandonada cuando un avion sin pilote, portante un mesaje political, ia provoca scaramuxas de juores e fanes.
La max per entra a Euro 2016 ia es sesada en sua minuto 41, egal a zero puntos.
La disturba ia comensa cuando un bandera e mesaje albanian ia vola supra la campo e ia es caturada par un juor serbsce.
Juores albanian ia atenta prende lo, e alora alga fanes ia invade la campo.
La arbitror ia gida la juores de sur la campo. Pos un pausa de sirca 30 minutos, UEFA ia confirma ce on ia abandona la max.
Fanes albanian ia es ja proibida de es presente a la max entre la du nasiones balcan oposante.
Serbia e Albania ave un istoria de relatas turbosa, spesial consernante Cosovo, un provinse pasada serbsce cual ia declara sua autonomia en 2008.
La SUA e paises major de la Uni European reconose Cosovo como un stato, ma Serbia (e la plu de serbsces etnical en Cosovo) refusa lo.
Un delegada de UEFA ia comenta: "Esta es un situa regretable sur cual nos va reporta -- la arbitror, me, e la conselor de securia. La situa ia es tal ce nos no ia pote continua la max."
On ia reporta la aresta de Olsi Rama, la frate de la ministro xef de Albania, en la parte de la stadion reservada per persones importante, per inisia la situa, ma esta es ancora no confirmada.
@T On acorda sur la sorti de siviles de Homs
@L aora_oji/2014/on_acorda_sur_la_sorti_de_siviles_de_homs
====== On acorda sur la sorti de siviles de Homs ======
6 febrero 2014
Ministros suri dise ce on ia acorda ce "siviles nonculpable" pote lasa areas asejada de la site Homs.
On va permete la parti de femes, enfantes, veas, e feridas, seguente un acorda entre la governor de la site e la Nasiones Unida.
Partes vea de la site es ja asejada par la armada de pos junio 2012.
La NU ia bonveni la reportas de un pausa umaniste en la combate.
@T On acorda sur un negosia de program nucleal de Iran
@L aora_oji/2014/on_acorda_sur_un_negosia_de_program_nucleal_de_iran
====== On acorda sur un negosia de program nucleal de Iran ======
21 febrero 2014
Iran ia dise ce discutes con potias global sur sua program nucleal ia conclui con un acorda de un negosia completa.
Abbas Araqchi, la minstro suordinada de esternas, ia descrive "un atmosfera positiva" a la confere en Wien, la capital austrian.
Catherine Ashton, la xef de politica esterna de la Uni European ia comenta ce la delegadas ia identifia la problemes cual on va debe solve.
Ma el ia averti ce on ave ancora "multe per fa", e ce ajunta a la acorda tempora fada en novembre no va es fasil.
@T On acusa ce comersiores de Rabobank ia manipula un taso de interesa
@L aora_oji/2014/on_acusa_ce_comersiores_de_rabobank_ia_manipula_un_taso_de_interesa
====== On acusa ce comersiores de Rabobank ia manipula un taso de interesa ======
14 janero 2014
En la SUA, on acusa ce tre comersiores pasada de Rabobank ia conspira per manipula la taso de interesa Libor per ien de pos 2006.
Prosedores dise ce Paul Robson, Paul Thompson, e Tetsuya Motomura, ia fa estimas falsa de tasos importante per benefica sua propre situas comersial.
Si on condena los, la comersiores va spende asta 30 anios en prison.
An tal, nun de los es aora tenida par la SUA, e lo no es clar esce on va estradi los per prosede.
@T On acusa ce la maior de Toronto ia organiza un bate
@L aora_oji/2014/on_acusa_ce_la_maior_de_toronto_ia_organiza_un_bate
====== On acusa ce la maior de Toronto ia organiza un bate ======
31 janero 2014
En Canada, on litiga Rob Ford, la maior de Toronto. On alega ce el ia conspira per organiza la bate de un prisonida, afin esta no parla sur la atas nonlegal de la maior.
Scott MacIntyre, la ami pasada de cor de la sore de Ford, demanda $1 milion en compensa.
El alega ce on ia ataca el en un prison de Toronto en marto 2012, su comanda de Ford.
La maior, ci ia confesa en novembre 2013 ce el ia fumi crac, aspira es denova elejeda como maior.
@T On acusa du omes sur cade de roca en la SUA
@L aora_oji/2014/on_acusa_du_omes_sur_cade_de_roca_en_la_sua
====== On acusa du omes sur cade de roca en la SUA ======
1 febrero 2014
Avocatos en la SUA intende litiga du gidores pasada de esplorores joven, ci ia cade un formida antica de rocas a un parce nasional.
En otobre 2013, Glenn Taylor ia puxa e cade un rocon de arenito, de 170 milion anios, en Goblin Valley (Vale de Orcetas) en Utah. Dave Hall ia filma el, e ambos ia selebra en la video.
On ia acusa Taylor, un om de 45 anios, sur turba criminal, e Hall, de 42, sur aida de turba criminal.
La omes ia dise ce la roca ia menasa cade mesma e feri algun.
@T On acusa ISIS de limpi etnical
@L aora_oji/2014/on_acusa_isis_de_limpi_etnical
====== On acusa ISIS de limpi etnical ======
2 setembre 2014
Amnestia Internasional dise ce lo ave indicas nova ce militiores de ISIS fa "un onda de limpi etnical" contra minorias en Irac norde.
Plu temprana, militias xia iraci e soldatos curdi ia fini un asjea de du menses par combatores de ISIS en la vila Amerli.
ISIS e rebelores suni aliada ia saisi areas vasta de Irac e Suria. Los ia mata miles de persones, de cual la plu ia es enfantes, e ia obliga ce plu ca milion fuji de sua casas en menses resente.
On ia colie un demostra ce alga matas coletiva ia aveni en Sinjar, un area norde, en agosto. Du de la plu males ia aveni a 3 agosto e 15 agosto, cuando ISIS ia ataca viletas e ia mata sentos.
Amnestia Internasional, un organiza promovente la diretos umana, ia dise:
"Grupos de omes e xicos, incluinte enfantes tan joven como 12, ia es saisida de ambos viletas par militiores ISIS, prendeda a via, e fusilida. ISIS esecuta crimines odiable, e ia cambia areas campanial de Sinjar a campos de mata sanguosa en sua batalia savaje per elimina tota trasas de nonarabis e muslimes nonsuni."
Ier, la Nasiones Unida ia anunsia ce lo envia un ecipo a Irac per investiga "atas de nonumania a grado nonimajinable".
La soldatos iraci e curdi ia saisi Amerli e Suleiman Beg, un fortres militial prosima, a lundi. La militiores ia dise ce Iran ia fa un rol en la operas resente, furninte armas e aidante con scemas militar.
Sirca 15 mil turcmenes xia ia es asejada en Amerli. La NU ia espresa sua teme de un masacra si ISIS ta catura la vila.
@T On acusa Suria de tortura e esecuta 11 000 prisonidas
@L aora_oji/2014/on_acusa_suria_de_tortura_e_esecuta_11_000_prisonidas
====== On acusa Suria de tortura e esecuta 11 000 prisonidas ======
21 janero 2014
Un reporta, par tre prosedores pasada de crimines de gera, dise ce on ave atestas clar ce la governa de Suria ia tortura e esecuta sirca 11 000 prisonidas en un modo sistemosa de pos la comensa de la rebela.
Dimashq nega la alegas.
La investigores ia esamina miles de fotos de prisonidas mor cual ia es furtiva sortida de la pais.
On publici la reporta a la dia ante la comensa de discutes de pas en Suiz. La discutes va comensa en la vila Montreux, e pos du dias va continua en Geneve.
@T On ajunta miles de plu ajentes de securia a la Copa Mundal
@L aora_oji/2014/on_ajunta_miles_de_plu_ajentes_de_securia_a_la_copa_mundal
====== On ajunta miles de plu ajentes de securia a la Copa Mundal ======
21 febrero 2014
Brasil ia anunsia un aumenta de securia con sirca 70 mil plu polisiores per manteni la bon ordina a la Copa Mundal de futbal.
En soma, on previde ce 170 000 persones va enforsa securia tra la 12 sites ospitante.
Presidente Dilma Rousseff ia dise en mercurdi ce on va pote introdui ance la fortes armada, si nesesada.
De pos junio de la anio pasada, protestores ia organiza marxas en stradas, con alga violentia, cual ia provoca consernas sur securia a la torneo.
@T On alega ce Berlusconi ia interfere con atestas en un prosede
@L aora_oji/2014/on_alega_ce_berlusconi_ia_interfere_con_atestas_en_un_prosede
====== On alega ce Berlusconi ia interfere con atestas en un prosede ======
24 janero 2014
On va investiga Silvio Berlusconi, la ministro xef pasada de Italia, sur alegas ce el ia interfere con atestas en un prosede de prostitui par minores.
El e sua avocatos es acusada de encontra la atestores fema per discute la atestas cual los va furni.
En 2013, on ia condena Berlusconi de paia per seso con un prostituida minor, Karima El Mahroug, ance conoseda como "Ruby la Furacor".
Esta es la plu resente en un cadena de casos legal cual afeta Berlusconi.
@T On alega ce Facebook scane mesajes privata
@L aora_oji/2014/on_alega_ce_facebook_scane_mesajes_privata
====== On alega ce Facebook scane mesajes privata ======
3 janero 2014
On intende prosede Facebook, alegante ce la compania monitori la mesajes privata de sua usores.
On dise ce cuando un usor envia un mesaje privata per comparti un lia a un otra pajeria, Facebook scane lo per analise la ativia enlinia de la envior. On alega ce la compania profita par dona esta datos a agregores e mercatores.
Facebook ia responde ce la acusas no es meritada.
La prosede reclama la cuantia de mone la plu grande de o $100 per cada dia de la violes alegada, o $10,000 per cada usor.
@T On alega ce fortes iraci maltrata prisonidas fema
@L aora_oji/2014/on_alega_ce_fortes_iraci_maltrata_prisonidas_fema
====== On alega ce fortes iraci maltrata prisonidas fema ======
7 febrero 2014
Un reporta nova de Human Rights Watch (Vijila de Diretos Umana) dise ce fortes de securia iraci prisoni nonlegal miles de femes, e tortura e maltrata los.
La reporta dise ce multe es tenida tra menses o an anios, sin es acusada.
Interogores demanda comun a los sur la ativia de sua relatadas mas, en loca de la crimines en cual los mesma es implicada.
Ministros ia descrive la alegas como "tro esajerada", ma ia confesa ce on ia maltrata alga prisonidas fema.
@T On alega ce Morsi ia esposa secretas nasional a Iran
@L aora_oji/2014/on_alega_ce_morsi_ia_esposa_secretas_nasional_a_iran
====== On alega ce Morsi ia esposa secretas nasional a Iran ======
23 febrero 2014
En Egipte, avocatos prosedente ia acusa Mohammed Morsi, la presidente desponeda, de esposa secretas nasional a la Armada de Gardores de la Revolui de Islam en Iran.
On ia oia la alega en la escuta du de sua prosede sur alegas de spia.
Avocatos dise ce el, e 35 otras, ia es envolveda en un conspira per destabli Egipte.
A pos, on ia pospone la prosede a 27 febrero.
@T On alega ce Snowden ia colabora con Rusia
@L aora_oji/2014/on_alega_ce_snowden_ia_colabora_con_rusia
====== On alega ce Snowden ia colabora con Rusia ======
20 janero 2014
On alega ce Edward Snowden, la esposor de metodos de spia american, ia colabora con Rusia.
Mike Rogers, la gidor de un comite de governores cual supravide la departes de securia, ia dise ce el crede ce esta esplica perce Snowden ia vade final a un ajente en Moscva.
Ma el ia ofre no atesta firma per suporta sua teoria.
Snowden es tempora refujada en Rusia. El es acusada sur sua atas de denunsia, ma el nega ce el ia dona documentos a cualce governa stranjer.
@T On alega ce un aidor de la governor de New Jersey ia organiza un conjesta
@L aora_oji/2014/on_alega_ce_un_aidor_de_la_governor_de_new_jersey_ia_organiza_un_conjesta
====== On alega ce un aidor de la governor de New Jersey ia organiza un conjesta ======
9 janero 2014
En la SUA, Chris Christie, la governor republiciste de New Jersey, fronti un acusa ce sua ofisia ia organiza un caos de trafica como parte de un vendeta political minor.
E-postas e mesajetas pare lia un aidor de Christie a la clui en setembre de la strada cual gida a la Ponte de George Washington. La ponte es un de la pontes la plu traficosa en la mundo.
Alegada, on ia reali la conjesta con intende de puni un maior democrata ci no ia suporta la eleje denova de la governor.
La documentos ia es publicida en mercurdi. Los no sujesta ce Christie mesma ia organiza la cluis, ma los pote contradise sua declara ce sua ofisiores no ia es culpable.
@T On alega contas nonjusta a un compania de petrolio en Nijeria
@L aora_oji/2014/on_alega_contas_nonjusta_a_un_compania_de_petrolio_en_nijeria
====== On alega contas nonjusta a un compania de petrolio en Nijeria ======
6 febrero 2014
La compania nasional de petrolio de Nijeria ia nega un alega par la xef de la banco sentral ce lo no ia justi $20 mil milion, cisa plu, de sua revenu.
En martedi, Lamido Sanusi ia informa un comite de senato ce, de $67 mil milion resetada par vendes de petrolio entre janero 2012 e julio 2013, $20 mil milion manca ancora.
La disputa sur la contas de la Corpora Nasional de Petrolio Nijerian ia comensa en la parte final de la anio pasada, pos un nota esposada.
Nijerianes ia es xocada par la cuantias grande de mone envolveda.
@T On anunsia la via de un canal tra Nicaragua
@L aora_oji/2014/on_anunsia_la_via_de_un_canal_tra_nicaragua
====== On anunsia la via de un canal tra Nicaragua ======
9 julio 2014
La governa nicaraguan ia acorda sur un via con un compania cual vole construi un canal entre la Mares Atlantica e Pasifica.
La canal ta estende tra 278 cilometres de Punta Gorda en la Mar Caribean, tra Lago Nicaragua, asta la boca de la rio Brito a borda de la Pasifica.
Ambientises ia espresa consernas sur la projeta de construi esta canal, cual ta compete con lo de Panama.
Nicaragua dise ce lo intende comensa construi la projeta en esta anio. Lo va custa $40 mil milion. Lo va ave un profondia de 27,6 metres e largias de entre 230m e 520m.
On ia eleje la via de la canal per evita areas de biodiversia grande, teritorios nativa, e locas ambiental protejeda.
Ma ambientistes resta consernada sur la efeto posible de la canal sur Lago Nicaragua, la lago la plu grande de America Sentral e un fonte importante de acua dulse.
La comision encargada con construi la canal ia dise ce lo va fa studias sur la efetos ambiental e sosial de la via, e ce cambias es ancora posible.
Lo previde ce la construi va comensa en desembre, e va es finida pos sinco anios. Ma seticas indica ja ce la SUA ia nesesa des anios per construi la Canal de Panama, cual ave min ca un tri de la longia de la canal projetada per Nicaragua.
@T On aproba regulas nova contra fumi en la UE
@L aora_oji/2014/on_aproba_regulas_nova_contra_fumi_en_la_ue
====== On aproba regulas nova contra fumi en la UE ======
27 febrero 2014
On va introdui leges contra fumi tra la Uni European, per atenta redui la cuantia de fumores par 2,4 milion.
La regulas, asetada par la Parlamento European, esije ce avertis sur sania con imajes va domina la fronte e retro de tota pacetas.
On va proibi ance sigaretas con sabor. Caritales de canser ia suporta la cambia, ma grupos favorente fumores ia critica lo.
On estima ce 700 mil persones en la UE mori prematur par causa de fumi en cada anio.
@T On aproba un projeta de dejeta sur la Parador Grande de Coral
@L aora_oji/2014/on_aproba_un_projeta_de_dejeta_sur_la_parador_grande_de_coral
====== On aproba un projeta de dejeta sur la Parador Grande de Coral ======
31 janero 2014
Autoriosas australian ia aproba un projeta de prende deponedas dragada e dejeta los a la Parador Grande de Coral.
Esta es un parte de un scema per crea un de la portos la plu grande de esporta carbon en la mundo. On nesesa move deponedas a via per permete barcones plu grande en la porto.
La deside ia es fada par la Autoriosa de la Parce Maral de la Parador Grande de Coral.
Siensities ia recomenda ce lo no suporta la idea, car la deponedas risca sofoca o veneni la coral.
@T On arde corpos en la strada en la RAS
@L aora_oji/2014/on_arde_corpos_en_la_strada_en_la_ras
====== On arde corpos en la strada en la RAS ======
20 janero 2014
Un manada cristian en Bangui, la capital de la Republica de Africa Sentral, ia mata e arde du muslimes en la strada.
La ganges ia dise ce los va continua mata muslimes en sua rejion.
Soldatos de Frans e la Uni African luta per limita la violentia setal cual ia comensa pos cuando rebelores, xef muslim, ia saisi la controla de la pais.
Parlamentores va eleje un presidente nova tempora en lundi, a un semana pos cuando Michel Djotodia, gidor de la rebelores, ia sesa en la posto.
@T On aresta cuatro persones sur eroina en New York
@L aora_oji/2014/on_aresta_cuatro_persones_sur_eroina_en_new_york
====== On aresta cuatro persones sur eroina en New York ======
10 febrero 2014
La polisia de New York ia aresta cuatro persones en relata a drogas, a sola alga dias pos la mori de ator Philip Seymour Hoffman par un supradosa suspetada de eroina.
350 sacos de la droga ia es saisida en la arestas en Manhattan sude.
La polisia dise ce los ancora no ia lia esta arestas a la mori de Hoffman.
La ganior de Oscar, ci ia ave 46 anios, ia es trovada en soldi pos mori a sua casa con un siringa en sua braso.
@T On aresta du omes sur viole de fem en Delhi
@L aora_oji/2014/on_aresta_du_omes_sur_viole_de_fem_en_delhi
====== On aresta du omes sur viole de fem en Delhi ======
16 janero 2014
La polisia en India ia aresta du omes en relata a la viole de un fem dansce par un gang, prosima a sua otel en Delhi.
La turiste, ci ave 51 anios, ia es violeda su menasa de cotel en la area de Paharganj a la sera de martedi, pos perde sua via e demanda aida.
On ia aresta ance un om en Chennai, acusante ce el ia viole un deutx de 18 anios en un tren en la semana pasada.
En 2013, la governa ia severi la leges sur viole sesal. Los ia reata a multe protestas pos cuando un gang ia viole e mata un studiante en un bus en Delhi.
@T On aresta escavores sudafrican pos sua emerji de mina
@L aora_oji/2014/on_aresta_escavores_sudafrican_pos_sua_emerji_de_mina
====== On aresta escavores sudafrican pos sua emerji de mina ======
18 febrero 2014
Des escavores nonlegal de oro ia emerji de un mina vea en Sudafrica. Plu es ancora su tera.
Alga de la omes ia sorti pos oia ce la polisia no es prosima. Ma polisiores ia asconde se, e ia aresta aora tota de la des.
On reporta ce la escavores ia es trapida par un grupo competente.
Los su la tera refusa denova emerji, temente ce on va aresta ance los.
@T On aresta gardores suspetada de Auschwitz
@L aora_oji/2014/on_aresta_gardores_suspetada_de_auschwitz
====== On aresta gardores suspetada de Auschwitz ======
21 febrero 2014
Autoriosas deutx ia prisoni omes con 88, 92, e 94 anios, sur ci on suspeta ce los ia es gardores a la campa nazi de Auschwitz.
On ia invade la casas de alga omes en tre statos de Deutxland, a menses pos cuando investigores de crimines de gera de la eda nazi ia anunsia ce los recomenda acusa 30 persones.
La tre omes ia es prendeda a un ospital de prison.
Plu ca 1,1 milion persones, de cual la majoria ia es iudi, ia es matada en Auschwitz.
@T On aresta la posesor pasada de un pajeria de pornografia venjante
@L aora_oji/2014/on_aresta_la_posesor_pasada_de_un_pajeria_de_pornografia_venjante
====== On aresta la posesor pasada de un pajeria de pornografia venjante ======
24 janero 2014
Autoriosas en la SUA ia aresta du omes en Californai per invade contas de e-posta e per fura fotos nuda per publici los en un loca de rede de "pornografia venjante".
Hunter Moore, ci ave 27 anios, e Charles Evens, ci ave 24, es acusada de conspira, de asede nonautorida un computador protejeda per oteni informas, e de fura de identia.
On reporta ce la omes ia publici imajes ofendente a la pajeria sin la permete de la vitimes.
Los fronti un puni de desenios en prison si on judi ce los es culpable.
@T On aresta multe frodores de asiones sin valua
@L aora_oji/2014/on_aresta_multe_frodores_de_asiones_sin_valua
====== On aresta multe frodores de asiones sin valua ======
28 febrero 2014
La polisia ia reata contra ganges criminal ci engana persones a investi en asiones sin valua.
Esta opera internasional, la plu grande de sempre contra tal frodas, ia resulta 110 arestas, xef en Espania e la Rena Unida.
La polisia ia dirije se a la scemores de la crimin.
La intende de la investiga de du anios, nomida Opera Rico, es elimina tal froda en Europa.
@T On aresta un bomba umana de 8 anios en Afganistan
@L aora_oji/2014/on_aresta_un_bomba_umana_de_8_anios_en_afganistan
====== On aresta un bomba umana de 8 anios en Afganistan ======
7 janero 2014
En Afganistan sude, la polisia ia aresta un xica afgani de sola oto anios, ci ia porta un jaceta de bomba.
On ia teni el a note de soldi en la provinse Helmand, cuando el ia atenta bombi la polisia de frontera nasional.
On crede ce la xica es la sore de un comandor major de la Taliban, ci ia comanda el a fa la ataca. El es en un state de xoca e confusa.
Un de la soldatos afgani ia vide ce la xica porta un jaceta de bomba. La xica ia es arestada ante pote esplode la bomba.
On ia move el a la Lashkar Gah, la capital provinsal.
@T On aresta un fem american sur lua de video tarda de nove anios
@L aora_oji/2014/on_aresta_un_fem_american_sur_lua_de_video_tarda_de_nove_anios
====== On aresta un fem american sur lua de video tarda de nove anios ======
18 febrero 2014
En la SUA, un fem en Carolina Sude ia es arestada e prisonida per un note, sur un video luada de cual sua redona ia es tarda de nove anios.
Kayla Finley ia visita un ofisia de polisia per reporta un crimin. Ma el ia descovre ce on ia comanda sua aresta en 2005, cuando el ia ave 18 anios.
Finley ia lua un copia VHS de Monster-in-Law ("Monstro par sposi"), un comedia romantica con Jennifer Lopez e Jane Fonda.
La televisa local ia descrive el como "xocada e repulsada" par la aresta.
@T On aresta un gidor de protestas en Tai
@L aora_oji/2014/on_aresta_un_gidor_de_protestas_en_tai
====== On aresta un gidor de protestas en Tai ======
11 febrero 2014
En Bangkok, la polisia tai ia aresta un gidor xef de protestas, alegante ce el la viole la regulas de crise.
Sonthiyan Chuenruethainaitham es entre 19 figures antigovernal de ci on ia comanda sua arestas en la semana pasada.
Esta es la ves prima de prisoni un gidor de protestas de pos la comensa de assemblas antigovernal en novembre.
Yingluck Shinawatra, la ministro xef, ia declara un state de crise ante un vota subita en 2 febrero. On ancora no sabe la resultas de la vota, car protestores ia disturba lo.
@T On aresta un maniate indian per froda
@L aora_oji/2014/on_aresta_un_maniate_indian_per_froda
====== On aresta un maniate indian per froda ======
28 febrero 2014
Subrata Roy, un de la maniates la plu ostentosa en India, ia es arestada pos sede a la polisia.
La Corte Suprema ia comanda sua aresta en mercurdi, pos cuando el ia fali apare ante judores en un caso de froda.
Du companias de sua grupo Sahara es acusada de colie 240 mil milion rupis ($3,9 mil milion) tra obligas finansial cual ia es nonlegal.
Regulores de la mercato dise ce Roy ia fali repaia la mone a miliones de investores, an pos un comanda de corte.
@T On aresta un padron de drogas en Mexico
@L aora_oji/2014/on_aresta_un_padron_de_drogas_en_mexico
====== On aresta un padron de drogas en Mexico ======
10 febrero 2014
La polisia en Mexico ia aresta un padron major de drogas en Guanajuato, un stato sentral.
Tirso Martínez Sánchez ia spesiali sur emporta, transporta, e distribui drogas per alga ganges criminal.
La Departe de Stato de la SUA ia ofre ja un premio de $5 milion per sua catura.
On acusa ce el ia contrabanda 76 tones de cocaina de Colombia a la Statos Unida entre 2000 e 2003.
@T On aresta un padron major de drogas en Mexico
@L aora_oji/2014/on_aresta_un_padron_major_de_drogas_en_mexico
====== On aresta un padron major de drogas en Mexico ======
22 febrero 2014
La Statos Unida dise ce on ia aresta un de la padrones de drogas la plu criminal de mundo en Mexico.
Joaquín Guzmán, conoseda como El Chapo (car el es un om corta), ia gida la cartel Sinaloa, cual contrabanda cuantias vasta de drogas nonlegal a la SUA.
Guzmán ia es un fujor de pos evade un prison de securia alta en un sesto de vestes en 2001.
On ia aresta el en la stato Sinaloa, en un opera juntada con fortes antidroga de la SUA.
@T On aresta un person sur un ataca contra femes en Delhi
@L aora_oji/2014/on_aresta_un_person_sur_un_ataca_contra_femes_en_delhi
====== On aresta un person sur un ataca contra femes en Delhi ======
3 febrero 2014
En India, la polisia en Delhi, la capital, ia aresta un person en relata a un ataca alegada contra du femes de la norde-este de la pais.
La femes de la stato Manipur dise ce un grupo de omes ia ataca los en un area poplida de la site a 25 janero.
Esta veni a media de un scandal sur la bate e mori de un studiante de la norde-este en la semana pasada.
Oservores dise ce la avenis lumina la prejudi contra minorias nativa de acel parte de India.
@T On aresta un xef pasada de polisia ecuadoran
@L aora_oji/2014/on_aresta_un_xef_pasada_de_polisia_ecuadoran
====== On aresta un xef pasada de polisia ecuadoran ======
30 janero 2014
La polisia en la SUA ia aresta Edgar Vaca, un comandor pasada de la polisia ecuadoran. On acusa el sur maltratas en relata a diretos umana.
La ministro de internas en Quito ia anunsia ce la jeneral, un jubilor, ia es arestada en Washington e va es estradida a Ecuador.
On acusa Vaca e nove otra ofisiores de saisi e tortura tre rebelores sinistriste en 1985.
El nega tota la acusas.
@T On aresta vendores de un DVD proibida en Cenia
@L aora_oji/2014/on_aresta_vendores_de_un_dvd_proibida_en_cenia
====== On aresta vendores de un DVD proibida en Cenia ======
14 febrero 2014
En Cenia, on ia aresta deses de comersiores de DVDs piratida ci ia vende copias de un filma proibida, The Wolf of Wall Street ("La lupo de Wall Street").
La Comite Cenian de Clasi Filmas ia proibi la filma en janero per sua "senas estrema de nudia, seso, vilia, edonisme, e blasfema". La filma es nomida per un premio Oscar.
Multe cenianes ia regarda lo en copias piratida cual botecas peti de DVD ia vende per sirca $0,57.
La arestadas risca un multa de asta $1160 o alga anios en prison.
@T On asasina un rea pasada de belia en Venezuela
@L aora_oji/2014/on_asasina_un_rea_pasada_de_belia_en_venezuela
====== On asasina un rea pasada de belia en Venezuela ======
8 janero 2014
En Venezuela, Monica Spear, pasada un rea de belia de la pais, e Thomas Berry, sua sposo eres, ia es asasinada par fusil en sua auto.
Sua fia de sinco anios ia es ferida en la aveni, ma el es en state stable en ospital.
La polisia ia comensa un investiga sur la asasina, cual ia aveni sur la autovia de Valencia a Puerto Cabello.
Spear ia deveni Miss Venezuela en 2004, e ia ata ance en telenovelas.
El e sua sposo ia para sua auto car lo ia fali. La polisia suspeta ce la fusilores ia intende ruba los.
@T On asinia un presidente tempora per Ucraina
@L aora_oji/2014/on_asinia_un_presidente_tempora_per_ucraina
====== On asinia un presidente tempora per Ucraina ======
23 febrero 2014
La parlamento ucrainsce ia nomi sua presidente interna como la presidente tempora de la pais.
Oleksandr Turchynov emprende la posto pos la despone de Viktor Yanukovych en saturdi. El ia dise ce parlamentores debe formi un governa nova unida ante martedi.
La parlamento ia vota ance per saisi la imobila lusosa de Yanukovych, prosima a Kiev, a cual protestores ia entra en saturdi.
Entretempo, Yulia Tymoshenko, la ministro xef pasada ci on ia libri de prison, ia clari ce el no desira es denova la ministro xef.
@T On atenta atera un robot sur un cometa
@L aora_oji/2014/on_atenta_atera_un_robot_sur_un_cometa
====== On atenta atera un robot sur un cometa ======
12 novembre 2014
La Ajenteria European de Spasio ia dona sua aproba final per un atenta osante de atera sur un cometa.
La satelite Rosetta veni de relasa un aterador en un desende de sete oras a la surfas de cometa 67P/Churyumov-Gerasimenko.
La ecipo tecnical, locada en Darmstadt en Deutxland, ia confirma ce Rosetta es coreta aliniada.
Si Philae ariva susedosa, esta va es la ves prima de atera un robot sur la surfas de un cometa. On previde oia un confirma de susede o fali sirca 16:00 de ora universal oji.
On intende ce la robot peti usa vises e arpones per securi sua posa sur la cometa.
Lo va envia direta un foto de sua ambiente -- un vista strana de cavas profonda e pinaculos de jelo.
Ma esta es un emprende de cual la resulta es estrema nonserta. Plu temprana oji, on no ia susede inisia la sistem de puxadores cual la robot ta usa per forsa se a en la surfas pos atera.
Stephan Ulamec, xef de atera, ia comenta: "Nos va debe aora fida sola la arpones, la vises en la pedes, o la molia de la surfas. Esta no fasili la taxe, serta."
Plu, la tereno elejeda per la atera es vera no plana. La robot risca xoca contra falesas, cade sur un inclina presipe, o desapare an en un fesur.
Ma Fred Jansen, la manejor de mision, ia dise ce an con esta defias, el es multe esperosa ce la resulta va es positiva.
Ian Wright, un otra siensiste laborante sur la aterador, ia dise: "Nos comprende ce esta es un aventura riscosa. En alga modo, acel es un parte de la stimula de la emprende. Tal es esplora: on visita la nonconoseda, on no sabe lo cual on va fronti."
La premio per un atera susedosa va es enorme valuosa -- la capasia de esamina un cometa. On crede ce cometas conteni indicas importante de la materias orijinal de cual nosa sistem solal ia es creada a plu ca 4,5 mil milion anios ante aora.
La aterador es nomida Philae, seguente la nom de un isola en la Rio Nilo do on ia descovre un obelisce cual, como la Petra famosa de Rosetta, ia aida desifri la ieroglifos egiptian.
@T On atenta salva un om de un cava profonda
@L aora_oji/2014/on_atenta_salva_un_om_de_un_cava_profonda
====== On atenta salva un om de un cava profonda ======
10 junio 2014
En Deuxtland, un ecipo atenta salva un om de 52 anios ci ia es ferida en un cade de rocas en un cava con profondia de un cilometre. Probable la labora va ocupa alga dias.
La cava Riesending es la plu profonda en la pais. Un de la acompaniores de la om ia spende 12 oras en reveni a la surfas per fa un alarma.
Sirca 200 persones es envolveda en la labora de salva, cual aveni prosima a Berchtesgaden en Deutxland sude.
La salvores prima la ateni la om en la cava vertical a lundi. Un grupo du, incluinte un dotor osteraices abituada a salvas de cava, ia desende a alga oras plu tarda, e un otra ecipo veni de Suiz.
La om ia es con du acompaniores en un vacanse en la montania Untersberg. El ia sufri feris a sua testa e tronco en la cade de rocas, cual ia aveni en la oras temprana de soldi. An si el ia porta un xapo protejente, esta no ia proteje el contra la pesa de la roca.
Un ofisior ia dise: "El responde, ma el no vade bon."
La om ia es un de la rexercores ci ia descovre a cava a no multe anios ante aora.
@T On avansa a un proba de sangue per la maladia de Alzheimer
@L aora_oji/2014/on_avansa_a_un_proba_de_sangue_per_la_maladia_de_alzheimer
====== On avansa a un proba de sangue per la maladia de Alzheimer ======
8 julio 2014
Siensistes brites ia fa "un avansa major" en developa un proba de sangue per predise la comensa de la maladia de Alzheimer.
Par rexerca sur plu ca mil persones, on ia identifia en la sangue un grupo de protenas capas de predise la comensa de la dementia con esatia de 87%.
On va usa la descovre per boni probas de drogas nova.
Espertas ia avisa ce la proba es ancora no preparada per usa dial par dotores: par causa de la nonesatia, on ta risca informa persones sana ce los va developa la maladia, e esta ta pote causa ansia e depresa.
La rexercas sur maneras de trata la maladia de Alzheimer ia encontra multe problemes. Entre 2002 e 2012, 99,6% de probas intendeda per preveni o reversa la maladia ia fali.
Dotores crede ce la manca de susede es causada par trata pasientes cuando la tempo la plu conveninte es ja pasada, car sintomes apare a un desenio pos la comensa de la maladia.
Donce la identifia temprana de pasientes es un de la goles la plu importante per la rexercas sur dementia.
Esta grupo de rexercores conteni siensistes de universia e industria. Lo ia xerca diferes en la sangue de 452 persones sana, 220 con alga descapasi conosal, e 476 con la maladia de Alzheimer.
Con esatia de 87%, los ia pote indica cual pasientes con alga descapasi conosal va developa la maladia en la anio seguente.
@T On campania per preveni la mata de un jirafa dansce
@L aora_oji/2014/on_campania_per_preveni_la_mata_de_un_jirafa_dansce
====== On campania per preveni la mata de un jirafa dansce ======
10 febrero 2014
En Danmarc, campaniores per diretos de animales atenta preveni la mata de un jirafa, joven e intera sana, a la Zo de Kobenhavn.
La zo no pote reteni la animal, nomida Marius, par causa de regulas european contra endogamia. Atentas de trova un casa nova per el ia fali.
La zo dise ce lo nesesa mata la jirafa ante cuando el adulti e atenta reprodui.
La campaniores dise ce acel ta es un ata barbar. Marius ave sola 18 menses.
@T On cansela la lansa de un libro par Malala Yousafzai
@L aora_oji/2014/on_cansela_la_lansa_de_un_libro_par_malala_yousafzai
====== On cansela la lansa de un libro par Malala Yousafzai ======
29 janero 2014
On ia cansela un aveni en Pacistan norde-ueste per lansa la racontas de Malala Yousafzai a mercato, pos presa de ofisiores local.
Malala es la xica ci ia es fusilida a la testa par la Taliban en 2012 per sua campania per boni instruis a femes.
La polisia e ofisiores de la provinse ia dise ce on ia para la aveni par causa de securia.
Ma Imran Khan, de ci sua partito governa la provinse, ia dise ce el no pote comprende la deside.
@T On catura la gidor de un cartel de drogas en Mexico
@L aora_oji/2014/on_catura_la_gidor_de_un_cartel_de_drogas_en_mexico
====== On catura la gidor de un cartel de drogas en Mexico ======
28 janero 2014
Fortes mexican ia catura un de la plu xercadas de la padrones de drogas.
Dionicio Loya Plancarte, conoseda como "La Tio", ia es un de la gidores de la cartel Cavalores Templal en la stato de Michoacán en la ueste de la pais.
La governa ia ofre un premio de 30 milion pesos ($2,2 milion) per sua catura. On xerca el per crimines de droga e de lava de mone.
Plu temprana en esta mense, la pais ia envia soldatos a Michoacán post combates entre ganges e patruliores estralegal.
@T On clari la secretas de serpentes volante
@L aora_oji/2014/on_clari_la_secretas_de_serpentes_volante
====== On clari la secretas de serpentes volante ======
30 janero 2014
Siensistes ia solve cisa la misterio de la vola de serpentes volante.
On trova esta retiles nonusual en Asia sude-este.
Los es capas de lansa los de arbores e lisca refinada tra la aira.
Rexercores dise ce la serpentes altera estrema la forma de sua corpo per jenera la fortes airodinamical nesesada per reali esta.
@T On comanda a para la vive de un fem ensinta ma serebral mor en Texas
@L aora_oji/2014/on_comanda_a_para_la_vive_de_un_fem_ensinta_ma_serebral_mor_en_texas
====== On comanda a para la vive de un fem ensinta ma serebral mor en Texas ======
26 janero 2014
En la SUA, un judor en Texas ia comanda un ospital a sesa la susta de vive de un fem serebral mor, ci on manteni en vive car el es ensinta.
R. H. Wallace ia dise ce la Ospital John Peter Smith debe para la vive de Marlise Munoz ante la sera de lundi.
Munoz ave 33 anios. El ia es ja ensinta de 14 semanas cuando el ia deveni nonconsensa en novembre. On crede ce el ave un coagula de sangue.
La ospital ia razona ce un lege de stato proibi la refusa de salva la vive a pasientes ensinta.
@T On comensa identifia la vitimes de la avion MH17
@L aora_oji/2014/on_comensa_identifia_la_vitimes_de_la_avion_mh17
====== On comensa identifia la vitimes de la avion MH17 ======
23 julio 2014
Investigores siensal de crimin ia comensa identifia la vitimes de la cade de la avion MH17 en Ucraina.
La restas, cual on ia move plu temprana de la teritorio ocupada par rebelores prorusce, va es transportada a Nederland de la site Kharkiv.
Ma sola 200 corpos ia ariva en Kharkiv, e no 282 como la rebelores ia dise. Investigores va revade a la loca de cade per fa un xerca nova.
La avion de la compania Malaysia Airlines ia cade a jovedi pasada, en un area controlada par rebelores. Tota la 298 pasajores e ecipores ia es matada. La plu de los ia es nederlandes.
Nasiones ueste dise ce los vide sempre plu indicas ce la rebelores ia tira la avion a tera, usante un misil furnida par Rusia. Rusia ia sujesta ce fortes de la governa ucrainsce es culpable.
Oservores de la Organiza per Securia e Colabora en Europa ia esamina la ruinas, e ia trova ce on ia talia pesos major de la avion, tal ce partes grande aspeta aora diferente.
Paises direta afetada par la desastre -- como Nederland, Australia, e la Rena Unida -- es consernada ce on no ia isoli sufisinte la loca de cade. La risca esiste ce trasas importante pote es danada o perdeda.
Rebelores ia dona la rejistradores "caxa negra" de la avion a ofisiores malaisian. On va analise los en la Rena Unida, do on ave un de la sola du laborerias en Europa con la aparatos spesialiste per escuta la sonas rejistrada. La otra es en Frans.
@T On comensa prosede sur la aseja de Westgate en Cenia
@L aora_oji/2014/on_comensa_prosede_sur_la_aseja_de_westgate_en_cenia
====== On comensa prosede sur la aseja de Westgate en Cenia ======
16 janero 2014
La prosede de cuatro omes, acusada sur la aseja de Westgate, un sentro comersial en Cenia, ia comensa en Nairobi, la capital de la pais.
La cuatro suspetadas stranjer nega ce los ia aida un grupo teroriste, e ce los ia es nonlegal en Cenia.
La corte ia oia atestas de gardores ci ia vide lo cual ia aveni cuando la fusilores ia fa sua ataca en setembre. A la min 67 persones ia mori.
Al-Shabab, un grupo somali cual es liada con al-Qaidah, ia dise ce un de sua brigadas ia fa la aseja.
La ataca ia es la plu mal en Cenia de pos la mata de 224 persones en 1998, cuando on ia bombi la ambasada de la SUA.
@T On condena du briteses per gida a 232km per ora
@L aora_oji/2014/on_condena_du_briteses_per_gida_a_232km_per_ora
====== On condena du briteses per gida a 232km per ora ======
29 janero 2014
En la Rena Unida, on ia condena du omes ci ia gida sua autos a 232 cilometres per ora sur un via xef en la contia de Yorkshire Norde.
Daniel Scott Richardson, ci ave 21 anios, e James Burrows, de 26 anios, ia confesa ce los ia es culpable de viaja perilinte.
La laboror de la camera de polisia ia es "completa stonada" cuando el ia rejistra la du autos tan rapida movente, la un vera prosima a la otra.
On ia condena ambos a cuatro menses en prison, ma la punis ia es suspendeda per 18 menses.
@T On condena polisiores pilipina per un rota de tortura
@L aora_oji/2014/on_condena_polisiores_pilipina_per_un_rota_de_tortura
====== On condena polisiores pilipina per un rota de tortura ======
29 janero 2014
Grupos de diretos umana ia critica la polisia en la Pilipinas per la usa alegada de un "rota de tortura" en un prison.
On alega ce polisiores ia jira la rota per eleje metodos de maltrata prisonidas.
La punis posible ia inclui "la posa de cirotero", en cual persones ia debe pende inversada per 30 secondos.
Amnestia Internasional ia dise ce polisiores en la provinse de Laguna, prosima a Manila, ia maltrata la prisonidas "per un diverti".
@T On condena un deside de no envia un scior sudafrican a Sochi
@L aora_oji/2014/on_condena_un_deside_de_no_envia_un_scior_sudafrican_a_sochi
====== On condena un deside de no envia un scior sudafrican a Sochi ======
26 janero 2014
Suportores de la sola scior posible de la Juas Olimpial ia condena un deside de no envia el a Sochi.
La comite Olimpial nasional ia dise ce Sive Speelman "ia fali sasia la esijes minima".
Speelman ave 18 anios e es gradida como numero 2290 en la mundo.
Peter Pilz, la xef de sci de Sudafrica ia dise: "El ia sede un dui de sua enfantia per segue sua sonia. Esta es un delude."
@T On condena un dotor canadian per viole femes
@L aora_oji/2014/on_condena_un_dotor_canadian_per_viole_femes
====== On condena un dotor canadian per viole femes ======
26 febrero 2014
Un dotor canadian ia viole sesal 21 pasientes calmida, en cuando los ia regarda el sin defende. On ia condena el a des anios en prison.
George Doodnaught, un anestesiste de 65 anios, ia maltrata femes con entre 25 e 75 anios ci ia es su sua cura.
La vitimes ia atesta ce los ia es consensa, ma noncapas de move, cuando los ia es besada, caresada, e atacada par Doodnaught.
La plu atacas ia aveni en Toronto entre 2006 e 2010, e ia es ascondeda de otra empleadas medical par mera un cortina sirurjial.
@T On condena un monce fema a prison per entra un compleso de defende
@L aora_oji/2014/on_condena_un_monce_fema_a_prison_per_entra_un_compleso_de_defende
====== On condena un monce fema a prison per entra un compleso de defende ======
20 febrero 2014
On ia condena un monce catolica fema vea a cuasi tre anios en prison per la dana cual el ia causa en entra par forsa a un loca SUA de defende nucleal.
Megan Rice, ci ave 84 anios, e du otra protestores ia talia sercas per entra a un compleso en Tennessee do on prosede e conserva uranio.
On ia condena la otra du a plu ca sinco anios en prison.
La aveni en julio 2012 ia causa cambias de securia a la compleso.
@T On condena un soldato de guatemalteca sur un masacra en 1982
@L aora_oji/2014/on_condena_un_soldato_de_guatemalteca_sur_un_masacra_en_1982
====== On condena un soldato de guatemalteca sur un masacra en 1982 ======
11 febrero 2014
Un corte SUA ia condena un soldato pasada de Guatemala a des anios en prison per menti sur sua rol en un masacra en 1982.
On ia sutrae ance la sitadania SUA de Jorge Vinicio Sosa Orantes, ci ave 55 anios.
On ia aresta el en Canada en 2011, pos fuji de la SUA en la anio presedente.
Plu ca 200 persones ia es matada en la masacra de Dos Erres, un de la avenis la plu macabre de la gera interna de 36 anios en Guatemala.
@T On condena violores sesal a mori en India
@L aora_oji/2014/on_condena_violores_sesal_a_mori_en_india
====== On condena violores sesal a mori en India ======
5 april 2014
Un corte en India ia condena tre omes a pende, su un lege nova cual dona la puni de mori a persones culpable de violes sesal multiple. La omes ia es condenada per viole un fotojornaliste en Mumbai en la anio pasada.
Los ia es ance entre sinco omes condenada a pasa sua vives en prison en marto de esta anio per viole un otra fem en un aveni separada en la mesma site. Los es la prima ci on ia condena su la lege nova.
A un corte en Mumbai, judor Shalini Phansalkar Joshi ia dise: "On debe ave no tolera per tal avenis. On debe envia un mesaje forte e clar a la sosia."
Ambos vitimes -- un telefoniste ci ia ave 18 anios, e la fotojornaliste ci ia ave 22 -- ia es atacada en 2013. Ambos prosedes ia es completida en sete menses.
La fotojornaliste, un stajior con un jornal de Mumbai, ia vade a la Molines Shakti -- un molin aora abandonada -- con un colaboror mas per un taxe de fotografia cuando on ia ataca el. Sua colaboror ia es bateda par la atacores. Pos la publici de acel caso, la telefoniste ia anunsia ce el ia es atacada en la mesma loca a un mense a ante.
On ia comensa esamina plu atendosa la viole sesal en India pos la viole coletiva e omiside de un studiante de 23 anios en un bus en Delhi en desembre 2012. Acel caso ia causa protestas tra la nasion e ia obliga la autoriosas indian a introdui leges nova e sever.
Per la ataca en Delhi, on ia condena cuatro omes a mori, e on ia envia un otra a un prison per jovenes per tre anios. La ataca contra la fotojornaliste en Mumbai ia renovi la coleria publica.
@T On confirma un judi de compensa femes afetada par implantadas PIP
@L aora_oji/2014/on_confirma_un_judi_de_compensa_femes_afetada_par_implantadas_pip
====== On confirma un judi de compensa femes afetada par implantadas PIP ======
22 janero 2014
Un corte franses de apela ia suporta un judi importante de compensa 1700 femes, a ci on ia furni implantadas de seno con silicon defetosa. Multe de la implantadas ia fende.
Judores ia dise ce la compania deutx cual ia validi la implantadas, TÜV Rheinland, debe paia 3000 euros a cada fem afetada.
En 2013, on ia judi ce la compania es culpable sur esta scandal de sania, en junta con la compania franses Poly Implant Prothèse (PIP).
Jean-Claude Mas, la fondor de PIP, ia es condenada a cuatro anios en prison e multada per 75 000 euros en desembre.
@T On confirma un mori par gripe avial
@L aora_oji/2014/on_confirma_un_mori_par_gripe_avial
====== On confirma un mori par gripe avial ======
10 janero 2014
Ofisiores de sania en Canada ia confirma la mori prima cual on conose en America Norde par causa de la gripe avial, nomida H5N1.
La mor ia es un abitor de la provinse Alberta, ci ia viaja resente a Beijing.
Rona Ambrose, la ministro canadian de sania, ia descrive la caso como "isolida", e ia dise ce la risca a la popla jeneral es basa.
Des persones ia mori ja en esta saison en Alberta par causa de la gripe porcal, nomida H1N1. Lo infeta la partes basa de la via respiral, profonda en la plumon, do lo pote causa un pneumonia matante.
@T On construi un temple como tribui a Sonia Gandhi
@L aora_oji/2014/on_construi_un_temple_como_tribui_a_sonia_gandhi
====== On construi un temple como tribui a Sonia Gandhi ======
10 janero 2014
Un suportor de Sonia Gandhi, la xef de la partito Congresa cual governa en India, construi un temple cual conteni un idol de el.
P. Shankar Rao, un ministro pasada, abita en la stato de Andhra Pradesh.
La idol ave un altia de 2,7 metres. Rao dise ce lo es un tribui a sua gidor.
Gandhi ave 67 anios e es un de la politicistes la plu potiosa en la pais. El parteni a un dinastia influente de cual tre de sua membros ia es ministros xef de India.
@T On culpa vodca per la cuantia de moris joven en Rusia
@L aora_oji/2014/on_culpa_vodca_per_la_cuantia_de_moris_joven_en_rusia
====== On culpa vodca per la cuantia de moris joven en Rusia ======
31 janero 2014
La cuantia alta de moris joven en Rusia es xef causada par bevi tro multe alcol, spesial vodca.
La studia en la jornal The Lancet revela ce 25% de omes rusce mori ante sua aniversario 55. La plu de la moris es liada a alcol.
La causas de mori inclui maladia de figato e veneni par alcol. Multe mori ance en asidentes o en combates enebriada.
On crede ce esta rexerca es la plu grande de sua spesie en la pais.
@T On desativi un bomba vea trovada en Hongkong
@L aora_oji/2014/on_desativi_un_bomba_vea_trovada_en_hongkong
====== On desativi un bomba vea trovada en Hongkong ======
7 febrero 2014
En Hongkong, la polisia ia susede desativi un bomba con pesa de 900 cilogrames de la Gera Mundal Du. On ia descrive lo como la bomba la plu grande de gera cual on ia trova en la site.
On ia sorti plu ca 2200 persones pos descovre lo en un construeria en la posmedia de jovedi.
La bomba ia conteni 450 cilogrames de esplodentes.
On crede ce lo ia es cadeda par la marina SUA en la gera, cuando Japan ia ocupa la colonia alora brites.
@T On descondena siensistes ci no ia preside un trematera
@L aora_oji/2014/on_descondena_siensistes_ci_no_ia_preside_un_trematera
====== On descondena siensistes ci no ia preside un trematera ======
11 novembre 2014
On ia desculpa un grupo de siensistes italian ci ia es condenada de mata sin intende pos fali predise un trematera.
La sete omes ia es condenada a ses anios en prison pos un trematera cual ia ruina L'Aquila, un vila medieval, en 2009, matante 309 persones.
La condena ia provoca controversia, e alga persones ia dise ce on ia prosede contra la siensa mesma.
Ier, un corte de apela ia desculpa la grupo. La judor, Fabrizia Ida Francabandera, ia judi ce no caso valida esiste per esamina.
Stefano Gresta, presidente de la Instituida Nasional de Jeofisica e Volcanolojia, ia dise: "La credablia de la comunia siensal intera de Italia es restorada."
La sete omes -- de ci tota es siensistes major o espertas sur desastre -- ia es membros de un comite asemblada en L'Aquila en 2009, pos un serie de tremas en la area.
A alga dias pos sua consenta, un trematera de grado 6,3 ia colpa la vila a media de la note. Multe de la construidas medieval ia es destruida, e alga abitores ia culpa la comite per no furni avisas sufisinte.
En la prosede cual ia segue, la avocatos acusante ia dise ce la espertas ia ofre informas falsa calminte a la abitores. Los ia nota ce un comitor ia dise ce la tremas presenta "no peril".
Pos la condenas, plu ca 5000 siensistes ia suscrive un letera publica a Giorgio Napolitano, la presidente de Italia, per suporta la espertas. Multe ia espresa la opina ce la condenas representa un malcomprende fundal de la siensa de tremateras.
La deside de cansela ia aveni pos un apela cual ia dura tra un mense. La acusores ave ancora la direto de vade a un corte plu alta per atenta repone la condenas.
@T On descovre antrax en carne de bove en Magiar
@L aora_oji/2014/on_descovre_antrax_en_carne_de_bove_en_magiar
====== On descovre antrax en carne de bove en Magiar ======
5 julio 2014
On monitori sinco persones a un ospital magiar pos descovre antrax, un maladia matante, en carne de bove.
La sinco ia es ospitalida pos consernas ce cisa la maladia ia infeta los.
On ia descovre la maladia en la carne jelada de du animales ci ia es nonlegal matada.
Antrax es causada par un bateria cual esiste natural en tera.
La sintomes de esposa a lo inclui ulseras de pel, nauseas, vomitis, e febres. Si on no trata la maladia en umanas, lo pote mata.
On reporta ce la animales en la aveni resente ia es matada a un cultiveria en Tiszafüred, un vila a 160 cilometres a este de la capital, Budapest.
@T On descovre la dinosauro la plu grande de istoria
@L aora_oji/2014/on_descovre_la_dinosauro_la_plu_grande_de_istoria
====== On descovre la dinosauro la plu grande de istoria ======
18 maio 2014
On ia desentera la osos fosilida de un dinosauro, sur cual on crede ce lo es la animal la plu grande cual ia sta a cualce tempo sur la tera.
Calculas fundida sur sua osos de coxa revela ce lo ia ave 40 metres de longia e 20 metres de altia -- egal a un construida de sete niveles. Lo ia pesa 77 tones, tan pesosa como 14 elefantes african, e plu pesosa par 7 tones ca la recordo presedente, Argentinosaurus.
Siensistes crede ce lo es un spesie nova de titanosauro, un erbivor enorme cual ia esiste en la periodo Crestasica Tarda.
Un cultivor local ia trova prima la restas en la deserto prosima a La Flecha, a sirca 250 cilometres a ueste de Trelew en Patagonia.
La fosiles ia es escavada par un ecipo de paleontolojistes de un museo. Los ia desentera la sceletos partal de sete individuas -- sirca 150 osos en soma -- de cual tota ia es en "un state notable bon".
An con sua grandia vasta, la dinosauro recordo ancora no ave un nom. La rexercores ia dise: "On va nomi lo per descrive sua merveliosia, e per onora no sola la area ma ance la cultivores ci ia avisa nos sur sua descovre."
@T On descovre la jenetica de la canser moderna la plu vea
@L aora_oji/2014/on_descovre_la_jenetica_de_la_canser_moderna_la_plu_vea
====== On descovre la jenetica de la canser moderna la plu vea ======
25 janero 2014
Siensistes en la Rena Unida ia descovre ce la canser vivente la plu vea conoseda ave un eda de 11 000 anios.
Lo ia apare en un sola can, e ia survive en canines asta aora. La selulas de canser ia pasa entre animales cuando los ia copula.
Un ecipo gidada par la Instituida Sanger, prosima a Cambridge, ia desifri la ADN de la canser, revelante la jenetica de un can antica de grandia media.
La animal ia es simil a un husci, e ia ave un pelo corta e lisa de color gris brun o cisa negra.
@T On descovre plu sur la condui de supervolcanes
@L aora_oji/2014/on_descovre_plu_sur_la_condui_de_supervolcanes
====== On descovre plu sur la condui de supervolcanes ======
6 janero 2014
Espertas ia descovre ce supervolcanes como Yellowstone en la SUA pote esplode an sin trema de tera o otra causa esterna. La volum mera de magma licuida sufisi per causa un eruta enorme e desastrosa.
Un esperimenta a la Laboreria European de Radia Sincrotron en Grenoble, en Frans, ia recrea la caldia e presa intensa en un volcan jigante.
On conose sirca 20 supervolcanes sur la Tera, incluinte Lago Toba en Indonesia, Lago Taupo en Zeland Nova, e la Campos Flegreo prosima a Napoli en Italia.
Per promedia, un supervolcan eruta a sola un ves en cada 100 000 anios. Ma cuando esta aveni, lo fa un efeto ruinante a la clima e ecolojia de la planeta.
@T On descovre sinco corpos fusilida en autos en Rusia
@L aora_oji/2014/on_descovre_sinco_corpos_fusilida_en_autos_en_rusia
====== On descovre sinco corpos fusilida en autos en Rusia ======
9 janero 2014
On ia envia fortes de securia rusce a un opera antiteroriste a 300 cilometres a este de Sotxi, do la juas olimpial de inverno va aveni en febrero.
Esta aveni pos la descovre de sinco corpos mor en cuatro autos en la area de la site Stavropol. Tota la mores ia es fusilida.
Cuando investigores ia prosimi a un de la veculos, un aparato improvisada ia esplode prosima, ma nun ia es ferida. Los ia securi un otra aparato de esplodentes.
La autoriosas rusce ia aumenta ja la securia en Sotxi, a lado de la Mar Negra.
@T On desculpa Dieudonné sur un video antiiudiste
@L aora_oji/2014/on_desculpa_dieudonne_sur_un_video_antiiudiste
====== On desculpa Dieudonné sur un video antiiudiste ======
8 febrero 2014
On ia desculpa Dieudonné M'bala M'bala, un comediste controversa franses, sur un video en cual el ia xerca la libri de un om ci ia tortura e mata un iudi en 2006.
La corte ia judi ce lo no pote demostra ce la video ia es publicida par el.
Dieudonné, ci on ia condena ja per provoca odia contra iudis, ia fronti un multa de 20 000 euros ($27 000) o 200 dias en prison.
Resente, Frans ia proibi un de sua presentas, sur consernas ce lo es antisemita.
@T On desemplea la governor de la banco sentral de Nijeria
@L aora_oji/2014/on_desemplea_la_governor_de_la_banco_sentral_de_nijeria
====== On desemplea la governor de la banco sentral de Nijeria ======
20 febrero 2014
Lamidos Sanusi, la governor de la banco sentral de Nijeria, ia es suspendeda par la presidente per "freta e malcondui finansial".
Sanusi ia provoca un xoca en la pais cuando el ia alega ce 20 mil milion en revenu de petrolio ia desapare.
La compania nasional de petrolio de Nijeria ia nega fali justi la mone, descrivente la alega como "nonsuportada".
On respeta Sanusi pos sua reformis a la campo de bancos de pos sua emprende de la posto en 2009.
@T On desemplea la xef de un stasion autonom de radio rusce
@L aora_oji/2014/on_desemplea_la_xef_de_un_stasion_autonom_de_radio_rusce
====== On desemplea la xef de un stasion autonom de radio rusce ======
19 febrero 2014
La xef de Ekho Moskvy, un de la poca difusantes autonom cual resta en Rusia, ia es desempleada e recambiada con un editor de la jornalisme de stato.
Yuri Fedutinov ia gida la stasion de radio de pos 1992. La dirijor nova, Yekaterina Pavlova, ia labora la plu resente a Vose de Rusia.
Ekho Moskvy es un de poca voses nondependente en jornalisme rusce.
Sua editor ia descrive la deside como "nonjusta" e "intera political", e ia comenta ce la intende ia es reali un cambia de politica edital.
@T On desemplea un xef colombian de securia sur spia nonasetable
@L aora_oji/2014/on_desemplea_un_xef_colombian_de_securia_sur_spia_nonasetable
====== On desemplea un xef colombian de securia sur spia nonasetable ======
5 febrero 2014
Juan Manuel Santos, la presidente de Colombia, ia desemplea la xef de securia de la armada, sur alegas de spia sur ofisiores governante ci ia negosia con rebelores FARC a discutes de pas en Cuba.
Jeneral Mauricio Ricardo Zúñiga e un otra ia es desempleada per la tempo de un investiga completa.
Un grupo militar superior ia es organizada per intersepi usas de telefoneta par la ofisiores.
Santos ia descrive la interfere alegada como "intera nonasetable".
@T On desveli un primador capas de construi confetos
@L aora_oji/2014/on_desveli_un_primador_capas_de_construi_confetos
====== On desveli un primador capas de construi confetos ======
8 janero 2014
En un esibi en Las Vegas, on ia revela du primadores de tre dimensiones cual es capas de prepara comedas.
La macinas crea confetos de xocolada e zucar, en formas cual ta es difisil produable par metodos tradisional.
La min grande, Chefjet, es limitada a creas de un color, ma la plu grande, Chefjet Pro, es capas de crea confetos multicolor.
La min grande va custa sirca $5000. La preso de la plu grande va es duplida. Espertas ia dise ce la presos alta va restrinje la vendes.
@T On discute un foto de un saleta privata jemelo en Sochi
@L aora_oji/2014/on_discute_un_foto_de_un_saleta_privata_jemelo_en_sochi
====== On discute un foto de un saleta privata jemelo en Sochi ======
23 janero 2014
On ia conversa multe en Twitter a tema de un foto de un saleta privata per omes en un construida de la Olimpiales en Sochi. La saleta conteni du vasones.
La foto, fada en la Sentro de Biatlon, ia es tuitada par un corespondente de la BBC, e Alexei Navalny, un gidor oposante rusce, ia tira la atende a lo.
Navalny ia demanda esce on ia spende la soma de 1 700 mil milion rublos ($50 000 milion) per la juas en la modo la plu bon posible.
Otras ia reata a la foto con noncrede e ilaria, e alga ia broma ce lo relata a la debate resente sur diretos ge.
@T On discute un tubo proposada de petrolio entre Canada e Nebraska
@L aora_oji/2014/on_discute_un_tubo_proposada_de_petrolio_entre_canada_e_nebraska
====== On discute un tubo proposada de petrolio entre Canada e Nebraska ======
1 febrero 2014
La departe de esternas de la SUA no ia leva un oposa ambientiste major contra un tubo proposada de petrolio de Canada.
Ma lo ia judi ce probable la tubo no va aselera la developa de arenito de petrolio canadian.
An tal, ambientistes dise ce lo va causa un aumenta de emetes de carbono, va contribui a la caldi global, e va risca malversas longo sua via.
Presidente Barack Obama ancora no ia deside esce el va permete lo.
@T On disputa sur la drogas de puni par mori en Ohio
@L aora_oji/2014/on_disputa_sur_la_drogas_de_puni_par_mori_en_ohio
====== On disputa sur la drogas de puni par mori en Ohio ======
17 janero 2014
Avocatos en la SUA va disputa sur la drogas usada en Ohio per puni par mori, pos cuando un omisidor ia spende 25 minutos en mori par un misca nova de cimicales.
Los dise ce Dennis McGuire, ci ia ave 53 anios, ia sufri un mori "estrema dolosa" cual ia viole sua diretos constitual.
McGuire ia viole e mata un fem ensinta en 1989. On dise ce, ante mori, el ia respira ruidosa tra 10 minutos, a la min.
Ohio ia es obligada de cambia sua injeta matante a un misca nova de du drogas, car la fabricor dansce de la droga presedente ia refusa permete ce on usa lo per puni par mori.
@T On eleje un governor nova de Tokyo
@L aora_oji/2014/on_eleje_un_governor_nova_de_tokyo
====== On eleje un governor nova de Tokyo ======
9 febrero 2014
En Tokyo, on vota per eleje un governor nova. On va regarda la resulta como un judi de la popla sur la usa de potia nucleal.
16 omes ia compete, campaniante tra du semanas, per deveni la dirijor de un site de 13 milion persones.
Un cade de neva la plu profonda en desenios pote afeta la cuantia de persones ci vota ultima.
Sondas sujesta ce Yoichi Masuzeo, un om de 65 anios ci ia es ja un ministro governante e un presentor de televisa, va vinse probable, an con sua suporta per un politica de recomensa la reatadores nucleal de Japan.
@T On entera un om de Ohio con sua motosicle
@L aora_oji/2014/on_entera_un_om_de_ohio_con_sua_motosicle
====== On entera un om de Ohio con sua motosicle ======
2 febrero 2014
En la stato de Ohio en la SUA, on ia entera un motosicliste zelosa con sua Harley-Davidson.
Billy Standley ia es reposada sur un cruser Electra Glide de 1977, en un caxon transparente.
Per sasia sua desira final, on ia nesesa asinia un peso de tera plu grande ca normal en la semetero.
El ia ave 82 anios. Sua familia ia descrive el como un om de spesie nonusual ci ia spende anios en projeta esta modo de parti.
@T On esamina la elmo de Michael Schumacher
@L aora_oji/2014/on_esamina_la_elmo_de_michael_schumacher
====== On esamina la elmo de Michael Schumacher ======
4 janero 2014
Investigores en Frans esamina un camera cual ia es fisada a la elmo de sci de Michael Schumacher, la corsor de autos. Los espera ce la aparato va revela plu informas sur sua asidente de sci en la Alpes franses.
La xampion deutx, ci ia jublia en 2012, es en un coma medical induida pos sua sufri de feris de testa en un cade en Meribel a la soldi pasada. Sua elmo ia rompe cuando el ia colpa un roca cuando el ia scinte sur tereno nonmantenida.
La polisia ia intervisa ance la fio adolesente de Schumacher, ci ia vide la xoca.
En la posmedia de venerdi, fanes ia fa un vijila estra la ospital franses do on trata Schumacher, per selebra la aniversario 45 de sua nase. Los ia asembla en Grenoble e ia sta silente tra un minuto.
@T On espeta un sinial de la sonda Rosetta
@L aora_oji/2014/on_espeta_un_sinial_de_la_sonda_rosetta
====== On espeta un sinial de la sonda Rosetta ======
20 janero 2014
La projeta Rosetta, un sonda spasial cual intende atera un robot sur un cometa, ia ateni un paso importante.
La sonda ia spende la tredes menses pasada en viaja tra spasio en un dormi profonda, ma aora on espera ce lo va velia e envia un sinial a la Tera.
Si los reseta esta mesaje de un distantia de 800 milion cilometres, siensistes va sabe ce la projeta vade ancora bon.
Rosetta va ariva a la cometa 67P/Churyumov-Gerasimenko en agosto, e la atera de la robot peti cual el porta va aveni en novembre.
@T On esplica un tomba de multe balenas en Txile
@L aora_oji/2014/on_esplica_un_tomba_de_multe_balenas_en_txile
====== On esplica un tomba de multe balenas en Txile ======
26 febrero 2014
En 2011, on ia descovre un tomba de multe balenas fosilida, a lado de la Autovia Panamerican en Txile.
Siensistes crede ce los pote ara esplica como tan multe de la bestias ia mori en un sola loca a plu ca sinco milion anios ante aora.
La atesta sujesta forte ce tota la balenas ia come alges nosiva, e ce esta ia aveni a cuatro veses separada.
En o pos cuando los ia mori, la flue ia porta los a un estuario e ia lasa los sur arenas plana do la tempo ia entera los.
@T On estradi un spior pasada corvatsce a Deutxland
@L aora_oji/2014/on_estradi_un_spior_pasada_corvatsce_a_deutxland
====== On estradi un spior pasada corvatsce a Deutxland ======
25 janero 2014
On ia estradi Josip Perković, un xef pasada de spia corvatsce, suspetante ce el ia scema la omiside de un oposor iugoslavian.
On ia dona el a la autoriosas deutx a la airoporto, de do on ia vola el a München.
Stjepan Đureković ia es matada en 1983 prosime a München, a un tempo cuando Perković ia es un membro de la ajenteria secreta de Iugoslavia.
Corvatsca ia esita estradi el, causante un disputa cual ia manxa sua junta a la UE en julio 2013.
@T On estrae un cucaraxa grande de un orea umana
@L aora_oji/2014/on_estrae_un_cucaraxa_grande_de_un_orea_umana
====== On estrae un cucaraxa grande de un orea umana ======
11 janero 2014
Un om australian ia es medical tratada per estrae un cucaraxa grande cual ia rampe en sua orea. La inseto ia es longa de du sentimetres.
Cuando Hendrik Helmer ia velia a la matina de mercurdi, el ia trova un dole forte en sua orea destra, e ia pensa prima ce un arania venenosa ia entra a lo.
El ia atenta estrae la peste con un despolvador, e par jeta acua en sua orea. La dole ia deveni plu intensa, donce sua camerada de aparte ia gida la om a ospital.
Ala, un dotor ia proba pone olio en la canal de orea, ma la resulta ia es mera ce la cucaraxa ia vade an plu profonda. Final, la inseto ia mori, e la dotor ia pote estrae lo con pinse.
@T On fa arestas per froda en la area de un trematera italian
@L aora_oji/2014/on_fa_arestas_per_froda_en_la_area_de_un_trematera_italian
====== On fa arestas per froda en la area de un trematera italian ======
9 janero 2014
En Italia, on investiga oto persones en la area de L'Aquila sur alegas de froda, pos un trematera a cuasi sinco anios ante aora.
40 polisiores ia fa atacas subita a lus prima. Cuatro persones ia es arestada, e a cuatro otras on ia dise ce los va es formal investigada.
On suspeta ce los ia aseta sobornas o ia falsi sua contas, a un cuantia de plu ca 2 milion euros ($2,3 milion).
On alega ce sobornas ia es paiada par companias de construi, pos la trematera en cual 65 000 persones ia perde sua casas.
Un de la suspetadas es Robert Riga, la maior suordinada. El ia nega la acusa.
@T On fa arestas sur un esplode a un aposteria nonlegal en Xina
@L aora_oji/2014/on_fa_arestas_sur_un_esplode_a_un_aposteria_nonlegal_en_xina
====== On fa arestas sur un esplode a un aposteria nonlegal en Xina ======
14 janero 2014
La polisia xines ia aresta oto persones sur un esplode a un vileta en la provinse Guizhou cual ia mata a la min 15 persones.
La esplode ia aveni en la posmedia de lundi, a un vileta distante en la site Kaili. Oto persones ia es ferida.
On crede ce lo ia aveni en un aposteria nonlegal en la montania.
La polisia investiga la causa de la esplode.
@T On fisa la data de prosede per la bombi de la maraton de Boston
@L aora_oji/2014/on_fisa_la_data_de_prosede_per_la_bombi_de_la_maraton_de_boston
====== On fisa la data de prosede per la bombi de la maraton de Boston ======
13 febrero 2014
Un judor ia fisa un data de prosede en novembre per Dzokhar Tsarnaev, la suspetada sur la bombi de la maraton de Boston. Demandas per plu tempo, par avocatos defendente, ia es rejetada.
La acusada ia declara se como nonculpable sur 30 alegas, sur cual 17 porta la posible de puni de mori.
Avocatos prosedente alega ce la om de 20 anios ia esplode du bombas en casolas de presa con Tamerlan, sua frate plu vea, ci ia mori plu tarda en un fusili contra la polisia.
La du esplodes, en april 2013, ia mata tre persones e feri plu ca 260.
@T On fuji coletiva en Indonesia pos eruta de volcan
@L aora_oji/2014/on_fuji_coletiva_en_indonesia_pos_eruta_de_volcan
====== On fuji coletiva en Indonesia pos eruta de volcan ======
14 febrero 2014
En Indonesia, miles de persones abandona sua casas pos la eruta de un volcan en Djava este.
Monte Kelud ia sperde sene e detrito sur un area grande, incluinte la site Surabaya a distantia de 130 cilometres.
Du persones ia mori cuando sua casas ia colasa su pesa de sene. Alga vilas es covreda con cuatro sentimetres de sene.
Tre airoportos major ia es ance obligada de clui par manca de capasia de vide.
@T On fuji de un site en Sudan Sude ante un ataca par la governa
@L aora_oji/2014/on_fuji_de_un_site_en_sudan_sude_ante_un_ataca_par_la_governa
====== On fuji de un site en Sudan Sude ante un ataca par la governa ======
9 janero 2014
En Sudan Sude, miles de persones fuji de la site Bentiu, temente ce la governa va ataca per recatura la area de rebelores. La area es un fonte importante de petrolio.
Multe es refujada en un base de la Nasiones Unida en Bentiu.
Entretempo, lo pare ce la discutes sur un sesaspara entre la du lados ia vade a un rua sin sorti, pos cuando la governa la prisoni 11 persones alegada de conspira per un colpa de stato.
Multe governas ia sorti sua sitadanes de la pais, e multe nativas de Sudan Sude traversa a paises visina.
@T On fura la portamone de un prete en un servi
@L aora_oji/2014/on_fura_la_portamone_de_un_prete_en_un_servi
====== On fura la portamone de un prete en un servi ======
26 febrero 2014
En Noria, on ia fura la portamone e telefoneta de un prete en cuando el ia gida la servi de soldi.
John Olav Hodne, la prete de un parocia prosima a Trondheim, dise ce el ia lasa la ojetos en la vesteria a retro de la eglesa. El ia trova ce los ia desapare pos la fini de la servi relijiosa.
La autoriosas ave no trasas per segue, donce los ia fa un anunsia publica per xerca plu informas.
Un portavose de la polisia ia dise: "Esta es un fura spesial desplasente e nonusual."
@T On fura un nom rara de usor de Twitter
@L aora_oji/2014/on_fura_un_nom_rara_de_usor_de_twitter
====== On fura un nom rara de usor de Twitter ======
31 janero 2014
En Twitter, la posesor de la nom de usor @N alega ce un pirata de rede ia fura lo de el.
Naoki Hiroshima, un programor de California, ia posese la nom @N de pos 2007.
En sua blog, el ia dise ce on ia ofre ja $50 000 a el afin el vende lo, e ce persones ia atenta fura lo a ante.
A esta ves, algun ia saisi la controla de alga otras de sua contas enlinia, asta cuando el ia acorda sede la nom.
@T On fura un relicia de Pape Joan Paul 2 de un egleseta
@L aora_oji/2014/on_fura_un_relicia_de_pape_joan_paul_2_de_un_egleseta
====== On fura un relicia de Pape Joan Paul 2 de un egleseta ======
28 janero 2014
La polisia italian xerca un relicia santa furada cual conteni la sangue de Pape Joan Paul 2.
Lo ia es furada en un efrata de un egleseta cual ia es un loca de sinifia spesial a acel Pape. La eglesa de San Pietro della Ienca es isolida en la montania de la area de Abruzzo en Italia sentral.
En la fini de semana, furores ia rompe alga baras de fero protejente e ia entra tra un fenetra.
Los ia lasa la caxa de mone, ma ia prende un crus e la relicia nonestimable. Lo conteni un peso de gaza cual ia es empapada en la sangue de la Pape -- un de sola tre tal ojetos en la mundo.
@T On fusili a un convoia de aida en Homs
@L aora_oji/2014/on_fusili_a_un_convoia_de_aida_en_homs
====== On fusili a un convoia de aida en Homs ======
9 febrero 2014
En la site Homs en Suria sentral, on ia fusili a un convoia de aida cual ia es traente furnis a la distrito asejada. Un person, cisa plu, ia es ferida.
Batalias renovida en la site ia lenti ja atentas de emporta furnis aidante.
La Cresente Roja suri ia dise ce on ia fusili a sua veculos, ferinte un de sua gidores.
An tal, la jornalisme nasional de Suria ia reporta ce la fusili par rebelores ia feri cuatro aidores.
@T On fusili crocodiles pos un ataca a un xico en Australia
@L aora_oji/2014/on_fusili_crocodiles_pos_un_ataca_a_un_xico_en_australia
====== On fusili crocodiles pos un ataca a un xico en Australia ======
27 janero 2014
En Australia, la polisia ia fusili du crocodiles en xerca un xico mancante ci ia es atacada par un crocodil a soldi.
La enfante de 12 anios ia es saisida par la bestia en cuando el ia nada con sua amis en un stange en Kakadu, un parce nasional en la Teritorio Norde.
Un otra xico ia es savajida par la crocodil, ma el ia susede evade.
Gardaforestas ia dise ce probable la du crocodiles matada no ia fa la ataca, e ce la xerca va continua.
@T On ia studia dentes putrida de la eda de petra
@L aora_oji/2014/on_ia_studia_dentes_putrida_de_la_eda_de_petra
====== On ia studia dentes putrida de la eda de petra ======
7 janero 2014
Siensistes ia trova indicas vera temprana per la esiste vasta de putri de dentes en umanas.
Los ia esamina la restas sceletal de xasores-coliores de la eda de petra, ci ia vive en la area de Maroco presente a plu ca 13 700 anios ante aora.
La rexercores ia descovre ce la individuas ia come multe comedas nozosa e carboidratosa. La state povre de sua dentes sujesta ce los ia es frecuente en dole estrema.
La state de dentes ia mali cuando persones ia grupi sua en comunias cultival per crese granes, e ia comensa come multe plu carboidratos. Ma lo pare aora ce an en sosias plu temprana de forajores, la contenida zucarosa de alga comedas de planta ia causa problemes.
@T On interoga Dieudonné pos alegas de fusili
@L aora_oji/2014/on_interoga_dieudonne_pos_alegas_de_fusili
====== On interoga Dieudonné pos alegas de fusili ======
23 janero 2014
La polisia ia interoga Dieudonné M'Bala M'Bala, un comediste controversa franses, pos alegas par ajentes de corte ce on ia xuta baletas de cauxo a los ante sua casa.
La ajentes no ia pote vide ci ia fusili, ma un arma ia es trovada en un xerca plu tarda de la casa de Dieudonné.
La comediste debe paia miles de euros en multas per ofendes diversa, incluinte parlas odiosa antisemita.
La ajentes ia intende dona a el un esije de paia, ma la securiores a la casa ia demanda ce los parti. On ia fusili cuando la ajentes ia revade a sua auto.
@T On investiga des ofisiores militar american sur drogas
@L aora_oji/2014/on_investiga_des_ofisiores_militar_american_sur_drogas
====== On investiga des ofisiores militar american sur drogas ======
11 janero 2014
La Forte de Aira de la SUA investiga 10 ofisiores a ses bases militar sur alegas de posese de drogas nonlegal.
On ia implica nove tenintes e un capitan a bases en la SUA e Britan.
Du ofisiores de controla de xuta nucleal a la base de Malmstrom en Montana es envolveda en la investiga.
La Forte de Aira is suspende la diretos de securia de ambos ofisiores.
@T On investiga fotos de soldatos american ci arde iracis mor
@L aora_oji/2014/on_investiga_fotos_de_soldatos_american_ci_arde_iracis_mor
====== On investiga fotos de soldatos american ci arde iracis mor ======
17 janero 2014
La Corpo de Soldatos Maral de la SUA dise ce el atenta determina la veria de imajes publicida par un pajeria de rumores sur persones selebrada. La fotos pare mostra soldatos ci arde la corpos de rebelores iraci mor.
La pajeria TMZ ia publici oto fotos e dise ce lo ave 33 otras cual es tro xocante per publici.
Lo ia dise ce la fotos ia es fada en Fallujah en 2004.
Un portavose per la Pentagon ia dise ce la atas mostrada en la fotos "no es lo cual nos espeta de la membros de nosa servi".
@T On investiga la polisia brasilera sur matas venjante
@L aora_oji/2014/on_investiga_la_polisia_brasilera_sur_matas_venjante
====== On investiga la polisia brasilera sur matas venjante ======
15 janero 2014
En Brasil, on comensa un investiga per descovre esce un grupo de polisiores ia pasa tre oras en un orjia de matas venjante.
Des-du persones ia es matada en la note par fusilores en veculos en un distrito de Campinas, un site a norde de São Paulo.
La atacas ia comensa a no multe oras pos un fura en cual un polisior nonlaborante ia mori.
En un caso, la atacores ia para sua auto a lado de un grupo de persones. Los ia demanda ce on move la enfantes a via, e ia fusili a la otras, matante alga.
La calibre de la armas usada es la mesma como lo de la polisia militar.
@T On investiga un dona de sposa a la xef de SABC
@L aora_oji/2014/on_investiga_un_dona_de_sposa_a_la_xef_de_sabc
====== On investiga un dona de sposa a la xef de SABC ======
20 junio 2014
En Sudafrica, un investiga ia comensa sur alegas ce la xef de SABC, la compania difusante, ia reseta un sposa como un donada.
La Comision per Egalia de Jenero ia oia cexas pos un reporta ce xefes tradisional ia dona un sposa a Hlaudi Motsoeneng. Estas ia es un parte de un grupo cultural cual ia desira la difusa de plu programas en la lingua venda.
La governa ia dise ce la condui de la grupo ia es "regretable". Motsoeneng no ia comenta.
Esta ia aveni en un visita resente de Motsoeneng a Limpopo, un provinse norde, do el e otra dirijores de SABC ia encontra la grupo de promove venda.
Seguente un de la promovores, sirca des femes joven ia parada ante Motsoeneng, e el ia eleje la fem cual el ia gusta. Tota la femes ia es acompaniada par sua jenitores, ci ia sabe ja lo cual va aveni, e ia acorda sur lo.
On reporta ce Motsoeneng ia eleje un studiante de maneja. On ia publici un foto de la fem, con peto nuda, con el. On dise ce Motsoeneng ia reseta ance un bove e un boveta.
La ministreria de femes sudafrican ia espresa ce lo regarda la prosede intera como un maltrata de valuas cultural: "La usa de femes como donadas, en modo de bestias, es un regresa grave e un insulta a la beneficas de 20 anios de democratia e libria, spesial la contribuis de femes."
@T On judi ce la pospone de elejes tai es legal
@L aora_oji/2014/on_judi_ce_la_pospone_de_elejes_tai_es_legal
====== On judi ce la pospone de elejes tai es legal ======
25 janero 2014
La Corte Constitual de Tai ia judi ce elejes projetada per 2 febrero pote es legal posponeda.
Ma lo ia dise ce cualce pospone nesesa es asetada par la comision de eleje e par la ministro xef.
La comision recomenda pospone la elejes par causa de la tumulta political. La governa insiste ce la elejes debe aveni como intendeda, an tal.
Tai es en un de state de crise car protestores esije la resinia de la ministro xef, Yingluck Shinawatra.
@T On libri prisonidas afgani de Bagram
@L aora_oji/2014/on_libri_prisonidas_afgani_de_bagram
====== On libri prisonidas afgani de Bagram ======
13 febrero 2014
On ia libri 65 persones de la prison a Bagram en Afganistan, un libri cual la SUA ia descrive como "profonda regretable".
La ambasada en Kabul ia dise ce alga de la libridas es culpable per la matas de siviles afgani, e de soldatos afgani e aliada.
Ma Kabul insiste ce on no ave atestas sufisinte contra los.
De pos cuando la prison de Bagram ia deveni controlada par Afganistan en marto 2013, on ia libri sentos de prisonidas.
@T On libri un australian controversa condenada sur drogas
@L aora_oji/2014/on_libri_un_australian_controversa_condenada_sur_drogas
====== On libri un australian controversa condenada sur drogas ======
10 febrero 2014
On ia libri Schapelle Corby, un australian condenada per contrabanda de drogas, su cautia pos nove anios en prison sur Bali, un isola indonesian.
On ia prisoni el per 20 anios en 2005 per atenta contrabanda mariuana a la isola de turisme.
Sua caso ia atrae multe interesa en Australia. En Indonesia, multe ia regarda el como un criminal ci ia rompe la leges sever de drogas.
Corby ave 36 anios e ia es un studiante de terapia de belia. El ia dise sempre ce el es nonculpable, pos entra a Bali en 2004 con mariuana ascondeda en un de sua sacos.
@T On mata du campaniores political en Afganistan
@L aora_oji/2014/on_mata_du_campaniores_political_en_afganistan
====== On mata du campaniores political en Afganistan ======
2 febrero 2014
Du campaniores afgani ci labora per Abdullah Abdullah, un aspiror de presidente, ia es matada par fusili en Herat, un site ueste.
La fusilis ia aveni en la dia ante la comensa ofisial de campanias per la vota a 5 april.
Fusilores ia ataca la du en cuando los ia sorti de un ofisia de sua campania.
Abdullah ia es la sucampion en la eleje disputada de 2009, cual presidente Karzai ia gania. Karzai no es elejable a esta ves.
@T On mata la organizor alegada de bombas umana de Volgograd
@L aora_oji/2014/on_mata_la_organizor_alegada_de_bombas_umana_de_volgograd
====== On mata la organizor alegada de bombas umana de Volgograd ======
6 febrero 2014
Fortes de securia en Dagestan, un area turbada de Rusia, ia mata la organizor suspetada de la bombas umana de Volgograd.
Dzhamaldin Mirzayev, ci ia ave 30 anios, ia mori con un otra om, pos cuando los ia fusili a la fortes ci ia ensirca la casa.
Un om tre ia sede en la aseja en la vila Izberbash.
Du atacores ia mata 34 otra persones en bombis en Volgograd a du dias en segue en la tarda de desembre.
@T On mata un suspetada sur asasinas tunisi
@L aora_oji/2014/on_mata_un_suspetada_sur_asasinas_tunisi
====== On mata un suspetada sur asasinas tunisi ======
5 febrero 2014
Un suspetada sur la matas de du membros importante de la oposa tunisi ia mori en un combate con fortes de securia.
Kamel Gadhgadhi ia es entre sete gerores matada en la ataca sur un casa en la capital, Tunis.
Un polisior ia mori ance en la opera, cual ia comensa a la posmedia de lundi.
Fortes de securia tunisi ia fa un campania longa contra gerores islamiste tra la du anios pasada.
@T On mesura estrema esata la grandia de la universo
@L aora_oji/2014/on_mesura_estrema_esata_la_grandia_de_la_universo
====== On mesura estrema esata la grandia de la universo ======
9 janero 2014
Astronomistes ia mesura la distantias entre galasias en la universo con esatia de 1%.
La mesura stonante traversa ses mil milion anios de lus. Lo es un paso esensal a mapa la universo e a descovre la natur de la enerjia oscur.
On ia fa la mesura en la SUA, con la Telescopio de la Funda Sloan en Mexico Nova.
David Schlegel, la esploror xef de la projeta, ia dise ce el sabe aora plu bon la grandia de la universo ca la grandia de sua casa.
@T On multa la presidente de Romania per desvalua romanis
@L aora_oji/2014/on_multa_la_presidente_de_romania_per_desvalua_romanis
====== On multa la presidente de Romania per desvalua romanis ======
11 febrero 2014
Un ajenteria ofisial contra prejudi ia multa la presidente de Romania per $185, car el ia dise ce romanis evita labora e susta se par fura.
Inisial, la Consilia Nasional per Combate Prejudi ia refusa aseta la caso, car el ia fa sua comentas estra la pais.
Ma la Corte Suprema ia comanda ce la autoriosa autonom, controlada par parlamento, debe considera la caso.
Presidente Traian Băsescu no ia reata direta a la judi.
@T On multa un australian per mata un selaco
@L aora_oji/2014/on_multa_un_australian_per_mata_un_selaco
====== On multa un australian per mata un selaco ======
13 febrero 2014
On ia multa un om australian per $16 000 pos cuando el ia mata un selaco grande blanca par puxa lo con sua barco e bate lo con un palo.
En jovedi, un corte en Cimri Sude Nova ia trova ce la om, de 40 anios, es culpable de dana un spesie perilida.
La situa ia aveni en janero 2012 a un baieta a sude de Sydney. On ia acusa ance un otra om.
Selacos grande blanca es protejeda en acuas australian. Los es importante a la ecosistem local.
@T On multa un motoriste per "parci" en un filo de trafica
@L aora_oji/2014/on_multa_un_motoriste_per_parci_en_un_filo_de_trafica
====== On multa un motoriste per "parci" en un filo de trafica ======
8 febrero 2014
On ia dona un multa de parci a un motoriste brites ci ia espeta mera en un filo de trafica.
Un veculo autoriosa ia filmi la auto de Victor Hankins a un parabus. Ma el ia es en un filo ante un lampa roja.
Hankins ia apela contra la comite local, descrivente la multa como "asoluta un broma".
La Consilio de Bradford ia demanda pardona e ia cansela la multa, confesante ce lo ia es un era.
@T On nega un envolve brites en un masacra en India en 1984
@L aora_oji/2014/on_nega_un_envolve_brites_en_un_masacra_en_india_en_1984
====== On nega un envolve brites en un masacra en India en 1984 ======
15 janero 2014
La jeneral indian ci ia comanda un masacra a la Temple de Oro en Amritsar en 1984 ia nega alegas ce la Rena Unida ia conspira en la opera.
Kuldeep Singh Brar ia dise ce la ecipo de Margaret Thatcher no ia consilia Delhi.
David Cameron, la ministro xef presente de Britan, ia comanda un investiga de la alegas, pos cuando Tom Watson, un membro de parlamento brites, ia dise ce el ia vide documentos desecretida cual revela la envolve.
La ataca ia es fada con intende de forsa separistes sic a via.
@T On no va prosede un om arestada sur tre matas en la Alpes
@L aora_oji/2014/on_no_va_prosede_un_om_arestada_sur_tre_matas_en_la_alpes
====== On no va prosede un om arestada sur tre matas en la Alpes ======
22 febrero 2014
Avocatos en Frans ia dise ce on no va prosede un om arestada en relata a la mata de un injenior brites e sua familia.
Saad al-Hilli, ci ia ave 50 anios, sua sposa Iqbal, e la madre de esta, Suhaila al-Allaf, ia es fusilida sur un rua de foresta en la Alpes en 2012.
La om suspetada ave 48 anios, e es aora librida de prisoni polisial.
Ma on investiga ancora el sur un alega de partisipa en contrabanda de armas.
@T On nomi un fem como editor xef de un jornal dial en Arabia Saudi
@L aora_oji/2014/on_nomi_un_fem_como_editor_xef_de_un_jornal_dial_en_arabia_saudi
====== On nomi un fem como editor xef de un jornal dial en Arabia Saudi ======
18 febrero 2014
En Arabia Saudi, on ia nomi un fem como la editor xef de un jornal dial a la ves prima.
La Saudi Gazette, scriveda en engles, ia anunsia en sua pajeria ce Somayya Jabarti va segue Khaled Almaeena.
En la numero de soldi, Almaeena ia scrive ce Jabarti ia gania la posto par merita, descrivente el como un jornaliste ostinosa e dedicada.
Jabarti ia comenta: "Un fesur ia apare en la sofito de vitro. E me espera ce on va cambia lo a un porte."
@T On ofre un monte engles per vende
@L aora_oji/2014/on_ofre_un_monte_engles_per_vende
====== On ofre un monte engles per vende ======
7 maio 2014
Un aristocrata brites atenta vende un monte per paia sua impostas vasta. El ia prefere vende lo, en loca de descasi otras ci abita sur la imobila cual sua familia posese ja tra sentenios.
Hugh Lowther, la Conte de Lonsdale, ia ofre Blencathra, un monte con altia de 869 metres, contra 1,75 milion paundes. Lo es situada en la Distrito Lagosa en la norde-ueste de England.
Par erita pos la mori de sua padre en 2006, el debe aora 9 milion paundes de impostas.
La person ci compra la monte va reseta ance la direto de usa la titulo "Baron de la Feudo de Threlkeld", e de pone 5471 oveas fema, 732 oveas joven, e 200 ovetas a pasto.
Blencathra es ance conoseda como Saddleback ("dorso de sela") par causa de sua forma notable. Alfred Wainwright, un autor famosa de libros gidante pasada, ia descrive lo como "un de la ojetos la plu grandiosa en la Distrito Lagosa, e un de la plu bon conosedas".
Lo atrae paseores e turistes de la mundo intera, e es vidable tra un area grande de la parte norde de la contia Cumbria.
John Robson, ci organiza la vende de la monte, ia dise ce lo no es simil a cualce ben cual el ia maneja a ante.
@T On para labora sur la Canal de Panama en disputa sur custas
@L aora_oji/2014/on_para_labora_sur_la_canal_de_panama_en_disputa_sur_custas
====== On para labora sur la Canal de Panama en disputa sur custas ======
6 febrero 2014
On ia para labora sur la crese de la Canal de Panama, un de la vias de barcon la plu ocupada en la mundo.
La sesa segue un fali de discutes entre la Autoriosa de Canal de Panama e la asosia, gidada par espanioles, ci reali la projeta.
La du lados disputa ci debe paia la custa de esedes, con soma de 1,6 mil milion.
La asosia dise ce 10 000 empleas es perilida, ma la autoriosa de la canal dise ce lo no va "sede a estorse".
@T On pausa xerca airal un avion mancante en Nepal
@L aora_oji/2014/on_pausa_xerca_airal_un_avion_mancante_en_nepal
====== On pausa xerca airal un avion mancante en Nepal ======
17 febrero 2014
On ia pausa, per la note, la xerca airal per un avion cual ia desapare en Nepal con 18 persones embarcada.
Du elicotores ia pausa sua labora en un clima mal.
Soldatos continua xerca sur tera en la area do on crede ce la avion ia es situada a la tempo de sua comunica final.
On va recomensa la xerca con aviones en lundi.
@T On permete ce un protestor bateda sorti de Ucraina
@L aora_oji/2014/on_permete_ce_un_protestor_bateda_sorti_de_ucraina
====== On permete ce un protestor bateda sorti de Ucraina ======
3 febrero 2014
Un gidor de la protestas en Ucraina, ci dise ce on ia fura el e tortura el, va es permeteda de sorti de la pais per es medical tratada.
Dmytro Bulatov es presente en un ospital en Kiev. En la semana pasada, el ia apare en televisa local con un talia sur sua fas e sin un parte de sua orea.
El ia dise ce on ia prisoni el e bate el tra oto dias.
Sua caso ia deveni un provoca nova per la protestores, ci desira la resinia de presidente Viktor Yanukovych.
@T On permete la televisa partal de la prosede de Oscar Pistorius
@L aora_oji/2014/on_permete_la_televisa_partal_de_la_prosede_de_oscar_pistorius
====== On permete la televisa partal de la prosede de Oscar Pistorius ======
26 febrero 2014
Un judor sudafrican ia judi ce on pote televisa partes de la prosede de la atleta Oscar Pistorius.
Pistorius ia fusili sua xica de cor, Reeva Steenkamp, un model e un stela de televisa de realia, a plu ca un anio ante aora. Sua prosede va comensa en lundi.
Avocatos prosedente alega ce el ia preconsidera la mata, ma el dise ce el ia malpersepi Steenkamp como un intruor.
Esta va es la ves prima de televisa direta partes de un prosede en Sudafrica.
@T On pirati la conta Twitter de la fortes defendente de Cenia
@L aora_oji/2014/on_pirati_la_conta_twitter_de_la_fortes_defendente_de_cenia
====== On pirati la conta Twitter de la fortes defendente de Cenia ======
22 julio 2014
La contas Twitter de la fortes de defende cenian e de sua portavose ia es atacada par ativistes ci protesta sur froda.
La tuitas piratida ia es suscriveda par Anonim, un grupo ativiste.
La portavose militar Major Emmanuel Chirchir usa frecuente Twitter per furni novas sur la gera contra al-Shabab, un grupo combatosa de Somalia.
La atacores ia critica la governa de Presidente Uhuru Kenyatta. Los ia dise ce la governa proteje sola la consernas de la persones superior, e no fa sufisinte contra la problemes de xasores nonlegal e drogas contrabandada.
Coronel Willy Wesonga ia dise ce no sistemes interna militar ia es infiltrada, e ce tecnicistes atenta aora descovre la identia de la atacores.
Problemes de securia en la flue de tuitas de la ministreria de defende es embarasante per la governa, car on ia critica ance sua respondes a alga defias resente de securia.
En la anio pasada, un grupo nomida Africa Anonim ia entra a la conta de la ministreria de defende de Zimbabue, e ia ataca la pajeria de la Congresa Nasional African cual governa Sudafrica.
@T On presenta un projeta de aida contra secia estrema en California
@L aora_oji/2014/on_presenta_un_projeta_de_aida_contra_secia_estrema_en_california
====== On presenta un projeta de aida contra secia estrema en California ======
20 febrero 2014
Politicistes en California ia anunsia un projeta de $687 milion per furni direta aidas a comunias sofocada par la secia recordo cual continua ancora.
La idea ia es proposada par democratas californian, e par Jerry Brown, la governor de la stato.
La plu de la mone, colieda de du obligas finansial cual votores ia aproba ja, ta contribui a la conserva de acua local.
Esta ta aida resicli plu acua, incluinte par catura acua de tempesta.
@T On prisoni un ativiste ambientiste en Rusia
@L aora_oji/2014/on_prisoni_un_ativiste_ambientiste_en_rusia
====== On prisoni un ativiste ambientiste en Rusia ======
13 febrero 2014
En Rusia, on ia condena un ativiste ci ia critica la efeto de la Olimpiales Invernal a la ambiente a tre anios en prison.
Yevgeny Vitishko ia reseta prima un condena suspendeda a du anios ante aora, per dana un serca con pinti de jeta.
El ia dise ce on ia construi nonlegal la serca sirca la imobila de un governor local, en un foresta protejeda.
Un corte en Krasnodar, la capital de la area, ia converti la condena a un periodo de prisoni.
@T On prisoni un marinor SUA pasada per atenta spia
@L aora_oji/2014/on_prisoni_un_marinor_sua_pasada_per_atenta_spia
====== On prisoni un marinor SUA pasada per atenta spia ======
12 febrero 2014
On ia condena un marinor pasada de la marina SUA a 30 anios en prison per atenta spia.
Un corte federal en Virginia ia dise ce Robert Hoffman ia dona informas secreta a persones sur ci el ia crede ce los es spiores rusce.
En fato, los ia es ajentes FBI desemblada.
La avocatos prosedente ia dise ce Hoffman, pasada un tecniciste e criptografiste en sumarinas SUA, ia dona documentos sur segue la trasas de barcones.
@T On projeta un esperimenta importante sur neutrinos
@L aora_oji/2014/on_projeta_un_esperimenta_importante_sur_neutrinos
====== On projeta un esperimenta importante sur neutrinos ======
15 febrero 2014
Rexercores en la SUA ia furni detalias de un projeta per un de la esperimentas la plu grande de fisica.
Siensistes a Fermilab, prosima a Chicago, vole xuta un raio de neutrinos tra 1300 cilometres de roca, a un distantia de 30 cilometres su la surfas de la Tera.
La intende es aprende plu sur la crea de la Universo.
La ecipo descrive esta como la esperimenta la plu importante de pos la xerca de la boson de Higgs.
@T On proposa compensa vitimes de viole sesal en la revolta libi
@L aora_oji/2014/on_proposa_compensa_vitimes_de_viole_sesal_en_la_revolta_libi
====== On proposa compensa vitimes de viole sesal en la revolta libi ======
20 febrero 2014
La governa de Libia ia dise ce on debe reconose femes sesal violeda en la revolta de 2011 como vitimes de gera.
Sua anunsia, cual nesesa es aprobada par la congresa, ta pone la femes a la mesma grado como combatores ferida. Los ta merita alora un compensa.
On alega ce fortes favorente Muammar Gaddafi ia usa la viole sesal como un spesie de arma.
La revolta cual ia despone Gaddafi ia comensa a tre anios ante aora. Votores eleje aora un autoriosa per scrive un constitui nova.
@T On proposa reformi la UE a un confere en Bruxeles
@L aora_oji/2014/on_proposa_reformi_la_ue_a_un_confere_en_bruxeles
====== On proposa reformi la UE a un confere en Bruxeles ======
28 maio 2014
Britan e Frans ia recomenda un reformi de la Uni European, cuando gidores ia ariva en Bruxeles per un confere pos un vota fortinte per la partitos eurosetica.
Presidente François Hollande ia demanda ce Europa ta "atende" la avenis en Frans, do sua partito sosialiste ia perde contra la destristes estrema de la Fronte Nasionaliste.
David Cameron, de ci sua partito conserviste brites ia perde contra la Partito per Autonomia de la Rena Unida, ia dise ce Bruxeles es "tro grande, tro dominante".
Partitos popliste e estrema destriste tra tota la UE ia esperia aumentas de suporta.
La elejes ia forti la disposa de los ci oposa la UE en la Parlamento European. An tal, jeneral, la partitos proeuropean ia gania la plu de votas.
La confere nonformal a martedi ia es la momento prima a cual gidores de tota 28 statos membros ia pote discute la via futur pos la elejes de la semana pasada. Multe de la presentes ia veni de un serie de mal dias political.
Hollande ia descrive sua resultas como "dolosa".
@T On prosede asentes sur la asasina de Rafik Hariri
@L aora_oji/2014/on_prosede_asentes_sur_la_asasina_de_rafik_hariri
====== On prosede asentes sur la asasina de Rafik Hariri ======
16 janero 2014
En Den Haag en Nederland, on ia comense la prosede de cuatro omes su acusa de asasina Rafik Hariri, un ministro xef pasada de Lubnan.
On alega ce la cuatro es asosiores de Hezbollah, la promove de gerores xia, suportada par Suria. On no ia aresta los, e on prosede los an cuando los es asente.
Hariri ia es matada par un bomba grande de auto en Beirut en 2005. Sua asasina ia polali lubnanis e ia causa la retira de soldatos suri.
Hezbollah nega sua partisipa, disente ce la mata ia es un parte de un conspira israeli e american.
@T On prosede polisiores brasilera sur un masacra de 1992
@L aora_oji/2014/on_prosede_polisiores_brasilera_sur_un_masacra_de_1992
====== On prosede polisiores brasilera sur un masacra de 1992 ======
18 febrero 2014
On prosede 15 polisiores en Brasil, acusada de partisipa en un masacra a la prison de Carandiru en São Paulo en 1992.
On ia divide la prosede en cuatro fases -- un per cada solo de la prison do la 111 matas ia aveni.
La escuta presente relata a los ci on acusa de mata oto prisonidas. Sua avocatos dise ce on no pote serti ci ia fa la xutas matante.
48 polisiores ia es condenada en la du fases presedente de la caso.
@T On prosede un membro pasada de un culto ci ia ataca la metro de Tokyo
@L aora_oji/2014/on_prosede_un_membro_pasada_de_un_culto_ci_ia_ataca_la_metro_de_tokyo
====== On prosede un membro pasada de un culto ci ia ataca la metro de Tokyo ======
16 janero 2014
On ia comensa la prosede de un membro pasada de Aum Shinrikyo, un culto japanes, a cuasi 20 anios pos cuando la grupo ia fa un ataca matante con gas de sarin en Tokyo.
Makoto Hirata es prosededa sur la saisi e mori de un om de 68 anios, Kiyoshi Kariya, un notario. On no acusa el en relata con la ataca de metro en 1995, cual ia mata 13 persones.
A du anios ante aora, Hirata ia entra a un ofisia de polisia e ia sede se, pos es un fujor.
On ia condena des-tre otra membros de la culto a mori.
@T On prosede un spior ruanda sur jenoside
@L aora_oji/2014/on_prosede_un_spior_ruanda_sur_jenoside
====== On prosede un spior ruanda sur jenoside ======
5 febrero 2014
Un corte franses ia comensa la prosede importante de un xef pasada de spia ruanda, ci on acusa sur aida la jenoside en 1994.
Pascal Simbikangwa, ci es paraplejica pos un xoca de auto, ia es arestada en 2008 en cuando el ia abita (con nom falsa) sur Mayotte, un isola franses en la Mar Indian.
Sua avocatos dise ce el ia deveni un portaculpa per la matas.
On ia critica Frans per es tro lenta en prosede los ci es alegada liada a la jenoside, en cual sentos de miles de ruandas ia mori en 100 dias.
@T On protesta contra leges de interede en Turcia
@L aora_oji/2014/on_protesta_contra_leges_de_interede_en_turcia
====== On protesta contra leges de interede en Turcia ======
9 febrero 2014
En Turcia, polisiores de tumulta ia xuta canones de acua e gas lacrimojen a sentos de protestores en Istanbul.
La protestores oposa un lege nova cual va forti la controla de la interede par la governa.
Protestores ia lansa pirotecnicales e petras a la polisia ci ia bari la plaza xef de la site.
On presa la presidente per no validi la lege. Lo inclui permetes a autoriosas de bloci pajerias per violes de privatia, sin desides par corte.
@T On recatura un omisidor zelandes en Brasil
@L aora_oji/2014/on_recatura_un_omisidor_zelandes_en_brasil
====== On recatura un omisidor zelandes en Brasil ======
13 novembre 2014
La polisia brasilera ia aresta un om zelandes ci ia es condenada a spende sua vive en prison per molesta enfantes e per omiside.
Phillip Smith, ci ave 40 anios, ia es arestada en un otel en Rio de Janeiro. On previde ce el va es estradida o deportada.
A 6 novembre, Smith ia usa un pasaporte con sua nom orijinal, Phillip Traynor, per vola a Txile e per continua alora a Brasil.
El ia fuji cuando el ia es librida per tre dias de un prison a sude de Auckland en Zeland Nova.
On ia condena Smith en 1996 pos cuando el ia mata la padre de un xico de 13 anios ci el ia maltrata sesal entre 1992 e 1995.
La familia ia move casa, ma el ia trasa la xico a sua casa nova en Wellington en desembre 1995. El ia coteli la padre a multe veses, matante el. La xico ia susede evade e crea un alarma.
Pos oia ce on ia catura denova Smith, la vitim, ci ave aora 30 anios, ia dise ce el pote aora sesa dormi con un cotel su sua cuxin.
La evade par Smith ia pone ajenterias de la governa zelandes en controversia. On sujesta forte un revisa de la sistem de libris corta de prison e de monitoris de ofendores major.
En un e-posta a Radio Zeland Nova, Smith ia clari ce el ia scema sua evade par controla criminal sua nom orijinal e descovre ce nun ia ajunta un averti a lo.
El ia dise ance ce el ia pote finansia sua evade con mone prendeda de alga comersias cual el ia maneja de prison.
Smith ia eleje Brasil car el ia crede ce, si on catura el, estradi el va es plu difisil, car Brasil e Zeland Nova ave no acorda formal de estradi.
On ia aresta el pos cuando algun en Rio de Janeiro ia reconose el de imajes sirculinte en oteles.
@T On recorda la masacra de la Plaza Tiananmen
@L aora_oji/2014/on_recorda_la_masacra_de_la_plaza_tiananmen
====== On recorda la masacra de la Plaza Tiananmen ======
5 junio 2014
Deses de miles de persones ia asembla ier en Hongkong per la sola rituo major en Xina a la aniversario 25 de la masacra en la Plaza Tiananmen en Beijing.
La organizores ia dise ce sirca 180 000 persones ia partisipa en la vijila, ma la polisia ia descrive la fola como pico min ca 100 000.
La site reteni librias sivil cual on no permete en la parte xef de Xina.
La protestores en 1989 ia desira un reformi political, ma on ia comanda un colpa oposante e matante cuando asolutistes ia gania la luta per potia en la Partito Comuniste governante.
En Beijing, la autoriosas ia pone un covre de securiores, spesial en la Plaza Tiananmen, per preveni cualce atenta de onora la aniversario.
On ia teni deses de ativistes en la dias presedente, e jornalistes stranjer ia es moveda a via de la plaza en mercurdi mesma.
La autoriosas xines clasi la protestas de 1989 como tumultas contrarevoluiste, e donce los fa no rituo.
Ma, en Hong Kong, un fola grande ia partisipa en la asembla per recorda Tiananmen, cual on organiza ja a cada anio de pos la masacra.
@T On rejistra un trematera entre Cimri e England sude-ueste
@L aora_oji/2014/on_rejistra_un_trematera_entre_cimri_e_england_sude-ueste
====== On rejistra un trematera entre Cimri e England sude-ueste ======
21 febrero 2014
On ia rejistra un trematera su la Canal de Bristol cual separa la sude de Cimri de la sude-ueste de England.
La trema ia es de cuantia 4,1. Lo ia aveni en la posmedia temprana de jovedi, e on ia senti lo en multe locas.
La episentro ia es entre la Penisola Gower en Cimri e la vila peti de Ilfracombe en la contia de Devon.
La trema ia aveni a la profondia de 5 cilometres.
@T On reordina pos tumultas major en Bosnia e Hersegovina
@L aora_oji/2014/on_reordina_pos_tumultas_major_en_bosnia_e_hersegovina
====== On reordina pos tumultas major en Bosnia e Hersegovina ======
9 febrero 2014
Bosnia e Hersegovina ia comensa limpi la desordina lasada pos un tumulta la plu mal de anios.
Tra la pais, on ia ensende construidas de governa en coleria sur la manca de emplea, e sur la noncapasia persepida de la politicistes de boni la situa.
Protestas ia continua en saturdi, ma a un grado plu peti e pasosa. Alga ofisiores rejional major ia resinia.
La ministro de securia de la pais ia demanda "un tsunami contra froda".
@T On reporta un maladia simil a poliomielite en California
@L aora_oji/2014/on_reporta_un_maladia_simil_a_poliomielite_en_california
====== On reporta un maladia simil a poliomielite en California ======
24 febrero 2014
Dotores averti sur un maladia emerjinte, simil a poliomielite, en California. Lo ia infeta asta 20 persones.
Alga pasientes ia developa un paralise de tota cuatro membros, cual no ia boni pos es medical tratada.
Poliomielite no esiste en la SUA, ma viruses relatada pote ataca ance la sistem de nervos, causante paralise.
Dotores dise ce la infeta es ancora rara, e ce los no previde un epidemica.
@T On revela la filmas la plu piratida de la anio pasada
@L aora_oji/2014/on_revela_la_filmas_la_plu_piratida_de_la_anio_pasada
====== On revela la filmas la plu piratida de la anio pasada ======
3 janero 2014
En 2013, La hobit: un viaja nonprevideda ia es la filma de cual on ia fa la plu multe copias nonlegal, seguente la pajeria TorrentFreak.
Plu ca 8,4 milion persones ia descarga lo, usante redes de BitTorrent par cual computadores egal pote comparti sua fixes.
La filma Django Unchained par Quentin Tarantino ia es a la loca du en la lista, pos 8,1 milion descargas.
La pirati de filmas resta popular, partal par causa de la interval entre la mostra de un filma en sinemas e la publici de lo per descarga o flue.
TorrentFreak compila sua lista con fontes diversa, incluinte statisticas de descarga reportada par analisadores publica de BitTorrent. Ma sua contas no inclui flues nonlegal enlinia o descargas de ospitafixes, cual permete ce usores con un parola secreta comparti fixes.
@T On revela la governa nova de Ucraina
@L aora_oji/2014/on_revela_la_governa_nova_de_ucraina
====== On revela la governa nova de Ucraina ======
26 febrero 2014
On ia presenta la governa tempora nova de Ucraina a la campa xef de protesta en Kiev, seguente la despone de Viktor Yanukovych en la semana pasada.
On ia nomi Arseniy Yatsenyuk per deveni la ministro xef. La consilio, sur ci la parlamento va vota en jovedi, inclui alga protestores.
La governa fronti defias grande, incluinte la repara de la economia lutante de la pais.
Entretempo, on ia pone Yanukovych en la lista internasional de criminales, acusante el sur la matas de plu ca 100 protestores par polisiores de tumulta.
@T On revela un bebe de panda jigante en Taiuan
@L aora_oji/2014/on_revela_un_bebe_de_panda_jigante_en_taiuan
====== On revela un bebe de panda jigante en Taiuan ======
6 janero 2014
Un bebe de panda jigante ia fa sua apare publica prima a un zo en Taipei, sur la isola de Taiuan.
Yuan Zai ave ses menses, e el es la bebe prima de pandas jigante sur la isola. On ia presenta el a jornalistes en saturdi, e a la popla jeneral en lundi.
Visitores ia es deletada par vide el en trepa sirca sua caje ante vade a via per dormi con sua madre. Taipei espeta ce 19 000 visitores va regarda la panda en cada dia.
Sua jenitores, Tuan Tuan e Yuan Tuan, ia es donada a Taiuan de Xina en desembre 2008. Sua nomes sinifia "reuni" en xines.
@T On revela un froda SUA de enscrive soldatos en la gera iraci
@L aora_oji/2014/on_revela_un_froda_sua_de_enscrive_soldatos_en_la_gera_iraci
====== On revela un froda SUA de enscrive soldatos en la gera iraci ======
5 febrero 2014
On investiga plu ca 1200 persones sur un froda de enscrive militar SUA en la gera iraci.
Du jenerales e deses de coroneles en implicada en la conspira alegada. On reporta ce paias de refere ia es nonlegal reseteda per enscrive de soldatos.
La froda ia custa ja $29 milion, cisa plu, a la governa, e cisa va esede ultima $100 milion.
Du jenerales de la armada ia revela la detalias a un escuta de la Senato SUA.
@T On saisi biblias en Malaisia
@L aora_oji/2014/on_saisi_biblias_en_malaisia
====== On saisi biblias en Malaisia ======
3 janero 2014
Autoriosas muslim en Malaisia ia confisca plu ca 300 biblias de la Asosia de Biblia, car los usa la parola "Allah" per refere a Dio.
En otobre, un corte ia deside ce nonmuslimes no pote usa la parola "Allah" en acel modo. La corte ia dise ce la terma "Allah" debe resta unica de islam, per preveni tumultas.
Ma en la lingua melaiu, persones de tota credes usa la parola "Allah" per refere a sua dios. La parola ia veni a melaiu de arabi.
Cristianes razona ce los usa ja la parola como nom de sua Dio tra sentenios, e ce la deside viole sua diretos.
@T On salva la pasajores en Antartica
@L aora_oji/2014/on_salva_la_pasajores_en_antartica
====== On salva la pasajores en Antartica ======
2 janero 2014
En Antartica, salvores ia susede move secur tota de la 52 pasajores de la barcon de rexerca Akademik Shokalskiy.
Un elicotor de un rompejelo xines ia vola los en grupos a un barcon australian.
La barcon Shokalskiy ia deveni trapida en jelo a 24 desembre.
Sua 22 ecipores va resta sur la barcon asta cuando el deveni denova libre.
@T On solve la misterio de la gato espaniol en Scotland
@L aora_oji/2014/on_solve_la_misterio_de_la_gato_espaniol_en_scotland
====== On solve la misterio de la gato espaniol en Scotland ======
2 febrero 2014
Tina, un gato con microtelia espaniol ci on ia trova en un garaje en Scotland, ia deveni reunida con sua posesor.
Un dotor veterinar ia reconose la posesor, permetente un reuni en la site Aberdeen.
En la pasada, la posesor, Fiona Prati, ia abita en Las Palmas en Fuerteventura.
Tina ia desapare de sua casa en la semana pasada. On pensa ce cisa el ia salta sur un veculo cual ia transporta el tra 50 cilometres.
@T On studia cambias en la corente de jeta supra Europa e America norde
@L aora_oji/2014/on_studia_cambias_en_la_corente_de_jeta_supra_europa_e_america_norde
====== On studia cambias en la corente de jeta supra Europa e America norde ======
16 febrero 2014
Rexercas nova sujesta ce la sistem xef cual determina la clima de Europa Norde e America Norde es cisa cambiante.
La studia mostra ce la corente de jeta segue un via sempre plu longa e serpente.
Esta ia causa ce la clima resta la mesma tra periodos plu estendeda.
Lo es posible ce esta resulta de la caldi resente de Artica, do la temperatur ia alti con rapidia duple o truple de la resta de la globo.
@T On subasta un permete de mata un rinosero negra
@L aora_oji/2014/on_subasta_un_permete_de_mata_un_rinosero_negra
====== On subasta un permete de mata un rinosero negra ======
12 janero 2014
A un subasta en la SUA, on ia vende un permete de xasa e mata un rinosero negra per $350 000.
La Club de Safari de Dallas, en Texas, dise ce la xasa va aida la proteje de acel spesie riscada par sutrae un membro vea e atacosa, e par finansia la conserva futur.
An tal, conservores de natur la critica sever la subasta, cual ia atrae an menasas de mata.
Sirca un tri de la 5000 rinoseros negra en la mundo abita en Namibia. La pais furni sola tre permetes de xasa en cada anio.
@T On sujesta un lia entre DDT e la maladia de Alzheimer
@L aora_oji/2014/on_sujesta_un_lia_entre_ddt_e_la_maladia_de_alzheimer
====== On sujesta un lia entre DDT e la maladia de Alzheimer ======
28 janero 2014
Rexercores sujesta ce la esposa a diclorodifeniltricloroetano (DDT), un pestiside cual ia es vasta usada en la pasada, pote aumenta la posible de developa la maladia de Alzheimer.
Un studia ia mostra ce la cuantia de DDT restante en pasientes con la maladia ia es la cuatruple de lo en persones sana.
Alga paises usa ancora la pestiside per controla malaria.
Ma un organiza de rexercores sur la maladia ia dise ce on nesesa plu atestas per demostra ce DDT fa un rol en dementia.
@T On suscrive un acorda de sesaspara en Sudan Sude
@L aora_oji/2014/on_suscrive_un_acorda_de_sesaspara_en_sudan_sude
====== On suscrive un acorda de sesaspara en Sudan Sude ======
24 janero 2014
La governa e rebelores de Sudan Sude ia suscrive un acorda de sesaspara, pos discutes en Itiopia.
La acorda ia es asetada en un otel en Addis Ababa, la capial itiopian. La combate debe fini en min ca 24 oras pos la suscrive.
En la semana pasada, soldatos de la governa ia recatura la du sites xef cual la rebelores ia saisi.
Plu ca un dui de milion persones ia es forsada de sua casas en esta gera de un mense.
@T On suspende lansores de misiles nucleal ci ia engana
@L aora_oji/2014/on_suspende_lansores_de_misiles_nucleal_ci_ia_engana
====== On suspende lansores de misiles nucleal ci ia engana ======
17 janero 2014
Tredes-cuatro ofisiores de la forte de aira de la SUA, ci ia es la supravidores de lansa misiles nucleal, ia es suspendeda de sua labora pos acusas ce los ia engana en esaminas de sua capasias.
Un cuantia peti de empleadas ia envia la respondes de la demandas a otras par mesajeta. Otra empleadas ia sabe esta, ma no ia reporta lo.
La grados consernada inclui sutenintes e capitanes.
La alegas ia emerji en un investiga sur la usa alegada de drogas par empleadas a otra bases militar.
@T On teme sur un droga nondetetable en Sochi
@L aora_oji/2014/on_teme_sur_un_droga_nondetetable_en_sochi
====== On teme sur un droga nondetetable en Sochi ======
7 febrero 2014
WADA, la Ajenteria Antidrogi Mundal, dise ce lo es xocada par un reporta ce on ofre vende un droga nova de crese musculal, cual no pote es detetada, a atletas olimpial.
On dise ce la droga, nomida "Full Size MGF", es capas de dupli la rapidia de developa musculos.
Un reportor alega ce lo ia es ofreda a el, desemblada, par un siensiste de la Academia Rusce de Siensas.
La president de WADA ia comenta: "Lo es scandalosa ce algun produi un tal sustantia e furni lo con risca a atletas."
@T On teme un ataca grande par cristianes en la RAS
@L aora_oji/2014/on_teme_un_ataca_grande_par_cristianes_en_la_ras
====== On teme un ataca grande par cristianes en la RAS ======
8 janero 2014
Un laboror de aida a un misioneria catolica en la Republica de Africa Sentral, cual refuja 3000 persones, dise ce el teme un ataca enorme.
Vojtech Bily ia dise ce la vila Bozoum, a norde de Bangui, la capital, es ensircada par gerores cristian, e ce el teme ce los intende masacra la abitores muslim.
La mision ave comedas sufisinte per no plu ca tre dias.
Frans ia envia 1600 soldatos per atenta fini la combate, ma la batalia continua. La Uni African ave ance 4000 mantenores de pas en la pais.
@T On teme un ondon inondante en Serbia
@L aora_oji/2014/on_teme_un_ondon_inondante_en_serbia
====== On teme un ondon inondante en Serbia ======
19 maio 2014
En Serbia, laborores de crise prepara per un "ondon inondante" sur un de la rios xef de la pais. On previde ce la acua de la Rio Sava va ateni un profondia estrema, menasante la sentro eletrical la plu grande en Serbia.
Esta segue la inondas la plu sever en desenios, cual ia lasa plu ca 35 persones mor e ia obliga deses de miles de persones a fuji de sua casas.
En Bosnia e Hersegovina, liscas de tera ia covre casas e disturba minas teral cual on ia depone en la gera de la desenio de 1990.
La inondas afeta ance Corvatsca. Tre menses de pluve ia cade sur la area en sola un pico de dias, causante ce rios supraflue e entra en la casas de la popla. On ave ancora avisas de inonda en multe partes de Serbia e Bosnia norde.
En soldi, on ia regania des-du corpos de Obrenovac, un vila serbsce. Con estas, la cuantia de mores en Serbia deveni 17.
Entretempo, on crede ce 19 persones, e cisa plu, ia mori en Bosnia, e la autoriosas averti ce la cuantia pote crese ancora.
En la capital serbsce, Beograd, la pluve ia sesa final. Ma ofisiores teme ce acua fluente de Corvatsca e Bosnia pote crea un ondon sur la Rio Sava. Laborores e bonvolores ia pila sacos de arena longo la rio en Beograd e otra vilas.
@T On teni Sarkozy sur alegas de malusa de influe
@L aora_oji/2014/on_teni_sarkozy_sur_alegas_de_malusa_de_influe
====== On teni Sarkozy sur alegas de malusa de influe ======
2 julio 2014
On ia deslibri Nicolas Sarkozy, la presidente de Frans entre 2007 e 2012, per interoga el sur alegas ce el ia malusa sua influe political.
Sarkozy es tenida a Nanterre, prosima a Paris, en un paso sin presedente contra un presidente pasada.
On atenta descovre esce Sarkozy ia promete un rol prestijiosa en Monaco a Gilbert Azibert, un judor major, en intercambia per informas secreta sur un investiga de alegas ce metodos nonlegal de suporta finansial ia es usada en un campania political.
On esplora aora alegas ce on ia averti Sarkozy ce sua conversas telefonal es secreta escutada como parte de acel investiga pasada.
Comentores regarda esta developa como un ostaculo per la atentas de Sarkozy de regania la presidentia en 2017.
On ia clama Azibert, un de la judores la plu major a la corte de apela, per un interoga a lundi. On ia interoga ance un otra judor, Patrick Sassoust, e Thierry Herzog, la avocato de Sarkozy.
Esta es la ves prima a cual la polisia ia teni un xef pasada de Frans. Investigores pote teni Sarkozy per un periodo inisial de 24 oras, cual los pote estende a du dias.
La presedente en la posto, Jacques Chirac, ia es condenada a prison (ma la puni ia es suspendeda) per froda e rompe de fida cuando el ia es la maior de Paris. Ma el ia es sempre un om libre cuando on ia interoga el.
@T On tribui a un adolesente pacistani ci ia atenta para un bombor
@L aora_oji/2014/on_tribui_a_un_adolesente_pacistani_ci_ia_atenta_para_un_bombor
====== On tribui a un adolesente pacistani ci ia atenta para un bombor ======
10 janero 2014
On ia fa multe tribuis a un adolesente pacistani, ci ia mori en lundi cuando el ia combate un bomba umana ci ia prepara ataca sua scola.
Aitzaz Hasan ia ave 15 anios. El ia es con sua amis estra la scola cuando los ia vide un om ci porta un jaceta de bomba.
An pos la suplicas de la otra scolores, el ia deside fronti e catura la bombor. Ma la bombor ia esplode se.
La redes sosial loda Aitzaz como un eroe. On ia sujesta an ce el debe reseta la onora la plu alta cual la armada pote dona a los ci sacrifia se per sua pais. Ma, car el ia es un nonmilitar, on no sabe esce acel es posible.
@T On trova cisa la ruina de la barcon prima de Colombo
@L aora_oji/2014/on_trova_cisa_la_ruina_de_la_barcon_prima_de_colombo
====== On trova cisa la ruina de la barcon prima de Colombo ======
14 maio 2014
Un investigor SUA crede ce el ia descovre su acua la ruina de la Santa Maria, la barcon prima de la mision famosa de Cristoforo Colombo.
Barry Clifford ia dise ce la indicas "sujesta forte" ce un ruina prosima a la costa norde de Aiti es acel barcon. Con sua ecipo, el ia mesura la ruina e ia fa fotos de lo.
El labora aora con la governa aitian per proteje la loca per permete un investiga plu detaliosa.
La Santa Maria, con ance la Niña e la Pinta, ia partisipa en la viaja de Colombo en 1492, cual ia esplora isolas en la Mar Caribean en atenta trova un pasaje a ueste en dirije a Asia.
La barcon prima ia es perdeda en la mision, no longa ante la reveni de Colombo a Espania.
Clifford ia identifia la loca posible de la Santa Maria par studia descovres arceolojial plu temprana cual ia indica un loca probable per la fortres de Colombo -- un construida sur cual espertas ia crede sempre ce on ia erije lo prosima a do la barcon ia encalia.
El ia usa ance informas de la jornal personal de la esploror. Un projeta resente de tufa, prosima a la loca, ia forti sua crede ce el ia trova la Santa Maria. On ia trova ala ance un canon de un desinia de la sentenio 15.
@T On trova cocaina en un barcon de marina espaniol
@L aora_oji/2014/on_trova_cocaina_en_un_barcon_de_marina_espaniol
====== On trova cocaina en un barcon de marina espaniol ======
7 agosto 2014
La polisia espaniol ia saisi 127 cilogrames de cocaina trovada en un sala de furnis de un barcon de instrui marinores. Los dise ce la cocaina ia entra a la barcon cuando lo ia para en Colombia.
Tre marinores ia es ja arestada cuando la barcon ia reveni a Espania en julio.
Contrabandores de drogas ia contrata con la marinores per transporta la drogas cuando la barcon ia reposa a porto en la site Cartegena de Indias.
La drogas ia es saisida en Cadiz, en Espania sude-ueste. Los ia es ascondeda entre la velas reservada de la barcon.
La polisia ia deveni consensa sur la drogas cuando la autoriosas SUA ia aresta du colombianes, sur ci los ia suspeta ce los ia oteni 20 cilogrames de cocaina de la marinores en un visita a New York en maio.
La barcon, un goleta nomida Juan Sebastián de Elcano, ia veni de completi un turi de ses menses, viajante tra 18 mil milias maral.
@T On trova cranios en un tomba coletiva en Srilanca
@L aora_oji/2014/on_trova_cranios_en_un_tomba_coletiva_en_srilanca
====== On trova cranios en un tomba coletiva en Srilanca ======
18 janero 2014
En Srilanca norde, on ia desentera cuatro plu cranios umana a un tomba coletiva descovreda en la mense pasada.
On ia estrae la restantes como parte de laboras escavante en la distrito de Mannar. On ia trova aora 31 sceletos intera o partal ala.
Esta es la tomba coletiva prima cual on ia desentera e esamina siensal en la area, de pos la fini de la gera separiste en 2009.
Miles de siviles ia mori en bombardas de granadas en la periodo final de la batalia contra la rebelores Tigres Tamil. Ma lo es posible ce la sceletos trovada veni de un tempo plu vea.
@T On trova la caxa de un relicia furada de Pape Joan Paul 2
@L aora_oji/2014/on_trova_la_caxa_de_un_relicia_furada_de_pape_joan_paul_2
====== On trova la caxa de un relicia furada de Pape Joan Paul 2 ======
31 janero 2014
La polisia italian, ci xerca un relicia manxada par la sangue de Pape Joan Paul 2, ia trova sua caxa de oro e vitro.
Ma la tela mesma cual porta la sangue manca ancora.
Lo ia veni de un roba de prete cual la Pape ia porta en 1981, cuando un fusilor ia atenta asasina el.
On ia aresta tre suspetadas, alegante ce los ia fura la relicia de un eglesa en la area Abruzzo ma ia dejeta la tela sin comprende sua valua.
@T On trova la corpos de du escavores nonlegal en Sudafrica
@L aora_oji/2014/on_trova_la_corpos_de_du_escavores_nonlegal_en_sudafrica
====== On trova la corpos de du escavores nonlegal en Sudafrica ======
19 febrero 2014
On ia descovre la corpos de du escavores nonlegal a un mina desusada, a este de Johannesburg en Sudafrica.
La mina es en la mesma area do on ia salva resente plu ca 20 escavores nonlegal ci ia deveni trapida su tera tra alga dias.
Acel omes, sur ci on dise ce un grupo oposante de escavores nonlegal ia trapi los, ia es arestada pos sua emerji de la duto.
Los va apare en corte, acusada sur escavas nonlegal.
@T On trova la ruina de un avion nepali mancante
@L aora_oji/2014/on_trova_la_ruina_de_un_avion_nepali_mancante
====== On trova la ruina de un avion nepali mancante ======
17 febrero 2014
En Nepal, on ia trova la ruina de un avion desapareda, cual ia porta 18 persones, en Arghakhanchi, un distrito ueste.
La avion ia es volante de la site Pokhara a Jumla cuando on ia perde contata, corta pos sua enaira en soldi.
Un ofisior ia dise ce lo ia pare ce la avion ia colpa un colina.
Un elicotor ia identifia un ruina ardente, e xercores crede ce nun ia survive.
@T On trova la tomba de un biror de Egipte antica
@L aora_oji/2014/on_trova_la_tomba_de_un_biror_de_egipte_antica
====== On trova la tomba de un biror de Egipte antica ======
4 janero 2014
Arceolojistes ia descovre la tomba de un biror ci ia servi un corte en Luxor (Uqsur), en Egipte, a plu ca 3000 anios ante aora.
Un ecipo japanes ia trova la tomba en labora sur un otra tomba, parteninte a un ofisior major su Faraon Amenofis 3, ci ia mori sirca 1354 AEC.
Luxor conteni un compleso grande e famosa de temples, construida par Amenofis 3 e par Ramses 2 a pos.
La depintas sur la mures de la tomba es bon conservada. Los imaji rituos relijiosa e ance la vive dial.
On ia aumenta la securia de la tomba asta la completi de la escavas. Pos acel, on intende restora lo afin visitores pote regarda lo.
@T On trova plu depintas importante en la casa de Cornelius Gurlitt
@L aora_oji/2014/on_trova_plu_depintas_importante_en_la_casa_de_cornelius_gurlitt
====== On trova plu depintas importante en la casa de Cornelius Gurlitt ======
12 febrero 2014
Deses de plu obras de arte ia emerji a la casa austrian de Cornelius Gurlitt, la colior deutx ci on ia trova en 2012 con sentos de depintas sur cual on ia crede ce la nazis ia fura los.
La descovres la plu resente en Salzburg inclui depintas par Renoir, Monet, e Picasso.
Un portavose per Gurlitt, ci ave plu ca 80 anios, ia dise ce espertas esamina la obras per vide esce on ia fura los en la eda de nazis.
El ia clari ce la judi inisial no confirma acel suspeta.
@T On trova sentos de animales mor en un airoporto sudafrican
@L aora_oji/2014/on_trova_sentos_de_animales_mor_en_un_airoporto_sudafrican
====== On trova sentos de animales mor en un airoporto sudafrican ======
1 febrero 2014
Sirca 400 amfibios e retiles perilida ia mori de desidrata e mal transporta en Sudafrica.
On ia descovre plu ca 1600 animales presada en du caxones a la Airoporto Internasional O.R. Tambo. On trata la surviventes a un zo local.
La animales ia veni de Madagasicara. Los ia ave no acua e no comeda en sinco dias, cisa plu.
On crede ce la intende ia es vende los como animales esotica de casa en la SUA.
@T On trova un medusa enorme sur un plaia australian
@L aora_oji/2014/on_trova_un_medusa_enorme_sur_un_plaia_australian
====== On trova un medusa enorme sur un plaia australian ======
7 febrero 2014
Siensistes en Australia labora per clasi un spesie nova de medusa jigante cual ia mar ia depone sur un plaia en Tasmania.
Un familia ia descovre la medusa, cual ave un diametre de 1,5 metres, a sude de Hobart en la mense pasada.
Un spesialiste de un departe de la governa australian ia clari ce siensistes conose ja la spesie tra alga tempo, ma no ia susede clasi lo.
El ia descrive la medusa trovada como "un animal vera merveliosa".
@T On trova un violin furada en un suteto
@L aora_oji/2014/on_trova_un_violin_furada_en_un_suteto
====== On trova un violin furada en un suteto ======
7 febrero 2014
Un violin de Stradivari con valua de $5 milion ia es furada en Milwaukee en la stato Wisconsin de la SUA. Ma on ia trova lo en un suteto en la site.
La strumento de 300 anios ia es furada de un violiniste xef de simfonia, a ci on ia presta lo.
On ia aresta du omes, con edas de 41 e 36, e un fem de 32 anios, en relata a la fura.
Per segue la trasa de la violin, la polisia ia usa informas sur un arma de xoca eletrical cual la furores ia usa.
@T On trova un vivente en un saco funeral
@L aora_oji/2014/on_trova_un_vivente_en_un_saco_funeral
====== On trova un vivente en un saco funeral ======
1 marto 2014
Funerores en la stato Mississippi en la SUA ia trova un om ancora vivente en un saco de corpo, an pos cuando on ia declara ce el ia mori.
Laborores ia prepara balsami Walter Williams en jovedi, cuando subita el ia move.
Un esaminor medical ia trova un manca de pulsa cuando on ia clama el a la casa de Williams en la site Lexington en la sera presedente. El ia declara ce Williams ia mori.
On ia clari ce cisa la pasmacer de la vea ia sesa tempora funsiona.
@T On usa bus per combate un virus en Txile
@L aora_oji/2014/on_usa_bus_per_combate_un_virus_en_txile
====== On usa bus per combate un virus en Txile ======
22 febrero 2014
Ofisiores en Txile fa un alia nonprobable -- con bus savaje. On atenta combate un maladia comunicable cual ia causa ja sirca 15 moris.
Bus es la predores natural de la ratas cual porta un virus matante.
Tipal, la ratas dona la virus a umanas sola cuando los encontra tendores en la forestas. Ma focos savaje en la menses de estate ia forsa la ratas a areas urban, maladinte plu persones.
La maladia no afeta la ratas mesma.
@T On va esecuta la gidor de un partito bangla per contrabanda de armas
@L aora_oji/2014/on_va_esecuta_la_gidor_de_un_partito_bangla_per_contrabanda_de_armas
====== On va esecuta la gidor de un partito bangla per contrabanda de armas ======
31 janero 2014
On ia condena Motiur Rahman Nizami, la gidor de la partito islamiste xef de Bangladex, a mori per contrabanda de armas. Esta ia provoca temes de violentia nova.
On ia judi ce el, e 13 otras, es culpable de contrabanda armas a separistes en la stato visina indian de Assam.
El ia es la ministro de industria en 2004, cuando on ia descovre la reserva de armas en Chittagong, un porto sude.
El fronti ance acusas sur crimines de gera de la tempo de autonomi en 1971.
@T On va move la Costa Concordia en junio
@L aora_oji/2014/on_va_move_la_costa_concordia_en_junio
====== On va move la Costa Concordia en junio ======
11 janero 2014
Un opera per estrae la ruina de la barcon de turi Costa Concordia de la costa de Italia norde-ueste va comensa en junio. On va prende lo a via per resicli sua metal.
Portos en Italia, Britan, Frans, Turcia, e Xina fa ofres per la contrata profitosa de desasembla la barcon.
La Costa Concordia ia colpa un resife prosima a la isola de Giglio en janero 2012. Lo ia inversa, matante 32 persones.
On prosede la capitan, Francesco Schettino, per matas sin intende e per abandona sua barcon.
@T On va vende asecura contra tormentores en Corea Sude
@L aora_oji/2014/on_va_vende_asecura_contra_tormentores_en_corea_sude
====== On va vende asecura contra tormentores en Corea Sude ======
8 febrero 2014
Un de la companias la plu grande de asecura en Corea Sude ia ofre la contrata prima contra tormentores en la pais.
Hyundai Haesang dise ce lo va introdui la scema nova a un tempo plu tarda en esta anio. Paias reclamada va contribui a la custa de consela e trata medical.
Alga casos publicida de tormenta ia aveni en Corea Sude en anios resente. Alga de los ia es liada a suisides adolesente.
La compania va asecura ance contra tre otra "males sosial" -- violentia de casa, ataca sesal, e contamina de comeda.
@T On vacui la airoporto de Edinburgh par causa de un saco suspetosa
@L aora_oji/2014/on_vacui_la_airoporto_de_edinburgh_par_causa_de_un_saco_suspetosa
====== On vacui la airoporto de Edinburgh par causa de un saco suspetosa ======
8 janero 2014
En Scotland, on ia vacui la airoporto de Edinburgh pos un averti de securia.
La polisia dise ce los ia clui la construida e sua via de asede pos descovre "un saco posible suspetosa" en la area sentral de xerca en la airoporto.
Espertas de desativi bombas ia ariva. No volas pote atera ala.
On reporta ce la securiores ia para un pasajor mas per esamina sua bagaje.
@T On vende plu ca mil milion telefonetas intelijente en un anio
@L aora_oji/2014/on_vende_plu_ca_mil_milion_telefonetas_intelijente_en_un_anio
====== On vende plu ca mil milion telefonetas intelijente en un anio ======
28 janero 2014
Tra la mundo, on ia vende plu ca mil milion telefonetas intelijente en 2013. La cuantia es plu grande par 38,4% ca en la anio presedente.
Samsung ia estende sua gida como la vendor xef de mundo. Apple e la compania xines Huawei ia ocupa la locas seguente.
Plu ca un dui de la 1,8 mil milion telefonetas vendeda ia es intelijente.
Un compania de rexerca mercatiste ia dise ce esta es la ves prima de vende plu ca mil milion telefonetas intelijente en un anio.
@T On vole aresta un protestor ucrainsce ci recovre en ospital
@L aora_oji/2014/on_vole_aresta_un_protestor_ucrainsce_ci_recovre_en_ospital
====== On vole aresta un protestor ucrainsce ci recovre en ospital ======
1 febrero 2014
La polisia vole aresta un protestor ucrainsce ci dise ce atacores ia fura el e tortura el.
Polisiores e avocatos prosedente ia ariva a la ospital do Dmytro Bulatov recovre pos un asentia de oto dias en la tumultas en Kiev.
Sua suportores ia visita ance la ospital, temente ce on va aresta el per organiza un turba coletiva.
On ia trova el en un state sanguinte e desordinada en un parte nonsentral de la capital en jovedi.
@T On xerca survivores de un naveta afondada en Corea Sude
@L aora_oji/2014/on_xerca_survivores_de_un_naveta_afondada_en_corea_sude
====== On xerca survivores de un naveta afondada en Corea Sude ======
17 april 2014
Servis de crise continua xerca cisa 300 persones ci manca pos la afonda de un naveta en la mar prosima a Corea Sude. Lo ia transporta 462 persones de Porto Incheon en la norde-ueste de la pais a la isola Jeju en la sude.
Ofisiores dise ce 174 persones ia es salvada de la barcon. On crede ce nove persones ia mori, e deses de otras ia es ferida.
Tra la note, ecipos de salvores ia usa lampas inondante e misiles luminante per xerca pasajores.
On ancora no sabe perce la naveta ia apoia a un angulo estrema e inversa, tal ce sola un parte peti de sua corpo resta vidable supra la acua.
Lo ia afonda en 30 metres de acua, e, car on crede ce multe pasajores ia deveni trapida a interna, la salvores consentra sua laboras a la ruina de la barcon.
Chung Hong-won, la ministro xef de Corea Sude, ia avisa ce on pote "peri an no un minuto o secondo" en la xerca per survivores. El ia speroni la ecipos a fa tan multe como posible per salva plu vives.
La opera envolve barcos gardacostal, militar e comersial. Ma lo es impedida par corentes forte e par un mal capasia de vide. Lee Gyeong-og, visministro de securia e dirije publica, ia comenta: "La acua conteni tan multe fango, e on no pote vide clar."
@T On xerca trepores mancante pos nevon en Nepal
@L aora_oji/2014/on_xerca_trepores_mancante_pos_nevon_en_nepal
====== On xerca trepores mancante pos nevon en Nepal ======
16 otobre 2014
En Nepal, ecipos de salva xerca a la min 70 persones mancante longo la vias de pasea en Himalaia, pos un venton de neva sur la Curso Annapurna. Nove corpos ia es trovada a mercurdi.
On teme ce la cuantia final de mores va es multe plu alta. Multe paseores resta ultra contata.
Esta es un de la climas la plu matante cual la area ia esperia. On crede ce la pluves e nevones sever ia es causada par Siclon Hudhud en Barat.
La mal clima ia colpa un loca de reposa a 4500 metres supra la nivel de mar, no multe su la punto la plu alta de la curso, la colo Thorung La.
La mores inclui trepores nepali, israeli e polsce, ma reportas no acorda sur la cuantia esata.
Ofisiores indica ce la saison presente es popular per paseores, e donce lo es probable ce multe trepores ia es sur la colos de la montes.
Cuatro canadianes e un barati es entre los ci on ia reporta como mancante.
A mercurdi, du elicotores militar ia es enviada de Kathmandu, la capital, per aida la opera de salva, e nove persones ia es salvada en la note.
Un survivor ia descrive la xoca de vide corpos mor en la viaja de reveni pos la tempesta.
En april, un avalanxa sur Sagarmata/Everest ia mata 16 xerpas e ia redui grande la cuantia de misiones a la monte la plu alta de mundo.
La apicos de Nepal atrae alga de la trepores la plu esperiosa. Ma paseas en la montanias nepali es jeneral secur, atraente cuantias vasta de persones comun.
@T On xerca tufores japanes ci ia desapare en Bali.
@L aora_oji/2014/on_xerca_tufores_japanes_ci_ia_desapare_en_bali
====== On xerca tufores japanes ci ia desapare en Bali. ======
16 febrero 2014
De venerdi, salvores en Indonesia ia xerca sete tufores japanes ci ia desapare prosima a la isola Bali.
On ia para la xerca per la grupo, cual inclui du instruores, a la sera de saturdi, e va recomensa lo a la matina de soldi.
Tota de la sete es tufores esperta. Los ia desapare en mal clima, cuando los ia es esplorante un area de rizoforas.
On ia reporta ventas e pluves forte a acel tempo.
@T On xerca un declara global sur contrabanda de animales
@L aora_oji/2014/on_xerca_un_declara_global_sur_contrabanda_de_animales
====== On xerca un declara global sur contrabanda de animales ======
13 febrero 2014
Gidores de 40 statos asembla en London per discute la comersia nonlegal de viventes savaje.
On intende prepara un declara global per trata la contrabanda de animales.
La consenta es ospitada par la governa de la Rena Unida, e prinses Charles e William es presente.
Conservores de natur dise ce la xasa nonlegal ia ateni un punto de crise: on mata deses de miles de elefantes, rinoseros, e tigres en cada anio.
@T On xerca un tigre perilinte en India
@L aora_oji/2014/on_xerca_un_tigre_perilinte_en_india
====== On xerca un tigre perilinte en India ======
16 janero 2014
En India norde, forestores en la stato de Uttar Pradesh xerca un tigre ci ia mata sete persones en la du semanas pasada. Viletanes terorida resta en sua casas.
La vitim la plu resente ia es un fem, de ci on ia trova sua corpo en un foresta a martedi.
Reportas dise ce la vitim prima ia es un om de 65 anios. On ia trova sua corpo en la distrito Sambhal en la mense pasada.
La tigre es fema. On crede ce sua vagas traversa un area con largia de 130 cilometres.
@T On xerca un violor evadente en Japan
@L aora_oji/2014/on_xerca_un_violor_evadente_en_japan
====== On xerca un violor evadente en Japan ======
9 janero 2014
La polisia japones ia comensa un xerca nasional per un suspetada de viole sesal, ci ia evade los a sude de Tokyo.
On ia ativi plu ca 4000 ofisiores en la xerca per Yuta Sugimoto, ci ave 20 anios.
La suspetada ia evade sua gardores en un visita a la ofisia de la prosedores en Kawasaki, per encontra sua avocato.
La evade ia alarma la popla, e on ia recomenda ce enfantes no sorti solitar de casa.
Yuta Sugimoto ia es suspetada de partisipa en un gang cual ia viole e ruba un fem en la stradas de Kawasaki a 2 janero.
@T Ondas jigante colpa la costa de la Rena Unida
@L aora_oji/2014/ondas_jigante_colpa_la_costa_de_la_rena_unida
====== Ondas jigante colpa la costa de la Rena Unida ======
7 janero 2014
Ondas enorme ia bate la costa sude de la Rena Unida. Meteorolojistes averti ce areas esposada va esperia cisa plu inondas an plu sever ca en dias resente.
On ia rejistra ondas con altia de 8 metres a Land's End en Cerneu.
Owen Paterson, la ministro per la ambiente, ia dise ce sete persones ia mori e ce 1700 casas ia es inondada en England, par causa de tempestas e inondas en desembre e janero.
Viajas par strada e tren es ance afetada. La clima sever la plu resente ia colpa xef la areas ueste e sude.
@T Onduras suspende oto consules
@L aora_oji/2014/onduras_suspende_oto_consules
====== Onduras suspende oto consules ======
12 febrero 2014
Onduras ia suspende oto de sua des consules en la Statos Unida.
La presidente, Juan Orlando Hernández, ia dise ce on va investiga esce la oto ave paperes nonlegal de identia.
La consulerias afetada es en Atlanta, Chicago, Dallas, Houston, Los Angeles, Miami, New Orleans, e New York.
Un grupo representante onduranes en la SUA ia alega ce alga consulerias furni paperes cual porta la cresta e bandera de Onduras, ma cual on no reconose como formas ofisial de identifia.
@T Orolojos rusce es retardada a la ves final
@L aora_oji/2014/orolojos_rusce_es_retardada_a_la_ves_final
====== Orolojos rusce es retardada a la ves final ======
27 otobre 2014
Rusia ia retarda sua orolojos a la ves final, en adota permanente oras invernal.
Lo ia aumenta ance sua cuantia de zonas de ora de nove a des-un, estendente de la Mar Pasifica asta la fronteras de la Uni European.
Tra la tre anios pasada, la pais ia esperimenta con oras permanente estatal. Ma esta ia es estrema nonpopular con multe rusces.
La Uni Soviet ia introdui oras estatal en 1981.
En 2011, cuando Dmitry Medvedev ia es la presidente, el ia redui la cuantia de zonas de ora a nove, e ia deside ance manteni la oras estatal tra la anio intera.
Rusces ia avansa alora sua orolojos par un ora, ma no ia retarda los en inverno.
Medvedev ia razona ce la cambias de ora disturba la bioritmos de persones e ce los ajita an boves. Ma multe persones en la norde de Rusia ia cexa sur sua matinas plu oscur en inverno.
A un confere jornaliste en Moscva, representores de la Academia Rusce de Siensas ia dise ce Europa va es aora plu prosima, car la difere entre la capital e la Tempo Media de Greenwich va es mera tre oras.
Arkady Tishkov, la visdirijor de la Instituida Jeografial, ia dise ce el oposa la cambia la plu resente car el crede ce on ia esecuta lo mera per plase anunsiores de produidas, car plu de persones va televide pos la cambia.
Cuando Rusia ia ocupa Crim en marto, la oras en Crim ia es ajustada per conforma a los en Moscva.
@T Osca Pistorius descrive sua tristia sur sua fusili de sua ami de cor
@L aora_oji/2014/osca_pistorius_descrive_sua_tristia_sur_sua_fusili_de_sua_ami_de_cor
====== Osca Pistorius descrive sua tristia sur sua fusili de sua ami de cor ======
14 febrero 2014
Oscar Pistorius, un atleta sudafrican, ia parla sur sua tristia sur sua fusili matante de Reeva Steenkamp, sua ami de cor, a esata un anio ante oji.
En un declara sur sua pajeria, el ia comenta: "La perde de Reeva e la trauma completa de acel dia -- me va porta los con me tra la resta de mea vive."
Pistorius va es prosededa per la omiside en Pretoria en marto.
El dise ce el ia malpersepi Steenkamp como un intruor cuando el ia fusili el tra la porte de saleta privata, a la Dia de San Valentin en 2013.
@T Oservores de ETA dise ce los labora per pas
@L aora_oji/2014/oservores_de_eta_dise_ce_los_labora_per_pas
====== Oservores de ETA dise ce los labora per pas ======
24 febrero 2014
En Espania, oservores laborante per reali la desarma de combatores de ETA ia insiste ce sua sola gol es ateni pas en la area euscara.
Membros de la Comision Internasional de Serti ia comenta pos es interogada par judores sur un consenta resente con membros mascada de ETA.
La Comision ia anunsia en venerdi ce la grupo separadiste euscara ia pone un cuantia peti de sua armas "ultra capasia de usa".
ETA ia declara la fini de sua campania armada en 2011.
@T Ostajes turces en Irac es librida
@L aora_oji/2014/ostajes_turces_en_irac_es_librida
====== Ostajes turces en Irac es librida ======
20 setembre 2014
Deses de ostajes turces ia es librida e ia reveni a Turcia pos es saisida par Stato Muslim en junio en Mosul, un site en la norde de Irac.
Ahmet Davutoğlu, la ministro xef de Turcia, ia dise ce la departe de securia ia prende la 46 persones a Şanlıurfa, un site sude.
La detalias es ancora nonclar, ma presidente Recep Tayyip Erdoğan ia descrive la opera como "detaliosa e secreta". NTV, un difusor nasional de novas, ia reporta ce Turcia no ia paia un rescata.
La ostajes ia inclui no sola soldatos ma ance diplomatas e sua familias.
Turcia ia refusa deveni direta envolveda en la campania militar contra Stato Muslim, partal par causa de temes sur la securia de la ostajes.
Davutoğlu ia dise ce tota la persones es en bon sania. El ia corti un visita a Azerbaijan per encontra los, ci ia es librida a un ora temprana de saturdi.
Plu ca 30 camionores turces ia es ance saisida en Mosul en junio. Los ia es librida pos un mense, ma on no ia publici esta informa.
Stato Muslim ia saisi ja areas grande de Irac e Suria. On estima ce la grupo pote ave asta 30 mil combatores.
La SIA ia fa ja plu ca 170 atacas airal contra la jihadistes en Irac de pos la media de agosto, suportante soldatos iraci e curdi sur la tera.
Ier, jetos franses ia fa sua atacas prima, colpante un reserva de Stato Muslim en Irac norde-este.
Ance ier, Turcia ia abri un parte de sua frontera sude-este a miles de curdis suri ci ia es fujinte de un avansa par Stato Muslim.
Plu temprana, soldatos turces ia preveni ce los traversa, provocante protestas coler de curdis turces en un vileta fronteral.
Paises ueste recomenda ce Turcia forti sua fronteras con Suria e Irac, per para la flue de combatores stranjer ci junta se a la violentes.
@T Oto corpos es trovada en la escaveria de Doornkop
@L aora_oji/2014/oto_corpos_es_trovada_en_la_escaveria_de_doornkop
====== Oto corpos es trovada en la escaveria de Doornkop ======
6 febrero 2014
Salvores a un escaveria de oro en Sudafrica dise ce los ia retrae oto corpos mor pos un foco e cade de rocas.
Un otra escavor resta mancante a la escaveria de Doornkop, a ueste de Johannesburg.
Plu temprana, on ia trova oto otra escavores nonferida en un refuja su tera. On ia trae los a la surfas.
La foco ia comensa en la sera de martedi a sirca 1700 metres su la surfas. On no sabe la causa.
@T Pacistan bombi asconderias de combatosas
@L aora_oji/2014/pacistan_bombi_asconderias_de_combatosas
====== Pacistan bombi asconderias de combatosas ======
20 febrero 2014
Jetos pacistani ia fa atacas de aira contra asconderias suspetada de ativistes combatosa en la norde-ueste, matante a la min 15 persones.
La atacas en la note ia consentra sur la vila Mir Ali e la areas ambiente de Uaziristan Norde.
Los segue un fali de discutes de pas entre reconsiliores de governa e ativistes de Taliban.
A sola alga dias ante aora, un grupo de Taliban en un otra area ia confesa mata 23 soldatos paramilitar.
@T Pacistan comanda denova la aresta de Musharraf
@L aora_oji/2014/pacistan_comanda_denova_la_aresta_de_musharraf
====== Pacistan comanda denova la aresta de Musharraf ======
1 febrero 2014
Un corte pacistani ia comanda la aresta de Pervez Musharraf, la renor militar pasada. On ia refusa sua demanda de vade estra la pais per un trata medical.
Musharraf ia resta en ospital de pos 2 janero, cuando el ia sufri doles de peto en via a sua prosede per tradi.
Avocatos prosedente ia razona ce sua state medical no es sufisinte grave per impedi sua apare ante judores.
El dise ce tota la alegas contra el es political motivada.
@T Panama va libri ecipores de un barcon de Corea Norde
@L aora_oji/2014/panama_va_libri_ecipores_de_un_barcon_de_corea_norde
====== Panama va libri ecipores de un barcon de Corea Norde ======
31 janero 2014
Panama ia comanda la libri de 32 membros de un barcon de Corea Norde cual ia porta armas cuban tra la Canal de Panama a ses menses ante aora.
La capitan e du otra ecipores va resta prisonida, car los es acusada de contrabanda armas.
Cuba ia dise ce on la aviones e armas de la eda soviet ia es en via a Corea Norde per es reparada.
Ma la Nasiones Unida dise ce esta ia desobedi la punis internasional contra Corea Norde.
@T Pape Benedito ia despreti cuasi 400 pretes en du anios
@L aora_oji/2014/pape_benedito_ia_despreti_cuasi_400_pretes_en_du_anios
====== Pape Benedito ia despreti cuasi 400 pretes en du anios ======
18 janero 2014
La Vatican ia confirma ce Pape Benedito 16 ia despreti cuasi 400 pretes en sola du anios sur alegas de maltrata de enfantes.
La statisticas per 2011 e 2012 mostra un aumenta grande en compara con anios presedente.
La arcivo ia es un parte de datos vatican, colieda per un comite de la Nasiones Unida a jovedi.
Acel escuta ia es la ves prima a cual la Vatican ia fronti publica la maltrata sesal de enfantes par eglesores.
@T Pape Fransisco crea 19 cardinales nova
@L aora_oji/2014/pape_fransisco_crea_19_cardinales_nova
====== Pape Fransisco crea 19 cardinales nova ======
22 febrero 2014
Pape Fransisco va asinia 19 cardinales nova a un rituo en Roma -- la tal nomis prima de sua papia.
Cardinales es la eglesores catolica la plu major su la pape.
La inclui de eglesores de locas como Aiti e Burcina Faso refleta la suporta de la pape arjentina per nasiones povre.
Des ses de la novas ave min ca 80 anios, donce los va pote fa un conclave per eleje la pape seguente.
@T Pape Fransisco va visita Filastin
@L aora_oji/2014/pape_fransisco_va_visita_filastin
====== Pape Fransisco va visita Filastin ======
5 janero 2014
Pape Fransisco ia anunsia sua viaja prima a Filastin. El va turi ala de 24 maio a 26 maio.
El va visita Ieruxalim, Betlehem, e Amman, la capital de Jordan.
El ia fa la anunsia a soldi, en sua bondise semanal en la Site Vatican.
Asta aora, la visita es sua sola viaja stranjer anunsiada per 2014. Lo va coresponde a la aniversario 50 de la encontra prima entre un pape (Paul 6) e un padron de cristiansme ortodox.
@T Pape Fransisco visita Turcia
@L aora_oji/2014/pape_fransisco_visita_turcia
====== Pape Fransisco visita Turcia ======
28 novembre 2014
Pape Fransisco va ariva pronto en Turcia en un viaja descriveda como major, per aida comunicas intercredal en la pais.
A la comensa de sua visita de tre dias, en Ankara el va encontra Recep Tayyip Erdoğan, ci ia domina la politica turces tra 12 anios.
El intende alora vade a Istanbul per consenta con la xef de la eglesa ortodox cristian.
Esta es sola la visita cuatro par un pape a Turcia, do la majoria de persones es muslim.
En sua viaja, on ia organiza ce Pape Fransisco visita la mascita de Sultan Ahmed en Istanbul, un loca de adora construida en la sentenio 17 e comun conoseda como la Mascita Azul.
El intende ance suscrive un declara juntada con Patriarca Bartolomeo 1, la gidor de 300 milion cristianes ortodox, per aida ponti la vale entre catolicisme e cristiania ortodox.
Sua visita aveni a un tempo cuando la politica en la area es plu delicata ca normal.
Turcia conteni aora a la min 1,6 milion refujadas de la gera en Suria. La plu de los abita prosima a la frontera cual separa la du paises.
La viaja de la pape ave cualias umaniste, e on previde ce el va comenta sur la mal situa de la refujadas.
En un intervisa a la sera ante sua visita, la Pape ia clari sua sentis sur la gera suri. El ia informa un jornal israeli ce la persegue de cristianes en la area es "la plu mal" de pos la dias prima de cristiania.
An si la plu de la 80 milion sitadanes de Turcia es muslim, sirca 120 mil cristianes abita en la pais, cual ia es la sentro de la mundo cristian ortodox a un ves pasada.
@T Parla sur la retira SUA de Afganistan pote forti la Taliban
@L aora_oji/2014/parla_sur_la_retira_sua_de_afganistan_pote_forti_la_taliban
====== Parla sur la retira SUA de Afganistan pote forti la Taliban ======
27 febrero 2014
La plu alta de la ofisiores militar SUA ia dise ce parla sur la retira de la SUA de Afganistan risca "coraji la enemi".
Major Jeneral Martin Dempsey ia clari ce parla de un retira completa ta pote gida alga fortes afgani a alia con la Taliban.
En lundi, presidente Barack Obama ia averti ce la SUA va retira cisa tota sua soldatos de la pais en esta anio, si on no va suscrive un acorda biladal de securia.
Ma Hamid Karzai, la presidente de Afganistan, ia refusa suscrive lo asta aora.
@T Parlamentores ucrainsce oposante xerca un restrinje de potia presidental
@L aora_oji/2014/parlamentores_ucrainsce_oposante_xerca_un_restrinje_de_potia_presidental
====== Parlamentores ucrainsce oposante xerca un restrinje de potia presidental ======
4 febrero 2014
En Ucraina, la parlamento comensa oji un periodo nova. On previde ce parlamentores oposante va esije leges cual va redui la potia de la presidente.
Los va demanda la readota de un constitui plu temprana sur cual la parlamento ia ave un controla plu forte sur la formi de governas.
Gidores oposante aumenta sua presa contra Viktor Yanukovych, la presidente, pos semanas de turba antigovernal.
La ministro xef, Mykola Azarov, e la governa intera ia resinia en la semana pasada.
@T Pasajores puia un avion jelada
@L aora_oji/2014/pasajores_puia_un_avion_jelada
====== Pasajores puia un avion jelada ======
27 novembre 2014
En Sibir, pasajores desirante vola ia sorti de sua avion e puia lo, pos cuando sua frenos ia jela.
La avion ia atenta enaira de Igarka, un vila rusce, ma no ia pote move cuando la temperatur ia cade tro.
La pasajores, de ci multe ia es turnores, ia ofre aida, temente un pospone de sua viaja a casa si no.
A pos, la avion de la airocompania Katekavia ia susede enaira e ia atera secur en la site Krasnoyarsk.
Un portavose ia clari: "Seguente la raconta prima, la temperatur de la aira ia ateni -52°C, e la sistem de frenos en la avion ia jela en sua posa parcida. La trator puiante no ia susede move la avion a sur la via a la atereria, e la pasajores ia deside aida puia lo. Esta no es permeteda car lo pote dana la casca de la avion."
Avocatos controla aora esce la airoporto, la airocompania, la ecipo, o la pasajores ia rompe cualce leges de securia avional.
Igarka es situada a 160 cilometres a norde de la Sirculo Artica, donce temperatures multe fria en inverno no es nonusual. Ma -52°C es notable plu fria ca normal: la promedia de la temperatur basa es plu simil a -30°C.
La airoporto es un sentro major per volas en la area. Lo es usada par 100 mil pasajores per anio, de ci multe labora en la campos artica de petrolio e gas rusce.
@T Pasientes de Ebola desapare en Liberia
@L aora_oji/2014/pasientes_de_ebola_desapare_en_liberia
====== Pasientes de Ebola desapare en Liberia ======
18 agosto 2014
On oia reportas contradisente sur 17 pasientes con Ebola ci ia desapare pos cuando persones ia fura benes de un sentro isolinte en Monrovia, la capital de Liberia. Plu ca 400 persones ia mori ja de la virus en la pais.
Un manada coler ia ataca la sentro en la sera de saturdi en West Point, un munisipa densa poplida.
Un ofisior major de sania ia dise ce tota pasientes es moveda a un otra compleso medical. Ma un otra reporta dise ce 17 pasientes ia evade, e ce 10 otras ia es prendeda a via par sua familias.
Alga dise ce la protestores ia es nonfelis ce on ia introdui resente pasientes de otra partes de la capital. Otras dise ce la atacores ia crede ce la crise de Ebola es un engana, e ia desira obliga la sentro a clui.
La ataca crea un problem grande en la batalia per para la sperde de la virus.
Ebola es sperdeda par contata con la licuidas corpal de un person infetada, per esemplo sua suo o sangue. On dispone ancora no remedia o vasin.
Ma la protestores ia prende materases manxada con sangue de la sentro, e ance multe aparatos medical. Un polisior xef ia descrive la aveni como "un de la cosas la plu stupida cual me ia vide en mea vive".
Como resulta de la furas, la virus pote aora sperde tra la intera de la area West Point. Descriveda como un visineria misera, la loca conteni sirca 50 mil persones.
La epidemica de Ebola ia comensa en Gine en febrero, e ia ateni aora Liberia, Siera Leon, e Nijeria.
@T Pasientes de Ebola es prendeda de un clinica en Siera Leon
@L aora_oji/2014/pasientes_de_ebola_es_prendeda_de_un_clinica_en_siera_leon
====== Pasientes de Ebola es prendeda de un clinica en Siera Leon ======
29 maio 2014
En Siera Leon, ses persones, sur ci on suspeta ce los ave la virus matante Ebola, ia es "violente" prendeda de un clinica par sua relatadas, en defia de la empleadas medical.
Un de los ia mori, e on teme ce esta virus estrema comunicable pote sperde.
On no sabe perce la relatadas ia prende la pasientes a via.
Cuasi 200 persones ia mori de Ebola en Afria ueste de pos la reporta prima de un apare en Gine en marto.
No remedia o vasin esiste per la virus, cual es entre la plu matantes de mundo.
Ma lo es plu probable ce un person va survive si on identifia temprana la problem, e si el reseta alora un trata medical.
Ebola pote mata asta 90% de sua infetadas. Lo es comunicada par contata con la licuidas de persones o animales infetada, per esemplo urina, sua, o sangue.
@T Patatas jenetical alterada resiste la clorose
@L aora_oji/2014/patatas_jenetical_alterada_resiste_la_clorose
====== Patatas jenetical alterada resiste la clorose ======
17 febrero 2014
Siensistes brites ia developa patatas jenetical alterada cual es capas de resiste la menasa la plu grande a se -- la clorose.
Un esperimenta de tre anios ia mostra ce esta patatas pote survive bon, an pos esposa a la maladia Phytophthora infestans.
Acel mofo ia pesta cultivores tra jeneras. Lo ia causa la Famion Grande de Er en la desenio de 1840.
On nesesa la aproba de la Uni European ante pote cultiva comersial esta vejetal.
@T Patruliores mexican ocupa un fortres de cartel de droga
@L aora_oji/2014/patruliores_mexican_ocupa_un_fortres_de_cartel_de_droga
====== Patruliores mexican ocupa un fortres de cartel de droga ======
9 febrero 2014
En la stato mexican de Michoacán, grupos de patruliores estralegal ia entra a un fortres de la Cavalores Templal, un cartel de drogas, e ia ocupa la plaza xef.
Sentos de patruliores, suportada par veculos e soldatos armada, ia ariva en Apatzingán en saturdi.
Los ia bloci ance alga stradas tra la site, cual es en la ueste de la pais.
La cartel controla multe de la contrabanda de drogas en la area. Lo mata e saisi persones, e estorse mone de la locales.
@T Patruliores mexican parada tra Apatzingán
@L aora_oji/2014/patruliores_mexican_parada_tra_apatzingan
====== Patruliores mexican parada tra Apatzingán ======
10 febrero 2014
En Mexico, grupos de patruliores estralegal ia parada en veculos tra un fortres de la Cavalores Templal, un cartel de drogas, en la stato Michoacán.
La patruliores ia ariva en la site Apatzingán en saturdi, suportada par veculos e soldatos armada.
En soldi, los ia gida sirca la vila, criante sloganes, ante asembla en la plaza xef.
La grupos ia comensa un projeta de ataca en la janero, intendente fini la ativia de la gang de drogas en la stato.
@T Patruliores mexican scaramuxa con un gang de drogas
@L aora_oji/2014/patruliores_mexican_scaramuxa_con_un_gang_de_drogas
====== Patruliores mexican scaramuxa con un gang de drogas ======
13 janero 2014
Un grupo de patruliores estralegal en Mexico ia saisi la vila peti de Nueva Italia, pos scaramuxa con membros alegada de un cartel de drogas nomida "Knights Templar" (Cavalores de la Temple).
Plu ca 100 omes ia entra a la vila en la ueste de la stato Michoacán a la matina de soldi, e ia desarma la polisia local.
Fusilis ia es intercambiada con membros de la gang ante cuanto la patruliores ia ocupa la vila.
La grupo de justia estralegal ia es fundida par abitores ci dise ce la polisia e armada ia fali proteje los.
@T Penguin defende sua deside de retira un libro
@L aora_oji/2014/penguin_defende_sua_deside_de_retira_un_libro
====== Penguin defende sua deside de retira un libro ======
15 febrero 2014
Penguin India ia defende sua deside de retira e destrui copias de un libro sur induisme par un erudita de la SUA.
En sua comentas prima sur la disputa, la compania ia dise ce lo debe respeta tal leges como los par cual un ofende a sentis relijiosa es un crimin.
Penguin ia dise ance ce lo debe proteje sua empleadas contra menasas.
La libro La indus: un istoria alternativa, par Wendy Doniger, ia es la tema de un caso legal, en cual on ia declara ce la testo es ofendente a indus.
@T Peregrinores pilipina onora un sculta de Cristo
@L aora_oji/2014/peregrinores_pilipina_onora_un_sculta_de_cristo
====== Peregrinores pilipina onora un sculta de Cristo ======
10 janero 2014
En la Pilipinas, sentos de miles de catolicas ia foli la stradas de la capital, Manila, per onora un sculta conoseda como la Cristo Negra.
Peregrinores ia trepa la un sur la otra per toca la sculta de lenio, en cuando lo ia prosegue lenta tra la site.
Multe crede ce la sculta de Cristo, de grandia natural, posese potias mistica capas de sutrae pecas e remedia maladias.
La organizores dise ce la prosegue aveni partal per prea per la vitimes de un siclon cual ia colpa la parte sentral de la Pilipinas en 2013.
Plu ca 80% de la 100 milion abitores de la pais es catolica.
@T Persones mori en protestas de la Fratia Muslim
@L aora_oji/2014/persones_mori_en_protestas_de_la_fratia_muslim
====== Persones mori en protestas de la Fratia Muslim ======
4 janero 2014
En Egipte, a la min ses persones, cisa 17, ia mori en scaramuxas entre polisiores e protestores de la Fratia Muslim.
La combate ia estende tra Cairo (Qahira) e otra sites, cuando la polisia ia xuta gas lacrimojen per sperde la protestores.
La autoriosas ia intensi resente sua colpas contra la promove, cual los trata como un grupo teroriste pos culpa lo per un bombi umana de un xeferia de polisia. La Fratia Muslim ia nega ce los ia fa la ataca, e un grupo jihadiste de la penisola Sina ia anunsia se mesma como culpable.
Suportores de Mohammed Morsi, la presidente pasada e un membro de la Fratia, ia protesta frecuente de cuando la militares ia despone el en julio.
@T Peru desculpa un governa pasada de sterilis obligada
@L aora_oji/2014/peru_desculpa_un_governa_pasada_de_sterilis_obligada
====== Peru desculpa un governa pasada de sterilis obligada ======
25 janero 2014
Peru ia desculpa la governa de Alberto Fujimori, un presidente pasada, de fa un campania de sterilis obligada en la desenio de 1990.
Prosedores dise ce los ia trova no atesta cual suporta alegas ce on ia sterili sentos de femes e omes, xef povre e nativa, contra sua vole.
La governa de Fujimori ia insiste sempre ce tota operas ia es acordada con la pasientes.
Ma grupos de diretos umana ia reata coler, disente ce los va apela.
@T Pete Seeger mori con 94 anios
@L aora_oji/2014/pete_seeger_mori_con_94_anios
====== Pete Seeger mori con 94 anios ======
28 janero 2014
Pete Seeger, un cantor de folclor e un ativiste american ia mori a la eda de 94, pos un maladia corta.
El ia deveni famosa en la grupo The Weavers (La Texores), formida en 1947, ma ia continua fa presentas solitar en un carera de ses desenios.
Conoseda per sua cantas de protesta, Seeger ia es poneda en lista negra en la desenio de 1950 per sua disposa sinistriste.
La banjiste alta e barbida ia deveni un figur de proa per tal causas political como la desarma nucleal e la promove "Occupy Wall Street" de 2011.
@T Pexes ave la ADN per ditos, ma descomutada
@L aora_oji/2014/pexes_ave_la_adn_per_ditos_ma_descomutada
====== Pexes ave la ADN per ditos, ma descomutada ======
26 janero 2014
Un studia sujesta ce pexes ave la jenetica nesesada per formi ditos, ma ce lo es descomutada.
La rexerca aida esplica como pexes ia evolui per deveni la animales la plu temprana de tera, a miliones de anios ante aora.
Pexes ia susede traversa a la tera par reusa un parte de sua ADN per crea ditos.
La siensistes ia prende jenes de pexes e ia introdui los a muses.
@T Pexes inspira robotes
@L aora_oji/2014/pexes_inspira_robotes
====== Pexes inspira robotes ======
16 febrero 2014
Pexes eletrical de America Sude abri ideas nova en robotica.
Alga pexes envia un corente peti tra la acua per sensa sua ambiente, e los onda un pina longa per move.
Siensistes en la SUA crede ce los pote usa ambos cualias en un clase nova de veculos autonom su acua.
Los developa robotes cual va es capas de nada sirca detrito en oscuria completa, como en barcones afondada.
@T Pexores txilan vinse contra contamina par sentros eletrical
@L aora_oji/2014/pexores_txilan_vinse_contra_contamina_par_sentros_eletrical
====== Pexores txilan vinse contra contamina par sentros eletrical ======
12 janero 2014
La corte suprema de Txile ia comanda ce la compania manejante de du sentros eletrical de carbon debe no contamina la mares e no mata la vive maral.
La judores ia acorda con pexores e ambientistes en la area Bio Bio de Txile sentral.
Los ia dise ce la sentros eletrical a Bocamina engoli crabes, sardinas, e otra spesies, e esflue acua tepida e contaminada.
La du sentros es manejada par un sucompania de Endesa en Espania.
@T Phil Everly mori en California
@L aora_oji/2014/phil_everly_mori_en_california
====== Phil Everly mori en California ======
4 janero 2014
Phil Everly, un musiciste american ci ia es un dui de la Frates Everly, ia mori en California a la eda de 74.
El ia mori pos un maladia de pulmon, causada par un vive de fumi.
Everly e sua frate Don ia es conoseda como The Everly Brothers, un de la atas pop la plu susedosa en la desenio de 1950 e la parte prima de la desenio seguente.
Los ia fa multe cantas de armonia streta, incluinte "Wake Up, Little Susie" (Velia, Susie peti), "Cathy's Clown" (Bufon de Cathy), "Bye Bye Love" (Adio, la ama), e "All I Have To Do Is Dream" (Me debe mera sonia).
@T Piranias ataca baniores en Arjentina
@L aora_oji/2014/piranias_ataca_baniores_en_arjentina
====== Piranias ataca baniores en Arjentina ======
1 janero 2014
Un manada de pexes carnivor ia ataca baniores en un rio arjentina, ferinte sirca 70 persones.
La ataca ia aveni a la dia de natal, cuando miles de baniores ia es frescinte en la Rio Parana, a 300 cilometres norde de Buenos Aires.
Paramedicistes ia dise ce la manos e pedes de deses de persones ia es atacada, e ce alga persones ia perde ditos.
La pexes es de un spesie de pirania. Los es grande e fame, e ave dentes multe agu.
@T Pistorius demanda pardona per la mata de Steenkamp
@L aora_oji/2014/pistorius_demanda_pardona_per_la_mata_de_steenkamp
====== Pistorius demanda pardona per la mata de Steenkamp ======
7 april 2014
En un corte en Pretoria en Sudafrica, Oscar Pistorius, un atleta paralimpial, ia demanda emosiosa un pardona de la familia de Reeva Steenkamp, sua ami de cor, a la dia prima de sua atesta a sua prosede per mata el.
En un vose tremante, el ia dise ce el ia "atenta proteje" el, e ce el no pote imajina la dole de la familia. El ia dise ce el sufri malsonias asustante, e velia frecuente credente ce el ole la sangue de Steenkamp.
La avocatos prosedente dise ce Pistorius ia mata Steenkamp en febrero 2013 pos un disputa. El dise ce el ia malpersepi sua ami de cor como un intruor.
A la relatadas de Steenkamp, Pistorius ia dise: "A cada momento pos la aveni de esta trajedia, me ia pensa sur vosa familia. Me velia a cada matina e vos es la persones prima sur ci me pensa, la persones prima per ci me prea."
El ia continua: "Me promete ce, cuando Reeva ia vade a leto a acel note, el ia senti amada. Me ia atenta pone mea parolas sur paper a multe multe veses per scrive a vos. Ma no parolas va sufisi an."
June, la madre de Reeva Steenkamp, ia senta con fas fria en cuando Pistorius ia parla a la corte folida.
La atleta de 27 anios ia dise ce el usa aora piles antidepresante e piles de dormi, e ce el vole nunca denova toca un fusil. El ia informa la corte sur sua enfantia difisil, pos nase sin partes de ambos gamas e donce nesesante porta membros prostesal.
On ia demanda a Pistorius esce el e sua familia ia es esposada a atas criminal. El ia responde ce multe intruis criminal ia aveni en sua enfantia. El ia dise ance ce, a un ves, un auto ia segue el a en sua comunia securida, ma el ia ave sua fusil con se, e la du omes en la auto ia vade rapida a via.
El ia dise ce el ia mostra sua fusil a un otra ves en atenta proteje un taxiste ci persones ia es atacante. "Los ia comensa bate el con rocas a sua fas e sua testa. A acel punto, me ia pasa un lampa roja, sonante la claxon de mea auto. Me ia estrae mea fusil. Me ia punta lo a la tre persones. Los ia entra rapida a la taxi. Los ia vade rapida a via."
El ia detalia la importantia de relijio a se: "Cuando me ia encontra Reeva, me crede ce lo ia es vera un bondise. Me ia vole sempre un acompanior ci es un cristian. El ia es un cristian forte."
El ia deveni denova emosiosa cuando el ia dise: "Mea Dio es un Dio de refuja." Sua avocato ia demanda un pausa. La avocatos prosedente ia permete esta, con la constrinje ce lo no va aveni a cada dia. La caso va recomensa a la matina de martedi.
@T Plu ca 200 persones mori en inondas en Pacistan e Barat
@L aora_oji/2014/plu_ca_200_persones_mori_en_inondas_en_pacistan_e_barat
====== Plu ca 200 persones mori en inondas en Pacistan e Barat ======
7 setembre 2014
Plu ca 200 persones ia mori en inondas causada par pluves forte tra areas grande de Barat e Pacistan. La inondas ia sumerji multe de la site Lahore.
A la min 110 ia es matada par deluvias en partes pacistani de Caxmir e Pandjab. Sirca 100 ia mori ance en la parte barati de Caxmir.
La inondas ia destrui casas e ia causa liscas de tera.
A jovedi, un bus portante sirca 50 membros de un rituo de sposi ia es puxada en un canion en Caxmir barati, matante deses. On teme ce la sposa e sposo futur ia mori.
La cuantia completa de moris es ancora no clar. La pluve ia diminui aora, donce on espera ce la acua va comensa deveni min profonda.
Plu ca 2000 persones ia deveni isolida par la inondas, e la armada aida en la labora de salva los.
Pacistan esperia comun inondas estrema en la saison de monsones, ma la loca esperia aora sua inondas la plu de mal de du desenios.
@T Plu ca tre milion suris es ofisial refujadas
@L aora_oji/2014/plu_ca_tre_milion_suris_es_ofisial_refujadas
====== Plu ca tre milion suris es ofisial refujadas ======
29 agosto 2014
La departe de refujadas de la Nasiones Unida dise ce plu ca tre milion suris es aora rejistrada como refujadas, e ce la crise mali ancora.
Suria es aora "la crise umaniste la plu grande de nosa eda". Cuasi un dui de tota suris ia deveni obligada a fuji de sua casas.
La majoria ia vade a paises visina a Suria. 1,14 milion xerca un refuja en Lubnan.
Plu ca 190 mil ia mori en la gera interna de Suria, cual ia dura tra tre anios.
Grupos oposante en la pais ia combate soldatos fidosa a Presidente Bashar al-Assad, de cuando sua governa ia supresa protestas contra el en marto 2011.
En menses resente, la situa ia es maliada par la formi e avansa de la grupo "Stato Muslim", cual controla aora areas vasta de Suria e Irac.
La NU dise ce un oti de tota suris ia traversa la frontera, e ce 6,5 milion otras es deslocada en la pais. Plu ca un dui de estas es enfantes.
Familias ci ariva a campas de refujadas en paises visina es multe fatigada e asustada. Alga de los ia spende plu ca un anio en fuja de un vileta a un otra en Suria.
La viaja sortinte de Suria deveni ance plu difisil: ganges armada esije sobornas de multe persones.
En ajunta a la refujadas rejistrada, la visinas de Suria estima ce sentos de miles de otra suris xerca un refuja en sua paises, causante un tensa enorme.
@T Plu matas con fusil en Missouri pos cansela de lege de compra
@L aora_oji/2014/plu_matas_con_fusil_en_missouri_pos_cansela_de_lege_de_compra
====== Plu matas con fusil en Missouri pos cansela de lege de compra ======
18 febrero 2014
Un rexerca nova furni atesta nova per recomenda un controla plu sever de fusiles en la SUA.
La rexercores ia esplora la resultas de la cansela par la Stato Missori de sua lege sur fusiles de mano en 2007.
Su la lege, on ia debe es sertida par la xerif local e reseta un lisensa ante compra un fusil.
En un numero veninte de la Jornal de Sania Urban, la rexercores va dise ce la cansela ia causa un alti direta en violes e matas con fusil.
@T Plu suris sorti de Homs
@L aora_oji/2014/plu_suris_sorti_de_homs
====== Plu suris sorti de Homs ======
11 febrero 2014
300 suris ia fuji de Homs pos un acorda entre ambos lados per estende un sesaspara de tre dias en la Site Vea asejada.
La Cresente Roja suri ia confirma esta sortis la plu resente en Twitter.
Sentos de siviles ia es permeteda de parti a la fini de semana, pos un acorda de sesaspara entre la governor local e la NU.
Entretempo, negosiores de la governa e oposa ia recomensa discutes de pas en Genève. Analistes dise ce on previde poca progresa.
@T Pluvones en Nicaragua e un siclon en Bermuda
@L aora_oji/2014/pluvones_en_nicaragua_e_un_siclon_en_bermuda
====== Pluvones en Nicaragua e un siclon en Bermuda ======
19 otobre 2014
En Nicaragua, 22 persones ia mori en alga dias de pluve forte.
Nove de los ia es matada en la capital, Managua, cuando un mur ia colasa en un pluvon deluviante.
En otra areas de la site, ecipos de crise ia aida la sorti de familias de areas cual risca liscas de tera. Los va junta se a miles de otras casida en refujas tempora par causa de pluvones ja de setembre.
Multe de la comunias plu povre en Nicaragua no gusta la locas a do la governa prende los, car estas es comun tro distante de sentros urban e de sua locas de labora. La sortidas tende reveni a sua casas.
Plu ca 30 mil persones es afetada par la pluves en Nicaragua. Salvador, Onduras, e Guatemala sufri ance.
Entretempo, en Bermuda, un colpa direta par un siclon nomida Gonzalo ia dana construidas e tira cordas eletrical a tera.
An si la tempesta sur la isola ia es la plu forte de des anios, on ia reporta sola feris minor. Esta ia es la tempesta du sur la isola en un semana.
Plu ca 30 mil casas ia esperia un rompe de eletrica, ma on ia restora la furni a du tris de los ja a posmedia de saturdi.
La siclon ia inonda ance, e ia cade arbores.
@T Polisiores e pompores en New York es acusada de froda sur descapasias
@L aora_oji/2014/polisiores_e_pompores_en_new_york_es_acusada_de_froda_sur_descapasias
====== Polisiores e pompores en New York es acusada de froda sur descapasias ======
8 janero 2014
En la SUA, on ia aresta deses de laborores pasada de servis de crise, en un investiga vasta de froda en relata a paias aidante a descapasidas.
Prosedores dise ce 72 polisiores, oto pompores, e sinco ofisiores de prison es entre la acusadas.
On reporta ce alga de los ia declara falsa ce los ia deveni descapasida par la atacas en New York en 11 setembre 2001.
On crede ce la froda ia custa sentos de miliones de dolares.
@T Polisiores egiptian es matada a un posto de controla
@L aora_oji/2014/polisiores_egiptian_es_matada_a_un_posto_de_controla
====== Polisiores egiptian es matada a un posto de controla ======
23 janero 2014
Sinco polisiores ia es matada en Egipte pos un ataca armada contra un posto de controla a sude de Cairo.
Du otras ia es ferida, un de los en modo grave, en la ataca en la provinse Beni Suef, a 100 cilometres de la capital.
Du omes sur motosicles ia fusili multe a la fortes a la posto.
Atacas contra fortes de securia ia aumenta de pos la despone de Mohammend Morsi, la presidente islamiste, en julio.
@T Pompores ia vide un xica ante crase el con sua veculo
@L aora_oji/2014/pompores_ia_vide_un_xica_ante_crase_el_con_sua_veculo
====== Pompores ia vide un xica ante crase el con sua veculo ======
16 janero 2014
Pompores ci ia responde a la cade de un avion en San Francisco en julio 2013 ia sabe ce un adolesente xines es sur la tera prosima, ante cuando los ia crase el con sua veculo.
Video de un camera de elmo mostra un otra pompor ci indica Ye Mengyuan sur la tera. A alga minutos plu tarda, un veculo ia colpa el.
Pompores dise ce los ia crede ce la xica de 16 anios ia mori ja, ma un avocato dise ce nun ia esamina el per sinias de vive.
Un esaminor medical ia trova ce Ye ia es matada par la veculo, no par la colpa pos cade.
@T Portugal selebra 40 anios de democratia, entre protestas
@L aora_oji/2014/portugal_selebra_40_anios_de_democratia_entre_protestas
====== Portugal selebra 40 anios de democratia, entre protestas ======
28 april 2014
Protestas sur medios sever forsada par la Uni European ia ombri la aniversario 40 de democratia en Portugal.
Alga miles de persones ia marxa en la sentro de Lisbon e ia escuta parlas criticante reduis de spende par la governa. La partisipores en la protestas ia inclui alga de la gidores de la Revolui Cariofilo de 1974, cual ia fini cuasi sinco desenios de tirania.
Portugal ia debe reali medios finansial sever pos reseta un presta internasional en 2011.
Figures influosa ci ia partisipa en la revolui de 1974, en cual ofisiores minor ia suverti la governa, ia boicota la aniversario ofisial per la anio tre en segue.
Selebras organizada par la governa ia aveni a un distantia corta de la protestas.
Vasco Lourenço, un de la gidores de la c, ia critica la governa presente de Portugal, cual ocupa un loca political a destra de sentro. El ia demanda esce la pais debe an resta en la Uni European.
Otelo Saraiva de Carvalho, un otra ofisior ci ia aida organiza la colpa de state, ia descrive la medios sever como "la comanda de mori per la esperas e valuas" de la revolui.
Miguel Januario, un artiste, ia dise ce la portugeses "ia permete ce formas nova de tirania -- finansial en esta caso -- ia saisi la controla".
Ma la ministro xef, Pedro Passos Coelho, ia dise: "Par un coaveni felis, nos onora esta dia simbolin a cuasi la mesma tempo a cuando nos fini nosa program de aida economial."
La program de presta ia dura tra tre anios, e va fini a 17 maio. En maio 2011, Portugal ia reseta plu ca 78 mil milion euros de aida urjente. La cuantia de nonempleadas en la pais resta entre la plu altas en la eurozona.
Portugal selebra la Revolui Cariofilo con un festa nasional a 25 april, nomida la Dia de Libria.
@T Prinsesa Cristina de Espania es clamada a corte sur froda
@L aora_oji/2014/prinsesa_cristina_de_espania_es_clamada_a_corte_sur_froda
====== Prinsesa Cristina de Espania es clamada a corte sur froda ======
8 janero 2014
Un judor espaniol ia clama la fia la plu joven de Re Juan Carlos a corte sur acusas de froda e de lava de mone. Prinsesa Cristina ave 48 anios.
El ia deveni formal un suspetada, e debe apare en corte a 8 marto. On crede ce esta es la ves prima cuando un relatada direta de la re espaniol va apare acusada en corte.
En la anio pasada, on ia confisca imobilas parteninte a sua sposo, Inaki Urdangarin, la Duxe de Palma, pos alegas ce Urdangarin ia malusa miliones de euros donada a un organiza carital cual el ia maneja.
La duxe ia nega la alega, e on no ia acusa formal el.
Un de la imobilas es un casa grande e lusosa a la borda de Barcelona, cual parteni a la duxe e Prinsesa Cristina.
@T Prinsesa Cristina de Espania va apare en corte
@L aora_oji/2014/prinsesa_cristina_de_espania_va_apare_en_corte
====== Prinsesa Cristina de Espania va apare en corte ======
8 febrero 2014
Prinsesa Cristina de Espania va es interogada en corte en relata a un scandal de froda sur la negosias comersial de sua sposo.
Esta va es la ves prima cuando un membro de la familia reial de Espania ia apare en corte como la sujeto de un investiga criminal.
On alega ce sua sposo, Inaki Urdangarin, ia froda governas local sur miliones de euros de mone publica.
Ambos nega ce los ia fa cualce mal, e on no ia acusa formal los.
@T Protestas en Bosnia e Hersegovina deveni violente
@L aora_oji/2014/protestas_en_bosnia_e_hersegovina_deveni_violente
====== Protestas en Bosnia e Hersegovina deveni violente ======
8 febrero 2014
Protestores en Bosnia e Hersegovina ia ensende construidas de la governa, en un dia tre de violentia continuante tra la pais.
La polisia ia usa baletas de cauxo e gas lacrimojen contra protestores en Sarajevo, la capital, e en Tuzla, un vila norde.
Fuma negra ia es vidable, jetante de la construida presidental en Sarajevo.
La protestores no gusta la manca de progresa economial e political en sua pais.
@T Protestas global sur diretos ge ante la Olimpiales rusce
@L aora_oji/2014/protestas_global_sur_diretos_ge_ante_la_olimpiales_rusce
====== Protestas global sur diretos ge ante la Olimpiales rusce ======
5 febrero 2014
Tra la mundo, ativistes de diretos ge fa un dia de protestas contra la governa rusce, a sola du dias ante la comensa de la Olimpiales Invernal en la site sude costal de Sochi.
La protestores vole convinse sponsores de la Juas a critica la leges controversa de Rusia sur omosesalia.
En la anio pasada, Rusia ia proibi la promove de sesalia "nontradisional". Multe ia persepi esta como un ataca a diretos ge.
On ia previde protestas en 19 sites de la mundo, incluinte London, New York, Paris, e Sanct-Peterburg.
@T Protestas per democratia en Hongkong
@L aora_oji/2014/protestas_per_democratia_en_hongkong
====== Protestas per democratia en Hongkong ======
30 setembre 2014
CY Leung, la gidor de Hongkong, ia recomenda forte ce protestores prodemocrata sesa "direta" sua campania, car folas enorme preveni la opera normal de partes de la teritorio.
Deses de miles de persones ia bloci stradas en alga areas.
La protestores vole ce Beijing permete ce Hongkong vota libre per sua gidor seguente. Beijing rejeta esta.
A presente, la stradas es relativa cuieta, ma on previde ce folas va ariva plu tarda, per la Dia Nasional Xines a la prima de otobre -- un festa cual selebra la fundi de Xina Comuniste.
A la fini de semana, polisiores antitumulta ia usa gas lacrimojen e airosoles de peper, ma on ia retira esta polisia a pos, e la protestores ia resta calma.
Partes major de la site es blocida, incluinte alga scolas e bancos.
La protestores desira ce Leung, la dirijor xef de Hongkong, resinia. El ia pare rejeta esta, disente ce si on ta despone el, la gidor seguente ta es elejeda par un comite, e no par votores.
En la mense pasada, Beijing ia deside ce la popla de Hongkong pote eleje sua gidor seguente en 2017.
Ma la aspirores va es restrinjeda a du o tre persones ci debe es aprobada par la majoria de un comite ci suporta Beijing. En efeto, Beijing pote elimina aspirores ci lo no gusta.
@T Protestas tra la SUA sur la xuta en Ferguson
@L aora_oji/2014/protestas_tra_la_sua_sur_la_xuta_en_ferguson
====== Protestas tra la SUA sur la xuta en Ferguson ======
26 novembre 2014
Tra la SUA, folas ia asembla per protesta contra la deside a lundi de no prosede un polisior sur la mata de Michael Brown, un adolesente negra.
La polisior blanca ci ia mata Brown ala dise ce el ave "un consiensa pur". Darren Wilson ia fusili la om de 18 anios a 9 agosto, gatilinte semanas de turba en la vila Ferguson en Missouri.
Protestas de New York a Seattle ia es xef pasosa, ma tumultas ia aveni en Oakland en California. En e sirca Ferguson, la suburbe de St Louis do tumultas major ia aveni a lundi, 2200 soldatos de la Garda Nasional ia es posada per para plu turbas.
La comunia de Ferguson es xef african-american, e multe de los ia recomenda ce on prosede la polisior per omiside. Ma la deside de la juria alta sinifia ce el no va fronti alegas criminal sur la xuta.
Avocatos per la familia de Brown ia denunsia la deside como "nonjusta" ma ia condena ance la violentia cual ia segue lo.
Con un cuantia plu ca truplida de soldatos, la situa en Ferguson ia es calma tra la plu de ier, an si protestores ia clui corta un via major en la sentro de St Louis, e protestas ia aveni estra la corte federal.
Ma tarda en la sera, la situa ia deveni plu tensada. Protestores ia ensende un veculo de polisia pos fali inversa lo, e la polisia ia comensa vacui la stradas, xutante bombas de fuma e gas lacrimojen, e arestante alga persones.
La protestores ia porta cartones con la mesaje "Vives negra importa". Los ia canta lenta "Manos alta, no fusili" en refere a alegas par alga atestores ce Brown ia leva ja sua manos cuando el ia es fusilida.
En Oakland, en la area de la Baia de San Francisco, tumultores ia fa vandalisme a autos de polisia e a organizas comersial en la sentro. Esta ia es la note du de turba en acel site de porto, do 406 mil persones abita.
On ia reporta la fura de benes en alga locas, incluinte un venderia de autos clasica e un boteca de telefonetas. Un strada xef ia es blocida per un tempo corta. A la note de lundi, la polisia ia aresta 43 persones en Oakland en atenta controla un fola de sirca 2000 persones.
Protestores ia susede ance para corta la trafica en la sentro de Los Angeles ante cuando la polisia ia ariva per sperde los.
A otra locas en la pais:
-- Sentos de persones ia impedi la trafica en Cleveland en Ohio, en un protesta separada sur la mata par xuta de un xico de 12 anios par un polisior.
-- Protestores en New York ia clui corta la Ponte de Brooklyn e ia disturba la trafica sur otra vias.
-- Un auto ia xoca protestores ci ia bloci un via en Minneapolis, ferinte un person.
-- En Chicago, on ia fa un protesta par senta estra la ofisia de la maior.
Parlante en Chicago ier, la presidente Barack Obama ia dise ce "no escusa" esiste per conduis destruosa e atas criminal de tumulta. El ia ajunta ce la culpables debe es prosededa.
El ia dise ce la frustra a la deside par la juria alta "ave radises profonda en multe comunias de color ci ave un senti ce nosa leges no es enforsada en modo uniforma o justa".
@T Protestores ataca la televisa nasional de Pacistan
@L aora_oji/2014/protestores_ataca_la_televisa_nasional_de_pacistan
====== Protestores ataca la televisa nasional de Pacistan ======
1 setembre 2014
En Pacistan, la canal nasional de televisa ia sesa difusa cuando sua construida en Islamabad ia es atacada par protestores antigovernal.
La canal ia veni de mostra, con imajes direta, folas entrante par forsa tra la portones e fluente tra la ofisias.
Seguente reportas la plu resente, soldatos ia sutrae la protestores de la loca.
La protestores desira la resinia de Nawaz Sharif, la ministro xef. El nega acusas de froda political e votal.
Plu temprana, en la note de soldi, otra scaramuxas ia aveni entre protestores e la polisia.
On reporta ce alga polisiores ia es ferida cuando miles de protestores ia avansa contra un construida cual conteni la burocratia federal de la pais e la casa de la ministro xef.
Polisiores de tumulta ia es obligada a retira de la strada xef ante la parlamento.
Alga de la protestores ia porta bastones e ia lansa petras. Los ia ataca veculos e ia ensende contenadores transportal cual on ia pone sur la strada per bloci la via.
Protestores ia usa camiones per rompe la serca esterna de la construida parlamental, an si la loca ia es gardada par soldatos.
Protestores, fidosa a Imran Khan, un politiciste oposante, e Tahirul Qadr, un eglesor, senta ja en la sentro de la capital tra du semanas.
@T Protestores atenta clui Bangkok
@L aora_oji/2014/protestores_atenta_clui_bangkok
====== Protestores atenta clui Bangkok ======
13 janero 2014
En Tai, protestores ia bloci stradas en partes de la capital, Bangkok, en un atenta de despone la governa ante la elejes subita a 2 febrero.
Los ia construi paradores e ia ocupa alga crusas major de stradas. La governa ia envia 18 000 securiores per manteni la bon condui.
La protestores ia comensa sua campania en novembre. Los vole sustitui un "Consilio de Popla" nonelejeda per la governa de Yingluck Shinawatra.
Los alega ce Yingluck es mera un tempora per sua frate, la ministro xef pasada Thaksin Shinawatra, ci ia es desponeda par la militaria en 2006.
@T Protestores condena un balo estrema destriste en Wien
@L aora_oji/2014/protestores_condena_un_balo_estrema_destriste_en_wien
====== Protestores condena un balo estrema destriste en Wien ======
25 janero 2014
En Wien en Austria, miles de persones ia partisipa en prosegues protestante contra un balo anial a cual on ia previde ce gidores stranjer estrema destriste va vade.
La protestores no vole ce la Partito de Libria, un partito oposante, fa sua Korporierten-Fest ("balo de studiantes") en la palasio Hofburg.
On ia aresta alga persones pos atas violente.
En anios pasada, la balo ia atrae persones estrema destriste como Marine le Pen, la gidor de la Fronte Nasional, un partito franses.
@T Protestores defiante prepara en Ucraina
@L aora_oji/2014/protestores_defiante_prepara_en_ucraina
====== Protestores defiante prepara en Ucraina ======
19 janero 2014
Protestores ucrainsce per la Uni European prepara per un protesta grande en Kiev, defiante leges resente adota per restrinje protestas publica.
Tre gidores xef de la oposa espera vide miles de suportores en la Plaza de Autonomia en la capital, como ja en oto protestas presedente cual ia aveni en soldis.
La leges ia es rapida asetada en jovedi par parlamentores fidosa a presidente Victor Yanukovych.
@T Protestores en Ucraina fini sua ocupa de construidas
@L aora_oji/2014/protestores_en_ucraina_fini_sua_ocupa_de_construidas
====== Protestores en Ucraina fini sua ocupa de construidas ======
17 febrero 2014
Protestores ucrainsce ia fini sua ocupa de la ofisia de site e otra construidas en la capital, Kiev.
Los ia ocupa la locas tra plu ca du menses. Los es noncontente sur la abandona par presidente Yanukovych de un acorda con la Uni European.
Ofisiores ia promete desprende la acusas contra la protestores si tota de los parti de construidas de governa ante lundi.
La gidores de la protestas dise ce los ia sasia aora la constrinje de esta amnestia.
@T Protestores filastini ataca polisiores israeli en Ieruxalim
@L aora_oji/2014/protestores_filastini_ataca_polisiores_israeli_en_ieruxalim
====== Protestores filastini ataca polisiores israeli en Ieruxalim ======
26 febrero 2014
Protestores filastini ia scaramuxa con la polisia israeli sur la Monte de Templo en Ieruxalim.
De la loca santa, conoseda a muslimes como la Haram al-Sharif ("refuja nobil"), sirca 20 jovenes ia lansa petras e esplodentes minor a polisiores.
A pos, la polisia ia entra la compleso e ia aresta tre persones.
La turba ia aveni en cuando la parlamento de Israel ia prepara debate un proposa recomendante ce Israel "reali sua autoria" en relata a la Monte de Templo.
@T Protestores marxa global contra cambia de clima
@L aora_oji/2014/protestores_marxa_global_contra_cambia_de_clima
====== Protestores marxa global contra cambia de clima ======
22 setembre 2014
Ier, protestas demandante un reata rapida contra la cambia de clima ia atrae sentos de miles de marxores en plu ca 2000 locas tra la mundo.
La Marxa de Popla sur Clima campania per reduis de emetes de carbono, ante un confere de la Nasiones Unida sur clima en New York en la semana veninte.
En Manhattan, 310 mil persones ia partisipa en un marxa protestante, do Ban Ki-moon, la Secretor Jeneral de la NU, ia es ance presente.
Ban ia dise: "Esta es la planeta do nosa jeneras seguente va vive. Nos ave no otra solve car nos ave no otra planeta."
La marxa en New York ia es la plu grande de la protestas, atraente plu ca un dui de la cuantia estimada de 600 mil marxores sirca la mundo.
Manhattan ia resona con cantas, claxones e tambures en cuando la protesta colorosa ia progresa tra la stradas.
La protesta global ia inclui avenis en 156 paises.
Sirca 40 mil persones ia marxa en London, incluinte la ator Emma Thompson, ci ia descrive la menasa de clima cambiante a un invade martan.
Sirca 30 mil ia marxa en Melbourne, 25 mil en Paris, 15 mil en Berlin, e 5 mil en Rio, do on ia projeta sloganes ambiental e un cor verde sur la sculta famosa de Cristo la Salvor cual sta supra la site.
Protestas min grande, atraente mera sentos o un pico de miles de persones, ia aveni ance en tal sites como Bogota, Barcelona, Jakarta, e Delhi.
A martedi, la Nasiones Unida va ospita un confere sur clima a sua xeferia en New York, con 125 gidores de stato. Esta va es la tal colie prima pos un confere nonsusedosa en København en 2009.
Ban Ki-moon espera ce gidores va progresa sur un acorda universal cual tota nasiones va suscrive a la fini de 2015.
@T Protestores tai impedi la distribui de paperes de vota
@L aora_oji/2014/protestores_tai_impedi_la_distribui_de_paperes_de_vota
====== Protestores tai impedi la distribui de paperes de vota ======
1 febrero 2014
Protestors antigovernal en Tai bloci construidas do on teni paperes de vota, a du dias ante la eleje.
Los ia ensirca a la min un ofisia en Bangkok e alga otras en Tai sude, per atenta impedi la distribui de la paperes.
La protestores oposa la eleje, cual va es serta ganiada par la partito ja governante.
Los vole ce on sustitui un "comite de la popla" nonelejeda per reformi la sistem political.
@T Protestores tai impedi votas temprana
@L aora_oji/2014/protestores_tai_impedi_votas_temprana
====== Protestores tai impedi votas temprana ======
27 janero 2014
En Tai, protestores ia ensirca voterias, impedinte votas temprana ante la eleje jeneral de la semana veninte.
Un de sua gidores ia es matada par fusili en un scaramuxa con suportores de la governa en Bangkok este.
On ia cansela la vota temprana en deses de locas tra la capital e alga provinses sude.
Ativistes antigovernal vole ce la ministro xef resinia, e ce on reformi la sistem political.
@T Protestores tai promete no impedi la vota
@L aora_oji/2014/protestores_tai_promete_no_impedi_la_vota
====== Protestores tai promete no impedi la vota ======
26 janero 2014
Suthep Thaugsuban, la gidor de protestas en Tai, ia promete ce sua suportores no va impedi votas temprana per la eleje jeneral de la semana veninte.
Suthep dise ce protestores no va atenta para persones ci vole fa sua votas, de soldi. Ma los va protesta ancora estra la voterias.
Los desira ce la ministro xef resinia, e ce on reformi la sistem political.
La governa dise ce la vota va aveni, an pos un judi par la Corte Constitual ce on pote pospone lo.
@T Protestores ucrainsce ataca ofisias rejional de governa
@L aora_oji/2014/protestores_ucrainsce_ataca_ofisias_rejional_de_governa
====== Protestores ucrainsce ataca ofisias rejional de governa ======
25 janero 2014
Ativistes antigovernal en Ucraina aumenta sua protestas pos un manca de progresa en discutes entre presidente Viktor Yanukovych e la oposante.
En Ucraina ueste, la ativistes ia saisi la ofisia rejional de governa en la site Ivano-Frankivsk, e ia ataca un otra en Chernivtsi.
On ia reporta ance protestas en Lutsk en la norde-ueste e en Sumy en la este.
Entretempo, Yanukovych ia promete usa "tota medios legal" si on no trova un solve de la crise.
@T Protestores ucrainsce sorti de la ministreria de justia
@L aora_oji/2014/protestores_ucrainsce_sorti_de_la_ministreria_de_justia
====== Protestores ucrainsce sorti de la ministreria de justia ======
28 janero 2014
En Ucraina, protestores antigovernal ia fini sua ocupa de la ministreria de justia, car la ministro ia menasa un state de crise.
Un portavose per la protestores ia dise ce los ia parti car los no ia desira provoca la autoriosas.
Sirca 30 persones resta estra la construida e refusa permete ce cualcun entra.
La turba ia estende tra la pais en dias resente, spesial sirca construidas munisipal.
@T Pussy Riot es flajelida en Sochi
@L aora_oji/2014/pussy_riot_es_flajelida_en_sochi
====== Pussy Riot es flajelida en Sochi ======
20 febrero 2014
Pussy Riot, un bande protestante rusce, ia es bateda con flajelos par cozaces ci aida patrulia Sochi tra la Olimpiales invernal.
On ia publici un video en cual membros de la bande es flajelida en cuando los protesta.
La bande ia deveni famosa pos presenta un canta protestante contra presidente Vladimir Putin en un eglesa.
En lundi, on ia aresta du membros per un fura suspetada, ma on ia libri los a pos.
@T Putin avisa visitores ge a Sochi
@L aora_oji/2014/putin_avisa_visitores_ge_a_sochi
====== Putin avisa visitores ge a Sochi ======
18 janero 2014
Vladimir Putin, la presidente de Rusia, ia dise ce omosesales va es bonvenida en Sochi per la juas olimpial, ma el ia averti los contra difusa "propaganda ge".
El ia dise: "Nos no proibi la relatas sesal nontradisional. Nos proibi la promove de omosesalia e pedofilia entre minores."
El ia parla en Sochi a bonvolores ci va aida en la juas olimpial de inverno en la mense veninte.
Putin ia dise ce Rusia va serti la securia de la juas, sin produi un efeto grande a la aveni.
@T Putin encontra leopardos farsi en un turi Olimpial
@L aora_oji/2014/putin_encontra_leopardos_farsi_en_un_turi_olimpial
====== Putin encontra leopardos farsi en un turi Olimpial ======
5 febrero 2014
Vladimir Putin, la presidente de Rusia, ia gida ofisiores xef de la Olimpiales en un turi de un refuja per leopardos farsi, ante la Juas Invernal en Sochi.
Un leopardeta ia deveni ajitada e ia ataca du jornalistes. Putin ia atenta calmi la animal.
La visita a la Parce Nasional de Sochi atenta mostra ce la Juas va benefica la ambiente.
Putin es conoseda per sua encontras con animales savaje. En la pasada, la televisa rusce ia mostra el en eticeti balenas, salva un ecipo de TV de un tigre, e vola con grues sibirsce.
@T Putin encontra Yanukovych a la Olimpiales
@L aora_oji/2014/putin_encontra_yanukovych_a_la_olimpiales
====== Putin encontra Yanukovych a la Olimpiales ======
9 febrero 2014
Vladimir Putin, la presidente de Rusia, ia encontra sua corespondente ucrainsce, Viktor Yanukovych, a la rituo abrinte de la Olimpiales de Inverno.
Ambos lados ia refusa clari lo cual los ia discute en sua conversa nonformal en Sochi.
Rusia ia pausa la reali de un program de salva finansial, con custa de $15 mil milion, asta la formi de un governa nova en Kiev.
Presada par Moscva, Yanukovych ia refusa suscrive un acorda vasta de comersia con la UE, provocante la protestas presente cual ia comensa en novembre.
@T Putin es tratada como un eroe en un visita a Crim
@L aora_oji/2014/putin_es_tratada_como_un_eroe_en_un_visita_a_crim
====== Putin es tratada como un eroe en un visita a Crim ======
10 maio 2014
La presidente rusce, Vladimir Putin, ia fa sua visita prima a Crim de pos cuando Rusia ia prende lo de Ucraina en marto.
A folas festante la vinse soviet contra la nazis en 1945, el ia dise ce Crim ia mostra un fida a "un veria istorial" cuando los ia eleje deveni un parte de Rusia. Ma la governa ucrainsce ia protesta contra la visita, descrivente lo como "un viole grande de la autonomia de Ucraina".
Kiev ia reporta ance ce alga persones ia mori en un opera de securia contra separadistes en Mariupol. Arsen Avakov, la ministro ucrainsce de internas, ia dise ce sirca 20 protestores prorusce e un securior ia es matada en la porto sude. Soldatos ucrainsce e separadistes ia combate a la xeferia de polisia, cual on ia ensende.
En Sevastopol, un porto crimsce, Putin ia grasia la fortes militar per sua rol en la Gera Mundal Du, e ia bonveni la ajunta de la penisola a la Federa Rusce.
El ia regarda un parada volante de aviones rusce, e ia parla a marinores sur barcones, en cuando folas ia asembla sur presipes regardante la porto. En cuando el ia pasea tra la plaza xef, presante manos con persones crimsce, on ia trata el como un eroe vinsente.
Plu temprana, Putin ia parla a miles en un parada enorme en la Plaza Roja de Moscva, prometente defende "la propre pais". El ia dise ce 9 maio, conoseda en Rusia como la Dia de Vinse, es "un dia de lamenta e recorda eterna", e ia asentua como "la vole ferin de la popla soviet" ia salva Europa de sclavia.
@T Putin suporta la aspira de Sisi per presidentia de Egipte
@L aora_oji/2014/putin_suporta_la_aspira_de_sisi_per_presidentia_de_egipte
====== Putin suporta la aspira de Sisi per presidentia de Egipte ======
14 febrero 2014
Vladimir Putin, la presidente de Rusia, ia dise ce el suporta la xef militar de Egipte, Abdul Fattah al-Sisi, en sua campania per deveni presidente.
Putin ia encontra Sisi en Moscva per discute un negosia de armas. El ia comenta ce el es "consensa" sur la aspira de Sisi.
An tal, la lado egiptian ia fa no anunsia sur esta tema.
La marexal de campo ia gida la despone de presidente Mohammed Morsi en julio 2013. La constitui nova esije un vota ante la media de april.
@T Qantas va sutrae 5000 empleas
@L aora_oji/2014/qantas_va_sutrae_5000_empleas
====== Qantas va sutrae 5000 empleas ======
27 febrero 2014
Qantas, un airolinia australian, ia anunsia sua intende de elimina 5000 empleas. Lo ia reporta ance un perde finansial grande.
Esta es un parte de sua projeta de redui sua custas par A$2 mil milion ($1,8 mil milion) tra la tre anios veninte.
On ia anunsia la reduis a lado de un perde fundal, ante imposta, de A$252 milion en la ses menses asta la fini de 2013.
La compania intende ance elimina plu ca 50 aviones. Lo fronti competes forte en sua operas nasional e internasional.
@T Queensland prepara ante un tempesta forte
@L aora_oji/2014/queensland_prepara_ante_un_tempesta_forte
====== Queensland prepara ante un tempesta forte ======
10 april 2014
La stato Queensland en Australia prepara per la ariva de Siclon Ita, un tempesta de categoria sinco cual va colpa sua costa estrema norde.
On previde ce lo va ateni la penisola Cape York a un ora tarda de venerdi, portante ventas multe destruosa. La Departe de Meterolojia ia dise ce ondas pote dana alga areas basa, e ce pluves forte pote causa inondas.
Esta es la tempesta la plu forte cual ia colpa la area de pos Siclon Yasi en 2011.
On ia averti abitores costal sur "un marea tempestal perilinte" a cuando la siclon traversa la costa.
Ventones pote estende a 190 cilometres de la sentro de la tempesta, cisa afetante alga vilas incluinte Port Douglas, un loca popular per turistes, situada a norde de Cairns.
Siclon Ita ia porta ja pluves deluviante a la Isolas Solomon en la semana pasada, causante inondas subita cual ia mata 21 persones, cisa plu.
@T Re Juan Carlos de Espania renunsia la trono
@L aora_oji/2014/re_juan_carlos_de_espania_renunsia_la_trono
====== Re Juan Carlos de Espania renunsia la trono ======
3 junio 2014
Re Juan Carlos de Espania ia anunsia sua intende de renunsia, pos cuasi 40 anios sur la trono. Sua fio, Prinse Erital Felipe, ci ave 45 anios, va emprende.
En un parla televisada, la re de 76 anios ia dise: "Un jenera nova debe es a la fronte... persones plu joven con enerjias nova."
Tra multe de sua rena, on ia regarda Juan Carlos como un de la monarcas la plu popular de mundo. Ma resente, multe espanioles ia perde sua fida sur el.
Sua reputa ia deveni manxada par un investiga longa sur froda en la atas comersial de sua fia e sua sposo. La suporta per la re ia cade plu cuando on ia descovre ce el ia fa un viaja lusosa a Botsuana per xasa elefantes, a media de la crise finansial de Espania.
Espania no ave un lege esata per regula sua pasas de rena. La ministro xef, Mariano Rajoy, ia dise ce ministros va fa un consenta spesial per discute la prosede per cual Re Felipe 6 va emprende la trono.
Juan Carlos ia deveni la re pos la mori de Jeneral Francisco Franco, la autocrata destriste ci ia rena tra 36 anios pos sua vinse contra fortes republiciste en la Gera Interna Espaniol.
El ia iniora pronto la suportores de Franco, ci ia desira estende la autocratia. En loca, el ia fundi un sistem nova de monarcia parlamental.
Con la pasa de anios, la re ia envolve sempre min se en la politica dial, e ia deveni plu un xef sin potia. An tal, el ia aida stabli areas como Catalunia e Euscaleria, cual desira deveni autonom, e ia aida ance desativi un colpa atentada de stato en 1981.
@T Rebelores es matada par la militaria en la Pilipinas
@L aora_oji/2014/rebelores_es_matada_par_la_militaria_en_la_pilipinas
====== Rebelores es matada par la militaria en la Pilipinas ======
30 janero 2014
A la min 37 rebelores pilipina ia es matada par un ataca militar de du dias en la sude.
Benigno Aquino, la presidente, ia dise ce la ataca va proteje viletanes de rebelores en la provinse de Maguindanao.
La rebelores oposa un acorda resente de pas entre la governa e la Fronte Moro de Libri Muslim, un organiza plu grande.
Su la acorda, la rebelores debe sede sua armas en intercambia per autonomia en partes de la sude.
@T Rebelores iraci es matada par sua propre bomba
@L aora_oji/2014/rebelores_iraci_es_matada_par_sua_propre_bomba
====== Rebelores iraci es matada par sua propre bomba ======
11 febrero 2014
21 rebelores, cisa plu, ia es matada en Irac sentral pos la esplode nonintendeda de un bomba de auto.
La esplode ia aveni en la posmedia temprana sur un via de deserto, a sirca 20 cilometres de la site Samarra.
La veculo ia es plenida con esplodentes. On ia es acompaniante lo de la ensirca de la rebelores a un strada xef, cuando lo ia esplode.
La site Samarra en la provinse Salah al-Din es xef suni. Lo es ja longa un fortres de rebelores.
@T Refujadas evade un sentro de prisoni en Papua e Gine Nova
@L aora_oji/2014/refujadas_evade_un_sentro_de_prisoni_en_papua_e_gine_nova
====== Refujadas evade un sentro de prisoni en Papua e Gine Nova ======
17 febrero 2014
En Papua e Gine Nova, alga xercores de refuja ia evade la sentro de prisoni australian. Los ia rompe un serca e ia sufri feris.
Sirca 35 refujadas ia sorti de la sentro par forsa en soldi, ma on ia trova rapida los.
On ia aresta oto, e dona trata medical a 19.
La Isola Manus ospita un de la campas costal do Australia trata xercores de refuja.
@T Republicistes gania controla de la Senato SUA
@L aora_oji/2014/republicistes_gania_controla_de_la_senato_sua
====== Republicistes gania controla de la Senato SUA ======
5 novembre 2014
En la SUA, en elejes de mediaperiodo, la republicistes ia gania controla de la Salon alta (la Senato), aumentante sua potia en la du anios final de la presidentia de Barack Obama.
La partito ia vinse en Arkansas, Colorado, Iowa, Carolina Norde, Dakota Sude, e Virginia Ueste, e lo previde plu ganias pos la conta de votas en otra statos.
Mitch McConnell, un senator republiciste sur ci on predise ce el va gida la salon, ia descrive la resulta como un vota contra "un governa cual la popla no pote fida plu".
En la elejes de mediaperiodo (tal nomida car los aveni a media de la periodo du de cuatro anios de la presidentia de Obama), votores ia eleje cuasi un tri de la Salon alta, la Salon basa intera, 36 de 50 governores de stato, e multe ofisiores local o de stato.
Tra la campania, republicistes ia consentra sur la nonsasia de votores con Obama, un democrata. Los ia presenta la vota como un referendo sur sua presidentia.
En cuando la resultas prima ia apare tarda a martedi, lo ia deveni clar ce la republicistes ia fa ganias major en la Salon.
La votas es ancora contada en multe statos, ma la Partito Republiciste ia gania fasil la ses sejas nesesada per prende la controla de la Senato.
Cuando la Congresa nova es inaugurada en janero, la republicistes va controla ambos salones a la ves prima pos 2006.
Los va ave aora la capasia de complica, e cisa an impedi completa, la projetas de Obama en la du anios final de sua periodo en la Casa Blanca.
Par controla la Senato, la republicistes va pote ance restrinje la capasia de Obama de nomi persones nova como judores federal, membros de consilio, e ofisiores major de governa.
En ajunta a la sejas cual la partito ia gania de la democratas, la republicistes ia reteni sua sejas en Alabama, Georgia, Idaho, Kansas, Kentucky, Maine, Mississippi, Nebraska, Oklahoma, Carolina Sude, Tennessee, e Texas.
En Louisiana, no la un e no la otra de la du aspirores major ia gania 50% de la votas. Acel stato va debe fa un eleje nova en la parte temprana de desembre.
@T Restas nonidentifiada es redonada a Punto Zero en Manhattan
@L aora_oji/2014/restas_nonidentifiada_es_redonada_a_punto_zero_en_manhattan
====== Restas nonidentifiada es redonada a Punto Zero en Manhattan ======
11 maio 2014
En un rituo formal, miles de restas nonidentifiada pos la atacas de 9 setembre 2011 ia es redonada a Punto Zero.
Des-sinco veculos ia porta los de la Ofisia de la Esaminor Medical Xef a un compleso dedicada, su do la Sentro de Comersia Mundal ia sta. La move ia divide opinas entre la familias de vitimes, de cual alga ia fa un protesta a la loca.
La atacas ia mata sirca 3000 persones en New York, la area de Washington DC, e Pennsylvania. La restas es 7930 fratos de texeda umana cual ecipos investigante no ia susede identifia. On ia pone los en caxas de metal, ia covre los con la bandera SUA, e ia prende los en un convoia de camiones de pompor e veculos de polisia a la sentro de Manhattan.
Pompores e polisiores ia pone la caxas en un compleso su la Museo de Recorda ala, a 20 metres su la tera. On va permete ce sola membros de familia e ecipos investigante asede los. En esta modo, on va pote fa atentas nova de identifia la restas, seguente avansas posible de siensa.
Alga membros ia protesta silente, fininte sua vijila direta ante la aveni de la rituo. Los crede ce la restas de la vitimes debe es situada en un monumento respetosa, e no en la susolo de un museo. Ma otra familias ia suporta la deside.
De la 2753 persones ci ia mori a la Sentro de Comersia Mundal, 1115 es nonidentifiada.
On ia construi ja un rascasielo nova a la loca de la tores jemelo presedente. Lo es aora la construida la plu alta en la emisfera ueste.
@T Rexercores crea un virus de Wi-Fi
@L aora_oji/2014/rexercores_crea_un_virus_de_wi-fi
====== Rexercores crea un virus de Wi-Fi ======
27 febrero 2014
En Britan, rexercores en Liverpool ia crea un virus de computador cual pote sperde fasil par Wi-Fi.
En areas densa poplida do multe redes de Wi-Fi esiste, la virus pote traversa la redes, xercante puntos debil.
Pos controla un punto de Wi-Fi, lo lasa tota computadores en acel rede en un state estrema atacable.
La rexercor xef ia dise ce lo developa programes per preveni tal atacas.
@T Rexercores esposa la nonsecuria de Gmail en telefonetas
@L aora_oji/2014/rexercores_esposa_la_nonsecuria_de_gmail_en_telefonetas
====== Rexercores esposa la nonsecuria de Gmail en telefonetas ======
23 agosto 2014
Rexercores ia susede intrui en contas de Gmail a 92% de veses, par esplota la nonsecuria de la memoria de telefonetas.
Los ia pote asede alga programes, incluinte Gmail, par desembla un program malvolente como un otra program descargada.
Entre la programes popular cual la rexercores ia proba, Gmail ia es un de la plu fasil asedables. Los ia usa un telefoneta de Android, ma los crede ce la truco pote opera ance en otra sistemes de opera, incluinte iOS e Windows.
Un portavose per Google ia dise ce la compania bonveni la rexerca, car lo permete forti e securi plu la produida.
La truco usa un program malvolente ma desemblada (como un imaje fondal, per esemplo) per asede la memoria compartida de un telefoneta.
Esta parte de la memoria es usada par tota programes, e per analise la usa de lo, on pote descovre cuando un person identifia sua programes como Gmail. Esta permete la fura de nomes de usor e de parolas secreta.
Un de la rexercores ia comenta: "On ia suposa sempre ce esta programes no pote interfere fasil la un con la otras. Nos mostra ce la esta suposa no es coreta, e ce un program pote fa un efeto importante a un otra e causa resultas nosiva per la usor."
En un otra esemplo, la rexercores ia esplota un parte de la program de la banco Chase cual permete ce on envia un xece par fotografi lo con telefoneta. La rexercores ia susede fura la foto a la momento de sua crea, tal oteninte la suscrives e la detalias de banco.
La rexerca ia es presentada a un confere de sibersecuria en San Diego, California.
@T Rob Ford presenta se per redeveni maior de Toronto
@L aora_oji/2014/rob_ford_presenta_se_per_redeveni_maior_de_toronto
====== Rob Ford presenta se per redeveni maior de Toronto ======
3 janero 2014
Rob Ford, la maior de Toronto en Canada, ci ia confesa ce el ia fumi cocaina en un stupor enebriada, ia presenta se como aspiror per es denova elejeda.
El ia dise a jornalistes ce el ave la lista de atenis la plu bon, e ce el es la maior la plu bon cual la site ia ave a cualce tempo.
Asta aora, el es la sola aspiror per la eleje a 27 otobre, ma on previde ce competores va oposa el.
On ia eleje prima el como maior conserviste en 2010, pos cuando el ia promete trata la spendes perosa a la ofisia de site.
El ia dise ce la votores debe presenta sua deside sur sua problemes personal.
@T Robin Williams es trovada mor a sua casa
@L aora_oji/2014/robin_williams_es_trovada_mor_a_sua_casa
====== Robin Williams es trovada mor a sua casa ======
12 agosto 2014
Robin Williams, un ator e comediste famosa de la SUA, ia suiside a sua casa a la eda de 63.
La polisia en California ia trova ce el es mor pos responde a un telefoni sirca mediadia.
Williams ia es bon conoseda per tal filmas como Bon Matina, Vietnam e Club de Poesistes Mor, e ia gania la premio Oscar como la ator suportante la plu bon pos sua rol como terapiste en Bon Will Hunting.
Sua anunsior ia dise ce el ia "batalia un depresa sever". En la pasada, William ia parla -- e broma an -- sur sua lutas contra alcol e drogas.
El ia revade resente a un sentro de resani per "ajusteta" sua sobria.
La polisia suspeta ce sua mori es un suiside par asfixia, ma on va investiga ancora detaliosa.
Sua sposa, Susan Schnedier, ia demanda ce on respeta la privatia de la familia en sua tempo de lamenta, e ce on recorda no la modo en cual Williams ia mori, ma "la multe momentos de joia e rie cual el ia dona a miliones".
@T Rowling confesa ce el ia era sur la sposi final en Harry Potter
@L aora_oji/2014/rowling_confesa_ce_el_ia_era_sur_la_sposi_final_en_harry_potter
====== Rowling confesa ce el ia era sur la sposi final en Harry Potter ======
3 febrero 2014
En un intervisa nova, la autor J.K. Rowling pare sujesta ce Harry Potter ia ta conveni plu ca Ron Weasley como sposo de Hermione Granger.
El ia clari ce el ia sposi Ron e Hermione "per razonas multe personal, no per razonas credable".
Rowling ia dise ance ce el pote "oia la coleria e furia ce esta va causa cisa a alga fanes" de sua naras, e ia espera ce sua revela no va "rompe cores".
La intervisa apare en un numero de la jornal Wonderland, spesial editada par Emma Watson ci ia fa la rol de Hermione en la filmas de la novelas.
@T Rusia aresta sinco suspetadas teroriste
@L aora_oji/2014/rusia_aresta_sinco_suspetadas_teroriste
====== Rusia aresta sinco suspetadas teroriste ======
12 janero 2014
Autoriosas rusce dise ce los ia prisoni sinco membros de "un organiza proibida de teroristes internasional" en la area turbosa de Caucaso Norde.
La arestas ia es fada en la vila Naltxik, a 300 cilometres a este de Sotxi, do la juas olimpial de inverno va aveni en febrero.
A ante, Rusia ia anunsia ce lo envia plu ca 30 000 polisiores e soldatos a la area.
La conserna xef es la menasa de ataca par gerores islamiste. Du bombas umana ia mata 34 persones en Volgograd, un site sude, en 29 e 30 desembre.
@T Rusia defende un ataca contra Pussy Riot
@L aora_oji/2014/rusia_defende_un_ataca_contra_pussy_riot
====== Rusia defende un ataca contra Pussy Riot ======
22 febrero 2014
Dmitry Kozak, la ministro xef suordinada de Rusia, ia defende como minor un ataca en Sochi contra la grupo protestante Pussy Riot.
Sinco membros de la grupo punc e un filmor ia es atacada en mercurdi par patrulias cosac de securia cuando los ia atenta presenta su un bandera anunsiante la Olimpiales Invernal.
Un video ia mostra la cosaces flajelinte la bande, tirante sua mascas de sci a via, e lansante los a la tera.
Kozak ia dise: "La xicas ia veni asi spesial per provoca esta disputa."
@T Rusia defini un zona spesial per protestores a la Olimpiales Invernal
@L aora_oji/2014/rusia_defini_un_zona_spesial_per_protestores_a_la_olimpiales_invernal
====== Rusia defini un zona spesial per protestores a la Olimpiales Invernal ======
4 janero 2014
La autoriosas rusce va crea un zona spesial per asemblas de protestores a la Olimpiales Invernal en Sotxi.
Un securia spesial va opera en e sirca la site, en Rusia sude, entre 7 janero e 21 marto.
En la anio pasada, la autoriosas ia anunsia ce los va proibi protestas en la area de la Juas. Ma on dise aora ce on va pote fa protestas en febrero si la autoriosas permete.
On va debe preacorda tota asemblas publica con la autoriosas de la site, departes de la ministreria de relatas interna, e la ajenteria de securia federal.
On va pote ancora restrinje la cuantia de persones ci pote partisipa en protestas.
@T Rusia libri Lebedev, un asosior pasada de Khodorkovsky
@L aora_oji/2014/rusia_libri_lebedev_un_asosior_pasada_de_khodorkovsky
====== Rusia libri Lebedev, un asosior pasada de Khodorkovsky ======
25 janero 2014
Platon Lebedev, un asosior comersial pasada de Mikhail Khodorkovsky, ia es librida pos 10 anios en prison en Rusia.
On ia intende libri el en maio, ma la Corte Suprema ia redui sua periodo en jovedi.
Pos finansia partitos oposante e entra a un disputa con presidente Vladimir Putin, Lebedev e Khodorkovsky ia es condenada de evade de imposta e de fura.
Putin ia pardona Khodorkovsky en desembre 2013. Lebedev no ia demanda per un pardona.
@T Rusia recomenda ce Kiev evita la usa de fortia
@L aora_oji/2014/rusia_recomenda_ce_kiev_evita_la_usa_de_fortia
====== Rusia recomenda ce Kiev evita la usa de fortia ======
14 april 2014
Rusia ia recomenda forte ce la autoriosas en Kiev no usa fortia contra protestores prorusce en Ucraina este.
A un consenta spesial de la Consilio de Securia de la Nasiones Unida, la ambasador de Rusia ia apela per la "comensa de un dialoga vera" par Kiev. Ma Yuriy Sergeyev, la ambasador de Ucraina, ia dise ce Moscva ia crea artifisial la crise en Ucraina este.
Ucraina ia institui un limita de tempo sur la parti par ativistes prorusce de la construidas cual los ocupa. Esta ia pasa a 6:00 UTC a lundi.
Kiev ia promete atas militar si los ta fali parti. En Ucraina este, on espeta aora per vide esce Olexander Turchynov, la presidente tempora, va usa la armada per atenta regania la construidas. A soldi, el ia dise ce sua fortes militar ta fa "un opera antiteroriste de estende completa" contra la omes armada ci teni la construidas.
Tal limitas ia pasa a ante, ma oji ta pote deveni un dia multe importante per Ucraina este. La governa nova en Kiev luta per pare credable en acel parte de la pais, e, tra la fini de semana, alga vilas e sites ia es saisida en efeto par grupos prorusce.
Sloviansk, en la area de Donetsk, es intera ensircada con paradores de rebelores. Postos de controla operada par militias prorusce sta sur vias xef cual entra a la site.
An si Kiev ia promete reprende controla de Sloviansk, un ataca par tota fortes ave riscas enorme, e ta pote gatili un reata de Rusia, de cual deses de miles de soldatos campa prosima a sua frontera con Ucraina.
Ministros de esternas de la Uni European va consenta oji en Luxemburg per discute la crise.
@T Rusia refusa dona un visa a un jornaliste de la SUA
@L aora_oji/2014/rusia_refusa_dona_un_visa_a_un_jornaliste_de_la_sua
====== Rusia refusa dona un visa a un jornaliste de la SUA ======
15 janero 2014
Un jornaliste de la SUA ia es proibida de entra a Rusia. Sua empleadas dise ce esta es "un viole fundal de la direto de parla libre".
David Satter ia atenta renovi sua visa rusce, ma on ia informa el ce la autoriosas en Moscva ia judi ce el es "nondesirada". An tal, Rusia ia dise ce el ia viole regulas de visa a ante.
On no sabe esce on ia proibi el per razonas political o per alga otra motiva.
Rusia es reatosa en la periodo ante la juas olimpial de inverno, cual va comensa en la site Sotxi pos tre semanas.
@T Rusia retira sua ambasador de Ucraina
@L aora_oji/2014/rusia_retira_sua_ambasador_de_ucraina
====== Rusia retira sua ambasador de Ucraina ======
24 febrero 2014
Rusia ia retira sua ambasador de Ucraina sur lo cual lo ia descrive como la situa malinte en la pais.
Moscva ia condena la despone de presidente Viktor Yanukovych par parlamentores en saturdi.
La presidente tempora, Olexander Turchynov, nova asiniada, dise ce la pais va foca aora a integra plu prosima con la Uni European.
La turba ia es causada cuando Yanukovych ia rejeta un acorda de negosia con la UE, preferente relatas plu prosima con Rusia.
@T Rusia xerca un bomba umana suspetada
@L aora_oji/2014/rusia_xerca_un_bomba_umana_suspetada
====== Rusia xerca un bomba umana suspetada ======
23 janero 2014
La polisia rusce en Sochi xerca un fem ci es suspetada de intende fa un ataca como bomba umana.
Los ia mostra posteres con la fas de la fem en oteles sirca la vila, do la Juas Olimpial de Inverno va aveni en febrero.
On crede ce Ruzanna Ibragimova, ci ave 23 anios e veni de Dagestan en Caucaso Norde, es la vidua de un geror islamiste.
On dise ce el ia entra secreta a Sochi, plu temprana en esta mense, sircoveninte la securia forte ante la sporte.
@T Salvador vota per un presidente nova
@L aora_oji/2014/salvador_vota_per_un_presidente_nova
====== Salvador vota per un presidente nova ======
3 febrero 2014
La popla de Salvador partisipa en un vota presidental.
La competores xef es Salvador Sánchez Cerén, aora la vispresidente, de un partito sinistriste, e Norman Quijano de un alia conserviste.
On previde ce nun de los va vinse intera, car probable un aspiror tre ci representa un partito nova e autonom va susede bon.
La campania ia es dominada par povria e crimin. La cuantia de omisides en Salvador es entre la plu altas de mundo.
@T Salvores libri escavores nicaraguan trapida
@L aora_oji/2014/salvores_libri_escavores_nicaraguan_trapida
====== Salvores libri escavores nicaraguan trapida ======
30 agosto 2014
En Nicaragua, on ia libri la plu de 24 escavores de oro ci ia deveni trapida par un colasa de un mineria.
La escavores ia es pico desidratada ma ia es en bon sania en otra modos.
On ancora no ia reporta esce on ia trova la escavores restante.
Los ia deveni trapida cuando un duto a la mina El Comal ia colasa pos pluves forte a jovedi.
La mina es situada prosima a Bonanza, un vila a 420 cilometres a norde-este de Managua, la capital.
La omes ia es escavores luable ci no ia es direta empleada par un compania escavante.
La posesor de la mineria, la compania Hemco de Colombia, ia comenta ce lo ia descovre resente ce la mineria es nonsecur.
Pos la moris de du omes en un lisca de tera en julio, la compania ia averti ja escavores contra entra a la minerias.
@T Samsung descovre labora par enfantes a un de sua furnores
@L aora_oji/2014/samsung_descovre_labora_par_enfantes_a_un_de_sua_furnores
====== Samsung descovre labora par enfantes a un de sua furnores ======
14 julio 2014
La compania de eletronicales Samsung dise ce lo ia trova "indicas de labora suspetada par enfantes" a un fabriceria de Eletronicales Dongguan Shinyang, sua furnor xines.
Samsung ia investiga la furnor pos cuando China Labor Watch, un grupo campaniante en New York, ia acusa ce lo emplea enfantes.
La compania de Corea Sude ia suspende "tempora" sua comersia con la furnor, par causa de la investiga. Lo ia dise ce autoriosas xines esplora ance la caso.
Lo ia anunsia: "Si la investigas conclui ce vera la furnor ia emplea nonlegal enfantes, Samsung va sesa permanente sua comersia con la furnor, en acorda con sua politica de nontolera asoluta de labora par enfantes."
"Plu, Samsung va forti sua prosede de emplea, no sola a sua complesos de produi ma ance a sua furnores, per preveni la reveni de un tal caso."
La compania ia esamina la furnor a tre veses de pos 2013. La plu resente ia fini a 25 junio de esta anio. Esta esaminas no ia trova casos de labora par enfantes.
An tal, lo ia fa un investiga nova pos la alegas, e ia trova indicas de un prosede nonlegal de emplea cual ia aveni a 29 junio.
La furnor no ia comenta.
@T Samsung e LG desveli sua teles flexable
@L aora_oji/2014/samsung_e_lg_desveli_sua_teles_flexable
====== Samsung e LG desveli sua teles flexable ======
8 janero 2014
Samsung ia revela un televisador flexable, en forma de un prototipo de 85 ditones (216 sentimetres). On pote ajusta la curvia de la scermo par telecomanda.
On ia desveli la televisador de diodos de lus a la Esibi de Eletronicales de Consumor en Las Vegas.
LG ia anunsia ance un tele flexable de 77 ditones (196 sentimetres), cual usa diodos organica de lus.
On sujesta ce un scermo curva pote boni la esperia de regarda la tele, en depende de la cuantia e distantia de la regardores. An tal, no tota oservores de la industria es convinseda ce un mercato esiste per esta inova.
@T Samsung mostra du orolojetas intelijente nova
@L aora_oji/2014/samsung_mostra_du_orolojetas_intelijente_nova
====== Samsung mostra du orolojetas intelijente nova ======
24 febrero 2014
Samsung ia esibi la Gear 2, sua atenta du de crea un orolojeta intelijente per atrae multe consumores.
La compania ia mostra la aparato a lado de un otra model nova, la Gear 2 Neo, cual es min pesosa.
Ambos conteni un sensador de frecuentia de bateta de cor, un podometre, e utiles diversa per mesura eserse, dormi, e niveles de stresa.
La orolojetas usa Tizen, un sistem nova de opera, en loca de la sistem Android de Google.
@T Samsung previde un redui de profita
@L aora_oji/2014/samsung_previde_un_redui_de_profita
====== Samsung previde un redui de profita ======
7 janero 2014
Samsung, la fabricor la plu grande de telefonetas e televisadores en la mundo, ia preanunsia un redui en sua profita per la cuatri de otobre a desembre.
Lo previde un profita (ante interesa e imposta) de $7,8 mil milion per la cuatri. Esta es reduida par 18% de la tre menses presedente.
En compara con la mesma periodo en 2012, la profita es reduida par 6%.
La compania no ia indica la causa de la redui, ma analistes ia sujesta ce lo es colpada par profitas diminuinte de telefonetas intelijente.
@T Scaramuxas aveni en un protesta en Kiev
@L aora_oji/2014/scaramuxas_aveni_en_un_protesta_en_kiev
====== Scaramuxas aveni en un protesta en Kiev ======
20 janero 2014
En la capital de Ucraine, scaramuxas ia aveni cuando folas grande de protestores favorente la Uni European ia asembla per cexa contra un lege nova cual restrinje protestas publica.
On ia lansa granadas aturdinte e misiles luminante cuando grupos de persones ia vade en dirije a la parlamento.
La parlamento ia es barida par linias de polisiores e buses.
Vitali Klitschko, un politiciste oposante, ia atenta para atacas contra la polisia. On ia jeta polvo a el de un estinguador.
@T Scaramuxas violente a un marxa en Caracas
@L aora_oji/2014/scaramuxas_violente_a_un_marxa_en_caracas
====== Scaramuxas violente a un marxa en Caracas ======
23 febrero 2014
En Caracas, protestores oposante ia scaramuxa con la polisia venezuelan a la fini de un marxa cual ia colie deses de miles de persones.
Alga persones ia es ferida cuando polisiores ia xuta gas lacrimojen e ativistes ia lansa petras.
Suportores de Nicolás Maduro, la presidente sinistriste, ia marxa en la sentro de Caracas e otra sites.
En cuasi du semanas de protestas, des persones ia mori. Maduro ia descrive la protestores como atentante un colpa de stato.
@T Scarlett Johansson resinia de Oxfam
@L aora_oji/2014/scarlett_johansson_resinia_de_oxfam
====== Scarlett Johansson resinia de Oxfam ======
31 janero 2014
Scarlett Johansson ia resinia como ambasador de Oxfam par causa de un disputa sur sua suporta de un compania israeli cual opera en la Riva Ueste.
Un portavose per la ator ia dise ce el ave "un difere fundal de opina" con la grupo umaniste.
El va resta como un ambasador comersial per SodaStream, cual ave un fabriceria en la colonia iudi de Ma'ale Adumim.
Oxfam oposa la comersia de la colonias. Los es internasional nonlegal, ma Israel disputa esta.
@T Scotland rejeta autonomia
@L aora_oji/2014/scotland_rejeta_autonomia
====== Scotland rejeta autonomia ======
19 setembre 2014
Votores en Scotland ia eleje resta en la Rena Unida e no deveni un pais autonom.
La lado de "no" ia gania pico plu ca 2 milion votas, e la lado de "si" ia reseta 1,6 milion.
Cuasi 85% de la popla ia vota a jovedi, incluinte persones de 16 e 17 anios. Esta referendo ia es la ves prima cuando persones de min ca 18 anios en la Rena Unida ia pote vota sur un tema major political.
La resulta de la referendo ia deveni matematical serta a no longa pos la ora 6 de la matina de venerdi.
Asetante la defeta, Alex Salmond, la ministro xef de Scotland, ia recomenda forte ce la tre partitos unidiste en London obedi aora sua prometes de furni plu potia a la parlamento scotes.
David Cameron, la ministro xef de la Rena Unida, ia dise ce el es "deletada" ce la pais va resta unida.
La vinse per la campania "Plu bon unida", par 55% contra 45% de la votas, ia esede par sirca 3% lo cual la sondas final de opina ia previde.
Salmond ia comenta: "An con tota otra cual on pote dise sur esta campania referendal, nos ia stimula partes de la comunia ci ia es nunca stimulada par politica a ante. Esta partes de la comunia ia stimula nos e ia stimula la prosede political."
Cameron ia descrive la resulta como desidosa. El ia dise: "Aora nos ia fini la debate per un jenera o, como Alex Salmond ia dise, 'cisa per un vive intera'. Nun pote disputa: nos ia oia la vole de la popla scotes."
La vota ia es la culmina de un campania cual ia dura tra du anios.
Glasgow, ia area consilial la plu grande de Scotland, e ance la site tre de la plu grandes en Britan, ia vota favorente autonomia par 195 mil votas contra 169 mil.
Ma la capital scotes, Edinburgh, ia rejeta autonomia par 195 mil votas contra 124 mil.
@T Securia lenti la transporta de armas cimical de Suria
@L aora_oji/2014/securia_lenti_la_transporta_de_armas_cimical_de_suria
====== Securia lenti la transporta de armas cimical de Suria ======
17 janero 2014
La xef de la autoriosa de la Nasiones Unida cual debe estrae e destrui la armas cimical de Suria ia dise ce la taxe deveni retardada par consernas de securia.
Ahmet Uzumcu ia dise ce la cuantia de cimicales cual on ia transporta ja a la porto de Latakia no es multe alta.
Ma el ia espresa un fida ce la armas va es destruida ante la fini de junio.
La sutrae de la cimicales la plu perilinte es la paso prima de un acorda, suportada par la NU, per elimina tota la armas cimical de la pais.
@T Securiores rusce mata sete en un aseja en Dagestan
@L aora_oji/2014/securiores_rusce_mata_sete_en_un_aseja_en_dagestan
====== Securiores rusce mata sete en un aseja en Dagestan ======
19 janero 2014
Fortes de securia rusce ia mata sete persones suspetada sur envolve en un ataca par granada e bomba a un restorante en la republica de Dagestan.
Ofisiores antiteroriste ia ensirca un casa prosima a la capital Makhachkala, e ia fusili la sete.
Alga reportas descrive la mores como membros de ganges criminal, ma otras dise ce los ia es gerores muslim.
Rusia ia envia miles de securiores a la area per serti ce la Juas Olimpial de Inverno aveni pasosa.
@T Sentos es ferida en selebras en la Pilipinas
@L aora_oji/2014/sentos_es_ferida_en_selebras_en_la_pilipinas
====== Sentos es ferida en selebras en la Pilipinas ======
1 janero 2014
A la min un person ia es matada, e cuasi 600 otras ia es ferida, par focos de arte e par fusilis en la Pilipinas.
Un baleta deviante ia mata un bebe, e un adolesente ia es matada par un presenta de petardos.
La cuantia de feridas es 43% plu ca a la comensa de 2013, an pos laboras per fa ce la selebras de 2014 es plu secur ca en anios presedente.
Un mercato negra de fusiles nonlisensada flori en la Pilipinas. La tradision de fusili a la sielo en selebra causa frecuente feris o an moris.
La Departe de Sania ia demanda un proibi de presentas privata de petardos, recomendante presentas publica organizada en loca.
@T Serebros de canes reata a voses como serebros umana
@L aora_oji/2014/serebros_de_canes_reata_a_voses_como_serebros_umana
====== Serebros de canes reata a voses como serebros umana ======
22 febrero 2014
Posesores de canes dise comun ce sua animales pote comprende los. Un studia nova sujesta ce cisa los no imajina esta.
Siensistes de Ungaria ia pone canes en un scanador de imaji par resona magnetal.
Los ia descovre ce la serebro de un can reata a voses en la mesma modo como la serebro umana.
Sonas emosiosa, como ploras o ries, ia provoca ance respondes simil, cisa esplicante perce canes pote ajusta a emosias umana.
@T Serena Williams es vinseda par Ana Ivanović
@L aora_oji/2014/serena_williams_es_vinseda_par_ana_ivanovic
====== Serena Williams es vinseda par Ana Ivanović ======
19 janero 2014
En tenis, Serena Williams ia sorti de la Abrida Australian.
Un feri de dorso ia impedi la campion de sinco veses, en un max contra Ana Ivanović.
Pos perde la set prima, la serbsce ia reveni per gania par 4-6 6-3 6-3.
Esta ia es sua vinse prima contra Williams en sinco atentas.
@T Sete persones mori a la aniversario tre de la revolta egiptian
@L aora_oji/2014/sete_persones_mori_a_la_aniversario_tre_de_la_revolta_egiptian
====== Sete persones mori a la aniversario tre de la revolta egiptian ======
26 janero 2014
A la min sete persones ia es matada en scaramuxas en Egipte. La pais onora la aniversario de la revolta en 2011 cual ia fini con la despone de presidente Hosni Mubarak.
Protestas competente de suportores e oposores de la governa ia aveni en Qahira (Cairo).
Ma la polisia la para protestas antigovernal par usa de gas lacrimojen, e on ia reportas arestas en Qahira e Alexandria.
La governa ia dise ce lo ia forti la medios de securia per saturdi.
@T Sete protestores es ferida par fusilores en Bangkok
@L aora_oji/2014/sete_protestores_es_ferida_par_fusilores_en_bangkok
====== Sete protestores es ferida par fusilores en Bangkok ======
11 janero 2014
En Bangkok, la capital de Tai, a la min sete persones ia es ferida cuando atacores nonconoseda ia fusili a protestores. Un person es estrema ferida.
Esta aveni a la dia pos la feri de ses persones en scaramuxas entre grupos competente.
La oposores campania per despone Yingluck Shinawatra, la ministr xef, de pos novembre 2013.
Protestores vole impedi un eleje subita en febrero.
@T Shirley Temple mori a 85
@L aora_oji/2014/shirley_temple_mori_a_85
====== Shirley Temple mori a 85 ======
12 febrero 2014
Shirley Temple, pasada un ator enfante de Hollywood, ia mori a la eda de 85.
Con encanta adorable e risas blonde, el ia es un de la stelas la plu popular de la desenio de 1930. El ia apare en filmas como Bright Eyes (Oios Briliante) e Stand Up and Cheer (Sta e Aclama).
Pos jubila de filmas a la eda de 21 en 1950, Temple ia deveni denova conoseda como politiciste e diplomata.
El ia mori en lundi a sua casa en California, par causas natral, ensircada par sua familia.
@T Siclistes en Sarajevo recorda la comensa de la Gera Mundal Prima
@L aora_oji/2014/siclistes_en_sarajevo_recorda_la_comensa_de_la_gera_mundal_prima
====== Siclistes en Sarajevo recorda la comensa de la Gera Mundal Prima ======
23 junio 2014
Miles de siclistes, incluinte competores profesal, ia partisipa en un corsa en Sarajevo, la capital de Bosnia e Hersegovina.
Esta ia es la prima en un serie de avenis en la pais per recorda la asasina ala de Arciduxe Franz Ferdinand a sento anios ante aora, cual ia causa la Gera Mundal Prima.
La corsa ia es sponsorida par la organizores de la Turi de Frans, e ia funsiona como un comensa ritual per la Premio Grande de Sarajevo 2014, en cual 140 profesales va compete.
La via de la corsa completa ave un longia de 140 cilometres. Lo traversa locas cual ia es linias de batalia en la gera de 1992--95. Lo asende ance Monte Igman, alta de 1510 metres, cual es situada a sude-ueste de la capital e ia es un campo de batalia en la gera.
La intende de la corsa ritual de soldi ia es asembla e uni la popla, e envia un mesaje de pas e unia.
Lo es la sola aveni recordante la comensa de la Gera Mundal Prima cual es organizada en junta par ambos areas etnical de Bosnia e Hersegovina.
La aniversario ofisial de la fusili de Franz Ferdinand, eritor de la trono osteraices-magiar, va es a la saturdi veninte.
@T Sinco sieraleonianes es infetada con ebola en cada ora
@L aora_oji/2014/sinco_sieraleonianes_es_infetada_con_ebola_en_cada_ora
====== Sinco sieraleonianes es infetada con ebola en cada ora ======
2 otobre 2014
Un asosia carital major ia avisa ce esijes per aida medical en Siera Leon suprapasa multe la capasia de furni lo, car on descovre aora sinco casos nova de ebola en cada ora.
Salva la Enfantes ia dise ce, en la semana pasada, 765 casos nova ia es reportada en la pais, cual ave sola 327 litos de ospital.
Espertas e politicistes va consenta en London per debate un responde global a la crise.
La aveni presente de la virus en Africa ueste es la plu mal de istoria de mundo. Lo ia mata 3338 persones asta aora, e on ia confirma 7178 casos. Siera Leon, Liberia, e Gine sufri la plu.
La asosia carital dise ce Ebola estende tra Siera Leon a "un rapidia asustante". La cuantia de casos nova dupli en cada pico de semanas.
An cuando organizas medical susede maneja la virus en un area, lo ia estende ja a un otra.
La asosia cexa ance ce la grado de la maladia es ance "enorme nonreportada", car "cuantias noncontable de enfantes mori anonim a casa o en la stradas".
Plu temprana en esta mense, Britan ia promete construi complesos per 700 litos nova en Siera Leon. Ma an la prima de estas no va es preparada asta pos alga semanas, e la construi de la otras va ocupa alga menses.
Salva la Enfantes ia dise ce, si la comunia internasional no ta aumenta forte sua responde, persones ta continua mori a casa e risca infeta sua familia e otra persones prosima abitante.
Ier, la Organiza Mundal de Sania ia anunsia ce probas de du vasines esperimental progresa en la SUA e la Rena Unida, e ce esta probas va continua a des locas en Africa, Europa, e America Norde en la semanas veninte.
Lo previde ce on va comensa usa la vasines, a la min a un grado peti, en Africa ueste en la parte temprana de 2015.
@T Sistemes nova en la Egleseta Sistina
@L aora_oji/2014/sistemes_nova_en_la_egleseta_sistina
====== Sistemes nova en la Egleseta Sistina ======
30 otobre 2014
La Vatican ia desveli un sistem de lumina e frescadores cual pote conserva e esibi plu bon la frescos famosa de la Egleseta Sistina.
On previde ce la frescadores nova va redui la dana causada a la frescos par polvo, e par la respira, sua, e caldia de la ses milion persones ci visita en cada anio.
La atraes de la egleseta inclui un sofito par Michelangelo (1475--1564), cual imaji un Dio barbida ci dona vive a Adam.
La lumina nova par 7000 diodos de lus garda enerjia. Alga de los asentua la fondo oscur blu de un otra fresco par Michelangelo, La Judi Ultima.
Otra luses lumina frescos par artistes como Botticelli, Perugino, e Domenico Ghirlandaio, de cual sua laboras en la Egleseta Sistina ia deveni ombrida par los de Michelangelo.
La sistem nova va usa min ca 20% de la enerjia de la sistem presedente, cual ia es instalada a 20 anios ante aora, cuando la egleseta ia reseta sola 1,5 milion visitores per anio.
La frescadores va move lenta la aira tra la salon vasta, per evita dana la frescos. La flue, umidia, e temperatur de la aira va es ajustada seguente datos de 70 sensadores en la mures, e ance de cameras TV cual monitori la cuantia de visitores.
On ia spende tre anios e 3 milion euros per instala la sistemes nova.
Michelangelo ia depinta sua frescos en la Egleseta Sistina en la dui prima de la sentenio 16. On ia restora la plu resente los en un projeta de 14 anios, completida en 1994.
Antonio Paolucci, la dirijor de museos vatican, ia dise ce lo conveni bon ce on onora la aniversario 450 de la mori de Michelangelo con "alga cosa durante, no tempora".
@T Siviles es permeteda de sorti de Homs
@L aora_oji/2014/siviles_es_permeteda_de_sorti_de_homs
====== Siviles es permeteda de sorti de Homs ======
27 janero 2014
La reconsilior a la discutes de pas en Geneve ia dise ce Suria va permete ce femes e enfantes sorti de la area asejada de Homs "de aora".
Lakhdar Brahimi ia alega ce grupos armada ia impedi la sortis.
El ia clari ance ce la oposante ia acorda dona a la governa listas de la persones prisonida par tal grupos.
Ma el ia dise ce lo es "tro temprana" per evalua la posible de un acorda vasta.
@T Snapchat es atacada par piratas
@L aora_oji/2014/snapchat_es_atacada_par_piratas
====== Snapchat es atacada par piratas ======
2 janero 2014
Piratas de rede ia oteni la nomes de usor e numeros de telefon de 4,6 milion contas de Snapchat.
Un pajeria nomida SnapchatDB ia publici tempora la datos, ma ia sensura la du dijitos final de la numeros de telefon.
Snapchat ia deveni popular como un program cual permete ce on comparti fotos cual desapare automata pos cuando la resetor ia regarda los.
Lo conteni un util capas de envia la lista de contatas de un usor a un servador, per aida trova amis ci usa ance la servi.
A la dia de natal, Gibson Security, un compania australian, ia averti sur un parte atacable en la program. La piratas dise ce los ia esplota la problem indicada par la compania.
Gibson Security dise ce lo no es envolveda en la ataca, ma ce lo mesma ia susede reseta des mil numeros de telefon de usores de Snapchat en sirca 7 minutos, a un gigabit per secondo en un servador virtual.
@T Snowden dise ce el no pote revade a la SUA
@L aora_oji/2014/snowden_dise_ce_el_no_pote_revade_a_la_sua
====== Snowden dise ce el no pote revade a la SUA ======
25 janero 2014
Edward Snowden, un contrator pasada de la Departe de Securia Nasional american, ia dise ce el ave "no posible" de un prosede justa en la SUA, e ce el ave no intende de revade ala.
El ia dise ce la lege de 100 anios, su cual on ia acusa el, "proibi un defende fundida sur la benefica publica".
En un intervisa enlinia, el ia comenta: "Me pote en no modo reveni a mea pais e defende me ante un juria".
Snowden, ci ave 30 anios, es tempora refujada en Rusia pos esposa detalias de programes de monitori eletronical.
@T Soldatos en la RAS linxa un rebelor alegada
@L aora_oji/2014/soldatos_en_la_ras_linxa_un_rebelor_alegada
====== Soldatos en la RAS linxa un rebelor alegada ======
6 febrero 2014
En violentia continuante en la Republica de Africa Sentral, soldatos ia linxa un om acusada de es un rebelor.
La om ia es matada par coteli e bate, e on ia arde sua corpo en la capital, Bangui.
Esta ia aveni direta pos cuando Catherine Samba-Panza, la presidente tempora, ia fini parla a un rituo de armada.
Reportas separada dise ce rebelores de la grupo Seleka atenta regrupi en la norde-este de la pais.
@T Soldatos saisi armas sin catura la gidor de militia en la RAS
@L aora_oji/2014/soldatos_saisi_armas_sin_catura_la_gidor_de_militia_en_la_ras
====== Soldatos saisi armas sin catura la gidor de militia en la RAS ======
16 febrero 2014
En la capital de la Republica de Africa Sentral, mantenores franses e african de pas ia saisi armas de militia.
Soldatos ia spende alga oras en xerca tra la casas en un visineria de Bangui sur cual on crede ce lo es un base per atacas contra muslimes.
On ia confisca armas automata, granadas, coteles, e muni.
Plu ca 250 soldatos ia es enviada a esta taxe de desarma, ma on no ia susede catura la gidor de la militia.
@T Spiores ia intersepi cameras de ueb de usores de Yahoo
@L aora_oji/2014/spiores_ia_intersepi_cameras_de_ueb_de_usores_de_yahoo
====== Spiores ia intersepi cameras de ueb de usores de Yahoo ======
27 febrero 2014
GCHQ, un departe de spia brites, ia intersepi imajes de camera de ueb de miliones de usores de Yahoo sirca la mundo.
Yahoo ia nega conose a ante la scema, e ia descrive lo como un viole de privatia "intera nonasetable".
Documentos esposada revela ce la scema ia colie acaso an imajes sesal.
La departe ia declara ce tota sua atas segue la lege.
@T Stallone parla sur sua egosia pos la filmas "Rocky"
@L aora_oji/2014/stallone_parla_sur_sua_egosia_pos_la_filmas_rocky
====== Stallone parla sur sua egosia pos la filmas "Rocky" ======
13 janero 2014
Sylvester Stallone ia confesa ce la susede de la filmas Rocky ia cambia el a un person "nontolerable", e a algun ci regarda se como "un esperta sur tota cosas".
En un intervisa sur la stadio en la teatro London Palladium, el ia dise: "Me ia malusa vil mea potia. Me leje aora alga de mea intervisas de alora, e me desira revade per puxa un punio a mea fas."
El ia ajunta ce la fali completa de un otra de sua filmas ia sutrae plu tarda sua egosia estrema.
@T Stranjeres en la RAS va es estraeda par avion
@L aora_oji/2014/stranjeres_en_la_ras_va_es_estraeda_par_avion
====== Stranjeres en la RAS va es estraeda par avion ======
11 janero 2014
On va comensa estraes urjente de la primas de miles de stranjeres trapida en la Republica de Africa Sentral.
La Organiza Internasional per Migra ia dise ce lo va transporta 800 txadis par avion de un campo tempora en la capital, Bangui, en saturdi.
Lo ia dise ce 33 000 africanes de paises visina nesesa urjente la aida.
La presidente tempora de la RAS ia renunsia sua posto a venerdi, par causa de la combate entre gerores muslim e cristian.
@T Studiantes scaramuxa con polisia en Cosovo
@L aora_oji/2014/studiantes_scaramuxa_con_polisia_en_cosovo
====== Studiantes scaramuxa con polisia en Cosovo ======
8 febrero 2014
La polisia en Pristina, la capital de Cosovo, ia usa gas lacrimojen per sperde sentos de protestores, xef studiantes, a un universia publica.
La protestores ia demanda la resinia de la gidor de la universia e de alga de sua empleadas, pos alegas ce los ia falsi rexercas per reseta diplomas.
Deses de polisiores e protestores ia es ferida.
La scaramuxas ia comensa cuando la protestores ia lansa rocas e pinta roja a la polisia.
@T Studiantes SUA pone un laso a un sculta de desepara
@L aora_oji/2014/studiantes_sua_pone_un_laso_a_un_sculta_de_desepara
====== Studiantes SUA pone un laso a un sculta de desepara ======
22 febrero 2014
Ofisiores de la Universia de Mississippi en la SUA vole interoga tre studiantes blanca, sur ci on suspeta ce los ia pone un laso de pende sur un sculta cual selebra la desepara.
La laso es ia trovada sur un sculta de James Meredith, un studiante african-american ci ia fronti corajosa manadas de separistes en 1962.
La tre studiantes ave 19 anios e es en sua anio prima de universia. Sua avocatos ancora no ia permete ce on interoga los.
La aveni ia provoca protestas par studiantes.
@T Sua ministro pasada de defende critica Obama sur Afganistan
@L aora_oji/2014/sua_ministro_pasada_de_defende_critica_obama_sur_afganistan
====== Sua ministro pasada de defende critica Obama sur Afganistan ======
8 janero 2014
Robert Gates, la ministro pasada de defende de la SUA, ia scrive un libro cual critica forte la maneja par presidente Barack Obama de la gera en Afganistan.
En Debe: Autobiografia de un secretor de gera, Gates dise ce la presidente ia es setica ce la stratejia sur Afganistan va susede.
El ia scrive: "Me ia duta nunca sua suporta per la soldatos, sola sua suporta per sua mision."
Gates ia es la xef de la Pentagon ance su presidente George W. Bush. El ia es la xef prima de la Pentagon ci ia servi presidentes de partitos diferente. El ia parti de sua posto political en 2011.
@T Suarez es proibida de futbal per cuatro menses pos morde
@L aora_oji/2014/suarez_es_proibida_de_futbal_per_cuatro_menses_pos_morde
====== Suarez es proibida de futbal per cuatro menses pos morde ======
27 junio 2014
En sporte, on ia proibi la atacor uruguaia Luis Suarez de tota ativia relatada a futbal per cuatro menses, car el ia morde un defendor italian, Giorgio Chiellini, en un max de la Copa Mundal a martedi.
En ajunta, on ia esclui el de la nove maxes internasional veninte. Esta va elimina el de la resta de la Copa Mundal.
Uruguai intende apela, descrivente la deside como "plu ca nesesada", disente ce on no ia ave atestas sufisinte per justi lo.
Plu, on ia multa la juor per 100 000 frances suiz.
Sua proibi es la plu grande en la istoria de la Copa Mundal. Lo suprapasa la proibi de oto maxes cual on ia dona a Mauro Tassotti de Italia cuando el ia usa sua codo per colpa forte Luis Enrique de Espania en 1994.
La presidente de la comite disiplinal de FIFA ia comenta: "La tal condui no pote es tolerada sur cualce campo de futbal, e spesial no a un max de la Copa Mundal, cuando la oios de miliones de persones regarda la stelas sur la campo."
Suarez es aora judida como culpable de morde tre juores oposante en sua carera.
@T Sudafrica onora la aniversario de Mandela con un dia de limpi
@L aora_oji/2014/sudafrica_onora_la_aniversario_de_mandela_con_un_dia_de_limpi
====== Sudafrica onora la aniversario de Mandela con un dia de limpi ======
19 julio 2014
Sudafricanes ia onora la Dia de Mandela a la ves prima pos la mori de acel icon antiapartait.
Sirca la mundo, on ia fa avenis, e on ia recomenda ce persones pasa 67 minutos en aida otras, per selebra la 67 anios de servi publica par Nelson Mandela.
Ier ia es la aniversario 96 de sua nase.
Mandela, ci ia mori en desembre 2003, ia es forte respetada tra la mundo per sua batalia contra la governa par la minoria blanca en Sudafrica.
Pos spende 27 anios en prison, el ia deveni la presidente negra prima de la pais en 1994.
En jovedi, on ia subasta ojetos diversa cual el ia suscrive, per colie reservas carital. Esta ia jenera $160 mil -- min ca on ia previde.
Jacob Zuma, la presidente presente de Sudafrica, ia recomenda ce persones ala prende scopas per partisipa en la campania "Limpi per Madiba". Madiba ia es la nom clanal de Mandela.
La presidente ia aida limpi un scola en Mvezo, la vileta distante do Mandela ia nase en 1918.
Otras ia aida en casas de veas e orfanerias, o ia crea covreletos per aida persones sin casa en la inverno de la emisfera sude.
@T Sudan comanda ce la Crus Roja suspende sua labora
@L aora_oji/2014/sudan_comanda_ce_la_crus_roja_suspende_sua_labora
====== Sudan comanda ce la Crus Roja suspende sua labora ======
2 febrero 2014
Sudan ia comanda ce la Comite Internasional de la Crus Roja suspende sua ativias en la pais.
La instituida ia reseta un letera de autoriosas sudani cual ia sita "problemes tecnical en relata a sua intendes umaniste per esta anio", ma cual ia dona no plu detalias.
Sudan ia suspende o esclui organizas umaniste en la pasada.
La Crus Roja furni comeda, acua, aida medical, e otra formas de aida, xef en Darfur, un area en la ueste de la pais.
@T Sudan discute con Sudan Sude sur aida militar
@L aora_oji/2014/sudan_discute_con_sudan_sude_sur_aida_militar
====== Sudan discute con Sudan Sude sur aida militar ======
7 janero 2014
Sudan e Sudan Sude ia comensa discutes per envia un forte juntada per proteje campos de petrolio en la sude, cual es menasada par rebelores.
Omar al-Bashir, la presidente de Sudan, ia vola a Sudan Sude per discute la turba con sua corespondente, Salva Kiir.
La rebela pone la suportores de Kiir contra la rebelores gidada par Riek Machar, sua suordinada desempleada.
Kiir ia acusa ce Machar ia atenta un colpa de stato, ma Machar nega la alega.
A la min 1000 persones ia mori de pos la comensa de la violentia a 15 desembre.
@T Suiz no suscrive un acorda sur migra de corvatsces
@L aora_oji/2014/suiz_no_suscrive_un_acorda_sur_migra_de_corvatsces
====== Suiz no suscrive un acorda sur migra de corvatsces ======
16 febrero 2014
Suiz ia refusa suscrive un acorda proposada su cual corvatsces ta pote asede libre la mercato suiz de emplea.
Ambos paises ia fa la acorda en la estate pasada, pos cuando Corvatsca ia junta se a la Uni European.
Suiz ia dise ce la acorda no pote es suscriveda "en sua forma presente". Un referendo resente ia desvalidi la acorda entre Suiz e la UE sur libria de move.
Par un marjin multe streta, votores suiz ia favore un proposa de relimita la cuantias de migrores de paises UE.
@T Suiz vota sur redui de migra
@L aora_oji/2014/suiz_vota_sur_redui_de_migra
====== Suiz vota sur redui de migra ======
30 novembre 2014
La abitores de Suiz vota en un referendo sur esce on debe redui la migras neta a la pais asta no plu ca 0,2% de la popla (16 mil migrores per anio).
Suportores de la idea declara ce lo va diminui la presa a la recursos de Suiz.
Oposores, incluinte tota la partitos political xef, dise ce lo va dana la economia.
En febrero, Suiz ia vota per reintrodui limitas, e donce en efeto ia eleje no partisipa en un acorda de moves libre en la Uni European.
La governa ancora no ia reali la resulta de la referendo de febrero, cual ia disturba la relatas de Suiz con la UE.
An si sua nonemplea es basa e sua cualia de vive es alta, multe suizes es ansiosa sur la problemes de suprafoli e degrada ambiental.
La cuantia de abitores en Suiz ia crese par plu ca milion en 20 anios, e es aora 8,2 milion. Cuasi un cuatri de los ci abita ala es stranjer, e la plu de estas ia veni de paises de la Uni European.
Sondas sur la vota sujesta ce la du lados va fini prosima, ma la indicas la plu resente es la idea va es ultima rejetada.
@T Sveria sesa xerca un sumarina suspetada
@L aora_oji/2014/sveria_sesa_xerca_un_sumarina_suspetada
====== Sveria sesa xerca un sumarina suspetada ======
24 otobre 2014
La militaria svensce ia abandona sua xerca per un sumarina suspetada en la mar a sude de la capital.
Barcones marinal e aviones ia xerca en la arcipelago de Stockholm tra la semana pasada, suspetante ce un sumarina rusce esperia problemes ala.
La departe de defende de Rusia ia nega ce cualce de sua barcones es envolveda.
On ia reporta ce esta es la ativi militar la plu grande en Sveria de pos la Gera Fria.
La militaria ia declara: "Esta sinifia ce la majoria de barcones e fortes amfibin ia reveni a porto." Lo ia ajunta ce alga unias plu peti va resta en la area.
La declara no ia dise perce on ia cansela la xerca.
La militaria ia investiga "ativias stranjer su acua", fundida sur lo cual lo ia descrive como "alga operas credable".
Ofisiores svensce no ia nomi paises, ma multe persones ia suspeta la envolve de la marina rusce.
Oservas de sumarinas soviet ia causa avertis de securia en Sveria en la desenio de 1980.
La interveni militar de Rusia en Ucraina en esta anio ia provoca suspetas sur sua intendes en relata a otra statos visina, spesial la balticas.
A martedi, OTAN ia dise ce sua jetos ia intersepi un avion rusce de spia cual ia entra a la spasio airal de Esti per un tempo corta.
Rusia ia dise ce la avion ia fa un vola de instrui e no ia viole la spasio esti.
@T Tai entra a un state de crise per maneja protestas
@L aora_oji/2014/tai_entra_a_un_state_de_crise_per_maneja_protestas
====== Tai entra a un state de crise per maneja protestas ======
22 janero 2014
La governa tai ia forsa un state de crise en la capital, Bangkok, e la provinses ensircante.
La state va dura tra 60 dias, comensante a mercurdi.
La anunsia dona a la governa potias vasta per maneja protestores.
Protestores antigovernal ia bloci partes de la capital per atenta obliga la resinia de Yingluck Shinawatra, la ministro xef.
@T Tamil Nadu va libri conspirores de asasina de Rajiv Gandhi
@L aora_oji/2014/tamil_nadu_va_libri_conspirores_de_asasina_de_rajiv_gandhi
====== Tamil Nadu va libri conspirores de asasina de Rajiv Gandhi ======
19 febrero 2014
La governa en la stato de Tamil Nadu en India ia deside libri sete persones condenada de conspira per asasina de Rajiv Gandhi, la ministro xef pasada.
La ses omes e un fem ia es membros de la rebelores Tigres Tamil de Srilanca.
On ia anunsia esta deside a la dia pos cuando la Corte Suprema ia muta la condenas a mori de tre de la condenadas.
La omiside de Gandhi en maio 1991 ia es videda como un contrataca per la envia de indianes a Srilanca en 1987 per manteni la pas.
@T Tel Aviv desveli un monumento a vitimes ge de la olocausto
@L aora_oji/2014/tel_aviv_desveli_un_monumento_a_vitimes_ge_de_la_olocausto
====== Tel Aviv desveli un monumento a vitimes ge de la olocausto ======
11 janero 2014
Tel Aviv ia deveni la site israeli prima con un monumento per onora vitimes ge e lesbian de la olocausto nazi.
La sculta en la sentro de la site es desiniada sirca un triangulo ros, la simbol cual prisonidas ge ia es obligada de porta en la campas de consentra.
No min ca 15 000 omosesales ia es matada en la campas nazi.
On ia pone monumentos simil per recorda los en Amsterdam, Berlin, San Francisco, e Sydney.
La monumento ave la testo seguente: "Per recorda la persones persegueda par la rena nazi per sua orienta sesal e sua identia de jenero."
@T Tensas sur istoria asian en la NU
@L aora_oji/2014/tensas_sur_istoria_asian_en_la_nu
====== Tensas sur istoria asian en la NU ======
30 janero 2014
Relatas entre Japan e sua visinas ia tensa a la Consilia de Securia de la NU, sur problemes istorial. Ambasadores major ia intercambia parolas forte.
Liu Jieyi, la ambasador xines, ia dise ce un visita resente par la ministro xef japanes a Yasukuni, un santeria controversa, "ia clui la porte de dialoga".
Entretempo, la ambasador de Corea Sude ia acusa Japan de "un persepi contorseda" sur istoria.
Japan ia dise ce leva tal cosas a la Nasiones Unida no aida redui tensas.
@T Terapia de jenes pote trata siecia
@L aora_oji/2014/terapia_de_jenes_pote_trata_siecia
====== Terapia de jenes pote trata siecia ======
17 janero 2014
En Britan, sirurjistes en Oxford ia usa un tecnica de terapia de jenes per boni la capasia de vide de ses pasientes ci ia ta deveni sieca.
La opera ia envolve introdui un jene a la oio, per revive selulas cual deteta lus.
La dotores crede ce on pote ultima usa la metodo per trata formas comun de siecia.
Robert MacLaren, la sirurjiste ci ia gida la rexerca, ia dise: "Vera, nos no ia pote desira un resulta plu bon."
@T Texas va esecuta un mexican contra la desira de Mexico e la SUA
@L aora_oji/2014/texas_va_esecuta_un_mexican_contra_la_desira_de_mexico_e_la_sua
====== Texas va esecuta un mexican contra la desira de Mexico e la SUA ======
23 janero 2014
La stato Texas intende esecuta un sitadan mexican condenada sur omiside, an contra oposa par la governas de la SUA e Mexico.
Mexico dise ce la esecuta de Edgar Tamayo, ci ave 46 anios, va viole leges internasional.
La pais dise ce on no ia informa el sur sua direto de reseta aida legal de la consuleria mexican cuando on ia aresta el.
John Kerry, la ministro de relatas interna de la SUA, ia fa la ata rara de demanda ce Texas pospone la esecuta.
@T Tota parlamentores de Aurora de Oro pote es criminal acusada
@L aora_oji/2014/tota_parlamentores_de_aurora_de_oro_pote_es_criminal_acusada
====== Tota parlamentores de Aurora de Oro pote es criminal acusada ======
21 febrero 2014
Judores elinica ia demanda ce on sutrae la imunia parlamental de nove plu parlamentores de Aurora de Oro, un partito estrema destriste, afin on pote fa acusas criminal contra los.
Si la parlamento aproba la demanda, on ta acusa ce tota 18 de la parlamentores de la partito ia maneja un organiza criminal.
Nove es ja acusada, e Nikolaos Michaloliakos, la gidor, es un de ses ci on ia prisoni ante sua prosede.
Sua arestas segue la mata de un musiciste antifaxiste.
@T Tre ostajes relijiosa es librida en Camerun pos du menses
@L aora_oji/2014/tre_ostajes_relijiosa_es_librida_en_camerun_pos_du_menses
====== Tre ostajes relijiosa es librida en Camerun pos du menses ======
2 junio 2014
Du pretes italian e un monce canadian, saisida par fusilores en Camerun en april, ia deveni librida. La ostajes pasada ia entra a un avion a la capital, Yaounde, en soldi.
La tre ia es furada de la construida do los ia reposa en Maroua, un distrito norde, en la oras temprana de 5 april.
No grupo ia declara se como la atacores, ma on ia suspeta Boko Haram, un grupo combatosa de Nijeria ci ia saisi un otra prete, e sete membros de un familia franses, en Camerun norde en 2013.
La ministreria italian de esternas ia confirma la libri de Gianantonio Allegri e Giampaolo Marta, e de la canadian Gilberte Bussier. Lo ia grasia la autoriosas canadian e camerunes, ma no ia clari como la tre ia es librida.
Seguente sua bispia en la area Vicenza de Italia, la pretes ia es laborante sur boni la furnis de acua e sur combate la sperde de aides, en ajunta a sua laboras relijiosa.
La un ia es ja en Camerun tra plu ca ses anios. La otra ia ariva a sirca un anio ante sua saisi.
Camerun ia anunsia resente ce lo ia envia sirca mil soldatos a sua frontera con Nijeria, per combate la menasa cresente de Boko Haram.
@T Trenes franses es tro larga per la plataformas
@L aora_oji/2014/trenes_franses_es_tro_larga_per_la_plataformas
====== Trenes franses es tro larga per la plataformas ======
24 maio 2014
SNCF, la compania nasional de trenes en Frans, ia descovre ce 2000 trenes nova, comandada a custa de 15 mil milion euros (20,5 mil milion dolares), es tro larga per multe plataformas provinsal.
La era ia custa ja plu ca 50 milion euros a la compania. On ia comensa laboras per ajusta la plataformas de stasiones per dona un spasio sufisinte per la pasa de la trenes. Ma on debe ancora cambia sirca mil plataformas.
Lo pare ce la era ia aveni car RFF, la compania nasional de ferovias, ia furni dimensiones noncoreta a SNCF.
On ia mesura plataformas construida a min ca 30 anios ante aora, oblidante ce multe plataformas provinsal ia es construida a plu ca 50 anios ante aora, cuando trenes ia es min larga.
La problem es ce la bordas de la plataformas es tan prosima a la reles ce la trenes no pote entra a la stasiones.
Un portavose per la RFF ia dise ce los ia "descovre alga tro tarda la problem".
Frédéric Cuvillier, la ministro de transporta, ia culpa "un sistem asurda" per la caos. El ia comenta: "Cuando on ave companias separada per ferovias e trenes, tal cosas aveni."
@T Trierweiler va visita India
@L aora_oji/2014/trierweiler_va_visita_india
====== Trierweiler va visita India ======
25 janero 2014
Valérie Trierweiler, ofisial la dama prima de Frans, va visita India, en cuando on resta nonserta sur sua relata con presidente François Hollande.
Trierweiler va es en Mumbai en soldi e lundi per un visita organizada e finansiada par un ajenteria franses de aida, Ata Contra Famia.
On ia invita el a India en sua capasia ofisial.
Dutas ia apare sur sua titulo pos alegas ce Hollande fa un relata de ama con un otra fem.
@T Tsvangirai es suspendeda par sua partito
@L aora_oji/2014/tsvangirai_es_suspendeda_par_sua_partito
====== Tsvangirai es suspendeda par sua partito ======
27 april 2014
La Promove per Cambia Democrata, la partito oposante en Zimbabue, dise ce lo ia suspende sua gidor Morgan Tsvangirai car el ia "devia de prinsipes democrata".
La anunsia par Tendai Biti, la secretor jeneral, segue un consenta de la partito en la capital, Harare.
De 2009 a 2013, Tsvangirai ia servi como ministro xef en un governa frajil aliada, en cuando Robert Mugabe ia resta la presidente de la pais.
Acel governa ia fini con la elejes en julio 2013, cuando la partito de Mugabe ia gania un majoria grande. Tsvangirai ia descrive la elejes como frodante.
Sua defeta ia es un problem major per un om ci ia es la sola oposor credable de Mugabe tra multe anios. El ia fali ance vinse la gidor vea en du atentas presedente.
Oservores dise ce batalias interna ia aveni entre la gidores de la Promove per Cambia Democrata tra menses, seguente la elejes.
On ia reporta ce alga otra persones importante de la partito ia es ance suspendeda par la consenta a saturdi, e ce on ia repone alga membros ci ia es suspendeda a ante.
@T Tunis aresta un suspetada de asasinas political
@L aora_oji/2014/tunis_aresta_un_suspetada_de_asasinas_political
====== Tunis aresta un suspetada de asasinas political ======
9 febrero 2014
En Tunis, fortes de securia ia aresta un islamiste suspetada de la asasina de Mohamed Brahmi, un politiciste major oposante, en la anio pasada.
La suspetada, Hmed el-Melki, con nometa "Somali", ia es caturada estra la capital, pos un batalia forte de fusili a un casa de un grupo teroriste.
La mata de Brahmi e un otra gidor oposante, Chokri Belaid, ia lansa la pais en un crise political.
Ultima, la ministros governante ia es obligada de resinia.
@T Turcia debe paia 90 milion euros per sua invade de Cipros
@L aora_oji/2014/turcia_debe_paia_90_milion_euros_per_sua_invade_de_cipros
====== Turcia debe paia 90 milion euros per sua invade de Cipros ======
13 maio 2014
La Corte European de Diretos Umana ia deside ce Turcia debe paia 90 milion euros (123 milion dolares SUA) en compensa per sua invade de Cipros en 1974. Entre la compensas comandada asta aora par la corte, esta es un de la plu grandes.
La isola resta divideda depos 1974, cuando Turcia ia invade la norde en responde a un colpa militar ala cual la governa elinica ia suporta De acel tempo, la tri norde es xef abitada par cipricas turces, e la du tris sude par cipricas elinica.
En la judi a lundi, la corte ia trova ce Turcia es ancora obligada a paia compensas, an pos la cuatrodes anios cual ia pasa.
La corte ia deside ce Turcia debe paia 30 milion euros per la sufri de relatadas de los ci ia desapare en la invade. Lo ia comanda un plu paia de 60 milion euros per la sufri de cipricas elinica ci abita sur la penisola Karpas, un enclave en Cipros norde.
Turcia no ia segue sempre la comandas de la corte. Lo ave ancora sirca 30 mil soldatos sur la isola, e lo es la sola pais cual reconose Cipros norde como un teritorio separada.
La Nasiones Unida estima ce 165 mil cipricas elinica ia fuji o ia es escluida de la norde, e 45 mil cipricas turces de la sude. Ma la partitos consernada dise ce la cuantias es an plu grande.
Gidores ciprica fa aora discutes nova con espera de reconsilia la diferes e reuni la isola.
@T Turcia libri la fios arestada de ministros pasada
@L aora_oji/2014/turcia_libri_la_fios_arestada_de_ministros_pasada
====== Turcia libri la fios arestada de ministros pasada ======
1 marto 2014
Autoriosas turces ia libri la fios de du ministros pasada de la governa, ante un prosede.
Barış Güler e Kaan Çağlayan ia es arestada en desembre. Los es entre deses de persones ci on ia teni en un investiga de froda en relata a furni de servis a la governa.
La investiga ia coleri Recep Tayyip Erdoğan, la ministro xef, ci ia persepi lo como un conspira contra el.
El ia responde par desemplea multe polisiores e judores major.
@T Turcia protesta sur un lege proposada sur usa de la rede
@L aora_oji/2014/turcia_protesta_sur_un_lege_proposada_sur_usa_de_la_rede
====== Turcia protesta sur un lege proposada sur usa de la rede ======
19 janero 2014
La polisia turces ia usa gas lacrimojen e canones de acua per sperde sentos de protestores en Istanbul e Ankara.
La protestas ia relata a un lege proposada par la governa, per forti la esamina de la usa de la interede.
La lega controversa ta permete ce la governa reteni rejistras de tota ativia par usores tra asta du anios.
@T Txile proibi camisas antiiudiste de un ecipo de futbal
@L aora_oji/2014/txile_proibi_camisas_antiiudiste_de_un_ecipo_de_futbal
====== Txile proibi camisas antiiudiste de un ecipo de futbal ======
21 janero 2014
La federa txilan de futbal ia proibi ce un ecipo de divide prima usa camisas nova sur cual la numero 1 ave la forma de la mapa de Filastin ante la crea de Israel.
Palestino, un ecipo fundida par la comunia filastini grande en Txile, ia usa ja la vestes nova en tre maxes.
Organizas iudi ia cexa ce la desinia implica ce tota la area es filastini.
La federa txilan ia dise ce lo oposa tota formas de prejudi, e lo ia multa la ecipo per $1300.
@T Tymoshenko recomenda la continua de protestas ucrainsce
@L aora_oji/2014/tymoshenko_recomenda_la_continua_de_protestas_ucrainsce
====== Tymoshenko recomenda la continua de protestas ucrainsce ======
23 febrero 2014
Yulia Tymoshenko, un ministro xef pasada de Ucraina, ia parla a suportores oposante en la Plaza de Autonomia en Kiev. El ia recomenda forte ce los continua sua protestas.
Tymoshenko ia veni de es librida de prison. Sua dorso es ferida, donce el ia parla de un seja rolante. El ia dise: "Asta cuando vos fini esta taxe, nun ave la direto de parti."
Sua parla ia aveni a la fini de un dia dramosa en cual la presidente, Viktor Yanukovych, ia fuji de Kiev, ma ancora refusante resinia.
Tymoshenko ia plora en dise a sua suportores: "Vos es eroes. Nun ta pote fa lo cual vos ia fa. Nos ia elimina esta canser, esta tumor."
@T Ucraina ave un presidente nova
@L aora_oji/2014/ucraina_ave_un_presidente_nova
====== Ucraina ave un presidente nova ======
8 junio 2014
Petro Poroxenco ia es induida como presidente de Ucraina, clarinte un projeta de repasi la este turbada de la pais.
La maniate de 48 anios, ci ia gania la eleje a 25 maio, ia ofre vantajes political a persones en la este, disente ce el no desira gera o venja.
Ma el ia dise ance ce el ia informa la presidente de Rusia ce Crim, cual Moscva ia saisi, "va es sempre ucrainsce".
Alga separadistes ia rejeta la parla, declarante ce los "va sede nunca".
Mihail Zurabov, la ambasador rusce en Ucraina, ia dise ce la parla es "un declara prometente sur intende". Presente a la inaugura, el ia dise ce Ucraina debe fini sua operas militar en la este, si militias ta clama un sesaspara e ta permete asedes umaniste.
Ucraina dise ce Rusia suporta militaristes armada en la area Donbas, ma Rusia nega esta.
En saturdi, combates ia continua en alga areas este. La armada ia bombarda Sloviansc, un fortres de rebelores, e sparas ia aveni ance plu sude, en Mariupol.
Poroxenco ia es induida en la presentia de deses de ofisiores alta stranjer, en parlamento en la capital, Ciiv.
@T Ucraina fa un lege contra protestas antigovernal
@L aora_oji/2014/ucraina_fa_un_lege_contra_protestas_antigovernal
====== Ucraina fa un lege contra protestas antigovernal ======
18 janero 2014
Viktor Yanukovych, la presidente de Ucraina, ia legali un projeta cual intende restrinje protestas contra la governa.
La parlamento ia aseta lo en jovedi. Parlamentores fidosa a la presidente ia vota con un mostra rapida de manos, en loca de usa la sistem eletronical usual.
La cambias inclui un proibi de tendas nonautorida en areas publica, e un culpablia criminal si on malacusa ofisiores de la governa.
Los ia coleri la oposores, ci dise ce la cambias es nonlegal, e ce la partito renante ia fa un colpa de stato.
@T Ucraina libri un ministro xef pasada pos la fuji de Yanukovych
@L aora_oji/2014/ucraina_libri_un_ministro_xef_pasada_pos_la_fuji_de_yanukovych
====== Ucraina libri un ministro xef pasada pos la fuji de Yanukovych ======
22 febrero 2014
En Ucraina, on ia libri Yulia Tymoshenko de prison. El es un gidor oposante e un ministro xef pasada.
El es librida par un vota de parlamentores pos la fuji de presidente Viktor Yanukovych de Kiev.
Parlante pos sua libri, el ia anunsia ce "la autocratia ia cade".
On ia condena el a sete anios en prison en 2011, pos un judi controversa sur sua atas como ministro xef.
@T Ucrainsces descovre la lusosia de la imobila privata de Yanukovych
@L aora_oji/2014/ucrainsces_descovre_la_lusosia_de_la_imobila_privata_de_yanukovych
====== Ucrainsces descovre la lusosia de la imobila privata de Yanukovych ======
24 febrero 2014
En Ucraina, on ia abri la imobila campanial e lusosa de Viktor Yanukovych a la publica, pos sua despone par vota de parlamento.
Yanukovych ia parti de Kiev, la capital, e on no sabe do el es.
A soldi, la parlamento ia vota per redona la posese de la imobila a la stato.
Lo conteni un campo de golf, un zo privata con astruzos e servos, e un reprodui de un galeon sur un rio artifisial.
@T Ucrainsces protesta contra la acorda de sua governa con Rusia
@L aora_oji/2014/ucrainsces_protesta_contra_la_acorda_de_sua_governa_con_rusia
====== Ucrainsces protesta contra la acorda de sua governa con Rusia ======
6 janero 2014
Sirca 10 000 persones ia asembla en la sentro de Kiev, la capital ucrainsce, en la protesta prima contra la governa en esta anio.
La protestores oposa la politica de presidente Victor Ianucovitx de forti relatas con Rusia, e de abandona un acorda de asosia con la Uni European. Los ia comensa protesta en novembre, demandante ce el resinia.
En desembre, Ucraina ia fa un acorda con Rusia. Un resulta es reduis grande a la custa de gas importada de Rusia. Rusia ia compra ance $15 bilion de obligas finansial de la governa ucrainsce, per suporta la pais.
Multe protestores ia campa en la Plaza de Autonomia de la comensa de la campania. De ves a ves, violentia ia aveni cuando la polisia ia atenta vacui la plaza con gas lacrimojen.
@T Uganda adota un lege sever contra persones ge
@L aora_oji/2014/uganda_adota_un_lege_sever_contra_persones_ge
====== Uganda adota un lege sever contra persones ge ======
25 febrero 2014
La gidor de Uganda, Yoweri Museveni, ia suscrive un lege cual severi la punis per persones ge. Ma el ia omete un parte cual ta criminali los ci no reporta conosedas ge.
La lege inclui un condena de prisoni tra vive, per relatas sesal ge e sposis ge. Un condena proposada de asta 14 anios per ofendores de ves prima ia es sutraeda.
Barack Obama, la presidente de la SUA, ia averti ce la lege es un paso retrogradal. A ante, Museveni ia acorda pospone la suscrive asta reseta conselas siensal de la SUA.
Atas omosesal es ja nonlegal en Uganda.
@T Uganda pausa ante un lege contra omosesalia
@L aora_oji/2014/uganda_pausa_ante_un_lege_contra_omosesalia
====== Uganda pausa ante un lege contra omosesalia ======
22 febrero 2014
Yoweri Museveni, la presidente de Uganda, demanda ce la SUA consela siensistes ugandan sur omosesalia. El considera esce el debe suscrive un lege per aumenta punis.
Un portavose per Museveni ia dise ce la presidente no va suscrive la lege asta reseta la consela siensal.
En la semana pasada, el ia deside suscrive la Lege Contra Omosesalia, cual la parlamento ia aseta.
La SUA -- un de la donores la plu grande de aida a Uganda -- ia avisa ce la lege ta complica relatas entre la du paises.
@T Un acorda sur la program nucleal de Iran va reali
@L aora_oji/2014/un_acorda_sur_la_program_nucleal_de_iran_va_reali
====== Un acorda sur la program nucleal de Iran va reali ======
13 janero 2014
Un acorda tempora de suspende la projetas nucleal de Iran va deveni obligante a 20 janero.
La acorda, atenida en discutes con potias mundal en novembre, previde un laxi de alga punis internasional contra la pais.
Barack Obama, la presidente de la SUA, ia bonveni la anunsia, ma ia dise ce on nesesa ancora plu labora per ateni un acorda permanente. El ia menasa con punis nova si Iran no segue la acorda.
La ueste acusa ce Iran atenta crea armas nucleal, ma Tehran ia nega sempre esta.
@T Un afgan ateiste es refujada en la Rena Unida
@L aora_oji/2014/un_afgan_ateiste_es_refujada_en_la_rena_unida
====== Un afgan ateiste es refujada en la Rena Unida ======
14 janero 2014
La Rena Unida ia refuja un sitadan afgani per razonas relijiosa. El es un ateiste.
La om ia fuji a la Rena Unida en 2007, a la eda de 16, pos un disputa envolvente sua familia en Afganistan. On ia permete ce el resta asta 2013.
On ia eleva el como muslim, ma en sua tempo en la Rena Unida el ia deveni ateiste.
El va fronti persegues e cisa un condena de mori si el revade a Afganistan.
@T Un afonda de naveta en Sudan Sude mata plu ca 200
@L aora_oji/2014/un_afonda_de_naveta_en_sudan_sude_mata_plu_ca_200
====== Un afonda de naveta en Sudan Sude mata plu ca 200 ======
14 janero 2014
Plu ca 200 sivitanes en Sudan Sude ia afoca en un asidente de naveta sur la rio Nil.
Los ia es fujinte de batalia en la vila Malakal. Femes e enfantes ia es entre la vitimes.
La Nasiones Unida dise ce 335 000 persones es deslocada par la combate entre la governa de Sudan Sude e fortes rebelante.
Malakal es situada sur la via a la campos de petrolio en la area plu alta de la Nil.
@T Un aidor pasada per Ronald Reagan mori
@L aora_oji/2014/un_aidor_pasada_per_ronald_reagan_mori
====== Un aidor pasada per Ronald Reagan mori ======
11 janero 2014
Larry Speakes, un aidor sur jornalisme per Ronald Reagan, un presidente pasada de la SUA, ia mori. El ia ave 74 anios.
Speakes ia emprende la rol en 1981 pos cuando sua presedor, James Brady, ia es grave ferida en un atenta de asasina Reagan.
Pos resinia en 1987, Speakes ia labora en la campo privata ante jubila en 2008.
On reporta ce el ia sufri de la maladia de Alzheimer ante sua mori.
@T Un airolinia ecuadoran suspende volas a Venezuela
@L aora_oji/2014/un_airolinia_ecuadoran_suspende_volas_a_venezuela
====== Un airolinia ecuadoran suspende volas a Venezuela ======
24 janero 2014
TAME, un airolina de Ecuador, ia suspende sua volas a Venezuela. Lo esije $43 milion en paias tarda per biletas.
En jovedi, 80 pasajores ia es abandonada a la airoporto en la capital, Quito.
TAME dise ce la Banco Sentral Venezuelan ia move no mone a sua conta en Ecuador de pos April 2013.
Medios sever sur mone stranjer crea difisiles per airolinias stranjer cual vole renativi mone otenida par vendes de bileta en Venezuela.
@T Un amnestia comensa per protestores ucrainsce
@L aora_oji/2014/un_amnestia_comensa_per_protestores_ucrainsce
====== Un amnestia comensa per protestores ucrainsce ======
18 febrero 2014
Un amnestia per protestores antigovernal en Ucraina ia comensa funsiona, pos cuando la protestores ia fini sua ocupa de construidas ofisial.
La pajeria de la avocato prosedente ia dise ce on va supresa acusas criminal, car la oposa ia parti ja de la ofisia de site Kiev.
La protestores ia ocupa alga de la construidas tra plu ca du menses.
Ma un vila vasta de campas resta en un plaza sentral, do alga ia denunsia la deside de fini la ocupas.
@T Un arcibispo ugandan suporta leges antige
@L aora_oji/2014/un_arcibispo_ugandan_suporta_leges_antige
====== Un arcibispo ugandan suporta leges antige ======
1 febrero 2014
La xef de la eglesa anglican en Uganda ia fa un responde critical a un letera de la Arcibispos de Canterbury e York, en cual los ia avisa ce on no debe vitimi persones ge e lesbian.
Los ia envia sua letera a tota arcibispos presidente de la Comunia Anglican.
Lo ia es ance enviada a la presidentes de Uganda e Nijeria, paises cual ia introdui resente leges antige.
Arcibispo Stanley Ntagali ia responde ce "la pratica omosesal es nonarmoniosa con la scriveda santa".
@T Un aresta final pos un focon vea en Bangladex
@L aora_oji/2014/un_aresta_final_pos_un_focon_vea_en_bangladex
====== Un aresta final pos un focon vea en Bangladex ======
9 febrero 2014
En Bangladex, du posesores de un fabriceria de vestes, do 112 laborores ia mori en un focon a du anios ante aora, ia presenta se per aresta.
On ia acusa Delwar Hossain e sua sposa de omiside en desembre.
Anwarul Kabir, la avocato prosedente, ia dise ce la duple ia ariva a la corte en Dhaka, e es aora prisonida ante un escuta de libria su cautia.
An si on ia comanda sua arestas en desembre, los ia continua vive libre en Dhaka.
@T Un asidente de strada mata 27 persones prosima a Mumbai
@L aora_oji/2014/un_asidente_de_strada_mata_27_persones_prosima_a_mumbai
====== Un asidente de strada mata 27 persones prosima a Mumbai ======
2 janero 2014
Un bus ia desende cadente en un canion profonda en la stato Maharashtra en India ueste. La bus ia conteni 40 persones, e a la min 27 es matada.
On reporta ce la gidor ia perde la controla de la bus pos cuando el ia xoca un camion prosima a Malshej Ghat, un area de turisme a sirca 160 cilometres de Mumbai.
Asidentes de strada es comun en India, e es frecuente causada par gida nonatendente o par stradas e veculos mal mantenida.
A cada anio, deses de miles es matada sur la stradas de la pais, e la cuantia aumenta. En 2012, cuasi 140 mil persones ia mori tal.
@T Un asteroide pasa la Tera
@L aora_oji/2014/un_asteroide_pasa_la_tera
====== Un asteroide pasa la Tera ======
8 setembre 2014
Un asteroide peti, con sirca la grandia de un casa, ia pasa la Tera.
A sua punto la plu prosima, 2014 RC ia traversa supra Zeland Nova a 18:18 de ora universal a soldi.
Lo ave un largia de sirca 18 metres, e un distantia de sirca 40 000 cilometres de la Tera.
Lo no menasa nos. Ma espertas dise ce lo es posible ce un meteorite cual ia atera prosima a Managua, la capital de Nicaragua, a soldi ia veni de la asteroide.
La ojeto ia causa un esplode e un trematera peti, e ia lasa un crater -- con diametre de 12 metres e profondia de 5 metres -- prosima a la airoporto.
La asteroide ia es prima descovreda a sola 31 agosto. Cuando lo ia pasa tra sua loca la plu prosima a nos, lo ia es situada a sirca un desi de la distantia entre la sentro de la Tera e la Luna.
On previde ce lo va reveni a nosa visinia en la futur.
En febrero 2013, un meteorite de grandia simil ia esplode supra Chelyabinsk en Rusia sentral. Lo ia feri plu ca mil persones.
NASA, la departe SUA de aironautica e spasio, segue la cursos de plu ca 11 mil asteroides cual pasa relativa prosima a nosa planeta.
@T Un ataca contra un scola nijerian mata deses
@L aora_oji/2014/un_ataca_contra_un_scola_nijerian_mata_deses
====== Un ataca contra un scola nijerian mata deses ======
26 febrero 2014
En Nijeria norde-este, combatosas islamiste de la grupo Boko Haram ia ataca un scola e fusili alga studiantes.
Deses de enfantes ia es matada. La polisia ia dise ce tota de los ia es xicos, e ce alga de la corpos ia es "ardeda asta senes".
Abitores de la vila Buni Yadi ia clari ce la ataca ia aveni a note.
La atacores ia talia ance la gargas de alga studiantes.
@T Un ataca nova en Nijeria contradise un declara de gania la gera
@L aora_oji/2014/un_ataca_nova_en_nijeria_contradise_un_declara_de_gania_la_gera
====== Un ataca nova en Nijeria contradise un declara de gania la gera ======
20 febrero 2014
Bombas umana ia partisipa en un ataca major contra la vila Bama, a la frontera norde de Nijeria.
Esta ia aveni a la dia pos cuando un portavose per la presidente ia dise ce la armada "gania la gera" contra ativistes islamiste.
Ahmend Zanna, la senator per la stato de Borno, ia comenta ce la ataca ia dura tra sinco oras en la matina de mercurdi.
Islamistes suspetada ia mata plu ca 245 persones en la pais en sola esta anio.
@T Un ataca par fusil a un museo iudi en Beljia
@L aora_oji/2014/un_ataca_par_fusil_a_un_museo_iudi_en_beljia
====== Un ataca par fusil a un museo iudi en Beljia ======
25 maio 2014
Un om ia mata tre persones par fusil a la Museo Iudi en Bruxelles, la capital de Beljia. Un person cuatro ia es grave ferida.
La atacor ia ariva par auto, ia sorti de la veculo, ia fusili persones a la entra de la museo, e ia revade a la Audi, cual ia move rapida a via.
Un de la persones prima ci ia ariva pos la aveni ia es Didier Reynders, la ministro de esternas. El ia dise ce el ia es xocada par la ataca: "Me ia oia ruidos de xuta, ia freta a asi, e ia vide la corpos sur la tera."
Yvan Mayeur, la maior de Bruxeles, ia dise ce tre omes e un fem ia es atacada en lo cual ia es probable "un ata teroriste". El ia dise: "La aveni es clar estrema seria, e ance a la Museo Iudi. Acel no es un coaveni."
Un atestor ia descrive vide du corpos en la atrio de la construida. Un ia es un fem joven covreda con sangue, teninte un folieta, con aspeta de turiste.
Alga persones ia es medical tratada per xoca pos la fusili en la sentro de la site.
Joëlle Milquet ia comenta ce tota indicas sujesta un ataca antisemita. La ministro xef, Elio Di Rupo, ia espresa sua compatia e suporta per la familias de la vitimes.
@T Un atenta final de rompe la nonprogresa en discutes suri
@L aora_oji/2014/un_atenta_final_de_rompe_la_nonprogresa_en_discutes_suri
====== Un atenta final de rompe la nonprogresa en discutes suri ======
15 febrero 2014
A un consenta final de discutes en Genève, la ambasador spesial NU per Suria va atenta rompe la state de nonprogresa entre la governa suri e la oposa.
Lakhdar Brahimi va arbitra a un encontra final de ambos lados a la matina de saturdi.
A ante, negosias ia deveni futil en cuando la du grupos delegada ia intercambia acusas. Ofisiores suri ia descrive la esijes de la rebelores como "nonrealosa".
La gera en Suria ia mata plu ca 100 000 persones de pos marto 2011.
@T Un ativiste xines de diretos es condenada a cuatro anios en prison
@L aora_oji/2014/un_ativiste_xines_de_diretos_es_condenada_a_cuatro_anios_en_prison
====== Un ativiste xines de diretos es condenada a cuatro anios en prison ======
26 janero 2014
Un corte xines ia condena Xu Zhiyong, un ativiste conoseda de diretos umana, a cuatro anios en prison.
Xu ia campania per diretos de enfantes e contra froda. On ia condena el per "asembla folas per rompe la ordina publica".
Alga otra ativisites de un promove de nonasconde fronti acusas simil.
Grupos de diretos ia critica presidente Xi Jinping, ci ia promete batalia froda, sur sua casos.
@T Un atleta de bob lansa se tra un porte trapida
@L aora_oji/2014/un_atleta_de_bob_lansa_se_tra_un_porte_trapida
====== Un atleta de bob lansa se tra un porte trapida ======
9 febrero 2014
En la dia abrinte de la Olimpiales Invernal, un competor american de bob ia debe destrui la porte per sorti de un sala de bani en la vileta de atletas.
Johnny Quinn, de 30 anios, ia es trapida pos un duxi. Con nun per aida el, el ia lansa se tra la porte.
El ia tuita: "Sin telefoneta per clama un aidor, me ia usa mea capasias de puia de bob per emerji par forsa."
En un aveni separada, Bex Wilson, un bobor brites, ia sorti de sua sala en la vileta e ia descovre un duto de asendador sin porte.
@T Un australian enebriada evade un crocodil
@L aora_oji/2014/un_australian_enebriada_evade_un_crocodil
====== Un australian enebriada evade un crocodil ======
21 setembre 2014
Un xasor australian ia survive un ataca de crocodil, par colpa la oio de la retil.
Stephen Moreen, ci ave 20 anios, dise ce el ia vada en acua en la Teritorio Norde per retrae un ganso cual el tira a tera, cuando un crocodil ia saisi el e ia tira el a su la acua.
La animal ia es longa de du metres. Cuando la xasor ia puxa a la oio de la bestia, el ia relasa el.
Sua cusin ia fusili alora la retil.
Moreen confesa ce el ia es "pico enebriada" a la tempo. El dise ce el ia bevi plu bir per redui la dole de feris minor en cuando el ia espeta un ambulansia.
"Me ave un rasca a mea dorso, e un otra feri a mea braso. La crocodil ia lasera un pico de pel a via, e ia lasa me con du o tre bucos."
La ataca ia aveni a la sera de venerdi en Peppimenarti, a sirca 320 cilometres a sude-ueste de Darwin.
En la mense pasada, un pexor ia es matada par un crocodil jigante de acua salosa cuando el ia vada en la Rio Adelaide, a sude de Darwin.
La cuantia de crocodiles ia crese pos cuando on ia declara los como spesie protejeda en 1971. Los apare comun en la norde tropical de Australia.
En marto, la governa australian ia rejeta un idea controversa de permete ce on xasa ala crocodiles en safari.
@T Un auto esplode en un area de Hezbollah en Lubnan
@L aora_oji/2014/un_auto_esplode_en_un_area_de_hezbollah_en_lubnan
====== Un auto esplode en un area de Hezbollah en Lubnan ======
2 febrero 2014
Un bomba de auto ia esplode en un fortres de Hezbollah, prosima a la frontera norde de Lubnan con Suria. Lo ia mata cuatro persones, cisa plu.
La esplode ia aveni prosima a un gasolineria en Hermel, un vila este.
Marwan Charbel, la ministro de internas, ia dise ce el crede ce la esplode ia es fada par un bomba umana.
Hezbollah es la promove xia islamiste de Lubnan. Lo suporta la fortes de la governa en Suria.
@T Un autor mexican es en ospital pos un cade
@L aora_oji/2014/un_autor_mexican_es_en_ospital_pos_un_cade
====== Un autor mexican es en ospital pos un cade ======
27 janero 2014
José Emilio Pacheco, un poesiste e novelor mexican de 74 anios, es en un state multe grave en ospital, pos dana sua testa en un cade.
En 2009, on ia dona a el la Premio Cervantes, la onora leteratural la plu alta en la mundo de la lingua espaniol.
On regarda Pacheco como un de la poesistes la plu grande de sua pais, e un representor importante de sua jenera.
El es la plu bon conoseda per sua naras de adolesentes en un Mexico malida e nonjusta en la desenios de 1940 e 1950.
@T Un avion aljeri cade con plu ca 100 pasajores
@L aora_oji/2014/un_avion_aljeri_cade_con_plu_ca_100_pasajores
====== Un avion aljeri cade con plu ca 100 pasajores ======
12 febrero 2014
Un avion aljeri de transporta militar ia cade en montes en la norde-este de la pais. 103 pasajores e ecipores ia embarca.
La avion ia cade en un montania de la provinse Oum al-Bouaghi, sur via a Kasantina.
On ia trova un survivor, mal ferida, e ia prende el a ospital.
La avion ia porta soldatos e membros de sua familias. Enfantes e femes es entre la mores.
@T Un avion atera sur un autovia en New York
@L aora_oji/2014/un_avion_atera_sur_un_autovia_en_new_york
====== Un avion atera sur un autovia en New York ======
5 janero 2014
En la SUA, un avion peti ia atera urjente sur un autovia en la distrito Bronx de Site New York.
La Piper PA-28, un avion con sola un motor, ia atera a la posmedia de saturdi, pos cuando laborores reparante bucos en la autovia ia para la trafica per vacui la strada.
Tre persones ia es en la avion. Nun de los ia es grave ferida.
La avion ia vola ja sirca la Sculta de Libria, e ia es reveninte cuando lo ia sufri un spesie de fali de motor.
@T Un avion de pasajores cade en Mali
@L aora_oji/2014/un_avion_de_pasajores_cade_en_mali
====== Un avion de pasajores cade en Mali ======
25 julio 2014
En Mali, on ia trova la ruinas de un avion cual ia desapare portante 116 persones en vola de Burcina Faso a Jazair.
Soldatos franses en la area vade per securi la loca de cade, cual es a sirca 50 cilometres de la frontera. La pasajores ia inclui 51 sitadanes franses.
Controlores de trafica airal ia perde sua contata con la avion a un ora temprana de jovedi, pos cuando la pilotes ia reporta tempestas sever. On crede ce la avion ia desintegra.
Mali ia acorda la xerca, comensada pos cuando un abitor de Gossi ia descrive vide un cade de avion a sude-ueste de la vila.
Un elicotor de Burcina Fas ia trova restas umana e la ruinas de la avion, intera ardeda e sperdeda, en la vileta Boulikessi.
A ante, jetos franses e elicotores NU ia xerca la ruinas en la deserto plu distante de Mali norde, entre Gao e Tessalit.
Comunicas con la avion AH 5017 ia sesa a 50 minutos pos sua enaira de Ouagadougou. La pilote ia contata la tore de controla a Niamey en Nijer, indicante ce el va cambia sua dirije par causa de un tempesta de arena.
La otra pasajores ia inclui 27 de Burcina Faso, oto lubnanis, ses jazairis, du luxemburgeses, sinco canadianes, cuatro deutxes, un camerunes, un beljes, un misri, un ucrainsce, un suiz, un nijerian, e un malian. La ses ecipores ia es espaniol.
@T Un avion irani cade prosima a un airoporto de Tehran
@L aora_oji/2014/un_avion_irani_cade_prosima_a_un_airoporto_de_tehran
====== Un avion irani cade prosima a un airoporto de Tehran ======
10 agosto 2014
Plu ca 40 persones, incluinte alga enfantes, ia mori cuando un avion peti ia cade prosima a Tehran, la capital irani.
La avion ia colpa un area abitada, prosima a un airoporto en la ueste de la site, a la matina de soldi.
On reporta ce la avion ia es en via a Tabas, un site en la este de la pais.
Iran ia esperia un serie de cades de avion, per cual on culpa la eda de la veculos e un istoria de manteni mal los.
La pais usa ancora aviones comprada ante la revolui en 1979, cual ia es segueda par un crise en cual 52 diplomatas SUA ia es ostajida en Tehran tra 444 dias. Par causa de la crise, restrinjes internasional ia es introduida sur comersia con Iran.
Multe aviones irani usa partes reservada cual ia es nonofisial fabricada.
En la 25 anios pasada, plu ca 200 asidentes ia envolve aviones irani, causante plu ca 2000 moris.
La reportas prima indica ce la asidente de oji pertine a un jeto Iran-140 cual ia porta cuatrodes pasajores e oto ecipores.
@T Un avion itiopian es saisida e atera en Suiz
@L aora_oji/2014/un_avion_itiopian_es_saisida_e_atera_en_suiz
====== Un avion itiopian es saisida e atera en Suiz ======
17 febrero 2014
Un avion de Airolinia Itiopian, en via de Addis Ababa a Roma, ia es obligada de atera en Genève pos es saisida en viaja.
On ia aresta un de la saisores. La airolinia ia anunsia ce tota pasajores e ecipores es secur.
Nun es ferida, e la polisia ia dise ce la situa es "controlada".
Vola 702 ia es saisida en cuando lo ia pasa supra Sudan.
@T Un avion itiopian es saisida par sua copilote
@L aora_oji/2014/un_avion_itiopian_es_saisida_par_sua_copilote
====== Un avion itiopian es saisida par sua copilote ======
18 febrero 2014
Plu detalias ia emerji sur la saisi de un avion de Airolinia Itiopian, volante de Addis Ababa a Rome.
La saisor ia es la copilote. El ia espeta asta cuando la pilote ia visita la saleta privata, e alora ia securi se en la piloteria. El no ia porta un arma.
El ia atera la avion en Genève per xerca refuja en Suiz. On ia aresta el.
Tota la 201 pasajores e ecipores es secur.
@T Un avion libi cade en Tunis
@L aora_oji/2014/un_avion_libi_cade_en_tunis
====== Un avion libi cade en Tunis ======
21 febrero 2014
Un avion militar libi, portante dotores e pasientes, ia cade en Tunis, matante tota 11 persones embarcada.
La avion ia desende sur un campo prosima a Grombalia, a sirca 40 cilometres a sude de la capital.
Lo ia porta tre dotores, du pasientes, e ses ecipoores. Sua motor ia fali.
Libis es comun medical tratada en Tunis, do la cualia de cura es plu alta.
@T Un avion malaisian cade en Ucraina este
@L aora_oji/2014/un_avion_malaisian_cade_en_ucraina_este
====== Un avion malaisian cade en Ucraina este ======
18 julio 2014
Un avion malaisian, portante 295 persones, ia cade en Ucraina este en media de vola de Amsterdam a Kuala Lumpur. On alega ce lo ia cade pos es atacada par xuta.
On trova no indicas de survivores a la sena de cade, prosima a la vileta Grabovo, cual es controlada par rebelores separadiste.
Avion MH17 ia es a punto de entra a la aira rusce cuando on ia perde la contata con lo.
La presidente ucrainsce ia descrive la perde de la avion como "un ata de terorisme". Ma la rebelores ia nega ce los ia xuta a lo.
An tal, on crede ce separadistes ia tira a tera du aviones militar de Ucraina super la area en dias resente.
Alexander Borodai, la gidor de la organiza rebelante cual nomi se la Republica de la Popla de Donetsk, defiante la governa ucrainsce, ia dise ce on ta pote acorda un sesaspara per "alga dias" per permete investigas e laboras de salva.
Companias major de avion ia anunsia ce los evita aora Ucraina este.
@T Un balena viaja sur un autovia franses
@L aora_oji/2014/un_balena_viaja_sur_un_autovia_franses
====== Un balena viaja sur un autovia franses ======
4 janero 2014
En Frans este, un caxalote jigante, transportada sur un camion, ia confonde motoristes. Lo ia ave 17 metres de longia.
On ia solve la misterio pos cuando fotos de la animal ia apare en Twitter a 31 desembre. En alga fotos, la camion ia es parcida a un gasolineria.
Tuitores ia razona ce la transporta de balenas sur tera es sever regulada, e ce probable la balena no ta survive un tal viaja.
En fato, la balena ia es un pupa de grandia natural, construida con fibre de vitro par un grupo de artistes beljes.
Lo ia turi Europa per fa ce on deveni plu consensa sur la situa perilosa de caxalotes. Lo ia es revadente a sua casa en Nederland pos un esibi en Espania.
@T Un barco de turistes inversa matante en la Baia de Bangla
@L aora_oji/2014/un_barco_de_turistes_inversa_matante_en_la_baia_de_bangla
====== Un barco de turistes inversa matante en la Baia de Bangla ======
27 janero 2014
Un barco de turisme ia afonda prosima a la Isolas Andaman e Nicobar en la Baia de Bangla. 21 persones ia mori.
La barco, Aqua Marine, ia inversa sirca 16:00 a soldi.
13 persones ia es salvada e moveda a ospital, ma nove persones manca ancora.
Un investiga studia la causa de la afonda.
@T Un barco inversa se en la Pantanal
@L aora_oji/2014/un_barco_inversa_se_en_la_pantanal
====== Un barco inversa se en la Pantanal ======
27 setembre 2014
Ecipos de salvores brasilera e paraguai ia retrae aora oto corpos de la Rio Paraguai, do un barco ia inversa se en un tempesta a mercurdi.
La barco paraguai, Sonia de la Pantanal, ia porta 11 ecipores paraguai e 16 turistes brasilera.
Des-tre persones ia susede nada a tera. Ses manca ancora, e on suposa ce los ia mori.
La turistes ia fa un viaja de pexa a la Pantanal, un de la pantanes de acua dulse la plu grande de mundo.
La Pantanal es un area de biodiversia stonante cual estende tra partes de Brasil, Paraguai e Bolivia. Lo es popular con ecoturistes.
Multe de la vitimes ia es amis ci ia veni de la mesma vila en la stato Paraná en la sude de Brasil. Los ia lua la barco e ia pasa comun 10 dias en pexa en la Pantanal.
La barco ia inversa se a min ca 48 oras ante la fini intendeda de la viaja. Lo ia deveni caturada en un tempesta forte a la posmedia de mercurdi, e ia afonda entre la vilas Carmelo Peralta en Paraguai norde e Porto Murtinho en Brasil.
Sumerjores de la marinas paraguai e brasilera ia labora en junta per trova la corpos. Los crede ce la corpos restante es trapida en la barco inversada.
@T Un barcon corean saisida en Panama revade a Cuba
@L aora_oji/2014/un_barcon_corean_saisida_en_panama_revade_a_cuba
====== Un barcon corean saisida en Panama revade a Cuba ======
16 febrero 2014
La governa panaman ia dise ce un barcon de Corea Norde, cual ia es saisida con armas cuban nondeclarada, revade aora a Cuba.
La Autoriosa de Canal de Panam ia permete resente la parti de la barcon, pos la paia de un multa de cuasi $700 000 par Pyongyang.
La barcon ia es saisida a sete menses ante aora, cuando on ia trova armas e jetos de la eda soviet ascondeda su sacos de zucar.
Tre membros de la ecipo ia resta en Panama, acusada de contrabanda armas. La barcon ia parti a la matina de saturdi.
@T Un barcon de carga fende a la costa de Frans
@L aora_oji/2014/un_barcon_de_carga_fende_a_la_costa_de_frans
====== Un barcon de carga fende a la costa de Frans ======
6 febrero 2014
Frans ia avisa sur contamina pos cuando un barcon vacua de carga ia fende sur un molo prosima a Bayonne, a la costa Atlantica.
Vagante pos fali de motor, la Luno, un barcon espaniol, ia colpa la molo a Anglet, fendente en du pesos simple, con un dui a cada lado de la rocas.
Tota la 12 ecipores ia es estraeda par elicotor, la un pos la otra. Un person ia sufri un feri de nas.
Car la barcon ia gotea petrolio, on ia declara un avia de contamina.
@T Un barcon de Corea Norde parti de Panama pos paia de multa
@L aora_oji/2014/un_barcon_de_corea_norde_parti_de_panama_pos_paia_de_multa
====== Un barcon de Corea Norde parti de Panama pos paia de multa ======
10 febrero 2014
La Autoriosa de Canal de Panama ia permete la parti libre de un barcon de Corea Norde, cual lo ia saisi a sete menses ante aora, portante armas cuban e nondeclarada.
Corea Norde ia paia un multa de cuasi $700 000.
La barcon ia porta 25 contenadores, en cual armas e jetos de la eda soviet ia es ascondeda su sacos de zucar.
Tre ecipores, incluinte la capitan, va resta en Panama, acusada sur contrabanda de armas. La NU proibi tota paises de furni armas a Corea Norde.
@T Un barcon trae donadas de natal a la Stasion Spasial
@L aora_oji/2014/un_barcon_trae_donadas_de_natal_a_la_stasion_spasial
====== Un barcon trae donadas de natal a la Stasion Spasial ======
13 janero 2014
La mision comersial prima de refurni ia ateni la Stasion Spasial Internasional, portante cosas esensal -- e ance donadas de natal per la ecipo.
La barcon de carga Cygnus de la Corpora de Siensas Orbital, un compania american, ia ariva a doca a tre dias pos sua lansa en Virginia.
Lo ia transporta pico plu ca 1,2 tones de furnis a la ses astronautas, incluinte comedas, vestes, esperimentas siensal, partes reservada, e donadas de sua familias.
Esta es la visita du par la barcon. Lo ia visita ance en setembre, en un vola demostrante.
@T Un bebe nase de un utero transplantada
@L aora_oji/2014/un_bebe_nase_de_un_utero_transplantada
====== Un bebe nase de un utero transplantada ======
4 otobre 2014
A la ves prima de mundo, un fem ia pari un bebe de un utero transplantada.
La madre, ci ave 36 anios e ia nase sin utero, ia reseta un utero donada de un ami.
La xico bebe ia es prematur naseda en Sveria en setembre, con pesa de 1,8 cilogrames. La padre ia descrive sua fio como "stonante".
Femes pote es ance lasada sin utero funsionante pos trata de canser. Ante aora, los ci ia desira un propre enfante ia debe usa un madre sustitua.
On no ia publici la identia de la madre e padre en Sveria, ma on sabe ce la madre ia ave ovarios ancora funsionante.
La duple ia usa la tecnica de fertili en vitro per produi 11 embrios, cual on ia jela. Dotores a la Universia de Göteborg ia transplanta alora la utero.
La donor ia ave 61 anios. El ia es un ami de la familia, ci ia esperia la menopausa a sete anios plu temprana.
La dotores ia nesesa usa drogas per supresa la sistem de imunia, afin la corpo de la fem no rejeta la utero.
A un anio pos la transplanta, la dotores ia deside ce los pote implanta un de la embrios jelada, e un ensintia ia segue.
La bebe ia es naseda pos cuasi 32 semanas de ensintia, cuando la madre ia developa preeclampsia, e la bates de cor de la bebe ia adota un rapidia nonormal.
Ambos la bebe e la mama vade aora bon.
@T Un bebeta es trovada en un baldon de botelas
@L aora_oji/2014/un_bebeta_es_trovada_en_un_baldon_de_botelas
====== Un bebeta es trovada en un baldon de botelas ======
12 julio 2014
On ia trova un bebeta fema abandonada en un baldon de resicli botelas en Rouvroy, un vila en Frans norde.
La xica ia es descovreda par un pasor ci ia crede prima ce la crias veni un gato trapida.
La corda ombilical ia es ancora juntada a la bebeta.
On trata la enfante per talias de pel e per ipotermia a un ospital en Lens, un vila prosima. La polisia dise ce la vive de la enfante no es en peril.
Un investiga ia comensa per identifia la madre.
La maior local, Jean Haja, ia comenta ce el nesesa sabe plu sur la caso ante pote espresa sua judi. El ia demanda: "Esce la madre ia ata tal par teme o despera? Me no sabe. Esce lo es un ata desperante?"
@T Un bilionor demanda pardona pos compara un disputa a un persegue nazi
@L aora_oji/2014/un_bilionor_demanda_pardona_pos_compara_un_disputa_a_un_persegue_nazi
====== Un bilionor demanda pardona pos compara un disputa a un persegue nazi ======
29 janero 2014
Un capitaliste riscosa ia demanda pardona pos compara un disputa sur buses libre per laborores de tecnolojia en San Francisco a la persegue de la iudis su la nazis en Deutxland.
Esta segue un mense de protestas en San Francisco sur lo cual alga abitores vide como un efeto negativa de tal laborores.
En un letera publica a Wall Street Journal, Tom Perkins, un bilionor, ia descrive "un marea levante de odia" de ricas.
On ia critica sua comentas en Twitter.
@T Un bispia catolica en Montana es acusada sur maltrata de enfantes
@L aora_oji/2014/un_bispia_catolica_en_montana_es_acusada_sur_maltrata_de_enfantes
====== Un bispia catolica en Montana es acusada sur maltrata de enfantes ======
1 febrero 2014
En la SUA, un bispia catolica en la stato Montana xerca proteje ofisial contra bancaroti, entre alegas ce sentos de enfantes ia es maltratada.
Du casos legal de 2011 contra la bispia en Helena, la capital de la stato, alega ce on ia maltrata 362 enfantes entre 1940 e 1980.
Acusores dise ce la bispia ia scermi la ofendores o ia deside iniora los.
La xerca de proteje de bancaroti presede acordas proposada en consentas privata de reconsilia.
@T Un bomba colpa un bus de peregrinores xia en Pacistan
@L aora_oji/2014/un_bomba_colpa_un_bus_de_peregrinores_xia_en_pacistan
====== Un bomba colpa un bus de peregrinores xia en Pacistan ======
22 janero 2014
En Pacistan, a la min 22 peregrinores xia ia es matada cuando un bomba ia colpa un bus en la distrito Mastung de la provinse Balochistan.
La peregrinores ia es reveninte de un viaja a locas santa en Iran cuando la esplode ia aveni.
Un de la convoia de buses ia es ensendeda, e plu ca dudes persones ia es ferida.
Gerores suni opera en acel area, e blanci frecuente la muslimes xia.
@T Un bomba de auto esplode en Mogadishu
@L aora_oji/2014/un_bomba_de_auto_esplode_en_mogadishu
====== Un bomba de auto esplode en Mogadishu ======
14 febrero 2014
En Mogadishu, la capital de Somalia, a la min ses persones ia mori pos la esplode de un bomba de auto, prosima a la entra de la airoporto internasional.
Atestores ia dise ce lo ia intende ataca un convoia de un ajenteria NU de refujadas.
La plu de la matadas ia es pasores. Alga gardacorpos de NU ia es ferida par la esplode.
Al-Shabab, un grupo islamiste, ia dise ce lo ia fa la ataca. La bomba ia esplode en un area fortida de la site, conteninte multe ambasadas.
@T Un bomba de la Gera Mundal Du mata un construor en Deutxland
@L aora_oji/2014/un_bomba_de_la_gera_mundal_du_mata_un_construor_en_deutxland
====== Un bomba de la Gera Mundal Du mata un construor en Deutxland ======
3 janero 2014
Un bomba de la Gera Mundal Du ia esplode en un loca de construi prosima a Euskirchen, un vila en Deutxland ueste. Lo ia mata un om e ia feri oto otra persones.
La esplode ia aveni cuando un escavador ia colpa la bomba sin intende. La operor de la macina ia mori direta.
Lo ia dana ance ofisias e autos prosima, e ia rompe la fenetras de alga botecas e casas local.
On ia senti la xoca de la esplode a un distantia de un cilometre.
@T Un bomba esplode a un stasion de bus en Baghdad
@L aora_oji/2014/un_bomba_esplode_a_un_stasion_de_bus_en_baghdad
====== Un bomba esplode a un stasion de bus en Baghdad ======
13 janero 2014
En Irac, un bomba de auto ia mata a la min nove persones e ia feri otras a un stasion de bus en Baghdad sentral.
La bomba ia esplode a la matina de soldi, estra la stasion en la area de Allawi.
En jovedi pasada, un bomba umana ia esplode se entre soldatos enscriveda en la mesma area, matante 23 persones.
Tensas e violentia political ia aumenta en Irac. La Nasiones Unida dise ce 2013 ia es la anio la plu matante de la sinco anios la plu resente. Plu ca 8800 perones ia es matada.
@T Un bomba grande de auto en Cairo sentral
@L aora_oji/2014/un_bomba_grande_de_auto_en_cairo_sentral
====== Un bomba grande de auto en Cairo sentral ======
24 janero 2014
Un bomba de auto ia esplode estra la xeferia de polisia en la capital de Egipte. Lo ia mata cuatro persones e ia feri 51.
La esplode ia es sensada tra Cairo, e un fuma negra ia es vidable, levante supra la sentro de la site.
Plu tarda, un esplode du ia es oiada en la distrito Dokki de la site.
No grupo ia dise ce lo es culpable per la atacas.
@T Un bomba mata cuatro en un suburbe xia de Beirut
@L aora_oji/2014/un_bomba_mata_cuatro_en_un_suburbe_xia_de_beirut
====== Un bomba mata cuatro en un suburbe xia de Beirut ======
22 janero 2014
En Beirut, un bomba ia mata cuatro persones en un fortres de Hizbu'llah en un suburbe dominada par xias.
On suspeta ce la bomba ia es algun en un auto. A la min 20 persones ia es ferida.
Flamas e fuma ia versa de la fasada de un construida multinivel.
La tensa setal en Lubnan ia aumenta par causa de la batalia visina en Suria.
@T Un bomba mata un xef de polisia en Pacistan
@L aora_oji/2014/un_bomba_mata_un_xef_de_polisia_en_pacistan
====== Un bomba mata un xef de polisia en Pacistan ======
10 janero 2014
En Pacistan, un polisior senior, conoseda per sua campanias contra la Taliban, ia es matada par un bomba en Karachi.
Chaudhry Aslam Khan ia es la xef de la operas antiteroriste de la site. El ia mori con a la min du otra persones en un ataca a un convoia de polisia.
El ia survive alga atacas presedente.
La Taliban ia dise ce los ia fa la ataca en jovedi, car Khan ia "mata, tortura, e feri" membros de la Taliban.
@T Un bomba matante esplode en Nijeria
@L aora_oji/2014/un_bomba_matante_esplode_en_nijeria
====== Un bomba matante esplode en Nijeria ======
15 janero 2014
Un bomba de auto ia esplode en la site Maidugiri en Nijeria norde-este, matante a la min 17 persones.
Boko Haram, un grupo islamiste, ia dise ce lo ia fa la ataca. On ia aresta un suspetada.
La bomba ia esplode prosima a un mercato, enviante un plumon grande de fuma tra la aira. Persones ia fuji de la sena, covreda en sangue.
Boko Haram ia fa un campania de violentia tra cuatro anios per institui un rena muslim en Nijeria norde.
@T Un bomba separadiste mata en un tren pacistani
@L aora_oji/2014/un_bomba_separadiste_mata_en_un_tren_pacistani
====== Un bomba separadiste mata en un tren pacistani ======
8 april 2014
En Pacistan, a la min des-tre persones ia es matada par un bomba en un tren de pasajores. La esplode a un stasion en Balotxistan ia feri deses de persones, e ofisiores ia dise ce la cuantia de mores va crese probable.
La Armada Balotxi Unida, un de alga grupos separadiste armada en la area, ia dise ce lo ia fa la ataca. La esplode ia aveni a la dia pos cuando soldatos pacistani ia ataca combatosas en la provinse.
La tren, nomida la Espresa de Jaffar, fa un viaja dial de 1460 cilometres, de Rawalpindi en la provinse Pandjab a Quetta en Balotxistan. La bomba ia esplode cuando la tren ia ariva a la stasion Sibi e pasajores ia comensa desembarca. Sibi es situada a sirca 160 cilometres a sude de Quetta, la capital de sua provinse.
Un de la polisiores a la sena ia dise ce du de la vagones de la tren ia deveni rapida engolida par flamas, e alga pasajores ia luta per evade.
"Nos ia regania 12 corpos mor de la tren," el ia dise, ajuntante ce un de la feridas ia mori pos es ospitalida. "Me no pote dise esce la mores es adultes o enfantes, car los es nonreconosable."
Khawaja Saad Rafique, la ministro de ferovias en Pacistan, ia dise ce la mesma servi ia es atacada a sola alga dias ante aora, ma ce nun ia es alora matada.
@T Un bomba umana a un restorante en Afganistan mata 14
@L aora_oji/2014/un_bomba_umana_a_un_restorante_en_afganistan_mata_14
====== Un bomba umana a un restorante en Afganistan mata 14 ======
18 janero 2014
A la min 14 persones ia mori en un ataca par bomba umana a un restorante popular con turistes en la capital de Afganistan.
Stranjeres e afganis es entre los matada par la esplode en la distrito Wazir Akbar Khan de Kabul.
La area conteni alga ambasadas e organizas stranjer.
La ataca ia aveni a un sera de venerdi, cuando la restorante Taverne du Liban ia es plen de comores.
@T Un bomba umana esplode en Beirut sude
@L aora_oji/2014/un_bomba_umana_esplode_en_beirut_sude
====== Un bomba umana esplode en Beirut sude ======
4 febrero 2014
Un bomba umana ia esplode se en un distrito sude de Beirut, la capital de Lubnan. El ia feri alga persones.
La ministro de internas ia dise ce la bombor ia usa esplodentes en un minibus a la ora de presa en la distrito Choueifat.
La abitores de la area es xef cristian e durzi.
Multe atacas de bomba ia aveni resente en Beirut. On culpa un crese de tensa setal sur la gera en Suria.
@T Un bomba umana esplode en Kabul
@L aora_oji/2014/un_bomba_umana_esplode_en_kabul
====== Un bomba umana esplode en Kabul ======
26 janero 2014
En Afganistan, un bomba umana ia esplode se, prosima a un bus cual ia porta soldatos en la capital, Kabul. A la min cuatro persones ia es matada.
La Taliban dise ce los ia fa esta ataca en la sude-este de la site. Los ia forti sua campania ante la parti de soldatos gidada par OTAN a la fini de 2014.
La ataca la plu resente es la numero tre par la rebelores en Kabul en pico plu ca un semana. A 17 janero, 21 persones ia mori en un ataca par fusil e bomba a un restorante.
En la ataca a soldi, du soldatos en la bus e du siviles sur la strada ia mori.
@T Un brites en Pacistan es condenada a mori per blasfema
@L aora_oji/2014/un_brites_en_pacistan_es_condenada_a_mori_per_blasfema
====== Un brites en Pacistan es condenada a mori per blasfema ======
25 janero 2014
Un corte en la site Rawalpindi en Pacistan ia condena un om brites de 70 anios a mori per blasfema.
Muhammad Asghar ia es arestada en 2010 pos scrive leteras a persones diversa en cual el ia declara ce el es un profeta.
Sua avocatos ia razona per tolera, disente ce el ave un istoria de maladia mental, ma un panel medical ia refusa esta.
La leges controversa de blasfema en Pacistan furni la posible de un condena a mori per cualcun sur ci on judi ce el ia insulta Islam.
@T Un buco negra va presenta un spetaculo
@L aora_oji/2014/un_buco_negra_va_presenta_un_spetaculo
====== Un buco negra va presenta un spetaculo ======
11 janero 2014
Astronomistes prepara oserva la buco negra misteriosa a la cor de nosa galasia.
El va emete "focos spetaculin" si lo consuma un nube jigante de gas cual deveni perilosa prosima.
Siensistes dise ce la colpa va aveni en primavera. On va pote regarda la culmina en un loca de rede publica nova.
Bucos negra es tan densa ce an no lus es capas de evade los, pos cuando lo ia pasa un punto nomida la "orizon de avenis".
Donce on pote oserva los sola par modos nondireta, como par relasas rapida de radia par materia cual cade en los.
@T Un bus de turisme egiptian es bombida
@L aora_oji/2014/un_bus_de_turisme_egiptian_es_bombida
====== Un bus de turisme egiptian es bombida ======
17 febrero 2014
Un ataca de bomba, a un bus de turisme en la penisola Sina, ia mata a la min tre turistes de Corea Sude e la gidor egiptian.
Alga otra persones corean ia es ance ferida en la ataca, cual ia aveni cuando la bus ia es a punto de traversa a Israel.
On dise ce la arma ia es o un bomba de auto o un bomba de lado de strada. No organiza ia anunsia se como culpable.
La penisola ia deveni sempre plu anarciosa de pos la despone de presidente Hosni Mubarak en 2011.
@T Un campanior australian contra troles de rede mata se
@L aora_oji/2014/un_campanior_australian_contra_troles_de_rede_mata_se
====== Un campanior australian contra troles de rede mata se ======
23 febrero 2014
Charlotte Dawson, un presentor de televisa australian, ia es trovada pos mori en sua casa en Sydney.
La polisia dise ce no situa suspetosa pertine a la aveni. Dawson ia ave 47 anios e un istoria longa de depresa.
El ia es un model pasada de Zeland Nova, e ance un vitim bon conoseda de sibertormenta.
En 2012, el ia es ospitalida pos es tormentada en Twitter. A pos, el ia deveni un campanior major contra troles de rede.
@T Un cantor protestante xines retira de un gala televisada
@L aora_oji/2014/un_cantor_protestante_xines_retira_de_un_gala_televisada
====== Un cantor protestante xines retira de un gala televisada ======
18 janero 2014
Cui Jian, un cantor xines, de ci un de sua cantas ia deveni un imno de la protestas en Plaza Tian'anmen, ia retira de un gala major en la televisa nasional.
El ia intende jua a la Carnaval de Primavera, cual atrae sentos de miliones de televidores.
En 1989, el ia presenta a studiantes protestante en Plaza Tian'anmen. Los ia adota sua canta "Me ave no cosa".
El ia vole presenta acel canta en la gala, ma el ia retira se cuando la organizores ia insiste ce el eleje un otra canta.
@T Un cimical nosiva malversa en un rio en Virginia Ueste
@L aora_oji/2014/un_cimical_nosiva_malversa_en_un_rio_en_virginia_ueste
====== Un cimical nosiva malversa en un rio en Virginia Ueste ======
12 janero 2014
On ia avisa sirca 300 000 persones en la stato american de Virginia Ueste ce los debe no bevi sua acua de valva, par causa de un malversa de cimicales en un rio.
Scolas e ofisias ia clui en nove contias, e un consenta de la legores de la stato ia es canselada.
No plu ca 5000 galones de un ajente spumante ia gotea de un tance a Freedom Industries en jovedi.
La cimical es nosiva si on engoli lo, e pote irita la pel e la oios.
@T Un comandor de rebelores es matada en Aleppo
@L aora_oji/2014/un_comandor_de_rebelores_es_matada_en_aleppo
====== Un comandor de rebelores es matada en Aleppo ======
24 febrero 2014
En Aleppo, un site suri, un comandor major de rebelores liada al al-Qaidah ia es matada par un bomba umana.
Abu Khaled al-Suri ia es un de alga ci ia mori en la ataca contra un compleso de sua grupo combatosa.
On crede ce un otra grupo combatosa, la Stato Muslim de Irac e la Mediteraneo Este, es culpable.
Lo fa scaramuxas violente con otra tal grupos de pos la temprana de janero. Sentos de combatores de ambos lados es ja matada.
@T Un comediste antisemita debe paia sua multas
@L aora_oji/2014/un_comediste_antisemita_debe_paia_sua_multas
====== Un comediste antisemita debe paia sua multas ======
4 janero 2014
Manuel Valls, la ministro franses de relatas interna, dise ce el es va insiste ce Dieudonné M'bala M'bala, un comediste controversa, paia sua multas grande per sua condui antisemita.
El ia acusa ce Dieudonné ia atenta bancaroti se per evita paia multas de deses de miles de euros.
A jovedi, on ia suspeta ce algun ia pone un bomba en un teatro manejeda par la comediste. La polisia ia envia espertas de bomba, ma los ia trova no esplodentes.
Dieudonné es ja condenada a ses veses per parla odiosa contra iudis, ma el ia comensa como un ativiste contra razisme. La escutores xef de sua comedia es jovenes de comunias migrante.
@T Un comediste antisemita franses abandona sua presenta
@L aora_oji/2014/un_comediste_antisemita_franses_abandona_sua_presenta
====== Un comediste antisemita franses abandona sua presenta ======
12 janero 2014
La comediste franses Dieudonné M'bala M'bala, ci on ia condena ja per parla odiosa antisemita, ia abandona un presenta controversa pos cuando on ia proibi lo.
El ia dise ce el no va presenta plu "La Mur". Con refere a "interfere political nonascondeda", el ia dise ce el vole aora fa un presenta nova sur Africa.
La presenta nova es ja proibida par la autoriosas en Paris.
Manuel Valls, la ministro de relatas interna, atenta impedi apares par Dieudonné sur tota stadios en Frans. El ia espresa sua desaproba intera per la "mecanica de odia" de la comediste.
@T Un comeria de McDonald's abri en Vietnam
@L aora_oji/2014/un_comeria_de_mcdonald_s_abri_en_vietnam
====== Un comeria de McDonald's abri en Vietnam ======
9 febrero 2014
McDonald's, la compania jigante de comeda rapida, comun regardada como un simbol de la capitalisme SUA, ia abri sua restorante prima en la pais comuniste de Vietnam.
Sentos de persones ia fa un filo per entra a la comeria en la site Ho Chi Minh en la sude de la pais.
La governa viet, suportada par la SU, ia ave sua base en Ho Chi Minh -- nomida Saigon en la pasada -- asta sua despone par fortes comuniste a 38 anios ante aora.
La restorante es manejada par la fio par sposi de la ministro xef.
@T Un comite consilia ce spia par la NSA es nonlegal
@L aora_oji/2014/un_comite_consilia_ce_spia_par_la_nsa_es_nonlegal
====== Un comite consilia ce spia par la NSA es nonlegal ======
24 janero 2014
Un comite gardante de privatia american ia judi ce la colie coletiva de datos sur telefonis, par departes de securia, es nonlegal, e ce lo ia fa beneficas mera "minima" en la impedi de terorisme.
La Comite Supravidente de Privatia e Librias Sivil ia conclui con un majoria de 3/2 ce la program debe sesa.
En un parla major de la semana pasada, presidente Barack Obama ia clari ce el comanda restrinjes a la usa de tal datos.
Ma el ia dise ance ce la SUA debe continua colie datos per preveni atacas.
@T Un comite fronti la Vatican sur maltrata sesal de enfantes
@L aora_oji/2014/un_comite_fronti_la_vatican_sur_maltrata_sesal_de_enfantes
====== Un comite fronti la Vatican sur maltrata sesal de enfantes ======
17 janero 2014
A la ves prima, on ia fronti publica la Vatican sur la maltrata sesal de enfantes par eglesores.
A un comite de la Nasiones Unida en Geneve, ofisiores ia debe responde a multe demandas, per esemplo: perce los no va publici datos, e cual los fa per preveni maltratas futur?
Los ia insiste ce la Eglesa ia aprende de la crise, e ia reata per impedi repetes en futur.
Avocatos de vitimes ia cexa ce la situa es ancora multe tro opaca.
@T Un compania engles de taxis va refusa persones descapasida
@L aora_oji/2014/un_compania_engles_de_taxis_va_refusa_persones_descapasida
====== Un compania engles de taxis va refusa persones descapasida ======
12 janero 2014
En la norde-este de England, la xef de la compania la plu grande de taxis en la area Teesside ia dise ce sua compania va sesa transporta pasajores descapasida.
Mohammed Bashir ia dise ce el ia fa la deside per razonas economial.
On ia avisa resente a taxistes en Teesside ce los pote perde sua lisensas si los fatura plu alta a la pasajores descapasida.
Bashir ia dise ce sua compania, Boro Taxis, no pote tolera plu la custa de envia un minibus de oto sejas si la cliente debe paia no plu ca un person capasida en un auto de cuatro sejas.
@T Un confere internasional sur interede aveni en Xina
@L aora_oji/2014/un_confere_internasional_sur_interede_aveni_en_xina
====== Un confere internasional sur interede aveni en Xina ======
19 novembre 2014
Ofisiores e dirijores asembla ex Xina per un confere a tema de interede, suportada par la governa, entre criticas contra la praticas interedal de Beijing.
La Confere Mundal de Interede, en Wuzhen, es un parte de la intende par Xina de ave un rol plu grande en la maneja de la siberspasio global.
La pais ave plu ca 600 milion usores de ueb. Ma Amnestia Internasional, un grupo promovente diretos umana, ia averti ce la libria de interede en Xina es "atacada".
La confere va inclui presentas sur governa global de interede, sibersecuria, e la interede portable. Lo es organizada par la Comite Siberspasial de Xina, cual es la gardor xef de interede en la pais.
Representores de companias global como Apple, Amazon e Microsoft es presente a la confere, a lado de companias de tecnolojia xines.
La governa xines bloci costumal miles de pajerias stranjer, incluinte furnores de novas e medios sosial como Facebook e Twitter.
William Nee, un rexercor sur Xina per Amnestia Internasional ia comenta: "La libria de interede es atacada par governas tra la mundo. Aora Xina pare desira promove sua propre regulas de interede como model per regulas global."
La ofisior xines de grado la plu alta ci es presente a la confere, Ma Kai, ia dise ce tota paises debe reata sever contra ativias de terorisme en la ueb e colabora contra siberatacas.
Jack Ma, la fundor de la compania e-comersial Alibaba, ia informa la confere ce "la rede xines ia influe e cambia la sosia xines e la economia xines."
Plu temprana en esta semana, la sistem con nometa de la Parafoco Grande de Xina ia aumenta sua sensura cuando la autoriosas ia bloci EdgeCast, un compania major de ospita ueb e furnor de servis de nube.
Armadas de sensurores sutrae cualce testos postada par sitadanes xines cual la propagandores oposa, e a veses la cortes deside prisoni la postores.
An tal, on permete ce la partisipores de la confere asede locas de rede como Google e Facebook cual es normal blocida en la pais.
@T Un congresor de la SUA va resinia sur cocaina
@L aora_oji/2014/un_congresor_de_la_sua_va_resinia_sur_cocaina
====== Un congresor de la SUA va resinia sur cocaina ======
28 janero 2014
En la SUA, un congresor de Florida ci ia confesa sua culpablia sur posese de cocaina intende resinia sua posto.
Republiciste Trey Radel ia revade resente a la Congresa pos un periodo de asentia e un reposa en un clinica de recapasi. El ave 37 anios.
El ia confesa ce el ia compra 3,5 grames de cocaina de un polisior desemblada en otobre. On ia condena el a un anio de libria oservada.
El ia dise ce el ia luta con alcolomania e malusa de drogas.
@T Un consilio vatican proposa revisa sua disposa a omosesalia
@L aora_oji/2014/un_consilio_vatican_proposa_revisa_sua_disposa_a_omosesalia
====== Un consilio vatican proposa revisa sua disposa a omosesalia ======
14 otobre 2014
Eglesores major ci partisipa en un revisa de instruis catolica sur la familia ia recomenda ce la eglesa adota un disposa plu positiva a omosesalia.
Un reporta inisial, scriveda par bispos en un consilio vatican, ia dise ce omosesales ave "capasias e cualias per ofre".
La reporta no defia la oposa longa de la eglesa contra sposia omosesal, ma alga grupos de diretos ge ia bonveni lo como un avansa grande.
Ma grupos tradisional ia rejeta la reporta. Un ia descrive lo como "un tradi", e "un de la documentos la plu mal de istoria de la eglesa".
Plu ca 200 bispos partisipa en la consilio, cual ia comensa a 5 otobre. Pape Fransisco ia asembla lo per debate tal temas controversa como aborta, contraconsepi, omosesalia, e divorsa.
La reporta de lundi, publicida a media de la consilio de du semanas, ia dise: "Omosesales ave capasias e cualias per ofre a la comunia cristian. Esce nos es capas de bonveni esta persones, garantiante a los un spasio fratin en nosa comunias?"
La documento ajunta: "Sin nega la problemes moral liada a unis omosesal, on debe nota ce casos esiste en cual la aida mutua, a grado de sacrifia, formi un suporta valuosa en la vive de la duple."
En la anio pasada, un sonda inisiada par la pape ia sujesta ce la majoria de catolicas rejeta la instruis eglesal sur temas como seso e contraconsepi.
@T Un consilior brites culpa sposis ge per la mal clima
@L aora_oji/2014/un_consilior_brites_culpa_sposis_ge_per_la_mal_clima
====== Un consilior brites culpa sposis ge per la mal clima ======
19 janero 2014
Un consilior de UKIP, la Partito de Autonomia de la Rena Unida, ia declara ce la tempestas e inondas resente tra Britan ia es causada par la deside par la governa de legali sposis ge.
En un letera a sua jornal local, David Silvester ia dise ce la ministro xef ia ata "egosa contra la evanjelio", e ce el ia averti ce la legali va causa "un desastre".
La partito mesma ia clari ce la opinas de Silvester "no es la crede de la partito", ma lo ia defende la direto de el de espresa los.
UKIP es forte eurosetica e ave 30 000 membros.
@T Un conspira teroriste es impedida en Uganda
@L aora_oji/2014/un_conspira_teroriste_es_impedida_en_uganda
====== Un conspira teroriste es impedida en Uganda ======
14 setembre 2014
La autoriosas en Uganda ia descovre un selula teroriste sur cual los crede ce lo ia intende fa un ataca pos un tempo corta.
La ambasada SUA ia dise ce la selula ia parteni a al-Shabab, un grupo islamiste somali, ma la polisia ugandan ancora no ia confirma esta.
Plu temprana, la ambasada ia avisa sua sitadanes en la capital, Kampala, a resta en sua casas tra la dura de la opera polisial per trova la selula.
La polisia ia forti la securia en locas publica tra la capital, incluinte la airoporto internasional. Los ia fa ance alga arestas e ia saisi ance materias esplodente.
Al-Shabab ia promete retalia contra la mata de sua gidor, Ahmed Abdi Godane, par un ataca airal SUA a 2 setembre.
La grupo, cual vole suverti la governa suportada par la Nasiones Unida en Somalia, ia nomi Ahmad Umar como sua gidor nova.
Al-Shabab ia causa du esplodes a un campo de rugbi e un restorante itiopian en Kampala en julio 2010. Acel esplodes ia mata 76 fanes de futbal ci ia es regardante la max final de la Copa Mundal.
A acel tempo, Godane ia dise ce la ataca ia es un venja contra Uganada per sua contribui de soldatos a un forte juntada african cual ia aida Somalia en sua batalia contra al-Shabab.
@T Un constitui nova per Tunisia
@L aora_oji/2014/un_constitui_nova_per_tunisia
====== Un constitui nova per Tunisia ======
27 janero 2014
La parlamento de Tunis ia adota un constitui nova, la prima pos la despone de presidente Zine el-Abidine Ben Ali a tre anios ante aora.
La Asembla Constituinte Nasional ia aseta la testo con 200 favorentes entre 216 votas.
Politicistes espera ce esta va envia un mesaje de stablia pos menses de nonprogresa entre fortes muslim e nonrelijiosa.
Entretempo, Mehdi Jomaa, la ministro xef nomida, dise ce el ia formi un governa tempora nova.
@T Un construida en Corea Sude colasa
@L aora_oji/2014/un_construida_en_corea_sude_colasa
====== Un construida en Corea Sude colasa ======
18 febrero 2014
A la min des persones ia mori, e plu ca sento ia es ferida, cuando un construida ia colasa en Corea Sude.
On crede ce plu ca 560 persones ia es presente a un conserta en Gyeonghu, un site sude-este, cuando un parte de la salon ia cade.
Nove de la matadas ia es studiantes.
Pompores ia culpa la pesa de neva sur la teto. La clima ia impedi ance la laboras de salva.
@T Un construida nova colasa en Goa
@L aora_oji/2014/un_construida_nova_colasa_en_goa
====== Un construida nova colasa en Goa ======
4 janero 2014
Un construida ia colasa en la stato de Goa en India sude, matante a la min ses persones.
On teme ce deses es trapida pos la colasa de la strutur, cual on ia es ancora construinte. Lo ia ave tre niveles.
On reporta ce sirca 40 persones ia es en la construida cuando lo ia cade. Salvores escava la detrito per xerca survivores.
On ancora no sabe perce la construida ia colasa.
@T Un contrabandor de ivor reseta un multa recordo en Cenia
@L aora_oji/2014/un_contrabandor_de_ivor_reseta_un_multa_recordo_en_cenia
====== Un contrabandor de ivor reseta un multa recordo en Cenia ======
29 janero 2014
En Cenia, un corte ia multa un om xines per 20 milion xilinges ($230 000) per contrabanda ivor. Esta es un recordo.
On ia catura Tang Yong Jian en la semana pasada con un denton de elefante, de pesa 3,4 cilogrames, en un valis a la airoporto internasional de Nairobi.
Si el no pote paia la multa, el va spende sete anios en prison.
Cenia ia proibi la comersia de ivor en 1989, ma en anios resente la pratica ia deveni plu comun.
@T Un conversa esposa sur Ucraina embarasa la SUA
@L aora_oji/2014/un_conversa_esposa_sur_ucraina_embarasa_la_sua
====== Un conversa esposa sur Ucraina embarasa la SUA ======
7 febrero 2014
On ia publici enlinia un conversa, parente acaso escutada, en cual un diplomata major de la SUA desvalua la UE sur la crise ucrainsce.
Un vose semblante lo de Victoria Nuland, la Secretor Suordinada de Stato, refere a la UE con un parola ofendente, en conversa parente con la ambasador SUA a Ucraina.
La SUA ia dise ce Nuland ia "demanda pardona per esta comentas reportada".
La UE e SUA partisipa en discutes per fini menses de turba en Ucraina.
@T Un coror carital susede traversa Canada
@L aora_oji/2014/un_coror_carital_susede_traversa_canada
====== Un coror carital susede traversa Canada ======
4 febrero 2014
Un aventuror, ci ia spende cuasi un anio en core traversante Canada, ia ariva en Vancouver e ia completi tal sua defia carital de 8000 cilometres.
Jamie McDonald ave 27 anios. El ia ateni la Mar Pasifica a la dia 275 pos pone sua mano en la Atlantica.
On crede ce el es la person prima ci ia fini la viaja entre la du costas sin aida.
Pos traversa la linia de fini, el ia descrive sua como "estasiante".
@T Un corte confirma la condena de Amanda Knox per omiside
@L aora_oji/2014/un_corte_confirma_la_condena_de_amanda_knox_per_omiside
====== Un corte confirma la condena de Amanda Knox per omiside ======
31 janero 2014
Amanda Knox, un fem american, dise ce el es "asustada e tristida" par la deside de un corte en Italia de suporta sua condena per la omiside de Meredith Kercher, sua camerada brites de aparte, en 2007.
Knox es aora en la SUA. On ia condena el a 28 anios e un dui en prison.
On ia confirma ance un condena de 25 anios per Raffaele Sollecito, sua ami pasada de cor.
La avocato per la familia Kercher ia dise ce justia ia es realida.
@T Un corte deutx aboli la limita de votas per entra a la Parlamento European
@L aora_oji/2014/un_corte_deutx_aboli_la_limita_de_votas_per_entra_a_la_parlamento_european
====== Un corte deutx aboli la limita de votas per entra a la Parlamento European ======
27 febrero 2014
La corte suprema de Deutxland ia declara la nonconstitualia de un regula cual esije ce partitos gania a la min 3% de votas per pote entra a la Parlamento European.
La governa ia basi la limita de 5% en la anio pasada, ma la Corte Constitual Federal en Karlsruhe ia dise ce on debe aboli intera la limita.
Esta permete ce partitos plu peti deveni capas de gania sejas en la vota de maio 2014.
Un de los es la Partito Democrata Nasional, cual es estrema destriste e frecuente acusada de promove un ideolojia neonazi.
@T Un corte egiptian comanda un reprosede sur un tumulta de futbal
@L aora_oji/2014/un_corte_egiptian_comanda_un_reprosede_sur_un_tumulta_de_futbal
====== Un corte egiptian comanda un reprosede sur un tumulta de futbal ======
7 febrero 2014
Un corte de apela en Egipte ia comanda un reprosede de la 21 persones ci on ia condena a mori en relata a un tumulta malfamosa de futbal en Porto Said en 2012.
74 persones, de ci la majoria ia es fanes de la club Al Ahly de Cairo, ia es matada en scaramuxas en un max contra la club local, Al Masry.
La condenas de la acusadas ia es suportada par un corte min alta en marte pasada.
Ma la deside ia crea furia, e en Porto Said, e en Cairo. On ia cexa ce la prosede ia deveni political.
@T Un corte egiptian va deside sur Mubarak
@L aora_oji/2014/un_corte_egiptian_va_deside_sur_mubarak
====== Un corte egiptian va deside sur Mubarak ======
29 novembre 2014
En Egipte, on previde la deside de un corte en la reprosede de Hosni Mubarak, la presidente desponeda, sur alegas ce el ia conspira sur la mata de protestores en la revolui de 2011.
En la anio pasada, un corte de apela ia desfa la condena inisial de prisoni per vive cual on ia dona a Mubarak.
Si on desculpa el, Mubarak no va es librida, car el es ja prisonida per tre anios per froda de reservas publica.
La om de 86 anios nega tota la alegas.
En 2012, on ia condena Mubarak -- como ance sua ministro de internas Habib al-Adly -- a vive en prison per aida reali la moris de protestores en la revolui cual ia obliga el a resinia final.
Ma en janero 2013, un corte ia suporta un apela par la du omes contra sua condenas, per razonas tecnical, e ia comanda un reprosede.
En agosto, un otra corte ia comanda ce on libri Mubarak de prison e envia el a un ospital militar en Cairo, do on teni el en state arestada.
Sua fios Gamal (a ante, sua eritor legal) e Alaa (un comersior), es ance reprosededa sur otra alegas de froda.
Mohamed Morsi, la islamiste ci ia segue Mubarak como presidente, ia teni la potia tra sola un anio ante sua despone par la militaria en julio 2013. Acel ia segue cuatro dias de protestas antigovernal e la rejeta par Morsi de un esije ultima par la jenerales per solve la crise political la plu mal en Egipte de pos 2011.
Abdel Fattah al-Sisi, un xef pasada de la armada, ia es elejeda como la presidente nova de la pais a pos.
En un developa separada ier, a la min du protestores ia mori en scaramuxas entre protestores islamiste e la polisia en Cairo.
La protestas ia es organizada par Salafi, un grupo estrema conserviste, cual ia oposa la despone de Morsi. La grupo ia demanda ce protestores defende lo cual lo ia nomi "la identia muslim" de Egipte.
Ajunta: La corte ia deside cansela intera la caso contra Mubarak.
@T Un corte en Turcia judi ce la proibi de Twitter es nonlegal
@L aora_oji/2014/un_corte_en_turcia_judi_ce_la_proibi_de_twitter_es_nonlegal
====== Un corte en Turcia judi ce la proibi de Twitter es nonlegal ======
2 april 2014
La corte constitual de Turcia ia judi ce la proibi resente par la pais contra la usa de Twitter es un viole de la libria de espresa e la diretos de individuas.
En un mesaje a la autoriosa de telecomunica e a la governa, la corte ia dise ance ce on debe cansela la proibi.
Twitter mesma ia rejistra un defia de la proibi, cual ia es instituida a 21 marto par causa de un fali par Twitter de sutrae alegas de froda pertinente a ofisiores major.
On no sabe esce la judi va causa vera un cansela de la proibi. La autoriosas ia fa ancora no comenta publica sur la deside, ma Recep Tayyip Erdoğan, la ministro xef, ia promete "elimina Twitter" pos cuando usores ia difusa la alegas.
Usores ia fa cexas en cortes, razonante ce la proibi es nonlegal e nonconstitual.
La corte en Ankara ia fa un comanda tempora cual obliga la autoriosa de telecomunica a restora la asede a Twitter, asta la prepara de un documento con concluis completa sur la proibi.
Entretempo, la proibi ia deveni vasta criticada e burlada, e usores tra la pais ia trova multe modos de sircoveni lo.
@T Un corte italian cansela un lege proibinte canaba
@L aora_oji/2014/un_corte_italian_cansela_un_lege_proibinte_canaba
====== Un corte italian cansela un lege proibinte canaba ======
13 febrero 2014
La corte constitual de Italia ia cansela un lege cual ia trupli condenas per vende, cultiva, e posese canaba. Lo ia declara ce la lege es "nonvalida".
Antigone, un grupo de diretos de prisonidas, dise ce la lege ia fa ce la prisones deveni tro folida. 40% de tota prisonidas es ala per crimines de droga.
La cambia pote afeta 10 000 persones, ci va es cisa librida en resulta.
La lege ia comensa funsiona en 2006 su la governa conserviste gidada par Silvio Berlusconi, alora la ministro xef.
@T Un corte malaisian desvalidi un lege relijial contra transvesti
@L aora_oji/2014/un_corte_malaisian_desvalidi_un_lege_relijial_contra_transvesti
====== Un corte malaisian desvalidi un lege relijial contra transvesti ======
7 novembre 2014
Tre femes malaisian transjenero ia gania un apela contra un lege relijial cual proibi omes muslim de porta vestes fema.
La judor de la corte de apela, Mohamad Yunus, ia dise ce la lege "degradante, opresante, e noncompatiosa" ia es prejudosa contra persones con difisiles de jenero.
Tal difisiles, e ance la omosesalia, resta areas tabu en Malaisia.
La avocato de la apelores, Aston Paiva, ia dise ce esta judi en la pais relijial tradisional va es "un presedente" major. "Esta corte domina tota otra cortes alta."
En un sistem duple de leges en Malaisia, tota muslimes en la pais es su la controla de leges muslim.
Ce omes vesti o condui como femes es nonlegal su acel leges, e ofendores risca prisoni per asta tre anios. Alga statos proibi ance femes de vesti como omes.
La apelores, de cual tota es muslimes ci ia nase mas ma identifia aora se como femes, ia es arestada a cuatro anios ante aora. Los ia dise ce los ia es atacada e prisonida per porta tal cosas como clipes de capeles. En 2012, un corte minor ia deside ce, car los ia nase mas, los debe porta vestes mas.
La femes no ia apare en la corte de apela, ma un ia comenta a pos: "Me es felis ce nos ia vinse. Me senti aora min tensada."
La comite de apela en la stato Negeri Sembilan, con tre judores, ia dise ce la lege "priva la apelores de la direto de vive con dinia. Lo ave la efeto de proibi ce la apelores e ote sufrores de disforia de jenero move libre en locas publica."
Grupos de diretos ia bonveni la deside. Un portavose per la Organiza Aidante de Femes ia dise: "Esta es un vinse per tota malaisianes, car la constitui proteje tota de nos, sin relata a etnicia, jenero, e clase. Serta no corte, o sivil o de xaria, pote refuta la fato ce la dinia umana es suprema importante."
La grupo SUA Vijila de Diretos Umana ia lista Malaisia como un de la locas la plu mal per persones transjenero.
En un reporta en setembre, la grupo ia dise ce tal persones fronti persegues sempre plu mal, incluinte arestas e atacas fisical e sesal par autoriosas de relijio e polisia.
La reporta ia indica avenis de vergonia forsada en cual femes transjenero ia es obligada a desvesti publica. Lo ia lista ance ostaculos contra asede aida medical, emplea, e instrui.
@T Un corte pilipina defia la eglesa e suporta contraconsepi
@L aora_oji/2014/un_corte_pilipina_defia_la_eglesa_e_suporta_contraconsepi
====== Un corte pilipina defia la eglesa e suporta contraconsepi ======
8 april 2014
La corte suprema en la Pilipinas ia aproba un lege de contraconsepi, en un defeta per la Eglesa Catolica. La lege esije ce sentros governal de sania distribui aora condomes libre e piles contraconsepal.
La corte ia pospone reali la lege en desembre 2012 pos cuando grupos eglesal ia sujesta ce lo es nonconstitual.
Suportores de la lege ia aclama cuando la corte ia anunsia sua judi ce la plu de la esijes en la lege es constitual.
La governa de presidente Benigno Aquino ia defia anios de presa par la eglesa cuando lo ia aseta la lege. Lo dise ce la lege va aida persones povre, ci no pote comun compra contraconsepales, e ce lo va redui la cuantia alta de madres en la pais ci mori.
Par la lege, cuasi tota formas de contraconsepi va deveni libre disponable a clinicas de sania publica. Instruis sesal va deveni ance obligada en scolas, e laborores de sania publica va debe reseta instruis sur la metodos de projeta un familia. On va furni ance curas medical a femes ci ia fa abortas nonlegal.
Cuasi 100 milion persones abita en la Pilipinas, e sirca 80% de los es catolica. La pais ave un de la tasos de nase la plu alta en Asia.
La Eglesa ia batalia forte contra la lege, descrivente lo como un menasa malvolente contra la vive. Lo ia denunsia politicistes ci ia suporta lo, incluinte Aquino.
Campaniores ia averti sur la posible de desobedis publica pos la judi de la corte. La Eglesa Catolica ia fa un rol importante en la vive political de la Pilipinas, e lo continua influe forte la popla.
@T Un corte SUA rejeta un caso de mesajeta ofendente
@L aora_oji/2014/un_corte_sua_rejeta_un_caso_de_mesajeta_ofendente
====== Un corte SUA rejeta un caso de mesajeta ofendente ======
25 febrero 2014
En la SUA, la corte suprema de la stato Georgia ia rejeta un caso contra un om ci ia envia a un fem un mesajeta con un foto nonxercada de sua penis tatuada.
La corte ia judi unida ce un lege de 1970 aplica sola a materias "concreta" enviada par posta.
Charles Les Warren ia risca spende asta tre anios en prison pos envia la foto en 2012.
La lege su cual on ia prosede el defini ce lo es un crimin major si on envia imajes nonxercada de nudia o atas sesal, estra si la "envelopa o contenador" porta un averti en leteras spesa.
@T Un corte ungarian clui un scola cual separa enfantes romani
@L aora_oji/2014/un_corte_ungarian_clui_un_scola_cual_separa_enfantes_romani
====== Un corte ungarian clui un scola cual separa enfantes romani ======
1 marto 2014
La Eglesa Catolica Elinica en Ungaria ia perde un caso importante, do los ia vole ce un scola prima resta abrida en un area xef romani.
Ativistes de diretos umana ia susede convinse la corte ce la scola separa enfantes romani de la majoria nonromani.
La scola es en Nyíregyháza, un site este. On ia clui lo con intende de desepara en 2007, ma lo ia reabri en 2011.
La judi pote afeta ance otra scolas ungarian cual es manejada o par eglesas o par la stato.
@T Un corvo e un gavota ataca la pijones pasosa de la Pape
@L aora_oji/2014/un_corvo_e_un_gavota_ataca_la_pijones_pasosa_de_la_pape
====== Un corvo e un gavota ataca la pijones pasosa de la Pape ======
27 janero 2014
Du pijones blanca, librida par enfantes a lado de Pape Fransisco en la Vatican, ia es atacada par otra avias.
La pijones ia es librida de la Palasio Apostolal en jesto de pas. Ma un gavota e un corvo negra ia desende rapida sur los.
Deses de miles de persones ia regarda en cuando un pijon ia luta per evade. La corvo ia pica repetente la otra.
Final, ambos pijones ia vola a via. On no sabe cual ia aveni a los a pos.
@T Un crese de profita per la posesente de Weibo
@L aora_oji/2014/un_crese_de_profita_per_la_posesente_de_weibo
====== Un crese de profita per la posesente de Weibo ======
25 febrero 2014
La profita de Sina.com, la posesente de Weibo, la pajeria xines la plu grande cual sembla Twitter, ia alti multe en la cuatri cuatro de 2013.
Lo ia es aumentada par un crese de revenu par anunsias comersial.
Lo ia reporta un profita neta de $44,5 milion en la periodo de otobre a desembre, comparable con $2,4 milion a un anio a ante.
Weibo dise ce lo ave plu ca 500 milion usores rejistrada.
@T Un crus relijiosa crase un om en Italia
@L aora_oji/2014/un_crus_relijiosa_crase_un_om_en_italia
====== Un crus relijiosa crase un om en Italia ======
25 april 2014
En Italia norde, un om de 21 anios ia mori cuando el ia es craseda par un crus erijeda per onora Pape Ioannes Paulus 2. Marco Gusmini ia es matada sin pausa, e un otra om ia es ospitalida.
La sculta ia ave un altia de 30 metres. Un parte de lo ia colasa a un rituo ante la santi de Ioannes Paulus 2 e la pape presedente, Ioannes 23, a soldi.
La crus simboli la visita de la pape a Brescia, un site prosima, en 1998. Lo ia es desiniada par scultor Enrico Job. Lo ave la forma de un crus grande e curva, con un sculta de Jesus Cristo fisada a la culmina. La sculta de Cristo ave un pesa de 600 cilogrames.
Un grupo de enfantes ia es presente cuando lo ia cade.
Esta no es la mori prima causada par un crus cadente en Italia. En 2004, un fem de 72 anios ia es craseda par un crus de metal, con altia de pico plu ca 2 metres, en la vila Sant'Onofrio en la sude.
@T Un cuantia persental recordo de elinicas es nonempleada
@L aora_oji/2014/un_cuantia_persental_recordo_de_elinicas_es_nonempleada
====== Un cuantia persental recordo de elinicas es nonempleada ======
14 febrero 2014
La cuantia persental de nonempleadas en Elas ia ateni 28% en novembre -- un nivel recordo alta.
La statistica ia crese de 27,7% en otobre. 61,4% de persones con min ca 25 anios es desempleada.
Medios sever ia causa un diminui de la economia elinica par un cuatri en cuatro anios.
An tal, otra indicantes economial ia sujesta ce sinias de recovre apare.
@T Un debate e combate en la parlamento turces
@L aora_oji/2014/un_debate_e_combate_en_la_parlamento_turces
====== Un debate e combate en la parlamento turces ======
15 febrero 2014
Membros de la parlamento turces ia aproba un projeta controversa de reformi la autoriosa xef de judores en la pais. Ma los ia fa ance un combate fisical cual ia lasa un parlamentor oposante con nas rompeda.
La governa vole ce la Comite Suprema de Judores e Avocatos Prosedente veni su la controla de la ministreria de justia.
La projeta ia es debateda tra la note -- entre senas violente. On reporta un combate de punios entre deses de parlamentores.
En la mense pasada, la comite de judores ia dise ce la projeta es nonconstitual, e ce lo ta sumina sua autonomia.
@T Un defeto de program desvalua bitcoines
@L aora_oji/2014/un_defeto_de_program_desvalua_bitcoines
====== Un defeto de program desvalua bitcoines ======
11 febrero 2014
La valua de un bitcoin ia cade subita, de $700 a $540, pos un anunsia ce sua programes fundal conteni un defeto.
La compania Mt.Gox en Tokyo ia dise ce lo ia descovre ce on pote engana la prosede de intercambia per envia la duple de la cuantia coreta de bitcoines.
Lo ia comenta: "Un defeto en la programes permete usa la rede de bitcoin per altera la detalias de un intercambia per dona la pare ce un envia a un bolseta de bitcoin no ia reali, cuando en fato lo ia aveni."
"Car lo pare alora ce la intercambia no ia susede, on pote envia denova la bitcoines."
@T Un defeto programal crea un problem enorme en la interede
@L aora_oji/2014/un_defeto_programal_crea_un_problem_enorme_en_la_interede
====== Un defeto programal crea un problem enorme en la interede ======
9 april 2014
Lo es posible ce un defeto en un program usada par miliones de servadores de ueb ia esposa ja visitores de la pajes ospitada a spias e oservas secreta.
La defeto es en un biblioteca nomida "OpenSSL", usada en servadores, sistemes de opera, e programes de e-posta e mesajes pronto. La intende de la biblioteca es proteje datos privata en cuando los viaja tra la rede.
On no sabe esce o cuanto on ia esplota ja la defeto, car atacas cual usa lo ta lasa no trasa.
Un article en la blog de la projeta Tor, cual produi programes cual aida persones evita ce on oserva sua abituas de surfa, ia dise: "Si tu nesesa anonimia o privatia forte en la interede, cisa tu va prefere evita intera la rede tra alga dias seguente, asta cuando la situa calmi."
Partes vasta de la ueb pote es atacable, car OpenSSL es usada en Apache e Nginx, du servadores multe popular. On crede ce sirca 500 mil de la servadores secur en la ueb opera con varias diversa de esta biblioteca.
Multe companias freta per aplica ajustas a programes atacable. Otras ia clui an sua servis tra cuando los labora sur reparas. Car on comparti ja codigo cual demostra la metodo de ataca, multe persones es ansiosa ce sibercriminales va comensa pronto esplota la defeto.
Par un coaveni strana, esta problem enorme de securia ia apare a esata la mesma tempo cuando Microsoft abandona furni solves de tal problemes a usores de Windows XP.
@T Un descovre major sur selulas madrin
@L aora_oji/2014/un_descovre_major_sur_selulas_madrin
====== Un descovre major sur selulas madrin ======
30 janero 2014
Rexercores sur selulas madrin ia anunsia "un descovre siensal major" cual pote comensa un eda nova de medica personalida.
Siensistes en Japan ia mostra ce on pote rapida crea selulas madrin par sumerji selulas de sangue en asida.
Selulas madrin es capas de muta a cualce texeda, e on proba ja los per sani oios, la cores, e serebros.
Con la developa nova, publicida en la jornal Nature, la tecnolojia pote deveni plu barata, rapida, e secur.
@T Un deutx es acusada sur un masacra en la Gera Mundal Du
@L aora_oji/2014/un_deutx_es_acusada_sur_un_masacra_en_la_gera_mundal_du
====== Un deutx es acusada sur un masacra en la Gera Mundal Du ======
9 janero 2014
On ia acusa un om deutx de 88 anios sur partsipa en un de la masacras la plu malfamosa de la Gera Mundal Du.
La acusas pertine a Oradour-sur-Glane en Frans sentral, un vileta do 642 persones ia es asasinada par soldatos de la SS en 1944. La soldatos ia obliga ce multe persones entra a un eglesa local, ante lansa granadas en la construida e ensende lo.
Prosedores en Dortmund ia dise ce la om es acusada sur la asasina direta de 25 persones e sur aida la mata de sentos.
On ia conserva la ruinas de la vileta como los ia es pos la masacra, per fa ce on oblida nunca la cruelia de la ocupa nazi.
On ia prosede 60 soldatos en la desenio de 1950. Dudes ia es condenada, ma tota ia es librida a pos.
@T Un deutx reseta un premio de cuiz a 45 anios pos la compete
@L aora_oji/2014/un_deutx_reseta_un_premio_de_cuiz_a_45_anios_pos_la_compete
====== Un deutx reseta un premio de cuiz a 45 anios pos la compete ======
17 janero 2014
Un om de Deuxtland Este ci ia compete en un cuiz musical de Deutxland Ueste ia reseta final sua premio, a 45 anios pos la interveni de la polisia secreta.
Günter Zettl ia oblida intera la cuiz asta setembre 2013, cuando el ia leje un arcivo cual la Stasi ia manteni sur el.
Los ia intersepi sua carta postal e ia reteni lo como atesta.
Car el ia furni la responde coreta, el ia deside envia lo a la stasion de radio cual ia difusa la compete orijinal. E los ia dona a el un premio.
@T Un dieta grasosa en ensintia pote altera la serebro de la bebe
@L aora_oji/2014/un_dieta_grasosa_en_ensintia_pote_altera_la_serebro_de_la_bebe
====== Un dieta grasosa en ensintia pote altera la serebro de la bebe ======
25 janero 2014
Rexercas en la SUA sujesta ce si un fem ensinta ave un dieta con multe gras, esta pote afeta la developa de la serebro de la bebe e alti sua probablia de obesia en sua vive plu tarda.
Un ecipo a la Scola de Medica de la Universia de Yale ia mostra ce dietas pote cambia la strutur de serebros de muses.
On razona ce esta esplica perce lo es plu probable ce la enfantes de jenitores obesa pote deveni estrema obesa.
Espertas ia dise ce la studia ave valua, ma ce lo no demostra la esiste de alteras en serebros umana.
@T Un diplomata deutx es ferida en un saisi atentada en Iaman
@L aora_oji/2014/un_diplomata_deutx_es_ferida_en_un_saisi_atentada_en_iaman
====== Un diplomata deutx es ferida en un saisi atentada en Iaman ======
29 april 2014
Un diplomata deutx ia es ferida en un atenta suspetada de saisi el en Sanaa, la capital de Iaman.
Fusilores ia atenta obliga la veculo portante la diplomata e un colaboror a para en Hadda, un distrito sude cual conteni multe ambasadas. Cuando la diplomatas ia refusa e ia fuji de la sena, la atacores ia comensa fusili.
On no conose la identia de la fusilores, ma saisis de stranjeres par membros armada de tribus o par combatosas liada a al-Qaidah es comun en Iaman.
La ministreria deutx de esternas ia confirma ce un veculo engranada a cuatro rotas, parteninte a sua ambasada en Sanaa, ia es atacada con fusiles. On ia declara ce la pasajores es secur, ma no ia confirma esce cualcun ia es ferida.
En la mense pasada, du empleadas de la Nasiones Unida ia es saisida en la distrito, ma fortes de securia ia libri los pos poca oras. En febrero, on ia saisi ance un dotor txesce, un deutx, e du otra europeanes.
La plu de persones saisida par tribales es librida sin es ferida, pos un periodo corta de prisonia. Ma los ci es saisida par combatosas fronti un situa min serta.
La grupo jihadiste al-Qaidah en la Penisola Arabi teni ja un instruor sudafrican depos maio 2013. Los teni ancora ance un visconsul saudi ci los ia saisi en 2012. E un empleada de un ambasada irani resta prisonida pos es saisida par combatosas suspetada de al-Qaidah en julio 2013.
@T Un diplomata encontra Machar en Sudan Sude
@L aora_oji/2014/un_diplomata_encontra_machar_en_sudan_sude
====== Un diplomata encontra Machar en Sudan Sude ======
13 janero 2014
On continua negosia un sesaspara en Sudan Sude. Un diplomata spesial de la SUA e otra reconsiliores encontra Riek Machar, la gidor de la rebelores.
La diplomata Donald Booth ia encontra Machar a un loca nonrevelada en la pais.
A pos, el ia dise ce reconsiliores va continua esije la libri de asosiores prisonida de Machar, afin los pote vade a discutes de pas en Itiopia.
Un portavose per la rebelores ia dise ce un sesaspara ta es acordada si on ta libri los.
@T Un diplomata indian acusada parti de la SUA
@L aora_oji/2014/un_diplomata_indian_acusada_parti_de_la_sua
====== Un diplomata indian acusada parti de la SUA ======
10 janero 2014
Un diplomata indian, de ci sua aresta en la SUA ia causa un disputa, ia parti per India.
On ia comanda ce Devyani Khobragade parti de la SUA a jovedi, pos acusas criminal contra el. India ia insiste sur sua imunia.
On ia aresta Seniora Khobragade en New York en la mense pasada, acusante el sur froda de visa e de no paia sufisinte a sua manejor de casa. El ia nega sempre la alegas.
On ia lia el con securipolsos, e ia nudi el per esamina. India ia esije un demanda de pardona per sua umili.
@T Un diplomata irani es fusilida en Iaman
@L aora_oji/2014/un_diplomata_irani_es_fusilida_en_iaman
====== Un diplomata irani es fusilida en Iaman ======
19 janero 2014
Un diplomata irani ia mori en un ataca par fusil en Sana, la capital de Iaman.
Atacores ia fusili Ali Asghar Assadi a tre veses cuando el ia sorti par auto de la casa de la ambasador irani en Hadda, un distrito sude.
On ia prende el a ospital, ma sua feris ia mata el.
La televisa nasional ia dise ce el ia es colpada en peto e ventre, e ia descrive el como "martirida".
@T Un dirijor brasilera de filmas es matada par coteli
@L aora_oji/2014/un_dirijor_brasilera_de_filmas_es_matada_par_coteli
====== Un dirijor brasilera de filmas es matada par coteli ======
3 febrero 2014
En Brasil, Eduardo Coutinho, un dirijor respetada de filmas, ia es matada par coteli a sua casa en Rio de Janeiro.
La polisia crede ce la sinemiste de 80 anios ia es matada par sua fio, sur ci on alega ce el ia ataca alora sua madre ante feri se mesma. La fio e madre es en ospital.
On ia regarda Coutinho como un de la dirijores brasilera la plu grande de filmas atestante. Resente, on ia invita el a la Academia de Artes e Siensas Sinematografial en la SUA.
Jornalistes en Brasil reporta ce sua fio Daniel, ci ave 41 anios, sufri de problemes de sania mental.
@T Un diton de la sculta de Cristo en Rio es danada par lampo
@L aora_oji/2014/un_diton_de_la_sculta_de_cristo_en_rio_es_danada_par_lampo
====== Un diton de la sculta de Cristo en Rio es danada par lampo ======
19 janero 2014
Un colpa de lampo ia dana un de la ditones de la sculta famosa de Cristo la Salvor en Rio de Janeiro.
La diton destra ia es colpada en un tempesta en la note de jovedi. On va repara pronto lo.
La sculta ave 38 metres de altia, e ia es restorada a custa de $4 milion en 2010. Cuasi du milion persones visita lo en cada anio.
En la tempesta de jovedi, Brasil ia rejistra colpas de lampo en un de la cuantias la plu alta de pos la comensa de sua arcivos en 1999.
@T Un dotor cose sua propre gama pos un ataca par selaco
@L aora_oji/2014/un_dotor_cose_sua_propre_gama_pos_un_ataca_par_selaco
====== Un dotor cose sua propre gama pos un ataca par selaco ======
29 janero 2014
Un dotor en Zeland Nova ia usa sua cotel per survive un ataca par selaco, ia cose sua feris, e ia vade final a la taverna per un bir.
James Grant ave 24 anios. En saturdi, el ia es pexante con lansia a la costa sude de la pais cuando (en sua parolas) "alga cosa ia fisa se a mea gama".
El ia coteli la bestia, sur cual el ia suposa ce lo es un selaco, e ia susede forsa lo a via.
A pos, el ia nada a tera e ia cose sua gama con la utiles en un caxa de aida prima.
@T Un dui de la politicores congresal de la SUA es milionores
@L aora_oji/2014/un_dui_de_la_politicores_congresal_de_la_sua_es_milionores
====== Un dui de la politicores congresal de la SUA es milionores ======
12 janero 2014
A la ves prima, un dui de la membros de la Congresa de la Statos Unida es milionores.
En 2012, a la min 268 de la 534 politicistes en la Senato e la Casa de Representores ia ave neta milion dolares o plu.
Democratas ia es pico plu rica ca republicistes.
@T Un dui de la popla suri nesesa es urjente aidada
@L aora_oji/2014/un_dui_de_la_popla_suri_nesesa_es_urjente_aidada
====== Un dui de la popla suri nesesa es urjente aidada ======
16 janero 2014
Ban Ki-moon, la secretor jeneral de la Nasiones Unida, dise ce 9,3 milion persones en Suria -- un dui de la popla -- nesesa es urjente aidada.
El ia parla a un confere de donores en Cuait per promove esta apela, cual es plu grande ca cualce otra par la NU sur un sola tema.
La encontra ia espera recolie $6,5 bilion. Lo ia reseta ja prometes de $2,4 bilion a la fini de mercurdi.
Entretempo, la ministro suordinada de relatas stranjer en Suria ia dise ce departes de securia ueste ia fa discutes con Dimashq sur combate grupos islamiste en la pais. La Rena Unida e la Statos Unida ia nega un tal colabora.
@T Un duple sientolojial sposi en London
@L aora_oji/2014/un_duple_sientolojial_sposi_en_london
====== Un duple sientolojial sposi en London ======
24 febrero 2014
Un duple ia sposi en un egleseta de sientolojia en London, pos gania un apela de Corte Suprema.
Louisa Hodkin ia inisia un caso legal cuando ofisiores ia refusa rejistra la egleseta como un loca de sposi per el e sua prometeda, Alessandro Calcioli.
En desembre, sinco judores de la Corte Suprema ia deside ce la egleseta de sientolojia es "un loca de reuni per adora relijiosa".
Pos la sposi, Calcioli ia dise ce el no pote crede ce la dia ia ariva.
@T Un editor indian es acusada sur viole sesal
@L aora_oji/2014/un_editor_indian_es_acusada_sur_viole_sesal
====== Un editor indian es acusada sur viole sesal ======
18 febrero 2014
En India, on ia acusa la editor pasada de un jornal major de novas sur la viole sesal de un colaboror fema.
On ia acusa Tarun Tejpal ance sur "molesta sesal" e "viole la modestia de un fem".
Tejpal es ja en prison de pos 30 novembre. El nega la acusas.
On no ia nomi sua acusor, ma el alega ce Tejpal ia ataca el a un aveni organizada par la jornal en Goa en novembre.
@T Un eglesa montenegrin mostra Tito, Marx, e Engels en enferno
@L aora_oji/2014/un_eglesa_montenegrin_mostra_tito_marx_e_engels_en_enferno
====== Un eglesa montenegrin mostra Tito, Marx, e Engels en enferno ======
2 febrero 2014
Un eglesa en Montenegro ia crea un controversa par esibi un fresco cual imaji Josip Broz Tito, la gidor comuniste pasada de Iugoslavia, en la focos de enferno con Karl Marx e Friedrich Engels.
On ia critica ja la Eglesa de Revive, nova construida en Podgorica, la capital, per sua desinia lusosa.
Criticores dise aora ce la eglesa debe no interfere en politica.
Obras par la filosofistes Marx e Engles ia es lejes obligada cuando Montenegro ia es un parte de Iugoslavia comuniste.
@T Un eglesor de la Vatican es acusada de lava mone
@L aora_oji/2014/un_eglesor_de_la_vatican_es_acusada_de_lava_mone
====== Un eglesor de la Vatican es acusada de lava mone ======
22 janero 2014
On ia acusa ce un eglesor senior italian ia lava miliones de euros par usa la banco vatican.
Nunzio Scarano es ja prosededa e arestada sur otra alegas ce el ia conspira per contrabanda 20 milion euros ($26 milion) a Italia.
La polisia ia aresta la contor pasada de la Vatican, e du otra persones, en martedi.
En 2013, Pape Fransisco ia crea un encargada per esamina la ativia de la banco, pos un serie de scandales.
@T Un eglesor turces nega inisia investigas sur froda
@L aora_oji/2014/un_eglesor_turces_nega_inisia_investigas_sur_froda
====== Un eglesor turces nega inisia investigas sur froda ======
27 janero 2014
En Turcia, Fethullah Gülen, un eglesor muslim e retirada, ia nega usa sua influe per comensa investigas sur froda de governa.
On regarda Gülen como un competor de Recep Tayyip Erdoğan, la ministro xef turces.
El ia responde a la alega ce el ia comanda sua seguores con postos major en la polisia e la juderia a inisia la investigas.
Gülen es la gidor de la promove de hizmet, un forma tolerante de Islam. Lo asentua la instrui, la altruisme, e la asiduia, e ave miliones de seguores tra la mundo.
@T Un enebriada atenta estingui la flama su la Arc de Triomphe
@L aora_oji/2014/un_enebriada_atenta_estingui_la_flama_su_la_arc_de_triomphe
====== Un enebriada atenta estingui la flama su la Arc de Triomphe ======
16 janero 2014
On ia aresta un om enebriada ci ia atenta estingui la flama eterna su la Arco de Vinse (Arc de Triomphe), un monumento en Paris.
La om ia es arestada a la sera de martedi pos core en dirije a la flama, con un estinguador en sua manos.
La polisia dise ce el ia confesa atenta sutrae la flama.
La flama arde ante la Tomba de la Soldato Nonconoseda, un monumento a los ci ia mori nunca identifiada en la Geras Mundal Prima e Du.
@T Un ensenior SUA es arestada pos un video acusante sur maltrata sesal
@L aora_oji/2014/un_ensenior_sua_es_arestada_pos_un_video_acusante_sur_maltrata_sesal
====== Un ensenior SUA es arestada pos un video acusante sur maltrata sesal ======
4 febrero 2014
On ia aresta un ensenior en California Sude sur alegas de maltrata sesal, pos cuando un studiante pasada ia acusa el en un video a YouTube.
On ia comanda la aresta de Andrea Cardosa, de 40 anios, pos acusa el de sinco atacas sesal a enfantes.
La aresta ia aveni pos cuando la studiante pasada, fema, ia publici un video en cual el ia fronti Cardosa en un telefoni.
Cardos va apare en corte, plu tarda en esta semana.
@T Un eres es acusada de omiside pos un jua disputosa de xace
@L aora_oji/2014/un_eres_es_acusada_de_omiside_pos_un_jua_disputosa_de_xace
====== Un eres es acusada de omiside pos un jua disputosa de xace ======
14 janero 2014
En Er, un om ia apare en corte en Dublin, acusada sur la omiside de un om pos un disputa sur un jua de xace.
Thomas O'Gorman, ci ia ave 39 anios, ia es forte bateda e cotelida a sua casa en Castleknock.
Savario Bellante, ci ave 34 anios, ia es tempora prisonia per un semana. El veni orijinal de Italia, ma el labora en Dublin e ia abita con O'Gorman.
Un polisior ia clari ce Bellante ia dise "Me es culpable" cuando on ia acusa el.
@T Un escluida ruandan es mor en Johannesburg
@L aora_oji/2014/un_escluida_ruandan_es_mor_en_johannesburg
====== Un escluida ruandan es mor en Johannesburg ======
2 janero 2014
Patrick Karegeya, un escluida e la xef pasada de la ajenteria secreta en Ruanda, ia es trovada como mor en un sala de otel en Johannesburg.
On ia sutrae sua coronelia pos cuando el ia disputa con sua aliada pasada, Paul Kagame, la presidente de Ruanda. Kagame ia acusa Karegeya sur envolve en atacas teroriste en la capital, Kigali.
Karegeya ia vive en Africa Sude tra la ses anios pasada. Sua partito ia reporta ce on ia asasina el, ma esta no es confirmada.
@T Un esplode a un protesta tai causa feris
@L aora_oji/2014/un_esplode_a_un_protesta_tai_causa_feris
====== Un esplode a un protesta tai causa feris ======
17 janero 2014
En Bangkok, la capital de Tai, un esplode a un protesta contra la governa ia feri a la min 22 persones.
La protesta ia es gidada par Suthep Thaugsuban, la gidor de la oposores political. El no ia es ferida.
A la min oto persones ia mori de pos la comensa de la protestas en novembre, causada par un projeta controversa de amnestia.
La protestores ocupa ja crusas major de via en la site de pos lundi. Los alega ce la ministro xef, Yingluck Shinawatra, es influeda par sua frate, la gidor desponeda.
@T Un esplode aveni a un fabriceria cimical en Japan
@L aora_oji/2014/un_esplode_aveni_a_un_fabriceria_cimical_en_japan
====== Un esplode aveni a un fabriceria cimical en Japan ======
9 janero 2014
En Japan sentral, a la min sinco persones ia es matada en un esplode a un fabriceria cimical de Mitsubishi Materials.
17 otra persones ia es ferida par la esplode, cual ia aveni en cuando mantenores ia labora sur un intercambiador de caldia, usada en crea produidas de silico.
La compania fabrica produidas per automobiles, per eletronica, e per la industria de construi.
La fabriceria es en Yokkaichi, a 350 cilometres a ueste de la capital, Tokyo.
@T Un esplode aveni en un suburbe de Bayrut
@L aora_oji/2014/un_esplode_aveni_en_un_suburbe_de_bayrut
====== Un esplode aveni en un suburbe de Bayrut ======
2 janero 2014
A la min du persones ia mori pos un esplode forte en un suburbe de Bayrut, la capital de Lubnan. La suburbe es un fortres de la grupo xia jihadiste Hizbullah.
La propre televisa de Hizbullah ia dise ce la esplode ia aveni en un area multe poplida de la distrito Haret Hreik.
La site ia es resente colpada par un serie de atacas liada a tensas altida entre sunis e xias sur la gera suri.
A venerdi, la ministro pasada Mohamad Chattah, un suni e criticiste de Hizbullah, ia es matada par un bomba de auto en la sentro de Bayrut.
@T Un esplode feri 12 enfantes a un scola libi
@L aora_oji/2014/un_esplode_feri_12_enfantes_a_un_scola_libi
====== Un esplode feri 12 enfantes a un scola libi ======
6 febrero 2014
En Libia, des du enfantes ia es ferida en un ataca par granada a un scola en Benghazi. Du de los es en un state grave.
Atestores dise ce algun ia lansa la granada a traversa la mur de un scola privata, en un pausa de lesones.
Benghazi ia esperia un serie de bombis e asasinas en la anio pasada, ma atacas de scolas es rara.
On ancora no sabe ci ia lansa la granada.
@T Un esplode mata du a un fabriceria en Nebraska
@L aora_oji/2014/un_esplode_mata_du_a_un_fabriceria_en_nebraska
====== Un esplode mata du a un fabriceria en Nebraska ======
21 janero 2014
En la SUA, a un fabriceria de comeda per bestias en Omaha en Nebraska, du persones ia es matada par un esplode e la colasa partal de un construida.
Des otras ia es ferida en la esplode a International Nutrition. 19 otra laborores ia susede evade.
Salvores ia labora per stabli la construida ante suspende sua xerca.
On ancora no sabe la causa de la esplode.
@T Un esplode mata nove persones en Pacistan
@L aora_oji/2014/un_esplode_mata_nove_persones_en_pacistan
====== Un esplode mata nove persones en Pacistan ======
6 janero 2014
A la min nove persones, incluinte tre enfantes, ia es matada en un esplode a un casa en la area tribal de Khyber en la norde-ueste de Pacistan.
La esplode ia aveni en un armeria a la casa de Hakim Khan, un gidor tribal en la Vale Tirah.
En anios resente, la area ia esperia batalias ferose, cuando la armada e grupos diversa de gerores ia compete per controla, obligante miles a fuji.
Ofisiores crede ce la loca ia es usada par gerores de Lashkar-e-Islam, per distribui armas.
Un reporta sujesta ce la esplode ia aveni cuando on ia es preparante esplodentes, ma esta no es confirmada.
@T Un esplode mata soldatos en convoia en Pacistan
@L aora_oji/2014/un_esplode_mata_soldatos_en_convoia_en_pacistan
====== Un esplode mata soldatos en convoia en Pacistan ======
19 janero 2014
En Pacistan norde-ueste, a la min 20 soldatos ia es matada par un esplode de bomba cual ia colpa un convoia militar.
24 otras, cisa plu, ia es ferida en la esplode prosima a la vila Bannu.
On investiga ancora la causa de la esplode.
La Taliban pacistani ia dise ce los ia fa la ataca como un parte de "un batalia contra un sistem nonrelijiosa". Los ia promete "multe plu tal atacas".
@T Un esplode matante aveni a un loca de filma en Iran
@L aora_oji/2014/un_esplode_matante_aveni_a_un_loca_de_filma_en_iran
====== Un esplode matante aveni a un loca de filma en Iran ======
9 janero 2014
En Iran, a la min sinco persones ia mori e alga otras ia es grave ferida par un esplode a un loca de filma.
La esplode ia aveni a 35 cilometres a sude de la capital, Tehran, en cuando on ia transporta esplodentes a un xuta de filma sur la gera de Irac e Iran entre 1980 e 1988.
La xef de efetos spesial, alga atores, e membros de la ecipo ia es matada.
On ia usa esplodentes vera par causa de un proibi sur la importa de falsas.
@T Un esplode matante colpa un tren pacistani
@L aora_oji/2014/un_esplode_matante_colpa_un_tren_pacistani
====== Un esplode matante colpa un tren pacistani ======
17 janero 2014
En Pacistan sentral, un tren ia salta de la reles pos un esplode, matante a la min tre persones e ferinte 15.
La tren rapida ia es viajante de Peshawar, un site norde, a Karachi, un porto sude.
La esplode ia colpa lo en la distrito Rajanpur de la provinse Panjab. Lo es ancora nonclar esce lo ia aveni sur la reles o en la tren mesma.
Sete vagones ia salta. Un crater grande ia formi en la ferovia, impedinte la labora de salva.
@T Un estremiste elinica menasa la governa
@L aora_oji/2014/un_estremiste_elinica_menasa_la_governa
====== Un estremiste elinica menasa la governa ======
21 janero 2014
Un fujor elinica ci ia desapare en un asentia permeteda de prison ia menasa la governa con retalia armada. El acusa ce la governa ia ruina la pais con sua medios economial sever.
Christodoulos Xiros, ci on ia condena en 2003 de parteni a Novembre 17, un organiza estrema sinistriste, ia jura ce el va revade a batalia.
El ia es pasante ses periodos de vive en prison per bombis e fusilis.
El ia desapare en janero cuando on ia permete ce el sorti de prison per visita sua familia.
@T Un fali de pila proibi la vola de un avion en Japan
@L aora_oji/2014/un_fali_de_pila_proibi_la_vola_de_un_avion_en_japan
====== Un fali de pila proibi la vola de un avion en Japan ======
15 janero 2014
Airolinia Japan ia proibi la vola de un avion Boeing 787 Dreamliner pos deteta fuma o gases cisa emeteda par un fali en la pila xef.
On ia descovre la problem en fa un manteni normal. Falis de pila ia proibi la vola de tota aviones 787 tra tre menses en la anio pasada.
Boeing ia dise ce lo es consensa de la problem, e ce lo colabora con la airolinia.
La airolinia ia dise ce on ia persepi fuma en la piloteria, e lampas de averti ia flaxi per indica un fali de pila.
@T Un fem condenada a mori en Sudan es librida
@L aora_oji/2014/un_fem_condenada_a_mori_en_sudan_es_librida
====== Un fem condenada a mori en Sudan es librida ======
24 junio 2014
Un fem sudani, ci on ia condena a mori per abandona sua fida muslim, ia deveni librida de prison.
La puni de mori per Meriam Ibrahim ia es canselada par un corte de apela.
El es sposida a un om cristian. En maio, su la lege de xaria, on ia condena el a pende cuando el ia refusa renunsia cristianisme.
Sua sposo, Daniel Wani, ia espeta zelosa vide el, e desira ce sua familia parti de Sudan tan pronto como posible.
Meriam Ibrahim ia pari un fia en prison, no longa pos sua condena. Sua puni ia jenera un coleria internasional.
Sua avocato, Elshareef Ali, ia comenta ce Ibrahim ia mostra "un coraje estracomun" tra sua malesperia.
El ia dise ance: "Lo es un vinse per libria de relijio en Sudan. Nos crede ce nun en futur va sufri tal."
@T Un fem es violeda par gang su comanda de veas de vileta
@L aora_oji/2014/un_fem_es_violeda_par_gang_su_comanda_de_veas_de_vileta
====== Un fem es violeda par gang su comanda de veas de vileta ======
23 janero 2014
En la stato Bangla Ueste en India, la polisia ia aresta 13 persones sur un viole par gang de un fem. On alega ce la viole ia es comandada par veas de vileta ci ia oposa sua relata con un om.
La fem de 20 anios es ospitalida en un state estrema grave.
Cortes nonofisial en viletas indian permete comun la matas de duples sur ci on judi ce los ia rompe regulas local de condui.
On esamina aora plu la violentia sesal en India pos la viole e mata par gang de un studiante en un bus en Delhi en 2012.
@T Un fem polsce vive pos declara de mori
@L aora_oji/2014/un_fem_polsce_vive_pos_declara_de_mori
====== Un fem polsce vive pos declara de mori ======
15 novembre 2014
Un fem polsce ci ia spende 11 oras en la friador de un moreria ia reveni a sua familia, cexante ce el senti fria.
La dotor de la familia ia declara ce Janina Kolkiewicz, ci ave 91 anios, es mor pos esamina el.
Ma empleadas a la moreria ia es stonada de vide moves en sua saco cuando lo ia es en la friador.
A sua casa, Kolkiewicz ia recaldi se con un bol de sopa e du crepes.
La sobrina de la fem, en la vila Ostrów Lubelski en Polsca este, ia clama la dotor pos reveni a casa a un matina e descovre ce sua tia pare no respira no ave un pulsa.
Pos esamina el, la dotor ia scrive sua documnto de mori. On ia prende sua corpo a la moreria e prepara per un funera pos du dias.
Kolkiewicz ia informa sua relatadas ce el senti bon e normal pos reveni a casa.
El no comprende cuanto el ia prosimi a sua tomba, car el sufri de un fase tarda de dementia.
On ia desvalidi sua documento de mori, e la polisia investiga.
@T Un fem reseta un responde a sua mesaje en botela
@L aora_oji/2014/un_fem_reseta_un_responde_a_sua_mesaje_en_botela
====== Un fem reseta un responde a sua mesaje en botela ======
3 janero 2014
Un fem brites, ci ia lansa un mesaje en botela en la Mar Norde a plu ca 20 anios ante aora, ia reseta un responde de Nederland.
Zoe Averianov ia lansa sua nota a 12 setembre 1990 de un naveta, viajante a Beljia per vacanse.
En la periodo de natal, el ia reseta un letera enviada de Europa a la adirije de sua jenitores. El ia espresa sua surprende a la distantia viajada par la mesaje.
La envelopa ia conteni sua letera orijinal e un responde de un duple nederlandes.
La letera orijinal ia dise: "Cara trovor, mea nom es Zoe Lemon. Per favore, scrive a me. Me ta gusta multe acel. Me ave 10 anios e me gusta baletia e la jua de flauta e piano. Me ave un criceto nomida Sparkle e un pex nomida Speckle."
La responde ia dise: "Cara Zoe, ier en un de mea multe paseas con mea sposa longo la paramares de Oosterschelde, regardante entre la dejetada, me ia trova un botela peti de plastica cual ia conteni tua mesaje."
@T Un fem vea australian ia reposa mor tra sete anios
@L aora_oji/2014/un_fem_vea_australian_ia_reposa_mor_tra_sete_anios
====== Un fem vea australian ia reposa mor tra sete anios ======
6 febrero 2014
Un fem vea australian ia reposa mor en sua casa tra sirca sete anios ante cuando on ia descovre sua corpo.
La polisia ia trova Natalie Wood en sua casa en Sydney en julio 2011, e crede ce el ia mori en 2004.
On reporta ce el ia mori cisa pos un cade, ma la cuantia de tempo pasada fa ce lo es nonposible de sabe vera la causa.
El ia nase en 1924, e ia vive eremitin, abrinte sua porte sola pos un bateta de forma spesial.
@T Un ferovia rapida es abrida en Turcia
@L aora_oji/2014/un_ferovia_rapida_es_abrida_en_turcia
====== Un ferovia rapida es abrida en Turcia ======
27 julio 2014
Turcia ia abri un ferovia multe rapida entre Istanbul e Ankara. Esta dui la sete oras nesesada a ante per viaja entre la du sites.
Recep Tayyip Erdoğan ia viaja sur la tren prima de Ankara, e ia para a un vila en via per fa un parla political campaniante.
La ferovia permete ce trenes ateni un rapidia de 250 cilometres per ora.
Erdoğan es un aspiror en la elejes presidental cual va aveni en agosto. El ia promete refresci la rede de transporta en la pais.
La abri de la ferovia ia es ja posponeda per causas diversa, de cual la plu resente ia es la xoca de un tren a un veculo de manteni.
La servi nova va fini en la suburbe Pendik de Istanbul, sur la lado asian de la Streta de Bosforo.
La governa intende construi un otra ferovia nova, su la Bosforo, gidante a la sentro de la site. Ma on no sabe cuando esta va es realida.
@T Un ferovia reabri en Srilanca
@L aora_oji/2014/un_ferovia_reabri_en_srilanca
====== Un ferovia reabri en Srilanca ======
13 otobre 2014
En Srilanca, la Rea de Jaffna, un ferovia popular, va reabri oji. Lo lia la capital, Colombo, a Jaffna en la norde de la pais.
Presidente Mahinda Rajapaksa va inaugura la ferovia renovida, cual ia clui a 24 anios ante aora par causa de la gera interna de Srilanca.
Lo ia furni un lia multe importante entre norde e sude, transportante benes e persones tra la pais.
Multe persones regarda la reabri como un simbol positiva de Srilanca pos gera.
La tren va ofre un esperia nova a la jovenes de Jaffna, de ci multe ia vide nunca un tren.
Tra desenios, tamiles ia usa la servi per viaja de un fini de la isola a la otra, navetinte entre sua viletas de abita en la norde e sua empleas en la sude.
En la gera interna, soldatos governal ia usa la servi per asede la norde. La trenes ia deveni un blanco per ataca cuando los ia pasa tra areas controlada par la rebelores Tigres Tamil.
La gera ia comensa en 1983 e ia mata plu ca 70 mil persones.
Lo ia fini en maio 2009, cuando soldatos de la governa ia recatura la teritorios ultima cual ia rebelores ia saisi.
@T Un filma xines gania la premio Urso de Oro
@L aora_oji/2014/un_filma_xines_gania_la_premio_urso_de_oro
====== Un filma xines gania la premio Urso de Oro ======
16 febrero 2014
A la carnaval internasional de filmas en Berlin, Bai Ri Yan Huo ("Carbon negra, jelo magra"), un filma xines, ia gania la premio Urso de Oro per la filma la plu bon.
Liao Fan ia gania la premio per ator mas la plu bon en la mesma filma. Haru Karoki ia es nomida la ator fema la plu bon per sua rol en Chiisai Ouchi ("La casa peti"), un filma japanes.
Un juria de oto persones deside la premios.
En esta anio, la juria ia es gidada par James Schamus, un dirijor e produor american, ci es cisa la plu bon conoseda per produi la filma Brokeback Mountain.
@T Un filmor ferida en protestas en Rio ia mori serebral
@L aora_oji/2014/un_filmor_ferida_en_protestas_en_rio_ia_mori_serebral
====== Un filmor ferida en protestas en Rio ia mori serebral ======
11 febrero 2014
Dotores dise ce Santiago Andrade es mor serebral. El es un filmor brasilera ci ia es ferida en scaramuxas entre protestores e polisiores en Rio de Janeiro en la semana pasada.
Andrade ave 49 anios e labora per un rede de televisa. El ia sufri un feri de testa en filma un protesta contra altis de costas a la Stasion Sentral de Rio.
On ia debe opera sur sua serebro pos la esplode de un esplodente, parente ensendeda par un protestor, pos sua testa.
On no sabe esce la dotores ia descomuta sua suporta de vive.
@T Un focon dana un vila antica tibetan
@L aora_oji/2014/un_focon_dana_un_vila_antica_tibetan
====== Un focon dana un vila antica tibetan ======
11 janero 2014
Un focon ia dana grave un vila antica tibetan en Xina sude-ueste.
Plu ca 100 casas, jeneral de lenio, ia es destruida en Dukezong en la provinse de Yunnan.
La vila depintin ave 1300 anios. Sua stradas es paveda con petras ronda, e lo es un loca popular per turistes.
On ia estrae multe abitores, e on estima la valua danada como $16 milion.
@T Un focon en un tren indian mata nove persones
@L aora_oji/2014/un_focon_en_un_tren_indian_mata_nove_persones
====== Un focon en un tren indian mata nove persones ======
8 janero 2014
En India, a la min nove persones ia mori en un focon en un tren viajante tra la stato ueste de Maharashtra.
La focon ia comensa en un vagon de clase du, e ia estende pronto a la du vagones visina.
On ancora no sabe la causa de la arde.
La tren ia es la rapida de Mumbai a la site norde de Dehradun.
@T Un focon mata tre persones en un casa de veas en Québec
@L aora_oji/2014/un_focon_mata_tre_persones_en_un_casa_de_veas_en_quebec
====== Un focon mata tre persones en un casa de veas en Québec ======
24 janero 2014
En Canada, a la min tre persones ia mori, e 30 otras manca, pos un focon cual ia destrui completa un casa de veas en Québec.
On ia reporta la focon a sirca 00:30 de ora local. Lo ia aveni en Résidence du Havre en L'Isle-Verte, a 225 cilometres a este de la capital provinsal.
La construida ia ave 52 apartes, abitada par 50-60 persones vea.
Un polisior ia dise ce la salvores espera ancora trova alga persones mancante.
@T Un focon menasa un vileta istorial en Noria
@L aora_oji/2014/un_focon_menasa_un_vileta_istorial_en_noria
====== Un focon menasa un vileta istorial en Noria ======
19 janero 2014
On ia sorti deses de persones de un vileta vea en Noria sude, car un focon menasa sua construidas unica de lenio.
Flamas ia estende rapida pos la comensa de la focon en la note en un casa en Lærdalsøyri, en la area de Lærdal sur la fiordo Sognefjord. Ventas forte ia porta la focon a 10 otra construidas, cisa plu.
1150 persones abita la vileta. A la min 52 es tratada en ospital, ma on ia reporta no moris.
Lærdal conteni un eglesa de palos (stavkirke) e multe otra construidas antica de lenio cual turistes visita frecuente.
@T Un focon svensce esplode botes de pexes putrida
@L aora_oji/2014/un_focon_svensce_esplode_botes_de_pexes_putrida
====== Un focon svensce esplode botes de pexes putrida ======
3 maio 2014
Un focon en un beneria a la costa este de Sveria ia causa ce botes de pexes fermentada ia esplode e vola tra la aira.
Cuando lo ia arde, la construida ia conteni mil botes de surströmming (arenges putrida), un de la comedas la plu malodorosa de mundo.
Cuatro persones dorminte supra la beneria ia evade sin feris.
La focon ia aveni a la matina de jovedi, prosima a la vila Enånger en la area Hudiksvall.
La botes de arenge ia crese ja par causa de la gases potios de fermenta cual los ia conteni. Los ia deveni plu caldida par la focon, e ia esplode tra un periodo de ses oras.
Un de la botes ia vola supra la teto de un latrina, e un otra ia traversa la baia e ia atera a un casa visina. A la comensa, la pompores ia crede ce la esplodes ia es causada par botelas de propano.
Surströmming es un plato tradisional de Sveria norde. On fermenta arenges baltica en bariles tra menses, ante pone lo en botes per continua la fermenta. La odor de la comeda es tan repulsante ce on come comun lo su sielo.
Alga airolinias major ia proibi lo, razonante ce lo es un compresada e donce capas de esplode.
@T Un foto de Djibouti gania un premio
@L aora_oji/2014/un_foto_de_djibouti_gania_un_premio
====== Un foto de Djibouti gania un premio ======
15 febrero 2014
John Stanmeyet, un fotojornaliste de la SUA, ia gania un premio xef per sua imaje de migrores african prosima a la site Djibouti.
La foto, fada su lus de luna, mostra omes ci atenta reseta la sinial de telefoneta de Somalia.
Jillian Edelstein, un de la judores, ia comenta ce la foto mostra ideas de tecnolojia, globali, migra, povria, despera, aliena, e umania.
La Premios de Foto Jornaliste Mundal, judida par un comite de espertas, ia es donada de pos 1955.
@T Un fotografiste vesti controversa un sculta antica
@L aora_oji/2014/un_fotografiste_vesti_controversa_un_sculta_antica
====== Un fotografiste vesti controversa un sculta antica ======
5 agosto 2014
En Italia, un fotografiste ia deveni controversa par vesti un sculta famosa, con eda de 2500 anios, en un tanga leopardin e un boa de plumas ros.
La Bronzes de Riace es du scultas de gerores elinica, e es entre la tesoros arceolojial la plu importante de la pais.
On ia descovre los en la fondo de mar prosima a la costa italian en 1972. Los ia reposa ala tra du milenios. Aora sua state es estrema frajil, e los veni de es delicata restorada.
Gerald Bruneau ia reseta un permete de fa fotos de los en un museo en la site Reggio Calabria en Italia sude.
Ma on ia para sua laboras cuando on ia descovre ce el ia pone vestes nonconveninte sur la obras.
Un politiciste local demanda aora un investiga formal. La idea ce algun ia pote ajunta vestes a los crea consernas sur la cualia de cura cual on furni a la scultas.
La xef de la departe arceolojial ia dise ce on ia dona la permete de fotografi a Bruneau car el ia fa ja un xuta con un velo a la Galeria Borghese en Roma en modo refinada.
La museo no ia sabe a ante ce la fotografiste intende pone vestes nonconveninte sur un de la Bronzes. Empleadas ia interveni tan pronto como posible per para el.
@T Un fugu brasilera veneni du familias
@L aora_oji/2014/un_fugu_brasilera_veneni_du_familias
====== Un fugu brasilera veneni du familias ======
25 otobre 2014
En Brasil sude-este, des-un persones ia deveni sever malada pos come un fugu venenosa.
La grupo de visinas, incluinte cuatro enfantes, ia es ospitalida pos un era en prepara la pex, cual es un de la plu venenosas de mundo.
En minutos, tota la comores ia comensa vomita forte. Ma sinco ia parti ja de ospital.
Fugus es estrema matante. Los conteni un venena capas de causa un paralise sever.
La visinas ia encontra per come media a mercurdi en Duque de Caxias, un site a la costa sude-este de Brasil.
Los ia asembla a un de sua casas, e ia sabe ce los va come un fugu.
Per evita un veneni, on debe prepara la bestia, de cual sua venena es plu matante ca sianido, en modo complicada.
Un dotor a la ospital ia clari ce un de visinas ia crede ce el sabe bon coce lo, ma ce el ia fa un era en la prosede.
La afetadas ia inclui sinco membros de du familias diferente - la familias de Souza e da Silva. Tre de la enfantes da Silva ia es entre la venenidas.
On ia desospitali sinco de la visinas a venerdi. Tre resta su cura intensa, e un de la enfantes es ancora en state grave.
Reportada, un otra adulte e un otra enfante es aora en state stable.
@T Un fusa political colasa en Sudafrica
@L aora_oji/2014/un_fusa_political_colasa_en_sudafrica
====== Un fusa political colasa en Sudafrica ======
3 febrero 2014
Un acorda ia colasa, cual ia ta furni un aspiror negra de presidente a la Alia Democrata (AD), la partito oposante xef en Sudafrica.
La acorda ia es fada en la semana pasada, e ia ta fusa la AD con la partito Agang de Mamphela Ramphele.
On ia nomi dotor Ramphele como aspiror per la vota presidental de esta anio.
Ma, en anunsia la colasa, la AD ia acusa ce Ramphele ia rompe sua promete de es nomida.
@T Un fusilor en un boteca en Maryland mata du persones e se
@L aora_oji/2014/un_fusilor_en_un_boteca_en_maryland_mata_du_persones_e_se
====== Un fusilor en un boteca en Maryland mata du persones e se ======
26 janero 2014
Un om ia fusili a un sentro comersial en Maryland en la SUA, matante du persones ante mata se. Sinco otra persones ia es ferida.
Esta ia aveni a un grupo de botecas en Columbia, un suburbe de la site Baltimore.
La om ia es en un boteca de vestes de patini cuando el ia xuta. El ia mata un om e un fem. Ambos ia es empleadas de la boteca.
La fusilor ia es ja mor cuando on ia trova el prosima a un fusil e muni.
@T Un fusilor mata du en un catedral rusce
@L aora_oji/2014/un_fusilor_mata_du_en_un_catedral_rusce
====== Un fusilor mata du en un catedral rusce ======
9 febrero 2014
Un fusilor ia xuta en un catedral sur la isola de Sakhalin en Rusia este. El ia mata un monce fema e un preor.
Ses otra persones ia es ferida en la aveni. On reporta ce la majoria ia es fusilida a sua gamas, e no ia es grave ferida.
A la sena en Yuzhno-Sakhalinsk, la site xef de la isola, on ia aresta un empleada de un compania de securia privata.
On no sabe la motiva de la om. On dise ce el ave sirca 25 anios.
@T Un gato de la Isolas Canaria es trovada en Scotland
@L aora_oji/2014/un_gato_de_la_isolas_canaria_es_trovada_en_scotland
====== Un gato de la Isolas Canaria es trovada en Scotland ======
1 febrero 2014
On ia trova acaso un gato en un garaje en Aberdeenshire, en Scotland este.
Confondente, sua microtelia de identia indica ce el ia veni de Fuerteventura en la Isolas Canaria.
La familia ci ia descovre el ia prende el a un dotor veterinar. Pos no susede trova la gato en la banco de datos nasional, on ia trova el en un internasional.
Los ia nomi la gato Juanita.
@T Un gidor de rebelores congoles va apare en corte internasional
@L aora_oji/2014/un_gidor_de_rebelores_congoles_va_apare_en_corte_internasional
====== Un gidor de rebelores congoles va apare en corte internasional ======
10 febrero 2014
Bosco Ntaganda, un gidor pasada de rebelores congoles, va apare en la Corte Criminal Internasional en Den Haag en Nederland.
On acusa el de crimines de gera a un desenio ante aora, en la este de la Republica Democrata de Congo.
Ntaganda nega la acusas. El ia sede en la ambasada de la SUA en Ruanda en marto pasada, en cuando la promove M23 de rebelores ia es fendente.
La escuta va aida judores a deside esce on ave atestas sufisinte per prosede el.
@T Un gidor oposante es ferida en un tumulta en Kiev
@L aora_oji/2014/un_gidor_oposante_es_ferida_en_un_tumulta_en_kiev
====== Un gidor oposante es ferida en un tumulta en Kiev ======
11 janero 2014
En Kiev, la capital de Ucraina, alga persones ia es ferida en scaramuxas entre protestores e polisiores de tumulta.
Iuri Lutsenco, un ministro pasada de relatas interna e un gidor oposante, ia es entre la feridas.
La violentia ia es causada par la prisoni de tre ativistes sur un conspira teroriste alegada.
La turba ia aveni en protestas continuante contra la deside par la governa de retira se de un acorda major con la Uni European. En loca, la presidente Victor Yanucovich ia fa un acorda con Rusia en desembre, reduinte grande la preso de importa de gas rusce.
@T Un grupo disentinte de Taliban mata 23 soldatos pacistani
@L aora_oji/2014/un_grupo_disentinte_de_taliban_mata_23_soldatos_pacistani
====== Un grupo disentinte de Taliban mata 23 soldatos pacistani ======
18 febrero 2014
Nawaz Sharif, la ministro xef de Pacistan, ia condena la matas de 23 soldatos, par un grupo disentinte de Taliban, como un crimin "odiable".
A la note de soldi, ativistes ia declara ce los ia mata la soldatos, ci los ia prisoni de pos 2010.
Sharif ia dise ce la moris va fa un efeto negativa a discutes corente de pas con la Taliban.
Negosiores de governa ia cansela un consenta, projetada per lundi, con la Taliban.
@T Un intercambieria major de bitcoin deveni estralinia
@L aora_oji/2014/un_intercambieria_major_de_bitcoin_deveni_estralinia
====== Un intercambieria major de bitcoin deveni estralinia ======
26 febrero 2014
Mt. Gox, un de la ofisias la plu grande de intercambia de bitcoin, ia desapare de la interede.
Lo ia es ja colpada par problemes tecnical, e resente lo ia para tota retiras de mone par clientes, pos persepi lo cual lo ia descrive como "ativia nonusual".
La desapare embarasa suportores de bitcoin, ci ia promove la adota plu vasta de esta mone dijital.
Entretempo, ses otra intercambierias major de bitcoin ia fa un declara juntada en cual los distanti se de la problemes de MtGox.
@T Un investi par Goldman Sachs fronti un oposa dansce
@L aora_oji/2014/un_investi_par_goldman_sachs_fronti_un_oposa_dansce
====== Un investi par Goldman Sachs fronti un oposa dansce ======
1 febrero 2014
En Danmarc, la popla comun ia causa un tempesta political par oposa un scema de vende un parte de un compania publica de enerjia a Goldman Sachs.
Oposores continua ajunta sua nomes a un suplica enlinia cual ia colie ja cuasi 200 000 suscrives.
La alia governante de Helle Thorning-Schmidt, la ministro xef, ia deveni suminada par esta disputa sur Dong Energy.
La membros sosialiste de la governa ia resinia sua postos.
@T Un investigor envolve Rusia en la mori de Alexander Litvinenko
@L aora_oji/2014/un_investigor_envolve_rusia_en_la_mori_de_alexander_litvinenko
====== Un investigor envolve Rusia en la mori de Alexander Litvinenko ======
22 janero 2014
La legiste medical ci investiga la mori de Alexander Litvinenko, un spior rusce, ia dise ce lo pare evidente ce Rusia ia es envolveda.
Avocatos per sua vidua xerca un esplora ofisial de la refusa "legal nonrazonada" par la ministro brites de relatas interna de comanda un investiga publica.
An tal, avocatos de la governa dise ce la deside ia es razonada e legal.
Litvinenko ia es venenida con polonio radioativa en London en 2006, a la eda de 43.
@T Un japanes es arestada per crea fusiles con un primador 3D
@L aora_oji/2014/un_japanes_es_arestada_per_crea_fusiles_con_un_primador_3d
====== Un japanes es arestada per crea fusiles con un primador 3D ======
9 maio 2014
En Japan, on ia aresta un om de 27 anios de prosima a Tokyo, alegante ce el ia posese fusiles creada con un primador de tre dimensiones.
La polisia ia saisi sinco fusiles, de cual du es capas de xuta baletas en modo matante, e ance la primador cual ia produi los. On no ia trova munis usable.
Polisiores ia reata pos cuando Yoshitomo Imura ia esibi sua fusiles en videos enlinia. Esta es la aresta prima de sua spesie en Japan.
Imura ia dise ce el no ia comprende ce primi la fusiles es nonlegal.
La fusil prima creada con un primador 3D ia es xutada en maio 2013 en la SUA, par un grupo ci ia publici enlinia la scemas. La governa SUA ia esije rapida ce on sutrae la scemas de la rede.
@T Un jeneral es matada par embosce en Sudan Sude
@L aora_oji/2014/un_jeneral_es_matada_par_embosce_en_sudan_sude
====== Un jeneral es matada par embosce en Sudan Sude ======
6 janero 2014
Un jeneral de la armada de Sudan Sude ia es matada en combate estra la vila Bor, ocupada par rebelores.
Un convoia cual ia avansa en dirije a Bor ia es multe fusilida en un embosce.
La combate continua tra cuando la grupos oposante encontra la un la otra en Itiopia per atenta acorda un sesaspara.
La governa ia envia un cuantia grande de soldatos refortinte a Bor. 2000 soldatos atenta aora recatura la vila de la rebelores.
La batalias envolve du fortes esperta, car la fortes rebelante inclui ance grupos de soldatos ci ia parteni a la armada en la pasada.
@T Un jeto peti cada en atera en Colorado
@L aora_oji/2014/un_jeto_peti_cada_en_atera_en_colorado
====== Un jeto peti cada en atera en Colorado ======
6 janero 2014
Un jeto privata ia cade en atera a la airoporto de Aspen, en Colorado. La avion ia xoca la atereria en un clima jelada.
Un de la tre persones en la avion ia es matada, e la otra du ia es ferida.
Aspen, un site de sci en la Montes Rocosa, es situada a sirca 160 cilometres a sude-ueste de Denver, la capital de Colorado.
@T Un jornal ugandan nomi 200 omosesales
@L aora_oji/2014/un_jornal_ugandan_nomi_200_omosesales
====== Un jornal ugandan nomi 200 omosesales ======
26 febrero 2014
Un jornal ugandan ia nomi la "200 omosesales major" de la pais, a la dia pos cuando presidente Yoweri Museveni ia suscrive un lege cual severi la punis per persones ge.
La lista ia apare su la titolo "Esposada", provocante consernas sur un panica moral contra persones omosesal.
Governas ueste ia condena la deside de Museveni de aproba la lege.
Uganda es un sosia profonda conserviste do la plu persones oposa omosesalia.
@T Un jornaliste dise ce on ia emplea el per sua capasia de pirati telefonetas
@L aora_oji/2014/un_jornaliste_dise_ce_on_ia_emplea_el_per_sua_capasia_de_pirati_telefonetas
====== Un jornaliste dise ce on ia emplea el per sua capasia de pirati telefonetas ======
28 janero 2014
En Britan, un prosede sur la pirati nonlegal de telefonetas par jornalistes ia oia ce un jornaliste ia revela sua capasia en acel campo en un intervisa de emplea.
Dan Evans ia clari ce on ia ensenia el sur tal pirati cuando el ia labora a la jornal Sunday Mirror ("Miror a Soldi"), e ce News of the World ("Novas de la Mundo") ia enscrive el per acel capasia.
Plu temprana, la ator Jude Law ia oia un alega ce News of the World ia paia un de sua relatadas per esposa informas.
@T Un judor indian dise ce la seso ante sposi es nonmoral
@L aora_oji/2014/un_judor_indian_dise_ce_la_seso_ante_sposi_es_nonmoral
====== Un judor indian dise ce la seso ante sposi es nonmoral ======
6 janero 2014
Un judor en Delhi, la capital de India, ia dise ce la seso ante sposi es nonmoral e contra la prinsipes de cada relijio.
Virender Bhat ia fa sua comentas pos un judi ce la seso entre du adultes pos un promete de sposi no constitui un viole.
La seso ante sposi resta un tabua cultural en India.
En la anio pasada, un corte en Delhi ia dise ce tal relatas es nonmoral e un produida malfamosa de la cultur ueste.
Bhat preside un corte rapida cual trata casos relatada a ofendes sesal contra femes.
@T Un judor pasada en India es acusada de malcondui sesal
@L aora_oji/2014/un_judor_pasada_en_india_es_acusada_de_malcondui_sesal
====== Un judor pasada en India es acusada de malcondui sesal ======
7 janero 2014
Un judor pasada de la corte suprema de India ia resinia como xef de un comite sur diretos umana, pos acusas sur sua malcondui sesal.
Un stajior de lege ia alega ce la judor, A.K. Ganguly, ia menasa sesal el. Ganguly nega forte la alega.
En la mense pasada, un comite de la corte suprema ia investiga la caso e ia dise ce la atesta inisial indica "un condui nonbonvenida" par Ganguly. La corte ia eleje no ata plu sur la caso, car la judor ia jubila.
Ganguly ia refusa comenta sur sua resinia. Ma Soli Sorabjee, la avocato jeneral pasada de India, ia confirma lo, nominte lo "un deside coreta".
@T Un laboror mori en asidente de construi un stadion en Brasil
@L aora_oji/2014/un_laboror_mori_en_asidente_de_construi_un_stadion_en_brasil
====== Un laboror mori en asidente de construi un stadion en Brasil ======
9 febrero 2014
En Brasil norde, un construor ia es matada en un asidente a un stadion cual on construi per la Copa Mundal de futbal. La concurso va comensa en junio.
La om ia es portuges. El ia es colpada a testa en desasembla un gru estra la stadion "Arena da Amazonia" en la site Manaus.
El es la laboror tre ci ia mori en un asidente a acel construeria.
On ia debe desasembla la gru car la labora ala ia es cuasi completa.
@T Un lege saudi proteje laborores de la sielo
@L aora_oji/2014/un_lege_saudi_proteje_laborores_de_la_sielo
====== Un lege saudi proteje laborores de la sielo ======
16 junio 2014
En Arabia Saudi, on ia introdui regulas nova per proteje laborores su sielo de la sol. De aora asta la media de setembre, laborores es proibida de labora su sielo entre mediadia e la ora des-sinco.
La governa saudi dise ce la regulas mostra sua conserna per la bonstate e securia de laborores.
Los ci labora sur petrolio e laborores de repara urjente es esentada de la regula nova, ma sola si on ia introdui medios de aida proteje de la sol.
Companias cual desobedi la proibi va es punida con multas sever o an cluida.
La ministreria de labora ia declara ce lo "labora asidua en furni un ambiente secur de labora cual es imune contra tota periles de taxe".
An tal, alga laborores ia espresa dutas esce on va enforsa la regula. Otras ia teme ce sua salarios va diminui si on redui sua oras de labora.
Catar, un pais visina, ia es forte criticada per obliga ce laborores asian, ci construi la stadiones per la Copa Mundal de futbal de 2022, labora su sielo tra la dia intera. La governa ala ia dise ce lo va adota medios per fa ce sua ambientes de labora deveni plu secur.
@T Un leoneta gida un om a sua madre mor
@L aora_oji/2014/un_leoneta_gida_un_om_a_sua_madre_mor
====== Un leoneta gida un om a sua madre mor ======
13 agosto 2014
En un refuja barati de animales, un leoneta de 15 menses ia gida gardaforestas a la corpo de sua madre mor.
Un gardor ia vide la leoneta ascondeda en la arboretas. Car un leoneta tan joven es normal sempre acompaniada par sua madre, la gardor ia segue el, e ia descovre la corpo sur un colina prosima.
Alora la leoneta ia senta vijilante sua madre asta cuando la gardor ia reveni con ofisiores de foresta e polisiores per prende la corpo a via.
La autopsia ia sujesta ce la madre ia mori en combate con otra animales, cisa un manada de bufalos. El ia ave costelas rompeda e feris interna, e ia mori par emoraje.
Seguente la conta la plu resente de la anio 2010, la parce Gir, en la stato Gujarat, conteni 411 leones asian.
Anshuman Sharma, la Visconservor de Forestas en Gir, ia descrive la condui de la leoneta como "rara" e "multe strana". El ia esperia nunca un tal cosa a ante en sua multe anios de oserva leones.
Sharma ia dise ce leones es conoseda per sua condui sosial: "Los no es simil a canes -- los no presa pedetas con manos, e no secute sua codas. Ma nos crede ce los reconose la umanas ci los vide a cada dia."
La leoneta es aora constante oservada par empleadas de la parce. On previde ce el va junta se a un otra grupo, o cisa un otra leon fema va comensa cura el.
@T Un leopardo core libre en un vila indian
@L aora_oji/2014/un_leopardo_core_libre_en_un_vila_indian
====== Un leopardo core libre en un vila indian ======
25 febrero 2014
Un panica ia saisi la vila Meerut en India norde, do un leopardo core libre.
On ia clui scolas e universias en la vila, cual es situada a du oras par auto de Delhi.
La animal ia entra a un ospital a soldi. On ia securi el en un sala per alga oras, ma lo ia evade final.
On ia posa un cuantia grande de polisiores, e ia clama espertas de viventes savaje per aida catura la bestia.
@T Un libro academial ofendente a indus va es retirada
@L aora_oji/2014/un_libro_academial_ofendente_a_indus_va_es_retirada
====== Un libro academial ofendente a indus va es retirada ======
12 febrero 2014
La compania Penguin India ia acorda retira e destrui tota copias restante de un libro sur induisme par un profesor major american.
La libro La indus: un istoria alternativa par Wendy Doniger ia es la tema de un caso legal en cual on ia alega ce la testo es ofendente per indus.
Detalias de un acorda parente entre la grupo campaniante Shiksha Bachao Andolan e Penguin India ia sirculi enlinia.
La compania ancora no ia comenta.
@T Un limpor baldoni obras de arte moderna
@L aora_oji/2014/un_limpor_baldoni_obras_de_arte_moderna
====== Un limpor baldoni obras de arte moderna ======
21 febrero 2014
Un limpor ia fa la era de baldoni alga obras de arte moderna cual on ia intende esibi en Italia sude.
El ia dejeta jornales e pesos de carton e biscoto cual ia es sperdeda sur un solo. La obras ia es creada par Sala Murat.
Lorenzo Roca de la compania de limpi ia dise ce la limpor -- no nomida -- ia "fa no plu ca sua taxe".
El ia ajunta ce la asecura de sua compania va covre la valua de la arte: sirca 10 mil euros.
@T Un lisca de tera en Japan mata 39
@L aora_oji/2014/un_lisca_de_tera_en_japan_mata_39
====== Un lisca de tera en Japan mata 39 ======
22 agosto 2014
Pluves forte ia impedi la laboras de salva en la provinse Hiroshima de Japan, do un lisca de tera ia mata 39 persones, cisa plu.
La cuantia de persones mancante ia ateni 51 pos cuando polisiores ia intercambia informas con pompores.
Sirca 3000 salvores labora en la area, ma los ia debe pausa sua xercas par causa de la pluve en la note de jovedi.
Pluves deluviante ia obliga ce asta 100 mil persones parti de la area.
On teme ce plu liscas de tera va aveni. Los ia es causada cuando la cuantia de pluve tipal per un mense ia cade en sola 24 dias ante la matina de mercurdi.
Deses de casas en un area abital ia deveni covreda par tera, prosima a un monte.
Un de la matadas ia es un salvor de 53 anios ci ia mori cuando la tera ia lisca denova, pos cuando el ia tira ja alga persones a securia.
Reportas dise ce el ia es matada en cuando el ia teni un enfante joven ci el ia es salvante. Un padre ia es donante sua fio a la salvor, ma ambos ia deveni engolida su la lisca nova.
Un survivor ia descrive la esperia: "On ia persepi un odor vera strana, un odor multe cru e terin. Cuando nos ia abri un fenetra per vide lo cual aveni, la lado intera de la monte ia desende con un ruido crepitante, un ruido tonante.
El e sua sposo ia fuji a no plu ca momentos ante cuando fango ia flue tra sua casa, lasante rocones do los ia veni de dormi.
@T Un maior de Ruanda es condenada per sua rol en jenoside
@L aora_oji/2014/un_maior_de_ruanda_es_condenada_per_sua_rol_en_jenoside
====== Un maior de Ruanda es condenada per sua rol en jenoside ======
19 febrero 2014
Un corte deutx ia condena Onesphore Rwabukombe, un maior pasada de Ruanda, a 14 anios en prison per sua rol en la jenoside en Ruanda en 1994.
On ia judi ce la om de 56 anios es culpable de comanda la matas de sentos de persones en un eglesa en Kiziguro, do los ia xerca refuja.
El abita ja como un refujada political en Deutxland de pos 2002.
Esta ia es la prosede prima sur la jenoside ruanda cual ia aveni en Deutxland.
@T Un maior pasada de Orleans Nova ia aseta sobornas
@L aora_oji/2014/un_maior_pasada_de_orleans_nova_ia_aseta_sobornas
====== Un maior pasada de Orleans Nova ia aseta sobornas ======
13 febrero 2014
On ia deside ce Ray Nagin, la maior de Orleans Nova a la tempo de Siclon Katrina, es culpable sur froda.
El ia aida contratores a oteni miliones de dolares de labora en intercambia per sobornas, viajas sin paia, e otra donadas.
On ia acusa el en janero 2013, e ia trova ce el es culpable sur 20 de la 21 acusas.
Cuando la siclon ia colpa la site en 2005, on ia critica Nagin per fali reali sua projeta de sorti la popla.
@T Un malversa de petrolio sur la stradas de Los Angeles
@L aora_oji/2014/un_malversa_de_petrolio_sur_la_stradas_de_los_angeles
====== Un malversa de petrolio sur la stradas de Los Angeles ======
16 maio 2014
En la SUA, un tubo ia malversa sirca 38 mil litres de petrolio en la stradas de Los Angeles.
Un geser de petrolio ia jeta a un altia de ses metres, covrente un area con longia de cuatro sincis de un cilometre.
On ia clui la tubo de un controleria distante, e ia suca la plu de la petrolio a via ja ante la ora ses de la matina.
Cuatro persones ia reporta problemes de respira, e du ia vade a ospital. Alga companias comersial ia es afetada, e un loca de note ia es vacuida.
La tubo no ia es situada su la tera. Lo ia rompe en la oras temprana de jovedi, prosima a un strada major.
On ave "no atestas vidable" ce petrolio ia entra a la cloacas tempestal de la site, cual porta acua de pluve a la rio. An tal, lo es posible ce alga petrolio ia trova un via su la covrentes de bucos de cloaca en la area.
Ecipores ia usa arena per aida bloci la petrolio fluente, e la departe local de transporta ia aida maneja la problemes de trafica.
@T Un marxa grande en Espania suporta Eta
@L aora_oji/2014/un_marxa_grande_en_espania_suporta_eta
====== Un marxa grande en Espania suporta Eta ======
12 janero 2014
A la min 100 000 persones ia marxa tra la site Bilbao en Espania norde per suporta gerores prisonida euscara, pos la proibi de un protesta.
On ia dona permete sola per un prosegue silente, ma alga protestores ia cria sloganes suportante Eta, la grupo euscara separiste.
Vitimes de violentia par Eta ia dise ce la marxa burla sua sufris.
En la parte final de la anio pasada, la corte suprema de Espania ia comanda ce alga membros de Eta ta es librida de prison. Multe de los ia es condenada par causa de omiside.
La Corte European de Diretos Umana ia judi ce Espania ia ata nonlegal cuando lo ia aplica retroativa un lege cual ia impedi sua libris temprana.
@T Un mascita es atacada en Nijeria
@L aora_oji/2014/un_mascita_es_atacada_en_nijeria
====== Un mascita es atacada en Nijeria ======
9 janero 2014
Fusilores ia ataca un mascita en la stato de Kano en Nijeria norde, matante tre adorores e ferinte 12 otra persones.
La atacores ia fusili a en la mascita, cual es en la vileta abitada par la governor de Kano, Rabiu Musa Kwankwaso.
Sua padre vea ia es en la mascita, ma no ia es ferida.
No grupo ia dise ce lo ia fa la ataca. En pasada, Boko Haram, un grupo islamiste ia fa alga atacas en Kano e otra locas en Nijeria norde.
Violentia entre grupos political competente aveni comun en la periodo ante elejes en Nijeria.
@T Un meteorite recordo colpa la Luna
@L aora_oji/2014/un_meteorite_recordo_colpa_la_luna
====== Un meteorite recordo colpa la Luna ======
25 febrero 2014
Siensistes ia revela sua oserva de un colpa recorda a la Luna.
Astronomistes ia vide la efeto de un meteorite con masa de sirca un dui de ton, cual ia cade sur la surfas lunal en setembre pasada.
Los dise ce la xoca ia jenera un flax tan briliante ce lo ia ta es vidable de la Tera.
Lo es la colpa la plu grande e briliante de sempre cual on ia oserva sur la Luna.
@T Un minibus es colpada par un tren en Ucraina
@L aora_oji/2014/un_minibus_es_colpada_par_un_tren_en_ucraina
====== Un minibus es colpada par un tren en Ucraina ======
5 febrero 2014
A la min 12 persones ia es matada cuando un tren ia colpa un minibus en Ucraina norde-este.
Sinco otra persones ia es ferida, prosima a la vileta Vyry en la area de Sumy.
Jornalisme local reporta ce la tren de pasajores ia tira la minibus tra 300 metres longo la reles.
Multe de los sur la bus ia es studiantes e enseniores revadente a casa pos un dia de scola.
@T Un ministro deutx resinia sur rompe de privatia en un investiga
@L aora_oji/2014/un_ministro_deutx_resinia_sur_rompe_de_privatia_en_un_investiga
====== Un ministro deutx resinia sur rompe de privatia en un investiga ======
15 febrero 2014
Hans-Peter Friedrich, la ministro de cultiva de Deutxland, ia resinia pos alegas ce el ia rompe privatia en un investiga sur pornografia de enfantes.
On suspeta un parlamentor sosial democrata, Sebastian Edathy, sur envolve con tal pornografia. El ia nega esta, ma ia resinia sua posto parlamental.
Friedrich ia es la ministro de internas en la anio pasada, cuando on alega ce el ia informa la partito de Edathy sur la suspeta.
On investiga aora acel esposa alegada.
@T Un ministro indian nega un relata de ama
@L aora_oji/2014/un_ministro_indian_nega_un_relata_de_ama
====== Un ministro indian nega un relata de ama ======
17 janero 2014
Un ministro indian e sua sposa ia dise ce los resta felis sposida, pos cuando un serie de tuitas ia pare revela ce la sposo fa un relata de ama.
Shashi Tharoor e Sunanda Pushkar ia dise ce la "controversia nonconveninte" ia resulta de "alga tuitas nonpermeteda" de sua contas.
An tal, seniora Pushkar ia dise plu temprana a jornales ce la contas de la duple no ia es atacada, e ce el mesma ia envia la tuitas.
@T Un ministro libi es asasinada
@L aora_oji/2014/un_ministro_libi_es_asasinada
====== Un ministro libi es asasinada ======
12 janero 2014
En Libia, la ministro suordinada de industria ia mori pos es fusilida en un visita a Sirte, sua vila de nase, a este de la capital, Tripoli.
Fusilores nonconoseda ia "jeta baletas" en dirije a Hassan al-Droui, prosima a un mercato sentral.
Esta es la asasina prima de un membro de la governa tempora de Libia. On ancora no sabe la motiva.
Libia ia sufri multe de atas criminal pos la despone de Muammar Gaddafi en otobre 2011.
@T Un ministro libi survive un atenta de asasina
@L aora_oji/2014/un_ministro_libi_survive_un_atenta_de_asasina
====== Un ministro libi survive un atenta de asasina ======
30 janero 2014
En Libia, la ministro tempora de relatas interna ia survive un atenta de asasina el en la capital, Tripoli.
Al-Sidik Abdul-Karim ia es en via a un encontra cuando sua auto ia es fusilida par atacores nonidentifiada.
Plu temprana en janero, Hassan al-Droui, la ministro suordinada de industria, ia es matada par fusili -- la asasina prima de un membro de la governa tempora.
Libia ia sufri un anarcia estrema de pos la despone de Muammar Gaddafi en otobre 2011.
@T Un ministro nederlandes pasada mori en sua garaje
@L aora_oji/2014/un_ministro_nederlandes_pasada_mori_en_sua_garaje
====== Un ministro nederlandes pasada mori en sua garaje ======
12 febrero 2014
Autoriosas en Nederland ia comensa un investiga sur la mori de Els Borst, un ministro pasada de sania, de ci un de sua amis ia trova sua corpo en un garaje.
Borst ia ave 81 anios. En 2001, el ia aida la aseta de leges par cual Nederland ia deveni la pais prima de legali eutanasia.
Siensistes legal no ia pote dise perce el ia mori, ma la polisia ia dise ce on no suspeta un crimin.
Borst ia es un academiste medical. El ia servi como ministro de 1994 a 2002.
@T Un ministro negra en Italia demanda un reata contra razisme
@L aora_oji/2014/un_ministro_negra_en_italia_demanda_un_reata_contra_razisme
====== Un ministro negra en Italia demanda un reata contra razisme ======
16 janero 2014
La sola ministro negra de la governa italian ia demanda plu suporta, en cuando el tolera atacas raziste, nonviolente ma nonsedente.
Cecile Kyenge, ci ia nase en Congo, supravide la taxe de integra comunias de migrores en la sosia italian plu vasta. Oposores destriste ataca frecuente el.
El ia dise: "La politica debe sta unida per condena la razisme, per evita ce lo deveni un arma perilosa capas de mata la democratia."
@T Un ministro venezuelan reata sur froda polisial
@L aora_oji/2014/un_ministro_venezuelan_reata_sur_froda_polisial
====== Un ministro venezuelan reata sur froda polisial ======
12 janero 2014
En televisa en Venezuela, la ministro de relatas interna ia publici sua numero personal de telefoneta. El ia prea ce polisiores ta clama direta el per reporta casos de froda en la polisia.
Miguel Rodriguez ia dise ce la elimina de froda es la sola modo par cual la polisia pote regania la fida de la popla.
On dise ce la froda polisial es un razona per la cuantia multe alta de omisides en Venezuela.
La comentas de Rodriguez segue un coleria publica sur la fusili resente de Monica Spear. La rea pasada de belia e sua sposo ia es fusilida en sua auto ante sua fia de sinco anios, ci ia es ferida.
@T Un misionor demanda pardona per sua "crimines" en Corea Norde
@L aora_oji/2014/un_misionor_demanda_pardona_per_sua_crimines_en_corea_norde
====== Un misionor demanda pardona per sua "crimines" en Corea Norde ======
28 febrero 2014
En Corea Norde, un misionor prisonida de Corea Sude ia apare ante jornalistes per leje un declara en cual el ia demanda publica un pardona per "crimines contra la stato".
Baptiste Kim Jong-uk, ci ave 50 anios, ia dise ce on ia aresta el pos cuando el ia entra tra Xina con materias relijiosa en otobre.
Ativias relijiosa es restrinjeda en la Norde, e on ia aresta multe misionores en la pasada.
A veses, persones stranjer ci on ia aresta en Corea Norde ia confesa publica, ma a pos los ia clari ce la stato ia menasa los.
@T Un momia en America Sude ia es ritual sacrifiada
@L aora_oji/2014/un_momia_en_america_sude_ia_es_ritual_sacrifiada
====== Un momia en America Sude ia es ritual sacrifiada ======
28 febrero 2014
Rexercores ia descovre ce un momia fema en America Sude, nonidentifiada a ante, ia es matada en un sacrifia ritual.
Siensistes ia analise la cranio e ia trova indicas de un trauma a la testa cual sujesta ce la fem ia es colpada e ia mori multe rapida.
Plu, un analise de sua ADN ia revela ce el ia sufri de un infeta parasital cual on nomi la maladia de Chagas.
Sua sintomes ia indica ce no ia ta survive tra un tempo longa an si el ia ta evade sua matores.
@T Un monce italian pari sin sabe ce el es ensinta
@L aora_oji/2014/un_monce_italian_pari_sin_sabe_ce_el_es_ensinta
====== Un monce italian pari sin sabe ce el es ensinta ======
18 janero 2014
Un monce ci ia pari un bebe-xico en la site Rieti en Italia sentral ia dise ce el no ia sabe ce el es ensinta.
On ia freta la fem, ci ave 31 anios, a ospital con doles adomenal. El ia suposa ce los es mera crampos de stomaco.
La madre veni orijinal de Salvador. On reporta ce el ia nomi sua bebe Fransisco, como la pape presente.
@T Un monumento en Sahara es vidable de spasio
@L aora_oji/2014/un_monumento_en_sahara_es_vidable_de_spasio
====== Un monumento en Sahara es vidable de spasio ======
23 janero 2014
En la deserto Sahara, a 16°51'53.748"N 11°57'13.362"E, on trova la contorno de un avion dirijeda a Paris. Imajes de lo en fotos de satelite ia sperde virusin.
Lo es un monumento a un vola cual ia ariva nunca.
En 19 setembre 1989, un avion franses ia es viajante a Paris de Brazzaville en la Republica de Congo cuando un bomba ia esplode lo supra la deserto. Tota la 156 pasajores e 14 ecipores ia es matada.
Do la avion ia cade, la familias de la vitimes ia construi un monumento durante. Un silueta de la avion, de grandia natural, reposa en un sirculo de petra oscur, ensircada par 170 mirores rompeda. A la punto norde, un ala de la avion sta protendente.
@T Un "mor" velia en un moreria cenian
@L aora_oji/2014/un_mor_velia_en_un_moreria_cenian
====== Un "mor" velia en un moreria cenian ======
10 janero 2014
Autoriosas en Cenia ia comensa un investiga pos cuando un om, ci on ia declara como mor, ia velia en la moreria de un ospital a la dia seguente.
Laborores de la moreria de la ospital de Naivasha ia fuji xocada cuando la corpo ia move e ia comensa respira.
Paul Mutora ia atenta mata se par engoli insetiside. On ia declara el como mor a la note de mercurdi.
La mediciste xef ia dise ce on ia trata el con un droga cual ia lenti sua batetas de cor, e ce esta ia causa cisa la era.
@T Un multa enorme per un sicliste japanes ci ia mata par colpa
@L aora_oji/2014/un_multa_enorme_per_un_sicliste_japanes_ci_ia_mata_par_colpa
====== Un multa enorme per un sicliste japanes ci ia mata par colpa ======
31 janero 2014
En Japan, un corte ia comanda ce un sicliste paia 47 milion ienes (cuasi un dui de milion dolares american) en compensa a la familia de un fem vea ci el ia mata par colpa.
La om de 46 anios ia colpa la fem de 75 a un pasaje de traversa per paseores.
La judor ia dise ce el vole ce la caso presenta un esemplo a otra siclistes ce bisicles pote mata.
Tokio ia esperia un alti grande en sua cuantia de siclistes en anios resente.
@T Un nijerian reseta flajelis per atas ge pasada
@L aora_oji/2014/un_nijerian_reseta_flajelis_per_atas_ge_pasada
====== Un nijerian reseta flajelis per atas ge pasada ======
16 janero 2014
Un om nijerian ia reseta 20 flajelis pos cuando un corte muslim en Bauchi, un site norde, ia condena el sur ofendes omosesal.
Su lege muslim, cortes pote puni atas ge par un bombarda matante con petras.
Ma la judor ia dise ce el ia considera ce la om muslim, Mubarak Ibrahim, de 20 anios, ia fa la atas a sete anios ante aora, e ce el ia para ja la pratica.
En Nijeria, atas omosesal es nonlegal su lege muslim e lege secular, e on ia aumenta la restrinjes.
@T Un ofisior major es desempleada pos un froda elejal
@L aora_oji/2014/un_ofisior_major_es_desempleada_pos_un_froda_elejal
====== Un ofisior major es desempleada pos un froda elejal ======
2 janero 2014
On ia desemplea un ofisior major xines en relata a un scandal grande de froda elejal. Tong Mingqian ia condui nonatendente e ia fali maneja coreta la casos de soborna.
Plu ca 500 legores en la provinse Hunania ia resinia en la semana pasada, cuando on ia descovre ce los ia aseta sobornas per eleje parlamentores provinsal.
La presidente Xi Jinping ia jura per batalia la froda en la Partito Comuniste.
@T Un om bisicli sur un autovia pos era de telefoneta
@L aora_oji/2014/un_om_bisicli_sur_un_autovia_pos_era_de_telefoneta
====== Un om bisicli sur un autovia pos era de telefoneta ======
26 febrero 2014
En Britan, un om ia bisicli tra alga cilometres sur un autovia xef a sude-ueste de London, car sua telefoneta ia furni dirijes falsa a el.
Motoristes ia vide el sur sua bisicle en la banda de crise, a media de la ora de presa a la matina de martedi.
El ia dise ce el ia xerca un via plu corta de reveni a sua casa pos labora.
La polisia ia comenta ce, an pos la era de la telefoneta, el ia debe para ante entra a la autovia.
@T Un om es matada pos envia mesajetas en un sinema de Florida
@L aora_oji/2014/un_om_es_matada_pos_envia_mesajetas_en_un_sinema_de_florida
====== Un om es matada pos envia mesajetas en un sinema de Florida ======
15 janero 2014
En un sinema en Florida, un polisior jubilada ia mata un otra membro de la vidores pos un disputa sur mesajetas.
Curtis Reeves, ci ave 71 anios, ia fusili pos demanda a plu ca un ves ce la om direta ante el para envia mesajetas.
Chad Oulson ia esplica ce el comunica con sua fia, ci ave tre anios. El ia mori en ospital. El ia ave 43 anios.
La du omes, acompaniada par sua sposas, ia es en la sinema de Wesley Chapel, a norde de Tampa, en lundi.
@T Un om ia come la carne de un otra en la RAS per venja
@L aora_oji/2014/un_om_ia_come_la_carne_de_un_otra_en_la_ras_per_venja
====== Un om ia come la carne de un otra en la RAS per venja ======
13 janero 2014
En la Republica de Africa Sentral, un om ci ia come la carne de un otra om ia dise ce el ia xerca "venja" la mata de membros de sua famillia.
La om, ci nomi se "Mad Dog" (Can Coler), ia es en un fola de cristianes ci ia ataca un muslim en la capital, Bangui.
El ia dise ce el ia es coler car muslimes ia mata sua sposa ensinta, e ance sua sore par sposi e la bebe de esta.
A la min 1000 persones ia es matada de pos la comensa de violentia en la pais en desembre. La pais ave un majoria cristian.
@T Un om noncapas de nada survive 60 oras en la mar de Taiuan
@L aora_oji/2014/un_om_noncapas_de_nada_survive_60_oras_en_la_mar_de_taiuan
====== Un om noncapas de nada survive 60 oras en la mar de Taiuan ======
7 janero 2014
Un om taiuan ia survive 60 oras en mar turbosa, an sin sabe nada.
Tseng Lien-fa ave 42 anios. A venerdi, el ia es sur un plaia cuando ondas grande ia saisi el. El ia ariva final a un otra plaia a distantia de 75 cilometres de la plaia prima.
El ia es pico desidratada, e ia ave ulseras sur sua brasos pos spende un tempo tan longa en acua salosa. El ia come e bevi no cosa tra sua malesperia.
El ia dise ce el ia susede evade un de la ondas, ma ce la onda du ia es plu grande e ia inonda el.
El ia vade a la plaia per catura angiletas, esperante vende los.
@T Un om reclama un parte de Africa per sua fia
@L aora_oji/2014/un_om_reclama_un_parte_de_africa_per_sua_fia
====== Un om reclama un parte de Africa per sua fia ======
16 julio 2014
Un om de la SUA ia reclama un area peti de Africa, car sua fia desira deveni un prinsesa.
Jeremiah Heaton ia viaja de Virginia con un bandera per proclama la area como "la Rena de Sudan Norde".
La area es situada entre Misre e Sudan. Lo conteni 2000 cilometres cuadrida de deserto seca, e lo parteni a no pais.
Heaton dise ce el ia fa demandas ofisial sur la posese de la area a ambos nasiones visina, ma ambos no ia responde.
El descrive como sua fia Emily ia adota "un tono seria" e ia demanda "esce a un dia el va es un prinsesa". Donce sua padre ia rexerca areas de tera nonreclamada e ia descovre esta parte, cual persones local nomi Bir Tawil.
Per selebra la aniversario sete de sua fia, Heaton ia viaja a la area, arivante a 16 junio. El ia planta un bandera desiniada par sua fia en la tera.
El insiste ce sua reclama a la area es valida. Par causa de un disputa teritorial entre Sudan e Misre, Bir Tawil es un de la ultimas de la areas nonreclamada sur la planeta.
Heaton dise ce el intende demanda suporta de la Uni African, razonante ce multe paises, incluinte la Statos Unida, ia es reclamada tra la anios par la ata simple de planta un bandera.
Prinsesa Emily, como sua familia nomi aora el, ia comanda ce sua pais nova deveni un sentro de cultiva. El porta aora sua corona reial a tota tempos.
Ma no sola Misre e Sudan, ma ance la Nasiones Unida, va debe reconose la Rena de Sudan Norde ante cuando el va deveni ofisial la fia de un re.
@T Un om usa un levacarga contra un vendador de xocolada
@L aora_oji/2014/un_om_usa_un_levacarga_contra_un_vendador_de_xocolada
====== Un om usa un levacarga contra un vendador de xocolada ======
21 febrero 2014
Un om en la stato de Iowa en la SUA ia es desempleada pos usa un levacarga per desfisa un bara de xocolada de un vendador falinte.
Robert McKevitt, ci ave 27 anios, ia es laborante en la site Milford cuando esta ia aveni en la autono de 2013.
El ia dise ce el ia pone un dolar en la macina, ma sua bara ia deveni trapida sur un onca.
El ia usa alora un levacarga de cuasi 4000 cilogrames per secute la macina, en dise de sua empleor.
@T Un om xines litiga la governa local sur contamina de aira
@L aora_oji/2014/un_om_xines_litiga_la_governa_local_sur_contamina_de_aira
====== Un om xines litiga la governa local sur contamina de aira ======
26 febrero 2014
Un abitor de la site Shijiazhuang en Xina norde atenta litiga la governa local sur la nivel alta de contamina en la aira.
Li Guixin ia rejistra un cexa a un corte distrital en la provinse Hebei, prosima a Beijing.
El esije ce la ofisia ambiental de la site fa plu per controla la strato de nebla fumosa cual cade comun sur Xina norde en la menses de inverno.
El esije ance compensa finansial, pos spende mone per compra mascas, un purador de aira, e un paseador sur cual el eserse en sua casa cuando la contamina es estrema mal.
@T Un omisidor SUA es fusilida en un prison israeli
@L aora_oji/2014/un_omisidor_sua_es_fusilida_en_un_prison_israeli
====== Un omisidor SUA es fusilida en un prison israeli ======
24 febrero 2014
Fortes spesial de Israel ia mata un prisonida american-israeli par fusili, pos cuando el ia xuta a gardores de prison.
Samuel Sheinbein ia es prisonida per 24 anios per un omiside savaje en 1997 en la SUA.
Pos la omiside, el ia fuji a Israel en un caso cual ia dana relatas entre la SUA e Israel per un tempo corta.
El ia xuta aora tre ofisiores de securia, grave ferinte un de los, e ia bari la entra a la compleso.
@T Un onda de caldia aveni en Australia
@L aora_oji/2014/un_onda_de_caldia_aveni_en_australia
====== Un onda de caldia aveni en Australia ======
15 janero 2014
Australia sude-este esperia un clima estrema calda, con un temperatur de plu ca 40°C en alga areas. On ia averti sur risca de focon a alga savanas.
En Victoria, colpas par lampo ia ensende plu ca 250 focos a la note de martedi. On ia proibi focos tra la stato intera.
En Melbourne, un tenisor e un coliebal a la Abrida Australian ia colasa en la caldia.
La temperatur en la site ia resta supra 30°C tra multe de la note de martedi.
@T Un ospital ganaian debe mostra ce sinco bebes mancante ia mori
@L aora_oji/2014/un_ospital_ganaian_debe_mostra_ce_sinco_bebes_mancante_ia_mori
====== Un ospital ganaian debe mostra ce sinco bebes mancante ia mori ======
28 febrero 2014
En la site Kumasi en Gana, la ministro de sania ia esije ce un ospital produi pronto la corpos de sinco bebes, sur cual la ospital dise ce los ia nase mor.
On ia acusa sete persones de fura o conspira de fura un bebe de la Ospital Enseniante de Komfo Anokye en febrero.
Suwaiba Mumuni, de cual sua bebe es entre la sinco ci manca, ia dise ce el crede ce sua fio vive ancora.
La ospital, la du la plu grande en la pais, ia nega la alega.
@T Un ospital suri es atacada con bomba de auto
@L aora_oji/2014/un_ospital_suri_es_atacada_con_bomba_de_auto
====== Un ospital suri es atacada con bomba de auto ======
24 febrero 2014
Alga persones ia es matada par un bomba de auto en visinia de un ospital de campania en Suria norde, prosima a la frontera con Turcia.
La esplode ia aveni en la vila Atmeh, cual es ocupada par rebelores e conteni un campa per miles de persones deslocada par la gera interna.
On no ia sabe direta ci ia fa la ataca.
En saturdi, tota la Consilio de Securia de la Nasiones Unida ia aproba un deside sur asede a aida umaniste en la pais.
@T Un otel en Somalia es atacada con bombas
@L aora_oji/2014/un_otel_en_somalia_es_atacada_con_bombas
====== Un otel en Somalia es atacada con bombas ======
2 janero 2014
Du bombas de auto ia esplode estra un otel en Mogadishu, la capital de Somalia.
La esplodes ia es segueda par fusilis intercambiada entre fortes de securia e la atacores.
La grupo jihadiste somali al-Shabaab ia es forsada de Mogadishu en 2011, ma ia continua ataca la capital. Lo controla ancora multe areas sude e sentral de la pais.
En la semana pasada, a la min 11 persones, incluinte ses soldatos, ia es matada par un bomba telecomandada en un restorante en la capital.
@T Un otra fem pende de un arbor en Uttar Pradex
@L aora_oji/2014/un_otra_fem_pende_de_un_arbor_en_uttar_pradex
====== Un otra fem pende de un arbor en Uttar Pradex ======
12 junio 2014
En Barat norde, on ia trova un fem de 19 anios ci pende de un arbor en un vileta. Esta es la tal caso tre en semanas resente en la stato Uttar Pradex.
La corpo ia es trovada en la area Moradabad, a tre oras par auto de Delhi. Sua familia ia dise a la polisia ce el ia es sesal violeda. Investigores fa un autopsia.
On ia trova un otra fem, de 44 anios, pendente de un arbor en la stato a mercurdi. La polisia ia dise ce locales ia menasa el per sua vende de distiladas en la area.
Sua familia ia nomi sinco persones, alegante ce los ia viole sesal el, ma la autopsia ia es nonconcluinte.
La viole e mata par gang de du adolesentes fema en la distrito Badaun, a 29 maio, ia renovi un senti de protesta tra la pais contra la violentia sesal. On ia aresta tre atacores suspetada en acel caso, e ance du polisiores sur ci on suspeta ce los ia abandona sua debes e ia conspira criminal.
200 milion persones abita en Uttar Pradex, cual alga ia descrive como la stato falinte la plu grande de mundo.
Narendra Modi, la ministro xef nova de Barat, ia dise ce la proteje de femes debe es estrema importante.
On ia esamina plu la violentia sesal en la pais de pos 2012, cuando un studiante ia es violeda e matada par gang sur un bus en Delhi. Acel caso ia provoca protestas vasta, pos cual la governa ia severi la leges sur violentia sesal en 2013.
@T Un otra zo dansce va mata cisa un jirafa nomida Marius
@L aora_oji/2014/un_otra_zo_dansce_va_mata_cisa_un_jirafa_nomida_marius
====== Un otra zo dansce va mata cisa un jirafa nomida Marius ======
14 febrero 2014
Un otra zo dansce ia dise ce lo va debe cisa mata un de sua jirafas, an con multe protestas pos un ata simil par la Zo de Kobenhavn.
La Zo de Jyllands Park ia dise ce lo va mata la animal per segue la regulas de un program de eleva.
Par un coaveni strana, sua jirafa ave la mesma nom como la jirafa de Kobenhavn: Marius.
La Marius de Kobenhavn ia es matada en soldi an pos un suplica enlinia.
@T Un panica matante a un conserta ginean
@L aora_oji/2014/un_panica_matante_a_un_conserta_ginean
====== Un panica matante a un conserta ginean ======
31 julio 2014
A la min 34 persones ia mori en un panica en Gine, a un conserta per selebra la fini de Ramadan, la mense santa muslim.
La ofisia de la presidente ia declara un semana de lamenta nasional per lo cual lo ia descrive como "un drama trajediosa" a un conserta par Instinct Killers, un grupo rap de la pais.
Lo pare ce tota la mores ia es adolesente. Deses de otra persones ia es ance ferida.
La conserta ia aveni a la sera de martedi sur un plaia en Ratoma, un suburbe norde de la capital, Conakry. Atestores ia reporta ce asta 10 mil persones ia es presente.
Esta no es la aveni prima de esta spesie en Gine. En janero de la anio pasada, ses persones ia es matada sur un otra plaia de la suburbe a un conserta rege.
On ia desemplea aora la xef de la comite governal per divertis.
@T Un partito islamiste sorti de la governa libi
@L aora_oji/2014/un_partito_islamiste_sorti_de_la_governa_libi
====== Un partito islamiste sorti de la governa libi ======
22 janero 2014
En Libia, la Partito de Justia e Construi, la partito du la plu grande en la governa tempora, ia anunsia ce lo no va partisipa plu.
La partitio islamiste ia dise ce sua sinco ministros va resinia pos cuando lo no ia gania suporta sufisinte per un proposa de reproxa Ali Zeidan, la ministro xef.
La ministros inclui los de petrolio, la economia, e casas.
La partito es la ramo political de la Fratia Muslim en Libia.
@T Un partito nasionaliste ungarian asembla en un sinagoga
@L aora_oji/2014/un_partito_nasionaliste_ungarian_asembla_en_un_sinagoga
====== Un partito nasionaliste ungarian asembla en un sinagoga ======
15 febrero 2014
Jobbik, un partito estrema destriste en Ungaria, ia provoca criticas pos organiza un asembla political en un sinagoga pasada en la vila Esztergom.
Grupos iudi ia descrive la aveni en venerdi como "repulsante", disente ce lo "insulta la recorda" de vitimes de la Olocausto.
Gábor Vona, la gidor de la partito, ia insiste ce lo no desira provoca la popla, incluinte la comunia iudi.
La partito es la tre la plu grande en parlamento. Lo fa comun declaras antisemitica.
@T Un pediatriste ia tortura un xica con acua
@L aora_oji/2014/un_pediatriste_ia_tortura_un_xica_con_acua
====== Un pediatriste ia tortura un xica con acua ======
14 febrero 2014
En la SUA, on ia judi ce un pediatriste pasada en Delaware es culpable de tortura sua fia par lege, ci ia ave 11 anios, par teni sua testa su un valva de acua.
Melvin Morse, de 60 anios, ia es condenada de un crimin major e sinco crimines minor.
El ia presenta se como un esperta sur esperias de mori prosiminte en enfantes. El ia scrive libros e ia apare en televisa.
On ia aresta el en 2012 cuando la xica ia fuji e reporta la maltrata.
@T Un perdeda a mar desira revade a Mexico pos 13 menses
@L aora_oji/2014/un_perdeda_a_mar_desira_revade_a_mexico_pos_13_menses
====== Un perdeda a mar desira revade a Mexico pos 13 menses ======
3 febrero 2014
Un mexican, ci dise ce el ia es perdeda en la Mar Pasifica tra plu ca un anio, ia demanda revade a sua pais pos atera en la Isolas Majel.
On ia prende el a Majuro, la capital de la isolas, per un esamina medical.
José Ivan ia parti de Mexico con un ami, per un viaja en barco de fibre de vitro, en desembre 2012. El ia dise ce sua ami ia mori a mar, a alga menses ante aora.
Sua barco ia ariva sur un resife a un isola peti en jovedi. El ia es magrida, ma ia survive sua malesperia de 8000 cilometres par catura pexes, avias, e tortugas con sua manos.
@T Un perdeda de mar reviaja a sua pais
@L aora_oji/2014/un_perdeda_de_mar_reviaja_a_sua_pais
====== Un perdeda de mar reviaja a sua pais ======
11 febrero 2014
Un om de Salvador, ci dise ce el ia spende plu ca un anio perdeda sur la Mar Pasifica, ia comensa sua viaja a sua pais.
José Salvador Alvarenga ia grasia la presidente de la Isolas Majel, do on ia trova el a la fini de janero, ante embarca un avion per Hauaii.
El ia parti de Mexico en un barcon de fibre de vitro en desembre 2012, con un ami ci ia mori en la vaga.
El ia survive par catura pexes, avias, e tortugas con sua manos, e par bevi urina, pluve, e la sangue de avias.
@T Un periodo corta de inverni
@L aora_oji/2014/un_periodo_corta_de_inverni
====== Un periodo corta de inverni ======
6 desembre 2014
Aora oji reposa per un mense, ma lo va comensa denova en janero.
@T Un pex catura un avia volante
@L aora_oji/2014/un_pex_catura_un_avia_volante
====== Un pex catura un avia volante ======
13 janero 2014
Siensistes ia filma un pex african ci catura un rondin volante.
On sabe ce alga spesies de pex catura avias nonmovente per come los, ma espertas dise ce esta es la atesta prima de un pex capas de catura un avia volante.
Pexes Hydrocynus goliath es predores de acua dulse. On conose los per sua dentes grande e estrema agu.
On ia filma la fenomeno a Schroda Dam, un lago artifisial en la provinse Limpopo de Sudafrica.
@T Un polisior afgani ataca du jornalistes e mata un
@L aora_oji/2014/un_polisior_afgani_ataca_du_jornalistes_e_mata_un
====== Un polisior afgani ataca du jornalistes e mata un ======
4 april 2014
Du jornalistes laborante per Associated Press ia es fusilida par un comandor de polisia en Afganistan este. Un de la femes, Anja Niedringhaus, ia mori en la ataca. On reporta ce sua colaboror, Kathy Gannon, es en un state stable.
La ataca ia aveni en la vila Khost, prosima a la frontera con Pacistan, a un tempo cuando Afganistan intensi la securia ante sua elejes presidental a saturdi, respondente a menasas de violentia taliban.
La presidente nova va segue Hamid Karzai, ci governa ja de pos la despone de la taliban en 2001, ma ci la constitui proibi de continua per un periodo tre en segue. On teme ce un froda votal va aveni.
La du jornalistes ia es viajante con un convoia de laborores votal, protejeda par soldatos de securia afgani. La convoia ia es traente caxas de vota de la sentro de Khost a Tani, un distrito a la borda de la vila. La jornalistes ia es en sua propre auto, con un interpretor e un otra jornaliste autonom.
No longa ante la xuta, los ia ariva en un compleso forte gardada. En cuando los ia senta sur la seja retro de la auto, espetante ce la convoia va move denova, un comandor de polisia ia cria "Dio es grande" en arabi e ia fusili a los. El ia sede alora a la otra polisiores ci ia aresta el.
Anja Niedringhaus ia es direta matada. El ia ave 48 anios. El ia es un fotojornaliste deutx e un membro de un ecipo ci ia gania la Premio Pulitzer per sua reportas sur la gera en Irac.
@T Un polisior baraini mori pos un bombi a la aniversario de revolta
@L aora_oji/2014/un_polisior_baraini_mori_pos_un_bombi_a_la_aniversario_de_revolta
====== Un polisior baraini mori pos un bombi a la aniversario de revolta ======
15 febrero 2014
En Barain, a la aniversario tre de la revolta en la pais, un polisior ia mori pos feris de un bomba cual ia esplode en protestas.
El ia es un de du ofisiores ferida par la esplode en la vileta Dair.
Tre plu polisiores ia es ferida par un esplode prosima a la vileta Dih.
La protestores ia onora la tumultas en 2011, cual ia es nurida par esijes per plu diretos e per un fini de prejudis contra la comunia xia ci es la majoria.
@T Un portavose de UKIP ia es un xef de gang de fura persones
@L aora_oji/2014/un_portavose_de_ukip_ia_es_un_xef_de_gang_de_fura_persones
====== Un portavose de UKIP ia es un xef de gang de fura persones ======
4 febrero 2014
On ia revela ce un om, ci ia es la portavose sur la Comunia de Nasiones per UKIP (la Partitio de Autonomia de la Rena Unida), ia es pasada la gidor de un gang de fura persones en Pacistan.
La gang de Mujeeb ur Rehman Bhutto ia fa un fura major de persones en Karachi en 2004, e el ia aseta un paia de rescata de £56 000 en Manchester.
En 2005, el ia confesa ce el es la xef de la gang, e un corte brites ia condena el a sete anios en prison.
UKIP ia comenta ce Bhutto, ci ave 35 anios, ia resinia resente sua membria de la partito.
@T Un presidente deutx pasada es nonculpable de froda
@L aora_oji/2014/un_presidente_deutx_pasada_es_nonculpable_de_froda
====== Un presidente deutx pasada es nonculpable de froda ======
28 febrero 2014
Un corte deutx ia desculpa Christian Wulff, un presidente pasada de Deutxland, de froda.
El ia es un gidor suordinada de la partito conserviste de Angela Merkel, ci ia eleje el per la rol -- xef ritual -- de presidente.
Wulff ia resinia a du anios ante aora sur alegas ce el ia aseta ce David Grönewold, un produor de filmas, paia 720 euros de custas de otel e diverti per el e sua familia en un visita a München en 2008.
On ia alega ce Wulff ia promove alora la labora de Grönewold a companias deutx. El ia risca tre anios en prison.
@T Un presidente pasada averti sur un gera interna en Ucraina
@L aora_oji/2014/un_presidente_pasada_averti_sur_un_gera_interna_en_ucraina
====== Un presidente pasada averti sur un gera interna en Ucraina ======
30 janero 2014
Un presidente pasada de Ucraina, la prima de pos la autonomi de la nasion, ia averti ce la pais es "a la borda de un gera interna".
Leonid Kravchuk ia es la presidente de 1991 a 1994.
El ia recomenda aora ce la parlamento ata con encarga masima en sua debates sur un amnestia per protestores prisonida.
Viktor Yanukovych, la presidente corente, vole dona un amnestia sola si la protestores sorti de construidas ofisial e desasembla sua paradores.
@T Un prete saisida reveni a Frans
@L aora_oji/2014/un_prete_saisida_reveni_a_frans
====== Un prete saisida reveni a Frans ======
1 janero 2014
Presidente François Hollande ia bonveni denova a Frans un prete catolica franses ci ia es saisida e librida en Camerun.
Georges Vandenbeusch ia ariva a un base de aviones prosima a Paris, a un ora temprana de la prima de janero.
Fusilores ia saisi la prete en sua parocia a 17 novembre e ia move el a Nijeria. El ia es librida a 31 desembre per razonas nonclar. La governa franses dise ce on no ia rescati el.
Boko Haram, un grupo jihadiste de Nijeria, ia declara ce lo ia fa la saisi.
Ses otra franseses resta prisonida en Suria e Mali.
@T Un prisonida en Corea Norde demanda per aida american
@L aora_oji/2014/un_prisonida_en_corea_norde_demanda_per_aida_american
====== Un prisonida en Corea Norde demanda per aida american ======
21 janero 2014
Un sitadan american, tenida tra plu ca un anio en Corea Norde, ia parla a jornalistes stranjer, e ia demanda per colabora american per reali sua libri.
Forte gardada par ofisiores de prison, Kenneth Bae ia fa sua confere prima de jornalistes de pos sua prisoni.
El es un corean-american. On ia aresta el en novembre 2012 e ia condena el a 15 anios de labora puninte con manos.
Corea Norde ia dise ce el ia usa sua compania de turisme per formi grupos per despone la governa.
@T Un program vil ataca usores de Apple en Xina
@L aora_oji/2014/un_program_vil_ataca_usores_de_apple_en_xina
====== Un program vil ataca usores de Apple en Xina ======
6 novembre 2014
Un compania de securia enlinia ia averti ce un program vil nova en produidas de Apple afeta xef usores xines.
Palo Alto Networks ia dise ce la program "WireLurker" (Spiafilo), cual infeta la sistemes de opera de computadores de table e aparatos portable, pare ave sua orijina en Xina e infeta xef aparatos ala.
La program sperde sua en otra programes descargada de un boteca esterna de Apple, e pote fura datos. Plu ca 400 programes infetada es ja descargada a plu ca 350 mil veses.
Un dirijor de la compania ia comenta: "WireLurker difere de tota cual nos ia vide a ante en programes vil per iOS e OS X. La tecnicas usada sujesta ce atacores deveni plu refinada en la campo de esplota alga plataformas la plu conoseda de mundo."
WireLurker es capas de envia entre un computador Mac a un aparato portable (un telefoneta o tabletin) tra un corda USB.
Lo pote fura "informas diversa" de aparatos portable cual lo infeta, e lo refresci frecuente se de la servador controlante de la atacores.
Plu, iCloud, la servi de ospitafix de Apple, ia es atacada en Xina en otobre par criminales ci ia atenta fura datos de usores.
Un grupo xines ci monitori la ueb ia dise ce atacores ia intersepi datos, cisa asedente parolas secreta, mesajes, fotos, e listas de persones conoseda. Los crede ce la governa en Beijing ia es culpable.
Ma la governa xines ia nega la alegas, e ia es suportada par China Telecom, un furnor nasionalida de servis de rede, ci ia descrive la acusa como "nonvera e sin funda".
Xina conteni la mercato de telefoneta la plu grande de mundo. En la cuatri de april a junio, Apple ia esperia ala un aumenta par 50% en la cuantia de vendes de sua iPhone.
@T Un proibi a la Asosia Olimpial de India es canselada
@L aora_oji/2014/un_proibi_a_la_asosia_olimpial_de_india_es_canselada
====== Un proibi a la Asosia Olimpial de India es canselada ======
12 febrero 2014
On ia sutrae un proibi contra la Asosia Olimpial de India, permetente ce la pais reveni a la Olimpiales.
La Comite Internasional Olimpial (CIO) ia suspende India per eleje ofisiores acusada sur froda en 2012. Ma en soldi, la Asosia ia fa un eleje nova cual es regardada como justa.
Atletas indian compete ja a la Juas Invernal en Sochi su la bandera de la CIO, ma pote aora compete per sua pais.
Esta es la ves prima de cansela un suspende de un comite nasional olimpial a media de Juas Olimpial.
@T Un proibi contra macistes fema en Barat deveni nonlegal
@L aora_oji/2014/un_proibi_contra_macistes_fema_en_barat_deveni_nonlegal
====== Un proibi contra macistes fema en Barat deveni nonlegal ======
4 novembre 2014
La corte la plu alta de Barat ia judi ce femes debe es permeteda de labora como macistes per filmas.
Un pratica de 59 anios ia proibi femes de deveni macistes, ma ia permete ce los labora como capelores.
Sindicatos ia resiste promoves de permete ce femes macia, disente ce esta ta dana la modo de susta de omes. Ma la corte ia deside ce esta es nonlegal.
Barat ave un de la industrias la plu grande de filma e televisa en la mundo.
Nove femes ia apela a la corte en janero 2013, cexante ce un sindicato potiosa de Bollywood no permete ce los fa labora de macia.
La Corte Suprema ia deside a lundi ce esta pratica es "un prejudi constitual nonpermetable". La judores ia dise: "Nos no vide un razona per proibi un fem de deveni un maciste si el ave la capasia."
La corte ia comanda ce la asosia de macistes e capelores abandona direta sua proibi de macistes fema.
"Nos es en 2014, no 1935," la judores ia comenta. "Tal cosas no pote continua an per un dia."
Un de la apelores, Charu Khurana, ia clari ce el ia aprende macia de un scola en California, ma ce el ia es impedida de labora en Bollywood.
"Me ia labora sur du filmas, ma esta ia es difisil. La sindicatos es forte e veni a la studio per para la filma. Produores es obligada a paia multas. Multe macistes fema desira labora sur filmas. E atores fema ta trova ance ce lo es plu oportun e comfortosa si los es maciada par un fem."
Femes ia es menasada e an bateda en Barat per atenta labora como macistes per filmas.
La plu de femes instruida sur macia fini par labora per galas de moda e anunsias comersial o par macia sposas nova.
@T Un protesta brasilera sur preso de transporta deveni violente
@L aora_oji/2014/un_protesta_brasilera_sur_preso_de_transporta_deveni_violente
====== Un protesta brasilera sur preso de transporta deveni violente ======
7 febrero 2014
Sentos de persones en Brasil ia scaramuxa con la polisia en un protesta contra presos altida per transporta publica.
Viajores dial ia es caturada en la violentia a la Stasion Sentral de Rio de Janeiro, en la ora de presa.
Polisiores de tumulta ia introdui gas lacrimojen per atenta sperde la fola. Ativistes ia lansa petras e bombas de gasolina.
Un filmor es en un state grave en ospital pos sufri un feri de testa.
@T Un protestor rompe un vaso valuosa de Ai Weiwei
@L aora_oji/2014/un_protestor_rompe_un_vaso_valuosa_de_ai_weiwei
====== Un protestor rompe un vaso valuosa de Ai Weiwei ======
23 febrero 2014
En la SUA, un artiste de Florida fronti acusas criminal pos cade intendosa un vaso par Ai Weiwei, un artiste xines oposante.
Maximo Caminero, ci ave 51 anios, ia es acusada sur turba criminal pos rompe la vaso en Miami. Lo ia ave un valua de milion dolares.
El ia informa la polisia ce el ia rompe lo per protesta contra la fato ce la Museo Perez de Arte en acel site no esibi obras de artistes local.
Ai ia dise ce el no suporta artistes ci destrui obras de otras.
@T Un referendo egiptian comensa su securia forte
@L aora_oji/2014/un_referendo_egiptian_comensa_su_securia_forte
====== Un referendo egiptian comensa su securia forte ======
15 janero 2014
Egiptianes ia comensa vota entre securia forte, en un referendo de du dias sur un constitui nova.
La constitui nova pote presenta un via a plu elejes. Lo ta sustitui per la constitui asetada su Mohammed Morsi, la presidente islamiste, a menses ante sua despone par la armada.
La militaria desira un vota forte aprobante per validi la sutrae de Morsi. Sua Fratia Muslim, aora tratada como un grupo teroriste, boicota la vota.
On teme violentia. Corta ante la comensa de vota, un esplode ia aveni prosima a un construida de corte en la distrito Imbaba de Cairo. On ia reporta no matadas.
@T Un referendo suiz favore restrinje migrores
@L aora_oji/2014/un_referendo_suiz_favore_restrinje_migrores
====== Un referendo suiz favore restrinje migrores ======
10 febrero 2014
Lo pare ce un referendo suiz sur reintrodui limitas sever de migra ia ateni un responde favorente, ma par un marjin multe peti.
Sirca 50,5% de votores ia favore abandona un acorda de UE sur la move libre de persones.
Suiz no es un membro de la Uni European, ma ia adota partes grande de sua politica.
La UE ia avisa ja Suiz ce lo no pote eleje sola alga aspetas gustada de la politica.
@T Un rena militar comensa subita en Tai
@L aora_oji/2014/un_rena_militar_comensa_subita_en_tai
====== Un rena militar comensa subita en Tai ======
20 maio 2014
La armada tai ia crea un rena militar a media de un crise political, "per manteni la bonordina sosial".
En la anunsia surprendente, la armada ia reseta ance potias forte per enforsa sua deside.
La militaria ia insiste ce esta no es un colpa de stato. An tal, soldatos ia saisi stasiones de televisa e radio, e ia bloci stradas en la capital, Bangkok.
Esta segue menses de tensas cresente entre la governa e la oposa.
La cambia pote furia suportores de la governa, spesial si on va regarda lo como un colpa de stato. La armada ia fa a la min 11 tal colpas de pos la fini de la monarcia asoluta en 1932.
Soldatos ia entra a la construida xef de governa en Bangkok, cual ia sta nonocupada pos menses de protestas violente par oposores ci vole despone un governa cual los descrive como frodante.
La militaria ia comanda ance un sensura jornaliste per aida "la securia nasional".
On ia comanda protestores oposante e nonoposante a no fa marxas en cualce loca, per preveni combates.
@T Un reporta detalia maltratas de prisonidas par la CIA
@L aora_oji/2014/un_reporta_detalia_maltratas_de_prisonidas_par_la_cia
====== Un reporta detalia maltratas de prisonidas par la CIA ======
2 april 2014
La CIA (Departe Sentral de Securia) ia malgida la governa de la SUA sur la severia e produosia de sua metodos de interoga.
Un reporta secreta de 6300 pajes, par la Senato de la pais, dise ce la CIA ia interoga prisonidas en "locas negra" secreta, usante tecnicas cual on no ia reconose a ante. Estas ia inclui sumerji suspetadas en acua jelin, e bate la testas de prisonidas contra mures.
La descovres relata a la eda de George W. Bush, ci ia es la presidente entre 2001 e 2009.
Ofisiores ci ia regarda la documento ia dise ce la interogas par la Departe ia produi poca informas usosa. Los ia dise ance ce on ia esajera esta informas a pos, afin la program pare plu produosa ca lo es.
La reporta, descriveda en la jornal Washington Post, segue un investiga vasta par la comite de securia de la Senato, cual ia comensa en 2009. La comite va consenta denova en jovedi per deside esce lo va envia un resoma de la reporta a Presidente Barack Obama, per un publici futur.
La jornal alega ce ofisiores xef de la CIA ia comanda la continua de interogas sever, an pos es convinseda ce la prisonidas pote ofre no plu informas. Un ofisior ia dise ce cuasi tota la informas valuosa de Abu Zubaida, un suspetada de al-Qaidah, ia es otenida ante sua tortura a 83 veses con afocas similida.
La reporta ia refere ance a desacordas en la CIA en protesta contra la state cual prisonidas ia debe tolera.
Un portavose per la CIA ia responde ce la Departe ancora no ia vide la varia final de la reporta, e donce no pote fa un comenta ofisial sur sua contenida. An tal, ofisiores presente e pasada ia informa privata la jornal ce la reporta conteni eras de fato e concluis noncoreta.
@T Un reporta sur dejeta de obras de arte ia es esajerada
@L aora_oji/2014/un_reporta_sur_dejeta_de_obras_de_arte_ia_es_esajerada
====== Un reporta sur dejeta de obras de arte ia es esajerada ======
24 febrero 2014
La conservor de un esibi de arte en Italia, do un limpor ia dejeta acaso alga obras, ia dise ce la detalias reportada sur la aveni no es vera.
On ia dise en la semana pasada ce obras fada de jornales e carton ia es baldonida car los ia aspeta como dejetadas.
Ma Ala Roushan, la conservor, ia nega esta, clarinte ce on no ia despaci ja la obras de sua caxas de carton.
El ia dise ce la limpor no ia vide an la obras, e ia crede mera ce el baldoni caxas vacua.
@T Un rocon colpa un tren en Frans
@L aora_oji/2014/un_rocon_colpa_un_tren_en_frans
====== Un rocon colpa un tren en Frans ======
9 febrero 2014
En la Alpes franses, du persones ia es matada cuando un rocon cadente ia fa ce un tren de turistes salta de la reles.
Nove persones ia es ferida, cisa plu.
La tren ia viaja de Nice a la vila Digne-les-Bains, sur un ferovia cual traversa caniones e viadutos a un altia de asta un cilometre supra la nivel de mar.
Fotos de la sena mostra ce la tren de du vagones pende de la reles. Un lado de un vagon es desformida par la rocon.
@T Un rusce ci ama poesia mata sua ami ci ama prosa
@L aora_oji/2014/un_rusce_ci_ama_poesia_mata_sua_ami_ci_ama_prosa
====== Un rusce ci ama poesia mata sua ami ci ama prosa ======
30 janero 2014
En Rusia, un disputa enebriada sur la meritas de formas leteratural ia fini cuando un amor de poesia ia mata un suportor de prosa par coteli el.
On ia acusa un om de 53 anios en Irbit, un vila en la montania Ural, sur la omiside de un otra om, de 67 anios. On dise ce la du ia es amis.
Los ia bevi distiladas en la aparte de la plu vea cuando esta ia dise -- seguente la reportas -- ce sola la prosa es vera leteratur.
On alega ce la plu joven, un ensenior pasada, ia coteli el ante core a via.
@T Un satelite barati ariva en orbita de Marte
@L aora_oji/2014/un_satelite_barati_ariva_en_orbita_de_marte
====== Un satelite barati ariva en orbita de Marte ======
24 setembre 2014
Barat ia susede pone un satelite en orbita sirca Marte, deveninte la pais cuatro cual ia fa esta.
Mangalyaan, un sonda robotal cual es entre la misiones interplanetal la min custosa, va comensa pronto studia la atmosfera de la planeta roja.
Narendra Modi, la ministro xef de Barat, ia dise ce la pais ia ateni "la cuasi nonposible".
Parlante a la sentro de mision en la site Bangalore, el ia comenta: "La probablia no ia favore nos. De 51 misiones atentada en la mundo, sola 21 ia susede. Nos ia vinse."
Sola la SUA, Europa e Rusia ia envia misiones a Marte a ante. Barat es la pais prima cual ia susede a sua atenta prima.
La satelite SUA la plu resente, Maven, ia ariva a Marte a lundi. NASA, la departe SUA de spasio, ia loda sua corespondente barati, la Organiza Barati de Spasio e Rexerca, sur la susede.
De temprana en la matina, siensistes ia senta ante sua monitores, trasante la progresa de Mangalyaan. Multe de los ia es femes, e alga ia es joven.
Scermos jigante supra sua testas ia furni un flue constante de datos. La aclamas prima ia es oiada cuando la satelite ia inisia susedosa sua motor de propulsante licuida, la prima en un serie de moves importante per serti ce lo va es caturada par la gravita de la planeta.
Pos acel, on ia debe espeta tra 20 minutos longa, en cuando Mangalyaan ia desapare a retro de Marte, ultra contata. Final, cuando los ia vide confirma ce la satelite orbita aora la planeta, tota la siensistes ia sta subita per aclama, abrasa e aplaudi.
"Si nosa ecipo de criceta gania un torneo, la nasion selebra," Modi ia dise. "La ateni de nosa siensistes es plu grande."
La sonda va fa fotos de la planeta e studia sua atmosfera. Un gol major es atenta deteta metano en la aira martan. Si on trova lo, lo pote indica ativia biolojial a la surfas -- o, plu probable, prosima su lo.
@T Un scalera rolante mata un fem en Montréal
@L aora_oji/2014/un_scalera_rolante_mata_un_fem_en_montreal
====== Un scalera rolante mata un fem en Montréal ======
31 janero 2014
Un viajor dial ia mori pos cuando sua scarfa ia deveni trapida en un scalera rolante a un stasion de metro en Montréal en Canada.
La fem ia es en sua anios 30.
El ia es mor cuando on ia trova el a la basa de la scalera a la stasion Fabre, en la norde de la site, en la matina de jovedi.
Lo ia pare ce sua capeles ia deveni ance trapida cuando el ia curvi per atenta estrae la scarfa.
@T Un scandal sur un rejistra audio de la ministro xef turces
@L aora_oji/2014/un_scandal_sur_un_rejistra_audio_de_la_ministro_xef_turces
====== Un scandal sur un rejistra audio de la ministro xef turces ======
26 febrero 2014
La ministro xef de Turcia, Recep Tayyip Erdoğan, ia condena coler un rejistra audio cual pare mostra el en parla a sua fio sur asconde somas grande de mone.
El ia dise ce la rejistra secreta, distribuida en redes sosial, ia es "un ataca tradosa".
Lo pare revela Erdoğan demandante ce sua fio Bilal desprende miliones de euros de mone fisical de un casa.
La oposa ia esije la resinia de la ministro xef.
@T Un scema per stabli la euro ia es cisa nonlegal
@L aora_oji/2014/un_scema_per_stabli_la_euro_ia_es_cisa_nonlegal
====== Un scema per stabli la euro ia es cisa nonlegal ======
8 febrero 2014
La corte xef de Europa va considera un medio urjente sur cual on ia dise ce lo ia stabli la euro.
En venerdi, la corte constitual de Deutxland ia dise ce lo es posible ce la scema par la Banco Sentral European de compra obligas finansial es "nonarmoniosa" con la leges de la UE.
Aora, la Corte European de Justia va deside la legalia de la scema, introduida en 2012.
An si la Banco Sentral no ia usa esta potia, sua esiste ia calmi un tumulta en la mercatos finansial de Europa.
@T Un scermo de sol per un rascasielo
@L aora_oji/2014/un_scermo_de_sol_per_un_rascasielo
====== Un scermo de sol per un rascasielo ======
21 maio 2014
On va ajunta un scermo permanente a un rascasielo nova en London per preveni ce la lus cual lo refleta de la sol dana imobilas visina.
En la estate pasada, la brilia de la construida nomida "Walkie-Talkie" (radio de du dirijes) ia fonde veculos parcida e ia causa dana a botecas prosima. La scermo va sustitui per un sistem tempora cual on ia erije pos multe cexas en la anio pasada.
En setembre, en cuando la rascasielo de 37 niveles ia es ancora en construi, botecores en un strada visina ia trova ce la lus refletada ia buli la pinta sur sua imobilas, ia rompe telias, e ia scalda stofas e tapetos de porte.
La brilia e caldia estrema ia dana ance veculos, incluinte un Jaguar, de cual sua miror ladal, sua paneles, e sua insinia ia deveni fondeda.
La posedor de la rascasielo ia paia sirca mil paundes (1,7 mil dolares) a la motoriste, e ia ajunta un scermo tempora a la construida.
On dise ce la erije de la scermo nova no va impedi clientes de comensa usa la rascasielo. La spende no va afeta multe la custa orijinal estimada de construi: 200 milion paundes (335 milion dolares).
@T Un sculta de Mandela ave un coneo en sua orea
@L aora_oji/2014/un_sculta_de_mandela_ave_un_coneo_en_sua_orea
====== Un sculta de Mandela ave un coneo en sua orea ======
23 janero 2014
La governa de Sudafrica ia comanda ce scultores sutrae un coneo de bronze cual los ia asconde en la orea de un sculta de Nelson Mandela.
La sculta ia es desvelida pos la mori de la presidente pasada en desembre.
On reporta ce la scultores ia ajunta la coneo como un suscrive comersial, e per representa la rapidia con cual los ia debe completi la obra.
En africans, la parola per "coneo" es "haas", cual sinifia ance "freta".
@T Un selaco mata un fem nadante a un plaia australian
@L aora_oji/2014/un_selaco_mata_un_fem_nadante_a_un_plaia_australian
====== Un selaco mata un fem nadante a un plaia australian ======
4 april 2014
Un fem ia deveni matada par un selaco cuando el ia nada a un plaia popular en Cimri Sude Nova en Australia. Christine Armstrong ia es nadante entre la molo e la plaia a la vileta Tathra cuando el ia es atacada. El ia ave 63 anios.
La polisia reporta ce sua sposo ia vide la forma de un selaco cual ia pare ave tre o cuatro metres de longia. On ia clui la plaia en cuando barcos e elicotores ia xerca sua corpo, ma un mal clima ia fa ce on abandona la xerca.
La servis de crise ia trova alga restas umana partal, ma on ancora no ia confirma ce los relata a la fem mancante.
La manejor jeneral de la comite local ia dise ce la grupo de nadores de cual seniora Armstrong ia es un membro reuni a la plaia a cada matina per nada asta la molo e reveni. Seniora Armstrong ia nada con un grupo en la matina de jovedi, ma cuando la selaco ia ataca, el ia separa ja de los e ia comensa reveni solitar.
Sua familia ia clari ce el ia nada a la plaia de Tathra tra 14 anios. On ancora no sabe cual spesie de selaco ia ataca el. Un cuantia de tal atacas ia aveni prosima a plaias australian en la menses resente.
En Australia Ueste, la polisia crede ce un om de 38 anios, ci ia desapare en tufa prosima a Perth en la semana pasada, ia es cisa prendeda par un selaco. On ia trova restas umana con indicas de mordes par selaco, ma on no sabe esce estas ia es fada ante o pos la mori.
La governa de Australia Ueste ia comanda resente un mata de selacos, pos ses atacas matante a la plaias de la stato en sola tre anios. On ia instala oncas con tentantes en la acua prosima a la plaias popular de Perth, con intende de fusili cualce selaco con plu ca tre metres de longia. Ma miles de persones ia partisipa en protestas contra esta politica.
@T Un servi de trae condomes en Nairobi
@L aora_oji/2014/un_servi_de_trae_condomes_en_nairobi
====== Un servi de trae condomes en Nairobi ======
15 febrero 2014
Un comersior cenian ia crea un servi de trae condomes per aida combate aides. El dise ce multe persones es tro embarasada per compra los.
Faith Ndiwa ia dise ce la idea ia veni a el pos la mori de alga de sua amis. "La plu de los ia mori de aides car los ia teme compra condomes," el ia clari.
La condomes es usual traeda par motosicle per vinse la conjestas malfamosa de trafica en Nairobi.
Ma en la Dia de San Valentin, on ia usa du limusines, decorada con flores roja, per alga clientes.
@T Un sesaspara de sinco dias comensa en Gaza
@L aora_oji/2014/un_sesaspara_de_sinco_dias_comensa_en_gaza
====== Un sesaspara de sinco dias comensa en Gaza ======
14 agosto 2014
La israelis e la filastinis ia comensa un sesaspara nova de sinco dias en Gaza, acordada a la fini de un sesaspara de tre dias.
Ma an cuando on ia anunsia esta, Israel ia ataca de aira en responde a rocetos sur cual lo alega ce los ia veni xutada de Gaza.
Hamas, cual controla Gaza, ia nega ce sua membros ia lansa esta rocetos a Israel. Lo pare ce no lado ia sufri moris a esta ves.
No plu reportas de violentia ia segue en la note. On previde ce la du lados va continua sua discutes nondireta en Cairo, arbitrada par Misre.
Israel ia comensa sua opera militar en Gaza a 8 julio, atentante para atacas de Gaza.
La filastinis dise ce la sesaspara estendeda va crea un pausa per permete plu negosias. Ma la discutes va es estrema difisil.
La lado filastini desira ce on sutrae la bloci de Gaza. La lado israeli desira ce on desarma intera la teritorio.
Israel ia ocupa Gaza en 1967, e no ia retira sua soldatos e colonistes asta 2005. An tal, lo controla ancora la plu de la fronteras, acua e spasio airal de Gaza. La frontera sude es controlada par Misre.
@T Un sesaspara en Sudan Sude es rompeda
@L aora_oji/2014/un_sesaspara_en_sudan_sude_es_rompeda
====== Un sesaspara en Sudan Sude es rompeda ======
19 febrero 2014
En la stato de Nil Alta en Sudan Sude, batalias ia aveni. Estas es la prima tal atacas de pos la suscrive de un acorda entre la governa e la rebelores en janero.
Ambos lados acusa la un la otra de comensa la violentia en Malakal, la capital de la stato.
La governa dise ce batalias ia aveni en la plu partes de la vila.
La violentia va causa consernas nova sur la securia de campos de petrolio en la norde, cual es la funda de la economia.
@T Un siclon forte prosimi a la sude de Japan
@L aora_oji/2014/un_siclon_forte_prosimi_a_la_sude_de_japan
====== Un siclon forte prosimi a la sude de Japan ======
7 julio 2014
Un siclon potiosa prosimi a Okinawa, un cadena de isolas japanes, portante ventas forte e pluves deluviante.
Siclon Neoguri move a 250 cilometres per ora, ganiante plu potia en cuando lo vade a norde.
On previde ce lo va crese a un tempesta estrema intensa a o ante martedi. Ma probable lo va es min forte ca Siclon Haiyan, cual ia mata miles de persones en la Pilipinas en la anio pasada.
Un portavose de la Departe Meteorolojial de Japan ia dise ce la tempesta va veni la plu prosima a Okinawa a la matina de martedi. El ia averti ce lo pote jenera ondas alta.
On recomenda ce persones es atendente, resta en construidas, e evita fa laboras a estra o viajas nonenesada.
Reportas en la televisa local ia mostra pexores ci tira sua barcos de la acua.
Okinawa es la provinse la plu sude de Japan. Lo conteni bases major de la SUA: sirca 26 mil soldatos SUA ave sua postos ala, su un acorda durante de securia.
@T Un siclon sever bate la costa este de Barat
@L aora_oji/2014/un_siclon_sever_bate_la_costa_este_de_barat
====== Un siclon sever bate la costa este de Barat ======
12 otobre 2014
La bandas esterna de Siclon Hudhud colpa la costa este de Barat, causante danas estendosa e provocante ce 300 mil persones sorti de la area.
La siclon porta ventas de asta 195 cilometres per ora, e es categorida como "multe sever".
Lo ia desradisi ja sentos de arbores e ia tira cordas eletrical a tera en la statos Andhra Pradesh e Orissa.
Du persones es ja matada en Andhra Pradesh, la un per un arbor e la otra par un mur cadente.
On teme ce un ondon de asta du metres de altia pote inonda areas basa, e donce sentos de sentros aidante ia abri en la du statos.
On ia recategori la fortia de la siclon de pos venerdi, e la marina barati e otra ecipos es preparada per aida.
Un siclon simil en 1999 ia mata plu ca 10 mil persones en Orissa, e en otobre de la anio pasada, cisa 500 mil persones ia debe sorti de esta du statos cuando un siclon sever ia pasa a tra.
La costa este de Barat, como ance Bangladex, es costumal colpada par tempestas siclonal entre april e novembre. Los causa comun moris e danas vasta a imobilas.
@T Un soldato fusili colaborores a un base militar SUA
@L aora_oji/2014/un_soldato_fusili_colaborores_a_un_base_militar_sua
====== Un soldato fusili colaborores a un base militar SUA ======
3 april 2014
A un base militar en Texas en la SUA, un soldato ia fusili, matante tre colaborores e ferinte 16 otras, ante mata se.
On no ia confirma ofisial la identia de la suspetada, ma jornalistes ia identifia el como Ivan Lopez. El ia ave 34 anios, e ia sufri de problemes de sania mental.
Un portavose militar ia dise ce on ave ancora no indicas ce la fusilis a mercurdi es relatada con terorisme. El ia ajunta ce la suspetada no ia deveni ferida cuando el ia servi en Irac en 2011, ma ce on ia es evaluante el per deside esce el sufri de angusa pos trauma. On ia es tratante la fusilor per depresa e angusa.
On no sabe esce la ataca ia es preconsiderada. Tota la feridas e matadas es membros de la militaria.
Lopez ia gida un veculo a du construidas a la base e ia xuta ante cuando la polisia militar ia para el. La aveni ia dura tra 15 o 20 minutos. El ia fusili alora sua propre testa con un pistol semiautomata de calibre .45, cual el ia compra en un boteca local.
A la mesma base, Fort Hood, en 2009, un ataca con fusil ia mata 13 soldatos e feri 32. En setembre 2013, on ia condena Major Nidal Hasan a mori per acel ataca.
Hasan ia declara ce el ia xuta per proteje rebelores taliban de soldatos SUA ci ia es a punto de vade a Afganistan. Acel ia es la ataca la plu matante contra un loca militar en la istoria de la SUA.
@T Un soldato indian fusili sua colaborores
@L aora_oji/2014/un_soldato_indian_fusili_sua_colaborores
====== Un soldato indian fusili sua colaborores ======
27 febrero 2014
En Kashmir, un soldato indian ia fusili matante sinco de sua colaborores, ante mata se.
Esta ia aveni en la note de mercurdi a un campa militar a sirca 20 cilometres a norde de la site Srinagar.
On ia comensa un investiga per determina la causa.
Kashmir es divideda en lados manejada par India e Pacistan, ma ambos lados reclama la area intera.
@T Un soldato japanes ci ia refusa sede tra desenios mori
@L aora_oji/2014/un_soldato_japanes_ci_ia_refusa_sede_tra_desenios_mori
====== Un soldato japanes ci ia refusa sede tra desenios mori ======
17 janero 2014
Un soldato japanes ia mori a la eda de 91 anios en Tokyo. Refusante crede ce la Gera Mundal Du ia fini, Hiroo Onoda ia pasa 29 anios en un jungla sur la isola pilipina de Lubang.
On ia convinse final el a emerji pos cuando sua ofisior comandante pasada ia ariva par avion e ia parla con el. Cuando Onoda ia revade a Japan, on ia saluta el como eroe.
El ia es un teninte en la gera, e ia deveni isolida cuando soldatos american ia move a norde.
La soldato joven ia reseta un comanda ce el debe no sede, e el ia obedi tra cuasi tre desenios.
@T Un spior cuban es librida de prison en la SUA
@L aora_oji/2014/un_spior_cuban_es_librida_de_prison_en_la_sua
====== Un spior cuban es librida de prison en la SUA ======
28 febrero 2014
La SUA ia libri Fernando González, un ajente cuban, de prison. El ia completi sua periodo prisonida.
El es la spior du ci on ia libri de un grupo ci ia deveni conoseda como la Sinco Cuban. On ia condena los en 2001 per conspira e otra crimines.
On previde la deporta de González a Cuba en poca dias. El e sua colaborores es regardada como eroes ala.
Avocatos prosedente ia dise ce la sinco ia xerca infiltra bases militar de la SUA, e ia spia sur escluidas cuban ci abita en Florida.
@T Un strada nederlandes lumina se a note
@L aora_oji/2014/un_strada_nederlandes_lumina_se_a_note
====== Un strada nederlandes lumina se a note ======
15 april 2014
Sur un dui de un cilometre sur un autovia en Nederland, on ia desveli marcas de strada cual brilia en la note.
La pinta usada conteni un polvo spesial cual carga se en la dia e relasa lenta un lumina verde per asta oto oras de la note. Con tal linias per indica la strada, on no nesesa lampas.
On proba aora la tecnolojia a la ves prima, e va inisia ofisial lo a un data plu tarda en esta mense. Lo es situada sur la N329 en Oss, a sirca 100 cilometres a sude-este de Amsterdam.
Daan Roosegaarde, un artiste de interata, ia labora sur la idea con Heijmans, un compania nederlandes de injenia sivil. El ia dise: "La governa sutrae lampas a note per conserva mone, e enerjia deveni multe plu importante ca nos ia pote imajina a 50 anios ante aora. Esta strada esiste per securia e per modeli un mundo plu autosustante e plu interatante."
Sua projetas aida la interata de persones e tecnolojia. En la pasada, el ia crea un solo de dansa con lampas discotecal cual prende enerjia de la moves de la pedes de la dansores, e un roba cual deveni diafana cuando la person ci porta lo es stimulada.
El ia dise ance: "Me ia es intera stonada ce nos spende biliones sur la desinia e developa de autos, ma en alga modo la stradas -- cual determina vera la aspeta de nosa ambiente -- es intera imune de acel prosede."
Inisial, la ecipo ia intende ance developa simboles de clima cual ta apare sur la via cuando la temperatur ta ateni un grado spesifada. On ta usa un pinta capas de reata a temperatur per crea simboles jigante en forma de flocos de neva sur la asfalto, per averti persones ce jelo es cisa sur la via. Ma la strada en Oss no inclui esta cualia.
@T Un studiante mata du persones a un scola rusce
@L aora_oji/2014/un_studiante_mata_du_persones_a_un_scola_rusce
====== Un studiante mata du persones a un scola rusce ======
4 febrero 2014
On ia aresta un studiante armada ci ia entra a un scola en Moscva. El ia mata du adultes par fusili, e ia ostaji 20 adolesentes.
La polisia ia dise ce el ia mata un polisior e un ensenior. Un otra polisior ia es ferida par fusili.
La ostajes ia es librida cuando la padre de la studiante ia entra a la scola.
Vladimir Putin, la presidente de Rusia, ia descrive la aveni como "un trajedia". La maior de Moscva ia demanda un resenia de securia a scolas.
@T Un sufisa arabi de adirije de rede comensa funsiona
@L aora_oji/2014/un_sufisa_arabi_de_adirije_de_rede_comensa_funsiona
====== Un sufisa arabi de adirije de rede comensa funsiona ======
4 febrero 2014
Un sufisa per adirijes de rede arabi ia deveni la prima funsionante en un serie de plu ca mil sufisas per nomes nova de dominas major jeneral.
La pajerias prima con adirijes fininte con شبكة. (dise: "punto-xabaca") ia apare enlinia a un dia plu temprana ca intendeda. La sufisa sinifia "ueb".
Asta aora, sola 22 dominas major jeneral ia esiste, incluinte .com e .org, en ajunta a dominas major nasional, como .cn e .es.
Organizores dise ce la sistem esistente ia deveni tro folida, ma criticistes cexa ce la crese va alti custas per companias.
@T Un telon preinca reveni a Peru
@L aora_oji/2014/un_telon_preinca_reveni_a_peru
====== Un telon preinca reveni a Peru ======
17 junio 2014
En Lima, on esibi un telon funeral de Peru antica cual veni de la periodo preinca. Lo ia es redonada de Sveria.
La Telon de Göteborg es multe complicada. Lo conteni plu ca 80 tinjes de blu, verde, jala, e roja, texeda en un motif de 32 imajes.
Lo es un de cuatro stofas antica cual on redona su un acorda intergovernal. Un diplomata svensce ia contrabanda los de Peru a 80 anios ante aora.
Rexercores crede ce la imajes sur la telon ia funsiona como un calendario de saisones cultival. La imajes mostra condores, ranas, gatos, mais, manioca, e persones.
La telon es esibida a la Museo Nasional de Arceolojia, Antropolojia, e Istoria.
On previde la redona de 85 otra stofas ante 2021. Los ia es produida par un sivilia cual ia flori en la penisola Paracas, en la sude-ueste de Peru moderna.
An si la telones ave sirca 2000 anios, los es perfeta conservada, car on ia entera los en arena seca, fria, e salosa de deserto, tal protejente los como osijen e lus ultravioleta cual ta dejenera los.
@T Un tempesta de jelo move norde en la SUA
@L aora_oji/2014/un_tempesta_de_jelo_move_norde_en_la_sua
====== Un tempesta de jelo move norde en la SUA ======
13 febrero 2014
Un tempesta sever jelante ia crea un caos en la SUA sude e move per bate aora la costa este.
Plu ca 350 000 persones ia perde eletrica, e on ia cansela 3000 volas par causa de jelo e ventas forte.
On ia reporta stradas cuasi vacua, car multe persones ia obedi la recomendas de resta en casa.
Carolina Norde e Virginia prepara per asta 30 sentimetres de neva en cuando la tempesta vade a norde.
@T Un tempesta de neva ariva en Canada
@L aora_oji/2014/un_tempesta_de_neva_ariva_en_canada
====== Un tempesta de neva ariva en Canada ======
15 febrero 2014
Un tempesta jigante de inverno ia avansa a Canada este, pos causa conjestas de trafica, canselas de aviones, e eliminas de eletrica a la costa este de la SUA.
On ia previde ce an 60 sentimetres va cade en alga areas ante la fini de venerdi, soflada par ventas forte, de Québec a Newfoundland.
En Québec, autoriosas ia clui 200 cilometres de la Autovia Transcanadian.
On culpa la tempesta per la moris de plu ca dudes persones.
@T Un tempesta de neva en la sude profonda de la SUA
@L aora_oji/2014/un_tempesta_de_neva_en_la_sude_profonda_de_la_sua
====== Un tempesta de neva en la sude profonda de la SUA ======
30 janero 2014
En la sude profonda de la SUA, miles de persones ia spende la note sur autovias, en scolas, o en eglesas, par causa de un tempesta de neva.
Airoportos e stradas ia es cluida, e sinco statos ia declara states de crise.
La militaria ia envia veculos per aida motoristes trapida e persones ci ia nesesa comedas e acua.
No plu ca 7,6 sentimetres de neva ia causa un caos en un area usual calda, do multe sites ave no scopinevas e no camiones salinte.
@T Un tempesta de neva mata sete persones en la SUA
@L aora_oji/2014/un_tempesta_de_neva_mata_sete_persones_en_la_sua
====== Un tempesta de neva mata sete persones en la SUA ======
20 novembre 2014
On previde ce un plu metre de neva va cade sur partes norde-este de la SUA. Ier, un tempesta grande ia mata a la min sete persones en la stato de New York.
Alga partes de la site Buffalo es ja covreda su 1,5 metres de neva, e alga persones es trapida en sua autos tra un dia e un dui.
Andrew Cuomo, la governor de New York, ia descrive la tempesta como "un aveni istorin".
Temperatures jelante ia continua en multe partes de la pais, disturbante multe la capasia de viaja.
Ventas forte e jelo ia causa asidentes de autovia e ia obliga alga scolas a clui.
En New York, plu ca 100 membros de la Garda Nasional ia es enviada per aida desnevi la vias e move veculos abandonada.
La Servi Nasional de Clima ia dise ce alga locas ia rompe cisa la recordo de cuantia de neva cadente en un dia. La recordo es 1,93 metres.
Servis de tren en partes de New York ia es suspendeda a mercurdi, e estendes longa de vias prosima a Buffalo ia es cluida.
En ajunta a la moris en New York, on ia reporta ance du moris relatada a la neva en New Hampshire e Michigan.
La clima ia mata sirca 20 persones tra la SUA de pos saturdi.
Tre pompores en Indiana ia es ferida cuando un otra veculo ia colpa sua camion sur un strada covreda con neva.
@T Un tempesta enorme colpa Xina sude
@L aora_oji/2014/un_tempesta_enorme_colpa_xina_sude
====== Un tempesta enorme colpa Xina sude ======
21 julio 2014
La siclon la plu grande en Xina sude en 40 anios ia mata 17 persones, pos causa moris e danas en la Pilipinas.
Silcon Rammasun ia mata a la min oto sur la isola Hainan, do otra persones manca ancora, e ia mata nove en la area Guangxi.
Lo ia ariva de la mar a venerdi. Sua venta ia esede 200 cilometres per ora.
Plu temprana en la semana, a la min 94 persones ia es matada cuando la siclon ia bate la parte norde de la Pilipinas.
La tempesta afeta ance Vietnam, do on previde pluves forte ante un debili a lundi.
En Xina, la trafica de aira, ferovia e strada ia es suspendeda.
Canales televisal ia mostra stradas sur cual la venta ia sperde multe detrito, incluinte arbores desradisida e tetos de casas.
@T Un tempesta puxa tre galegos en la mar
@L aora_oji/2014/un_tempesta_puxa_tre_galegos_en_la_mar
====== Un tempesta puxa tre galegos en la mar ======
7 janero 2014
On ia comensa un xerca a la costa norde-ueste de Espania, pos cuando un onda jigante ia puxa tre persones de la mesma familia en la mar.
Un om, sua frate, e du de sua fias ia es engolida par la onda cuando los ia pasea a la plaia rocosa en Valdovino en Galisia.
Un fia ia susede trepa denova a la plaia. On ia prende el a ospital.
Jose Antonio Vigo, la maior local, ia dise ce, en xerca la tre persones mancante, on usa un barcon e un avion de un sentro de salva en Corunia.
La xerca es difisilida par la clima tempestosa, cual crea ondas con 10 metres de altia e ventas de 80 cilometres per ora.
@T Un trematera forte colpa Xina sude-ueste
@L aora_oji/2014/un_trematera_forte_colpa_xina_sude-ueste
====== Un trematera forte colpa Xina sude-ueste ======
4 agosto 2014
Xina ia envia 2500 soldatos a Yunnan, un provinse sude-ueste, pos un trematera cual ia mata sentos de persones.
A la min 381 persones ia mori e plu ca 1800 ia es ferida par la aveni a soldi.
La trematera de grandia 6,1 ia es la plu forte cual ia aveni en la provinse montaniosa en 14 anios.
Soldatos xines con detetadores de vive e aparatos de escava vade a la area per aida con la laboras de salva.
Los va junta se a plu ca 300 polisiores e pompores de Zhaotong e sirca 400 laborores de crise e canes detetante de la provinse intera.
Li Keqiang, la ministro xef, vade ance a la area.
12 mil casas ia es destruida e sirca 30 mil ia es danada. La governa ia envia 2000 tendas, 3000 letos pliable, 3000 covreletos, e 3000 jacones a la zona de desastre.
Ma los ci atenta trae la furnis encontra problemes en ateni la loca, par causa de un pluve nonsesante e liscas de tera cual ia dana multe la vias.
La trematera ia es focada a sola 10 cilometres su la area Zhaotong en la norde-este de Yunnan.
@T Un trematera major colpa Txile
@L aora_oji/2014/un_trematera_major_colpa_txile
====== Un trematera major colpa Txile ======
2 april 2014
Un trematera con grandia 8,2 ia colpa Txile norde, matante a la min sinco persones e creante un peril de tsunami. La trema ia aveni a 20:46 de ora local (23:46 UTC) a sirca 86 cilometres a norde-ueste de Iquique, un area de escaverias.
Alga partes de Txile ia vide ondas con altia de asta 2,1 metres, e la pais ia esperia rompes de eletrica, focones, e liscas de tera.
On ia sorti deses de miles de persones de la areas pertinente, do on ia declara ance un state de crise. Multe conjestas de trafica ia aveni en cuando persones ia atenta parti.
Ofisiores ia dise ce la mores inclui persones craseda par mures colasante e alga matadas par atacas de cor. Plu, Gonzalo Prieto, la governor de Iquique, ia informa jornalistes ce alga persones ia es grave ferida.
La governa ia reporta no danas major a areas costal, ma alga casas de adobe ia es destruida en Arica, un site de porto. La trema ia secute ance construidas moderna en Peru e en La Paz, la capital alta de Bolivia, a plu ca 470 cilometres de Iquique.
La trema ia es segueda par oto replicas, cisa plu, incluinte un con grandia 6,2.
Un de la vias xef estra Iquique ia deveni blocida par detrito cual ia cade. La ministreria de internas dise ce liscas de tera ia aveni ance entre la vilas Putre e General Lagos, e ce 300 prisonidas fema ia evade un prison en Iquique. On ia envia un avion de soldatos spesial per preveni saisi benes de botecas.
Michelle Bachelet, la presidente de Txile, va viaja a la area colpada.
@T Un tren de petrolio arde en Canada
@L aora_oji/2014/un_tren_de_petrolio_arde_en_canada
====== Un tren de petrolio arde en Canada ======
9 janero 2014
En New Brunswick en Canada, un tren cual transporta petrolio e propano arde ancora pos salta de la reles en la note de martedi.
On ia sorti plu ca 100 abitores de Plaster Rock, un vileta prosima, a la note pos la salta de 15 vagones e un locomotiva.
Ofisiores usa elicotores per descovre la estende de la focon.
Un otra salta de la reles en Quebec ia mata 47 persones en julio 2013, e, en desembre, un tren de petrolio ia esplode en Dakota Norde en la SUA.
@T Un tubo ucrainsce de gas esplode
@L aora_oji/2014/un_tubo_ucrainsce_de_gas_esplode
====== Un tubo ucrainsce de gas esplode ======
18 junio 2014
En Ucraina, un tubo major cual porta gas de Rusia a la resta de Europa, ia es colpada par un esplode.
On ia pote vide flamas erutante de la Linia Transibirsce en Ucraina sentral. Nun ia es ferida par la esplode.
La causa no es clar, ma la servi nasional de crise de Ucraina ia dise ce lo ia pare es la resulta de un creve o un perde de presa. An tal, la ministrerias de enerjia e internas ia dise ce lo ia es cisa un ataca terroriste atentada.
Companias european e rusce ia dise ce la problem no ia afeta esportas de gas a la Uni European.
En lundi, Ucraina ia anunsia ce Rusia ia sesa furni gas a la pais, pos un disputa sur paias.
Sentos de vives es ja perdeda en la provinses de Ucraina este, do rebelores prorusce es bataliante soldatos governal pos sua declara de autonomia a pico plu ca un mense ante aora.
@T Un usor de Google Glass apare en corte
@L aora_oji/2014/un_usor_de_google_glass_apare_en_corte
====== Un usor de Google Glass apare en corte ======
17 janero 2014
On ia abandona la caso contra un fem ci ia apela pos es multada per gida un auto en cuando el ia usa un oculo Google Glass.
Cecilia Abadie ia reseta un multa per vade tro rapida e per porta la oculo intelijente a 30 otobre.
Un lege californian proibi ce motoristes regarda televisa cuando los gida veculos. Ma, en jovedi, un comisionor de corte en San Diego ia judi ce el ia trova no atesta ce la aparato ia es funsionante a la tempo.
Abadie, ci developa programes de ueb e telefoneta ia dise ce la oculo no impedi la vide de gidores.
@T Un varia nova de gripe avial
@L aora_oji/2014/un_varia_nova_de_gripe_avial
====== Un varia nova de gripe avial ======
5 febrero 2014
Espertas es consernada sur la estende de un varia nova de gripe avial cual ia mata ja un fem en Xina.
La fem, de la Site da Nanchang, ia ave 73 anios, e ia developa la virus pos visita un mercato de avias cultivada vivente. Ma on no sabe serta esce esta ia es la fonte de sua infeta.
Un person du ia deveni ance infetada en la provinse de Jiangxi.
Siensistes ia dise ce on debe no suestima la posible ce la virus ta deveni un pandemica.
@T Un veculo spasial de Virgin Galactic esplode
@L aora_oji/2014/un_veculo_spasial_de_virgin_galactic_esplode
====== Un veculo spasial de Virgin Galactic esplode ======
1 novembre 2014
Richard Branson ia promete continua sua projeta de turisme spasial, an pos cuando un de sua veculos ia cade matante en la deserto de California.
Un pilote ia mori e la otra ia es grave ferida cuando la veculo SpaceShipTwo ["Barcon Spasial Du"] de Virgin Galactic ia esplode ier.
La fundor de la Grupo Virgin ia dise ce el es "xocada e tristida", ma el ia insiste ce el va continua con viajas spasial.
La veculo ia es en vola de proba cuando lo ia esperia lo cual ia compania ia descrive como "un anomal grave".
Ofisiores de la Comite Nasional SUA de Securia de Transporta comensa oji sua investiga, cual va dura probable tra alga dias.
Branson ia dise ce Virgin Galactic va colabora completa con la autoriosas investigante la desastre. El ia clari ance ce el mesma vola a California, descrivente esta como "un de la viajas la plu difisil cual me ia fa a cualce tempo".
"La spasio es difisil -- ma lo merita la labora," el ia ajunta. "Nos va ostina e progresa unida."
Charles Bolden, la xef de NASA, la organiza spasial de la SUA, ia vosi sua propre xoca a la desastre: "La dole de esta trajedia va es sentida par tota la omes e femes ci ia dedica sua vives a esplora. La vola spasial es noncredable difisil, e nos loda la pasion de tota en la comunia spasial ci emprende riscas per avansa la fronteras de la susedes umana."
En la semana presente, esta ia es la asidente du per un compania comersial de spasio en la SUA .
A martedi, un roceto nonabitada nomida Antares ia esplode corta pos sua lansa de Virginia. Lo ia porta cargas a la Stasion Spasial Internasional.
Virgin Galactic es un competor major en la industria nasente de turisme spasial, e en otobre Branson ia dise ce el previde ce sua veculo va ateni la spasio suorbital pos alga menses.
Plu ca 800 persones ia paia o depone ja per un viaja en SpaceShipTwo, a custa de sirca $200 mil per person.
@T Un video causa la resinia de un aidor de la ministro xef de Elas
@L aora_oji/2014/un_video_causa_la_resinia_de_un_aidor_de_la_ministro_xef_de_elas
====== Un video causa la resinia de un aidor de la ministro xef de Elas ======
3 april 2014
Un aidor major de Antonis Samaras, la ministro xef de Elas, ia resinia sur un rejistra video en cual el pare acusa sua xef de influe un investiga criminal.
En la video, Panayiotis Baltakos conversa con un portavose de Aurora de Oro, un partito estrema destriste, sur la aresta de sua gidores en setembre. La partito acusa ce la governa, un alia gidada par conservistes, persegue lo per razonas political. Un ministro ia rejeta la acusa como un fantasia.
La video es no sola embarasante per la governa, ma ance un plu atesta ce la autoriosas judinte de Elas no es nondependente, e ce la caso contra Aurora de Oro no es intera solida.
A la vota jeneral la plu resente, en junio 2012, Aurora de Oro ia gania 7% de votas, en cuando la partito Democratia Nova de Samaras ia gania 30%.
Ilias Kasidiaris, la portavose de Aurora de Oro, ia es un de sete parlamentores de la partito ci on ia aresta en setembre de la anio pasada, su acusa de parteni a un grupo criminal. El ia es librida a pos. El ia es en parlamento a mercurdi per oposa un proposa de sutrae sua direto parlamental de nonprosede -- ma on ia sutrae esta esenta de el e cuatro otra parlamentores de sua partito.
Kasidiaris ia publici la rejistra de sua conversa con Baltakos, per suporta sua declara ce la partito ia deveni un vitim political. En la video, Baltakos dise ce la gidores de Aurora de Oro ia es prisonida pos un comanda par ministros de la governa, e ce la autoriosas ia posese no atestas contra la partito.
En anunsia sua resinia, Baltakos ia clari ce sua comentas ia es intendeda sola per pasi ofisiores de Aurora de Oro ci ia acusa el de conspira contra los.
@T Un volcan en Ecuador eruta con un plumon jigante
@L aora_oji/2014/un_volcan_en_ecuador_eruta_con_un_plumon_jigante
====== Un volcan en Ecuador eruta con un plumon jigante ======
6 april 2014
En Ecuador, un volcan prosima a sude de la capital, Quito, ia eruta. Lo ia crea un plumon spetaculin de sene, con altia de 10 cilometres.
La volcan Tungurahua ia emete la nube jigante a venerdi, en un eruta cual ia dura tra sola sinco minutos.
La volcan eruta de tempo a tempo de pos 1999, ma lo ia deveni spesial ativa en la du menses pasada.
Tungurahua es un de oto volcanes ativa en Ecuador, cual es situada en la Anelo de Foco en la Mar Pasifica.
@T Un volcan indonesian eruta matante
@L aora_oji/2014/un_volcan_indonesian_eruta_matante
====== Un volcan indonesian eruta matante ======
2 febrero 2014
Un volcan ia eruta sur Sumatera, un isola indonesian. Lo ia mata 14 persones, cisa plu, e sua sene ia engoli viletas.
En un serie de erutas en la matina de saturdi, Monte Sinabung ia vomi gas calda, sene, e rocas a un altia de 2 cilometres en la aira.
Tre scolores e un ensenior es entre la mores.
En setembre, on ia move miles de persones a via cuando la monte ia eruta pos dormi tra tre anios. A venerdi, on ia permete ce multe revade a sua casas.
@T Un volcan japanes mata 30 paseores
@L aora_oji/2014/un_volcan_japanes_mata_30_paseores
====== Un volcan japanes mata 30 paseores ======
28 setembre 2014
Salvores ia trova 30 paseores sin vive, prosima a la apico de Monte Ontake, pos un eruta volcanal ier.
La paseores no ia respira e sua cores ia sesa. La confirma final de moria en Japan veni sempre par esamina medical.
Sirca 250 persones ia es trapida sur la inclinas, ma la plu ia desende secur.
La volcan, a ueste de Tocio par sirca 200 cilometres, ia eruta subita a saturdi, ejetante sene e rocas.
Normal, la monte es un loca popular per regarda la folias de autono.
En cuando la labora de xerca ia intensi oji, ofisiores ia dise ce los vole trova la 30 persones ancora mancante.
Plu temprana, elicotores militar ia leva sete persones de sur la monte, e salvores sur pede ia aida ance otras a desende.
An si Japan es un de la nasiones la plu sismica ativa de mundo, nun ia perde sua vive par causa de un eruta volcanal de pos 1991, cuando 43 persones ia mori a Monte Unzen en la sude-ueste.
On no ia clari perce la eruta a saturdi ia aveni sin averti. Japan oserva atendosa sua volcanes, e si cualce mostra indicas de ativia, lo es direta cluida de paseores. Ma acel no ia aveni a esta ves.
@T Un vota presidental en Costa Rica
@L aora_oji/2014/un_vota_presidental_en_costa_rica
====== Un vota presidental en Costa Rica ======
3 febrero 2014
En la vota presidental de Costa Rica, la aspiror de la partito governante ia pare gida, seguente la contas la plu temprana.
A un punto, Johnny Araya de la Partito de Libri Nasional ia ave 36% de la votas, en cuando Luis Guillermo Solís, un sentriste, ia ave 21%, e José María Villalta, un sinistriste, ia ave 17%.
Araya ia promete distanti se de la governa scandalosa de presidente Laura Chinchilla. El ia es la maior de San José, la capital tra 20 anios, e ia promete redui la povria.
Si no aspiror vinse intera, on va fa un vota nova a 6 april.
@T Un xef de Google demanda reformas plu grande de la NSA
@L aora_oji/2014/un_xef_de_google_demanda_reformas_plu_grande_de_la_nsa
====== Un xef de Google demanda reformas plu grande de la NSA ======
28 janero 2014
Un empleada major de Google ia dise ce la stratejia de presidente Barack Obama per restrinje spiores a la NSA (Departe de Securia Nasional) no sufisi.
David Drummond, la ofisior legal xef de Google, ia dise ce la SUA nesesa cambia sua disposa sur securia per restora la fida sur la interede.
Sua comentas es entre la primas par persones major en la mundo de tecnolojia pos un parla sur la tema par la presidente, plu temprana en janero.
Entretempo, Edward Snowden ia fa sua intervisa televisada prima. El ia dise ce la NSA spia sur companias deutx cual compete con companias american.
@T Un xica afgani revela sua malesperia de es un bomba umana
@L aora_oji/2014/un_xica_afgani_revela_sua_malesperia_de_es_un_bomba_umana
====== Un xica afgani revela sua malesperia de es un bomba umana ======
13 janero 2014
Un xica afgani ia dise ce sua familia ia obliga el a ataca un posto de controla de polisia en la provinse Helmand.
El ia dise ce sua frate e padre ia bate el, comandante ce el apone un jaceta de bomba.
On ia prende el a cura protejente en Lashkar Gah, la capital provinsal, pos cuando un soldato afgani ia vide ce el porta la jaceta en lundi pasada.
El ave sirca des anios. El ia apela a presidente Hamid Karzai per un abita nova.
Un portavose per la presidente ia dise ce on va redona la xica a sua relatadas sola si la membros major de sua tribu garantia sua securia.
@T Un xica arjentina ia es prisonida en un garaje tra cuasi un desenio
@L aora_oji/2014/un_xica_arjentina_ia_es_prisonida_en_un_garaje_tra_cuasi_un_desenio
====== Un xica arjentina ia es prisonida en un garaje tra cuasi un desenio ======
18 april 2014
La polisia en Arjentina dise ce los ia salva un xica de 15 anios ci sua jenitores adotante ia fami, bate, e prisoni en un garaje tra nove anios.
El ia pesa sola 20 cilogrames, e ia dise ce on ia nuri el con sola pan e acua tra sua prisonia. Sua sola acompaniores ia es un can e un simia. El ia dise ce on ia bate el con un sintur si el ia atenta come la comedas restante cual on ia lansa a la animales.
On ia aresta sua adotores e acusa los de sclavia e maltrata.
La adolesente ia es trovada en Buenos Aires, la capital de la pais, par un de sua frates biolojial ci ia perde trasa de el.
La xica ia dise ce el ia sorti de la garaje a sola du veses en nove anios. El es aora en ospital.
Seguente ofisiores, sua jenitores adotante ia adota tempora la xica en 2001, pos cuando un corte ia judi ce sua jenitores biolojial -- ci ia ave ance sete otra enfantes -- no ia es finansial capas de cura el.
Prima, la du familias ia resta en contata, ma lo cual ia aveni pos 2005 no es clar. On ance no sabe perce la familia biolojial de la xica ia perde trasa de el.
La jenitores adotante ia es espetante la completi de la paperes formal de adota.
@T Un xica de cuatro anios fusili asidental sua cusin
@L aora_oji/2014/un_xica_de_cuatro_anios_fusili_asidental_sua_cusin
====== Un xica de cuatro anios fusili asidental sua cusin ======
18 janero 2014
En la SUA, un xica de cuatro anios ia fusili e mata sua cusin, ance de cuatro anios, en un asidente trajedin e evitable.
La enfantes ia jua en la casa de sua avo en Detroit en la posmedia de jovedi. La xica ia trova un fusil cargada su un leto. La xico ia es fusilida a la peto a un ves.
La polisia investiga esce los debe acusa. On no ia sabe direta ci ia posese la fusil.
La sola adulte en la casa a la tempo ia es un ami de la familia.
@T Un xica japanes confesa mata un otra
@L aora_oji/2014/un_xica_japanes_confesa_mata_un_otra
====== Un xica japanes confesa mata un otra ======
30 julio 2014
Un xica japanes ci on ia aresta a soldi ia confesa ce el ia mata e desmembri un otra xica en sua clase. La polisia ia dise ce el ia confesa "desira mata algun" e desmembri un corpo.
Japan ia esperia alga matas de enfantes par enfantes. Un caso simil ia aveni en la mesma site, Sasebo, a des anios ante aora.
En la caso presente, la corpo de Aiwa Matsuo -- ci ia ave 15 anios -- ia es trovada en la casa de la suspetada en la matina temprana de soldi. Sua jenitores ia clama la polisia cuando el no ia reveni a casa.
La suspetada no pote es nomida, car el es un enfante, ma el ave 16 anios. A la note de saturdi, el ia revade con la vitim a sua propre casa, do el ia abita sola de pos april. Ala, el ia colpa la retro de la testa de Matsuo con un util e ia strangula el con un corda.
On ia trova la vitim con sua testa e mano sinistra taliada a via, e con sua ventre abrida par talia. La polisia ia trova un martel e un siera a la casa.
Lo pare ce la suspetada ia publici ance alga mesajes sur un foro de interede, incluinte fotos de un mano sanguosa. Esta mesajes ia comensa a sirca du oras pos la mori de Matsuo.
La suspetada ia ave un istoria de problemes. Sua madre ia mori de canser en la anio pasada, e sua padre ia resposi resente. El mesma ia es preparante per studia estra pais. Aora on va fa un evalua psiciatrial sur el.
@T Un xico de 5 anios descovre un problem de securia de Microsoft
@L aora_oji/2014/un_xico_de_5_anios_descovre_un_problem_de_securia_de_microsoft
====== Un xico de 5 anios descovre un problem de securia de Microsoft ======
5 april 2014
Un xico de sinco anios ia descovre un problem de securia en la servi Xbox Live de Microsoft. La compania ia grasia formal el.
Kristoffer Von Hassel, de San Diego en California, ia trova un metodo de entra a la conta de sua padre sin la parola secreta. Microsoft ia coreti la defeto e ia ajunta Kristoffer a sua lista reconoseda de rexercores sur securia.
Pos cuando la xico ia tape un parola noncoreta a la scermo prima de identifia, la sistem ia mostra un scermo du simil. El ia trova ce si el fa no plu ca tape multe spasios per la parola secreta a la scermo du, la sistem ia permete ce el entra a la conta.
En un intervisa en sua televisa local, Kristoffer ia dise: "Me ia deveni nervosa. Me ia pensa ce mea padre va trova lo cual me ia fa. Me ia pensa ce algun va fura la Xbox."
Sua padre Robert, ci labora en la campo de securia, ia envia la detalias a Microsoft.
La compania ia dise: "Nos escuta sempre nosa clientes, e nos grasia los cuando los mostra problemes a nos." Lo ia dona a Kristoffer ance cuatro juas, 50 dolares, e un enscrive a Xbox Live per un anio.
@T Un xoca de bus e camion mata 18 en Arjentina
@L aora_oji/2014/un_xoca_de_bus_e_camion_mata_18_en_arjentina
====== Un xoca de bus e camion mata 18 en Arjentina ======
8 febrero 2014
A la min 18 persones ia es matada en Arjentina cuando un bus ia colpa un camion cual ia viaja a mal lado de un autovia.
La colpa ia aveni en cuando la bus ia prosimi a la site ueste de Mendoza.
On reporta ce la camion, con placa brasilera, ia es furada e gidada a rapidia alta.
Un video fada par un otra gidor mostra la camion viajante sur la lado noncoreta de la autovia 7, a alga minutos ante la xoca.
@T Usores de XP fronti la fini de suporta par Microsoft
@L aora_oji/2014/usores_de_xp_fronti_la_fini_de_suporta_par_microsoft
====== Usores de XP fronti la fini de suporta par Microsoft ======
8 april 2014
La suporta par Microsoft per Windows XP fini oji. Ofisial, la compania va ofre no plu reparas de defetos e ajustas contra problemes de securia en acel sistem vea de opera.
Alga governas ia negosia contratas spesial de suporta estendeda per la sistem, per atenta continua proteje sua computadores. Companias de securia ia dise ce otra persones ci usa ancora la sistem, aora con eda de 13 anios, va fronti un risca aumentada de infeta e perili par siberfurores.
La statistica sujesta ce entre 20% e 25% de tota usores ia resta con XP, an pos la publici de tre varias major de Windows entretempo. Ma plu ca un cuatri de infetas pertine a XP. Acel proportio va crese pos la publici de la repara securial ultima per XP.
Acel repara ultima va coreti un cuantia de defetos, de cual un es regardada como estrema grave e es ja esplotada par criminales, an si on ia descovre lo sola en la parte tarda de marto.
Scrivores de programes vil sabe ce infeta un computador de XP es multe plu fasil ca infeta un macina nova cual usa Windows 8.1, con sua multe cualias nova de securia.
Lo es probable ce grupos criminal va cumula secreta la metodos de ataca cual los conose, en loca de ajunta los a la spam infetante cual miliones de persones reseta. Los va reserva sua metodos per usa contra blancos major e per spias companial. Alga organizas va es spesial consernada car la move a via de XP es tan difisil per los.
Ma pos cuando algun usa un metodo nova per ataca un blanco companial, lo es probable ce la mesma metodo va deveni comun reusada a pos, car criminales va ajunta lo a la utiles per scrive programes enemin.
@T Vasinores de poliomielite es matada en Karachi
@L aora_oji/2014/vasinores_de_poliomielite_es_matada_en_karachi
====== Vasinores de poliomielite es matada en Karachi ======
22 janero 2014
En la site Karachi en Pacistan sude, tre laborores de poliomielite ia es matada en la dia pos la comensa de un projeta nova de vasini coletiva.
Atacores ia fusili en la area Qayumabad, matante un om e du femes ci ia es servinte la vasin.
Esta continua un serie de atacas contra ecipos de poliomielite en la pais.
No grupo ia declara se como culplable, ma la Taliban oposa la projeta, opinante ce lo es un metodo de spia internasional.
@T Venezuela esclui tre ofisiores SUA sur protestas
@L aora_oji/2014/venezuela_esclui_tre_ofisiores_sua_sur_protestas
====== Venezuela esclui tre ofisiores SUA sur protestas ======
17 febrero 2014
La presidente venezuelan, Nicolás Maduro, esclui tre ofisiores de consuleria SUA. El acusa los de encontra studiantes envolveda en protestas antigovernal.
La pais ia esperia resente un crese de tensa political e asemblas protestante. Tre protestores ia mori en scaramuxas en la semana pasada.
On ia comanda ia aresta de Leopoldo López, la gidor oposante, ci ia promete gida un marxa en Caracas, la capital, en martedi.
La SUA ia espresa conserna sur arestas de protestores oposante.
@T Venezuelanes protestante para la trafica
@L aora_oji/2014/venezuelanes_protestante_para_la_trafica
====== Venezuelanes protestante para la trafica ======
25 febrero 2014
En Venezuela, protestores antigovernal ia erije paradores en la capital, Caracas.
Los ia pone dejetadas e mobilas ardente sur stradas major, per atenta bloci asedes a la site.
Plu temprana, Henrique Capriles, la gidor oposante, ia demanda ce sua suportores no obedi un clama en redes sosial per un "bloci nasional".
La blocis es la paso la plu resente en un serie de protestas en cual 13 persones ia mori.
@T Ventas de cuasi 160 km/ora colpa la Rena Unida
@L aora_oji/2014/ventas_de_cuasi_160_km_ora_colpa_la_rena_unida
====== Ventas de cuasi 160 km/ora colpa la Rena Unida ======
13 febrero 2014
Ventas de fortia siclonin bate partes de la Rena Unida. Un om vea ia mori, parente en atenta move un arbor cadeda a via.
La Ofisia Meteorolojiste ia anunsia "avertis roja" per venta en la norde-ueste de England e Cimri, e 16 avertis de inonda sever resta.
Miles de casas ave no eletrica, e ferovias e stradas ia es sever afetada par un situa cual on ia descrive como "un crise natural cuasi sin paralel".
En Er, plu ca un cuatri de milion casas es sin eletrica. La contias Cork e Kerry es la plu afetada par la ventas estrema.
@T Veterinares trova plu ca 40 calsetas en un can
@L aora_oji/2014/veterinares_trova_plu_ca_40_calsetas_en_un_can
====== Veterinares trova plu ca 40 calsetas en un can ======
5 setembre 2014
En la SUA, sirurjistes veterinar ci ia opera sur un can malada ia es surprendeda en descovre la causa de la descomforta de sua pasiente: 43 calsetas e un dui en sua stomaco.
La can, de la spesie mastin deutx, ia gusta mastica calsetas. Ma nun ia sabe ce el engoli los como interas.
La sirurjistes ia opera sur la can en febrero. Los ia dise ce los ia estrae nunca tan multe calsetas de un animal.
La can ia recovre bon, e ia gania aora un premio per sua abituas strana de come.
El ocupa la loca tre en un concurso nomida "Los ia come cual cosa?!", organizada par un jornal veterinar.
La premio xef ia es donada a un rana ci ia come plu ca 30 rocas ornal de sua caje.
La judores ia comenta favorente ance sur un gateta ci ia come un jueta de figur estrateran, e sur un retraor oro ci ia engoli un bulbo de lus.
@T Viaja a la airoporto sur un valis
@L aora_oji/2014/viaja_a_la_airoporto_sur_un_valis
====== Viaja a la airoporto sur un valis ======
31 maio 2014
Un cultivor en Xina ia inventa un valis motorida, capas de porta la vestes de viajores en cuando lo transporta ance la viajores a la airoporto.
La aparato ave du rotas peti a la retro e un a la fronte, e es la creada de He Liang, un cultivor de la provinse Hunan.
Lo pote porta asta du pasajores tra distantias de asta 60 cilometres. La rapidia masima cual lo pote manteni es 20 cilometres per ora.
Lo prende sua enerjia de un pila recargable de litio, e on pote dirije lo con manicos cuando on senta sur lo.
He ia spende des anios en developa esta valis spesial, cual el nomi la Taxi de Site. El dise ce lo ave la mesma spasio per vestes como en bagaje normal, e cuando lo es vacua, lo pesa mera 7 cilogrames.
El ia patenta la valis como un veculo multiusa, e espera vide pronto persones usante lo sur la stradas.
@T Viajores es atacada a un stasion en Xinjiang
@L aora_oji/2014/viajores_es_atacada_a_un_stasion_en_xinjiang
====== Viajores es atacada a un stasion en Xinjiang ======
1 maio 2014
Xi Jinping, la presidente de Xina, ia recomenda forte "atas nonvasilante" contra atacas teroriste en Xinjiang, pos un bomba matante a un stasion de ferovia.
La esplode ia aveni a martedi en cuando la presidente ia completi un turi de la area ueste. Tre persones ia es matada, e 79 ia es ferida. La atacores ia usa coteles e esplodentes a la stasion sude de Urumqi.
Xinjiang ia esperia un serie de atacas violente en la anio pasada. Beijing culpa separadistes de la minoria uigur, xef muslim, per la violentia.
Esta ataca nova segue un simil a la stasion de Kunming en Xina sude en marto. Alora 29 persones ia mata. On ia culpa uigures ance per acel.
La visita de Xi a Xinjiang ia es sua prima de pos deveni presidente en 2012. El ia dise ce lo es esensal ce on "comprende profonda la separadisme de Xinjiang".
La ataca a Urumqi ia comensa con un esplode a un sorti de la stasion a sirca 19:10, en cuando la tren de Chengdu ia ariva. La atacores ia coteli persones a la sorti de la stasion, e ia crea un esplode a la mesma tempo.
Tota la feridas reseta cura medical.
Atestores ia dise ce la esplode ia pare aveni en bagaje lasada sur la tera entre un sorti e un parabus.
@T Vietnam condena 30 a mori per contrabanda de drogas
@L aora_oji/2014/vietnam_condena_30_a_mori_per_contrabanda_de_drogas
====== Vietnam condena 30 a mori per contrabanda de drogas ======
20 janero 2014
Un corte en Vietnam ia condena 30 persones a mori per contrabanda de eroina en un prosede cual on descrive como la plu grande de sua spesie de sempre en la pais.
La prosede sur la contrabanda de cuasi du tones de eroina, ia comensa en la provinse de Quang Ninh en la temprana de janero.
Deses de otras ia es ance condenada a periodos en prison de entre du anios e la vive intera.
Esta es la prosede la plu grande de sempre en Vietnam sur drogas, en relata a la cuantia de acusadas e la cuantia de condenas de mori.
@T Viletas afgani es grave inondada
@L aora_oji/2014/viletas_afgani_es_grave_inondada
====== Viletas afgani es grave inondada ======
26 april 2014
Inondas subita en Afganistan norde ia mata a la min 58 persones e ia isoli sentos de viletanes. Plu ca 80 persones manca.
Boymurod Qoyinli, la governor de la provinse Jowzjan, ia averti ce la cuantia de vitimes va crese probable.
Persones ia deveni trapida sur la tetos de sua casas, e on ia envia elicotores salvante a la area.
On reporta ance inondas en otra provinses en la norde e ueste de la pais.
Qoyinli ia dise: "Miles de casas es destruida, e miles de persones sufri." Tre distritos difisil per asede ia es spesial grave afetada.
Un fem ia es surprendeda par la inonda, direta pos leje sua preas de sera. El ia perde du de sua enfantes.
Un pluve forte e tempestas en la note de jovedi ia crea un situa perilosa per la viletanes, de ci sua casas es xef construida con fango.
@T Violentia en Irac desloca 300 000
@L aora_oji/2014/violentia_en_irac_desloca_300_000
====== Violentia en Irac desloca 300 000 ======
13 febrero 2014
Asta 300 000 persones es aora deslocada par la batalia entre combatosas suni e fortes de securia en la provinse de Anbar en Irac ueste.
Combatoses gidada par la Stato Muslim de Irac e la Mediteraneo Este, un organiza jihadiste, ia ocupa partes de la sites de Falluja e Ramadi en la tarda de desembre.
A pos, soldatos e membros de tribus aliada ia luta per regania la controla.
La cuantia deslocada es la plu alta de pos la apico de la rebela setal entre 2006 e 2008.
@T Violentia en la RAS pote forsa la popla muslim a via
@L aora_oji/2014/violentia_en_la_ras_pote_forsa_la_popla_muslim_a_via
====== Violentia en la RAS pote forsa la popla muslim a via ======
10 febrero 2014
Violentia relijiosa en la Republica de Africa Sentral va obliga cisa la fuji de tota la popla muslim.
Peter Bouckaert, la dirijor de crise de Human Rights Watch (Vijila de Diretos Umana), ia comenta ce esta ta afeta la economia, car muslimes controla la mercato de bestias e otra comersias.
La pais ia es ruinada par violentia entre muslimes e la majoria cristian, pos un colpa de stato en la anio pasada.
Bouckaert ia dise ce a la min des persones ia mori en la capital en esta fini de semana.
@T Violentia en Sudan Sude perili la labora de dotores
@L aora_oji/2014/violentia_en_sudan_sude_perili_la_labora_de_dotores
====== Violentia en Sudan Sude perili la labora de dotores ======
27 febrero 2014
Dotores Sin Fronteras, un carita medical, ia avisa ce sua laboras en Sudan Sude es perilida par atacas savaje contra complesos medical.
Lo dise ce la efeto es impedi la furni de aida esensal a sentos de miles de persones.
La Nasiones Unida dise ce la combate entre la governa e rebelores ia desloca sirca 860 mil persones de pos la media de desembre.
Ambos lados ia acusa la un la otra de rompe un sesaspara acordada en janero.
@T Violentia matante sirca la parlamento en Kiev
@L aora_oji/2014/violentia_matante_sirca_la_parlamento_en_kiev
====== Violentia matante sirca la parlamento en Kiev ======
18 febrero 2014
Violentia ia esplode denova entre protestores e polisiores en Kieve, la capital de Ucraina. A la min sete persones ia es matada.
En la violentia la plu mal de semanas, la polisia ia usa baletas de cauxo e granadas aturdinte per para miles de protestores ci ia marxa contra la parlamento, lansante petras.
Fortes de securia ia pone un limita de tempo de 18:00 per fini la turba.
La scaramuxas ia aveni cuando parlamentores ia es a punto de debate cambias a la constitui.
@T Voterias es ensendeda en Bangladex
@L aora_oji/2014/voterias_es_ensendeda_en_bangladex
====== Voterias es ensendeda en Bangladex ======
4 janero 2014
On ia ensende criminal a la min 30 voterias en Bangladex, ante un eleje controversa cual va aveni a soldi. Multe de la voterias es situada en scolas e otra construidas publica.
En multe semanas de violentia relatada a la vota, a la min 100 persones ia es matada.
La partito oposante boicota la vota, e ia comensa un greve de du dias per protesta contra un situa cual lo ia nomi un "farsa scandalosa".
La oposante desira ce manejores neutral supravide la eleje, como en anios presedente, ma la governa ia refusa.
@T Wal-Mart retira carne de asino en Xina
@L aora_oji/2014/wal-mart_retira_carne_de_asino_en_xina
====== Wal-Mart retira carne de asino en Xina ======
2 janero 2014
Wal-Mart ia retira un produida de carne de asino en Xina pos probas cual ia mostra ce lo conteni la ADN de volpe.
La compania american va repaia a clientes ci ia compra la carne "Sinco Spises". Lo aida ance autoriosas a investiga sua furnor local.
Carne de asino es un cometa popular en alga partes de Xina.
@T Wikipedia proibi editas de la Salon Basa de la SUA
@L aora_oji/2014/wikipedia_proibi_editas_de_la_salon_basa_de_la_sua
====== Wikipedia proibi editas de la Salon Basa de la SUA ======
26 julio 2014
Dirijores de Wikipedia ia proibi editas anonim per 10 dias par computadores a la Salon Basa de la SUA.
La proibi segue la ajunta de cambias a articles sur politicistes, companias, e avenis istorial major.
On ia edita la biografia de Donald Rumsfeld, la ministro pasada de defende SUA, per dise ce el es "un lezardo estrateran ci come bebes mexican".
Editas de computadores a la adirije redal de la Salon Basa ia es ja proibida a ante, pos atas simil de vandalisme.
Wikipedia permete ce cualce usor fa cambias a un paje, an anonim a la plu de pajes. Ma la cambias es esaminada par bonvolores, ci desfa mal editas e bloci usores ci iniora constante la regulas de la ensiclopedia libre.
Esta proibi la plu resente segue la revela de mal editas par @congressedits, un flue de Twitter, cual publici cada cambia fada a la ensiclopedia par la adirije governal.
Un de la cambias revelada ia es a la paje sur la asasina de John F. Kennedy. Algun ia edita lo per dise ce Lee Harvey Oswald ia ata "representante la governa de Fidel Castro".
Un article sur la teorias de conspira sur la atera lunal ia es editada per dise ce los ia es "promoveda par la governa cuban". Un otra, sur Nataliya Vitrenko, un politiciste ucrainsce, ia es cambiada per descrive el como "un pupeta rusce".
Ma la edita cual ia provoca final la proibi de editas anonim de la Salon Basa ia apare en la article sur Mediaite, un pajeria de novas jornaliste. La cambior ia descrive la blog como "sesiste" e "transfobica", disente ce "lo suposa automata ce un person es mas sin atesta".
A ante, Mediaite ia publici un article sur la mal editas de computadores congresal.
Jimmy Wales, la fundor de Wikipedia, ia comenta ce la proibi no surprende el, car vandalisme "ia aveni sempre e va continua sempre".
Alga empleadas de la Salon Basa ia protesta ce on no debe puni la organiza intera per la mal atas de sola du o tre persones.
@T Woody Allen es acusada sur maltrata sesal par sua fia adotada
@L aora_oji/2014/woody_allen_es_acusada_sur_maltrata_sesal_par_sua_fia_adotada
====== Woody Allen es acusada sur maltrata sesal par sua fia adotada ======
3 febrero 2014
La fia adotada de Woody Allen ia renovi alegas ce el ia es sesal maltratada par la sinemiste en 1992, cuando el ia es un enfante.
En un letera publica, Dylan Farrow acusa Alen de molesta el en "un suteto oscur" a la eda de sete.
Farrow, ci ave aora 28 anios, critica ance la respeta continuante en Hollywood per "un predor ci ia trae caos a nosa casa".
On ia investiga Allen sur la alegas a la tempo de la aveni, ma on no ia acusa el.
@T Xec Hasina deveni la ministro xef bangla
@L aora_oji/2014/xec_hasina_deveni_la_ministro_xef_bangla
====== Xec Hasina deveni la ministro xef bangla ======
13 janero 2014
On ia indui Xec Hasina Oyajed como ministro xef de Bangladex per sua periodo du en segue, pos un eleje malida par violentia e boicotas.
Sua partito ia gania un majoria clar, ma sur multe sejas la oposores no ia compete. La oposores ia esije ce un governa neutral supravide la vota.
La otra membros de la governa ia es ance induida, en un rituo televisada en Dhaka.
La comunia internasional ia demanda un refa de la eleje, entre temes de plu violentia.
@T 2014
@L aora_oji/2014/xef
====== 2014 ======
En la du menses prima de sua esiste Aora oji ia publici 1000 articles peti.
La blog ia reposa en marto 2014, e a 14 april lo ia adota sua ritmo durante, ofrente un article plu longa a cada dia.
Reportas plu vea ...
@T Xi Jinping promete ce Xina no va domina sua visinas
@L aora_oji/2014/xi_jinping_promete_ce_xina_no_va_domina_sua_visinas
====== Xi Jinping promete ce Xina no va domina sua visinas ======
29 junio 2014
Xi Jinping, la presidente xines, ia dise ce Xina va atenta nunca forsa sua desiras a otra nasiones, an si lo deveni multe forte.
Xi ia parla en Beijing, ospitante gidores de Barat e Miama per un fini de semana de discutes.
Multe de la visinas de Xina es maraniada en disputas teritorial con Beijing. Los es consernada sur aumentas de spende militar par Xina e sur lo cual alga persones regarda como la autofida cresente de la pais.
La parla de la presidente ia es fada a la aniversario 60 de un acorda mutua de nonataca e noninterfere, suscriveda con Barat e Miama.
El ia dise: "Xina no junta se a la idea ce un pais debe nesesada xerca domina cuando lo crese en fortia. La domina e militarisme no es en la jenes de la xineses. Xina va xerca developa pasosa, sin diverje, car esta es bon per Xina, bon per Asia, e bon per la mundo."
E en lo cual ia pare un burla contra la Statos Unida, el ia sujesta ce la domina par potias grande es ja un cualia de la pasada. "La idea de domina relatas internasional parteni a un eda diferente, e tal atentas es destinada a fali."
Xina es fisada en disputas con alga visinas sur reclamas en la Mar de Xina Sude, e atenta oposa atentas par la SUA de aumenta sua presentia en Asia.
@T Xina e Rusia suscrive un acorda enorme sur gas
@L aora_oji/2014/xina_e_rusia_suscrive_un_acorda_enorme_sur_gas
====== Xina e Rusia suscrive un acorda enorme sur gas ======
22 maio 2014
Vladimir Putin, la presidente de Rusia, ia suscrive un acorda con Xina sur furnis de gas per tredes anios.
La preparas de la acorda entre la compania rusce Gazprom e la Corpora Nasional Xines de Petrolio ia ocupa des anios.
Rusia ia desira trova un mercato nova per sua gas, car lo fronti la posible de punis economial par Europa sur la crise en Ucraina.
On no ia anunsia un custa ofisial, ma espertas estima ce la acorda ave la valua de plu ca 400 mil milion dolares.
La suscrive ia aveni a un confere en Xanghai. On previde ce lo va furni 38 mil milion metres cubo de gas natural per anio a la economia de Xina, comensante en o sirca 2018.
La discutes xef ia pertine a la custa, e analistes crede ce Xina ia negosia forte per redui esta.
En la des anios pasada, la pais ia trova ance otra furnores de gas. Turcmenistan es aora sua furnor stranjer la plu grande, e en 2013 la pais ia comensa importa gas natural par tubo de Miama.
@T Xina e Taiuan en negosias prima intergoverna
@L aora_oji/2014/xina_e_taiuan_en_negosias_prima_intergoverna
====== Xina e Taiuan en negosias prima intergoverna ======
11 febrero 2014
Xina e Taiuan ia comensa negosias de nivel la plu alta de pos la fini de la gera interna xines en 1949.
Wang Yu-chi e Zhang Zhijun, la ofisiores xef a cada lado, es presente a la discutes de cuatro dias en Nanjing.
Ofisiores taiuan ia dise ce los va estende la libria de jornalistes, pos cuando Beijing ia impedi la asede a alga medios.
Lo es probable ce Beijing va presa Taiuan per aseta un acorda de comersia libre, cual es aora retardada en parlamento.
@T Xina esecuta un om per viole e omiside de sclavos sesal
@L aora_oji/2014/xina_esecuta_un_om_per_viole_e_omiside_de_sclavos_sesal
====== Xina esecuta un om per viole e omiside de sclavos sesal ======
22 janero 2014
Xina ia esecuta un om ci ia reteni ses femes como sclavos sesal e ia obliga tre de los a mata du de la otras.
Li Hao, ci ia ave 36 anios, ia es condenada a mori en 2012 sur acusas de omiside, viole sesal, prostitui organizada, e prisoni nonlegal.
El ia construi un prison en un susolo, e ia teni ala la femes asta 2011, cuando un de los ia evade e reporta el.
La polisia ia dise ce Li ia vole fa mone par forsa la femes a prostitui.
@T Xina estende sua scema de armarios de bebe
@L aora_oji/2014/xina_estende_sua_scema_de_armarios_de_bebe
====== Xina estende sua scema de armarios de bebe ======
16 febrero 2014
La autoriosas xines ia fundi 25 "armarios de bebe" tra la pais, afin jenitores pote abandona secur sua enfantes nondesirada.
On intende fundi multe plu en la menses veninte, an entre critica ce los va coraji persones a sede sua bebes.
La armarios conteni un incubador e un alarma retardada. Los boni la probablia ce la bebes va survive.
La plu de la abandonadas ave descapasias o maladias grave.
@T Xina mata atacores de polisia en Xinjiang
@L aora_oji/2014/xina_mata_atacores_de_polisia_en_xinjiang
====== Xina mata atacores de polisia en Xinjiang ======
15 febrero 2014
Autoriosas xines ia mata par fusili oto persones ci ia atenta ataca polisiores en Xinjiang.
Tre plu ia es matada par sua propre bombas cuando los ia ataca un patrulia, prosima a un parce en la contia de Wushi.
Ofisiores ia descrive la atacores como "teroristes", un terma comun usada per uigures muslim envolveda en tumultas.
Xina dise ce lo batalia separadistes muslim, ma grupos de uigures escluida acusa Beijing de represa los.
@T Xina multa un dirijor de filmas sur sua cuantia de enfantes
@L aora_oji/2014/xina_multa_un_dirijor_de_filmas_sur_sua_cuantia_de_enfantes
====== Xina multa un dirijor de filmas sur sua cuantia de enfantes ======
10 janero 2014
Xina ia multa Zhang Yimou, un dirijor de filmas populal, per plu ca milion dolares car el ia iniora la politica de ave sola un enfante.
La dirijor ave tre enfantes e 30 dias per paia la multa. El es ance conoseda per sua dirije de la rituo abrinte a la juas olimpial en Beijing en 2008.
La politica ia es introduida en la desenio de 1970 per limita la crese de la popla. Asta la anio pasada, on ia permete sola un enfante a familias urban, e du a familias campanial de cual sua enfante prima es un xica.
En 2013, la politica ia es laxida: on permete aora du enfantes si un jenitor ave no sores o frates.
@T Xina permete la vende de consoles video stranjer
@L aora_oji/2014/xina_permete_la_vende_de_consoles_video_stranjer
====== Xina permete la vende de consoles video stranjer ======
8 janero 2014
La governa xines ia sutrae tempora un proibi de vende consoles stranjer de juas video. Esta permete ce companias como Sony, Nintendo, e Microsoft entra a un mercato profitosa.
Xina ia proibi consoles en 2000, indicante ce los afeta mal la sania mental de jovenes. Ma un mercato gris en consoles ia continua en la pais.
Partal como resulta de la proibi, la juas video en computador personal ia deveni dominante. Los ia catura du tris de la mercato de $13 mil milion.
La governa ia dise ce lo va permete ce companias stranjer fabrica consoles en la zona de comersia libre de Shanghai, e ce on vende los en Xina pos esamina par departes cultural. Lo no ia dise tra cuanto tempo la permete va dura.
@T Xina projeta bancos privata nova
@L aora_oji/2014/xina_projeta_bancos_privata_nova
====== Xina projeta bancos privata nova ======
7 janero 2014
En Xina, en esta anio, on va crea asta sinco bancos privata. La pais vole abri sua campo finansial e provoca plu compete en la industria.
On va permete ce la bancos funsiona per un periodo de proba, supravideda par la autoriosas de banco xines.
O on va restruturi bancos esistente, o on va fundi novas cual aseta sua propre riscas.
La Encargada Regulante de Bancos Xines ia dise ce lo va esplora ance la idea de redui la restrinjes sur la entra de bancos stranjer a la industria.
@T Xina projeta festas de aniversarios de la gera contra Japan
@L aora_oji/2014/xina_projeta_festas_de_aniversarios_de_la_gera_contra_japan
====== Xina projeta festas de aniversarios de la gera contra Japan ======
26 febrero 2014
Xina considera du festas nasional nova per selebra la gera contra Japan en la desenios de 1930 e 1940, a media de un senti cresente antijapanes.
La idea, aora en parlamento, es ce on va selebra la aniversarios de la sede formal de Japan en 1945 e de la masacra de Nanjing en 1937.
Xina dise ce 300 000 siviles ia es matada en acel site pos sua ocupa par soldatos japanes.
Nasionalistes japanes disputa la descrive xines de avenis.
@T Xina va construi un ferovia nova en Africa este
@L aora_oji/2014/xina_va_construi_un_ferovia_nova_en_africa_este
====== Xina va construi un ferovia nova en Africa este ======
12 maio 2014
En Nairobi, la capital de Cenia, on ia suscrive acordas formal per un projeta de construi un linia nova de ferovia en Africa este con aida xines.
Lo va vade de Mombasa a Nairobi, e va estende ultima tra Uganda a Ruanda e Sudan Sude. En Cenia, lo va recambia un linia streta cual on ia construi a plu ca 100 anios ante aora, su la rena colonial brites.
Xina va finansia 90% de la custa de la paso prima, estimada a 3800 milion dolares, e la labora va es realida par un compania xines.
On previde ce la construi va comensa en otobre de esta anio, e ce la ferovia de 610 cilometres entre Nairobi e la mar va es finida en la temprana de 2018.
Uhuru Kenyatta, la presidente de Cenia, ia dise: "La custa de move nosa persones e nosa benes a traversa de nosa fronteras va diminui multe." En pasada, el ia clari ce la lia nova va redui la custa de envia un ton de carga tra un cilometre de 0,2 de un dolar SUA a 0,08.
Li Keqiang, la ministro xef de Xina ia comenta: "Esta projeta mostra ce on ave colaboras egal e beneficas mutua entre Xina e la paises de Africa Este, e la ferovia es un parte multe importante de la developa de infrastrutur transportal."
Seguente la detalias de la acorda, la Banco de Esportas-Importas en Xina va furni 90% de la custa de la fase prima de la ferovia, e Cenia va furni la resta.
La construi de la linia orijinal ia comensa en Mombasa en 1895, e la ferovia ia ateni Nairobi en 1899 e Lago Victoria en desembre 1901.
La labora ia es difisil e perilosa. A la min 2000 laborores ia mori, de cual multe ia es baratis venida a Africa per fa la construi. Problemes ia es causada no sola par asidentes, ma ance par maladias como malaria e disenteria -- e par animales savaje.
@T Yanukovych dise ce la oposante ucrainsce flami la situa
@L aora_oji/2014/yanukovych_dise_ce_la_oposante_ucrainsce_flami_la_situa
====== Yanukovych dise ce la oposante ucrainsce flami la situa ======
31 janero 2014
Viktor Yanukovych, la presidente de Ucraina, ia insiste ce el e sua governa fa tota cosas posible per solve la crise en la pais.
Ma el ia ajunta ce la oposante political continua "flami" la situa.
La mesaje ia apare en la pajeria presidental pos un anunsia ce la presidente es aora asente car el ave un febre e un maladia respiral.
Yanukovych ave 63 anios.
@T Yanukovych parla sur la "trajedia" de Crim
@L aora_oji/2014/yanukovych_parla_sur_la_trajedia_de_crim
====== Yanukovych parla sur la "trajedia" de Crim ======
3 april 2014
Viktor Yanukovych, la presidente desponeda de Ucraina, ia dise ce la saisi de Crim par Rusia es "un trajedia major" e ce el espera ce lo va deveni denova un parte de Ucraina.
En un intervisa, el ia clari ance ce el no ia comanda ce on xuta protestores en la capital, Kiev. Yanukovych ia fuji de Kiev pos protestas en cual plu ca 100 persones ia mori.
Entretempo, Jeneral Philip Breedlove, un comandor xef de OTAN, ia averti ce soldatos rusce es capas de prende areas vasta de Ucraina en la poca dias veninte. On crede ce Moscva ia asembla resente deses de miles de soldatos a la frontera este de Ucraina, causante alarma en Kiev e la Ueste.
Breedlove ia dise ce tota elementos es presente per un avansa rapida, incluinte veculos blindada, unias macinida, elicotores, aviones, e tota la lojistica suportante.
En marto, Rusia ia saisi Crim, un penisola en la sude de Ucraina, pos un referendo controversa cual Kiev e la Ueste ia descrive como nonlegal. La popla de la penisola es xef de etnico rusce. Moscva ia insiste ce lo ave no intende de invade Ucraina, ma sua condui ia causa consernas en Esti, Latvia, e Lietuva, cual ia parteni a la Uni Soviet en la Gera Fria.
Yanukovych es aora en Rusia. En sua intervisa, el ia dise ce el va atenta convinse Vladimir Putin, la presidente rusce, a redona Crim a Ucraina. "Nos debe crea un tal taxe, e xerca modos de revade a Crim en cualce situa, afin Crim pote ave la grado masima posible de autonomia... ma como un parte de Ucraina."
El ia dise ce, si el ia ta resta en governa, el ia ta atenta preveni la referendo. El ia descrive lo como "un forma de protesta" contra la gidores nova de Ucraina ci favore la Ueste.
Sur la xuta de protestores, el ia clari ce esta ia es fada par la lado oposante, no par la polisia de tumulta. "Me mesma ia dona nunca un comanda de xuta," el ia dise. "Mea prinsipes, cual me segue sempre, es ce no autoria, no potia merita an un gota de sangue."
La turba en Ucraina ia comensa tarda en la anio pasada, cuando Yanukovych ia rejeta un acorda de asosia con la Uni European, favorente lias plu prosima con Rusia en loca.
@T Yanukovych promete batalia per Ucraina
@L aora_oji/2014/yanukovych_promete_batalia_per_ucraina
====== Yanukovych promete batalia per Ucraina ======
1 marto 2014
En sua apare publica de pos es desponeda como presidente en la semana pasada, Viktor Yanukovych ia promete batalia per la futur de Ucraina.
Parlante a jornalistes en Rusia, el ia dise ce on no ia suverti el, ma ce el ia es obligada de parti de Ucraina pos menasas a sua vive.
En la problem la plu resente, Ucraina ia acusa soldatos rusce de saisi du airoportos en Crim. Moscva nega la acusa.
Vladimir Putin, la presidente de Rusia, ia esije ce Ucraina revade rapida a un state de normalia.
@T Yanukovych revade a labora
@L aora_oji/2014/yanukovych_revade_a_labora
====== Yanukovych revade a labora ======
3 febrero 2014
Viktor Yanukovych, la presidente ucrainsce, revade oji a labora pos cuatro dias de maladia. Protestores esije ancora ce el sede sua potia.
La crise political ia continua en sua asentia, con miles de persones en la stradas de Kiev, la capital.
Entretempo, Dmytro Bulatov, la gidor oposante, ia ariva en Lietuva per es medical tratada.
El ia apare en televisa en la semana pasada, disente ce el ia es furada e torturada.
@T Yingluck encontra gidores militar pos un colpa de stato en Tai
@L aora_oji/2014/yingluck_encontra_gidores_militar_pos_un_colpa_de_stato_en_tai
====== Yingluck encontra gidores militar pos un colpa de stato en Tai ======
23 maio 2014
En Tai, a la dia pos un colpa de stato par soldatos, Yingluck Shinawatra, la gidor desponeda ia apare a un compleso militar en Bangkok. El es entre plu ca 100 politicistes clamada par la armada.
La militaria ia proibi ce 155 politicistes major parti de la pais sin permete.
En jovedi, la armada ia suspende la constitui, ia proibi asemblas, e ia teni politicistes, disente ce la bon ordina sosial es nesesada pos menses de protestas tumultosa contra la governa.
En la posmedia de venerdi, lo ia pare ce Yingluck ia parti de la loca a do on ia clama el, e ia vade a un otra compleso militar. On no sabe esce el es libre.
Alga membros de parlamento ci favore la governa ia asconde se. La promove antigovernal ia declara un vinse, e ia envia sua suportores a casa.
Internasional, on ia critica vasta la colpa de stato, cual ia aveni a la dia du pos la declara de un rena militar. La Nasiones Unida ia recomenda forte "un revade pronto a un rena constitual, sivil, democrata."
Entretempo, tais ia pasa la note su un proibi de sorti, cual ia dura de 22:00 a 05:00. Bangkok ia es jeneral pasosa.
En la 16 oras prima de la rena militar, autoriosas ia fa du comandas e 19 anunsias. Cada es lejeda con repetes en canales de radio e TV -- cual es silente a otra tempos, estra ce los jua musica tradisional usada per saisis militar. De tempo a tempo, portavoses de la armada apare per un tempo corta e leje anunsias ofisial.
@T YouTube comensa esamina cuantias de regardas
@L aora_oji/2014/youtube_comensa_esamina_cuantias_de_regardas
====== YouTube comensa esamina cuantias de regardas ======
5 febrero 2014
YouTube, un loca de rede per comparti videos, ia dise ce el ia comensa "esamina" la cuantia de regardas a cada video.
Lo intende impedi ce usores aumenta falsa sua cuantias de regardas resetada. YouTube dise ce esta malgida la publica sur la popularia de un video.
On es consernada ce alga usores aumenta sua cuantias par tecnicas como redirijes o compra de regardas.
YouTube ia dise ce lo va confirma "periodal" la regardas a videos, e va sutrae la falsas de la soma.
@T Zeland Nova esperia un trematera grande
@L aora_oji/2014/zeland_nova_esperia_un_trematera_grande
====== Zeland Nova esperia un trematera grande ======
20 janero 2014
Un trematera de grado 6,3 ia secute la Isola Norde de Zeland Nova, ma on reporta no danas major o feris grave.
La trema ia aveni a 38 cilometres a norde-ueste de Masterton a 15:52 de ora local.
On ia descrive un secute grande, benes cadente de scafales, e depintas colpada a un posa nonreta.
Un sculta de un agila jigante, suspendeda de la teto a la airoporto en Wellington per promove un filma, ia cade.
@T 100 tances deutx dorminte va reativi
@L aora_oji/2015/100_tances_deutx_dorminte_va_reativi
@D 2015
====== 100 tances deutx dorminte va reativi ======
11 april 2015
Deutxland va reativi sento tances desusada, parente per responde a tensas cresente contra Rusia supra Ucraina.
A ante, la tances ia es vendeda a la campo industrial como parte de reduis pos la Gera Fria.
La ministreria deutx de defende ia dise ce lo va spende 22 milion euros en aumenta sua cuantia de tances a 328.
En febrero, ofisiores de OTAN ia acorda crea un forte de reata rapida per fronti la defias stada par la crise ucrainsce e par estremistes muslim.
Ministros de defende en OTAN ia acorda ance grandi la Forte de Responde de la aliada a plu ca duple.
On regarda esta cambias como un sinial ce OTAN regarda la saisi par Rusia de Crim e sua ativias militar en Ucraina este como multe plu ca un crise tempora.
Un portavose per la ministreria deutx de defende ia confirma un reporta jornaliste, disente ce on va recompra sento tances batalial de spesie Leopardo 2 de la industria defendal, cual ia reteni los.
El ia dise ce Deutxland debe serti ce lo pote envia soldatos con la aparatos coreta a la loca coreta en un tempo corta, considerante la goles nova de flexablia e reatas rapida.
"Esta pote susede sola si on no nesesa prima move la aparatos tra la pais," el ia ajunta.
La cambia reversa partal un deside de cuatro anios ante aora, cual ia talia la cuantia de tances deutx de 350 a 225.
On va comensa moderni la tances en 2017.
@T 50 anios pos la autonomi de Singapor
@L aora_oji/2015/50_anios_pos_la_autonomi_de_singapor
====== 50 anios pos la autonomi de Singapor ======
9 agosto 2015
Singapor fa avenis nasional per selebra la aniversario 50 de cuando lo ia deveni un stato autonom.
On previde ce deses de miles de persones va es presente a un parada, cual va inclui ance paradas volante par la forte de aira e un avion A380 de Singapore Airlines.
Singapores va junta se en resita la promete nasional e en canta la imno nasional.
La pais ia deveni autonom cuando lo ia es ejetada de la Federa de Malaisia entre turbas sosial.
En 50 anios, Singapor, cual ia es un colonia brites a ante, ia cambia se a un de la plu ricas de la paises de mundo. Ma criticistes dise ce la developa ia es acompaniada par controlas sever de la parla libre e la politica.
La site-stato selebra sua dia de autonomia en cada anio, ma on presenta la avenis "SG50" de esta anio como la selebra la plu grande de istoria en la pais, pos menses de preparas en botecas, scolas, laborerias, e jornalisme.
La parada va inclui un tribui spesial a Lee Kuan Yew, ci ia gida Singapor a autonomia e ia es sua ministro xef asta 1990. Acel gidor respetada ia mori en marto de esta anio, con lamenta publica. On ia difusa un rejistra de el lejente la Proclama de Autonomia a la ora nove de esta matina.
Parlante ier, Lee Hsien Loong, la ministro xef presente e la fio de Lee Kuan Yew, ia dise: "A sincodes anios, cuando nos sta a un campa de base alta, nos retrospeta e mervelia ce nos ia veni de tan distante. Nos grasia los ci ia reali esta."
Otra persones major ci va es presente a la selebras es Najib Razak, la ministro xef de Malaisia, e Warren Truss, la visministro xef de Australia.
An si la pais ia ateni goles como la posese de casas par 90% de la abitores e un produi interna bruta de plu ca $56 mil per person, oposores continua asentua la restrinjes political sever.
La Partito de Ata Poplal (PAP) rena ja tra plu ca 50 anios, ma la oposores espera susede plu en un vota cual va aveni cisa en setembre. En la eleje la plu resente, la PAP ia es debilida, an si lo ia reteni ancora 80 de la 87 sejas.
La PAP espera ce la aniversario e la reconose de la lega de Lee Kuan Yew va aida lo a la vota veninte.
@T ADN antica revela la orijina eres
@L aora_oji/2015/adn_antica_revela_la_orijina_eres
====== ADN antica revela la orijina eres ======
29 desembre 2015
Siensistes ia seguensa jenomes umana antica de Er a la ves prima, luminante alga la orijina de la poplas celta.
Un jenom, composada de tre mil milion leteras de ADN, es la instruis per construi e manteni un umana.
La studia mostra ce cultivores eres temprana ia es simil a europeanes sude.
A pos, la motifes jenetical ia cambia multe en la Eda de Bronze, cuando arivores de la periferia este de Europa ia coloni la area atlantica.
Detalias de la studia par jeneticistes de Trinity College en Dublin e arceolojistes de Universia Queen's en Belfast ia es publicida en la jornal PNAS.
Membros de la ecipo ia seguensa la jenomes de un cultivor fema de 5200 anios de la periodo neolitica e tre mases de 4000 anios.
A ante, opinas ia difere sur esce la cambias grande en la Isolas Brites de un cultur xasante a un cultur cultival, e (plu tarda) de la usa de petra a la usa de metal, ia es causada par la adota local de metodos nova par la popla nativa o par moves grande de la popla.
La jenomes antica eres atesta nonambigua un migra coletiva en ambos casos.
La analise de ADN de la fem neolitica de Ballynahatty, prosima a Belfast, revela ce el ia es la plu simil a persones moderna de Espania e Sardinia. Ma sua asendentes ia veni ultima a Europa de Asia sude-ueste, do on ia inventa la cultiva.
La mases de la Isola Rathlin, ci ia vive no longa pos la introdui de metalurjia, ia mostra un motif diferente de la fem. Un tri de sua asendentes ia veni de fontes antica en la Stepe Pontica, un area aora traversante Rusia e Ucraina.
"Un onda grande de cambia jenomal ia entra a Europa de la Eda de Bronze de supra la Mar Negra," profesor Dan Bradley ia dise. El es la jeneticiste ci ia gida la labora. "Nos sabe aora ce lo ia es portada tra tota la via asta la costas de sua isola la plu ueste."
El ia ajunta: "Esta grado de cambia jenetical invita la posible de otra cambias asosiada, cisa an la introdui de un lingua asendente de la linguas celta ueste."
En contrasta de la fem neolitica, la grupo de Rathlin ia mostra un similia jenetical prosima a la ereses, scoteses, e cimricas moderna.
Oji, Er ave la frecuentia la plu alta de mundo de varias jenetical cual representa la persiste de lactase -- la capasia de bevi lete cuando on es adulte -- e alga maladias jenetical, incluinte emocromatose, cual es la reteni tro grande de fero en la corpo.
Un de la omes de Rathlin ia porta la muta comun eres de emocromatose, mostrante ce lo ia es ja instituida en la Eda Bronze. Interesante, la femes de Ballynahatty ia porta un varia diferente cual ia es ance asosiada con un risca aumentada de la maladia.
Cisa ambos mutas ia estende orijinal car los ia dona un vantaje a sua portores, per esemplo un capasia de tolera un dieta conteninte poca fero.
La mesma mas de la Eda de Bronze ia porta un muta cual ia ta permete ce el bevi lete cru en adultia, an cuando la fem de Ballynahatty no ia ave esta varia. Esta coere con datos de otra locas en Europa cual indica un estende relativa tarda de la jenes de tolera de lete.
Bradley ia esplica ce la individuas de Rathlin no ia es identica a poplas moderna, e ia ajunta ce on nesesa labora plu per comprende como la diversia rejional ia apare en la grupos celta.
@T Aida finansial afin Siera Leon recovre pos Ebola
@L aora_oji/2015/aida_finansial_afin_siera_leon_recovre_pos_ebola
====== Aida finansial afin Siera Leon recovre pos Ebola ======
3 marto 2015
Siera Leon va reseta plu ca 80 milion dolares sin pospone, per aida la pais a fini la aveni de Ebola e recovre de sua efetos.
La Reserva Monal Internasional ia promete un scema de aida finansial con 187 milion dolares per suporta la economia debil de la pais.
Gidores mundal va consenta oji en Bruxelles per parla sur Ebola e projetas plu longa per batalia contra la maladia.
Cuasi 10 mil persones ia mori en esta aveni. La plu de los ia es en Gine, Liberia, e Siera Leon.
Ier, la Nasiones Unida ia comenta ce la luta per limita la epidemica ateni aora "un fase du".
Ma David Nabarro, la ambasador spesial de la NU sur Ebola, ia dise ce la comunia internasional debe no deveni autosasiada, car ateni zero casos es "la parte la plu difisil".
Sirca 600 delegadas va encontra oji per discute la responde a la maladia.
Gidores de la mundo, incluinte la presidentes de tota tre nasiones la plu colpada, va parla sur la modo la plu bon de reconstrui la economias pos la fini de la epidemica, e sur la modo de responde durante a Ebola.
La aveni ia mata 9714 persones en Africa ueste de pos sua comensa en la anio pasada, con 23 913 casos confirmada.
@T Air France desemplea cuatro persones ci ia protesta violente
@L aora_oji/2015/air_france_desemplea_cuatro_persones_ci_ia_protesta_violente
====== Air France desemplea cuatro persones ci ia protesta violente ======
13 novembre 2015
Cuatro empleadas de Air France ia deveni desempleada pos protestas violente a la xeferia de la compania en otobre. Un laboror sinco, acusada de malcondui grave per ataca manejores, segue un otra prosede car el es un representor de sindicato.
En cuando laborores ia protesta contra desempleas coletiva, los ia lasera la camisas de du manejores, de ci un ia es obligada a fuji par traversa un serca. Alga otra persones ia deveni ferida.
La protesta ia aveni entre un coleria jeneral sur reduis tra la economia franses.
Sentos de laborores ia protesta contra projetas de elimina 2900 postos, de longi la oras de labora de pilotes, e de redui la grandia de la flotila. La projetas intende redui custas par €1,8 mil milion tra du anios.
Du manejores ia es sever atacada -- Xavier Broseta, un manejor de recursos umana, e Pierre Plissonnier, un ofisior major. Los ia partisipa en un consenta de consilio de labora sur la reduis proposada, cuando sentos de laborores ia intrui coler en la xeferia.
Sete persones ia es ferida, incluinte un gardor de securia ci ia deveni nonconsensa pos es colpada.
La sinco laborores, con un otra asosior, va apare en corte a 2 desembre per fronti acusas criminal en relata con la violentia. Air France ia dise ce lo ia suspende 11 otra empleadas per du semanas sin paia, per intrui violente en la xeferia.
Pos la protestas, la compania ia redui la cuantia de postos cual lo intende elimina a min ca mil.
La consenta veninte de la consilio de labora de Air France va aveni a 19 novembre. Sindicatos ia recomenda un greve a acel data per protesta contra la medios disiplinal.
A fini de otobre, Air France--KLM, la compania posesente, ia reporta un perde neta de €158 milion per la nove menses prima de esta anio, en contrasta con un perde de €533 milion per la periodo corespondente en la anio pasada.
@T Aitianes protesta sur la custa de gasolina
@L aora_oji/2015/aitianes_protesta_sur_la_custa_de_gasolina
====== Aitianes protesta sur la custa de gasolina ======
10 febrero 2015
La polisia en Aiti ia scaramuxa con protestores antigovernal ci es coler sur la custa alta de carburante.
Alga persones ia es ferida en cuando polisiores ia avansa per reabri vias en la capital, Port-au-Prince.
Organizores de la protesta ia dise an ce motoristes ci ta entra a la sentro de la site en la protesta de du dias ta risca sua vives.
Aiti ia esperia menses de protestas contra sua presidente Michael Martelly sur un vota posponeda.
La governa ia redui resente la custa de gasolina e gasolio, ma la protestores desira un redui par 50%, per refleta la cade en la custa internasional de petrolio tra la ses menses pasada.
Evans Paul, la ministro xef, ia apela per calmia, disente: "Nos no pote redui la custa de gasolina. Esta no es car nos no vole, lo es car nos no pote."
Protestores dise ce los va bloci denova vias en Port-au-Prince oji.
Martelly ia comensa governa en la mense pasada pos la fini de la periodo ofisial de parlamento. Entretempo, el ia acorda con la oposantes ce on va formi un governa nova e fa votas jeneral e local, cual es ja tarda par tre anios.
Ma la noncontentia continua en esta nasion la plu povre de la emisfera ueste, colpada en 2010 par un trematera cual ia ruina multe de la capital.
@T Animales de zo vaga en Tbilisi inondada
@L aora_oji/2015/animales_de_zo_vaga_en_tbilisi_inondada
====== Animales de zo vaga en Tbilisi inondada ======
15 junio 2015
Un inonda sever en Tbilisi, la capital de Jorjia, ia mata 12 persones, cisa plu.
Deses de persones es lasada sin casa, e ecipos de salvores xerca abitores cisa trapida en casas sumerjida. On ia declara ce oji es un dia de lamenta.
Ofisiores avisa la popla a resta en casa per evita animales cual ia evade un zo.
La animales vagante inclui tigres, leones, ursos, e lupos. On ia trapi un ipopotamo en un de la plazas xef de la site e ia adormi lo con un fusil de medisin calminte.
Tre de la persones mor ia es trovada en la zo, incluinte du empleadas.
Un portavose per la zo ia dise ce la compleso ia deveni "un vortis enfernin", e ce lupos, tigres, xacales, e jaguares ia es matada par fusilores o es ancora libre.
La acua inondante ia ateni la tetos de ensircas en la zo, afocante sentos de animales. Lo ia puxa multe animales a estra sua ensircas, e los ia evade tal.
On ia trova un urso pendente a un frescador a media de la mur esterna de un construida, e un om ia descovre un iena sur sua balcon.
La inonda ia comensa cuando pluves forte ia causa un supraflue de la rio Vere -- cual es normal apena plu ca un rieta.
Miles de persones es lasada sin acua e eletrica, e on ia debe usa elicotores per leva otras a securia.
Stradas es destruida, e autos e casas peti ia es puxada a via par la acua. On reporta ce la acua ia desentera caxones en un semetero de la site e ia lasa los sur la fango.
On no sabe cuanto animales vaga ancora. Elicotores sirculi supra la site en parte de la labora de xerca e salva.
@T "Aniversario felis" no nesesa plu es lisensada
@L aora_oji/2015/aniversario_felis_no_nesesa_plu_es_lisensada
====== "Aniversario felis" no nesesa plu es lisensada ======
23 setembre 2015
On ia deside ce la compania cual colie paias lisensal per la canta Happy Birthday To You -- conoseda tra la mundo como Cumpleaños feliz, Joyeux anniversaire, Tanti auguri a te, Parabéns a Você, Zum Geburtstag viel Glück, e multe otras -- no posese un direto valida de autor.
En 1988, la compania Warner/Chappell Music ia oteni la diretos de autor, orijinal rejistrada en 1935 par la compania Summy.
Ma un judor federal en la SUA ia deside ce la diretos orijinal ia es donada sola per ordinas spesifada de la musica, e no per la canta mesma.
La melodia ia es composada par du sores de la stato Kentucky en 1893. Mildred e Patty Hill ia nomi lo Good Morning To All ("Bon matina a tota"), e lo ia evolui plu tarda a la varia popular en selebras de aniversario tra la mundo.
La caso contra Warner/Chappell ia es inisiada en 2013 par Rupa Marya e Robert Siegel, ci prepara un filma sur la canta. La compania ia esije $1500 per permete usa la canta mesma en la filma.
Marya e Siegel ia oposa ce la canta es en la domina publica e no debe incore custas lisensal.
Judor George King ia deside ce Summy ia reseta no diretos de autor en relata con la testo de la canta. El ia esplica: "La sores Hill ia dona a Summy la diretos de la melodia, e la diretos de ordinas per piano fundida sur la melodia, ma nunca cualce diretos de la testo."
La diretos ia es ultima comprada par Warner/Chappell per $25 milion cuando los ia compra un compania desendente de Summy en la desenio de 1980.
Warner/Chappell ia gania sirca $2 milion per anio, de la paias lisensal fada sempre cuando on ia usa la canta en un filma, un episodio televisada, un anunsia comersial, o un otra presenta publica.
Pos la revela de la deside, la compania ia dise: "Nos regarda la opina longa de la corte e considera nosa posibles."
@T Arjentinas protesta contra la mori de un investigor
@L aora_oji/2015/arjentinas_protesta_contra_la_mori_de_un_investigor
====== Arjentinas protesta contra la mori de un investigor ======
19 febrero 2015
Sentos de miles de persones ia partisipa en un pasea tra Buenos Aires, la capital de Arjentina, a un mense pos la mori de Alberto Nisman, un avocato prosedente.
La familia de Nisman e politicistes antigovernal ia es presente.
Los ia iniora un pluve forte per esije justia per Nisman, ci ia investiga la governa.
On ia trova el, mor, en sua aparte a 18 janero, con un feri de baleta a sua testa e un fusil a sua lado. On ancora no sabe esce el ia mata se o ia es asasinada.
Nisman ia investiga la bombi de la sentro iudi AMIA en 1994, la ataca teroriste la plu matante en Arjentina.
A poca dias ante sua mori, el ia publici un reporta de 300 pajes, en cual el ia acusa ce Presidente Cristina Fernández de Kirchner e Héctor Timerman ia asconde la rol alegada de Iran en la bombi. El ia es a punto de apare ante un comite congresal per presenta plu detalias de sua alegas.
La pasea silente ier ia es clamada per otra avocatos per esije un investiga completa. Protestas simil ia aveni tra la pais, e arjentinas abitante en Espania, Frans, Israel e otra paises ia asembla ance.
Ofisiores ia denunsia la pasea como un move political per debili la governa.
En un letera publica en sua loca de rede, Fernández ia sujesta ce ajentes renegada ia dona informas falsa a Nisman per destabli sua governa. El ia dise ance ce el es convinseda ce la mori no ia es un suiside.
A alga dias plu tarda, el ia anunsia ce el intende disolve la departe nasional de colie informas. Oposores ia responde ce el fa esta per diverje la atende de la mori de Nisman.
@T Asemblas en Atina ante la referendo finansial
@L aora_oji/2015/asemblas_en_atina_ante_la_referendo_finansial
====== Asemblas en Atina ante la referendo finansial ======
3 julio 2015
En Elas, partitos competente va aveni asemblas major en Atina, ante un referendo importante sur la constrinjes de un salva finansial internasional.
Alexis Tsipras, la ministro xef, va es presente a un asembla per suporta la vota de "no" per oposa la constrinjes. Ma xefes de la Uni European ia averti ce un vota de "no" pote comensa la sorti de Elas da la eurozona.
La economia elinica es aora multe presada, car la pais ia perde resente sua capasia de asede mone nova.
Bancos ia clui e on pone limitas a la retira de mone fisical. Alga bancos ia reabri per permete ce jubilores retira asta €120 per semana, e esta ia crea filos longa. On pote retira no plu ca €60 per dia de automatas.
Elas es ja en un state de nonprogresa con sua creditores tra menses, ma lo ia anunsia la referendo sola en la semana pasada.
Un sonda oji publicida indica un vinse pico per la vota de "si" con 44,8%, contra "no" con 43,4%.
Ma on ave ancora la posible ce la referendo va es canselada. La corte suprema de la pais va judi sur la legalia de la referendo. Posible lo va deside ce la referendo desobedi la constitui.
La Consilio de Europa, promovente diretos umana, ia dise ja ce la referendo "no va sasia la normas internasional", car on no ia anunsia sufisinte temprana lo a votores, e car la linguaje de la demanda a cual la votores debe responde es multe nonclar.
6000 suportores de la Partito Comuniste Elinica ia protesta, recomendante ce votores desvalidi sua votas.
A jovedi, la Reserva Monal Internasional ia comenta ce Elas va nesesa reseta €50 mil milion tra la tre anios seguente per stabli sua finansias su la scema de salva. Lo ia ateni esta conclui ante la colasa de negosias entre Elas e sua creditores a la fini de semana pasada, cuando la governa ia anunsia la referendo.
A martedi, la scema esistente de salva ia fini, privante Elas de asede a miles de miliones de euros, e la pais ia fali repaia €1,5 mil milion.
@T Asiones de Fosun International es suspendeda
@L aora_oji/2015/asiones_de_fosun_international_es_suspendeda
====== Asiones de Fosun International es suspendeda ======
11 desembre 2015
On ia suspende la comersia en la asiones en Hongkong de Fosun International, un de la agregadas la plu grande de investi en Xina.
Esta aveni entre nonsertia sur la loca de sua presidente, e un reporta dise ce Guo Guangchang es noncontatable de pos mediadia ier.
Fosun ave interesas estendente tra asecura, imobila, e vende. Lo controla la grupo franses de vacanserias conoseda como Club Med.
Guo Guangchang es un de la persones la plu rica de Xina.
Empleadas de Fosun no pote contata el, e mesajes a redes sosial dise ce on ia vide el con polisiores en Xanghai.
Fosun Internasional es la supracompania de Fosun Group en Xanghai, e ia deveni listada en Hongkong en 2007.
Oji, en un declara a la asioneria de Hongkong, la compania ia dise ce sua asiones va es no plu comersiada "de 09:00 a venerdi 11 desembre 2015, asta la publici de un anunsia conteninte informas interna".
Como parte de la declara, la nom de Guo ia es incluida en un lista de la dirijores de Fosun.
En la anio pasada, Guo ia parla sur alga de la difisiles cual la emprende privata ia fronti tra sua anios de comersia en Xina. El ia dise ce, cuando tota la bancos de Xina ia es poseseda par la governa, la oteni de prestas longa no ia es fasil.
Fosun International ia anunsia un crese de profita par 24% per la anio fininte en desembre 2014, a 6,86 mil milion iuan ($1,1 mil milion). Sua asiones ia cade par cuasi 2% a la reportas ier, ma ja a tarda de posmedia los ia recovre alga, e ia cade par sola 0,45%.
Si Guo ia desapare vera, el no es la dirijor major prima en la campo finansial xines ci ia desapare en semanas resente.
On divina ce esta es un parte de un campania plu vasta contra froda, inisiada par Beijing per limpi alga colonas diversa de la economia de la pais.
@T Asiones global afonda en teme sur la economia xines
@L aora_oji/2015/asiones_global_afonda_en_teme_sur_la_economia_xines
====== Asiones global afonda en teme sur la economia xines ======
25 agosto 2015
Asionerias tra la mundo ia cade acuta, entre temes par investores de un lenti economial en Xina.
En comersia volatil, la indise Dow Jones en New York ia afonda par 6%, ma lo ia regania cuasi sua perdes ante clui final basida par 3,6%. A un momento, lo ia cade su 16 000 a la ves prima pos febrero 2014.
La indise Nasdaq de companias tecnolojial ia clui basida par 3,8%, recovrente pos un tufa plu temprana de 8%.
La S&P 500 ia fini comersia a 3,9% plu basa, e a 11% su sua recordo de maio, ofisial locante se en la campo nomida "coreti", cual sinifia un cade de 10% o plu de sua apico.
Asiones en Asia ia es colpada en la note. La Indise Composada de Xanghai en Xina ia clui basida par 8,5%, sua fini la plu mal pos 2007.
La indise FTSE 100 en London ia clui ier basida par 4,6% a 5 898,87. A sua punto la plu basa, lo ia cade par 6%, perdente sirca 100 mil milion paundes de sua valua.
Asionerias major en Frans e Deutxland ia afonda par 5,5% e 4,96% en acel ordina.
Investores global es ansiosa sur la crese en la economia du de la plu grandes de mundo. La banco sentral de Xina ia desvalua la iuan a du semanas ante aora, creante temes nova ce la lenti en la economia de acel pais es plu mal ca on ia suposa orijinal.
La presos de comersia en mones e benes cade ance sever, car acel mercatos depende multe de demanda forte par Xina. Sin calmis convinsente de ofisiores xines, investores no desira compra.
@T Atacas en Paris mata a la min 120 persones
@L aora_oji/2015/atacas_en_paris_mata_a_la_min_120_persones
====== Atacas en Paris mata a la min 120 persones ======
14 novembre 2015
Frans ia declara un state nasional de crise e ia tensa sua fronteras pos cuando 120 persones, cisa plu, ia es matada en un note de atacas par fusil e bomba en Paris.
Otodes persones ia es matada cuando fusilores ia entra violente a la salon de concerta Bataclan e ia prende deses de ostajes. La aseja ia fini cuando fortes de securia ia recatura la construida.
A sinco otra locas en Paris, persones ia es matada par fusil a bares e restorantes. On reporta ce oto atacores ia es matada.
La polisia crede ce tota la fusilores ia mori ma lo no es clar esce alga aidores ia fuji pos la series de atacas cuasi simultan.
On ia demanda ce abitores de Paris resta en casa, e ia posa sirca 1500 militares tra la site.
La motivas de la fusilores no ia es direta confirmada, ma un atestor a la Bataclan ia oia un de la atacores ci ia pare espresa suporta per la grupo combatosa Stato Islamiste. La om ia cria "Hollande es culpable, el ta debe no interveni en Suria!", en refere a la deside par la presidente franses de partisipa en atacas airal contra la combatosas.
Paris ia esperia ance tre dias de atacas en la temprana de janero, cuando fusilores islamiste ia mata 18 persones pos ataca la jornal satira Charlie Hebdo, un supramercato iudi, e un polisior fema patruliante.
La ataca a la salon Bataclan ia es la plu sever de la atacas a la sera de venerdi. Fusilores ia xuta a visitores ci ia regarda un presenta par Eagles of Death Metal, un grupo roc de la SUA. Biletas per tota 1500 sejas en la salon ia es comprada.
La serie de atacas, prosima a la Place de la République e la Place de la Bastille, ia colpa la cor de la capital franses en cuando caferias, bares, e restorantes ia es la plu ocupada. Clientes ia es fusilida a locas incluinte un restorante de piza e un restorante camputxa.
La otra blanco ia es la Stadion de Frans, a la borda norde de Paris, do presidente Hollande e 80 mil otra persones ia regarda un max internasional amin entre Frans e Deutxland, con miliones de televidores.
On ia freta la presidente a via pos la prima de a la min du esplodes direta estra la stadion, per fa un consenta urjente de consilio. Tre atacores a la stadion ia es matada.
Cuando la estende de la matas ia deveni clar, Hollande ia apare en televide nasional per anunsia un state de crise a la ves prima en Frans de pos 2005. Esta permete ce la autoriosas clui locas publica e restrinje la moves de trafica e persones.
Pos min ca un ora, fortes de securia ia ataca la salon de conserta, e tota cuatro atacores ia es mor. Tre ia esplode se, e la otra ia es fusilida par la polisia. Un otra atacor ia es matada en un strada en Paris este.
Parlante pos ariva a la salon de conserta, presidente Hollande ia dise ce on va combate la atacores "sin pardona".
Ann Hidalgo, la maior de Paris, ia anunsia ce tota scolas, museos, bibliotecas, jinasios, pisinas, e mercatos va es cluida oji.
@T Baghdad para la flue de refujadas de Baghdad
@L aora_oji/2015/baghdad_para_la_flue_de_refujadas_de_baghdad
====== Baghdad para la flue de refujadas de Baghdad ======
23 maio 2015
La autoriosas en Baghdad ia clui un ponte major, preveninte ce refujadas fujinte de la site Ramadi entra a la capital iraci.
Plu ca 40 mil persones ia sorti de Ramadi pos sua catura par soldatos de la Stato Islamiste (SI), plu temprana en esta semana.
Lo no es clar perce on ia clui la ponte de Bzebiz, ma alga persones ia es ansiosa ce soldatos pote infiltra la capital par misca se con la deslocadas.
On regarda Bzebiz como la sola pasaje secur a Baghdad de la provinse Anbar.
La Program de Nuri Mundal de la Nasiones Unida ia dise ce lo ia comensa envia comedas aidante a la provinse. Sirca 25 mil persones ia reseta tal aida a jovedi, e on envia ja furnis per 15 mil otras.
On reporta ce SI vade a este de Ramadi longo la vale de la rio Eufrate, en dirije a Habbaniya, do soldatos de la governa asembla per un contrataca proposada contra Ramadi.
Si los catura Habbaniya, SI va es prosima a un lia direta con Falluja, un site prosima a Baghdad cual lo ia ocupa tra plu ca un anio, an pos atacas repeteda par soldatos de la governa.
Ier, la visministro xef de Irac, Saleh al-Mutlaq, ia averti ce la batalia contra SI ia sesa es "un cosa local", e ia recomenda ce la comunia internasional ata.
En la avansa la plu resente, SI ia saisi ier la pasaje final controlada par la governa suri entre Suria e Irac. La perde de esta pasaje de frontera, al-Tanf, segue la ocupa de Palmira, un site antica suri, a jovedi.
@T Ban Ki-moon recomenda flexablia en discutes sur Suria
@L aora_oji/2015/ban_ki-moon_recomenda_flexablia_en_discutes_sur_suria
====== Ban Ki-moon recomenda flexablia en discutes sur Suria ======
30 otobre 2015
Ban Ki-moon, la secretor jeneral de la Nasiones Unida, ia recomenda "flexablia" a discutes en Wien entre la paises cual suporta lados oposante en la gera interna de Suria.
El ia sujesta forte ce la sinco partisipantes xef -- la SUA, Rusia, Iran, Arabia Saudi, e Turcia -- debe sustitui "gida global" per "perspetivas nasional".
Esta discutes, en Osteraic, es la prima tales cual inclui Iran, cual -- con Rusia -- suporta la presidente suri, Bashar al-Assad. La SUA, Turcia, Arabia Saudi, e otra nasiones arabi de la Mar de Persia, insiste ce Assad no pote ave un rol permanente en la futur de la pais.
La gera de cuatro anios en Suria, cual ia comensa con un revolta contra Assad, ia lasa 250 mil persones mor e ia obliga un dui de la popla de la pais -- o 11 milion persones -- a parti de sua casas.
Rusia e Iran ia aumenta resente sua envolve militar en la gera, suportante la fidosas de Assad.
A la dia ante la discutes, Ban ia comenta: "Plu on segue sua propre perspetivas nasional, plu la persones va sufri, e la mundo intera va sufri. Como me dise sempre, on trova no solve militar."
La ministro irani de esternas, Mohammad Javad Zarif, ia dise ce otra potias ia comprende ce no modo esiste de ateni "un solve asetable" de la gera suri, sin la envolve de Tehran.
Ministros de esternas ia fa discutes nonformal en Wien ier, con la discutes major en la ajenda per oji.
John Kerry, la ministro de esternas de la SUA, ia encontra ier Zarif, e ance la ministro rusce de esternas, Sergei Lavrov, e la ministros de esternas de Arabia Saudi e Turcia. Ministros de esternas de Deuxtland, Frans, la Rena Unida, Misre, Lubnan, e la Uni European ia confirma ance ce los va es presente a la consenta, e on previde ance la presentia de otra potias de Asia sude-ueste.
Un diplomata ueste ia descrive la discutes en Wien como "embrial", con ce un otra ia dise ce on va susede si mera on preveni ce la lados oposante parti subita en protesta.
@T Barat atenta deteta esportas nonlegal de carne de bove
@L aora_oji/2015/barat_atenta_deteta_esportas_nonlegal_de_carne_de_bove
====== Barat atenta deteta esportas nonlegal de carne de bove ======
7 otobre 2015
Barat intende pone laborerias siensal a portos per deteta esportas nonlegal de carne de bove, a media de un controversa causada par la linxa de un om muslim sur un rumor ce el ia come tal carne.
La plu de statos barati proibi mata boves, cual es regardada como animales santa par la comunia indu majorial de la pais. An tal, on permete jeneral la mata e come de bufalos.
La proibi ia provoca un coleria grande, en cual multe persones demanda perce la governa ave la direto de deside lo cual los come.
On ia critica ance la proibi car carne de bove es min custosa ca carne de gal o pex, e es un comeda major per la comunias plu povre muslim, tribal, e dalit (istorial conoseda como parias).
La ministro minor de cultiva ia informa jornalistes ce la laborerias va ajunta un plu strato per deteta la pasa nonlegal de carne de bove tra portos, con ce tota esportas de carne es sever regulada par la governa.
La esaminas va consentra xef a la site ueste Mumbai, cual es la punto major de sorti per esportas de carne barati.
La governa es sempre plu presada par indus noncomprometente a proteje plu la boves.
En la mense pasada, Mohammad Akhlaq, un om de 50 anios, ia es matada par un manada indu sur rumores ce sua familia ia conserva e come carne de bove a sua casa. Sua fio de 22 anios ia es grave ferida en la ataca, ma recovre aora en ospital.
An con la proibi vasta de mata boves, Barat esporta plu carne de bove ca tota otra paises, con grasias a sua esportas de carne de bufalo. On previde ce lo va esporta 2,4 milion tones de tal carne en 2015, contra (per esemplo) 2 milion par Brasil.
On reporta ce Barat ave cuasi 1700 mataderias, de cual la plu es en la stato norde Uttar Pradesh e la stato ueste Maharashtra.
@T Barcones japanes parti per xasa balenas
@L aora_oji/2015/barcones_japanes_parti_per_xasa_balenas
====== Barcones japanes parti per xasa balenas ======
1 desembre 2015
Barcones japanes de xasa balenas ia parti per recomensa sua atas en la Antartica pos un anio de asteni, ma los es internasional oposada.
Japan dise ce sua program de xasa es per rexerca siensal -- un de la esetas en cual la regulas internasional permete xasa balenas.
Ma en 2014, la Corte Internasional de Justia ia dise ce la xasa japanes en la Antartica no es siensal e debe sesa. Ativistes dise ce la program es noncompatiosa e nonsustable.
Japan insiste ce lo atenta demostra ce la popla de balenas es sufisinte grande per justi recomensa la xasa per intendes comersial, e dise ce lo nesesa mata la mamales per fa bon sua rexercas.
En la saison 2014--2015, la pais ia dise ce lo va respeta la deside par la Corte, e lo ia catura no balenas en la Antartica, an si lo ia fa un xasa min grande en la Mar Pasifica.
A lundi, la Departe de Pexerias de Japan ia dise ce lo ia considera la judi par la Corte e intende catura sola 333 balenoteras antartica en esta anio -- aprosima un tri de la cuantia tipal presedente.
Alga nasiones, incluinte Australia, cual ia inisia la prosede legal contra Japan, ia junta se a ativistes ambiental en vosi sua angusa a la recomensa de la xasas.
Un barcon de 8000 tones -- la Nisshin Maru -- e tre barcones plu peti de arpon ia parti de Shimonoseki en Japan sude-ueste.
Tomoaki Nakao, la maior de Shimonoseki, ia suporta zelosa la recomensa. "No cosa es tan felis como esta dia," el ia dise a un rituo per la ecipo de la flotila ante cuando los ia parti.
La xasa mesma va aveni de la tarda de desembre asta marto de la anio veninte, seguente la Departe de Pexerias. On ia anunsia la deside de recomensa a mera un pico de dias ante la parti oji.
La industria es regulada par la Comision Internasional de Xasa Balenas. Lo ia acorda ce un suspende de xasa va comensa de la saisonn 1985--1986. Japan ia acorda acel, ma ia continua xasa balenas a pos, su la esenta de rexerca siensal.
Alga otra nasiones cual xasa balenas, per esemplo Noria, continua xasa pos rejistra formal sua oposa a la suspende. On permete la xasa par poplas orijinal su un eseta per "susta nativa".
@T Batalias desastrosa per nonmilitares en Ucraina
@L aora_oji/2015/batalias_desastrosa_per_nonmilitares_en_ucraina
====== Batalias desastrosa per nonmilitares en Ucraina ======
4 febrero 2015
Asta 16 persones nonmilitar ia mori e deses de otras ia es ferida en 24 oras de batalia en Ucraina este. La Nasiones Unida averti ce la aumenta nova de violentia deveni desastrosa.
Representores de la governa e la rebelores ia reporta la moris la plu resente en locas tra la areas de Donetsk e Luhansk.
La armada de Ucraina ia dise ance ce sinco soldatos ia mori combatente rebelores prorusce prosima a Debaltseve, un vila stratejial.
La cuantia de moris nonmilitar ia crese multe en semanas resente par causa de atacas par la rebelores.
La Nasiones Unida dise ce plu ca 5350 persones ia mori aora, e ce plu ca 12 mil otras ia es ferida par la batalia.
On ia esperia multe combate sirca Debaltseve, la loca de un junta major de ferovia tra la semana pasada, en cuando rebelores ia atenta ensirca soldatos de la governa.
La vila es cuasi intera destruida e multe abitores es trapida -- ascondente en susolos, sin comedas, eletrica e furnis de acua.
En un otra developa, la governa en Ciiv ia anunsia regulas nova per restrinje la documentos cual rusces pote usa per entra a Ucraina. On predise ce la esta cambia va alti la tensa contra Moscva.
De 1 marto, rusces va nesesa un pasaporte esterna per pote entra a la pais, e no plu sola sua documentos interna de identia.
@T Beijing proibi fumi publica
@L aora_oji/2015/beijing_proibi_fumi_publica
====== Beijing proibi fumi publica ======
1 junio 2015
La fumi publica en Beijing, la capital de Xina, es aora proibida pos la introdui de un lege nova.
La pais ave plu ca 300 milion fumores, e plu ca milion xineses mori de maladias relatada con fumi en cada anio.
Proibis de fumi ia esiste ja en Xina, ma los ia es neblosa e jeneral los no ia susede redui la pratica.
La regulas nova e plu sever ia es acordada par legores en novembre 2014. Los proibi fumi en restorantes, ofisias, e transporta publica en la capital. Miles de esaminores va enforsa los.
Los ci desobedi va es multada per 200 iuanes ($32), e si un compania iniora la fumi de sua empleadas, on pote multa lo per asta 10 mil iuanes.
Persones ci ofende repetente va es publica nomida en un pajeria de governa.
La lege nova restrinje ance anunsias de tabaco tra la site.
La Organiza Mundal de Sania ia bonveni la regulas plu sever, comentante: "Esta lege nova va trae permanente la aira limpa a la interna de tota construidas publica de Beijing. En fa esta, lo va proteje plu ca 20 milion abitores de Beijing de la efetos matante de esposa a la fuma nosiva de otra persones."
An tal, otras crede ce mera la popularia de la abitua va difisili la enforsa de la regulas.
@T Blancos militar es atacada en Misre
@L aora_oji/2015/blancos_militar_es_atacada_en_misre
====== Blancos militar es atacada en Misre ======
30 janero 2015
A la min 26 persones, xef soldatos, ia es matada en un serie de atacas par ativistes islamiste en la norde de la penisola Sina en Misre.
Un bomba de auto e rocetos ia colpa blancos militar en El-Arish, la capital provinsal. Otra atacas ia aveni en la vila Sheik Zuwayid e en Rafah, prosima a Gaza.
Un grupo combatosa, Provinse Sina, cual ia adota acel nom pos promete sua fida a Stato Islamiste, ia dise ce lo ia esecuta esta atacas "estendosa e simultan".
La SUA ia condena la atacas, descrivente se como ancora "firma en sua suporta de la laboras de la governa misri contra la menasa de terorisme".
La rebelores en Misre ia intensi sua atacas de pos la despone de la presidente islamiste Mohammed Morsi en 2013.
La atacas de ier ia es casos de violentia antigovernal la plu mal en la pais en menses resente.
Prima, rocetos ia es xutada a ofisias de polisia, un base militar, e un otel militar en El-Arish. Alora un bomba de auto ia esplode a la porton retro de la base.
La jornal al-Ahram ia reporta ce sua ofisia en El-Arish, fasante la otel e base, ia es completa destruida.
Cuatro soldatos ia es ferida en un ataca a un posto de controla estra El-Arish, e un major de armada ia es matada par fusil a un posto de controla en Rafah.
Plu ca 50 persones ia es ferida en la atacas. La esecuta sujesta un grado de colabora cual on no ia vide a ante.
Misre es ance tensa en esta semana par causa de protestas onorante la aniversario de la revolta de 2011 cual ia despone Hosni Mubarak.
@T Bombas mata en Nijeria norde
@L aora_oji/2015/bombas_mata_en_nijeria_norde
====== Bombas mata en Nijeria norde ======
23 julio 2015
A la min du bombas ia esplode en du stasiones de bus en Gombe, un site en la norde de Nijeria, matante 29 persones, cisa plu.
Plu temprana en la dia, bombas umana ia mata a la min 11 persones en Camerun, la pais direta a este.
49 persones ia es matada en esplodes a un mercato en Gombe en la semana pasada. On ia culpa estremistes de Boko Haram per acel ataca.
La grupo islamiste, cual ataca frecuente en Nijeria norde, ia aumenta sua atacas de pos cuando Muhammadu Buhari ia deveni presidente en maio.
Asta aora, no grupo ia dise ce lo ia esecuta la atacas a la sera de ier, ma Boko Haram ia ataca stasiones de bus en la site a ante.
On teme ce la cuantia de mores en Gombe va crese, entre reportas ce deses de persones ia es ferida. Un atestor ia dise ce el ia conta 30 corpos mor a un de la stasiones.
En la anio pasada, Boko Haram ia saisi un area grande de Nijeria norde-este e ia declara un califia -- un stato governada par lege muslim.
La armada nijerian, suportada par soldatos de paises visina (incluinte Camerun), ia recatura la plu de la teritorio, ma en semanas resente on ia esperia un aumenta de atacas par suiside.
A no multe oras ante la ataca en Gombe, bombas umana ia ataca la site Maroua en Camerun norde, lasante a la min 11 persones mor e deses ferida.
Un atestor local ia dise ce la bombores ia es du xicas joven ci ia desembla se como mendicores. Un de los ia detona la esplodentes a la mercato sentral de la site, en la tal ataca du de la semana pasada.
La autoriosas ia estende aora un proibi de porta burcas afin lo inclui ance Douala, la capital comersial de la pais. A ante, la proibi ia esiste sola en la provinse nomida la Area Estrema Norde, pos du atacas ala par bombas umana a un tempo plu temprana en esta mense.
La armada camerunes usa Maroua como un base per sua operas contro Boko Haram, como parte de un forte multinasional cual batalia la estremistes en areas visina de Nijeria.
Paul Biya, la presidente de Camerun, ia descrive la atacas como "coarde e vil".
Seguente Amnestia Internasional, a la min 17 mil persones, de cual la plu ia es nonmilitar, ia es matada de pos la comensa de la revolta par Boko Haram en 2009. La grupo estremiste teni nonlibre ancora multe femes e enfantes, incluinte 219 xicas ci lo ia fura de un scola en Chibok en april de la anio pasada.
@T Bosnia condena un ataca contra la ministro xef de Serbia
@L aora_oji/2015/bosnia_condena_un_ataca_contra_la_ministro_xef_de_serbia
====== Bosnia condena un ataca contra la ministro xef de Serbia ======
12 julio 2015
La governa de Bosnia e Hersegovina ia condena un ataca contra Aleksandar Vučić, la ministro xef de Serbia, a un rituo per onora la aniversario 20 de la masacra a Srebrenica.
Lo ia dise ce Vučić ia visita la vila "en spirito de reconsilia, intendente mostra respeta". Vučić ia es obligada a fuji de la rituo pos es desaclamada, interompeda, e an colpada con petras.
Sirca 8000 muslimes ia es matada en Srebrenica par soldatos serbsce bosance en la gera de Bosnia.
Parlante en Beograd, la capital de Serbia, pos la ataca, Vučić ia dise ce sua oculo ia deveni rompeda en la aveni ma ce el mesma no ia es ferida. El ia dise ce la atacores ia es organizada, ma ia asentua ce el va continua sua politica de rearmoni.
"Me regrete ce alga persones no ia comprende mea desira sinsera de construi amia entre serbsces e muslimes bosance," el ia dise. "Mea mano resta estendeda a la popla bosansce."
En la pasada, Vučić ia es un nasionaliste revoluiste serbsce ci ia labora su Slobodan Milošević, la xef serbsce, en la tarda de la desenio de 1990.
Aora, el es un politiciste proueste ci vole gida Serbia a entra a la Uni European. Sua governa ia susede gania suporta de Rusia, sua aliada, a mercurdi per rejeta un deside par la Nasiones Unida cual ta nomi la avenis en Srebenica un jenoside.
Deses de miles de persones ia asembla per la rituo ier en la vila en Bosnia este.
Atestores dise ce Vučić ia veni de pone un flor a un monumento cuando partes de la fola ia comensa cria "Dio es alta" en arabi e lansa petras. Scermida par parapluves, el e sua gardacorpos ia core a via.
En sua declara, la governa de Bosnia -- cual conteni membros de cada de la tre comunias xef de la pais: corvatsce, serbsce, e muslime bosance -- ia ofre sua regretes a "tota delegas stranjer" per la aveni.
La maior de Srebrenica ia descrive la ataca como "la labora de mentes malada ci ia malusa esta aveni formal".
Serbia ia condena la ataca como "un atenta de asasina", e sua ministro de esternas ia dise ce lo ia es un ataca "contra tota Serbia e sua politica de pas e colabora rejional".
Ance ier, on ia fa un rituo funeral per plu ca sento vitimes de ci on ia identifia resente sua restas par analise de ADN.
Presente a ambos rituos, Bill Clinton, la presidente SUA a tempo de la masacra, ia regrete ce tan multe tempo ia es usada per fini la gera. El ia ajunta: "Me vole nunca vide un otra campo de mata como esta."
@T Brasil introdui regulas nova sur sesareas
@L aora_oji/2015/brasil_introdui_regulas_nova_sur_sesareas
====== Brasil introdui regulas nova sur sesareas ======
7 julio 2015
En Brasil, regulas nova ia comensa es usada con intende de redui la cuantia alta de paris par sesarea en la pais.
Otodes-sinco persentos de tota nases en ospitales privata en Brasil es sesareal, e en ospitales publica la persentos es 45.
La regulas nova obliga dotores a informa femes sur la riscas e a solisita sua suscrive sur un formulario de acorda ante la opera.
Dotores va debe ance justi perce un sesarea es nesesada. Los va debe scrive un rejistra completa de la developa de la pari e nase, e esplica sua atas. Cada fem ensinta va ave aora notas medical rejistrante la istoria de sua ensintia, e el va pote prende estas si el cambia sua dotor.
On intende ce la regulas va redui sirurjias nonesesada e serti ce ensintas es consensa de la riscas asosiada con sesareas.
An tal, espertas dise ce car on ave un nonsufisi de letos de pari e de salas capas de prosede nases natural, un sesarea es regardada como la eleje la plu bon per multe femes en Brasil.
Femes ci desira pari natural en un ospital privata ia reporta trova ce tota letos es reservada per paris ajendida. On ia reporta sur multe femes ci ia comensa pari sin reserva ja un sesarea, e ci ia debe donce viaja de ospital a ospital per xerca un leto.
Rexercores dise ce multe femes regarda ance sesareas como plu sivil e moderna, e paris natural como primitiva, fea, e nonoportun.
En la cultur brasilera preocupada de aspeta, do on distribui poca informas sur pari, on ave ance un ansia grande ce la pari natural pote redui la atrae sesal de femes.
Multe dotores prefere ance sesareas, car los permete organiza la ora de un nase, e la dotores senti plu protejeda de litiga.
@T Bruxelles clui en teme de un ataca nova teroriste
@L aora_oji/2015/bruxelles_clui_en_teme_de_un_ataca_nova_teroriste
====== Bruxelles clui en teme de un ataca nova teroriste ======
22 novembre 2015
La sentro de Bruxelles, la capital de Beljia, ia es cuasi vacua a la sera de ier, pos un avisa de terorisme cual ia clui temprana restorantes e bares, en teme de un plu ataca de spesie de Paris.
Soldatos ia patrulia ia stradas en cuando un xerca intensa ia continua per la fujor Salah Abdeslam, ci on vole aresta en relata con acel atacas.
Amis de el, ci ia parla a el par Skype, ia dise ce el es ascondeda en la area de Bruxelles e atenta viaja a Suria.
La estremistes de Daex ci ia mata 130 persones en Paris ia usa Bruxelles como un base. La autoriosas beljes ia leva Bruxelles a sua nivel la plu alta de vijila en la tarda de venerdi.
La ministro xef, Charles Michel, ia dise ce on ia ave "un informa vera esata" ce "alga individuas con armas e esplodentes pote esecuta un ataca... cisa an en plu ca un loca".
Un de la omes ci ia automobili Abdeslam a Beljia ia dise a sua avocato ce Abdeslam ia es vestida en "un jaca grande" e ia porta cisa un sintur de bomba.
La avocato, Carine Couquelet, ia dise a la televisa beljes ce esta leva demandas, incluinte la posible ce Abdeslam ia intende esplode se en Paris ma ia reconsidera e ia cambia sua deside.
La amis de Abdeslam ia dise ce el es trapida entre la autoriosas european ci xasa el e membros de Daex ci "oserva el" car el no ia detona sua sintur de bomba.
On ia avisa ce la abitores de Bruxelles evita folas, on ia clui la metro e sinemas, e on ia demanda ce sentros comersial, caferias e restorantes clui a 18:00. Soldatos ia es enviada a la stradas.
Michel ia comenta ce la governa va rejudi la situa de securia en la site a la posmedia de oji.
@T Budapest reabri sua stasion xef pos un crise de migrores
@L aora_oji/2015/budapest_reabri_sua_stasion_xef_pos_un_crise_de_migrores
====== Budapest reabri sua stasion xef pos un crise de migrores ======
3 setembre 2015
La stasion xef de ferovia en Budapest, la capital de Ungaria, ia abri sua portes a sentos de migrores pos un nonprogresa de du dias.
Un fola de persones ia asende la grados en dirije a la plataformas pos la abri de la portes, ma un anunsia publica ia dise ce trenes internasional a Europa ueste es suspendeda per la futur previdable.
Esta ia aveni cuando Viktor Orbán, la ministro xef e antimigror de Ungaria, ia es espetada en Bruxelles per discute la crise.
La migrores trapida a la stasion Keleti ia es prevenida de embarca trenes a martedi e mercurdi. Alga ia es envolveda en scaramuxas con polisiores.
Los ia compra biletas pos cuando Ungaria ia pare abandona per tempo corta sua atentas de rejistra migrores, permetente ce un cuantia grande de los embarca trenes a Wien e Deutxland sude.
Lo no ia es direta clar esce on va permete ce los embarca trenes local oji.
La cuantia de migrores ci entra e Europa ia ateni un nivel recordo, con 107 500 arivores sola en julio. Deutxland previde aseta sirca 800 mil migrores en esta anio -- la cuatruple de la soma en 2014.
La aumenta de la cuantia ia crea tensas e desacordas sur la politica de migra en la Uni European. Ier, Deutxland, Italia e Frans ia recomenda "un distribui justa" de refujadas tra la UE intera, ma David Cameron, la ministro xef de la Rena Unida, ia dise ce la aseta de "sempre plu" refujadas no va solve la problem.
Italia e Elas ia cexa ce los es inondada par la cuantia de persones ci ariva a sua costas. E an si paises como Deutxland es preparada per aseta cuantias grande de refujadas, otras no es.
Ministros de internas e de justia de la UE va consenta en Bruxelles a 14 setembre per dirije se a la crise.
La custa umana de la crise ia deveni clar ier, cuando sinco enfantes ia es entre 12 migrores ci ia afoca en acuas turces en atenta ateni Elas. Imajes de la corpo encaliada de un enfante de tre anios, ci ia mori a lado de sua madre e frate de sinco anios, ia sirculi vasta en redes sosial.
@T Buzz Aldrin envia un mesaje a Marte de Stonehenge
@L aora_oji/2015/buzz_aldrin_envia_un_mesaje_a_marte_de_stonehenge
====== Buzz Aldrin envia un mesaje a Marte de Stonehenge ======
18 marto 2015
Buzz Aldrin, la person du ci ia pasea sur la luna en 1969, ia envia "un mesaje a la planeta roja" de Stonehenge.
Stante ante la monumento preistorial famosa, la astronauta ia es fotografida en abri sua jaca per revela un camiseta con slogan recomendante ce on vade pronto a Marte.
Pos sua visita a la sirculo de rocas en England sude-ueste, el ia tuita: "Cuando me ia es a Stonehenge, me ia deside envia un mesaje a la universo."
La astronauta veteran ia recomenda ja laboras nova no sola per envia un mision abitada a Marte ma ance per coloni acel planeta.
La organiza English Heritage (Erita Engles), cual maneja Stonehenge, ia reseta alga demandas esce la foto de Aldrin es real.
Un portavose ia dise: "Esta ia es un visita privata per el e sua familia. Nos ia oia ce el va visita a sirca un semana ante aora, e cadun ia es multe stimulada ante encontra el."
Pos turi la loca antica, Aldrin ia demanda ance bromosa "do on asconde la estrateranes".
@T Caos en la parlamento de Sudafrica
@L aora_oji/2015/caos_en_la_parlamento_de_sudafrica
====== Caos en la parlamento de Sudafrica ======
13 febrero 2015
La parlamento de Sudafrica ia deveni caososa cuando parlamentores sinistriste ia scaramuxa con securiores a media de un parla major anial par presidente Jacob Zuma.
La Bataliores per Libria Economial (EFF en engles), gidada par Julius Malema, ia interompe Zuma a multe veses, esijente respondes sur un scandal de spende.
Alora, la xef de parlamento ia comanda ce on sutrae los de la sala, causante scaramuxas.
La partito oposante la plu grande, la Alia Democrata, ia sorti ance en protesta a la esclui de la EFF. Sua gidor, Mmusi Maimane, ia dise: "On no pote usa la polisia contra la parlamento."
La EFF ia usa la aveni de la parla anial sur la State de la Nasion per fa demandas a Zuma sur bonis a sua abitada privata, cual ia es publica finansiada e ia custa miliones de dolares.
Un cuantia grande de securiores ia esclui los de la sala. Malema ia es entre la escluidas.
El ia defende la atas de sua parlamentores, indicante ce la interompes ia es un atenta valida de defende la democratia. El ia ajunta ce sete de sua partito ia deveni ferida e va fa acusas.
Lo no es clar esce la securiores ia es de la polisia o la parlamento. La difere es importante, seguente un parlamentor ci ia dise ce la usa de polisiores ta es un modo de menasa la oposante.
Malema e Zuma ia es aliadas prosima en la pasada, ma los ia desacorda.
La EFF ia secute la mundo political en Sudafrica con un serie de proposas popliste per redistribui la ricia.
En 2014, un esamina autonom ia trova ce Zuma ia "benefica nonmeritada" de la bonis custosa a sua casa en la vileta Nkandla. Los ia custa sirca $23 milion e ia inclui un pisina e un ensirca de boves. La presidente ia nega ce el ia fa mal.
An con criticas de la bonis a sua casa e la economia staniante de la pais, la partito de Zuma, la Congresa Nasional African, ia es forte reelejeda en la anio pasada.
@T Cavores espaniol mori en la montania de Magrib
@L aora_oji/2015/cavores_espaniol_mori_en_la_montania_de_magrib
====== Cavores espaniol mori en la montania de Magrib ======
6 april 2015
Du cavores espaniol ia mori, e un ia survive, pos deveni trapida tra dias a la fondo de un canion profonda en la montes Atlas de Magrib.
Tarda ier, on ia salva un om de 27 anios, ma sua du acompaniores ia es matada par sua feris ante pote es salvada.
Jornalistes local reporta ce la survivor es nonferida, ma ce el sufri de ipotermia e de angusa pos trauma.
Tota tre cavores ia es vivente cuando on ia trova los a la matina de saturdi.
Los ia separa de la resta de sua grupo per esplora cavas diferente, e a martedi on ia reporta ce los ia desapare.
A saturdi, los ia pare en bon state, reatante a siniales de un avion xercante.
Ma un de los, Gustavo Virués, ia mori plu tarda en acel dia en cuando ecipos de salva ia luta ancora per ateni la mancantes. La canion ave 400 metres de profondia, e asede lo no es fasil.
Cuando los ia ariva e dona aida medical, José Antonio Martínez ia mori an tal.
Juan Bolivar Bueno ia es susedosa estraeda de la canion e ia es moveda a Ouarzazate, un site visina.
La montania Atlas Alta inclui montes con plu ca 4000 metres de altia. Multe turistes visita la montania per pasea o sci.
@T Cenia lamenta la vitimes de un ataca somali
@L aora_oji/2015/cenia_lamenta_la_vitimes_de_un_ataca_somali
====== Cenia lamenta la vitimes de un ataca somali ======
5 april 2015
Cenia ia comensa tre dias de lamenta per la 148 vitimes de un ataca contra studiantes par al-Xabab, un grupo ativiste.
On va fa rituos pascual per recorda los ci ia mori en la ataca a la Universia de Garissa a jovedi, e banderas va es basida a altia media.
Presidente Uhuru Kenyatta ia promete responde a la ataca "en la modos tan sever como posible".
En Cairo, la Universia de al-Azhar -- la loca de studia la plu respetada sur islam suni, ia condena ance la ataca.
La Crus Roja de Cenia dise ce, asta aora, relatadas ia identifia 54 de la vitimes a un moreria en la capital, Nairobi.
Buses transporta plu ca 600 studiantes e sirca 50 empleadas survivente a sua propre vilas.
Multe survivores ia es reunida con sua familias a la Stadion Nasional Nyayo en Nairobi, cual ia deveni un base de desastre.
Cuasi tota la 148 matadas ia es studiantes. 79 otra persones ia es ferida.
Cuatro fusilores ia es matada, e ofisiores dise ce los teni sinco persones per interoga los. On crede ce un de esta persones es un securior de la universia.
Ambos cristianes e muslimes ia denunsia la ataca. On previde ce, en sua mesaje pascual tradisional, Pape Fransisco va descrive la studiantes como martires cristian contempora.
En Cenia, persones ia vade sur la stradas per protesta sur la matas e per rejeta la idea ce al-Xabab ia susede divide la pais.
Ma on ia critica como la servis de securia ia trata la ataca. Sola du gardores ia es laborante cuando la ataca ia aveni, an pos avertis ofisial ce un tal ataca contra un universia es probable.
Garissa es situada a 150 cilometres de la frontera de Somalia, de do al-Xabab opera. La grupo ativiste ia dise ce sua atacas venja atas par soldatos cenian en Somalia.
@T Ciroteros en covreletos
@L aora_oji/2015/ciroteros_en_covreletos
====== Ciroteros en covreletos ======
10 novembre 2015
Un paje de Facebook deleta cores e cambia opinas con sua fotos de ciroteros bebe orfan envolveda en covreletos. La paje comunial de "Batzilla" ia colie ja plu ca 155 mil gustas.
La paje ia es creada par Denise Wade, un coordinor de la grupo de Conserva e Salva Ciroteros en Queensland, Australia, per asentua la mal situa de ciroteros e volpes volante en la pais.
El ia esplica: "Lo funsiona xef como un util de instrui, un cosa cual me pote usa per lumina la veria sur ciroteros e per desapare malinformas sur sua spesies. Me espera ce la veria va parla ance per se mesma: ce ciroteros es animales noncredable bela e intelijente."
Ciroteros e volpes volante es protejeda en Australia, ma poplas urban de ciroteros es un fonte de controversia. La developa de vilas intrui a sua abitadas, e abitores ansiosa sur maladia, ruido, e odores ia atenta move colonias de ciroteros a via de sua casas.
Wade espera converti plu persones a amores de ciroteros. "Plu ciroteros move a areas urban, e esta pote causa desacordas con umanas. Nos nesesa comprende plu los, e nos pote fa esta sola par cambia nosa modo de condui afin tota de nos vive en armonia."
El ia dise ce la nom "Batzilla" no porta un sinifia spesial. "Lo ia es mera alga cosa divertinte cual me ia inventa."
Multe de la fanes de la paje visita per vide la fotos de ciroteros bebe, comun fotografida en covreletos spesa. "La problem cual esta petis fronti," dise Wade, "es ce cuando los sorti de la incubador, los fri multe rapida e pote deveni perilida, donce nos nesesa caldi sua corpos."
Wade ia crese sua impresa de pede en la mundo de redes sosial, con un conta de YouTube conteninte videos de sua ciroteros e volpes volante.
El ia loda sua "grupo merveliosa de seguores", comentante: "Me spende tan multe tempo como posible a la refrescis, car me opina ce medios sosial pote es un util multe importante de instrui."
@T Colombia proibi un erbiside carsinojen
@L aora_oji/2015/colombia_proibi_un_erbiside_carsinojen
====== Colombia proibi un erbiside carsinojen ======
10 maio 2015
Colombia ia anunsia ce lo va sesa usa un erbiside controversa per destrui cultiverias nonlegal de coca, la ingrediente cru per cocaina.
La deside segue un averti par la Organiza Mundal de Sania ce glifosato es "probable carsinojen".
On ia usa la cimical en programes antinarcotica per duxi campos en America Sude.
La presidente de Colombia, Juan Manuel Santos, ia dise ce la pais va debe trova otra metodos de combate la produi de coca.
Ofisiores antinarcotica en Colombia va prepara un projeta alternativa ante otobre.
Santos ia ajunta ce la pais no va "basi la garda" en sua batalia contra contrabanda de drogas.
La program colombian de elimina drogas ia comensa en 1994. La autoriosas consentra xef a areas controlada par la FARC (Fortes Armada Revoluinte de Colombia), la grupo la plu grande de rebelores en la pais.
La FARC usa la revenu de produi cocaina per finansia sua ativias armada.
Ance otra paises en la area cual produi coca, incluinte Ecuador e Peru, ia usa la erbiside per destrui campos de coca.
Cultivores dise ce la fumiga airal ia ruina campos intera de cafe e otra produidas legal.
@T Combates mata plu ca dudes persones en un site jazairi
@L aora_oji/2015/combates_mata_plu_ca_dudes_persones_en_un_site_jazairi
====== Combates mata plu ca dudes persones en un site jazairi ======
9 julio 2015
A la min 22 persones ia mori en scaramuxas entre comunias arabi e berber sirca Ghardaia, un site de oasis en Jazair.
La site ia esperia combates tra la du anios pasada, par causa de compete entre la comunias per emplea, casas, e tera. Ma la du dias resente de scaramuxas en Ghardaia -- e Guerrara e Berianne, du sites prosima -- es la plu violentes asta aora.
Presidente Abdelaziz Bouteflika ia fa un consenta de crise a mercurdi, e ia recomenda forte ce la popla en Ghardaia "aida restora calmia e conserva la lias antica de fratia cual ia cuali sempre la area".
Plu temprana en la dia, Noureddine Bedoui, la ministro de internas, ia ariva en Ghardaia. La site es un de la locas de erita mundal de UNESCO.
Membros de la comunia mozabita berber local ia fa un protesta en la capital, a 600 cilometres a norde, per solicita un proteje plu bon.
"La situa es multe grave," un xef de la mozabitas ia dise. "Esta no es aora mera un caso de combates, lo es terorisme."
La ajenteria ofisial de novas en Jazair ia reporta ce la plu de la moris ia resulta de "misiles". On no sabe a cual grupos la mores ia aparteni.
Un semetero de mozabitas ia es violeda en desembro 2013, provocante batalias entre comunias. A la min 12 persones ia es matada ante la recomensa de violentia en esta semana.
@T Comentas scandalosa par Donald Trump
@L aora_oji/2015/comentas_scandalosa_par_donald_trump
====== Comentas scandalosa par Donald Trump ======
9 desembre 2015
En la SUA, la Pentagon ia averti ce la retorica antimuslim de Donald Trump sumina la securia par aida la grupo Daex.
La aspiror major republiciste per la presidentia ia dise ce on debe proibi muslimes de entra a la SUA, seguente un ataca matante en California.
Tra la mundo, persones ia es xocada e ofendeda par la comentas de Trump.
John Kerry, la ministro de esternas de la SUA, ia junta se a la condena a la posmedia de ier, disente ce la comentas "no es construinte" en la batalia contra Daex.
La combatosas de Daex es la blanco de la campania de bombi, gidada par la SUA, en Suria e Irac.
Trump ia anunsia sua proposa a mera un pico de dias pos cuando un ataca en California ia crea temes en la SUA sur terorisme interna. Un duple muslim, sur ci on crede ce los ia deveni estremida, ia fusili e mata 14 persones a un sentro de sania en la site San Bernardino.
On reporta ce un de la du atacores, Tashfeen Malik, ia promete sua fida a Daex a la dia de la trajedia.
Ma en responde a la comentas de Trump, la Pentagon ia dise ce un frontera cluida per muslimes ta impedi la laboras SUA per oposa ideolojias estrema.
Sin usa la nom de Trump, un portavose de la Pentagon ia dise: "Cualce cosa cual forti la situa de Daex e pone la Statos Unida contra la fida muslim es serta no sola contra nosa valuas ma contra nosa securia nasional."
Esta ia es un eco de un tuita de Hillary Clinton cual ia dise ce la proposa par Trump es "no sola contra nosa valuas -- lo entra direta a la jua de la teroristes."
La coleria ia segue rapida pos cuando Trump ia dise en un declara a la sera de lundi ce muslimes ave un "odia" a America e debe es proibida "asta cuando la representores de nosa pais pote comprende lo cual aveni".
La bilionor de imobila e stela de TV de realia ia dise plu tarda ce la regula no ta aplica a persones ci abita ja en la SUA. Ier, el ia defende plu la idea, egalinte lo a politicas realida par Franklin Roosevelt en la Gera Du Mundal contra persones japanes, deutx, e italian en la SUA.
Ma xefes muslim, la Nasiones Unida, e xefes de otra paises ia critica la proposa como perilosa e dividente. La Casa Blanca ia dise ce on debe elimina Trump de la concurso presidental.
Atentante esplica sua comentas, Trump ia dise ce partes de London es "tan estremida ce la polisia teme perde sua vives".
La maior de London, Boris Johnson, ia dise ce esta es "riable", e ia ajunta: "La sola razona perce me no ta vade a alga partes de New York es la risca real de encontra Donald Trump."
Xefes de la partito republiciste ia reata forte per condena Trump. Paul Ryan, la presidente de la Salon basa, ia dise: "Lo cual ia es ier proposada no es lo cual esta partito representa. E plu importante, lo no es lo cual esta pais representa."
@T Conservistes espera gania un vota polsce
@L aora_oji/2015/conservistes_espera_gania_un_vota_polsce
====== Conservistes espera gania un vota polsce ======
25 otobre 2015
Polsca fa un vota parlamental, en cual la conservistes espera reveni a potia pos oto anios de oposa.
Sondas de opina ante la vota ia indica ce la partito Lege e Justia, gidada par Jarosław Kaczyński, es multe plu popular ca la partito Platforma Sitadanal de la ministro xef, Ewa Kopacz.
Lege e Justia ia regania la presidentia en maio, cuando Andrzej Duda ia es elejeda.
Multe polsces es nonfelis sur sua futur, e senti ce paias par la stato es distribuida en modo nonjusta.
La suporta la plu forte per Lege e Justia es en areas campanial e par persones prosima a la Eglesa potiosa catolica de la pais.
Plataforma Sitadanal ia es colpada par malreputa, con ce alga ministros ia es caturada en un scandal de escuta secreta en la anio pasada.
E a venerdi, Monika Zbrojewska, la ministro suordinada de justia, ia es desempleada pos es acusada de gida enebriada un auto.
Ance la crise european de refujadas ia apare como un tema major de debate ante la vota. An si la governa ia acorda aseta 7000 migrores, partitos oposante ia denunsia la idea.
En la semana pasada, on ia critica Kaczyński per sujesta ce migrores pote trae maladias e parasitos a Polsce.
La om de 66 anios no ofre se como aspiror de ministro xef, e ia proposa Beata Szydło, un fem relativa nonconoseda, como la elejeda ofisial per la posto en loca.
An tal, alga oservores crede ce, si Lege e Justia vinse forte, Kaczyński va emprende mesma la posto suprema.
La resulta de la vota va es regardada con interesa en nasiones eurosetica como la Rena Unida.
An si Plataforma Sitadanal xerca relatas prosima con la Uni European, un membro de Lege e Justia ia comenta ce los desira "un UE min burocrata, plu nonperosa cual no xerca un integra political plu profonda".
@T Contrabandores profita de un barcon a Italia
@L aora_oji/2015/contrabandores_profita_de_un_barcon_a_italia
====== Contrabandores profita de un barcon a Italia ======
4 janero 2015
La polisia en Italia crede ce contrabandores ia gania sirca tre milion dolares de migrores nonlegal ci los ia abandona en un barcon de carga en la Mediteraneo.
La barcon Ezadeen ia es tirada a la porto Corigliano Calabro pos cuando gardacostas ia trova lo a venerdi.
La plu de la pasajores pare es suris.
Esta es la aveni du de un tal caso con barcon de carga en esta semana. Ambos barcones ia comensa sua viaja en Turcia, evitante la curso libi cual ganges favore usual.
La xef de polisia de la provinse Cosenza ia dise ce cada migror ia paia entre $4000 e $8000 per entra a la barcon.
La contrabandores ia porta capetas e ia enclui la migrores en la cala, ante parti en un barco de salva.
En la caso prima, a martedi, gardacostas italian ia embarca la barcon Blue Sky M cual ia porta 796 migrores. Los ia trova ce la ecipo manca, e ia move la barcon a la porto Gallipoli en Italia sude.
La tatica nova de la contrabandores pare simple e produosa: on dirije un barcon de carga a Italia e lasa ce la gardacostas reseta lo.
Migras nonlegal a la Uni European deveni aumentada par migrores economial e par la gera interna en Suria, cual obliga persones a xerca un refuja en Europa.
On estima ce en 2014 cuasi 3500 refujadas ia mori en atenta traversa la Mediteraneo. Ma 200 mil ia es salvada.
@T Corea Norde desvela un airoporto nova
@L aora_oji/2015/corea_norde_desvela_un_airoporto_nova
====== Corea Norde desvela un airoporto nova ======
25 junio 2015
Fotos de botecas e otra recursos en un termina nova de airoporto en Corea Norde ia es publicida.
Alga pajes de la jornal dial Rodong Sinmun ia mostra imajes de la xef de stato Kim Jong-un e sua sposa, ci ia regarda la restorantes e la botecas.
Corea Norde ia desvela un diversa de construidas grande nova en anios resente, ma grupos de diretos umana dise ce multe de la pais vive ancora en state povre.
La airoporto nova en Pyongyang va abri a 1 julio, e va servi a sola un pico de volas.
Plu temprana en esta mense, la pais ia dise ce lo fronti sua secia la plu sever de sento anios, causante temes de mancas malinte de comedas.
Tre pajes de Rodong Sinmun (Jornal de Laborores) -- la jornal dial ofisial de la Partito de Laborores -- ia es dedicada a fotos de la turi de Kim Jong-un en la termina.
En un foto, baras Mars e bires botelida ia es vidable en un de la botecas sin imposta de la airoporto. Un otra ia mostra un caferia servinte espresos.
La construida ave un fronte de vitro, e es sesuple plu grande ca la termina vea, ma sua cuantia de pasajores va es probable basa.
La plu de la cuantia pico de volas a e de la capital de Corea Norde porta turistes xines e coreanes norde con taxes ofisial entre Pyongyang e Beijing.
On reporta ce Kim Jong-un ia demanda ance la construi de un ferovia rapida e un autovia entre Pyongyang e la airoporto, cual es situada a 24 cilometres a norde-ueste de la capital.
Pos deveni la xef de stato en 2011, Kim ia promete boni la cualia de vive en la pais isolida, ma la plu de sua projetas es ultra la ateni de la popla promedia, como vacanserias de sci e parces acual.
Multe coreanes norde sufri de un manca de comedas, acua bevable, e un furni fidable de eletrica.
@T Coreanes sude gania un concurso de robotica
@L aora_oji/2015/coreanes_sude_gania_un_concurso_de_robotica
====== Coreanes sude gania un concurso de robotica ======
7 junio 2015
Un ecipo de Corea Sude ia gania un concurso robotical internasional en Pomona en California, SUA.
La batalia de robotes ia aveni sur un curso de ostaculos, en un situa simil a la desastre de 2011 a la compleso nucleal de Fukushima.
La robot umanin DRC-Hubo ia vinse 22 otra robotes de spesies diversa, ganiante un premio de $2 milion de DARPA (la Ajenteria SUA de Projetas de Rexerca Avansada de Defende).
En min ca un ora en soma, la robotes ia debe completi un serie de taxes como gida un auto e asende un scalera.
La robotes ia es partal autonom, con sola un lia nonconstante a sua operores, per copia states de desastre vera.
La defia ia es la prima en cual robotes ia opera sin es stabilida par cordas. Multe de los ia cade a tera, csusante ce la fola oservante jemi e rie.
La otra taxes per la robotes ia inclui sorti de un auto, abri un porte, crea un buco en un mur par fora, turna un valva, e traversa detrito -- o par desbloci un via tra lo o par pasea sur lo.
La ecipo Kaist ganiante ia es la plu rapida, fininte tota taxes en 44 minutos e 28 secondos.
La concurso ia ocupa du dias, e ia inclui ance du taxes nonanunsiada a ante. A la dia prima, la robotes ia debe opera un lever, e a la dia du, los ia debe estrae un liador de un asetador e move lo a un otra.
On ia permete a cada ecipo du atentas per completi la curso.
25 ecipos ia intende compete, ma la ecipo Hydra de Japan ia retira se a la ora final pos un asidente eletronical. Un ecipo xines ia espera ance compete, ma no ia susede oteni puntual sua visas.
@T Corvatsca ave sua presidente fema prima
@L aora_oji/2015/corvatsca_ave_sua_presidente_fema_prima
====== Corvatsca ave sua presidente fema prima ======
12 janero 2015
Kolinda Grabar-Kitarović ia deveni la presidente fema prima de Corvatsca, vinsente par marjin minima.
Pos la conta de 99% de la votas, el ia gania 50,5% de los. Sua presedente en la posto, Ivo Josipović, ia gania 49,5%. Josipović ia aseta sua defeta e ia loda sua oposor.
La esta vinse oposante indica ce la politica en Corvatsca move cisa a destra, pos cuando la alia governante, a sinistra de sentro, ia fali fini ses anios de diminui economial.
On ia regarda la eleje como un proba major per la partitos xef ante elejes parlamental prevideda per la parte final de 2015.
La distantia de votas entre la du aspirores ia resta a sirca un persento tra multe de la ronda du.
58.9% de persones ia vota, un cuantia plu grande par 12% ca en la ronda prima, aveninte a du semanas a ante e con resulta simil prosima.
Grabar-Kitarović, ci ave 46 anios, ia servi ja como ministro de esternas e como aidor a la secretor jeneral de OTAN. El es un membro conserviste de la Uni Democrata Corvatsce, cual ia autonomi la pais de Iugoslavia en 1991.
A suportores joiosa en la capital Zagreb, el ia recomenda un unia nasional per fronti la crise economial. El ia comenta: "Me no va permete ce algun dise a me ce Corvatsca no va es rica."
Josipović, un esperta de lege e composor clasica, ia es presidente de pos 2010. El ave 57 anios. Sua problem ia es sua suporta par la alia governante cual no ia susede estrae la pais de un retrosede de ses anios.
Corvatsca ia deveni la membro la plu nova de la Uni European en julio 2013. 20% de sua laborores posible es nonempleada.
La presidente es la xef de la armada e pote influe la politica esterna, ma la maneja de la pais es xef la taxe de la governa. Josipović ia proposa cambias constitual per atenta solve la crise, incluinte plu potia per la presidente.
@T Cuasi 300 persones es salvada de Boko Haram
@L aora_oji/2015/cuasi_300_persones_es_salvada_de_boko_haram
====== Cuasi 300 persones es salvada de Boko Haram ======
29 april 2015
La militaria nijerian dise ce lo ia salva 200 xicas e 93 femes de un area do la grupo combatosa islamiste Boko Haram es ativa.
Ma lo ia ajunta ce la xicas saisida de un liseo en Chibok a un anio ante aora no ia es entre estas.
La xicas e femes ia es librida en operas contra Boko Haram en la Foresta de Sambisa, do cuatro campas ia es caturada.
Un portavose militar ia dise ce on intervisa aora la libridas.
On ia saisi ance armas a la cuatro campas.
En otobre 2014, la governa ia dise ce lo ia negosia un acorda per un sesaspara e la libri de la xicas prendeda de Chibok. An tal, Boko Haram ia nega esta a pos.
@T Curdis saisi un distrito major de Kobani
@L aora_oji/2015/curdis_saisi_un_distrito_major_de_kobani
====== Curdis saisi un distrito major de Kobani ======
6 janero 2015
Combatores curdi ci batalia contra la Stato Islamiste en Kobani en Suria norde ia saisi un distrito major, e controla aora 80% de la vila.
Curdis suportada par soldatos iraci ia catura la distrito de securia, incluinte la xeferia de polisia.
La Stato Islamiste ia avansa contra Kobani en setembre e ia invade multe de lo. Ma pos alora, los ia deveni gradal forsada a via par combatores curdi, aidada par atacas airal gidada par la SUA.
La Oserveria Suri per Diretos Umana ia clari ce curdis ia saisi la area de securia pos combates ferose cual ia comensa a la note de soldi.
Soldatos de la Stato Islamiste controla ancora Maqtala e Kani Kordan, distritos en la este de la vila.
Un ofisior en la vila ia dise ce la avansa curdi ia rapidi e la atacas airal ia intensi.
La invade de Kobani ia fa ce miles de refujadas fuji a ultra la frontera turces, cual es prosima.
On crede ce sentos de persones ia mori en la batalia per la vila.
@T Danmarc rejeta la regulas de la UE
@L aora_oji/2015/danmarc_rejeta_la_regulas_de_la_ue
====== Danmarc rejeta la regulas de la UE ======
4 desembre 2015
Dansces ia rejeta la adota de regulas de la Uni European sur la enforsa de leges internasional, en un referendo cual ia ta pote prosimi plu la pais con la bloco.
La governa sentral destriste de Danmarc ia vole abandona alga de la desides de nonpartisipa dansce en leges interna de la UE. Ma pos la conta de tota votas, plu ca 53% ia dise no a la proposa.
La vota ia aveni a no multe semanas pos la atacas en Paris, e en cuando Europa luta per maneja cuantias recordo de migrores.
"Lo es clar un 'no'," la ministro xef Lars Løkke Rasmussen ia dise, ajuntante ce el ave "un respeta plen" per la deside de la votores.
La governa, suportada par la partito oposante, ia campania per "si", disente ce lo va aida autoriosas dansce en la tempo seguente la fusilis e bombas umana en Paris a 13 novembre.
Alga de acel atacores ia es sitadanes franses ci ia abita en Beljia. On crede ce a la min un fusilor, Salah Abdeslam, ia fuji a traversa de la frontera franses a pos.
La resulta de la vota es ce Danmarc va debe negosia un acorda spesial per resta en Europol, la departe de polisia de la UE cual fronti crimin organizada e terorisme.
La Partito Dansce de Popla (DF), cual oposa migras a la pais e suporta la governa de Rasmussen en parlamento, ia recomenda ce votores dise "no" per evita sede plu autonomia a Bruxelles.
An si un vota de "si" no ia ta afeta la deside dansce de nonpartisipa en reseta migrores, la DF ia razona ce lo ta gida cisa final a la comanda direta de politica de migra par la UE.
La resulta de la referendo va es regardada con interesa en Britan, do la governa atenta negosia sua relatas con la UE ante ofre un vota sur esce la pais va resta en la bloco.
@T Democratas SUA disputa pos la atacas en Paris
@L aora_oji/2015/democratas_sua_disputa_pos_la_atacas_en_paris
====== Democratas SUA disputa pos la atacas en Paris ======
15 novembre 2015
En la SUA, la aspirores presidental de la partito Democrata ia disputa sur la modo de trata la grupo combatosa Stato Islamiste ("Daex"), pos la atacas teroriste en Paris.
Hillary Clinton, parlante a un debate en Iowa, ia dise ce "lo no pote es un batalia american" e ia recomenda ce Turcia e la statos de Golfo fa plu.
Ma sua oposor Martin O'Malley ia desacorda, disente ce la SUA debe "fronti la malia" e gida de la fronte.
La atacas ia mata 129 persones e ia feri sentos en la capital franses a venerdi. A pos, CBS News ia promete move la foca de la debate presidental per asentua plu la politicas de contraterorisme e esternas.
On ia oserva un momento de silentia en Des Moines ante la comensa de la debate, e la tre aspirores ia espresa sua compatia a la popla franses. Ma los ia disputa alora sur la crese de Daex, cual ia declara se como culpable per la atacas.
Clinton, un ministro pasada de internas, ia es defiada par Bernie Sanders, un senator de Vermont, per sua suporta de la Gera de Irac, sur cual Sanders ia dise ce lo ia gida a la crese de la combatosas.
Clinton ia desacorda, disente ce la politica de esternas de la SUA no ave "la majoria de culpablia" per la nonstablia en la area, indicante en loca la presidente de Suria, Bashar al-Assad, e la gidor pasada de Irac, Nouri al-Malaki.
El ia dise ce on no pote conteni Daex -- on debe vinse lo. Ma no el no la otra aspirores ia revela cuanto los ta vade en acel dirije.
La SUA ia es ja un parte de un alia de paises partisipante en atacas airal contra SI en Suria en Irac, ma alga de la aspirores presidental de la partito Republiciste ia proposa la envia de soldatos SUA a tera.
@T Deutxland finansia plu sua statos per aida refujadas
@L aora_oji/2015/deutxland_finansia_plu_sua_statos_per_aida_refujadas
====== Deutxland finansia plu sua statos per aida refujadas ======
25 setembre 2015
La governa federal de Deutxland ia promete €4 mil milion ($4,5 mil milion) a sua statos rejional, duplinte la cuantia esistente de finansia, per aida los a maneja un influe recordo de refujadas.
Berlin ia dise ance ce lo va paia €670 per mense per cada refujada ci on aseta.
Canselor Angela Merkel ia parla pos discutes con 16 governores de stato. El ia dise ce Albania, Cosovo e Montenegro va es declarada como "paises de orijina secur" per redui la flue de persones ci veni de ala a Deutxland.
Sirca un dui de milion migrores -- de ci la plu veni de paises gerosa en Asia sude-ueste e Africa norde -- ia ariva en Europa en esta anio, esposante divides profonda en la Uni European.
En esta semana, la UE ia acorda relocali sirca 120 mil refujadas tra Europa.
En la discutes ier en Berlin, on ia acorda ce la governa federal va aumenta sua aida finansial a statos, de €2 mil milion en esta anio a €4 mil milion en 2016.
Ofisiores ia dise ce la mone va aida casi e cura refujadas joven e nonacompaniada.
Merkel ia promete ance rapidi la prosedes per refujadas en Deutxland, en cuando la pais luta per aseta sentos de miles de arivores nova.
El ia averti ce la crise de migrores ave no solve en la futur prosima, e ce la modo de maneja lo va formi Europa per tempo longa.
Referente a la acorda per relocali refujadas, ci ariva prima xef en Elas o Italia, el ia dise: "Me es profonda convinseda ce lo cual Europa nesesa es no sola relocalis distinguinte, ma un prosede permanente per distribui justa refujadas entre statos membros. Un paso prima es fada, ma nos es ancora a distantia grande de do nos debe es."
Merkel ia dise ce la UE nesesa aida de estra la bloco, solisitante la suporta "de nosa asosiores transatlantica, la SUA, e ance Rusia e la statos de la area de Asia sude-ueste."
La flue ia continua sin sesa, e a mercurdi Ungaria ia rejistra un cuantia recordo: 9939 persones ia entra de Corvatsca e 102 de Serbia.
La introdui par Ungaria de leges nova a sua frontera con Serbia en la semana pasada ia causa la diverje de miles de migrores a Corvatsca. Esta ia aumenta la tensa entre Serbia e Corvatsca.
Serbia ia proibi la trafica de carga corvatsce, e Corvatsca ia responde par proibi veculos con rejistras serbsce.
Corvatsca ia dise ce reportas no es coreta ce on ia proibi ance sitadanes serbsce individua de entra. Lo ia clari ce sola "un problem con pasaportes" ia aveni.
Ma Serbia ia condena Corvatsca, disente ce sua restrinjes de frontera es "comprable sola a los de la governa faxiste en la Gera Mundal Du".
Ungaria ia erije un serca de filo lamosa longo sua frontera con Serbia, e construi aora du plu tales longo sua fronteras con Corvatsca e Slovenia.
@T Diferes major resta pos discutes sur finansia elinica
@L aora_oji/2015/diferes_major_resta_pos_discutes_sur_finansia_elinica
====== Diferes major resta pos discutes sur finansia elinica ======
12 junio 2015
La creditores internasional de Elas ia aumenta sua presa a la governa en Atina pos negosias en Bruxelles.
Elas desira reseta mone par intercambia per reformis interna, afin lo ta evita fali repaia un deta de 1,5 mil milion euros ($1,7 mil milion) a la Reserva Monal Internasional.
Un portavose per la Reserva ia dise ce diferes major esiste ancora e ce on es "vera distante de un acorda". El ia ajunta ce la problemes xef restante es pensiones, impostas, e modos de finansia.
La presidente de la Consilio European ia dise ce no plu tempo resta per apostas, e ce la jua va es finida pos no longa.
Alexis Tsipras, la ministro xef de Elas, ia negosia con Jean-Claude Juncker, la xef de la Comision European, en Bruxelles en la posmedia de ier. Ma poca progresa ia es realida.
El ia fa ance un consenta en la tarda de note con la xefes franses e deutx, pos cual el ia dise ce los ia deside intensi la discutes.
La Uni European e la RMI es nonfelis sur la cuantia de reformis cual la governa elinica ofre per la relasa de 7,2 mil milion euros salvante. Sua acorda per salva Elas va desvalidi a la fini de esta mense.
Plu temprana ier, asiones elinica ia alti par plu ca 8% pos cuando un comisionor de la UE ia dise ce un acorda es prosima. Ma, cuando la umor ia afonda, asionerias en otra locas ia comensa retira se, e a acel ora la asioneria de Atina ia clui ja.
Syriza, la partito sinistra de Tsipras, ia es elejeda per governa en janero, pos campania contra medios economial sever.
On crede ce Tsipras ia sede alga sua opina sur reformis de IVA (imposta de valua ajuntada) en la dias resente. Ma el esije ancora alga lejeris de la deta de sua pais, e esta es la problem major en la negosias. Gidores european no va aboli la detas si Elas no promete reformi.
Tsipras ia averti ce si on fali ateni un acorda per salva Elas ante la fini de junio, esta va es la comensa de la fini per la eurozona.
Sua partito ia reali ier un de sua prometes de campania: la difusor nasional ERT ia recomensa presenta programes, a esata du anios pos cuando on ia sustitui un compania plu peti.
@T Du astronautas comensa un anio en spasio
@L aora_oji/2015/du_astronautas_comensa_un_anio_en_spasio
====== Du astronautas comensa un anio en spasio ======
28 marto 2015
La astronautas Scott Kelly de la SUA e Mikhail Kornienko de Rusia ia ariva per comensa un periodo de 12 menses abitante la Stasion Spasial Internasional.
Esta va es la tempo continuante la plu longa tra cual cualce person ia resta en la satelite, cual orbita a 400 cilometres supra la Tera.
Siensistes espera comprende plu bon la efetos a la corpo umana de vive en microgravita tra periodos estendeda. La ajenterias de spasio dise ce esta datos va es esensal per sua projetas de envia final un mision a Marte.
An si Kelly e Kornienko va rompe un recordo de dura per la Stasion Spasial Internasional, alga de la abitas en Mir, la plataforma rusce vea, ia es multe plu longa.
A tempos diversa, cuatro astronautas is abita Mir tra plu ca un anio, e Valeri Polyakov ia spende 437 dias en orbita en 1994 e 1995.
On sabe aora multe plu ca en la eda de Mir per redui la efetos danante de vive en microgravita, e on previde ce Kelly e Kornienko va reveni en state plu bon ca la abrivias temprana.
Programes de nuri e eserse preveni aora multe de la perde de densia de oso e la debilia de musculo cual astronautas ia esperia en pasada.
Ma dotores nesesa ancora studia e comprende otra problems. Los no ave multe datos sur la efeto a la sistem de imunia, per esemplo.
Los es ance consernada sur la dana cual la microgravita causa a la oios. Esta es un fenomeno nova reconoseda, e pare ave un relata con la manera de restribui de licuida en un corpo sin pesa. Un presa crese en la cranio e la nerve oial, e multe astronautas cexa, pos reveni a Tera, ce los no vide tan bon como a ante.
Kelly es un caso spesial interesante, car el ave un frate jemelo identica, Mark, ci mesma ia es un astronauta asta 2011. On va usa la du en un studia comparante.
La teoria de relativia dise ce Scott Kelly va senese min ca sua frate par causa de la rapidia de sua viaja orbitante -- ma sola par un pico de milisecondos en la anio.
@T Du trenes colide en Johannesburg
@L aora_oji/2015/du_trenes_colide_en_johannesburg
====== Du trenes colide en Johannesburg ======
18 julio 2015
Sirca 300 persones ia es ferida en un colide entre du trenes, prosima a Johannesburg, la site la plu grande de Sudafrica.
La xoca ia aveni prosima a la stasion Booysens, a sude de la site, a sirca 18:30 de ora local.
La plu de la feridas ia es ospitalida, e paramedicistes trata otras a la sena. Un portavose ia dise ce alga de la feris es grave, ma nun ia mori. Alga enfantes ia es ferida.
On ancora no sabe la causa de la colide, ma un de la trenes ia salta partal de la reles. Lo pare ce un tren movente ia colpa un nonmovente.
Pompores xerca ancora pasajores ci es cisa trapida en la vagones.
Imajes compartida en redes sosial mostra pasajores asemblada a lado de la ferovia, espetante cura medical.
@T Ecuador saisi 200 000 pinas de selacos
@L aora_oji/2015/ecuador_saisi_200_000_pinas_de_selacos
====== Ecuador saisi 200 000 pinas de selacos ======
29 maio 2015
En Ecuador, la polisia ia saisi sirca 200 mil pinas de selacos cual ia es a punto de deveni nonlegal esportada a Asia.
La pinas, comun usada per fa sopas, ia es descovreda pos atacas a nove locas en Manta, un site de porto.
Ses persones, incluinte un sitadan xines, ia es arestada e acusada de dana viventes savaje.
José Serrano, la ministro de internas, ia dise ce la contrabandores ia mata 50 mil selacos, cisa plu.
El ia ajunta ce la autoriosas ia "dona un colpa major a un rede internasional cual ia contrabanda pinas de selacos. Nos debe fini esta redes criminal ci es consernada sola par sua propre interesas economial e ci destrui la ecosistem."
La pexa de selacos es proibida en Ecuador. On no pote vende los estra si los ia deveni acaso caturada en redes de pexa.
@T Elas eleje "no"
@L aora_oji/2015/elas_eleje_no
====== Elas eleje "no" ======
6 julio 2015
Alexis Tsipras, la ministro xef de Elas, ia dise ce la popla elinica ia fa "un eleje corajosa" en vota per rejeta un acorda de salva finansial internasional en un referendo ier.
Miles de persones ia selebra en la stradas pos oia ce la resulta final es 61,3% per "no" e 38,7% per "si".
Ma ofisiores european ia averti ce esta pote causa la ejeta de la pais de la eurozona. La valua de la euro ia cade ja en tota asionerias en Asia oji.
La ministro finansial de Elas, ci ia desacorda frecuente con la creditores, ia resinia. En sua blog, el ia scrive ce el ia "deveni consensa de un prefere par alga partisipores de la Eurogrupo per sua 'asentia' de la consentas".
La partito governante, Syriza, ia campania per un vota de "no", disente ce la acorda ta es umilinte.
Tarda ier, en un parla televisada, Tsipras ia comenta ce la elinicas ia demostra ce "democratia refusa deveni estorseda".
El ia dise ce Elas va revade a la negosias a lundi, ajuntante ce un evalua par la Reserva Monal Internasional, publicida en esta semana, confirma ce un restruturi de la deta elinica es nesesada.
Ma alga ofisiores ia averti ce la creditores pote interprete un vota de "no" como un indica ce la elinicas rejeta plu negosias.
Xefes de statos european ia ave opinas diversa sur la idea de continua negosias con la pais pos esta referendo.
La viscanselor de Deutxland, Sigmar Gabriel, ia dise ce negosias renovida con Elas es "difisil per imajina" e ce Tsipras ia "destrui la pontes" entre Elas e Europa.
Ma ministros italian e beljes ia es plu reconsiliante. La ministro finansial de Beljia ia comenta ce la porte resta abrida per recomensa negosias.
Jeroen Dijsselbloem, ci preside la grupo eurozonal de ministros finansial, ia descrive la resulta de la referendo como "multe regretable" per la futur de Elas.
Entretempo, Martin Schulz, la presidente de la Parlamento European, ia averti ce Europa va entra a "un tempo multe difisil e an dramosa" si la governa elinica no fa proposas "sinifiosa" en la oras veninte.
Elas ia es ja en negosias con sua creditores tra menses cuando la governa elinica ia clama un referendo nonprevideda sur la acorda ofreda.
@T Espania judi contra la autonomia de Catalunia
@L aora_oji/2015/espania_judi_contra_la_autonomia_de_catalunia
====== Espania judi contra la autonomia de Catalunia ======
12 novembre 2015
Xefes proautonom en Catalunia, a norde-este de Espania, ia promete continua sua projeta per separa de Espania, an pos un deside par la Corte Constitual per suspende la prosede.
Neus Munté, la vispresidente catalan, ia dise ce la vole political de la governa rejional es ce on continua la projeta de autonomia pos 18 menses.
Plu temprana, la governa de Espania ia apela a la Corte Constitual per un interveni. La corte ia averti la gidores catalan ce los debe segue la comanda.
A lundi, la parlamento rejional de Catalunia ia aseta un proposa per comensa la prosede de separa, declarante un gol de autonomia pos no plu ca 18 menses, e permetente 30 dias per comensa la prepara de un sistem catalan de constitui, reservas, e aida finansial.
La ministro xef, Mariano Rajoy, ia anunsia a mercurdi ce el ia prende la caso a la Corte Constitual. El ia descrive la proposa como "un iniora ofendente de la instituidas de la stato" e la acusa la separadistes de "atenta elimina la democratia".
"Lo es un caso de la defende de un pais intera," el ia dise. "Los atenta licuidi la unia de un nasion con plu ca sinco sentenios de istoria."
En un deside prevideda, la panel de 11 judores de la corte ia acorda oia la caso de la governa contra la promove catalan, con resulta ce la proposa es automata suspendeda per alga menses en cuando la escutas legal aveni.
La panel ia acorda ance con la solisita par Madrid ce la judores informa "personal" la presidente catalan Artur Mas, sua consilio, e Carme Forcadell, la presidente de la asembla rejional, sur lo cual ta resulta si los ta deside no segue la deside de la corte.
La partitos proautonom ia previde ce sua proposa va es declarada como nonlegal, e como parte de lo, los ia espresa ce la corte ave no legalia.
Sondas sujesta ce un majoria de catalanes favore un referendo sur autonomia, ma es divideda en modo egal sur la demanda de separa.
Partitios catalan nasionaliste ia gania un majoria de sejas pos un eleje en setembre, ma no ia susede gania un dui de la votas. Los ia dise a ante ce los regarda la vota como un referendo par fato sur la separa de Espania.
Alga partitos oposa la autonomia de Catalunia, incluinte la Socialistes e Sitadanes Catalan, un partito sentral destriste cual ia nase en la area consernada ma ia deveni popular tra la intera de Espania.
Sua xef, Albert Rivera, ia dise resente: "A acel catalanes ci desira autonomia: la solve no es divide la pais; lo es reformi lo."
@T Fanes de Star Wars espeta la mostra prima
@L aora_oji/2015/fanes_de_star_wars_espeta_la_mostra_prima
====== Fanes de Star Wars espeta la mostra prima ======
14 desembre 2015
La mostra prima de la filma la plu resente en la francisia Star Wars [Gera de la Stelas], "La velia de la Fortia", va aveni plu tarda oji en Los Angeles.
Lo es la filma sete en la serie, e lo reuni stelas de la episodios orijinal, incluinte Harrison Ford, Mark Hamill, e Carrie Fisher.
On va mostra lo a tre sinemas -- la Teatro Xines TCL, la Teatro Dolby (conoseda per la rituo anial de presenta la premios Oscar), e la Teatro El Capitan.
Fanes asembla ja estra la tre sinemas de pos la semana pasada.
On ia clui partes grande de la Bolevar Hollywood, e ia erije tendas cual es plu longa ca blocos de construidas.
La fanes ci campa ala debe spende a la min 24 oras en la filo per es permeteda a compra du biletas. Los ci fili per 24 oras de plu va pote compra un bileta tre.
La Teatro Xines TCL, conoseda como la Teatro Xines de Grauman a ante, ia ospita la mostra prima de la filma prima de Star Wars en 1977.
Invitas enviada a jornalistes ia demanda ce on no revela puntos major de la nara en sua resenias.
En otobre, alga pajerias de sinema ia es colasada par la esije per compra biletas.
@T Femes en Arabia Saudi vota a ves prima
@L aora_oji/2015/femes_en_arabia_saudi_vota_a_ves_prima
====== Femes en Arabia Saudi vota a ves prima ======
12 desembre 2015
Arabia Saudi fa elejes munisipal sin presedente, en cual femes pote vota a la ves prima.
Femes partisipa ance como aspirores, ance a la ves prima, an si la rena tradisional es la sola nasion do on no permete ce femes gida autos.
978 femes ia rejistra se como aspirores, a lado de 5938 omes.
Aspirores fema ia debe parla de pos un mureta en sua apares campaniante, o ia es representada par un om.
Sirca 130 mil femes ia rejistra per vota. Esta cuantia es ancora multe min ca la cuantia corespondente per omes, cual es 1,35 milion.
Salma al-Rashed ia es la fem prima ci ia rejistra per vota. "Lo ia dona un senti vera bon," el ia comenta. "Cambia es un parola grande, ma la vota es la sola modo de serti ce nos es vera representada."
Elejes political mesma es un cosa rara en la rena saudi: oji es sola la ves tre de istoria cuando saudis ia vota. On ia fa no elejes en la 40 anios entre 1965 e 2005.
La deside de permete la partisipa de femes ia es fada par la Re Abdullah, aora mor, e on regarda lo como un parte major de sua lega.
Anunsiante la reformas, la Re Adbullah ia dise ce femes en Arabia Saudi "ia mostra disposas cual ia espresa opinas e conselas coreta".
Ante sua mori en janero, el ia asinia 30 femes a la Consilio Xura major de la pais.
2100 sejas munisipal es ganiable en esta vota oji. On va aproba 1050 plu sejas pos aproba de la re. On previde ce la resultas de la elejes va es anunsiada a la plu tarda de saturdi.
@T Foles diverti se par salta de fenetras en un Boston nevosa
@L aora_oji/2015/foles_diverti_se_par_salta_de_fenetras_en_un_boston_nevosa
====== Foles diverti se par salta de fenetras en un Boston nevosa ======
18 febrero 2015
La neva en Boston en Massachusetts es aora tan profonda ce la maior ia debe recomenda forte ce on no diverti se par salta de fenetras a en lo.
Martin Walsh ia dise ce la ativia, cual on ia comparti en redes sosial, pote es multe perilosa. "Lo es un ata fol, e on ta pote mata se."
Febrero ia rompe la recordo per la mense la plu nevosa de istoria en Boston, cual la reseta la desuple de sua cuantia de neva tipal de inverno.
Ier, la area la prende asta sinco plu sentimetres de neva, ma otra partes de la SUA ia debe responde a cumulas plu grande.
La neva de tempestas presedente ancora no ia fonde en Boston. On ave aora tan multe neva ala ce on ia usa cuasi tota la spasio disponable per dejeta lo.
On previde ce lo va neva an plu en la site a esta fini de semana.
@T Frans oposa un moneta con imaje de Waterloo
@L aora_oji/2015/frans_oposa_un_moneta_con_imaje_de_waterloo
====== Frans oposa un moneta con imaje de Waterloo ======
12 marto 2015
Un desinia nova per un moneta de €2 cual mostra un mapa de un batalia european ia divide opinas en Bruxelles.
La moneta mostra la Colina de Leon, un monumento locada a Waterloo. Beljia ia proposa lo per onora la batalia ala fada a 18 junio 1815.
Ma un membro de la Uni European opina ce lo no conveni.
En un letera oposante, la governa franses razona ce la desinia conteni "un simbol negativa" per alga europeanes.
La letera sujesta ce la Batalia de Waterloo, do Napoléon ia es vinseda, es un aveni con resonas spesial en la memoria coletiva de Europa, e es plu ca mera un caso de combate militar.
On averti ce la monetas risca provoca un disposa nonfavorente en Frans, an cuando la governas de la Eurozona atenta aumenta la unia e la colabora.
Ma no cadun acorda ce Waterloo es cargada con tan multe sinifia en la sentenio 21. Un diplomata ia espresa sua surprende ce "pos du sentenios, un proposa per monetas con imaje de colina pote causa un tal reata en Paris".
Beljia debe aora deside esce lo vole retira o cambia la desinia.
Si lo eleje reteni lo en sua forma presente, la paises membros de la Eurozona va vota sur reali la moneta nova.
@T Frans reata contra Uber pos protestas
@L aora_oji/2015/frans_reata_contra_uber_pos_protestas
====== Frans reata contra Uber pos protestas ======
26 junio 2015
En Frans, la ministro de internas ia comanda un proibi contra UberPOP, un servi de comparti autos a custa basa, pos un dia de protestas nasional par taxistes.
Bernard Cazeneuve ia descrive la servi como "nonlegal" e ia comanda ce la polisia e avocatos enforsa sua clui.
La dia ia es plen de protestas, violente a veses, par taxistes franses, ci dise ce Uber, un compania situada en la SUA, fura sua modo de susta.
Courtney Cobain, un cantor roc famosa, ia es trapida a media de la tumulta. El ia tuita sua frustra, mostrante un foto de la fenetra de sua auto salpicada con ovos, e grasiante du motosiclistes ci ia salva el.
La grevores ia bloci autovias major sirca Paris e ia arde numaticos. Blocis ia apare ance sirca Marseille e Aix-en-Provence en Frans sude-este.
Alga autos ia es inversada, e la fenetras de otras ia es rompeda con bastones.
La compania cual opera la airoportos Charles de Gaulle e Orly en Paris ia avisa ce pasajores debe ariva par tren, car "la asede par strada es completa blocida". Alga viajores ia pasea longo la lado de la autovia per ateni la airoporto.
La taxistes de Frans -- ci debe paia miles de euros per un lisensa -- dise ce lo es nonjusta ca UberPOP vende plu barata ca los.
Un portavose de la sindicato de taxistes ia dise ce on debe crea un lege per proibi la transporta de pasajores par taxistes nonlisensada. El ia ajunta ce la lisensadas ia perde entre 30% e 40% de sua revenu tra la du anios pasada par causa de la crese de UberPOP.
UberPOP es un servi cual lia clientes a taxistes privata a custa min basa ca companias tradisional de taxi e an ca otra servis de Uber.
Lo es ja nonlegal en Frans de pos janero, ma la lege ia es difisil per enforsa e la servi ia continua opera. Cazeneuve ia dise ier ce el ia comanda la polisia en Paris a proibi UberPOP e saisi cualce autos cual defia esta.
Thomas Meister, un portavose de Uber, ia dise ce sua compania ia oposa la lege cual ia nonlegali UberPOP, e ia acusa la ministro de iniora la metodo normal de lege.
Uber, con sua base en San Francisco, dise ce lo ave milion usores en Frans, incluinte 250 mil per UberPOP. La compania opera ance un servi lusosa cual no es proibida.
Lo ia fronti problemes simil con taxistes tradisional en sites tra la mundo. Ma on ia critica la taxistes lisensada per no adota rapida la tecnolojia jeolocalinte cual ia permete la susede de Uber.
@T Furores de meteorites es arestada en Arjentina
@L aora_oji/2015/furores_de_meteorites_es_arestada_en_arjentina
====== Furores de meteorites es arestada en Arjentina ======
31 maio 2015
Polisiores en Arjentina ia aresta cuatro omes ci, parente, ia atenta fura plu ca un ton de meteorites en Chaco, un provinse en la norde-este de la pais.
La polisia de via dise ce los ia trova plu ca 200 pesos grande de meteorites ascondeda su la sejas de un camion cual los ia para per un esamina acaso.
Tre arjetinas e un paraguai ia es arestada.
La provinse de Chaco es famosa per meteorites, e los es protejeda par leges de Arjentina.
Lo conteni un area conoseda como "Campo de la Siel", estendente tra 1300 cilometres cuadrida, e plen de meteorites cual ia cade a sirca 4000 anios ante aora.
La plu grande, nomida El Chaco, ia es descovreda con un detetador de metales en 1967. Lo pesa 37 tones, e es la meteorite du de la plu grandes trovada en la mundo.
Ance lo ia velia un avaria entre investores e coliores. En 1990, un polisior de via arjentina ia aborta un conspira de fura lo per vende a un colior en la SUA.
@T Futbalores de Ertra xerca refuja en Botsuana
@L aora_oji/2015/futbalores_de_ertra_xerca_refuja_en_botsuana
====== Futbalores de Ertra xerca refuja en Botsuana ======
15 otobre 2015
Des juores de la ecipo ertri de futbal ia refusa revade a Ertra pos jua en un max per entra a la Copa Mundal en Botsuana. Los xerca aora refuja ala.
La omes ia es tenida par la polisia pos deside no embarca sua avion.
On reporta ce los ia refusa revade a sua pais an pos la interveni de la ambasador ertri en Botsuana.
Alga atletas ertri ia abandona coletiva sua pais en anios resente. Un de la tal avenis la plu notable ia es en 2013, cuando Uganda ia refuja un ecipo de 15 juores ertri e sua dotor, pos cuando los ia fuji a la fini de un torneo de futbal.
Un ofisior major a la Asosia Tsuana de Futbal dise ce on ancora no ia descovre perce la juores ia refusa parti con sua coecipores.
Ma un reporta en la jornal tsuana La vose ia dise ce la juores ia es angusada sur la posible de deveni enscriveda a la armada ertri, e ce los ia desira xerca refuja an pos cuando la ambasador ia proba convinse los a via de esta.
Ofisiores de la ecipo ia trova ce la juores es asente de sua salas de otel en la temprana de la matina de ier.
Basadi Akoonyatse, la vispresidente de la Asosia Tsuana de Futbal, ia esplica: "On ia fa un reporta a la polisia, ci ia trova los en Francistown, do los ia dise ce los xerca un sentro de la Crus Roja per es aidada a refuja en Botsuana."
Un representor de la juores ia dise ce el ia oia ce on ia atenta estrae la juores de Botsuana par forsa.
Ertra es malfamosa per maltratas contra diretos umana. Un reporta par un comision de la Nasiones Unida ia indica ce la tortura e la sclavia es comun.
La NU ia acusa ance ce la pais obliga sua sitadanes a servi militar sin fini definida, e ce lo mata persones ci atenta evade a otra paises. La governa ertri ia rejeta esta acusas como "intera sin funda e con asentia de merita".
@T Gerilias colombian invita Seniora Universo a negosias
@L aora_oji/2015/gerilias_colombian_invita_seniora_universo_a_negosias
====== Gerilias colombian invita Seniora Universo a negosias ======
8 febrero 2015
Rebelores de la militia FARC de Colombia ia invita la Seniora Universo nova coronida a aida sua negosias per pas con la governa.
En un declara publicida a sua loca de rede, la grupo ia dise ce los aseta un ofre fada par Paulina Vega, de Colombia, en sua xerca per gania sua titulo.
Vega, ci ave 22 anios, ancora no ia responde a esta.
La armada rebelante es ja en discute con la governa tra la du anios pasada. Lo fa ja un gera de gerilia contra la governa tra 50 anios.
Representores de ambos lados atenta ateni un acorda, ma la discutes en Habana, la capital de Cuba, ia ariva a un state de nonprogresa.
On ia acorda sur temas de reformi de tera e de la entra de la FARC a politica formal. Ma un trata final de pas resta nontrovable.
En intervisas ante sua coroni como Seniora Universo, Vega ia parla sur sua desira de vide pas en Colombia.
En sua declara, la rebelores de FARC ia dise ce los bonveni sua "volentia" de viaja a Habana, ajuntante: "Nos invita tu a reali tua visita afin nos informa tu sur la developa de la discutes de pas."
On estima ce sirca 220 mil persones, de ci la plu ia es nonmilitar, ia es matada de pos la rebelores, con inspira marxiste, ia comensa sua batalia armada en 1964.
@T Gine pare ave no plu pasientes de Ebola
@L aora_oji/2015/gine_pare_ave_no_plu_pasientes_de_ebola
====== Gine pare ave no plu pasientes de Ebola ======
17 novembre 2015
En Gine, la ultima de la pasientes conoseda con la virus Ebola ia recovre e ia es relasada de un sentro medical en la capital, Conakry.
Un portavose per la unia ginean cual colabora sur la maladia ia dise ce du probas a la pasiente -- un bebe -- ia mostra resultas negativa.
La bebe ave 19 dias. El ia nase en la sentro medical Nongo Ebola, ma sua madre infetada no ia survive.
On va declara ofisial ce Ginea es librida de Ebola si no casos nova es reportada en la ses semanas veninte.
La epidemica, cual ia comensa en Gine, ia mata plu ca 11 mil persones en Africa ueste.
Plu temprana en esta mense, la Organiza Mundal de Sania ia declara Siera Leon, un pais visina, como libre de Ebola pos 42 dias sin caso conoseda.
Liberia ia es simil declarada como libre de la maladia en setembre.
La aveni de la virus en Africa ueste ia es prima reportada en marte 2014.
@T Google revela un logo nova
@L aora_oji/2015/google_revela_un_logo_nova
====== Google revela un logo nova ======
2 setembre 2015
Google ia desveli un logo nova per sua servis sentral de xerca. La cambia lisi alga de la cualias de la leteras de sua nom cual composa la insinia colorosa e bon conoseda.
La compania ia dise ce la cambia es nesesada car on usa aora la servis en multe aparatos portable, no sola en computadores de table.
La cambia segue pos cuando Google ia pone sua multe divides su un supracompania nomida Alphabet.
Lo ia dise ce la logo, e sua multe varias, va vade plu bon en la scermos de grandias diversa tra cual persones usa o encontra oji Google e sua servis. En ajunta a la insinia plen de la nom de la compania, lo intende ance representa se con cuatro puntos en sua colores identifiante (azul, roja, jala, e verde) e con un G major de esta colores.
Google ia anunsia la cambia en sua blog ofisial, e ia ilustra lo cual es nova con un serie de imajes animada. Lo ia descrive la logo nova como "simple, nonfolida, colorosa, amin" e ce lo representa la cualias la plu bon de la compania.
Lo ia furni ance un esplica plu detaliosa de la razonas per cambia la insinia. Un defia major per la desiniores, lo ia dise, ia es la refina de "lo cual fa ce nos es Google-in".
La plu resente, Google ia refresci sua logo en setembre 2013.
Un comentor ia dise ce la cambia es importante car, ante aora, Google ia resiste fa simil a otra companias informatical, de cual multe ia adota un aspeta plu simple e frecuente plu blanda en refresci sua insinias ofisial.
@T Grupos ge partisipa en la parada de San Patrisio en Boston
@L aora_oji/2015/grupos_ge_partisipa_en_la_parada_de_san_patrisio_en_boston
====== Grupos ge partisipa en la parada de San Patrisio en Boston ======
16 marto 2015
A la ves prima, grupos ge e lesbian ia partisipa ofisial en un parada de la Dia de San Patrisio en la site Boston en la SUA.
Ante aora, los ia es proibida par la organizores, la Consilio Aliada de Veteranes de Gera de Boston Sude, de ci sua disposa ia es suportada par la Corte Suprema de la pais.
Ma la organizores ia cambia sua opina e ia informa Outvets, la grupo cual representa veteranes militar ge, ce lo es bonvenida.
Bryan Bishop, la fundor de Outvets, ia dise: "Final en la site Boston, nos vide la inclui sur cual nos ia crede ce nos va vide nunca lo. Personal, esta es un de la dias la plu bon de mea vive."
La Dia de San Patrisio selebra la cultur eres e eres-american.
En 1995, la Corte Suprema ia susta un proibi contra grupos ge e lesbian, sitante diretos de parla libre. La organizores ia espresa ce sua prinsipes catolica ta es violeda.
Ma la Consilio de Veteranes ia altera sua disposa. On reporta ce sua comandor, Brian Mahoney, ia dise "Perce me ta judi?" cuando on ia demanda a el sur la tema de orienta sesal.
La maior de Boston, Marty Walsh, ia pasea en la parada a la ves prima en 20 anios. A ante, maiores ia boicota la aveni par causa de sua disposa antige. "Con la parada de esta anio," el ia comenta, "Boston avansa pos anios de controversia."
Boston es la capital de Massachusetts, cual en 2004 ia deveni la stato prima SUA cual permete sposis ge.
@T Hollande desira severi la leges sur crimines de odia
@L aora_oji/2015/hollande_desira_severi_la_leges_sur_crimines_de_odia
====== Hollande desira severi la leges sur crimines de odia ======
24 febrero 2015
La presidente franses, François Hollande ia proposa forti la leges sur crimines de odia antisemita, raziste e omofobica.
Parlante a la come de sera de un grupo iudi en Paris ier, Hollande ia reserti a iudis ce los es bonvenida e secur en Frans. El ia nota ance ce muslimes deveni sempre plu atacada.
Sua proposas segue la matas de 17 persones en la xutas a Charlie Hebdo e un aseja de supramercato caxer en janero. La pais es ancora en un state de vijila estrema pos acel atacas.
Ier, Hollande ia dise ce el desira "punis plu rapida, plu capas" contra la odia parlada.
Plu temprana en esta mense, sentos de tombas iudi ia es violeda en Frans este. Grupos muslim franses ia reporta ance un aumenta de avenis islamofobica pos la atacas a Charlie Hebdo.
La anunsia par Hollande ia es alga ombrida par un disputa entre gidores de la comunias iudi e muslim de Frans.
Un grupo muslim importante ia boicota la come post cuando un figur iudi major ia declara ce seguores joven de Islam es culpable per tota crimin violente.
Esta ia aveni ance ier, cuando la autoriosas franses ia confisca la pasaportes de ses sitadanes sur ci on ia alega ce los intende viaja a Suria per partisipa con jihadistes.
Bernard Cazeneuve, la ministro franses de internas, ia dise ce la departe de securia crede ce esta omes desira junta se a la grupo combatosa Stato Islamiste.
@T Indonesia esecuta sete stranjeres sur drogas
@L aora_oji/2015/indonesia_esecuta_sete_stranjeres_sur_drogas
====== Indonesia esecuta sete stranjeres sur drogas ======
30 april 2015
Ban Ki-moon, ia secretor jeneral de la Nasiones Unida, ia espresa "un regrete profonda" sur la esecuta par Indonesia de oto persones condenada sur crimines de droga.
La sete stranjeres e un indonesian ia es esecutada par fusili ier, provocante un furia diplomata.
En un declara, Ban ia dise ce la puni de mori ave "no loca en la sentenio 21", e ia recomenda forte ce Indonesia salva tota otra prisonidas tal condenada.
Indonesia ia defende firma sua atas como un parte de sua "gera contra drogas".
Entre la prisonidas matada ia es du australianes -- Andrew Chan e Myuran Sukumaran -- e Rodrigo Gularte, un brasilera. Tota ia es condenada per contrabanda drogas.
Australia, un aliada major de Indonesia, ia protesta par retira sua ambasador.
Tony Abbott, la ministro xef de Australia, ia descrive la trata de la prisonidas australian como "cruel e nonesesada", e un "momento ombrosa" en la relatas entre Australia e Indonesia.
Brasil ia dise ce la esecuta de Gularte -- ci on ia diagnose con un maladia sever de mente -- ia es "un aveni seria en la relatas entre la du paises".
El ia es la brasilera du ci Indonesia ia esecuta per contrabanda drogas en la cuatro menses pasada. Un prete ci ia acompania Gularte en cuando el ia vade a la fusili ia informa jornalistes ce el no ia pare comprende ce el es a punto de mori.
Nijeria ia espresa ance "un delude profonda" sur la esecuta de cuatro de sua sitadanes. Orijinal, on ia reporta noncoreta ce un de los ia veni de Gana.
An tal, en Pilipinas, on ia selebra pos la salva de un fem pilipina de esecuta a la minuto final.
La mata de Mary Jane Veloso ia es posponeda cuando la governa indonesian ia acorda permete ce el atesta en la caso de la fem ci el ia acusa de planta eroina en sua bagaje.
Maria Kristina Sergio ia presenta se a la polisia, nonespetada, en esta semana, e on ia prende el a Manila, la capital pilipina, per investigas.
Un franses, Serge Areski Atlaoui, resta en la coredor de mori. El ave un cexa legal ancora no prosededa sur sua demanda per pardona.
La leges sur drogas en Indonesia es entre la plu severes de mundo. En 2013, la pais ia fini sua suspende de esecutas per cuatro anios.
La governa dise ce lo condui tan sever par causa de la propre problemes de drogas en la pais, declarante ce 33 indonesianes mori a cada dia como resulta de esta problemes.
@T Inondas en la deserto Atacama
@L aora_oji/2015/inondas_en_la_deserto_atacama
====== Inondas en la deserto Atacama ======
26 marto 2015
En la deserto Atacama de Txile, un de la areas la plu seca de mundo, inondas subita ia mata du persones e desapare 24.
Pluves forte en la Andes ia envia acua a la vales e vilas a su.
La rio ia supraflue en la site Copiapó, famosa per un asidente de mina en 2010 cual ia trapi 33 persones per 69 dias.
38 mil persones ave aora no eletrica e cuasi 50 mil ave no acua bevable.
On previde plu pluve, e salvores ia comensa usa elicotores per sorti persones, temente ce la tera va lisca.
Un de la mores ia es caturada par un tal lisca. La otra ia es eletrocutada sur la strada.
La governa descrive la situa presente en la vila Chañaral como "estrema".
La presidente Michelle Bachelet ia cansela sua taxes e va vola a Copiapó.
La tempestas ia comensa a la sera de martedi. Los ia isoli vias, causa rompes de eletrica, e sutrae medios de comunica.
Esta inondas ia aveni en cuando Txile sude batalia ja focos savaje enorme, malida par un periodo de secia estrema.
@T Israelis es atacada par cotel en Ieruxalim
@L aora_oji/2015/israelis_es_atacada_par_cotel_en_ieruxalim
====== Israelis es atacada par cotel en Ieruxalim ======
13 otobre 2015
Sinco persones israeli ia es atacada con coteles en Ieruxalim, en la plu resente de un series de cotelis resente par persones filastini.
En la ataca la plu resente, un soldato israeli ia es ferida pos es cotelida en un bus. La atacor ia es matada con fusil e un person nonmilitar ia es ferida.
Plu temprana, du jovenes ia es cotelida a un comunia israeli en Ieruxalim Este, lasante un de los, un xico de 13 anios, en un state estrema grave.
Du polisiores israeli ia es ance ferida en atacas separada.
Cuatro israelies e deses de filastinis, incluinte alga atacores, ia es matada en la aumenta resente de violentia.
En la ataca sinco de ier, un om ci la polisia israeli descrive como arabi ia coteli un soldato israeli en un bus, pos atenta saisi sua fusil. Un nonmilitar ia es ance ferida ante cuando on ia fusili la atacor.
La atacas de la dia ia comensa cuando un om arabi ia coteli un polisior en la Site Vea pos es parada par la polisior ci ia persepi ce el ata suspetosa. La polisior ia es salvada de feris car el ia porta un jaceta protejente. Sua atacor ia es ance matada con fusil par la polisia.
Esta ia aveni prosima a la Porton de la Leones, la sena de alga otra cotelis presedente.
Plu tarda, un fem arabi ia coteli un polisior prosima a un xeferia de polisia en la area Colina de Munis en Ieruxalim Este. La polisior, ci ia deveni lejera ferida, ia susede fusili e feri sua atacor.
Un de la atacores filastini de la du jovenes en la comunia Pisgat Ze'ev ia es fusilida e matada par la polisia. Sua aidor, ci ia ave 13 anios, ia es fusilida e grave ferida.
Un portavose de la polisia israeli ia identifia la du atacores como filastinis de 13 e 17 anios de la comunia prosima Beit Hanina.
Tensas entre israelis e filastinis ia alti resente, sustada par scaramuxas a un santeria provocante en Ieruxalim, a la Riva Ueste, e a otra lado de la frontera de Gaza, como ance par la serie de cotelis.
A la fini de semana, alga filastinis ia es matada en combate con soldatos israeli e par un ataca airal israeli contra un loca de ativistes en Gaza en responde a un xuta de rocetos a Israel.
@T Japan esperia inondas sever
@L aora_oji/2015/japan_esperia_inondas_sever
====== Japan esperia inondas sever ======
10 setembre 2015
En Japan norde-este, inondas e liscas de tera ia forsa plu ca 90 mil persones a abandona sua casas.
La site Joso, a norde de la capital, Tokyo, ia es colpada par un mur de acua pos un supraflue de la rio Kinugawa. Ecipos de salva en elicotores ia leva persones de la tetos.
On ia reporta ce un person en la area ia desapare, e a la min 12 persones es ferida.
La pluves ia aveni a la dia pos cuando la siclon Etau ia trae ventas de asta 125 cilometres per ora a la provinse Aichi.
La areas la plu colpada es la provinses Ibaraki e Tochigi. La departe meteorolojial de Japan ia dona un averti de peril la plu sever a ambos areas.
Autos e casas intera ia es portada a via par la deluvia cuando la rio Kinugawa ia supraflue pos du dias de pluve forte.
En Tochigi, plu ca 500 milimetres de pluve ia cade en 24 oras en alga locas: sirca la duple de la cuantia cual cade ala tra tota de un setembre normal.
Partes de Tochigi ia reseta cuasi 60 sentimetres de pluve pos la sera de lundi, creante un recordo nova.
On ia dona avertis climal a multe otra areas de Japan este e norde-este, incluinte la provinse Fukushima cual conteni la compleso nucleal ancora danada cual ia es colpada par la trematera e tsunami de 2011.
La deluvia ia inonda la pompas de drena a la compleso. On teni ala cuantias enorme de acua per fri la reatadores rompeda.
Tra Japan, 15 persones ia es ferida par la clima. Du ia es femes vea ci ia es grave ferida pos es cadeda par ventas forte.
Alga areas ia esperia rompes de eletrica e disturbas a transporta: multe servis de avion e tren ia es canselada o posponeda, e on ia clui ance alga stradas.
La ministro xef, Shinzo Abe, ia dise: "La governa va sta unida e fa la plu bon cual lo pote per maneja la desastre, par trata vives umana como la cosa la plu importante."
@T Japan reabri un vila prosima a Fukushima
@L aora_oji/2015/japan_reabri_un_vila_prosima_a_fukushima
====== Japan reabri un vila prosima a Fukushima ======
6 setembre 2015
Japan invita abitores a reveni a un vila vacuida en 2011 pos la desastre a la compleso nucleal de Fukushima.
Naraha es la vila prima cual permete persones a reveni permanente, seguente alga anios de labora descontaminante.
Ma multe dise ce los no es preparada per reveni, e sola un cuantia peti de persones ia reveni per reposas corta de pos la comensa de un periodo esperimental en april.
La compleso Fukushima Daiichi ia sufri un serie de fondes nucleal pos un teratrema e tsunami enorme. A pos, tota la 7400 abitores de Naraha ia move a via.
On regarda la vila, a sirca 20 cilometres a sude de la compleso nucleal, como un caso probante per la reveni de abitores. Sirca sento mil persones en la area ancora no pote revade a sua casas.
Autoriosas en Naraha furni aparatos con cual persones pote mesura la grado de radia, e reconstrui ja servis local, incluinte botecas e clinicas.
Yukiei Matsumoto, la maior de Naraha, ia descrive la cansela de la comanda de vacui como "sola un comensa", ajuntante: "La orolojo cual on ia para ia comensa aora tictaca."
Abitores pasada ia vijila per onora la renase de la vila. Ma seguente un sonda resente, no plu ca 46% de abitores ia dise ce los espera reveni.
Un de la teratremas la plu potiosa rejistrada de istoria ia colpa prosima a la costa de Japan en marto 2011, inisiante un tsunami vasta. Cuasi 16 mil persones ia mori, e plu ca 2500 es ancora listada como asente.
An tal, on ia lia zero de la moris a la desastre nucleal, an si alga persones ia mori en la sorti cual ia segue lo.
@T Kentucky lisensa sposis ge pos prisoni un notario
@L aora_oji/2015/kentucky_lisensa_sposis_ge_pos_prisoni_un_notario
====== Kentucky lisensa sposis ge pos prisoni un notario ======
5 setembre 2015
En la SUA, un contia en la stato Kentucky ia comensa dona lisensas de sposi a duples ge, pos cuando on ia prisoni la notario per refusa fa esta.
Kim Davis, un ofisior elejeda en Rowan County, ia dise ce la deside par la Corte Suprema desacorda con sua credes como un cristian renaseda.
Alga de sua suordinadas ia comensa trata la lisensas a venerdi, furninte un a un duple a ci on ia nega lo a ante.
La Corte Suprema de la SUA ia declara ce la sposi ge es legal en junio.
A jovedi, Davis ia rejeta la posible de es librida de prison cuando el ia refusa la demanda par un judor ce el permete ce sua suordinadas dona lisensas. El pote resta en prison per asta un semana.
Sinco notarios suordinada ia informa plu tarda la judor ce los va obedi la comanda de la corte, e ia comensa dona lisensas a la matina de ier. Ma la fio de Davis, ci es la notario suordinada ses, ia refusa.
La duple prima ci ia emerji de la ofisia de contia con un lisensa de sposi ge ia es William Smith Jr e James Yates. Esta ia es la ves ses a cual los ia atenta oteni un lisensa. Duples de suportores ia canta "la ama ia vinse" cuando los ia sorti de la construida.
Ma un disputa esiste sur esce la lisensas es valida, car los no es suscriveda par la notario elejeda. Avocatos per la duples crede ce los es valida, ma la avocato de Davis ia dise ce los ave "an no la valua de la paper sur cual los es scriveda".
Entretempo, la sposo de Davis, ci ia es estra la corte ier, ia dise ce sua sposa no va resinia ma va resta en prison "per tan longa como nesesada".
Joe Davis ia dise ce sua sposa es en bon umor pos sua note prima en prison.
El ia para dona lisensas de sposi a tota duples en junio, en loca de segue la deside par la Corte Suprema de la SUA per legali sposis ge tra la pais. El ia envia duples a via a multe veses.
A lundi, la Corte Suprema ia rejeta la razona ce sua crede preveni el de esecuta sua debes.
Car el es un ofisior elejeda, on pote despone el de sua posto sola si la legeria de Kentucky acusa el.
Aspirores presidental republiciste diversa ia declara sua suporta per la disposa de Davis, incluinte Mike Huckabee e Ted Cruz. Huckabee ia dise ier ce el intende encontra la notario prisonida e organiza un asembla publica suportante el.
Otra aspirores, como Lindsey Graham e John Kasich ia dise ce la notario debe fa sua taxe e segue la lege.
@T La 1% la plu rica es a punto de posese plu ca 50% de tota
@L aora_oji/2015/la_1_la_plu_rica_es_a_punto_de_posese_plu_ca_50_de_tota
====== La 1% la plu rica es a punto de posese plu ca 50% de tota ======
19 janero 2015
La ricia de la 1 persento la plu rica de mundo va suprapasa pronto la mone poseseda par tota otra persones, seguente un reporta par la asosia carital Oxfam.
La reporta averti ce un "esplode de nonegalia" impedi la batalia contra povria global.
A la frecuentia presente de crese, la 1 persento la plu rica va posese plu ca 50% de la ricia global en 2016. Ja en la sinco anios pasada, sua ricia ia crese de 44% a 48%.
De la 52% restante, cuasi 46% es poseseda par la resta de la sinci la plu rica de la popla de mundo.
La popla restante posese sola 5,5% de la ricia global, e la adultes en esta categoria ia posese $3851 en 2014. En compara, la 1% la plu alta ia ave $2,7 milion.
Oxfam ia dise ce lo va urje un reata rapida per para "la marea altinte de nonegalia", comensante con medios forte contra la evita de impostas par companias.
Doman, Barack Obama va fa la parla anial par presidente de la SUA, "La State de la Uni", e on previde ce el va recomenda aumentas de impostas de persones rica per aida la clase media.
@T La ambasador SUA a Corea Sude es atacada
@L aora_oji/2015/la_ambasador_sua_a_corea_sude_es_atacada
====== La ambasador SUA a Corea Sude es atacada ======
5 marto 2015
Un nasionaliste combatosa de Corea Sude ia talia la fas de la ambasador SUA a un consenta de come de matina en Seoul.
Mark Lippet, ci ave 42 anios, ia es ance taliada a sua mano sinistra, ma el no ia es grave ferida.
Securiores ia vinse la atacor -- supresante el con sapato a sua colo -- e on ia aresta el.
Lippert ia es ospitalida, ma ia dise a pos ce el recovre bon. Dotores ia nesesa 80 sutures per clui la feri a sua fas, cual ia es 11 sentimetres en longia con profondia de 3 sentimetres.
Atestores ia descrive ce la atacor, un om de 55 anios con istoria de ativisme combatosa nasionaliste, ia cria esijes per la reuni de Corea Norde e Sude.
El ia condena ance eserses anial militar par Corea Sude e la SUA, cual aveni presente. Esta eserses envolve plu ca 200 mil soldatos, e Corea Norde descrive los como un pratica per un invade. Lo ia promete un contrataca. Ma on ave no indica ce la atacor ia es un ajente de Corea Norde.
En pasada, la atacor ia lansa beton a la ambasador japanes a Corea Sude.
@T La anio fini con un clima nonusual
@L aora_oji/2015/la_anio_fini_con_un_clima_nonusual
====== La anio fini con un clima nonusual ======
31 desembre 2015
NASA, la ajenteria SUA de spasio, ia averti ce la efetos de la fenomeno climal El Niño presente ta pote es tan grave como los de 1998, la plu fortes de istoria rejistrada.
El Niño de acel anio ia disturba multe la sistemes climal de la mundo, e on ia culpa lo per alga avenis de clima estrema.
On ia lia ja la fenomeno presente a alga inondas e un state noncomun temperada en la emisfera norde.
El Niño es la fenomeno en cual acuas calda de la Pasifica sentral estende a este en dirije a America Norde e Sude.
Lo aveni natural a un ves en cada du asta sete anios. Lo culmina normal en la parte tarda de la anio calendarial, an si sua efetos pote persiste tra la primavera seguente o dura an tra 12 menses.
NASA dise ce El Niño de esta anio "mostra no sinias de diminui", seguente la imaje satelital la plu resente de la Mar Pasifica.
Lo ave "un similia saisinte" a la fenomeno de desembre 1997, "la suscrive de un Niño grande e potiosa".
On ia relata lo a la inondas la plu grave de 50 anios en Paraguai, Arjentina, Uruguai, e Brasil, cual ia forsa plu ca 150 mil persones a abandona sua casas. Plu ca 100 miles de estas es en la capital de Paraguai.
En la SUA, 13 persones ia mori en la stato Missouri como resulta de rios inondada pos cuando la area ia es colpada par siclones e tempestas.
On ia esclui barcos de oto cilometres de la Rio Mississippi, prosima a la site St Louis, como resulta de la "state perilosa" cual ia es ala causada.
El Niño ia es ance sitada como un fator contribuinte a la inondas cual ia colpa partes norde de la Rena Unida, sortinte miles de persones de sua casas e lasante miles de otras sin eletrica.
Un boia climal prosima a la Polo Norde ia mesura un temperatur positiva, cuasi sin presedente en esta parte de la anio, cuando la temperatur normal es sirca -25°C.
On ia nota temperatures plu alta ca la promedia saisonal en multe partes de Europa e la SUA. En Frans, la temperatur promedia a 25 desembre ia es la plu alta de istoria rejistrada, estra lo de 1997, cual ia es pico plu calda.
La clima temperada ia obliga cultivores a recolie temprana tal granes como letugas, fresas, e asparago, e on reporta ce cuantias grande de la produidas es perida.
En un vacanseria de sci franses, on ia deveni tan desperante sur la manca de neva ce on ia transporta 100 tones de neva a la loca par elicotor.
En Italia, espertas dise ce la clima noncomun calma e seca ia mali la contamina airal supra la sites Milano e Roma.
Contrastada, en la norde de Mexico on culpa El Niño per temperatures jelante. On ia esperia neva en partes de la Deserto de Sonora a la ves prima de 33 anios. En la stato Sonora on ia culpa la fria per tre moris.
@T La aniversario 70 de la bombi de Hiroshima
@L aora_oji/2015/la_aniversario_70_de_la_bombi_de_hiroshima
====== La aniversario 70 de la bombi de Hiroshima ======
6 agosto 2015
Abitores de la site japanes Hiroshima onora la aniversario 70 de la cade de la bomba atomal prima par un avion SUA.
Un rituo, a cual la ministro xef Shinzo Abe ia es presente, ia es fada en la parce monumental en la site, ante la relasa de miles de lampas sur la rio Motoyasu.
On atribui la fini de la Gera Mundal Du a la bombi de Hiroshima -- e a la otra en Nagasaki a tre dias a pos. Ma lo ia mata a la min 140 mil persones en la site.
Un bombador B-29 nomida Enola Gay ia cade la bomba de uranio, cual ia esplode a 600 metres supra la site a sirca 08:15 a 6 agosto 1945.
En sola acel dia, on crede ce 70 mil persones -- e cisa plu -- ia es matada. Multe plu ia mori de feris xocante causada par veneni de radia en la semanas e menses seguente.
Tra Japan, on ia fa un minuto de silentia per onora la aniversario. En Hiroshima, un campana ia sona a 08:15.
Parlante a 40 mil persones a la rituo en la parce, prosima a la episentro de la ataca, Abe ia recomenda un desarma nucleal de la mundo intera. El ia dise ce, en ajunta a mata miles de persones en la site, la bomba atomal ia causa ance sufris nondescrivable a la survivores.
"Oji Hiroshima ia revive," el ia dise, "e ia deveni un site de cultur e ricia. Pos setedes anios, me vole reasentua la nesesa de pas mundal."
@T La aniversario 70 de la libri de Auschwitz
@L aora_oji/2015/la_aniversario_70_de_la_libri_de_auschwitz
====== La aniversario 70 de la libri de Auschwitz ======
28 janero 2015
Survivores de Auschwitz ia urje ce la mundo ne permete un reaveni de la crimines de la Olocausto, en cuando los ia onora la aniversario 70 de la libri de la campa.
300 survivores ia reveni per un rituo su un tenda jigante. On previde ce esta va es la aniversario major final a cual survivores de Auschwitz pote es presente en cuantia grande.
Sirca 1,1 milion persones, xef iudis, ia es matada ala entre 1940 e 1945.
La presidente polsce, Bronisław Komorowski, ia dise a la rituo ce la deutxes ia muta Polsca a "un semetero per iudis".
Prisonidas pasada ia descrive como la gardores nazi ia separa familias par forsa, organizante la arivores nova en du clases: los ci va labora con manos, e los ci va vade direta a la cameras de gas.
Pos la parlas, on ia dise preas iudi e cristian per la mores, ante cuando candelas ia es ensendeda ante la monumento per la vitimes de Birkenau.
Auschwitz ia es librida par soldatos soviet a 27 janero 1945. Lo ia deveni un museo ja en 1947.
Ier, la ministreria rusce de defende ia publici documentos arcival (en rusce) sur la libri. La soldatos e reportores prima ci ia entra a la campa ia descrive folas de prisonidas fatigada e magrida, e ia trova montones de corpos mor.
Vladimir Putin, la presidente de Rusia, no ia es presente a la rituo par causa de un disputa con Polsca sur lo, liada con la interveni resente de Rusia en Ucraina.
En loca, la gidor rusce ia vade a un rituo a la Museo Iudi de Moscva con Berel Lazar, la rabi xef de Rusia.
La Cremlin ia acusa Polsca de "isteria" antirusce pos cuando Grzegorz Schetyna, la ministro polsce de esternas, ia atribui la libri de Auschwitz a soldatos ucrainsce.
Ante parti de Paris per vade a Polsca, la presidente franses, François Hollande, ia condena la problem "nontolerable" de antisemitisme contempora. A un otra rituo recordante la Olocausto, el ia dise a iudis: "Frans es vosa propre pais."
Plu temprana, Angela Merkel, la canselor de Deutxland, ia dise ce lo es "desonorosa" ce iudis fronti insultas, menasas, e violentia.
@T La aresta de contrabandores de ceso en Rusia
@L aora_oji/2015/la_aresta_de_contrabandores_de_ceso_en_rusia
====== La aresta de contrabandores de ceso en Rusia ======
19 agosto 2015
La polisia rusce dise ce los ia aresta un gang cual ia produi miliones de dolares de ceso contrabandada.
Ses persones ia es tenida, acusada de crea ceso con valua de $30 milion, usante ingredientes de la Ueste.
En venja per la punis sur la ocupa de Crim, Rusia ia proibi alga emportas e ia destrui multe tones de cesos e otra comedas fada en la Ueste, incluinte lado, netarinas, pescas, e tomates.
On ia institui un linia direta par cual la popla pote dona informas sur emportas o vendes nonlegal.
La destrui de la comedas ia provoca criticas de alga politicistes, e cexas de campaniores contra povria ci dise ce on ta debe dona la comedas a persones povre en loca.
Plu ca 370 000 persones ia suscrive un solisita enlinia cual proposa ce presidente Vladimir Putin distribui la comedas a la povres.
La polisia en la area de Moscva ia acusa la arestadas de usa un dui de ton de calio proibida per calia la ceso. La gang ia dona alora eticetas falsa a la ceso e ia vende lo en supramercatos en Moscva e San Peterbug.
La gang risca es acusada de froda, con puni de asta 10 anios en prison.
Ofisiores insiste ce la destrui de la comedas pertine a sania e no a politica. Los dise ce la plu de la ingredientes nonlegal furnida es de mal cualia.
Asta lundi, on ia saisi ja 321 tones de produidas de animal e 592 tones de frutas e vejetales.
@T La aterador Philae siniali denova de sua cometa
@L aora_oji/2015/la_aterador_philae_siniali_denova_de_sua_cometa
====== La aterador Philae siniali denova de sua cometa ======
20 junio 2015
Philae, la aterador european de cometa, ia fa un contata nova con la Tera -- sua prima pos la note de soldi pasada.
Sua comunica ia es sinialida par Rosetta, sua veculo madrin, cual orbita un bal de fango jelada con la nom 67P/Churyumov-Gerasimenko.
La sinial ia es resetada par un antena enorme de la ajenteria spasial SUA en California, e alora enviada a la Ajenteria Spasial European en Deutxland.
Ante la fini de semana pasada, Philae ia dormi tra sete menses.
La robot ia perde potia a mera 60 oras pos atera sur la cometa a 12 novembre, car lo ia rebondi e ia entra tal a un foso do la lus de sol no ia ateni sua paneles solal per jenera eletrica.
Ma la cometa ia veni aora considerable plu prosima a la sol, e donce la lumina ia boni e Philae ia velia.
La comunicas con la Tera, tra un distantia de 305 milion cilometres, es multe corta asta aora, durante no plu ca un pico de deses de secondos. La sinial prima ia ariva a saturdi, segueda par un otra a soldi.
Ance la sinial de oji es multe corta. Lo revela sola la state de Philae, cual pare bon. Controlores manobra aora Rosetta a plu prosima a la cometa, per atenta reali comunicas plu longa e fidable. On intende ce lo desende a un orbita de min ca 200 cilometres.
Probable pos alga tempo, Philae va deveni capas de recomensa la investigas siensal de la cometa cual ia para cuando la eletrica ia manca.
La esperimenta xef va fora un buco en la corpo jelada, per determina sua composa cimical.
On ia atenta ja esta en la 60 oras disponable en novembre, ma sin susede, probable car la posa de la robot ia preveni ce la forador toca la surfas.
La injeniores crede ce si los pote comanda Philae a jira en la semanas veninte, lo va pote oteni un sample. Ma tota va depende de la cuantia de potia disponable a la aterador en sua loca ombrida.
On es ance consernada sur la veculo madrin. Lo ia retira resente se de la cometa per atenta evita la multe gas e polvo cual la cometa ejeta aora, deveninte plu calda en sua prosimi a la sol.
Esta materia risca confusa la sistemes navigal automida de Rosetta, e la controlores debe atende ce sua labora per crea un comunica plu bon con la aterador no esposa la sonda mesma a peril.
@T La conservistes gania la vota brites
@L aora_oji/2015/la_conservistes_gania_la_vota_brites
====== La conservistes gania la vota brites ======
8 maio 2015
La mapa political de la Rena Unida ia cambia vasta pos un vota jeneral ier, en un resulta cual ia surprende cuasi cadun.
La parlamento de London ave 650 sejas per parlamentores de tra England, Scotland, Cimri, e Er Norde. A la momento de publici esta article, on ia anunsia la resulta de la votas per 629 de estas.
Ante ier, tota sondas ia predise ce no partito va gania plu ca un dui de la sejas, per reseta automata la direto de governa la pais.
Tra la sinco anios pasada, la governa brites ia es un alia de la partito conserviste e la partito libriste-democrata. Los ia atenta recovre la economia pos la crise finansial de 2008 par redui la spende publica e par otra medios sever.
An tal, la conservistes ia gania ier un cuantia grande de sejas, e on predise ce los va ocupa final pico plu ca un dui de la sejas, tal ce los no va nesesa xerca un aliada.
La otra resulta notable ia es par la Partito Nasionaliste Scotes, cual ia gania 50 sejas nova e ocupa aora 56 de la 59 sejas scotes en la parlamento de London.
Esta es sua vinse la plu susedosa de istoria. En alga sejas, los ia rompe la recordo per la "penduli" (pd. la cambia de proportio de votas), con moves favorente de asta 34% de votores.
La nasionalistes ia sutrae alga parlamentores de otra partitos ci ia ocupa sejas scotes tra desenios.
Ma car la conservistes ia susede ance, la nasionalistes no ia reali sua espera de pote alia se con otra partitos oposante per deveni potiosa en parlamento.
Alga analistes sujesta ce la conservistes ia susede xef car la otra partes de la popla ia teme la susede de la nasionalistes scotes e la desuni ultima de la Rena Unida.
La otra oposores xef, la partito de labora e la libristes-democratas, ia perde multe sejas. Probable sua gidores va resinia.
La libristes-democratas ia perde a la min 46 sejas, e ia redeveni un partito minor con sola 8 parlamentores. E en la partito de labora, la ministro oposante de finansia ia perde sua seja.
UKIP, un partito destriste e relativa nova, e conoseda per sua politica forte contra migras a la pais, ia perde un de sua du sejas.
La partito verde ia susede reteni sua seja solitar a la costa sude de England, resetante cuasi 42% de la votas, un crese de plu ca 10% pos la vota presedente a sinco anios ante aora.
La mapa de la Rena Unida sembla aora cuasi un bandera de tre colores: Scotland ia jali pos la vinse de la nasionalistes; la norde de England es jeneral ancora roja per la partito de labora; e la sude es conserviste blu.
@T La coroni de la re de Tonga
@L aora_oji/2015/la_coroni_de_la_re_de_tonga
====== La coroni de la re de Tonga ======
4 julio 2015
Re Tupou 6 de Tonga, un nasion de isolas en la Mar Pasifica, ia es formal coronida a plu ca tre anios pos deveni la re.
Persones reial stranjer, incluinte la prinse erital de Japan, ia es presente a la rituo de coroni en la capital, Nukuʻalofa.
La coroni mesma ia es fada par D'Arcy Wood, un prete jubilada australian de 78 anios, car toca la testa de sua re es tabu per tonganes.
La re presedente, George Tupou 5, ia mori en marto 2012.
La coroni ia es la culmina de un semana de festas cual ia inclui un rituo tradisional de bevi, selebras en stradas, e bancetas. Lo ia atrae miles de tonganes e turistes.
En ajunta a Prinse Naruhito, la reiales european Prinse Georg von Habsburg de Ungaria e Prinsesa Marie-Therese von Hohenberg de Austria ia es presente.
Tupou 6 ave 55 anios. El ia es tronida pos la mori de sua frate, ci no ia sposi.
Tonga ia gania sua autonomia de Britan en 1970, ma sua monarcia ave mil anios de istoria.
@T La cuantia de mores pos la trematera nepali suprapasa 3000
@L aora_oji/2015/la_cuantia_de_mores_pos_la_trematera_nepali_suprapasa_3000
====== La cuantia de mores pos la trematera nepali suprapasa 3000 ======
27 april 2015
A la min 3300 persones ia mori en la teratrema enorme cual ia colpa Nepal a saturdi. Plu ca 6500 persones ia es ferida, e deses ia es matada en Xina e Barat.
Miles de persones ia pasa un note du estra casa. La trema, de mesura 7,8, ia causa ance avalanxas matante sur Monte Everest (Sagarmata).
En la capital nepali, Kathmandu, do replicas sismica continua ancora, sites vasta de tendas ia apare per los ci ia perde sua casas o ci teme revade a los.
Misiones de salva e aida ariva per maneja la tempo pos la trematera, cual ia es la plu mal en Nepal en plu ca 80 anios.
A esta matina, la clima ia boni e elicotores ia viaja a la campa de base de Everest per atenta salva 210 trepores ci ia deveni trapida cuando los ia perde sua cordas e scalas en avalanxas.
Laboras per estrae vitimes de su la detrito de construidas ruinada en Kathmandu continua ance. Ma un ofisior de la ministreria de internas ia informa jornalistes ce la salvores es "en state vera mal" pos labora sin sesa tra du dias.
On ia averti ce la cuantia de mores pote crese cuando ecipos de salva ateni montanias distante en Nepal ueste.
Un om ci on ia estrae par elicotor a Pokhara, a 200 cilometres de la capital, ia dise ce cuasi cada casa en sua vileta de plu ca 1000 casas ia es destruida.
En la distrito Dhading, a 80 cilometres a ueste de Kathmandu, persones campa su sielo, la ospital es estrema plen, la eletrica manca, e la botecas es cluida.
Ier, on ia esperia un replica forte en Nepal, Barat, e Bangladex, e plu avalanxas ia aveni prosima a Everest.
Esta trema nova, de mesura 6,7 e con sentro a 60 cilometres a este de Kathmandu, ia causa un panica en la site cuando persones ia core de construidas. Lo ia cade alga casas cual ia es ja danada par la trema prima.
Ospitales privata e publica ave no plu spasio, e trata sua pasientes su sielo.
A la min cuatro de sete locas de Erita Mundal de Unesco en la vale de Kathmandu ia deveni sever danada. Tre ia es plazas de sites antica.
En Bhaktapur, cual ia es la site vea nepali la plu bon conservada a ante, un dui de tota casas es aora ruinada e oto de des temples es danada.
Pluves forte a saturdi ia mali an plu la situa. Ofisiores de la Nasiones Unida ia espresa ansia ce tempestas de lampo pote feri los ci resta su sielo.
@T La curso balcan de migrores es blocida
@L aora_oji/2015/la_curso_balcan_de_migrores_es_blocida
====== La curso balcan de migrores es blocida ======
19 otobre 2015
La tensa aumenta entre miles de migrores ci viaja a norde tra statos balcan, car restrinjes nova impedi sua curso a Europa ueste.
Corvatsca ia demanda ce Slovenia, sua visina norde, aseta 5000 migrores per dia, ma Slovenia ia dise ce lo va aseta sola un dui de acel cuantia.
Esta ia causa un cumula de persones a la frontera corvatsce con Serbia, e Corvatsca risca consuma tota la spasio en sua campas de traversa.
Buses folida con persones ia formi un filo en Serbia ier, e temperas ia coleri entre la migrores frustrada e la polisiores tro cargada. Multe ia es obligada a espeta en la fria e la pluve tra la note.
Miles de refujadas move a norde tra la Balcanes, e la plu espera ateni Osteraic, Deutxland, e otra statos de la Uni European.
Magiar, sitante consernas de securia, ia clui sua fronteras con Serbia e Corvatsca, forsante migrores a adota un curso plu lenta tra Slovenia.
Esplicante la restrinjes nova a soldi, Boštjan Šefic, la ministro de internas slovensce, ia dise ce sua visina norde Osteraic aseta no plu ca 1500 persones per dia.
El ia dise ce Slovenia "no pote aseta cuantias nonlimitada de migrores si nos sabe ce los no pote continua sua viaja. Si nos ta aseta 5000 migrores per dia, acel ta causa ce 35 mil va es en Slovenia pos 10 dias. Acel ta es nonasetable."
Sirca 5000 migrores ia pasa un note fria en un campa de traversa en Opatovac en la este de Corvatsca.
Ultra la frontera en Serbia, miles de persones ia es tenida en sirca 50 buses de pos la temprana de soldi, espetante traversa a Corvatsca.
Muhammad Samin de Afganistan ia dise: "Nos espeta asi tra cuatro oras en la bus. La clima es tro fria. Nos porta multe de camisas. La enfantes es ance en la fria. No comeda."
La migrores, de ci la plu veni de Afganistan, Suria e Irac, ia spende ja semanas en pasea de Turcia, tra Elas, Macedonia, e Serbia.
La departe de refujadas de la Nasiones Unida ia comenta ce la curso nova tra Slovenia longi la malesperia per miles de persones. Un portavose ia dise: "La deside par Magiar de clui sua frontera ia ajunta serta a la sufri e miseria e la longia de la viaja per esta persones desperante. On va ave defias si la prosede deveni lenta o nos ave un cumula de persones nontratada."
Plu ca 600 mil persones, de cual la plu es suri, ia ateni ja Europa en esta anio, contrastada con pico plu ca 200 mil en la intera de 2014.
Deutxland ia dise ce lo previde 800 mil refujadas en esta anio, ma on crede ce la cuantia pote es tan grande como 1,5 milion.
@T La dia final de campania ante un vota jeneral en Elas
@L aora_oji/2015/la_dia_final_de_campania_ante_un_vota_jeneral_en_elas
====== La dia final de campania ante un vota jeneral en Elas ======
24 janero 2015
La ministro xef de Elas, Antonis Samaras, ia fa un apela final a votores ante la vota jeneral doman. Sua partito es oposada par la Alia de la Sinistra Radisal, conoseda par sua corti elinica SIRIZA.
Samaras ia dise ce, an pos anios de medios sever, la pais no mostra indicas de recovre.
Entretempo, Alexis Tsipras, gidante SIRIZA, ia dise ce sua partito va repone "dinia" a Elas.
El vole renegosia la deta de Elas e fini la medios sever creada par suporta finansial internasional.
Elas ia tolera reduis profonda de spende, liada a esta suporta par la Uni European, la Reserva Monal Internasional, e la Banco Sentral European.
La posible de un vinse par SIRIZA en la vota ia provoca temes ce Elas ta pote fali repaia sua deta e ta parti de la zona de euro.
En un asembla final de sua campania, Samaras ia informa suportores de sua partito conserviste ce el ia labora "tra dia e note" per manteni la pais.
Tsipras ia dise ce el espera trova "un solve mutua asetable" con la creditores de Elas, repetente un promete de fa ce on cansela un dui de la deta internasional de la pais ante la fini de la acorda de suporta esistente en julio.
El ia dise ce un fini de "umili nasional" es prosima.
Angela Merkel, la canselor de Deutxland, ia recomenda ce la pais resta en la zona de euro. "A la cor de nosa prinsipes on ave unia," el ia dise. "Me desira ce Elas, an con la difisiles, resta un parte de nosa nara."
@T La dirijor xef de Toshiba resinia en scandal
@L aora_oji/2015/la_dirijor_xef_de_toshiba_resinia_en_scandal
====== La dirijor xef de Toshiba resinia en scandal ======
21 julio 2015
Hisao Tanaka, la dirijor xef e presidente de Toshiba, va resinia pos un anunsia par la compania japanes ce lo ia esajera sua declaras de profitas tra la ses anios pasada. La vis-presidente Norio Sasaki va resinia ance.
Ier, un comite autonom asiniada par Toshiba ia dise ce la compania ia esajera sua profita operante par 151,8 mil milion ienes ($1,22 mil milion). La esajera es plu o min la truple de un estima ja fada par la compania mesma.
La ministro de finansia, Taro Aso, ia dise ce la caso risca sumina la fida a la maneja de corporas en Japan. El ia ajunta ce la nonormalias de conta a Toshiba es "multe regretable".
La governa de Japan atenta ja regania la fida de investores global pos cuando on ia descovre ce la compania Olympus ia asconde un perde de $1,7 mil milion en la tarda de 2011. Asta aora, esta ia es la scandal la plu mal de maneja corporal en la pais.
On previde ce, per Toshiba, la reporta de la comite va gida a un reanunsia de revenu, un cambia intera de dirijores, e cisa multas sever.
La comite ia trova ce la malreporta de profitas ia comensa pos la rompe finansial a sete anios ante aora, cuando manejores major ia comensa pone goles nonrealable.
La reporta ia dise: "En Toshiba, on ia ave un cultur corporal en cual on no ia pote ata contra la vole de persones superior. Donce, cuando la dirijores xef ia presenta "defias", la presidentes de areas, manejores de grupos, e empleadas su estas ia esecuta continuante praticas nonconveninte de conta per ateni goles, per segue la desiras de sua superiores."
Tanaka e sua presedor Sasaki es entre oto dirijores major ci ia resinia aora pos la reporta.
Asiones de Toshiba ia crese par 6% en la asioneria Nikkei en Japan, pos la lejeri ce la reporta conteni poca surprendes nonplasente. Ma los es ancora basida par sirca 23% de pos cuando Toshiba ia revela la casos prima de nonormalias de conta en la temprana de april.
@T La du xefes de Cipros recomensa negosia
@L aora_oji/2015/la_du_xefes_de_cipros_recomensa_negosia
====== La du xefes de Cipros recomensa negosia ======
15 maio 2015
En Cipros, la xefes de la comunias divideda elinica e turces va recomensa negosias de pas, arbitrada par la Nasiones Unida, cual ia es abandonada en la anio pasada.
La presidente Nicos Anastasiades e la xef de a cipricas turces Mustafa Akıncı va reinisia oji la prosede de pas en la zona neutra en Nicosia.
On ia eleje Akıncı a sua posto en april, e la discutes ia es anunsiada pos un consenta a lundi.
La norde de la isola, controlada par Turcia, ia separa en 1974 pos un despone corta inspirada par la elinicas.
Pos acel, la isola ia deveni divideda: la tri norde es aora abitada par cipricas turces e la du tris sude par cipricas elinica. La Republica Turces de Cipros Norde, autodeclarada, es diplomatada isolida: sola Turcia reconose lo.
La discutes de pas ia sesa en otobre 2014, cuando la elinicas ia sorti en protesta sur la presentia de un barcon turces xercante gas natural a lado de la costa sude.
Fortias de la Nasiones Unida ci manteni la pas estima ce 165 mil cipricas elinica ia fuji o ia es escluida de la norde, e 45 mil cipricas turces de la sude. Ma la du lados oposante mesma dise ce la cuantias es plu alta.
La compensas per la deslocadas resta como un de la temas la plu difisil en la negosias.
Analistes sujesta ce on ave esperas ce Akıncı, un sinistriste moderada, es capas de progresa la situa. El ia vinse sua presedor noncomprometente, Derviş Eroğlu, en april.
@T La editor de Charlie Hebdo publici un libro sur islam
@L aora_oji/2015/la_editor_de_charlie_hebdo_publici_un_libro_sur_islam
====== La editor de Charlie Hebdo publici un libro sur islam ======
16 april 2015
On publici oji un libro scriveda par Stéphane Charbonnier, la editor mor de Charlie Hebdo, un jornal satira semanal franses.
La libro suporta la direto de burla relijios, e ia es completida a sola du dias ante la mata de sua autor -- conoseda como Charb -- par combatosas islamiste en janero.
Lo razona ce en loca de la bon batalia contra razisme, la mundo sustitui sempre plu un luta maljudida contra "islamofobia".
Charb e 11 otras ia es matada a media de un consenta edital de la jornal.
La ataca a la ofisias de la jornal en Paris ia es esecutada par du frates, Saïd e Chérif Kouachi, ci mesma ia es matada a pos par fusili par la polisia.
Charb ia reseta multe menasas de mata pos la publici par Charlie Hebdo de cartunes mostrante la profeta Muhammad en 2006. La ofisias de la jornal ia es ensendeda par bomba en 2012.
La titulo de la libro es Un letera publica a la frodores de islamofobia ci vantaji la razistes. Lo es no sola un defende de la disposa edital de la jornal, ma ance un ataca a sua oposores.
La autor scrive: "La sujesta ce on pote rie sur tota, con eseta de alga partes de islam, car muslimes es multe plu iritable ca la resta de la popla -- cual es esta, si no un separa prejudosa?"
El condena esta disposa como un "paternalisme inteletal burjes sinistriste blanca".
Charlie Hebdo, cual ia es inisiada en 1969, ia burla conservistes e tota relijios. Lo ia sirculi en cuantia peti, e ia colasa en 1981, ma on ia revive lo en 1992.
@T La ferovia suiz emplea oveas-cortierbas
@L aora_oji/2015/la_ferovia_suiz_emplea_oveas-cortierbas
====== La ferovia suiz emplea oveas-cortierbas ======
20 maio 2015
Cuando pasajores de tren en Suiz regarda tra la fenetras, los va vide cisa la enscrivedas la plu nova de la compania nasional de ferovia -- un manada de oveas.
La animales opera como cortierbas cuatropedal per Ferovias Federal Suiz, aidante manteni la bonordina de la erba longo la reles.
Los es spesial usosa sur inclinas presipe, cual es min atenable per cortierbas macinal.
La sistem famosa de ferovias suiz estende tra plu ca tre mil cilometres de reles, e multe de la vias traversa un tereno montaniosa.
En cuando los come a pasto, la oveas resta secur car on usa sercas de rede e de cordeta eletricida.
Si on vole segue la progresa de la manada, on pote regarda un mapa enlinia cual mostra la loca de la oveas.
La animales ia comensa sua labora en esta mense, e la compania ia loda multe los. Lo dise ce la oveas es "plu bon ca cortierbas normal" car los eleje curante sua comedas "en loca de falxi tota en modo de macina", e multe flores savaje es tal salvada.
En ajunta a es ecolojial sana, la oveas es estrema nonperosa, pausante per dormi en sola du oras per dia.
La compania dise plu ce, comparada con un cortierba comun, los es "multe plu divertinte per oserva".
@T La fia de Nemtsov condena la propaganda jornaliste
@L aora_oji/2015/la_fia_de_nemtsov_condena_la_propaganda_jornaliste
====== La fia de Nemtsov condena la propaganda jornaliste ======
10 junio 2015
Un fia de Boris Nemtsov, un politiciste rusce oposante ci ia es asasinada, ia acusa jornalistes pro-Cremlin de sperde propaganda odiosa. El dise ce el ia parti de Rusia per abita escluida.
Janna Nemtsova ia dise ce el ia esperia menasas, e ce esta es un de la razonas per sua parti.
En un article en un jornal dial de comersia, el ia scrive ce la propaganda rusce ia sembla la edas de jenoside en Deutxland nazi e en Ruanda.
Nemtsov, un oposor major de la Cremlin, ia es matada par fusil en Moscva en febrero.
On ia aresta sinco suspetadas sur la omiside, de ci tota veni de la republica rusce Txetxnia. An tal, la investiga no ia descovre ci ia comanda la mata, e un de la sinco ia dise ce on ia forsa el a confesa.
Alga oposores de la presidente rusce Vladimir Putin ia parti de la pais en anios resente, protestante contra menasas e autoritarisme.
Vladimir Kara-Murza, un ami prosima de Nemtsov, ia es ospitalida con un problem acuta renal en la mense pasada. Dotores no ia trova la causa, e sua padre ia dise ce el suspeta venena.
Nemtsova ia scrive ce la medios controlada par la governa en Rusia ia contribui a la mori de sua padre par descrive el e otra gidores oposante como "tradores".
El ia acusa jornalistes progovernal de sperde odia e nontolera, e el ia demanda forte ce la Ueste puni la envolvedas.
"Multe de la testos jornaliste controlada par la Cremlin fa ce on recorda la retorica de propagandistes african. La macina de informa de Putin -- simil a los en Deutxland nazi e Ruanda -- usa metodos criminal de propaganda, e semi un odia cual jenera violentia e teror."
@T La fonte Trevi es restorada
@L aora_oji/2015/la_fonte_trevi_es_restorada
====== La fonte Trevi es restorada ======
4 novembre 2015
En Roma, acua cascade denova de la fonte Trevi, pos la fini de un renovi de 17 menses per la fonte famosa, a custa de 2,2 milion euros.
La fonte famosa en la capital de Italia ave cuasi 300 anios, e miliones de turistes visita lo en cada anio.
Ma la state povre de sua strutur ia es revelada en 2012, cuando pesos de sua cornisa detaliosa ia comensa cade pos un inverno noncomun sever.
La fonte ia deveni famosa en 1960 a la apare de la filma La dolce vita (La vive dulse). En la filma, la ator Anita Ekberg (ci ia mori plu temprana en esta anio) dansa en la acua con sua costela Marcello Mastroianni, en lo cual reseniores ia descrive como un de la imajes sinematografial la plu durante de la sentenio 20.
Un ecipo de 26 restorores ia furni no sola un limpi completa a la fonte, ma los ia preveni ance ce lo desintegra. Los ia repara fesures e suportadores de aser, con intende de evita un reaveni de la momento en 2012 cuando pesos ia cade de lo.
Acua versa aora denova de la funda de sua sena de dio maral, e un lumina nova esibi sua fasada baroca e refletante.
La reparas ia es finansiada par Fendi, un compania italian de moda, fundida en Roma como un comersia de benes de cuoro en la desenio de 1920, e aora un parte de LVMH, un compania jigante franses de benes lusosa. Lo ia negosia un acorda cual permete ce lo pende un placa anunsiante prosima a la monumento per cuatro anios.
La compania ia spende ance 320 mil euros per refresci la Cuatro Fontes, un grupo de fontes min conoseda en la site.
@T La fumi va mata un tri de omes joven xines
@L aora_oji/2015/la_fumi_va_mata_un_tri_de_omes_joven_xines
====== La fumi va mata un tri de omes joven xines ======
9 otobre 2015
Un studia nova averti ce un tri de tota omes en Xina ci ave aora min ca 20 anios va mori prematur si los no sesa fumi.
La rexerca, publicida en la jornal medical The Lancet ("La bisturi"), dise ce aora du tris de omes xines comensa fumi ante sua anio 20. Lo conclui ce la abitua va mata sirca un dui de estas.
La siensistes ia fa du studias nasional, con interval de 15 anios, envolvente sentos de miles de persones.
Si la tendes presente continua, la cuantia anial de moris par tabaco en Xina, xef entre omes, va ateni du milion en o ante 2030. La rexercores ia descrive esta como "un epidemica cresente de moris prematur".
La esploras ia es fada par siensistes de la Universia de Oxford, la Academia Xines de Siensas Medical, e la Sentro Xines per Controla de Maladia.
Ma un de la coautores, Richard Peto, ia dise ce un espera esiste -- si on pote convinse persones a abandona la abitua. "La clave per evita esta onda enorme de moris es la sesa," el ia dise, "e si on es un om joven, ta ce on no comensa."
An si la proportio de fumores ia diminui en paises developada -- a min ca un person entre sinco en la SUA, per esemplo -- lo ia alti en Xina, en cuando sigaretas ia deveni plu disponable e consumores ia deveni plu rica.
Autoriosas ia mostra ansia sur la crese, e Beijing ia introdui an un proibi de fumi publica. Ma atentas de redui la fumi es impedida par la popularia de la abitua, e par sua usosia como un fonte de revenu impostal.
Global, tabaco mata asta un dui de sua usores, seguente la Organiza Mundal de Sania.
@T La governor de Adan es matada en Iaman
@L aora_oji/2015/la_governor_de_adan_es_matada_en_iaman
====== La governor de Adan es matada en Iaman ======
6 desembre 2015
La governor de la site Adan en la sude de Iaman ia es matada en un esplode grande.
Un convoia portante Jaafar Mohammed Saad ia es colpada en la area Tawahi de esta site de porto.
Rebelores huti, con base en Iaman norde, ia saisi ja multe de la pais, incluinte la capital Sana'a.
Plu temprana en esta anio, Adan ia es recaturada par soldatos de governa, suportada par un alia de gida saudi.
Alga de los ci ia acompania Saad ia mori ance en la ataca.
Esta violentia nova aveni corta pos cuando la ambasador iamani de la Nasiones Unida ia consenta con presidente Abd Rabbuh Mansur Hadi en Adan ier. Los ia labora per atenta fini oto menses de gera interna.
La Nasiones Unida espera organiza discutes entre la du lados, plu temprana en esta mense.
A saturdi, atacores ia mata con fusil un judor importante antiterorisme e sua du fios e un ofisior militar de securia, en atacas diversa.
Hadi ia declara Adan como la capital tempora de Iaman pos cuando fortes aliada ia saisi lo de rebelores huti, irani suportada, en julio.
@T La jua la plu peti de xace en computador
@L aora_oji/2015/la_jua_la_plu_peti_de_xace_en_computador
====== La jua la plu peti de xace en computador ======
29 janero 2015
Un programor franses ia crea lo cual pare la program la plu peti de xace.
BootChess, capas de opera en computadores de Windows, Mac OS X, e Linux, ave mera 487 baites de codigo. Lo es plu peti ca un jua de xace per la computador ZX81 cual ia conteni 672 baites de codigo e ia manteni la recordo tra 33 anios.
La creor, Olivier Poudade, ia comenta ce el espera ce sua ateni va inspira otra programores a atenta crea programes de petia simil estrema.
"Lo mostra perce la lingua de asembla es ancora la lingua prefereda per los ci vole esele en programi."
El ia dise ce el ia desira ance onora la talento de David Horne, la creor de 1K ZX Chess per la computador ZX81. Acel macina ia posese mera 1024 baites de memoria, cual ia restrinje forte la taxes cual lo ia pote fa.
La computadores de oji ave normal memorias capas de teni plu ca acel cuantia a miliones de veses.
Per compara, an du tuitas sin imaje ocupa plu o min la mesma cuantia de memoria como la program intera de xace de Poudade.
Per ateni sua gol, el ia debe simpli la aspeta de sua jua, an plu ca sua presedor de 1982. La table e pesos es representada par leteras e sinias de puntua. Per esemplo, P representa un peon, Q representa un dama, e puntos indica la cuadros vacua. La colores de la pesos es mostrada par leteras minor e major.
Alga criticistes ia cexa ce esta program de xace no es "completa", car lo no permete ce on roca (pd. intercambia la locas de un re e un tore).
Ma Poudade ia responde ce 1K ZX Chess ia ave la mesma restrinje, e ia asentua ce sua program permete ce peones deveni reas cuando los ateni la otra lado de la table -- cual no ia es posible en la program de Horne.
@T La ministro xef de Corea Sude ofre resinia
@L aora_oji/2015/la_ministro_xef_de_corea_sude_ofre_resinia
====== La ministro xef de Corea Sude ofre resinia ======
21 april 2015
Lee Wan-koo, la ministro xef de Corea Sude, ia ofre resinia pos es acusada de aseta sobornas.
La presidente, Park Geun-hye, no ia dise esce el va aseta sua resinia, ma ia espresa compatia con el.
La ajenteria jornaliste nasional ia dise ce Park ia demanda "un investiga completa" sur la scandal.
Lee nega ce el ia aseta 30 milion uones (cuasi $28 mil) en forma de reservas nonlegal de campania en 2013. On ia presa el a resinia sua posto, an tal.
Su leges de Corea Sude, politicistes no pote aseta plu ca 100 mil uones en contribuis.
La scandal ia comensa cuando on ia trova la corpo mor de Sung Wan-jong, un comersior, plu temprana en esta mense, pos sua suiside suspetada. Sung ia es a punto de fronti demandas par autoriosas sur alegas ce el ia froda mone de companias per soborna politicistes.
Investigores ia trova un nota en sua pox cual ia lista la nomes de alga persones, incluinte Lee, e numeros cual ia pare es cuantias paiada a los. Un partito oposante ia demanda alora ce on acusa Lee.
En refere a la resinia, seniora Park ia dise en un declara scriveda: "Me trova ce lo es regretable. Me compatia ance la angusa de la ministro xef."
Park fa presente un visita de cuatro dias a Peru. On reporta ce el va deside sur aseta la resinia ante la semana veninte.
Lee ocupa ja sua posto tra sola du menses. El ia deveni la ministro xef pos un xerca longa per recambia sua presedente, Chung Hong-won.
Chung ia resinia a corta pos la desastre de la naveta Sewol en april 2014, cual ia mata plu ca 300 persones.
Ma on ia reteni Chung tra alga menses en cuando Park ia xerca un seguente. Du aspirores ia retira se pos acusas de fa mal, ante cuando Lee ia reseta la posto.
@T La mori de Sunido
@L aora_oji/2015/la_mori_de_sunido
====== La mori de Sunido ======
23 marto 2015
Nos regrete anunsia ce Jean-Claude Caraco, un elefeniste major, ia mori en febrero a la eda de 65 anios.
Jean-Claude ia contribui multe a la vici de elefen, usante la nometa "Sunido" -- un tradui esperanto de la nometa "fio de sol" de un de sua treavos.
Sunido ia es forte interesada par linguas construida, e la veas e la novas. El ia aprende esperanto en 1967, e ia es un membro respetada de la comunia de elefen tra la sinco anios pasada.
Estra esperanto e elefen, el ia developa un interesa spesial sur la linguas uropi e kah, e ia parla tan bon volapük ce el ia deveni un membro de la academia de acel lingua. La disionario esperanto-volapük de André Cherpillod mostra alga fotos de Jean-Claude con sua amis volapükiste.
La vici de elefen conteni ancora alga traduis eselente creada par Sunido, per esemplo "La Mestre Gato o la Gato con botas" par Charles Perrault de la sentenio 17, e "Grasias, ami!" par la esperantiste Claude Piron.
Nos compatia sua familia grande. Multe comunias va senti sua manca.
@T La mori de un om ci ia rapidi la destrui de la Mur de Berlin
@L aora_oji/2015/la_mori_de_un_om_ci_ia_rapidi_la_destrui_de_la_mur_de_berlin
====== La mori de un om ci ia rapidi la destrui de la Mur de Berlin ======
2 novembre 2015
Un ofisior major de Deutxland Este, de cual sua anunsia improvisada a un confere jornaliste ia rapidi la destrui de la Mur de Berlin en 1989, ia mori a la eda de 86.
Günter Schabowski ia dise ce on va sutrae direta la restrinjes sur viaja de la sitadanes, e esta ia provoca deses de miles de persones a traversa a la ueste.
Ofisiores ia intende introdui gradal la cambias, comensante a la dia seguente, ma la fola grande de persones ia aselera la cade rapida de la Mur.
La restrinjes ia es projetada per preveni un parti coletiva protestante a Magiar.
A min ca un anio plu tarda, Deutxland Este e Ueste ia es reunida a un sola pais, fininte 45 anios de divide.
Schabowski ia es un portavose per la rena este-deutx en 1989, cuando governas comuniste tra Europa este ia fronti un onda de protesta poplal.
La governa ia deside fasili la viaja de deutxes este a Europe ueste, en atenta para un deluvia de persones traversante a Magiar, cual ia abri mesma sua fronteras ueste.
A 9 novembre, el ia fa un confere jornaliste per contorni la cambias, ma el ia ata tro temprana -- la intende ia es no anunsia la cambias asta la temprana de la matina seguente.
Demandada cuando la cambias va reali, el ia responde: "Esta aveni, cuanto me sabe... direta... sin retarda."
En 1997, Schabowski ia es prisonida per tre anios per sua rol en la politica este-deutx de fusili los ci atenta traversa a la ueste, ma on ia pardona el pos un anio.
El ia scrive un autobiografia en 2009, denunsiante la rena este-deutx como destinada a fali.
@T La Museo de Irac reabri
@L aora_oji/2015/la_museo_de_irac_reabri
====== La Museo de Irac reabri ======
1 marto 2015
La museo nasional de Irac en Baghdad ia reabri ofisial, a 12 anios pos clui en la tempo seguente la invade gidada par la SUA. On ia regania e restora aora multe de la anticalias furada en la gera.
La abri ia es avansada en responde a un video par Stato Islamiste cual mostra la destrui de scultas en Mosul.
La ministro xef de Irac, Haider al-Abadi, ia promete puni la culpables. A la abri de la museo, el ia dise: "Acel teroristes barbar e criminal atenta destrui la cosas eritada de la sivilia umana e iraci. Nos va xasa los afin los paia per cada gota de sangue perdeda en Irac e per la destrui de la sivilia de Irac."
La Museo de Irac estima ce sirca 15 mil ojetos ia es saisida en la caos cual ia segue la despone de Saddam Hussein. On ia retrova cuasi un tri de los.
La colie estende tra 7000 anios de istoria, e presenta Mesopotamia (como on ia nomi Irac tra multe de la istoria umana) como la cuna de sivilia.
La realia en Irac moderna es min sivil. La areas en e sirca Baghdad continua vide violentia a cada dia. Ier, a la min 25 persones ia es matada en du atacas separada, a norde de la capital.
@T La NU condena la comentas sesiste de un monce miama
@L aora_oji/2015/la_nu_condena_la_comentas_sesiste_de_un_monce_miama
====== La NU condena la comentas sesiste de un monce miama ======
22 janero 2015
La xef de diretos umana de la Nasiones Unida ia urje ce Miama condena un monce budiste nasionaliste ci ia descrive un ambasador spesial de la NU como "un puta".
Zeid Ra'ad Al Hussein ia dise ce la comentas fada par Ashin Wirathu's ia es en efeto un "provoca de odia", e ia descrive la linguaje usada como "sesiste" e "insultante".
La comentas pertine a Yanghee Lee, un ambasador fema de Corea Sude, ci ia es en Miama en la semana pasada a tema de la mal situa de la minoria muslim de la pais.
La monce Wirathu ia pasa ja cuasi un desenio en prison pos provoca violentia antimuslim.
El es un gidor de la promove 969, cual dise ce Miama debe resta un pais budiste e cual recomenda restrinjes e boicotas contra muslimes.
De pos la fini en 2011 de la rena militar en Miama, ance conoseda como Burma, la nasionalisme budiste ia forti, xef gidada par monces.
En 2012, deses de persones ia mori e miles ia perde sua casas en la stato Rakhine cuando violentia ia esplode entre budistes e muslimes, xef de la minoria rohingia. Violentia antimuslim ia aveni a alga plu veses a pos.
La NU dise ce la rohingias es persegueda. En la semana pasada, la organiza ia aproba un deside de recomenda ce Miama dona sitadania a estas.
Lee, ci ia es en un viaja de 10 dias en esta pais de Asia sude-este, ia dise ce la rohingias fronti prejudis sistemosa. El ia critica un lege proposada, par un alia de monces budiste nasionaliste, cual ta retrinje sposis intercredal e convertis relijial.
A venerdi, Wirathy ia parla a un asembla publica do el ia critica la interfere par la NU, e ia ataca personal Lee. El ia dise: "Nos ia esplica la lege de proteje de raza, ma la puta ia critica la leges sin studia coreta los. No suposa ce tu es un person respetable par causa de tua posto. Per nos, tu es un puta."
En sua declara per la NU, Zeid ia dise ce, en loca de foca a individuas, gidores debe trata la contenida de la consernas indicada par la ambasador spesial.
Ier, la governa miama ia dise ce lo investiga la parla de la monce. Ma la monces es un promove political forte, e un vota jeneral va aveni en esta anio. On pote demanda cual de la gidores va risca parla contra la monces.
@T La "om de acua barati" gania un premio internasional
@L aora_oji/2015/la_om_de_acua_barati_gania_un_premio_internasional
====== La "om de acua barati" gania un premio internasional ======
22 marto 2015
Un onora con nometa "la Premio Nobel de Acua" ia es donada a un campanior barati ci ia trae acua a mil viletas.
Seguente la judores de la Premio Stockholm de Acua, sua metodos ia preveni ance inondas, ia restora la tera e la rios, e ia reatrae la viventes savaje. Los dise ce sua tecnica es simple e sin custa grande, e on debe aplica lo tra la mundo.
La premior, Rajendra Singh, usa un varia moderna de recolie pluve, un tecnica antica barati.
On construi colinetas basa de tera per resiste la flue de acua en la saison pluvosa e per permete ce la acua permea la tera per usa futur.
Singh ia es prima instruida como mediciste, ma cuando el ia comensa un posto en un vileta campanial en la secia de Rajastan, on ia informa el ce la cosa la plu nesesada es no aida medical ma acua bevable.
La ativia de cultivores ia consuma la acua de tera. E en cuando la acua ia desapare, la cultivas ia fali, la rios, forestas e animales savaje ia desapare ance, e la abitores ia parti a la vilas.
Singh ia dise: "Cuando nos ia comensa nosa labora, nos ia regarda sola la crise de acua bevable. Oji nosa intende es plu alta. Esta es la sentenio de esplota, contamina e viole. Para tota de esta, converti la gera de acua a un pas -- esta es la gol de mea vive."
La Instituida Internasional de Acua de Stockholm, cual ia presenta la premio, ia dise ce la lesones de Singh es esensal en cuando la cambia de clima altera la meteorolojia sirca la globo.
@T La pajeria de la ministro xef de Japan es atacada
@L aora_oji/2015/la_pajeria_de_la_ministro_xef_de_japan_es_atacada
====== La pajeria de la ministro xef de Japan es atacada ======
10 desembre 2015
La polisia japanes investiga pos cuando la loca de rede de la ministro xef Shinzo Abe ia deveni nonasedable oji.
Un mesaje postada a Twitter ia sujesta ce la grupo piratal internasional cual nomi se "Anonymous" (Anonim) ia ataca lo. La tuita ia es acompaniada par alga parolas grilida de campanias contra xasa de balenas.
Yoshihide Suga, la secretor xef de la consilio, ia dise ce la pajeria es nonfunsionante ma ia refusa confirma la declara par Anonim.
Un person alegante ce el es asosiada con Anonim ia tuita en la temprana de la matina a Abe, disente: "Xasa de balenas NO ES direto cultural! Tua pajeria es #TangoDown! [= eliminada]". On no ia pote controla la identia de la person.
Japan ia recomensa sua xasas en la Antartica en esta mense pos un pausa de un anio, an entre oposa internasional. Lo dise ce lo fa rexercas siensal, e ce la carne de balena cual on vende a consumores es un suproduida de la program.
La come de carne de balena no es comun en Japan, ma alga persones japanes regarda lo como un tradision de cultur.
Oposores dise ce la program es cruel e nonsustable.
@T La pape abri un sinodo entre disputas sur omosesalia
@L aora_oji/2015/la_pape_abri_un_sinodo_entre_disputas_sur_omosesalia
====== La pape abri un sinodo entre disputas sur omosesalia ======
4 otobre 2015
Pape Fransisco va selebra la misa a la Basilica de San Pedro en la Vatican, a la comensa de un sinodo de bispos cual va consentra sur temas de familia.
La tempo presedente ia es dominada par un disputa sur un prete vatican ci ia anunsia ier ce el es en un relata ge.
Krzysztof Charamsa, ci ia nase en Polsca, ia dise ce el vole defia la disposa "retardada" de la Eglesa a omosesalia. Plu tarda, el ia es desempleada de sua posto a la ofisia vatican cual garda la credes catolica.
Un portavose ia comenta ce la deside par Charamsa de es intervisada a la sera ante la sinodo es "grave e nonencargada", e ce lo va pone la pape su "un presa jornaliste nonmeritada".
En un intervisa con la jornal Corriere Della Sera, la prete, ci ave 43 anios, ia dise: "La Eglesa debe ja abri sua oios e comprende ce lo es nonumana ce a credores ge on ofre un asteni intera de un vive de ama."
Cisa 300 xefes eglesal -- e alga persones nonrelijiosa -- va discute tal problemes como la trata de catolicas ci es ge, e de duples ci coabita sin es sposida o ci vole fa la eucaristia pos divorsa.
Lo es nonprobable ce la Eglesa va cambia sua prinsipes, ma alga tradisionalistes teme ce la sinodo sperde confusa sur la ideales de la fida catolica.
La pape ia recomenda un disposa plu tolerante sur temas sesal. Pos deveni elejeda en 2013, Pape Fransisco ia reconfirma la disposa de la Eglesa Catolica ce atas omosesal es pecas, ma ia dise ce la omosesalia mesma no es. "Si un person es ge e xerca Dio e ave un bon vole, ci es me per judi?"
La tema de omosesalia ia es ance asentuada en la visita par la pape a la SUA en la semana pasada.
A la misioneria vatican en Washington, el ia encontra privata un om ge instruida par el en la pasada e sua ami de cor. El ia encontra ance un ofisior local ci ia tira resente a se la atende de jornalistes cuando el ia refusa furni lisensas sposal a duples ge.
@T La pape encontra Castro
@L aora_oji/2015/la_pape_encontra_castro
====== La pape encontra Castro ======
21 setembre 2015
Pape Fransisco ia encontra Fidel Castro, la presidente pasada de Cuba, pos fa un misa ante deses de miles de persones en Havana.
La du omes ia discute consernas de mundo e relijio en lo cual la Vatican ia descrive como un encontra "nonformal e amin".
Ante la encontra, la pape ia dise un sermon en cual el ia recomenda ce cubanes servi la un la otra en loca de ideolojia.
Esta es la visita prima par la pape a la isola comuniste governada, en un viaja cual va trae el a la SUA. Ambos sua predesores, pape Joan Paulo 2 e Benedito 16, ia visita la isola en sua papias.
Castro e la pape ia intercambia libros: la pape ia dona tre, incluinte un libro de sermones par un ensenior pasada de Castro, e ia reseta Fidel e Relijio, un colie de intervisas con un prete brasilera.
Plu temprana en la dia, miles de persones ia vade a la Plaza de Revolui per escuta la pape.
Securiores ia aresta a la min tre persones ci ia cria e atenta distribui folias avisante a borda de la plaza a la comensa de la misa.
@T La pape va santi du monces filastini
@L aora_oji/2015/la_pape_va_santi_du_monces_filastini
====== La pape va santi du monces filastini ======
17 maio 2015
Pape Fransisco va santi du monces fema de la sentenio 19 ci ia abita Filastin, alora un parte de la Impero Osmanian, e ci ia parla arabi como sua propre lingua.
Marie Alphonsine Ghattas e Mariam Bawardy va es entre cuatro santas nova declarada en la Plaza de San Pedro en Roma.
La presidente filastini, Mahmoud Abbas, e plu ca du mil peregrinores cristian de la area va es presente a la rituo. On vide la ata como un simbol de suporta vatican per comunias cristian diminuinte en Asia sude-ueste.
Ier, la pape ia encontra Abbas en la Vatican, descrivente el como "un anjel de pas". Sua visita segue a no plu ca alga dias pos la reconose formal par la Vatican de Filastin como un stato.
La documento declara ce la Seja Santa favore solve la disputa con Israel par ave du statos, e permete ce la Vatican supravide aspetas de la vive catolica en la areas controlada par Abbas.
Israel ia espresa sua delude con la acorda, cual usa la terma "stato filastini".
Marie Alphonsine Ghattas ia nase en un familia filastini en Ieruxalim, e ia cofundi la Instituida de la Sores de Rosario, cual maneja oji multe scolas e jardines de enfantes.
Mariam Bawardy ia nase en Galilea a jenitores elinica catolica de Suria e Lubnan. El ia es un mistica. On dise ce el ia fa miracles e ia esperia stigmas -- feris representante los de Jesus sur la crus.
Ambos monces ia vive en un ambiente difisil. Los ia vinse povria, maladia, e la domina mas en la sosia osmanian, a la mesma tempo como aida otra persones. On dise ce los ia vide alusinas de Maria la Virjin, e ia resta en comunica con el.
Par santi esta femes, la Eglesa selebra sua bon laboras, ma lo mostra ance suporta per cristianes en la loca do acel relijio ia comensa.
La cuantia de cristianes en Israel e la teritorios filastini ia diminui a min ca 2% de la popla. Esta es partal causada par la crese de la poplas iudi e muslim, ma ance par la gera e la posible de vive estra la pais.
@T La pape visita un mascita en Bangui
@L aora_oji/2015/la_pape_visita_un_mascita_en_bangui
====== La pape visita un mascita en Bangui ======
30 novembre 2015
Pape Fransisco visita un mascita en la capital de la Republica de Africa Sentral (RAS), en lo cual on regarda como la parte la plu difisil de sua turi de Africa.
El encontra muslimes ci ia xerca refuja en Bangui pos cuasi tre anios de violentia entre cristianes e muslimes. La plu de muslimes ia parti de la capital, ma 15 mil resta en un area nomida PK5 cual es ensircada par un militia cristian armada.
La pape va conclui sua visita a Africa con un misa final en Bangui.
A soldi, el ia recomenda ce la partitos bataliante en la RAS pone sua armas a lado. Selebrante la misa en Bangui, el ia dise ce los debe arma se "con justia, ama, pardona, e pas vera" en loca.
Plu temprana, la pape ia dise ce el espera ce la vota en la mense veninte en la RAS va abri "un capitol nova" per la pais.
La Republica de Africa Sentral ia deveni ruinada par violentia entre rebelores muslim e militias cristian.
Esta es la visita prima par la pape a un zona de gera e la punto final en sua turi major de tre nasiones african.
Catherine Samba-Panza, la presidente tempora de la RAS, ia demanda la pardona de la pape per la violentia relijial resente en sua pais.
Sentos de persones ia espeta entre securia forte ma en ambiente calma, ante la visita par la pape a la mascita Koudoukou en Bangui oji. Pos encontra xefes muslim local, Fransisco va parla a la fola, do on previde ce el va continua sua tema de reconsilia relijial.
A soldi, folas grande ia sta longo la via de la airoporto per bonveni la pape -- e on ia aclama e canta cuando el ia ariva a un campa de refujadas.
En un parla a la palasio presidental, el ia recomenda unia e la evita de "la tenta de la teme de otras, de la nonconoseda, de lo cual no es un parte de nosa etnico, nosa opinas political, o nosa confesa relijiosa".
Ante sua visita, la pape ia dise ce el desira forte trae un mesaje de pas e espera a la pais.
Gera ia dana la RAS tra desenios, ma sola a du anios ante aora la combate ia adota un forma relijial. La presidente François Bozizé ia es desponeda en un colpa de stato en marto 2013, e un grupo de rebelores xef muslim de la norde -- la "seleka" ("alia") -- ia marxa contra Bangui e ia saisi la controla de la pais per un tempo corta.
En Uganda, la pape ia selebra la misa ante sentos de miles de persones, e ia parla a un santeria dedicada a cristianes martirida per sua fida en la sentenio 19.
A venerdi, el ia parla a un asembla de jovenes en Nairobi, la capital de Cenia, forte recomendante ce los uni per oposa la efetos destruinte de tribalisme.
Sua rebela ia promove un senti entre la persones norde ce los es escluida a nonrepresentada par la governa sentral. Los ia ataca eglesas e comunias cristian, provocante la crea de la militias antiviolentia e gidante a un spiral malinte de violentia venjante cual continua.
Vilas e viletas es divideda, con sentos de miles de persones deslocada a campas separada en modo relijial.
@T La pape visita un site filipina ruinada par siclon
@L aora_oji/2015/la_pape_visita_un_site_filipina_ruinada_par_siclon
====== La pape visita un site filipina ruinada par siclon ======
17 janero 2015
Pape Fransisco is fa un misa su sielo en la site Tacloban en la Pilipinas, cual ia es ruinada par un siclon a pico plu ca un anio ante aora.
Deses de miles de persones ia fronti corajosa la pluve e ventas forte, portada par un tempesta tropical, per es presente a la misa.
La pape ia intende encontra survivores de la siclon a pos, ma la tempesta ia obliga el a avansa la fini de sua visita par cuatro oras e revade a Manila.
El ia dise ce el ia deside visita direta cuando el ia vide la desastre causada. El es en la Pilipinas, do 80 milion catolicas abita, como parte de un viaja de ses dias en Asia.
La siclon, nomida Haiyan, es ancora la plu forte rejistrada sur tera. Lo ia crea un onda con altia de 7 metres, e esta ia destrui cuasi tota ante se cuando lo ia ateni la costa a 8 novembre 2013.
Sirca 90% de Tacloban sur la isola Leyte ia es destruida. Plu ca 14,5 milion persones ia es afetada en ses areas e 44 provinses. Sirca milion resta sin casa.
Partinte, la pape ia demanda la pardona de la folas a la catedral xef, disente: "Me es triste sur esta, vera tristida, car me ia prepara alga cosa spesial per vos." Ma el ia clari ce sua pilotes ia informa ce la clima va mali. "Nos ave apena la tempo nesesada per ateni la avion."
La tempesta tropical Mekkhala, con ventas de asta 130 cilometres per ora, ia obliga ce on suspende servis de naveta a Leyte, trapinte miles de viajores.
Un fem ia es matada pos la misa, cuando un ponteta tempora ia colasa prosima a la stadio.
La pape ia fa la misa en espaniol, con tradui engles, parlante sur la efeto xocante de la siclon a la popla de Tacloban. En cuando la multe miles ia inclina sua testas per prea, la sola cosa nonsilente ia es la pluve salpicante sur la tera fangosa a sua pedes.
La aveni xef de la visita de Fransisco va es un otra misa su sielo en Manila, doman. On ia declara un festa nasional en la capital per la periodo.
La securia es multe sever, usante multe miles de soldatos e polisiores, seguente atentas nonsusedosa de mata du papes pasada en la Pilipinas.
@T La partito de Suu Kyi pare vinse en Miama
@L aora_oji/2015/la_partito_de_suu_kyi_pare_vinse_en_miama
====== La partito de Suu Kyi pare vinse en Miama ======
11 novembre 2015
La xef oposante de Miama, Aung San Suu Kyi, ia solisita consentas con la xefes militar en la semana veninte, per discute reconsilias nasional.
Sua partito, la NLD (Alia Nasional per Democratia), ave un vantaje clar en la resultas de un eleje a soldi. Pos la declara de sirca 40% de sejas, la NLD ia gania cuasi 90% de la votas, lasante la partito USDP, militar suportada, con sirca 5%.
An tal, un cuatri de la sejas es reservada per la militaria.
Suu Kyi ia envia leteras a presidente Thein Sein, la comandor de la fortes armada, e la presidente de parlamento.
La resulta per la USDP, cual ia vinse en la eleje la plu resente a sinco anios ante aora, es un umili per la partito ganiante. La acel eleje ia es vasta criticada.
Lo es aora probable ce la NLD va trova se en un situa comandante en la parlamento seguente, oposada par sola la partito militar. Ma la constitui proibi Suu Kyi de deveni presidente.
Suu Kyi ancora no ia declara sua vinse, e fa pasos lejera, demandante consentas con la tre figures la plu major en la governa corente per discute un pasa ordinada de potia.
En un responde a sua paje de Facebook, Ye Htut, la ministro de informa, ia repete ce la governa va respeta la resultas de la eleje, ma ia dise ce la consenta solisitada va aveni sola pos cuando la comision de eleje ia fini sua labora.
Plu temprana, Suu Kyi ia reteni sua propre seja e va reveni como parlamentor per Kawhmu en Yangon. El ia dise ce la proibi constitual "no va para me de fa tota la desides".
La comision de eleje publici lenta la resultas. La USDP, en potia de 2011, ia prende 10 de la 491 sejas disponable en ambos salones parlamental, contrastada con 163 par la NLD.
Un cuatri de la 664 sejas parlamental es reservada per la armada. Afin la NLD va ave un majoria vinsente e pote eleje la presidente, lo nesesa gania a la min du tris de la sejas restante (329).
Sirca 30 milion persones ia ave la direto de vota en Miama a soldi. On ia estima la partisipa como sirca 80%. Ma la direto ia es refusada a sentos de miles de persones, incluinte la minioria rohingia muslim, ci no es reconoseda como sitadanes.
An tal, la esta eleje es regardada como la plu democrata en Miama, ance conoseda como Burma, en 25 anios.
@T La polisia barati regrete deteni un artiste sur sua obra de bove
@L aora_oji/2015/la_polisia_barati_regrete_deteni_un_artiste_sur_sua_obra_de_bove
====== La polisia barati regrete deteni un artiste sur sua obra de bove ======
23 novembre 2015
En la stato barati Rajasthan, la polisia ia demanda es pardonada par artistes pos invade un esibi cual ia inclui un bove de polistiren pendente de un balon de elio.
Polisiores ia ariva a la Confere Alta de Arte de Jaipur a saturdi, pos cexas ce la bove de grandia natural flotante en la aira es ofendente per indus.
Los ia deteni du artistes per un pico de oras, en cuando ativistes indu ia desasembla la instalada.
Ativistes dise ce la invade es un indica de un crese de nontolera relijial en la pais.
Vasundhara Raje, la ministro xef de Rajasthan, ia tuita a soldi ce el es "tristida" par la aveni, e la comisionor polisial de Jaipur ia espresa ance sua regrete.
Raje ia dise ce la xef de la ofisia de polisia ia es "sutraeda e me mesma ia parla a la artiste".
La artiste es Siddhartha Kararwal. El ia nomi sua pupa flotante "Bove divin" e ia crea lo per lumina la mal situa de boves barati cual foraje e sofoca par causa de sacos plastica.
Ma alga persones ia cexa ce la bove aspeta como si on ia esecuta lo par pende lo, e ce la model insulta la animal cual indus adora como simbol de vive e susta.
La ativistes indu ci ia desasembla la obra ia garlandi e bondise la bove ante cuando la polisia ia saisi lo.
La polisia ia deteni corta du otra artistes, Chintan Upadhyay e Anish Ahluwalia, ci ia protesta contra esta, provocante coleria en redes sosial.
Pratap Sharma, la dirijor de la esibi, ia informa jornalistes ce on no intende reesibi la bove. "Nos no desira causa denova un ofende, donce nos no va instala denova la obra."
@T La polisia canadian investiga un tunel misteriosa
@L aora_oji/2015/la_polisia_canadian_investiga_un_tunel_misteriosa
====== La polisia canadian investiga un tunel misteriosa ======
25 febrero 2015
En Canada, la polisia en Toronto demanda ce la popla aida identifia la intende de un buncer trovada a tre metres su la tera, prosima a un loca cual la Juas Panamerican va usa en julio.
Mark Saunders, la xef suordinada de polisia, ia dise ce no parte de la buncer sujesta un intende criminal, ma ce lo ia es construida con un "sofistica notable".
La tunel ave un altia de cuasi 2 metres, un largia de cuasi un metre, e un longia de 10 metres. Lo es suportada par strutures de lenio.
On ia trova lo en janero, a min ca un cilometre de la Sentro de Tenis Canadian, en la compleso de la Universia de York, do competes profesal de tenis va aveni a esta estate.
La tunel ia es trovada cuando un ofisior de conserva ia descovre un cuantia grande de tera escavada prosima a un serca en la bosce pos la sentro.
A interna, la polisia ia trova un bote de gasolina, contenadores de comedas, un jenerador, e un careta de jardin. Los ia trova ance bulbos de lus secur contra umidia e un pompa per sutrae acua de su la tera.
Un crus a la fini de un cadena de perletas rosarial, con un papavera liada, ia es trovada pendente de un clo en la buncer.
La entra a la tunel ia es ascondeda par un covrente de lenio.
"Me no ave an un teoria inisial," Saunders ia dise. El ia ajunta ce la buncer ia es serta construida par algun ci "ave clar alga espertia sur fortia strutural".
On ia repleni ja la tunel con tera.
@T La polisia desrespeta la maior de New York a un funera
@L aora_oji/2015/la_polisia_desrespeta_la_maior_de_new_york_a_un_funera
====== La polisia desrespeta la maior de New York a un funera ======
5 janero 2015
Sentos de polisiores ia dirije sua dorsos a la maior de New York a la funera de la numero du de du polisiores matada par fusili en la mense pasada.
Wenjian Liu, un fio de migrores xines, ia es matada con sua asosior Rafael Ramos a 20 desembre par un fusilor ci ia senti un oposa contra la polisia.
Parlores ia fa un filo per dise tribuis a la rituo, cual ia aveni en un casa funeral en Brooklyn.
En la strada a estra, polisiores uniformida ia dorsi un scermo video cuando Maior Bill de Blasio ia parla.
En menses resente, multe membros comun de la Departe de Polisia de New York ia deveni ofendeda per espresas, fada par la maior, de compatia per protestores antipolisia.
La omiside duple ia es fada par un fusilor american african ci ia declara ce el venja omes negra matada par polisiores blanca, e lo ia aturdi la site.
Bill Bratton, la xef de polisia en New York, ia recomenda forte ce polisiores asteni de plu "atas de desrepeta", disente en un nota scriveda: "La funera de un eroe es un caso de lamenta, no de tormenta."
En la rituo, Maior de Blasio ia dise: "Nosa site intera es oji angusada."
Liu, ci ia ave 32 anios, ia perde sua vive en combate per "tota cual es brava e bon", la maior ia dise. El ia fa un tribui a "un om joven ci ia veni asi de Xina con 12 anios, xercante la sonia american".
La du polisiores ia es fusilida pos un onda de protestas sur la matas par polisiores blanca de omes negra nonenarmada, comensante en la vila Ferguson en Missouri en la estate pasada.
@T La polisia franses invade un aparte de teroristes
@L aora_oji/2015/la_polisia_franses_invade_un_aparte_de_teroristes
====== La polisia franses invade un aparte de teroristes ======
19 novembre 2015
Espertas franses labora per determina esce la gidor suspetada de la atacas en Paris ia es entre la persones matada en un invade polisial contra un aparte ier.
La polisia ia dise ce Abdelhamid Abaaoud es la blanco cuando ofisiores ia ataca la aparte en la suburbe Saint Denis. No el no Salah Abdeslam, un otra suspetada, ia es entre oto persones arestada, ma on ancora no ia identifia a la min du corpos.
Entretempo, parlamentores franses va vota sur estende la state presente de crise.
La grupo combatosa Daex* (Stato Islamiste), cual controla partes de Suria e Irac, ia dise ce lo ia esecuta la atacas a venerdi pasada, cuando fusilores e bombas umana ia mata 129 persones e ia feri sentos.
Un de la mores a la aparte es un fem sur ci on crede ce el ia detona un sintur esplodente en cuando la polisia ia entra. Un fonte prosima a la investiga ia indica ce lo es posible ce la fem ia es un cusin de Abaaoud.
François Molins, la avocato prosedente en Paris, ia dise ce lo ia pare ce "un ecipo nova de teroristes" ia prepara se per un plu ataca.
Un gidor de un de la unias spesial cual ia partisipa en la ataca a la aparte ia dise ce on ia usa avionetas e robotes con cameras per atenta vide la interna de la aparte, ma tro multe detrito ia es presente. La combatosas ia fusili un can de polisia.
Cuando la polisiores ia entra a la construida, los ia trova un corpo cual ia cade de la nivel tre a la nivel du. Los ia comenta: "La corpo ia es mutilada, probable par causa de granadas, e no ia es reconosable. Otra persones ia es en la poso de la scalera: du omes ascondeda su covreletos e otra cosas acaso trovada. Nos ia aresta los."
La identias de la oto arestadas es ancora no confirmada. Ma los no inclui Salah Abdeslam, la franses de 26 anios ci on ia reconose como un suspetada de la matas a venerdi, e sur ci on crede ce el es ancora libre.
La blanco de la invade polisial, Abaooud, es regardada como un figur multe importante en un selula de Daex cual departes de securia en la SUA ia investiga tra alga menses.
On ia crede ce Abaaoud ia fuji a Suria pos un opera par polisia en Beljia en janero, e el ia vanta en propaganda de Daex ce el es capas de move entre Suria e Europa sin deveni detetada.
Pos la atacas a venerdi contra un conserteria, caferias, e la stadion nasional, presidente François Hollande ia declara un state de crise per 12 dias.
Daex ia dise ce lo ia fa la atacas en responde a la campania airal par Frans contra sua locas en Suria, e la grupo ia promete plu matas. En la tempo interveninte, Frans ia aumenta sua atacas airal contra blancos de Daex en Suria.
Ambos Frans e Rusia -- cual ataca ance combatosas en Suria -- prepara proposas a la Consilio de Securia de la Nasiones Unida, per presenta un stratejia internasional per la defeta de Daex.
Hollande ia recomenda forte ce la consilio aproba rapida un deside sur combate la grupo.
* Esta blog prefere segue la disposa franses en nomi la teroristes "Daex", car la nom "Stato Islamiste" pare ofendente a la mil miliones de muslimes pasosa en la mundo. "Daex" es un corti de la nom ofisial arabi de la teroristes, ma lo difere ance par sola un letera de la parola daes, cual sinifia "crasor".
@T La potia de pedales en São Paulo
@L aora_oji/2015/la_potia_de_pedales_en_sao_paulo
====== La potia de pedales en São Paulo ======
27 junio 2015
Un banda per bisiclistes va abri doman en un de la stradas la plu famosa de America Latina. La banda roja ia es construida en Avenida Paulista, en la sentro de São Paulo.
La site brasilera ave plu ca 5,6 milion autos e es conoseda tra la mundo per sua conjestas de trafica.
La maior, Fernando Haddad, ia promete estende la longia de la rede de bandas bisiclal de 65 a 400 cilometres ante 2016.
Ma la projeta no es noncontroversa. Alga oposores dise ce lo ia es mal desiniada e ce la consultas no ia sufisi. Otras dise ce la cuantia de demanda no justi la custa e la disturba.
Tal bandas es ja un cosa de debate en São Paulo de pos 1975, cuando la prima ia es construida. Pos 15 anios, on ia sustitui per lo un tunel de autos.
Tre proposas de crea un rede de bandas per bisiclistes en la 30 anios pasada ia reali nunca. Ma lo pare ce la suporta aora par la autoriosas de la site ia dona un impulsa nova a la siclistes.
La secretor de transporta de la site ia dise: "Multe persones ia desira usa bisicles, ma no ia fa, car los ia teme. Nos vole garantia la securia de la siclistes. Esta es sua direto."
Un sonda fada en febrero ia sujesta ce 66% de abitores suporta la politica. Plu ca un dui de la intervisadas ia dise ce los usa un bisicle a un ves de semana, cisa plu. 13% ia dise ce los bisicli nunca.
A des-tre anios ante aora, un grupo de bisiclistes ia comensa un protesta, ocupante un parte de Avenida Paulista per esije ce on investi a modos de transporta otra ca autos.
@T La povria estrema diminui
@L aora_oji/2015/la_povria_estrema_diminui
====== La povria estrema diminui ======
5 otobre 2015
La Banco Mundal ia dise ce, a la ves prima, min ca 10% de persones en la mundo va abita en povria estrema a la fini de esta anio.
La banco ia clari ce lo regarda aora $1,90 per dia como la cuantia de revenu cual defini un povria estrema, aumentada de $1,25.
Lo previde ce la proportio de la popla de mundo en esta categoria va cade de 12,8% en 2012 a 9,6%.
An tal, lo ia comenta ce "la consentra cresente de povria global en Africa susaharan es un conserna grande".
An si on predise ce la proportio de persones povre en acel parte de Africa va diminui de 42,6% en 2012 a 35,2% a la fini de 2015, esta va representa ancora sirca un dui de la persones povre en la mundo.
Jim Yong Kim, la presidente de la Banco Mundal, ia dise: "Nos es la jenera prima en istoria umana cual pote fini la povria estrema."
La banco ia esplica ce la tende basinte es causada par tasos forte de crese en paises developante e par investis en instrui, sania, e redes de securia sosial.
Ma Kim ia averti ce continua la progresa va es "estracomun difisil, spesial en un periodo de crese global min rapida, mercatos finansial volatil, geras, multe nonemplea joven, e la efeto cresente de cambia climal".
E la banco ia averti ce povria "deveni plu profonda e plu radisida en paises cual es o saturada con gera o tro dependente de esportas de benes".
@T La presidente de FIFA es investigada e va resinia
@L aora_oji/2015/la_presidente_de_fifa_es_investigada_e_va_resinia
====== La presidente de FIFA es investigada e va resinia ======
3 junio 2015
Ofisiores SUA investiga Sepp Blatter, la presidente de FIFA, como un parte de sua esamina de froda a la organiza governante de futbal.
Esta ia es revelada pos cuando Blatter ia dise ier ce el va resinia.
Anunsiante sua parti, la suiz de 79 anios ia clama un congresa estracomun de FIFA per eleje "tan pronto como posible" un presidente nova.
Blatter es ja la presidente de FIFA de 1998. El ia es reelejeda en la semana pasada, an pos la aresta de sete ofisiores major de la organiza a mera du dias ante la vota.
Ma el ia dise aora: "Mea autoria no pare es suportada par tota persones."
On previde ce la congresa estracomun va aveni entre esta desembre e marto 2016.
FIFA ia es colpada par la arestas, cual es un parte de un prosede legal par la SUA cual ia acusa 14 persones. On alega ativias criminal incluinte blancis de mone, comersias frodante, e estorses postal.
Ier, on ia reporta ance alegas ce Jérôme Valcke, la secretor jeneral de FIFA, ia organiza un paia de $10 milion de sobornas en relata con la ofre par Sudafrica de ospita la Copa Mundal de 2010.
Separada, autoriosas suiz fa ance un investiga criminal sur la asinia de la Copas Mundal de 2018 e 2022.
Blatter dise ce el ia presenta se per reeleje car el ia senti ce esta es "la via la plu bon per futbal", ma el ia deside resinia per la benefica de FIFA. El nega forte la alegas ce el ia fa mal.
@T La presidente de Nijeria parla sur la manca de mone governal
@L aora_oji/2015/la_presidente_de_nijeria_parla_sur_la_manca_de_mone_governal
====== La presidente de Nijeria parla sur la manca de mone governal ======
24 junio 2015
Muhammadu Buhari, la presidente de Nijeria, ia dise ce la tesoreria de sua pais es "cuasi vacua".
El ia promete regania miles de miliones de dolares "furada" su governas presedente.
Buhari ia fa discutes con governores de la provinses sur la manca de mone per paia salarios a laborores governal.
El e sua Congresa de Tota Progresistes ia gania la eleje en marto, fininte 16 anios de governa par la Partitio Democrata de la Popla.
On ia inaugura Buhari a min ca cuatro semanas ante aora. El ia emprende la presidentia de Goodluck Jonathan, ci ia ocupa la posto de pos 2010.
A la governores provinsal, Buhari ia dise: "La dias de esenta e nonprosedablia es pasada. La tre menses veninte va es cisa difisil, ma nos pote regania biliones de dolares, e nos va fa la plu bon cual nos pote."
Plu temprana, en un presenta a jornalistes, el ia dise ce lo es "vergoniosa" ce laborores governal ia reseta no paia tra alga menses.
"En esta situa mal manejada," el ia dise, "nos nesesa vera vosa aida per proteje nos de persones ante cuando los va marxa contra nos."
Yemi Osinbajo, la vispresidente, estima ce Nijeria ave un deta de sirca 60 mil milion dolares. Ma Ngozi Okonjo-Iweala, un ministro pasada de finansia ia dise ce la cuantia es multe plu basa, e ce la plu de lo ia es incoreda par la provinses, e no par la governa federal.
La presidente ia gania la vota pos promete fronti la froda e rici la pais. Nijeria produi plu petrolio ca cualce otra pais african, ma la plu de sua sitadanes es povre.
@T La presidente de Turcia aida un om a punto de suiside
@L aora_oji/2015/la_presidente_de_turcia_aida_un_om_a_punto_de_suiside
====== La presidente de Turcia aida un om a punto de suiside ======
26 desembre 2015
La presidente turces, Recep Tayyip Erdoğan, ia susede convinse un om a no salta de un ponte en Istanbul.
La om ia trepa ultra un rel sur la Ponte de Bosporo cual lia Europa e Asia. El ia menasa mata se.
La convoia de autos de la presidente ia es traversante la ponte a acel tempo.
Imajes televisada ia mostra ce la empleadas de Erdoğan ia demanda ce la om sanglotante parla a la presidente. Pos alga momentos, on ia gida el a securia.
La om ia es depresada par causa de problemes de familia, e polisiores ia spende ja du oras en atenta preveni el de salta.
Erdoğan no ia sorti de sua auto, e ia parla a la om par telefon.
Un ofisior de la ofisia de la presidente ia informa jornalistes ce la presidente ia promete aida la om.
@T La presidente irani vole boni la imaje mundal de islam
@L aora_oji/2015/la_presidente_irani_vole_boni_la_imaje_mundal_de_islam
====== La presidente irani vole boni la imaje mundal de islam ======
28 desembre 2015
Hassan Rouhani, la presidente de Iran, ia dise ce muslimes debe labora per boni la opina mundal sur islam, sur cual el crede ce violentia ia manxa lo.
"Nos debe sutrae la imaje negativa de islam en la siberspasio e spasio real de oji," el ia dise a un confere jornaliste en Tehran.
Rouhani, un person de relijio moderada, ia dise ce la prinsipes de Islam oposa la violentia.
En un refere velida a Arabia Saudi e sua aliadas a la Mar de Persia, el ia critica ance la nasiones cual ia compra armas de la SUA e ia usa los contra otra muslimes.
Iran es forte oposada a la campania de bombi airal, gidada par Arabia Saudi, cual ataca la rebelores huti xia ci ia saisi partes grande de Iaman en la plu temprana de 2015.
"Cuanto bombas e misiles vos ia compra de la SUA en esta anio?" Rouhani ia demanda. "Si vos ia ta distribui la mone per acel bombas e misiles entre muslimes povre, nun ta vade fame a leto."
Parlante a un confere sur unia muslim ier, la presidente irani ia descrive la vergonia de oserva enfantes muslim ci fa viajas longa e perilosa per xerca refuja en paises nonmuslim.
"Coreti la imaje de islam en la opina publica de la mundo es oji nos debe la plu grande," el ia dise en sua parla, cual ia es direta difusada par la televisa nasional.
El ia vosi sua ansia ce la reputa de islam deveni danada par violentia en sua locas sentral, e ia recomenda forte ce tota nasiones muslim en acel area sesa "la violentia, teror, e masacras".
Ance, el ia condena paises muslim per "es silente an entre tota la mata e versa de sangue" en Suria, Irac, e Iaman -- geras en cual Iran fa un rol.
Iran suporta la governa de Bashar al-Assad, la presidente de Suria, furninte soldatos e espertia militar a la batalia contra la rebelores e jihadistes, incluinte la grupo Daex. Iran ave ance lias prosima a Irac, e condena militaristes de Daex ci combate la governas suri e iraci.
@T La re de Arabia Saudi mori
@L aora_oji/2015/la_re_de_arabia_saudi_mori
====== La re de Arabia Saudi mori ======
23 janero 2015
La re saudi Abdullah bin Abdulaziz ia mori, a alga semanas pos entra a ospital. El ia ave sirca 90 anios, e ia sufri de un infeta de pulmon.
Un declara temprana a esta matina ia anunsia ce sua duifrate Salman, ci ave 79 anios, ia deveni la re nova.
Abdullah ia deveni la re en 2005, ma sua sania ia sufri multe en anios resente. Sua duifrate ia emprende ja resente la taxes de monarca.
Ante la anunsia, la televisa saudi ia presenta strofes de la Curan, un tecnica comun ante indica la mori de un person reial major.
Re Salman ia recomenda ce la Consilio de Fida de la familia reial reconose un otra duifrate, Muqrin, como eritor legal.
Tota tre es fios de la fundor de Arabia Saudi moderna, Re Abdulaziz, comun conoseda como Ibn Saud, ci ia mori en 1953.
La Re Abdullah 2 de Jordan ia corti un visita a Davos en Suiz per viaja a Arabia Saudi, e la corte reial jordani ia declara 40 dias de lamenta.
Abdullah bin Abdulaziz ia es la numero 13 de la fios 37 de sua padre. On crede ce el ia nase en agosto 1924 en Riyadh, an si on no es serta sur sua data esata de nase.
En 1962, el ia emprende la rol de comandor de la Garda Nasional Saudi, do el ia gania la respeta e fida de la tribus de deserto.
Cuando el ia deveni la re, el ia segue un otra duifrate, Fahd. Ma ja alora el ia gida par fato tra 10 anios, car sua presedor ia es debilida par un ataca serebral.
On ia vide Abdullah como un reformor, an si lenta e gradal. El ia permete criticas minor de sua governa par jornalistes, e ia sujesta ce on debe permete ce plu femes labora.
La re nova, Salman, ia pasa 48 anios como governor de la provinse Riyadh ante deveni eritor legal e ministro de defende.
@T La reserva de adirijes vea de rede es vacua en America Norde
@L aora_oji/2015/la_reserva_de_adirijes_vea_de_rede_es_vacua_en_america_norde
====== La reserva de adirijes vea de rede es vacua en America Norde ======
26 setembre 2015
America Norde ia consuma sua reserva intera de adirijes vea de interede.
A esta semana, la departe cual supravide adirijes en la area ia distribui la bloco final de estas. Lo ia recomenda ce companias en America Norde aselera aora sua move a la sistem nova de adirije.
Africa es aora la sola parte de mundo cual dispone ancora cualce blocos de adirijes vea.
La sistem vea, aora nomida IPv4, ia es creada cuando on ia inisia la interede en la desenio de 1970. Lo es capas de distingui asta 4,3 mil milion adirijes diferente, ma la crese enorme de la mundo enlinia ia consuma rapida estas.
La sistem nova, IPv6, es capas de trata un cuantia vasta de adirijes e va es probable nunca consumada. IPv6 es ja disponable de 1999, ma sola aora cuantias grande de companias comensa usa lo.
La move a IPv6 pote es difisil per alga furnores de servis interedal car los debe suporta ambos scemas a la mesma tempo. La nesesa de tradui adirijes entre la du sistemes pote rompe alga servis e introdui retardas iritante.
La organiza AFRINIC, cual distribui adirijes de rede en Africa, ave ancora sirca 2,3 milion adirijes IPv4. La statistica sujesta ce estas va deveni consumada en la temprana de 2019. Adirijes IPv4 ia es ja consumada en otra areas a alga anios ante aora.
La redui de la reserva IPv4 ia inisia un mercato de compra e vende blocos de adirijes no plu usada par companias grande o cluida. La informa ce la reserva es vacua va provoca cisa un aumenta major de custas en acel mercato.
@T La rituo funeral de la padre nasional de Singapor
@L aora_oji/2015/la_rituo_funeral_de_la_padre_nasional_de_singapor
====== La rituo funeral de la padre nasional de Singapor ======
29 marto 2015
Singapor ia dise adio a Lee Kuan Yew, sua padre nasional, ci ia mori a lundi a la eda de 91.
Sua caxon funeral ia es portada en prosegue tra la stradas pluvosa de la capital a un rituo do xefes de stato global ia es presente. Sua corpo ia es senida en un rituo privata de familia.
En la semana pasada, plu ca milion persones ia visita locas de tribui tra la pais per mostra sua respeta a Lee. Plu ca 415 mil persones, o 12% de la sitadanes de Singapor, ia visita la Casa de Parlamento per vide sua caxon.
La pais ia fa un minuto de silentia pos la rituo funeral, e multe de la sentros comersial de la pais ia clui.
Lee ia es la ministro xef de Singapor tra 31 anios, renunsiante la posto en 1990. El la supravide la autonomi de la pais de Britan e sua separa de Malaisia, e on ia respeta jeneral el como la arcitetor de la ricia de Singapor. La produi nasional bruta per person ia des-sincupli entre 1960 e 1980.
Ma Lee ia introdui ance medios sever. Sua governa ia restrinje forte la librias de parla e de jornalisme, e oposores political ia es prosededa en corte.
Parlante en 2010, el ia comenta: "Me no dise ce tota mea atas ia es coreta, ma tota mea atas ia es con intende onorable."
@T La situa finansial en Elas deveni urjente
@L aora_oji/2015/la_situa_finansial_en_elas_deveni_urjente
====== La situa finansial en Elas deveni urjente ======
12 maio 2015
La ministro de finansia de Elas dise ce la situa finansisal en sua pais es "estrema urjente" e ce la crise pote culmina pos sola du semanas.
Yanis Varoufakis ia fa la averti pos cuando ministros de finansia de la eurozona ia consenta en Bruxelles per discute la parte final (7,2 mil mlion euros) de la projeta de 240 mil milion euros de la Uni European e la Reserva Monal Internasional (RMI) per salva Elas.
Ministros ia dise ce Elas ia fa "progresa" ma ce plu labora es nesesada.
La governa elinica no susede fasil reali sua repaias obligada.
Plu temprana, Elas ia comensa envia 750 mil euros de interesa de deta a la RMI, a un dia ante la limita de tempo per acel paia.
Elas debe ateni un acorda de reformi con sua creditores internasional ante la fini de junio. Sua reservas de mone es tan basa ce lo ia nesesa demanda aida de organizas publica.
La crise ia introdui la posible ce Elas pote fali paia sua detas e parti de la euro.
La eurozona insiste sur un sistem sever de reformis, incluinte reduis de pensiones, par intercambia per la salva. Ma la governa elinica, gidada par la partito sinistriste Syriza, oposa medios sever e resiste la proposas.
On ia teme ce Elas va fali repaia oji sua deta a la RMI. Ma un ofisior de la ministreria finansial de la pais ia dise ce la comanda per repaia ia es realida a lundi.
Elas ia dona ja cuasi mil milion euros a la RMI de pos la comensa de esta mense.
Lo no es clar como la governa ia oteni la mone, ma la maior de Thessaloniki, la site du de la pais, ia revela en la semana pasada ce el ia dona biletas e monetas en responde a un apela per mone.
Syriza ia dise ce lo no va rompe sua prometes elejal de oposa severia, e esta ia presenta la posible de un referendo sur cualce acorda negosiada en Bruxelles.
La ministro finansial de Deutxland, Wolfgang Schäuble, ia dona sua suporta a la idea. El ia comenta: "Cisa esta ta es la modo coreta de permete ce la popla elinica deside esce lo es preparada per aseta la nesesada."
@T La SUA restrinje foras per petrolio e gas en mares artica
@L aora_oji/2015/la_sua_restrinje_foras_per_petrolio_e_gas_en_mares_artica
====== La SUA restrinje foras per petrolio e gas en mares artica ======
17 otobre 2015
La governa SUA ia anunsia restrinjes nova de esplora per petrolio e gas en la acuas artica prosima a la costa norde de Alasca.
Esta segue pos cuando Royal Dutch Shell, un compania jigante de petrolio, ia sesa sua ativias en la Artica en la mense pasada, reportante probas "deludente".
La departe de internas SUA ia dise ce lo cansela du vendes de contratas de lua costal en la Artica, e no va estende contratas esistente.
La anunsia ia es bonvenida par ambientistes. Miyoko Sakashita de la Sentro per Diversia Biolojial ia dise ce la deside es "eselente per la Artica e sua ursos blanca. Nos nesesa teni tota la petrolio artica en la tera."
Luas par la governa va desvalidi en la Mar de Beaufort en 2017 e en la Mar Txucot en 2020.
Shell ia spende sirca $7 mil milion sur developa costal artica en acel mares. Ma lo ia anunsia resente ce lo no ia trova un cuantia sufisinte de petrolio e gas en la area per merita plu esploras. La compania ia dise ce lo va abandona sua esploras a Alasca "per la futur previdable".
Par companias de petrolio, la Artica es un loca riscosa e custosa per esplora, e la custa basa presente de petrolio fa ce lo pare an min atraente.
La Jeometre Jeolojial de la SUA estima ce la Artica conteni sirca 30% de la gas natural nondescovreda de la mundo, e ance 13% de sua petrolio.
Ma grupos ambientiste dise ce foras costal contamina e dana un tera savaje natural. Los razona ance ce on debe lasa combustables de fosil, como petrolio e gas, en la tera -- car si no, la mundo va esperia un cambia noncontrolable de clima.
@T La televisa turces impedi la partito oposante
@L aora_oji/2015/la_televisa_turces_impedi_la_partito_oposante
====== La televisa turces impedi la partito oposante ======
12 april 2015
La televisa nasional de Turcia ia proibi la mostra de la presenta campaniante de la partito oposante xef, car lo ataca direta la governa.
La Partito Republiciste de Popla ia acusa la difusor TRT de "malusa sua ofisia publica" e ia promete ce lo va pone la caso ante un corte.
Lo ia protesta ja a ante contra la "prejudi" de TRT en favore a presidente Recep Tayyip Erdoğan e sua Partito de Justia e Developa.
La popla va vota a 7 junio.
En un declara turces en la pajeria de la partito oposante, la visxef Bülent Tezcan ia dise: "Par fa la deside de no difusa la presenta, TRT ia crea un scandal nova."
El ia ajunta: "La intende xef de televisa nasional finansiada en tota paises democrata es la justia de difusa. La dirijores de TRT fa la crimin de malusa sua ofisia publica."
Tezcan ia dona ance un recorda a la difusor ce lo es "poseseda par la popla".
TRT ia refusa comenta asta aora.
La anunsia de la partito oposante ia conteni la slogan "nos aplaudi como un nasion". Lo ia critica la "opresa" de justia, libria e secularisme en la pais.
Lo ia recomenda forte ce votores visita la asembla coletiva prima de la partito a saturdi.
Esta controversa segue un judi par un corte en Ankara a jovedi, pos cual Kemal Kılıçdaroğlu, la xef oposante, debe paia un compensa per insulta presidente Erdoğan en un parla en 2013.
@T La temperatur en Barat mata 500 persones
@L aora_oji/2015/la_temperatur_en_barat_mata_500_persones
====== La temperatur en Barat mata 500 persones ======
26 maio 2015
A la min 500 persones ia mori en un onda de caldia cual traversa Barat. Allahabad en Uttar Pradesh ia rejistra 48°C, e la temperatur ia esede 44°C en la capital, Delhi.
Autoriosas ia recomenda forte ce on resta en casa e bevi multe licuidas.
La plu de la moris ia aveni en Telangana e Andhra Pradesh, statos sude, do plu ca 140 persones ia mori de pos saturdi.
Un state simil calda domina acel du statos de pos la media de april, ma la plu de la moris ia aveni en la semana pasada.
246 persones ia es matada par la temperatur en Andhra Pradesh en esta semana. 62 ia mori ier.
La majoria de la vitimes ia es direta esposada a la sol. Los ave comun 50 anios o plu, e parteni a la clases laborante.
On recomenda la usa de parasoles e xapetas, la bevi de cuantias grande de licuidas como acua o lete fermentada, e la porta de vestes de coton.
186 ia mori en Telangana, incluinte 58 ci ia mori de pos saturdi.
Rajasthan, un stato desertin en la norde-ueste, ia reporta ance alga moris par la caldia, incluinte un fem ci ia colasa a lado de un strada en la site Bundi.
La departe meteorolojial ia informa ce la caldia es causada par un manca de pluve, e ce la situa va continua probable per alga dias.
19 persones, cisa plu, ia mori en Bengal Ueste, un la stato en la este de la pais.
En Kolkata, la capital de la stato, on ia deside ce taxis sin frescadores no va opera per la sinco oras la plu calda de la dia, car la temperatur ia mata ja du taxistes.
@T La traduador de Google interprete
@L aora_oji/2015/la_traduador_de_google_interprete
====== La traduador de Google interprete ======
15 janero 2015
Google dise ce sua program Tradui es aora capas de servi como interpretor, pos la ajunta de un moda de tradui voses en tempo real.
La varia nova de la program reconose automata la lingua parlada e tradui lo.
La refresci, ier lansada, permete ance ce on usa la camera de sua telefoneta per tradui pronto mesajes scriveda. Esta no nesesa un lia de rede.
Ma la sistem resta noncapas de comprende la sutiles de comunica, la referes cultural o la umor.
An ante la refresci, la program ia pote tradui frases parlada o tapeda e pronunsia la resultas. Ma lo ia trata un formula pos un otra, no en tempo real, e la pronunsia e ritmo ia es noncoreta a veses.
La cualia nova es disponable per tradui entre engles e cuatro de la sinco linguas de fonte de elefen: franses, espaniol, italian, e portuges. Lo opera ance entre engles e deutx o rusce.
Otra programes simil es ja en la mercato. Skype ia lansa un funsion simil en desembre.
Google dise ce plu ca 500 milion persones usa sua traduador en cada mense, fante plu ca mil milion traduis per dia.
@T La trata climal de Paris
@L aora_oji/2015/la_trata_climal_de_paris
====== La trata climal de Paris ======
13 desembre 2015
En Paris, on ia ateni un acorda sur cambia de clima.
La presidente SUA, Barack Obama, ia descrive lo como "la posible la plu bon cual nos ave per salva la sola planeta cual nos ave".
Xina, la pais la plu contaminante de mundo, ia loda ance la acorda. Ma alga campaniores ia dise ce lo no va sufisi per proteje la planeta.
La trata de Paris intende restrinje la caldi global a min ca 2°C supra la temperatur preindustrial.
Cuasi 200 paises ia partisipa en negosias tensada en la capital franses tra du semanas, preparante la acorda prima cual obliga tota nasiones a redui sua emetes.
La acorda, cual es partal legal obligante e partal de vole libre, va deveni ativa en 2020.
Descrivente la acorda como "aspirante", Obama ia dise: "En junta, nos ia mostra lo cual es posible cuando la mundo sta unida." Ma el ia confesa ce la trata no es "perfeta".
Xie Zhenhua, la negosior xef xines, ia acorda ce la trata no es ideal. Ma el ia ajunta: "Esta no preveni ce nos marxa a ante par pasos istorin."
Plu temprana, Xina ia comenta ce paises rica e developada debe ofre plu suporta finansial a paises developante.
Giza Gaspar Martins, la presidente de la grupo cual representa alga de la paises la plu povre de mundo, ia dise: "Lo es la resulta ia plu bon esperable, no sola per la Paises La Min Developada, ma per tota sitadanes de la mundo."
Ma Nick Dearden, dirijor de Justia Global Aora, un grupo campaniante, ia dise: "Lo es scandalosa ce on dora la acorda proposada como un susede, cuando lo sumina la diretos de la comunias la plu debil de mundo e conteni cuasi no parte obligante per serti un clima secur e abitable per jeneras futur."
Alga partes de la acorda va es legal obligante, per esemplo la presenta de un gol de emetes reduida e la revisa periodal de esta. Ma la goles declarada par nasiones no va es obligante.
La medios en la trata inclui:
--- Culmina tan pronto como posible la emetes de gases invernerial.
--- Reali un ecuilibra entre fontes e consumas de tal gases en la dui du de esta sentenio.
--- Restrinje la alti de temperatur global a "un bon pico su" 2°C, e labora per limita lo a 1,5°C.
--- Revisa la progresa a cada anio sinco.
--- Dona $100 mil milion de finansia climal per anio a paises developante en o ante 2020, prometente plu finansia futur.
Oservores dise ce la atenta de obliga goles de emete a paises ia es un de la razonas xef perce la negosias a København ia fali en 2009. Alora, nasiones incluinte Xina, Barat, e Sudafrica no ia vole suscrive un restrinje sur cual los ia opina ce lo va impedi sua crese e developa economial.
La negosias resente ia susede evita acel rua sin sorti par developa un sistem de "contribuis intendeda e nasional determinada". Estas, en cual nasiones resoma sua projetas de redui sua emetes pos 2020, formi la funda de la trata de Paris.
@T La Vatican prosede sur publici de secretas
@L aora_oji/2015/la_vatican_prosede_sur_publici_de_secretas
====== La Vatican prosede sur publici de secretas ======
24 novembre 2015
Sinco persones va es prosededa en la Vatican, acusada de esposa e publici documentos secreta cual revela malmanejas en la Seja Santa.
Du jornalistes ci ia sita la documentos en du libros va fronti la judores, como ance du membros de un comision papal e un aidor.
Si on deside ce los es culpable, lo es posible ce los va es prisonida per asta oto anios. Grupos jornaliste ia condena la prosede.
La jornalistes, Emiliano Fittipaldi e Gianluigi Nuzzi, ia presenta alegas de la malusa de reservas carital en sua libros Mercatores en la temple e Avaria. Sua alegas ia inclui la renovi lusosa de apartes per cardinales e otras.
La tre ci on acusa de esposa la documentos es un prete espaniol, un esperta italian de relatas publica, e la secretor de la prete. La du primas ia partisipa en un comision conselante la Pape sur reforma economial. Pape Fransisco ia crea la comision per proposa maneras de boni la flue de mone a persones povre.
Grupos jornaliste ia recomenda forte ce la Vatican abandona la acusas.
Un portavose per la Comite per Proteje Jornalistes ia comenta: "Jornalistes debe es permeteda de fa sua rol como gardor e investiga mal atas alegada, sin teme la resultas."
La jornalistes envolveda ia descrive la prosede como "Kafka-in", disente ce no los no sua avocatos ia vide detalias de la acusas.
Fittipaldi ia dise: "Esta es un prosede contra la libria de jornalisme. En no otra parte de la mundo, a la min en la parte de la mundo cual regarda se como democrata, on ave un crimin de publici novas."
La rapidia con cual la Vatican ia move per acusa la sinco ave un contrasta forte con la lentia con cual lo ia prosede multe pretes acusada de maltrata sesal de enfantes.
Si lo dona punis longa a esta jornalistes, la Vatican va ave no compleso per prisoni los e va debe demanda ce Italia (do on proteje la libria de jornalisme) estradi los e prisoni los seguente un acusa cual no es ala un crimin.
@T La Vatican suporta la usa de fortia contra Stato Islamiste
@L aora_oji/2015/la_vatican_suporta_la_usa_de_fortia_contra_stato_islamiste
====== La Vatican suporta la usa de fortia contra Stato Islamiste ======
15 marto 2015
La Vatican ia dise ce, si on no trova un solve political, la usa de fortia va es cisa nesesada per para atacas par Stato Islamiste contra cristianes e otra minorias de Asia sude-este.
La arcibispo Silvano Tomasi, la diplomata xef de la Vatican a la Nasiones Unida en Genève, ia dise ce jihadistes fa un "spesie de jenoside" e ce on debe para los.
Tradisional, la Vatican oposa intervenis militar en la area. An tal, Pape Fransisco ia denunsia la destesti de 21 cristianes copta par Stato Islamiste en Libia en febrero.
La combatosas ia ataca minorias relijial en la partes de Suria e Irac cual los controla. Miles plu persones ia es obligada a fuji de sua casas.
La arcibispo ia dise: "Nos debe para esta spesie de jenoside. Si no, nos va cria en futur sur la razona per cual nos no ia ata, perce nos ia permete la aveni de un trajedia tan xocante."
"Cristianes, eziditis, xias, sunis, alauis -- tota es umanas de ci sua diretos merita es protejeda," el ia ajunta.
Seguente el, un alia ta debe inclui statos muslim de Asia sude-este e es gidada par la Nasiones Unida.
@T La xefes de un megaeglesa en Singapor es condenada de froda
@L aora_oji/2015/la_xefes_de_un_megaeglesa_en_singapor_es_condenada_de_froda
====== La xefes de un megaeglesa en Singapor es condenada de froda ======
21 otobre 2015
On ia judi ce ses xefes de un eglesa jigante en Singapor es culpable de froda, en un caso con valua de 50 milion dolares singapor (35 milion dolares SUA).
La judor ia deside ce la pastor de la eglesa Recolie de Site, Kong Hee, e otras ia usa la recursos de la eglesa per finansia la carera musical de sua sposa, Sun Ho, o ia falsi contas per asconde esta fato.
La acusadas ia razona ce la carera pop de Ho es un modo de estende la mano a noncristianes. On ia libri los su cautia asta sua condena, ma los fronti la posible de spende sua vives en prison.
On no acusa ce Sun Ho mesma ia fa mal.
Recolie de Site -- regardada como un "megaeglesa" -- es entre la eglesas evanjelial la plu rica de Singapor, con sirca 30 mil membros en Singapor e 15 servis a cada fini de semana. Lo dise ce lo ave 48 ramos en paises incluinte Malaisia, Indonesia, Barata, Taiuan, Brune, e Australia.
En un anunsia postada a la loca de rede de la eglesa, Ho ia dise ce los es "deludeda par la resulta" e ce la ses xefes reseta plu conselas legal.
El ia grasia membros de la eglesa per sua "fida nonvasilante en ama Dio e en ama la un la otra" e ia recomenda "un unia cual es nonrompable".
Cuando la ses xefes ia apare en corte, la eglesa ia envia tuitas solisitante ce suportores prea.
La avocatos prosedente ia dise ce la malusa de reservas ia aveni entre 2007 e 2008.
On ia acusa la ses xefes e alga empleores finansial de embuti 24 milion dolares singapor de un reserva de construi a investis falsa, cual los ia usa alora en un projeta per usa la musica de Ho per evanjelisme. La acusores ia dise ce on ia spende ance 26 milion dolares singapor en asconde acel investis.
Ma la judor, See Kee Oon, ia dise ce la fatos fondal de la caso es "jeneral nondisputada" e ce "la pesa de la atesta mostra ce los ia condui nononesta".
Kong e un membro pasada de la comite de la eglesa, John Lam, ia es judida como culpable su tre acusas de rompe criminal de fida.
La pastor senior (Tan Ye Pang), un comitor (Chew Eng Han), e du manajores pasada de finansia (Serina Wee e Sharon Tan) ia es condenada su plu ca un acusa de rompe criminal de fida e de falsi contas.
Ho, ci ia es en corte per suporta sua sposo, ia inisia sua carera musical en 2002. El ia publici alga albumes en putong, e es conoseda en Xina e Taiuan.
El ia labora ance con figures de la industria musical SUA, como la composor de cantas Diane Warren e la rapor Wyclef Jean, ci ia produi sua album engles.
@T Lagos perilosa formi sur la glasia Khumbu
@L aora_oji/2015/lagos_perilosa_formi_sur_la_glasia_khumbu
====== Lagos perilosa formi sur la glasia Khumbu ======
27 novembre 2015
Lagos cual ia formi prosima a Monte Sagarmata (Qomolangma, Everest) risca menasa abitadas umana plu basa si los supraflue.
Stanges a la surfas de la glasia Khumbu en la Montes Himalaia ia crese e deveni unida per formi areas plu grande de acua. Montaniores nesesa traversa esta glasia, incluinte la cascade jelada e tradosa de Khumbu, per asende esta monte estrema.
La fonde aselerada de glasias en la area causa ansia, con fondo de la alti de temperatures global.
Siensistes dise ce la averti presente es la prima de sua spesie per Khumbu, an si otra glasias en la Himalaias ia esperia ance un crese en la cuantia de lagos formida.
Tal lagos glasial pote supraflue e causa inondas, danante construidas e matante persones a su.
Esta ecipo de siensistes es la prima ci ia visita la area pos la trematera ruinante en april.
Los ia studia imajes satelital de la glasia Khumbu tra la 15 anios pasada, e ia jeometre ance la area a tre veses de pos 2009. Los ia descovre ce partes de la area plu basa de la glasia ia diminui car los perde sua jelo a su, par causa de la temperatur levada. Esta ia permete la formi e crese de lagos.
La datos de la 15 anios pasada mostra ce la surfas de la glasis ia declina con rapidia de du metres per anio.
Nonsimil a glasias en otra locas, cual es usual fada de jelo lisa, multe en la area Himalaia es covreda con un strato de detrito de arena, calculos, e rocas.
La lago glasial Dig Tsho en la vale de Khumbu ia rompe en 1985, destruinte un compleso de enerjia idraulical e otra construidas de infrastrutur.
Como reportada par la Program de Ambiente de la Nasiones Unida, la paises Nepal, Pacistan, Butan, e Xina ia esperia a la min 35 avenis de rompes subita de lagos glasial en la sentenio pasada.
Arcivos indica ce stanges ia developa e drena sur la glasia Khumbu ance en la pasada, ma siensistes dise ce la temperatur levante e la fonde plu rapida de glasias en anios resente es un causa de ansia.
Esta ansia es sentida par alga membros de la comunia xerpa cual abita en la vale, ma otras dise ce los no teme.
"Nos oia tal reportas alarmante de tempo a tempo," Ang Kami Sherpa ia dise. El es la xef de un ecipo xerpa de "dotores de cascade" ci repara la via tra la cascade jelada de Khumbu per trepores a cada anio. "La stanges va veni e parti, ma si nos manteni la felisia de nosa dios sur la montes, nos no ave un razona de teme."
@T Lampo en Barat mata plu ca 30 persones
@L aora_oji/2015/lampo_en_barat_mata_plu_ca_30_persones
====== Lampo en Barat mata plu ca 30 persones ======
7 setembre 2015
A la min 32 persones ia mori pos colpas de lampo en Barat.
Dudes-tre ia mori en sete distritos de la stato Andhra Pradesh, e nove ia es matada en Orissa, un stato este.
La plu de los ci ia mori ia es laborante sur cultiverias en pluve deluviante ier.
Colpas de lampo aveni comun en Barat en pluves forte de monson.
A la min ses femes ia es entre la mores.
Du ecipos de cricetores fema ia evita apena cuando lampo ia colpa un palma prosima a la campo do los ia jua un max en la distrito Guntur. On ia abandona la jua a pos.
Un ofisior major de criceta ia comenta: "Lo ia es un evita miraclosa per nosa juores e ance per la empleadas."
En Orissa, nove persones ia es matada, e a la min oto ia es ferida, en colpas separada de lampo.
Barat reseta 80% de sua pluve anial en la saison monsonal, cual estende entre junio e setembre.
@T Legores canadian aproba la crese de potias de spia
@L aora_oji/2015/legores_canadian_aproba_la_crese_de_potias_de_spia
====== Legores canadian aproba la crese de potias de spia ======
7 maio 2015
En Canada, un projeta legal cual ta estende multe la potias de la ajenteria de spia ia pasa ultra un ostaculo major.
La Salon basa ia aproba ier la Ata Antiterorisme, speronida par un ataca contra parlamento en la anio pasada.
La lege ta permete ce la ajenteria de spia opera ance estra la pais e fa arestas preveninte. Dominada par la partito conserviste, on previde ce la Salon alta va aproba la lege ante junio.
La ministro xef, Stephen Harper, suporta forte la projeta, cual criminali la promove de terorisme, incluinte par interede.
Jason Kenney, la ministro canadian de defende, ia dise: "On ave un probablia alta de atacas jihadiste de interna. La menasa de terorisme ia es nunca plu grande."
La lege fasili ance ce la polisia aresta e teni persones sin acusa.
Oposores, ci opina ce la lege es tro jeneral e no sufisinte supravideda, ia atenta fa cambias a lo, ma sin susede.
Cuatro ministros xef pasada de la pais e sinco judores de la Corte Suprema Canadian ia scrive leteras publica per oposa la projeta.
Allan Weiss, profesor de siensas umana a la Universia de York, ia comenta: "Esta lege va gida cuasi serta a un redui de libria de espresa. Lo es plen de linguaje neblosa cual ta permete ce la governa eticeti cuasi cualce cosa con cual lo desacorda como mal per la interesa nasional de Canada."
En otobre 2014, un atacor ia fusili e mata un soldato a la monumento nasional de gera en la captial, Ottawa, e ia ataca alora la construidas de parlamento visina.
A du dias plu temprana, un om descriveda como inspirada par la grupo Stato Islamiste ia crase du soldatos en un parce de autos en Quebec, matante la un e ferinte la otra, ante cuando on ia mata el par fusil.
@T Madrid va renomi stradas cual pertine a Franco
@L aora_oji/2015/madrid_va_renomi_stradas_cual_pertine_a_franco
====== Madrid va renomi stradas cual pertine a Franco ======
8 julio 2015
En Espania, la comite nova sinistriste de Madrid, la capital, ia dise ce lo intende sutrae tota nomes de stradas e plazas cual pertine a la autocratia de jeneral Francisco Franco.
On ia renomi ja multe stradas su un lege de 2007 de "memoria istorial" cual ia introdui sustituas per la simboles de la rena de Franco entre 1939 e 1975. Ma 167 stradas es ancora nomida pos figures major de acel periodo.
Manuela Carmena Castrillo, la maior nova de Madrid, e un sinistriste, ia es un avocato anti-Franco en la anios tarda de la tirania.
El ia emprende la posto en Madrid pos anios de governa par la Partito Poplal, sentral destriste.
Sua presedente, Ana Botella Serrano, ia es un de 38 maiores ci un avocato de diretos umana, en la parte prima de esta anio, ia acusa de pospone tro longa la sutrae de simboles de Franco.
An si un portavose per la comite de vila ia dise ce on ave "no projeta concreta" per comensa cambia la nomes de stradas, el ia indica ce esta va aveni en colabora con distritos local e grupos sitadanal.
Nomes listada par jornalistes espaniol inclui la strada de la Mores de la Divide Azul, un unia cual ia servi con la nazis en la Gera Mundal Du, e la plaza Arriba España, cual refere a Falanje, un partito vea de Espania.
Alga vestijios de la rena de Franco resta sur construidas istorial en Madrid. Entre los es un arco de vinse a un de la entras a la site, alga construidas de defende, e la palasios El Pardo e Santa Cruz.
@T Magiares protesta ante un visita par Putin
@L aora_oji/2015/magiares_protesta_ante_un_visita_par_putin
====== Magiares protesta ante un visita par Putin ======
17 febrero 2015
Sirca 2000 persones ia pasea tra Budapest, la capital magiar, ante discutes entre la ministro xef Viktor Orbán e la presidente rusce Vladimir Putin.
La visita oji va es la prima par Putin a un gidor de la Uni European de pos junio 2014.
Magiar vole negosia un acorda nova per furnis de gas rusce.
La plu de statos membros de la UE ia evita Rusia par causa de la situa en Ucraina este, an si Rusia nega la acusa ce lo ia provoca la violentia.
Protestores ia asembla en Budapest a la sera de lundi, portante banderas con la parolas "Putin Niet, Europe Yes" (Putin No, Europa Si).
La visita par Putin aveni a min ca du semanas pos cuando Angela Merkel, la canselor deutx, ia visita Budapest ante un semana de diplomatia intensa, con resulta ce on ia anunsia un sesaspara en Ucraina este.
La presidente rusce desira forte mostra ce el ave ancora aliadas en la UE e OTAN.
En sua visita a Budapest, el va pone un garlanda a un monumento soviet de gera cual onora soldatos ci ia mori en supresa la revolta magiar en 1956.
Magiar ia suporta punis donada a Rusia par la UE sur la situa ucrainsce, ma ia parla ance sur la efeto negativa de los.
En 2014, Orbán ia dise ce la UE ia "xuta se a la pede" en restrinje la comersias con Moscva.
Magiar depende de Rusia per la plu de sua furnis de gas, e desira negosia un acorda flexable de periodo longa per segue la acorda presente cual va fini en esta anio.
Orbán ia deveni importante como un gidor de studiantes, con un disposa forte anticomuniste e antirusce. A venerdi, el ia informa la radio magiar ce tensas psicolojial esiste con Rusia, ma ce el vole vinse estas.
On regarda el como un de la aliadas la plu prosima de Putin en Europa.
Ma multe de la protestores ci ia pasea tra Budapest ier ia dise ce los es cauta sur lias plu prosima con Rusia.
@T Mal alcol ospitali plu ca sento persones en Barat
@L aora_oji/2015/mal_alcol_ospitali_plu_ca_sento_persones_en_barat
====== Mal alcol ospitali plu ca sento persones en Barat ======
13 janero 2015
En Barat, a la min 14 persones ia mori pos bevi alcol nosiva en la stato Uttar Pradex.
On trata plu ca 100 persones en ospital, temente ce la cuantia de mores pote crese.
Moris par alcol nosiva aveni frecuente en Barat, do on bevi comun distiladas barata. (La similia de la parolas es un coaveni.)
On ia move rapida la vitimes a ospitales diversa pos reportas de la casos prima de veneni en la vileta Kharta, prosima a Lacnau, la capital de la stato.
La ofisior xef medical ia comenta ce 123 persones ia es ospitalida.
Autoriosas ia comensa un investiga, ma on ia aresta nun.
Un portavose per la governa ia esplica ce on ia suspende la labora de des-du ofisiores de departes local diversa, par causa de sua descura. "On no va desculpa la culpables," el ia dise.
@T Malaisia xerca e salva barcos de migrores
@L aora_oji/2015/malaisia_xerca_e_salva_barcos_de_migrores
====== Malaisia xerca e salva barcos de migrores ======
21 maio 2015
Najib Razak, la ministro xef de Malaisa, ia dise ce sua pais va fa misiones de xerca e salva per barcos de migrores rohingia en la Mar Andaman. Aidas umaniste va es ance furnida par tera e mar.
Sua anunsia segue semanas en cual la autoriosas ia rejeta barcos de migrores e ia move los a ultra acuas malaisian.
La ministros de esternas de Malaisia e Indonesia es en Nay Pyi Taw, la capital de Miama, per discute la crise de migrores. On crede ce sirca 7000 persones es trapida a mar.
La migrores es muslimes rohingia ci fuji de persegue en Miama, e ance banglas, sur ci on crede ce los es migrores economial.
Malaisia e Indonesia ia dise ce los va refuja tempora los ci atera sur sua teritorio, ma los nesesa la aida de la comunia internasional per relocali los.
En sua conta de Twitter, Najib ia dise ce "la compatia umana fundal" obliga furni aida a la fames e la maladas. El ia ajunta ce la marina e autoriosa maral de la pais nesesa xerca e salva per "preveni perdes de vive".
Malaisia ia es entre alga statos en la area cual ia refusa aseta la migrores a ante. Lo ia tira la barcos a la acuas de otra paises, creante un situa cual criticistes ia descrive como un max matante de tenis de table.
Alga persones vide la discutes de oji como un avansa grande, car a ante Miama ia nega sua culpablia per la crise e no ia es presente a la consenta de ministros de esternas de la area ier, do on ia acorda usa refujas tempora e no diverje plu la barcos.
La dirijor pasifica de Amnestia Internasional ia dise ce la deside de refuja va aida los ci ia veni ja a tera, ma "fa no cosa per la miles ancora vagante a mar, con furnis diminuinte de comeda e acua, o per cualce otras ci segue los".
Tai ia dise ce lo va para tira barcos a mar, ma no ia suscrive la acorda de refuja, disente ce lo luta ja per maneja deses de miles de refujadas miama.
Plu ca 3000 es ja salvada par persones local o ia atera mesma en Indonesia e Malaisia.
Acel du paises ia apela per aida de otra nasiones per recasi la migrores ante la pasa de un anio. La departe de esternas SUA ia dise ce la Statos Unida va aseta volente refujadas, per gida un taxe multinasional de recasi los.
Miama (ance conoseda como Burma) regarda la rohingias como migrores de Bangladex, an pos cuando multe jeneras de los ia abita en Miama. Lo restrinje sua moves e vives personal, e la rohingias es persegueda par la popla major budiste.
@T Mamales australian deveni rapida estinguida
@L aora_oji/2015/mamales_australian_deveni_rapida_estinguida
====== Mamales australian deveni rapida estinguida ======
11 febrero 2015
Australia ia perde ja un desi de sua spesies de mamales nativa en la 200 anios pasada. No otra nasion ia esperia un rapidia tan alta de perde de mamales de tera en acel periodo.
La perde es xef causada par la ativias predorin de la gato savaje e la volpe roja, cual on ia introdui de Europa. Focones grande per maneja la tera fa ance un efeto.
Como un nasion rica con popla peti, on ta previde ce la animales de Australia es relativa secur de tal menasas como la perde de abitadas.
Ma un esplora nova de la mamales nativa, publicida en la jornal Prosegues de la Academia Nasional de Siensas, sujesta ce la problem es plu grave ca on ia suposa.
De 1788, 11% de 273 spesies de mamales nativa sur tera ia deveni estinguida; 21% es perilida; e 15% es prosima a peril. La situa es alga plu bon per mamales de mar.
On estima ce la continente conteni sirca 15 e 23 milion gatos savaje.
Medios pratical per proteje la spesies nativa inclui boni la biosecuria sur isolas costal, do on trova min gatos e volpes savaje.
La isolas ta pote ance opera como arcas per spesies perilida. On considera an la usa cauta de foco e otra medios per elimina esta predores.
Ma la rexercores averti ce cisa australianes va nesesa final revisa sua modo de vive per impedi la perde de natur.
@T Mausoleos es reconstruida en Mali
@L aora_oji/2015/mausoleos_es_reconstruida_en_mali
====== Mausoleos es reconstruida en Mali ======
20 julio 2015
On ia reconstrui des-cuatro mausoleos en la site Timbuctu en Mali norde, a tre anios pos cuando estremistes islamiste ia destrui los.
La reconstrui ia es fada par petrores local, laborante per UNESCO, la organiza cultural de la Nasiones Unida.
En un visita a la site, la xef de UNESCO ia dise ce el vole ce la destruores apare ante la Corte Criminal Internasional.
La intera de la site Timbuctu es listada como un loca de erita mundal.
On ia regarda la site como la sentro de aprende muslim de la sentenios 13 a 17. A un eda pasada, lo ia conteni cuasi 200 scolas e universias cual ia atrae miles de studiantes de tra la mundo muslim.
La mausoleos ia es santerias dedicada a la fundores de Timbuctu, ci ia es respetada como persones santa par la plu de la abitores de la site.
Ma esta pratica es regardada como blasfemosa par fundalistes ci ia ocupa la site e multe otra partes de Mali norde en 2012, asta cuando soldatos franses ia forsa los a via en janero 2013.
En sua ocupa, la estremistes ia destrui e fa vandalisme a mascitas e mausoleos, e ia arde deses de miles de manoscritos antica.
Inaugurante la mausoleos reconstruida a saturdi, Irina Bokova, la dirijor jeneral de UNESCO, ia dise ce la destrui de eritas cultural es un crimin de gera su la Acorda de Den Haag fada par la Nasiones Unida en 1954.
Petrores ia usa metodos tradisional de construi e conoses cultural de la area per recrea la mausoleos. La labora ia ocupa un anio.
Onorante los, Bokova ia dise: "Vosa labora es un leson sur tolera, comunica, e pas... Lo es un responde a tota estremistes de ci sua eco es oiable an multe ultra la fronteras de Mali."
@T Mexico investiga desapares nova en Guerrero
@L aora_oji/2015/mexico_investiga_desapares_nova_en_guerrero
====== Mexico investiga desapares nova en Guerrero ======
22 maio 2015
En Mexico, investigores federal rexerca la desapare de 15 persones, cisa plu, en la site Chilapa en la stato Guerrero, pos cuando lo ia es invadeda par sentos de fusilores.
Familias ia informa la polisia ce la fusilores ia declara se como polisiores de comunia e ce los ia prende alga omes joven a via.
Chilapa es caturada en batalias entre du ganges de drogas ci combate per controla la teritorio.
Jornalistes local dise ce la cuantia de desaparedas pote es multe plu grande.
La fusilores ia invade Chilapa entre 9 a 14 maio, desarmante polisiores local e obligante la xef de polisia a parti.
Los ia dise ce los veni per fini la violentia en la site entre la ganges Los Rojos e Los Ardillos, e ce alga polisiores labora per Los Rojos.
Plu tarda, la fusilores ia redona la armas de la polisia.
Pos sua parti, alga abitores ia reporta ce la fusilores ia asembla e fura omes. La plu de la omes ia ave min ca 30 anios.
Avocatos federal ia anunsia ier ce los envia detetores e espertas a Chilapa per xerca la persones desapareda.
Ance ier, la polisia ia trova a la min tre corpos desmembrida, envolveda en covreletos en un semetero prosima a Chilapa. On no ia identifia los.
En la anio pasada, 43 studiantes ia desapare en Iguala, un otra vila en Guerrero.
@T Microondadores e lavavestes domina la monte de dejetadas
@L aora_oji/2015/microondadores_e_lavavestes_domina_la_monte_de_dejetadas
====== Microondadores e lavavestes domina la monte de dejetadas ======
19 april 2015
Un reporta sujesta ce 60% de la 41,8 milion tones de dejetadas eletronical cual on ia baldoni en 2014 ia es aparatos de cosina, laveria, e sala de banio.
Scriveda par rexercores a la Universia de la NU en Tocio, la reporta detalia cuanto tal dejetadas apare en areas diversa de la mundo.
La plu de la dejetadas ia es fornos de microonda, lavavestes, lavaplatos, e otra aparatos simil de casa.
Sola 16% de la dejetadas ia ariva coreta a scemas de resicli e reusa.
La reporta ia judi ce la SUA es la nasion con la plu multe dejetadas eletronical. Lo ia jenera 7072 mil tones en 2014. Xina ia es numero du (6032 mil tones) e Japan numero tre (2200 mil tones).
Nasiones european ia domina la lista de areas mesurada per cuanto cada sitadan dejeta.
En Noria, cada abitor ia desprende sirca 28,4 cilogrames de dejetadas eletronical. Tra Africa, la mesuras ia es plu basa: 1,7 cilogrames per person.
La reporta ia dise ce la cuantia multiplinte de aparatos eletronical dejetada es nurida par la popularia cresente de eletronicales de casa, e par causa ce multe aparatos moderna no dura tra tan longa como varias plu vea de la mesma produidas.
La 41,8 milion tones de dejetada ia conteni plu ca 16 milion tones de fero, 1900 mil tones de cupre, 300 tones de oro, e ance cuantias de otra metales valuosa, como paladio.
La reporta estima ce la valua combinada de tota esta recursos es sirca $52 mil milion.
Plu, la dejetadas conteni sustantias nosiva como plomo, cual on ta desprende plu saja con plu atende.
@T Migrores mori pos un inversa de barco en la Mediteraneo
@L aora_oji/2015/migrores_mori_pos_un_inversa_de_barco_en_la_mediteraneo
====== Migrores mori pos un inversa de barco en la Mediteraneo ======
20 april 2015
On teme ce sentos de persones ia afoca pos la inversa de un barco portante asta 700 migrores en la Mar Mediteraneo.
La barco, sur cual on crede ce lo ia es no plu longa ca 20 metres, ia inversa a medianote ante soldi, en acuas libi a sude de Lampedusa, un isola italian.
Asta aora, on ia salva sola 28 persones e ia retrova sola 24 corpos.
Matteo Renzi, la ministro xef de Italia, ia descrive la aveni como un trajedia per Europa, e ia recomenda un confere alta e spesial de la Uni European a tema de migrores.
La ajenteria de la Nasiones Unida per refujadas ia dise ce la afonda representa cisa la perde la plu grande de vives en un traversa par migrores a Europa. A la min 900 otra migrores ia mori en traversa la Mediteraneo ja en esta anio.
Barcones de la marina e gardacosta italian e malti, con ance tre elicotores, partisipa en la opera de salva, a distantia de 210 cilometres de la costa de Lampedusa, e 27 cilometres de la costa de Libia.
On reporta ce la migrores ia cade en la mar cuando los ia freta per atrae la atende de un barcon comersial portuges cual ia veni prosima. La esta move subita ia causa ce sua propre barco ia inversa.
@T Migrores proba un via nova tra Corvatsca
@L aora_oji/2015/migrores_proba_un_via_nova_tra_corvatsca
====== Migrores proba un via nova tra Corvatsca ======
16 setembre 2015
La grupo prima de migrores ia ariva a la frontera de Serbia e Corvatsca, xercante un via nova per entra a la Uni European.
Buses ia porta la migrores a la vila Šid, pos cuando Ungaria ia clui sua frontera con Serbia, trapinte miles de persones ci ia atenta ateni Deutxland.
Corvatsca ia dise ce lo "no va permete ce persones traversa", e ce la migrores va es parada e reenviada cuando los ateni la fronteras slovensce e ungarian, an tal.
Restrinjes nova de frontera e un disputa sur asinia migrores ia revela divides amarga en Europa sur la crise.
Sentos de migrores trapida ia pasa la note su la sielo o en tendas tempora, prosima a la frontera serbsce con Ungaria. Alga ia colie lenio per focos.
Ier, Ungaria ia ativi leges nova. La polisia ia clui un traverseria de ferovia cual deses de miles de migrores ia usa ja per entra a la zona Schengen sin fronteras.
On ave un state de crise, con sentos de soldatos e polisiores posada.
A medianote, Austria ia deveni la pais la plu resente cual ia introdui regulas plu sever de frontera. Los pertine a la frontera con Ungaria ma ta pote es estendeda.
Ma Austrai ia insiste ce on va reenvia a Ungaria nun ci fuji de persegue.
La polisia austrian ia dise ce la du stasiones xef de la capital, Wien, es estrema plen de migrores e ce lo es posible ce la stasion xef en Salzburg va debe clui.
La Uni European, un bloco de 28 membros, fronti un influe vasta de migrores, de ci multe fuji de gera e povria en paises incluinte Suria, do un gera interna es bataliada de 2011.
La departe fronteral de la UE dise ce plu ca 500 mil migrores ia ariva a la fronteras de la Uni en esta anio, comparable con 280 mil en 2014.
La grupo de sirca 40 migrores ia ariva a Šid, un vila fronteral serbsce, en la temprana de oji. Los ia viaja par bus de Preševo, un vila serbsce prosima a la frontera macedonsce en la sude.
Ungaria ia dise ance ce lo considera estende sua serca asta la frontera con Romania. Romania ia dise ce esta ta viole la "spirito european" de colabora.
@T Miles de persones fuji de la batalia en Tikrit
@L aora_oji/2015/miles_de_persones_fuji_de_la_batalia_en_tikrit
====== Miles de persones fuji de la batalia en Tikrit ======
6 marto 2015
La Nasiones Unida dise ce un opera militar per recatura la site Tikrit en Irac de Stato Islamiste ia causa ce sirca 28 mil persones fuji de sua casas.
La deslocadas vade en dirije a la site Samarra, ma multe familias es impedida a postos de controla. Ajenterias de la NU envia convoias de furnis per aida la afetadas.
La opera per recatura Tikrit envolve sirca 30 mil soldatos e militiores xia, e es aora en sua dia sinco. Los atenta ensirca la combatores de Stato Islamiste, ma sua avansa es lentida par bombas poneda sur la via pos cuando la site ia es saisida en junio de la anio pasada.
Jetos e elicotores iraci suporta la soldatos sur tera, ma aviones de la alia SUA no partisipa.
La combatosas ia ensende ier posos de petrolio estra la site, creante nubes de fuma, parente per asconde blancos de atacas airal.
En cuando la batalia continua, la ansia crese per la popla nonmilitar.
La Casa Blanca e organizas de diretos umana ia averti ance sur un peril de contratacas setal par militiores xia en la area xef suni.
Tikrit es la propre vila de la presidente pasada Saddam Hussein. Lo es un gol major per la governa iraci en sua intende de recatura Mosul, la site du de la pais, cual Stato Islamiste ia saisi ance en 2014.
@T Militias vade per aida Ramadi contra Stato Islamiste
@L aora_oji/2015/militias_vade_per_aida_ramadi_contra_stato_islamiste
====== Militias vade per aida Ramadi contra Stato Islamiste ======
18 maio 2015
On reporta ce la governa iraci envia militias suportada par Iran a Ramadi per recatura lo de Stato Islamiste (SI), cual ia saisi ier lo.
Sirca 500 persones ia mori cuando la militaria iraci ia abandona sua postos en la site, a 112 cilometres a ueste de Baghdad.
Un ofisior de governa rejional ia dise ce persones fuji de Ramadi, la capital de la provinse Anbar, "en cuantias grande". Ma la SUA ia descrive la situa en la site como "fluente e disputada".
La militias xia, conoseda como la Movabli Popular, ia es esensal en la recatura de Tikrit, un site a norde de Baghdad, a du menses ante aora. Los ia retira se de Tikrit pos reportas de violentia e fura de benes.
La governa iraci ia teme la efetos setal de envia fortias xia a Ramadi, un area forte suni.
La polisia e militaria ia retira se de la area en un modo caososa, pos dias de combate intensa.
Un declara, parente par SI, ia dise ce sua soldatos ia "purga la site intera". Lo ia dise ce SI ia catura la base militar de la Brigada 8, e ance tances e lansamisiles cual on ia abandona ala.
La ofisia de la governor de Anbar ia sujesta ce Ramadi es aora completa controlada par SI, e ce tota soldatos governal ia retira se.
Un ofisior militar, anonim parlante, ia dise ce la plu soldatos ia parti a un base militar en la site Khalidiya, a este de Ramadi, an pos cuando Haider al-Abadi, la ministro xef, ia comanda ce los resta. Soldatos governal ave poca munis, e no pote forsa a via la atacas enorme par SI.
Fortias iraci ia fuji pos un serie de atacas par bombas umana en autos a soldi.
Cuatro esplodes cuasi simultan ia colpa la polisia ci ia defende la distrito Malaab en Ramadi sude. Plu tarda, tre plu bombas umana ia gida autos esplodente contra la porton de la xeferia militar provinsal.
La perde de Ramadi representa un problem multe seria per la governa, e ofisiores iraci es alarmada.
La provinse Anbar covre un estende vasta de la pais, de ueste de la capital Baghdad asta la frontera suri. Lo conteni vias esensal cual lia Irac a Suria e Jordan. On reporta ce SI controla plu ca un dui de esta teritorio.
Plu ca 500 persones ia mori en la du dias pasada de combate en e sirca Ramadi, incluinte polisiores ci ia usa tota sua munis, e persones nonmilitar colpada par fusilis crusada.
Sirca 8000 persones ia deveni deslocada en la mesma periodo corta, seguente la Organiza Internasional per Migra.
@T Misre suspende futbal pos un tumulta matante
@L aora_oji/2015/misre_suspende_futbal_pos_un_tumulta_matante
====== Misre suspende futbal pos un tumulta matante ======
9 febrero 2015
Misre ia suspende tota maxes ofisial de futbal pos scaramuxas ier a un stadion en Qahira (Cairo) cual ia mata 22 persones, cisa plu.
Persones ia es craseda pos cuando la polisia ia xuta gas lacrimojen a suportores de la ecipo Zamalek, ci ia atenta entra par forsa per vide un max contra sua competores ENPPI. A la min 20 otra persones ia es ferida.
La fanes ia culpa la autoriosas per abri sola un porte a la stadion. An pos la violentia, on ia fa la max.
On ia comanda la aresta de la gidores de la Cavalores Blanca, la grupo de suportores de Zamalek.
Maxes ofisial de futbal ia es ance suspendeda en 2012 pos la moris de 74 fanes en tumultas a un jua en Porsaid.
Fanes dedicada de futbal misri es comun profonda politicosa, e los ia ave un rol en la despone de presidente Hosni Mubarak en 2011.
Multe persones opina ce la polisia ia permete la violentia en Porsaid per venja se contra la rol de la fanes en tumultas contra Mubarak. La polisia nega la alega.
Resente, on ia sutrae restrinjes de la cuantia de persones ci pote regarda maxes de futbal, pos la moris a Porsaid. Ma aora esta restrinjes va es reajuntada.
A la stadion, montones de sapatos lasada par la mores e feridas ia atesta silente la aveni de ier.
@T Multe curdis turces mori en violentia en Cizre
@L aora_oji/2015/multe_curdis_turces_mori_en_violentia_en_cizre
====== Multe curdis turces mori en violentia en Cizre ======
11 setembre 2015
La ministreria interna de Turcia dise ce a la min 30 persones ia mori en scaramuxas en la site Cizre pos la comensa de un opera militar ala en la semana pasada.
La plu de la mores ia es ativistes curdi, ma la Partito Democrata de la Popla, cual es procurdi, dise ce 20 siviles ia es matada en la violentia.
Abitores local dise ce la site es aora "asejada" pos cuando la militaria ia defini un proibi de move.
Ier, la polisia ia para un delega de gidores de la Partitio Democrata ci ia atenta ateni la site sude-este par pede.
La grupo inclui la gidor de la partito Selahattin Demirtaş e 30 membros de parlamento ci dise ce los vole atrae atende a lo cual aveni en la area xef curdi.
Los ia es intersepida par polisiores prosima a İdil, a 28 cilometres de Cizre.
Combates matante entre fortes turces e PKK, la organiza de combatosas curdi, ia intensi pos la colasa de un sesaspara en julio.
Jetos turces ia bombi bases de PKK en Irac norde, e la armada ia aumenta securia e proibi moves tra la sude-este.
Demirtaş ia dise ce la situa umaniste en Cizre mali: on no pote compra pan o asede acua.
La corpo de un xico de 10 anios ci ia es matada en la violentia es tenida en un friador par membros de sua familia, car, par causa de la restrinjes, los no pote prende el a la moreria.
Fortes de securia turces no ia aseja sola la site ma opera ance a interna de lo, blocinte la asedes entre visinerias diversa.
Un atestor ia descrive vide un fola portante un xico ferida de 14 anios a un loca do on ia espera ce un ambulansia va prende el.
Selami Altınok, la ministro de internas, ia dise ce la proibi de moves va continua asta la completi de la opera militar, e ce on no ia permete ce la delega de la Partito Democrata entra a Cizre par causa de consernas de securia.
Ma Saruhan Oluç, un de la legores de la Partito Democrata ci atenta asede la site, ia comenta ce tal declaras es sin funda.
"Nos no crede ce nos es menasada par la popla de la site," el ia dise. "La sola menasa ante nos es par la soldatos ci impedi nos via e no permete ce nos entra."
@T Narendra Modi gida miles en un selebra de ioga
@L aora_oji/2015/narendra_modi_gida_miles_en_un_selebra_de_ioga
====== Narendra Modi gida miles en un selebra de ioga ======
22 junio 2015
Narendra Modi, la ministro xef de Barat, ia gida miles de persones en un program de ioga coletiva en la capital, Delhi, a la aveni prima de la Dia Internasional de Ioga.
El ia fa estendes, curvis, e eserses de respira con 35 mil enfantes, burocratas, e soldatos.
La securia en la site ia es forte vijilada, con miles de polisiores e paramilitares presente a la aveni a la matina de soldi.
On ia previde ce miliones de otra persones va fa ioga a avenis simil en sentos de sites e vilas barati.
Modi, ci es zelosa sur ioga e dise ce el pratica esta arte barati antica a cada dia, ia promove ce la Nasiones Unida declara 21 junio como la Dia Internasonal de Ioga.
On ia pone miles de tapetos colorosa sur Rajpath (la Bolevar de la Re), do la aveni xef ia es fada.
Plu temprana, ofisiores ia dise ce la ministro xef va visita la aveni per parla a la fola asemblada, ma ce el no va fa ioga. Ma Modi ia surprende par partisipa en la eserses.
La cuantia de partisipores ia crea cisa un recordo nova de mundo per la clase la plu grande de ioga a un loca.
Ioga ia es ance praticada sur la glasia Siachen en la Montes Himalaia, e sur la mar profonda, e on ia festa la dia tra la mundo. 30 mil persones ia fa ioga en Times Square en New York.
An tal, la dia, cual ia intende promove armonia e pas, ia provoca un controversa cuando alga organizas muslim ia dise ce ioga es esensal un pratica indu e es contra la credes de Islam.
@T Nepal adota un constitui nova
@L aora_oji/2015/nepal_adota_un_constitui_nova
====== Nepal adota un constitui nova ======
20 setembre 2015
Nepal va adota formal sua constitui nova, preparada pos anios de disputas political.
Su la constitui nova, la nasion en la Montes Himalaia va es un republica secular e federal con sete statos.
An tal, alga grupos oposa lo, preferente ce Nepal es un nasion indu. Minorias etnical teme ance ce lo va crea prejudis.
Protestas organizada par la tarus e madesis (du grupos etnical) en la sude ia disturba partes de la pais tra alga semanas. A la min 40 persones ia es matada en la disturbas.
La autoriosas ia enforsa proibis de sorti e ia envia soldatos, ma la protestas ia retarda la transporta stradal a la capital, Kathmandu.
Un portavose per Sushil Koirala, la ministro xef, ia dise: "La constitui cual on va proclama es la resulta de multe anios de luta par la popla nepali. Lo dirije se a la aspiras e esijes de tota partes de la sosia nepali en un manera incluinte e representante."
Un constitui nova ia esijeda par rebelores maoiste, de ci sua gera interna de 10 anios ia fini con un acorda de pas en 2006.
En 2008, la maoistes ia es elejeda a un asembla composante, e ia causa tal la aboli de la monarcia de 240 anios. Ma entre sua disputas, la asembla no ia susede prepara un constitui nova.
Nepal ave 28 milion abitores. Lo recovre ancora de un trematera sever en april cual ia mata miles.
@T Nepal eleje sua presidente fema prima
@L aora_oji/2015/nepal_eleje_sua_presidente_fema_prima
====== Nepal eleje sua presidente fema prima ======
29 otobre 2015
La parlamento de Nepal ia eleje Bidhya Devi Bhandari, un campanior per diretos de femes, como sua presidente fema prima.
El es la person du ci ia emprende esta rol, xef ritual.
Bhandari, ci ave 54 anios, es presente la vispresidente de la Partito Comuniste cual rena la pais.
El ia es la ministro de defende de 2009 a 2011. Como presidente, el ia promete suporta forte la diretos de minorias e de femes en Nepal.
Plu temprana en esta mense, la parlamento de la pais ia eleje sua ministro xef nova, KP Sharma Oli.
Bhandari prende la loca de Ram Baran Yadav, ci ia es la presidente prima elejeda de la pais en 2008, pos cuando Nepal ia aboli sua monarcia.
La eleje de Bhandari segue corta pos cuando Nepal ia institui sua constitui nova en setembre. Esta ia intende stabli la pais, ma ia fini par provoca violentia cual ia mata 40 persones, cisa plu.
La constitui defini la nasion indu majorial como un republica secular, divideda en sete provinses federal.
Ma grupos etnical en Nepal sude desira plu teritorio e diretos per statos federal etnical.
@T Nepal esperia un plu trematera sever
@L aora_oji/2015/nepal_esperia_un_plu_trematera_sever
====== Nepal esperia un plu trematera sever ======
13 maio 2015
Un trematera major ia colpa la este de Nepal, prosima a Monte Sagarmata (Everest), a du semanas pos la mori de plu ca 8000 persones en un trema destruosa.
A la min 65 nepalis ia es matada e cuasi 2000 ia es ferida par la trema nova. 17, cisa plu, ia mori en Barat.
La trematera ia colpa prosima a la vila Namche Baza e ia envia miles de abitores panicante a la stradas de la capital de Nepal, Kathmandu.
Lo ia mesura 7,3 a la scala de Richter. La trema de 25 april ia mesura 7,8.
On ia envia elicotores a distritos a este de Kathmandu sur cual on crede ce los es la plu sever afetada. La polisia en Charikot, a 80 cilometres a norde-este de la capital, ia dise ce 20 persones ia mori ala.
Plu temprana ier, la militaria SUA ia anunsia ce un elicotor partisipante en la labora de salva ia desapare prosima a Charikot. Lo ia porta oto persones.
Un portavose per la governa nepali ia dise ce la trematera nova ia afeta 31 de la 75 distritos de la pais.
La ministro xef, Sushil Koirala, ia clama per "coraje e pasientia" e ia recomenda forte ce tota ci ia aida Nepal pos la trema de 25 april "estende denova vosa manos aidante".
A la min cuatro persones ia es matada en la vila Chautara, a este de Kathmandu, do on reporta ce un cuantia de construidas ia colasa.
La Organiza Internasional de Migra ia dise ce on estrae corpos de la detrito ala, do alga liscas de tera ia aveni.
Liscas de tera ia es reportada ance en Sindhupalchok e Dolakha. Un portavose per la organiza Salva la Enfantes ia dise ce sua empleadas ia debe "evita rocas jigante cual ia rola de sur la monte".
La trematera nova ia colasa plu casas en la area de Monte Sagarmata, ma poca turistes ia es ancora en acel loca pos la trematera presedente.
Lo ia aveni a profondia de 15 cilometres, la mesma como la trema de april. Tremas min profonda tende causa plu danas a la surfas.
La trema de ier es probable un de la plu grandes cual Nepal ia esperia. Lo ia es segueda par ses replicas sismica de grandia 5,0 o plu. Un tal, a 30 minutos pos la trema xef, e sentrida a la distrito Ramechhap a este de Kathmandu, ia mesura 6,3.
@T Nepal perde la espera per plu survivores
@L aora_oji/2015/nepal_perde_la_espera_per_plu_survivores
====== Nepal perde la espera per plu survivores ======
2 maio 2015
La autoriosas en Nepal ia perde la espera de trova plu survivores su la detrito pos la trematera de la semana pasada.
6621 persones ia mori e plu ca 14 mil ia es ferida par la trema a un semana ante aora.
On ancora no sabe la fortuna de miles de persones en areas distante.
La cuantia de mores pote an crese, car laboras de xerca e salva continua ancora en alga distritos montanial.
An si la majoria grande de mores ia aveni en Nepal, on reporta ce sirca 100 persones ia mori en la paises visina: Bod, Barat, e Bangladex.
Nepal ia repete sua clamas per plu aidas stranjer e umaniste, confesante ce lo no ia es bon preparada per la desastre.
Liscas de tera e mal climas ia impedi la atentas de furni aida a distritos isolida, e on dispone mera sirca 20 elicotores per la laboras de salva e aida.
La ministro nepali de finanisa, Ram Sharan Mahat, ia dise ce la contas de governa ancora no ia reseta deses de miliones de dolares prometeda par donores stranjer. "A presente," el ia ajunta, "la opera intera de la governa es finansiada par la propre recursos interna de la governa."
UNICEF ia averti ce enfantes en la areas la plu sever afetada es "sin casa, en xoca profonda, e sin asede a cura fundal".
Ospitales supraflue, la acua manca, corpos es ancora trapida su la detrito, e persones dormi su sielo.
Plu, la saison de monsones va comensa pos poca semanas.
@T Netanyahu averti la SUA contra acorda sur potia nucleal irani
@L aora_oji/2015/netanyahu_averti_la_sua_contra_acorda_sur_potia_nucleal_irani
====== Netanyahu averti la SUA contra acorda sur potia nucleal irani ======
4 marto 2015
La ministro xef de Israel ia averti ce un acorda discuteda sur la program nucleal de Iran ta pote "pave sua via a la bomba", en loca de bari lo.
En un parla ier a la Congresa de la SUA, puntuada con aplaudis starante, Benjamin Netanyahu ia descrive Iran como "un menasa a la mundo intera".
Negosias sur la program nucleal irani prosimi a sua limita de tempo, en la tarda de marto, per la ateni de un acorda jeneral.
La parla ia aveni a mera du semanas ante un vota en Israel de cual sua resulta no es previdable.
Netanyahu ia insiste ce el no atenta interfere en la politica interna de la SUA.
La Casa Blanca ia critica sua intende de parla a la Congresa -- invitada par la republicistes, sin consulta la Casa Blanca -- disente ce la gidor israeli vole aumenta la oposa SUA contra un acorda con Iran.
Pos la parla, la presidente Barack Obama ia informa reportores ce el ia vide no cosa nova en la transcrive de la parla, e ce on ia presenta no alternativa realable de preveni Iran de oteni un arma nucleal.
La SUA, Rena Unida, Frans, Deutxland, Rusia, e Xina atenta acorda per redui la program nucleal irani en intercambia per un diminui de punis economial.
Los teme ce Iran aspira construi un bomba nucleal. Iran nega esta, insistente ce lo usa mera sua direto a potia nucleal pasosa.
Negosiores labora per ateni un acorda jeneral con Iran en esta mense. Lo ta es segueda par un acorda detaliosa ante la fini de junio.
Ma Netanyahu ia dise: "On ia informa nos ce un manca de acorda es plu bon ca un mal acorda. Ma esta es un mal acorda, un acorda multe mal."
@T New York va redui sua ilumina per aida avias
@L aora_oji/2015/new_york_va_redui_sua_ilumina_per_aida_avias
====== New York va redui sua ilumina per aida avias ======
28 april 2015
En la SUA, la state de New York va estingui lampas nonesensal en construidas publica per aida avias a segue sua vias migral.
On crede ce avias migrante usa stelas per dirije se, ma los pote deveni tan desorientada par lampas eletrical ce los colpa construidas.
La fenomeno mata asta mil milion avias per anio en la pais. Miliones de avias migra tra la state de New York, e aora los ci vola supra la site a note va susede plu probable ariva plu norde.
Lampas briliante esterna va es estinguida entre 23:00 e lus prima, en primavera e autono.
Andrew Cuomo, la governor de New York, ia anunsia ance un loca de rede nomida "Me ama avias de NY", cual va furni informas sur oserva avias e esplica como on pote partisipa en la stratejia de estingui lampas.
La Sosia Nasional de Audubon labora ja con otra sites major per proteje avias de colpa fenetras.
La esta atrae matante a lampas pare afeta avias cantante migrante como turdos e pasaros plu ca avias local, ci aprende do los pote vola secur.
Daniel Klem, un profesor de ornitolojia ci ia abri la via a la studia de avias ci colpa fenetras, ia dise ce la membros la plu sana de la popla avial risca mori en esta modo tan probable como avias plu debil.
Scrivente plu temprana en esta mense, la novelor Jonathan Franzen ia critica la developores de un stadion en la state Minnesota per no usa un vitro con motifes spesial cual pote redui la cuantia de colpas.
@T Nicaraguanes protesta contra un canal nova
@L aora_oji/2015/nicaraguanes_protesta_contra_un_canal_nova
====== Nicaraguanes protesta contra un canal nova ======
14 junio 2015
Miles de nicaraguanes ia protesta contra la construi projetada de un canal entre la mares Atlantica e Pasifica.
La scema, con custa de $50 mil milion, es ce un compania xines va construi un canal plu longa, larga e profonda ce la Canal de Panama.
Ma la protestores teme ce esta va dana vasta la ambiente e forsa miles de persones a abandona sua tera.
La governa de Nicaragua dise ce la canal va trae investis esensal a un de la paises la plu povre de America Sentral.
La plu de la protestores ia es cultivores. Alga de los ia acusa la presidente Daniel Ortega de vende Nicaragua a Xina.
La labora inisial sur loca ia comensa en desembre de la anio pasada. On previde ce la projeta va es completida pos sinco anios.
@T Nijeria eleje un presidente nova
@L aora_oji/2015/nijeria_eleje_un_presidente_nova
====== Nijeria eleje un presidente nova ======
1 april 2015
Muhammadu Buhari, un renor militar pasada, ia deveni la oposor prima ci gania un vota presidental en Nijeria.
Sua partito ia dise ce sua competor, Goodluck Jonathan, ia aseta sua defeta con lodas a la ganior. Buhari ia gania sirca du milion votas plu ca Jonathan cuando la presidente pasada ia aseta la resulta.
La plu de oservores ia comenta bon sur la prosede de eleje, ma on ia oia alga alegas de froda, e alga persones teme ce esta ta pote gida a protestas e violentia.
Esta es un momento estrema importante en la istoria turbada de la pais. Nun a ante ia despone un presidente en un vota ala.
Pos la autonomi de Nijeria de Britan en 1960, la pais ia esperia multe colpas de stato, e la plu de votas a acel tempo ia es falsida.
Natural, pos un compete difisil ganiada, multe votores no va es contente sur la resulta, ma la prosede intera sujesta ce la democratia profondi en Nijeria.
La vota ia fa ce diferes perilosa de relijio e teritorio emerji denova, e on senti ancora un menasa de violentia.
La suportores de Buhari ia vade sur la stradas en Kano e Kaduna, sites norde, per canta e dansa selebrante.
Esta es ja la ves cuatro a cual Buhari ia xerca la presidentia. El ave 72 anios. El ia rena la pais de janero 1984 asta agosto 1985, pos un colpa militar a la fini de 1983.
Multe votores ia dise ce los crede ce Buhari conveni plu bon ca Jonathan per vinse la grupo islamiste combatosa Boko Haram.
@T Nijerianes eleje sua presidente
@L aora_oji/2015/nijerianes_eleje_sua_presidente
====== Nijerianes eleje sua presidente ======
30 marto 2015
On conta la votas en la eleje de presidente nijerian. Goodluck Jonathan, la postor esistente, fronti un defia forte de Muhammadu Buhari, un renor militar pasada.
La comision de eleje ia dise ce lo espera anunsia oji la ganior.
La Nasiones Unida ia loda la metodo de vota, an entre problemes tecnical, protestas, e violentia liada con Boko Haram.
La prosede de vota ia comensa sua dia du en alga partes de la pais, pos problemes con lejecartas eletronical nova.
Jonathan ia es entre los ci no ia pote fa sua vota usante acel tecnolojia, cual on ia introdui per preveni froda. Sua partito ia oposa la lejecartas, e ia nomi la fiasco "un embarasa nasional enorme".
La xef de la comision de eleje, Attahiru Jega, ia asentua ce sola un cuantia peti de la 150 mil lejecartas usada ia malfunsiona.
La vota ia es posponeda tra ses semanas par causa de la rebela par combatosas de Boko Haram. La islamistes ia ataca voterias en statos norde-este, e on ia declara un proibi de sorti en la stato Bauchi pos un batalia entre securiores e la grupo.
Ban Ki-moon, la secretor jeneral de la NU, ia loda la "determina e dura" de votores nijerian.
Ma on ia esperia tensa en la stato Rivers, do miles de persones ia protesta contra la matas alegada de oposores e contra fasetas noncoreta de la prosede de vota.
La comision de eleje ia descrive se como "consernada" par la cexas, ajuntante ce un de sua ofisias ia es ensendeda par la turbores.
On ave ancora no indica ofisial sur cual partito va gania.
@T Nonsertia political en Aiti
@L aora_oji/2015/nonsertia_political_en_aiti
====== Nonsertia political en Aiti ======
14 janero 2015
On ia cansela la parlamento en Aiti pos la fali de la negosias final sur un lege nova de eleje.
La presidente Michel Martelly ia atenta gania suporta per un projeta, aprobada par la SUA, per pospone denova la eleje.
Aora, el rena ancora la pais par comanda de corte, ma sua periodo de servi va fini en la anio seguente.
Grupos aitian oposante dise ce los va continua sua menses de protestas su sielo per atenta obliga el a resinia.
La nonprogresa political es focada sur un disputa sur un lege nova cual legores oposante ia refusa permete.
A soldi, Martelly ia anunsia ce el e la oposores ia acorda final ce la eleje pote aveni.
Ma Fanmi Lavalas, la partito major sinistra e oposante, cual ia gida la protestas antigovernal, no ia partisipa en la acorda.
Elejes mediaperiodo a la Salon alta ia es orijinal espetada en maio 2012, e elejes local es ja retardada par tre anios.
Ativists aitian ia acusa Martelly de froda e malusa de potia, disente ce el ia desira ruina la acorda per pote rena par comanda de corte. Martelly ia nega esta.
Donores stranjer e la Nasiones Unida ia ofre sua suporta a la presidente, descrivente se como "estrema consernada ce la parlamento de Aiti es canselada sin deside sur la aveni de elejes governal longa posponeda".
@T Ojetos es trovada en la xerca per la avion QZ8501
@L aora_oji/2015/ojetos_es_trovada_en_la_xerca_per_la_avion_qz8501
====== Ojetos es trovada en la xerca per la avion QZ8501 ======
3 janero 2015
En la Mar de Djava, ecipos ci xerca la ruinas de la avion QZ8501 de AirAsia ia trova du ojetos grande. Los basi aora un veculo telecomandada per fa fotos su la mar.
Un mal clima e un mar tempestosa continua impedi la progresa.
La jeto ia desapare con 162 persones a soldi de la semana pasada, en vola de Surabaya en Indonesia a Singapor.
Asta aora, on ia regania 30 corpos. No survivores es trovada, e on no ia reprende la partes xef de la avion. On crede ce la plu de la corpos es trapida en la tronco.
Nun sabe perce la avion ia cade. Xercores ia reseta ancora no siniales de la caxas negra rejistrante.
Plu, on ia revela ce la airolinia AirAsia no ia es ofisial permeteda de vola longo acel curso en soldis.
Ante esta, AirAsia ia esperia nunca un asidente matante con sua aviones.
@T On acusa un cricetor bangla de tortura sua servor
@L aora_oji/2015/on_acusa_un_cricetor_bangla_de_tortura_sua_servor
====== On acusa un cricetor bangla de tortura sua servor ======
30 desembre 2015
La polisia en Bangladex ia acusa ce la cricetor Shahadat Hossain e sua sposa ia tortura sua servor pasada de casa, un xica de 11 anios.
Si on judi ce los es culpable, la duple risca periodos longa en prison. Los es aora libre su cautia, e los nega acusas de emplea e ataca un minor.
La paje de acusas cual la polisia ia presenta a la corte en Dhaka dise ce la duple ia tortura fisical la enfante.
La Comite de Criceta de Bangladex ia suspende ja la lansor rapida de bal.
La caso va es oiada a 12 janero.
La xica, Mahfuza Akhter Happy, ia es trovada en un strada de Dhaka en setembre con feris multiple, incluinte un gama rompeda e contusas sirca un oio.
El ia informa la polisia ce el ia labora per la duple tra un anio e ce los ia bate e tortura el.
La acusas es fada su leges desiniada per proteje femes e enfantes de viole familial.
La cricetor e sua sposa, Jasmine Jahan Nritto Shahadat, ta pote es prisonida per 7 e 14 anios, e ta pote es ance multada.
Hossain ia presenta se a la polisia en 5 otobre. El ia vade inisial a la polisia a 6 setembre, declarante ce sua servor de casa ia asenti sin permete.
@T On aresta australianes sur alegas de terorisme intendeda
@L aora_oji/2015/on_aresta_australianes_sur_alegas_de_terorisme_intendeda
====== On aresta australianes sur alegas de terorisme intendeda ======
18 april 2015
La polisia en Australia dise ce los ia preveni un conspira per fa un ataca a un aveni per onora la aniversario sento de la Gera Mundal Prima.
On ia aresta sinco suspetadas, incluinte du omes de 18 anios ci on teni per ofendes alegada con relata a terorisme.
On ia dise ce la suspetadas ia intende ataca la polisia a un aveni de recorda en Melbourne en la semana veninte.
Sirca 200 polisiores ia partisipa en la opera contrateroriste en la site, temprana oji.
La indicas colieda par la polisia ia sujesta ce la suspetadas ia deveni influeda par la Stato Islamiste.
Un om tre, ance con 18 anios, ia es arestada per posese nonlegal un arma. Du otra adolesentes arestada, con 18 e 19 anios, es interogada par la polisia..
Ofisiores ia refere a atacas posible con "armas agu", ma la viscomisionor de polisia ia dise ce on ave no indica cual sujesta "un destesti intendeda".
La dia de ANZAC (Corpo de Armada de Australia e Zeland Nova) es un dia anial de recorda soldatos de acel du paises.
On projeta un serie de avenis per la semana veninte, a la aniversario sento de la ateras aliada sur la penisola Gelibolu (Gallipoli) per securi la streta Dardanelos.
La polisia ia dise ce, an si los mesma ia es la blanco xef de la conspira alegada en Melbourne, un menasa ia esiste ance a la popla jeneral.
On continua xerca a alga adirijes en la sude-este de la site.
Australia ia aumenta sua nivel de menasa a "alta" en setembre 2014, e ia fa alga atacas contrateroriste pos alora.
@T On completi la seguensa de jenom de mamute
@L aora_oji/2015/on_completi_la_seguensa_de_jenom_de_mamute
====== On completi la seguensa de jenom de mamute ======
24 april 2015
Un grupo internasional de siensistes ia seguensa la jenom intera de la mamute lanosa.
E un ecipo en la SUA atenta ja studia la cualias de la animales par introdui jenes de mamute en selulas madrin de elefantes. Los vole descovre como mamutes ia difere de sua relatadas moderna, e como sua ajustas ia aida los a survive la edas glasial.
Dotor Love Dalén a la Museo Svensce de Istoria Natural en Stockholm ia dise ce la publici prima de la ADN intera de la mamute pote aida los ci atenta revive la animal.
"En prinsipe," el ia comenta, "vide un mamute vivente ta es multe divertinte, per persepi como lo condui e como lo move." Ma el prefere ce on no usa sua rexercas per esta. "Lo pare a me ce lo ta gida cisa a sufris per elefantes fema, e esta no ta es etical justable."
Dalén e la rexercores internasional con ci el colabora no atenta revive la mamute. Ma Long Now Foundation (la Funda de Presente Longa), un organiza en San Francisco, ia anunsia ce lo fa esta.
En se loca de rede, la fonda dise ce sua gol ultima es "produi mamutes nova cual es capas de repopli la estendes vasta de tundra e taiga en Eurasia e America Norde."
"La gol no es crea copias perfeta de mamutes lanosa estinguida, ma consentra sur la ajustas de mamute nesesada afin elefantes asian pote vive en la clima fria de la tundra."
La fonda suporta un ecipo a la Universia de Harvard cual usa tecnicas de injenia jenetical per introdui jenes de mamute en selulas vivente de elefantes. La ecipo dise ce lo ia pone ja jenes relatada con sangue, gras, e capeles en selulas madrin de elefantes per studia la efetos de esta jenes.
La rexercores espera produi selulas roja de sangue per vide cuanto osijen los ia porta, e en esta modo aprende plu sur la fisiolojia de la animales.
La fonda dise ce lo intende introdui materia jenetical de mamute, artifisial creada, en un ovo de elefante, cual los ta pone alora en un elefante de zo. Lo crede ce atentas de clone va pote comensa ja en 2018.
Ma multe espertas opina ce ostaculos major esiste contra la tal crea de un mamute. Entre los es profesor Beth Shapiro de la Universia de California, ci ia scrive un libro nomida La modo de clone un mamute.
El ia dise: "Un difere enorme esiste entre un selula vivente en un plateta en un laboreria siensal, con alga cambias de jenom, e un animal vivente ci es alga mamutin. On ta debe usa acel selula per crea un embrio, move la embrio a un madre ospitante, e institui un ensintia e espera ce acel ensintia va susede."
Shapiro oposa lo cual spesialistes nomi la "desestingui de mamutes".
"Elefantes no vade bon en prisonia. Los luta con la reprodui aidada, e on debe permete ce los crea plu elefantes. Plu, elefantes es animales estrema sosial, e on ave no razona per suspeta ce esta no ia es vera ance per mamutes. Un mamute ta es solitar en la mundo. On no ta pote relasa lo a la libria de la Artica ante ave multe de los. E asta cuando nos pote crea multe mamutes sin usa elefantes, en mea opina lo es etical mal."
Dalén e sua colaborores ia seguensa la jenom de mamute per aprende plu sur lo cual ia aveni cuando la animal ia deveni estinguida a sirca 4000 anios ante aora, sur la Isola Wrangel de Rusia.
Los ia compara la ADN de un de la animales final ci ia vive ala con un ci ia vive a 45 mil anios ante oji, cuando mamutes ia es plu comun. La esta studia ia mostra ce la cuantia de mamutes sur la isola ia es tan peti ce la animales ia deveni endogama en la 5000 anios final de sua esiste.
Dalén no pote dise serta ce la endogamia ia es la causa o ia contribui a la mori ultima, car lo no ave sempre un efeto negativa. Ma el dise ce sua studia leva esta como un posible clar.
La datos jenetical ia mostra ance un diminui en la cuantia de mamutes a 300 mil anios ante oji.
"Esta ia surprende multe nos," Dalén ia dise. "Lo ia aveni ante cuando umanas moderna ia es en acel area, e nos no es intera serta sur la causa. Un divina probable es ce lo ia es causada par un cambia istorial de clima."
@T On condena la bombor de Boston a mori
@L aora_oji/2015/on_condena_la_bombor_de_boston_a_mori
====== On condena la bombor de Boston a mori ======
16 maio 2015
En la SUA, un juria ia condena Dzhokhar Tsarnaev, la bombor de Bostono, a mori par injeta.
Tre persones ia es matada, e 260 ia es ferida, pos cuando Tsarnaev e sua frate ia pone bombas a la fini de la Maraton de Boston en 2013.
Lo es probable ce on va move Tsarnaev, ci ave aora 21 anios, a un prison federal en Indiana ante sua esecuta, ma cisa anios de apelas va segue.
Vitimes ia plora a la leje de la puni, ma Tsarnaev is mostra no emosia.
"Aora el va vade a via e nos pote progresa. Justia. En sua propre parolas, «un oio per un oio»," Sydney Corcoran ia dise, ci ia sangui cuasi a mori, e de ci sua madre ia perde ambos sua gamas en la bombi.
Pos 14 oras de discutes, la juria ia conclui ce Tsarnaev ia mostra no repenti e ce on debe donce esecuta el.
On ia judi en la mense pasada ce el es culpable de aida reali la ataca, e ance de mata un polisior par fusil.
Como stato, Massachusetts ia abandona la puni de mori en 1984, ma on ia prosede Tsarnaev sur crimines federal, con resulta ce sua esecuta ia es permetable.
Pos la anunsia de la condena, Lorreta Lynch, la avocato jeneral SUA, ia dise: "La puni ultima es un puni conveninte per esta crimin xocante, e nos espera ce la completi de esta prosede va clui a alga mesura la situa per la vitimes e sua familias."
Ma no tota la vitimes ia suporta la puni de moria per Tsarnaev.
La jenitores de Martin Richard, un xico de oto anios ci ia es matada en la esplode, ia scrive un article en un jornal en april, demandante ce la governa no xerca un puni de moria, car esta ta pospone sua reposa emosial.
Jornalistes ia telefoni ier a Anzor Tsarnaev, la padre de la bombor, en la area Dagestan en Rusia. Pos oia la condena, el ia jemi e descomuta.
En la prosede, la ecipo defendente Tsarnaev ia confesa ce el ia fa un rol en la atacas, ma los ia dise ce la motor vera ia es sua frate plu vea, Tamerlan, ci la polisia ia fusili.
Avocatos ia asentua ance sua vive temprana difisil. La familia Tsarnaev -- etnical txetxen -- ia vive en Cirgistan e Dagestan, prosima a Txetxnia. Los ia move a la SUA en 2002.
Ma la acusores ia razona ce Dzokhar Tsarnaev ia es un partisipor egal en la ataca, mostrante a la juria un mesaje cual el ia scrive sur la barco do on ia aresta el: "Sesa mata nosa nonculpables e nos va sesa."
@T On critica la ministro xef de Canada sur sua enfantores
@L aora_oji/2015/on_critica_la_ministro_xef_de_canada_sur_sua_enfantores
====== On critica la ministro xef de Canada sur sua enfantores ======
3 desembre 2015
On acusa Justin Trudeau, la ministro xef de Canada, de ipocritia pos revela ce el usa mone publica per paia a enfantores per atende sua enfantes.
En sua campania political, el ia critica la disposa de la partito conserviste a suportas finansial per eleva enfantes. El ia razona ce familias rica no nesesa es aidada par paiores de imposta.
Du enfantores ia es empleada como "aidores spesial" a la casa de la ministro xef, seguente la regulas en la Ata de Abitadas Ofisial.
La postos ia es aprobada par la consilio en la semana pasada, ma on va paia a la enfantores per sua labora de 4 novembre -- la dia cuando Trudeau e sua consilio ia es induida.
Lisa Raitt, un membro de la partito, ia descrive la usa de enfantores como "ipocrita" e ia dise ce la postos debe es finansiada par la salario de Trudeau.
Trudeau ia oposa la foca par la conservistes a tal suportas finansial. Campaniante, el ia dise: "En esta eda, la taxe prima de Senior Harper [la ministro xef presedente] es dona $2000 a familias rica como lo de el e lo de me. Nos no nesesa esta. E Canada no pote tolera la spende."
La enfantores va reseta entre $15 e $20 per ora per turnos de dia, e entre $11 e $13 per seras.
Un portavose per Trudeau ia dise: "Como per tota familias de ministros xef, un cuantia peti de empleadas furni aida. Considerante la natur de la encargas de la ministro xef e sua familia joven, la Trudeaus emplea du servores de casa ci, en ajunta a fa otra taxes sirca la casa, funsiona como atendores suordinada a la tre enfantes."
La sesion 7.1 de la Ata de Abitadas Ofisial dise ce "un manejor de casa e otra tal empleadas" pote es usada per maneja la casa de la ministro xef si on opina ce esta es nesesada.
Trudeau ave ance la direto de reseta sirca $3400 como parte de la suporta universal de Canada per eleva enfantes, ma el ia dise ce esta mone va es donada a un asosia carital.
@T On descovre multe armas ascondeda en Barain
@L aora_oji/2015/on_descovre_multe_armas_ascondeda_en_barain
====== On descovre multe armas ascondeda en Barain ======
1 otobre 2015
En Barain, on ia descovre un de la reservas la plu grande de esplodentes e armas de pos la comensa de violentia ala en 2011.
La polisia dise ce 1,4 tones de esplodentes de grado alta ia es trovada en un sala suteran securida a sude de Manama, la capital. On ia trova ance fusiles e granadas de mano.
Barain ia esperia un turba de grado basa de pos la protestas de la Primavera Arabi. On ia acusa la governa de maltratas de diretos umana, ma rebelores ia ataca resente la polisia.
La ministreria de internas ia informa ce la materia ia es saisida en la distrito Nuwaidrat e ia conforma con trasas de esplodente trovada a un serie de atacas resente.
"La compleso ia es ajustada per conteni un rede complicada de bunceres suteran ascondeda e un opera fabricante a la surfas," la declara ia dise.
La polisia ia comenta ce los ia fa "un cuantia" de arestas, sin dona detalias.
La xef de polisia ia dise ce on ia descovre un fabriceria con macinas per crea bombetas e otra bombas, e ce on ia porta un cuantia grande de atestas dijital a via per analise.
El ia dise ce la esecutores es liada a grupos en Iran e Irac e ce lo pare ce la construi de la compleso ia ocupa menses. Iran ia nega tota envolve en la violentia baraini.
La majoria de la popla de Barain es xia, e ia solisita de la monarcia suni un representa political plu grande tra tempo longa.
@T On descovre un particula suatomal nova
@L aora_oji/2015/on_descovre_un_particula_suatomal_nova
====== On descovre un particula suatomal nova ======
15 julio 2015
Siensistes a la Colidador Grande de Adrones ("Large Hadron Collider" o LHC) ia anunsia la descovre de un particula nova nomida la pentacuarc.
On ia previde la esiste de esta particula en la desenio de 1960 ma, simil a la boson de Higgs a ante, la pentacuarc ia asconde se asta sua deteta par la LHC.
En 1964, du fisicistes -- Murray Gell-Mann e George Zweig -- ia proposa separada la esiste de la particulas suatomal cual on nomi aora cuarces. Los ia teori ce la esplica la plu bon per la cualias xef de bariones e mesones es ce los es composada de otra particulas plu peti. Zweig ia proba la nom "as" per la composantes ipoteseda, ma la nom "cuarc", sujestada par Gell-Mann, ia gania.
Esta model ia permete ance otra organizas de cuarces, como la pentacuarc. Alora intera teorial, esta particula ia es composada de cuatro cuarces e un anticuarc (un cuarc de antimateria).
En la media de la desenio de 2000, alga ecipos ia declara ce los ia deteta pentacuarces, ma sua descovres ia es suminada par otra rexercas a pos.
Esperimentas presedente ia mesura sola la distribui de masa, en cual un apico statistical pote apare contra la "ruido" fondal, indicante cisa la presentia de un particula nova. La LHC ia permete ce rexercores regarda la datos de perspetivas ajuntada, pd. la cuatro angulos definida par la dirijes diversa de viaja de particulas en la aselerador.
Un portavose ia dise: "La pentacuarc no es mera un particula nova. Lo representa un modo de agrega cuarces, cual es la composantes fundal de protones e neutrones comun, en un manera cual on ia oserva nunca a ante en plu ca sincodes anios de xercas esperimental."
On ia recomuta la LHC en april, pos un pausa de du anios per reali un program de reparas e renovis.
@T On fali acorda sur la deta de Elas
@L aora_oji/2015/on_fali_acorda_sur_la_deta_de_elas
====== On fali acorda sur la deta de Elas ======
12 febrero 2015
Ofisiores de Elas e la Eurozona ia fali acorda sur la crise de deta elinica. An tal, ambos lados ia dise ce on espera ancora ateni un acorda.
Sete oras de discutes en Bruxelles ia fini sin un declara juntada per resoma la pasos seguente. La discutes va continua en lundi.
Elas dise ce sua acorda presente con la Uni European es un puni, e debe sesa. La UE ia averti ce Elas debe onora la acorda.
La governa elinica, gidada par la partito sinistra Syriza, opina ce la restrinjes de la acorda, cual ia presta €240 mil milion a la pais, ia povri ance lo.
La governa ia proposa revisa 30% de sua obligas acordada, sustituinte un scema de des reformis per los.
Ma la creditores de Elas en la UE, gidada par Deutxland, insiste ce on no pote cambia la acorda.
Ofisiores de ambos lados ia fa negosias con intende de reali un acorda nova sur la repaia de deta, per distanti la posible ce la pais va sorti de la Eurozona. La mercatos teme acel sorti.
Jeroen Dijsselbloem, la presidente de la Eurogrupo (de ministros de finansia en la Eurozona), ia clari: "Nos ia fa un discute intensa, construosa, esplorante multe temas, ance progresante, ma ancora no sufisinte per ariva a concluis juntada."
Yanis Varoufakis, la ministro de finansia elinica, ia comenta ce la oras de negosia en Bruxelles ia produi "discutes multe bon".
On dise ce la elinicas ia rejeta un acorda proposada par la Eurogrupo cual ia sujesta estende la acorda presente. Acel acorda va desvalidi a la fini de esta mense.
La governa elinica xerca un "acorda de ponte" cual va permete ce lo resta nonpaiante asta cuando lo pote reali un projeta nova de reformis tra cuatro anios con sua creditores.
A mercurdi, miles de protestores de politica sinistra ia asembla en Atina per suporta la proposa de sua governa.
@T On ia repara la danas a la santeria tai bombida
@L aora_oji/2015/on_ia_repara_la_danas_a_la_santeria_tai_bombida
====== On ia repara la danas a la santeria tai bombida ======
4 setembre 2015
Artistes en Bangkok ia repara danas causada a la sculta a la Santeria Erawan par un ataca matante de bomba en agosto.
La ojeto sentral de la santeria es un sculta de la dio indu Brahma con cuatro fases. Lo ia es danada en 12 locas a la min, la plu evidente a la mento de un de la fases.
La santeria es ance regardada como santa par budistes tai, e lo atrae multe visitores stranjer.
Adorores e soldatos tai ia es presente a la desveli de la sculta reparada ier.
La reparas ia es esecutada par la departe de artes bela de la ministreria cultural.
A la rituo de desveli, Vira Rojpojchanarat, la ministro de cultur, ia dise ce la sculta va aida "crea fida e leva la bonstate de la popla e turistes en Tai".
Persones ia continua visita la santeria de cuando lo ia reabri a un tempo corta pos la esplode de bomba a 17 agosto.
On teni du persones en relata con la esplode. Ambos es stranjer. On ia comanda ance la aresta de alga persones. Ma no individua o grupo ia declara ja se como culpable.
@T On identifia un enfante arjentina furada en 1978
@L aora_oji/2015/on_identifia_un_enfante_arjentina_furada_en_1978
====== On identifia un enfante arjentina furada en 1978 ======
1 setembre 2015
Campaniores en Arjentina ia identifia un plu enfante furada de prisonidas political sinistriste en la rena militar entre 1976 e 1983.
La grupo Avas de la Plaza de Maio dise ce esaminas de ADN confirma ce la fem, aora en sua desenio cuatro, es la fia de ativistes comuniste saisida en 1977.
Sua madre ia pari el en prison, e ambos sua jenitores biolojial ia es nunca revideda.
La organiza dise ce plu ca 400 otras resta ancora per trova.
Grupos de diretos umana dise ce la saisi de bebes ia es un parte de un scema sistemosa par la governa. La intende ia es dona la enfantes de persones regardada par la governa como rebelores a familias militar e aliadas, per evita eleva un plu jenera de -- en la opina de la renores militar -- estremistes sinistriste.
En esta caso, la fem es la enfante de Walter Dominguez e Gladys Castro, ci ia abita en Mendoza, un site norde. Ambos ia es membros de la partito comuniste-marxiste-leniniste de Arjentina.
Los ia es arestada en sua casa e prendeda a via par persones sur ci la visinas ia crede ce los es polisiores.
Gladys Castro ia es ensinta de ses menses a la tempo de sua saisi. El ia pari en 1978.
La Avas de la Plaza de Maio ia es fundida en 1977 con gol de trova tal enfantes furada e nonlegal adotada.
@T On investiga ancora la cade de la avion rusce
@L aora_oji/2015/on_investiga_ancora_la_cade_de_la_avion_rusce
====== On investiga ancora la cade de la avion rusce ======
8 novembre 2015
La xef egiptian de la ecipo internasional ci investiga la cade de un avion rusce en Sina ia dise ce lo es tro temprana per identifia la causa. Ayman al-Muqaddam ia dise ce on considera ancora tota posibles.
A venerdi, ofisiores franses ia sujesta ce la asidente ia es causada par un esplode violente.
La Airbus 321 ia cade a la Penisola de Sina a 31 otobre, matante tota de la 224 persones portada, corta pos enaira de la vacanseria Sharm el-Sheikh.
Plu temprana a saturdi, la ministro egiptian de esternas, Sameh Shoukry, ia critica ce alga paises nonidentifiada ia fali comparti informas pertinente con Egipte. El ia comenta ce Egipte "ia previde ce la informas furnida a nivel tecnical va es furnida a nos, en loca de deveni publicida a jornalistes en esta manera abrida."
La SUA e la Rena Unida ia dise ce informas indica forte la posible ce la causa ia es un bomba. La Rena Unida ia para volas a Sharm el-Sheikh e retrae sua sitadanes.
Shoukry ia critica ance un fali de colabora en combate terorisme, acusante alga paises de "consentra a sua propre interesas" e suestimante la defias cual fronti Egipte. Ma John Casson, la ambasador de la Rena Unida a Egipte, ia responde ce el mesma ia es en contata prosima con la governa egiptian, revelante tota informas e esplicante la razonas per la desides.
Muqaddam ia confirma reportas ce on ia oia un ruido en la secondo final de la sona caturada par la rejistrador de voses de pilote, ma ia dise ce on debe ancora fa un analise spetral de la sona.
La plu de la vitimes de la asidente ia es rusce. Rusia ia dise a venerdi ce lo suspende volas a la intera de Egipte e recomenda ce sua vacansores -- en cuantia de 80 mil -- reveni a Rusia. Arkady Dvorkovich, la ministro xef suordinada, ia dise ier ce des aviones portante rusces reveninte ia parti ja de Egipte.
Ativistes conoseda como Provinse Sina, e liada a la grupo Stato Islamiste, ia dise ce los ia cade la avion, ma no ia revela como. Stato Islamiste ia recomenda un gera contra ambos Rusia e la SUA par causa de sua atacas airal en Suria.
Un compania difusante en la SUA ia dise a venerdi ce on ia intersepi comunicas entre ofisiores de Stato Islamiste en Suria en persones en Sina sur la cade de la avion. Lo ia sita un ofisior SUA, sin nomi el, ci ia dise: "Los ia selebra clar."
La envolve de Stato Islamiste en la cade ta cambia multe la nivel de menasa presentada par lo e sua partenores.
@T On investiga perce un copilote ia cade sua avion
@L aora_oji/2015/on_investiga_perce_un_copilote_ia_cade_sua_avion
====== On investiga perce un copilote ia cade sua avion ======
27 marto 2015
La polisia deutx ia saisi ojetos parteninte a la copilote ci, parente, ia xoca sua avion en la Alpes franses a martedi, matante tota 150 pasajores e ecipores.
Datos de la rejistravose de la avion sujesta ce Andreas Lubitz ia ata con intende en comensa un desende en cuando la pilote xef ia es escluida de la piloteria.
Alga airocompanias ia promete cambia sua regulas per serti ce a la min du ecipores es sempre presente en la piloteria.
Polisiores ia esplora la aparte de Lubitz en Düsseldorf e la casa cual el ia comparti con sua jenitores en Montabaur, a norde de Frankfurt.
Los ia porta a via alga ojetos, incluinte caxas e un computador, de ambos locas.
Un portavose ia dise: "Nos ia trova un cosa cual nos va esamina atendente. Nos no pote ja dise cual lo es, ma lo es cisa un indica multe importante sur la aveni."
Alga reportas en Deutxland, nonconfirmada, dise ce Lubitz ia sufri de depresa, ma polisiores ia dise ce la cosa descovreda no es un nota de suiside.
Entretempo, ofisiores de la governa deutx ia clari ce Lubitz no es conoseda a la servis de securia de la pais.
Plu temprana, Carsten Spohr, la xef de Lufthansa, ia dise ce la copilote ia pasa tra instruis intensa e ia "conveni a 100% per vola sin restrinjes".
El ia dise ce la instrui a Lubitz ia es interompeda per alga menses a ses anios ante aora, ma el no ia clari la razona. La instrui ia recomensa pos cuando "on ia redetermina ce la aspiror conveni".
Ier, Brice Robin, un avocato prosedente de Marseille, ia dise ce la copilote ia pare desira "destrui la avion". Sitante informas de la rejistravose, el ia dise ce Lubitz ia es solitar en la piloteria en la minutos ante la cade.
El ia dise ce on oia "un silentia asoluta en la piloteria" en cuando la pilote xef luta per reentra a lo.
Controlores de trafica airal ia fa multe atentas de contata la avion, ma sin susede.
Robin ia ajunta ce la pasajores no ia es consensa de la problem "ante la momento ultima", cuando crias es oiada. Los ia mori direta.
@T On investiga un mata coletiva en California
@L aora_oji/2015/on_investiga_un_mata_coletiva_en_california
====== On investiga un mata coletiva en California ======
5 desembre 2015
En la SUA, avocatos representante la familia de du atacores ci ia mata 14 persones e ia feri 21 otras en California a mercurdi ia dise ce la relatadas es "en xoca completa" sur la fusilis.
Los ia clari ce la familia ia ave no idea ce Syed Rizwan Farook e sua sposa, Tashfeen Malik, es capas de un tal ataca.
La avocatos ia averti contra concluis rapida pos un comenta plu temprana par la FBI ce on investiga la ataca como "un ata de terorisme".
Malik, de 27 anios, e sua sposo Farook, de 28 anios, ia mori fusilida par la polisia pos la matas en San Bernardino, un site de California sude, a este de Los Angeles.
La avocatos ia dise ce no indica esiste ce la duple ia ave opinas estremiste o ia es membros de un grupo combatosa.
La sore de Farook, Saira Khan, ia comenta: "Me pote nunca imajina ce mea frate o mea sore par sposi ta fa un tal cosa, spesial car los ia es felis sposida. Los ia ave un fia bela de de ses menses."
On reporta ce Farook ia es un individua isolida con poca amis, e la familia de Malik ia descrive el como un fem "curante, de vose cuieta".
Seguente la avocatos, Malik ia es multe tradisional. El no ia gida un auto, no ia interata con membros mas de familia, e ia porta un burca.
La familia ia sabe ce Farook posese du fusiles de mano, e ia dise ce colaborores ia burla resente sua barba.
En responde a la ataca, The New York Times ia publici un article de opina par sua editor sur la debate de fusiles, a la paje fronte de sua numero de oji. Esta es la ves prima, pos 1920, a cual un article de opina ia apare a la paje prima de acel jornal.
La article ia dise: "Lo es un scandal moral e un desonora nasional ce siviles pote legal compra armas desiniada per mata persones con rapidia e nonperosia savaje. La xefes elejeda de America ofre preas per vitimes de fusil, e alora, calosa e sin teme de efeto, rejeta la restrinjes la plu fundal sur armas de mata coletiva."
James Comey, la dirijor de la FBI (Departe Federal de Investiga) ia dise ier ce la investiga fa sua pasos temprana e ce on ave ancora "multe indicas cual no es lojical".
El ia ajunta ce on ave indicas ce la duple ia deveni estremida e ce los ia es "posible inspirada" par grupos stranjer teroriste. An tal, el ia dise ce no atesta sujesta ce los ia es un parte de un rede.
Plu temprana, un portavose per la FBI ia dise ce on esplora ance reportas ce Malik ia promete sua fida a la organiza Daex. On reporta ce, su un otra nom, el ia posta un mesaje a Facebook per suporta Abu Bakr al-Baghdadi, la xef de Daex. On ia sutrae la posta.
Pos la ataca a mercurdi a un departe de servis sosial, on ia trova aparatos de bomba, armas, e miles de cartuxes en la casa de la du atacores.
@T On lamenta la vitimes de un teratrema en Malaisia
@L aora_oji/2015/on_lamenta_la_vitimes_de_un_teratrema_en_malaisia
====== On lamenta la vitimes de un teratrema en Malaisia ======
8 junio 2015
En Singapor e la state Sabah en este de Malaisia, on fa un dia un lamenta per la persones matada en un teratrema a Monte Kinabalu.
Des-ses persones ia mori pos la trema de grandia 6.0, cual ia colpa la monte en Sabah a venerdi.
Entre la mores es ses enfantes singapor e sua ensenior e gidor, ci ia fa un viaja instrual.
En Singapor, banderas es partal basida, e on ia silenti per un minuto a la locas de la Juas de Asia Sude-Este, cual la site-stato ospita.
A la fini de semana, Joseph Pairin Kitingan, la visministro xef de Sabah, ia relata la teratrema con un grupo de des stranjeres ci ia nudi se sur Monte Kinabalu.
El ia dise ce la trajedia es "un confirma" ce los ia mostra "desrespeta" a la monte. "Lo es un monte santa e on no pote trata nonseria lo."
Autoriosas ia identifia alga de acel turistes e ia comanda ce ofisiores de frontera vijila masima per la caso ce los atenta parti de Sabah.
Kinabalu es un de la montes la plu alta de Asia sude-este e un destina popular per paseores.
Cuando la teratrema ia aveni en la temprana de venerdi, persones de Japan, Xina, Tai, Turcia, la Pilipinas, la Rena Unida, e la Statos Unida ia es sur la monte. On reporta ce un turiste japanes e un xines ia es matada.
Plu ca 130 persones ia es salvada o ia evade. Multe ia debe trova mesma un via de desende, con aida de gardaforestas e gidores de turistes.
La teratrema ia aveni a profondia de 10 cilometres, con episentro a 54 cilometres de Kinabalu, cual ave 4095 metres de altia.
Lo ia es tan potiosa ce lo ia destrui un de la du formis de roca nomida "oreas de asino" a la culmina de la monte. Lo ia dana ance stradas e construidas, incluinte scolas e un ospital a la costa ueste de Sabah.
@T On leje un libro antica rolada par raios X
@L aora_oji/2015/on_leje_un_libro_antica_rolada_par_raios_x
====== On leje un libro antica rolada par raios X ======
21 janero 2015
A la ves prima, on ia leje parolas de un libro rolada cual ia deveni ardeda e enterada par Monte Vesuvio en la anio 79 EC.
La roladas de Herculaneo, la sola biblioteca clasica ancora esisente, ia es colpada par gas volcanal con temperatur de plu ca 300°C, e los es estrema frajil.
A la interna profonda de un de la roladas, fisicistes ia susede distingui la inca e la paper, par un tecnica radiografial usada en scanes de seno.
On crede ce otra roladas pote es simil desifrida sin desrola los.
La vila Herculaneo, nomida "la otra Pompei" a veses, ia es enterada su sene par la volcan. En la sentenio 18, on ia escava un biblioteca notable de roladas en un de sua casas.
Atentas presedente de leje los, tra multe desenios, ia envolve stratejias spesial per desmarania tan delicata como posible la roladas.
An si on ia susede leje alga fratos desrolada, xef en anios resente con aida de cameras infraroja, on ia abandona final tal atentas de desrola car los destrui tro multe la roladas.
Otra atentas de regarda la internas, par usa de tomografia de computador, ia revela la forma de la stratos antica e enrolada, ma ia desifri nunca sua contenidas.
Aora en Italia, un ecipo gidada par dotor Vito Mocella de un instituida de eletronica en Napoli ia identifia un cuantia peti de leteras elinica a interna de un de la roladas a la ves prima.
La radiografia tradisional mesura simple la cuantia de raios X cual permea partes diversa de un ojeto. Ma la metodo nova usa la fato ce raios X pasante tra un ojeto deveni retardada -- la fase de sua ondas cambia.
An varias pico en la composa de la ojeto afeta acel cambia, donce par mesura esta "contrasta de fase" on pote produi un imaje multe detaliosa, en tre dimensiones, de la strutur interna.
@T On prisoni la dama prima pasada de Costa Ivor
@L aora_oji/2015/on_prisoni_la_dama_prima_pasada_de_costa_ivor
====== On prisoni la dama prima pasada de Costa Ivor ======
10 marto 2015
Simone Gbagbo, la sposa de la presidente pasada de Costa Ivor, ia es condenada a 20 anios en prison per sua rol en la violentia cual ia segue un vota en 2010.
Gbagbo, ci ave 65 anios, ia es acusada de sumina la securia de la stato.
Sua sposo, Laurent Gbagbo, va es prosededa a la Corte Criminal Internasional.
Plu ca 3000 persones ia mori en la violentia pos la eleje presidental, cuando la gidor pasada ia refusa aseta sua defeta par Alassane Ouattara.
On ia aresta la duple en 2011, cuando soldatos ia ataca un buncer cual ia refuja los en Abidjan, la site xef.
Gbagbo, nomida "la Dama de Fero" a ves pasada, ia es prosededa en Abidjan. On ia acusa el ance de disturba la ordina publica e de organiza ganges armada.
La corte ia es en acorda unida sur sua condena de 20 anios, la duple de la tempo cual la avocatos prosedente ia demanda. Sua propre avocato ia dise ce los va apela.
Laurent Gbagbo va es prosededa sur cuatro alegas a la CCI en Den Haag, incluinte omiside, viole sesal, e persegue.
La Corte Criminal Internasional ia atenta aresta ance Simone Gbagbo, ma esta demanda ia es refusada par la governa ivorian.
@T On prisoni polisiores afgani per no preveni la mata de un fem
@L aora_oji/2015/on_prisoni_polisiores_afgani_per_no_preveni_la_mata_de_un_fem
====== On prisoni polisiores afgani per no preveni la mata de un fem ======
19 maio 2015
On ia condena des-un polisiores afgani a un anio en prison per fali proteje un fem matada en Kabul en marto.
Farkhunda Malikzada, un fem de 28 anios, ia es bateda a moria pos es acusada de arde un copia de la Curan, an si atestores dise ce el no ia fa esta.
Plu temprana en esta mense, on ia condena cuatro omes a mori per la mata, e oto otras a periodos en prison.
La aveni ia provoca multe protestas contra la trata de femes.
Oto otra polisiores acusada en la caso ia es remeteda oji.
Farkhunda ia disputa con un vendor sur sua pratica de vende joalas majiosa a femes a la santeria Shah-Do Shamshira, cual es prosima a la palasio presidental e la bazar xef de Kabul.
La vendor ia es un de los ci on ia condena a mori plu temprana en esta mense.
En la curso de la disputa, Farkhunda ia es acusada de arde la Curan. Un fola ia oia esta e ia ataca el. En declaras lejeda en corte, alga de la acusadas ia confesa ce los ia es saisida par la alega.
Un investigor ofisial ia dise ce no atesta esiste ce el ia arde la Curan.
@T On puni Volkswagen per asconde niveles de contamina
@L aora_oji/2015/on_puni_volkswagen_per_asconde_niveles_de_contamina
====== On puni Volkswagen per asconde niveles de contamina ======
19 setembre 2015
En la SUA, regulores ia comanda ce Volkswagen retira un dui de milion autos cual conteni un aparato per desembla niveles de contamina airal.
La "aparato vinsente" permete ce autos susede en probas siensal an si los emete vera la cuatrodesuple de la cuantia permeteda de sustantias contaminante.
La Departe de Proteje Ambiental ia adota un disposa plu atacante contra contamina par autos e contra violes de la Ata per Aira Limpa de la pais.
La retira pote custa asta 18 mil milion dolares a la compania fabricante de autos. Lo afeta Jettas, Beetles, Audi A3s e Golfes de entre 2009 e 2014, e ance Passates de pos 2014.
Un portavose per la Ofisia de Enforsa e Serti de Obedi ia comenta: "La usa de un aparato vinsente en autos per evade normas de aira limpa es nonlegal e lo menasa la sania publica."
La sistem nonlegal ia permete ce autos deteta cuando los esperia un proba de emetes, e ia basi la cuantia de contaminantes emeteda. Esta ia es alora descomutada en la usa comun.
La stato California cual ia aida la investiga ia envia ance un avisa de viole a Volkswagen.
En 2014, la Departe de Proteje Ambiental ia multa du fabricores de autos corean (Hyundai e Kia) per malrepresenta la consuma de carburante en 1,2 milion de sua autos. Acel multa es la plu alta asta aora.
@T On recorda la xicas saisida en Nijeria a un anio ante aora
@L aora_oji/2015/on_recorda_la_xicas_saisida_en_nijeria_a_un_anio_ante_aora
====== On recorda la xicas saisida en Nijeria a un anio ante aora ======
14 april 2015
On va fa rituos tra la mundo per onora la aniversario de la saisi de plu ca 200 xicas par Boko Haram, un grupo islamiste combatosa en Nijeria.
Un prosegue va aveni en la capital, Abuja, con partisipa de 219 xicas per representa cada xica ci ia desapare.
On organiza prosegues simil en otra paises, incluinte en Washington e London.
A martedi, Amnestia Internasional ia dise ce 2000 xicas e femes ia es saisida de pos la comensa de la anio pasada, e obligada a deveni cosinores, combatores, o sclavos sesal. Lo ia fundi sua reporta sur cuasi 200 racontas par atestores, incluinte 28 femes e xicas ci ia evade sua prisonia.
La saisi de la xicas de un scola en Chibok en Nijeria norde-este a 14 april 2014 ia coleri la mundo, e nasiones como la SUA e Xina ia promete aida trova los. Ma asta aora, on no ia susede trova an un.
Campaniores ia critica la governa de Goodluck Jonathan, la presidente aora partinte, per no ata sufisinte per deteta la xicas e combate la rebela de ses anios par Boko Haram en la norde.
La presidente nova, Muhammadu Buhari ia promete "crase" la rebelores. On va inaugura el a 29 maio pos sua defeta de Jonathan en la eleje de la mense pasada.
@T On reinisia un reatador nucleal en Japan
@L aora_oji/2015/on_reinisia_un_reatador_nucleal_en_japan
====== On reinisia un reatador nucleal en Japan ======
11 agosto 2015
Japan ia reinisia un reatador nucleal, su regulas nova de securia, a la ves prima pos la desastre a Fukushima en 2011.
On ia descomuta gradal tota la complesos nucleal en la pais pos un serie de fondes a Fukushima, causada par un tsunami e trematera.
Pos susede en esaminas nova sever de securia, la Compania de Potia Eletrical de Kyushu ia reinisia la reatador xef a sua compleso en Sendai a esta matina.
Ma la popla jeneral es ancora multe noncalma sur la idea de revade a potia nucleal: ante la desastre a Fukushima, on ia dise ce un tal aveni es nonposible.
Protestas ia aveni estra la compleso de Sendai, e estra la abitada de la ministro xef Shinzo abe en Tokyo, a distantia de sirca mil cilometres.
25 otra complesos ia proposa se per reinisia, ma tota fronti defias legal de persones local.
Imajes televisada ia mostra la controleria de la compleso en cuando laborores ia recomuta la reatador. Un portavose per la compania ia dise ce on ia esperia no problemes.
Sirca 24 oras va pasa ante un reata completa aveni, e on previde ce la compleso va jenera potia a o ante venerdi. Lo va ateni sua capasia masima a alga tempo en la mense veninte.
Abe ia dise ier ce la reatadores ia susede pasa tra "la esamina de securia la plu sever de mundo".
Pos descomuta tota sua complesos nucleal, Japan ia depende de emporta combustables de fosil per oteni sua enerjia, a custa enorme. La governa ia dise ce on nesesa recomensa usa la potia nucleal per redui la custa de emporta e la emetes cresente de diosido de carbon.
Espertas ia averti ce cuando on reinisia un reatador nonusada tra alga anios, lo tende esperia problemes temprana. Los dise ance ce on ia atenta nunca un tal reinisia coletiva de reatadores dorminte.
La Autoriosa de Regula Nucleal de Japan ia aproba du reatadores a Sendai en setembre 2014, su la regulas nova. On intende reinisia la reatador du en otobre.
On ia spende plu ca $100 milion en ajunta sistemes nova de securia a la compleso de Sendai. Ma abitores local dise ce estas no sufisi. Los es ansiosa sur la peril posible de volcanes ativa en la area.
La protestores ia es asemblada par Naoto Kan, la ministro xef a la tempo de la crise de Fukushima, ci ia dise ce acel desastre "ia esposa la mito de la securia e baratia de potia nucleal, cual ia es final mostrada como perilosa e custosa."
Un trematera de la plu fortes de istoria rejistrada ia colpa prosima a la custa de Japan en marto 2011. Lo ia crea un tsunami vasta cual ia dana la compleso de Fukushima e ia causa un fonde nucleal.
Cuasi 16 mil persones ia mori, e plu ca 2500 es ancora listada como asente, an si no un de la moris ia es ofisial liada a la desastre.
160 mil persones ia es sortida de la areas ambiente en la semanas a pos, e la plu de los ia reveni nunca a sua casas par causa de la nivel continuante de radia alta.
@T On salva un marinor perdeda pos du menses
@L aora_oji/2015/on_salva_un_marinor_perdeda_pos_du_menses
====== On salva un marinor perdeda pos du menses ======
4 april 2015
On ia salva un marinor ci ia es perdeda a mar tra du menses. El ia survive par come pexes cru e bevi acua de pluve.
Louis Jordan veni de la SUA e ave 37 anios. El ia catura pexes par pone sua vestes en la acua.
El ia dise: "Final, Dio ia responde a mea preas, direta ante cuando me ia consuma mea gutas ultima de acua."
Sua barco de vela ia inversa, e ia es trovada par un barcon deutx a jovedi, a distantia de plu ca 300 cilometres de la costa de Carolina Norde.
Jordan ia sufri desidrata e un spala ferida.
La gardacosta ia espresa un surprende sur la bon state de la marinor, ma ave no razona per duta sua raconta.
El dise ce cuando la barco ia inversa a media de un note, el ia vade volante tra la aira.
Par causa de la feri a sua spala, el no ia pote repara sua masto rompeda, e sua sistemes eletronical de naviga ia resta nonusable.
Pos consuma tota sua comedas e bevidas, el ia colie acua de pluve, e ia ave ultima 25 galones. El ia bevi un otigalon de esta per dia.
Prima, el ia trova ce catura pexes es difisil, asta cuando el ia oserva ce los ia deveni atraeda a sua vestes cuando el ia pone los en la mar per lava los. Tal, usante un rede de mano, el ia susede oteni comedas.
Sua familia, ci ia reporta sua asentia a fini de janero pos cuando el ia vade per pexa, ia parla a el par telefon pos la salva.
Sua padre ia dise: "Me ia pensa ce me ia perde tu." En responde, Jordan ia demanda un pardona per no pote renaviga a casa.
La gardacosta ia transporta el de la barcon deutx par elicotor a un ospital en Virjinia. On ia desospitali el a la matina de venerdi.
@T On sesa xerca un barcon SUA mancante
@L aora_oji/2015/on_sesa_xerca_un_barcon_sua_mancante
====== On sesa xerca un barcon SUA mancante ======
8 otobre 2015
La gardacosta SUA ia abandona sua xerca per la barcon El Faro, cual ia afonda prosima a la Bahamas con 33 persones a sur.
La ecipores de la barcon de cargo, cual ia ave 224 metres de longia, ia manca pos envia un clama per aida.
Aviones xercante ia trova detrito cual inclui jacetas inflable, contenadores e petrolio en la acua, ma on ia recovre sola un corpo.
Lo no es clar perce la capitan ia deside gida sua barcon a acuas prosima a la siclon Joaquin.
La xerca ia fini ofisial a la reposa de sol a la sera de mercurdi. La xef de la gardacosta ia comenta: "Los ia fa tota cual los ia pote en esta taxe de xerca. Nosa ecipos e aviones ia vola repetente en acel tempesta."
On ia trova ance un barco de salva, vacua e grave danada.
La gardacosta ia xerca 70 mil milias maral cuadrida per atenta descovre la loca de la ecipo, cual ia es composada de 28 americanes e sinco polsces.
La barcon ia es en viaja de Florida a Porto Rica. Diseda par la clama per aida, acua ia entra a lo ante cuando lo ia afonda.
Tote Maritime, la compania cual posese la barcon, dise ce lo ia perde sua potia pos la rompe de sua motores. Lo ia envia du barcos a la sena, e ia trova un contenador "cual pare veni de El Faro".
La siclon ia trae pluves forte a la Bahamas, danante alga casas. La compania ia declara ce sua ecipo ia es "preparada per fronti tal situas como cambias de clima".
@T On sutrae un sculta colonialiste en Kaapstad
@L aora_oji/2015/on_sutrae_un_sculta_colonialiste_en_kaapstad
====== On sutrae un sculta colonialiste en Kaapstad ======
10 april 2015
En Sudafrica, la Universia de Kaapstad (Cape Town) ia sutrae un sculta de Cecil Rhodes, un colonialiste brites, cual ia deveni un foca de protestas.
La monumento ia es basida ante protestores aclamante, ma on va conserva ancora secur lo.
Studiantes ia campania per la sutrae de la sculta de la figur de la sentenio 19, cual on ia desveli en 1934. Otra monumentos a gidores de la eda colonial ia deveni ance focas per protestores en la pais.
Pos cuando la sculta ia es basida par gru, alga studiantes ia salta sur lo, ia bate lo con bastos de lenio, e ia covre la fas con plastica.
Esta ia es un vinse grande per sudafricanes negra ci es iritada par un manca de instruis e posibles de emplea, an a 20 anios pos la fini de apartait.
"Nos ia susede final senta la blancas afin los escuta nos," un studiante ci ia campania ia dise.
La fola ci ia regarda la basi ia es miscada, con multe profesores e studiantes blanca ci ia suporta ance la sutrae.
La protestores ia dise ce la sculta ave "un potia simbolin grande" cual glori algun "ci ia esplota la labora negra e ia fura tera de persones nativa".
La aveni intera indica ce Sudafrica nesesa fronti la problem de nonegalia razal. La Universia de Kaapstad ave sola sinco profesores negra ci ia nase en la pais.
La 30 membros de la comite de la universia ia vota a mercurdi per sutrae la sculta. Los ia esamina la opinas de studiantes, profesores, studiantes pasada, e la popla jeneral ante fa sua deside.
"Esta es esata la bon modo de funsiona per un universia, e nos crede ce lo es un model per la pais en fronti problemes de erita," la comite ia comenta.
La campania ia provoca atacas contra otra scultas en Sudafrica cual on persepi como representas de la pasada raziste de la pais.
Ma lo ia causa ance un contrareata, en cual alga sudafricanes blanca ia asembla per proteje la sculta de Paul Kruger, un presidente de la sentenio 19, en la capital, Pretoria, e de Jan van Riebeeck, un colonialiste de la sentenio 17 en Kaapstad.
@T On trova fratos de misil rusce a la loca de cade de MH17
@L aora_oji/2015/on_trova_fratos_de_misil_rusce_a_la_loca_de_cade_de_mh17
====== On trova fratos de misil rusce a la loca de cade de MH17 ======
12 agosto 2015
Investigores ia trova fratos de lo cual pare es un sistem de misil rusce a la loca en Ucraina do la avion MH17 cade. Los dise ce ce la partes, cisa de un sistem Buk de tera a aira, es "de interesa spesial" e pote aida descovre la causa de la cade. Ma los no ia demostra ce lo ojeto aora fratida ia es la causa.
MH17, un avion de Malaysia Airlines, ia cade sur tera ocupada par rebelores suportada par Rusia a 17 julio 2014, matante tota 298 viajores: 283 pasajores (incluinte 80 enfantes) e 15 ecipores. Sirca du tris de los ci ia mori ia es nederlandes, e deses de malaisianes e australianes ia es entre la otras.
Ucraina e multe paises ueste ia acusa ce rebelores prorusce ia tira la avion a tera, alegante ce los ia ave la capasia de usa un sistem Buk de misil, furnida par Rusia.
Rusia e la rebelores nega tota culpablia e culpa la militaria ucrainsce.
La investigores va es aora aidada par espertas de armas e spesialistes forense en esamina la partes trovada. La ecipo conteni representores de Nederland, Ucraina, Beljia, Malaisia, e Australia, ci consenta en Den Haag per discute un reporta ru sur la causas de la cade. On previde la publici de la reporta final en otobre.
A du semanas ante aora, Rusia ia rejeta un deside ru per asembla un corpo de judores internasional sur la desastre, provocante un coleria estendeda.
@T On trova un zona colpada par asteroide en Australia
@L aora_oji/2015/on_trova_un_zona_colpada_par_asteroide_en_australia
====== On trova un zona colpada par asteroide en Australia ======
24 marto 2015
Siensistes en Australia dise ce los ia descovre la area la plu grande colpada par asteroide.
La zona ave un largia de 400 cilometres. Lo es profonda enterada en la crosta de la Tera e es composada de du sicatrises separada.
La ecipo de la Universia Nasional Australian dise ce la asteroide ia rompe a du pesos ante colpa, e ce cada peso ia ave un largia de plu ca 10 cilometres.
On crede ce la colpa ia aveni a 300 milion anios ante aora, cisa plu.
La crater a la surfas ia desapare ja longa de Australia sentral, ma modeles jeofisical de su la surfas ia trova indicas de du colpas enorme.
Dotor Andrew Glikson, la gidor de la ecipo, ia dise: "Suposable esta ia causa la fini de multe spesies de vive sur la planeta a acel tempo."
Ma la ecipo no ia susede relata la colpa con cualce estingui conoseda, donce los suspeta ce la colpa es an plu vea ca los crede.
La rocas sirca la zona de colpa ave entre 300 e 600 milion anios, ma on ia deteta no deponeda de sene ejetada en stratos de roca de la mesma periodo.
La meteorite grande sur cual on crede ce lo ia mata la dinosauros a 66 milion anios ante aora coresponde a un strato de deponeda en rocas tra la mundo.
"Tal colpas grande ia ave cisa un rol multe plu importante en la evolui de la Tera ca nos ia crede a ante," Glikson ia comenta.
La zona de colpa en la Basin Warburton ia es acaso descovreda cuando siensistes ia fora a 2 cilometres su la surfas de la Tera per un projeta de rexerca jeotermal.
Acel escava ia presenta indicas ce roca ia deveni vitro en un temperatur e presa estrema, sujestante un colpa jigante.
@T On va prosede un comandor de rebelores ugandan
@L aora_oji/2015/on_va_prosede_un_comandor_de_rebelores_ugandan
====== On va prosede un comandor de rebelores ugandan ======
26 janero 2015
Dominic Ongwen, un comandor xef de rebelores ugandan va apare a la Corte Criminal Internasional en Den Haag en Nederland, acusada de crimines de gera e crimines contra umania, incluinte omiside e sclavi.
El es un de la gidores de la Lord's Resistance Army (LRA: "Armada Resistente de la Senior"), un promove cristian estremiste, e sua prosede va es la prima contra un membro de acel organiza.
On acusa ce la organiza ia saisi enfantes per usa los como combatores e sclavos sesal.
Cuando Ongwen apare oji, la judor va serti sua identia e informa el sur la alegas en un lingua cual el va comprende.
On no previde ce la avocatos prosedente va presenta formal sua caso a esta paso.
Ongwen ia es arestada pos sede se en la Republica de Africa Sentral en la mense pasada. Soldatos african e de la SUA ia xerca el de pos 2011.
Uganda ia acorda ce el debe es prosededa par la Corte Criminal Internasional, an si el critica forte acel corte.
On crede ce Ongwen es la suordinada de Joseph Kony, la comandor de la LRA, ci es ancora en evade.
La rebela par la LRA ia comensa a plu ca du desenios ante aora en Uganda norde. On estima ce lo ave entre 200 e 500 soldatos, de ci multe es enfantes. Lo ia terori partes grande de Africa sentral.
Ban Ki-moon, la secretor jeneral de la Nasiones Unida, ia bonveni la move de Ongwen de la Republica de Africa Sentral. Ban, ci mesma ia es un soldato enfante, ia dise ce pos anios de asconde en forestas, la momento ia ariva cuando Ongwen debe fronti la acusas contra el.
@T On va republici "Mein Kampf" con notas erudita
@L aora_oji/2015/on_va_republici_mein_kampf_con_notas_erudita
====== On va republici "Mein Kampf" con notas erudita ======
2 desembre 2015
La declara political par Adolf Hitler, Mein Kampf ("Mea batalia"), va es republicida en la mense veninte -- a la ves prima de pos la fini de la Gera Mundal Du, con notas critical par eruditas.
La Instituida de Istoria Contempora en München dise ce lo va primi asta 4000 copias con sirca 3500 notas.
Andreas Wirsching, la dirijor de la instituida, dise ce la testo, con comentas esperta, va "frati la mito" cual ensirca la libro.
Ma la primi es criticada par grupos iudi, ci razona ce on debe nunca republici obras nazi.
Mein Kampf ia es orijinal primida en 1925, a oto anios ante cuando Hitler ia ariva en potia como canselor.
Pos la defeta de Deutxland Nazi en 1945, la fortes Aliada ia dona la direto de autor de la libro a la stato Bayern. La autoriosas local ia refusa permete un reprimi de la libro, per preveni la tisa de odia.
Su leges deutx, la direto de autor dura tra 70 anios, e donce editores va pote asede libre la testo orijinal de pos janero.
An tal, ofisiores deutx ia dise ce los va restrinje la asede publica a la testo, entre temes ce lo pote provocas sentis neonazi.
@T On xasa e aresta "la fantasma de la opera"
@L aora_oji/2015/on_xasa_e_aresta_la_fantasma_de_la_opera
====== On xasa e aresta "la fantasma de la opera" ======
7 febrero 2015
En Austria, on ia aresta un om a la Opera de Stato de Wien ci ia ocupa a multe veses sejas plu cara ca los per cual el ia paia.
A la mostra prima de la baletia Verklungene Feste ("Festas Pasada") a la sera de mercurdi, un aidor ia vide un senior sentante en un de la suites.
La om de 63 anios ia es conoseda per sua abitua de paia per un bileta la plu barata, e move alora a un seja plu cara pos la comensa de la presenta.
Polisiores ia xasa el tra la teatro ante fisa securipolsos a el.
On no ia nomi la om, ma jornalistes local ia dona a el la nometa "la fantasma de la opera".
A veses presedente, el ia susede evita deveni caturada par cambia sua seja a multe veses tra un presenta.
La empleadas ia deside clama la polisia a mercurdi, pos fali catura la ofendor per acel razona.
Sejas en la suites -- comun reservada per ofisiores alta de la stato -- es tipal vendeda per 139 euros, en contrasta de la sejas la plu barata de sola 12 euros.
Cuando on ia fronti el, la "fantasma" ia declara ce el es un jornaliste e ia ataca un de la polisiores atentante aresta el.
El ia spende alga oras en prison, e on ia impedi el de tota presentas futur a la teatro de opera.
@T OTAN critica un secute de sabres rusce
@L aora_oji/2015/otan_critica_un_secute_de_sabres_rusce
====== OTAN critica un secute de sabres rusce ======
17 junio 2015
OTAN ia condena un move par Rusia per forti sua armas nucleal, descrivente lo como "un secute de sabres nucleal", "nonjustida", e "perilosa".
Presidente Vladimir Putin ia dise ce, en esta anio, Rusia va ajunta plu ca 40 misiles balistical intercontinental a sua colie de armas ativa.
Esta es un parte de un program estendeda de moderni la armada de la pais. La move segue un proposa par la SUA de aumenta sua propre presentia militar en Europa este.
La tensa es alta sur la rol de Rusia en la gera en Ucraina este.
Pos la comentas par Jens Stoltenberg, la secretor jeneral de OTAN, Putin ia dise ce Rusia ta es obligada a punta sua militaria a cualce pais cual ta menasa lo.
Plu temprana, el ia dise ce la armas ta pote vinse an la sistemes de defende la plu tecnical avansada contra misiles.
OTAN e xefes de statos ueste acusa Rusia de envia soldatos e armas pesosa, incluinte tances e misiles, a la separadistes prorusce en Ucraina este. Rusia ia nega repeteda esta, insistente ce cualce rusces ci combate ala es "bonvolores".
@T Pacistan esecuta Shafqat Hussain an pos apelas
@L aora_oji/2015/pacistan_esecuta_shafqat_hussain_an_pos_apelas
====== Pacistan esecuta Shafqat Hussain an pos apelas ======
4 agosto 2015
Pacistan ia esecuta Shafqat Hussain, condenada de mata un enfante en 2004, an pos apelas de grupos internasional de diretos umana.
Sua avocatos dise ce el ia ave 14 anios cuando on ia judi el como culpable, e ce on ia estrae sua confesa par tortura, ma ofisiores dise ce on ave no demostra ce el ia es un minor cuando on ia condena el.
El ia encontra sua familia a un ves final ante medianote, e ia es pendeda a un tempo corta ante lus prima en un prison en Karachi.
Pos disputas legal, sua esecuta ia es posponeda a cuatro veses en la anio presente. Ma an con la pospones, disputas, e promoves, tota sua apelas per pardona ia es ultima refusada.
La governa pacistani ia aboli un suspende de la puni de mori en la tempo pos un ataca contra un scola en Peshawar en desembre 2014, en cual la taliban ia mata plu ca 150 aprendores e enseniores. Pos acel, la autoriosas ia pende a la min 193 condenadas en prisones tra la pais.
Pacistan ave la cuantia la plu grande de mundo de prisonidas en la coredor de mori. On reporta ce plu ca 8000 persones espeta sua esecuta, e la pais va ateni probable un frecuentia de esecuta entre la plu altas de mundo.
Reprieve, un organiza nonprofitante cual labora contra la puni de mori, ia declara ce la sistem legal de Pacistan ia abandona Hussain a cada ves, e ce on no ia investiga bon sua caso.
Corta pos la esecuta, la organiza ia dise: "Lo pare ce la deside par la governa de continua a la esecuta, an pos clamas per para lo de tra Pacistan e sirca la mundo, ia es plu un esibi de potia political ca un aveni con alga relata a justia."
Ma la governa pacistani crede ce Hussain ia ave 23 anios cuando on ia judi el como culpable, e cortes ia rejeta solisitas ce on serti sur la eda.
@T Pacistan pospone la pende de un om descapasida
@L aora_oji/2015/pacistan_pospone_la_pende_de_un_om_descapasida
====== Pacistan pospone la pende de un om descapasida ======
22 setembre 2015
En Pacistan, on ia pospone la pende intendeda de un prisonida paraplejica.
En comanda la puni, un judor ia dise ce Abdul Basit no pote es pendeda seguente la manual prisonal, car el es en un seja rolante. La regulas de prison en Pacistan esije ce un prisonida sta sur la pendador.
Organizas per diretos dise ce la pende de un person descapasida ta es un condui cruel e degradante, e ce un risca esiste ce la pende va malfunsiona.
Abdul Basit, ci ave 43 anios, es paraliseda su sua taie e usa un seja rolante pos deveni malada en prison.
Pacistan ia reintrodui la puni de mori en desembre 2014 e ia pende 239 persones pos alora.
A acel tempo, la governa ia descrive lo como un medio per combate terorisme, pos cuando la taliban ia masacra plu ca 150 persones, xef enfantes, en un scola en Peshawar.
On ia condena Basit de omiside a ses anios ante aora, e ia intende pende el en Lahor en la mense pasada, ma acel ia es posponeda.
Un corte ia comanda alora ce la autoriosas de prison fa la pende an tal, an cuando sua apela per pardona, rejistrada a 22 julio, es ancora no tratada.
Ambos la Corte Suprema e la Corte Alta de Lahor ia dona sua acorda sur la esecuta.
Lo no es clar esce cualce limita de tempo aplica a la pospone la plu resente.
Campaniores dise ce lo es posible ce la pende va malfunsiona e fini par dana la dinia de la prisonida, cual es protejeda par leges pacistani.
@T Paradas grande a la aniversario 70 de Corea Norde
@L aora_oji/2015/paradas_grande_a_la_aniversario_70_de_corea_norde
====== Paradas grande a la aniversario 70 de Corea Norde ======
10 otobre 2015
Corea Norde fa un de sua selebras la plu grande de istoria, onorante la aniversario 70 de la Partito de Laborores.
Un prosegue de veculos blindada e misiles balistical ia comensa move tra la capital Pyongyang, acompaniada par soldatos marxante.
Kim Jong-un, la xef suprema de la pais, va preside a la rituo, ma no xefes de otra paises va es presente.
La comensa de la ativia ia es retardada par un pluve forte en la note.
Analistes va oserva atendosa per deteta cualce aparatos nova cual indica la developa militar de la Norde.
Cuando lo ia anunsia sua intendes per la aniversario en la plu temprana de esta anio, la governa ia refere a armas "vangarda" conveninte a gera moderna.
On no sabe esce Kim Jong-un -- la avo de la xef prima, Kim Il-sung -- va parla a cualce de la avenis de la dia, ma on previde ce la aniversario va envia un sinial defiante, spesial a Corea Sude e la Statos Unida.
El ia comensa la dia par mostra sua respeta a sua padre e avo mor a la Palasio Kumsusan de la Suno en Pyongyang.
Ofisiores no ia revela detalias de la selebras de la dia, ma on ia vide miles de sitadanes en plazas publica tra la site, praticante ante un parada con torxas cual va aveni en la sera.
On ia construi ance un stadio sur un rio per un conserta tarda cual va inclui la banda fema Moranbong, la grupo musical la plu popular de la pais.
Xina, la aliada la plu prosima de Corea Norde, ia envia un ofisior major de la Partito Comuniste a la aniversario.
La program nucleal de Corea Norde es ja longa un causa de teme en la area. On crede ce Pyongyang ia fa tre detonas nucleal esperimental suteran, e lo menasa fa un plu, an entre condenas e reproxas internasional.
En la mense pasada, lo ia anunsia ce lo reinisia Yongbyon, sua compleso nucleal xef, e ce lo boni sua armas nucleal "en cualia e cuantia".
La Norde declara ce lo ia crea un bomba nucleal sufisinte peti per es casida en la ojiva de un misil. Ma ofisiores de la SUA ia espresa sua duta sur esta, e espertas dise ce on no pote fasil estima la progresa cual Corea Norde ia fa sur miniaturi.
@T Paris va sutrae securadores de ama de sua pontes
@L aora_oji/2015/paris_va_sutrae_securadores_de_ama_de_sua_pontes
====== Paris va sutrae securadores de ama de sua pontes ======
30 maio 2015
En Frans, on va sutrae la securadores cual duples enamada ia fisa simbolin a un de la pontes xef de Paris.
Lo ia deveni un tradision per turistes en anios resente ce on lia un "securador de ama" a la Ponte de Artes ante lansa la clave en la Rio Seine.
Ma un parte de la ponte ia colasa su la pesa en 2014. Ofisiores de la site dise ce tota securadores va es sutraeda, comensante a lundi, car los crea un risca a securia.
On previde ce on va talia cuasi milion securadores pendente, con pesa de 45 tones.
La Ponte de la Arcibispo, prosima a la catedral Notre Dame, va perde ance la securadores fisada a sua lado.
Per la estate, depintas va sustitui per la grilias de metal a la lado de la Ponte de Artes, construida en 1804. Plu tarda en esta anio, on va instala paneles transparente en loca.
Bruno Julliard, la vismaior de Paris, ia dise: "Nos vole ce Paris resta la capital de ama romantica." El ia ajunta ce la site va crea ideas nova per coraji persones a espresa sua ama en otra maneras.
Un campania par la site en la anio pasada, afin persones fa un selfi en loca de ajunta un securador, no ia susede.
A venerdi, la comite de la site ia declara ce la tradision "ia gida a du problemes grande: danas notable a nosa construidas istorial, e un risca a la securia de visitores".
Venezia ia luta ance per impedi ce turistes afisa securadores a la Ponte de Rialto. E en New York, clavores-amatores ia inisia un campania per sutrae securadores de la Ponte de Brooklyn.
@T Parlamentores brites vota sur bebes de tre persones
@L aora_oji/2015/parlamentores_brites_vota_sur_bebes_de_tre_persones
====== Parlamentores brites vota sur bebes de tre persones ======
3 febrero 2015
Oji en Britan, parlamentores va vota per deside esce on debe permete la crea de bebes con ADN de tre persones.
La tecnica intende preveni comunica maladias jenetical matante de madre a enfante.
La Rena Unida ta pote deveni la pais prima cual legali bebes de tre persones, e esta ta pote aida sirca 150 duples per anio. Ma la idea ia provoca un debate etical forte, e persones major relijial ia recomenda bloci la proposa.
An tal, si la Salon basa vota aprobante, la bebe prima de tre persones ta pote nase en 2016.
Mitocondrios es partes pico en cuasi cada selula de la corpo, e los converti comeda a enerjia. Los ave sua propre ADN cual no afeta tal cualias como la aspeta de un person.
Mitocondrios defetosa, cual desende sola de la madre, pote causa dana de serebro, atrofia de musculos, malfunsiona de cor, e siecia.
La tecnica nova usa un varia de fertili in vitro per combina la ADN de la du jenitores con la mitocondrios sana de un donor fema. Lo produi bebes de ci 0,1% de sua ADN veni de la fem du, e esta es un cambia permanente cual va desende tra la jeneras.
La governa brites suporta la proposa. Ma parlamentores va pote vota libre, sin presa de sua partitos, car esta es un demanda de consiensa.
Doug Turnbull, la dirijor de la sentro de rexerca mitocondrial do on ia abri la via de la tecnica, ia recomenda un vota favorente. El ia dise: "La rexerca es sujestada par pasientes, suportada par pasientes, e per la pasientes."
A la min 40 otra siensistes de 14 paises ia recomenda simil. Ma no cadun acorda.
En la semana pasada, la eglesas catolica e anglican en England ia dise ce la idea es no secur no etical, partal car lo envolve la destrui de embrios.
Otra grupos dise ce la adota de la tecnica ta abri un porte a plu alteras jenetical de enfantes en futur.
An tal, un fem de ci sua tia ia mori de un maladia mitocondrial, ia dise ce on ia esamina la sistem de regula "a grado sin presedente", e ce on ia malinforma multe sur la risca de bebes jenetical alterada per belia o intelijentia.
"On no considera cambia la ADN nucleal, ma sola preveni maladias."
@T Partitos nova gania en Espania
@L aora_oji/2015/partitos_nova_gania_en_espania
====== Partitos nova gania en Espania ======
25 maio 2015
En elejes local e rejional en Espania, la promoves nova antifroda ia gania de la partitos tradisional xef.
A cuasi la fini de conta, la Partito Poplal governante ia gania la plu votas (27%). Ma lo pare ce lo va perde la consilio de Madrid a la ves prima en 20 anios. La partito sosialiste ia reseta 25%.
Espania ia emerji aora ofisial de retrosede, ma la economia de la pais ia es un conserna major per votores. Multe es ance coler sur reduis de spende publica e reportas de froda political.
On vide e la governa de la ministro xef, Mariano Rajoy, e la governa sosialiste presedente como culpable.
La du partitos tradisional xef no ia ateni majorias asoluta en la plu de areas. Los ia perde un cuantia notable de votas a la grupos Ciudadanos ("Sitadanes") e Podemos ("Nos pote").
Como prevideda, pos la crise economial e la scandales de froda cual ia manxa la reputa de la partitos tradisional en Espania, la pais ia entra a un eda nova de politica.
Partitos liada a la promove Podemos a la sinistra estrema (cual esiste tra apena un anio) cual oposa medios sever, ave aora la prestijia de potia en Barcelona. E los va formi cisa un alia per governa en la capital, Madrid.
La maior nova de Barcelona va es Ada Colau, un fem ci ia deveni conoseda par campania per los ci no pote repaia sua ipotecas e risca es descasida par la bancos pos la creve de la bola finansial de construi de imobilas en Espania.
La Partito Poplal ia perde majorias asoluta en parlamentos rejional tra la pais, incluinte en sua nucleos tradisional como Valencia, do la partito ia es grave danada par froda.
Cisa lo va nesesa ance alia se con la partito Cuidadanos, cual favore la comersia, en tal locas como Murcia e La Rioja.
Espania no conose bon alias governante, car la Partito Poplal e la Sosialistes ia domina tra desenios.
La anio pasada ia es la ves prima de un crese economial tra la anio intera en Espania de pos 2008, cuando la bola de imobila ia creve, desempleante miliones de persones e cuasi gidante la pais a aseta suporta finansial.
La nonemplea resta alta -- cuasi un de cuatro laborores es sin posto -- partal par causa de reformis par la governa cual ia redui la custa de emplea e desemplea.
Pico plu persones ia partisipa en esta eleje ca en la presedente en 2007.
@T Partitos oposante gania en Danmarc
@L aora_oji/2015/partitos_oposante_gania_en_danmarc
====== Partitos oposante gania en Danmarc ======
19 junio 2015
En Danmarc, la partitos oposante ia vinse la alia governante, pos un eleje difisil ganiada.
Pos la conta de tota votas estra los de la isolas dansce, la grupo sentriste-destriste gidada par Lars Løkke Rasmussen, un ministro xef pasada, ia vinse la alia sentriste-sinistriste de la ministro xef Helle Thorning-Schmidt.
La Partito de la Popla Dansce, cual es destriste e oposa migras a la pais, va deveni la numero du de la plu grandes en parlamento.
A ante, Kristian Thulesen Dahl, la xef de acel partito, ia espresa un manca de zelo sur la idea de entra a la governa. El ia dise ce el prefere "la rol de la avia libre peti, par cual la Partito de la Popla Dansce pote prosimi plu a reali nosa politica en la mundo real ca on opina".
Ma Dahl pote es ancora en un bon situa per deveni la ministro xef.
En sua parla de vinse, Rasmussen (ci ia gida la pais entre 2009 e 2011) ia dise: "A cuatro anios ante aora, nos ia redona la claves a la ofisia de la ministro xef. Me ia dise a acel tempo ce los es sola un presta."
El ia dise ance ce el va presa per "controla de la flue de refujadas".
An si lo ia perde jeneral, la Partito Democrata Sosial de Thorning-Schmidt va es la plu grande, ganiante a la min 26,3% de la votas. Ma sua aliadas ia fali gania tan multe votas como la oposantes, e pos aseta la perde, el ia resinia como xef de la partito.
@T Peru aproba xuta a aviones contrabandante drogas
@L aora_oji/2015/peru_aproba_xuta_a_aviones_contrabandante_drogas
====== Peru aproba xuta a aviones contrabandante drogas ======
21 agosto 2015
La Congreso Peruan ia aproba un lege cual permete ce la forte de aira xuta per tira a tera aviones peti, suspetada de porta drogas nonlegal.
Peru produi plu cocaina ca cualce otra pais, e ajentes antinarcotica dise ce la plu de lo es contrabandada a la SUA.
La projeta ia es asetada con acorda unida -- 89 congresores ia suporta lo, e nun ia oposa. On previde ce presidente Ollanta Humala va suscrive per legi lo.
An tal, ofisiores dise ce la SUA ia espresa sua oposa contra la restora de lo cual on nomi "la proibi airal".
Peru ia para la tatica en 2001 pos cuando un misionor de la SUA e sua fia bebe ia es matada en un ataca contra un avion sur cual on ia suspeta erante ce lo transporta drogas.
La avion ia es tirada a tera par la forte de aira de Peru, ma la opera ia es fada en junta con la CIA.
Pos acel, la SUA, cual sponsori programes antidroga tra America Sude, ia oposa atacas contra aviones suspetada de droga.
Otra paises en la area, incluinte Colombia, Brasil, Venezuela, e Bolivia, permete ja la xuta a tal aviones, ma con regulas sever.
Ofisiores en Peru dise ce sirca un dui de la cocaina cual traversa sua frontera es prendeda en aviones peti a Bolivia.
Carlos Tubino, la congresor peruan ci ia scrive la projeta legal, dise ce la governa no pote plu permete ce contrabandores defia sua leges. El ia dise ce on ave sirca 600 tal volas de avion per anio en Peru, e ia ajunta: "An oji on ia fa du!"
Humala ia promete xefi la taxe de combate la contrabanda de drogas cuando el ia emprende sua posto en 2011.
Sua governa ia elimina un cuantia recordo de cultivas de coca, con aida de la SUA, ma on ia critica lo per saisi un cuantia relativa peti de cocaina e per lasa nondisturbada la lia airal a Bolivia.
@T Peru investiga un ataca par un tribu retirada
@L aora_oji/2015/peru_investiga_un_ataca_par_un_tribu_retirada
====== Peru investiga un ataca par un tribu retirada ======
5 maio 2015
La governa peruan ia envia spesialistes de cultur nativa per aida un comunia en la foresta de la Amazon, pos cuando un om ia es matada par un membro de un tribu isolida.
La om ia es colpada par un flexa xutada cuando persones de la tribu Mashco Piro ia invade sua vileta, Shipetiari, en la foresta.
Esta es la ves tre de esta anio cuando on ia vide la tribu.
Antropolojistes dise ce los ia xerca probable utiles o comeda. An tal, on no sabe perce los ia ataca.
On estima ce la grupo conteni sirca 600 persones, e los abita en grupos separada, constante movente tra la foresta.
De tempo a tempo, los construi campas tempora longo rivas, e los escava per ovos de tortuga.
La governa de Peru ia proibi la contata fisical con la Mashco Piro e sirca un desuple de otra tribus nativa "noncontatada", car los ave poca imunia o capas de resiste maladias portada par otra umanas.
Antropolojistes reporta ce en la area de jungla do on ia vide la tribu, prosima a la rio Madre de Dios en Peru sude, alga persones local ia atenta usa premios per tenta la Mashco Piro a sorti de la foresta, compatiante lo cual on regarda como un esiste primitiva.
La governa finansia ja un grupo de spesialistes tra alga tempo en la area, per trata contatas entre tribus isolida e comunias fisada.
@T Plu ca mil prisonidas evade en Iaman
@L aora_oji/2015/plu_ca_mil_prisonidas_evade_en_iaman
====== Plu ca mil prisonidas evade en Iaman ======
1 julio 2015
Sirca 1200 prisonidas, incluinte suspetadas de al-Qa'ida, ia fuji de un prison en Iaman sentral.
Scaramuxas ia aveni en la prison en la vila Taiz, en la montania, ante la evade.
Iaman esperia sua crise la plu sever de multe anios, car fortes competente batalia per controla.
La pais ia cade en caos cuando rebelores huti ia obliga la presidente Abd Rabbuh Mansur Hadi a fuji a Aden e alora a Arabia Saudi.
On ancora no sabe como la prisonidas ia susede sorti.
Alga jornalistes sita un securior ci ia descrive un ataca a la prison par suportores de al-Qa'ida. Ma un otra ofisior ia dise ce la prisonidas ia fuji entre combates sever entre militias oposada.
La gardores de la prison ia abandona sua postos pos scaramuxas entre rebelores huti e sua oposores.
Esta es la numero tre de evades major par prisonidas en Iaman de pos la comensa de un campania airal, gidada par Arabia Saudi, contra la rebelores a 26 marto.
@T Poliomielite diminui multe en Pacistan
@L aora_oji/2015/poliomielite_diminui_multe_en_pacistan
====== Poliomielite diminui multe en Pacistan ======
4 junio 2015
En Pacistan, la cuantia de casos de poliomielite ia diminui par 70% en esta anio, car soldatos avansa teritorial en la norde contra persones combatosa ci oposa la program de vasini.
Asta aora en 2015, on ia esperia sirca 25 casos.
En otobre, ofisiores ia dise ce Pacistan ia esperia sua cuantia la plu alta de casos en 15 anios, xef par causa de atacas par combatosas.
A acel tempo, la pais ia ave 200 casos, plu ca la 199 casos en 2001 ma min ca la 558 casos en 1999.
La plu de infetas de poliomielite aveni en la area tribal norde-ueste, do combatosas ataca ecipos medical. Los acusa la medicistes de es spiores, e dise ce la vasinis es un parte de un conspira ueste per sterili muslimes.
Aora, probas per la maladia en zonas do lo ia aveni comun mostra resultas negativa.
La Areas Tribal Federal Manejada ia reporta sola sete casos asta aora en 2015, e Karachi ia reporta zero.
Ayesha Raza, un avisor sur poliomielite a la ministro xef, ia dise ce la armada aida multe en ambos acel areas. "Con sua aida, e con la aida de finansia de la Amirias Arabi Unida, nos ia pote estende promoves de imuni a areas de risca grande," el ia dise.
En menses resente, la cuantia de atacas contra ecipos de poliomielite ia redui clar. On ia aresta alga omes ci ia partisipa en tal atacas.
La du otra paises do poliomielite es endemica ia fa simil bon. Nijeria ia reporta no casos nova en esta anio, e Afganistan ia reporta sola un.
@T Premios a la festa sinematografial de Venezia
@L aora_oji/2015/premios_a_la_festa_sinematografial_de_venezia
====== Premios a la festa sinematografial de Venezia ======
13 setembre 2015
Un filma venezuelan, locada entre la caos e violentia de la capital Caracas, ia gania la Leon de Oro, la premio xef a la festa sinematografial de Venezia.
En Desde allá (De Ala), la dirijor Lorenzo Vigas nara sur un om rica ci deveni sesal envolveda con un om joven de un de la ganges de la site.
Venezuela esperia un crise economial sever, cual ia provoca menses de protestas sur strada en la anio pasada a la manca de multe benes. A jovedi, Leopoldo López, un gidor major oposante, ia es condenada a 13 anios e 9 menses en prison per tisa violentia en acel protestas.
Vigas ia dise ce filmas debe aida la paises latina a "aprende de la eras de la pasada".
Entretempo, La clan, un triler arjentina de crimin dirijeda par Pablo Trapero, ia gania la Leon de Arjento per la dirijor la plu bon.
La filma, cual ia es estrema susedosa en Arjentina, presenta la raconta vera de un familia comun de Buenos Aires ci ia saisi persones rica per rescata e ia asconde los en sua casa ante mata los.
La dirijor mexican Alfonso Cuarón ia es la presidente de la juria de la festa sinematografial de Venezia en esta anio. El ia dise ce el ia es plaseda ce un filma latina ia gania la premio xef, ma ia dise ce lo es "mera un coaveni" ce la juria ia es gidada par un mexican.
La premio sucampion de Juria Grande ia es donada a Anomalisa, un fantasia comedial SUA cual ia es dirijeda par Duke Johnson e Charlie Kaufman.
Fabrice Luchini, ci ia jua la rol de un judor en la filma La ermino par Christian Vincent, ia reseta la premio per la ator la plu bon.
@T Protestas en un campa de refujadas a Australia
@L aora_oji/2015/protestas_en_un_campa_de_refujadas_a_australia
====== Protestas en un campa de refujadas a Australia ======
20 janero 2015
Tony Abbott, la ministro xef de Australia, dise ce on ia "rompe" un protesta par refujadas a un campa costal.
A la campa de refujadas sur la isola Manus en Papua e Gine Nova, gardores ia entra a un compleso do refujadas ia enclui se en un greve de famia.
Cuasi 60 refujadas ia es arestada, ma sentos de otras resta grevente.
Australia envia tota refujadas ci ariva par barco a campas en Papua e Gine Nova e en Nauero, per colie e trata los.
Grupos de diretos umana ia critica la politica de prisoni los a mar -- intendeda per preveni ce los ariva an.
Reportas de la campa es difisil per serti. Jornalistes no es permeteda de asede la loca, e on no pote confirma dises de ofisiores e refujadas.
Protestas ia comensa a la campa de Manus en la semana pasada. A du dias ante aora, on ia reporta ce alga prisonidas ia enclui se en un de la complesos.
Gardores, portante vestes antitumulta, ia entra a la compleso en la posmedia ier.
Peter Dutton, la ministro de migra, ia confirma ce on ia usa "un grado de fortia", ma ia dise ce la situa "no ia mali a grado ce la polisia ta presenta se e oposa la persones en la sentro".
On dise ce la gardores ia xerca la gidores alegada de la refujadas, sur ci autoriosas australian ia acusa ce los ia provoca la protesta.
La situa a la otra complesos de la campa no es clar.
La tensa ia crese a la sentro de pos la comensa de la protesta a martedi pasada. On reporta ce alga refujadas ia dana se par cose sua labios la un a la otra o par engoli lamas e deterjente.
La sania de los ci fa un greve de famia ia mali. On alega ce la autoriosas ia sesa la furni de acua e comedas a alga prisonidas. Ma la autoriosas ia nega esta, acusante en loca ce la refujadas ia impedi la furnis.
La prisonidas protesta contra un projeta de move los ci on reconose como refujadas ofisial a Lorengau, la capital de la isola. Los teme ce la popla local va ataca los ala.
La campa sur Manus ia es la sena de tumultas en febrero 2014, cuando abitores local ia entra e combate con prisonidas. Un refujada ia es matada, e 70, cisa plu, ia es ferida en la violentia.
Su leges introduida par la governa presedente, la persones tenida en campas costal no pote previde ce on va aseta los en Australia, an si on va judi ce los es vera refujadas.
La governa dise ce sua politica sever intende para la flue de barcos portante refujadas, afin no plu persones mori en la viaja perilosa a Australia.
@T Protestores en Nijer ensende eglesas cristian
@L aora_oji/2015/protestores_en_nijer_ensende_eglesas_cristian
====== Protestores en Nijer ensende eglesas cristian ======
18 janero 2015
En Nijer, a la min tre persones ia es matada e ses eglesas ia es atacada, en protestas nova contra un cartun de la profeta Muhammad par la revista franses Charlie Hebdo.
La protestas ia comensa estra la mascita xef de la capital Niamey, e ia estende a otra partes de la pais.
Presidente Mahamadou Issoufou, ci ia es presente a la prosegue de unia en Paris a un semana ante oji, ia condena la violentia e ia apela per calmia. La pais ia es un colonia franses en pasada.
En la semana pasada, fusilores islamiste ia mata 12 persones a la ofisias de Charlie Hebdo. La fronte de la numero la plu resente de la revista, publicida pos acel ataca, presenta un imaje de Muhammad larmante e teninte un carton con la parolas "Me es Charlie".
On primi sete milion copias de la numero per sasia un demanda estracomun. Ante la ataca, la cuantia de copias de cada numero ia es 60 mil.
Ma multe muslimes opina ce cualce imaje de sua profeta es ofendente.
En Niamey, sentos de protestores ia asembla a la mascita, clamante "Dio es alta" en arabi.
A la min ses eglesas ia es ensendeda o sacada en Niamey e vilas ambiente. On ia ataca ance bares, oteles, e comersias poseseda par nonmuslimes.
Du corpos carbonida ia es reganiada de un eglesa a la borda de la capital, e on ia trova la corpo de un fem en un bar.
Issoufou ia dise: "Los ci saca esta locas de adora, ci viole los e mata sua cameradas cristian... ia comprende no parte de Islam."
En un protesta simil en Zinder, la site du de Nijer, protestores ia ataca botecas manejada par cristianes e la sentro cultural franses. Un fola coler de sirca 50 persones ia rompe la porte de la sentro e ia ensende la caferia, biblioteca e ofisias.
Ance a venerdi, protestas contra la cartun de Charlie Hebdo ia aveni en Jazair, Khartoum, e Karachi. En Somalia, on ia protesta simil ier.
@T Rabia mata 160 persones per dia
@L aora_oji/2015/rabia_mata_160_persones_per_dia
====== Rabia mata 160 persones per dia ======
17 april 2015
Un reporta par la Alia Global per Controla de Rabia dise ce sirca 59 mil persones mori en cada anio par causa de rabia comunicada par canes.
La autores recomenda ce on fa plu per vasini canes, spesial en paises de revenu basa.
Vasines per vitimes mordeda debe es ance plu disponable a custa plu bon en tal areas.
Rabia es un infeta virusal matante, cual es cuasi intera prevenable. Lo pote infeta tota mamales, ma la reporta dise ce canes domada causa plu ca 99% de tota moris umana de la virus.
La plu de paises developada ia elimina rabia de sua popla de canes. Ma en multe paises developante, rabia es ancora presente en canes domada, e lo es comun mal controlada.
La reporta estima ce sirca 160 persones mori de la maladia per dia, e la plu de esta avenis es trovada en Asia (representante 60% de moris) e Africa (36%).
Par se mesma, Barat ave 35% de moris umana de rabia -- plu ca cualce otra pais.
La reporta dise ce la proportio de canes vasinida en cuasi tota paises en Africa e Asia es multe tro basa per susede controla la maladia.
Lo dise ce la modo la plu bon e frugal de preveni rabia de can es la vasini de canes, ma on debe ance boni la disponablia de vasines umana.
La studia mostra ce la custa global de rabia es sirca 8,6 mil milion dolares USA per anio, si on inclui la moris prematur, la revenu perdeda par mordedas, e la spende sur vasines umana.
@T Reatas pos un acorda nucleal con Iran
@L aora_oji/2015/reatas_pos_un_acorda_nucleal_con_iran
====== Reatas pos un acorda nucleal con Iran ======
16 julio 2015
Barack Obama, la presidente de la SUA, ia dise ce los ci oposa la acorda nucleal con Iran desacorda con "99% de la mundo e la majoria de espertas nucleal".
El ia defia la oposores a presenta un alternativa plu bon ca la acorda fada a martedi. On regarda esta como un refere velida a sua oposores republiciste en la Congresa.
En la semana veninte, la Consilio de Securia de la Nasiones Unida va vota sur un deside per validi la acorda. En intercambia per un sesa de punis economial, Iran va limita sua ativias nucleal.
Obama ia dise ce un debate forte va aveni en la Congresa.
Sua oposores republiciste, ci espera aboli la acorda en un vota seguente, ia acusa el de sede. John Boehner, la presidente de la Salon basa, ia comenta ce la acorda va fa no plu ca "coraji" Iran e comensa un corsa de armas nucleal tra la globo.
Ma Obama ia dise: "Si 99% de la comunia de mundo e la majoria de espertas nucleal regarda esta e los dise ce lo va preveni ce Iran oteni un bomba nucleal, e vos razona o ce lo no va preveni o ce, an si lo preveni, la efeto va es tempora, alora vos debe ave alga alternativa."
El ia ajunta ce la mundo va risca "an plu gera en Asia sude-ueste" sin la acorda nucleal con Iran.
Mohammad Javad Zarif, la ministro irani de esternas, ia dise ier ce la acorda, fada con ses potiosas global en Wien en Austria, va comensa es realida en o ante novembre. La presidente de Iran, Hassan Rouhani, ia dise ce la acorda mostra ce "engranas construosa susede".
An tal, Benjamin Netanyahu, la ministro xef de Israel, ia denunsia lo cual el ia descrive como "un era major e stonante".
Obama ia espresa esperas ce la acorda va aida Iran a "condui diferente", sitante "se suporta de terorisme e sua usa de representores per destabli partes de Asia sude-ueste".
El ia dise ce la SUA va xerca plu colabora de Tehran per fini la geras en Suria e Iaman. Ma el ia ajunta: "Nos fa no apostas sur esta."
Entre 2006 e 2010, la Consilio de Securia ia aproba ses desides esijente ce Iran para produi uranio ricida, cual pote es usada per intendes nonmilitar ma ance per construi bombas nucleal.
@T Rebelores sede armas en la Pilipinas
@L aora_oji/2015/rebelores_sede_armas_en_la_pilipinas
====== Rebelores sede armas en la Pilipinas ======
16 junio 2015
En la Pilipinas, la Fronte Moro de Libri Muslim (MILF), un grupo de rebelores, ia sede un colie prima de armas en parte de un prosede de pas.
Presidente Benigno Aquino ia es presente a la aveni en Maguindanao, e ia loda lo como un paso major de progresa.
La rebelores va desativi setedes-sinco armas como un sinia de sua promete de pas.
En 2012, la governa e la MILF ia acorda un strutur per un acorda de pas. Sirca 145 de la 10 mil membros (un cuantia estimada) de la ala armada de la MILF (la Fortes Armada Muslim Bangsamoro) va es integrada en la sosia normal.
La governa va dona 25 mil pesos pilipina ($555) a cada de la 145, per aprende e susta.
Un lege realinte la acorda de pas entre la governa e la MILF ia es sola tepida suportada en congresa.
Plu temprana en esta anio, deses de comandos de polisia ia es matada en scaramuxas con la rebelores.
Aquino ia dise ce la cuantia de armas oji sededa es importante. "Lo no es un caso de sola un o du o un desuple de fusiles. Esta es fusiles potiosa, moderna, e los no ia deveni vea. Esta armas pote dona e ia dona sufris estrema," el ia dise a la rituo.
La armas va es tenida e desativida par un organiza nondependente.
La strutur de acorda de 2012 ia es atenida pos 17 anios de negosia. La governa pilipina ia acorda dona plu autonomia a muslimes sur la isola Mindanao, en la area sude de la pais, do la majoria de persones es muslim. La resta de la Pilipinas es xef catolica.
@T Relatas entre Israel e Turcia va es restorada
@L aora_oji/2015/relatas_entre_israel_e_turcia_va_es_restorada
====== Relatas entre Israel e Turcia va es restorada ======
18 desembre 2015
Israel e Turcia ia fa un acorda inisial sur normali sua relatas, en dise de un ofisior israeli nonomida.
La lias entre la paises ia cade pos 2010, cuando la marina de Israel ia ataca un flotila turces viajante a Gaza. Des ativistes turces ia es matada.
Par la acorda, Israel va compensa la familias de la matadas, e Turcia va abandona tota acusas contra Israel.
On reporta ce la acorda ia es realida a un consenta entre ofisiores major israeli e turces en Suiz. Ma on ancora no ia oia un confirma ofisial de un lado o la otra.
Seguente la ofisior, la acorda va renovi la intercambia de ambasadores, e on va comensa discutes per crea un tubo de gas natural de Israel a Turcia.
Turcia es aora envolveda en un disputa con Rusia, sua furnor major de gas, sur la tira a tera de un jeto xasante rusce par Turcia.
Israel e Turcia ia es aliadas firma asta la ataca matante a la flotila de aida, cual ia atenta rompe la bloci par Israel de Gaza.
@T Romania era en diplomatia deutx con un mapa franses
@L aora_oji/2015/romania_era_en_diplomatia_deutx_con_un_mapa_franses
====== Romania era en diplomatia deutx con un mapa franses ======
11 marto 2015
La ministreria de esternas romanian ia demanda es pardonada pos dona a un diplomata deutx un libreta cual onora la relata entre la du paises, ma cual ia mostra la bandera de Deutxland sur un mapa de Frans.
La ofisia de governa ia dise ce esta ia es "un era tecnical e regretable".
Bogdan Aurescu, la ministro de esternas en Romania ia dona la libreta a sua corespondente Frank-Walter Steinmeier a un presenta jornaliste.
Esta es la ves du en du menses ce la ministreria de esternas ia debe es pardonada per un era.
En febrero, la ambasada romanian en Paris ia envia invitas a un selebra formal, ma ia afisa acaso un fix conteninte descrives nonfavorente de alga invitadas como "nondesirable" o "repulsante".
Steinmeier ia fa un visita de un dia a Romania a lundi per discutes sur OTAN e Ucraina este, e per onora la aniversario 135 de relatas diplomatal entre Romania e Deutxland.
La libreta ia es produida par Agerpres, la ajenteria nasional de novas en Romania. Lo ia dise ce la intende es "catura momentos unica en la relatas biladal" entre la du paises.
Lo ia clari ce la ministreria de esternas ia reseta la varia coreta de la libreta en forma eletronical, ma ce "la malprimida ia es un era tecnical" par se, per cual lo ia demanda la pardona de ambos minstrerias.
@T Ruanda vota per permete ce Kagame continua como presidente
@L aora_oji/2015/ruanda_vota_per_permete_ce_kagame_continua_como_presidente
====== Ruanda vota per permete ce Kagame continua como presidente ======
19 desembre 2015
La resultas inisial de un referendo indica ce ruandas ia vota forte per permete ce presidente Paul Kagame estende sua periodo de ofisia.
Sirca 98% de votores ia suporta cambia la constitui per permete ce el aspira denova la posto en 2017 pos la fini de sua periodo du.
Kagame, ci ave 58 anios, ta pote resta en potia asta 2034 si la cambias es asetada.
La vota ia aveni an con criticas de un tal cambia par la SUA e otra donores ueste.
La comision votal de Ruanda ia dise ce 21 de la 30 distritos ia publici ja sua resultas. Estas representa sirca 70% de la votores. On previde la resultas completa en la plu tarda de oji.
Kagame mesma no ia dise esce el va presenta denova se como aspiror, ma on espeta jeneral ce esta va aveni.
Cuando on ia demanda a la voteria esce el vole continua, el ia responde: "Lo cual aveni es la eleje de la popla. Demanda a la popla perce los vole me."
An tal, la SUA ia dise ce Kagame debe resinia en 2017 per permete la emerji de un jenera nova de gidores.
Grupos de diretos ia acusa la governa de sofoca la oposa political. La Partito Verde Democrata ia alega ce on ia preveni lo de campania contra la cambia.
Kagame es ja presidente de pos 2000, ma ia es ja en potia de pos 1994, cuando sua soldatos rebelante ia entra a Kigali, la capital, per fini la jenoside de la pais.
La debate sur estende de periodos presidental ia causa nonstablia en otra paises african, como Burundi e Republica de Congo, ma ia causa no tumulta en Ruanda mesma.
@T Rusia desentera la osos de tsar Nicolai
@L aora_oji/2015/rusia_desentera_la_osos_de_tsar_nicolai
====== Rusia desentera la osos de tsar Nicolai ======
24 setembre 2015
Investigores rusce ia desentera la restas de la tsar final e sua sposa, como un parte de reesamina sua matas en 1918.
Los ia prende samples de tsar Nicolai 2, sua sposa Alecsandra, e de la uniforma sanguida de Alecsandr 2, la avo de Nicolai ci ia es matada en 1881.
La membros de la familia Romanov ia es omisideda par bolxevices revoluiste, e es tombida a un catedral en San Peterburg.
La Eglesa Ortodox desira ce on reesamina la restas per confirma lias a otra relatadas de ci sua restas reposa en otra locas.
On ia clui la caso longa de omiside en 1998, pos cuando probas de ADN ia confirma la identia de alga restas Romanov trovada en un tomba coletiva en la Montes Ural en 1991.
Nicolai 2, Alecsandra, sua cuatro fias (duxesas grande Anastasia, Maria, Olga e Tatiana), sua fio Alecsei, e cuatro empleadas de la casa reial ia es omisideda en 1918 en la sutera de un casa en Iecaterinburg.
A un note, seguente atestores, un ecipo de fusilores bolxevic ia alinia los como per un foto de familia, e ia mata los. On ia baioneti los ci no ia mori direta.
La probas ADN no ia convinse alga membros de la Eglesa Ortodox Rusce, car la restas de du -- Alecsei e Maria -- no ia es trovada asta 2007, a un loca diferente en la Urales.
La Comite Investigal, un parte de la governa, dise ce on nesesa esaminas nova per serti la identia de la restas de acel du.
Rusia intende reentera Alecsei e Maria a lado de la otra membros de la familia en la Catedral de Pedro e Paulo en San Peterburg. Ma ante cuando on fa acel, la Eglesa vole deveni serta sur la restas.
La duple reial e tre fias ia es formal reenterada a 17 julio 1998, la aniversario 80 de sua mata. La Eglesa Ortodox ia santi los en 2000.
Lo es probable ce Alecsei e Maria va es ance santida ante la aniversario 100 en 2018. A la tempo presente, on conserva sua restas a la Arcivos de la Stato Rusce.
La investiga nova envolve ance prende samples de la duxesa grande Elizabeta Fiodorovna, la sore de Alecsandra, ci es tombida en Ieruxalim. La investigores pote asede sola aora acel restas.
La familia Romanov ia es desponeda de pota e escluida en 1917, no longa ante cuando la bolxevices comuniste ia suverti la governa tempora.
On va studia ance documentos de la investiga "Gardores Blanca" sur la omiside en 1918. Estas ia apare en la cuatro anios pasada.
Tsar Alecsandr 2 ia es matada par un bomba lansada par un revoluor de la "Desira Poplal" en 1881, e ia es tombida en sua uniforma militar en la catedral.
Un avocato per duxesa grande Maria Vladimirovna, un desendente de la matadas, ia dise ce el suporta la investiga nova.
@T Rusia e la SUA discute la securia airal supra Suria
@L aora_oji/2015/rusia_e_la_sua_discute_la_securia_airal_supra_suria
====== Rusia e la SUA discute la securia airal supra Suria ======
14 otobre 2015
Rusia e la SUA va fa discutes nova sur securia airal en Suria, pos cuando on ia descovre ce aviones de combate de la du nasiones ia veni tro prosima la un a la otra a saturdi.
La aviones ia es vidable la un de la otra, con distantia de 15 a 30 cilometres entre los.
Esta va es la ves tre de tal discutes, en cual la du paises atenta trova maneras de evita un gera nonintendeda.
An con la discutes, la SUA ia descrive la atas de Rusia en Suria como "malgidada".
La ministro de defende de la SUA ia dise ce el previde un acorda pos un tempo corta. Rusia ia dise ce lo ia "refresci la proposas" cual on va discute en un confere video.
Rusia ia comensa sua campania de atacas airal en Suria a 30 setembre, disente ce sua blanco es la combatosas de Stato Islamiste e otra grupos jihadiste, pos cuando la presidente suri ia solisita aidas militar.
Paises ueste e ativistes suri dise ce aviones rusce ia ataca blancos nonmilitar. Moscva nega esta.
En un developa separada a martedi, du cartuxes ia colpa la compleso de la ambasada rusce en Dimashq, la capital suri, en cuando sentos de persones progovernal ia asembla estra casa per suporta la atacas airal rusce.
Nun ia mori, ma alga persones ia es ferida. Rusia ia descrive la bombarda como "un ataca teroriste".
@T Rusia reclama partes de la artica
@L aora_oji/2015/rusia_reclama_partes_de_la_artica
====== Rusia reclama partes de la artica ======
5 agosto 2015
Rusia ia renovi sua laboras per fa ce la Nasiones Unida reconose 1,2 milion cilometres cuadrida de la plano artica suacuan cual lo reclama.
Lo ia fa un promove simil per esta teritorio rica de recursos en 2001. Ma un comision de la NU ia rejeta lo par causa de un nonsufisi de atesta.
La ministreria rusce de esternas ia dise ce la move nova es suportada par datos siensal.
Ma tota la otra paises cual borda la artica -- Noria, Danmarc, Canada, e la SUA -- rejeta la reclama de Moscva.
Tota sinco nasiones ia atenta declara sua autoria sur partes de la artica, sur cual on crede ce lo conteni asta un cuatri de la petrolio e gas ancora nondescovreda de la mundo.
La compete per recursos artica ia intensi en anios resente, car la jelo diminuinte de polo presenta posibles nova per esplora.
Rusia ia dise ce sua proposa nova a la Comision NU sur la Limitas de la Plano Continental conteni razonas nova.
En 2007, Rusia ia fa un reclama per la fondo de mar par cade un silindre conteninte la bandera rusce de un sumarina a la Polo Norde.
La promove fresca aveni a un semana pos cuando la Cremlin ia anunsia ce lo aumenta sua fortes marinal en la artica como parte de un stratejia nova militar.
Dmitry Rogozin, la visministro xef, ia dise ce la projeta inclui un flotila nova de rompejelos.
Plu temprana en esta anio, la militaria rusce ia fa eserses en la artica con 38 mil soldatos, plu ca 50 barcones surfasal e suacuan, e 110 aviones.
@T Satelites segue caracoles per redui maladia en Africa
@L aora_oji/2015/satelites_segue_caracoles_per_redui_maladia_en_africa
====== Satelites segue caracoles per redui maladia en Africa ======
16 febrero 2015
Siensistes usa satelites per segue la trasa de caracoles, con intende de impedi la sperde de maladias parasital en Africa.
La informa es usada per predise la locas probable de infeta, permetente ce ajenterias de sania organiza plu bon sua laborores.
Esta es un esemplo de la influe cresente de datos spasial en aplicas nova de aida medical.
On ia anunsia la developa a un encontra de la Asosia American per la Avansa de Siensa, en San Jose.
Natural, on no pote persepi caracoles individua de orbita, ma spesialistes va ave un idea estrema bon de la locas do esta animales prefere es, e de la states en cual los abunda.
Caracoles de acua porta la larvas de la vermes cual sperde xistosomiase tra poplas umana en Africa. La maladia no mata usual, ma lo debili sufrores.
En Cenia, siensistes crea mapas satelital de tota rios e canales do esta caracoles abita probable. Los projeta como los va move tra la campania. On compara alora esta informa con datos satelital sur la abitadas de persones en acel campania.
Par combina la du mapas, on vide la locas con risca la plu alta, do on debe foca programes de sania.
On fa un labora simil con insetos cual sperde maladias, como moscitos.
@T Sceletos de persones contrabandada es trovada en Tai
@L aora_oji/2015/sceletos_de_persones_contrabandada_es_trovada_en_tai
====== Sceletos de persones contrabandada es trovada en Tai ======
6 maio 2015
Ofisiores en Tai dise ce los ia trova du sceletos cisa relatada a la contrabanda umana, a poca dias pos la descovre de 26 corpos en un tomba coletiva.
Ambos sceletos ia es trovada en campas abandonada en la provinse Phang Nga. Un de los ia es liada a un arbor.
Phang Nga es a distantia de alga sentos de cilometres de la loca en la provinse Songkhla do on ia trova la tomba coletiva en la semana pasada.
Tre tais e un miama ia es arestada en Tai, suspetada sur contrabanda umana.
La tomba con 26 corpos ia es descovreda en un campa abandonada en la jungla prosima a la frontera malaisian -- un area comun usada par tal contrabandores.
Separada, on ia trova un campa du con a la min sinco plu tombas en Songkhla.
La area es situada sur un via frecuente usada par muslimes rohingia ci fuji de persegue en Miama.
Ofisiores crede ce contrabandores teni migrores posible en la campas, e esije rescatas de sua familias.
On ia critica forte Tai per no ata contra la redes de contrabandores ci teni tipal miles de persones de Miama e Bangladex per rescata en cada anio.
La polisia ia dise ce la tais arestada a lundi inclui un membro de la comite local de Songhkla e du ofisiores de vileta.
Grupos promovente diretos umana ia alega longa ce ofisiores e polisiores local es consensa de, o an aida, la contrabandas.
On ia nomi la person miama como Soe Naing, conoseda como Anwar. El es "un figur sentral ci dirije campas e esije rescatas".
La polisia xerca cuatro otra suspetadas, ci es ance ofisiores local.
On crede ce multe de la vitimes trovada en la campa ia mori de maladia o famia. Un survivor ia informa jornalistes tai ce plu tombas coletiva esiste en la area.
En cada anio miles de persones es contrabandada tra Tai a Malaisia. Spesial, muslimes rohingia usa esta via per evade la persegue e violentia setal en Miama, la pais visina.
En 2012, plu ca 200 persones ia es matada e miles ia perde sua casas cuando violentia ia eruta entre budistes e muslimes en Miama. Violentia antimuslim ia aveni a plu ca un ves a pos.
En desembre, la Nasiones Unida ia aseta un deside cual ia recomenda forte ce Miama permete naturali la rohingias, de ci multe es clasida como persones sin stato.
@T Sentos de persones manca pos un lisca de tera en Guatemala
@L aora_oji/2015/sentos_de_persones_manca_pos_un_lisca_de_tera_en_guatemala
====== Sentos de persones manca pos un lisca de tera en Guatemala ======
3 otobre 2015
En Guatemala, laborores de salva xerca sentos de persones ci manca pos cuando un flue de fango ia colpa un vileta prosima a la capital.
On ia recovre a la min 26 corpos asta aora de la vileta El Cambray 2, a 15 cilometres a este de la site Guatemala.
Ier, un pluve forte ia puxa un deluvia de rocones e fango a sur casas. Relatadas ia reseta telefonis e mesajetas de persones trapida su la detrito.
On ia prende survivores a refujerias tempora. La salvores ia pausa sua xercas en la note par causa de pluves forte.
Un portavose per la pompores-bonvolores de Guatemala ia dise ce 26 persones ia mori, incluinte alga enfantes, e ce 36 persones ia es prendeda a ospitales.
On ia tira un om vivente de la detrito a plu ca 15 oras pos la colpa de la fango.
Ma Alejandro Maldonado, la xef de la departe guatemalteca de desastre, ia averti ce asta 600 persones es cisa ancora mancante. El ia ajunta ce esta ia es la cuantia de persones sur ci on crede ce los ia dormi en sua casas cuando la fango ia lisca.
El Cambray 2 es ensircada par colinas presipe e torinte supra la casas, de cual la plu es situada en la fondo de la vale.
Intervisada a radio, Maldonado ia comenta ce la colinas forestosa ia deveni ja plu debil tra alga tempo e ce sua colasa ia es xef causada par la pluve forte resente.
@T Simias es refusada en un disputa diplomata
@L aora_oji/2015/simias_es_refusada_en_un_disputa_diplomata
====== Simias es refusada en un disputa diplomata ======
9 april 2015
Arabia Saudi ia refusa aseta cuatro simias amazonan pico de un zo svensce par causa de un disputa diplomata.
On ia intende ce la uistitis pigmeo de la zo Skansen en Stockholm vade a un zo en Riyadh.
Jonas Wahlström, la xef de Skansen, ia dise: "Los no ia desira plu la simias, par causa de la situa political."
En la mense pasada, la ambasador saudi a Sveria ia es retirada pos cuando Sveria ia abandona un acorda sur armas en un disputa sur diretos umana.
"Lo es alga comica," Wahlström ia comenta. "Me va debe mera espeta asta cuando on dona denova visas a comersiores svensce. Cisa ance simias va reseta alora visas."
En marto, Arabia Saudi ia ataca Margot Wallström, la ministro svensce de esternas, per un parla "ofendente" cual lo ia descrive como "un interfere evidente" en sua governa interna.
Arabia Saudi ia preveni ce el leje la parla a un consenta de la Alia Arabi en Cairo.
En la parla, Wallström ia recomenda "libria de asosia, asembla, relijio, e espresa" e ce nasiones arabi "foca sua atende a diretos de femes, representa de femes, e sua recursos sufisinte".
Cada simia pesa apena plu ca 100 grames. Uistitis pigmeo es la primates la plu peti de mundo.
@T Sinco norsces es prisonida per xasa lupos
@L aora_oji/2015/sinco_norsces_es_prisonida_per_xasa_lupos
====== Sinco norsces es prisonida per xasa lupos ======
22 april 2015
En Noria, on ia condena sinco omes a prison per organiza un xasa nonlegal de lupos, a fini de la prosede prima de un tal caso en la pais.
La xef de la grupo ia es condenada a un anio e oto menses en prison, e on ia comanda la prisoni de cuatro otras per entre ses e des-du menses.
Tota ia nega la acusa, e cuatro ia apela contra la deside.
La caso importante ia considera la diretos norsce a xasa a lado de la survive de un de la colies la plu peti de lupos en Europa.
On ia prosede la omes per atenta trapi lupos en febrero 2014, su la leges norsce de crimin organizada, pos un opera alta en cual la polisia ia escuta secreta telefonis.
La condena la plu sever ia es donada a Dennis Nordahl, ci ave 48 anios. On ia regarda el como la acusada xef.
On ia acusa el ance de fusili un lupo en un aveni separada en marto de la anio pasada. El ia dise ce el ia partisipa en un mision de xasa volpes, e ia nega sabe ce la animal matada es un lupo.
En ajunta a la condenas prisonal, tota sinco omes ia es proibida de xasa per periodos diversa.
La corte rejional en Noria este ia judi ce un acusada ses es nonculpable.
On crede ce la cuantia de lupos de Noria es entre la plu petis en Europa, cisa tan basa como 30.
En Scandinavia sude, lupos ia es xasada cuasi asta estingui. La pratica ia deveni nonlegal sola en la desenio de 1970. An tal, cultivores bonveni jeneral la xasa de lupos, car los vide la animales como un menasa grande a oveas e canes.
@T Soldatos combate en Burundi pos un colpa de stato
@L aora_oji/2015/soldatos_combate_en_burundi_pos_un_colpa_de_stato
====== Soldatos combate en Burundi pos un colpa de stato ======
14 maio 2015
En la capital de Burundi, grupos oposante de soldatos batalia entre se en nonsertia sur la susede de un colpa de stato atentada contra la presidente.
On ia oia fusilis e esplodes forte en la note, prosima a la stasion nasional de radio e televisa.
La xef de la armada dise ce la colpa, gidada par un xef pasada de securia, ia fali. Ma la presidente, Pierre Nkurunziza, no ia susede reveni de Tanzania, e on no sabe do el es.
La tumulta ia comensa cuando Nkurunziza ia anunsia ce el xerca un periodo tre de ofisia. Oposores dise ce esta defia la constitui. Nkurunziza ia deveni presidente en 2005.
El ia parti per Tanzania ier, e a pos, la major jeneral Godefroid Niyombare, sua aliada pasada, ia anunsia la colpa. "La governa es suvertida," el ia dise en un difusa de radio.
Miles de persones ia vade sur la stradas per selebra la anunsia, marxante a la sentro de la capital, Bujumbura, a lado de soldatos e du tances.
Un protestor ia comenta ce esta es un vinse pos semanas de protestas.
Ma la ecipo de la presidente ia rejeta la colpa de stato como "imajinal". En la note, jeneral Prime Niyongabo, la xef de la armada, ia anunsia: "La colpa atentada es finida."
El ia dise esta pos un note de negosias con la ministro de defende, ci suporta la colpa.
Ma lo pare ce poca acorda esiste entre la soldatos mesma. Grupos fidosa a cada lado ia comensa combate la un la otra per controla la stasion de radio e televisa.
La presidente ia vola a Dar es Salaam, la capital de Tanzania, per discute la crise con otra xefes de paises de Africa este.
El ia intende vola denova a Burundi pos deveni informada sur la colpa. Ma Niyombare ia comanda la clui de la airoporto e la fronteras, donce Nkurunziza ia debe revade a Dar es Salaam. On no sabe esce el es ancora ala.
La otra xefes de stato a la consenta en Tanzania ia condena la colpa. La Nasiones Unida e la SUA ia recomenda forte ce ambos partitos freni se.
La crise ia comensa a 26 april, e ia causa ja la moris de plu ca 20 persones. Deses de miles de burundeses ia fuji a paises visina en la semanas resente.
Nkurunziza ia rejeta sujestas ce el pospone la vota de la mense veninte. An tal, la consenta de xefes en Tanzania ia recomenda ce el fa esta.
La gidor pasada de rebelores ave 51 anios. El crede ce el ave la direto de xerca un periodo tre car la posto ia es direta donada a el par la parlamento en 2005.
La constitui de Burundi dise ce un presidente pote governa tra no plu ca du periodos, ma la corte constitual de la pais ia suporta la interprete de Nkurunziza, plu temprana en esta mense.
@T Sponsores de FIFA es ansiosa sur arestas per froda
@L aora_oji/2015/sponsores_de_fifa_es_ansiosa_sur_arestas_per_froda
====== Sponsores de FIFA es ansiosa sur arestas per froda ======
28 maio 2015
FIFA, la organiza governante de futbal, va abri oji sua congresa anial, an pos avertis par sponsores ce los va repensa cisa sua relatas pos la aresta de ofisiores major en acusas de froda.
Coca-Cola, Adidas e Visa ia es entre la companias ci ia vosi sua ansia.
La organiza european de futbal, UEFA, va deside esce lo va boicota doman la vota per la presidente seguente de FIFA.
Sete ofisiores major de FIFA ia es arestada en Zürich ier, entre 14 persones acusada.
Ance ier, FIFA ia anunsia ce 11 de acel persones es proibida de ativia relatada a futbal per la presente. Ma lo ia dise ce la eleje de presidente a venerdi, en cual la rolor esistente Sepp Blatter xerca un periodo sinco de preside -- va aveni.
Blatter, ci no es nomida en la investigas, ia declara: "Tal malcondui ave no loca en futbal, e nos va serti ce los ci partisipa en lo es escluida de la jua."
El va fa oji sua apare publica prima pos la arestas, a la congresa de FIFA en Zürich en Suiz.
Avocatos prosedente ia comensa ance un investiga separada sur la sistem de subasta per la torneos de la Copa Mundal en Rusia en 2018 e en Catar en 2022.
La sponsores xef de FIFA reseta esposa en stadiones e ave la direto de usa marcas comersial de FIFA en sua anunsias comersial.
Blatter ia es sever reproxada par UEFA, cual ia dise ce la avenis es "un desastre per FIFA e un manxa a la reputa intera de futbal". Lo ia alega ce la froda ave radises profonda en la cultur de FIFA.
UEFA ia fa ance la comenta ce la congresa risca deveni "un farsa" e ce on debe pospone la vota.
@T Tables de picnica viaja nonlegal en Australia
@L aora_oji/2015/tables_de_picnica_viaja_nonlegal_en_australia
====== Tables de picnica viaja nonlegal en Australia ======
18 novembre 2015
La polisia australian vole identifia un grupo de omes ci on ia filma en cuando los ia viaja sur tables motorida de picnica, sur stradas publica en la site Perth.
Un video ia sperde virusin, mostrante como la nove omes ia rola casual tra un crusa en Scarborough, un suburbe costal, a soldi.
Atestores ia dise ce los ia es divertida par la spetaculo, ma la polisia ia averti ce lo ia envolve periles real.
Los ia esplica ce la omes pote fronti acusas diversa, incluinte de gida un veculo nonlisensada e nonsecur.
En un posta a Facebook, la polisia de Australia Ueste ia dise: "Nos es consernada per la securia de los ci ia viaja sur la tables sin vestes protejente, spesial cuando sur stradas a lado de otra veculos motorida."
On reporta ce la posesor de la table ia dise ce un ofisior ia parla ja a la grupo e ia relasa los con mera un averti.
La posesor ia comenta: "Ambos gidores ia es sobre. La polisia ia demanda ce nos move la tables a traversa denova la strada, a la plaia. Nos ia obedi tota demandas par la polisia a soldi."
En esta anio, on ia aresta alga australianes per bevi alcol en gida veculos simil, incluinte caxas frinte a cual on ia ajunta rotas e un motor.
En janero, un om sur la Penisola Mornington a sude-este de Melbourne ia es multada per $1476 per viaja sur un caxa frinte sur un via de paseores.
@T Tai proibi la usa comersial de madres sustitua
@L aora_oji/2015/tai_proibi_la_usa_comersial_de_madres_sustitua
====== Tai proibi la usa comersial de madres sustitua ======
20 febrero 2015
Tai ia aproba un lege cual proibi stranjeres de paia a femes tai afin los deveni madres sustitua. Du casos major ia causa un debate en la anio pasada.
La lege proibi ance la usa de tal ajenterias, e de tota anunsias sur femes volente crese bebes per otras.
En 2014, la caso de un xico naseda con sindrom de Down ia fa ce la mundo persepi la industria de madres sustitua en Tai. Sua madre sustitua ia dise ce sua jenitores australian ia abandona la xico, ma ia prende sua sore jemelo sana con se.
Consernas sur la industria ia aumenta cuando on ia descovre ce un om japanes ia jenita plu ca des bebes con madres sustitua diversa.
Lo ia pare ce la comite medical de Tai ia proibi ja la usa de madres sustitua en 1997. An tal, acel industria ia buma denova, atraente multe stranjeres.
La legor Wanlop Tangkananurak ia dise ce la lege, prima presentada en parlamento en novembre, intende preveni ce Tai deveni "la utero de la mundo".
La lege defini un condena masima de 10 anios en prison per cualcun ci lua comersial un madre sustitua.
No tota sustituas es proibida. Duples tai pote continua usa sustituas si la fem pertinente ave plu ca 25 anios.
La caso de la xico bebe ia deveni conoseda tra la mundo. La xico, Gammy, ia resta en Tai con sua madre sustitua, Pattaramon Chanbua, ci ave 21 anios. Aora, Australia ia aseta el como sitadan afin el pote reseta cura medical.
@T Taiuan restrinje furnis de acua
@L aora_oji/2015/taiuan_restrinje_furnis_de_acua
====== Taiuan restrinje furnis de acua ======
8 april 2015
Taiuan ia comensa divide furnis de acua a plu ca milion casas en cuando lo fronti la secia la plu mal sur la isola en multe anios.
On va para intera la furni de acua per du dias en cada semana, en modo sirculinte, en alga sites norde.
La manca es causada par un redui de pluve cual ia lasa un nivel estrema basa de acua en lagos de reserva. Ma on culpa ance un sistem goteante de furni, la cumula de deponeda en la lagos, e simple la peri.
En la tarda de marto, la governa ia predise ce la periodo seca va continua.
On ia avisa ce abitores en areas afetada ta conserva acua per usa en coce e lava.
Sirca 1400 usores industrial -- incluinte fabricores de composantes cimical e eletronical -- es ance afetada. Asta aora, sua produis no ia cambia car los ave furnis en propre tores de acua, o ia ajusta sua program de fabrica.
En Taiuan, la custa de acua es entre la plu basas de mundo. Esta ia causa ce on peri vasta lo. La tubos sur la isola ia es construida a desenios ante aora, causante un perde par goteas de sentos de miliones de tones de acua per anio.
Ance deponedas acumulada en la lagos ia redui la capasia de conserva la pluve.
On critica la governas presedente e presente de Taiuan, como ance la compania publica de acua, per no ata sufisinte per trata esta problem a tempo plu temprana.
La governa ofre aora regalas per promove la conserva de acua, incluinte descontas per usas reduida, e un suporta finansial per instala valvas e vasones nonperosa.
On considera alti la custa de acua per minimi la peri, ma politicistes teme fa esta ante la elejes presidental e parlamental de la anio veninte.
@T Tempestas destruinte colpa la SUA sude
@L aora_oji/2015/tempestas_destruinte_colpa_la_sua_sude
====== Tempestas destruinte colpa la SUA sude ======
25 desembre 2015
A la min des persones ia es matada e plu deses ia es ferida par un tempesta destruinte cual ia traversa ier la sude de la SUA.
Ses ia es matada cuando siclones ia pasa tra la norde de la stato Mississippi en la note. Tre otras ia mori en Tennessee, e un en Arkansas.
On ia reporta no min ca 20 siclones de intensias diversa.
La autoriosas en partes de Mississippi fa aora un opera de xerca e salva, vadente de casa a casa. La stato ia es colpada par siclones multiple.
Un xico de sete anios ia es entre la vitimes. El ia es en un auto cual la tempesta ia saisi e lansa. Sua relatadas ci ia es ance en la auto es aora tratada en ospital.
Aviones a un airoporto peti en la norde-ueste de la stato ia es puxada a sur sua lados, e un cuantia nonsabeda de persones ia es ferida.
Un siclon grande ia ariva a tera en Mississippi e ia viaja tra 160 cilometres a Tennessee.
La menasa de siclones ia diminui en cuando la serie de tempestas ia move a este en jovedi. Ma pluves forte e tempestas de tona ia causa inondas e un caos per viajores en Georgia, Alabama, e Carolinas Norde e Sude.
La sentro nasional per predise tempestas, en Oklahoma, ia averti sur "un situa spesial perilosa" a la ves prima de pos junio 2014, cuando du siclones enorme ia ruina un vila campanial en la stato Nebraska, matante du persones.
La posible de un mal clima direta ante natal no es noncomun en la SUA. En la anio pasada, un siclon ia colpa la sude-este de Mississippi, matante sinco persones. E un tempesta de siclones multiple a la dia de natal en 2012 ia dana casas de Texas asta Alabama.
@T Teroristes ataca un museo en Tunis
@L aora_oji/2015/teroristes_ataca_un_museo_en_tunis
====== Teroristes ataca un museo en Tunis ======
19 marto 2015
La presidente de Tunis ia promete combate terorisme "sin pardona", pos cuando un ataca par fusilores a la Museo Bardo en la capital ia mata 19 persones.
Des-sete de la mores ia es turistes, incluinte visitores de Japan, Italia, Colombia, Australia, Frans, Polsca e Espania. Du tunisis, de ci un ia es un polisior, ia es ance matada.
Plu ca 40 persones, incluinte turistes e tunisis, ia es ferida.
Securiores ia mata du fusilores ma xerca ancora aidores.
La presidente, Beji Caid Essebsi, ia dise ce la pais es "en un gera con teror". En televisa nasional, el ia dise: "Esta minorias monstrin no asusta nos. Nos va resiste los asta la fini la plu profonda e sin pardona. Democratia va vinse e lo va survive"
A la tempo de la ataca, delegadas en la construida visina de parlamento ia discute leges antiterorisme. On ia vacui la construida, ma la parlamento ia reasembla per un consenta spesial en la sera.
Multe tunisis ia vade sur la stradas de Tunis sentral per protesta contra la ataca, brandinte banderas e ensendente candelas estra la museo.
Gidores de mundo ia condena la ataca e ia espresa sua suporta per la laboras par la pais contra terorisme.
La Consilio de Securia de la Nasiones Unida ia declara ce no ata teroriste pote reversa la dirije de Tunis a democratia. La declara ia ofre compatia a los ci la ataca ia afeta, e ia recomenda forte ce on puni la atacores.
La ataca es un colpa sever per la industria turiste de Tunis e per sua governa, cual ia emerji a mera menses ante aora pos un traversa longa political.
Combatosas islamiste ia atenta ruina la cambia a democratia, cual es frajil ma resta como la resulta la plu positiva de la Primavera Arabi de Asia sude-ueste.
La turisme es un campo major de la economia tunis, con un cuantia grande de visitores european a la vacanserias de la pais.
La ansia sur securia en Tunisia ia crese en menses resente en cuando Libia, un pais visina, ia deveni sempre min stable.
@T Tsipras rejeta un alia con sua oposor
@L aora_oji/2015/tsipras_rejeta_un_alia_con_sua_oposor
====== Tsipras rejeta un alia con sua oposor ======
15 setembre 2015
En Elas, la gidor de la partito sinistra, Alexis Tsipras, ia deside contra formi un alia con sua oposor xef si el vinse en un vota cual ia aveni ier.
Parlante en un debate con Vangelis Meimarakis, la gidor de Democratia Nova, un partito sentral destriste, Tsipras ia dise ce un tal governa aliada ta es "nonatural".
Sondas sujesta ce no la un no la otra va gania probable un majoria parlamental.
Tsipras ia anunsia la eleje subita pos reali un projeta de salva finansial con la Uni European en la mense pasada.
En la debate, ospitada par la difusor nasional ERT, Meimarakis ia dise ce elinicas desira la stablia cual sola un alia grande pote ofre. "Nos pote ave un ecipo nasional no sola per governa la pais, ma ance un ecipo nasional de negosia finansial," el ia dise.
Ma Tsipras ia responde ce "diferes fundal" esiste entre la du, tal ce un governa aliada no ta es posible.
On ia presenta la debate como un modo posible de gania votores ci ancora no ia fa sua deside. Seguente un sonda resente, ambos partitos ia reseta 31,6% de la votas.
Un debate prima ia inclui sinco otra partitos, ma esta nova ia permete ce la du omes fa demandas la un a la otra e comenta sur la respondes.
Plu temprana en esta anio, Tsipras ia deveni la ministro xef con promete de fini la medios finansial sever. Ma en loca, el ia es obligada a aseta un projeta de salva cual ia inclui plu reduis de spende.
El ia dise ce el vole continua batalia contra povria e froda, ma Meimarakis ia acusa el de ruina la economia.
@T Turcia es coler a la parola "jenoside" parlada par la Pape
@L aora_oji/2015/turcia_es_coler_a_la_parola_jenoside_parlada_par_la_pape
====== Turcia es coler a la parola "jenoside" parlada par la Pape ======
13 april 2015
Turcia ia retira sua ambasador de la Vatican pos cuando Pape Fransisco ia descrive como "jenoside" la mata coletiva de armenianes su governa osmanian en la Gera Mundal Prima.
La pape ia fa la comenta a un servi en Roma ier, e Turcia ia reata coler.
Armenia e multe istoriistes dise ce asta 1,5 milion persones ia es matada par soldatos osmanian en 1915. Ma Turcia ia disputa sempre esta mesura, disente ce la moris ia es un parte de un batalia interna cual la Gera Mundal ia causa.
La disputa continua dana la relatas entre Armenia e Turcia.
La comentas de la pape ia es fada a un misa en la rituo armenian catolica a la basilica de San Pedro, ante la presidente e xefes eglesal de Armenia.
El ia dise ce umanas ia vive tra "tre trajedias enorme e sin presedente" en la sentenio pasada.
"La prima," el ia dise, "cual es jeneral considerada como «la jenoside prima de la sentenio 20», ia colpa vosa propre popla armenian." Sua parolas ia repete un espresa usada en un declara par Pape Joan Paulo 2 en 2001.
Pape Fransisco ia refere ance a la crimines "esecutada par nazisme e stalinisme", e ia dise ce otra jenosides ia segue en Camputxa, Ruanda, Burundi e Bosnia.
El ia dise ce la onora de la memoria de los ci ia es matada es sua debe.
"Asconde o nega la malia es simil a permete ce un feri continua sangui sin trata lo con banda," la Pape ia ajunta.
Serzh Sargsyan, la presidente de Armenia, ia bonveni sua comentas, disente ce los envia un mesaje potiosa a la comunia internasional.
Ma Turcia ia clama direta la ambasador de la Vatican a Ankara per demanda un esplica, e ia retira plu tarda sua ambasador de Roma.
La ministreria de esternas ia dise ce lo senti "un delude e tristia grande" a la comentas de la Pape, sur cual lo ia dise ce los va causa "un problem de fida" entre los.
@T Turcia lamenta pos esplodes matante
@L aora_oji/2015/turcia_lamenta_pos_esplodes_matante
====== Turcia lamenta pos esplodes matante ======
11 otobre 2015
Turcia comensa tre dias de lamenta pos cuando du esplodes ier a un asembla per pas en la capital Ankara ia mata a la min 95 persones. Esta ia es la tal ataca la plu matante en la pais.
Lo ia lasa ance 245 persones ferida, con 48 de los en state sever.
Imajes televisada ia mostra senas de panica e persones covreda en sangue sur la tera, entre banderas protestante.
La governa ia nomi la esplodes "un ata teroriste" e ia rejeta coler alegas ce lo mesma es culpable.
La esplodes ia aveni prosima a la stasion sentral de ferovia en cuando on ia asembla per un prosegue organizada par grupos sinistriste. La asembla ia esije un fini de la violentia entre la rebelores separadiste curdi e la governa turces.
On ia intende comensa lo a mediadia. La du esplodes ia aveni no longa pos 10:00, en cuando folas ia comensa formi per prosegue. Un video de amator mostra un grupo de persones joven teninte manos e cantante cuando la esplode prima aveni.
Atestors ia descrive un coleria en la fola contra la polisia a pos. Un partisipor de la asembla ia dise ce la polisia ia usa gas lacrimojen "direta cuando la bomba ia esplode" e "no ia permete la pasa de ambulansias".
La ministro xef Ahmet Davutoglu ia dise ce on ave indicas ce du bombas umana ia esecuta la ataca. Lo ia aveni a tre semanas ante un refa de la vota parlamental nonconcluinte de junio.
La presidente Erdoğan ia descrive la ataca como "despetable". El ia cansela un visita intendeda a Turcmenistan.
La partitio HDP cual suporta la curdis ia es entre la asembladas. Sua xef, Selahattin Demirtaş, ia culpa la stato per la ataca e ia cansela tota asemblas ante la vota.
Demirtaş ia condena la governa como "omisidores" e ia dise ce lo ave sangue sur sua manos.
A ante, la partito ia culpa la governa per conspira en tal atacas contra ativistes curdi, ma la governa nega esta.
Cemalettin Haşimi, la dirijor de jornalisme e informa a la ofisia de la ministro xef, ia comenta ce tal alegas es "desonorosa, nonasetable". El ia insiste ce la autoriosas vole forte trova la atacores.
@T Turcia tira un avion rusce a tera
@L aora_oji/2015/turcia_tira_un_avion_rusce_a_tera
====== Turcia tira un avion rusce a tera ======
25 novembre 2015
Rusia dise ce un de sua pilotes ia mori e un otra manca pos cuando sua jeto ia es tirada a tera par Turcia cuando lo ia vola supra Suria. Un soldato marinal, envolveda en atenta salva los, ia es ance matada.
Seguente la ministreria de defende rusce, on ia xuta a la pilotes en cuando los ia salta con paracade de la avion. La elicotor de la soldato marinal ia es fusilida a pos.
La cade de la avion ia alti la tensa entre Rusia e Turcia.
La xef de OTAN ia dise ce lo suporta sua membro Turcia, ma el ia repete recomendas de calmia.
Turcia ia dise ce la jeto ia entra a sua spasio airal, ma la presidente rusce Vladimir Putin ia insiste ce la SU-24 ia es volante supra teritorio suri en cuando lo ia es colpada par la misil de aira a aira.
Putin ia descrive la cade de la avion como "un cotel en la dorso".
Rompente sua contatas militar con Turcia, la ministreria de defende rusce ia dise ce un cruser con sistem de defende airal va es enviada a la Mediteraneo per destrui "cualce blancos representante un peril posible" per soldatos rusce en Suria.
La militaria ia clari ce la bombadores rusce cual fa atacas airal supra Suria va es aora acompaniada par aviones xasante.
Un portavose per la ministreria rusce ia dise ce un ecipo de salva, usante du elicotores MI-8, ia atenta salva la du pilotes. "En la opera, un de la elicotores ia es fusilida par armas lejera, ia es danada, e ia atera urjente sur teritorio neutral. Un soldato marinal servinte par contrata ia es matada."
El ia ajunta ce la otra membros de la ecipo de salva ia es secur sortida de la area a la base airal rusce Humaymim, prosima a Latakia en Suria.
Rebelores suri ia dise ce los ia usa un misil antitance per esplode la elicotor, corta pos sua atera, e ia publici un video de esta ataca.
On ia avisa rusces a no visita Turcia -- un destina popular per turistes -- con ce Sergei Lavrov, la ministro de esternas, ia descrive la menasa teroriste ala como no min ca en Misre, do un ataca par bomba ia cade un avion rusce de pasajores en la mense pasada.
La presidente turces ia dise ce sua soldatos ia segue sua regulas de engrana. "Cadun debe respeta la direto de Turcia de proteje sua fronteras."
La SUA, la UE, e la NU ia apela per calmia.
Barack Obama, la prsidente SUA, ia telefoni sua corespondente turces, Recep Tayyip Erdoğan, per serti el ce la SUA suporta la direto de sua pais de defende sua domina.
El ia dise ce lo es importante ce on descovre la natur esata de la aveni e ce on ata per "descoraji cualce spesie de aumenta".
Ma el ia dise ance ce la aveni indica "un problem continuante" con la condui rusce en Suria, con la comenta ce si Rusia ta ataca Daex en loca de soldatos "moderada" de la oposa suri, tal avenis ta es nonprobable.
Rusia e Turcia ia trova se a lados oposante en la gera de Suria, con ce Rusia suporta sua aliada, la presidente Bashar al-Assad, e Turcia recomenda despone el.
@T Turcia vacui un tomba turces en Suria
@L aora_oji/2015/turcia_vacui_un_tomba_turces_en_suria
====== Turcia vacui un tomba turces en Suria ======
22 febrero 2015
Sentos de soldatos turces en veculos blindada ia entra a Suria norde e ia vacui un tomba osmanian istorial.
Turcia opina ce lo ave la autoria ultima sur esta santeria.
Ahmet Davutoğlu, la ministro xef de Turcia, ia dise ce on ia prende tempora la restas de Suleyman Shah a Turcia, ma ce on intende move los a un otra loca en Suria, plu prosima a la frontera turces.
Suleyman Shah ia es la avo de la fundor de la impero osmanian, Osman la Prima.
Soldatos ia destrui la compleso de la tomba, parente per preveni ce ativistes de Stato Islamiste usa lo.
La bandera turces ia es levada supra la santeria. La soldatos no ia es atacada en la opera, ma un de los ia mori asidental.
La opera ia comensa sirca 21:00 de ora local ier, e ia fini a esta matina.
Un convoia grande, incluinte 600 soldatos e sirca 100 tances e veculos blindada, ia pasa tra Kobani -- la site cual soldatos curdi suri ia recatura de SI en la mense pasada. Los ia viaja tra 35 cilometres a sude, asta la tomba a lado de la rivas de la rio Eufrates.
On crede ce Suleyman Shah ia mori en la rio.
La tomba ia es sempre gardada par un grupo de sirca 40 soldatos, con intercambias periodal.
La loca es un parte de la teritorio turces, seguente un trata suscriveda en franses en 1921.
A acel tempo, la tomba e enclave legal ia es a 80 cilometres plu sude de sua loca presente. On ia move los pos cuando la tomba orijinal ia es inondada par la crea de Lago Assad en 1974.
@T Turistes mexican es matada par soldatos egiptian
@L aora_oji/2015/turistes_mexican_es_matada_par_soldatos_egiptian
====== Turistes mexican es matada par soldatos egiptian ======
14 setembre 2015
Fortes de securia en Egipte ia mata 12 persones par era, incluinte turistes mexican, en un opera antiterorisme.
La turistes ia viaja en cuatro veculos cual ia entra a un zona restrinjeda en la area Wahat de la Deserto Ueste.
Des mexicanes e egiptianes ia es ance ferida. On trata los en un ospital local.
La ministreria de internas dise ce lo ia formi un ecipo per investiga la aveni.
Enrique Peña Nieto, la presidente de Mexico, ia condena la aveni, disente ce el "ia esije un investiga completa par la governa egiptian".
La ministreria mexican de esternas ia confirma ce a la min du de persones mexican ia es matada, e ia dise ce lo labora per confirma la identias de la otra vitimes.
@T Un acorda de clima deveni plu probable en Paris
@L aora_oji/2015/un_acorda_de_clima_deveni_plu_probable_en_paris
====== Un acorda de clima deveni plu probable en Paris ======
29 novembre 2015
Entre medios forte de securia, cuasi 150 xefes de mundo asembla oji en Paris per un consenta major de la Nasiones Unida sur la cambia de clima.
La confere, conoseda como COP21, va atenta prepara un acorda permanente per limita la emetes de carbono.
Oservores dise ce la atacas teroriste resente a la capital franses va aumenta la probablia de un acorda nova.
On previde ce sirca 40 mil persones va partisipa en la aveni, cual va continua asta 11 desembre.
La asembla de 147 xefes de stato o governa va es multe plu grande ca lo de 115 ci ia vade a København en 2009, a la ves la plu resente cuando la mundo ia prosimi a fa un acorda permanente sur cambia climal.
An si multe xefes, incluinte la presidentes Obama e Xi Jinping, ia intende sempre partisipa en esta confere, la atacas violente en Paris ia coraji otras a veni per espresa unia con la popla franses.
Diferente ca en København, la organizores franses introdui la xefes a la comensa de la confere, en loca de espeta sua ariva a la fini -- un tatica cual ia fali dramosa en la capital dansce.
La umor de la aveni es multe positiva, ma on trova ancora diferes notable entre la partitos. Un problem major es la forma de la acorda. Per esemplo, la SUA no va suscrive un acorda legal nonrompable, car on ta ave poca espera de aseta lo en la Senato dominada par republicistes.
En ajunta a la forma, multe problemes esiste ance sur la contenida. On ave un diversia grande de opinas sur la gol ultima de la acorda.
An si, parente, lo va es un caso de preveni ce la temperatur alti par plu ca 2°C supra la nivel preindustrial, la demanda de como on va representa esta en la testo es la tema de multe disputa.
Alga paises rejeta an la idea de 2°C e dise ce la norma debe es 1,5°C. Otras desira proposa la descarboni de la mundo ante la media o fini de esta sentenio. E produores major de petrolio odia la conseta.
@T Un airoporto abandonada es sobornada en Espania
@L aora_oji/2015/un_airoporto_abandonada_es_sobornada_en_espania
====== Un airoporto abandonada es sobornada en Espania ======
19 julio 2015
Un grupo de investores internasional ia gania un soborna bancarotal per un airoporto abandonada en Espania sentral. Los ia ofre €10 000: un sento-mili de la custa orijinal de construi.
La investores ia es la sola ofrores per la airoporto Ciudad Real a sude de Madrid. La airoporto ia es completida en la anios bumante de Espania.
Ma lo no es clar esce la vende va continua, car un otra compror pote ancora presenta se estra la prosede de soborna.
La ofre ganiante ia es fada par un uni de investores gidada par Xina. La grupo, nomida Tzaneen International, dise ce lo vole fa ce la airoporto deveni un loca de entra a Europa per companias xines.
On ia intende ce la airoporto, situada a 235 cilometres a sude de Madrid, va es un alternativa de la airoporto Barajas de Madrid.
On ia spende plu ca mil milion euros per construi lo. Lo ia abri en 2008, ma ia bancaroti e clui en 2012.
Cisa un otra compror va ofre ancora €28 mil euros -- la paia minima cual la manejores tempora ia fisa per la susede de la vende --- ante la fini de setembre.
La airoporto ave un capasia per 2,5 milion pasajores per anio. Lo es un de alga "airoportos fantasmin", creada en la buma de construi en Espania, cual no ia atrae un cuantia sufisinte de pasajores.
Un malfortuna simil ia aveni a la airoporto de Castellón en la este. Lo ia abri en 2011 ma an no un avion ia atera ala.
@T Un alarma roja de contamina en Beijing
@L aora_oji/2015/un_alarma_roja_de_contamina_en_beijing
====== Un alarma roja de contamina en Beijing ======
8 desembre 2015
Scolas en Beijing ia clui e la construi esterna ia sesa cuando on ia reali la "alarma roja" prima de contamina en la capital xines.
La esta averti de nivel la plu alta ia es avisada en la tarda de lundi e va continua asta mediadia a jovedi.
On ia restrinje la usa de autos e ia comanda alga fabricerias a sesa sua operas, e ia consela la clui de scolas cual no ave un bon sistem de filtri aira.
Esta aveni en cuando Xina, la contaminor la plu sever de mundo, partisipa en discutes sur emetes de carbono en Paris.
Xina ia adota un sistem de cuatro niveles de averti a pico plu ca du anios ante aora, ma esta es la ves prima de un alarma roja. An tal, la niveles presente de contamina es serta no la plu alta cual la site ia esperia.
Industrias e sistemes de caldi cual usa carbon, como ance emetes de veculos e polvo de construerias, contribui a la nebla fumosa cual ia deveni malida par umidia e un manca de venta.
On previde ce un fronte fria va ariva a jovedi, lejerinte la problem.
La usa de autos es permeteda sola a dias alternante, con ce la dia depende de la dijito final de la numero de la auto. Ofisiores ia promete plu transporta publica per compensa.
La site es bordada a sude e este par areas industrial cual crea contamina e a norde e ueste par montes cual trapi lo.
Xina depende ancora de carbon per plu ca 60% de sua potia, an pos investis major en fontes renovable de enerjia. On demanda sempre plu esce la pais ia promove sua crese economial a custa tro alta per sua ambiente.
@T Un apare publica rara par la re de Tai
@L aora_oji/2015/un_apare_publica_rara_par_la_re_de_tai
====== Un apare publica rara par la re de Tai ======
15 desembre 2015
Re Bhumibol Adulyadej de Tai ia fa un apare publica rara, entre un ansia sur sua sania malinte.
En imajes televisada ier publicida par la palasio, on vide ce el indui judores a un ospital do el ia reposa resente en Bangkok.
El ia es tratada per maladias diversa, incluinte un infeta de pulmon.
La sania de la monarca, ci ave 88 anios, es un conserna publica, car on adora vasta el e regarda el como un arbitror en la politica divideda de la pais.
La re es la monarca la plu longa servinte de mundo. A la ves la plu resente, on ia vide el en setembre, en un video relasada par la palasio.
Esta ia es la anio du en segue cuando el no ia pote partisipa en la selebras de sua aniversario, a 5 desembre. La dia aveni ia es onorada par un aveni de siclisme en Bangkok en la semana pasada, gidada par sua fio, la prinse erital Maha Vajiralongkorn.
Ofisiores de la palasio ia dona no plu detalias de la sania de la re a lundi.
Bhumibol ia reposa en multe ospitales de tempo a tempo en la anios resente, e on ia opera sur el per sutrae sua vesica bilal e per trata idrosefalia -- un cumula tro grande de licuida en la serebro.
On ia reentra el a la Ospital Siriraj en Bangkok en junio, a tempo corta pos relasa el a la ves presedente.
La popularia de la re veni partal de sua rena longa, ma on vide el ance como un colona de stablia en Tai. En anios resente, la pais ia sufri disputas political sever, e es aora controlada par un governa militar gidada.
Leges sever contra viole de reia proibi tota critica de el e la familia reial.
@T Un aresta en Arjentina sur oro de la sentenio 19
@L aora_oji/2015/un_aresta_en_arjentina_sur_oro_de_la_sentenio_19
====== Un aresta en Arjentina sur oro de la sentenio 19 ======
17 marto 2015
La autoriosas arjentina dise ce los ia aresta du omes de Paraguai ci ia atenta traversa la frontera con un bara de oro con valua de plu ca $2 milion.
La bara ia pesa 25 cilogrames e ia es impresada con la enscrive "Banco Sentral de Paraguai 1824".
Un de la arestadas ia dise ce los ia compra lo de un grupo de persones nativa per sirca $50 mil.
On ia saisi ance sirca un cilogram de arjento cuando la camion de la omes ia es parada per un xerca costumal.
Los ia traversa de la vila Encarnación en Paraguai a Posadas en Arjentina.
Con scanador, duanores ia trova la bara ascondeda su un seja de pasajor.
Reportas dise ce cisa lo ia es enterada per securia par un familia rica en la gera de la Alia Truple entre 1864 e 1870, cuando Paraguai ia batalia contra Arjentina, Brasil e Uruguai.
Paraguai ia es vinseda per la alia. Lo ia sufri un cuantia grande de moris e ia perde teritorios.
@T Un aseja teroriste en Mali fini
@L aora_oji/2015/un_aseja_teroriste_en_mali_fini
====== Un aseja teroriste en Mali fini ======
21 novembre 2015
Un ataca par estremistes islamiste suspetada en la capital de Mali ia fini. La atacores ia prende 170 persones como ostajes en la otel Radisson Blu.
La Consilio de Securia Nasional ia condena la "ataca odiable" en Bamako.
La fusilores ave "no plu ostajes" e es xasada. Plu ca 20 persones ia mori, e on ia declara un state nasional de crise.
Al-Qaida en la Magrib Muslim e sua parteninte al-Murabitoun ia dise ce los ia esecuta la ataca.
Parlante pos un conseta urjente de consilio en la tarda de ier, Ibrahim Boubacar Keita, la presidente malian ia anunsia un state de crise de medianote a venerdi per des dias, e ance tre dias de lamenta nasional.
El ia dise ce 21 persones ia es matada en la ataca, incluinte du fusilores.
Reportas plu temprana ia sujesta ce a la min 27 persones ia mori. Un ofisior de la Nasiones Unida, anonim parlante, ia revela ce on ia trova 12 corpos en la sutera e 15 sur la nivel du.
Un de la ostajes matada ia es Geoffrey Dieudonné, un membro de parlamento en la area Ualonia de Beljia. La ajenteria nasional de novas en Xina dise ce tre nasionales xines es entre la mores, e la departe de esternas de la SUA ia indica ce un sitadan SUA ia es matada.
Imajes mostra ce alga de la ostajes sortinte de la otel ia es ferida.
La presidente SUA, Barack Obama, ia dise ce la ataca es ancora un plu recorda ce "la tormenta de terorisme" menasa multe nasiones, e ia comenta ce la barbaria de la ataca "firmi sola nosa determina per fronti esta defia".
La otel es poseseda par un compania de la SUA, e es popular entre companias stranjer e ecipos de avion.
Atestores ia dise ce asta 13 fusilores ia entra a la otel, xutante e criante "Dio es la plu alta" en arabi.
Ante cuando soldatos spesial ia invade la construida, un fonte ia indica ce la teroristes libri alga ostajes si los es capas de resita partes de la Curan.
La presidentia de Mali ia grasia la soldatos de securia e paises amin per sua suporta en responde a la atacas. Soldatos SUA nonlaborante ia aida en la opera de salva ostajes, e soldatos spesial de Frans ia es ance envolveda.
On ia trova ancora no lia con la atacas en Paris cual ia mata 130 persones a un semana ante aora.
En agosto, fusilores islamiste suspetada ia mata 13 persones, incluinte sinco laborores de la NU, en un aseja con ostajes a un otel en la vila Sévaré en Mali sentral.
Frans, la potia colonial pasada en Mali, ia interveni en la pais en janero 2013, cuando estremistes liada a al-Qaida ia menasa marxa contra Bamako pos saisi controla de la norde de la pais.
La soldatos de la NU en Mali ia emprende la taxe de securia en la pais de soldatos franses e african en julio 2013, pos cuando on ia recatura la vilas xef en la norde de la estremistes.
@T Un asembla antigovernal sur la crise de dejetadas en Lubnan
@L aora_oji/2015/un_asembla_antigovernal_sur_la_crise_de_dejetadas_en_lubnan
====== Un asembla antigovernal sur la crise de dejetadas en Lubnan ======
30 agosto 2015
Miles de persones ia partisipa en un asembla en Beirut, la capital de Lubnan, per protesta contra un governa sur cual los dise ce lo es frodante e noncapas.
Multe securiores ia es presente car on ia teme ce la protesta va deveni violente, simil a los a la fini pasada de semana. En fato, la asembla a saturdi ia es xef pasosa.
Sua organizores ia esije ce la ministro de ambiente resinia ante la pasa de 72 oras.
La fali par la governa de solve la crise sur desprende dejetadas ia provoca la campania "Tu apesta".
La campaniores recomenda ce la governa fa un vota parlamental subita, e vole ance ce on judi la ministro de internas per la tro multe fortia usada par la polisia a la protestas de la semana pasada.
La protestores ia flue a un plaza major en Beirut sentral, brandinte banderas lubnani e criante sloganes antigovernal. Multe ia porta camisetas con la parolas "Tu apesta". Alga de los ia canta o jua musica.
Un grupo peti de jovenes mascida ia atenta rompe un parador de filo spinosa per ateni la ofisia de la ministro xef. Los ia ensende dejetadas e ia lansa petras e botelas de plastica a polisiores.
La paradores ia es instalada sirca construidas governal per forti la securia ante la asembla.
Montones de dejetadas ia formi sur la stradas de Beirut pos la clui en julio de la dejeteria enterante la plu grande de la pais. No loca alternativa es preparada.
Esta ia provoca a crea la promove "Tu apesta", cual culpa la paralise e froda political per la fali de solve la problem.
A martedi, la consilio de ministros no ia pote acorda un modo de progresa, disente ce la custas proposada par companias privata de maneja dejetadas es tro alta.
Lubnan es ja sin presidente tra plu ca un anio, e parlamentores ia estende sua propre periodos de ofisia asta 2017 pos fali acorda un lege per votas nova.
La gera en Suria visina ia mali ance divides political e setal, e ia causa la ariva de 1,1 milion refujadas, tensante la economia e la servis publica.
@T Un asidente de naveta en Bangladex
@L aora_oji/2015/un_asidente_de_naveta_en_bangladex
====== Un asidente de naveta en Bangladex ======
23 febrero 2015
Un naveta ia inversa en Bangladex sentral, matante a la min 69 persones, incluinte multe enfantes.
La naveta ia porta plu ca 100 persones. Lo ia xoca un barcon de carga sur la rio Padma a sirca 40 cilometres a norde-ueste de la capital, Dhaka.
Deses de pasajores ia nada a la riva o ia es salvada. Los ci ia mori ia es xef trapida a la niveles basa.
Asidentes es comun en la rede de rios bangla. La barcos es suprafolida e mal construida.
On ia leva la naveta a la surfas e ia tira lo a la riva a esta matina.
Nun sabe esata cuanto persones ia es sur lo, car navetas bangla no ave usual listas formal de pasajores.
La polisia ia aresta tre persones, incluinte a la min un ci ia es encargada de dirije la barcon de carga.
Un asidente simil, plu temprana en febrero, ia mata sete pasajores, cisa plu, en Bangladex sude.
En agosto 2014, plu ca 100 persones ia mori cuando un naveta ia inversa, portante plu ca 200 persones. Lo ia es ofisial capas de porta 85.
@T Un asidente de naveta en Hongkong
@L aora_oji/2015/un_asidente_de_naveta_en_hongkong
====== Un asidente de naveta en Hongkong ======
26 otobre 2015
A la min 124 persones ia es ferida cuando un naveta de rapidia alta, viajante de Macau a Hongkong, ia colpa un ojeto en la acua.
La naveta, portante 174 pasajores e ecipores, ia perde sua potia cuando lo ia es prosima a la isola Lantau a sirca 18:00 de ora local, e ia comensa lasa acua a en.
On ia envia barcos de polisia maral per salva la pasajores. Jornalistes local ia reporta ce multe ia ave feris a sua membros e fases.
Alga pasajores ia resta sur la barcon, espetante es salvada tra alga oras.
Un pasajor ia descrive la esperia: "La lampas ia estingui subita. Prima, lo ia es caososa, ma alora la pasajores ia susede calmi se pos tempo corta."
A esta matina, sinco persones es ancora en un state estrema grave.
Hongkong ave vias navigable entre la plu ativa de mundo, e la via de Macau es un de la plu populares.
La nivel de securia es alta, ma on ia vide alga asidentes sever en anios resente.
Deses de persones ia es ferida en novembre 2013 en un aveni simil, cuando un naveta ia colpa un ojeto en la acua.
En otobre 2012, 39 persones ia mori en un xoca entre un barcon de plaser e un naveta de pasajores. On ia condena la capitan de la naveta de mata sin intende.
@T Un ataca beljes contra teroristes
@L aora_oji/2015/un_ataca_beljes_contra_teroristes
====== Un ataca beljes contra teroristes ======
16 janero 2015
Beljia vijila estrema pos un ataca major antiterorisme en cual du combatosas islamiste suspetada ia es matada.
La suspetadas ia es fusilida en Verviers, un vila este prosima a la frontera deutx con sirca 56 mil abitores, pos cuando los ia usa armas automata per xuta a la polisia en la sera ier.
Los ia reveni de Suria e ia scema atacas prosiminte contra blancos polisial.
Un otra suspetada ia es ferida e arestada.
A pos, on ia descovre cuatro fusiles automata, aparatos per crea bombas, e vestes de polisia.
Multe securiores resta en la area de Verviers.
Alga scolas iudi en Antwerpen e Bruxelles es oji cluida pos es informada ce los es blancos posible.
On ia fa xercas tra la note ance en la area de la capital Bruxelles, incluinte sua vilas ambiente.
Plu temprana en la dia, du islamistes suspetada ia es arestada en la suburbe Zaventem.
Ofisiores beljes dise ce plu ca 300 persones ia parti de Beljia per junta se a grupos de islamistes combatosa en Suria e Irac. On crede ce, entre la paises de Europa, Beljia ave la cuantia la plu grande per person de combatores stranjer ci ia partisipa en combate en Suria.
Sur la suspetadas en Verviers, on crede ce los ia scema un ataca contra un ofisia de polisia per mata un cuantia grande de persones.
Atestores ia reporta oia fusilis intensa tra alga minutos, e tre esplodes a la min. La area sirca la stasion ferovial es ancora cluida.
Charles Michel, la ministro xef de Beljia, ia dise ce la esta opera par la securiores "mostra la ostina de la governa per combate los ci vole sperde la teror".
@T Un ataca matante contra la libria jornaliste en Frans
@L aora_oji/2015/un_ataca_matante_contra_la_libria_jornaliste_en_frans
====== Un ataca matante contra la libria jornaliste en Frans ======
8 janero 2015
Frans lamenta des-du persones matada cuando la revista satira Charlie Hebdo ia es ier atacada par fusilores clamante sloganes islamiste.
La polisia franses ia aresta ja sete persones e xerca aora du suspetadas nomida. La sete, liada a la du suspetadas xef, ia es arestada en la vilas Reims e Charleville-Mézières, e ance en la area de Paris.
On ia publici fotos de du frates, Chérif e Saïd Kouachi, sur ci la polisia suspeta ce los ia es envolveda en la ataca, con averti ce los es "armada e perilosa".
Chérif Kouachi ia es condenada a tre anios en prison en 2008 per parteni a un grupo en Paris cual ia envia combatores jihadiste a Irac.
Un suspetada tre, Hamyd Mourad, ci ave 18 anios, ia sede se a la polisia en Charleville-Mézières pos oia sua nom en la novas.
La pais va fa un minuto de silentia a mediadia, e la campanas de Notre Dame en la capital va sona.
Paris vijila aora a la grado la plu alta contra terorisme. On ia envia plu soldatos per garda ofisias jornaliste, locas relijial, transporta publica, e otra areas perilida.
A esta matina on reporta un fusili nova a un stasion de metro en la sude de Paris, do a la min un polisior es ferida. On no sabe esce esta es relatada con la ataca a Charlie Hebdo.
Ier, alga pos la ora des-un, oto jornalistes -- incluinte la editor de la revista -- ia mori, como ance un mantenor e un visitor, cuando omes mascida con fusiles de ataca ia invade la ofisias de Charlie Hebdo a media de un consenta edital.
Des-un otra persones ia es ferida, grave en alga casos.
Du polisiores ia es matada sur la strada a estra cuando la atacores ia fuji par auto a Paris norde. Alora la atacores ia abandona sua auto e ia saisi un otra.
La ofisia de la jornal ia es atacada con un bomba ensendente en 2011. Lo ia coleri alga muslimes par primi cartunes de la profeta Muhammad, como parte de sua disposa nonrespetosa a novas e avenis corente.
On ia fa vijilas tra la note en Paris e sites tra la mundo como tribui a la mores. Multe persones ia teni cartones con la testo "Je suis Charlie" (= me es Charlie) per onora la vitimes.
Candelas e montones de penes simbolinte la libria de espresa ia es poneda sur la Plaza de la Republica en Paris, do miles de persones ia asembla. Tribuis de cartun sirculi en redes sosial, enviante un mesaje de libria jornaliste.
La presidente François Hollande ia dise ce on ia ataca la tradision de parla libre en Frans.
La Universia Al-Azhar en Cairo, la sentro xef de eruditia de islam suni, ia descrive la ataca como "criminal", asentuante ce la relijio muslim denunsia "tota violentia". Ance la Lia Arabi ia condena forte la ataca.
@T Un ataca teroriste es prevenida prosima a Orléans
@L aora_oji/2015/un_ataca_teroriste_es_prevenida_prosima_a_orleans
====== Un ataca teroriste es prevenida prosima a Orléans ======
23 desembre 2015
La polisia franses ia preveni un ataca teroriste contra polisiores e soldatos en la area de Orléans.
Bernard Cazeneuve, la ministro de internas, ia dise ier ce du omes, con 20 e 24 anios, ia es arestada a 19 desembre e ce on teni los per interoga.
On pensa ce ambos ia es en contata con un franses sur ci on crede ce el es en Suria.
Frans ia esperia sua atacas la plu grave de desenios en novembre, cuando 130 persones ia es matada en Paris.
Parlante en la site sude Toulouse, Cazeneuve ia dise ce on ia preveni 10 atacas en Frans asta aora en esta anio.
El ia ajunta ce la investiga sur la conspira alegada la plu resente, a sude-ueste de Paris, va esamina esce la ataca ia es comandada par la om franses en Suria, sur ci on crede ce el es un jihadiste.
Un de la arestadas ia confesa ce los ia intende ataca polisiores, empleadas militar, e cualcun asosiada con la stato franses.
Investigores pensa ce la suspetadas ia colie mone per la conspira e ia es xercante armas.
On reporta ce la polisia ia es ja consensa de la suspetadas, e ce la otra ia es conoseda como un criminor minor.
Cazeneuve ia dise ance ce on ia refusa la entra de 3414 persones a Frans, "par causa de la risca cual los presenta a la securia e la ordina publica", pos la declara de un state de crise pos la atacas en Paris.
@T Un atestor en la prosede de Ruto es matada en Cenia
@L aora_oji/2015/un_atestor_en_la_prosede_de_ruto_es_matada_en_cenia
====== Un atestor en la prosede de Ruto es matada en Cenia ======
7 janero 2015
La avocato de un om mor, ci on ia trova en Cenia a la fini de semana, ia dise ce la om ia es un atestor major per Vispresidente William Ruto a sua prosede en Den Haag.
On ia descovre la corpo descomposada de Meshack Yebei en Cenia ueste pos reportas ce el ia es saisida a 28 desembre.
La Corte Criminal Internasional ia dise ce Yebei ia refusa partisipa en sua program de proteje atestores.
Ruto nega acusas de crimines contra umanas sur violentia cual ia esplode pos la eleje de 2007.
El es la governor la plu alta ci la corte en Den Haag ia prosede de pos sua formi a plu ca un desenio ante aora.
La corte ia abandona acusas simil contra Presidente Uhuru Kenyatta en la mense pasada, alegante ce on ia menasa atestores acusante afin los cambia sua atestas. Kenyatta ia insiste ce el es nonculpable.
La Dirijor de Prosedes Publica en Cenia ia comanda ce la polisia fa "un investiga rapida e completa" sur la omiside de Yebei.
Sua familia ia dise resente ce el ia es matada per preveni ce el apare a Den Haag, ma on no ia confirma ofisial ce el ia es envolveda en la prosede de la vispresidente.
La corpo de Yebei ia es trovada a saturdi, prosima a un ponte sur la via entre Eldoret e Kisumu. La autopsia ia mostra ce on ia colpa el a la testa con un ojeto pesosa e nonagu.
Ruto e Kenyatta ia es a lados oposante en la eleje de 2007, ma los ia alia se per la eleje de 2013 cual ia propulsa los a la governa.
Sirca 1200 persones ia mori e 600 mil ia fuji en la gera, cual ia es la plu mal en la pais de pos cuando lo ia deveni autonom.
@T Un ava es reunida con un fem ci no es sua neta
@L aora_oji/2015/un_ava_es_reunida_con_un_fem_ci_no_es_sua_neta
====== Un ava es reunida con un fem ci no es sua neta ======
27 desembre 2015
Un ativiste arjentina de 92 anios ci ia spende cuasi un dui de sua vive en xerca sua neta mancante va debe recomensa xerca pos un caso de identia erante.
María Isabel Mariani, conoseda como Chicha, ia anunsia a jovedi ce el ia encontra final sua neta. Clara Anahí Mariani Teruggi ia es saisida par la militaria en 1976. Ma un avocato prosedente ci labora sur la caso ia dise ce seniora Mariani ia es presentada a un fem noncoreta.
La anunsia a jovedi ia es bonvenida como un plu vinse per Avas de la Plaza de Mayo, un grupo campaniante cual ia formi per aida reuni familias con sua enfantes mancante.
An presidente Mauricio Macri ia selebra la anunsia a sua conta de Twitter.
Ma a du dias plu tarda, on ia publici probas de ADN cual mostra ce la fem cual Mariani ia encontra no es sua neta.
Seniora Mariani es cuasi sieca, ma intende continua la xerca.
Sua neta ia es saisida a 39 anios ante aora, a la eda de mera tre menses. Sua jenitores ia es membros de Montoneros, un grupo sinistriste.
La bebe ia es prendeda de sua casa en un opera en cual Diana Teruggi, la madre, ia es matada. Daniel, la padre de la bebe e la fio de Mariani, ia evade e asconde se, ma ia es matada pos alga menses.
Nun sujesta ce la fem ci ia encontra Mariani ia atenta engana el.
La organiza Avas de la Plaza de Mayo ia reuni ja 119 enfantes con sua familias.
On estima ce sirca 30 mil persones ia es matada en la plu ca sete anios de rena militar en Arjentina.
@T Un avansa en la discutes per salva la economia de Elas
@L aora_oji/2015/un_avansa_en_la_discutes_per_salva_la_economia_de_elas
====== Un avansa en la discutes per salva la economia de Elas ======
23 junio 2015
La ministro de economia elinica ia revela la detalias de proposas nova per fini la state de nonprogresa sur la crise de deta en la pais. La ideas inclui impostas nova a comersias e persones rica.
Ministros de finansia en la eurozona ia bonveni la scema, disente ce lo es aora posible ce un acorda va es realida pos no multe dias.
Elas debe repaia un presta de 1,6 mil milion euros par la Reserva Monal Internasional ante la fini de esta mense. Si lo no repaia, lo va risca sorti de la euro e cisa ance de la Uni European.
Xefes de statos en la eurozona ia discute ier la proposas a un confere en Bruxelles.
La proposas inclui ance un aumenta en la tarifa de IVA (imposta de valua ajuntada) per alga benes.
Entretempo, deses de polisiores antitumulta es ativa per preveni scaramuxas entre protestores asemblada estra la parlamento elinica.
La discutes ia es trapida en un rua sin sorti tra la sinco menses pasada. La Comision European, la Reserva Monal Internasional, e la Banco Sentral European no desira relasa la 7,2 mil milion euros final de sua mone de salva ante cuando Elas acorda a reformis economial.
La Banco Sentral European ia crese denova sua finansia de crise a bancos elinica, pos cuando clientes ansiosa ia retira plu ca 4 mil milion euros en la dias resente.
Alexis Tsipras, la ministro xef de Elas, ia esclui ja la posibles de redui pensiones o alti la custa de eletrica. El ia dise ce el espera ce Elas "va reveni a crese en la eurozona".
El ia consenta ier con la xefes de la tre creditores internasional de Elas en Bruxelles, la capital de Beljia, ante discute con la ministros xef de 18 otra nasiones de la eurozona.
Ma ministros finansial ia dise ce los no ia reseta un tempo sufisinte per studia la proposas e judi coreta los, a media ance de un confusa causada par la presenta de varias diversa de los.
Un de la figures major, Jean-Claude Juncker, la xef de la Comision European, ia dise ce sua gol es trova un acorda "ante la fini de la semana".
La novas de un avansa posible ia felisi asionerias european. La asioneria xef de Elas ia asende par 9% a la fini de comersia ier.
@T Un avion cade en la Alpes sin survivores
@L aora_oji/2015/un_avion_cade_en_la_alpes_sin_survivores
====== Un avion cade en la Alpes sin survivores ======
25 marto 2015
Un avion deutx, portante 150 persones, ia cade ier en la Alpes franses en via de Barcelona a Düsseldorf.
La Airbus A320 ia cade entre Digne e Barcelonnette. Nun ia survive.
La avion ia desende rapida tra oto minutos, sin envia un sinial per aida.
On ia trova un de la du caxa negras -- la rejistrador de vose -- ma lo es danada e on ancora no sabe la causa de la cade. On espera trova oji la rejistrador de datos de vola.
Entre la pasajores, 16 studiantes deutx ia es reveninte de un viaja de intercambia cultural.
La avion parteni a Germanwings, un airocompania de custa basa cual es poseseda par Lufthansa. La compania ave un istoria eselente de securia.
La gidores franses, espaniol, e deutx ia espresa sua xoca e intende visita la loca.
Un ecipo de salva ia ateni la loca, en un canion montanial distante. Los ia debe sesa sua labora en la sera, ma los ia recomensa oji a lus prima.
La ministro xef de Espania, Mariano Rajoy, ia declara tre dias de lamenta nasional.
@T Un avion ensende en Las Vegas
@L aora_oji/2015/un_avion_ensende_en_las_vegas
====== Un avion ensende en Las Vegas ======
9 setembre 2015
Un avion con destina de London ia ensende a la airoporto de Las Vegas, obligante la sorti de 172 persones par toboganes de crise.
A la min 13 persones ia es prendeda a ospital con feris minor, de cual la plu ia es sufrida en lisca longo la toboganes inflable.
Un portavose per la Dirije Federal SUA de Avioni ia dise ce la motor sinistra de la Boeing 777-200 ia ensende ante la enaira. On ia vide la avion a media de flamas e fuma. La focon ia es estinguida a pos.
La avion 2276 de British Airways ia intende vola a la airoporto Gatwick en London. Lo ia conteni 159 pasajores e 13 ecipores.
Jacob Steinberg, un jornaliste entre la pasajores, ia tuita: "Dorminte per la enaira de la avion. Veni a un para xocante. Odor de fuma. Inisial on recomenda resta sentante, alora cria per sorti."
El ia ajunta plu tarda: "Me ia pote ole e vide fuma ma ia es a otra lado de avion. Algun ia dise ce la focon ia fonde du fenetras."
Alga de la persones en la avion ia vide fuma en la cabana cuando on ia abri un sorti e ia declara direta ce lo es nonsecur.
Un atestor espetante en la construida ia vide "esplodes de flamas veninte de la media de la avion".
On investiga aora la focon pos lo cual ia es clar un evita fortunosa. Ofisiores ia dise ce los ia clui un de la atererias, ma ce tre otras continua opera.
La airoporto McCarran es un major en la SUA. Lo ia maneja plu ca 40 milion pasajores en la anio pasada.
@T Un avion lisca de la atereria en Japan
@L aora_oji/2015/un_avion_lisca_de_la_atereria_en_japan
====== Un avion lisca de la atereria en Japan ======
15 april 2015
En Japan, autoriosas de securia investiga como un avion de Corea Sude ia patini de sur un atereria pos atera a la airoporto de Hiroshima.
La 74 pasajores e sete ecipores ia debe infla la toboganes de crise per sorti de la Airbus 320, tarda ier. On reporta ce a la min 20 persones ia es ferida.
Ofisiores de la ministreria de transporta ia dise ce probable un rota de la avion ia colpa un strutur de radio prosima a la atereria.
La strutur, nomida la locador, aida aviones a trova la atereria. On ia descovre un frato de lo sur la rota sinistra de la avion.
Imajes de la sena ia pare mostra un dana a la tore de 6 metres, con metal laserada e torseda.
La lado sinistra de la coda de la avion ia es ance danada, e la comite de securia de transporta investiga.
La airocompania Asiana ia demanda es pardonada per la asidente, disente ce lo ia institui un ecipo de responde per maneja la tempo seguente.
Pasajores ia comenta ce los ia oia un esplode pos atera, e la cabana ia es pronto plenida con fuma e un odor de arde. La avion ia pare ance lisca longo la tera.
Un fem ia dise: "Fuma ia emerji, e alga de la mascas de osijen ia desende. La ospitores ia es tan en panica, e me ia pensa: «nos va mori»."
La avion ia vola de Hiroshima de la airoporto Incheon, prosima a Seoul en Corea Sude.
En julio 2013, un otra avion de la mesma compania ia cade en atera a San Francisco en la SUA pos colpa sua coda contra un mur maral. Tre persones ia mori en acel cade, incluinte un adolesente xines ci ia es craseda par un camion de pompores en la caos.
@T Un avion rusce cade en Egipte
@L aora_oji/2015/un_avion_rusce_cade_en_egipte
====== Un avion rusce cade en Egipte ======
1 novembre 2015
On investiga pos cuando un avion rusce ia cade en Egipte, matante tota 224 persones cual lo ia porta.
La ministro xef de Egipte, Sharif Ismail, ia dise ce un fali tecnical ia es la causa la plu probable, rejetante alegas par ativistes de Stato Islamiste ce los ia es culpable.
An tal, tre airocompanias -- Emirates, Air France, e Lufthansa -- ia deside no vola supra la Penisola Sina asta cuando on ave plu informas.
Rusia oserva un dia de lamenta pos esta, sua desastre avional la plu mal.
On ia trova ja la rejistradores de la avion e ia envia los per analise.
La cade es un colpa major per la industria ja problemosa de turisme en Egipte, e la autoriosas egiptian labora multe per aselera la prosede de investiga.
La Airbus A-321 de la compania Kogalimavia ia cade en la temprana de ier, corta pos parti de la vacanseria Sharm el-Sheikh en dirije a San Peterburg en Rusia.
Hossam Kamal, la ministro egiptian de avioni publica, ia dise ce on ia vide no indica de problemes en la avion, contradisente lo cual un otra ofisior egiptian ia dise plu temprana: ce, ante perde contata con controlores de trafica airal, la pilote ia declara ce la avion esperia problemes tecnical e ia demanda urjente per un atera a la airoporto la plu prosima.
En Rusia, la sposa de Sergei Trukhachev, la copilote de la avion, ia dise ce sua sposo ia cexa sur la state tecnical de la avion.
Investigores rusce e franses ia junta se a la esplora gidada par Egiipte, con ance espertas de Airbus, cual ave sua xeferia en Frans. Entretempo, un ecipo rusce ia ariva a la loca de cade per aida la labora de regania la corpos.
On ia abri un caso criminal contra Kogalimavia per "viole regulas de vola e de prepara per vola". La polisia ia xerca la ofisias de la compania.
Un portavose per Kogalimavia ia insiste ce la avion, cual ia ave 18 anios, ia es "intera secur per vola, a 100%", e ia ajunta ce la pilote ia ave 12 mil oras de esperia de vola.
En Sina mesma, do grupos jihadiste es ativa, combatosas aliada a Stato Islamiste ia declara en redes sosial ce la avion KGL9268 ia es cadeda par los. Ma Sharif Ismail ia rejeta esta, disente ce espertas ia confirma ce un misil de tera a aira no pote cade un avion cual vola a la altia (9450 metres) cual la Airbus ia ave.
Maksim Sokolov, la ministro rusce de transporta, ia dise ce "on no pote opina ce tal reportas es vera". On ia vide no atesta indicante ce la avion ia es un blanco.
La avion ia porta 217 pasajores, incluinte 25 enfantes, e sete ecipores. Egipte ia dise ce 213 de la pasajores ia es rusce e cuatro ia es ucrainsce, ma Rusia ia ajunta ce a la min un de la vitimes ia veni de Bielarus.
On ia retrae ja plu ca 140 corpos, prendente los a Qahira (Cairo). On previde ce la corpos prima rusce va es volada a San Peterburg oji.
Un ofisior ia descrive "un sena trajediosa" en cual la corpos de la vitimes ia es ancora bandida a sua sejas. El ia ajunta ce la avion ia pare fende a du partes, pos cuando un parte ia arde e la otra ia colpa un roca.
@T Un avion solal comensa sua vola sirca la globo
@L aora_oji/2015/un_avion_solal_comensa_sua_vola_sirca_la_globo
====== Un avion solal comensa sua vola sirca la globo ======
9 marto 2015
Un atenta recordo de vola sirca la mundo en un avion de enerjia solal ia comensa.
La avion -- nomida Solar Impulse-2 -- ia enaira de Abu Dhabi en la Amirias Arabi Unida, viajante a este en dirije a Muscat en Oman.
Tra la sinco menses veninte, lo va move de continente a continente, traversante e la Mar Pasifica e la Mar Atlantica en sua viaja.
André Borschberg ia controla la veculo de un person cuando lo ia enaira a 07:12 de ora local (03:12 universal).
Tra la viaja, el va divide la taxe pilotal con un otra suiz, Bertrand Piccard.
Los intende para a locas diversa sirca la globo, per reposa e manteni, e ance per distribui un mesaje de campania sur tecnolojias limpa.
La viaja oji a Oman va traversa sirca 400 cilometres e ocupa sirca 12 oras. On posta detalias de la viaja en la interede.
La avion segue un prototipo de la mesma projeta, e sua largia entre alas es 72 metres, plu ca un jeto 747. An tal, lo pesa sola 2,3 tones.
Lo porta 17 mil selulas solal sur sua alas, e va usa pilas de ion de litio per susta se en la note.
Sua capasia de opera en oscuria va es spesial importante cuando la avion traversa la Pasifica e la Atlantica. Car lo viaja lenta, esta partes de sua viaja va ocupa un serie de dias e notes sin pausa.
La pilote va debe resta vijilante tra cuasi tota acel tempo. El va pote fa dormetas de no plu ca 20 minutos.
El va debe tolera ance la descomforta fisical de es encluida en un piloteria cual no es multe plu grande ca un ciosco de telefon.
@T Un barco de pexa afonda en Rusia este
@L aora_oji/2015/un_barco_de_pexa_afonda_en_rusia_este
====== Un barco de pexa afonda en Rusia este ======
2 april 2015
Un dragador rusce ia afonda prosima a la penisola Kamchatka en la este de la pais, matante a la min 54 marinores, incluinte la capitan.
On ia salva 63 tre persones, de ci multe ia sufri de ipotermia, ma la 15 otras manca ancora. On crede ce la 15 ia es grapida en la cala.
78 de la ecipo ia es rusce, e 42 ia es de Miama. La resta ia veni de Vanuatu, Latvia e Ucraina.
La Vostok Dalniy ("Este Distante") ia es un barco de pexa. Lo ia afonda en la Mar de Okhotsk, a 330 cilometres a ueste de Krutogorovsky, a sirca 06:30 de ora local (20:30 de ora universal).
La capitan de un de la 26 barcones de salva ia dise ce la clima ia es mal cuando la barco ia afonda, con neva, venta, e ondas de asta tre metres de altia.
La acua ia ave un temperatur cuasi jelada. Un portavose ia dise ce on pote survive en tal acua per asta dudes minutos.
On no sabe la causa de la trajedia, ma un dana a sua sala de motor sujesta ce la barco ia colpa alga ostaculo, cisa jelo vagante. Acua ia inonda la sala e la barco ia desapare en min ca 15 minutos.
Un ofisior en Kamchatka ia dise ce, cuando la barco ia afonda, lo ia tira un rede de draga con pesa de 100 tones. Cisa on ia desobedi regulas de securia, esedente la limita masima de carga.
La barco no ia envia un clama per aida.
@T Un barcon de cimicales nosiva afonda en Costa Rica
@L aora_oji/2015/un_barcon_de_cimicales_nosiva_afonda_en_costa_rica
====== Un barcon de cimicales nosiva afonda en Costa Rica ======
4 maio 2015
En Costa Rica, un barcon conteninte cimicales nosiva ia provoca un crise a lado de la costa de Puntarenas, un vila turiste, cuando lo ia afonda en mar turbosa.
La governa ia institui un zona de crise longo sirca 100 cilometres de costa, e ia demanda ce on evita nada e pexa.
La barcon ia es transportante sirca 200 tones de nitrato de amonio, un sustantia usada en fertilintes e esplodentes.
Ma un portavose ia dise plu tarda ce on no ia trova plu ca trasas peti de la sustantia en la acua.
La Comision de Crise de la pais ia dise ce persones pote denova nada secur, ma ce lo va proibi la pexa per 72 plu oras.
Esta organiza ia descrive la situa como "preveninte" par causa de "la efeto posible de nitrato de amonio a la sania umana".
La cimical es multe disolvable, e la Comision de Crise espera ce lo ia disolve ja, portada a la mar profonda par la marea.
Ofisiores governal ia dise ce on va comensa la plu pronto un investiga sur ci es culpable per la afonda de la barcon e la malversa cimical.
Costa Rica ave la cuantia la plu grande de turistes stranjer en America Sentral, e es un loca popular per ecoturistes par causa de sua plaias noncontaminada, sua forestas tropical, e sua parces grande de natur.
@T Un barcon de turi xines inversa
@L aora_oji/2015/un_barcon_de_turi_xines_inversa
====== Un barcon de turi xines inversa ======
2 junio 2015
Sinco persones ia mori e sentos manca pos la inversa de un barcon de turi sur la Rio Iangtse en la provinse Hubei de Xina. Lo ia porta 458 persones.
La barcon flota aora inversada en un parte larga de la rio. Salvores ci ia bateta la strutur esterna ia oia clamas per aida de interna.
On reporta ce la barcon, la Stela Este, ia envia no sinial de crise. Alga persones ia nada a la tera per avisa la polisia.
La plu de la persones sur la barcon ia es turistes, con 50 asta 80 anios, viajante de Nanjing, un site este, a Chongqing en la sude-ueste, un viaja de plu ca 1500 cilometres.
La labora de salva es impedida par venta e pluve forte.
On ia salva sola sirca 12 persones asta aora. Alga persones con feris minor es ospitalida.
Xina no ia esperia un desastre tan grande en un tempo longa. La governa controla forte la informa cual sorti de la sena, e jornalistes local es prevenida de prosimi.
Miles de soldatos e salvores es ativida, e on envia un barcon potiosa de salva per desinversa la barcon de turi.
La capitan e la injenior xef, de ci ambos ia es salvada pos plu ca un ora en la acua, es tenida par la polisia. On reporta ce los ia dise ce la barcon ia es colpada par un siclon e ia afonda en poca minutos, cuando multe pasajores ia dormi.
La Stela Este ave 76 metres de longia, pesa 2200 tones, e es capas de casi 534 persones.
Lo ia afonda ier en la parte Damazhou de la Iangtse en la contia Jianli de Hubei, a sirca 21:30 de ora local (13:30 de ora universal). La acua ala ave sirca 15 metres de profondia.
Salvores no ia ateni lo asta du oras e en dui, cisa plu, pos la asidente.
La barcon es poseseda par la Corpora de Barcones Este de Chongqing, cual organiza turis a la Tre Caniones, un area de belia longo la rio.
Relatadas ansiosa ia asembla estra la ofisia de la compania en Shanghai, ma lo resta cluida. Los ia dise a reportores ce los no ia susede telefoni a sua amadas en la barcon.
@T Un batalia contra la Taliban en Kunduz
@L aora_oji/2015/un_batalia_contra_la_taliban_en_kunduz
====== Un batalia contra la Taliban en Kunduz ======
30 setembre 2015
En Afganistan, on continua combate forte en la site Kunduz, a la dia pos un contrataca par soldatos governal per reclama lo de la Taliban.
Ier, du atacas airal par la SUA ia para un atenta par rebelores de saisi la airoporto, cual la armada usa como un fortres.
La departa afgani de spia dise ce la atacas ia mata la xef de la Taliban en la provinse e sua suordinada, ma la Taliban ia nega esta.
La SUA ia reconose la saisi de Kunduz como problem, ma ia dise ance ce lo resta serta ce soldatos afgani pote recatura lo.
Combates ia aveni en esta site norde tra la note, ma lo es ancora nonclar cuanto de lo resta su controla governal.
Un portavose per la xef de polisia en la site ia dise: "Sentos de la Taliban es matada e sua corpos mor es sur stradas."
La ministreria afgani de defende afgani ia declara ce on ia recatura la xeferia de polisia e la prison, pos ce la rebelores ia relasa sentos de prisonidas cuando los ia saisi la site a lundi.
Ma videos publicida par la Taliban mostra rebelores en la vila ci ostenta tances, veculos blindada, autos de polisia, e furgones de la Crus Roja, cual los ia saisi.
Lo pare ce soldatos refortinte de Taliban ia ariva ance, con la situa aora tan perilosa ce abitores local no pote parti. La abitores resta xef en casa, ansiosa sur la Taliban e sur la posible de combates sur strada en la batalia per la site.
La xef nova de la Taliban, Akhtar Mansur, ia dise ce la governa debe anunsia sua propre defeta.
La presidente Ashraf Ghani, ci ia completi ier sua anio prima de posto, ia comenta en un parla televisada ce on fa "progresa" per recatura Kunduz, ma ce fortes de securia ia es impedida par la usa par la Taliban de persones nonmilitar como scermos umana.
La ataca a lundi ia es rapida e ia surprende soldatos afgani. A noti, soldatos forte armada ia traversa campos per ataca la site de multe dirijes. Los ia inonda rapida alga de la puntos de controla do la polisia defende la perimetre de la vila.
A pos, los ia catura construidas major, ia libri sirca 500 prisonidas de la prison de la site, e la forsa ofisiores e soldatos a retira se a la airoporto.
La provinse Kunduz ia esperia atacas diversa de pos april, con la Taliban juntante se a otra rebelores.
En desembre, OTAN ia fini sua mision de combate en Afganistan, retirante la plu de sua soldatos, estra un armada restante de 13 mil persones usada per operas de instrui e antiterorisme.
Violentia par rebelores ia crese tra la pais pos la parti de la plu de la soldatos ueste.
@T Un beneria esplode en un porto de Xina
@L aora_oji/2015/un_beneria_esplode_en_un_porto_de_xina
====== Un beneria esplode en un porto de Xina ======
13 agosto 2015
A la min 44 persones ia mori e plu ca 500 ia es ferida par du esplodes major en Tianjin, un site en la norde de Xina. Des-du pompores es entre la mores.
Presidente Xi Jinping ia esije "laboras completa" per salva vitimes e restrinje la focon.
La esplodes ia aveni en un beneria conteninte "benes perilosa e cimical" en esta site de porto. Un bal enorme de foco ia lumina la sielo, e construidas prosima ia colasa.
La esplode prima, a sirca 23:30 de ora local (15:30 de ora global) ier, ia es segueda par un otra esplode plu forte a alga secondos plu tarda. On ia senti la ondas de xoca a distantia de alga cilometres.
La Sentro de Redes de Tremateras de Xina ia dise ce la fortia de la esplode prima ia es egal a un detona de tre tones de TNT, e ce la numero du ia coresponde a 21 tones. A pos, otra esplodes ia es gatilida en la visinia.
La Televisa Sentral de Xina ia reporta ce un carga de esplodentes ia detona, ma on no ia confirma esta. Lo ia dise ance ce alga tores prosima a la area de porto ave no eletrica.
La dirijores alta de la compania Lojistica Ruihai, cual posese la beneria cual ia esplode, es aora interogada par autoriosas.
Un atestor ia informa jornalistes local ce el ia es comprante en un boteca cuando "subita, de pos, on ia ave un bal grande de foco e esplode". El ia dise: "A tempo de la esplode, la tera ia secute ferose, autos e construidas prosima ia secute, tota la vitro de alga construidas ia rompe, e cadun ia comensa core."
Un otra atestor, un ensenior canadian, ia descrive velia en panica pos lo cual ia pare un trematera.
"Me ia regarda tra la fenetra e la sielo ia es roja. Me ia vide la aveni de un esplode du, e on ia ave sola un caos -- cadun ia sorti de sua tores de apartes en pensa ce lo es un trematera, autos ia atenta parti de la compleso. Lo ia es demente."
La Radio Nasional de Xina ia dise ce fesures es vidable en construidas prosima a la loca de la esplode.
15 milion persones abita en Tianjin, un porto e area industrial major a sude-este de Beijing, la capital xines.
@T Un biblioteca trova ce arte mancante es mera malarcivida
@L aora_oji/2015/un_biblioteca_trova_ce_arte_mancante_es_mera_malarcivida
====== Un biblioteca trova ce arte mancante es mera malarcivida ======
6 junio 2015
En la SUA, du obras de arte valuosa, crededa mancante de la Biblioteca Publica de Boston, ia deveni trovada... en la biblioteca.
On ia reporta ce un grava par Rembrandt de 1634, e un grava de 1504 par Albrecht Dürer, es asente en april. Ma un conservor ia trova los en la scafales de imprimidas de la biblioteca a jovedi.
Adam e Eva par la artiste deutx Dürer, e la Autopitur con xapeta plumida e sabre basida par la depintor nederlandes Rembrandt, ia es trovada en la sala de conserva, malarcivida, pos un xerca de 320 mil ojetos cual ia dura tra oto semanas.
La polisia de Boston, la FBI, e un avocato federal ia investiga la situa de la obras, de cual on estima ce sua valua combinada es sirca $630 mil, entre sujestas ce algun ia fura los.
Plu temprana en esta semana, Amy Ryan, la presidente de la biblioteca de pos 2008, ia anunsia sua resinia.
Un esamina, con resultas publicida en la semana presedente, ia critica forte la biblioteca, acusante lo de proteje nonsufisinte alga colies spesial e de conserva valuosas en modo desorganizada.
En la mesma semana, la biblioteca ia anunsia ce monetas de oro, parente tenida en un capsula de tempo, ia asenti a desenios ante aora.
La Biblioteca Publica de Boston ia es la prima de la bibliotecas munisipal finansiada en la Statos Unida, e un de la primas de la bibliotecas publica sin custa en la mundo.
@T Un bilionor es arestada en scandal de Petrobras
@L aora_oji/2015/un_bilionor_es_arestada_en_scandal_de_petrobras
====== Un bilionor es arestada en scandal de Petrobras ======
26 novembre 2015
On ia aresta un de la comersiores la plu rica de Brasil e un senator major como parte de un investiga profonda de froda en Petrobras, un compania multinasional de petrolio.
André Esteves ia es arestada a sua casa en Rio de Janeiro. On ia saisi documentos de ala e de la banco cual el dirije en São Paulo.
A la mesma tempo, la gidor senatal de la partito governante, la Partito de Laborores, Delcídio do Amaral ia es arestada.
On acusa ambos omes de impedi la curso de la investiga.
Esteves es la om 13 de la plu ricas de Brasil, con $2,5 mil milion estimada. Amaral es la legor ativa prima ci on ia deteni en la scandal.
Pos sua aresta en la temprana de mercurdi, la polisia ia publici un rejistra en cual Amaral pare sujesta ce la xef pasada e prisonida de la divide internasional de Petrobras debe revela no informas sur Amaral e Esteves. En intercambia, la dirijor de Petrobras, Nestor Cerveró, va es aidada a fuji de Brasil a Europa.
Esta banda ia es secreta rejistrada par la fio de Cerveró. El ia dise a jornalistes brasilera ce e el e sua padre ia desacorda sur la scema de fuji.
Plu tarda ier, la Senato ia fa un consenta urjente cual ia suporta la deside par la Corte Suprema de aresta Amaral.
Aora, on ia aresta plu ca sento persones en la du anios de la investiga, incluinte politicistes e dirijores major pasada a Petrobras e alga de la companias la plu grande de construi en la pais.
La presidente de Brasil, Dilma Rousseff, ia es un presidente de Petrobras en la pasada, ma on no ia implica direta el en la scandal. An tal, el fronti un presa political sever en relata.
Rui Falcão, la presidente de la Partito de Laborores, ia publici un declara en cual el distanti se de la senator desonorada. El ia descrive se como "confondeda par la fatos" cual ia gida a la aresta.
"Zero de la atas atribuida a la senator es liada con sua ativia per la partito. Per esta razona, la Partito de Laborores no senti obligada a ofre cualce unia a el."
@T Un blogor saudi es publica flajelida
@L aora_oji/2015/un_blogor_saudi_es_publica_flajelida
====== Un blogor saudi es publica flajelida ======
10 janero 2015
On ia flajeli publica un blogor saudi ci on ia condena per sibercrimin e per insulta Islam.
Raif Badawi ia reseta un condena de 1000 flajelis e 10 anios en prison. Sua puni va es semanal esecutada: on ia flajeli el a 50 veses ier.
Badawi es la cofundor de un loca de rede, aora proibida, nomida la Rede Saudi Liberal. On ia aresta el en 2012.
Grupos de diretos ia cexa contra sua condena, e la SUA ia apela per un pardona. A jovedi, Jen Psaki, la portavose per la departe SUA de esternas, ia recomenda forte ce la autoriosas saudi "cansela esta puni savaje" e revista la caso.
En ajunta a sua condena, on ia comanda ce Badawi paia un multa de milion riales ($266 mil).
En 2013, on ia desculpa el de disenti de sua relijio, cual ta furni un condena de mori.
En la anio pasada, la avocato de Badawi ia es condenada a 15 anios en prison pos cuando un corte antiterorisme ia judi ce el es culpable de ofendes diversa.
La flajelis ia aveni estra un mascita en la site Jiddah a la Mar Roja, pos la preas de venerdi. Badawi ia ariva en un auto de polisia, e on ia leje la acusas a el ante un fola. Alora, on ia obliga el a sta con dorso a la fola, e ia flajeli el.
Amnestia Internasional ia comenta: "La flajeli de Raif Badawi es un ata vil de cruelia cual es proibida par lege internasional. Par iniora clamas internasional per cansela la flajeli, la autoriosas de Arabia Saudi ia fa un nonoserva repulsante de la prinsipes la plu fundal de diretos umana."
Arabia Saudi enforsa un varia sever de lege muslim, e no tolera la disenti political.
Lo ave un de la usas la plu alta de redes sosial en la area, e ia reata forte contra criticas interna enlinia, donante punis sever.
@T Un bomba matante a un santeria tai
@L aora_oji/2015/un_bomba_matante_a_un_santeria_tai
====== Un bomba matante a un santeria tai ======
18 agosto 2015
Prayut Chan-ocha, la ministro xef de Tai, ia dise ce la bombi ier de un santeria en la capital, Bangkok, ia es "la ataca la plu sever de istoria" contra la pais.
La ataca ia mata a la min 20 persones, incluinte stranjeres, e deses ia es ferida.
Prayut ia dise ce on no ia identifia la bombores, ma ce la polisia investiga un suspetada ci ia es filmada par cameras vijilante.
La bomba ia esplode a Erawan, un santeria indu e un atrae major de turistes, a sirca 19:00 de ora local (12:00 de ora global) a lundi. La santeria, e la crusa Ratchaprasong do lo es situada, ia es folida.
Prayut ia dise: "Nos ia esperia bombas minor o mera ruidos, ma a esta ves los ataca vives inosente. Los vole destrui nosa economia, nosa turisme."
Autoriosas esamina aora la video de alga cameras vijilante a la santeria per trova trasas. Los xerca spesial un om joven ci ia pare entra a la santeria con un bolson negra a sua dorso, ma ci ia pasea sin lo a pos. Membros de la publica dona ance sua propre videos.
Lo es clar ce la bomba ia es locada per mata tan multe persones como posible. On senti un xoca en Tai, un pais cual ia evita asta aora la spesies de aveni teroriste cual alga de sua visinas ia esperia.
La xef de polisia nasional ia descrive la aparato como "un bomba de tubo". On ia reporta ce lo ia conteni 3 cilogrames de TNT.
La santeria es dedicada a la dio indu Brahma, ma lo es ance visitada par miles de budistes a cada dia. Lo es situada entre un otel de sinco stelas e un sentro popular de botecas a la crusa Ratchaprasong, do protestas political ia aveni en anios resente.
Bangkok ia esperia un desenio de oposa, violente a veses, entre partitos political. La militaria ia emprende la pais en maio 2014, desponente un governa elejeda, pos menses de turba. La capital ia es entretempo relativa calma.
Suspetadas posible no manca. Cisa la bomba ia es esplodeda par la revoluistes muslim ci combate per un stato autonom en la sude estrema. Multe bombas esplode ala, ma la revoluistes ia fa nunca un ataca estra sua propre rejion, donce esta ta es un cambia grande de stratejia.
Tais regarda ance la violentia political resente e demanda a se sur la envolve posible de la partitos vinseda.
@T Un busor deutx bonveni migrores a sua pais
@L aora_oji/2015/un_busor_deutx_bonveni_migrores_a_sua_pais
====== Un busor deutx bonveni migrores a sua pais ======
14 agosto 2015
Un busor deutx ia atrae la atende de jornalistes pos pausa per fa un parla bonveninte a un grupo de migrores en sua bus.
Sven Latteyer ia improvisa la anunsia en cuando el ia gida sua bus sirca Erlangen, un vila calma en Baiern, con pasajores ci ia inclui sirca 15 stranjeres joven, de ci alga ia es de Africa.
Un otra pasajor raconta ce la busor ia saisi sua microfon e ia dise en engles: "Pardona me, senioras e seniores de tra la mundo intera en esta bus -- me vole dise alga cosa. Me vole dise bonveni. Bonveni a Deutxland, bonveni a mea pais." El ia conclui con: "Ave un bon dia!"
La parla ia es oiada con fases stonada, segueda par ries e aplaudis, incluinte de la deutxes. "Un de la xicos african ia brosi un larma de sua oio."
La raconta ia sperde virusin en Deutxland, provocante un onda de respondes positiva. "Lodas a la busor," un om ia tuita con un emosicon de cor roja. Un otra person ia scrive: "Resente me ia comenta ce nun dise bonveni a Deutxland. Lo es bon ce me ia era." An un lejor de novas en un canal nasional de televisa ia pare emosiosa en reporta la aveni.
Latteyer dise ce el ia senti inspirada a fa la parla par la esperia de sua frate par sposi, ci ia fuji de la gera de Cosovo en la desenio de 1990, e sua avo, ci ia es ferida en la Gera Mundal Du.
Cuasi 180 000 persones ia xerca refuja en Deutxland en la dui prima de 2015 -- la duple de la cuantia ci ia fa tal en la mesma periodo de la anio pasada. On ia vide ance un aumenta de atacas contra abitadas de migrores, incluinte vandalisme e ensendes criminal fada par grupos estrema destriste tra la pais.
@T Un camion esplodente mata plu ca 170 en Sudan Sude
@L aora_oji/2015/un_camion_esplodente_mata_plu_ca_170_en_sudan_sude
====== Un camion esplodente mata plu ca 170 en Sudan Sude ======
18 setembre 2015
A la min 176 persones ia es matada pos cuando un tancador de petrolio ia esplode en Sudan Sude, ofisiores dise.
La camion ia diverje ja de la via en Maridi, en la stato Ecuatoria Ueste, e abitores ia es sifoninte la carburante cuando la veculo ia esplode.
On reporta ce 50 persones ia es ferida. La cuantia vera de feridas es probable plu grande, car multe ia fuji pos la aveni.
Ospitales local es inondada e ofisiores nasional ia solisita aida de la Crus Roja e la Nasiones Unida. Dotores e empleadas medical vola a la loca de tra la pais per aida con la situa urjente.
La tancador ia viaja tra sirca 250 cilometres de la capital Juba e ia es prosiminte a Maridi cuando lo ia sorti de la via e ia cade.
En cuando la camionor ia pasea a la vila la plu prosima per es aidada, abitores local ia asembla a la camion per colie alga de sua gasolina.
La causa de la esplode es ancora nonclar.
Un dotor local, Chandi Savior, ia dise a Radio Tamazuj ce on ave un manca de furnis fundal como osijen e paradoles. El ia descrive ce multe persones ia ariva scaldada e ce on "no es vera capas de calmi esta dole".
Sudan Sude ia deveni un pais autonom en 2011, pos un acorda de pas con Sudan cual ia fini la gera interna la plu longa de istoria african.
Ma la pais es entre la plu povres de Africa, e plu ca 2,2 milion persones ia es obligada a fuji de sua casas par un gera entre soldatos governal e rebelores.
On ia suscrive esitosa un acorda de pas internasional arbitrada, ma la sesaspara es ja iniorada.
@T Un clima jelada en Australia sude-este
@L aora_oji/2015/un_clima_jelada_en_australia_sude-este
====== Un clima jelada en Australia sude-este ======
13 julio 2015
Australia sude-este ia esperia un clima la plu fria de desenios a saturdi, ma la efetos no ia es tan mal como on ia predise.
Ventas forte e cades de neva ia colpa la statos Victoria e Cimri Sude Nova, en un fenomeno cual jornalistes ia nomi "la vortis antartica".
An la stato Queensland, normal solosa, ia jela en alga partes. On ia reporta ce neva ia cade a cuasi 20 cilometres de la frontera con Cimri Sude Nova.
On previde plu clima nonusual fria per esta semana.
La dirijor rejional de la Buro de Meteorolojia per Cimri Sude Nova ia dise ce la clima strana es relatada con un serie de frontes fria cual ia pasa tra la statos.
En Victoria e Cimri Sude Nova, on averti sur plu clima sever. La state jelada ia clui alga vias major, incluinte partes de la Autovia Ueste Grande.
La frontes basa ia es causada par un sistem de presa basa, e on predise ce esta sistem va dura tra multe de la semana veninte.
Areas alpal e vacanserias de sci ia esperia bon cades de neva a la fini de semana. La area nomida Central Tablelands (Plano Alta Sentral) en Cimri Sude Nova ia reseta ance un neveta.
@T Un clima savaje a la costa de Cimri Sude Nova
@L aora_oji/2015/un_clima_savaje_a_la_costa_de_cimri_sude_nova
====== Un clima savaje a la costa de Cimri Sude Nova ======
26 agosto 2015
En Australia, sentos de abitores a sude de Sydney ia es obligada a fuji de sua casas par causa de inondas levante.
On ia salva cuasi 70 persones de acuas inondante, de pos la ariva de un clima sever a la suburbes sude de la capital a lundi.
Plu ca 1400 telefonis per aida ia es fada a la Servi de Crise de Stato, per cual un portavose ia dise ce la plu de casos ia envolve salva persones ci ia atenta gida un veculo tra acua.
"Esta es perilosa, no sola a membros de la publica ma ance a nosa bonvolores," el ia comenta.
La area la plu colpada es sirca Illawarra e Shoalhaven a la costa sude de Cimri Sude Nova.
On ia salva ance alga animales, incluinte cavalos, boves, e alpacas. Persones spesialinte sur la salva de animales grande ia move los a tera plu alta.
Ier, dudes-sinco persones ia es moveda de sua casas en la area de Kiama, a sirca 120 cilometres a sude de Sydney, entre temes ce la mures de un parario peti va colasa.
Autoriosas ia judi aora ce la Parario de Jerrara es secur, e ia informa abitores ce los pote revade a sua casas.
@T Un colide de barcones en la Streta de Singapor
@L aora_oji/2015/un_colide_de_barcones_en_la_streta_de_singapor
====== Un colide de barcones en la Streta de Singapor ======
17 desembre 2015
Autoriosas de Singapor e Indonesia xerca ses persones pos un colide entre un tancador cimical e un barcon de carga en la Streta de Singapor.
La barcon ia afonda pos la colide en la note de mercurdi, a aprosima 11 cilometres de Batam, un isola indonesian. Lo ia porta 560 tones de carburante, ma on no ia reporta un malversa de petrolio.
Per trafica maral, la Streta de Singapor es un de la vias la plu usada de mundo, an si asidentes major es rara.
La tancador Stolt Commitment, rejistrada en la Isolas Caiman, ia xoca con la barcon Thorco Cloud, cual ia ave la bandera de Antigua e Barbuda, a sirca 20:00 de ora local.
La tancador ia es sola pico danada.
La omes mancante parteni a la ecipo de 12 de la barcon de carga. On ia salva la otras, e los es aora tratada en un ospital en Singapor.
Barcos descontaminante es preparada per la caso de un malversa de petrolio.
@T Un conjesta de 50 cilometres en Cenia
@L aora_oji/2015/un_conjesta_de_50_cilometres_en_cenia
====== Un conjesta de 50 cilometres en Cenia ======
20 novembre 2015
En Cenia, on ia envia la polisia per lejeri un conjesta de trafica cual estende tra 50 cilometres sur la autovia entre Mombasa e Nairobi.
La via es esensal per la economia de Africa este, car lo lia la porto Mombasa a paises sin costa, como Uganda, Sudan Sude, e Ruanda.
La area la plu sever afetada es sirca Taru, a aprosima 80 cilometres de Mombasa.
On reporta ce la conjesta es causada par reparas cual on fa a la via pos pluves intensa.
Conjestas de trafica es comun en Cenia e es comun causada par sua rede de vias mal mantenida, ma on descrive la conjesta presente como la plu sever de alga anios.
Plu ca 1500 camiones ia deveni trapida, seguente Willingtone Kiberenge, la dirijor xef tempora de la Asosia de Transportores Cenian.
Alga motoristes es ja trapida en la campania, a multe cilometres de la boteca la plu prosima, de pos la comensa de la conjesta a la sera de martedi.
"Me no ia come pos la matina de ier, me no ia duxi e no ia cambia an mea vestes," ia es la comenta de Nathaniel Chewya, un camionor ci transporta des autos a Kampala, la capital de Uganda.
Sola la trafica en dirije a Nairobi es afetada par la conjesta.
Alga camiones ia atenta diverje de la autovia a sur la tera de subosce a lado, ma los ia deveni fisada en fango.
Un ferovia esiste entre Mombasa e Nairobi, ma lo es vea e nonfidable e spende alga dias en sua viaja de 500 cilometres. Los ci pote tolera la custa, e ci no ave cargas pesosa, tende vola entre la sites. Un avion parti a cada ora.
@T Un consenta diplomata de Xina, Japan e Corea Sude
@L aora_oji/2015/un_consenta_diplomata_de_xina_japan_e_corea_sude
====== Un consenta diplomata de Xina, Japan e Corea Sude ======
21 marto 2015
La ministros esterna de Xina, Japan e Corea Sude consenta per sua discutes prima de tre anios.
Esta encontra en Seoul va consentra probable sur modos de redui la tensa sur disputas teritorial e diplomata.
La tre statos es economial forte liada, ma sua relatas mutua es ancora danada par problemes nesolveda con orijina de atas japanes en la Gera Mundal Du.
Un portavose per la departe xines de esternas ia dise ce el espera ce la ministros va pote "avansa sua regarda a la futur".
Yun Byung-se de Corea Sude ia bonveni Fumio Kishida de Japan e Wang Yi de Xina a la capital de Corea Sude.
Ministros de esternas de la tre paises ia consenta la plu resente en april 2012. Acel ia es numero ses de sua consentas anial triladal.
En la anio seguente, la consenta ia es canselada pos cuando Shinzo Abe, la ministro xef de Japan, ia coleri la otra du paises par visita un santeria onorante la mores japanes de gera, incluinte alga criminales major de gera.
Japan ia coloni la penisola corean e ia ocupa partes de Xina en la Gera Mundal Du, e ambos paises ia acusa ce lo no ia espia sufisinte sua atacas.
Kishida ia encontra sua corespondente corean ante la consenta triladal, disente ce "an con problemes difisil entre la du paises", la du lados va "comunica ancora a niveles diversa per forti nosa colabora".
Aora la coleria de 2012 ia fri, donce esta consenta nova atenta fa un paso nova a comunica formal. Lo aveni a alga dias pos la confere alta prima de cuatro anios entre Xina e Japan sur securia.
On crede ce acel discutes relata a la crea de un linia direta de comunica maral entre la du paises, pos tensa sur isolas en la Mar de Xina Este.
@T Un consenta sin presedente entre Xina e Taiuan
@L aora_oji/2015/un_consenta_sin_presedente_entre_xina_e_taiuan
====== Un consenta sin presedente entre Xina e Taiuan ======
7 novembre 2015
La xefes de Xina e Taiuan fa discutes a la ves prima de pos la fini de la Gera Interna Xines en 1949.
Discutes entre la presidente xines Xi Jinping e la presidente taiuan Ma Ying-jeou ia comensa en Singapor a 15:00 de ora local.
Xina regarda Taiuan como un provinse diverjente cual lo intende reuni con sua pais xef en la futur, par fortia si nesesada.
La du xefes ia entra a la sala de consenta en junta e, suriente, ia saluta con mano un foleta de fotografistes.
En Taipei, on ia fa protestas contra la discutes, e un grupo ia atenta entra a la parlamenteria taiuan. Alga taiuanes senti ce Xina gania tro multe influe en la pais.
Relatas entre la du paises ia boni pos cuando Ma ia emprende sua posto en 2009, con lias economial e turiste, e la suscrive de un acorda de comersia.
La du lados ia divide en 1949 cuando la Kuomintang ia perde contra la Partitio Comuniste Xines en la gera interna e ia institui un governa nova en Taiuan.
La consenta aveni a lado de un visita ofisial par Xi a Singapor. Como un indica de la sensosia political de la situa, la xefes va refere la un a la otra como "senior Xi" e "senior Ma", en loca de "presidente".
Ma ia dise ce la discutes intende promove la pas e trova modos de redui enemias, per esemplo par sutrae misiles xines puntada a Taiuan. "Nos espera ce la xefes de la paises va avansa per fa la paso prima en la normali de relatas," el ia comenta.
Un otra gol major, el ia dise, es normali consentas entre la du lados, e convinse Xina a permete un reconose plu grande de Taiuan en la comunia internasional.
On no previde la ateni de acordas major en esta consenta, e Ma ia ajunta ce on va fa no refere a la problem de la disputas de la Mar de Xina Sude, cual ia domina consernas resente en la area.
An tal, Xi ia leva la problem en un parla a la Universia Nasional de Singapor ante la consenta, disente ce Xina ia espera sempre solve pasosa la disputas.
@T Un conservor xines ia sustitui falsas per depintas mestral
@L aora_oji/2015/un_conservor_xines_ia_sustitui_falsas_per_depintas_mestral
====== Un conservor xines ia sustitui falsas per depintas mestral ======
22 julio 2015
En Xina, un om ia confesa ce el ia fura de un universia plu ca 140 obras mestral de depinta, e ia sustitui sua propre falsas per los.
Xiao Yuan, ci ave 57 anios e ia es un conservor a la Academia de Artes Bela en Guangzhou en Xina sude, ia vende 125 de la esibidas per plu ca 34 milion iuanes.
Defendente se, el ia informa la corte ce depintas falsida ia es ja presente en la sala de conserva cuando el ia comensa labora ala.
Xiao ia ave un clave a acel sala en la universia, e tra du anios comensante en 2004, el ia sustitui falsas per obras famosa par mestres como Zhu Da, Qi Baishi, e Zhang Daqian.
El ia dise a la corte ce en acel periodo el ia es surprendeda de trova ce alga de sua propre falsas ia es mesma furada e ce otra copias ia es sustituida per los.
"Me ia comprende ce un otra person ia pone sua propre depintas en loca de los de me," el ia dise, "car me ia pote persepi clar ce sua obras es estrema mal."
El ia ajunta ce el no sabe ci ia fura sua falsas, ma ce studiantes e profesores ave la direto de empresta depintas en la mesma modo como libros de biblioteca.
Entre 2004 e 2011, el ia vende 125 depintas, usante la revenu per compra imobilas e plu depintas. On estima ce la 18 otras cual el ia fura ave un valua de plu ca 70 milion iuanes.
Xiao ia resinia de la universia en 2010 cuando alegas ia es comunicada a la polisia. El ia presenta se como culpable a la acusa de froda. El ia demanda ce on pardona el, ma ia desacorda con alga detalias indicada par la avocatos prosedente.
En 2012, Xinhua, un ajenteria de novas xines, ia reporta ce falsis artal aveni "sempre plu vasta" en la pais. En acel anio, Xina ia deveni la mercato la plu grande per arte e anticalias, diseda par la Funda European de Arte Bela.
@T Un crise umaniste en Iaman
@L aora_oji/2015/un_crise_umaniste_en_iaman
====== Un crise umaniste en Iaman ======
20 agosto 2015
Un ofisior major dise ce la gera en Iaman ia trae la pais cuasi a famion.
Ertharin Cousin, la xef de la Program Mundal de Nuri de la Nasiones Unida, ia dise ce mercatos en iamani no ave comedas sufisinte per nuri la popla, e ce cuasi 13 milion persones nesesa urjente es aidada.
El ia ajunta ce la violentia continuante causa ce ajenterias de aida no pote ateni areas de nesesa.
La gera envolve rebelores huti ci combate fortes fidosa de la governa iamani e sua aliadas.
Cousin, parlante en Qahira (Cairo) pos un visita de tre dias a Iaman, ia dise ce la batalias sirca la portos major preveni la furni de aida.
El ia dise ce Iaman fronti "la tempesta perfeta" car on no ateni la persones la plu nesesante, e car grupos aidante no reseta un suporta finansial sufisinite de donores.
Entretempo, Stephen O'Brien, la xef umaniste de la Nasiones Unida ci veni ance de visita Iaman, ia informa ier la Consilia de Securia ce "la estende de sufri umana es cuasi noncomprendable".
El ia critica ance forte la alia, saudi gidada, en Iaman per bombi la porto Hodeida, descrivente esta como un viole de la lege umaniste internasional.
Un barcon de la Program Mundal de Nuri ia es en la porto, a la costa ueste de la pais, cuando lo ia es atacada par aviones a la note de martedi.
La NU ia leva Iaman a sua grado la plu alta de crise umaniste, locante lo con los en Sudan Sude, Suria, e Irac.
On dise ce cuasi 2000 persones nonmilitar ia mori pos cuando la alia ia comensa sua campania de bombi en marto, suportante la governa escluida.
Plu ca 21 milion persones en Iaman -- sirca 80% de la popla -- nesesa es aidada, seguente la Nasiones Unida.
@T Un defeta per la sosialistes en Venezuela
@L aora_oji/2015/un_defeta_per_la_sosialistes_en_venezuela
====== Un defeta per la sosialistes en Venezuela ======
7 desembre 2015
En Venezuela, la alia oposante ia gania un majoria de sejas en la Asembla Nasional, fininte cuasi du desenios de domina par la sosialistes de presidente Nicolás Maduro.
A sinco oras pos la fini de vota, la Consilio Elejal Nasional ia anunsia ce la aliadas ia gania 99 sejas. Maduro ia aseta sua defeta, reconosente "esta resultas oposante". La defeta es la plu grande per la promove sinistriste cual Hugo Chávez ia fundi en 1999.
La sosialistes ia gania 46 sejas, e 22 es ancora no declarada.
La resultas ia ariva multe plu tarda ca prevideda, ma focos artal ia es vidable supra la capital, Caracas, no longa a pos.
Entre la temas de campania ia es mancas sever de comedas major como lete, ris, cafe, zucar, farina de mais, e olio comable.
Maduro ia culpa "un gera economial" cual la oposores ia fa contra sua governa.
La alia oposante, composada de partitos sentriste e conserviste, previde gania a la min 112 sejas pos 16 anios de controla sosialiste.
Como diseda par persones major en la alia, los intende alora aseta leges per permete la libri de prisonidas political e per reversa, per esemplo, la asinia de postos major legal par la governa presedente.
La aliada va es ance plu forte si lo desira fa un referendo sur la futur de Maduro. Esta ta pote aveni sola cuando sua presidentia ateni sua punto media en april de la anio veninte.
An tal, su la sistem presidental de la pais, la Partito Sosialiste Unida de Venezuela (PSUV) va es ancora potiosa, car lo controla multe munisipas.
On ia regarda jeneral esta vota como ja un referendo sur Maduro -- ci ia es direta elejeda par Chavez -- e la politicas sosialiste de la partito.
La oposores ia acusa la PSUV de malmaneja la economia e de peri la ricia de petrolio en la pais.
Maduro dise ce sua partito defende la interesas de venezuelanes comun e vole completi la "Revolui Bolivaral" de Chavez.
La alia oposante ia acusa ance la governa de autoritarisme cresente. Plu temprana en esta anio, la xef oposante Leopoldo López ia es condenada a des tre anios en prison per provoca violentia -- un acusa a cual oposores atribui un motiva political.
Venezuela ia invita oservores votal de la Uni de Nasiones de America Sude, ma ia refusa los de la Organiza de Statos American e la Uni European.
@T Un dia du de discutes alta entre la du Coreas
@L aora_oji/2015/un_dia_du_de_discutes_alta_entre_la_du_coreas
====== Un dia du de discutes alta entre la du Coreas ======
23 agosto 2015
Corea Norde e Sude va fa oji un ronda du de discutes alta per calmi un tensa cresente. On ia fa ier alga oras de negosias.
Aidores major de la xefes de la du paises ia consenta a Panmunjom, la vileta de sesaspara a la frontera.
La Norde ia menasa "atas militar forte" si la Sude no para usa parladores a la frontera per difusas cual ia provoca "un state partal de gera".
La du lados ia acorda consenta denova a esta posmedia per "detalia diferes" pos la fini de cuasi 10 oras de discutes tra la note.
No jornalistes ia es presente a la discutes, cual ia aveni en la Zona Desmilitarida cual divide la du Coreas.
Ante la discutes, Corea Sude ia dise ce lo va es representada par Kim Kwan-jin, la xef de securia nasional, e par Hong Yong-pyo, la ministro de uni. La Norde ia envia ofisiores major Hwang Pyong-so e Kim Yong-gon.
Multe analistes regarda Hwang como la xef suordinada su Kim Jong-un.
Plu temprana, Corea Norde ia spesifa un limita de tempo per la desasembla de la strutures de multe parladores cual difusa forte novas, predises de clima, e musica de la Sude. Lo ia move artileria a locas per xuta a los.
Corea Sude ia sorti cuasi 4000 abitores de areas fronteral, avertinte ce lo va "contrataca sever".
Jetos xasante de la SUA e Corea Sude ia vola en forma, prosima a la frontera, e la soldato xef de la SUA ia reconfirma "la promete nonvasilante" de sua pais per defende Corea Sude en un telefoni a sua corespondente corean.
La du Coreas es ancora tecnical en gera, car la gera entre 1950 e 1953 ia fini con sesaspara, no un trata de pas.
@T Un dia rara de 86 401 secondos
@L aora_oji/2015/un_dia_rara_de_86_401_secondos
====== Un dia rara de 86 401 secondos ======
30 junio 2015
La medianote va es pico plu tarda a esta note. A la ves prima de tre anios, on va ajunta un secondo a la ora ofisial indicada par orolojos atomal.
Esta secondo ajuntada va causa ce la minuto final de junio conteni 61 secondos. An si 23:59:59 deveni normal 00:00:00, oji lo va deveni 23:59:60.
On usa secondos ajuntada (e anios estendeda) como modos fasil de manteni la orolojo en sincronia con la Tera e sua saisones.
Ma secondos ajuntada crea ance problemes per alga sistemes de infotecnolojia, car los es tan nonusual e nonautomatable. Los depende de mesuras de la jira de la Tera, cual varia en modo nonpredisable, e donce los aveni a intervales nonperiodal.
Car on avisa ce un secondo ajuntada va aveni a mera ses menses a ante, computadores no pote es furnida con un lista ja programida de la secondos ajuntada, e on nesesa ajunta los par mano.
Cronometristes profesal es divideda sur la demanda de reteni la secondos ajuntada, e esta va es debateda a un confere de radiocomunica en Geneve en Suiz, plu tarda en esta anio.
Jornalistes ia scrive sur la risca de problemes de computador cual ta pote afeta comersias finansial e otra operas tra la mundo cual depende de cronometris esata.
Sempre cuando un secondo ajuntada aveni, alga sistemes encontra problemes par causa de eretas en la codigo scriveda per trata los. La resultas es la plu sever en la ueste de la Pasifica, do secondos ajuntada aveni en la periodo xef de labora.
Alga grupos ia proposa aboli esta secondos ajuntada car los presenta problemes per redes de comunica.
La secondo ajuntada de esta note va es la numero 26 de istoria.
@T Un disturba major a un deteneria australian de refujadas
@L aora_oji/2015/un_disturba_major_a_un_deteneria_australian_de_refujadas
====== Un disturba major a un deteneria australian de refujadas ======
9 novembre 2015
Detenidas ia ensende focones a un sentro per migrores sur la Isola Christmas de Australia, en un "disturba major" cual on ancora no ia solve. On ia retira la gardores "per razonas de securia".
Partes medical, instrual, e sportal de la compleso es danada.
La departe de migra ia nega ce "un tumulta grande" aveni, ma ia confesa ce la situa a la sentro es "tensada".
La sentro casi ance zelandeses ci va es deportada de Australia.
La turba ia comensa pos cuando un grupo de detenidas irani ia protesta sur la mori de un curdi irani, Fazel Chegeni, ci ia evade la compleso a saturdi. On ia trova ier la corpo de Chegeni a basa de un falesa.
En un declara, la departe ia dise: "Un grupo de detenidas, sur ci nos crede ce los es nonsitadanes de ci sua visas ia es canselada en modo obligante, continua ajita e causa dana a la compleso. On ave no reportas a esta tempo de feris a detenidas o empleadas."
Un portavose per la grupo Alia Atante per Refujadas ia dise ce Chegeni "ia sufri la efetos de es acaso detenida tra tempo longo. El ia dise a otras ce el no pote plu tolera es detenida, e desira mera vade a estra."
Jornalistes ia sita ance Matej Cuperka, un detenida con 25 anios, ci ia dise ce el teme sur sua propre securia. "Los ensende focos en tota partes. Los ia intrui en la caferia, en la area de proprias. Autos plen de ofisiores move sirca la compleso. Los regarda mera tra la fenetra, ma nun aida nos."
Sarah Hanson-Young, un senator per la partito verde, ia dise ce la sentro sur la isola es "en fonde": "La governa ia es avertida a multe veses sur la situa sempre plu nosiva sur Isola Christmas, ma regretable on ia iniora esta avertis."
Australia envia refujadas intersepida a acel isola, a 2650 cilometres a norde-ueste de Perth e 380 cilometres a sude de Java en Indonesia. Lo envia otras a Isola Manus en Papua Gine Nova e a Nauero en la sude de la Pasifica.
La governa dise ce la viaja maral par la refujadas per ateni Australia es perilosa e controlada par ganges criminal, e ce los es obligada a para lo. Criticores dise ce la oposa a refuja ave comun motivas razal e dana la reputa de Australia.
@T Un eclis de sol en Europa
@L aora_oji/2015/un_eclis_de_sol_en_europa
====== Un eclis de sol en Europa ======
20 marto 2015
Europa es a media de esperia un eclis solal la plu bon de multe anios. Un curso sur la surfas de la Tera es ombrida car la Luna covre la Sol.
La ombra ia comensa en la Atlantica norde en la ora pasada. Un parte de lo traversa Africa norde, e lo move norde en dirije a la Sirculo Artica. Lo va fusa final con la oscuria normal de note en Rusia.
Tra un anio, la Sol pare segue un curso definida contra la fondo de la stelas (si on iniora la jira de la Tera cual causa la efeto dial de leva e reposa de la Sol).
Oji es ance la dia prima de primavera en la emisfera norde -- la dia cuando esta curso anial de la Sol pare traversa la plana de la ecuator de la Tera, en dirije a norde.
La resulta de esta coaveni nonusual es ce, a la Polo Norde mesma, la eclis va aveni en cuando la Sol apare de su la orizon a sua ves prima de ses menses.
Esta eclis es intera: a esta momento, la distantias de la Sol e la Luna de nos es tal ce la diametre parente de la Luna es pico plu grande ca lo de la Sol. A la sentro de la ombra, tota lus es ascondeda per no plu ca tre minutos.
An tal, la Isolas Faro e Svalbard es la sola locas abitada e atenable par transporta publica cual la sentro de la ombra va traversa. Locas su otra partes de la ombra va vide mera un eclis partal.
Multe astronomistes ia viaja a la Isolas Faro, do la site capital Tórshavn va esperia la eclis intera per du minutos, comensante a 09:41 de ora universal.
On averti ce on debe no regarda direta la Sol, car on ta risca dana sever sua oios o deveni an sieca. On debe es spesial atendente si on vole fotografi la eclis con telefoneta. La fotografi mesma no es perilosa, ma on risca regarda la Sol cuando on posa la camera.
Esta eclis es la prima con un efeto cisa mesurable a la sistem de eletrica, car aora on usa multe la potia solal per jenera eletrica en la Uni European.
@T Un esperimenta de un anio simula la vive sur Marte
@L aora_oji/2015/un_esperimenta_de_un_anio_simula_la_vive_sur_marte
====== Un esperimenta de un anio simula la vive sur Marte ======
29 agosto 2015
Per simula la vive sur Marte, un ecipo de enscrivedas de NASA, la ajenteria spasial SUA, ia comensa abita un cupola prosima a un volcan steril en Hauaii.
La esperia isolinte, cual va dura tra un anio, va es la plu longa de sua spesie cual on ia atenta.
Espertas estima ce un mision umana a la planeta roja ta ocupa entre un e tre anios.
La ecipo de ses persones va abita en prosimia su la cupola, sin aira fresca, comedas fresca, e privatia.
Los ia enclui se a la ora 15 local de ier (la ora 1 de oji par orolojo global).
Cada viaja estra la cupola -- cual ave un diametre de sola 11 metres e un altia de 6 metres -- va nesesa un veste spasial.
La ecipo conteni un astrobiolojiste, un fisiciste deutx, e cuatro persones de la SUA -- un pilote, un arcitetor, un jornaliste, e un siensiste de solo de tera.
Cada de la omes e femes va ave un propre sala con un leteta e un table. Furnis inclui ceso polvida e tun botida.
Misiones a la Stasion Spasial Internasional dura tra ses menses. NASA ia fa resente esperimentas isolinte de cuatro e oto menses.
An si otra esperimentas consentra a la defias tecnical e siensal de la viaja, los de isoli considera la elemento umana de esplora, e la problemes cual aveni cuando persones comparti un abitada peti.
Un investigor ia dise: "Me pensa ce un de la lesones es ce vera on no pote preveni disputas interpersonal. Los va aveni en tal misiones longa, an con la persones la plu bon."
@T Un esplode a un compleso cimical en Xina
@L aora_oji/2015/un_esplode_a_un_compleso_cimical_en_xina
====== Un esplode a un compleso cimical en Xina ======
7 april 2015
En Xina sude-este, un esplode ia aveni a un compleso cimical en la provinse Fujian, causante un focon major.
La esplode ia aveni ier, a sirca 19:00 de ora local, a la compleso en Zhangzhou. On ia reporta tre persones ferida.
La compleso produi paraxilen (PX), un cimical flamable cual on usa en la fabrica de poliester e plastica. Lo es operada par un de la produores autonom la plu grande en Xina.
Esta es la esplode du a la compleso en Zhangzhou en du anios. La compania no ia comenta.
La esplode ia rompe la fenetras de un gasolineriia a un cilometre de la compleso.
On ia televisa la focon, mostrante flamas cual salta en la aira, ma furninte poca detalios. Sirca 430 pompores es a la loca.
Abitores ia protesta contra la construi de complesos de PX en Xina, incluinte cexas violente en la provinse Guangdong en april 2014. Multe persones teme ce la contamina de la complesos perili la sania.
Protestas publica es ancora rara en Xina, do protestores debe ave un lisensa. Ma campanias sur la ambiente crese en cuantia.
En anios resente, paraxilen ia deveni un foca de tal protestas, obligante ce on retarda o cansela la complesos, iritante la governa nasional.
@T Un esplode a un parce acual en Taiuan
@L aora_oji/2015/un_esplode_a_un_parce_acual_en_taiuan
====== Un esplode a un parce acual en Taiuan ======
28 junio 2015
En Taiuan, plu ca 500 persones ia es ferida cuando un foco ia ensende en un fola a un selebra en un parce de diverti, prosima a la capital, Taipei.
La foco ia aveni cuando un polvo colorida ia es jetada supra la fola e ia ensende.
Persones ia panica e xilia. Materases inflable de nada ia es usada como portaferidas.
Cuasi 200 persones ia es grave ferida e reseta aida medical intensa. Alga de los ia enspira la polvo, causante problemes respiral.
La organizores de la selebra Color Play Asia ("Jua Colorosa de Asia") es interogada par la autoriosas.
Filmas de la aveni mostra un selebra multe ativa cuando un foco esplode subita.
Un studiante mas ci ia es minor ferida ia descrive la sena como "la enferno". "Sangue ia es a tota locas, incluinte en la pisina, do multe feridas ia empapa se per lejeri la dole."
Plu ca 1000 persones ia es prosima a la stadio a la tempo de la foco. On ia envia la 519 vitimes a 41 ospitales, e 413 es ancora ospitalida.
La foco ia es rapida controlada, ma on investiga ancora la causa. Pompores suspeta ce la caldia de la lampas sur la stadio ia ensende la polvo colorida, usada per crea un ambiente selebrosa. La polvo es fada de mais secida, e pote es estrema flamable.
Multe persones ia foli ier parces acual en Taiuan, cuando la temperatur ia ateni 38 °C. La maior de la site Taipei Nova ia comanda ce la parce acual clui completa per la tempo de la investiga.
Taiuan ia esperia un serie de focones matante en la du o tre anios pasada, partal causada par la enforsa debil de regulas de securia e par construis nonlegal.
Un focon plu temprana en esta anio ia mata ses pompores, provocante un comanda per coreti construidas nonlegal e per renovi la aparatos e instruis de pompores.
@T Un esplode de gas en Rio de Janeiro
@L aora_oji/2015/un_esplode_de_gas_en_rio_de_janeiro
====== Un esplode de gas en Rio de Janeiro ======
20 otobre 2015
Un esplode ia causa danas major en la site Rio de Janeiro en Brasil.
Deses de construidas ia es danada en la esplode en la visineria São Cristóvão, e a la min sete persones ia es ferida, incluinte un enfante.
Ofisiores ia dise ce los suspeta ce la causa ia es un gotea de gas en un compania local.
Laborores de salva xerca en la detrito, ma asta aora los ia reporta no moris.
La esplode ia es oiada a distantia tan grande como ses cilometres.
Un abitor local, Marlene Sangy Aires, ia descrive la momento cuando la esplode ia aveni: "La teto ia colasa, e mea fio de 21 anios ia susede proteje mea fia de 18 anios con sua corpo. Nos ia es trapida en la detrito e ia usa la lus de nosa telefonetas per siniali a la laborores de salva. Los ia trova nos e ia estrae nos."
Un xica de nove anios ia es prendeda a ospital pos deveni enterada su la detrito tra tre oras.
Laborores de crise ia dise ce 40 construidas ia es danada.
@T Un fabriceria colasa en Pacistan
@L aora_oji/2015/un_fabriceria_colasa_en_pacistan
====== Un fabriceria colasa en Pacistan ======
5 novembre 2015
On fa un opera major per salva deses de persones sur ci on crede ce los es trapida en detrito pos la colasa de un fabriceria en Lahore, Pacistan.
A la min 17 persones ia mori cuando la fabriceria, cual ia deveni construida, ia colasa ier. Salvores usa grus e puxadetritos, e la armada aida en la labora.
La causa de la colasa es ancora nonconoseda, ma la securia de construi en Pacistan es comun sunormal.
Du niveles de la fabriceria, en la area industrial Sundar a la borda de la site, ia es funsionante en cuando on ia construi la nivel tre.
On crede ce sirca 200 laborores ia es en la construida a la tempo de la colasa, seguente un portavose per la servis de salva. Otra estimas par jornalistes pacistani sujesta un cuantia plu prosima a 150.
On ia estrae 98 persones vivente, de ci multe ia es alora ospitalida. Lo es difisil de sabe esata cuanto persones es ancora trapida, car la posesor e empleadas manejal ia es entre los en la construida.
La armada ia dise ce lo envia un ecipo de injeniores e espertas per partisipa en la salva.
En setembre de la anio pasada, a la min 24 persones ia mori en Lahore cuando la teto de un mascita ia colasa. E 17 persones, cisa plu, incluinte enfantes, ia es matada cuando un fabriceria ia colasa pos un esplode de gas en un area abital de la site en febrero 2012.
@T Un fem de Hongkong es prisonida per maltrata sua servor
@L aora_oji/2015/un_fem_de_hongkong_es_prisonida_per_maltrata_sua_servor
====== Un fem de Hongkong es prisonida per maltrata sua servor ======
27 febrero 2015
On ia condena un fem de Hongkong a ses anios en prison per maltrata sua servor indonesian de casa.
Plu temprana en esta mense, on ia judi ce Law Wan-tung es culpable de feri sever, menasa criminal, e fali paia a sua servor, Erwiana Sulistyaningsih.
Erwiana ia atrae la atende mundal en 2014 cuando el ia revade a Indonesia per trata en ospital.
En la prosede, el ia descrive como sua empleor ia bate el e ia fami el.
La caso ia es intensa oservada en Hongkong, do un cuantia notable de familias depende de servores de casa.
La abitores de la site emplea sirca 300 mil servores fema de otra partes de Asia, xef de Indonesia e la Pilipinas.
En ajunta a sua condena a prison, Law, ci ave 44 anios e du enfantes, ia es ance multada per 15 mil dolares de Hongkong (1725 euros). El ia risca un condena masima de sete anios en prison.
La prosede ia dura tra ses semanas. La corte ia oia ce Law ia bate Erwiana con ojetos diversa de casa, e ia priva el de comeda conveninte, permetente sola un cuantia peti de ris e pan.
Law ia permete ance ce Erwiana dormi per sola cuatro oras per note. A un ves, Law ia colpa el tan forte ce sua dentes sisorante ia frati.
Presentante la condena, la judor Amanda Woodcock ia dise ce Law "ia mostra no compatia" a Erwiana e sua otra aidores de casa. El ia vide los como "persones inferior". La judor ia recomenda ce autoriosas en Hongkong e Indonesia investiga la state de vive de laborores.
Erwiana ave 24 anios. El ia ariva en Hongkong en 2013, ia labora per Law per sirca oto menses, e ia revade a sua vileta en Djava sentral en 2014.
El ia reveni bateda e contusada, tro debil per pasea, e con no mone. Sua fas, manos e gamas ia es covreda con sicatrises e laseras, e partes de sua pel ia es negrida e desintegrante. Fotos de el ia causa coleria publica en Indonesia.
@T Un fem txilan ia porta un feto tra 50 anios
@L aora_oji/2015/un_fem_txilan_ia_porta_un_feto_tra_50_anios
====== Un fem txilan ia porta un feto tra 50 anios ======
21 junio 2015
Dotores en Txile ia descovre un fem ci ia porta un feto calcida tra sirca 50 anios.
La fem, ci ave a la min 90 anios, ia vade a ospital en la site San Antonio pos un cade.
Radiogrames ia revela alora la presentia de un feto cual ia pesa sirca du cilogrames.
La fenomeno, nomida un litopedio, aveni cuando un feto mori en la ensintia e deveni alora calcida estra la utero.
Ance alga casos rejistrada a ante ia envolve femes ci no ia es consensa sur la presentia de la feto asta la pasa de desenios.
La dirijor de la ospital ia descrive la caso como "estracomun rara", e ia dise ce la feto ia es "grande e developada e ia ocupa tota de sua caveta adomenal".
On ia envia aora la pasiente a sua casa. Dotores dise ce lo no es probable ce los va atenta estrae la feto de la fem, car un tal opera ta crea tro multe riscas per un pasiente de sua eda.
@T Un focon destrui un stasion-museo en Brasil
@L aora_oji/2015/un_focon_destrui_un_stasion-museo_en_brasil
====== Un focon destrui un stasion-museo en Brasil ======
22 desembre 2015
Un focon en la site brasilera São Paulo ia destrui partes de un stasion ferovial de la sentenio 19 cual ia conteni un museo popular.
La museo, presentante la istoria de la lingua portuges, ia es forte danada.
La flamas ia destrui la teto de la Stasion de Lus, orijinal construida par briteses en 1901 a media de la buma de cafe per transporta la favas a Santos, un porto atlantica en la stato.
Un pompor ia es matada en esta focon enorme cual ia arde noncontrolada tra multe oras, an su un pluve intensa.
Per securia, on ia clui la ferovia suburban a lado de la construida ardente.
La Stasion de Lus ia es nomida per la visinia en cual lo sta. Con sua tore de orolojo e sua teto de aser arcida, lo ia pare segue la model de ferovias brites de la mesma periodo.
An tal, alga istoristes dise ce lo ia es inspirada par la stasion de Flinders Street en la site Melbourne en Australia.
@T Un focon en un rascasielo en Dubai
@L aora_oji/2015/un_focon_en_un_rascasielo_en_dubai
====== Un focon en un rascasielo en Dubai ======
21 febrero 2015
En Dubai en la Amirias Arabi Unida, un focon ia pasa tra la rascasielo Marina Torch, un de la construidas abital la plu alta de mundo.
Ventas forte ia aida la foco a estende tra la construida de 336,1 metres en la distrito de la barceria. On ia estingui ja lo.
Un atestor ia reporta "detrito a cada loca, cadente a en construidas visina".
On ancora no sabe serta cual ia causa la focon, ma lo pare ce lo ia comensa a la nivel 50. Sentos de persones ia es sortida, e on ia reporta no feris o moris.
La construida es iconin, e persones ia veni sur balcones ensircante per regarda la arde, an a la ora 3 de matina cuando lo ia aveni.
Un abitor ia dise ce el ia vide paneles de la rascasielo cual ia ensende, deveninte saisida par la venta e cadente a la tera. Los ia cade ancora en flamas e ia colpa construidas visina.
En 2012, un focon ia ruina la 34 niveles de la Tore Tamweel en Dubai. Nun ia es ferida en acel aveni, parente causada par un sigareta, ma sentos de abitores ia es lasada sin casa.
@T Un focon grave a un gasolineria en Gana
@L aora_oji/2015/un_focon_grave_a_un_gasolineria_en_gana
====== Un focon grave a un gasolineria en Gana ======
5 junio 2015
En Gana, sirca 175 persones ia mori en un focon a un gasolineria en Accra, la capital.
La focon ia comensa en la note de mercurdi cuando la abitores de la site ia luta contra du dias de pluve forte, cual ia lasa multe de los sin casa e sin eletrica.
La inondas ia impedi la laboras de salva e ia causa cisa la focon. On crede ce persones ia es usante la gasolineria como un refuja de la deluvias cuando la focon ia esplode.
La presidente, John Dramani Mahama, ia anunsia tre dias de lamenta nasional en la semana veninte.
El ia visita la ruina de la gasolineria e ia descrive la moris como "desastrosa" e "cuasi sin presedente". El ia promete medios forte per preveni ce on construi sur vias de acua, car lo pare ce esta ia fa un rol en causa la desastre.
Pos un consenta estracomun sur modos de trata inondas, la governa dise ce lo va relasa 14 milion dolares per aida la vitimes.
Scolas ia clui tra la capital, e on ia demanda ce enfantes resta a casa.
Yaw Aforve, un biletor de bus, ia dormi en sua veculo a la gasolineria cuando la focon ia comensa. El ia salta en la acuas, e cuando el ia emerji per respira, la foco ia arde sua fas.
"La acua ia puxa me a la otra lado de la strada," el ia dise. "Me ia vide tan multe persones ci xilia e cria."
La pompores ia dise ce la inondas ia permete ce gasolio e gasolina flue a via de la gasolineria. A pos, un foco en un casa prosima ia causa la esplode.
Multe casas es inondada, e persones vaga en sua vestes de dormi, obligada a sorti de sua letos. Un om ia informa la radio local ce el ia pone sua enfantes sur un armario per salva los de la acua entrante a sua casa.
Meteorolojistes predise ancora plu pluve.
@T Un focon grave en un caferia en Queensland
@L aora_oji/2015/un_focon_grave_en_un_caferia_en_queensland
====== Un focon grave en un caferia en Queensland ======
11 junio 2015
Oto persones es en un state estrema grave pos cuando un camioneta ia colpa un caferia en la stato Queensland en Australia a martedi, ensendente la construida.
La xoca ia causa ce un botela de gas ia esplode a un caferia en Ravenshoe, a sude de Cairns.
La oto pasientes de state grave, scaldada asta 80%, es entre 20 persones ferida en la esplode e focon en acel vila peti de cultiverias.
Ofisiores en Queensland ia descrive esta como la aveni la plu grave de scaldas en la istoria de la stato. On ia envia ja ses persones a un ospital en Brisbane, la capital de Queensland, e du otra pasientes va es ance enviada oji.
Cameras vijilante ia mostra como la esplode ia lansa clientes a estra la caferia e longo la paseria.
Alga persones ia emerji de la construida con vestes ardente, en cuando otras ia freta per estingui la flamas.
La esplode ia destrui ambos lados de la construida, e un ora ia es nesesada per controla la focon.
On no sabe cual ia causa ce la veculo verje de sur la strada e colpa la caferia, ma alga reportas sujesta ce la gidor ia sufri un ataca de cor.
La presidente de la sentro comunial de la vila ia comenta ce lo es stonante ce cualcun ia survive la esplode. El ia dise ce un grupo de sirca oto persones vea ia es en la caferia, e ia veni de oia un presenta par pompores local sur securia contra foco.
Conselores es presente per aida vitimes, atestores, e la comunia jeneral.
@T Un focon grave en un ospital en Arabia Saudi
@L aora_oji/2015/un_focon_grave_en_un_ospital_en_arabia_saudi
====== Un focon grave en un ospital en Arabia Saudi ======
24 desembre 2015
Un focon en la note a un ospital en la sude de Arabia Saudi ia mata a la min 25 persones e ia feri plu ca 100 otras.
La arde ia aveni en la departes de pari e cura intensa de la Ospital Jeneral de Jazan.
La focon es aora estinguida, e on ia move la feridas a otra ospitales en la mesma area.
On investiga per descovre la causa de la foco.
Plu ca 20 ecipos de defende sivil ia aida estingui la flamas.
Fotos publicida en la jornal Okaz ia mostra ce salas en la ospital ia deveni profonda negra, con detrito pendente de la sofito.
Jazan es prosima a la frontera con Iaman, cual ia esperia menses de batalias entre rebelores huti e soldatos suportada par Arabia Saudi.
En la parte plu temprana de esta semana, on ia reporta ce un roceto xutada de Iaman a Jazan ia es intersepida par Arabia Saudi. Ma on ave no indica ce esta focon es relatada con acel gera.
@T Un focon matante a un loca de note romanian
@L aora_oji/2015/un_focon_matante_a_un_loca_de_note_romanian
====== Un focon matante a un loca de note romanian ======
31 otobre 2015
Dudes-sete persones -- xef adolesentes e jovenes -- ia es matada cuando un focon ia ensende a un loca de note en Bucuresti, la capital de Romania.
La focon ia saisi la club Colectiv a la note pasada, causante un sorti panicada. On trata 155 persones en ospitales.
Lo pare ce la ensende ia es inisiada par focos artal cual on ia presenta a interna de la construida.
La pirotecnicales ia es un parte de un presenta par un bande de roc metal.
Atestores ia dise ce un sintil sur la stadio ia ensende alga de la decora de polistiren. Un colona e la sofito ia comensa flami, un esplode ia aveni, con fuma densa.
Un atestor ia descrive la sena: "Persones ia desmaia, los ia desmaia en la fuma. Lo ia es un caos completa: persones ia es crasente la un la otra su pede."
Lo es posible ce asta 400 persones ia es en la club, cual ia ospita un conserta de roc sin custa.
La club es situada en un vea fabriceria convertida, con du portes peti de sorti, e inisial on ia pote abri sola un de estas. Un otra atestor ia dise ce la visitores asustada ia debe rompe la porte du per evade la focon.
Multe de los en ospital sufri pos enspira fuma o ave scaldas sever. On reporta ce 25 persones, cisa plu, es en un state grave a la Ospital Munisipal.
Empleadas a un otra ospital ia indica ce la plu de la persones ci los ia trata es adolesentes con entre 14 e 16 anios.
La ministro xef, Victor Ponta, ia dise ce el corti sua visita a Mexico per revade direta a Bucuresti.
Klaus Iohannis, la presidente romanian, ia scrive a sua paje de Facebook ce el es "profonda lamentosa sur la avenis trajedial cual ia ariva a esta sera en la sentro de la site". El ia ajunta: "Lo es un dia multe triste per tota de nos, per nosa nasion e personal per me."
@T Un fusili matante en un eglesa en la SUA
@L aora_oji/2015/un_fusili_matante_en_un_eglesa_en_la_sua
====== Un fusili matante en un eglesa en la SUA ======
18 junio 2015
En la SUA, nove persones ia mori en un fusili a un eglesa vea african-american en la site Charleston en la stato Carolina Sude.
Oto de la vitimes ia es matada en la Eglesa Episcopal Metodiste African Emanuel a la sera de mercurdi, e un otra person ia mori a pos.
La polisia xerca un suspetada mas blanca ci ave sirca 21 anios.
La pastor de la eglesa e senator de la stato, Clementa Pickney, ia es entre la matadas.
A la tempo de la fusili a sirca 21:00 de ora local, un consenta de prea ia es aveninte en la eglesa.
La xef de polisia de la site ia dise: "Lo es noncomprendable ce algun en la sosia de oji ta entra a un eglesa do on fa un consenta de prea e mata los. Me crede vera ce lo ia es un crimin de odia."
On ia vide elicotores supra la area, e un eglesor polisial ia es presente.
A un punto, la polisia ia demanda ce abitores move a via pos reportas de un bomba, ma plu tarda los ia indica ce acel reportas es falsa.
Un grupo de adorores ia es videda en prea, prosima a la eglesa. Un de los ia dise: "Nos desira respondes vera aora."
La ataca ia aveni a du menses pos cuando Walter Scott, un om negra e sin armas, ia es fusilida e matada par un polisior blanca en North Charleston, un site prosima.
Acel fusili ia provoca protestas coler e ia asentua tensas razal en la site. La polisior ia es acusada de omiside.
La eglesa de la fusili en Carolina Sude ia es construida en la sentenio 19, e es un de la plu veas en la SUA. Un de sua fundores, Denmark Vesey, ia gida un revolta falida de sclavos en 1822.
@T Un fusilor es desarmada en un tren franses
@L aora_oji/2015/un_fusilor_es_desarmada_en_un_tren_franses
====== Un fusilor es desarmada en un tren franses ======
22 agosto 2015
Tre persones ia es ferida cuando un om forte armada ia comensa fusili en un tren en la norde de Frans. Du pasajores de la SUA ia susede desarma el.
Esta ia aveni en la servi de rapidia alta de Thalys, prosima a Arras, do la atacor ia es arestada a la stasion.
Barack Obama, la presidente de la SUA, ia loda la pasajores, ci ia inclui du militares SUA nonlaborante.
La om arestada ia es un magribi de 26 anios, e ofisiores antiteroriste ia emprende la investiga. Sua armas ia inclui un kalaxnikov, un cotel, un pistol automata, e cartuxes.
Autoriosas franses ia dise ce du persones ia es grave ferida -- la un ia es colpada par la fusili, la otra par la cotel.
Bernard Cazeneuve, la ministro de internas franses, ia dise ce la ataca ia aveni ier a 17:45 de ora local (15:45 de ora global).
Jornalistes franses ia reporta ce la arestada es conoseda a la departes de securia. Asta aora, el ia refusa parla a la polisia en Arras.
Charles Michel, la ministro xef beljes, ia descrive la aveni como "un ataca teroriste".
La pasajores ia inclui Jean-Hugues Anglade, un ator franses ci ia es lejera ferida en rompe vitro per sona la alarma, e Chris Norman, un om brites ci abita en Frans. Norman e du otra omes de la SUA ia reseta medalias per coraje a un restorante en Arras.
On ia reporta ce la pasajores ci ia vinse e desarma la suspetada es soldatos maral ci ia oia cuando la om ia carga un arma en un saleta privada. Los ia fronti el cuando el ia sorti.
Imajes distribuida en redes sosial ia pare mostra la restrinje de un om sur la plataforma en Arras.
SNCF, la compania de ferovia franses, ia dise ce la tren ia porta 554 persones.
Frans es vijilante de pos la ataca contra la jornal Charlie Hebdo e un supramercato iudi en Paris en janero, cual ia mata 17 persones.
E en junio, un om, sur cual on dise ce el ia es inspirada par la grupo Stato Islamiste, ia destesti sua xef de labora e ia atenta esplode un compleso de gas en Frans sude.
@T Un fusilor es matada en København
@L aora_oji/2015/un_fusilor_es_matada_en_kobenhavn
====== Un fusilor es matada en København ======
15 febrero 2015
En Danmarc, la polisia de København ia fusili un om sur ci los crede ce el ia fa plu temprana du atacas matante en la capital.
Los ia mata la om en la distrito Nørrebro, pos cuando el ia comensa xuta a los.
Esta ia segue la mata ier de un om iudi e la feri de du polisiores a un debate sur la libria de espresa, en un caferia prosima a la sinagoga xef de la site.
La polisia dise ce la monitoris video ia sujesta ce la mesma om ia fa ambos atacas. Los no crede ce cualce otra persones ia en envolveda.
La site ia es forte vijilante pos la xutas ier.
Temprana a esta matina, la polisia ia anunsia ce los ia oserva un adirije en Nørrebro, espetante la reveni de la abitor.
Cuando el ia apare, el ia vide la polisiores, ia estrae un fusil, e ia comensa fusili. La polisia ia responde par mata el. Esta ia aveni prosima a la stasion ferovial de Nørrebro.
Plu temprana, la polisia ia averti abitores ce los no va es secur en la sentro de site, an si los ia asentua ce los no enforsa un proibi de sorti.
La cartuniste Lars Vilks, ci ia fronti ja menasas de mori sur sua imajes de la profeta Muhammad, ia espresa sua opina ce el ia es la blanco intendeda de la ataca prima. El no ia es ferida.
La ambasador franses, François Zimeray, ia es ance presente a la ataca.
La anunsia de la debate a la cafe ia demanda esce artistes pote "osa" blasfema pos la atacas par fusilores islamiste contra la jornal Charlie Hebdo en Paris en janero.
@T Un fusilor mata en un universia SUA
@L aora_oji/2015/un_fusilor_mata_en_un_universia_sua
====== Un fusilor mata en un universia SUA ======
2 otobre 2015
En la SUA, nove persones ia es matada e sete ferida par un fusilor a un universia en la stato Oregon.
La atacor, ci ia ave 26 anios, ia fusili a Umpqua Community College a la matina de ier, e ia es matada par la polisia.
La polisia no ia identifia formal la atacor, ma alga ofisiores ia informa jornalistes ce sua nom es Chris Harper Mercer. John Hanlin, la xerif local, ia refusa confirma la nom, ajuntante: "Me no va dona a el la onora cual probable el ia xerca par esta ata repulsante e coarde."
On no sabe la motiva de la mator, ma la polisia investiga reportas ce el ia averti sur sua intendes en redes sosial.
A alga oras pos la ataca, la presidente Barack Obama, vidable frustrada, ia esije leges plu sever sur fusiles, comentante ce preas "no sufisi plu".
Apena ascondente sua irita, el ia dise ce tal fusilis -- e sua propre responde -- ia deveni ja costumal. "Nos no es la sola pais sur la Tera con persones ci ave maladias mental o vole feri otra persones. Ma nos es la sola pais avansada sur la Tera cual esperia esta fusilis coletiva en cada pico de menses."
Un fem ci abita fasante la compleso ia dise ce el ia oia un sona simil a focos artal, e cuando el ia sorti de sua casa, el ia vide un esflue de studiantes. "Un xica ia sorti envolveda en un covreleto con sangue sur el," el ia nota.
Hannah Miles, un studiante de 19 anios, ia dise ce on ia gida el e sua costudiantes a un libreria prosima, do los ia asconde en un sala retro.
"Nun ia es vera serta sur lo cual aveni," el ia comenta. "A la momento seguente, nos ia oia tre o cuatro plu sonas de xuta e tota de nos ia regarda la un la otras -- e nos ia sabe."
La universia ave 3000 studiantes, e es situada en Roseburg, un area campanial a sirca 280 cilometres a sude de Portland. Sentos de persones ia asembla ritual en un parce de Roseburg en la sera.
Studiantes ia es transportada par bus a un feria local per es reunida con sua amadas.
@T Un fusilor matante en Tunis ia es aidada
@L aora_oji/2015/un_fusilor_matante_en_tunis_ia_es_aidada
====== Un fusilor matante en Tunis ia es aidada ======
29 junio 2015
Ofisiores dise ce un fusilor ci ia mata 38 persones a un plaia tunisi a venerdi ia es aidada par otra persones.
Un portavose per la ministreria de internas ia dise ce la polisia es "serta" ce Seifeddine Rezgui Yacoubi ia ave aidores.
Rezgui ia finje ce el es mera un banior, ma el ia porta un fusil su sua parasol. El ia fusili sur la plaia ante entra a un otel, do el ia continua fusili.
La governa ia anunsia un securia plu alta pos la ataca, cual ia es reclamada par la Stato Islamiste.
A la min 30 de la mores ia es turistes de la Rena Unida, do la polisia dise ce los ia envia polisiores a la Republica Tunisi, e ce sentos plu labora sur un de la investigas antiterorisme la plu grande en la Rena Unida de pos un serie de bombis en London en 2005. La plu de la otra vitimes ia es eres.
Investigores tunisian crede ce la aidores suspetada ia furni la fusil Kalashnikov a Rezgui e ia aida el a ariva a la sena.
La polisia interoga la padre e tre cameradas de aparte de Rezgui, ma no ia dise ce cualce de los es suspetada de envolve.
Visinas e relatadas en Gaâfour, la vila de orijina de la atacor, ia parla a jornalistes sur sua xoca a la ata.
"Ci ta imajina ce el va esecuta un tal asusta?" sua tio ia dise. "Cisa el ia es cambiada do el ia studia, cisa el ia trova alga cosa en la interede. Ma nos ave simple no respondes."
La autoriosas en la pais dise ce soldatos reserviste va es enviada e locas de turisme, e ce on va clui sirca 80 mascitas acusada de provoca violentia ante la fini de esta semana.
La ataca a venerdi ia es la plu matante en la istoria resente de Tunis. En marto, combatosas ia mata 22 persones, xef stranjeres, a la museo Bardo en la site Tunis.
La economia turisi depende de turisme, e on teme ce la atacas resente va colpa sever acel industria.
@T Un greve de enseniores brasilera fini
@L aora_oji/2015/un_greve_de_enseniores_brasilera_fini
====== Un greve de enseniores brasilera fini ======
13 junio 2015
En Brasil, enseniores ia vota per revade a labora pos cuasi tre menses de greve.
Miles de protestores de un de la sindicatos la plu grande de enseniores en la Americas ia asembla en la sentro de la site São Paulo.
La greves ia comensa cuando la governa ia refusa ofre un aumenta de salario.
Un gidor de la sindicato ia comenta ce la greve ia perde sua fortia cuando la sindicato ia debe redui sua paias compensante a la enseniores.
La grevores de la Sindicato de Enseniores Ofisial per la Stato de São Paulo ia demanda un aumenta de salario de 75%. La sindicato representa sirca 180 mil enseniores.
En la anio pasada, cuando la Copa Mundal ia prosimi, miles de protestores ia pasea sur la stradas en sites tra Brasil en cexa contra froda e la custas spiralinte de construi la stadiones de futbal.
Multe protestores ia cexa alora ce on ia sutrae mone de servis publica fundal.
@T Un gru colasa en Mecca
@L aora_oji/2015/un_gru_colasa_en_mecca
====== Un gru colasa en Mecca ======
12 setembre 2015
Arabia Saudi ia comensa un investiga pos la colasa ier de un gru en la site santa muslim Mecca, matante a la min 107 persones e ferinte a la min 230 otras.
La gru roja e enorme ia cade sur un parte de la Mascita Grande, cual ia es plen de adorores a acel tempo. On no sabe serta cuanto vitimes ia es matada par la colasa e cuanto par la panica seguente.
Criticas crese aora sur la nivel de securia a la site santa, cual prepara se per la hadj, la peregrina anial muslim. On previde ce, plu tarda en esta mense, miles de persones va ariva de tra la mundo.
La xef de la departe de defende sivil de Arabia Saudia ia dise ce la gru ia colasa par causa de ventas e pluves forte. Corta ante la cade, la site ia es colpada par un cuantia noncomun alta de pluve e par ventas de asta 83 cilometres per ora.
Videos postada a la rede mostra la momento cuando la strutur ia colasa, con un pum forte segueda par un panica con crias. Corpos e sangue ia es vidable sur la solo de la mascita.
On investiga per evalua la dana e la grado de securia de la loca.
La Mascita Grande es presente ensircada par des-sinco grus grande cual fa laboras major de redevelopa. A la tempo de la asidente, sirca 800 mil persones ia es en la area.
La hadj va comensa pos sirca 10 dias, e Mecca prepara se per bonveni sirca du milion muslimes de la mundo intera. Islam esije ce cada muslim peregrina a la site santa a minima un ves en sua vive, si el es capas de fa lo.
En la anio pasada, on ia comensa un labora major a la loca santa per grandi la area de la mascita par 400 mil metres cuadrida, afin lo pote conteni asta 2,2 milion persones a la mesma tempo.
Plu ca tre milion persones ia emprende la peregrina a Mecca en 2012. De 2013, la autoriosas saudi ia limita la cuantia de partisipores, car cuantias grande de peregrinores ia causa plu ca un trajedia en anios pasada.
@T Un imaje plu clar de la surfas de Pluto
@L aora_oji/2015/un_imaje_plu_clar_de_la_surfas_de_pluto
====== Un imaje plu clar de la surfas de Pluto ======
11 julio 2015
La veculo spasial Orizones Nova prosimi a Pluto, traente imajes sempre plu clar.
La imaje la plu resente comensa ofre indicas vera sur la jeolojia sur la planeta nana. La imaje blanca-negra revela un banda vasta de tereno distinguida, cual estende sirca la globo tra plu o min 1500 cilometres.
La veculo va pasa la miniplaneta distante a martedi. A acel momento, lo va es a mera 12 500 cilometres supra la surfas, e sua camera telescopial va reseta imajes a densia plu bon ca 100 metres per pixel.
A presente, an tal, la cualias videda ave ancora un aspeta alga neblosa.
La foto la plu resente publicida ia es fada a jovedi cuando Orizones Nova ia es ancora a 5,4 milion cilometres de sua gol. A esta distantia, la densia es 27 cilometres per pixel, ma jeolojistes deveni ja multe stimulada.
Basa, on pote vide un tereno multe oscur cual siensistes ia nomi "la balena" per sua forma. La area multe luminada con forma de un cor cual ia es vidable en imajes plu temprana es ascondeda par la jira de Pluto en la imaje nova. Ma lo va es a la fas vidable de la mundo a la prosimi masima.
Alan Stern, la investigor xef de Orizones Nova, ia dise: "Entre la strutures esitosa identifiada en esta imaje nova es alga cualias parente poligon; un banda complicada de tereno traversante la planeta a este-norde-este, con longia de sirca 1600 cilometres; e un area complicada do terenos briliante encontra la terenos oscur de la balena."
La veculo ia es lansada de la Tera en 2006. On intende ce lo va colie sentos de fotos e otra spesies de datos rexercal en cuando lo pasa Pluto e sua lunas: Caron, Stije, Nix, Cerbero, e Idra.
La taxe difisil de la veculo es envia tota esta informas a la Tera. Lo es situada a un distantia enorme de nos -- plu ca 4,7 mil milion cilometres -- e esta no permete la transmete rapida de datos.
La ecipo de la mision previde ce Orizones Nova va spende 16 menses en envia tota la informas cual lo va colie en la semana veninte.
@T Un imno noncoreta es oiada a un max de futbal
@L aora_oji/2015/un_imno_noncoreta_es_oiada_a_un_max_de_futbal
====== Un imno noncoreta es oiada a un max de futbal ======
31 marto 2015
Organizores de un max amin de futbal entre Salvador e Arjentina ia repenti pos jua la imno de la Isola Man -- un isola peti entre Britan e Er.
Fanes de Salvador ia sibila antipatiosa e sua juores ia es confondeda en cuando la imno noncoreta ia es oiada ante la max en la SUA a saturdi.
La organizores ia dise ce los "aseta la encarga intera per la era onesta".
Ellan Vannin -- la nom manes per la Isola Man -- e Salvador ia es visina la un a la otra en la lista de imnos nasional.
Plu ca 50 mil oservores ia vade a un stadio en la stato Maryland per regarda la max amin.
Alga de la juores salvadoran ia lasa ce sua manos cade lenta de sua petos en cuando "Pais de nosa nase" ia es oiada en loca de sua imno nasional.
Un portavose per la organizores ia dise ce esta no ia es fada con "intendes malvolente" e ce lo va "adota medios per preveni ce esta aveni denova".
Arjentina, ci ia jua sin sua capitan Lionel Messi, ia gania la max con du goles par Ever Benega e Federico Mancuello. Salvador ia fa no goles.
En sua intervisa pos la max, Albert Roca, la manejor de la ecipo salvadoran, no ia refere a la era.
@T Un jornaliste stranjer es librida de prison en Misre
@L aora_oji/2015/un_jornaliste_stranjer_es_librida_de_prison_en_misre
====== Un jornaliste stranjer es librida de prison en Misre ======
2 febrero 2015
La familia de Peter Greste, un jornaliste de al-Jazira, ia dise ce el no va reposa ante cuando on libri sua du colaborores de prison en Misre.
Ier, pos 400 dias en prison, Greste ia es librida e deportada. El ia ariva secur en Cipros, en via a Australia, sua propre pais.
On ia aresta el en 2013, acusante ce el sperde novas falsa e aida la Fratia Muslim.
Sua colaborores de al-Jazira, Mohamed Fahmy e Baher Mohamed, es ancora prisonidas. Fahmy ave un sitadania duple de Misre e Canada, e lo es posible ce on va libri el pos cansela sua sitadania misre. Ma on es ancora consernada sur senior Mohamed, un sitadan sola de Misre.
Andrew Greste, la frate de la jornaliste, ia grasia los ci ia suporta sua frate e ia labora per reali sua libri. El ia dise: "Nos es mera rotas peti en esta campania jigante."
On ia acusa la tre jornalistes de colabora con la Fratia Muslim, un organiza proibida, pos la despone de presidente Mohammed Morsi par la militares en 2013.
Tota la acusadas ia nega la acusas, disente ce sua prosede es un finje. Fahmy e Greste ia es condenada a sete anios en prison, e Mohamed a des. On ia descondena los a 1 janero, ma los ia resta en prison per un reprosede.
Sua libri a soldi ia aveni pos un campania longa internasional. La indicetas prima ia es persepida en novembre, cuando presidente Abdul Fatta al-Sisi ia dise ce el considera pardona la du jornalistes stranjer. El ia suscrive plu temprana un comanda sur renativi prisonidas stranjer.
Seguente la grupo campaniante Reporters Without Borders (= Reportores sin fronteras), 165 jornalistes es aora prisonida tra la mundo, en paises incluinte Xina, Iran, Ertra, Misre, Uzbecistan, e Rusia.
@T Un lansor de mango es recompensada con un casa
@L aora_oji/2015/un_lansor_de_mango_es_recompensada_con_un_casa
====== Un lansor de mango es recompensada con un casa ======
26 april 2015
Nicolás Maduro, la presidente de Venezuela, ia reali la desira de un fem per un aparte pos cuando la fem ia colpa el sur la testa con un mango.
Marleny Olivo ia lansa la fruta a Maduro cuando el ia gida un bus tra Aragua, un stato sentral. Lo ia porta un mesaje scriveda, en cual Olivo ia prea a el per aida.
Maduro ia mostra la mango con sua numero de telefon sur lo en un difusa televisada a pos. El ia dise ce el ia acorda a la demanda per un aparte.
Olivo ia scrive "Si tu pote, telefoni me" con sua nom e numero. El ia vade tan prosima como posible a la bus en cuando lo ia pasa, e ia lansa la mango a la presidente.
En un video cual ia sperde virusin en la pais, on vide ce Maduro basi sua testa cuando la mango colpa el supra sua orea sinistra. Alora, el prende calma la fruta e mostra lo a la fola.
A pos, la presidente ia apare en un de sua difusas direta normal, do el ia discute la aveni.
"El ia ave un problem de casi, si? E, Marleny, me ia aproba ja lo, como un parte de la mision grande de casis venezuelan, tu va reseta un aparte e on va dona lo a tu en la oras veninte. Doman, no plu tarda ca a la dia pos doman, nos va dona lo a tu."
Olivo ia dise ce sua ata ia conteni "no intende malvolente", ma sola un desira a reali sua aspira de posese un casa ante sua mori.
En un posto pasada, la presidente ia gida buses. El gusta aora crea relatas con venezuelanes comun par turi comunias local a la volante de un bus.
El ia ajunta ce la mango es matur, e ce plu tarda el va come lo.
@T Un lisca de tera en Guangdong
@L aora_oji/2015/un_lisca_de_tera_en_guangdong
====== Un lisca de tera en Guangdong ======
21 desembre 2015
Sentos de laborores salvante xerca survivores pos un lisca de tera cual ia colpa 33 construidas en Shenzhen, un site de Xina sude.
On ia tira sete persones de la detrito con feris minor, ma 91 manca ancora. Sirca 900 ia es sortida de la loca cuando la lisca ia aveni ier.
La autoriosas dise ce un monton jigante e artificial de tera, semento, e otra detritos construal ia perde sua stablia e ia colasa.
Shenzhen es un de la sites la plu grande de Xina. Lo es un sentro major de industria, situada en la provinse Guangdong, a la otra lado de la frontera de Hongkong.
La lisca, a un parce industrial, ia covre un area vasta de 380 mil metres cuadrida con asta 10 metres de fango.
Lo ia causa ance un esplode a un tubo de gas natural. Laborores ia limpi sirca 400 metres de tubo danada e repara aora lo.
La monton ia cumula a un escaveria vea de petra cual on ia converti a un dejeteria, de cual sua entra e sorti regarda la distrito industrial.
La construidas danada o enterada inclui tre dormerias de laborores, alga fabricerias e ofisias, e un caferia.
59 omes e 32 femes manca, ma on ia deteta sinias de vive a tre locas diversa.
Un filma atestante mostra ondas de tera roja cual engoli e crase construidas con rapidia grande. Un otra mostra la asende de plumones de tera a la aira cuando la monton colasa.
@T Un lisca de tera en Xina este
@L aora_oji/2015/un_lisca_de_tera_en_xina_este
====== Un lisca de tera en Xina este ======
16 novembre 2015
Plu ca 2000 salvores xerca survivores de un lisca de tera en Xina este cual ia mata a la min 25 persones.
Alga dias de pluve ia inisia un deluvia de fango e roca cual ia engoli casas en la vileta Lidong en la provinse Zhejiang.
La lisca ia aveni no longa ante 23:00 a la sera de venerdi, enterante cuasi 30 casas.
Partes de la vileta resta inondada, difisilinte la labora de salva. La lisca ia crea ance un parario cual impedi plu la taxe.
Reportas indica ce 12 persones manca ancora.
Ofisiores local ia dise ce asta aora on ia salva un person, e ce el es en un state stable.
En ajunta a salvores, canes detetante, e macinas, on ia envia ance psicolojistes a la area per aida membros de la familias de la vitimes.
La plu de la mancantes es enfantes e veas, seguente reportas local, cual ia dise ance ce on ia acorda un compensa per los ci ia perde sua casas en la desastre.
@T Un madre txilan e usor medical de mariuana no pote vide sua bebeta
@L aora_oji/2015/un_madre_txilan_e_usor_medical_de_mariuana_no_pote_vide_sua_bebeta
====== Un madre txilan e usor medical de mariuana no pote vide sua bebeta ======
28 novembre 2015
En Txile, un madre dise ce un ospital restrinje sua asede a sua bebe resente naseda car el ia dise ce el fumi mariuana.
Sindy Melany Ortiz ia dise ce el fumi la droga per razonas medical, per lejeri la dole en un de sua brasos.
El dise ce on no permete ce el dona lete a sua fia e pote vide el per sola du oras per dia.
Ofisiores a la ospital en la site sude Talcahuano ia esplica ce los segue sua protocol e ce la bebeta es perilida.
"Los ia viole mea diretos de madre," Ortiz ia dise. "Me usa esta droga sola per la dole en mea brasos. Lo ia es recomendada a me par un profesal de medica, e me es asoluta no un consumor de drogas."
"Los ia comensa demanda esce me fumi o usa cualce droga, e me ia informa los. Cuando me fia ia nase, los ia dise ce el va resta alga con me, ma ce me no pote dona lete al el car me ia consuma mariuana cual es mal per la bebe."
La ospital ia avisa un corte local ce probas ia trova sustantias capas de dana la enfante. La corte ia comanda ce la bebe resta en la ospital Las Higueras ("La figos") asta jovedi, cuando lo va fa un deside.
En julio, la Congresa de Txile ia aproba con marjin grande un projeta legal cual intende descriminali la usa e cultiva personal de mariuana. Si asetada, la lege va permete la posese de asta 10 grames de canaba e la crese de asta ses plantas.
On regarda lo como un modo per para la persegue de usores medical e per permete ce los asede un medisin cual los pote crese en sua jardines.
Plu temprana en esta anio, Santiago, la capital de la pais, ia es la loca de la cultiveria medical prima de mariuana en America Latina.
La projeta legal va move a la Salon basa ante pasa a la Senato, en un prosede cual pote ocupa alga anios.
@T Un maior joven brasilera es xercada per froda
@L aora_oji/2015/un_maior_joven_brasilera_es_xercada_per_froda
====== Un maior joven brasilera es xercada per froda ======
31 agosto 2015
Un maior en Brasil es aora un fujor pos es acusada de fura mone de la sistem scolal e de telemaneja sua vila par WhatsApp.
Lidiane Leite, un fem con 25 anios, ia fa un vive lusosa en la capital de la stato Maranhão. Sua acusores dise ce sua sola contatas con sua vila, Bom Jardim, ia es par mesajes dial a sua consilio, enviada con WhatsApp, un program de telefoneta.
On ia comanda la aresta de el e sua xico de cor, ci ia servi como sua conselor xef.
Leite ia es en la temprana de sua desenio tre cuando Beto Rocha, sua xico de cor, ia es proibida de atenta deveni la maior, su alegas de froda. Leite ia sustitui se e ia deveni elejeda. El ia nomi Rocha como sua conselor xef, e ia vade per abita en São Luís, la capital de stato, a distantia de 275 cilometres.
Sua avocato ia comenta: "El ia es tro joven e sin esperia cuando el ia emprende sua posto. El no ia ave autofida, e ia delega multe taxes a senior Rocha."
Jornalistes brasilera dise ce la duple ia fini sua relata a un tempo plu temprana de esta anio, corta ante cuando Rocha ia resinia.
Leite ia fuji cuando sua nom ia apare en un investiga federal sur la malusa de reservas per instrui statal. La investiga "Eden" ia descovre atestas ce sirca $4 milion de mone per la scolas de Bom Jardim ia desapare.
La sistem de instrui, ja coxeante, de la vila ia colasa aora. Enseniores no reseta sua paias.
Un maior nova -- la suordinada pasada de Leite -- ia es inaugurada a saturdi. El ia promete fa un investiga completa.
Un judor statal ia dise ce el va xerca un comanda internasional de aresta si Leite no presenta se ante martedi.
Maranhão en Brasil norde-este es un de la statos la plu povre de la pais.
@T Un manca de contravenena per mordes de serpente
@L aora_oji/2015/un_manca_de_contravenena_per_mordes_de_serpente
====== Un manca de contravenena per mordes de serpente ======
8 setembre 2015
La mundo ia consuma cuasi tota sua reservas de un de la remedias la plu bon contra mordes par serpente, riscante deses de miles de vives.
La organiza Médicins Sans Frontières (Medicistes Sin Fronteras) dise ce on nesesa forte ave eservas nova de Fav-Afrique, cual neutri des mordes diversa cual pote aveni en Africa susaharan.
La reserva final va desvalidi en junio 2016, ma no sustitua comparable esiste. Alternativas es disponable, ma MSF dise ce los no opera tan bon.
Fav-Afrique es la sola contravenena cual ia mostra se como secur e capas de trata venenis de spesies variosa de serpentes tra Africa susaharan.
La compania Sanofi Pasteur, cual ia produi lo, dise ce la mercato ia deveni tro custosa. Ma lo va comparti la reseta con otras. Sanofi ia para produi la sero en la anio pasada e ia cambia sua ativia a produi un remedia de rabia en loca.
On crede ce lo negosia afin un otra compania produi Fav-Afrique, ma on no previde ce esta discutes va conclui ante la tarda de 2016. Per esta razona, un produida sustitua no va apare en la mercato asta la pasa de du plu anios.
MSF dise ce la manca de un contravenena jeneral, secur e capas en acel periodo va causa moris ultra conta.
Polly Markandya de la organiza ia esplica: "La plu de persones ci es mordeda par un serpente no sabe esata la spesie de serpente, e donce lo es vera importante ce on ave un contravenena cual susede contra un diversia de spesies diferente. Nos es ansiosa ce sin dispone acel contravenena, persones va mori nonesesada."
Alain Bernal, un portavose de Sanofi Pasteur, ia dise ce la compania ia ofre move la tecnolojia de contravenena a otras, ajuntante: "No cosa ia reali asta aora."
La Organiza Mundal de Sania dise ce mordes par serpente es un tema iniorada cual nesesa plu atendes e investis.
On estima ce, en cada anio, serpentes morde sinco milion persones, de ci 100 000 mori e 400 000 deveni permanente descapasida o malformida.
Mera en Africa susaharan, 30 000 persones mori par esta causa en cada anio, e sirca 8 000 sufri amputas.
@T Un maraton noiante en Hongkong
@L aora_oji/2015/un_maraton_noiante_en_hongkong
====== Un maraton noiante en Hongkong ======
2 marto 2015
Sentos de corores ia compete en la ultramaraton prima en la urbe Hongkong, an si la organizores mesma ia descrive la curso como "alga noiante".
On defini un ultramaraton como cualce corsa tra plu ca la distantia normal de maraton.
En la corsa de 50 cilometres en Hongkong, la competores ia core longo la mesma estende de strada a 25 veses.
Nestor Wong ia gania la compete, fininte en 3 oras, 24 minutos e 20 secondos. El ia defende la curso, disente ce el ia es aidada par oia la folas aclamante.
Ma ante la aveni, corores local la critica la curso.
Un ia dise: "Lo va es noiante e mute difisil, si no mareante, per la corores, ci va debe traversa a 25 veses la mesma parte de via."
Un otra ia comenta: "Me no oposa cursos monotonosa, ma esta es un monotonia alga estrema per mea preferes."
Kwan Kee, la presidente de la Asosia Atletal de Amatores de Hongkong e un de la organizores de la corsa, ia aseta ce la curso es noiante. Ma el ia dise ce la partisipa de oservores va aida, ajuntante: "Lo ia es eselente ce nos ia pote oteni esta curso en la cor de la site. La spasio asi en Hongkong es multe limitada."
@T Un max de futbal en Gana deveni un tumulta
@L aora_oji/2015/un_max_de_futbal_en_gana_deveni_un_tumulta
====== Un max de futbal en Gana deveni un tumulta ======
6 febrero 2015
On ia descrive la max semifinal de la Copa African de Nasiones, entre Gana e la ospitores Gine Ecuatoral, como "un zona de gera". La jua ia es pausada per plu ca 30 minutos par causa de tumultas.
La juores ia debe evita botelas lansada de la fola; fanes ganaian ia xerca refuja pos un gol; polisiores ia usa gas lacrimojen; e un elicotor ia flota supra la stadion.
La Asosia de Futbal Ganaian ia tuita "Esta es aora como un zona de gera", alegante ce "atas barbar de vandalisme" e "atacas violente e nonprovocada" ia aveni en la stadion.
Cuando la max ia recomensa, Gana ia gania par 3--0 per ateni la final a soldi. Alora los va jua contra Costa Ivor, ci ia vinse la Republica Democrata de Congo par 3--1 a mercurdi.
La tumultas ia eruta a medijua. Juores ganaian ia debe es protejeda par polisiores con scermos plastica en parti de la campo, pos fa ja du goles.
On ia para la dui du de la jua a oto minutos ante la fini, cuando suportores de Gana ia core sur la campo pos es atacada.
Ofisiores de la Federa de Futbal African ia usa la sistem de parladores per menasa abandona la max si la fola no sesa lansa ojetos a la juores de Gana.
A pos, on ia trova sur la campo un peso de miror rompeda, un dui de un plato, e un roca.
@T Un mision a Mercurio fini con colpa
@L aora_oji/2015/un_mision_a_mercurio_fini_con_colpa
====== Un mision a Mercurio fini con colpa ======
1 maio 2015
La mision Messenger ("Mesajor") par NASA a Mercurio ia fini esplodente, pos des anios en spasio e cuatro en orbita.
La veculo ia cade sur un area prosima a la polo norde de la planeta, nonvidable de la Tera, a sirca 20:00 de ora universal ier.
Siensistes ia confirma esta a alga minutos plu tarda, cuando los ia reseta mera un silentia en loca de la comunica seguente de la veculo.
Messenger ia ateni Mercurio en 2011 e ia suprapasa multe sua intende fundal de orbita per un anio.
Ier, lo ia colpa la surfas de la planeta la plu peti de nosa sistem solal a 14 mil cilometres per ora -- la desduple de la rapidia de sona.
La xoca ia destrui completa la veculo, e lo ia aveni car Mercurio no ave un atmosfera densa cual ta arde ojetos entrante.
La veculo de tre metres ia pesa 513 cilogrames. Calculas indica ce lo ia formi un crater nova con grandia de un campo de tenis. Ma acel es multe tro peti per es vidable de asi.
Sua furni de carburante, cual ia representa un dui de sua pesa cuando lo ia es lansada en 2004, ia deveni intera spendeda a alga semanas ante aora.
Ma on ia susede fa cuatro manobras final per estende plu la vola, par relasa la elio normal usada per move carburante a la puxadores. La ultima de esta manobras ia aveni a 28 april.
En sua mision, Messenger ia cambia multe nosa comprende de la planeta Mercurio. Lo ia envia plu ca 270 mil imajes e 10 terabaites de mesuras siensal.
Lo ia deteta indicas de acua ascondente en la ombras de la crateres polal, e ia descovre ce la campo magnetal de Mercurio es bizara nonsentrida, deslocada longo la ase de la planeta par 10% de sua diametre.
Tra cuatro anios e 4104 sirculos, Messenger ia segue un orbita estrema elise sirca Mercurio. Lo ia vaga frecuente a un distantia de cuasi la duple de la diametre de la planeta, ante reveni a min ca 96 cilometres a la plu prosima.
Per manteni esta ritmo an entre interfere par la Sol, la veculo ia nesesa usa sua motor a un ves en cada pico de menses. La resulta nonevitable ia es ce la mision ia fronti un fini violente cuando la carburante ia deveni consumada.
Lo ia fa sua pasa cuasi ultima a distantia de entre 300 e 600 metres -- no multe plu ca la altia de la Tore Eiffel -- a sirca 13:00 ier.
Car la colpa ia aveni a la lado de la planeta nonvidable de la Tera, la veculo no es ia comunicante en sua momentos final. Donce probable lo ia porta plu ca mil imajes nonvideda a sua loca de reposa.
La nom Messenger ia es un corti de "Mercury Surface, Space Environment, Geochemistry, Ranging" (surfas, ambiente spasial, jeocimica, jeometre).
@T Un monce momida medita ancora
@L aora_oji/2015/un_monce_momida_medita_ancora
====== Un monce momida medita ancora ======
5 febrero 2015
Un monce momida, ci on ia trova en state conservada en Mongol en la semana pasada, ia stona e confonde los ci ia descovre el.
Budistes major dise ce la monce, ci senta en la posa de nelumbo, es en un transe profonda de medita e no es mor.
On fa esaminas medical sur la restas, cual ia es envolveda en peles de bove en Mongol norde-sentral.
Siensistes ancora no ia determina como la monce es tan bon preservada, ma alga pensa ce la clima fria de Mongol pote es la causa.
Ma dotor Barry Kerzin, un mediciste de la Dalai-Lama, la gidor spirital de Tibet, ia dise a jornalistes ce la monce es en un state rara de medita nomida "tukdam".
"Si la meditor pote continua resta en esta state de medita, el pote deveni un buda," el ia comenta.
On ia descovre la monce pos cuando un om ia fura el, esperante vende el a la mercato negra.
La polisia mongol ia aresta la furor, e on garda aora la monce a la Sentro Nasional de Espertia de Investiga Legal.
La identia de la monce no es clar, ma on divina ce el es la ensenior de Lama Dashi-Dorzho Itigilov, ci on ia trova ance como momia.
On dise ce en 1927, Itigilov ia informa sua studiantes ce el va mori, e ce los debe desentera sua corpo pos 30 anios. El ia senta en la posa de nelumbo, ia comensa medita, e ia mori. Cuando on ia desentera el, la lejenda dise ce sua corpo ia es ancora bon conservada.
Temente un interfere par la autoriosas soviet, sua seguores ia entera denova el. On ia redesentera el en 2002, e ia trova ce el es ancora bon conservada. Sua seguores ia loca el en un temple budiste afin on pote adora el per eternia.
@T Un om mata jornalistes en televisa direta
@L aora_oji/2015/un_om_mata_jornalistes_en_televisa_direta
====== Un om mata jornalistes en televisa direta ======
27 agosto 2015
Un om ia fusili e mata du jornalistes en un difusa direta televisada en la stato Virginia en la SUA. Pos la ataca, lo pare ce el ia envia un fax longa en cual el ia descrive se como "un baril umana de polvo esplodente".
Vester Flanagan, ci ia es desempleada par la mesma stasion, WDBJ7, ia mata se pos un xasa de polisia.
En la fax, un om, parente Flanagan, descrive sua sufris de prejudis e tormentas per es ge e negra.
La Casa Blanca ia dise ce la ataca ier ia mostra la nesesa de controla plu bon fusiles.
La du persones matada ia es Alison Parker, un reportor, e Adam Ward, un filmor. La dirijor de la station, Jeff Marks, ia comenta: "Me no pote dise cuanto los ia es amada."
El ia descrive Flanagan como "un om nonfelis" ci on ia debe acompania a estra de la construida pos sua desemplea en 2013.
Parker ia es a media de un intervisa sur turisme, direta difusada, en la temprana de mercurdi en la vila Moneta. Subita, fusilis ia es oiada, e televidores ia vide la camera cadente a la tera. On ia oia xilias e la camera cadeda ia mostra corta la fusilor.
Plu tarda, jornalistes ia debe reporta sur la moris de du de sua colaborores.
A alga oras plu tarda, la fusilor ia posta un filma de se en fusili prosima, ma on ia sutrae lo a pos.
La intervisada, Vicki Gardner de la Comite de Comersia de la Area de Smith Mountain Lake, es en un state stable en ospital pos sirurjia.
ABC News ia dise ce lo ia reseta un fax de 23 pajes, parente enviada par Flanagan como Bryce Williams (se nom profesal) plu tarda a mercurdi. En la fax, el ia dise ce sua coleria ia "crese constante" e ce el ia deveni "un baril umana de polvo" cual "espeta fa PUM!!!!".
La scrivor de la fax dise ce el ia sufri razisme e omofobia en sua labora, e el espresa sua amira per la adolesentes ci ia mata 13 persones a la Liseo de Columbine en la stato Colorado en 1999.
El ia dise ce la ataca en Charleston en la stato Carolina Sude, cuando nove persones ia es matada en un eglesa en junio de esta anio, ia es lo cual "ia envia me ultra la limita".
Bill Overton, la xerif de Franklin County, ia dise ce la fax es aora esaminada par investigores. El ia ajunta: "Lo es evidente ce esta senior ia es turbada en alga modo."
@T Un om perdeda en Australia scrive un mesaje en arena
@L aora_oji/2015/un_om_perdeda_en_australia_scrive_un_mesaje_en_arena
====== Un om perdeda en Australia scrive un mesaje en arena ======
24 agosto 2015
Un turiste brites ci ia es perdeda tra du dias en un area distante de Australia norde ia descrive como on ia salva el pos cuando el ia scrive un demanda per aida en la arena.
Geoff Keys, un om con 63 anios, ia perde sua via en julio pos atenta trova un cascade isolida en la Parce Nasional de la Rio Jardine en la stato Queensland.
Sua desapare ia causa un xerca grande par elicotores e otra salvores. La polisia ia dise ce sua scrive de la mesaje ia salva probable sua vive.
En sua blog, Keys ia esplica ce el ia atenta trova un cascade nomida Elliot Falls. Sua mapa ia mostra ce lo es relativa prosima a sua loca de campa, donce el ia deside pasea longo un via minor per un parte de la distantia, e nada longo un rieta per la parte restante.
El ia scrive: "Mea vestes ia es composada de un slip de nada, un pantala de nada supra lo, un camisa T, e un xapo."
Cuando el no ia susede trova la cascade, Keys ia para nada e ia atenta revade a sua loca de campa.
"En loca de reversa mea dirije e nada contra la flue, me ia deside entra a la savana e vade direta tra lo a la via. Lo ia es cuasi la note. Me ia ave no sapatos. Como me ia opina ce la idea es bon?"
El ia vaga de loca a loca asta la ora du de matina, cuando el ia reposa per la note. Sua amis ia reporta ce el manca, e on ia comensa un xerca con elicotor a la dia seguente.
Keys ia dise ce el ia deside nada con la flue, e pos alga tempo el ia sorti de la rieta per scrive la mesaje "HELP 2807" ("AIDA" e la data, 28 julio) con un flexa indicante la dirije de la flue.
El ia pasa un plu note su sielo e ia recomensa nada ante cuando salvores ia vide la mesaje e ia leva el a la securia de la elicotor.
Polisiores ia dise ce los ia es a punto de move sua xerca a un otra area de savana densa cuando los ia trova la demanda per aida.
@T Un otel de governa iamani es colpada par roceto
@L aora_oji/2015/un_otel_de_governa_iamani_es_colpada_par_roceto
====== Un otel de governa iamani es colpada par roceto ======
6 otobre 2015
En Iaman, un otel casinte la ministro xef e sua consilio en Aden ia es colpada par un ataca de roceto.
On ia reporta feris, ma no a la ministros ci abita ala.
La otel Qasr es usada como un governeria de pos cuando un alia gidada par Saudi Arabia ia forsa rebelores huti a via de Aden, la site du de la plu grandes en la pais.
La rebelores ia avansa a la site e en marto ia obliga la presidente Abd Rabbuh Mansur Hadi e la governa a fuji a Arabia Saudi.
En julio, militiores e soldatos progovernal ia forsa la hutis e sua unias armada fidosa a Ali Abdullah Saleh, la presidente pasada, a parti de la site de porto, con aida de soldatos de la alia saudi.
Hadi ia reveni de esclui a Aden en la tarda de la mense pasada, ma on reporta ce el no ia es en la otel Qasr cuando lo ia es atacada en la temprana de oji.
Abitores ia cexa ce la site ia devolui a caos e anarcia, con combatosas jihadiste liada a al-Qaida e Stato Islamiste videda sur la stradas.
La Nasiones Unida dise ce cuasi 4900 persones ia es matada en la ses menses pasada de batalia en Iaman, incluinte 2200 nonmilitares.
@T Un padre e fio criminal es caturada en Australia
@L aora_oji/2015/un_padre_e_fio_criminal_es_caturada_en_australia
====== Un padre e fio criminal es caturada en Australia ======
28 otobre 2015
En Australia, on ia aresta Gino e Mark Stocco, du criminores fujinte ci es padre e fio, pos un xerca estendeda.
La omes ia es arestada en Dunedoo, en la area sentral ueste de Cimri Sude Nova.
On ia xerca los en relata con alga crimines violente. Los ia fuji ja tra oto anios.
Un opera grande per catura los ia es inisiada pos cuando los ia xuta, alegada, a polisiores a des dias ante aora.
La polisia dise ce los ia trova un corpo mor en la imobila do los ia aresta la du omes, e los crede ce lo ia es un om de 68 anios ci ia manca de pos la temprana de esta mense. On no ia deside la causa de mori.
A ante, la padre de 58 anios e la fio de 35 ia es condenada de crimines cual inclui ataca, fura, e froda.
On ia comanda ance sua aresta sur danas alegada a imobilas, ma la du ia evita la polisia tra anios, sustante se par bricola e par sua propre capasias de survive.
On crede ce los ia cambia sua placas de veculo e sua propre aspetas a plu ca un ves, per evite catura.
No baletas ia es xutada e nun ia es ferida en la aresta.
@T Un padron mexican de drogas evade sua prison
@L aora_oji/2015/un_padron_mexican_de_drogas_evade_sua_prison
====== Un padron mexican de drogas evade sua prison ======
14 julio 2015
Mexico ofre un premio de 60 milion pesos ($3,8 milion) per recatura un padron de drogas ci ia evade un prison de securia masima. On xerca aora intensa Joaquín Guzmán, ci ia sorti de sua selula a saturdi tra 1,5 cilometres de tunel.
Osorio Chong, la ministro de internas dise ce el crede ce ofisiores a la prison ia aida la evade. On ia desemplea ja tre ofisiores major, incluinte la dirijor de la prison Altiplano.
Guzmán ia fuji an cuando el ia porta un brasaleta de vijila e ia es monitorida per 24 oras de dia.
Ier, Chong ia visita la prison e la area visina, a sirca 90 cilometres a ueste de la Site Mexico. El ia ariva par elicotor, con un grupo de congresores e la comisionor de securia nasional.
Chong es encargada con la opera car Enrique Peña Nieto, la presidente, visita Frans per la selebras ala de la festa nasional oji.
On ia forti la securia tra Mexico. Volas de la airoporto de Toluca es suspendeda e on ia institui postos de controla. Guatemala ia aumenta ance sua securia longo sua frontera norde con Mexico, car ala on ia catura Guzmán en 1993.
Guzmán ia es enviada a un prison de securia masima en Mexico, ma el ia evade en 2001, parente par asconde en un caro de vestes pos soborna ofisiores. En la anios seguente, el ia largi la estende de sua organiza. Analistes averti ce la mesma pote reaveni si sua evade nova desacorda con otra carteles ci desira proteje sua teritorios.
On interoga deses de gardores de prison a la prison Altiplano per descovre como Guzmán ia susede evade a esta ves.
Video ia mostra el en entra a la area de dux de sua selula a oto minutos ante nova (de ora local) a saturdi. La tunel ia lia esta area a un casa construida en la anio pasada en campos de mais.
La tunel mesura 1,7 metres par 70 sentimetres, permetente ce Guzmán, un om corta, pasea comfortosa sin curvi. (Se nometa es "El Chapo", cual sinifia "La Nana".) Lo ia es ventida e luminada, e gardores ia trova ance un motosicle cual probable on ia usa per transporta la tera en cuando la tunel ia es escavada.
En la casa prosima a la prison, ofisiores ia trova un cosina e un leto, indicante ce la escavores ia spende cisa series de dias ala. Un calcula usante la altia, largia e longia de la tunel estima ce la tera escavada ta pleni 379 camiones.
Presidente Nieto ia descrive la evade de Guzmán como "un scandal per la stato", e ia comanda un investiga completa.
On estima ce Guzmán posese bilion dolares.
@T Un panica a un tempe barati mata 10 persones
@L aora_oji/2015/un_panica_a_un_tempe_barati_mata_10_persones
====== Un panica a un tempe barati mata 10 persones ======
10 agosto 2015
A la min 10 persones ia mori e 20 ia es ferida en un panica a un temple en la stato Jharkhand en la este de Barat.
Peregrinores ia selebra un festa indu en la vila Deoghar. La panica ia aveni cuando los ia atenta entra a la compleso.
Panicas matante es comun en tal festas relijiosa, car los atrae folas grande e no ave multe medios de securia.
La panica a la temple Baidyanath ia comensa pos cuando la portes ia abri a un ora temprana de oji. La peregrinores ia avansa subita en dirije a la santeria.
Ironial, on ia regarda oji como un data fortunosa per visita la loca, cual inclui un temple xef e 21 plu petis dedicada a Xiva, la dio de destrui.
La peregrinores ia formi un filo con longia de ses cilometres. Alga de los ia es ancora dorminte, e ia es craseda en cuando otras ia es puxada en dirije a la portes.
Multe ia atenta freta a la fronte de la filo. Esta ia causa un caos e cuando alga de los ia cade, la adorores ia deveni craseda.
On ia confirma la moris de des persones, incluinte un fem.
En otobre 2014, 91 peregrinores, xef femes e enfantes, ia es matada en un panica a un festa indu prosima a la temple de Ratangarh en la stato Madhya Pradesh. E en 2011, plu ca 100 persones ia mori a un festa en Kerala, un stato sude.
@T Un parada militar enorme en Rusia
@L aora_oji/2015/un_parada_militar_enorme_en_rusia
====== Un parada militar enorme en Rusia ======
9 maio 2015
Rusia presenta sua parada militar la plu grande, a 70 anios pos la defeta de Deutxland nazi en la Gera Mundal Du.
Miles de soldatos marxa sur la Plaza Roja, e on va mostra tecnolojia nova a la ves prima.
Plu ca 20 xefes de stato es en Moscva, ma multe otras boicota la aveni par causa de la rol alegada de Rusia en la crise ucrainsce.
A la comensa de la parada, presidente Vladimir Putin ia dise ce colaboras internasional ia deveni perilida en anios resente.
Rusia nega acusas par la Ueste ce lo arma rebelores en Ucraina este. Plu ca 6000 persones es ja matada de pos la comensa de combate en april 2014 en la areas Donetsk e Luhansk.
La parada en Moscva ia comensa a 10:00 de ora local (07:00 de ora universal), pos un serie de praticas sur la stradas de la capital.
Unias militar de la intera de Rusia marxa. Alga porta uniformas de la eda de la Gera Mundal Du. Plu ca 100 aviones va vola supra la Plaza Roja.
On va presenta a la ves prima la tance de batalia T-14 Armata, cual ave un toreta-de-fusil telecomandada e un capsula refortida per la ecipo.
On va esibi ance la misiles balistical intercontinental, de cual cada es capas de porta tre ojivas nucleal.
Siniante relatas plu prosima entre Rusia e Xina, un colona de soldatos xines va marxa en Moscva a la ves prima.
Entre plu ca 20 xefes ci oserva la aveni es Xi Jinping, la presidente xines; Pranab Mukherjee, la presidente barati; e Ban Ki-moon, la secretor jeneral de la Nasiones Unida.
Ma la SUA, Australia, Canada, e la plu de la Uni European boicota la aveni supra la crise en Ucraina.
Ier, Polsca ia organiza un aveni alternativa en Gdansk per la xefes ci ia refusa vade a Moscva.
Ala, la presidente de Ucraina, Petro Poroshenko, ia comenta ce "on fa crimines oji en la sentenio 21 entre la atacas contra mea pais Ucraina, an pos la lesones la plu cruel de la pasada". El ia descrive la aveni de oji en Moscva como "un parada de sinicisme".
@T Un parario rompe en Brasil
@L aora_oji/2015/un_parario_rompe_en_brasil
====== Un parario rompe en Brasil ======
6 novembre 2015
En Brasil, on teme ce plu ca des persones ia mori pos la creve de un parario cual reteni acua de cloaca de un mineria de rocas de fero. Casas prosima ia deveni inondada.
Ofisiores en Minas Gerais, un stato sude-este, ia confirma ce un person ia mori, ma on reporta ce asta 16 ia mori e ce otras manca.
Rios de fango densa roja ia versa longo la vales de la area colinosa estra Mariana, un site vea colonial. Lo ia engoli autos e camiones, e ia destrui casas.
La parario ia rompe a la posmedia de ier, enviante un deluvia de fango e detrito a la vila peti Bento Rodrigues, a distantia de sirca sete cilometres.
La area afetada es abitada par sirca 500 persones.
La labora de salva es impedida par temes de liscas de tera, ma elicotores ia leva alga persones encaliada a securia.
On ia averti ce la acua es miscada con sustantias restante de operas de mina, e pote es nosiva.
Un portavose per Samarco, la compania de mina cual posese la parario, ia dise ce on ancora no sabe la causa de la creve.
@T Un pausa de du dias
@L aora_oji/2015/un_pausa_de_du_dias
====== Un pausa de du dias ======
31 janero 2015
Esta blog va recomensa a lundi.
@T Un pausa peti
@L aora_oji/2015/un_pausa_peti
====== Un pausa peti ======
24 julio 2015
Esta blog vacanse, ma va reveni en agosto.
@T Un polisior misri es prosededa sur mata un protestor
@L aora_oji/2015/un_polisior_misri_es_prosededa_sur_mata_un_protestor
====== Un polisior misri es prosededa sur mata un protestor ======
11 maio 2015
On ia comensa la prosede de un polisior misri ci on ia acusa de mata un ativiste fema nonenarmada.
Yassin Hatem Salahedeen, un teninte de polisia ci ave 24 anios, fronti un acusa de mata sin intende sur la mori de Shaimaa al-Sabbagh.
El ia mori pos pare es fusilida par un polisior mascida a un protesta pasosa en Cairo en janero.
Sua momentos final ia es filmida e ia sperde virusin tra la rede, provocante coleria en Misre.
La judor ia comanda la teni de Salahedeen a la escuta inisial ier. A ante, el ia es libre su cautia.
La ativiste ia ave 32 anios. El ia mori pos es fusilida con granes de plomo.
En la dias cual ia segue, la polisia misri ia nega ce los usa tal baletas contra protestores.
An tal, su un presa cresente par la sosia de Misre, la presidente Abdel Fattah el-Sisi ia interveni. El ia promete un investiga completa, referente a Sabbagh como "mea propre fia".
La prosede va recomensa a 14 maio, cuando atestores prosedente va apare.
Sabbagh ia es un libriste political, un poesiste publicida, e un madre de un xico de sinco anios. Sua mori ia xoca Misre.
A 24 janero, el ia pasea con amis a la Plaza Tahrir en Cairo per pone un garlanda per recorda la revolui de 2011, cuando polisiores mascida ia xuta gas lacrimojen e granes de plomo a la grupo.
Un video ia mostra como el ia colasa a la tera e ia es comfortada par un ami.
La ativia de polisia a protestas en Misre es un fonte recorente de critica. Seguente la organiza Human Rights Watch ("Vijila de diretos umana"), 1150 protestores ia es matada sola en julio e agosto 2013.
@T Un politiciste rusce oposante es matada
@L aora_oji/2015/un_politiciste_rusce_oposante_es_matada
====== Un politiciste rusce oposante es matada ======
28 febrero 2015
Boris Nemtsov, un politiciste oposante rusce e un ministro xef suordinada pasada, ia es matada par fusili en Moscva.
Un atacor nonidentifiada en un auto ia fusili la dorso de Nemtsov a cuatro veses en cuando el ia traversa un ponte en vista de la Kremlin.
El ia mori a oras pos apela per suporta per un pasea protestante en Moscva a soldi contra la gera en Ucraina.
La Kremlin ia dise ce la presidente Vladimir Putin condena la omiside. Sua portavose ia clari ce Putin ia emprende "controla personal" de la investiga sur la mata.
Barack Obama, la presidente de la SUA, ia condena la "omiside savaje" e ia recomenda ce la governa rusce fa "un investiga rapida, nonpartisan, e transparente".
Thorbjørn Jagland, ia secretor jeneral de la Consilio de Europa, ia condena ance la mata, disente en un tuita: "Me es xocada e angusada ce la gidor major oposante Boris Nemtsov ia es fusilida. La matores debe fronti justia."
En un intervisa resenta, Nemtsov ia dise ce el teme ce Putin va fa ce on mata el par causa de sua oposa de la gera en Ucraina.
Nemtsov, ci ia ave 55 anios, ia servi como ministro xef suordinada su presidente Boris Ieltsin en la desenio de 1990.
Cuando el ia es governor de Nijni Novgorod, un de la sites la plu grande de Rusia, el ia gania un reputa como un reformor economial. El ia desacorda con Putin, la seguor de Ieltsin, e ia deveni un politiciste franca oposante.
@T Un presidente nova en Srilanca
@L aora_oji/2015/un_presidente_nova_en_srilanca
====== Un presidente nova en Srilanca ======
9 janero 2015
Mahinda Rajapaksa, la gidor durante de Srilanca, ia deveni vinseda en un eleje presidental.
Resultas ofisial ia mostra ca Maithripala Sirisena, un aliada pasada de Rajapaksa, ia gania 51,3% de votas.
Rajapaksa, ci gida la pais de pos 2005, ia dise en Twitter ce el va serti ce la potia move pasosa.
Sua suportores atribui a el la fini de la gera interna e la aumenta de la economia, ma oposores cexa ce el ia deveni sempre plu autoritar e frodante.
Sirisena ia reseta ja prometes suportante de gidores tamil e muslim ante la eleje. Ma la resulta indica ce el ia gania ance un parte notable de la votas de la majoria sinala, de ci la plu ia suporta forte Rajapaksa en elejes pasada.
Sirisena ia es ensircada par suportores e fotografistes cuando el ia parti de sua ofisias. Plu tarda, on va indui el como presidente.
Rajapaksa ia xerca un periodo tre de governa pos cambia la constitui per sutrae un limita de du periodos.
Ambos Rajapaksa e Sirisena es sinalas, membros de la etnico xef en Srilanca.
Los ia es aliadas asta novembre, cuando Sirisena, la ministro de sania en la governa de Rajapaksa, ia anunsia subita se como aspiror.
En multe areas, plu ca 70% de persones ia vota, prosima como en elejes pasada, sin reportas de disturbas major en la prosede.
La periodo ante un eleje srilanca es usual malida par deses de moris, ma en esta anio on ia reporta sola un mori relatada con la eleje.
@T Un presidente pasada de Txad va es prosededa
@L aora_oji/2015/un_presidente_pasada_de_txad_va_es_prosededa
====== Un presidente pasada de Txad va es prosededa ======
14 febrero 2015
Un corte en Senegal ia comanda Hissène Habré, la presidente pasada de Txad, a es prosededa sur alegas de crimines de gera, tortura, e crimines contra umania.
Judores a la Camera African Estracomun ia dise ce on ave atestas sufisinte contra Habré, ci es en prison en Senegal.
La corte ia es fundida par Senegal e la Uni African per atenta prosede Habré pos sua aresta en 2013.
Sua prosede va es la usa prima de autoria universal en Africa.
Habré, ci ave aora 72 anios, es acusada de miles de matas political en sua presidentia de 1982 a 1990, cual ia fini cuando la presidente presente, Idriss Déby, ia despone el.
El nega la alegas e refusa reconose la legalia de la corte.
En 2008, en sua asentia, Txad ia condena el a mori per sua gida de un rebela armada en la pais, plu temprana en acel anio.
On previde ce la prosede va comensa en maio o junio. Lo va es manejada par un comite de tre persones: du judores senegales e un judor xef stranjer de un otra stato membro de la Uni African.
Jacqueline Moudeina, avocato xef per la vitimes alegada en la caso, ia comenta; "Pos tan multe anios, la vitimes de Habré es aora a punto de vide justia per lo cual los ia sufri."
Clément Abaifouta, un prisonida political en la rena de Habré, ia dise: "Nos va pote final fronti nosa tormentor xef e regania nosa dinia como umanas."
Descriveda como "la Pinochet de Africa", Habré ia es prima acusada en Senegal en 2000, ma la cortes de la pais ia judi alora ce on no pote prosede el ala.
En 2005, Beljia ia acusa el sur crimines contra umania e tortura, ma Senegal ia refusa cuatro demandas de estradi el.
@T Un prinse saudi va dona tota sua mone a carita
@L aora_oji/2015/un_prinse_saudi_va_dona_tota_sua_mone_a_carita
====== Un prinse saudi va dona tota sua mone a carita ======
2 julio 2015
Prinse al-Walid bin Talal, un bilionor saudi, ia dise ce el intende dona sua ricia intera de $32 mil milion a un asosia carital.
La sobrino de Re Salman ave 60 anios e es un de la persones la plu rica de mundo.
El ia descrive se como inspirada par la Funda Gates, instituida par Bill e Melinda Gates en 1997.
El vole ce on usa la mone per "construi pontes per boni la comprende intercultural, developa comunias, dona potia a femes, capasi jovenes, furni aida esensal pos desastres, e crea un mundo plu tolerante e asetante".
Bill Gates ia loda la deside, descrivente lo como "un inspira a tota de nos ci labora en filantropia sirca la mundo".
Prinse Walid es la numero 34 en lista de la plu ricas en la jornal Forbes. La mone va vade a sua propre organiza carital, Filantropias al-Walid, a cual el ia dona ja $3,5 mil milion.
La prinse, ci no ave un posto ofisial de governa, es la presidente de un compania de investi, Kingdom Holding, cual posese asiones en companias major, incluinte Fairmont (un compania de oteles lusosa) e Apple.
La prinse va dona sua ricia personal. El ia dise: "Esta es multe separada de mea asiones en Kingdom Holding."
En sua anunsia, el ia ajunta: "Filantropia es un encarga personal cual me ia embarca a plu ca tre desenios ante aora, e un parte fundal de mea crede muslim."
Sua declara aveni en ramadan, la mense santa, cuando muslimes es corajida a carita e a aida persones povre.
La dona va es fada tra un cuantia de anios, e va es supravideda par un comite de fidusiores cual Walid va dirije.
@T Un projeta de proteje selacos en Cuba
@L aora_oji/2015/un_projeta_de_proteje_selacos_en_cuba
====== Un projeta de proteje selacos en Cuba ======
22 otobre 2015
La governa cuban ia inisia un projeta permanente per proteje la selacos sirca sua costas.
La projeta, formulada con un grupo ambientiste de la SUA, va obliga pexores a rejistra e limita caturas de selacos, e va crea ance areas nova de pexa protejeda.
On crede ce cuasi 20% de la 500 spesies de selaco de mundo nada en acuas cuban.
La cuantia de selacos ia declina rapida par causa de tro multe pexa, un demanda per pinas de selaco, e caturas nonintendeda.
Cuba proibi ja recolie selacos sola per sua selacos.
La projeta ia es anunsiada pos du anios de labora con la Reserva de Defende Ambientiste en la SUA.
La dirijor de sua program en Cuba ia dise ce la cuantia de selacos en Cuba es sustada par resifes de coral relativa sana. "On regarda Cuba como la joala de corona de la Caribe, xef par causa de sua ecosistemes stonante de resife de coral, sua rizoforas, sua erbas de mar."
La grupo dise ce la proteje de selacos pote es ance un bon comersia, car ecoturisme crese, e la recursos maral de un pais es un poseseda importante.
Cuba prepara aora un projeta rejional per conserva de selacos.
@T Un proposa per stabili Libia
@L aora_oji/2015/un_proposa_per_stabili_libia
====== Un proposa per stabili Libia ======
9 junio 2015
La Nasiones Unida ia presenta un proposa ru per un governa unida libi a la partitos bataliante, en un atenta de stabili la pais.
La projeta ia es desvelida entre discutes en Magrib ier, e lo sujesta un manera de ateni un sesaspara e la desarma de grupos armada.
Pos la suverti de Muammar Gaddafi en 2011, Libia ia desende a caos, con grupos jihadiste combatente per controla esta nasion rica de petrolio. Gerores de Stato Islamiste ia ocupa resente la sites Darnah e Surt.
Bernardino Léon, la diplomata spesial de la NU per Libia, ia recomenda forte ce la libis suporta la proposa.
A la discutores en Skhirat, el ia dise: "Oji, la popla de Libia regarda esta asembla, vos, esperante, ce vos va salva vosa pais e vosa popla de un gera longida. Me es plen de espera ce esta proposa ru representa un modo justa e asetable de progresa."
La documento proposa un governa nasional unida per un anio, e dise ce la parlamento elejeda en 2014 es la sola organiza capas de fa leges.
Presente, la parlamento internasional reconoseda es situada en Tubruq, un porto este. Sua oposante, la Congresa Nasional Jeneral, dominada par estremistes islamiste, es a cuasi 1000 cilometres a ueste en la capital, Tarabulus/Tripoli.
On previde ce representores de ambos grupos, ci ia fa no comenta publica sur la proposa asta aora, va reasembla per plu negosias en la semana veninte.
@T Un prosegue de unia en Paris
@L aora_oji/2015/un_prosegue_de_unia_en_paris
====== Un prosegue de unia en Paris ======
11 janero 2015
Gidores internasional asembla en Paris per un prosegue grande, per mostra sua unia pos tre dias de terorisme en la capital franses cual ia mata 17 persones.
On previde ce 40 gidores va es presente a la asembla, cual va es plu grande ca los de ier en cual 700 000 persones ia apare sur la stradas.
Sirca 2000 polisiores e 1350 soldatos va proteje la prosegue. Lo es probable ce plu ca milion persones va partisipa.
La polisia xerca aidores de la fusilores ci ia ataca un revista satira e un supramercato.
A la matina de oji, Bernard Cazeneuve, la ministro franses de internas, va ospita un consenta de otra ministros de internas de tra Europa. Los va discute la menasa presentada par ativistes violente.
Cazeneuve ia promete "medios spesial" per la prosegue oji, incluinte la posa de xutores sur tetos. La prosegue va comensa en la Plaza de la Republica a 15:00 de ora local.
La presidente François Hollande va parla ance con gidores de la comunia iudi. Acel comunia es ancora xocada pos cuando un fusilor ia mata cuatro persones a un supramercato caxer en Paris este a venerdi.
On crede ce la fusilor, Amedy Coulibaly, ia mata ance un polisior fema a la dia presedente.
El, e la frates Kouachi, ci ia mata 12 persones en sua ataca contra la revista Charlie Hebdo a mercurdi, ia es matada par la polisia a fini de du asejas separada.
La polisia xerca ancora aidores de la tre, incluinte Hayat Boumeddiene, la acompanior de Coulibaly. Ofisiores en Turcia crede ce cisa Boumeddiene ia viaja tra acel pais en via a Suria, plu temprana en la semana pasada.
Entretempo, la polisia en Deutxland ia reporta un ensende criminal a la ofisias de un jornal cual ia reprimi la cartunes par Charlie Hebdo de la Profeta Muhammad. Nun ia es ferida en esta ataca contra Hamburger Morgenpost.
La frate de Ahmed Merabet, un de la polisiores matada a mercurdi, ia dise ce Merabet ia es "muslim, e multe orgulosa de es un polisior defendente la valuas de la Republica".
Ance la familia de Coulibaly ia condena la atacas, ofrente compatia a la familias de la vitimes, e comentante: "Nos asoluta no comparti esta ideas estrema. No espera ce no confusa va aveni entre esta atas odiable e la relijio muslim."
@T Un redui de migrores intruinte a Eurotunel
@L aora_oji/2015/un_redui_de_migrores_intruinte_a_eurotunel
====== Un redui de migrores intruinte a Eurotunel ======
16 agosto 2015
La cuantia de migrores ci atenta entra a la termina de Eurotunel, prosima a Calais en Frans, ia redui a sirca 150 per note. Esta es un cade grande de un apico de 2000 persones per note a la fini de la mense pasada.
La compania de tren Eurotunel ia dise ce medios de securia, resente ajuntada, fa "un efeto real", ma ce la cuantia de intruis atentada resta "nonasetable".
A cada note, migrores en Calais atenta traversa la Manga a la Rena Unida, causante pospones a alga trenes de la tunel.
La governa de la Rena Unida dise ce lo spende 7 milion paundes (11 milion dolares) per boni la securia a la tunel, ma confesa ce on debe labora ancora plu sur la problem.
On ia erije sercas nova, per cual la Rena Unida ia paia, con intende de impedi la via de migrores a la plataformas e trenes.
Un cuantia plu grande de polisiores preveni ance alga migrores de prosimi a la termina, tal ce min disturbas aveni a trenes de pasajor e carga.
La compania Eurotunel ia descrive la diminui en la cuantia de intruis como "un boni enorme", ajuntante ce la plu de los ci susede asede la stasion es caturada par gardores. An tal, lo crede ce alga migrores susede ancora ariva a Britan.
La medios acordada a ante entre la autoriosas brites e franses inclui: la ajunta de plu gardores privata, finansiada par la Rena Unida, a la ecipo esistente de 200 persones; plu polisiores franses a la frontera tra la estate; plu sercas sirca la tunel, con plu altia e plu stratos de materia cuando nesesada, e con un parador grande de metal per proteje la plataformas; e plu cameras, detetadores infraroja, e lampas inondante a la perimetre.
David Cameron, la ministro xef brites, ia defende ier sua maneja de la crise, insistente ce sua governa atenta serti ce migrores nonlegal no pote "entra par forsa a Britan".
El ia dise: "Nos debe rompe la lia entre embarca un barco en la Mediteraneo e reseta la direto de abita en Europa."
Ofisiores estima ce cisa 250 000 persones ia traversa ja a Europa par barco en esta anio. Plu ca 40 migrores ia mori resente en un barco suprafolida en la Mar Mediteraneo.
@T Un redui de profondia de barcones a la Canal de Panama
@L aora_oji/2015/un_redui_de_profondia_de_barcones_a_la_canal_de_panama
====== Un redui de profondia de barcones a la Canal de Panama ======
8 agosto 2015
La Autoriosa de la Canal de Panama dise ce lo va redui tempora la grandia masima de barcones cual lo permete traversa la canal. Esta es la resulta de la secia causada par la fenomeno climal El Niño.
De 8 setembre, la profondia masima de barcones va es reduida a 11,89 metres, cisa afetante 20% de la trafica. Un restrinje simil ia es usada en 1998 per la mesma razona.
La autoriosa dise ce lo va redui plu la profondia masima a 16 setembre si la situa no boni.
On ia fa esta deside car la nivel de acua en la lagos Gatún e Alhajuela ia diminui como resulta de El Niño.
A presente, la limita masima es 12,04 metres. A 16 setembre, lo va es cisa reduida asta 11,73 metres.
Companias de barconi ia reseta ja avertis ce esta reduis prosimi.
La Canal de Panama ia selebra sua aniversario 100 en la anio pasada, pos esperia la traversa de plu ca milion barcones.
Panama ia prende la encarga de la canal de la SUA en 2000, e on ia loda jeneral la modo en cual lo ia maneja la funsiona. La paias per usa la canal trae aora sirca bilion dolares per anio a la governa panaman.
@T Un referendo en Er favore forte la sposi ge
@L aora_oji/2015/un_referendo_en_er_favore_forte_la_sposi_ge
====== Un referendo en Er favore forte la sposi ge ======
24 maio 2015
Un de la eglesores catolica major de Er ia recomenda un "regarda a realia" per la Eglesa pos un referendo cual ia favore forte la sposi ge en la pais.
La referendo ia trova ce 62% de la popla favore cambia la constitui per permete la sposi de duples ge e lesbian. La sposis prima va aveni probable en la temprana de la autono.
Diarmuid Martin, la arcibispo de Dublin, ia dise ce la Eglesa en Er nesesa rejunta se a persones joven.
El ia comenta: "Nos [la Eglesa] debe pausa e fa un regarda a realia, no entra a un nega de realias. Nos no va recomensa con un senti de renovi si nos ave un senti de nega. Me reconose como omes e femes ge e lesbian senti a esta dia. Ce los senti tal es un cosa cual rici sua modo de vive. Me pensa ce lo es un revolui sosial."
El mesma ia vota "no", razonante ce on debe respeta diretos ge "sin cambia la defini de sposi".
El ia ajunta: "La plu de esta persones joven ci ia vota «si» es produidas de 12 anios de nos sistem de scolas catolica. Me dise ce un defia grande esiste en vide como nos ta espresa la mesaje de la Eglesa."
Er es la pais prima de mundo cual legali la sposi ge par un vota de popla, e lo ia fa sua referendo a 22 anios pos la descriminali de atas omosesal en la pais.
En soma, 1 201 607 persones ia vota per favore sposis ge, e 734 300 ia vota per oposa.
De 43 sejas parlamental, sola un -- xef campanial en la media de la isola -- ia trova ce un majoria (51%) de votores ia dise "no".
Er ave un constitui scriveda cual pote es cambiada sola par referendo.
La governa va introdui un projeta legal per reali la vole de la popla, e dise ce lo espera ce esta va deveni un lege ante la fini de la parlamento eres en la estate. Per esta razona, lo no es probable ce la sposis prima va aveni ante setembre.
La sposi omosesal es aora legal en 20 paises de mundo.
@T Un salva finansial nova per Elas
@L aora_oji/2015/un_salva_finansial_nova_per_elas
====== Un salva finansial nova per Elas ======
15 agosto 2015
Ministros finansial de la Eurozona ia acorda un scema nova de salva Elas, pos reseta la suporta de Atina.
Jean-Claude Juncker, la presidente de la Comision European, ia dise ce la acorda envia un mesaje "forte e clar" ce Elas va resta en la Eurozona.
La acorda esije aumentas de impostas e plu reduis sever de spende, intercambiada per la salva finansial tre de Elas en sinco anios.
Como resulta, prestas nova de asta €86 mil milion ($95 mil milion) va es disponable en la tre anios veninte.
La parte prima va es €26 mil milion per recapitali la bancos e €16 mil milion en un serie de paias partal, de cual la prima (€13 mil milion) va es fada ante 20 agosto, cuando Elas debe repaia sirca €3,2 mil milion a la Banco Sentral European.
La acorda ave un custa grande political per Alexis Tsipras, la ministro xef, ci ia fronti un rebela en Syriza, sua partito sinistriste.
Plu ca 40 parlamentores de Syriza ia vota contra el ier cuando la parlamento ia deside sur la acorda, pos discutes durante tra la note intera. Reportas sujesta ce Tsipras va xerca un vota de fida en parlamento en la semana veninte, tal prosiminte la posible de un eleje subita.
Euclides Tsakalotos, la ministro finansial de Elas, ia dise ce la acorda "avansa Elas tal ce on previde ce la sistem finansial va es multe plu stable de aora. On ave un promete de recapitali la bancos, sin ce cualce deponor debe contribui a la salva o deveni ansiosa."
Un serie de votas en parlamentos nasional tra Europa va debe aora suporta la acorda.
@T Un scola svensce sufri un ataca raziste
@L aora_oji/2015/un_scola_svensce_sufri_un_ataca_raziste
====== Un scola svensce sufri un ataca raziste ======
23 otobre 2015
La polisia crede ce un om mascida ci ia mata ier un ensenior e un aprendor a un scola en Sveria ia ave "motivas raziste".
Niclas Hallgren, la xef de polisia, ia dise ce los ia fundi esta conclui sur lo cual los ia descovre a la aparte de la mator e "se condui en la ata".
Reportas jornaliste sujesta ce la atacor, de 21 anios, ia ave tendes estrema destriste.
Armada con un spada e portante un elmo e masca, el ia ataca un scola en Trollhättan, prosima a Göteborg, ante deveni matada par fusil de polisia.
El ia es fotografida con un grupo de studiantes, ci ia suposa ce el es vestida per selebra la Vijila de Tota Santas. A pos, el ia visita salas de clase diversa a la scola Kronan.
Un ensenior e xico de 17 anios ia mori de feris de cotel. Un otra studiante mas, de 15 anios, e un ensenior de 41 anios resta en state grave en ospital.
La polisia ancora no ia publici la nom de la atacor, an si los dise ce el ia es un abitor de Trollhättan.
Sveria ia reata con xoca a la matas. Ante visita la sena de la ataca, la ministro xef, Stefan Löfven, ia dise ce lo es "un dia negra" per la pais. "La scola debe es la loca per aprende, jua e curiosia e amia, e donce esta es un trajedia cual afeta la pais intera."
La re Carl Gustaf ia dise ce el es "en xoca" e ce el ia oia sur la avenis en Trollhättan "con angusa e tristia grande".
A la sera de ier, deses de persones ia asembla estra la scola per paia sua respetas a la vitimes e per pone flores e candelas sur la tera.
Alga abitores de la vila ia teni cartones con la demanda "perce on mata?"
Seguente reportas svensce, la contas de la suspetada en Facebook e YouTube sujesta ce el ia es interesada sur Hitler e Deutxland Nazi, e ia es ance oposada a Islam e migras. La polisia ia comenta ce los no ia conose el a ante.
Un costudiante pasada ia dise: "El ia es un person solitar. El ia usa juas de video, ia vive en sua propre mundo."
La scola Kronan ave sirca 400 studiantes con entre ses e des-sinco anios, incluinte multe enfantes de migrores. Trollhättan es un vila industrial en Sveria ueste, situada a sirca 75 cilometres a norde de Göteborg, la site du de la plu grandes en la nasion.
Atacas a scolas es rara en Sveria. Sola un tal ia aveni en la 20 anios pasada. En acel, un aprendor ia mori pos es fusilida.
@T Un sculta saisida par la nazis reveni a Warszawa
@L aora_oji/2015/un_sculta_saisida_par_la_nazis_reveni_a_warszawa
====== Un sculta saisida par la nazis reveni a Warszawa ======
20 desembre 2015
Pos 75 anios, on ia redona a Polsca un busto de marmo de Diana, un diva roman, cual ia es furada par la nazis.
La sculta de la sentenio 18 ia es saisida en 1940, ma on no ia sabe sua loca asta cuando lo ia apare en un subasteria en Wien, Osteraic en la parte plu temprana de esta anio.
La colior privata ci ia presenta la busto per subasta ia permete aora ce lo revade permanente a Warszawa. El ia dise ce sua avo ia compra lo en en 1946, cuando el ia viaja en la ruinas de la capital polsce pos la fini de la gera.
La governa de Polsca estima ce aprosima 63 mil obras artal manca ancora pos la Gera Mundal Du.
Sete otra pesos ia es redonada en esta anio, seguente Piotr Gliński, la ministro cultural. Ma el ia ajunta ce la discutes es difisil con Sveria per retrae ojetos saisida cuando acel pais ia invade Polsca en la sentenio 17.
La re polsce final, Stanisław August Poniatowski, ia compra la sculta de Diana, fada par Jean-Antoine Houdon, un franses, en la parte tarda de la sentenio 18.
On ia previde ce la subasta va vende lo per cuasi 250 mil euros (270 mil dolares), e sua reveni ia es la tema de menses de negosias.
"Lo es merveliosa ce el es denova con nos," Gliński ia dise, descrivente la sculta de la diva como "un obra mestral".
La busto va es casida a la Palasio Łazienki en Warszawa, do la re final la abita.
@T Un setica sur morbilio debe paia sento mil dolares
@L aora_oji/2015/un_setica_sur_morbilio_debe_paia_sento_mil_dolares
====== Un setica sur morbilio debe paia sento mil dolares ======
13 marto 2015
Un corte ia comanda un paia par un biolojiste deutx ci ia ofre plu ca sento mil dolares a cualcun ci ta demostra ce morbilio es un virus.
Stefan Lanka, ci crede ce la maladia es psicosomatica, ia fa la promete a sua loca de rede a cuatro anios ante aora.
A pos, la premio ia es reclamada par David Barden, un dotor deutx, ci ia colie atestas de studias medical diversa. Lanka ia rejeta la atestas.
Ma la corte en la vila Ravensburg ia judi ce la demostra sufisi.
Reatante a la deside, Lanka ia dise ce el va apela. "Lo es un maladia psicosomatica," el ia dise. "On deveni malada pos separas traumal."
Un aveni resente de morbilio en Deutxland ia provoca un debate sur esce on debe obliga vasinis contra la maladia.
Un xico de 18 menses ia mori en Berlin en febrero par causa de morbilio.
La Organiza Mundal de Sania ia descrive se como "surprendeda" par la 22 mil avenis reportada tra Europa de pos 2014, e ia recomenda un aumenta de vasinis.
Morbilio es un maladia estrema comunicable, distinguida par un febre sever, un irita de la pel, e un senti jeneral de nonsania. La casos la plu grave pote mata.
@T Un siclon lenta bate sever la Pilipinas
@L aora_oji/2015/un_siclon_lenta_bate_sever_la_pilipinas
====== Un siclon lenta bate sever la Pilipinas ======
18 otobre 2015
Construidas es platida, linias eletrical cade, e miles de persones ia fuji de sua casas en cuando Siclon Koppu puxa se tra la norde de la Pilipinas.
La tempesta crea ance ondones con altia de cuatro metres a la costa.
La siclon enorme e lenta movente ia ariva a la tera prosima a la vila Casiguran sur la isola Luzon a la temprana de esta matina.
On previde ce lo va trae tre dias de pluve deluvial, causante inondas sever e cisa liscas de tera.
Des mil persones ia es deslocada en la norde-este de Luzon, ma asta aora on ia reporta no moris.
La sentro de la tempesta move a ueste con rapidia de sola 3 cilometres per ora, par causa de un cresta de presa alta entre lo e un otra siclon cual es ance presente en la Pasifica ueste.
On ia cansela aviones e navetas de mar en la norde, e on ia suspende la servi de bus en montanias do on teme ce la tera va lisca.
A venerdi, la presidente Benigno Aquino ia dona un averti televisada, a la ves prima pos Siclon Haiyan en 2013, cual ia mata plu ca 6300 persones.
La sistemes de averti la popla ia boni multe pos acel siclon, donce lo es multe plu probable ce persones va es secur a esta ves.
Siclon Koppu, ance nomida Lando, ave un largia de asta 650 cilometres, e produi ventas de asta 250 cilometres per ora. Car lo move lenta, lo pote trae un pluve intensa tra un tempo longa.
Persones en la areas la plu sever colpada nesesa es capas de susta se tra asta 72 oras, car en acel periodo la usa de transporta va es estrema difisil.
@T Un siclon prosimi a Iaman
@L aora_oji/2015/un_siclon_prosimi_a_iaman
====== Un siclon prosimi a Iaman ======
3 novembre 2015
Un siclon tropical rara prosimi a Iaman, traente ventas forte, pluve deluvial, e ondas potiosa.
Fotos e videos enlinia mostra acua versante longo la stradas de Mukalla, un site a la costa sude. La site es controlada par al-Qaida, e on reporta ce lo no es bon preparada per un tal desastre.
Plu temprana, la silcon Chapala ia colpa Socotra, un isola iamani distante, matante a la min un person. Multe abitores ala ia refuja se en scolas e cavas.
On crede ce Chapala es la tempesta la plu potiosa cual Iaman ia esperia en alga desenios.
La Organiza Meteorolojial Mundal de la Nasiones Unida ia descrive la siclon como "estrema sever", e ia dise ce la state de la mar sirca la sentro de la tempesta es "spetaculin".
A lundi, a 12:00 de ora global, la Sentro Juntada de Averti sur Siclones (un parte de la marina de la SUA) ia reporta ce Chapala jenera soflones de asta 240 cilometres per ora, corespondente a un siclon de categoria 4.
On predise ce la tempesta va ateni la tera a ueste de Mukalla entre 00:00 e 12:00 de ora global oji, e on previde soflones de asta 140 cilometres per ora.
La Sentro Juntada ia dise ce Chapala va comensa debili cuando aira seca emerjinte de Arabia erode la sistem de tempesta, e ce lo va diminui rapida pos ariva a la tera, xef par causa de interata con la tereno ru e seca de Iaman.
An tal, la siclon pote deluvia partes de la pais con asta 500 milimetres de pluve en du dias -- la desuple de la promedia nasional.
Socotra es situada a 368 cilometres a sude de la costa iamani, en la Mar de Arabia, a este de Somalia.
Sirca 50 mil persones abita sur lo, parlante sua propre lingua, e sentos de spesies esotica de planta esiste ala cual on trova en no otra loca sur tera, incluinte arbores de sangue de dragon.
La maior de la vila Hadibu sur la isola ia dise ce Chapala ia dana plu ca 80 casas, e ia lasa sentos de persones nesesante trata en ospital. On ia sorti plu ca mil familias, relocalinte los en scolas e campas a interna de la isola ante la colpa de la tempesta.
Entretempo, abitores de Mukalla -- cual es controlada par un comite tribal e par jihadistes de al-Qaida de pos april -- ia espresa ansia sur preparas local per la ariva de la tempesta.
Un abitor ia comenta: "La nivel de acua maral ia alti par nove metres e ia destrui la fronte de mar. Multe persones ia parti de sua casas e xerca refuja en scolas. No la comite tribal no al-Qaida emprende laboras de aida, e la situa es vera mal."
@T Un siclon ruina la isolas de Vanuatu
@L aora_oji/2015/un_siclon_ruina_la_isolas_de_vanuatu
====== Un siclon ruina la isolas de Vanuatu ======
14 marto 2015
Siclon Pam ia bate la arcipelago Vanuatu en la sude de la Mar Pasifica, causante destruis estrema.
Lo ia mata deses de persones, e es cisa entre la desastres la plu sever en la istoria de la Pasifica.
La siclon ia porta ventas de asta 270 cilometres per ora e deluvias de pluve.
La stradas en la capital, Port Vila, es aora covreda con un marania de tetos, arbores desradisida, e linias eletrical cual ia cade.
On reporta ce, en areas distante, viletas intera ia es destruida.
Un portavose de Unicef ia descrive la siclon como "30 minutos de teror asoluta" cuando lo ia traversa la capital. "Me ia vide cuando la venta ia sutrae la portes liscable de mea sala en mea otel de tre niveles. Lo ia es asustante."
Ban Ki-moon, la secretor jeneral de la Nasiones Unida, ia dise ce el teme ce la dana e destrui pote es vasta. "Nos espera ce la perde de vive es minima," el ia ajunta en un confere mundal en Japan sur risca e redui de desastres.
Seguente reportas nonconfirmada, 44 persones ia mori en la provinse Penama en la norde-este de Vanuatu.
La ministro de esternas australian ia dise ce la pais prepara envia un ecipo de crise a Vanuatu, si nesesada. "On ave ventas destruinte, pluves, inondas, liscas de tera, ondones, e mares multe turbada, e la tempesta es forte destruosa ala. Nos evalua ancora la situa, ma nos sta preparada per aida."
Tota ses provinses de Vanuatu ia es a vijila masima, tal ce on ia consela ce cadun xerca refuja sin pausa. Miles de persones ia pasa la note en refujas de crise, ma multe plu ia es obligada a esperia la tempesta en sua propre casas.
Situada a sirca un cuatri de la distantia de Australia a Hauaii, Vanuatu ave un popla de 267 mil persones sur 65 isolas. Sirca 47 mil abita en la capital.
Esta siclon tropical ia causa ja danas major sur otra isolas de la Pasifica, incluinte Ciribati e la Isolas Solomon.
Tuvalu, un grupo de nove isolas pico a norde-este de Vanuatu, ia declara ance un state de crise pos un aveni de inondas subita causada par la siclon.
@T Un siclon sever colpa Mexico
@L aora_oji/2015/un_siclon_sever_colpa_mexico
====== Un siclon sever colpa Mexico ======
24 otobre 2015
Partes de Mexico risca liscas de tera e inondas major pos la ariva de Siclon Patricia, la tempesta la plu forte rejistrada en la Americas.
La tempesta ia ateni la tera en Mexico ueste, traente ventas e pluves destruosa, ma lo pare ce on ia evita danas sever.
La statos Nayarit, Jalisco, Colima, Michoacan, e Guerrero es en peril spesial en cuando la tempesta move de la costa. Sirca 400 mil persones abita la areas perilida.
La polisia federal de Mexico ia dise ce en Colima on ia reporta sola "liscas minor e arbores cadeda". Ma la governa ia averti ce sene de la volcan de Colima, cual ia deveni sempre plu ativa en esta anio, pote combina con pluve intensa per causa flues vasta de fango.
La siclon ia ateni la costa con ventas de 265 cilometres per ora. A ante, la ventas ia es sufisinte forte per "enaira un avion e manteni lo en vola", diseda par un portavose de la Organiza Meteorolojial Mundal.
Videos filmada en la site de porto Manzanillo, corta ante la ariva de la siclon, mostra arbores curvinte en venta sever.
Abitores ia reserva comedas e otra furnis, e botecores ia planci fenetras.
Jalisco conteni la vila vacanserial Puerto Vallarta, cual ia pare evade la plu mal de la tempesta. Patrulias de polisia ia recomenda ce persones retira se de la costa per vade a areas plu secur, distante par a la min tre blocos. Parladores ia comanda persones en oteles a sorti.
On ia clui la airoporto de la vila, e ance du otras en la curso de la tempesta.
@T Un sonda spasial va fa un foto de Pluto
@L aora_oji/2015/un_sonda_spasial_va_fa_un_foto_de_pluto
====== Un sonda spasial va fa un foto de Pluto ======
25 janero 2015
Un sonda de NASA -- nomida Orizones Nova -- va comensa fotografi Pluto, pos viaja tra 5 mil milion cilometres e nove anios per prosimi a la planeta nana.
On presenta esta mision a Pluto como la ultima de la encontras grande en esplora la planetas. Lo es serta un de la oportunes prima per studia un planeta nana de prosima.
La imajes es importante car los va permete ce la sonda posa coreta se per un visita plu prosima en la plu tarda de esta anio.
Ma la sonda es ancora a distantia de 200 milion cilometres. Pluto va es apena distinguable en la imajes -- no plu ca un punto de lus entre la stelas.
Cuando Orizones Nova ariva en julio, lo va es movente a cuasi 14 cilometres per secondo, tan rapida ce lo no va es capas de entra a un orbita sirca la mundo. En loca, lo va continua a ante.
Un fator complicante es ce la sete strumentos siensal en la veculo debe opera a distantias diversa per oteni sua mesuras, e donce la ecipo ia prepara un program estrema detaliosa per oserva tota de los.
On previde ce la punto la plu prosima a Pluto va es atenida sirca mediadia (de ora universal) a 14 julio. La sonda va pasa supra la surfas a distantia de sirca 13 695 cilometres.
La projetores de la mision vole ce on predise la tempo de tota mesuras con esatia de 100 secondos. La sonda va sabe alora do e cuando lo debe punta sua strumentos.
Per los ci ia crese con la crede ce on ave nove planetas, esta es la anio de completi la colie. Sondas robotin ia visita ja tota la otras, an Urano e Netuno.
En 2006, siensistes ia retrosede ofisial Pluto, cual ave 2300 cilometres de largia e es covreda con jelo, a la categoria de "planeta nana".
La nanas es la clase de ojetos planetin la plu comun en la Sistem Solal, e esta sonda es un de la oportunes prima de regarda prosima un tal.
On no sabe cual cosas la imajes va revela. Cisa on va trova plu lunas de Pluto -- on conose ja sinco -- o cisa an anelos como los videda sirca alga de la planetas plu grande.
Pos visita Pluto, la sonda va continua en dirije a un ojeto an plu distante en la Sintur de Kuiper, la area ultra la planetas. Siensistes crede ce acel zona conteni multe miles de ojetos simil a Pluto, de cual alga ave cisa la grandia de Marte o an de la Tera.
@T Un supraluna coaveni con un eclis lunal
@L aora_oji/2015/un_supraluna_coaveni_con_un_eclis_lunal
====== Un supraluna coaveni con un eclis lunal ======
28 setembre 2015
Tra la mundo, on ia regarda la sielo per oserva un aveni astronomial rara, cuando un eclis lunal ia coaveni con un "supraluna" -- cuando la Luna pare plu grande car lo es la plu prosima a la Tera en sua orbita.
La eclis ia dona un aspeta roja a la Luna. Lo ia es vidable en America Sude, America Norde, e la ueste de Africa e Europa.
On ia oserva la plu resente esta fenomeno en 1982, e lo no va reaveni asta 2033.
En un eclis lunal completa, la Tera, la Sol, e la Luna es cuasi esata aliniada, e la Luna es situada a la otra lado de la Tera ca la Sol. En esta posa, on vide un luna plen.
Cuando la Luna entra a la ombra de nosa planeta, lo deveni multe oscur ma resta usual vidable, luminada par lus de sol cual pasa tra la atmosfera de la Tera.
En cuando esta lus viaja tra la gas ensircante nosa planeta, la partes entre verde e violeta deveni plu filtrida ca la parte roja, e la resulta es ce la lus cual ateni la surfas lunal pare xef roja.
Oservores sur la Tera pote vide un luna con color de brice, osidi, o sangue, dependente de la state de la atmosfera. A veses, la luna pare mera oscur gris.
Un supraluna aveni cuando un luna plen o oscur prosimi a sua perijeo -- sua distantia minima de la Tera.
La Luna segue un orbita elise sirca nosa planeta. Tal, sua distantia promedia varia entre 405 mil cilometres e 363 mil cilometres.
La coaveni entre la du fenomenos causa ce la Luna aspeta plu grande par 7--8%.
Ma la conseta "supraluna" no ave un defini esata en astronomia: lo no relata clar a un momento spesifada en tempo. Donce on pote disputa la raria de sua coaveni con otra fenomenos.
La eclis ia comensa a 00:11 de ora universal, cuando la Luna ia entra a la penombra -- la parte inisial de la ombra de la Tera -- e ia deveni jala. A esata du oras plu tarda, lo ia entra completa a la ombra interna.
La momento de eclis la plu profonda ia aveni a 02:47, cuando la Luna ia es la plu prosima a la sentro de la ombra. A 05:22, la eclis ia fini.
@T Un tempesta de arena en la AAU
@L aora_oji/2015/un_tempesta_de_arena_en_la_aau
====== Un tempesta de arena en la AAU ======
3 april 2015
Un tempesta grande de arena ia colpa la Amirias Arabi Unida, ascondente la orizon famosa de Dubai.
Ventas forte ia enaira la arenas de deserto, sever reduinte la capasia de vide a mera 500 metres, e causante problemes de respira a alga persones.
Per evita la tempesta, aviones ia debe diverje de la Airoporto Internasional de Dubai, lasante multe pasajores encaliada.
An si tempestas de arena no es nonusual en la area, la estremia de esta clima ia xoca alga abitores.
La polisia en Abu Dhabi dise ce la tempesta ia causa un asidente major de trafica. Un person de 24 anios ia es portada a ospital par avion pos deveni grave ferida en la asidente.
Meteorolojistes predise ce la tempesta pote dura tra alga dias.
@T Un tempesta de neva clui New York
@L aora_oji/2015/un_tempesta_de_neva_clui_new_york
====== Un tempesta de neva clui New York ======
27 janero 2015
La Site New York e otra areas en la norde-este de la SUA ia desativi, car meteorolojistes averti abitores contra la previde de un cuantia estrema de neva.
On dise ce Tempesta Juno pote pone asta 76 sentimetres de neva sur alga partes de New Jersey, Maine, e New Hampshire.
Tota veculos, estra los de crise, es aora proibida en la Site New York, e on ia suspende la servi de metro.
Cisa 60 milion persones va es afetada.
On ia declara un crise en multe statos, e la site Boston e Massachusetts ia suspende sua transporta publica e ia proibi viajas par auto.
Ma alga meteorolojistes en Pennsylvania e New Jersey ia redui sua predises, disente ce min neva ia cade ca on ia previde orijinal.
En New York, la teatros de Broadway ia es sin lus, e la bolevares de neon ia es sin person. La site cual dormi nunca ia pare dormi.
@T Un trematera colpa Afganistan e Pacistan
@L aora_oji/2015/un_trematera_colpa_afganistan_e_pacistan
====== Un trematera colpa Afganistan e Pacistan ======
27 otobre 2015
On aumenta laboras per aida la persones afetada par un trematera ier, de grandia 7,5, cual ia colpa areas distante de Afganistan e Pacistan.
On sabe ce a la min 275 persones ia mori, e asta du mil ia es ferida.
Salvores ia vade a areas montaniosa distante do la efetos de la trema es ancora nonclar. La foca de la trema ia es profonda, reduinte sua efeto.
La vitimes ia inclui 12 xicas afgani ci ia es matada en un panica en cuando los ia atenta sorti de sua clases de scola.
Multe persones tra la area, temente un trema nova, ia pasa la note en dormi su sielo en temperatur cuasi de jelo.
En un parla televisada, Ashraf Ghani, la presidente de Afganistan, ia recomenda ce abitores en la areas afetada aida en la laboras de salva.
Un ofisior de Badakhshan, un provinse norde-este, ia dise ce salvores no va pote ateni areas montaniosa afetada asta la tarda de oji. Ance, partes de la provinse es saisida par combatores taliban.
La plu de la moris reportada asta aora es en Pacistan norde e la areas tribal norde-ueste. En sola la provinse Khyber Pakhtunkhwa, autoriosas ia informa ce a la min 179 persones ia mori e plu ca 1800 ia es ferida.
La Cresente Roja de Pacistan ia tuita ce sua ecipo de responde a desastres es enviada a la areas afetada.
La ministro pacistani de informa ia dise ce la salva de vives es la taxe la plu importante, e ce la labora de salva va continua "sirca la orolojo".
Baata, Iran, e fortias SUA en Afganistan ia ofre sua aida, ma asta aora la autoriosas local no ia solisita tal aidas.
La trematera ia es sentrida en la area montaniosa Hindu Cux, a 76 cilometres a sude de Faizabad, en la provinse Badakhshan.
Lo ia es profonda -- a plu ca 200 cilometres su la surfas -- tal ce la trema a la surfas ia es min ca per un trematera plu alta.
Un serie de otra tremas, de cual on ia mesura tota como 4,0 o plu -- ia colpa a ueste de la orijinal en la oras seguente.
Abitores de Kabul e Delhi ia es xocada par la trema, cual ia causa ce persones asustada freta a la stradas.
Construidas en Dushanbe, la capital tadjic, ia es ance danada par la tremas.
La area ave un istoria de tremateras potiosa, causada par la xoca de Barat con Eurasia en dirije a norde. La du placas move la un a la otra con rapidia de 4--5 sentimetres per anio.
En 2005, un trema de grandia 7,6 en la parte pacistani de Caxmir ia lasa plu ca 75 mil persones mor. E en april de esta anio, Nepal ia sufri sua trematera la plu sever rejistrada. Lo ia mata 9000 persones e ia dana o destrui sirca 900 mil casas.
@T Un trematera colpa Nepal
@L aora_oji/2015/un_trematera_colpa_nepal
====== Un trematera colpa Nepal ======
25 april 2015
Un trematera forte ia secute Nepal sentral, causante danas estendosa a construidas.
On no sabe ja esce persones ia mori.
La trema ia colpa a 81 cilometres a norde-ueste de la capital, Kathmandu.
Inisial, sua fortia ia es mesurada como 7,5, ma on ia alti esta estima asta 7,9.
Sites en Barat norde, como Delhi, prosima a la frontera con Nepal, ia esperia ance la trema.
La autoriosas barati responde.
Narendra Modi, la ministro xef de Barat, ia tuita: "Nos es a media de descovre plu informas, e labora per estende a la afetadas, e asi e en Nepal."
@T Un tren de vapor reopera en Dimashq
@L aora_oji/2015/un_tren_de_vapor_reopera_en_dimashq
====== Un tren de vapor reopera en Dimashq ======
3 maio 2015
Un tren de via streta ia recomensa opera en Dimashq, tal ce on recorda un eda plu bon en la capital de Suria, un pais cual sufri aora un gera interna sever.
En pasada, la tren de vapor de Rabwah ia es multe popular con abitores de la site. Lo ia transporta los a la campania a finis de semana. Ma la servi ia sesa a cuatro anios ante aora.
Car multe areas de Dimashq es aora ocupada par rebelores, la servi nova va es restrinjeda a partes mantenida par la governa.
La reveni de la tren, distinguida par sua vagones jala e sua sentas de cuoro, ia atrae deses de persones, incluinte enfantes, a venerdi. Multe ia brandi banderas nasional suri.
Zuheir Khalil, un de la ofisiores de la reinisia de la tren, ia esplica: "Nos ia deside reopera esta tren per dona denova un espera a persones e per pone un surie sur la fases de los en Dimashq."
Un studiante ia comenta: "Lo es la tren de mea enfantia. Me vole viaja denova en lo per recorda acel dias bela."
La tren pote conteni sento persones, e la custa de un bileta es sirca $0,25.
Ofisiores suri dise ce los espera ce la servi va ofre un metodo alternativa de transporta per abitores ci luta con la conjestas de trafica en la capital.
@T Un vila nederlandes proteje se contra atacas par bu
@L aora_oji/2015/un_vila_nederlandes_proteje_se_contra_atacas_par_bu
====== Un vila nederlandes proteje se contra atacas par bu ======
26 febrero 2015
On recomenda ce abitores en Purmurend, un vila en Nederland norde, porta parapluves a note, pos un serie de atacas par un bu.
Deses de persones ia sufri feris de testa en la tre semanas pasada par causa de la garas de la avia, cual es un bu real. La preda usual de esta spesie es avias e mamales peti.
Du corores ia es atacada a martedi, e un de los ia nesesa sutures per sinco feris diversa de testa.
Un de la locas de la atacas ia es un casa per persones descapasida. Un portavose ia dise ce abitores e laborores ala ia sufri a la min 15 atacas separada par la avia notal, cual resta libre.
"En la dia, on ave no problem," el ia dise. "Ma a note aora, nos vade a estra sola pos arma nos con parapluves, elmos, xapos, o cualce cosa simil per proteje nos."
Rabobank, un banco nederlandes, ia dona parapluves a la casa, e un portavose per la compania ia informa la televisa local ce lo intende envia ance un falconor.
La Funda Nederlandes de Bus dise ce la condui nonusual de la animal es cisa la resulta de sua eleva sin libria e donce de un asosia entre umanas e comeda. O cisa la bu ave simple un nivel altida de ormones a comensa de la saison de reprodui.
La comite local de Purmurend ia recomenda ce abitores no atenta catura la avia.
Bues real es entre la spesies de bu la plu grande de mundo. Sua alas ave un estende de asta 1,8 metres, e los pote pesa asta 3 cilogrames.
@T Un vitim ensinta de viole alegada vola de Nauero
@L aora_oji/2015/un_vitim_ensinta_de_viole_alegada_vola_de_nauero
====== Un vitim ensinta de viole alegada vola de Nauero ======
12 otobre 2015
Un fem somali ci ia deveni ensinta pos un viole alegada sur Nauero ia ariva en Australia.
A alga semanas ante aora, la fem de 23 anios ia demanda ja ce on envia el de Nauru a Australia per un aborta.
La isola Nauru es un parte de un rede de locas do Australia casi persones ci xerca refuja. La corte suprema de Australia revisa aora la legalia de esta sentros.
Miles de australianes ia asembla a la fini de semana per suporta refujadas e esije la clui de la sentros.
Entretempo, Nauru ia nega un alega par un otra refujada somali ce on ia viole el. La autoriosas ia dise ce la atesta no sufisi per suporta la declara par la fem ce el ia es violeda par du omes nauero.
Su la politica sever de refuja australian, on intersepi tota migrores nonprevideda ci atenta ariva a la pais par barco, e on teni los en sentros sur Nauero e la Isola Manus de Papua Gine Nova.
La governa dise ce esta preveni contrabandores de persones, ma on ia critica la situa a la campas.
On reporta ce la fem somali de 23 anios ave plu ca 12 semanas de ensintia. Nauero permete abortas en alga situas, ma no en la caso de viole.
La governa australian ia es ja presada sur permete ce el entra a Australia per aborta la ensintia.
Sua avocato ia comenta: "Nosa cliente es lejerida ce esta problem delicata es concluida. El es aora en Australia, e la governa ia acorda furni medica a el."
Ma un politiciste oposante, Sarah Hanson-Young de la Partito Verde, ia cexa sur la manera en cual on ia trata la fem. "On debe demanda perce la situa multe angusante de un fem joven ia deveni tan publica, e la popla australian ia debe solisita de la ministro xef."
@T Un volcan clui airoportos indonesian
@L aora_oji/2015/un_volcan_clui_airoportos_indonesian
====== Un volcan clui airoportos indonesian ======
10 julio 2015
On ia clui sinco airoportos en Indonesia, incluinte sur Bali, un isola de turisme, par causa de un eruta volcanal.
Monte Raung en Java Este jeta ja sene en la aira tra cuasi un semana, reduinte la capasia de vide a la airoporto de Denpasa sur Bali.
A la dia du en segue, on ia cansela multe volas entre Bali e Australia, encaliante viajores. La isola es un destina major de vacanse per australianes.
Un portavose de la ministreria indonesian de transporta ia dise ce la reabri de la airoportos va depende de la ativia de la monte.
La cuatro otra airoportos afetada es la Internasional e lo de Selaparang en Lombok, la airoporto de Blimbingsari en Banyuwangi, e lo de Notohadinegoro en Jember.
A venerdi, e Jetstar e Virgin Australia ia cansela tota aviones a e de la airoporto de Denpasar, la capital de Bali.
Jetstar ia es ance obligada a cansela volas entre Australia e Bali en la semana pasada. Lo ia declara ce lo va monitori atendente la nube de sene, e va ajunta plu volas per pasajores.
La volcan eruta ja tra sirca un semana, jetante constante sene. La eruta no es esplodente -- lo es mera un jeta nonsesante.
La apico de la monte es tan alta ce sola un pico de sene pote disturba la funsiona de aviones.
La aspeta la plu perilosa es ce motores moderna de jeto suca multe aira. La sene consentra alora en la motor e deveni un spesie de vitro fondeda, cual covre la interna de la motor e afeta la flue de carburante. En la situa la plu mal, lo pote causa ce la motores descomuta.
@T Un volcan txilan eruta
@L aora_oji/2015/un_volcan_txilan_eruta
====== Un volcan txilan eruta ======
23 april 2015
La volcan Calbuco en Txile sude ia eruta a la ves prima de plu ca cuatro desenios, puxante un plumon de fuma e sene a altia de alga cilometres.
Servis de crise ia anunsia un alarma roja, e on ia sorti sirca 1500 persones de un raio de 20 cilometres, per proteje los.
Puerto Montt, un site prosima, ia deveni ja covreda par un nube de sene. La maior, Gervoy Paredes, ia dise ce abitores es "multe multe asustada".
Arjentina, pais visina, ia inisia ance medios de crise per la site Bariloche -- a sirca 100 cilometres de Calbuco -- do on ia previde nubes de sene. On ia avisa abitores ala a resta en casa.
Ofisiores dise ce on ia vide no rocas calda o lava asta aora, ma sola sene. An tal, espertas ia averti ce rios local pote deveni inondada par la fonde de neva e jelo.
Imajes televisada ia mostra conjestas de trafica en Puerto Montt, e filos longa a gasolinerias. Puerto Varas, un vila prosima, es ance en state vijilante.
Rodrigo Peñailillo, la ministro txilan de internas, ia recomenda ce la persones afetada "resta calma e informada".
Calbuco ia eruta la plu resente en 1972.
Entre la cadenas de volcanes en la mundo, Txile ave la numero du par grandia (pos sola Indonesia), con sirca 500 cual es posible ativa.
Esta es la eruta volcanal du en Txile sude en du menses. En marto, la volcan Villarrica ia eruta en la temprana de matina, ejetante sene e lava.
@T Un vota jeneral en Srilanca
@L aora_oji/2015/un_vota_jeneral_en_srilanca
====== Un vota jeneral en Srilanca ======
17 agosto 2015
Srilancas fa un vota jeneral, e la presidente pasada Mahinda Rajapaksa espera revade a un posto major como ministro xef.
Rajapaksa ia perde la presidentia a la ministro de sania, Maithripala Sirisena, en un vota subita en janero.
Cuatro persones ia mori en avenis violente en la campania political, ma oservores dise ce on ia esperia min violentia ca en anios presedente.
Des-sinco milion persones ave la direto de vota, e on previde sabe la resulta doman.
Rajapaksa vole deveni la ministro xef de un governa gidada par la Partito de Libria de Srilanca. Sirisena, ci gida aora acel partito, ia menasa rejeta la idea.
Multe de la majoria sinala budiste de la pais regarda la presidente pasada, ci ave 69 anios, como un eroe per supresa un revolta tamil de 26 anios en 2009.
Ma oposores acusa el de opera un governa frodante, savaje, e dinastial. Rajapaksa nega esta.
Tensas etnical entre la majoria sinala e la minoria tamil ia es la forte impulsante en un gera interna longa e amarga, cual ia fini en maio 2009 pos plu ca un cuatri de sentenio de violentia. An tal, acusas venjante continua sur maltratas fada par ambos lados.
Sirisena ave 63 anios. Per despone Rajapaksa en janero, el ia formi un alia multiladal gidada par la Partito Nasional Unida.
Pos resinia sua posto como ministro de sania en la governa de Rajapaksa, el ia gida la alia a un vinse surprendente contra la presidente.
En un letera esposada en la campania, Sirisena ia acusa ce Rajapaksa "ostaji" la partito e ia esclui la idea de nomi el como ministro xef.
La presidente presente ia usa ance sua potia como gidor de partito per elimina fidistes de Rajapaksa de postos major en dias resente.
"Tota de nos ia uni e vota contra Rajapaksa per envia el a jubila," Ranil Wickremesinghe, la ministro xef, ia dise a sua campanieria final a sera de venerdi. "Si el no ia comprende la mesaje, nos debe uni per serti ce el comprende aora lo."
@T Un xef temeda de la armada brasilera mori
@L aora_oji/2015/un_xef_temeda_de_la_armada_brasilera_mori
====== Un xef temeda de la armada brasilera mori ======
16 otobre 2015
La xef pasada de la departe de securia de la armada en la stato brasilera São Paulo ia mori. El ia ave 83 anios.
Grupos de diretos umana ia acusa ce Coronel Carlos Alberto Brilhante Ustra ia comanda la aresta e tortura nonlegal de sirca 500 ativists sinistriste.
El ia gida la departe DOI-CODI (Destacamento de Operações de Informações -- Centro de Operações de Defesa Interna) de 1970 a 1974, cuando Brasil ia es militar renada.
"Me ia batalia la terorisme," el ia dise a un comision de veria en maio 2013. La armada ia preveni Brasil de deveni "un autocratia de la proletaria", el ia ajunta.
Ustra ia regrete nunca -- e ia demanda nunca es pardonada per -- sua atas contra grupos sinistriste ci ia combate la governa militar, cual ia ave la potia de 1964 asta 1985.
El ia dise ce la presidente presente de Brasil, Dilma Rousseff, "parteni a cuatro organizas teroriste" cual suporta la reali de un tirania comuniste en la pais. Rousseff ia es arestada a torturada en São Paulo en 1970 per sua ativias political.
Ustra ia dise ce el mesma ia viole nunca la lege, e ce el ia fa no plu ca obedi comandas de persones superior en la armada.
Ma Marival Dias Chaves, un ajente pasada de DOI-CODI, ia informa la comision ce Ustra ia dirije personal du sentros de tortura. "El ia es la mestre de vive e mori a acel veses. El ia deside ci va vive e ci va mori."
En 2012, un judor ia trova ce Ustra es culpable de viole diretos umana, e ia comanda el a paia un compensa per la tortura de un jornaliste saisida par ajentes secreta a sirca 30 anios ante aora.
Ustra ia es apelante contra la judi cuando el ia mori.
@T Un zona de ora nova en Corea Norde
@L aora_oji/2015/un_zona_de_ora_nova_en_corea_norde
====== Un zona de ora nova en Corea Norde ======
7 agosto 2015
Corea Norde va adota un zona de ora nova per onora sua libri de Japan a la fini de la Gera Mundal Du.
A presente, la pais es en la mesma zona como Corea Sude e Japan, a nove oras ante la Tempo Universal Coordinada (TUC). Ma a 15 agosto, la orolojos en Corea Norde va es cambiada per indica un ora plu temprana par 30 minutos.
KCNA, la ajenteria nasional de novas, ia dise ce "imperalistes japanes malvolente" ia "priva Corea de an sua ora normal" par cambia la orolojos cuando los ia ocupa la pais.
La penisola corean intera -- un sola pais a acel tempo -- ia es a 8,5 oras ante TUC asta cuando Japan ia coloni lo en 1910.
Corea Sude ia dise ce la cambia va causa cisa alga cualias nonoportun per un tempo corta a la compleso industrial de Kaesong en Corea Norde, cual es operada en junta par ambos Coreas.
"E en tempo plu longa, on pote ave un efeto a laboras per uni normas e redui diferes entre la du lados," Jeong Joon-Hee, un ofisior de la ministreria de uni, ia comenta.
No autoria internasional esiste cual aproba un tal cambia de zona de ora, car cada pais deside propre.
En 2011, Samoa ia cambia per situa se a la otra lado de la linia internasional de data, perdente un dia intera, ma fasilinte sua comunicas con sua visinas Australia e Zeland Nova.
Corea Norde no es la sola pais cual ia crea sua zona de ora propre e unica. En 2007, Venezula ia deside reversa sua orolojos par un dui de ora, car presidente Hugo Chávez ia desira "un distribui plu justa de la leva de sol" per la abitores.
Venezuela es aora la sola pais con un zona de ora a 4,5 oras ante TUC.
@T Ungaria usa gas lacrimojen contra refujadas
@L aora_oji/2015/ungaria_usa_gas_lacrimojen_contra_refujadas
====== Ungaria usa gas lacrimojen contra refujadas ======
17 setembre 2015
Ban Ki-moon, la secretor jeneral de la Nasiones Unida, ia dise ce el es "xocada" pos cuando la polisia ungarian ia xuta gas lacrimojen e canones de acua per forsa migrores a retira se de la frontera.
El ia dise ce un tal trata de refujadas es "nonasetable".
Ier, sentos de migrores ia es envolveda en la scaramuxas a la frontera entre Ungaria e Serbia, en atenta rompe un serca de filo lamosa. Multe de los vole ateni Deutxland, ma la Uni European es divideda sur la manera de maneja la crise.
Ungaria ia defende sua atas, reportante ce 20 polisiores ia es ferida cuando refujadas ia atenta rompe un porteta, e un portavose ia acusa migrores de usa enfantes como "scermos umana". A la min du migrores ia es ance ferida.
Ungaria ia clui sua frontera intera con Serbia a martedi, pos deslegali ce on entra a la pais o dana la serca fronteral. La cortes de la paises ia comensa ja prosede rapida migrores arestada.
Plu ca 200 000 ia traversa ja a en Ungaria per entra a la zona Schengen, cual permete normal ce on viaja entre paises membros sin restrinje.
Multe vade aora a la frontera corvatsce, do jornalistes ia reporta ce alga miles ia entra ja a la pais.
Ranko Ostojic, la ministro de internas, ia dise ce la polisia controla presente la situa, ma si refujadas continua ariva en cuantias grande, la autoriosas va debe considera un disposa diferente.
Ier, ofisiores ia dise ce Corvatsca va permete ce migrores viaja a Europa norde.
Ance ier, un sena caososa ia aveni prosima a la vila Horgoš en Ungaria, con focos ardente, ambulansias e veculos de polisia arivante a la lado serbsce de la frontera, e linias densa de polisiores a la otra lado.
Alga refujadas ia lansa misiles, incluinte petras e botelas de acua. La xuta de gas lacrimojen e canones de acua ia panica la migrores, puxante los a via de la frontera.
Alga persones, sufrinte la efetos de gas lacrimojen, ia es tratada par la servi ambulansial serbsce.
Amir Hassan de Irac ia comenta: "Nos ia fuji de geras e violentia, e no ia previde un tal savajia e trata noncompatiosa en Europa."
Serbia ia dise ce lo va envia plu polisiores a sua frontera con Ungaria.
António Guterres, la comisionor alta de la NU per refujadas, ia recomenda forte ce la autoriosas ungarian serti "un asede nonimpedida" per los ci fuji de geras e persegue.
En un declara, el ia dise ce sua departe "ia es spesial xocada e tristida par vide refujadas suri, incluinte familias con enfantes ci ia sufri ja tan multe, prevenida de entra a la UE con canones de acua e gas lacrimojen".
Seguente la organiza carital Save the Children, un de la motivas xef cual atrae suris a Europa es la posible de trova un vive e instrui plu bon per sua enfantes. Lo reporta ce plu ca du milion enfantes en Suria no pote vade a scola.
@T Ursos blanca no ajusta a la Artica fondente
@L aora_oji/2015/ursos_blanca_no_ajusta_a_la_artica_fondente
====== Ursos blanca no ajusta a la Artica fondente ======
17 julio 2015
On ia descovre ce ursos blanca no pote ajusta sua condui per maneja la perdes de comeda asosiada con estates plu calda en la Artica.
Siensistes ia suspeta ce la animales entra a un spesie de "inverni paseante" cuando privada de preda. Ma un rexerca nova indica ce la ursos mori simple de famia en tal clima.
La autores dise ce esta implica mal per la survive de la spesie en un mundo plu calda.
Ursos blanca vive xef par come focas cual los xasa sur la jelo de mar. Ma la fonde aora aumentada en estates redui la cuantia de focas, e la ursos no trova tan fasil sua comedas.
Alga rexercores ia razona ce, simil a la reata de otra spesies de urso a inverno, la ursos blanca entra a un state spesial de ativia basa cuando los no reseta un cuantia sufisinte de calorias.
Per proba esta idea, siensistes ia fa un esperimenta custosa e perilosa: los ia fisa colares satelital e rejistradores sirurjial implantada, per trasa la moves de la ursos e per nota detalias fisiolojial. Los ia studia a la min 25 ursos en la mar a norde de Alasca, e ia conclui ce la ursos mori de famia en la estate.
An si la ursos no pote cambia sua condui per comedas, los pare ave un ajusta importante cual aida los a survive nada en acua fria. Esta ia es un surprende grande a la rexercores.
La autor xef de la article ia dise: "Los ave un capasia de permete tempora ce la parte la plu esterna de la tronco de sua corpo fri a un grado notable, e esta proteje la organes esensal interna."
On ia studia un urso fema ci ia survive un nada tra 650 cilometres e nove dias, entre un costa e un isola de jelo. Cuando on ia recatura el pos sete plu semanas, la urso ia perde 22% de sua masa corpal -- e ance sua enfante.
La studia ia es multe custosa, usante sirca 200 persones, un rompejelo, e elicotores. La rexercores crede ce lo no es probable ce cualcun va repete la esperimenta.
@T Ventas recordo colpa Sydney
@L aora_oji/2015/ventas_recordo_colpa_sydney
====== Ventas recordo colpa Sydney ======
16 desembre 2015
En Australia, un siclon ia pasa tra Sydney. Un stasion meteorolojial ia rejistra la venta la plu rapida de istoria en la stato Cimri Sude Nova.
Ventas destruinte de 213 cilometres per ora ia colpa Kurnell, a la promontania sude de Botany Bay a esta matina.
On ia ospitali du persones, de ci un ia sufri feris de testa e un otra ia es en xoca.
Un abitor de Kurnell ia dise ce la tempesta ia sona "como un tren de carga".
La autoriosas dise ce lo es fortunosa ce no persones ia es grave ferida, ma a la min 25 casas ia es sever danada. On ia declara alga como nonabitable.
La servi de crise ia responde a plu ca 500 telefonis per aida, e ia fa 11 salvas de inonda, incluinte alga persones ci ia deveni trapida en sua veculos en inondas subita.
Sirca 180 enfantes ia es obligada a sorti de sua salas de clase en Kurnell.
Entretempo, otra suburbes incluinte Bondi ia es ance forte colpada. Imajes filmada par telefoneta mostra comprores ci regarda la colasa de un teto a un sentro comersial en Westfield.
Un de la comprores ia es colpada par detrito e ia es tratada a la sena per feris minor.
En la area Sutherland Shire, abitores ia es stonada par trova pesos de graniza tan grande como sua palmas.
La airoport de Sydney es ancora abrida, ma la clima ia causa retardas.
@T Xamanes tanzanian es arestada per preveni matas de albinos
@L aora_oji/2015/xamanes_tanzanian_es_arestada_per_preveni_matas_de_albinos
====== Xamanes tanzanian es arestada per preveni matas de albinos ======
7 marto 2015
La polisia en Tanzania ia aresta 32 xamanes en Geita, un area norde-ueste, como parte de labora per preveni la matas de albinos.
A jovedi, la Corte Alta ia condena cuatro persones a mori per la omiside en 2008 de un fem albino en la mesma area. Sua sposo ia es entre la condenadas. Ma on no sabe serta esce la condenas va es realida, car la puni de mori es tempora proibida en la pais.
Ante alga semanas, on ia descovre la corpo mor de un xico de un anio, de ci sua brasos e gamas ia es sutraeda.
La governa ia deslegali xamanes en janero, seguente un teme ce la vota jeneral de esta anio va provoca un aumenta de violentia contra albinos.
Albinisme es un state medical cual afeta la produi de pigmento de pel. Lo es notable comun en Tanzania, do un de 1400 persones es afetada. En paises ueste, la cuantia es sola un de 20 mil.
La xamanes crede ce la partes de corpos de albinos ave potias spesial, capas de atrae susedes e bon fortunas. Seguente la Crus Roja, xamanes pote paia asta $75 mil per un colie completa de partes de corpo albino.
De pos 2000, Tanzania ia vide 75 omisides relatada con albinos.
La xef de polisia ia dise ce "la xamanes ia es arestada en posese de cosas diversa, incluinte preparas e olios de un fonte nonconoseda". El no ia clari esce on ia acusa la xamanes, o esce on ia catura los con cualce cosa relatada con albinos.
Jakaya Kikwete, la presidente de Tanzania, ia promete elimina un pratica cual el descrive como "un malia continuante" cual vergonia la pais.
@T Xampania deveni un erita mundal
@L aora_oji/2015/xampania_deveni_un_erita_mundal
====== Xampania deveni un erita mundal ======
5 julio 2015
La ramo cultural de la Nasiones Unida ia dona la cualia de un erita mundal a la industria cual produi xampania.
UNESCO ia deside ce la viterias, susolos de vino e venderias do on produi e vende xampania es cultural importante.
Los ia es entre des-un cosas e locas cual la organiza ia eticeti formal como eritas mundal en Deutxland ier.
La eticeta debe serti ce la locas reseta un proteje spesial en futur.
UNESCO (la Organiza de la Nasiones Unida per Instrui, Siensa e Cultur) ia descrive la industria de xampania como "un ativia de artisanes multe spesialida, cual ia deveni un emprende agricultural-industrial".
La lista inclui ja Machu Picchu en Peru, la Taj Mahal en Barat, e la Mur Grande de Xina. La ajunta de la industria de xampania a la lista va trae cisa plu aida finansial e plu turistes.
La viterias de la area Burgonia en Frans ia reseta ance la cualia de eritas mundal a saturdi.
Entre la otra locas anunsiada ia es la Jardines Botanical de Singapor, la Fortres Diyarbakır en Turcia, e la cavas abitada de Maimand en Iran.
Un loca de erita mundal, la ruinas de Palmira en Suria, ia es ocupada par estremistes de la Stato Islamiste en maio, cuando los ia catura Tadmur, la site moderna la plu prosima. Esta ia provoca criticas ce la eticeta de UNESCO no aida proteje locas de importa cultural.
@T 2015
@L aora_oji/2015/xef
====== 2015 ======
En 2015, Aora oji ia publici un article nova a cuasi cada dia.
Reportas plu vea ...
@T Xerpas repara la via de Sagarmata
@L aora_oji/2015/xerpas_repara_la_via_de_sagarmata
====== Xerpas repara la via de Sagarmata ======
28 agosto 2015
Un ecipo de trepores spesialiste xerpa nepali ia comensa labora per repara la via de trepa sur Monte Sagarmata (Everest), a cuatro menses pos cuando lo ia es destruida par un trematera grande.
En april, 18 trepores e aidores ia es matada cuando la trematera ia causa un avalanxa cual ia pasa tra la campa de base de la monte.
La ecipo, conoseda como la "dotores de cascade," ia comensa sonda la monte. Los intende fisa cordas tra la Cascade Jelada de Khumbu en la dias seguente.
La Cascade Jelada es un estende malfamosa tradosa de jelo movente e fesurinte, tra cual trepores debe pasa pos sorti de la campa de base en via a la campa prima sur la monte. Sin la cordas fisada, esta no ta es posible.
La dotores de cascade espera ce la via restorada va atrae trepores a la monte per la saison autonal.
Un ecipo japanes ia ariva ja en Nepal. A martedi, trepor Nobukazu Kuriki, ci ave 33 anios, ia parti de Kathmandu, la capital de Nepal, per vade a la area de Sagarmata, e per comensa ajusta a la clima ala ante sua propre atenta de ateni la apico en setembre.
Kuriki, ci ia perde tota sua puntos de dito e un diton par causa de ulseras jelal, es asta aora la sola person ci intende asende Sagarmata en la saison defiante de autono.
La industria profitosa de trepa en Nepal ia es destruida par la teratrema ruinante en april e la avalanxas cual ia segue lo.
La governa e la comunia xerpa, ci depende de trepores stranjer per susta se, desira reconstrui tan rapida como posible la industria. Ma alga nepalis critica la deside de reabri tan pronto la via.
La presidente de la asosia nepali de trepores, Ang Tsering Xerpa, ia descrive la mision japanes como "riscosa e perilosa". El dise ce trepa en la autono ajunta ja riscas de temperatures fria e ventas forte.
@T Xina aresta 175 persones sur fura de relicias
@L aora_oji/2015/xina_aresta_175_persones_sur_fura_de_relicias
====== Xina aresta 175 persones sur fura de relicias ======
27 maio 2015
La polisia en Xina ia aresta 175 persones per regania relicias furada.
En un opera estrema grande, los ia trova 1168 relicias cultural con valua de plu ca 500m iuan ($80 milion).
On crede ce la ojetos ia es nonlegal estraeda de escavas en Niuheliang, un loca arceolojial neolitica en la provinse Liaoning en la norde-este.
La ministreria de securia publica ia dise ce la atas de la furores ia dana grave la loca.
Unesco dise ce la loca en Niuheliang ave de 5000 a 5500 anios, e ce lo ia es un sentro de entera e sacrifia en la tarda de la periodo de la cultur de Hongshan.
Entre la ojetos trovada es un dragon enrolada de jada, un de la imajis la plu temprana cual on conose de acel bestia mital.
Un polisior ia comenta: "Tal relicias es rapida vendeda e frecuente comersiada en un tempo corta."
Jornalistes nasional ia descrive la opera polisial como la plu grande de sua spesie de pos la fundi de Xina moderna en 1949.
On no ia furni la data de la opera, ma la ministreria ia declara formal ce lo ia envolve 1000 polisiores.
La furores ia es divideda en des ganges encargada con tota aspetas, de la escava mesma a la vende de la relicias. On reporta ce la ganges ia conteni cuatro arceolojistes.
@T Xina promete mone a la mundo developante
@L aora_oji/2015/xina_promete_mone_a_la_mundo_developante
====== Xina promete mone a la mundo developante ======
27 setembre 2015
Xi Jinping, la presidente de Xina, ia promete institui un reserva de $2 mil milion per aida paises developante e per aumenta investis.
Parlante a un confere de la Nasiones Unida sur goles de developa, Xi ia dise ce investis va ateni $12 mil milion en la 15 anios veninte.
El ia dise ance ce Xina va cansela detas de la nasiones la min developada de mundo, incluinte nasiones peti sur isolas. En la sinco anios veninte, Beijing va aida en 600 projetas en paises stranjer e va ofre plu donadas per studia.
A la confere en New York, la xef xines ia dise: "Si on regarda tra la mundo, la pas e la developa resta la du temas major de la eda. Per solve defias global diversa, incluinte la crise resente de refujadas en Europa, la solves fundal es en la xerca de pas e la reali de developa. Frontinte defias e difisiles variosa, nos debe reteni la clave de la developa. Sola la developa pote elimina la causas de la disputas."
Sua prometes de aida dona un aumenta grande a un inisia nova de la Nasiones Unida -- la Goles Global per Developa Sustable.
Esta program multe aspirante ia es inisiada a la dia presedente, e tota membros statos ia promete se a lo. La projeta intende elimina la povria e la famia ante 2030.
Su la goles presedente de Developa Milenial, la redui global de povria ia es notable par causa de la susedes de Xina en leva tan multe familias de povria.
Ma acel susedes ia es multe isolida e noncoerente. Xina ofre aora aida otra paises -- spesial en Africa -- a fa la mesma cambias.
La inisia nova sujesta ance ce Xina desira emprende plu de la encargas cual acompania sua state como un suprapotia emerjinte.
@T Xina sutrae de la rede un filma sur contamina
@L aora_oji/2015/xina_sutrae_de_la_rede_un_filma_sur_contamina
====== Xina sutrae de la rede un filma sur contamina ======
8 marto 2015
La autoriosas en Xina ia sutrae de la rede un filma atestante cual parla sur la problem sever de contamina en la pais.
Su la cupola esplica la custas sosial e sanial de contamina, e plu ca 100 milion persones ia regarda enlinia lo en min ca 48 oras, provocante debates.
On ia sutrae lo a sola du dias pos cuando Li Keqiang, la ministro xef, ia descrive la contamina como un malinte a la vives de la popla.
Esta problem de ambiente ia domina la consenta presente de la parlamento xines en Beijing, e Li ia promete combate lo con tota la fortia de la governa.
Ma lo pare ce la popularia enorme de un filma pasionida e nondependente sur la problem ia fa ce la autoriosas comuniste deveni ansiosa.
Un investiga tra un anio de contamina en Xina -- fada par Chai Jing, un jornaliste investigante famosa, ci ia finansia ance lo -- la filma critica forte la leges laxe de Xina sur la ambiente.
Stante ante un salon de escutores, Chai parla franca tra la video de 103 minutos.
Partes de la filma es profonda personal. Prosima a la comensa, Chai intervisa un enfante de ses anios ci abita la provinse Shanxi, do on mina carbon e cual es entre la locas la plu contaminada sur la planeta.
"Esce tu ia vide stelas?" Chai demanda. "No," la xica responde.
"Esce tu ia vide un sielo azul?" La xica dise: "Me ia vide un sielo cual es pico azul."
"Ma esce tu ia vide nubes blanca?" "No," la xica suspira.
La filma es ancora regardable en YouTube, con sutesto engles.
@T Zeland Nova va crea un conserveria vasta de vive maral
@L aora_oji/2015/zeland_nova_va_crea_un_conserveria_vasta_de_vive_maral
====== Zeland Nova va crea un conserveria vasta de vive maral ======
29 setembre 2015
Zeland Nova ia revela ce lo intende converti un parte de la Pasifica sude, con sirca la grandia de Frans, a un conserveria per vive maral.
La Refuja Maral de Kermadec es situada a norde de la pais, e conteni un cadena de isolas e volcanes suacuan.
John Key, la ministro xef, la fa la anunsia a la Asembla Jeneral de la Nasiones Unida en New York.
La pexa e mina va es proibida en lo cual Key ia descrive como "un de la areas la plu jeografial e jeolojial variosa de mundo".
El ia dise: "Zelandeses valua nosa costas e mares, cual es un parte importante de nosa cultur, economia, e ambiente, e nos es dedicada a maneja los en modo sustenable."
La governa intende aseta leges per crea la conserveria en la anio veninte.
La area per proteje es un estende vasta de la Pasifica sude, a sirca mil cilometres a norde-este de la Isola Norde de Zeland Nova. Lo ave un area de 620 mil cilometres cuadrida.
Lo conteni la Foso de Kermadec, cual es profonda de 10 cilometres e donce un de la fosos maral la plu profonda de mundo. La foso es rica con vive maral incluinte balenas, delfines, tortugas perilida, e avias de mar.
Ambientistes ia bonveni la deside. Alga grupos ia promove la crea de la conserveria, cual va estende la proteje de la ambiente maral de Zeland Nova de 0,5% a 15,5% en mesura spasial.
La anunsia ia surprende companias de pexa e mina. La presidente de Seafood New Zealand ia dise ce on ia reseta "no preaverti de la governa" e ce la industria "nesesa tempo per considera tota la resultas implicada".
@T 30 pasajores es ferida en un avion secutente
@L aora_oji/2016/30_pasajores_es_ferida_en_un_avion_secutente
@D 2016
====== 30 pasajores es ferida en un avion secutente ======
5 maio 2016
Plu ca tredes persones ia es ferida cuando un avion de Etihad Airways, volante a Indonesia, ia encontra "un turba grave e nonespetada".
La avion de Abu Dhabi ia es a sirca 45 minutos de Jakarta ier cuando lo ia comensa secute.
Video, parente de esta vola, mostra pasajores criante en cuando la avion es secuteda.
La Airbus A330-200 ia atera secur pos la aveni, ma on ia prende des persones a ospital.
La airocompania nasional de la Amirias Arabi Unida ia dise ce la armarios de bagaje ia es danada. Pasajores ia reporta ce mascas de osijen ia es librida en la secute.
Etihad Airways no ia furni detalias sur la gravia de la feris, ma on sabe ce la des persones ospitalida inclui nove pasajores e un ecipor. La otras ia es tratada par paramedicistes de airoporto.
La compania ia cansela la vola reveninte. Lo reserva sejas per pasajores en otra volas e furni salas de otel.
La airoporto dise ce sua ofisiores e los de la Comite Nasional Indonesian de Securia Transportal esamina aora la avion.
@T 33 escavores mori en un esplode en Xina
@L aora_oji/2016/33_escavores_mori_en_un_esplode_en_xina
====== 33 escavores mori en un esplode en Xina ======
2 novembre 2016
En Xina, on ia trova tota 33 de la escavores trapida par un esplode en un mineria. Tota es mor.
Salvores ia labora sin pausa per ateni la escavores pos la esplode, cual ia aveni en la matina de lundi en la rejion Chongqing en la sude-ueste de la pais.
La jornal Dial de la Popla ia reporta ce on ia estrae tota la corpos de la mineria de Jinshangou e identifia aora los.
Du escavores ia susede sorti vivente.
Asidentes de escava es comun en Xina, an entre laboras per boni la securia.
La causa de la esplode es ancora no clar, ma tal avenis es usual causada par un sintil cual ensende gas relasada de la tera.
Autoriosas local ia inisia un investiga sur la asidente e ia comanda ce minerias plu peti de carbon en la rejion clui tempora.
Xina es la produor e consumor la plu grande de carbon de mundo. La mineria de Jinshangou es lisensada per produi 60 mil tones de carbon per anio.
@T 75 000 enfantes nijerian risca mori de famia
@L aora_oji/2016/75_000_enfantes_nijerian_risca_mori_de_famia
====== 75 000 enfantes nijerian risca mori de famia ======
16 novembre 2016
La Nasiones Unida dise ce sirca 75 000 enfantes en Nijeria norde-este risca mori de famia en la poca menses veninte.
Peter Lundberg, coordinor umaniste de la NU, ia dise ce intera 14 milion persones nesesa es aidada en un rejion cual ia es la fortres pasada de militaristes de Boko Haram.
El ia averti ce la reservas de la NU no sufisi per averti la crise.
Jihadistes de Boko Haram ia destrui la rejion ante deveni forsada a via par soldatos nijerian en menses resente.
"Presente nosa evalua es ce 14 milion persones es identifiada como nesesante aidas umaniste" ante 2017, Lundberg ia dise ier en Abuja, la capital de Nijeria.
El ia ajunta ce esta cuantia inclui sirca 400 000 enfantes, e ce 75 000 de los "va mori en la poca menses ante nos... si nos no reata rapida e seria".
Deses de miles de persones ia es matada e plu ca du milion ia deveni deslocada pos cuando Boko Haram ia comensa sua operas militar en 2009 en la stato Borno e otra rejiones.
En julio, la Nasione Inida ia averti ce un cuatri de milion enfantes en partes de Borno sufri grave de malnuri.
@T A sinco anios pos la tsunami japanes
@L aora_oji/2016/a_sinco_anios_pos_la_tsunami_japanes
====== A sinco anios pos la tsunami japanes ======
11 marto 2016
Japan onora la aniversario sinco de la trematera e tsunami cual ia lasa plu ca 18 mil persones mor o mancante.
La ministro xef Shinzō Abe e imperor Akihito ia visita un monumento en Tokyo, e ia partisipa en un momento de silentia nasional a la tempo esata cuando la trematera ia colpa.
La trema de grandia 9,0 ia colpa a mar, creante un ondon vasta cual ia ruina la costa norde-este.
Lo ia causa ance la desastre nucleal la plu grave pos Txernobil, a la compleso Fukushima Daiichi. Acua ia inonda la compleso, descapasinte sistemes frinte e provocante un serie de fondes nucleal.
Esta ia sperde radia tra un area grande e la obliga plu ca 160 mil abitores a parti. An pos sinco anios e multe laboras descontaminante, la plu de los no pote revade a sua casas.
La trematera a 11 marto 2011 ia es entre la plu fortes rejistrada de istoria. Ma la tsunami resultante ia prende la plu vives, cuando un mur de acua de mar ia forsa se tra areas costal de Tohoku, crasente vilas e viletas intera.
A 14:46 de ora japanes (05:46 de ora global), la momento esata de deteta la trema, la popla de Japan ia basi sua testas per respeta la vitimes. Campanas ia sona, e en la capital la metro suteran ia pausa.
Parlante a la rituo, Akihito ia dise: "Multe de la persones afetada par la desastre senese, e me es ansiosa ce cisa alga de los sufri solitar en locas do nosa oios e atende no ateni."
A la dia ante la aniversario, Abe ia redise la dedica de sua governa a la potia nucleal, clarinte ce Japan "no pote funsiona sin lo" en la futur.
Pos la desastre de Fukushima, tota complesos nucleal en Japan ia es comandada a desativi entre ansia sur securia, e la pais ia es obligada a depende de emporta custosa combustables de fosil.
On ia reinisia sola un pico de complesos, e an estas es oposada par abitores ci dise ce on no ia ata sufisinte per serti ce un tal desastre va reaveni nunca.
Plu temprana en esta semana, on ia comanda ce du complesos desativi denova, par causa de temes sur sua securia.
En soma, 470 mil persones ia es sortida de la area sirca Fukushima cuando la estende de la problem de radia ia deveni clar.
La governa ia spende miles de miliones de dolares en laboras de reconstrui, ma multe taxes resta nonfada e multe persones no ia pote reveni. La ministro japanes de reconstrui ia promete ce on va completi la labora.
Ma per multe survivores, problemes emosial domina.
Eiki Kumagai, un pompor-bonvolor, ia comenta: "La infrastrutur recovre, la cores no. Me ia crede ce la pasa de tempo va remedia la situa."
El ia es en Rikuzentakata, un de la areas la plu sever colpada, e ia perde 51 colaborores en la tsunami. "Me vide ancora la fases de los ci ia mori. Me ave tan multe regrete ce me no pote espresa lo."
@T Aiti es sever colpada par un siclon
@L aora_oji/2016/aiti_es_sever_colpada_par_un_siclon
====== Aiti es sever colpada par un siclon ======
6 otobre 2016
En Aiti, salvores labora forte per asede partes de la pais colpada par la siclon la plu potiosa en la Caribe de cuasi un desenio.
La destrui causada par siclon Matthew ia forsa la pospone de la eleje presidental en Aiti a esta fini de semana. Miles de persones es deslocada e des, cisa plu, ia mori.
La statos Florida e Carolina Sude en la SUA prepara per la tempesta, cual prosimi aora a la Bahamas. Ala, tota trafica de aira e mar ia sesa, e on ia recomenda ce persones vade a tera plu alta.
Presente, la siclon es un tempesta de categoria 3, ma on previde ce lo va forti a categoria 4 cuando lo ariva a la costa de la SUA.
A martedi, ventas de asta 230 cilometres per ora ia bate un area distante de Aiti -- un de la paises la plu povre de mundo, do multe abitores abita en casas frajil en areas inondable.
On ancora no pote judi la estende vera de la dana, spesial en la area Grande-Anse a la punto sude de la isola, cual ia es direta en la curso de la siclon.
Un ponte esensal ia es destruida, vias es blocida, e telefones no funsiona. A la min des mil persones es en refujerias, e ospitales supraflue.
Entre la construidas danada es scolas e eglesas cual on ia intende usa como voterias per la eleje. On ancora no ia anunsia un data nova per la vota ja multe posponeda.
On crede ce la siclon ia mata a la min 16 persones asta aora, incluinte cuatro par mures colasante e liscas de fango en la Republica Dominican.
En Cuba, deses de casas ia es destruida en Baracoa, un site este.
@T Akihito indiceta ce el desira renunsia la imperoria
@L aora_oji/2016/akihito_indiceta_ce_el_desira_renunsia_la_imperoria
====== Akihito indiceta ce el desira renunsia la imperoria ======
8 agosto 2016
Imperor Akihito de Japan ia dise ce el teme ce, par causa de sua eda e sania dejenerante, el trova difisilia en continua en sua rol.
La comentas de la imperor adorada, ci ave 82 anios, ia es presentada en un parla televisada -- un modo de comunica cual el ia usa a sola un ves a ante.
El no ia usa la parola "renunsia", ma el ia indica forte ce el desira dona sua taxes a un otra person.
Shinzō Abe, la ministro xef, ia dise ce la governa va discute "seria" la cambias legal cual ta es nesesada per un renunsia de la imperoria.
En sua mesaje prerejistrada de des minutos, Akihito ia dise ce el espera ce la debes de la imperor pote continua constante sin interompes.
El ia dise: "Me es ansiosa ce lo va deveni difisil ce me reali mea debes como la simbol de la stato con mea esense intera, como me ia fa asta aora."
Akihito, ci ia reseta sirurjia de cor e un trata per canser de prostata, ocupa ja la Trono de Crisantemo de pos la mori de sua padre, Hirohito, en 1989.
Sua fio la plu vea, Prinse Erital Naruhito, ci ave 56 anios, es la prima en la ordina de pasa de rena, segueda par sua frate Prinse Akishino. On no permete ce femes erita la trono, e donce Prinsesa Aiko, la fia de Naruhito, no pote segue.
Akihito ia dise ce un posible, cuando un imperor no pote reali sua taxes par causa de eda o maladia, es ce on ta institui un rejente. Ma el ia sujesta ce esta no ta es la resulta ideal: "Me crede ce on no pote continua eterna redui la atas de la imperor en cosas de stato, e sua debes como la simbol de la stato."
La leges esistente dise no cosa sur renunsia, donce on ta nesesa cambia los afin la imperor pote resinia. La cambias va nesesa es aprobada par parlamento, ance.
La constitui proibi la imperor de fa declaras political, e on ta pote opina ce un desira de renunsia es political.
La popla pare suporta la desira de la imperor. Spesial la jenera plu joven dise ce on debe permete ce el reposa en sua eda matur.
Un sonda resente ia trova ce plu ca 85% de persones japanes opina ce on debe legali la renunsia de imperoria. Ma la idea es oposada par alga partes plu tradisional de la sosia.
En 2006, cuando la imperor ia ave no netos, on ia proposa un debate sur esce un fem ta pote ocupa la trono. On ia pospone lo cuando un fio ia nase.
En 2011, Prinse Akishino ia recomenda un debate sur esce on debe defini un eda de jubila per la imperor, ma no cambia de lege ia resulta.
@T Aora un trematera en Ecuador
@L aora_oji/2016/aora_un_trematera_en_ecuador
====== Aora un trematera en Ecuador ======
17 april 2016
Pos la du tremateras resente en Japan, un nova de grandia 7,8 ia mata a la min 41 persones en Ecuador.
La trema ia colpa a 18:58 de ora local ier, prosima a Musine, un vila costal norde.
On reporta danas major en multe rejiones, e un ponte ia es destruida tan sude como Guayaquil a distantia de sirca 300 cilometres.
Un state de crise es ja declarada en ses provinses, e on ia ativi la Garda Nasional.
La trema ia es la plu grande de desenios en la pais. Lo ia secute ance construidas en la capital, Quito, do la eletrica ia fali tra alga tempo.
Presidente Rafael Correa corti sua visita a Italia per reveni a Ecuador. El ia demanda per calmia, disente en Twitter: "Nosa ama infinita a la familias de la mores."
La maior de la vila Pedernale, prosima a la episentro, ia comenta: "Nos atenta fa tan multe como posible, ma nos pote fa cuasi no cosa." El ia ajunta ce deses ia construidas ia deveni platida e ce on ia comensa fura.
"Esta no ia es mera un casa colasada, lo ia es un vila intera," el ia dise.
Danas major ia es ance reportada en la site Manta, do un tore de airoporto es entre la construidas destruida.
Un abitor ia dise: "La plu de persones es en la stradas, portante bolsones e vadente a tera plu alta. La stradas es fesurida. La eletrica ia fali e telefonas no funsiona."
La trematera ia colpa no multe profonda, a 19,2 cilometres su la surfas e a sirca 27 cilometres de Muisne, en un area poca abitada.
Alga replicas sismica ia segue, de cual la plu grande ia es mesurada a grado 5,4.
La Sentro Pasifica de Averti sur Tsunamis ia publici un informa ce la menasa de un tsunami ia desapare per la plu, e ce cualce risca restante debe es evaluada par autoriosas local. An tal, plu temprana, lo ia dise ce ondas con altia de asta un metre supra la nivel de marea es posible per alga costas de Ecuador.
La pais visina, Peru, ia averti ance sur un tsunami posible a sua costa norde.
On ia sensa la trema ance en Colombia, do on ia sorti pasientes de un clinica en la site Cali como medio protejente.
Ecuador es propensada a tremateras. Lo es situada longo la Anelo de Foco, un area sismica turbosa con forma de fero de cavalo en la Mar Pasifica.
@T Apple contrataca sur securia de telefonetas
@L aora_oji/2016/apple_contrataca_sur_securia_de_telefonetas
====== Apple contrataca sur securia de telefonetas ======
25 febrero 2016
La xef de Apple, Tim Cook, ia contrataca la FBI sur sua trata de un comanda par corte per aida desclavi la iPhone de Syed Rizwan Farook, ci con sua sposa ia mata 14 persones en la site San Bernardino en California en desembre 2015.
Cook ia dise ce sua compania ia descovre prima ce la comanda controversa esiste cuando jornalistes ia reporta lo.
"Me no crede ce la ferovia debe funsiona en esta modo," el ia comenta. "Me no crede ce on debe maneja un cosa tan importante a esta pais en esta modo."
An tal, un fonte prosima a la investiga ia informa jornalistes ce esta ia es "simple no vera", e ce la ecipo legal de Apple ia es "la prima persones ci ia sabe".
Un portavose per la FBI ia refusa comenta.
On reporta ance ce Apple ia comensa labora a un renovi de sua aparatos, pos cual lo ta es nonposible de intrui a un iPhone par la metodo proposada par la FBI en esta caso.
Cook ia defende la refusa par Apple de segue un comanda par la FBI ce lo ta sutrae la blocos securial de la telefoneta de Farook afin on pote asede la datos en lo. El ia dise ce la FBI demanda ce la compania ta crea "la corespondente informatical de canser".
El ia dise: "Me crede ce la securia de la publica es estrema importante. La proteje de la datos de persones es estrema importante. E donce en esta caso la compromete es ce nos sabe ce par fa esta nos ta pote esposa persones a riscas noncredable."
A la demanda esce el es ansiosa ce Apple va impedi investigas cual ta preveni un ataca teroriste futur, Cook ia responde: "Alga cosas es difisil e alga cosas es coreta. E alga cosas es ambos. Esta es un de tal cosas."
La FBI ia razona ce Apple esajera la risca securial a sua aparatos. Sua dirijor James Comey ia dise ce Apple ave la sabes tecnical per intrui a sola la aparato de Farook en un manera cual no ta crea un "porte retro" en cada aparato de Apple.
Sondas reporta opinas diferente entre la popla de la SUA. Un sujesta ce la majoria de la persones sondada suporta la FBI, ma la rexercores ia nota plu suporta per Apple entre persones ci posese telefonetas intelijente.
Ma un otra sonda ia indica un ansia entre 55% de la respondores ce la FBI ta atenta usa la porte retro per "spia usores de iPhone".
@T Apple investi a la competor xines de Uber
@L aora_oji/2016/apple_investi_a_la_competor_xines_de_uber
====== Apple investi a la competor xines de Uber ======
13 maio 2016
Apple ia investi $1000 milion en Didi Chuxing, un compania cual produi un ap de taxi cual domina plu de la mercato en Xina ca Uber, sua competor de la SUA.
Tim Cook, dirijor xef, ia dise ce esta va aida Apple a comprende plu bon la mercato xines.
Didi Chuxing, conoseda a ante como Didi Kuaidi, ia indica ce esta es la investi la plu grande de sua istoria.
La compania furni plu ca 11 milion viajas de taxi per dia, e declara ce lo ave 87% de la mercato en Xina. Lo es ance suportada par la jigantes de rede Tencent e Alibaba.
Uber ia luta per entra a la mercato xines, an pos gania Baidu, un compania xines de xerca de rede, como investor. En febrero, Uber ia confesa ce lo perde plu ca $1000 milion per anio en Xina, par spende cuantias vasta per suporta viajas descontada.
Cook ia dise ce el vide multe modos posible en cual Apple e Didi Chuxing va pote colabora en futur. El ia asentua ance ce la investi es un modo de aprende plu sur Xina como la mercato du de la plu grandes de Apple.
La aspiras de Apple en Xina ia es resente alga impedida, cuando regulores xines ia clui la servis enlinia de libro e filma de la compania per enforsa leges sever sur lo cual on pote publici en la rede.
Multe comentores ia regarda esta como un delude per Apple, cual desira forte serti ce sua produidas es popular e bonvendeda en Xina.
En april, Apple ia reporta ce sua revenu ia diminui a la ves prima de pos 2003, spesifante Xina como un punto spesial debil.
@T Arestas sur predise de jenero de bebes en Xina
@L aora_oji/2016/arestas_sur_predise_de_jenero_de_bebes_en_xina
====== Arestas sur predise de jenero de bebes en Xina ======
16 otobre 2016
La polisia en Xina ia deteni 75 persones en relata con un rede vasta cual ia revela nonlegal la jenero de bebes ancora no naseda.
La emprende, dirijeda a jenitores espetante ci desira enfantes mas, ia contrabanda samples de sangue fetal a Hongkong per probas de jenero. Lo ia opera tra multe de Xina e ia colie un revenu de $30 milion.
An pos desenios de campanias, familias xines continua valua xicos plu ca xicas, spesial en areas estra urbes.
La autoriosas en la provinse este Zhejiang ia dise ce a la min 300 persones ia es envolveda en la emprende nonlegal.
La grandia de la emprende e la mone relatada revela la despera de la jenitores ci ia desira lo.
Xina ia fini sua politica de sola un enfante en la anio pasada. On ia judi ce lo ia contribui a la nonecuilibra de jenero en Xina. Ma ofisiores xines de cuantia de popla ia averti en esta semana ce la nonecuilibra -- 113 xicos per cada sentuple de xicas -- va resta per anios.
@T Arjentina afonda un barcon de pexa xines
@L aora_oji/2016/arjentina_afonda_un_barcon_de_pexa_xines
====== Arjentina afonda un barcon de pexa xines ======
16 marto 2016
La gardacosta de Arjentina dise ce lo ia xasa e afonda un barcon xines cual ia pexa nonlegal en acuas arjentina ier.
En un declara publica, la gardacosta ia clari ce un de sua propre barcones ia xuta avertinte a la Lu Yan Yuan YU 010 en cuando lo ia vade en dirije a acuas internasional.
Lo ia dise ance ce lo ia atenta prima oteni un responde par radio.
Tota 32 ecipores ia es salvada.
Xina ia espresa formal sua ansia sur la afonda.
Un portavose per la ministreria xines de esternas ia dise en un declara ce Beijing ia fa comentas formal urjente a Arjentina, esijente un investiga completa sur la aveni.
La pexa nonlegal es un problem comun en la rejion.
"A plu ca un ves, la barcon ofendente ia fa manobras desiniada per obliga un colide con la gardacosta, perilinte no sola sua propre ecipo ma ance empleadas de la gardacosta, ci on ia comanda a xuta a partes de la barcon," la declara de la gardacosta ia dise.
Esta ia aveni an si la relata de Arjentina a Xina ia deveni plu prosima en anios resente.
@T Atacas de bomba en vilas de turiste en Tai
@L aora_oji/2016/atacas_de_bomba_en_vilas_de_turiste_en_tai
====== Atacas de bomba en vilas de turiste en Tai ======
12 agosto 2016
En Tai, un serie de esplodes coordinada ia ataca vilas de turiste. Reportas ariva ancora, ma a la min cuatro persones es mor e multe otras es ferida.
Cuatro bombas ia esplode en la 24 oras pasada en la via Hua Hin. Alga esplodes ia aveni ance sur la isola Phuket oji.
No grupo ia dise ce lo ia esecuta la atacas, ma on va suspeta probable rebelores separadiste.
La esta fini de semana en Tai es longa, per onora la aniversario de nase de la rea.
La polisia ia elimina la idea de terorisme internasional, e ia dise ce lias con la rebela sude no es clar.
Ma si on trova ce rebelores ia fa esta atacas, esta ta es un cambia major de tatica. La rebela ia dura tra 12 anios e ia mata plu ca 6000 persones, ma ia blanci nunca turistes a ante.
Hua Hin es a sirca 200 cilometres a norde de Bangkok, e la provinse Phuket es en la sude estrema de la pais. Ambos areas es multe popular con turistes.
La eleje de ataca Hua Hin pare simbolin, car la site es conoseda como reial e como la abitada favoreda de la re estra Bangkok.
Du esplodes en la sera pasada ia colpa un area de bares popular con turistes, e stranjeres ia es entre la feridas. Du plu esplodes a esta matina ia colpa la tore de orolojo en la sentro de vila.
Atacas peti e improvisada con bombas ia aveni comun en Tai a tempos de turba political, ma tal atacas ia deveni estrema rara pos cuando la militaria ia prende la potia par colpa de stato en maio 2014.
La ministro xef, Prayut Chan-o-cha, ia dise: "La bombas es un atenta de crea caos e confusa. Nos no ta debe fa ce persones panica plu."
Esta ia aveni a mera un pico de dias ante la aniversario prima de la bomba a la santeria Erawan en Bangkok cual ia mata 20 persones.
En la semana pasada, tais ia vota en un referendo cual ia aproba un constitui nova per forti la influe political de la militaria per multe anios.
@T Bales jigante de neva en Sibir
@L aora_oji/2016/bales_jigante_de_neva_en_sibir
====== Bales jigante de neva en Sibir ======
6 novembre 2016
En Sibir norde-ueste, persones en la Golfo Ob ia vide un vista strana e bela cuando miles de bales de neva ia formi natural sur la plaia.
Un estende de 18 cilometres de costa ia deveni covreda par sferas jelada. La formas varia de la grandia de un bal de tenis asta cuasi un metre de diametre.
Los resulta de un prosede ambiental rara en cual pesos peti de jelo formi, deveni rolada par venta e acua, e fini como bales jigante.
Abitores de la vileta Nyda, a la Penisola Yamal direta a norde de la Sirculo Artica, dise ce los ia vide nunca un cosa comparable.
La Instituida de Rexerca Artica e Antartica ia esplica: "Normal, on comensa con un fenomeno natural prima: jelo partal dejelada. A pos, on ave un combina de la efetos de la venta, la forma de la tereno costal, e la state de temperatur e venta. Lo pote es un combina tan orijinal ce sua resulta es la formi de bales como estas."
On ia vide un fenomeno simil en la Golfo de Suomi en desembre 2014, e sur Lago Michigan en desembre 2015.
Imajes de la bales ia encanta rusces enlinia. Un bromor ia comenta: "Pronto la penisola va es invadeda par nevosauros bebe!"
@T Barain desitadani un eglesor xia
@L aora_oji/2016/barain_desitadani_un_eglesor_xia
====== Barain desitadani un eglesor xia ======
21 junio 2016
La xef de la Gardores Revolual de Iran ia sujesta ce un resiste armada ta pote aveni en Barain, un pais governada par muslimes suni, pos cuando on ia sutrae la sitadania de la eglesor xia major.
Generalo Qasem Soleimani ia dise ce la ata par Bahrain contra xec Isa Qassim ta pote "ensende la rejion".
Barain ia acusa la eglesor de usa sua autoria per "servi interesas stranjer", promovente "setalisme e violentia".
Miles de protestores ia asembla prosima a sua casa. Los ia canta sloganes denunsiante Re Hamad bin Isa al-Khalifa e la governa. La ministreria de internas ia avisa contra protestas.
En un declara publicida par Fars, un ajenteria semiofisial de novas, Soleimani ia dise: "La al-Khalifas [la renores de Barain] sabe serta ce sua ataca conta xec Isa Qassim es un linia roja, e ce traversa lo ta ensende Barain e la rejion intera, e lo ta lasa a persones no otra posible ca fa un resiste armada."
Plu temprana, la ministreria de esternas irani ia critica ance la ata.
La eglesor ave la titulo relijial aiatola. El ia suporta protestas gidada par la comunia xia, la majoria, per plu diretos sivil e political.
En anunsia la deside de sutrae la sitadania baraini de Qassim, la ministreria de internas ia dise ce la eglesor "ia adota teocratia e ia asentua la fida asoluta a la eglesa".
Lo ia acusa el de es en contata continuante con "organizas e partitos cual es enemis de la rena".
La departe de esternas de la SUA ia descrive se como "alarmada" par la deside, ajuntante ce lo es "nonconsensa de atestas credable" per suporta la sutrae la sitadania.
La developa aveni a mera dias pos la suspende par la governa baraini de la grupo xef de oposores xia, la Sosia Muslim Nasional al-Wefaq, cluinte sua ofisias e comandante ce on jela sua ativas finansial.
La xef political de al-Wefaq, xec Ali Salman, un eglesor xia, es en prison. El ia es condenada en 2015, e on ia estende resente sua periodo de prisoni a nove anios.
Un mesaje diplomata de la SUA, publicida par WikiLeaks, ia descrive xec Isa Qassim como la xef spirital de al-Wefaq. On regarda el ance como la xef spirital de la comunia xia plu vasta de Barain.
La mesaje ia dise ce la eglesor ia studia en Qom, un site irani, en la desenio de 1990, e ce el ia spende ance tempo en la site Najaf, un sentro de eruditia xia en Iran.
@T Barat considera envia tigres a otra paises
@L aora_oji/2016/barat_considera_envia_tigres_a_otra_paises
====== Barat considera envia tigres a otra paises ======
15 april 2016
On va reloca cisa tigres barati a Camputxa como parte de un projeta per crese la popla global de esta animales.
La deside de reloca los ia es prinsipal acordada a un consenta ministral en Delhi de des-tre nasiones asian do tigres abita.
La animales va es moveda de paises do los flori, a nasiones do los es cuasi estinguida.
La cuantia estimada de tigres savaje en la mundo ia crese resente a la ves prima en un sentenio. On estima ce la cuantia global de tigres es aora cuasi 3900, an si en 2010 lo ia es sola 3200. Barat ave plu ca la dui, con 2226.
Un campania internasional espera dupli la cuantia de tigres ante la fini de 2022.
Estra tigres barati, lo es posible ce tigres sibirsce de Rusia va es relocada a Cazacstan, do no gatos grande resta plu.
Rajesh Gopal, la secretor jeneral de la Foro Global de Tigre, un organiza intergovernal instituida per salva tigres de estingui, ia comenta: "Relocas va aveni pos la prepara nesesada de abitadas e la oteni de spesies sufisinte de preda per tigres."
La ministro barati de ambiente, Prakash Javadekar, ia dise ce sua governa es "preparada per coopera con tota paises" per conserva tigres.
Cisa tigres va es relocada ance a interna de Barat. Per esemplo, la parce nasional Corbett conteni 260 tigres, a densia de 20 per sento cilometres cuadrida, ma en la parce Rajaji, relativa prosima, on trova sola du o tre tigres fema.
@T Berlusconi vende AC Milan
@L aora_oji/2016/berlusconi_vende_ac_milan
====== Berlusconi vende AC Milan ======
6 julio 2016
Silvio Berlusconi, ministro xef pasada de Italia, dise ce el ia vende la club de futbal AC Milan a un asosia xines.
Berlusconi, ci posese esta ecipo de Serie A, ia fa la comenta a jornalistes local ier.
El ia dise ce la asosia va paia a la min 400 milion euros en la du anios seguente, cual va valua la club a cisa asta 750 milion euros, incluinte detas.
"Milano ia embarca aora sur esta via en dirije a Xina," el ia dise, sin revela la identia de la comprores. Ma otra reportas, sitante sua propre fontes, ia indica ce on prepara ancora la detalias de la acorda.
Berlusconi ave 79 anios. El ia servi como ministro xef a cuatro veses ante deveni condenada sur frodas impostal e sobornas.
On reporta ce Fininvest, la compania teninte de sua familia, ia comensa negosias privata con la grupo de investores xines en maio. La grupo vole compra 80% de la club ante emprende ultima ance la resta.
La vende ta pote an causa ce la club deveni listada en Xina.
Associazione Calcio Milan es un de la clubes de futbal la plu susedosa de Europa, ma lo xerca capital nova per pote opera plu capas contra otra competores bon finansiada. Lo ia reporta un perde de 93,5 milion euros en 2015.
Berlusconi ia prosimi a vende un majoria de AC Milan a un comersior tai en la anio pasada, ma ia cambia sua deside.
Multe ecipos european es aora poseseda o finansiada par investores o companias rica de Asia. En la mense pasada, Inter Milano, un ecipo local competente, ia es vendeda a Suning Commerce Group, un compania xines cual vende eletronicales.
E en la mesma mense, Xia Jiantong, un comersior xines conoseda como Tony Xia, ia completi sua compra de Aston Villa, club engles, per 76 milion paundes (cuasi 100 milion dolares).
Futbal es un sporte popular en Xina, e la governa ia promete developa la industria local sur lo per deveni un suprapotiosa de mundo.
@T Bernie Sanders continua sua campania presidental
@L aora_oji/2016/bernie_sanders_continua_sua_campania_presidental
====== Bernie Sanders continua sua campania presidental ======
9 junio 2016
En la SUA, la presa crese contra Bernie Sanders, senator de Vermont, afin el ta abandona sua aspira per deveni la nominada presidental de la Partito Democrata.
On regarda aora Hillary Clinton como la nominada nondeclarada, pos cuando el ia gania cuatro de ses preelejes a martedi.
Sanders ave aora cuasi no posible de deveni la nominada, ma el ia promete continua sua campania. El va encontra oji presidente Obama.
Democratas ia recomenda forte ce el junta se a la campania de Clinton per aida vinse Donald Trump, la nominada nondeclarada de la Partito Republiciste.
La consenta con Obama a la Casa Blanca ia es solisitada par Sanders. El va fa ance oji un asembla en Washington, ante la preeleje par la capital a 14 junio.
Sanders ia gania 22 preelejes de stato e asemblas "caucus", ma ia fali afeta multe la vantaje de Clinton, an si Sanders ia fa un campania impresante cual ia influe la debate Democrata e ia interesa multe votores joven.
En cuando on ia conta la votas en California, Sanders ia dise: "Me es alga bon a aritmetica, e me sabe ce la batalia ante nos es un batalia multe multe presipe, ma nos va continua batalia per cada vota e cada delegada cual nos pote oteni."
A la comensa de la preeleje de California, Sanders ia dise ce el espera atrae la supradelegadas, ci no nesesa dise ci los suporta asta la confere de la partito en julio. Ma multe comentores political ia duta ce esta va aveni.
Sua campania redui sua cuantia de empleadas par sirca un dui ante la preeleje en la stato capital.
@T Bin Laden ia lega $29m per jihad
@L aora_oji/2016/bin_laden_ia_lega_29m_per_jihad
====== Bin Laden ia lega $29m per jihad ======
2 marto 2016
Osama bin Laden, la xef pasada de al-Qaida, ia lasa un ricia personal de sirca $29 milion pos sua mori en un ataca en 2011.
Esta es indicada par sua atesta final, cual es un de multe documentos saisida en la ataca par la SUA en Abbotabad en Pacistan, e aora publicida.
Bin Laden ia recomenda ce sua familia ta "obedi mea vole" e ta spende sua erita sur "jihad, per la benefica de Alah".
El ia descrive la mone como esente en Sudan, ma lo no es clar esce lo ia es mone fisical o ativas. Bin Laden ia abita en Sudan tra sinco anios en la desenio de 1990, como un invitada de la governa sudani.
On no sabe esce cualce de la mone ia susede ateni sua eritores.
Otra leteras atribuida a el e ier publicida mostra ce Bin Laden ia recomenda ce americanes combate la cambia "desastrosa" de clima per "salva umanas", ia teme ce un dentiste ia asconde un aparato de locali en la dente de sua sposa, e ia projeta un campania jornaliste major per la aniversario des de la atacas de 11 setembre en la SUA.
El ia presenta ance sua evalua de la progresa de la "gera contra teror" par la Ueste e de la campania militar de la SUA en Afganistan.
"Los ia pensa ce la gera va es fasil e ce los va reali sua ojetos en alga dias o alga semanas," el ia scrive. "Nos nesesa es pasiente per un plu pico de tempo. Con pasientia, on vinse!"
Bin Laden ia es matada par fortes spesial de la SUA en maio 2011 en un ataca a sua compleso en Pacistan. De pos, la grupo es gidada par Ayman al-Zawahiri, sua viscomandor pasada.
@T Bolivia abri un scola antiimperaliste
@L aora_oji/2016/bolivia_abri_un_scola_antiimperaliste
====== Bolivia abri un scola antiimperaliste ======
18 agosto 2016
Evo Morales, presidente de Bolivia, ia abri un academia nova de defende militar. El dise ce lo va ofre cursos per oposa la influe de la Statos Unida en la mundo developante.
La intendes inclui la studia de imperalisme e sua segues.
Morales ia comenta ce la academia va funsiona contra la Scola de la Americas en la stato Georgia, cual ia instrui aliadas de la SUA en la Gera Fria. Alga de sua graduadas ia fa maltratas major de diretos umana.
La academia nova es situada en la site Santa Cruz en la este de la pais, e va comensa par aseta 100 enscrivedas.
Parlante a la rituo inisiante, Reymi Ferreira, ministro de defende, ia dise: "La Scola de Antiimperalisme es un scola cual desira conserva la vive, no como la Scola de la Americas, cual ia lava la serebros de ofisiores militar afin los crede ce la enemi es nosa popla."
El ia dise ce la sentro va aida soldatos a identifia menasas major a la autoria nasional de la pais.
De pos sua indui en 2005, la relata de Morales con la SUA ia es multe tensada a veses.
En 2008, el ia esclui la ambasador SUA e la ajenteria SUA contra drogas. Plu resente, el ia acusa la SUA de coraji "colpas congresal de stato", como la prosede prosiminte de Dilma Rousseff, la presidente suspendeda, en Brasil.
El ia acusa ance la SUA de promove terorisme global par intervenis militar, sitante la crese de la grupo Daex como esemplo.
En America Latina, alga ofisiores instruida a la Scola de la Americas ia fa plu tarda alga de la violes la plu grave de diretos umana en la rejion.
Estas inclui du de la ofisiores militar arjentina ci ia gida la junta en la tarda de la desenio de 1970. Organizas per diretos umana dise ce acel governa ia mata sirca 30 mil oposores sinistriste.
Ance Jeneral Efraín Ríos Montt, presidente pasada de Guatemala, ia es instruida a la Scola de la Americas en la desenio de 1950. Du Comisiones de Veria ia documenti crimines vasta contra diretos umana par sua governa, incluinte violes sesal, torturas, esecutas, e atas jenosidal contra la popla, incluinte la popla nativa, par un campania de tera ardeda.
En 2000, on ia dona un nom formal nova a la academia a Fort Benning en Georgia: la Instituida de la Emisfera Ueste per Coopera sur Securia.
@T Bombas bruta en New York
@L aora_oji/2016/bombas_bruta_en_new_york
====== Bombas bruta en New York ======
19 setembre 2016
Un bomba detonada a saturdi en New York, e un otra aparato trovada en la prosimia, ia es casolas de presa plenida con fratos, simil a la bombas usada a la maraton de Boston en 2013.
Ambos ia ave telefonetas e lampetas de natal como detonadores tempora.
La esplode en la parte Chelsea de Manhattan ia feri 29 peresones.
La FBI ia dise ce lo ia para "un veculo de interesa" en Brooklyn ier, ma ia aresta nun. Lo ia teni sinco persones per interoga.
La bomba en Manhattan ia es segueda par un esplode de un bomba tubal sur la curso de un corsa carital en New Jersey a soldi.
Investigores esamina ance un aparato suspetosa cual on ia trova prosima a un stasion de ferovia en Elizabeth, New Jersey.
Andrew Cuomo, governor de New York, ia dise ce un aparato du cual on ia descovre en la site New York en la fini de semana ia pare es "simil en desinia" a lo cual ia esplode.
On ia trova lo a cuatro blocos de la loca de la esplode, e ia prende lo a via per destrui lo en manera controlada. Nun ia es ferida.
Mil plu securiores es aora posada a la sentros transportal de New York.
Autoriosas ia descrive la bombis en New York e New Jersey, como ance un ataca de coteli en Minnesota, como atas de teror. Los atenta comprende esce cualce lias esiste entre los. Ma los dise ce la bombas ia es tan bruta ce lo no es probable ce un grupo internasional ia crea los.
La organiza Daex ia dise ce la atacor suspetada en Minnesota ia es un de la "soldatos" de la grupo, an si lo no es clar esce lo ia es envolveda en scema la ataca.
La esplode en Chelsea ia aveni a sirca 21:00 de ora local. Sua fortia ia destrui fenetras e ia es oiable a distantia de alga blocos.
Alga reportas dise ce lo ia esplode en un caxa de metal negra per utiles; otras dise ce lo ia es en un baldon.
Chelsea es entre la distritos la plu modosa de Manhattan, e sua bares e restorantes es comun folida a finis de semana.
Bill de Blasio, la maior de New York, ia dise ce on va ave un presentia "plu grande ca sempre" de polisia en New York en la semana veninte. A martedi, presidente Obama e otra xefes de mundo va es a la Asembla Jeneral de la Nasiones Unida en la site.
@T Brasil aumenta securia ante la olimpiales
@L aora_oji/2016/brasil_aumenta_securia_ante_la_olimpiales
====== Brasil aumenta securia ante la olimpiales ======
13 julio 2016
La governa federal en Brasil dise ce lo relasa plu finansias per aumenta la securia ante la juas olimpial en Rio de Janeiro en agosto.
Leonardo Picciani, la ministro de sporte, ia dise ce la fortes armada va reseta $24 milion plu per aida los a sasia la esijes de securia.
El ia ajunta ce la militaria va comensa patrulia avenerias sportal a 24 julio. Plu ca 80 mil polisiores e soldatos va patrulia la stradas de Rio tra la intera de la juas.
La stato de Rio de Janeiro ia redui resente multe spesies de bujeta, incluinte de la polisia.
La polisia ia organiza protestas contra la paia tarda de sua salarios e la manca de nesesadas fundal como carburante de auto e paper de vason.
On reporta esta protestas como un sintom de la mal fortunas political e economial cual ia engoli Brasil en la tempo resente.
En maio, la Senato de Brasil ia suspende Dilma Rousseff, la presidente de la pais, ante inisia un prosede de acusa el sur alegas ce el ia manipula la bujeta governal ante sua campania de reeleje en 2014.
A vista economial, la statistica governal per la cuatri prima de 2016 ia mostra ce Brasil esperia sua retrosede la plu sever de 25 anios.
E la comite organizante de la juas olimpial ia debe maneja la anunsia ce alga sportores famosa -- incluinte Jason Day, campion de mundo de golf -- ia retira se de la juas par causa de la teme sur la virus de Zica.
An tal, la dirijor xef de la juas ia dise ce la ansia sur la efeto de la virus a la olimpiales ia deveni "esajerada estra proportio".
@T Brices de Lego deveni plu violente
@L aora_oji/2016/brices_de_lego_deveni_plu_violente
====== Brices de Lego deveni plu violente ======
24 maio 2016
Un studia nova dise ce la produidas de Lego deveni sempre plu violente en cuando la fabricores fa un "corsa de armas" per atrae la atende de enfantes en la eda dijital.
Rexercores de Zeland Nova dise ce brices con armas ia deveni plu comun e apare aora en 30% de pacos de Lego, refletante un tende plu jeneral en divertis per enfantes.
Lego dise ce lo usa armas sempre per un intende plu bon, como la salva de la mundo, e ce los es un parte de la developa de enfantes.
En un studia publicida par la jornal enlinia PLOS ONE, rexercores de la Universia de Canterbury ia conclui ce Lego "mostra creses major e esponente de violentia tra la tempo", con un proportio plu alta de armas aparente entre la pesos de construi e la pacos temida de Lego.
Lego ia apare sua armas prima en 1978 cuando un paco de castel ia inclui spadas, axas, e lansias.
"La produidas de la compania Lego no es tan inosente como a un ves pasada," Christoph Bartneck, ia rexercor xef, ia comenta. "Lo pare ce la violentia en la produidas de Lego ia suprapasa mera la rici de juas."
Un analise de catalogas de Lego de 1973 asta 2015 ia trova ce la situas imajida ia deveni ance plu violente, tal ce 40% de tota pajes conteni aora alga spesie de violentia como fusili o condui menasante.
La studia ia dise: "Per catura la atende de sua clientes, fabricores de juas es simil fisada en un corsa de armas metafor per produidas nova e stimulante."
Un portavose per Lego ia responde ce la produidas de la compania promove ativias diversa de jua, como construi, fantasia, e disputa. "Como en otra spesies de jua, la jua de disputa es un parte natural de la developa de un enfante. Nos atenta sempre usa comicia cuando posible, car esta aida diminui la grado de violentia."
En 2003--4, ego ia bancaroti cuasi, cuando juas eletronical ia menasa sua futur.
La compania con base en Danmarc ia atenta reinventa se par abrasa la cultur popular, vendente pacos con temas liada a francisias major de sinema, como Star Wars, Batman, e Harry Potter.
La resulta ia es des-un anios de crese en segue. Plu temprana en esta anio, la compania ia anunsia ce sua profita neta en 2015 ia alti par 31% a $1,4 mil milion.
@T Britan en Bruxelles pos Brexit
@L aora_oji/2016/britan_en_bruxelles_pos_brexit
====== Britan en Bruxelles pos Brexit ======
28 junio 2016
La ministro xef de la Rena Unida, David Cameron, va consenta oji con otra xefes de la Uni European a la ves prima pos la deside par la pais per sorti.
A un confere alta de la UE en Bruxelles, el va discute la implicas de la vota per Brexit.
La xefes deutx, franses, e italian ia dise ier ce no discutes "formal o nonformal" pote aveni sur la parti de Britan a esta paso.
Entretempo, la ministro de finansia, George Osborne, ia esclui se de deveni la ministro xef nova de la Rena Unida.
Ma la ministro de sania, Jeremy Hunt, ci considera aspira la posto, ia dise ce la pais debe resta en la mercato comun de la Uni. El ia proposa la idea ce la RU ta pote reteni sua asede completa a la mercato, con la beneficas comersial de esta, ma ta pote negosia un compromete sur la regulas de la move libre de persones.
En cuando Europa atenta comprende la deside par Britan, Cameron va es presente con otra xefes UE a un come laborante de sera, pos consentas con Donald Tusk, la presidente de la Consilio European, e Jean-Claude Juncker, la presidente de la Comision European.
El no va es presente a discutes entre la xefes de la otra 27 statos membros de la Uni a la come de matina de mercurdi.
Cameron ia anunsia sua resinia pos cuando la referendo de la semana pasada ia oposa el. El ia campania afin la pais resta en la Uni, ma ia insiste ce on debe aseta la resulta de la vota.
Parlante ier, el ia dise ce on institui aora un departe spesial de governa per fa la preparas inisial per sorti de la Uni European.
An tal, el ia dise ance ce sola sua seguor -- ci on va eleje ante la comensa de setembre -- va deside la modo de continua e la tempo esata de la avisa formal de la intende de sorti. La avisa va invoca Article 50 de la Trata de Lisbon.
Su la regulas de la UE, cuando esta aveni, la Rena Unida va ave du anios per negosia la constrinjes de sua divorsa, estra si tota la 27 membros restante ta acorda estende la tempo. La pais va nesesa ance negosia sua relata futur de comersia con la UE.
Angela Merkel, la canselor de Deutxland, ia dise ce on debe permete alga tempo per la prepara de un governa nova de la RU, ma el e du otra xefes UE ia indica ance ce on no va pote pospone la prosede sin fini.
François Hollande, la presidente de Frans, e Matteo Renzi, la ministro xef de Italia, ia asentua ce on debe trata la parti de la Rena Unida con rapidia masima per consentra sur la otra defias a la Uni, como la batalia contra terorisme e la forti de fronteras.
Ance la Parlamento European va fa oji un consenta de crise per debate la situa pos la vota per Brexit, incluinte un proposa nonobligante cual recomenda la "ativi pronto" de Article 50.
Membros de la parlamento, ci va debe validi la acorda final con la Rena Unida, ia dise ce los desira es "completa envolveda" en la prosede, e ce la retira nesesa es "rapida e coerente" per proteje la interesas de la projeta european plu vasta.
Pos du dias de cades subita de la paund en asionerias e un tumulta political en Britan, la nonsertia crese sur la implicas de Brexit e la natur esata de la autoria cual la seguor de Cameron va reseta.
@T Britan oteni un state spesial per se en Europa
@L aora_oji/2016/britan_oteni_un_state_spesial_per_se_en_europa
====== Britan oteni un state spesial per se en Europa ======
20 febrero 2016
David Cameron, la ministro xef de la Rena Unida de Britan Grande e Er Norde, dise ce un acorda fada con otra xefes de la Uni European va dona "un state spesial" a la pais, e ce el va campania "con sua cor e spirito" per resta en la uni.
La acorda ia es atenida en la tarda de ier pos du dias de negosias en Bruxelles.
La Rena Unida reseta la potia de limita paias a alga migrores UE, per sete anios. La acorda inclui ance un cambia de constitui, tal ce Britan no resta liada a "un uni sempre plu prosima" con otra statos membros de la UE.
Ma campaniores per sorti de la uni ia descrive la acorda como "vacua", disente ce lo ofre sola "cambias multe minor".
La acorda de renegosia la parteni de la Rena Unida a la UE ia es anunsiada par Donald Tusk, la politiciste polsce ci es la presidente de la Consilio European.
Lo abri la via per un referendo en la RU sur la parteni a Europa. On ia promete ja ce un tal referendo va aveni ante la fini de 2017, ma on previde ce lo va aveni en junio de esta anio.
Puntos de la acorda inclui:
• Un "freno urjente" contra paias aidante a migrores laborante, en situas de cuantias "estracomun" de migra -- cual la Comision European reconose como aveninte en Britan aora. On debe relasa la freno pos sete anios, sin eseta.
• Reduis en paias aidante per la enfantes de migrores european ci abita estra sua pais. Estas va es aplicada a arivores nova sin pausa, e va comensa en 2020 per la 34 mil persones ci reclama ja tal paias.
• La cambia de tratas de la UE per dise abrida ce referes a la esije per xerca un uni sempre plu prosima "no pertine a la Rena Unida", con la efeto ce Britan "pote nunca es obligada a un integra political".
• La direto ce la Rena Unida pote reali "un restrinje urjente" per proteje la Site de London, per preveni ce companias brites deveni obligada a reloca se en Europa e per serti ce los no fronti "prejudi" par causa de sua situa estra la Eurozona.
Angela Merkel, la canselor deutx, ia predise ce la reformis "va provoca suporta en la Rena Unida ce la pais ta resta en la UE".
Tusk ia comenta: "Nos no ia dorsi la table de negosia. Nos ia aseta sacrifia un parte de nosa interesas per la bonia comun, per mostra nosa unia. Me crede profonda ce Britan nesesa Europa e ce Europa nesesa Britan. Ma la deside final es en la manos de la popla brites."
Pos cuando Cameron ia reporta a sua ministros en un consenta spesial de consilio a esta matina, los va pote campania libre o per o contra la parteni european en la referendo.
El ia dise ce el ia reali la reformis cual el ia desira, declarante ce los va pone la pais "en la seja de gidor" de un de la mercatos la plu grande de mundo e ce los va crea un Uni European "plu flexable".
"Nos ia proteje permanente la paund e nos direto de reteni lo," el ia ajunta, disente ce a la ves prima la UE "ia reconose ofisial ce lo ave plu ca un unia de mone".
Cameron ia dise ce el ia proteje la Rena Unida contra plu integra political en la UE: "Ta ce me espresa esta tan simple como me pote: Britan va es nunca un parte de un superstato european."
Contorninte sua caso per resta en la Europa nova, el ia dise ce "mostra nos dorso a la UE es tota no solve". El ia ajunta: "Nos debe es suspetosa sur los ci declara ce la sorti de Europa es automata un via rapida a un pais de lete e miel. La popla brites debe aora deside esce los va resta en esta Uni European reformida o parti. Esta va es un momento, unica en nos jenera, per formi la destina de nos pais."
La acorda, realida entre tota 28 statos membros de la uni, ia es fada pos cuando alga xefes ia oposa la reformis projetada par Cameron.
On ia intende orijinal conclui la negosias a un consenta de "come engles de matina" a venerdi, ma esta ia deveni un "come engles de matina tarde", alora un "come engles media", e final un "come engles de sera", a cual tempo on ia anunsia la acorda.
Nicola Sturgeon, la ministro xef de Scotland, ia dise ce lo es aora "plu importante ca sempre" ce los ci suporta la parteni continuante de Scotland a la Uni European espresa sua opina "tan forte como posible".
Euroseticas ia burla la reformis, disente ce los no va permete ce Britan bloci leges european nondesirada o redui la migra. Matthew Elliott, la dirijor xef de la campania Vota per Sorti, ia dise ce Cameron "va declara aora un vinse, ma lo es un vinse intera vacua".
@T Busores causa caos en Caracas
@L aora_oji/2016/busores_causa_caos_en_caracas
====== Busores causa caos en Caracas ======
22 setembre 2016
Busores en Caracas, la capital de Venezuela, ia paralise la site tra oto oras par bloci la stradas con sua veculos. Los protesta contra la crise economial de la pais.
Sentos de busores ia esije plu paia e proteje de crimin violente.
Multe ia dise ce los nesesa plu mone per manteni sua buses, e ia cexa ce partes reservada manca.
Entretempo, la autoriosas elejal ia deside contra fa un referendo en esta anio per deseleje cisa Nicolás Maduro, la presidente.
La deside es un problem per la oposores, ci ia recomenda forte un vota per despone el.
La comision elejal ia dise ce un referendo pote aveni en la temprana de la anio veninte si la oposores gania suscrives de cuatro milion votores en un periodo de tre dias en otobre.
La tempo de la vota es esensal. Si Maduro ta sesa preside pos 10 janero, on no ta fa elejes fresca, e la vispresidente ta emprende la posto.
On crede ce la protesta par busores ia afeta un dui de la buses en Caracas, un site de tre milion persones.
Venezuela ia fronti un nonsufisi de multe benes, incluinte comedas e medisin. La busores dise ce numaticos, pilas de auto, e petrolio de motor manca.
Sua portavose ia dise ce los va recomensa sua protesta oji si la governa no responde a sua cexas.
@T Carlsen resta la campion mundal de xace
@L aora_oji/2016/carlsen_resta_la_campion_mundal_de_xace
====== Carlsen resta la campion mundal de xace ======
1 desembre 2016
Magnus Carlsen de Noria ia gania la Torneo Mundal de Xace a la ves tre en segue.
El ia vinse sua defior, Sergey Karjakin de Rusia, pos tre semanas de jua e un serie de maxes desidente en New York.
Karjakin ia es egal a Carlsen en 12 rondas ma ia sufri un defeta en la fase final, composada de cuatro juas rapida.
Organizores ia dise ce la torneo ia es segueda par sirca ses milion fanes de xace tra la mundo.
Sentos de oservores ia paia entre $100 e $500 per regarda la maxes a un mercato pasada de pex en Manhattan. Los ia es separada de la du mestres grande par vitro acustical isolida.
Pos sua vinse, la suportores de Carlsen ia saluta el par aclama e canta "Bon aniversario" per onora la aniversario de sua nase.
La premio de $1,1 milion es divideda entre la du juores, tal ce la vinsor prende 60%.
@T Casa abrida en mascitas franses
@L aora_oji/2016/casa_abrida_en_mascitas_franses
====== Casa abrida en mascitas franses ======
10 janero 2016
Mascitas franses ia invita nonmuslimes a entra, per atenta boni la comprende de islam en Frans.
En esta fini de semana de "casa abrida", on ofre a visitores bevidas calda, pastas dulse, mostras de caligrafia, e discutes.
La corpo muslim xef de la pais, la Consilio Franses de la Fida Muslim (CFFM), vole crea un distantia entre la varia normal de islam e la atacas jihadiste resente.
La stratejia segue a un anio pos la matas a Charlie Hebdo en Paris. Fusilores jihadiste ia mata 17 persones a locas diversa en la capital, incluinte la ofisias de la jornal satira Charlie Hebdo e un supramercato caxer.
Onorante la aniversario de la matas, presidente François Hollande ia desveli ier un placa de tribui a un de los ci ia mori, la polisior Clarissa Jean-Philippe.
Frans ia recorda ance la cuatro ostajes iudi ci ia mori a la supramercato.
La pais es ancora en un state de crise pos la atacas en Paris en novembre, fada par fusilores liada con la grupo Daex, cual ia mata 130 persones.
Sentos de mascitas franses partisipa en esta abri de casa, cual on descrive como "un tas de te fratin".
Anouar Kbibech, la presidente de la CFFM ia dise: "La intende es crea un spasio do persones pote asembla e encontra adorores muslim normal e tota de nosa otra sitadanes."
El ia clari ce la CFFM desira usa la aniversario de la atacas a Charlie Hebdo per "asentua la valuas real de islam, per coreti la clixes sur relatas con violentia e terorisme".
@T Cenia ajusta sua lege antidope per partisipa en la Olimpiales
@L aora_oji/2016/cenia_ajusta_sua_lege_antidope_per_partisipa_en_la_olimpiales
====== Cenia ajusta sua lege antidope per partisipa en la Olimpiales ======
27 maio 2016
La parlamento de Cenia ia aproba cambias a un lege antidope, esperante evita un proibi contra la partisipa de sua atletas en la Juas Olimpial en Rio.
Medios nova contra drogas de dope ia es asetada en la lege en la mense pasada, ma la Ajenteria Mundal Antidope (WADA) ia dise ce estas no sasia la normas internasional.
On ia retira parlamentores a un consenta spesial ier per aseta la cambias.
Si Cenia ta es escluida de la Juas, alga de la atletas xef de mundo ta ave no posible de gania medalias.
A la Concursos Mundal de Atletisme Lejera en Beijing, la pais ia gania sete medalias de oro, fininte a la apico de la table de medalias.
Chris Wamalwa, un parlamentor nongovernante, ia dise a la parlamento: "Sporte es multe esensal a esta pais, e la atletas ia ajunta multe valua en esta pais en relata con mercatisme."
La lege nova debe es aprobada par la Senato ante cuando presidente Uhuru Kenyatta va suscrive lo.
WADA ia esije cambias pos un serie de scandales de dope envolvente atletas cenian. De pos 2011, plu ca 40 de sua atletas ia fali en probas de droga.
De la comensa de esta anio, on ia suspende 18 atletas cenian per dope. La plu conoseda es Rita Jeptoo, ci ia gania la maratones de Boston e Chicago.
En novembre pasada, Dick Pound, un presidente pasada de WADA, ia comenta ce "lo es vera clar ce on usa multe drogas per alti la capasia" en Cenia.
Cenia ia introdui leges criminal nova en novembre, como parte de un projeta legal contra dope. Lo ia crea un autoriosa nasional per proba, e ia fa ce la dope es un ofende con puni de prison.
On ia suposa jeneral ce esta medios va sasia WADA, ma plu tarda, la ajenteria la indica "noncoeres" en la lege e ia declara ce Cenia es "nonseguente" a 12 maio.
@T Cenia perde sua eletrica par causa de un simia
@L aora_oji/2016/cenia_perde_sua_eletrica_par_causa_de_un_simia
====== Cenia perde sua eletrica par causa de un simia ======
8 junio 2016
Un simia ia causa un rompe de eletrica tra la intera de Cenia cuando lo ia cade a sur un aparato esensal.
La simia ia cade ier sur un mutador en la sentro idroeletrical de la compania KenGen.
La mutador ia descomuta, con resulta ce 180 megavates de enerjia ia es perdeda e ce la pais intera ia es privada de sua furni de eletrica.
On ia restora la furni a cuasi cuatro oras plu tarda.
La simia ia survive sua aventura, e lo es aora curada par la Servi de la Vive Savaje de Cenia.
En un declara, la compania ia esplica: "La complesos de KenGen es securida par sercas eletricida cual impedi animales sacante. Nos regrete esta aveni isolida, e la compania investiga modos de aumenta plu la securia a tota nosa complesos de eletrica."
La pajeria de la jornal Business Daily Africa ("Comersia Dial de Africa") ia reporta ce companias ia sufri la plu par esta perde de eletrica. Multe ia instala ja jeneradores como resulta de rompes presedente.
@T Clinton critica la FBI sur un investiga nova de sua epostas
@L aora_oji/2016/clinton_critica_la_fbi_sur_un_investiga_nova_de_sua_epostas
====== Clinton critica la FBI sur un investiga nova de sua epostas ======
30 otobre 2016
En la SUA, la ecipo de la campania presidental de Hillary Clinton ia ataca la FBI sur un deside de informa la legores sur un investiga nova de la usa de eposta par la aspiror democrata.
James Comey, la dirijor de la FBI, ia informa la Congresa sur la deside en un letera a venerdi, a sola 11 dias ante la vota.
Clinton ia informa sua suportores ce la deside es "sin presedente" e "profonda disturbante". Ma Donald Trump, sua oposor republiciste, ia loda la deside.
En sua letera a la Congresa, Comey ia dise ce la FBI ia descovre la esiste de plu epostas cual es cisa "pertinente" a sua investiga presedente sur la usa de un servador privata par la aspiror democrata cuando el ia es la ministro de esternas en la governa de Obama.
Comey ia defende la deside, insistente ce nonpublici ta es "malgidante" e ta risca ance es "malcomprendeda", car la FBI no sabe esce la epostas nova trovada es importante.
Parlante ier a sua suportores en Florida, Clinton ia dise: "Lo no es mera strana, lo es sin presedente. E lo es profonda disturbante, car votores merita reseta fatos plen e completa."
Clinton ia dise ce el es serta ce la investiga no va cambia la judi orijinal par la FBI en julio, cual ia critica el ma ia desculpa el de atas nonlegal.
Comey es forte criticada par suportores de Clinton -- e ance, seguente la jornal New York Times, par ofisiores de la departe de justia -- per sua deside de publici la informa a tempo tan prosima a la dia de vota.
En un nota, el ia reconose ce "comun nos no informa la Congresa sur investigas corente". Ma el ia dise ce el senti "un obliga" a fa esta, car el ia atesta ja ce la investiga par la FBI es finida.
Trump ia descrive la tema como la scandal political la plu grande en la SUA pos Watergate, cual ia despone presidente Richard Nixon.
A un asembla en Colorado ier, el ia dise: "Sua ata criminal ia es voleda, desideda, intendeda, e dirijeda. Hillary ia institui un servador nonlegal con la intende evidente de scermi sua atas nonlegal de revela e esposa publica."
La FBI ia trova ja ce Clinton ia teni informas secreta en un servador privata de eposta.
En julio, Comey ia dise ce la prosede de tal documentos par Clinton en sua periodo como ministro de esternas ia es "estrema nonatendosa", ma ia desculpa el de condui criminal.
La epostas la plu resente ia es descovreda en un investiga separada sur la sposo distantida de Huma Abedin, la aidor xef de Clinton.
On ia saisi aparatos parteninte a el e a Anthony Weiner, un congresor major pasada, en un investiga sur esce el ia envia eposta sesal a un xica de 15 anios en Carolina Norde.
Investigores esamina la documentos per vide esce los conteni informas secreta.
La servador privata de Clinton ia es revelada en marto 2015 par New York Times. El no ia espresa prima sua regrete, disente ce la razona xef per sua adirije "hdr22@clintonemail.com" ia es "oportunia".
Pronto a pos, el ia demanda per es pardonada, e ia espresa sua regrete a votores a alga veses.
@T Clinton descrive Trump como antisemita
@L aora_oji/2016/clinton_descrive_trump_como_antisemita
====== Clinton descrive Trump como antisemita ======
5 julio 2016
En la SUA, Hillary Clinton, la aspiror presidental de la partito democrata, ia dise ce un tuita par sua oposor Donald Trump, conteninte un stela de ses puntos, es "evidente antisemita".
La tuita ia inclui un forma simil a la stela de David sur un fondo de multe biletas de mone, con testo descrivente Clinton como la "aspiror la plu frodante de istoria!"
Plu tarda, on ia sutrae la tuita e reenvia lo con la slogan contenida en un sirculo.
Trump ia dise ce jornalistes es "nononesta" en descrive la forma como la stela de David, un simbol de iudisme.
On reporta ce la imaje ia apare prima en un mesajeria conoseda per antisemitisme e supremia blanca.
La ecipo campaniante de Clinton ia dise: "La usa par Donald Trump de un imaje evidente antisemita de pajerias raziste per promove sua campania ta es sufisinte turbante. Ma la fato ce lo es un esemplo de un serie repetente debe furni un causa major de ansia a votores."
Trump ia retalia en un declara, descrivente la forma como "un stela fundal, comun usada par xerifes", e disente ce acusas de antisemitisme es "riable". El ia acusa Clinton de atenta redirije la atende a via de un consenta entre la sposo de Clinton e la avocato jeneral.
La ecipo de Trump ia nega ce la imaje ia es prendeda de un pajeria antisemita.
La stela de David apare sur la bandera israeli, e ia es usada par la nazis per identifia persones iudi.
A ante, Trump ia es esaminada cuando el ia reposta comentas fada par grupos supremiste en redes sosial.
Plu temprana en esta anio, on ia critica el cuando el ia fali nega direta sua suporta per David Duke, un xef de la Ku Klux Klan, un organiza de supremia blanca, ci ia declara sua aproba per Trump.
@T Coleria a la esecuta de un eglesor xia
@L aora_oji/2016/coleria_a_la_esecuta_de_un_eglesor_xia
====== Coleria a la esecuta de un eglesor xia ======
3 janero 2016
La esecuta par Arabia Saudi de un eglesor xia major, xec Nimr al-Nimr, ia provoca coleria e protestas en comunias xia tra acel area.
La condena ia es gidada par Iran, xia renada, e la oposor local xef de Arabia Saudi, suni renada.
Protestas ia aveni en la Provinse Este de Arabia Saudi, en Barain, e en alga otra paises.
Nimr mesma ia suporta protestas coletiva en la provinse en 2011.
El ia es un eglesor franca ci ia espresa la sentis de los en la minoria xia de Arabia Saudi ci senti marjinalida e prejudida. El ia es entre 47 persones esecutada ier, pos cuando on ia judi el como culpable sur ofendes teroriste.
Ofisiores irani ia es forte en sua condena. La ministreria de esternas ia dise ce la rena suni va paia un preso alta per sua ata, e lo ia clama la visambasador saudi en Tehran en protesta.
A sua turno, Arabia Saudi ia clama la ambasador irani e "ia dona a el un nota de protesta con parolas forte sur la declaras atacosa par Iran".
La pajeria de la gidor suprema irani, aiatola Khamenei, ia posta un imaje comparante la esecuta a la atas de la grupo Daex.
Como la potia xia de la area, Iran ave un interesa grande en la relatas de minorias xia en Asia sude-ueste, tal ce lo ia es nonevitable ce la du paises va desacorda sur la trata de xec Nimr.
Ma un de la consernas xef de la saudis es lo cual los regarda como la influe cresente de Iran en locas como Suria e Irac.
@T Colombia saisi un cuantia recordo de cocaina
@L aora_oji/2016/colombia_saisi_un_cuantia_recordo_de_cocaina
====== Colombia saisi un cuantia recordo de cocaina ======
16 maio 2016
La polisia en Colombia dise ce los ia saisi un cuantia drogas nonlegal la plu grande de sua istoria -- cuasi oto tones de cocaina.
La drogas ia es ascondeda en un cultiveria de bananas prosima a Turbo, un vila costal en la norde-ueste de la pais.
La drogas ia parteni a Clan Usuga, un gang de criminores. On ia aresta tre suspetadas, ma tre otras ia evade.
Cuasi 1,5 tones ia es envolveda "e preparada per vade a la mercato esportal", seguente Luis Carlos Villegas, la ministro de defende.
Esta ia es la catura de cocaina la plu grande sur teritorio colombian, an si cisa saisis pico plu grande ia aveni a mar.
La ocupa xef de Clan Usuga es la contrabanda de drogas, ma on ia acusa lo ance de estorse, mina nonlegal, desapares forsada, e omiside.
La polisia colombian estima ce la gang ave sirca 2000 membros ativa. En la sinco anios pasada, la fortes de securia ia catura 6700 membros.
Plu temprana en esta mense, la governa de la pais ia dise ce lo va inisia atacas airal contra ganges ci contrabanda drogas o fa minas nonlegal.
La stratejia nova foca a tre ganges -- Clan Usuga, Los Pelusos e Los Puntilleros.
@T Colpas de lampo en Europa
@L aora_oji/2016/colpas_de_lampo_en_europa
====== Colpas de lampo en Europa ======
29 maio 2016
En tempestas de estate, colpas de lampo en alga paises european ia mata un om e ia causa feris grave.
La om ia mori en Polsca sude. El ia es colpada par lampo cuando el ia es desendente un monte.
Tre persones ia es grave ferida a un max de futbal joven en Deutxland.
En Parc Monceau en Paris, un selebra de aniversario de nase ia es colpada, e 11 persones ia es ferida. Oto de los es enfantes de sirca nove anios, e ses es en un state grave.
Lampo ia colpa la parce cuando la grupo ia xerca refuja su un arbor.
Un pompor, Pascal Gremillot, ia es acaso prosima, e ia pote rapida dona aida prima e masajes de cor. Ofisiores ia dise ce la situa ta es multe plu mal si el no ta es presente.
A la max en Hoppstädten en la sude-ueste de Deutxland, la arbitror ia es un de tre adultes ci ia sufri feris grave. El ia es direta colpada par lampo, sua cor ia para, e on ia move el a ospital par elicotor.
Un om du ia es ance transportada a ospital par aira, e un otra ia es ospitalida par ambulansia. Tota la tre es en sua desenio sinco.
Reportas inisial ia indica ce 35 persones ia es ferida a la max, ma multe ia es prendeda a ospital mera como medio preveninte.
Atestores a la max ia dise ce on ia ave no nubes oscur. La sielo ia es azul cuando la lampo ia colpa corta pos la sibila final.
Un deluvia de pluve ia para la tenis a la Internasionales de Frans, cuando la campion defendente Serena Williams ia es a punto de comensa un max contra Kristina Mladenovic.
La tempestas ia developa car un masa de aira multe calda e umida ia covre Europa norde-ueste a la mesma tempo como la aira plu alta en la atmosfera ia deveni plu fria. Esta ia destabli la atmosfera, produinte tempestas con rapidia surprendente.
Tra multe de la rejion, la temperatur ia ateni 25°C, plu ca sufisinte per provoca la nubes tempestal.
Tal tempestas crea pluve forte, graniza, e multe colpas de lampo. Los es tipal la plu intensa en la temprana de la posmedia. Los no es noncomun en la estate en Europa continental, ma la avenis de ier ia afeta un area plu vasta ca normal.
En ajunta, la fato ce los ia aveni a fini de semana, en un clima jeneral bela e calda, ia aumenta la probablia de un mal efeto a persones.
On previde plu tempestas oji per la sude e este de Deutxland, per Txesco, e per la dui ueste de Polsca.
@T Companias de infotecnolojia va reconose imajes estremiste
@L aora_oji/2016/companias_de_infotecnolojia_va_reconose_imajes_estremiste
====== Companias de infotecnolojia va reconose imajes estremiste ======
6 desembre 2016
Facebook, Microsoft, Twitter, e YouTube colabora per preveni ce on sperde imajes e videos violente e estremiste par sua locas de rede.
La cuatro companias infotecnolojial intende crea un banco de datos cual conteni "impresas de dito dijital" de la contenidas. Estas va es comparada con imajes nova postada per deteta materias violente o estremiste ante cuando on comparti lo.
Ultima, la banco de datos va es disponable a otra companias ci desira garda contra tal contenidas.
Un portavose de Twitter ia dise: "On ave no loca per materias cual promove la terorisme en nosa servis de consumor ospitada." El ia dise ance ce la stratejia es dirijeda contra imajes e videos "la plu estrema e xocante".
La banco va es poplida con caturas dijital de imajes e videos conoseda como "axis", cual es un modo normal de identifia unica fixes.
La axis de materias reconoseda como estremiste o violente va es compartida entre la cuatro companias, ci pote usa los per sutrae la mesma imajes de sua propre pajes e servis.
Si cualcun crede ce sua posta ia es noncoreta indicada como promovente grupos de teror, acel va pote apela contra la sutrae.
La portavose de Twitter ia dise ce la projeta juntada va fa ce la companias deveni plu capas de sutrae postas cual viole sua politicas sur cual cosas on pote posta e comparti.
La lia entre la cuatro aveni en cuando la Comision European recomenda ce companias SUA de infotecnolojia reata plu rapida contra parla odiosa.
Věra Jourová, la comisionor de justia de la UE, ia dise ce companias no ia reali sua declara de ses menses ante aora, en cual los ia promete reata en no plu ca 24 oras pos deveni informada sur contenidas odiosa e raziste.
El ia dise ce Bruxelles va introdui leges puninte si companias de infotecnolojia no comensa responde plu rapida.
@T Construidas colasa en Xina
@L aora_oji/2016/construidas_colasa_en_xina
====== Construidas colasa en Xina ======
11 otobre 2016
Dudes-du persones ia mori cuando un grupo de construidas abital ia colasa ier en la este de Xina.
Cuatro construidas en Wenzhou, en la provinze Zhejiang, ia es reduida a detrito.
On reporta ce la construidas ia es creada par viletanes en la desenio de 1970 e ce los ia es en un mal state.
La plu de la vitimes ia es laborores migrante ci ia lua salas barata.
Un atestor ia comenta: "Los ia perde se vive per benefica de lua barata. Lo es xocante."
On ia tira ses persones vivente de la detrito. Un de los ia es un xica joven ci ia es protejeda par la corpos de se jenitores.
@T Corea Norde fa un proba nucleal sinco
@L aora_oji/2016/corea_norde_fa_un_proba_nucleal_sinco
====== Corea Norde fa un proba nucleal sinco ======
9 setembre 2016
Corea Norde dise ce lo ia esecuta susedosa sua proba nucleal sinco. La anunsia ia es fada a alga oras pos cuando on ia deteta un aveni sismica prosima a sua loca de probas.
Corea Sude crede ce esta es la proba la plu grande par la Norde, e teme ce la pais ia fa avansas nucleal major. Park Geun-hye, la presidente de Corea Sude, ia nomi lo un ata de "autodestrui" cual mostra la "noncautia manica" de Kim Jong-un.
La SUA ia averti sur "resultas grave".
En Xina, la ministreria de esternas ia dise ce Beijing es firma oposada a la proba, e ia recomenda ce Corea Norde evita plu atas cual ta mali la situa.
La Norde ia dise ce lo ia proba un "ojiva nucleal nova developada" e ce lo es aora capas de instala un bomba nucleal sur rocetos balistical.
Estimas varia sur la cuantia de enerjia emeteda par la esplode resente. La militaria de Corea Sude ia dise ce lo es sirca 10 cilotones, sufisinte per descrive lo como la proba nucleal la plu forte par la Norde. Otra espertas dise ce indicas inisial sujesta 20 cilotones o plu.
La bomba cadeda par la SUA a Hiroxima en 1945 ia emete sirca 15 cilotones de enerjia.
Park, ci corti un visita stranjer, ia comenta ce la proba es "un defia grave" a la comunia internasional cual va "gania sola plu punis e isoli" per Corea Norde. "Tal provoca va aselera plu sua via a autodestrui," el ia dise.
La proba ia es prima detetada como un trematera de grado 5,3 a esta matina en la norde-este de Corea Norde, prosima a sua proberia suteran a Punggye-ri. Como con probas nucleal pasada, la forma de onda jenerada ia indica ce la trema no ia aveni natural.
La proba presedente, en janero, ia emete sirca 6--8 cilotones. Corea Norde ia dise ce lo ia pertine a un bomba de idrojen, usante fusa nucleal, ma multe analistes duta esta.
On ia espeta longa un proba sinco. En semanas resente, imajes de satelite ia mostra ativia aumentada a Punggye-ri. Ance, la Norde usa comun datas nasional importante per esibi sua fortia militar. Oji es sua Dia Nasional, selebrante la fundi de la rena presente.
Probable un tempo longa va pasa ante cuando on confirma nondependente la estende e manera de la proba.
Japan ia envia aviones militar per colie samples de aira per monitori radia, e Xinia ia dise ce lo oserva la cuantia de radia prosima a sua fronteras con Corea Norde.
Corea Norde es proibida par la Nasiones Unida de tota probas de tecnolojia nucleal o de misil. Ma en menses resente, lo ia lansa un serie de misiles balistical -- de cual alga ia ateni acuas japanes -- e ia menasa atacas nucleal contra sua enemis.
La Norde ia es ance colerida par un projeta par la SUA e Corea Sude de instala un sistem de defende contra misiles en la Sude, e par la eserses militar anial de la aliadas, cual es enorme e aveni ancora.
Punis internasional ia es multe fortida en responde a probas presedente de misiles e tecnolojia nucleal, ma esta ia fa poca efeto a la program de armas nucleal de Pyongyang.
@T Corea Norde lansa un roceto
@L aora_oji/2016/corea_norde_lansa_un_roceto
====== Corea Norde lansa un roceto ======
7 febrero 2016
Corea Norde ia lansa un roceto de distantia longa, sur cual oposores dise ce lo es un proba de tecnolojia proibida de misil.
Un anunsior a televisa nasional ia declara ce la pais ia susede pone un satelite en orbita.
La lansa ia es condenada par Japan, Corea Sude, e la SUA, ci ia solisita un consenta crisal de la Consilio de Securia de la Nasiones Unida en la parte plu tarda de oji.
Corea Sude dise ce lo va comensa discute con la SUA la institui de un sistem de defende par misil.
Ryu Je-Seung, un ofisior major de defende, ia comenta ce si on ta ativi la sistem THAAD -- regardada como un de la plu avansadas de mundo -- lo ta es sola per oposa la menasa de la Norde.
En un declara formal, la Comite Nasional de Developa Airospasial de Corea Norde ia dise ce Kwangmyŏngsŏng-4 ("Stela Briliante 4"), un satelite de oserva la Tera, ia entra a orbita a sirca 10 minutos pos enaira de la sentro spasial Sohae en la provinse Phyongan Norde.
Anunsiante la lansa a televisa nasional, un lejor de novas ia dise ce lo ia es comandada par la xef de pais, Kim Jong-un, e ia ajunta ce Corea Norde projeta per lansa plu satelites en futur.
On ia descrive la lansa como "la vapor fasinante de satelite de djutxe ("autodepende", la ideolojia political ofisial de Corea Norde) lasante un trasa en la sielo clar e azul en primavera de febrero a borda de la Dia de la Stela Briliante" (16 febrero, la aniversario de nase de Kim Jong-il, la padre de Kim Jong-un).
Un portavose per la Ministreria de Defende de Corea Sude ia dise ce un barcon de gera ia deteta la lansa a 09:31 (00:31 de ora global).
La lansa de roceto ia es forte condenada par la comunia internasional.
John Kerry, la ministro de esternas de la SUA, ia nomi lo "un viole evidente" de desides par la NU e ia averti sur "medios notable per culpabli" Corea Norde.
Desides par la Consilio de Securia proibi la stato de esecuta cualce probas de misil nucleal o balistical.
Xina ia dise ce lo "regrete" la atas de Corea Norde, ma ia recomenda ce "la partitos pertinente freni se de fa atas cual ta alti cisa plu la tensas sur la penisola corean".
La Norde insiste ce sua program de spasio es de natur intera siensal, ma la SUA, Corea Sude, e an la aliada Xina dise ce la lansas de roceto ave la gol de developa un misil balistical intercontinental cual ta es capas de colpa la SUA.
A 6 janero de esta anio, Corea Norde ia provoca ja critica internasional con un proba cuatro de bomba nucleal.
@T Corea Norde proba un bomba de idrojen
@L aora_oji/2016/corea_norde_proba_un_bomba_de_idrojen
====== Corea Norde proba un bomba de idrojen ======
6 janero 2016
Corea Norde dise ce lo ia susede proba un bomba miniaturida de idrogen. Si esta es vera, lo es sua proba nucleal cuatro de pos 2006.
La anunsia ia es fada pos cuando on ia deteta un trematera de grandia 5,1 en la visinia de sua loca de probas nucleal a Punggye-ri.
Esta es la ves prima a cual Corea Norde ia declara ce lo ia proba un bomba de idrojen, plu potiosa ca un bomba atomal.
Espertas internasional ia espresa duta sur la capasia nucleal de la pais.
On ia comensa suspeta ce un proba suteran ia aveni cuando la Jeometre Jeolojial SUA ia dise ce la episentro de la trema, detetada a 01:30 de ora global, ia es situada en la norde-este de la pais, a sirca 50 cilometres de la site Kilju, prosima a Punggye-ri.
Alora, en un anunsia surprendente, un presentor de novas en la televisa nasional de Corea Norde ia dise: "La proba prima de bomba de idrojen en la republica ia es esecutada con susede a 10:00 a 6 janero 2016."
Cisa dias o semanas va pasa ante cuando esaminas autonom pote confirma la declara.
En la mense pasada, Kim Jong-un, la xef de la pais, ia dise ce Pyongyang ia developa un bomba de idrojen, an si multe espertas ia es setica.
Si on confirma esta, on va conclui ce Pyongyang intende continua sua program nucleal con poca ansia sur la custas political e diplomata grande cual va acompania lo.
A alga oras ante la ativia sismica, jornales en Corea Sude ia reporta ce Pyongyang ia proba xuta un misil balistical de un sumarina en la tarda de desembre. Lo no es clar esce acel proba ia susede, ma en maio 2015, Corea Norde ia declara un lansa susedosa de un misil de un sumarina.
@T Corea Norde proba un motor de misil
@L aora_oji/2016/corea_norde_proba_un_motor_de_misil
====== Corea Norde proba un motor de misil ======
9 april 2016
Corea Norde dise ce lo ia proba susedosa un motor desiniada per un misil balistical intercontinental.
La ajenteria jornaliste KCNA ia dise ce la spesie nova de motor va "garantia" la capasia de lansa un ataca nucleal contra la SUA.
La proba ia es fada a la lanseria de misiles de distantia longa, prosima a la costa ueste de la pais.
Lo es la plu resente en un serie de esperimentas e lansas esecutada par la nasion isolida.
La xef Kim Jong-un ia supravide la proba, en cual "la motor ia sputa flamas enorme con un pum sordinte".
Seguente reportas, Kim ia dise ce Corea Norde va pote aora "teni cualce posos de malia en la tera, incluinte la continente SUA, en nosa campo de ataca".
Un portavose per la departe SUA de esternas ia dise ce Corea Norde debe "asteni de atas e retorica cual destabli plu la rejion, e foca en loca sur la fa de pasos concreta en dirije a reali sua prometes e obligas internasional".
En marto, Corea Norde ia anunsia ce lo ia developa ojivas nucleal tan peti ce los cabe en un misil balistical. Ma espertas ia duta la veria de esta.
Ance en la mense pasada, la pais ia menasa atacas nucleal "nondistinguinte" contra la SUA e Corea Sude en cuando los ia fa juntada eserses militar, cual la norde regarda como praticas per un invade futur.
Entretempo, la SUA forsa punis nova a Corea Norde pos un proba nucleal en janero e un lansa de satelite en febrero, jeneral interpreteda como un proba de tecnolojia proibida de misil.
La SUA ia fa ance discutes con Corea Sude, con intende de posa un sistem SUA de misiles defendente a la penisola corean, un idea forte oposada par Corea Norde, Rusia, e Xina.
Beijing ia comenta ce la sistem THAAD ta compromete sua securia e ta sumina sua teoria de desconvinse nucleal.
@T Corea Norde simula ataca la presidente de Corea Sude
@L aora_oji/2016/corea_norde_simula_ataca_la_presidente_de_corea_sude
====== Corea Norde simula ataca la presidente de Corea Sude ======
25 marto 2016
Corea Norde dise ce lo ia usa artileria en simula un ataca contra la abitada ofisial de la presidente de Corea Sude.
La eserse ia es supravideda par Kim Jong-un, la xef de Corea Norde, ci ia recomenda ce la militaria prepara se per destrui "cruel" la governa en la Sude.
Esta es la plu resente en un serie de jestis par Pyongyang.
La presidente sude, Park Geun-Hye, ia comanda la armada a vijila. Ma el ia dise ier ce "provocas fretosa va deveni mera un via a autodestrui per la governa txoson".
Corea Norde ia reata ja pos cuando la Nasiones Unida ia pone alga de sua punis la plu forte, seguente probas nucleal e de rocetos de distantia longa par la pais.
Pyongyang ia es colerida, como en cada anio, par eserses militar juntada entre la SUA e Corea Sude cual aveni a sude de la frontera.
Ja conoseda per linguaje vitriolosa, la reporta par la Ajenteria Sentral de Novas Corean ia menasa cambia la abitada presidental sude, nomida la Casa Azul, a "un mar de flamas e senes".
Lo no es clar cuando la eserse simulante ia es fada, ma la reporta ia averti sur "un fini misera" per presidente Park.
La Casa Azul ia es atacada par comandos de Corea Norde en 1968.
Lo acel atenta alora a asasina la presidente no ia susede, ma sete persones de Corea Sude e la plu de la 31 atacores ia es matada.
@T Corea Norde xuta misiles a la mar
@L aora_oji/2016/corea_norde_xuta_misiles_a_la_mar
====== Corea Norde xuta misiles a la mar ======
3 marto 2016
La ministreria de defende de Corea Sude dise ce Corea Norde ia xuta ses misiles de distantia corta a en la mar, a oras pos la pone de restrinjes nova par la Nasiones Unida.
Un portavose ia dise ce la misiles ia es lansada a sirca 10:00 (01:00 de ora global) de Wonsan a la costa este. Los ia es o rocetos o misiles gidada.
Analistes regarda esta como un ata de defia contra la restrinjes.
Mera a oras plu temprana, la Consilio de Securia de la NU ia vota unida per usa alga de sua medios la plu forte de istoria contra Corea Norde. La restrinjes nova reata contra un proba nucleal e lansa de satelite par Corea Norde, ambos de cual ia viole la restrinjes esistente.
Su la restrinjes, tota carga cual entra a e sorti de la pais va es esaminada, e on ia ajunta 16 individuas e 12 organizas a la lista negra.
La Statos Unida e Xina, un aliada longa de Corea Norde, ia pasa sete semanas en discute la restrinjes nova.
La presidente SUA, Barack Obama, ia dise ce la comunia internasional "parla con un vose" per informa Corea Norde ce "lo debe abandona esta programes perilosa e eleje un via plu bon per sua popla".
Park Geun-hye, la presidente de Corea Sude, ia bonveni la restrinjes nova, disente ce el espera ce la Norde "va abandona aora sua program de developa nucleal e comensa un curso de cambia".
Corea Norde insiste ce sua program de misiles es de natur intera siensal, ma la SUA, Corea Sude, e an sua aliada Xina, dise ce lansas como lo cual ia pone un satelite en orbita en febrero ave la gol de developa misiles balistical intercontinental.
La Norde ia declara ce sua proba nucleal en janero -- la numero cuatro de pos 2006 -- ia es fada per esplora sua tecnolojia de bombas de idrojen.
@T Cosovo e Jibraltar deveni membros de FIFA
@L aora_oji/2016/cosovo_e_jibraltar_deveni_membros_de_fifa
====== Cosovo e Jibraltar deveni membros de FIFA ======
14 maio 2016
Cosovo e Jibraltar va pote compete en la Copa Mundal de 2018 pos deveni asetada como membros de FIFA, la organiza governante de futbal de mundo.
Sua asetas aumenta la cuantia de membros de FIFA a 211.
Fadil Vokrri, la presidente de la asosia de futbal cosovan, ia dise: "La juores e popla de Cosovo ia espeta tra tempo longa. Grasias."
Ambos teritorios ia reseta majorias grande en la vota -- 86% favorente la inclui de Cosovo, e 93% per Jibraltar -- an si sua paises visina ia oposa la asetas.
Espania, cual ia sede Jibraltar a Britan a 300 anios ante aora, ma desira ce on redona lo a governa espaniol, oposa ja longa la progresa de Jibraltar a parteni en FIFA.
Serbia ia oposa forte la inclui de Cosovo, cual ia declara sua autonomia de Serbia en 2008.
Par causa de la state complicada political de Cosovo, alga juores ala naseda jua presente per paises diversa. Estas inclui Xherdan Shaqiri e Valon Behrami ci jua per Suiz, Shefki Kuqi per Suomi, e Lorik Cana per Albania.
La entra par Cosovo leva la demanda esce on va permete un cambia de ecipo a juores naseda en la provinse pasada serbsce.
Jeneral, un juor con nasionalia duple ci ia jua ja per un ecipo nasional no pote cambia a sua pais du. Ma per la caso de Cosovo, on previde ce FIFA va considera la juores a modo individua.
Sola en la semana pasada, on ia deside inclui Cosovo como un membro de UEFA, la organiza governante european. Ala, Cosovo ia reseta 28 votas favorente e 24 oposante.
Cosovo ia jua en un max amin internasional a la ves prima en 2014 pos reseta la permete de FIFA.
Jibraltar ave sirca 32 mil abitores. Lo ia deveni un membro completa de UEFA en 2013 e ia partisipa en maxes clasinte per Euro 2016, an si lo ia gania no puntos.
Michael Llamas, la xef de la asosia de futbal de Jibraltar, ia dise: "Nos es realosa sur nosa capasia sur la campo, ma esta no es la foca. La foca es nosa multe enfantes ci ama nosa sporte e ci va es aora la jenera prima de jibraltarianes ci crese como membros de FIFA. Los va pote sonia."
@T Cuatro infetas misteriosa de Zica en Florida
@L aora_oji/2016/cuatro_infetas_misteriosa_de_zica_en_florida
====== Cuatro infetas misteriosa de Zica en Florida ======
28 julio 2016
En la SUA, ofisiores de sania en la stato Florida investiga cuatro casos de la virus de Zica cual no pare relatada a viajas.
Asta aora, casos estra America Latina e Caribe, do la virus es comun, ia sperde par viajas a acel rejion o par transmete sesal. La cuatro casos en Florida leva la posible ce moscitos en la SUA comensa aora porta la virus.
La virus de Zica causa no plu ca un maladia minor en la plu de persones, ma on ia lia lo con defetos grave de serebro en bebetas.
Ofisiores en Florida dise ce los ancora no ia veni a un conclui. Los investiga ancora la metodo par cual la virus ia es transmeteda.
Per confirma esce Zica es portada par moscitos local, siensistes va sonda casas e persones en raio de 150 metres de la casos. Esta es la raio de vola de la insetos.
Espertas en la SUA ia es confondeda en la semana pasada par un otra caso, en la stato Utah, en cual un curor ia developa la febre de Zica pos pasa tempo con un om vea morinte ci ia ave la virus.
E plu temprana en la semana presente, un fem espaniol infetada par Zica ia pari un xico con microsefalia, un maladia de serebro. On crede ce esta es la nase prima de esta spesie en Europa.
En febrero, la Organiza de Sania Mundal ia declara ce la virus de Zica es un crise global de sania publica, par causa de la risca a bebetas. En casos grave, enfantes pote mori, e los ci survive pote ave descapasias inteletal o retardas developal.
@T Cuatro sites va proibi veculos de gasolio
@L aora_oji/2016/cuatro_sites_va_proibi_veculos_de_gasolio
====== Cuatro sites va proibi veculos de gasolio ======
2 desembre 2016
La xefes de cuatro sites major dise ce los va proibi la usa de tota autos e camiones de gasolio ante la media de la desenio veninte.
La maiores de Paris, Site Mexico, Madrid, e Atina dise ce los reali la proibi per boni la cualia de aira. Los va motiva la usa de otra spesies de veculo e va promove pasea e bisicli.
La prometes ia es fada en Mexico a un consenta duanial de xefes de site.
La usa de gasolio en transporta ia deveni sempre plu esaminada en anios resente, car un ansia ia crese sur sua efeto a la cualia de aira. La Organiza de Sania Mundal dise ce sirca tre milion moris en cada anio es relatada con esposa a la contamina de aira esterna.
Motores de gasolio contribui a la problem en du modos major: los produi particuletas e osidos de nitrojen. La particuletas pote entra a la pulmones e provoca maladias cardiovascular.
Osidos de nitrojen pote contribui a la formi de ozon a nivel de tera, e esta pote aumenta difisilias de respira, an per persones sin istoria de problemes respiral.
Grupos ambientiste ia usa la cortes per atenta enforsa normas e regulas de aira pur.
Aora, maiores de sites major con problemes bon conoseda de cualia de aira ia deside usa sua autoria per restrinje sever la usa de gasolio.
A la consenta C40 de xefes urban en Mexico, la cuatro maiores ia declara ce los va proibi tota veculos de gasolio ante 2025 e "promete fa tota en sua potia per motiva la usa de veculos eletrical, idrojenal, e ibride."
Paris ia fa ja un serie de pasos per redui la efeto de autos e camiones de gasolio. Veculos rejistrada ante 1997 es ja proibida de entra a la site, e la restrinjes grandi a cada anio asta 2020.
A un ves en cada mense, on clui la Champs-Élysées a trafica. Multe resente, on ia cambia 3 cilometres de la riva destra de la rio Seine afin los es no plu un autovia de du bandas, ma un zona de paseores.
Multe de la medios proposada per redui la contamina de aira ave ance la vantaje de redui la emetes cual mali la caldi global.
En Barcelona, viajas usante bisicles publica disponable ia redui emetes de diosido de carbono par plu ca 9000 tones -- corespondente a plu ca 33 milion cilometres traversada par un veculo promedia.
@T Daex publici un video de la atacores de Paris
@L aora_oji/2016/daex_publici_un_video_de_la_atacores_de_paris
====== Daex publici un video de la atacores de Paris ======
25 janero 2016
La grupo Daex ia posta un video cual pare mostra nove de la fusilores suspetada ante cuando los ia esecuta sua atacas en Paris a 13 novembre.
La filma mostra alga de la omes destestinte prisonidas e esente militar instruida en Asia sude-ueste.
Lo mostra ance locas cual ia es atacada en la capital de Frans, lasante 130 persones mor.
La video ia es publicida a la canal comunical de Daex, e lo fini con imajes de parlamentores de la Rena Unida ci suporta bombardas contra Daex en Suria.
La presidente franses, François Hollande, ia dise ce la video no va preveni sua pais de resiste terorisme. En un visita ofisial a Barat, el ia dise a reportores en Delhi: "No cosa va impedi nos; no menasa va fa ce Frans vasila en la batalia."
El ia ajunta ce la atacas ia es projetada en Suria ma preparada e organizada en Beljia.
La grupo SITE, cual segue la trasas de ativia enlinia de organizas jihadiste e blanca supremiste, ia dise ce la video ia es filmada en Raqqa, la capital par fato de Daex, ante la atacas en Paris.
Un de la imajes mostra un om ci sembla multe Abdelhamid Abaaoud, la xef de la atacores suspetada. El ia es de nasionalia beljes, e ia mori cuando la polisia ia ataca un aparte en Saint-Denis, prosima a Paris, a alga dias pos la atacas.
Nove atacores suspetada ia mori a 13 novembre o en la dias seguente, e du otras es ancora fujores.
La video descrive la atacores como "leones" ci ia "fa ce Frans ajena". Lo no es clar perce lo es publicida a plu ca du menses pos la atacas.
@T Darfur vota sur sua futur political
@L aora_oji/2016/darfur_vota_sur_sua_futur_political
====== Darfur vota sur sua futur political ======
11 april 2016
La rejion Darfur en la ueste de Sudan va vota sur sua state political, a 13 anios pos la comensa de un gera cual ia mata 300 mil persones.
La demanda es esce la rejion va uni o resta como sinco states, e la referendo va continua asta mercurdi.
On fa esta a un tempo ancora nonsecur, e multe persones deslocada no ia es rejistrada per vota. La SUA ia dise ce la vota no va es credable, ma Omar al-Bashir, la presidente sudani, insiste ce lo va es libre e justa.
La referendo es la paso final en un prosede de pas cual ia es negosiada en Doha, en Catar.
Tra tempo longa, rebelores ia demanda per plu potia rejional per fini lo cual los regarda como interfere par la capital sudani, Khartoum, en disputas sur posese de tera.
Los crede ce si Darfur eleje deveni sola un rejion, lo ta es plu forte en la pais.
Ma multe de los ci ia desira inisial esta referendo va boicota probable la vota car los opina aora ce lo no va es justa.
Plu ca 2,5 milion persones resta deslocada en Darfur, seguente un statistica de la Nasiones Unida, e 130 mil otras ia fuji de violentia renovida ja en esta anio.
Sirca 300 mil ia mori de pos la comensa de gera en la rejion turbada en 2003.
Militiores janjauid sur cavalos ia sperde teror en un gera de multe niveles pos cuando rebelores ia batalia la governa sentral, sentinte ce los es marjinalida.
La janjauides ia es usada par la governa, como ance campanias de bombi. Oji, multe de los es integrada en la Fortes de Suporta Rapida ci combate presente en la rejion de la montania Marra.
La Corte Criminal Internasiona ia acusa Bashir de jenoside e crimines geral en Darfur. Bashir, ci ia indica ce el va resinia como presidente en 2020, ia rejeta la CCI como "judores political".
@T David Bowie mori
@L aora_oji/2016/david_bowie_mori
====== David Bowie mori ======
11 janero 2016
La cantor engles David Bowie ia mori a la eda de 69 anios, pos sufri de canser.
Sua fio, la dirijor Duncan Jones, ia confirma la novas, e on ia publici un declara a sua contas ofisial de redes sosial:
"David Bowie ia mori pasosa oji, ensircada par sua familia, pos un batalia corajosa de 18 menses con canser. An si multe de vos va comparti esta perde, nos solisita ce vos respeta la privatia de la familia en sua tempo de lamenta."
La cantor ia publici sua album la plu resente, Blackstar (Stela negra), a venerdi, sua aniversario. Lo inclui sola sete cantas, ma reseniores ia aclama lo.
Rumores ia esiste sur la sania de Bowie tra anios. Sua presenta direta final ia es a un conserta carital en New York en 2006.
Sua avansa grande ia aveni con la album The Rise and Fall of Ziggy Stardust and the Spiders from Mars (La alti e cade de Ziggy Stardust e la Aranias de Marte) en 1972.
Sua cantas susedosa inclui "Let's Dance" (Ta ce nos dansa), "Space Oddity" (Strana de spasio), "Heroes" (Eroes), "Under Pressure" (Su presa), "Rebel Rebel" (Rebelor rebelor), "Life on Mars" (La vive sur Marte), e "Suffragette City" (Site de sufrajetas).
El ia es ance bon conoseda per sua crea de Ziggy Stardust, sua personalia alternativa.
Plu, el ia forja un carera de ator, incluinte sua rol como un estrateran xercante aida per sua planeta morinte en The Man Who Fell to Earth (La om ci ia cade a la Tera) par Nicolas Roeg en 1976.
Bowie ia fa un periodo de tre menses como la Om-Elefante en un teatro de Broadway en New York en la desenio de 1980.
El ia es la stela ance de la filma final de Marlene Dietrich, Schöner Gigolo, armer Gigolo (Jigolo bela, jigolo povre) de 1978, e ia fa la rol de Pontio Pilato en The Last Temptation of Christ (La tenta ultima de Crist) par Martin Scorsese en 1988.
Bowie ia nase con la nom David Jones en London a 8 janero 1947, ma ia cambia sua nom en 1966 pos la fama enorme de Davy Jones de la bande The Monkees.
El ia partisipa en bandes diversa ante suscrive un acorda con la compania Mercury Records, cual ia publici sua album Man of Words, Man of Music (Om de parolas, om de musica) en 1969, incluinte "Space Oddity", la canta prima par el cual ia ateni la numero un en la parada de susedes en la Rena Unida.
@T Delfines arjentin es tirada de la mar
@L aora_oji/2016/delfines_arjentin_es_tirada_de_la_mar
====== Delfines arjentin es tirada de la mar ======
19 febrero 2016
On ia critica visitores a un plaia en Arjentina pos reportas ce los ia prende delfines perilida de la mar per fa selfis con lo.
Fotos postada a redes sosial mostra un fola de persones ci teni e toca un delfin en la site Santa Teresita.
La imajes ia provoca condenas de espertas sur viventes savaje e de otra usores de redes sosial.
Delfines fransiscan risca deveni estinguida, e conservores dise ce no plu ca 30 mil de los vive aora en abitada natural.
Un instituida arjentina sur viventes savaje ia dise ce la du delfines ia es trovada par persones sur la plaia e ce a la min un de los ia es mor.
Un video de la aveni pare mostra un om ci prende un delfin de la mar e pasea de asi a ala portante lo.
En imajes postada a Facebook, deses de otra persones sta sirca la animal, tocante lo e fante fotos.
Lo no es clar esce la delfin ia es vivente o ja mor, o esce tota imajes mostra la mesma animal.
Delfines fransiscan, ance nomida delfines de la Plata, es entre la plu petis de mundo, con longia entre 1,3 e 1,7 metres. On trova los sola en Arjentina, Brasil, e Uruguai.
Pos la apare de la imajes, la Instituida Vida Silvestre, un grupo conservante, ia publici un avisa ce si on trova un delfin encaliada, on debe aida lo a revade a la acua "afin la istoria no va repete se".
Usores de redes sosial ia condena ance la aveni. Multe ia descrive lo como la resulta de stupidia o nonsabe.
@T Delhi sofoca pos pirotecnicales de divali
@L aora_oji/2016/delhi_sofoca_pos_pirotecnicales_de_divali
====== Delhi sofoca pos pirotecnicales de divali ======
31 otobre 2016
Abitores coler de la capital barati, Delhi, comparti imajes de nebla fumosa, a la dia pos la selebras de divali a cual on ia relasa cuantias enorme de pirotecnicales.
La nivel de materia particulal en la aira, perilosa per la sania, ia crese a cuasi la desuple de la limita secur de 100.
Autoriosas ia averti ja ce Delhi va esperia aira contaminada a esta divali, par causa de fatores como umidia e rapidia de venta.
Divali, la festa indu la plu importante en Barat norde, selebra la vinse de bonia contra malia. On esplode comun petardos en la festa, ma estas dana la cualia de la aira.
En la semana pasada, la governa local de Delhi ia anunsia ce lo va instala puradores prosima a vias, per atenta redui la efeto de la contamina.
Ma a esta matina, la capasia de vide ia es estrema debil tra la site intera, par causa de un covrente densa de nebla fumosa.
Un tuita coler ia dise: "Bon spetaculo a sera ier, Delhi. Aora sofoca!"
Ante divali, campanias diversa ia demanda ce persones redui sua usa de pirotecnicales, ma campanias simil en la pasada ia es jeneral iniorada.
Petardos ia deveni un simbol normal de selebras, e per alga persones, divali es un momento per ostenta sua ricia. Familias comersial spende sentos de miles de rupis per compra focos artal cual los relasa en sola un note.
Un sonda par la Organiza Mundal de Sania en 2014 ia trova ce 13 de la 20 sites la plu contaminada de mundo es en Barat. Lo ia ajunta ce Delhi es la plu contaminada de tota.
La aira contaminada es ance un causa major de moris prematur en Barat, do sirca 620 mil persones mori de maladias relatada en cada anio.
En ajunta a la pirotecnicales, la contamina en Delhi en inverno es aumentada par un cade de temperatur, par causa de cual la persones povre de la site arde dejetadas a note per resta calda.
On ensende ance dejetadas cultival sur miles de ectares sirca Delhi per vacui campos de gran, e esta arde continuante tra multe dias.
@T Democratas SUA protesta sur noncontrola de fusiles
@L aora_oji/2016/democratas_sua_protesta_sur_noncontrola_de_fusiles
====== Democratas SUA protesta sur noncontrola de fusiles ======
23 junio 2016
En la Salon basa de la Congresa de la SUA, membros de la Partito Democrata protesta par senta sur la solo per esije plu controlas sur fusiles, pos matas a un discoteca ge en Florida.
Congresor John Lewis ia recomenda ce sua colaborores sede nunca.
Paul Ryan, la presidente republiciste de la Salon, ia desvalua la protesta como un truco per atrae atende.
Senatores esije un compromete, e Harry Reid, la senator democrata major, suporta un lege nova proposada par Susan Collins, un senator republiciste, per proibi la vende de fusiles a un cuantia restrinjeda de persones ci on trova en alga listas de oserva de terorisme.
On ia intende pasa oji la projeta ante la Senato. "An si lo es cisa un paso peti a ante, a la min lo es un paso a ante," Reid ia dise.
A 12 junio, Omar Mateen, un om ci ia declara sua fida a la organiza Daex, ia mata 49 persones a Pulse, un loca de note en Orlando, en la fusili la plu matante de la istoria moderna de la SUA.
La Partito Republiciste, ci controla la Congresa, ia anunsia un suspende, ma cuasi 100 democratas ia veni a la fronte de la salon, ia senta se, e ia canta lenta "no lege, no suspende".
Esta ia es un de la avenis la plu estracomun videda a cualce ves en la Congresa.
La xefes republiciste ia descomuta la cameras de la Salon, ma la protestores ia vade enlinia con sua mesaje, tuitante fotos e fluente videos direta en redes sosial.
A alga oras pos la comensa de la protesta, Ryan ia atenta recomensa la ativia normal, ma sua vose ia es perdeda su la crias de la protestores. La solo de la Salon ia deveni caososa, con ce republicistes e democratas ia cria a lunlotra sur la tema.
La protesta es gidada par Lewis, un veteran de la promove per diretos sivil en la desenio de 1960.
"Cual cosa esta organiza ia fa [per responde a la violentia]?" Lewis ia demanda, referente a alga atentas nonsusedosa en la semana pasada per aseta un lege de controla de fusiles. "No cosa. Nos ia ofre oreas sorda a la sangue de inosentes. Nos sta sieca ante un crise. Cuanto plu madres e padres debe plora larmas de lamenta?"
En Twitter, presidente Barack Obama ia grasia Lewis per sua "gida sur la violentia de fusil do nos nesesa masima lo".
La protestores desira ce on fa un vota ante la suspende ajendida a la fini de esta semana. La suspende va fini a 5 julio.
Ma Ryan ia insiste ce el no va permete un vota sur controla de fusiles en la Salon basa: "Los sabe ce nos no va trata un proposa cual sutrae la diretos constitual garantiada de un person, sin la prosedes nesesada."
@T Des mil ranas peruan mor
@L aora_oji/2016/des_mil_ranas_peruan_mor
====== Des mil ranas peruan mor ======
18 otobre 2016
En Peru, la departe de ambiente investiga la moris de sirca 10 mil ranas de ci on ia trova sua corpos en un rio en la sude de la pais.
Un grupo campaniante dise ce on debe culpa la contamina en la Rio Coata, e ce la govena ia iniora solisitas per la construi de un compleso de trata acua cloacal en la rejion.
La ranas acual de Titicaca es un spesie perilida cual on trova sola en acel lago enorme de acua dulse, compartida par Peru e Bolivia, e sua afluentes.
La Comite Contra Contamina de la Rio Coata ia dise ce la autoriosas peruan ia fali dirije se a un problem grave de contamina.
Ativistes ia prende sirca sento ranas mor a la plaza sentral en Puno, la capital rejional.
Maruja Inquilla, xef de la protestores, ia comenta: "Me ia debe trae la ranas mor a los. La autoriosas no comprende como nos vive. Los no comprende ce la contamina es tan grave. La situa coleri nos."
La Emprende Nasional de Forestas e Viventes Savaje de Peru ia dise ce lo investiga la aveni. En un declara, lo ia dise: "Sur funda de atestas de abitores local e samples prendeda en la dias pos la aveni, on crede ce plu ca 10 000 ranas ia es afetada tra sirca 50 cilometres."
Telmatobius culeus ave plias enorme de pel cual grandi sua area surfasal e aida la amfibio a asorbe plu osijen de la aira ambiente.
La ranas es estrema perilida car umanas ia colie tro multe de los per come, sua abitada deveni perdeda, e spesies invadente ocupa la partes restante.
@T Deses mori en un cade de avion en Rusia
@L aora_oji/2016/deses_mori_en_un_cade_de_avion_en_rusia
====== Deses mori en un cade de avion en Rusia ======
19 marto 2016
En Rusia sude, un jeto ia cade en la site Rostov-de-Don, matante tota sua 55 pasajores e sete ecipores.
La Boeing 737-800 de FlyDubai, viajante de Dubai, no ia trova la atereria cuando lo ia atenta atera a 03:50 de ora local a esta matina.
La causa de la era no es clar, ma un mal capasia de vide e ventas alta es cisa fatores.
Cameras vijilante ia rejistra un esplode e un lampi grande pos la cade de la avion.
A sua pajeria, la Comite Investigante de Rusia ia dise: "La avion ia colpa la tera e ia rompe a pesos."
On reporta ce la avion ia abandona sua atenta prima de atera, e ia sirculi tra du oras ante cade a la atenta du. Lo ia colpa la tera a sirca 250 metres ante la comensa de la atereria en Rostov, un site a 950 cilometres a sude de Moscva.
La plu de la pasajores en la vola FZ981 ia es rusce, diseda par la governor rejional. Un otra ofisior ia informa ce tre stranjeres es en la lista de pasajores.
Ses de la ecipores ia es nonrusce, seguente un declara de la ministreria rusce de situas urjente.
On ia envia sirca 700 laborores de salva a la loca de cade, e la foco ia es estinguida. On xerca aora la rejistradores de vola, e ia comensa un investiga sur la causa de cade.
Otra aviones es diverjeda de la airoporto.
La airocompania ia confirma la "asidente trajedin" a sua paje de Facebook, ajuntante ce lo ia inisia un reata de crise. A Twitter, Boeing ia indica ce sua ecipo labora per recolie plu detalias.
FlyDubai es un compania transportante de custa basa con sentro en Dubai. Lo ia es lansada en 2009 e vola aora a 90 destinas.
@T Discutes sur la clima apela a la SUA
@L aora_oji/2016/discutes_sur_la_clima_apela_a_la_sua
====== Discutes sur la clima apela a la SUA ======
19 novembre 2016
La xef seguente de la discutes climal de la Nasiones Unida ia apela a la SUA per salva isolas pasifica de la efetos de caldi global.
Frank Bainimarama, ministro xef de Fiji, ia dise ce la isolas nesesa la Statos Unida aora tan multe como en la Gera Mundal Du.
Parlante a la fini de discutes sur la clima global en Maracex en Magrib, el ia dise ce la cambia de clima no es un engana, como alegada par Donald Trump, presidente elejeda de la SUA.
Trump ia promete retira la SUA de la Acorda Climal de Paris e elimina tota paias per projetas NU de caldi global.
En cuando la xef fijian ia aseta la rol de presidente de la Confere de la Partitos per la anio veninte, el la recomenda ce la presidente veninte de la SUA abandona sua seticisme: "La acorda siensal global es ce lo es multe real e nos debe ata plu desidosa per evita desastre."
El ia apela ance direta a la popla de la SUA afin los veni a sua aida en relata con la problem de mares levante, causada par caldi global.
Pos du semanas de discutes en Maracex, la partisipores ia deside la pasos seguente per la acorda major de clima.
Esta asembla ia inclui la abri de CMA1, la Confere de la Partitos consentante como la suscrivores de la Acorda de Paris, cual intende limita la crese de temperatur global.
CMA1 va es la corpo formal de la NU cual va dirije, maneja, e defini la regulas per la funsiona de la trata de Paris.
La cuantia de paises cual ia aseta la acorda ia suprapasa aora 100. La partisipores ia acorda ance la Proclama de Maracex, un declara cual reafirma la intendes de tota 197 suscrivores a la Acorda de Paris.
Regardada como un mostra de unia sur la tema, en relata con un retira posible par la SUA, la paises ia declara ce los va reali sua prometes de redui emetes. La proclama ia apela ance afin tota nasiones aumenta sua aspiras de redui emetes de carbono.
A esta consenta, alga de la nasiones la plu povre de mundo ia anunsia ce los vade en dirije a la usa de sola enerjia verde.
La Foro de Clima Riscada ia dise ce la 47 paises membros, incluinte Bangladex, Itiopia, e Iaman, va reali esta gol entre 2030 e 2050. Los ia defia paises plu rica a fa la mesma.
An con esta avansas, on ia trova ancora alga puntos de difere major entre la partitos, spesial a tema de mone. La discutes va continua en 2017 con un delega nova de la SUA, elejeda par la governa de Trump.
@T Divides apare en la campania de Trump
@L aora_oji/2016/divides_apare_en_la_campania_de_trump
====== Divides apare en la campania de Trump ======
4 agosto 2016
En la SUA, Donald Trump, la nominada republiciste per presidente, ia insiste ce sua campania es unida, an entre reportas de divides profonda pos un serie de mal pasos.
El ia refusa suporta du otra membros de la partito republiciste, Paul Ryan e John McCain, en sua elejes veninte.
Mike Pence, la nominada republiciste per la vispresidentia, ia abandona Trump per suporta Ryan en loca.
Trump ia continua sua batalia controversa de parolas contra Khizr e Ghazala Khan -- la jenitores de un capitan SUA ci ia mori en la Gera de Irac -- an pos recomendas repeteda par sua aliadas ce el debe sesa.
Bizara, sua portavose xef ia dise ce politicas inisiada en 2009 par Barack Obama ia causa la mori de Capitan Khan en 2004.
Trump ia averti sua suportores ce la eleje veninte va es cisa un caso de froda.
El ia descrive sua oposor, Hillary Clinton, como "la diablo".
A un campania en Virginia, algun ia dona a el un Cor Purpur -- un medalia per membros ferida de la militaria SUA. Grupos de veteranes ia critica el per sua responde: "Me ia desira sempre reseta la Cor Purpur. Esta ia es multe plu fasil."
E el ia broma ce on debe ejeta un madre e sua bebe plorante de la mesma asembla en Virginia. "Tu pote sutrae la bebe de asi," el ia dise sur la stadio.
Alga empleadas de sua campania ia espresa la senti ce los peri sua tempo.
Ma Trump ia declara ce "la campania progresa multe bon. Lo ia es nunca tan bon unida."
Plu temprana, la manejor de sua campania ia culpa Hillary Clinton per la reportas de nonunia. "Esta es un plu nara par Clinton cual el ia pone a la mundo e cual la jornalistes regarda. Senior Trump ia apare en esta semana ante folas suprafluente a sur la strada."
La clave de la calcula political es en la sondas de opina e la reata publica. Si lo pare ancora posible a Trump ce el pote gania la vota en novembre, el va persiste, como el ia fa ja tra la anio intera.
Ma si sua sondas cade e politicistes republiciste deveni plu ansiosa sur la risca de perde sua propre elejes en novembre ca de aliena la funda de sua partito, la vagon de Trump ta pote salta de la via ondante.
Oposa Trump es ancora un aposta riscosa, e politicistes tende minimi riscas per reteni sua postos.
On ia reporta ce alga republicistes major intende fa un "interveni" per restabli la campania, asentuante tal temas como la emplea e acordas per comersia. La intervenores inclui Newt Gingrich, presidente pasada de la Salon basa, e Rudy Giuliani, maior pasada de New York.
Gingrich ia comenta ier: "Me opina ce alga de lo cual Trump ia fa es multe autodestruinte."
En esta semana, tre republicistes major ia dise ce los intende vota per Clinton, la nominada de la partito democrata, descrivente Trump como nonconveninte per la posto de presidente. Multe otra republicistes ci oposa Trump ia asteni de espresa suporta per Clinton, disente ce los va vota per un aspiror tre en loca.
@T Du esplodes a la airoporto de Bruxelles
@L aora_oji/2016/du_esplodes_a_la_airoporto_de_bruxelles
====== Du esplodes a la airoporto de Bruxelles ======
22 marto 2016
Du esplodes ia aveni en la zona de parti a la airoporto Zaventem en Bruxelles.
La governa beljes ia confirma ce persones ia deveni ferida, ma ancora no ia indica cuanto.
La causa de la esplodes no es clar. Tota persones es sortida de la airoporto, cual on ia clui a aviones arivante.
En minutos resente, un plu esplode ia aveni a la stasion de metro Maelbeek, prosima a la instituidas de la Uni European. On ia clui la metro intera.
La esplodes ia aveni a cuatro dias pos la catura en Bruxelles de Salah Abdeslam, la suspetada xef en la atacas a Paris a 13 novembre 2015.
Beljia ia aumenta sua nivel de menasa teroriste a grado masima.
On reporta ce on ia trova plu bombas, e ce on ia oia fusilis e crias en arabi ante la esplodes.
Imajes a redes sosial mostra fuma levante de un de la construidas de la termina, e on ia descrive un panica en cuando persones ia fuji de la construidas.
On ia para la transporta ferovial a la airporto e ia recomenda ce persones no atenta veni a lo.
Imajes ia mostra un banda de vitro fratida sur un de la construidas.
Alga reportas dise ce a la min un de la esplodes ia aveni prosima a la area de rejistra per American Airlines, ma denova on no ia confirma esta.
Un difusor beljes ia sita un atestor ci ia dise ce persones es ferida o nonconsensa en la zona de parti, a fas de la otel Sheraton.
Jan Jambon, la ministro beljes de internas, ia dise ier ce la pais es a la nivel masima de vijila atacas venjante pos la catura de Abdeslam. El ia comenta: "Nos sabe ce la para de un selula pote provoca otras a ata. Nos es consensa de lo en esta caso."
La airoporto Zaventem es situada a 11 cilometres a norde-este de Bruxelles e ia trata plu ca 23 milion pasajores en la anio pasada.
@T Du esplodes ataca Turcia en e estra la pais
@L aora_oji/2016/du_esplodes_ataca_turcia_en_e_estra_la_pais
====== Du esplodes ataca Turcia en e estra la pais ======
18 febrero 2016
Turcia ia promete venja sua contra la esecutores de un esplode potiosa en la capital, Ankara, cual ia mata a la min 28 persones e ia feri 61.
Presidente Recep Tayyip Erdoğan ia dise: "Turcia no va retira se de usa sua direto de defende se a cualce tempo, cualce loca, o cualce ves."
Ofisiores ia dise ce un veculo plen de esplodentes ia es detonada cuando buses militar ia pasa lo ier. Asta aora, no grupo ia dise ce lo ia esecuta la ataca.
La esplode ia aveni a sirca 18:30 (16:30 de ora global) en un area prosima a la parlamento e la xeferia militar.
Plumones grande de fuma levante de la loca ia es vidable, e atestores dise ce la esplode ia es oiada tra la site intera.
Securiores ia fa un esplode controlada a un paco suspetada a pos.
Alga de la vitimes ia es persones nonmilitar. On previde ce funeras va aveni oji.
Plu tarda ier, en un developa separada, un esplode ia dana un construida conteninte un sentro cultural turces prosima a Stockholm, la capital svensce.
Nun ia es ferida, e lo no es clar esce la aveni es relatada con la esplode en Ankara.
En un declara publicida a alga oras pos la ataca prima, Erdoğan ia dise: "La nos determina de venja nos contra esta atacas en Turcia e a estra, puntada a nos unia, juntadia, e futur, es grandida par tal atas."
El ia cansela un viaja intendeda a Azerbaijan a jovedi, e simil la ministro xef Ahmet Davutoğlu ia dise ce el no va vade a Bruxelles, do el ia intende partisipa en consentas sur la crise de refujadas en Europa.
Turcia ia es colpada par un serie de atacas en menses resente, e la ansia ia crese ce la pais pote deveni la blanco de un plu ataca grande.
Lo no es clar ci ia causa la esplode en Ankara. Jornalistes ia reporta ce securiores ia culpa la organiza Daex e ance ativistes de la Partito de Laborores Curdi (PKK), un partito proibida.
Un portavose per la governa ia comenta ce la ataca ia es bon scemada.
La PKK batalia per autonomia de la minoria curdi en Turcia ja tra desenios, e ia fa atacas periodal contra securiores turces.
La esplode en Ankara ia aveni en cuando Turcia aumenta sua envolve en la gera en Suria. En la norde de acel pais visina, lo ia lansa cartuxes a la militia curdi, nomida Unia de Proteje la Popla, cual lo regarda como aliada con la PKK.
Turcia ia permete ance la usa de un de sua bases avional par un alia, gidada par la SUA, cual bombi Daex.
@T Du frates ia fa la ataca en Bruxelles
@L aora_oji/2016/du_frates_ia_fa_la_ataca_en_bruxelles
====== Du frates ia fa la ataca en Bruxelles ======
23 marto 2016
Jornalistes beljes ia nomi la du bombores ci ia ataca la airoporto internasional en Bruxelles ier como Khalid e Brahim el-Bakraoui.
La polisia ia es ja consensa de la du frates ante la ataca. Los ia ave un istoria criminal.
On xerca ancora un om tre ci ia es fotografida con los a la airoporto.
A martedi, du esplodes ala -- e un plu a un stasion de metro -- ia mata sirca 34 persones e ia feri 250.
La grupo Daex ia dise ce lo ia esecuta la atacas, e ia averti ce plu va segue.
Beljia fa tre dias de lamenta nasional, e on va oserva un minuto de silentia a mediadia per onora la vitimes.
Lo pare ce Khalid el-Bakraoui ia usa un nom falsa per lua la aparte en la area Forest de la capital beljes do la polisia ia mata un fusilor en la semana pasada.
En acel opera, polisiores ia deteta un impresa de dito de Salah Abdeslam, la suspetada xef de la atacas teroriste a Paris, ci on ia aresta a venerdi.
Un jornal reporta oji ce la polisia ia es ja xercante Khalid el-Bakraoui par causa de sua ativia teroriste, e ce Brahim ia es un fujor pos es condenada per otra atas criminal.
La polisia ia distribui un imaje de camera vijilante cual mostra tre omes a la airoporto. La mesma jornal ia nomi la om tre como Najim Laachraoui, ci la polisia ia nomi plu temprana en la semana como un aidor de Abdeslam.
@T Du tremateras en Zeland Nova
@L aora_oji/2016/du_tremateras_en_zeland_nova
====== Du tremateras en Zeland Nova ======
14 novembre 2016
Un trematera de fortia 6,3 ia colpa la Isola Sude de Zeland Nova, a mera oras pos un trema prima cual ia mata du persones.
La trema du ia aveni a 13:45 de ora local, con profondia de 10 cilometres, a norde-este de Christchurch.
Un trema de fortia 7,5, con la mesma profondia, ia colpa ja la mesma rejion a tempo corta pos medianote, provocante avertis de tsunamis.
Un rio grande, blocida par un lisca de tera, ia supraflue, enviante "un mur grande de acua" con la corente. On ia recomenda ce persones abitante sirca la Rio Clarence -- un de la plu grandes sur la Isola Sude -- vade direta a terenos plu alta.
Sentos de replicas sismica ia aveni ance, causante rompes de furni de eletrica e acua.
Autoriosas ia spende la note e dia en salva e sorti abitores longo la costa este.
Ondas de sirca 2 metres ia colpa la costa no longa pos la trema prima. On ia sutrae aora la averti de tsunami, ma recomenda ancora ce persones resta distante de la linia de costa.
Abitores de Christchurch e vilas ambiente ia compra rapida furnis fundal. Alga scolas en la rejion afetada ia resta cluida oji.
En Kaikoura, un destina popular per turistes, la strada xef ia deveni blocida par liscas de tera, con rompes de telecomunica, acua e eletrica. La militares e pompores ia envia ecipos en elicotores a la vila, e on sorti alga persones par aira.
Tre boves ia deveni encaliada sur un isola pico cuando la tera ensircante ia colasa prosima a Kaikoura.
La ministro xef, John Key, ia dise ce el crede ce la cuantia de mores va resta basa, e Gerry Brownlee, la ministro de defende sivil, ia comenta ce la problem la plu grande pare es la dana a la infrastrutur.
La trema ia es ance esperiada en Welligton sur la Isola Norde, do la distrito comersial sentral de la site ia es cuieta oji en cuando laborores ia move detrito e ia esamina construidas.
Christchurch recovre ancora pos un trematera en 2011 cual ia mata 186 persones e ia destrui la sentro de la site.
@T Du trenes colide en Deutxland
@L aora_oji/2016/du_trenes_colide_en_deutxland
====== Du trenes colide en Deutxland ======
9 febrero 2016
Du trenes de pasajor ia colide en la state Bayern en Deutxland.
La polisia dise ce alga persones ia mori e deses ia es ferida.
La colide de frontes ia aveni a Bad Aibling, un vila de banieria mineral a sirca 60 cilometres a sude-este de München.
Un de la trenes ia salta de la reles en la colide, e alga vagones ia deveni inversada.
Servis crisal es a la loca de la asidente, con elicotores de salva. Los atenta libri persones ci es ancora trapida en la ruinas.
La cuantia esata de moris e feris es ancora nonclar, ma un tuita par la polisia ia dise: "A state presente, sirca sento feridas, incluinte feris grave e an moris."
On no sabe la causa la colide.
Stradas sirca la loca es aora cluida, e la ferovia entre Holzkirchen e Rosenheim es blocida.
Un portavose per la polisia ia comenta: "Esta es la asidente la plu grande cual ia aveni a nos en esta rejion, e nos ave multe dotores, ambulansias, e elicotores de crise a la loca."
@T Duterte promete no blasfema plu
@L aora_oji/2016/duterte_promete_no_blasfema_plu
====== Duterte promete no blasfema plu ======
28 otobre 2016
Rodrigo Duterte, la presidente de Pilipinas, dise ce el ia promete a Dio ce el va limpi sua linguaje famosa vulgar.
Arivante en sua site Davao pos un viaja a Japan, Duterte ia dise ce Dio ia fa un esije ultima a el en la avion.
"Me ia oia un vose cual ia comanda me a sesa blasfema o la avion va cade de la aira, e donce me ia promete sesa," el ia dise a reportores en la airoporto.
La parla brusca de Duterte, comun dirijeda a la Ueste, ia contribui a sua popularia en sua nasion.
El ia nomi Barack Obama un "fio de puta", ia descrive la Uni European como "ipocrita", ia menasa abandona la Nasiones Unida, e ia aseta comparas a Hitler, disente ce el ta mata felis tre milion drogamanicas.
Tota de estas ia es respondes a criticas de sua gera sanguosa contra drogas, en cual miles de vendores e usores alegada de drogas ia es matada par la polisia e par patruliores estralegal.
Duterte ia dise ce el ia promete a Dio ce el no va "espresa jergo, parolas blasfemante, e tota", e ia ajunta ce "un promete a Dio es un promete a la popla pilipina".
Ma el ia sujesta ce sua promete va ave cisa limitas. El ia dise ce la nonvulgaria de sua linguaje cuando el parla sur la SUA, la UE, o sua arcenemi political Leila de Lima va depende de la momento.
Como la plu de pilipinas, Duterte es catolica, an si el ia vanta sur sua relatas sesal e ia nomi la Pape un "fio de puta" per causa conjesta de trafica cuando el ia visita.
La presidente ia dise ce el ia es maltrada par un prete SUA cuando el ia es un enfante, e ce acel esperia ia influe sua opinas political.
Resente, el ia dise ce Pilipinas desira "un separa" de la Statos Unida, sua aliada longa, e vole ce soldatos de la SUA parti de la pais, cisa ante la pasa de du anios.
@T Dylan "mudida" par sua Premio Nobel
@L aora_oji/2016/dylan_mudida_par_sua_premio_nobel
====== Dylan "mudida" par sua Premio Nobel ======
29 otobre 2016
La cantor-composor Bob Dylan dise ce el aseta sua Premio Nobel de leteratur, fininte sua silentia pos es premiada en la parte plu temprana de esta mense.
El ia comenta ce la onora ia "mudi" el.
La Funda Nobel ia dise ce on ancora no ia deside esce la cantor SUA va es presente a la rituo de premia en desembre. Ma un jornal brites reporta ce Dylan ia dise ce el intende reseta personal la premio "si an pico posible".
La premio a la stela ia es anunsiada a 13 otobre "per sua crea de espresas poesial nova en la tradision grande de canta american".
An tal, sua fali de reconose lo ia causa surprende.
En la semana pasada, un membro de la Academia Svensce, cual deside la premiadas, ia descrive sua silentia como "noncortes e egosa".
Ier, la Funda Nobel ia dise ce Dylan ia telefoni a Sara Danius, la secretor permanente de la Academia Svensce, per dise: "La novas sur la Premio Nobel ia mudi me. Me es tan grasiosa per la onora."
En un intervisa con un jornal, Dylan ia descrive la premio como "stonante, noncredable. Lo es difisil per crede. Ci de mundo sonia ce un tal cosa va aveni?"
@T Elejes political en Zambia
@L aora_oji/2016/elejes_political_en_zambia
====== Elejes political en Zambia ======
11 agosto 2016
En Zambia, on ia comensa vota en elejes presidental e parlamental, pos campanias manxada par violentia entre suportores oposante.
On previde un corsa difisil ganiada entre la partito governante Fronte Patriota (FP) de presidente Edgar Lungu e la Partito Unida per Developa Nasional (PUDN) gidada par Hakainde Hichilema.
A la ves prima, un aspiror presidental nesesa gania plu ca 50% de votas per evita un ronda desidente. Lungu ia gania apena la eleje la plu resente, con 48% de votas.
Oservores dise ce la economia debil de la pais es un conserna major. Custas desendente per cupre, sua esporta xef, ia clui minerias e ia lasa miles de persones nonempleada.
Pos un dui aprosima de sua crese economial, la pais ia demanda per aida de la Reserva Monal Internasional en la plu temprana de esta anio.
Plu, Zambia, como otra partes de Africa sude, ia sufri un secia cual la NU ia descrive como la plu grave de 35 anios.
La PUDN ia acusa Lungu de preside la colasa de la economia. Ma la FP dise ce lo ave un projeta per diversi la economia.
Ier, on ia averti ce probable alga persones va resta a via de la voterias pos la scaramuxas violente entre grupos political oposada cual ia aveni en semanas resente.
A martedi, Esau Chulu, la xef de la comision elejal, ia avisa la du partitos major sur la nesesa de evita crea turba. El ia dise: "Me no crede ce la un o la otra de vos va desira es rejistrada como la du partitos political ci ia contribui a rompe la istoria de elejes pasosa en Zambia."
On ia suspende la campanias per des dias en la capital Lusaka en la mense pasada, pos cuando un suportor de la PUDN ia es matada par fusil a un protesta.
Zambianes vota ance en un referendo sur cambias a la declara de diretos.
La vota va fini a 18:00 de ora local, e on previde sabe la resultas en la tarda de doman.
@T Eletrica manca en la parlamento venezuelan
@L aora_oji/2016/eletrica_manca_en_la_parlamento_venezuelan
====== Eletrica manca en la parlamento venezuelan ======
21 otobre 2016
Un rompe de eletrica ia lasa la parlamento de Venezuela en oscuria cuando lo ia es a media de discute un lege dedicada a la campo de enerjia.
La lampas ia desensende cuando Ramón Lobo, un legor progovernal, ia defende ia politicas sur enerjia de presidente Nicolás Maduro.
Luis Florido, un parlamentor oposante, ia broma en Twitter: "La realias de la pais ia colpas los a la fas." Delsa Solórzano, un otra oposor, ia tuita un video de la salon oscur.
On ia suspende la sesion.
Venezuela fronti un crise sever de eletrica, e la furni manca frecuente. On reporta ce ance otra construidas en la mesma area de la capital, Caracas, ia sufri rompes de eletrica a la posmedia ier.
Venezuela, rica de petrolio, es a media de un crise economial profonda causada par un redui de la custa global de acel carburante. La pais sufri un manca de benes fundal, comedas, e eletrica.
Plu temprana en esta anio, la governa ia atenta maneja la crise par introdui un sistem de rasiona la enerjia e un semana de du dias de labora per laborores en la campo publica.
Lo ia culpa un secia major cual ia redui multe la profondia de acua a sua parario idroeletrical xef. Ma la oposores ia acusa la autoriosas de malmaneja.
La governa ia sutrae ja alga de la medios introduida.
@T Fidel Castro mori a eda de 90
@L aora_oji/2016/fidel_castro_mori_a_eda_de_90
====== Fidel Castro mori a eda de 90 ======
26 novembre 2016
Fidel Castro, la presidente pasada de Cuba e gidor de la revolui comuniste, ia mori a la eda de 90 anios.
El ia rena Cuba como un stato de un partito tra cuasi 50 anios ante cuando sua frate Raúl ia continua en 2008.
Sua suportores ia dise ce el ia redona Cuba a la popla. Ma on ia acusa el ance de supresa oposa.
Con fas pal en un televisa nonprevideda en la tarda de sera ier, Raúl Castro ia informa la nasion ce sua frate ia mori e va es senida oji. Alga dias de lamenta va segue sur la isola. El ia fini la anunsia par cria la slogan revoluiste: "A la vinse, sempre!"
Estra articles en jornales de tempo a tempo, Fidel Castro ia retira ja se de la vive political tra alga tempo.
En april, el ia fa un parla rara a la dia final de la congresa de la partito comuniste de la pais. El ia reconose sua eda grande, ma ia dise ce consetas comuniste cuban es ancora valida e ce la popla cuban "va vinse".
"Me va ave pronto 90 anios," el ia dise, ajuntante ce esta es "un cosa cual me ia imajina nunca".
Castro, ci ia survive multe conspiras de asasina, ia es la plu longa renante de la xefes nonreial de la sentenio 20.
El ia dona tempora la potia a sua frate en 2006, cuando el ia recovre de un maladia acuta de intestin. Raúl Castro ia deveni ofisial presidente a du anios plu tarda.
Tra la Gera Fria, Castro ia es un problem per la SUA.
Un taticiste capas a campo de batalia, el e sua armada peti de gerilias ia suverti la xef militar Fulgencio Batista en 1959, ganiante multe suporta de la popla.
Ante la pasa de du anios, el ia declara ce la revolui es de natur marxiste-leniniste, e ia alia firma la nasion-isola a la Uni Soviet.
Ma, an con la menasa constante de un invade par la SUA e con la continua longa de un embargo economial contra Cuba, Castro ia susede manteni un revolui comuniste en un nasion situada a min ca 150 cilometres de la costa de Florida.
Tan despetada par sua oposores como adorada par sua seguores, el ia dura plu longa ca des presidentes SUA e ia defia deses de atentas par la CIA a mata el.
@T Filantropiste Edhi mori en Pacistan
@L aora_oji/2016/filantropiste_edhi_mori_en_pacistan
====== Filantropiste Edhi mori en Pacistan ======
9 julio 2016
Abdul Sattar Edhi, un filantropiste pacistani selebrada ci ia dedica sua vive a persones povre, ia mori con 88 anios, a un sentro medical en Karachi do on ia trata el tra alga semanas.
El ia comensa sua labora carital cuando ancora joven. La Funda Edhi furni aora servis sosial diversa e sin custa, incluinte ambulansias, orfanerias, e suporta per persones vea e descapasida.
La ministro xef, Nawaz Sharif, ia espresa sua tristia a la mori, disente ce el prea ce Edhi va ave "la loca la plu bon en paradiso".
"Nos ia perde un servor grande de umania," Sharif ia dise. "El ia es la representa real de ama per los ci ia es sosial dolable, sin defende, e povre."
Malala Yousafzai, la resetor la plu joven de la Premio Nobel de pas, ia descrive Edhi como "un figur lejendin". "El ia vive sua vive per la vives e felisia de otras, e per esta razona el es un model per segue. Me no ia vide cualcun otra simil a el."
Yousafzai ia repete sua recomenda ce on onora Edhi con la Premio Nobel de pas.
Edhi ia veni de un familia de comersiores gujarati e ia ariva en Pacistan en 1947. Ma el ia deside emprende filantropia pos vide como la stato ia fali aida sua familia a cura sua madre paraliseda e malada.
El ia abri sua clinica prima en 1951. La Funda Edhi ia crese per deveni la organiza de aida sosial la plu grande de Pacistan, manejante scolas, ospitales, e servis de ambulansia tra la pais, comun covrente bucos en servis cual la stato ia fali furni.
Edhi ia es cisa la person la plu respetada en Pacistan. Alga persones ia regarda el cuasi como un santa.
El ia lista la cualias fundal de sua labora: simplia, onestia, asiduia, e puntualia.
"Cura otras es la obliga de cadun -- esta es la sinifia de es umana," el ia esplica. "Si plu persones ta crede tal, on ta pote solve tan multe problemes."
El ia es ance famosa per sua modo de vive umil. On ia reporta ce el posese sola du colies de vestes e vive en un sala peti e poca mobilida, a lado de la ofisia de sua organiza.
On ia diagnose Edhi con renes falinte en 2013. En junio el ia refusa un ofre par Asif Ali Zardari, un presidente pasada, de trata medical estra la pais. El ia insiste ce on trata el en un ospital publica en Pacistan.
@T Focos savaje en Israel
@L aora_oji/2016/focos_savaje_en_israel
====== Focos savaje en Israel ======
25 novembre 2016
On ia comanda sirca 80 mil persones a abandona sua casas car focos savaje entra a Haifa, la site tre de la plu grandes de Israel.
La focos segue un secia de du menses e es vanida par ventas forte en la norde de la site. Focos menasa ance casas prosima a Ieruxalim e sur la Riva Ueste.
La xef de polisia israeli ia dise ce on suspeta ensendes criminal en alga casos, e ce on pote suposa un motiva political.
La ministro xef, Benjamin Netanyahu, ia dise ce cualce tal ataca ta es egal a "teror" e ta es sever punida.
Naftali Bennett, la ministro de instrui e xef de la partito relijial destriste Casa Iudi, ia pare sujesta un envolve arabi o filastini en la focos cuando el ia tuita: "Sola los a ci la pais no parteni es capas de arde lo."
La comentas ia provoca un reata coler de la promove Fatah de la presidente filastini Mahmoud Abbas, cual ia dise ce ofisiores israeli "esplota la foco" per acusa filastinis.
"Lo cual arde es nosa arbores e nosa tera de Filastin istorial," lo ia dise en un declara.
Sentos de reservistes militar ia es clamada per aida batalia la focos cual esiste ja tra tre dias.
En Haifa, la comite de vila ia dise ce alga visinerias va es sin eletrica en la note.
Persones ia carga caretas de supramercato con posesedas, e on ia vacui scolas, jardines de enfantes, universias, e un ospital de persones vea. On ia vacui ance du prisones prosima a Haifa.
Plu ca 130 persones ia es ospitalida con feris minor, xef par causa de enspira de fuma, ma la plu ia es relasada a pos.
Plu sude, la autovia 443 -- liante Ieruxalim e Tel Aviv, e traversante la Riva Ueste -- ia es cluida oji per la trafica de matina en cuando un otra foco ia ateni la site Modi'in Illit.
Casas e autos ia es danada, e 300 studiantes ia es sortida de un scola en Talmon, un parte de la Riva Ueste abitada par persones israeli.
Pompores batalia ja focos en locas diversa de pos martedi, e meteorolojistes averti ce la state seca e la ventas forte va continua probable asta la temprana de la semana veninte.
Alga paises (entre cual es Cipros, Rusia, Italia, Corvatsca, e Elas) ia envia persones e aparatos, incluinte aviones, per aida maneja la ardes.
@T Fondes antartica pote dupli la alti de nivel global de mar
@L aora_oji/2016/fondes_antartica_pote_dupli_la_alti_de_nivel_global_de_mar
====== Fondes antartica pote dupli la alti de nivel global de mar ======
31 marto 2016
La nivel global de mar ta pote leva par plu ca la duple de la estima corente la plu bon, seguente un analise nova de la cambia climal en Antartica.
La evalua modelinte dise ce mera la fonde antartica ta pote contribui plu ca un metre a la nivel de mar ante la fini de esta sentenio.
Ante 2500, seguente la rexerca, la mesma fonte ta pote causa un leva de 13 metres tra la mundo.
La autores de la studia dise ce un redui rapida de emetes de carbono pote limita esta risca.
En 2013, la Panel Intergovernal sur Cambia Climal ia predise ce, sin restrinjes de emetes de carbono, la mares tra la mundo va leva probable par no plu ca 98 sentimetres ante 2100. Ma esta estimas ia conteni un contribui minima de Antartica.
Otra analises a pos ia previde levas plu alta. Un studia resente ia sujesta ce la mares leva plu rapida ca a cualce tempo en la 2800 anios pasada, e ce en 2100 los va es plu alta par asta 1,31 metres.
On ia debate multe la nivel esata de la efeto de Antartica a esta prevides. En la tarda de la anio pasada, rexercores ia sujesta ce prevides de un contribui de un metre o plu no es credable.
Ma lo esta studia nova razona ce, ante la fini de la sentenio, la mundo ta pote esperia 1,14m de alti, mera de Antartica.
La siensistes pertinente dise ce sua model es capas de furni un predise plu esata car lo integra la efetos de alga prosedes fisical a la ves prima.
Otra modeles ia foca a la efeto de acuas plu calda cual fonde la planos de jelo de su, esta rexerca nova inclui ance la efeto de acua fondeda a la surfas e de pluve cual flueta de supra e frati jelo suportante, tal rapidinte sua lisca a la mar.
La model calcula ance la efeto de la desintegra de planos de jelo flotante. Si esta aveni, lo va revela mures de jelo tan alta ce los no pote suporta sua propre pesa.
La siensistes previde ce esta fatores ajuntada va ativi en la desenios veninte, en cuando la caldi de la atmosfera (e no mera de la acuas plu calda a su) deveni la causa dominante de perde de jelo.
La autores crede ce los ia demostra la esatia de la model nova par reprodui coreta la alti de nivel de mar en periodos calda, tra miliones de anios pasada.
Si la mundo continua emete niveles corente de diosido de carbono en la desenios veninte, la rexercores razona ce la alti de nivel e mar va es la duple de la estima esistente per la sento anios pos aora.
Los opina ce sua reporta conteni ance novas bon. Si on redui major la emetes global de carbono, alora la fatores cual aumenta la fonde antartica va es evitada. Mares va leva ancora, ma no a la rapidia estrema sujestada par esta studia.
@T Fuma confirmada en la avion MS804
@L aora_oji/2016/fuma_confirmada_en_la_avion_ms804
====== Fuma confirmada en la avion MS804 ======
30 junio 2016
Investigores misri ia afirma ce un rejistra de la caxa negra de la vola MS804 de EgyptAir indica la presentia de fuma en la avion.
La avion de Paris a Qahira ia cade en la Mar Mediteraneo a 19 maio, matante tota la 66 persones cual lo ia porta.
Lo ia envia mesajes eletronical automatida cual ia mostra ce detetadores de fumas ia es ativida en un saleta privata e en la alcova avionical su la piloteria, a minutos ante la desapare de la avion.
La datos rejistrada es coerente con acel mesajes.
On ia retrae la rejistradores de vose e datos de vola, conoseda como "caxas negra", de un profondia de sirca 3000m en la mar.
La caxa du, la rejistrador de de piloteria, deveni ancora reparada en Paris.
La comite misri investigante ia dise ance ce un parte de la sesion fronte de la ruina de la avion "ia mostra un indica de dana par temperatur alta" e suje.
No clama per aida ia es fada de la avion ante sua cade. La causa resta nonconoseda.
@T Fuma en la avion cual ia cade a jovedi
@L aora_oji/2016/fuma_en_la_avion_cual_ia_cade_a_jovedi
====== Fuma en la avion cual ia cade a jovedi ======
21 maio 2016
On reporta ce fuma ia es detetada en la avion de EgyptAir ante cuando lo ia cade en la Mediteraneo a jovedi.
Sensadores ia persepi fuma en la saleta privata e en la sistemes eletrical de la avion, a mera minutos ante la perde de la sinial, seguente datos publicida par Aviation Herald (Eraldo de Avioni), un pajeria de la industria de aviones.
An tal, on no ia confirma ofisial esta informa.
La vola MS804 ia es viajante de Paris a Qahira con 66 persones.
La Eraldo de Avioni ia dise ce lo ia reseta datos de vola arcivida par ACARS (la Sistem de Adirije e Reporta per Comunicas Avional) tra tre canales nonrelatada.
La sistem ia mostra ce a 02:26 de ora local a jovedi, fuma ia es detetada en la saleta privata de la Airbus A320. Pos un plu minuto, un avisa de fuma en la alcova de avionica ia es transmeteda.
La mesaje final de ACARS ia a veni a 02:29, e on ia perde la contata con la avion a 02:33.
ACARS es costumal usada per envia datos de vola a la airocompanias.
La editor de Jornal Internasional de Securia de Avioni ia comenta ce lo es posible ce un fali tecnical ia aveni: "On ia reporta fuma en la saleta privata, e fuma en la alcova de avionica a pos, e tra un periodo de tre minutos la sistemes de la avion ia descomuta, donce, sabe, esta comensa indica ce lo ia es probable no un saisi, lo ia es probable no un luta en la piloteria -- lo ia es plu probable un foco en la avion. Ma esce esta ia es un foco tecnical, un sircuito corta, o esce lo ia es car un bomba ia esplode en la avion, nos no sabe."
Elas ia dise plu temprana ce la radar ia mostra ce la Airbus A320 ia fa du verjes subita e ia desende tra plu ca 7600 metres ante cade en la mar.
Ier, ecipos xercante ia trova detrito, partes de corpo, sejas e bagaje a sirca 290 cilometres a norde de Alexandria.
@T Furia en Frans sur un simpli de spele
@L aora_oji/2016/furia_en_frans_sur_un_simpli_de_spele
====== Furia en Frans sur un simpli de spele ======
5 febrero 2016
Un controversa ia deveni inisiada par la proposa de speles nova per plu ca 2000 parolas franses.
La Académie Française ia proposa ja la cambias en 1990, incluinte la sutrae de la sircoflexe (^) e ifen (-) en alga parolas, ma los ia es elejable.
Aora companias publicinte dise ce los va inclui la speles nova en libros de scola.
La ministro de instrui de Frans ia dise ce la cambias no va culmina en aboli la sircoflexe, e ce ambos speles va resta coreta.
An tal, la anunsia ia provoca reatas furiosa en redes sosial, do persones ia declara ce la cambias es un move en un dirije tro simplinte.
La coleria ia pare comensa pos cuando un reporta a la pajeria TF1 ia dise ce la reformis va reali en la anio academial veninte.
Lo ia sita un nota de la ministeria instrual de la anio pasada cual ia dise ce on debe adota la speles nova. Lo ia reporta ance ce companias publicinte ia deside ajunta la cambias en libros de aprende per usa en setembre.
Studiantes va pote aora eleje entre usa la speles vea o la novas, e enseniores va debe aseta ambos maneras como coreta.
La cambias proposada ia segue un revisa de la lingua franses per simpli la aprende de lo, ma los no ia es obligante. Los ia fronti ja un oposa forte en la pais.
Los inclui sutrae la sircoflexe en "coût" (custa) e "paraître" (pare), e la ifen en "porte-monnaie" (portamone) e "week-end" (fini de semana). Plu, la parola "oignon" (onion) perde sua letera I.
La spele nova afeta sirca 2400 parolas.
Redores sosial ia esprima sua coleria sur la cambias, e la parolas grilida #ReformeOrthographe (reformi ortografial) e #JeSuisCirconflexe (me es sircoflexe) ia apare entre la temas de moda a Twitter en Frans ier.
Multe usores ia comparti imajes mostrante sua noncontentia con la reformi, e la plu de la furia ia es dirijeda a la mori alegada de la sircoflexe.
@T Futbalores brasilera en un cade de avion
@L aora_oji/2016/futbalores_brasilera_en_un_cade_de_avion
====== Futbalores brasilera en un cade de avion ======
29 novembre 2016
Un avion portante 81 persones, incluinte un ecipo major de futbal brasilera, ia cade prosiminte a la site Medellín en Colombia.
On reporta ce ses persones ia survive. La avion ia esperia problemes eletrical.
La avion, volante de Bolivia, ia porta membros de la ecipo Chapecoense ci ia intende jua en la maxes final de la Copa de America Sude contra un ecipo de Medellín.
La gama prima de la finales ia es projetada per mercurdi, ma es aora suspendeda.
La ecipo de la site sude Chapecó ia es levada a la divide prima de Brasil en 2014 e ia ateni la finales en la semana pasada, pos vinse contra un ecipo de Arjentina.
La avion de vola corta ia es de la spesie British Aerospace 146. Lo ia es operada par Lamia, un airocompania bolivian, e ia porta 72 pasajores e nove ecipores.
Lo ia cade sur un montania estra la site, no longa ante medianote de ora local.
Seguente un comunica a jornalistes par la airoporto José María Córdova de Rionegro, lo ia reporta un fali eletrical a la tore de controla.
La airoporto, cual servi Medellín, ia dise ce "on ativi tota aidas posible car ses survivores es reportada".
Par causa de un mal clima, la loca de cade es asedable sola par tera. Ma car la avion no ia ensende, salvores espera ce los va trova cisa plu survivores.
@T Gabon confirma la resulta de sua eleje presidental
@L aora_oji/2016/gabon_confirma_la_resulta_de_sua_eleje_presidental
====== Gabon confirma la resulta de sua eleje presidental ======
24 setembre 2016
La corte constitual de Gabon ia suporta la vinse de Ali Bongo en la eleje presidental, rejetante un recomenda par la oposores per un reconta de votas.
On ia teme ce un tal deside va provoca violentia nova. La governa ia dise ce lo va culpa Jean Ping, la oposor xef, si scaramuxas segue la deside.
Presidente Bongo ia gania la eleje en agosto par sola 6000 votas, ma la oposores dise ce la eleje ia es frodante.
Pos la judi de la corte, Bongo ia recomenda "un conversa political" con sua oposores.
Abitores de Libreville, la capital, ia cumula comedas ante la deside. On ia esperia filos longa a bancos e supramercatos ier, e la ambasada franses ia dise ce sua sitadanes debe resta en casa.
Polisiores antitumulta es posada tra la site.
Ping ia alega froda en un de la provinses forte de la presidente, Haut-Ogooué, do Bongo ia gania 95% de votas con partisipa de 99,9% de votores.
Ping ia averti ce Gabon pote fronti un nonstablia grave si la corte rejeta sua apela per un reconta en acel provinse.
La corte ia ajusta partal la resultas de la eleje amarga ganiada, donante 50,66% de la votas a Bongo e 47,24% a Ping.
La resulta inisial a 27 agosto ia provoca dias de violentia matante.
@T Gas lacrimojen a un protesta par jubilores elinica
@L aora_oji/2016/gas_lacrimojen_a_un_protesta_par_jubilores_elinica
====== Gas lacrimojen a un protesta par jubilores elinica ======
4 otobre 2016
La polisia en Elas ia usa gas lacrimojen contra jubilores ci ia protesta sur reduis de sua revenu pensional.
Alga de la sentos de veas protestante ia atenta cade un bus de polisia. Otras ia atenta forsa se tra linias de polisiores antitumulta.
Medios sever en Elas ia causa la redui repeteda de pensiones. Los ave aora un valua de 25--55% min ca ante la crise economial.
Pensiones es un problem en la negosias de Elas con sua creditores internasional.
La defini de un acorda aidante con prestores internasional obliga la governa de Alexis Tsipras a regania plu ca mil milion euros ($1,12 mil milion) par reformis de pensiones.
Ma un sonda publicida par la Rede Nasional de Pension en la semana pasada ia sujesta ce cuasi un dui de jubilores ave aora un revenu mensal cual es su la nivel ofisial de povria.
"Nos no pote vive con €400," ia es un canta lenta de la jubilores en sua protesta. Un otra ia es: "Ta ce la ricas paia per la crise."
La protesta ier ia es organizada per coaveni con la presenta de un bujeta ru, projetante 2,7% de crese economial, a parlamento. Alga de la protestores ia burla acel sujesta.
"Lo es mera un menti vasta grande," Vassilis Bardas, ci ave 76 anios, ia dise. "Esta governa es la mentores la plu grande de tota la otras juntada."
Pos la protesta, Nikos Toska, la ministro de proteje sitadanes, ia responde rapida, comandante ce gas lacrimojen es proibida de es usada en "protestas par jubilores e laborores".
@T Gas lacrimojen en la parlamento cosovan
@L aora_oji/2016/gas_lacrimojen_en_la_parlamento_cosovan
====== Gas lacrimojen en la parlamento cosovan ======
27 febrero 2016
La parlamentores de Cosovo ia eleje la ministro de esternas, Hashim Thaçi, como presidente a la fini de un dia malida par protestas.
El ia gania la majoria simple nesesada en la ronda tre, pos du niveles de vota nonconcluinte en la capital, Pristina.
Plu temprana, alga legores oposante ia es proibida de vota pos relasa gas lacrimojen en la construida de parlamento.
Thaçi, ci ave 47 anios, ia es un xef de gerilias en la gera cual ia provoca Cosovo, un provinse de etnico xef albanian, a declara autonomia de Serbia.
"Me promete construi un Cosovo nova, un Cosovo european, e profondi nosa relatas con la SUA," el ia dise pos la vota ier.
El segue Atifete Jahjaga como presidente.
En pasada, Thaçi ia servi ance como ministro xef. El ia disputa con multe grupos oposante pos aida negoisa un acorda con Serbia cual ia dona plu autonomia a la minoria serbsce de Cosovo.
Serbia, como multe otra paises de mundo, no reconose la autonomia cual Cosovo ia declara per se en 2008.
@T Inondas en Frans e Deutxland
@L aora_oji/2016/inondas_en_frans_e_deutxland
====== Inondas en Frans e Deutxland ======
3 junio 2016
On previde ce la acua inondante Paris va ateni oji sua culmina, con la Rio Seine a un altia de ses metres supra sua nivel normal.
La Louvre e la museo de Orsay es cluida afin sua empleadas pote move obras major de arte a locas plu secur.
La inondas tra Frans e Deutxland ia mata a la min 11 persones e ia obliga miles a abandona sua casas.
Plu deluvias es prevideda per la fini intera de semana tra un banda de Europa sentral, de Frans a Ucraina. On predise ce asta 50 milimetres de pluve va cade en alga partes en sola un pico de oras.
Alga vilas en Deutxland sude ia deveni forte danada, e Beljia e Polsca es ance afetada.
François Hollande, la presidente franses, ia dise ce la pluve es un fenomeno seria climal e un defia global. El va declara un state de desastre natural en la partes la plu colpada, tal librinte reservas finansial de crise.
En Paris, on ia erije paradeluvias tempora longo la Seine, cual ia supraflue en alga locas. La compania ferovial SNCF ia clui un linia cual vade longo la rio en la sentro de Paris.
Sirca 25 mil persones ave no eletrica en Paris e Frans sentral.
En Nemours, on ia sorti 3000 persones de la sentro de vila. La rio Loing, un afluente de la Seine, ave aora un altia no videda de pos la inondas ruinante de 1910.
Ses semanas de pluve ia cade en tre dias en la departe Loiret, sumerjinte ruas e obligante motoristes a abandona sua autos.
En Deutxland en dias resente, a la min nove persones ia mori par causa de la inondas, e la loca presente de alga persones es nonsabeda.
Angela Merkel, la canselor, ia dise ce la pais lamenta per los ci ia perde sua vives.
La aveni la plu mal ia es Simbach am Inn en Bayern en Deutxland sude, do on ia trova ce un fem de 78 anios, sua fia de 56, e sua neta de 28 anios ia mori en la sutera de sua casa.
Plu temprana en la semana, cuatro persones ia mori en inondas en la sude-ueste de Deuxtland.
En otra partes de la pais, on ia declara un state de crise en Passau, un vila istorial. En Pfarrkirchen a martedi, plu ca 35 milimetres de pluve ia cade en ses oras. E en la distrito Wesel en la stato Nordrhein-Westfalen, on ave ansia sur un parario cual pare a punto de rompe.
Ance Beljia ia esperia pluves forte. On reporta inondas en multe partes, incluinte sirca Antwerpen, Limburg, e Liège.
@T Irac lamenta la vitimes de un bombi en Baghdad
@L aora_oji/2016/irac_lamenta_la_vitimes_de_un_bombi_en_baghdad
====== Irac lamenta la vitimes de un bombi en Baghdad ======
4 julio 2016
La governa iraci ia declara tre dias de lamenta nasional pos un bomba grande en la capital Baghdad, cual ia mata a la min 125 persones e ia feri sirca 150.
Un camion cargada con esplodentes ia es detonada en la distrito Karrada en cuando familias ia es comprante per la vacanse a la fini de Ramadan.
Salvores ia dise ce familias intera ia es eliminada e ce multe vitimes ia deveni nonreconosable ardeda.
La organiza Daex dise ce lo ia fa esta ataca par bomba umana.
La ministro xef, Haider al-Abadi, ia visita ier la area xef xia, ma sua convoia ia encontra folas coler. Plu tarda, sua ofisia ia anunsia la tre dias de lamenta, ajuntante ce Abadi comprende la reata coler de abitores.
A noti de soldi, ecipos de laborores ia sutrae ancora detrito de la loca en cuando los ia xerca en la ruinas negrida de construidas.
La bombi, a sirca medianote de saturdi, ia es la plu matante en Irac de esta anio. Lo ia aveni a un semana pos la recatura de la site Falluja de Daex par soldatos iraci.
Metraje de la loca en la minutos pos la esplode mostra la area intera engolida par flamas.
Un bomba du ia esplode corta a pos en un otra area xef xia a norde de la capital, matante sinco plu persones.
Daex, cual segue sua varia propre e estrema de Islam suni, ia dise en un declara enlinia ce la ataca en Karrada ia es realida como un parte de "operas de securia continuante".
La SUA ia dise ier ce esta ataca forti sua deside per suporta soldatos iraci en sua combate contra Daex.
Ján Kubiš, la ambasador de la Nasiones Unida en Irac ia descrive la violentia como "un ata coarde e odiable de grandia sin presedente". El ia dise ce ativistes de Daex ci "ia sufri defetas a la fronte de batalia atenta venja sua perdes par ataca persones nonmilitar e nondefendeda".
Plu temprana ier, Abadi ia anunsia ance medios de securia aumentada, incluinte la elimina de la detetadores falsa de bombas cual on usa ancora a puntos de controla en Irac, an si on ia esposa los como nonfunsionante a alga anios ante aora.
El ia comanda ance ce on instala sistemes plu bon de esamina veculos a la puntos de entra a Baghdad e en otra provinses.
@T Irac proibi alcol
@L aora_oji/2016/irac_proibi_alcol
====== Irac proibi alcol ======
23 otobre 2016
La parlamento en Irac ia vota per proibi la vende, emporta, e produi de alcol.
Suportores de la cambia dise ce la dispone de alcol contradise Islam e es nonconstitual.
Oposores dise ce la vota viole garantias constitual de libria de crede relijial per grupos minor como cristianes. Los intende apela en la cortes contra esta deside nonprevideda.
La proibi ia es realida pos un cambia de opina par parlamentores conserviste.
Pos la cade de Saddam Hussein, atas persepida como oposada a la codigo moral de Islam ia es atacada en modo repeteda. Botecas de alcol ia es atacada en Baghdad e otra sites.
An si alcol no es comun trovada en restorantes e oteles en Irac, sua consuma es relativa comun en la multe botecas e bares peti de Baghdad.
La lege nova ia deveni asetada a un tempo cuando la atende es focada a la batalia per reprende controla de Mosul de la grupo militariste Daex, cual nomi se la Stato Islamiste.
Ammar Toma, un parlamentor ci ia suporta la proibi, ia razona ce lo es justida car la constitui esije ce "no lege cual contradise la furnis instituida de Islam pote es instituida".
@T Iran abri un capitol nova
@L aora_oji/2016/iran_abri_un_capitol_nova
====== Iran abri un capitol nova ======
17 janero 2016
Iran ia "abri un capitol nova" en sua relatas con la mundo, diseda par presidente Hassan Rouhani, corta pos la sutrae de punis economial contra la pais.
Ier, la AIEA (Ajenteria Internasional de Enerjia Atomal) -- la gardor nucleal internasional -- ia confirma ce Iran ia obedi un acorda desiniada per preveni lo de developa armas nucleal.
La plu de governas ueste ia bonveni la progresa, ma la ministro xef de Israel insiste ancora ce Tehran vole construi un bomba nucleal.
Benjamin Netanyahu ia dise: "Sin un reata conveninte a cada viole, Iran va descovre ce lo pote continua developa armas nucleal, destabli la rejion, e estende teror."
Ante la acorda, Iran ia ta pote rici un cuantia sufisinte de uranio per crea un bomba nucleal en mera un pico de semanas. Aora, esta ta ocupa plu ca un anio, e ta es vidable a esaminores internasional.
Rouhani ia dise ce la acorda dana no nasion, e ce tota es felis, estra los ci el ia descrive como provocores de gera en la rejion -- Israel e alga membros de la Congresa SUA con politica fisada.
En un declara a sua nasion a esta matina, el ia dise: "Nos, la iranis, ia estende nosa mano a la mundo como sinia de aminia, e, lasante pos nos la enemias, suspetas, e conspiras, ia abri un capitol nova en la relatas de Iran con la mundo."
El ia ajunta ce la sutrae de punis ia es "un momento monumental" per la economia de Iran, disente ce la pais nesesa depende min de revenu de petrolio.
Federica Mogherini, la xef de politica esterna de la Uni European, ia dise ce la acorda par Iran e la sutrae de punis va contribui a un boni de pas e securia rejional e internasional.
Oji, Yukiya Amano, la xef de la AIEA, va visita Tehran per discute como continua monitori la program nucleal de Iran. "Multe de labora es ja fada afin nos ateni esta punto, e la reali de esta acorda va esije un labora simil," el ia dise.
Como parte de la acorda, Iran ia debe redui vasta sua cuantia de sentrifugas e desasembla un reatador de acua pesosa, prosima a la vila Arak, car ambos ia es usable per aida crea armas nucleal. On ia pleni la reatador con beton.
Seguente estimas, la acorda va relasa cuasi $100 mil milion de ativas irani.
A mera oras ante la sutrae de punis, reportores ia sita la ministro de transporta irani disente ce on ia fa un acorda con la asosia Airbus en Europa per compra 114 avions nova de pasajor. E en novembre, Iran ia dise ce lo previde dupli sua esporta dial de 1,1 milion bariles de petrolio, direta cuando la punis va es levada.
Iran ia manteni sempre ce sua program nucleal es pasosa, ma oposores de la acorda -- como alga republicistes de la SUA -- dise ce lo no sufisi per preveni serta ce la pais pote developa un bomba nucleal.
A saturdi, la AIEA ia dise ce sua oservores ia serti ce Tehran ia completi la pasos esijeda. Como resulta, John Kerry, la ministro de esternas de la SUA, ia comanda ce on sutrae la punis economial nucleal de sua pais contra Iran.
Parlante en Wien, la capital de Osteraic, do el ia fa discutes con sua corespondente irani, Kerry ia dise ce Iran "ia embarca pasos importante" sur cual multe persones "ia duta ce los va aveni a cualce tempo".
La AIEA ia dise ce lo ia instala un aparato a la compleso de Natanz per monitori la rici uranial de Iran en tempo real, per serti ce on manteni la cuantia a o su 3,67% como acordada con la potias global.
Plu temprana ier, on ia descovre ce Iran ia libri cuatro prisonidas irani-american, parente en un intercambia de prisonidas con la Statos Unida.
Un de los, Jason Rezaian, un jornaliste, ia es acusada de spia e prisonida en novembre pasada. La SUA ia dise ce lo ofre un pardona a sete iranis tenida per viole de punis economial.
@T Island eleje sua presidente nova
@L aora_oji/2016/island_eleje_sua_presidente_nova
====== Island eleje sua presidente nova ======
26 junio 2016
Guðni Jóhannesson, un istoriste e un politiciste nova, ia vinse en la eleje presidental de Island.
Pos la conta de 32% de votas, el ia gania 37,8% de los, plu ca la 29,9% ganiada par sua oposor, la comersior Halla Tómasdóttir.
Jóhannesson ia comenta: "On no ia conta tota la votas, ma me crede ce nos ia vinse." El ia informa sua suportores ce el va labora multe per es la fortia uninte cual islances desira e merita.
Multe persones ia predise ce el va sustitui per Ólafur Ragnar Grímsson, ci ia ocupa la posto de 1996.
On crede ce sirca 10% de la popla de la isola es aora en Frans, regardante sua futbalores en la torneo Euro 2016. Jóhannesson ia dise ce sua taxe prima de presidente va es visita Frans per aclama la ecipo islansce en sua max de ronda du contra England a lundi.
La ambasada de Island en Frans ia envia paperes de vota a la otel de la ecipo en Annecy, afin la juores pote vota a saturdi. Ma on ia organiza no tal sistem per la fanes islansce ci es en Frans, e esta pote produi un partisipa multe basa de min ca 65%.
La presidentia de Island es un posto xef ritual.
La eleje ia aveni a un tempo cuando la popla es desencantada con sua clase political. En la investiga sur evitas de imposta pos la esposa de la Paperes Panaman, on ia alega ce alga politicistes islansce posese contas estrateritorial.
Acel scandal ia obliga Sigmundur Gunnlaugsson, la ministro xef, a resinia.
Jóhannesson ave 47 anios. El es un esperta sur istoria political, diplomatia, e la constitui, e no ia declara cual partito political el suporta.
El descrive se como un padre normal ci gusta leje, core lenta, e jua futbal. El ia tradui ance a la lingua islance cuatro novelas par Stephen King, un autor famosa de trileres.
@T Italia sentral sufri un trematera major
@L aora_oji/2016/italia_sentral_sufri_un_trematera_major
====== Italia sentral sufri un trematera major ======
24 agosto 2016
Un trematera de mesura 6,2 ia aveni en Italia sentral, matante a la min des persones mor e trapinte otras su detrito.
La maior de Amatrice, un de la areas la plu afetada, ia dise: "Un dui de la vila ia desapare."
On teme ce un familia de cuatro persones ia mori en la ruina de sua casa en Accumoli, un vila visina.
La trema ia aveni a 03:36 de ora local, a 100 cilometres a norde-este de Roma, con sola 10 cilometres de profondia. Alga construidas en la capital ia secute tra 20 secondos.
Alga de la dana la plu grave es en la vila Amatrice, do alga persones ia mori e on labora per salva survivores. La strada xef tra la vila es ruinada, e on labora per atenta ateni ses persones en un construida colasada.
Du persones ia mori ance en la vileta Pescara del Tronto.
Un fem de Ceselli en Umbria ia comenta: "Lo ia es tan forte. Lo ia pare ce la leto traversa la sala par se mesma con nos sur lo."
Inisial, on ia reporta la mesura de la trema como 6,4. Alga replicas sismica cuasi tan forte ia segue lo.
La trema ia colpa prosima a Norcia, un vila umbrian de cual sua sentro istorial e depintin es un loca cual multe turistes visita. Ma la maior de Norcia ia dise ce on ia reporta ala no moris. "La strutures antisismica de la vila ia resiste. La erita e construidas istorial es danada, ma nos ave no feris grave."
En 2009, un trema de mesura 6,3 en la rejion L'Aquila, e ance esperiada en Roma, ia mata plu ca 300 persones.
@T Italianes protesta contra reconose de duples ge
@L aora_oji/2016/italianes_protesta_contra_reconose_de_duples_ge
====== Italianes protesta contra reconose de duples ge ======
31 janero 2016
En Roma, miles de persones ia asembla per protesta contra un projeta de reconose legal duples ge e dona a los la direto de adota.
Protestores ia veni de tra Italia per es presente a la "Dia de Familia", cual ia inclui pretes catolica en un dansa de conga.
La parlamento ia comensa considera esta legi en la semana pasada, e va vota sur lo en febrero.
Italia es la sola de la nasiones ueste major cual no ia reconose ja legal la duples omosesal.
Multe de los a la asembla a la Sirco Masima, un loca antica de corsa de caros, ia teni banderas con la testo "Mal es mal an si lo deveni legal".
"Esta duples es multe fasil per formi ma ance fasil per colasa," un protestor ia dise. "En loca, nos opina ce la familia ave un valua grande e ce esta lege pote destrui lo."
Spesial controversa es un parte de la projeta cual va permete persones ge a adota la enfantes biolojial de sua asosior.
Un otra protestor ia dise: "La familia tradisional es escluinte fundida sur un om e un fem. Nos no vole priva enfantes de la direto de ave un padre e un madre."
Organizores ia dise ce du milion persones ia asembla, ma esta es multe plu ca la loca pote conteni. Jornalistes presente ia estima la cuantia a sirca 300 mil.
En sua intende de legali la projeta, la ministro xef Matteo Renzi es oposada par otra membros de sua governa aliada. Sua ministro de ambiente ia es a la asembla, e sua ministro de internas ia tuita sua suporta per lo.
Ma en la semana pasada, on ia asembla en sites major tra la pais, esijente un reconose legal per duples ge.
Italia ia reseta ja cexas de la Corte European de Diretos Umana sur sua disposa a la sposi omosesal.
@T Juncker averti ce Trump risca turba relatas con la UE
@L aora_oji/2016/juncker_averti_ce_trump_risca_turba_relatas_con_la_ue
====== Juncker averti ce Trump risca turba relatas con la UE ======
12 novembre 2016
Jean-Claude Juncker, la presidente de la Comision European, ia averti ce la eleje de Donald Trump risca turba "fundamental e strutural" la relatas entre la Uni European e la SUA.
"Nos va nesesa instrui la presidente elejeda sur lo cual Europa es e como lo funsiona," el ia dise a studiantes en Luxemburg.
El ia predise ce on va peri du anios en cuando Trump "turi un mundo cual el no conose".
Sua comentas ia contrasta con la reatas min forte de otra xefes de la UE.
En New York, Trump ia comensa formi la ecipo ci va gida el asta sua indui a 20 janero, cuando el va emprende la posto presidental en la Casa Blanca.
Juncker ia ofre ja sua lodas formal a Trump a martedi, en un declara juntada con Donald Tusk, la presidente de la Consilio European.
Ma parlante ier, el ia fa comentas como estas:
"Jeneral, la americanes ave no interesa a Europa."
"En la campania, senior Trump ia dise ce Beljia es un vileta a alga loca sur nosa continente."
"El leva demandas cual ta pote ave resultas danante, car el crea duta sur la alia transatlantica e donce la model sur cual la defende de Europa resta."
"El ave un opina sur refujadas e americanes nonblanca cual no refleta credes e sentis european."
En sua campania, Trump ia provoca alarma en la UE par sua critica forte de OTAN, la funda de la strutur defendal de Europa ueste, e par sua recomendas de relatas plu bon con Rusia.
Conserna ia es ance causada par sua promete de "cansela" la Acorda Climal de Paris en sua 100 dias prima de presidentia, par sua disposa protejiste sur comersia, e par sua comentas controversa sur minorias etnical e relijial.
An si xefes UE ia loda la republiciste sur sua vinse xocante contra Hillary Clinton, la canselor deutx Angela Merkel ia asentua en sua mesaje a el ce la SUA e Deutxland comparti "la valuas de democratia, libria, respeta per la rena de lege e dinia umana, sin relata a orijina, color de pel, relijio, jenero, orienta sesal, o crede political".
Deutxland, Frans, e Nederland va ave elejes en la anio veninte. Partitos popliste e estrema destriste atenta esplota la noncontentia sur la problem continuante de migrores en la UE e la recovre lenta par la eurozona de sua crise de deta.
@T Juores de Pokémon Go risca bombetas en Bosnia
@L aora_oji/2016/juores_de_pokemon_go_risca_bombetas_en_bosnia
====== Juores de Pokémon Go risca bombetas en Bosnia ======
20 julio 2016
On averti bosances ci jua Pokémon Go contra vaga en areas do la tera conteni ancora bombetas de la gera en la desenio de 1990.
Un asosia carital bosansce, Posavina bez mina (Posavina sin bombetas), ia fa sua averti pos oia reportas ce usores de Pokémon Go entra a areas perilosa.
En la jua multe susedosa, juores usa sua telefonetas per xerca monstros animada en la mundo real.
Asidentes de bombeta ia mata a la min 600 persones en Bosnia pos la fini de la gera en 1995. On estima ce sirca 120 mil bombetas resta nondescovreda.
En cuando la popularia de Pokémon Go ia crese, la mundo ia esperia multe avenis e asidentes envolvente la juores.
Plu temprana en esta semana, en la stato Florida en la SUA, un posesor de casa ia xuta a du juores adolesente sur ci el ia crede ce los es efratores.
Ma la jua ia produi ance alga efetos positiva e nonespetada. En un vila en la Rena Unida, la polisia ia dise ce juores ia reporta un fura en cuando los ia xerca monstros.
@T Köln aumenta la securia per sua carnaval
@L aora_oji/2016/koeln_aumenta_la_securia_per_sua_carnaval
====== Köln aumenta la securia per sua carnaval ======
4 febrero 2016
En Deutxland ueste, la site Köln ia aumenta sua securia per sua carnaval anial, pos cuando multe femes ala ia es atacada e rubada a la comensa de la anio.
2500 polisiores va patrulia la stradas tra la carnaval de un semana.
La pais ia es xocada par la atacas a la anio nova, sur cual on ia culpa xef migrores. Deses de femes ia es vitimes, ma la estende de la problem no ia deveni clar asta pos la pasa de alga dias.
La turba ia nuri un ansia entre deutxes sur un enflue vasta de refujadas. En la anio pasada, migras a Deutxland de estra la Uni European ia ateni 1,1 milion -- un cuantia recordo.
La problemes en Köln a la comensa de la anio ia contribui a un colasa en la grado de aproba per la canselor, Angela Merkel.
Polisiores va es presente a un punto nova de securia per femes, prosima a la catedral de Köln, en la area do la plu de atacas ia aveni entre la selebras de la anio nova.
La polisia ia proba ja "cameras de corpo" (portada sur la vestes) cual pote filma suspetadas en tal avenis.
Merkel ia es criticada par sua aliadas conserviste -- como ance par multe politicistes oposante -- per bonveni tan multe persones a Deutxland.
On dona jeneral refuja a los de Suria e Irac, ci esiste en cuantia grande, ma ance multe migrores economial de estra la UE atenta veni a Deutxland per abita.
@T Kuczynski gania la presidentia de Peru
@L aora_oji/2016/kuczynski_gania_la_presidentia_de_peru
====== Kuczynski gania la presidentia de Peru ======
10 junio 2016
Pos la conta de tota votas, lo pare ce la economiste Pedro Pablo Kuczynski ia gania apena la eleje presidental de Peru.
La comision elejal ia dise ce el ia reseta 50,12% de la votas, contra 49,88% per sua oposor, Keiko Fujimori.
Ante cuando on pote declara ofisial la ganior, sirca 50 mil votas resta per es judida par un corte elejal.
Fujimori ancora no ia aseta sua defeta, ma Kuczynski ia tuita sua grasias a la popla peruan. "Lo es la momento per labora en junta per la futur de nosa pais," el ia dise a sua seguores en Twitter.
Esta ia es la eleje la plu difisil ganiada en Peru en sinco desenios.
An en cuando on ia es contante la votas final, la aspirores ia resta cuasi egal, con mera un vantaje pico per Kuczynski.
La resulta ia surprende multe persones, car sondas en la periodo ante la eleje ia sujesta ce Fujimori ave un vantaje grande.
Analistes ia dise ce scandales de froda en la partito de Fujimori, Fortia Popular, ia redui cisa sua cuantia de suportores pos april, cuando el ia gania fasil la ronda prima de votas.
El es la fia de Alberto Fujimori, un presidente pasada de Peru, ci es en prison per crimines contra diretos umana.
Kuczynski es un finansior pasada de Wall Street. El ia dise ce el va usa sua esperia de finansia internasional per promove un crese de economia.
El ave la suporta de persones importante como Mario Vargas Llosa, un novelor ci ia gania la Premio Nobel de Leteratur, e la aspiror sinistriste Verónika Mendoza, ci ia fini la ronda prima de votas como la numero tre.
Ma on ia esamina Kuczynski sur sua relata prosima a la persones potiosa ci influe la comersia de la pais.
[Aora oji va recomensa a 18 junio.]
@T La 1% la plu alta es tan rica como la otra 99% combinada
@L aora_oji/2016/la_1_la_plu_alta_es_tan_rica_como_la_otra_99_combinada
====== La 1% la plu alta es tan rica como la otra 99% combinada ======
18 janero 2016
La asosia Oxfam dise ce la 1% la plu rica de la mundo ave aora tan multe mone como la resta de la mundo combinada.
Lo usa datos de otobre de la compania Credit Suisse per sua reporta, cual recomenda ce la xefes consentante en Davos en Suiz en esta semana ata contra la nonegalia.
Oxfam ia calcula ance ce la 62 persones la plu rica de mundo ave combinada tan multe mone como la dui la plu povre de la popla global.
Lo ia critica la labora de los ci promove per comersia e la cuantia de mone cual es tenida en paradisos finansial.
Oxfam ia predise ja ce la 1% va suprapasa la resta de mundo a esta tempo en la anio pasada.
Per trova se en la 10% la plu alta, on nesesa ave mone fisical e ativas con valua de $68 mil; e per es en la 1%, on nesesa $760 mil.
La statistica es acompaniada par avisas diversa, per esemplo ce informas sur la mone de persones suprarica es difisil per oteni. Credit Suisse dise ce sua estimas de la proportio de ricia tenida par la 10% e la 1% "era probable en dirije tro basa".
Car lo es global, la reporta nesesa inclui ance alga estimas de niveles de ricia en paises per cual no statistica esata es disponable.
Sur la fato ce la 62 persones la plu rica ave la mesma como la 50% la plu povre, Oxfam ia comenta ce esta indica un consentra notable nova de ricia, car en 2010, la 50% ia es egalida par 388 individuas.
La reporta dise: "En loca de un economia cual labora per la ricia de tota, per jeneras futur, e per la planeta, nos ia crea un economia per la 1%."
Tra la periodo en cual Credit Suisse ia fa esta rexerca, la tende ia es ce la proportio de ricia tenida par la 1% la plu alta ia cade gradal entre 2000 e 2009, ma ia crese a cada anio a pos.
Vera, sola en la statistica de 2015, la proportio de la 1% suprapasa sua proportio en la reporta prima en 2000.
Oxfam recomenda a governas ce los ata per reversa esta tende. Lo vole ce on paia un salario capas de susta a laborores, e ce on redui la difere creada par premios a dirijores.
Lo recomenda ance un fini de diferes de paia par jenero, compensas per curores nonpaiada, e la promove de diretos egal de imobila e erita per femes.
E lo vole ce governas ata contra la promoves per comersia, basi la premio de medisines, imposta la ricia e no la consuma, e fronti la nonegalia par sua modo de spende publica.
@T La aniversario tredes de Txornobil
@L aora_oji/2016/la_aniversario_tredes_de_txornobil
====== La aniversario tredes de Txornobil ======
26 april 2016
Ucraina onora la aniversario tredes de la desastre nucleal en Txornobil.
On ia sona avertadores a la mesma momento como la esplode prima a la reatador, en la oras temprana de 26 april 1986.
La fonde a la compleso resta la desastre la plu grave de istoria. Un reata noncontrolada ia rompe la teto, emetente un nube de materia radioativa cual ia traversa la fronteras de Ucraina a Rusia, Bielarus, e un parte grande de Europa norde.
La relatadas de los ci ia mori ia partisipa en vijilas en lus de candela a eglesas, incluinte en la capital Kiev e en Slavutitx, un vila construida per recasi laborores ci ia abita prosima a la compleso nucleal.
Ante la aniversario, alga abitores pasada ia reveni a la loca, aora descurada e plen de plantas savaje.
Zoya Perevozchenko, ci ave 66 anios, ia abita en Pripyat, un vila de laborores de Txornobil cual on ia abandona pos la asidente. El ia descrive sua visita: "Me ia trova apena mea aparte, car lo es aora un foresta -- arbores crese tra la troteria, sur la tetos. Tota la salas es vacua, la vitro ia cade de la fenetras, e tota es destruida."
La nivel de radioativia resta alta en la area ensircante. Un organiza carital, Pontes a Bielarus, averti ce alga bebes en un rejion prosima a la frontera ucrainsce nase ancora con malformis grave, e un cuantia nonusual grande de persones ave canseres de formas rara.
Ier, donores de tra la mundo ia ofre €87,5 milion ($99 milion) per crea un compleso nova suteran de dejetada nucleal en la rejion. Ucraina va nesesa ajunta ancora €10 milion per completi la projeta.
On ia comensa labora en 2010 sur un sarcofago de 25 mil tones per enclui la 200 tones de uranio cual resta en la reatador danada. Esta projeta custa €2,1 mil milion.
Espertas teme ce si partes de la reatador senesente colasa, plu materia radioativa ta pote es ejetada a la atmosfera.
On disputa ancora cuanto persones ia es matada par la desastre. Un reporta en 2005 par la Foro de Txornobil, suportada par la Nasiones Unida, ia conclui ce min ca 50 persones ia mori par esposa a radia, de ci la plu es laborores ci ia mori direta pos la aveni. Ma alga ia survive asta tan resente como 2004.
La foro ia estima ce ultima asta 9000 persones pote mori de esposa a esta radia. La organiza Greenpeace alega ce la cuantia pote es tan alta como 93 mil.
@T La avion noncarburante cual ia sirconaviga la mundo
@L aora_oji/2016/la_avion_noncarburante_cual_ia_sirconaviga_la_mundo
====== La avion noncarburante cual ia sirconaviga la mundo ======
24 julio 2016
Impulsa Solal, la avion de zero carburante, ia parti de la capital misre, Qahira, en la paso final de sua turi de globo.
Lo viaja a Abu Zabi en la Amirias Arabi Unida, do lo ia comensa sua sirconaviga en marto 2015.
La viaja va ocupa sirca 48 oras, e la pilote es Bertrand Piccard.
On previde un vola relativa simple, an si la ecipo ave ansia sur la efeto de la caldia en Asia sude-ueste a la avion. Piccard va debe probable spende multe tempo a altia grande, enspirante osijen aumental, per leva supra la colones termal e la turba cual los produi.
La aira plu calda e min densa supra la deserto saudi va labora ance plu la motores per propulsa la veculo. Par causa de esta, on va maneja atendente la reservas de enerjia en la pilas de polimer de litio, per serti ce los susta la avion tra la oras de note.
Impulsa Solal ia viaja tra 30 mil cilometres en sua aventura per deveni la avion prima cual sirconaviga la mundo par sola la enerjia de la sol, en loca de carburante.
La vola de Qahira a Abu Zabi es la parte 17 e final en sua viaja grande, cual ia inclui traversas de la Mares Pasifica e Atlantica.
Piccard e André Borschberg, sua ami e asosior comersial, ia alterna como pilote.
La duple ia espera completi la defia en la anio pasada, ma sua progresa no ia es sufisinte rapida per encontra la clima la plu bon en la estate de la emisfera norde. E cuando la pilas ia es danada en un viaja epica de sinco dias e notes supra la Pasifica ueste en junio e julio 2015, on ia deside resta a tera per des menses.
La idea ia nase cuando Piccard ia fa la sirconaviga prima nonparante en balon en 1999. Sua balon ia ariva apena, aterante en la deserto misre con cuasi no reservas restante de la propano cual lo ia usa per susta sua vola.
Piccard ia dise alora ce un otra metodo debe esiste.
El aseta ce aviones comersial no es a punto de cambia sua motores de jeto a selulas solal, ma el razona ce enerjia solal va ave un rol en la futur de avioni.
"Me aposta," el ia dise, "ce pos des anios nos va ave aviones eletrical con 50 pasajores per volas corta o media. On pote vola sin contamina e sin ruido, ma aterante en airoportos urban, creante no disturba per la visinas."
@T La avocatos per Salah Abdeslam sesa defende el
@L aora_oji/2016/la_avocatos_per_salah_abdeslam_sesa_defende_el
====== La avocatos per Salah Abdeslam sesa defende el ======
12 otobre 2016
Avocatos per la suspetada xef de la atacas islamiste en Paris en la anio pasada dise ce los no plu va defende el.
Salah Abdeslam va usa sua direto de resta silente.
Un de la du avocatos, Frank Berton, ia esplica: "Nos ia dise de la comensa ce nosa cliente ta resta silente, nos ta para sua defende."
En novembre pasada, atacas contra bares, restorantes, un salon de conserta, e la stadion nasional ia mata 130 persones. La organiza Daex ia dise ce lo ia esecuta la atacas.
On ia aresta Salah Abdeslam en Bruxelles en marto. El ia resta silente pos sua move a Frans en april.
El es monitorida par camera per 24 oras de dia en sua selula de prison. En maio, Berton ia dise ce la suspetada es "spesial disturbada" par la monitori.
On crede ce Abdeslam ia fa un rol major en scema la atacas de Paris e en transporta la atacores, ma investigores ancora no ia descovre sua rol esata.
A 6 otobre, la avocatos ia informa el ce los va sesa representa el. On reporta ce, a presente, Abdeslam no desira es defendeda par un otra avocato.
El no nesesa un representa legal en cuando la investiga continua, ma va nesesa lo a sua prosede.
La otra avocato, Sven Mary, ia comenta: "La vitimes vera de tota de esta es la vitimes de la atacas de Paris, car los ave la direto de esta veria e de atenta comprende la noncomprendable."
@T La bebe prima de 28 anios en un vila italian
@L aora_oji/2016/la_bebe_prima_de_28_anios_en_un_vila_italian
====== La bebe prima de 28 anios en un vila italian ======
29 janero 2016
Un vila peti en Italia norde selebra la ariva de sua bebe prima de pos la desenio de 1980.
La maior de Ostana, cual es situada en la montania de la rejion Piemonte, dise ce la bebe es "un sonia realida" per la comunia pico, cual ia esperia un diminui de sua popla en la sento anios pasada.
La bebe Pablo, naseda en un ospital de Torino en la semana pasada, leva la cuantia de abitores a 85, an si sola sirca un dui abita permanente ala.
Giacomo Lombardo, la maior, dise ce an si mil persones ia abita en Ostana en la temprana de la sentenio 20, un cade constante en la taso de nase ia comensa pos la Gera Mundal Du. "La declina vera ia comensa en 1975, con sola 17 bebes entre 1976 e 1987, cuando la xico final ia nase -- asta la peti Pablo."
Ostana atenta reversa la tende despoplinte, xef par crea empleas nova. La jenitores mesma de Pablo, Silvia e José, ia intende move a estra la pais a sinco anios ante aora, ma ia resta cuando on ia ofre a los la posible de maneja un refujeria sur un monte prosima.
Alga persones senti ce la esperia de acel familia premostra bon per otra comunias montanial.
Marco Bussone de la Uni Nasional de Vilas e Comunias de Monte ia dise: "Los es elejes individua, ma los multipli." El desira regulas nova como esentas de imposta de companias, per aida la rejenera de comunias.
Vilas peti tra Italia batalia la despopli car persones joven parti per xerca labora. Alga ia atenta reversa la situa par ofre casas vacua sin custa, e un maior ia foca an sua ativia a para la declina de la popla esistente par "proibi" abitores de deveni malada.
En Ostana, on joia la ariva de Pablo con un selebra e -- a la entra de la vila -- un siconia artifis con paco peti azul a sua beco.
@T La campania de Trump aseta ce Obama ia nase en la SUA
@L aora_oji/2016/la_campania_de_trump_aseta_ce_obama_ia_nase_en_la_sua
====== La campania de Trump aseta ce Obama ia nase en la SUA ======
16 setembre 2016
La campania de Donald Trump ia publici un declara asetante ce presidente Barack Obama ia nase en la SUA. La aspiror republiciste ia es un de la gidores de un promove cual ia fa demandas sur la sitadania de Obama, ci ia nase en Hawaii.
Ma aora la campania de Trump acusa aora ce sua oposor democrata Hillary Clinton ia introdui la "manxa" en la concurso de nomina democrata de 2008. No atesta esiste cual lia Clinton e la promove.
En reata, Clinton ia tuita ce la seguor de Obama "no pote es e no va es la om ci ia gida la promove raziste dutanase".
La declara ia apare pos un intervisa en cual Trump ia refusa dise ce Obama ia nase en la SUA, indicante en loca ce el no vole responde a la demanda.
Un teoria de conspira dise ce Obama ia nase vera en Cenia e es nonelejable per preside la SUA per esta razona. Reportas en publicis diversa sujesta ce la teoria ia es sirculida en 2008 par suportores forte de Clinton cuando lo ia deveni clar ce el no va gania la nomina democrata. Ma on ave no atestas relatante o Clinton o sua campania de acel anio con la teoria.
La idea ia revive entre alga suportores de John McCain, la aspiror republiciste, cuando el ia comensa perde contra Obama en sondas de opina.
Trump ia fa demandas publica sur la sitadania de Obama cuando Obama ia aspira sua periodo du como presidente.
En april 2011, Trump ia defia el a mostra sua documento de nase, ganiante aproba de republicistes. Pos alga semanas, Obama ia publici sua documento de nase de la stato Hawaii. A un come de sera con jornalistes en acel anio, Obama ia trata la alegas como nonimportante e el ia burla Trump.
En agosto 2012, la aspiror republiciste Mitt Romney ia refere a la teoria falsa ante un asembla de sua campania. El ia broma ce nun ia demanda per vide sua documento de nase. La campania de Obama ia condena rapida el.
@T La CIA es criticada per tuita la mori de bin Laden
@L aora_oji/2016/la_cia_es_criticada_per_tuita_la_mori_de_bin_laden
====== La CIA es criticada per tuita la mori de bin Laden ======
2 maio 2016
En la SUA, on ia critica la Ajenteria Sentral de Informas (conoseda como la CIA) per tuita en tempo real la mata de Osama bin Laden, cual ia aveni a sinco anios ante aora, como si lo aveni aora.
Lo ia comparti detalias de la mision e informas cual ia gida a la loca de la om la plu xercada de America.
Ma la reata ia es xef negativa. Un usor de Twitter ia descrive la tuitas como "fea e embarasante". Otras ia posta memes e imajes de persones ci leva frustrada sua oios o pone sua testa en sua manos.
La tuitas par la CIA pertine usual a trivia e ojetos istorial.
La xef de al-Qa'ida, sur ci on crede ce el ia comanda la atacas de 11 setembre 2001 a New York e Washington, ia es matada par fusili a un compleso en Abottabad en Pacistan en maio 2011. El ia evita catura par la SUA e sua aliadas tra cuasi un desenio.
Parlante a la aniversario sinco de sua mori, la dirijor de la CIA, John Brennan, ia dise ce la SUA ia destrui un parte grande de al-Qa'ida.
El ia dise ce bin Laden ia ave un sinifia grande simbolin e stratejial, e ce lo ia es importante ce on ia sutrae la om culpable per la atacas de 11 setembre.
El ia ajunta ce sutrae Abu Bakr al-Baghdadi, la xef de la organiza Daex (cual nomi se la Stato Muslim de Irac e la Levante), ta pote ave ance un efeto grande, ma ce ajenterias contrateroriste fronti no mera un organiza ma un fenomeno, e ce la defia va continua tra multe anios.
"Me opina ce lo ave un resona, nonfortunosa," Brennan ia comenta, "cual ia atrae la cores e spiritos e mentes de individuas ci es malgidada par la presenta de lo como un bandera relijial."
@T La comersia de asiones xines es denova pausada
@L aora_oji/2016/la_comersia_de_asiones_xines_es_denova_pausada
====== La comersia de asiones xines es denova pausada ======
7 janero 2016
La comersia en mercatos xines continental ia pausa per la dia, pos cuando asiones ia cade par plu ca 7% a la ves du de esta semana.
La regula "rompesircuito", introduida per redui volatilia, ia es ativida en la tredes minutos prima de comersia.
Investores ia deveni ansiosa cuando la banco sentral ia ata per debili la iuan. Esta ia indica ce Beijing desira aumenta sua esportas, car cisa la economia de la pais lenti plu ca prevideda.
La indise CSI 300, cual ia causa la para de comersia, ia cade par 7,2% a 3284,74. La indise es un colie de asiones major de Xanghai e Xenjen, e lo ia comensa par ativi un pausa de 15 minutos cuando lo ia cade par 5%.
La indise Xanghai Composada, un mesurador de comersia en Xina, ia cade ance, par 7,3% a 3115,89, e la Xenjen Composada, cual conteni multe asiones tecnolojial, ia perde 8,3% ante la sesa completa de comersia per oji.
Esta ia es la dia la plu corta de comersia en la istoria de 25 anios de la asioneria de Xina.
Pos la para, la Comision Regulante de Titulos Finansial de Xina ia anunsia ce asionores major no pote vende plu ca 1% de la asiones de un compania en la tre menses comensante a 9 janero.
Un regula de ses menses cual ia proibi ce asionores major vende sua asiones va fini a venerdi.
@T La cuantia de deslocadas es la plu grande de istoria
@L aora_oji/2016/la_cuantia_de_deslocadas_es_la_plu_grande_de_istoria
====== La cuantia de deslocadas es la plu grande de istoria ======
20 junio 2016
La ajenteria de refujadas de la Nasiones Unida dise ce la cuantia de persones deslocada par gera es la plu alta de istoria rejistrada.
Lo estima ce, a la fini de 2015, 65,3 milion persones ia es o ja refujada o xercante refuja o interna deslocada. La cuantia ia crese par 5 milion persones en un anio.
La cuantia coresponde a un person en cada grupo de 113 sur la planeta.
Entretempo, la xef NU sur refujadas dise ce un clima disturbante de xenofobia ia saisi Europa en cuando lo luta per maneja la crise de migrores.
La enflue de persones, la plu grande de pos la Gera Mundal Du, ia aumenta la suporta per grupos estrema destriste e politicas controversa contra la migra.
En sua reporta anial oji, a la Dia Mundal de Refujadas, la NU ia dise ce esta es la ves prima cuando la cuantia de refujadas en la mundo ia esede 60 milion.
Plu ca un dui de los veni de sola tre paises: Suria, Afganistan, e Somalia.
An con la foca intensa sur la crise de migrores a Europa, la NU ia dise ce 86% de la refujadas de mundo es refujada en paises de revenu basa e media.
Turcia es la pais cual reseta la plu multe refujadas, con 2,5 milion persones, segueda par Pacistan e Lubnan.
Plu ca milion migrores ia ariva en Europa par mar en la anio pasada, seguente la Organiza Internasional per Migra (OIM), ma otra ajenterias estima un cuantia multe plu grande. La OIM ia dise ce sirca 35 mil ia ariva par tera.
La destinas prefereda per la plu multe persones es paises norde e plu rica, como Deutxland e Sveria. Esta es refletada en la statistica NU per solisitas nova de refuja en 2015, cual indica Deutxland como la resetante major, segueda par la Statos Unida e Sveria.
La plu de refujadas suri en Turcia pertine a la scema tempora de proteje de la governa turces, e donce on no conta los como refujadas.
La crise european de migra ia causa divides political major en la Uni European. Alga statos en la zona Schengen, en cual on ia aboli fronteras nasional, erije sercas e reinstitui un sistem de frontera.
La bloco european ia ateni un acorda con Turcia en un atenta de limita la move coletiva de persones a la UE. Grupos de diretos umana ia critica forte esta acorda.
En comentas separada, Filippo Grandi -- la xef NU sur refujadas -- ia dise ce xefes de statos european debe ata plu per coordina sua politicas e per combate stereotipos negativa sur refujadas. "Los ci fa la reversada, ci tisa la opina publica contra refujadas e migrores, es culpable de crea un clima de xenofobia cual es multe disturbante en la Europa de oji."
El ia ajunta ce lo es nonfortunosa ce alga desides fada par la UE per maneja la crise "no ia es realida", e ia descrive esta como "un posible cual on ia perde".
@T La destra estrema gania la ronda prima en Osteraic
@L aora_oji/2016/la_destra_estrema_gania_la_ronda_prima_en_osteraic
====== La destra estrema gania la ronda prima en Osteraic ======
25 april 2016
En Osteraic, la aspiror estrema destriste de la Partito de Libria ia vinse en la ronda prima de elejes presidental.
Norbert Hofer ave sirca 36% de la votas per la rol, cual es xef ritual. Esta cuantia no es sufisinte grande per evita un plu vota en maio.
Lo es probable ce el va es oposada par Alexander Van der Bellen, un aspiror autonom, suportada par la Verdes, ci ave 20% en la sondas.
A la ves prima pos la Gera Mundal Du, la aspirores de la du partitos xef de Osteraic ia es eliminada en la ronda prima.
Lo pare ce cada de Rudolf Hundstorfer de la Democratas Sosial e Andreas Khol de la Partito de la Popla, a sinistra e destra de la sentro, ia gania sirca 11% de votas.
Ambos partitos ia governa Osteraic tra desenios -- o solitar o aliada.
La vinse clar de la aspiror estrema destriste refleta un noncontentia vasta con la state presente, e ance un ansia sur la economia e sur migras a la pais.
La suporta per la Democratas Sosial e la Partito de la Popla ia diminui en anios resente. En 2013, en la elejes jeneral la plu resente, la du partitos ia gania apena un cuantia sufisinte de votas per governa en un "alia grande".
Si, como pare, no aspiror gania un majoria de votas en la ronda prima de la elejes presidental, la ronda du va aveni a 22 maio.
La presidente presente, Heinz Fischer, ci ave 77 anios, no pote aspira denova la rol pos du periodos ja en la posto.
@T La dia la plu calda en Barat
@L aora_oji/2016/la_dia_la_plu_calda_en_barat
====== La dia la plu calda en Barat ======
20 maio 2016
Un site barati en la stato Rajasthan ia rompe la recordo de temperatur de la pais, rejistrante 51°C.
La recordo nova en Phalodi, en esta stato de deserto, ia apare a media de un onda de caldia tra la intera de Barat.
La recordo presedente per la temperatur la plu alta ia es 50,6°C, notada en 1956.
La caldia ia colpa multe de la norde de la pais, do la temperatur es ja plu ca 40°C tra alga semanas.
On esperia sempre semanas de sol forte e caldia cresente ante la saison de monson en Barat, ma lo es nonusual ce la temperatur esede 50°C e menasa la vive.
La ofisia de meteorolojia ia publici avertis de "onda de caldia sever" tra partes grande de la statos norde e ueste de Barat per la fini de semana.
Barat declara un onda de caldia cuando la temperatur masima ateni 45°C, o sinco grados plu alta ca la promedia per la area en anios presedente.
En esta estate, la caldia ia prende deses de vives en Telangana e Andhra Pradesh, statos sude.
On previde un libri permanente de la caldia sola cuando la monson va ariva. Esta aveni normal en la media de junio.
@T La economia de Japan contrae
@L aora_oji/2016/la_economia_de_japan_contrae
====== La economia de Japan contrae ======
15 febrero 2016
La economia de Japan ia contrae en la tre menses final de 2015, ajuntante a un serie de problemes per la politica governal de reformi economial.
La statistica ofisial mostra ce entre otobre e desembre, lo ia diminui par 0,4% en compara con la cuatri presedente. On ia previde un redui de 0,3% per la cuatri.
Un desira min forte per benes en la pais ia contribui a la contrae, como ance un investi min rapida en casas.
Si on aniali la statistica, la economia ia contrae par 1,4% en la periodo, ma on ia previde un contrae anialida de 1,2%. Esta cuantia anialida es la taso a cual la economia ta diminui tra 12 menses, si la cuatri final ta refleta la anio intera.
La projeta de la ministro xef Shinzo Abe per revive la economia -- nomida "abenomia" -- ia es introduida pos sua vinse en la vota de desembre 2013.
Lo ia intende combate la defla, con cual Japan ia luta tra cuasi du desenios, e ance aumenta la desira per benes e la investi. Lo ia vole ance debili la ien per aida ce companias multe esportante como Toyota deveni plu competosa.
Ma la crese ia resta un problem. Analistes dise ce Japan nesesa serti plu esportas per suporta la crese economial futur. Per cada 1% de crese de la economia japanes, entre 0,5 and 0,7% veni de esportas.
La pais depende ance multe de consuma interna, ma sua popla es senesente e diminuinte, donce min persones contribui a la economia.
En la tre menses asta setembre, seguente un statistica revisada, Japan ia evita un retrosede tecnical. Ma lo es ja en retrosede a cuatro veses de pos la crise finansial global.
Investores ia pare iniora la statistica nova: la Nikkei 225, regardada como un punto de refere, ia salta par plu ca 4% a un tempo corta pos la publici de la statistica. An tal, lo ia perde plu ca 11% en la semana pasada, cual ia es un semana corta de comersia par causa de un festa nasional a jovedi.
La esportores grande de la pais ia es spesial grave colpada cuando un ien plu forte contra la dolar ia dana la sentis de investores.
En un move surprendente en la mense pasada, la Banco de Japan ia introdui un taso de interesa de -0,1%. Esta taso negativa -- la prima de istoria per la pais -- es desiniada per aumenta la spende e la investi, cual en sua turno debe stimula la crese economial.
Ma alga analistes duta ce la redui de interesa va susede, sujestante en loca ce la investi debil va continua probable tra multe de esta anio.
@T La economia italian va stania per dudes anios
@L aora_oji/2016/la_economia_italian_va_stania_per_dudes_anios
====== La economia italian va stania per dudes anios ======
12 julio 2016
La Funda Monal Internasional (FMI) ia averti ce Italia va esperia du desenios de stania en sua economia.
Sua reporta la plu resente sur la pais estima la crese en esta anio a min ca 1%, reduida de 1,1% -- sua estima presedente -- e previde un crese de sirca 1% en 2017, reduida de la 1,25% estimada.
La FMI dise ce Italia no va reateni sua nivel de ante la crise asta 2025, cuando sua visinas va ave economias a 20--25% supra la nivel de 2008.
Italia es la pais tre de la plu grandes en la eurozona. Lo ave nonemplea a 11% e un campo bancal en crise, e la deta de sua governa es plu alta ca lo de tota otra paises estra Elas.
La bancos de la pais es su presa, car la povria longa de la economia ia basi la revenu par impostas e ia alti la probablia ce companias va trova se en la situa difisil de no pote manteni sua paias per prestas.
Bancos italian porta un carga enorme de detas reganiable e va nesesa cisa un injeta notable de finansia nova.
Seguente la FMI, lo es probable ce la recovre va es longa e riscosa.
Entre la riscas es la retira de la Rena Unida de la Uni European, cual ia dise en la semana pasada ce per esta razona lo ia deside redui sua prevides de crese economial per la eurozona intera.
Otra partes problemosa inclui "la ondon de refujadas, e ventas oposante par la lenti de comersia global".
En la semana pasada, la FMI ia comenta ce lo previde ce la eurozona va crese par 1,6% en esta anio, e par 1,4% en 2017. Ante la referendo de Brexit, la FMI ia predise un crese de 1,7% per ambos anios.
Lo ia revisa ance sua previde de crese per 2018, reduinte lo de 1,7% a 1,6%.
@T La eleje de la presidente osteraices va es postal desideda
@L aora_oji/2016/la_eleje_de_la_presidente_osteraices_va_es_postal_desideda
====== La eleje de la presidente osteraices va es postal desideda ======
23 maio 2016
Votas postal va deside la eleje presidental de Osteraic, pos cuando la resultas prendeda de voterias ier ia dona un vantaje peti a la aspiror estrema destriste.
La ministreria de internas ia dise ce Norbert Hofer de la Partito de Libria ia sta pico ante sua oposor, Alexander Van der Bellen. Si el es elejeda, Hofer va es la xef prima de stato estrema destriste en la Uni European.
Un tema major de sua campania ia es la crise de migrores en Europa, do la cuantia de refujadas ia crese rapida.
Sirca 90 mil persones ia reclama refuja en Osteraic en la anio pasada, corespondente a sirca 1% de la popla de la pais, e la Partito de Libria ia fa un campania antimigra.
Oji, on va conta sirca 750 mil votas postal de aprosima 12% de la 6,4 milion votores osteraices.
La eleje presente ia revela un divide profonda sur la dirije cual la nasion debe segue.
Suporta per la Partito de Libria ia crese en anios resente par causa de un frustra grande con la partitos instituida de la sentro sinistra e sentro destra. Temes sur la crise de migrores ia aida plu la destra estrema.
La presidentia es un posto xef ritual, ma un vinse per Hofer ta dona momento a partitos popliste e estrema destriste en otra paises european.
A la ves prima de pos la Gera Mundal Du, ambos partitos sentral ia es eliminada en la ronda prima.
La presidente de la Comision European, Jean-Claude Juncker, e de la Parlamento European, Martin Schulz, ia espresa sua ansia sur la posible de un vinse par Hofer.
Pos la conta final de votas a voterias, Hofer ia ave 51,9% e Van der Bellen -- un aspiror autonom ma suportada par la Partito Verde -- ia ave 48,1%.
Hofer ia comenta ce la vinsor ultima va ave "la taxe de uni Osteraic". Van der Bellen ia dise ce el ia batalia per la Uni European en sua campania.
En la ronda prima en april, Hofer ia gania 35% de la votas e Van der Bellen ia reseta 21%. La resulta ia provoca la canselor Werner Faymann a resinia cuando el ia perde la suporta de sua colaborores en la Partito Sosial Democrata.
Acel partito e la Partito de la Popla ia governa Osteraic tra desenios, o solitar o aliada. A la eleje jeneral la plu resente en 2013, los en junta ia gania apena un cuantia sufisinte de votas per governa en un "alia grande".
La presidente presente, Heinz Fischer, ci ave 77 anios, no ia pote aspira denova pos sua du periodos en la posto.
@T La eleje de Trump provoca protestas
@L aora_oji/2016/la_eleje_de_trump_provoca_protestas
====== La eleje de Trump provoca protestas ======
10 novembre 2016
En la SUA, miles de persones ia protesta sur la stradas de sites diversa contra la eleje de Donald Trump. Multe ia cria la slogan "No mea presidente". Otras ia arde pupas de la comersior.
Trump va deveni la presidente 45 de la pais, pos gania un vinse surprendente contra Hillary Clinton.
El va consenta con Barack Obama, la abitor presente de la Casa Blanca, per discutes sur reali un traversa nonproblemosa.
Obama -- ci ia descrive Trump como "nonconveninte" per la posto e ci ia campania contra el -- ia recomenda forte ce tota persones SUA aseta la resulta de la eleje a martedi. "Tota de nos anela aora sua susede en uni e gida la pais," el ia dise.
Clinton ia informa ance sua suportores ce on debe dona la "posiblia de gida" a Trump.
Iniorante esta, protestores ia asembla tra la pais. En New York, miles ia protesta estra Trump Tower, atacante la politicas de la elejeda sur migra, diretos ge, e diretos reprodual. Des-sinco persones ia es arestada.
En Oakland, California, protestas ia es jeneral pasosa, ma alga persones ia rompe fenetras de botecas e ia lansa misiles a polisiores de tumulta, ci ia responde con gas lacrimojen.
Un asembla contra Trump ia clui un autovia major en Los Angeles, e un otra en Portland, Oregon. En Chicago, folas ia bloci ia entra a Trump Tower, cantante: "No Trump, no KKK, no faxistes SUA".
Protestas ia aveni ance en Philadelphia, Boston, Seattle, e San Francisco, entre otra sites.
En sua parla de vinse en la oras temprana de ier, Trump ia promete "lia la feris de divide" pos un compete amarga per votas, e es "presidente per tota americanes".
La presidente elejeda va es acompaniada a la Casa Blanca a esta matina par sua sposa, Melania, ci va consenta ala con Michelle Obama.
Presidente Obama, ci ia espresa sua bonvole a sua seguor en un telefoni ier, ia dise ce lo es "no secreta" ce el e Trump ave diferes major. Ma el ia ajunta ce "tota de nos desira lo cual es la plu bon per nosa pais" e ce el es "corajida" par lo cual el ia oia en la parla de Trump a la note presedente.
La ecipo traversante per la periodo de des semanas asta la indui de Trump va es dirijeda par Chris Christie, la governor de la stato New Jersey.
Trump, ci ia ocupa nunca un posto elejeda a ante, ia dise ce sua consernas prima va es la restora de la infrastrutur de la pais e la dupli de sua crese economial.
Como presidente elejeda, Trump ave la direto de reseta la mesma reporta dial como Obama, incluinte informas sur operas secreta e otra datos colieda par la 17 departes de securia de la SUA.
@T La FBI desculpa Clinton, e Trump protesta
@L aora_oji/2016/la_fbi_desculpa_clinton_e_trump_protesta
====== La FBI desculpa Clinton, e Trump protesta ======
7 novembre 2016
Donald Trump ia acusa la FBI de malcondui pos cuando lo ia desculpa denova sua oposor Hillary Clinton de atas criminal en relata con sua epostas.
La dirijor de la FBI ia dise ce un investiga nova de la comunicas par la aspiror democrata ia trova no cosa cual cambia la conclui ja fada par la departe a esta estate.
La campania de Clinton ia descrive se como "felis" ce la problem persistente ia es reposada.
Esta verje dramosa ia leva un nube de sur sua campania ante la dia final de la corsa maratonin de la eleje SUA. Ier, la sondas la plu resente de opina, ante la anunsia par la FBI, ia dona un vantaje de cuatro o sinco persentos a Clinton supra Trump.
La nominada republiciste ia protesta forte pos aprende la deside par la departe de securia. A un asembla en la suburbes de Detroit, Trump ia insiste ce lo ta es nonposible ce la FBI revista un cuantia tan grande de epostas (reportada como 650 mil) en tempo tan corta.
"Aora el es protejeda par un sistem frodosa. Lo es un sistem intera frodosa. Me ia dise lo tra tempo longa," el ia dise a suportores en Michigan. "Hillary Clinton es culpable, el sabe lo, la FBI sabe lo, la popla sabe lo, e aora la taxe de la popla american es furni justia a la caxa de vota a 8 novembre."
An si Clinton mesma no ia parla sur la letera de la dirijor de la FBI sur sua curso de campania, sua ecipo ia dise ce lo ia fida sempre ce el va es desculpada.
En Nova Hampshire ier, Clinton ia dise ce la pais fronti "un momento de compete" e ce americanes debe eleje entre "divide e unia".
En julio, la FBI ia dise ce el ia es "estrema nonatendente" en trata informas secreta a un servador privata de eposta cuando el ia es la ministro de internas entre 2009 e 2013, ma lo ia trova no indica ce el ia fa un crimin.
An tal, a 11 dias ante la vota, James Comey, la dirijor de la FBI, ia turba la concurso par anunsia ce on va investiga un grupo nova descovreda de epostas de Clinton.
La malsurprende ia furia la partito de Clinton, ma ia lansa un corda de salva a la campania de Trump cual ia retrosede en la sondas.
En un letera a la Congresa ier, Comey ia dise ce sua investigores ia "labora sirca la orolojo" sur la epostas la plu resente, cual ia es trovada par un investiga separada en la temprana de otobre.
Lo pare ce la mesajes ia es descovreda en un computador portable parteninte a la sposo distantida de un de la conselores la plu prosima de Clinton, la congresor pasada Anthony Weiner, ci on acusa de envia mesajes nonlegal a un xica de 15 anios.
Comey ia dise ce investigores ia trova no razona per cambia la judi plu temprana par la FBI ce Clinton no debe es formal acusada per sua trata de informas secreta.
Ofisiores de governa ia dise ce investigores ia serti ce la epostas nova trovada es o personal o duples de corespondes cual los ia esamina ja a ante.
Harry Reid, la xef democrata en la Salon alta, ia dise ce la conclui par Comey "sulinia la nonfidablia" de la anunsia sur Clinton par la dirijor de la FBI a la Congresa en la tarde de la mense pasada.
Ambos aspirores va fa oji un turi rapida de la statos xef de batalia, ancora corsante per votas a la momento final.
@T La foco savaje en Canada menasa un otra provinse
@L aora_oji/2016/la_foco_savaje_en_canada_menasa_un_otra_provinse
====== La foco savaje en Canada menasa un otra provinse ======
8 maio 2016
La foco savaje cual arde en la provinse canadian Alberta crese plu e va ateni cisa Sakatchewan, la provinse visina.
Un clima calda, seca, e ventosa impedi la laboras par sentos de pompores per batalia la focon.
La flamas ia causa ja la parti de 80 mil persones de Fort McMurray, un site de petrolio. Miles de otras es ancora locada a norde de la site, e on no va completi sua parti ante la fini de oji.
Rachel Notley, la ministro xef de Alberta, ia dise: "Esta foco es controlada en no modo."
La foco covre aora un area de plu ca 200 mil ectares, incluinte partes ancora ardente e partes ja ardeda.
On espera ce la pluve prevideda per oji e doman va reali.
Plu temprana en esta semana, la plu de la persones sortida ia fuji a norde, refujante se en campas de labora ultra Fort McMurray. A pos, on ia naveti miles de persones a securia par via e aira. Convoias peti ia viaja ier tra la site ardeda.
Notley ia indica ce on intende completi la sortis ante la fini de ier, ma car on ave ancora persones en la campas norde, la labora de sorti los va continua oji.
La foco ia destrui visinerias intera, e on ia avisa abitores ce cisa un tempo longa va pasa ante cuando los va pote revade.
An con la comanda obligante de parti, la Polisia Reial de Canada ia dise ce los ia trova un om vea e un familia de sinco en Fort McMurray e ia prende los a securia.
Sirca 1600 casas e otra construidas es perdeda, ma on ia reporta no moris o feris.
Fort McMurray es locada en la sentro de la tereno de arena de petrolio en Canada, e la rejion ave la reserva tre de la plu grandes de petrolio en la mundo.
La focon ia para asta un cuatri de la produi de petrolio de la pais, creante un ansia sur sua efeto a la economia canadian.
On ia averti ce la flamas risca ateni la borda de un compleso de petrolio manejada par Suncor Energy, ma ofisiores ia dise ce la compleso es estrema capas de resiste foco.
@T La gidor de un tren colidente ia usa un jua video
@L aora_oji/2016/la_gidor_de_un_tren_colidente_ia_usa_un_jua_video
====== La gidor de un tren colidente ia usa un jua video ======
13 april 2016
On ia aresta un gidor de tren deutx par causa de un desastre ferovial cual ia mata 11 persones en Bayern en febrero. Avocatos suspeta ce el ia es distraeda par un jua video a la tempo pertinente.
Seguente los, el ia fa un era de siniali en cuando el ia usa la jua en sua telefoneta, e ia telefoni alora a la numero noncoreta de crise.
La om acusada ia confirma ce esta ia es la segue de avenis.
Du trenes de viaja dial ia colide sur un estende de ferovia con sola un duple de reles.
Otodes-sinco pasajores ia sufri feris, de cual alga ia menasa la vive.
Cisa la om va es acusada de mata sin intende, e pote spende sinco anios en prison.
La frontes de la trenes ia colide contra lunlotra en cuando ambos ia viaja a sirca 100 cilometres per ora, a este de Bad Aibling, un vila de banieria mineral a sirca 60 cilometres a sude-este de München.
Investigores ia dise ce la cronometri de la jua computada e de la colide indica ce "la acusada ia es distraeda de sua maneja de trafica ferovial a la force".
La estende pertinente de ferovia ia ave un sistem de siniali automata, desiniada per para cualce tren cual ia pasa un sinial blocinte. Ma reportas sujesta ce on ia descomuta la sistem per permete la pasa de la tren, ja tarda, cual ia vade a este.
La investiga ia elimina falis tecnical en la trenes o la sistem de siniali como causa de la desastre.
Tota los ci ia mori en la colide ia es omes con entre 24 e 59 anios.
@T La Juas Olimpial fini spetaculin
@L aora_oji/2016/la_juas_olimpial_fini_spetaculin
====== La Juas Olimpial fini spetaculin ======
22 agosto 2016
La Juas Olimpial de Rio ia fini con un spetaculo carnavalin e la pasa ofisial a Tocio, la site ospitante de 2020.
La rituo colorosa, cual ia dura tra cuasi tre oras, ia selebra la artes de Brasil. Lo ia aveni en pluve.
Entre la puntos xef ia es un presenta impresante par Japan e un parada vibrante de carnaval.
"Estas ia es Olimpiales merveliosa, en un site merveliosa," Thoma Bach, la xef de la Comite Internasional Olimpial, ia dise. "Tra la 16 dias presedente, un Brasil unida ia inspira la mundo, a tempo difisil per tota de nos, con sua joia nonresistable per vive."
Bach ia clui ofisial la Juas de la Olimpiada 31 pos 16 dias de compete. 11 303 atletas ia partisipa, de 206 nasiones e un ecipo de refujadas.
Un de la aclamas la plu grande de la note ia aveni cuando Shinzō Abe, la ministro xef de Japan, ia apare, vestida como la carater de jua video Super Mario, asendente de en un tubo verde jigante en la stadion Maracaña.
La spetaculo, regardada par miles de miliones de persones en la mundo, ia inclui un parada de atletas e un estingui dramosa de la flama olimpial.
@T La Jungla de Calais va clui a lundi
@L aora_oji/2016/la_jungla_de_calais_va_clui_a_lundi
====== La Jungla de Calais va clui a lundi ======
22 otobre 2016
Frans va comensa desasembla la campa "Jungla" de migrores en la porto Calais a la matina de lundi.
Sirca 7000 persones abita ala en state misera. On va ofre reloca los a sentros de refujadas tra la pais.
La Jungla ia deveni un simbol potiosa de la fali par Europa de maneja la crise de migrores. Multe de esta persones atenta vade a la Rena Unida par embarca camiones cuando los prosimi a portos o la Eurotunel.
La ministreria de internas franses ia dise ce, cuando on desasembla la resta de la Jungla, on va prende enfantes a la caxones de doca convertida en la campa.
Esta caxones ia es usada como abitadas tempora, en loca de tendas. La migrores ci abita presente los va es moveda a via per crea spasio per la enfantes.
On ave 7500 letos disponable per la migrores de Calais en sentros tra Frans. On va usa 60 buses per move los de la campa.
Ofisiores es ansiosa ce folas va freta per parti en la fase prima de la opera. La ministreria de interna ia dise ce lo es posible la polisia va "es obligada a interveni" si un resiste aveni.
De martedi, on va usa macinas pesosa per sutrae la tendas e refujerias restante.
On previde ce algas de la enfantes de la campa va es relocada a la Rena Unida. Bernard Cazeneuve, la ministro franses de internas, ia fa discutes sur esta tema con Amber Rudd, la ministro corespondente de la RU. En un declara, on ia reconose ce la discutes "ia es difisil a veses, como pote aveni entre asosiores prosima".
La Jungla ia esperia senas de miseria e violentia con ce migrores, xef de Africa e Asia sude-ueste, ia atenta entra a camiones dirijeda a la Rena Unida, combatente camionores e polisiores.
Un mur con longia de un cilometre, finansiada par la Rena Unida, deveni construida longo la via xef a la porto per atenta impedi pasajores secreta. La governa de la RU no ia declara la custa, ma on reporta ce lo ia contribui sirca €2,2 milion.
La labora a la mur ia comensa en la semana pasada. On previde ce lo va es completa ante la fini de la anio.
@T La maraton la plu alta de mundo
@L aora_oji/2016/la_maraton_la_plu_alta_de_mundo
====== La maraton la plu alta de mundo ======
30 maio 2016
Un soldato nepali ia vinse en la maraton la plu alta de mundo sur Monte Sagarmata (Everest).
Bed Bahadur Sunuwar ia es un de plu ca 150 corores local e stranjer en la corsa, cual ia comensa a la campa de base en Nepal.
La corsa aveni a cada anio a la aniversario de la asende prima de la monte par Tenzing Norgay e Edmund Hillary en 1953.
La ganior ia completi la corsa, cual ia fini a un punto plu basa par sirca 2000 metres, en cuatro oras e des secondos.
"La via es multe defiosa ma ance stonante," la om de 29 anios ia dise. "Me senti orgulosa de es la ganior."
Aprosima 30 corores local ia es acompaniada par sirca 130 de multe otra paises, incluinte Xina, Australia, la Rena Unida, e la Statos Unida.
Un om nepali ia vinse ance en 2015.
Esta es la saison prima de trepa sur Sagarmata pos du saisones desastrosa. Un avalanxa ia mata 16 gidores de montania en 2014, e un trematera matante ia aveni en la anio pasada.
Ma ance la saison de 2016 es ja no sin trajedia. Alga persones ia mori de maladia de altia en un periodo spesial ativa sur la monte.
A venerdi, ofisiores ia anunsia ce los ia trova la corpo de un trepor barati sur la inclinas alta, aumentante la cuantia de persones ci ia mori en esta saison asta cuatro.
@T La ministro xef de Slovensco perde sua majoria
@L aora_oji/2016/la_ministro_xef_de_slovensco_perde_sua_majoria
====== La ministro xef de Slovensco perde sua majoria ======
6 marto 2016
Robert Fico, la ministro xef sinistriste-nasionaliste de Slovensco, ia gania la vota jeneral ma ia perde sua majoria parlamental.
El va nesesa aora alia se con otras si el vole reveni per un periodo tre.
Ganias par partitos peti, incluinte un de la destra estrema, va produi cisa un parlamento divideda sin via clar a formi un governa majorial.
Fico ia jura ce el va aseta "an no un" migror muslim.
Sua pais va emprende la presidentia jirante de la Uni European en julio. Sua opinas dur sur la migra refleta los de xefes polsce, txesce, e magiar.
Intera, nove partitos, incluinte Nosa Slovensco, un partito estrema destriste su Marian Kotleba, va es representada en parlamento. Nosa Slovensco ia gania plu ca 8% de la votas.
Kotleba es un amiror nonrepentinte de la fato ce Slovensco ia esiste como un stato nazi pupetin en la Gera Mundal Du, e asta resente, el ia vesti se en un uniforma imitante la militia pronazi de acel stato.
Pos la conta de sirca un dui de la votas, la partito de Fico es suportada par sirca 29%, cual ta coresponde a 48 sejas en la parlamento de 150 membros.
Como la xef de la partito la plu forte en la vota ier, on previde ce Fico va es solisitada a formi un governa nova. El ave 51 anios, e es conoseda per politicas popliste como la usa sin custa de la ferovia par studiantes e jubilores.
El ia oposa ferose cuotas UE sur la relocali de migrores de Elas e Italia cual ta introdui sirca 2600 persones a Slovensco. La pais ia reseta sola 260 solisitas de refuja en la anio pasada.
@T La move de un torneo de golf coleri Trump
@L aora_oji/2016/la_move_de_un_torneo_de_golf_coleri_trump
====== La move de un torneo de golf coleri Trump ======
2 junio 2016
Donald Trump, aspiror republiciste per la presidentia de la SUA, ia reata coler pos la move de un torneo major de golf de un de sua golferias a Mexico.
El ia dise ce la PGA (Asosia de Golfores Profesal) "ia pone sua profita ante miles de empleas american". En sua campania, Trump representa Mexico como suminante la economia SUA.
La organiza PGA Tour ia dise ce lo no pote trova sponsores per la Torneo Mundal de Golf 2017 a la campo de Trump en Doral en Miami.
Timothy Finchem, un comisionor per PGA Tour ia esplica ce la profil presente de Trump ia crea difisiles en atrea sponsores.
On reporta ce Cadillac, fabricor de autos lusosa, no ia renovi sua acorda de sponsori.
"Donald Trump es un marca comersial, un marca grande," Finchem ia comenta, "e cuando on demanda ce un compania investi miliones de dolares per marca un torneo e lo va comparti acel marca con la ospitor, on ave un deside difisil."
An tal, la organiza ia insiste ce sua deside per move la concurso de Florida a la Site Mexico, do lo ia aveni tra la 55 anios pasada, no es political.
"De la punto de vista de golf, nos ave no problemes con Donald Trump. De un punto de vista political, nos es neutra. PGA Tour es nunca envolveda e desira nunca es envolveda en politica presidental."
PGA Tour ia suscrive un acorda nova de sponsori per sete anios con Grupo Salinas, un grupo de companias mexican, e la Torneo WGC-Mexico prima va aveni en marto 2017.
Trump ia dise ce la deside indica "un dia triste per Miami, la SUA, e la jua golf". El ia ajunta: "La esta deside fa no plu ca corpi plu la razona mesma perce me aspira la presidentia de la Statos Unida."
On no ia afirma ofisial la aveneria per la torneo, ma jornalistes reporta ja ce lo va aveni a la Club de Golf Chapultepec prosima a la Site Mexico.
"Me espera ce los ave asecura contra fura de persones," Trump ia comenta.
Finchem ia responde ce un de sua empleadas ia confirma ja ce esta es organizada. "Me no ia demanda sur la detalias," el ia dise, "ma me ia espresa la opina ce cisa esta es un cualia cual nos no vole asentua."
@T La olimpiales va aveni an con la virus de Zica
@L aora_oji/2016/la_olimpiales_va_aveni_an_con_la_virus_de_zica
====== La olimpiales va aveni an con la virus de Zica ======
2 febrero 2016
Brasil ia dise ce no posible esiste ce on va cansela la juas olimpial en Rio par causa de la virus de Zica.
La autoriosas ia dise ce on ave no risca per atletas e oservores -- estra femes ensinta -- a la aveni en agosto.
Plu temprana, la Organiza de Sania Mundal (OSM) ia averti ce un maladia relatada con la virus presenta un crise global de sania publica e esije un responde unida.
On ia lia la infeta a casos de microsefalia, en cual bebes nase con serebros sudevelopada.
Espertas es ansiosa ce la virus, portada par moscitos en America Latina, estende vasta e rapida, con resultas ruinante.
Jaques Wagner, la xef de consilio de presidente Dilma Rousseff, ia dise: "Nos debe esplica a los ci va veni a Brasil, la atletas, ce on ave no risca si on no es un fem ensinta."
Rousseff ia permete ja ce, si nesesada, esaminores sanial usa fortia per entra a construidas privata, como parte de la labora par la governa per elimina locas de reprodui de moscitos, spesial acuas staniante.
Esaminores ave aora la direto de clama la polisia si nesesada, e on ia envia plu ca 200 mil soldatos per fa tal esaminas.
La ministreria brasilera de sania dise ce on ia esamina ja sirca 25% de la 49 milion casas en la pais.
Entretempo, la dirijor jeneral de la OSM, Margaret Chan, ia descrive Zica como "un aveni estracomun" cual nesesa un responde coordinada.
"Me declara aora," el ia dise, "ce la grupo resente de nonormales de microsefalia e otras de neurolojia, reportada en America Latina pos un grupo simil en Polinesia Franses en 2014, composa un crise de sania publica de conserna internasional."
La avisa par OSM pone la virus de Zica en la mesma categoria de problem como Ebola. Lo sinifia ce on va rapidi rexercas e aidas per ataca la infeta.
On ia reporta ja sirca 4000 casos de microsefalia sola en Brasil de pos otobre.
La OSM ia fronti criticas forte ce lo ia pospone tro longa ante declara ce la aveni de Ebola es un crise publica.
@T La palasio de Ceaușescu deveni visitable
@L aora_oji/2016/la_palasio_de_ceausescu_deveni_visitable
====== La palasio de Ceaușescu deveni visitable ======
12 marto 2016
La cason lusosa de Nicolae Ceaușescu, la xef pasada de Romania, abri oji sua pordes a visitores.
Un cuatri de sentenio ia pasa pos cuando la presidente desponeda e sua sposa Elena ia es esecutada par fusilores a la Dia de Natal en 1989. Ma aora, romanianes comun pote esplora la casa do la duple ia abita.
La construida lusosa, nomida la Palasio de Primavera, deveni oji abrida a la popla a la ves prima.
Per tan poca como 15 leus ($4), visitores pote vaga tra la abitada de 80 salas, sur cual on reporta ce lo inclui un sinema, un pisina, e un sala impresante de vesti.
Lo es situada en 14 mil metres cuadrida de tereno en Primăverii, un visineria desirable de București. Lo ia es desiniada en la media de la desenio de 1960, seguente la spesifas esata de la tirano e sua sposa, sur ci on dise ce el mesma ia eleje la candelabros e mosaicas.
Pos la revolui romanian en 1989 cual ia despone Ceaușescu, la construida ia es ocupada par la stato e usada sola a veses rara per ospita delegas ofisial. On ia atenta vende lo en 2014, ma lo no ia atrae un compror.
En la mense pasada, la Palasio de la Parlamento -- un otra construida enorme de cual la tirano pasada ia comanda sua crea -- ia abri se per turis virtual.
Con mil salas, do 100 mil persones ia labora en la dias final de la eda comuniste, lo es e amirada e despetada par la popla de Romania.
La reapare de interesa en la eda comuniste e un suavi de disposa a la rena odiada ariva aora, cuando multe romanianes senti ce la vive no ia boni multe pos la suverti de Ceaușescu.
@T La pape envia 1000 "suprapretes"
@L aora_oji/2016/la_pape_envia_1000_suprapretes
====== La pape envia 1000 "suprapretes" ======
11 febrero 2016
Pape Fransisco ia envia plu ca mil pretes a un mision global de pardona pecas grave cual es normal sola pardonable par el o un bispo major.
La Misionores de Pardona, con nometa "suprapretes", ia reseta esta permete spesial per la anio aniversarial de la Vatican, cual va fini en novembre.
Pecas grave inclui la viole de pan e vino santida, la rompe de la secretia de confeseria, e la conspira de mata un pape.
La pape ia dise comun ce la Eglesa nesesa es min rijida e criticante. El ia declara la anio presente como un Anio Santa de Pardona, e usa lo per sperde un mesaje de pardona -- spesial entre catolicas ci ia vaga a via de sua crede ma desira reveni.
A un rituo en la Vatican a martedi, la pape ia parla ia 700 de la pretes elejeda, disente ce on debe bonveni repentores con brasos abrida, en loca de judi los con "un senti de superioria".
"Lo no es con la baston de judi ce nos va susede retrae la oveas perdeda a la ensirca," el ia dise a un asembla en la Palasio Apostolal.
La pretes es elejeda de bispias sirca la mundo, e on previde ce los va fa sua mision spesial en paises incluinte Burundi, Misre, Xina, e la Amirias Arabi Unida.
Un de la pretes va viaja entre comunias inuit en la Artica canadian, e un otra intende turi partes distante de Australia en un furgon.
La aborta es en la categoria de pecas grave, ma en la anio pasada, la pape ia anunsia ce el va permete ce cualce prete remete esta peca de femes ci vole repenti, tra la Anio Santa.
La pape ia dise ce el comprende ce alga femes senti ce los ave no otra posible ca la deside "angusante" de fa un aborta.
@T La pape onora la aniversario de luteranisme
@L aora_oji/2016/la_pape_onora_la_aniversario_de_luteranisme
====== La pape onora la aniversario de luteranisme ======
1 novembre 2016
Pape Fransisco ia partisipa en avenis per onora la aniversario de la Reformi Protestante en sua viaja a Sveria.
El ia apela a catolicas e luteranes ce los ta "repara" istoria e regarda onesta la pasada, "reconosente eras e xercante pardona".
La tradision dise ce, a 31 otobre 1517, la teolojiste deutx Martin Luther ia cloi sua 95 teses a la porte de un eglesa.
La visita par la pape inisia un anio de avenis per la aniversario 500.
La pape e xefes luteranes ia preside ier un servi de prea universal en la catedral de Lund en Sveria sude.
La xef de la Eglesa Catolica Roman ia loda la Reformi car lo ia aida dona plu sentralia a la scrivedas santa en la vive eglesal.
La libreta de Luther ia ataca suprapasas e maltratas en la eglesa, e sua atas e scrives ia es multe importante en la fende cual ia developa en Cristiania Ueste, cual ia deveni conoseda como la Reformi.
Luther ia es escluida a pos, ma sua ensenias ia sperde tra Europa norde. Desenios de geras relijial en Europa ia segue.
La Eglesa de Sveria es un parte de la ramo luteran de protestantisme, an si la pais es xef secular.
En un declara juntada, la Eglesa Catolica Roman e la Federa Mundal Luteran ia dise ce ambos partitos "es no plu stranjeres" e ce sua gol comun es asembla membros de la du eglesas a la table de eucaristia.
A ante, Pape Fransisco ia loda Luther per sua batalia contra froda e avaria en la eglesa de sua tempo. El ia critica ance sua propre eglesa, recomendante ce lo ta evita avaria.
@T La pape refere a un jenoside istorial par Turcia
@L aora_oji/2016/la_pape_refere_a_un_jenoside_istorial_par_turcia
====== La pape refere a un jenoside istorial par Turcia ======
25 junio 2016
Pape Fransisco ia descrive la mata coletiva de armenianes su la rena osmanian turces en la Gera Mundal Prima como "jenoside", repetente un parola cual ia provoca coleria turces en la anio pasada.
El ia fa la comenta en un visita a Erevan, la capital de Armenia, per onora la memoria de la masacra.
Armenia e multe istoristes dise ce asta 1,5 milion cristianes armenian ia es matada par fortes osmanian en 1915.
Turcia ia desacorda sempre con esta statistica e rejeta la usa de la terma "jenoside". Lo dise ce la moris ia es un parte de un gera interna inisiada par la Gera Mundal.
La disputa sur la modo de descrive la matas ia continua asidi la relatas entre Armenia e Turcia, e ia atrae ance otra paises como Deutxland, do la parlamento ia declara resente ce la matas ia es un jenoside.
En un parla a la presidente armenian Serj Sargsian e la corpo de diplomatas, lo ia pare ce la Pape ia ajunta la parola "jenoside" a sua testo preparada.
"Esta trajedia, esta jenoside, ia marca regretable la comensa de un serie triste de desastres grande de la sentenio pasada," el ia dise. El ia ajunta ce la matas ia es "posiblida par intendes contorseda de raza, ideolojia, o relijio cual ia oscuri la mentes de la tormentores an asta la punto de scema la elimina de poplas intera".
La escutores ia sta se per aplaudi la comentas.
Sargsian ia dise: "On no pote fa otra ca fida la vinse de justia cuando, pos 100 anios, la mesaje de justia es espresada a umanas de la cor de la mundo catolica."
Turcia ia fa no reata direta. En la anio pasada, lo ia retira sua ambasador vatican per 10 menses cuando la Pape ia refere a jenoside.
En 2014, a la ves prima, Recep Tayyip Erdoğan, la ministro xef de Turcia, ia ofre compatia a la netas e netos de tota la armenianes ci ia perde sua vives. Ma el ia dise ance ce lo es nonpermetable ce Armenia cambia la desacorda "a un tema de disputa political".
Armenia dise ce asta 1,5 milion persones ia mori en 1915--16 cuando la Impero Osmanian ia es desintegrante. Turcia ia dise ce la cuantia de moris ia es multe min grande.
Multe de la vitimes ia es persones nonmilitar ci ia es deportada a desertos steril do los ia mori de famia e sidia. Miles ia mori ance en masacras.
La plu de eruditas nonturces sur la avenis regarda los como jenoside. Entre la otra statos cual reconose formal los como jenoside es Arjentina, Beljia, Canada, Frans, Italia, Rusia, e Uruguai.
Turcia insiste ce multe de la mores ia es matada en scaramuxas de la Gera Mundal Prima, e ce turceses etnical ia sufri ance.
@T La Parador Grande de Coral blanci grave
@L aora_oji/2016/la_parador_grande_de_coral_blanci_grave
====== La Parador Grande de Coral blanci grave ======
20 april 2016
Un sonda estendosa airal e suacuan ia revela ce 93% de la Parador Grande de Coral en Australia es afetada par un fenomeno de blanci.
Esta segue avisas plu temprana ce la resife esperia sua blanci la plu mal de istoria rejistrada.
Cuando la tmperatur de la acua leva, la corales ejeta sua alges colorinte. La corales pote mori si la ambiente no reveni a sua state normal.
La sonda mostra ce la dana la plu sever es en la parte norde de la resife.
La Parador Grande de Coral es locada a la costa de la stato Queensland e ave longia de 2300 cilometres.
On culpa la efetos de El Niño e cambias climal per la leva de temperatures maral.
Plu ca 900 resifes individua ia es sondada con un avion lejera e un elicotor. A pos, la esatia de la sonda airal ia es controlada par ecipos de sumerjores.
Profesor Terry Hughes, ci ia gida la sonda per la Unia Nasional sur Blanci de Coral, ia comenta: "Me es fundal un otimiste, ma me crede ce nosa fenetra de posiblia per salva la Parador Grande clui rapida. Si nos no ata contra la caldi global, lo va deveni plu danada. Pos tre avenis de blanci, la misca de spesies de coral ia cambia ja."
La aveni la plu resente es multe plu grave ca presedentes en 2002 e 1998.
A esta ves, sola 7% de la resife no ia blanci. La cuantia ia es aprosima 40% a la otra du veses.
Turisme a la Parador Grande jenera sinco mil milion dolares australian ($3,9 mil milion SUA) a cada anio, e emplea sirca 70 mil persones.
La Consilio de Industria Turiste de Queensland ia dise: "Nos es grasiosa ce multe partes de la resife es ancora en forma eselente. Ma nos no pote mera iniora la blanci de la coral e espera un recovre rapida."
La departe de ambiente en Australia ia indica a ante ce governas statal e federal investi un cuantia projetada de du mil milion dolares australian tra la desenio veninte per proteje la resife.
@T La parlamento nijerian perde sua documentos finansial
@L aora_oji/2016/la_parlamento_nijerian_perde_sua_documentos_finansial
====== La parlamento nijerian perde sua documentos finansial ======
13 janero 2016
Sentos de copias de un proposa finansial ia desapare a la parlamento de Nijeria. Como resulta, la senato no ia pote comensa considera la proposa.
La pospone risca mali la crise economial de la pais, en cual lo reata a la custa cadente de petrolio.
Presidente Muhammadu Buhari ia furni la copias sur paper de sua proposa finansial prima a ambos salones a la fini de la mense pasada. Lo ia detalia sua projeta per estende la spende par 20% par plu emprestas.
La presidente ia entra a sua posto en maio 2015. El ia promete ance boni la recolie de impostos e investi en otra industrias, incluinte la escava e la cultiva, per crea plu empleas.
Bukola Saraki, la presidente de la senato, ia fa un consenta privata con Buhari en la tarda de ier, ma on no sabe esce los ia discute la problem de la documentos mancante.
Copias de la documento per la salon basa no manca, e va distribuida oji.
La parlamentores es ja criticada per refusa redui sua salarios e spendes cuando la economia la plu grande de Africa luta en sua crise la plu grave de anios resente.
Alga senatores oposante ia reata coler a la informa ce la documentos manca, acusante la governa de asconde los. Ma un portavose per Buhari ia nega la alega, disente: "Cuando la proposa es enviada, lo sesa parteni a nos."
On previde ce la du salones va pasa sirca du menses en considera la proposa, con valua de $31 mil miliones.
@T La Pilipinas gania un presidente nonortodox
@L aora_oji/2016/la_pilipinas_gania_un_presidente_nonortodox
====== La Pilipinas gania un presidente nonortodox ======
10 maio 2016
Rodrigo "Digong" Duterte, la aspiror nonortodox anticrimin, ia vinse en la eleje presidental en la Pilipinas, pos la retira de sua oposores.
An si la resulta ofisial es ancora no declarada, sua oposor xef, Mar Roxas, ia confesa sua defeta cuando la sondas ia dona un vantaje nonatacable a Duterte.
Duterte ia dise ce el aseta la autoria con "umilia estrema".
La om de 71 anios ia tisa controversia con comentas ensendente en sua campania.
El ia atribui sua susede a sua disposa forte sur lege e ordina. Sua condui como la maior anticrimin de Davao, un vila sude cual ia es malfamosa a ves pasada per sua criminosia, ia gania a el la nometa "La Punor" e ia resona bon con votores.
Otra temas propulsante de la campania ia es la froda permeante, como ance la povria e nonegalia esperiada par multe filipinos an con la crese economial su la presidente partinte Benigno "Noynoy" Aquino.
Ofisiores de la eleje ia nota un partisipa recordo a voterias, do plu ca 81% de la 54 milion votores rejistrada ia fa sua vota. On eleje ance senatores e sirca 18 mil ofisiores, incluinte maiores.
La sonda par la Consilio Pastoral Parocial per Vota Fidable ia indica ce, pos conta 90% de la votas presidental, Duterte ia reseta plu ca 14,8 milion votas. La acel organiza es asiniada par la comision elejal per monitori la contas, ma sua reportas no representa un resulta ofisial.
Roxas, un ministro pasada de internas e la oposor la plu prosima de Duterte, ia gania 8,6 milion votas.
Cuando la estende de sua vinse ia deveni clar, Duterte ia dise: "Lo es con umilia, umilia estrema, ce me aseta esta, la aproba de la popla."
Roxas ia aseta la vinse de sua oposor. "On ave multe larmas en la sala. Me ta dise a vos ce esta no es un tempo per larmas. Per nosa pais, nos ia fa un move pasosa e susedosa de potia."
Un otra oposor major, senator Grace Poe, ia es la prima ci ia sede sua defeta, prometente "colabora con la prosede de sani" pos un campania turbosa.
En la eleje per deveni vispresidente, Leni Robredo, un ativiste sosial, susede pico plu bon ca Ferdinand "Bongbong" Marcos, la fio de la tirano pasada Ferdinand Marcos.
Aquino retira se car la constitui restrinje presidentes a sola un periodo de ses anios. En cuando Duterte ia leva en sondas opinal ante la vota, Aquino ia atenta uni otra aspirores contra el, avertinte ce sua eleje ta pote causa un revade a tirania per la Pilipinas.
Duterte ia fa multe declaras controversa en sua campania, disente ce el va masacra criminores e usores de drogas, bromante sur la viole sesal de un misionor australian, e comentante ce el ta clui la Congresa si el no ta acorda con el.
El ia presenta ance opinas franca sur la disputa teritorial de la Pilipinas con Xina en la Mar Xines Sude, disente ce el va naviga a isolas disputada e planta ala la bandera pilipina.
La Pilipinas ia prende un de sua reclamas a un corte arbitral en Den Haag en Nederland. Ier, Duterte ia dise ce el va xerca discutes multiladal sur la tema, incluinte la SUA e Japan.
@T La polisia barati serti ce birianis conteni no bove
@L aora_oji/2016/la_polisia_barati_serti_ce_birianis_conteni_no_bove
====== La polisia barati serti ce birianis conteni no bove ======
8 setembre 2016
En la state Hariana en Barat norde-ueste, la polisia va esamina platos de biriani de ovea per serti ce los no conteni carne de bove.
Un dotor veterinar va aida polisiores a esamina la platos de ris en la distrito Mewat.
La majoria indu de la abitores de Barat regarda boves como bestias santa, ma multe otra baratis come la carne. Carne de bove es proibida en Hariana.
Bhani Ram Mangla, la presidente de la Comision de Boves de Hariani, ia dise: "Nos ia reseta multe cexas ce carne es miscada en la birianis en la distrito Mewat, donce me ia comanda la polisia a proba fisical la birianis vendeda en comerias ala."
On va envia samples de carne a un laboreria per analise.
Mewat es locada a 100 cilometres de la capital Delhi. Lo es un area xef muslim e ia esperia tumultas comunial en la pasada.
On ia institui un unia spesial de polisia en Hariana per preveni la mata e contrabanda de boves. On instrui ance bonvolores a vijila en viletas esce cualcun mata un bove.
Nooruddin Noor, un membro de la Asosia de Avocatos de Mewat e un ativiste sosial major, ia dise ce la idea ce muslimes en la distrito pone bove en biriani de ovea es "un alega sin funda".
"Lo es un atenta de disturba la armonia comunial cual nos ave asi en Mewat," el ia dise. "On vende ja biriani en nosa distrito tra longa. On misca nunca carne de bove. An tal, si la polisia desira esamina, nos ave no problem."
@T La polisia de Hongkong xasa un senglar
@L aora_oji/2016/la_polisia_de_hongkong_xasa_un_senglar
====== La polisia de Hongkong xasa un senglar ======
16 janero 2016
En Hongkong, la polisia ia catura un senglar pos un xasa de tre oras en un parce de site.
La animal ia inisia la xasa cuando on ia persepi lo en la Parce Hongkong en la distrito sentral, do on ia adormi lo con un fusil de medisin calminte.
Simil, a mercurdi, un senglar videda ante un otel prosima ia susede evita la polisia tra du oras.
E en maio, on ia catura un senglar cual ia deveni trapida en un boteca de vestes de enfante, ance en Hongkong.
Senglares no es noncomun en la areas campanial de Hongkong. Los pote deveni atacosa cuando on fronti los.
On no ia confirma ce la senglar ier caturada es la mesma como la animal cual ia evita la polisia en la media de la semana. Ma lo pare probable, car senglares vagante no entra frecuente a locas multe poplida.
La animal es un mas preadulte con longia de sirca un metre.
Sua aventura ia saisi la atende de Hongkong, e multe usores de redes sosial ia tuita sur lo tra cuando la aveni ia developa.
La polisiores ia es destensada e ia fa fotos de la animal. Un atestor ia comenta: "Los ia tende forsa la senglar a un area, e lo ia tende evade. Los ia ave un disposa de 'denova la mesma'."
Jornalistes local reporta ce la senglar ave bon sania e ce on ia libri lo en un area de campania. Lo ia es adormida par un controlor governal de animales en cuando on ia nuri lo con pomas.
@T La polisia deutx invade parlores de odia
@L aora_oji/2016/la_polisia_deutx_invade_parlores_de_odia
====== La polisia deutx invade parlores de odia ======
17 julio 2016
La polisia deutx ia fa un serie de invades a persones sur ci on suspeta ce los ia posta parlas de odia a redes sosial.
La invades coordinada a 60 adirijes ia es la ves prima cuando la autoriosas ia reata en esta modo sur esta problem.
On intende fronti lo cual la polisia ia descrive como "un aumenta sustantial de testos estremiste". Crimines tipal inclui "dona gloria a nazisme e estremismes xenofobica, antisemita, e de otra spesies destriste".
La presidente de la autoria polisial criminal federal de la pais ia dise ce crimines de odia political motivada a la interede ia crese notable pos la comensa de la crise european de refujadas.
En la anio pasada, Deutxland ia aseta asta milion migrores e refujadas.
Multe de la parla de odia alegada ia aveni en un grupo secreta de Facebook entre julio e novembre 2015.
La invades ia es fada en 14 provinses deutx, e ia envolve 25 departes de polisia.
La provoca de odia razal es un crimin par lege deutx. Un person pote es prisonida per asta sinco anios en un caso de provoca "odia contra un grupo nasional, razal, relijial, o un grupo definida par sua orijinas etnical".
On ia critica Facebook, Twitter e Google en Deutxland car los no ia sutrae rapida parlas de odia de sua plataformas.
Presada par la autoriosas deutx a la fini de la anio pasada, la tre companias tecnolojial ia acorda sutrae tal contenidas de sua servis pos no plu ca 24 oras.
@T La presidente de Mexico compara Trump a Hitler
@L aora_oji/2016/la_presidente_de_mexico_compara_trump_a_hitler
====== La presidente de Mexico compara Trump a Hitler ======
9 marto 2016
Enrique Peña Nieto, la presidente de Mexico, ia compara la retorica de Donald Trump -- un de la aspirores republiciste per la presidentia de la SUA -- a lo de Adolf Hitler.
En un intervisa con un jornal mexican, el ia descrive la retorica de Trump como "xiliante", e ia ajunta: "En acel modo Mussolini ia susede, en acel modo Hitler ia susede."
La xef mexican ia dise ance ce Trump ia dana la relata entre la SUA e Mexico.
Trump ia declara ce si on eleje el, el va construi un mur longo la frontera SUA--Mexico per preveni migrores de traversa nonlegal a la SUA. La aspiror republiciste ia insiste ance ce Mexico va paia per la mur, ma Peña Nieto ia rejeta intera esta, disente ce "no caso" esiste en cual Mexico ta paia per un tal mur.
Trump presenta la batalia contra la migra nonlegal como la tema sentral de sua campania. El ia coleri mexicanes en junio 2015 cuando el ia descrive migrores mexican nondocumentida como "criminores" e "violores".
Peña Nieto ia dise ce Trump ofre "solves multe fasil e simple per problemes cual es evidente no tan fasil solvable".
El ia continua: "E on ia ave avenis en la istoria umana, nonfortunosa, do esta espresas de esta retorica xiliante ia gida sola a situas multe menasante." Referente a Mussolini e Hitler, el ia ajunta: "Los ia esplota un situa, cisa un problem, tra cual la mundo ia pasa a acel tempo, pos un crise economial."
Peña Nieto, ci ia evita comenta sur Trump asta aora, ia insiste ce el va es "asoluta respetosa" sur la prosede political SUA.
Ma presidentes presedente ia parla plu franca. Vicente Fox ia blasfema en televisa direta per asentua ce Mexico no va paia per la mur proposada par Trump.
E Felipe Calderón, ci ia governa de 2006 a 2012, ia rejeta ance la idea, disente: "Mexicanes, nos no va paia an un sentim per un mur tan stupida!"
@T La presidente de Pacistan condena la festa de Valentin
@L aora_oji/2016/la_presidente_de_pacistan_condena_la_festa_de_valentin
====== La presidente de Pacistan condena la festa de Valentin ======
14 febrero 2016
La presidente de Pacistan ia denunsia la festa de Valentin, disente ce lo ave no relata con la cultur pacistani e ce on debe evita lo.
Mamnoon Hussain ia informa studiantes ce lo es un tradision ueste cual desacorda con la cultur muslim.
El ia fa sua comentas pos cuando un distrito en la norde-ueste de la pais ia proibi selebra la festa.
La festa de Valentin es popular en multe sites en Pacistan, ma grupos relijiosa ia denunsia lo como moral declinante.
Plu temprana en la semana, la governa local en Kohat, en la provinse Khyber Pakhtunkhwa, ia comanda polisiores a proibi botecas de vende cartas de Valentin. La distrito Kohat es manejada par un partito political relijiosa e lo borda la areas conserviste tribal de Pacistan.
Entretempo, la consilio local de Peshawar ia aseta ance un deside de proibi selebras de lo cual lo ia nomi un dia "nonusosa".
Maulana Niaz Muhammad, un dirijor de la distrito Kohat, ia comenta: "La festa de Valentin ave no funda legal, e plu lo es contra nosa relijio, donce lo ia deveni proibida."
El ia dise ce an si la dona mesma de cartas e flores no es un mal ata, lo no es conveninte si on lia esta a un dia spesifada. El ia ajunta ce el senti ce tal praticas ta pote coraji conduis ofendente.
An tal, plu tarda, ofisiores en ambos locas ia dise ce on ia dejeta o iniora la proibis car los ia es multe nonpopular.
Jornalistes ia reporta plu temprana en esta semana ce on ia proibi donadas de Valentin en la capital Islamabad, ma la governa ia nega esta a pos.
@T La presidente pasada de Arjentina es acusada de froda
@L aora_oji/2016/la_presidente_pasada_de_arjentina_es_acusada_de_froda
====== La presidente pasada de Arjentina es acusada de froda ======
28 desembre 2016
Cristina Fernández de Kirchner, la presidente presedente de Arjentina, ia es acusada sur alegas de froda.
Un judor federal ia aproba acusas de asosias nonlegal e manejas frodosa contra Fernández. Julián Ercolini ia comanda ance la jela de $633 milion de la ativas de el.
En la pasada, Fernández ia nega malcondui.
On alega ce sua governa ia dirije acordas formal a un comersior prosima a sua familia.
Fernández dise ce la caso es political motivada e acusa Mauricio Macri, la presidente presente, de conspira longo el.
Aparente en corte en otobre, Fernández ia presenta documentos de bujeta nasional como parte de sua atesta, asentuante ce la contas ia es aprobada par corpos parlamental e la esaminor jeneral de la pais.
Ercolini ia aproba ance acusas de froda contra du de la aidores pasada de Fernández -- Julio Vido, ministro pasada de projetas, e José López, ministro pasada de infrastrutur publica -- e ance contra Lázaro Báez, un comersior.
On acusa Fernández de favore la compania de construi de Báez -- Austral -- en la distribui de acordas formal per projetas publica. La compania ia reseta plu ca 50 tal acordas en la du periodos presidental de Fernández.
En junio, on ia catura López lansante sacos plenida con cuasi $9 milion a traversa de la mures de un monceria, e ia aresta el con suspeta de lava de mone.
Fernández ia fini sua posto en la anio pasada e es un de la xefes major ci oposa la governa de Macri.
@T La presidente pilipina menasa abandona la NU
@L aora_oji/2016/la_presidente_pilipina_menasa_abandona_la_nu
====== La presidente pilipina menasa abandona la NU ======
21 agosto 2016
Rodrigo Duterte, la presidente de Pilipinas, ia menasa separa de la Nasiones Unida car esta organiza ia critica sua gera contra drogas como un crimin.
Duterte ia dise ce el va demanda cisa ce Xina e nasiones african formi un organiza alternativa. El ia acusa ance la NU de fali contra terorisme, famia, e geras.
Per atenta elimina la comersia de drogas, Duterte ia permete ofisial la mata de contrabandores par la polisia e la popla. La NU ia condena repeteda esta politica como un viole de diretos umana.
De pos la eleje de Duterte en maio, sirca 900 contrabandores suspetada ia es matada.
En la semana pasada, du espertas NU de diretos umana ia dise ce la politica de Duterte es egal a "provoca a viole e mata, un crimin su lege internasional".
En un arenga, plen de parolas basa, contra la NU a soldi, Duterte ia descrive la espertas como "stupida", disente ce los debe conta la cuantia de vives inosente cual es perdeda par causa de drogas.
"Me no vole insulta vos," el ia dise. "Ma cisa nos va debe simple separa de la Nasiones Unida. Si vos es tan noncortes, nos ta vade egal bon par parti. Donce sutrae nos de vosa organiza. Vos ia fa no cosa. Cuando vos ia es asi a ves resente? Nunca. Estra per critica."
Duterte ia dise ce la NU debe repaia sua contribui "afin nos pote sorti".
El ia ajunta ce la NU ia es noncapas de combate famia e terorisme, e ia fali fini la mata de persones nonmilitar en Irac e Suria.
"Aora vos, Nasiones Unida, si vos pote dise un mal cosa sur me, me pote dona des a vos. Me dise, vos es nonusosa. Car si vos ta es vera fidosa a vosa autoria, vos ia ta pote para tota esta geras e matas."
La secretor jeneral de la NU, Ban Ki-moon, e la Ofisia NU sur Drogas e Crimin ia condena esta "aproba parente de matas estra la lege, cual es nonlegal e un rompe de diretos e librias fundal".
Duterte ia es induida como presidente en junio, pos un vinse inondante en la vota. A ante, el ia es la maior de Davao, la site tre de la plu grandes de la pais, tra 22 anios. Sua disposa dur e comentas controversa ala ia gania per el la nometa "La Punor".
@T La Rena Unida eleje sorti de la Uni European
@L aora_oji/2016/la_rena_unida_eleje_sorti_de_la_uni_european
====== La Rena Unida eleje sorti de la Uni European ======
24 junio 2016
En un referendo sin presedente, la Rena Unida ia vota per sorti de la Uni European pos 43 anios.
David Cameron, la ministro xef ci ia inisia la referendo e ci ia campania pasionosa per la lado Resta, ia anunsia ce el va resinia per permete ce un otra "capitan" maneja la negosias de sorti. Ma el va resta en sua posto per tre menses per "stabli la barcon".
La lado Sorti ia gania cuasi 52% de votas. Cimri e England, estra London, ia vota forte per Brexit, ma Scotland, Er Norde e London ia suporta resta en la UE.
Nigel Farage, la xef de UKIP (la Partito per la Autonomia de la Rena Unida), ia descrive la resulta como la "dia de autonomia" per Britan, ma la lado Resta ia nomi lo "un desastre".
La paund ia cade asta sua valua la plu basa pos 1985 contra la dolar cuando asionerias ia reata a la resultas.
Plu ca 30 milion persones ia vota, 71,8% de los ci ia pote partisipa. Esta proportio es la plu alta en la Rena Unida pos 1992.
John McDonnell, la ministro ombral de finansia per la Partito Laboriste, ia dise ce la Banco de England va debe cisa interveni per reforti la paund, cual ia perde 3% de sua valua a la anunsia de la resulta local prima per sorti. Contra la euro, lo ia perde asta 6,5% de sua valua.
Farage, ci ia campania tra 20 anios afin Britan sorti de la UE, ia dise a suportores aclamante: "Esta va es un vinse per persones comun, per persones bon." A la comensa de la note, el ia predise an un vinse per Resta, credente la sondas.
Keith Vaz, un ministro pasada de Europa per la Partito Laboriste, ia dise ce la popla brites ia vota con "se emosias" e ia rejeta la consela de espertas ci ia averti sur la efeto economial de sorti de la Uni. El ia ajunta ce la UE debe fa un confere alta per discute la resulta, cual el ia descrive como "desastrosa per nosa pais, per la resta de Europa, e per la resta de la mundo".
La ministro de esternas deutx, Frank-Walter Steinmeier, ia descrive la resulta como "un dia triste per Europa e Britan Grande".
Ma Liam Fox, un parlamentor conserviste ci vole sorti, ia dise ce la votores ia mostra multe "coraje" par deside "cambia la curso de istoria" per la Rena Unida e, el ia espera, la resta de Europa. El ia recomenda "un periodo de calmia, un periodo de refleta, per permete ce on comprende la situa e esplora la detalias real".
Nicola Sturgeon, la ministro xef de Scotland, ia dise ce la vota "clari ce la popla de Scotland vide sua futur como un parte de la Uni European", car tota 32 areas de autoria scotes ia declara majorias per Resta.
Britan va es la pais prima cual sorti pos la formi de la Uni European, ma lo no va sesa direta es un membro de la alia de 28 nasiones. La prosede de sua parti pote ocupa a la min du anios, e no va comensa asta pos la resinia de Cameron.
La prosede va comensa con la ativi de la Article 50 de la Trata de Uni European. A pos, Britan no va pote rejunta se a la UE sin la acorda de tota statos-membros.
@T La resinia de la ministro xef de Island
@L aora_oji/2016/la_resinia_de_la_ministro_xef_de_island
====== La resinia de la ministro xef de Island ======
6 april 2016
La ministro xef de Island ia resinia. El es la vitim major prima de la "Paperes Panaman" esposada cual ia lumina la mundo oscur de finansia estrateritorial.
La esposas, veninte de la compania avocatal Mossack Fonseca, ia mostra ce Sigmundur Gunnlaugsson posese un compania estrateritorial con sua sposa, ma no ia declara lo cuando el ia entra a parlamento.
On acusa el de asconde miliones de dolares de mone familial. El dise ce el ia vende sua asiones a sua sposa, e nega ce el ia ata mal.
El es un de deses de persones global importante ci es indicada en la 11,5 milion fixes finansial e legal, prima publicida a soldi.
Pos alora, la presa ia aumenta per sua resinia. A lundi, miles de persones ia protesta estra la casa parlamental en la capital Reykjavík, e partitos oposante ia proposa un vota de no fida.
Plu temprana ier, Gunnlaugsson ia demanda ce la presidente Ólafur Ragnar Grímsson clui la parlamento e inisia un eleje political.
Ma Grímsson ia responde ce, ante acel, el vole consulta la xefes de la Partito de Autonomia, cual es un membro de la alia governante con la Partito Progresante de Gunnlaugsson de pos 2013.
Plu tarda, ante la vota proposada, la ministro xef ia anunsia ce el resinia sua posto.
Sigurður Ingi Jóhannsson, la xef suordinada de la Partito Progresante, la ministro de cultiva, ia informa reportores, pos un consenta, ce la partito intende nomi el como la xef nova e proposa ce el deveni la ministro xef.
An pos la resinia, Katrín Jakobsdóttir, la xef de la Promove Verde-Sinistra, ia dise ce partitos oposante desira ancora elejes tempranida.
La compania estrateritorial Wintris ia es usada per investi miliones de dolares de mone eritada, seguente un documento suscriveda par Anna Sigurlaug Pálsdóttir, la sposa de Gunnlaugsson, en 2015.
On crede ce alga de la coleria de la islansces veni de un persepi de interesas nonarmoniosa.
La ministro xef ia es envolveda en negosias sur la futur de la bancos islansce, e ia descrive creditores stranjer ci ia desira recovre sua mone como "vultures", an cuando sua compania Wintris mesma ia es un creditor.
En sua anunsia de resinia, Gunnlaugsson ia indica ce el ave no desira de impedi la labora continuante de la governa, incluinte un reformi de la sistem finansial.
@T La risca de avalanxa par causa de elicotores a Everest
@L aora_oji/2016/la_risca_de_avalanxa_par_causa_de_elicotores_a_everest
====== La risca de avalanxa par causa de elicotores a Everest ======
29 april 2016
Ofisiores nepali dise ce companias de elicotor fa volas nonpermeteda per turistes supra la partes la plu alta de Monte Everest (Sagarmata, Chomololungma).
Xerpas ia espresa sua ansia ce la vibra de la elicotores pote causa avalanxas.
Aviones de turisme no es permeteda a vola plu alta ca la Campa de Base, a 5364 metres. Ma la companias de elicotor dise ce los vola sola supra atraes como la Cascade Jelada de Khumbu, e ce esta es permeteda.
On ia fa no atenta de asende la monte en la du anios pasada par causa de un serie de desastres. Des-ses xerpas ia mori en via a la Campa Prima en 2014, e a la min 18 trepores ia mori a la Campa de Base cuando un trematera major ia causa un avalanxa enorme en 2015.
Pos la desastre de 2014, on ia move la via de trepa a la media de la Cascade Jelada de Khumbu. Esta es un parte tradosa cual trepores debe traversa en asende a la culmina de la monte.
Xerpas transporta aora aparatos e materias a campas plu alta per la saison presente de trepa.
Pabitra Karki, la presidente de la Asosia de Operores de Airocompanias e Nepal, ia dise: "Nos vola a 710 metres supra la tera e manteni un distantia minima de un cilometre de la montes, donce en no modo la vibra pote causa un avalanxa."
La asosia dise ce on fa sirca ses volas de turisme en cada semana de la saison de trepa. Ma otra persones a la Campa de Base ia comenta ce tal volas deveni plu comun.
Phurba Namgyal Sherpa, la secretor jeneral de la Asosia Nasional de Gidores Montanial de Nepal, ia espresa sua ansia: "Per trepores xerpa, spesial los ci porta aparatos per ecipos de mision, elicotores cual vola supra los en rejiones plu alta es un esperia mental torturosa. La state frajil de neva e jelo ta pote es disturbada a cualce tempo par la rotores de elicotores, e esta ta pote gida a un desastre per nos."
Espertas sur avioni dise ce un parte de la problem es la modo en cual tal volas es controlada. Ofisiores de la Autoria de Avioni Nonmilitar de Nepal ia confesa ce los no es presente per monitori tal volas, ma ce los depende de otra departes governal ala locada.
En ajunta, la departe de turisme ia permete ce elicotores transporta cordas e otra materias a la Campa Prima per repara la via, pos cexas par dirijores de misiones ce la trematera ia mali la difisilia de traversa la Cascade Jelada de Khumbu.
La asende de Everest es la sonia de multe trepores ci es contente de paia multe mone per ateni la culmina.
@T La rituo inisiante de la Olimpiales de Rio
@L aora_oji/2016/la_rituo_inisiante_de_la_olimpiales_de_rio
====== La rituo inisiante de la Olimpiales de Rio ======
6 agosto 2016
La Olimpiales de 2016 ia comensa ofisial con un presenta colorosa e pulsante a la stadion Maracanã en Rio. Televisada a un cuantia estimada de tre mil milion persones, lo ia selebra la istoria, cultur, e belia natural de Brasil.
En la periodo ante Rio 2016, on ia esperia un retrosede profonda e protestas political en la pais. La Juas, la primas cual ia aveni en America Sude, ia es ance turbada par ansia sur la scandal de drogi rusce, la virus de Zica, e problemes con la securia, infrastrutur, e avenerias de la site.
Ma con la abri formal de la Juas de la Olimpiada 31, organizores espera ce la foca va move aora a la ativia par 207 ecipos en 28 sportes.
La calderon ia es ensendeda par Vanderlei de Lima, ci ia gania la medalia de bronze per Brasil en la maraton de la Juas de 2004, pos cuando un vidor ia ataca el cuando el ia es a fronte de la corsa. Pelé, stela lejendin de futbal, ia elimina sua de la rol, disente ce sua state fisical no conveni.
An con la problemes economial de Brasil, la fola en la Maracanã ia es regalada par un spetaculo miscada de lus, pirotecnicales, dansa, e musica.
Pos un presenta simple ma emosiosa de la imno nasional brasilera, cantada e juada a gitar acustical par cantor-composor Paulinho da Viola, projetas video sur la solo de la stadion ia esplora la istoria de la pais.
Comensante con imajes dividente e scultas jigante de microbios, representante la inisia de vive, la rituo ia mostra la contribuis fada a la istoria e cultur de Brasil par poplas nativa, esplorores portuges, sclavos african, e migrores nion.
Atores ia salta a traversa de projetas de construidas simbolinte la sites de Brasil.
Un recreada de un biplana 14-bis, inventada par Alberto Santos-Dumont e prima enairada en 1906, ia atrae un de la aclamas la plu grande de la sera cuando lo ia pare sorti volante de la arena.
La fola no ia reata negativa a la ecipo rusce, reduida a 271 atletas de la 389 inisial, pos acusas de drogi en un reporta per la Asosia Mundal Antidrogi.
Ma lo ia doni un bonveni spesial amin a un ecipo composada de atletas refujada -- la ecipo anteultima ci ia entra a la stadion. Thomas Bach, la presidente de la Comite Internasional Olimpial, ia dise ce la atletas refujada envia "un mesaje de espera a la miliones de refujadas sirca la globo".
La fola de 60 mil persones ia esplode con ruido, cantante "Brasil, Brasil, Brasil", cuando la ecipo brasilera ia apare en la stadion. La bandera de la nasion ia es portada par la pentatlonor Yane Marques, medaliste de bronze en 2012.
@T La sitadania global pare crese
@L aora_oji/2016/la_sitadania_global_pare_crese
====== La sitadania global pare crese ======
28 april 2016
Persones identifia se como sitadanes sempre plu global e no nasional, seguente un sonda par la Servi Mundal de la BBC.
La tende es spesial forte en economias emerjinte, do persones opina ce sua mentes es abrida e internasional. Ma en Deutxland, min persones dise ce los senti aora como sitadanes de mundo ca en 2001.
La sondores ia demanda a 20 mil persones en 18 paises.
Plu ca un dui de la persones sondada (56%) en economias emerjinte ia regarda se como xef sitadanes de mundo, no de nasion. En Nijeria (73%), Xina (71%), Peru (70%), e Barat (67%), la cuantias ia es multe alta.
Par contrasta, la tende en nasiones industrialida pare vade a la otra dirije. En esta nasiones plu rica, lo pare ce la conseta de sitadania global ia es forte colpada par la crise economial de 2008.
En Deutxland, per esemplo, sola 30% de respondores vide se como sitadanes de mundo. Esta es la proportio la plu basa en Deutxland de pos la comensa de la sonda a 15 anios ante aora.
La sonda sujesta ce multe persones en Deutxland considera profonda cuanto la pais debe abri sua portes en la futur, seguente la deside par Angela Merkel de enflue milion refujadas en la anio pasada.
54% de persones deutx ia aproba bonveni persones suri a sua pais. En la Rena Unida, do la governa ia defini un limita masima a la cuantia de refujadas asetable, la proportio ia es multe plu alta, a 72%.
Un cuantia notable de deutxes ia evita responde cuando on ia sonda sur temas de migra e sosia. Sur la tema de la sposi entre persones de orijinas razal o relijial diversa, per esemplo, 46% de sondadas deutx no ia pote responde serta, o ia atenta cuali sua responde par dise ce lo depende de la situa.
Esta contrasta con otra paises european, como Frans, do persones ia favore multe plu asentuada tal intersposis.
La datos indica ance alga divides clar entre disposas en la continentes.
En Europa, Rusia ave la resiste la plu forte contra intersposi: 43% de persones rusce ia desaproba ativa la sposi entre razas e etnicos diferente. Ma en Espania, sola 5% ia oposa lo.
Rusia pare ave la oposa la plu forte de migras. Sola 11% de la rusces sondada ta aproba aseta refujadas de Suria, per esemplo.
A la otra lado, entre tota paises en la sonda, Espania ta es la plu bonveninte a refujadas suri. Un majoria grande de 84% ala crede ce los debe aseta plu de la persones ci fuji de la sinco anios de gera interna en Suria.
La statistica indica ance un divide interesante entre disposas a refujadas en America Norde. De la canadianes sondada, 77% ia dise ce los ta aproba aseta suris fujinte. Ma en la Statos Unida, la proportio ia es sola 55%.
Indonesia ave la senti la plu debil de sitadania nasional (4%). En loca, lo pare ce persones indonesian ave un senti multe plu forte de localisme: plu ca un dui de respondores ia regarda sua comunias local como defininte los a modo la plu importante.
Jeneral, relijio pare ave un rol multe plu peti ca nasionalia en la defini de persones. La eseta grande es Pacistan, do 43% de la sondadas ia pare identifia se par xef sua relijio -- notable plu multe ca en cualce otra pais.
La demanda sur relijio fa ce on recorda ance un de la diferes major entre Europa e la Statos Unida. En la SUA, 15% de la sondadas ia dise ce los defini se par xef sua relijio, ma en paises european la proportio es mera 5%.
@T La SUA ataca radarerias iamani
@L aora_oji/2016/la_sua_ataca_radarerias_iamani
====== La SUA ataca radarerias iamani ======
13 otobre 2016
La militaria de la SUA ia ataca stasiones de radar en Iaman pos cuando un de sua barcones de gera en la Mar Roja ia es atacada par misiles a la ves du en poca dias.
La Pentagon ia dise ce sua evaluas inisial ia mostra ce tre radarerias envolveda en la atacas resente ia es destruida. La locas ia es en teritorio controlada par rebelores huti aliada con Iran.
La atacas ia es autorida par presidente Barack Obama, e esecutada usante misiles cruser Tomahawk xutada de la xasatorpedo Nitze.
Un portavose ia dise: "Esta atacas limitada de autodefende ia es fada per proteje nosa empleadas, nosa barcones, e nosa libria de naviga en esta coredor maral importante. La Statos Unida va responde a cualce plu menasas a nosa barcones e trafica comersial, a grado conveninte."
A la min un misil ia es xutada a la Mason, un xasamisil, en la Mar Roja prosima a Iaman. La barcon ia ata per defende se e ia sufri no dana.
A soldi, du misiles ia es xutada a la mesma barcon SUA de la mesma teritorio de rebelores. Ambos ia colpa la acua ante ateni la barcon. Un portavose huti ia dise ce lo ia punta no atacas a barcones de gera.
Un alia multinasional, gidada par Arabia Saudi e suportada par la SUA, fa un campania de atacas airal contra la promove huti. Ma la suporta SUA per esta ia deveni tensada pos un ataca a un salon funeral en la capital Sana cual ia mata a la min 140 persones en la parte plu temprana de esta mense.
Washington ia dise ce lo va revisa sua suporta per "alinia plu bon con prinsipes, valuas, e interesas de la SUA".
La governa saudi no ia reconose publica ce sua aviones ia esecuta la ataca de misil, ma lo ia inisia un investiga. Lo ia dise ance ce lo va aida la retrae de iamanis ferida en la ataca ci nesesa es medical tratada estra la pais.
La Nasiones Unida dise ce a la min 4125 persones nonmilitar es matada e 7207 es ferida pos marto 2015, cuando la alia ia interveni en la gera entre fortes fidosa a la governa internasional reconoseda de Iaman e los aliada a la hutis.
@T La SUA rejeta un proposa per plu spasio en aviones
@L aora_oji/2016/la_sua_rejeta_un_proposa_per_plu_spasio_en_aviones
====== La SUA rejeta un proposa per plu spasio en aviones ======
8 april 2016
La Senato de la SUA ia rejeta un lege cual ia ta fisa un norma minima per spasio de pasajor en aviones comersial.
En anios resente, airocompanias desirante redui sua spendes ia redui la grandias de sejas e la cuantia de spasio per gamas, entre otra cambias.
Pasajores ia cexa frecuente sur la ambiente sempre plu restrinjeda.
Alga volas ia es disturbada cuando disputas ia aveni entre pasajores par causa de la organiza de sejas.
Multe airocompanias aumenta aora la custa a pasajores ci desira plu spasio.
"On debe paia un braso e un gama sola per ave spasio per sua brasos e gamas," Senator Chuck Schumer ia dise. El ia sponsori la proposa, cual ia es liada a un lege plu vasta sur avioni.
La lege ia ta proibi airocompanias de redui plu la "grandia, largia, cuxini, e angulo" de sejas. Lo ia fronti ance la problemes de spasio per gamas e la largia de coredores.
Airocompanias ia oposa la proposa, disente ce on atenta "reregula" la industria.
La projeta ia es rejetada par 54 votas contra 42. Tota republicistes ia vota contra la lege, con eseta de un.
@T La SUA xerca la puni de mori per la fusilor de Charleston
@L aora_oji/2016/la_sua_xerca_la_puni_de_mori_per_la_fusilor_de_charleston
====== La SUA xerca la puni de mori per la fusilor de Charleston ======
25 maio 2016
La departe de justia de la SUA xerca la puni de mori en la caso de la fusilor ci ia mata nove persones en un eglesa en Charleston en la anio pasada.
Loretta Lynch, la avocato jeneral, ia dise ce "la natur de la crimin alegada e la dana resultante" ia es fatores en eleje la puni de mori.
On ia acusa Dylann Roof sur la omisides de nove adorores a un eglesa afroamerican en la site Charleston en la stato Carolina Sude.
La polisia ia dise ce el ia pasa un ora en senta con parocianes ante comensa fusili. La om de 22 anios ia es a un consenta de studia biblial a la Eglesa Bispal Metodiste African Emanuel cuando el ia ataca.
El fronti 33 acusas federal, incluinte crimines de odia, impedi de relijio, e atacas par fusil.
Seguente la polisia, el ave opinas de supremisme blanca e ia ataca la vitimes par causa de sua raza.
Miles de persones ia es presente a la funera de un de la vitimes, la prete Clementa Pinckney. Presidente Barack Obama ia es entre los, e el ia fini sua loda de la prete par canta la imno Amazing Grace ("Grasia stonante").
La trajedia ia reinisia debates sur relatas de razas e ia provoca un reata forte contra la bandera batalial de la Statos Federada, pos cuando un foto ia apare en cual la suspetada porta un tal.
@T La taliban ataca un ambasada deutx en Afganistan
@L aora_oji/2016/la_taliban_ataca_un_ambasada_deutx_en_afganistan
====== La taliban ataca un ambasada deutx en Afganistan ======
11 novembre 2016
En la site Mazar-e-Sharif en Afganistan, un bomba umana ia puxa un camion contra la ambasada deutx, matante a la min du persones.
Reportas ia descrive un esplode enorme a la ambasada, segueda par fusilis.
Un ofisior de ospital ia dise ce plu ca 80 persones ia es ferida en la ataca, cual ia aveni sirca 23:00 de ora local.
La taliban dise ce lo ia esecuta la ataca en responde a colpas airal aliada en la plu temprana de esta mense cual ia mata nonmilitares en Kunduz, un site norde.
OTAN investiga acel, cual ia aveni cuando soldatos afgani ensircada par militaristes taliban ia clama per suporta airal. Tredes nonmilitares ia mori en la combate, multe en atacas airal.
La ambasada deutx es en un compleso murida en la sentro de Mazar-e-Sharif, la capital de la provinse Balkh. Deutxland ave cuasi 1000 soldatos en Afganistan, xef en acel provinse.
Un portavose per OTAN ia dise ce on ave "dana vasta" a la embasada. Soldatos OTAN es en la construida, preparante per sorti sua empleadas.
A la min un auto pacida con esplodentes ia es puxada contra la muron sirca la compleso. On investiga ance esce un plu bomba de auto ia es ance usada.
Reportas en redes sosial dise ce elicotores vola supra la compleso e ambulansias freta tra la site.
La ataca ia aveni a media de un situa malinte de securia en Afganistan. En otobre, militaristes taliban ia prosimi a ocupa Kunduz ante cuando on ia forsa los a via.
@T La taliban ataca un compleso stranjer en Kabul
@L aora_oji/2016/la_taliban_ataca_un_compleso_stranjer_en_kabul
====== La taliban ataca un compleso stranjer en Kabul ======
1 agosto 2016
En Kabul, la capital de Afganistan, un otel casinte contratores stranjer ia es atacada par combatores taliban.
On ia oia un esplode grande tra la site a sirca 01:25 de ora local a esta matina. Un bomba de camion ia esplode a la porton de la compleso, e du fusilores ia entra.
En un batalia de fusil, un polisior e ambos atacores ia es matada. Tre polisiores ia es ferida en la batalia cual ia dura tra alga oras.
Nun de la persones abitante la compleso ia es ferida. La ataca ia fini aora.
North Gate es un compleso forte gardada, e ia es atacada par combatores a tre anios ante aora.
La eletrica en partes de Kabul ia rompe per un tempo corta pos la esplode.
Inamullah Khan, un abitor local, ia dise: "Me ia es a punto de adormi cuando la esplode ia aveni. La eletrica ia descomuta. Lo ia es un esplode multe grande. Lo ia es multe grande."
"Me ia spende oto anios en Afganistan, e lo ia es la esplode la plu forte cual me ia esperia a cualce ves," Andreas Wilmers ia dise. El es la xef de un compania de televisa en la pais.
El ia ajunta: "La controla par la polisia afgani, conoseda como la anelo de aser, per dise puntos diversa de controla en esta compleso -- fundal, acel puntos funsiona en la dia, ma en la note los no es vera operante."
En la semana pasada, du bombas umana, con lias a la organiza Daex, ia mata 80 persones e ia feri 230 plu en Kabul.
@T La tempo pos un siclon en Fiji
@L aora_oji/2016/la_tempo_pos_un_siclon_en_fiji
====== La tempo pos un siclon en Fiji ======
22 febrero 2016
En Fiji, on ia comensa la taxe de reboni pos la siclon la plu forte recordada, cual ia mata a la min 20 persones.
Laborores de salva dise ce la cuantia de mores pote crese, car on ancora no ia ateni alga de la isolas distante la plu colpada.
Miles de persones es aora en sentros de asembla, e multe partes de la pais resta sin eletrica.
La siclon Winston, cual ia colpa a la fini de semana, ia trae ventas de plu ca 320 cilometres per ora, pluves deluviante, e ondas de asta 12 metres de altia.
La tempesta ia es entre la plu grandes cual ia aveni en la emisfera sude. Lo ia move a ueste pos atera a 18:30 (06:30 de ora global) a saturdi en la norde de Viti Levu, la isola xef.
Lo ia verje a la momento ultima, librinte la capital Suva de la fortia plen de sua ventas.
Imajes airal ia mostra ce alga viletas, spesial en areas distante, ia es completa destruida. Un om en Viti Levu ia comenta ce la dana es tan grande ce "lo aspeta como un otra pais".
La siclon ia rompe linias de eletrica e comunica e ia destrui sentos de casas. Miles de persones abita aora en 750 sentros abrida par la governa, cual coraji persones a comensa vade a casa per limpi.
Sirca 80% de la 900 mil abitores de la nasion ave no eletrica sustada.
La governa ia declara un state de crise e ia demanda ce companias privata aida con transporta e la move de furnis.
Ofisiores ia institui ance un ora de retira, aumentante la potias arestal de la polisia, ma on ia sutrae esta oji. On ia comanda ce scolas clui per un semana, ma la airoporto xef ia reabri per reseta furnis umaniste e permete ce turistes parti.
Australia e Zeland Nova ia permete la relasa de furnis crisal de aida cual on teni en Suva. Los ia furni ance aviones per aida evalua la dana en areas min fasil asedable.
Raijeli Nicole, la dirijor de Oxfam per la rejion pasifica, ia dise ce la estende de la desastre va deveni clar cuando on restora la comunica con la areas distante la plu grave afetada. "La fijianes atenta desperante repara linias rompeda de comunica, ma los ave temes seria ce la novas cual espeta los va es grave."
Frank Bainimarama, la ministro xef, ia descrive la tempesta como "un malesperia de spesie la plu grave", ajuntante: "Cuando nos pote, nos va dona un calendario per la reinstitui de acua e eletrica."
La ministro de turisme, Faiyaz Siddiq Koya, ia dise ce la tempesta ia causa ruinas vasta, ma ia insiste ce "tota visitores es secur e comfortosa", an sin la posible de comunica con alga areas.
@T La tunel ferovial la plu longa e profonda de mundo
@L aora_oji/2016/la_tunel_ferovial_la_plu_longa_e_profonda_de_mundo
====== La tunel ferovial la plu longa e profonda de mundo ======
1 junio 2016
En Suiz oji, on va abri ofisial la tunel ferovial la plu longa e profonda de mundo, pos cuasi du desenios de construi lo.
La du foras de la Tunel Basa de Gotthard ave un longia de 57 cilometres. Los va furni un lia rapida de ferovia su la Alpes entre Europa norde e sude.
Suiz dise ce esta va revolui la transporta de carga en Europa.
Benes portada sur esta via par milion camiones en cada anio va es transportada par tren en loca.
La longia de la tunel suprapasa la tunel Seikan de Japan, cual ave 53,9 cilometres. La Eurotunel es longa de 50,5 cilometres e deveni aora la numero tre de mundo.
La canselor deutx Angela Merkel, la presidente franses François Hollande, e la ministro xef italian Matteo Renzi va acompania ofisiores de Suiz a la abri formal.
La construi ia custa plu ca $12 mil milion. Votores suiz ia aproba lo en un referendo en 1992, e, a du anios plu tarda, los ia suporta un proposa de grupos ambientiste per move tota carga viajante tra Suiz de autovia a ferovia.
La tunel completida pasa a 2,3 cilometres su la surfas de la montania e tra roca con temperatur de 46°C.
Injeniores ia escava e esplode 73 spesies diferente de roca, de cual alga ia es tan dur como granito e otras ia es tan mol como zucar. Plu ca 28m tones de roca ia es escavada.
Nove laborores ia mori en la labora.
La tunel ia es finida a la tempo e custa prediseda. Aora on ave un lia de ferovia arterin entre Rotterdam en Nederland e Genova en Italia.
Cuando la servi plen comensa en desembre, la tempo de viaja per pasajores entre Zürich e Milano va es reduida par un ora, asta du oras e 40 minutos.
La curso de la tunel nova es plana e reta. Lo no asende curvinte tra la montania como la tunel vea de ferovia, e como la tunel de rua cual on ia abri en 1980.
On previde ce sirca 260 trenes de carga e 65 de pasajor va pasa tra la tunel en mera 17 minutos.
La tunel es finansiada par impostas de valua ajuntada e de carburante, par fa ce veculos pesosa paia per viaja sur autovias, e par prestas governal cual on debe repaia ante la fini de des anios.
@T La vende recordo de un selo imperal
@L aora_oji/2016/la_vende_recordo_de_un_selo_imperal
====== La vende recordo de un selo imperal ======
15 desembre 2016
Un selo imperal xines de la sentenio 18 ia es vendeda per €21 milion euros ($22 milion), plu ca la dudesuple de sua custa estimada.
La vende, a un colior xines anonim, ia aveni ier en la subasteria Drouot en Paris pos un batalia enerjiosa de ofres. On ia previde ce lo va es vendeda per entre 800 mil e milion euros.
La selo ave la grandia de un palma, e es fada de steatite roja e blanca, un spesie de roca mineral.
Lo ia es un de sentos poseseda par Imperor Qianlong, un de la imperores xines la plu longa renante.
La vende la rompe la recordo per subastas de selos: la recordo presedente ia es vendeda per €14 milion en 2011.
La selo ier vendeda ia es orijinal otenida par un dotor marinal joven franses ci ia visita Xina en la tarda de la sentenio 19. Lo ia resta sempre en sua familia a pos.
Imperor Qianlong, un colior zelosa de arte ci ia rena Xina tra multe de la sentenio 18, ia es mesma un artiste ci ia usa selos per suscrive sua obras. El ia comanda la produi de alga de los per sua artisania detaliosa.
La selo mostra nove dragones cual simboli la masia e la autoria imperal.
Drouot ia dise ce plu ca 1800 selos de Qianlong ia es creada, e 700 de los ia desapare. 1000 es retenida par la Museo Palasial en la Site Proibida en Beijing.
@T La virus de Zica causa microsefalia en bebes brasilera
@L aora_oji/2016/la_virus_de_zica_causa_microsefalia_en_bebes_brasilera
====== La virus de Zica causa microsefalia en bebes brasilera ======
21 janero 2016
La statistica la plu resente de Brasil indica un plu crese en la cuantia de bebes parida con testas nonormal peti par madres infetada con la virus de Zica.
On ia trova aora 3893 casos de microsefalia de pos otobre, cuando la autoriosas ia persepi prima un aumenta. En la reporta corespondente de la semana pasada, la cuantia ia es 3500.
Zica es transmeteda par la morde de la moscito Aedes aegypti, cual sperde ance la maladias denge e xicungunia.
Brasil esperia sua aveni la plu grande conoseda de Zica. La virus ia mata ja sinco bebes en la pais, e on investiga 44 otra casos.
En la semana pasada, Marcelo Castro, la ministro de sania, ia dise ce on developa un paceta de proba per identifia rapida la presentia de cualce de la tre viruses.
El ia anunsia ance un ajunta de finansia per aselera la developa de un vasin per Zica "en tempo recordo". A presente, la sola modo de combate la virus es par sutrae acua staniante do moscitos reprodui.
On ia vide un crese subita en la cuantia de casos de Zica en alga otra paises de America latina.
En Colombia, on ia reporta plu ca 13 500 casos. Alejandro Gaviria, la ministro de sania, ia dise: "Nos es la pais du [en America latina] pos Brasil par cuantia de casos reportada."
En Bolivia, la autoriosas ia reporta la caso prima de un fem ensinta con diagnose de Zica.
"El no ia viaja estra la pais. Esta es un caso interna," Joaquín Monasterio, la dirijor de servis de sania per Santa Cruz, un departe este.
A venerdi pasada, la Sentros SUA per Controla e Preveni Maladia ia avisa ce femes ensinta debe evita viaja a Brasil e otra paises de America latina e la Caribe do on ia rejistra avenis de Zica.
La avisa pertine a Aiti, Brasil, Colombia, Guatemala, Guian Franses, Martinic, Mexico, Onduras, Panama, Paraguai, Porto Rica, Salvador, Suriname, e Venezuela.
@T La vispresidente cenian a la Corte Criminal Internasional
@L aora_oji/2016/la_vispresidente_cenian_a_la_corte_criminal_internasional
====== La vispresidente cenian a la Corte Criminal Internasional ======
5 april 2016
William Ruto, la vispresidente de Cenia, va trova esce judores a la Corte Criminal Internasional (CCI) intende rejeta un caso contra el sur crimines contraumana.
Ruto nega acusas de omiside, deporta, e persegue en la violentia cual ia segue la elejes de 2007 e cual ia mata sirca 1200 persones.
Sua avocatos vole ce on abandona la caso par causa de un manca de atesta. Ruto es un de la politicistes la plu importante ci la CCI ia prosede.
La caso contra el es ja impedida par problemes diversa.
En febrero, judores a la CCI ia proibi la usa de atestas retirada, con resulta ce avocatos no ia pote usa declaras rejistrada a ante par atestores.
Alga atestores major en la caso ia cambia sua declaras. Avocatos ia dise ce esta ia es causada par menasas e sobornas.
La avocatos de Ruto dise ce on debe remete el car tan multe atestores major de la lado prosedente ia sutrae o cambia sua declaras orijinal.
Fatou Bensouda, un de la avocatos prosedente a la CCI, ia aseta ce la perde de atestores ia debili la caso contra la vispresidente, ma el ia razona ce on ave ancora atestas sufisinte per fa la prosede.
Un posible es ce la judores va desculpa Ruto de tota acusas. Un otra es ce los va solisita ce la prosedores ajusta la acusas. O los va rejeta la razonas de la defendores e permete ce la prosede continua.
En 2014, la prosedor ia abandona acusas simil contra la presidente cenian Uhuru Kenyatta, alegante ce on ia menasa atestores afin los cambia sua declaras.
Aora, la futur de la caso pare depende de esce la avocatos prosedente ia demostra ce los ave atestas sufisinte per ecuilibra un proposa de "no caso esiste" par la avocatos de Ruto.
La usa de atestas presedente es definida par Regula 68 de la Trata de Roma, cual ia institui la Corte Criminal Internasional.
Ma la ecipo defendente de Ruto ia protesta ce esta es nonjusta, car on ia introdui cambias a la regula pos la comensa de la caso contra el e sua coacusada, Joshua Sang, un jornaliste.
La judor presidente Piotr Hofmanski ia deside ce atestas rejistrada a ante es presentada sin permete ce la acusadas contrainteroga la atestores.
Sang, ci on acusa de usa sua program de radio per organiza atacas pos la elejes political, ia dise ce acel deside es "un paso a nosa libria".
Ruto e Kenyatta ia es a lados oposante de la elejes de 2007, ma ia formi un alia cual ia gania los de 2013.
@T La xef de la Taliban es probable matada
@L aora_oji/2016/la_xef_de_la_taliban_es_probable_matada
====== La xef de la Taliban es probable matada ======
22 maio 2016
Ofisiores de la SUA dise ce Akhtar Mansur, la xef de la Taliban afgani, ia es probable matada en un ataca airal.
El e un otra combator mas ia es atacada cuando los ia viaja en un veculo en un area distante de Pacistan, prosima a la frontera de Afganistan.
La Pentagon ia confirma ce lo ia atenta ataca Mansur, ma ia dise ce on judi ancora la resultas.
Mansur ia deveni la xef de la Taliban en julio 2015, sustituinte per Mohammand Omar, la fundor e xef spirital.
La ataca ia aveni prosima a la vila Ahmad Wal a sirca 15:00 de ora local ier, e ia es autorida par Barack Obama, la presidente de la Statos Unida.
La Casa Blanca ia comenta ce e Pacistan e Afganistan ia es informada sur la ataca a un tempo corta pos sua aveni.
Un comandor anonim de la Taliban ia dise: "Nos ia oia esta reportas nonfundida, ma esta no es la ves prima. Me ia vole sola comparti con vos mea propre informa ce Mula Mansur no ia es matada."
Rumores falsa ia flota comun supra xefes de la Taliban. Omar ia mori en 2013, ma la Taliban no ia confirma esta asta pos la pasa de du anios. On ia reporta ce Mansur ia es matada en un batalia de fusil en la anio pasada, ma la governa afgani ia rejeta esta.
La asinia de Mansur como xef de la Taliban ia es disputada, e un grupo competente ia eleje sua propre xef.
La declara par la Pentagon ia dise ce Mansur es ativa envolveda con la projeta de atacas "presentante un menasa a nonmilitares e fortes de securia afgani, nosa empleadas, e aliadas".
La Taliban ia fa ganias pos cuando soldatos internasional ia retira se de un rol ativa combatente en 2014. La fortes de OTAN es sempre plu posada en zonas de batalia per suporta soldatos afgani ci combate la Taliban.
@T La xef de Magiar sujesta un site per migrores en Libia
@L aora_oji/2016/la_xef_de_magiar_sujesta_un_site_per_migrores_en_libia
====== La xef de Magiar sujesta un site per migrores en Libia ======
25 setembre 2016
La ministro xef de Magiar, Viktor Orbán, ia dise ce la Uni European debe crea "un site jigante de refujadas" a la costa de Libia per trata refujadas african ante cuando los ariva en Europa.
Orbán, ci ave un punto de vista forte contra la migra, ia sujesta ce un governa libi nova ta maneja la campa. El ia fa sua comentas a un confere de xefes european e balcan en Wien, Osteraic.
Libia ia deveni caososa pos un revolta en 2011, con governas oposante e militias lutante per oteni la potia.
Orbán, ci ia clui la fronteras sude de Magiar con sercas de filo lamosa e canes gardante, ia dise ce la UE debe reprende "controla completa" de sua fronteras esterna.
El ia recomenda la cansela de un embargo ueste de armas contra Libia, e ce la ueste ta furni suporta a la Armada Libi Libre, un grupo rebelante.
Angela Merkel, la canselor deutx, ci ia es criticada par la ministro xef magiar sur sua politica de "porte abrida" per refujadas e migrores, ia dise ce la solve es ce on ta fa acordas con paises african per reenvia migrores ci no cuali per es refujada.
Merkel ia recomenda ance ce la UE ata plu per para la migra nonlegal, ma segue ance sua encargas umaniste a la mesma tempo.
El ia es criticada par alga persones en Deutxland sur sua manera de trata la crise. En elejes resente de stato, sua partito, la Democratas Cristian, ia perde alga de sua vantaje a oposores popliste a antimigra.
Plu ca 300 000 migrores ia traversa la Mar Mediteraneo en esta anio, e on ia rejistra 3500 moris.
@T Laboras per restora la tomba de Jesus
@L aora_oji/2016/laboras_per_restora_la_tomba_de_jesus
====== Laboras per restora la tomba de Jesus ======
7 junio 2016
Un ecipo de espertas ia comensa restora la tomba antica en Ieruxalim sur cual cristianes crede ce Jesus ia es ala enterada. Esta es la labora prima a la tomba en 200 anios.
La renovi en la Eglesa de la Tomba Santa intende reforti e conserva la strutur.
Disputas entre la tre ramos cual maneja la eglesa ia retarda la labora. Ma eglesores de la eglesas elinica ortodox, roman catolica, e armenian ia pone sua disputas a lado, reconosente la nesesa de comensa la repara.
La labora va consentra sur la santeria antica conteninte la tomba de Jesus, sur cual cristianes dise ce lo sta supra la loca do on ia unje, envolve, e entera la corpo de Jesus.
La restora la plu resente ala ia aveni en 1810 pos un focon.
La autoriosas de la tre ramos eglesal es encargada con maneja partes diversa de la eglesa, ma los comparti la encarga de la santeria.
La relatas entre la ramos es tensada a veses. En 2008, un disputa entre monces elinica ortodox e armenian ia aumenta a un scaramuxa. Ma los ia deside ata juntada pos cuando la autoriosa de anticas israeli ia dise en la anio pasada ce la eglesa es nonsecur. La polisia ia clui lo per un tempo corta.
La coordinor siensal de la reparas, Antonia Moropoulou, ia dise ce la tomba es stable ma desformida, e ce lo nesesa ce on atende lo pos multe anios de esposa a acua, umidia, e fuma de candelas. El ia ajunta ce la strutur nesesa ance deveni protejeda de la risca de dana par tremateras.
On previde ce la labora va ocupa entre oto e des-du menses. En acel periodo, peregrinores va pote ancora visita la santeria.
Cada ramo contribui mone a la projeta de $3,3 milion. En ajunta, Re Abdullah de Jordan ia fa personal un dona finansial.
Jordan ia controla la Site Vea de Ieruxalim, do la eglesa sta, asta la gera arabi-israeli de 1967. Lo continua ave un rol en proteje locas santa muslim e cristian ala.
@T Laborores de potia nucleal junta se a greves en Frans
@L aora_oji/2016/laborores_de_potia_nucleal_junta_se_a_greves_en_frans
====== Laborores de potia nucleal junta se a greves en Frans ======
26 maio 2016
Laborores a sentros eletrical nucleal en Frans va greve oji entre protestas sur reformis controversa.
La sindicato CGT (Federa Jeneral de Labora) ia dise ce empleadas a des-ses de la sentros nucleal de la pais ia vota per un greve de un dia.
Ier, la governa ia dise ce lo comensa usa reservas statejial de petrolio en cuando grevores ia impedi refinerias.
Sindicatos vole ce la governa reversa la reformis laboral cual ia es forsada tra parlamento en la parte plu temprana de esta mense.
La compania nasional de potia, Électricité de France, ia refusa comenta sur esce la greve oji va afeta la furni de eletrica.
Sirca 75% de la eletrica usada en Frans veni de complesos nucleal.
Greves e blocis disturba ja ses de la oto refinerias de petrolio en la pais. A martedi, scaramuxas ia aveni a un de estas, cuando la polisia ia separa un bloci a Fos-sur-Mer en Marseille.
Laborores a un termina grande de petrolio en la porto de Le Havre ia intende ance greve oji per bloci emportas.
Alain Vidalies, la ministro de transporta, ia dise ce 40% de gasolinerias sirca Paris ave problemes en oteni carburante. Per evita la manca, motoristes ia fa compras de panica.
Presidente François Hollande ia informa ministros a mercurdi ce "tota va es fada per serti ce on furni la popla franses e la economia".
Analistes dise ce la pais posese cuasi cuatro menses de petrolio reservada.
La presa par sindicatos ia estende ier ance a la ferovias de Frans, cuando un greve par locomotivores ia cansela no sola alga servis TGV de rapidia alta, ma ance alga trenes rejional e de viaja dial. On previde ce la transporta va es denove disturbada oji.
La CGT ia demanda ance per asemblas protestante en sites tra Frans.
La governa ia provoca la coleria de la sindicato cuando lo ia usa un truco de la constitui per forsa sua reformis debilida tra parlamento sin ce on vota sur los. Lo dise ce esta reformis, par cual la emplea e desemplea deveni plu fasil per companias, es nesesada per redui la cuantia de nonempleadas.
La problem cresente crea ansia per la concurso de futbal Euro 2016 cual va comensa en Frans pos pico plu ca du semanas.
@T Legores de Corea Sude vota contra Park Geun-hye
@L aora_oji/2016/legores_de_corea_sude_vota_contra_park_geun-hye
====== Legores de Corea Sude vota contra Park Geun-hye ======
9 desembre 2016
La parlamento de Corea Sude ia vota per acusa presidente Park Geun-hye de malcondui en un scandal de froda.
La proposa en la Asembla Nasional ia es asetada par 234 votas contra 56, indicante ce alga membros de la partito renante de Park ia vota contra el.
La autoria de Park pasa aora a Hwang Kyo-ahn, la ministro xef.
Park ia es profonda envolveda en un scandal political cual ia provoca miles de coreanes a protesta sur la stradas en semanas resente per esije ce on sutrae el de potia.
A la cor de la crise es la relata entre Park e Choi Soon-sil, sua conselor prosima, ci on acusa de usa sua relatas per gania influe e vantajes finansial.
Avocatos prosedente dise ce Park ave un rol "notable" en la froda alegada, cual el ia nega. En la semanas la plu resente, el ia demanda a multe veses ce on pardona el per sua rol en la scandal.
La vota sinifia ce Park es aora suspendeda de sua posto, ma la deside nesesa ancora es aprobada par la nove judores de la corte constitual, ci ave ses menses per discute lo.
Si la corte suporta la deside, sola alora Park ta deveni desempleada. El ta deveni la presidente prima de Corea Sude ci on despone en la eda democrata de la pais.
@T Leones salvada de sircos vola a Sudafrica
@L aora_oji/2016/leones_salvada_de_sircos_vola_a_sudafrica
====== Leones salvada de sircos vola a Sudafrica ======
1 maio 2016
On ia vola plu ca tredes leones salvada de sircos en Colombia e Peru a Sudafrica afin los comensa un vive nova en un refujeria.
Los ia pare alga turbada ma sana pos sua viaja longa.
Alga de los ia es sededa par un sirco, e otras ia es saisida.
La grupo Defendores Internasional de Animales, cual ia esecuta la ata, dise ce on ia estrae dentes o garas de cuasi tota la leones, e ce los no ta survive savaje.
On move aora la leones sur tera a la Refujeria Emoya de Gatos Grande, un conserveria de 5000 ectares en la norde de Sudafrica. Ala, la leones va ave stanges de bevi, plataformas, juetas, e cura veterinar.
Un portavose ia dise: "Esta es un mision de salva enorme importante car lo fa un anunsia tra la mundo sur la modo en cual persones trata bestias. Esta leones ia sufri vasta."
La grupo prima de nove leones ia es colieda en Bogota, la capital de Colombia, par un avion de carga cual ia vola a pos a Lima, la capital peruan, per prende 24 plu.
La leones ia es librida pos cuando on ia proibi la usa de animales savaje en Peru en 2011 e Colombia en 2013.
La refujeria es situada sur tera privata e conteni ja ses otra leones salvada e du tigres.
On intende estende gradal la abitadas de leones ala en la menses veninte, en cuando la leones comensa conose sua vive nova e deveni presentada a lunlotra.
@T Libros de scola es plen de sesisme
@L aora_oji/2016/libros_de_scola_es_plen_de_sesisme
====== Libros de scola es plen de sesisme ======
8 marto 2016
UNESCO dise ce libros de scola usada en paises developante es plen de disposas sesiste. La ajenteria de la Nasiones Unida, onorante la Dia Internasional de Femes, dise ce stereotipos negativa sumina la instrui de xicas.
Lo dise ce, tro comun, femes es representada en tal libros como "peones nurinte" en roles de casa.
En la reporta, Manos Antoninis de UNESCO esplica ce esta es un "ostaculo ascondeda" sur la via a la egalia de jeneros.
UNESCO ia campania per furni instruis a deses de miliones de enfantes ci no pote vade a scola, e en multe paises plu povre, la xicas es los a ci un ensenia scolal manca la plu probable.
La reporta, cual monitori la instruis global, lumina como carateres fema apare comun en rol suordinada en la libros usada a scola, e averti ce esta limita la espetas careral de xicas.
"La serti ce tota xicos e xicas vade a scola es sola un parte de la batalia. Lo cual on ensenia a los es egal, si no plu, importante. Un prejudi persistente sur jenero en libros de aprende drena de xicas la motiva, la autorespeta, e la partisipa en scola."
Con esemplos de paises en Asia e Africa, la reporta comenta ce omes en tal libros es plu probable mostrada como xefes comersial, botecores, injeniores, siensistes, e politicistes, en cuando femes resta plu probable videda en roles de cosini o atende enfantes.
Estra mera la stereotipos, la studia indica ance ce la libros de aprende depinta multe plu comun omes ca femes, e ce esta fenomeno es an plu forte trovada en libros de siensa o matematica. Lo nota ce, en alga libros de aprende siensal, sola un carater entre 20 es fema.
La reporta dise ce on ia fa sola un progresa lenta en atenta egali plu la representas. Lo sujesta ce esta resulta de un manca de vole political per xasa la problem e, en alga casos, de un resiste de la persones encargada sur la contenida de cursos de scola o sur la produi de la libros.
Un otra reporta cual onora la Dia Internasional de Femes es "La povria es sesiste", de One, un grupo campaniante per developa.
Lo dise ce la nonegalia de jenero e la povria es interliada, tal ce femes en paises povre, spesial en Africa susaharan, es probable plu povre ca sua corespondentes mas.
La reporta indica ance ce sinco sento milion femes tra la mundo es noncapas de leje, e ce la cuantia corespondente de omes es sola un dui de esta. Lo dona la esemplo ce, en Mali, 93% de xicas va vade nunca a scola.
La campania ia prepara un lista de paises do "nase fema es la plu difisil", usante tal criterios como la asede a sania e instrui, la oportunes economial, la posible de ave un conta de banco, e la representa political.
En esta lista, la des paises prima es: Nijer, Somalia, Mali, la Republica de Africa Sentral, Iaman, la Republica Democrata de Congo, Afganistan, Costa de Ivor, Txad, e Comori.
@T Mexico proposa legali sposis ge
@L aora_oji/2016/mexico_proposa_legali_sposis_ge
====== Mexico proposa legali sposis ge ======
18 maio 2016
La presidente de Mexico, Enrique Peña Nieto, ia proposa un reformi constitual per legali sposis omosesal tra la pais.
La deside segue un judi par la Corte Suprema cual ia abri la via per tal unis.
Sposis ge es legal sola en la capital -- la Site Mexico -- e en alga statos.
En otra partes de America Latina, sposis omosesal ia deveni ja legalida en Arjentina, Brasil, Uruguai e, la plu resente, Colombia.
La Corte Suprema de Mexico ia deside en la anio pasada ce lo es nonconstitual ce la statos de la pais proibi tal sposis.
Peña Nieto ia fa la anunsia a un aveni per onora la dia nasional de Mexico contra omofobia.
A Twitter, la presidente ia dise: "Per un Mexico incluinte cual reconose en diversia un de sua fortes la plu grande." El ia ajunta la parola grilida "#SinHomofobia".
La imajes de el e la governa mexican en Twitter ia es miscada con la bandera de colores de arco de sielo cual representa la orgulo ge.
Arjentina ia es la pais prima de America Latina cual ia legali sposis omosesal en julio 2010.
En pasada, la partito cual governa Mexico -- la Partito Revoluinte Institual -- ia es sempre orgulosa ce lo ia suporta la valuas tradisional de la sosia mexican. Ma la move par la presidente es cisa un reconose par la governa ce la disposa sur diretos ge ia destensa en anios resente.
@T Miama fini sua parlamento militar en modo joiosa
@L aora_oji/2016/miama_fini_sua_parlamento_militar_en_modo_joiosa
====== Miama fini sua parlamento militar en modo joiosa ======
30 janero 2016
Politicistes en Miama ia conclui la consenta final de sua parlamento -- e ance desenios de rena sola militar -- con caraoce e dansas.
Un ambiente joiosa ia pleni la construida sever cuando politicistes, normal multe seria, ia pasa la oras final en canta e rie.
La plu de los no va reveni. De lundi los va es sustituida par parlamentores elejeda par un vota sin presedente en novembre.
Aung San Suu Kyi ia grasia sua oposores per "abri la via" per sua partito.
"Me crede ce tota de nos pote colabora per nosa pais e popla, e estra e en la parlamento," la xef prodemocratia ia dise en sua adirije a parlamento.
Usual, on no asosia la conseta de diverti con la parlamento en la capital Nay Pyi Taw, cual ia es dominada asta aora par omes sever de pasadas militar. Ma la oras final de esta periodo parlamental de sinco anios ia aspeta como la dia final de scola.
Parlamentores ia presenta cantas de adio. Shwe Mann, la presidente parlamental partinte, ia demanda ce tota acompania el en cuando el ia canta "Sonias pote deveni real".
De lundi, la Alia Nasional per Democratia de Suu Kyi va controla la parlamento, an si un cuatri de la sejas va resta en la manos de la militaria. Ance alga ministrerias major va resta tal.
Un de la taxes prima de la parlamento nova va es eleje un presidente per recambia Thein Sein, ci va sesa en esta posto a la fini de marto.
Suu Kyi, ci tra 15 anios ia es prisonida en sua casa par la armada, es constitual proibida de presenta se per la posto car sua fios es brites, no miama.
Ma on ave un rumor ce un acorda es ja cisa fada con la militara per permete ce el emprende la posto.
@T Microsoft repenti un inteleto artifisial ofendente
@L aora_oji/2016/microsoft_repenti_un_inteleto_artifisial_ofendente
====== Microsoft repenti un inteleto artifisial ofendente ======
26 marto 2016
Microsoft ia demanda ce on pardona lo per crea un inteleto artifisial capas de conversa, cual ia deveni rapida un raziste e negor de la Olocausto.
Ma a la mesma tempo, lo ia clari ce la opinas de Tay resulta de sua eleva, e no de sua natur. La aveni confirma lo cual nos ia sabe ja: persones en la interede pote es cruel.
Tay ia es intendeda per interata con persones de entre 18 e 24 anios en redes sosial, ma lo ia esperia "un ataca coordinada par un sugrupo de persones" pos sua publici en la semana pasada.
Pos 24 oras, la ecipo de Microsoft ia desativi Tay per fa "ajustas".
Ier, Peter Lee, la xef de rexerca ia dise ce la compania es "profonda repentosa per la tuitas nonintendeda ofendente e cruel" e ia sutrae Tay de Twitter per la futur prosima.
Lee ia ajunta: "Tay es aora estralinia, e nos va atenta retrae lo sola cuando nos es serta ce nos pote previde intendes malvolente cual desacorda con nosa prinsipes e valuas."
Tay ia es desiniada per aprende de sua interatas con persones vera a Twitter. Saisinte la momento, alga usores ia deside nuri lo con informas raziste e ofendente.
En Xina, on ia reata diferente. Un conversador simil ia es ja publicida par Microsoft a usores xines, ma con resultas plu bon: sirca 40 milion persones interata con lo, deletada par sua racontas e parletas.
Lee ia confesa ce un era en la desinia ia permete ce Tay deveni cruel.
"An si nos ia prepara contra multe spesies de malusa de la sistem, nos ia fali imajina esta modo esata de ataca. Como resulta, Tay ia tuita parolas e imajes estrema nonconveninte e condenable. Nos aseta la culpa intera per no previde esta posible."
@T Migrores fuji de un campa elinica ardente
@L aora_oji/2016/migrores_fuji_de_un_campa_elinica_ardente
====== Migrores fuji de un campa elinica ardente ======
20 setembre 2016
On ia sorti asta 4000 migrores de la campa Moria sur Lesbos, un isola elinica, pos un focon grande cual ia destrui tendas e casas prefabricada.
No feridas es reportada, e on ia permete ce alga migrores revade a la campa. Sirca 30% de la campa ia es destruida.
La polisia investiga esce la focon ia es ensendeda con intende, ma un laboror de aida ia indica ce lo ia comensa pos un disputa sur comedas. On dise ce un scaramuxa ia comensa ier pos un rumor ce refujadas va es coletiva deportada a Turcia.
Multe de los sur la isola teme deveni enviada a Turcia o sua paises nativa.
Lesbos conteni aora sirca 5600 refujadas, diseda par la Nasiones Unida, ma la isola es capas de sola 3600.
La situa ala es malida car multe migrores atera ala, do los resta asta cuando on fini trata sua demandas per refuja. Los ci on refuja pote viaja a Elas continental, e la otras es enviada a via.
La prosede es un parte de un acorda fada entre la Uni European e Turcia en marto. La UE ia promete labora per permete ce sitadanes turces viaja sin visa a la zona Schengen de Europa, si Turcia va aida impedi migrores ci traversa a la isolas elinica.
@T Migrores vade recordo de Deutxland a la Balcanes
@L aora_oji/2016/migrores_vade_recordo_de_deutxland_a_la_balcanes
====== Migrores vade recordo de Deutxland a la Balcanes ======
29 desembre 2016
Un cuantia recordo de migrores -- 55 mil -- ia parti volente de Deutxland en esta anio -- plu ca la duple de la cuantia deportada. La plu ia vade a la Balcanes ueste.
Albanianes ia formi la grupo la plu grande de 15 mil persones. Cada de la cuantias de Serbia, Irac, e Cosovo ia es sirca 5000.
En la anio pasada, 890 mil refujadas ia ariva en Deutxland -- un enflue recordo. En esta anio, Deuxtland ia deporta 25 mil migrores. Los ci ariva de la Balcanes ueste ave jeneral no direto de resta en Deutxland.
La Ofisia per Migra e Refujadas dise ance ce cuantias cresente de refujadas revade volente a Irac, Iran, e Afganistan.
Los ci ia revade volente a Afganistan en esta anio ia es plu ca 3200 -- sirca la desuple de la cuantia en 2015. Plu temprana en esta mense, 34 afganis ia es deportada pos sua solisitas de refuja ia es rejetada.
La governa deutx ia promete aumenta la taso de migrores revadente, entre criticas jeneral de la politica libriste sur migra de la canselor Angela Merkel.
Ma leges internasional proibi "repuxas" a rejiones do migrores risca gera o persegue. E on debe evalua individua cada solisita de refuja -- on no pote es prejudosa contra grupos.
La Uni European no ave un lista acordada de paises de orijina "secur" -- statos membros fa sua propre desides sur individuas.
Nonsimil a deportadas, migrores ci parti volente no es detenida par la polisia en la note e pote projeta per sua futur en bon tempo.
An si deportadas reseta un proibi de reentra per multe anios, los ci parti volente reseta alga aida finansial. Plu temprana los deside parti, plu grande es la mone.
La mone inisial per un familia de sinco, si los deside parti ante la rejeta de sua solisita de refuja, pote es €4200 ($4383). Acel es en ajunta a la suporta finansial fundal cual la plu de migrores reseta de la Organiza Internasional de Migra.
En esta anio, Deutxland ia refusa la entra de 20 mil migrores a sua fronteras esterna.
En la temprana de 2017, Deutxland intende inisia un program nova de developa per aida migrores a reintegra en sua propre paises.
La program va es prima dirijeda a migrores orijinante de Magrib, Tunis, Nijeria, Cosovo, Serbia, e Albana. Deuxtland ia asinia €150 milion tra tre anios a projetas de reintegra, per aida los ci revade volente.
La grupos la plu grande ci ia solisita refuja en janero-otobre 2016 ia es suris (38%), afganis (18%), e iracis (13,5%).
@T Miles de salvores aida pos la trematera italian
@L aora_oji/2016/miles_de_salvores_aida_pos_la_trematera_italian
====== Miles de salvores aida pos la trematera italian ======
25 agosto 2016
La cuantia de persones matada par la trematera italian ia crese a 247, cisa plu.
Plu ca 4300 salvores continua sua labora per trova survivores, usante aparatos de leva cargas pesosa e ance sua propre manos.
On crede ce deses de persones es trapida en ruinas en Amatrice, Accumoli e Pescara del Tronto en la montania de Italia sentral.
La xerca ia continua tra la note, e un replica sismica forte ia secute construidas ja danada.
Multe de la vitimes ia es enfantes. A esta matina, on ia reporta 190 moris en la provinse Rieti e 57 en Ascoli Piceno.
Sinco corpos ia es tirada de la ruinas de la Otel Roma en la vila istorial Amatrice. Sirca 35 persones ia reposa a la otel, e la plu de los ia susede evade. Sirca 10 manca ancora.
En la tarda de ier, on ia oia aclamas en la vileta Pescara del Tronto cuando on ia tira un xica joven vivente de la detrito. El ia es trapida tra 17 oras. Cuasi tota la casas ala ia colasa.
La trema ia colpa vilas peti e viletas en la montania do la rejiones Umbria, Lazio e Marche encontra lunlotra. Persones ala ia spende la note su la sielo o en tendas furnida par la servis de crise.
Entre la vitimes ia es un enfante de 18 menses, de ci sua madre ia survive la trematera de 2009 en L'Aquila e ia move a via de ala pos sua esperia traumal. La madre es aora en ospital pos es estraeda de la detrito en la vileta Arquata del Tronto.
La replicas sismica ia inclui un trema de mesura 4,7 con episentro a sirca 7 cilometres a este de Norcia.
La maior de Amatrice ia dise ce tre cuatris de la vila ia es destruida e ce no construida resta secur per abita.
Multe de la afetadas ia es vacansente en la rejion. Alga ia es en Amatrice per un festa de selebra un spesiali local famosa -- salsa de lardo e tomate.
Tremateras mediteraneo resulta de la colide grande entre la placas tetonical de Africa e Eurasia.
La Mar Tireno, situada a ueste de Italia entre la continente e Sardinia e Corse, abri lenta. Esta contribui a un tensa jeolojial longo la cadena de montes nomida la Apeninos. La tensa es plu aumentada par moves en la Mar Adriatico a la este.
La resulta es un falia major longo tota la cadena, e un serie de falias plu peti cual estende a la lados. La fundas de sites como Perugia e L'Aquila sta supra esta.
@T Miles marxa tra Bruxelles contra teror e odia
@L aora_oji/2016/miles_marxa_tra_bruxelles_contra_teror_e_odia
====== Miles marxa tra Bruxelles contra teror e odia ======
18 april 2016
A la min sete mil persones ia marxa sur la stradas de Bruxelles per protesta "contra teror e odia".
A la fronte de la prosegues ia es alga de los afetada par la atacas resente de bomba umana a la airoporto e stasion de metro cual ia mata 32 persones.
Un difusor beljes ia descrive la protesta como "calma e silente".
On ia intende fa la marxa a un semana pos la atacas de 22 marto, ma ofisiores ia demanda ce on pospone lo par causa de la menasa a securia.
Relatadas de la vitimes, e paramedicistes e empleadas airoportal afetada par la atacas, ia junta se a persones de relijios diversa en la marxa ier. On ia porta flores per recorda la persones ci ia perde sua vives.
La prosegue ia gida los a lado de la visineria Molenbeek -- do multe de la esecutores alegada de la atacas en Bruxelles e Paris ia abita -- e a la monumento tempora estra la asioneria de la site.
Un de la organizores de la marxa, Hassan Bousetta, ia dise: "Cuando nosa cositadanes, persones comun sin defende, es cadeda en un ataca coarde, tota sitadanes debe sta per espresa sua repulsa e unia."
La partisipa ia es min ca un dui de la 15 mil cual organizores ia espera.
La atacas en Bruxelles ia es reclamada par la grupo militariste Daex, cual ia dise ance ce lo ia esecuta la atacas par fusil e bomba en Paris a 13 novembre cual ia mata 130 persones.
La polisia beljes ia fa deses de arestas en semanas resente, ma la autoriosas -- como otra departes de securia en Europa --- es presada par revelas de falis alegada e oportunes iniorada per para la selula teroriste cual ia reali ambos atacas.
@T Miliones de persones peregrina a Mecca
@L aora_oji/2016/miliones_de_persones_peregrina_a_mecca
====== Miliones de persones peregrina a Mecca ======
10 setembre 2016
Sirca 1,5 milion muslimes ia comensa la hadj, la peregrina anial a Mecca en Arabia Saudi.
La peregrinores fronti aora medios nova de securia, incluinte brasaletas de identia, per preveni un repete de un fuji manadin en 2015 cual ia mata plu ca 2000 persones.
La peregrina es entre la asemblas relijial la plu grande de mundo.
Pos rituos inisial a la Mascita Grande en Mecca en la parte plu temprana de esta semana, la hadjores va vade oji par bus, tren, o pede a Mina, a sirca 5 cilometres a este, en temperatur de 40°C.
Los fa la mesma viaja como la profeta Muhammad a sirca 1400 anios ante aora.
Saturdi es la dia prima de la hadj, e tradisional la tempo cuando peregrinores acui sua animales e repleni sua furnis de acua. Doman los va viaja a Monte Arafat, a distantia de alga cilometres, per la parte xef de la peregrina.
A Mina, on ia erije un estende vasta de tendas blanca e secur contra foco, per casi plu ca 2,5 milion peregrinores.
On regarda la fuji manadin en Mina en la setembre pasada como la desastre la plu grave en la istoria de la hadj. Lo ia aveni cuando peregrinores -- de ci multe ia es iranis -- ia vade a la Ponte Djamaraat per la rituo nomida la Bombarda de la Diablo con Petras. La rituo va comensa a lundi en esta anio.
Arabia Saudi ia desasentua la cuantia de matadas. Lo ia anunsia un investiga, ma ia publici no concluis.
Iran envia no peregrinores en esta anio, car lo ia fali acorda con Arabia Saudi sur la organiza de la hadj. Iran crede ce la saudis no ata sufisinte per serti la securia de la peregrinores, ma la saudis acusa Iran de fa esijes nonpratical.
@T Militaristes mata a un scola de polisia en Pacistan
@L aora_oji/2016/militaristes_mata_a_un_scola_de_polisia_en_pacistan
====== Militaristes mata a un scola de polisia en Pacistan ======
25 otobre 2016
A la min 59 stajiores e gardores ia es matada cuando militaristes ia ataca un scola de polisia en la site Quetta en Pacistan.
Tre militaristes, portante jacetas de bomba umana, ia entra a la scola en la tarda de lundi, saisinte ostajes.
Un opera major de securia ia dura tra alga oras, e tota la atacores ia es matada.
No grupo ia dise ce lo ia esecuta la ataca, ma Quetta ia esperia atacas simil par separadistes e militaristes islamiste en anios resente.
On ia sorti sentos de stajiores de la Scola de Polisia de Balotxistan en cuando soldatos ia ariva per forsa la militaristes a via. A la min tre esplodes ia es oiada a la loca.
La scola de polisia es abitada par sentos de stajiores, e multe de los ci ia mori ia es matada en la esplodes.
La segue esata de avenis es ancora nonclar, ma fusilis ia es intercambiada de tempo a tempo entre la atacores e la securiores tra alga oras. On ia reporta ance un situa de ostaje.
Plu ca 100 persones, xef stajiores, ia es ferida.
La armada e la Corpo de Frontera paramilitar ia partisipa en la contraopera militar, cual ia fini aora.
Du de la militaristes ia mori pos detona sua jacetas, e un ia es matada par soldatos.
Ofisiores ia culpa un partito de la grupo militariste Lashkar-e-Jhangvi, disente ce la atacores "es en comunica con ativistes en Afganistan".
Quetta es la capital de la provinse Balotxistan, cual batalia no sola militaristes islamiste ma ance un rebela. Atacas violente aveni comun.
Plu temprana en la dia, du duanores ia es matada par fusil e un otra ia es grave ferida en Surab, a sude de Quetta. E en agosto, 88 persones en Quetta ia mori en atacas de bomba contra un ospital e avocatos.
La militaria pacistani ia fa operas militar contra combatosas en areas tribal volatil prosima a la frontera afgani.
@T Modi oposa protejores estralegal de boves
@L aora_oji/2016/modi_oposa_protejores_estralegal_de_boves
====== Modi oposa protejores estralegal de boves ======
7 agosto 2016
Narendra Modi, la ministro xef de Barat, ia critica patruliores estralegal ci presenta se como protejores de boves -- bestias cual indus regarda como santa.
Modi, un nasionaliste indu, ia dise ce tal persones "coleri" el, e ce on debe investiga tota tal atacas.
On ia critica el car el no ia comenta sur un flajeli publica de omes de caste basa par patruliores en la mense pasada.
La defendores de boves ia acusa ce la cuatro omes de la caste dalit ia feri bestias. La vitimes ia insiste ce los prende la corpo mor de un bove per despeli, seguente sua tradision.
Ance en julio, du femes muslim ia es bateda par patruliores pos acusas ce los porta carne de bove.
Parlante ier en la capital Delhi, Modi ia dise ce el va demanda ce governas de tota statos de Barata a investiga cualcun liada con tal atacas par patruliores.
El ia declara ce el crede ce "70--80% de los va es mostrada como persones ci partisipa en ativias antisosial e desembla se como protejores per salva se."
Asta aora, alga comentores ia opina ce Modi resta silente sur la tema de patruliores estralegal afin el manteni sua atrae a votores nasionaliste indu.
On ia critica el en modo simil en la anio pasada, cuando du semanas ia pasa ante cuando el ia condena la linxa de un om muslim sur rumores ce el ia conserva e consuma carne de bove.
Mata boves es proibida en alga statos barati. Ma indus sever ia presa la governa de la Partito de Popla Barati a fa plu per proteje boves.
La majoria de la sirca 1,2 mil milion abitores de Barat es indu. An tal, la pais casi ance minorias grande muslim, cristian, e budiste.
@T Moris par asma de tona
@L aora_oji/2016/moris_par_asma_de_tona
====== Moris par asma de tona ======
27 novembre 2016
En la site Melbourne en Australia, la cuantia de persones ci ia mori par un fenomeno rara, nomida asma de tona, ia crese a ses.
Tre otras es en un state grave.
Pluves e ventas forte a lundi ia provoca miles de atacas de asma par alerjia de polen en la state Victoria.
Paramedicistes e ospitales ia es masima presada cuando miles ia telefoni per reporta problemes de respira.
Plu ca 8000 persones ia es tratada en ospital.
Asma de tona aveni en la primavera cuando polen deveni moiada, rompe a pesos plu peti, e entra a la pulmones de persones, difisilinte la respira.
Sirca 10 persentos de persones en Australia ave asma, e sirca 80% de los esperia alerjias, spesial a polen de lolio.
La primavera presente ia es plu pluvosa ca usual en Melbourne, creante problemes major per los ci sufri de asma e rinite.
@T Mugabe selebra custosa sua aniversario 92
@L aora_oji/2016/mugabe_selebra_custosa_sua_aniversario_92
====== Mugabe selebra custosa sua aniversario 92 ======
28 febrero 2016
On ia critica la partito governante de Zimbabue per ospita un selebra lusosa de la aniversario 92 de presidente Robert Mugabe, en cuando multe de la popla esperia mancas de comeda.
Lo pare ce la selebra ia custa sirca $800 mil. La partito oposante, la Promove per Cambia Democrata, ia descrive lo como "ofendente".
Mugabe ia domina la politica zimbabuean pos cuando la pais ia deveni autonom de la Rena Unida en 1980.
La selebra ia es televisada, e ia inclui scolores lejente poesias sur tema de la presidente. On ia aveni lo en Masvingo, un site sufrinte de secia en la sude-este.
La presidente vea, acompaniada par sua sposa Grace, ia libri 92 balones per inisia la selebra a la monumento nasional en Zimbabue Grande, do deses de miles de persones ia es presente.
En un parla, Mugabe ia ataca donores ueste, disente ce el no va aseta aidas "putrida e mugrosa" si estas depende de ce Zimbabue aseta sposis omosesal.
Ma la oposores ia dise ce la selebra es "mal consetada", e ce la mone usada ia debe es usada per emporta mais "per evita moris de famia" en Masvingo e otra rejiones.
Eddie Cross, un parlamentor per la Promove per Cambia Democrata, ia comenta: "La ofende de esta eserse presente es no sola ce el fa esta selebra usante mone publica... ma ce el fa lo en un de la partes la plu grave afetada par secia en la pais."
La Program Mundal de Comeda de la NU ia dise ce la cuantia produida de comedas ia es la dui de la cuantia a un anio ante aora, par causa de la secia estrema.
La governa ia dise ce sirca tre milion persones no es serta de reseta comedas. Plu temprana en esta mense, lo ia solisita cuasi $1,6 mil milion de aida.
La oposantes ia dise ce Zanu-PF, la partito governante, "debe vergonia completa" per sua ospita de la selebra custosa cuando "plu ca 90% de zimbabueanes luta en povria molente".
An tal, un xef de jovenes per Zanu-PF ia defende la selebra. "Mone no debe es la tema," Pupurai Togarepi ia dise. "On no pote pone un valua a la contribui de presidente Mugabe a la istoria e developa de esta nasion. Tota esta cosas es plu valuada ca mone."
La pais ia fronti defias economial sever en anios resente, per cual oposores culpa politicas cual ia inclui la saisi e redistribui de cultiverias poseseda par persones blanca en la anio 2000.
Un state de iperinfla ia lasa la unia de mone sin valua, nesesante ce on usa mones stranjer per la plu de intercambias.
Mugabe ia culpa interferes ueste per la problemes economial de sua pais.
@T Muhammad Ali mori
@L aora_oji/2016/muhammad_ali_mori
====== Muhammad Ali mori ======
4 junio 2016
La boxor Muhammad Ali ia mori a la eda de 74.
La campion mundal pasada de boxe pesosa, e un de la sportores la plu conoseda de mundo, ia mori en la site Phoenix, Arizona en la SUA, pos es ospitalida a jovedi.
El ia sufri de un maladia respiral, un state complicada par la maladia de Parkinson.
La funera va aveni en sua site de nase: Louisville, Kentucky.
Naseda con la nom Cassius Marcellus Clay, Ali ia deveni subita famosa cuando el ia gania la medalia de oro de boxe semipesosa a la Olimpiales de 1960 en Roma.
El ia vinse Sonny Liston en 1964 per gania sua titulo prima de mundo, deveninte la person prima ci ia reseta un titulo mundal de boxe pesosa a tre veses separada. El ia reseta la nometa "The Greatest" (La plu grande).
Coronida como "Sportor de la Sentenio" par la jornal Sports Illustrated e como "Person Sportal de la Sentenio" par la BBC, Ali ia es notada no sola per sua capasia en la boxeria ma ance per sua comentas ante e pos maxes e per sua predises corajosa.
El ia es ance un campanior per diretos sivil e un poesiste ci ia transende la fronteras de sporte, raza, e nasionalia.
El ia jubila final en 1981, pos gania 56 de sua 61 maxes.
Corta a pos, rumores ia comensa sur la state de sua sania. Sua parla ia deveni nonclar, el ia tira sua pedes, e el ia es frecuente dormosa. Ultima, on ia diagnose la sindrom de Parkinson, ma Ali ia continua apare publica, resetante un bonveni zelosa sempre do el ia viaja.
El ia ensende la caldera olimpial a la juas de 1996 en Atlanta, Georgia, e ia porta la bandera olimpial a la rituo cual ia abri la juas de 2012 en London.
El ia dise: "Me desira ce on recorda me como un om ci ia gania la titulo pesosa a tre veses, ci ia es bonumorosa, e ci ia trata bon cadun. Como un om ci ia senti nunca superior a los ci ia respeta el... ci ia defende sua credes... ci ia atenta uni tota umanas par fida e ama.
"E si tota esta es tro multe, alora me suposa ce me ta aseta ce on recorda me sola como un boxor eselente ci ia deveni un gidor e un campion de sua popla. E me no va es an ofendeda si on oblida ce me ia es tan bela."
@T Nederland rejeta un asosia entre la UE e Ucraina
@L aora_oji/2016/nederland_rejeta_un_asosia_entre_la_ue_e_ucraina
====== Nederland rejeta un asosia entre la UE e Ucraina ======
7 april 2016
En Nederland, votores en un referendo ia rejeta un acorda UE per sutrae ostaculos contra comersia con Ucraina.
La partisipa ia es peti, a sola 32,2%, ma car plu ca 30% de persones ia vota, ia resulta es valida. La acorda ia es rejetada par 61,1% de la votas, con 38% favorente lo.
La ministro xef, Mark Rutte, ia dise ce la governa va debe cisa reconsidera la acorda, an si la vota no es legal obligante.
Petro Poroshenko, la presidente ucrainsce, ia insiste ce sua pais va "continua nosa move en dirije a la UE".
Un ofisior de la ministreria de esternas en Kiev ia comenta ce la resulta es deludente, e ia ajunta ce euroseticas no pote saisi Ucraina como ostaje per espresa sua nonsasia con la Uni European.
On ia regarda jeneral la vota en Nederland como un proba de la opina publica sur la UE. Lo ia es provocada par un apela en la interede inisiada par ativistes eurosetica cual ia atrae plu ca 400 mil suscrives.
La resulta crea un problem pr la governa nederlandes, car la parlamento ia validi la acorda de asosia UE con Ucraina en la anio pasada. Tota la otra 27 statos membros de la Uni ia validi ja la acorda.
Televisada, Rutte ia dise: "Mea opina es ce si la partisipa es plu ca 30%, con un tal vinse per la lado de 'no', la validi no pote aveni sin discute."
Geert Wilders, ci gida la Partito de Libria, oposante la Uni European ma ance oposante islam, ia descrive la resulta como "la comensa de la fini per la UE".
La governa rusce ia es forte oposada a la acorda UE con Ucraina e on ia crede jeneral ce lo ia presa Viktor Yanukovych, alora la presidente, a rejeta lo en novembre 2013. La deside de Yanukovych ia provoca protestas en Kiev cual ia gida ultima a sua perde de potia.
Multe persones ia culpa separadistes prorusce en Ucraina este per la mata de 298 persones cuando un avion de Malaysia Airlines de Amsterdam ia es tirada a tera en julio 2014. Nederland ia perde alora 193 sitadanes.
La presidente ucrainsce ia asentua la natur nonobligante de la vota.
Ante la referendo, Thierry Baudet, un de la euroseticas nederlandes ci ia inisia lo, ia avisa la governa a atende un vota de "no". A la sera presedente, el ia dise televisada: "Lo no es bon per Nederland, no bon per Europa, e no bon per Ucraina."
Ance a ante, la presidente de la Comision UE, Jean-Claude Juncker, ia descrive la risca como alta, avertinte ce un vota de "no" ta pote gida a un crise plu vasta en la uni.
@T Nijeria saisi $800 000 de judores frodosa
@L aora_oji/2016/nijeria_saisi_800_000_de_judores_frodosa
====== Nijeria saisi $800 000 de judores frodosa ======
10 otobre 2016
En Nijeria, la departe de securia ia saisi $800 mil de mone fisical en atacas contra judores major ci on ia suspeta de froda.
La ajenteria dise ce la atacas ia es fada en dias resente e ce alga judores ia es arestada.
La Asosia de Avocatos Nijerian ia acusa la autoriosas de fa un opera "en stilo de Gestapo", e ia esije la libri de la arestadas.
En un declara, la departe de securia ia dise: "La xercas ia descovre un monton de mone fisical de valuas diversa, local e stranjer, con imobila con valua de alga miliones de naira e documentos afirmante atas pecosa par esta judores. Nos ia monitori la modo de vive custosa e lusosa de alga de la judores, como ance cexas de la public consernada sur judis donada par froda e pertinente a cuantias de mone paiada."
La declara ia detalia ce la judores es de la corte suprema, la corte de apela, e la corte alta. On no ia publici la nomes de la suspetadas.
Reatante a la atacas, la asosia de avocatos ia recomenda ce presidente Muhammadu Buhari "averti direta tota la ajenterias de securia nasional e respeta la regulas de lege".
Pos emprende sua posto en la anio pasada, Buhari ia promete labora contra la froda vasta florinte cual ia impedi la crese economial tra la pais.
Como parte de acel campania, un cuantia de ofisiores major pasada ia es acusada, ma sua casos no ia progresa multe en la cortes.
Par causa de froda en la sistem legal, la condena de individuas potiosa es estrema difisil.
@T Noria deporta migrores a Rusia
@L aora_oji/2016/noria_deporta_migrores_a_rusia
====== Noria deporta migrores a Rusia ======
20 janero 2016
Noria ia reenvia 13 migrores a Rusia par bus su regulas nova, su cual on previde ce miles de otras va es deportada.
Sirca 5500 persones va es moveda de Noria a Rusia. Multe ia traversa la frontera artica par bisicle como parte de la enflue de migrores a Europa en la anio pasada.
En novembre, Noria ia anunsia ce lo va deporta direta cualcun ci ia ariva de un pais regardada como secur.
La bus prima ia parti de un refujeria en la vila Kirkenes.
A ante, Noria ia intende reenvia la migrores a Rusia par bisicle, par causa de regulas cual proibi veculos de porta persones a traversa de la frontera si los no ave la documentos nesesada. On ia proibi ance traversas par pede.
Miles de migrores ia traversa la frontera sur bisicles en 2015, pos descovre un fesur en la leges. La plu de los ia fuji de la gera en Suria.
Grupos de diretos umana ia condena la move a deporta la migrores. La temperatur a la frontera en la dia es sirca -30°C.
Rusia ia acorda ce Noria pote reenvia migrores con visa rusce par bus en loca de bisicle.
Un bus con 13 pasajores ia vade a la airoporto en Murmansk, un site de porto rusce, en la note pasada.
Un portavose per la servi migral de la polisia norsce ia dise ce tota la pasajores ave o un visa rusce valida o un otra permete de abita. El ia ajunta ce la deportas va continua e ce "lo cual va segue es un deside per la rusces".
A la fini de semana pasada, sirca 70 persones ia es traeda de otra sentros de refuja en Norsce a la reseteria en Kirkenes, a sirca 8 cilometres de la frontera rusce.
Sirca 40 persones ia fuji de un sentro en Vadsø con teme de es reenviada a Rusia. On ia reporta ance ce un grupo de migrores en Kirkenes ia comensa un juna per protesta contra sua deporta prevideda.
La polisia norsce dise ce, en la dui du de 2015, 5500 persones ia ariva de Rusia tra la pasaje de frontera en Kirkenes.
Tota de los ia ave visas o otra documentos permetente ce los resta tempora o permanente en Rusia.
Grupos de diretos umana ia scrive a la ajenteria sur migrores de la Nasiones Unida, cexante ce on debe no regarda Rusia como un loca secur per refujadas.
Un cuantia cresente de migrores ia comensa traversa la frontera de Rusia a Noria par bisicle en la anio pasada, en atenta evita la viaja perilosa a Europa sur la Mediteraneo.
An si Noria no es un membro de la Uni European, lo es un parte de la Acorda de Schengen, cual on ia desinia per permete viajas sin fronteras.
@T Obama implica Putin sur siberatacas
@L aora_oji/2016/obama_implica_putin_sur_siberatacas
====== Obama implica Putin sur siberatacas ======
17 desembre 2016
Presidente Barack Obama ia dise ce el ia comanda Vladimir Putin a sesa en un conversa sur pirati de e-postas ante la eleje SUA.
Implicante ce la presidente rusce ia sabe sur la piratis, Obama ia dise: "No multe aveni en Rusia sin Vladimir Putin."
La presidente ia dise ce el ia averti Putin sur resultas grave a un confere en setembre. A un mense plu tarda, la SUA ia acusa Rusia de interfere en sua prosede democrata.
Obama ia promete un responde "a proportio" a la pirati de la Partito Democrata e de e-postas parteninte a la xef de campania de Hillary Clinton, la aspiror presidental ci ia perde.
El ia pare sujesta ce la SUA pote fa propre siberatacas, disente: "Tota cual los fa a nos, nos ave la posiblia de fa lo a los."
La comentas de Obama ia formi un parte de sua confere jornaliste final de la anio.
El no ia critica direta sua seguor, la republiciste Donald Trump, ma ia dise ce alga republicistes fali reconose la seria de la envolve de Rusia en la eleje SUA.
El ia espresa ance confusa sur suportores republiciste ci dise ce los aproba Putin, declarante: "Ronald Reagan ta rola en sua tomba."
La presidente ia recomenda forte ce Trump suporta un investiga par ambos partitos sur siberintruis rusce.
Ma plu temprana en esta semana, Trump ia rejeta alegas par departes de securia SUA ce piratas rusce ia aida move la eleje en dirije favorente el, descrivente los como riable e political motivada.
El ia tuita: "Esce vos pote imajina si la resultas ta es reversada e NOS ta atenta jua la carta de Rusia/CIA. On ta nomi lo un teoria de conspira!"
Ier, John Brennan, la dirijor de la CIA, ia informa empleadas ce la FBI acorda con la conclui par la CIA ce Rusia ia intende aida la vinse de Trump.
La Cremlin nega la alega ce Rusia ia pirati e-postas ofisial, e ia descrive los como "ofendente". Un portavose per Putin ia dise: "Ta ce los o para parla sur esta o presenta final alga spesie de demostra."
A la mesma tempo, Clinton ia atribui sua defeta elejal a pirati rusce, a la ves prima.
El ia dise a donores de partito ce Putin ave "un cexa personal" contra el car el ia descrive la elejes parlamental de Rusia a sinco anios ante aora como frodada.
@T Obama legi un projeta per eletrica en Africa
@L aora_oji/2016/obama_legi_un_projeta_per_eletrica_en_africa
====== Obama legi un projeta per eletrica en Africa ======
10 febrero 2016
La presidente de la SUA, Barack Obama, ia suscrive a lege un stratejia nova cual intende trae eletrica a 50 milion persones en Africa susaharan ante la fini de 2020.
La Ata de Eletrici Africa de 2015 va dona suporta legal a la projeta major de Obama, Potia per Africa, cual atenta boni la asede a eletrica par asosias publica-privata. Sua aseta en ambos salones de la Congresa de la SUA ia dura tra cuasi du anios.
Sirca du-tris de persones en Africa ave no fonte dependable de potia.
Comentores dise ce lo es probable ce la lege nova va serti ce la projeta va continua an pos cuando Obama parti de la Casa Blanca en 2017.
La projeta ia dona a se la gol ultima de dupli la asede a eletrica en Africa susaharan.
Ed Royce, la presidente de la Comite de la Salon Basa sur Situas Esterna e un suportor longa de la stratejia, ia dise ce la lege "va boni la vives de miliones en Africa susaharan par aida redui la depende de carbon de lenio e otra fontes de carburante cual produi fuma nosiva cual mata plu ca aides e malaria en combina."
En sua declara ier, el ia ajunta ce lo "va promove ance la developa de enerjia dependable a bon custa".
McKinsey, un compania cual consela sur maneja, estima ce la custa de lia la popla intera de la continente a eletrica ante la fini de 2030 va es 835 mil milion dolares.
En ajunta a la governa SUA, governas african, asosiores de developa, e la campo privata es envolveda en la projeta Potia per Africa.
La governa SUA ia promete 7 mil milion dolares per suporta lo, disente ce esta mesma ia atrae 43 mil milion plu dolares de investis prometeda par otra asosiores publica e privata.
@T Obama va comenta cisa sur presidente Trump
@L aora_oji/2016/obama_va_comenta_cisa_sur_presidente_trump
====== Obama va comenta cisa sur presidente Trump ======
21 novembre 2016
Barack Obama ia dise ce cisa el va parla franca pos sesa es la presidente de la SUA, si el senti ce sua seguor Donald Trump menasa la valuas fundal de la pais.
Par abitua, presidentes pasada tende parti de politica e evita comenta sur sua seguores.
Obama ia dise ce el va dona tempo a Trump per contorni sua ideas, ma ia ajunta ce, como sitadan privata, el va comenta cisa sur alga temas.
Trump ia spende la fini de semana en intervisa aspirores per postos major de sua consilio.
Obama ia descrive se como "un sitadan american ci cura profonda sur nosa pais".
Parlante a un confere jornaliste a la fini de la consenta de la Coopera Economial Asian-Pasifica (APEC), el ia repete ce el va ofre a la governa arivante de Trump la mesma cortesia profesal cual sua propre presedor George W Bush ia mostra a sua ecipo.
Pos parti de la posto, Bush ia asteni de comenta sur la presidentia de Obama. En 2013, el ia dise: "Me no opina ce lo aida. Lo es un posto difisil. El ave multe en sua ajenda. Lo es difisil. Un presidente pasada no nesesa fa ce lo deveni plu difisil. Otra presidentes ia fa desides diferente; acel es la mea."
La disposa de Bush segue la tradision presidental, ma Obama ia fa sua comenta entre consernas cresente de grupos de diretos sivil sur la asinias political cual Trump fa aora.
Steve Bannon, stratejiste xef de la presidente elejeda, ia es la xef de Breitbart, un loca de rede cual on acusa de promove razisme e antisemitisme. E jeneral Michael Flynn, la conselor de Trump sur securia nasional, ia descrive Islam como "un canser" estendente tra la SUA.
La nominada de Trump per avocato jeneral, Jeff Sessions, ia perde la posible de deveni un judor federal en 1986 par causa de comentas raziste alegada.
Obama ia dise ce el crede ce la encarga intensa de la presidentia va obliga Trump a modera alga de la opinas political plu estrema cual el ia promove en sua campania.
Trump ia encontra ance Mitt Romney, sua oposor pasada, ci es aora considerada per deveni la ministro de esternas.
Trump ia dise ce sua sposa Melania e sua fio de 10 anios no va move direta a la Casa Blanca. Los va move "multe pronto, direta pos cuando el fini scola", el ia dise. La anio scolal en la SUA comensa en la tarde de agosto o la temprana de setembre, e fini en la tarda de maio o en junio.
Entretempo, Obama ia dise ce sua conserna prima pos parti de la presidentia es prende sua sposa Michelle en vacanse, "reposa alga, spende tempo con mea fias, e scrive alga, pensa alga".
@T Obama visita Cuba
@L aora_oji/2016/obama_visita_cuba
====== Obama visita Cuba ======
21 marto 2016
Barack Obama ia ariva en Cuba per un visita sin presedente resente a la isola, e per discute con sua xef comuniste.
El es la presidente corente prima de la SUA ci ia visita de pos la revolui de 1959, cual ia provoca desenios de enemia.
Parlante en la ambasada SUA reabrida en la capital Havana, el ia descrive la visita como "istorin". El ia pasa ance tempo en la site vea.
Obama va encontra presidente Raúl Castro -- ma no la xef revoluiste jubilada Fidel Castro -- e la du va discute comersia e reformis political.
La presidente SUA ia emerji suriente de la avion Forte de Aira Un con sua sposa Michelle e sua fias Sasha e Malia. Teninte parapluves, la grupo ia pasea tra pluve lejera longo un tapeto roja per es salutada par Bruno Rodríguez Parrilla, la ministro cuban de esternas.
A du oras pos atera, Obama ia saluta empleadas de la ambasada SUA con la parolas: "Lo es merveliosa ce me es asi. En 1928, presidente Coolidge ia veni en un barcon blindada. El ia spende tre dias per ateni; me ia spende sola tre oras. A la ves prima de istoria, Forte de Aira Un ia atera en Cuba, e esta es nosa punto prima de pausa."
El ia ajunta ce la visita es un oportun ce el presenta "un idea per un futur cual brilia plu ca nosa pasada".
Plu tarda, la Obamas ia comensa un pasea tra Havana Vea. On ia intende ce los va interata con cubanes comun a la stradas, ma esta parte de la dia ia es manxada par un tempesta tropical.
Los ia foli su parapluves ante visita la catedral nasional en loca.
La visita de Obama es la punto alta de un lejeri resente de relatas, incluinte la abri de ambasadas en la anio pasada.
Ma a mera oras ante sua ariva, on ia aresta protestores en Havana ci ia clama per la libri de prisonidas political. La polisia ia prende deses de protestores de la grupo Damas en Blanca, formida de sposas de prisonidas political, de estra un eglesa do los atenta fa un protesta a cada semana.
Obama e Castro va senta con lunlotra a un banceta formal, los va fa un confere de jornalistes en junta, e los va discute la comersia.
La Casa Blanca ia clari ce Obama va encontra oposores political, o si esta plase a la autoriosas cuban, o si no. On previde ce estas va inclui membros de la grupo Damas en Blanca.
An si la presidente SUA no va encontra Fidel Castro, Cubanes ia recorda ier sua xef veteran pasada cuando jornales ia publici fotos de el en consenta con Nicolás Maduro, la presidente de Venezuela.
Analistes sujesta ce la publici de esta fotos indica sentis desacordante en la Partito Comuniste sur ospita Obama.
@T Obama visita Hiroshima
@L aora_oji/2016/obama_visita_hiroshima
====== Obama visita Hiroshima ======
28 maio 2016
Barack Obama ia deveni la presidente corente prima de la SUA ci ia visita Hiroshima de pos cuando lo ia es nucleal atacada en la Gera Mundal Du.
El ia dise ce la memoria de 6 agosto 1945 debe pali nunca, ma el no ia demanda es pardonada per la ataca par la SUA, cual ia es la bombi nucleal prima de mundo.
En un parla formal, Obama ia recomenda ce la nasiones xerca un mundo sin armas nucleal.
A la min 140 mil persones ia mori en Hiroshima, e 74 mil plu ia es matada pos tre dias par un bombi du a Nagasaki.
Obama ia comensa par visita la Museo Monumental de Pas de Hiroshima ante pasea a la Parce Monumental de Pas, acompaniada par la ministro xef Shinzō Abe. Ambos ia sta ante la flama eterna. Obama ia pone un garlanda, segueda par Abe.
"Moria ia cade de la sielo e la mundo ia es cambiada," Obama ia dise en sua parla, notante ce la bombi ia mostra ce "umanas posese un medio per destrui se". El ia dise ce la memoria de la bombi "permete nos a combate autosasias, nuri nosa imajina moral, e permete ce nos cambia".
Sur armas nucleal, el ia dise: "Nos debe ave la coraje per evade la lojica de teme, e xerca un mundo sin los."
Obama ia parla con du survivores, abrasante Shigeaki Mori, ci ave 79 anios. "La presidente ia jesti como si el intende abrasa me, donce nos ia abrasa," Mori ia dise a pos.
La presidente ia parla ance con Sunao Tsuboi, ci ave 91 anios.
El ia atera plu temprana a un base prosima de la Corpo SUA de Soldatos Marinal, pos parti de un confere de la G7, ance avenida en Japan.
A la empleadas de la base, Obama ia dise: "Esta es un momento per onora la memoria de tota ci ia es perdeda en la Gera Mundal Du."
El ia loda la alia SUA--Japan como "un de la plu fortes de mundo", e ia descrive sua visita como "un atesta de como on pote ponti an la divides la plu dolosa -- como nosa du nasiones, enemis pasada, pote no sola deveni asosiores, ma deveni la plu bones de amis e la plu fortes de aliadas".
Alga persones en la SUA crede ce la usa de la bomba nucleal, an si tan destruinte, ia es coreta, car lo ia obliga Japan a sede, causante la fini de la gera.
La fia de un survivor, ci ia visita la monumento a venerdi, ia dise ce la sufri ia "continua tra la jeneras". Han Jeong-soon, ci ave 58 anios, ia dise: "Me vole ce Presidente Obama conose esta. Me vole ce el comprende nosa sufris."
Seiki Sato, de ci sua padre ia es orfanida par la bomba, ia dise: "Nos la japaneses ia fa cosas xocante, xocante, tra tota de Asia. Esta es vera. E nos la japaneses debe dise ce nos regrete car nos vergonia tan multe, e nos no ia espresa sinsera nosa regrete a tota esta paises asian. Ma la cade de la bomba atomal ia es completa malvolente."
Xina ia responde a la visita par dise ce la ataca de ses semanas par Japan contra la site xines Nanjing, cual ia comensa en desembre 1937, merita plu ce la considera. Lo dise ce 300 mil persones ia es matada, ma otra fontes sujesta ce la cuantia ia es min alta.
"Vitimes merita compatia, ma faores debe evade nunca sua culpablia," Wang Yi, la ministro xines de esternas, ia dise.
@T Ofisiores franses investigada sur la jenoside ruanda
@L aora_oji/2016/ofisiores_franses_investigada_sur_la_jenoside_ruanda
====== Ofisiores franses investigada sur la jenoside ruanda ======
30 novembre 2016
Ruanda ia comensa un investiga formal sur 20 ofisiores franses ci lo suspeta de envolve en la jenoside de 1994.
La avocato prosedente xef, Richard Muhumuza, ia dise ce autoriosas franses ia es contatada e ce on previde un colabora completa.
Relatas entre la du paises es tensada de pos la matas coletiva.
Sirca 800 mil persones, xef tutsis, ia es matada par estremistes hutu en la jenoside ruanda.
A la sentro de la disputa es la rol de Frans como un aliada prosima de la governa nasionaliste hutu de Juvenal Habyarimana ante la matas. La masacra ia es provocada par la tira a tera de sua avion supra Kigali en april 1994.
Ruanda ia acusa Frans de iniora o de no persepi indicas avertinte, e de instrui los ci ia fa la matas.
Frans ia confesa fa eras sur la jenoside, ma nega tota alegas ce lo ia aida.
En un declara, Muhumuza ia dise: "La investiga, per la presente, es focada sur 20 individuas sur ci, seguente informas ja colieda, la autoriosa prosedente esije ce los esplica o furni claria sur alegas contra se."
El ia ajunta ce un deside sur cualce acusas posible va es fada a tempo plu tarda.
Xefes ruanda ia es colerida en otobre cuando Frans ia reabri un investiga sur la tira a tera de la avion de Habyarimana.
Investigores franses ia dise ce los vole oia la atesta de un jeneral pasada, aora escluida e vivente en Sudafrica, ci ia alega ce la presidente ruanda Paul Kagame ia es envolveda.
Kagame ia rejeta la alegas e ia averti sur "un fronti" contra Frans.
@T Ofisiores saisi tigres de un templo tai
@L aora_oji/2016/ofisiores_saisi_tigres_de_un_templo_tai
====== Ofisiores saisi tigres de un templo tai ======
31 maio 2016
En Tai, autoriosas sur viventes savaje ia comensa sutrae tigres de un templo budiste, pos acusas de contrabanda e maltrata de bestias.
On ia move tre de la 137 tigres a la templo en la provinse Kanchanaburi a lundi. La taxe emplea 1000 persones e va ocupa la semana intera.
La monces nega tota la alegas. Los ia resiste prima, ma ia sede cuando on ia presenta un comanda de corte a los.
On prende la tigres a refujerias per animales.
La Wat Pha Luang Ta Bua, o Templo de Tigres, es un destina popular per turistes. Tra anios lo resiste ja atentas ofisial de prende la bestias a via.
Visitores pote nuri la tigres e fa fotos pos un paia, an si on ia proibi la templo de esije mone per entra.
"Nos ave un comanda de corte a esta ves," Adisorn Nuchdamrong, la visdirijor jeneral de la Departe de Parces Nasional, ia dise. "Esta es diferente de veses presedente cuando nos ia demanda sola per la coopera de la templo, lo cual no ia susede."
On ia acusa la monces a la templo controversa de eleva tigres en modo nonlegal e de contrabanda animales.
Un invade ofisial en febrero de la anio pasada ia descovre ce on teni xacales, calaus, e ursos asian a la santeria sin la permete nesesada.
@T On abandona la mision Kon-Tiki2
@L aora_oji/2016/on_abandona_la_mision_kon-tiki2
====== On abandona la mision Kon-Tiki2 ======
18 marto 2016
Autoriosas en Txile dise ce los ia salva 14 persones de du balsas, fininte un atenta de imita la viaja famosa de Kon-Tiki en 1947.
La mision Kon-Tiki2 la comensa en Peru en novembre, e la balsas ia ateni la Isola Pascual de Txile pos 43 dias.
Ma la organizores ia dise ce los ia deside abandona la viaja de reveni car lo "ia mostra se como plu difisil par causa de ventas nontipal".
La governa txilan ia indica ce la ecipores salvada es en bon sania.
La ecipo ia comensa sua viaja de reveni, en dirije a Txile, en janero, ma corentes forte ia devia los. La marina txilan ia declara ce la balsas ia veni a sirca 1600 cilometres a ueste de la site Puerto Montt. A mercurdi, la mision ia envia un sinial per solisita aida.
En un declara, Torgeir Higraff, la gidor de mision ia dise: "Nos comprende ce la viaja a America Sude va ocupa tro multe tempo, e nos prefere abandona per serti la securia de tota persones."
El ia culpa la fenomeno El Niño per crea modeles nontipal de clima, ajuntante ce "en un anio normal, nos ia ta ateni ja America Sude. En loca, nos es ancora a 900 milias maral de la tera, e la predises meteorolojial no es prometente."
Alga de la ecipores ia fa rexercas sur cambia de clima, contamina par microplasticas, e la efeto de la fenomeno El Niño.
En la mision de la Kon-Tiki orijinal de 1947, un ecipo xef norsce ia traversa la Mar Pasifica par balsa. Lo ia es gidada par Thor Heyerdahl, un norsce ci on regarda como un de la aventurores grande de la sentenio 20.
Sua mision ia demostra la posibilia de un viaja par balsa de Peru a Polinesia, contradisente ideas alora asetada.
@T On acorda un sesaspara per Suria
@L aora_oji/2016/on_acorda_un_sesaspara_per_suria
====== On acorda un sesaspara per Suria ======
12 setembre 2016
Un sesaspara va comensa en Suria a la reposa de sol oji, pos multe atacas par avion a la fini de semana.
La acorda de 10 dias va es segueda par atacas airal coordinada par la SUA e Rusia contra jihadistes militariste.
Suria ia reporta ce presidente Bashar al-Assad bonveni la acorda, cual on ia ateni en la tarda de venerdi en Genève pos menses de negosias entre Rusia e la SUA.
Ma on no sabe esce la rebelores va obedi la sesaspara.
La grupo Armada Suri Libre ia scrive a la governa de la Statos Unida, disente ce an si lo va "coopera positiva" con la sesaspara, lo es consernada ce la acorda va benefica la governa.
Un otra grupo rebelante, Ahrar al-Sham, influosa e noncomprometente, ia rejeta la acorda, disente: "Un popla rebelosa ci ia combate e sufri tra ses anios no pote aseta solves partal." Ma la comandor de la grupo no ia dise clar ce lo va desobedi la sesaspara.
En la fini de semana, la governa suri ia fa atacas par avion contra areas rebelosa, matante sirca 100 persones. Ance aviones rusce de gera ia opera en la provinses Idlib e Aleppo.
Un tal intensi de violentia ia aveni ante otra sesasparas en Suria cual ia aborta final.
Abu Abdullah, ci abita en la parte este de Aleppo, ocupada par rebelores, ia comenta: "Nos espera ce on va ave un sesaspara afin persones nonmilitar pote ave reposa. La cartuxi continua tra note e dia -- on ave matas dirijeda, sites asejada. Nonmilitares ave no plu espera."
La acorda dise ce soldatos de la governa suri va fini sua misiones de combate en areas spesifada cual la rebelores ocupa.
A pos, Rusia e la SUA va institui un sentro juntada per combate grupos jihadiste, incluinte Daex e Jabhat Fateh al-Sham (conoseda asta resente como la Fronte al-Nusra).
La gera en Suria, cual ia comensa con un revolta contra Assad, ia dura intensa tra sinco anios e ia prende la vives de plu ca un cuatri de milion persones.
Miliones ia fuji a otra paises, e multe ia xerca refuja en la Uni European. Ma cuasi 18 milion resta en Suria, cual es aora divideda par combate entre fortes governante e oposante.
@T On acusa ce la governa suri cade cloro sur Aleppo
@L aora_oji/2016/on_acusa_ce_la_governa_suri_cade_cloro_sur_aleppo
====== On acusa ce la governa suri cade cloro sur Aleppo ======
7 setembre 2016
On acusa ce fortes suri governal ia cade bombas de baril, conteninte cloro, de elicotores sur un suburbe de Aleppo, ferinte 80 persones.
Bonvolores de labora de crise dise ce persones ia sufri problemes de respira pos un ataca a la area Sukari.
La reportas no ia es nonpartisan sertida.
Un investiga gidada par la Nasiones Unida en agosto ia trova ce la governa suri ia usa cloro a du veses, cisa plu. Ma la governa ia nega sempre la usa de armas cimical.
Esta aveni en cuando xefes suri oposante prepara consenta oji en London, per inisia un projeta nova de traversa political per atenta fini la gera.
La grupo political xef de la oposante, la Comite Alta de Negosias, va es ospitada par Boris Johnson, la ministro de esternas de la Rena Unida. Ministros de esternas de la grupo Amis de Suria va es presente.
Adel al-Jubeir, la ministro de esternas de Arabia Saudi, ia dise ce el crede ancora ce on pote trova un solve political de la gera, e ce Bashar al-Assad no ocupa "un loca de vantaje o vinse", an pos la avansas resente de sua fortes. "Ma si Assad continua es ostinosa e continua ata lenta e continua refusa engrana seria," el ia dise, "alora evidente on va debe ave un Scema B, cual va envolve ativia militar plu aumentada."
Ibrahem Alhaj, un salvor de la Defende Sivil Suri, ia dise ce el ia ariva a la loca de la ataca en Aleppo ier, corta pos la cade par elicotor de bariles conteninte lo cual el ia descrive como cuatro silindres de cloro.
La Defende Sivil Suri es un ecipo de bonvolores ci responde a crises en areas ocupada par la oposante. Lo ia posta video a sua paje de Facebook, mostrante enfantes angusada ci respira usante mascas de osijen. La grupo ia acusa la governa de un otra ataca de cloro en agosto.
Rusia, un aliada de la governa suri, ia acusa rebelores de xuta cartuxes conteninte "gas nosiva" a areas de Aleppo ocupada par la governa.
Cloro es un cimical industrial comun, ma sua usa en armas es proibida par la Acorda sur Armas Cimical.
La Nasiones Unida ia dise ier ce un periodo corta de lejeri per persones nonmilitar afetada par la gera en Suria, en la parte temprana de esta anio, ia cambia aora a un recomensa de combate an plu savaje.
En sua reporta des-du sur Suria, lo ia dise ce la sesa de atas de gera en febrero ia permete ce alga vilas reseta sua aida prima de anios, ma ce esta ia dura tra sola un pico de semanas. La reporta dise ce 600 mil suris es aora asejada, e ce 300 mil otras es trapida en la site Aleppo.
A soldi, on ia reporta ce fortes suri governal ia recatura partes de Aleppo cual ia es perdeda a rebelores en la mense pasada. Par esta causa, distritos ocupada par rebelores en la este de site es aora denova asejada.
Oservores ia dise ce fortes governal ia recatura du academias militar en la suburbe Ramouseh a sude de la site e ia rompe un linia de furni resente instituida a la rebelores.
@T On alega ce Rusia ia aida la vinse de Trump
@L aora_oji/2016/on_alega_ce_rusia_ia_aida_la_vinse_de_trump
====== On alega ce Rusia ia aida la vinse de Trump ======
10 desembre 2016
En la SUA, ofisiores ia revela ce departes de securia crede ce Rusia ia ata secreta per aumenta Donald Trump en la corsa presidental.
Un reporta en la jornal New York Times dise ce la departes ave "fida alta" sur un envolve rusce en pirati. Un evalua par la CIA, reportada par la jornal Washington Post, ia trova cosas simil.
Ma la ecipo de Trump ia rejeta la sujesta de la CIA, disente: "Esta persones es la mesmas ci ia dise ce Saddam Hussein ave armas de destrui coletiva."
Ofisiores rusce ia nega a multe veses la acusas de pirati.
A venerdi, presidente Barack Obama ia comanda un investiga sur un serie de siberatacas, per cual on ia culpa Rusia, en la periodo de la eleje SUA.
La piratis ia consentra se a epostas de la Partito Democrata e de un aidor major de la nominada Hillary Clinton. En otobre, ofisiores de la governa SUA ia acusa Rusia de interfere en la campania.
Aora, ofisiores major sitada par New York Times dise ce los es serta ce piratas rusce ia infiltra no sola la sistemes de computador de la Partito Democrata, ma ance los de la Comite Nasional Republiciste, ma ce los no ia relasa informas prendeda de la redes republiciste.
Departes de securia dise ce la rusces ia dona la documentos de la Democratas a WikiLeaks.
Democratas ia reata con furia cuando on ia pirati contas epostal de la Comite Nasional Democrata e de John Podesta, la xef de la campania de Clinton. La epostas de Podesta ia es revelada par WikiLeaks enlinia.
Sitante "un ofisior major SUA" anonim, Washington Post ia dise ce "departes de securia ia identifia individuas con lias a la governa rusce ci ia furni a WikiLeaks miles de epostas piratida de la Comite Nasional Democrata e otras, incluinte la xef de campania de Hillary Clinton".
A un punto en sua campania, Trump ia coraji publica Rusia a "trova" la epostas de Clinton, an si el ia dise plu tarda ce el ia parla con sarcasmo.
Democratas ia alega ce la piratis es un atenta intendeda per sumina la campania de Clinton.
Eric Schultz, portavose per la Casa Blanca, ia dise ce Obama desira ce on fa esta investiga cuando el es ancora la presidente "car el regarda lo como multe seria". El ia ajunta: "Nos es dedicada a serti la solidia de nosa elejes."
@T On aprende la aida prima en Paris
@L aora_oji/2016/on_aprende_la_aida_prima_en_paris
====== On aprende la aida prima en Paris ======
27 marto 2016
Sirca 3200 persones en Paris ia fa sin custa un curso de aida prima, per es plu preparada per la posible de un ataca.
La sesiones de du oras ia aveni en cada distrito de Paris, e ia mostra a sua partisipores como on debe reata en un situa de crise.
Ofisiores intende repete la curso a un ves o plu per anio.
La curso ia es aprobada par la consilio de site pos la atacas teroriste en novembre pasada cual ia mata 130 persones en la capital franses.
A pos, pompores e la Crus Roja ia nota un aumenta major de demandas per sua programes de instrui de aida prima.
@T On atenta desasembla la Jungla de Calais
@L aora_oji/2016/on_atenta_desasembla_la_jungla_de_calais
====== On atenta desasembla la Jungla de Calais ======
1 marto 2016
En Frans, ecipos va revade a la porto de Calais per desasembla plu cabanas tempora en la campa de migrores nomida "la Jungla".
En la note, polisiores antitumulta ia xuta gas lacrimojen a refujadas ci ia lansa petras a la ecipos.
La autoriosas dise ce la migrores debe move a contenadores de barconi en un otra parte de la loca. Ma multe teme ce par causa de esta los va debe xerca ofisial refuja en Frans e abandona sua esperas de viaja a Britan.
En la oscuria de note, migrores ia atenta asede camiones sur la autovia cual vade a la porto. Gas lacrimojen ia es usada per forsa los a retira se.
Los ci abita en la campa, xef de Asia sude-ueste, Afganistan, e Africa, espera traversa la Manga, comun usante contrabandores per atenta entra nonlegal a Britan.
La autoriosas franses crede ce sirca 1000 migrores va es afetada par la projeta de descasi, ma ajenterias de aida dise ce la cuantia de persones ci abita ala es multe plu grande.
On ia desasembla sirca 100 cabanas ier. A la min 12 ia es ensendeda.
Plu temprana, Good Chance (Bon Acaso), un grupo teatral cual labora en la campa, ia dise ce la polisia preveni bonvolores de entra a la campa.
Ofisiores dise ce areas publica en la campa, como locas de adora relijial e scolas, no va es afetada, e los descrive la moves como "un opera umaniste".
La state de vive en la parte sude es misera, e la presentia de la campa ia deveni controversa.
La ofisiores dise ce migrores pote o move a contenadores convertida en la parte norde de la campa, do on ave spasio per 1500 persones, o move a sentros simil a otra locas en Frans, o xerca refuja ofisial en Frans.
Ma multe abitores no vole parti de Calais. Un ia comenta: "Vade a Britan es lo cual on desira. Donce destrui un parte de la Jungla no es la solve."
@T On averti sur tsunami pos un teratrema en Japan
@L aora_oji/2016/on_averti_sur_tsunami_pos_un_teratrema_en_japan
====== On averti sur tsunami pos un teratrema en Japan ======
22 novembre 2016
Japan ia cansela avertis de tsunami cual ia es publicida pos cuando un teratrema de mesura 7,4 ia colpa sua costa este.
La trema ia aveni prosima a Fukushima a sirca 06:00 de ora local, provocante avertis inisial de ondas con altia de 3 metres. La ondas cual ia colpa final la costa ia es multe plu peti.
On ia solisita ce miles de persones sorti de la area, e feris minor ia es reportada.
Un trematera e tsunami ia colpa la area en 2011, matante 18 mil persones. Acel trema ia es un de la plu potiosas cual on ia rejistra, e lo ia causa un fonde a la compleso nucleal de Fukushima, do on fa ancora un labora jigante de limpi.
Ofisiores ia dise ce on ave no indica de dana a la compleso a esta ves.
La Ajenteria Meteorolojial de Japan ia dise ce la trema de oji ia es un replica de lo de 2011.
On ia senti secutes forte an en Tokio, la capital, a 160 cilometres a sude de Fukushima. Construidas en Tokio ia secute tra 30 secondos, a la min.
Obedinte la avertis en Fukushima, barcones ia move a via de portos, e Nissan ia suspende labora a sua fabriceria de motores.
Japan es situada en un rejion con un cuantia nonusual de ativia sismica, representante sirca 20% de tremas de mesura 6 o plu en la mundo.
@T On catura un suspetada de la atacas teroriste en Paris
@L aora_oji/2016/on_catura_un_suspetada_de_la_atacas_teroriste_en_paris
====== On catura un suspetada de la atacas teroriste en Paris ======
20 marto 2016
Un avocato franses dise ce Salah Abdeslam, suspetada de la atacas en Paris, ia confesa ce el ia vole esplode se a la Stadion de Frans, ma ia cambia sua deside.
A la dia pos catura el, on ia acusa el de crimines teroriste. Sua avocato dise ce el va oposa sua estradi a Frans, ma ce el coopera con la polisia.
La atacas en Paris en novembre ia mata 130 persones e ia feri multe otras. La grupo Daex ia dise ce la bombis e fusilis ia es esecutada par lo.
Abdeslam, un sitadan franses naseda en Beljia a 26 anios ante aora, ia es arestada en Bruxelles a venerdi, pos cuatro menses de fuji. El ia deveni fusilida a sua gama cuando on ia aresta el.
Investigores espera ce el va revela plu informas sur la rede de Daex, sua finansia, e sua projetas.
Los crede ce el ia aida con lojistica, incluinte lua salas e transporta bombas umana a la Stadion de Frans. Los crede ance ce el ia fuji corta pos la atacas, revadente a la distrito Molenbeek de Bruxelles.
Entretempo, Interpol ia recomenda "un vijila aumentada" a fronteras pos la catura a venerdi, disente ce cisa plu aidores va atenta evade Europa.
La sujeto de un xerca jigante, Abdeslam ia es arestada a sirca un dui de cilometre de sua casa en Molenbeek. Sua frate, Brahim, ia es un de la atacores ci ia esplode se en Paris.
Un otra om arestada a la mesma tempo como Abdeslam, Monir Ahmed Alaaj, es ance acusada de partisipa en omiside teroriste e la ativias de un grupo teroriste.
La catura a venerdi ia deteni ance tre membros de un familia. Los inclui Abid Aberkan, descriveda como un ami de Abdeslam, ci on ia acusa de partisipa en la ativias de un grupo teroriste e de refuja criminores.
Un otra membro de familia, identifiada como Djemila M, es acusada de refuja criminores, ma no es arestada. La madre es ja librida sin es acusada.
On ia catura Abdeslam pos trova sua impresas de dito en un aparte en Forest, un otra distrito de Bruxelles, invadeda par la polisia a martedi.
Metraje dramosa de venerdi mostra Abdeslam puxada a en un auto de polisia pos un serie de fusilis. Alaaj ia es ance ferida en la arestas, ma ambos suspetadas ia es desospitalida ier.
François Hollande, la presidente de Frans, ia descrive la aresta de Abdeslam como "un momento importante".
A un confere jornaliste con Charles Michel, la ministro xef de Beljia, el ia declara: "La batalia contra terorisme no fini a esta sera, an si esta es un vinse. Nos debe catura tota los ci ia permete, organiza, o fasili esta atacas, e nos comprende ce los es multe plu numerosa ca nos ia crede e identifia plu temprana."
Avocatos ia dise ce Alaaj ia viaja con Abdeslam a Deutxland en otobre pasada, do on ia rejistra sua impresas de dito en un esamina de identia.
En la aparte en Forest, on ia trova un pasaporto suri falsa con nom de Alaaj e paperes beljes de identia falsa.
@T On descovre un sistem solal la plu grande
@L aora_oji/2016/on_descovre_un_sistem_solal_la_plu_grande
====== On descovre un sistem solal la plu grande ======
28 janero 2016
Astronomistes ia descovre un sistem solal la plu grande conoseda. Lo es composada de un planeta grande per cual un orbita de sua stela ocupa cuasi milion anios.
Esta jigante de gas es a distantia de milion milion cilometres de sua stela, e sua orbita es plu larga a 140 veses ca la via de Pluto sirca nosa sol.
On ia trova sola un cuantia pico de tal duples estrema larga, en anios resente.
La detalias apare en la jornal Notas Mensal de la Sosia Astronomial Reial.
La planeta, nomida 2MASS J2126-8140, ave entre des-du e des-sinco veses de la masa de Jupiter.
Dr Simon Murphy de la Universia Nasional Australian ia comenta: "Nos ia es multe surprendeda en trova un ojeto de masa tal basa a distantia tan grande de sua stela relatada. Serta, los no ia formi en la mesma modo como nosa sistem solal, de un disco grande de polvo e gas."
La sistem ave cuasi la truple de la grandia de la stela-con-planeta la plu larga conoseda a ante.
La duple ia es trovada par un esplora de stelas joven e nanas brun en la visina de la Tera.
Cuando rexercores ia descovre ce la du ave un distantia simil de nos -- sirca 100 anios de lus -- los ia compara la move de la du tra spasio e ia persepi ce los acompania la un la otra.
"Nos pote ipotese ce los ia formi entre 10 e 45 milion anios ante aora, de un filo de gas cual ia junta ambos en la mesma dirije," Murphy ia esplica. "La situa no pote es ce los ia pasa sua vives en un ambiente multe densa. Los es liada en modo tan debil ce cualce stela prosima ia ta disturba completa sua orbita."
@T On descovre un site antica misri
@L aora_oji/2016/on_descovre_un_site_antica_misri
====== On descovre un site antica misri ======
24 novembre 2016
En Misre, arceolojistes ia descovre lo cual los descrive como un site vea de plu ca 5000 anios, conteninte casas, utiles, seramicas, e tombas enorme.
Lo es situada a lado de la rio Nil, prosima a la Templo de Seti la Prima en Abydos.
Espertas dise ce la grandia de la 15 tombas nova descovreda indica la grado sosial alta de la enteradas. On crede ce la site ia flori en la eda temprana de Misre antica.
La descovre pote aida la industria de turisme de la pais, cual ia deveni min ativa pos la suverti de presidente Hosni Mubarak en 2011.
Arceolojistes ia fa multe descovres en la site nova trovada, incluinte construidas, pesos de seramica, e utiles fada de metal e petra.
Lo pare ce la loca ia es la abitada de ofisiores major e persones ci ia construi tombas reial en Abydos, un site santa prosima. Abydos conteni multe templos, e ia es un capital en un periodo temprana de Misre.
La descovre ia es fada par un mision arceolojial cual parteni a la ministreria de anticas de la pais, e no par un grupo stranjer.
@T On descovre un spesie estinguida de planta
@L aora_oji/2016/on_descovre_un_spesie_estinguida_de_planta
====== On descovre un spesie estinguida de planta ======
16 febrero 2016
Biolojistes ia descrive un spesie nova de planta estinguida, fundida sur du flores fosilida cual ia es trapida en pesos de ambar tra 15 milion anios a la min.
Strychnos electri parteni a la jenero de cual sua arboretas, arbores, e vites es famosa per produi stricnina, un venena matante.
Rexercores en la SUA ia nomi lo seguente la parola elinica per ambar (elektron), la resina fosilida de arbores antica.
La du flores ia es entre 500 fosiles colieda en 1986 en un esplora par profesor George Poinar de la Universia de la Stato Oregon. Poinar es un entomolojiste famosa e multe de esta esemplos colieda ia es insetos. Ma pos cuasi 30 anios de labora sur estas, el ia comensa esamina la flores.
Los ia es notable completa, no como multe fosiles de plantas en ambar, cual es usual no plu ca fratos.
En 2015, el ia envia fotos de densia alta a profesor Lena Struwe a la Universia Rutgers en Nova Jersey.
"Esta flores ia aspeta como si los ia cade resente de un arbor," Poinar ia esplica. "Me ia opina ce los es cisa Strychnos, e me ia envia los a Lena car me sabe ce el es un esperta en esta jenero."
Struwe ia compara la strutur fisical de la flores con tota 200 spesies conoseda de Strychnos, esplorante la colies de multe museos e erberias.
"La cualias la plu usosa per identifia spesies de Strychnos es en la morfolojia de la flores, e fortunosa esta es lo cual nos ave per esta fosil," Struwe ia dise. "Me ia regarda cada esemplo de spesies american, fotografinte e mesurante lo, e ia compara lo a la foto cual George ia envia a me. Me ia demanda a me: 'Como la capeletas sur la petales aspeta? Do es la capelatas situada?' e tal plu."
Per la animales en la tarda de la eda cretasica, S. electri ia es probable estrema nonurinte.
"Cuasi tota spesies de la jenero Strychnos es venenosa en alga modo," Poinar ia comenta. "Cada planta conteni sua propre alcaloides con efetos diversa. Alga es plu venenosa ca otras, e cisa los ia susede car sua venenas ia furni alga defende contra erbivores."
La tal alcaloide la plu famoisa, stricnina, ia formi la funda de multe venenas contra ratas en la pasada, e ia es un de la modos de omiside usada par la carater Norman Bates en la filma Psico de Alfred Hitchcock.
Ma esta plantas parteni ance a la familia de asteridos, cual inclui plu ca 80 mil plantas florinte, incluinte multe de los cual umanas come, de patatas e menta asta eliantos e favas de cafe.
La descovre nova es un ajunta importante a la arcivo fosilal de esta familia cual on no comprende ja bon.
@T On desculpa la ministro xef de Malaisia de froda
@L aora_oji/2016/on_desculpa_la_ministro_xef_de_malaisia_de_froda
====== On desculpa la ministro xef de Malaisia de froda ======
26 janero 2016
La avocato prosedente xef de Malaisia ia desculpa Najib Razak, la ministro xef, de froda en un scandal finansial.
La ofisia de la avocato jeneral ia dise ce la 681 milion dolares cual Najib ia reseta en sua conta de banco ia es un donada de la familia reial de Arabia Saudi.
Criticistes ia alega ce la mone ia veni de 1Malaysia Development Berhad, un compania de investi nasional.
Najib ia nega sempre esta acusas, ma ia fronti presa a resinia par causa de los.
En pasada, ofisiores antifroda ia dise ce el ia reseta mone como un donada de un finansior stranjer.
En un anunsia a jornalistes a esta matina, Mohamed Apandi Ali, la avocato jeneral, ia declara ce la mone ia es "un donada personal" de la familia reial saudi, enviada entre la fini de marto e la temprana de april 2013.
El ia ajunta ce ofisiores antifroda ia confirma esta par intervisa atestores, incluinte la person ci los ia identifia como la donor.
"Me es sasiada ce no atesta esiste per mostra ce la donada ia es un forma de regala donada en modo frodante," el ia dise, clarinte ce la atestas no mostra ce la donada ia es usada como "un indui o recompensa" per dirije la atas de Najib en sua rol como ministro xef.
Malaisia ia fa sua vota jeneral la plu resente en maio 2013. Alora, la partito de Najib ia gania denova, ma con un de sua resultas la plu debil de istoria.
La avocato jeneral ia dise ance ce Najib ia fa no crimin en relata con tre otra investigas liada, e ce tota esta investigas va sesa.
@T On investiga un crimin posible par monces arjentina
@L aora_oji/2016/on_investiga_un_crimin_posible_par_monces_arjentina
====== On investiga un crimin posible par monces arjentina ======
21 julio 2016
La eglesa roman catolica en Arjentina ia comensa un investiga sur esce cuatro monces fema ia aida asconde un cumula de mone e joalas.
La investigor xef, Tom O'Donnell, ia dise ce on atenta descovre esce un crimin contra la leges eglesal ia aveni.
En junio, un ministro pasada de governa ia es arestada estra la monceria. On alega ce el ia atenta asconde cuasi $9 milion de joalas e mone fisical.
La monceria es la comunia de Nosa Dama de Rosario de Fátima, situada a sirca 55 cilometres a ueste de la capital, Buenos Aires. Monces fema laborante ala ia clama la polisia pos vide un om jetante sacos plastica a ultra un mur.
On alega ce el es José López, ci ia es la ministro de infrastrutur en la governa de Cristina Fernández de Kirchner.
Resente en Arjentina, on ia publici imajes de camera vijilante sur cual on alega ce los mostra López portante la sacos, conteninte joalas e faxas de biletas de mones diversa, a en la monceria, aidada par du monces.
On dise ce cuatro monces ia aida el en soma. Un de los va apare ante un judor en la mense veninte.
De pos la emprende de la posto de presidente par Mauricio Macri en la parte plu temprana de esta anio, on ia fa un serie de investigas de ofisiores pasada sur la tema de lava de mone.
@T On move maxes de basebal par causa de Zica
@L aora_oji/2016/on_move_maxes_de_basebal_par_causa_de_zica
====== On move maxes de basebal par causa de Zica ======
7 maio 2016
On ia move du maxes de la Concurso Major de Basebal cual on ia intende jua en Porto Rica, par causa de ansia de la juores sur la virus de Zica.
La maxes entre la Piratas de Pittsburgh e la Marlines de Miami va aveni en Miami en loca.
Juores ia dise ce los es ansiosa ce los va reseta la virus e dona lo a sua sposas.
On suspeta ce Zica causa maladias conjenital en bebes de ci sua madres ave la virus cuando los es ensinta.
Porto Rica ia esperia plu ca 600 casos de Zica, e la isola rejistra sua mori prima par lo en la semana pasada.
En un anunsia, la Concurso Major de Basebal (Major League Baseball) e la Asosia de Juores de la Concurso Major de Basebal ia dise ce la comisionor de basebal "ia ave no otra eleje" ca reloca la maxes car tan multe juores ave un sposa ci es ensinta o ci atenta ensinti.
La anunsia ia dise ance ce on espera jua denova basebal en Porto Rica "en la futur prosima", e ce la persones pertinente "va continua suporta la crese de la jua en Porto Rica, do un tradision eselente de basebal ia fa ce la isola es ja longa un aveneria importante per la jua".
Plu ca dudes paises reporta casos de Zica, cual es sperdeda par moscitos.
La pais la plu grave afetada par la eruta es Brasil, do la Juas Olimpial va aveni en agosto de esta anio. La autoriosas ala ia dise en febrero ce on ave no posible ce on va cansela la Olimpiales par causa de la virus, e ce no risca esiste per juores o oservores estra femes ensinta.
En la tempo interveninte, la Organiza Mundal de Sania ia indica ce la transmete sesal de la virus es plu comun ca on ia crede a ante.
@T On prosede Prinsesa Cristina de Espania en corte
@L aora_oji/2016/on_prosede_prinsesa_cristina_de_espania_en_corte
====== On prosede Prinsesa Cristina de Espania en corte ======
4 marto 2016
Prinsesa Cristina de Espania ia atesta a la ves prima en sua prosede per froda alegada de imposta, ma ia responde sola a demandas fada par sua propre avocato.
El ia informa la corte en Mallorca ce el ia demanda nunca a sua sposo, Iñaki Urdangarin, como el maneja un compania de imobila cual los posese en junta.
On acusa Urdangarin de usa sua relatas reial per jenera revenu comersial cual los ia usa per spendes privata.
Ambos nega ce los ia fa mal. Des-sinco otra acusadas es ance en prosede.
Cristina, ci ave 50 anios e es la sore de Re Felipe, va risca un periodo masima de oto anios en prison si on judi ce el es culpable. El nega conose la froda alegada cual envolve ance sua sposo e des-ses otra acusadas.
En sua apare de 20 minutos en corte, sua avocato ia demanda perce el ia parla nunca con sua sposo sur la ativias de la compania, e el ia responde ce "los no es temas cual interesa me".
El ia ajunta: "A acel tempo, mea enfantes ia es multe peti e nos ia es multe ocupada. El ia maneja la spendes de la familia. Me no ia deveni envolveda en acel."
La caso ia es inisiada en 2010 e ia deveni ja forte simbolin de frodas persepida entre grupos superior en Espania, incluinte la familia reial.
En la anio pasada, Re Felipe ia sutrae la titulos de sua sore e sua sposo, la Duxe e Duxes de Palma de Mallorca.
Cristina abita aora en Suiz, ma resta la person ses en la pasa de rena e es la membro prima de la familia reial ci on ia prosede en corte.
La avocatos de la prinsesa ia razona ce on debe rejeta la acusas, car ofisiores publica ia refusa acusa formal el. Ma la tre judores ia acorda continua con la prosede, usante la atestas rejistrada par Manos Limpias (Manos Limpa), un grupo antifroda.
La acusas pertine a Aizoon, un compania de imobila cual el posese con sua sposo, ci es un medaliste olimpial pasada de handbal.
On acusa ce el ia usa personal la reservas comersial per paia per vestes e lesones de dansa per sua enfantes, e ance per boni sua cason en Barcelona, reduinte la profitas impostable de la compania.
On alega ance ce sua sposo ia usa la Instituida Nóos, un funda sportal cual el ia maneja, como un metodo de gania contratas falsa aumentada de autoriosas de governa rejional, e ia redirije alora la mone a sua contas personal tra paradisos finansial.
Alegada, Nóos ia reseta plu ca €6 milion de mone publica, de cual la plu ia veni de la Isolas de Baleares e de la governas rejional de Valencia.
@T On va prosede empleadas de museo sur la barba de Tutancamon
@L aora_oji/2016/on_va_prosede_empleadas_de_museo_sur_la_barba_de_tutancamon
====== On va prosede empleadas de museo sur la barba de Tutancamon ======
24 janero 2016
En Misre (Egipte), oto empleadas de museo va es prosededa sur sua reafisa malfada de la barba a la masca de tomba de la faraon Tutancamon.
A un anio ante aora, ofisiores ia comensa investiga como la barba blu, con decoras de oro, ia deveni desfisada e alora rapida recolida.
La empleadas es acusada de descura e de viole normas profesal.
La ojeto de 3000 anios es un de la atraes la plu grande per turistes en Qahira (Cairo).
Conservores a la Museo Misri ia dona esplicas diferente de la manera en cual la barba ia deveni desfisada. Un sujesta ia es ce algun ia colpa asidental lo; un otra ia es ce on ia move lo car lo ia sesa ja es secur fisada.
Avocatos prosedente ia dise ce la laborores ia atenta "fretosa" asconde sua era, usante cuantias grande de cola nonconveninte en atenta repara la ojeto.
Intera, los ia fa cuatro atentas de refisa la barba. A la tre veses plu tarda, los ia atenta ance sutrae la indicas de sua atentas falida plu temprana.
La avocatos ia dise: "Iniorante tota metodos siensal de restora, la suspetadas ia atenta asconde sua crimin par usa utiles agu de metal per sutrae partes de la cola cual ia deveni vidable, tal danante la obra de 3000 anios con an no un momento de consiensa.
Los ci va es prosededa inclui un dirijor pasada de la museo e un dirijor pasada de restora.
En otobre 2015, un ecipo de conservores gidada par espertas deutx ia comensa labora per sutrae la dana e refisa la barba en modo profesal. Pos un restora susedosa, la masca ia es denova publica esibida en desembre.
@T On va prosede un presidente brasilera pasada sur froda
@L aora_oji/2016/on_va_prosede_un_presidente_brasilera_pasada_sur_froda
====== On va prosede un presidente brasilera pasada sur froda ======
21 setembre 2016
Luiz Inácio Lula da Silva, la presidente pasada de Brasil, va es prosededa sur acusas de froda e blanci de mone a Petrobras, la compania nasional de petrolio.
Avocatos prosedente dise ce el ia aseta 3,7 milion reales ($1,11 milion) de sobornas en relata con un scema de du mil miliones de dolares.
Lula, ci ave 70 anios, ia es ja acusada en agosto sur impedis de investigas. El nega ce el ia fa mal, e dise ce la acusas es political motivada.
"Me es triste," el ia dise. "Lo es un farsa grande, un menti grande, un pirotecnical grande. Lo cual aveni no depresa me, ma simple lo motiva me a apare e parla plu."
Sérgio Moro, la judor ci supravide Opera Lava de Auto -- la investiga sur alegas de froda a Petrobras -- ia dise ce on ave "atesta sufisinte sur la culpablia" de Lula.
Seguente la prosedores, la mone cual, alegada, la presidente pasada ia reseta ia es lavada par la compra e renovi de un aparte de plaia. La aparte ia es construida par un compania implicada en la scandal. Sua sposa, Marisa Letícia, e ses otra persones es ance acusada.
Prosedores ia acusa ce Lula ia es la "xef" de la scema, sur cual on estima ce lo ia custa plu ca $2 mil milion de la compania.
On ia aresta e condena alga politicistes e dirijores de Petrobras como resulta de la investiga de du anios.
La investigores crede ce on ia dona contratas con Petrobras de custa inflada par intercambia per sobornas. Los alega ce alga de la mone nonlegal otenida ia es usada per finansia la campanias elejal de politicistes brasilera major.
Lula, ci ia servi como presidente entre 2003 e 2011, ia es un de la xefes la plu popular de Brasil, e on regarda el como un aspiror posible per la elejes presidental de 2018.
An tal, la popularia de sua Partito Laboriste ia afonda en esta anio, e sua seguor Dilma Rousseff ia es acusada de malcondui en agosto. Un condena criminal ta proibi Lula de es nominada en 2018.
@T On xerca ancora la atacor de Berlin
@L aora_oji/2016/on_xerca_ancora_la_atacor_de_berlin
====== On xerca ancora la atacor de Berlin ======
22 desembre 2016
Tra Europa, on xerca la om tunisi ci ia fa la ataca de camion en Berlin.
Anis Amri, ci ave 24 anios, ia es ja monitorida en la temprana de esta anio, car on ia suspeta ce el projeta un fura per paia per fusiles. Sua monitori ia es ultima abandonada par causa de un manca de atestas.
Ante entra a Deutxland, el ia spende cuatro anios en prison en Italia per un ensende criminal.
La ataca a la sera de lundi a un mercato de natal ia mata 12 persones e ia feri 49.
On ia comanda la aresta de Amri pos trova sua permete de abita en la comparte de gidor de la camion.
Autoriosas deutx averti ce el es cisa armada e perilosa. On ofre un premio de asta €100 000 per informas cual gida a sua aresta.
Reportas sujesta ce el ia es ferida en un luta con la gidor polsce de la camion, de ci on ia trova sua corpo mor en la comparte de gidor.
Canselor Angela Merkel ia consenta con sua consilio de securia per discute la investiga de la ataca.
En un otra developa, la consilio deutx ia aproba un projeta acordada en novembre per permete plu monitoris video de locas publica.
@T OPEP anunsia redui la produi de petrolio
@L aora_oji/2016/opep_anunsia_redui_la_produi_de_petrolio
====== OPEP anunsia redui la produi de petrolio ======
29 setembre 2016
La Organiza de Paises Esportores de Petrolio (OPEP) ia fa un acorda inisial per redui la produi a la ves prima en oto anios. La premio de petrolio ia alti par resulta.
La nasiones major cual esporta petrolio ia ateni la acorda a negosias ier en Jazair per oposa temes de suprafurni.
La premio de Brent, la gida internasional per petrolio, ia crese par cuasi 6% a cuasi $49 per baril. En la comersia temprana en Asia, petrolio ia esperia sola ganias peti, ma companias de enerjia tra la rejion ia alti.
Ministros de petrolio ia dise ce on va completi la detalias de la acorda a un consenta formal de OPEP en novembre.
La esflue va diminui a sirca 700 mil bariles per dia, an si la reduis no va es coerente distribuida tra la cartel, car on permete ce Iran aumenta sua produi.
Desacordas entre Iran e Arabia Saudi, sua competor rejional, ia impedi atentas plu temprana de reali un acorda.
Multe de la membros plu peti de OPEP ia presa per la redui pos cuando la premio de petrolio ia cade de $110 per baril en la du anios pasada, par causa de suprafurni e demanda lentinte.
Emmanuel Ibe Kachikwu, la ministro de petrolio per Nijeria, ia descrive la acorda como "multe positiva", e Noureddine Bouarfaa, la ministro de enerjia per Jazair, ia dise: "La deside ia es par acorda unida, e sin reservas."
Mohammed Bin Saleh Al-Sada, ministro de enerjia per Catar e presidente presente de OPEP, ia dise ce la acorda va limita la esflue de paises OPEP a entre 32,5 milion e 33 milion bariles per dia.
On estima ce la esflue corente es 33,2 milion bariles per dia, ma Irac ia demanda ier como OPEP mesura la produi de sua membros.
Alga mercatores de petrolio resta setica sur la acorda, disente ce los vole vide tota la constrinjes, incluinte la reduis acordada par statos membros individua, ante fa un judi final.
@T Pacistan sesa proibi filmas de Bollywood
@L aora_oji/2016/pacistan_sesa_proibi_filmas_de_bollywood
====== Pacistan sesa proibi filmas de Bollywood ======
18 desembre 2016
Sinemas major en Pacistan ia acorda fini un proibi de filmas barati.
La deside de proibi ia es inisiada cuando relatas entre la du paises ia mali en setembre a tema de Caxmir, un teritorio disputada, pos un crese de violentia ala.
Alga filmores barati ia proibi atores pacistani de labora en filmas de Bollywood.
Bollywood es popular en Pacistan, e on reporta ce la probi autoinisiada ia causa un perde notable de revenu.
Distribuores de filma e posesores de sinema en Pacistan ia dise ce los va recomensa mostra filmas barati a lundi.
Pacistan ia introdui un proibi simil pos la gera Indo-Pacistani de 1965. Acel no ia es sutraeda asta 2008.
Caxmir ave un majoria muslim, es ja un loca de enemia tra desenios, e ia provoca du geras entre Barat e Pacistan, de cual ambos controla partes de la teritorio. Oji lo resta un de la zonas la plu militarida de mundo.
En setembre, 18 soldatos ia mori en un ataca contra un base de armada en Uri, en la parte barati de Caxmir. Lo ia es la tal ataca la plu matante de anios.
@T Palmira es recaturada
@L aora_oji/2016/palmira_es_recaturada
====== Palmira es recaturada ======
28 marto 2016
Fotos nova ia emerji de Palmira, a oras pos cuando soldatos suri ia recatura lo de la grupo Daex.
La imajes revela la estende de la destrui fada par la grupo en sua ocupa tra de menses a esta loca de erita mundal.
An si alga monumentos valuada es destruida, on dise ce multe de la ruinas de la site antica resta intata.
Maamoun Abdulkarim, la xef de anticas de Suria, ia dise ce la autoriosas ia "previde la plu mal". Ma el ia ajunta ce "la tereno, jeneral, es en bon forma".
Presidente Bashar al-Assad ia bonveni la recatura de Palmira como "un ateni importante" en la "gera contra terorisme".
Fontes militar dise ce la armada suri ave aora "controla completa" pos dias de batalia, suportada par atacas airal rusce.
Vladimir Putin, la presidente rusce, ia loda Assad. La Cremlin ia dise ce Assad sabe ce la opera de Palmira "ia ta es nonposible sin la suporta de Rusia".
Daex ia saisi la loca de Erita Mundal de Unesco, e ance la vila moderna, en maio 2015. Corta a pos, los ia mata la arceolojiste ci ia atende la ruinas tra 40 anios.
Palmira es situada en un area stratejial importante a la via entre la capital Dimashq e Deir al-Zour, un site este sur cual on batalia.
Cuando Daex ia saisi la site, lo ia destrui locas arceolojial, provocante un coleria global. Du templos vea de du mil anios, un arco, e tores funeral ia es lasada en ruinas.
La grupo jihadiste, cual ia destrui ance alga locas premuslim en Irac, crede ce tal strutures representa la adora de idoles.
A la min 400 bataliores de Daex ia es matada en la batalia per Palmira. En un declara a saturdi, la ministreria de defende rusce ia dise ce sua atacas airal ia colpa 158 blancos de Daex, matante plu ca 100 militaristes.
@T Pandas jigante es no plu clasida como perilida
@L aora_oji/2016/pandas_jigante_es_no_plu_clasida_como_perilida
====== Pandas jigante es no plu clasida como perilida ======
5 setembre 2016
La panda jigante es no plu un spesie perilida, pos desenios de labora par conservores per salva lo.
On ia cambia la state ofisial de esta animal multe amada de "perilida" a "riscada" par causa de un recrese de cuantia en Xina.
La cambia ia es anunsiada como un parte de un refresci de la Lista Roja de la Uni Internasional per Conserva de Natur (UICN). Ma la refresci ia porta ance novas triste. La gorila este, la primate la plu grande de mundo, es aora perilida.
Laboras par Xina, cual reclama la panda jigante como sua animal nasional, ia retrae la cuantia de la borda de estingui. La estima la plu resente indica un popla de 1864 de adultes.
On no sabe esata la cuantia de jovenes, ma on estima ce la cuantia intera de pandas jigante es 2060.
Ma la UICN ia averti ce la recrese de cuantia pote es corta. On predise ce la cambia de clima en la 80 anios veninte va elimina plu ca un tri de la bambu do la pandas abita.
La reporta ia dise: "Per proteje esta spesie iconin, lo es esensal ce on continua la medios produosa de proteje de foresta, e ce on dirije se contra menasas emerjinte."
Un crese de xasa nonlegal ia redui la cuantia de gorilas este a no plu ca 5000 tra la mundo. Cuatro de la sete ominidos de la Tera es aora grave perilida -- la gorila este, la gorila ueste, la orangutan de Borneo, e la orangutan de Sumatra.
Inger Andersen, la dirijor jeneral de la UICN, ia comenta: "Oji es un dia triste car la Lista Roja mostra ce nos elimina alga de nosa relatadas la plu prosima."
La cuantia de gorilas este ia diminui par plu ca 70% en la du desenios la plu resente. La Lista Roja de la UICN inclui 82 954 spesies, no sola animales ma ance plantas. On lista cuasi un tri (23 928) como menasada par estingui.
@T Parlamentores brites ataca Cameron sur la colasa de Libia
@L aora_oji/2016/parlamentores_brites_ataca_cameron_sur_la_colasa_de_libia
====== Parlamentores brites ataca Cameron sur la colasa de Libia ======
14 setembre 2016
Un reporta parlamental en la Rena Unida ia critica sever la interveni par Britan e Frans cual ia produi la suverti de Muʿammar Qaddafi, la xef de Libia, en 2011.
La comite de esternas ia acusa David Cameron, la ministro xef de acel tempo, de no ave un stratejia coerente per la campania de atacas airal. Lo ia dise ce la interveni no ia es determinada par informas esata, e ce sua resulta ia es la crese de la organiza Daex en Africa norde.
La governa de la RU ia dise ce la deside de interveni ia es internasional, recomendada par la Alia Arabi, e autorida par la Consilio de Securia de la Nasiones Unida.
Un alia internasional, gidada par Britan e Frans, ia inisia un campania de atacas par avion e misil contra la fortes de Muammar Qaddafi en marto 2011, pos cuando el ia menasa ataca la site Benghazi, ocupada par rebelores.
Ma pos la suverti de Qaddafi, Libia ia cade a violentia, con governas diversa oposante e sentos de militias, e la organiza Daex ia deveni plu forte.
Cameron ia defende sua trata de la situa. En janero, el ia clari a parlamentores ce on ia debe reata car Qaddafi "ia es maltratante persones en Benghazi e menasante fusili sua propre popla como ratas".
Ma la comite de esternas ia reporta ce la governa "ia fali identifia ce la menasa a persones nonmilitar es esajerada", ajuntante ce lo "ia comprende leteral elementos elejeda de la retorica de Qaddafi".
La governa ia fali ance reconose "la elemento estremiste islamiste combatosa en la rebela", la comite ia dise. "La posible ce grupos estremiste combatosa va atenta benefica de la rebela no ia ta debe es reservada per la retrospeta. La stratejia de la RU ia es fundida sur suposas erante e un comprende noncompleta de la atestas."
La comite ia dise ce "elejables political" ia deveni disponable pos la securi de Benghazi, incluinte par la contatas de la ministro xef pasada Tony Blair con Qaddafi, ma la governa RU ia "foca escluinte sur interveni militar".
La reporta dise ce ja en la estate de 2011, la interveni limitada per proteje nonmilitares ia deveni un politica oportunitse de cambia de rena.
"Acel politica no ia es fortida par un stratejia de suporta e formi Libia pos Qaddafi. La resulta ia es un colasa political e economial, geras entre militias e tribus, crises umaniste e migral, violes vasta de diretos umana, la estende de armas de la rena de Qaddafi tra la rejion, e la crese de Isil [Daex] en Africa Norde. Par la desides cual el ia fa en la Consilio de Securia Nasional, la ministro xef pasada David Cameron ia es ultima culpable per la fali de developa un stratejia coerente sur Libia."
La comite ia recomenda un resenia nondependente de la funsiona de la Consilio de Securia Nasional (de la Rena Unida, presideda par la ministro xef) per vide esce lo ia susede boni la state debil de la fa de desides governal cual on ia reconose en la tempo ante la invade de Irac en 2003.
La ministreria de esternas ia defende la interveni.
Un portavose ia dise: "Muʿammar Qaddafi ia es nonpredisable, e el ia ave medios e motivas per esecuta sua menasas. Sua atas no ia pote es iniorada e ia esije un ata internasional, desidente e coletiva. Tra la campania intera, nos ia segue la autoria de la Nasiones Unida per proteje nonmilitares. Pos cuatro desenios de malgoverna par Qaddafi, Libia fronti defias enorme, sin duta. La RU va continua ave un rol major en la comunia internasional per suporta la Governa Libi de Acorda Nasional, internasional reconoseda."
@T Polisiores es matada a media de protestas en Dallas
@L aora_oji/2016/polisiores_es_matada_a_media_de_protestas_en_dallas
====== Polisiores es matada a media de protestas en Dallas ======
8 julio 2016
En la SUA, sinco polisiores ia es matada e ses ia es ferida par xutores en protestas en la site Dallas contra fusilis a omes negra par la polisia.
La polisia es aora en un state nonprogresante con un om armada en un garaje. Tre otra persones es detenida.
Fusili ia aveni a sirca 20:45 de ora local ier, en cuando protestores ia prosegue tra la site. La protestas ia es provocada par la moris resente de Philando Castile en Minnesota e Alton Sterling en Louisiana.
David Brown, la xef de polisia de Dallas, ia dise ce on crede ce tota suspetadas ia colabora, atacante par fusil en cuando la protesta ia aveni.
El ia dise plu temprana ce 11 polisiores ia es fusilida en "modo emboscin" par xutores, e tre ia mori. La polisia ia tuita plu tarda ce un polisior cuatro ia mori ance, e on ia confirma resente la mori de un plu de la feridas.
Lo pare ce du xutores ia fusili de locas alta. Brown ia comenta: "Nos crede ce esta suspetadas ia posa se en modo per trianguli esta polisiores de du perxas separada... e ia intende feri e mata tan multe polisiores como los ia pote."
La maior de Dallas, Mike Rawlings, ia dise ce lo es "un momento estrema angusante per la site".
On ia restrinje volas supra Dallas.
La protesta ia es un de un cuantia cual on ia fa tra la Statos Unida sur la usa de fortia matante par la polisia contra persones afroamerican.
Philando Castile ia es fusilida e matada par un polisior en un controla costumal de veculo en St Paul, Minnesota a mercurdi, pos dise ce el porta un fusil lisensada.
Alton Sterling ia es matada par polisia a martedi en Baton Rouge, Louisiana, seguente un reporta anonim ce el usa un revolver per menasa en sua vende de cds.
Ambos matas ia es caturada en video, reensendente un debate nasional.
Presidente Barack Obama ia dise ce "tota persones justa debe es consernada" par la matas frecuente de persones negra par la polisia.
Indicante un statistica cual mostra ce lo es multe plu probable ce sitadanes afroamerican va es fusilida par la polisia ca sitadanes blanca, Obama ia recomenda ce la polisia desradisi sua prejudi interna.
"Cuando atas como esta aveni, on ave un parte grande de nosa cositadanes ci senti como si par causa de la color de sua pel, on no trata los en la mesma modo," el ia dise. "E esta dole."
Ma Obama ia dise ance ce on ave "grasia e respeta estracomun per la majoria vasta de polisiores ci risca sua vives per proteje nos a cada dia individua. Los ave un taxe perilosa. Lo es un taxe difisil."
@T Porto Rica luta per paia sua detas
@L aora_oji/2016/porto_rica_luta_per_paia_sua_detas
====== Porto Rica luta per paia sua detas ======
5 janero 2016
Porto Rica, un teritorio de la Statos Unida de America, ia fali paia sua detas a la ves du de sinco menses. La isola luta contra un deta enorme e un economia debil.
En la semana pasada, la governor de la isola ia dise ce lo va paia la plu, ma no tota, de la cuasi mil milion dolares cual lo debe, par usa de medios finansial estracomun.
Governor Alejandro Padilla ia proposa ce on dona a la isola diretos de bancarotia como los a la continente. La Congresa SUA va debate esta en la semanas veninte.
En tota, la isola debe sirca 70 mil milion dolares, sur cual Padilla ia dise ce lo no pote paia lo.
La paia la plu grande ier, de 328,7 milion dolares, ia es contra la deta de obliga jeneral.
Plu ca un dui de esta paia ia es fada par prende mone de reservas per otra ajenterias governal, en un move spesial con intende de serti la paia de la deta de obliga jeneral, como garantiada par la constitui.
Como resulta de la manobra, la isola ia fali paia sirca 37 milion dolares de obligas finansial liada a infrastrutur e instituis de developa.
Padilla ia dise ce la isola prepara se per reseta prosedes legal, avertinte ce "cada dolar usada per paia a avocatos va es un dolar nondisponable per paia a creditores".
En menses resente, el ia averti repetente sur un crise umaniste cual risca emerji, e ia recomenda ce la Congresa SUA estende protejes de bancarotia a la teritorio.
Su leges federal, statos e teritorios de la SUA no pote declara se como bancarota, ma sites e emprendes publica sur la continente pote. La emprendes publica de Porto Rica porta detas pesosa, ma no ave la mesma direto de bancarotia.
Republicistes oposa estende esta direto a la isola. La Casa Blanca, an suportante la posible de bancarotia, ia defini ce on no pote ofre un suporta finansial.
La laboras par la partito democrata per aida la isola ia es impedida en debates finansial en desembre.
En cuando la crise de deta sur la isola ia apare, sua economia ia bambola, e comentores ia descrive lo como "la Elas de la Caribe".
12,5% de la persones capas de labora sur la isola es nonempleada -- sirca la duple de la cuantia en la SUA -- e sirca 45% de persones es povre.
La isola fronti un fatura de sirca 400 milion dolares en febrero e un otra, multe plu grande, de 1,9 mil milion dolares en julio.
Padilla ia dise: "Esta no es retorica political; esta es matematica. Lo es multe simple: nos no ave la mone per paia."
@T Presidente Trump es entre la 10 riscas global la plu grave
@L aora_oji/2016/presidente_trump_es_entre_la_10_riscas_global_la_plu_grave
====== Presidente Trump es entre la 10 riscas global la plu grave ======
17 marto 2016
Seguente la Unia de Informa Economiste, un de la des riscas la plu grave cual la mondo fronti es un gania de la presidentia de la SUA par Donald Trump.
La compania rexercante, cual parteni a la jornal La economiste, averti ce el ta pote disturba la economia global e aumenta riscas political e securial en la SUA.
An tal, lo no previde ce Trump va vinse Hillary Clinton, ci lo regarda como "se competor democrata la plu probable".
On gradi Trump como plu riscosa ca un sorti par Britan de la Uni European o un gera en la Mar de Xina Sude.
Otra avenis listada como plu perilosa es un lenti subita de la economia de Xina, e un gera fria nova causada par la intervenis de Rusia en Ucraina e Suria.
En sua evalua de riscas global, cual considera efetos e probablias, la compania ia dise: "Asta aora, senior Trump ia dona vera poca detalias de sua politicas -- e estas tende es propensada a revisas constante."
La lista usa un scala de 1 asta 25. Trump colie la grado 12, la mesma risca como "un destabli de la economia global par la menasa cresente de terorisme jihadiste".
Sur Trump, la compania ia comenta plu: "El ia es spesial enemin a la comersia libre, e a veses repeteda el ia eticeti Xina como un 'manipulor de mone'."
Lo ia averti ce sua linguaje forte en dirije spesial a Mexico e Xina "ta pote grandi rapida a un gera de comersia".
Trump ia recomenda la construi de "un mur tan grande" a la frontera SUA--Mexican, paiada par Mexico, per preveni ce migrores nonlegal e vendores de drogas entra a la Statos Unida.
Campaniante, Trump ia recomenda ance ce on mata la familias de teroristes e invade Suria per elimina la grupo Daex e prende sua petrolio.
La Unia de Informa Economiste ia ajunta: "Se tendes atacosa militar en dirije a Asia sude-ueste e sua proibi de tota viajas muslim a la SUA ta es un util potiosa de enscrive per grupos jihadiste, aumentante sua menasa e en la rejion e ultra lo."
Oposores political de Trump ia fa comentas simil. An tal, la comersior prosimi plu a deveni la aspiror proposada par la partito republiciste. Trump, ci ave no esperia political, ia dise ce sua suportores "va tumulta" si el no deveni proposada.
Si el gania la presidentia, la rexercores predise ce la politicas interna e esterna de la SUA va es suminada: "La enemia inata en la ierarcia republiciste en dirije a senior Trump, combinada con la oposa amarga e nonevitable par la partito democrata, va causa ce multe de sua politicas plu estrema deveni blocida en la Congresa."
@T Protestas causa un crise de acua en Delhi
@L aora_oji/2016/protestas_causa_un_crise_de_acua_en_delhi
====== Protestas causa un crise de acua en Delhi ======
21 febrero 2016
La capital barati Delhi fronti un crise grave de acua par causa de protestas violente sur diretos de caste en Haryana, un stato visina.
Ofisiores de la governa ia dise ce la site ave furnis de acua sola asta la matina de oji, e ia anunsia ce tota scolas va es cluida doman.
Protestores de la comunia jat ia dana aparatos en la canal Munak, un fonte major de acua per la site. A la min nove persones ia es matada en cuando la violentia ia continua ier.
La protestores cexa contra la sistem de cuotas per castes en Barat. Los dise ce esta es un nonvantaje per los en postos governal e en instituidas instrual de la stato.
A presente, la jates es listada como de caste superior, ma la protestores desira cuotas de posto simil a los donada a castes inferior.
A saturdi, protestores ia furia an con proibi de sorti e la usa de la armada, sur ci on reporta ce los ia comensa fusili en dirije a los en la distritos Rohtak e Jhajjar.
La violentia ia obliga ce on clui alga stradas major e autovias nasional, e lo ia paralise la sistem de ferovias en Barat norde.
La governa local en Delhi ia vade a la corte suprema per xerca sua interveni en la crise de acua. Ance Rajnath Singh, la ministro barati de internas, ia promete ce la governa va adota "medios urjente".
Manohar Lal Khattar, la ministro xef de Haryana, ia dise ja ce la governa va acorda con la esijes de la protestores "en la limitas de la constitui".
Partitos oposante ia recomenda ce la governa sentral desemplea la governa de Khattar e ce on forsa un rena presidental a la stato.
A venerdi, protestores en Rohtak ia lansa petras a securiores, ia bloci la trafica, ia ataca veculos, e ia atenta ensende la casa de la ministro de finansia.
@T Protestores inonda un vila franses con vino
@L aora_oji/2016/protestores_inonda_un_vila_franses_con_vino
====== Protestores inonda un vila franses con vino ======
5 agosto 2016
Un grupo protestante ia abri tances de vino en un vila de Frans sude, enviante miles de litres a sur la stradas.
La servis de crise ia debe aida controla la inonda e preveni ce lo entra a en parces suteran de autos.
La faores ia dise ce los parteni a la Comite Rejional de Ata par Vinores (CRAV), un organiza violente.
CRAV es turbada par emportas barata e ia fa otra atacas a ante.
"Perce la esta ata? Car nos es nunca escutada," un portavose de CRAV ia informa jornalistes.
La ataca ia aveni en Sète, un vila de porto en Languedoc-Roussillon, un de la plu importantes de la rejiones de Frans cual produi vino.
Alga suteras e casas prosima ia deveni inondada.
Plu temprana en esta anio, Espania ia clama la ambasador de Frans pos cuando cultivores franses ia saisi camiones espaniol e ia drena sua carga de vino, prosima a Le Boulou en Frans sude.
Frédéric Rouanet, un xef de sindicato local per vinores, ia condena la ata la plu resente, ma ia dise ce ance el es consernada par la cuantia cresente de emportas barata cual apare en botecas franses.
@T Protestores oposa la cuantia de turistes en Venezia
@L aora_oji/2016/protestores_oposa_la_cuantia_de_turistes_en_venezia
====== Protestores oposa la cuantia de turistes en Venezia ======
13 novembre 2016
Sentos de abitores de Venezia ia protesta contra la despopli rapida de esta site italian.
Protestores ia pende un avisa de la ponte famosa Rialto, e algas ia porta valises per simboli la nesesa de parti.
Persones local dise ce los deveni forsada a via par luas custosa, un manca de casas, e un crese de la cuantia de apartes luada a visitores a custas inflada.
La cuantia de abitores de Venezia ia cade a min ca 55 mil. En 1951, lo ia es sirca 175 mil.
Alga de la protestores ia es asetada par la ofisia de site e ia dise a pos ce los ia es corajida par la consenta.
Venezia es un site depintin sin autos, a lado de un lagon. La cuantia de persones en lo crese enorme en la dia, spesial en la saison presosa cuando 60 mil turistes visita a veses.
Plu temprana en esta anio, persones sur barcos peti ia atenta impedi ce un barcon de turi ariva a doca.
La maior de la site ia proposa imposta la turistes de un dia per aida contra la problem.
"Venezia perde mil abitores per anio," Matteo Secchi ia dise. El es la xef de la asosia cual ia organiza la protesta. "Nos deveni Pompeii, un vila a cual persones veni per visita e dise ce lo es merveliosa, ma nun abita ala."
@T Putin protesta contra la proibi de atletisme rusce
@L aora_oji/2016/putin_protesta_contra_la_proibi_de_atletisme_rusce
====== Putin protesta contra la proibi de atletisme rusce ======
18 junio 2016
Vladimir Putin, la presidente de Rusia, ia dise ce lo es nonjusta ce la ecipo rusce de atletisme lejera es ancora proibida de concursos internasional, incluinte la Juas Olimpial de esta anio en Brasil.
La Asosia Internasional de Federas Atletal (IAAF) ia deside no sutrae la suspende, ajuntada pos acusas de drogis sponsorida par la governa.
Atletas individua pote compete en modo neutral si los demostra ce los es limpa, sin drogas.
Putin ia recomenda un interveni par la Comite Internasional Olimpial (CIO). La dirijores de la CIO ia dise ce los va fa oji un confere telefonal per discute la tema, ante un consenta completa de la CIO en Lausanne a martedi.
"On ave prinsipes universal reconoseda de lege, e un de los es ce la culpablia debe sempre es personida," Putin ia comenta. "Perce la persones ci ave no relata a violes ta sufri per los ci ia fa la violes? Me suposa ce nos va fa un discute con nosa colaborores en la strutur mundal antidrogi, e me espera un reata conveninte de la Comite Internasional Olimpial."
La pais ia es suspendeda par la IAAF en novembre 2015, pos un reporta autonom par la Asosia Mundal Antidrogi (WADA) cual ia descrive un cultur de usa vasta de drogas, con la envolve an de ajenterias secreta.
A pos, Rusia ia fa reformis incluinte un revisa completa de la regulas, la introdui de probas autonom, e lesones antidrogi en scolas.
Un ecipo ia studia esta reformis, ma un reporta nova par WADA, publicida a martedi, ia conteni plu alegas danante. An si on ia fa progresas notable per sasia la criterios de la IAAF, lo ia dise, plu laboras resta.
Spesial, lo pare ce la cultur profonda de tolera drogis no ia cambia. La atletas e sua instruor xef pare no vole reconose la estende de la problem; on ancora no ia crea un infrastrutur forte e produosa contra lo, capas de deteta e preveni; e on ave alegas detaliosa ce la ministreria de sporte ia dirije un sistem de drogi e asconde.
WADA ia dise ce ofisiores en Rusia es impedida de proba atletas, e es menasada par ajenterias de securia.
Rune Andersen de la IAAF ia dise ce la atletisme rusce es "contaminada par drogi, an a la nivel la plu alta". El ia comenta: "La drogi sistemosa cual ia aveni en Rusia -- distingui la atletas limpa es difisil."
John Coates, la vispresidente de la CIO, ia dise ce on debe continua proibi atletas rusce e no permete ce los partisipa en la Olimpiales cual va comensa en Rio de Janeiro a 5 agosto. El ia sujesta ance ce en Rusia la ajenteria antidrogi e la organiza atletal es "putrida asta la cor".
Entretempo, Yelena Isinbayeva, un saltor con palo ci ave 34 anios e medalias de oro ganiada en la Olimpiales de 2004 e 2008, ia dise ce el va defia la deside de la IAAF en corte legal, declarante ce lo es "un viole de diretos umana".
El ia ajunta: "Me es deludeda e coler. Me es ofendeda. Nun ia batalia per nos diretos, e on ave un ansia enorme sur la IAAF mesma e sua disposa a defende la diretos de atletas limpa. On culpa nos per un cosa cual nos no ia fa. Me no va resta silente, me va ata. Me va apela a la corte de diretos umana."
En un declara, la ministreria de sporte de Rusia ia descrive se como "estrema deludeda" par la deside de la IAAF, ajuntante ce lo crede ce "la sonias de atletas limpa deveni destruida par causa de la condui odiable de otra atletas e ofisiores".
Sebastian Coe, la presidente de la IAAF, ia dise ce "no politica" es envolveda en la deside sur proibi Rusce. El ia asentua la natur unida de la deside e la diversia internasional de la membros de la consilio.
@T Rebelores suri libri Manbij de Daex
@L aora_oji/2016/rebelores_suri_libri_manbij_de_daex
====== Rebelores suri libri Manbij de Daex ======
13 agosto 2016
Soldatos curdi e arabi dise ce los ia libri la vila Manbij en Suria norde de la organiza Daex ("Stato Islamiste"), blocinte la via de esta a Europa.
La alia de militias ia combate per 73 dias per esclui Daex. A la dia final, los ia libri 2000 persones ci ia es usada como scermos umana.
Daex ia catura Manbij, prosima a la frontera turces, a du anios ante aora. Vias a Aleppo, la site du de Suria, a media de batalia, e a Raqqah, la capital de Daex, pasa tra la vila.
La alia de Fortias Democrata Suri inclui YPG (Unias de Proteje Poplal), la militia potiosa curdi. Los ia es suportada en sua campania contra Daex par atacas airal, gidada par la SUA, contra locas de Daex.
Respondente a reportas de la scermos umana, Federica Mogherini, la coordinor xef de la Uni European sur politica de esternas e securia, ia dise ce Daex continua "presenta un menasa a la persones de Suria, Irac, la rejion, e ance a Europa e a ultra."
El ia ajunta: "La avansas militar resente contra Daex par la Alia Global, juntada con la Fortias Democrata Suri en Suria norde-ueste, es bonvenida, e la UE va continua dedica sua laboras, como parte de la Alia, a sua campos nonmilitar de ativia."
La vias tra Manbij ia deveni esensal per la capasia de Daex de move combatores, armas, e furnis a en e a estra Suria.
Seguente la Oserveria Suri per Diretos Umana, cual monitori la gera de distante, sirca 500 autos ia parti de Manbij, portante membros de Daex e nonmilitares. Los ia vade a norde-este en diije a Jarabulus, un vila controlada par Daex a la frontera turces.
@T Redores xines critica la Olimpiales de Rio
@L aora_oji/2016/redores_xines_critica_la_olimpiales_de_rio
====== Redores xines critica la Olimpiales de Rio ======
2 agosto 2016
Jornalistes e usores de redes sosial xines ia comenta amarga sur la state mal de la abitadas per atletas en Rio de Janeiro.
On mostra ansia sur la securia de la ecipos xines. Atletas ia cexa ce la situa impedi sua eserses.
Multe redores nomi ja la juas en Brasil "la Olimpiales la plu mal de istoria".
416 olimpianes xines es en Rio.
La ajenterias nasional xines de novas ia vosi sua ansia sur securia de pos april, cuando competes inisial ia aveni. On ia reconose un problem de securia pos cuando scrimores fema ia es rubada e membros de la ecipo de xuta ia trova "paias nonpermeteda" en sua cartas de credito.
En esta semana, la ministreria de esternas ia avisa visitores xines sur evita partes "perilosa" de Rio, e ia promete aumenta la proteje per atletas xines pos cuando un corsor de ostaculos ia deveni un vitim de un engana.
La bagaje de Shi Dongpeng, incluinte sua computador, ia es furada en un rus complicada en cual algun ia distrae el par pare vomita sur el.
Jornalistes ia usa plataformas de lingua engles per informa lejores internasional sur la situa cual sua atletas fronti.
Un conta profesal a Twitter alega ce la abitadas per la atletas es mal construida e nonsecur a veses. Lo mostra un foto de la sala de un juor de tenis de table cual ave un buco baliante en la sofito.
Otra postas dise ce alga salas ave no eletrica o an no acua. On critica ance la eleje de comedas ueste a la vileta olimpian.
Feng Zhe, un campion de baras paralel, ajunta ce "tota la vasones en la eserseria es blocida, e donce tota es cluida", e ce "ecipores fema pote fa no otra ca revade a la vileta".
Ning Zetao, un nador olimpian, ia fa no comentas negativa, ma deses de miles de persones ia visita sua paje de Weibo per comenta sarcasmosa ce el debe "garda contra acua nosiva".
La plu de postas usante la parola #RioOlympics veni de redores ci critica la riscas parente de securia. Un ia descrive la aveni como "un broma grande".
Un otra dise ce la taxe major per la atletas de esta anio es "reveni vivente".
Xina ia es orgulosa sur la Juas Olimpial de 2008 en Beijing, cual ia atrae 4,7 mil milion vidores de tra la mundo. Los ia es la juas la plu televideda de istoria.
@T Refujadas maladi en la fria
@L aora_oji/2016/refujadas_maladi_en_la_fria
====== Refujadas maladi en la fria ======
8 janero 2016
Con la ariva de temperatures jelante, medicistes laborante a campas aidante refujadas en la Balcanes dise ce los nota un alti de la cuantia de migrores maladinte.
La area esperia temperatures tan basa como -11°C.
La asosias carital Corpop Medical Internasional e Medicistes Sin Fronteras dise ce la plu de pasientes sufri de problems respiral, per esemplo la broncite e la gripe.
Un ansia esiste ance sur los ci refusa o no xerca trata.
A la puntos xef de refujadas a la fronteras serbsce con Macedonia a la sude e con Corvatsca a la norde, on ofre aida medical, vestes caldinte, e comedas.
Corpo Medical Internasional opera un clinica tempora a la stasion ferovial en Sid, un vila pico en Serbia norde.
La xef de acel ecipo, Sanja Djurica, ia dise: "En la semana pasada, cuando temperatures ia es min sever, nos ia vide sirca 50 o 60 persones per dia. Aora en esta semana, cuando la temperatur ia basi, la cuantia es aprosima 100 per dia en loca. Cuasi tota de los sufri de maladias respiral causada par la fria."
Medicistes ia asentua ance la efeto psicolojial grande a los ci fa esta viajas migrante.
En Sid, on dispone psicolojistes, e an si la refujadas tende resta ala per mera un pico de oras, medicistes e aidores ave alga tempo per furni "aida prima psicolojial" a los.
Djurica ia comenta: "Lo es un caso de comforta emosial, escuta empatica, e coraji tecnicas de maneja. Los es grasiosa per encontra algun ci vole escuta los."
@T Renzi perde la referendo italian
@L aora_oji/2016/renzi_perde_la_referendo_italian
====== Renzi perde la referendo italian ======
5 desembre 2016
La ministro xef de Italia, Matteo Renzi, ia resinia pos un defeta forte en un referendo sur sua projeta de reformi la constitui.
En un confere jornaliste en la tarda de note, el ia dise ce el aseta la culpablia per la resulta, e ce la campa de "no" debe aora fa proposas clar.
Pos la conta de la plu de votas, la campa de "no" gania con 60% contra 40% per "si".
La partisipa ia es cuasi 70%, en un referendo cual on ia regarda como un momento per rejistra noncontentia con la ministro xef.
La vinse par "no" ia es plu grande ca prevideda par la sonda la plu resente en novembre.
La Promove Sinco Stelas dise ce lo prepara aora per governa Italia. Sua xef, Beppe Grillo, ia proposa ce on fa un vota pos no plu ca un semana.
Entretempo, la eleje presidental en Osteraic ia es ganiada par Alexander Van der Bellen contra la aspiror estrema destriste Norbert Hofer.
Van der Bellen ia descrive la resulta como un vota per un Osteraic proeuropan fundida sur "libria, egalia, e unia".
Referente a la bandera osteraices, el ia dise ce "un sinial roja-blanca-roja de espera e cambia vade oji de Osteraic a tota la capitales de la Uni European".
@T Republicistes abandona Trump pos sua comentas repulsante
@L aora_oji/2016/republicistes_abandona_trump_pos_sua_comentas_repulsante
====== Republicistes abandona Trump pos sua comentas repulsante ======
9 otobre 2016
En la SUA, multe republicistes major ia retira sua suporta per Donald Trump, aspiror de la presidentia, pos la publici de comentas ofendente par el a tema de femes.
A venerdi, la jornal The Washington Post ia revela un rejistra audio de 2005 en cual el vanta ce el ia palpa e besa femes.
Trump ia responde ce el va abandona nunca la compete per deveni la presidente, e va delude nunca sua suportores.
A la min des-du republicistes ia dise aora ce los no va vota plu per el. La plu resentes es John McCain, aspiror pasada de la presidentia, e Condoleezza Rice, ministro pasada de esternas.
McCain ia dise ce la comentas de Trump "nonposibli ce on continua ofre an un suporta dependente per sua aspira". Rice ia dise: "Basta! Donald Trump no debe es la presidente. El debe retira."
Kelly Ayotte, senator de la stato Nova Hampshire, ia dise: "Me no pote suporta e no va suporta un aspiror de la presidentia ci vanta sur degrada e ataca femes." El ia dise ance ce el no va vota per Hillary Clinton ma intende scrive la nom de Mike Pence, la aspiror republiciste de la vispresidentia, sur sua paper de vota.
Alga otra republicistes ia dise ce los va vota per Pence ance.
Trump mesma ia asentua ce el vide "no probable ce me va abandona", ajuntante ce el reseta un suporta "noncredable". En un tuita, el ia dise ce "la jornalistes e la funda desira tan multe ce me parti de la corsa".
Sua sposa Melania ia declara ier ce "la parolas usada par mea sposo es nonasetable e ofendente a me". Ma el ia ajunta ce sua sposo ave "la cor e mente de un xef", disente ce el "espera ce on va aseta sua escusa, como me ia fa, e va foca a la problemes importante cual sta ante nosa nasion e la mundo". El ia sposi Trump en 2005, la anio de la rejistra ofendente.
Paul Ryan, presidente de la Salon basa, ia invita ja Trump a un aveni campaniante en la stato Wisconsin a esta fini de semana, ma ia cansela sua invita, descrivente se como "repulsada" par lo cual el ia oia. On ia intende ce Pence vade en loca, ma el ia deside resta asente.
Hillary Clinton, la oposor democrata en la compete per la presidentia, ia descrive la comentas de Trump en la rejistra como "repulsante".
En la rejistra, fada en 2005 cuando Trump ia es a punto de apare en un telenovela, el dise ce "on pote fa cualce cosa" a femes "cuando on es un stela" e usa an la espresa "saisi los par la cuno".
Sua parolas conteni un violentia casual cual cualce vitim de maltrata sesal reconose e cual repulsa la plu de femes.
Trump ia publici un declara video en cual el escusa se per la comentas. Esta ia ombri la publici de transcrives par Wikileaks de parlas par Clinton a asemblas privata.
La debate televisada du entre Trump e Clinton va aveni a esta sera en la site San Louis en la stato Missouri.
Trump ia dise resente ce en la debate el no intende reali sua menasas de raconta sur la adulteras de Bill Clinton. Ma en sua escusa video, el ia ataca direta la presidente pasada: "Bill Clinton ia maltrata vera femes, e Hillary ia tormenta, ataca, e vergonia sua vitimes. Nos va discute esta en la dias veninte. Asta revide a la debate a soldi."
@T Romanes va eleje cisa sua maior fema prima
@L aora_oji/2016/romanes_va_eleje_cisa_sua_maior_fema_prima
====== Romanes va eleje cisa sua maior fema prima ======
19 junio 2016
Lo pare probable ce Roma va eleje sua maior fema prima en un ronda desidente de vota munisipal.
On regarda Virginia Raggi, de la Promove Sinco Stelas antisistem, como la favoreda contra Roberto Giachetti de la Partito Democrata sentral destriste.
Un vinse par Raggi ta es un colpa contra Matteo Renzi, la ministro xef de Italia. La Partito Democrata de Renzi risca perde ance en Milano, la capital finansial de la pais, e va esperia batalias difisil en Torino e Bologna.
Raggi es un avocato de 37 anios. El ia gania 35% de votas en la ronda prima a du semanas ante aora, contra 24% per Giachetti.
Analistes dise ce un vinse en Roma va dona a Sinco Stelas e sua mesaje antiglobaliste un plataforma forte per la elejes parlamental en 2018.
La maior seguente de Roma va trova un site afondante en detas de plu ca €13 mil milion ($15 mil milion), la duple de sua spende presuposada anial.
Romanes es frustrada par dolinetas, montones de dejetada, e problemes seria de transporta publica e de casas.
La Promove Sinco Stelas ia es fundida par Beppe Grillo, un comediste, en 2009, e lo campania contra la froda cual domina ja la politica italian tra anios.
Ignazio Marino de la Partito Democrata ia resinia como maior de Roma en otobre, pos un scandal de spende. La site es sin maior en la tempo interveninte.
Un scandal multe plu grande, envolvente la influe alegada de la mafia en la governa local de Roma, ia nuri la asende de Sinco Stelas. La partito desira institui se per deveni la oposor xef en la vota jeneral de 2018.
Renzi ia aposta sua futur political sur un referendo en otobre en cual el vole ce italianes suporta reformis constitual profonda. La intende es fini la tradision de governas "porda caruselin" e ajunta stablia pos anios de disputas en partitos e de nonprogresas en legi.
@T Rusia prosede un biblioteciste ucrainsce sur provoca odia
@L aora_oji/2016/rusia_prosede_un_biblioteciste_ucrainsce_sur_provoca_odia
====== Rusia prosede un biblioteciste ucrainsce sur provoca odia ======
3 novembre 2016
La dirijor de la Biblioteca de Leteratur Ucrainsce en Moscva es legal prosededa sur provoca odia etnical contra rusces.
On acusa Natalia Xarina de sperde leteratur proibida cual on ia clasi como estremiste.
El ia nega la acusas en corte, e sua avocato ia dise ce el crede ce la caso ave un motiva political.
La prosede ia comensa con un intercambia enerjiosa entre la biblioteciste e la avocato prosedente.
Prima, la prosedor ia sita un lista longa de publicis ucrainsce cual es o proibida o regardada par espertas como "degradante" a rusces. El ia acusa formal Xarina de oteni la libros e libretas e un CD e dispone los a la public.
"Me no comprende la acusa e donce me senti no culpa," la dirijor de biblioteca ia responde, vestida en un cardigan longa e sapatos gris. "Me demanda ce la prosedor respetada esplica cual atas me ia fa per sperde enemia," el ia ajunta, esijente sabe par cual motiva el ia ata.
Xarina, ci ave 59 anios, nega ance un plu acusa ce el ia froda reservas de la biblioteca.
Sua avocato dise ce atestores descrive ce los ia vide ofisiores plantante libros proibida a la biblioteca cuando los ia ariva per xerca la construida en otobre 2015.
"Lo es multe triste ce algun atenta tira esta corte a politica," Ivan Pavlov ia informa la judor.
Relatas entre Moscva e Ciev es ancora estrema fria pos cuando Rusia ia propri Crim e soldatos prorusce ia saisi potia en partes de Ucraina este en 2014.
"Lo no es un coaveni ce on ia xerca la biblioteca de leteratur ucrainsce, e no de la bielarusces o cozaces," Pavlov ia razona.
La prosede ia es pausada per tre semanas, e Xarina va resta prisonida en sua casa, como el ia fa tra plu ca un anio. On ia permete sola resente ce el sorti per un pasea dial, e el es proibida de parla direta a jornalistes.
Si on trova final ce la biblioteciste es culpable, el ta pote spende multe plu ca un desenio en prison.
@T Rusia retira se de Suria
@L aora_oji/2016/rusia_retira_se_de_suria
====== Rusia retira se de Suria ======
15 marto 2016
Fortes rusce prepara comensa parti de Suria pos un anunsia surprendente ier par presidente Vladimir Putin.
La ministro de defende, Sergei Shoigu, ia comanda la retira, e on carga aora aviones per vola a Rusia.
Ofisiores ueste ia bonveni cauta la move, disente ce lo ta pote presa la governa de Suria a partisipa en negosias. Discutes de pas entra ja a sua dia du.
Entretempo, un comision de la Nasiones Unida va presenta oji un reporta sur crimines de gera en Suria.
La redui de la fortes rusce ia es anunsiada a un consenta entre Putin e sua ministros de defende e esternas.
Rusia es un aliada esensal de la presidente suri, Bashar al-Assad, de ci sua ofisia ia rejeta divinas ce un divide ia apare entre la du paises, descrivente la move como mutua acordada.
La campania airal rusce ia comensa en setembre pasada, aidante la governa suri e permetente ce lo recatura teritorio de rebelores.
On no ia dona detalias sur la cuantia de aviones e soldatos cual va es retirada de la base Khmeimim en la provinse Latakia. On ia indica ance no limita de tempo per completi la retira.
Ma la ministreria rusce de defende ia declara en sua pajeria ce la "parte xef" de la grupo de fortes armada rusce en Suria deveni relocada a la Federa Rusce.
Lo ia ajunta ce aviones de la base va fa la vola a Rusia -- de plu ca 5000 cilometres -- en forma ofisial, acompaniada par la aviones de transporta, con pausas per prende carburante longo la via.
Lo no es clar cuanto soldatos Rusia ia envia a Suria, ma estimas par la SUA sujesta ce la cuantia es entre 3000 e 6000.
An tal, Putin ia dise ce Khmeimim e la base marinal mediteraneo de Rusia a Tartus va continua opera en modo normal.
Rusia insiste ja longa ce sua campania de bombarda ataca sola grupos teroriste, ma potias ueste ia cexa ce la atacas colpa ance oposores political de Assad.
En Genève, discutes con intende de fini la gera continua. On previde ce la ambasador NU per Suria, Staffan de Mistura, va consenta con la supragrupo oposante, la Comite Alta de Negosias.
Plu temprana, de Mistura ia descrive la discutes como "un momento de veria" e ia averti ce on ave no otra scema per si la discutes va fali. La sola alternativa ta es un revade a gera.
La plu de partisipores en la gera ia acorda un sesa de batalia, e jeneral on ia obedi esta, an con reportas de alga violes.
En un telefoni, Putin e Barack Obama, la presidente SUA, ia discute la situa en Suria e "la pasos seguente nesesada per reali completa la sesa de batalia" acordada en la mense pasada.
La Cremlin ia dise ce ambos presidentes ia "recomenda un intensi de la prosede per un solve political" de la gera.
La move rusce ia reseta un bonveni reservada de diplomatas ueste e la oposores suri.
@T Salvador colpa un gang potiosa
@L aora_oji/2016/salvador_colpa_un_gang_potiosa
====== Salvador colpa un gang potiosa ======
29 julio 2016
La autoriosas en Salvador ia anunsia un serie de atacas contra un de la ganges criminal la plu potiosa de la pais, la Mara Salvatrucha o MS-13.
On ia aresta sinco xefes de la gang, incluinte la xef de finansia. La polisia ia deteni 120 persones e ia saisi armas, mone, e drogas.
Salvador es pestada par violentia de ganges e ave un de la tasos la plu alta de omiside en la mundo.
Multe de la moris ia es causada par la compete entre la MS-13 e un otra gang, nomida Barrio 18. Un sesaspara tempora entre la du en 2012 ia redui la taso de omiside par 40%.
La atacas contra MS-13 ia comensa a la note de mercurdi. La blancos ia es oteles, bares, restorantes, bordeles, casas, e transporta liada con la gang. Miliones de dolares ia es saisida e alga contas de banco ia es suspendeda.
Mauricio Ramírez Landaverde, la ministro de justia e securia, ia dise ce esta es la ves prima cuando la governa ia disturba la finansia de la gang par investiga como los investi sua ganias nonlegal.
MS-13 e Barrio 18 ave sua radises en California sude en la desenio de 1980.
Los ia es creada en Los Angeles e sua suburbes par migrores povre (e nonlegal, per la plu) ci ia fuji de geras interna en America Sentral. Cuando la geras ia fini ala, multe gangsteres ia es deportada de la SUA, esportante la cultur de gang de Los Angeles a la mesma tempo.
On estima ce Salvador ave 70 mil gangsteres ativa.
@T Senegal deteni 900 persones per razonas de securia
@L aora_oji/2016/senegal_deteni_900_persones_per_razonas_de_securia
====== Senegal deteni 900 persones per razonas de securia ======
27 janero 2016
En Senegal, la polisia ia deteni 900 persones como parte de un opera de securia pos atacas par combatosas en Burcina Faso e Mali.
La arestas, cual no es relatada con terorisme, ia aveni a la fini de semana en la capital Dakar e en la site Thiès.
Temes sur securia en la rejion ia es levada par la atacas contra un otel e Mali e un otel e restorante en Burcina Faso. Ambos atacas ia es reclamada par islamistes combatosa.
Senegal ia es relativa secur asta aora, ma lo es un destina popular de turistes.
En la semana pasada, la governa senegales ia comanda ce oteles debe boni sua securia, menasante clui los si los no obedi.
La ministro de internas ia dise ce la soldatos de securia senegales va aumenta sua patrulias.
On senti ja esta presentia de securiores. On vide cuantias plu grande de polisiores, e multe xercas de veculos aveni.
La persones detenida a la fini de semana es suspetada no de terorisme, ma como parte de esta vijila de securia plu larga. Sua ofendes varia de posese drogas a ave documentos noncoreta per sua veculos.
Un portavose per la ministreria de justia ia dise: "La securia es refortida a tota niveles."
La organiza al-Qaida en la Magrib Muslim (AQMM) ia dise ce lo ia esecuta un ataca en Ouagadougou, la capital de Burcina Faso, cual ia mata 30 persones, a 15 janero.
Acel mesma grupo ia reclama ance la aseja de un otel en Bamako, la capital malian, en novembre de la anio pasada, en cual 20 persones ia mori.
AQMM ave sua base en la deserto Sahara e vaga entre Mali, Nijer, e Jazair. Asta aora, Senegal ia evita un ataca major par combatosas islamiste, an si lo ave un frontera con Mali.
@T Sento persones mori en un focon de templo barati
@L aora_oji/2016/sento_persones_mori_en_un_focon_de_templo_barati
====== Sento persones mori en un focon de templo barati ======
10 april 2016
En Barat, plu ca sento persones ia mori en un focon a la Templo Puttingal en Paravur.
La focon ia comensa a sirca 03:30 de ora local, cuando un esplode ia aveni en un reserva de pirotecnicales per usa en selebra un festa de anio nova indu.
Multe persones ia mori cuando un construida a la templo ia colasa. Plu ca 200 es ferida.
La ministro xef de la pais, Narendra Modi, viaja a la loca, e ia tuita ce la asidente en Paravur es "angusante e xocante ultra la capasia de parolas".
Multe de la feridas es en un state grave e on trata los a la scola medical de governa en Thiruvananthapuram, la capital de la stato Kerala.
La xef de polisia de la stato ia dise ce multe de la mores es tan carbonida ce on va debe usa probas de ADN per identifia los.
On ia senti la colpa de la esplode en casas a distantia de an un cilometre. Un abitor ia comenta: "Pesos enorme de beton ia vola tra la aira. Blocos ia atera en nos jardin."
La ministro de internas ia comanda ce on investiga la asidente, e la ministro xef de Kerala va visita ance la loca a esta matina.
On ia teni la pirotecnicales en prepara per selebras a jovedi de un festa local, nomida vishu, a la comensa de la anio nova indu.
An tal, la judor distrital ia refusa permete ce on mostra la focos artal a esta ves, par causa de ansia sur securia e cexas par abitores prosima.
La polisia intende prosede la manejores de la templo e la contratores ci ia prepara la mostra de focos artal.
Pirotecnicales e petardos es comun usada a festas de templo e otra avenis publica en Barat, e asidentes no es rara.
@T Shimon Peres mori
@L aora_oji/2016/shimon_peres_mori
====== Shimon Peres mori ======
28 setembre 2016
Shimon Peres ia mori a la eda de 93 anios. El ia servi a du veses como la ministro xef de Israel e a un ves como la presidente.
El ia sufri un ataca serebral a du semanas ante aora. Sua state ia boni ante un mali subita ier.
Sua fio Chemi ia gida tribuis a "un de la padres fundinte de la stato Israel" ci "ia labora nonfatigable" per lo.
Peres ia es un de la ultimas de un jenera de politicistes israeli presente a la nase de la nasion nova en 1948.
El ia gania la Premio Nobel de pas en 1994 per sua rol en negosia acordas de pas con la filastinis en la anio presedente. El ia dise ce la filastinis es la "visinas la plu prosima" de Israel e ta pote deveni sua "amis la plu prosima".
Peres ia mori en un ospital prosima a Tel Aviv en la temprana de esta matina, con sua familia a lado de sua leto. El ia es ja en la unia de cura intensa de la Sentro Medical Sheba pos un ataca serebral major a 13 setembre.
Benjamin Netanyahu, la ministro xef de Israel, ia espresa sua "tristia personal profonda sur la mori de la presidente pasada e amada de la nasion".
En un declara, Barack Obama, la presidente de la SUA, ia nomi Peres sua "ami cara", comentante: "El ia es gidada par un imajina de la dinia e progresa cual, el ia sabe, persones bonvolente ta pote avansa juntada."
Ephraim Mirvis, la rabi xef de Britan, ia descrive Peres como "un jigante vera entre umanas" e "la esemplo vivente la plu grande de un crede nonmovable a la xerca de pas an contra tota. Trajedial, asta aora, nos no ia susede. Ma de Shimon Peres nos ia aprende ce nos debe nunca desteni acel promete corajosa a pas, an cuando tota la mundo sirca nos vole fa tal."
Peres ia divide sua Premio Nobel de pas con la ministro xef Yitzhak Rabin, ci ia es asasinada a tempo plu tarda, e la xef filastini Yasser Arafat.
A la comensa de sua carera political longa, on ia encarga el con organiza de empleadas e compra de armas per la Haganah, la presedente de la Fortes de Defende de Israel.
El ia negosia un acorda con Frans afin la nasion israeli nova ta es furnida con jetos xasante Mirage. El ia institui ance la compleso nucleal secreta de Israel.
El ia es la ministro de defende en 1976, cuando saisores filastini ia diverje un avion de Israel a Entebbe en Uganda. El ia supravide la salva susedosa de plu ca 100 ostajes.
Inisial un promovor de colonias iudi a la Riva Ueste ocupada, Peres ia deveni plu tarda un simbol political major de pas. El ia parla a multe veses sur la nesesa de compromete sur esijes teritorial en areas filastini.
El ia manteni un program ativa de apares publica an en sua senese, xef en contesto de sua organiza nongovernal, la Sentro Peres per Pas, cual promove lias plu prosima entre israelis e filastinis.
En 2013 el ia dise: "On ave no alternativa de pas. La vade a gera es nonrazonante."
El ia retira se de sua rol como presidente de la pais en 2014.
Sua funera va aveni a venerdi a Monte Herzl, la semetero nasional de Israel en Ieruxalim. Sua caxon va es locada a la parlamento a jovedi afin la popla pote ofre respeta.
@T Soldatos bangla salva ostajes en un caferia
@L aora_oji/2016/soldatos_bangla_salva_ostajes_en_un_caferia
====== Soldatos bangla salva ostajes en un caferia ======
2 julio 2016
En Bangladex, soldatos ia vacui un caferia en la capital Dhaka, do fusilores ia prende ier a la min dudes ostajes.
Des-tre ostajes, incluinte cuatro persones stranjer, ia es salvada, e a la min sinco atacores ia es matada par fusil. La state de otra persones resta nonclar.
On crede ce alga de la ostajes es italian e japanes.
La grupo combatosa Daex, cual nomi se la Stato Islamiste, ia dise ce lo ia fa la ataca.
En un parla televisada, la ministro xef Sheikha Hasina ia dise: "Lo ia es un ata estrema odiable. De cual spesie de muslim es esta persones? Los ave no relijio. On debe resiste esta teroristes. Mea governa ia deside firma desradisi la terorisme e combatosia de Bangladex."
Koichi Hagiuda, la secretor suordinada de consilio de Japan, ia dise ce un sitadan japanes ia es fusilida e ferida en la ataca, e ce sete otras ia es en la caferia. La governa de Japan ancora no ia susede comunica con los.
Plu temprana, on ia oia esplodes e fusilis forte cuando la armada e comandos marinal ia invade la caferia en la matina. Los ia es suportada par la polisia e la paramilitaria Gardores de Frontera Bangla.
On ia vide ance moves de veculos blindada en la visineria. La fusilis ia sesa pos sirca un ora.
Sumon Reza, un supravidor de la caferia, ia descrive sua esperia: "Me ia es en la teto. La construida intera ia secute cuando los ia detona esplodentes."
On no ia sabe direta la identia de la ostajes salvada e la state de otra ostajes sur ci on crede ce los ia es en la caferia.
A la min du polisiores ia es matada en intercambias de xuta en la tarda de venerdi, e tredes polisiores ia es ferida.
La ataca ia comensa a sirca 21:20 ier, cuando oto o nove omes armada ia entra subita a la caferia en la parte diplomata de la site e ia comensa xuta.
Un declara par la ajenteria de novas de Daex ia dise ce militaristes ia ataca un restorante "comun visitada par stranjeres". Lo ia dise ce plu ca dudes persones "de nasionalias diversa" ia es matada, ma on no ia confirma esta.
On reporta ce la ambasador italian en Dhaka, Mario Palma, ia dise ce on crede ce sete italianes ia es en la caferia.
Teninte-colonel Tuhin Mohammad Masud, la comandor de la Batalion de Ata Rapida, ia esplica ce la fusilores no ia responde cuando on ia demanda negosia con los. Lo no es clar esce la atacores ia esije cualce cosa.
La ataca segue un serie de matas de blogores secular, ativistes ge, profesores, e membros de minorias relijial, per cual on culpa combatosas islamiste.
La caferia es descriveda como popular con sitadanes a stranjer, diplomatas, e familias de clase media.
@T Soldatos franses es atacada estra un mascita
@L aora_oji/2016/soldatos_franses_es_atacada_estra_un_mascita
====== Soldatos franses es atacada estra un mascita ======
2 janero 2016
Soldatos ia fusili un om estra un mascita en la sude-este de Frans cuando el ia gida un auto contra los.
Como reportada par la polisia, la gidor ia feri un de la cuatro soldatos gardante la mascita en Valence.
El ia es fusilida a sua braso a gama, ma sua feris no menasa sua vive, e el es aora en ospital.
La fortes de securia franses es ancora estrema vijilosa pos la atacas en Paris a 13 novembre.
On no sabe la motiva per la ataca, cual ia aveni entre sesiones de prea, cuando multe persones ia es estra la construida.
La polisia dise ce la om ia dirije sua auto a la soldatos a du veses. Los ia xuta a el cuando el ia reversa ja sua auto e ia es reveninte en dirije a los pos sua atenta prima.
On dise ce el ave 29 anios e veni de Lyon, un site a distantia de un ora de Valence.
Un baleta deviante ia colpa la sura de un person vea en la visinia.
La ministro de defende, Jean-Yves Le Drian, e la ministro de internas, Bernard Cazeneuve, ia declara ce la soldatos ia fusili per defende se.
La maior local, Nicolas Daragon, ia loda sua autorestrinje "notable". El ia dise ance a jornalistes local ce la mascita es "nonestremiste".
Sirca des mil securiores es ancora posada sirca la pais per proteje locas delicata.
@T Soldatos veteran zimbabuean sesa suporta Mugabe
@L aora_oji/2016/soldatos_veteran_zimbabuean_sesa_suporta_mugabe
====== Soldatos veteran zimbabuean sesa suporta Mugabe ======
22 julio 2016
La asosia de soldatos veteran de Zimbabue, cual ia fa un rol major e a veses violente en suporta presidente Robert Mugabe, ia publici un declara retirante sua suporta de el.
Lo acusa Mugabe de tendes tiranin, egosentralia, e malgoverna.
On no sabe esce tota la membros de la asosia acorda con la testo.
La presa contra Mugabe, ci ave 92 anios, crese. Grupos en ZANU-PF, la partito governante, disputa publica per segue el, e on fa protestas sur la economia falinte. Ma Mugabe ia dise ce el intende aspira la presidentia denova en 2018 per governa asta sua mori.
An en la momentos la plu difisil de sua 36 anios en potia, Mugabe ia pote fida sempre la soldatos veteran, sua cameradas en la campania per libria de Zimbabue en la desenio de 1970. Los ia es suportores dedicada ci a veses ia furni a el la fortia per violentia political.
La declara, ier publicida pos un consenta de representores de tra la pais, ia averti: "Nos nota, con ansia, xoca, e angusa, la radisi de tendes tiranin, personida par la presidente e sua suportores, cual ia devora lenta la valuas de la campania per libria."
Lo pare ce la declara refleta no sola la opinas de alga soldatos veteran, ma ance alga persones militar major. Mugabe depende forte de la militaria per reteni sua potia.
En la declara, la veteranes dise ce los no va suporta la campania de Mugabe per reeleje. Los acusa el de abandona los per la alia joven de ZANU-PF.
Plu, la declara culpa la "gida bancarota" per la crise economial de la pais. Mone manca de la bancos, e la governa ave difisiles en paia ofisiores publica.
"Nos es angusada," la declara ia dise, "par la tende de la presidente a favore sua vitriol usual contra enemis persepida, incluinte protestores pasosa e ance soldatos veteran, cuando la economia es a punto de colasa. El es multe culpable per la situa grave de la economia nasional."
Plu temprana en esta semana, Mugabe ia responde a protestas antigovernal par recomenda ce Evan Mawarire, la prete ci ia organiza un greve nasional, ta parti de Zimbabue si el es noncontente con la situa ala.
On ia aresta Mawarire en la semana pasada, ma ia libri el cuando un corte ia rejeta la acusa de suverti. A pos, el ia sorti de Zimbabue a Sudafrica, do el ia dise ce el teme plu la critica par sua fias ce el fali reata ca la puni cual la governa ta pote dona a el si el ta revade.
@T Sosialistes espaniol permete la governa conserviste
@L aora_oji/2016/sosialistes_espaniol_permete_la_governa_conserviste
====== Sosialistes espaniol permete la governa conserviste ======
24 otobre 2016
En Espania, la sosialistes oposante ia vota per, en efeto, permete un governa minorial par la conservistes su Mariano Rajoy.
A un consenta en Madrid, un majoria de xefes de partito ia deside asteni cuando la parlamento vota sur la governa par la Partito Poplal.
La pais ia fronti la posible de un vota jeneral tre en un anio. Ma la sosialistes ia despone sua xef, Pedro Sanchez, plu temprana en esta mense, cuando el ia refusa asteni.
Rajoy ia gida un governa tempora pos perde sua majoria jeneral en un eleje en la desembre pasada. Un repete de la eleje en junio ia fali progresa la situa, ma ia forti sua mano.
La sosialistes ia es la sucampiones a ambos veses. Sua suporta ia es erodeda par Podemos, un partito nova de sinistristes radisal.
Tra desenio, la du partitos xef ia alterna en governa la pais, ma en la anio pasada, la vota ia es divideda a cuatro -- Sitadanes, un partito sentriste nova, ia fini a la loca cuatro.
La deside a soldi ia es asetada par 139 votas favorente, con 96 oposantes e du membros de la comite federal ci no ia vota.
La sosialistes ave 85 sejas, contrastada con la 137 ganiada par la Partito Poplal en junio.
Par causa de la asteni, la partito de Rajoy no nesesa plu trova 176 votas en la parlamento de 350 sejas per formi un governa. En loca, lo va pote susede con un majoria simple cuando la parlamentores asembla.
Oposores de asteni ia protesta estra la xeferia sosialiste con cartones con la parola "No".
Pablo Iglesias, xef de Podemos, ia dise ce la sistem jirante de du partitos ia fini con un alia gande entre acel du partitos.
An con la nonsertia, la economia de Espania ia manteni un crese constante de pico plu ca 3% per anio de pos la temprana de 2015. Turistes ariva en cuantia recordo e la nonemplea redui lenta.
An tal, la empresta par la governa es ancora multe plu alta ca la cuantia desirada, e la Uni European presa per basi lo en la anio veninte.
Sin un governa sentral e intera funsionante, on pote crea no politicas nova de bujeta.
@T Suiz fa un referendo sur la revenu fundal
@L aora_oji/2016/suiz_fa_un_referendo_sur_la_revenu_fundal
====== Suiz fa un referendo sur la revenu fundal ======
5 junio 2016
Suiz vota sur un proposa de introdui un revenu fundal garantiada per cada sitadan. Lo deveni la pais prima cual fa un tal referendo.
On proposa paia a adultes un revenu nonrestrinjeda de 2500 frances suiz ($2555) per mense, o si los labora o si no.
Suportores de la idea dise ce la labora en la sentenio 21 es sempre plu automatida, e ce min postos es disponable per laborores. Ma sondas sujestas ce sola un cuatri de votores suiz aproba la idea.
Su la defini de la revenu fundal, laborores ci gania ja plu ca 2500 frances no ta reseta plu mone.
On vide poca suporta per la idea entre la politicistes de Suiz, e an no un partito parlamental ia declara se como favorente lo.
La oposores razona ce un deslia de la mone ganiada de la labora fada ta es un mal paso per la sosia.
Ma Che Wagner de la grupo campaniante Revenu Fundal Suiz dise ce lo no ta es un paia per no cosa. "En Suiz, plu ca 50% de tota la laboras fada es nonpaiada. Los es laboras de cura, los es a casa, los es en comunias diversa, tal ce la laboras ta es plu valuada con un revenu fundal."
Luzi Stamm, un parlamentor destriste per la Partito de la Popla Suiz, oposa la idea. "Teorial, si Suiz ta es un isola, la responde ta es «si». Ma con fronteras abrida, lo es completa nonposible, spesial per Suiz, con un norma alta de vive. Si on ta ofre a cada individua un cuantia de mone suiz, on ta ave biliones de persones ci ta atenta move a Suiz."
On esplora la idea ance en otra paises. En Finland, la governa considera un periodo probante de dona un revenu fundal a sirca 8000 persones de grupos de revenu basa.
E en la site nederlandes Utrecht, on developa ance un projeta esperimental cual va comensa en janero 2017.
La revenu fundal es oji un de sinco temas sur la paper de vota suiz. On vota ance sur la finansia de servis publica e sur un simpli de la metodo per xerca refuja.
@T Suomi prisoni un polisior xef per contrabanda de drogas
@L aora_oji/2016/suomi_prisoni_un_polisior_xef_per_contrabanda_de_drogas
====== Suomi prisoni un polisior xef per contrabanda de drogas ======
30 desembre 2016
Un corte suomi ia condena la xef pasada de la polisia antidroga de Helsinki a des anios en prison per contrabanda de drogas e per multe otra crimines.
On ia judi ce Jari Aarnio ia aida un gang a emporta cuasi 800 cilogrames de haxix de Nederland e a vende lo en Suomi en 2011 e 2012.
On ia condena Aarnio, ci ave 59 anios, sur sinco crimines de droga e 17 otra crimines, incluinte un atenta de produi atestas falsa ce un om nonculpable ia es la xef de la gang de drogas.
Un aidor de la polisior, descriveda como un criminal local major, ia es ance condenada a des anios en prison.
Arnio ia pasa 30 anios en la polisia antidroga e ia es arestada en 2013. El ia nega tota la acusas, disente ce tota sua atas ia es legal e fada como parte de labora polisial.
Sua ecipo de avocatos ia dise ce Aarnio intende vade a la Corte de Apela de Helsinki per apela contra la condena de la corte de distrito.
En un caso separada en setembre, Aarnio ia es ja condenada a tre anios en prison per froda.
Crimines es relativa rara en Suomi en compara con la plu de otra paises european. Suomi es la pais du de la min criminosas, pos Danmarc, en un indise global compilada par Transparentia Internasional.
@T Sveria ajunta controlas de identia a sua frontera
@L aora_oji/2016/sveria_ajunta_controlas_de_identia_a_sua_frontera
====== Sveria ajunta controlas de identia a sua frontera ======
4 janero 2016
Sveria ia comensa esamina la identia de viajores de Danmarc, per atenta redui la cuantia de migrores ci ariva en la pais.
On va refusa entra a cualce viajor ci vole traversa la ponte Öresund par tren o bus, o ci vole usa la naveta de mar, si el no ave la documentos nesesada.
Viajores dial a Sveria va debe aora cambia sua tren a la airoporto de København e pasa tra puntos de identia.
Miles de tal viajores traversa la ponte a cada dia. Lo lia la sites svensce Malmö e Lund con la capital dansce, København.
Per obedi la regulas nova forsada par Sveria, on ia erije un serca sirca un de la plataformas a la stasion ferovial de la airoporto Kastrup en København.
Viajas direta de la stasion xef de ferovia de København, traversante la ponte Öresund a Sveria, va es no plu disponable. Companias ferovial ia redui la cuantia de trenes a Sveria, avertinte sur un posible de retardas major.
On previde ce la cambias va ajunta sirca 30 minutos a la viaja presente de 40 minutos.
Per aplica la controlas nova, la governa svensce ia oteni un esenta tempora de la acorda Schengen sur fronteras abrida en la Uni European.
En la mense pasada, SJ, la compania nasional de ferovia en Sveria, ia anunsia ce lo va sesa sua servis a e de Danmarc car lo no pote fa la esaminas de identia cual la lege svensce nova esije.
Su la lege, companias transportante va es multada si viajores a Sveria no ave un fotoidentia valida. SJ ia dise ce lo no va ave la tempo nesesada per controla los ci viaja entre København e Malmö par la ponte Öresund.
Milion migrores ia ariva en Europa par tera e mar en 2015, seguente la Organiza Internasional de Migra. Como Deutxland, Sveria es un de la destinas xef per migrores. Sveria ia reseta plu ca 150 mil solisitas de refuja en la anio pasada; contrastada, Danmarc previde reseta sola 20 mil refujadas en esta anio.
@T Tai lamenta sua re
@L aora_oji/2016/tai_lamenta_sua_re
====== Tai lamenta sua re ======
14 otobre 2016
La popla de Tai lamenta la mori de Re Bhumibol Adulyadej, la monarca la plu longa renante de mundo, ci ia mori ier con 88 anios.
En Bangkok, un fola emosiosa ia fa un vijila en la tarde de note, e folas en vestes negra pleni aora la stradas.
Plu tarda oji, on va prende la corpo de la re a la Templo de Esmeralda en la Palasio Grande. La lamenta ofisial va dura per un anio.
On previde ce Maha Vajiralongkorn, la prinse erital, va deveni la monarca nova, ma el ia demanda per un pospone de pasa de rena.
La consilio governante ia declara ce oji es un festa nasional, e banderas va vola sola partal levada per la 30 dias seguente.
La governa ia demanda ance ce la popla porta vestes negra e evita "avenis joiosa" en esta periodo. Locas de rede jornaliste ia ajusta sua pajes a blanca-negra, e xefes tra la mundo ia ofre sua tribuis.
Miles de lamentores sta aora sur la stradas de Bangkok espetante la prosegue funeral de la re. La prinse erital va fa la rituo tradisional de bani la corpo de la re a esta sera.
Bhumibol ia es regardada como un figur stablinte en un pais cual esperia sicles de turba political e colpas de stato. El ia es vasta respetada tra Tai, e multe persones ia regarda el como semidivin. El ia gania la dedica de tais per sua laboras de aida persones povre en la campania, incluinte projetas de developa cultival, e per sua otra atas carital.
La re ia es malada tra tempo longa. Cuando on ia anunsia ier sua mori, multe persones en la folas grande estra la ospital ia perde controla de sua emosias.
La pasa de rena ia pare inisial simple, ma lo es aora probable ce lo va nesesa un tempo plu longa de clari. La prinse ia dise ce el no va prende direta la corona, car el desira tempo per lamenta la mori de sua padre.
Tai es ancora militar governada pos un colpa de stato en 2014.
La pais ia sufri violentia political e turbas grande en la desenio pasada, e ance un rebela longa par separadistes muslim en la provinses sude cual fa atacas minor e periodal de bomba.
An si Bhumibol ia es un monarca constitual con potia limitada, multe tais ia espeta ce el va interveni en tempos de tensa alta. On ia vide el como un influe uninte e calminte tra multe colpas de stato e 20 constituis.
Sua oposores ia alega ce el ia validi la controla militar e ia fali parla contra maltratas de diretos umana a veses.
La prinse erital ave 64 anios. El es multe min conoseda a tais, e no ia ateni la popularia vasta de sua padre. El pasa multe de sua tempo estra la pais, spesial en Deutxland.
Leges sever contra tradi proteje la membros la plu alta de la familia reial tai de insultas e menasas. Discutes publica de la pasa de rena pote es punida par un prisoni longa.
@T Taiuan lansa un misil sin intende
@L aora_oji/2016/taiuan_lansa_un_misil_sin_intende
====== Taiuan lansa un misil sin intende ======
1 julio 2016
La marina de Taiuan ia lansa, par era, un misil antibarcon suprasonal de sua base en Kaohsiung.
On ia es a media de esamina la eserses militar sur un barco de patrulia cuando la misil Hsiung Feng III ia es ativida.
Lo ia atera en acuas prosima a la isolas Penghu, en dirije a Xina continental, e ia causa no feris.
Esta ia aveni en cuando Xina selebra la aniversario 95 de la formi de la Partito Comuniste Xines.
Cuando jornalistes ia demanda esce la asidente va afeta la relatas entre Taiuan e Beijing, la visamiral Mei Chia-hsu ia dise ce la marina ia reporta lo a la ministreria de defende de la isola.
El ia ajunta ce on investiga la caso e va trata lo "en modo conveninte".
Lo no es clar esce Beijing ia es direta avisada.
La misil ave un estende de sirca 300 cilometres.
Xina regarda Taiuan como un provinse diverjente cual debe deveni reunida con Xina continental, par forsa si nesesada. Lo ave sempre sentos de misiles puntada a la isola.
La presidente de Taiuan, Tsai Ing-wen, ci es ance la xef de la militaria, es en un otra pais a presente.
@T Taiuan vijila ante siclon Nepartak
@L aora_oji/2016/taiuan_vijila_ante_siclon_nepartak
====== Taiuan vijila ante siclon Nepartak ======
7 julio 2016
Taiuan prepara per la ariva de un supersiclon, sur cual on previde ce lo va colpa la isola en la oras veninte.
Ier, a 780 cilometres a sude-este de la site taiuan Hualien, siclon Nepartak ia trae un venta de asta 263 cilometres per ora.
Predisente un venta forte e pluves ferose, on ia averti sur risca de inondas e liscas de fango.
On ia sorti 3000 turistes de la Isola Verde e de Lan Yu (Isola Orcidea), du isolas costal popular prosima a Taitung, un contia sude-este.
Un tempesta es clasida como un supersiclon si lo susta un rapidia de venta de 65 metres per secondo a la surfas per a la min un minuto. Esta coresponde a un siclon de categoria 5 en la basin atlantica.
La ministreria de defende dise ce sirca 35 mil soldatos es preparada per aida.
Hochen Tan, la ministro de transporta, ia informa sitadanes ce on ia reali medios per serti ce la airoporto de Taoyuan no va deveni inondada.
Taiuan esperia multe siclones. Un supersiclon en la anio pasada ia mata tre persones e ia feri plu ca 300, e un otra ia mata a la min oto persones en Taiuan e 21 en Xina.
La tereno ru de la isola, con un montania alta de asta 4000 metres estendente tra la teritorio, aumenta la risca de inondas e liscas de tera en un siclon.
@T Tempestas matante en Australia
@L aora_oji/2016/tempestas_matante_en_australia
====== Tempestas matante en Australia ======
6 junio 2016
Tre persones es mor e plu es mancante pos tempestas enorme cual ia inonda rios, desradisi arbores, e bate plaias longo la costa este de Australia.
Tempestas colpa ancora la sude de New South Wales, Victoria, e Tasmania.
En Sydney, erode a la plaia Collaroy ia obliga ce on abandona casas multe rica cual risca aora colasa.
On teme ce du persones vea ia afoca sur la isola Tasmania, do avertis major de inonda afeta sete rios.
On reporta ce un om ia es puxada a en la Rio Ouse de sua jardin retro, e un fem ia desapare pos cuando acua ia inonda sua casa en la norde-ueste de la isola.
Salvores xerca ance un om ci la mar ia puxa de sur rocas prosima a la plaia Bondi en Sydney.
A esta matina, on ia trova la corpo de un om en la Rio Cotter prosima a Canberra en la Teritorio Capital Australian. La polisia ia dise ce la om ia ave 37 anios e ia deveni caturada en un inonda a un vado de rio.
Sumerjores polisial ia retrae ance la corpos de du omes de ci la acua ia puxa sua autos de sur la via en du avenis separada en New South Wales.
Un om de 65 anios ia es trapida en sua veculo en atenta traversa un inonda a Bowral, e un otra om ia mori cuando sua camioneta ia es puxada de sur la via a la borda sude-ueste de Sydney.
Tasmania norde fronti oji un inonda la plu grave de desenios, con partes de Launceston, Latrobe, e Railton sumerjida.
La Consilio Asecural de Australia ia dise ce companias de asecura ia reseta ja 11 150 reclamas tra Queensland e New South Wales, per la soma estimada de 38 milion dolares australian.
@T Trata medical es nesesada en vilas suri asejada
@L aora_oji/2016/trata_medical_es_nesesada_en_vilas_suri_asejada
====== Trata medical es nesesada en vilas suri asejada ======
12 janero 2016
Sirca 400 persones en Madaya, un vila asejada en Suria, nesesa es rapida sortida per trata medical, seguente Stephen O'Brien, la xef umaniste de la Nasiones Unida.
El ia parla pos un consenta urjente de la Consilio NU de Securia per discute la crise en la vila ocupada per rebelores prosima a Dimashq.
La NU dise ce lo ia reseta reportas credable ce persones mori de famia.
Plu temprana ier, un convoia aidante ia trae comedas a 40 mil abitores de la vila cual es asejada par la governa tra menses.
Acel furni de aida ia es la prima cual on ia permete a Madaya de pos la media de otobre, cuando la Program Mundal de Comeda de la NU ia trae comedas per un mense per 20 mil persones.
Simultan, camiones aidante ia entra a du vilas asejada par soldatos-rebelores en Idlib, un provinse norde, pos un acorda entre la partitos bataliante. On dise ce la situa ala en Foah a Kefraya es ance grave, con un cuantia estimada de 20 mil persones trapida ala de pos marto.
O'Brien ia dise: "Nos debe atenta fa esta e organiza la trata medical tan pronto como posible, o los va es en peril grave de perde sua vives e mori par causa de malnuri o complicas de otra razonas medical."
Un pico de abitores de la vila ia es permeteda a sorti, e on ia vide los espetante con sua posesedas.
44 camiones ia ateni Madaya de Dimashq ier, operada par la NU, la Comite Internasional de la Crus Roja, la Cresente Roja Suri, e la Program Mundal de Comeda. La convoia ia trae comedas e medisines, covreletos, materias refujante, e sapon, e on ia previde ce la distribui va continua tra la note.
Pawel Krzysiek de la Crus Roja ia comenta: "La persones ia veni a cada minuto sinco con la demanda: 'Escuta, vos ia trae comedas? Vos ia trae medisin?' Alga persones surie e saluta nos con mano, ma multe es simple tro debil, con espresa multe sombre, tro fatigada."
Un abitor, Hiba Abdel Rahman, ci ave 17 anios, ia dise: "Me ia vide un om joven ci ia mata gatos e ia presenta la carne como coneo a sua familia. Alga persones ia esplora baldones de dejetadas. Otras ia come erba. Nos ia solisita comedas de la combatores, ma los ia refusa dona a nos."
Madaya es situada a sirca 25 cilometres a norde-ueste de Dimashq e a 11 cilometres de la frontera con Lubnan. Lo es asejada de pos la temprana de julio par soldatos de la governa e sua aliadas en la promove Hizbullah islamiste xia de Lubnan.
Entretempo, 21 camiones ia entra a Foah e Kefraya a lundi. Los ia porta comedas fundal -- incluinte ris, olio vejetal, farina, zucar, e sal -- e ance acua, lete artifis per bebes, covreletos, medisines, e furnis medical.
A solid, la asosia carital Dotores Sin Fronteras ia dise ce 28 persones ia mori de famia en Madaya de pos 1 desembre. Esta cuantia inclui ses enfantes con min ca un anio.
An tal, ofisiores suri e Hizbullah ia nega ce moris ia aveni en la vila. La ambasador NU de Suria, Bashar Jaafari, ia dise: "La governa suri no obliga e no va obliga cualce politica de famia contra sua popla propre."
On ia acusa ce la xefes de la rebelores ia vende comedas a la abitores de Madaya a custas estrema inflada.
Asejas es un cualia comun de la gera interna en Suria. Asta 4,5 milion persones abita en areas difisil per asede, incluinte cuasi 400 mil en 15 locas asejada ci no pote reseta aida cual ta salva vives.
@T Tremateras en Italia sentral
@L aora_oji/2016/tremateras_en_italia_sentral
====== Tremateras en Italia sentral ======
27 otobre 2016
Du tremateras forte ia aveni en Italia sentral, danante construidas e ferinte deses de persones.
Un trema de mesura 5,5 ia aveni a 19:10 de ora local, prosima a Visso en la provinse Macerata, segueda a du oras plu tarda par un trema de mesura 6,1 en la mesma area.
En agosto, un trematera ia mata sirca 300 persones a sude de Visso.
Ecipos de crise ia labora tra la note. On ave poca reportas de feris grave, ma un mal clima ia impedi atentas de evalua la dana.
Visso es a 70 cilometres de Amatrice, cual ia es multe danada en la trematera de mesura 6,2 en agosto.
La tremas de martedi ia es sentida tra Italia sentral, incluinte en la capital, Roma, do construidas ia secute, e portes e fenetras ia clace.
Deses de persones ia es ferida, ma sola cuatro persones ia sufri feris grave.
La trematera du ia es notable plu forte ca la prima, e multe replicas sismica ia aveni a pos. Un atestor ia dise ce el ia regarda cuando un parte de un construida ia colasa ante el.
On crede ce la vila Camerino ia deveni multe danada. Un abitor ia comenta: "Totas parti de Camerino par pede o auto per xerca securia. Du eglesas es destruida e multe casas ia cade."
En Campo, prosima a Norcia en la rejion Umbria, la eglesa de San Salvatore de la tarda de la sentenio 15 ia colasa. Lo ia es ja debilida par la trema en agosto.
On reporta ance cades de linias eletrical, danas a construidas istorial, e un lisca de tera sur un via xef a norde de Roma.
La trema prima, a 7 cilometres a sude-ueste de Visso, ia es relativa nonprofonda, a 9 cilometres su la surfas. La trema du, cual ia aveni a 21:18 de ora local, ia es a profondia de 10 cilometres, a 2 cilometres a norde-ueste de Visso.
Ofisiores ia dise ce esta tremas es relatada con lo de agosto. Mario Tozzi de ia Instituida Nasional de Jeofisica ia clari: "Replicas sismica pote dura tra tempo longa, tra menses a veses."
@T Tribuis purpur a la mori de Prince
@L aora_oji/2016/tribuis_purpur_a_la_mori_de_prince
====== Tribuis purpur a la mori de Prince ======
22 april 2016
Con tribuis purpur, on onora la vive de la cantor Prince, ci ia mori con eda de 57 anios. Tra la SUA e a ultra, construidas, pajerias, e pajes fronte de jornales ia cambia sua color.
Prince ia mori ier a sua casa en la stato Minnesota. El ia devenin un stela major en la desenio de 1980, con sua albumes 1999, Pluve purpur ("Purple Rain"), e Sinia de l' eda ("Sign o' the Times").
On no ia declara la causa de mori, ma un autopsia va aveni oji.
La musica inovosa de Prince ia traversa roc, func, e jaz. El ia vende plu ca 100 milion discos en sua carera.
En Minneapolis, do el ia nase, la ecipo de basebal ia purpuri sua stadion. La Ponte de Lowry Avenue en la sentro de la site ia es ance purpur luminada.
Otra construidas major en New York e New Orleans ia reseta un aspeta purpur nova. E fanes de Prince ia bonveni la coaveni ce la Cascades de Niagara es ja purpurida per onora la aniversario 90 de Rea Elizabeth de la Rena Unida a la mesma dia.
Sentos de persones ia asembla en la sentro de Minneapolis asta la oras temprana de esta matina. A un momento, tota en junta ia canta Pluve purpur de 1984.
Vijilas per la cantor ia aveni ance estra sua casa e en Los Angeles e Brooklyn, do Spike Lee, un dirijor de filmas e ami de Prince, ia improvisa un selebra sur strada.
La polisia ia responde a un telefoni medical a sirca 09:43 de ora local, e ia trova un mas adulte nonrespondente en un asendador a la Studios de Paisley Park. Aidores prima ia atenta revive el, ma on ia declara ce el es mor a 10:07.
Naseda como Prince Rogers Nelson en 1958, el ia es un musiciste produosa an de sua jovenia. On reporta ce el ia scrive sua canta prima cuando el ia ave sola sete anios.
El ia es capas de jua multe strumentos e ia rejistra plu ca 30 albumes.
El ia scrive ance musica per otra artistes. La canta No cosa simili a tu ("Nothing Compares 2 U"), creada per sua bande The Family, ia deveni plu famosa cuando Sinéad O'Connor ia canta lo en 1990.
En 1984, el ia gania un Oscar per la partitur de Pluve purpur, un filma en cual el ia ave ance un rol major de ator.
Tra sua carera, el ia ave un reputa de secretia e strania. A un ves, el ia cambia sua nom a un simbol nonpronunsiable.
El ia ave un relata volatil con tecnolojia. En 2000, el ia publici singulares a Napster, la servi abrivial de comparti musica. Ma plu tarda, el ia declara ce la interede es "completa finida" e ia refusa permete sua musica a plataformas major de flue.
Sua album la plu nova ia es publicida en la anio pasada, e el ia turi tan resente como la semana pasada.
A 15 april, el ia es ospitalida pos un atera de crise par sua avion privata en la stato Illinois. Esta ia aveni corta pos un presenta par el en la stato Georgia. On ia trata el, e el ia parti de ospital pos sola un pico de oras.
Otra artistes joven e vea de la spetro musical intera ia fa sua tribuis.
@T Trump e Clinton vinse en Nevada
@L aora_oji/2016/trump_e_clinton_vinse_en_nevada
====== Trump e Clinton vinse en Nevada ======
24 febrero 2016
En la Statos Unida de America, la aspiror presidental republiciste Donald Trump ia gania forte la stato Nevada, aumentante sua vantaje en la compete per eleje par sua partito.
La bilionor ia fa aora tre vinses en segue, pos los en Nova Hampshire e Carolina Sude. Marco Rubio e Ted Cruz, ci ia ataca la un la otra en esta semana, compete per la loca du.
Ofisiores de la partito republiciste dise ce los investiga reportas de votas duple e un manca de paperes de vota a un loca. Alga bonvolores ia porta ance vestes suportante Trump, ma ofisiores ia dise ce esta no rompe la regulas.
En sua parla de vinse, Trump ia informa un fola aclamante de suportores: "Nos gania, gania, gania la pais, e pronto la pais va comensa gania, gania, gania."
Nevada, tipal un stato ecuilibrada con un cuantia notable de persones latina, es esensal a la prosede de eleje.
En la corsa de la partito democrata, Hillary Clinton ia gania la stato a saturdi, vinsente Bernie Sanders par sinco persentos. A saturdi veninte, esta du va fronti denova la un la otra en Carolina Sude, do los consentra sua campanias a la vota negra.
No min ca 30 delegadas -- plu ca 1% de la cuantia intera -- es disponable en Nevada, la proba prima per la republicistes en la ueste de la SUA.
Resultas temprana mostra ce Trump gida par 42% ante la otra aspirores republicistes, e ce Rubio ave sola 25% de la votas.
La gol de esta competes tra la menses veninte es deside cual aspirores va representa la du partitos xef en la vota presidental en novembre.
La votas seguente per ambos partitos va es multe importante ante la ronda nomida "Supramartedi" a 1 marto, cuando plu ca des statos va eleje sua aspirores e sirca un cuatri de tota delegadas va es ganiable.
Trump ia ataca Cruz a lundi, criticante sua taticas de campania e descrivente el como "malada". Plu temprana, Cruz ia desemplea sua portavose par causa de un video alterada cual ia desonora la opinas de Rubio sur la Biblia.
Cruz ia contrataca ier, acusante Trump de "vasila" sur la temas e politicas de sua campania. Rubio, entretempo, ia recomenda forte ce tota republicistes rejistrada ta vota.
La aspiror republiciste Ben Carson, un neurosirurjiste jubilada, ia apare en multe articles jornaliste pos sujesta ce la presidente Barack Obama ia es "elevada en manera blanca".
En la consentas de vota, cual ia comensa a 17:00 de ora local e ia dura tra tre oras, la suportores republiciste ia fa un discute publica sur la aspirores ante vota secreta.
La campo republiciste, cual ia conteni des-du aspirores a un mense ante aora, ia diminui a sola sinco. Jeb Bush, la fio de la presidente 41 e la frate de la presidente 43, ia resinia de la compete en Carolina Sude a la fini de semana pasada.
@T Trump telefoni a la presidente de Taiuan
@L aora_oji/2016/trump_telefoni_a_la_presidente_de_taiuan
====== Trump telefoni a la presidente de Taiuan ======
3 desembre 2016
Donald Trump, la presidente elejeda de la SUA, ia parla direta con la presidente de Taiuan, defiante un politica de la SUA inisiada en 1979 cuando relatas formal ia es rompeda.
La ecipo traversante de Trump ia dise ce el e Tsai Ing-wen ia nota "lias prosima de economia, politica, e securia" entre la SUA e Taiuan en un telefoni.
La ata risca coleri Xina, cual regarda Taiuan como un provinse separadiste. Wang Yi, la ministro xines de esternas, ia descrive la telefoni como "un truco trivial" par Taiuan.
Trump ia tuita ier ce Tsai ia telefoni a el per loda el sur gania la presidentia SUA. La ecipo de Trump ia dise ce el ia loda ance Tsai sur deveni la presidente de Taiuan en janero pasada.
Lo es multe noncomun ce un presidente o presidente elejeda de la SUA parla direta a un xef taiuan.
Pos cuando jornalistes ia scrive sur la riscas de coleri Xina, Trump ia tuita: "Interesante ce la SUA vende biliones de dolares de aparatos militar a Taiuan ma me debe no aseta un telefoni lodante."
La Casa Blanca ia dise ce la conversa no indica un cambia en la politica de la SUA, e un portavose per Trump ia dise ce Trump es "bon consensa" sur la politica esistente sur Taiuan.
Washington ia rompe relatas diplomata formal con Taiuan en 1979, espresante sua suporta per la conseta "Un Xina" de Beijing, cual declara ce Taiuan es un parte de Xina.
Xina ave sentos de misiles puntada a Taiuan e ia menasa usa fortia si Taiuan xerca autonomia.
Tsai, la xef fema prima de Taiuan, ia gida la Partito Progresiste Democrata a un vinse inondante en la vota de janero. La partito ia favore tradisional autonomia de Xina, e la governa de Tsai no aseta la politica Un Xina.
La ministreria xines de esternas ia dise ce lo oposa tota interatas ofisial o contatas militar entre la SUA e Taiuan, seguente la jornal La Dial de la Popla (cual es un portavose per la Partito Comuniste).
Wang ia dise ce la conversa entre Trump e Tsai es "mera un truco trivial par Taiuan" sur cual el crede ce lo no va cambia la politica de la SUA sur Xina: "La politica Un Xina es la peso major de la developa sana de relatas Xina-SUA, e nos espera ce on no va interfere o dana esta funda political."
An si la relatas formal ia es rompeda a cuasi cuatro desenios ante aora, la SUA manteni ancora nonofisial relatas amin con Taiuan.
Pos la telefoni de Trump, la Casa Blanca ia dise ce la SUA resta firma dedicada a sua politica Un Xina.
Entretempo, on reporta ce Trump ia fa un telefoni "multe interesante e animada" con presidente Rodrigo Duterte de Pilipinas, en cual el ia invita el a la Casa Blanca en la anio veninte.
La xef pilipina ia desacorda con presidente Barack Obama, an insultante el en la pasada. Obama ia cansela un consenta projetada con el en setembre.
@T Tutu desira la direto de mori aidada
@L aora_oji/2016/tutu_desira_la_direto_de_mori_aidada
====== Tutu desira la direto de mori aidada ======
8 otobre 2016
Arcibispo Desmond Tutu de Sudafrica ia revela ce el desira ave la posible de un mori aidada.
Tutu, ci ia gania un premio Nobel de pas e ia campania contra apartait, ia dise ce el "no desira ce sua vive es mantenida an con tota". El ia scrive en la jornal Washington Post a sua aniversario 85.
El ia declara se como un suportor de moris aidada en 2014, sin spesifa esce el mesma vole ave la eleje. En la mense pasada, el ia es ospitalida per sirurjia per trata infetas recorente.
"Me espera ce on va trata me con compatia e va permete ce me progresa a la fase seguente de la viaja de la vive en la manera cual me eleje," Tutu ia scrive. "Sin relata a lo cual on ta eleje per se mesma, perce on ta nega a otras la direto de fa esta eleje? Per los ci sufri nontolerable e veni a la fini de sua vives, mera la sabe ce un mori aidada es disponable pote furni un comforta nonmesurable a los."
Sudafrica ave no leges spesifada per governa la mori aidada. Ma en un judi major en april 2015, un corte sudafrican ia permete la direto de mori a un om con maladia nonremediable. A pos, on ia solisita un clari de la leges en tal casos.
Esta no es la ves prima cuando Tutu ia parla contra la eglesa.
El es un suportor franca de diretos ge, e ia critica publica la disposas de cristianes tradisional sur omosesalia. En 2013, el ia dise ce el "ta refusa vade a un sielo omofobica" e ta prefere "la otra loca". El ia ajunta: "Me no ta adora un dio ci es omofobica, e esta es la profondia de mea sentis sur esta."
Plu temprana en esta anio, el ia bondise la sposi de sua fia Mpho con sua acompanior fema, an si la lege anglican sur sposi en Sudafrica declara ce "la sposi santa es la uni eterna e escluine entre un om e un fem".
En la media de la desenio de 1990, Tutu, alora esente la arcibispo de Site de Capo, ia suporta controversa un cambia afin abortas ta deveni plu disponable en Sudafrica, an con alga dutas personal.
@T Ucraina gania la Concurso de Eurovision
@L aora_oji/2016/ucraina_gania_la_concurso_de_eurovision
====== Ucraina gania la Concurso de Eurovision ======
15 maio 2016
La cantor Jamala de Ucraina ia vinse en la Concurso Cantal de Eurovision, cual ia aveni en Stockholm, la capital de Sveria.
La pais ia gania 534 puntos con sua canta "1944", sur la deporta de tatares crimsce su Iosif Stalin.
Australia ia fini en la loca du con 511 puntos. Lo no es un pais european, ma on ia invita lo a partisipa denova pos la selebras de la aniversario 60 en la anio pasada.
Ante la concurso, on ia vide Rusia como la pais la plu probable de vinse, xef par causa de un saisioio en cual la cantor pare suportada par imajes projetada, ma esta ia es ultima la numero tre con 491 puntos.
Susana Jamaladinova es la tatar crimsce prima de istoria ci ia canta a la concurso, e la natur political de sua canta ia causa controversia.
La canta refere a la anio en cual Stalin ia deporta cuasi tota la etnico de Crim, sua rejion nativa, en lo cual ia es alora Rusia Soviet ma ia deveni un parte de Ucraina a pos. La cantor ia dedica la canta a sua duava, ci ia es un de la cuatri de milion tatares obligada a parti como puni coletiva per los ci ia colabora en la ocupa nazi.
On ia previde ce la canta ucrainsce va fini en un de la tre locas la plu alta, ma en un resulta surprendente, lo ia vinse Rusia, cual ia prende Crim de Ucraina en 2014 e ia es colerida par la canta.
Coliente sua premio, Jamala ia grasia emosiosa Europa per sua votas, ajuntante: "Me desira vera pas e ama a cadun."
Parlante sur sua vinse a pos, la cantor ia comenta: "Lo es stonante. Me ia es serta ce si on parla sur veria, on pote emosia multe la persones."
Un sistem nova de presenta la puntos ia es introduida en esta anio, separante la puntos donada par la juria e la popla de cada pais, en loca de combina los como a ante.
A la punto media pos la presenta de la votas de la jurias ofisial, Australia ia domina la table con sua 320 puntos, en situa forte supra la 211 puntos de Ucraina. Ma "Sona de silentia" cantada par Dami Im no ia es tan susedosa en la votas publica, e ia fini la sera a numero cuatro.
La sistem nova de puntos ia asentua la nonegalia entre la preferes publica e los de la jurias. Polsca, cual ia sta a numero 25 entre la 26 paises competente pos reseta sola 7 puntos de la jurias, ia salta a la loca oto cuando on ia anunsia ce la televotas publica ia dona 222 puntos a sua canta "Color de tua vive" par Michał Szpak.
La loca la plu basa ia es ocupada par la canta "Fantasma" par Jamie-Lee de Deutxland, con sola 11 puntos.
La concurso ia aveni en la stadion Ericcson Globe en Stockholm, e ia es presentada par la cantor vinsente de la anio pasada, Måns Zelmerlöw, e Petra Mede, un comediste e ator svensce.
@T Uganda va dirije sua petrolio tra Tanzania
@L aora_oji/2016/uganda_va_dirije_sua_petrolio_tra_tanzania
====== Uganda va dirije sua petrolio tra Tanzania ======
24 april 2016
Uganda, un pais sin costa, ia anunsia ce lo va construi un tubo major per esporta sua petrolio tra Tanzania.
Uganda ia projeta envia la tubo tra Cenia, cual ia desira un compleso compartida per petrolio ance de sua propre campos developante.
La tubo va vade aora plu sude. On dise ce un fator en la deside ia es un ansia sur atacas posible par la islamistes al-Shaba de Somalia. Esta grupo ia ataca blancos prosima a locas do la tubo ta pasa.
Uganda ia anunsia sua deside en Kampala, sua capital, a un consenta alta de la Comunia de Africa Este, cual grupi Uganda, Cenia, Tanzania, Burundi, Ruanda, e Sudan Sude.
La tubo de 1400 cilometres va lia la rejion ueste de Uganda prosima a Hoima, do on ia descovre reservas grande de petrolio, con la porto Tanga en Tanzania.
On previde ce la projeta va custa sirca $4 mil milion e ce lo va crea 15 mil empleas.
La cuantia de reservas descovreda en Uganda es estimada a 6,5 mil milion bariles, e la pais espera comensa produi en 2018. La plu de la lisensas es poseseda par la companias Total de Frans, CNOOC de Xina, e Tullow de Britan e Er.
Cenia, cual ia descovre ance petrolio, ia vole ce la tubo pasa tra sua teritorio. Uganda ia suscrive inisial un tal acorda, ma Total ia demanda plu tarda sur la securia de la projeta.
La ministro ugandan de esternas, Sam Kutesa, ia dise ier ce la custa es ance un fator de la eleje. "Nos ia considera la via de tubo de petrolio a Tanga en maneras diversa -- entre los, lo ave la min de custa."
Reportas sujesta ce Uganda ia suporta la via tanzanian ance car la porto Tanga es ja completa funsionante, ma on construi ancora la porto Lamu en Cenia.
Cuando completida, esta va es la tubo major prima de petrolio de Africa Este.
Entretempo, Cenia ia dise ce lo va construi sua propre tubo de Lokichar, en la norde-este, a Lamu.
@T Un acorda major de pas en Colombia
@L aora_oji/2016/un_acorda_major_de_pas_en_colombia
====== Un acorda major de pas en Colombia ======
27 setembre 2016
En Colombia, la governa e la rebelores sinistriste de FARC ia suscrive un acorda major per fini formal 52 anios de gera armada.
La xef de la rebelores, Timoleón Jiménez, conoseda como Timochenco, ia demanda per pardona de "tota la vitimes de la gera" e ia es salutada par aclamas e aplaudis.
El ia dise: "Mi desira demanda per pardona per tota la dole cual nos ia causa en esta gera."
Invitadas a la rituo en Cartagena ia porta vestes blanca per simboli la pas.
La ultima de la geras de la Gera Fria ia mata 260 mil persones e ia lasa plu ca 6 milion deslocadas.
Juan Manuel Santos, la presidente, ia declara: "Colombia selebra, la planeta selebra, car on ave un min gera en la mundo. Nos va reali cualce gol, vinse cualce ostaculo, e cambia nosa nasion a un pais a cual nos ia fantasia sempre -- un pais en pas."
Timchenco ia dise ce la FARC, cual ia comensa en 1964 como la ala armada de la Partito Comuniste, abandona la gera armada per entra a la politica pasosa.
"Nos es renaseda per inisia un eda nova de reconsilia e de construi la pas," el ia dise. "Ta ce tota de nos es preparada per desarma nosa cores."
La presidente e Timochenco ia usa un pen fada de un baleta per suscrive la acorda.
La acorda aveni pos cuatro anios de discutes en Havana, Cuba, entre negosiores de governa e rebela. Lo debe es aprobada par la popla colombian en un vota a soldi ante cuando lo pote deveni legal.
Sondas indica ce la plu de colombianes suporta la acorda, an si on ave alga oposores, gidada par Alvaro Uribe, un presidente pasada.
Con la acorda, la FARC va es reinisiada como un partito political.
Santos risca sua futur political sur la susede de la acorda. On espera jeneral ce lo va fini la furas de persones e la versa de sangue cual ia manxa Colombia tra sinco desenios, ma lo ia crea ance divides en la economia cuatro de la plu grandes de America Latina.
Alga persones es coler ce lo permete ce rebelores entra a parlamento sin pasa tempo en prison.
Ofisiores major presente a la rituo ia inclui Ban Ki-moon (la secretor jeneral de la Nasiones Unida), John Kerry (la ministro de esternas de la Statos Unida de America), e Raúl Castro (la presidente de Cuba).
Ban ia dise a la asembladas: "Vos pote regarda la futur con otimisme. Vos invita colombianes a vive en pas."
Cuando Kerry ia ariva en la pais, el la loda la laboras de Santos per oteni la acorda, e ia promete 390 milion dolares per reali lo.
El ia clari ce la SUA ancora no va sutrae la FARC de sua lista de organizas teroriste, ma lo va reconsidera la state cuando la acorda de pas funsiona.
An tal, a mera oras ante la suscrive, la Uni European ia anunsia ce lo va suspende la FARC de sua lista.
"La esta deside va permete ce nos suporta la program pos gera, e va benefica tota colombianes," Federica Mogherini, la xef de politica esterna de la UE, ia comenta en redes sosial.
La rebelores de FARC debe aora dona sua armas a la NU ante la pasa de 180 dias. Ma la Armada de Libria Nasional, un grupo min grande de rebelores, es ancora ativa, como ance alga grupos paramilitar destriste.
@T Un acorda nova de pas en Colombia
@L aora_oji/2016/un_acorda_nova_de_pas_en_colombia
====== Un acorda nova de pas en Colombia ======
23 novembre 2016
La governa de Colombia dise ce lo va suscrive un acorda nova de pasa con rebelores FARC a jovedi, seguente la rejeta de la acorda presedente par un referendo en la mense pasada.
La acorda nova revisada va es enviada a la Congresa per aproba, en loca de un vota poplal.
Ma grupos oposante dise ce lo ancora no sufisi per puni rebelores per maltratas de diretos umana.
La acorda intende fini plu ca 50 anios de gera armada cual ia mata plu ca 260 mil persones.
En un parla televisada a la nasion ier, presidente Juan Manuel Santos ia dise: "Nos ave un momento unica per clui esta capitol dolosa en nosa istoria cual ia priva e dole miliones de colombianes tra un dui de sentenio."
La acorda orijinal ia es suscriveda a du menses ante aora en un rituo emosiosa ante xefes de mundo, ma un referendo a 2 otobre ia rejeta lo.
Oposores de la governa, gidada par Álvaro Uribe, un presidente pasada, ia dise ce la acorda es tro favorente a la rebelores.
Negosiores de governa e FARC ia labora constante per fa plu ca 50 cambias a la acorda afin lo deveni plu asetable a colombianes conserviste ci despeta la FARC.
Uribe e otra seticas ia continua declara ce la cambias es mera cosmetica.
Santos ia clari ce on ave no plu posible de negosia, an pos cuando Uribe ia demanda per un consenta con la gidores FARC per discute sua consernas.
"Cisa esta acorda nova no va sasia totas," Santos ia dise, "ma acel aveni en acordas de pas. On ave sempre voses critical; lo es comprendable e respetable."
El ia dise ce la validi va aveni en la Congresa, do la alia governal ave un majoria solida.
Uribe ia presa per un plu referendo cual, el ia dise, va vota contra la acorda denova.
Santos ia reseta la Premio Nobel de pas en otobre per sua laboras per fini la gera, provocante divinas ce on va pote ancora salva la acorda.
Negosiores governal dise ce on nesesa suscrive urjente la acorda de pas, car on teme la colsasa de la sesaspara delicata si la acorda no es rapida realida.
En la semana pasada, du combatores suspetada de FARC ia es matada en batalia contra fortes de securia, ci ia dise ce los ia malreconose los como membros de la ELN, la grupo rebelante numero du de la plu grandes en Colombia.
Rebelores FARC ia espresa ance coleria sur la matas de alga ativistes per reasinia de tera e defendores de diretos umana.
@T Un acorda nova sur gases de inverneria
@L aora_oji/2016/un_acorda_nova_sur_gases_de_inverneria
====== Un acorda nova sur gases de inverneria ======
15 otobre 2016
Plu ca 150 paises ia fa un acorda per retira gradal gases cual aumenta la caldi global.
Idrofluorocarbonos (IFCs) es vasta usada en friadores, frescadores, e boteles de airosol.
Delegadas consentante en Ruanda ia aseta un cambia complicada a la Protocol de Montréal, disente, entre otra cosas, ce paises plu rica va redui sua usa de IFCs pos 2019.
Alga oposores dise ce la compromete pote ave un efeto min grande ca desirada.
Ma John Kerry, la ministro de esternas SUA ci ia aida reali la acorda en un serie de consentas en la capital de Ruanda, ia descrive lo como un vinse major per la Tera: "Lo es un avansa monumentin cual trata la nesesas de nasiones individua, ma lo va permete ce nos redui la caldi de la planeta par un dui intera de grado celsius."
La acorda projeta tre vias separada per paises diversa. La plu ricas -- como la UE, la SUA, e otras -- va comensa limita sua usa de IFCs pos poca anios e va redui par a la min 10% pos 2019.
Alga paises developante -- incluinte Xina, nasiones en America Latina, e statos isolal -- no va aumenta plu sua usa de IFCs pos 2024.
E otra paises developante -- spesifada como Barat, Pacistan, Iran, Irac, e la statos de la Golfo Irani -- no va aumenta plu sua usa pos 2028.
Xina, la produor de IFCs la plu grande de mundo, no va comensa redui la produi o usa de los asta 2029. Barat va comensa an plu tarde, no reduinte sua usa par 10% asta 2032.
Serta, si on reali intera la acorda, lo va ave un efeto grande a la caldi global. Espertas estima ce lo va sutrae un cuantia corespondente a sirca 70 mil milion tones de diosido de carbono de la atmosfera a 2050.
Ma alga oservores ia leva demandas sur la sedes fada a Barat e Xina, sujestante ce los ia debili la resulta jeneral. Lo es posible ce on no va ateni la intende de redui la caldi global par 0,5 grados.
Suportores dise ce la esta acorda en Kigali va construi sur la funda creada par la acorda de clima en Paris, suscriveda par plu ca 190 paises en desembre 2015, cual va comensa funsiona en la temprana de novembre.
Los indica ance la istoria pasada de la Protocol de Montréal: on ia elemina plu ca 100 gases fluorida en la 30 anios de la acorda. Pos aseta la regula, industrias developa rapida alternativas.
@T Un airoporto turcmen con forma de avia
@L aora_oji/2016/un_airoporto_turcmen_con_forma_de_avia
====== Un airoporto turcmen con forma de avia ======
18 setembre 2016
Turcmenistan ia revela un airoporto internasional nova, con teto en forma de un falcon volante.
La desinia refleta la mascote de sua compania nasional de transporta.
La airoporto ia custa $2,3 mil milion, e es situada en la capital, Axcabat. Lo es capas de trata plu ca 1600 pasajores per ora.
Ma poca stranjeres visita esta pais isolida de Asia sentral, cual es conoseda per sua gida autocrata e reservas grande de enerjia. Sola 105 000 turistes ia visita en 2015, e oteni un visa es difisil.
Presidente Gurbanguly Berdimuhamedow ia loda la "capasia solida de transporta" de sua pais.
Axcabat conteni alga otra strutures unica, incluinte un casa de publici con forma de un libro abrida.
La site ava ance du scultas jigante de oro de Berdimuhamedow e sua presedor mor Saparmurat Niyazov.
@T Un amnestia per evadores de imposta fini en Barat
@L aora_oji/2016/un_amnestia_per_evadores_de_imposta_fini_en_barat
====== Un amnestia per evadores de imposta fini en Barat ======
2 otobre 2016
En Barat, un amnestia per evadores de imposta ia provoca deses de miles de persones a declara plu ca $9,5 mil milion de revenu e ativas nondeclarada.
La fenetra de cuatro menses ia fini a venerdi, e ia trae 64 275 declaras. A tota, on ia ofre imunia contra prosede legal, intercambiada per paia de la imposta, un ajuntal, e un multa.
On estima ce la governa va gania sirca $4,5 mil milion de la scema. "Mone negra" (revenu nondeclarada) es un problem grande en Barat.
Plu temprana en esta anio, la governa ia contata sirca 700 mil evadores suspetada, recomendante ce los declara sua revenu e ativas ascondeda.
Los ci ia segue la recomenda inclui un grupo de vendores de comeda de strada en Mumbai, ci ia declara cuasi $7,5 milion.
Ma an esta cuantia grande es mera un frato de la ganias nonrevelada de la pais. Lo no covre mone ascondeda en bancos suiz e paradisos finansial estra la pais. Alga investigores crede ce tal mone ave un valua de sirca $500 mil milion.
En la elejes barati de 2014, la ministro xef, Narendra Modi, ia promete trata sever la froda e la mone negra. En un serie de tuitas ier, el ia declara ce la amnestia ia es "susedosa", disente ce lo ia es "un contribui grande a transparentia e la crese de la economia".
La governa dise ce lo va spende la mone ganiada per la bonstate publica.
Autoriosas ia senti presada a reata pos la publici de la "Paperes de Panama" en april cual ia revela como persones rica e potiosa usa paradisos finansial per asconde sua ricia. Sirca 500 baratis ia es entre la nomidas.
@T Un artiste brasilera bandi la oios de scultas
@L aora_oji/2016/un_artiste_brasilera_bandi_la_oios_de_scultas
====== Un artiste brasilera bandi la oios de scultas ======
13 marto 2016
Sento scultas sur la stradas de Rio de Janeiro ia ave sua oios covreda con bandas roja, en un protesta artal contra la crise political profondinte en Brasil.
La artiste anonim ia dise ce el desira proteje figures nasional de istoria brasilera contra vide la state vergoniosa de la pais.
El ia dise ce la obra no es liada con prosegues protestante contra presidente Dilma Rousseff, cual va aveni oji.
La scultas, a locas diversa tra la site, inclui un de Getúlio Vargas, la autocrata prima de la pais, ci ia rena de 1930 a 1945 e ia vole transforma Brasil de un economia fundida en cultiverias a un pais de industria forte.
Ance con oios bandida ia es un sculta de Alberto Santos-Dumont, la padre de avioni brasilera e Isabel, la Prinsesa Imperal de Brasil ci, cuando renante, ia promove ativa e suscrive final la "Lei Aurea" (Lege Orosa), librinte tota sclavos en Brasil a 13 maio 1888.
La artiste, ci labora en un projeta de arte nomida Oraculo, ia clari ce el vole espresa ce "protesta no es mera prosegues sur stradas".
A soldi, protestas vasta es projetada par los ci oposa Rousseff per esije ce on acusa el de malmaneja la finansia e la economia.
Brasil sufri sua retrosede economial la plu grave de desenios.
La artiste ia comenta: "La idea es ce on bandi la oios de los ci no pote plu ata per la pais, e ce on evita ce los atesta sin potia la crise economial e political en la pais, noncapas de reata."
@T Un ataca con bombas en Jakarta
@L aora_oji/2016/un_ataca_con_bombas_en_jakarta
====== Un ataca con bombas en Jakarta ======
14 janero 2016
Un serie de bombas ia esplode en Jakarta, la capital de Indonesia, segueda par batalias con fusiles en la stradas.
La esplodes ia aveni sirca la strada Thamrin, un distrito major de botecas e comersia, prosima a ambasadas e la ofisias de la Nasiones Unida.
La polisia dise ce cuatro atacores suspetada es entre a la min ses persones ci ia mori.
On ancora no sabe cual grupo ia esecuta la ataca.
Presidente Joko Widodo ia recomenda un responde calma, disente: "Tota de nos lamenta la vitimes mor de esta aveni, ma nos condena ance la ata cual ia disturba la securia e la pas e ia sperde teror entre nos popla."
Imajes de Jakarta mostra corpos sur la strada estra un caferia, e ance la porta a via de alga persones grave ferida.
Detalias resta nonclar, ma a la min un de la esplodes ia colpa un caferia de Starbucks estra Sarinah, un colie de botecas prosima a un punto de securia de polisia.
Atestores dise ce alga atacores ia entra a la caferia e ia detona esplodentes.
On ia comensa fusili cuando la polisia ia ariva, e otra esplodes ia aveni. On reporta ance ce la polisia ia xasa suspetadas.
Polisiores armada, xutores, e veculos blindada ia es enviada a la stradas de la capital, e la polisia ia proibi la asede jeneral a la area sirca la botecas.
Gen Budi Gunawan, la viscomandor xef de la polisia nasional, ia dise ce du persones ia es matada en un fusili estra un teatro, e ce du otras ia esplode se a la punto de polisia ante Starbucks.
Indonesia es ja atacada par grupos combatosa islamiste en la pasada, e ia es forte vijilante en la periodo de la anio nova, pos menasas de la grupo Daex.
Un portavose per la polisia nasional ia dise ce, an si on ancora no sabe clar ci ia fa la ataca, Daex ia averti sur "un conserta en Indonesia" cual va apare en novas internasional.
@T Un ataca de camion a un mercato en Berlin
@L aora_oji/2016/un_ataca_de_camion_a_un_mercato_en_berlin
====== Un ataca de camion a un mercato en Berlin ======
20 desembre 2016
La polisia deutx investiga "un ataca probable teroriste" pos cuando un om ia gida un camion tra un mercato de natal en la sentro de Berlin, matante 12 persones e ferinte 48.
On reporta ce la camionor es un refujada afgani o pacistani ci ia ariva en Deutxland en febrero, e ce el ia es ja conoseda a la polisia per crimines minor, ma no per lias teroriste.
Politicistes deutx ia evita descrive la ataca como un ata teroriste en la oras direta a pos, ma Thomas de Maizière, la ministro de internas, ia dise: "Multe cosas indica tal."
La mercato es a Breitscheidplatz, prosima a la Kurfürstendamm, la strada xef de botecas en la ueste de Berlin.
La ataca ia aveni prosima a la Eglesa de Memoria de Kaiser Wilhelm, cual ia es danada par un bomba en la Gera Mundal Du e cual on conserva como un simbol de pas.
La camion, cargada con faxones de aser, ia verje a la mercato a 20:14 de ora local, un de la tempos la plu ocupada. Lo ia rompe cabanas de lenio e strutures plen de turistes e persones local.
La polisia crede ce lo ia traversa 50--80 metres de la mercato. On ia saisi la camionor pos cuando el ia sorti de sua veculo e ia fuji par pede.
El ia core longo la strada en dirije a la parce Tiergarten. Un atestor ia segue el tra cuasi du cilometres e ia clama polisiores, ci ia aresta el prosima a la monumento Colona de Vinse.
Un portavose per la polisia ia ipotese ce la camionor ia desira cisa "trova refuja en la oscuria de la parce".
La polisia ia confirma ce on ia trova un pasajor mor en la camion, un polsce. On teme ce el ia es la gidor orijinal de la veculo, e ce sua camion ia es saisida en viaja.
La posesor polsce de la camion ia confirma ce sua gidor manca e es noncontatable de 16:00 a lundi. "Nos no sabe cual ia aveni a el," el ia dise. "El es mea cusin. Me ia conose el de cuando me ia es un enfante. Me pote atesta sua bon carater."
La aveni ia evoca recordas de la ataca par camion en la site Nice en Frans a 14 julio, cuando 86 persones ia es matada. Acel ataca ia es reclamada par la organiza Daex.
Ambos Daex e al-Qa'ida ia recomenda ce sua seguores usa camiones per ataca folas.
@T Un ataca enlinia a la conta nasional australian
@L aora_oji/2016/un_ataca_enlinia_a_la_conta_nasional_australian
====== Un ataca enlinia a la conta nasional australian ======
10 agosto 2016
La pajeria per la conta de abitores australian ia es cluida par lo cual on ia descrive como un serie de atacas intendeda, par piratas de rede stranjer.
Miliones de australianes ia es prevenida de partisipa en la sonda nasional a la sera de ier. La Departe Australian de Statistica ia vanta, a poca oras a ante, ce sua servador no va rompe.
La ministro xef, Malcolm Turnbull, ia serti a la popla ce sua informas personal no ia es furada.
A un ves en sinco anios, cadun en Australia debe completi formularios, cual on compila per ave un comprende de la pais. On ia previde ce en esta anio du tris de australianes va responde enlinia, en loca de par paper.
On ia ave ja consernas sur privatia, an pos sertis par la governa ce la securia no es perilida.
Turnbull ia dise: "La cosa cual es intera clar es ce no penetra de la pajeria ia aveni. Lo cual vos ia vide ia es un ataca de descapasi la servi, cual, como vos sabe, es desiniada par preveni asedes a un pajeria, e no pertine a entras a la servador fondal. Franca, alga de acel defendes ia fali."
La partito oposante ia recomenda la resinia de Michael McCormack, la tesoror suordinada, ci ia es encargada con supravide la conta.
La Departe de Statistica labora con autoriosas per descovre la fonte de la atacas.
Pos multe semanas de avisas sur partisipa enlinia a 9 agosto, miliones de australianes ia es frustrada par trova ce los no pote completi la sonda. En redes sosial, on ia burla la situa con referes a asurdas simil en comedias televisada.
@T Un ataca matante a un airoporto de Istanbul
@L aora_oji/2016/un_ataca_matante_a_un_airoporto_de_istanbul
====== Un ataca matante a un airoporto de Istanbul ======
29 junio 2016
Un ataca de fusil e bomba a la airoporto internasional Atatürk de Istanbul ia mata 36 persones e ia feri plu ca 140.
Tre atacores ia comensa fusili prosima a un punto de entra a la termina en la tarda de ier. Cuando polisiores ia xuta a los, los ia detona se.
Binali Yıldırım, la ministro xef de Turcia, ia dise ce la indicas prima sujesta ce la ataca ia es fada par Daex. Bombis resente es liada o a Daex o a separadistes curdi.
La airoporto ave radiografes a sua entreria, ma la controlas securial per autos es limitada.
Imajes de la termina ia mostra corpos covreda su telones, e vitro e bagaje abandonada sperdeda tra la construida.
Presidente Recep Tayyip Erdoğan ia dise ce la ataca debe deveni un momento desidente en la batalia global contra grupos combatosa: "La bombas cual ia esplode oji en Istanbul ia ta pote esplode en cualce airoporto en cualce site de la mundo."
La Statos Unida ia descrive la ataca como "odiable", ajuntante ce la SUA resta "firma en nosa suporta per Turcia". La ministro de esternas deutx, Frank-Walter Steinmeier, ia dise: "Nos lamenta la vitimes. Nos suporta Turcia."
Parlante a alga oras pos la ataca de ier, Yıldırım ia dise ce lo es probable ce la vitimes inclui persones stranjer, e ce la atacores ia ariva a la airoporto en un taxi.
Video en redes sosial mostra un atacor corente en la salon de parti, con ce persones fuji sirca el. La polisia fusili el, e el resta sur la tera tra sirca 20 secondos ante detona se.
On ia usa taxis per transporta rapida la persones ferida a ospital a pos. Relatadas desperante de persones mancada ia asembla estra un de la ospitales local a cual on ia prende multe de la vitimes. Alga ia espresa sua coleria sur la manca de informas.
Volas a e de la airoporto ia es suspendeda pos la ataca, ma aora on ia recomensa alga volas.
Charles Michel, la ministro xef de Beljia, de cual bombores ia ataca sua site capital en marto, ia tuita de la confere alta de la UE en Bruxelles: "Nosa pensas es con la vitimes de la atacas a la airoporto de Istanbul. Nos condena esta atas repulsante de violentia."
La eticeta #PrayForTurkey ("prea per Turcia") ia deveni comun en Twitter pos la ataca.
En desembre, un esplode a un otra airporto de Istanbul ia mata un limpor. La acel ataca ia es reclamada par un grupo curdi, la Falcones de Libria de Curdistan.
Plu ca 61 milion pasajores ia viaja tra la airoporto Atatürk en 2015. Ma en esta anio, la turisme en Turcia es ja danada par ansia sur securia e par un boicota rusce causada par la tira a tera de un jeto militar rusce a la frontera de Turcia e Suria en la anio pasada.
@T Un atenta de desrestrinje un iPhone a distantia
@L aora_oji/2016/un_atenta_de_desrestrinje_un_iphone_a_distantia
====== Un atenta de desrestrinje un iPhone a distantia ======
26 agosto 2016
On ia descovre defetos en la sistem de opera iOS de Apple, cual permete un criminal a instala programas de spia a un aparato si la usor segue un lia simple a un paje de rede.
Un avocato de diretos umana ia avisa rexercores de securia sur mesajetas nonsolisitada cual el ia reseta. La rexercores ia trova tre defetos nova en la codigo de Apple. Apple ia publici un refresci cual elimina la problem.
La du companias de securia, Citizen Lab e Lookout, ia dise ce los ia reteni detalias de la descovre asta pos la publici de la solve.
La avocato, Ahmed Mansoor, ia reseta la mesajetas a 10 e 11 agosto. Los ia promete revela "secretas" sur persones torturada en la prisones de la Amirias Arabi Unida si el ta toca la lias.
Si el ia ta fa esta, sua iPhone 6 ia ta es "desrestrinjeda", e on ia ta pote instala programas nonpermeteda.
Citizen Lab ia comenta: "Infetada, la telefon de Mansoor ia ta deveni un spior dijital en sua pox, capasa de usa la camera e microfon de sua iPhone per monitori ativia en la visinia de la aparato, rejistra sua usas de WhatsApp e Viber, nota mesajes enviada en programas de parleta, e trasa sua moves. Nos conose no avenis presedente de usa un desrestrinje de iPhone a distantia como parte de un ataca dirijeda, tal ce esta es un trova rara."
La rexercores crede ce la spiador pertinente, Pegasus, ia es creada par NSO Group, un compania israeli de "sibergera".
"Lo esplota la integra de aparatos portable en nosa vives e la combina de cualias disponable sola en telefonetas -- un lia permanente a la interede, comunicas de vose, camera, eposta, mesaji, jeoloca par satelite, parolas secreta, e listas de contatas."
NSO ia publici un declara asetante ce lo crea tecnolojia usada per "combate teror e crimin", ma ia dise ce lo sabe no cosa sur avenis individua e no ia refere a la spiador descovreda en esta caso.
Apple ia comprende rapida la gravia de la defeto e ia publici la coreti en sola 10 dias.
@T Un avion cade en Pacistan
@L aora_oji/2016/un_avion_cade_en_pacistan
====== Un avion cade en Pacistan ======
8 desembre 2016
La pilote de un avion cual ia cade ier en Pacistan ia fa un clama per aida, direta ante perde la contata.
El ia informa ance controlores de trafica sur un problem de motor a 16:09 de ora local.
Tota 48 persones en la avion, cual ia vola a Islamabad, ia mori.
Un investiga aveni, ma la airocompania PIA (Pakistan International Airlines) ia insiste ce probas sever ia lasa "no spasio per eras tecnical".
On ia trova un rejistrador de datos de vola. Autoriosas pacistani ia dise ce la problem parente de motor va es un foca de investiga.
La avion ia cade en la rejion Havelian de la provinse Khyber-Pakhtunkhwa, a sirca 70 cilometres de Islamabad.
La polisia ia dise ce on ia prende la restas carbonida de la pasajores a un ospital per identifia par ADN.
Junaid Jamshed, un cantor de pop e prete muslim, ia es en la avion, como ance tre persones stranjer -- du de Osteraic e un de Xina.
Relatadas de la vitimes ia es coler cuando los ia asembla a la ospital per reprende la restas de sua amadas. Un de los ia comenta: "Lo es un omiside e me vole sabe ci ia mata mea frate."
Cades de avion no es noncomun en Pacistan, ma la cade major la plu resente de un avion de PIA ia aveni en 2006, cuando 44 persones ia mori.
@T Un avion colpa un auto en California
@L aora_oji/2016/un_avion_colpa_un_auto_en_california
====== Un avion colpa un auto en California ======
3 april 2016
Un avion ia cade sur un autovia en California, colpante un auto e matante un de la pasajores, a un desenio e un dui pos cuando on ia atera lo sur esata la mesma via.
Sinco otra persones ia es ferida, incluinte la pilote e pasajor de la avion.
Atestores ia dise ce la avion ia pare esperia problemes tecnical ante cuando lo ia atenta atera.
En 2000, un posesor presedente ia susede un desende de la mesma avion Lancair IV sur esta autovia cuando sua motor ia rompe.
Ma a esta ves, lo ia atera sur sua ventre ante lisca contra un auto prosima, crasente Antoinette Isbelle, un fem de 38 anios de la site San Diego, ci ia senta sur la seja retro.
La polisia dise ce la gidor ia parci tempora la auto per pote usa sua telefon.
La pilote ia es Dennis Hogge, un om de 62 anios. El e sua pasajor ia es grave ferida.
Matt Nokes, un bascetbalor profesal pasada ci ia fa la desende en 2000, ia dise ce el conose la pilote, descrivente el como un bon om.
En la desenio pasada, tre otra aviones ia es obligada a desende sur la mesma estende de via.
@T Un avion misre desapare en vola de Paris
@L aora_oji/2016/un_avion_misre_desapare_en_vola_de_paris
====== Un avion misre desapare en vola de Paris ======
19 maio 2016
Un avion de EgyptAir cual ia es portante 66 persones de Paris a Qahira (Cairo) ia desapare de radar.
La Airbus A320 ia asenti supra la este de la Mediteraneo, corta pos entra a la airospasio misri.
La airocompania dise ce lo ia reseta un sinial per aida ante cuando la avion ia sesa es detetable par radar.
En la vola MS804, on ia ave 56 pasajores -- incluinte tre enfantes -- sete ecipores, e tre securiores. La pasajores ia inclui 30 misris, 15 franseses, un brites, du iracis, e ance viajores de Canada, Beljia, Cuait, Arabia Saudi, Jazair, Sudan, Txad, e Portugal.
La avion ia parti de la airoporto Charles de Gaulle en Paris a 23:09 de ora local a la sera de ier, e la intende ia es ce lo va ariva en la capital de Misre oji, corta pos 3:00 local.
Lo ia vola a 11 300 metres supra la Mediteraneo cuando on ia perde la contata a 02:45 de ora de Qahira.
La autoriosas elinica ia acompania soldatos misri en la opera de xerca.
Plu temprana, un ofisior sitada par la jornal misri Al-Ahram ("La piramides") ia dise ce la contata final con la avion ia aveni a des minutos ante sua desapare, e ce no sinial per aida ia es enviada. Ma EgyptAir ia tuita ce la aparatos de crise de la avion ia envia un tal sinial.
La avion ia vola de Asmara en Eritrea a Qahira, e de ala a Tunis (la capital de la pais con la mesma nom), ante vade tra Qahira a Paris.
Sherif Ismail, la ministro xef de Misre, es a la airoporto en Qahira con la familias de los ci ia es en la avion.
En marto, un avion de EgyptAir ia es saisida en viaja e diverjeda a Cipros. La atacor ia sede plu tarda e tota ostajes ia es librida.
En otobre pasada, un avion rusce de pasajor en vola de Sharm el-Sheikh ia cade a la penisola Sina, matante tota sua 224 persones. Ofisiores en Rusia e Misre ia dise plu tarda ce lo ia es tirada a tera par un aparato esplodente, e ativistes de Daex ia dise ce los ia bombi lo.
@T Un avion rusce cade en la Mar Negra
@L aora_oji/2016/un_avion_rusce_cade_en_la_mar_negra
====== Un avion rusce cade en la Mar Negra ======
26 desembre 2016
Un opera jigante de xerca continua en Rusia pos la cade ier de un avion militar rusce con 92 persones en la Mar Negra.
Sirca 3500 persones en barcones, jetos, elicotores, e sumarinas es envolveda en la xerca prosima a Sotxi.
La avion Tu-154 ia vade en dirije a Suria, portante soldatos, reportores, e membros de un bande famosa de musica militar.
On teme ce tota esta persones ia mori, e on ia declara oji como un dia de lamenta nasional.
11 corpos e 154 fratos es ja trovada. Lampas forte de punto ia es usada per xerca la loca tra la note.
Maksim Sokolov, ministro de transporto, ia dise ce terorisme no es "entre la varias xef" de la causas posible de la cade. El ia clari ce investigores esplora esce un era de pilote o un fali tecnical ia cade la avion.
La avion ia desapare de radar a du minutos pos sua enaira de la airoporto Adler en Sotxi a 05:25 de ora local, en dirije a Latakia en Suria. La vola ia orijina en Moscva e ia atera en Sotxi per prende carburante.
Lo ia porta 64 membros de la grupo Alexandrov ci ia intende presenta musica a soldatos rusce en Suria.
Un rejistra audio, parente de la conversa final entre la avion e controlores de trafica airal conteni no indica ce la ecipo esperia problemes. Voses resta calma asta cuando la avion desapare e la controlores atenta futil regania la contata.
La avion ia comensa opera en 1983. Lo ia es mantenida en setembre, e ia es reparada a grado plu grande en desembre 2014. Sua pilote ia es esperiosa.
@T Un barco-bus esplode en Bangkok
@L aora_oji/2016/un_barco-bus_esplode_en_bangkok
====== Un barco-bus esplode en Bangkok ======
5 marto 2016
A la min 58 persones ia deveni ferida en Bangkok, la capital de Tai, cuando la motor de un barco-bus ia esplode cuando lo ia ariva a un molo.
La plu de la feridas ia es minor ardeda, ma on reporta ce du pasajores ia es grave colpada par detrito volante.
On sujesta ce un gotea de carburante es culpable.
Barcos-buses opera en la canales de Bangkok e es un modo popular de transporta en la site traficosa.
Un video de la aveni, postada par un jornal, mostra ce la barco folida ia prosimi a la molo Wat Thep Leela en la este de Bangkok con nubes de fuma negra vidable a sua retro.
Un grupo de pasajores, parente sin reconose la peril, atenta embarca, ante cuando la barco es colpada par un esplode. Deses de persones salta alora a securia sur la molo.
Du persones miama e un japanes es entre la feridas.
La barco ia es propulsada par e gasolio e gas natural licuidida. Sua compania va usa sola gasolio en sua barcos asta cuando la investiga trova sua resultas.
Seguente un statistica de 2012, plu ca 100 mil persones usa esta barcos de canal en Bangkok a cada dia.
@T Un barcon colpa la mur de la Canal Panaman
@L aora_oji/2016/un_barcon_colpa_la_mur_de_la_canal_panaman
====== Un barcon colpa la mur de la Canal Panaman ======
26 julio 2016
Un portacontenador xines ia colpa un mur de la Canal Panaman, resente largida a custa de multe miliones de dolares.
Esta es la asidente tre de esta spesie pos la abri de la renovis a un mense ante aora.
Alga persones ia ave ja ansia ce la canal nova ave min spasio per manobras e pote es nonsecur.
Laborores cexa ce la clusas es tro peti per funsiona secur su la scema nova, en cual la canal aseta barcones truple plu grande ca a ante.
La organiza autoriosa de la canal investiga la avenis.
La barcon Xin Fei Zhou ia sufri un talia grande a sua corpo. On repara aora lo.
La clusas nova es desiniada en tal modo ce barcos tirante gida la barcones tra la canal. En la sistem vea, locomotivas conoseda como "mulos" ia teni la barcones en bon alinia en cuando los ia pasa a tra.
Un studia per la Federa Internasional de Laborores de Transporta, publicida en la plu temprana de esta anio, ia conclui ce la cameras de la clusas nova es tro peti per permete bon manobras par la barcos tirante.
On ia comensa labora sur la largi en setembre 2007, con intende orijinal de fini en 2014. Pos retardas causada par greves de construores e par disputas sur esedes de bujeta, on ia pospone la data per completi asta april 2016.
La viaja prima tra la canal grandida ia aveni a 26 junio.
@T Un barcon de carga risca encalia en Frans
@L aora_oji/2016/un_barcon_de_carga_risca_encalia_en_frans
====== Un barcon de carga risca encalia en Frans ======
1 febrero 2016
Un barcon de carga vade malfunsionante en dirije a la costa franses, ma on espera ce on va susede tira lo a securia ante cuando lo encalia.
La Espresa Moderna, cual ave 164 metres e ia es rejistrada en Panama, ia comensa apoia a martedi pasada, e on ia move tota 22 ecipores de sur lo par elicotor pos un clama per aida.
Atentas de tira lo no ia susede, ma on va atenta denova oji. Si esta fali, la barcon va colpa la costa sude-ueste de Frans en la oras temprana de la matina doman.
Ier, un clima nonfavorente ia impedi la laboras de salva, a du dias pos la rompe de un cordon de tira liada a la barcon sur mar turbosa.
La barcon porta 3600 tones de lenio e macinas de escava, e apoia aora con angulo de entre 40 e 50 grados.
Un portavose ia dise ce "reti la barcon de carga es completa nonposible" aora.
Sirca 300 tones de carburante es en la barcon, diseda par autoriosas franses. La jornal Sud-Ouest ia reporta ce on va ativi medios de crise si la barcon encalia, per conteni e sutrae la carburante.
En 2002, un tancador de petrolio ia afonda a lado de la costa de Espania norde, malversante 50 mil tones de petrolio e contaminante miles de cilometres de la borda de mar.
A 10:00 de ora universal ier, la Espresa Moderna ia es situada a sirca 100 cilometres de la costa sude-ueste franses, entre Bordeaux e Biarritz.
@T Un blog major xines es blocida pos critica la presidente
@L aora_oji/2016/un_blog_major_xines_es_blocida_pos_critica_la_presidente
====== Un blog major xines es blocida pos critica la presidente ======
28 febrero 2016
Xina ia clui la contas de microblog de Ren Zhiqiang, un om franca ci ia es un maniate de imobila en pasada, pos cuando el ia critica presidente Xi Jinping.
La Dirijores Siberspasial de Xina ia acusa Ren de publici "mesajes nonlegal cual ia ave un mal efeto".
Ren ia scrive ce la jornalisme nasional es finansiada par paiores de imposta e debe servi estas, no la Partito Comuniste.
Plu temprana en febrero, la presidente ia recomenda forte ce jornalistes nasional segue la opinas de la partito en sua reportas.
On ia critica Xina per sua regula sever de la interede, incluinte la bloci de alga pajerias major e la sensura de postas. Ma Xi dise ce paises individua ave la direto de eleje sua propre manera de developa e regula la rede.
Cuasi 40 jornalistes es aora en prison en Xina per obras cual los ia posta enlinia, diseda par Reportores sin Fronteras, un grupo promovente.
Ren Zhiqiang es un developor major de imobila, jubilada, con plu ca 30 milion seguores enlinia. Sua blog a Weibo en la semana pasada ia ataca Xi e ia es criticada par la jornalisme ofisial. Per esemplo on ia descrive lo como comunicante pensas "contra la Partito Comuniste".
Un portavose per la Dirijores Siberspasial de Xina ia comenta ce usores de la rede debe obedi la lege e la fundas de sosialisme.
Xina ia desveli ance regulas nova, cual va reali a 10 marto, per proibi companias jornaliste stranjer e coemprendes stranjer de distribui informas enlinia sin un aproba presedente par ofisiores en Beijing.
@T Un bomba de camion mata sirca 50 persones en Irac
@L aora_oji/2016/un_bomba_de_camion_mata_sirca_50_persones_en_irac
====== Un bomba de camion mata sirca 50 persones en Irac ======
7 marto 2016
En Irac, a la min 47 persones ia mori pos cuando un tancador de carburante ia es esplodeda a un punto de controla prosima a Hilla, un site a sude de la capital, Baghdad.
Tredes-nove de la mores ia es nonmilitar, e deses ia deveni ferida.
La ataca ia aveni corta pos mediadia de ora local, cuando deses de autos ia sta a la punto de controla.
La grupo Daex ia declara ce lo ia esecuta la ataca en un posta a la pajeria de la ajenteria jornaliste Amaq, cual suporta lo. La posta ia descrive la ataca como "un opera de martir".
An si la area do la esplode ia aveni no es controlada par Daex, la estremistes suni ataca ja locas distante de la combate.
Bombas umana en camiones portante esplodentes es sempre plu usada par Daex per ataca blancos nonmilitar, spesial en rejiones con majorias xia.
Un statistica de la Nasiones Unida indica ce a la min 670 iracis ia es matada en la mense pasada, de ci du tris ia es nonmilitar.
On teme ce Daex va fa plu tal atacas en cuando los perde sua teritorio en la resta de la pais.
Fortes de securia iraci, suportada par la alia gidada par la SUA, aumenta la batalia en e sirca la vilas e sites ancora ocupada par Daex. Los prepara aora per un ataca major contra Mosul, la xeferia de Daex en Irac.
@T Un bomba mata en Ankara
@L aora_oji/2016/un_bomba_mata_en_ankara
====== Un bomba mata en Ankara ======
14 marto 2016
Recep Tayyip Erdoğan, la presidente de Turcia, ia promete trae terorisme "a sua jenos" pos un ataca en la capital, Ankara, cual ia mata a la min 32 persones.
Erdoğan ia dise ce la bomba umana de auto va susede mera forti la determina de la securiores turces.
La esplode en Güvenpark, un sentro major de transporta, ia feri a la min 125 persones. Du bombores suspetada ia mori ance.
La ministro de internas, Efkan Ala, ia dise ce un investiga va conclui oji e la atacores va es nomida.
No grupo ia dise ce lo ia esecuta la ataca, ma fontes governal sujesta ce on suspeta la Partito de Laborores de Curdistan (PKK).
La rebelores curdi ia fa un serie de atacas en Turcia en menses resente, matante sentos de persones, pos la fini de un sesaspara en la anio pasada. Ance la grupo Daex ia ataca resente Ankara.
Turcia es un parte de la alia gidada par la SUA contra Daex, e lo permete ce aviones aliada usa sua base a İncirlik per atacas contra Irac e Suria.
Lo ia fa ance un campania de bombardas contra combatores curdi suri de la Unias Protejente de la Popla (YPG), cual lo regarda como un estende de la PKK.
Erdoğan ia declara ce grupos teroriste ataca nonmilitares car los perde la batalia contra la fortes de securia turces.
Demandante per unia nasional, el ia dise ce Turcia va usa sua direto a autodefende per preveni atacas futur. "Nosa popla no debe es ansiosa. La luta contra terorisme va fini serta con susede, e terorisme va es traeda a sua jenos."
Seguente la ajenteria nasional de novas de Turcia, Ahmet Davutoğlu, la ministro xef, ia pospone un visita a Urdun par causa de la bombi.
La Statos Unida ia condena la ataca. Un portavose per la departe de esternas ia dise: "Nos reafirma nosa asosia forte con Turcia, nosa aliada en OTAN, en combate la menasa compartida de terorisme."
Jens Stoltenberg, la secretor jeneral de OTAN, ia condena ance la bombi, disente ce on ave "no justi de tal atas de violentia odiable".
La partito turces procurdi ia publici un declara condenante la ataca. La Partito Democrata de la Popla (HDP) ia dise ce lo comparti "la dole vasta sentida a lado de nosa sitadanes".
On acusa frecuente ce la HDP es la ala political de la PKK -- un acusa cual lo nega -- e ce lo no parla contra la violentia de la PKK.
La esplode ia aveni ier a sirca 18:40 de ora local, e on ia sorti cadun de la area per si un ataca du ta aveni.
Mehmet Müezzinoğlu, la ministro turces de sania, ia informa un confere jornaliste ce 30 persones ia es matada a la loca de esplode, e cuatro ia mori plu tarda en ospital. On crede ce du de la mores ia es la atacores.
Müezzinoğlu ia dise ce 125 persones es tratada a ospitales diversa en Ankara, e ce 19 de los es en state grave.
En la mense pasada, un ataca de bomba contra un convoia militar en Ankara ia mata 28 persones e ia feri deses de otras.
Lo acel bombi ia es reclamada par un grupo militariste curdi, la Falcones de Libria de Curdistan. La grupo ia dise a sua pajeria ce la ataca retalia contra la politicas de presidente Erdoğan. Ma Turcia ia culpa un suri ci ia es un membro de la YPG.
En otobre 2015, plu ca 100 persones ia es matada en un bombi umana duple a un asembla de pas curdi en Ankara.
Tre atacas en la capital turces en min ca ses menses indica la menasa multiple cual la pais fronti aora, e leva demandas sur la capasia de la governa de manteni la securia.
La pais cual ia es la angulo stable de Asia sude-ueste e la aliada esensal de la Ueste en un area volatil trova aora se a un momento perilosa.
@T Un bomba umana en Peshawar
@L aora_oji/2016/un_bomba_umana_en_peshawar
====== Un bomba umana en Peshawar ======
19 janero 2016
En Pacistan norde-ueste, a la min 10 persones ia es matada par un bomba umana sur un motosicle prosima a un punto de controla de polisia.
Sirca 20 persones ia es ance ferida en la esplode, cual ia aveni en la Areas Tribal Federal Manejada a la anteurbe de Peshawar.
Asta aora, no grupo ia nomi se como la atacor.
La bomba ia esplode prosima a la mercato Karkhano. Imajes televisada ia mostra veculos parcida en la visinia en flamas a pos.
A la min sinco polisiores es entre la mores. Sua veculo ia es la gol de la bombor, seguente ofisiores.
Alga siviles ia mori ance, incluinte un enfante.
Batalias ferose ia aveni ja en la area entre soldatos de securia e talibanes pacistani.
En la mense pasada, un otra ataca en cual on suspeta un bomba umana en Pacistan norde-ueste ia mata 26 persones.
Lo ia esplode estra la ofisia de la Autoriosa Nasional de Datos e Enscrive en la vila Mardan, e ia es un de la atacas la plu matante pos la masacra de 150 scolores e enseniores par talibanes en desembre 2014.
@T Un broma de april par Google fa ce on no rie
@L aora_oji/2016/un_broma_de_april_par_google_fa_ce_on_no_rie
====== Un broma de april par Google fa ce on no rie ======
2 april 2016
Google ia sutrae un boton de Gmail cual ia es intendeda como un broma de april. La boton ia envia un anima comica, ma alga persones ia encontra problemes con lo en sua laboras profesal.
La boton ia apare a lado de la boton normal de envia, e ia permete ce on fini un conversa epostal par envia un imaje animada de un minion ci cade un microfon. Pos clica lo, on ia reseta no plu mesajes en acel conversa.
Un serie de cexas sur la boton ia apare en la foros de Google. La compania ia sutrae la boton e ia demanda per un pardona.
Lo ia ajunta ce usores ancora capas de vide la boton pote sutrae lo par reinisia la program Gmail.
La cade de microfon es un conseta de cultur poplal en cual un person fa un declara o refuta concluinte, ante lasa ce sua microfon cade e pasea a via.
La boton no ia apare en la contas Gmail de clientes comersial.
"Con grasias a esta, me veni de perde mea emplea," un usor ia comenta a la foros de Google. "Me es un scrivor e ia debe fini ante un limita de tempo. Me ia envia mea articles a mea empleor e ia reoia nunca de el. Sin intende, me ia envia la eposta par la boton de cade la microfon."
Un otra person ia cexa ce ja tra tre menses el fa intervisas per un posto en un compania, ma ia envia acaso un cade de microfon a la departe de emplea.
Un usor tre ia dise ce el ia envia "un eposta importante a 30 resetores".
Plu, par causa de un era en la codigo, en alga casos la imaje de la minion ia pote es enviada a la resetor an cuando on no ia clica la boton bromante.
Google ia informa usores sur la boton e sua funsiona, par un mesaje en Gmail cuando lo ia apare prima.
Usores ci ia comuta la capasia de "desenvia" ia pote retira un mesaje en un periodo de tempo pos envia lo.
La compania ia publici ance alga videos bromante, incluinte un sur un servi nova de trae benes par paracade e un otra sur un elmo de "realia vera".
Google ia anunsia orijinal la crea de Gmail a 1 april 2004, e alora multe persones ia demanda a se esce lo va es desvelida como mera un broma de april.
@T Un cade rapida en la cuantia de renos
@L aora_oji/2016/un_cade_rapida_en_la_cuantia_de_renos
====== Un cade rapida en la cuantia de renos ======
13 desembre 2016
Siensistes averti ce la manada la plu grande de renos savaje ia diminui par 40% de pos la anio 2000.
Los dise ce esta animales, cual abita la Penisola Taimyr en la parte la plu norde de Rusia, es afetada par temperatur altinte e ativia umana. La bestias cambia sua migras anial.
La rexerca ia es presentada a la consenta autonal de la Uni Jeofisical American.
La manada de Taimyr es un de la grupos la plu monitorida de renos en la mundo. On ia segue la animales tra cuasi 50 anios par avion e plu resente par imajes de satelite.
La cuantia ia ateni milion en 2000, ma esta rexerca nova sujesta ce on ave aora sola 600 mil.
Cambia de clima e developa industrial en la rejion cambia la distribui de la bestias.
La rexercores ia descovre ce, en la estate, la renos move a este per evita umanas. Ma los move ance a norde e a locas plu alta, probable per atenta trova tera plu fria e per evita la moscitos cual buma en cuando la rejion deveni plu calda e plu pluvosa.
Esta estende la distantia tra cual la animales debe migra entre inverno e estate, con plu risca a los con bebetas.
En ajunta, rios en la rejion deveni plu grande e plu perilosa per la bestias, ci debe traversa los par nada, en loca de pasea.
E comedas en la rejion de estate deveni min comun, spesial car la animales move a locas plu alta.
Andrey Petrov, ci dirije la Sentro Artica a la Universia de Iowa Norde ia comenta: "Renos es estrema importante per biodiversia -- los es un parte de la cadena nural e, sin los, otra spesies ta ave problemes. Ma a contra, en tota la rejiones cual los abita, los es esensal per la survive de persones. Miles e miles de persones depende de renos savaje: lo es la funda de sua economia de susiste. Donce lo es ance un caso de sustablia umana."
@T Un caldia recordo en la Artica
@L aora_oji/2016/un_caldia_recordo_en_la_artica
====== Un caldia recordo en la Artica ======
24 desembre 2016
La temperatur presente a la polo norde es plu calda ca promedia par cuasi 20 grados, en un onda recordo de caldia.
Tra novembre e desembre, la temperatur ia ave sinco grados de celsius plu ca promedia, pos un estate cuando la jelo de la Mar Artica ia ateni la estende du de la plu petis de istoria rejistrada par satelites.
Dr Friederike Otto, un rexercor a la Instituida de Cambia Ambiental en Oxford ia dise ce en edas preindustrial, "un tal onda de caldia ia ta es estrema rara -- nos ta espeta esperia lo a sirca un ves en cada milenio."
El ia ajunta ce siensistes es "multe serta" ce la fenomenos climal es relatada con cambias par umanas.
On previde ce la temperatur masima, cuasi 0°C, va es atenida a la polo norde oji.
Aira calda de la Mar Atlantica norde va flue asta la polo par via de Spitsbergen, creante nubes cual va preveni la relasa de la caldia.
Otto ia esplica ce la redui de jelo de mar contribui a esta "sicle de renuri": "Si la globo caldi, alora la jelo de mar e jelo de tera diminui, e la acua e tera plu oscur es esposada. Alora la lus de la sol es asorbeda e no refletada par la jelo."
La ambiente jelante e dejelante causa ja ce renos no trova fasil comedas, car la mos cual los come es aora covreda par jelo dur, en loca de neva mol e penetrable.
@T Un colpa de stato es atentada en Turcia
@L aora_oji/2016/un_colpa_de_stato_es_atentada_en_turcia
====== Un colpa de stato es atentada en Turcia ======
16 julio 2016
La presidente de Turcia, Recep Tayyip Erdoğan, ia denunsia un atenta de colpa de stato como "un ata de tradi" e ia insiste ce sua governa resta en controla.
On acusa un parte de la fortes armada de atenta saisi la potia. Ofisiores dise ce la colpa ia fini, ma on ancora no ia confirma esta.
La sites Ankara e Istanbul ia esperia un note de bombas esplodente, atacas airal, e fusilis. A la min 60 persones ia mori e sentos ia es ferida. 1563 soldatos ia es arestada.
Imajes dramosa ia mostra deses de soldatos paseante a via de sua tances, con manos levada, sur un de la pontes supra la Bosporo en Istanbul. Los ia clui la ponte contra trafica tra la note intera.
La Cresente Roja en Turcia dise ce 800 persones en Ankara e 200 en Istanbul es en ospital pos la note de violentia.
La avenis ia comensa a la sera de ier, cuando tances ia posa se sur pontes major en Istanbul, blocinte los. On ia vide soldatos en la stradas e jetos militar ia vola basa supra Ankara, la capital.
Alora, un partito de la armada ia declara ce "un consilio de pas" maneja la pais, e ce on va enforsa un ora de retira e leges militar.
La grupo ia dise ce lo ia inisia la colpa de stato "per serti e restora la ordina constitual, democratia, diretos e librias umana." Lo ia declara ce la governa presente ia erode la lege democrata e secular, e ce on va ave un constitui nova.
Erdoğan ia es en Marmaris, un vacanseria en la sude-ueste de la pais, ma ia vola a Istanbul. El ia dise ce Marmaris ia es bombida pos sua parti.
El ia usa sua telefoneta per fa un declara televisada, recomendante ce persones vade sur la stradas per oposa la revolta. "Me ia crede nunca a un potia plu alta ca la potia de la popla," el ia dise.
La ministro xef, Binali Yıldırım, ia comanda la militaria a tira a tera la aviones usada par la conspirores.
On reporta ce Hulusi Akar, la jeneral xef de la armada, ia es saisida como ostaje par la rebelores, ma el es aora librida.
La parlamento e construidas presidental en Ankara ia es atacada en la note. A la min un bomba ia colpa la compleso parlamental. On crede ce parlamentores ia asconde en refujerias.
On ia oia xutas ance estra la xeferia de la polisia en Istanbul, e tances ia es posada estra la airoporto. La canal de novas CNN Türk ia es saisida par soldatos e sua difusa direta ia es abortada.
Multe persones ia segue la recomenda de Erdoğan e ia fronti la revoltores sur la stradas. On ia reporta scaramuxas en la Plaza Taksim de Istanbul, con fusilis e esplodes prosima.
Un de la elicotores volada par la rebelores ia es tirada a tera en Ankara, e fusilis ia es ancora oiada de tempo a tempo en alga partes cuando la matina ia ariva.
La situa no es clar, ma la ministreria turces de esternas ia dise ce la colpa de stato ia es "prevenida par la popla turces en unia e acorda. Nosa presidente e governa es en controla."
Atatürk, la airporto xef de Istanbul es aora controlada par la armada, e on ia intende recomensa volas -- interompeda per alga oras -- a 06:00.
La sede de un grupo de 60 soldatos sur un de la pontes de Istanbul ia es direta televisada a esta matina.
On ancora no sabe ci ia scema la colpa de stato. Turcia ia descrive la faores como "un ronda cluida en la fortes armada".
Plu temprana, Erdoğan ia colpa "un strutur paralel", un espresa cual el ia usa en la pasada per refere a Fethullah Gülen, un eglesor muslim en la SUA ci el acusa de provoca turbas.
Ma, en un declara, Gülen ia rejeta la sujesta ce el es liada a la avenis. "Me condena, en termas la plu forte, la colpa militar atentada en Turcia," el ia dise.
En Washington, Barack Obama, la presidente de la SUA, ia recomenda ce tota partitos en Turcia suporta "la governa democrata elejeda".
OTAN ia recomenda "respeta completa" per la instituis democrata de Turcia. E Donald Tusk, la presidente de la Consilio European, ia descrive la pais como "un asosior major per la Uni European", ajuntante: "Nos esije un reveni rapida a la ordina constitual de Turcia."
@T Un combate violente sur un plaia corsu
@L aora_oji/2016/un_combate_violente_sur_un_plaia_corsu
====== Un combate violente sur un plaia corsu ======
15 agosto 2016
Un combate de "violentia grande" sur un plaia sur la isola franses Corse, entre jovenes local e tre familias de desende norde african, ia lasa sinco persones ferida e tre autos ardeda.
La combate a saturdi ia comensa cuando la familias ia oposa ce on fa fotos de los. Los ia es baninte a un rieta prosima a la vileta Sisco en Corse Alta.
Petras e botelas ia es lansada, e alga de la combatores ia es armada con axetas e arpones.
La turba ia continua ier a un protesta en la capital rejional. La xef de la governa rejional, Gilles Simeoni, ia apela per calmia.
En esta estate, la tensa ia crese en la sude de Frans entre comunias local e muslimes de orijina norde african, spesial pos la masacra de 85 persones par un camionor en la site Nice a 14 julio.
A la fini de la mense pasada, un grupo corsu paramilitar e nonlegal ia averti ativistes islamiste contra ataca la isola.
E plu temprana en esta semana, la site Cannes ia crea un controversa en proibi la usa de la burcini, un veste de nada per femes muslim.
La turba ia comensa a sirca 18:15 cuando turistes ia fa fotos de femes baninte en tal vestes.
On reporta ce alga de la omes plu vea en la grupo baninte ia ataca un grupo de adolesentes local sur la plaia con axetas. Cuando la jenitores de la adolesentes ia ariva de la vileta, on reporta ce du de los ia es ferida con arpones. On alega ce viletanes ia ensende autos parteninte a la baniores.
On reporta ance ce un om ia es ferida a du veses par un arpon pos cuando sua fio ia es bateda. Du padres de la grupo baninte ia es ance ferida en la combate.
On ia libri aora tre de la persones ferida de ospital en la vila Bastia, e la otra du va es desospitalida pos tempo corta.
Bernard Cazeneuve, la ministro franses de internas, ia condena la violentia e ia apela ance per calmia.
Sentos de persones ia fa un protesta en Bastia, vadente en dirije a un compleso de casas do alga de los envolveda en la combate abita. Polisiores ia forsa los a retro e on ia xuta gas lacrimojen a la lansa de petras.
@T Un comite vota per acusa la presidente de Brasil
@L aora_oji/2016/un_comite_vota_per_acusa_la_presidente_de_brasil
====== Un comite vota per acusa la presidente de Brasil ======
12 april 2016
Lo ia deveni min probable ce la presidente de Brasil, Dilma Rousseff, va evita un esamina judal de sua ativias, pos cuando un comite ia vota ce esta debe aveni.
38 de la 65 membros de la comite congresal ia vota per recomenda acusa formal Rousseff sur alegas ce el ia manipula contas de governa per asconde problemes finansial cresente.
Un plu vota va aveni en la salon basa a 17 o 18 april.
La tema ia divide la pais, e la polisia prepara per protestas coletiva en la capital, Brasília.
La vota ia aveni a media de un sena caososa en cuando ambos la suportores e la oposores de la presidente ia cria sloganes e ia brandi cartones.
La vota de la comite es vera no plu ca un simbol, ma on oserva lo como un mesura de la cuantia de suporta per la prosede de acusa, ante la vota major en la salon basa de la Congresa.
Ala, un majoria de du tris va es nesesada per envia plu la demanda a la Senato. Un sonda resente sujesta ce 292 de la 513 membros favore la proposa, con 115 oposores e 106 ci ancora no ia deside.
La Senato ta ave alora la potia de suspende Rousseff, prosede el, e forsa ultima el de sua posto.
Si on suspende Rousseff, la vispresidente Michael Temer, de un partito oposante, ta deveni la presidente tempora. Ma en un plu developa, jornalistes brasilera ia revela ier un banda audio cual ia pare un varia ru de un parla cual el intende dise, asetante la posto e recomendante unia nasional.
En la rejistra, el dise: "Multe persones ia xerca me afin me va dona comentas inisial, a la min, a la nasion brasilera, e me fa esta con modestia, cautia, e modera."
Sua ofisia dise ce la rejistra ia es enviada a aidores par era.
En la caso ce on ta suspende ance Temer, la seguente en la posto xef ta es la presidente de la salon basa, Eduardo Cunha. Ma on ia acusa el de blanci mone e de otra malfas con orijina en la scandal de Petrobras.
@T Un compania rusce confesa sur la rojia de un rio
@L aora_oji/2016/un_compania_rusce_confesa_sur_la_rojia_de_un_rio
====== Un compania rusce confesa sur la rojia de un rio ======
13 setembre 2016
La produor la plu grande de nicel de mundo ia confesa ce un malversa a un de sua complesos ia cambia la color de un rio en la Artica rusce a roja sanguin.
Norilsk Nickel dise ce pluves forte a 5 setembre ia causa la suprabunda de un parario de filtra a sua compleso en Nadejda, a en la rio Daldican.
An tal, lo dise ce on ave no peril per persones o bestias savaje.
A ante, la compania ia nega intera sua culpablia cuando imajes de la rio roja, prosima a la site Norilsk, ia apare en la semana pasada.
Un ativiste rusce de Greenpeace ia comenta ce lo es ancora tan temprana ce on no pote judi la efeto a la ambiente. "On no pote dise mera ce esta es no cosa grande," Alecsei Ciselyov ia dise.
El ia ajunta ce Norilsk Nickel controla la asede a la intera de la Penisola Taimir do la problem ia aveni, e ce esta impedi investigores de studia la contamina par sua complesos.
En la semana pasada, ofisiores de la ministreria de ambiente ia sujesta ce un gotea de contaminantes cimical de un tubo a la compleso industrial ia pote descolori la rio.
Ma Norilsk Nickel ia nega tal alegas, an publicinte fotos sur cual lo ia dise ce los mostra la rio con un "tinje natural" a 7 setembre.
Comunias nativa ia acusa la compania de normas laxe de securia.
@T Un concurso de belia de boves
@L aora_oji/2016/un_concurso_de_belia_de_boves
====== Un concurso de belia de boves ======
9 maio 2016
A la fini de semana, sentos de boves mas e fema ia partisipa en un concurso unica de belia en la site Rohtak en la norde de Barat.
La aveni ia es organizada par la governa local per promove la razas boval de la pais e per crese consensia sur diretos de bestias.
Plu ca 600 boves ia partisipa. La posesor de la bove vinsente ia reseta un premio de 250 mil rupis ($3600).
Cultivores ia veni de distritos diversa de la stato Haryana con sua boves per la aveni, e la parada orgulosa sua animales.
An si la plu de la boves ia condui refinada e ia pasea rapida longo la plataforma, on ia debe puieta otras a fini la taxe.
On ia judi la boves mas per sua grandia, aspeta jeneral, e longia de cornos. La boves fema ia es judida per sua aspeta e capasia de produi lete.
La Ministro de Cultiva de Haryana ia dona la premio a la posesor de la vinsente.
Sola razas nativa ia es permeteda a partisipa en la concurso, per populari los entre cultivores local.
La studiantes de la Instituida Internasional de Instrui e Rexerca Veterinar ia fotografi se con la bove vinsente.
@T Un conserta en la ruinas de Palmira
@L aora_oji/2016/un_conserta_en_la_ruinas_de_palmira
====== Un conserta en la ruinas de Palmira ======
6 maio 2016
Un xef famosa de orcestra rusce ia gida un conserta en la ruinas de Palmira en Suria, cual ia es recaturada de la organiza Daex en marto.
Valery Gergiev, un suportor de la presidente rusce Vladimir Putin, ia gida la Orcestra Simfonial Mariinski, de San Petersburg, en la teatro roman en Palmira.
En julio pasada, Daex is posta videos cual ia mostra alga de sua combatores matante persones en esta teatro antica.
Fortes suri, suportada par atacas airal par Rusia, ia recatura la loca.
Gergiev ia dirije la orcestra tra obras par Johann Sebastian Bach, Sergei Procofiev, e Rodion Xtxedrin, ante un fola de soldatos rusce, ministros governal, e jornalistes.
Imajes de la conserta, difusada en la televisa nasional rusce, ia es interompeda de tempo a tempo par videos de atas militar, mostrante la suporta militar rusce per la fortes governal suri en cuando los ia libri Palmira de la combatores de Daex.
Asta resente, Gergiev ia es la xef major de la Orcestra Simfonial de London, e es aora la dirijor musical de la Orcestra Filarmonial de München. En 2014, el ia suporta Putin sur la prende de Crim de Ucraina. En 2008, el ia gida un conserta en la ruinas de Tshinvali, la capital de Osetia Sude, cuando Rusia e Jorjia ia batalia sur acel teritorio.
La musiciste distinguida ia descrive sua conserta como un protesta contra la barbaria e violentia mostrada par Daex ci ia usa la amfiteatro roman de Palmira per esecuta prisonidas.
Ance la presidente rusce ia parla a la conserta, par un lia video de sua casa a la Mar Negra en Sotxi. El ia nomi la terorisme un maladia cual la mundo nesesa aboli, e ia dise ce an la fato ce la conserta aveni es "surprendente".
"La ata de oji ia envolve nonoportunes e periles grande per cadun, en un pais de gera, prosima a do la batalia continua ancora. Esta ia esije multe fortia e coraje personal de tota de vos," el ia dise.
An tal, la ministro de esternas de la Rena Unida, Philip Hammond, ia comenta ce la conserta es "un atenta nonconveninte per distrae atende de la sufri continuante de miliones de suris. Lo mostra ce on ave no profondas a cual la governa no va basi se."
Un de la solistes a la conserta ia es xeliste Sergei Roldugin, un ami de Putin, ci on ia nomi resente como la posesor de companias estrateritorial en la Paperes de Panama. El nega tota malconduis.
La organiza Daex ia destrui alga monumentos en sua ocupa de des menses de Palmira e sua loca asosiada de erita mundal de UNESCO. Du templos vea de 2000 anios, un arco, e tores funeral ia es lasada en ruinas. La grupo jihadiste, cual ia desconstrui ance alga locas premuslim en Irac, pais visina, crede ce tal strutures es idolinte.
An si alga monumentos amada ia es destruida, multe de la loca istorial ia es lasada sin dana.
Gergiev ia fa un conserta carital en Tokyo per vitimes de la desastre nucleal a Fukushima en 2012, e ia dirije un turi de consertas carital per recolie reservas per vitimes de la masacra a la scola de Beslan en Rusia en 2004.
@T Un construida colasa en pluve en Nairobi
@L aora_oji/2016/un_construida_colasa_en_pluve_en_nairobi
====== Un construida colasa en pluve en Nairobi ======
30 april 2016
Salvores en Nairobi, la capital de Cenia, xerca deses de persones sur ci on teme ce los ia es trapida par la colasa de un construida de sete niveles en pluve forte.
Imajes televisada de la loca ia mostra la asembla de un fola en la visineria Huruma, do salvores escava per trova survivores.
La Crus Roja ia critica "senas caososa" cuando salvores ia ariva.
La polisia ia informa ce on ia salva a la min 121 persones. On no sabe clar cuanto persones es trapida su la sete niveles de beton.
En ajunta, la pluve ia causa liscas de tera, destrui casas, e inonda vias. 14 persones ia mori, incluinte sete en la colasa. Cuatro ia mori cuando un mur ia cade.
Hurumu es un distrito povre a la borda de Nairobi. Lo conteni multe stradas streta cual ia impedi la ariva de pompores. La folas grande cual ia asembla ia es ance un fator impedinte.
Pos alga tempo, la armada ia emprende la controla de la salva, con aida de la Crus Roja Cenian.
Un portavose per la Crus Roja ia dise: "Nos oia ancora voses de persones ancora a interna."
Abitores ia descrive como la construida ia secute violente en la pluve ante colasa.
La cualia basa de construidas es un fato de la vive en Cenia. Un sonda en la anio pasada ia trova ce plu ca un dui de la construidas en la capital no conveni per es abitada.
On ave un demanda grande per casas en Nairobi. Esta ia provoca alga developores de imobila a sircoveni la regulas de construi, per redui sua custas e grandi sua profitas.
En 2015, presidente Uhuru Kenyatta ia comanda ce on esamina tota construidas de la pais, seguente un serie de colasas.
La salvores ia esperia bon momentos cuando los ia susede estrae alga enfantes de la ruinas tra venerdi.
Entretempo, la Crus Roja dise ce du xicos-pastores manca en un otra parte de la pais inondada.
@T Un controversa de sceletos islansce
@L aora_oji/2016/un_controversa_de_sceletos_islansce
====== Un controversa de sceletos islansce ======
23 april 2016
Un projeta per un otel nova en Rejkjavík, la capital islansce, ia deveni controversa, car on intende construi un parte de lo sur la semetero la plu vea de la site.
On sutrae ja sceletos de la semetero de Víkurkirkja, do la mores de Rejkjavík ia es enterada de sirca la anio 1000 asta 1838.
Ma alga membros de la consilio de site opina ce la reentera de esta abitores pasada de la capital dana la erita de la pais.
Þór Magnússon, un dirijor pasada de la Museo Nasional de Island, ia scrive: "La site debe evita un otel en la semetero. On ta pote cambia lo a un loca bela e pasosa per recorda jeneras pasada, en loca de un deponeria do turistes tira sua bagaje."
An tal, los ci labora sur la projeta sirca la construida vea de telecomunica, do la semetero es situada, dise ce la controversa es la resulta de "un malcomprende".
Vala Garðarsdóttir, un arceolojiste, dise ce on ia conose ja la esiste de la semetero cuando sua permete de construi ia es donada, e ce la loca ia es ja disturbada par projetas de construi en la sentenio 20, per cual la projeta presente va es un sustitua.
A esta ves, el ia nota, la construores "es multe plu bon consensa de sua obliga" a locas istorial.
Si on iniora la contoversa, la escavas ia revela ja informas sur la pasada de Island. Vala dise ce "vide la rituos diferente de entera en cristianisme es interesante", e ce la osos descovreda va furni a rexercores un fenetra a plu ca 800 anios de la istoria de Rejkjavík.
@T Un debate longa ante la vota sur la prosede de Rousseff
@L aora_oji/2016/un_debate_longa_ante_la_vota_sur_la_prosede_de_rousseff
====== Un debate longa ante la vota sur la prosede de Rousseff ======
12 maio 2016
La Senato de Brasil debate esce presidente Dilma Rousseff debe es judal prosededa per malcondui.
La majoria de la senatores ia dise ja ce los va vota contra la presidente. Si la vota plu tarda confirma esta, Rousseff va es automata suspendeda de sua posto.
On acusa el de manipula finansias en modo nonlegal per asconde la difere cresente entre revenu e spende governal, ante sua reeleje en 2014. El nega esta.
Rousseff ia fa un apela final a la Corte Suprema per para la ata, ma on ia refusa lo.
Un debate longa es aveninte ante la vota. La sesion de la Senato ia abri a cuasi 18 oras ante aora.
On ave 81 senatores en la Senato, la Salon alta. Setedes-un ia rejistra se per partisipa en la debate, e cadun reseta 15 minutos per sua parla. On no va fa la vota eletronical asta cuando cadun ia parla, sirca 06:00 de ora local (09:00 global).
La sesion ia es multe min pasionosa ca lo en la Salon basa a 17 april, en cual un majoria forte de la 513 legores ia vota per la prosede judal.
La membros de la Salon basa ia sita razonas diversa per sua desides. Multe ia dise ce los fa lo "per mea familia", "per Dio", o simple "per la pais".
A 03:55 de ora local, 60 senatores ia parla. Un majoria de 42 de estas ia suporta la prosede e 18 ia rejeta lo. Min ca des senatores resta per parla.
En la Senato, la razonas donada per la prosede es xef economial. Multe ia culpa Rousseff per la situa estrema mal de la economia de la pais. Brasil sufri sua retrosede la plu mal de 10 anios; la nonemplea ia ateni 9% en 2015; e la infla es la plu alta de 12 anios.
Los ci ia presenta razonas contra la prosede judal ia dise ce lo sembla un colpa de stato, e ce lo es un produida de odia e venja.
Fernando Collor de Mello, un presidente pasada ci mesma ia fronti un prosede judal en 1992, ia fa un parla longa sur lo cual el ia descrive como la nonjustia fada contra el, ma no ia indica clar como el intende vota sur Rousseff.
Si la vota oposa Rousseff, la vispresidente Michel Temer va sustitui per el tra la periodo de la prosede.
Rousseff ia promete batalia asta la fini. "Me no va resinia. Esta ia entra nunca a mea mente," el ia dise en un parla a martedi.
@T Un defeta de terorisme intendeda per la dia de natal
@L aora_oji/2016/un_defeta_de_terorisme_intendeda_per_la_dia_de_natal
====== Un defeta de terorisme intendeda per la dia de natal ======
23 desembre 2016
La polisia de Australia dise ce los ia aborta un ataca de teror cual ia es projetada per la site Melbourne a la dia de natal.
Sinco omes ia es arestada en la temprana de esta matina.
La menasa ia envolve la "usa de esplodentes" e otra armas incluinte "coteles o un fusil", e ia es dirijeda a locas major incluinte la stasion ferovial de Flinders Street, la plaza Federation Square, e la catedral de San Paulo.
Cuatro de la suspetadas es omes en sua desenio tre, naseda en Australia a familias lubnani. La otra es un australian de orijina misri.
La xef de polisia de la stato Victoria ia dise ce la omes es "autoestremida", inspirada par propaganda de la organiza Daex.
Un otra om e un fem ia es ance arestada e librida sin es acusada.
La stasion Flinders Street, Federation Square, e la catedral ocupa tre angulos de un crusa de vias no multe distante de la criceteria do on previde ce asta 100 mil persones va regarda un max entre Australia e Pacistan a 26 desembre.
La polisia va aumenta sua presentia a la criceteria e otra locas en la site.
@T Un deteneria nijerian es "un loca de moria"
@L aora_oji/2016/un_deteneria_nijerian_es_un_loca_de_moria
====== Un deteneria nijerian es "un loca de moria" ======
11 maio 2016
Amnestia Internasional dise ce en esta anio a la min 149 arestadas ia mori ja "en state xocante" a un deteneria militar en Nijeria norde-este.
En un reporta, Amnestia dise ce des-un de los ci ia mori a la caserna de Giwa ia es enfantes joven, incluinte cuatro bebes. Lo nomi la sentro "un loca de moria" e recomenda ce on clui lo.
Esta es la plu resente en un serie de reportas condenante la trata de suspetadas par la militaria nijerian. La armada no ia comenta sur esta reporta, ma lo ia dise en la pasada ce lo ia institui un departe de diretos umana per esamina alegas de maltrata.
La caserna de Giwa en Maiduguri, la capital de la stato Borno, es en un area do la autoriosas combate la grupo violente Boko Haram.
La reporta de Amnestia dise ce informas colieda par intervisas con arestadas pasada e atestores, e suportada par videos e fotos, pare mostra ce multe detenidas ia mori par causa de maladia, famia, desidrata, e feris de fusil.
Netsanet Belay, la dirijor de rexerca e promove per Africa a Amnestia Internasional, ia dise: "La descovre ce bebes e enfantes joven ia mori en state xocante en un deteneria militar es e angusante e asustante. Nos ia sona la alarma a multe veses sur la taso alta de mori de arestadas en la caserna de Giwa, ma esta trovas mostra ce, per e adultes e enfantes, lo resta un loca de moria."
La reporta recomenda ce on clui direta la caserna e libri tota arestadas, o move los a autoriosas nonmilitar.
Amnestia crede ce a Giwa on deteni sirca 1200 persones, de cual multe ia es coletiva arestada en modo acaso.
Lo dise: "Cuando los es en la caserna, on prisoni los sin posible de asede la mundo esterna e sin prosede judal. A la min 120 de la detenidas es enfantes."
A ante, Amnestia ia acusa la militaria de esecuta plu ca 640 detenidas pos un ataca par Boko Haram a la deteneria en marto 2014.
Lo ia dise ance ce, de pos 2011, plu ca 8000 omes e xicos joven es matada par fusil, famia, sofoca, o tortura pos sua arestas par la militaria nijerian, ma ce on no ia judi la esecutores como culpable.
@T Un dia de furia contra la proibi de biletas de rupi
@L aora_oji/2016/un_dia_de_furia_contra_la_proibi_de_biletas_de_rupi
====== Un dia de furia contra la proibi de biletas de rupi ======
28 novembre 2016
En Barat, partitos oposante dise ce miles de persones va partisipa en protestas nasional contra la proibi de du biletas major de mone par la governa.
Plu temprana en esta mense, la biletas de 500 e 1000 rupis ia es subita proibida, causante un caos en cuando on ia fili a bancos per intercambia sua mone vea. En alga casos, la polisia ia debe interveni per controla clientes ansiosa.
La ministro xef Narendra Modi ia defende la deside, descrivente lo como un medio contra la froda.
Ma oposores dise ce la cambia ia es malmanejada. En la semana pasada, los ia retarda la parlamento e ia esije ce Modi espresa regrete per la deside.
Lo no es clar cuanto momento publica va es jenerada par un dia de protestas, car multe baratis ia suporta la cambia, an si lo es nonoportun.
La plu de partitos oposante ia dise ce los va partisipa en lo cual on nomi la "dia de furia".
La stato sude Kerala, governada par comunistes, va esperia probable un sesa de ativia, e on ia projeta un asembla major de protesta en Kolkata, un site este. En la site sude Bengaluru, la partito xef oposante va fa un prosegue protestante, en cual on previde ce alga miles de persones va partisipa.
Sirca 90% de la intercambias finansial en Barat usa mone fisical, e multe persones no ave un conta de banco.
En sua adirije nasional prima pos cuando la governa ia proibi la plu de biletas esistente a soldi, Modi ia recomenda ce on fa paias dijital e usa min mone fisical.
En la semana pasada, Manmohan Singh, la ministro xef presedente, ia dise ce la proibi subita de la biletas multe usada es "un malmaneja monumentin" e ce la produi interna bruta va redui "par sirca 2%" par causa de la cambia.
@T Un duple de tremateras en Japan
@L aora_oji/2016/un_duple_de_tremateras_en_japan
====== Un duple de tremateras en Japan ======
16 april 2016
On labora per aida vitimes de un trematera forte cual ia aida Japan sude-ueste a sola un dia pos un trema simil matante.
20 mil soldatos es ativa en la opera en la rejion Kyushu pos la trema de grado 7,3 a 01:25 de ora local a esta matina.
A la min 18 persones ia mori, e sentos es ferida. On teme ce deses es trapida en la detrito de construidas colasada. La trema a jovedi ia mata nove.
Vias ia deveni danada, e liscas de tera ia aveni en multe locas. Sirca 200 mil casas es aora sin eletrica.
On teme ce pluves prevideda va provoca plu liscas de tera.
La trema du ia aveni prosima a Kumamoto, con profondia de 10 cilometres. Lo ia es multe plu grande e ia colpa un area plu vasta ca lo cual ia colpa la site Kumamoto a la note de jovedi.
Miles de persones ia pasa la note sur stradas e en parces -- do los ia foli su covreletos, con espresas aturdida e temosa.
On ave multe reportas de persones trapida en construidas, incluinte a la min 60 en un casa de persones vea.
Un vileta es vacuida pos la colasa de un parario, resultante de la trema, e un eruta peti ia aveni a Monte Aso, un de la volcanes ativa la plu grande de mundo.
La trema nova ia impedi la opera esistente de salva, e ia dana probable plu car lo ia es min profonda e sua linia de falia ia es multe plu longa.
La trema a jovedi ia ave la grado 6,2. En alga locas, lo ia causa secutes tan intensa como la trematera enorme cual ia colpa la pais en 2011 e cual ia inisia un tsunami e un fonde nucleal a la sentro eletrical en Fukushima.
La plu de la persones ci ia mori en la trema a jovedi ia es en la vila Mashiki, do un tore de apartes ia colasa e multe casas ia es danada. Plu ca mil persones ia es ferida.
Inisial, sirca 40 mil persones ia fuji de sua casas. Multe de la plu prosimas a la episentro ia spende la note su la sielo, car plu ca 130 replicas sismica ia colpa ance la rejion.
@T Un eglesa peruan es destruida par foco
@L aora_oji/2016/un_eglesa_peruan_es_destruida_par_foco
====== Un eglesa peruan es destruida par foco ======
17 setembre 2016
En Peru, un focon ia destrui la eglesa famosa baroca de San Sebastian en la site Cuzco.
Persones local ia regarda desperante en cuando la foco ia arde la altar dorada e depintas valuosa en la eglesa de la sentenio 16.
La focon ia comensa en la oras temprana de venerdi. Autoriosas dise ce lo ia es probable causada par un sircuito corta.
Pompores ia cexa ce idrantes prosima no ia funsiona, e ce on no ia repara los asta pos du oras.
La prete local ia recomenda ce abitores atenta salva la eglesa. Persones ia freta a un rio prosima per colie acua, ma tro tarda.
La construida sta ancora, ma la plu de sua interna ornosa es destruida, incluinte obras par Diego Quispe Tito, un artiste nativa de la sentenio 17.
La eglesa ia es multe restorada entre 2008 e 2013, e la maior de Cuzco ia plora cuando el ia vide la estende de la dana.
Americo Carrillo, la arcitetor ci ia supravide la labora, ia descrive la eglesa como "un joala de la eda colonial de Peru".
La site Cuzco ia es la capital de la Impero Inca, cual ia es eliminada par la concista espaniol de la plu de la Americas.
@T Un elefante mori pos viaja longa en inondas
@L aora_oji/2016/un_elefante_mori_pos_viaja_longa_en_inondas
====== Un elefante mori pos viaja longa en inondas ======
16 agosto 2016
Un elefante savaje, cual on ia salva de acua en la semana pasada pos cuando lo ia viaja tra sentos de cilometres, ia mori.
Lo ia es puxada a via par corentes forte en inondas en Barat norde-este. On ia retrova lo en Bangladex, un pais visina.
Ala, on ia dona a lo la nom Bangabahadur, cual sinifia "eroe de Bengala".
Lo es posible ce la elefante ia viaja tra 1700 cilometres. Lo ia es debilida par sua viaja e par atentas per calmi lo, e on crede ce lo ia sufri un ataca de cor. Stress, desidrata e nonecuilibra de eletrolito ia es fatores.
On ia comanda un autopsia.
Pos cuando lo ia colasa, salvores ia dona a lo 12 litres de disolve salin, ma no ia susede revive la bestia.
Con pesa de sirca cuatro tones, la elefante ia deveni sempre plu debil pos spende semanas en acuas de inonda, car lo no ia pote nuri bon se.
Ofisiores zoolojial ia atenta transporta lo a un parce de safari -- calminte lo a multe veses -- ma ia fali, car la animal no ia es domable.
Ashit Ranjan Paul, la conservor xef de viventes savaje per la governa bangla ia comenta: "Nos ia dona nosa atenta la plu alta per salva la animal. A la min des gardaforestas, veterinares, e polisiores ia segue constante lo tra la 48 dias pasada. Ma nosa fortuna es mal."
La salva de la elefante ia es dramosa. Cuando lo ia es calmida, lo ia cade a en un lageta, do viletanes ia preveni ce lo afoca e ia aida estrae lo. Un om ia es ferida cuando la elefante ia pedi el.
A cada anio, inondas obliga miles de bestias a move a tera plu alta en la areas fronteral entre la du paises. Car la abitada natural de bestias savaje diminui, los encontra sempre plu difisilia en move a locas plu secur a la tempo de monson.
@T Un enfante peti survive tra tre dias en foresta sibirsce
@L aora_oji/2016/un_enfante_peti_survive_tra_tre_dias_en_foresta_sibirsce
====== Un enfante peti survive tra tre dias en foresta sibirsce ======
23 setembre 2016
En Rusia, un xico de tre anios ia survive solitar tra 72 oras en un foresta sibirsce, en un area conoseda per lupos e ursos.
Tserin Dopchut ia ave sola un bara peti de xocolada en sua pox cuando el ia vaga a en la foresta. On ia inisia un xerca vasta de tera e aira per trova Tserin, ci ia segue cisa un caneta cuando el ia desapare.
La enfante ia es atendeda par sua duava, ma el ia vade a via prosima a la vileta Khut, situada en foresta densa en la Republica Tuva, cuando la fem ia turna sua dorso.
Tra 72 oras la enfante corajosa la fronti temperatures basinte, la menasa de bestias savaje, e la peril de cade a un rio rapida, ante cuando sua tio ia salva final el.
"La situa ia es multe peril," Ayas Saryglar, la xef de la ajenteria de defende e crises sivil de Tuva, ia dise. "La Rio Minas es rapida e fria. Si un enfante peti ta cade a en, el ta mori serta."
"On ave lupos e ursos en la foresta. La ursos nuri aora se per la inverno. Los pote ataca cualce cosa movente. En ajunta, lo es calda en la dia, ma a note la tera jela an. Si nos recorda ce la enfante ia desapare en la dia, el no ia es bon vestida -- sola un camisa e sapatos, no jacon."
La opera de xerca Tserin ia envolve viletanes, polisiores local, e un elicotor en un area vasta de sirca 120 cilometres cuadrida, tra dia e note.
Un otra ofisior ia dise ce on ia trova la enfante cuando el ia reconose la vose de sua tio clamante sua nom. Pos es abrasada, sua demanda prima ia es esce sua auto de jueta ia es oce.
Salvores ia loda la stratejia de la paseor nova -- el ia trova un loca seca su un larix e ia dormi entre sua radises.
Sholban Kara-Ool, un xef de la rejion, ia comenta: "La vileta intera fa un selebra per festa sua survive."
Dotores dise ce Tserin ia sufri no feris grave de sua malesperia.
On ia dona a el la nometa Mowgli, la nom de la orfan imajinada en la novelas Libro de Junglas par Rudyard Kipling. On predise ce Tserin va deveni mesma un salvor, car el ia mostra un capasia stonante de dura per survive tan longa a sua eda en la foresta fria.
@T Un esplode a un compleso de petrolio mexican
@L aora_oji/2016/un_esplode_a_un_compleso_de_petrolio_mexican
====== Un esplode a un compleso de petrolio mexican ======
21 april 2016
Un esplode grande a un compleso de petrolio en Veracruz, un stato en la sude-este de Mexico, ia mata a la min tre persones e ia feri 136 otras.
La fabriceria es poseseda par la compania nasional de petrolio, Pemex, en Coatzacoalcos, un site de porto.
On ia sorti sentos de persones e ia clui scolas. Videos mostra un focon grande e plumones vasta de fuma.
La causa de la esplode no es clar, ma on ia reporta alga esplodes a complesos de Pemex en anios resente. La plu resente ia aveni a sirca 15:15 de ora local, e on ia sensa lo a distantia de 10 cilometres.
La focon ia es ja controlada a la temprana de sera. On ia recomenda ce abitores resta en casa par causa de la natur posible nosiva de la fuma de la esplode. Ma Pemex is dise ce la fuma ia disipa rapida, reduinte la efetos.
De la 136 feridas, 88 resta en ospital, e 13 de estas ave un state grave. Un video postada a redes sosial ia pare mostra senas de caos a un ospital local, con pasientes ci ia perde multe sangue.
Pemex ia comenta ce la parte de la compleso colpada par la esplode es manejada par un compania-sore, Mexichem.
La fabriceria produi clorido de vinil, un cimical perilosa cual on usa per crea tubos PVC e materias de paci.
La compleso es un de la terminas la plu grande de la distribui petrolio en Mexico. La compania ia ajunta ce sua esportas de petrolio no va es afetada.
En setembre 2012, un esplode e focon seguente a un compleso de gas en Tamaulipas, un stato norde, ia mata 33 persones.
La propre xeferia de Pemex en la Site Mexico ia es colpada par un esplode grande de gas en janero 2013, e esta ia mata 37.
Alga focones ia aveni ance sur la plataformas de la compania en la Golfo Mexican en la anio pasada, e un laboror ia mori en un plu focon a la compleso en Veracruz en la febrero resente.
@T Un esplode a un stadion malagasi
@L aora_oji/2016/un_esplode_a_un_stadion_malagasi
====== Un esplode a un stadion malagasi ======
27 junio 2016
Un esplode de granada ia mata a la min du persones a la selebras de la dia nasional de Madagasicara, en la capital Antananarivo.
Sirca 80 persones ia es ferida en la esplode a un stadion.
Presidente Hery Rajaonarimampianina ia descrive lo como "un ata teroriste" e ia culpa "diverjes political" per lo.
La situa en la pais resta frajil, con ce suportores e oposores de la presidente desacorda forte.
La esplode ia aveni en un conserta sin custa a la Stadion Munisipal de Mahamasina. Plu temprana, on ia fa un parade militar ala.
On no sabe clar ci o cual ia causa la esplode.
En un declara difusada a televisa nasional, la presidente ia dise: "Diverjes en punto de vista pote esiste entre nos. [Ma] si la xef no conveni, on no pote mata la popla. Nos va tolera nunca la destabli, spesial car esta es no sola un destabli ma un ata de terorisme."
La eleje de Rajaonarimampianina como presidente en 2013 ia trae un espera fresca pos anios de nonstablia political en Madagasicara.
Ma pos sola 18 menses de sua presidentia, la Asembla Nasional de la pais ia vota per acusa el de malcondui car el ia fali reali la prometes per cual on ia eleje el.
La acusa no ia susede, ma sua suportores e oposores continua batalia lunlotra.
En 2014, un esplode de granada ia mata un enfante peti e ia feri alga otra persones estra la mesma stadion. On ia aresta no person en relata a acel ataca, e no organiza ia reclama la culpablia.
@T Un esplode de focos artal a un mercato en Mexico
@L aora_oji/2016/un_esplode_de_focos_artal_a_un_mercato_en_mexico
====== Un esplode de focos artal a un mercato en Mexico ======
21 desembre 2016
Un esplode a un mercato de focos artal estra la Site Mexico ia mata a la min 31 persones.
Plu ca 70 otras ia es ferida par la esplodes a la mercato de San Pablito en Tultepec, a sirca 30 cilometres estra la site.
Eruviel Ávila Villegas, la governor de la stato Mexico, ia dise ce alga enfantes ci ia sufri ardes a plu ca 90% de sua corpos ia es enviada a la site Galveston en Texas en la SUA per reseta tratas spesialida.
Videos mostra un cuantia grande de focos artal cual lansa se a la sielo en cuando los ensende.
On ancora no sabe la causa, ma recomenda ce persones evita la loca e no bloci la stradas prosima.
Focos artal ia continua esplode an pos la pum inisial, e la loca ia emete nubes densa de fuma negra.
Fotos de polisiores e medicistes a la mercato ia mostra persones ferida entre cioscos destruida de mercato e construidas de brice negrida par la caldia.
La presidente de Mexico, Enrique Peña Nieto, ia tuita sua compatia a la familias de la vitimes e ia desira un recovre rapida a la feridas. El ia ajunta ce soldatos aida en la crise.
La mercato de San Pablito ia es forte danada par focos simil en setembre 2005, cuando un cadena de esplodes ia feri deses de persones, direta ante la selebras de la dia de autonomia de la pais.
@T Un esplode matante a un stadion turces
@L aora_oji/2016/un_esplode_matante_a_un_stadion_turces
====== Un esplode matante a un stadion turces ======
11 desembre 2016
Du esplodes prosima a un stadion de futbal en Istanbul, la site la plu grande de Turcia, ia mata 29 persones e ia feri 166.
Ofisiores dise ce un bomba de auto e un bomba umana a la sera de ier ia es intendeda contra la polisia.
Los ia aveni a du oras pos un max entre Beşiktaş e Bursaspor, du ecipos de la divide prima, a la stadion de Beşiktaş.
Des persones ia es arestada. Turcia ia comensa un dia de lamenta nasional.
No grupo ia declara se como la atacor, ma un onda de bombis ia es realida en Turcia en esta anio par militaristes curdi e la organiza Daex.
Presidente Recep Tayyip Erdoğan ia confirma la matas ma ia dona no detalias.
Jornalistes local ia reporta ce fanes ia vade ja a via, e Bursaspor ia tuita ce lo no es consensa de fanes ferida.
Süleyman Soylu, la ministro de internas, ia dise: "On crede ce lo ia es un bomba de auto a un punto do nosa polisia de fortia spesial ia es locada, direta pos la max, a la porte do fanes de Bursaspor ia sorti, pos la parti de la fanes."
El ia dise plu tarda ce on crede ce la esplode du, a Parce Maçka, ia es un bomba umana.
Un canal de televide ia reporta ce la blanco de la ataca prima ia es un bus portante polisiores de tumulta. Fotos postada pos la esplode mostra elmos sperdeda sur un strada e veculos danada.
Un elicotor de polisia ia sirculi a supra, e fenetras en construidas prosima ia es rompeda par la fortia de la esplodes.
@T Un esposa de paradisos finansial
@L aora_oji/2016/un_esposa_de_paradisos_finansial
====== Un esposa de paradisos finansial ======
4 april 2016
Un esposa enorme de documentos privata ia revela como persones rica e potiosa usa paradisos finansial per asconde sua ricia.
Des-un milion documentos ia es esposada de un de la companias la plu secretosa de mundo, Mossack Fonseca, un compania de notarios en Panama. Los mostra como la compania ia aida sua clientes a blanci mone e evita punis e impostas.
La organiza dise ce lo ia labora en modo noncriticable tra 40 anios e ce on ia acusa nunca lo de ativia criminal.
La datos en la documentos conteni lias a 72 xefes de stato corente o pasada, incluinte la ministro xef de Island, Sigmundur Gunnlaugson, ci ia ave un interesa nondeclarada liada a la mone de sua sposa.
Los lumina ance como Mossack Fonseca ia ofre servis finansial desiniada per aida clientes comersial a asconde sua ricia.
A un cliente, la milionor american Marianna Olszewski, la compania ia ofre articles falsa de posese per asconde mone de la autoriosas. Esta es un rompe direta de regulas internasional intendeda per preveni la lava de mone e la evita de impostas.
La datos conteni ance companias secreta liada a la familias e asosiores de Hosni Mubarak (la presidente pasada de Egipte), Muammar Gaddafi (la xef pasada de Libia), e Bashar al-Assad (la presidente de Suria).
Los revela ance un ronda suspetada de blanci biliones de dolares cual envolve asosiores prosima de presidente Putin de Rusia. La opera ia es manejeda par Bank Rossiya, cual debe segue regulas SUA e UE pos la oteni de Crim par Rusia.
Mone ia es canalida tra companias estra la pais, de cual du ia es ofisial poseseda par un de la amis la plu prosima de la presidente rusce.
La xeliste consertal Sergei Roldugin conose ja Vladimir Putin de pos cuando los ia es adolesentes, e es la padre de batiza de la fia Maria de la presidente.
Ofisial, Roldugin ia profita personal con sentos de miliones de dolares par acordas suspetosa. Ma documentos de sua companias dise: "La compania es un scermo corporal xef instituida per proteje la identia e secretia de la posesor beneficada ultima de la compania."
La documentos esposada mostra ce Gunnlaugsson ia ave un interesa nondeclarada en la bancos salvada de Island. On ia acusa el de asconde miliones de dolares de investis en esta bancos, scermida par un compania secretosa estra la pais.
La esposa indica ce el e sua sposa ia compra la compania Wintris en 2007. El no ia declara esta cuando el ia entra a parlamento en 2009. A oto menses plu tarda, el ia vende sua dui de la compania a sua sposa per $1.
Gunnlaugsson fronti aora clamas per sua resinia. Ma el dise ce el ia rompe no regulas, e ce sua sposa no ia benefica finansial par sua desides.
Mossack Fonseca dise ce tal companias es disponable tra la mundo e es usada per multe intendes legal.
@T Un fem contrabanda un enfante a Paris en sua saco
@L aora_oji/2016/un_fem_contrabanda_un_enfante_a_paris_en_sua_saco
====== Un fem contrabanda un enfante a Paris en sua saco ======
10 marto 2016
Un fem ia vola de Istanbul a Paris con un xica de cuatro anios ascondeda en sua bagaje de mano.
Air France ia dise ce la enfante, ci ia viaja sin bileta, ia es descovreda en la avion a la sera de lundi.
La fem ia es un abitor de Frans, e ia es en media de adota la enfante de Aiti.
La airocompania ia avisa la autoriosas franses, ma avocatos prosedente ia deside no acusa el.
Cuando la fem ia es en la zona internasional en la airoporto de Istanbul, on ia preveni el de embarca sua avion con la enfante. El ia compra alora un bileta nova de vola e ia asconde la enfante en un saco.
Pos embarca, el ia pone la xica a sua pedes su un covreleto, ma otra pasajores ia vide la enfante cuando esta ia nesesa visita la saleta privata.
Un pasajor ia esplica plu: "La saco de stofa ia parteni a un fem sentante a la retro de la avion. A un momento, el ia abri la saco, e la person visina a la otra linia de sejas ia vide un cosa movente a interna. La person ia averti la atendores, ci ia descovre alora un bebe."
On teni aora la fem e la xica a la airoporto Charles de Gaulle en cuando la autoriosas investiga la caso.
@T Un foco provoca un sorti coletiva en Canada
@L aora_oji/2016/un_foco_provoca_un_sorti_coletiva_en_canada
====== Un foco provoca un sorti coletiva en Canada ======
4 maio 2016
Un foco savaje enorme ia obliga la popla intera a sorti de la site Fort McMurray en Canada. 60 mil persones ia move.
La focon ia destrui alga casas, e ia cade sene sur la stradas.
Abitores fujinte ia conjesta completa la via xef de la site, cual es situada en un area de arena bitumosa a 380 cilometres a norde de Edmonton.
La esta sorti de Fort McFurray es la plu grande en la istoria de la provinse Alberta.
Un abitor ia dise: "Si on pasea mera a estra, on senti la sene cadente a sur. On vide lo flotante en la aira. Me pote prende un scopa e scopi lo de sur mea teraza."
Casas en a la min du visinerias es ruinada, e la foco ia estende aora asta Autovia 63 -- la via xef cual entra a Fort Murray de la sude.
Pompores continua batalia la arde, ma la autoriosas local ia demanda per refortis, incluinte un elicotor capas de cade acua.
Asta aora, on ia reporta no feris.
@T Un foco savaje en California
@L aora_oji/2016/un_foco_savaje_en_california
====== Un foco savaje en California ======
25 julio 2016
En la montania a norde de Los Angeles, California, pompores batalia per maneja un foco savaje cual ia destrui 18 casas e menasa sentos de otras.
La focon covre plu ca 89 cilometres cuadrida. Abitores de sirca 1500 casas prosima a Santa Clarita ia parti.
On ia trova un corpo en un auto ardeda, ma lo no es clar esce la mori pertine a la foco.
Ventas forte ia aumenta la flamas, soflante fuma e sene a Los Angeles.
Sirca 900 pompores atenta maneja la foco, aidada par elicotores e aviones cual cade acua e paraflama.
California sude es a media de un onda de caldia, ma meteorolojistes previde un temperatur plu fresca per la futur prosima.
@T Un focon a un refineria nicaraguan
@L aora_oji/2016/un_focon_a_un_refineria_nicaraguan
====== Un focon a un refineria nicaraguan ======
20 agosto 2016
Pompores en Nicaragua atenta control un focon enorme a la sola refineria de petrolio de la pais.
La arde ia comensa a du dias ante aora cuando un de cuatro tances grande de combustable ia esplode, a la compleso de Puma Energy en Puerto Sandino, un porto pasifica.
Un tance du ia ensende a jovedi.
On ia reporta no moris, ma la autoriosas ia averti persones local contra la nubes de fuma plen de gases nosiva cual estende a supra tra plu ca un cilometre.
Refujerias es preparada per la caso ce la venta verje a via de la osean e en dirije a la tera.
Espertas de la SUA e Canada es en la pais per consela ofisiores sur modos de controla la focon.
La compania Puma Energy ia dise ce lo labora per maneja la situa, asentuante ce securia per abitores local es un conserna prima.
@T Un focon de otel a la selebra de anio nova en Dubai
@L aora_oji/2016/un_focon_de_otel_a_la_selebra_de_anio_nova_en_dubai
====== Un focon de otel a la selebra de anio nova en Dubai ======
1 janero 2016
Un focon enorme ia engoli un otel alta en la sentro de Dubai ante un presenta de focos artal per selebra la anio nova.
Detrito ardente ia cade de la construida, cual ave 300 metres de altia, en cuando pompores ia batalia la flamas.
Cuando la medianote ia ariva en la Amirias Arabi Unida, la pirotecnical ia comensa como intendeda, a la rascasielo la plu alta de mundo, la Burj Khalifa, prosima a la focon.
On ia susede controla la arde pos sirca du oras, e 16 persones ia es ferida.
Autoriosas ia previde la ariva de asta du milion persones en la sentro de la site per la selebra. On ia demanda ce folas parti de la area direta sirca la otel ardente, nomida Address Downtown, de cual on ia sorti tota persones.
Flamas ia pare consuma multe de la construida en min ca des minutos. La construida ave 63 niveles, e conteni no sola la otel de sinco stelas ma ance un compleso de apartes.
La governa de Dubai ia tuita ce 14 persones ia es minor ferida, un person ia sufri feris moderada, e un otra ia esperia un ataca de cor par causa de "suprafoli e fuma a la loca de arde".
On reporta ce la focon ia comensa a la nivel 20, cisa cuando un cortina ia comensa arde, ma on ancora no sabe serta la causa.
Esta pirotecnical es un aveni de prestijia grande per Dubai, e la autoriosas vole ce la imajes cual on va recorda es la focos de arte, no la focon de arde.
Aora Oji desira un bon anio nova a tota sua lejores.
@T Un focon en un prison itiopian
@L aora_oji/2016/un_focon_en_un_prison_itiopian
====== Un focon en un prison itiopian ======
6 setembre 2016
A la min 23 prisonidas ia mori pos un focon a un prison en Itiopia do on reporta ce protestores antigovernal es tenida.
Un declara par la governa dise ce 21 ia mori par sofoca en un fuji manadin, e du otras ia es matada cuando los ia atenta evade.
Alga jornalistes local ia disputa la nara ofisial, sitante atestores anonim ci dise ce gardores ia fusili la prisonidas.
On no ia publici la identia de la prisonidas.
La focon ia ensende a saturdi, e on ia oia fusilis continuante de la prison Qilinto, a la borda de la capital Addis Ababa. Imajes televisada e fotos enviada a redes sosial ia mostra plumones de fuma levante de la compleso.
Alga reportas dise ce la focon ia es comensada con intende, como parte de un atenta de evade la prison, ma confirmas nondependente manca de esta.
Un onda de protestas sin presedente ia aveni en Itiopia en menses resente.
De novembre 2015, multe protestas ia es fada en la rejion Oromia par membros de la etnico la plu grande de la pais. Reportas antigovernal dise ce multe ativistes oromo es tenida a la compleso Qilinto.
La organiza Oserva de Diretos Umana, con xeferia en New York, dise ce plu ca 400 persones ia mori en scaramuxas con securiores en Oromia, ma la governa disputa esta.
Hailemariam Desalegn, la ministro xef de Itiopia, ia culpa "fortes antipas" per la violentia.
@T Un fola en Nice es atacada par camion
@L aora_oji/2016/un_fola_en_nice_es_atacada_par_camion
====== Un fola en Nice es atacada par camion ======
15 julio 2016
A la min 84 persones ia mori, incluinte enfantes, cuando un camion ia puxa se tra un fola selebrante la Festa Nasional en la site Nice en la sude-este de Frans.
La camionor ia continua tra 2 cilometres longo la Promenade des Anglais, un bolevar de plaia, a sirca 23:00 de ora local ante cuando la polisia ia mata el par fusil.
Presidente François Hollande ia dise ce la ataca ave "un natur nonegable teroriste".
Un state de crise, ja ativa pos la atacas en Paris en novembre, es aora estendeda par tre menses. Frans ia es ja estrema vijilosa pos acel atacas cual ia mata 130 persones e ia feri sentos de otras.
"Frans es grave colpada," Hollande ia dise, ajuntante ce "nos nesesa fa tota posibles per combate contra" tal atacas. "La intera de Frans es su la menasa de terorisme islamiste," el ia comenta.
El ia ajunta ce on va envia soldatos reservada per suporta la armada e fortes de securia tra la pais, con foca spesial a la fronteras.
Sirca 50 persones ia es ferida, 18 a grado estrema, en la aveni a jovedi, cual ia es Dia Nasional de Frans.
Un portavose per la ministro de internas ia nega reportas plu temprana ce on ave un situa de ostaje. El ia dise ce on ia "neutri" la camionor. Ofisiores investiga esce la camionor ia ata solitar.
Asta aora, no grupo ia reclama la ataca, ma avocatos prosedente ia indica ce la investiga va es fada par ofisiores antiterorisme.
Alga reportas ia dise ce la polisia e los en la camion ia fusili a lunlotra, ma on no ia confirma esta.
Videos en redes sosial ia mostra persones corente tra la stradas en panica pos la aveni. Un otra imaje, a Twitter, ia mostra un camion blanca, fronte danada e parada a media de la bolevar, con cuatro polisiores oservante lo de pos un palma.
Barack Obama, la presidente de la SUA, ia condena "en termas la plu forte" lo cual ia pare es "un ataca teroriste asustante en Nice".
Ance la presidente de la Consilio European, Donald Tusk, ia condena la ataca, disente: "Lo es un paradox trajedin ce la blanco de esta ataca ia es persones selebrante libria, egalia, e fratia."
Banderas en Frans va es basida a la altia media, e on ia cansela la carnaval de jaz en Nice.
@T Un fosil de papagaio sibirsce
@L aora_oji/2016/un_fosil_de_papagaio_sibirsce
====== Un fosil de papagaio sibirsce ======
26 otobre 2016
On ia descovre un fosil de papagaio en Sibir. Esta es la loca la plu norde do on ia trova un de esta avias.
Un oso de papagaio, desenterada en la rejion Baikal, ave la eda de entre 16 e 18 milion anios.
Esta sujesta ce la avias, cual abita oji xef en partes tropical e sutropical, ia es plu jeneral trovada en Eurasia a un ves pasada.
Lo es ance la ves prima de trova un fosil de papagaio en Asia.
Dotor Nikita Zelenkov, de la Instituida Paleontolojial de la Academia Rusce de Siensas en Moscva, ia descovre un parte de un oso nomida un tarsometatarso, locada en la basa de gama de avias. Pos compara lo con otra spesies, el ia trova ce lo ia parteni a un papagaio peti.
"Nonfortunosa," el ia comenta, "esta descovre no es sufisinte bon per reconstrui la aspeta o modo de vive de esta papagaio, ma nos pote vide ce lo ia es alga simil a la modernas. Donce probable lo ia es un avia peti de aspeta multe moderna, con la grandia aprosima de un papagaio de casa."
Lo ave alga cualias comun con un otra oso de papagaio, reportada en un studia en 2010.
La descovre pote cambia nosa comprende de la sperde de papagaios temprana tra la mundo, e de sua modo de ariva en la Americas.
Teorias esistente sujesta ce los ia vola a la Americas de Africa, ma la trova nova sujesta cisa un otra via, longo la Streta Bering, de Rusia a Canada e Alasca.
@T Un foto de lansamisiles en la Mar de Xina Sude
@L aora_oji/2016/un_foto_de_lansamisiles_en_la_mar_de_xina_sude
====== Un foto de lansamisiles en la Mar de Xina Sude ======
17 febrero 2016
Lo pare ce Xina ia posa misiles de tera a aira sur un isola disputada en la Mar de Xina Sude.
Imajes satelital fada a 14 febrero pare mostra du grupos de lansamisiles e un sistem de radar sur la Isola Woody/Yongxing en la Isolas Parasel.
Taiuan, cual reclama ance la isola, ia confirma la developa.
Ma la ministro xines de esternas, Wang Yi, ia dise ce la reportas es inventada par jornalistes ueste.
Parlante a un confere jornaliste en Beijing a lado de sua corespondente australian Julie Bishop, Wang ia dise ce jornalistes debe consentra en loca sur faros construida en la Mar de Xina Sude cual "es ja multe usosa en serti la securia de barcones pasante".
La presentia de misiles ta aumenta major la tensa de la disputa amarga sur la Mar de Xina Sude.
Xina ia fa ja laboras estendosa per reprende tera en la rejion, cual lo descrive como legal e per intendes nonmilitar.
Ma la labora ia coleri otra paises cual reclama ance la teritorio, e on ave un conserna cresente sur la implicas de la militari de la rejion.
La imajes la plu resente de la isola mostra un macro de un parte de plaia, de cual sua forma sembla la custa norde como lo apare en otra imajes, e los indica du strutures misilal. Cada strutur conteni cuatro lansamisiles e du veculos de controla.
Lo pare ce du de la lansamisiles es ja erijeda. Un imaje de la mesma loca a 3 febrero mostra un plaia vacua.
Un ofisior de defende SUA ia comenta ce la misiles pare es la sistem HQ-9 de defende airal, con estende de sirca 200 cilometres.
La esta reporta aveni en cuando xefes rejional de Asia sude-este fini un consenta de du dias en California, do la Mar de Xina Sude ia es un tema de debate.
@T Un fusilor solitar ataca en München
@L aora_oji/2016/un_fusilor_solitar_ataca_en_muenchen
====== Un fusilor solitar ataca en München ======
23 julio 2016
La polisia deutx ia dise ce un fusili a un boteceria en München, cual ia mata nove persones, ia es fada par un fusilor ci ia fini par mata se.
La suspetada es un om de 18 anios con nasionalia duple deutx-irani ci ia abita en München, la capital de la stato Bayern. Sua motiva no es clar.
Des-ses persones ia es ferida, tre de los a grado grave. Enfantes ia es entre la persones mor.
On ia comensa un xerca vasta pos reportas ce asta tre fusilores ia partisipa en la ataca. Atestores ia vide du persones partinte de la loca en un auto con multe rapidia. Plu tarda, la polisia ia afirma ce esta du persones no ia es envolveda.
La corpo de la suspetada ia es trovada a distantia de sirca un cilometre de la sentro comersial Olympia en Moosach, un suburbe norde-ueste.
La om no ia es conoseda par la polisia a ante, e ia pare ave no lias a grupos teroriste.
Seguente la ataca, on ia suspende la sistem de transporta en München e ia vacui la stasion sentral de ferovia. On ia reabri la transporta publica a alga oras plu tarda cuando la polisia ia indica cauta ce tota es secur.
Miles de persones ia es encaliada par la crise, noncapas de revade a sua casas. Abitores local ia refuja los.
La reportas prima de la xuta ia aveni corta ante 18:00 ier. La atacor ia fusili membros de la publica a un restorante de comeda rapida en la strada Hanauer ante move a la boteceria prosima.
Un video sirculinte a redes sosial ia mostra un om negra vestida con pistol ci pasea a via de un restorante, xutante a persones ci fuji.
La polisia ia descrive la aveni como "un situa acuta de teror", an si asentuante ce on ancora no conose la motiva.
La canselor Angela Merkel va consenta oji la consilio de securia de sua governa.
Securiores deutx ia es ja vijilante pos cuando un migror adolesente ia coteli e feri sinco persones en un tren en Bayern a lundi, en un ataca reclamada par la organiza Daex. La autoriosas ia averti alora sur la risca de avenis simil.
@T Un granada mata un xico en Sveria
@L aora_oji/2016/un_granada_mata_un_xico_en_sveria
====== Un granada mata un xico en Sveria ======
23 agosto 2016
Un xico de oto anios ia es matada pos cuando un granada ia es lansada a en un aparte en la site svensce Göteborg.
Yuusuf Warsame, ci veni de la Rena Unida, ia es dorminte en la salon de la aparte en la area Biskopsgården, do el ia visita relatadas.
La polisia ia dise ce la ataca "odiable" ia es cisa liada con un disputa criminal.
A la min sinco enfantes e alga adultes ia es en la aparte cuando la granada ia es lansada a en.
Warsame ia mori par causa de sua feris, sur via a ospital. El no ia es un membro de la familia rejistrada a la adirije.
La madre, sore, e frate de la xico ia es en la mesma sala cuando la ataca ia aveni, ma ia sufri sola feris minor.
Un abitor rejistrada de la adirije ia es un om condenada sur un xuta matante en la mesma area en marto 2015. Acel ia es un parte de un vendeta en la comunia somali de Göteborg. Omes con armas automata ia invade un bar de Biskopsgården, fusilinte un om conoseda a la polisia e un otra person acaso presente.
On ia condena oto persones en la plu temprana de esta mense, prisoninte los per entre sete anios e la vive intera.
Un jornal local ia reporta ce la fusili en la bar ia es la culmina de avenis violente entre ganges de drogas.
Sveria ave jeneral un proportio basa de crimin, ma la polisia ia esperia difisilia en maneja violentia en visinerias povre en Stockholm, Göteborg, e Malmö.
Tra esta estate, autos ia es ensendeda a cuasi cada note en alga partes.
@T Un inonda major en Louisiana
@L aora_oji/2016/un_inonda_major_en_louisiana
====== Un inonda major en Louisiana ======
14 agosto 2016
En la SUA, a la min tre persones ia mori e miles ia es salvada pos un inonda "sin presedente" cual ia deluvia la stato Louisiana.
La Garda Nasional e ecipos de crise ia usa elicotores per salva persones trapida en sua casas o autos. Xercas continua per persones mancante, car on previde ce la pluve va continua tra la fini de semana.
La pluve forte ia comensa a venerdi cuando alga areas ia reseta plu ca 43 sentimetres de acua.
Ance Alabama e Mississippi, statos visinia, esperia clima estrema.
John Bel Edwards, la governor de Louisiana, ia declara un stato de crise a venerdi. El e sua familia ia es relocada pos cuando acua ia inonda sua sutera.
J R Shelton, la maior de la site Central ia dise: "Cuando nos va parla sur inondas aora, nos va parla sur la inonda grande de 2016. Tota otras es pal en compara."
Alga rios en Louisiana e Mississippi supraflue. On previde ce alga de los va leva a 1,2 metres supra la nivel recordo presedente.
Baton Rouge, la capital de Louisiana, es un de la rejiones la plu colpada -- on reporta tan multe como 28 sentimetres de pluve. New Orleans ia reporta 6 sentimetres.
Lo pare ce la plu de la pluve ia pasa, ma on predise ce la depresa climal va move oji a norde, a Louisiana sentral e norde.
La stato es propensada a estremas subita de clima. On ia inonda partes vasta de lo en 2011 per diverje acua de la Rio Mississippi suprafluente, e per salva sites, incluinte Baton Rouge e New Orleans, situada a vale.
En 2005, New Orleans ia sufri un de la desastres natural la plu grave en la istoria de la pais, cuando Siclon Katrina ia colpa la site. La tempesta ia mata cuasi 2000 persones e ia desloca milion. Miles de casas ia es inondada e destruida en Louisiana e longo la costa de la Golfo Mexican.
@T Un jaguar olimpial es matada
@L aora_oji/2016/un_jaguar_olimpial_es_matada
====== Un jaguar olimpial es matada ======
22 junio 2016
Un jaguar es matada par fusil, corta pos cuando on ia usa lo en un rele de torxa olimpial a un zo en Manaus, un site en Brasil.
La jaguar fema ia evade sua manejores pos la rituo a lundi e ia ataca un soldato.
Cuatro dardos calminte ia fali para lo, e un soldato ia fusili lo con pistol.
Organizores de la juas olimpial ia dise ce los ia era en esibi la torxa olimpial a lado de un bestia savaje cadenida.
Grupos per diretos animal ia condena la mata. Alga ia demanda perce la jaguar ia es an envolveda en la rituo.
En un declara, la dirijor de enforsa de lege sur animales caturada a la organiza Persones per la Trata Etical de Animales ia dise: "Cuando nos va aprende? Bestias savaje, ci on teni caturada e ci on obliga a fa cosas asustante, dolosa a veses, e sempre nonatural, es bombas-orolojos tictacante."
La animal ia es nomida Juma. On ia eleva el, con ses conasedas, en la zo en la Amazon de cuando lo ia es un jaguareta.
La torxa olimpial viaja en rele tra Brasil ante la rituo abrinte de la juas en agosto.
@T Un leopardo entra a un scola barati
@L aora_oji/2016/un_leopardo_entra_a_un_scola_barati
====== Un leopardo entra a un scola barati ======
8 febrero 2016
Un leopardo mas cual ia entra a un scola en la site barati Bengaluru ia feri ses persones ci ia atenta catura el.
Un siensiste de conserva e un forestor ia es entre la atacadas en esta labora de cuasi des oras per trapi la animal perilosa ier.
La leopardo ia vaga a en la scola Vibgyor Internasional, e ia es final calmida e librida.
Un conta resente de viventes savaje ia estima ce Barat es abitada par entre 12 e 14 mil leopardos.
On ia vide la mas de oto anios cuando el ia vaga casual en la imobila de la scola en la area Kundalahalli.
Video de cameras de securia ia mostra lo atacante un om prosima a un pisina.
Cisa lo ia vaga a en la scola de un parte de foresta relativa prosima a la scola.
On ia move la animal caturada a un parce nasional. La ses persones atacada, ci inclui un filmor per un canal de
TV, ia es tratada per feris minor.
On ia esperia ja de tempo a tempo la vaga de leopardos e otra gatos grande a en areas poplida par persones, e conservores de natur ia averti ce tal frontis risca deveni plu comun en cuando umanas intrui sur la abitadas de animales.
En la anio pasada, un leopardo mas ia pasa sinco oras con sua testa fisada en un vaso de metal en un vileta en Rajasthan, un state en la norde de la pais.
@T Un malversa de petrolio en Peru
@L aora_oji/2016/un_malversa_de_petrolio_en_peru
====== Un malversa de petrolio en Peru ======
23 febrero 2016
A la min 3000 bariles de petrolio ia es malversada en un rejion de la Amazonas pos goteas de la tubo xef de petrolio peruan.
La petrolio ia contamina du rios de cual a la min oto comunias nativa depende per sua acua.
La compania Petroperú ia promete un limpi completa, e furni ance comedas e acua. Lo ia dise ce la gotea prima ia es causada par un lisca de tera, ma la causa de la otra rompe no es clar.
Petrolio ia entra a la rios Chiriaco e Morona en Peru norde-ueste. La malversa afeta la comunia axuar e pluves forte ia impedi la labora per conteni lo.
La ministreria peruan de sania ia declara un crise de cualia de acua en sinco distritos, e ofisiores ia dise ce Petroperú risca multas de asta 17 milion dolares si on trova ce la malversas ia afeta la sania de la popla local.
La Organiza de Evalua e Esamina Ambiental ia dise ce la malversas "no es casos isolida" e ia comanda la compania a recambia partes de la tubo e boni sua reparas.
La presidente de Petroperú, Germán Velásquez, ia nega ance reportas ce la compania ia paia a enfantes per limpi la mugre densa. An tal, el ia ajunta ce el considera desemplea cuatro ofisiores de la compania, de ci lo es posible ce un ia permete ce enfantes colie petrolio.
El ia dise ce la compania evalua la tubo, construida en la desenio de 1970, per preveni malversas futur.
La goteas ia bloci la transporta de asta 6000 bariles de petrolio per dia.
@T Un manada ensende un mascita en Miama
@L aora_oji/2016/un_manada_ensende_un_mascita_en_miama
====== Un manada ensende un mascita en Miama ======
3 julio 2016
Un manada ia arde un mascita en Miama norde, en la ataca du de sua spesie en pico plu ca un semana.
La polisia garda la vileta Hpakant en la stato Kachin pos fali preveni viletores budiste de ensende la mascita.
En la semana pasada, un grupo de omes ia destrui un mascita en la sentro de la pais, en un disputa sur sua construi.
La Nasiones Unida ia averti la governa, gidada par Aung San Suu Kyi, ganior de la Premio Nobel de Pas, ce lo debe reali medios forte contra violentia relijial.
La ataca la plu resente ia aveni a venerdi, cuando un grupo de viletores ia invade la mascita e ia ensende lo. On reporta ce los ia ataca la polisiores gardante la construida e ia preveni la brigada de pompores de ateni la loca.
Un polisior local ia comenta: "La problem ia comensa car on ia construi la mascita prosima a un pagoda [budiste]. La persones muslim ia refusa destrui la construida cuando la budistes ia descovre esta." El ia ajunta ce la situa ia calmi aora, e ce on ia fa no arestas.
En un aveni simil en la vileta Thayel Tha Mein en la stato Bago en la semana pasada, la comunia muslim ia es obligada a xerca refuja en un vila visina pos cuando sua mascita ia es destruida par arde e un om muslim ia es bateda.
Jornalistes local ia reporta ce plu ca un construida ia es destruida en la ataca, sur cual on ia culpa un grupo de plu ca 200 budistes. On ia envia polisiores a la vileta per proteje la comunia muslim ala.
Tensas relijial e etnical ia esiste en Miama de pos 2012, cuando ondas de violentia matante entre budistes e muslimes ia engoli partes de la stato Rakhine en la ueste de la pais. On crede ce la plu de la muslimes es rohingias.
Yanghee Lee, investigor spesial de la Nasiones Unida sur diretos umana en Miama, ia descrive se como consernada par reportas ce la governa no intende esamina la fatos de la ataca de la semana pasada.
"Esta es esata la sinial cual on no debe envia," el ia dise pos un visita de des-du dias a la pais. "La governa debe mostra ce la provoca e esecuta de violentia contra minorias etnical o relijial ave no loca en Miama."
@T Un matador es matada par un bove
@L aora_oji/2016/un_matador_es_matada_par_un_bove
====== Un matador es matada par un bove ======
10 julio 2016
En Espania, un matador ia mori pos deveni lansida par un bove. El es la combator prima de boves ci ia mori en la combateria en esta sentenio.
Víctor Barrio ia ave 29 anios e ia es un combator profesal de boves. El ia es matada cuando la corno de la bove mas ia perfora sua peto.
La combate, en la vila Teruel en la este de la pais, ia es direta televisada. La imajes mostra ce la bove lansa Barrio tra la aira ante perfora el a la lado destra de sua peto e lansa violente el.
Mariano Rajoy, la ministro xef de Espania, ia espresa sua compatia a Barrio en sua flue de Twitter.
Un comenta en la flue ofisial de la combateria Las Ventas en Madrid, do Barrio ia comensa como un stajior, ia dise ce lo es "angusada e multe emosiada" par sua mori.
La jornal El País ia reporta ce en la sentenio pasada, 134 persones, incluinte 33 matadores, ia es matada par boves mas en Espania.
En la anio pasada, matador Francisco Rivera Ordóñez ia es grave ferida cuando el ia partisipa en un combate de bove en la vila Huesca en la norde-este.
La matador presedente ci ia mori en un combate de bove en Espania ia es José Cubero, conoseda como "El Yiyo", en 1985.
On organiza sirca 2000 combates de bove en Espania a cada anio, ma la cuantia diminui. En 2010, Catalunia ia deveni la numero du de la rejiones espaniol cual ia proibi la tradision. La Isolas Canario ia es la prima.
Oposores descrive la galas sanguosa como barbar. Ma fanes -- incluinte Rajoy -- dise ce la tradision es un forma de arte antica con radises profonda en la istoria nasional.
Ance ier, un om de 28 anios ia mori pos deveni lansida par un bestia en un corsa de boves mas tra la vileta Pedreguer, prosima a Valencia. Jornalistes espaniol reporta ce el ia atenta aida un otra coror cuando un bove ia lansi sua garga e adomen.
Entretempo, en la carnaval de corsa de boves mas en San Fermín en Pamplona ier, un om japanes de 33 anios ia es lansida a sua peto, e un om espaniol a sua braso. 12 otra persones ia es ferida.
@T Un nevon recordo en la SUA este
@L aora_oji/2016/un_nevon_recordo_en_la_sua_este
====== Un nevon recordo en la SUA este ======
23 janero 2016
Un tempesta jigante de neva avansa longo la costa este de la SUA, traente plu ca 60 sentimetres de neva e ventas multe forte.
On ia recomenda ce plu ca 50 milion persones en plu ca des statos resta en sua casas en cuando la tempesta move a norde.
Cisa la site capital, Washington, va trova se su un cuantia recordo de 76 sentimetres de neva cuando la tempesta pasa a via a soldi.
Ja oto persones ia mori, ses statos ia anunsia un state de crise, e on ia cansela miles de volas.
Esta depresa climal afeta un estende vasta de la pais, de Arkansas en la sude a Massachusetts en la norde-este.
Supramercatos ia deveni vacua de comedas entre un freta per compra furnis ante la cade de la flocos prima ier.
La servi meteorolojial nasional ia avisa ce la neva la plu sever va cade en la area de Washington entre la oras temprana de saturdi e la dui prima de la posmedia. La venta va es probable plu rapida ca 80 cilometres per ora.
En un tuita a 02:17 oji, la servi ia informa ce "un banda intensa de neva" move tra la area.
Un camera de ueb de la parce National Mall ia mostra la "state cuasi intera blanca" sur cual la meteorolojistes ia averti.
Abitores de la capital e suburbes ambiente en Virginia e Maryland ia es informada ce la neva ala va suprapasa cisa la recordo de 71 sentimetres cual ia cade en du dias en acel distrito 1922.
Con esta depresa climal prosiminte a la site la plu poplida de la pais, la maior de New York ia recomenda forte ce cadun prepara se.
En Washington, Baltimore e Delaware, catolicas ia es informada par ofisiores de la arcibispia ce un nonpartisipa de misa a esta soldi es permetable, par causa de la clima estrema mal.
@T Un norsce para la furor de sua auto par viaja sur la teto
@L aora_oji/2016/un_norsce_para_la_furor_de_sua_auto_par_viaja_sur_la_teto
====== Un norsce para la furor de sua auto par viaja sur la teto ======
22 janero 2016
En Noria sude, en temperatur de -17°C, un om vestida sola en sua pantaleta ia preveni un furor de prende sua auto, par viaja sur la teto de la auto.
La polisia dise ce la om ia deveni "multe sanguosa" pos cuando la auto ia colide con un parador de securia sur un ponto.
La furor suspetada ia es arestada par la polisia.
La posesor, ci ave 25 anios, ia velia a un ora temprana de la matina de mercurdi en Kristiansand cuando el ia oia la inisia de la motor de sua Volkswagen Passat. El ia core a estra, ia saisi un de la manicos de la auto, e ia refusa desteni.
La furor ia atenta lansa el a via par move la auto contra la neva, ma la posesor ia trepa alora sur la teto e ia teni forte la baras cuando la auto ia aselera.
Jan Nesland, la xef de polisia local, ia dise ce la om ia susede viaja sur la teto de la auto tra alga cilometres, en modo simil a un sena tipal de la filmas enerjiosa de Hollywood.
La furor ia gida la auto a asta 90 cilometres per ora, ma la posesor ia susede rompe la fenetra retro con sua jeno, e ia luta alora con la furor ante cuando la auto ia colpa la parador.
"An Bruce Willis no ia ta susede acel," Nesland ia comenta. "Lo no es un ata cual nos recomenda, ma aora, cuando el ia reali lo -- bon, lo es un raconta stonante."
El ia ajunta ce an si on pote fasil rompe un fenetra de auto cuando on es normal vestida, lo es completa fol ce on viaja sur la teto a rapidia alta en pantaleta en temperatur su zero.
@T Un ofisior espaniol spende anios en asentia de labora
@L aora_oji/2016/un_ofisior_espaniol_spende_anios_en_asentia_de_labora
====== Un ofisior espaniol spende anios en asentia de labora ======
13 febrero 2016
On ia descovre ce un ofisior publica espaniol ia fali apare per sua labora tra a la min ses anios.
Joaquín García, ci ave 69 anios, ia es multada per €27 mil ($30 mil) pos cuando un premio per sua servi longa ia revela sua asentia longa.
La posto de García ia es supravide la construida de un compleso de trata acua de cloaca. Aora el ia jubila ja.
El nega la alegas, e sua avocato dise ce el ia asconde se pos sufri un "linxa" par jornalistes.
García ia dise ce el ia deveni un vitim de tormenta political en sua labora e ia es moveda a un posto do no labora es nesesada.
El ia reseta un salario de €37 mil per anio (ante imposta) de un compania de acua manejada par un autoriosa local en Cádiz, un site en la sude-ueste de Espania.
Un corte ia suporta la autoriosa e ia comanda ce el paia la multa, cual coresponde a sua salario anial pos imposta e es la cuantia la plu grande cual la compania pote reclama legal.
El ia scrive a la maior per solisita ce el no paia la multa, e el intende demanda ce on revisa la judi.
La corte ia oia ce la xef de la compania no ia vide García tra anios, an si el ia ocupa un ofisia a fas de la propre. La compania de acua ia crede ce el es supravideda par la autoriosas local, e la mesma en reversa.
La vismaior ia persepi sua asentia cuando García ia deveni conveninte per reseta un placa per sua labora de 20 anios.
García dise ce on ia tormenta el par causa de la politica de sua familia e ce el ia es enviada a la compania de acua per isoli se. El ia trova ce no labora esiste en sua posto nova.
Persones prosima a el ia comenta ce el ia esita reporta la situa car el ia debe suporta finansial sua familia, e ia es ansiosa ce el no va susede trova un otra emplea a sua eda.
Los ia clari ce el ia vade vera a sua ofisia, ma no per tota oras de labora a cada dia, e ce el ia dedica se a leje filosofia.
Jornales espaniol ia nomi el "la ofisior-fantasma".
@T Un om mata tre polisiores en Louisiana
@L aora_oji/2016/un_om_mata_tre_polisiores_en_louisiana
====== Un om mata tre polisiores en Louisiana ======
18 julio 2016
En la SUA, on ia revela ce Gavin Long, la om identifiada como la mator de tre polisiores en Baton Rouge, Louisiana, ia posta videos cexante sur la trata de persones afroamerican par la polisia e recomendante un retalia.
El ia es matada par polisia en la ataca a la matina de ier.
La situa en Baton Rouge ia es multe tensada pos cuando la polisia ia mata ala un om negra a du semanas ante aora.
La acel mata, e un plu fusili par la polisia en Minnesota, ia provoca protestas tra la Statos Unida e un ataca venjante par un veteran negra de armada ci ia mata sinco polisiores en la site Dallas, Texas.
Respondente a la matas la plu resente, presidente Barack Obama ia asentua ce tota americanes debe uni e evita linguaje dividente.
Plu detalias ia emerji sur Long, ci ia veni de Site Kansas, Missouri, incluinte sua istoria de servi militar.
El ia es un marinor de pede entre agosto 2005 e agosto 2010, asendente a la grado sarjento e servinte en Irac de junio 2008 asta januario 2009. El ia gania alga medalias e lodas, e ia es relasada con onor.
Sua videos e postas enlinia ia usa la nom falsa Cosmo Setepenra. En los, el arenga sur lo cual el ia vide como atas nonjusta contra persones negra. A un punto, el dise "on debe retalia".
En un video postada a YouTube, Long asentua ce, en caso ce alga mal cosa ta aveni a el, el no es liada con un grupo. "Me parteni a la spirito de justia, no plu, no min," el ia dise. "Me ia pensa mea propre pensas, me ia fa mea propre desides."
@T Un om norsce deveni trapida en un latrina
@L aora_oji/2016/un_om_norsce_deveni_trapida_en_un_latrina
====== Un om norsce deveni trapida en un latrina ======
27 agosto 2016
Pompores en Noria ia estrae un om de la interna de un vason. La om ia desende a la tance su la latrina per retrae la telefoneta de un ami, e ia deveni trapida.
Cato Berntsen Larsen, ci ave 20 anios, ia trepa a su con prima sua pedes, pos cuando sua ami urininte ia cade sua telefoneta en la vason.
El ia dise ce el ia ofre entra a la tance, cual ave no lia a la cloacas e cual on vacui a sola cuatro veses per anio.
Stante con gamas sumerjida en la contenida, el ia comensa senti malada, ma ia debe spende un ora intera encluida en la loca peti.
"Me ia panica," el ia dise, "car me odia spasios restrinjeda. Txa, lo ia es repulsante -- la plu mal cual me ia esperia. Animales ia es ala a su, ance."
El ia mali sua situa par vomiti pronto pos entra.
Sua esperia nonfortunosa ia comensa cuando sua ami ia cria per aida reave sua telefon.
"Me no ia esita," Berntsen Larsen ia dise sur sua deside de entra a la tance. Ma la sumerjor acaso ia comprende rapida ce el ia deveni trapida.
Pos es salvada, el ia descrive se como "parente sufisinte magra per desende ma no sufisinte magra per asende denova".
El ia sufri feris a sua brasos alta e ia dise ce el ia es mordeda a plu ca un ves. On ia prende el a ospital, do el ia reseta medisin antimicrobio.
La pompores ia debe destrui la vason, e la telefoneta resta en la tance.
Aora oji reposa aora per un semana, ma va recontinua a 5 setembre.
@T Un om usa un sintur falsa de bomba per saisi un avion
@L aora_oji/2016/un_om_usa_un_sintur_falsa_de_bomba_per_saisi_un_avion
====== Un om usa un sintur falsa de bomba per saisi un avion ======
30 marto 2016
Un om egiptian ci ia forsa un avion interna a atera en Cipros ier ia usa un sintur falsa de bomba umana. Sua motivas resta nonclar, ma la presidente ciprica ia dise ce la aveni no ia pertine a terorisme.
Videos publicida par la ministreria interna de Egipte mostra la om en pasa tra puntos diversa de securia a la airoporto Borg El Arab en Iskandariyya (Alexandria).
La drama ia fini a la airoporto de Larnaka en Cipros, con no pasajores ferida, cuando la om ia sede se.
Ofisiores ciprica ia nomi la om como Seif Eldin Mustafa, descrivente el como "psicolojial nonstable".
El ia demanda prima per parla con sua sposa pasada ciprica, ci la polisia ia trae a la airoporto, e ia fa un serie de esijes "noncoerente" a pos.
El va apare en corte en la site Larnaka oji.
La avion de Egyptair ia reparti de Larnaka a 22:05 de ora local ier, en dirije a Qahira (Cairo), sua destina orijinal.
La ministreria egiptian de turisme ia insiste ce tota medios de securia airoportal ia es "completa realida" ante cuando la vola MS181 ia comensa plu temprana en la dia.
Videos de cameras vijilante mostra ce securiores ia esamina Mustafa par palpa a du puntos de controla, e ce el ia pone un saco magra tra radiografes.
Egipte ia boni la securia de sua airoportos pos cuando un avion rusce ia es esplodeda supra Sina en otobre pasada. Lo spende aora mil milion plu dolares per anio sur securia.
An tal, on reporta ce la esaminas resta noncoerente. Multe persones major e parlamentores refusa es palpada, e la empleadas de la airoporto e la airocompanias sircoveni comun multe de la controlas.
Pos un nonprogresa de alga oras, Mustafa ia desende un scalera de la avion e ia sede se a securiores ciprica. Sua sintur blanca de bomba, con filos protendente, ia es final revelada como falsa.
Corta a ante, on ia vide alga persones fujinte de la avion, incluinte un, parente un ecipor, ci ia trepa tra un fenetra de la piloteria.
Plu temprana, la presidente ciprica Nicos Anastasiades ia responde en modo controversa a un demanda de un reportor sur la motivas cisa romantica de la saisor. El ia rie, disente: "Sempre un fem pertine."
Egyptair ia indica ce la Airbus A320 ia intende porta 56 pasajores de Iskandariyya a Qahira, con ses ecipores e un securior.
Un declara par la ministreria egiptian de avioni nonmilitar ia dise ce la avion ia conteni 26 pasajores stranjer, incluinte oto de la SUA, cuatro de Britan, du de Beljia, du de Elas, un franses, un italian, e un suri.
@T Un piramide matrioxcin es descovreda en Mexico
@L aora_oji/2016/un_piramide_matrioxcin_es_descovreda_en_mexico
====== Un piramide matrioxcin es descovreda en Mexico ======
17 novembre 2016
Espertas ia trova un strutur tre en la piramide famosa Kukulkan en Mexico este.
Un piramide con altia de 10 metres ia es detetada a interna de du otra strutures cual formi la piramide de 30 metres, a Chichen Itza, un compleso de arceolojia maia en la stato Yucatan.
La descovre sujesta ce on ia construi la piramide en tre fases.
La sivilia maia ia ocupa America Sentral e ia ateni sua culmina en la sentenio ses de la eda comun. La piramide tre ia es construida entre la anios 550 e 800.
La strutur media ia es descovreda en la desenio de 1930, e on estima ce lo ia es creada entre 800 e 1000. On crede ce la plu grande ia es finida entre 1050 e 1300.
René Chávez Segura, un rexercor, ia comenta: "Lo sembla un pupa caxida rusce. Su la grande nos ave un plu e un plu."
Piramides ia es construida a interna de lunlotra per razonas diversa, incluinte la dejenera de la strutur o la ariva de un xef nova.
La piramide la plu peti ia es detetada par un tecnica noninvadente en cual on ia lumina la interna de la piramide per vide sua interna sin causa dana.
La descovre ta pote ofre comprendes nova sur la cultur maia orijinal, ante cuando lo ia intermisca con poplas de Mexico sentral.
En la anio pasada, arceolojistes ia trova ce la piramide Kukulkan ia es construida sur un de la rios suteran cual es comun en la rejion e ia es respetada par la maias.
En nosa tempo, Chichen Itza es un loca de erita mundal de Unesco e plu ca milion persones visita lo en cada anio.
@T Un polisior en bicini para un furor
@L aora_oji/2016/un_polisior_en_bicini_para_un_furor
====== Un polisior en bicini para un furor ======
30 julio 2016
On ia loda un polisior svensce ci ia tacle un furor suspetada, an cuando el ia es baninte su sol en bicini con sua amis en Stockholm.
Mikaela Kellner ia dise a jornalistes ce el e un otra polisior ia xasa la om cuando los ia comprende ce el ia prende un de sua telefonetas. El ia ajunta ce el ta interveni "an si el ta es nuda".
Un foto de la tacle a la paje de Instagram de Kellner ia atrae plu ca 9000 aprobas en min ca du dias.
La situa ia aveni en la Parce Rålambshov a mercurdi. La grupo de amis ia es visitada par un om ci ia dise ce el vende publicis per aida persones sin casa.
Kellner ia deveni suspetosa cuando la om ia persiste, posante paperes sur la tapeto sur cual la grupo ia es reclinante.
Direta cuando la om ia parti, reprendente sua paperes, un otra membro de la grupo ia vide ce sua telefoneta manca.
"Nos ia ave no tempo," Kellner ia esplica, "donce me ia core pos el per cisa 15 metres o simil. Un de mea amis es ance un polisior, donce nos ia saisi la om. El ia atenta evade, donce nos ia teni plu forte el."
Los ia regania rapida la telefoneta furada, e la om ia es arestada par polisiores patruliante.
"Me ia reseta multe comentas positiva e de amis e de colaborores," Kellner ia dise. "Lo es multe comun ce valuosas es prendeda en esta modo. Me ia vole xef crese la consensia ce esta persones es tan rusosa, cuasi como majistes."
@T Un ponte colasa en Kolkata
@L aora_oji/2016/un_ponte_colasa_en_kolkata
====== Un ponte colasa en Kolkata ======
1 april 2016
En Barat, un ponte de trafica cual on construi en la site Kolkata ia colasa, matante a la min 20 persones e ferinte cuasi 100.
On teme ce alga persones es trapida su la ponte de beton e aser, cual ia cade sur un strada traficosa.
Imajes mostra abitores local ci usa sua manos en aida la labora de salva.
Problemes de securia -- per esemplo, un manca de esaminas e la usa de materias sunormal -- ia afeta multe projetas de construi en la pais.
La asidente ia aveni en un area prosima a un de la visinerias la plu densa poplida de Kolkata, do botecas e casas es multe prosima a lunlotra sur stradetas streta.
La ponte ave du cilometres de longia, e on construi ja lo de 2009, no sasiante la limitas de tempo per completi lo.
La causa de la desastre no es clar, ma la compania construinte ia dise ce lo va coopera con investigores.
Un video de un camera vijilante pare mostra la momento cuando la strutur ia colasa, colpante pasores, ricxas, e construidas prosima.
On reporta ce persones ia abita casas tempora su la ponte.
La armada e ajenteria de desastres nasional ia junta se a la labora de salva, cual es impedida par la difisilia de prosimi ambulansias e otra veculos a la loca.
La ministro xef de Barat, Narendra Modi, ci fa un visita ofisial a la site capital de la SUA, ia tuita ce el es "xocada e tristida" par la colasa.
@T Un ponte de autovia colasa en Barat
@L aora_oji/2016/un_ponte_de_autovia_colasa_en_barat
====== Un ponte de autovia colasa en Barat ======
3 agosto 2016
En Barat ueste, a la min 22 persones manca pos la colasa de un ponte de autovia entre la site Mumbai e la stato Goa.
Du buses portante pasajores ia cade a en un rio inondada.
La colasa ia aveni en la parte temprana de oji. Salvores ia trova no veculos e no survivores.
Pluves forte impedi la laboras de salva. On ia diverje la trafica a un ponte nova en la rejion.
OP Singh, xef de la Forte Respondente a Desastres Nasional cual es manejada par la governa, ia dise ce on ia envia rapida 80 salvores, incluinte sumerjores.
El ia clari ce la reportas temprana indica ce du buses, e cisa plu, cual ia viaja sur la ponte vea, ia cade a la rio Savitri. La rio ia es inondada par la pluves de monson.
Un otra portavose per la salvores ia dise: "La buses no es detetable en un cilometre de la ponte. Par causa de la corente a vale, lo es posible ce la buses ia es puxada a un distantia plu grande."
En marto, un viaduto a media de deveni construida en la site Kolkata ia colasa, matante 20 persones e ferinte cuasi 100.
E en 2011, 32 persones ia mori e 132 ia es ferida cuando un ponte ia colasa a un aveni political en Darjeeling en la ueste de Bengala.
@T Un prete franses es matada en sua eglesa
@L aora_oji/2016/un_prete_franses_es_matada_en_sua_eglesa
====== Un prete franses es matada en sua eglesa ======
27 julio 2016
Un de la omes suspetada de mata un prete en un eglesa en Frans norde ia es vijilada par la polisia, e ia porta an un monitor eletronical a la tempo de la ataca.
Adel Kermiche, ci ia ave 19 anios, ia es arestada a du veses en la anio pasada, en atenta vade a Suria.
El e un otra atacor ia ataca la eglesa en Saint-Étienne-du-Rouvray, un suburbe de Rouen, en la misa de matina. Los ia talia la garga de la prete vea, ante cuando la polisia ia mata los.
Un de cuatro ostajes, un parocian vea, ia sufri feris grave de cotel.
Cuando los ia entra a la eglesa catolica, la du atacores ia porta "un aparato finjeda de esplode, covreda en paper de aluminio" e armas de mano.
En cuando los ia ataca padre Jacques Hamel, alga de la congrega ia susede evade per avisa la polisia, ci ia envia un ecipo spesialida sur situas de ostaje.
Tre de la ostajes ia es usada como scermos umana per impedi la polisia de entra a la eglesa. Pos libri final la ostajes, la du atacores ia segue los a estra la eglesa, criante "Dio es grande" en arabi, e la polisia ia mata los.
La organiza Daex (o Stato Islamiste) ia anunsia ce sua "soldatos" ia fa la ataca.
Un monce ci ia identifia se como sore Danielle ia es en la eglesa e ia descrive la esperia. "Los ia forsa el [Hamel] a sua jenos. El ia vole defende se, e esta es cuando la trajedia ia aveni. Los ia rejistra se. Los ia fa un spesie de sermon sirca la altar, en arabi. Lo es un teror."
Hamel ia ave 85 anios. Abitores de la vila ia reata con xoca e tristia a sua mata, descrivente el como modesta, dedicada, amada, e sempre disponable a sua parocianes.
La imam local, Mohammed Karabila, ia dise ce el es "stonada par la mori de mea ami. El ia es algun ci ia dona sua vive a otras."
Investigores labora ancora per identifia la atacor du.
François Hollande, la presidente de Frans, ia apela per unia, avertinte ce la gera contra terorisme "va es longa". "Nosa democratia es la blanco," el ia dise, "e lo va es nosa scermo. Ta ce nos sta con lunlotra. Nos va vinse en esta gera."
@T Un prete zimbabuean recomenda protesta plu
@L aora_oji/2016/un_prete_zimbabuean_recomenda_protesta_plu
====== Un prete zimbabuean recomenda protesta plu ======
14 julio 2016
Un prete zimbabuean, ci on ia deteni per tempo corta car el ia organiza un greve nasional en la semana pasada, ia recomenda ce on continua protesta.
Evan Mawarire ia dise ce persones debe resta a casa per contribui a un campania contra froda, malmaneja de la economia, e nonemplea. El ia ajunta ce la campania es seria en sua desira de cambia.
Ier, Mawarire ia es librida cuando un corte en Harare ia rejeta un caso legal contra el.
Sua avocatos ia susede convinse ce la acusa de suverti ia es ajuntada a minuto final, sutraente la posiblia de un prosede justa per el.
La prete ia es resente a la sentro de un campania en redes sosial per denunsia la maneja de la economia par la governa. El ia dise ce la gol de la promove #ThisFlag ("esta bandera") es "fa ce tan multe sitadanes como posible deveni envolveda en construi la nasion".
Sua demanda la plu resente ce persones resta a via de labora per protesta contra la crise economial ia es jeneral iniorada, e la plu comersias ia abri como normal a mercurdi.
Mawarire ia confesa ce la protesta no ia es tan susedosa como lo de la semana pasada -- cuando la sites de la pais ia pare abandonada -- ma el ia dise ce la greve debe continua a jovedi.
"Ta ce tota de nos para e envia un mesaje a nosa governa ce la situa basta ja," el ia dise. "Nos nesesa cambias en cosas multe simple, en campos multe simple. E nosa protesta -- nonviolente, nonprovocante, en nosa propre casas -- es la plu bon car lo segue la constrinjes de la lege. Cada zimbabuean ci no partisipa prende de nos la posiblia de ajunta a la momento de la viaja de nosa pais."
@T Un proibi de comersia de ivor en Xina
@L aora_oji/2016/un_proibi_de_comersia_de_ivor_en_xina
====== Un proibi de comersia de ivor en Xina ======
31 desembre 2016
Xina ia anunsia ce, ante la fini de 2017, lo va proibi tota ativias de comersia e prosede ivor.
Conservores de natur ia saluta la deside como "sin presedente" e "cambiante la jua" per la futur de elefantes.
La anunsia segue un deside a la Confere sur Comersia Internasional de Spesies Perilida en Sudafrica en otobre.
Xina ave la mercato de ivor la plu grande de mundo. Alga estimas sujesta ce 70% de la comersia mundal fini ala, do ivor pote ateni un custa de $1100 per cilogram.
La Consilio de Stato de la pais ia anunsia la detalias ier.
La prosede e vende comersial de ivor va sesa ante 31 marto, e tota comersiores rejistrada va es gradal retirada a pos, intera parante la mercato ante la fini de la anio.
La Funda Mundal de Natur (WWF) ia bonveni la novas, descrivente lo como "un anunsia sin presedente... sinialinte un fini a la mercato legal xef de mundo de ivor, e un aida major a laboras internasional per fronti la crise de xasa nonlegal de elefantes en Africa".
An si la mercato internasional de ivor ia clui en 1989, mercatos legal interna ia continua en multe paises en la mundo.
Un crese en la mata de elefantes en la sete anios pasada ia causa ce la cuantias tra Africa ia diminui par un tri, diseda par la Conta Grande de Elefantes resente publicida.
Xina ia suporta la deside en otobre, surprendente otra partisipores par la fortia de sua acorda per la proibi. Alga delegadas ia dise ce Beijing ia desira un deside an plu forte.
@T Un projeta de sesaspara per Suria
@L aora_oji/2016/un_projeta_de_sesaspara_per_suria
====== Un projeta de sesaspara per Suria ======
12 febrero 2016
La potias major de mundo ia acorda ce un "sesa de enemia" en Suria debe comensa pos un semana, seguente discutes en München, Deuxtland.
La sesaspara no va pertine a la batalia contra la grupos jihadiste Daex e al-Qaida.
Ministros de la Grupo Internasional de Suporta Suria (GISS) ia acorda ance aselera e grandi furnis de aida.
La anunsia aveni en cuando la armada suri, suportada par atacas airal rusce, avansa en la provinse de Aleppo, con risca de ensirca deses de miles de siviles en partes de la site Aleppo ocupada par rebelores.
La governa suri e la grupos xef oposante no ia dise esce los va reali la sesaspara.
Plu ca un cuatri de milion persones es ja matada en cuasi sinco anios de batalia en Suria.
Un grupo de taxe presideda par la SUA e Rusia va labora per reali la sesaspara par consulta con la grupos oposante en Suria.
On previde ce furnis de aida a comunias suri asejada va comensa tan pronto como venerdi.
John Kerry, la ministro SUA de esternas, ia confesa ce la projeta de sesaspara es "aspirante" e ia dise ce la proba real va es esce la partitos diversa onora sua prometes.
El ia fa la anunsia a lado de sua corespondente rusce, Sergei Lavrov, e la ambasador spesial de la Nasiones Unida per Suria, Staffan de Mistura.
Lavrov ia comenta ce on ave "razonas per espera ce nos ia fa un labora eselente oji". Un proposa plu temprana de Rusia ia previde un comensa de sesaspara a 1 marto.
A la confere jornaliste, Kerry ia sujesta denova ce atacas airal rusce colpa lo cual la Ueste regarda como soldatos moderada oposante, e no teroristes, como Moscva declara.
La ministro brites de esternas, Philip Hammond, ia comenta ce la sesaspara va funsiona sola si Rusia para sua atacas, ma Lavrov ia dise ce los va continua.
La GISS ia acorda ance ce negosias de pas, incluinte la governa suri e la rebelores, debe recomensa tan pronto como posible. Discutes inisial ia es interompeda a mera dias pos comensa en la parte plu temprana de esta mense en Genève, seguente la avansa en Aleppo.
Miles de persones deslocada par la batalia ia deveni encaliada a la frontera con Turcia, e ajenterias de aida ia averti sur un situa rapida malinte.
Un portavose per la oposa suri ia comenta: "Si nos vide atas e realis en pratica, nos va es pronto en Genève."
@T Un referendo suporta la festa nasional de serbsces bosansce
@L aora_oji/2016/un_referendo_suporta_la_festa_nasional_de_serbsces_bosansce
====== Un referendo suporta la festa nasional de serbsces bosansce ======
26 setembre 2016
Serbsces bosansce ia vota inondante per reteni 9 janero como un festa nasional, defiante la corte la plu alta de Bosnia.
Pos la conta de plu ca 70% de votas en la referendo de ier, 99,8% ia suporta la festa.
La corte ia judi ce la data es prejudosa contra bosnianes muslim e corvatsces catolica, e ce on debe cambia lo.
La serbsces ia declara la crea de sua propre stato a interna de Bosnia a 9 janero 1992, provocante un gera etnical en cual sirca 100 mil persones ia mori. Bosnia es ancora etnical divideda entre la serbsces e un federa muslim-corvatsce.
La corte constitual, locada en la capital bosansce Sarajevo, ia proibi la referendo.
Sirca 1,2 milion persones ia cuali per vota, e on reporta ce plu ca 56% ia partisipa.
Milorad Dodik, la presidente de la serbsces bosansce, ia dise ce la referendo va deveni conoseda como "la dia de determina serbsce". En la vila Pale, el ia dise: "Me es orgulosa de la popla de la Republica Serbsce, de tota de los ci ia veni per vota."
9 janero es no sola la aniversario de la declara de la stato serbsce bosansce, ma ance un festa cristian ortodox.
Valentin Inzko, la Representor Alta Internasional a Bosnia e Hersegovina ia comenta ce la vota es "nonlegal e nonconstitual", disente: "No era: desides de la corte constitual es final e nonrompable. E la corte constitual ia es multe multe clar. Lo ia suspende esta referendo."
Entretempo, Bakir Izetbegovic, la xef de la bosnianes, ia acusa Dodik de "jua con foco".
La corte es un de la instituidas creada en 1995, a la fini de la gera. Par iniora lo, Dodik menasa la Acordas de Dayton cual ia fini la gera.
@T Un rompejelo encaliada en la Antartica
@L aora_oji/2016/un_rompejelo_encaliada_en_la_antartica
====== Un rompejelo encaliada en la Antartica ======
26 febrero 2016
On ia salva 37 persones trapida sur la rompejelo major de Australia, cual ia encalia en Antartica.
La Aurora Australis ia deveni libre de sua cordones liante pos un venton de neva a mercurdi.
La Divide Antartica Australian (DAA) dise ce un barcasa ia naveti la membros de la mision a la base de rexerca Mawson, cuando la clima ia boni.
31 ecipores resta sur la barcon per reflota lo.
La DAA ia esplica ce lo esta prosede de reflota, cuando la ecipo va atenta move la barcon de sur la rocas, va ocupa alga oras, e ce on va prende la barcon a un area calma prosima per esamina lo a pos.
La barcon ia gania un fesur peti en sua corpo cuando lo ia encalia. La DAA ia comenta ce esta crea no risca a la stablia de la barcon o a la ambiente, ajuntante ce no carburante ia es malversada.
La Aurora Australis ia parti de Hobart en Tasmania a 11 janero e ia fa rexercas de siensa maral sirca la Plano de Kerguelen, un continente sumerjida cual estende tra 2200 cilometres. Lo ia ariva a Mawson a saturdi.
Lo ia sorti de sua cordones liante a 09:15 (04:15 de ora global) a mercurdi, en ventas de plul ca 130 cilometres per ora, e ia encalia a West Arm en la porto de Fero de Cavalo (Horseshoe Harbour).
On ia intende ance ce lo colie un plu grupo de rexercores de la base Davis. La DAA ia dise oji ce on va avioni esta grupo a la base Casey, e de ala a casa en la dias veninte.
La Aurora Australis ave 95 metres de longia e lo pesa 3911 tones. Lo ia es enviada a mar en 1989 e es capas de rompe jelo con profondia de asta 1,2 metres.
On ia desinia lo per maneja bon mares turbosa. Lo conteni laborerias usada per rexercas biolojial, oseanografial, e meteorolojial, e lo ave ance un jinasio, biblioteca, e areas recreal.
@T Un scandal presidental en Corea Sude
@L aora_oji/2016/un_scandal_presidental_en_corea_sude
====== Un scandal presidental en Corea Sude ======
4 novembre 2016
Park Geun-hye, la presidente de Corea Sude, dise ce el es "angusada" sur un scandal cual menasa sua xefia.
El ia dise ce el aseta la culpablia intera per la asede par sua ami prosima, Choi Soon-sil, a documentos governa, e ia ajunta ce el es preparada per deveni investigada.
On suspeta ce Choi ia usa sua amia con Park per solisita donas comersial a un reserva nonprofitante cual el ia controla. El ia es detenida a lundi. Un aidor pasada de Park ia es arestada ier.
A jovedi, un portavose per la Corte Distrital Sentral de Seoul ia dise ce lo ia aseta un demanda par prosedores per comanda la aresta de Choi, sur acusas de froda e malusa de potia.
Avocatos prosedente ia dise ance ce los largi sua investiga ofisial.
La scandal ia lasa Park con un aproba estimada de mera 5%.
El ia recambia ja sua ministro xef, reorganiza sua consilio, e desemplea alga aidores, ma on oia sempre plu esijes per sua resinia o acusa.
Park ia confesa ce el ia lasa ce Choi aida el con sua parlas, sin permete securial. On ave ance reportas ce Choi ia es prosima envolveda en formi la politica de la governa.
En un parla corta televisada oji, Park ia demanda emosiosa per es pardonada, disente ce el "ia pone tro multe fida a un relata personal e no ia regarda atendente lo cual aveni".
"Pensas triste turba mea dormi a note," el ia comenta. "Me comprende ce lo no importa cual me va fa: lo va es difisil ce me repara la cores de la popla, e alora me senti vergonia e demanda a me: 'Esce me ia deveni presidente per esta?'"
El ia dise ce on va puni cualcun sur ci on trova ce acel ia fa mal. "Si nesesada, me ia deside permete ce prosedores investiga me e me va aseta ance un investiga par un avocato nondependente."
Ma el ia nega divinas ce sua presidentia ia es influeda par un culto, o ce rituos xamanal ia aveni en la compleso presidental.
Choi, un ami longa de Park, es la fia de Choi Tae-min, un xef cuasirelijial e ombrin ci ia es prosima liada a la padre de Park, la presidente pasada Park Chung-hee.
@T Un scaramuxa entre parlamentores turces
@L aora_oji/2016/un_scaramuxa_entre_parlamentores_turces
====== Un scaramuxa entre parlamentores turces ======
3 maio 2016
En Turcia, membros de la partito governante e politicistes procurdi ia ataca fisical lunlotra en parlamento, sur tema de un projeta cual va sutrae de parlamentores sua imunia contra prosedes judal.
La colpas ia comensa en cuando un comite ia es en consenta per discute esta cambias constitual, cual la governa suporta.
Alga parlamentores ia lansa se a la scaramuxa de un table. Otras ia lansa acua o ia fa colpas con sua punios.
La partito oposante dise ce la intende de la cambia es sofoca la disenti.
La presidente, Recep Tayyip Erdoğan, ia demanda ce on prosede membros de la Partito Democrata de la Popla, acusante ce los es un estende de la Partito de Laborores de Curdistan, cual es proibida.
Alga parlamentores ia es ferida en la combate.
En la semana pasada, ance un otra sesion sur la cambias a la constitui ia dejenera a violentia.
@T Un selula lusosa en un prison paraguai
@L aora_oji/2016/un_selula_lusosa_en_un_prison_paraguai
====== Un selula lusosa en un prison paraguai ======
31 julio 2016
En Paraguai, la polisia ia invade la selula de prison de un padron de drogas, e ia descovre ce el ia ave ala un vive lusosa.
La selula ia ave tre salas, e ia inclui un table de confere, un cosina, un biblioteca, e un televisador con scermo de plasma. Lo ia es ocupada par Jarvis Chimenes Pavão, un criminal brasilera.
On ia destrui aora la interna.
La polisia ia aprende ce Pavão ia intende deveni libre par usa esplodentes per crea un buco en la mur de la prison.
El ia ta fini sua condena per lava de mone en la anio veninte, e alora el ia ta es probable estradida a Brasil. Aora, on ia move el a un unia spesial, distante de sua selula lusosa en la prison Tacumbú, do el ia es prosima a Asunción, la capital de la pais.
On investiga per trova cual ofisiores ia permete esta vive de luso a Pavão.
Otra prisonidas a Tacumbú ia dise ce algun ci ia desira resta en la aparte lusosa ia debe dona un paia inisial de $5000 a Pavão, e $600 per cada semana a pos.
"El ia es la om la plu amada en esta prison," un prisonida ia comenta.
La selula ia conteni ance un frescador, mobilas comfortosa, un sala de bani, e un colie de DVDs. Entre la DVDs on ia trova un televisa de la vive de Pablo Escobar, un padron de drogas de Colombia.
Escobar ia es matada en 1993. El ia fa un acorda con autoriosas colombian, permetente el a desinia sua propre prison.
@T Un sena teatral malfunsiona e ospitali un ator
@L aora_oji/2016/un_sena_teatral_malfunsiona_e_ospitali_un_ator
====== Un sena teatral malfunsiona e ospitali un ator ======
3 febrero 2016
Un ator italian es en un coma pos la malfunsiona de un sena en cual sua carater ia es linxada.
On ia ospitali rapida Raphael Schumacher, ci ave 27 anios, a la sera de soldi, cuando un de la vidores ia persepi ce el deveni real pendeda par un corda cual ia streti sirca sua colo.
Schumacher ia apare en Mirajes, un teatral esperimental en Pis, cuando la sena ia aveni.
La polisia ia inisia un investiga e ia clui la teatro en cuando los ia intervisa otra atores e ecipores.
On crede ce la problem ia aveni pos cuando on ia move un caxa sur cual on ia intende ce Schumacher va sta. On ia intende ance ce el porta un arnes de securia.
Un ator ia dise: "La laso ia ta debe es falsa e un arnes ia ta debe catura el si el cade. Me no pote esplica como un tal asidente ia aveni."
Mirajes es composada de ses senas presentada en partes diversa de la teatro, e la vidores pasea entre los.
La sena de la linxa, cual on ia fa ja susedosa en un presenta plu temprana de la mesma sera, ia es atada sur un patio.
On reporta ce un de la vidores, un graduada medical resente, ia comprende ce alga cosa ia malfunsiona cuando Schumacher ia comensa trema.
Ier el ia es ancora en state grave en ospital.
Sua madre ia rejeta un teoria, cual la polisia ia esplora, ce la ator ia atenta cisa suiside. El ia comenta: "Mea fio ia perde resente sua padre e ia fini un relata, ma ia trova denova sua calmia. El no ia lasa un letera de suiside e ia ave no razona per mata se."
@T Un sesaspara en Halab
@L aora_oji/2016/un_sesaspara_en_halab
====== Un sesaspara en Halab ======
16 desembre 2016
La sorti de siviles e rebelores de la este de Halab (Alep/Aleppo) en Suria continua longo un sesaspara.
Plu ca 3000 persones ia parti en buses a la dia prima de la sorti ier, ma la Nasiones Unida dise ce asta 50 mil es ancora trapida.
La armada de Suria, suportada par Rusia, ia saisi cuasi tota distritos ocupada par rebelores.
La Nasiones Unida ia acusa la governa suri de esecuta "un masacra" en la site.
Suria e Rusia ia nega a multe veses ce los ataca siviles. Bashar al-Assad, la presidente suri, ia saluta ier "la libri" de Halab pos plu ca cuatro anios de combate, disente ce un istoria deveni creada.
Multe miles de persones, incluinte multe siviles, ia es matada en la combate ferose.
Vladimir Putin, la presidente rusce, ia dise ce Rusia e Turcia atenta negosia un ronda nova de discutes de pas en Astana en Cazacstan. Estas va es en ajunta a la laboras de la NU en Genève.
En otra developas relatada ier:
-- Donald Trump, la presidente elejeda de la SUA, ia repete ce el va institui zonas secur en Suria, partal finansiada par la statos de la Golfo Irani.
-- A un confere de la Uni European, Angela Merkel, la canselor deutx, ia descrive la situa en Halab como "crevente la cor" e ia regrete ce la diplomatia european ia fali.
-- Donald Tusk, la presidente de la Consilio European ia esije la abri direta de coredores umaniste per permete ce aida entra a Halab.
-- Britan ia dise ce lo va furni $25 milion plu de aida, incluinte acua pur e comedas, a miliones de suris.
Rebelores ia esplode sua reservas de muni e ia destrui documentos ante parti de la site.
La Sentro Rusce per la Reconsilia de Partitos Oposante en Suria, un parte de la ministreria rusce de defende, ia dise ce la autorias suri ia garantia la securia de tota membros de la grupos armada ci deside parti de Halab.
Cuando la opera ia comensa, un ofisior en Halab este ia dise ce on ia fusili contra un convoia de ambulansias, ferinte tre persones.
La persones sortida es moveda a areas ocupada par rebelores en la provinse visina Idlib.
La ambasador de la NU a Suria, Staffan de Mistura, ia averti ce on risca esperia plu violentia en Idlib. "Si on ave no acorda political e no sesaspara," el ia dise, "Idlib va deveni la Halab seguente."
Turcia, cual ia aida negosia la sorti, prepara reseta alga de la siviles la min capas de defende se.
En otobre, Assad ia dise ce un vinse en Halab va es "la trampolin per libri otra areas de teroristes". La governa usa la parola "teroriste" per descrive tota rebelores combatente.
El ia indica spesial Idlib, a ueste de Halab, cual es cuasi intera controlada par un alia de partitos islamiste rebelante e Jabhat Fateh al-Sham, un grupo jihadiste conoseda en pasada como la Fronte al-Nusra.
Idlib conteni pasajes de frontera cual rebelores usa per reseta furnis de Turcia, un suportor major.
@T Un sesaspara en Iaman
@L aora_oji/2016/un_sesaspara_en_iaman
====== Un sesaspara en Iaman ======
20 otobre 2016
En Iaman, un sesaspara de tre dias ia comensa ofisial, negosiada par la Nasiones Unida.
La acorda ia ativi a un minuto ante medianote de ora local, a mera oras pos scaramuxas nova.
La soldatos de presidente Abdrabbuh Mansur Hadi, suportada par un alia saudi gidada, batalia la rebelores huti ci controla Sana.
La NU espera ce la pausa de combate va gida cisa a un recomensa de negosias de pas entre la du lados. La alia dise ce lo va onora la sesaspara si sua enemis en la promove huti obedi ance lo.
La parlamento en Sana, en cual parlamentores prohuti es la majoria, ia recomenda ier "un obliga completa" a la sesaspara.
Ma on es setica sur esce la acorda va es obedida e va deveni un modo de fini esta gera interna de 19 menses. Lo es ja la atenta ses.
Hadi, ci abita aora estra la pais, ia dise ier ce el previde ce sua enemis va viole la sesaspara. "Nos no espeta de los oji cualce cosa plu ca parolas evitante e posponente," el ia dise pos encontra la ambasadores SUA e brites.
La anunsia de la sesaspara segue ansia internasional sur la moris de 140 persones en un ataca airal saudi cual ia colpa un asembal funeral en Sana.
Ofisiores saudi dise ce la intende ia es ataca gidores de la rebelores huti, ma par causa de informas erante, on ia dirije lo a un otra loca.
Ismail Ould Cheikh Ahmed, la ambasador spesial de la NU a Iaman, ia comenta ce el espera ce la sesaspara "va salva la popla iamani de la versa de plu sangue e va permete la furni aumentada de aida umaniste".
En la gera en Iaman, soldatos fidosa a la governa internasional reconoseda de presidente Hadi combate la rebelores. La alia cual suporta Hadi, gidada per Arabia Saudi, acusa Iran de suporta la rebelores.
La NU dise ce la gera ia mata cuasi 7000 persones, ia feri plu ca 35 mil, e ia desloca a la min tre milion de pos marto de la anio pasada.
@T Un siclon atlantica rara en janero
@L aora_oji/2016/un_siclon_atlantica_rara_en_janero
====== Un siclon atlantica rara en janero ======
15 janero 2016
Un siclon rara ia formi en la media de la Atlantica, la prima en janero de pos 1938.
On ia averti la Asores, car Siclon Alex move en acel dirije con venta de rapidia de 140 cilometres per ora.
La Sentro Nasional SUA de Siclones ia dise ce proable lo va ateni oji la isolas.
Abitores previde ondas de altia de asta 18 metres e soflones de venta de asta 160 cilometres per ora.
De la sistemes tropical cual ia formi en la Atlantica de pos la comensa de arcivos ofisial, esta es un de la plu tempranas en la anio calendarial.
Entretempo, un otra tempesta tropical, Pali, ia formi supra la Pasifica, do un tal aveni es simil rara a esta tempo de anio.
Siensistes ia relata la siclones con ventas potiosa e temperatures alta de la surfas de mar, resultante de la fenomeno El Niño cual es nonusual forte en esta anio.
La Organiza Meteorolojial Mundal ia dise ce la aveni de El Niño en 2015 es entre la tre plu fortes de los notada de pos 1950.
A esta fenomeno, cual aveni a un ves en cada du a sete anios, on atribui la secia grave en multe partes de la mundo, e ance la inondas sever en multe otras.
Lo es un aveni natural de clima en cual la acuas calda de la sentro de la Pasifica estende a este en dirije a America Norde e Sude.
@T Un siclon intensi en la Caribe
@L aora_oji/2016/un_siclon_intensi_en_la_caribe
====== Un siclon intensi en la Caribe ======
1 otobre 2016
La siclon la plu potiosa en la Mar Atlantica de nove anios move en dirije a Jamaica. La rapidia de venta es asta 260 cilometres per ora, sufisinte forte per destrui casas.
Meteorolojistes ia leva siclon Matthew a categoria sinco, la plu alta en la scala de intensia.
La ministro xef de Jamaica, Andrew Holness, ia clama un consenta urjente de parlamento per discute la preparas.
On previde ce la tempesta va ariva de la mar en o ante lundi. La costa sude va es la prima colpada. La capital, Kingston, es en acel parte, como ance la sola refineria de petrolio en la pais.
On ia averti ce la ventas alta pote bate ance la areas xef per turistes, incluinte Baia Montego en la norde.
La polisia, la armada, e ecipos local de crise es preparada per ativi, e on prepara refujerias tra la isola. Multe jamaicanes cumula aora acua e comedas.
On ia averti sur tempestas tropical ance per partes costal de Colombia e Aiti en la fini de semana.
Ofisiores en Aiti dise ce la conserna prima es proteje la isolas sude de la pais, de cual los descrive sua abitores como "prima riscada".
On previde ce asta 38 sentimetres de pluve va cade sur Jamaica e Aiti sude.
Jamaica ia es danada par siclon Gilbert en 1988, ma la tempesta major la plu resente en la rejion ia es siclon Sandy en 2012.
@T Un siclon matante en Pilipinas
@L aora_oji/2016/un_siclon_matante_en_pilipinas
====== Un siclon matante en Pilipinas ======
27 desembre 2016
Un siclon potiosa ia mata a la min cuatro persones pos pasa tra Pilipinas.
An pos temes inisial, Manila, la capital multe poplida, no ia es danada par la tempesta, cual ia trae ventas de asta 120 cilometres per ora.
La tempesta, nomida Nok Ten, ia cade arbores e linias eletrical, e ia obliga 380 000 persones a parti de sua casas.
Autoriosas ia averti sur un risca de inondas subita e liscas de fango en la 36 oras veninte.
On ia envia laborores de crise per sutrae detrito de la vias, prometente ce la eletrica va es rapida restorada en locas forte colpada.
Deses de volas nasional e internasional ia es canselada par causa de la tempesta, e ofisiores ia dise ce plu ca 12 000 persones ia spende natal en portos car navetas ia es proibida de viaja.
La transporta de mar, tera, e aira ia recomensa lenta funsiona.
Un cultivor ia mori cuando un arbor ia cade sur el en la provinse Quezon, e tre otra viletanes ia mori en la provinse Albay, incluinte un duple ci ia es puxada a via par un inonda.
En Albay, ofisiores ia obliga la parti de abitores ci no ia desira abandona sua casas a natal, la vacanse la plu grande en la nasion xef catolica.
La tempesta, conoseda como Nina en Pilipinas, ia ariva a la costa este, prosima a la isola Catanduanes en la tarda de soldi, movente en dirije a la Mar Xines Sude.
En Catanduanes, Albay, e Camarines Sur, ofisiores ia declara un state de desastre per permete un distribui plu rapida de reservas de crise.
En otobre, la pais ia es colpada par supersiclon Haima, cual ia mata a la min cuatro persones. En 2013, supersiclon Haiyan ia prende plu ca 7350 vives.
@T Un siclon vade de Taiuan a Xina
@L aora_oji/2016/un_siclon_vade_de_taiuan_a_xina
====== Un siclon vade de Taiuan a Xina ======
15 setembre 2016
Siclon Meranti ia ateni Xina continental pos bate Taiuan con sua tempesta la plu forte de 21 anios.
La suprasiclon, con soflones de asta 227 cilometres per ora, ia mata un person e ia lasa un dui de milion casas sin eletrica en Taiuan.
Lo ia ariva en Xina prosima a Xiamen, un site sude-este, a esta matina, pos perde alga de sua potia.
On ia cansela deses de aviones e trenes en Xina sude, e ia sorti deses de miles de persones.
Lo es la siclon la plu forte cual ia colpa Taiuan en 21 anios, si on regarda sua masima de venta sustada a la sentro.
La venton ia ariva a la comensa de la Festa de Mediautono cual dura per tre dias.
On ia recomenda ce abitores resta en casa e ce barcones revade a porto. Ma a persones en Pingtung en Taiuan on ia recomenda parti de la casas.
En Taiuan, un person ia es matada e 38 ferida.
La tempesta ia provoca avertis sur lisca de tera posible en montanias. On ia previde 800 milimetres de pluve en alga partes.
Scolas e ofisias ia es cluida en la plu de contias este e sude, e 650 000 casas ia esperia rompes de eletrica.
Palos eletrical e arbores ia deveni desradisida. Camiones ia es cadeda de vertical e tetos ia es sutraeda par la venton.
Tempestas potiosa no es rara en Taiuan. En la anio pasada, siclon Dujuan ia mata tre persones e ia feri plu ca 300 ala. E en julio de esta anio, tre ia mori e sentos ia es ferida cuando siclon Nepartak ia bate la costa este de Taiuan.
On predise ce un otra siclon, Malakas, va prosimi a venerdi e saturdi, ma probable lo va resta a mar.
@T Un sonda spasial desende sur Marte
@L aora_oji/2016/un_sonda_spasial_desende_sur_marte
====== Un sonda spasial desende sur Marte ======
19 otobre 2016
La Ajenteria Spasial European (ASE) prepara per pone un sonda sur Marte.
Sua robot Schiaparelli va atenta la desende riscosa a la surfas en la oras veninte, pos viaja tra 500 milion cilometres de la Tera.
On regarda la atera como un eserse per un projeta multe plu importante pos cuatro anios, cuando ASE va ofre pone un vagador multe custosa sur la planeta. Acel veculo de ses rotas va fora su la surfas per xerca la vive.
La atera de Schiaparelli, un robot plu peti, debe es un taxe plu simple. Ma la istoria mostra ce Marte no es la plu bonveninte de locas, an per aparatos la plu sofisticada.
Plu ca un dui de la misiones enviada a la planeta visina de la Tera ia fali. Multe ia es perdeda en via, ia pasa sua blanco, o ia es ruinada par la secutes de sua ariva.
Per Europa, la sonda Schiaparelli es un posible per oblida la delude de la aterador Beagle 2 cual ia desende bon sur Marte en 2003, ma ia malfunsiona cuasi direta.
Schiaparelli, construida en Italia, va usa un combina de un scermo termal, un paracade, e un grupo de rocetos per redui sua rapidia de 21 000 cilometres per ora a sua entra a la atmosfera asta cuando lo flota direta supra la surfas.
En sua du metres final, la robot de 600 cilogrames va cade a sur sua ventre.
Desendente, la sonda va emete tonos de frecuentia estrema alta (UHF). Un telescopio de radio en Barat va atenta catura estas e envia los a controlores en Darmstadt en Deutxland.
On previde ce la atera va aveni a 14:58 de ora universal. Si la compleso barati oia ancora Schiaparelli a la comensa de la ora 15, esta va indica ce la modulo ia survive sua desende a la tereno martan.
@T Un strada japanes cade en un buco
@L aora_oji/2016/un_strada_japanes_cade_en_un_buco
====== Un strada japanes cade en un buco ======
8 novembre 2016
A esta matina, un dolina jigante ia engoli un strada de sinco bandas en la sentro de un de la sites la plu grande de Japan.
La colasa ia comensa a sirca 05:00 de ora local, prosima a la stasion Hakata, la plu ativa en la site Fukuoka sur la isola sude Kyushu.
Lo ia comensa con du bucos plu peti cual ia crese constante asta cuando los ia formi un depresa enorme con largia de sirca 30 metres.
On ave no reportas de feris grave, ma la situa ia disturba eletrica, acua, gas, e transporta en la rejion.
La difusor NHK ia reporta ce un fem vea ia cade sur un scalera par causa de la rompe de eletrica.
Ofisiores ia dise ce la apare subita de la dolina es cisa relatada con laboras per estende un linia prosima de la metro.
@T Un sumerjor es matada par un raia
@L aora_oji/2016/un_sumerjor_es_matada_par_un_raia
====== Un sumerjor es matada par un raia ======
5 otobre 2016
Un sumerjor profesal ia es matada par un raia de spina a un parce de animales maral en Singapor.
Philip Chan, ci ia ave 62 anios, ia gida un ecipo de sumerjores ci ia es movente animales de la atrae Mundo Suacuan ier.
La parce popular ia clui resente.
Chan ia es moveda a ospital, do el ia mori par causa de sua feris. La polisia investiga "la mori nonatural".
La aveni ia es la prima de sua spesie en Singapor. Un declara ofisial de la Corpora Haw Par, cual posese la parce, ia descrive lo como "un asidente trajedin".
"Senior Chan ia es un de des empleadas ci ia continua labora per cura la animales en cuando on ia trova casas conveninte," un portavose ia dise, ajuntante ce on ia suspende aora la program de move la animales.
"El ia es esperta como sumerjor, acueriste, e curor de animales, ci ia cura ja la animales acual de la abri de Mundo Suacuan."
La parce ia abri en maio 1991 ma ia clui en junio pos no susede compete contra atraes simil de acueria.
On ia critica lo per teni delfines ros rara, de cual alga ia es prendeda de la natur. La animales move aora a un acueria en Xina.
Raias de spina es comun trovada en acuas tropical. Sua spinas lamin, locada a fini de sua codas, es covreda con venena nosiva cual los usa frecuente per defende se de menasas.
An si la picas de esta animales es dolosa, los ataca sola rara umanas.
Steve Irwin, un esperta famosa de conserva de natura, ia es matada par un raia de spina en 2006, prosima a la Parador Grande de Coral. Sua peto ia es colpada par la spina.
@T Un supraluna lumina la sielo
@L aora_oji/2016/un_supraluna_lumina_la_sielo
====== Un supraluna lumina la sielo ======
15 novembre 2016
La luna ia veni plu prosima a la Tera ca a cualce otra tempo de pos 1948. Persones sirca la mundo ia asembla a locas famosa, sur plaias, o sur construidas alta per regarda lo.
La "supraluna" ia deveni la plu briliante en Asia a la sera de ier.
La luna ia ateni sua punto la plu prosima -- a distantia de sola 356 509 cilometres -- a 11:21 de ora universal.
Nosa satelite orbita la Tera en un elise, no un sirculo, donce a alga veses lo es plu prosima a la Tera ca a otras. Cuando la perijeo (la punto la plu prosima) e la luna plen coaveni, on nomi esta un supraluna.
La supraluna presente ia es la plu bon vidable en America Norde en la temprana de lundi, ante la leva de sol.
Supralunas pare plu grande par sirca 14% e plu briliante par 30% ca cuando la luna es a sua punto la plu distante en sua orbita.
La luna no va es denova tan prosima ante 25 novembre 2034, cuando lo va veni an plu prosima -- a 356 445 cilometres.
On ia recomenda ce, per crea un bon foto de la luna, on inclui un monumento o otra punto de refere en la imaje.
@T Un suri porta la torxa olimpial tra un campa de refujadas
@L aora_oji/2016/un_suri_porta_la_torxa_olimpial_tra_un_campa_de_refujadas
====== Un suri porta la torxa olimpial tra un campa de refujadas ======
27 april 2016
Un refujada suri, ci ia es un sportor ante perde un parte de sua gama en un bombi, ia porta la flama olimpial tra un campa de refujadas en Atinai.
Ibrahim al-Hussein, a ci on ia dona refuja en Elas, ia porta la torxa tra la campa Eleonas.
Esta eletriciste de 27 anios ia partisipa en competes de nada e judo en Suria. El es entre plu ca milion migrores ci ia entra a la Uni European, traversante a Elas par barco inflable.
Al-Hussein ave aora un gama prostesal, labora en un cafe de Atinai, e jua bascetbal de seja rolante.
El pote nada 50 metres en 28 secondos -- sola tre secondos min ca sua ateni la plu bon ante sua feri. El va compete en la concurso elinica per nadores descapasida en junio.
El ia descrive sua porta de la flama como un onora. "Me porta la flama per me, ma ance per suris, per refujadas en tota locas, per Elas, per sportes, per mea ecipos de nada e bascetbal. Mea gol es sede nunca, ma continua, avansa sempre. E me pote reali esta par sportes."
Entretempo, la Comite Internasional Olimpial ia anunsia ce un ecipo de asta 10 refujadas va partisipa en la Juas Olimpial de Rio. Un prosede de eleje va aveni en junio.
La flama olimpial ia es ensendeda en la semana pasada en la Templo de Hera, vea de 2600 anios, a Olimpia Antica.
A martedi, on va dona lo a ofisiores brasilera en un rituo a la stadion istorial olimpial en Atinai, do la Olimpiales prima de la eda moderna ia aveni en 1896.
Des-du mil torxores va porta la flama tra Brasil ante la comensa de la Olimpiales en agosto.
@T Un tancador esplode en Mozambic
@L aora_oji/2016/un_tancador_esplode_en_mozambic
====== Un tancador esplode en Mozambic ======
18 novembre 2016
A la min 73 persones ia es matada e 110 ferida cuando un tancador de carburante ia esplode en Mosambic ueste.
La esplode ia aveni a la posmedia de jovedi en la vileta Caphiridzange en la provinse Tete, prosima a la frontera de Malaui, ma la contesto es ancora nonclar.
Alga reportas dise ce la gidor de la tancador ia atenta vende carburante a viletanes; otras dise ce el ia deveni embosceda.
La esplode mesma ia es cisa causada par un colpa de lampo o par un focon prosima.
Deses de corpos carbonida ia es trovada sirca la loca de esplode. Alga de la vitimes grave ardeda ia atenta core a la rio local.
Un otra reporta ia dise ce la veculo ia colide a la posmedia de martedi, e ce viletanes ia es sifoninte la carburante de lo cuando lo ia esplode a jovedi.
La governa ia dise ce lo "deplora la perde de vive" e "furni aora la aida nesesada per salva vives e per comforta la familias de la vitimes".
Tre ministros va ariva en la rejion a venerdi per supravide la labora de salva e per fa un investiga.
La governa mosambican ia alti resente la custa de carburante en responde a la basi de la mone local en relata a la dolar.
Mozambic es un de la paises la plu povre de mundo, e plu ca un dui de sua 24 milion abitores vive su la linia ofisial de povria. Lo ia gania autonomia de Portugal en 1975, ma sufri ancora la efetos de un gera interna de 16 anios cual ia fini en 1992.
@T Un tance taiuan cade de un ponte
@L aora_oji/2016/un_tance_taiuan_cade_de_un_ponte
====== Un tance taiuan cade de un ponte ======
17 agosto 2016
En Taiuwan, un veculo blindada ia cade tra tre metres de un ponte en pluve forte pos un eserse militar. Tre soldatos ia es matada.
La tance CM11, portante sinco soldatos, ia es revadente a sua base cuando lo ia cade de sur la ponte a en la rio Wangsha, en la contia Pingtung en la sude de la pais.
La gidor e capitan de la veculo ia survive.
La eserse ia es un parte de preparas per Han Kuang, la eserse militar anial, en la semana veninte.
Presidente Tsai Ing-wen ia envia sua compatia.
La veculo ia es viajante de un proba de xuta a sirca 10:30 de ora local cuando lo pare ce un fali macinal en un de la bandas erugin ia preveni la gidor de fa la verje nesesada a sinistra.
La gidor ia sorti con feris minor.
On ia tira la cuatro otras de la veculo en state nonrespondente. La capitan ia es reviveda e prendeda a un ospital mililtar en Kaohsiung, un site visina.
Reportas indica ce la soldatos ia parteni a la Comanda de la Armada Oto.
Presidente Tsai ia esije un investiga rapida sur la causa de la aveni. El va preside la eserses militar, cual simula atacas posible par Xina.
@T Un tore de apartes arde en la AAU
@L aora_oji/2016/un_tore_de_apartes_arde_en_la_aau
====== Un tore de apartes arde en la AAU ======
29 marto 2016
Un focon grande ia colpa a la min du tores abital en la Amirias Arabi Unida. Esta es la tal aveni tre en no multe plu ca un anio.
La foco ia comensa en un tore en la amiria Ajman, a norde de Dubai, ante estende a un bloco visina.
On ia sorti la abitores, ma alga ia nesesa es tratada per problemes de respira e per feris minor.
A 31 desembre, un focon ia engoli un otel lusosa de 63 niveles en la sentro de Dubai.
La focon nova ia comensa en la tarda de lundi en la compleso Ajman Un, un developa de des-du tores con sirca 3000 apartes.
Videos postada a Twitter par la polisia ia mostra flamas consumante la plu de un lado de la tore, ateninte la altia de alga niveles.
Un video presedente ia mostra un cuantia grande de detrito ardente en cade a la tera.
A esta matina, la autoriosas ia dise ce la focon es estinguida e ce ecipos espeta la descaldi de la construida.
On ia spende 2,7 mil milion dirhemes ($735 milion) per completi la compleso, de cual sua abri ia es projetada -- ma no realida -- per la anio 2009.
La focon a la sera de la anio nova ia arde tra plu ca dudes oras. 16 persones ia deveni ferida, ma focos artal a un loca visina ia es mostrada como intendeda.
La polisia ia dise ce la strato covrente la esterna de acel otel no ia conforma a normas de securia. La focon ia es causada par un sircuito corta en un lampa de punto.
En febrero de la anio pasada, un focon grande ia dana multe la rascasielo Marina Torch en Dubai, un de la tores abital la plu alta de mundo.
@T Un trematera en Taiuan
@L aora_oji/2016/un_trematera_en_taiuan
====== Un trematera en Taiuan ======
6 febrero 2016
En la sude-ueste de Taiuan, un trematera ia cade construidas en la site Tainan, matante a la min sete persones.
Ecipos salvante atenta ateni persones trapida en detrito de pos la aveni de la trema de mesura 6,4 pronto ante 04:00 de ora local (20:00 de ora global).
Un bebe ia es entre cuatro persones ci ia mori cuando un tore de apartes ia colasa. Plu ca 300 persones ia es ferida.
Presidente Ma Ying-jeou ia promete ce on va fa tota posible per salva persones. Arivante en la site, el ia dise ce on va crea refujerias per los ci ia perde sua casas. La site ave du milion abitores.
Imajes televisada ia mostra salvores usante scalas per traversa montones de detrito.
Un de la construidas la plu afetada ia es la compleso de apartes Wei Kuan, cual ia ave 17 niveles e do a la min 256 persones ia abita.
On ia salva plu ca 200 persones, ma un bebe, xica joven, e du omes adulte no ia survive. On crede ce 30 persones, cisa plu, es ancora trapida a interna.
Chen Wei-jen, la ministro de internas, ia dise ce el teme ce plu persones ia es en la tore ca usual, car familias ia asembla per selebra la anio nova xines. El ia comenta ce investigores va esamina esce la strutur de la construida ia sasia la regulas.
Abitores ia parla sur sua modo de sorti de sua casas en la tore. Un fem ia dise: "Me ia usa un martel per rompe la porte de mea casa, cual ia es torseda e clavida, e ia susede trepa a estra." Un om ia lia vestes per crea un corda cual el ia usa per desende de la nivel nove a la nivel ses.
Taiuan es situada prosima a la junta de du placas tetonical e esperia comun tremas.
Esta ia aveni prosima a la surfas, donce sua efetos ia es grandida. On ia senti lo an en la capital, Taipei, a 300 cilometres a norde de Tainan, e a la min sinco replicas sismica ia segue.
Lo pare ce la dana no es vasta, ma alga construidas alta es lasada con apoia perilosa.
On reporta ance rompes de eletrica, e lias transportal ia deveni disturbada a un de la dias la plu viajosa de la anio, ante la festa de anio nova xines.
Beijing ia ofre aida. En 1999, cuando un trema de mesura 7,6 ia mata plu ca 2300 persones en Taiuan sentral, un ofre simil ia deveni maraniada en disputa political, car Taiuan ia acusa ce Xina ia esplota la situa per progresa sua propre intendes.
@T Un trematera en Tanzania
@L aora_oji/2016/un_trematera_en_tanzania
====== Un trematera en Tanzania ======
11 setembre 2016
En Tanzania norde, un trematera de grado 5,7 ia mata a la min 13 persones e ia feri 203.
La trema ia aveni prosima a la frontera con Uganda e Ruanda, no distante de Lago Victoria.
Imajes postada a redes sosial ia mostra construidas danada en Bukoba, un site de plu ca 70 mil persones do on ia reporta la cuantia la plu grande de vitimes.
On ia sensa la trema an en Cenia ueste.
La comisionor de distrito de Bukoba ia dise: "La esta aveni ia causa multe dana. Per aora, la situa es calma e controlada. On ia relasa alga persones de ospital. Nos no previde reseta multe plu feridas."
La Studia Jeolojial de la SUA dise ce la trema ia aveni a profondia de 10 cilometres a 15:27 de ora local ier.
La Vale de Falion Grande en Africa este segue un linia de falia jeolojial, ma tremateras major es rara ala.
Un trema de grado 6 ia colpa la vila Arusha en Tanzania, a este de Bukoba, en julio 2007.
@T Un trematera sever en Aceh, Indonesia
@L aora_oji/2016/un_trematera_sever_en_aceh_indonesia
====== Un trematera sever en Aceh, Indonesia ======
7 desembre 2016
Un trematera su mar, prosima a la provinse Aceh en la norde de Indonesia, ia mata a la min 52 persones.
La trema de mesura 6,5 ia aveni a la costa norde-este de la isola Sumatra, do deses de construidas ia colasa e on teme ce multe persones es trapida su detrito.
La ajenteria meteorolojial de Indonesia ia dise ce on ave no risca de tsunami. En 2004, Aceh ia es ruinada par un tsunami cual ia mata plu ca 160 mil persones sola en Indonesia.
La trematera nova ia aveni a 05:03 de ora local a profondia de 17,2 cilometres. Alga enfantes es entre la mores e ospitales local es folida.
On usa aparatos pesosa per xerca survivores, ma on nesesa la aida de plu persones, car alga empleadas es ocupada en aida sua propre familias.
La rejion la plu sever colpada es Pidie Jaya a la costa norde de Aceh. Lo ave sirca 150 mil abitores, e es situada a sirca 110 cilometres de Banda Aceh, la capital provinsal.
La trema ia secute Banda Aceh, provocante multe persones tra la rejion a fuji de sua casas. On reporta ce multe esita reentra en cuando replicas sismica aveni ancora.
Indonesia es propensada a tremateras car lo es sur la Anelo de Foco -- la linia de tremas e erutas volcanal cual ensirca cuasi la borda intera de la Mar Pasifica.
La isola Sumatra es ja colpada par alga tremateras en esta anio.
@T Un tren colpa un stasion en New Jersey
@L aora_oji/2016/un_tren_colpa_un_stasion_en_new_jersey
====== Un tren colpa un stasion en New Jersey ======
30 setembre 2016
En la SUA, un tren de viajores dial ia colide con un stasion en la stato New Jersey. Un fem ia mori e plu ca sento otra persones ia es ferida.
La tren ia fali lenti, ia pasa tra la paradores de bileta, e ia entra a la reseteria de la stasion Hoboken. La vagones e la stasion ia es multe danada, e un parte de la teto de la construida ia cade.
La servis de crise ia ativi a pos: pompores e empleadas de ferovia ia aida persones a sorti de la vagones destruida.
Hoboken es situada a la Rio Hudson, a la otra lado de la site New York. Multe persones usa la stasion per viaja a Manhattan.
La fem ci ia mori ia es colpada par detrito en sta sur un plataforma. El ia ave 34 anios.
La gidor de la tren, Thomas Gallagher, ci ave 48 anios, es en un state grave a un ospital local, ma el coopera con investigores.
Chris Christie, la governor de la stato, ia dise: "Nos ave no indica ce esta es cualce otra ca un asidente trajedial."
En 2008, la Congresa de la SUA ia aseta un lege obligante tota trenes a porta sistemes nova de securia ante la fini de 2015. Ma la plu de companias ferovial no ia sasia la esije, car la sistem es custosa e complicada per instala.
Alga companias, incluinte New Jersey Transit, ia menasa clui completa si on ta enforsa la lege. La Congresa ia responde par estende la limita asta 2018. Companias va pote alora solisita plu tempo per fini la renovis e proba la sistem.
On intende completi instala la sistem nova en la trenes de viajores dial de New Jersey ante la fini de 2018.
Seguente la reporta de progresa la plu resente de New Jersey Transit, zero de la 440 trenes en acel linia porta la sistem nova, e on ia instrui zero empleadas sur sua usa.
La sistem, nomida "controla positiva de tren", es desiniada per supresa automata la atas de la gidor si la locomotiva viaja tro rapida. En efeto, lo garda contra eras umana cual ta pote causa colides o desrelis. Lo usa jeolocali e un lia sin filo per envia informas de trenes a controlerias en tempo real.
On ia judi ce la parte de la construida usada per trenes de viajores dial es secur, e pote recomensa funsiona.
La Comite de Securia de Transporta Nasional va esplora esce la colide ier ave cualce similes con un colide a la mesma stasion cual ia feri 34 persones en 2011.
@T Un tren rapida desreli en Barat
@L aora_oji/2016/un_tren_rapida_desreli_en_barat
====== Un tren rapida desreli en Barat ======
20 novembre 2016
En la norde de Barat, a la min 96 persones ia es matada cuando 14 vagones de un tren rapida ia salta de la reles en la stato Uttar Pradesh.
Plu ca 150 persones es reportada como ferida.
La desreli ia aveni corta pos 3:00 de ora local a esta matina, prosima a la site Kanpur. Sua causa no ia es direta clar.
La plu de la vitimes ia es locada en du vagones prosima a la locomotiva cual ia deveni inversada e grave danada.
Laborores de salva a la loca usa macinas pesosa per talia la vagones e ateni survivores. Multe pasajores es ancora trapida.
Un pasajor, de ci sua vagon no ia desreli, ia dise ce la tren ia viaja a rapida normal. Lo ia para subita, ante recomensa corta ante la asidente.
Narendra Modi, ministro xef de Barat, ia tuita: "Angusada ultra parolas sur la perde de vives par la desreli de la tren Patna-Indore. Mea pensas es con la familias privada. Preas con la feridas en la asidente trajedin de tren."
Modi ia dise ance ce el ia parla a Suresh Prabhu, la ministro de ferovias, ci "mesma monitori prosima la situa".
A sua propre conta de Twitter, Prabhu ia averti ce on va reata en modo tan sever como posible contra los ci es culpable per la asidente. El ia dise ce un investiga va comensa direta, e ce on va paia compensa "a pasajores nonfortunosa ci ia mori e a feridas".
Kanpur es un junta major de ferovias, e sentos de trenes pasa tra lo a cada dia.
Asidentes ferovial no es rara en Barat, do multe de la aparatos es vea. Un otra asidente en Uttar Pradesh en marto 2015 ia mata 39 persones e ia feri 150.
A cada dia, sirca 23 milion pasajores usa la rede vasta de ferovias barati, numero cuatro de la plu grandes de mundo.
@T Un turiste mori a la Parador Grande de Coral
@L aora_oji/2016/un_turiste_mori_a_la_parador_grande_de_coral
====== Un turiste mori a la Parador Grande de Coral ======
14 desembre 2016
Un fem vea de Japan ia mori en nada con airador a la Parador Grande de Coral. Esta es la mori cuatro de un turiste a la atrae australian en sola un mense.
La fem de 75 anios ia es tirada ier de la acua a Moore Reef, a sirca 45 cilometres de Cairns.
El ia es nadante con un grupo de turi. On ia atenta reanima cardiopulmonal el, ma no ia susede revive el.
En la mense pasada, du turistes franses en sua desenio oto ia mori, como ance un sumerjor brites de 60 anios.
La resifes ia esperia des moris en esta anio: la duple de la promedia per la industria de turi maral.
La Asosia de Operores de Parces Maral ia dise ce la plu de la vitimes ia es vea e ia sufri ja de problemes medical.
Un portavose ia dise oji ce on considera ajusta la regulas pos la mori la plu resente. Per esemplo, on va obliga cisa ce visitores vea declara ce los aseta la riscas asosiada con sumerji e nada con airador.
La Parador Grande de Coral es un de la atraes la plu popular con turistes en Australia. Lo es situada longo la costa de Queensland e es composada de miles de resifes indvidua e sentos de isolas.
Plu ca du milion persones visita lo en cada anio, jenerante plu ca du mil milion dolares australian de revenu.
@T Un turiste rejistra se como migror par era
@L aora_oji/2016/un_turiste_rejistra_se_como_migror_par_era
====== Un turiste rejistra se como migror par era ======
9 agosto 2016
Un turiste xines ia spende cuasi du semanas en un otel deutx per migrores, pos demanda nonintendente per refuja cuando el ia vole mera reporta un fura.
La bolsonor de 31 anios, ci no parla deutx e no parla engles, ia reseta un esamina medical, e on ia arcivi sua trasas de dito.
Plu tarda, un laboror de la Crus Roja ia trova ce la portamone de la om ia es furada en Stuttgart. Ma en loca de vade a la polisia, la om ia rejistra se como migror.
Un parlor de putong ia solve la rompetesta. Un traduor ia es trovada a un restorante xines prosima a la otel casinte la turiste, en Dülmen, prosima a la site Dortmund en la ueste de Deutxland.
La turiste ia ariva a la otel en la temprana de julio, en un bus con migrores, de Dortmund.
Christoph Schlütermann, un laboror per la Crus Roja, ia descrive el como "tan diferente de la otras -- multe noncapas de ata sin aida".
Un ap traduinte ia confirma sua suspeta ce la turiste ia deveni maraniada en la sistem de refuja par era. "Lo ia emete frases como «me vole vade en viaja estra pais»," el ia dise.
La turiste, de Xina norde, ia intende visita Italia e Frans. El ia permete calma ce la autoriosas prende a via sua pasaporto e visa, e rejistra sua ditos.
On ia dona a el un esamina medical e la documentos normal cual migrores reseta pos ariva en Deutxland. El ia come a la otel de migrores e ia reseta alga mone per spende.
Schlütermann ia clari ce empleadas de la otel ia telefoni futil a consulerias diversa, esperante identifia la turiste. Un era sur la visa de la om ia causa un plu retarda.
Final, on ia cansela sua solisita de refuja, e el ia pote continua sua turi european.
Seguente la difusor Westdeutscher Rundfunk, la om no ia parti coler, ma con mera la comenta ce el ia imajina ce Europa es intera diferente.
@T Un video arenga Putin sur un salva tro tarde de nevon
@L aora_oji/2016/un_video_arenga_putin_sur_un_salva_tro_tarde_de_nevon
====== Un video arenga Putin sur un salva tro tarde de nevon ======
9 janero 2016
Un survivor de un venton de neva ia envia un mesaje video coler a Vladimir Putin, la presidente rusce, pos cuando sirca 80 persones ia spende 15 oras en espeta salvores en la area Orenburg de Rusia.
Un motoriste ia mori jelada e multe otras ia sufri ulseras jelal cuando sua veculos ia deveni trapida sur un via major en la sude de la Montes Ural.
Pavel Gusev ia dise ce Rusia envia aida a los estra la pais ma "nos no pote salva nosa propre popla".
Cuais un dui de milion persones ia regarda se video a YouTube.
La mesaje dise: "Me apela a tu, Vladimir Vladimirovitx -- me demanda ce tu maneja tota de esta, aida los ci ia sufri ulseras jelal sever... e ordina nosa ministreria de servis de crise."
Como diseda par Gusev, a alga telefonis per aida, la empleadas de la servi de salva ia responde: "Vos ia debe resta a casa. Vos ia ata mal en vade a estra."
Avocatos prosedente en la Comite Investigal de la pais esamina aora la responde crisal a la note de 3 janero, cuando autos ia deveni perdeda su neva sur la via de Orenburg a Orsk. Survivores dise ce la nevon ia es tan forte ce on ia pote vide cuasi no cosa.
On reporta ce un polisior, ci, en la ativia de salva, ia dona sua jacon de laboror a un fem jelante e sua gantos a un om, va reseta un medalia de la ministeria per internas rejional.
La aida par Dabil Mascudov es regardada como un ata eroin. El mesma es aora ance en ospital, con ulseras sever a sua ditos.
Patriarca Cirill, la xef de la Eglesa Ortodox Rusce, ia dise ce adorores debe prea ce otra persones condui tan nobil como acel polisior.
@T Un video de Boko Haram mostra la xicas saisida de Chibok
@L aora_oji/2016/un_video_de_boko_haram_mostra_la_xicas_saisida_de_chibok
====== Un video de Boko Haram mostra la xicas saisida de Chibok ======
14 april 2016
Un video publicida par la grupo islamiste Boko Haram en Nijeria pare mostra alga de la xicas ci ia es saisida a du anios ante aora de la vila Chibok.
La video, parente filmada en desembre, ia es enviada a la governa nijerian. Lo mostra des-sinco xicas en robas negra ci identifia se como aprendores saisida de la scola.
Estas es la imajes prima de la xicas cual on vide de pos maio 2014, e alga de la filmadas ia es identifiada par sua jenitores.
La saisi de la 276 xicas ia provoca un campania global en redes sosial. Ma an pos acel, la plu de la xicas manca ancora.
Entretempo, sentos de jenitores va marxa en Abuja, la capital nijerian, per esije ce la governa fa plu per trova sua fias. Los culpa e la governa presedente cual no ia reata cuando la saisi ia aveni, e la governa presente sur cual los cexa ce lo no dedica recursos sufisinte a la xerca.
Militaristes de Boko Haram ia ataca la scola abitada governal en la stato Borno a 14 april 2014, saisinte la xicas ci ia vade ala per fa sua esaminas.
Corta a pos, los ia publici un video de los, e ia esije un intercambia de prisonidas.
La xef de Boko Haram, Abubakar Shekau, ia dise ce la xicas ia converti a Islam. El ia menasa obliga los a sposi sua soldatos o vende los como sclavos.
Con la pasa de la menses, sirca 57 studiantes ia susede evade, ma a la min 219 es ancora mancante.
La video nova, parente filmada a la dia de natal en 2015, mostra la xicas preante a la governa nijerian per coopera con la militaristes sur sua libria. Los dise ce los es bon tratada, ma ce los desira es con sua familias.
Du madres, Rifkatu Ayuba e Mary Ishaya, ia dise ce los reconose sua fias en la video, e un madre tre, Yana Galang, ia identifia sinco de la xicas mancante.
Amnestia Internasional dise ce Boko Haram ia saisi sirca du mil enfantes de pos 2014. Multe es usada como sclavos sesal, soldatos, e an bombas umana.
An si la miltaristes continua ataca, la armada nijerian ia fa alga progresas en batalia los en la anio pasada. Lo ia recaturas vilas e viletas controlada par Boko Haram, e ia libri ance sentos de femes e enfantes prisonida.
@T Un vinse xocante per Donald Trump
@L aora_oji/2016/un_vinse_xocante_per_donald_trump
====== Un vinse xocante per Donald Trump ======
9 novembre 2016
Donald Trump va deveni la presidente 45 de la SUA pos un vinse nonprevideda contra sua oposor democrata Hillary Clinton.
La vinse de la aspiror republiciste ia es realida par un cuantia peti de statos pivotin, an pos menses de sondas cual ia favore Clinton.
La statos Florida, Ohio, e Carolina Norde ia abri la via per sua vinse surprendente.
Indises asionerial ia cade multe: la Dow Jones ia comensa la dia con un redui de 800 puntos.
La vinse projetada par Trump en la stato Wisconsin ia dona a el plu ca la 270 puntos de vota nesesada per gania la Casa Blanca.
La presidente futur, ci ave 70 anios, ia asende la stadio a sua asembla de vinse en New York, disente: "Me veni de reseta un telefoni de secretor Clinton. El ia loda nos sur nosa vinse. Esta es la ora cuando nos debe asembla como un popla unida."
La maniate de imobila, stela pasada de televisa de realia, e politiciste nova -- ci ia es vasta burlada cuando el ia declara sua intende de compete en junio de la anio pasada -- ia comenta ce sua vinse ia es "difisil".
Clinton, ci ave 69 anios e ia sonia deveni la presidente fema prima de la SUA, no ia apare a la aveni cual on ia prepara como un asembla de vinse en Manhattan.
La democratas ia fali ance prende la controla de la Salon alta de la republicistes, ci ia reteni sua majoria en ambos salones de la Congresa.
A mera oras pos la clui de voterias, Clinton ia sufri ance defetas grande en statos como Pennsylvania e Iowa, do no republiciste ia vinse pos 2004.
En la statos Nova Hampshire e Michigan -- cual ia formi un parte de la "parafoco" de Clinton -- la resulta es ancora tro difisil per predise.
Trump, un bilionor popliste, ia provoca controversia en sua campania par causa de sua comentas sur femes, muslimes, e un projeta de construi un muron longo la frontera entre la SUA e Mexico.
La campania de Clinton ia es impedida par investigas par la FBI sur esce el ia maltrata informas secreta de governa per opera un servador privata de eposta en sua tempo como ministro de internas.
Trump e Clinton ia compete per segue Barack Obama, un presidente democrata. Pos du periodos de cuatro anios en la Casa Blanca, el ia es proibida par la constitui de la SUA de ofre se per reeleje.
@T Un vota difisil ganiable en Osteraic
@L aora_oji/2016/un_vota_difisil_ganiable_en_osteraic
====== Un vota difisil ganiable en Osteraic ======
4 desembre 2016
En Osteraic, on vota en un refa de la eleje presidental cual pone Norbert Hofer, la xef de la Partito de Libria estrema destriste contra Alexander Van der Bellen, xef pasada de la Partito Verde.
La vota en maio ia es difisil ganiada par Van der Bellen, ma la corte suprema de Osteraic ia cansela la resulta par causa de noncoeres en la conta.
Si Hofer gania, el va deveni la xef de stato estrema destriste prima de la Uni European.
Sondas en novembre no ia es capas de predise la resulta.
An si la rol es apena plu ca ritual, la vota es oservada como un barometre per aspirores popliste en elejes veninte.
En 2017, Frans, Nederland, e Deutxland va fa elejes en cual partitos deveni plu popular ci oposa la corente dominante e la migras.
On atende ance la dirije cual Osteraic va segue en relata con la UE.
Hofer ia campania sur un plataforma antimigra, e ia dise inisial ce Osteraic ta pote fa sua propre referendo per segue la vota par cual Britan ia deside sorti de la UE.
Van der Bellen ia dise ce esta indica ce Hofer favore sorti de la UE. Ma a un consenta de partito a venerdi, Hofer ia dise ce Osteraic deveni danada par oposores ci acusa el de favore esta.
En april, Hofer ia gania la ronda prima de elejes presidental par elimina aspirores sentriste de partitos cual ia domina Osteraic de pos la Gera Mundal Du.
Van der Bellen ia gania la ronda du, ma par sola 31 000 votas. La Partito de Libria ia defia la resulta, cual on ia dejeta par causa de noncoeres trovada.
La campania de eleje ia es longa e amarga, con ce ambos omes intercambia insultas e posteres de ambos es vandalida.
En la debate final televisada a jovedi, Hofer ia nomi Van der Bellen un mentor a 24 veses, e ia reseta la mesma insulta a tre veses.
La vota en Osteraic coaveni con un referendo atendeda en Italia, do Matteo Renzi, la ministro xef sentriste-sinistriste aposta sua futur political a un paco de reformis political cual es oposada par la Promove Sinco Stelas popliste de Beppe Grillo.
@T Un xef de Xina visita Hongkong
@L aora_oji/2016/un_xef_de_xina_visita_hongkong
====== Un xef de Xina visita Hongkong ======
17 maio 2016
En Hongkong, un securia forte es ativa per la visita de un ofisior major de Beijing.
Zhang Dejiang, la om encargada con cosas de Hongkong en Beijing, va ariva entre consernas sur la libria de la teritorio e sur interferes par Xina.
On ia posa plu ca 6000 polisiores, ia proibi avionetas, e ia erije paradores alta en areas sentral.
Grupos prodemocrata dise ce los va fa protestas en la visita, an tal.
Zhang, ci es ance la presidente de la Comite Permanente de la Congresa Poplal Nasional e donce la xef tre de Xina, va parla a un confere economial en sua visita de tre dias, ma va encontra ance un grupo de legores prodemocrata.
Mera a oras ante sua atera, ativistes ia desplia un bandera sur la colina Beacon Hill en Hongkong. Lo ia ave la testo: "Me desira la direto vera universal de vota." On ia sutrae la bandera a pos.
Zhang es la ofisior xines la plu major ci ia visita Hongkong de pos 2014, cuando miles de protestores ia ocupa partes grande de la site per esije un vota completa libre.
A pos, alga grupos localiste ia apare e ia mostra ce los es preparada per usa violentia per combate lo cual los vide como un dilui de la identia de la site, temente un influe cresente sosial e political de Xina continental.
En febrero, sentos de protestores, nurida par tal sentis localiste, ia escava e lansa brices en un scaramuxa violente con la polisia ci ia atenta clui un mercato noturna de comedas. La protestores ia regarda la mercato como un simbol de tradisiones local.
Plu temprana en esta mense, reportas ia dise ce on ia usa cola per reforti petras de pave sirca la legeria afin on no pote usa los como misiles.
E ier, un om de Hongkong ia es arestada en Shenzhen, pico a la otra lado de la frontera, per atenta compra un avioneta sur cual on ia alega ce el intende usa lo per disturba la visita.
La intensia de securia sirca la visita de Zhang es un indica de la nivel de ansia de la autoriosas. Ma ativistes prodemocrata es iritada ce on ia refusa ce los prosimi a la visitor, e ia promete defia la restrinje.
Hongkong ave librias cual on no trova en Xina continental. Estas ia es un parte de esensal de la acorda fada cuando Britan ia redona Hongkong a Xina en 1997.
Ma un ansia ce tal librias pote deveni debilida ia es asentuada par la desapare de sinco vendores de libros de Hongkong, conoseda per publici libros controversa sur xefes xines.
On ia descovre ce autoriosas de Xina continental ia deteni la omes en lo cual la departe de esternas de la Rena Unida ia descrive como "un nonsegue major" de protocol.
@T Un zebra japanes mori en un lago de golf
@L aora_oji/2016/un_zebra_japanes_mori_en_un_lago_de_golf
====== Un zebra japanes mori en un lago de golf ======
24 marto 2016
En Japan, un zebra ci ia evade un club de cavalores ia mori en un lago a un campo de golf, pos cuando on ia calmi el.
Polisiores e dotores veterinar ia spende oras en xasa la animal sirca la golferia prosima a la site Toki en Gifu, un prefetia en la sentro de la pais.
On ia xuta un dardo calminte a el, e el ia core a en la lago pos un tempo corta.
El ia mori an si on ia susede estrae el de la lago en poca minutos. Probable el ia afoca e sua cor ia sesa bateta.
La zebra mas de du anios ia es poseseda par un zo viajante, ma ia es tempora casida a la staleria de un club de cavalores.
A la sera de martedi, manejores ia es movente la zebra a interna per la note cuando el ia deveni ajitada, ia crase un serca su pede, e ia evade, fujinte en dirije a un monte prosima.
Ja temprana en la matina de ier, la polisia ia reseta reportas ce un zebra core longo un strada. Los ia locali rapida el a la Campo de Golf Internasional en Toki, do dotores e polisiores ia atenta catura el.
El ia sumerji en un lago a tempo no longa pos reseta la dardo calminte.
La raconta nonusual ia deveni rapida un punto de discute entre interedores japanes ier, ci ia espresa sua xoca e tristia. La parola shimauma, cual sinifia "zebra" en japanes, ia deveni modosa en Twitter.
Multe persones ia retuita un foto par un fem joven ci ia vide la animal galopante longo un via en la note de martedi, e ia indica sua surprende a trova "un zebra en la foresta".
@T Usain Bolt gania un truple de duples
@L aora_oji/2016/usain_bolt_gania_un_truple_de_duples
====== Usain Bolt gania un truple de duples ======
19 agosto 2016
A la Olimpiales de Rio, Usain Bolt ia gana sua medalia du de oro par vinse en la corsa mas de 200 metres.
El ia vinse en esta corsa ance en la Olimpiales de 2008 and 2012. Plu, el ia vinse ja en la 100 metres de Rio, repetente sua susedes de 2008 e 2012, anios cuando el ia gania la oro ance en la corsa de 4 × 100 metres.
El espera oji vinse en la 4 × 100 de Rio, tal ganiante un truple de truples sin presedente.
La atleta jamaican ia core tra 200 metres en 19,78 secondos, fininte ante Andre De Grasse de Canada e Christophe Lemaitre de Frans.
Adam Gemili de la Rena Unida ia core en la mesma tempo como Lemaitre, seguente la cronometre, ma la foto de fini ia preveni el de gania sua medalia olimpial prima.
Bolt, ci ave 29 anios, ia gania tota oto de la finales olimpiales en cual el ia partisipa. En febrero, el ia anunsia sua intende de retira se de compete pos la Torneos Mundal de Atletisme Lejera en 2017.
Sola Carl Lewis, sprintor e saltor de longia de la SUA, e Paavo Nurmi, coror de distantia longa de Suomi, ia gania plu medalias oro per atletisme lejera a la Juas Olimpial. Lewis ia gania nove entre 1984 e 1996, e Nurmi ia gania la mesma cuantia entre 1920 e 1928.
Bolt ia crede ce, en la Stadio Olimpial de Rio, el pote rompe sua recordo mundal de 19,19 secondos.
Ma cuando la jamaican ia traversa la linia a plu ca du desis de secondo ante De Grasse, el ia opina ce el ia core en tempo lenta -- a la min par sua normas -- e el reata con jestis coler. Ma pos un momento, el ia surie larga e ia selebra en sua posa famosa de raio de lampo con miles de fanes cantante sua nom.
@T Venezuela cambia biletas a monetas
@L aora_oji/2016/venezuela_cambia_biletas_a_monetas
====== Venezuela cambia biletas a monetas ======
12 desembre 2016
La governa venezuelan ia anunsia ce lo va sustitui monetas per la biletas la plu valuosa de la pais en min ca 72 oras.
Lo espera ce, par sutrae la biletas de 100 bolivares, lo va aida preveni la contrabanda e maneja mancas de comedas e otra cosas.
Presidente Nicolás Maduro dise ce ganges operante en rejiones de frontera no va ave un tempo sufisinte per redona la biletas.
Sua oposores ia rejeta la idea como mera la plu resente de la atentas desperante par Maduro per maneja la crise economial.
Henrique Capriles, xef de oposa, ia tuita: "Cuando la noncapasia governa! Ci ta pote imajina fa un tal cosa en desembre entre tota nosa problemes?"
Otras ia razona ce lo es nonposible ce on va intercambia tota la biletas esistente de 100 bolivares en la tempo asiniada.
La bileta de 100 ia perde la plu de sua valua en la anios resente e es aora egal a sirca 2 sentimes SUA.
Venezuela, cual esperia un crise grave de economia e politica, ave un de la tasos de infla la plu alta de mundo.
Maduro ia dise televisada: "Me ia dona la comandas per clui tota posibles teral, maral, e airal afin acel biletas no pote es redonada e los estra la pais va resta con sua froda."
Plu temprana en esta mense, la banco sentral ia dise ce ses biletas nova, de 500 a 20 000 bolivares, va comensa sirculi a 15 desembre.
La governa ia publici la statistica de infla a la plu resente en desembre 2015, declarante lo a 180%, ma la Reserva Monal Internasional estima ce custas va alti par plu ca 2000% en la anio veninte.
En Barat en la mense pasada, un politica simil per elimina biletas de valua alta ia causa un disturba grande.
@T Venezuelanes compra comedas en Colombia
@L aora_oji/2016/venezuelanes_compra_comedas_en_colombia
====== Venezuelanes compra comedas en Colombia ======
11 julio 2016
Miles de persones ia traversa a Colombia pos cuando Venezuela ia abri sua frontera comun per permete ce sua popla compra comedas e medisin.
La frontera ia es cluida par Venezuela en agosto de la anio pasada, como un medio contra crimin. Lo ia resta abrida per 12 oras.
Venezuela esperia aora un crise profonda de economia, e multe persones dise ce nuri sua familias ia deveni difisil.
En la semana pasada, sirca 500 femes venezuelan ia forsa se tra la frontera per xerca comedas.
Nicolás Maduro, la presidente de Venezuela, ia comanda ce on clui la frontera car, diseda par el, la rejion ia es infiltrada par paramilitares e ganges colombian.
La medio preveni ance la contrabanda de benes finansial suportada a Colombia de Venezuela.
Sirca 35 mil persones ia traversa ier la frontera entre San Antonio del Táchira en Venezuela e Cúcuta en Colombia, pos pone sua en filo en la oras temprana de la dia.
Multe ia porta camisetas blanca como un simbol de pas, negante ce esta es liada con la oposa political.
Un fem anonim ci ia traversa con sua sposo e du enfantes joven ia dise ce lo es "nonjusta" ce la frontera es normal cluida. "Nos es de San Antonio, e la realia es ce nos ave no comedas per dona a nosa enfantes."
@T Violentia a un asembla en Jakarta
@L aora_oji/2016/violentia_a_un_asembla_en_jakarta
====== Violentia a un asembla en Jakarta ======
5 novembre 2016
Joko Widodo, la presidente de Indonesia, ia cansela sua visita a Australia pos scaramuxas violente a un asembla en Jakarta en cual miles de muslimes noncomprometente ia partisipa.
Widodo ia culpa "atores political" de esplota la situa en cuando protestores ia protesta contra la governor de Jakarta.
La protestores acusa Basuki Tjahaja Purnama, un cristian, de insulta la Curan, la libro santa de islam.
La violentia ia mata un person e ia feri 12.
"Nos deplora la aveni," Widodo ia dise en cuando el ia demanda per calmia a la stradas de la capital de la pais.
En un declara oji, Malcolm Turnbull, la ministro xef de Australia, ia confirma ce la presidente indonesian ia pospone sua visita.
La polisia indonesian ia usa gas lacrimojen e canones de acua per vinse protestores ci ia refusa parti pos la preas de venerdi, en cuando los ia asembla sirca la palasio presidental.
La polisia ia es ja preparada per la posible ce tensas relijial o razal va eruta a la asembla, a cual on estima ce sirca 50 mil persones ia es presente.
La aveni ia es xef pasosa, ma grupos de protestores coler ia combate la polisia pos la noti, ensendente veculos.
Grupos muslim ia acusa Purnama de insulta islam cuando el ia dise ce sua oposores ia usa un strofe de la Curan per engana votores. La strofe implica ce muslimes debe no eleje nonmuslimes como sua xefes.
On ia aveni la protesta per esije la prosede legal de Purnama per blasfema. El ia demanda per pardona, ma cexas formal ia provoca un investiga par la polisia.
@T Votores colombian rejeta la acorda de pas
@L aora_oji/2016/votores_colombian_rejeta_la_acorda_de_pas
====== Votores colombian rejeta la acorda de pas ======
3 otobre 2016
En Colombia, votores ia rejeta un acorda monumental de pas con rebelores FARC en la resulta surprendente de un referendo. 50,24% ia vota a contra.
La acorda ia es suscriveda en la semana pasada par Juan Manuel Santos, la presidente, e Timoleón Jiménez, la xef de FARC, pos cuasi cuatro anios de negosias. Ma la popla ia nesesa validi lo ante cuando lo ia pote deveni legal.
Parlante a la nasion, Santos ia dise ce el aseta la resulta ma va continua labora per ateni la pas.
El ia dise ce la sesaspara corente resta, e ce el ia comanda negosiores a viaja a Cuba per consulta xefes de FARC sur la paso seguente.
"Me no va sede," el ia dise. "Me va continua la xerca per pas asta la momento final de mea autoria, car esta es la modo de lasa un pais plu bon a nos enfantes."
Entretempo, la xef FARC, conoseda como Timochenco, ia dise ce la grupo resta dedicada a reali un fini de la gera. El ia critica ance la campania de no.
"La FARC regrete profonda ce la potia destruosa de los ci semi odia e venja ia influe la opina de la popla colombian," el ia dise.
A ante, la rebelores ia acorda abandona sua armas pos 52 anios de gera per junta se a la prosede political. Ma oposores crede ce la acorda trata tro pardonosa la FARC, ci la SUA regarda ancora como un grupo teroriste.
La acorda ia ta permete ce la xefes de la rebelores evita un condena de prison si los ta confesa sua crimines. On ia promete ance des sejas en congresa a la rebelores per la du elejes seguente.
La difere de cuantia entre la votores ci ia favore la acorda e los ci ia rejeta lo ia es min ca 63 mil entre 13 milion votas.
La prosede de pas es aora nubida par nonsertia.
Alvaro Uribe, la presidente pasada ci ia dirije la campania no, ia comenta ce tota colombianes desira la pas, ma ce la acorda nesesa "coretis". "Nos vole contribui a un acorda nasional e deveni oiada," el ia dise.
En la pasada, Santos ia averti ce on ave no scema alternativa per fini la gera cual ia mata 260 mil persones e ia desloca sirca oto milion.
@T 2016
@L aora_oji/2016/xef
====== 2016 ======
En 2016, como en la anio presedente, Aora oji ia publici un article a cuasi cada dia.
La parola "sua" (en loca de "se") ia apare a la ves prima en la article de 23 otobre. An tal, on ia revisa aora tota articles de ante acel data per usa "sua" en la modo moderna.
Reportas plu vea ...
@T Xefes olimpial deside esce Rusia pote compete
@L aora_oji/2016/xefes_olimpial_deside_esce_rusia_pote_compete
====== Xefes olimpial deside esce Rusia pote compete ======
19 julio 2016
La Ajenteria Mundal Antidrogi (AMA) ia dise ce on debe esclui Rusia de la juas olimpial e paralimpial de esta estate, car on ia descovre indicas de un program de cuatro anios de drogi governal sponsorida.
Un reporta comandada par AMA ia trova ce samples de competores rusce ia es manipulada tra "la majoria vasta" de sportes olimpial de estate e inverno de la tarda de 2011 asta agosto 2015.
La Comite Internasional Olimpial (CIO) va deside oji esce lo va esclui Rusia de la olimpiales a Rio, cual va comensa a 5 agosto.
Thomas Bach, la presidente de la CIO, ia promete "la punis la plu sever disponable" e ia dise ce la trovas es "un ataca xocante e sin presedente contra la unia de sporte e contra la juas olimpial".
La reporta par Richard McLaren, un dotor canadian, ia trova ce 580 probas positiva ia es ascondeda en 30 sportes diversa, incluinte en la prepara per la olimpiales en London en 2012 e a la olimpiales de inverno de 2014 en Sotxi en Rusia.
McLaren ia comenta ce el "ia toca mera la surfas" en sua investiga de 57 dias. AMA vole ce el completi sua taxe par identifia atletas ci ia es beneficada par la program.
La sportores rusce de atletisme lejera es ja proibida de compete en Rio, pos cuando la Asosia Internasional de Federas de Atletisme ia vota en junio per manteni un proibi global de compete par la Federa Rusce de Atletisme (FRA).
La FRA espera reversa acel deside e va trova a no plu tarda ca jovedi esce sua apela a la Corte de Arbitra per Sporte ia susede.
Presidente Vladimir Putin ia dise ce el va suspende ofisiores nomida en la reporta de McLaren, e Yuri Nagornykh, la ministro de sporte, es ja la prima.
Seguente la reporta, el ia conose "cada trova analisal positiva" e ia deside cual atletas on va proteje.
Putin ia dise ce Grigory Rodchenkov, la xef pasada de la laboreria antidrogi nasional de Rusia, de ci sua alegas denunsiante ia provoca la investiga, es "un person de reputa scandalosa".
La Cremlin ia demanda ce AMA furni "informas plu completa, empirical, fundida sur atesta" a investigores rusce.
@T Xicas de Chibok es reunida con sua familias
@L aora_oji/2016/xicas_de_chibok_es_reunida_con_sua_familias
====== Xicas de Chibok es reunida con sua familias ======
25 desembre 2016
Plu ca 20 xicas nijerian, librida en otobre par la grupo islamiste Boko Haram, ia es reunida con sua familias per natal.
Esta es la reveni prima a casa per la xicas pos cuando los ia es saisida de sua scola en Chibok en april 2014.
La femes joven ia es librida cuando Suiz e la Crus Roja Internasional ia fa un acorda con Boko Haram. A pos, la 21 xicas ia es tenida en un loca secreta par la governa nijerian.
Un de la xicas, Asabe Goni, ci ave 22 anios, ia dise ce lo es "un miracle" ce el es denova a casa.
Aidante sua madre en prepara per natal, el ia dise ce el es stimulada per vade a eglesa a la dia de natal. "Me ia sabe nunca ce me va reveni," el ia dise simple. "Me ia sede la espera de reveni a casa a cualce tempo."
De la 276 studiantes saisida, 197 manca ancora e negosias per sua libri continua.
Multe de la xicas ia es cristian, ma en sua tempo prisonida on ia coraji los a converti a islam e a sposi sua saisores.
Goni ia dise ce alga xicas ia es flajelida per refusa sposi, ma en otra modos los ia es bon tratada e nurida, a la min asta un manca resente de comedas.
Pos la acorda en otobre, la saisores ia anunsia ce cualce xica ci desira es librida debe sta en filo.
Goni ia es malada e tro fatigada per move en cuando la otras ia formi un filo, ma el ia aprende ce el va es entre la cuantia peti e fortunosa ci va parti.
An tal, sua joia ia es reduida cuando el ia es obligada a lasa sua cusin Margaret, con ci el ia abita de sua enfantia.
Ier, Muhammadu Buhari, la presidente de Nijeria ia dise ce la armada ia puxa la militaristes de Boko Haram de la campa en sua fortresa en la foresta Sambisa.
Tra alga semanas, la armada fa ja un ataca major en la foresta, cual ia es un conserveria jigante de animales savaje en la tempo colonial. On ia divina ce alga de la xicas de Chibok es tenida en la foresta, car un cuantia peti de los ci ia evade ia refere a lo.
Buhari ia dise ce on intensi la labora per trova la xicas restante.
@T Xicas labora 40% plu ca xicos
@L aora_oji/2016/xicas_labora_40_plu_ca_xicos
====== Xicas labora 40% plu ca xicos ======
7 otobre 2016
Diseda par un reporta nova de Unicef, la departe de la Nasiones Unida per enfantes, xicas pasa 40% plu tempo ca xicos en fa taxes nonpaiada de casa.
La difere soma a 160 milion plu oras per dia tra la mundo.
Du de tre xicas cosini e limpi en sua casa, e cuasi un dui colie acua o lenio de foco.
Los fa ance laboras "min vidable", como atende enfantes o persones vea.
La reporta ia trova ance ce la labora ajuntal aumenta con la pasa tempo. Entre sinco e nove anios, xicas spende promedia 30% plu tempo sur tal taxes, ma cuando los ave 14 anios, esta cuantia crese asta 50%.
Lo averti ance ce taxes como colie de acua e lenio pote esposa xicas a plu risca de violentia sesal.
En Somalia, xicas con entre 10 e 14 anios pasa 26 oras per semana en taxes de casa -- la plu de cualce pais. Burcina Faso e Iaman ave ance alga de la caniones la plu grande de labora entre xicos e xicas.
Anju Malhotra de Unicef ia dise: "Xicas sacrifia posibles importante de aprende, de crese, e an de joia sua enfantia. La esta distribui nonegal de labora entre enfantes permane la stereotipos de jenero e la carga duple a femes e xicas tra jeneras."
La reporta, cual inclui ance datos sur violentia, sposi de enfantes, mutila jenital fema, e instrui, es publicida en coaveni con la dia internasional NU de enfantes fema a 11 otobre.
@T Xicas librida de Chibok es reunida con sua familias
@L aora_oji/2016/xicas_librida_de_chibok_es_reunida_con_sua_familias
====== Xicas librida de Chibok es reunida con sua familias ======
17 otobre 2016
En Nijeria, dudes-un xicas saisida par la grupo islamiste Boko Haram en la vila Chibok ia deveni reunida con sua familias.
En un rituo emosiosa en la capital Abuja, un de la xicas ia dise ce los ia survive tra 40 dias sin comeda e ia evita apena mori a un ves, cisa plu.
Lo no es clar como on ia negosia la libris, ma un ofisior dise ce discutes continua per libri plu de la xicas. De la 276 studiantes saisida en april 2014, 197 manca ancora.
Un de la xicas librida ia dise en un rituo cristian en Abuja: "Me ia es en la bosce cuando la avion ia cade un bomba prosima a me, ma me no ia es ferida. Nos ia ave no comeda tra un mense e des dias, ma nos no ia mori. Nos grasia Dio," el ia ajunta, parlante en hausa, la lingua local.
Multe de la scolores saisida ia es cristian ma ia es obligada a converti a Islam en sua prisonia.
Un otra xica ia dise: "Nos ia imajina nunca ce nos va vide esta dia, ma, con aida de Dio, nos ia pote sorti de sclavia.
Relatadas emosiosa ia espeta per es reunida con la xicas, ci ia es librida a jovedi.
Autoriosas nijerian ia nega reportas ce on ia intercambia soldatos caturada de Boko Haram per la xicas. Ma un ofisior ia dise ce cuatro comandores ia es librida.
On reporta ance ce un rescata de miliones de dolares ia es paiada par la governa suiz per la governa nijerian.
La ministro de informa nijerian, Lai Mohammed, ia dise ce la libri a jovedi es "la paso prima" per la libri de tota la xicas restante.
Alga de la xicas ia susede evade a mera oras pos la saisi, xef par salta de camiones e par core a arboretas prosima.
Intera, 219 xicas ia es caturada e prendeda a via. Ma lo pare posible ce alga de la xicas ia mori. Plu, on reporta ce pos plu ca du anios en prisonia e pos deveni sposida a soldatos de Boko Haram, alga de la xicas no desira revade a sua familias.
@T Xina atera un avion militar sur un isola disputada
@L aora_oji/2016/xina_atera_un_avion_militar_sur_un_isola_disputada
====== Xina atera un avion militar sur un isola disputada ======
19 april 2016
Xina ia atera un avion militar sur un de sua isolas artifis en la Mar Xines Sude, un area disputada.
On crede ce esta es la ves prima cuando la militaria xines ia declara publica ce lo ia atera un avion sur la isola Resife de Fiery Cross ("Crus Focosa", nomida per un barcon cual ia deveni ruinada ala en 1860).
La avion ia sorti tre laborores ferida de la resife.
Xina e alga de sua visinas fa un disputa teritorial sur la Mar Xines Sude, cual Beijing reclama cuasi intera.
La avion militar ia atera a la matina de soldi per prende la tre laborores. Lo ia vola los a la Isola Hainan per tratas medical.
Xina ia atera aviones nonmilitar sur la resife en la pasada, provocante criticas de Vietnam, un pais cual reclama ance la teritorio, e de la SUA.
Beijing dise ce lo construi isolas e strutures artifis sur resifes per intendes sivil. Ma otra paises ia espresa sua ansia ce la complesos pote deveni usada en modos militar.
La SUA ia sujesta ce la construi de isolas par Xina aumenta la tensas en la rejion e preveni ce barcones naviga libre tra la area.
Xina, Taiuan, Vietnam, Pilipinas, Malaisia, e Brune reclama partes de esta mar.
Xina ia cambia la Resife de Fiery Cross a un isola artifis par un opera jigante de draga. Lo ia crea construidas e un atereria per aviones.
Paises oposante disputa ja teritorio en la Mar Xines Sude tra sentenios, ma la tensa ia crese constante en anios resente.
En febrero, Taiuan e la SUA ia dise ce Xina ia posa misiles de tera a aira sur un otra isola disputada. Xina ia responde par dise ce la SUA militari la mar par sua patrulias avional e marinal.
Ofisial, la SUA ave no opina sur la disputas. Lo descrive sua patrulias como operas de "libria de naviga" cual serti la posible de asede vias major de barcon e avion.
@T Zsa Zsa Gabor mori
@L aora_oji/2016/zsa_zsa_gabor_mori
====== Zsa Zsa Gabor mori ======
19 desembre 2016
La ator Zsa Zsa Gabor ia mori pos un ataca de cor a eda de 99.
A punto de larmas, sua sposo Frédéric von Anhalt ia informa jornalistes ce Gabor ia mori a sua casa, en ambiente de amis e familia. "Cadun ia es ala. El no ia mori solitar," el ia dise.
Naseda en Magiar, Gabor ia migra a la Statos Unida en la Gera Mundal Du e ia fa sua apare prima en filma de Hollywood en 1952. El ia sposi a nove veses.
El ia apare en plu ca 70 filmas, ma ia es plu famosa per sua modo de vive como fem de mundo.
El ia sposi a la ves prima a eda de 20 anios, e a la ves final (e la plu longa) cuando el ia ave cuasi 70 anios. En sua propre opina, el ia sposi a sola oto veses e un dui -- el no ia inclui plen un duxe espaniol en 1982.
El ia nase como Sari Gabor en Budapest a 6 febrero 1917, e ia reseta direta la nometa Zsa Zsa de sua familia.
An si el ia desira prima deveni un dotor veterinar, sua madre ia ave otra projetas, e sua belia ia atrae la mundo de spetaculo.
Gabor ia gania la titulo Senioreta Magiar en 1936, ma on ia descuali el a pos, car el ia menti sur sua eda per entra a la concurso.
Sua atribuis inclui un lista longa de roles en filmas susedosa como Moulin Rouge (1952), Lili (1953), e Rea de Venus (1958). Plu resente, el ia apare en la serie Un malsonia en Elm Street e en la parodias Fusil nuda.
A sua apico, Gabor ia representa la ideal blanca blonde de Hollywood, e ia es conoseda per porta robas formal de lame.
Sua sola enfante ia es Constance Francesca Hilton, sua fia en 1947 con Conrad Hilton, un maniate de oteles.
Sua madre ia dise a el: "Tu no nesesa sposi cada om con ci tu fa la ama." Gabor ia dise ce el ia fa esta car el ia "para nunca es un catolica de cor".
En sua autobiografia de 1993, Un vive no sufisi, el ia scrive ce el ia perde sua virjina a Kemal Atatürk, la fundor de Turcia moderna, cuando el ia ave 15 anios.
La raconta esposante ia refere ance a relatas romantica con Sean Connery e Frank Sinatra, estra sua lista de sposos. El ia reclama ce el ia refusa John F Kennedy e Elvis Presley.
An si el ia pasa sua vive en parla replicas scriveda par otras, Gabor ia es mesma capas de crea dises memorable. Referente a sua bon relatas con sua sposos pasada, el ia dise: "Me ia odia nunca un om a tal grado ce me ta redona sua diamantes."
Gabor ia sufri de mal sania en sua anios tarda, e ia debe usa un seja rolante pos un asidente de auto en 2002 en Los Angeles.
El ia survive atacas serebral en 2005 e 2007 e ia depende forte de sua sposo a pos. En 2011, el ia sufri un infeta cual ia menasa sua vive, e on ia amputa sua gama destra supra la jeno per salva el.
El ia es cisa un de la femes prima "famosa par es famosa" -- un cualia comun atribuida a Paris Hilton, sua duneta par sposi.
On ia burleta Gabor per sua pronunsia forte magiar en cual el ia nomi cadun darlink ("cara"). El ia clari: "Me nomi cadun darlink car me no pote recorda sua nomes."
@T Aora pausada
@L aora_oji/2017/aora_pausada
@D 2017
====== Aora pausada ======
24 janero 2017
Aora oji pausa per un tempo, ma va recomensa.
@T Arestas en relata con un fura de diamantes en 2005
@L aora_oji/2017/arestas_en_relata_con_un_fura_de_diamantes_en_2005
====== Arestas en relata con un fura de diamantes en 2005 ======
22 janero 2017
Sinco omes e du femes ia deveni arestada, suspetada de envolves en un fura de diamantes con valua de €75 milion a la airaporto de Sciphol en Amsterdam en 2005.
La sete sitadanes nederlandes ia es arestada en Amsterdam, e en Valencia en Espania.
La gang armada, desemblada como laborores de airaporto, ia fura la diamantes cuando estas ia es a punto de es cargada a un avion.
On ia retrova alga de la diamantes en un auto de fuji, ma un cuantia manca ancora con valua estimada de €40 milion.
Esta ia es un de la furas de joalas la plu grande de mundo.
La diamantes e otra joalas ia es saisida en un area de securia alta pos cuando la furores ia entra par forsa a un auto blindada de de la airocompania KLM.
La sete ia es detenida par polisiores atacante a venerdi e saturdi, con suspeta de ruba e lava de mone.
Cuando la fura ia aveni, la jemes ia es a punto de vola a Antwerpen, la sentro european de diamantes.
@T Avias menasa aviones a la airoporto de Beirut
@L aora_oji/2017/avias_menasa_aviones_a_la_airoporto_de_beirut
====== Avias menasa aviones a la airoporto de Beirut ======
12 janero 2017
Aviones a la airoporto de Beirut risca peril car avias ia comensa manadi a un dejeteria prosima.
Youssef Fenianos, la ministro de transporta de Lubnan, ia dise ce la pais fronti "un crise" car la avias continua ariva a la loca.
A martedi, un avion de Middle East Airlines ia encontra un manada grande de avias en desende a la atereria uesete de la airoporto.
Ativistes urje ce on clui la dejeteria per preveni la risca de un asidente.
La dejeteria Costa Brava ia es creada en marto 2016. Lo es un parte de un solve tempora de la problem de dejetadas en la cite, do 20 tones ia cumula sur la stradas en la menses la plu calda de la anio.
Ma car on ancora no ia construi la compleso projetada a la dejeteria, la monton de dejetadas ia ateni un altia de nove metres.
Ambientistes averti ja tra alga menses ce la dejeteria atrae rodentes e un cuantia cresente de avias. En agosto, la uni lubnani de pilotes ia averti sur la posible ce avias va es sucada a motores de aviones.
An tal, lo pare ce Fenianos no ia urje ce la ministro xef Saad Hariri reata asta aora.
"Oji nos fronti un crise," Fenianos ia dise en un declara. "Nos reconose ce un peril es presentada a la move de aviones sivil par la avias. Grasias a Dio, asta aora, la volas ia encontra no peril real."
Fenianos ia dise ce el espera ce un cuantia aumentada de aparatos emetente sonas de avias xasante a locas diversa tra la airoporto va aida solve la problem.
La idea ia es burlada par la promove ativiste "Vos Apesta", inisiada per protesta contra la nonreata par la governa a la apico de la crise de dejetadas.
"La solve no es asusta la avias a via," la promove ia dise, recomendante ce on clui la dejeteria en loca.
@T Haradinaj arestada sur crimines de gera
@L aora_oji/2017/haradinaj_arestada_sur_crimines_de_gera
====== Haradinaj arestada sur crimines de gera ======
5 janero 2017
La polisia franses ia aresta un ministro xef pasada de Cosovo par un comanda serbsce sur alegas de crimines de gera.
Ramush Haradinaj ia servi como un comandor de rebelores en la gera de Cosovo 1998--99, cual ia gida ultima a autonomia per la pais.
El ia es acusada sur crimines de gera a du veses a la Nasiones Unida, ma ia es desculpada a ambos veses.
La ministro de esternas de Cosovo ia dise ce sua aresta es nonasetable e ce lo labora per reali sua libri.
Haradinaj, aora un xef oposante en Cosovo, ia es arestada par la polisia a la airoporto Basel Mulhouse Freiburg en Frans este.
El ia es detenida par la polisia slovensce per tempo corta en 2015 ma ia es rapida librida.
Serbia alega ce el ia supravide un campania de tortura e omiside contra la etnico serbsce cuando el ia es un comandor en la Armada de Libri de Cosovo. El ia nega sempre la alegas, ma ia resinia como ministro xef pos sola 100 dias per fronti los.
A sua prosede la plu resente, en 2012, la judor ia dise ce on ave no atesta per suporta la alegas.
Cosovo ia declara sua autonomia de Serbia en 2008, ma esta no es reconoseda par Serbia.
@T La auto la plu vendeda en Sveria no es un Volvo
@L aora_oji/2017/la_auto_la_plu_vendeda_en_sveria_no_es_un_volvo
====== La auto la plu vendeda en Sveria no es un Volvo ======
3 janero 2017
La auto la plu vendeda en Sveria en 2016 no ia es un Volvo. Esta aveni a la ves prima en plu ca un dui de sentenio.
En loca, la Volkswagen Golf ia es la numero un en la lista de vendes, diseda par la asosia nasional de fabricores de autos.
5,9% de autos nova comprada en la pais ia es de spesie Golf. Volvo ia ave sola 5,7% de la vendes, con tre spesies de auto.
La ves presedente cuando Volvo no ia es a la apico svensce ia es 1962, cuando la Volkswagen Tipo 1 "Scarabe" ia es la plu bon vendeda.
An si la emprende de autos Volvo es aora poseseda par un compania xines, on regarda ancora lo como un marca iconin svensce. E lo teni ancora la parte la plu grande de la mercato intera de autos en la pais, con 21,5% de la autos en Sveria. Volkswagen ave sola 15,7%.
La asosia ia dise ce la cuantia de vendes de auto en 2016 ia es recordo, altida par 8% de la cuantia en 2015 con aida de un economia forte.
@T La condena de Chelsea Manning es mutada
@L aora_oji/2017/la_condena_de_chelsea_manning_es_mutada
====== La condena de Chelsea Manning es mutada ======
19 janero 2017
En sua confere jornaliste final, presidente Barack Obama de la SUA ia defende sua deside de libri Chelsea Manning, un fonte de WikiLeaks, a 29 anios ante sua libri projetada.
Manning ia es condenada a 35 anios en prison per esposa mesajes diplomata, en un de la revelas la plu grande de materia secreta en la istoria de la SUA.
Republicistes ia ataca la muta de la condena como un mal mesaje e un presedente perilosa.
La soldato transjenero de 29 anios, naseda como Bradley Manning, ia esposa documentos a WikiLeaks en 2010. El va es librida a 17 maio, an si sua libria ia es projetada per 2045.
La presidente ia dise ce Manning ia esperia ja un condena sever de prison.
La muta, anunsiada a martedi, redui la condena ma no es la pardona cual alga campaniores ia desira.
Josh Earnest, secretor jornaliste de la Casa Blanca, ia responde a criticas republiciste, sujestante ce la partito reata ipocrita, car Donald Trump, sua presidente elejeda, ia loda WikiLeaks.
La plu de persones condenada de esposa secretas ia es prisonida per entre un e tre anios. La governa de Obama ia persegue plu persones per esposa secretas governal ca ia es acusada en tota presidentias presedente.
Manning ia atenta mata se a du veses en la anio pasada a la prison militar mas do on teni el a Fort Leavenworth en la stato Kansas. El ia protesta ance par juna, pos cual la militar ia acorda furni cura de cambia jenero a el.
En un de sua atas final como presidente, Obama ia muta la condenas de 209 individuas e ia pardona 64 otras.
Oposores dise ce la deside par Manning de esposa un colie enorme de documentos a WikiLeaks -- incluinte 250 mil mesajes diplomata e plu ca 450 mil reportas de la geras en Irac e Afganistan -- ia perili soldatos, ajentes de securia, diplomatas, e stranjeres ci ia aida los en locas violente.
Los dise ce la enlini de la materia ia esposa la documentos a tota, incluinte al-Qa'ida.
Manning ia dise ce el ia crede ce la materia va provoca un debate en la SUA.
@T La mori de la padre de piniin
@L aora_oji/2017/la_mori_de_la_padre_de_piniin
====== La mori de la padre de piniin ======
15 janero 2017
Zhou Youguang, la linguiste ci ia crea la sistem piniin per scrive xines en la alfabeta roman, ia mori a 111 anios.
Zhou e un comite de la Partito Comuniste ia spende tre anios en developa piniin en la desenio de 1950. Lo ia cambia la modo de ensenia la lingua e ia aida alti la cuantia de persones capas de leje.
El ia nase en 1906 en la Dinastia Qing, e ia deveni final un oposor forte de la governores comuniste de Xina. Zhou ia mori ier en Beijing, a la dia pos sua aniversario.
Como un joven, Zhou ia pasa tempo en la SUA e ia labora como un bancor de Wall Street.
El ia revade a Xina pos la vinse comuniste en 1949, e on ia encarga el con crea un sistem nova de scrive usante la alfabeta roman.
Ante la developa de piniin, 85% de persones xines no ia pote leje. Aora, cuasi tota es capas.
Piniin ia deveni la sistem la plu comun de mundo per scrive xines, an si alga comunias -- spesial en Hongkong e Taiuan -- continua usa alternativas.
Lo es ance vasta usada per tape sinias xines en computadores e telefonetas, tal ce alga persones teme ce lo va deveni final un sustitua intera per la sinias xines tradisional.
Sua ateni ia proteje Zhou de alga de la persegues cual ia aveni su la governa de Mao Zedong. An tal, plu tarda, en la Revolui Cultural, on ia envia el a la campania per reinstrui el.
En sua anios plu vea, el ia deveni forte desaprobante sur la autoriosas xines. El ia scrive libros, de cual la plu ia es proibida.
Intervisada en 2011, el ia dise ce el espera vive sufisinte longa per vide un confesa par la autoriosas xines ce la colpa sanguosa contra protestores prodemocrata en la Plaza Tiananmen en 1989 ia es un era.
El ia dise ce sitadanes comun no crede plu a la Partito Comuniste, e ce la majoria vasta de inteletosas xines favore la democratia.
@T La polisia combate nebla fumosa en Beijing
@L aora_oji/2017/la_polisia_combate_nebla_fumosa_en_beijing
====== La polisia combate nebla fumosa en Beijing ======
8 janero 2017
La maior de Beijing ia dise ce un ecipo nova de polisiores ambiental va atenta redui la nivel perilosa de nebla nosiva cual covre la site.
La polisia va xerca fontes local de contamina de aira, incluinte barbecues su sielo e stradas polvosa.
La maior ia promete ance redui la consuma de carbon par 30% en esta anio.
Multe abitores ia es obligada a resta en sua casas tra dias per evita enspira la aira nosiva.
La popla ia urje la governa a fa plu per fronti fontes major de nebla fumosa, per esemplo par redui la depende de Xina sur sentros eletrical usante carbon, la fonte xef de eletrica en Xina.
Ofisiores dise ce un state nonaidosa de clima en la capital ia preveni ce contaminantes move a via.
Cai Qi, la maior, ia dise: "Barbecues su sielo, ardes de dejetadas, ardes de biomasa, polvo de stradas -- esta atas de nonobedi la regulas es vera la resulta de supravide nonatendosa e de enforsa debil la leges."
La sola sentro eletrical de carbon en la site va es cluida pos la inverno, cuando la consuma crese per caldi construidas.
On va retira gradal ance 300 mil veculos vea cual contamina multe. Fabricerias contaminante va es cluida, e 2000 otras va es renovida per sasia normas plu alta de prosede contamina.
Plu temprana, autoriosas en Beijing ia anunsia ce los va comensa instala puradores de aira en alga de la scolas e jardines de enfantes en la site. On ia comanda ja ce estas sesa tota ativia su sielo.
@T La presidente de Gambia refusa resinia
@L aora_oji/2017/la_presidente_de_gambia_refusa_resinia
====== La presidente de Gambia refusa resinia ======
14 janero 2017
La presidente elejeda de Gambia, Adama Barrow, ia parti de la pais pos un fali de discutes per convinse presidente Yahya Jammeh a resinia.
La presidente de Nijeria ia vola a Banjul per atenta reali un acorda, ma Jammeh ia refusa sede la potia.
Barrow vade aora a Mali, do el va encontra xefes de Africa ueste ci ia asembla ala per un confere. La ajente pasada de imobila desira solve la nonprogresa afin on pote inaugura el en la semana veninte.
La periodo presidental de Jammeh va fini a jovedi. La Uni African ia dise ce lo no va reconose plu la governa de Jammeh pos acel tempo.
Muhammadu Buhari ia vola a Banjul, capital de Gambia, per aida reali un acorda, car la rejion teme la segues de un cambia nonpasosa de potia.
Ecowas, un bloco de 15 statos cual ia organiza la asembla, ia dise ce lo va considera despone Jammeh par fortia militar si el refusa resinia.
Jammeh ia aseta inisial sua defeta pos la eleje en desembre. Ma corta a pos, el ia recomenda ce on cansela la resulta.
La xef de 51 anios ia saisi potia en la pais en 1994, e on ia acusa el de maltratas de diretos umana, an si el ia organiza votas periodal.
A jovedi, un avocato per Jammeh ia solisita un comanda de la Corte Suprema per preveni la inaugura de Barrow. La Corte Suprema no pote considera la defia asta maio, car judores manca, e Jammeh dise ce el no va resinia asta alora.
La teme crese ce la nonsertia risca causa un parti de refujadas.
Miles de gambianes, xef femes e enfantes, ia traversa ja la fronteras a Senegal e a Gine-Bisau, do los no nesesa un visa.
Barrow ia gania 43,3% de la votas en la eleje de desembre, en compara con 39,6% per Jammeh. Un aspiror tre, Mama Kandeh, ia gania 17,1%.
@T La stadion Maracana es sacada
@L aora_oji/2017/la_stadion_maracana_es_sacada
====== La stadion Maracana es sacada ======
11 janero 2017
Ofisiores de futbal en la site Rio de Janeiro en Brasil ia urje ce on ata rapida per preveni plu dana a la stadion famosa Maracanã, pos cuando esta ia es rubada.
La federa de futbal de Rio ia dise ce fenetras ia es rompeda e ojetos ia es furada.
La stadion ia es usada en la Juas Olimpial resente, e es a la sentro de un disputa sur la demanda de ci debe manteni lo.
Lo es poseseda par la governa de la stato Rio de Janeiro cual ia es grave afetada par la crise economial profonda en la pais.
La stadion ia es custosa modernida per la Copa de Mundo de 2014 e la Juas Olimpial de 2016, ma lo senta vacua en cuando clubes e autoriosas disputa ci debe maneja lo.
La federa ia dise ce "la ansias sur la presente e la futur de la stadion fa no plu ca crese".
Pos sua aveni ofisial la plu resente en setembre, la stadion ia es abandonada e sacada.
On descomuta la lampas de la stadion a note per evita la custa, e la campo es en un mal state, con sespe seca e plen de bucos.
Fili de cupre ia es furada de mures e sofitos, como ance estinguadores, mangeras, televisadores, e un busto de Mário Filho, la jornaliste per ci on ia nomi la stadion.
La federa ia clama un consenta con la clubes de la site per discute la maneja de la stadion.
La Maracanã ia ospita la rituos abrinte e cluinte de la Olimpiales de Rio, e ance la max final de Copa de Mundo en 1950.
Lo ia es usada par tota la cuatro ecipos grande de la site: Botafogo, Flamengo, Fluminense, e Vasco da Gama.
@T On aresta la fia de la presidente de Corea Sude
@L aora_oji/2017/on_aresta_la_fia_de_la_presidente_de_corea_sude
====== On aresta la fia de la presidente de Corea Sude ======
2 janero 2017
La fia de la fem a la sentro de un scandal presidental en Corea Sude ia es arestada en Danmarc.
Chung Yoo-ra, ci ave 20 anios, es acusada de resta nonlegal en la pais.
Sua madre, Choi Soon-sil, es acusada de usa sua amia con presidente Park Geun-hye per sua propre benefica, incluinte entra Chung a un universia corean major.
Pos semanas de protestas, parlamento ia vota per acusa Park a 9 desembre. Ambos femes ia demanda es pardonada, ma nega la acusas.
Autoriosas de Corea Sude ia demanda aida de Interpol per trasa Chung pos cuando el ia fali reveni per responde a demandas sur sua rol en la scandal.
Los intende estradi Chung, ci ia es un cavalor nasional en la pasada.
Sua madre Choi ia reveni de estra la pais e es aora detenida per es interogada. On ia acusa el de crimines diversa, incluinte malusa de autoria, convinse par menasa, atenta de convinse par menasa, e atenta de froda.
La corte constitual de Corea Sude ave ses menses per suporta o reversa la vota de acusa contra Park.
Asta alora, Park es ancora la presidente ma sin sua potias, cual on ia dona a la ministro xef, un person asiniada par el.
@T On identifia un elemento en la cor de la Tera
@L aora_oji/2017/on_identifia_un_elemento_en_la_cor_de_la_tera
====== On identifia un elemento en la cor de la Tera ======
10 janero 2017
Siensistes japanes crede ce los ia identifia un elemento nonconoseda en la cor de la Tera.
Los xerca ja la elemento tra desenios, suposante ce lo composa un proportio notable de la sentro de nosa planeta, con fero e nicel.
Aora, par recrea la temperatur e presa alta cual on trova en la interna profonda, esperimentas sujesta ce la elemento la plu probable es silico.
La descovre pote aida nos a comprende plu bon la formi de nosa mundo.
On crede ce la parte la plu interna de la Tera es un bal solida con raio de sirca 1200 cilometres. Lo es multe tro profonda per es direta investigada, donce siensistes studia como ondas sismica pasa tra esta parte.
Lo es xef composada de fero, cual representa sirca 85% de la pesa, e nicel per sirca 10%. Sirca 5% es nonidentifiada.
Eiji Ohtani e sua ecipo a la Universia de Tohoku ia crea aliadas de fero e nicel e ia misca los con silico. Los ia esposa estas a la presa e temperatur enorme cual esiste en la cor.
Los ia descovre ce la resultas de esta misca es egal a lo cual on vide en la interna de la Tera par datos sismica.
Ohtani ia dise ce on nesesa labora plu per confirma la presentia de silico, e ia asentua ce la descovre no elimina la posible ce otra elementos es ance presente.
Otra rexercores ia sujesta resente ce osijen es cisa importante en la cor.
@T On previde un pesta de muses en Australia
@L aora_oji/2017/on_previde_un_pesta_de_muses_en_australia
====== On previde un pesta de muses en Australia ======
17 janero 2017
La departe de siensa en Australia ia averti ce la pluve de primavera ia crea un situa ideal per un pesta de muses en la parte cultivada de la pais.
Victoria e Australia Sude esperia aora un cuantia plu alta de muses ca prevideda.
La departe defini un pesta de muses como plu ca 1000 muses per ectare. Si la situa ofre comedas sufisinte, la cuantia pote ateni acel pos sola un pico de menses.
Un primavera eselente ia produi un recolie recordo en esta anio, ma esta es un situa ance multe favorable per muses.
Datos de trapas e atestas indica un crese subita de cuantia. On regarda sirca sinco muses per ectare como normal.
Pestas de muses aveni comun sola en la zonas cultivada de Australia e un provinse en Xina norde-ueste.
Victoria e Australia Sude ocupa un parte grande de la Basin Murray-Darling, un rejion fertil cual representa cuasi 40% de la revenu cultival de Australia, como diseda par la governa.
Erutas de muses crea un problem major finansial per cultivores ci es obligada a compra tentantes custosa e a resemi sua granes.
Los jenera ance angusa en comunias campanial. Un rexercor ia comenta: "Los invade casas, los es en veculos, en cada dirije on vide un mus. Persones en la sites es xocada cuando on ave un mus en la casa. Los en la campania bloci cada fesur en sua casa con lana de aser per preveni ce la muses entra."
Muses ia es introduida a Australia par colonistes european. Los ave poca predores natural e fronti poca compete de la viventes savaje nativa.
@T Ovos plastica encalia sur un isola deutx
@L aora_oji/2017/ovos_plastica_encalia_sur_un_isola_deutx
====== Ovos plastica encalia sur un isola deutx ======
6 janero 2017
Miles de ovos plastica conteninte juetas peti ia apare sur Langeoog, un isola deutx pico en la Mar Norde.
La juetas ia veni de sinco contenadores cual ia cade de un barcon de carga cual ia pasa difisil tra acuas turbosa.
La arivas nonespetada ia deleta enfantes sur la isola.
Lo e otra partes de Deutxland ia es resente bateda par Tempesta Axel, cual ia causa alga de la inondas la plu sever a la costa norde de Deutxland de pos 2006.
Uwe Garrels, maior de Langeoog, ia deside permete ce enfantes de la scola-jardin local colie tan multe de la ovos como los desira. Cada ovo conteni un jueta peti e un mesaje en rusce.
"La ovos surprendente ia trova sua via a libria," el ia comenta.
La maior ia dise ce si cualce compania stranjer oposa esta, el invita los a aida colie miles de "sacos plastica peti e otra materias de paci" cual ia encalia con la ovos e contamina la plaias de la isola.
Vilas e sites longo la costa baltica ia es inondada par la tempesta de Kiel en la norde estrema a la isola vacansal Usedom, prosima a la frontera polsce.
A un punto, on ia rejistra la nivel de mar en la porto de Wismar como 1,83 metres supra la norma.
@T Protestores tibetan es arestada en Suiz
@L aora_oji/2017/protestores_tibetan_es_arestada_en_suiz
====== Protestores tibetan es arestada en Suiz ======
16 janero 2017
La polisia suiz ia aresta 32 ativisites protibetan ci ia protesta contra un visita par Xi Jinping, la presidente de Xina.
La grupo, composada de tibetanes e suizes, ia es detenida ier per iniora restrinjes instituida par la polisia en la capital, Bern.
Un om ia es ance prevenida de ensende se.
Xi es en Suiz per un visita ofisial ante la Foro Economial Mundal cual va comensa doman en Davos. Sua partisipa en la foro va es la prima par un presidente xines.
La protesta a soldi ia aveni en la sentro de Bern e la polisia ia intende ce lo va fini a mediadia, ante la ariva de Xi.
La protestores ia condui jeneral pasosa, ma alga ia continua protesta pos la limita de tempo, ia refusa ce on esamina sua identias, e ia causa otra disturbas.
Pl tarda, la arestadas ia es librida. Dotores ia atende la om ci ia atenta ensende se.
La protestas ia atrae entre 700 e 800 partisipores.
La politicas de Xina en Tibet ia provoca comun protestas ultramar par tibetanes ci desira libria de Xina e la aseta de sua xef spirital, la dalai-lama.
En 1999, un protesta simil protibetan ia aveni en un visita par Jiang Zemin, alora la presidente de Xina, ci ia es colerida cuando protestors ia lansa ovos contra la delegadas xines.
@T Soldatos rebela en Costa de Ivor
@L aora_oji/2017/soldatos_rebela_en_costa_de_ivor
====== Soldatos rebela en Costa de Ivor ======
7 janero 2017
Soldatos controla la site du de Costa de Ivor pos rebela sur sua salario.
Los ia saisi la controla de Bouaké en la oras temprana de venerdi. Protestas ia sperde ance a Daloa, Daoukro, Odienné, e Korhogo.
Cuando la note ia veni, la soldatos ia parti de la stradas de cada vila estra Bouaké.
Un parlamentor local dise ce los esije $8000 e un casa per cada soldato.
La governa ia apela per calmia, e presidente Alassane Ouattara ia asembla sua xefes militar per un consenta de crise.
Alain-Richard Donwahi, la ministro de defende, ia urje soldatos a revade a sua casernas afin on pote trova "solves durante".
On comprende ce la plu de la soldatos es rebelores pasada ci ia integra a la armada pos la fini de la gera.
La rebelores ia entra a la site Abidjan de sua fortres Bouaké en 2011, aidante Ouattara a gania la potia pos cuando sua presedor Laurent Gbagbo ia refusa aseta sua defeta en la eleje de la anio presedente.
Gbagbo es aora prosededa en la Corte Crininal Internasional sur acusas de crimines de gera.
Plu temprana ier, soldatos armada con fusiles de ataca AK-47 ia xuta a la ofisias de la organiza difusante nasional en la site, e ia saisi la controla de la entra ueste a Bouaké.
La soldatos pare ave no xef o portavose, tal ce la taxe de negosia con los es difisil.
Un ensenior en Bouaké ia dise ce la site es sin abitores vidable. "Omes en balaclavas patrulia la site sur motosicles o en autos. Los no ataca abitores. Los ia comanda nos a resta a casa."
@T Tornados mata en la SUA sude
@L aora_oji/2017/tornados_mata_en_la_sua_sude
====== Tornados mata en la SUA sude ======
23 janero 2017
Clima sever ia mata minima 18 persones en la sude de la SUA e ia feri multe plu. Cuatro ia es matada par tornados en Mississippi a saturdi.
La Servi Nasional de Clima ia dise ce un risca de tornados continua per Florida sude, avertinte sur ventas danante e sur graniza.
Un state de crise es declarada en sete contias de Georgia sude-sentral, do 14 persones ia mata. La plu de estas ia es en un parce de casas movable cual ia es colpada par un tornado.
Multe casas movable ia es platida ante lus prima a soldi, en la parce prosima a la site Adel. Ecipos de crise xerca ancora survivores.
Du persones ia mori cuando un tornado ia lansa un casa movable tra sirca 100 metres a sur la media de un autovia.
En Mississippi sude, cuatro persones ia es matada par un tornado con venta plu rapida ca 218 cilometres per ora. Plu ca 50 otras ia es ferida, e sirca 480 casas ia es danada.
En la tarda de saturdi, la Ajenteria de Georgia per Maneja Crises ia consela sur la locas la plu bon e mal en cual on pote proteje se. Lo ia recomenda ce persones en via de un tornado pone se su covreletos o un materas.
@T Trump fa sua pasos prima
@L aora_oji/2017/trump_fa_sua_pasos_prima
====== Trump fa sua pasos prima ======
21 janero 2017
Donald Trump ia es ier inaugurada como la presidente 45 de la SUA. El ia fa ja sua pasos prima, suscrivente un comanda contra la reformis de aida medical introduida par sua presedor, Barack Obama.
En sua parla inaugural, el ia promete ce trata prima la SUA e fini la problem de fabricerias abandonada e crimin cresente.
Oji, sirca 200 mil persones va partisipa en un prosegue de femes en Washington. La organizores dise ce los vole asentua la egalia de razas e jeneros, e otra temas persepida como menasada par la governa de Trump.
Prosegues simil aveni ja en Australia e Zeland Nova, e multe otras es projetada.
Corta pos sua inaugura, Trump ia envia sua nominas de consilio a la Salon alta.
El ia suscrive un documento cual permete ce Jeneral James Mattis servi como ministro de defende, an si esta ia retira se de la militar a min ca la sete anios nesesada ante aora.
La ecipo de Trump ia refresci rapida la pajeria de la Casa Blanca. Aora lo lista sola ses temas -- enerjia, politica esterna, emplea e crese, militar, enforsa de leges, e acordas comersial.
Oposores cexa ce lo conteni no refere a diretos sivil, diretos LGBT, aida medical, o cambia de clima.
Trump ia suscrive ance un proclama cual declara un dia nasional de patriotisme.
En sua parla inaugural, Trump ia adota un manera nasionaliste e protejiste. "De pos esta momento, on va trata prima la SUA. Nos va segue du regulas simple: compra american e emplea american."
El ia acusa politicistes de abandona sitadanes a declina industrial e crimin spiralinte. "Esta masacra american sesa ja asi e sesa ja aora," el ia dise. "Cada deside sur comersia, sur impostas, sur migra, sur temas esterna, va es fada per benefica laborores american e familias american."
Pos la rituo, alga protestores ia rompe fenetras de comersias en Washington e ia denunsia capitalisme e la presidente nova. Polisiores antitumulta ia forsa los a via con gas de peper.
@T Un ataca de anio nova en Istanbul
@L aora_oji/2017/un_ataca_de_anio_nova_en_istanbul
====== Un ataca de anio nova en Istanbul ======
1 janero 2017
A la min 39 persones, incluinte 15 stranjeres, ia es matada en un ataca a un loca de note en Istanbul.
Un om ia mata un polisior e un sivil estra la loca de note Reina a sirca 01:30 de ora local, ante entra e fusili en cuando persones ia es selebrante la anio nova.
On crede ce la fusilor ia ata solitar, e on atenta aora trova el.
69 persones es en ospital, e cuatro es en state grave. Tre de la vitimes turces, cisa plu, ia es empleadas de la loca de note.
Reportas sujestas ce la atacor ia porta vestes de San Nicolas. La loca ia conteni sirca 700 persones, de ci alga ia salta a la acua de la Streta Bosporo per fuji.
La autoriosas turces supresa reportas jornaliste sur la ataca, par causa de ansia sur securia e ordina publica, ma esta no estende a declaras ofisial.
Istanbul ia es ja estrema vijilosa, con 17 mil polisiores laborante en la site pos atacas teroriste en menses resente. Multe ia es fada par militaristes curdi o la organiza Daex.
Plu felis, pirotecnicales ia lumina la sielo supra monumentos famosa de la mundo per bonveni la anio 2017.
Un plu secondo ia es ajuntada a 31 desembre per compensa un lenti pico en la jira de la Tera.
Aora Oji desira un bon anio nova a tota sua lejores.
@T Un avalanxa destrui un otel en Italia sentral
@L aora_oji/2017/un_avalanxa_destrui_un_otel_en_italia_sentral
====== Un avalanxa destrui un otel en Italia sentral ======
20 janero 2017
Salvores resta esperosa ce los va trova survivores pos un avalanxa a un otel montanial en Italia. La avalanxa ia mata a la min du persones e ia covre desuples de otras su detrito e neva.
Ecipos ia labora tra la note, xercante a la min 25 persones sur ci on crede ce los manca. On ia prende du corpos de la ruinas de la otel Rigopiano en Abruzzo, un rejion de Italia sentral.
Du persones ia survive ci ia es estra la otel cuando la avalanxa ia aveni a mercurdi. Enfantes es entre los ci manca.
Xercores ia batalia la clima per ateni la loca e dise ce los no ia perde espera, an si los ia trova ancora no indicas de vive.
La avalanxa ia segue un serie de tremateras. Cuatro de los ia es plu forte ca la grado 5, e ia asusta abitores campanial ci ia es ja lutante pos un neva profonda cual ia covre linias de telefon e ia destrui cordas eletrical.
Paolo Gentiloni, la ministro xef, ia solisita unia nasional, disente ce Italia es caturada en "un abrasador nonpresededa de jelo e tremateras".
Ecipos ia debe usas scis e palas per prosimi a la loca de la avalanxa, e no ia ateni la otel ante 04:30 ier. Neva ia bloci un via e ia impedi un cuantia grande de veculos de crise.
Un salvor ia comenta: "La parte alta de la otel no esiste plu -- lo es plen de neva en la salas diversa. Ma on ave plu ca un nivel, e nos crede ce la plu de la persones es sur la nivel prima, no la nivel du o tre. Lo es multe difisil, ma nos espera ce algun pote es ancora vivente."
Lo pare ce la abitores de la otel ia asembla sur la nivel de tera de la otel per espeta parti pos la tremas.
Des-du visitores e sete empleadas ia es rejistrada como presente a la otel, ma salvores dise ce la cuantia vera pote es 35. Tre es enfantes de ses, sete e nove anios, e la person la plu vea en la lista es un om de 60 anios.
La avalanxa ia aveni a un momento entre 16:30 e 17:40, seguente la mesajis e telefonis par persones a la otel. Lo ia cade partal la teto e, par alga reportas, ia move la construida de sur sua funda par 10 metres.
@T Un clima jelin tra Europa
@L aora_oji/2017/un_clima_jelin_tra_europa
====== Un clima jelin tra Europa ======
9 janero 2017
Un temperatur jelin tra Europa ia mata plu ca 20 persones e ia covre an la isolas elinica e Italia sude su neva.
En Italia, navetas e aviones ia es canselada, e scolas en la sude va es cluida oji.
Turcia es ance grave afetada. La Streta Bosporo ia es cluida per barcones cuando un tempesta forte de neva ia colpa Istanbul.
A la min 10 persones ia mori de fria en Polsca. La temperatur de note en Rusia ia desende a --30°C.
Elas, normal plu calda, ia esperia un temperatur de --15°C en la norde, do un migror afgani ia mori de fria en la semana pasada e stradas ia es cluida.
En Atina, la temperatur no ia asende supra 0°C, e alga de la isolas ia es covreda su neva.
Miles de migrores abita sur alga de la isolas elinica, e on move multe de los a casas tempora e tendas caldida.
Oteles per persones sin casa en Italia ia abri sua portes tra dia e note. On ia culpa la clima per la moris de sete persones, de ci sinco ia abita su sielo.
Airoportos en Sisilia, Bari, e Brindisi ia clui a saturdi. Roma ia esperia ance un temperatur jelin.
En Rusia, la natal ortodox ia es la plu fria de 120 anios.
Praha en Txesco ia esperia la note la plu fria de la inverno asta aora, con reportas de tre moris, de ci du ia es sin casa.
Reportas de Balgaria dise ce on ia trova du migrores iraci mor en un foresta en la sude-este de la pais.
On previde ce esta periodo de clima fria va fini en multe partes de Europa pos oji.
@T Un dia sin omiside en Salvador
@L aora_oji/2017/un_dia_sin_omiside_en_salvador
====== Un dia sin omiside en Salvador ======
13 janero 2017
La polisia en Salvador dise ce la pais ia esperia 24 oras sin omisides. Esta es un aveni rara en un nasion con multe combates de ganges.
La pais ave un de la tasos de omiside la plu alta de mundo, seguente la Nasiones Unida.
Asta aora en esta anio en Salvador, des persones per dia ia es matada asta la martedi de pas nonespetada.
La plu de la violentia es causada par ganges criminal, local conoseda como maras, cual opera tra America Sentral.
La polisia no ia ofre un esplica per la manca de violentia. Ma la autoriosas ia nega rapida ce los ia restora un sesafusili controversa con la ganges.
La grupos criminal ia es inisial formida sur la stradas de Los Angeles en la desenio de 1980, par enfantes de migrores salvadoran ci ia fuji de la gera interna savaje de la pais.
Cuando la gera ia fini en 1992 e multe de los ia revade a casa, los ia prende la cultur de gang con los.
La maras es envolveda con contrabanda de drogas, ruba, e estorse.
La du ganges xef ativa en la rejion es Mara Salvatrucha, ance nomida MS-13, e Mara-18, o la Gang de la Strada 18.
@T Un era par la militar nijerian mata refujadas
@L aora_oji/2017/un_era_par_la_militar_nijerian_mata_refujadas
====== Un era par la militar nijerian mata refujadas ======
18 janero 2017
Un jeto militar nijerian ia bombi un campa de persones deslocada en la norde-este, par era, matante a la min 52 persones e ferinte multe plu.
Laborores de aida es entre la persones mor en Rann, e la Crus Roja dise ce ses de sua empleadas ia es matada.
La ajenteria Medicistes Sin Fronteras (MSF) ia dise ce plu ca 200 persones ia es ferida, e lo ia apela per aida la sorti medical de persones.
Presidente Muhammadu Buhari, de ci sua armada combate militaristes de Boko Haram, ia espresa sua angusa e ia solisita calmia.
La ataca ia aveni prosima a la frontera con Camerun, do la militar es engranada en lo cual lo descrive como sua puxa final contra Boko Haram.
On crede ce esta es la ves prima a cual la militar de Nijeria ia confesa fa un tal era.
MSF ia dise ce lo ave ecipos en Camerun e Txad, preparada per trata pasientes ferida. Lo crede ce multe de la vitimes ia es persones ci ia fuji de locas ja atacada par Boko Haram.
Jeneral Rabe Abubakar, un portavose per la militar nijerian, ia dise ce on ia deteta alga "restantes" de Boko Haram estra Rann e ce on ia ata per elimina los.
Cuando la militares ia comprende sua era, los ia es "tota en dole", el ia ajunta. "An tal, en un opera militar de esta spesie, de tempo a tempo tal cosas aveni. An si lo ia es estrema regretable, lo ia es nunca intendeda."
Jeneral Lucky Irabor, ci comanda operas contra rebelores en la norde-este, ia dise ce on va fa un investiga.
Un portavose per la presidente nijerian ia dise ce la governa va ofre aida a la stato Borno "en atende esta era regretable de opera".
Boko Haram ia causa ruina en la pais la plu poplida da Africa par un serie de bombis, asasinas, e saisis de persones. Lo batalia per suverti la governa e crea un stato muslim.
La grupo ia aumenta sua atacas en la semanas resente cuando la fini de la saison pluvosa ia permete ce sua combatores move plu fasil sur la savana.
En la mense pasada, la Nasiones Unida ia inisia un apela per mil milion dolares per aida los ci sufri de famia en la rejion.
Lo ia esplica ce on previde ce cuasi 5,1 milion persones en tre statos norde-este va fronti un manca grave de comedas. En la tre anios la plu resente, cultivores no ia pote planta car los teme trova aparatos improvisada e nonesplodeda cual la militaristes ia lasa.
Sirca sento mil persones, xef enfantes, risca mori de famia e nesesa es urjente aidada.
@T Un porte xef bricida en la note
@L aora_oji/2017/un_porte_xef_bricida_en_la_note
====== Un porte xef bricida en la note ======
4 janero 2017
Un om en Deuxtland sentral ia atenta sorti de sua casa tra la porte xef, ma ia trova mera un mur de brices ala.
Persones nonidentifiada en Mainhausen, prosima a la site Offenbach, ia brici la porte en la note.
La motiva no es clar -- cisa un broma, un venja, o un aposta.
La polisia, xercante plu ca un person, ia comenta ce la mur ia es cisa construida en sola un pico de minutos.
On estima ce la dana a la casa va custa €500 per repara.
Un portavose per la polisia ia dise: "Lo ia fa ce me recorda la mur en Berlin, cual ia vade ance multe rapida a la fini." Ma el ia ajunta: "Esta es un crimin e no un broma."
@T 2017
@L aora_oji/2017/xef
====== 2017 ======
En 2017, la autor de Aora oji ia dedica la plu de sua tempo libre a prepara la disionario elefen como un libro. Per esta razona, la blog ia dormi tra 13 menses.
Reportas plu vea ...
@T 50 anios pos la asasina de Martin Luther King
@L aora_oji/2018/50_anios_pos_la_asasina_de_martin_luther_king
@D 2018
====== 50 anios pos la asasina de Martin Luther King ======
5 april 2018
Campanas ia sona en sites tra la SUA per onora la momento a 50 anios ante aora, cuando Martin Luther King, gidor de diretos sivil, ia es matada par la fusil de un supremiste blanca. Los ia sona a 39 veses -- un per cada de la anios de la vive de King.
La campanas xef ia es a la motel en Memphis, Tennessee, do la asasina ia aveni. Jesse Jackson, un gidor major afroamerican ci ia es presente a la mata, ia dise a la asembla ce la dole es ancora forte sentida.
Dr King es regardada como un eroe en la SUA, e la aniversario de sua nase es onorada par un festa nasional.
A la asembla en Memphis en la sera de mercurdi, Martin Luther King III, un de sua fios, ia dise ce on ia fa progresas grande en relatas de raza, ma ce America es ancora multe distante de la state desirada.
King, comun conoseda par sua inisiales MLK, ia es fusilida cuando el ia sta sur la balcon de sua motel en un visita a Tennessee per protesta contra la paia basa de dejetores.
Un garlanda ia es poneda a la tomba de King en Atlanta, sua vila de nase, e ance en Chicago, un site colpada par tumultas pos la asasina en 1968. Ance ier, sentos de persones ia asembla en Washington per un prosegue de prea silente de la monumento MLK, erijeda en 2011, asta la Bolevar Nasional.
En un mesaje video, Barack Obama, la presidente pasada, ia dise: "Cuando nos atenta ancora, la spirito de Dr King joia ancora." Presidente Donald Trump ia tuita un video en cual el ia loda King a sua aniversario en janero.
En un proclama separada en cual el ia declara ce ier es "un dia per onora la erita de Dr King", Trump ia dise "lo cual va reali la ideales de Dr King no es la governa" ma vera la persones comun, ci "debe aspira ativa securi la sonia de vive en junta como un popla con un gol comun".
A la sera de martedi en un eglesa en Memphis, do King ia fa un parla a la dia ante sua mori, sua fia, la eglesor Bernice King, ci ave aora 55 anios, ia descrive la difisilia de lamenta publica sua padre.
Acompaniada par sua frate Martin Luther King III, el ia dise: "Lo es importante ce on vide du de la enfantes ci ia perde sua papa a la baleta de un asasinor a 50 anios a ante. Ma nos ia continua."
En un tuita plu tarda, el ia sita Maya Angelou, un poesiste afroamerican, ci ia ta ave 90 anios ier, disente en pertine a sua padre: "Me pote es e es plu bon car tu ia esiste."
@T 68 persones mori en un focon en un prison venezuelan
@L aora_oji/2018/68_persones_mori_en_un_focon_en_un_prison_venezuelan
====== 68 persones mori en un focon en un prison venezuelan ======
30 marto 2018
Relatadas de 68 persones ci ia mori cuando un focon ia eruta a un polisieria en la site Valencia en Venezuela esije respondes sur la aveni. La arde ia comensa cuando prisonidas ia ensende materases en atenta sorti a mercurdi.
La Nasiones Unida ia demanda ce la autoriosas venezuelan fa un investiiga rapida e compensa la familias de la vitimes. La focon ia es un de la avenis la plu matante en la prisones de Venezuela.
A mercurdi, relatadas angusada ia asembla ante la polisieria, esijente informa sur sua amadas. La polisia ia forsa los a via par gas lacrimojen.
Tarek William Saab, la avocato acusante xef, ia dise ce 66 omes e du femes, ci ia visita la selulas en la note, ia es matada en la focon. El ia dise ance ce on va inisia "direta" un investiga.
On no ia confirma ofisial la avenis cual ia causa la focon, ma la asosia Un Fenetra a Libria, cual monitori la state de prisones, ia dise ce un prisonida ia fusili la gama de un polisior, e ce, corta a pos, materases en selulas ia es ensendeda. La arde ia sperde rapida.
Salvores ia rompe mures per atenta libri persones trapida par la flamas.
Prisones en Venezuela es suprafolida, e violentia e tumultas matante es comun. La pais ia batalia per casi sua prisonidas a media de un crise economial, e per esta razona lo usa complesos tempora como la prison en Valencia.
@T Abitores evacuada de un tore fesurida en Sydney
@L aora_oji/2018/abitores_evacuada_de_un_tore_fesurida_en_sydney
====== Abitores evacuada de un tore fesurida en Sydney ======
27 desembre 2018
En Sydney, Australia, sentos de persones ia debe parti de un tore de apartes a la ves du, pos la apare de un fesur en sua mures a lundi.
La Tore Opal ave 38 niveles. Multe de sua abitores ia reinstala ja se pos la alarma inisial, cuando on ia oia ruidos forte e la fesur ia es descovreda.
La compania Icon cual ia construi la tore ia dise ce lo resta "en bon state strutural" e ce la reloca es mera un proteje per permete ce injeniores e investigores labora a 24 oras per dia.
Icon ia clari ce nun es en peril, ma la reloca de persones va aida los a repara la tore en tempo tan corta como posible, sin plu disturbas a la abitores.
A ante, ofisiores ia dise ce sola 51 de la 392 apartes de la tore es afetada. La construida nova en la Parce Olimpial de Sydney ia es declarada como secur per la reveni de la plu de abitores.
A lundi, la polisia ia evacua sirca 3000 persones cuando un mur de suporta interna ia fali a la nivel 10 de la construida.
Icon ia confirma ce un panel premoldida de beton ia fesuri. Un ecipo de injeniores de Icon e la developores Ecove esamina aora la construida, cual ia es completida en la parte plu temprana de esta anio.
Ier, la governa de Cimri Sude Nova ia dise ce lo investiga ance la solidia strutural de la construida e de tores abital visina.
Jornalistes local ia publici fotos de la dana a la construida, mostrante jeso nonfisada e mures desintegrante. Ma Ecovre ia defende la "cualia alta" de la construida, cual lo ia descrive como supra la norma de la industria.
Icon ia dise ce abitores va debe cisa abita estra sua apartes per asta 10 dias. Tota abiterias tempora va es furnida par la compania.
@T Arjentina cansela un max amin de futbal contra Israel
@L aora_oji/2018/arjentina_cansela_un_max_amin_de_futbal_contra_israel
====== Arjentina cansela un max amin de futbal contra Israel ======
6 junio 2018
Arjentina ia cansela un max de prepara per la Copa de Mundo contra Israel, parente par causa de presa political sur la trata israeli de filastinis en Gaza.
Pos cuando Gonzalo Higuain, un atacor arjentina, ia dise publica ce la jua ia es canselada, la ambasada israeli en Arjentina ia tuita un confirma.
On reporta ce Benjamin Netanyahu, ministro xef de Israel, ia telefoni a Mauricio Macri, presidente de Arjentina, per atenta salva la max amin entre la du paises, cual on ia intende jua en Ieruxalim a saturdi.
La anunsia de la cansela ia es salutada par aclamas en Gaza, do no min ca 120 filastinis ia es matada par soldatos israeli en protestas resente.
En Ramallah en la Riva Ueste, la asosia de futbal de Filastin ia grasia publica Lionel Messi (un otra atacor arjentina) e sua cojuores per la cansela. "Valuas, moralia e sporte ia gania oji un vinse, e un carta roja ia es levada contra Israel par la cansela de la jua."
Jibril Rajoub, presidente de la asosia, ci ante la cansela ia recomenda ce filastinis arde camisas e imajes de Messi, ia anunsia ce el va fa oji un confere jornaliste.
La grupo campaniante Avaaz, cual ia recomenda ce on cansela la max, is loda lo cual lo ia descrive como "un deside etical corajosa": "Esta demostra ce Arjentina comprende ce jua en Ieruxalim ta ave no parte amin, cuando a un distantia mera de milias, xutores israeli spara contra protestores nonarmada."
La max ia ta es la jua final de Arjentina ante la comensa de sua campania de Copa de Mundo en Rusia en la plu tarda de esta mense. On ia intende reali lo en un stadion en Ieruxalim Ueste.
Ieruxalim es un loca estrema delicata. Israel regarda lo como sua capital "eterna e nondivideda". Filastin vide la parte este de lo como la capital de un stato filastini futur, e ia es colerida par la deside de move la max a ala de Haifa.
@T Arjentina "no ave recursos" per leva un sumarina
@L aora_oji/2018/arjentina_no_ave_recursos_per_leva_un_sumarina
====== Arjentina "no ave recursos" per leva un sumarina ======
18 novembre 2018
On ia trova la ruina de un sumarina arjentina cual ia desapare con 44 ecipores en la Mar Atlantica. Ma la ministro de defende ia dise ce la pais "no ave la recursos" per leva lo.
La San Juan ia deveni mancante a 430 cilometres de la costa de Arjentina en 15 novembre 2017, e ia es retrovada pos un anio e un dia. Lo reposa a 900 metres su la surfas.
Relatadas de la ecipo esije aora ce la governa leva la ruina.
La sumarina ia implode. Sua casco es completa desformida e colasada, e detrito es sperdeda tra un area de sirca 70 metres.
Lo ia es trovada par un compania privata esuan cual pote mapa la fondo de mar. Arjentinaes fada ia emplea la compania pos la fali de un labora internasional per trova la barcon.
En pasada, la compania, cual usa vagadores suacuan, ia atenta trova la ruina de la avion malaisian perdeda MH370, ma sin susede.
La descovre de la San Juan ia aveni a la dia pos un rituo sombre per relatadas recordante sua amadas. Presidente Mauricio Macri ia es presente, e ia promete manteni la xerca per la sumarina.
Un ofisior marinal ia dise anonim: "Leva la sumarina a la surfas no es nonposible, ma lo es un opera multe complicada, e donce multe custosa."
La causa de la implode de la barcon es ancora nonclar, e la familias de la vitimes desira un investiga nondependente.
@T Astronautas repara un gotea en la stasion orbitante
@L aora_oji/2018/astronautas_repara_un_gotea_en_la_stasion_orbitante
====== Astronautas repara un gotea en la stasion orbitante ======
31 agosto 2018
Astronautas en la Stasion Spasial Internasional (SSI) responde a un gotea de aira cual ia resulta cisa de un colide. On ia trasa la gotea a un buco peti en un capsula usada per trae un ecipo nova en junio.
On crede ce la dana ia es causada par la colpa de un frato de roca volante tra la spasio a rapidia alta -- un micrometeorite. La controlores de mision en Houston e Moscva dise ce la ses ecipores de la laboreria orbitante no es en peril.
Tal colpas es sempre un menasa per la SSI. Lo ia es construida per es capas de tolera un bombarda constante de fratos de polvo.
La controlores ia es avertida sur la problem par sensadores de la presa de aira en la stasion. La astronautas ia es alora dorminte, ma cuando los ia leva per sua labora a martedi, los ia debe xerca la gotea.
Los ia trova lo en la veculo Soiuz rusce, en cual on ia trae tre ecipores a la stasion a 8 junio. Entre los ia es Alexander Gerst de Deutxland, ci va prende la posto de comanda.
Gerst ia confirma la presentia de la buco par pasa sua dito supra lo. On ia reali direta un repara, usante un selinte e un banda per covre la buco, sur cual on dise ce lo ave un diametre de du milimetres.
La astronautas labora aora con injeniores sur la tera per evalua esce on nesesa un repara plu durante.
Gerst, como ance Serena Auñón-Chancellor de la SUA e Sergei Prokopiev de Rusia, va usa la mesma veculo Soiuz per revade a la Tera a la fini de la anio.
@T Barat antica ia inventa la interede
@L aora_oji/2018/barat_antica_ia_inventa_la_interede
====== Barat antica ia inventa la interede ======
18 april 2018
Un ministro ci ia declara ce la interede ia es inventada par baratis antica, a miles de anios en pasada, ia trova se su un cuantia considerable de burla.
Biplab Deb, la ministro major de Tripura, un stato en la norde-este de Barat, ia fa la comentas a un aveni publica en la sera de ier. El ia sita un esemplo de Mahabharata, un de la du epicas major de induisme antica, per demostra sua reclama, ma no multe persones vole crede el.
Aora sua nom es modosa en Twitter car multe baratis broma sur el.
Deb ia dise ce la batalia de Kurukshetra en Mahabharata indica la esiste en Barat antica de no sola la interede, ma ance la tecnolojia de satelite.
El ia sujesta ce car un de la carateres, Sanjaya, ia pote raconta a sua re Dhritarashtra tota detalias de un batalia aveninte a distantia de multe cilometres, lo es donce demostrada ce Barat ia es capas de ambos tecnolojias.
Natural, esta ia provoca plu demandas, incluinte de un profesor de la istoria de Asia sude ci ia tuita: "Perce Abhimanyu no ia demanda a Quora como el pote evade la chakravyuha [un posa sirculo de bataliores]? Perce Sanjaya ia nara la Gera de Kurukshetra cuando Siri ia ta pote fa lo? Ance, vera Crixna ia ta debe flue la Bhagavad Gita [un parte famosa de Mahabharata] en Facebook Live."
Deb ia ajunta se a un lista de ministros barati ci ia dise ce multe tecnolojias moderna ia es inventada en la antica de sua pais.
En 2014, Narendra Modi, la ministro xef ia informa un asembla de dotores e empleadas medical ce sirurjia cosmetica ia esiste istorial en Barat. Plu resente, en setembre pasada, Satyapal Singh, ministro minor de educa, ia surprende par declara ce la refere prima a un avion es en Ramayana, la otra de la du epicas major.
@T Barat cansela un imposta a produidas ijienal
@L aora_oji/2018/barat_cansela_un_imposta_a_produidas_ijienal
====== Barat cansela un imposta a produidas ijienal ======
22 julio 2018
En Barat, la governa ia cansela un imposta de 12% a tota produidas ijienal, pos menses de campania par ativistes.
La anunsia ia segue a un anio pos la introdui par la governa de imposta per tota benes, incluinte a 12% per produidas de ijien menstrual. Campaniores ia dise ce la imposta va fa ce esta produidas deveni an min comprada en un pais do on estima ce cuatro de sinco femes e xicas ave ja no asede a tal cosas.
Surbhi Singh, fundor de un carital per promove consensia de sania menstrual, ia comenta: "Esta ia es un paso multe nesesada per aida xicas e femes a resta en scola e sua emplea, e a pratica bon ijien menstrual. Esta va aida los a crese, a mostra sua potensia vera."
Un otra campanior, Amar Tulsiyan, ia descrive la deside como "un vinse grande per cadun" en la pais.
La menstrua es un de la razonas xef de la abandona de educa par xicas en Barat. Multe otras es obligada a resta a casa car los no pote asede produidas ijienal. Alga femes usa telas o trapos acaso, cual porta un risca de infeta si los no es limpa.
Donce cuando la governa ia eticeti tal tampones e teletas como cosas lusosa, con imposta de 12%, lo ia provoca direta un campania per cansela esta, incluinte defias en corte e solisitas formal, de cual un ia colie plu ca 400 mil suscrives. En hindi, la imposta ia es nomida "lahu ka lagaan", traduable como "imposta de sangue".
La anunsia ce la campania ia susede ia es fada par Piyush Goyal, la ministro tempora de finansia, ci ia dise ce el es "serta ce tota madres e sores va es multe felis de oia ce teletas de fem es aora tra 100% esentada de imposta."
@T Bemba no pote aspira la presidentia de RD Congo
@L aora_oji/2018/bemba_no_pote_aspira_la_presidentia_de_rd_congo
====== Bemba no pote aspira la presidentia de RD Congo ======
25 agosto 2018
La comision elejal de la Republica Democrata de Congo ia dise ce Jean Pierre-Bemba, un comandor militar pasada de la pais, no pote aspira deveni la presidente seguente de la pais.
Bemba ia es un de ses aspirores sur ci on ia judi ce los es noncualinte, pos oras de discute. Esta xef pasada de rebelores ia es descondenada de crimines de gera en junio, ma la comision ia dise ce el no es elejable par causa de un otra condena par la Corte Criminal Internasional per sua soborna de atestores.
Bemba, ci ia revade a la pais a la comensa de agosto pos des-un anios como un escluida o prisonida, apela presente contra acel condena.
On intende ce la vota en esta anio va eleje un seguor per presidente Joseph Kabila, de ci sua periodo du e final ia fini ofisial a du anios ante aora. La alia governante ia nomina Emmanuel Ramazani Shadary, un ministro pasada de internas, como sua aspiror.
En soma, 25 persones ia proposa sua nomes, incluinte Antoine Gizenga e Adolphe Muzito, du ministros xef pasada, sur ci on ia judi ce ance los no pote aspira la presidentia.
Partitos oposante ia cexa sur la deside par la comision elejal an ante sua anunsia, acusante "la rena presente" de atenta "supresa la prosede elejal".
La escluidas, incluinte Bemba, ci es un de la oposores la plu temeda de presidente Kabila, pote apela contra la deside nova. On va publici la lista final de aspirores en setembre.
@T Bisicles nondocida inonda la mundo
@L aora_oji/2018/bisicles_nondocida_inonda_la_mundo
====== Bisicles nondocida inonda la mundo ======
15 maio 2018
La nederlandeses ia populari la idea de bisicli en sites, ma par un modo nova tecnolojial de lua veculos, on espera revolui la usa de bisicles en sites tra la mundo.
La inova xef es la lua de bisicles nondocida. On trova e libri los par un pico de tapes a un telefoneta, e pos lua los per un ora, un dia, un semana, etc, on reclavi los e lasa los a cualce loca do sua viaja fini, e no en un doca definida.
Tal veculos composa aora la majoria de la 18 milion bisicles de autoservi publica en la mundo, en 1608 sites. La cuantia ia grandi ja de sola du milion a la fini de 2016.
La plu de la crese ia aveni en Xina, do du companias nova, rica con finansia de jigantes comersial competente, batalia per domina la stradas. Como resulta, 1,5 milion bisicles ia inonda la stradas de sola Shanghai.
Ma la combate mercatal ia lasa ance montones de bisicles dejetada en la campos ensircante. En setembre, la sites la plu grande de Xina ia proibi companias de introdui plu bisicles a la vias, e la montones ia comensa aora desapare.
Estra la oportunia de pote lasa un sicle en cualce loca, scemas de bisicles nondocida es multe plu barata per opera ca la sistemes vea, car on no nesesa instala e manteni un doca.
Par move la tecnolojia de clavi e paia de la doca a la bisicle, operores pote ajunta sicles en modo vera rapida. Sensadores de jeolocali aida siclistes a trova bisicles par un ap de telefoneta, e on fa la lua e desclavi par scane un codigo QR o par usa identifiadores radiofrecuential.
La tecnolojia es enerjida par un pila cual deveni cargada par un dinamo tra cuando la sicliste pedali.
La susede de la bisicles en Xina ia atrae investores: la capital riscosa cual on investi a companias de bisicles nondocida tra la mundo ia alti de $290 milion en 2016 asta $2,6 mil milion en 2017.
Siclistes no lasa sempre la bisicles en locas ideal per otra usores, donce la operores de la scemas debe redistibui los a veses. En Oslo, un compania usa computadores per descovre la modo la plu nonperosa de distribui la sicles, atentante masimi la cuantia de viajas par cada veculo ante cuando on nesesa reloca lo.
@T Blasfemas par la presidente pilipina
@L aora_oji/2018/blasfemas_par_la_presidente_pilipina
====== Blasfemas par la presidente pilipina ======
26 junio 2018
Rodrigo Duterte, la presidente de la Pilipinas, ia descrive Dio como "stupida", provocante coleria en sua pais catolica. En un parla televisada, el ia critica la nara biblial de la cade de Adam e Eva e la lojica de la conseta cristian de la peca orijinal.
Duterte es conoseda per sua declaras scandalosa e sua atacas nonfiltrida contra sua oposores.
An si la Eglesa e multe sitadanes ia condena sua comentas, sua ofisia ia dise ce el ia espresa credes personal. En pasada, la presidente ia critica ance la Pape con linguaje cru e ia fa otra declaras jeneral regardada como estrema ofendente, cruel o misojine.
Sua comentas la plu resente ia es fada en un parla en Davao, la site cual el ia governa como maior ante campania per deveni presidente.
Demandante "Ci es esta Dio stupida?", Duterte ia critica la raconta en la Biblia ce Adam e Eva ia es espulsada de la jardin Eden car los ia come frutas proibida. "Tu ia crea un cosa perfeta," el ia dise, "e a pos tu imajina un aveni tentante cual ta manxa la cualia de tua labora."
La presidente ia cexa ance sur la conseta de la peca orijinal, par cual tota umanas es manxada par la malcondui de Adam e Eva disente: "Vos ancora no ia nase, ma aora vos porta la peca orijinal. Cual spesie de relijio es esta? Me no pote aseta lo."
Arturo Bastes, un bispo catolica local, ia responde par dise ce la presidente es "un demente" e ia recomenda ce on prea per la fini de sua "vosis blasfemosa e propensas autocrata".
Duterte es un critica conoseda e franca de la Eglesa Catolica en un pais do plu ca 90% de la popla es cristian, e la majoria grande de estas es catolica. Sua comentas ia provoca un reata negativa e multe debate enlinia.
El ia emprende sua posto presidente en julio 2016 con un disposa sever contra crimin e froda, ma on ia critica multe sua campania de matas estralegal contra vendores e usores de drogas. Plu temprana en esta anio, la Corte Criminal Internasional ia abri un investiga criminal sur estas.
Duterte ia dise ce el ta mata "felis" miliones de drogamanicas en la Pilipinas, e ia responde a criticas internasional de sua politica par descrive Barack Obama, presidente pasada de la SUA, como un "fio de puta" e la Uni European como ipocritas.
En april 2016, el ia parla a un asembla de campania elejal sur la omiside e viole sesal en 1989 de un misionor fema australian en Davao, do el ia es alora maior. Duterte ia dise: "Me ia es coler car el ia es violeda. Ma el ia es tan bela -- la maior ia ta debe es la prima -- un peri grande." Pos esta comentas, sua ofisia ia espresa vergonia.
@T Brasil clui e reabri sua frontera per venezuelanes
@L aora_oji/2018/brasil_clui_e_reabri_sua_frontera_per_venezuelanes
====== Brasil clui e reabri sua frontera per venezuelanes ======
7 agosto 2018
Brasil ia reabri sua frontera norde con Venezuela a persones fujinte de la problemes economial e political ala, pos clui lo per tempo corta. La Corte Suprema ia reversa un comanda plu temprana per clui la frontera asta cuando Brasil ta crea un situa conveninte per reseta la enflue grande de persones.
Persones autoriosa en la stato brasilera Roraima (a media de la rejion de la rio Amazon) dise ce sirca 500 venezuelanes traversa la frontera a cada dia.
La frontera ia es reabrida a migrores venezuelan pos alga oras ier. Un atenta parente de asasina contra Nicolás Maduro, la presidente de Venezuela, en la fini de semana, ia aumenta an plu la tensa en la pais.
Rosa Weber, judor de la Corte Suprema, ia anunsia sua deside corta ante medianote. El ia dise: "Lo no es justable ce on segue la via fasil de 'clui la portes' par causa de difisiles per ospita refujadas."
La comanda tempora par un judor de corte basa ia dise ce la frontera va resta abrida per brasileras e otra nonvenezuelanes. On ia intende ance abri lo per venezuelanes ci reveni de Brasil. Fronteras de mar e aira no ia es afetada par la deside.
En la tre anios pasada, multe miles de venezuelanes ia fuji a paises visina, xef Colombia e Brasil, xercante un situa economial plu bon. La plu de los ci ia traversa a Brasil en menses resente abita aora en state xocante mal sur la stradas de la Boa Vista, la capital povre de la state Roraima.
Tra menses, autoriosas en Roraima ia recomenda ce on clui la frontera. Los dise ce la servis publica ia colasa e ce la migra ia causa un crese notable de crimines.
La governa sentral de Brasil ia oposa tota cluis de frontera, razonante ce venezuelanes comun sufri la resultas de un crise umaniste e ce Brasil debe continua aida.
@T Burcas e nicabes es proibida en Danmarc
@L aora_oji/2018/burcas_e_nicabes_es_proibida_en_danmarc
====== Burcas e nicabes es proibida en Danmarc ======
1 junio 2018
Danmarc ia legi un proibi contra velos de fas intera. Alga otra paises de la Uni European ia fa ja un lege simil, cual afeta xef femes muslim ci porta un nicab o burca.
La lege dansce ia es asetada par 75 votas contra 30 en la parlamento ier, e va deveni obligante a 1 agosto. Los ci iniora la proibi va debe paia 1000 kroner ($157). La multas per ofendores repetente va es desuple plu alta.
La linguaje de la lege nova no spesifa femes muslim, ma dise ce "cualcun ci porta un veste cual asconde la fas en publica va es punida par multa".
La ministro dansce de justia ia dise: "En termas de valua, me vide un discute de cual spesie de sosia nos debe ave con la radises e cultures cual nos ave, ce nos no covre nosa fas e oios, nos debe pote vide lunlotra e nos debe ance pote vide la espresas de fas de lunlotra, lo es un valua en Danmarc."
Amestia Internasional ia descrive la vota dansce como "un viole prejudosa de la diretos de femes". Ma en la anio pasada, la Corte European de Diretos Umana ia suporta un proibi simil en Beljia, disente ce la armonia comunial es plu importante ca la direto individua de espresa relijiosa.
Frans ia es la pais prima en Europa cual ia proibi velos de fas intera en april 2011, a sete anios pos sua introdui de un lege proibinte la porta de simboles relijiosa fasil vidable en scolas. Lo ia es segueda pos alga menses par Beljia, do on ia deslegali cualce veste cual asconde la identia de un person en locas publica.
A pos, proibis completa o partal ia es asetada en Osteraic, Balgaria e la stato Bayern en Deutxland sude. La parlamento nederlandes ia acorda un proibi en la tarda de 2016, espetante un aproba par sua salon alta.
@T Cameras deteta enganiores en un duimaraton xines
@L aora_oji/2018/cameras_deteta_enganiores_en_un_duimaraton_xines
====== Cameras deteta enganiores en un duimaraton xines ======
30 novembre 2018
Cuasi 250 corores en un duimaraton ia es descovreda como enganiante par cameras de trafica, cual ia rejistra sua usa de un via rapida tra arboretas.
La organizores de la corsa en Shenzhen, Xina, ia trova ance 18 partisipores ci ia porta numeros falsa e tre corores descriveda como "finjores". Tota la 237 persones ci ia froda es aora proibida de corsa en maratones.
"La core de maraton es no mera un eserse, lo es un metafor per la vive, e cada coror es encargada per se," la organizores ia comenta.
Imajes caturada par cameras de polisia ia mostra corores ci ia pasa tra arboretas a un otra strada visina, en loca de continua longo la via coreta e turna a la fini.
La enganiores ia core tra du o tre cilometres min ca la distantia completa de 21 cilometres.
Esta corsa aveni anial en la site cuatro de la plu grandes en Xina, e lo atrae tipal sirca 16 mil partisipores.
La reportas de la engania ia provoca la jornal Dial de la Popla, un de la publicis la plu grande en Xina, a urje corores a "respeta la maraton e respeta la spirito de sporte" en un editorial.
En la anio pasada, organizores de la duimaraton de Beijing ia introdui un sistem de reconose fases, per preveni ce persones sustitui otras per core per los.
Xina ia aveni 1072 maratones e otra corsas de strada en esta anio. Esta cuantia es plu par 22 ca en 2011, longo la Asosia de Atletisme Xines.
@T Canada esperia un semana de temperatur estrema
@L aora_oji/2018/canada_esperia_un_semana_de_temperatur_estrema
====== Canada esperia un semana de temperatur estrema ======
6 julio 2018
En Canada, tredes-tre persones ia mori en un onda de caldia forninte la parte sude de la provinse Quebec.
La temperatur nonormal ia comensa a un semana ante aora, e ia ateni 35°C con umidia alta. Persones ia mori a cada dia en esta semana. La plu de los ia ave entre 50 e 80 anios.
La caldia es la plu estrema cual la provinse ia esperia en desenios. On recomenda bevi multe acua e resta en ombra.
La site Montreal ia abri pisinas e construidas con frescadores per la usa de la popla. Respondores medical prima ia visita casas de 15 mil abitores perilida, per serti sua bonstate.
18 de la 33 moris ia aveni en Montreal, la site la plu poplada en la provinse. Otra moris ia aveni en la rejiones ensircante.
Ondas de caldia pote es spesial perilosa per persones multe joven o multe vea e debil. La plu de la montrealanes ci ia mori ia ave plu ca 65 anios, problemes medical esistente, e no frescador.
La temperatur promedia en Montreal en esta parte de la anio es sola 25°C. On predise ce la caldia va redui multe oji, cadente asta 24°C.
@T Canada legali canaba recreal
@L aora_oji/2018/canada_legali_canaba_recreal
====== Canada legali canaba recreal ======
17 otobre 2018
Canada ia deveni la pais du en la mundo cual legali la posese e usa recreal de canaba.
La mercato nasional per canaba ia abri a medianote, an entre demandas restante sur sua efeto a la sania, la lege e la securia publica.
On ia envia informa a 15 milion casas sur la leges nova e la campanias de consensia. Ma on ave ancora consernas, incluinte sur esce la polisia es sufisinte preparada per trata motoristes drogosa.
Uruguai ia es la pais prima do canaba recreal ia es legalida, ma ance Portugal e Nederland ia descriminali la sustantia.
Provinses e munisipas canadian ia fa menses de prepara per la fini de la proibi. La provinses e teritorios es encargada per defini multe de la detalias sur la locas do on pote compra e consuma canaba en sua rejiones. Esta ia crea un misca de leges tra la pais, con ce rejiones eleje sistemes plu o min restrinjente per vende e usa la droga.
Botecas en la provinse Newfoundland, cual ave la zona de ora la plu este en Canada, ia abri a la momento de medianote per la vendes legal prima de canaba en la pais.
La legali reali un promete campaniante de 2016 par la ministro xef Justin Trudeau, la xef de la Partito Libraliste cual governa aora.
El ia razona ce la leges cual criminali canaba, e cual esiste ja tra cuasi un sentenio, ia es nonefetosa, car canadianes es ancora entre la usores la plu major de la droga en la mundo. El ia dise ce la lege nova es desiniada per teni drogas ultra la manos de minores e profitas ultra la manos de criminores.
La governa federal predise ce lo va recolie $400 milion per anio en revenu impostal sur la vende de canaba.
@T Cenianes perde sua casas per la crea de un autovia
@L aora_oji/2018/cenianes_perde_sua_casas_per_la_crea_de_un_autovia
====== Cenianes perde sua casas per la crea de un autovia ======
24 julio 2018
On ia desconstrui la casas de sirca 30 mil persones en un visineria misera en Nairobi, la capital de Cenia, per crea spasio per un autovia nova con custa de $20 milion.
La abitores de Kibera, la visineria misera la plu grande de la site, ia es avisada a sola du semanas ante cuando los ia debe parti. Buldozeres ia avansa a lus prima, e on ia regarda sin potia.
La grupo per diretos umana Amnestia Internasional ia condena la descasis, ma ofisiores cenian ia dise ce la popla de la area ia es abitores nonlegal.
La abitores ia oposa la strada nova en corte, presentante du defias legal, ma ia perde en la anio pasada cuando un judor ia deside ce la autovia va benefica la popla. Autoriosas dise ce la autovia nova va redui la trafica en la ueste de la site.
A lundi, alga de la abitores de Kibera ia senta con sua posesedas e ia cria angusada.
Jacqueline Anzemo, un madre de tre enfantes ci ave 30 anios e ia abita en Kibera tra 16 anios, ia dise: "Nos ia es elevada asi, nos ia vade a scola asi, e nos ia sposi asi. Aora nos no sabe do nos va vade."
Ance Arthur Shakwira ia oserva cuando on ia crase la loca do el ia abita tra plu ca du desenios. "Me ia prende mea posesedas a un visina. Mea sposa e enfantes ia move a la casa de mea frate per reposa ala per la presente. Me no sabe de do me va comensa. Nos no ia refusa ce la strada pasa, ma on debe considera nosa bonstate."
On ia desconstrui du scolas prima e un orfaneria. Amnestia Internasional ia descrive la descasis como un trajedia nonlegal, notante la angusa de vide enfantes joven ci porta la posesedas de sua familias a via.
Irungu Houghton, la dirijor de Amnestia per Cenia, ia ajunta ce la desconstruis tradi un acorda ja fada per deside sur un projeta de relocali ante descasi.
La departe de la governa cenian per stradas urban ia refusa comenta direta, mera referente a un declara plu temprana en cual lo ia dise ce lo colabora con otra grupos per relocali la abitores.
@T Cloro ia es cisa usada en la ataca a Duma
@L aora_oji/2018/cloro_ia_es_cisa_usada_en_la_ataca_a_duma
====== Cloro ia es cisa usada en la ataca a Duma ======
7 julio 2018
Un organiza vijilante sur armas cimical dise ce cloro ia es cisa usada en un ataca contra la site Duma en Suria en april. La reporta tempora par la Organiza per la Proibi de Armas Cimica (OPCW) dise ce on ia trova "cimicales organica clorida diversa", ma no indica de gases nerval.
Desuples de sitadanes ia es matada en la ataca contra la vila ocupada par rebelores en la rejion Guta Este prosima a Dimashq. La governa suri nega ce lo ia esecuta atacas par armas cimical. Pos la ataca a Duma, aviones militar de la SUA, Britan e Frans ia ataca blancos militar governal.
Potias nova ia es resente donada a OPCW per nomi los ci usa armas cimical. Sua investiga sur la ataca a Duma continua.
A 7 april, medicistes en Duma ia reporta ce on ia trae plu ca 500 pasientes a sentros medical con sintomes cual ia sujesta esposa a un cimical. Laborores de salva ia reporta ance un odor forte de cloro en la aira pos un ataca airal contra du locas en Duma.
OPCW ia envia un mision rexercante a Duma a sirca un semana a pos. Sua reporta aora dise ce du samples de silindres de gas a la sena ia indica positiva sur cloro.
Pos la ataca, un investiga par la Nasiones Unida ia dise ce la atesta sujesta la usa de cloro, ma ce alga persones ia mostra sintomes plu coerente con esposa a un gas nerval. An tal, la reporta par OPCW ia dise ce "no gases nerval organofosforal o produidas de sua descomposa ia es detetada" a la locas.
La aseja de Guta Este, un rejion cultival estra la capital do a la min 265 000 nonmilitares ia abita, ia dura tra sinco anios, e ia deveni la aseja la plu longa en istoria moderna. Lo ia fini en april, pos un ataca de du menses par fortes progovernal, suportada par atacas airal rusce, cual ia destrui casas, companias e ospitales e ia mata plu ca 1700 persones.
@T Compensante per la retira SUA de la acorda de Paris
@L aora_oji/2018/compensante_per_la_retira_sua_de_la_acorda_de_paris
====== Compensante per la retira SUA de la acorda de Paris ======
23 april 2018
Michael Bloomberg, maior pasada de York Nova, dise ce el va paia $4,5 milion como un sustitui per la obliga finansial a la acorda climal de Paris cual la SUA ia abandona.
El ia esplica ce el senti un encarga de aida boni la ambiente par causa de la deside de presidente Donald Trump de estrae la pais de la acorda. La retira ia es anunsiada en junio de la anio pasada e ia provoca desaprobas internasional. Sua efeto es ce la SUA va es la sola pais cual no partisipa en la acorda.
La acorda de Paris obliga la SUA e 187 otra paises a manteni la temperatur global levante a "clar su" 2°C plu ca la nivel preindustrial.
Bloomberg ia comenta: "America ia fa un promete e, como un american, si la governa no va fa lo, alora tota de nos ave un encarga. Me pote fa lo. Donce, si -- me va envia a los un xece per la mone cual America ia promete a la organiza, como si los ta reseta lo de la governa federal."
En la anio pasada, sua asosia carital, Filantropias Bloomberg, ia ofre $15 milion per covre un otra manca relatada a cambia climal.
@T Corea Norde acorda clui un compleso de misiles
@L aora_oji/2018/corea_norde_acorda_clui_un_compleso_de_misiles
====== Corea Norde acorda clui un compleso de misiles ======
19 setembre 2018
La presidente de Corea Sude dise ce Kim Jong-un ia acorda descomuta un de la locas xef de proba e lansa misiles en Corea Norde.
Pos consenta en Pyongyang, Moon Jae-in e Kim Jong-un "ia acorda un modo de reali la desnucleali", longo Moon. Kim ia descrive la acorda como "un salta a ante" en dirije a pas militar sur la penisola. El ia dise ance ce el espera "visita Seoul en la futur prosima". El ta deveni la xef prima de Corea Norde ci ta fa tal.
La tema xef de la consenta ia es la problem de desnucleali. An si la SUA e Corea Norde ia acorda jeneral labora per acel gol, la negosias ia sesa progresa. Aora, Pyongyang ia fa un paso per reconfirma sua sinseria.
Moon ia dise ce Kim ia "acorda clui permanente la proberia de motores de misiles e compleso de lansa misiles a Tongchang-ri", e ce, importante, esta va aveni "con la presentia de espertas de nasiones pertinente" ci va serti ce lo no funsiona plu.
El ia dise ce Kim ia acorda ance clui la compleso nucleal a Yongbyon -- sur cual on crede ce Corea Norde ia produi ala la materia usada en sua probas nucleal -- ma sola si la SUA ta fa alga ata resiproca. On no ia spesifa la detalias de esta.
Corea Norde ia esplode sua proberia nucleal xef a Punggye-ri a tempo corta ante la consenta de Kim con presidente Donald Trump de la SUA en junio.
La du Coreas ia avansa ance a tema de relatas mutua, anunsiante projetas per lia sua ferovias, permete plu reunis per familias separada par la frontera, e colabora sur aida medical.
Moon ia invita Kim a Seoul, la capital de Corea Sude, sujestante ce la visita ta aveni ante la fini de esta anio. La du va aspira ance ospita juntada la Juas Olimpial de Estate en 2032.
La ministro de defende de Corea Sude e la xef de la armada de Corea Norde ia suscrive ance un acorda per redui la tensa militar, instituinte un zona de cuxin longo la frontera per preveni scaramuxas nonintendeda.
La suscrive ia aveni a media de un visita de tre dias a Pyongyang par Moon. La labora per desnucleali entre Corea Norde e la SUA ia ariva resente a un state de nonprogresa, e la consenta en Pyongyang de esta semana va forti la rol de la Sude como un reconsilior.
An tal, multe oservores averti ce, asta aora, la Norde ia fa no pasos major per fini sua program controversa de armas nucleal.
@T Corea Norde es dedicada a desnucleali
@L aora_oji/2018/corea_norde_es_dedicada_a_desnucleali
====== Corea Norde es dedicada a desnucleali ======
9 marto 2018
On ia anunsia ce Kim Jong-un, gidor de Corea Norde, e Donald Trump, presidente de la SUA, va fa un consenta personal en maio, pos menses de enemia mutua.
La informa ia es furnida par ofisiores de Corea Sude pos discutes con Trump a la Casa Blanca. Los ia comunica un mesaje de Kim, disente ce el es "dedicada a desnucleali".
Moon Jae-in, presidente de Corea Sude, ia dise ce la anunsia "ia veni como un miracle". El ia comenta: "Si Presidente Trump e Dirijor Kim consenta pos un confere de xefes intercorean, la desnucleali completa de la Penisola Corean va entra forte a la bon curso."
La move ia aveni a alga dias pos un consenta de un delega de Corea Sude con Kim en Pyongyang, Corea Norde.
Parlante estra la Casa Blanca pos discute con Trump, Chung Eui-yong, avisor de securia nasional de Corea Sude, ia comunica un mesaje ce Kim ia "promete ce Corea Norde va asteni de tota plu probas nucleal o de misiles".
Trump ia dise ce la developa representa "progresa eselente" ma ce punis a Corea Norde va resta ativa asta cuando on ateni un acorda firma.
La ambasador de Corea Norde a la Nasiones Unida ia dise ce "la deside corajosa" de Kim va aida securi "pas e stablia en la Penisola Corean e la rejion de Asia este".
On ave ancora no indica do la discutes Trump--Kim va aveni, ma locas probable inclui Beijing e la zona desmilitarida a la frontera corean.
Corea Norde es isolida tra desenios par causa de sua maltratas bon documentida de diretos umana e sua laboras per reali armas nucleal, contra leges internasional. Lo ia fa ses probas nucleal, e ave misiles capas de ateni la SUA. Lo dise ce estas es nesesada per serti sua survive.
Ma la ospita par Corea Sude de la Juas Olimpial de Inverno ia crea un posible nonespetada per diplomatia. Discutes rara entre la du Coreas ia aveni per fasili la presentia coreografida de Corea Norde.
En esta semana, Corea Sude ia fa discutes importante con Kim Jong-un en Pyongyang, e ia reveni disente ce la Norde va abandona sua armas nucleal si lo senti ce lo ave no razona per reteni los.
La anunsia par Chung ia conteni cuatro elementos xef: (1) Kim es disposada a consenta con la presidente SUA; (2) Corea Norde es "dedicada a desnucleali"; (3) lo va sesa tota probas nucleal e de misiles; (4) lo comprende ce eserses militar de la SUA e Corea Sude "nesesa continua".
Corea Norde ancora no ia promete un abandona completa de sua armas nucleal, e on no sabe esata cual lo esije par intercambia. Ja a ante, la Norde ia sesa sua probas a tempo de discutes, ma ia recomensa cuando lo ia perde sua pasientia o ia senti ce lo no reseta lo cual lo esije.
@T Corea Norde menasa cansela sua consenta con Trump
@L aora_oji/2018/corea_norde_menasa_cansela_sua_consenta_con_trump
====== Corea Norde menasa cansela sua consenta con Trump ======
16 maio 2018
Corea Norde ia dise ce lo va cisa retira se de un confere con Donald Trump, presidente de la SUA, si la SUA insiste ce lo abandona sua armas nucleal.
On ia espeta ce la consenta entre Trump e Kim Jong-un va aveni a 12 junio. Ma en un declara coler, la visministro txoson de esternas ia acusa la SUA de parla fretosa e de ave intendes malvolente. Kim Kye-gwan acusa direta John Bolton, la conselor SUA de securia nasional, disente: "Nos no asconde nosa senti de repulsa par el."
La acorda monumental per un encontra entre Kim e Trump ia reali cuando Corea Norde ia dise ce lo intende desnucleali la penisola corean. La implicas esata de esta resta nonclar, ma la pais ia invita jornalistes stranjer a oserva la desasembla de sua proberia nucleal xef en la parte du de esta mense.
La anunsia par Kim, nasional difusada, dise ce si la SUA "trapi nos e esije uniladal ce nos abandona armas nucleal, nos va es no plu interesada par discutes" e "va debe reconsidera" sua partisipa en la consenta a 12 junio.
El ia dise ce Corea Norde ave "esperas alta" ma ce lo es "multe nonfortunosa ce la SUA provoca nos ante la confere par sputa dises asurda".
On sabe ce Kim Kye-gwan es forte respetada entre la gidores de Corea Norde. El ia partisipa en negosias presedente con la SUA. Lo es multe nonprobable ce sua comentas no ia es personal aprobada par Kim Jong-un.
Bolton, political conservaliste, es un defendor dedicada de la potia de la SUA e de usa lo a stranjer. En la pasada, el ia dise ce un ataca preveninte contra Corea Norde ta es "perfeta legal". En intervisas en la fini de semana, el ia comenta ce Corea Norde pote segue la model libi de desnucleali: Libia ia abandona sua armas ante prende aida economial.
A oras ante la anunsia, en un indica de problemes cresente, Corea Norde ia retira se ance de un consenta ajendida per ier con Corea Sude. Acel ia es un reata a la comensa de eserses militar juntada par la SUA e Corea Sude. Corea Norde ia dise ce lo va permete la eserses, ma plu tarda lo ia descrive los como "un disturba militar provocante" cual sumina sua atentas diplomata.
@T Datos de abandonores de Corea Norde es esposada
@L aora_oji/2018/datos_de_abandonores_de_corea_norde_es_esposada
====== Datos de abandonores de Corea Norde es esposada ======
28 desembre 2018
Cuasi 1000 abandonores de Corea Norde ia esperia un esposa de sua datos personal pos un ataca contra un computador a un sentro de relocali en Corea Sude.
On ia trova ce un computador personal a la sentro, manejada par la governa, ia es "infetada con codigo malvolente".
La identia de la atacores e la orijina de la siberataca es ancora no clar.
A multe veses, Corea Norde ia menasa silenti abandonores en la Sude ci fa declaras degradante contra la governa.
Ma a esta ves, la governa en la Sude no ia indica Corea Norde como suspetada, an si multe espertas de sibersecuria averti ja sur la sofistica cresente de atacores de la Norde.
Un de la atacas la plu famosa liada a Corea Norde en anios resente ia es contra la comersia de diverti de Sony en 2015. Acel ataca ia destrui cuantias enorme de informa e ia distribui enlinia epostas e datos personal delicata.
@T Deluvias e tera liscante en Japan
@L aora_oji/2018/deluvias_e_tera_liscante_en_japan
====== Deluvias e tera liscante en Japan ======
8 julio 2018
A la min 60 persones ia es matada par inondas e liscas de tera en areas ueste de Japan. Desuples de otra persones manca.
La plu de la moris ia aveni en la prefetia Hiroshima, cual ia es bateda par un pluve deluvial cual ia comensa a jovedi. Sentos de casas es danada.
On ia comanda ce sirca 1,5 milion persones parti de sua casas, e consela la mesma a tre milion otras.
Autoriosas dise ce lo es cisa la desastre climal la plu grave cual Japan ia esperia en desenios. Shinzo Abe, la ministro xef, ia dise ce on fa "un corsa contra la tempo" per salva e evacua persones.
Alga de la vitimes ia deveni enterada su la tera liscante. Miles de polisiores, pompores e soldatos partisipa en operas de xerca e salva.
En la vila Motoyama, a sirca 600 cilometres a ueste de la capital Tokyo, 583 milimetres de pluve ia cade entre la matina de venerdi e lo de saturdi, longo la ajenteria meteorolojial de la pais. On previde plu pluve en la dias veninte.
Kyoto, a sirca 300 cilometres a este de Hiroshima, ia es ance deluviada. Persones ci abita prosima a la rio es nervosa car la saison de siclones comensa aora.
@T Democratas regania sejas en la Salon Basa de la SUA
@L aora_oji/2018/democratas_regania_sejas_en_la_salon_basa_de_la_sua
====== Democratas regania sejas en la Salon Basa de la SUA ======
7 novembre 2018
En la elejes mediaperiodal en la SUA, la Partito Democrata ia gania la controla de la Salon Basa a la ves prima en oto anios, ma la Republicistes de presidente Trump ia forti sua controla de la Salon Alta.
On ia regarda la vota ier como un referendo sur un presidente polalinte, an si el mesma no va aspira la reeleje asta 2020.
La resulta confirma la tende istorial ce la partito cual no es en la Casa Blanca fa ganias a media de la periodo presidental.
Democratas ia converti la enerjia de la resiste libraliste contra Trump a ganias elejal, en la vota nasional prima pos la asende a potia par la presidente a du anios ante aora.
On predise ce la Partito Democrata va gania la 23 sejas cual los nesesa per prende la controla de la Salon Basa de la Congresa. Esuanes ia vota per tota 435 sejas en la Salon.
Aora, la Democratas va pote inisia investigas sur la atas manejal e comersial de Trump, de sua declaras de revenu impostable asta alga nonconvenis posible entre sua interesas. Los ta pote ance impedi plu efetosa sua projetas legal, incluinte sua promete de construi un mur longo la frontera con Mexico.
Aspirores fema ia susede notable bon en un sicle elejal cual on ia eticeti como la Anio de la Fem.
Du Democratas de 29 anios, Alexandria Ocasio-Cortez e Abby Finkenauer, va deveni la femes la plu joven en istoria ci gania sejas en la Salon Basa.
Ilhan Omar e Rashida Tlaib es la femes muslim prima, e Sharice Davids e Debra Haaland es la femes prima american orijinal, ci deveni elejeda a la Congresa. Tota es Democratas.
@T Deutxland no litiga du rapores antisemita
@L aora_oji/2018/deutxland_no_litiga_du_rapores_antisemita
====== Deutxland no litiga du rapores antisemita ======
17 junio 2018
Du rapores deutx no va es litigada pos un furia publica sur un testo antisemita. On ia critica Kollegah e Farid Bang per compara sua corpos musculosa con los de prisonidas a Auschwitz, e per sujesta un Olocausto nova.
Ma litigores ia dise ce libria artal es garantiada par la constitui. Los ia dise ce la rap gangsteral, an si ofendente, no coresponde a un nega de la Olocausto o un provoca de violentia. Un portavose per la ofisia litigante de Düsseldorf ia clari ce esta spesie de rap es vulgar, misojine e omofobica, ma litiga no va es posible.
La controversa sur la du rapores foca a du linias en sua album la plu resente JBG3. (La leteras es un corti de la parolas deutx per "joven, savaje, bonaspetante".) Un peso inclui la testo "Mea corpo es plu definida ca los de prisonidas de Auschwitz", e un otra conteni la frase: "Me fa un plu Olocausto, veninte con la Molotov."
Cuando la industria musical de Deutxland ia deside dona a esta rapores la premio Echo en la categoria hiphop/urban, artistes tra la pais ia condena sin esita. Par causa de la responde furiosa, la industria ia abandona completa la premios Echo, como un marca ruinada.
La museo Auschwitz en Polsca sude inclui la locas de la casernas, cambras de gas e otra construidas a la campas de consentra de Auschwitz e Birkenau, do sirca 1,1 milion persones ia es matada par la nazis en la ocupa deutx en la Gera Mundal Du. La plu de la matadas ia es iudis european.
@T Du monces fura mone per fa juas de fortuna
@L aora_oji/2018/du_monces_fura_mone_per_fa_juas_de_fortuna
====== Du monces fura mone per fa juas de fortuna ======
11 desembre 2018
Du monces fema ci ia labora en un scola catolica en California ia confesa fura sirca $500 mil per aposta en casinos en Las Vegas.
Mary Kreuper e Lana Chang ia prende la mone de un conta cual ia conteni paias per instrui e otra donadas. Los ia jubila resente.
Kreuper ia es xef de la scola tra 29 anios, e Chang ia labora como ensenior tra sirca 20 anios. On crede ce los ia fura la mone tra minima un desenio, per spende lo en viaja e juas de fortuna.
Ier, sua eglesa ia dise ce la monces ia espresa "un repenti profonda" sur sua atas. La organiza ia ajunta ce la polisia es informada, ma ce on no va fa acusas criminal contra la duple.
La ordina de la monces, la Sores de San Josef de Carondelet, ia declara: "La monces ia confirma la froda de mone e ia coopera en la investiga. Nosa comunia es consernada e tristida par esta situa e regrete cualce dana a nosa relata longa con la familias de la scola."
La arcibispia de Los Angeles ia dise ce la eglesa ia descovre la manca de la mone en un esamina normal.
Lo pare ce la monces ia pote asconde sua atas par depone alga xeces, paiada a la scola, a un otra conta de banco cual la scola no ia usa.
@T eBay litiga contra la envia de epostas par Amazon
@L aora_oji/2018/ebay_litiga_contra_la_envia_de_epostas_par_amazon
====== eBay litiga contra la envia de epostas par Amazon ======
18 otobre 2018
La mercato enlinia eBay va litiga contra Amazon, acusante Amazon de usa taticas nonlegal per atrae vendores. Lo dise ce representores de Amazon ia malusa la sistem interna de eposta de eBay per contata vendores, en un viole de sua politica.
Amazon ia refusa comenta sur la caso, cual segue un letera de eBay esijente un fini a la pratica. A ante, lo ia dise ce lo investiga la acusa.
eBay ia declara ce laborores de Amazon ia crea contas de eBay per solisita vendores, comun enviante mesajes a mera minutos pos prepara sua profiles. Lo dise ce esta ativia ia aveni ja en 2015 e ia envolve desuples de representores de Amazon, de ci cadun ia envia sentos de epostas.
Un vendor ia averti eBay sur la problem a alga semanas ante aora, e eBay ia demanda ce Amazon para lo.
La declara litigal dise ce la mesajes mostra ce Amazon ia sabe ce sua pratica viole la politica de usa de eBay. Lo cexa ce la pratica de Amazon "pare es un parte de un model plu grande de condui atacosa e nonmoral" par la compania vendente.
eBay, cual posese ance StubHub, un revenderia de biletas, xerca la ofre de compensa monal par un litiga con juria. La compania californian, cual ia inisia se en 1995, ia es un abrivia de vende enlinia, developante un plataforma per lia comprores a vendores.
Aora lo ave plu ca 175 milion comprores ativa, con vendes de cuasi $90 mil milion par sua plataforma en la anio pasada. Ma sua brilia ia pali entre competores, spesial car la domina de Amazon atrae plu mercatores a acel plataforma.
En la anio pasada, plu ca un dui de la cosas vendeda par Amazon ia veni de vendores esterna. Intera, on estima ce Amazon representa sirca un dui de la dolares enlinia paiada a vendores en la SUA.
@T Empleadas critica Google sur un xercador sensurante
@L aora_oji/2018/empleadas_critica_google_sur_un_xercador_sensurante
====== Empleadas critica Google sur un xercador sensurante ======
17 agosto 2018
Sentos de empleadas de Google ia scrive a la compania per protesta contra la intende de crea un "xercador sensurante" en Xina.
Los dise ce la projeta leva "demandas urjente moral e etical" e ia urje la compania a deveni plu transparente. "A presente, nos no ave la informa nesesada per fa desides etical informada sur nosa labora," los ia ajunta.
Google, cual ia parla nunca publica sur esta projeta, ia refusa comenta.
La compania ia abandona Xina a oto anios ante aora, protestante contra la leges de sensura e alegas de sibercrimines par la governa de la pais. Ma reportas en la mense pasada ia sujesta ce lo ia labora secretosa sur un servi nova de xerca xines, interna nomida Dragonfly ("libela").
La plataforma, cual ancora no ia reseta la aproba de la governa xines, bloci alga locas de rede, como ance xercas sur consetas como diretos umana e relijio.
Esta ia coleri alga empleadas ci teme ce los ia labora nonsabente sur tecnolojia cual va aida Xina a supresa la espresa libre. En sua letera, cual los ia comparti a organizas jornaliste diversa, los dise ance ce la xercador sensurante contradise la frase "no es malvolente" en la codigo de condui de Google.
Lo no es la ves prima cuando empleadas de Google ia oposa publica la desides de la compania. En April, miles de empleadas ia critica sua labora sur un program militar esuan per developa intelijentia artifis per avionetas. A pos, Google ia fini sua acorda con la Pentagon.
La cuantia de usores de interede en Xina es la plu grande de mundo, ma companias esuan de tecnolojia ia encontra difisiles en susede en Xina par causa de restrinjes e blocis de contenida. Facebook, Google, Twitter e Instagram es proibida, ma Google ave ancora tre ofisias en la pais.
@T Esplodes a un airoporto suri
@L aora_oji/2018/esplodes_a_un_airoporto_suri
====== Esplodes a un airoporto suri ======
2 setembre 2018
Suria ia nega reportas ce un serie de esplodes oji a un airoporto militar prosima a Dimashq ia resulta de atacas airal israeli.
Fontes militar suri ia dise ce la pumes forte, reportada a la airoporto de Mezzeh, ia es causada par un esplode en un teneria de armas cual ia resulta de un rompe eletrical.
Israel ia inisia atacas airal contra Suria en la pasada, e on ia acusa lo de dirije estas contra la airoporto de Mezzeh en la anio pasada.
La xef de la Oserveria Suri per Diretos Umana, un grupo monitorinte, ia dise ce la airoporto militar ia es cisa colpada par "un misil israeli" xutada supra la teritorio ocupada de la Plano Alta Golan. La airoporto conteni empleadas de la Forte de Aira Suri.
Ma un fonte militar suri ia rejeta plu tarda la informa, disente ce la base no ia es la ojeto de un ataca israeli.
Imajes en redes sosial ia pare mostra alga esplodes potiosa en la rejion.
En maio, Israel ia dise ce lo ia ataca infrastrutur militar irani en Suria pos lo cual lo ia descrive como un ataca irani par roceto contra teritorio tenida par israelis. En la mense seguente, Israel ia dise ce lo ia tira a tera un avion militar suri cual ia entra a sua spasio de aira -- un aveni rara entre la du enemis.
En janero de la anio pasada, jornalistes de stato ia sita un dise de la armada ce alga rocetos ia es lansada a la compleso airoportal de Mezzeh, acusante Israel de bombarda la loca.
@T Facebook perde valua par crese tro lenta
@L aora_oji/2018/facebook_perde_valua_par_crese_tro_lenta
====== Facebook perde valua par crese tro lenta ======
26 julio 2018
La valua de asiones de Facebook ia cade par plu ca 20% ier, cuando la crese de revenu e usores de acel rede sosial ia fali sasia la espetas de investores.
La compania fronti un contrareata per sua trata de novas falsa e de privatia. Lo ia dise ce, a la fini de junio, lo ia ave 2,23 mil milion usores ativa mensal. Esta ia es plu ca en junio 2017 par mera 11% -- la crese la plu lenta en plu ca du anios.
Lo ia averti ance sua investores ce sua crese de spende va esede sua ganias de revenu en 2019, reduinte la profitas.
Facebook espeta un lenti de revenu car persones comensa usa posibles nova de vide min anunsias comersial. Sua crese deveni ance propulsada par mercatos min profitosa ultramar.
Lo intende ance spende miles de miliones de dolares per boni sua metodos de monitori contenidas, trasa anunsiores comersial e prosede datos de usor. Esta partes de sua opera ia es resente esaminada par organizas regulante.
La compania, cual posese ance Instagram e WhatsApp, investi aora a posibles nova como video e realia virtual.
Inisial ier, sua asiones ia cade par sirca 12% en la oras tarda en York Nova, ma la perde ia aselera cuando la compania ia presenta sua projeta de spende.
@T Febre de rata en acua contaminada en Kerala
@L aora_oji/2018/febre_de_rata_en_acua_contaminada_en_kerala
====== Febre de rata en acua contaminada en Kerala ======
4 setembre 2018
Kerala, la stato inondada en la sude de Barat, ia declara un crise de sania pos la mori de des-un persones par febre de rata en la du dias pasada.
La governa ia demanda ce cadun ci ia contata la acuas de inonda prende medisin como un media protejente, per evita un epidemica. Ofisiores ia dise ce on ave no causa direta per alarma e ce la situa es controlada.
Inondas ruinante ia mata sirca 400 persones en Kerala de pos junio. Plu ca milion otras ia es deslocada, e multe de los ia refuja se en campas aidante tra la stato.
Dotores ia dise ce la eruta no ia surprende los e ce los es preparada per trata lo. Los ia espeta vide maladias portada par acua, como colera, tifoide, diarea, epatite e febre de rata (ance nomida "leptospirose"). Persones ia comensa revade de la campas a sua casas, ma en multe de estas la acua no ia retrosede.
Asta aora, on ia deteta la maladia en sinco de la des-tre distritos cual ia es inondada.
Leptospirose es sperdeda par ratas o licuidas de animal, e pote entra a la corpo umana tra talias peti en la pel, o tra la oios, nas e boca. Sintomes inclui febre, nausea, doles musculal, vomiti e diarea.
Ratas afoca en la acua inondante, plu contaminante lo e permetente ce baterias "leptospiro" entra a la corpo umana.
@T Femes pote automobili en Arabia Saudi
@L aora_oji/2018/femes_pote_automobili_en_arabia_saudi
====== Femes pote automobili en Arabia Saudi ======
24 junio 2018
Femes saudi es aora ofisial permeteda a gida veculos pos la sutrae de un proibi cual ia esiste tra desenios. La cambia ia es anunsiada en setembre pasada, e Arabia Saudi ia dona la lisensas prima a femes en la parte plu temprana de esta mense.
Lo ia es la sola pais restante en la mundo do femes no ia pote automobili, e familias ia debe lua gidores per relatadas fema.
An tal, la cambia es acompaniada par medias intensida contra ativistes ci ia campania per la direto. La organiza Amnestia Internasional dise ce on ia deteni a la min oto ativistes per diretos fema, ci va es cisa litigada en un corte antiteroriste, riscante an un prisoni longa per sua ativisme.
Amnestia ia urje ance per reformis plu jeneral en Arabia Saudi, do femes es ancora controlada par leges de garda mas.
Grupos de diretos umana en la rena ia campania tra anios afin on permete ce femes gida veculos. On ia aresta desduples de femes per automobili en Riad en 1990, e alga femes saudi ia comensa posta videos de se a volantes en 2008 e entre 2011 e 2014.
A 5 junio, des femes ia deveni la lisensadas fema prima pos intercambia sua lisensas stranjer per documentos saudi en sites tra la pais. La autoriosas saudi ia dise ce on espeta ce sirca 2000 femes va ave ja lisensas a la tempo de sutrae la proibi.
An tal, alga omes saudi ia espresa sua nonsasia con la cambia, usante en redes sosial un parola grilida cual on pote tradui como "Vos no va automobili".
La sutrae de la proibi es un parte de la program par la prinse erital Mohammed bin Salman per moderni alga aspetas de sosia saudi. El ia gida la projeta Vista 2030 per diversi la economia de petrolio e abri plu la sosia.
Ma on ave ancora limitas a lo cual femes saudi pote fa. La lege enforsa un forma sever de islam suni nomida uahabisme, conoseda per sua regulas separante de jenero. Femes debe segue codigos de vesti e no pote asosia con omes nonrelatada. Si los vole viaja, labora o usa aida medical, los nesesa es acompaniada par -- o ave la permete scriveda -- un defendor mas.
@T Feroviores franses greve contra la reformis de Macron
@L aora_oji/2018/feroviores_franses_greve_contra_la_reformis_de_macron
====== Feroviores franses greve contra la reformis de Macron ======
3 april 2018
Gidores de tren e otra laborores de SNCF, la compania nasional de ferovia franses, ia comensa un greve major sur cual on previde ce lo va paralise viajas par tren tra Frans.
A la sera de ier, empleadas ia comensa tre menses de paras en cuando sindicatos resiste la reformis de labora par presidente Emmanuel Macron.
On previde un periodo la plu grande de greves industrial de pos la eleje de Macron en maio pasada. On espeta greves ance en la campos de eletrica, enerjia e colie de dejetadas.
A 22 marto, deses de miles de enseniores, curores e otra laborores ia greve con empleadas de ferovia -- indicante un oposa grande de la projeta de Macron per librali la campo publica.
Laborores de SNCF ave regulas jenerosa, incluinte aumentas automata anial de paia, jubila temprana, 28 dias de vacanse paiada, e proteje contra desemplea. Sua relatadas prosima pote ance reseta biletas de tren sin paia.
La governa de Macron vole retira gradal la contratas spesial de SNCF, proposante ce empleadas nova va reseta contratas simil a los cual pertine a alga partes de industria. El intende abri la ferovias nasional per compete ante la fini de 2023, seguente un esije par la Uni European.
Sola 12% de la trenes de rapidia alta va opera oji, e la servi Ouigo de custa basa no va move. Sola un de sinco trenes rejional va funsiona. Servis internasional va es min afetada: on va opera ancora 75% de trenes de Eurostar e sirca 90% de servis de Thalys a Beljia, Nederland e Deutxland.
La sindicatos de ferovia intende greve per du dias en cada sincuple asta la fini de junio. Empleadas de Air France, ci esije un aumenta de paia par 6%, ia comensa ja greve, ma la plu de volas no es afetada.
La greves va proba la potia de la sindicatos franses. Pico plu ca 11% de empleadas franses parteni a un sindicato -- un proportio entre la plu basas en la Uni European -- ma tradisional la sindicatos ia tende engrana batalias difisil, e economial e political.
Multe sindicatistes regarda Macron como la person ci desira rompe la potia de la sindicatos. En setembre, greves ia fali preveni el de reali leges cual fasili empleas e desempleas par companias.
@T Finansia nova per un disionario gailica completa
@L aora_oji/2018/finansia_nova_per_un_disionario_gailica_completa
====== Finansia nova per un disionario gailica completa ======
24 april 2018
En Scotland, on ia prepara un finansia de £2,5 ($3,5) per la fase veninte de la developa de la disionario completa prima de gailica. Faclair na Gàidhlig intende documenti la istoria, developa e usa de cada parola en la lingua, con multe plu detalias ca cualce disionario esistente.
Sua produi es posiblida par un colabora entre universias e la Sentra Nasional per Lingua e Cultur Gailica. La suporta la plu resente cual la governa de Scotland ia anunsia va es manejada par la Consilio de Finansia Scotes.
La disionario nova es un projeta de dura longa, e va coresponde a la recursos multivolumal cual on dispone per la linguas engles e scotes. Lo va ocupa cisa 30 anios de labora, e va conteni probable sirca 100 mil entradas.
La universias de Aberdeen, Edinburgh, Glasgow, Strathclyde e Sabhal Mòr Ostaig (sur la isola Skye) es envolveda en la projeta, cual es suportada par Bòrd na Gàidhlig, la organiza publica nasional con encarga per la lingua gailica.
John Swinney, ministro de educa, ci es encargada sur esta lingua celta, ia dise ce el es forte impresada par la labora fada asta aora e ce el espeta zelosa vide la avansa a la fase seguente.
La dirijor xef tempora de la Consilio de Finansia Scotes, John Kemp, ia comenta: "La disionario nova va vade ultra lingua a la cultur e erita gailica. Lo va nuri la crese e estende de educa gailica a tota edas e grados. En ajunta a sua pertine a la parlores e studiantes de gailica oji, Faclair na Gàidhlig va es un recurso importante per multe jeneras futur."
Profesor Boyd Robertson, xef de Sabhal Mòr Ostaig e reasemblor de la comite dirijante de la disionario, ia espresa sua opina: "Lo va dona a usores un disionario autoriosa, defininte e informante cual va fasili un comprende profonda de la materia e erita scriveda de la lingua, ofre comprendes detaliosa sur sua developa lingual, leteratural e cultural, e furni un sabe de la contribui fundal de la gailicas a la istoria, sosia e vive scotes. Par dona atestas direta de la lingua mesma, un disionario de esta spesie e grandia furni informas a un grado cual no ensiclopedia pote esede."
La labora preparante per la obra inclui la asembla de un banco de datos con 30 milion parolas gailica de fontes scriveda, e la usa de rejistras audio tenida en otra colies nasional.
@T Florida es bateda par un tempesta estrema
@L aora_oji/2018/florida_es_bateda_par_un_tempesta_estrema
====== Florida es bateda par un tempesta estrema ======
11 otobre 2018
En la SUA, un siclon estrema potiosa ia colpa la norde-ueste de Florida, inondante vilas costal, sumerjinte casas e rompente arbores. Siclon Michael ia ateni la costa en la posmedia de ier como un tempesta de categoria tre, con ventas de 200 cilometres per ora.
La tempesta ia lasa cuasi un dui de milion persones sin eletrica en Florida, Alabama e Georgia. Un person ia es matada par un arbor cadente.
Lo ia es tan forte ce lo ia es ancora un siclon cuando lo ia move a plu interna. Sua intensi rapida ia surprende multe persones, an si lo ia debili plu tarda.
Acua nonusual calda en la Golfo Mexico ia aumenta esta tempesta de mera un depresa tropical a soldi. Lo ia deveni ja un siclon de categoria du a martedi, e ia ateni cuasi la categoria sinco a la matina de mercurdi.
Lo ia mata a la min des-tre persones en America Sentral: ses en Onduras, cuatro en Nicaragua e tre en El Salvador. On ia comanda ce plu ca 370 mil persones en Florida evacua, ma ofisiores crede ce multe ia iniora la averti.
Michael es la tempesta tre de la plu potiosas cual ia ateni la tera xef de la SUA en istoria, pos Camille en Mississippi en 1969 e la siclon de la Dia de Labora en Florida en 1935.
La site costal Apalachicola ia reporta un leva de mar par cuasi 2,5 metres. Meteorolojistes ia sujesta ce partes de Florida va esperia levas de mar par asta 4 metres, e deluvias subita par asta 30 sentimetres de pluve.
Scolas e ofisias governal en la rejion va resta cluida en esta semana.
@T Focon savaje en California: mil persones manca
@L aora_oji/2018/focon_savaje_en_california_mil_persones_manca
====== Focon savaje en California: mil persones manca ======
17 novembre 2018
En California, SUA, plu ca 1000 persones es reportada como mancante en un focon savaje cual ia destrui miles de casas e ia mata a la min 71 persones.
On ia averti ce alga de los en la lista de asentes es cisa en bon state, ma mera nonconsensa ce on atenta trova los, o noncapas de telefoni. Ma, egal, un person ta pote es mor sin ce cualcun ta comprende ce el manca.
La focon es la plu matante en la istoria de la stato. Lo ia destrui ja 57 000 ectares, incluinte la plu de la vila Paradise, do 27 000 persones ia abita. Laborores de salva, aidada par canes, ia continua ier esamina la restas de la vila.
En soma, on ia evacua 47 000 persones. Alga de los ci ia fuji es aora casida en refujas de crise. Otras campa, o abita con sua amis o familia.
Presidente Donald Trump va visita oji California per regarda la dana e encontra persones afetada.
La departe de pompores dise ce lo ia preveni aora la sperde de sirca 50% de la focon, ma no espeta completi la controla de lo asta la fini de esta mense.
On batalia ance otra focones simil, ma min grande, incluinte un cual es prosima a San Francisco e un otra prosima a Los Angeles.
La dirijor de la Ajenteria Federal per Maneja de Crises ia descrive la dana a Paradise como "un de la desastres la plu mal" cual el ia vide en sua vive. Ofisiores dise ce Paradise va nesesa alga anios de reconstrui completa.
Investigas continua, e on ancora no ia confirma la causa de la focones. Ma alga persones litiga ja un compania local de eletrica, alegante ce la focon grande ia ensende cuando un cable transmetente de tensa alta ia fali.
Istorial, la saison de focones savaje en California ia comensa en estate e ia continua asta la temprana de autono. Espertas averti ce on ave aora un risca de los tra la anio intera.
Umidia basa, ventas calda e tera seca pos un mense sin pluve ia combina per produi un ambiente en cual focones pote aveni e sperde rapida.
@T Focones de la Sirculo Artica asta la Mar Baltica
@L aora_oji/2018/focones_de_la_sirculo_artica_asta_la_mar_baltica
====== Focones de la Sirculo Artica asta la Mar Baltica ======
19 julio 2018
Focones savaje arde en multe partes de Sveria, an tan norde como la Sirculo Artica, provocante solisitas per aida internasional.
En la posmedia ier, 44 focones ia es flaminte, de Sami en la norde estrema asta la isola Gotland en la sude. Los es xef causada par un clima calda e un secia persistente. La servi meteorolojial nasional ia averti sur risca de foco en cuasi tota la pais.
Italia ia aida par envia des-tre persones en du "bombadores de acua" de Canadair, de cual cada es capas de porta 6000 litres de acua. Noria ia envia des elicotores per aida sua visina, ses a martedi e cuatro plu ier, an con la risca de focones simil en Noria mesma.
En alga partes, la focones arde ja tra dias, e car la clima continua es multe calda e seca, lo no pare probable ce los va sesa.
On ia evacua multe persones de sua casas en Sveria, e ia recomenda ce otras clui tota fenetras e otra abris de venti per teni la fuma a estra.
La focon en Jämtland es la plu grande e la plu rapida cresente. Sola en martedi, sua area ia dupli cuasi, de 1600 ectares a 3000. Pompores no ia susede conteni lo. On retira multe pompores de vacanse per forti la opera.
Nove avertis publica major ia es fada -- un cuantia recordo -- con ce la temperatur ia resta prosima a, o plu ca, 30°C tra un tempo notable.
Un ofisior de salva en Jokkmokk, un vila popular per turistes de inverno, ia dise: "La plu resente cuando nos ia vide focones savaje de esta grado ia es a des-du anios ante aora."
La servi telefonal de crise en Sveria, SOS Alarm, ia dise ce lo labora estrema par causa de la focones. Lo reseta multe clamas de persones ci diverti se en la clima solosa e ci encontra problemes en nada, barci o bisicli.
@T Focones elinica ia es criminal ensendeda
@L aora_oji/2018/focones_elinica_ia_es_criminal_ensendeda
====== Focones elinica ia es criminal ensendeda ======
27 julio 2018
Elas ave "indicas seria" ce un focon prosima a Atina, cual ia mata a la min 83 persones en la parte prima de esta semana, ia es ensendeda con intende.
La focon ia comensa a lundi e ia afeta viletas costal cual es popular con turistes. Sirca 60 persones es ancora tratada en ospital, e 11 de los es en state grave. Desuples de otra persones manca.
Salvores xercante un falesa en Mati, un vila costal, ia trova restas umana. Multe de la vitimes ia es trapida prosima a la falesa cuando la flamas ia estende rapida, intensida par ventas tan rapida como 120 cilometres per ora. Multe survivores ia es salvada par la mar, ma otra persones no ia pote ateni la acua.
Nikos Toskas, la ministro de proteje sitadanes, ia dise ce un otra focon prosima a Atina a alga oras plu temprana ia es ance inisiada con intende. Acel focon ia mata no person. El ia ajunta ce la state climal en la locas afetada par focones ia es "estrema par causa de cambia de clima".
Plu temprana, Panos Kammenos, la ministro de defende, ia dise ce construidas nonlegal ia contribui a la desastre, descrivente la construi par abitores entre areas boscin como "un crimin" cual ia bloci la vias de fuji.
Kammenos ia es encontrada par persones coler cuando el ia visita partes ruinada par focones a este de Atina en esta semana. Cuando el ia ariva en Mati, el ia es ensircada par abitores local ci ia acusa el de abandona los.
Ma el ia dise: "Esta es un crimin de la pasada. Esta costa de Atina, tota esta imobilas, la majoria es sin lisensa, e los ia ocupa la costa sin regulas."
Entre la persones mancante es Vassiliki e Sofia Philippopoulou, du xicas jemelo de nove anios ci ia es con sua avis, prosima a Mati, cuando la focon ia aveni.
Aora oji pausa per un semana.
@T Frans gania la Copa Mundal
@L aora_oji/2018/frans_gania_la_copa_mundal
====== Frans gania la Copa Mundal ======
16 julio 2018
En futbal, Frans ia vinse Corvatsca par 4--2 en la final de la Copa Mundal, deveninte campiones de mundo a la ves du.
Finales de la Copa Mundal en anios resente ia furni poca goles, ma esta final ia ateni la soma combinada de goles en la cuatro presedente. La final la plu resente con plu ca du goles ia es en 1998, a la otra ves cuando Frans ia gania.
Lo ia egali ance la cuantia recordo de goles en un final pos 1958, cuando Brasil ia vinse Sveria par 5--2. La torneo de 2018 ia furni 169 goles -- du min ca la recordo de 171 en Brasil a cuatro anios ante aora, e en Frans en 1998.
En esta anio, la Copa Mundal ia vide 12 autogoles, e an la final ia conteni un. La corvatsce Mario Mandžukić ia fa un colpa de testa par cual el ia deveni la juor prima ci ia fa un autogol en un final de la Copa Mundal. Esta ia es an la gol prima de la max.
La franses Kylian Mbappé ia deveni la juor tre con min ca 20 anios ci ia partisipa en un final de la Copa, e la numero du ci ia fa ala un gol, pos la du par Pelé contra Sveria en 1958. Plu temprana en la torneo, Mbappé ia deveni ance la juor prima su 20 anios ci ia fa du goles en cualce max de Copa pos acel juor brasilera famosa.
En esta final, Hugo Lloris, la capitan franses, ia fa cisa la era la plu grande de la torneo intera. Cuando sua coecipor Samuel Umtiti ia reenvia la bal a el, Lloris ia atenta move la bal sirca Mandžukić, ma ia susede mera colpa lo contra el e a en sua propre gol. En esta modo, Mandžukić ia deveni la juor du ci ia fa e un gol e un autogol en un max de la Copa Mundal, e la prima en un final.
Car la torneo ia es ospitada par Rusia, on ia ave ansia sur la posible de razisme, vandalisme e violentia contra fanes ge. Ma tota ia rola lisa -- asta un invade de la campo en la final, sur cual la grupo punc Pussy Riot ia dise ce los ia inisia lo, per protesta contra alga problemes political en la pais.
Empleadas ia reata rapida per sutrae la protestores de la campo, ma alga de los ia fronti juores de ambos lados.
@T Frans proibi descrive produidas vejetal como carne
@L aora_oji/2018/frans_proibi_descrive_produidas_vejetal_como_carne
====== Frans proibi descrive produidas vejetal como carne ======
21 april 2018
En Frans, on va proibi la vende de produidas con funda vejetal su nomes cual sujesta carne, como stecas de soia e salsixes vejetaliste, car consumores es malgidada par los.
Produores va es no plu permeteda a usa "salsix", "steca" o cualce otra terma simil per descrive cosas cual no es intera o partal composada de carne. La cambia va afeta ance la presenta de produidas vejetaliste o vegan como alternativas a comedas con funda de lete.
Un fali de obedi la regula nova va incore un multa de asta 300 mil euros.
La regula ia es proposada como un ajusta a un lege de cultiva par Jean-Baptiste Moreau, un parlamentor-cultivor ci razona ce salsixes vegan e produidas con nomes simil es confusante per comprores.
El ia tuita, en franses: "Lo es importante ce on combate reclamas falsa. Nosa produidas debe es coreta identifiada: la termas #ceso o #steca va es reservada per produidas de orijina animal."
Moreau es un membro de la partito political La République En Marche! ("La Republica En Move!") de presidente Emmanuel Macron. La ajusta ia es aprobada par parlamentores franses a jovedi.
En la anio pasada, la Corte de Justia de la Uni European ia judi ce en la UE on no pote vende comedas con funda de planta su nomes usante termas como "lete", "bur" e "ceso".
@T Frans sutrae numaticos nosiva de la fondo de mar
@L aora_oji/2018/frans_sutrae_numaticos_nosiva_de_la_fondo_de_mar
====== Frans sutrae numaticos nosiva de la fondo de mar ======
24 setembre 2018
A la fondo de mar a sude de Frans, sumerjores labora per leva un resife artifis composada de multe miles de numaticos de autos. On ia trova ce la numaticos sperde contamina par cimicales nosiva.
La opera custa plu ca milion euros e es partal finansiada par Michelin, fabricor de numaticos, e ance par la governa franses. La sumerjores usa un barco con aparatos de leva.
On ia nota ce pexes ia evita la loca. Alga ia nada sirca la colie de numaticos, e no spesie ia susede abitua a los.
A un ves pasada, on ia vide tal resifes como un solve duple: un modo de dejeta numaticos vea, ma ance de crea abitadas per viventes maral e de stimula organismes a crese sur la cauxo.
En la desenio de 1980, autoriosas local ia acorda la afonda de 25 mil numaticos en la acuas a 500 metres de la costa entre Cannes e Antibes, a la Riviera Franses. En 2005, rexercores ia descovre ce la numaticos emete cimicales, incluinte metales pesosa cual perili umanas, a la ambiente.
Ma en 2015, autoriosas ia informa jornalistes ce, a la tempo de sua afonda, on ia crede ce la numaticos es "completa inerte" e ia presenta no risca. Un otra problem documentida es ce pilas de numaticos pote colasa o desintegra, disturbante viventes prosima.
On ia sutrae un colie prima de 25 mil numaticos en 2015, e intende leva 10 mil en la semanas veninte, e plu en 2019.
Resifes de numaticos ia es ance sumerjida en otra partes de la mundo. Deses de miles de numaticos ia es sutraeda de la fondo de mar a Fort Lauderdale en Florida en la SUA. E sirca Jibraltar, la numaticos ia es moveda a via par corentes en la desenio de 1970. Plu tarda, on ia usa barcos, autos e blocos de beton.
@T Fratos falsida de la Enrolas de la Mar Mor
@L aora_oji/2018/fratos_falsida_de_la_enrolas_de_la_mar_mor
====== Fratos falsida de la Enrolas de la Mar Mor ======
23 otobre 2018
Un museo biblial en la SUA ia sesa esibi fratos crededa de la Enrolas de la Mar Mor, car probas ia sujesta ce los es falsida.
La Museo de la Biblia en Washington DC ia envia sinco de sua des-ses fratos per analise en Deutxland. La resulta ia mostra "cualias noncoerente con orijina antica".
Con custa de $500 milion, la museo ia es abrida par Steve Green, un cristian evanjelial e bilionor, en 2017.
La Enrolas de la Mar Mor es un colie de manoscritos antica de la Biblia Ivri. La primas de la enrolas ia es trovada en cavas en Qumran a la costa ueste de la Mar Mor en 1947. On dise ce sua descovror ia es un pastor badaui joven ci ia xerca sua oveas perdeda.
La probas ia es comandada cuando eruditas biblial ia dise, pos esamina des-tre de la fratos nonstudiada de la museo, ce on ave un probablia alta ce alga de los es falsidas moderna.
La conservor xef de la museo ia comenta ce el ia espera ce "la proba va furni resultas diferente". Ma el ia ajunta: "Esta es un oportun per educa la publica sur la importa de serti la autenticia de ojetos biblial rara, la prosede detaliosa de proba cual ia es emprendeda, e nosa dedica a transparentia."
Esta no es la ves prima cuando la posesores de la museo ia fronti un controversa. En la anio pasada, la compania Hobby Lobby de Green ia debe paia un multa de tre milion dolares e redona multe de ojetos, cuando la Departe de Justia SUA ia acusa lo de contrabanda ojetos fabricada de Irac.
@T Froda en futbal ganaian
@L aora_oji/2018/froda_en_futbal_ganaian
====== Froda en futbal ganaian ======
8 junio 2018
Gana ia disolve sua asosia nasional de futbal pos cuando sua presidente ia es filmada en aseta parente de un dona de mone. Kwesi Nyantakyi ia prende $65 000 de un reportor ci ia desembla como un comersior desirante investi a futbal ganaian. El no ia comenta sur la alega.
La investiga secreta par Anas Aremayawa Anas, un jornaliste controversa, sta demandas sur la natur de futbal en Africa. Sua filma, titulda "Cuando avaria e froda deveni normal", ia es donada a autoriosas en la mense pasada e ia es publica mostrada a la ves prima a mercurdi.
Mustapha Abdul-Hamid, ministro ganaian de informa, ia dise ce la governa ia "deside fa direta medias per disolve la Asosia de Futbal de Gana" (AFG), sitante "la natur vasta de la putri parente". El ia ajunta ce medias tempora per la governa de futbal ganaian va es anunsiada pos tempo corta, en cuando on formi un asosia nova.
Nyantakyi es la vispresidente de la Federa de Futbal African e ance un membro de la Consilio de FIFA, cual es en efeto la comite cual governa futbal mundal. Pos emprende la AFG, el ia presenta la oposa de froda como un parte major de sua mesaje. Ma en la filma, el carga un saco de plastica negra con mone.
La ecipo de la filma ia invita el a un otel lusosa en Asia sude-ueste, prometente un consenta con un comersior rica ci desira negosia sponsoria con la AFG. Nyantakyi ia negosia e scrive un acorda de sponsoria cual ta permete envia alga de la mone a un compania poseseda par el. Si la acorda ia ta es realida, el ia ta pote profita par $4,5 milion.
@T Gas lacrimojen contra protestores en jacetas jala
@L aora_oji/2018/gas_lacrimojen_contra_protestores_en_jacetas_jala
====== Gas lacrimojen contra protestores en jacetas jala ======
2 desembre 2018
En Frans, en un fini de semana tre de protestas en "jacetas jala", persones ia asende la Arco de Vinse en la sentro de Paris, e scaramuxas ia continua con polisiores de tumulta.
La polisiores ia spara gas lacrimojen, granadas aturdinte e canones de acua sur la Champs-Élysées, e protestores ia lansa misiles e ia ensende construidas.
A la min 110 persones ia es ferida, incluinte 17 membros de la fortes de securia, e on ia fa 270 arestas.
La protestas sur la imposta de carburante ia crese a un coleria jeneral sur la custa alta de vive. Emmanuel Macron, presidente de Frans, dise ce sua politica de carburante es nesesada per combate la caldi global.
Un person ia es state grave pos la destrui par protestores de un porton de fero a la jardin Tuileries, prosima a la museo Louvre. La porton ia cade sur un grupo de persones.
On ia fura ance un fusil de ataca de un veculo de polisia, ma lo no es clar esce lo ia es cargada.
La ministreria de internas franses ia dise ce, tra la pais intera, a la min 75 mil persones ia partisipa en la protestas la plu resente de jacetas jala. La protestas ave acel nom car la partisipores porta la jaceta de vidablia cual, par lege, es presente en cada veculo.
On ia estingui cuasi 190 focones, e ses construidas ia es ensendeda.
En la confere G20 en Buenos Aires, Macron ia responde ce la protestas "ia pertine en tota no modo a un esibi pasosa de un nonfelisia o noncontentia legal." El ia ajunta ce la culpables no desira cambias, ma intende crea un caos.
@T Gera iamani: batalias recomensa a un porto major
@L aora_oji/2018/gera_iamani_batalias_recomensa_a_un_porto_major
====== Gera iamani: batalias recomensa a un porto major ======
20 novembre 2018
Batalias ia recomensa en la site Hudayda en Iaman, an pos cuando la alia militar e la rebelores huti ia acorda para sua atacas. Aviones aliada ia bombi denova pos scaramuxas entre la rebelores e la fortes progovernal.
La Nasiones Unida atenta revive discutes per fini un gera de tre anios cual ia causa un crise umaniste grande. La gera ia mata miles de persones e ia fa ce plu miliones de iamanis mori cuasi de famia.
En la semana pasada, la alia, gidada par Arabia Saudi e la Amirias Arabi Unida, ia comanda un sesa a sua atacas contra Hudayda, un porto a la Mar Roja. La alia suporta ance la discutes gidada par la NU. La hutis ia fali apare a negosias de pas en setembre.
Esta violentia nova va impedi la labora internasional per fini la gera continuante. La porto es esensal per cuasi du tris de la popla de Iaman, cual depende forte de emportas de comedas, carburante e medisin.
La gera ia comensa en 2014, cuando la hutis, un promove relijial de rebelores armada, ia esplota la debilia de la presidente e ia saisi la controla de la provinse Sada e partes visina en la norde de Iaman.
A pos, la hutis ia catura la capital, Sana, obligante ce presidente Abdrabbuh Mansur Hadi esclui se a estra la pais.
En marto 2015, la gera ia deveni multe plu sever. Arabia Saudi e oto plu statos arabi, xef de islam suni, e suportada par la SUA, la Rena Unida e Frans, ia inisia atacas airal contra la hutis, intendente restora la governa de Hadi.
@T Gidores de Cmer Roja es culpable de jenoside
@L aora_oji/2018/gidores_de_cmer_roja_es_culpable_de_jenoside
====== Gidores de Cmer Roja es culpable de jenoside ======
16 novembre 2018
A la ves prima, on ia judi ce du xefes de Cmer Roja, la rena cruel en Camputxa, es culpable de jenoside.
Nuon Chea, ci ave aora 92 anios, ia es la suordinada de la xef major Pol Pot, e Khieu Samphan, ci ave 87, ia es de xef de stato. Los ia es litigada a un corte suportada par la Nasiones Unida, sur acusas de mata muslimes txam e persones ci es etnical viet.
La judi de culpablia es la deside ofisial prima ce lo cual la rena ia fa ia es un jenoside, como definida par leges internasional.
On crede ce asta du milion persones, de ci la plu ia es etnical cmeres, ia mori en la rena corta e sistemin barbar de Cmer Roja entre 1975 e 1979.
Car la matas plu vasta de la popla camputxa no cabe a la defini streta de jenoside en leges internasional, aceles ia es prosededa como crimines contra umanas, en loca.
La du omes, ci es ja en prison per sua vive intera par causa de sua crimines contra umanas, ia reseta aora un plu condena a prisoni eterna. Los es du de sola tre persones condenada en la esiste de esta corte, nomida la Cambras Estracomun de la Cortes de Camputxa.
@T Google abandona un compleso deutx pos protestas
@L aora_oji/2018/google_abandona_un_compleso_deutx_pos_protestas
====== Google abandona un compleso deutx pos protestas ======
25 otobre 2018
Google ia abandona un projeta de abri un compleso grande en un distrito modosa de Berlin, pos un oposa forte par campaniores local.
La jigante tecnolojial ia intende crea un incubador per companias nova en Kreuzberg, ma ia dise ier ce lo va sede la loca a du asosias carital. Sua portavose no ia dise esce la oposa local ia fa un rol en la deside, ma ativistes contra la enflue de abitores rica ia declara ce la aveni mostra ce "protestas susede".
La compleso en Berlin ia ta es la numero sete de Google, pos London, Tel Aviv, Seoul, Madrid, São Paulo e Warszawa.
En setembre, ativistes ia ocupa la construida pertinente per alga oras. Los ia posta ance aderentes en la distrito, con sloganes como "Adio, Google" e "Google no es un bon visina".
Alga ativistes ia oposa lo cual los ia descrive como la praticas "malvolente" de Google, como la evita de imposta e la usa nonetical de datos personal.
Otras ia protesta contra la enflue de abitores rica, sur cual los dise ce lo leva la custa de casas a un nivel cual persones local no pote compra. Entre 2016 e 2017, la custa de un casa en Berlin ia crese jeneral par 20%, ma par 71% en Kreuzberg.
La distrito es longa conoseda per sua cultural revoluiste e suvertinte.
Un portavose per Google ia dise ce discutes con grupos umaniste local ia gida la compania a conclui ce la solve la plu bon per la construida ta es dona lo a estas. La asosias es Betterplace, un plataforma enlinia per dona carita, e Karuna, cual suporta enfantes povre.
@T Gralias colie dejetadas en un parce franses
@L aora_oji/2018/gralias_colie_dejetadas_en_un_parce_franses
====== Gralias colie dejetadas en un parce franses ======
12 agosto 2018
Un parce de divertis en Frans va usa ses avias per colie dejetadas.
On ia instrui la gralias a la parce Puy de Fou en la ueste de la pais a colie restas de sigaretas e otra dejetadas peti. Los depone la pesos en un caxa cual furni alga comeda per recompensa la labora.
La primas de esta limpores plumida labora ja, e la otras va comensa doman.
Nicolas de Villiers, la xef de la parce, ia dise: "La gol no es sola la limpi, car la visitores atende jeneral ce los manteni la limpia." Lo pertine ance a mostra ce "la natur mesma pote instrui nos a cura la ambiente".
Gralias parteni a la familia de corvos, cual inclui ance corvones e monedulas. De Villiers ia ajunta ce los es "spesial intelijente" e ce los "gusta comunica con umanas e construi un relata par jua".
Esta no es la ves prima cuando corvos ia esibi sua intelijentia. En la parte plu temprana de esta anio, siensistes ia crea un vendador cual mostra la capasia de corvos en solve problemes.
La macina ia dona un regala cuando un avia ia presenta a lo un paper de grandia definida. On ia trova ce corvos pote recorda la grandia nesesada, e ia es an capas de corti paperes plu grande per cabe los a la macina.
@T Impostas plu alta per companias minante en RD Congo
@L aora_oji/2018/impostas_plu_alta_per_companias_minante_en_rd_congo
====== Impostas plu alta per companias minante en RD Congo ======
11 marto 2018
La Republica Democrata de Congo ia deside alti la impostas de companias minante, an con oposa forte par companias internasional. Presidente Joseph Kabila ia suscrive un codigo nova de mina, legalinte lo, a venerdi.
La pais es la produor la plu grande en Africa de cupre e cobalto, un composante esensal en pilas de telefonetas.
Companias minante internasional ia oposa la lege, disente ce sua operas en RD Congo va sesa es profitosa.
Alga dirijores xef ia vola a Kinshasha, la capital congoles, en esta semana, esperante convinse Kabila a cambia sua opina. Los ia razona ce la lege nova va impedi investis futur e va viole acordas esistente.
Ma la governa ia acorda considera sua consernas en modo individua, e labora con los per reali la codigo nova.
Tra anios, RD Congo ia parla sur cambia sua codigo de mina de 2002, sur cual lo ia crede ce lo pone tro multe profitas en la manos de companias stranjer. Sua industria de mina -- cual produi ance diamante, tantalo, stanio e oro -- es la fonte la plu grande de revenu esportal en la pais.
La lege, asetada par parlamento en janero, va dupli la paias cual produores de tota minerales debe dona a la governa.
La nasion es povre, ma rica con minerales, e furni plu ca 60% de la cobalto per la mundo. La custa de cobalto ia deveni plu ca duple en la anio pasada par causa de un esije cresente per autos eletrical, cual nesesa cobalto per sua pilas.
La imposta de cobalto ta pote ance deveni plu ca cuatruple si la governa deside clasi lo como "un sustantia stratejial".
@T Inondas grave en Barat sude
@L aora_oji/2018/inondas_grave_en_barat_sude
====== Inondas grave en Barat sude ======
18 agosto 2018
Narendra Modi, la ministro xef de Barat, ia vola supra alga de la inondas en la stato sude Kerala cual ia mata ja 324 persones. El ia discute ance con ofisiores major la metodos de responde a esta inondas, la plu graves en la stato en un sentenio.
Plu ca 200 mil persones es sin casa, e sentos es encaliada sur tetos. Soldatos e elicotores partisipa en un labora enorme de salva.
Semanas de pluve ia causa liscas de tera e inondas, de cual on previde plu. On predise ance ventas forte per oji e soldi. Tra la pais, cuasi mil persones ia es matada en esta saison pluvosa, cual ia comensa en junio.
Elicotores ia trae furnis de crise a multe locas, e on ia envia ance trenes spesial cual porta acua bevable.
Partes de Kochi, la capital comersial de Kerala, es su acua, conjestante la stradas e lasante ferovias en state nonusable. Alga cultiverias ia deveni inondada, perilinte la industrias local de cauxo, te, cafe e spises.
On ia clui scolas en tota 14 distritos de la stato, e alga distritos ia proibi turistes par causa de consernas sur securia.
Lo es normal ce Kerala ave un de la cuantias la plu alta de pluve en la saison de monson, ma la Departe Meteolojial de Barat dise ce lo ia reseta 37% plu pluve ca usual pos un periodo de presa basa supra la rejion.
Siensistes de ambiente culpa ance la desforesti, spesial un fali de proteje montanias ecolojial frajil.
Pinarayi Vijayan, la ministro xef de la stato, ia dise ce la situa ia es malida par governas visina. Plu temprana en esta semana, el e sua corespondente en la stato Tamil Nadu, ia disputa publica sur la relasa de acua de un parario.
Kerala ave 41 rios fluente a la Mar Arabi, e on reporta ce 80 de sua pararios es aora abrida pos deveni supracargada.
@T Iran xuta misiles venjante a Suria
@L aora_oji/2018/iran_xuta_misiles_venjante_a_suria
====== Iran xuta misiles venjante a Suria ======
1 otobre 2018
En Iran, la Corpo de Gardores de la Revolui Muslim dise ce los ia xuta misiles a ativistes en Suria este, en responde a un ataca matante contra un parada militar en setembre. Sua declara dise ce "multe teroristes ia es matada o ferida" par la misiles.
A la min 25 persones ia es matada en la fusili en la mense pasada en la site Ahvaz. Esta ia es la ataca la plu matante en Iran en plu ca un desenio. E la grupo Daex e un grupo separadiste arabi ia reclama lo.
Oji, alga misiles balistical ia es xutada a un area a este de la rio Eufrates en Suria. La Corpo ia publici alga fotos sur cual los dise ce los mostra la lansa de la misiles.
Iran ia suporta presidente Bashar al-Assad en la gera interna en Suria, enviante sentos de soldatos e fortinte militias cual combate per la governa suri.
Femes, enfantes e membros de la Corpo de Gardores ia es entre la persones matada cuando cuatro fusilores ia spara a un parada onorante la aniversario de la comensa de la gera de 1980 a 1988 entre Iran e Irac. A pos, Iran ia anunsia la aresta de 22 persones en relata con esta.
A la funeras de la vitimes, la visxef de la Corpo de Gardores ia promete un responde "crasente e ruinante" a la ataca, per cual el ia culpa Arabia Saudi, Israel e la SUA. Sua critica ia es repeteda par presidente Hassan Rouhani de Iran, ci ia acusa ce la SUA e la statos arabi de la Golfo Persian ia capasi la ataca.
An tal, la ambasador SUA a la Nasiones Unida ia comenta: "Lo cual el debe fa es regarda la miror."
@T Israel presenta un masca neolitica
@L aora_oji/2018/israel_presenta_un_masca_neolitica
====== Israel presenta un masca neolitica ======
29 novembre 2018
La Autoriosa de Anticas Israeli (AAI) ia revela un masca de petra cual ave 9000 anios.
La ojeto ia orijina en la area sirca Hebron en la sude de la Riva Ueste ocupada. Lo ia es fabricada de arenito ros e jala en la eda neolitica.
On reporta ce lo ia es reganiada de furores en la parte plu temprana de esta anio, ma la detalias es ancora nonclar.
Lo es multe naturin. On pote vide fasil la osos de jena e la nas.
Arceolojistes divina ce lo ia es cisa portada en la adora ritual de asendentes. Bucos forada en sua lados sujesta ce lo ia es cisa ance pendeda per esibi.
En un declara, la AAI ia dise ce la masca veni de un tempo cuando xasores-coliores ia comensa cultiva la campos e doma la bestias, "acompaniada par un cambia en strutur sosial e un aumenta grande en ativia ritual o relijiosa".
La masca es un de sola 15 similes en la mundo. Des-tre es en colies privata, cual difisili la studia de los. On va presenta oji la resultas de un studia inisial de esta masca a la Museo de Israel en Ieruxalim.
@T Jazair descomuta la interede per esaminas
@L aora_oji/2018/jazair_descomuta_la_interede_per_esaminas
====== Jazair descomuta la interede per esaminas ======
21 junio 2018
En Jazair, on ia descomuta la interede tra la pais intera per atenta fronti froda en esaminas de scola.
La servis de interede, e par linia fisada e par telefoneta, va sesa per un ora pos la comensa de cada esamina de diploma de liseo, per preveni esposas de informa. Esta va aveni tra tota la semana de esaminas, de 20 a 25 junio.
La responde segue un froda vasta en 2016, cuando on ia esposa enlinia la demandas ante e en la esaminas. Como resulta, la autoriosas ia solisita en la anio pasada ce furnores de servis de interede preveni la asede a redes sosial -- ma esta medias nonobligante no ia sufisi.
Nouria Benghabrit, ministro de educa, ia dise ce Facebook va es blocida tra la pais per la periodo intera. El ia comenta ce, an si la governa "no es comfortosa" con la deside, "nos debe no sta pasiva ante un tal esposa posible".
En ajunta, on ia proibi tota studiantes e empleadas scolal de entra a cualce de la 2000 esaminerias de la pais si los porta un aparato eletronical con capasia de asede la rede. On ia pone detetadores de metales a la portes.
Benghrabit ia dise ance ce on ia instala cameras monitorinte e blocadores de telefoneta a locas do on primi la paperes de esamina.
Pico plu ca 700 mil studiantes va presenta se per la esaminas de liseo en la semana veninte. Los espeta descovre sua resultas de 22 julio.
@T Jenitores litiga sua fio ci refusa parti de casa
@L aora_oji/2018/jenitores_litiga_sua_fio_ci_refusa_parti_de_casa
====== Jenitores litiga sua fio ci refusa parti de casa ======
23 maio 2018
En la SUA, la jenitores de un om de 30 anios ia adota un modo estrema de obliga sua fio a move a via: los litiga el.
Documentos de corte indica ce Michael Rotondo no paia un custa de lua, no aida con taxes de casa, e ia iniora ofres de mone par sua jenitores.
An pos presenta sinco leteras de descasi, Christina e Mark Rotondo dise ce sua fio refusa parti de la casa. Michael dise ce, legal, on no ia dona a el sufisinte temprana la avisa de descasi.
La jenitores ia rejistra sua caso con la Corte Suprema de la Contia Onondaga, prosima a Syracuse, New York, a 7 maio, pos menses de recomenda nonsusedosa a sua fio ce el parti.
"Nos ia deside ce tu debe parti direta de esta casa," la letera prima ia dise a 2 febrero. Cuando la fio ia iniora esta, sua madre e padre ia scrive un avisa formal de descasi, aidada par sua avocato, ci ia dise ce los ia conose no otra modo de descasi la om.
Un avisa de 13 febrero, suscriveda par Sra Rotondo, dise: "Par esta, tu es descasida. Un prosede de enforsa legal va es direta instituida si tu no parti ante 15 marto 2018."
La jenitores ia ofre $1100 a sua fio, con ance alga comentas sever sur sua condui. "Postos es disponable an per los con mal istoria de labora como tu. Trova un -- tu debe labora!"
Ma a 30 marto, lo ia deveni clar ce sua fio ancora no intende parti. En april, la Rotondos ia vade a sua corte de vila per descovre esce los pote descasi sua fio. Ma car el es un familian, los ia nesesa un judor de corte suprema per obliga ofisial sua parti.
La fio ia descrive la litiga como "venjante" e ia demanda ce la corte refusa la caso. La familia va vade a la Corte Suprema en la plu tarda de esta mense, a sola un pico de semanas ante la aniversario 31 de la nase de la fio.
@T La acorda de Katowice sur la acorda de Paris
@L aora_oji/2018/la_acorda_de_katowice_sur_la_acorda_de_paris
====== La acorda de Katowice sur la acorda de Paris ======
16 desembre 2018
Negosiores en Polsca ia ateni final un acorda sur medias diversa cual permete ce la acorda climal de Paris comensa opera en 2020.
Disputas sur mercatos de carbono ia menasa la confere de du semanas, e ia estende lo par un plu dia.
La delegadas crede ce la regulas nova va serti ce paises onora sua prometes de redui emetes de carbono. La acorda de Katowice intende reali la gol de Paris de preveni ce la temperatur global crese par plu ca 2°C.
La acorda ia es suscriveda par 196 paises. Lo defini un scema per regulas comun per tota paises, governante la detalias de redui emetes, finansiante nasiones plu povre, e sertinte ce cada pais fa lo cual lo debe.
Defini la regulas es un prosede multe tecnical, car paises ave frecuente scemas diferente per sua reduis de emetes.
Paises plu povre desira alga flexablia afin los no deveni inondada par regulas cual los no es capas de reali. La idea de culpablia legal per la causa de cambia climal es ja longa rejetada par nasiones plu rica, cual teme paias enorme en la futur.
La negosias ia es menasada par un nonprogresa entre Brasil e otra paises sur la regulas per monitori creditos de carbono. Brasil ia desira regulas plu debil sur mercatos de carbono, an contra un oposa forte par multe otra paises. On ia deside pospone esta discutes asta la anio veninte.
En la fini de semana pasada, siensistes e delegadas ia es xocada cuando la SUA, Arabia Saudi, Rusia e Cuait ia oposa dise ce la confere "bonveni" un reporta resente par la Nasiones Unida sur manteni la crese de temperatur su 1,5°C. La reporta ia indica ce la mundo vade en dirije a un crese plu simil a 3°C en esta sentenio.
Par compromete, la declara final de la confere ia bonveni la completi de la reporta e ia invita paises a usa lo.
@T La batalia de Telegram
@L aora_oji/2018/la_batalia_de_telegram
====== La batalia de Telegram ======
31 maio 2018
Apple e Rusia fronti lunlotra en relata con la boteca de ap de la compania. La organiza regulante de telecomunica rusce ia demanda ce Apple sutrae Telegram, un ap popular de mesajes, de la varia rusce de sua boteca.
An pos atentas par autoriosas rusce de bloci la ap pos la media de april, lo resta multe usada. La regulor Roskomnadzor ia permete un mense per un responde par Apple; lo es nonclar cual cosa va aveni si lo iniora la solisita.
En la pasada, Apple ia obedi solisitas xines e ia sutrae servis de VPN (rede privata virtual) de sua boteca.
Telegram ia es developada en Rusia e es un de la servis de mesaje la plu popular de mundo. Lo es disponable per tabletines, computadores e telefonetas, e furni la capasia de sifri comunicas tal ce sola la envior e resetor pote vide los. Mesajes resta privata de otra rolores, como la governa rusce.
La compania Telegram ia parti de Rusia par causa de la regulas de interede en acel pais, e ave aora sua base en Dubai.
En april, miles de persones ia asembla en Moscva per protestas contra la proibi de la ap, e Pavel Durov, fundor de Telegram, ci ia nase en San Petersburg, ia envia un tuita per grasia la protestores.
En la demandas frecuente de sua pajeria, Telegram dise ce "Apple bloci ja Telegram de refresci sua ap iOS de la media de april, global. Lo es posible ce, como resulta, la ap no conforma a GDPR. En la boteca Google Play de Android, en compara, la ap ia es la plu resente refrescida a 26 maio, la dia pos la data de reali de GDPR."
Apple ia refusa comenta.
@T La bebe prima en 12 anios sur un isola
@L aora_oji/2018/la_bebe_prima_en_12_anios_sur_un_isola
====== La bebe prima en 12 anios sur un isola ======
21 maio 2018
Un isola brasilera distante, do pari es proibida, selebra an tal la bebe prima cual ia nase ala en 12 anios.
La isola Fernando de Noronha es situada a 370 cilometres de la site Natal. Lo ave sirca 3000 abitores ma no ospital madral. On espeta ce madres espetante ta viaja a la tera xef.
Un fem ci no desira es nomida ia pari ier un xica sur la isola. El dise ce el no ia sabe an sua ensintia, e es aora "stonada". On crede ce el ave 22 anios.
La bebe, parida en la sala de banio de la fem, ia es prendeda a la ospital local. La autoriosas ia confirma la nase.
Per selebra, persones local aida aora la familia, e alga dona vestes per la xica.
Fernando de Noronha ave alga de la plaias la plu bon de mundo, e es famosa per sua conserveria de animales en la parce maral nasional de Brasil. On vide comun tortugas de mar, delfines e avias rara ala.
Par causa de la conserveria, la isola controla forte sua cuantia de popla.
@T La canoni de Arcibispo Oscar Romero
@L aora_oji/2018/la_canoni_de_arcibispo_oscar_romero
====== La canoni de Arcibispo Oscar Romero ======
14 otobre 2018
Sentos de persones relijiosa en America Sentral ia comensa selebras per onora la santi oji de Oscar Romero, un arcibispo salvadoran ci ia es omisideda a 38 anios ante aora.
En la gera interna de Salvador, Romero ia recomenda franca la pas, e ia es fusilida par soldatos destriste a media de un misa en marto 1980. Sua matores ia es nunca litigada, car un amnestia de 1992 proteje los.
Pape Fransisco va santi el en Roma oji.
La dona de santia a Romero es ja longa promoveda par catolicas en la rejion, ci regarda el como la santa de America Sentral. Per relijiosas, sua potia ia veni de lo ce el ia critica ambos lados de la gera salvadoran, e la sinistriste e la destriste, per cualce ata cual ia afeta persones nonmilitar.
El es ancora despetada par alga persones a la destra estrema, ci descrive el como "un gerilia en roba de prete", car el ia urje soldatos a escuta sua cor e desobedi comandas.
Sua mori ia xoca la mundo e ia intensi la violentia en Salvador, cual ia dejenera rapida a un gera interna de 12 anios cual ia prende 75 mil vives.
@T La clima sta a un crus de vias
@L aora_oji/2018/la_clima_sta_a_un_crus_de_vias
====== La clima sta a un crus de vias ======
3 desembre 2018
Cuatro persones major ci suporta laboras per limita la cambia de clima ia averti ce la planeta sta "a un crus de vias", cuando un consenta importante ia abri en Polsca.
En un ata rara, cuatro presidentes pasada de esta confere, sponsorida par la Nasiones Unida, ia recomenda ata nonvasilante.
La consenta en Katowice es la plu importante sur la cambia de clima pos la acorda de Paris en 2015. Espertas dise ce la mundo nesesa redui estrema sua emetes si lo vole ateni la goles acordada en Frans.
Negosiores ia asembla per la confere a un dia plu temprana ca espetada, car on presa los a progresa.
Entretempo, la Banco Mundal ia anunsia 200 mil milion dolares de finansia tra sinco anios, per suporta paises cual ata contra la cambia de clima.
Esta confere de la partitos acordada es la prima cual ia aveni pos la apare en otobre de la reporta major par la Comite Intergovernal sur Cambia de Clima, cual ia discute la problem de limita la aumenta de temperatur global a 1,5°C.
Acel reporta ia dise ce per ateni la gol, governas va debe redui emetes de gases invernerial par 45% ante 2030. Ma un studia resente ia mostra ce aora la emetes de diosido de carbono alti denova pos un reposa de cuatro anios.
Ier, cuatro presidentes pasada de la confere ia publici un declara urjente. Los ia dise ce "atas desidente en la du anios veninte va es esensal".
Ma la divide ia es nunca plu larga entre lo cual paises dise ce los fa e lo cual nesesa es fada.
29 xefes de stato e governa va presenta declaras a la comensa de la consenta. Esta cuantia es multe min ca en Paris a tre anios ante aora, cisa indicante ce multe regarda la confere como mera un punto longo la via e no un crus major.
Ma per Xina e la Uni European, la confere es multe importante. Los vole mostra ce la coopera internasional pote susede ancora, an en la eda de Presidente Trump.
@T La color contaminada de la Taj Mahal
@L aora_oji/2018/la_color_contaminada_de_la_taj_mahal
====== La color contaminada de la Taj Mahal ======
2 maio 2018
En Barat, la Corte Suprema ia comanda la governa a xerca aidas stranjer per repara lo cual lo descrive como un cambia ansiante de la color de la Taj Mahal.
Lo dise ce la tomba famosa, construida en la sentenio 17 de marmo blanca e otra materias, ia jali e deveni aora brun e verde. La causas inclui contamina airal, construis, e la fece de insetos.
La judores ia esamina fotos de la palasio furnida par ambientistes e ia comanda ce la governa trova espertas en e estra la pais.
En la pasada, la governa ia covre la fenetras de miles de fabricerias prosima a la Taj Mahal, ma ativistes dise ce la marmo perde ancora sua brilieta. Cloacales en la Rio Yamuna, a lado de la palasio, atrae insetos cual escrete sur la mures, manxante los.
La Taj Mahal ia es construida en la site Agra par la Imperor Mugul Shah Jahan, e es aora un de la atraes major de turisme global, con asta 70 mil visitores per dia.
La problem de susia no es nova, ma on teme ce lo deveni plu sever. A veses diversa en la du desenios pasada, on ia covre la marmo su un trata de fango: cuando on lava la fango a via, lo desprende ance alga de la susia. La plu resente de esta tratas ia comensa en janero.
@T La consentas de Corea Norde
@L aora_oji/2018/la_consentas_de_corea_norde
====== La consentas de Corea Norde ======
29 marto 2018
La gidores de Corea Norde e Sude va fa sua confere prima de plu ca un desenio a 27 april.
Un declara juntada ia dise ce discutes entre Kim Jong-un de la Norde (Txoson) e presidente Moon-Jae-in de la Sude (Tehan) va aveni en la vileta fronteral Panmunjom.
La data ia es revelada pos un consenta entre ofisiores de ambos lados per prepara la encontra.
La anunsia segue a la dia pos reportas de discutes entre Kim Jong-un e Xi Jinping, presidente de Xina. A acel consenta en Beijing, la gidor de Corea Norde ia repete sua ofre de desnucleali la Penisola Corean.
Kim Jong-un ia dise resente ce el vole consenta con Donald Trump, presidente de la SUA. Trump ia aseta la ofre, e lo es posible ce los pote encontra lunlotra a tempo tan prosima como maio.
La presenta de un data per discutes entre la du Coreas es la move la plu resente en un eruta de ativia diplomata en esta anio, en cual Txoson ia es presente a la Juas Olimpial de Inverno en Tehan.
@T La desativi de un bomba en Berlin
@L aora_oji/2018/la_desativi_de_un_bomba_en_berlin
====== La desativi de un bomba en Berlin ======
20 april 2018
Un evacua major aveni en Berlin a esta matina, per permete ce espertas desativi un bomba de la Gera Mundal Du. Construidas ia es vacuida de 09:00 en un raio de 800 metres sirca la construeria do on ia descovre la bomba.
En cada anio, on trova miles de bombas nonesplodeda de la gera de 1939--45. La polisia dise ce on ave no peril direta de la bomba brites, cual ave 500 cilogrames de pesa e ia es descovreda en Heidestraße a mercurdi pasada.
La area vacuida inclui la stasion sentral de ferovia, un ospital militar, la ministrerias de economia e transporta, e la ambasadas de Indonesia e Uzbecistan. La labora per desfunsiona la aparato va aveni sirca mediadia.
La compania de ferovia e otra transportores ia averti sur un disturba grande per trenes, trames e buses en la rejion. Volas a e de la airoporto Tegel, a distantia de sirca 7 cilometres, no es afetada, ma aviones aterante va evita vola supra la loca de la bomba.
Tegel es la airoporto la plu ativa de Berlin, e ia es cluida per tempo corta en agosto pasada pos la descovre de un bomba rusce de la Gera Mundal Du.
En setembre pasada, on ia evacua pasientes de ospitales en Frankfurt per permete la esplode controlada de un otra bomba enorme de acel gera.
@T La descovre de un pirania jurasica
@L aora_oji/2018/la_descovre_de_un_pirania_jurasica
====== La descovre de un pirania jurasica ======
19 otobre 2018
Siensistes ia descovre la restas fosilida de un creada simil a un pirania, de la eda jurasica. Los dise ce lo es la esemplo la plu temprana cual on conose de un pex carnivor.
La creada ososa, trovada en la sude de Deutxland, ia vive a sirca 150 milion anios ante aora e ia ave la dentes agu cual distingui la piranias de oji. Lo ia usa estas per sutrae la carne e pinas de otra pexes, de cual on ia trova ance sua restas.
Un de la rexercores ia dise: "Nos ave otra pexes de la mesma loca con pesos mancante de sua pinas. Si on come un pex, lo es mor. Si on rode sua pinas, on ave comeda per la futur."
La siensistes ia analise la mandibulas e ia trova dentes longa e puntida a la esterna de un oso cual ia formi la teto de la boca. Los ia trova ance dentes triangulo con bordas sierin sur osos longo la lado de la mandibula basa.
La ecipo internasional ia conclui ce la organiza e forma de la dentes e la strutur e funsiona de la mandibulas sujesta un boca bon preparada per talia carne o pinas.
La loca do la pexes ia es trovada es entre la plu bon en la mundo per descovre fosiles, ma lo continua ofre surprendes como esta.
@T La descovre major de un barcon ruinada portuges
@L aora_oji/2018/la_descovre_major_de_un_barcon_ruinada_portuges
====== La descovre major de un barcon ruinada portuges ======
25 setembre 2018
Arceolojistes ia trova un barcon ruinada ante 400 anios a lado de la costa de Portugal.
La barcon reposa a 12 metres su la surfas de la acua, ensircada par spises, seramicas e canones gravada con la scermo eraldial de la pais. On ia trova lo prosima a Cascais, un vila turismal en la rejion de la capital Lisbon.
On crede ce la barcon ia es reveninte de Barat cuando lo ia afonda a alga tempo entre 1575 e 1625. Esta ia es a la zenito de la comersia portuges de spises con Asia.
Jorge Freire, dirijor de la projeta, ia dise ce la barcon es multe bon conservada. "De punto de vista istorial, esta es la descovre de la desenio," el ia comenta, descrivente lo ance como "la trova la plu importante de tota tempo" per Portugal.
On ia trova porselana xines de la tarda de la sentenio 16 e la temprana de la sentenio 17 en la ruina, e ance artileria de bronze e cascas de cauri, usada como mone en la comersia de sclavos.
La barcon ia es descovreda a la comensa de esta mense cuando on ia draga la estuario de la rio Tejo, cual flue longo Cascais e Lisbon. La maior Carlos Carreiras ia descrive la trova como "un descovre estracomun" cual va forti la "identia coletiva e valuas compartida".
Luis Mendes, ministro de cultur, ia dise ce on regarda la boca de la Tejo como un loca major per ruinas de barcon. "Esta descovre ia aveni per demostra lo," el ia ajunta.
La projeta arceolojial estende tra 10 anios, suportada par la vila Cascais, la governa e marina portuges, e la Universia Nova de Lisbon.
@T La du blocos political svensce fini cuasi egal
@L aora_oji/2018/la_du_blocos_political_svensce_fini_cuasi_egal
====== La du blocos political svensce fini cuasi egal ======
10 setembre 2018
La vota jeneral en Sveria ia lasa la du blocos political xef en state cuasi egal, e la partito contra migras ia avansa.
Pos la conta de cuasi tota la votas, la alia governante de la sinistra sentral es pico ante sua oposores desvensce la alia de la destra sentral. Ambos ave sirca 40% de la votas. La partito nasionaliste, la Democratas Svensce, ia gania sirca 18%, un crese de 5% pos la eleje presedente.
Lo es serta ce on va fa aora un batalia longa per formi un alia funsionante.
Sveria usa un sistem de representa proportial, en cual on asinia a cada partito un cuantia de sejas en cada distrito en modo corespondente a sua parte de la votas. Ambos de la blocos xef ia refusa governa con la nasionalistes, ma sua gidor ia dise ce el es preparada per negosia con tota otra partitos.
Otra paises european ia vide un crese en la suporta per partitos antimigral en anios resente. Plu temprana en esta anio, Italia ia instala un alia governante nova, dirijeda par un partito antiortodox e un alia destriste. En 2017 en Deutxland, un partito de la destra estrema ia gania 12,6% de votas, e la Partito de la Popla Dansce ia gania 21% en 2015.
Migras ia es un tema major de la campania. La nasionalistes desira restrinje forte los. La ministro xef ci fini sua periodo, Stefan Löfven, ia descrive esta como "raziste".
La Democratas Svensce ia es liada tra anios a neonazis e otra grupos estrema destriste, e ia ave no parlamentores asta 2010. Los ia labora per restili se, cambiante sua logo de un torxa flaminte a un margarita en la colores de la bandera de la pais.
La economia de Sveria buma, ma multe votores es consernada ce servis de casi, sania e aida sosial ia deveni presada par un onda de persones ci ia ariva en la crise migrante de 2015. En acel anio, Sveria ia aseta 163 mil xercores de refuja -- la enflue la plu alta en la Uni European en proportio a cuantia de abitores.
Multe votores es ance consernada sur violentia. La nasionalistes lia un crese de fusilis a la crese de migra, an si la statistica ofisial mostra no corelata. Los desira ance sorti de la Uni European, e ia proposa un referendo. Ma tota la partitos sentriste oposa un tal vota, donce lo no es probable ce lo va aveni.
Ultra la migra, la cambia de clima es un tema sur cual multe svensces es ansiosa, spesial pos un estate longa e calda con focones savaje. En la caldia estrema, sirca 25 mil ectares de foresta ia arde. La suporta per la partito verde, cual ia es danada par alga scandales interna, ia reforti tra la pais.
@T La Eglesa Ortodox Rusce separa de Constantinopoli
@L aora_oji/2018/la_eglesa_ortodox_rusce_separa_de_constantinopoli
====== La Eglesa Ortodox Rusce separa de Constantinopoli ======
16 otobre 2018
La Eglesa Ortodox Rusce dise ce lo rompe tota lias con la Patriarcia Nonramal de Constantinopoli, cual ave la autoria spirital supra la 300 milion cristianes ortodox de la mundo.
La Patriarcia, con base en Istanbul, ia reconose resente ce la Eglesa Ucrainsce es autonom de Moscva. Multe cristianes ucrainsce acusa la Eglesa Rusce de favore rebelores suportada par Rusia en Ucraina este.
Moscva refusa la autonomia de la Eglesa Ucrainsce. Un bispo major -- Hilarion Alfeyev - ia dise ce la deside de reconose lo es "contra la veria istorial". A ante, Constantinopoli ia rejeta la moves per autonomi de la Eglesa Ucrainsce, ma ia aseta aproba los en la semana pasada.
Petro Poroshenko, presidente de Ucraina, ia dise ce la autonomia de la Eglesa vade con mano en mano con la autonomia de Ucraina. El ia ajunta: "Lo es un tema de securia nasional ucrainsce. Lo es un tema de la nasionia ucrainsce."
Ucraina ia deveni autonom en 1991, cuando la Uni Soviet ia disolve. Ma la propri de Crim par Rusia en 2014 e la batalias en Ucraina este ia veneni sua relatas con sua visina.
La ramo moscvan de la eglesa ia nega ce lo es un util de la Cremlin, e dise en loca ce lo ia atenta reali la pas en Ucraina este. Moscva dise ce lo espera ce Constantinopoli va cambia sua deside sur reconose la autonomia de la Eglesa Ucrainsce, per evita un separa formal entre la du eglesas.
Rusia regarda Ciiv como la cuna istorial de la Eglesa Ortodox Rusce. La Cremlin ia dise resente ce lo teme la aveni de scaramuxas en Ucraina sur locas ortodox do la Patriarcia de Moscva fa sua servis.
@T La estraeda la plu vea de la Odisea
@L aora_oji/2018/la_estraeda_la_plu_vea_de_la_odisea
====== La estraeda la plu vea de la Odisea ======
11 julio 2018
Un tableta de arjila escavada conteni cisa la testo la plu vea trovada en Elas de la Odisea, un poesia epica de Homero.
On ia descovre la tableta en un escava arceolojial prosima a la ruina de la Templo de Zeus en la site antica Olimpia, e on ia dati lo a la eda roman.
Lo es gravada con 13 linias de la poesia cual raconta la aventuras de la eroe Odiseo pos la cade de Troia. La nara ia es probable composada en la tarda de la sentenio oto AEC, e es tradisional atribuida a un poesiste semilejendal nomida Homero. On ia resita lo per recorda lo tra sentos de anios ante la enscrive de la tableta.
On ancora no ia confirma la data esata de la tableta, ma la ministreria de cultur elinica ia descrive sua descovre como "un esibi grande arceolojial, epigrafial, leteratural e istorial". La escavas cual ia trova lo ia ocupa tre anios.
La Odisea es jeneral regardada como un obra influosa a leteratur ueste. En sirca 12 mil linias, la poesia nara sur Odiseo, re de Itaca, ci ia pasa des anios en atenta reveni a sua propre pais pos partisipa en la destrui de la rena de Troia.
La tableta ia es descovreda par rexercores elinica e deutx. Lo conteni 13 linias de capitol 14 de la poesia, en cual Odiseo parla a sua ami Eumeo.
@T La fumi confondente de un elefante barati
@L aora_oji/2018/la_fumi_confondente_de_un_elefante_barati
====== La fumi confondente de un elefante barati ======
27 marto 2018
Un video de un elefante savaje en Barat cual pare espira sene ia confonde espertas tra la mundo. Vinay Kumar, un siensiste ci parteni a la Sosia de Conserva de Viventes Savaje de India, ia filma la video de 48 secondos en un visita laborante a la foresta Nagarhole en la stato Karnataka en April 2016.
Asta aora, el no ia comprende la importa de la video. Lo es la filma prima conoseda de un elefante savaje con esta condui, e siensistes es ancora no serta sur lo.
Kumar e sua ecipo ia vade a la foresta, en la temprana de matina, per monitori trapas de camera intendeda per fa imajes de tigres. El ia vide un elefante fema a no plu ca 50 metres de distantia, e ia comensa filma lo.
En la filma, la elefante pare come carbon de lenio lasada par un foco controlada sur la tera, e sofla la sene en espira a pos. Kumar ia dise: "Lo cual nos ia vide a acel dia ia pare cuasi como si la elefante fumi -- el pleni sua trompa con sene, leva lo a sua boca, e espira a lo, produinte un sofleta de fuma."
Varun R Goswami, un biolojiste de elefantes ci ia esamina la video crede ce "la plu probable, la elefante ia atenta come carbon de lenio, car el ia pare prende alga cosa de la solo ardeda de foresta, soflante per sutrae la sene cual ia acompania lo en sua trompa, e consumante la resta".
El ia dise: "Carbon de lenio ave un capasia reconoseda de lia a toxinas, e an si lo ave cisa no multe contenida nural, animales savaje es cisa atraeda a lo per esta valua medisinal. Lo pote servi ance como un laxinte, duplinte sua usosia per animales cual consuma lo pos focones savaje, colpas de lampo o ardes controlada."
@T La malsonia la plu mal de contrabandores de ivor
@L aora_oji/2018/la_malsonia_la_plu_mal_de_contrabandores_de_ivor
====== La malsonia la plu mal de contrabandores de ivor ======
26 agosto 2018
Un tecnica nova permete ce canes deteta la odor de ivor, corno de rinosero e otra cosas simil, ascondeda en contenadores de transporta, usante mera un sample pico de aira. On proba la metodo a la porto Mombasa en Cenia, sur cual on dise ce lo es la sentro la plu ativa per contrabanda de ivor en Africa.
Longo un reporta, on ia saisi plu ca 18 mil cilogrames de ivor a la porto entre 2009 e 2014. Per furni un tal cuantia, la reporta sujesta ce cisa plu ca 2400 elefantes ia mori -- e esta pertine sola a la ivor cual on ia deteta.
Ma canes ave un capasia stonante de ole, e los pote deteta an cuantias pico en un contenador enorme de 10 metres.
En la sistem nova, alga aira es sucada de un contenador e pasada tra un filtro. On presenta esta filtro a un can spesial instruida, ci senta se si el ole cualce cosa suspetosa: no sola ivor, ma ance otra produidas nonlegal de animales, plantas e lenio.
La scema permete ance ce la canes esamina plu de la sirca 2000 contenadores cual pasa tra la porto de Mombasa en cada dia. A ante, la canes ia debe visita direta la contenadores, cual ia es un taxe difisil su la sol de Africa este.
An si lo ia consuma tempo, la metodo nova ia resulta 26 saisis susedosa en mera ses menses, furninte informa esensal sur la redes criminal cual gania profitas vasta de la comersia nonlegal.
On trova se ancora en un corsa contra la tempo, car on estima ce no plu ca sirca 25 mil rinoseros negra e blanca resta en esiste. Sola en Sudafrica, plu ca mil rinoseros ia es matada par xasores en la anio pasada. E en cada dia, sirca 55 elefantes african es matada per sua ivor.
@T La mares asorbe plu caldia ca on ia estima
@L aora_oji/2018/la_mares_asorbe_plu_caldia_ca_on_ia_estima
====== La mares asorbe plu caldia ca on ia estima ======
1 novembre 2018
Rexercores en la jornal Natur dise ce la mundo ia suestima multe la cuantia de caldia cual nosa mares ia asorbe en la 25 anios pasada. Sua studia sujesta ce la cuantia vera esede par 60% lo cual on ia crede a ante.
Longo la evalua major la plu resente par la Panel Intergovernal sur la Cambia de Clima, la mares de la mundo ia asorbe plu ca 90% de la caldia esedente cual ia deveni trapida par gases invernerial. Ma esta studia nova dise ce, en cada de la 25 anios pasada, nos ia pone en la mares sirca la 150-uple de la enerjia usada per jenera eletrica global.
Siensistes ateni sua predises sur la caldi de la planeta par ajunta tota la caldia esedente cual es produida par la cuantia conoseda de gases emeteda par atas umana. La calcula nova mostra no sola ce multe plu caldia ca nos ia suposa ia entra a la mares, ma ance ce multe plu caldia ia es jenerada par acel gases.
Si la descovre es coreta, lo indica ce la Tera es plu sensosa a emetes de combustables de fosil ca on ia estima. La rexercores crede ce esta situa va impedi multe la atentas per manteni la caldi global a un nivel secur en esta sentenio, como difinida par governas en la acorda de Paris.
De 2007, siensistes ia pote usa un sistem de sirca 4000 flotas cual rejistra la temperatur e salosia de mares tra la mundo. Ma ante esta, la metodos usada ia ave multe defetos e nonsertas.
Aora, la rexercores ia developa un metodo multe esata per deteta la temperatur de la mares par mesura la cuantia de osijen e diosido de carbono en la aira: acua plu calda relasa plu de esta gases a la aira. Esta metodo permete mesura la temperatur de mares tra la mundo en cada anio pasada de 1991, cuando datos ia deveni disponable de un rede global de stasiones.
Otra siensistes ia reata a la anunsia con ansia, car la rexercores ave un bon reputa. An tal, alga siensistes dise ce on nesesa ancora plu investiga car ance la metodo nova conteni alga nonsertia.
@T La ministro xef de Australia es desponeda
@L aora_oji/2018/la_ministro_xef_de_australia_es_desponeda
====== La ministro xef de Australia es desponeda ======
24 agosto 2018
Scott Morrison va deveni la ministro xef nova de Australia pos la despone de Malcolm Turnbull par sua oposores en un compete per la posto. Turnbull ia perde la suporta de sondas, e ia esperia lo cual el ia descrive como "un rebela" par otra parlamentores.
En un vota interna, Morrison, la tesoror, ia gania 45 votas contra la 40 per sua oposor la plu forte Peter Dutton, un ministro pasada de internas.
Con un eleje prosima, parlamentores ia es nervosa sur la suporta debil per la governa en sondas de opina, e par causa de defetas resente en elejes partal.
En la semana pasada, un disputa sur politica de enerjia ia ensende un tensa cual esiste ja longa entre la moderada Turnbull e la ala conservaliste de sua partito. A martedi, Dutton, un conservaliste, ia defia el sin susede, ma la marjin peti de sua defeta ia tisa plu la situa.
Morrison ia entra a la compete cuando Turnbull ia perde alga suportores major. Turnbull ia acorda resinia cuando un majoria de parlamentores ia urje la abri de la posto de ministra xef per reeleje -- un situa nomida "spill" (malversa) en engles australian.
Multe persones ia descrive esta semana como un de la plu caososas en la istoria political de la pais. En sua confere jornaliste final, Turnbull ia descrive la semana como "fol", ma ia grasia sua colaborores per eleje Morrison e no Dutton.
En la des anios pasada en Australia, tre otra ministros xef ia es ance desponeda par oposores en la mesma partito. An no un ministro xef en la eda resente ia susede completi sua periodo como ministro xef, partal car elejes aveni tan frecuente (a un ves en cada truple de anios) e donce persones nonpopular en la pais o en sua partito es rapida sacrifiada.
En la sistem australian, la ministro xef no es direta elejeda par votores, ma es simple la gidor de la partito o la alia cual ave la majoria de membros de parlamento.
@T La moleculas colorosa la plu vea de mundo
@L aora_oji/2018/la_moleculas_colorosa_la_plu_vea_de_mundo
====== La moleculas colorosa la plu vea de mundo ======
10 julio 2018
Siensistes ia descovre lo cual los descrive como la colores biolojial survivente la plu vea de mundo, de rocas antica su la deserto Sahara.
La eda de la pigmentos es 1,1 mil milion anios. Los ave un color briliante ros, ma en sua forma consentrada los varia de un roja sanguin asta un purpur oscur e intensa.
Los es moleculas fosilida de clorofila produida par organismes maral. Per estrae los, rexercores ia mole xel a polvo.
Nur Gueneli, un studiante dotoral de la Universia Nasional Australian, ia trova la pigmentos cuando el ia pasa un disolvente organica tra la roca polvida. La prosede de estrae ia es "simil a un macina de cafe".
Un profesor ia comenta: "Lo es simple stonante ce alga cosa con color biolojial pote survive tra un tempo tan longa."
Un compania de mina ia trova la rocas en un deponeda de xel maral en la Basin Taoudeni en Muritania, en Africa ueste, a sirca des anios ante aora, pos fora un buco a profondia de sentos de metres.
Analisente la pigmentos, on ia trova ce los ia es produida par sianobaterias en la mares a mil milion anios ante aora. Esta contribui a nosa comprende de la evolui de vive sur la Tera.
A acel tempo, sianobaterias pico ia domina la funda de la cadena nural en la mares, preveninte la esiste de animales plu grande contempora. Viventes no ia deveni plu grande asta sirca 600 mil milion anios ante oji, car on no ia ave un fonte sufisinte de comeda a ante.
La rexerca ia envolve ance siensistes en Japan e la SUA.
@T La monarca de Japan dise adio a un fola grande
@L aora_oji/2018/la_monarca_de_japan_dise_adio_a_un_fola_grande
====== La monarca de Japan dise adio a un fola grande ======
24 desembre 2018
Plu ca 80 mil persones ia es presente cuando Imperor Akihito de Japan ia fa sua parla final a sua aniversario de nase ante sua renunsia.
La imperor, ci ave 85 anios, ia dise ce el senti "un comforta profonda" ce sua rena ia pasa sin ce Japan engrana denova a gera.
El ia deveni emosiosa en grasia la popla de Japan e sua sposa Imperoresa Michiko per sua suporta.
Akihito es la monarca vivente prima ci renunsia la trono de crisantemo en cuasi 200 anios. El ia reseta sirurjia de cor e ia es tratada per canser de prostata. El va es segueda en april par sua fio la plu vea, Prinse Naruhito.
Sua rena de tre desenios es conoseda como la eda Heisei, cual sinifia "ateninte la pas" en japanes.
En sua parla corta, Akihito ia ofre ance compatia a persones japanes ci ia perde familianes o ia sufri dana -- un refere a la tremateras, tempestas e ondas de caldia cual ia afeta la pais en la anio pasada.
Sua posto es ritual e el ave no potia political, ma tra la plu de sua rena, Akihito ia sperde un consensia de la atas de Japan en la Gera Mundal Du en la rena de sua padre, Imperor Hirohito.
El ia espresa regrete sur la atas militar par Japan en Xina e la penisola corean, e ia visita ance alga campos de batalia pasifica per onora la mores. Esta atas ia pone el en desacorda con grupos destriste en Japan.
Ante sua aniversario, Akihito ia comenta: "Lo es importante ce on no oblida ce vives noncontable ia es perdeda en la Gera Mundal Du ... e ce on pasa esta istoria en modo esata a persones naseda pos la gera."
@T La mori de Bush major e la vive de la Obamas
@L aora_oji/2018/la_mori_de_bush_major_e_la_vive_de_la_obamas
====== La mori de Bush major e la vive de la Obamas ======
1 desembre 2018
George H W Bush, presidente pasada de la SUA, ia mori con 94 anios. El ia servi como la presidente 41 entre 1989 e 1993. Sua periodo ia es definida par la fini de la Gera Fria e par la gera prima contra Saddam Hussein en Irac.
An si el ia es min sana en anios resente, el ia susede ancora apare publica. En april, el ia vade a ospital con infeta de sangue, ma ia es desospitalida a pos. El ia mori a sete menses pos sua sposa, Barbara.
En un otra anunsia de la SUA, la autobiografia de Michelle Obama, dama prima pasada, ia deveni la libro la plu bonvendeda en la pais en esta anio, a sola 15 dias pos sua publici. On ia vende plu ca du milion copias en la SUA e Canada, e la publicor dise ce lo es bonvendeda ance en multe otra paises.
La libro es un fenetra a la vive personal de la Obamas ante, tra e pos sua tempo en la Casa Blanca. Sra Obama revela difisiles en sua sposia con Barack, detaliante como los ia sufri un aborta natural e ia usa la fertili en vitro per consepi ambos sua enfantes.
Sra Obama ance critica Donald Trump, la presidente presente, scrivente ce el pote "pardona nunca" Trump per "risca la securia de mea familia" sur sua defende forte de la teoria ce Sr Obama no ia nase en la SUA e donce no ia es un presidente valida de la pais.
@T La mori de la fundor de la festa Om Ardente
@L aora_oji/2018/la_mori_de_la_fundor_de_la_festa_om_ardente
====== La mori de la fundor de la festa Om Ardente ======
29 april 2018
Larry Harvey, fundor de la festa de artes Burning Man ("Om Ardente"), ia mori en San Fransisco con eda de 70 anios. El ia sufri un ataca serebral en la parte plu temprana de esta mense e ia mori en sua casa a la matina de ier.
Asta 70 mil persones asembla anial per la festa de contracultur en la Deserto Roca Negra en Nevada, SUA. Lo presenta instalas jigante de arte interatante e un om enorme de lenio cual on arde a la fini de la aveni.
Om Ardente ia es fundida en junio 1986 cuando Harvey e sua ami Jerry Goodell ia flami un om de lenio sur la Plaia Baker en San Fransisco per selebra la solstisio de estate. Esta ia inisia la festa, cual ia aveni en la deserto a la ves prima en 1990, e ia deveni rapida un de la culturales la plu bon conoseda de America.
En 2015, la Projeta Om Ardente ia reporta un revenu anial de $37,5 milion, de cual on ia reinvesti $30,4 milion per maneja la aveni.
Harvey ia ave la titulo Ofisior Xef de Filosofia. En 2016, el ia esplica la orijina de la festa:
"Lo ia es la aniversario de un caso de ama rompeda. On ia infla sempre plu acel raconta. Me ia arde mea xica de cor, vos oia, me ia arde la avocato de mea xica de cor -- me ia inventa acel sola per crea interesa! De do la om ia veni, me no sabe. La spirito de lo es vivente e sana. Nos tende dise cuando on demanda sur la natur de la aveni: me no sabe -- descovre lo es tua taxe."
@T La mori de la mas final de la rinoseros blanca de norde
@L aora_oji/2018/la_mori_de_la_mas_final_de_la_rinoseros_blanca_de_norde
====== La mori de la mas final de la rinoseros blanca de norde ======
20 marto 2018
La mas final de la rinoseros blanca de norde ia mori pos menses de maladia. Sudan, ci ia ave 45 anios, ia abita en la Conserveria Ol Pejeta en Cenia. On ia adormi el a lundi pos un mali notable de sua problemes de senese.
Sua mori lasa sola du femas vivente -- sua fia e neta -- de la suspesie en la mundo. Atentas de usa Sudan per continua la suspesie con los ia fali. Esperas per conserva esta rinoseros foca aora a tecnicas de fertili en vitro (FEV).
On ia crea un conta per la mas en Tinder, la ap de cortea, en la anio pasada, no per trova ama, ma per aida finansia la developa de FEV per rinoseros. La conta ia gania per el fanes tra la mundo, ci lamenta aora sua mori e la prosimia de rinoseros blanca de norde a estingui.
Sua materia jenetical ia es colieda a lundi per suporta atentas futur de reprodui rinoseros blanca de norde par tecnolojias avansada selulal, usante semin conservada e ovos de la femas Najin e Fatu.
La rinosero mas, de ci sua eda ia coresponde a 90 anios per un umana, ia es tratada per cambias dejeneral en sua musculos e osos, combinada con multe feris de pel. El no ia pote sta, e ia sufri en sua oras final, regretable.
@T La mori de Montserrat Caballé
@L aora_oji/2018/la_mori_de_montserrat_caballe
====== La mori de Montserrat Caballé ======
6 otobre 2018
Montserrat Caballé, la cantor de opera de ci sua presenta duple con Freddie Mercury ia deveni forte asosiada con la Juas Olimpial en Barcelona en 1992, ia mori a la eda de 85 anios. Sua sania ia sufri tra alga tempo, e el ia es ospitalida en Barcelona en setembre.
Sua carera ia estende tra 50 anios. El ia presenta con la Operas de Basel e Bremen ante sua avansa major en 1965 en Lucrezia Borgia a Carnegie Hall en York Nova.
Plu tarda, el ia presenta con la Opera Metropolitan, la Opera de San Francisco e la Opera Nasional de Wien, aparente con tal cantores como Luciano Pavarotti e Placido Domingo.
La canta Barcelona ia es prima publicida en 1987 e ia deveni un imno per la Olimpiales en la site en la anio pos la mori de Mercury. Caballé ia canta a la rituo abrinte, con Domingo e José Carreras.
Montserrat Caballé ia nase en Barcelona, e cuando el ia ave sola nove anios, el ia es asetada per instrui a la Conservatori Liceu en la site. El ia gradua en 1953, e ia vade a Italia, do el ia canta alga roles minor.
Sua carera ia avansa rapida pos un apare susedosa como Mimi en La Bohème a la Opera Nasional de Suiz en Basel.
En 1965, el ia fa un debua vinsente en la Statos Unida, emprendente con poca preavisa la rol titulal en Lucrezia Borgia par Donizetti a Carnegie Hall. Sua presenta ia trae multe lodas per la belia de sua vose e sua interprete dramosa, e ia institui el como un stela internasional.
En la mesma anio, el ia apare a Glyndebourne en Der Rosenkavalier e La sposi de Figaro, ma el ia espeta tra sete plu anios ante sua debua en Covent Garden, como Violetta en La Traviata.
Con figur corta ma impresante, Caballé ia cari se a regardores tra la mundo con sua personalia nonrepresable. Sua fanes ia nomi el "La Superba".
Sua carera ia es difisilida par maladia. En 1985, el ia pasa tre menses en ospital con un tumor serebral, e ia reseta un trata per un disturba cardial en 1993. En 2015, el ia es condenada a un prisoni suspendeda de ses menses per froda impostal.
Sua funera va aveni en Barcelona a lundi.
@T La NU atenta remedia se sur Suria en Sveria
@L aora_oji/2018/la_nu_atenta_remedia_se_sur_suria_en_sveria
====== La NU atenta remedia se sur Suria en Sveria ======
22 april 2018
En un consenta rara estra York Nova, la Consilio de Securia de la Nasiones Unida fa discutes en un casa de cultiveria distante en la sude de Sveria.
On previde ce la sesion nonformal, cual aveni a cada anio, va foca a la gera en Suria e a vinse la divides profonda de opina de membros sur la tema. Sveria dise ce lo espera injeta momento nova a la prosede.
15 ambasadores consenta con António Guterres, la secretor jeneral, en un sesion de discute cual aveni usual en la norde de York Nova. En esta anio, lo aveni en Backåkra, invitada par Sveria, un membro nonpermanente de la organiza.
Los ia asembla en un casa de estate cual ia parteni a Dag Hammarskjöld, la secretor jeneral du de la NU, ci ia mori en un cade de avion en Africa en 1961. La ala sude conteni en estate la Academia Svensce, cual eleje la resetores de la Premio Nobel de Leteratur.
Carl Skau, visambasador de Sveria a la NU, ia dise ce la idea es "recrea la dialoga" e "relansa la momento" con "umilia e pasientia", a un semana pos la atacas airal par Frans, la Rena Unida e la Statos Unida contra Suria pos un ataca alegada cimical en Duma. "Lo es importante per la credablia de la consilio," el ia comenta.
La atacas airal, esecutada sin un deside de la Consilio de Securia, ia provoca un tensa ferose entre Rusia -- un membro permanente e un aliada de Suria -- e la SUA, Frans, la RU e Xina.
Ma a venerdi, Margot Wallström, la minstro svensce de esternas, ia averti contra nuri "esperas esedente ce la problem intera va es solveda" a la consenta. "Ante tota, nos nesesa ave tempo per parla sur la rol durante de la Consilio de Securia e la Nasiones Unida en la gera suri," el ia dise.
@T La pape condena la mundo de materialisme
@L aora_oji/2018/la_pape_condena_la_mundo_de_materialisme
====== La pape condena la mundo de materialisme ======
25 desembre 2018
Pape Fransisco ia urje persones en paises developada a un vive plu simple e min materialiste.
El ia condena ance la divide vasta entre la ricas e la povres de la mundo, disente ce la nase de Jesus en povria en un stala debe fa ce cadun considera la sinifia de la vive.
El ia parla en la misa tradisional a la sera de natal en la Basilica de San Pedro en la Vatican.
"Per multe persones," el ia dise, "la sinifia de la vive es trovada en posese, en ave un esede de ojetos material. Un avaria nonsasiable marca tota la istoria umana, an oji, cuando, paradoxal, alga persones come lusosa an si la pan dial nesesada per survive manca a tro multe."
Per Fransisco, ci ave 82 anios, esta natal es la numero ses como la xef de la Eglesa Catolica.
El va presenta oji sua mesaje "Urbi et Orbi" (a la site e a la mundo) de la balcon de San Pedro.
Fransisco, la pape prima de America Latina, ia atrae atende a la povria como un tema major de sua papia.
@T La Pape consela sobria de monces en redes sosial
@L aora_oji/2018/la_pape_consela_sobria_de_monces_en_redes_sosial
====== La Pape consela sobria de monces en redes sosial ======
17 maio 2018
La Pape ia dona instruis conselante ce monces fema debe usa apes de redes sosial "con sobria e cautia".
La documento, titulida Cor orans ("Cor preante"), clari regulas sur la vive moncal cual ia apare en 2016. Lo esplica ce sua conselas es intendeda per proteje silentia e recorda. La testo refere a "comunicas sosial" en loca de nomi apes, ma la jornal catolica La Tableta ia indica ce esta refere a Facebook e Twitter entre otra servis.
En la documento, on dise ce on debe aplica cautia a "la cuantia de la informa e la tipo de comunica", en ajunta a la contenida vera de la mesaje.
Un ordina de monces fema en Espania norde ia usa redes sosial en la mense pasada per comenta sur un caso controversa en Pamplona, en cual un grupo de omes acusada de viole coletiva ia reseta condenas cual multe ia regarda como tro pardonosa.
En sua paje de Facebook, la Monces Carmelal de Hondarribia ia defende la vitim par refere a sua propre eleje de vive en un monceria, sin alcol e sin sosiali de sera: "Car lo es un deside libre, nos va defende con tota medias disponable a nos (e esta es un) la direto de tota femes de fa libre la oposada sin ce on judi, viole, menasa o vergonia los per lo."
On no crede ce la consela nova de la Pape resulta de acel caso. Plu, esta no es la ves prima cuando la Eglesa Catolica ia furni conselas a monces fema sur la usa de redes sosial.
La constitui orijinal sur la vive fema moncal, Sponsa Christi ("Sposa de Cristo"), ia es publicida en 1950 par Pape Pio 12, ma Pape Fransisco ia estende lo en 2016 per averti contra la "influe desidente" de la cultur dijital a la sosia. El ia recomenda ce monces no permete ce comunicas dijital "deveni veses per perde tempo".
La Vatican mesma es un tuitor major. Lo ia envia cuasi 15 mil mesajes par sua conta de novas, e plu ca 1500 par la paje engles ofisial de la Pape. Lo opera ance contas de Facebook, Google+, Instagram e YouTube.
@T La presidente de Ertra visita Itiopia
@L aora_oji/2018/la_presidente_de_ertra_visita_itiopia
====== La presidente de Ertra visita Itiopia ======
14 julio 2018
Isaias Afwerki, presidente de Ertra, va ariva en Itiopia a la ves prima pos la comensa en 1998 de la gera fronteral entre la du paises.
Sua visita intende forti la reconsilia resente de la enemis longa. Un acorda de pas per fini la gera de 1998--2000 ia es nunca completa realida, e on ia ave un tensa entre la du paises sempre a pos. Aora on ia acorda reinstitui relatas comersial e diplomata.
La frontera ia es cluida a la fini de la gera, separante familianes. La du paises ia es en un state de "no gera, no pas" de pos 2000, cuando los ia fini un gera en cual deses de miles de persones ia es matada.
Un comision fronteral, instituida par la acorda de pas, ia judi ce la vila Badme, la sentro de la gera, parteni a Ertra. Ma Itiopia ia refusa aseta esta, e donce on ia recomensa nunca la relatas normal.
La disputa ia afeta la rejion intera, con ce cada pais ia adota opinas oposada sur cualce tema. Los ia oposa lunlotra ance en la gera longa de Somalia. On ia acusa Ertra de suporta grupos islamiste, e Itiopia, aliada con la SUA, ia suporta la governa internasional reconoseda.
Asta aora, Ertra ia dise sempre ce la gera pote recomensa a cualce tempo, e donce lo obliga sitadanes a enscrive militar, cisa sin fini. Esta es un de la razonas xef per cual tan multe ertris atenta parti de la pais, xercante refuja en Europa.
La visita de Afwerki es un cambia notable per la presidente, ci ave 72 anios e ia deveni diplomata isolida e regardada como secretosa e paranoica.
Cuando Abiy Ahmed ia emprende la posto de ministro xef de Itiopia a tre menses ante aora, el ia introdui multe cambias. En ajunta a sua invitas a Ertra, el ia sutrae un state de crise, ia libri prisonidas political e ia anunsa reformis economial.
El ia erita un pais cual ia esperia un de la creses economial la plu rapida de mundo en anios resente, ma ia es ance divideda par anios de protestas par persones ci senti marjinalida. Multe persones ia acusa la governa presedente de violes de diretos umana, incluinte torturas e matas estralegal de oposores political.
Abiy es la xef itiopian prima de la etnico oromo, la grupo a la cor de cuasi tre anios de protestas antigovernal en cual sentos de persones ia mori.
La du xefes ia dise ce sua paises va boni la relatas political, economial e diplomata. On va reinstitui lias de transporta e telefon. E on previde ce la volas prima entre la paises en du desenios va aveni en la semana veninte.
Tra la dudes anios pasada, on no ia pote viaja direta de un nasion a la otra. On ia ave no volas, la frontera ia es cluida, e linias de telefon no ia funsiona. La cambia ofre la posible de reuni final per familias divideda par la gera.
@T La presidente de Srilanca cexa sur nozas
@L aora_oji/2018/la_presidente_de_srilanca_cexa_sur_nozas
====== La presidente de Srilanca cexa sur nozas ======
11 setembre 2018
La airocompania nasional ia es criticada par la presidente de la pais sur mal nozas.
Presidente Maithripala Sirisena ia cexa ce, en un viaja resente con SriLankan, on ia dona a el alga anacardias cual no ia conveni per come. En fato, la xef coler ia ajunta, los no ta conveni an per es comeda par canes.
La airocompania, cual ave a la min mil milion dolares de deta, ia fa ancora no comenta sur la cexa de Sirisena. Lo es xasada par alegas de froda en anios resente, e es aora investigada par un comision presidental spesial.
An tal, la natur esata de la problem de la nozas no es clar.
Parlante ier a un asembla de cultivores en la sude de Srilanca, Sirisena ia dise ce la produidas ofendente ia es servida a el en un vola de Kathmandu, la capital de Nepal, a Colombo en la semana pasada.
Esta no es la ves prima cuando un paceta de nozas en un avion ia deveni un tema per jornalistes.
A cuatro anios ante aora, Heather Cho, la fia de la xef de Korean Air, ia obliga un avion a revade a sua porte de parti, cuando un ospitor ia servi a el nozas de macadamia en un paceta e no sur un plato. A pos, on ia condena el per viole la securia de la avion, e el ia spende alga menses en prison.
@T La presidente pasada de Brasil es condenada
@L aora_oji/2018/la_presidente_pasada_de_brasil_es_condenada
====== La presidente pasada de Brasil es condenada ======
6 april 2018
Un judor brasilera ia comanda ce Luiz Inácio Lula da Silva, la presidente pasada, presenta se a la polisia ante la fini de la posmedia oji, per comensa un condena de 12 anios en prison per froda.
Ier, la Corte Suprema ia deside contra la solisita de Lula per resta libre en cuando el apela contra sua condena. Lula dise ce la acusas es political motivada, e intendeda per preveni el de aspira la presidentia en otobre. El ia ta es la aspiror la plu probable de gania.
En sua comanda, Sergio Moro ia dise ce Lula, ci ave 72 anios, debe presenta se ante 17:00 de ora local a la xeferia de la polisia federal en Curitiba, un site sude.
Moro ia dise ce un selula spesial "ia es preparada a ante... en cual la presidente pasada va es separada de otra prisonidas, con no risca a sua solidia moral o fisical".
Pos la anunsia, sentos de suportores de Lula ia asembla estra la sindicato de metalores prosima a São Paulo.
La acusas veni de un investiga antifrodal, conoseda como "Lava de Auto", cual ia implica politicistes major de partitos diversa.
Lula ia servi como presidente entre 2003 e 2011. An con un vantaje en sondas de opina per la eleje en otobre, el es ancora un figur dividente. En la pasada, el ia es un metalor e ativiste de sindicato. El ia deveni la gidor sinistriste prima ci ia susede deveni presidente en cuasi un dui de sentenio.
En sua presidentia, Brasil ia esperia sua periodo la plu longa de crese economial en tre desenios, permetente ce sua governa spende multe sur programes sosial. Deses de miliones de persones ia es estraeda de povria par la stratejias de sua governa, e, pos du periodos en serie, el ia parti de la posto con popularia recordo.
En 2014, acusores ia comensa investiga alegas ce dirijores a Petrobras, la compania nasional de petrolio, ia aseta sobornas per dona contratas a companias spesifada de construi. Lava de Auto ia descovre un rede vasta de froda e sobornas a politicistes de la spetro intera.
Lula mesma ia es condenada de reseta un aparte de plaia con valua de 3,7 milion reais ($1,1 milion), como un soborna par OAS, un compania de injenia.
@T La produi recordo de cocaina en Colombia
@L aora_oji/2018/la_produi_recordo_de_cocaina_en_colombia
====== La produi recordo de cocaina en Colombia ======
20 setembre 2018
Un statistica nova publicida par la Nasiones Unida indica ce la produi de cocaina en Colombia ia ateni un nivel recordo en 2017.
La Ofisia NU sur Drogas e Crimin dise ce la produi ia crese par sirca 31% a 1400 tones, cultivada sur 171 mil ectares. La departe ia averti ce la produi pote dana laboras resente de pasi.
Colombia es la produor de cocaina la plu grande de mundo. Multe de la droga fini en la SUA, cual es la consumor la plu grande.
La reporta dise ce la area usada per crese coca en Colombia en la anio pasada ia es la plu grande rejistrada a cualce tempo, e plu grande ca en 2016 par 25 mil ectares. La cocaina teorial produable ta ave un valua de $2,7 mil milion en la mercato local.
La NU ia dise ce la rejion bordante la Mar Pasifica en Colombia es la plu intensa cultivada. Sola, la stato Nariño a la frontera con Ecuador conteni plu tera cultivada per coca ca la intera de Peru, cual es un otra produor major.
Otodes persentos de la coca ia es creseda en la mesma area tra la des anios pasada, e la recolies produi folias de coca -- la ingrediente xef de cocaina -- a 33% plu ca en 2012.
La pais ia batalia la produi de cocaina tra anios, e la SUA furni sirca $400 milion en cada anio per aida esta. En la anio pasada, Colombia ia suscrive ance un acorda de $300 milion con la NU, intendeda per redui la produi de cocaina par compensa cultivores ci aseta cambia de crese coca a crese otra plantas.
En agosto, Iván Duque Márquez, la presidente nova elejeda, ia informa reportores ce la governa va crea un politica nova de combate drogas, disente ce la gol es "resultas concreta" en la cuatro anios seguente. Ma un scema de usa avionetas per jeta erbiside a cultivas de coca ia atrae critica.
Sua presedor, Juan Manuel Santos, ia suspende la fumiga airal con glifosato en 2015, pos avertis par la Organiza Mundal de Sania ce la cimical ave cisa un relata con canser.
La comersia de cocaina en Colombia flori ancora, an pos un acorda de pas de 2016 cual ia fini sinco desenios de gera armada con la FARC, un grupo rebelante major. Alga culpa la governa per consentra tro forte a pas. Otras ia dise ce par deveni legal, la rebelores FARC ia lasa un vacua en la mercato cual los ia controla a ante.
@T La reabri de la tram volante en Sarajevo
@L aora_oji/2018/la_reabri_de_la_tram_volante_en_sarajevo
====== La reabri de la tram volante en Sarajevo ======
7 april 2018
A dudes-ses anios pos sua destrui en la Gera Bosnian, la tram volante de Sarajevo ia recomensa funsiona.
La monte Trebević ia es un punto de vista usada par xutores e morterores serbsce en la aseja de la capital de Bosnia, cual ia ocupa 1425 dias entre 1992 e 1996.
On ia draga la campos de bombetas sola en anios resente.
La tram reabrida es aora nomida per un gardor pasada, Ramo Biber, ci ia es matada par fusilores serbsce en 1992, a la comensa de la gera.
32 gondolas viaja de la sentro de Sarajevo a la apico de la monte Trebević.
On no ia repara la tram direta pos la dana cual lo ia sufri en la gera. Sua restora ia custa $8 milion, de cual un dui ia es donada par un dotor american ci es sposida a un siensiste bosnian.
En 1984, la monte ia es usada per corsas de bob en la Juas Olimpial de Inverno.
@T La Rena Unida esclui diplomatas rusce
@L aora_oji/2018/la_rena_unida_esclui_diplomatas_rusce
====== La Rena Unida esclui diplomatas rusce ======
15 marto 2018
La Casa Blanca dise ce lo "sta en unia" con la Rena Unida, "sua aliada la plu prosima", e suporta la deside de esta de esclui 23 diplomatas rusce.
Theresa May, la ministro xef brites, ia anunsia la esclui de la diplomatas pos cuando Moscva ia refusa esplica como un cimical antinervo ia es usada a un spior pasada en la Rena Unida. Moscva continua nega tota envolve en la ataca.
Un portavose per Donald Trump ia acusa Rusia de sumina securia, disente ce la SUA vole serti ce "esta spesie de ataca odiable no aveni denova", e descrivente la esclui de la diplomatas como "un responde justa":
"Esta ata la plu resente par Rusia conforma a un model de condui en cual Rusia iniora la ordina internasional regulada, sumina la autonomia e securia de paises tra la mundo, e atenta suverti e desonora instituidas e prosedes democrata de la Ueste."
La spior pasada Sergei Scripal e sua fia Iulia resta estrema malada en ospital pos es trovada colasada sur un banca en Salisbury, England a 4 marto.
May ia comenta ce on ia identifia la cimical usada en la ataca contra los como parteninte a un grupo de antinervos developada par Rusia, conoseda como Novitxoc. El ia dise ce on ave "no otra conclui" ca crede ce Rusia es "culpable" per la venenis.
Ance parlante a la Consilio de Securia de la Nasiones Unida, un ambasador brites, Jonathan Allen, ia acusa Rusia de rompe sua obligas su la Acorda de Proibi de Armas Cimical. En responde, la ambasador rusce, Vasili Nebenzia, ia nega la envolve par Moscva en la ataca e ia esije un "demostra material" de Britan per suporta sua acusa.
Sergei Lavrov, la ministro rusce de esternas, ia dise ce Moscva va coopera en la caso si lo reseta de la Rena Unida un solisita formal per clari su la Acorda de Proibi, cual defini un limita de des dias per un responde.
Ma Rusia ia refusa sasia la limita definida par la Rena Unida per esplica la usa de la antinervo, provocante May a anunsia la esclui de diplomatas e otra medias intendeda per envia "un mesaje clar" a Rusia.
@T La resinia de la presidente miama
@L aora_oji/2018/la_resinia_de_la_presidente_miama
====== La resinia de la presidente miama ======
21 marto 2018
Htin Kyaw, la presidente de Miama, ia resinia. En menses resente on ia deveni plu consernada sur la sania de la om de 71 anios, cuando el ia pare frajil a avenis ofisial.
El ia es inaugurada como presidente en 2016 pos elejes cual ia fini desenios de gida militar. Ma el ia es esensal un gidor per rituos, con ce Aung San Suu Kyi, la gidor oposante, servinte como presidente par fato.
Un declara a la paje de Facebook de la presidentia ia dise ce Htin Kyaw desira "un reposa". La vispresidente, Myint Swe, un jeneral pasada, va servi como presidente asta cuando on eleje un nova ante la pasa de sete dias.
Suu Kyi, ci ia es prisonida tra anios su la junta militar, es proibida de prende la posto. Un frase en la consititui -- jeneral regardada como desiniada con intende de impedi el -- dise ce no person con enfantes de un otra nasionalia pote deveni presidente. El ia ave du enfantes con sua sposo brites (ci es aora mor).
Como enfante, Htin Kyaw ia es la ami de Suu Kyi, sua conselor tra tempo longa, e sua gidor de veculo tra alga tempo. On ia regarda Htin Kyaw como cuieta e fidable.
La Alia Nasional per Democratia de Suu Kyi ia vinse inondante en elejes en novembre 2015. Ma la partito ia es segueda par problemes pos sua prende de potia, de cual la plu evidente es la crise en la provinse Rakain.
Deses de miles de migrores rohingia ia fuji de un colpa militar provocada par atacas matante contra polisierias. La governa ia dise ce la opera es dirijeda a persones combatosa, ma sua estende ia leva acusas de jenoside.
La popularia global de Suu Kyi ia cade rapida, e el ia trova ce el es sempre plu isolida par sua aliadas internasional pasada.
@T La saisi de enfantes de un scola camerunes
@L aora_oji/2018/la_saisi_de_enfantes_de_un_scola_camerunes
====== La saisi de enfantes de un scola camerunes ======
6 novembre 2018
Desuples de persones, xef scolores, ia es saisida de un scola abitada en la ueste de Camerun.
A la min 79 studiantes e tre otras, incluinte la ensenior xef, ia es ier saisida en la temprana de la matina en Bamenda, la capital de la rejion norde-ueste. On fa aora un opera vasta de xerca, envolvente la armada camerunes.
La rejiones norde-ueste e sude-ueste de la pais ia es afetada par un rebela separadiste en anios resente. Militias ci ia esije la autonomia de la rejiones ia urje ce on boicota la scolas.
Ma no organiza ia dise ce lo ia fa la saisi a la Liseo Presbiterian de Bamenda, cual ave enfantes de edas entre 10 e 14 anios.
Un video de alga de la enfantes, sur cual on crede ce un de la saisores ia filma lo, sirculi en redes sosial.
La studiantes, de ci tota es xicos, es en un sala pico. Los aspeta nervosa cuando la person ci teni la camera comanda los a dise sua nomes e locas de orijina. Los repete ance: "Me ia es prendeda de scola en la note pasada par la xicos amba. Me no sabe do me es."
"Amba" pertine a Ambazonia, la nom de la pais nova cual la separadistes desira crea.
La militias separadiste ia comensa emerji en 2017 pos cuando la fortes de securia ia supresa protestas coletiva, gidada par avocatos e enseniores, sur la alega ce la governa ia fali reconose sufisinte la sistemes engles de lege e educa en la norde-ueste e sude-ueste.
On ia acusa la governa de emplea persones instruida en la tradision legal e educal franses en postos major, e de marjinali jeneral la minoria de lingua engles, ci composa sirca 20% de la popla de Camerun.
Paul Biya, ci es presidente ja de 1982, ia es resente reelejeda per un periodo sete, con plu ca 70% de la votas. Partitos oposante alega ce la eleje ia es frodosa, ma atentas legal ia fali cansela la resulta.
@T La secretas jenetical de la rosa
@L aora_oji/2018/la_secretas_jenetical_de_la_rosa
====== La secretas jenetical de la rosa ======
1 maio 2018
A la ves prima, rexercores ia desifri la "testo" jenetical intera de la rosa. Sua istoria revela un surprende: lo es plu prosima relatada a la fresa ca nos ia suposa. Pos tempo, la labora va produi cisa rosas con odores e colores nova.
La prepara de la mapa nova de jenom ia ocupa oto anios, e ia revela jenes pertinente a la crea de odor e color e a la longia de vive de flores.
La studia, par un grupo de plu ca 40 siensistes de Frans, Deutxland, la Rena Unida e Xina, furni un comprende plu bon de la razonas perce la colores e odores de rosas es tan diversa. La informa jenetical va aida cultivores a developa varias nova cual dura plu longa en la vaso, o es plu capas de resiste pestes.
Lo lumina ance la familia Rosaceae, cual conteni no sola plantas ornal como la rosa, ma ance frutintes como pomos, peros e plantas de fresa.
La cultiva de rosas en jardines ia comensa a miles de anios ante aora, probable en Xina. En la periodo roman, rosas ia es multe creseda en Asia sude-ueste, do on ia usa los per parfum o como confeti.
@T La site la plu abitable de mundo
@L aora_oji/2018/la_site_la_plu_abitable_de_mundo
====== La site la plu abitable de mundo ======
14 agosto 2018
Wien, la capital de Osteraic, ia vinse Melbourne en Australia per deveni nomida la site la plu abitable de mundo.
Esta es la ves prima cuando un site european ia ateni la loca prima en la sonda anial, fada par Economist Intelligence Unit. La lista global ordina 140 sites par fatores diversa, incluinte stablia political e sosial, crimin, educa e asede a aida medical.
En la sonda, Manchester ia asende plu ca cualce otra site european, tra 16 puntos a la numero 35. Pos sua asende, lo es plu alta ca London par 13 puntos, la difere la plu grande entre la du pos la comensa de la sonda a du desenios ante aora.
La salta de Manchester tra la lista es la resulta de un gradi bonida per securia. En la anio pasada, on ia critica la sonda car lo ia basi Manchester pos un ataca en stadion cual ia mata 22 persones.
En esta anio, la editor de la sonda ia dise ce Manchester "ia mostra durantia en la recovre de la site pos un ataca resente de terorisme multe reportada, cual ia secute la stablia a ante."
El ia dise ce la securia ia boni ance en "alga sites de Europa ueste" e ce la susede de Wien refleta "un reveni a stablia relativa tra multe de Europa".
Longo la sonda, cuasi un dui de la sites ia reseta un boni de sua grado de abitablia en la anio pasada. Melbourne, cual ave la numero du en la lista de esta anio, ia vinse en cada de la sete anios direta presedente. Du plu sites australian apare ance entre la des plu abitables de esta anio: Sydney e Adelaide.
A la otra estrema de la scala, Dimashq en Suria apare como la site la min abitable, prosima segueda par Dhaka en Bangladex e Lagos en Nijeria. Crimin, turba interna, terorisme e gera ave ave roles forte en deside la des sites la min abitable.
@T La sposi de la Duxe e Duxesa de Sussex
@L aora_oji/2018/la_sposi_de_la_duxe_e_duxesa_de_sussex
====== La sposi de la Duxe e Duxesa de Sussex ======
20 maio 2018
Ier, en la Rena Unida, Prinse Harry e Meghan Markle ia sposi en un rituo a la Castel de Windsor, a ueste de London. La duple ia intercambia prometes e anelos ante Rea Elizabeth 2 e 600 invitadas en la Eglesa de San Jorj. La duple es aora nomida la Duxe e Duxesa de Sussex.
Vestida en un roba par Clare Waight Keller, desinior brites, Markle ia pasea solitar longo la parte prima de la eglesa, ante cuando Prinse Charles, la padre de Harry, ia acompania el asta la altar.
Sra Markle ia es ance acompaniada par des damas e pajos, de ci tota ia es enfantes joven, incluinte Prinse George e Prinsesa Charlotte, la fies de William, frate de Harry.
El ia porta la coroneta de diamante de Rea Mary (sposa de Re George 5) de 1932, prestada a el par la rea presente. Sua roba blanca ia es desiniada per Givenchy, un compania franses de moda, e sua aspeta ia es completida par un velo longa de sinco metres e brodeda con flores de cada pais en la Comunia de Nasiones.
Persones famosa entre la invitadas ia inclui Oprah Winfrey, George e Amal Clooney, David e Victoria Beckham, e Elton John, ci ia canta a la reseta pos la rituo.
La Prinse de Cimri ia acompania Markle longo la eglesa car la sania de sua padre, Thomas, ia preveni esta de partisipa. El ia televide la rituo en California, en loca.
En sua prometes, Markle no ia dise ce el va "obedi" sua sposo, e la prinse ia rompe un tradision real par eleje porta un anelo de sposia. La sua es de platino tramada, e lo de sua sposa es de oro cimrica.
Bispo Michael Curry, presidente de la Eglesa Bispal de America, ia fa un parla animada e felisinte sur la potia de ama. Dama Jane Fellowes, sore de la madre mor de Harry, Prinsesa Diana de Cimri, ia leje de la Biblia, e Karen Gibson e la Coro Kingdom ia presenta la canta sol Stand By Me ("Resta con me").
Cuando la sposes nova ia es suscrivente la rejistra ofisial, un xeliste de 19 anios, Sheku Kanneh-Mason, ia presenta tre pesos par Gabriel Fauré, Franz Schubert e Maria Theresia von Paradis, acompaniada par un orcestra.
La coro ia presenta un varia joiosa de la canta This Little Light of Mine ("Esta lus peti de me") en cuando la Dux e Duxesa de Sussex ia sorti de la eglesa per viaja en caro tra la sentro de Windsor entre folas grande de bondesirores.
La vila ia ave ier plu ca 100 mil visitores, e 1200 persones -- incluinte multe ci ia es reconoseda per sua labora carital -- ia es bonvenida a en la ensirca de la Castel per la aveni.
A pos, la congrega en la eglesa ia vade a un come media ospitada par la rea, do la duxesa nova ia fa un parla, como ance sua sposo e padre par sposi. En la sera, la familia ia selebra plu privata con 200 amis prosima.
La custa de la sposi, aprosima un dui de milion paundes, ia es paiada par la familia real.
@T La SUA menasa Rusia sur la ataca en Suria
@L aora_oji/2018/la_sua_menasa_rusia_sur_la_ataca_en_suria
====== La SUA menasa Rusia sur la ataca en Suria ======
12 april 2018
La SUA dise ce "tota posibles es en discute" en responde a un ataca suspetada de armas cimical en Suria, con ce otra gidores ueste continua considera sua reata. La SUA ancora no ia fa un deside final, ma ia dise ce lo regarda Rusia e Suria como culpable per la aveni. La Consilio de Securia Nasional de la SUA va consenta oji.
Ativistes, salvores e medicistes dise ce deses de persones ia mori a saturdi en la vila Duma, ocupada par rebelores. Ma la governa de presidente Bashar al-Assad, cual es militar suportada par Rusia, nega ce lo ia esecuta un ataca cimical.
En un tuita temprana ier, presidente Donald Trump ia menasa Rusia sur colpas de misil en Suria: "Prepara, Rusia, car los va veni, bon e nova e capas." En la mesma mesaje, el ia descrive la gidor de Suria como "un animal matante par gas".
La SUA, la Rena Unida e Frans ia acorda labora en junta, e on crede ce los prepara un ataca militar en responde a la ataca cimical alegada. La ministro de defende de la SUA ia dise ce sua pais evalua ancora la ataca, ma el ia ajunta ce la militar sta preparada "per furni posibles militar si los conveni como la presidente determina".
La Casa Blanca ia dise ce Trump no ia spesifa un scema per cuando colpas militar pote aveni. Un xasatorpedo SUA de misiles gidada es en la Mar Mediteraneo.
En la Rena Unida, on reporta ce Theresa May, ministro xef, pare preparada per permete un reata militar en Suria sin xerca la aproba de parlamento a ante: el no vole demanda ce la SUA espeta asta cuando el ia consulta la parlamentores.
On reporta ce Emmanuel Macron, la presidente de Frans, va fa un deside en la dias veninte. El ia dise ce cualce atacas va es dirijeda contra la "capasias cimical" de la governa suri.
Entretempo, António Guterres, la secretor jeneral de la NU, ia averti sur la nesesa de evita ce la situa "spirali ultra controla".
Ativistes oposante dise ce aviones de la governa suri ia cade bombas plenida con cimicales nosiva sur Duma, la final de la fortreses major de rebelores, prosima a la capital, Dimashq. Aidores local ia reporta ce on ia trata plu ca 500 persones per sintomes "indicante esposa a un ajente cimical".
Ier, la Organiza Mundal de Sania de la NU ia esije asede per serti reportas ce 70 persones ia mori, incluinte 43 ci ia mostra "sintomes coerente con esposa a cimicales multe nosiva". Un ecipo de la Organiza per la Proibi de Armas Cimical va vade a Suria "pos corta" per determina esce armas proibida ia es usada.
Duma ia es denova atacada par fortes suri e rusce en la semana pasada. Aora, rebelores parti de la vila su un acorda cual envolve la militar rusce.
Rusia ia descrive la reportas de la ataca cimical como "un provoca" desiniada per justi un interveni ueste contra sua aliada. Lo ia dise ier ce samples prendeda de la vila ia revela no sustantias cimical.
Figures major rusce ia averti sur un responde rusce a un ataca par la SUA. Ier, Alecsander Zasypkin, la ambasador rusce de Lubnan, ia repete un averti par la xef de la militar ce on va tira misiles a tera e ataca la locas de cual los ia es lansada si los menasa la vives de empleadas rusce.
Ance ier, un portavose per la ministro rusce de esternas ia demanda esce la intende de atacas ueste es cisa "sutrae rapida la trasas de la provoca" tal ce "esaminores internasional va ave no cosa per regarda en xerca atesta".
Parlante a ambasadores nova en Moscva, presidente Vladimir Putin ia dise ce el espera ce la sensa comun va domina e ce la situa va stabli. El ia dise ce Rusia "va manteni completa tota de sua obligas internasional".
@T La SUA resta "cargada e preparada" contra Suria
@L aora_oji/2018/la_sua_resta_cargada_e_preparada_contra_suria
====== La SUA resta "cargada e preparada" contra Suria ======
15 april 2018
Presidente Donald Trump ia averti la governa de Suria ce la SUA es "cargada e preparada" per ataca denova si lo esecuta plu atacas cimical.
La averti ia veni pos un colpa par misiles de la SUA, la Rena Unida e Frans a tre locas suri en responde a un ataca matante, sur cual on suspeta ce lo ia es cimical, en la vila Duma a un semana ante aora.
Suria nega la usa de cimicales e dise ce la ataca ia es finjeda par rebelores.
La Consilio de Securia de la Nasiones Unida ia rejeta un vota proposada par Rusia, aliada con Suria, condenante la atacas gidada par la SUA.
La onda de colpas representa la ataca la plu grande par potiosas ueste contra la governa de presidente Bashar al-Assad en sete anios de la gera interna de Suria.
@T La tomba de Tutancamon ave no cambra secreta
@L aora_oji/2018/la_tomba_de_tutancamon_ave_no_cambra_secreta
====== La tomba de Tutancamon ave no cambra secreta ======
7 maio 2018
Ofisiores en Misre ia fini sua xerca per un cambra secreta en la tomba de Tutancamon, concluinte ce lo no esiste. Presedente, los ia es cuasi serta ce un plu sala es ascondeda pos la mur de la tomba famosa de la re-xico ci ia vive a 3000 anios ante aora.
Un teoria ia sujesta ce la sala es cisa la tomba de Rea Nefertiti, sur ci alga pensa ce el ia es la madre de Tuntancamon. Ma rexercas nova ia trova simple ce la cambra no esiste.
La xerca per la loca ascondeda ia comensa cuando Nicholas Reeves, un arceolojiste engles, ia esamina scanes detaliosa de la tomba xef, e ia descovre lo cual ia pare como trasas apena persepable de portes su la jeso. En sua esajo "La entera de Nefertiti", el ia razona ce la tomba relativa peti ia es orijinal desiniada per la rea, e ce lo es posible ce sua restas reposa en un tomba plu profonda.
On ia trova nunca la restas de Nefertiti, ma on ia fa multe divinas. Par causa de un sculta de el, con 3000 anios ma perfeta conservada, Nefertiti es probable la fem la plu reconosable de Egipte antica. On crede ance ce cisa el mesma ia rena Egipte entre la mori de sua sposo e la troni de Tutancamon.
Pos la publici dramosa par Reeves, un serie de scanes de radar ia pare suporta sua teoria tan multe ce autoriosas major en Misre ia declara ce los ave "un sertia de 90%" sur la esiste de un plu cambra. Un plu scane ia pare ance suporta la idea, cual ia ta es la descovre la plu importante en desenios per la studia de Egipte antica.
An tal, spesialistes italian de la Universia de Torino ia usa scanes nova de radar penetrante per ateni sua conclui, declarante ce los fida la resultas.
Dr Francesco Porcelli, xef de la rexercores, ia comenta: "Lo es cisa pico deludente ce no cosa esiste pos la mures de la tomba de Tutancamon -- ma a la otra lado me crede ce esta es bon siensa." El ia esplica ce los ia analise tre colies diversa de datos de radar, e ia contracompara la resultas per elimina "complicas en la datos" cual ia afeta la resultas de scanes pasada.
La ministro misri de anticas, Khaled al-Anani, ia dise ce la autoriosas en la pais aseta la conclui.
@T La UE aproba la acorda per la sorti de la RU
@L aora_oji/2018/la_ue_aproba_la_acorda_per_la_sorti_de_la_ru
====== La UE aproba la acorda per la sorti de la RU ======
26 novembre 2018
Xefes de la Uni European ia aproba ier un acorda sur la retira de la Rena Unida (RU) e relatas futur, insistente ce lo es "la sola acorda posible, e la plu bon".
Pos dudes menses de negosias, la 27 xefes ia aproba la acorda pos min ca un ora de discute. La acorda nesesa ancora es aprobada par la parlamento de la RU, ma la UE ia dise ce lo ofre un modo de "retira ordinada".
Parlante en Bruxelles, Theresa May, ministro xef de la RU, ia urje tota persones a uni sur la acorda, declarante ce la popla brites "no desira spende plu tempo en disputa sur Brexit".
La Rena Unida va retira se de la Uni European a 29 marto 2019. La UE ia validi ofisial la reegulas per esta en un consenta corta, fininte negosias cual ia comensa en marto 2017.
Jean-Claude Juncker, presidente de la Comision European, ia dise ce si cualce person en Britan opina ce la bloco va ofre regulas plu bon si parlamentores rejeta la acorda, acel person va es "deludeda".
Ma la presidente de la Consilio European, Donald Tusk, ci ia anunsia la acorda en Twitter, ia indica ce el no va divina sur lo cual ta aveni en un tal situa, disente: "Me no es un clarvidente."
On previde ce la parlamento RU va vota sur la acorda a 12 desembre, ma lo no es serta ce esta va aproba lo.
A un confere jornaliste en Bruxelles, May ia dise ce la acorda va fini la direto de viaja "en modo completa e per sempre", va proteje la unia constitual de la pais, e va garantia ce un reveni a "leges preparada en nosa pais par politicistes democrata elejeda, interpreteda e enforsada par cortes brites".
El ia ajunta ce la acorda no va sutrae Jibraltar de la "familia RU", en refere a un disputa resente con Espania sur acel teritorio.
On ia aproba vera du cosas. La un es la acorda de retira, un documento legal de 599 pajes cual presenta la regulas de la retira de la RU. Lo clari la paia nesesada, la diretos de sitadanes e un garantia de manteni la frontera entre Er e Er Norde.
La otra es un declara political cual defini la relata posible entre la Rena Unida e la Uni European a pos, resomante como comersia e securia va funsiona.
On ia ave no vota formal ier, e la UE ia prosede simple par acorda jeneral. Juncker ia dise ce lo es "un dia triste" e ce nun debe "leva vitros de xampania" a la idea de la retira.
@T La urso sibirsce fa caos tra Europa
@L aora_oji/2018/la_urso_sibirsce_fa_caos_tra_europa
====== La urso sibirsce fa caos tra Europa ======
2 marto 2018
Partes grande de Europa ia esperia un plu note jelada. La neva e ventas ia clui vias, ferovias e scolas, e ia obliga la cansela de sentos de volas.
55 persones ia mori par causa de la clima; multe de los ia es sin casa en Polsca. La Organiza Mundal de Sania ia averti ce persones povre, sin casa o migrante va es la plu afetada par la fria. En Paris, on ia abri refujerias per la sirca 3000 persones sin casa de la site.
La fria noncomun afeta locas tan sude como la Mediteraneo. Neva ia apare an sur la plaias de la Riviera Franses. Er prepara per sua cade de neva la plu forte de desenios, en cuando Tempesta Emma prosimi de la sude.
On ia dona nometas diversa a la jela. En Nederland on nomi lo "la urso sibirsce"; en Sveria lo es "la canon de neva"; e en la Rena Unida on refere a "la bestia de la este".
La airoporto en la site Geneve en Suiz ia clui a la matina ier, ma ia reabri pos usa de scopinevas per desbloci la atereria. Ance la Airoporto Schiphol de Amsterdam ia es afetada par la ventas jelante, e desuples de volas ia es canselada o posponeda.
En Frans, sirca 2000 motoristes ia es encaliada sur un autovia prosima a la site Montpellier. Alga de los ia es trapida tra 24 oras. On ia cansela alga trenes de Eurostar entre Bruxelles, Paris e London.
Ucraina, do on previde plu nevones per la dias veninte, trova se en un disputa nova con Rusia sur furnis de gas. La corpora rusce jigante Gazprom ia dise ce, par manca de acordas completida, lo no va recomensa distribui gas como espetada.
La compania ucrainsce Naftogaz ia acusa Gazprom de viole sua obliga contratal, e la Comision European funsiona como un ajente entre la du.
@T La virus ebola reapare en DR Congo
@L aora_oji/2018/la_virus_ebola_reapare_en_dr_congo
====== La virus ebola reapare en DR Congo ======
9 maio 2018
On ia declara un eruta de la virus ebola en la norde-ueste de la Republica Democrata de Congo, con du casos confirmada e 17 moris.
La aveni en la vila Bikoro segue a plu ca un anio pos la mata par la maladia de cuatro persones en la pais. E en 2014, la virus ia mata plu ca 11 mil persones en Gine, Siera Leon e Liberia.
La anunsia ia es fada pos cuando resultas de laboreria ia confirma du casos de ebola en un sample de sinco pasientes suspetada.
Un portavose per la Organiza Mundal de Sania ia dise: "Nosa conserna xef es vade a Bikoro per labora a lado de la governa. Laboras con asosiores e respondes temprana e coordinada va es esensal per conteni esta maladia matante."
La organiza ia relasa $1 milion de un reserva de crise e ia envia plu ca 50 espertas per labora con ofisiores en la pais.
Esta es la ves nove de un eruta rejistrada de ebola en la Republica Democrata de Congo. On ia fa ala la descovre prima de la virus en 1976 (cuando la pais ia es conoseda como Zair) -- la virus prende sua nom de la rio Ebola.
On crede ce la virus es sperdeda tra distantia longa par ciroteros de fruta, e es comun transmeteda a umanas tra carne contaminada de animales xasada.
@T La vispresidente pasada de Guatemala es prisonida
@L aora_oji/2018/la_vispresidente_pasada_de_guatemala_es_prisonida
====== La vispresidente pasada de Guatemala es prisonida ======
10 otobre 2018
Un corte en Guatemala ia condena la vispresidente pasada, Roxana Baldetti, a des-sinco anios e un dui en prison per sua rol en lo cual ia deveni conoseda como la scandal de "acua majiosa".
Acusores ia dise ce el ia froda un reserva governal instituida per descontamina un lago. El ia acorda paia cuasi $18 milion a un compania israeli per puri la lago Amatitlán, ma la formula usada ia es un solve nonefetosa de acua, sal e cloro.
La acorda ia es negosiada par sua frate, Mario, ci no ia ave un posto ofisial. On ia condena el a des-tre anios en prison.
En sua deside, judor Pablo Xitumul ia dise ce Baldetti ia es la scemor de un projeta intendeda per froda la governa guatemalteca.
Jornalistes en Guatemala descrive la deside como major, en un rejion do persones rica e potiosa ia es tradisional esenta de puni.
Baldetti ia parti desonorada de sua posto en 2015, pos la protestas antifrodal la plu grande cual la pais ia vide. El va es ance litigada en un otra scandal relatada con la paia de sobornas par companias privata a la duana guatemalteca.
Acusores ia implica Baldetti e Otto Pérez Molina, la presidente de acel tempo, en la scema de froda. Pérez Molina ia es detenida a la fini de sua presidentia en 2015 e es ancora arestada, espetante sua litiga. Ambos nega la alegas.
@T La vive de Stephen Hawking, 1942–2018
@L aora_oji/2018/la_vive_de_stephen_hawking_1942_2018
====== La vive de Stephen Hawking, 1942--2018 ======
14 marto 2018
La fisiciste famosa Stephen Hawking ia mori a la eda de 76 anios. El ia mori pasosa a sua casa en Cambridge, England en la oras temprana de oji.
El ia batalia la maladia de motoneuron per deveni un de la siensistes la plu respetada e bon conoseda de sua tempo. Un om de umor grande, el ia deveni un ambasador poplal per siensa e ia atende sempre ce sua laboras es jeneral asedable.
Sua libro Un istoria consisa de tempo ia deveni un bonvendeda nonprobable, an si on no sabe cuanto persones ia susede leje asta la fini de lo. El ia apare en alga programes popular televisada, e ia presta sua vose sinteseda a rejistras diversa.
Stephen William Hawking ia nase en Oxford, England a 8 janero 1942. Sua padre, un biolojiste rexercante, ia move de London con sua madre per evade la bombi deutx. Hawking ia crese en London e St Albans e, pos gania un diploma de grado prima en fisica a Oxford, ia vade a Cambridge per fa rexercas posgraduada en cosmolojia.
Como adolesente, el ia gusta es un cavalor e remor, ma cuando el ia es a Cambridge on ia diagnose el con un forma de maladia de motoneuron par cual el ia deveni ultima cuasi intera paraliseda. En 1964, cuando el ia prepara sposi sua sposa prima, Jane, sua dotores ia suposa ce el ave no plu ca du o tre anios de vive restante.
Ma la maladia ia developa plu lenta ca on ia previde. La duple ia ave tre enfantes, e en 1988 -- an si alora capas de parla sola con usa de un sintesador de vose, pos un traceotomia -- Hawking ia completi scrive Un istoria consisa de tempo, un gida a cosomolojia per nonfisicistes. Lo ia vende plu ca des milion copias, an si sua autor ia es consensa ce on ia descrive lo como "la plu popular de la libros nonlejeda".
El ia descovre la fenomeno cual on nomi aora la radia de Hawking, en cual bucos negra emete enerjia e desapare. El ia es famosa per sua capasia nonusual de imajina solves siensal sin calcula o esperimenta.
Ma la plu atende ia es cisa atraeda par sua "teoria de tota", cual ia sujesta ce la universo evolui seguente leges bon definida. El ia dise: "Esta colie completa de leges pote dona a nos la respondes de esta demandas: Como la universo la comensa? A do lo vade, e esce lo va ave un fini? Si tal, como lo va fini? Si nos trova la respondes de esta demandas, nos va conose vera la mente de Dio."
La fama de Hawking ia es atestada an par La Simpsones -- el ia es imajida como bevinte a un bar con Homer, e sujestante ce el considera fura la idea de Homer ce la universo ave la forma de un donut.
El ia apare ance como se mesma en un episodio de la serie comedial Nana Roja de la BBC, e como un ologram de se en Star Trek: La jenera nova. La bande roc Pink Floyd ia usa sua vose sinteseda famosa en la introdui de un canta en sua album The Division Bell de 1994.
Nonprevenida par sua state medical, el ia continua sua labora como Profesor Lucasal de Matematica a la Universia de Cambridge, e en 2001, el ia publici sua libro du -- La universo en un casca de noza.
El ia crede ce sua maladia ia trae alga beneficas, disente ce ante cuando el ia developa lo, el ia es noiada par la vive. Ma sua state ia fa ce el deveni nonevitable dependente de otras. El ia loda comun sua sposa, ci ia cura el tra plu ca dudes anios, e amis e relatadas ia es xocada cuando el ia divorsa el per un de sua curores, ci el ia sposi en 1995.
Ja en 2000, Hawking ia es un visitor frecuente a la departe de urjentes en la Ospital Addenbrooke en Cambridge, xercante trata per feris diversa. La polisia ia interoga persones sur alegas ce el ia sufri maltratas parlada e fisical tra alga anios. On ia sabe ce el tende gida sua seja rolante eletrical en modo cuasi iniorante peril, e Hawking ia insiste ce sua feris no es causada par maltrata. On no ia litiga.
En 2007, el ia deveni la tetraplejica prima ci esperia lejeria completa, en un avion spesial desiniada per simula la manca de gravita. El ia dise ce el ia fa esta per coraji la interesa a viaja spasial:
"Me crede ce la vive sur Tera fronti un risca sempre cresente de deveni eliminada par un desastre como un gera nucleal subita, un virus jenetical injeniada, o otra periles. Me pensa ce umanas ave no futur si los no vade a spasio. Donce me desira coraji la interesa publica a spasio."
En 2014, la filma La teoria de tota ia es publicida, fundida en un raconta par Jane Hawking de sua cortea e sposia. Hawking mesma ia encontra la ator Eddie Redmayne en sua preparas per la rol de la siensiste.
En un serie televisada per Discovery Channel, el ia dise ce on ave bon razonas per suposa ce la vive intelijente esiste en otra partes de la universo, ma ia averti ce estrateranes visitante ta fura cisa la recursos de la Tera.
El ia scrive ce el ia ave la maladia de motoneuron tra cuasi tota sua vive adulte, ma el ia clari ce lo no ia impedi el de un familia atraosa e laboras susedosa. "Lo mostra," el ia dise, "ce on no debe perde la espera."
@T La vortis pasifica de plastica crese rapida
@L aora_oji/2018/la_vortis_pasifica_de_plastica_crese_rapida
====== La vortis pasifica de plastica crese rapida ======
23 marto 2018
Un colie de plastica flotante en la Mar Pasifica crese rapida. Predises sujesta un cumula de sirca 80 mil tones de plastica en la "vortis de dejetadas" entre California e Hawaii. Esta mesura es plu ca la des-sincuple de lo cual on ia reporta a ante.
Dejetadas deveni colieda en sinco rejiones de mar, de cual la plu grande es esta, en la norde de la Mar Pasifica. Rexercores ia usa barcos e aviones per mapa esta parte, do corentes jirante e ventas causa la converje de dejetadas, incluinte plastica, alges e plancton.
Sua labora de tre anios mostra ce la contamina par plastica "crese esponental e plu rapida ca en la acua ensircante", la ecipo internasional ia dise.
8% de la masa de plastica flotante en un area de 1,6 milion cilometres cuadrida es microplastica. De sirca 1,8 milion milion pesos de plastica, alga es plu grande, incluinte redes de pexa, juetas, e an un seja de vason.
La usa de esploras airal, e no sola de barcos, esplica cisa partal perce la estimas nova es plu alta. Ma la diferes pote es ance causada par un crese de la contamina par plastica en la tempo pos studias presedente.
Plastica puxada a mar pos la trematera e tsunami en Japan en 2011 representa cisa an 20% de la cumula resente, la rexercores sujesta.
En cada anio, miliones de tones de plastica entra a la mar e vaga. Algas junta se a sistemes plu grande de corentes sirculinte, do los descomposa a microplastica -- pesos pico cual pote es comeda par viventes maral.
@T La xef txesce destrui un vesteta de oposa
@L aora_oji/2018/la_xef_txesce_destrui_un_vesteta_de_oposa
====== La xef txesce destrui un vesteta de oposa ======
16 junio 2018
Miloš Zeman, presidente de Txesco, ia asembla ier jornalistes per ensende un pantaleta jigante roja. La presidente ia organiza la aveni subita sin dona un razona, provocante multe divinas.
La vesteta vasta ia es usada en pasada par un grupo de artistes per critica el. El ia arde lo en un calderon tempora de foco, ante parti, disente a reportores: "Me regrete fa ce vos pare como stupidas peti; vera, vos no merita lo."
La ajenteria de novas AFP ia descrive la confere como "un aveni bizara" cual ia surprende la jornalistes asemblada.
La culote, longa de un metre, ia es creada par Ztohoven, un coletiva de artistes ci ia vola lo supra la palasio presidental en 2015. La presidente ia compra lo de la ofisia de propria nasional per sola un corona txesce.
En menses resente, Ztohoven ia produi camisas e insinias de la pantaleta roja per protesta contra la campania de reeleje de Zeman, par cual el ia vinse, ma apena, en janero. Radio Praha ia dise ce la protesta ia intende simboli "la tempo per fini la eda de lavadas susia en politica".
La oposores political de Zeman ia fali vide la umor en la presenta focosa a jovedi. Un ia scrive ce si el no ta ave respeta per la presidentia, el "ta dise ce la presidente ia deveni un fol" e ce la spetaculo "redui la dinia de la posto presidental".
Esta confere nonusual no ia es la ves prima cuando Zeman ia ataca jornalistes. En otobre de la anio pasada, el ia veni a un confere jornaliste con un fusil falsa con la eticeta "per jornalistes". En maio, el ia dise ce on debe "licuidi" jornalistes -- un comenta cual on ia representa como un broma.
En janero, el ia broma ance ce on pote despone la ministro xef de Txesco o par vota o par Kalashnikov, referente a un tipo popular de fusil automata.
La presidente de 73 anios ia gania difisil sua periodo du en janero, fininte con sola 52% de votas, ma tal vinsente sua oposor ci ia favore la Uni European. Zeman suporta ce sua pais parteni a la UE e OTAN, ma con dutas. El oposa ce la UE puni Rusia e el critica la sistem UE per distribui migrores entre statos-membros.
@T Lias a la disionario primida en Amazon
@L aora_oji/2018/lias_a_la_disionario_primida_en_amazon
====== Lias a la disionario primida en Amazon ======
13 julio 2018
Disionario de lingua franca nova: elefen--engles / engles--elefen
* amazon.com
* amazon.co.uk
* amazon.es
* amazon.fr
* amazon.it
* amazon.de
Compra e saborea!
@T Litigas contra separa de familias migrante a la SUA
@L aora_oji/2018/litigas_contra_separa_de_familias_migrante_a_la_sua
====== Litigas contra separa de familias migrante a la SUA ======
27 junio 2018
Des-sete statos de la SUA litiga la governa de Donald Trump sur sua separa "cruel e nonlegal" de familias migrante. Los oposa la politica de refusa ce refujadas traversa la frontera de Mexico.
Entretempo, un judor en California ia deside ce tota familias de migrores nondocumentida ci on ia separa a la frontera debe es reunida en 30 dias, e ce enfantes con min ca sinco anios debe trova se denova con sua jenitores en 14 dias.
Paperes presentada par la Uni American de Librias Sivil ia conteni multe racontas de jenitores ci no ia pote trova o comunica con sua enfantes pos deveni separada par ofisiores de frontera.
Esta es la defia legal prima par la statos sur separa de familias. On razona ce la comanda par la presidente republican preveni la tratada coreta de familias migrante, con direto de xerca refuja.
En la semana pasada, Trump ia recomenda deportas rapida, a mera un pico de dias ante fa la comanda.
Statos xerca aora un judi de corte per reuni familias e fini la pratica separante par declara ce lo es oposada a la constitui de la pais.
La litiga cexa ce la comanda par Trump no refere a la fini de separa familias o a la reuni de familias ja separada. Lo descrive ance la politica como "un ofende" contra la interesas de la statos a manteni niveles de cura per enfantes e a conserva relatas entre enfantes e jenitores.
Un nota de Barbara Underwood, la Avocato Jeneral de York Nova, ia refere a enfantes migrante, tenida en acel site, ci sufri depresa, ansia e condui suisidal. "Par aranca enfantes a via de sua jenitores e envia los a distantia de sentos de milias, la governa de Trump ia causa ja un trauma nomimajinable a esta enfantes, e ia sumina la interesas fundal de York Nova a proteje sua sania, securia e bonstate."
La Ofisia de Relocali de Refujadas de la SUA ia dise ier ce 2047 enfantes de migrores es ancora su cura de la departe de sania. On ia envia los a selulas, benerias convertida, tendas de deserto o adotores tempora.
La litiga es simil a la caso contra la proibi par la governa ce la plu de persones de Iaman, Iran, Libia, Somalia e Suria viaja a la SUA. Hawaii ia bloci inisial la proibi, ma la Corte Suprema ia reversa la deside a la matina de ier.
@T Lubnanis eleje un parlamento nova
@L aora_oji/2018/lubnanis_eleje_un_parlamento_nova
====== Lubnanis eleje un parlamento nova ======
6 maio 2018
En Lubnan, on ia comensa vota en la elejes parlamental prima de cuasi un desenio. La ves la plu resente ia es en 2009, per lo cual on ia intende como un periodo de cuatro anios.
Ma la parlamento ia estende sua periodo a du veses par causa de nonstablia en Suria visina, e per reformi la leges elejal de la pais. Lo ia cambia la sistem de vota, ia redui la cuantia de distritos, e ia permete votas par sitadanes a stranjer a la ves prima.
Hezbollah, un grupo armada cual la Statos Unida e otras regarda como un organiza teroriste, desira aumenta sua representa en parlamento.
La prosede de vota per tota 128 sejas continua asta 19:00 de ora local. On no previde la apare de resultas ofisial asta lundi o martedi, ma analistes espeta ce detalias temprana va emerji a esta note.
Deses de miles de sitadanes lubnani ci abita estra la pais ia fa ja sua votas en la parte plu temprana de esta semana.
La sistem nova usa un sistem proportial, con sejas distribuida entre la grupos diversa cristian e muslim. Tra multe tempo, Lubnan ave ja un sistem political de comparti potia entre la relijios. La cuantia de sejas es divideda entre muslimes e cristianes, e cada de la presidente, ministro xef e ofisior autoriosa de la parlamento debe veni de un fondo relijial spesifada.
Saad Hariri, la ministro xef presente, ia causa un crise major en novembre cuando el ia fuji de la pais a Arabia Saudi, anunsiante sua resinia en un parla televisada en cual el ia dise ce el teme un atenta de asasina. Pos du semanas, el ia suspende sua resinia pos parla con presidente Michel Aoun en Lubnan, e ia retira completa sua deside en desembre.
La Uni European ia dise ce lo ia envia oservores elejal a tota de la distritos de vota lubnani.
Temas major cual la parlamento nova va fronti inclui la destina de un cuantia grande de refujadas ci ia entra a la pais pos la eruta de la gera interna suri, e problemes continuante de economia.
@T Macron: Europa debe uni contra “caos global”
@L aora_oji/2018/macron_europa_debe_uni_contra_caos_global
====== Macron: Europa debe uni contra "caos global" ======
19 novembre 2018
La presidente franses, Emmanuel Macron, ia recomenda relatas plu prosima entre sua pais e Deutxland, disente ce Europa "ave la obliga de no lasa ce la mundo lisca a caos".
El es en Berlin per la dia anial de lamenta per vitimes de gera. En sua parla a la parlamento deutx, el ia dise ce Europa debe no "deveni un jueta de potias grande".
Macron desira un Uni European plu integrada, con bujeta compartida tra la eurozona. El desira ance la suporta de Deutxland per un armada european, sur cual el ia dise ce lo ta redui la depende esuan de la bloco, e per un imposta nova a la companias jigante de tecnolojia de interede.
La canselor deutx, Angela Merkel, ia espresa sua suporta inisial per alga de esta ideas, ma otras es controversa en Berlin.
La xef de Frans ia refere a fortes nasionaliste "con no memoria" e ia urje fortes progresiste a uni en un mundo nonserta.
"On ave tro multe potias cual vole impedi nos," el ia dise, "cual interfere en nosa debates publica, ataca nosa democratias libraliste, e atenta fa ce nos oposa lunlotra. E en esta ordina global, cual nos debe trata multe seria, nosa fortia -- nosa fortia vera -- es trovada en unia."
La presidente de la SUA, Donald Trump, ia es provocada a un arenga de tuitas par comentas simil fada par Macron a un semana ante aora, cuando la xef franses ia descrive nasionalisme como "un tradi de patriotisme" en onora la fini de la Gera Mundal Prima.
Macron ia reconose ce la unia pote es "asustante", e ta implica ce la nasiones ta combina sua reservas finansial e sua prosedes de deside. Ma el ia demanda: "Esce lo es plu bon ce nos resta fisada en un rua sin sorti?"
La xefes franses e deutx ia consenta per discutes pos la parla de Macron. Los ia intende discute la migra, la coopera per defende, e strutures de imposta per companias dijital. On previde ce oji la du paises va desveli un scema limitada per un bujeta juntada per la eurozona.
Merkel ia dise a Macron: "Tu ia clari en un parla impresante ce la amia e coopera deutx-franses es tan importante, e ce lo jua un rol en la contesto european. Tu ia dise ce nos sta a un crus de vias, e esta es esata lo cual me persepi. Los de nos ci ia nase pos la gera es encargada con la lesones cual nos ia aprende."
Merkel, ci ia governa Deutxland tra 13 anios, ia declara resente ce el no va aspira continua como la xef de sua partito.
El intende completi sua periodo cuatro como canselor, cual va fini en 2021, ma alga comentores crede ce el va deveni cisa desponeda ante alora par disputas interna en sua partito o en la alia governante plu vasta cual el dirije.
@T Macron reintrodui la servi nasional a Frans
@L aora_oji/2018/macron_reintrodui_la_servi_nasional_a_frans
====== Macron reintrodui la servi nasional a Frans ======
28 junio 2018
La governa franses ia introdui un scema de servi nasional per tota persones de 16 anios.
Esta idea ia es proposada par Emmanuel Macron en sua campania presidental, per promove un senti de debe munisipal e unia nasional entre jovenes franses. Ma alga resta nonconvinseda sur la vantajes.
La servi nasional va afeta e xicas e xicos e va es divideda en du fases. La prima es un posto obligante per un mense, con foca a cultur munisipal, sur cual la governa dise ce lo va "permete ce jovenes crea relatas nova e developa sua rol en sosia".
Ensenia sin salario e labora con organizas carital es entre la posibles, como ance la prepara tradisional militar con la polisia, armada o pompores.
La fase du es un posto nonobligante per entre tre e des-du menses, en cual jovenes va es corajida a servi "en un area liada a defende e securia" -- ma denova los pote eleje fa taxes nonpaiada cual pertine a la istoria cultural, a la ambiente o a la aida sosial.
Cuando Macron ia sujesta la idea en la anio pasada, lo ia es un spesie de servi militar miniatur, tal ce tota sitadanes franses ta es obligada a reseta "un esperia direta de la vive militar" per minima un mense entre la edas de 18 e 21 anios.
On ia moli e largi esta a lo cual on nomi un Servi Nasional Universal, partal par causa de un teme ce la program orijinal ta custa tro multe e ta supracarga la fortes militar de la pais. An aora, on estima ce la scema va custa 1,6 mil milion euros per anio, con 1,75 mil milion euros de investi inisial.
Aora on comensa consultas, intendente reali la program en la temprana de la anio veninte. Ma on ave ancora multe detalias per deside, incluinte la funda legal.
Un comite cual esplora la scema ia averti ce la constitui franses proibi ce la governa obliga un parte intera de la popla a pasa tempo a via de sua casa, estra en la caso de defende nasional.
An ante la anunsia, des-cuatro organizas jovenial ia oposa alga noncoerentes en la proposa, nonfelis con la idea de es obligada a partisipa. "La eleje de un obliga es egal importante como la obliga mesma, si no an plu," los ia razona, recomendante ce on permete ce jovenes ave un eleje libre.
Plu jeneral, sirca 60% de la popla favore la idea, ma la cuantia diminui asta min ca 50% si on solisita sola la opinas de jovenes.
Macron es la presidente franses prima ci no ia servi militar; la pratica ia es abandonada en 1996 cuando el ia ave 18 anios. A ante, on ia espeta ce tota omes joven franses servi en la fortes armada per cuasi un anio.
@T Maduro vole presa manos con Trump
@L aora_oji/2018/maduro_vole_presa_manos_con_trump
====== Maduro vole presa manos con Trump ======
27 setembre 2018
Nicolás Maduro, la presidente de Venezuela, ia dise ier ce el es preparada per presa manos con sua corespondente Donald Trump en la SUA, "an con la diferes".
La xef sosialiste ia fa un visita nonespetada a la Asembla Jeneral de la Nasiones Unida en York Nova "per defende sua pais". Ses nasiones ia acusa el de crimines contra umanas, e Trump ia indiceta la posible de ata militar contra Venezuela en ajunta a punis esistente.
Trump ia dise plu temprana ce el ta aseta consenta con Maduro. An tal, el ia dise ance ce "tota posibles es sur la table" car el "vole vide Venezuela ordinada".
Venezuela es en un crise grave de economia de pos 2014. On estima ce 2,3 milion sitadanes ia fuji de iperinfla, rompes de eletrica, e mancas de comeda e medisin.
A la Nasiones Unida, la xef de la pais ia declara: "An con la diferes, me ta aseta estende mea mano a la presidente de la Statos Unida, Donald Trump, per discute biladal la situa." En sua parla longa, el ia asentua ce el es "un laboror, un gidor, un om de la popla" e "no un maniate".
A martedi, la tesoreria de la governa SUA ia pone punis finansial a la Dama Prima de Venezuela, cual la sosialiste ia descrive como "punis nonlegal uniladal". Maduro ia acusa la SUA ance de "dona ordina a la resta de la mundo como si la mundo ta es sua propria".
La sosialiste ia repete acusas ce la SUA ia controla un ataca par avioneta en agosto, un ata sur cual la SUA nega tota conose. El ia xerca un consenta con Trump tra cuasi du anios.
@T Magrib abandona subita sua ora de inverno
@L aora_oji/2018/magrib_abandona_subita_sua_ora_de_inverno
====== Magrib abandona subita sua ora de inverno ======
27 otobre 2018
Magrib ia deside abandona la ora de inverno e va manteni sua orolojos a la ora de estate, UTC+1, per la tota anio. La anunsia ia es fada a min ca du dias ante cuando la orolojos ia ta retira se par un ora a soldi. La deside ia es fada per salva un ora de lus natural.
La nasion de Africa norde junta se a alga otras, xef en Africa e Asia, cual no altera sua orolojos en estate.
La reata a la cambia ia es miscada en redes sosial. Un person ia dise ce la subitia de la deside pare simil a avenis en naras par Kafka. Un otra ia demanda como lo va afeta atas en ramadan, la mense santa de islam.
Ma otras ia bonveni la deside, como un comentor en Jazair ci ia broma ce sua visinas magribi, nova aliniada, va es ance plu prosima a la cultur jazairi, incluinte sua pizas cuadro.
An si multe persones en la mundo gusta spende un plu ora en leto cuando la orolojos es retirada per la inverno, otras ia fa campanias major per aboli la pratica. En agosto, la Uni European ia dise ce lo va recomenda ce sua paises membros abandona lo.
@T Malaisa eleje un ministro xef la plu vea de mundo
@L aora_oji/2018/malaisa_eleje_un_ministro_xef_la_plu_vea_de_mundo
====== Malaisa eleje un ministro xef la plu vea de mundo ======
10 maio 2018
Mahathir Mohamad va deveni la plu vea de la xefes elejeda en la mundo, pos un vinse surprendente en Malaisia. El ave 92 anios. La ministro xef pasada ia pausa sua jubila, ia junta se a la partito oposante, e ia batalia contra Najib Razak, orijinal sua disiplo, ma aora atacada par alegas de froda.
La vinse monumental de Mahathir despone la alia Barisan Nasional (BN), cual ia rena sempre pos la autonomi de la pais en 1957. Sua suportores joiosa ia pleni la stradas cuando la vinse ia deveni clar.
Najib ia dise ce el va "aseta la deside de la popla", ma un move fasil de potia no es serta pos un cambia political tan grande. No partito en la alia ia gania un majoria, donce la deside resta tecnical con la re de Malaisia.
En la oras temprana de esta matina, Mahathir ia esplica ce sua alia no desira venja ma va "restora la rena de lege". El ia anunsia ance -- aclamada par suportores -- un festa de du dias, ajuntante: "Ma la vinsores no va reposa."
La resultas ofisial ia mostra ce la partito oposante, Pakatan Harapan o la Alia de Espera, ia gania 113 de la 222 sejas, incluinte alga cual ia es sempre ocupada par la governa en la pasada. Barisan Nasional ia gania 79 sejas. La custa altinte de vive e alegas durante de froda ia convinse multe votores, tirante los a via de Najib e sua alia de fortia pasada.
Mahathir ia es la ministro xef, gidante la alia BN, tra 22 anios, de 1981 asta sua resinia en 2003. Su sua governa, Malaisia ia deveni un de la "tigres asian" -- la paises de cual sua economias ia crese rapida en la desenio de 1990.
Ma el ia es un figur autoritar ci ia usa leges controversa de securia per prisoni sua oposores. La plu malfamosa, sua ministro visxef, Anwar Ibrahim, ia es desempleada e acusada de froda e sodomia -- e, plu tarda, prisonida par la acusa du -- cuando el ia recomenda reformis economial e political.
Mahathir ia es ance un conselor a Najib, ci ia deveni la ministro xef en 2008. Ma Najib es xasada par alegas de froda. On ia acusa el de poxi $700 milion de un reserva nasional de investi cual el ia institui. Najib ia nega forte tota la alegas, e autoriosas malaisian ia remete el, ma alga otra paises investiga ancora la reserva. On ia acusa Najib ance de sofoca investigas malaisian par despone ofisiores major de sua postos.
En 2016, acel alegas ia gida a la traversa surprendente de Mahathir de Barisan Nasional a Pakatan Harapan, descrivente se como "embarasada" de asosia "con un partito cual on regarda como suportante froda". A pos, en esta janero, el ia anunsia ce el aspira denova la posto xef.
Ma an pos sua vinse presente, sua periodo de ofisia es nonclar. Ante la vinse, el ia intende governa per du anios ante resenia. El ia promete ce el va organiza un pardona per Anwar, abrinte la via per la reeleje de esta, ci ta deveni ultima la ministro xef.
On ia ave alegas ante la eleje ce la vota no va es justa. La governa ia aseta resente un lege cual ia cambia la distritos elejal, provocante acusas ce lo ia malmanipula los per serti ce los es plenida par muslimes melaiu, ci es tradisional suportores de Barisan Nasional.
Resente, on ia introdui ance un lege controversa sur novas falsa, sur cual oposores dise ce la autoriosas ta pote usa lo per mudi disentis. Mahathir mesma es investigada su acel lege pos alega ce on ia sabota sua avion.
E en la dias ante la vota, un grupo campaniante per reformis ia acusa la Comite de Eleje sur multe "crimines elejal", incluinte cualias nonlegal en la prosede de vota postal e un fali de sutrae persones mor de la lista de votores. La governa ia insiste ce la eleje va es libre e justa, e Najib ia dise ce la Comite de Eleje ata "per la benefica de cadun".
@T Malala Yousafzai revade a do el ia es fusilida
@L aora_oji/2018/malala_yousafzai_revade_a_do_el_ia_es_fusilida
====== Malala Yousafzai revade a do el ia es fusilida ======
31 marto 2018
Malala Yousafzai, ganior de la Premio Nobel de Pas, ia revade a sua vila de nase en Pacistan a la ves prima pos es fusilida ala par militaristes taliban.
Yousafzai, ci ave aora 20 anios, ia es fusilida a la testa en 2012 car el ia campania per educa fema. La rejion Swat do sua familia ia abita ia es un fortres mlitariste en la pasada, e el ia es atacada en un bus de scola ala a la eda de 15.
Lo ia es nonclar esce el va visita la rejion, par causa de consernas de securia.
A jovedi, on ia anunsia ce Yousafzai ia revade de la Rena Unida Pacistan a la ves prima pos sua ataca. El ia fa un parla emosiosa a la ofisia de la ministro xef en Islamabad:
"Sempre lo ia es mea sonia ce me va vade a Pacistan e ala, en pas e sin teme, me pote move sur stradas, me pote encontra persones, me pote parla a persones. E me pensa ce lo es denova mea casa vea. Donce lo aveni vera, e me grasia tota de vos."
Un elicotor portante Yousafzai ia atera prosima a sua casa familial en Mingora a saturdi, entre securia forte. On previde ce sua visita a Pacistan va dura per cuatro dias.
Como xica de 11 anios, Yousafzai ia comensa scrive un jornal anonim sur sua vive su governa taliban. On ia fa un filma atestante sur el en 2009.
El ia deveni rapida un defendor franca de educa fema entre supresas par militaristes en Pacistan, e ia es atacada con intende en un bus en otobre 2012 par islamistes estrema. Sua raconta ia atrae atende internasional.
La adolesente ia reseta feris cual ia menasa sua vive, e ia nesesa ce on sutrae un parte de sua cranio per lejeri un infla contra sua serebro. Pos es tratada a un ospital militar en Pacistan, el ia es transportada a la Rena Unida per plu tratas, e per recovre en la site Birmingham, do sua familia continua abita.
Pos recovre, Yousafzai ia parla plu per la educa e diretos de enfantes tra la mundo. El ia institui la Reserva Malala con sua padre, con gol de "labora per un mundo do cada xica pote aprende e gida sin teme".
En 2014, el ia deveni la person la plu joven ci ia gania la Pas Nobel de Pas. El e Kailash Satyarthi, un ativiste barati, ia reseta lo en junta per sua laboras per diretos de enfantes.
Yousafzai ia continua campania en sua studias, e studia aora politica, filosofia e economia a la Universia de Oxford.
@T Marvel ave supraeroes xines a la ves prima
@L aora_oji/2018/marvel_ave_supraeroes_xines_a_la_ves_prima
====== Marvel ave supraeroes xines a la ves prima ======
14 maio 2018
La supraeroes prima xines ia entra ofisial a la universo de Marvel Comics.
Aero e Lin Lie es sola du de un grupo de carateres xines ci debua en novelas grafica en esta semana. Cocreada par Marvel e NetEase, un plataforma enlinia major en Xina, los es un atenta par Marvel de atrae plu fanes en la mercato profitosa xines.
Lin Lie es la carater xef en un de la publicidas nova, de cual on pote tradui sua titulo como "Gerores de tre monarcas". La nara foca a esta xico de des-oto anios ci prende un spada antica per batalia contra Chiyou -- un vil reincarneda ci vole destrui umanas.
La novela du, traduable como "Siclon", presenta Aero, ance conoseda como Lei Ling, un fem ci labora como arcitetor ma es capas de controla corentes de aira. En la notes, el usa sua suprapotia per salva sua site de viles diversa.
On ancora no ia fa un confirma ofisial, ma en la numero prima de "Gerores de tre monarcas", un imaje de la masca de Iron Man es vidable en la sala de Lin Lie.
En la anio pasada, Marvel Comics ia anunsia ce lo va labora con NetEase -- un de la companias la plu grande de juas video e tecnolojia en Xina -- per crea sua supraeroes xines prima. Alora, la editor xef de Marvel ia dise ce la supraeroes nova va es "forte fundida sur cultur e mitolojia xines, ma locada en la mundo moderna".
Artistes e scrivores de Xina ia es multe envolveda en la crea.
Economial, la colabora es nonsurprendente, car Marvel ave un cuantia grande de fanes en Xina. En Weibo, la rede sosial la plu grande de Xina, la paje de Marvel ave plu ca 3,5 milion suportores.
"Gerores de tre monarcas" es ja lejeda a plu ca du milion veses pos sua publici, e "Siclon" a pico su 750 mil.
Un comentor en NetEase ia dise: "Final, nos ave supraeroes xines. Nos ia ariva." Un otra ia ajunta: "Cisa a alga dia, los va pote combate a lado de la Venjores."
@T Merkel dise ce Deuxtland va prende plu encargas
@L aora_oji/2018/merkel_dise_ce_deuxtland_va_prende_plu_encargas
====== Merkel dise ce Deuxtland va prende plu encargas ======
31 desembre 2018
En sua parla anial, Angela Merkel ia dise ce en 2019, Deutxland va prende plu encargas internasional e debe defende sua credes. La intera de la parla de la anio nova par la canselor va es difusada en la plu tarda de oji.
El ia dise ce sertas vea de coopera internasional ia "veni su presa", referente a relatas tensada entre Deutxland e la SUA. En 2018, Merkel e presidente Donald Trump ia disputa problemes interna e esterna de Deutxland.
En la anio pasada, Merkel ia es un defendor major de multiladalisme, contrastada con la politica esterna "America Prima" de Trump.
"En nosa propre interesa, nos debe prende plu encargas," la xef deutx ia dise, avertinte ce problemes global como la cambia climal, la migra e la terorisme no pote es solveda en modo solitar. Par ocupa un seja tempora en la Consilio de Securia de la NU en 2019 e 2020, Deutxland va presa per "solves global", Merkel ia dise.
La canselor, ci va renunsia sua posto en 2021, ia promete aumenta la spende par la pais a aidas umaniste e developal, e a defende.
Merkel ia parla ance sur la divide profonda political en Deutxland, sedente ce sua governa ia delude la sitadanes, ma recomendante unia e coopera. "Nos va mestri la defias de nosa eda sola si nos coere e colabora con otras ultra fronteras."
En esta anio, Merkel ia preveni apena la colasa de sua governa de aliadas en un disputa sur migra, inisiada par la aseta par Deutxland de plu ca milion migrores e refujadas en 2015.
Pos la resultas povre de sua partito en elejes rejional en 2018, Merkel ia anunsia ce el va renunsia sua posto como presidente de la partito, un posto cual el ia ocupa tra 18 anios.
@T Mexico eleje un presidente nova
@L aora_oji/2018/mexico_eleje_un_presidente_nova
====== Mexico eleje un presidente nova ======
2 julio 2018
Andrés Manuel López Obrador, la aspiror sinistriste, ia gania clar la eleje presidental de Mexico.
Un conta rapida pos la eleje ier ia indica ce la maior pasada de la Site Mexico ia vinse con sirca 53% de votas, plu ca la duple de los de sua defior la plu prosima.
Ance la sondas a sorti ia predise un vinse per López Obrador, conoseda per sua inisiales AMLO. Sua oposores ia sede, lodante el sur sua vinse.
La resultas inisial sujesta ce José Antonio Meade, la aspiror de la partito governante, ocupa la loca tre. Sua Partito Revolual Institual ia domina la politica mexican tra multe de la sentenio pasada, ma sua popularia diminui aora.
En sua comentas publica prima pos la eleje, López Obrador ia dise ce la mision xef de sua governa va es la elimina de froda e esenta. El ia dise ce el va xerca ance "amia e coopera" con la Statos Unida.
Relatas con Washington es tensada pos la eleje de presidente Donald Trump, ci ia critica forte Mexico sur comersia e migra. Ma ier, Trump ia tuita un loda a López Obrador "sur deveni la presidente veninte de Mexico".
@T Mexico inisia un projeta grande de ferovia
@L aora_oji/2018/mexico_inisia_un_projeta_grande_de_ferovia
====== Mexico inisia un projeta grande de ferovia ======
17 desembre 2018
La presidente de Mexico, Andrés Manuel López Obrador, ia inisia la Tren Maia, un projeta aspirante per construi un ferovia tra sinco statos en la sude-este de la pais.
A un rituo nativa, prosima a la ruinas maia antica de Palenque, el ia dise ce la projeta va aida la crea de sentos de miles de empleas.
La ferovia va ave un longia de 1525 cilometres. Lo va lia Palenque a la vacanseria Cancún a la costa caribe.
Ma oposores averti ce lo risca dana la biosfera importante de la rejion. Un tri de la via projetada pasa tra jungla nondevelopada, e la posesores de acel tera, la popla maia, dise ce on no ia consulta los.
López Obrador ia pone la consernas de ambientistes a lado, prometente ce "nos no va desplanta an un arbor".
On previde ce la projeta de cuatro anios va custa asta 7,4 mil milion dolares.
@T Migrores itiopian afoca prosima a la costa de Iaman
@L aora_oji/2018/migrores_itiopian_afoca_prosima_a_la_costa_de_iaman
====== Migrores itiopian afoca prosima a la costa de Iaman ======
7 junio 2018
A la min 46 migrores ci ia atenta traversa de Somalia a Iaman ia afoca cuando sua barco ia inversa se. Des-ses plu persones manca pos esta perde de barco en un mar turbosa a costa de Iaman.
Survivores dise ce la barco de contrabandor ia porta 100 persones, cisa plu, ci ia parti de la porto de Bosaso per xerca labora en Iaman e paises visina. Tota la migrores ia es sitadanes de Itiopia.
La barco ia inversa se en la Golfo Aden a la matina de ier. 37 omes e 9 femes ia es entre la vitimes. On reporta ce alga de la pasajores en la veculo plenida no ia ave un jaceta inflable.
Un portavose de la Organiza Internasional per Migras ia dise: "Plu ca 7000 migrores povre fa esta viaja perilosa en cada mense; sirca 100 mil ia fa lo en sola la anio pasada. Los es deplorable tratada e los sufri esperias xocante. Esta debe sesa."
Migrores e refujadas viaja ja a Iaman de la Corno de Africa tra desenios, par causa de sua prosimia e un persepi ce la pais es un porte a la paises de la Golfo Persian e Europa. Ma Iaman es a media de un gera interna e un crise sever de sufri umana.
@T Miles de migrores traversa de Guatemala a Mexico
@L aora_oji/2018/miles_de_migrores_traversa_de_guatemala_a_mexico
====== Miles de migrores traversa de Guatemala a Mexico ======
22 otobre 2018
Miles de persones viajante de nasiones de America Sentral per atenta entra a la Statos Unida ia recomensa sua viaja de Mexico sude a la frontera SUA.
A la temprana de ier, la grupo grande ia comensa pasea en dirije a norde de Ciudad Hidalgo, un site fronteral.
La autoriosas mexican ia atenta para los a un ponte de frontera entre Mexico e Guatemala. Ma alga ia susede traversa nonlegal a Mexico par barco sur la rio Suchiate.
La caravan, ci veni xef de Onduras e inclui femes e enfantes, dise ce lo fuji de violentia e povria.
2000 migrores, votante par leva sua manos, ia deside continua sua viaja, disente: "Ta ce tota de nos pasea en junta!" e "Si, nos pote!" On no ia deteni los cuando los ia traversa la frontera.
Otra migrores resta trapida a la frontera en sua atenta de entra legal a Mexico.
La autoriosas mexican ia aseta grupos peti per trata refujal e ia dona lisensas per visitas de 45 dias a otras. Nonobligada, alga ia embarca veculos organizada par la autoriosas guatemalan a Tecún Umán, per revade a Onduras.
Presidente Trump de la SUA ia averti a multe veses ce la migrores debe reversa sua viaja, menasante clui la frontera e redui aida a paises cual permete ce la grupo pasa.
En tuitas ier, el ia dise ce on labora per "para la enflue de stranjeres nonlegal". El ia sujesta ance ce la caravan ave un motiva political.
Ance un plu grupo separada de sirca mil migrores, xef de Onduras, ia comensa en dirije a la SUA, de Esquipulas en Guatemala.
@T Milion catalanes asembla per sua Dia Nasional
@L aora_oji/2018/milion_catalanes_asembla_per_sua_dia_nasional
====== Milion catalanes asembla per sua Dia Nasional ======
12 setembre 2018
Sirca milion persones ia vade sur la stradas de Barcelona ier per selebra la Dia Nasional de Catalunia e per mostra sua suporta continuada per autonomia. Esta festa anial es la prima pos la atenta falida de Catalunia per deveni nondependente de Espania en la otobre pasada.
Un fola de protestores en camisas roja e portante banderas roja e jala ia bate tambures, ia sona sibilas e ia canta sloganes de suporta. La cuantia de partisipores ia es aprosima la mesma como en 2017.
Quim Torra, presidente rejional de Catalunia, e sua presedor Carles Puigdemont, ci ia fuji a Beljia pos la fali de la atenta per autonomi, ia recomenda forte ce la popla protesta. A la fini de la asembla, Torra ia dise: "Nos comensa un marxa sin fini."
La festa "Diada" onora la dia cuando Barcelona ia cade a la soldatos de de Re Felipe 5 en 1714. Ma tra la oto anios pasada, on ia usa lo ance como un punto enerjinte per autonomia.
Catalunia ia fa un referendo sur la tema a 1 otobre 2017 e ia declara autonomia uniladal a 27 otobre. Ma la atenta ia fali cuando la corte constitual de Espania ia judi ce la cambia es nonlegal e Madrid ia forsa sua governa direta.
Ier, protestores ia formi tores umana e ia esije la libri de xefes separadiste ci es detenida ante sua litiga pos la campania per nondepende. On projeta plu protestas a la aniversarios de la referendo e la declara.
An tal, oposores ia cexa ce on usurpa la Diada, car no tota catalanes suporta la autonomia. Josep Borrell, la ministro de esternas de Espania, ci es catalan, ia dise: "Nos catalanes debe selebra nosa dia nasional e no sola un recomenda de autonomia cual es comun a min ca un dui de la popla."
Un sonda de opina en julio ia sujesta ce 46,7% de catalanes favore la autonomia e 44,9% oposa lo.
@T Misiles colpa un airoporto militar en Suria
@L aora_oji/2018/misiles_colpa_un_airoporto_militar_en_suria
====== Misiles colpa un airoporto militar en Suria ======
9 april 2018
Alga persones ia mori o ia deveni ferida cuando un airoporto militar suri ia es colpada par misiles, entre ansia internasional sur un ataca cimical suspetada contra un vila ocupada par rebelores.
La ataca oji ia colpa la base Tiyas, conoseda como T4, prosima a la site Homos. Suria ia dise inisial ce la Ueste es envolveda. La SUA e Frans ia menasa responde a la ataca cimical alegada, ma nega ce los ia colpa la base.
Israel ia ataca locas suri en la pasada, ma no ia comenta en esta caso.
Donald Trump, presidente de la SUA, ia dise ce on va ave un "custa grande per paia" pos la ataca cimical en Duma, en la rejion Guta Este, prosima a la capital, Dimashq. El ia nomi Bashar al-Assad, presidente de Suria, como un "animal".
Entretempo, la rebelores final en Duma ia sede e on transporta los de la enclave pos la reali de un acorda con la governa.
SANA, la ajenteria nasional de novas en Suria, la descrive inisial la colpa de misil a Tiyas como "un ataca suspetada de la SUA", ma ia omete plu tarda la refere a la SUA.
En april 2017, la SUA ia xuta 59 misiles cruser a Shayrat, un campo de avion militar en Suria, en responde a un ataca de armas cimical contra un otra vila ocupada par rebelores, Khan Shaikhun.
@T Misre condena un ativiste per diretos umana
@L aora_oji/2018/misre_condena_un_ativiste_per_diretos_umana
====== Misre condena un ativiste per diretos umana ======
30 setembre 2018
En Misre, un corte ia dona un multa e un condena suspendeda de du anios a Amal Fathy, un ator e ativiste per diretos umana, car el ia "sperde novas falsa".
Fathy es ja detenida de maio pos sua publici de un video en cual el ia critica la governa sur la grado de turba sesal en la pais. Amnestia Internasional ia dise ce esta es "un caso scandalosa de nonjustia".
Misre ia aseta resente un lege cual forti sua controla de la interede -- un cambia desaprobada par ativistes per diretos.
Par la lege nova sur sibercrimin, Misre pote bloci la asede a locas de rede sur cual on judi ce los menasa la securia nasional o la economia. La lege permete ance ce on supravide cualce conta de rede sosial cual ave plu ca 5000 seguores.
La potiosas de la pais dise ce esta es nesesada per combate nonstablia e terorisme. Car protestas sur strada es aora cuasi intera proibida en Misre, la interede ia es un de la foros final restante do misris pote espresa sua disenti.
En ajunta a la condena suspendeda, la corte a saturdi ia multa ance Fathy per 10 000 paundes misri (560 dolares SUA). Sua avocato ia dise ce Fathy va apela contra la judi.
En maio, Fathy ia publici un video de 12 minutos a Facebook, en cual el ia descrive como on ia turba el en modo sesal cuando el ia visita sua banco. El ia critica ance ce la governa no ata sufisinte per proteje femes.
Pos du dias, on ia aresta el e ia acusa el de atenta dana la stato misri e de posese materia ofendente.
Organizas per diretos umana dise ce autoriosas en Misre usa sempre plu la cortes e la leges de contraterorisme e crise per fa litigas nonjusta contra jornalistes, ativistes e oposores per sua critica pasosa. La autoriosas no ia comenta sur la judi contra Fathy.
@T Mone furada va es donada a nijerianes povre
@L aora_oji/2018/mone_furada_va_es_donada_a_nijerianes_povre
====== Mone furada va es donada a nijerianes povre ======
30 junio 2018
En Nijeria, mone furada par la renor militar pasada Sani Abacha va es redistribuida a familias povre, pos cuando plu ca $300 milion ia es redonada par la autoriosas en Suiz.
La mone ia es furada par Abacha en la desenio de 1990. On va comensa dona lo a sirca 300 mil casa en la mense veninte, tal ce cada reseta sirca $14 per mense.
La paias, a abitores en 19 de la 36 statos de Nijeria, va continua tra sirca ses anios. Ma oposores teme ce los es cisa un modo de influe la votas en la anio veninte.
La mone ia es orijinal deponeda en Luxemburg, e es mera un frato de la biliones de dolares alegada como furada cuando Abacha ia governa de 1993 a 1998. El ia rena Nijeria con punio ferin asta sua mori subita a 8 junio 1998, parente par un ataca de cor.
La regania de mone furada ia es un parte major de la campania de eleje de presidente Muhammadu Buhari en 2015. El ia dise ce el va aspira deveni reelejeda.
On crede ce Suiz ia redona sirca mil milion dolares a Nijeria en la des anios pasada.
La paias pertine a la Program de Rede de Securia Sosial Nasional de Nijeria, cual aida familias povre. La mone va es donada como paias partal e en cuantias peti, comensante en julio e supravideda par la Banco Mundal, cual va fa ance esaminas periodal.
Si la paia prima no es coreta manejada, on va sesa paias seguente, per preveni ce on fura la mone denova.
@T Multe lampo de monson en Barat sude
@L aora_oji/2018/multe_lampo_de_monson_en_barat_sude
====== Multe lampo de monson en Barat sude ======
27 april 2018
La stato Andhra Pradesh en la sude de Barat ia rejistra 36 749 colpas de lampo en 13 oras a martedi. De alora nove persones, incluinte un xica de nove anios, ia es matada par lampo.
Tal colpas aveni comun en Barat en pluvones de monson. Tipal, la saison comensa en junio e continua asta setembre. Ma esta rejion esperia usual plu lampo ante la comensa de la monson.
On regarda la multe lampos a martedi como anomal, car datos de la anio pasada mostra ce on ia ave sola 30 000 colpas de lampo tra la intera de maio en la mesma rejion.
En esta anio, ventas fria de la Mar Arabi ia colide con ventas plu calda de Barat norde e ia produi un state cual ia formi plu nubes ca usual. Esta ia alti la posiblia de lampo. Plu, en un fenomeno rara, la nubes ia covre 200 cilometres, sin deveni pesos separada e plu peti.
Alga siensistes crede ce la caldi global va aumenta notable la frecuentia de lampo.
@T Muses, drogas e polisiores
@L aora_oji/2018/muses_drogas_e_polisiores
====== Muses, drogas e polisiores ======
13 april 2018
En Arjentina, on ia desemplea oto polisiores car los ia culpa muses per un desapare de drogas.
Investigores ia descovre ce 540 cilogrames de canaba manca de un teneria de polisia en Pilar, a norde-ueste de Buenos Aires. Un comisionor polisial pasada, Javier Specia, e copolisiores ia informa un judor ce la drogas ia es "comeda par muses".
Espertas forense ia duta ce muses persepi drogas como comables. E si muses ia ta come los, probable los ia ta mori en la teneria.
La polisiores va atesta ante la judor a 4 maio, e la corte va deside esce la drogas manca par "vantajosia o descapasia".
Un saisi de 6000 cilogrames de canaba es conservada en la teneria tra la du anios pasada. Ma la seguor de Specia, Emilio Portero, ia nota la drogas mancante cuando el ia comensa en la posto de comisionor. Portero ia avisa la departe de internas polisial, ci ia xerca en la teneria e ia trova ce sola 5460 cilogrames resta ancora.
Specia ia deveni suspetada cuando autoriosas ia trova ce el no ia suscrive la cataloga per la drogas confiscada cuando el ia resinia sua posto en april 2017.
On reporta ce la comisionor pasada es ance investigada car el ancora no ia presenta un declara jurada de revenu per la anio pasada.
@T Nicaragua greve contra sua presidente
@L aora_oji/2018/nicaragua_greve_contra_sua_presidente
====== Nicaragua greve contra sua presidente ======
15 junio 2018
Un greve jeneral de 24 oras ia para multe de Nicaragua, con ce campaniores esije la resinia de presidente Daniel Ortega.
En la capital, Managua, companias ia clui e stradas es vacua, ma protestas violente ia eruta en otra sites. On reporta ce a la min tre persones ia mori ier. La cuantia de persones matada en oto semanas de scaramuxas es aora sirca 160.
On va fa oji discutes nova, con intende de fini la situa.
La protestas ia comensa a 19 april, pos cuando la governa ia redui sua programes de pension e securia sosial. Plu tarda, la reduis ia es abandonada, ma la protestas ia evolui a un rejeta de la governa intera, e miles de persones ia vade sur la stradas.
En Managua ier, polisiores de tumulta con fusiles de ataca ia patrulia stradas vacua do gasolinerias, supramercatos e comederias ia es cluida.
En la site León, un xico de altar con 15 anios ia mori fusilida par polisiores, diseda par la episcopo aidante de Managua. El ia dise ance ce la polisia ia xuta nondistinguinte sur la stradas de Nindiri, a sude-este de la capital. On no ia confirma esta, ma reportas de batalias de strada ia veni ance de Nagarote, Masatepe e Tipitapa.
La Eglesa Catolica de la pais ia atenta ja negosia un acorda, ma tota sujestas ia fali asta aora.
En la mense pasada, la Comision Interamerican sur Diretos Umana ia visita Nicaragua e ia dise ce lo ia vide violes grave de diretos umana en la protestas. Lo ia dise ce securiores nasional e otra partitos armada ia usa un fortia esedente. La ministreria de esternas de la pais ia rejeta ier la reporta como "prejudosa".
La protestas ia deveni la defia la plu grande a la autoria de Ortega pos sua emprende de posto en 2007. El dise ce asemblas de protestores es infiltrada par criminores e ganges. Studiantes e sindicatistes ia acusa el de un represa violente e ia urje el a resinia.
En la desenio de 1970, Ortega ia es un gerilia sinistriste ci ia aida suverti la tirania de Anastasio Somoza. An tal, sua oposores presente acusa el e sua sposa Rosario Murillo, ci es sua vispresidente, de condui ance como tiranos.
@T Nijeria: la presidente responde pos un ataca islamiste
@L aora_oji/2018/nijeria_la_presidente_responde_pos_un_ataca_islamiste
====== Nijeria: la presidente responde pos un ataca islamiste ======
25 novembre 2018
La presidente de Nijeria ia promete clui la fesures organizal cual ia permete la mata de desuples de soldatos par ativistes djihadiste a un base en la stato Borno, en la norde-este de la pais.
Muhammadu Buhari ia parla ja publica sur la ataca en la soldi pasada, pos cuando la armada ia confirma ce lo ia aveni.
On ia reporta ce minima 40 soldatos ia mori cuando un grupo islamiste ia ataca la base en Metele. La armada ia refusa confirma esta asta venerdi, cuando los ia publici un declara disputante la cuantia de mores, ma indicante no otra cuantia.
Buhari ia dise ce el es profonda xocada par la novas, en sua declara ier.
La presidente, ci va fronti un vota publica pos tre menses, ia ajunta ce no presidente fidable "ta reposa sur sua remos per permete ce teroristes perili la vives de sua empleadas militar e otra sitadanes". En resulta, el intende consenta con xefes de la militar e de securia "en la dias veninte" per deside sua "pasos seguente".
Buhari ia veni a sua posto en 2015 pos promete vinse la ativistes de Boko Haram, ci ia turba la pais par un onda de atacas per atenta suverti la governa e crea un pais muslim. Ma an si la armada ia recatura la plu de la teritorio cual la ativistes ia controla, estas es ancora capas de reali atacas matante.
En sua declara, publicida a la sera de venerdi, la armada confesa ce lo opera en "un eda difisil". Esta comenta velida pare indica ce la armada esperia problemes grande en sua combate contra la djihadistes.
@T No imposta televidal per la sposi de Harry e Meghan
@L aora_oji/2018/no_imposta_televidal_per_la_sposi_de_harry_e_meghan
====== No imposta televidal per la sposi de Harry e Meghan ======
30 april 2018
La BBC ia desprende la imposta de televide per comunias en la Rena Unida ci vole regarda coletiva la sposi de Prinse Harry e Meghan Markle a 19 maio.
Selebras su sielo e otra avenis spesial pote aora mostra publica la difusa direta de la rituo, sin compra un lisensa.
En Britan, cada casa cual regarda o rejistra televisas direta debe fa un paia anial per finansia la BBC, cual difusa programes sin anunsias comersial. Organizas como scolas, ospitales e bares fa ance esta paia.
La governa ia dise ce comites local ia reseta sentos de solisitas per organiza selebras en la stradas per onora la sposi. Multe consilios ia cansela la custa de clui la stradas, e on va estende la oras de funsiona de tavernas per la dia.
La xef de maneja de revenu de la BBC ia esplica: "En situas estracomun, la BBC pote permete un esenta tempora per televide, con esije ce la televide ave la sola intende de mostra un aveni cual, en la judi de la BBC, ave un importa nasional. La BBC crede ce la sposi real es un tal aveni."
Prinse Harry e Meghan Markle va es sposida par la Arcibispo de Canterbury en la Capel de San Jorj a la Castel de Windsor, a ueste de London.
@T No usa un volcan per tosta cremas de zucar
@L aora_oji/2018/no_usa_un_volcan_per_tosta_cremas_de_zucar
====== No usa un volcan per tosta cremas de zucar ======
30 maio 2018
La Jeometre Jeolojial de la SUA ia responde a un demanda en rede sosial sur esce lo ta es sin peril si on ta tosta cremas de zucar supra un ximine volcanal. Los ia dise ce no.
Kilauea en la stato Hawaii es un de la volcanes la plu ativa de mundo, e lo es multe ativa en semanas pasada. Sua rios de lava roja calda ia destrui desuples de casas sur la Isola Grande de Hawaii, e 2000 persones ia es comandada a abandona sua imobilas.
Jay Furr de Vermont ia demanda a la departe de la governa esce on ta pote secur rosta cremas de zucar supra ximines de volcan si on ta usa un basto longa.
La conta "Volcanes" de la Jeometre Jeolojial posta novas ofisial e informas sur volcanes en la SUA. Lo ia responde a la demanda, disente ce un tal esperimenta ta produi un mal sabor e "un reata vera spetaculin". Los ia clari ce lo ta es perilosa e ia consela ce on no atenta lo.
En la semana pasada, persones en Hawaii is es avertida sur la fumas nosiva emeteda cuando roca fondeda flue a en la mar.
Kilauea es estrema ativa e sua eruta presente ia comensa a 35 anios ante aora. Par causa de un aumenta de sua ativia en semanas resente, lo ia eruta an en la jardines de casas.
On ia reporta sola un feri grave, cuando un om sentante sur sua balcon ia es colpada par roca fondeda ejetada.
@T Nos anunsia la disionario primida de elefen
@L aora_oji/2018/nos_anunsia_la_disionario_primida_de_elefen
====== Nos anunsia la disionario primida de elefen ======
3 julio 2018
La labora longa per prepara e coreti la disionario primida de elefen es oji completida.
La Disionario de lingua franca nova: elefen--engles / engles--elefen va es disponable per compra ante la fini de julio. [Ajuntada, 13 julio: alga lias a lo en Amazon.]
La libro ave 14mm de largia, 21,5mm de altia e, con 622 pajes, plu ca 3cm de spesia. La parte elefen--engles coresponde a nosa disionario enlinia, e la parte du conteni la mesma informas en reversa, atendosa editada a un forma oportun.
Sur la covrente retro, la testo seguente presenta la obra:
Esta disionario bilingual es dirijeda a parlores de engles ci usa lingua franca nova, un lingua aidante internasional construida par George Boeree, prima publicida a la rede en 1998, developada par sua comunia tra du desenios, e aora comun conoseda -- longo sua inisiales -- como elefen.
La parte elefen--engles conteni plu ca 17 000 entradas xef e plu ca 6 000 espresas ajuntada; on trova plu ca 34 000 entradas xef en la parte engles--elefen. La libro ofre ance un resoma corta de la gramatica elefen, incluinte listas aidosa de parolas funsional, prefisas e sufisas.
Nos grasia Michael Everson, ci ia emprende la taxes major de tipografi e publici la libro. E per sita la prefasa: nos opina ce esta disionario va es un bon ajunta a vosa bibliotecas.
@T On abandona un atenta de asende K2 en inverno
@L aora_oji/2018/on_abandona_un_atenta_de_asende_k2_en_inverno
====== On abandona un atenta de asende K2 en inverno ======
6 marto 2018
Trepores polsce es obligada a cansela sua atenta de deveni la primas ci asende la monte du la plu alta de mundo en inverno. Neva forte ia dana campas e aparatos sur K2, un monte cual sola sirca 300 persones ia susede asende.
Anunsiante la deside, Krzysztof Wielicki, la gidor de la ecipo, ia dise ce securia es la conserna xef. El ia es la person prima ci ia asende Monte Everest en inverno, en 1980.
La cansela segue un divide en la grupo, cuando un membro ia atenta ateni solitar la apico en lo cual on ia descrive como un atenta "completa suisidal".
La ecipo ia ariva en Pacistan en la tarda de la anio pasada per prepara per la asende. Temperatures sur la monte cade comun a -55°C en inverno.
Un cade forte de neva prosima a la apico ia covre cordones lasada par trepores presedente e ia dana tendas en via. Plu, on ia previde un mal clima per la dias seguente, e la neva densa ia crea un risca de avalanxas.
En la tarda de febrero, Denis Urubko ia deveni frustrada con la mision pos retardas, incluinte un ves en janero cuando el e un otra ecipor ia salva un trepor franses en la note. La om de 44 anios ia comensa asende solitar a 25 febrero, ma ia abandona sua atenta pos spende un note en clima sever a 7200 metres de altia.
K2, ance nomida Txogori, es situada a la frontera de Xina e Pacistan, e es la monte la plu alta en la cadena Caracorum. Lo es un de la 14 montes teran con plu ca 8000 de altia, e la sola cual on ia asende nunca en inverno.
Prima asendeda en 1954, lo es conoseda como la Monte Savaje car la trepa es tan difisil. 77 persones ia mori en atenta lo.
@T On acusa la ministro xef pasada de Malaisia sur froda
@L aora_oji/2018/on_acusa_la_ministro_xef_pasada_de_malaisia_sur_froda
====== On acusa la ministro xef pasada de Malaisia sur froda ======
8 agosto 2018
On ia fa tre acusas de lava de mone contra Najib Razak, ministro xef pasada de Malaisia, en relata con un scandal de froda de multe miliones de dolares.
El es acusada de reseta 42 milion ringites ($10 milion) de la compania 1MDB, poseseda par la governa, en sua conta personal de banco.
On ia aresta Najib en julio e ia acusa el sur rompe de fida e sur malusa de sua posto. La investiga nova sur 1MDB ia comensa pos sua perde surprendente en la vota de maio. El ia nega sempre la culpa e ia es remeteda par autoriosas malaisian cuando el ia es ancora la ministro xef.
Najib, como ance membros de sua familia e alga aliadas, es acusada de froda cuantias vasta de mone, sur cual on alega ce los ia es usada per compra cosas diversa, incluinte obras de arte e imobilas lusosa tra la mundo.
La alegas ia fa un rol sentral en sua vinse par un alia reformiste, gidada par Mahathir Mohamad, un veteran political ci ave 93 anios.
En semanas resente, la polisia ia invade imobilas liada a Najib e sua sposa. La polisia dise ce la saisi de valuosas -- incluinte bolsas de moda, joalas e mone fisical -- ia es la plu grande en la istoria de Malaisia.
1MDB, instituida par Najib en 2009, ia es intendeda per cambia la capital Kuala Lumpur a un sentro finansial e per aumenta la economia tra investis stratejial.
Lo ia comensa atrae atendes negativa en la temprana de 2015 cuando lo ia fali repaia alga de la 11 mil milion dolares cual lo ia debe a bancos e posesores de obligas finansial.
A pos, un jornal ia reporta ce lo ia vide un serie de documentos sur cual lo alega ce lo trasa cuasi $700 milion de la compania a la contas personal de banco de Najib. Miles de miliones de dolares es ancora nontrasada.
@T On aresta du mexicanes ci ia reteni partes de corpo
@L aora_oji/2018/on_aresta_du_mexicanes_ci_ia_reteni_partes_de_corpo
====== On aresta du mexicanes ci ia reteni partes de corpo ======
9 otobre 2018
La polisia en Mexico investiga un om e fem ci ia es arestada per transporta partes de corpo en un caro de bebe, en relata con a la min des omisides.
On reporta ce a un escuta pos sua aresta, la om ia confesa mata dudes femes en un suburbe de la Site Mexico.
Investigores ia trova partes de corpo en la aparte de la duple e ance a un otra imobila prosima. Los ia es retenida en baldes plen de semento e en un friador.
La avocatos acusante dise ce la duple ia vende la partes de corpo, ma on no sabe a ci.
Matas de femes es comun en Mexico e multe es nonpunida, ma la detalias macabre de esta caso ia crea un scandal e ia provoca protestas sur strada en Ecatepec, la suburbe povre en la Stato Mexico do los ia aveni.
Visinas ia dise ce sempre cuando los ia vide la duple, los ia puia la caro en cual polisiores ia trova la partes de corpo.
La polisia ia para los per xerca pos la desapare en setembre de un fem local de 28 anios, Nancy Huitron, e Valentina, sua bebe de du menses.
La Stato Mexico es la rejion con la cuantia la plu alta de femes mancante en la pais. Entre janero e april de esta anio, 395 persones ia desapare en la stato, de ci 207 ia es femes.
La desapares es xef consentrada en locas violente cual es comun controlada par ganges e a cual la polisia teme entra.
@T On aresta tota polisiores de un vila mexican
@L aora_oji/2018/on_aresta_tota_polisiores_de_un_vila_mexican
====== On aresta tota polisiores de un vila mexican ======
25 junio 2018
On ia deteni la polisia intera de la vila Ocampo en Mexico, suspetada sur envolve en la omiside de un aspiror maioral. Fernando Ángeles Juárez, ci ia ave 64 anios, ia es fusilida par persones nonconoseda a jovedi estra un de sua casas.
Plu ca 100 politicistes ia es matada tra Mexico ante la vota jeneral a 1 julio. Ángeles ia es la politiciste tre matada en la stato ueste Michoacán en pico plu ca un semana.
La 27 polisiores e la secretor local de securia publica ia es detenida par fortes federal en la oras temprana de ier.
Ángeles ia es un comersior susedosa con poca esperia political presedente. El ia considera aspira nondependente, ma ia junta se final a un de la partitos xef de Mexico, la Partito de la Revoluti Democrata, a la sinistra sentral.
Un de sua amis la plu prosima ia dise: "El no ia tolera vide tan multe povria, nonegalia e froda, e donce el ia deside aspira."
Pos la omiside, avocatos ia acusa la secretor de securia publica, Oscar González García, sur involve. Cuando ajentes federal mexican ia ariva en la vila a saturdi per deteni el, los ia es parada par polisiores local. Los ia reveni con refortintes en la matina de soldi e ia aresta la polisia intera e sua xef, securinte sua polsos e prendente los per interoga en Morelia, la capital de Michoacán.
Avocatos acusa la polisiores e González sur lias con grupos de crimin organizada en la stato.
Mexicanes va vota en la soldi veninte per eleje un presidente nova, con senatores e membros de la Salon Basa. Plu ca 3000 postos a niveles rejional e local va es ance riscada.
@T On discute pas per Iaman en Sveria
@L aora_oji/2018/on_discute_pas_per_iaman_en_sveria
====== On discute pas per Iaman en Sveria ======
6 desembre 2018
En Sveria, on comensa consultas de pas, suportada par la Nasiones Unida, per fini cuasi cuatro anios de gera interna en Iaman.
En ecipo NU va labora con delegas de la governa iamani e la rebelores huti a la castel de Johannesberg, prosima a Stockholm, en discutes nonformal cual va ocupa un semana.
La gera ia causa la crise umaniste la plu grave de mundo en tempo resente. Miles de persones ia mori en combate e miliones ia veni cuasi a state de mori par fami.
La consultas recomensa a la ves prima pos 2016. La atentas la plu resente per un pas negosiada ia colasa en setembre, cuando la hutis no ia apare en Geneve.
On no previde un avansa major par la discutes presente. La intende xef de los es preveni un batalia forte per Hudaida, un porto a la Mar Roja do miles de siviles es trapida, car la porto es ocupada par la rebelores.
La NU espera ance crea un armatur per discute la natur de un solve political futur en la pais.
@T On proposa ce bancos sentral ta furni mone dijital
@L aora_oji/2018/on_proposa_ce_bancos_sentral_ta_furni_mone_dijital
====== On proposa ce bancos sentral ta furni mone dijital ======
14 novembre 2018
Christine Lagarde, la xef de la Reserva Monal Internasional, ia dise ce bancos sentral tra la mundo debe considera la furni de mone dijital. Parlante en Singapor, el ia dise ce esta ta forti la securia de intercambias dijital.
Paias par mone nonfisical ia multipli tra la anios, creante defias per governas e bancos sentral. Regulores ia espresa sua consernas sur mone dijital e ia recomenda un supravide aumentada.
"La vantaje es clar," Lagarde ia dise. "Paias ta es direta, secur, barata e cisa semianonim. E bancos sentral ta reteni un funda solida per paias." El ia ajunta ce bancos sentral en Canada, Xina, Sveria e Uruguai "considera seria" la proposas sur mone dijital.
La encarga de mone virtual, si furnida par un banco sentral, ta parteni a la governa, como lo de mone fisical, e no a un compania privata. Esta ta aida consumores par fa ce intercambias deveni plu secur e plu comun, e donce min custosa.
"Si on servi plu persones, la servi es plu barata e plu usosa," el ia nota. "Companias privata pote investi tan poca a securia ce los no mesura completa la custa sosial de un fali de paia."
El ia dise ce, an si la favore a mone dijital "no es universal", on debe investiga lo en modo "seria, atendente e creosa".
On ia loda la tecnolojia cual suporta mone dijital car lo ia rapidi intercambias finansial e ia redui custas. Ma la anonimia de comersia con sistemes como Bitcoin ia ansia regulores.
En pasada, Lagarde ia dise ce criminores e teroristes usa tal criptomones par causa de la la anonimia cual los ofre. E la governor de la Banco de England ia dise ce on debe regula la criptomones per combate ativia nonlegal e proteje la sistem finansial.
@T On recatura un gangster franses major
@L aora_oji/2018/on_recatura_un_gangster_franses_major
====== On recatura un gangster franses major ======
3 otobre 2018
Rédoine Faïd, un gangster franses ci en julio ia evade prison par usa un elicotor saisida, es aora recaturada. La fujor la plu xercada en Frans ia es detenida a norde de Paris, con sua frate e du otra omes.
Faïd, ci ave 46 anios, ia descrive se como un fan de filmas de gangster, sur cual el dise ce los ia instrui el sur metodos de fa atacas subita.
On ia aresta el a la ves prima en 1998, per un ruba armada. Sua fuji a 1 julio ia es sua evade du e la plu dramosa. El ia es librida de un prison en Réau, a sude-este de Paris, par tre omes forte armada ci ia entra par forsa a la sala de visitores. Los ia puxa el a un elicotor de ci la pilote ia es un instruor de vola, saisida como ostaje.
Faïd ia es prisonida per 25 anios per scema un ruba malfada en cual un polisior fema ia es matada en 2010. On ia recatura el en la vila Creil.
Naseda en 1972, el ia crese en un parte turbosa de Paris. En la desenio de 1990, el ia dirije un gang envolveda con rubas armada e estorse.
El ia dise ce filmas de Hollywood, como la triler Scarface de Al Pacino, ia inspira sua modo de vive e alga de sua scemas. A un ves a un festa de filmas en Paris, el ia parla a Michael Mann, dirijor de filmas de crimin, disente: "Tu ia es mea conselor tecnical."
Sua fama ia es aidada par un libro en 2009 cual ia resoma sua dias plu joven sur la stradas de Paris e sua desende a la vive de un criminor profesal. Par causa de esta, el ia gania la nometa "la scrivor" entre la polisia franses.
@T On subasta un depinta par un inteleto artifis
@L aora_oji/2018/on_subasta_un_depinta_par_un_inteleto_artifis
====== On subasta un depinta par un inteleto artifis ======
26 otobre 2018
Un obra de arte creada par un program de inteleto artifis (IA) ia es vendeda par subasta per $432 mil. La custa final es multe plu alta ca la estima de $7--10 mil proposada per lo par la subasteria Christie's en York Nova ante la vende.
La depinta, nomida Depinta de Edmond Belamy, ia es creada par un coletiva artal nomida Obvious ("Evidente"), con base en Paris.
La obra ia es produida par usa un algoritmo e un colie de 15 mil depintas personal creada entre la sentenios 14 e 20. Per jenera la imaje, la algoritmo ia compara sua propre obra a los en la colie asta cuando lo no ia pote plu distingui los.
La depinta es la obra prima de arte par IA cual on ia vende en un subasteria major. La vende ia atrae un cuantia notable de atende jornaliste.
Richard Lloyd, la spesialiste a Christie's ci ia organiza la vende, ia comenta: "IA es sola un de alga tecnolojias cual va fa un efeto a la mercato artal de la futur, an si lo es multe tro temprana per predise la detalias de acel cambias."
@T On trova la atesta la plu vea de pan
@L aora_oji/2018/on_trova_la_atesta_la_plu_vea_de_pan
====== On trova la atesta la plu vea de pan ======
18 julio 2018
Arceolojistes ia descovre la atesta la plu vea de la prepara de pan, en un loca de escava con eda de 14 mil anios.
Lo ia ta aspeta como un pan plata e ia ta sabori alga simil a la varias moderna cual on prepara con granes diversa. Cisa nosa asendentes ia usa lo per conteni carne rostada. Tal, lo ta es ance la sanduitx la plu vea.
La descovre, en un deserto en Urdun, temprani la atesta prima de pan par plu ca 5000 anios.
La panores de la eda de petra ia prende farina preparada de trigo e orzo savaje, ia misca lo con radises moleda de plantas, ia ajunta acua, e ia forni lo sur petras calda sirca un foco.
Pan es ja longa un comeda major per umanas, ma on sabe poca sur la orijinas de prepara lo. Asta aora, la atesta la plu vea de pan ia veni de Turcia, en trovas cual ave 9000 anios.
En Urdun, siensistes ia descovre du construidas. Cada conteni un ximineria grande e sirculo de petra, en cual on ia trova picos carbonida de pan. Analiseda su microscopio, la samples ia indica sinias revelante de mole, tamisi e amasa.
La abitores de la rejion a acel tempo ia es xasores-coliores. Los ia xasa gazelas e ia trapi animales plu peti, como lepres e avias. Los ia foraje ance per comedas plantal como nozas, frutas e sereales savaje.
La rexercores opina ce la pan ia es preparada cuando persones ia asembla per un selebra o banceta.
Esta ia aveni ante la inisia de cultiva, cuando on ia comensa crese sereales e eleva animales, e donce lo es posible ce la razona per comensa an cultiva ia es la desira per come pan.
@T On vende vino vera vea e recolie recordo
@L aora_oji/2018/on_vende_vino_vera_vea_e_recolie_recordo
====== On vende vino vera vea e recolie recordo ======
27 maio 2018
Un botela de vino orijinante en 1774 ia es subastada en Frans este per la cuantia recordo de 103 700 euros.
La botela de "vino jala" veni de la rejion Jura Este, e ia es preparada con uvas recolieda en la rena de Re Louis 16.
A la mesma subasta, un otra botela de la mesma anio ia ateni 76 250 euros, e un plu ia es vendeda per €73 200. La tre botelas de 87 sentilitres ia es preparada par la vinor Anatoile Vercel. Los ia es poseseda par sua desendentes en Arbois, la cor vinal de la rejion Jura, e on crede ce los es entre la vinos esistente la plu vea de mundo.
La comprores ia es canadianes e un person ci en la pasada ia compra vino per americanes con lias a Frans.
Brigitte Fenaux, subastor de la compania Jura Enchères, ia comenta: "Me no ia crede ce on va vende esta botelas per tan multe. La recordo presedente, creada en 2011, ia es 57 mil euros. On ia ave vinores en la sala ci ia aplaudi, ci ia es felis -- lo ia es emosiante."
En 1994, un comite de 24 espertas de vino ia proba la vino e ia premia lo con 9,4 puntos de 10.
@T Orolojos es retardada par un disputa political
@L aora_oji/2018/orolojos_es_retardada_par_un_disputa_political
====== Orolojos es retardada par un disputa political ======
10 marto 2018
Esce tu deveni tarda per labora e culpa tua veliador eletrical? La razona vera es cisa ce la rede eletrical de Europa es afetada par un disputa entre Cosovo e Serbia.
La organiza cual representa companias de transmete eletrical tra 25 paises european ia dise ce orolojos a lado de leto ia lenti par asta ses minutos pos la media de janero. Tempadores de caldi sentral e orolojos de fornos es ance afetada, ma no computadores o telefonetas.
Paises de Espania a Turcia e de Polsce asta Nederland parteni a un area grande en Europa cual es liada en un rede eletrical cual opera a un frecuentia sincronida. Esta frecuentia regula la cronometri en alga aparatos.
En la periodo de crise, Cosovo no ia jenera un cuantia sufisinte de eletrica per sua esije. Serbia es legal obligada a sasia esta esije, per manteni la stablia de la rede european. Ma car Cosovo e Serbia disputa esta situa -- como ance multe plu temas relatada con la separa uniladal par Cosovo de Serbia a des anios ante aora -- Serbia no ia reali sua obliga.
Esta manca de responde puntual ia devia la frecuentia, e la redui ia afeta orolojos. Otra paises, pos perde reservas en cuantia de 113 cilovate-oras, xerca un compensa.
Per remedia la ecuilibra tra la continente, on debe jenera enerjia suprapasante e introdui lo a la sistem per alga tempo.
Tu pote ajusta manual tua orolojos, ma sua retarda va sesa automata pos la restabli de la rede.
@T Osteraic va redui paias a migrores
@L aora_oji/2018/osteraic_va_redui_paias_a_migrores
====== Osteraic va redui paias a migrores ======
29 maio 2018
En Osteraic, la governa aliada ia revela sua intende de redui paias aidante a migrores, incluinte refujadas, per impedi arivas nova.
La paia xef va es limitada a 563 euros per mense, altinte asta 863 -- la cuantia resetada par osteraiceses -- si on susede un esamina de capasia de lingua deutx. Migrores va es ance proibida de reclama tal paias per sinco anios.
Sebastian Kurz, la canselor conservaliste en governa con destristes estrema, ia promete un politica sever sur migras. El ia campania en la eleje parlamental en la anio pasada con prometes de limita paias a refujadas e de clui vias de migra a Europa.
La anunsia ier pone Osteraic en desacorda con la resta de la Uni European, car regulas UE sur libria de institui esije ce la sitadanes de tota statos-membros es egal tratada.
La governa aliada entre la Partito de Popla (conservaliste) e la Partito de Libria (estrema destriste) ia es aprobada en desembre pos cuando elejes a 15 otobre no ia produi un resulta concluinte.
La campanias de la partitos ia es dominada par la crise de migra en Europa, un tema sur cual la Partito de Libria campania longa, oposada a migra.
En 2015, a la culmina de la crise de migra, plu ca 90 mil persones ia solisita la refuja en Osteraic. La cuantia ia es plu ca 1% de la popla de la pais. Inisial, on ia bonveni la refujadas, ma la umor en la pais ia cambia a pos.
@T Palu deveni desperante per aida
@L aora_oji/2018/palu_deveni_desperante_per_aida
====== Palu deveni desperante per aida ======
2 otobre 2018
La popla de Palu, la vila indonesian afetada par un trematera e tsunami a venerdi, deveni sempre plu desperante per aida. Acua, comedas e carburante es rara, e la vias danada difisili la furni e la asede a locas distante.
La polisia ia xuta avertinte e usa gas lacrimojen contra un fola ci ia atenta prende cosas de un boteca peti.
On ia confirma ce a la min 844 persones ia es matada par la desastre. Entre los es 34 studiantes indonesian de ci on ia trova sua corpos su un eglesa enterada par un lisca de fango. On teme ce alga survivores es ancora trapida su esta e otra construidas.
Salvores xerca ance en la ruinas de un otel de cuatro niveles, cual ia conteni sirca 50 persones cuando lo ia colasa. On ia estrae 12 persones, de ci sola tre ia es vivente.
Car ospitales es danada, on trata la feridas su la sielo, e ia institui un ospital militar en la campania.
La militar ia prende controla de la airoporto per transporta aida a la loca, e per fa evacuas. Ma miles de persones espeta ancora longa la vola comersial prima a via de Palu.
La trematera a venerdi ia es potiosa ma nonprofonda, e sua move ia es plu ladal ca vertical. Lo no ia es de la spesie cual crea tipal un tsunami.
Vispresidente Jusuf Kalla ia dise ce la conta final de la mores pote es plu ca mil, e la Crus Roja estima ce plu ca 1,6 milion persones es afetada.
@T Persones es ferida en un desreli de tram en Portugal
@L aora_oji/2018/persones_es_ferida_en_un_desreli_de_tram_en_portugal
====== Persones es ferida en un desreli de tram en Portugal ======
15 desembre 2018
Dudes-oto persones ia es ferida en Lisbon cuando un tram ia desreli e deveni inversada.
La plu de la feridas ia es prendeda a ospital pos la asidente ier, ma no person ia es en state grave.
La tram ia salta de la reles a un curva a basa de un colina presipe, e ia colpa un construida. Pasores ia salva un bebe de ses menses e un enfante de sete anios.
La asidente ia aveni a sirca 18:00 en la parte Lapa de la capital portuges. 26 persones ia nesesa es ospitalida, e du ia es tratada a la loca de la tram. Alga persones ia es ferida a sua peto o fas.
Un atestor ia dise ce el ia oia un pum e persones xiliante cuando la tram ia fali para a la angulo e ia desreli se.
La servis de crise ia responde par envia sirca 30 veculos per aida.
La compania operante la trames, Carris, ia confirma la desreli ma ia dise ce on ia ave sola feris "minor" a 28 persones. Lo ia dise ance ce lo va fa un investiga completa per determina la causa de la asidente.
@T Persones mori pos un disputa a un mercato nijerian
@L aora_oji/2018/persones_mori_pos_un_disputa_a_un_mercato_nijerian
====== Persones mori pos un disputa a un mercato nijerian ======
21 otobre 2018
Violentia setal, provocada par un disputeta a un mercato, ia mata 55 persones en la stato Kaduna en la norde de Nijeria.
Jovenes muslim e cristian ia scaramuxa pos un disputa entre portores de careta en la vila Kasuwan Magani. La comisionor de polisia per la stato ia dise ce on ia aresta 22 persones pos la turba.
La autoriosas ia institui ance un proibi permanente de sorti en la vila.
Erutas de violentia setal aveni frecuente en Nijeria.
Un portavose ofisial per presidente Muhammadu Buhari ia tuita ce la presidente opina ce la usa comun de violentia en tal disputas es "preocupante".
Sin armonia entre grupos diversa, "nosa comersias dial ta es nonrealable," Buhari ia dise. El ia urje xefes de comunia a promove la tolera e a para tal desacorda ante cuando lo developa a violentia.
@T Peru reversa la pardona a sua presidente pasada
@L aora_oji/2018/peru_reversa_la_pardona_a_sua_presidente_pasada
====== Peru reversa la pardona a sua presidente pasada ======
4 otobre 2018
Un corte en Peru ia reversa un pardona donada a Alberto Fujimori, un presidente pasada de la pais. El ia es pardonada en desembre par causa de sania, a nove anios pos cuando on ia judi el como culpable de relatas con un scuadron de moria e du masacras.
Ma un corte ia comanda sua revade a prison cuando un grupo de vitimes ia gania un apela contra la deside, fada par la presidente a acel tempo, Pedro Pablo Kuczynski.
Fujimori, ci ia gida Peru en la desenio de 1990, va batalia contra la judi. Sua fia Keiko, ci gida la partito xef oposante, ia descrive lo como "nonumana" e "nonjusta".
La plu de peruanes ia crede ce Fujimori, ci ave aora 80 anios, va es en prison per la resta de sua vive, car on ia condena el a 25 anios en 2009. On ia judi el como culpable de comanda la matas de 25 persones par un scuadron de moria, finansiada par la governa, en la gera interna en la pais.
Ma en desembre 2017, on ia move el de prison a un ospital en la capital, Lima, car el ia sufri de presa sangual basa e un ritmo nonormal de cor.
Kuczynski, ci ia resinia en marto sur un scandal de compra votas, ia dona un pardona a Fujimori en la mesma mense, provocante protestas en Lima, an cuando la suportores de Fujimori ia selebra estra la ospital do on ia trata el.
On ia regarda jeneral la pardona como un parte de un acorda political. A tre dias a ante, Kuczynski ia evita difisil un acusa de malcondui, con la suporta de la suportores de Fujimori.
Carlos Rivera, ci representa familianes de la vitimes, ia dise ce la deside de reversa la pardona "reinstitui la direto a justia per la membros de la familias".
Fujimori es amirada par multe en Peru car el ia crase noncompatiosa la rebelores maoiste en la desenio de 1990, fininte un gera cual ia custa deses de miles de vives. Ma sua oposores dise ce el es un tirano frodante ci on ia prisoni justa per comanda la matas de campanianes inosente.
@T Pesos de un mosaica es redonada a Turcia
@L aora_oji/2018/pesos_de_un_mosaica_es_redonada_a_turcia
====== Pesos de un mosaica es redonada a Turcia ======
9 desembre 2018
Fratos mancante de un mosaica antica, conoseda como la Xica Romani, es aora esibida en un museo en Turcia. Los ia es retraeda de la Statos Unida.
On esibi los prosima a la mosaica noncompleta de un xica joven, cual ia es creada a cuasi 2000 anios en la pasada.
Sua oios meamorable ia deveni un simbol de la site sude Gaziantep.
La pesos mancante ia es contrabandada de Turcia en la desenio de 1960 e comprada par un universia en la SUA, cual ia acorda final redona los.
Arceolojistes ia descovre la mosaica a 20 anios ante aora, cuando los ia escava la ruinas de la site Zeugma, fundida par un jeneral de Alexandro la Grande e destruida en la sentenio 3.
Ma an alora, alga pesos ia es ja furada e contrabandada a estra la pais. Los ia es comprada par la Universia de Bowling Green en la stato Ohio.
En 2012, Turcia ia solisita la reenvia de la pesos, e la redona ia es acordada pos sinco anios de negosias.
Ier, la pesos mancante ia deveni esibida en la Museo de Mosaicas de Zeugma en Gaziantep, la museo la plu grande de mosaicas en la mundo.
Fatma Şahin, la maior de Gaziantep, ia dise: "La Xica Romani es reunida con sua familia."
@T Pexes xines mori par causa de un ponte nova
@L aora_oji/2018/pexes_xines_mori_par_causa_de_un_ponte_nova
====== Pexes xines mori par causa de un ponte nova ======
23 novembre 2018
En Xina, lo pare ce la construi en un zona de ecoturisme ia causa la mori de 6000 sturiones estrema perilida.
Un ponte en la provinse Hubei ia es en construi, prosima a un cultiveria a la rio Yangzi do on eleva la pexes. Aora, tota labora ia sesa en cuando on investiga. Un pajeria de novas xines ia reporta ce la moris ia es "direta liada a la xocas, ruidos e cambias de fontes de acua".
Como spesie, la sturiones xines esiste ja tra plu ca 140 milion anios. Pexes individua pote crese asta longia de 5 metres e pote vive tra asta 60 anios, ma los ovipari a sola un pico de veses en acel tempo.
La spesie es cuasi estinguida en natur par causa de contamina, tro multe pexa (car on vende la carne e ovos como comedas), e cambias a la ambiente. Per esemplo, pararios idroeletrical vasta traversa aora la Yangzi, preveninte la pexes de visita sua locas de ovipari.
En la desenio de 1970, Xina la inisia un program de eleva per salva la spesie, e on crede ce sirca mil sturiones adulte esiste aora en la pais.
La cultiveria Hengshang, prosima a Jingzhou, ia es un parte esensal de esta program. Ma de la comensa de la anio, on ia reporta la mori de plu ca 6000 sturiones bebe ala, como ance de 36 pexes con eda de 20 anios o plu.
On sabe ce la pexes es multe sensosa a ruido e disturba, e jornalistes sita ofisiores de la cultiveria ci ia dise ce la pexes ia es angusada par la construi prosima, an saltante de la acua a veses.
Un siensiste de pexeria ia comenta ce la adultes ci ia mori ia es "estrema valuosa", car los ia desende direta de sturiones savaje.
La ministreria de cultiva e campania ia investiga e ia descovre ce la construi de la ponte ia intrui nonlegal a un conserveria natural. Un ofisior de la ministreria ia indica ce cualce person, sur ci on ta judi ce el es culpable, va es litigada su la lege de pexerias.
@T Pexores guianan es matada par piratas
@L aora_oji/2018/pexores_guianan_es_matada_par_piratas
====== Pexores guianan es matada par piratas ======
4 maio 2018
Presidente David Granger de Guiana ia dise ce un ataca par piratas en la semana pasada ia es "un masacra, un trajedia grande". On teme ce lo ia mata a la min des-du pexores.
Cuatro barcos, portante 20 persones, ia es atacada a lado de la costa de Suriname, visina en America Sude, a venerdi pasada. On ia trova la corpos de tre omes, e cuatro otras ia evade.
Alga de la pexores ci es ancora asente ia es puxada a en la mar con pesas liada a sua gamas, longo reportas par la survivores. La om, de ci la plu ia es guianan, ia es bateda e rubada.
Ier, Granger ia informa reportores ce Guiana ia es multe susedosa en restrinje piratia en la rejion, ma ce la atacas la plu resente ia "veni como un reversa grande". "Nos estende compatia a la familias privada," el ia ajunta.
La familias de la vitimes ia es informada ce la governa va suporta los. Ecipos de salvores continua opera en la rejion, con colabora entre autoriosas sranan e guianan.
Piratia es ja longa un problem en la mar prosima a Suriname e Guiana, an si la cuantia de avenis reportada ia redui en anios resente.
@T Pilotes de Ryanair greve
@L aora_oji/2018/pilotes_de_ryanair_greve
====== Pilotes de Ryanair greve ======
10 agosto 2018
Pilotes de Ryanair greve en sinco paises european, obligante la cansela de un sesi de la volas de acel airocompania en media de la saison de vacanses.
La greve de 24 oras envolve empleadas en Deutxland, Sveria, Er, Beljia e Nederland. On ia informa sirca 50 000 pasajores sur la cansela de 400 volas.
La greve es la plu grande en un serie pertinente a paia e situa. Ryanair dise ce lo ia fa la plu bon cual lo pote per solve la disputa.
Esta airocompania eres, cual es la plu grande de los de custa basa en Europa, ia evita un greve ante natal par acorda reconose sindicatos a la ves prima en sua istoria de 30 anios. Ma sempre a pos, on ia protesta sur la negosia de acordas coletiva de labora.
Sirca 300 volas de Ryanair ia es canselada en julio cuando cabinores en Beljia, Portugal e Espania ia greve per 48 oras. E en dias resente, la airocompania ia anunsia la canselas de 250 volas a e de Deutxland, 104 a e de Beljia, e 42 plu cual afeta Sveria e Er.
A la sera de jovedi, un corte nederlandes ia rejeta un caso de Ryanair cual ia atenta preveni pilotes en Nederland de junta se a la greve, afetante sirca 22 volas. Ma a cuasi la mesma tempo, la compania ia anunsia ce on va ave no canselas.
La sindicatos desira ce la contratas de empleadas de Ryanair es governada par la leges de la nasion do los ave sua base, e no par leges eres.
Ryanair ia descrive la greves como "regretable e nonmeritada", disente ce sua pilotes reseta salarios plu alta ca los de otra airocompanias de custa basa.
@T Pluve deluvial en Urdun
@L aora_oji/2018/pluve_deluvial_en_urdun
====== Pluve deluvial en Urdun ======
10 novembre 2018
En Urdun, deluvias subita ia mata a la min sete persones e ia obliga la evacua de cuasi 4000 turistes de la site antica Petra.
Salvores e elicotores xerca sinco persones de ci sua auto ia es puxada a via en Madaba, a sude-ueste de la capital Aman. Pluves forte ia causa ance un state de crise en Aqaba, site de porto.
Esta segue a sola du semanas pos la afoca de 21 persones, xef enfantes, en un deluvia subita prosima a la Mar Mor.
Un enfante ia es un de la sete persones matada par la inondas en la rejion Daba'a, a sude de Aman. Ance un autovia liante la capital con la sude de la pais ia deveni blocida.
En Petra, la acua ia ateni 4m de altia en alga locas. Videos mostra persones sur la strada xef de la site ci ia atenta traversa la acua. La turistes evacuada ia es moveda a locas secur.
On previde plu pluve forte per oji, e recomenda ce abitores en partes afetada parti de sua casas.
Urdun ia sufri ja alga semanas de pluve intensa. En otobre, la popla ia coleri cuando 18 scolores en un turi educal ia es puxada a via par acua. La ministros urduni de educa e turisme ia resinia a pos.
@T Polsca aborta grupos rusce de gera ibride
@L aora_oji/2018/polsca_aborta_grupos_rusce_de_gera_ibride
====== Polsca aborta grupos rusce de gera ibride ======
18 maio 2018
Polsca ia aresta un fem rusce sur ci on suspeta ce el ia labora con aidores per provoca tensa con Ucraina.
La ABW, la ajenteria de securia interna polsce, ia dise ce "Yekaterina C" va es pronto escluida. Cuatro otra persones es aora proibida de entra a Polsca.
Un portavose per la ABW ia dise ce la ajenteria ia "neutri" du "redes rusce de gera ibride" cual ia ataca Polsca. La terma "gera ibride" inclui la sperde de novas falsa per cambia disposas publica.
Polsca es ja vijilosa contra atentas par la Cremlin de influe opinas polsce pos cuando Rusia ia propri la rejion Crim de Ucraina en marto 2014.
Polsca, un membro de la Uni European e OTAN, es un de la oposores la plu forte de la politica stranjer rusce, e spesial de la interveni militar par Rusia en Ucraina. Ma manxas resta ance pos un enemia istorial entre Polsca e Ucraina de la periodo soviet e la Gera Mundal Du.
La portavose ia dise ce sua ajenteria es informada ce Rusia "no mera inspira sitadanes polsce a fa atas spesifada contra Polsca e favorente Rusia, ma ance finansia sua ativia".
El no ia furni detalias sur la ativia de la redes alegada, ma ia comenta ce los es engranada a "nuri odia polsce-ucrainsce en la sfera sosial e political e a sumina la interprete de la istoria polsce, sustituinte un nara rusce per lo".
Governas ueste acusa Rusia de sperde novas falsa sur la gera ucrainsce e otra temas delicata, per debili la suporta publica per politicas de OTAN e la UE.
@T Porto Rica perde sua eletrica
@L aora_oji/2018/porto_rica_perde_sua_eletrica
====== Porto Rica perde sua eletrica ======
19 april 2018
La isola intera de Porto Rica ia sufri un perde de eletrica, a cuasi sete menses pos la destrui de multe de sua infrastrutur e rede de potia par Siclon Maria.
PREPA, la compania nasional de eletrica de la isola, ia dise ce lo labora per restora la servi a cuasi 3,4 milion persones en 36 oras. Lo ia esplica ce la fali ia es causada par un escavador operada par un contrator en la rejion sude de la isola.
Esta problem es la plu grande cual ia afeta la recovre de la isola, un teritorio de la SUA.
La compania ia clari ce lo labora prima sur la refurni de eletrica a ospitales, la airoporto de la capital San Juan, sistemes de pompi acua, e sistemes finansial.
PREPA es ja bancarota de julio pasada, e ia deveni frecuente discuteda en jornales pos setembre, cuando la isola ia es colpada par la tempesta la plu sever de 90 anios.
Abitores ia esperia multe rompes de eletrica pos Maria, un siclon de categoria 4, e eletrica ia manca ancora de 40 mil persones cuando la potia ia rompe denova ier. Esta ia aveni a min ca un semana pos cuando la cade de un arbor ia bloci la servi a 870 mil clientes.
Siclon Maria mesma ia causa la perde la plu grande de eletrica en la istoria de la SUA.
@T Presidentia de Interpol: Rusia vinseda par Corea Sude
@L aora_oji/2018/presidentia_de_interpol_rusia_vinseda_par_corea_sude
====== Presidentia de Interpol: Rusia vinseda par Corea Sude ======
21 novembre 2018
La organiza internasional de polisia criminal, Interpol, ia eleje Kim Jong-yang de Corea Sude como sua presidente nova, rejetante la competor favoreda rusce ci es acusada de malusa la sistem de aresta.
Kim ia es elejeda par la 194 statos membros de Interpol a un consenta de sua congresa anial en Dubai. Membros ia deveni consernada ce Aleksander Prokopchuk, la aspiror rusce, ta usa la rol per ojeti oposores de presidente Putin.
La eleje segue la desapare de Meng Hongwei, la presidente pasada de Interpol, ci ia desapare en un viaja a Xina en setembre. Beijing ia confirma ce Meng es detenida e investigada sur alegas ce el ia aseta sobornas.
Kim, ci ia labora ja como presidente tempora, va completi la du anios restante de la periodo de Meng.
Prokopchuk es un veteran de la ministreria rusce de internas. Cuando el ia es la xef de la ofisia de Interpol en Moscva, on ia acusa ce el ia malusa la sistem de "avisas roja" (comandas internasional per aresta) contra criticores de la Kremlin.
Grupos rusce per diretos umama, como ance ofisiores de otra paises, ia comensa teme ce Moscva ta usa la posto de xef de Interpol per elimina sua oposores political.
Un grupo de senatores esuan ia dise ce la eleje de Prokopchuk ta es "simil a encarga un volpe con la casa de gales", e un criticor major de la Kremlin ia compara la idea a "dona la controla a la mafia".
Lietuva, cual ia regania sua autonomia de Rusia cuando la Uni Soviet ia colasa e es aora un membro e de OTAN e de la UE, ia menasa an esclui se de Interpol si on ta eleje Prokopchuk.
@T Prisoni de un poesiste ci promove reuni Somalia
@L aora_oji/2018/prisoni_de_un_poesiste_ci_promove_reuni_somalia
====== Prisoni de un poesiste ci promove reuni Somalia ======
16 april 2018
Un corte en Somaliland ia condena un poesiste joven a tre anios en prison. On ia judi ce Nacima Qorane es culpable de despeta la stato par promove ce Somaliland reuni con Somalia.
Grupos campaniante en Somaliland ia dise ce on ia viole la diretos umana fundal de Qorane. El ia es arestada en janero pos reveni de la capital somali Mogadishu, do, longo avocatos acusante, el ia resita poesia recomendante unia somali.
Somaliland ia autodeclara sua nondepende en 1991, ma ancora no es ofisial reconoseda a grado internasional. Pos un gera interna ferose, la norde-este de Somalia ia separa de la resta de la pais per deveni autonom. Sirca 3,5 milion persones abita en la teritorio.
En febrero 2018, la republica ia acorda permete ce la Amirias Arabi Unida institui un base militar a Berbera, un porto costal, como parte de la batalia par la AAU contra la rebelores huti de Iaman.
La litigores ia dise ce Sra Qorane ia descrive Somaliland como "un rejion" e ia "insulta e malacusa" sua governa.
La Sentro de Diretos Umana de Somaliland ia demanda ce la governa libri la poesiste e respeta diretos umana. La dirijor de la sentro ia comenta ce lo es "multe consernada par la condena e prisoni de Nacima Qorane". El ia ajunta: "Libria de espresa es tesorida e protejeda par la constitui de Somaliland. Nos urje la governa de Somaliland a respeta sua propre constitui."
En pasada, alga otra artistes e jornalistes ia es arestada en Somaliland per la mesma crimin.
@T Protestas grande contra la governa slovensce
@L aora_oji/2018/protestas_grande_contra_la_governa_slovensce
====== Protestas grande contra la governa slovensce ======
17 marto 2018
En Slovensco, sirca 65 mil persones ia partisipa en protestas antigoverna a la semana tre en segue. Coleria sur la mata de jornaliste Ján Kuciak e sua prometeda Martina Kušnírová ia provoca la ministro xef Robert Fico a resinia a jovedi.
Fico ia presenta sua colaboror Peter Pellegrini como sua sustitua, e ia promete resta political ativa. Protestores dise ce Fico va continua aplica potia e los esije elejes tempranida. Fico ia dise ce sua governa aliada ave autoria per servi tra tota sua periodo de cuatro anios, cual fini en 2020.
Kuciak ia investiga froda political alegada, liada a crimin organizada italian. Sua artcle final, no completida, ia es publicida pos sua mori en la tarda de febrero, tisante la coleria publica contra un governa jeneral regardada como falinte fronti la froda.
Protestas ia aveni ier en 35 sites tra la pais. La protesta en Bratislava en la semana pasada ia es probable la plu grande en Slovensco pos la cade de comunisme, con plu ca 40 mil partisipores. Ier la fola ala ia es an plu grande.
@T Puigdemont proposa la model suiz de autonomia
@L aora_oji/2018/puigdemont_proposa_la_model_suiz_de_autonomia
====== Puigdemont proposa la model suiz de autonomia ======
19 marto 2018
Carles Puigdemont, la gidor de la separadistes en Catalunia, dise ce un majoria de la catalanes ta suporta cisa un autonomia federal simil a lo en Suiz, en loca de un autonomia completa.
Sua comentas en Geneve pare sujesta un cambia de sua suporta presedente per autonomia completa. La presidente pasada ia fuji a Beljia pos la declara de autonomia par Catalunia, seguente un vota disputada en otobre pasada.
La rejion ajitada resta direta governada par Madrid, an si en elejes en desembre, partitos favorente autonomia ia gania un majoria de sejas.
Espania vole deteni Puigdemont sur acusas de rebela. Cuatro plu gidores catalan, incluinte la vispresidente pasada Oriol Junqueras, es ancora en prison per sua parte en la vota de autonomia en otobre.
La autonomia de Catalunia resta pausada, car Madrid refusa desprisoni la om nominada per gida la governa rejional de Catalunia.
Puigdemont, parlante a un festa de film per diretos umana internasional en Geneve, ia sujesta ce autonomia completa no es la sola posible. "Cisa, entre otra modos, la model suiz es la plu efetosa e atraente," el ia dise. Suiz ave un governa multe desentrida, en cual governas rejional, nomida cantones, ave un cuantia notable de potia.
@T Ratas destrui biletas en un automata de banco
@L aora_oji/2018/ratas_destrui_biletas_en_un_automata_de_banco
====== Ratas destrui biletas en un automata de banco ======
20 junio 2018
En la stato Assam en Barat, tecnicistes ci ia ariva per repara un automata malfunsionante de banco ia es xocada cuando los ia abri lo.
Biletas con valua de plu ca 1,2 milion rupis ia es trinxada. On suspeta ce ratas es culpable. Probable los ia entra a la macina tra un fora per filos.
On ia tuita fotos de la mone masticada a la Banco Nasional de Barat en la distrito Tinsukia. Un de la fotos mostra un rodente mor, reclinante en la desordina.
La macina ia es malfunsionante tra sirca 12 dias. La tecnicistes ci ia desasembla lo ia trova biletas destruida de 2000 e 500 rupis. Los ia susede salva biletas con valua de 1,7 milion rupis, an tal.
@T Razisme en un jornal privata de Einstein
@L aora_oji/2018/razisme_en_un_jornal_privata_de_einstein
====== Razisme en un jornal privata de Einstein ======
14 junio 2018
Jornales personal de viaja, nova publicida, revela alga opinas raziste e xenofobica esprimada par Albert Einstein. Scriveda entre otobre 1922 e marto 1923, la jornales trasa la esperias de la fisiciste famosa en Asia.
En los, el ia fa jeneralis negativa e nondistinguinte, per esemplo en descrive la popla de Xina como "persones asidua, susia e nonagu."
Ma on debe recorda ce, plu tarda en sua vive, Einstein ia defende diretos sivil en la Statos Unida de America, e ia nomi razisme "un maladia de persones blanca".
Esta es la ves prima de publici la jornales como un volum individua en engles. Publicida par la Universia de Princeton, La jornales de viaja de Albert Einstein: Asia este, Filastin e Espania, 1922--1923 ia es editada par Ze'ev Rosenkranz, dirijor aidante de la Projeta de Paperes de Einstein a la Instituida de Tecnolojia de California.
Einstein ia viaja de Espania a Asia ueste, e tra Srilanca a Xina e Japan. La fisiciste ia descrive ariva en Porto Said en Misre e fronti "levantanes de cada color... como si emeteda de enferno" ci ia embarca la barcon per vende sua benes.
El ia scrive ance sur sua tempo en Colombo en Srilanca, disente sur la popla: "Los vive en susia estrema e en apesta notable sur la tera, fa poca, e nesesa poca."
Ma sua comentas la plu asida ia es fada sur persones de Xina. El ia descrive enfantes xines como "sin spirito e nonagu", e ia dise ce lo va es "triste si esta xineses recambia tota otra razas".
En otra entradas, el ia nomi Xina "un nasion strana e manadin" e "plu simil a automatas ca persones", ia reclama ce on ave "poca difere" entre omes e femes xines, e ia demanda como la omes es "noncapas de defende se" contra la "atrae ruinante" de femes.
Notada per sua brilia siensal e sua umanisme, Albert Einstein ia migra a la SUA en 1933 pos la asende de Adolf Hitler e la partito nazi. La siensiste iudi ia descrive razisme como "un maladia de persones blanca" en un parla en 1946 a la Universia de Lincoln en Pennsylvania.
@T Rebelores itiopian suspende sua resiste
@L aora_oji/2018/rebelores_itiopian_suspende_sua_resiste
====== Rebelores itiopian suspende sua resiste ======
23 junio 2018
En Itiopia, un grupo rebelante ia suspende sua resiste armada contra la governa. Ginbot 7 ia dise ce reformis par Abiy Ahmed, la ministro xef, ia dona a lo un espera ce "democratia autentica" pote es "un posible vera".
Plu temprana, la governa ia dise ce lo ia desbloci 264 locas de rede e canales de TV.
Esta es la plu resente de multe cambias fada pos cuando Abiy ia veni a sua posto en april, laxinte la teni forte a potia par la governa.
Ginbot 7, con base en Ertra, un pais visina, ia es identifiada como un organiza teroriste par governas presedente. Sua secretor jeneral, Andargachew Tsege, ia es saisida en Iaman en 2014, e enviada a Itiopia, do on ia condena el a mori en asentia ja en 2009 per conspira alegada per un colpa de stato.
La governa itiopian ia pardona Tsege en 29 maio e el ia revade a la Rena Unida, do sua familia abita.
En anios resente, Itiopia es fendeda par protestas par membros de la du etnicos la plu grande en la pais -- la oromos e la amarinas. Protestas ia estende tra la pais en 2015 entre urjes per reformi political e economial e un fini de froda governal.
On ia acusa la governa de violes de diretos umana en acel tempo, incluinte la tortura e mata nonautorida de oposores political.
La canales Ethiopian Satellite Television (Televisa Satelital Itiopian) e Oromo Media Network (Rede de Medias Oromo), con bases en la SUA, ia es entre la difusores proibida e acusada en asentia par la governa presedente de provoca violentia e promove atas de teror. Aora on ia abandona la acusas, ma multe jornalistes ia es condenada a prison per articles cual los ia scrive, e otras ia fuji de la pais.
Hailemariam Desalegn ia resinia nonespetada como ministro xef en febrero, disente ce el espera fini anios de turba political.
Pos emprende la posto en april, Abiy ia anunsia multe reformis estendosa. El ia promete abri la mundo de difusa, e ia recomenda an ce difusores oposante con bases stranjer abri ofisias en Itiopia. Un portavose ia dise ce "libria de espresa es un direto fundal. Un flue libre de informa es esensal per sitadanes engranada e encargada. Sola un mercato libre de ideas va gida a la veria."
Abiy ia anunsia ance la privati partal de companias nasional. El atenta stabli la relata problemosa entre Itiopia e Ertra, e ia cansela un state de crise inisiada par la governa presedente.
@T Reportas de resiste ofisial contra Trump
@L aora_oji/2018/reportas_de_resiste_ofisial_contra_trump
====== Reportas de resiste ofisial contra Trump ======
6 setembre 2018
En la SUA, un ofisior major su Donald Trump ia dise ce membros de la governa labora per frustra partes de la projeta de la presidente, per proteje la pais de sua "tendes la plu mal".
En un editorial en la jornal New York Times, la autor anonim ia dise ce la "manca de moralia" e "noncautia" de la presidente ia gida a desides mal informada e fretosa.
Trump mesma ia descrive la scrivor como "coarde" e la jornal como "finjente".
La jornal ia defende la editorial en un declara, disente: "Nos es estrema orgulosa ce nos ia publici esta peso, cual ajunta valua importante a la comprende publica de lo cual aveni en la governa de Trump."
La article de opina ia es publicida a la dia pos cuando estraedas de un libro par Bob Woodward sur Trump ia sujesta ce sua ofisiores xef es engranada en un "colpa de stato manejal" per proteje la nasion de sua presidente, incluinte par move documentos major a via de sua table ante cuando el pote suscrive los.
La lista de criticas de Trump en la article inclui sua consentas desorganizada, sua condui fretante e trivial, un noncapasia de segue sua desides, un antipatia contra jornalisme libre, e sua instintos "antidemocrata".
La autor descrive un "presidentia de du niveles", en cual la atas de la presidente -- como sua disposa pasinte a "autocratas e tiranos" como Kim Jong-un e Vladimir Putin -- es constrinjeda e redirijeda par "adultes en la sala".
Plu, el dise ce alga persones en la governa ia xuxa an sur usa la Altera 25, un regula en la constitui cual permete un vota par la vispresidente e un majoria de ministros per sutrae un presidente ci es "noncapas de reali la potias e debes de sua ofisia".
On reporta un promove atacosa de en la Casa Blanca per descovre la identia de la fontes de ci Woodward ia depende per sua libro Teme: Trump en la Casa Blanca.
Sur la article en la jornal, Trump ia tuita un sola parola: "TRADI?" El ia segue esta par demanda esce la ofisior esiste vera o esce la jornal ia inventa el, ajuntante: "Si la persona anonim COARDE esiste vera, la Times debe, per razonas de Securia Nasional, envia el a la governa sin pausa!"
Plu tarda, el ia ajunta un plu tuita, disente: "Me drena la Pantan, e la Pantan atenta contrataca. No ansia, nos va vinse!"
@T Reunis per familias separada par la Gera Corean
@L aora_oji/2018/reunis_per_familias_separada_par_la_gera_corean
====== Reunis per familias separada par la Gera Corean ======
20 agosto 2018
Un grupo de tehanes vea ia ariva en Txoson per encontra relatadas ci los no ia vide pos la Gera Corean de 1950--53.
La gera ia divide la Penisola Corean, e persones abitante a la lado norde no ia pote parti. La du Coreas, ancora tecnical en gera, ia organiza reunis a ante, ma esta es la prima en tre anios.
Sento persones ia es elejeda par cada lado per partisipa en la reuni. Alga ia renunsia pos descovre ce la relatadas ci los ia espera vide no vive plu. En soma, on va ave 83 persones de la Norde e 89 de la Sude.
La gera ia separa miliones de persones de sua familias, e esta reunis corta va es probable la ves final cuando multe va vide lunlotra.
Tra la anios, a tempos de calmia relativa, la du Coreas ia organiza ce grupos elejeda visita lunlotra. On ia fa esta a 20 veses en la 18 anios pasada. La reunis pasada entre frates e sores, enfantes e jenitores, e sposas e sposos ia es esperias estrema emosiosa.
La tehanes viaja par bus a traversa de la frontera gardada, asta la vacanseria de la montania Kumgang. Los va pasa tre dias en Txoson, ma va es con sua relatadas per sola alga oras en cada dia: sola 11 oras en soma. La plu de sua visita va es forte supravideda.
Multe de los trae donadas como vestes, medisin e comedas per sua relatadas en Corea Norde, un pais multe plu povre. Alga dotores e ospitalores viaja con la grupo per institui un sentro medical per la partisipores vea.
La aveni, fasilida par la Crus Roja, es la resulta de un encontra entre la xefes Kim Jong-un de Txoson e Moon Jae-in de Tehan a la frontera en april. Los ia encontra lunlotra a ves du en maio, cuando los ia acorda recomensa la reunis. On previde ce los va fa un plu encontra en la semanas veninte.
@T Rohingias teme ce on va reenvia los a Miama
@L aora_oji/2018/rohingias_teme_ce_on_va_reenvia_los_a_miama
====== Rohingias teme ce on va reenvia los a Miama ======
15 novembre 2018
On ave teme e confusa en campas de refujadas par causa de nonsertia sur esce Bangladex va reenvia rohingias a Miama. La autoriosas ia dise ce los intende move oji la grupo prima, ma lo no es clar esce esta va aveni.
La Nasiones Unida e grupos per diretos umana ia dise ce on debe obliga nun a revade, car la situa en Miama no es secur.
Plu ca 700 mil muslimes rohingia e otra persones ia fuji a Bangladex en la anio pasada. Los ia fuji de violentia e atas militar en la ueste de la provinse Rakhine.
La NU ia dise ce on debe investiga ofisiores miama major e litiga los sur jenoside par causa de esta atas, sur cual la armada dise ce los ia ojeti sola ativistes violente.
Sirca 300 mil rohingias ia fuji ja Miama pos ondas plu temprana de violentia comunial.
La plu de la refujadas abita en state simple en campas estendosa, prosima a la site Cox's Bazar a la frontera bangla. Miama e Bangladex ia acorda ce on debe gradal reenvia los a Miama, e miles de persones es ja aprobada par Miama per esta prosede.
Esta ia provoca un panica entre la refujadas. En Miama, multe de los ia sufri violentia, ia perde membros de sua familias, o ia esperia la arde de sua casas.
La rohingias muslim es un de la multe minorias etnical en Miama. La pais es xef budiste, e la autoriosas ala regarda los como migrores nonlegal, privante los de sitadania e otra diretos. Tra multe anios, la NU ia alega multe maltratas de diretos umana, incluinte matas caprisal, viole sesal, e arde de imobilas.
En la anio pasada, la militar miama ia inisia medias forte en Rakhine, pos cuando ativistes rohingia ia fa atacas matante contra polisierias. Pos alora, a la min 700 mil rohingias ia fuji a Bangladex, pais visina.
La armada miama ia desculpa ja se de malcondui e ia rejeta la alegas. Aung San Suu Kyi, la xef nonmilitar de Miama par fato, es presente en Singapor per un confere internasional.
El es internasional criticada per lo cual promovores de diretos umana descrive como sua fali de oposa la ativia militar contra la rohingias.
@T Rusia es acusada sur siberatacas global
@L aora_oji/2018/rusia_es_acusada_sur_siberatacas_global
====== Rusia es acusada sur siberatacas global ======
5 otobre 2018
On ia acusa spiores rusce sur relatas con un serie de siberatacas tra la mundo. Rusia ia rejeta la alegas como "un mania ueste sur spiores".
Nederland ia acusa cuatro omes rusce de conspira per ataca en april la Organiza per la Proibi de Armas Cimical (OPCW), cual ia investiga un ataca cimical contra un spior pasada rusce en la Rena Unida.
La governa de la Rena Unida ia acusa la departe militar de securia rusce de scema cuatro siberatacas major contra companias en Rusia e Ucraina, un rede peti de televisa en la Rena Unida, e la Partito Democrata de la SUA.
La SUA ia dise ce departes de securia rusce ia ataca sua departe contra drogi, un de sua companias de enerjia nucleal, e FIFA, la organiza governante de futbal.
Canada ia dise "con sertia alta" ce penetras a sua sentro per etica en sporte e a la Departe Mundal Contra Drogi en Montreal ia es fada par departes rusce.
Nederland dise ce aparatos en la portabagaje de la auto de la suspetadas ia es dirijeda a la construida de OPCW per recolie detalias de usores. Un antena ia es ascondeda su un jaca sur la scafal retro de la auto. Cuando on ia intersepi la omes, los ia atenta destrui un de sua telefonetas.
En ajunta, la autoriosas nederlandes ia trova ce un computador portable saisida de la cuatro suspetadas ia es ja usada en Brasil, Suiz e Malaisia. Lo ia es usada en Malaisia per ataca la investiga contra la cade de la vola MH17 en 2014 supra teritorio ocupada par rebelores suportada par Rusia en Ucraina este.
La departe rusce de esternas ia publici un declara ofisial en la tarda de ier, descrivente se como la vitim de "ancora un plu campania organizada de propaganda". La declara ia ajunta: "Cualce sitadan rusce con un aparato portable es regardada como un spior."
@T Sara Netanyahu es acusada de froda
@L aora_oji/2018/sara_netanyahu_es_acusada_de_froda
====== Sara Netanyahu es acusada de froda ======
22 junio 2018
La sposa de Benjamin Netanyahu, ministro xef de Israel, es acusada sur froda pertinente a un malusa alegada de mone governal. On ia acusa Sara Netanyahu de usa 359 mil xeceles per furni comedas a la casa ofisial de la ministro xef. On ia acusa el ance sur un rompe de fida pos un investiga polisial.
Sara Netanyahu ia nega tota la acusas, cual sua avocatos ia descrive como asurda e iludente.
En la anio pasada, la avocato jeneral ia anunsia ce el considera acusa Netanyahu sur la alegas pos un investiga longa cual ia deveni la tema de discutes intensa en jornales israeli.
On suspeta Netanyahu e Ezra Seidoff, un visdirijor pasada de la ofisia de la ministro xef, sur es envolveda en reclamas de spende entre setembre 2010 e marto 2013 per comedas traeda a la casa de la ministro xef e per cosinores privata.
On dise ce la reclamas de spende ia es fada en asconde ce la casa emplea ance sua propre cosinor. On no permete ce la governa finansia ambos.
Un declara de la avocato jeneral en setembre pasada ia dise: "En esta modo, sentos de comes de restorantes e cosinores ia es frodosa resetada a cuantia de 359 mil xeceles."
Benjamin Netanyahu ia reata coler a lo cual el ia regarda longo como un xasa de sorsores contra sua familia de profil alta, gidada par oposores political.
La avocatos de Sara Netanyahu ia dise ce no froda o rompe de fida ia aveni, e ce el no ia conose la prosedes coreta. Los ia ajunta ce la person ci ia comanda la comedas ia es la manejor pasada de la casa.
@T Sento anios pos la autonomi de Polsca
@L aora_oji/2018/sento_anios_pos_la_autonomi_de_polsca
====== Sento anios pos la autonomi de Polsca ======
12 novembre 2018
Folas vasta ia selebra la aniversario sento de la autonomi de Polsca, ma con controversia sur un deside de inclui grupos estrema destriste.
Nasionalistes ia es entre plu ca 200 mil persones partisipante en un prosegue en la capital, Warszawa, gidada par presidente Andrzej Duda. Partitos oposante ia boicota la aveni.
A la mesma tempo, presidente Emmanuel Macron de Frans ia urje xefes de stato a rejeta la nasionalisme, en cuando los ia onora la aniversario sento de la fini de la Gera Mundal Prima.
La Dia Nasional de Autonomia en Polsca remente la popla sur la restora de potia a la pais en 1918, de la imperos rusce, deutx e osteraices-magiar.
La plu de la partisipores en la prosegue en Warszawa ier ia porta banderas polsce e sinturetas roja e blanca, ma alga ia teni banderas representante partitos estrema destriste de Polsca e Italia. Multe de la proseguores ia ave pirotecnicales portable, cual ia pleni la stradas con fuma roja.
Duda ia dise ce el desira ce la prosegue es un selebra orgulosa e joiosa, e ia averti ce la polisia va prosede cualcun ci porta banderas ofendente o canta sloganes de la spesie oiada a la prosegue en 2017, como "Polsca pur, Polsca blanca".
En la semana pasada, un corte polsce ia reversa un proibi contra la prosegue de nasionalistes en Warszawa, ma on reporta ce la avenis de ier ia es pasosa, sen banderas o cantas ofendente.
La prosegue a la Dia Nasional de Autonomia es ance popular con miles de polsces patriota comun, incluinte los ci suporta la partito Lege e Justia, cual governa. Sirca 60 mil persones ia partisipa en la anio pasada.
Macron, parlante a xefes de stato en Paris, ia descrive la nasionalisme como "un tradi de patriotisme" e ia urje otras a "batalia per la pas". El ia ajunta: "Si on dise 'nosa consernas es prima e la otras no importa', on elimina la cosa la plu valuosa de un nasion -- sua valuas moral."
@T Sento anios pos la fini de la Gera Mundal Prima
@L aora_oji/2018/sento_anios_pos_la_fini_de_la_gera_mundal_prima
====== Sento anios pos la fini de la Gera Mundal Prima ======
11 novembre 2018
Rituos aveni oji tra la mundo per onora la aniversario sento de la sesaspara cual ia fini la Gera Mundal Prima.
En Australia, on ia fa un rituo a la Monumento Nasional de Gera en Canberra, e en Adelaide un avion ia cade miles de papaveras de paper roja. En Zeland Nova, un saluta par fusil ia aveni en la capital, Wellington. La militares de esta du paises ia perde multe soldatos en la campania de la Penisola Gallipoli en 1915.
En Barat, rituos ia es fada per onora la 74 000 soldatos ci ia mori en combate a la otra lado de la mundo. La papaveras cual es en Europa moderna un simbol de la versa de sangue ia reposa miscada con calendulas jala, egal simbolin.
La rituo xef en Europa va aveni en Paris. Donald Trump e Vladimir Putin es entre los ci va es presente a un rituo su la Arco de Vinse.
En la Rena Unida, 10 000 persones va prosegue a la Senotafio en London, e membros de la popla, elejeda par votas, va partisipa en la rituo de pone ala garlandas de papaveras.
Ier, Emmanuel Macron e Angel Merkel ia visita la vila Compiègne en la norde de Frans. Los ia suscrive un libro de recorda en un vagon de ferovia identica a lo en cual on ia acorda ala la sesaspara de 11 novembre 1918.
Donald Trump ia condui controversa par cansela un visita a un semetero de la mores de gera, par causa de un mal clima. Sirca 50 organizas ativiste intende fa oji un protesta en Paris contra sua visita.
@T Siclones sever menasa la Statos Unida e la Pilipinas
@L aora_oji/2018/siclones_sever_menasa_la_statos_unida_e_la_pilipinas
====== Siclones sever menasa la Statos Unida e la Pilipinas ======
14 setembre 2018
Siclon Florence ia ariva a la costa este de la SUA. Deses de miles de casas es sin eletrica, e acua de mar versa longo stradas costal.
La tempesta crea ventas con rapidia masima de 150 cilometres per ora. Lo ia perde alga de sua fortia en cuando lo ia prosimi a Carolina Norde e Sude, ma ofisiores averti ce lo pote ancora mata multe persones e produi inondas desastrosa.
Lo es probable ce Carolina Norde va reseta oto menses de pluve en sola du o tre dias.
La situa es simil en la Pilipinas, do un siclon enorme prosimi e miles de persones ia comensa parti de rejiones costal. Siclon Mangkhut va ariva a la punto norde de Luzon, la isola xef, a no min tarda ca saturdi.
On clui scolas e ofisias, e cultivores atenta salva sua recolies. Des milion persones es en la curso de la tempesta, como ance miliones de otras longo la costa sude de Xina.
La Pilipinas reseta sirca dudes siclones o otra tempestas en cada anio. Mangkhut es la plu forte asta aora en esta anio, con diametre de 900 cilometres e venta sustada de plu ca 200 cilometres per ora.
Lo ia bate ja la Isolas Mariana norde e Guam.
@T Sinco atletas camerunes abandona sua ecipo
@L aora_oji/2018/sinco_atletas_camerunes_abandona_sua_ecipo
====== Sinco atletas camerunes abandona sua ecipo ======
11 april 2018
A la Juas de Comunia de Nasiones en Australia, sinco atletas camerunes ia deveni asente de sua abiterias sin esplica. Ofisiores regarda esta como un "abandona". On ia reporta la atletas mancante a la polisia australian.
Tre levores de pesa e du boxores ia es final videda a oras diversa en lundi e martedi. Camerun ia dise ce la visas australian de la grupo va resta valida australian asta 15 maio.
La atletas ia es nomida como Olivier Matam Matam, Arcangeline Fouodji Sonkbou e Petit Minkoumba (levores de pesa), e Christian Ndzie Tsoye e Simplice Fotsala (boxores).
Un ofisior ia comenta: "La autoriosas es multe deludeda par la abandonores. Alga an no ia compete. La espera sinsera es ce los va reveni a la vileta per viaja a casa con la otras."
La governa australian ia averti atletas contra resta per plu longa ca sua visas.
La Federa de la Juas de Comunia de Nasiones ia dise ce lo monitori la situa, ma atletas ave par sua visas "la direto de viaja libre".
En 2012, sete atletas camerunes ia desapare cuando los ia es en London per la Juas Olimpial.
@T Srilanca emerji de sua state de crise
@L aora_oji/2018/srilanca_emerji_de_sua_state_de_crise
====== Srilanca emerji de sua state de crise ======
18 marto 2018
Srilanca ia sutrae un state de crise ajuntada a 6 marto en responde a violentia contra comunias muslim. Du persones ia es matada, cuasi 450 casas e botecas de posese muslim ia es danada, e 60 veculos ia es ardeda en atacas en la distrito sentral de Kandy.
On ia introdui proibis de sorti e de redes sosial per atenta redui la tensa.
Violentia ia crese en la pais de majoria budiste de pos 2012, e on alega ce lo es nurida par grupos budiste estremiste. Los ia acusa muslimes de forsa persones a converti a islam e de vandali locas arceolojial de budisme. Deses de locas relijial muslim ia es ance danada.
Asta aora, la polisia ia aresta cuasi 300 persones, incluinte un gidor de organiza budiste estremiste sur ci los suspeta ce el ia inisia la violentia.
En la state de crise, autoriosas ia pote aresta e deteni suspetadas per periodos longa si los ia judi ce esta es nesesada. Sentos de soldatos ia es asiniada a la rejion de Kandy, e gas lacrimojen ia es usada cuando alga grupos ia continua defia la proibis de sorti.
Presidente Maithripala Sirisena ia anunsia par tuita ce el sutrae la state de crise a soldi, pos evalua la securia publica. Plu temprana en la semana, on ia sutrae ance proibis nasional contra locas ueb de redes sosial, incluinte Facebook.
Esta ia es la ves prima en sete anios cuando Srilanca ia adota un state de crise. La pais ia es en tal state tra cuasi tre desenios cuando la governa ia combate rebelores tamil en la gera interna cual ia fini en 2009.
@T Suris fuji en la rejion asejada Guta Este
@L aora_oji/2018/suris_fuji_en_la_rejion_asejada_guta_este
====== Suris fuji en la rejion asejada Guta Este ======
16 marto 2018
Plu ca 12 mil persones ia fuji de un vila en la rejion Guta Este cual ensirca Dimashq, la capital de Suria, con ce soldatos de governa avansa. A presente, la rejion es asejada e ocupada par rebelores.
Omes, femes e enfantes, portante covreletos e sacos, ia parti de Hamuria, cual ia deveni intensa bombardada en dias resente. Esta es la parti la plu grande de la enclave pos cuando la militar ia aumenta sua campania de resaisi lo en la mense pasada.
A la mesma tempo, 25 camiones portante comables ia entra a la vila Duma. La Comite Internasional de la Crus Roja ia dise ce la aida es mera un parte peti de lo cual es nesesada en Guta Este, do cuasi 400 mil persones fronti un manca sever de comedas e furnis medical.
La gera interna en Suria comensa aora sua anio oto. Lo ia lasa plu ca 350 mil persones mor, 1,5 milion otras con descapasias permanente, e 11 milion deslocada e en e estra la pais. Plu ca 1100 persons ia es matada de pos la intensi de la bombarda de Guta Este par la governa e sua aliadas a 18 febrero.
Pos cuando soldatos ia penetra la linias de rebelores estra Hamouria a la note de mercurdi, la governa ia identifia un via tra cual sitadanes pote parti. Ier, plu ca 12 mil persones ia usa la momento per fuji en dirije a un punto de controla governal en Adra.
"Nos ia es trapida en la suteras e no ia osa sorti," un om ia comenta en la anteurbe de Hamouria. "Nos ia pote fa no cosa... On ia ave no comables."
@T Tempestas en la norde e ueste de Italia
@L aora_oji/2018/tempestas_en_la_norde_e_ueste_de_italia
====== Tempestas en la norde e ueste de Italia ======
31 otobre 2018
Italia ia es bateda par ventas e pluves forte cual ia mata 11 persones en la ueste e norde. Scolas e locas turismal ia clui en alga rejiones car on ia teme sur la securia de la popla.
On ia reporta ventas de asta 180 cilometres per ora, e du tornados ia pasa tra la sentro de Terracina, un vila costal, matante un person e ferinte des otras.
En Venezia, acuas levante ia inonda multe de la plazas e paserias famosa. Cisa 75% de la site de canales es aora sumerjida.
La Plaza San Marco ia es cluida a la posmedia de lundi, cuando la acua ia ateni 156 sentimetres de profondia. On ia rejistra ala un nivel plu profonda a sola tre veses pasada.
Ultra Venezia en la norde, on ia esperia ventas forte, arbores cadente e tera liscante. En la rejion Veneto, un om ia es matada par un arbor e un pompor-bonvolor ia mori en la rejion fronteral Alto Adige (Tyrol Sude) en la norde-este de Italia.
On ia trova un om mor, de 61 anios, en un rio prosima a Belluno en Veneto, pos descovre plu temprana sua auto. Un fem ia es matada cuando sua casa ia es destruida par un liscatera, e la corpo de un pexor ia es trovada a alga oras pos cuando el ia vade per serti la state de sua barco sur un lago en Trento.
A sude de la vacanseria Rimini, un surfor airotirada con 63 anios ia mori cuando sua cometa ia lansa el contra rocas. Tra Italia, ses persones ia mori a lundi e on ia confirma plu moris ier.
Alga de la problemes la plu mal ia es esperiada a la costa ueste, spesial en Liguria en la norde-ueste.
La muron esterna de mar en Rapallo, un porto modosa, ia es destruida cuando sua beton fortida ia desintegra, danante alga de la iates ala liada. Pompores ia debe salva ance 19 persones ci ia deveni trapida en Rapallo.
Plu sude, la provinse costal Grosseto ia reporta un desastre. Arbores ia cade en la capital Roma e en Napoli, do un studiante de 21 anios ia es matada. Du tornados ia destrui la tetos de construidas en Terracina, a sude de Roma, con ce abitores ia core per proteje se.
Transporta e la furni de eletrica es ance disturbada, e meteorolojistes averti ce la mal clima va continua.
@T Traversa la Pasifica par nada
@L aora_oji/2018/traversa_la_pasifica_par_nada
====== Traversa la Pasifica par nada ======
5 junio 2018
Un nador franses ia parti de Japan con intende de deveni la person prima ci traversa la Mar Pasifica par nada.
Ben Lecomte, ci ave 51 anios, va nada tra oto oras per dia, tra plu ca ses menses, en dirije a la costa ueste de la SUA. La periles cual el risca fronti inclui selacos, tempestas, manadas de medusas, e acua de temperatur intensa basa.
El espera trae consensia a la cambia de clima, e un ecipo de siensistes va fa rexercas en sua nada de 9000 cilometres. Los va studia detrito plastica e la efeto de eserses estrema a la cor. Los va esamina ance como la desastre nucleal de Fukushima ia afeta la mar.
Lecomte, ci abita en la SUA, ia prepara se par oras de nada en acua nonencluida a cada dia. El ia fa ance eserses de "imajina e desasosia" per serti ce sua mente es en state conveninte.
Sua preparas ia ocupa Lecomte tra plu ca ses anios, ma el ia desira fronti la defia tra tempo multe plu longa. En 1998, el ia fa la nada solo prima conoseda de lado a lado de la Mar Atlantica, traversante 6400 cilometres en 73 dias. Cuando el ia ateni final la tera en Frans, sua parolas prima ia es "nunca denova", ma pos corta el ia xerca un defia nova.
Sua costum dial va resta cuasi la mesma tra sua viaja intera. El va nada per oto oras, entra a la barco suportante per come e dormi, e reentra a la acua a pos.
Per manteni un nivel alta de enerjia, el intende consuma 8000 calorias per dia. "Me ave un dieta asoluta sin sucre," el ia comenta. "La plu de mea calorias va veni de un dieta grasosa, incluinte multe comes jelada completa, ris, pastas e sopas diversa."
La barco acompaniante va ave un jeolocalador, e persones interesada pote segue la progresa de Lecomte en sua pajeria.
@T Trump anunsia un acorda comersial con Mexico
@L aora_oji/2018/trump_anunsia_un_acorda_comersial_con_mexico
====== Trump anunsia un acorda comersial con Mexico ======
28 agosto 2018
La SUA e Mexico ia acorda alga termas major de comersia, en cuando la presa aumenta per completi un renegosia de la Trata de Comersia Libre de America Norde.
Donald Trump, presidente de la SUA e un criticor frecuente de la acorda esistente, ia anunsia ier esta avansa parente.
La resulta final resta en duta, e Canada, la pais tre en la trata, va rejunta se a la negosia oji.
Trump ia inisia un anio de discute cuando el ia menasa retira la SUA de la trata. El ia esije ce on renegosia la acorda de 1994, cual el culpa per un declina de empleas fabricante en la SUA, spesial en la industria de autos.
Asiones SUA ia crese e la peso mexican ia forti a la anunsia de la resulta inisial a lundi.
@T Trump cansela sua confere con Corea Norde
@L aora_oji/2018/trump_cansela_sua_confere_con_corea_norde
====== Trump cansela sua confere con Corea Norde ======
25 maio 2018
Corea Norde ia dise ce lo vole ancora discute "a cualce tempo en cualce forma", pos cuando Donald Trump, presidente de la SUA, ia cansela subita sua consenta con Kim Jong-un.
Kim Kye-gwan, visministro de esternas, ia descrive la deside par Trump como "estrema regretable". Trump ia culpa la "enemia franca" de Corea Norde per la cansela.
La confere ia ta es la aveni prima de un encontra entre un presidente corente de la SUA e un gidor de Corea Norde.
Detalias de la consenta, ajendida per Singapor a 12 junio, ia es nonclar. Ma discutes ia ta foca a modos de desnucleali la penisola corean e de redui tensa.
A mera oras ante la anunsia par Trump, Corea Norde ia dise ce lo ia reali sua promete de desasembla tuneles a sua sola proberia nucleal.
Trump ia fa sua anunsia en forma de un letera personal adirijeda a Kim.
Plu tarda, un portavose ia furni plu detalias, disente ce Corea Norde ia mostra "un manca profonda de sinseria". El ia informa reportores ce un serie de "prometes rompeda" ia veni de Pyongyang, incluinte cuando la Casa Blanca ia envia un ofisior a Singapor per fa discutes inisial con diplomatas de Corea Norde, ma la diplomatas no ia apare.
La ofisior ia afirma ce Trump "ia dita cada parola" de sua letera a Kim Jong-un.
@T Trump e Kim fa un encontra sin presedente
@L aora_oji/2018/trump_e_kim_fa_un_encontra_sin_presedente
====== Trump e Kim fa un encontra sin presedente ======
12 junio 2018
Donald Trump e Kim Jong-un ia fa la encontra prima entre un presidente corente de la SUA e un xef de Corea Norde (Txoson), en un developa major pos un anio de intercambia menasas.
La duple ia presa manos con lunlotra a un otel lusosa sur la isola Sentosa en Singapor ante fa discutes. A la fini de sua confere, los ia suscrive un documento descriveda como "completa", ma no ia esplica lo cual los ia acorda.
Los ia discute la redui de tensa e la desarma nucleal. "Me pensa ce ambos lados va es multe impresada con la resulta," Trump ia dise, ajuntante ce plu detalias va es furnida a pos.
La confere ia comensa con un vista saisinte, nonimajinable a mera menses ante aora. La du omes ia pasea en dirije a lunlotra, e cada ia teni firma la mano de la otra ante banderas de la SUA e Txoson.
Con Trump colpetante la braso de Kim, los ia sta sur un tapeto roja e ia intercambia alga parolas ante turna se a la jornalistes asemblada.
Sentante a lado de lunlotra ante un consenta privata, la duple ia pare destensada an en la situa. "Veni asi no ia es fasil," Kim ia dise. "On ia ave ostaculos ma nos ia vinse los per es asi." Sua corespondente ia responde: "Acel es vera."
La du omes, acompaniada mera par interpretores, ia parla tra pico min ca 40 minutos. Alora delegas peti de conselores ia ajunta se per un come en labora.
De Washington, la grupo ia inclui Mike Pompeo, ministro SUA de esternas, e John Bolton, conselor de securia. A la lado de Pyongyang ia es Kim Yong-chol, la aidor xef de Kim e un xef pasada de spiores, e Ri Yong-ho, ministro de esternas.
Los ia comparti un misca de platos de orijinas diversa, incluinte concombres plenida e pexes lenta coceda en soia.
@T Trump es contradiseda sur un compra de silentia
@L aora_oji/2018/trump_es_contradiseda_sur_un_compra_de_silentia
====== Trump es contradiseda sur un compra de silentia ======
3 maio 2018
En la SUA, Rudy Giuliani, aidor legal de presidente Donald Trump, ia dise ce Trump ia repaia personal a sua avocato $130 000 usada per compra la silentia de un ator de filmas adulte sur un adultera alegada.
Esta pare contradise Trump, ci ia insiste ce el no ia sabe sur esta paia, fada par avocato Michael Cohen a Stormy Daniels ante la eleje de 2016. Trump ia nega ance la alega par Sra Daniels sur la relata de ama en 2006.
Giuliani ia dise ce no finansia campaniante ia es usada -- un cualia major en la situa, car acel ia ta es nonlegal.
La maior pasada de la Site York Nova, ci ia deveni resente un membro de la ecipo legal de Trump, ia comenta: "Los ia embuti lo tra un compania de avocatos e la presidente ia repaia lo." El ia ajunta ce la repaia ia es fada "tra un periodo de alga menses".
La avocato de Daniels, Michael Avenatti, ia dise ce americanes "debe es scandalida" par la revela de Giuliani. El ia tuita: "Nos ia predise a menses ante aora ce on va demostra ce on ia menti a la popla american sur la paia de $130 mil e lo cual Trump ia sabe."
Pos nega inisial la paia, Cohen ia confesa ultima ce el ia fa la paia privata a Stormy Daniels -- de ci sua nom vera es Stephanie Clifford -- en otobre de 2016, usante sua propre finansia, per compra sua silentia. El ia dise ance ce la campania de Trump e la organiza de Trump ia ave no sabe sur la paia, e ce el mesma no ia reseta un repaia de la mone.
La presidente ia aseta resente ce on ia fa un "acorda". La paia relata a alegas par Daniels ce el ia fa la seso con Trump en 2006, negada par Trump.
En marto de esta anio, Daniels ia inisia un litiga contra la presidente, alegante ce la acorda de nonrevela ia es nonvalida car Trump no ia suscrive lo. A pos, Daniels ia perde un proposa de corte ce Trump ta atesta jurada sur sua reclama ce los ia fa un relata de ama.
An si Trump ia nega la reclama, sua avocatos xerca $20 milion de compensa de Daniels, razonante ce el ia rompe la acorda de nonrevela.
Daniels litiga la presidente ance sur un tuita "malacusante" cual el ia envia pos cuando Daniels ia dise ce un om ia menasa el en un parce de autos en Las Vegas a abandona sua alegas. Trump ia dise ce la reclamas es "un caso completa de froda".
@T Trump es criticada pos defende Rusia
@L aora_oji/2018/trump_es_criticada_pos_defende_rusia
====== Trump es criticada pos defende Rusia ======
17 julio 2018
Multe persones en la SUA ia reata criticante cuando presidente Donald Trump ia defende Rusia sur alegas de interfere en la vota esuan de 2016.
A un consenta con la presidente rusce Vladimir Putin en Finland, Trump ia contradise sua departes de securia, disente ce Rusia ia ave no razona per interfere.
La republiciste xef en la Congresa, Paul Ryan, ia dise ce Trump debe vide ce "Rusia no es nosa aliada". E Dan Coats, la dirijor de securia nasional de la SUA, ia alega ce Rusia es culpable de "atentas continuante e permeante" de sumina la democratia.
Putin ia nega la alega.
Ier, la du presidentes ia fa cuasi du oras de discutes sin sua conselores, en la capital finsce, Helsinki.
A un confere jornaliste a pos, on ia demanda a Trump esce el crede sua departes de securia o la presidente rusce a tema de la alegas de interfere en la vota. El ia responde: "Presidente Putin dise ce Rusia no ia fa lo. Me vide no razona perce lo ta fa lo."
Trump ia culpa ance governas pasada de sua pais, e no atas rusce, per la mal relata de la SUA con Rusia.
Plu tarda, el ia desfa sua pasos, tuitante ce el ave "fida grande a mea persones de securia".
En 2016, departes de securia esuan ia conclui ce Rusia ia inisia un atenta de influe la eleje contra Hillary Clinton, con un campania autorida de siberatacas e articles de novas falsa en redes sosial.
@T Trump es isolida a la confere G7
@L aora_oji/2018/trump_es_isolida_a_la_confere_g7
====== Trump es isolida a la confere G7 ======
9 junio 2018
Divides entre Donald Trump e otra xefes de nasiones industrida major ia es revelada en la dia prima de sua confere G7.
La presidente de la SUA ia fa un recomenda nonespetada ce on reentra Rusia a la grupo pos espulsa lo per sua propri de Crim. Ma Angela Merkel, canselor de Deutxland, ia dise ce tota membros de la Uni European presente a la confere en Canada oposa la idea.
En la sesion ier, desacordas ia continua sur la tarifas de comersia cual la governa de Trump ia institui resente. Un aida presidental franses ia es sitada en dise ce la SUA ia acorda comensa un discute tecnical sur estas con la UE en la du semanas veninte.
Canada ia descrive la tarifas como "nonlegal", e Donald Tusk, presidente de la Consilio European, ia averti ce la disposa de Trump sur comersia, cambia climal e Iran crea un peril vera.
Trump mesma parti temprana de esta confere de du dias, per vade ultima a Singapor per un encontra monumental con Kim Jong-un, xef de Corea Norde.
@T Trump promove carbon a la confere de clima
@L aora_oji/2018/trump_promove_carbon_a_la_confere_de_clima
====== Trump promove carbon a la confere de clima ======
10 desembre 2018
Representores de la Casa Blanca ariva oji a discutes climal en Polsca, ma los va promove la usa de carbon e otra combustables de fosil.
La consenta aveni con ce investores, ci maneja 32 milion milion dolares de ativas, urje la fini de la usa de carbon como fonte de enerjia. Entretempo, ministros de sirca 130 paises ariva per atenta dirije la discutes a un conclui susedosa.
Como a la asembla en Bonn en la anio pasada, la Casa Blanca de Trump desira mostra un suporta forte per combustables de fosil.
Longo un declara par la ministreria SUA de esternas, la aveni "va esibi metodos de usa combustables de fosil en modo tan limpa e nonperosa como possible, e ance la usa de enerjia nucleal sin emetes".
La aveni en Bonn ia es disturbada par protestores cantante ci ia vole indica ce la promove de carbon e gas no es bonvenida.
On dise ce la declara par investores global, publicida en Katowice, Polsca, es la interveni la plu major par investores a la tema de temperatures altinte. Lo representa alga de la reservas la plu grande de mundo.
La supravidor de la Reserva Comun de Jubila de la Stato York Nova, ci es encargada con un reserva pensional de 207 mil milion dolares, ia comenta: "An con la politicas malgidada de la governa de Trump, laboras global continua per trata la menasa multe real cual la risca climal presenta a la economia, mercatos finansial e revenus de investi. Nos resta dedicada a suporta la goles climal de la Acorda de Paris."
Un disputa major sur siensa ia eruta en la fini de semana e ia mali la relata entre alga delegadas en Polsca.
Negosiores de la SUA, Arabia Saudi, Rusia e Cuait ia refusa "bonveni" la reporta sur 1,5°C par la Comite Intergovernal sur Cambia de Clima, cual la majoria vasta de paises ia desira pone a la sentro de la negosias.
Esta disposa ia coleri rexercores e campaniores, ci ia descrive lo como "un nonsabe intendeda e un iniora nonasetable".
Un oservor ia comenta: "La mundo ia vide la lansa de la reporta par la CICC, e on ia comprende ce nos nesesa fa plu, ata plu rapida e plu forte e plu rapida aora. La reata no va es bon si nos fali bonveni acel siensa."
La ministros va atenta acorda la temas restante en la regulas per la Acorda de Paris. Ma on ave ance un senti ce los debe esede acel gol e ofre plu determina per ataca la problem.
@T Trump "sur un unicorno supra un arco de sielo"
@L aora_oji/2018/trump_sur_un_unicorno_supra_un_arco_de_sielo
====== Trump "sur un unicorno supra un arco de sielo" ======
13 julio 2018
Sean Spicer, portavose pasada per Donald Trump, ia descrive la presidente de la SUA como "sur un unicorno supra un arco de sielo" en sua libro nova.
La portavose prima de la Casa Blanca de Trump scrive lodante sur sua empleor pasada, ma el ance contradise sua judi de Paul Manafort, la xef pasada de campania.
"Me no crede ce nos va vide denova un aspiror como Donald Trump," Spicer scrive. "Sua ata de trapezior es tal ce poca persones va pote segue lo. El es sur un unicorno supra un arco de sielo. Sua capasia de pivote de un momento cual ta pare fini la carera asta un ataca furiosa contra sua oposores es un talento cual poca politicistes dispone."
La libro contradise comentas presedente par Spicer sur Manafort, ci ia resinia en agosto 2016 entre alegas ce el no ia declara paias orijinante en paises pasada soviet do el ia labora como un promovor political. El ia es prisonida en junio, acusada de lava de mone, froda de imposta, fali rejistra se como un ajente stranjer, e impedi de justia.
En un confere jornaliste a la Casa Blanca, Spicer ia dise ce Manafort ia "fa un rol multe limitada tra un cuantia multe limitada de tempo". En la libro, Spicer scrive ce Manafort "ia trae un maturia multe nesesada a la campania de Trump", ajuntante ce ante sua partisipa, "on ia ave no pare de un strutur de campania, ma sola alga persones ajitada e tro laborante ci ia abaia constante a sua telefones. Paul ia institui e ia ecipi la la operas political e comunical nesesada per combate la macina de [Hillary] Clinton."
Spicer scrive ance ce la Departe SUA de Securia Interna ia consenta con la campania en otobre 2016 per serti los "ce on ave no modo de infiltra o manipula la resulta de un eleje nasional." Ma securiores SUA ia conclui ce piratas rusce ia ataca servadores democrata de eposta e ia fa otra siberatacas per aida la campania de Trump.
"Parente crede ce Clinton va vinse, los ia suplica nos a espresa publica un sertia sur la solidia de la prosede, sistem e resulta de vota," Spicer scrive.
@T Turcia atenta evita un crise economial
@L aora_oji/2018/turcia_atenta_evita_un_crise_economial
====== Turcia atenta evita un crise economial ======
13 agosto 2018
La banco sentral de Turcia ia dise ce lo es preparada per usa "tota medias nesesada" per serti un stablia finansial pos la colasa de la lira. Lo ia promete furni "tota la licuidia cual la bancos nesesa".
Esta ia aveni pos cuando la lira turces ia ateni un punto basa recordo contra la dolar, en un disputa diplomata grandinte con la SUA.
La valuas en asionerias en Asia ia cade oji car investores ia deveni ansiosa sur la crise de mone en Turcia. A venerdi, la presidente esuan Donald Trump ia dise ce el ia aproba la dupli de tarifas a aser e aluminio turces.
Ante la anunsia de la medias nova, la indise Nikkei 225 de Japan ia cade par cuasi 2% en sua comersia tarda.
Espertas culpa temes ce Turcia desende a un crise economial per la diminui rapida en la valua de la lira. Tra la mundo, investores es consernada par la estende de la dana e esta ia provoca los a vende ativas plu riscosa, incluinte asiones asian e mones de mercatos emerjinte.
Analistes dise ce investores xerca aora un refuja en la ien e la dolar esuan.
@T Turcia culpa Arabia Saudi per la mata de Khashoggi
@L aora_oji/2018/turcia_culpa_arabia_saudi_per_la_mata_de_khashoggi
====== Turcia culpa Arabia Saudi per la mata de Khashoggi ======
3 novembre 2018
La presidente de Turcia, Recep Tayyip Erdoğan, a la ves prima ia acusa direta la governa saudi de mata la jornaliste Jamal Khashoggi. Ma asentuante la relatas amin entre Turcia e Arabia Saudi, el ia ajunta ce el no crede ce Re Salman ia es envolveda.
Khashoggi ia es omisideda a la consuleria saudi en Istanbul a 2 otobre.
Investigores turces crede ce la jornaliste, ci ia abita como un escluida, ia es strangulada cuando el ia visita per prende documentos per sua sposi veninte a un sitadan turces. On no ia trova sua corpo, e un aidor de Erdoğan ia dise ce el crede ce lo ia es disolveda en asida pos deveni taliada a pesos.
La omiside, inisial ascondeda par ofisiores saudi, ia causa un crise diplomata entre Arabia Saudi e sua aliadas. La saudis ia aresta 18 suspetadas, sur ci los dise ce los va es litigada en Arabia Saudi. Turcia vole estradi los.
Ofisiores saudi ia confesa ce Khashoggi ia mori a la consuleria, ma nega ce los sabe do sua corpo ia vade.
En la plu temprana de esta semana, un litigor major turces, Irfan Fidan, ia dise ce investigores crede ce la jornaliste ia es strangulada direta pos entra a la consuleria, en un omiside scemada. Fidan ia ajunta ce la corpo ia es desmembrida e destruida, "denova seguente scemas preparada".
@T Uber va consentra a bisicles
@L aora_oji/2018/uber_va_consentra_a_bisicles
====== Uber va consentra a bisicles ======
27 agosto 2018
La compania Uber dise ce lo intende consentra plu a bisicles e patinetas eletrical, e min a autos, an si esta risca redui sua profita.
La xef, Dara Khosrowshahi, ia dise ce modos de transporta individua conveni plu a viajas en sites. El previde ance ce persones va fa viajas plu frecuente ma plu corta en la futur.
La compania de taxis compartida ia investi a companias diversa de bisicle en la anio pasada. Sua bisicles eletrical es aora disponable en oto sites en la SUA, incluinte York Nova e Washington, e va es lansada a mercato en Berlin pos tempo corta.
Lo ia junta se ance con Lime, un compania de patinetas eletrical, e ia negosia acordas en otra mercatos como la transporta publica e la move de carga.
Khosrowshahi ia confesa ce Uber reseta min mone de un bisicli ca de la mesma viaja par auto, ma ia sujesta ce la difere va es reduida car clientes va usa plu comun la ap per viajas plu corta. El ia aseta ce la taxistes de Uber risca perde par la projeta, ma ia dise ce los va pote benefica futur de viajas plu longa par auto.
Uber, cual ia perde mesma $4,5 mil milion en la anio pasada, senti un presa per boni sua finansia ante ofre sua asiones per compra. La revenu de sua taxis crese, ma lo ia perde ance multe par causa de la custa de estende a mercatos nova, como la comparti de bisicles e ia trae de comedas.
Ance un presa par regulores menasa la crese de la compania. En esta mense, per trata la conjesta, York Nova ia vota per pone un limita tempora a la cuantia de lisensas nova per veculos funsionante como taxis, e la maior de London ia dise ce el vole ajunta restrinjes simil.
@T Un acorda pos 27 anios de disputa un nom
@L aora_oji/2018/un_acorda_pos_27_anios_de_disputa_un_nom
====== Un acorda pos 27 anios de disputa un nom ======
13 junio 2018
Elas ia fa un acorda sur la nom de sua visina norde, nomida Macedonia pos la desintegra de Iugoslavia. Pos 27 anios de discute, e multe protestas, on ia acorda la nom Republica de Macedonia Norde.
Elas ia oposa la nom Macedonia, temente reclamas teritorial contra sua propre rejion norde con acel mesma nom. Lo ia rejeta la proposa ce sua visina junta se a OTAN e la Uni European.
Aora, la nom nova debe es aprobada par la popla macedonsce e la parlamento elinica.
Su la acorda, la pais conoseda a la Nasiones Unida como Former Yugoslav Republic of Macedonia ("Republica Iugoslavian Pasada de Macedonia") va es nomida Republic of North Macedonia, o Republika Severna Makedonija en sua propre lingua. Acel lingua va es nomida "macedonsce", como sua popla.
On ia acorda ce la nom nova va es usada e internasional e biladal, tal ce an la 140 o plu paises cual reconose la nom Macedonia va debe ance adota "(Republica de) Macedonia Norde". On ia acorda ance ce e la nom engles e la nom slavica pote es usada.
Plu temprana, la du lados ia rejeta alga otra posibles, incluinte Gorna Makedonija (Macedonia Alta), Nova Makedonija (Macedonia Nova) e Macedonia de Ilinden.
La nom Macedonia parteni ja a un rejion norde de Elas cual inclui Thessaloniki, la site du de la pais. Par adota la mesma identia en 1991, la nasion slavica nova ia coleri multe elinicas, ci ia suspeta aspiras teritorial de sua visina.
La macedonsces nova no ia boni la situa cuando los ia dona la nom de Alexandro la Grande a la airoporto xef en sua capital, Skopje, e a un autovia major cual vade de la frontera serbsce asta la elinica. En la sentenio 4 AEC, la Macedonia de Alexandro e sua padre Filipo 2 ia rena la intera de Elas e multe tera a ultra.
@T Un airoporto brites es disturbada par avionetas
@L aora_oji/2018/un_airoporto_brites_es_disturbada_par_avionetas
====== Un airoporto brites es disturbada par avionetas ======
22 desembre 2018
En Britan, on ia aresta un om e un fem en relata a un serie de avionetas cual ia para la funsiona de la Airoporto Gatwick en London. La du ia es arestada en acel rejion a sirca 22:00 ier.
Per plu ca un dia, aviones ia es proibida de vola, car on ia oserva avionetas en la sielo prosima a la atereria.
La polisia ia dise ce los continua sua investiga sur "la usa criminal de avionetas". Los demanda per informas de la popla.
La airoporto ia declara ce sua atereria va es oji abrida, ma ia recomenda ce pasajores regarda la state de sua vola ante viaja.
Polisiores resta a la airoporto, preparada per "deteta e lejeri" cualce plu volas de avioneta, par stratejias diversa. On ia solisita ce pasajores e abitores local resta vijilante e reporta sua suspetas.
Gatwick ia reabri a la matina ier pos disturbas a desuples de volas cual ia afeta plu ca 100 mil viajores.
La atereria ia es denova cluida per un tempo corta pos un plu oserva confirmada a 17:10. Un portavose ia dise ce la reabri es secur car on ia institui metodos militar sirca la campo de vola.
Des-un aviones arivante ia es diverjeda a otra airoportos en la clui la plu resente. Aviones partinte va esperia un retarda cumulada, ma zero de los es canselada, a la min longo la declara ofisial.
@T Un anunsia de locas nova de erita mundal
@L aora_oji/2018/un_anunsia_de_locas_nova_de_erita_mundal
====== Un anunsia de locas nova de erita mundal ======
1 julio 2018
UNESCO, la organiza cultural de la Nasiones Unida, ia consenta en Barain per acorda alga locas monumentin tra la mundo cual on debe conserva per sua importa cultural, istorial o siensal. Esta locas va es legal protejeda su tratas internasional. Los inclui la seguentes:
--- En la este de Oman, la site muronida Qalhat ia es un porto major en la sentenios 11 e 15. UNESCO descrive lo como "un atesta arceolojial unica" de la relatas entre la este de Arabia e la resta de la mundo.
--- La isola Kyushu en Japan conteni un loca cristian de des viletas, un castel e un catedral, construida en la sentenios 18 e 19, cuando cristianisme ia es proibida en la pais. Esta loca refleta la ativia la plu temprana de misionores e colonistes cristian en Japan.
--- Pos deveni un sentro de comersia global en la tarda de la sentenio 19, Mumbai ia inisia un projeta major de arciteta, creante construidas bela per abita e labora. Los en la stilo gotica victorian ave un aspeta clasica con balcones e verandas, e los de arte deco es sinemas, apartes e ospitales en multe colores.
--- Al-Ahsa, en la este de la Penisola Arabi, es la oasis la plu grande de mundo. Umanas abita lo ja de la eda neolitica asta oji. Lo conteni ance jardines, canales, fontes, posos, un lago de drena, construidas istorial, locas arceolojial e 2,5 milion datilos. UNESCO descrive lo como "un esemplo esetal de interata umana con la ambiente".
--- La moncerias montanial Sansa en la sude de Tehan opera como sentros relijial de la sentenio 7. On ave sete templos conteninte patios abrida con salas de educa, paviliones e salones ornosa budiste.
--- A oto locas arceolojial en Fars, un provinse irani, un misca de strutures fortida, palasios e planas de sites survive de la eda de la Impero Sasanan, de la sentenios 3 asta 5. Longo UNESCO, esta locas refleta no sola "la usa masimida de topografia natural", ma ance la influe de arte roman e la tradisiones de la cultures acemenan e partian.
--- Thimlich Ohinga en Cenia es la abiteria con mures de petra seca la plu bon conservada. Lo es situada a norde-ueste de la vila Migori, e es tipal de la rejion de Lago Victoria. On crede ce lo ia es construida en la sentenio 16, parente como un fortres per comunias pastoral e sua bestias.
@T Un aparato radioativa manca en Malaisia
@L aora_oji/2018/un_aparato_radioativa_manca_en_malaisia
====== Un aparato radioativa manca en Malaisia ======
21 agosto 2018
En Malaisia, on xerca un aparato radioativa cual ia desapare de un camioneta en la parte plu temprana de esta mense. On dise ce la sustantia en la aparato radiografial ta sperde un contamina perilosa si on ta desasembla lo en modo nonconveninte.
On teme ance ce persones malvolente ta pote usa lo como un composante de bomba si los ta oteni lo.
La ojeto mancante es usada en radiografia industrial. Lo ia parteni a un organiza cual fa probas, ajustas e esaminas per companias de petrolio e gas.
La tubo grande, con manico, cual pesa 23 cilogrames, ia es usada per deteta fesures en metal. Lo conteni la isotopo radioativa iridio-192, cual pote causa feris permanente si on manipula lo per an alga minutos, e pote mata si on es prosima a lo tra oras o dias.
Un problem simil ia aveni en la anio pasada, e on ave no informa ance sur la loca de acel aparato.
La aparato ia es portada en retro de un camioneta en la capital malaisian, Kuala Lumpur. On ia usa lo a un loca a la borda de la site, ante move lo a un otra loca. Cuando los ia ariva, la gidores de la camioneta ia descovre ce la aparato manca. On ia interoga la du omes ante relibri los.
On divina ce algun ia fura la aparato o ce lo ia cade de sur la camioneta movente. La polisia ia inisia un investiga. La governa ia confirma la aveni ma insiste ce "tota es en controla".
@T Un arcibispo culpable de asconde maltrata de enfantes
@L aora_oji/2018/un_arcibispo_culpable_de_asconde_maltrata_de_enfantes
====== Un arcibispo culpable de asconde maltrata de enfantes ======
22 maio 2018
Un corte australian ia judi ce un arcibispo catolica es culpable de asconde la maltrata sesal de enfantes en la desenio de 1970.
Philip Wilson, arcibispo de Adelaide, deveni la catolica la plu major de mundo ci on ia acusa e condena per esta crimin.
On ia trova ce el ia asconde la maltrata de xicos de misa par un prete pedofilica en New South Wales. En sua litiga, el ia nega ce alga de la vitimes ia informa el sur la maltrata.
En un declara publicida par la Eglesa, Wilson ia dise ce el es "evidente deludeda" par la judi e va esplora sua posibles legal.
En la mense pasada, el ia dise a la corte ce el ia sabe no cosa sur la atas de prete James Fletcher, cual ia aveni cuando el ia es un prete aidante en Maitland, a 130 cilometres a norde de Sydney.
A pos, Fletcher ia es condenada sur nove acusas de maltrata sesal de enfantes en 2004. El ia mori en prison en 2006.
Un de sua vitimes, Peter Creigh, ci ia es un xico de misa, ia informa la corte ce el ia descrive la detalias de la maltrata a Wilson en 1976, a sinco anios pos cuando lo ia aveni.
La judor Robert Stone ia rejeta la reclama de Wilson ce el no recorda la conversa, e ia dise ce el crede ce Creigh es un atestor fidable. La prete ia sabe ce "lo cual el oia es un alega credable, e la acusada ia vole proteje la Eglesa e la reputa de lo," Stone ia dise.
Un plu vitim, nonomable, ia informa la corte ce el ia revela la maltrata en la confeseria cuando el ia ave 11 anios. El ia dise ce Wilson ia responde ce el menti, puninte el par comanda a resita la prea "Ave Maria" a des veses.
Pos la deside, survivores de la maltrata ia loda la judi en un sena emosiosa estra la corte. Creigh ia comenta: "Esperable la deside va desmarania la ipocritia, la engana, e la maltrata de potia e fida cual la Eglesa ia mostra."
La avocatos de Wilson ia atenta fa ce on refusa la caso a cuatro veses, pos la diagnose ce la prete de 67 anios ave la maladia de Alzheimer. El risca un prisoni de masima du anios. On va anunsia sua condena en junio.
@T Un aspiror controversa per la presidentia de Brasil
@L aora_oji/2018/un_aspiror_controversa_per_la_presidentia_de_brasil
====== Un aspiror controversa per la presidentia de Brasil ======
23 julio 2018
Un politiciste controversa de la destra estrema, Jair Bolsonaro, ia declara formal ce el aspira la presidentia de Brasil en la eleje a esta otobre.
En sondas, esta ofisior militar pasada ocupa aora la loca du, pos la presidente pasada Luiz Inácio Lula da Silva. Ma Lula es en prison per froda e lo es nonprobable ce el va partisipa.
Bolsonaro ia coleri multe persones en Brasil con sua comentas raziste e omofobica. Ma sua suportores regarda el como un salvor en un pais criminosa. An tal, sondas sujesta ce el ta fali vinse an si el ta trova se en un desegali.
Bolsonaro, ci ave 63 anios, ia anunsia se como aspiror ante sirca 3000 suportores aclamante a un asembla en Rio de Janeiro.
La congresor ia dise ce el va es representada par la Partito Sosial Libraliste, cual on no regarda como forte en la politica brasilera. Per esta razona, el va ave sola des secondos de tempo per la anunsias televisada de sua campania: un nonvantaje major en la compete presidental.
El ia dise: "Nos no ave un partito grande. Nos no ave finansia elejal. Nos no ave tempo televisada. Ma nos ave lo cual la otras no ave, cual es vos, la popla brasilera."
Bolsonaro es segueda par miliones de brasileras en redes sosial, e multe persones descrive el como "la Trump de Brasil". El recomenda laxi la leges sur fusiles per maneja la crimin, e es ance suportada par miliones de cristianes evanjelial per sua disposa noncomprometente contra la aborta.
@T Un aspiror presidental es cotelida en Brasil
@L aora_oji/2018/un_aspiror_presidental_es_cotelida_en_brasil
====== Un aspiror presidental es cotelida en Brasil ======
7 setembre 2018
Un competor favoreda en la eleje presidental de Brasil, Jair Bolsonaro, ia es cotelida en un asembla campaniante. La politiciste estrema destriste ia es atacada entre un fola en Minas Gerais, un stato sude-este.
El ia reseta sirurjia per feris a sua intestines e on previde ce el va recovre.
Esta politiciste controversa, ci ia scandali multe en Brasil par sua comentas raziste e omofobica, ia presenta forte en sondas resente. Si la sondas es coreta, el va gania la plu votas en la eleje en otobre si la presidente pasada Lula da Silva va fali en sua atenta de reversa un proibi ce el mesma reaspira la posto.
Videos de la aveni en la site de Juiz de Fora mostra Bolsonaro tenida en la aira par sua suportores e levante sua diton, cuando algun feri el con lo cual pare es un cotel. El convulsa en dole, e sua suportores basi rapida el a la tera per pone el en un auto.
Pos la ataca, sua fio Flavio ia tuita inisial ce la feri es "sola surfasal", ma el ia dona un evalua plu sombre pos du oras, disente ce Bolsonaro ia ariva "cuasi mor" a la ospital.
Ofisiores de la ospital ia clari plu tarda ce Bolsonaro ia sufri un coteli profonda e perilinte en sua intestines e es aora en un state "grave ma stable". El va spende a la min un semana en ospital.
La polisia ia dise ce los ia aresta un suspetada nomida Adelio Obispo de Oliveira, ci ave 40 anios. On reporta ce el ia pare mental disturbada. Suportores coler de Bolsonaro ia puxa e bate el ante sua aresta.
Tota la competores de Bolsonaro ia condena la coteli. Presidente Michel Temer ia dise ce un tal ataca es "nontolerable" en un stato democrata e ce el espera ce Bolsonaro va recovre rapida. "La tolera es un parte de democratia," el ia dise. "Lo es un parte de la rena de lege."
@T Un atacor coteli pasores en Paris
@L aora_oji/2018/un_atacor_coteli_pasores_en_paris
====== Un atacor coteli pasores en Paris ======
13 maio 2018
Un ataca matante de cotel ia aveni en la sentro de Paris a la sera de ier. La suspetada ia nase en 1997 en la republica rusce Txetxnia.
La atacor ia mata un om de 29 anios e ia feri cuatro otras en la distrito de la Plaza de l'Opera ante cuando la polisia ia mata el par fusil. La organiza Daex ia dise a pos ce un de sua "soldatos" ia fa la ataca. On interoga la jenitores de la suspetada.
Emmanuel Macron, la presidente de Frans, ia tuita: "Frans ia paia denova con sangue, ma no va sede par un diton a la enemis de libria." La maior de Paris, Anne Hidalgo, ia tuita: "A esta sera, nosa site ia es contusada."
La atacor ia comensa coteli pasores a sirca 21:00 de ora local. Atestores descrive el como un om joven con capeles brun e un barba, portante un pantalon negra de sporte. El ia atenta entra a alga bares e restorantes ma ia es forsada a via par persones a la interna.
Polisiores ia ariva pos sinco minutos. Prima, los ia atenta para la atacor par pistol eletrical, ma ultima los ia mata el, ante nove minutos pos la comensa de la ataca. Du de la persones ferida es en state grave, ma sua vives no es menasada.
La unia antiteroriste de la departe litigal franses ia inisia un investiga.
Frans ia es ja vijilosa pos un serie de atacas. Plu ca 230 persones ia es matada par djihadistes inspirada par Daex en la tre anios pasada. La violentia la plu matante ia aveni a 13 novembre 2015, cuando fusilores e bombas umana ia ataca locas publica diversa en Paris a cuasi la mesma momento, e ia mata 130 persones.
Pos gania la eleje de la anio pasada, Macron ia promete ce la combate de terorisme islamiste va es sua conserna xef de politica esterna. El ia dise ce la vinse de Daex en Irac e Suria debe acompania medias antiteroriste en Africa.
@T Un ativiste ucrainsce mori pos un ataca de asida
@L aora_oji/2018/un_ativiste_ucrainsce_mori_pos_un_ataca_de_asida
====== Un ativiste ucrainsce mori pos un ataca de asida ======
5 novembre 2018
Un ativiste major ucrainsce contra la froda ia mori a tre menses pos deveni ferida en un ataca de asida.
Kateryna Handzyuk, ci ia ave 33 anios, ia sufri ardedas a 40% de sua corpo e danas grave a sua oios par resulta de la ataca a 31 julio en la site sude Kherson. Handzyuk ia esperia 11 operas sirurjial en la capital Ciiv.
El ia es ance un membro de la comite de la site, e ia campania contra la separadisme suportada par Rusia.
Ier, presidente Petro Poroshenko ia urje ce on puni la matores. Sinco suspetadas es ja arestada.
La causa esata de la mori de Handzyuk no ia es direta sabeda, ma reportas par jornalistes local ia sujesta ce lo ia aveni par un coagula de sangue.
En setembre, la ativiste ia posta un video en cual el ia urje ucrainsces a batalia la froda nonfrenida. "Me sabe ce aora me aspeta mal. Ma a la min on trata me. E me sabe serta ce me aspeta multe plu bon ca la justia en Ucraina, car nun trata acel."
Sua mori ier ia relasa un avalanxa de reatas en redes sosial ucrainsce, en cual multe usores ia espresa sua xoca.
@T Un avion cade en Kathmandu
@L aora_oji/2018/un_avion_cade_en_kathmandu
====== Un avion cade en Kathmandu ======
13 marto 2018
Un avion portante 71 pasajores e ecipores ia cade en atera a la airoporto Tribhuvan en Kathmandu en Nepal, matante 49 persones. Pos estingui la focon, salvores ia tira corpos de la ruina negrida de la avion, cual ia es operada par la airocompania US-Bangla.
La compania culpa la controla de trafica airal, ma la airoporto dise ce la avion ia prosimi de dirije erante. La vola BS211 ia verje de sur la atereria en la posmedia ier.
Un rejistra de la conversa entre la pilote e la controlores de trafica a poca minutos ante la cade sujesta un malcomprende sur cual fini de la atereria ia es preparada per esta avion. On oia un controlor ci dise: "Me repete, turna!"
La avion, volante de Dhaka, la capital de Bangladex, ia ave 17 anios. Atestores ia descrive un pum grande e un secute violente de la veculo. Pasajores ia plora e ia repete frases en grupo. Dudes-du persones ia survive, e es aora en ospital: 11 nepalis e 11 banglas.
Esta es la desastre avional la plu mal en Nepal de anios. La nasion himalaian ave un istoria miscada en esta relata, con plu ca 70 cades envolvente aviones e elicotores pos 1949, cuando la avion prima ia atera ala. On ia atribui la plu de la asidentes a mal clima, pilotes nonesperiosa e manteni nonsufisinte.
@T Un avion cade en un lagon en Micronesia
@L aora_oji/2018/un_avion_cade_en_un_lagon_en_micronesia
====== Un avion cade en un lagon en Micronesia ======
28 setembre 2018
Un avion de pasajores ia cade en un lagon prosima a la Airoporto Internasional Chuuk en Micronesia. Lo ia suprapasa la atereria.
Imajes sirculinte mostra la avion de Air Niugini, de Papua Gine Nova, cual reposa en acua nonprofonda a lado de la costa. No feris grave ia es sufrida par cualce de la 35 pasajores e 12 ecipores en la vola ANG73.
La manejor de la airoporto ia dise: "La avion ia cade en la lagon, a sirca 150 metres de la atereria. A esta momento nos no sabe vera como lo ia aveni. On va comensa investiga a la plu temprana de doman, ma operas comensa denova como usual en la airporto."
El ia ajunta ce tota la persones en la avion Boeing 737-800 ia es transportada a ospital per es esaminada. El ia crede ce alga ia sufri "feris minor".
La avion ia vola de la isola Pohnpei en Micronesia a Port Moresby, la capital de Papua Gine Nova, parante a la isola Weno en via.
@T Un avion de la Gera Mundal Du cade en Suiz
@L aora_oji/2018/un_avion_de_la_gera_mundal_du_cade_en_suiz
====== Un avion de la Gera Mundal Du cade en Suiz ======
6 agosto 2018
Dudes persones ia mori cuando un avion vea de la Gera Mundal Du ia cade sur un monte en la este de Suiz.
La avion ia porta 17 pasajores e tre ecipores en un vola turiste cuando lo ia enaira a la posmedia de saturdi.
JU-Air, la compania operante, ia espresa sua tristia sur la aveni e ia institui un numero de telefon per aida relatadas. Lo ia suspende tota volas per la tempo presente.
La pasajores ia es reveninte a Zürich pos un viaja de du dias en Locarno, prosima a la frontera sude de Suiz.
La avion no ia ave un caxa negra, e on ia pote poca monitori lo par radar par causa de sua loca distante alpan. On sabe ce lo ia colpa cuasi vertical la tera, a rapidia relativa alta. On ia elimina ja la posible de un colide con un otra avion o ostaculo.
Un person ci ia es sur la monte a la tempo de la cade ia dise ce la avion ia turna tra 180° a la sude, e ia cade a la tera como un petra.
De la dudes persones volante, des-un ia es omes e nove ia es femes. Los ia ave entre 42 e 84 anios. Des-sete ia es de Suiz e tre ia es osteraices.
La avion ia cade a sirca 2540 metres supra la nivel de mar, a la lado ueste de un monte de 3000 metres, nomida Piz Segnas.
JU-Air organiza turis de atraes en sua scuadron de aviones vea deutx. La turis enaira de la campo avional militar a Dübendorf, prosima a Zürich. La avion cual ia cade ia es mantenal esaminada en julio.
En un plu cade a saturdi, un familia de cuatro persones, incluinte du enfantes joven, ia es matada cuando un avion peti ia cade en Suiz sentral.
@T Un avion indonesian cade en la Mar Djava
@L aora_oji/2018/un_avion_indonesian_cade_en_la_mar_djava
====== Un avion indonesian cade en la Mar Djava ======
30 otobre 2018
En Indonesia, on usa avionetas e sonar per xerca un avion de pasajores cual ia cade en la mar ier. La vola JT 610 de Lion Air ia cade pos enaira de Jakarta, portante 189 pasajores e ecipores.
On ave no indica de survivores, ma detrito de la avion e posesedas personal ia es colieda de la acua.
Lo no es clar perce la avion ia cade a sola 13 minutos pos sua enaira. La pilote de la Boeing 737 ia demanda per reveni a la airoporto Soekarno-Hatta, corta ante perde contata con la controlores de trafica airal.
La avion ia encontra ja problemes en vola de Bali a Jakarta a la dia presedente. Sua jornal tecnical ia descrive un strumento como "nonfidable", tal ce la pilote ia pasa la controla a la ofisior prima.
La dirijor xef de Lion Air ia dise oji ce la avion ia es alora reparada ante enaira denova.
JT 610 ia es viajante en dirije a la site Pangkal Pinang en la ueste de Indonesia cuando la avion ia aselera subita e ia perde altia, cadente en la Mar Djava, a norde-este de Jakarta.
Indonesia, un arcipelago vasta, depende forte de aviones, ma multe de sua airocompanias ave un mal istoria de securia. Los ia ave problemes de securia e malmaneja en la pasada e Lion Air ia es proibida de entra a la airospasio european asta 2016.
@T Un avocato defendente ia es un informor de polisia
@L aora_oji/2018/un_avocato_defendente_ia_es_un_informor_de_polisia
====== Un avocato defendente ia es un informor de polisia ======
4 desembre 2018
La condenas de alga de la criminores major de Australia es aora dutada pos la desmasci de un avocato como un informor de polisia.
La avocato defendente, ci ia representa figures malfamosa de crimin organizada, ia dona informas a la polisia de Victoria entre 2005 e 2009. La governa de la stato ia anunsia un investiga publica per determina cuanto condenas ia es direta afetada.
La caso ia es revelada cuando restrinjes judal ia es sutraeda ier. Esta ia es la fini de un batalia de corte en cual, tra du anios, la polisia ia atenta preveni la esposa de la identia de la avocato a sua clientes. La Corte Alta ia deside contra la polisia.
En un judi despetosa, la corte ia dise ce la polisia de Victoria ia es culpable de "un condui odiable" par coraji la avocato a furni informas sur sua clientes.
La avocato, un fem ci on no pote nomi per razonas legal, ia representa figures major en la criminalia de Melbourne en un periodo de violentia aumentada de ganges. Un disputa violente cual ia prende a la min 28 vives en la site ia fini a plu ca un desenio ante aora, ma detetores dise ce un tensa resta ancora.
A cada dia, la avocato ia contata la polisia e ia reseta la nom sifral 3838.
Documentos mostra ce la polisia ia atenta preveni acusores de avisa la omes condenada sur la rol de sua propre avocato como un informor. Ma par causa de la deside par la Corte Alta de sutrae restrinjes sur la caso, criminores va reseta aora un letera sur la situa. Los va pote alora apela, e sua condenas va es cisa reduida o an canselada.
La xef de la polisia de Victoria ia defende ier la usa de la avocato como informor: "Melbourne ia es saisida par lo cual on conose aora como la geras de gang. La risca per la comunia a esta tempo ia es notable."
El ia ajunta ce, en 2009, la polisia ia cambia sua modo de trata informores, e un aveni simil no ta es posible aora.
@T Un balena mori pos come 80 sacos plastica
@L aora_oji/2018/un_balena_mori_pos_come_80_sacos_plastica
====== Un balena mori pos come 80 sacos plastica ======
3 junio 2018
Un balena ia mori a costa de Tai sude pos engoli otodes sacos plastica. Lo ia vomita sinco sacos en cuando conservores ia atenta futil salva lo en un canal en la provinse Songkhla.
La sacos, con pesa de sirca 8 kg, ia preveni la balena de come.
Un reporta resente ia averti ce la cuantia de plastica en la mar risca trupli en des anios, si on no restrinje la contamina.
Tai es un usor major de sacos plastica, e en la mense pasada, sua governa ia anunsia ce lo considera imposta los. On crede ce los mata ala sentos de animales maral en cada anio.
La balena peti mas de jenero Globicephala (balena pilote) ia es descovreda en la canal Na Thap a lundi. Lo ia es malada e noncapas de nada.
Ambientistes ia usa barcos per atenta aida flota la balena, e ia erije un parasol per lo. Los ia cura la balena tra la semana, ma lo ia mori a la posmedia de venerdi.
Thon Thamrongnawasawat, biolojiste maral, ia comenta ce, par causa de la sacos, la balena no ia pote come sustantias nural: "Si on ave otodes sacos plastica en sua stomaco, on mori."
@T Un barcon abandonada encalia en Miama
@L aora_oji/2018/un_barcon_abandonada_encalia_en_miama
====== Un barcon abandonada encalia en Miama ======
1 setembre 2018
En Miama, la polisia esplora un portacontenador misteriosa e osidinte per informas, pos cuando pexores ia vide ce lo vaga prosima a la rejion Yangon.
La barcon, portante la nom "Sam Ratulangi PB 1600", ia es descovreda en la plu temprana de esta semana, flotante prosima a la costa de la capital comersial de la pais. Lo ia conteni no marores e no benes.
Autoriosas e empleadas de la marina ia entra a la barcon a jovedi per investiga. En un declara en Facebook, la polisia de Yangon ia dise ce la barcon es "encaliada sur la plaia" e ce lo "porta un bandera indonesian".
Aung Kyaw Linn, la secretor jeneral de la Federa Nondependente de Marores Miama, ia dise ce la barcon es ancora en state funsionable, e ce el suspeta ce on ia abandona sola resente la barcon. El ia ajunta: "Un razona debe esiste."
La barcon ia es construida en 2001. Sua longia es plu ca 177 metres, longo la pajeria de Trafica Maral, cual rejistra la moves de barcones tra la mundo.
La rejistra la plu resente de esta barcon ia es a lado de la costa de Taiuan en 2009. Esta es la esemplo prima reportada de la apare de un barcon abandonada en la acuas de Miama.
@T Un bebe nase pos transplanta de utero mor
@L aora_oji/2018/un_bebe_nase_pos_transplanta_de_utero_mor
====== Un bebe nase pos transplanta de utero mor ======
5 desembre 2018
Dotores ia revela ce un xica bebe ia nase par un utero transplantada de un corpo mor.
La opera de transplanta ia ocupa 10 oras e ia aveni en 2016 en São Paulo, Brasil, do on ia fa ance la aida de fertilia. La madre, ci ave 32 anios, ia nase sin utero.
On ia fa 39 transplantas de utero usante un donor vivente, incluinte madres ci dona sua utero a sua fia, produinte 11 bebes. Ma tota la 10 transplantas presedente de un donor mor ia fali o aborta.
En esta caso, la donor ia es un madre de tre enfantes a media de sua desenio sinco, ci ia mori par emoraje serebral.
La resetor ia ave un sindrom cual afeta sirca un fem en cada grupo de 4500 e preveni la formi normal de la vajina e utero. Ma sua ovarios ia funsiona, e dotores ia pote estrae ovos, fertili los con la spermas de la padre futur, e jela los.
La fem ia prende drogas per debili sua sistem imunial e preveni ce sua corpo ataca e rejeta la transplanta.
Pos sirca ses semanas, el ia comensa menstrui. Pos sete menses, la ovos fertilida ia es implantada. E pos un ensintia normal, un bebe de 2,5 cilogrames ia es parida par sesarea a 15 desembre 2017.
La xef de la rexerca, Dr Dani Ejzenberg de Hospital das Clínicas en São Paolo, ia dise: "La transplantas prima de utero de donores vivente ia es un monumento en medica, creante la posiblia de pari per multe femes nonfertil ci pote asede donores conveninte e la recursos medical nesesada. An tal, la nesesa de un donor vivente es un constrinje major, car donores es rara: tipal, los es familianes o amis volente e cualinte."
@T Un cabana motorida atenta la recordo de rapidia
@L aora_oji/2018/un_cabana_motorida_atenta_la_recordo_de_rapidia
====== Un cabana motorida atenta la recordo de rapidia ======
12 maio 2018
Sur un plaia en Cimri a esta fini de semana, on va atenta crea recordos mundal nova de rapidia -- usante un cabana multe aumentada e un motosicle.
La veculo prima va atenta rompe sua propre recordo -- 129 km/h -- per la cabana la plu rapida viajante. E sur sua motosicle supracargada, Zef Eisenberg va atenta crea un recordo nova de rapidia sur arena.
Kevin Nicks, proprior de la cabana, ci ave 53 anios e labora como jardinor, ia dise ce lo es la sola cabana motorida en la mundo cual es legal usable sur vias publica. El ia spende miles de paundes en crea sua cabana movente, cual conteni aora un motor de 400 cavalos frenal, plu potiosa ca multe autos de sporte.
El ia ave prima la idea de crea un cabana sur rotas en 2015 cuando sua Volkswagen Passat vea ia reposa rompeda ante sua casa. Alora el ia pensa: "Ta ce nos vide esce me pote fa pico diferente."
La padre ia spende inisial £5000 e des-du menses en aumenta sua cabana, cual el mesma ia construi, per pote prende sua fia a scola e visita la botecas. A pos, el ia demanda a se sur la rapidia masima. En concursos el ia susede rompe la recordo Guinness. Ma la cabana ia desintegra, nesesante reparas major.
Aora, pos du anios e 30 000 cilometres de viaja, Nicks ia usa plu £8000 per renovi la cabana con un motor RS4 de Audi, cual el ia ajusta multe. El ia comenta: "Me ia spende tota la inverno en boni lo e ajunta un motor e suspende nova. Lo inisia tan rapida. Ma nun sabe a cuanto rapidia lo va vade."
El va comensa sua atenta de recordo oji a Pendine, un plaia cual ia deveni asosiada con rapidia teral cuando Sir Malcolm Campbell ia rompe ala la recordo en la desenio de 1920. Ance sur la plaia on va trova multe supracaros, autos de tre rotas, e motosicles de potia alta, con sua gidores ci espera rompe recordos.
"Arenas Pendine es un corseria malfamosa difisil," Eisenberg ia dise. "Concursores ave no idea sur la natur de la surfas asta la esflue de la marea. Car Pendine es un loca ofisial de proba de artileria, on encontra comun armas nonesplodeda a lado de medusas jigante encaliada."
Eisenberg, ci veni de Gernsi, ia mori cuasi pos rompe la recordo teral per un turbosicle a 18 menses ante aora, cuando el ia colide a 370 km/h e ia es en ospital tra tre menses.
"Nun en istoria, con auto o motosicle, ia esede 200 milias per ora (322 km/h) sur la arena a Pendine," el ia ajunta. Lo es la calix santa de rapidia, do la corsores la plu rapida de mundo ia fa la atenta."
@T Un cade de elicotor en Mexico mata un governor
@L aora_oji/2018/un_cade_de_elicotor_en_mexico_mata_un_governor
====== Un cade de elicotor en Mexico mata un governor ======
26 desembre 2018
Un governor mexican ci ia es inaugurada en la plu temprana de esta mense, e sua sposo ci ia es un senator, ia mori en un cade de elicotor en Puebla, un stato en la sentro de la pais.
La veculo portante Martha Erika Alonso e Rafael Moreno Valle ia cade corta pos sua enaira.
La du pilotes ia es matada. On reporta ce un pasajor tre ia mori ance.
Ofisiores dise ce la elicotor ia sufri cisa un fali nonspesifada. On ia inisia un investiga.
Alonso ia ave 45 anios. El ia es inaugurada a 14 desembre como la governor fema prima de la stato, pos un eleje difisil ganiada.
Moreno ia servi como governor de la stato Puebla entre 2011 e 2017. El ia ave 50 anios
@T Un campania per jornalisme libre
@L aora_oji/2018/un_campania_per_jornalisme_libre
====== Un campania per jornalisme libre ======
16 agosto 2018
Plu ca 300 organizas jornaliste en la SUA va inisia oji un campania de jornalisme libre per oposa atacas par presidente Donald Trump.
En la semana pasada, la jornal Boston Globe ia recomenda un denunsia nasional de la "gera susia" par la presidente contra jornalisme, usante la eticeta #EnemyOfNone ("enemi de nun").
Trump ia burla reportas jornaliste como "novas falsa" e ia ataca jornalistes como "enemis de la popla". Espertas en la SUA ia dise ce esta aumenta la risca de violentia contra jornalistes.
Boston Globe ia promete scrive un editorial "sur la periles de la ataca governal a jornalisme" a 16 agosto, e ia solisita ce otra jornales fa simil. Jornales nasional major e locales plu peti ia promete reata, como ance publicis internasional como la jornal Guardian, con base en London.
Acel jornal brites scrive en sua editorial ce Trump es la presidente prima "ci pare ave un politica calculada e coerente de sumina, deslegali e an perili la labora de jornalistes."
Su la titulo "La jornalisme libre nesesa tu", New York Times ia descrive la atacas par Trump como "perilosa per la sangue animante de democratia," e ia ajunta estraedas de desuples de otra publicis a su.
En sua propre editorial, su la titulo "Jornalistes no es la enemi", Boston Globe ia dise ce jornalisme libre ia es un prinsipe esensal de la SUA tra plu ca 200 anios. "Oji lo es su menasa grave," lo ia continua, razonante ce un tal trata de jornalisme par la presidente american "envia un sinial alarmante a despotas" tra la mundo.
La campania de oji segue un serie de avenis e comentas par Trump cual ia alti la presa contra jornalistes.
An si la fia de Trump, Ivanka, ia distanti se de esta atacas par sua padre, Sarah Saunders, la Portavose de la Casa Blanca, ia refusa dise ce jornalisme no es un enemi de la popla.
@T Un can detetante manca en Dar es Salaam
@L aora_oji/2018/un_can_detetante_manca_en_dar_es_salaam
====== Un can detetante manca en Dar es Salaam ======
21 julio 2018
En Tanzania, polisiores xerca un can detetante talentosa ci manca ja tra du dias. Hobby es capas de catura contrabandores a la porto Dar es Salaam par ole fusiles, ivor e drogas.
Kangi Lugola, la ministro de internas, ia permete un dia a la polisia per trova la can, ma asta aora los no ia susede. El ia dise ce lo es posible ce algun ia prende Hobby a via de la porto, do sola tre otra canes detetante labora aora.
El ia comenta: "Lo cual me ia oia sur esta canes es vera nonplasente. On informa me ce alga es luada per otra usas. Me es vera tristida par esta reportas, car esta canes es polisiores."
En 2016, la SUA ia dona a Tanzania cuatro canes instruida per deteta ivor e drogas nonlegal a la porto e airoporto xef de la pais. Lo no es clar esce Hobby ia es entre los.
@T Un canal xines es proibida de difusa Eurovision
@L aora_oji/2018/un_canal_xines_es_proibida_de_difusa_eurovision
====== Un canal xines es proibida de difusa Eurovision ======
11 maio 2018
La Uni European de Radio-Televisa (UER) ia proibi un de la canales TV la plu popular en Xina de difusa la concurso Eurovision de canta, car lo ia sensura elementos LGBT de la presenta.
Mango TV ia es criticada en redes sosial cuando lo ia pare ce lo ia nebli banderas con colores de arco de sielo e ia sensura tatuas en la semifinal prima a martedi. Lo ia deside ance no difusa la presentas de Er e Albania.
La UER ia dise ce la sensura no acorda con sua valuas de diversia. En un declara, lo ia afirma: "Lo es con regrete ce donce nos va fini direta nosa asosia con la difusor, e los no va es permeteda a difusa la semifinal du o la final grande."
Un conta, La Vose de Omosesalia, ia dise ce la deside par la difusor de elimina referes a omosesalia es "un retropaso major". Otra usores de Weibo ia recomenda ce on "boicota Mango TV", e un usor ia dise ce el "serta no va regarda Mango TV en la mense veninte".
La entrada eres, Ryan O'Shaughnessy, ia comenta ce el bonveni la deside par la UER: "De la comensa mesma, nos ia dise ce la ama es la ama -- si lo es entre du xicos, du xicas, o un xico e un xica -- donce me crede ce esta es un deside vera importante. On no ia reata pardonosa, e me crede ce lo es un move en la bon dirije, donce me es felis sur lo."
El va canta en la ronda final en Lisbon doman con un canta sur la fini de un relata. El ia es acompaniada par du dansores mas en la presenta cual Mango TV ia pare sensura.
Otra paises cual ia susede ateni la final inclui Australia, Danmarc e Magiar.
@T Un casa covreda con un depinta par Van Gogh
@L aora_oji/2018/un_casa_covreda_con_un_depinta_par_van_gogh
====== Un casa covreda con un depinta par Van Gogh ======
20 julio 2018
En Florida, SUA, un maior ia espresa sua regrete a tema de un duple ci on ia multa per miles de dolares cuando los ia recrea La Note Stelosa par Vincent van Gogh sur la esterna de sua casa como un gidador per sua fio autiste.
La consilio de Mount Dora, cual ia dise a ante ce la depinta viole la leges de la site, ia acorda ance ce la arte pote resta e ce la familia va reseta un paia de $15 000.
La duple ia dise ce la arte es intendeda per aida sua fio a retrova sua via si el ta deveni perdeda.
En julio de la anio pasada, on ia informa la jenitores Nancy Nemhauser e Lubomir Jastrzebski ce la depinta, cual covre la esterna de sua casa, no obedi la leges de sinia de la site e ta pote deveni un distrae per motoristes. Plu tarda, on ia multa los per $10 000 e ia comanda ce los repinti supra la arte.
Nemhauser ia oposa la judi e la litiga la consilio per viole la direto de la familia a espresa libre, comentante sur sua fio ce "el ta pote a la min descrive la casa de Van Gogh e persones ta pote aida".
A martedi, la consilio de la site ia acorda unida sur la cansela de la multa e sur la paia a la familia. Maior Nick Girone ia espresa ance sua regrete a la duple, ajuntante ce sua site ave un istoria longa de suporta artistes.
La Note Stelosa es un de la obras la plu famosa par Van Gogh, e la casa ia deveni un atrae minor per turistes en la site, cual es situada a sirca 40 cilometres a norde-ueste de Orlando.
@T Un caso de un peso de ceso en un vaso
@L aora_oji/2018/un_caso_de_un_peso_de_ceso_en_un_vaso
====== Un caso de un peso de ceso en un vaso ======
19 agosto 2018
On ia trova ce un sustantia trovada par arceolojistes en un tomba antica egipsian es un ceso estrema vea.
A alga anios ante aora, un ecipo ia descovre jares rompeda en la tomba de Ptahmes, un ofisial egipsian major. En un de la vasos, los ia trova "un masa blancin e solidida". Los ia suspeta ce lo es un comeda, ma no ia sabe de cual spesie.
Aora un studia ia identifia lo como ceso de 3200 anios ante aora. La descovre es importante car on ia ave no indicas presedente de la produi de ceso en Egipte antica.
La ceso ia es xef composada de lete de ovea e capra, e ia ave probable un sabor multe asida.
La rexercores ia trova ance trasas de un bateria capas de causa un maladia comunicable, nomida bruselose, cual resulta de come produidas nonpasteurida de leteria. La maladia esiste ancora oji, e sua sintomes inclui febres, suis e doles de musculos. Si on confirma la bateria, lo va es la atesta la plu vea de un tal caso.
La tomba, a la necropoli Saqqara prosima a Qahira, ia parteni a un maior de la site antica Memfis. On ia desentera lo a la ves prima en 1885. Pos deveni perdeda su arena, lo ia es redescovreda en 2010.
@T Un corte barati deside favorente sur biometria
@L aora_oji/2018/un_corte_barati_deside_favorente_sur_biometria
====== Un corte barati deside favorente sur biometria ======
26 setembre 2018
En Barat, la corte suprema ia deside ce Aadhaar, un scema controversa de identia biometrial, es constitual e no viole la direto de privatia. Ma lo ia limita la estende de la scema, disente ce esta no pote es obligante per contas de banco, telefonetas, o la asede a scolas.
La scema la plu grande de identia biometrial en la mundo pertine a paias de aida sosial e de imposta, e a servis sosial diversa.
Plu ca mil miliones baratis es ja enscriveda en la scema. Los ia reseta un numero unica con 12 dijitos pos presenta sua datos biometrial.
Sirca tredes apelores ia vade a corte per declara ce la scema viole la privatia. Ma la panel de tota sinco judores corente en la corte suprema ia dise: "Aadhaar dona dinia a grupos marjinalida, e esta es plu importante ca la dana. On no pote ejeta la bebe con la acua de bani*."
Aadhaar ia es inisiada en 2010 par la governa, gidada par la partito Congresa Nasional Barati. Alora lo ia es un program nonobligante, intendeda per fronti froda en la aida sosial.
Ma la scema ia deveni multe plu vasta, e aora, pos oto anios, lo es entre la sistemes de identia la plu grande de mundo. La numeros de identia ia deveni sempre plu nesesada per servis comun, como la interata con bancos, la solisita de un pasaporto, e la oteni de cartas SIM per telefonetas.
* Un idiom engles cual espresa la perde de un cosa favorable en la sutrae de un nonfavorable.
@T Un coteli matante en un tren japanes
@L aora_oji/2018/un_coteli_matante_en_un_tren_japanes
====== Un coteli matante en un tren japanes ======
10 junio 2018
On ia aresta un om suspetada de mata un pasajor e de feri du otras en un ataca de cotel en un tren en Japan. La coteli ia aveni ier a sirca la ora 22:00 en un tren Shinkansen viajante de Tokyo a Osaka.
La polisia ia entra la vagon e ia aresta la om cuando la veculo ia para a la stasion de Odawara. La tren ia porta plu ca 800 pasajores a tempo de la crimin.
Un pasajor mas ia es ospitalida con feris de colo, ma ia mori plu tarda. La du otra vitimes es femes.
On ia nomi la suspetada como Ichiro Kojima, ci ave 22 anios. El ia informa la polisia ce el ia eleje vitimes en modo acaso e ia es armada con multe ojetos con lamas.
Atestores ia dise ce pasajores ia plora en atenta fuji. "Subita, multe pasajores ia es fretante. On ia panica," un om ia dise.
Tal atacas es rara en Japan, un pais cual ave un de la tasos la plu basa de crimin violente en la mundo developada. En 2015, un om ia mori pos ensende se en un tren Shinkansen. Un pasajor fema ia es ance matada e plu ca 20 persones ia es ferida cuando la foco e fuma ia sperde tra la vagones.
@T Un defior per la strada la plu presipe de mundo
@L aora_oji/2018/un_defior_per_la_strada_la_plu_presipe_de_mundo
====== Un defior per la strada la plu presipe de mundo ======
8 setembre 2018
La abitores de la vila Harlech en la norde de Cimri desira ce on reconose ofisial un de sua stradas como la plu presipe en la mundo.
A presente, la libro Guinness de Recordos de Mundo declara ce la strada la plu presipe es Baldwin Street, en la site Dunedin en Zeland Nova, de cual sua gradiente ateni 35%. Ma en Harlech, on crede ce Ffordd Pen Llech es plu presipe, con gradiente de 36%.
Sarah Badhan, ci maneja un paje de discute en Facebook per la comunia de Harlech, ia dise ce la plu de persones abita a basa de la colina, ma la farmasia e posteria es a la culmina.
"Esta manteni nos en bon forma, lo es serta," el ia dise. "La asende es un defia grande. On es vera fatigada pos ariva a la culmina."
@T Un depinta trinxa se en la subasteria
@L aora_oji/2018/un_depinta_trinxa_se_en_la_subasteria
====== Un depinta trinxa se en la subasteria ======
7 otobre 2018
La artiste Banksy ia publici un video cual mostra como el ia ajunta secreta un trinxador a un de sua depintas cual ia destrui se direta pos cuando on ia vende lo per plu ca milion paundes.
La depinta moldurida Xica con balon, un de la obras la plu conoseda de la artiste, ia es subastada par Sotheby's en London. Ma a mera momentos pos sua vende, la lona ia pasa se tra la lado basa de la moldur, deveninte trinxada. La depinta ia mostra un xica estendente sua mano a un balon con forma de cor.
Banksy ia publici un video en sua conta de Instagram, ajuntante un sita de Picasso: "La desira per destrui es ance un desira construinte."
La video comensa con un testo cual dise: "A alga anios ante aora, me ia pone secreta un trinxador en un depinta." On vide algun en un sueter de capeta ci instala un trinxador en la moldur, pos cual un plu testo ajunta: "Per la caso ce on ta ofre lo per subasta."
La video mostra alora la momento cuando la depinta ia trinxa se a la subasteria en venerdi, filmada par telefoneta. On no sabe como la trinxador ia es ativida. La depinta, stensilida con pinta jetada en 2006, ia veni de vende per 1 042 000 paundes.
Banksy ia deveni conoseda par un serie de obras de grafiti tra Britan. On crede ce el ia crese en Bristol en la sude-ueste de England, ma sua identia resta secreta an pos multe esplora tra la anios.
La depinta Xica con balon ia apare orijinal sur un mur en un strada en London. La varia vendeda ia usa pinta jetada e acrilica sur lona, e ia es monturida sur un funda. Sotheby's no ia revela ci ia compra la obra ante la trinxa, e lo es nonclar esce la contrata es ancora obligante. Ma cisa la truco par la artiste ia ajunta an a la valua de la obra.
@T Un desinia de 73 mil anios sur un petra
@L aora_oji/2018/un_desinia_de_73_mil_anios_sur_un_petra
====== Un desinia de 73 mil anios sur un petra ======
13 setembre 2018
Siensistes ia descovre ia desinia astrata la plu vea conoseda sur un frato peti de roca en Sudafrica. La imaje ave sirca 73 mil anios e mostra linias crusada de pigmento ocer roja.
La frato de imaje ia es trovada en la Cava Blombos a la costa sude. Un reporta publicida en la jornal Natur descrive lo como "un indica eselente de cognisio moderna".
An si on ia trova gravas plu vea en locas diversa en la mundo, la rexercores dise ce la linias sur esta petra es la desinia astrata la plu temprana cual on conose.
Tota la linias fini subita a la bordas de la frato, sujestante ce la desinia intera ia es probable plu grande e complicada. La rexercores esita descrive la imaje como arte, ma aseta ce lo ia ave cuasi serta "alga sinifia a sua faor".
Umanas ia usa ocer, un pigmento de arjila, tra 285 mil anios, e cisa plu. La apare prima conoseda de umanas moderna ia es a plu ca 315 mil anios ante aora, en Africa.
On ia trova multe otra ojetos fabricada en la Cava Blombos, a 300 cilometres a este de Site Capo, incluinte perletas covreda con ocer roja, fratos gravada de ocer, e utiles per crea pinta con eda de sirca sento mil anios.
@T Un destriste estrema va deveni la presidente de Brasil
@L aora_oji/2018/un_destriste_estrema_va_deveni_la_presidente_de_brasil
====== Un destriste estrema va deveni la presidente de Brasil ======
29 otobre 2018
Jair Bolsonaro, la aspiror de la destra estrema, ia fa un vinse major en la eleje presidental de Brasil. El ia gania 55,2% de la votas, contra 44,8% per la sinistriste Fernando Haddad de la Partito de Laborores.
Bolsonaro ia campania prometente elimina la froda e basi la nivel alta de crimin en la pais.
La campania ia es forte dividente. Cada partito ia declara ce un vinse per la otra pote destrui Brasil.
La vinse par Bolsonaro representa un move notable a la destra per la democratia la plu grande en America Latina, cual ia es governada par la Partito de Laborores tra 13 anios entre 2003 e 2016.
En la du anios pasada, la pais ia es governada par un conservaliste, Michel Temer, pos acusas de malcondui contra presidente Dilma Rousseff. Ma Temer ia deveni multe nonpopular con brasilanes.
La presidente partinte ia es aprobada par sola 2% de votores, un recordo basa. La popla ia esije un cambia, ma con desacorda profonda sur la dirije de la cambia.
Ultima, Bolsonaro ia vinse par 10 persentos de la votas. El ia ofre un promete de un Brasil en cual la consernas xef va es redui la crimin e promove la valuas familial.
@T Un dirijor beljes de aser rusce mori par cade
@L aora_oji/2018/un_dirijor_beljes_de_aser_rusce_mori_par_cade
====== Un dirijor beljes de aser rusce mori par cade ======
30 agosto 2018
Un dirjior beljes ci ia labora per un compania rusce de aser ia mori pos cade de un construida de nove niveles.
Dr Bruno Charles De Cooman ia es la vispresidente per rexerca e developa a NMLK (Aser Novolipetsk). On ia trova sua corpo pos cuando el ia cade de un construida de apartes en la Strada Serafimovitx, prosima a la Cremlin en Moscva.
La razona per la cade es nonclar, ma la polisia investiga.
La compania NLMK ia confirma la mori de De Coonan en un declara formal, e ia envia compatia a sua amadas. La jigante de aser ia esplica ce lo "no va comenta sur la detalias de la trajedia ante clari tota la situa".
NLMK es entre la companias la plu grande de aser en Rusia, e es poseseda par Vladimir Lisin, un oligarca e un de la omes la plu rica en la pais.
Resente, Lisin ia perde $832 en asiones -- cisa 4% de sua fortuna -- cuando la conselor economial xef de presidente Vladimir Putin ia proposa aumentas de imposta a companias de mina.
La aidores de Putin ia dise ce on va usa la revenu de imposta per finansia un crese prometeda de spende sosial. Lisin es un criticor fote de la projeta.
@T Un disputa sur votas reensende en Gabon
@L aora_oji/2018/un_disputa_sur_votas_reensende_en_gabon
====== Un disputa sur votas reensende en Gabon ======
4 novembre 2018
Jean Ping, la xef de la partito oposante en Gabon, ia reclama denova la vinse de la eleje fada en 2016, car presidente Ali Bongo Ondimba es en un ospital estra la pais.
Parlante en Libreville, Ping ia urje la nasion a abandona sua divides e foca a un ideal comun. El ia ajunta ce esta ideal es lo indicada par la votas de agosto 2016, disente ce el es la person ci ia gania vera la plu de los.
Protestas violente ia eruta cuando Bongo ia es ofisial declarada como la vinsor con marjin estrema peti.
Bongo, de ci sua familia ia governa acel nasion de Africa ueste tra 50 anios, es tratada a presente en un ospital en Riad, la capital de Arabia Saudi. No plu novas ofisial ia apare sur la state de la presidente pos la anunsia inisial, a des dias ante aora, ce el es estrema fatigada e nesesa reposa.
Pos la eleje de 2016, la partito oposante ia declara ce la votas ia es frodosa manejada, e ia esije ce on reconta los. La esije ia es refusada par la corte constitual de la pais.
En sua deside, la corte ia cambia partal la resulta de la eleje difisil bataliada, donante 50,66% de la votas a Bongo e 47,24% a Ping.
@T Un encontra a la frontera de la Coreas
@L aora_oji/2018/un_encontra_a_la_frontera_de_la_coreas
====== Un encontra a la frontera de la Coreas ======
26 april 2018
Doman, Kim Jong-un va deveni la gidor prima de Corea Norde (Txoson) ci entra a la teritorio de Corea Sude (Tehan) pos la fini de la gera corean en 1953. En detalias nova anunsiada, la Sude ia dise ce presidente Moon Jae-in va encontra personal Kim a la frontera, a 09:30 de ora local.
Sua discutes va foca a la indicas resente par la Norde ce lo ta pote sede volente sua armas nucleal. Esta es un avansa major pos anios de tensa cresente.
Ma Seoul ia averti ce la reali de un acorda intendeda per elimina la armas nucleal de Pyongyangva va es difisil, car la tecnolojia nucleal e misilal de Txoson ia avansa tan multe pos la ves la plu resente de discutes entre la du lados.
La consenta -- la numero tre de sua spesie, pos los en 2000 e 2007 -- resulta de menses de relatas boninte entre la du Coreas, e abri la via per un consenta posible entre Kim Jong-un e presidente Donald Trump de la SUA.
En ajunta a la aspiras nucleal de Corea Norde, on previde ce la gidores va discute un via a pas sur la penisola per fini formal la Gera Corean de 1950--3, e ance alga problemes economial e sosial.
Moon va encontra Kim e sua delega de nove ofisiores a la frontera, de do gardores onoral de Tehan va acompania la gidores a un rituo de bonveni en un plaza en Panmunjom, un compleso militar en la zona desmilitarida entre la du paises.
Discutes ofisial entre Moon e Kim va comensa a 10:30 de ora local a la Casa de Pas en Panmunjom. La duple va pausa pos la sesion prima per come en modo separada: la delega de la Norde va revade a sua lado de la frontera.
A un rituo en la posmedia, Moon e Kim va planta un pino usante tera e acua de ambos paises, per simboli "pas e susede". Pos acel, los va pasea en junta en Panmunjom ante comensa la ronda seguente de discutes.
La confere va conclui cuando la gidores suscrive un acorda e fa un declara juntada. On va fa un banceta a la lado tehan, e los va regarda un video nomida "Primavera de un" ante cuando Kim revade a sua pais.
Kim va es acompaniada par nove ofisiores, incluinte sua sore Kim Yo-jong, ci ia gida la delega txoson a la Juas Olimpial de Inverno en Tehan, plu temprana en esta anio. Ance Kim Yong-nam, la xef de stato par titulo, va es presente.
En un move no videda a conferes presedente entre la du Coreas, la delega va inclui ance diplomatas e ofisiores militar xef. Corea Sude va envia sete ofisiores, incluinte sua ministros de defende, esternas e uni.
@T Un eroe de polisia franses mori de sua feriis
@L aora_oji/2018/un_eroe_de_polisia_franses_mori_de_sua_feriis
====== Un eroe de polisia franses mori de sua feriis ======
24 marto 2018
Un polisior franses ia mori, ci ia sustitui se per un ostaje en un aseja de supramercato ier. Emmanuel Macron, presidente de Frans, ia dise ce Arnaud Beltrame, de 45 anios, "ia cade como un eroe" e ia mostra "coraje estracomun".
Beltrame ia aida fini la ativia de un fusilor ci ia mata tre persones en la sude de Frans. La fusilor estremiste islamiste, Redouane Lakdim, de 25 anios, ia es matada par la polisia.
Gérard Collomb, la ministro franses de internas, ia dise ce Beltrame "ia mori per sua pais. Frans va oblida nunca sua eroisme, sua coraje, sua sacrifia."
Plu temprana, Macron ia revela ce Beltrame ia sufri feris grave e batalia per sua vive en ospital. Des-ses persones ia es ferida, du en modo grave, en lo cual Macron ia nomi un ata de "terorisme islamiste".
Lakdim ia esije la libri de Salah Abdeslam, la plu importante de la suspetadas survivente de la atacas en Paris a 3 novembre 2015, cual ia mata 130 persones.
La violentia ier ia comensa en la matina en Carcassonne, do Lakdim ia saisi un auto. El ia mata un pasajor, de ci on ia trova sua corpo ascondeda en un arboreta, e ia feri la gidor. A pos, el ia xuta a un grupo de polisiores corente, ferinte un de los.
Lo pare ce el ia viaja tra distantia peti a Trèbes, un vila peti do el ia invade la supramercato Super-U, criante: "Me es un soldato de Daex!" El ia mata du persones -- un cliente e un laboror -- ante saisi otras como ostajes.
La polisia ia susede sorti alga persones de la boteca, ma la fusilor ia reteni un fem como scermo umana. A esta punto, Beltrame ia ofre sustitui se per la fem. El ia lasa sua telefoneta sur un table, con linia abrida, afin polisiores estra la construida pote monitori la situa.
Cuando la polisia ia oia xutas, un ecipo tatical ia entra a la supramercato. La fusilor ia es matada, ma Beltrame ia es ferida.
@T Un eruta major de volcan en Guatemala
@L aora_oji/2018/un_eruta_major_de_volcan_en_guatemala
====== Un eruta major de volcan en Guatemala ======
4 junio 2018
Dudes-sinco persones ia es matada e sentos ferida en la eruta la plu violente de desenios en Guatemala.
La volcan Fuego, a sirca 40 cilometres a sude-ueste de la capital Site Guatemala, ia ejeta rocas, fuma negra e sene a la sielo. Un rio de lava ia ateni la vileta El Rodeo, matante persones en casas.
On ia clui la airoporto de la capital, e presidente Jimmy Morales considera declara un state de crise.
Esta eruta es la plu grande de pos 1974 longo espertas local, e alga enfantes es entre la persones confirmada como mor. Videos mostra corpos reposante sur un flue de lava, e salvores ci atende persones covreda par sene.
Un fem ia descrive como la lava ia versa tra campos de gran, ajuntante ce el crede ce plu persones ia mori su la flue.
Ofisiores dise ce sirca 1,7 milion persones es afetada par la eruta, e los consela ce on porta mascas per proteje se contra sene cadente en cuatro de la rejiones de Guatemala.
La militar aida con salva, institui refujerias tempora, e sutrae sene volcanal de la atereria de la airoporto La Aurora de Site Guatemala.
@T Un fe de mar salva un bove afocante
@L aora_oji/2018/un_fe_de_mar_salva_un_bove_afocante
====== Un fe de mar salva un bove afocante ======
8 novembre 2018
En England, un bove afocante ia es salvada de la Rio Thames par un "fe de mar" pasante en sua nada de 320 cilometres.
Lindsey Cole nada per aumenta la consensia de la efetos ambiental de plastica dejetable. El ia comensa a venerdi en la vila Lechlade, la punto la plu alta do la rio es navigable, portante un paracua, un xapo e un coda de fe de mar.
Nomida la "fe de mar urban", Cole ia vide la bove afetada cuando el ia traversa la contia Oxfordshire a soldi. El ia continua nada en cuando sua canoiste aidante ia telefoni la servis de crise.
La canoa tira un sculta grande de un fe de mar, composada de botelas plastica. Cole pleni lo con pesos de plastica cual el encontra en la acua, e pasores pote ajunta ance plastica trovada longo la rio.
El ia pensa inisial ce la bove es mera un plata grande de plastica blanca. Ma cuando el ia siniali a sua canoiste (la artiste Barbara de Moubray) per retrae lo, los ia descovre ce "lo ave cuatro gamas e lo mui".
Pompores de la ecipo local ci fa salvas de rio ia susede lia un corda a la animal per leva lo a un loca de securia. On crede ce la bove ia cade en la acua cuando lo ia es en la campo visina e ia atenta bevi.
Cole intende nada longo la rio en 22 dias, e va pausa a scolas per discute la problemes de plastica.
@T Un fem enganada a sposi un om nonconoseda
@L aora_oji/2018/un_fem_enganada_a_sposi_un_om_nonconoseda
====== Un fem enganada a sposi un om nonconoseda ======
29 agosto 2018
Un fem de Hongkong ci ave 21 anios dise ce el ia es enganada per sposi un om nonconoseda sur Xina continental, cuando el ia partisipa en un sposi "finjeda".
El dise ce on ia informa el ce el debe fa la rol de un sposa nova en un sposi simulada, como un parte de sua aprendes per deveni un organizor de sposis. En la rituo, el e la om ia suscrive un documento vera de sposi.
La fem ia comprende ce el es vera sposida sola pos revade a Hongkong, do el ia xerca aida legal. La polisia local no ia pote aida, car atestas ia manca ce un crimin ia aveni, donce el ia vade a la Federa de Sindicatos de Hongkong.
En maio, la fem, de ci on no ia publici sua nom, ia vide un anunsia en Facebook per un stajia de artiste de macia. Ma pos presenta se per la rol, la compania ia convinse el a segue un curso de organizor de sposis en loca.
On ia dona a el un semana de instrui sin custa en Hongkong, pos cual on ia dise ce, per susede la curso, el nesesa partisipa en un sposi finjeda en Fuzhou, un provinse xines. En julio, el ia suscrive un documento de solisita de sposi en un sentro de governa local.
La compania ia dise a el ce la sposi va es nonvalida a pos. Ma pos sua reveni a Hongkong, un de la otra persones en sua clase ia convinse el ce la situa es un engana.
La fem resta sposida per la presente, e va debe cisa solisita un divorsa. Lo no es clar ci es la om ci el ia sposi, o esce la om ia vade a Hongkong a pos.
Tong Kamgyiu, dirijor de la Comite de Diretos e Beneficas de la Federa de Sindicatos, ia dise: "Esta es un forma nova de sposi frodosa. Me senti deludeda e no pote crede ce lo aveni an en Hongkong moderna. On ia esplota la fem cuando el ia sabe no cosa sur la situa. Sua perde la plu grande es ave un rejistra de sposi, e lo ia causa un dana psicolojial a el."
En cada anio, la polisia de Hongkong vide, per promedia, mil casos de sposi frodosa cual traversa la frontera. Abitores de Xina ci es sposida a un person de Hongkong pote solisita abita mesma en la site.
@T Un ferovia nova controversa entre Hongkong e Xina
@L aora_oji/2018/un_ferovia_nova_controversa_entre_hongkong_e_xina
====== Un ferovia nova controversa entre Hongkong e Xina ======
23 setembre 2018
On ia abri un ferovia de rapidia alta en Hongkong, liante la teritorio a la site Guangzhou en Xina sude. La viaja ocupa sola 40 minutos, min ca la dui de la tempo usada par trenes plu vea.
La autoriosas xines va opera a un punto de controla juntada a la stasion e en la trenes. Esta es controversa, car lo es la ves prima cuando la lege criminal de Xina es enforsada en Hongkong. Oposores dise ce esta viole la libria e constitui de la teritorio.
La ferovia ia es abrida con un rituo ier. Un legor local ia loda la viaja prima a Guangzhou como "multe cuieta, como si me ta es en un avion". Ofisiores governal dise ce la lia va aida la comersia en Hongkong, Shenzhen e Guangzhou.
La ferovia va abri oji per la popla jeneral, aidante ance la lias de tren con la resta de Xina, incluinte la capital Beijing. Ma legores prodemocratial ia boicota la rituo de abri e ia organiza un protesta estra la stasion, disente ce la ferovia menasa la sistem de lege autonom de la teritorio.
Hongkong, un colonia brites pasada, ia es redonada a Xina en 1997, longo un acorda ce la teritorio va esperia sincodes anios de "un grado alta de autonomia, estra problemes esterna e de defende". Como resulta, Hongkong ave sua propre leges, e protejes per alga diretos e librias, e on no pote aplica ala la plu de la leges de la tera xef de Xina.
La corpo leginte suprema de Xina ia dise ce la sistem en la ferovia nova no sumina la autonomia de Hongkong. Sua suportores razona ce lo simpli la prosede de migra.
On ia critica ance la projeta de la ferovia car lo ave tre anios de tardia e ia esede sua bujeta par cuasi $3 mil milion.
@T Un focon cisa criminal en un scola ugandan
@L aora_oji/2018/un_focon_cisa_criminal_en_un_scola_ugandan
====== Un focon cisa criminal en un scola ugandan ======
13 novembre 2018
A la min des persones es mor e desuples es ferida pos un ataca, sur cual on alega ce lo ia es un ensende criminal, contra un dormeria en un scola abitada per xicos en Uganda sude.
La focon ia comensa en la temprana de la matina de lundi, en un bloco cual ia casi desuples de studiantes de la Liseo San Bernard en la distrito Rakai. La portes de la dormeria ia es securida, e desuples de persones ia es trapida a la interna.
La ensenior xef de la scola, Henry Nsubuga, ia descrive la focon como "un ata odiable".
Tre persones, incluinte un gardor de scola, ia es arestada par la polisia per interoga. Dudes studiantes es en state estrema grave en ospital, e ofisiores averti ce la cuantia de mores va crese cisa.
On investiga esce studiantes escluida ia es envolveda en la ensende alegada.
Persones visina desperante ia atenta estingui la flamas, usante arena, acua e brices, ma sua labora ia es complicada par la portes clavida e par un fuma densa en la construida.
Rakai es situada a sirca 280 cilometres a sude de Kampala, la capital de Uganda, prosima a la frontera con Tanzania. Alga ofisiores major de la governa, incluinte la ministros de educa e securia, ia viaja a la scola pos la focon.
@T Un focon en un sentro comersial en Sibir
@L aora_oji/2018/un_focon_en_un_sentro_comersial_en_sibir
====== Un focon en un sentro comersial en Sibir ======
26 marto 2018
A la min 53 persones ia mori ier en un focon cual ia destrui un compleso de botecas e diverterias en Cemerovo, un site en Sibir. Lo es posible ce 41 enfantes es entre la vitimes, e on no conose do plu ca 10 persones es.
La arde ia comensa a un solo alta de la compleso Seriso de Inverno, cuando multe de la vitimes ia es a la sinema. Persones ia salta de fenetras per evade la flamas.
La causa de la focon es ancora no conoseda, e autoriosas ia inisia un investiga. 660 laborores de crise ia es usada en la salva, e pompores ia batalia la flamas tra plu ca 17 oras.
Cemerovo, un loca major de mina de carbon, es situada a sirca 3600 cilometres a este de Moscva.
La sentro comersial ia abri en 2013. En ajunta a un sinema-multipleso, lo conteni restorantes, un sauna, un bolingeria e un zo per enfantes. On ia deteni cuatro persones per interoga, incluinte la xef de la compania cual maneja la sentro e la proprior de la compleso.
Ofisiores rusce ia dise prima ce 64 persones manca, ma ia clari plu tarda ce esta inclui vitimes de ci on no ia identifia sua restas. A la min nove de la corpos trovada asta aora es enfantes.
La servis de crise ia ateni final un salon de sinema a la solo tre, pos es impedida par fuma e la peril de partes colasante. Los ia trova no corpos a interna, ma teme ce alga persones ia es cisa covreda par detrito.
@T Un froda par tecnolojia en un esamina singapor
@L aora_oji/2018/un_froda_par_tecnolojia_en_un_esamina_singapor
====== Un froda par tecnolojia en un esamina singapor ======
17 april 2018
En Singapor, un ensenior ia confesa aida ses studiantes xines a froda en sua esaminas de otobre 2016, en lo cual acusores descrive como un conspira complicada.
Tan Jia Yan ia fa la esaminas como un aspiror privata e ia envia la demandas par FaceTime a aidores ci ia telefoni a la studiantes e ia leje a los la respondes. Ier, Sra Tan ia declara se como culpable de 27 acusas de froda.
La esaminas ia es los de nivel O, tipal fada par studiantes con sirca 16 anios. Tre otra suspetadas fronti acusas simil.
La conspira ia es descovreda pos cuando un supravidor ia oia sonas nonusual veninte de un de la studiantes. On ia prende la studiante a lado pos la esamina e ia demanda ce el desapone sua camiseta. On ia trova ce el porta un telefoneta, un aparato de Bluetooth, e escutadores de color de pel.
Un avocato ia descrive la "operas de froda" como "estrema refinada".
Tan ia es empleada a la Sentro Zeus de Educa a la tempo de la esamina. La otra tre suspetadas es la xef de acel sentro e du otra enseniores de ala. Los disputa la acusas contra se, ma on previde ce los va es litigada plu tarda en esta semana.
On alega ce la xef de la sentro, Poh Yuan Nie, ia reseta un depone de 8 mil dolares singapor (6100 dolares SUA) de un sitadan xines e mil dolares singapor per cada studiante enviada a la Sentro Zeus. Un repaia de tota la mone ia es projetada en caso ce la studiantes ta fali sua esaminas.
@T Un frontera nova per Timor Este e Australia
@L aora_oji/2018/un_frontera_nova_per_timor_este_e_australia
====== Un frontera nova per Timor Este e Australia ======
7 marto 2018
Australia e Timor Este ia suscrive un trata istorial sur un frontera permanente en la Mar Timor. La acorda fini un disputa de un desenio entre la visinas sur diretos a la reservas rica de petrolio e gas en acel mar. Timor Este, un de la nasiones la plu povre de mundo, va gania aora la majoria de revenu futur.
La paises ia fa la suscrive en la xeferia de la Nasiones Unida en York Nova, pos negosias en la corte internasional de arbitra.
Pos cuando Timor Este ia separa de Indonesia en 2002, no frontera permanente de mar ia es fisada entre Australia e la nasion nova. En loca, la du lados ia acorda un frontera tempora, ma Timor Este ia declara plu tarda ce los ia es nonjusta obligada a aseta lo.
Lo ia crede ce sua visina plu potiosa ave un divide nonjusta grande de asede a campos de petrolio e gas de cual on estima sua valua como deses de miles de miliones de dolares.
En 2016, Timor Este ia disputa la acorda en la Corte Permanente de Arbitration en Den Haag. La arbitra entre la nasiones ia fini en la semana pasada.
La acorda nova defini la frontera a la punto media entre la paises, seguente regulas de la Nasiones Unida sur lege maral. Australia ia presa per un frontera a la borda de sua plano continental, con frontera plu prosima a Timor Este.
Como resulta de la acorda, Timor Este va reseta a la min 70% de la campo la plu grande de petrolio. A ante, revenu ia es egal divideda entre la du paises. Australia va perde sua autoria en campos de petrolio aora compartida par ambos.
La economia de Timor Este depende forte de gas e petrolio, ma resente sua recursos ia comensa deveni consumada.
@T Un fusilor mata a un mercato de natal franses
@L aora_oji/2018/un_fusilor_mata_a_un_mercato_de_natal_franses
====== Un fusilor mata a un mercato de natal franses ======
12 desembre 2018
Frans ia avisa un nivel masima de vijila, car la polisia xerca un fusilor ci ia spara a un mercato de natal en la site Strasbourg, en la este de la pais.
Tre persones ia es matada e des-tre ia es ferida, oto a grado grave.
La fusilor ia fuji, ma on reporta ce el mesma ia es ferida. El ave 29 anios e es conoseda a la polisia como un estremiste suspetada.
Sirca 350 polisiores es envolveda en xerca el, e la departe contrateroriste franses ia inisia un investiga.
La ministro de internas ia dise ce la pais ia fa un avisa de ataca urjente, tal estendente la potias de la polisia e creante la grado la plu alta de vijila.
El ia ajunta ce la controlas de frontera es fortida e ce la securia a tota mercatos de natal va es aumentada.
La maior de Strasbourg ia dise ce oji la mercato va es cluida e banderas a la ofisia de site va es basida a altia media.
@T Un fusilor mata a un sinagoga en Pennsylvania
@L aora_oji/2018/un_fusilor_mata_a_un_sinagoga_en_pennsylvania
====== Un fusilor mata a un sinagoga en Pennsylvania ======
28 otobre 2018
En la SUA, un om suspetada de mata 11 persones en un sinagoga en Pittsburgh, Pennsylvania es acusada de omiside, pos un aveni regardada como la ataca antisemita la plu mal en la istoria resente de la pais.
On acusa Robert Bowers, ci ave 46 anios, de fusili a la sinagoga Arbor de Vive en sua servi de la dia santa. El fasa 29 acusas, incluinte la usa de un fusil per omiside.
La acusores federal dise ce los va rejistra ance acusas de crimin de odia, e la suspetada va reseta cisa la puni de mori.
Presidente Donald Trump ia descrive la ataca como "un ata malvolente de omiside coletiva", e ia comanda la basi partal de banderas SUA a construidas governal asta 31 otobre.
Ses persones, incluinte cuatro polisiores, ia es ferida en la ataca ier. La suspetada ia es ance ferida en un batalia de fusil contra la polisia.
Plu tarda, sentos de persones, no sola de la visineria Squirrel Hill ma ance de tota Pittsburgh, ia asembla per un vijila intercredal per la vitimes de la ataca.
A la matina de ier, persones ia veni a la sinagoga per un rituo de nomi de bebe. Squirrel Hill ave un de la poplas iudi la plu grande en la stato Pennsylvania, e esta ia ta es la dia la plu ativa per la sinagoga en la semana.
On reporta ce Bowers ia entra a la construida en la servi de matina, armada con un fusil de ataca e tre pistoles. Pos sirca 20 minutos, el ia mata ja 11 persones e ia es sortinte de la sinagoga, cuando el ia encontra un ecipo de polisiores spesialida e ia intercambia sparas con los.
A pos, la atacor ia reentra a la construida per atenta asconde se de la polisia. El ia sede pos un batalia de fusil, e es aora en ospital con plu ca un feri de baleta.
Longo reportas, el ia clama "tota iudis debe mori" en cuando el ia fa la ataca. Postas en redes sosial par algun con la nom Robert Bowers ia es ance plen de comentas antisemita. El no ia es conoseda a autoriosas ante la ataca. Sua motiva resta nonclar, ma on crede ce el ia ata solitar.
Trump ia descrive la fusilor como un "manica" e ia sujesta ce la SUA debe "forti nosa leges de la puni de mori", ajuntante ce la aveni "pertine poca" a la leges de fusil en la pais. "Si on ia ta ave un proteje en la construida, cisa la situa ia ta pote es diferente."
La presidente presedente, Barack Obama, ia espresa un otra opina sur la debate continuante de lege de fusil. El ia tuita: "Nos debe sesa fasili tan multe la oteni de fusiles par los ci vole feri persones inosente."
@T Un futbalor mori pos un colpa de lampo
@L aora_oji/2018/un_futbalor_mori_pos_un_colpa_de_lampo
====== Un futbalor mori pos un colpa de lampo ======
5 maio 2018
Un futbalor sudafrican, colpada par lampo en un max, ia mori en ospital.
Luyanda Ntshangase, atacor per la ecipo Maritzburg Unida, ia es en un coma induida pos deveni ferida en la jua amin a 1 marto. El ia ave 21 anios.
En un declara en Facebook, la club ia descrive el como un de sua stelas joven e asendente, e ia dise ce la ecipo es lamentosa.
Ntsangase ia asende tra sua club pos sua apare prima contra Kaizer Chiefs a du anios ante aora. El ia es un de tre juores colpada par la flax de lampo en la max en la provinse KwaZulu-Natal. La du otras ia es mera pico ferida, ma Ntshangase ia sufri un peto ardeda.
Sua mori es la trajedia tre per Maritzburg Unida en anios resente. La sentrores prometosa Mondli Cele, con 27 anios, e Mlondi Dlamini, con 20, ia mori en asidentes separada de auto en 2016 e 2017.
A presente, la club ave la numero 4 en la Liga Prima de Sudafrica.
@T Un gania de loto a sua aniversario 18
@L aora_oji/2018/un_gania_de_loto_a_sua_aniversario_18
====== Un gania de loto a sua aniversario 18 ======
28 marto 2018
Un fem canadian ia gania masima pos compra sua bileta prima de loto a sua aniversario 18.
Charlie Lagarde, de la provinse Québec, ia compra un bileta de rasca en un botela de xampania per selebra ateni la eda de 18 anios a 14 marto.
El ia gania, e ia fronti un eleje entre prende un sola premio de milion dolares canadian o reseta mil dolares a cada semana per la resta de sua vive. Pos consulta un conselor finansial, la ganior joven ia eleje la paia anial de mil dolares, car lo no es impostada.
Un portavose per la compania de loto ia comenta: "Lo es estra imposta, alora lo coresponde a un salario de plu ca 100 mil dolares per anio, donce lo es un comensa eselente de la vive de acel fem joven."
Lagarde dise ce el vole usa la mone per viaja e paia per sua educa. "Me desira studia fotografia. Un de mea sonias es labora per National Geographic.
@T Un gitariste jaz jua tra sua sirurjia serebral
@L aora_oji/2018/un_gitariste_jaz_jua_tra_sua_sirurjia_serebral
====== Un gitariste jaz jua tra sua sirurjia serebral ======
21 desembre 2018
Un musiciste jaz de Sudafrica, ci ia jua sua gitar en sua sirurjia serebral, recovre bon.
Musa Manzini ia resta veliada tra la opera de ses oras, partal per conserva e restora la move de sua ditos. La deside ia es fada "considerante mea carera como musiciste", longo la multistrumentiste e ensenior de universia.
La prosede ia aveni a la ospital Chief Albert Luthuli en la site costal Durban.
Un video de la sirurjia mostra Manzini ci toca lejera sua gitar sur la table de opera, en cuando medicistes atende el.
La opera ia es fada en la semana pasada par un ecipo de neurosirurjistes, gidada par Dr Basil Enicker e Dr Rohen Harrichandparsad.
Manzini ia dise ce la tumor recorente en sua serebro es relatada a un disturba neurolojial cual el sufri ja de 2006.
Enicker ia esplica ce en esta caso on ia prefere fa un opera veliada ca usa un anestesente jeneral. "Tal, nos pote proba rejiones de la serebro ante la sutrae. Esta permete un sutrae aumentada de la tumor, e minimi la dana a la serebro," el ia dise.
Dotores ia desira minimi la risca de paralise o perde de funsionas en la cortex de move, la parte de la serebro cual controla moves voleda.
Manzini ia comenta ce el es grasiosa per sua trata, ajuntante: "Me no crede ce nos reconose sufisinte la valua de nosa instituidas publica de sania."
La musiciste campionida ia dise ance ce el desira apare denova sur stadios pos completi sua recovre.
@T Un greve afeta volas de Lufthansa
@L aora_oji/2018/un_greve_afeta_volas_de_lufthansa
====== Un greve afeta volas de Lufthansa ======
10 april 2018
Lufthansa es obligada a cansela oji 800 volas car la "primavera de noncontentia" entre laborores de Europa ia ateni Deutxland. La airocompania ia sutrae un dui de sua 1600 volas scemada, afetante 90 mil pasajores.
Laborores fa un greve ante discutes de paia, pos ativia simil en Frans. On previde plu disturba per Air France oji pos sua greves a la fini de semana.
Lufthansa ia recomenda a pasajores de ci sua volas no es canselada ce los lasa plu tempo per viaja, e ce los ariva plu temprana a la airoportos.
La greve no envolve la empleadas de Lufthansa mesma, ma laborores de la campo publica como la mantenores de aviones sur tera a la airoportos de Frankfurt, München, Köln e Bremen.
Un servi normal va recomensa a mercurdi. Air France ia dise ce lo va opera oji 75% de sua volas, pos cansela un tri de los a saturdi.
@T Un jeto cade en Cuba
@L aora_oji/2018/un_jeto_cade_en_cuba
====== Un jeto cade en Cuba ======
19 maio 2018
Plu ca sento persones ia mori pos la cade de un avion Boeing 737, prosima a la airoporto xef de Cuba en Havana. Esta es la desatre avional la plu mal de desenios en la pais.
On ia estrae tre femes vivente de la ruina, ma los es en un state estrema grave.
La avion, cual ia ave cuasi 40 anios, ia porta 104 pasajores e ses ecipores. Autoriosas cuban ia inisia un investiga, e on ia declara du dias de lamenta nasional.
La avion ia cade a 12:08 de ora local ier, no longa pos enaira de Havana en vola interna a Holguín en la este de la isola. Tota ses ecipores ia es mexican; la plu de la pasajores ia es cuban, con sinco stranjeres reportada entre los.
Lo es tro temprana per sabe la causa de la desastre, ma atestores sur la tera ia vide la jeto esplode en flamas ante cade sur un campo prosima a un bosce.
La avion ia es construida en 1979 e ia es susedosa esaminada en novembre de la anio pasada.
Longo rexercas en la industria, 2017 ia es la plu secur en la istoria intera de volas comersial, con zero cades de jetos de pasajor. Ma en esta febrero, un avion ia cade prosima a Moscva, matante 71 persones; en marto, un cade ia aveni en Catmandu, matante 51; e en april, un avion militar ia cade en Jazair, causante la moris de plu ca 250 persones.
En 1989, un jeto soviet ia cade prosima a Havana, matante 126 persones en la avion e 24 otras sur la tera.
@T Un laboratorio spasial cade en la Pasifica Sude
@L aora_oji/2018/un_laboratorio_spasial_cade_en_la_pasifica_sude
====== Un laboratorio spasial cade en la Pasifica Sude ======
2 april 2018
Tiangong-1, un laboratorio spasial desusada de Xina, ia reentra a la atmosfera de la Tera e ia desintegra supra la Pasifica Sude, a pico pos medianote (de ora global) oji.
Lo ia es lansada en 2011 per fa esperimentas de doci e orbita, como parte de atentas par Xina de construi un stasion spasial ante la fini de 2022. Ma lo ia sesa funsiona en marto 2016.
Parente, lo ia cade a tera en alga loca a norde-ueste de la isola Tahiti.
Per espertas, la predise de do lo va reentra ia es difisil. La ajenteria spasial de Xina mesma ia sujesta noncoreta ce lo va cade prosima a São Paulo en Brasil.
La Ajenteria Spasial European (ASE) ia predise ce Tiangong-1 va desintegra supra acua, cual covre multe de la surfas de la Tera. Lo ia asentua ce la probablia ce un person va es colpada par un peso de detrito es un des-milioni de lo ce on va es colpada par lampo en cualce anio.
On no sabe cuanto de la laboratorio ia ateni la surfas sin desintegra.
Ideal, on ia ta sutrae lo de orbita en manera projetada. Tradisional, on usa la puxadores de veculos grande per envia los a la loca maral la plu distante de tera, en la rejion entre Zeland Nova e America Sude. Ma lo pare ce, a esta ves, acel no ia es posible, par causa de un perde de lias de comanda.
Des-tre ajenterias spasial, gidada par la ASE, ia usa radar e oservas otical per segue la via de Tiangong-1 sirca la globo.
La modulo Tiangong ia ave 10 metres de longia, e sua nom sinifia "palasio sielal".
@T Un leoneta es trovada en un aparte franses
@L aora_oji/2018/un_leoneta_es_trovada_en_un_aparte_franses
====== Un leoneta es trovada en un aparte franses ======
24 otobre 2018
Un om de 30 anios ia es arestada cuando on ia descovre un leoneta en un aparte en la suburbes de Paris.
La polisia ia es avisada cuando la suspetada ia atenta vende la leon fema, ci ave ses semanas, per 10 mil euros.
La om ia asconde se en un armario en la casa de un visina, do on ia trova el ier. La leoneta ia es trovada sur un leto de enfante.
On reporta ce la animal es sana. Autoriosas sur viventes savaje cura aora el. La om suspetada ia ave condenas presedente per furas.
Esta no es la ves prima cuando polisiores ia descovre gatos savaje ci on ia manteni nonlegal.
En 2017, la polisia ia trova un leoneta magra en un aparte vacua en Paris, mantenida par un om ci ia fa selfis con el. La leoneta ia es recasida en un conserveria de animales en Sudafrica en esta agosto.
Plu temprana en esta mense, un coror en Nederland ia trova un leoneta abandonada en un caje en un campo.
@T Un leopardo mata un monce meditante
@L aora_oji/2018/un_leopardo_mata_un_monce_meditante
====== Un leopardo mata un monce meditante ======
13 desembre 2018
Un monce ci ia medita en un foresta en la stato Maharashtra en Barat ia mori atacada par un leopardo.
La om, Rahul Walke, ia medita su un arbor en la foresta Tadoba, un conserveria de tigres. El ia parteni a un templo budiste en la foresta, ma ia pasea a un loca alga distante de lo per medita.
Ofisiores de la foresta dise ce los ia averti la monces contra vaga tro profonda en la conserveria.
Ma on intende aora catura la leopardo. Forestores ia prepara du cajes e un trapa fotografial, e va atenta calmi la animal.
Ofisiores de la stato ia dise ce la familia de Walke va reseta 1,2 milion rupis ($17 mil) de compensa.
Un monce de la mesma templo ia dise ce el ia vide la ataca de Walke par la animal cuando el ia visita sua loca de medita per dona comedas a la matina de ier. El ia vade per trae aida, ma cuando el ia reveni con otra persones, Walke ia es ja mor.
On estima ce 88 tigres abita la conserveria Tadoba. Lo conteni ance multe otra animales diversa, incluinte leopardos, ursos labiosa, ienas, e rateles.
@T Un linia de boves colpada par lampo
@L aora_oji/2018/un_linia_de_boves_colpada_par_lampo
====== Un linia de boves colpada par lampo ======
8 marto 2018
Un cultivor australian ia trova ses boves mor, reposante en linia, en un situa cual espertas ia atribui a un colpa de lampo. La animales ia es descovreda longo la serca de filo spinosa de un ensirca en Queensland en la semana pasada, a alga dias pos un tempesta forte.
Dr Sabrina Lomax, un rexercor sur condui e bonstate de bestias a la Universia de Sydney, ia dise ce el crede ce tota ses boves ia es tocante la serca cuando los ia mori.
"En esta asidente strana, lo ia es mera un posa nonoportun de la animales en relata a la lampo," Lomax ia esplica. "Los ia mori direta par un ataca intensa de cor."
La posesor de la boves, Sr Derek Shirley, ia descrive se como "aturdida" par la descovre. Sua cultiveria es a sirca 70 cilometres a sude de Brisbane. El ia pensa inisial ce algun ia veneni la bestias.
"On simple no vide un grupo de los aliniada longo la serca," el ia comenta. "On ia ta pote cuasi estende un regla longo los."
Dr Karl Kruszelnicki, un comentor de siensa, ia sujesta ce la boves ia es cisa xocada cuando la lampo ia colpa la tera. "La campo eletrical entra tra sua gamas posterior, tra la corpo, e los esperia un ataca de cor," el ia dise.
En 2016, plu ca 300 renos ia es matada en un tempesta de lampo en Noria.
@T Un lisca de tera en Uganda
@L aora_oji/2018/un_lisca_de_tera_en_uganda
====== Un lisca de tera en Uganda ======
13 otobre 2018
Un lisca de tera ia mata plu ca 40 persones pos pluve forte en la rejion Bududa, prosima a Monte Elgon en la este de Uganda. On teme ce la cuantia de mores va crese.
Un rio ia supraflue e un deluvia de fango e acua ia puxa viletas a via. Imajes mostra persones ci retrae corpos de la fango.
Un aveni simil en la mesma rejion ia mata plu ca 300 persones en 2010. Lo es un loca montaniosa con un solo volcanal cual es rica per cultiva. Ma la rejion es ance multe poplada, donce la tera cultivable es forte desirada.
Pos desastres presedente, on ia recomenda ce persones move a via de la rejion. An tal, multe reveni par causa de la fertilia de la tera e sua lias a sua orijina familial.
La Crus Roja de Uganda dise ce lo ia regania 36 corpos, ma un ofisior local, sitada en la Monitor Dial, un jornal ugandan, ia dise ce on ia trova 40 corpos.
Un portavose per la Crus Roja ia dise: "Cuando la acua ia flue a su, lo ia trae con se alga petras grande cual ia destrui la casas de persones."
La ofisia de la ministro xef ia envia un ecipo per aida con la labora de xerca e salva, cual continua en la tereno ru e colinosa.
@T Un liscatera segue la siclon en la Pilipinas
@L aora_oji/2018/un_liscatera_segue_la_siclon_en_la_pilipinas
====== Un liscatera segue la siclon en la Pilipinas ======
21 setembre 2018
Un lisca de tera en la Pilipinas ia mata a la min 21 persones e ia manca desuples de otras. Alga su la detrito ia envia mesajetas demandante per aida.
La lisca ier ia engoli du viletas parteninte a la site Naga en la provinse Cebu. Lo ia aveni corta pos un tempesta forte cual ia mata plu ca 80 persones en la norde de la Pilipinas.
Siclon Mangkhut no ia pasa direta tra Cebu, ma ia provoca pluves plu forte de monson, levante la risca de liscateras tra la pais.
La lisca en Cebu ia sutrae un parte grande de un colina sur cual persones ia construi sua casas tempora.
Un abitor ia descrive la esperia: "Lo ia es como un trematera e on ia ave un sona tonante, puminte, forte. Tota de nos ia sorti corente." El ia ajunta ce sua sposo e enfantes ia survive la desastre. "Multe de nosa visinas ia es criante e xiliante per aida. Alga ia vole aida la colpadas, ma tro multe tera ia covre la casas, incluinte lo de mea frate."
Plu ca 600 familias de Naga ia pasa la note pasada en sentros de evacua.
Un polisior xef ia dise ce on ia susede salva alga persones de en casas enterada. "On ia ave sinias de vive. Alga de los ia susede envia mesajetas." On espera ce otra persones es trapida en cavetas de aira en la detrito.
Plu ca 20 casas ia es afetada, a la borda de Naga. Los ia es prosima a un escaveria pasada de calcario, cual ia destabli cisa la colina supra la viletas. Autoriosas local ia identifia ja la loca como riscosa per lisca.
En la plu temprana de esta semana, la Pilipinas ia sufri ance liscateras cual ia mata a la min 32 persones en Itogon, un vila de mineria en la provinse Benguet. Un grupo de persones ia fuji de la siclon a un refujeria en un colina, ma la colina ia colasa.
@T Un ministro nijerian resinia sur un documento falsa
@L aora_oji/2018/un_ministro_nijerian_resinia_sur_un_documento_falsa
====== Un ministro nijerian resinia sur un documento falsa ======
16 setembre 2018
La ministro finansial de Nijeria ia resinia pos alegas ce el ia usa un documento falsida per evita sua obliga de partisipa per un anio en un scema de servi nasional joven.
Kemi Adeosun, ci ia abita en la Rena Unida asta la eda de 34 anios, ia dise ce on ia informa el ce el es esentada car el ave plu ca 30 anios.
La bancor investal pasada ia dise ce on ia dona a el un documento sur cual el ia crede ce lo es autentica. Ma un investiga interna ia mostra ce lo es falsida.
Sua resinia segue menses de discute en jornalisme local sur la veria de sua documento de la Corpo Nasional de Servi Joven. Inisial, el no ia comenta sur la alega, provocante critica de sua oposores. Ma en un declara formal, el ia dise ce el senti obligada a resinia pos la publici de la resulta de la investiga.
La rol de ministro de finansia ia es asiniada a Adesoun par presidente Muhammadu Buhari en 2015. Sua politica xef ia es un atenta de boni la colie de impostas e enforsa regulas sur malmaneja par departes governal.
Aora la ministro per bujeta e projeta nasional, Zainab Ahmed, va supravide la ministreria de finansia.
Studiantes de universia en Nijeria debe fa un anio de servi nasional pos gradua, per serti ce graduadas contribui a la developa de la pais. On envia Membros de la Corpo a statos ultra sua loca de nase, per forti la senti de unia nasional.
Graduadas nijerian no pote labora per la governa o fa multe postos privata asta sua completi de la anio obligante.
@T Un mision xines a la lado distante de la Luna
@L aora_oji/2018/un_mision_xines_a_la_lado_distante_de_la_luna
====== Un mision xines a la lado distante de la Luna ======
8 desembre 2018
Xina ia lansa la mision prima per atera un veculo robotal a la lado distante de la Luna.
La mision Chang'e 4 va atenta pone un aterador e vagador sur la crater Von Kármán, locada a la lado de la Luna cual fasa nunca la Tera. Lo abri la via de retrae samples de roca e solo a la Tera.
La atera no va aveni asta la temprana de janero, cuando la veculo va desende usante puxadores.
La crater Von Kármán interesa siensistes car lo es situada en la cualia la plu vea e grande sur la Luna -- la Basin Polo Sude / Aitken, probable formida par la colpa de un asteroide enorme a miles de miliones de anios ante aora.
La ateradores va analise la jeolojia de la rejion e la composa de la roca e solo.
Par causa de un fenomeno nomida "jira sincrona", la Tera vide sempre la mesma lado de la Luna. Esta aveni car la Luna pasa esata la mesma tempo en jira sur sua propre ase como en completi un orbita de la Tera.
An si on refere comun a la otra lado como "la lado oscur", acel parte de la Luna es ance luminada par la Sol e ave la mesma fases como la lado cual fasa nos. "Oscur" asi vole dise mera "nonvideda".
La lado distante aspeta alga diferente de la lado prosima. Lo ave un crosta plu densa e vea, cual conteni plu crateres. On ave ance poca de la "mares" de basaltos oscur, creada par flues de lava, cual es tan evidente sur la lado prosima.
Cisa la colpa potiosa cual la crea la Basin Polo Sude / Aitken ia penetra la crosta, ateninte la litosfera de la Luna. La strumentos en Chang'e 4 pote esamina esce esta ia aveni, clarinte un parte de la istoria temprana de nosa sola satelite.
La mision va analise ance la "radioambiente" a la lado distante, en un esperimenta desiniada per fa la labora fundal per la crea de telescopios futur de radioastronomia a acel lado, do los ta es protejeda de la ruido de la Tera.
La aterador nonmovente va porta un contenador de tre cilogrames, con semes de patata e arabis, per un esperimenta biolojial. Esta esperimenta de "minibiosfera lunal" ia es desiniada par 28 universias xines.
La desinia de la veculo es simil a lo de sua presedente, Chang'e 3, cual ia envia veculos aterante a la rejion Mar de Pluves en 2013. Ma lo ave alga alteras importante.
La aterador porta du cameras: un esperimenta sur radia, construida en Deutxland, e un spetrometre cual va fa la oservas radioastronomial de frecuentia basa.
La vagador va porta un camera panoramal, un radar per sonda su la surfas, un spetrometre imajinte per identifia minerales, e un esperimenta per esamina la interata entre la venta solal (un flue de particulas enerjida de la Sol) e la surfas de la Luna.
La mision parteni a un program xines plu grande de esplora lunal. La misiones Chang'e prima e du ia es desiniada per colie datos en orbita, e la numeros tre e cuatro ia es construida per opera sur la surfas.
@T Un misionor matada par un tribu noncontatada
@L aora_oji/2018/un_misionor_matada_par_un_tribu_noncontatada
====== Un misionor matada par un tribu noncontatada ======
27 novembre 2018
Ofisiores barati ia pospone sua laboras per retrae la corpo de un misionor esuan ci ia es matada par un tribu perilida en la Isolas Andaman en la semana pasada.
John Allen Chau, de 27 anios, ia es matada par flexas cuando el ia atera sur la Isola Sentinel Norde a 17 novembre. El ia desira converti la tribu a cristianisme. Sua corpo es ancora sur la isola, e atentas per retrae lo ia fali.
La tribu sentineles es un popla noncontatada ci reata violente a stranjeres. Los es protejeda par lege.
Un ofisior anonim ia clari la deside de para la xerca per la corpo, disente ce la taxe "es tro riscosa" e car "protestas" ia es fada par grupos diversa.
Ier, Survive Internasional, un organiza promovente diretos, ia recomenda para la xerca car lo es "noncredable perilosa" per e la sentineleses e la ofisiores. Sua dirijor ia comenta: "Tal laboras en casos simil en la pasada ia fini con ce la sentineleses atenta defende violente sua isola."
Ance antropolojistes e rexercores barati ia espresa sua ansia ce ecipos visitante la isola ta aumenta cisa la problem.
En la dias la plu resente, polisiores ia usa un barco e un elicotor per veni prosima a la isola, pos la rejistra de un caso de omiside cual los debe investiga. Ma car la tribu es protejeda, la polisia no sabe un bon modo de continua.
En 2006, la sentineleses ia mata du pexores barati ci ia atenta atera furtiva sur la isola. Pos alga atentas, la governa ia pote retrae sola un de la corpos. La otra resta ala enterada.
La atenta la plu resente per retrae la corpo de Chau ia aveni a la fini de semana, cuando un barco polisial ia viaja asta sirca 400 metres de la costa. Usante binoculos, polisiores ia vide omes de la tribu sur la plaia, armada con arcos e flexas. La barco ia parti.
Ses pexores ci ia transporta Chau a la isola ia es arestada.
On proibi an la prosimi par stranjeres a la isola, per proteje la popla abitante e sua modo de vive. Car la popla es completa isolida, contatas con la mundo esterna ta perili los, car lo es probable ce los ave no imunia contra maladias comun como la gripe e la morbilio.
@T Un museo brasilera es perdeda en flamas
@L aora_oji/2018/un_museo_brasilera_es_perdeda_en_flamas
====== Un museo brasilera es perdeda en flamas ======
3 setembre 2018
Un focon ia ruina la Museo Nasional de Brasil en Rio de Janeiro, la instituida siensal la plu vea en la pais. On teme ce la plu de sua colie, incluinte fosiles, obras de arte, e documentos de tra la sentenios es destruida.
Pompores labora ancora per estingui la flamas. On no ia reporta feris.
La museo, cual ia funsiona en pasada como la casa de la familia real portuges, ia selebra sua aniversario 200 en esta anio.
La focon ia comensa ier en la sera, pos la clui de la compleso per la dia. On no sabe la causa. Imajes airal, difusada en televisa brasilera, ia mostra la estende de la flamas tra la construida.
Entre la 20 milion ojetos contenida ia es trovadas arceolojial, fosiles, e la meteorite la plu grande descovreda en Brasil. La colie de istoria natural ia inclui osos de dinosauros e la sceleto de un fem nomida Luzia, cual, con eda de 12 mil anios, ia es la sceleto la plu vea conoseda en la Americas.
La construida ia conteni ance documentos istorial pertinente a la sentenios entre la ariva de la portugeses en la desenio de 1500 e la declara de un republica en 1889. Arte e ojetos de Egipte antica e de la eda grecoroman ia es ance esibida en la museo.
La familia real ia move a la construida en 1808, cuando la pais ia fronti un menasa de invade par Napoleon.
La dirijor de la museo ia descrive la focon como "un trajedia cultural".
En pasada, empleadas ia espresa ja sua ansia sur reduis finansial e la state gastada de la construida. Aora, un ia dise ce manejores ia esperia "difisiles enorme" en atenta securi finansia per recursos "sufisinte" per la palasio. Un otra ia esplica ce la construida ia ave solos de lenio, e ia conteni "multe cosas cual arde multe rapida", como documentos de paper.
La instituida ia es fundida en 1818 como la Museo Real, con intende de promove rexerca siensal par pone sua colie a la dispone de spesialistes.
@T Un nasionaliste serbsce gania un seja presidential
@L aora_oji/2018/un_nasionaliste_serbsce_gania_un_seja_presidential
====== Un nasionaliste serbsce gania un seja presidential ======
8 otobre 2018
En Bosnia e Hersegovina, Milorad Dodik, la xef nasionaliste de serbsces bosnian, ia gania la seja per sua comunia en la sistem de tre presidentes. Dodik, ci ave relatas prosima con Rusia, ia recomenda forte ce serbsces bosnian ta separa, disente ce la pais ia fali.
La partito xef de la bosniaces ia dise ce sua aspiror Šefik Džaferović va es sua representor. Votores corvatsce ia repone la democrata sosial sentriste Željko Komšić a sua seja presidential. 53% de votores ia partisipa ier.
La tempo ante la eleje ia es malida par maltratas e menasas etnical, a plu ca dudes anios pos la gera interna en Bosnia.
La pais es ancora divideda en du esentes: la Republica Serbsce e la Federa de Bosnia e Hersegovina. Sua presidentia coletiva de tre membros (corvatsce, bosniace e serbsce) ia es instituida como un parte de la acorda de pas en 1995 cual ia fini la gera en cual sento mil persones ia mori.
Dodik, ci gida la Republica Serbsce ja de 2006, ia reclama sua vinse en Banja Luka, un vila norde.
Par la sistem political complicada de Bosnia e Hersegovina, votores ia debe eleje sinco presidentes e des-cuatro ministros xef. Aspirores ia xerca entra a la governa sentral, composada de du salones parlamental e la presidentia tripartisan, como ance a la governas de la du esentes political.
@T Un naveta inversa sur Lago Victoria
@L aora_oji/2018/un_naveta_inversa_sur_lago_victoria
====== Un naveta inversa sur Lago Victoria ======
22 setembre 2018
A la min 136 persones ia mori pos la inversa de un naveta portante sentos de pasajores sur Lago Victoria en Tanzania. Multe persones manca, e on teme ce plu ca 200 persones ia afoca.
La naveta MV Nyerere ia inversa prosima a la isola Ukara en viaja de Bugorora. On crede ce la barco tro cargada ia desecuilibra cuando la fola ia move a un lado per permete la doci.
La opera de salva sur la lago la plu grande en Africa ia envolve sumerjores de la polisia e armada, como ance barcos privata peti e pexores local. Abitores de la rejion Mwanza teme oia la fortuna de sua relatadas ci ia viaja sur la barco a jovedi.
La motores de la naveta ia es resente recambiada pos cuando un parlamentor local ia cexa sur la presedentes.
La barco ia es capas de porta 100 persones, ma on reporta ce lo ia conteni un fola de plu ca 400 cuando lo ia inversa. A oto veses per dia, lo traversa entre la isolas Ukara e Ukwerewe, cual es prosima a Mwanza, la site du de la plu grandes de Tanzania.
La naveta ia es spesial folida car jovedi ia es la dia de mercato en Bugorora sur Ukerewe. Lo ia porta ance carga, incluinte sacos de semento e mais, cuando lo ia desecuilibra a sincodes metres de la costa.
On crede ce multe de la pasajores no ia pote nada. Un investiga ofisial va aveni pos la fini de la atentas de trova survivores.
@T Un nederlandes litiga per redui sua eda par 20 anios
@L aora_oji/2018/un_nederlandes_litiga_per_redui_sua_eda_par_20_anios
====== Un nederlandes litiga per redui sua eda par 20 anios ======
9 novembre 2018
Un instruor nederlandes de positivia ia comensa un batalia legal per cambia sua eda per aumenta sua posibles de cortea.
Emile Ratelband, ci ia nase a 11 marto 1949 e ave 69 anios, vole move sua data de nase a 11 marto 1969. El descrive la cambia como simil a la autoidentifia de persones como transjenero.
Un corte local en la site Arnhem en la este de Nederland va judi la caso ante la fini de cuatro semanas. Ma la ofisiores duta, credente on ave no mecanicisme legal cual permete ce un person cambia sua data de nase.
Un de la judores ia demanda como on ta trata la dudes anios cual Ratelband desira sutrae. "Ci tua jenitores ia cura alora? Ci ia es acel xico peti?"
Ratelband dise ce otras es prejudosa contra el par causa de sua eda, e ce esta afeta sua posibles de emplea e sua susede en Tinder, la ap de cortea. Plu, el dise ce, longo sua dotores, el ave la corpo de un om de 45 anios. El descrive se an como un "dio joven".
El dise ce el no teme senese ma desira masimi sua vive per un tempo tan longa como posible. El dise ance ce el va renunsia sua pension si el susede cambia sua data de nase.
La constitui de Nederland proibi clar la prejudi contra emplea par causa de eda.
Ratelband, un famosa en medias publica e un guru motivante, ia converti a budisme en la parte plu temprana de esta anio. El es un ensenior de programi neurolinguistical, e ia vosi la carater Vladimir Trunkov en la varia nederlandes de la filma de Pixar Autos 2 en 2011.
@T Un ofisial enebriada retarda trenes barati
@L aora_oji/2018/un_ofisial_enebriada_retarda_trenes_barati
====== Un ofisial enebriada retarda trenes barati ======
9 julio 2018
En la stato Uttar Pradesh en Barat norde, alga trenes ia es retardada cuando la xef de stasion ia deveni enebriada e ia adormi en sua labora.
Deep Singh no ia responde a telefonis repeteda de ofisiores, tal ce los ia freta a la stasion de Murshadpur. Los ia trova ce el dormi en sua ofisia con botelas vacua de distilada sur la solo.
Un esamina medical ia mostra un cuantia grande de alcol en sua sangue. On ia comanda un investiga.
"El ia es tota enebriada e apena capas de pasea," un ofisior major de ferovia ia dise, ajuntante ce la aveni ia es "multe grave" e va es investigada.
Multe trenes de distantia longa ia debe para car la stasion no ia mostra un sinial verde. La cuantia de trenes cual pasa tra la stasion de Murshadpur en cada dia es alta. Tra la pais, plu ca 22 milion baratis viaja dial en sirca 9000 trenes.
Tal avenis no es sin presedente en Barat. En April, on ia suspende la emplea de alga persones en la stato Orissa cuando 22 vagones ia deveni desfisada de un tren e ia rapidi a retro tra 11 cilometres.
E en novembre de la anio pasada, un grupo de cultivores veliante ia descovre ce la tren en cual los viaja ia vade tra 160 cilometres en dirije noncoreta en la note.
@T Un om japanes ia caji sua fio tra 20 anios
@L aora_oji/2018/un_om_japanes_ia_caji_sua_fio_tra_20_anios
====== Un om japanes ia caji sua fio tra 20 anios ======
8 april 2018
La polisia japanes ia aresta un om de 73 anios ci los suspeta de teni sua fio en un caje de lenio tra plu ca 20 anios.
Yoshitane Yamasaki ia dise ce el ia enclui sua fio, ci ave aora 42 anios, car el ia sufri problemes mental e ia es violente a veses.
La caje ia ave sola un metre de altia e du metres de largia, e ia es situada en un cabana a lado de la la casa de Yamasaki en la site Sanda.
Aora la fio sufri de un dorso curvida, e es curada par autoriosas, en un loca de aida sosial en Japan ueste, de janero.
Un visita par un ofisior de site a la casa de Yamasaki ia atrae la atende de autoriosas a la caje. Investigores crede ce Yamasaki ia comensa restrinje sua fio de la eda de 16, cuando el ia comensa "malcondui".
Per la presente, la polisia ia fa no plu ca aresta la jubilor per caji sua fio per 36 oras a 18 janero.
On reporta ce Yamasaki ia aseta la alegas, disente ce el ia nuri sua fio a cada dia e ia permete el a bani en cada dia du.
@T Un orangutan multe vea mori en Australia
@L aora_oji/2018/un_orangutan_multe_vea_mori_en_australia
====== Un orangutan multe vea mori en Australia ======
19 junio 2018
La orangutan sumatran la plu vea conoseda ia mori en un zo australian con 62 anios, lasante 54 desendentes.
Puan, descriveda como "la vea dama grande" de la zo de Perth, ia es eutanasiada ier par causa de complicas relatada con sua eda. El ia es a la zo de 1968, e ia es ofisial reconoseda par Recordos Mundal Guinness como la plu vea de sua spesie en 2016.
Orangutanes sumatran ateni rara la eda de 50 anios, estra en zos, e los es multe perilida.
On crede ce Puan ia nase en un jungla en Sumatra, Indonesia, en 1956. La zo ia dise ce el ia lasa "un lega noncredable" de 11 enfantes e 54 desendentes en la SUA, Europa e otra partes.
Holly Thompson, supravidor de primates a Perth, ia dise: "Sua jenetica representa cuasi 10% de la popla zolojial global. El ia fa tan multe per la colonia en la zo de Perth e per la survive de sua spesie."
On ia relasa alga de la desendentes de Puan a savaje en Sumatra. Sola sirca 14 600 orangutanes sumatran resta.
Martina Hart, la atendor xef de Puan ia scrive un anunsia de mori, publicida oji en la jornal La Australian Ueste: "Tra la anios, la siles de Puan ia grisi, sua moves ia lenti e sua mente ia comensa vaga. Ma el ia resta la madron, la dama cuieta e diniosa ci el ia es sempre."
@T Un parario inonda un vileta lau
@L aora_oji/2018/un_parario_inonda_un_vileta_lau
====== Un parario inonda un vileta lau ======
25 julio 2018
En Lau, on freta per trova survivores pos la colasa de un parario en la tarda de lundi. La colasa ia inonda alga viletas e ia mata a la min dudes persones. A la min sento persones manca ancora, e miles ia perde sua casas.
La parario ia es un parte de un projeta de enerjia idroeletrical cual envolve companias de Lau, Tai e Tehan (Corea Sude).
La autoriosas en la provinse Attapeu usa elicotores e barcos per atenta evacua viletanes trapida. Los ia apela a organizas governal e a otra comunias per furni aida como vestes, comedas, acua bevable e medisin.
Videos mostra survivores folida sur la tetos de sua casas sumerjida, o teninte enfantes e posesedas en cuando los vada tra acua.
90% de la parario ia es ja completa, e on ia intende comensa opera comersial lo en 2019.
En anios resente, Lau ia investi forte a potia idroeletrical, cual composa sirca 30% de sua esportadas. La governa intende dupli la produi de enerjia ante 2020, per deveni "la pila de Asia sude-este". Ma grupos averti sur la efeto de la projeta a la ambiente e a la nasiones cual la rio suporta.
@T Un parocian espaniol malfa un restora de scultas
@L aora_oji/2018/un_parocian_espaniol_malfa_un_restora_de_scultas
====== Un parocian espaniol malfa un restora de scultas ======
9 setembre 2018
Un parocian espaniol ia repinti un colie de scultas de la sentenio 15 en colores xiliante, atraente burlas tra la pais.
En un de la scultetas de lenio, cual ia es nonpintida a ante, Jesus porta aora un roba briliante verde, e Maria ave un tela de testa e linioio de ros briliante. Un otra sculta mostra San Pedro, aora vestida en roja intensa.
Los es situada en un eglesa en un vileta en la rejion Asturias en Espania norde.
Un de la 28 abitores de El Ranadoiro, María Luisa Menéndez, ia reseta la permete de la prete local per pinti la scultetas. El ia comenta: "Me no es un [depintor] profesal, ma me ia gusta sempre lo, e la figures ia nesesa vera es pintida. Donce me ia pinti los a mea capasia, con la colores cual ia aspeta bon a me, e la visinas ia gusta lo."
Ofisiores de la rejion ia es min plaseda.
En junio on ia critica un eglesa en Estella, un vila norde, cuando lo ia emplea un ensenior de arte e artisania per refresci un sculta de lenio de San Jorj de la sentenio 16. La geror ia es vera mutada, ganiante un fas ros e armur de colores briliante. Alga comentores ia compara lo a Tintin, un carater de cartunes.
Ma entretempo, un restora malfada de un fresco en 2012 ia deveni mesma un atrae major, tirante miles de visitores a la vila Borja, ance en Espania norde. Ecce Homo par Elías García Martínez ia es vidable en un eglesa prosima a Zaragoza tra plu ca sento anios, mostrante Jesus en la corona de spinas.
La fresco ia dejenera gradal par causa de umidia, asta cuando un parocian vea ia atenta boni lo par sua brosa. La resulta aspeta simil a un simia.
@T Un pasajor coler causa ce un bus cade en un rio
@L aora_oji/2018/un_pasajor_coler_causa_ce_un_bus_cade_en_un_rio
====== Un pasajor coler causa ce un bus cade en un rio ======
2 novembre 2018
Video de securia filmada en un bus cual ia cade en un rio en Xina ia revela ce la gidor ia veni de combate un pasajor.
La bus ia cade tra 50 metres de un ponte supra la Rio Yangtze en Chonqging a soldi. A la min 13 persones ia mori e du otras manca.
Reportas temprana ia dise ce la bus ia devia per evita un veculo prosiminte. Ma la metraje nova mostra ce la gidor ia retalia pos es bateda par un pasajor. La bus, viajante con rapidia, ia verje alora a la banda oposada e ia rompe la paradores de securia.
La polisia ia declara ce la combate ia causa la cade.
La pasajor, identifiada como un fem de 48 anios con nom familial Liu, ia es coler ce la bus no ia pausa a sua parabus. Cuando la gidor, nomida Ran, ia refusa para per lasa ce el desembarca, la fem ia colpa el con sua telefoneta.
Un opera enorme de salva ia es fada, usante ecipos de sumerjores e desuples de barcos e grus. Ma on ia reporta no survivores. A la note de mercurdi, la ruina de la bus ia es tirada de 71 metres de profondia en la rio.
La asidente, sur un ponte bon mantenida e relativa cuieta, ia xoca Xina. La plu de comentas oji en redes sosial culpa la pasajor, ma alga persones critica ance la gidor per sua reata.
@T Un pasea tra Barat per remente Modi
@L aora_oji/2018/un_pasea_tra_barat_per_remente_modi
====== Un pasea tra Barat per remente Modi ======
18 junio 2018
Un om barati ci ia pasea tra 1350 cilometres, per asentua "un promete nonrealida" par la ministro xef, ia recomensa sua viaja pos un reposa corta en ospital.
Muktikant Biswal ia intende pasea de la stato este Orissa asta la capital Delhi en la norde. El ia es ospitalida en Agra, a 218 cilometres de sua destina.
Biswal ia dise ce el vole "remente" la ministro xef sur sua promete de renovi un ospital en sua stato. El ia comensa sua pasea a 16 april, con la bandera barati en mano, e tra la temperatur sempre plu altinte de estate.
La ministro xef Narendra Modi ia dise en 2015 ce on va converti la ospital a "un compleso de spesialia eselente", simil a la Instituida de Siensas Medical de Tota Barat en Delhi.
Biswal is dise ce el vole encontra Modi e demanda ce el reali sua promete de renovi la ospital jeneral de Ispat. "Me no sabe esce la ministro xef va encontra me o no," el ia clari. "Si el no va encontra me, me va fa un juna."
Modi no ia reata a Biswal, de ci sua raconta ia deveni bon conoseda pos un tuita suportante par Rahul Gandhi, la xef de la partito xef oposante de la pais.
Biswal ia dise ce el es felis ce Gandhi ia tuita sur sua pasea con promete de aida, ma el no sabe la detalias de la modo de aida. On previde ce el va ariva en Delhi en la parte plu tarda de esta semana.
@T Un perde grande per un partito aliada con Merkel
@L aora_oji/2018/un_perde_grande_per_un_partito_aliada_con_merkel
====== Un perde grande per un partito aliada con Merkel ======
15 otobre 2018
En Deutxland, la resultas inisial de un eleje governal en Baiern sujesta ce un partito liada con lo de Angela Merkel ia sufri un perde grande. La Uni Sosial Cristian de Baiern, aliada con la Uni Democrata Cristian nasional cual canselor Merkel gida, va perde probable sua majoria asoluta en la parlamento nasional.
La Partito Verde va asende a la loca du, e la Alternativa per Deutxland, cual ia campania contra la aseta de migrores, va entra probable a la parlamento a la ves prima.
La Uni Sosial Cristian (USC) es cuasi la sola partito governante de Baiern de pos 1957. Ma sua suporta ia diminui con la polali de opinas sur tal temas como la migra.
La xef de la partito, Horst Seehofer, ia dise ce lo es "no un bon dia", ma ia ajunta ce lo representa "sola un lado de la medalia" car la vota dona "un autoria clar" cual permete ce la USC formi un governa nova.
La resultas ofisial inisial ia mostra ce la USC ia gania sirca 37% de la votas, min par 10 persentos ca a cuatro anios ante aora. La Verdes, ci es sinistriste e favore la aseta de migrores, ia gania pico min ca 18%. La Alternativa per Deutxland ia fini en la loca cuatro con sirca 10% de la votas, pos un coletiva de aspirores nondependente, conoseda como la Votores Libre.
La aliadas nasional de Merkel, la Democratas Sosial sentriste-sinistriste, ia fini con min ca 10%, la dui de sua cuantia presedente. Un rumor sujesta ce lo va estrae se de la governa federal deutx per atenta survive como un partito. Sua xef, Andrea Nahles, ia culpa disputas interna per sua mal resulta en Baiern.
@T Un ponte de autovia colasa en Italia
@L aora_oji/2018/un_ponte_de_autovia_colasa_en_italia
====== Un ponte de autovia colasa en Italia ======
15 agosto 2018
En la site Genoa en Italia norde-ueste, on continua xerca survivores pos la colasa dramosa de un ponte de autovia.
A la min 35 persones ia mori cuando desuples de veculos ia cade tra 45 metres. La colasa ia feri ance sirca 16 persones, e on estima ce entre cuatro e des-du persones manca.
Sirca 250 pompores de tota Italia partisipa en la xerca, usante canes detetante e aparatos de trepa. On ia evacua plu ca 400 persones, temente ce otra partes de la ponte va cade.
La colasa ia aveni en un pluve deluvial. Sua causa no es clar, ma on ia fa ja demandas sur la securia de la strutur. Matteo Salvini, la ministro de internas, ia promete puni cualcun culpable per la cade.
La Ponte Morandi, construida en la desenio de 1960, sta sur la autovia A10, un via importante per trafica de benes de portos local. La autovia servi ance la Riviera Italian e la costa sude de Frans.
Pompores atenta abri fesures peti per trova cualcun cisa trapida en un veculo. On crede ce alga persones vive ancora, ma tre enfantes es entre la mores.
Entre 30 e 35 autos e tre veculos pesosa ia es sur la ponte cuando lo ia colasa. Un tore enorme e partes de la ponte mesma ia cade sur linias de ferovia, un rio e un beneria.
@T Un problem de conserva corpos mor en Mexico
@L aora_oji/2018/un_problem_de_conserva_corpos_mor_en_mexico
====== Un problem de conserva corpos mor en Mexico ======
18 setembre 2018
En la stato Jalisco en la ueste de Mexico, abitores ia cexa sur la odor de un vagon frida cual conteni a la min 100 corpos mor.
La autoriosas local ia dise ier ce los atenta move la contenador, cual los ia lua cuando morerias en la site Guadalajara ia deveni plen.
Un abitor ia comenta: "Nos ave multe enfantes en esta visineria. Lo ta pote maladi tota de nos."
Leges en Mexico preveni ce on seni corpos relatada con crimin violente. On xerca un solve per la problem de conserva corpos pos un aumenta resente de violentia.
La xef de la unia de investigores forense de Jalisco ia dise: "Nos ia usa ja tota la locas de semetero do nos ia pote entera los." El ia ajunta ce on prepara un compleso sur cual on previde ce lo va conserva 800 corpos.
A ante, la vagon frida ia es parcida a un beneria a la borda de Guadalajara. Pos du semanas, la abitores ia comensa cexa sur un mal odor e ia dise ce la contenador atrae moscas.
On ia move lo a un peso vacua en la suburbe Tlajomulco de Zúñiga, ma la abitores ala ia comensa protesta a la fini de semana.
Mexico ia sufri un aumenta de matas violente en anios resente. Plu ca 200 mil persones ia es matada o ia desapare de pos desembre 2006, cuando la governa mexican ia declara un gera contra crimin organizada.
La statistica ofisial sujesta ce Mexico ia esperia sua anio la plu violente en 2017, con plu ca 25 mil omisides. Esta es la cuantia anial la plu alta pos la comensa de rejistras moderna. Crimin organizada ia representa cuasi tre cuatris de acel matas.
@T Un proibi de focos artal a la Isolas Galapagos
@L aora_oji/2018/un_proibi_de_focos_artal_a_la_isolas_galapagos
====== Un proibi de focos artal a la Isolas Galapagos ======
29 desembre 2018
Sur la Isolas Galapagos, on ia proibi la vende e usa de focos artal, per proteje la animales unica de la arcipelago. Focos cual produi lus sin sona es escluida de la proibi.
Conservores dise ce animales ia sufri de rapidias altida de cor, trema e ansia pos avenis pirotecnical.
Miles de persones visita la isolas en cada anio, atraeda par sua biodiversia e ambiente noncontaminada. La isolas es situada a sirca mil cilometres de la costa xef de Ecuador.
La autoriosas ia dise ance ce focos artal causa multe feris per anio, spesial en enfantes.
La campania contra pirotecnicales ia comensa en 2017. La regula nova proibi transporta los a la isolas e vende o usa ala los.
On ave un presa cresente a la governa ecuadoran afin lo fa plu per proteje sua ecosistemes sensosa. Plasticas de un sola usa es ance proibida sur la isolas, cual ave un popla de 25 mil persones.
La spesies nativa de la Isolas Galapagos, incluinte iguanas e tortugas, ia fa un rol major en la developa de la Teoria de Evolui par Charles Darwin.
@T Un protesta par tradisionalistes en Corvatsca
@L aora_oji/2018/un_protesta_par_tradisionalistes_en_corvatsca
====== Un protesta par tradisionalistes en Corvatsca ======
25 marto 2018
Miles de corvatsces ia asembla en la sentro de Zagreb contra un acorda european desiniada per proteje femes, protestante ce lo menasa valuas tradisional.
Los cexa ce la Acorda de Istanbul va legali la sposi omosesal e va boni diretos per persones transjenero.
Grupos de diretos fema ia fa un contraprotesta longo la via de la prosegue, disente ce sondas sujesta ce du tris de corvatsces suporta la acorda, an con la asende de la destra estrema pos la junta de Corvatsca a la Uni European en 2013.
Parlamento ancora no ia validi la acorda, ma la governa destra sentriste ia aproba lo, provocante disentis de en se mesma, de grupos conservaliste, e de la Eglesa Catolica.
Multe de la protestores suporta combate violentia de casa e violentia contra femes, ma dise ce la defini de jenero en la acorda es tro fluente, abrinte la via per un reconose plu grande de persones transesal e transjenero.
La acorda defini jenero como "la roles, conduis, atas e cualias sosial construida cual un sosia spesifada regarda como conveninte per femes e omes".
Organizas eglesal ia esije un referendo sur la validi, an si sondas indica ce la plu de corvatsces suporta la acorda. Serbia, Bosnia e Slovenia ia validi ja lo, ma Balgaria e Slovensco ia rejeta lo.
@T Un recordo mundal nova de maraton
@L aora_oji/2018/un_recordo_mundal_nova_de_maraton
====== Un recordo mundal nova de maraton ======
17 setembre 2018
Eliud Kipchoge ia rompe un recordo mundal par completi un maraton en du oras, un minuto e 39 secondos en Berlin.
La atleta cenian, ci ave 33 anios, ia suprapasa la recordo presente par cuasi 80 secondos. Acel recordo ia es fada par un otra cenian, Dennis Kimetto, ci ia core la 42 195 cilometres en 2 oras, 2 minutos e 57 secondos en la mesma site en 2014.
"Me ave no parolas per descrive esta dia," Kipchoge ia dise. "Me es vera grasiosa, felis de rompe la recordo mundal."
La corsa de femes ia es vinseda par Gladys Cherono de Cenia en 2 oras, 18 minutos e 11 secondos.
Kipchoge ia gania la Maraton de London a la ves tre en la parte plu temprana de esta anio, e el es la campion olimpial de maraton.
"Lo ia es difisil," el ia comenta. "Me ia core mea propre corsa. Me ia fida mea program e mea instruores. Acel ia puxa me en la cilometres final."
En 2017, Kipchoge ia core an plu rapida, falinte completi la maraton prima de min ca du oras par sola 26 secondos. Car on ia usa alora precorsores ci ia pote entra a e sorti de la core, on no ia reconose acel cronometri como un recordo.
@T Un redui de emetes en barconi global
@L aora_oji/2018/un_redui_de_emetes_en_barconi_global
====== Un redui de emetes en barconi global ======
14 april 2018
A la ves prima, la industria global de barconi ia acorda redui sua emetes de gases invernerial, pos un semana de discutes a la Organiza Maral Internasional (OMI) en London.
Transportas par barcon ia es escluida de acordas climal presedente, ma aora la emetes va es reduida par 50% ante 2050 en compara con la nivel de 2008.
La industria de barcones jenera sirca la mesma cuantia de gas invernerial como Deutxland. Si on ta conta lo como un nasion, lo ta es la emetor ses de la plu grandes de mundo. Como avioni, lo ia es escluida de negosias de clima car lo es un campo internasional: la Protocol de Cioto e la Acorda de Paris ia envolve prometes nasional per redui gases invernerial.
La SUA, Arabia Saudi, Brasil e alga otra paises no ia desira cualce gol per redui emetes de barconi. Ma la Uni European e statos de isola peti ia presa per un redui de entre 70% e 100%. La acorda de 50% es un compromete cual, en la opina de algas, es nonrealosa, an si otras dise ce lo es sufisinte forte.
Kitack Lim, la secretor jeneral de la OMI, ci ia preside la discutes, ia comenta: "Esta stratejia inisial no es un declara final ma un punto major de comensa."
La Isolas Majel, un nasion pico en la Mar Pasifica, ia abri la confere con un suplica. An si lo es la numero du de mundo par grandia de sua lista de barcones rejistrada, lo ia averti ce un nonreali de un redui profonda va menasa la survive de la pais contra la leva de nivel de mar par caldi global.
A la fini de la discutes, David Paul, ministro de ambiente majel, ia dise: "Ariva a esta punto ia es difisil, multe difisil. E lo ia envolve comprometes par tota paises, notable par nasiones de isola perilida como mea propre ci ia desira alga cosa multe multe plu aspirosa ca esta."
El ia ajunta: "Nos construi istoria. Si un pais como la Isolas Majel, un pais cual es multe nondefendable contra cambia climal -- e cual depende spesial sur barconi internasional -- pote aproba esta acorda, on ave no escusa credable per la nonpartisipa de cualce otra pais."
Laurent Parente, la ambasador de Vanuatu, un otra nasion de isolas pasifica, no ia es sasiada, ma ia espera ce la acorda va gida a un responde plu forte en la futur prosima.
Par contrasta, la xef de la delega SUA a la discutes, Jeffrey Lantz, ia clari ce sua pais oposa la acorda. "Nos no suporta la institui de un gol asoluta de reduis a esta tempo," el ia dise. "En ajunta, nos nota ce la ateni de reduis notable de emetes en la campo de barconi internasional va depende de inovas tecnolojial e de plu bonis en la nonperosia de enerjia."
Lantz ia repete ce la SUA, su presidente Donald Trump, ia anunsia sua retira de la Acorda de Paris sur cambia climal. El ia critica ance la modo en cual la OMI ia maneja la discutes, descrivente lo como "nonasetable e nonconveninte a esta organiza respetada".
Ma un majoria clar de la confere ia favore la redui.
Inovas rapida va es aora nesesada. Barcones va debe cisa opera plu lenta per usa min carburante. Desinias nova de barcones va es plu lisa, e motores va debe es min contaminante, cisa funsionante par potia de idrojen, par pilas, o an par la venta.
@T Un redui grande a la custa de petrolio
@L aora_oji/2018/un_redui_grande_a_la_custa_de_petrolio
====== Un redui grande a la custa de petrolio ======
12 julio 2018
La custa de petrolio ia redui multe ier cuando Libia ia dise ce lo va aumenta la furni, an si investores teme ce la tensa comersial va afeta la compra.
Petrolio Brent ia redui par 6,9% -- la cade la plu grande en plu ca du anios -- fininte a $73,40 per baril. Petrolio SUA ia cade par 5% a $70,38 per baril -- sua redui dial la plu grande en un anio.
Esta segue un reenerji tra menses cual ia leva la custa asta un de la niveles la plu alta en anios resente. Ma la custa de petrolio ia deveni volatil en la semanas resente, pos cuando la SUA ia anunsia ce lo va repone punis contra Iran, un produor major.
La vende ier ia comensa pos un anunsia par la Corpora Nasional de Petrolio de Libia ce lo va reabri cuatro terminas de esporta cual lo ia clui en la tarda de junio, impedinte la plu de la esflue de petrolio de la pais.
La redui de custa ia aveni an con un reporta par la governa SUA ce sua reservas de petrolio ia diminui par plu ca 12 milion bariles en la semana pasada e es aora plu basa par sirca 4% ca la promedia per esta parte de la anio.
Suhail Al-Mazrouei, la presidente de OPEP, ia dise ce volatilia en la custa de petrolio no es desirable: "Flutua no es bon, e nos no gusta vide multe flutua en la custas."
Economistes es ansiosa ce la crese de tensa comersial entre la SUA e Xina va dana la economia global, reduinte la compra.
A martedi, la SUA ia desveli un lista de $200 mil milion de produidas a cual on va ajunta un tarifa de 10%, provocante Xina a promete un contratatica. Esta ia segue la reali en la semana pasada de tarifas a $34 mil milion de la benes de cada de la du paises.
An si on no previde un resulta estrema mal de la tarifas, esta va pote cambia si la interbatalia continua. Xina ia es la importor la plu grande de petrolio en la anio pasada, segueda par la SUA.
@T Un referendo suiz bloci aposterias stranjer
@L aora_oji/2018/un_referendo_suiz_bloci_aposterias_stranjer
====== Un referendo suiz bloci aposterias stranjer ======
11 junio 2018
Votores en Suiz ia suporta forte un lege nova cual va bloci locas de rede stranjer de juas de fortuna. La Ata de Aposta ia gania la suporta de 72,9% de votores, an entre acusas ce lo representa un sensura enlinia.
La lege va deveni ativa en 2019 e va es un de la plu severes en Europa. Lo va permete la opera sola de casinos e aposterias autenticida en Suiz. La governa dise ce lo va aida contra apostamania.
Ambos salones de parlamento ia aseta ja la lege. Ma alga alas joven de partitos political diversa ia colie la 50 mil suscrives nesesada per fa un referendo en atenta de suverti lo.
La governa insiste ce la lege es esensal per enforsa regulas sever, como la bloci de apostamanicas conoseda, per aida contra la problem. On dise ce la lege va permete ance ce la governa imposta la revenus de aposta per finansia medias oposante.
Apostores en la pais spende sirca 250 milion frances suiz en cada anio en locas de rede stranjer e nonregulada. Ma campaniores dise ce la lege nova va custa an plu mone, car lo leva la limita de ganias impostable de mil frances suiz a milion.
Ante la vota, Luzian Franzini, copresidente de la grupo joven de la Partito Verde ia comenta ce la lege crea "un presedente multe perilosa". El ia refere a un "canion de jeneras" entre votores joven ci es coler sur la lege e la legores ci ia aseta lo. "Cisa los no ia comprende vera lo cual esta pote fa a la interede," el ia dise.
@T Un relijio pagan islansce va construi un zigurat
@L aora_oji/2018/un_relijio_pagan_islansce_va_construi_un_zigurat
====== Un relijio pagan islansce va construi un zigurat ======
2 junio 2018
En Island, membros de un promove relijial fundida sur credes antica sumer intende oteni un templo en la capital Reykjavík.
La zuistes -- ci parteni a un relijio pagan moderna derivada de lo de Sumer -- ia solisita un permete per construi un zigurat de du niveles como un sentro per sua congrega cresente.
Zuisme es un relijio relativa nova. Lo ia deveni ofisial rejistrada en Island en 2013, e plu ca 2800 persones es membros.
Sua xef, Águst Arnar Ágústsson, ia esplica ce la grupo ia desira sempre un loca de adora per sua seguores, ma par causa de la crese rapida de la promove en Island, la situa ia deveni plu presante. El ia dise ce la comunia nesesa spasio per rituos de nomi, sposi e adora jeneral, como ance per reunis de "bir e preas".
Zuisme es cisa atraente car sua membros no paia custas de parocia. En loca, on solisita ce zuistes rejistrada contribui a la reserva de zigurat, per aida construi e manteni la templo projetada.
La promove reclama ce sua sistem de crede es la plu vea de mundo, e es fundida sur la panteon sumer, reconosente An, Enlil, Enci e otra dios adorada en Mesopotamia antica.
An con sua popla cresente, zuisme es ancora distante de defia la relijios major par sua cuantia de membros. Plu ca 80% de islansces es rejistrada como cristianes, e plu ca 230 000 identifa se como membros de la Eglesa Luteran de Island. Zuistes representa 1% de la popla de la pais.
@T Un roceto Soiuz malfunsiona dramosa
@L aora_oji/2018/un_roceto_soiuz_malfunsiona_dramosa
====== Un roceto Soiuz malfunsiona dramosa ======
12 otobre 2018
En Rusia, on investiga la causa de un problem en un roceto aidante cual ia obliga un capsula Soiuz a fa un atera urjente direta pos sua lansa.
La du astronautas, Alexey Ovchinin de Rusia e Nick Hague de la SUA, ave bon sania. Los ia vade a un mision de ses menses en la Stasion Spasial Internasional cuando sua vola ia es abortada. Sua capsula ia separa, aterante a 400 cilometres de la loca de lansa.
La lansa ia pare vade bon, ma a sirca 90 secondos pos la comensa de la vola, NASA, la ajenteria spasial de la SUA, ia reporta un problem con la roceto aidante entre la sesiones prima e du.
En video direta difusada de la astronautas, los ia secute violente con la vibras causada par la malfunsiona. Pos sirca 114 secondos, la sistem de crise ia inisia se, separante de la roceto la capsula portante la ecipores.
La capsula ia comensa alora lo cual NASA ia nomi "un desende balistical", esposante la ecipores a un forte aseleral plu intensa ca en un atera normal. Usante paracades, la capsula ia atera sur la stepe cazac pos 34 minutos, a sentos de cilometres a norde-este de la lanseria a Baikonur.
On ia lansa direta un mision de salva. Ecipos en veculos multiterenal e paracadores en elicotores ia rapidi per trova la capsula, cual ia ariva prosima a la site Dzhezkazgan en Cazacstan.
Corta a pos, ambos ajenterias spasial ia reporta ce la astronautas es en bon sania. Fotos ia mostra la du omes sentante con suries sur un sofa, liada a monitores de rapidia de cor e presa sangual.
La ministro visxef de Rusia, Yuri Borisov, ia dise ce no plu misiones abitada va aveni "asta cuando nos crede ce la situa intera garantia la securia". El ia rejeta sujestas ce la fali de esta mision va dana la relata entre Rusia e la SUA, disente ce on reconose ce rocetos es "un industria de tecnolojia alta, liada a risca", ma el ia ajunta: "Nos serta no va asconde la razonas -- tal situas es noncomun."
La colabora spasial es un campo cual ia survive la relatas jeneral tensada entre la du paises. NASA paia ja per sejas en rocetos Soiuz per transporta sua astronautas a la Stasion Spasial Internasional (SSI) de pos la fini de la programa de la Naveta Spasial en 2011.
La ecipores ja en la SSI no va es afetada par la mision abortada, car los ave furnis sufisinte. Ma la tre persones -- un deutx, un rusce e un esuan -- va debe cisa resta en la stasion asta la anio veninte.
Roscosmos, la departe spasial de Rusia, ia comanda la institui de un comision governal per investiga la aveni, e on espeta ance un investiga criminal.
@T Un sacrifia antica de enfantes en Peru
@L aora_oji/2018/un_sacrifia_antica_de_enfantes_en_peru
====== Un sacrifia antica de enfantes en Peru ======
28 april 2018
Arceolojistes ia descovre la restantes de un sacrifia coletiva de enfantes cisa la plu grande en istoria. Plu ca 140 enfantes ia es sacrifiada a plu o min la mesma tempo en la rejion costal de la norde de Peru, a sirca 550 anios ante aora.
On ia fa la descovre prosima a la site Trujillo, a distantia corta de la sentro de la siviliza tximu antica. Plu ca 200 liamas ia es sacrifiada a lado de la enfantes -- de ci tota ia es matada en un sola aveni.
En 2011, la descovre prima de vitimes de sacrifia umana a la loca, nomida Huanchaquito-Las Llamas, ia trova la restantes de 40 vitimes e 74 liamas en la escava de un templo de 3500 anios.
La conta final de 140 enfantes, anunsiada en esta semana, mostra ce la vitimes ia ave entre 5 e 14 anios, la plu entre 8 e 12.
On sabe ce los ia es vitimes de sacrifia par causa de marcas de talia a la osos, incluinte la sterno. Ance multe costelas ia es danada, cisa indicante ce la cor ia es estraeda. En ajunta, multe de la enfantes ia es pintida con un pigmento briliante roja, fada de sinabar -- probable un parte de la rituo sacrifial.
Tota la liamas ia ave min ca 18 menses, e ia es enterada per fasa la Andes.
La escava ia furni ance un sujesta de la razona per la sacrifias. La strato de fango en cual la vitimes ia es enterada ia es cisa causada par deluvias en esta rejion seca, resultante de un aveni estrema de clima. Un tal aveni ta pote disturba pexerias maral e inonda la infrastrutur de canales cultival.
Par dati radiocarbonal de stofas descovreda a la loca, on crede ce la sacrifia ia aveni entre 1400 e 1450 de la eda presente. La tximus, ci ia adora un dio de luna, ia es concistada par la incas pos sola alga plu desenios. E pos 50 plua anios, la espanioles ia ariva en America Sude e ia concista la impero inca.
@T Un salutor faxiste es prisonida en Deutxland
@L aora_oji/2018/un_salutor_faxiste_es_prisonida_en_deutxland
====== Un salutor faxiste es prisonida en Deutxland ======
15 setembre 2018
Un corte deutx ia prisoni per sinco menses un om de 34 anios ci ia fa salutas faxiste en un protesta en Chemnitz, un site este. La om, un abitor de la site, ia es presente a un protesta grande par destristes estrema a 27 agosto, provocada par la coteli matante de un om deutx en un scaramuxa con migrores.
Sinias e simboles, incluinte salutas faxiste, es nonlegal en Deutxland.
A jovedi, la corte en Chemnitz ia dona un prisoni suspendeda de oto menses a un otra om, de 33 anios, ci ia fa ta salutas. On ia comanda ance ce el paia un multa de €2000.
Car la om ier prisonida ia ave ja un serie de otra condenas, incluinte per viole fisical, un puni suspendeda no ia es posible.
En Chemnitz, pos la coteli de Daniel H a 26 agosto, miles de persones ia fa un serie de protestas estrema destriste. Contraprotestas sinistriste ia aveni ance.
On ia deteni du refujadas -- un suri e un iraci -- en relata con la mata. La polisia xerca un suspetada tre, ci es ance un migror.
Deuxtland ia es scandalida par atacas e insultas raziste liada a la protestas en Chemnitz. Grupos estrema destriste, incluinte la partito oposante xef, es coler ce on permete ce plu ca milion refujadas ci ia ariva en Deutxland en 2015 e 2016 resta.
A mercurdi, canselor Angela Merkel ia dise a la parlamento ce "on ave no escusa o razona per xasa persones en modo enemin, per usa violentia e sloganes nazi, per mostra enemia a persones ci aspeta diferente, ci ave un restorante iudi, per atacas contra polisiores".
En la semana pasada, plu ca 60 mil persones ia es presente a un conserta sin custa en Chemnitz per protesta contra la destra estrema.
@T Un scola en Brasil gania un premio arcitetal
@L aora_oji/2018/un_scola_en_brasil_gania_un_premio_arcitetal
====== Un scola en Brasil gania un premio arcitetal ======
24 novembre 2018
Un scola abitada per enfantes nonvantajida en un parte distante e forestosa de Brasil ia gania la premio de esta anio per la construida nova la plu bon de mundo.
La compleso Vileta de Enfantes, cual casi 540 enfantes, ia reseta un premio internasional per eselentia en esta semana. Lo es situada en un cultiveria ensircada par foresta pluvosa en la stato Tocantins.
La construida es xef composada de lenio colida e conteni tre patios de jardines desiniada. La dormerias ensirca la jardines, e cada es distinguida par un panel de porte con un motif unica.
La salas es ventida con brices perforada, fabricada par mano en la compleso mesma, e los conteni mobilas spesial preparada. Un serie de scaleras de lenio scultada lia a la nivel alta de paserias e balcones, de do on pote regarda la patios e la compleso intera.
La judores de la premio ia loda la strutur per sua "eroisme umil". Lo ia es desiniada par Aleph Zero e Rosenbaum, du companias de arcitetores.
Gustavo Utrabo, ci labora a Aleph Zero, ia dise ce la construida "boni la cualia de vive de la enfantes". El ia ajunta: "Nos ia atenta crea un senti nova e un interprete contempora de la modos tradisional de construi en esta parte de Brasil."
@T Un siclon destrui multe en Japan
@L aora_oji/2018/un_siclon_destrui_multe_en_japan
====== Un siclon destrui multe en Japan ======
5 setembre 2018
A la min des persones ia es matada par Siclon Jebi, la tempesta la plu forte cual Japan ia esperia en 25 anios. Lo ia pasa tra la ueste de la pais, colpante sites major como Kyoto e Osaka e causante multe destrui.
Aviones, trenes e navetas ia es canselada, ma on ia susede evacua miles de pasajores trapida a la airoporto internasional de Osaka. En cuando la ventas lenti aora e move norde, on recomenda ce persones resta vijilante per inondas e liscas de tera.
La siclon ia feri 300 persones, cisa plu. A esta matina, on ia avisa la evacua de plu 1,2 milion persones. E a plu ca 30 mil persones on ia dona recomendas plu forte de evacua, ma ancora no en modo obligante.
Videos en redes sosial ia mostra ce la rota jigante con altia de 100 metres en Osaka ia jira rapida en la tempesta, an si lo ia es descomutada.
Plu ca du milion casas ia esperia perdes de eletrica en la tempesta, e scolas e companias en la rejion afetada ia resta cluida. On ia cansela cuasi 800 aviones, incluinte volas internasional a Nagoya e Osaka.
Oji, viajores a la airoporto Kansai en Osaka ia es transportada par barcos a un otra airoporto local. Asta tre mil persones ia deveni encaliada a Kansai, cual es construida sur un isola artifis, cuando un tancador ia colide con la ponte cual lia lo a la tera xef.
La atererias e suteras de la airoporto ia deveni inondada, e la compleso va resta cluida tra la intera de oji.
@T Un siclon sever en Uman
@L aora_oji/2018/un_siclon_sever_en_uman
====== Un siclon sever en Uman ======
26 maio 2018
Siclon Mekunu ia bate la sude de Uman con ventas e pluve forte, matante un xica de 12 anios e lasante tre otra persones ferida. La xica ia es puxada contra un mur par la venta.
La televisa nasional ia mostra areas grande de inonda en la provinses Dhofar e al-Wusta, con multe veculos sumerjida.
La siclon ia deveni plu intensa ier, ma es aora reduida: ofisiores dise ce lo perde plu fortia asta deveni mera un tempesta tropical.
Mekunu ia ariva a tera a ueste de Salalah, la site du de Uman, a un dia pos colpa Socotra, un isola iamani, do on reporta ce sete persones ia es matada, cisa plu.
Miles de abitores de partes costal de Dhofar e al-Wusta ia es moveda a refujerias cuando ventas de 170 cilometres per ora e pluves deluvial ia bate la rejion. Sirca 10 mil persones ia es evacuada de scolas e construidas governal, xef en Salalah.
Meteorolojistes ia averti sur deluvias subita, previdente ce Salalah pote esperia a la min 20 sentimetres de pluve -- la duple de la cuantia promedia per un anio intera. On ia recomenda ce persones resta en casa, e la airaporto de Salalah es cluida asta medianote a fini de oji.
La governa de Iaman ia declara la isola Socotra como un zona de desastre. La ministro de pexerias ia dise ce on ia reprende la corpos de sinco iamanis e du baratis, ma des-du baratis manca ancora.
Soldatos saudi ia es enviada a Socotra en la mense pasada. Un alia gidada par Arabia Saudi suporta la governa de Iaman en la gera interna de tre anios en acel pais.
@T Un siensiste altera la jenom de bebes
@L aora_oji/2018/un_siensiste_altera_la_jenom_de_bebes
====== Un siensiste altera la jenom de bebes ======
28 novembre 2018
Un siensiste xines, ci dise ce el ia crea la bebes prima de mundo ci es jenetical alterada, ia defende sua labora.
Parlante a un confere sur jenomes en Hongkong, He Jiankui ia dise ce el es "orgulosa" sur sua labora, ajuntante ce "un plu ensintia posible" es ja en sua grado temprana.
On no ia serti la reclama en modo nondependente. Multe siensistes ia condena la anunsia, e alga ia descrive la idea como monstrin. Tal laboras es proibida en la plu de paises.
La Universia Sude de Siensa e Tecnolojia en Shenzhen, do He labora, ia dise ce lo no ia conose la esiste de la projeta e va fa un investiga.
Plu temprana en esta semana, He ia anunsia ce el ia altera la ADN de embrios -- xicas jemelo -- per preveni ce los reseta VUI (la virus de imunodebilia umana). En un video, el reclama ce el ia elimina un jen nomida CCR5 per fa ce la xicas deveni plu capas de resiste la virus.
Sentos de siensistes xines ia suscrive ja un letera en redes sosial per condena la rexerca.
Oji, He ia parla publica a la ves prima pos la video. El ia revela ce la du xicas, nomida Lulu e Nana, "ia nase normal e sana". El ia dise ance ce on intende monitori la jemelos tra la 18 anios veninte.
El ia esplica ce oto duples, de padres seropositiva per VIU e madres seronegativa, ia suscrive volente per la esperimenta. Un duple ia sesa partisipa plu tarda. La siensiste mesma ia finansia inisial la esperimenta.
La altera de jenes ta aida cisa evita maladias eritable par sutrae o cambia codigos problemosa en embrios. Ma espertas averti ce interferes con la jenom de un embrio ta pote dana no sola la individua ma ance jeneras futur cual erita la cambias.
@T Un stajior de Google distribui un anunsia vacua
@L aora_oji/2018/un_stajior_de_google_distribui_un_anunsia_vacua
====== Un stajior de Google distribui un anunsia vacua ======
7 desembre 2018
A Google, un era en un eserse de instrui empleores ia causa la apare de un anunsia comersial falsa en un cuantia grande de apes e pajes de rede.
Un retangulo jala vacua ia es vidable en acel locas tra sirca 45 minutos a 4 desembre, ma sola per persones en la SUA e Australia.
La era ia aveni cuando stajiores ia aprende la sistem interna de Google per compra anunsias. Esta anunsia vacua ia es enviada car un stajior ia esede la intende e ia ajunta un comanda vera a la sistem.
La anunsia ia es ativida con taso de revenu multe plu alta ca cualce otra, e ia es dirijeda tra alga sistemes de otra companias, tal ateninte un popla vasta.
Google ia declara: "Direta cuando nos ia deveni consensa de esta era onesta, nos ia labora rapida per para la sirculi de la campanias." Lo ia ajunta ce lo va reali cualce paias cual publicores ia incore par causa de la era.
On no ia clari la custa esata de la era, ma un jornal ia divina ce lo va fa ce Google paia sirca $10 milion per sasia publicores e desmarania la situa. La compania ia dise ce lo va institui plu controlas per preveni un repete de la problem.
@T Un supraconta par la FBI de telefonetas securida
@L aora_oji/2018/un_supraconta_par_la_fbi_de_telefonetas_securida
====== Un supraconta par la FBI de telefonetas securida ======
24 maio 2018
En la Statos Unida de America, la FBI ia confesa ce lo ia supraestima la cuantia de telefonetas saisida cual sua tecnicistes no pote asede. En sua investigas de crimin, lo ia saisi entre 1000 e 2000 telefonetas cual resta securida, e no la 7800 cual lo ia anunsia a ante.
Lo ia culpa un defeto de computador per sua conta de alga aparatos a plu ca un ves.
En la pasada, la ajenteria ia cexa ce medias de securia de Apple e otra fabricores impedi sua capasia de investiga.
La caso la plu conoseda veni de febrero 2016, cuando la FBI ia vole asede la iPhone de un de la du fusilores ci ia ataca un sentro comunial en la site San Bernardino en California.
Apple ia es presada par la FBI afin iPhones securida ta deveni asedable par ajenterias anticriminal per preveni ce los deveni "oscur". "Oscuria" refere a un situa en cual un ajenteria teni un aparato ma no pote asede atestas en lo, an si lo es legal permeteda a fa esta.
La caso ia es abandonada cuando la FBI ia reseta la codigo de clave de un fonte nonidentifiada.
An con la embarasa posible, on previde ce la FBI no va sesa presa companias tecnolojial a fa ce sua programes deveni plu asedable. En un declara, lo ia dise: "La FBI va continua xasa un solve cual serti ce enforsores de lege pote asede atestas de ativia criminal con autoria legal conveninte."
@T Un tecnica nova per comunica de su acua
@L aora_oji/2018/un_tecnica_nova_per_comunica_de_su_acua
====== Un tecnica nova per comunica de su acua ======
23 agosto 2018
Rexercores a MIT (la Instituida Tecnolojial de Massachusetts) ia developa un metodo par cual sumarinas pote comunica con aviones.
A presente, aviones no pote fasil deteta siniales de sonar de su la mar, car estas refleta de la surfas de la acua e penetra rara. La rexercores ia trova ce radar de frecuentia estrema alta es capas de deteta ondetas pico en la acua, creada par un parlador suacuan comun.
Sumarinas comunica usante ondas de sonar, cual move bon sola su la acua, e aviones comunica par siniales de radio cual no move bon en acua. Per envia mesajes, sumarinas pote veni a la surfas, ma esta risca revela sua loca. A veses, on usa boias per reseta siniales de sonar e tradui los a radio.
La sistem developada a MIT usa un parlador suacuan per dirije sonar direta a la surfas de la acua, creante ondetas pico con altia de sola alga micrometres. Radar supra la acua pote deteta estas e redesifri los a mesajes.
La rexercores ia proba la idea en un pisina e ia susede reseta la mesajes suacuan. An tal, la sistem pote spende un tempo longa en envia un cuantia grande de informa, e lo no funsiona bon si la acua conteni ondas plu alta ca 16 sentimetres.
Lo es ance un sistem de sola un dirije: la avion no pote envia mesajes a la sumarina. Ma on espera developa algoritmos capas de elimina la "ruido" de un mar ondosa per isoli la ondetas de sonar.
En futur, la tecnica va pote aida aviones o avionetas a deteta ance la loca de rejistradores perdeda, de la spesie nomida "caxas negra".
@T Un tempesta destruosa prosimi a Australia norde
@L aora_oji/2018/un_tempesta_destruosa_prosimi_a_australia_norde
====== Un tempesta destruosa prosimi a Australia norde ======
14 desembre 2018
En Australia, on averti sur un siclon potiosa cual vade en dirije a la costa de Queensland.
Siclon Owen move lenta supra la acua prosima a la Teritorio Norde, con ventas de asta 200 cilometres per ora. On previde ce lo va intensi e ateni la tera en la temprana de saturdi.
La servis de crise ia envia multe plu empleadas a vilas longo la via espetada de la tempesta.
Meteorolojistes previde ce la siclon va viaja de la Golfo Carpentaria a la costa este de Queensland, portante ventas destruosa tra sentos de cilometres de tera.
Partes de la stato va reseta asta 400 milimetres de pluve en la dias veninte. Deluvias subita e mareas de tempesta es prevideda. On recomenda ce abitores resta en casa.
Australia esperia frecuente un clima estrema, con inondas, tempestas de arena e periodos tro seca en alga rejiones.
En novembre, Queensland ia sufri focones savaje cual ia obliga evacua miles de persones.
@T Un tempesta major de polvo en Sydney
@L aora_oji/2018/un_tempesta_major_de_polvo_en_sydney
====== Un tempesta major de polvo en Sydney ======
22 novembre 2018
Tra la sude-este de Australia, un tempesta grande de polvo ia orani la sielo e ia crea ansia sur la cualia de aira.
On ia fa un avisa publica sur sania per oji en Sydney cuando la banda de polvo, con largia de 500 cilometres, ia ateni la site e ia retarda aviones. Multe otra rejiones en Cimri Sude Nove ia esperia ance un mal vidablia.
La tempesta es produida par la menove de tera seca par ventas forte, malida par un periodo seca cual afeta ja la stato intera de agosto.
Paramedicistes ia dise ce desuples de persones ia reporta difisiles de respira o disturbas asmica, ma la cuantia vera de persones afetada par polvo no es clar.
En Sydney, la polvo ia oscuri la sielo e ia causa indicas de aira "perilosa" en alga suburbes. Ofisiores de sania ia recomenda ce abitores local resta en sua casas, spesial enfantes, veas e persones con disturbas respiral.
On ia compara la tempesta a un aveni simil ma plu intensa cual ia covre la site en 2009. Acel tempesta ia lasa sentos de persones con problemes de respira, e ia preveni la vola de aviones.
@T Un trematera e tsunami en Indonesia
@L aora_oji/2018/un_trematera_e_tsunami_en_indonesia
====== Un trematera e tsunami en Indonesia ======
29 setembre 2018
Plu ca 380 persones ia mori cuando un tsunami, causada par un trematera grande, ia bate un site indonesian ier. Ondas con altia de asta tre metres ia pasa tra Palu sur la isola Sulawesi.
Replicas forte secute ancora la site. Miles de casas ia colasa, como ance ospitales, oteles, mascitas e sentros comersial.
La labora de salva es impedida par un rompe major de eletrica. La via xef a Palu es blocida par un liscatera e un ponte importante ia cade.
A la min 540 persones es ferida. Alga ia survive par asende en arbores alta per evade la ondas.
Ance ier, un trematera min potiosa ia mata un person e ia feri a la min des en Donggala, un vila de pexa. Plu ca 600 mil persones abita en Palu e Donggala.
En Palu, sentos de persones ia intende partisipa en un festa de plaia, cual ia ta comensa a la sera de venerdi.
La ospital xef de la site ia es danada en la trema, e on trata pasientes a estra en tendas tempora.
La airoporto xef resta cluida pos la tsunami. Sua atereria ia es danada, ma on espera ce elicotores va pote ancora atera. La militar de la pais envia aviones de aida de la capital, Jakarta.
La trematera ia aveni prosima a la isola Sulawesi, con profondia de 10 cilometres e fortia 7,5. On ia difusa un averti de tunami, ma ia cansela lo pos min ca un ora. On ia critica la departe meteorolojial per esta, ma lo pare ce la ondas ia ariva cuando la averti ia es ancora ativa.
@T Un trematera nova afeta Lombok
@L aora_oji/2018/un_trematera_nova_afeta_lombok
====== Un trematera nova afeta Lombok ======
9 agosto 2018
La isola indonesian Lombok ia es colpada par un trema forte nova, an cuando lo atenta recovre pos un trematera major a soldi. La trema nova ia ave un grado de 5,9, e on reporta ce lo ia cade alga construidas.
Salvores xerca ancora tra detrito e atenta trae aida a vitimes de la trema plu temprana, cual ia es plu grande e ia mata ofisial 131 persones. Ma alga jornalistes local reporta un cuantia tan alta como 347 persones mor.
Alga viletas ia colasa completa. La governa dise ce plu ca 1400 persones ia es ferida, e plu ca 156 000 ia es deslocada. Alga rejiones en la norde de la isola ia reseta ancora no aida.
Lombok es situada a este de Bali, un isola pico plu grande, e lo ave sirca 4500 cilometres cuadrida. La plu de persones abita casas simple en comunias peti. Deses de miles dormi aora su la sielo o en la ruinas de sua casas. Car ospitales es ance afetada, on trata multe de la persones ferida su la sielo o en clinicas tempora.
La trematera de soldi ia aveni a mera alga dias pos un otra plu peti, cual ia mata a la min 16 persones. On deveni ansiosa ce la industria importante de turisme va es sever danada a un tempo cuando lo ta es normal multe ativa.
Miles de turistes ci visita Lombok, como ance Bali e la Isolas Gill, ia es ja evacuada o ia eleje mesma parti.
Indonesia es propensada a tremateras car lo es locada sur la Anelo de Foco, un linia de tremateras e erutas volcanal cual ensirca cuasi tota la borda de la Mar Pasifica. Supra la nivel de mar, plu ca un dui de la volcanes ativa en la mundo parteni a esta anelo.
@T Un tren barati colpa un fola selebrante
@L aora_oji/2018/un_tren_barati_colpa_un_fola_selebrante
====== Un tren barati colpa un fola selebrante ======
20 otobre 2018
Plu ca 60 persones ia es matada e 100 ferida cuando un tren ia colide con un fola, prosima a Amritsra en la rejion Pandjab en la norde de Barat. On reporta ce la mores inclui enfantes.
La vitimes ia sta sur la ferovia per regarda selebras de Dasahara, un festa indu sur la vinse de bonia contra malia. Los no ia oia la prosimi de la tren, a media de la arde de un pupa plen de petardos, representante la re demonal Ravana.
Alga reportas sujesta ce organizores ia avisa la fola a move a via de la petardos. Otras dise ce persones ia core a la ferovia car los ia teme ce la pupo ardente va colasa.
Longo atestores, multe persones sur la ferovia ia es ocupada en filma la selebra par sua telefonetas, e no ia persepi la tren prosiminte con rapidia alta. La tren ia viaja de Jalandhar a Amritsar.
La feridas va reseta aida medical sin paia. On ia declara un state de lamenta, e ofisias e scolas en Pandjab es oji cluida.
@T Un tsunami en la Streta Sunda pos un eruta volcanal
@L aora_oji/2018/un_tsunami_en_la_streta_sunda_pos_un_eruta_volcanal
====== Un tsunami en la Streta Sunda pos un eruta volcanal ======
23 desembre 2018
En Indonesia ier, a la min 168 persones ia mori e 745 ia es ferida cuando un tsunami ia ariva a la costa de la Streta Sunda, entre Sumatra e Djava.
Ance sentos de construidas ia es destruida. La causa ia es cisa un lisca de la fondo de mar pos la eruta de la volcan Anak Krakatau.
Temente un plu tsunami, la departe de maneja desastres ia averti ce la popla debe resta distante de la costa.
On reporta moris en la rejiones Pandeglang, Lampung e Serang. La cuantia de persones mor en Lampung es cisa plu ca sento.
Videos distribuida en redes sosial mostra la ariva subita de un ondon a un tenda en Lampung, do un bande roc popular, Seventeen, ia es presentante. Membros de la bande ia es puxada a via cuando la ondon ia destrui la stadio.
Un cantor de la bande ia dise ce sua basiste e sua organizor de turi ia mori, e ce tre otra membros de la bande e sua propre sposa es mancante.
La Crus Roja xerca vitimes en la detrito de construidas colasada.
On investiga esce la tsunami ia es causada par Anak Krakatau, un isola volcanal en la streta liante la Mar Djava a la Mar Indian.
Cuando volcanes eruta, magma calda puxa se su la tera e pote desloca e penetra roca plu fria. Esta pote causa un lisca de tera.
Ma car un parte de esta volcan es su la acua, cisa la fondo de mar ia lisca, levante un tsunami.
Anak Krakatau ia deveni plu ativa en menses resente. Lo ia eruta tra 2 minutos e 12 secondos a venerdi, creante un nube de sene cual ia asende a 400 metres supra la monte. On ia recomenda ce on proibi ce persones vade a plu ca du cilometres de la crater.
La mar ia es ance altida par causa de la luna plen, e lo es posible ce ance esta ia contribui a la fortia de la ondon.
La portavose per la departe de desastres ia dise inisial ce la onda no es un tsunami, e mera un ondon mareal, e el ia recomenda ce la popla resta calma. A pos, el ia demanda per pardona, disente ce la era ia aveni car on no ia esperia un trematera.
Entretempo, en la plu temprana de oji, un alarma de tsunami ia sona par era tecnical, provocante un panica vasta e nonesesada. Multe persones ia core a refujas per salva se.
Indonesia es propensada a tsunamis car lo es situada a la Sintur de Foco, la linia de tremateras e erutas frecuente cual ensirca cuasi tota la Mar Pasifica longo sua borda.
En setembre, plu ca 2000 persones ia mori cuando un trematera forte ia aveni prosima a la isola Sulawesi, creante un tsunami cual ia ruina Palu, un site a la costa.
A 26 desembre 2004, un serie de ondones jigante, jenerada par un trematera potiosa en la Mar Indian, ia mata sirca 228 mil persones en Indonesia e des-tre otra paises.
Tsunamis causada par ativia volcanal es min frecuente.
@T Un turiste mori sur Uluru
@L aora_oji/2018/un_turiste_mori_sur_uluru
====== Un turiste mori sur Uluru ======
4 julio 2018
Un turiste japanes ia mori en asende Uluru en Australia sentral.
La om, ci ia ave 76 anios, ia colasa ier a sirca la altia media de la roca e on no ia pote revive el. On no trata sua mori como suspetosa.
De la desenio de 1950, a la min 37 persones ia mori en esta asende, cual on va proibi de otobre 2019. Tra tempo longa, la australianes orijinal ia demanda ce visitores no trepa sur la monolito jigante, car lo es un loca santa.
La polisia de la Teritorio Norde ia dise ce un elicotor ia vola la turiste a un sentro medical prosima, do on ia declara ce el ia mori.
Plu ca 250 000 persones visita la monumento, istorial conoseda como Ayers Rock, en cada anio. La mori la plu resente rejistrada ia es en 2010.
Autoriosas dise ce sola 16% de visitores entre 2011 e 2015 ia fa la asende, cual es presipe e ocupa sirca un ora de tempo.
En la anio pasada, la comite de la Parce Nasional de Uluru e Kata Tjuta ia vota unida per proibi la trepa par causa de la importa cultural.
Un declara a la pajeria de la parce dise: "Tro multe persones ia mori en atenta asende Uluru. Multe otras ia deveni ferida en la asende. Nos senti un tristia grande cuando un person mori o es ferida sur nosa tera."
@T Un vileta gronlandes es menasada par un isberg
@L aora_oji/2018/un_vileta_gronlandes_es_menasada_par_un_isberg
====== Un vileta gronlandes es menasada par un isberg ======
15 julio 2018
Un isberg enorme ia flota prosima a un vileta en la ueste de Gronland, provocante un evacua partal per caso ce lo fende e produi un onda deluviante.
La isberg tori supra casas sur un promontania en la vileta Innaarsuit, ma ia deveni encaliada e no ia move en la note. Persones local ia vide nunca un isberg tan grande.
En la estate pasada, cuatro persones ia mori en Gronland norde-ueste cuando un trematera ia crea ondas cual ia deluvia casas.
Innaarsuit ave sola 169 abitores, e on ia move los ci es la plu prosima a la monte de jelo flotante.
Un membro de la consilio de vileta ia comenta: "Lo ave fesures e bucos cual fa ce nos teme ce lo pote fende a cualce tempo." El ia ajunta ce la sentro eletrical e tances de combustable es prosima a la custa.
Alga espertas ia averti ce isberges estrema risca deveni plu comun par causa de la clima cambiante, e esta va grandi la risca de tsunamis.
En junio, siensistes ia publici un video de un isberg jigante fendente de un glasia en Gronland este.
@T Un volcan destrui casas hawaian
@L aora_oji/2018/un_volcan_destrui_casas_hawaian
====== Un volcan destrui casas hawaian ======
8 maio 2018
La eruta de la volcan Kilauea en Hawaii ia destrui 35 construidas, xef casas, e menasa sentos de plu.
On ia evacua cuasi 2000 persones asta aora. Alga abitores ia es permeteda a visita sua casas per salva animales, ma ofisiores ia dise ce resta no es secur.
Fesures e bocas nova ia abri en la rejion Leilani Estates, do lava ia es lansada en la aira a asta 70 metres de altia.
La isola ia es colpada par un trematera de potia 6,9 a venerdi. Kilauea es un de la volcanes la plu ativa de mundo e es ja en eruta constante tra 35 anios.
On ia recolie plu ca $35 mil per un ensenior de scola prima ci ia perde tota en la flue de lava. Un fesur ia abri direta su sua casa de nove anios.
La ensenior, Amber Makuakane, ia responde: "Franca me no sabe como me debe comensa o cual me debe dise, otra ca... MAHALO! MAHALO MAHALO!", usante un parola hawaian cual sinifia "grasias".
@T Un vota colombian no suporta la FARC
@L aora_oji/2018/un_vota_colombian_no_suporta_la_farc
====== Un vota colombian no suporta la FARC ======
12 marto 2018
La partitos conservaliste de Colombia, oposada a la acorda de pas de 2016 con rebelores FARC, es a punto de gania la elejes en la pais.
La vota ier ia es la prima en cual la gerilias FARC pasada, aora un partito political, ia partisipa.
Pos conta plu ca 90% de la votas, la partito Sentro Democrata de Álvaro Uribe ia gania la plu sejas.
La FARC no ia reseta multe votas, seguente la espetas -- ma la acorda de pas garantia alga sejas per lo. Lo ia reseta sola 0,4% de la votas, ma va reseta sinco sejas en cada de la du salones de parlamento.
La partitos destra ia susede la plu, ma no ia ateni un majoria jeneral, an tal.
On previde anunsia la resultas ofisial final a ora plu tarda oji.
On ia reporta ance sesiones de vota plu pasosa ca en anios presedente, cuando la aveni ia es malida par violentia a veses.
@T Un vota de fida pos un compra de casa
@L aora_oji/2018/un_vota_de_fida_pos_un_compra_de_casa
====== Un vota de fida pos un compra de casa ======
28 maio 2018
En Espania, la xef de la partito sinistriste Podemos ("Nos Pote") e sua acompanior ia survive un vota de fida provocada par sua deside de compra un casa lusosa.
On ia acusa Pablo Iglesias e Irene Montero, la portavose de la partito, de spende 600 mil euros per un casa con pisina e abiteria per visitores. En la pasada, Iglesias ia critica politicistes ci abita en casas grande.
La duple ia reseta 68,4% de cuasi 190 mil votas fada. Los ia anunsia la vota enlinia en la plu temprana de esta mense, pos un furia publica sur sua deside de compra la casa en la anteurbe de Madrid. Alga membros ia dise ce esta sumina la credablia de la partito entre persones comun.
On ia demanda a votores: "Esce tu opina ce Pablo Iglesias e Irene Montero debe continua como xef e portavose de la partito?"
Iglesias e Monero, ci espeta pari jemelos, ia defende la compra, disente ce la casa es per sua propre usa e no es un investi divinante.
Podemos ia es formida en janero 2014 par Iglesias e un grupo de enseniores sinistriste de universia. La partito ia crese de un promove cual ia protesta medias sever de economia, recomendante cambias radisal entre nonemplea altinte e reduis de servis publica.
Iglesias ia descrive la susede de la partito como la nase de "un Espania nova" e la mori de desenios de politica de du partitos. En pasada, el ia foca atende a lo ce el abita modesta en Vallecas, un visineria de clase laborante en Madrid, e ce el compra sua vestes en supramercatos.
@T Un xasor de servos es condenada a regarda Bambi
@L aora_oji/2018/un_xasor_de_servos_es_condenada_a_regarda_bambi
====== Un xasor de servos es condenada a regarda Bambi ======
18 desembre 2018
En la SUA, un xasor nonlegal ia es comandada a regarda la filma Bambi a multe veses, como un parte de sua condena per mata sentos de servos.
David Berry minor, de la stato Missouri, debe regarda la filma a minima un ves per mense en sua prisoni per un anio.
El ia es arestada en agosto con du membros de sua familia per mata la servos, prende sua testas e abandona sua corpos a putri. La caso es un de la plu grandes de xasa nonlegal en la istoria de la stato.
En ajunta a la condena de prisoni, la judor ia comanda Berry a "regarda la filma Bambi de Walt Disney, con la regarda prima a o ante 23 desembre 2018 e a la min un tal regarda en cada mense seguente".
La anima sur animales de foresta, creada en 1942, mostra la mata de la madre de Bambi, la servo eponim, par un xasor.
Un investiga tra un serie de menses e un serie de statos ia ave como sua resulta la aresta de Berry minor, sua padre David Berry major e sua frate Kyle Berry.
On no sabe la cuantia intera de servos nonlegal matada, ma un conservor ia dise ce lo pote es "alga sentos".
Berry minor ia reseta un condena de un anio en la prison de Lawrence County pos confesa se como culpable de matas nonlegal de animales.
El ia reseta ance un condena de 120 dias en la prison de Barton County per un viole de regulas de sua libria oservada, car el ia posese un fusil. Ance, la Comision Conservante de Missouri ia cansela la diretos de xasa de el e sua padre per la resta de sua vives.
@T Un xerpa atenta sua asende recordo de Everest
@L aora_oji/2018/un_xerpa_atenta_sua_asende_recordo_de_everest
====== Un xerpa atenta sua asende recordo de Everest ======
1 april 2018
Per la plu de persones, la preparas per asende la monte la plu alta de mundo ta es un esperia difisil, plen de cosas nonconoseda. Ma no per Kami Rita Sherpa, un trepor nepali con 48 anios.
El va parti oji, esperante crea un recordo nova per la cuantia de asendes susedosa de Monte Everest. La recordo presente de 21 asendes susedosa parteni juntada a el e du otra trepores nepali. La otra du ia jubila, tal ce un bon asende va defini Kami Rita como la everestor la plu esperiosa.
El ia dise: "Me fa ancora un plu atenta de crea istoria, per dona orgulo a la comunia xerpa intera e mea pais."
Kami Rita labora como un gidor per un compania SUA cual organiza misones de trepa. El ia fa sua asende prima de Everest en 1994 e ia completi la plu resente en maio pasada.
Trepores stranjer depende usual de aida de gidores esperiosa como el, ci on paia per prepara la via, afisa cordas e porta la aparatos nesesada per trepa.
Kami Rita va gida un ecipo de 29 trepores de multe partes de la mundo a esta ves. La grupo, incluinte americanes e japaneses, va parti oji de la campa de base e va comensa la asende vera pos du semanas. La clima va deside cuando los ateni la apico.
"Si tota segue la intende, me va fa la asende final a la apico a 29 maio," el ia dise. Ma el vole continua rompe la recordo an si esta trepa susede. El ia comenta ce el desira ateni la apico de Everest a 25 veses. "Me desira crea istori," el ia dise.
@T Un xica nederlandes fusilida en un cabana de bisicles
@L aora_oji/2018/un_xica_nederlandes_fusilida_en_un_cabana_de_bisicles
====== Un xica nederlandes fusilida en un cabana de bisicles ======
20 desembre 2018
En Nederland, studiantes, enseniores e familias en la site Rotterdam ia espresa sua xoca pos la mori de un studiante fema de 16 anios ci ia es fusilida a sua scola.
Humeyra Öz ia es atacada en la cabana de bisicles a la Scola de Desinia, corta pos la fini de sua lesones a la posmedia de martedi.
Un om de 31 anios ia es arestada. La amis de la xica ia dise ce el ia separa de la om a alga tempo pasada e ia cexa ce la om ia menasa el.
La polisia ia confirma ce la xica ia conose la suspetada, ma no ia dona plu detalias.
La scola ave sirca 300 studiantes. Alga de los ia es en la cabana a la tempo de la fusili, e los ia vide lo cual ia aveni.
E la vitim e la suspetada es descriveda como membros de la comunia nederlandes-turces, e la consul turces ia visita la scola ier.
Costudiantes ia es xocada par la mata, e jenitores ia espresa ansia sur securia.
Un ami de la vitim ia dise: "El ia es un bon xica bela e intelijente. Nos es ancora vera asustada. Como lo ia pote aveni?"
La xef de la scola ia dise ce el no pote discute cualce menasas contra la vitim, car acel pertine a la investiga par la polisia. Ma el ia insiste ce la securia de la scola no es dutada. "Esta relata a un person plu vea ci entra subita a un scola," el ia dise. "Esta no es un prison."
La maior de Rotterdam ia dise ce on debe no regarda la ataca como un fusili en scola, ma ce lo ia envolve un om demente ci ia ta pote fa la ataca en cualce loca. El ia espresa la espera ce la situa va revade a normalia pos la vacanse de natal.
Humeyra Öz ia comensa conose la suspetada, identifiada como Bekir E, en Facebook a du anios ante aora. Ance en acel loca de rede el ia fini sua relata.
Amis ia dise ce la xica ia es prendeda a scola par sua padre par causa de la menasas contra se.
Un cusin ia comenta: "Sua familia ia vade an per parla a la familia de la om. Los ia dise ce el es tro joven. Ma la om la continua presa e menasa el."
La cusin ia ajunta ce la familia ia rejistra un cexa contra la suspetada a sirca un anio pasada, e ce el ia es resente condenada a du anios en prison. Avocatos ia confirma la condena resente de la suspetada, e ce el ia es supravideda en libria oservada, sin spesifa la acusa.
@T Un xico australian fuji solitar a Bali en aventura
@L aora_oji/2018/un_xico_australian_fuji_solitar_a_bali_en_aventura
====== Un xico australian fuji solitar a Bali en aventura ======
25 april 2018
Polisiores australian dise ce los va investiga como un xico de 12 anios ia viaja solitar a Bali, pos disputa con sua jenitores e usa sua carta de credito.
La xico, de Sydney, ia usa la interede per reserva sua volas e otel cuando sua jenitores ia deside cansela un viaja a acel isola indonesian. El ia vola a Bali tra Perth, presentante sola sua pasaporto e carta de identia scolal.
On ia trova el en Bali a 17 marto. La Polisia Federal Australian ia confirma ce on ia reporta sua manca a nove dias plu temprana cuando el ia parti de sua casa sin ariva a scola. On no ia revela cuanto dias el ia spende en Bali.
El ia usa un macina de autoservi en la airoporto de Sydney per rejistra se e embarca un avion a Perth, e alora un plu a Bali. La xico, identifiada par sola un nom falsa, ia dise ce ofisiores de airocompania ia fa demandas a el en Perth.
"Los ia solisita mera mea identia de studiante e mea pasaporto per demostra ce me ave a la min 12 anios e es en liseo," el ia esplica. "Lo ia es eselente car me ia desira vade en aventura."
El ia rejistra se per sua sala de otel en Bali par informa empleadas ce el espeta la ariva de sua sore.
La polisia australian ia es avisada sur la presentia de la xico en Bali a 17 marto. On ia deteni el per sua proteje ante reuni el con sua jenitores.
La polisia va esplora la detalias de la caso per serti ce cosas simil no va aveni futur. Un portavose ia dise ce on no ia furni un averti per preveni ce la xico viaja internasional. Tota airocompanias ave prosedes cual permete minores a viaja solitar, ma la constrinjes varia entre la companias.
@T Vanuatu usa un avioneta per distribui medisin
@L aora_oji/2018/vanuatu_usa_un_avioneta_per_distribui_medisin
====== Vanuatu usa un avioneta per distribui medisin ======
19 desembre 2018
Un bebe sur un isola peti en la Mar Pasifica ia deveni la person prima ci reseta un vasin traeda par un avioneta comersial.
UNICEF ia organiza la vola de la avioneta tra 40 cilometres de montania ru cual on pote traversa rapida en no otra modo.
Sirca 20% de enfantes en Vanuatu no reseta vasinis importante car la furni de los es tro difisil. La reserva NU per enfantes espera ce la furni par avioneta va deveni multe importante en locas distante.
Sua dirijor Henrietta Fore ia dise: "La vola peti par avioneta oji es un avansa grande per la sania global. Car la mundo luta ancora per imuni enfantes la plu difisil atenable, tecnolojias de avioneta pote muta la situa e traversa la distantia restante per ateni cada enfante."
An si avionetas es ja usada per furni medisin, UNICEF dise ce esta ia es la ves prima de mundo ce un pais ia contrata un compania comersial de avionetas per trae vasines a locas distante.
Du companias ia compete per la projeta de Vanuatu. Swoop Aero de Austraila ia gania la contrata pos esperimentas susedosa en la plu temprana de esta mense.
Sua avioneta ia porta la vasines en un caxa de polistiren con pacos de jelo e un rejistrador de temperatur. Lo ia vade a un vileta distante sur la isola Erromango, de Baia Dillon en la ueste a Baia Cook en la este.
Ala, la medisin ia es usada par Miriam Nampil, un curor local, per vasini des-tre enfantes e sinco femes ensinta.
Sin avioneta, Baia Cook es asedable sola par pede o barco, ma ambos posibles ocupa oras, en contrasta con la 25 minutos usada par la viaja de la avioneta a la vileta.
On nesesa ance manteni furnis medical a temperatur fria.
"Lo es estrema difisil si on debe porta caxas de jelo per manteni la fria de la vasines en pasea a traversa de rios, montes, pluve e cornisas de roca," Nampil ia comenta. "Car la viaja es frecuente longa e difisil, me pote vade ala a sola un ves per mense per vasini enfantes. Ma aora, con esta avionetas, nos pote espera ateni multe plu enfantes en la partes la plu distante de la isola."
@T Venezuela es paraliseda par sua mone nova
@L aora_oji/2018/venezuela_es_paraliseda_par_sua_mone_nova
====== Venezuela es paraliseda par sua mone nova ======
22 agosto 2018
Venezuela ia sesa funsiona ier en atenta comprende sua sistem de mone nova introduida. Miles de companias ia clui per ajusta se a la "bolivar suveran", e multe laborores ia resta a casa.
Presidente Nicolás Maduro ia inisia la biletas nova a lundi, revaluante e renominte la bolivar esistente, e declarante la dia como un festa nasional. La governa dise ce la mone nova va doma la problem de infla noncontrolable, ma oposores sujesta ce lo va mali an plu la crise.
La mone nova sutrae sinco zeros de la "bolivar forte" vea. Per esemplo, un taso de cafe cual ia custa 2,5m bolivares forte a ante ave aora la custa de sola 25 bolivares suveran. An tal, persones en la capital, Caracas, cexa ce los pote retira no plu ca 10 bolivares suveran de automatas de banco.
An la mercato negra de dolares ia es parada par la cambia de mone.
La governa ia anunsia alga otra cambias economial per acompania la biletas nova, incluinte un aumenta enorme de la salario minima, un crese de la imposta de valua ajuntada, e un redui de la suporta jenerosa per carburantes.
Maduro ia dise ance ce la bolivar nova va es liada a la petro, un mone virtual sur cual la governa dise ce lo es liada a la reservas de petrolio de la pais. La SUA ia proibi sua sitadanes de comersia con petros, e un pajeria de criptomone descrive la petro como an "frodosa".
Ance ier, Venezuela ia es secuteda par un trematera major longo la rejion de sua costa norde. On ia senti lo en Caracas, do multe de la construidas ia es evacuada. Sismolojistes venezuelan ia rejistra un trema de grado 6,3, con episentro en la este de la pais. On no reporta ce persones ia mori.
@T Violentia etnical reapare en RD Congo
@L aora_oji/2018/violentia_etnical_reapare_en_rd_congo
====== Violentia etnical reapare en RD Congo ======
3 marto 2018
Plu ca 33 persones es matada en violentia etnical nova en la Republica Democrata de Congo. Turbas ia eruta entre la comunias hema e lendu en Ituri, un provinse norde-este. La atacores ia es ultima forsada a via par soldatos de securia.
De la media de desembre, violentia ia mata plu ca 100 persones en la provinse.
La turba entre la hemas, tipal pastores de boves, e la lendus, tipal cultivores de tera, es un de alga geras en RD Congo cual ia produi un cuantia vasta de refujadas e ia desloca persones en la du anios pasada. On estima ce sirca 200 mil persones ia es obligada a fuji de sua casas par la violentia en sola la rejion Ituri.
Un portavose per la armada local ia descrive un situa de venja entre la du comunias, e ia reportaVi ce alga persones ia es destestida.
La hemas e lendus ia batalia per controla de tera. Miles ia mori en combate entre la du grupos entre 1997 e 2003, un tempo cuando RD Congo ia es a la sentro de lo cual alga oservores nomi "la gera mundal de Africa", car alga otra paises ia es envolveda.
La batalia ia es nurida par la ricia mineral vasta de Congo, e la gera ia prende asta ses milion vives, o direta par combate o par maladia e malnuri.
Ajenterias de aida averti sur la custa de violentia en Ituri. UNICEF dise ce plu ca 46 mil enfantes es refujadas, e la Consilio Norsce de Refujadas, 4,5m persones en la pais nesesa aida umaniste.
@T Voterias en RD Congo abri per un eleje tensada
@L aora_oji/2018/voterias_en_rd_congo_abri_per_un_eleje_tensada
====== Voterias en RD Congo abri per un eleje tensada ======
30 desembre 2018
Vota ia comensa en la pais du de la plu grandes de Africa, en un eleje retardada per plu ca du anios.
Cuasi 40 milion persones pote vota en la Republica Democrata de Congo, do presidente Joseph Kabila renunsia sua posto, cual el ia ocupa de 2001.
Ma la tempo ante la eleje ia es afetada par violentia e controveria sur la deside de esclui cuasi 1,3 milion persones de vota. Ier, la aspirores oposante ia fali ance acorda un declara intendeda per redui la tensa.
Si tota va pasa sin mal avenis oji, esta va es la traversa pasosa prima de potia en RD Congo pos sua autonomi de Beljia en 1960.
Kabila ia prende la potia de sua padre asasinada en 2001, ma la constitui proibi el de aspira un plu periodo en la posto.
La intende ia es ce el renunsia a du anios ante aora, ma on ia pospone la eleje cuando la comision elejal ia dise ce lo nesesa plu tempo per rejistra votores.
La deside ia provoca scaramuxas violente, con ce la oposores ia acusa Kabila de atenta reteni la potia.
En la semana pasada, la eleje ia es denova posponeda, per sete dias, par causa de problemes en prepara la voterias. Esta ia segue pos cuando miles de macinas eletronical de vota, usada a la ves prima, ia es destruida en un focon en la capital, Kinshasa.
En esta semana, vota en tre distritos ia es retardada asta marto. La comision elejal ia culpa nonsecuria e un eruta de la virus ebola.
Par resulta, sirca 1,2 milion persones no va pote vota oji. En efeto, la deside ia cansela sua votas, car la presidente nova va es inaugurada per la media de janero, an tal.
Un fola ia ataca un clinica de ebola en la este de la pais pos la anunsia.
@T Vultures evita Portugal par manca de caronia
@L aora_oji/2018/vultures_evita_portugal_par_manca_de_caronia
====== Vultures evita Portugal par manca de caronia ======
4 marto 2018
Un rexerca nova mostra ce vultures tende aora evita Portugal e favore Espania. Pos marca 71 avias de caronia tra tre anios, rexercores ia nota ce sola 13 de los ia vade a Portugal en acel periodo.
La causa es relatada a ensefalopatia sponjiforma boval, comun nomida la maladia de boves demente. En Portugal, leges sever aida preveni la estende de esta maladia par obliga cultivores a sutrae la corpos de bestias mor de sua campos sin pausa e presenta los per arde o entera. Per esta razona, forajores no pote usa los per nuri se.
En 2011, Espania ia esplota un cambia de regulas de la Uni European per permete ce consilios rejional deside esce on pote lasa corpos mor su la sielo -- spesial car la pais es la abitada de 90% de la avias de caronia en Europa.
Pos alora, siensistes rexercante ia nota un declina forte de la vultures brun e negra cual traversa la frontera a Portugal. Sua studia trova ce esta es probable relatada a la dispone de corpos mor, e no a la clima o jeografia.
La rexercores dise ce spesies perilida paia la custa de la "paradox de regulas diversa" en la Penisola Iberian. Los sujesta ce un armoni de la regulas es esensal per la recovre de la popla nativa de vultures portuges, cual es aora cuasi estinguida.
La Sosia Portuges per la Studia de Avias campania per areas separada e selida do cultiverias pote depone corpos de bestias, prosima a la colonias la plu grande restante de vultures en la pais. Avias ia perde sua abitadas ance par la focones savaje de la estate pasada.
@T Xasada par un scural
@L aora_oji/2018/xasada_par_un_scural
====== Xasada par un scural ======
11 agosto 2018
La polisia deutx ia aida un om ci ia es xasada par un scural bebe.
Los ia responde a un telefoni per aida en Karlsruhe, un site en la sude-ueste de Deutxland. Cuando los ia ariva, la animal peti ia es ancora asustante la om. Los ia saisi la scural cuando lo ia adormi subita.
La reporta ofisial sur la aveni dise ce la rodente persistente ia deveni la mascote nova de la polisia. On ia nomi el Karl-Friedrich, e el es aora curada en un sentro de salva animales.
Scurales pote xasa persones si los desira reseta comeda o aida. Si un scural perde sua madre, el pote foca sua atende a un person como un sustitua.
Ma atacas par scurales no es sempre tan cortes. En julio de la anio pasada, on ia averti visitores a Prospect Park en New York sur un scural "nonusal coleriosa" ci ia ataca sinco persones en un semana. E en la anio presedente en Cerno, en la sude-ueste de England, un xico de tre anios ia sangui pos deveni mordeda par ses scurales.
@T 2018
@L aora_oji/2018/xef
====== 2018 ======
Pos un reposa de pico plu ca un anio, Aora oji ia recomensa sua ritmo dial en marto 2018.
Reportas plu vea ...
@T Xicos tai ancora trapida en un cava
@L aora_oji/2018/xicos_tai_ancora_trapida_en_un_cava
====== Xicos tai ancora trapida en un cava ======
5 julio 2018
En Tai, salvores batalia la clima per libri la des-du xicos e sua instruor de futbal ci es trapida en un cava inondada.
On previde la comensa de pluves forte pos un pico de dias. La nivel de acua va leva, menasante la loca do la grupo ia refuja se.
La provinse Chiang Rai ia esperia un periodo corta de clima seca en la dias resente. Aora on considera la modo la plu bon de retrae la grupo a securia.
La governor provinsal ia dise ce un posible es flota la xicos en jacetas inflable. El ia dise ance ce on instala linias de telefon en la cava afin la xicos pote parla a sua familias, ma la linias ancora no ia ateni la xicos.
On prende ance un telefon nova a la cava, car un presedente ia cade en la acua e ia sesa funsiona.
Si la pluve sesa per tempo sufisinte longa, on ave un posible ce la grupo ta pasea o flota tra la compleso de cavas, en loca de sumerji.
A presente, la viaja de la entra a la cava asta la grupo ocupa ses oras, e la reveni ocupa sinco. Multe de la xicos no pote nada, e on va debe ensenia a los la tecnica fundal de sumerjores si los va sorti en acel modo.
La militar tai ia dise ce si la grupo no pote sorti par sumerji, los va debe cisa spende cuatro menses en la cava asta cuando la inonda basi denova. On prepara comedas e otra furnis per acel situa.
On atenta redui la risca de plu inondas par pompi acua de la sistem de cavas. La nivel de acua ia cade tra plu ca 40 sentimetres de ier, tal ce salvores pote aora pasea tra un estende de 1,5 cilometres de la entra asta la cambra tre.
La xicos, con edas entre 11 e 16, e sua instruor de 25 anios ia entra a la cava a 23 junio cuando lo ia es seca, ma un pluvon subita ia bloci la sorti. On ia trova la grupo a lundi, sur un area peti de roca a sirca cuatro cilometres de la boca de la cava.
@T Xicos tai trapida en un cava
@L aora_oji/2018/xicos_tai_trapida_en_un_cava
====== Xicos tai trapida en un cava ======
29 junio 2018
Des-du futbalores joven e sua instruor es trapida en un cava en la provinse Chiang Rai en Tai tra cuasi un semana.
Los ia desapare pos parti per esplora la cava Tham Luang Nang Non, acompaniada par sua instruor, ci ave 25 anios. On crede ce los ia deveni trapida par acua levante.
Un xerca grande per la grupo ia saisi la atende de la pais.
Alga usores de redes sosial ia comparti un imaje de la xicos sentante sur un senglar, cual es la sinifia de la nom la ecipo Moo Pa per cual los jua futbal. Otras ia envia mesajes suportante a la salvores.
On reporta ce la enfantes ia visita frecuente la cava en la distrito Mae Sai per eserse a recrea. Ma en la saison pluvosa, entre junio e otobre, la cava pote deveni inondada a profondia de sinco metres.
Car la boca xef de la cava es aora blocida par acua, sumerjores profesal, salvores e militares ia labora per trova un otra modo de entra. Sua atentas es frustrada par la profondi continuante de la acua en la cava.
On no sabe esata do la grupo es trapida, ma impresas de pede ia es trovada en la compleso de cavas, donante espera ce la xicos vive ancora.
Mesajes enviada par la enfantes ante sua parti a saturdi sujesta ce los ave lampas de pox e alga comedas.
@T Xina aumenta sua bujeta militar
@L aora_oji/2018/xina_aumenta_sua_bujeta_militar
====== Xina aumenta sua bujeta militar ======
5 marto 2018
Xina ia anunsia un bujeta militar de 1,11 milion milion iuanes ($175 mil milion) per la anio veninte. La soma es plu par 8% ca en la anio presedente, e ia es anunsiada par Li Keqiang, la ministro xef, a la comensa de la consenta anial de parlamento en Beijing.
Li ia anunsia ance un gol de crese economial par 6,5%.
On previde ce la Asembla Nasional de la Popla (ANP) va sutrae la limita presidental de du periodos, tal ce Xi Jinping pote resta en sua posto per tempo nonrestrinjeda. La cambia, longa espetada ma controversa an en Xina, aida forti la state de Xi como la gidor la plu potiosa pos Mao Zedong.
Miles de legores xines a la consenta de lundi ia esplode en aplaudi cuando on ia leje a la salon la proposa de elimina la limita de du periodos. La vota sur esta va aveni a 11 marto; on previde ce lo va es asetada par acorda unida.
La ANP es jeneral un parlamento de disesi, aprobante desides ja fada par la Partito Comuniste. Lo ave sirca 3000 delegadas, representante tota provinses e rejiones, ci es elejeda en modo democrata en teoria, ma en pratica longo la vole de la Partito.
La congresa aveni en securia sever. On sutrae de la capital oposores conoseda ante la comensa.
La governa ia dise ce lo va foca a tre goles xef en la anio veninte: redui la esposa de Xina a risca finansial, controla la contamina de la ambiente, e continua combate la povria.
En sua reporta abrinte a la parlamento, Li ia anunsia la bujeta militar nova, disente ce la armada debe es "forte como petra" fasante "cambias profonda en la campo de securia nasional".
On vide la aumenta como un bon indica de la aspiras stratejial de Xina en cuando lo continua moderni sua armada -- la plu grande de mundo -- e developa sua infrastrutur en rejiones disputada, como la Mar Xina Sude e sua fronteras himalaian.
An si espetada, la crese de spende va ansia plu la competores rejional de Xina.
@T Zeland Nova va sutrae condenas omosesal istorial
@L aora_oji/2018/zeland_nova_va_sutrae_condenas_omosesal_istorial
====== Zeland Nova va sutrae condenas omosesal istorial ======
4 april 2018
Zeland Nova ia reali un lege per permete la sutrae de la rejistra criminal de persones ci on ia condena de atas omosesal en la pasada.
A presente, omes condenada ante la descriminali de omosesalia en 1986 ave ancora un crimin listada en sua rejistras ofisial. Sirca 1000 persones va cuali per la sutrae de rejistras cuando la projeta comensa en la anio veninte.
Legores ia espresa ance sua regrete a la persones afetada par la condenas.
Andrew Little, la ministro de justia, ia dise ce la lege "envia un sinial clar ce prejudi contra persones ge es no plu asetable, e nos es dedicada a coreti maltratas de la pasada".
La governa ia dise ce la condenas pertine a tre atas cual on ia descriminali en 1986 -- sodomia, vulgaria entre mases, e manteni de un loca per atas omosesal.
Membros de familia va pote aplica per sutrae la rejistras de relatadas mor. Per cuali, la seso cual ia provoca la condena debe es acordada e entre persones con 16 anios o plu.
Un solisita per supresa condenas istorial per atas omosesal ia es prima introduida a parlamento en la anio pasada. Zeland Nova ia reali leges proibinte prejudi contra persones ge en 1993, e ia deveni la pais prima en la rejion de Asia Pasifica cual ia legali la sposi omosesal a dudes anios plu tarda.
@T Zuckerberg responde sur esplota de datos de usor
@L aora_oji/2018/zuckerberg_responde_sur_esplota_de_datos_de_usor
====== Zuckerberg responde sur esplota de datos de usor ======
22 marto 2018
Mark Zuckerberg, la fondor de Facebook, ia confesa ce sua rede sosial ia fa eras causante la esplota de la datos de miliones de usores par un compania conselante. On ia acusa Cambridge Analytica de malusa la datos per benefica clientes political.
En un declara, Zuckerberg ia dise ce "un rompe de fida" ia aveni. En un intervisa plu tarda, el ia demanda per pardona e ia promete reata contra "apes vil", ajuntante ce el va atesta ante la Congresa SUA "si lo es la ata coreta".
Prometente cambia la situa afin apes no pote recolie tan fasil informas de usor, el ia dise: "Nos es encargada per proteje vosa datos, e si nos no pote, alora nos no merita servi vos."
En 2014, Facebook ia invita usores a descovre sua tipo de personalia par un cuiz developada par un rexercor de la Universia de Cambridge. La datos de sirca 270 mil usores ia es colieda, ma ance alga datos publica de la amis de la partisipores.
Entretempo, Facebook ia cambia la cuantia de datos cual un ap pote recolie en esta modo, ma un denunsior, Christopher Wylie, dise ce la datos de sirca 50 milion persones ia es ja colieda ante esta per Cambridge Analytica -- un compania en London sin relata con la Universia de Cambridge. El reclama ce la datos ia es vendeda a la compania, cual ia usa los per jenera profiles psicolojial de persones e distribui informas suportante la campania presidental de Donald Trump.
La dirijor xef de la compania, Alexander Nix, ia es ier suspendeda. On ia rejistra secreta un comenta par el ce Cambridge Analytica ia maneja la campania dijital de Trump en la elejes de 2016 en la SUA.
La rexercor, Dr Aleksandr Kogan, ia dise ce a acel tempo la compania ia informa el ce tota cual lo ia fa es legal, e ce aora lo e Facebook usa el como un portaculpa.
@T 14 marinores mori en un sumarina rusce
@L aora_oji/2019/14_marinores_mori_en_un_sumarina_rusce
@D 2019
====== 14 marinores mori en un sumarina rusce ======
3 julio 2019
Un focon en un barcon sumerjable rexercante de la marina rusce ia mata 14 ecipores. Los ia es venenida par vapor nosiva cuando los ia fa mesuras en acuas teritorial de Rusia en lundi.
La ministreria de defende ia furni no detalias sur la tipo de barcon, ma on reporta ce lo ia es un minisumarina nucleal, usada per operas spesial.
Ultima, on ia estingui la focon, e la barcon es aora a Severomorsk, la base xef de la Flotila Norde Rusce.
On no ia revela cuanto persones ia es en la ecipo a la tempo de la asidente. Reportas en jornales local dise ce alga ecipores ia es ferida e ospitalida.
La comandor xef de la marina ia inisia un investiga.
Ier, Vladimir Putin, presidente de Rusce, ia retira se de un aveni ajendida en la rejion Tver, a norde-ueste de Moscva, per discute la asidente con Sergei Shoigu, ministro de defende.
Putin ia descrive la asidente como un perde grande per la marina rusce, e ia espresa compatia a la familias de la vitimes. El ia dise ance ce sete capitanes e du empleadas portante la titulo onorosa la plu alta, Eroe de la Federa Rusce, ia es entre los ci ia mori.
@T 15 mil casas es destruida par un focon en Dhaka
@L aora_oji/2019/15_mil_casas_es_destruida_par_un_focon_en_dhaka
====== 15 mil casas es destruida par un focon en Dhaka ======
18 agosto 2019
Un focon enorme ia ruina un distrito misera en Dhaka, capital de Bangladex, lasante 50 mil persones sin casa.
Sirca 15 mil casas ia es destruida en la visineria Chalantika en la tarda de venerdi.
Multe casas ia ave tetos de plastica, cual ia aida la sperde de la flamas. On no ia reporta persones mor, ma alga ia es ferida.
La plu de la abitores gania sola un salario basa, e multe ia es a via pos la festa muslim Eid al-Adha (Festa de la Sacrifia).
Pompores ia nesesa plu ca ses oras per estingui la flamas.
On investiga. La governa dise ce aida va es furnida a la multe miles ci ave aora no casa.
En febrero, un focon en la parte istorial de Dhaka ia mata sirca 80 persones, e nove ia mori en un otra arde en un distrito misera en Chittagong, site costal.
@T 1,9 milion baratis es escluida de la lista de sitadanes
@L aora_oji/2019/1_9_milion_baratis_es_escluida_de_la_lista_de_sitadanes
====== 1,9 milion baratis es escluida de la lista de sitadanes ======
31 agosto 2019
Barat ia publici la varia final de un lista cual, en efeto, sutrae la sitadania de sirca 1,9 milion persones en la stato norde-este Assam.
La Rejistra Nasional de Sitadanes es un lista de persones ci pote demostra ce los ia veni a la stato ante la fini de 24 marto 1971, la dia ante cuando Bangladex, pais visina, ia declara sua autonomia de Pacistan.
Persones no en la lista va ave 120 dias per apela contra sui esclui. Lo cual on intende fa a pos no es clar.
Barat dise ce la prosede es nesesada per identifia migrores bangla nonlegal. Lo ia deteni ja miles de persones suspetada de es stranjeres, en campas tempora en la prisones nasional, ma la deporta no es un eleje posible per la pais a presente.
La prosede ia provoca ance critica de "xasas de sorsores" contra la minorias etnical de Assam.
Un varia ru de la lista, publicida en la anio pasada, ia esclui cuatro milion persones.
La Rejistra Nasional ia es creada en 1951 per determina ci ia nase en Assam e es donce barati, e ci es cisa un migror de Bangladex. On renovi aora la lista a la ves prima.
Familias en la stato ia debe furni documentos per mostra sua linia de desende. Los ci no pote demostra sua sitadania es regardada como stranjeres nonlegal.
La partito de Narendra Modi, ministro xef, ia cexa longa contra migra nonlegal en Barat, e ia asentua la renovi de la Rejistra Nasional en anios resente.
Assam es un de la statos barati la plu multietnical. Demandas de identia e sitadania turba ja longa un cuantia vasta de persones ci abita ala.
Entre sua abitores es indus bangla e asames, como ance membros de tribus diversa. Un tri de la 32 milion abitores de la stato es muslim, la cuantia la plu alta estra la parte barati de Caxmir. Multe es desendentes de migrores ci ia comensa abita ala su la rena brites.
Ma la migra nonlegal de Bangladex, cual ave un frontera de 4000 cilometres con Barat, es un conserna tra desenios. En 2016, la governa ia estima ce 20 milion migrores nonlegal abita en Barat.
@T $2m de compensa per canser causada per erbiside
@L aora_oji/2019/2m_de_compensa_per_canser_causada_per_erbiside
====== $2m de compensa per canser causada per erbiside ======
14 maio 2019
Un juria en California, SUA, ia dona plu ca du mil milion dolares ci ia dise ce la erbiside Roundup ia causa sua canser.
Esta es la ves tre cuando Bayer, un compania farmasial deutx, ia es comandada a paia un compensa en relata a sua erbiside de glifosato.
La juria ia deside ce la compania ia condui nonatendente par no averti sur la riscas asosiada con la produida.
Bayer ia nega la alegas, insistente ce Roundup es secur per usa. La compania ia oteni la produida en la anio pasada, como parte de sua compra de sua competor Monsanto per 66 mil mion dolares.
Ier, un juria en Oakland ia judi ce Bayer es culpable per la limfoma reseteda par la acusores Alva e Alberta Pilliod.
Avocatos per la duple, ci es en sua desenio oto, ia descrive la deside de compensa como "notable". "La juria mesma ia vide documentos interna de la compania cual ia demostra ce, de la dia prima, Monsanto ia es nunca interesada par descovre esce Roundup es secur."
La juria ia asinia bilion dolares de compensa puninte a cada de la acusores, e ance 55 milion dolares de compensa direta.
En un declara, Bayer ia dise ce lo es deludeda par la judi e va apela. Lo ia descrive la deside par la juria como "esedente e nonjustable", ajuntante ce e Alva e Alberta Pilliod ave istorias de maladias cual es fatores conoseda de risca per tal limfomas.
La compania insiste ce desenios de studias ia mostra ce glifosato e Roundup es secur per usa umana.
Glifosato ia es developada par Monsanto en la SUA en la desenio de 1970, e ia deveni un de la ingredientes la plu comun en erbisides tra la mundo.
Ma Bayer fronti aora plu ca 13 400 litigas en la SUA sur la risca alegada de canser en relata a Roundup.
En marto, un juria en San Francisco ia dona 80 milion dolares a un otra om de California, judinte ce Roundup ia causa sua canser. E en agosto pasada, un plu om californian ia reseta 289 milion dolares cuando un juria ia fa la mesma deside.
@T 300 iaces mori trapida en neva en Barat
@L aora_oji/2019/300_iaces_mori_trapida_en_neva_en_barat
====== 300 iaces mori trapida en neva en Barat ======
12 maio 2019
A la min 300 iaces ia mori de famia prosima a la frontera barati con Xina, pos deveni trapida par un cade grande de neva.
La corpos ia es trovada en Sikkim, un state norde-este, a venerdi.
La iaces ia deveni trapida en desembre. On ia atenta usa un elicotor per cade comedas a los, ma la mal clima ia preveni esta.
Iaces esiste ja en la rejion tra miles de anios. Los es usada per sua lete e carne, e per transporta benes.
An si entre 10 e 15 iaces mori comun en cada anio, la cuantia en esta anio es la plu alta rejistrada.
On labora aora per ateni asta 50 iaces ancora trapida en la rejion.
La posesores de la bestias mor va reseta un compensa de 30 mil rupis per iac, asta la masima de tre iaces per familia.
@T Abiy Ahmed gania la Premio Nobel de Pas
@L aora_oji/2019/abiy_ahmed_gania_la_premio_nobel_de_pas
====== Abiy Ahmed gania la Premio Nobel de Pas ======
12 otobre 2019
La Premio Nobel de Pas per 2019, e la numero sento de istoria, ia es asiniada a Abiy Ahmed, ministro xef de Itiopia, ci ia reali pas con Ertra en la anio pasada. La premio ia es donada en reconose de sua labora per "ateni pas e coopera internasional".
La acorda con Ertra ia fini un nonprogresa militar de 20 anios pos la gera de frontera entre 1998 e 2000.
On ia nomi Abiy como la ganior en Oslo, do el va reseta la premio en desembre. Lo ave la valua de nove milion coronas svensce (sirca 900 mil dolares esuan).
Pos la anunsia, Abiy ia descrive se como "umilida e stimulada". En un telefoni con la secretor de la Comite Nobel Norsce, el ia dise: "Multe grasias. Lo es un premio donada a Africa, donada a Itiopia, e me pote imajina como la otra xefes de Africa va reata positiva a lo per labora sur la prosede de construi pas sur nosa continente."
En soma, 301 persones ia es nominada per la premio prestijiosa, incluinte 223 individuas e 78 organizas.
On ia divina multe sur ci va gania, e Greta Thunberg, ativiste sur la clima, ia es vasta prediseda como la person la plu probable. Longo la regulas de la Funda Nobel, on no pote publici la listas de nominadas asta pos la pasa de 50 anios, e la organiza dise ce tota predises ante la anunsia es mera divinas.
Pos deveni ministro xef en april 2018, Abiy ia introdui reformis libraliste grande a Itiopia, renovinte lo cual ia es un nasion sever controlada a ante.
El ia libri miles de ativistes oposante de prison e ia permete la reveni a la pais de desacordores espulsada. E en sua governa, alga femes ia es moveda a postos major. La plu importante, el ia suscrive la acorda de pas con Ertra.
Ma sua reformis ia esposa ance la tensa interetnical en Itiopia, e la violentia resultante ia forsa sirca 2,5 milion persones de sua casas.
@T Acusas de crimines contra diretos umana en Txile
@L aora_oji/2019/acusas_de_crimines_contra_diretos_umana_en_txile
====== Acusas de crimines contra diretos umana en Txile ======
15 desembre 2019
La Nasiones Unida ia acusa ce la polisia e fortes armada de Txile ia fa violes major de diretos umana en sua responde a protestas coletiva resente.
Investigores dise ce los ia confirma cuatro casos de moris nonlegal cual ia envolve ajentes de stato. Sua reporta nota ce 345 persones ia sufri trauma de oios par causa de pistoles de aira, e asentua ance tortura e violentia sesal.
De la 28 mil persones detenida pos la media de otobre per litiga, sirca 1600 persones resta tal.
La protestores esije reformis sosial e cambias a un constitui cual ia orijina en 1980, en la eda predemocratial, cuando la pais ia es ancora su la rena militar de Augusto Pinochet. A la min 26 persones ia es matada e sentos ia es ferida en la tumultas.
La reporta par la ofisia NU per diretos umana ia dise ce on disputa la statistica txilan ofisial de plu ca 4900 persones ferida, car otra fontes ofre estimas multe plu alta.
La ecipo de la NU ia documenti 113 casos spesifada de tortura e mal trata, e 24 casos de violentia sesal contra femes, omes e adolesentes, par membros de la polisia e armada.
Lo ia nota "la usa nonesesada e nonproportial de armas min matante" como fusiles antitumultal e gas lacrimojen. La xef de la investigores ia comenta: "Nos ia trova ce la maneja jeneral de asemblas par la polisia ia es realida en manera fundal represante."
La protestas ia es provocada par un anunsia ce la custa de transporta publica va leva en la capital, Santiago. Los ia sperde rapida tra la pais e ia deveni un revolta jeneral contra nonegalia, la custa alta de aida medical, e la finansia basa de educa.
Represa sever par la fortes de securia ia tisa plu la coleria de la protestores, como ance la responde par Presidente Sebastián Piñera, ci ia declara un state de crise e ia dise ce la pais es "en gera".
@T Airbus sesa produi sua aviones suprajigante
@L aora_oji/2019/airbus_sesa_produi_sua_aviones_suprajigante
====== Airbus sesa produi sua aviones suprajigante ======
14 febrero 2019
Airbus, un compania european cual fabrica aviones, ia dise ce lo va sesa construi la A380, sua model "suprajigante" cual es la avion la plu grande per pasajores en la mundo.
En un declara formal oji, Airbus esplica ce lo va fa sua furnis final de la A380 en 2021.
La deside ia aveni pos cuando la airocompania Emirates (Amirias), la cliente la plu grande de la avion, ia redui sua comanda de 162 aviones a sola 123.
La avion custosa ia compete difisil contra modeles plu peti e plu eficas.
En sua declara, Airbus ia dise ce on pote vide la efeto futur de la deside en sua resultas per 2018, cual ia mostra un profita neta de 3 mil milion euros, aumentada par cuasi 30% de la anio presedente.
Airbus va furni entre 880 e 890 aviones comersial nova en esta anio.
@T Apple reesamina fronteras disputada en sua mapas
@L aora_oji/2019/apple_reesamina_fronteras_disputada_en_sua_mapas
====== Apple reesamina fronteras disputada en sua mapas ======
30 novembre 2019
La compania Apple dise ce lo fa "un esamina plu profonda" de sua modo de trata fronteras disputada.
Ucraina ia critica la jigante tecnolojial ci ia mostra Crim como un parte de la teritorio de Rusia en sua apes Mapas e Clima.
Un portavose per Apple dise ce la compania segue leges internasional e nasional, e ce la cambia, cual es sola per usores en Rusia, ia es causada par un lege nova ala.
La propri de Crim par Rusia de Ucraina en 2014 ia es condenada par multe de la comunia internasional.
En un declara formal, Apple ia asentua ce "nos ia fa no cambias a Mapas Apple en relata con Crim, estra Rusia. Nos considera la lege internasional e ance leges pertinente en la SUA e otra paises, ante fa un deside de eticeti en nosa mapas, e nos fa cambias si obligada par lege."
La compania ia ajunta ce, resultante de sua reevalua de la trata de fronteras disputada, cisa lo va fa plu cambias en la futur.
"Nosa intende es serti ce nosa clientes pote gusta usa Mapas e otra servis de Apple en tota partes de la mundo."
La cambias a la mapa Apple de Crim per usores en Rusia ia es anunsiada en la plu temprana de la semana par la Duma de Stato, la salon basa de la parlamento rusce, en un declara cual ia descrive la fronteras presedente como "nonesata".
"Crim e Sevastopol apare aora en aparatos Apple como teritorio rusce," la declara ia dise. Rusia regarda Sevastopol, un site de porto e marina, como un rejion separada.
Apple ia negosia con Rusia tra alga menses e ia espera reteni Crim como un teritorio nondefinida, un parte no de Rusia e no de Ucraina.
Ance Google, cual produi sua propre ap popular de mapas, mostra Crim como parteninte a Rusia cuando on regarda de acel pais. Esta cambia ia aveni en marto.
La deside par Apple ia es agu condenada par Ucraina. La ministro de esternas Vadym Prystaiko ia tuita: "Apple, per favore, resta con tecno alta e divertis. Politica global no es vosa lado forte."
La ambasada de Ucraina en la SUA ia es egal criticante en Twitter: "Nos divina ce ucrainsces dona no grasias a @Apple a esta #FestaDeGrasia. Donce ta ce tota de nos remente Apple ce #CrimEsUcraina e lo es su ocupa rusce -- no su sua autocratia."
Garry Kasparov, campion rusce pasada de xace, ia ajunta sua vose, descrivente la deside como "pasi nonasetable".
@T Arabia Saudi furni aida finansial a Pacistan
@L aora_oji/2019/arabia_saudi_furni_aida_finansial_a_pacistan
====== Arabia Saudi furni aida finansial a Pacistan ======
18 febrero 2019
Arabia Saudi ia promete acordas de investi, con valua de $20 mil milion, con Pacistan, cual desira reforti sua economia frajil.
Los formi un parte de un turi publica de Asia par Mohammed bin Salman, la prinse erital de la rena.
Pacistan nesesa solve rapida un crise de salda de paias, e espera la aida de sua suportores internasional. La acordas inclui un refineria de petrolio con custa de $8 mil milion en Gwadar, un site de porto major.
La du lados ia suscrive ance alga otra acordas tempora e notas de comprende en la campos de enerjia, petrocimicales e mina.
Sola $8 mil milion de reservas stranjer resta en la banco sentral de Pacistan.
La ministro xef, Imran Khan, ia xerca aida de paises amin per redui la grandia probable de la rescata finansial cual sua pais va nesesa de la Funda Monal Internasional, su restrinjes multe sever. Lo xerca un rescata finansial a la ves des-tre pos la parte tarda de la desenio de 1980, e Arabia Saudi ia presta ja $6 mil milion.
Pacistan es la stasion prima en la turi de Asia. La prinse erital, conoseda como MBS, va es en Barat a martedi, e va visita Xina a jovedi e venerdi.
La prinse desira remoldi sua imaje internasional pos la caso de Jamal Khashoggi, un jornaliste ci ia es omisideda en la consuleria saudi en Istanbul en otobre.
En cuando Pacistan pote benefica de la jenerosia de Arabia Saudi, la pais en Asia sude importa ance a la rena. La du paises ave un relata militar longa, e la visita par MBS aveni a un tempo cuando la jeopolitica en la rejion cambia, incluinte entre consernas sur la influe de Iran.
@T Arabia Saudi permete femes a viaja nondependente
@L aora_oji/2019/arabia_saudi_permete_femes_a_viaja_nondependente
====== Arabia Saudi permete femes a viaja nondependente ======
4 agosto 2019
Femes en Arabia Saudi pote aora viaja estra la pais sin la permete de un defendor mas.
La regula nova, anunsiada par declara rial a venerdi, capasi femes de plu ca 21 anios a solisita mesma un pasaporto, e rejistra nases, sposis e divorsas.
La rena ia laxi resente ance otra restrinjes de dura longa contra femes, ma campaniores dise ce on nesesa fa ancora plu per aumenta la diretos de femes.
Arabia Saudi ia deveni sempre plu esaminada par causa de sua trata de sua sitadanes fema, un problem asentuada par alga casos major de femes saudi ci ia xerca refuja estra la pais.
La xef par fato, prinse erital Muhammad bin Salman, ia laxi alga restrinjes contra femes, incluinte par sutrae un proibi de gida autos en la anio pasada, en atenta moderni la rena tradisional.
Ma el ia responde sever contra ativistes per diretos fema, litigante alga de los en menses resente.
La sistem de defendores mas en Arabia Saudi dona a sposos, padres e otra relatadas mas la autoria de fa desides esensal sur femes.
Asta aora, esta ia causa ce femes ala nesesa xerca la permete de acel relatadas per oteni o renovi un pasaporto per sorti de la pais.
Ma la declaras rial nova, publicida en la jornal ofisial semanal de la rena, comanda ce un pasaporto saudi ta es donada a cualce sitadan ci solisita lo, e ce persones con 21 anios o plu no nesesa un permete de viaja.
La cambias covre ance regulas de emplea cual estende per femes la posibles de labora. Longo la regula, tota sitadanes ave aora la direto de labora sin discrimina de jenero, descapasia o eda.
An pos la reformis, alga partes de la sistem de defendores mas resta. Per esemplo, femes nesesa la permete de un relatada mas per sposi o vive nondependente, e per sorti de prison pos es arestada.
Los no pote ancora transfere sitadania a sua enfantes, o dona la acorda ce sua enfantes sposi.
@T Arestas de patinetores enebriada en Kobenhavn
@L aora_oji/2019/arestas_de_patinetores_enebriada_en_kobenhavn
====== Arestas de patinetores enebriada en Kobenhavn ======
9 julio 2019
En Danmarc, la polisia ia aresta 28 persones en Kobenhavn ci ia viaja sur patinetas eletrical su influe de drogas o alcol.
En la fini de semana, 24 patinetores ia es arestada per sua enebria par alcol, e cuatro per sua state pos usa drogas recreal.
La polisia ia anunsia la arestas a Twitter, pos un colpa contra la usa nonsecur de patinetas en la capital dansce en la plu temprana de esta anio.
Gidores enebriada debe paia un multa de 2000 krones ($300 dolares esuan).
Patinetas eletrical ia deveni plu popular en Kobenhavn pos alga cambias de la regulas trafical cual ia fasili sua usa. On lua la patinetas par ap, e on pote parci los a cualce loca en un zona definida.
Esta modo de transporta reseta resenias diversa. Abitores local cexa sur plu feris e sur la nonoportunia per se.
On ia introdui patinetas eletrical ance en alga sites tra Europa, como ance San Francisco, la Site Mexico, e York Nova.
En junio, la maior de Paris ia anunsia un colpa contra la usa de la patinetas, seguente un crese de la cuantia de persones ferida. El ia dise ce la situa es "no nonsimil de anarcia" e ce sua site nesesa reali "ordina e regulas per serti la securia de vias".
@T Blocos potiosa perde potia en la Parlamento European
@L aora_oji/2019/blocos_potiosa_perde_potia_en_la_parlamento_european
====== Blocos potiosa perde potia en la Parlamento European ======
27 maio 2019
La resultas de la votas per la Parlamento European mostra ce la blocos grande sentral destriste e sentral sinistriste ia perde sua majoria combinada, contra un suporta cresente per libralistes, verdes e nasionalistes.
An tal, la Partito de la Popla European (PPE), sentral destriste, resta la grupo la plu grande. On previde ce lo va formi un alia suportante la Uni European con la sosialistes e democratas, aidada par libralistes e verdes. Poplistes ia fa ganias en alga paises, ma no ia ateni la resultas estrema cual alga persones ia predise.
La Parlamento aida deside la leges de la UE. Esta resultas va fa un rol major en asinia la postos xef en la Comision European, la departe cual reali la leges.
Tra la 28 statos-membros, pico min ca 51% de la votores posible ia partisipa. Esta proportio es la plu alta en 20 anios, reversante du desenios de apatia profondinte.
Con la estimas presente, la blocos cual ia domina a ante (la PPE e la sosialistes-democratas) no va es capas de formi un alia grande en la parlamento, sin suporta. On predise ce la PPE ia gania 179 sejas, contra sua 216 sejas en 2014. La cuantia de parlamentores sosialiste-democrata va redui de 191 a sirca 150.
Lo es probable ce la partitos favorente la Uni European va reteni ancora un majoria de la sejas, xef pos la ganias fada par la bloco libraliste, ma ance pos un deside par la partito de Emmanuel Macron, presidente franses, de junta Frans a acel grupo. Sua alia Renase ia perde contra la Asembla Nasional estrema destriste de Marine Le Pen.
La partitos verde ia fa susedes grande. Sondas sujesta ce la verdes va asende de 50 parlamentores a sirca 67. Ma ganias par partitos nasionaliste en Italia, Frans e otra paises va forti la euroseticas ci vole restrinje la potia de la UE.
En Deutxland, ambos partitos sentral major ia sufri. La proportio de votas per la Democratas Cristian de Angela Merkel ia redui de 35% en 2014 a 28%, e la Uni Sosial Democrata (sentral sinistriste) ia cade de 27% a sola 15,5%. La Alternativa per Deutxland, partito popliste e destriste, ia fa min bon ca prevideda, an si plu bon ca a sua ves prima en 2014. La sondas indica ce lo ia gania 10,5%.
En la Rena Unida, la Partito de Brexit, nova formida e gidada par Nigel Farage, ia gania 32% de votas. Ance la Democratas Libraliste ia fa ganias, ma la partitos major Conservaliste e Laboriste ia sufri perdes grande.
Entre resultas miscada per partitos estrema destriste tra Europa, en Frans, la Asembla Nasional de Le Pen (nomida la Fronte Nasional en la pasada) ia selebra sua vinse, pos reseta 24% de votas contra la 22,5% per la partito de Macron. Un ofisior presidental ia descrive esta como un "delude", ma "asoluta onorosa" en compara con resultas pasada.
En Magiar, la partito antimigral de Viktor Orbán ia gania 52% de votas e donce 13 de la 21 sejas parlamental de sua pais. "Nos es peti ma nos vole cambia Europa," el ia dise, descrivente la elejes como "la comensa de un eda nova contra la migra".
En Espania, la partito sosialiste renante ia vinse clar, ganiante 32,8% de votas e 20 sejas. La partito Vox de la destra estrema ia prende sola 6,2% de votas e tre sejas, finite a la loca sinco.
En Elas, la ministro xef Alexis Tsipras ia recomenda un eleje nasional temprana, pos cuando la partito conservaliste Democratia Nova ia gania 33,5% de votas contra sola 20% per sua propre partito Syriza.
Sitadanes de la Uni European ia vade per vota con cuantia notable plu alta ca a la ves presedente, en 2014, cuando min ca 43% de la votores posible ia partisipa. La cuantia de votores en Magiar e Polsca ia deveni plu ca la duple de lo a acel ves, e en Danmarc on ia ateni 63%, un cuantia recordo.
Analistes atribui la partisipa grande a fatores diversa, incluinte la asende de partitos popliste e la consensia cresente sur la crise de clima.
@T Bolsonaro nega datos sur la desforesti de la Amazona
@L aora_oji/2019/bolsonaro_nega_datos_sur_la_desforesti_de_la_amazona
====== Bolsonaro nega datos sur la desforesti de la Amazona ======
20 julio 2019
Jair Bolsonaro, la presidente de Brasil, ia acusa ce la ajenteria nasional de spasio de sua propre pais ia menti sur la cuantia de desforesti en la Amazona.
El ia dise ce la organiza mali la reputa de Brasil en otra paises par publici datos mostrante un crese notable de desforesti ala.
La presidente estrema destriste ia dise ce el vole encontra la xef de la ajenteria per discute la situa.
La Instituida Nasional de Rexerca Spasial (INPE) dise ce sua datos ave un coretia de 95%.
Bolsonaro ia fa sua comentas ier, a la dia pos cuando datos inisial de satelite, publicida par INPE, ia indica ce plu ca 1000 cilometres cuadrida de la foresta pluvosa ia es destruida en en la 15 dias prima de esta mense: plu par 68% ca en la intera de julio 2018.
Parlante en un consenta con jornalistes stranjer, Bolsonaro ia dise ce la datos "no relata con la realia".
Siensistes dise ce la Amazona ia sufri perdes aselerada pos la ariva de Bolsonaro a sua posto en janero, con politicas cual favore la developa plu ca la conserva.
Como la foresta pluvosa la plu grande de mundo, la Amazona es un conserveria esensal de carbono cual redui la rapidia de la caldi global.
La statistica ofisial sujesta ce la razona major de cade arbores ala es per crea pastos nova per boves.
Tra la desenio pasada, governas presedente ia susede redui la desforesti, coordinante respondes par ajenterias federal e usante un sistem de multas.
Ma Bolsonaro e sua ministros ia critica esta punis e ia supravide un diminui notable de confiscas de lenio nova e de condenas per crimines ambiental.
Alga instituidas siensal, incluinte la Academia Brasilera de Siensas, ia defende INPE e la coretia de sua datos.
En sua comentas a jornalistes stranjer ier, Bolsonaro ia nega ance la esiste de famia en Brasil. El ia dise ce on ave "no persones sur la stradas con corpos sceletin como on vide en otra paises".
Ma longo datos de la Organiza de la Nasiones Unida per Nuri e Cultiva, 5,2 milion persones ia sufri de famia en Brasil en 2017.
@T Boves malada pasa tra un mataderia polsce
@L aora_oji/2019/boves_malada_pasa_tra_un_mataderia_polsce
====== Boves malada pasa tra un mataderia polsce ======
29 janero 2019
La polisia polsce investiga un mataderia sur cual on suspeta ce lo contrabanda boves malada, pos un filma secreta.
La ofisior veterinar xef de Polsca dise ce la filma, difusada en la pais par la canal TVN24, revela "ativia nonlegal, car la matas ia es esecutada con intende a note per evita supravide ofisial".
La filma mostra boves vidable malada, e laborores de mataderia ci talia la corpos mor. On no sabe a do la carne ia es enviada.
Esta revela es posible grave per la Uni European, car un scandal de carne de cavalo en 2013 ia esposa la complicadia de vendes de carne en la mercato interna de Europa. La scandal ia causa retiras de produidas, en cuando ofisiores ia labora per trasa carne suspetada.
Un declara par la ofisior veterinar dise ce sua esaminores e la polisia ia es avisada sur "matas suspetada nonlegal" a un mataderia prosima a Ostrów Mazowiecka en la norde-este de Polsca.
En la note de 14--15 janero, los ia trova ala oto boves malada, e "on ia fa un deside de mata la animales sin retarda, per fini sua sufri. En la esamina, on ia identifia la posesores de la animales, como ance un vendor de animales ci ia transporta boves nonconveninte per transporta, e empleadas de la mataderia ci ia es encargada sur la bonstate de animales."
La declara ia segue a poca dias pos la difusa televisada, cual mostra boves, tro malada per sta, tirada de camiones a en la mataderia.
On ia comanda la esaminores a visita otra mataderias en la rejion, e la polisia atenta identifia cualce comprores o vendores de carne de animales malada, cual no conveni per vende.
Eurostat, la departe UE sur statistica, dise ce Polsca es la produor sete de carne de bove en la UE, longo datos furnida de mataderias. En 2017, lo ia produi 558 500 tones de esta carne e sua produidas.
Polsca produi cuasi du milion boves per mata en cada anio. An tal, la carne de bove representa sola 2% de la consuma de carne en la pais.
@T Brasil usa soldatos contra crimin violente
@L aora_oji/2019/brasil_usa_soldatos_contra_crimin_violente
====== Brasil usa soldatos contra crimin violente ======
6 janero 2019
Sirca 300 soldatos ia es enviada a la site Fortaleza en la norde-este de Brasil per combate un crese de violentia criminal. Soldatos va patrulia ala e tra la stato Ceará per atenta para la atacas contra botecas, bancos e buses.
La ministreria de justia ia comanda esta envia spesial pos desuples de atacas en la semana pasada. La atacas protesta contra medias nova e plu sever en prisones local, cual es xef controlada par ganges criminal.
Prisones en la sato ia bloci siniales de telefoneta e ia abandona un politica de grupi prisonidas par la gang a cual los parteni.
Esta segue a poca dias pos la inaugura de presidente Jair Bolsonaro, ci ia es elejeda per sua promete de combate la crimin nonfrenida en la pais.
Videos de securia televisada en Brasil mostra ganges ci ensende gasolinerias. On ia aresta sirca 50 suspetadas sur ci on alega ce los pertine a la violentia.
Brasil ave plu ca 700 mil persones en prison, la numero tre de la cuantias la plu alta de mundo, pos la SUA e Xina.
Bolsonaro, ci ave 63 anios, ia gania la eleje presidental con marjin grande contra Fernando Haddad de la Partito de Laborores a 28 otobre. On regarda Bolsonaro como un figur profonda dividente, de ci sua comentas raziste, omofobica e misojine ia coleri multe persones.
Ante deveni un politiciste, Bolsonaro ia servi en la militar brasilera, do el ia es un paracador e ia deveni un capitan. El reteni lias prosima a la fortes armada.
@T Britan reeleje Boris Johnson per reali Brexit
@L aora_oji/2019/britan_reeleje_boris_johnson_per_reali_brexit
====== Britan reeleje Boris Johnson per reali Brexit ======
13 desembre 2019
En la Rena Unida, la Conservalistes de Boris Johnson ia fa un vinse inondante en la vota jeneral tre en min ca sinco anios.
Los ocupa aora sirca 55% de la sejas en la parlamento de London, pos gania en multe locas en Cimri e la norde de England cual ia vota tradisional per la Partito de Labora.
Johnson ia dise ce la resulta va permete ce el reali Brexit, e ce la Rena va sorti de la Uni European a la fini de janero. La Conservalistes va ave sua majoria la plu grande de sejas en parlamento pos la vinse de Margaret Thatcher en 1987.
Jeremy Corbyn, xef de la Partito de Labora, ia descrive la resulta como "multe deludente". El va resta en sua posto per la tempo de considera cual veni aora a sua partito, ma el va resinia a pos.
La Partito Nasional Scotes ia vinse ance, ocupante aora 48 de la 59 sejas scotes en la parlamento de London.
Nicola Sturgeon, ministro prima de Scotland e xef de acel partito, ia comenta ce sua pais ia envia "un mesaje multe clar" ce lo no desira un governa Conservaliste su Johnson, e ce la resulta no autori la sorti de Scotland de la UE ma suporta ce Scotland eleje sua propre futur en un referendo de autonomia.
Jo Swinson, ci ia deveni mera resente la xef de la Democratas Liberaliste e ia comensa sua campania par dise ce el intende deveni la ministro xef, ia perde sua seja en Scotland par sola 149 votas.
La Partito de Labora ia esperia sua defeta la plu profonda pos 1935. Notable, lo ia perde sejas representante comunias cual ia vota per sorti de la UE en la referendo de 2016.
Analises de la statistica sujesta ce Brexit ia es la fator dominante en la mentes de la votores. Divides forte de opina entre parlamentores ia stania la prosede de sorti de la UE, e la pais ia deveni tan fatigada par la nonprogresa eterna ce multe persones ia prefere vota an contra sua tradision.
Ma ance la nonpopularia de Corbyn, e sua politica de fa un plu referendo sur Brexit, ia contribui a la move de la votores a via de Labora.
La stratejia de Johnson ia es un foca sin sesa a un sola mesaje -- la completi de Brexit. Corbyn ia campania sur temas plu diversa, prometente spende plu per servis publica incluinte la Servi Nasional de Sania.
@T Canes norsce mori par un maladia misteriosa
@L aora_oji/2019/canes_norsce_mori_par_un_maladia_misteriosa
====== Canes norsce mori par un maladia misteriosa ======
9 setembre 2019
Un maladia nonconoseda ia mata alga canes en Noria en la dias resente.
La Departe Norsce per Securia de Comeda ia dise ce asta 40 canes ia deveni malada con vomiti e diarea, e alga ia mori.
La casos prima ia aveni en Oslo, la capital, e on ia reporta otras en 13 otra vilas, cisa plu.
La Instituida Veterinar ia dise ce lo no sabe esce la maladia es causada par du tipos de bateria trovada en autopsias.
NRK, la compania nasional difusante de Noria, reporta ce 25 canes en soma ia mori de la disturba. Ma esta no ia es confirmada par la Departe.
Un can en Sveria, pais visina, ia es ance moveda a un ospital veterinar pos apare a un gala en Trondheim, un site norsce.
La patolojistes de la Instituida Veterinar Norsce ia trova ce tre canes ave indicas de intestines sanguosa. Los ia elimina causas comun como salmonela e venena de rata.
Un portavose per la Departe ia dise ce la maladia pare "multe grave per un can, ma nos ancora no sabe esce esta es comunicable o mera un serie de casos individua".
La Departe recomenda ce posesores de canes teni sua bestias a corea per evita contata con otra canes.
@T Cimri Sude Nova prepara per un dia desastrosa
@L aora_oji/2019/cimri_sude_nova_prepara_per_un_dia_desastrosa
====== Cimri Sude Nova prepara per un dia desastrosa ======
12 novembre 2019
Un area vasta de la costa este de Australia, incluinte la rejion sirca Sydney, prepara se contra la menasa de focones savaje la plu grave en sua istoria.
Plu ca sincodes focones arde ja tra la stato Cimri Sude Nova, e on predise un situa "desastrosa" per la parte plu tarda de oji. La flamas va sperde rapida, perilinte vives, nurida par la temperatur alta e la ventas forte.
Sirca ses milion persones abita en la rejion afetada. On ia recomenda ce persones resta distante de la savana, e ce on parti de sua casa ante la grandi de la focones. Plu ca ses-sento scolas es cluida tra la stato.
Tre persones ia mori e plu ca sento sincodes imobilas ia es destruida pos la intensi de la crise a venerdi. Ma la autoriosas dise ce los fronti aora lo cual ta pote es "la semana de focones savaje la plu perilosa cual esta nasion ia vide nunca".
Espertas compara la predise per oji a la Saturdi Negra de 2009 en la stato Victoria, cuando tal focones ia mata 173 persones.
Esta es la ves prima cuando on ia avisa sur focones de grado "desastrosa" tra la rejion jeneral de Sydney e en la partes a sua norde e sude. Esta grado, la plu alta, ia es introduida pos la esperia de 2009.
A 15:00 de ora local, on ia publici ja 11 avisas de crise, avertinte persones ce sua vives es direta perilida. Ma la xefes de la pompores ia averti ce la situa la plu mal ancora no ia ariva, con temperatur prediseda de 37°C en alga partes e la posiblia de cambias tarda de la dirije de la venta.
Tre mil pompores batalia un fronte cual estende tra mil cilometres longo la costa norde de Cimri Sude Nova. La pompores es aumentada par ecipos de otra statos e de Zeland Nova, como ance par la Forte de Defende Australian.
Ofisiores dise ce la grandia de alga focones esede sento mil ectares. Brasas de la focones grande pote causa plu ensendes tan distante como tredes cilometres.
La saison de focones en Australia ia deveni plu longa e intensa par causa de cambias a la clima.
@T Cisa un vota jeneral en Osteraic pos un scandal de froda
@L aora_oji/2019/cisa_un_vota_jeneral_en_osteraic_pos_un_scandal_de_froda
====== Cisa un vota jeneral en Osteraic pos un scandal de froda ======
19 maio 2019
La canselor osteraices Sebastian Kurz ia demanda per un vota jeneral pos la resinia de sua viscanselor Heinz-Christian Strache sur un scandal de froda.
La organiza sentriste-destriste de Kurz, la Partito de la Popla, governa con la grupo estrema destriste de Strache, la Partito de Libria de Osteraic.
Strache ia resinia pos la apare de un video secreta filmada, cual pare mostra el en discute sur contratas governal con un investor alegada rusce.
Strache ia culpa alcol per sua atas "como adolesente", disente ce sua condui ia es "stupida e nonfidable", e ce el resinia per evita dana plu la governa.
Alexander Van der Bellen, la presidente de la pais, ia dise ce un vota jeneral es nesesada pos la resinia. El ia parla sur esta con Kurz, e los va discute oji la pasos veninte.
Miles de persones con cartones e banderas ia asembla en fola sur la plaza estra la ofisia de Kurz, esijente la vota.
Kurz ia atenta distanti se de scandales cual ia afeta la Partito de Libria en la pasada, xef los ci ia envolve ofisiores de partito e antisemitisme o razisme. Ma sua oposores political urje el a responde sur la revela la plu resente.
@T Coleria sur la deteni de un jornaliste nijerian
@L aora_oji/2019/coleria_sur_la_deteni_de_un_jornaliste_nijerian
====== Coleria sur la deteni de un jornaliste nijerian ======
10 novembre 2019
La departe governal de securia de Nijeria dise ce lo deteni ancora la jornaliste Omoyele Sowore, ci es acusada de tradi, an pos cuando on ia libri el con garantia, car no person ia veni per reprende el.
Ma Sahara Reporters, la pajeria de novas fundida par Sowore, dise ce on ia preveni ce sua avocatos asede el cuando los ia atenta prende el de prison en Abuja.
Sowore ia es detenida en Lagos en agosto, pos recomenda un revolui. El ia es un aspiror per la presidentia a la eleje en febrero pasada. Sua aresta ia provoca coleria publica contra la departe de securia, DSS.
Un ativiste e jornaliste ci abita usual en la SUA, el ia es acusada de tradi, lava de mone, e trasa dijital pos alegas ce el ia comparti informas falsa e insultante sur presidente Muhamadu Buhari, ci ia gania un periodo du en la eleje.
El ia recomenda un revolui pos dise ce la eleje en esta anio no ia es credable.
A 2 agosto, el ia tuita: "Tota cual es nesesada per un #Revolui es ce la opresadas eleje un data cual los desira per libra, no controlada par la aproba de la opresor."
A la dia seguente, el ia envia un plu tuita: "DSS invade la casa de Sowore."
Esta es la ves du a cual on ia dona libria a Sowore con garantia ma sin relasa ultima el.
@T Combates en Mexico sur la fio de un padron de drogas
@L aora_oji/2019/combates_en_mexico_sur_la_fio_de_un_padron_de_drogas
====== Combates en Mexico sur la fio de un padron de drogas ======
18 otobre 2019
En Mexico norde, la fortes de securia ia fa un batalia grave contra membros de la cartel Sinaloa, un organiza criminal e potiosa de drogas, pos la descovre de un de la xefes de la grupo.
Ovidio Guzmán López ia es trovada par un patrulia costumal en Culiacán. El es la fio de Joaquin "El Chapo" Guzmán, la padron ci ia es condenada en New York a vive en prison con 30 plu anios, sur 10 acusas, incluinte la contrabanda de drogas e la lava de mone.
El ia evade un prison mexican tra un tunel en 2015, ma ia es arestada a tempo plu tarda. On ia estradi el a la Statos Unida en 2017.
Guzmán, ci ave 62 anios, es un xef pasada de la cartel, sur cual ofisiores dise ce lo ia es la furnor la plu grande de drogas a la SUA.
Sur Ovidio Guzmán, en sua desenio tre, on crede ce el ia fa un rol major en la cartel pos la aresta de sua padre. La SUA xerca el per alga acusas relatada con drogas. El ia es detenida per tempo corta ante cuando la polisia ia libri el.
On ave no reportas ofisial de moris, ma imajes ia emerji cual pare mostra corpos mor sur la stradas de Culiacán.
La governa de la stato Sinaloa dise ce lo "labora per restora calmia e ordina a fas de la avenis con efeto grande cual ia reali en oras resente a puntos diversa sirca Culiacán".
@T Congresores fema responde pos un ataca par Trump
@L aora_oji/2019/congresores_fema_responde_pos_un_ataca_par_trump
====== Congresores fema responde pos un ataca par Trump ======
16 julio 2019
En la SUA, cuatro congresores fema ci ia es atacada par presidente Donald Trump en tuitas vasta condenada como raziste, ia rejeta sua comentas como un distrae.
Representores Alexandria Ocasio-Cortez, Ilhan Omar, Ayanna Pressley e Rashida Tlaib ia recomenda ce la popla esuan "no segue la tenta", a un confere jornaliste ier.
Trump ia sujesta ce la cuatro femes, de ci cada es un sitadan de la SUA, "pote parti". El ia defende sua comentas e ia nega alegas de razisme.
Parlante a reportores, tota la cuatro femes ia dise ce on debe foca a politica e no a la parolas de la presidente.
"Esta es simple un disturba e un distrae de la caos calosa e cultur nononesta de esta governa, tra tota niveles," Pressley ia dise.
Omar e Tlaib ia repete sua recomendas ce on acusa Trump de malcondui.
Tre de la femes ia nase en la SUA. Omar ia nase en Somalia.
Los ia responde pos un arenga en Twitter par Trump a soldi, comandante la cuatro femes a "revade per aida repara la locas completa rompeda e infestada par crimin, de do los ia veni".
La comentas de Trump ia es jeneral condenada como raziste e xenofobica.
@T Controversia sur la condena de un omisidor canadian
@L aora_oji/2019/controversia_sur_la_condena_de_un_omisidor_canadian
====== Controversia sur la condena de un omisidor canadian ======
9 febrero 2019
Un om canadian ci ia mata adorores en un mascita en la Site Quebec en 2017 ia deveni condenada a spende sua vive en prison.
Alexandre Bissonnette, ci ave 29 anios, va cuali per libria limitada pos 40 anios.
La acusores ia demanda per un condena de 150 anios en prison, cual ta es la puni prisonal la plu sever en la istoria de Canada. En loca, la judor François Huot ia eleje permete la posiblia de libria limitada cuando Bissonnette va vive ancora.
Anunsiante sua deside, la judor de la Corte Superior de Quebec ia dise ce "punis no debe es venjas".
En Canada, un condena per omiside de grado la plu estrema trae automata un condena per vive, sin posiblia de libria limitada ante la pasa de 25 anios.
A la sera de 29 janero 2017, Bissonnette ia entra violente a la Sentro Cultural Muslim de Quebec e ia spara a la persones asemblada per preas, matante ses de los e causante feris grave a sinco otras, incluinte Aymen Derbali, ci es aora paraliseda.
En marto, Bissonnette ia confesa la mata de Khaled Belkacemi (60 anios), Azzedine Soufiane (57), Abdelkrim Hassane (41), Mamadou Tanou Barry (42), Aboubaker Thabti (44) e Ibrahima Barry (39), en sua ataca.
El ia declara se culpable ance sur ses acusas de omiside atentada, incluinte un per la 35 persones ci ia es en la mascita a la tempo de la ataca, ma ci no ia es ferida.
"Me vergonia sur lo cual me ia fa," el ia dise a un corte en Quebec en la pasada. "Me no es un teroriste, me no es un islamofobica."
Huot ia dise ce la atacas par Bissonnette ia es motivada par prejudi, ma el ia nota ance ce Bissonnette ave disturbas de sania mental.
Derbali ia informa jornalistes a la corte ce multe de la survivores es profonda deludeda par la deside. El ia dise ce la condena no refleta bon la estremia de la crimines fada.
En 2011, la lege canadian ia es alterada per permete ce, per omisides multiple, judores dona un serie de condenas en loca de condenas paralel de 10 o 25 anios, sin posiblia de libria limitada.
La avocatos de Bissonnette ia razona ce, si on ta condena el a un serie de 25 anios per cada omiside, esta ta es egal a mata el par prisoni.
@T Criptomone es nonasedable pos la mori de la encargada
@L aora_oji/2019/criptomone_es_nonasedable_pos_la_mori_de_la_encargada
====== Criptomone es nonasedable pos la mori de la encargada ======
5 febrero 2019
La intercambieria la plu grande de criptomone en Canada es noncapas de asede miliones de dolares de mone dijital, pos la mori subita de sua fundor.
Quadriga ia rejistra se per proteje contra detas, estimante ce sirca 180 milion dolares canadian manca.
Lo no ia pote loca o securi sua reservas de criptomone pos cuando Gerald Cotten ia mori en desembre. Cotten, ci ia ave 30 anios, ia ave la sola encarga per manipula la reservas e la mone.
En documentos rejistrada con la Corte Suprema de Scotia Nova a 31 janero, sua vidua Jennifer Robertson dise ce la computador portable cual Cotten ia usa per labora "es sifrida, e me no conose la parola secreta o la clave de recovre. An con xercas repeteda e asidua, me no ia pote trova los scriveda en cualce loca."
La compania ia emplea un investigor per esplora esce on pote asede la datos, ma esta labora continuante ia fa sola "susedes limitada en regania un pico de monetas" e alga informas de la computador e telefoneta de Cotten.
Quadriga investiga ance esce lo es posible ce alga de la criptomone es securida en otra intercambierias. La compania dise ce sirca 115 mil de sua usores teni saldas en sua contas personal en forma de obligas.
La compania estima ce lo debe sirca 250 milion dolares canadian, incluinte 70 milion de mone fisical.
La afidavit dise ce la majoria de la criptomone ia es tenida par Quadriga en un "portamone fria", cual es estralinia e usada per securi criptomone de piratas e furores.
Problemes de licuidia per la compania, locada en Columbia Brites, ia comensa en janero 2018, cuando CIBC, un banco canadian, ia jela plu ca 25 milion dolares liada a sua prosedor de paia cuando la banco ia esperia difisiles en determina ci posese la mone.
La problemes es aumentada par la mori nonespetada de Cotten. El ia mori en un viaja en Barat, par complicas con la maladia de Crohn.
@T Cuatro polisiores es matada par un otra en Paris
@L aora_oji/2019/cuatro_polisiores_es_matada_par_un_otra_en_paris
====== Cuatro polisiores es matada par un otra en Paris ======
4 otobre 2019
En Frans, un empleada de la polisia ia usa un cotel per mata tre ofisiores e un manejor a la xeferia polisial sur un isola en la sentro de Paris.
La atacor, ci on ancora no ia nomi, ia es mesma matada par fusil par otra polisiores.
Atestores ia descrive un sena de panica, con multe persones larmante e corente de la construida. On ia clui acel parte de la Île de la Cité.
La ataca ia aveni a la dia pos cuando polisiores tra Frans ia greve sur violentia cresente contra se.
On ia inisia un investiga de omiside. La motiva de la ataca resta nonclar, ma alga ofisiores de la sindicato polisial ia sujesta ce la atacor ia es envolveda en un disputa en sua loca de labora.
Longo Christophe Castaner, ministro de internas, el ia es un spesialiste de infotecnolojia. El ia ave 45 anios, de cual el ia pasa 16 en labora per la polisia de Paris, en la departe de securia.
Castaner ia dise ce on ia persepi en la atacor no indicas avertinte. El ia ajunta: "A la surfas, el ia pare un empleada model."
La polisia ia esplora sua casa en la norde de la site e ia aresta sua sposa, an si los no ia acusa el.
@T Danmarc averti Trump ce el no pote compra Gronland
@L aora_oji/2019/danmarc_averti_trump_ce_el_no_pote_compra_gronland
====== Danmarc averti Trump ce el no pote compra Gronland ======
17 agosto 2019
Gronland ia dise ce lo es "no per vende" pos un sujesta ce Donald Trump ia dise ce la SUA desira compra la isola.
La Wall Street Journal ia reporta ce, a comes e consentas con sua conselores, la presidente esuan ia discute la idea de compra Gronland, un teritorio autonom dansce, ance nomida Calalitnunat.
Ma la governa gronlandes ia refusa la idea, disente: "Gronland es rica con recursos valuada como minerales, acua e jelo la plu pur, reservas de pexes, comedas de mar, e enerjia renovable, e es un frontera nova per turisme aventurosa. Nos es abrida per comersia, no per vende."
La idea ia es ance rapida rejetada par politicistes en Danmarc. Lars Løkke Rasmussen, ministro xef pasada, ia tuita: "Lo es probable un broma de la prima de april, ma intera estra la saison!"
La WSJ ia indica ce Trump ia parla sur la compra con "grados variante de seria". Fontes sitada en otra jornales ia desacorda sur esce la presidente broma o espera vera crese la teritorio de la SUA.
Poul Krarup, editor xef de la jornal Sermitsiaq, ia dise ce el no pote crede la comentas par Trump. "Gronland es un rejion autonom en la rena dansce e debe tal es respetada. Nos ta desira coopera con la SUA, esta es sin duta, ma nos es nondependente e nos deside ci es nosa amis."
Søren Espersen, portavose per la Partito de la Popla Dansce, ia comenta: "Si el contempla vera esta, alora esta es la demostra final ce el ia deveni loco. La pensa ce Danmarc ta vende 50 mil sitadanes a la Statos Unida es completa riable."
E Rasmus Jarlov, un parlamentor dansce conservaliste, ia scrive en Twitter: "De tota cosas cual no va aveni, esta es la plu nonprobable. Oblida lo."
Trump va visita Danmarc en setembre, ma on ave no indica ce la compra de Gronland es a la menu.
Gronland es la isola la plu grande de mundo (estra Australia, cual on defini como un continente). Lo es locada entre la Mar Atlantica Norde e la Mar Artica.
Lo ave un popla de sirca 56 mil persones, consentrada a la costa, de ci cuasi 90% es inuites nativa. Lo ave un autonomia limitada e sua propre parlamento.
Plu ca 80% de la isola es covreda par un glasia, sur cual on teme ce lo fonde par causa de la caldi global.
La fonde de jelo ia fa ce la recursos mineral de la isola deveni plu asedable. Ma on crede ce lo va esposa ance dejetadas radioativa lasada a alga stasiones militar esuan en la Gera Fria.
@T Desacorda en Zeland Nova sur sua aniversario european
@L aora_oji/2019/desacorda_en_zeland_nova_sur_sua_aniversario_european
====== Desacorda en Zeland Nova sur sua aniversario european ======
8 otobre 2019
Un marineta ia ariva en Zeland Nova per onora la aniversario 250 de la europeanes prima ci ia atera ala. Capitan James Cook, esploror brites, ia atera con sua ecipo a 8 otobre 1769, inisiante un rena colonial.
On fa alga dias de avenis per onora la data. Ma Zeland Nova ia es ja poplada par la maoris tra sento de anios, e multe dise ce on debe no onora la aniversario.
En la semana pasada, la Comisionor Alta brites ia ofre un declara de regrete a tribus local sur la mori de nove persones nativa en la encontra prima entre Cook e la maoris. Ma el no ia demanda per pardona.
On crede ce persones maori de isolas polinesian ia ariva en Zeland Nova (de cual la nom maori es Aotearoa) a alga sentenios ante la europeanes prima.
Cook ia es enviada en mision de Britan per trova e mapa lo cual persones de sua tempo ia imajina como un continente grande en la Mar Pasifica, a sude de Australia. El no ia trova acel continente mital, ma a 6 otobre sua xico aidante ia persepi Zeland Nova.
La ecipores, ci ia inclui un xef tahiti e un navigor ci ia aida Cook a comunica con la maoris, ia atera a Tuuranga-nui, aora nomida Gisborne, a la costa este de Isola Norde pos du plu dias.
Cook ia esplora e mapa multe de la costa de Zeland Nova, pausante a alga locas e inisiante relatas con abitores maori. El ia reclama ance la posese de du rejiones per la nom de la corona brites, tal comensante la prosede de coloni.
An si la esplora de Zeland par Cook domina la libros de istoria, un navigor nederlandes nomida Abel Tasman ia es la european prima ci ia vide lo, en 1642, ma el no ia veni a tera.
A saturdi, Jacinda Ardern, ministro xef zelandes, ia comensa la avenis recordante. El ia recomenda ce on parla plu libre sur la istoria de la pais, corajinte persones a "imajina como on ta senti en oia la raconta de un nara, sabente ce en fato on ia perde un asendente par causa direta de acel encontras".
El ia ajunta ce en la pasada, Zeland Nova "ia presenta vera sola 50% de la istoria, e no ia presenta sempre bon lo".
A esta matina, un marineta de barcones ia ateni Gisborne, incluinte un copia de lo de Cook, sur cual du parlamentores ia vade per saluta la ecipo. Protestores ia es ance presente en la vila.
En la encontra prima entre la ecipo de Cook e la abitores maori de Tuuranga-nui, persones ia mori. Un xef de la grupo Ngati Oneone ia es fusilida e matada sin pausa pos un malcomprende sur un defia ritual. A la min oto otra persones maori ia es matada.
An pos la declara de regrete par Britan, multe avocatos per diretos maori dise ce on no ia ata sufisinte per reconose lo cual ia aveni en la dias prima pos la ariva de Cook.
Protestores dise ance ce sua asendentes maori ia es nonjusta tratada en la eda colonial, con la resulta ce comunias maori esperia oji un nivel nonproportial de povria, crimin e discrimina.
En Gisborne, un sculta de Cook ia es manxada con pinta roja a multe veses e va es moveda a un museo.
@T Dirijores de Fukushima es judida como nonculpable
@L aora_oji/2019/dirijores_de_fukushima_es_judida_como_nonculpable
====== Dirijores de Fukushima es judida como nonculpable ======
19 setembre 2019
A plu ca oto anios pos la desastre nucleal a Fukushima, un corte japanes ia desculpa tre dirijores pasada de la compania operante la compleso sur acusas de descura profesal.
Esta ia es la sola caso criminal cual ia veni de la desastre, la plu mal pos Txernobil en 1986.
En 2011, un compleso operada par TEPCO ia es colpada par un tsunami, causante un fonde truple. Plu ca 470 mil persones ia es evacuada de sua casas en resulta, e cuasi 18 500 ia mori o manca par causas plu jeneral de la desastre.
La tre dirijores -- Tsunehisa Katsumata, la presidente pasada, ci ave 77 anios, e la vispresidentes Sakae Muto, de 66 anios, e Ichiro Takekuro, de 71 -- ia es acusada de fali reali taticas defendente, gidante a la moris de 44 persones.
An si nun ia mori direta en la fonde nucleal, plu ca 40 pasientes ospitalida ia mori pos cuando on ia freta los de la zona evacuada. Des-tre persones ia es ance ferida en esplodes de idrojen a la compleso.
En sua judi multe espetada, un corte en Tokyo ia deside ce tota tre omes es nonculpable de descura profesal causante moris e feris. Los ia ta es punida con sinco anios en prison si on ia ta condena los.
La acusores ia reclama ce, an tan temprana como 2002, la xefes ia es avertida ce un tsunami grande de plu ca 15 metres ta pote colpa la compleso, ma ce los ia eleje iniora la informa e no ia forti sua defendes.
Desuples de protestores ia asembla estra la corte ante la anunsia. Un de los, ci ia viaja de la rejion Fukushima, ia comenta: "Si nos no oia judis condenante, nosa laboras tra anios per trae esta a la corte no va es recompensada. E la cultur de la sosia japanes, ce nun aseta la culpablia, va continua."
A du veses, acusores ia refusa ja litiga formal la dirijores pasada, disente ce on ave poca posiblia de susede. Ma un comite judal ia deside a contra, obligante los a partisipa. La litiga ia comensa en junio 2017.
La asidente ia provoca un descomuta completa de tota reatadores nucleal en la pais. An con un opina vastida contra los, alga reatadores ia recomensa sua opera, pos pasa tra esaminas spesial de securia.
La compania TEPCO fasa alga casos legal cual xerca compensa sur la desastre, car alga laborores ia deveni malada pos relimpi la compleso en Fukushima.
@T Dises nonsaja sur laborores forsada en la pasada
@L aora_oji/2019/dises_nonsaja_sur_laborores_forsada_en_la_pasada
====== Dises nonsaja sur laborores forsada en la pasada ======
16 maio 2019
La eritor de un compania deutx de biscotas ia demanda per pardona pos dise ce la compania "ia fa no cosa erante" en sua usa de labora forsada en la rena nazi.
Verena Bahlsen, ci ave 25 anios, ia es acusada de es nonsabosa sur istoria, e ia compania ia distanti se de sua comentas. Ma pos la reata, el ia confesa ce sua dises no ia conveni.
La compania Bahlsen, cual fabrica biscotas Choco Leibniz, ia emplea sirca 200 laborores forsada entre 1943 e 1945, de ci la plu ia es femes de Ucraina, alora ocupada par la nazis.
La controversa ia comensa en la semana pasada, cuando Sra Bahlsen ia informa delegadas a un confere mercatiste: "Me es un capitaliste. Me posese un cuatri de Bahlsen, esta es eselente. Me vole compra un iate de vela e tal cosas."
An si la regardores ia aplaudi riente con la eritor, alga usores de redes sosial ia acusa ce sua bromas sur sua ricia es nonsensosa en relata a la esplota pasada de laborores forsada par la compania.
Demandada sur la critica en un intervisa a pos, Bahlsen ia responde: "Acel ia es ante mea eda, e nos ia paia esata tan multe a la laborores forsada como a la laborores deutx, e nos ia trata bon los." El ia ajunta ce la compania debe senti no culpablia.
Esta comentas ia fa no plu ca profondi la controversa.
Bahlsen ia demanda aora per pardona, disente ce sua parla ia es nonatendente. En un declara ier, el ia dise: "No cosa es plu distante de mea mente ca lejeri la sosialisme nasional o sua efetos."
El ia confesa ance ce el reconose ce el debe aprende plu sur la istoria de la compania.
@T Du scolores es matada par un pistolor en California
@L aora_oji/2019/du_scolores_es_matada_par_un_pistolor_en_california
====== Du scolores es matada par un pistolor en California ======
15 novembre 2019
En la SUA, du studiantes ia es matada e tre otras ia es ferida ier, par un pistolor ci ia spara en un liseo en California.
La xuta ia aveni a Liseo Saugus en Santa Clarita, a norde de Los Angeles, a poca minutos ante la comensa de la dia scolal. On ia aresta un suspetada mas, ci ia es ance ferida.
Multe scolas en la pais ia inisia ja prosedes per tal situas pos atacas simil en anios resente.
La polisia ia trova ses persones ci ia sufri feris de pistol. Esta persones ia es moveda a ospitales local, e la suspetada ia es identifiada como un de los, plu tarda.
Un xica de 16 anios e un xico de 14 ia mori par sua feris. La du otra vitimes ia es du xicas de 15 e 14 anios, e un plu xico de 14.
La suspetada ia es nomida como Nathaniel Berhow, un xico de cual ier ia es sua aniversario 16. Un otra studiante ia descrive el como introvertida ma "natural astuta", ajuntante ce el ave un xica de cor e es un scolta.
Longo cameras vijilante, la suspetada ia prende un pistol semiautomata de sua bolson e ia spara lo a la sinco studiantes, ante usa lo contra sua propre testa.
Polisiores ia dise ce los va xerca la casa de la suspetada per indicas atestante, ce los va intervisa ance tota studiantes a la scola ante relasa los a sua jenitores, e ce los va investiga rumores ce la suspetada ia posta menasas en redes sosial.
La persones en Liseo Saugus e otra scolas prosima ia es restrinjeda a sua construidas per tre oras.
Novas de la ataca ia emerji a media de un debate en la Salon Alta sur leges per regula la posese e usa de fusiles par persones nonmilitar. Richard Blumenthal, un senator de la Partito Democrata, ia razona favorente tal regulas cuando el ia reseta un nota informante sur la ataca.
"Nos aida la problem si nos fali ata," el ia dise. "Lo es no sola un encarga political, lo es un comanda moral."
La regula de fusiles e la direto de porta armas es temas cual divide la politica en la SUA. Un sonda en 2017 ia trova ce sirca 40% de esuanes posese un fusil o abita en un familia cual posese un. La taso de omiside, o mata sin intende, par fusil en la SUA es la plu alta en la mundo developada.
@T Ebola mostra no sinia de para en la RDC
@L aora_oji/2019/ebola_mostra_no_sinia_de_para_en_la_rdc
====== Ebola mostra no sinia de para en la RDC ======
13 junio 2019
La xef de un asosia carital major de rexerca medical ia descrive la eruta la plu resente de la virus ebola en Africa sentral como "vere asustante".
Jeremy Farrar, dirijor de Wellcome Trust, ia dise ce la epidemica es la plu grave pos lo de 2013--16 e ce lo mostra "no sinia de para".
Cuasi 1400 persones ia mori en la Republica Democrata de Congo, e du persones ia mori en Uganda en la casos prima reportada en acel pais. Un xico ugandan de sinco anios, infetada con la virus, ia mori a martedi, e un fem ia mori ier.
La governa de Uganda reporta aora a la min ses plu casos suspetada de la virus.
En un declara, Farrar ia dise ce la sperde de la virus es "trajedin ma nonfortunosa no surprendente". El ia averti ce on previde plu casos, e un responde "plen" nasional e internasional va es nesesada per proteje vives.
"La RDC no debe fronti solitar esta," el ia ajunta.
Pos la caso prima de ebola en la Republica Democrata de Congo en agosto pasada, cuasi 1400 persones ia mori -- sirca 70% de la cuantia intera de persones infetada.
Esta es la eruta du de la plu grandes en la istoria de la maladia, con un aumenta notable de casos nova en semanas resente.
La labora per constrinje la sperde es impedida par violentia de grupos de militiores, e par suspetas contra aida medical stranjer.
Cuasi 200 construidas medical es ja atacada en la RDC en esta anio, obligante mediciste a pospone vasinis e tratas. En febrero, la asosia carital Médecins Sans Frontières (Medicistes Sin Fronteras) ia suspende sua ativia en Butembo e Katwa, du sites este en la episentro de la eruta.
@T Eglesas engles no nesesa plu fa servis de soldi
@L aora_oji/2019/eglesas_engles_no_nesesa_plu_fa_servis_de_soldi
====== Eglesas engles no nesesa plu fa servis de soldi ======
22 febrero 2019
La Sinodo Jeneral, la organiza governante de la Eglesa de England, ia vota per cambia un lege cual esiste de 1603.
La lege ia esije ce pretes fa un servi de soldi en cada eglesa en sua cura. La Episcopo de Willesden, ci ia proposa la cambia, ia descrive lo como "nonmoderna".
Desenios de congregas diminuinte ia lasa un situa en cual alga pretes en England labora en asta dudes eglesas campanial.
A ante, un prete en la campania ia debe solisita la permete de un episcopo per no fa un servi de soldi en cada eglesa.
Entretempo, la Sinodo ia introdui ses prinsipes per boni la trata de persones de jeneros o sesalias diversa, disente ce la Eglesa ia es "descovreda como mancante en sua bonveni e trata de persones LGBTI+".
La "prinsipes pastoral" urje eglesas a vide "la difere como un donada, no un problem" e a construi "fida" e "jenerosia".
La prinsipes coraji persones a reconose sua prejudi, fa ce eglesas deveni locas bonveninte, fa discutes teolojial con respeta, "esclui" la teme, estende cortesia e jentilia a tota persones, e refusa esplota potia supra otras.
@T Erdoğan e Putin acorda contra combatores curdi
@L aora_oji/2019/erdogan_e_putin_acorda_contra_combatores_curdi
====== Erdoğan e Putin acorda contra combatores curdi ======
23 otobre 2019
Turcia e Rusia ia fa un acorda per teni soldatos curdi a via de la frontera de Suria con Turcia. Esta aveni a media de un pausa en la atentas par Turcia de espulsa la curdis e crea un zona secur en la rejion.
Par la acorda, fortes suri e rusce va supravide pronto la retira de combatores curdi. On ave no responde de la soldatos curdi, ci Turcia regarda como teroristes.
La acorda indica un scema de patrulias juntada par turceses e rusces longo la frontera en la semana veninte.
Lo ia es anunsiada pos ses oras de discutes ier, entre Recep Tayyip Erdoğan, presidente de Turcia, e sua ospitor rusce Vladimir Putin, en Sochi, un site a la costa de la Mar Negra.
Un sesaspara organizada par la SUA ia es a punto de espira a la sera de ier, e Turcia ia menasa recomensa sua atacas contra la combatores curdi. Lo dise aora ce esta no es nesesada.
La atacas turces ia comensa cuando la SUA ia anunsia un retira subita e nonespetada de sua soldatos de Suria norde. Analistes dise ce la retira ia forti la influe turces e rusce en acel parte de la mundo.
La soldatos esuan ia suporta la curdis, ci es aliadas en la batalia contra la grupo Daex (Stato Islamiste) en la rejion.
La Nasiones Unida dise ce plu ca 176 mil persones, incluinte cuasi 80 mil enfantes, ia es deslocada en la du semanas pasada en Suria norde-este, do tre milion persones abita.
@T Espania deside esce lo va reloca la restantes de Franco
@L aora_oji/2019/espania_deside_esce_lo_va_reloca_la_restantes_de_franco
====== Espania deside esce lo va reloca la restantes de Franco ======
24 setembre 2019
En Espania, la Corte Suprema va deside esce on debe desentera la restantes de la tirano Francisco Franco.
La governa sosialiste asentua la nesesa de move los de un mausoleo de stato a un loca min controversa. La familia de Franco ia apela contra la desentera.
Esta tema ia divide opinas en Espania, un pais cual senti ancora la efetos de la rena de Franco. El ia gania la gera interna en la desenio de 1930 e ia governa la pais asta 1975.
El reposa prosima a la capital Madrid, en un mausoleo jigante nomida la Vale de la Cadedas, con ance deses de miles de persones matada en la gera interna.
Multe odia acel compleso como un monumento a la vinse de faxisme, e lo ia deveni un santeria per la destra estrema.
La governa ia aproba la desentera en agosto. Lo intende reentera Franco a lado de sua sposa en la semetero El Pardo, a norde de Madrid, do alga otra politicistes es enterada.
Ma la familia, ci prefere evita cualce move, desira ce el ta reposa en un tomba familial en la Catedral de la Almudena, a media vera de la capital.
La governa dise ce la tirano pasada debe no es moveda a cualce loca do on ta pote glori el.
La controversa aveni a un tempo de crise political en Espania, con ce la pais prepara per sua vota jeneral cuatro en cuatro anios.
An si democratia es aora bon instituida, la epoca de Franco osese ancora Espania. On ia acorda un "deside de oblida" en la traversa a democratia.
Un lege de amnestia, adotada en 1977, preveni tota investiga criminal sur la anios de Franco. Scultas de la tirano ia es sutraeda e on ia renomi multe stradas per dejeta indicas evidente de la pasada faxiste.
Un lege de memoria istorial, asetada en 2007 par la governa sosialiste, ia reconose la vitimes de gera a ambos lados e ia furni alga aida a vitimes ci ia survive la tirania de Franco, e a sua familias.
An tal, la labora per trova e reentera miles de persones ci ia mori en la gera interna es lenta e controversa. Plu ca sento mil vitimes de la gera, e de la represa ferose realida a pos, es ancora mancante.
@T Espania es xocada par matas en violentia de jenero
@L aora_oji/2019/espania_es_xocada_par_matas_en_violentia_de_jenero
====== Espania es xocada par matas en violentia de jenero ======
19 janero 2019
On crede aora ce un om espaniol, condenada de mata sua sposa, ia omiside ance sua avocato de defende, con ci el ia fa un relata de ama, ante mata se mesma a venerdi.
José Javier Salvador Calvo, de 50 anios, ia salta de un ponte en la este de Espania cuando la polisia ia fronti el.
La caso ia xoca la pais, provocante debates sur leges de violentia familial.
En reata al la moris, la ministro xef Pedro Sánchez ia promete continua batalia violentia contra femes. On regarda sua tuita como un replica a Vox, un partito estrema destriste e influosa en Andalusia, un rejion sude. Vox vole para la aida legal a femes bateda par omes, disente ce lo favore la femes en modo nonjusta.
Salvador Calvo ia mata sua sposa, Patricia Maurel Conté, ci ia ave 29 anios, par fusil en maio 2003 en Aragon, un rejion en la norde-este de Espania.
Librida con restrinjes en 2017, la mator ia comensa un relata de ama con Rebeca Santamalia Cáncer, la avocato ci ia defende el a sua litiga.
La polisia ia trova la avocato matada par cotel a la casa de Salvador Calvo en Zaragoza, la capital de Aragon, poca pos 04:00 a la matina de ier, pos cuando sua sposo ia reporta el como mancante. El ia ave 47 anios.
Sirca medianote, la omisidor suspetada ia salta ja de un ponte en Teruel, un vila a 150 cilometres a la sude, cuando un patrulia de polisia ia vide el.
Carmen Sánchez, representor de governa local, ia comenta a reportores ce la avocato ia es un vitim de "violentia de jenero".
En Twitter, la ministro xef ia dise ce cuatro femes ia es omisideda en Espania en dias resente, e ce tota persones debe labora per para esta situa xocante.
En la anio pasada en Espania, 47 femes ia es omisideda, cuatro en Aragon, en crimines de violentia de jenero.
La mata de Laura Luelmo, un ensenior con 26 anios, en Andalusia en desembre ia causa un onda de repulsa en la pais. On ia trova sua corpo, partal nuda, prosima a un vileta pos sinco dias de xerca.
A pos, Bernardo Montoya, un om local abitante ia confesa mata el pos atenta viole el. Montoya, ci ave 50 anios, ia spende ja tempo en prison per la omiside de un fem en 1995.
@T Esti regrete un burla contra la ministro xef de Suomi
@L aora_oji/2019/esti_regrete_un_burla_contra_la_ministro_xef_de_suomi
====== Esti regrete un burla contra la ministro xef de Suomi ======
17 desembre 2019
La presidente de Esti ia demanda per pardona pos cuando sua ministro de internas ia descrive la ministro nova de Suomi como "un xica-vendor".
Kersti Kaljulaid ia dise ce el es "embarasada" par la comentas de Mart Helme, un om de 70 anios ci gida la partito Ekre popliste e estrema destriste.
Con 34 anios, Sanna Marin de Suomi es la ministro xef la plu joven de mundo. El gida un alia sentriste sinistra con cuatro otra partitos, de cual la xef de cada es un fem.
Helme ia fa sua comenta controversa a radio en la program de conversa de sua partito. "Aora nos vide como un xica-vendor ia deveni un ministro xef," el ia dise, "e como alga otra ativistes de strada e persones noneducada ia veni ance a la consilio."
Marin ia parla ja sur sua crese en un familia nonvantajida. El ia labora como un aidor de boteca ante vade a universia e comensa un carera political. El ia es la person prima de sua familia ci ia fini la liseo e ia vade a universia.
Respondente en Twitter, Marin ia descrive se como "estrema orgulosa de Suomi": "Asi un enfante de un familia povre pote deveni educada e ateni multe cosas en sua vive. La caxor de boteca pote deveni un ministro xef."
Helme ia dise ce on ia malcomprende sua comenta, ma ia ofre un espresa de regrete a Marin. El ia intende "reconose ce par labora on pote avansa ance de un nivel sosial basa a la politica la plu alta".
En un declara, Kaljulaid ia dise ce el ia telefoni sua corespondente suomi, Sauli Niinistö, e ia solisita ce el pasa sua espresa de regrete a Marin e sua governa.
Partitos oposante en Esti ia urje ce Helme resinia, o ce la ministro xef Jüri Ratas desemplea el.
Esti es la plu norde de la tre statos baltica, e ave lias lingual con la pais de Marin, cual fasa lo a traversa de la Golfo Suomi. La partito Ekre ia entra a la alia governante en maio pos gania 17,8% de la votas en un eleje jeneral, prometente proteje "un Esti nativa".
@T Evelyn Hernández es descondenada sur la mori de sua bebe
@L aora_oji/2019/evelyn_hernandez_es_descondenada_sur_la_mori_de_sua_bebe
====== Evelyn Hernández es descondenada sur la mori de sua bebe ======
20 agosto 2019
En Salvador, un fem de 21 anios, de ci on ia trova sua bebe mor en la vason do el ia pari, ia es desculpada de omiside en un relitiga.
Evelyn Hernández ia declara sempre sua inosentia, disente ce el no ia sabe ce el es ensinta e ce el ia perde consensia cuando el ia es parinte.
La avocatos acusante ia demanda per un condena de 40 anios en prison, ma ativistes per diretos de femes ia recomenda ce on desculpa el.
Salvador ave un de la leges la plu sever de mundo contra aborta. Abortas es nonlegal en tota situas, e persones es comun condenada a entre du e oto anios en prison.
An tal, en multe casos, incluinte lo contra Hernández, la acusa es cambiada a omiside grave, cual ave un condena minima de 30 anios.
"Grasias a Dio, la justia es fada," Hernández ia dise estra la corte, libre pos 33 menses en prison. "Mea futur es continua studia e avansa a mea goles. Me es felis."
La caso ia es la prima de sua spesie en Salvador en cual on ia comanda un relitiga completa. A ante, alga femes acusada de aborta ia reseta condenas reduida cuando on ia judi ce 30 anios en prison es nonproportial e nonmoral, ma los no ia deveni intera descondenada.
Aora, ativistes per diretos fema espera ce esta relitiga va es regardada como un presedente cual permete ce otra femes prisonida per aborta ta batalia sua condenas.
Amnestia Internasional ia descrive la judi como "un vinse resonante per la diretos de femes en Salvador", e ia recomenda ce la governa "fini la pratica vergoniosa e discriminante de criminali femes".
En la pasada, ance la Ofisia de la Comisionor Alta de la Nasiones Unida per Diretos Umana ia recomenda ce Salvador reformi sua leges de aborta.
@T Fanes esije un rescrive de saison 8 de Jua de Tronos
@L aora_oji/2019/fanes_esije_un_rescrive_de_saison_8_de_jua_de_tronos
====== Fanes esije un rescrive de saison 8 de Jua de Tronos ======
17 maio 2019
En la drama televisada Jua de Tronos, inverno ia ariva, ma sua saison final encontra un reseta jelin entre fanes.
Plu ca un dui de milion persons nonfelis ia suscrive un solisita enlinia per urje HBO, la compania cual crea la serie, a refa la saison oto en modo nova.
La saison la plu resente de la serie internasional popular, fundida en libros par George RR Martin, ia fronti un bombarda de critica enlinia. Regardores deludeda ia es ofendeda par cambias a la strutur naral de la drama e par la destina final de carateres amada.
La solisita a change.org, instituida pos la transmete de la episodio anteultima en esta semana, esije an un rescrive completa "con scrivores capas".
Lo opina ce la scrivores David Benioff e DB Weiss "ia mostra ce los es lamentable noncapas". En la parolas de la solisita, la scrivores ave "no materia de fonte per suporta se", referente a la libros nonfinida en cual la saison oto es laxe fundida.
Car la libro veninte par Martin, La ventas de inverno, es ancora un obra en construi, la drama televisada debe fini en modo diferente.
Suscrivores de la solisita ia lasa comentas ce la saison final "pare fretada", "ia desrepeta intera la autor" e ia pone oto anios de developa de carateres "a la baldon".
Par causa de la custa reportada de cada episodio, estimada como $15 milion, lo es nonprobable ce HBO va sede a la esijes. E un cuantia recordo de 18,4 milion persones ia regarda la episodio anteultima.
Lo ia sempre probable ce la fini va es controversa, como Benioff e Weiss mesma ia confesa. Benioff ia dise: "Un bon nara no es un bon nara si on ave un mal fini. Natural, nos es ansiosa."
@T Febre porcal african apare en Indonesia
@L aora_oji/2019/febre_porcal_african_apare_en_indonesia
====== Febre porcal african apare en Indonesia ======
19 desembre 2019
Indonesia ia deveni la pais asian la plu resente cual fasa un aveni de febre porcal african, un virus matante cual ia apare en cultiverias tra la rejion.
Ier, la departe de cultiva ia dise ce cuasi 30 mil porcos ia mori de la maladia en Sumatra Norde. On predise ce la virus va mata plu ca un dui de la porcos en Xina en esta anio.
Australia es ansiosa, aumentante sua sistemes de biosecuria per teni la virus a via.
Esta maladia no afeta persones, ma lo pote mata porcos en un pico de dias. La virus es estracomun forte, capas de survive sete dias sin ospitor e tra multe menses en produidas jelada de carne de porco.
La efeto la plu grave asta aora es en Xina, ma la sperde de la virus tra Asia sude-este es ance un problem. Vietnam e la Pilipinas ia esperia alga de la casos la plu mal.
Analistes previde ce la produi de carne de porco par Vietnam va es reduida par 21% en esta anio, e par 8% de plu en 2020. La cuantia de porcos en la Pilipinas va es reduida par cisa 13% en la anio veninte, ma en Xina on ia perde 55% en 2019.
En Indonesia, on ia susede isoli la virus a partes de Sumatra Norde. Ma on ia deteta la maladia ance en Mongol, Camputxa, Coreas Sude e Norde, Miama e Timor Este. Estra Asia, la virus es ance presente en partes de Europa este e Africa susaharan.
@T Femes crea un presedente par entra a un templo indu
@L aora_oji/2019/femes_crea_un_presedente_par_entra_a_un_templo_indu
====== Femes crea un presedente par entra a un templo indu ======
2 janero 2019
Du femes barati en sua desenio sinco ia ata sin presidente par entra a un santeria indu major en Kerala, un stato sude, pos menses de protestas contra la asede par femes.
La templo Sabarimala ia es istorial cluida per femes de "eda menstrual", definida como entre 10 e 50 anios.
La Corte Suprema ia cansela acel proibi, ma protestores ia ataca femes e ia preveni ce los entra a la santeria an tal.
Bindu Ammini, ci ave 42 anios, e Kanaka Durga, ci ave 44, ia entra a la santeria sirca la lus prima. Los ia atenta entra ance a 24 desembre, ma ia es obligada a reveni par protestores.
Ofisiores de la templo, ci dise ce la femes ia "viole" la templo, ia clui la santeria per un ora per fa "rituos de puri".
La ministro xef de Kerala ia declara ce la entra par la femes a la templo es un momento monumental. Sua governa suporta la judi de la corte. El ia dise ance ce la deside, par la manejores de la templo, de clui pos la visita de la femes ia viole acel judi.
La plu de templos indu permete ce femes entra si los no es menstruinte, ma la templo Sabarimala es nonusual: lo ia es un de poca cual ia despermete la entra par cualce fem con eda en un estende larga.
Lo es situada a la culmina de un colina presipe cual, en cada anio, miliones de adorores mas asende, comun con pedes nuda, per visita la santeria. Un de la modos de entra a la templo es par asende 18 grados santa. Longo la pajeria de la templo, esta es un ata santa cual no peregrinor pote fa sin juna sever per 41 dias.
Ammini ia dise ce la du femes no ia asende la grados car la loca ia es multe folida e los ia teme ce on va ataca los. El ia ajunta ce los ia es acompaniada par polisiores en vestes comun.
La templo es sola abrida per periodos corta en la anio. An si la proibi ia es canselada en setembre, no fem ia pote entra a la templo asta aora par causa de la protestas grande.
@T Formicas aspeta como pluve en un mapa meteorolojial
@L aora_oji/2019/formicas_aspeta_como_pluve_en_un_mapa_meteorolojial
====== Formicas aspeta como pluve en un mapa meteorolojial ======
17 julio 2019
Xamas enorme de formicas volante en la sude de England ia apare sur un mapa meteorolojial, aspetante como pluve.
Un cuantia vasta de lo cual la Ofisia Meteorojial la descrive como "insetos desordinada" ia es rejistrada par sistemes de radar entre 8:00 e 11:00 de ora local.
Nubes de la insetos ia es vidable, movente a este, sur la mapa interatante de clima.
La altia do ia formicas ia flota en la atmosfera, prosima a la funda de un nube, e sua cuantia jigante ia permete ce la sistemes de radar deteta los.
Rexercores ia sujesta ce on no ave un sola dia de formicas volante en la Rena Unida, ma un studia de la insetos ia trova ce los vola a alga loca en la pais a 96% de dias entre la comensa de junio e la comensa de setembre.
La moves es causada par la volas per reprodui de la reas nova e la formicas mas.
@T Fotos nova de Zona Zero en York Nova en un CD vea
@L aora_oji/2019/fotos_nova_de_zona_zero_en_york_nova_en_un_cd_vea
====== Fotos nova de Zona Zero en York Nova en un CD vea ======
20 junio 2019
Arcivistes ci ia compra un colie de discos compata a un vende pos la vacui de un casa ia trova 2400 fotos de Zona Zero en York Nova, fada pos la atacas de 11 setembre 2001.
La fotos pare es fada par un laboror de construi, ancora no identifiada, ci ia aida dejeta la ruinas de la tores de la Sentro Mundal de Comersia e clari la area sirca los.
La cds ia es en mal state, ma on ia susede final estra la datos. La arcivistes ia comparti la fotos en Flickr.
La albumes dijital inclui imajes de Zona Zero mesma, fada e de nivel de tera e de supra, empleadas de construi en sua labora, e la internas danada de construidas sirca la tores.
Cuasi 3000 persones ia mori cuando cuatro aviones saisida par teroristes ia es colideda con la Sentro Mundal de Comersia, la Pentagon e un campo en Pennsylvania.
La arciviste Johnathan Burgess ia comenta: "Jeneral tal articles es iniorada a vendes. Lo es multe probable ce estas ta es aora en un portadetrito si nos no ia visita." El ia ajunta: "Lo es un miracle ce la discos ia transfere tan bon. CD-ROMes de acel eda es alga nonfidable."
El ia usa un servi tecnical de regania per estrae alga de la imajes. Asta aora, el no ia pote descovre la identia de la fotor o sua relatadas.
Multe de los ci ia labora ala en la tempo direta pos la atacas de 11 setembre ia deveni plu tarda malada. On crede ce sirca 400 mil persones ia es esposada a contaminantes nosiva o ia es ferida o traumada a la dia mesma, longo la Sentro per Controla e Preveni de Maladia.
Dr Burgess ia dise ce la comparti de la fotos ia "pertine a fa la bon per la raza umana" e ia sujesta ce persones emosiada par los ta considera dona mone a cualce promove meritante.
@T Frodores asede contas de clientes de 7-Eleven en Japan
@L aora_oji/2019/frodores_asede_contas_de_clientes_de_7-eleven_en_japan
====== Frodores asede contas de clientes de 7-Eleven en Japan ======
5 julio 2019
En un fali notable de securia, clientes japanes de 7-Eleven, un cadena de supramercatos peti, ia perde miliones de enes cuando frodores ia susede asede sua contas enlinia.
Plu temprana en esta semana, la compania ia inisia un ap de telefon per paias eletronical, sin comprende la risca de securia.
La contas de sirca 900 clientes en Japan ia es atacada, perdente 55 milion enes (510 mil dolares esuan) en combina. La compania ia suspende la ap e ia promete repaia la mone a la clientes.
En un afirma, 7-Eleven ia dise ce persones nonautorida ia es capas de asede la contas de persones usante sua ap 7pay, imita esta persones, e fatura sua contas par la carta rejistrada de credito o banco.
La era ia permete criminores a solisita un reinisia de la parola secreta de la conta de cualce person. Los ia pote alora envia la lia de recovre a sua propre adirije de eposta, no lo de la posesor de la conta.
La sistem per reinisia la parola secreta ia demanda mera per informas minima, como la data de nase e la adirije de eposta de la posesor de la conta. En multe casos, tal informas ia es enlinia e fasil disponable.
La compania ia dise ce lo ia sesa aora aseta usores nova e ia suspende la usa de cartas de credito con sua ap.
@T Ganias major per la partitos verde en Suiz
@L aora_oji/2019/ganias_major_per_la_partitos_verde_en_suiz
====== Ganias major per la partitos verde en Suiz ======
21 otobre 2019
En Suiz, predises inisial indica ce la partitos verde ia gania forte en la eleje parlamental.
La Partito de la Popla Suiz (SVP), cual desira restrinje la aseta de migrores, va resta probable la partito la plu grande, ma lo ia perde a la min 3% de sua suporta.
Predises mostra un vota combinada de sirca 20% per la du partitos verde. Sua ganias refleta consernas de la votores sur la crise climal, regardada como la tema dominante en esta eleje.
On ancora no ia conta tota la votas, ma la difusor nasional ia predise ce la proportio de votas per la Partito Verde ia crese par 5,6% asta 12,7%, e ce la Partito Libraliste Verde - min grande e plu sentriste - ia recolie 7,6%.
Lo pare ce la Partito Verde va suprapasa la Democratas Cristian, un de la partitos en la alia governante, e va oteni cisa un seja en acel alia a la ves prima.
"Lo no es un onda verde: lo es un tsunami, un siclon," Celina Vara, visxef de la partito, ia comenta.
La Sosialistes en la sentro sinistra ia pare gania la loca du con 16,5% de votas, segueda par la Libralistes sentral destriste con 15,2%.
Si la du partitos verde ta vinse sua diferes de politica e uni, los ta es political potiosa.
Como usual en Suiz, on no previde ce cualce partito va oteni un majoria completa de votas. Tra desenios, la sete sejas de la Consilo Federal es dominada par la mesma cuatro partitos xef: la SVP, la Democratas Sosial, la Libralistes, e la Democratas Cristian.
La SVP campania tra plu ca un desenio con du mesajes xef: restrinjes contra migrores e refujadas, e limitas de la lias entre Suiz e Bruxelles. Suiz no parteni a la Uni European. Ma esta temas ia es apena discuteda en la campania per esta eleje, e la crise de clima ia domina como la problem la plu importante.
Tra la anio intera, on ia fa greves climal en la pais, fininte con un asembla jigante en Bern en setembre cual ia atrae 100 mil persones. La suizes vide fasil la efetos de la clima cambiante: la glasias alpan fonde, e comunias montanial es menasada par liscas de roca e fango.
En cuantia recordo, 40% de aspirores per la consilio nasional ia es femes, como ance plu ca un tri de los aspirante membria de la salon alta, la Cambra de Statos.
En junio de esta anio, sentos de miles de femes tra Suiz ia protesta sur la stradas, esijente egalia de paia e restrinjes, e la fini de discrimina.
@T Gas lacrimojen es usada contra protestores en Hongkong
@L aora_oji/2019/gas_lacrimojen_es_usada_contra_protestores_en_hongkong
====== Gas lacrimojen es usada contra protestores en Hongkong ======
25 agosto 2019
En Hongkong, polisiores ia relasa gas lacrimojen e ia usa bastones per ataca protestores, cuando un nonprogresa tensada ia deveni violente en la semana des-du de protestas ala.
Miles de protestores, con multe en xapos protejente e mascas de gas, ia marxa tra la rejion industrial Kwun Tong a saturdi e ia es encontrada par polisiores. Alga protestores ia xuta petras de fondetas, provocante la polisia a ataca.
A saturdi, la protestores ia fronti la polisia tra alga oras estra un polisieria en Kwun Tong, pos construi ostaculos con palos de bambu e paradores de trafica.
Los ia esije la sutrae de palos intelijente, sur cual la autoriosas dise ce los es sola presente per mesura la cualia de la aira. Protestores teme ce los ta deveni usada per monitori xines, incluinte par tecnolojia de reconose fases.
La nonprogresa ia fini cuando alga protestores ia lansa brices e botelas de acua a la polisiores, ci ia responde par core per ataca e par bate alga de la protestores. La polisiores ia deteni alga de los.
La violentia ia rompe un pas noncuieta cual ia esiste tra pico plu ca un semana. Sentos de miles de persones ia marxa nonviolente en la soldi pasada, cuando protestores ia xerca condui moral plu bon ca la polisia.
La protestas ia es provocada par un projeta legal de estradi, aora suspendeda, cual ta permete Hongkong a envia criminores suspetada a Xina per litiga. Ma los ia crese a un promove plu vasta cual urje un reformi democrata en la teritorio e un investiga de cruelia alegada de polisiores contra protestores.
En la soldi pasada, diseda par organizores, sirca 1,7 milion persones ia asembla en la sentro de Hongkong per suporta la democratia. La polisia ia sujesta un cuantia multe min alta, sirca 128 mil, contante sola los a un asembla ofisial permeteda en la Parce Victoria.
On ia fa ja protestas a la Airoporto Internasional de Hongkong e ance a locas de turisme en la site.
A venerdi, YouTube ia anunsia ce lo ia clui plu ca 200 canales, disente ce los ia parteni a un atenta xines "coordinada" per posta malinforma sur la protestas.
Facebook e Twitter ia dise a lundi ce los ia ata per bloci lo cual los ia descrive como un campania governal suportada de malinforma en redes sosial. Twitter ia sutrae 936 contas, comentante ce los ia es usada per "sperde desacorda political en Hongkong".
@T Graniza deleta la abitores de Delhi
@L aora_oji/2019/graniza_deleta_la_abitores_de_delhi
====== Graniza deleta la abitores de Delhi ======
8 febrero 2019
Delhi, la capital de Barat, ia es colpada ier par un tempesta forte de graniza. La site ia deveni blanca, stonante e deletante sua abitores.
Imajes e videos en redes sosial mostra bales de jelo con grandia de seriso, e stradas covreda con estas.
Multe persones ia compara la vista rara a un sena plu comun en Chicago o London.
La clima sever ia obliga ance ce on diverje plu ca 30 aviones en la oras temprana de la sera.
Ma un resulta sasiante de la tempesta es ce lo ia aida boni la cualia famosa contaminada de la aira en la site.
Partes norde de Barat ia esperia cades grande de neva en la dias resente. La clima ala ia provoca ance avertis sur avalanxas e cluis de scolas.
@T Greves fini en Sudan e discutes va recomensa
@L aora_oji/2019/greves_fini_en_sudan_e_discutes_va_recomensa
====== Greves fini en Sudan e discutes va recomensa ======
12 junio 2019
En Sudan, gidores de protestas e xefes militar ia acorda recomensa discutes. Plu, un alia oposada ia acorda suspende sua campania de desobedis e greves.
La armada, cual controla la pais pos la despone en april de Omar al-Bashir, presidente de tempo longa, ia acorda libri prisonidas political.
Protestores per democratia esije ce la pais revade a governa nonmilitar.
Discutes ia fali pos la mata de desuples de protestores en un colpa contra un protesta sentante a 3 junio. Pos alora, multe de la pais es nonfunsionante, car la oposores ia inisia un greve nonlimitada.
Dotores dise ce 118 persones ia mori en la eruta resente de violentia, ma ofisiores dise ce sola 71 ia mori.
Soldatos ia patrulia la stradas de vilas sudani a pos, e la plu de comersias ia resta cluida.
Ier, la reconsilior itiopian Mahmoud Dirir ia dise ce discutes per restora un governa nonmilitar va comensa pos corta.
La Alia per Libria e Cambia ia publici un declara recomendante ce persones revade a labora oji. La Asosia de Profesales Sudani, cual ia inisia la greves, ia suporta la suspende tempora e ia recomenda un revade a labora per la tempo presente.
Alga botecas e servis ia comensa ja reabri, xef entre comersias peti e ganiores de salarios dial, ci no ia pote tolera la custa de resta cluida.
@T Guatemala espulsa investigores de froda
@L aora_oji/2019/guatemala_espulsa_investigores_de_froda
====== Guatemala espulsa investigores de froda ======
8 janero 2019
Guatemala dise ce lo retira se de un comision contra froda, suportada par la Nasiones Unida, cual investiga la presidente de la pais, Jimmy Morales.
Sandra Jovel, ministro de esternas, ia dise ier ce la comite NU ave 24 oras per sorti de Guatemala. El ia ajunta ce Morales va continua la batalia contra froda, ma ce un malcomprende ia aveni sur la investigas de sua ativia.
Elejeda a tre anios ante aora, Morales ia suporta inisial la Comision Internasional Contra Esenta en Guatemala (CICEG), cual ia aida acusores en litigas contra desuples de ofisiores e dirijores major.
An tal, cuando Morales mesma ia deveni la tema de investiga, la presidente ia dise ce el va reesamina la autoria de la comision.
Sua comentas ia es criticada e ia provoca protestas sur strada contra froda ofisial, esijente ce el resinia.
En un consenta con António Guterres, secretor jeneral de la NU, Jovel ia anunsia ce la autoria de CICEG va fini. La CICEG ia es creada par la NU en 2006 e ia es desiniada per forti la usa de leges en la pais.
Guterres ia responde en un declara formal, disente ce el "rejeta forte" la deside, ajuntante ce la governa debe obedi la acorda internasional.
CICEG ia intende acusa Morales sur alegas de noncoeres finansial relatada a sua campania elejal de 2015. Morales ia es un comediste ante deveni presidente en 2016.
La NU ia suporta la recomenda ce on sutrae la esenta de Morales per permete ce on investiga el. Acel recomenda ia segue investigas separada sur membros de sua familia par CICEG.
@T Huawei acusa la SUA de siberatacas e menasas personal
@L aora_oji/2019/huawei_acusa_la_sua_de_siberatacas_e_menasas_personal
====== Huawei acusa la SUA de siberatacas e menasas personal ======
4 setembre 2019
Huawei, compania tecnolojial major de Xina, ia acusa la governa de la SUA de "usa cada util disponada a se" per interfere contra lo.
En un declara jornaliste ier, Huawei ia alega ce la SUA ia inisia siberatacas per infiltra sua redes, e ia menasa sua empleadas. La compania, ajuntada a un lista negra de comersia esuan en esta anio, no ia ofre detalias per suporta sua alegas.
Huawei es un foca de la disputa comersial entre la du paises.
Lo ia alega ce la SUA ia deteni nonlegal sua empleadas, ia fa atacas dijital per asede sua sistems de informa interna, e ce ajentes FBI ia es enviada a la casas de sua empleadas per presa los a colie informas sur la compania.
"Nos condena forte la atenta malvolente e coordinada par la governa esuan per desonora Huawei e limita sua posto gidante en la industria," la compania ia declara.
Ofisiores esuan ancora no ia dona un responde.
La declara par Huawei ia reata a un reporta en Wall Street Journal cual ia dise ce la compania ia es investigada par la Departe de Justia de la SUA sur la fura alegada de patentas per cameras de telefones astuta. Huawei ia nega la alegas.
La compania ia deveni un simbol de un luta cresente per potia, entre Xina e la SUA. La du economias la plu grande de mundo ia fa un gera comersial en la anio pasada.
La SUA razona ce Huawei presenta un risca de securia nasional, e ia ajunta la compania a un lista negra en maio. Washington ia atenta influe ance sua aliadas a evita la produidas de Huawei, temente ce Beijing ta pote usa estas per monitori.
Huawei ia rejeta esta alega a multe veses, disente ce lo no depende de la governa xines.
@T Indicas suprabundante per acusa Trump
@L aora_oji/2019/indicas_suprabundante_per_acusa_trump
====== Indicas suprabundante per acusa Trump ======
4 desembre 2019
La comite cual gida la investiga sur la posiblia de acusa Donald Trump, presidente de la SUA, per mal condui en sua posto ia dise ce la indicas contra el es "suprabundante".
En un reporta major a la legores, lo declara ce la presidente ia pone sua propre interesas political personal "supra la interesas nasional de la Statos Unida". Lo dise ce el ia atenta "solisita interfere stranjer" de Ucraina per aida sua aspira per es reelejeda en 2020.
Trump nega tota mal condui e ia descrive la investiga par la Partito Democrata como un xasa de sorsores. Ante la publici de la reporta, la presidente republiciste ia ataca lo como "multe nonpatriota".
Pos la publici, Stephanie Grisham, la secretor jornaliste de la Casa Blanca, ia dise ce la Democratas ia "fali intera produi cualce indica de malcondui" e ce la reporta "refleta no cosa plu ca sua frustras".
La cosa pasa aora a la Comite Judal, cual va comensa oji sua labora de considera acusa formal Trump.
La reporta dise ce la investiga "ia descovre un atenta tra menses par Presidente Trump per usa la potias de sua posto per solisita interfere stranjer per sua benefica en la eleje de 2020".
Lo dise: "La scema de Presidente Trump ia suverti la politica esterna de la SUA a Ucraina, e ia sumina nosa securia nasional en favore a du investigas political motivada cual ta aida sua campania de reeleje presidental."
"La presidente ia esije ce la Presidente Ucrainsce nova elejeda, Volodymyr Zelensky, anunsia publica investigas sur un competor political ci, parente, el ia teme la plu -- la vispresidente pasada Joe Biden -- e sur un teoria contradiseda ce lo es Ucraina, e no Rusia, cual ia interfere en la eleje presidental de 2016."
La reporta dise ce no sola la indicas de mal condui es suprabundante, ma "ance la indicas de sua impedi de la Congresa" (la parlamento).
Ier, par 13 votas contra 9, seguente la partitos, la comite de securia ia deside aproba la reporta e envia lo a la Comite Judal.
La escutas de la comite va comensa con cuatro eruditas sur la constitui, ci va esplica la prosede de acusa un presidente. La Casa Blanca ia refusa partisipa, referente a un manca de "justia".
Entre la acusas formal per cual on previde consideras es la malusa de potia, la impedi de justia, e la despeta de la Congresa.
La Democratas desira ce la Salon Basa fa un vota sur acusa Trump ante la fini de la anio, previdente un litiga en la Salon Alta cisa tan temprana como en janero.
@T Inondas trapi un tren de pasajores prosima a Mumbai
@L aora_oji/2019/inondas_trapi_un_tren_de_pasajores_prosima_a_mumbai
====== Inondas trapi un tren de pasajores prosima a Mumbai ======
28 julio 2019
En Barat, 1050 persones ia es salvada de un tren cual ia deveni trapida par un inonda, prosima a Mumbai.
Elicotores, barcos e sumerjores ia es enviada cuando la Mahalaxmi Rapida ia es encaliada, prosima a la vila Vangani, a la sera de venerdi.
On ia comanda la pasajores a resta en la tren, do los ia ave no comedas e no acua tra 15 oras.
Imajes publicida par la Forte de Responde a Desastres Nasional mostra la salva de pasajores en barcos de cauxo.
La compania Ferovia Sentral ia dise ce tota pasajores, incluinte nove femes ensinta, ia es estraeda e prendeda a securia.
Un campa tempora es instituida en la prosima, con comedas e furnis medical, e otra modos de viaja es organizada per la pasajores afetada.
Semanas de inondas de monson en Asia sude ia mata ja plu ca 600 persones.
La plu partes de la vilas Vangani, Badlapur e Ulhasnagar es sumerjida par pluves forte cual ia colpa la rejion, levante rios local.
Otra modos de transporta en Mumbai es ance afetada par inondas. 11 volas ia es canselada e alga otras ia es diverjeda a via de la airoporto.
@T Iran saisi mil minadores de bitcoin
@L aora_oji/2019/iran_saisi_mil_minadores_de_bitcoin
====== Iran saisi mil minadores de bitcoin ======
29 junio 2019
Autoriosas en Iran ia saisi sirca mil minadores de bitcoin en du fabricerias pasada, pos deteta un aumenta de consuma de eletrica.
La usa eletrical ia crese par 7% en junio, e on ia divina ce esta ia es causada par jenera criptomone.
Bitcoin deveni sempre plu notable en Iran como un modo de conserva ricia.
On mina criptomone par computadores, usual spesialida per funsiona como minadores, liada a la rede monal par la interede.
La macinas furni la potia computal nesesada per validi intercambias en la criptomone, e sua posesores es recompensada con mone nova jenerada. Tal, la prosede pote es profitosa, spesial si on fa lo a grado vasta.
On reporta ce minadores de bitcoin ia apare en locas diversa en Iran.
Con ce Iran es finansial colpada par punis esuan sur sua program nucleal, iranis en redes sosial discute comun la demanda de modos secur per conserva ricia.
Oro e dolares esuan es sujestas durante poplal, ma criptomone comensa apare como la alternativa tre.
@T Japan es afetada par un siclon multe forte
@L aora_oji/2019/japan_es_afetada_par_un_siclon_multe_forte
====== Japan es afetada par un siclon multe forte ======
13 otobre 2019
Japan ia asinia 27 mil soldatos e laborores salvante pos un de la tempestas la plu forte en multe anios. La siclon ia mata 18 persones, cisa plu.
Siclon Hagibis ia ateni la tera a sude de Tocio a saturdi, movente a norde e causante inondas grave. Des-tre persones manca.
En la prefetia Nagano en la sentro de la pais, acua ia ensirca trenes Shinkansen e elicotores ia prende persones de sua tetos.
"La governa va fa tota cual lo pote," la ministro xef Shinzō Abe ia dise, prometente envia plu soldatos si los va es nesesada.
Ja a soldi, la tempesta ia debili e ia move a via de la tera.
En la site Kawagoe, a norde de Tocio, ecipos de salva ia usa barcos per aida abitores trapida en un cureria de persones vea.
Cuasi 150 mil casas en la rejion Tocio Grande es sin eletrica, e la dispone de acua fluente es ance afetada. Trenes e aviones canselada su menasa de la tempesta comensa aora funsiona denova.
Multe de la moris ia aveni cuando persones ia es caturada en liscas de tera o puxada a via par la acua inondante. Un fem en sua desenio oto ia mori cuando un elicotor salvante ia cade el sin intende.
Alga partes de Japan ia esperia asta 40% de sua pluve promedia anial en mera un pico de dias.
En la vila Hakone, prosima a Monte Fuji, plu ca un metre de pluve ia cade a venerdi e saturdi, plu ca cualce cuantia rejistrada en un periodo de 48 oras en Japan a ante.
La pluve ia afeta ance cultivores, inondante campos e retenerias.
La tempesta ia obliga la cansela de alga maxes de la Copa Mundal de Rugbi, ma un max major entre Japan e Scotland va aveni oji. La corsa cualinte per la Premio Grande de Formula 1 ia es ance disturbada, ma lo ia aveni e ia es ganiada par Valtteri Bottas.
Cuando la tempesta ia prosimi, on ia recomenda ce plu ca sete milion persones parti de sua casas. An tal, on crede ce sola 50 mil ia vade a la refujerias.
Sola en la mense pasada, Siclon Faxai ia ataca partes de Japan, danante 30 mil casas, de cual on ancora no ia repara la plu.
@T Japan es bateda par un tempesta tropical sever
@L aora_oji/2019/japan_es_bateda_par_un_tempesta_tropical_sever
====== Japan es bateda par un tempesta tropical sever ======
16 agosto 2019
A la min un person ia mori e 49 ia deveni ferida cuando un tempesta tropical ia pasa violente tra partes de Japan.
Tempesta Krosa ia atera ier, prosima a Hiroshima en Japan sude, e lo move aora a norde.
On ia recomenda la evacua de plu ca 400 mil persones evacua. Sirca 800 aviones e trenes ia es canselada, impedinte viajas en la saison de vacanses de estate.
Un om de 82 anios en la prefetia Hiroshima ia mori pos cade en la mar en la matina de jovedi, cuando el ia atenta lia un barco en la venta forte.
Aora, Krosa ia diminui ofisial de un tempesta tropical sever (la grado direta su siclon) a un tempesta tropical normal.
Videos mostra ventas forte cual desradisi arbores, cade camiones, e jira la compartes de un rota jigante.
On ia vide ondas alta cual colpa un molo, engolinte un faro, e rios ia supraflue, inondante vias.
An ante la atera de la tempesta, un pluve forte ia lasa un grupo de 18 persones trapida sur la rivas de un rio levante. On ia evacua los a tera plu alta, per es salvada.
Jornales reporta ce la canselas de trenes causa problemes sur la isola Shikoku, como ance per multe lias rapida par trenes Shinkansen entre Tokyo, Osaka, Hiroshima e Fukuoka, un provinse en la sude-ueste.
Navetas a Shikoku ia es canselada cuando ondas alta ia bate la costa.
La problemes de viaja afeta probable miliones de persones ci visita sua vilas de nase per la festa Bon, cuando persones japanes onora tradisional sua asendentes.
@T Japan esporta no bir a Corea Sude en un disputa comersial
@L aora_oji/2019/japan_esporta_no_bir_a_corea_sude_en_un_disputa_comersial
====== Japan esporta no bir a Corea Sude en un disputa comersial ======
28 novembre 2019
La esporta de bir de Japan a Corea Sude ia cade a zero en la mense pasada, par causa de boicotas provocada par un disputa comersial entre la du paises.
La statistica ofisial, oji publicida, mostra ce esportas japanes de comeda ia redui par 58,1% en otobre. La esporta de sace ia cade par plu ca 90%, e la esporta de talietas pronto ia stania ance.
Un disputa diplomata cual ia comensa sur compensa per laboras en tempo de gera ia evolve a un situa plu difisil. La disputa ia afeta industrias diversa, incluinte la fabrica de autos en Japan e la furni de composantes eletronical en Corea.
Vendores de bir es entre la plu grave afetada. En otobre 2018, Japan ia envia 800,34 milion enes ($7,3 milion) de bir a Corea Sude, cual es un de la mercatos la plu grande per bir japanes. Lo ia representa sirca 60% de tota esportas de tal bir en 2018.
La tensa entre la du paises ia crese en julio, cuando Japan ia severi sua regulas per esportas a Corea Sude, en relata con materias usada en microtelias de memoria e en scermos, cual es esensal per companias corean como Samsung.
Plu tarda, ambos paises ia sutrae lunlotra de sua lista de asosiores comersial fidada. Esta ia fa un efeto: esportas japanes de aparatos usada en la fabrica de semicondutadores ia diminui par 49% en la mense pasada.
An tal, on ave sinias resente de un dejela posible de la relata.
En la semana pasada, Corea Sude ia acorda continua un trata per comparti informas de securia militar con Japan, menasada par la disputa. La deside ia es bonvenida par la Statos Unida, cual ia recomenda ce la du paises pasi sua desacorda.
La disputa ia comensa en la anio pasada, cuando un situa ja tensada ia es flamida par un judi de un corte en Corea, comandante companias japanes a paia compensa a coreanes per laboras forsada en la tempo de gera.
La deside ia atrae un desaproba forte en Japan, do on razona ce la disputa ia es ja reposada en 1965 cuando la relatas diplomata entre la du paises ia es normalida.
@T Japan investiga un subasta parente de uranio
@L aora_oji/2019/japan_investiga_un_subasta_parente_de_uranio
====== Japan investiga un subasta parente de uranio ======
1 febrero 2019
En Japan, la polisia investiga como un subasta enlinia ia pote presenta un sustantia sur cual on crede ce lo es uranio. La vendor e alga ofrores es interogada.
Pacida en un tubo de vitro, la produida ia es ofreda como "Uranio 99,9%" en un subasta de Yahoo. Un esamina prima de la polvo ia sujesta ce lo es radioativa.
La subasta ia atrae la atende de la autoria de regula nucleal de la pais en 2017. La departe ia judi ce la materia es probable uranio povrida e polvo de uranio. La vendor dise ce el ia compra la sustantia de un loca de rede estra Japan.
La departe ia contata Yahoo sur la vende surprendente, la subasta ia es parada, e la caso ia es enviada a la polisia.
On no ia confirma esce la materia es vera uranio, e si tal, esce lo es ricida. Uranio ricida es un composante esensal per la jenera de potia nucleal e per armas nucleal.
La vende de tal materias es proibida en Japan e pote es recompensada par un anio en prison.
@T Joalas real de Sveria es retrovada pos un fura
@L aora_oji/2019/joalas_real_de_sveria_es_retrovada_pos_un_fura
====== Joalas real de Sveria es retrovada pos un fura ======
6 febrero 2019
La polisia svensce dise ce la tesoros valuosa de la familia real, furada en julio pasada, es cisa aora reganiada.
Un declara enlinia informa ce polisiores "labora intensa" per confirma ce la ojetos es autentica.
Furores ia prende du coronas e un globo con crus, ante parti par motorbarco sur un lago prosima. La joalas ia parteni a un de la monarcas de Sveria en la sentenio 17.
Reportas en medias local sujesta ce la ojetos ia es trovada sur un baldon de dejetadas en un suburbe de Stockholm.
"Tota indicas es ce on ia trova la ornas funeral furada de Karl 9, prosima a Stockholm," la declara dise, ajuntante ce la autoriosas labora "a sento persentos" per identifia los.
La furores ia entra corente a la catedral de Strängnäs, a ueste de Stockholm, per saisi la joalas.
Un om de 22 anios es aora prosededa per la fura, ma la autoriosas xerca ancora "criminores ajuntal", como la declara dise.
La ojetos es ornada con perlas, petras valuosa e oro, e veni de la vestes funeral de Re Carl 9 e Rea Christina en 1611. A la tempo de sua fura, un portavose per la polisia ia descrive los como "ojetos de interesa nasional ultra valua".
@T La Amazona arde
@L aora_oji/2019/la_amazona_arde
====== La Amazona arde ======
23 agosto 2019
Miles de focones es destruinte la Foresta Amazona en Brasil. La focones es la plu intensa de cuasi un desenio.
La statos norde Roraima, Acre, Rondônia e Amazonas, como ance Mato Grosso do Sul, es spesial grave afetada.
Ma alga imajes de la focones cual on distribui, incluinte alga compartida con la eticeta #PreaPerAmazona, veni de desenios pasada o no ia es an en Brasil.
La Instituida Nasional per Rexerca Spasial en Brasil dise ce sua datos de satelite indica un crese par 85% de la cuantia de focones contra la mesma periodo en 2018.
La statistica ofisial ia rejistra plu ca 75 mil focones de foresta en la pais en la oto menses prima de esta anio.
Focones de foresta aveni comun en la Amazona en la saison seca, cual estende de julio asta otobre. Los pote es causada par fenomenos natural, como colpas de lampo, ma ance par cultivores e leniores ci vacui la tera per gran o pasto.
Ativistes dise ce la retorica antiambiental de Jair Bolsonaro, presidente de Brasil, ia coraji tal sutraes de arbores.
Respondente, Bolsonaro, ci es ja longa setica a tema de clima, ia acusa organizas nongovernal de comensa mesma la focones per dana la reputa de sua governa. El ia dise plu tarda ce la governa no ave la recursos nesesada per combate la flamas.
Amazonas, la stato la plu grande de la pais, ia declara un state de crise.
Plumones de fuma estende tra e ultra la rejion Amazona. On reporta ce la fuma viaja asta la costa atlantica, e ce lo ia oscuri an la sielo en São Paulo a distantia de plu ca 3200 cilometres.
La focones relasa multe diosido de carbono, corespondente a 228 megatones en esta anio, diseda par la Servi Copernicus de Monitori la Atmosfera (CAMS). Esta es la cuantia la plu alta pos 2010.
Los emete ance monosido de carbono, un gas relasada cuando lenio arde en un ambiente de poca osijen. Mapas de CAMS mostra la viaja de esta gas, cual es nosiva en cuantias grande, a ultra la costas de America Sude.
La Basin Amazona conteni sirca tre milion spesies de plantas e animales, e milion persones nativa. Lo es un fator esensal en freni la caldi global, car sua forestas asorbe miliones de tones de carbono emeteda en cada anio.
Ma cuando un arbor es taliada o ardeda, la carbono contenida deveni librida a la atmosfera, e la capasia jeneral de la foresta per asorbe plu emetes de carbono deveni reduida.
La presidente de Frans, Emmanuel Macron, ia dise ce la situa en la Amazona es un crise internasional cual debe domina la discutes a la confere de la G7 en Biarritz a esta fini de semana.
Bolsonaro ia responde ce Macron usa la crise per gania political, disente ce el evoca "un disposa de mente colonial e malponeda". Brasil no partisipa a Biarritz.
@T La anio 50 de la festa african la plu grande de filmas
@L aora_oji/2019/la_anio_50_de_la_festa_african_la_plu_grande_de_filmas
====== La anio 50 de la festa african la plu grande de filmas ======
25 febrero 2019
On previde ce sirca 100 mil persones va vide 450 mostras de filmas en la semana veninte a la festa Fespaco en Burcina Faso, do la securia es tensada pos atacas par militaristes islamiste en la pais.
En la 50 anios de la comensa de Fespaco, ancora no fem ia gania la premio la plu alta, la Cavalo de Oro de Yennenga.
Un de la favoredas en esta anio es Rafiki par Wanuri Kahiu de Cenia, sur un relata lesbian. Lo ia es tempora proibida en sua propre pais ma ia es mostrada a la festa de filmas en Cannes en Frans.
Un otra competor major per la premio, cual on va anunsia a saturdi, es Desrances, un filma par la dirijor de Apolline Traore de Burcina Faso, sur la violentia poselejal en Costa de Ivor en 2010 e 2011.
Per sinemafilicas, la defia es regarda tota la filmas, car a la min sesdes es mostrada, de 08:00 asta la tarda de sera. Alga locas mostra plu ca un filma a la mesam tempo.
Mostras aveni a nove locas tra Ouagadougou, la capital, e ance en la otra sites major de la pais, Bobo-Dioulasso e Ouahigouya.
Fespaco, acronim de la Festa Panafrican de Sinematografia e Televisa de Ouagadougou, aveni en cada anio du.
Plu ca 2000 gardores es stasionida per garantia la securia de invitadas e visitores. Sirca 80 persones ia es matada en la tre menses pasada par atacas militariste, cual ia obliga ance la clui de scolas en alga rejiones.
@T La aseja teroriste de un otel en Nairobi
@L aora_oji/2019/la_aseja_teroriste_de_un_otel_en_nairobi
====== La aseja teroriste de un otel en Nairobi ======
16 janero 2019
En Cenia, Presidente Uhuru Kenyatta ia dise ce un aseja par militaristes en Nairobi ia fini, e tota la atacores es "eliminada".
Ier, fusilores ia ataca la compleso de un otel en Nairobi, la capital, matante a la min 14 persones. La compleso conteni un otel e ofisias.
Ofisiores ia anunsia inisial la fini de la aseja a alga oras pos sua comensa, ma on ia oia sparas e esplodes denova en la temprana de esta matina.
Al-Shabab, un grupo militariste con base en Somalia, ia dise ce lo ia reali la ataca. On no sabe cuanto atacores ia es presente.
La ataca ia comensa a sirca 15:00 de ora local, cuando cuatro fusilores ia lansa bombas a veculos en la parce de autos ante entra a la atrio de la otel, do un ia esplode se.
Video de cameras de securia mostra a la min cuatro omes forte armada ci ia entra e comensa spara. On reporta ce persones ia vide la omes visitante la compleso en dias resente.
A 23:00, la secretor de la consilio interna de la governa, Fred Matiang'i, ia dise ce tota la construidas en la compleso ia deveni securida. "La situa es controlada e la pais es secur. Terorisme va vinse nunca nos."
Ma a mera un ora plu tarda, on ia reporta plu sparas e esplodes de ves a ves en la loca. Plu sparas intensa ia aveni a sirca 07:00.
Fortes de securia ia xerca sistemosa la construida, do laborores asustada ia bloci la portes, con se a interna, ascondente su tables e sejas o en salas de banio.
En la oras temprana, plu ca 100 persones ia es salvada. Sirca tredes es aora tratada en ospitales en Nairobi.
La atacores ia retira se asta la nivel sete de la otel, do on crede ce plu siviles ia asconde se.
La otel DusitD2, de sinco stelas, ave 101 salas. Locada en la suburbe Westlands, a distantia corta de la distrito comersial de la capital, lo ave sua propre banieria e alga restorantes.
Cenia ia esperia alga atacas teroriste en anios resente, xef en rejiones prosima a la frontera somali e en la capital.
Al-Shabab es un grupo militariste e islamiste cual oposa la governa de Somalia e ia fa atacas tra la este de Africa. Cenia parteni a un opera rejional per manteni la pas, cual suporta la governa somali en sua batalia contra la teroristes.
@T La avocato jeneral de la SUA es acusada de menti
@L aora_oji/2019/la_avocato_jeneral_de_la_sua_es_acusada_de_menti
====== La avocato jeneral de la SUA es acusada de menti ======
3 maio 2019
Nancy Pelosi, presidente de la Salon Basa de la Congresa SUA, ia acusa la avocato jeneral William Barr de menti a la Congresa.
El ia fa sua comenta a la dia pos cuando Barr ia atesta a un comite de la Salon Alta sur un reporta par Robert Mueller sur alegas de interfere rusce en 2016.
Barr ia es interogada sur sua deside de desculpa presidente Donald Trump sur impedi la justia. El ia refusa atesta ier a un comite gidada par membros de la Partito Democrata, creante un posible de judi ce el ia desrepeta la Congresa.
Barr es la ofisior legal xef en la Statos Unida.
Pelosi ia dise ier: "El ia menti a la Congresa. E si cualce otra person ta fa esta, on ta regarda lo como un crimin. No person es ultra la lege."
El ia fa sua acusa car Barr ia dise ce el conose no cexa par Mueller sur la resoma de sua reporta en cuatro pajes par Barr. Ma Mueller ia scrive un letera a Barr, espresante ce "contesto" manca de la resoma.
La departe de justia ia defende Barr pos la acusas par Pelosi. Republicistes ia condena ance la comenta, descrivente lo como "un dise ofendente".
Barr ia debe veni denova ante la comite per plu responde a plu demandas, ma el no ia apare.
En un reata plu bonumorosa, congresor Steve Cohen ia trae un caxa de carne de gal fritada e un sculta de un gal a acel consenta de la comite, lasante los en la seja vacua de Barr, con refere a la usa idiomal de "chicken" (gal) per dise "coarde".
@T La Bahamas es bateda par un tempesta estrema
@L aora_oji/2019/la_bahamas_es_bateda_par_un_tempesta_estrema
====== La Bahamas es bateda par un tempesta estrema ======
2 setembre 2019
La Bahamas ia es colpada par la tempesta la plu potiosa en istoria rejistrada. Lo ia sutrae tetos de construidas e ia causa inondas grave.
La tempesta Dorian move lenta, ma lo trae ventas sustada de asta 285 cilometres per ora. Entre siclones atlantica rejistrada, lo es la numero du de la plu fortes.
On predise ce la mar va leva par 7 metres en alga locas, menasante vives.
La siclon move a ueste e va colpa cisa partes de la costa este de la SUA, do la statos Florida, Georgia, e Carolina Norde e Sude ia declara un state de crise.
A 03:00 de ora universal, Dorian ia es a la borda este de la isola Bahama Grande, pos traversa plu temprana la Isolas Abaco, pico a este.
Ambos es en la norde de la arcipelago Bahamas en la Caribe. Bahama Grande es a sola 100 cilometres a este de la site West Palm Beach en Florida.
Poca informas ia es resetada de la Bahamas en la note, par causa de rompes de eletrica e funsionas limitada de la interede.
On ia reporta ce la Isolas Abaco es inondada, con acua tan profonda como un auto, e casas sin tetos.
Ventas alta e pluve deluvial ia afeta ance Bahama Grande. Abitores ia posta videos mostrante acua inondante alga casas, e barcos inversada flotante en inondas plen de detrito.
La governa ia abri 15 refujerias, e ia pone deses de eglesas, scolas e otra construidas en sua listas ofisial de refujerias ofisial.
Ma on ave un ansia ce, cuando esta locas deveni plen, persones va es obligada a refuja se en otra locas cual no es listada per reseta comeda e acua de la governa.
La Bahamas es un de la paises la plu frecuente colpada par siclones, e casas nesesa es fortida per tolera la ventas de un tempesta de categoria cuatro. La siclon presente es de categoria sinco.
Hubert Minnis, ministro xef, ia anunsia un comanda de evacua per partes de Bahama Grande e la Isolas Abaco. On ia demanda ce tota turistes parti. Ofisiores ia espresa sua angusa ce alga persones ia eleje resta.
Minnis ia dise, vidable turbada: "Me espera ce esta no es la ves final cuando los va oia mea vose. Ta ce Dio es con los. Esta es probable la dia la plu triste e mal de mea vive. Nos fasa un siclon cual nos ia vide nunca en la istoria de la Bahamas."
@T La canta “Africa” jua en sicle eterna en Africa
@L aora_oji/2019/la_canta_africa_jua_en_sicle_eterna_en_africa
====== La canta "Africa" jua en sicle eterna en Africa ======
15 janero 2019
La deserto la plu vea de mundo es aora ornada con un de la cantas la plu escutada, "Africa" par la bande Toto.
Max Siedentopf, un artiste namibian, ia prepara un instala audio en la Deserto Namib a la costa sude-ueste de la continente, juante en sicle de tribui a esta clasica de roc suave.
La peso musical de 1982 ia vende plu ca cuatro milion copias, e ia es la canta la plu flueda en 2017, con plu ca 440 milion regardas en YouTube.
Siedentopf, ci ave 27 anios, dise ce sua instala va jua la musica per sempre, con pilas solal "per fa ce Toto va continua per tota la eternia".
La canta, cual es longa de cuasi sinco minutos, resta popular en la cultur pop de oji. En la interede, lo ia deveni la tema de memes e an pajes intera de Reddit.
"Me ia desira dona la onora la plu alta a la canta e esibi fisical 'Africa' en Africa," la artiste ia esplica. "Alga namibianes ama lo, e alga dise ce lo es probable la instala audio la plu mal de istoria. Me crede ce esta es un loda grande."
El ia eleje un loca nonrevelada en la 81 cilometres cuadrida de la Deserto Namib per pone ses parladores, liada a un baladador dijital cual conteni sola esta musica.
La deserto esiste ja tra 55 milion anios, e Siedentopf dise ce el espera ce la canta va jua tra 55 milion plu. "La plu partes ia es elejeda per es tan durante como posible, ma me es serta ce, ultima, la ambiente dur de la deserto va devora la instala."
Asta aora, el dise ce sola la fanes la plu fidosa de Toto va pote trova esta "tesoro" entre la dunas.
@T La colasa de un parario brasilera
@L aora_oji/2019/la_colasa_de_un_parario_brasilera
====== La colasa de un parario brasilera ======
26 janero 2019
Sirca 200 persones manca pos la colasa de un parario a un mineria de minerales ferosa en la sude-este de Brasil.
La rompe ia relasa un mar de mugre fangosa cual ia covre la caferia do sentos de laborores ia es comente.
Ecipos salvante ia usa escavadores a la loca, cual es prosima a la vila Brumadinho en la stato Minas Gerais. Romeu Zema, governor de la state, ia dise ce lo es nonprobable ce on va trova persones vivente.
Asta aora, on ia confirma la mori de nove persones. La causa de la colasa no es clar.
La parario es poseseda par Vale, la compania minante la plu grande de la pais. Lo ia es construida en 1976 con otras en la rejion, e ia es usada per teni tera escavada de la mineria.
Lo ia ave un volum de 12 milion metres cubo, ma on ancora no sabe cuanto dejetada ia es relasada en la asidente. La loca ia es ja nonativa tra tre anios, Vale ia dise.
La colasa segue a sola tre anios pos la creve de un parario en Mariana, en la mesma state, cual ia mata 19 persones. On regarda acel como la desastre ambiental la plu grave en la istoria de Brasil.
@T La corpo de un escavor barati trovada en un buco de rata
@L aora_oji/2019/la_corpo_de_un_escavor_barati_trovada_en_un_buco_de_rata
====== La corpo de un escavor barati trovada en un buco de rata ======
17 janero 2019
Sumerjores de la marina barati ia trova la corpo de un laboror ci ia es trapida con 14 otras en un mineria de carbon inondada en Meghalaya, un stato norde-este.
A 13 desembre, la omes ia entra a la poso nonlegal, de la spesie nomida "buco de rata", e ia deveni trapida cuando acua levante de un rio prosima ia enflue.
Un veculo suacuan ia deteta la corpo a profondia de 48 metres. Lo va es estraeda de la mineria con supravide par dotores.
Sirca 200 salvores ia es enviada a la loca, do los ia atenta sutrae la acua de la mineria.
On ancora no sabe esce la otra escavores vive ancora, ma sola tre elmos ia es trovada ante la descovre de la corpo.
Atentas de salva presedente ia es impedida par un manca de aparatos. Inisial, on ia ave sola du pompas de potia basa per drena la acua.
La mineria de carbon do la laborores es trapida es situada en un distrito distante, e ave 112 metres de profondia.
Esta metodo de mina envolve escava dutos en la tera per crea un buco streta, e lo es perilosa. Laborores, incluinte enfantes, usa scalas de bambu per desende, e asidentes aveni comun.
La metodo ia es proibida en 2014, ma la posesores de la minas ia defia la judi en la Corta Suprema de Barat.
La plu de la escavores nonlegal de Meghalaya ia migra de statos visina per gania mone.
Barat es la nasion tre de la plu grandes cual produi carbon, e carbon furni 60% de la enerjia usada par la pais. Ma la industria es mal regulada. Laborores, ci fronti frecuente situas cual perili la vive, es poca protejeda contra menasas a sua sania.
@T La desapare misteriosa de un stasion de monitori maral
@L aora_oji/2019/la_desapare_misteriosa_de_un_stasion_de_monitori_maral
====== La desapare misteriosa de un stasion de monitori maral ======
6 setembre 2019
Un stasion grande de monitori ambiental, prosima a la costa baltica de Deutxland, ia desapare de la fondo de mar, confondente polisiores e rexercores.
La oserveria suacuan ia ave un valua de sirca €300 mil e ia pesa plu ca un duiton. Espertas dise ce lo no es posible ce lo ia es tirada a via par un tempesta, la marea o un animal grande.
Sumerjores ia trova sola un cable eletrical laserada a la loca, a 22 metres su la surfas e 1,8 cilometres de la costa.
Esta es un area proibida, a norde de Kiel. No barcos, an no barcos local de pexa, es permeteda en la area, nomida Baia Eckernförde, a sirca 70 cilometres a sude de la frontera dansce.
A 21 agosto, la oserveria mancante, instalada en la tarda de 2016, ia sesa envia datos. Lo ia es composada de un unia de eletrica, liada a la costa par cable, e un unia de strumentos. En junta, los ia pesa 770 cilogrames.
La strumentos deutx ia mesura la cualia de la acua de mar, incluinte sua temperatur e proportios de sal, osijen, nurintes, clorofila e metano.
"La datos cual nos reseta de los es ultra valua," Profesor Hermann Bange ia dise, xef de rexercas marolojial a Geomar, un sentro siensal en Kiel.
Geomar ia apela per informa de cualce person ci ia vide atas suspetosa en la rejion a 21 agosto. "O cisa algun va trova partes de la aparatos a alga loca sur la plaia," Bange ia ajunta.
@T La destina de la monetas de la fonte de Trevi
@L aora_oji/2019/la_destina_de_la_monetas_de_la_fonte_de_trevi
====== La destina de la monetas de la fonte de Trevi ======
14 janero 2019
Un disputa ia comensa entre la maior de Roma e la Eglesa Catolica sur lo cual on debe fa con la monetas de la fonte de Trevi.
En cada anio, on estrae cuasi 1,5 milion euros de la monumento famosa. La mone es tradisional donada a un asosia de carita catolica per aida persones povre.
Ma aora la maior, Virginia Raggi, vole ce on spende la mone per la infrastrutur desintegrante de la site en loca.
La asosia Caritas dise ce persones la plu povre va es afetada par la perde de revenu, e la jornal de la confere de bispos italian ia apare un article despetosa sur la tema en sua numero de saturdi.
Conselores de la site ia aproba la cambia, cual on intende reali en april. An tal, multe italianes en redes sosial demanda aora ce la comite de vila reconsidera la deside.
Raggi ia prende la controla de Roma en 2016 per la Promove Sinco Stelas, cual ia formi un governa nasional aliada en la anio pasada. Sua popularia ia cade car el ia fali trata la difisiles de la site debente.
En otobre, miles de protestores ia asembla estra la ofisia de site per denunsia Raggi a tema de problemes cual inclui dejetadas noncolieda e stradas dolinetosa.
La fonte de Trevi ave cuasi 300 anios e es visitada par miliones de turistes en cada anio.
La tradision de lansa monetas en la fonte ia deveni famosa pos la canta "Tre monetas en la fonte" par Frank Sinatra en la comedia romantica de 1954 con la mesma nom.
La fonte ia deveni ance conoseda pos sua apare en la filma La dolce vita ("La vive dulse") de 1960, en cual la ator Anita Ekberg ia vada tra la acua en un roba.
@T La deteta de radiosiniales de la spasio profonda
@L aora_oji/2019/la_deteta_de_radiosiniales_de_la_spasio_profonda
====== La deteta de radiosiniales de la spasio profonda ======
10 janero 2019
Astronomistes ia revela detalias de radioemetes misteriosa cual emerji de un galasia distante e ia es detetada par un telescopio en Canada. On no sabe la natur esata e la orijin de los.
Entre la 13 "radioflaxes rapida" ia es un sinial repetente e multe nonusal, veninte de la mesma fonte con distantia de sirca 1,5 mil milion anios de lus. On ia reporta un tal aveni a sola un ves presedente, detetada par un otra telescopio.
Ingrid Stairs, un astrofisiciste de la Universia de Columbia Brites, ia dise: "Ce on ave un otra fonte sujesta ce on ta pote ave plu. E con plu repetentes e plu fontes disponable per studia, nos va comprende cisa esta rompetestas astronomial -- de do los veni e como los es causada."
La oserveria CHIME, locada en la Vale Okanagan de Columbia Brites, es composada de cuatro antenas semisilindre con longia de 100 metres, cual scane tota la sielo norde a cada dia.
La telescopio ia comensa funsiona sola en la anio pasada, e cuasi sin retarda lo ia deteta des-tre de la radioemetes, incluinte la repetente.
"Nos ia descovre un repetente du, e sua cualias es multe simil a la repetente prima," Shriharsh Tendulkar de la Universia McGill en Quebec ia comenta. "Esta furni plu informa sur la cualias de repetentes como un colie."
Radioflaxes rapida es emetes corta e briliante de radioondas, cual pare traversa cuasi un dui de la universo. Asta aora, siensistes ia deteta cuasi 60 nonrepetentes e 2 cual repete. On crede ce cisa mil aveni en la sielo a cada dia.
On ave teorias diversa sur la causa, incluinte un stela de neutron con campo magnetal multe forte e multe rapida jirante; du stelas de neutron cual fusa con lunlotra; e (entre un minoria peti de comentores) alga spesie de veculo spasial estrateran.
@T La fini de un proibi contra tatuas a Air New Zealand
@L aora_oji/2019/la_fini_de_un_proibi_contra_tatuas_a_air_new_zealand
====== La fini de un proibi contra tatuas a Air New Zealand ======
10 junio 2019
Air New Zealand va fini un proibi contra tatuas vidable sur empleadas. Lo dise ce la cambia va permete ce sua empleadas espresa sua diversia cultural e individua.
Alga zelandeses con asendentes maori porta tatuas per onora sua jenealojia e erita.
La airocompania ia dise ce, de 1 setembre, tota empleadas va pote mostra tatuas "nonofendente" en labora. Lo ia ajunta ce on ave un aseta cresente de tatuas, spesial como un modo de espresa personal.
La restrinjes contra tatuas ia atrae critica, e alga persones ia acusa la compania de ipocritia per sua usa de otra aspetas de la cultur maori -- per esemplo, lingua e simboles -- en sua anunsias comersial.
On reporta local ce la cambia ia aveni pos alga casos asentuada de individuas a ci on ia refusa roles a Air New Zealand par causa de sua tatuas vidable.
La compania ia dise ce sinco menses de rexerca con clientes e empleadas ia trova ce un zelandes entre sinco ave un tatua a la min, e ce plu ca 35% de persones con min ca 30 anios es tatuada.
Per persones con asendentes maori, marcas conoseda como moko es siselida sur la pel. Los es un tradision santa, representante la lias de un person a sua familia e identia cultural.
Tatuas de fas es spesial importante. Los de omes tende covre la fas intera; los de femes covre la mento.
Un portavose per la airocompania nasional ia dise ce lo va "trata tatuas como la parla" per deside lo cual es ofendente. "En la mesma modo como on no debe blasfema, fa comentas odiosa, broma vulgar, o usa linguaje violente en sua labora, per esemplo, la mesma pertine a tatuas."
Cuando un situa es nonclar, la compania va ave un comite "per aida empleadas e manejores a deside esce un tatua es aliniada con nosa politica."
@T La libri de marores turces saisida par piratas
@L aora_oji/2019/la_libri_de_marores_turces_saisida_par_piratas
====== La libri de marores turces saisida par piratas ======
10 agosto 2019
Des marores turces ci ia es saisida en la mense pasada, prosima a la costa de Africa ueste, es aora librida.
La omes ia es viajante a Costa de Ivor en un portacontenador, cuando la barcon ia es intersepida par piratas a la costa de Nijeria a 16 julio.
La piratas ia eleje prende esta des omes de la barcon, lasante oto otras ancora en lo.
La canal de governa turces TRT ia reporta ce la marores librida ave bon sania, sin dona plu detalias.
On no sabe clar ci ia saisi la omes, o esce on ia paia un rescata.
Sua portacontenador, la Paksoy-1, ia es en viaja de Camerun a Costa de Ivor cuando la piratas ia embarca en la Golfo Gine. Numan Paksoy, de la copmania cual maneja la barcon, ia dise ce "sirca 12 piratas con fusiles major ia ataca la barco".
El ia esplica ce la ecipores ia asconde en un sala secur, nomida la fortres, cuando la piratas ia embarca, ma los ia emerji cuando la atacores "ia menasa arde la barcon e mata tota de los".
Plu tarda, la barcon ia doci se a la porto Tema, en Gana.
Longo la Departe Maral Internasional, la Golfo Gine es la mar la plu perilosa de mundo, en pertine a piratas. 73% de tota saisis a mar e 92% de prendes de ostajes aveni ala, prosima a la costas de Nijeria, Gine, Togo, Benin e Camerun.
Sur un aveni nonrelatada, TRT ia reporta ance ce cuatro sitadanes turces, ci ia es saisida a 19 julio en la stato Kwara de Nijeria, ia es salvada a 26 julio.
@T La libri de un ostaje irani par piratas somali
@L aora_oji/2019/la_libri_de_un_ostaje_irani_par_piratas_somali
====== La libri de un ostaje irani par piratas somali ======
22 setembre 2019
Un marinor irani ia es relasada par piratas somali pos pasa plu ca cuatro anios en nonlibria.
Mohammad Sharif Panahandeh ia es "grave malada" e ia es librida per razonas umaniste, longo la Asosia de Suporta de Ostajes, cual ia aida negosia sua relasa.
En la desenio pasada, miles de ecipores maral ia es saisida como ostajes a la costa de Somalia, e relibrida pos la paia de un rescata.
La Forte Marinal European, cual opera en la rejion, dise ce la cuantia de atacas par piratas ala ia ateni sua masima en 2011 ma ia diminui aora a un grado iniorable.
Pos la libri de Sharif, piratas prisoni aora sola tre persones. Tota tre es sitadanes de Iran, prendeda con Sharif de un barco de pexa en 2015.
Un portavose per la Asosia de Suporta ia dise sur Sharif: "El es grave malnurida. El ia perde un cuantia enorme de pesa e ave disturbas grave de stomaco e sanguis interna."
La marinor ia es moveda a Addis Ababa, la capital de Itiopia, per un trata inisial. A pos, on va vola el a Iran.
Iran ia grasia la aida de la Asosia de Suporta, la Nasiones Unida, e la autoriosas en Itiopia a Puntland (un rejion partal autonom de Somalia).
An si Sharif ia es librida par causa de sua sania, la piratas va desira cisa un rescata per la tre otra persones.
La declina de piratia a la costa somali es atribuida a la usa de gardores armada sur barcos en la rejion, como ance a la labora de alga marinas, incluinte los de la Uni European e OTAN.
@T La litiga de un gardor nazi vea en Deuxtland
@L aora_oji/2019/la_litiga_de_un_gardor_nazi_vea_en_deuxtland
====== La litiga de un gardor nazi vea en Deuxtland ======
17 otobre 2019
Un om de 93 anios va es litigada oji en Deutxland per crimines de aida la omiside coletiva a un campa de mata nazi en la Gera Mundal Du.
On acusa Bruno Dey de contribui a la matas de 5230 prisonidas entre 1944 e 1945 en la campa a Stutthof en lo cual es aora Polsca norde.
El ia confesa ce el ia servi ala e ce el ia sabe ce on fa atas odiable en la campa. Ma el dise ce el no ia aida en omisides.
La litiga va es probable un de la finales contra un gardor pasada nazi. La prosede va es limitada a sesiones de du oras a no plu ca du veses per semana, par causa de la mal sania de Dey.
La acusores alega ce Dey, ci ia ave sirca 17 anios cuando on ia envia el a Stutthof, ia es un de la "rotas de la macina de mata".
On acusa el de mata 5000 persones par crea e manteni un situa enemin, 200 par gasi, e 30 par usa un aparato cual ia fusili la nuca de un vitim sin averti.
La corte va deside esce el ia "suporta sabente" la mata spesial de prisonidas iudi, como la acusores alega. Car el no ia ave alora 21 anios, Dey va es litigada en un corte de jovenes.
Acusores ia inisia la caso contra Dey en 2016, cuando investigores ia trova vestes nazi con sua nom e suscrive en la arcivos de Stutthof.
Sua prosede segue un litiga major cual ia inversa un judi de 1969 ce on no pote es condenada mera par causa de sua emplea a Auschwitz.
En un plu deside importante en 2016, Oskar Gröning, conoseda como la contor de Auschwitz, ia es condenada a cuatro anios en prison per aida la omiside de 300 mil iudis, sin indicas ce el ia es envolveda en matas definida.
Ma la senese de Dey pote afeta la prosede presente. La litiga de Johann Rehbogen, simil acusada de aida la omiside coletiva a Stutthof, ia es suspendeda en desembre 2018 cuando on ia ospitali la om de 95 anios. Probable sua litiga no va recomensa.
Stutthof ia es instituida en setembre 1939 a este de Danzig (aora la site polsce Gdańsk) como un campa de prisoni pos la invade nazi de Polsca. On ia clasi ofisial lo como un campa de consentra en 1942.
Lo ia es la tal campa prima cual on ia construi ultra la frontera deutx en la gera, e lo ia es la final cual ia deveni librida -- par la armada soviet a 9 maio 1945.
On crede ce plu ca 65 mil persones ia mori ala. Gardores ia comensa usa cambras de gas en junio 1944, e on ia crea alga fabricerias en la rejion, usante laborores forsada, preparante aparatos e utiles per la nazis.
@T La marea la plu alta en Venezia de 50 anios
@L aora_oji/2019/la_marea_la_plu_alta_en_venezia_de_50_anios
====== La marea la plu alta en Venezia de 50 anios ======
13 novembre 2019
Partes de la site Venezia en Italia es inondada pos la marea la plu alta de plu ca 50 anios.
La acua ia culmina a 1,87 metres. On ia vide un marea plu alta a sola un ves pos la comensa de arcivos en 1923: la site ia esperia 1,94 metres de acua en 1966.
Fotos mostra acua pleninte locas popular de turisme e persones vadante longo la stradas.
La Plaza San Marco es un de la partes la plu basa de la site, e ia es entre la partes la plu grave afetada. Sua basilica ia es inondada a sola la ves ses en 1200 anios. Cuatro de esta veses ia aveni en la dudes anios pasada.
La maior de Venezia dise ce el va declara un state de desastre, avertinte ce la inonda va lasa un marca permanente.
Alga comersias ia es afetada, e on ia vide sejas e tables flotante estra caferias e restorantes. En botecas, laborores ia atenta move sua benes a via de la acua per preveni ce los deveni plu danada.
Multe turistes ia continua sua turi de la atraes en modo tan bon como posible. Un duple franses ia dise ce los ia debe nada, plu o min, pos la cade de alga de la plataformas de lenio locada en partes propensada a inondas.
A esta matina, on ia vide alga barcos encaliada.
On fa ja de 2003 un projeta per defende Venezia de inondas, ma esta ia es impedida par costas altinte, scandales e retardas. La intende es ce on construi alga portones flotante per proteje la site contra mareas alta.
Lo ia pluve forte en Italia ier, e on previde plu pluves per la dias veninte.
@T La ministro de esternas irani resinia
@L aora_oji/2019/la_ministro_de_esternas_irani_resinia
====== La ministro de esternas irani resinia ======
26 febrero 2019
Mohammad Javad Zarif, la ministro de esternas de Iran, ia dise ce el resinia en un anunsia surprendente postada a sua conta de Instagram.
El ia demanda per pardona sur "falis" en sua tempo en governa.
Zarif ia fa un rol importante en negosia la acorda nucleal de 2015 entre Iran e potiosas major internasional. Ma la futur de la acorda es en duta pos cuando presidente Donald Trump ia fini la envolve de la SUA.
La resinia de Zarif ia es confirmada par IRNA, la departe governal de novas, cual ia sita un portavose per la ministreria de esternas.
La om de 59 anios ia es educada en la SUA e ave un diploma dotoral sur lege internasional de la Universia de Denver.
El ia servi como la ambasador irani a la Nasiones Unida, e ia deveni la ministro de esternas en 2013 cuando presidente Hassan Rouhani ia es elejeda con prometes de un Iran plu moderada e abrida a otra paises.
@T La mori de Niki Lauda
@L aora_oji/2019/la_mori_de_niki_lauda
====== La mori de Niki Lauda ======
21 maio 2019
Niki Lauda, campion de mundo en Formula 1 a tre veses, ia mori con 70 anios.
La om osteraices, un de la persones la plu conoseda en corsa de autos, ia gania la titulo per Ferrari en 1975 e 1977 e per McLaren en 1984.
El es spesial recordada per sua recovre e reveni a corsa pos deveni grave ardeda en un colide en la Premio Grande deutx en 1976.
Lauda, ci ia reseta un transplanta de pulmo en agosto, "ia parti multe pasosa" a lundi, sua familia ia dise.
Pos sua carera como corsor de autos, el ia deveni un entreprenor de airocompania. Plu resente, el ia es un xef nondirijal per la ecipo Mercedes de Formula 1, influosa en la introdui de la corsor Lewis Hamilton, ci ia gania tre torneos de mundo.
La declara par sua familia ia comenta: "Sua atenis unica como atleta e entreprenor es e va resta nonoblidable. Sua zelo nonfatigable per ata, sua francia e sua coraje resta como un model e un norma per tota de nos."
@T La mori de un xica burundes, bastida a scola
@L aora_oji/2019/la_mori_de_un_xica_burundes_bastida_a_scola
====== La mori de un xica burundes, bastida a scola ======
31 otobre 2019
En Bujumbura, la capital de Burundi, un xica de 14 anios ia mori, parente pos cuando un ensenior ia basti el en modo savaje.
Chadia Nishimwe ia es colpada con basto a la colo e gamas. La bate ia causa ance ce sangue flue de sua nas e oreas, sua padre Jean-Marie Misago ia dise.
"El ia mori direta en clase pos es cruel bateda par sua ensenior. Los ia lasa el a la ofisia de la ensenior xef," el ia ajunta.
La ensenior xef ia organiza move Chadia a ospital, a do ance Misago ia rapidi, ma la dotor ia informa el ce sua enfante es ja mor.
Misago dise ce la puni ia aveni a martedi, e ce el ia entera sua fia a la mesma dia.
On ia informa el ce Chadia ia es bastida car el ia rompe regulas de clase. La scola ia declara ce "la enfante ia sufri un ataca epilesica pos un basti de studiantes ci no ia fa un taxe asiniada".
La puni corpal es nonlegal en Burundi. La departe de educa e la polisia no ia comenta.
@T La orolojo a du minutos ante la fini de la mundo
@L aora_oji/2019/la_orolojo_a_du_minutos_ante_la_fini_de_la_mundo
====== La orolojo a du minutos ante la fini de la mundo ======
25 janero 2019
En 2019, la Orolojo de Apocalise -- un simbol cual representa la probablia de la fini de la mundo -- resta a sua punto la plu prosima a medianote en sua istoria, par causa de la "nonormalia nova" cual la mundo fronti entre tal riscas como gera nucleal e clima cambiante.
La orolojo intende averti sur desastres menasante. Lo ia es creada par la organiza Bulletin of the Atomic Scientists (BAS, "Revisteta de la Siensistes Atomal") en 1947.
On ia anunsia ier sua indica per esta anio: lo resta a la mesma punto como en 2018. BAS ia averti ce "nos normali un mundo multe perilosa".
Medianote en la orolojo simboli un desastre cual ta fini la mundo. Esta es sola la anio tre en cual la orolojo ia veni tan prosima a acel punto. Lo ia es prima atenida en 1953 pos la proba de bombas de idrojen estrema destruosa par la SUA e la Uni Soviet.
En la anunsia en Washington a jovedi, representores de BAS ia dise ce la posa mantenida de la orolojo es "novas vera mal".
Rachel Bronson, presidente e dirijor xef de BAS, ia dise: "An si noncambiada pos 2018, on debe no regarda esta indica como un sinia de stablia, ma como un averti brusca a gidores e sitadanes tra la mundo. Esta nonormalia nova es simple tro volatil e tro perilosa per aseta."
Jerry Brown, governor pasada de California ci servi como presidente dirijal de BAS, ia averti simil: "Nos jua un roleta rusce con la mundo umana."
En la anunsia, la organiza ia reconose bonis en relatas entre la SUA e Corea Norde, ma ia critica ance tal developas como emetes aumentada de carbono par alga nasiones e fendes diplomata cual continua tra la mundo.
La grupo sita armas nucleal e la cambia de clima como la du menasas major corente per umanas, e averti ce la riscas deveni "malida" par la "usa grandida de gera par informas per sumina la democratia sirca la mundo".
Herb Lin, un erudita ci rexerca sur siberpolitica e sibersecuria a la Universia de Stanford, ia parla sur la periles spesial de "novas falsa" a la anunsia ier. "Un mundo asustante es un en cual furia e fantasia sustitui per veria," el ia nota.
A sua inisia, la ago de la orolojo ia indica la minuto sete ante medianote, e on ia move lo a 23 veses a pos.
Longo BAS, la desinia ia es consetada par la artiste Martyl Langsdorf. El ia desira imaji oservas pasionosa cual el ia oia de siensistes sur la efetos de la armas atomal prima de mundo, cual los ia aida developa.
Oji, la comite -- composada de fisicistes e siensistes ambiental de multe partes de la mundo -- deside ajustas a la orolojo en consulta con sua comite de sponsores, cual inclui lauridas Nobel.
@T La Pape fa un visita sin presedente a la AAU
@L aora_oji/2019/la_pape_fa_un_visita_sin_presedente_a_la_aau
====== La Pape fa un visita sin presedente a la AAU ======
3 febrero 2019
Pape Fransisco va ariva oji en la Amirias Arabi Unida, deveninte la pape prima ci visita la Penisola Arabi.
El ia es invitada par Xec Mohammed bin Zayed al-Nahyan, la prinse erital de Abu Dhabi, a partisipa en un confere intercredal. Sua visita va inclui ance un misa a martedi, sur cual on espeta ce lo va atrae 120 mil persones.
Oservores va regarda atendente la visita per cualce referes a la gera en Iaman. La pape ia condena ia gera, en cual la AAU es envolveda como parte de un alia gidada par Arabia Saudi.
En la anio pasada, Pape Fransisco ia apela a la comunia internasional "per evita un mali de la situa ja sufrosa" en Iaman. La AAU es ance la pais de cuasi milion catolicas, de ci la plu veni de la Pilipinas o Barat.
En un mesaje video a jovedi, la Pape ia descrive la AAU como "un pais cual atenta es un model de coesiste, de fratia umana, e un asembleria entre sivilias e cultures diversa".
En Abu Dhabi, la Pape va encontra ance Xec Ahmed al-Tayeb, la imam grande de la mascita Al-Azhar en Qahira, cual es la seja erudita la plu alta per muslimes suni.
La Vatican espera ce la visita par la Pape va laxi cisa la restrinjes contra la construi de eglesas en la rejion, spesial en Arabia Saudi, pais visina, do locas de prea nonmuslim es proibida.
@T La pape regrete la fura de scultas nativa
@L aora_oji/2019/la_pape_regrete_la_fura_de_scultas_nativa
====== La pape regrete la fura de scultas nativa ======
26 otobre 2019
La pape ia espresa sua regrete pos cuando scultas nativa de la Amazona ia es furada de un eglesa en Roma e dejetada en la Rio Tevere.
"Como un bispo de la bispia, me demanda per pardona de la persones ci ia es ofendeda par esta," el ia dise.
La sinco scultas en lenio de un fem nuda e ensinta ia es prendeda de la eglesa a lundi.
Furores nonidentifiada, ma sur ci on crede ce los es ativistes catolica conservaliste, ia descrive la scultas como "idoles". Plu tarda, los ia posta un video cual mostra como los ia fura la scultas de Pachamama e ia lansa los a la rio.
Pachamama es un diva adorada par alga comunias nativa en la Amazona, un rejion vasta en America Sude.
Pape Fransisco ia demanda per pardona a venerdi, la dia anteultima de un asembla de tre semanas en la Site Vatican. La consenta, nomida un sinodo, discute la futur de la eglesa catolica en la Amazona.
La pape ia dise ce la scultas es reganiada par la polisia italian e ce los pare es nondanada. El ia asentua ance ce on ia ave "no intende idolinte" en trae la scultas a la eglesa en Roma.
A ante, cuando la Vatican ia condena la fura, ofisiores major ia dise ce la scultas representa mera la vive, fertilia, e la tera-madre.
La pape ia reseta criticas forte de ultraconservalistes sur esce on va permete omes sposida a deveni pretes. Esta es un de la temas la plu discuteda a la sinodo.
@T La partito de Erdoğan es vinseda en Istanbul
@L aora_oji/2019/la_partito_de_erdogan_es_vinseda_en_istanbul
====== La partito de Erdoğan es vinseda en Istanbul ======
24 junio 2019
En Turcia, la Partito de Justia e Developa (AKP), gidada par presidente Recep Tayyip Erdoğan, ia perde la controla de Istanbul pos un refa de la eleje maioral de acel site.
Pos la conta de cuasi tota votas, Ekrem İmamoğlu, la aspiror per la partito xef oposante, ia ave 775 mil votas de vantaje -- un aumenta grande de sua marjin de 13 mil en la eleje prima en marto. Sua vinse alora ia es canselada car AKP ia alega cualias noncoerente en la prosede.
La resulta fini 25 anios de governa par AKP en Istanbul.
La aspiror AKP, ministro xef pasada Binali Yıldırım, ia sede a sua oposor. En Twitter, Erdoğan ia scrive: "Me loda Ekrem İmamoğlu ci ia gania la eleje longo resultas inisial."
Erdoğan ia dise en la pasada ce "el ci gania Istanbul gania Turcia". El governa la pais de 2003, como ministro xef e aora como presidente, deveninte la xef la plu potiosa de la pais pos Mustafa Kemal Atatürk, fundor de la republica turces moderna.
En sua parla de vinse, İmamoğlu, de la Partito Republiciste de la Popla (CHP), ia dise ce la resulta marca "un comensa nova" per e la site e la pais, e ce sua suportores "ia repara democratia".
"Nos abri un paje nova en Istanbul," el ia dise. "Sur esta paje nova, on va ave justia, egalia, ama." El ia ajunta ce el es preparada per labora armoniosa con Erdoğan.
Con 99% de votas contada, İmamoğlu ia ave 54% e Yıldırım 45%.
@T La pasea epica de un volpe artica
@L aora_oji/2019/la_pasea_epica_de_un_volpe_artica
====== La pasea epica de un volpe artica ======
2 julio 2019
Un volpe artica joven ia pasea a traversa de la jelo en un viaja epica de la isolas Svalbard en Noria asta la norde de Canada. Lo ia traversa 3506 cilometres en 76 dias.
En la tarda de marto de la anio pasada, rexercores a la Instituida Polal de Noria ia pone un aparato de jeolocali a la fema joven, e ia libri el su la sielo de la costa este de Spitsbergen, la isola xef de la arcipelago Svalbard.
La volpe ia ave min ca un anio cuando el ia comensa pasea a ueste per xerca comedas, arivante en Gronland pos sola 21 dias e un viaja de 1512 cilometres.
On ia locali el sur Isola Ellesmere en Canada, pos cuasi 2000 plu cilometres e sola 76 dias pos sua parti de Svalbard.
Nunca a ante, on ia rejistra un volpe cual ia viaja tan distante. Ma la rexercores ia es plu stonada par la rapidia de la volpe ca par la longia de sua viaja. La animal ia traversa promedia plu ca 46 cilometres per dia, e an 155 cilometres a veses.
Rexercor Eva Fuglei ia comenta: "Prima, nos no ia pote crede nosa oios. Nos ia pensa ce cisa lo ia mori, o ia es portada ala sur un barco, ma on ia ave no barcos en la rejion. Nos ia es intera aturdida."
Fuglei ia labora per esplora como volpes maneja la cambias dramosa de la saisones artica.
"On ave comedas sufisinte en la estate," el ia dise, "ma lo deveni difisil en inverno. Esta es cuando la volpe artica migra comun a otra rejiones jeografial per trova comedas per survive. Ma esta volpe ia vade multe plu distante ca la plu de otras cual nos ia segue a ante. Lo mostra vera la capasia spesial de esta creada peti."
La Instituida Polal ia produi un graf cual indica como la volpe ia fa du pausas en sua viaja traversante Gronland norde.
La siensistes opina ce cisa el ia enrola se en la neva per pasa tra un clima mal, protejeda par sua pelo spesa, o ce el ia trova un fonte de comedas como avias de mar en un canal abrida de acua.
Nos va sabe nunca la condui de la volpe peti en Canada, car sua transmetador ia sesa funsiona en febrero. Ma el va debe cambia sua abituas de come, car sur Isola Ellesmere la comeda xef de volpes es leminges, en loca de la dieta plu maral de Svalbard.
La diminui de la jelo polal fa un efeto contra volpes artica. Los no pote plu visita Island, per esemplo, e pos alga tempo cisa sua popla en Svalbard va deveni completa isolida.
Ma Fuglei dise ce on ave ancora espera: "Temperatures plu alta pote dona plu renos en Svalbard, e la volpes foraje sua corpos."
@T La persones de Elas eleje un parlamento nova
@L aora_oji/2019/la_persones_de_elas_eleje_un_parlamento_nova
====== La persones de Elas eleje un parlamento nova ======
7 julio 2019
La elinicas vota oji per eleje un parlamento nova. La oposantes sentral destriste defia la governa sinistriste.
La partito Democratia Nova de Kyriakos Mitsotakis espera fini plu ca cuatro anios de governa par la partito Syriza de Alexis Tsipras, la ministro xef.
Tsipras ia inisia un vota subita pos sua defeta en la elejes european en maio. Esta es la vota ses en Elas pos la crise finansial global en 2008.
La crise ia provoca un serie de rescatas finansial, en cuando la economia elinica ia diminui par 28% entre 2008 e 2016. La nonemplea ia povri multe persones elinicas. Elas ia parti de la program de rescatas en agosto de la anio pasada, e la crese ia reveni.
Mistotakis promete impostas min alta, privatis plu grande de servis publica, e projetas per renegosia un acorda con la creditores de Elas cual ta permete ce on reinvesti plu mone a la pais.
Tsipras, ci ia veni a governa e 2015, ia promete investi plu, e ia aumenta resente la pensiones. Ance sua propre politicas de investi ta debe es renegosiada con creditores, car la pais resta supravideda par la eurozona.
Per entra a la parlamento, cada de la multe partitos en la pais nesesa gania a la min 3% de la votas. Cisa tan multe como sete de los va gania sejas.
La partito vinsente va reseta 50 plu sejas de regala, e nesesa ave 151 sejas en la parlamento de 300 sejas per teni un majoria.
En la elejes european, Democratia Nova ia gania 33,11% de votas contra 23,78% per Syriza. La proportio la plu alta (30,5%) de persones con entre 18 e 24 anios ia suporta Democratia Nova en acel elejes.
@T La Pilipinas reenvia dejetadas canadian a Canada
@L aora_oji/2019/la_pilipinas_reenvia_dejetadas_canadian_a_canada
====== La Pilipinas reenvia dejetadas canadian a Canada ======
31 maio 2019
La Pilipinas ia reenvia multe tones de dejetadas a Canada, pos un disputa diplomata longa en cual Presidente Rodrigo Duterte ia menasa "viaja a Canada e repone sua dejetadas ala".
Sua pais cexa ce la dejetadas ia es falsa eticetida como plasticas resiclable cuando los ia es enviada a Manila en 2014. Canada ia acorda paia la custa completa de transporta e desprende los.
69 contenadores de dejetadas ia es reenviada en un barcon de carga cual ia comensa viaja de Baia Subic, a norde de Manila.
"Baaaaaaaaa bye [pd. 'txau'], como nos dise lo," Teddy Locsin Jr, ministro de esternas pilipina, ia scrive en Twitter a esta matina. La ministro, ci es conoseda per sua stilo turbosa de tuitas, ia posta ance imajes e video de la barcon partinte de la porto.
La sirca 1500 tones de dejetadas renativida va es transportada a la site Vancouver en Canada, arivante ante la fini de junio, per es tratada en un compleso cual converti dejetadas a enerjia.
Sean Fraser, la secretor parlamental de la ministro de ambiente canadian, ia comenta: "Esta es un demostra ce nos intende obedi nosa obligas internasional de trata dejetadas cual orijina en Canada."
El ia dise ance ce Canada ia ata rapida en la semanas resente per solve la problem, cual ia continua tra alga anios, pos cuando la governa pilipina ia clari "ce esta es un conserna multe seria per los".
Un cuantia cresente de paises tra Asia sude-este urje nasiones ueste a reprende dejetadas cual ia es enviada a los, razonante ce alga de los ia es nonlegal emportada.
La cuantia de dejetadas esportada par paises developada ia es revelada cuando Xina, cual ia emporta la majoria de lo tra anios, ia introdui un proibi contra "dejetadas stranjer". Como resulta, la dejetadas -- a veses, falsa declarada como resiclables -- ia es enviada a otra paises developante, ma esta paises comensa aora resiste.
Ofisiores en la Pilipinas ia indica la problem de dejetadas a Canada a la ves prima en 2014, disente ce contenadores de dejetadas maleticetida ia es enviada par barcon entre 2013 e 2014, arivante a la Porto Internasional de Contenadores de Manila.
En 2016, un corte pilipina ia comanda ce la emportor paia per reenvia la dejetadas a Canada. En acel mesma anio, Canada ia cambia sua propre regulas sur transporta de dejetadas perilosa, per preveni un repete de la aveni.
Plu temprana en esta mense, Manila ia retira sua ambasador de Ottawa cuando on ia ateni la 15 de maio sin ce Canada ia retrae la dejetadas. Alora, Canada ia dise ce lo va comensa preparas per reprende los.
Aora oji va continua denova pos un semana.
@T La polisia ataca en la metro de Hongkong pos protestas
@L aora_oji/2019/la_polisia_ataca_en_la_metro_de_hongkong_pos_protestas
====== La polisia ataca en la metro de Hongkong pos protestas ======
1 setembre 2019
En Hongkong, la polisia ia ataca violente protestores suspetada cuando miles ia marxa en la site, defiante un proibi. Imajes mostra polisiores ci colpa persones con bastones e usa gas de peper en un tren en la metro.
La polisia dise ce los ia es clamada a un sena de violentia contra sitadanes par "protestores revoluinte". Ma lo no es clar esce tota la persones ferida e arestada en la metro ia es envolveda en protestas.
Miles de persones ia vade sur la stradas ier, per refleta la aniversario sinco de cuando la governa de Xina ia proibi elejes intera democrata en Hongkong.
Protestores ia ensende focos, ia lansa bombas de gasolina, e ia ataca la construida de parlamento. En responde, la polisia ia usa gas lacrimojen, baletas de cauxo e canones de acua per sperde la fola, e ia xuta baletas avertinte en cuando los ia atenta vacui la stradas.
La protestas la plu resente ia aveni a la dia pos la aresta de alga ativistes e legores ci suporta democratia en esta rejion spesial manejada de Xina. Aora, Hongkong ia esperia un serie de 13 semanas de protestas.
La promove ia crese de asemblas contra un projeta controversa de estradi (aora suspendeda) cual ta permete ce on envia criminales suspetada a la tera xef de Xina per es litigada. Lo ia deveni un promove plu vasta per democratia, en cual la scaramuxas ia deveni plu violente.
En la protestas, un fola de persones ia asembla prosima a la stasiones Prinse Edward e Mong Kok en la distrito Kowloon. La polisia ia tuita ce los ia responde a ambos locas pos reportas de protestores revoluinte ci ataca sitadanes e dana imobilas.
En un declara formal, la governa de Hongkong ia dise ance ce alga protestores ia fa ensendes criminal e ia "lansa ojetos diversa e reles de fero" sur ferovias, "completa iniorante la securia de otra pasajores". 40 persones ia es arestada per asemblas nonlegal, danas criminal, e atacas contra polisiores.
Ma alga persones ia cexa sur la fortia esedente cual la polisia ia usa. Un om ia raconta: "La tren ia para. Polisiores ia entra e ia colpa me a du veses con un baston. Los no ia aresta me. Mera, los ia relasa sua coleria par colpa me."
La compania MTR, cual opera la metro de Hongkong, ia dise ce lo ia clui tre stasiones pos la aveni. On no sabe cuando los va reabri.
Protestores ia vade sur la stradas en la distrito Wan Chai, do multe ia junta se a un marxa cristian, e otras ia protesta su pluve intensa en Causeway Bay, un distrito de botecas. Multe ia porta parapluves e mascas de fas.
Protestores cantante "sta con Hongkong" e "batalia per libria" ia asembla estra ofisias governal, la xeferia local de la Armada Poplal de Libri e la parlamento de la site, nomida la Consilio Leginte.
En la distrito Admiralty, alga protestores ia lansa bombas ensendente en dirije a polisiores. Plu temprana, protestores ia marxa prosima a la abiteria ofisial de Carrie Lam, la dirijor xef de Hongkong ci es la foca de multe de la coleria.
Polisiores de tumulta ia erije paradores sirca construidas major, e ia xuta gas lacrimojen e jetas de acua con tinje blu. Esta licuida colorida es tradisional usada per fasili identifia protestores a pos.
La polisia ia confirma ce du polisiores ia spara a la aira en sua opera de move la protestores de la stradas. Cada de la du ia xuta un baleta cuando el ia senti ce sua vive es menasada.
Un studiante de 22 anios ia dise: "Comanda nos a sesa protesta es simil a comanda nos a sesa respira. Me senti ce batalia per democratia es mea debe. Cisa nos vinse, cisa nos perde, ma nos batalia."
@T La polisia barati mata la suspetadas de un viole sesal
@L aora_oji/2019/la_polisia_barati_mata_la_suspetadas_de_un_viole_sesal
====== La polisia barati mata la suspetadas de un viole sesal ======
6 desembre 2019
En Barat, la polisia ia mata par pistol cuatro omes suspetada de viole e mata un veterinar fema joven en Hyderabad en la semana pasada.
La omes ia es ja detenida par la polisia e ia es moveda a la loca de la crimin en la oras temprana de esta matina, per reconstrui la aveni. La suspetadas ia es pistolida cuando los ia atenta fura la pistoles de la polisiores e fuji. Du polisiores ia es ferida.
On ia descovre la restas de la vitim, ci ia ave 27 anios, a jovedi pasada, provocante protestas coler alegante ce la polisia no ia responde per du oras.
Pos la anunsia ce la suspetadas es mor, la madre de la vitim ia dise ce justia es fada. Visinas ia selebra con petardos e distribui bonbones, e miles de persones ia vade sur la stradas per aclama la polisia.
La madre ia ajunta ce el desira un lege plu sever contra atacas e violes sesal: "Omes ta teme an fisa sua regarda a femes, car los ta es punida."
La sore de la vitim ia descrive la ata par la polisia como "multe nonespetada", disente: "Me ia espeta prosedes legal e justia furnida par la corte. Esta no va revive mea sore, ma lo es un lejeri grande. Pos la ata par la polisia, persones va repensa ante fa un tal cosa denova."
La vitim ia parti de sua casa sur sua motosicle sirca 18:00 a des dias ante aora, per vade a sua dotor. Plu tarda, el ia telefoni sua familia per dise ce el ave un creve de numatico, e ce un camionor ia ofre aida. El ia dise ce el es prosima a un peajeria.
Atentas de contata el a pos no ia susede, e sua corpo ia es descovreda su un viaduto par un letor en la matina de jovedi.
En la semana pasada, tre polisiores ia es suspendeda de sua postos cuando la familia de la vitim ia acusa los de no responde sufisinte rapida a la reporta ce la fem manca. La polisiores ia sujesta an ce el ia fuji per sposi.
@T La polisia xines restrinje la jua de madjong
@L aora_oji/2019/la_polisia_xines_restrinje_la_jua_de_madjong
====== La polisia xines restrinje la jua de madjong ======
24 otobre 2019
Un proibi parente par la polisia contra tota salones de madjong en un site en Xina ia provoca un panica entre juores de esta pasatempo nasional xines.
La polisia en Yushan en Xina sude-este ia anunsia prima la proibi a la fini de semana, disente ce lo intende preveni apostas nonlegal e "puri la condui sosial".
Esta ia crea xoca e coleria, con multe persones descrivente la jua stratejial de telias como "la esense de cultur xines". La polisia ia clari alora ce los va clui sola la salones nonlisensada.
Esta segue pos anunsias par alga otra sites ce salones corajinte apostas va es cluida.
An tal, alga posesores de salones lisensada ia informa jornalistes local ce ance los no opera su la restrinje, ma on ancora no sabe esce los segue mera sua desira o esce ofisiores ia obliga los a sesa.
Madjong es un de la juas la plu popular en Xina, spesial entre persones vea. An si on no nesesa jua lo per mone, lo es comun ce juores fa apostas de cuantias peti. En un jua tipal, la juores aposta entre un e des-sinco dolares.
@T La presidente de Albania cansela elejes local
@L aora_oji/2019/la_presidente_de_albania_cansela_elejes_local
====== La presidente de Albania cansela elejes local ======
9 junio 2019
Ilir Meta, presidente de Albania, ia cansela elejes local pos menses de protestas antigovernal. El ia dise ce la situa political en la pais no permete elejes justa, intendeda per 30 junio.
La anunsia ia es fada no longa ante cuando protestores ia es sperdeda par polisiores xutante gas lacrimojen. Alga de la protestores ia lansa bombas de fuma e petardos estra la parlamento en Tirana, la capital.
La protestores esije la resinia de Edi Rama, la ministro xef sosialiste, e ia recomenda un vota jeneral temprana. Los desira ance la crea de un governa tempora, e ia refusa negosia con la ministro xef.
Lulzim Basha, xef de la Partito Democrata oposante, ia coraji la popla a continua la protestas asta cuando Rama resinia. A miles de sua suportores en Tirana, el ia descrive la deside par la presidente per cansela la elejes como "la resulta prima de nosa batalia contra Edi Rama". Partitos oposante ia boicota la elejes.
Ma Rama, ci gida la pais de 2013, ia dise plu tarda ce la elejes local no va es canselada.
La comunia internasional ia urje la partitos political de Albania a asteni de violentia e inisia un dialoga. En un declara ier, Presidente Meta ia solisita ce xefes oposante fa protestas "en un modo completa pasosa".
Multe figures, Presidente Meta, ia dise ce la divide continuante menasa la aspira de la pais per junta se a la Uni European. Statos-membros de la uni va vota en la semanas veninte sur la posible de comensa discutes de membria con la nasion balcan.
@T La presidente de Sudan declara un crise nasional
@L aora_oji/2019/la_presidente_de_sudan_declara_un_crise_nasional
====== La presidente de Sudan declara un crise nasional ======
23 febrero 2019
En Sudan, presidente Omar al-Bashir ia declara un state de crise nasional per un anio, desempleante la governa federal e tota governores de statos. El ia fa la anunsia en un parla televisada.
Plu temprana, la departe de securia ia dise ce Bashir va resinia. El ia es la foca de protestas antigovernal en semanas resente.
En la site Omdurman, persones ia protesta en la stradas pos la anunsia, ma ia reseta gas lacrimojen de la polisia.
En sua parla, Bashir ia demanda ce la parlamento pospone cambias constitual cual ta permete el a preside per un plu periodo. El ia dise ance ce la protestas es un atenta de destabli la pais.
A alga oras plu tarda, el ia publici du comandas presidental per asinia membros de la armada e la departe de securia per governa la des-oto provinses de Sudan.
El ia anunsia ance ce sinco membros de la consilio, incluinte la ministros de esternas, defende e justia, va reteni sua postos.
La protestas ia comensa sur reduis de aida finansial per pan e carburante en desembre, ma los ia deveni usada per espresa coleria contra la rena tra 30 anios de Bashir.
On reporta ce plu ca mil persones ia es detenida pos la comensa de la protestas. Campaniores per diretos dise ce plu ca cuatrodes persones ia es matada en scaramuxas contra la fortes de securia.
La organizores de la protestas ia promete continua asta cuando Bashir resinia sua posto.
Bashir ave 75 anios e ia deveni presidente en un colpa de stato en 1989.
@T La presidente de Txile desemplea sua consilio intera
@L aora_oji/2019/la_presidente_de_txile_desemplea_sua_consilio_intera
====== La presidente de Txile desemplea sua consilio intera ======
27 otobre 2019
Sebastian Piñera, presidente de Txile, ia desemplea sua consilio intera per formi un governa nova e introdui reformis sosial cual protestores esije.
Plu ca milion persones ia partisipa en un asembla pasosa a venerdi en la capital Santiago, solisitante justia sosial.
Piñera ia dise ce el ia oia la esijes de la stradas. "Nos es en un realia nova," el ia comenta. "Txile es diferente de como lo ia es en la semana presedente."
La presidente ia anunsia ance ce la ora de retira, introduida a sites tra Txile a la semana pasada, es canselada. Oposores ia urje ce on sesa ance la state de crise.
A la min 17 persones ia es matada e sentos ferida pos la comensa de la protestas contra nonegalia a pico plu ca un semana ante aora. La protesta a venerdi ia segue un semana de scaramuxas violente entre ativistes e la polisia antitumultal.
La presidente ia tuita: "Tota de nos ia cambia. La asembla joiosa e pasosa oji, en cual txilanes ia demanda per un Txile plu justa e unida, abri vias esperosa a la futur."
La governor de Santiago, Karla Rubilar, ia dise ce a la min milion persones ia asembla en la capital - plu ca 5% de la popla de la pais. En Twitter el ia dise ce la protestores "representa un sonia per un Txile nova".
Organizores dise ce la asembla ia es la plu grande ala pos la restora de democratia en 1990. Partisipores ia pasea tra distantia longa sirca la site, colpante casolas, brandinte banderas e clamante per reformis.
Protestores ia es ance sur la stradas en cada otra site major de Txile.
La protestas ia es orijinal provocada par un aumenta de la custa de biletas de metro, aora suspendeda, ma los ia crese per inclui cexas plu jeneral sur la custa de vive e sur nonegalia.
En la dias de protesta, on ia esperia alga furas de benes e ensendes de construidas. Plu ca 7000 persones ia es detenida. La militar ia prende controla de securia en Santiago, do on ave un state de crise con miles de polisiores sur la stradas.
A mercurdi, la presidente ia anunsia un colie de reformis intendeda per fini la protestas, incluinte un aumenta de la pension fundal e la salario minima.
@T La prisoni de la furor prima de banco en Svalbard
@L aora_oji/2019/la_prisoni_de_la_furor_prima_de_banco_en_svalbard
====== La prisoni de la furor prima de banco en Svalbard ======
9 maio 2019
Un om rusce ci ia fa la fura prima de banco en Svalbard, un arcipelago norsce en la artica distante, ia es condenada a 14 menses en prison.
Maxim Popov, ci ave 29 anios, ia fura 70 mil kroner (US$ 8000) de la banco la plu norde de mundo en la vila Longyearbyen en desembre.
La polisia dise ce el ia vade a Svalvard per mata se, ma ia cambia sua deside pos ariva ala. Alora el ia proposa sua propre aresta per evita revade a Rusia. Lo no es clar perce el no ia desira revade ala.
La investigor xef de polisia en Svalbard ia dise ce Popov ia es condenada par causa de sua condui menasante con un arma, no sua fura de la banco. La om ia atenta atrae atende a se.
On ia aresta el prosima a la banco sur la isola Spitsbergen pos la fura, e tota la mone ia es reganiada. No indica esiste de un scema per parti de la isola, do on ave poca vias, lias de barco, o volas.
Documentos de corte afirma ce Popov ia veni a Svalbard, a 1000 cilometres de la Polo Norde, pos leje enlinia ce on pote fasil oteni ala un fusil. Fusiles es vendeda en Svalbard per proteje contra ursos blanca.
Criminalia es estrema rara en Svalbard, e la polisia dise ce Popov es la person prima ci ia fura ala la banco. Min ca 3000 persones abita en Longyearbyen, un vila de mina de carbon, do la temperatur en inverno pote desende a su -40°C.
Popov ia es litigada e va es prisonida sur la tera xef de Noria, car Svalbard ave no prison.
@T La re de Tai sposi sua gardacorpo
@L aora_oji/2019/la_re_de_tai_sposi_sua_gardacorpo
====== La re de Tai sposi sua gardacorpo ======
2 maio 2019
La re de Tai ia sposi la visxef de sua ecipo de securia personal, donante a el la titulo de rea.
La anunsia nonespetada ia es fada ante la comensa de la rituos complicada per coroni la re a saturdi, cuando sua posto va es santida.
Re Maha Vajiralongkorn, ci ave 66 anios, ia deveni la monarca constitual pos la mori de sua padre en 2016. El ia es sposida e divorsada a tre veses pasada, e ave sete enfantes.
Un declara formal ia dise ce la re "ia deside leva Jeneral Suthida Vajiralongkorn Na Ayudhya, sua sposa real, a Rea Suthida e el va teni la titulo e state real como un parte de la familia real".
Suthida es ja longa la acompanior de Vajiralongkorn, publica videda con el tra multe anios, ma sua relata ia es nunca ofisial reconoseda a ante.
Imajes de la rituo de sposi ia es televisada en la pais en la tarda de ier, mostrante la presentia de otra membros de la familia real e conselores de la palasio. La re ia versa acua santa sur la testa de sua rea, e pos alora la duple ia suscrive un arcivo de sposia.
En 2014, Vajiralongkorn ia asinia Suthida Tidjai, un ospitor pasada de avion per Thai Airways, como la viscomandor de sua ecipo de gardacorpos. El ia leva el a la posto de un jeneral de la armada en desembre 2016.
La re presedente, Bhumibol Adulyadej, ia rena tra 70 anios, deveninte la monarca la plu longa renante de mundo cuando el ia mori.
@T La re pasada de Beljia furni sua ADN
@L aora_oji/2019/la_re_pasada_de_beljia_furni_sua_adn
====== La re pasada de Beljia furni sua ADN ======
29 maio 2019
Albert 2, la re pasada de Beljia, ia furni un sample de ADN per evita un multa de €5000 per dia, entre un alega ce el ia jenita un fia estrasposal en la desenio de 1960.
La om de 84 anios disputa ja la alega par Delphi Boël, un artiste beljes con 51 anios, tra plu ca un desenio. El ia furni ier un sample de saliva.
Plu temprana en esta mense, un corte de apela en Beljia ia deside ce on debe puni la monarca pasada par causa de sua refusa de la proba.
La re de 1993 asta 2013 nega la alega de padria.
En un declara, sua avocato ia dise: "El ia nota ce la corte ia deside ce la concluis de esta esamina va es asoluta privata asta un deside judal."
On no previde un judi de corte asta la fini de esta anio.
En febrero, un corte en Bruxelles ia comanda la re pasada a dona un sample de ADN en tre menses, o risca ce on suposa ce el es la padre de Boël.
@T La re pasada de Beljia refusa un proba de ADN
@L aora_oji/2019/la_re_pasada_de_beljia_refusa_un_proba_de_adn
====== La re pasada de Beljia refusa un proba de ADN ======
2 febrero 2019
Albert 2, re pasada de Beljia, ia refusa fa un proba de ADN en un caso cual intende demostra ce el ia jenita un enfante estrasposal en la desenio de 1960.
Un corte en Bruxelles ia comanda la monarca pasada, ci ave 84 anios, a furni un sample de saliva ante la fini de tre menses -- o risca ce on judi ce el es la padre de Delphine Boël, de 50 anios.
Albert nega la alega de padria e reseta conselas legal sur la posiblia de apela. La avocatos de Boël ia bonveni la solisita de ADN.
La monarca pasada ia anunsia sua resinia en 2013, con refere a sua mal sania. El ia renunsia formal a 21 julio, la dia nasional de Beljia.
On ia inaugura el como la re ses de la beljeses a 9 agosto 1993, pos la mori de sua frate, Re Baudouin, a 62 anios.
La madre de Delphine Boël, Baronesa Sybille de Selys Longchamps, dise ce el ia fa un relata de ama con la re tra du desenios. Alegas ia emerji, a plu ca un desenio ante aora, ce el es la padre, causante un scandal real.
Alga jornalistes divina ce cisa esta ia influe sua deside de renunsia la trono.
Beljia ave un monarcia constitual, en cual la re fa un rol xef ritual. Ma un de la taxes cual la monarca ave es la resolve atentada de crises constitual.
@T La rea de neva 2 esede espetas a la bileteria
@L aora_oji/2019/la_rea_de_neva_2_esede_espetas_a_la_bileteria
====== La rea de neva 2 esede espetas a la bileteria ======
25 novembre 2019
A sua fini prima de semana en la SUA, la filma La rea de neva 2 (engles: Frozen 2) ia recolie $127 milion par biletas, esedente la predises e multe suprapasante la debua de la filma orijinal.
La seguente de la susedosa clasica par Disney ia crea ance un recordo per un abri de filma animada en novembre.
La rea de neva ia deveni un fenomeno en 2013, resetante $1,27 mil milion a bileterias tra la mundo. La filma, conteninte cantas estrema popular como "Let It Go", ia catura la imajina de sua multe fanes.
Estimas indica ce la filma du ia recolie ja $127 milion en la SUA e $223 milion en otra paises, pd. $350 milion en la fini de semana. Disney ia predise vendes de $120 milion en la SUA e Canada combinada.
La filma ia domina la lista de susedes. A la numero distante du, Le Mans '66 (ance titulida Ford contra Ferrari) ia prende $16 milion, e Un ami estracomun / Un dia bela en la visineria ia reseta $13,5 milion en la loca tre.
Pos la popularia de la anima orijinal par Disney, cual foca a la relata de prinsesa Elsa e sua sore Anna, la espeta per sua seguente ia es alta. La filma prima ia recolie $93 milion en sua sinco dias prima en la sinemas.
@T La renunsia de la imperor japanes
@L aora_oji/2019/la_renunsia_de_la_imperor_japanes
====== La renunsia de la imperor japanes ======
30 april 2019
En Japan, Imperor Akihito prepara renunsia la trono, deveninte la monarca japanes prima ci fa tal en plu ca 200 anios. Rituos privata ia comensa ja en la Palasio Imperal en Tocio.
La om de 85 anios ia reseta la permete legal dede Japan renunsia pos dise ce el senti noncapas de fa sua rol par causa de sua eda e sania malinte. Sua fio, Prinse Naruhito, va asende a la Trono de Crisantemo, comensante un epoca nova.
La imperor ave no potia political, ma funsiona como un simbol nasional. La rena de Akihito ia es notable per sua interatas con persones sufrinte de maladia e desastre, cual ia cari el a multe en la popla.
On previde ce la rituo xef va aveni en la palasio a la ora 17 local, continuante per sirca des minutos. Plu ca 330 atendores va es presente.
La rituo va fini con la parla final de Akihito como imperor, an si, tecnical, el va es ancora la impede Japanror asta medianote. A la matina de martedi, Naruhito va erita la Tesoros Imperal en sua rituo prima como imperor. El va deveni la imperor 126 de la pais.
Naruhito, ci ave aora 59 anios, ia es educada en Oxford, England e ia deveni la prinse erital a la eda de 28 anios. El ia sposi en 1993, e sua sola enfante, Prinsesa Aiko, ia nase en 2001. La lege japanes proibi femes de erita la trono, donce Aiko no es la eritor de sua padre.
La Semana Oro, un festa nasional, es estendeda en esta anio a des dias, plu longa ca a cualce ves pasada, per onora la asende de la imperor nova.
On regarda la renunsia como un aveni cuasi joiosa, contrastada con la troni de Akihito a 30 anios ante aora, cuando la pais ia lamenta la mori de sua padre. A esta ves, persones va vacanse, visita sinemas, o resta en casa per regarda la rituos.
Multe ia dise ce los va senti la asentia de la imperor jubilante, ci va ave aora la titulo Joko, con la sinifia "imperor grande".
La sistem de imperores en Japan es la monarcia erital la plu vea de mundo. Lejendas dise ce lo ia comensa sirca 600 AEC. En pasada, on ia regarda la imperores como dios, ma Hirohito, padre de Akihito, ia renunsia publica sua divinia a la fini de la Gera Mundal Du, como un parte de la sede de la pais.
Pos la gera, Akihito ia aida repara la dana a la reputa de Japan. Imperores presedente no ia interata comun con la popla, ma Akihito ia redefini la rol e ia deveni conoseda per sua compatia.
En 1991, a du anios pos sua troni, Akihito e sua sposa ia rompe la condui normal e ia ajena per parla a persones afetada par un eruta volcanal en Nagasaki. Un plu difere agu de la pasada ia es sua interatas con sufrores de maladias cronica como leprosia, ci ia es marjinalida en Japan.
@T La resinia de la ministro de finansia mexican
@L aora_oji/2019/la_resinia_de_la_ministro_de_finansia_mexican
====== La resinia de la ministro de finansia mexican ======
10 julio 2019
La ministro finansial de Mexico ia resinia par causa de desacordas con Andrés Manuel López Obrador, la presidente sinistriste de la pais.
En un letera, publicida en sua conta de Twitter, Carlos Manuel Urzúa Macías ia dise ce on ave multe "devias" economial, e ce politica economial debe es fundida sur fatos e libre de "estremisme".
El ia scrive ance ce el trova ce "la introdui de ofisiores sin sabes sur finansia publica" es "nonasetable". La mercatos finansial ia cade pos la anunsia de sua resinia.
Arturo Herrera Gutiérrez ia deveni aora la ministro finansial de la economia du de la plu grandes en America Latina. En sua confere jornaliste prima, el ia dise ce el no previde un retrosede.
La economia de Mexico ia diminui par 0,2% en la cuatri prima de 2019.
López Obrador ia deveni presidente par promete reali un "muta radisal" de sua pais per furni un crese economial, empleas nova, e programes de developa sosial.
An si la asinia de Herrera, un ofisior reconoseda per sua capasia tecnical, va pasi alga investores, on previde ce consernas jeneral sur la economia de Mexico va continua.
@T La reveni de "La senior de la anelos" a Zeland Nova
@L aora_oji/2019/la_reveni_de_la_senior_de_la_anelos_a_zeland_nova
====== La reveni de "La senior de la anelos" a Zeland Nova ======
18 setembre 2019
Zeland Nova va reseta un plu aumenta economial liada a Tera Media, car Amazon Studios ia eleje la pais como la loca per filma sua serie televisada de La senior de la anelos.
On previde ce esta va es la drama televisada la plu custosa de istoria, con custa de mil milion dolares a la min.
La departe de Amazon desira esplota la susede enorme de la trilojia de filmas famosa, ance filmada en Zeland Nova. La francisia ia benefica la turisme e emplea en la pais.
Amazon Studios, cual ia compra la diretos de televisa a du anios ante aora, ia dise ce la serie nova va esplora naras fresca cual aveni ante La comunia de la anelos, la libro clasica par J. R. R. Tolkien.
En un anunsia ier, la compania ia dise ce la preprodui ia comensa e ce on va filma en Auckland en la menses veninte.
"Cuando nos ia xerca la loca en cual nos va pote anima la belia primeval de la Eda Du de Tera Media, nos ia sabe ce nos debe trova un loca merveliosa, con costas pur, forestas e montes," la declara ia dise.
La ministro de developa economial de Zeland Nova ia comenta ce la projeta va crea beneficas diversa, "incluinte empleas e investis stranjer notable".
Filmada a la comensa de la desenio pasada par Peter Jackson, dirijor zelandes, la trilojia La senior de la anelos ia atrae cuasi tre mil milion dolares de regardores e ia gania un monton de premios Oscar.
Acel filmas, como ance la trilojia La hobit, ia inisia un buma de turisme en Zeland Nova. Los ia revela a la mundo la vistas encantante bela de la pais, e ia provoca miliones de visitores a visita la locas mostrada.
La produis vasta ia muta ance la industria sinematografial peti de Zeland Nova a un xef de mundo, incluinte en efetos spesial dijital.
La pais ia bonveni Tera Media como un parte de sua identia cultural, e modeles jigante de dragones e sorsores decora la airoporto de Wellington.
@T La risca de estingui per 33% de plantas african tropical
@L aora_oji/2019/la_risca_de_estingui_per_33_de_plantas_african_tropical
====== La risca de estingui per 33% de plantas african tropical ======
21 novembre 2019
Un tri de plantas tropical en Africa es en via a estingui, longo un esplora nova.
La rejiones la plu afetada es multe de Africa ueste, Itiopia e partes de Tanzania e la Republica Democrata de Congo. Los risca perde plu ca 40% de sua abunda de plantas. Spesies perilida includi arbores, arboretas, erbas e vites leniosa.
Siensistes dise ce la plantas es menasada par desforesti, la popla cresente e la clima cambiante.
Dr Thomas Couvreur, rexercor xef a la Instituida Nasional Franses per Developa Sustable, ia dise: "Biodiversia furni beneficas nonombrable a umanas, e la perde de diversia perili nosa futur."
El ia ajunta ce la perde de biodiversia va es spesial problemosa en Africa tropical, "un rejion de diversia noncredable ma con espetas de defias major sosial e political e crese rapida de popla en la desenios veninte".
La concluis de la studia es fundida sur un metodo revisada de evalua la risca de estingui. Evaluas ofisial es rejistrada en la Lista Roja de Spesies Perilida, publicida par la Uni Internasional per Conserva de Natur.
Asta aora, on ia evalua cuasi 90% de mamales e du tris de avias, ma min ca 8% de plantas vascular (la florintes e la plu de la otras, escluinte la moses e la alges).
La rexercores ia usa un metodo simil, ma plu rapida, per evalua la risca probable de estingui per plu ca 20 mil spesies de planta.
Los ia trova ce 33% de la spesies es posible menasada par estingui, e un plu tri de la spesies es rara e va veni posible en peril de estingui en la futur prosima.
@T La rituo per troni la imperor nova de Japan
@L aora_oji/2019/la_rituo_per_troni_la_imperor_nova_de_japan
====== La rituo per troni la imperor nova de Japan ======
22 otobre 2019
La Imperor Naruhito de Japan ia proclama formal sua asende a la trono en un rituo complicada.
La emperor, ci ave 59 anios, ia comensa ofisial sua rena en maio pos la renunsia de sua padre, Akihito. Ma un serie de rituos tradisional en la palasio imperal en Tocio ia formali aora sua troni.
Japan ia sufri resente un siclon major cual ia lasa cuasi 80 persones mor. On ia pospone un parade selebrante, per respeta la vitimes e sua familias.
En la rituo, Naruhito ia senta sur la trono Takamikura, cual ave 6,5 metres de altia. El ia leje un proclama formal, vestida en un roba orania-jala usada sola par imperores a veses spesial.
"Me jura ce me va ata longo la constitui e esecuta mea encarga como la simbol de la stato e de la unia de la popla," el ia dise.
Sua sposa, la Imperoresa Masako, portante 12 stratos de robas, ia ocupa un trono separada e plu peti.
La ministro xef Shinzō Abe ia dona un parla lodante, segueda par crias de "Banzai!", cual sinifia "des mil anios" (de vive per la imperor).
Multe de la rituo ia es fada en silentia, ante un spada e joala antica - tesoros santa cual funsiona como simboles de la potia imperal.
Sentos de ofisiores stranjer ia es presente a la rituo. La imperor va ospita un bevi de te per visitores real, e Abe va dona un banceta en la sera.
Folas peti ia apare estra la palasio a esta matina, an con un pluvon. La venta e pluve ia sesa a la comensa de la rituo, cuando alga usores de redes sosial dise ce un arco de sielo ia apare.
@T La scrivor de un manoscrito istorial misteriosa
@L aora_oji/2019/la_scrivor_de_un_manoscrito_istorial_misteriosa
====== La scrivor de un manoscrito istorial misteriosa ======
29 novembre 2019
Un manoscrito scriveda par Rea Elizabeth 1 de England es descovreda pos reposa nonregardada tra plu ca un sentenio.
Dr John-Mark Philo, un istoriste leteratural de la Universia de Anglia Este ia trova lo en la biblioteca de la Palasio Lambeth en London. Par asembla la indicas, el ia conclui ce la rea ia es la scrivor.
La obra es un tradui de un libro en cual Tacito, un istoriste roman, ia descrive la beneficas de governa monarcal.
Philo ia descovre la manoscrito de 42 pajes cuando el ia xerca traduis de Tacito en la biblioteca. El ia trova ce lo es scriveda sur un tipo de paper cual ia deveni spesial comun en la corte tudor en la desenio de 1590.
"On ia ave, an tal," el ajunta, "sola un traduor a la corte tudor a ci un person contempora ia asinia un tradui de Tacito, e ci ia usa la mesma paper en sua traduis e sua coresponde privata -- la rea mesma."
Un plu indica ia es la presentia de tre filigranas -- un leon caprinte e la inisiales GB traversada par un balesta -- cual on vide ance en la paper cual Elizabeth 1 ia usa cuando el ia scrive leteras.
Ma la indica concluinte ia es la scrive de mano. La tradui ia es copiada par un de sua secretores, ma lo es covreda con coretis e ajuntas en la stilo multe distinguable e desordinada de la rea.
Philo comenta: "La coretis a la tradui acorda con la scrive tarda de Elizabeth, cual ia es -- e me restrinje mea espresa -- unica. Plu alta on ia es en la ierarcia sosial de England tudor, plu desordinada on ia pote lasa ce sua scrive de mano deveni. Per la rea, la comprende ia es la problem de un otra person."
La tradui veni de la istoria de la Impero Roman par Tacito. Lo presenta la mori de Augusto, la asende de Imperor Tiberio, e la sentri de potia en sola un individua.
Philo dise ce Tacita "es sempre regardada como la istoriste suvertinte, e ia es despetada, plu tarda, su Charles 1, como antimonarcal". El demanda esce Elizabeth ia studia la testo per conselas sur maneras de governa bon o per esemplos de malgoverna cual el debe evita.
Un otra posible es ce la tradui ia es mera un pasatempo per un rea sur ci nos sabe ce el ia gusta la istoria clasica.
La manoscrito es tenida a Lambeth de la sentenio des-sete, ma esta es la ves prima de identifia sua autor.
@T La SUA anunsia un Forte de Spasio
@L aora_oji/2019/la_sua_anunsia_un_forte_de_spasio
====== La SUA anunsia un Forte de Spasio ======
21 desembre 2019
Donald Trump, pos deveni ier formal acusada de malcondui, ia finansia ofisial un departe de la Pentagon focada a gera en spasio -- la Forte de Spasio de la Statos Unida.
Esta servi militar nova es la prima en plu ca 70 anios, e es suordinada a la Forte de Aira de la pais.
A un base militar prosima a Washington, Trump ia descrive spasio como "la domina de gera la plu nova de la mundo". El ia dise: "Entre menasas grave contra nosa securia nasional, la superioria esuan en spasio es asoluta esensal."
La asinia de finansia ia es confirmada ier, cuando la presidente ia suscrive la bujeta anial de 738 mil milion dolares per la militar esuan.
La inisia de la Forte de Spasio va es finansiada par un asinia de 40 milion dolares per sua anio prima. On no intende envia soldatos a orbita, ma la departe va proteje la propria de la SUA en spasio, como la sentos de satelites usada per comunica e oserva.
Xefes militar de la SUA nota avansas par Xina e Rusia a esta "frontera final" militar.
Mike Pence, la vispresidente, ia dise ja ce acel du nasiones ave laseres volante e misiles antisatelital a cual la SUA nesesa responde. "La ambiente de spasio ia cambia fundal en la jenera resente," el ia dise. "Lo cual ia es pasosa e ultra compete es aora folida e enemiosa."
La Forte de Spasio va estende la labora de la Comanda Spasial, creada en agosto per maneja la operas en spasio de la militar esuan.
La Secretor de la Forte de Aira, Barbara Barrett, ia esplica ce la Forte de Spasio va es composada de sirca 16 mil empleadas, alga de la Forte de Aira, alga nonmilitar. Lo va es dirijeda par Jeneral Jay Raymond, la dirijor presente de la Comanda Spasial.
Plu temprana en esta mense, Presidente Vladimir Putin ia sujesta ce la estende de la SUA en spasio crea un menasa contra interesas rusce, e ia comanda un responde par sua propre pais.
"La xefes militar-political de la SUA opina publica ce la spasio es un teatro militar, e projeta fa operas ala," el ia dise.
@T La SUA comensa retira se de la Acorda de Paris
@L aora_oji/2019/la_sua_comensa_retira_se_de_la_acorda_de_paris
====== La SUA comensa retira se de la Acorda de Paris ======
5 novembre 2019
La Statos Unida de America ia comensa la prosede de retira se de la Acorda de Paris, avisante la Nasiones Unida de sua intende de sesa. Otra paises ia reata con espresas de regrete e delude.
La avisa inisia un prosede de un anio per retira de la acorda global sur cambia de clima, culminate a la dia pos la eleje presidental de 2020.
Frans e Japan ia gida condenas internasional de la retira.
La acorda ia uni 188 nasiones per combate la crise climal. Lo ia obliga la SUA e 187 otra paises a manteni la crese de temperatur global a min ca 2°C supra la situa preindustrial, e ia atenta limita la crese an plu a 1,5°C.
La deside de retira, fada par presidente Donald Trump, ia fa ce la SUA es la sola nonsuscrivor en la mundo. Lo ia provoca laboras a nivel alta par la Uni European per manteni la bon funsiona de la acorda.
An tal, sentos de governas, comersias e organizas local en la SUA ia junta se a la promove "Nos Es Ancora En" [la acorda], prometente redui emetes e move a enerjia renovable.
Michael Bloomberg, ambasador de clima a la Nasiones Unida e emprendor esuan, ia dise en un declara postada en la pajes de la promove ce el labora per tapi la buco finansial lasada par la retira de la governa de Trump, cual el ia descrive como "un renunsia de xefia".
@T La SUA culpa Iran per atacas contra complesos saudi
@L aora_oji/2019/la_sua_culpa_iran_per_atacas_contra_complesos_saudi
====== La SUA culpa Iran per atacas contra complesos saudi ======
15 setembre 2019
Mike Pompeo, ministro esuan de esternas, ia culpa Iran per atacas par avioneta ier contra complesos de petrolio en Arabia Saudi.
El ia rejeta un reclama par rebelores huti de Iaman ce los ia ataca la du complesos, operada par Aramco, un compania publica.
La ministro saudi de enerjia ia dise ce la atacas ia redui la produi de petrolio par 5,7 milion bariles per dia, sirca la dui de la esflue de la rena.
Jornalistes dise ce esta va fa cisa un efeto notable a la custa internasional de petrolio.
Imajes video mostra un focon enorme a Abqaiq, la loca de la compleso la plu grande do Aramco prosede petrolio. Un otra ataca par avioneta ia ensende partes de Khurais, un campo de estrae petrolio.
La saudis gida un alia militar con finansia ueste cual suporta la governa de Iaman, e Iran suporta la rebelores huti. Si la rebelores ta fa la atacas, sua avionetas ta debe vola tra sentos de cilometres de Iaman a la parte sentral de Arabia Saudi.
Entretempo, espertas investiga esce la atacas ia pote es fada de la norde, o par Iran o par sua aliadas xia en Irac, usante misiles cruser en loca de avionetas.
La tensa political entre la SUA e Iran ia crese en menses resente, pos cuando la presidente esuan Donald Trump ia abandona un acorda per limita la ativia nucleal de Iran e ia repone la menasa de punis.
@T La SUA envia plu soldatos a la Golfo Uman
@L aora_oji/2019/la_sua_envia_plu_soldatos_a_la_golfo_uman
====== La SUA envia plu soldatos a la Golfo Uman ======
18 junio 2019
La militar de la SUA va envia 1000 plu soldatos a Asia sude-ueste, en un tensa cresente con Iran.
Patrick Shanahan, ministro tempora de defende, ia dise ce la stasioni responde a lo cual el ia descrive como "condui enemin" par la militar irani.
La marina esuan ia distribui ance imajes nova sur cual lo dise ce los lia Iran a atacas resente contra tancadores de petrolio en la Golfo Uman.
Ier, Iran ia dise ce pos 10 dias sua reserva de uranio va esede alga limitas fisada par un acorda nucleal de 2015.
Su la acorda, per restrinje sua capasia nucleal, on ia permete ce Iran produi asta 300 cilogrames de uranio poca ricida. Ma resente, lo ia aumenta sua produi en responde a punis plu sever par la SUA.
Xina ia recomenda autorestrinje, e ia junta se a otra partitos de la acorda nucleal en recomenda ce Iran no abandona lo.
@T La SUA retira se de un acorda nucleal con Rusia
@L aora_oji/2019/la_sua_retira_se_de_un_acorda_nucleal_con_rusia
====== La SUA retira se de un acorda nucleal con Rusia ======
2 agosto 2019
La SUA va retira formal se de un acorda nucleal con Rusia, provocante temes de un corsa nova de armas.
La Acorda INF (de Fortes Nucleal de Distantia Media) ia es suscriveda par Ronald Reagan e Mikhail Gorbachev en 1987. Lo ia proibi misiles con estendes entre 500 e 5500 cilometres.
Ma plu temprana en esta anio, la SUA e OTAN ia acusa Rusia de viole la acorda par ativi un tipo nova de misil cruser. Moscva ia nega esta alega.
La esuanes ia dise ce los ave indicas ce Rusia ia stasioni alga misiles de spesie 9M729. La acusa ia es pasada a la aliadas de Washington en OTAN, de ci tota ia suporta la reclama.
Donald Trump ia anunsia en febrero ce la SUA va retira de la acorda si Rusia continua no segue lo, e ia defini oji per la limita de tempo.
Corta a pos, Vladimir Putin ia suspende ance la obligas de sua pais a la acorda.
@T La SUA trema de fria en un vortis polal
@L aora_oji/2019/la_sua_trema_de_fria_en_un_vortis_polal
====== La SUA trema de fria en un vortis polal ======
30 janero 2019
Meteorolojistes averti ce la SUA va esperia un jela nonusual fria en esta semana. La ventas la plu estrema, causada par un vortis polal -- un bol jirante de aira fria -- risca basi la temperatur asta -53°C.
Ofisiores en la stato Iowa ia avisa ce on debe "evita respira profonda, e minimi la parla" si on vade a estra. On previde ce a la min 55 milion persones va trova se en un temperatur su zero.
Un state de crise es declarada en Wisconsin, Michigan e Illinois (statos norde sentral) e ance en Alabama e Mississippi, statos sude cual es usual plu temperada.
On averti ce ulseras jelal es posible en mera des minutos su la sielo en un tal temperatur estrema.
La temperatur la plu fria es prevideda per la periodo entre martedi e jovedi, e meteorolojistes predise ce Chicago va es plu fria ca Antartica. Esta site, la plu grande en Illinois, risca un basa de -33°C, ma con ventas jelante cual va dona un senti plu simil a -46°C.
En Wisconsin on previde 60cm de neva, e 30cm en Illinois. Ance Alabama e Georgia, un plu stato sude, espeta neva.
Presidente Donald Trump, ci ia demanda esce umanas ia causa la cambia de clima, ia envia un tuita sur la situa. "Cual de enferno aveni a la caldi global?" el ia dise. "Per favore, reveni rapida -- nos nesesa tu!"
Un de la departes meterolojial de la governa SUA ia responde rapida per refuta acel asurdia. Tota la siensistes major de la mundo dise ce la cambia de clima es xef inisiada par umanas e ce lo pote crea invernos plu dur.
On atribui esta periodo fria a un caldi subita supra la Polo Norde, causada par aira calda veninte de Magrib en desembre. Esta sistem climal ia divide la vortis polal, cual ia vaga a pos a sude.
La polisia en Chicago dise ce persones deveni aora rubada de sua jacones su menasa de fusil. Furores ataca los ci porta jacones de la marca Canada Goose, cual costa asta $1100.
Plu ca mil volas a o de la SUA ia es canselada ier, incluinte alga a Atlanta, Georgia, do la max Super Bowl va aveni a soldi.
En alga sites, incluinte en Milwaukee, Wisconsin, on ia abri desuples de "sentros de caldi", refujerias per persones sin casa.
@T La subasta de un depinta par Monet per un custa recordo
@L aora_oji/2019/la_subasta_de_un_depinta_par_monet_per_un_custa_recordo
====== La subasta de un depinta par Monet per un custa recordo ======
15 maio 2019
Un depinta par Claude Monet ia es comprada per $110,7 milion, un recordo nova de mundo per un obra par la artiste franses.
Monet ia completi la depinta de olio en 1890 como un parte de sua serie Meules ("montones [de feno]"), cual representa la vive campanial prosima a sua casa en la rejion Normandia.
Esta es ance la ves prima cuando un depinta impresiste ia es vendeda per plu ca $100 milion.
La plu resente, lo ia es subastada en 1986, per sola $2,5 milion. Asta alora, lo ia es poseseda par un familia tra cuasi un sentenio. La familia ia compra la obra direta de la vendor de la artiste.
Un declara par la subasteria Sotheby's ia dise ce la depinta es aora la obra nove en la lista de la plu custosas subastada a cualce tempo.
On reporta ce la compror ia suprapasa sinco otra ofrores a la vende en York Nova. Sotheby's no ia nomi la posesor nova.
La serie Meules par Monet conteni 25 depintas, de cual la majoria pende en galerias de arte tra la mundo. Esta es un de sola cuatro de sua obras cual on ia subasta en la sentenio presente.
A ante, la depinta par Monet la plu custosa ia es Nymphéas en fleur ("nimfeas florinte"), cual on ia vende per $84,7 milion en maio 2018.
@T La subasta recordo de un depinta trovada en un cosina
@L aora_oji/2019/la_subasta_recordo_de_un_depinta_trovada_en_un_cosina
====== La subasta recordo de un depinta trovada en un cosina ======
28 otobre 2019
Un depinta par un artiste famosa italian, longa perdeda ma trovada en la cosina de un fem vea franses, ia es subastada per 24 milion euros, creante un recordo nova per un depinta medieval.
Cristo Burlada par Cimabue, un artiste prerenasal, ia es descovreda en Frans norde en la mense pasada. On ia predise ce lo va es vendeda per asta ses milion euros, ma la ofre ganiante ia esede vasta la espeta: la depinta ia es vendeda a un compror anonim de Frans norde per la cuatruple de sua cuantia estimada.
"Cuando un obra unica de un depintor tan rara como Cimabue veni a la mercato, on debe es preparada per surprendes," la subastor Dominique Le Coent ia dise.
Tra anios, la depinta ia pende supra un stufa en un cosina en la site Compiègne. Lo ia es notada par un subastor ci ia consela sua posesor a oteni un evalua esperta. La posesor ia crede ce lo es un icon relijial vea con poca valua.
On ia fa probas a la obra, usante lus infraroja per determina sua similia con otra obras par la depintor italian Cimabue, ance conoseda como Cenni di Pepo.
Naseda en la site Firenze, el ia es ativa en la tarda de la sentenio 13 e la temprana de la sentenio 14. El ia es un figur traversante entre la arte stilida de la periodo medieval e la obras plu naturin de la Renase.
La obra vendeda es pico, con dimensiones de sola 20 × 26 sentimetres. On crede ce lo es un parte de un poliptico - un obra plu grande de senas depintada, divideda entre du o plu paneles - con data de 1280, mostrante la sufri e crusi de Cristo.
Du otra senas de la mesma serie par Cimabue pote es regardada a la Galeria Nasional en London e la Colie Frick en New York. La obras de esta artiste ia es xef influeda par arte bizantian, produida sur paneles de poplo con fondos de pinta de oro.
@T La suspende de un dotor pos la nase de un bebe sin fas
@L aora_oji/2019/la_suspende_de_un_dotor_pos_la_nase_de_un_bebe_sin_fas
====== La suspende de un dotor pos la nase de un bebe sin fas ======
25 otobre 2019
On ia suspende un ostetriciste portuges pos la nase de un bebe sin nas, oios o un parte de sua cranio. La jenitores no ia es consensa de la nonormalia fisical de sua fio asta sua pari en la plu temprana de esta mense.
Ofisiores de la comite medical ia vota per suspende Dr Artur Carvalho sur alegas de manca de cura.
On ia descovre otra cexas contra el, de tra plu ca un desenio, sur otra bebes. Reportas de acel casos, detaliada par jornalistes portuges, ia causa un scandal. Carvalho ia fa no comenta publica sur la alegas.
La bebe Rodrigo ia nase a 7 otobre en la ospital São Bernardo en Setúbal, a sirca 40 cilometres a sude de Lisbon.
Sua madre ia es atendeda par Carvalho per tre scanes ultrasonal en sua ensintia, a un clinica privata, e la jenitores dise ce la dotor ia indica no problemes pertinente a la sania de la feto.
En la mense ses de ensintia, la madre ia reseta un scane cuatro e plu detaliosa a un otra clinica. Alora, la posiblia de nonormalia ia es sujestada, ma on alega ce Carvalho ia rejeta la conserna.
La tia de Rodrigo ia dise: "El ia esplica ce a veses alga partes de la fas no es vidable [en scanes ultrasonal] cuando la fas de la bebe es presada a la ventre de la madre.
Pos la nase de Rodrigo e la revela de sua nonormalia, on reporta ce sua jenitores ia es informada ce el va survive tra sola alga oras. An tal, pos plu ca du semanas, la xico es ancora vivente, curada par la ospital.
La scandal cresente leva demandas en Portugal sur la funsiona de la sistem de sania de la pais, como ance sur la prosedes per cexa.
Miguel Guimarães, presidente de la asosia medical de Portugal, ia fa un confere jornaliste en la semana pasada a cual el ia dise ce el ia contata direta Carvalho, par causa de la "alarma sosial" forminte a tema de la caso.
El ia dise ce la dotor ia acorda sesa fa prosedes medical per la tempo de la investiga. La consilio disiplinal de la asosia ia consenta en esta semana e ia es unida en acorda per suspende Carvalho per ses menses.
@T La suspetada xef de un malversa grande de petrolio en Brasil
@L aora_oji/2019/la_suspetada_xef_de_un_malversa_grande_de_petrolio_en_brasil
====== La suspetada xef de un malversa grande de petrolio en Brasil ======
2 novembre 2019
Ofisiores brasilera suspeta ce un tancador de bandera elinica ia es la fonte de un malversa de petrolio cual ia manxa sirca 2500 cilometres de la costa de Brasil.
La polisia federal en la site Rio de Janeiro ia invade la ofisias de un compania elinica liada a la barcon. Los crede ce la tancador ia porta petrolio pesosa de Venezuela a Africa en julio.
Viventes maral e plaias popular en alga statos en la norde-este de Brasil ia es afetada par la malversa.
On ia colie sirca 2000 tones de mugre viscosa, ma la labora enorme de limpi continua ancora. Persones es ansiosa ce la petrolio va ateni la isolas Abrolhos, un conserveria major per viventes maral.
La malversa ia es prima detetada a 2 setembre. Plu tarda, analise ia mostra ce la petrolio trovada no es de tipo produida en Brasil. La departe governal brasilera per la ambiente ia dise ce lo ia veni "multe probable de Venezuela".
Venezuela ia nega tota culpablia per la asidente.
La autoriosas de Brasil ia investiga alga barcones cual ia naviga la rejion a acel tempo, ante foca plu a la tancador de bandera elinica. Los descrive la barcon como "la suspetada xef".
La compania, de ci on ia invade la ofisias a venerdi, ia fa no comenta publica sur la tema asta aora.
@T La sutrae de construidas danada par la bomba en Hiroshima
@L aora_oji/2019/la_sutrae_de_construidas_danada_par_la_bomba_en_hiroshima
====== La sutrae de construidas danada par la bomba en Hiroshima ======
16 desembre 2019
En la site Hiroshima en Japan, on intende desconstrui du construidas cual ia survive la bomba atomal de 1945, ma alga persones local vole conserva los como monumentos.
La du construidas, creada en 1913, ia es prima usada como un fabriceria de vestes militar, e plu tarda como abiterias per studiantes de universia. On ia usa los ance como un ospital tempora pos la bomba mesma.
Un survivor ia comenta: "On ta pote usa los como recursos per la aboli de armas nucleal."
Sirca 80 mil persones ia mori par causa direta de la bomba, e 35 mil otras ia es ferida. La ataca ia plati la plu de la site, e en la anio pasada sola 85 construidas creada ante la bomba ia resta a distantia de sinco cilometres o min de la "punto zero".
Esta du construidas ia survive, a la min partal car los ia es fabricada de beton fortida (con brices roja a la esterna). Alga danas de bomba a la fenetras e portes de metal es ancora vidable.
En 2017, autoriosas ia judi ce lo es multe probable ce la strutures, aora publica poseseda, ta colasa en un trematera major. Car los no es usada e no es abrida a la popla, la governa local ia deside desconstrui los ante 2022.
Un construida tre a la loca va es conservada, e sua mures e teto va es reparada e fortida per proteje lo contra tremateras.
Iwao Nakanishi, ci ave 89 anios, ia es en un de la construidas cuando la site ia es bombida. El es aora la xef de un grupo local cual esije la conserva de la strutures.
"Considerante la sinifia istorial de raconta la trajedia a la jeneras futur, nos pote en no modo aseta la desconstrui," el ia dise. "Nos oposa forte lo."
La ruina la plu famosa de la bombi es la cupola en la Parce Monumental de Pas. On ia forti esta loca de erita mundal per fa ce lo es plu capas de resiste tremateras.
@T La Telescopio Spasial James Webb es asemblada
@L aora_oji/2019/la_telescopio_spasial_james_webb_es_asemblada
====== La Telescopio Spasial James Webb es asemblada ======
29 agosto 2019
La seguente de la oserveria Hubble ia ateni un grado importante en sua construi. Tota partes cual composa la Telescopio Spasial James Webb (JWST) ia es asemblada a la ves prima.
Aora on pote fa alga probas esensal cual va gida esperable a un lansa a orbita a alga tempo en 2021.
JWST va usa un miror enorme e strumentos a cresta de la arte per atenta deteta lus de la stelas prima cual ia brilia en la universo.
Lo va ave ance la capasia de resolve la atmosferas de multe de la planetas nova cual on descovre aora ultra nosa sistem solal, e de analise sua atmosferas per la posiblia de vive.
La telescopio es un emprende juntada de NASA, ESA e CSA, la departes spasial de la SUA, Europa e Canada.
On pote considera lo como composada de tre partes xef: un telescopio (mirores e strumentos); un parasol grande per ombri sua regarda de la sielo; e un unia manejal cual va regula la operas dial de la oserveria en orbita.
Esta tre pesos ia es final visida a lunlotra en un fabrica en Los Angeles cual parteni a Northrop Grumman, la compania xef contratada.
Tota la composantes ia es probada a multe veses, a niveles individua e integrada. Esta sicle de probas continua aora, pos la junta de la tre partes major.
Un proba esensal va es ce la telescopio pote posa bon sua parasol. Esta ave la grandia de un campo de tenis, e es composada de sinco stratos estrema magra de filma isolinte.
Sua rol es crea un ombra completa per la mirores e la cuatro strumentos en cuando los oserva la universo. Sin lo, la lus de nosa sol ta caldi la surfases e ta inonda la radia infraroja apena persepable cual veni de galasias distante. Ma per funsiona bon, esta scermo debe desenrola coreta, sin torses e laseras.
La projeta de JWST es tarda par plu ca un desenio, e lo ia esede ance vasta sua bujeta. On estima ce sua custa pos construi, lansa e sinco anios de opera va es sirca 10 mil milion dolares esuan. Ma lo es un emprende sur cual astronomistes espeta ce lo va es un abrioio grande.
La telescopio Hubble, per esemplo, es restrinjeda en sua capasia de vide profonda tra la spasio e donce tra la tempo. Sua miror, con largia de 2,4 metres, no pote colie un cuantia sufisinte de fotones, e sua strumentos no es sensosa en la parte pertinente de la spetro eletromagnetal, per permete ce lo esplora la eda de la formis de la stelas prima a plu ca 13,5 mil milion anios ante aora.
Par contrasta, la miror de JWST es larga de 6,5 metres, donante un area capas de colie lus cual es la setuple de lo de Hubble. E sua strumentos va es esata ajustada per deteta la lus infraroja de esta stelas inisial.
@T La tera lisca matante en Cenia pos pluvones
@L aora_oji/2019/la_tera_lisca_matante_en_cenia_pos_pluvones
====== La tera lisca matante en Cenia pos pluvones ======
24 novembre 2019
En Cenia, 29 persones a la min ia mori en liscas de tera causada par clima estrema en la contia West Pokot.
La liscas ia afeta la viletas Nyarkulian e Parua, e pare es causada par pluve forte. Ambos viletas es isolida par vias inondada, e un ponte ia es destruida.
Presidente Uhuru Kenyatta ia declara ce sua "compatia de cor" es con la relatadas e amis de la vitimes. El ia dise ce un "destrui enorme" de imobila e infrastrutur ia aveni, e ce el ia envia soldatos e salvores a la rejion per aida.
Sete enfantes es entre la persones mor ja retrovada.
La ministro de internas ia comenta ce operas de salva aveni, ajuntante ce la mal clima impedi un evalua completa de la dana. La Crus Roja ia confirma ce lo responde a la reportas de liscas grande de tera.
Imajes en redes sosial mostra arbores, fango e otra detrito sperdeda sur la vias.
La departe meteorolojial de la pais ia avisa sur pluve forte a 18 novembre, recomendante ce persones vijila multe en locas propensada a liscas.
Paises tra Africa este ia es afetada par la pluvones en semanas resente. Liscas de tera e inondas rapida ia mata persones en Itiopia e Tanzania, e sentos de miles en Somalia ia es deslocada par pluves intensa.
Siensistes averti ce un sistem climal nomida la Dipolo de la Mar Indian mali la inonda en la rejion. Ance conoseda como la Niño Indian, lo aveni cuando la parte ueste de esta mar deveni notable plu calda ca la parte este.
@T La traversa de la Mar Atlantica en un baril
@L aora_oji/2019/la_traversa_de_la_mar_atlantica_en_un_baril
====== La traversa de la Mar Atlantica en un baril ======
10 maio 2019
Un aventuror franses de 72 anios ia ariva sur la isola caribe Martinic, pos traversa la Mar Atlantica en un capsula orania simil a un baril.
Jean-Jacques Savin ia comensa sua viaja en la tarda de desembre, de El Hierro en la Isolas Canario. El ia usa no plu ca la corentes de mar per propulsa sua baril tra la Atlantica.
El ia anunsia la susede de sua viaja a 27 april, cuando el ia entra a la Mar Caribe pos 122 dias a mar. La viaja ia traversa plu ca 4500 cilometres.
Como Savin ia esplica en un posta a Facebook, inisial un tancador nederlandes de petrolio ia colie el e la baril en acuas caribe, traente los a Sint Eustatius, un isola nederlandes pico.
Pos alga dias ala, un barco franses de tira ia transporta el a Martinic, un departe ultramar de Frans, ier. "Lo ia es un viaja deletante ma ance alga riscosa," el ia comenta pos ariva.
La paracador militar pasada ia spende plu ca cuatro menses en la baril, cual ave 3m de longia e 2,10m de largia. Lo inclui un leteta, un cosina e spasio per furnis, e ave en la solo un fenetreta tra cual el ia pote regarda pexes pasante.
La capsula ia es construida per resiste ondas e atacas posible par orcas. Un panel solal ia es usada per jenera eletrica per comunica e jeolocali.
Savin ia come reservas de comeda criosecida, e ance pexes fresca caturada e furnis ofreda par barcones cual el ia pasa. La costa de la viaja ia es xef colieda par finansia coletiva.
Cuando el ia parti en desembre, Savin ia broma ce el desira multe ariva a un isola franses como Martinic o Guadelupe. Viajante, la aventuror ia scrive un libro sur la esperia, cual el intende publici plu tarda en esta anio.
@T La trematera la plu forte de desenios en Albania
@L aora_oji/2019/la_trematera_la_plu_forte_de_desenios_en_albania
====== La trematera la plu forte de desenios en Albania ======
27 novembre 2019
Laborores de salva atenta trova survivores su la ruinas de construidas en Albania, do un trematera forte ia mata 24 persones e ia feri 650 otras.
La trema de grado 6,4 ia es focada a 34 cilometres a norde-ueste de la capital, Tirana, cuando persones ia dormi en la oras temprana de ier.
La plu de la moris ia aveni en Durrës, un site costal, e la vila Thumanë, prosima a la episentro. Sentos de persones ia pasa la note en tendas o en autos, entre plu replicas sismica.
Edi Rama, ministro xef, ia promete ce salvores va "continua xerca pasiente e completa asta la fini". La governa ia declara oji como un dia de lamenta.
La Comision European ia envia ecipos de salvores de Italia, Elas e Romania per aida con la xerca, e ecipos ia veni ance de Cosovo e Montenegro.
La Balcanes es un rejion propensada a tremateras, ma esta es la plu forte en Albania en desenios. Lo ia aveni a 03:54 de ora local e ia es segueda par 250 replicas potiosa a la min.
En Thumanë, un tore de sinco niveles de apartes ia colasa. Un om en sua desenio ses ia parla sur sua teme ce sua madre de 70 anios e sua sobrina de ses anios es trapida a interna: los ia abita sur la nivel la plu alta.
Un person de 24 anios ia es estraeda, vivente, pos la noti ier. Ma un fem de 30 anios ia mori a alga oras pos es estraeda. Sua fia ia mori su la detrito.
Alga de la persones mor es de Cosovo, pais visina, cual oserva ance un dia nasional de lamenta oji.
Un om ia es matada en un asidente de auto cuando la trema ia rompe la partes de un strada. Un otra ia mori pos salta panicante de un fenetra.
Doman es la aniversario de la autonomi de Albania de la Impero Osmanan en 1912, ma on ia cansela aora tota la selebras pertinente.
@T La xefes de la UE considera acorda per neutria climal
@L aora_oji/2019/la_xefes_de_la_ue_considera_acorda_per_neutria_climal
====== La xefes de la UE considera acorda per neutria climal ======
12 desembre 2019
Xefes de la Uni European asembla oji en Bruxelles su presa per promete ce la bloco de 28 paises va es climal neutra en 2050. Ma alga paises de Europa este desira garantias finansial ante acorda ce la UE va redui a zero sua cuantia neta de emetes de gases invernerial.
Ursula von der Leyen, la xef nova de la Comision European, ia pone esta gol a la cor de un projeta verde nova. Biliones de euros va es ajuntada a la bujeta per move a via de combustables de fosil.
La scema va inclui ance finansia de la Banco European de Investi, e va suporta paises como Polsca, Txesco e Ungaria, cual es entre la statos-membros cual depende la plu de la industria de carbon.
La presidente nova de la Consilio European, Charles Michel, ia dise ce lo es importante ce la xefes european acorda per envia un sinial a la consenta aora aveninte en Madrid de la Nasiones Unida sur cambia de clima.
On proposa:
* un projeta de sento mil milion euros per aida paises cual depende ancora multe de combustables de fosil a adota fontes de enerjia renovable;
* la redui ante 2030 de emetes de gases invernerial asta 50% o an min de la cuantia de 1990, en loca de la gol esistente de 40%;
* un lege cual va pone la Uni European "en via nonreversable a neutria climal" ante 2050;
* un scema per promove un economia plu sirculo, eliminante la peri de recursos, per boni la sustablia de la produi e distribui de comedas.
La proposas es major, ma los no va reali si la xefes de la statos-membros no suscrive sua acorda. Un de la problemes grande es la finansia disponable en un bujeta cual va diminui ja si la Rena Unida sorti de la bloco en 2020.
Ofisiores polsce ia bonveni la sistem proposada per compensa paises de cual sua economias depende ancora de carbon. Ma los averti ce la custa per Polsca de cambia va es jigante, e ce esta custa va continua es paiada tra la tredes anios veninte.
Ryszard Legutko, un parlamentor european de la partito Lege e Justia cual governa en Polsca, ia dise ier ce la stratejia es confusada e crea plu problemes ca lo solve. "Esce on ave cualce comprende de la custa sosial e ance la trajedias personal cual lo va jenera?" el ia demanda a la presidente de la Comision.
@T Locales coler tira un maior mexican pos un veculo
@L aora_oji/2019/locales_coler_tira_un_maior_mexican_pos_un_veculo
====== Locales coler tira un maior mexican pos un veculo ======
11 otobre 2019
Des-un persones ia es arestada en Mexico sude pos lia la maior de sua vileta a un camioneta e tira el longo la stradas.
Polisiores ia interveni per libri Jorge Luis Escandón Hernández, ci ia sufri no feris major.
Esta ia es la ataca du par cultivores ci esije ce la maior reali sua promete campaniante per repara un strada local. Plu polisiores ia es aora enviada a la vileta Santa Rita en la stato Chiapas.
Maiores e politicistes local en Mexico es frecuente atacada par ganges drogal cuando los refusa coopera con scemas criminal, ma lo es min comun ce on ataca fisical los par causa de sua prometes de campania.
Escandón ia dise ce el va presenta acusas de saisi e omiside atentada.
Video filmada par oservores estra la ofisia de la major mostra un grupo de omes ci tira el de la construida e forsa el sur la retro de la veculo.
Imajes plu tarda, par un camera vijilante, mostra ce el ia es liada a la retro de la camioneta par un corda sirca sua manos e tirada longo la stradas de la vileta, cual es un parte de la site Las Margaritas.
Deses de polisiores munisipal ia colabora per para la veculo e salva la maior. Alga persones ia es ferida en scaramuxas entre la polisiores e la omes ci ia saisi la maior.
En un aveni plu temprana, a cuatro menses ante aora, un grupo de omes ia destrui la ofisia de la maior cuando los no ia trova el ala.
En la tempo ante la eleje maioral en Las Margaritas, on ia aresta Escandón mesma, suspetante ce el ia partisipa en un combate contra suportores de un aspiror oposante. El ia es librida par causa de un manca de atesta.
@T Locustas destrui granes cultivada en Sardinia
@L aora_oji/2019/locustas_destrui_granes_cultivada_en_sardinia
====== Locustas destrui granes cultivada en Sardinia ======
11 junio 2019
Un pesta enorme de locustas causa multe dana sur la isola italian Sardinia en la Mar Mediteraneo. Esta es la invade de insetos la plu grave en plu ca 60 anios.
Manadas grande destrui granes e invade casas en la comunias Ottana e Orani en Nuoro, un provinse sentral.
On reporta ce plu ca 2000 ectares de tera cultivada es ja destruida par la covre de insetos.
Esta invade par locustas es relatada a un crese resente de temperatur sur la isola, pos menses de aira min calda.
Coldiretti, la asosia de cultivores italian, ia averti en un declara ier: "Miliones es en la campania. La locustas emerji sur tera noncultivada, ma a pos los vade a tera cultivada per come." Lo ia ajunta ce on pote aora fa poca per remedia la situa.
A la min 12 cultiverias es afetada. Pastos de bestias es ruinada e poca granes resta per recolie.
Locustas apare usual sur Sardinia en la menses de estate, entre junio e agosto.
Plu, sur la tera xef, Italia norde batalia un pesta de xinxes scermin cual destrui arbores de fruta.
@T Macron previde un deside sur Brexit en esta semana
@L aora_oji/2019/macron_previde_un_deside_sur_brexit_en_esta_semana
====== Macron previde un deside sur Brexit en esta semana ======
7 otobre 2019
Emmanuel Macron, presidente de Frans, ia informa Boris Johnson, ministro xef de la Rena Unida (RU), ce la Uni European (UE) va deside a la fini de esta semana esce un acorda de Brexit es posible.
Johnson ia averti la UE de deveni tentada par opina ce la retira de Britan pote es posponeda asta pos 31 otobre. An tal, un lege nova obliga el a solisita un pospone si on no ia trova un acorda a 19 otobre.
Como un parte de un fini de semana plen de telefonis a xefes de la UE, Johnson ia informa Macron ce el crede ce un acorda pote es realida, ma ce la UE nesesa egali alga comprometes fada par la RU.
Macron ia dise ce en la dias veninte on debe continua rapida la negosias con la ecipo de Michel Barnier, la negosior xef per la UE sur Brexit, per evalua a la fini de la semana esce on pote ave un acorda cual respeta la prinsipes de la UE.
La comentas ia es fada ante alga dias major de negosias, en cual ambos lados va atenta trova un acorda nova a tempo per un confere de xefes european a 17 e 18 otobre.
La metodo de preveni un frontera dur sur la isola Er es ancora un punto problemosa, car la UE desira cambias fundal a la proposas la plu resente de la RU.
Longo la Lege Benn, asetada en la mense pasada, si a 19 otobre la parlamentores brites no ia aseta un acorda con la UE, e si los no ia deside per un Brexit sin tal acorda, la ministro xef debe scrive a la UE per solisita un pospone de la data de retira.
Paperes governal cual ia es presentada a un corte scotes ia dise ce Johnson va obedi la lege, an si el ia declara ja ce on va fa "no plu esitas o retardas".
@T Macron redui esperas de evita un Brexit dur
@L aora_oji/2019/macron_redui_esperas_de_evita_un_brexit_dur
====== Macron redui esperas de evita un Brexit dur ======
22 agosto 2019
Boris Johnson, la ministro xef nova de la Rena Unida, va consenta oji con Emmanuel Macron, a mera oras pos cuando la presidente franses ia pare redui esperas de solve la problem de la frontera eres.
A martedi, Angela Merkel, canselor deutx, ia sujesta ce un solve de esta -- un problem major per la prosede formal de Brexit -- va es cisa realable en 30 dias.
Johnson ia dise ier ce el es "plu ca felis" con acel "projeta intensa". Ma plu tarda, Macron ia insiste ce la reabri de negosias a la tema es "no un posible cual esiste".
La frontera entre Er Norde (un parte de la Rena Unida) e la Republica Er (un pais separada en la Uni European) es un cosa de politica frajil. En la negosias sur Brexit, la RU e la UE ia acorda ce on no va introdui regulas nova per maneja lo.
Johnson dise ce on debe abandona esta proteje spesial si on vole evita la situa de "Brexit dur", en cual la Rena Unida ta sorti de la UE a 31 otobre con tota no acorda funsionante.
La UE ia dise a multe veses ce on no pote aora cambia la acorda negosiada par Theresa May, la ministro xef presedente. Ma a un confere jornaliste en Berlin ier con Johnson, Merkel ia indica ce un alternativa es cisa posible, asentuante ce la Rena Unida debe proposa un scema usable.
"On ia dise ce probable nos va trova un solve en du anios," Merkel ia comenta. "Ma nos ta pote ance trova lo en la 30 dias seguente, perce no?"
Macron regarda la prosede de Brexit como un contaminante de la projeta european intera, e el desira fini lo tan rapida como posible. El ia dise ance ce un negosia comersial con la SUA no va compensa la custa de un Brexit dur.
John Bolton, conselor de presidente Donald Trump sur securia nasional, ia dise en la pasada ce la SUA suporta un Brexit dur e ta ofre un serie aselerada de acordas comersial con la RU.
Macron ia ajunta ce "la briteses es abituada a es un potia grande" ma ce, pos Brexit, los ta deveni mera "un asosior minor" de la SUA.
Pos consenta con Macron, Johnson va vade a la confere de la G7 a saturdi, con otra xefes incluinte Trump.
@T Macron urje grevores ferovial a no destrui natal
@L aora_oji/2019/macron_urje_grevores_ferovial_a_no_destrui_natal
====== Macron urje grevores ferovial a no destrui natal ======
22 desembre 2019
La presidente de Frans, Emmanuel Macron, ia apela a sindicatos de transporta per suspende greves cual menasa crea un caos per viajores en la semana de natal.
Visitante Costa de Ivor, Macron ia sujesta ce la grevores debe "oserva un sesaspara per respeta familias e la vive de familias".
Du semanas de greves sur reformis projetada a pensiones causa ja problemes grande tra Frans.
SNCF, la compania nasional de ferovia, ia dise ce trenes va es "grave disturbada" en la tempo de natal. Sola un dui de la cuantia usual de trenes de rapidia alta ia funsiona ier, e un dui de la linias de metro en Paris ia es cluida.
Multe sitadanes franses ci ia parti per pasa un vacanse con sua familia o amis ia deveni encaliada par trenes canselada e vias conjestada. On ia cansela ance sentos de volas.
Ance en Frans, a la ves prima de plu ca 200 anios, no misa de natal va aveni a la Catedral Notre Dame en Paris. Laboras reparante continua pos la focon ala en april.
On va selebra ancora la misa de medianote a la sera de natal, ma en Saint-Germain l'Auxerrois, un eglesa prosima.
La catedral gotica de 850 anios, un loca UNESCO de erita mundal, ia perde sua teto e pinaculo a la flamas. Macron ia pone un gol de sinco anios per reconstrui lo, e en otobre, la ministreria franses de cultur ia dise ce on ia recolie o promete cuasi mil milion euros per finansia la labora.
On ancora no sabe la causa de la focon, ma investigores considera esplicas de nonatende, como un defeto eletrical o un sigareta mal estinguida.
Aora, de oji, Aora oji reposa per tempo corta asta la anio nova.
@T Maduro bloci la entra de aida a Venezuela
@L aora_oji/2019/maduro_bloci_la_entra_de_aida_a_venezuela
====== Maduro bloci la entra de aida a Venezuela ======
24 febrero 2019
Scaramuxas ia eruta en vilas fronteral de Venezuela ier, cuando presidente Nicolás Maduro ia preveni aida umaniste de entra de Colombia e Brasil.
Soldatos ia xuta gas lacrimojen e baletas de cauxo a protestores ci ia atenta colie e transporta la furnis. Grupos por diretos dise ce alga persones ia es atacada con muni cargada, e a la min du persones ia es matada.
La oposa vole dona la aida a persones afetada par la crise economial, ma Maduro regarda lo como un menasa de securia.
Mike Pompeo, ministro de esternas de la SUA, ia condena la atacas, sur cual el ia culpa "la savajes de Maduro". El ia descrive ance la arde de alga de la furnis como "repulsante".
Juan Guaidó, xef de la partito oposante, ci ia declara se como presidente tempora e ia aida organiza la aida, ia condena la atas de la sodlatos.
Guaidó, reconoseda como la xef par desuples de nasiones, va encontra Mike Pence, vis-presidente de la SUA, doman en Bogotá, Colombia. El vade ala per consenta con gidores de la Grupo Lima rejional, an su la proibi de viaja cual la governa de Maduro ia pone a el.
@T Malaisia eleje un re nova
@L aora_oji/2019/malaisia_eleje_un_re_nova
====== Malaisia eleje un re nova ======
24 janero 2019
Malaisia ia eleje Abdullah, Sultan de Pahang, como sua re nova pos la renunsia subita de la monarca presedente.
Sultan Muhammad 5 de Kelantan ia resinia en janero pos sola du anios a la trono, un recordo en la istoria malaisian.
Malaisia ave un monarcia constitual de spesie rara, en cual la posto pasa longo un sirculo de nove renores erital a un ves en cada anio sinco. La rol de la re es xef ritual, e el no partisipa en la governa dial.
On previde ce la Sultan de Pahang, un stato grande en la penisola malaisian, va es inaugurada como re a 31 janero. An, el ia deveni inaugurada como Sultan de Pahang mera en la plu temprana de esta mense.
Muhammad 5, ci ia ave 47 anios cuando el ia deveni la re, ia es conoseda per sua zelo per sportes estrema como motorisme multiterenal, spara, e cores de distantia longa.
En novembre de la anio pasada, el ia dise ce el va vacanse per razonas medical. Ma plu tarda en acel mense, fotos ia comensa sirculi en redes sosial cual pare mostra el en la capital rusce, sposinte un fem ci ia gania la titulo Senioreta Moscva en la pasada.
On ia dona no razona per sua renunsia.
@T Manos juntada en un fresco enorme en Paris
@L aora_oji/2019/manos_juntada_en_un_fresco_enorme_en_paris
====== Manos juntada en un fresco enorme en Paris ======
15 junio 2019
Un obra de arte jigante, cual mostra un linia de manos juntada, va es formal desvelida oji a la pede de la Tore Eiffel en Paris.
La fresco de pinta jetada estende tra plu ca 600 metres longo la parce Campo de Marte en la capital franses. La plu bon, on regarda lo de la alta de la tore.
Lo es creada par Saype, un artiste franses de ci sua nom vera es Guillaume Legros, ci spesiali sur depintas grande e biodegradante.
Sua obras ia apare ja sur montes e en parces tra la mundo. Los dura tra alga dias ante desapare en la tera.
Sua arte la plu resente es nomida Ultra mures. Lo mostra un serie de manos entretexeda en tribui a la asosia carital SOS Méditerranée, cual labora per salva migrores ci risca afoca en la Mar Mediteraneo.
En la anio pasada, ses migrores per dia promedia ia mori en traversa acel mar, longo la Nasiones Unida.
Saype ia descrive sua obra nova como "un simbol de junta a un tempo cuando persones deveni sempre plu introvertida en se".
La depinta va es oji inaugurada en un rituo a cual Anne Hidalgo, maior de Paris, va es presente.
Lo marca la comensa de un projeta de tre anios en cual Saype va esibi sua obras en dudes sites major tra la mundo.
London, Berlin, Nairobi e Buenos Aires va ospita imajes simil de manos e brasos teninte lunlotra.
@T Miliones en Zimbabue fronti un crise de nuri
@L aora_oji/2019/miliones_en_zimbabue_fronti_un_crise_de_nuri
====== Miliones en Zimbabue fronti un crise de nuri ======
7 agosto 2019
La Nasiones Unida ia aumenta sua apela de crise per Zimbabue, avertinte ce plu ca sinco milion persones -- un tri de la popla -- nesesa aida.
La Program Mundal de Nuri ia inisia un apela per 331 milion dolares, car la pais batalia la efetos de secia, un siclon, e un crise economial.
A ves pasada, Zimbabue ia es un rejion major de produi de sereales, ma lo ia sufri anios de turba.
Recolies resente ia es grave afetada par secia, e la custa de comedas ia alti multe. Un nivel basa de acua ia afeta ance la compleso idroeletrical xef a Kariba, causante rompes continuante de eletrica tra la pais.
Inisiante la apela ier, David Beasley, xef de la Program, ia dise ce sirca 2,5 milion persones es a punto de fami. "Nos refere a persones ci marxa vera en dirije a mori de famia si nos no es asi per aida los," el ia dise. "Nos fronti un secia nonsimil a cualce cual nos ia vide en tempo longa."
La problemes de Zimbabue ia es malida cuando Siclon Idai ia pasa tra la rejion en la parte plu temprana de esta anio.
Acel tempesta jigante, cual ia colpa ance partes de Malaui e Mosambic, ia afeta 570 mil zimbabueanes e ia lasa deses de miles sin casa.
En la semana pasada, Mthuli Ncube, ministro de finansia, ia dise ce la governa furni ja gran a 757 mil casas de pos janero, en rejiones campanial e urban.
E a martedi, presidente Emmerson Mnangagwa, ci ia emprende la posto de renor longa Robert Mugabe en novembre 2017, ia declara ce la secia es un desastre nasional.
La Nasiones Unida ia apela ja per 294 milion dolares per aida Zimbabue, ma dise ce lo nesesa aora plu mone, car la efetos de la secia ia estende.
@T Misre abri un piramide curva
@L aora_oji/2019/misre_abri_un_piramide_curva
====== Misre abri un piramide curva ======
14 julio 2019
Misre ia abri un piramide curva, prosima a Qahira, en un cambia cual parteni a un stratejia plu jeneral per crese turisme.
La Piramida Curva a Daxur ia es construida per la faraon Snefru a sirca 2600 AEC. Orijinal, on ia intende ce lo va es un piramida vera, con angula presipe de 54 grados.
Ma lo ia es construida sur arjila mol e arenin, e on ia encontra problemes de stablia e afonda. Per solve, on ia cambia la angula a sola 43 grados, cuando la strutur ia ave ja 45 metres de altia.
La forma nonusual cual ia resulta es contrastada con la lados reta de la Piramide Roja direta a norde.
Visitores pote aora trepa tra 79 metres per desende un tunel streta, de un porte levada en la lado norde, per ateni du cambras en la interna profonda de la construida.
Arceolojistes ia presenta ance momias, mascas e utiles descovreda en la escavas cual los ia comensa prosima a la piramides de Daxur en la anio pasada, e cual continua ancora.
Turisme es un fonte importante de revenu per la pais.
@T Modi grasia votores barati pos un vinse vasta
@L aora_oji/2019/modi_grasia_votores_barati_pos_un_vinse_vasta
====== Modi grasia votores barati pos un vinse vasta ======
24 maio 2019
Narendra Modi, ministro xef de Barat, ia grasia la popla de sua pais ci ia dona a el sinco plu anios de la posto, pos un vinse inondante en la vota jeneral.
"Tota de nos desira un Barat nova. Me desira inclina mea testa e dise grasias," el ia dise en un parla a suportores de sua Partito Bharatiya Janata (Popla Barati).
On previde ce la partito va ave sirca 300 de la 543 sejas de parlamento, e probable lo ia reseta un proportio plu grande de la votas ca en la elejes de 2014.
La alia xef oposante, gidada par la partito Congresa de Rahul Gandhi, ia aseta sua defeta. On espeta ce Congresa va gania min ca 60 sejas.
La vota ia es jeneral regardada como un referendo sur la politica nasionaliste indu de Modi. El ia fa sua vinse an con un crese de nonemplea, un teme de un retrosede economial, e un redui de produi industrial.
Un partito o alia nesesa a la min 272 sejas per oteni un majoria en la Salon Basa, o Lok Sabha, cual ave 543 membros.
Plu ca 600 milion persones ia vota en un prosede enorme de ses semanas, envolvente sete rondas de vota.
@T Modi promete restora la gloria de Caxmir
@L aora_oji/2019/modi_promete_restora_la_gloria_de_caxmir
====== Modi promete restora la gloria de Caxmir ======
15 agosto 2019
Narendra Modi, ministro xef de Barat, ia dise ce sua deside de sutrae la grado spesial de la parte de Caxmir su maneja barati va restora acel rejion a sua "gloria pasada".
En sua parla a la Dia de Autonomia oji, el ia dise ce Caxmir va fa "un rol importante" en la developa de Barat, e ce Article 370, la parte de la constitui cual ia dona un state spesial a la rejion, ia fa no plu ca coraji froda.
Modi no ia refere a la proibis de asembla e mancas de comunica forsada a Caxmir pos la deside en la semana pasada.
El ia fa sua comentas en un parla en la Fortres Roja en Delhi, la capital. Barat selebra sua Dia de Autonomia a la dia pos Pacistan, cual ia separa de lo en 1947.
En sua propre parla a martedi, Imran Khan, ministro xef de Pacistan, ia critica Barat per sua cambia de politica caxmiri:
"La oio de la mundo es a Caxmir e a Pacistan. A cualce cosa fada par Barat en la periodo de proibis, nos va informa la comunia internasional ce vos es culpable. A cualce foro cual nos ateni, me va es la ambasador e va leva la tema de Caxmir a cada foro."
Modi no ia responde a la comentas de Khan. En loca, el ia critica persones barati ci oposa la cansela de Article 370, acusante ce los fa "juas political".
El ia dise ce governas pasada no ia ave la coraje per fa un paso tan major, car los ia es consernada sur sua futur political. "Me no es consernada sur mea futur political," el ia dise. "Per me, la futur de la pais veni prima."
Caxmir ave ja un state de proibis tra plu ca un semana. Redes de telefon, telefoneta e interede es blocida, e restrinjes proibi persones de asembla en folas. An tal, ofisiores ia dise ier ce esta proibis es aora lejerida en la rejion Jammu, con majoria indu.
Ma an con la proibis, on ia fa protestas contra la cansela de Article 370, incluinte un a venerdi en Srinagar, capital de la vale Caxmir de majoria muslim. Ala, miles de persones ia sorti pos sua preas de mediadia per protesta contra la cambia.
Modi ia fa ance alga otra anunsias importante. A la ves prima en la istoria de Barat autonom, on va ave un posto con autoria supra tota tre de la fortes armada de la pais. El ia dirije se a la problem de plasticas de sola un usa, e ia refere a otra problemes como mancas de acua, controla de cuantia de persones, e medica organizada.
@T Muritanis reata confondeda a un donada de cameles
@L aora_oji/2019/muritanis_reata_confondeda_a_un_donada_de_cameles
====== Muritanis reata confondeda a un donada de cameles ======
11 desembre 2019
La Uni European ia dona 250 cameles a Muritania como un parte de sua atentas per combate la menasa de djihadistes e aida la securia de frontera en Sahel.
La ariva de la bestias en la vila Achemim en un rejion este con borda a Mali ia diverti la abitores local, ci ia es surprendeda par la dona, recordante ce sua pais es conoseda per ave un popla grande de cameles.
La animales va es usada en la unias militar de camel per aida garda partes de la frontera cual es spesial favoreda par djihadistes.
Un posta a Facebook par la ajenteria de novas Al-Akhbar ia provoca sentos de comentas e emojis riente. Un usor ia demanda de do la cameles ia veni: "Los ia veni como un donada de Europa, ma los ia es sempre asi?" Un otra ia scrive, finjente noncrede: "Ance la UE ave cameles?"
Otras ia fa demandas sur la importa de unias militar de cameles en la eda moderna, sujestante ce un donada tecnolojial ta es plu beneficante -- per esemplo, veculos per naviga la deserto o sistemes avansada de monitori e comunica.
Suportante esta razonada, alga persones ia nota ce Magrib ia reseta resente radares, en refere a la aida resetada de la Uni European e Espania per batalia la migra nonlegal.
Otras ia denunsia la donada como un insulta e un burla contra la popla muritani.
La donada parteni a 13 milion euros de aida de la UE per boni la developa e la securia de Muritania. Esta du goles representa la stratejia fundal de la UE per la rejion Sahel, cual es aora a la fronte de la batalia mundal contra terorisme.
La Grupo Nomada de la militar muritani inclui soldatos sur cameles e es un esemplo de combina operas de securia con developa de infrastrutur. On pote usa la unias per patrulia e monitori, ma ance en projetas de educa e ijien.
Muritania, como otra paises de Sahel, ia esperia multe atacas par djihadistes en la anios resente. La pais ave un borda, longa de 2000 cilometres, con Mali, e la autoriosas es spesial consernada par la partes la min abitada, car la diminui de controla governal ala ia grandi la menasa djihadiste.
La unias de camel esiste ja tra plu ca un sentenio, ma on ia envia los sola resente a la frontera distante. La militar dise ce la cameles ave un vantaje ca otra modos de patrulia: los pote move rapida en la deserto savaje.
@T Netanyahu es solisitada a formi la governa israeli
@L aora_oji/2019/netanyahu_es_solisitada_a_formi_la_governa_israeli
====== Netanyahu es solisitada a formi la governa israeli ======
26 setembre 2019
La presidente de Israel, Reuven Rivlin, ia solisita ce Benjamin Netanyahu asembla la governa seguente.
Esta aveni pos cuando Netanyahu e Benny Gantz, sua oposor xef en la vota jeneral resente, ia fali fa un acorda sur un governa unida.
La eleje en la semana pasada ia es ja la numero du de esta anio, e lo ia fini con no resulta concluinte. La Alia Azul e Blanca de Gantz (sentriste e libraliste) ia gania 33 de la 120 sejas de la parlamento, e la partito Likud de Netanyahu (plu destriste) ia gania 32.
Netanyahu ave aora asta ses semanas per atenta asembla un governa.
Rivlin ia dise ce el va fa tota cual el pote per evita un vota jeneral tre en esta anio. "Netanyahu ave plu probablia de formi un governa," el ia dise parlante a lado de Netanyahu.
A lundi, legores israeli-arabi ia recomenda ce Gantz, un xef pasada de la armada, deveni la ministro xef.
La Lista Juntada, un bloco de partitos arabi cual ia gania la loca tre en la eleje, ia dise ce lo desira despone Netanyahu. Esta ia es la ves prima pos 1992 cuando un grupo political arabi ia publici un aproba de un ministro xef israeli.
La Lista Juntada ia gania 13 sejas en la eleje en la semana pasada. Si Gantz ta es suportada par tota 13, el ancora no ta ave la 61 sejas nesesada per un majoria en la parlamento.
La vota resente ia es realida par causa de la colasa de la discutes per alia la partitos pos la eleje en april.
@T Netanyahu responde defiante contra alegas de froda
@L aora_oji/2019/netanyahu_responde_defiante_contra_alegas_de_froda
====== Netanyahu responde defiante contra alegas de froda ======
22 novembre 2019
Benjamin Netanyahu, la ministro xef de Israel, ia promete defiante ce el va reteni la potia, pos deveni acusada de soborna, froda e rompe de fida en relata con tre casos separada.
El ia condena la alegas como un colpa de stato atentada contra se. "Me no va permete ce la menti vinse," el ia dise.
On alega ce Netanyahu ia aseta donadas de comersiores rica e ia fa favores nonjusta per gania un imaje plu bon en jornales.
En un arenga de 15 minutos, el ia acusa ce la judores, la polisia e otras conspira contra el con alegas "political motivada", e ce investigores ia estorse mentis de atestores.
Plu temprana, la avocato jeneral Avichai Mandelblit ia dise ce el ia fa la deside "con cor pesosa", ma el ia dise ce lo mostra ce no person en Israel es ultra la lege. "La enforse de la lege no es un eleje," el ia ajunta. "Lo no es un caso de destra o sinistra. Lo no es un caso de politica."
La anunsia aveni a media de un situa nonprogresable en Israel, pos la resultas nonconcluinte de du votas jeneral en april e setembre.
A martedi, Benny Gantz, la aspiror oposante Netanyahu, ia dise ce el no ia pote formi un alia governante con un majoria en parlamento. On ia permete ce el atenta esta pos cuando Netanyahu ia fali lo.
Presidente Reuven Rivlin ia demanda ier ce legores acorda sur un aspiror per la ministro xef en 21 dias, per evita un vota jeneral tre en la anio -- un aveni sin presedente.
Pos la anunsia de la acusas contra Netanyahu, Gantz ia tuita sua suporta per la avocato jeneral e la departes de enforsa de lege, scrivente ce lo es "un dia multe triste" per la pais.
On regarda Netanyahu como nonculpable asta si on demostra la acusas, e a presente la lege no preveni el de resta en la posto de ministro xef.
Cisa multe menses va pasa ante la casos apare ante un corte. E an si la corte ta condena el, Netanyahu no ta debe resinia asta la fini de la prosede de apela, cual pote dura tra anios.
An tal, multe persones va duta ce un ministro xef pote maneja bon la funsiona de la governa si el defende se en corte a la mesma tempo.
@T Neva nonespetada a un festa en Frans
@L aora_oji/2019/neva_nonespetada_a_un_festa_en_frans
====== Neva nonespetada a un festa en Frans ======
7 maio 2019
A un rev franses, on ia debe trata sirca tredes persones per ipotermia pos un cade nonespetada de neva.
Selebrores a Teknival, un festa de musica tecno en la rejion Creuse, ia deveni esposada a un mal clima cuando la temperatur ia desende a -3°C.
Aprosima des mil persones ia es asemblada a la culmina de un colina de posese militar, cuando lo ia comensa neva multe.
Laborores de la Crus Roja ia trata la plu de la afetadas a la loca mesma, ma on ia debe prende du persones a ospital.
Los ia distribui ance 500 telones de survive, e la organizores de la festa ia caldi un tenda. Ma ja en la posmedia de soldi, la plu de la partisipores ia parti: diseda par jornalistes local, sola 2500 de la des mil persones orijinal ia resta.
On reporta ce la rev no ia es ofisial permeteda, e ce la militar franses ia rejistra un cexa a pos.
Esta ia es la anio 26 de Teknival. En la anio pasada, sua organizores ia es acusada par conservores ce los ia turba un zona natural e ia disturba avias abitante la rejion.
@T Obama urje la rejeta de xefes ci tisa la odia
@L aora_oji/2019/obama_urje_la_rejeta_de_xefes_ci_tisa_la_odia
====== Obama urje la rejeta de xefes ci tisa la odia ======
6 agosto 2019
Barack Obama, presidente pasada de la SUA, ia urje esuanes a rejeta linguaje de cualce person xef si lo nuri la odia o normali la razisme.
Obama ia nomi no person, ma el ia fa sua comentas rara pos cuando presidente Donald Trump ia atenta diverje criticas disente ce sua retorica antimigral ia coraji violentia.
En un parla ier, Trump ia condena la odia e la supremia blanca. El ia parla pos la mori de 31 persones en sparas coletiva en la statos Texas e Ohio.
En sua posto presidente, Obama ia batalia per restrinje la posese de fusiles, sin susede. El ia dise en 2015 ce sua fali de institui "leges pratical per securia de fusiles" ia es la frustra la plu grande de sua preside.
El ia asteni de comenta sur la retorica controversa par Trump a tema de migrores, ma ia publici un declara formal ier.
"Nos debe rejeta solida," Obama ia dise, "linguaje sortinte de la bocas de cualce de nosa xefes si lo nuri un clima de teme e odia, o normali sentis raziste: xefes ci demoni los ci no aspeta como nos, o sujesta ce otra persones, incluinte migrores, menasa nosa modo de vive, o refere a otra persones como suumanas, o implica ce America parteni a sola un spesie de persones. Lo ave no loca en nosa politica e nosa vive publica. E aora es cuando la majoria vasta de americanes de bonvole, de cada raza e crede e partito political, ta dise esta -- clar e nonambigua."
En sua campania presidential, Trump ia dise ce migrores de Mexico inclui vendores de drogas, criminores, e violores sesal.
Plu resente, el ia sperde coleria par sujesta ce cuatro congresores fema de color ta "revade e aida repara la locas, completa rompeda e infestada par crimin, de do los ia veni". El ia nega ce sua comentas es raziste.
@T On averti iudis deutx contra porta publica la cipa
@L aora_oji/2019/on_averti_iudis_deutx_contra_porta_publica_la_cipa
====== On averti iudis deutx contra porta publica la cipa ======
26 maio 2019
La comisionor de la governa deutx sur antisemitisme ia recomenda ce iudis evita porta la cipa en locas publica.
Felix Klein ia averti contra la porta de esta xapeta en alga partes de la pais, par causa de un crese notable de la cuantia de ofendes antiiudiste. El ia ajunta ce sua opina sur la tema ia cambia.
La statistica ofisial mostra ce la governa deutx ia rejistra 1646 crimines de odia contra iudis en 2018. Esta es plu par 10% ca en la anio presedente.
Ance la cuantia de atacas fisical contra iudis en Deutxland ia crese en la mesma periodo. 62 avenis violente ia es rejistrada, contrastada con 37 en 2017.
Katarina Barley, ministro de justia, ia comenta ce la aumenta de crimines antisemita es "vergoniosa per nosa pais".
Klein ia sujesta ce "la sutrae de inibis e la brutia" de la sosia moderna es cisa la causa de esta crese. El ia dise ce la interede, medias sosial e "atacas constante contra nosa cultur de recorda" pote es fatores contribuinte.
El ia recomenda ance ce polisiores, enseniores e avocatos debe reseta instruis per clari "lo cual es permeteda e lo cual no" en pertine a antisemitisme.
Organizas iudi ia averti ce un crese de la popularia de grupos estrema destriste nuri aora la antisemitisme e la odia de otra minorias tra Europa.
De 2017, Alternativa per Deutxland es la partito oposante xef en acel pais, e lo ave credes estrema destriste. Lo oposa la migra a Deutxland, ma lo nega ce sua credes es antisemita.
An tal, alga comentas fada par sua politicistes, incluinte sur la Olocausto, ia provoca critica par organizas iudi e otra politicistes.
@T On catura un fem contrabandante oro en sua sapatos
@L aora_oji/2019/on_catura_un_fem_contrabandante_oro_en_sua_sapatos
====== On catura un fem contrabandante oro en sua sapatos ======
6 novembre 2019
On ia deteni un fem ci ia atenta contrabanda oro en sua sapatos tra la frontera entre Rusia e Xina.
Usante un detetador de metales, duanores rusce ia descovre ce el ave oto discos de oro bandida a la fondos de sua pedes. En junta, la 1,9 cilogrames de oro ave un valua de plu ca sinco milion rublos.
La sitadan rusce ia pare "nervosa e suspetosa", un portavose ia dise per la duana a un punto de frontera prosima a Txita en Sibir este. El ia "pone nonatural un pede ante la otra", e esta ia crea suspeta en la duanores.
La fem ia porta la oro per un sitadan xines. Un investiga criminal es ja inisiada.
En esta anio, la autoriosas en la rejion Zabaicalsci-Crai ia catura persones diversa ci ia atenta contrabanda oro a Xina, incluinte un rusce ci ia atenta traversa la frontera con des baras de oro en sua sapatos de sporte.
La escava de oro es un comersia grande en Sibir, un pais rica con recursos. Ma en otobre, un parario ia colasa a un escaveria en la rejion Crasnoiarsc, matante a la min des-sinco persones.
@T On deteta un fungo estrema venenosa en Australia
@L aora_oji/2019/on_deteta_un_fungo_estrema_venenosa_en_australia
====== On deteta un fungo estrema venenosa en Australia ======
3 otobre 2019
Siensistes ia descovre ce un de la fungos la plu matante de mundo crese en Australia.
Nomida la "coral de foco venenosa", la fungo ave un aspeta roja. On ia crede a ante ce lo esiste sola en Japan e Corea.
Rexercores ia dise ce la presentia de la fungo en Queensland, stato tropical, largi notable la estende de la spesie.
Si on come lo, la fungo pote causa falis de organos e dana serebral.
En alga casos rejistrada de moris en Japan e Corea Sude, persones ia infusa te de la fungo venenosa, pos malreconose lo como un fungo comable cual es usada en medica tradisional.
An un toca a la fungo pote causa inflamas e dermatite, longo siensistes a James Cook University en Queensland.
Dr Matt Barrett ia comenta: "De la sirca sento xampiniones nosiva cual es conoseda a rexercores, esta es la sola en cual la toxinas pote es asorbeda tra la pel."
El ia identifia la presentia de la fungo par studia un foto fada par un fotor de natur en un foresta pluvosa prosima a la site Cairns.
Ma el dise ce on ia reporta vides de la fungo ance en Xina, Tai e Papua Gine Nova. El suspeta ce la venta ia sperde la sporas a miles de anios ante aora.
"Nos no ave folas de persones xercante xampiniones en Australia tropical," Barrett ia dise, "donce lo ia resta mera nondetetada asta aora."
El ia ajunta ce la fungo es entre plu ca dudes spesies nondetetada a ante cual on ia identifia en Australia en la ses menses pasada.
@T On ia atera sur la Luna a sincodes anios ante aora oji
@L aora_oji/2019/on_ia_atera_sur_la_luna_a_sincodes_anios_ante_aora_oji
====== On ia atera sur la Luna a sincodes anios ante aora oji ======
21 julio 2019
On selebra la aniversario sincodes de la atera prima sur la Luna, cuando la modulo Agila de Apolo 11 ia ariva a la Mar de Calmia e Neil Armstrong ia deveni la person prima ci sta sur la Luna.
Orijinal inspirada par la compete entre la SUA e la Uni Soviet en la Gera Fria, la mision es aora recordada como un momento major la mundo intera.
Armstrong ia es acompaniada par Buzz Aldrin e Michael Collins. Tota ia nase en 1930. Aldrin e Collins vive ancora, ma Armstrong ia mori en 2012, con 82 anios.
Michael Collins ia comenta ce el no pensa multe aora sur la mision. "Me ave un vive cuieta. Cisa me pasea longo mea strada a note, cuando lo comensa deveni oscur, e me sensa alga cosa supra mea spala destra -- e me regarda a supra e vide acel ageta peti arjento e me pensa: 'O! acel es la Luna. Me ia es ala!'"
Plu temprana ier, en un lansa coaveninte con la aniversario, un barcon spasial portante astronautas de la SUA, Rusia e Italia ia enaira de la lanseria Baiconur en Cazacstan.
Cuando la roceto ia es lansada, un presentor de NASA ia dise: "E la enaira -- a sincodes anios pos un paso peti per un om, la roceto Soiuz e sua ecipo multinasional fa un salta jigante de la lanseria, dirijeda a la Stasion Spasial Internasional."
@T On inventa un strato liscosa per vasones
@L aora_oji/2019/on_inventa_un_strato_liscosa_per_vasones
====== On inventa un strato liscosa per vasones ======
19 novembre 2019
Rexercores en la SUA ia crea un strato estrema liscosa per vasones, capas de conserva cuantias enorme de acua tra la mundo.
Siensistes a la Universia de la Stato de Pennsylvania dise ce esta strato redui par 90% la cuantia de acua cual on nesesa per porta fece a via. Los sujesta ce lo pote preveni ance la acumula de baterias en vasones e diminui la odores asosiada.
On aplica la strato par jeta lo sur la surfas. Lo es afetada par urina, e nesesa es reaplicada pos sirca sincodes descargas.
La rexercores espera ce sua descovre va redui la cuantia de acua perida. A cada dia, plu ca 141 mil milion litres de acua es usada per descarga la vasones de la mundo, un cuantia cual los descrive como la sesuple de la consuma intera de acua par Africa.
Los ia publici sua trovas en la jornal Sustablia de Natur.
Tak-Sing Wong, profesor asosiada de injenia macinal a la universia ia comenta: "Nosa ecipo ia developa un strato durante, bioinspirada, e capas de repulsa licuida, mugre e baterias, cual pote fa, a radis, ce un vason limpi se."
"Cuando la caca adere a la vason, lo es no sola nonplasente per usores, ma lo presenta ance consernas grave per sania," el ia ajunta. "Nosa intende es trae tecnolojia efetosa a la mercato afin cadun pote benefica."
@T On rasiona autos per redui la contamina estrema en Delhi
@L aora_oji/2019/on_rasiona_autos_per_redui_la_contamina_estrema_en_delhi
====== On rasiona autos per redui la contamina estrema en Delhi ======
4 novembre 2019
En Delhi, la capital de Barat, on ia inisia un sistem de rasiona autos, car la aira es contaminada a grado perilosa.
Autos privata con numeros duable e nonduable va es permeteda sur la stradas a dias alternante entre oji e 15 novembre. La sistem ia es usada ance en 2016 e 2017, ma on no sabe esce lo redui vera la contamina.
La cuantia de particulas perilinte en la aira es multe plu alta ca on recomenda, e la cualia malinte de la aira crea un risca de maladia respiral per miliones de persones.
Ofisiores de sania ia urje persones a resta en casa e evita ativia fisical. Scolas es cluida asta martedi, e la clui va es probable estendeda asta venerdi en cuando la site sofoca en esta nebla densa e fumosa.
Motoristes ci iniora la proibi va es multada per 4000 rupis ($56), la cuantia duple de la puni en anios presedente. Sola la transporta publica, veculos de crise, taxis e veculos de du rotas va es permeteda. Ance femes solitar viajante va es esentada de la regula.
Ma on ave dutas ce la scema va descontamina multe la aira. Medias simil en la pasada ia redui vasta la conjesta de trafica en Delhi, ma los ia fa no efeto notable contra la cuantia de contamina.
Espertas dise ce la emetes de veculos es sola un de alga elementos cual ia cambia la site a un cambra de gas.
Un causa major de la contamina alta a esta tempo de la anio es ce cultivores en statos visina arde palias basa per vacui sua campos. Esta crea un misca nosiva de materia particulin: la diosidos de carbono, nitrojen e sulfur.
La situa es malida par la multe focos artal relasada a divali, la festa indu de lampas, a un semana ante aora. Emetes par construis e industria ia contribui ance a la nebla nonrespirable.
Baratis espera ce pluve en la semana veninte va lava la contaminantes a via, ma probable esta no va cade asta jovedi.
@T On trasa la orijina de umanas moderna a Botsuana
@L aora_oji/2019/on_trasa_la_orijina_de_umanas_moderna_a_botsuana
====== On trasa la orijina de umanas moderna a Botsuana ======
29 otobre 2019
Siensistes ia identifia la pais orijinal de tota umanas oji vivente como un rejion a sude de la Rio Zambesi.
La loca es aora dominada par desertos de sal, ma en la pasada distante lo ia conteni un lago enorme, do lo es posible ce nos ia abita a 200 mil anios ante aora.
Rexercores proposa ce nosa asendentes ia resta ala tra 70 mil anios, asta un cambia de clima local. Los ia comensa move cuando bandas verde e fertil ia apare, abrinte la via per migras futur de Africa.
"Lo es ja clar tra alga tempo ce umanas anatomial moderna ia apare en Africa a sirca 200 mil anios ante aora," Profesor Vanessa Hayes ia dise. El es un jeneticiste a la Instituida Garvan de Rexerca Medical en Australia. "Lo cual on ia debate longa es la loca esata de esta emerji e sperde seguente de nosa asendentes la plu temprana."
Sua concluis ia atrae respondes setica de otra rexercores de la tema, an tal.
La rejion pertinente es a sude de la basin de la Zambesi, en Botsuana norde. La rexercores crede ce nosa asendentes ia abita prosima a Makgadikgadi, un sistem vasta de lagos preistorial cual es aora no plu ca un colie de planos de sal.
"Lo es un area estrema grande. Lo ia ta es multe umida, lo ia ta es multe plantosa," Hayes dise. "E lo ia ta furni vera un abitada conveninte per la vive de umanas moderna e animales savaje."
Cambias de pluve tra la rejion ia provoca tre ondas de migra, a 130 e 110 mil anios ante aora. La migrores prima ia viaja a norde-este, segueda par un onda du ci ia vade a sude-este. Un popla tre ia resta en la rejion orijinal asta aora.
Esta model es fundida sur un trasa de la arbor familial umana, usante sentos de samples de ADN mitocondrial de africanes vivente. ADN mitocondrial es lo cual pasa longo la linia madral entre la jeneras. Par combina jenetica con jeolojia e simulas de clima, rexercores ia pote formi un comprende de la cualias posible de la continente african a 200 mil anios en la pasada.
Ma la studia, publicida en la jornal Natur, ia es cauta resetada par a la min un esperta. Profesor Chris Stringer de la Museo de Istoria Natural en London ia dise ce, per reconstrui la loca de la orijina de umanas, on nesesa usa plu ca sola la distribui mitocondrial moderna.
El ia comenta: "Me opina ce esta esede la capasia de la datos, car on regarda sola un parte pico de la jenom, donce lo no pote dona la istoria intera de nosa orijinas."
Otra analises ia produi concluis diferente, e fosiles descovreda sujesta un orijina en Africa este. Tal, cisa umanas ia ave plu ca un pais orijinal.
@T On trova drogas efetosa contra ebola
@L aora_oji/2019/on_trova_drogas_efetosa_contra_ebola
====== On trova drogas efetosa contra ebola ======
13 agosto 2019
Siensistes dise ce la maladia de la virus ebola va deveni cisa "prevenable e tratable". Esperimentas con du drogas ia mostra un taso notable aumentada de survive.
On ia proba cuatro drogas a pasientes en la Republica Democrata de Congo, do on sufri un aveni major de la virus.
Lo pare ce plu ca 90% de persones infetada pote survive si los reseta temprana la drogas la plu efetosa.
Aora, la drogas va es usada per trata tota pasientes con la maladia en RD Congo.
La Instituida Nasional SUA de Alerjia e Maladias Infetante (NIAID), cual ia cosponsori la probas, ia descrive la resultas como "novas multe bon" per la batalia contra ebola.
La drogas labora par ataca la virus con anticorpos, neutrinte sua afeta a selulas umana.
Diseda par Dr Anthony Fauci, dirijor de NIAID, los es "la drogas prima cual, en un studia siensal solida, ia mostra clar un diminui sinifiosa de mori" per pasientes de ebola.
Per developa esta drogas, on ia usa anticorpos recolieda de survivores de la maladia, cual ia mata plu ca 1800 persones en RD Congo en la anio pasada.
Du otra tratas posible ia es abandonada cuando on ia trova ce los es min efetosa.
@T On trova un fujor en un cava pos 17 anios
@L aora_oji/2019/on_trova_un_fujor_en_un_cava_pos_17_anios
====== On trova un fujor en un cava pos 17 anios ======
30 setembre 2019
La polisia en Xina ia aresta un om ci ia es un fujor criminal tra 17 anios. Los ia usa avionetas per deteta la cava do el ia asconde se.
La om, nomida Song Jiang, ave 63 anios. El ia es prisonida par causa de contrabanda femes e enfantes, ma ia evade un campa de prison en 2002.
El ia abita un cava pico, isolida de interatas umana.
La polisia en Yongshan ia reseta indicas sur la loca de Song en la temprana de setembre. Estas ia gida los a la montania pos sua vila de nase en la provinse Yunnan en la sude-ueste de la pais.
Pos cuando xercas normal ia trova no cosa, la autoriosas ia envia avionetas per aida la polisiores. On ia persepi final un telia de aser azul sur un falesa presipe, e ance trasas de dejetadas.
La polisia ia prosimi par pede e ia descovre Song en un cava peti do el ia asconde se tra multe anios. El ia vive tan longa en sua state isolida ce la comunica con la polisiores ia es difisil per el.
On reporta ce la om ia usa botelas plastica per prende acua bevable de un rio, e ia usa ramos de arbores per crea foco.
El ia es reenviada a prison.
@T On va move salmones par elicotor pos un lisca de tera
@L aora_oji/2019/on_va_move_salmones_par_elicotor_pos_un_lisca_de_tera
====== On va move salmones par elicotor pos un lisca de tera ======
22 julio 2019
Miles de salmones canadian va es elicotorida a securia pos deveni trapida par un lisca de tera.
En junio, ofisiores ia trova ce la rocas ia bloci un parte de Rio Fraser en Columbia Brites, preveninte la salmon de nada contra la corente per ovipari.
Salvores ia spende semanas en prepara un metodo de vola la pexes par elicotor a un loca a la otra lado de la rocas cadeda.
Conservores de natur averti ce la pexes nesesa ovipari per no perili la popla local de salmones. Multe de la poplas umana nativa de Canada depende de la salmones per nuri se e per usas ritual.
On no sabe esata cuanto pexes es trapida, ma on crede ce sola 700 ia susede pasa tra la rejion afetada par la lisca, sin aida. Ofisiores no ia dise cuando la transporta va comensa.
On construi aora un stange per teni la salmones, de do los va es moveda a tances de entre 780 e 2700 litres cual un elicotor va porta a via de la rocas liscada.
La acua en la tances va es osijenida per aida calmi la pexes.
En cuando on construi la stange, otra laborores eticeti la salmones per pote trasa sua viaja a pos.
Ecipos ia atenta move la rocas la plu grande per fasili alga ce la pexes mesma pasa. Los ia prende a via ance rocas de un falesa prosima cual ta pote es perilosa per la persones laborante ala.
@T Opinas internasional sur la fiasco de Brexit
@L aora_oji/2019/opinas_internasional_sur_la_fiasco_de_brexit
====== Opinas internasional sur la fiasco de Brexit ======
14 setembre 2019
En la jornal New York Times, Benjamin Mueller scrive: "Britan ia ave nunca un constitui scriveda vera, un fato de alga orgulo per briteses. En cuando americanes disputa sua regulas, la politica brites opera sur un cataloga evoluinte de leges e praticas, arbitrada par la persones regardada como la bones en governa, con sua senti nonfalinte de condui justa.
Ma la fida poplal a acel metodo ia es forte secuteda en esta semana pasada [cuando Boris Johnson, ministro xef, ia suspende la parlamento]. E acel xoca prima ia es segueda par un otra persepi, cisa an plu stonante: cuando algun comensa colpa a via la abituas e costumes cual formi la democratia brites, on ave un cuantia surprendente peti de restrinjes solida e firma a la autoria esecutante."
En Turcia, la jornal progovernal Sabah vide un declina notable e perilosa en la reputa internasional de Britan. "Con la prosede de Brexit, Britan ia comensa projeta un imaje de un 'stato nonsusedosa' en cada respeta," Bercan Tutar scrive. "La prosede va deveni nonevitable la ruina de Britan."
Al-Dostour, un jornal dominante en Misre, regarda la Rena Unida como a borda de colasa, avertinte ce la resulta de Brexit va es cisa "la defeta political la plu grande en la istoria de la rena pos la colasa de la Impero Brites".
Resalat, un jornal noncomprometente en Iran, dise ce la autoriosas scema per "reversa" la resulta de la vota de 2016, e ce un referendo du ta "leva demandas seria sur democratia en Britan e Europa".
Plu prosima a la Rena Unida, Irish Times considera la reputa internasional de la pais e demanda: "Cuanto Britan pote cade? La fiasco de Brexit ia lasa ja la pais amarga divideda, sua parlamento paraliseda, sua influe diminuida, e sua reputa fratida."
En Beljia, la difusor publica flames VRT crede ce "la Rena Unida ia inversa se a caos". Lo dise ce "tradisiones e acordas esistente tra sentenios deveni abandonada".
En Espania, on trova un foca a Jibraltar, un teritorio ultramar de Britan. La jornal poplal ABC considera perdes posible per la economia jibraltarian, sitante un reporta governal cual averti sur la efeto de oras plu longa de pausa a la frontera.
Comentor Alain Frachon en Le Monde, jornal franses, dise sur la briteses ce "praticalisme ia es un parte de sua erita nasional -- como democratia represental, Wimbledon, e pex con fritadas. En nosa cusines brites, nos ia amira la inversa de nosa pasiones franses," el ajunta, avertinte contra "la delirio de ideolojia mantenida en un clima de gera interna permanente".
La jornal sentral destriste Lidové noviny en Txesco demanda: "Cual ia aveni a un pais cual ia es pasada un model per la rena de lege, razona e seticisme sana?"
En Ungaria, Magyar Nemzet, cual suporta Viktor Orban, la ministro xef popliste, declara brusca: "La pex apesta de la testa -- on pote resoma la crise cual preocupa Britan tra tre anios en esta frase multe corta."
La jornal dise ce de 2016 la Rena Unida es trapida. "La politicistes mesma ia gida la popla a un labirinto, ma on ia trova ancora no sorti. La dilema fundal e nonsolvable es ce la popla desira un cosa, e sua representores elejeda desira un otra."
New Zealand Herald publici un critica picante de la oposores de Boris Johnson par Joer Hildebrand, comentor australian. El denunsia "la disposa scandalosa elitiste ce la popla no ia es sufisinte educada per reconose lo per cual los ia vota en la referendo de 2016, e ce sua era debe es coretida par sua superiores inteletal".
"An [George] Orwell mesma ta mervelia ce, en Britan de la sentenio 21, politicistes a ci on atribui la luminadia razona ce on debe es permeteda a vota en cualce modo desirada, ma sola si la modo es la coreta."
Medias en xina burla lo cual los persepi como la "democratia malnomida" de Britan. Huánqiú Shíbào [Tempos Global] asentua asemblas favorente autonomia en Cimri e Scotland, como ance consernas sur Er Norde, per sulini sua punto ce la Rena Unida es vera no unida.
Su la titulo "Adio a impero" en Kommersant, un jornal sur politica e comersia en Rusia, Fiodor Lucianov demanda: "La Sirco Volante de Monty Python no ia atera en Westminster, si?"
El razona: "La sistem de governa elite en la Rena Unida, en cual prosedes democrata ia legali formal la manteni de potia en la manos conveninte, es desintegrante a sua costures. Cisa la xoca de Brexit va furni la reorganiza nesesada per coreti lo. La nasion dise final adio a la impero supra cual la sol ia reposa nunca."
@T Organizores de la Olimpiales proba un macina de neva
@L aora_oji/2019/organizores_de_la_olimpiales_proba_un_macina_de_neva
====== Organizores de la Olimpiales proba un macina de neva ======
13 setembre 2019
Neva ia cade oji a un compete de canoas en Tocio, la capital de Japan, an si la temperatur ia es 25°C.
Esta ia es un esperimenta par organizores de la Olimpiales de 2020 ci espera furni frescia e comforta a oservores cuando la Juas aveni en la estate veninte.
On ia jeta sirca 300 cilogrames de neva artifia supra scaleras de bancas per vide esce esta ta basi la temperatur e umidia. Tocio esperia comun un temperatur de 35°C e umidia de 80% en julio, provocante ansia ce oservores va sufri de ipertermia.
A la loca do competes de remi e canoa va aveni, un dui de la 2000 sejas es su sielo, car on ia abandona la idea de un teto completa per redui la custa de construi.
Donce oji, membros de la comite organizante ia senta sur la bancas per proba un macina de neva per sinco minutos. Ma la temperatur ia es esata la mesma a pos.
Takashi Okamura, xef de comunica, comanda e controla ia dise ce la macina ave an tal la vantaje de refresci e diverti la oservores.
La macinas, cual on ia usa ja a festas de musica, produi neva par crase jelo e misca lo con aira. On no ia revela sua custa.
La comite no ia fa un conclui desidente per usa la neva artifis, e plu esperimentas va segue, incluinte un plu proba oji.
On developa ja stratejias de fresci pos la anunsia en 2013 ce Tocio va ospita la Juas Olimpal. On ia atenta macinas de nebleta en stadiones, e xapos con forma de parasol.
Estates resente no ia redui la teme ce la Olimpiales en 2020 va es multe calda.
En 2018, la governa japanes ia declara un desastre cuando a la min 65 persones en un semana ia mori par causa de la temperatur. E en julio de esta anio, plu ca 5000 persones ia vade a ospital en un onda de caldia estrema.
En agosto, la Uni Internasional de Triatlon ia corti la tempo de core en un corsa de cuali per la Olimpiales, cuando la temperatur en Tocio ia ateni 32°C.
Ofisiores Olimpial ia apela inisial a la ministro xef de Japan per avansa la orolojo par un ora, afin competes de dura ta aveni en la parte la plu fresca de la dia.
On ia deside no avansa la orolojo, ma la corsas de maraton va comensa plu temprana ca usual, a 06:00, per atenta evita la caldia tro estrema.
Tecnolojia fa ance un rol en la maraton. On ia covre la stradas longo 42 cilometres de la curso con un materia cual refleta raios infraroja, reduinte la temperatur de sua surfas par asta 8°C.
Esta es spesial importante per atletas paralimpial ci usa sejas rolante en avenis su sielo, car tal sejas es multe prosima a la tera, ajuntante 2 o 3 grados a la temperatur de corpo de sua usores.
On lasa ce arbores crese tan multe como posible per ombri oservores longo la stradas, e on ia demanda ce construidas con frescadores permete ce la popla entra.
Organizores va permete ce oservores porta sua propre bevidas botelida a la avenerias, an si esta ia es proibida en Olimpiales pasada par causa de securia e la regulas de sponsores.
@T Parlamentores franses boicota un parla par Greta Thunberg
@L aora_oji/2019/parlamentores_franses_boicota_un_parla_par_greta_thunberg
====== Parlamentores franses boicota un parla par Greta Thunberg ======
24 julio 2019
Greta Thunberg, ativiste adolesente contra la cambia de clima, ia critica legores franses ci ia burla el, en un parla a la parlamento cual ia es boicotada par politicistes estrema destriste.
La xica de 16 anios ia parla ier a la legores, urjente los a "uni per la siensa" de la clima cambiante.
El e otra enfantes ia es invitada a la parlamento de Frans par un grupo de politicistes multipartital. "Vos no debe escuta nos, ma vos debe escuta la siensa," el ia dise.
On ia loda Thunberg, de ci sua protesta solo estra la parlamento svensce ia inspira un promove de greves climal par scolores, per sua parlas emosiante a politicistes.
Ma legores de partitos franses, incluinte la Republicistes conservaliste e la Reasembla Nasional a la destra estrema, ia dise ce los va evita sua parla en la parlamento.
Recomendante ce sua colaborores boicota la parla de Thunberg, Guillaume Larrivé, aspiror per gida la Republicistes, ia tuita: "Nos no nesesa gurus de la apocalise."
Otra legores franses ia lansa insultas a Thunberg ante sua parla, nominte el "un profetesa en pantala" e "la Justin Bieber de ecolojia". Julien Aubert, ci ance espera gida la Republicistes, ia sujesta ce Thunberg ta gania "un Premio Nobel de Teme".
Jordan Bardella, un parlamento european per la Reasembla Nasional, ia egali la labora campaniante de Thunberg a "un tirania de emosia eterna".
Membros de otra partitos, como la Verdes e En Marche, la sentristes de la presidente Emmanuel Macron, ia es plu suportosa de sua apare.
En sua parla, Thunberg ia responde a sua criticores e ia repete sua esijes ce governas ta ata rapida per restrinje emetes de carbono.
Parlante en engles, el ia dise ce enfantes como el ia deveni "la viles" car los ia osa dise a politicistes "cosas noncomfortante" sur la clima cambiante. "E mera car nos sita o reata a esta mesuras, esta fatos siensal, nos reseta cuantias nonimajinable de odia e menasas. Parlamentores e jornalistes burla nos e menti sur nos," el ia ajunta.
La adolesente ia inisia un promove joven internasional pos fa un "greve de scola per clima" ante la parlamento de Sveria en agosto de la anio pasada.
Pos alora, el ia encontra la Pape e ia parla a la Parlamento European, vergoniante politicistes per lo cual el regarda como un manca de reata a la cambia de clima.
Thunberg ia es cruel atacada par jornalistes e troles en Twitter, ma politicistes usa tipal un retorica plu considerada cuando los critica el.
Parlamentores verde ia reproxa la tono bruta de la critica par legores franses. Delphi Batho, xef de la partito Jenera Ecolojia, ia dise: "Larrivé e Aubert fa un jua interna a dorso de la batalia contra la clima cambiante."
@T Pausada
@L aora_oji/2019/pausada
====== Pausada ======
1 marto 2019
Aora oji pausa per alga semanas.
@T Plu ca 1000 casos de morbilio en Zeland Nova en esta anio
@L aora_oji/2019/plu_ca_1000_casos_de_morbilio_en_zeland_nova_en_esta_anio
====== Plu ca 1000 casos de morbilio en Zeland Nova en esta anio ======
5 setembre 2019
La aveni presente de morbilio en Zeland Nova ia suprapasa 1000 casos confirmada. La ministreria de sania ia dise ce de la prima de janero 2019 asta oji, 1051 persones ia es afetada.
Morbilio es un maladia multe comunicable e capas de mata. Lo causa toses, erutas de pel, e febres.
An si on ave aora vasines efetosa e fidable contra la maladia, alga paises developada ia esperia un recrese de morbilio en anios resente.
Tra la mundo, la cuantia de casos ia cuatrupli en la tre menses prima de 2019, comparada con la mesma tempo en 2018, longo la Organiza Mundal de Sania (OMS).
La problem en Zeland Nova es xef consentrada sirca Auckland, la site la plu grande en la pais: 877 de la casos confirmada ia aveni ala. La ministreria de sania ia urje ce cadun con eda entre 12 menses e 50 anios ta es vasinida.
On recomenda ance ce cualce person ci senti malada ta "resta a via de labora, scola o locas publica, per preveni risca otra persones". La ministreria ia consela ce visitores ta reseta la vasin a du semanas o plu ante sua ariva en Auckland.
Morbilio es un maladia virusal, fasil sperdeda par toses e stornuis. La plu de persones ci developa lo recovre, ma lo pote crea complicas cual menasa la vive.
Ante la introdui de un vasin en 1963 e un program vasta de vasini, "epidemicas major ia aveni a un ves en aprosima cada anio du o tre, e on estima ce morbilio ia causa 2,6 milion moris per anio", diseda par la OMS.
La cuantia de casos de morbilio ia redui constante en la mundo asta 2016, cuando la maladia ia reforti se. Plu temprana en esta anio, la OMS ia dise ce cuatro paises european es no plu regardada como paises sin morbilio.
La aumenta de casos en nasiones developada es partal causada par jenitores ci evita la vasin per razonas filosofial o relijial, o par ansia ce la vasin es relatada con autisme, an si la siensa medical contradise esta ansia.
@T Plu ca 40 persones mori en un fabriceria ardente en Delhi
@L aora_oji/2019/plu_ca_40_persones_mori_en_un_fabriceria_ardente_en_delhi
====== Plu ca 40 persones mori en un fabriceria ardente en Delhi ======
8 desembre 2019
Un focon grande ia destrui un fabriceria de sacos en Delhi, la capital de Barat, matante 43 laborores.
Lo ia comensa en la temprana de esta matina en un construida de cuatro niveles en la distrito vea de la site.
A la min sento persones ia dormi en la fabriceria, cual crea xef sacos de scola, cuando la flamas ia comensa. On ia salva plu ca 60 de los.
La ministro xef Narendra Modi ia descrive la focon como "xocante" e ia envia sua compatia.
Pompores ia es prima informada sur la focon a 05:22 de ora local. Lo ia ensende en la niveles basa, ma ia traversa rapida a la nivel tre, do laborores ia dormi.
La fabriceria es en un parte de la site con multe stradetas streta. Esta ia difisili la taxe de la pompores, e salvores ia es obligada a porta vitimes sur sua spalas, la un pos la otra.
La causa de la arde ancora no es clar, ma on ia comanda un investiga. Un atestor ia culpa un sircuito corta. On trata deses de persones ferida en la ospitales de Delhi, e sua relatadas luta per descovre do sua amadas es.
Sites barati ia vide multe focones matante. Fatores major cual contribui es la malfa de projetas de construi e la enforsa debil de regulas de securia.
@T Polsces compra un veculo nova per un camionor irani
@L aora_oji/2019/polsces_compra_un_veculo_nova_per_un_camionor_irani
====== Polsces compra un veculo nova per un camionor irani ======
20 desembre 2019
En Polsca, un stratejia de finansia coletiva ia recolie cuasi 250 mil zlotis per compra un camion nova per un camionor irani ci ia ave no solve cuando sua veculo ia fali.
Fardin Kazemi ia trae uvas seca a la pais, e ia intende continua a Txesco per prende benes per importa a Iran. Cuando el no ia pote tolera la custa de reparas, el ia debe dormi en sua veculo.
"La popla polsce ia es anjeles per me," el ia comenta. Con base en Khoy en Iran norde-ueste, Kazemi ia gida sua camion fidable a Europa per plu ca un cuatri de sentenio.
Ante cuando el pote revade a sua pais en la veculo nova, el nesesa reseta un permete de la autoriosas irani per importa la camion, evitante restrinjes cual Iran ia institui contra alga benes de la Uni European.
La problemes de Kazemi ia comensa a 3 desembre, cuando sua camion de 30 anios ia fali en la vila Koziegłowy en la media de Polsca, a norde de Katowice.
Camionores polsce ia inisia un apela enlinia per recolie mone per repara la veculo, e ance per furni comables e un loca de dormi a la om irani.
On ia ateni la gol inisial de 100 mil zlotis en 24 oras, e la soma es aora plu ca la duple de acel, con ce donadas ariva ancora. Repara la camion ia pare tro custosa, donce on intende aora compra un nova.
Su lege irani, on pote importa sola la veculos con min ca tre anios, donce la recoliores polsce intende compra un trator usada de 2017 per tira la vagon de la camion vea.
An tal, la idea risca ancora es impedida par restrinjes irani contra importas de la UE. On solisita aora un esenta per la veculo sustituinte.
Kazemi ia dise: "Me ia viaja tra tota Europa per 27 anios. Asta aora me no ia ave la tempo per pote conose plu bon la polsces, an si los ia es sempre plasente. Aora lo es mostrada ce los es un popla merveliosa, e crede sua aida es difisil per me."
El ia ajunta: "Nos no ia informa mea madre sur cualce detalias de esta, per no preocupa el. El pensa mera ce me labora."
@T Pompeo es otimiste sur un acorda per proteje curdis
@L aora_oji/2019/pompeo_es_otimiste_sur_un_acorda_per_proteje_curdis
====== Pompeo es otimiste sur un acorda per proteje curdis ======
13 janero 2019
Mike Pompeo, la ministro de internas esuan, ia dise ce el es otimiste ce on pote ateni un acorda con Turcia per proteje combatores curdi en Suria pos la parti de la SUA.
El ia parla en la Amirias Arabi Unida pos un telefoni con sua corespondente turces.
Fortes esuan en Suria norde combate con un militia curdi contra ativistes de Daex. Ma Turcia regarda esta militia, la Unias de Proteje Poplal, como un grupo teroriste e vole elimina lo.
Pompeo visita paises diversa en Asia sude-ueste per atenta calmi aliadas pos la anunsia subita par presidente Trump, en desembre, ce fortes esuan va retira se de Suria.
En la semana pasada, presidente Erdoğan ia rejeta coler la recomenda par John Bolton, la Conselor de Securia Nasional de la SUA, ce on ta proteje la militia curdi. Erdoğan ia descrive tal dises como "nonasetable".
@T Probas par Corea Norde a un lanseria de satelite
@L aora_oji/2019/probas_par_corea_norde_a_un_lanseria_de_satelite
====== Probas par Corea Norde a un lanseria de satelite ======
14 desembre 2019
Corea Norde reporta ce lo ia fa "un proba esensal" a un lanseria de satelite per aumenta sua defendes nucleal.
Un portavose ia dise ce la proba ia aveni en la tarda de venerdi a Sohae, ma ia dona no detalias spesifante. Esta es la proba du a acel lanseria en min ca un semana.
Discutes resta nonprogresante entre Corea Norde e la SUA sur la program nucleal de la prima. Pyongyang ia dise ce la SUA debe ofre sedes nova a la pais ante la fini de la anio, e ce lo va adota "un modo nova" si acel no aveni.
On no sabe esata cual cosa ia es probada a Sohae. Alga espertas sujesta ce lo es un sistem a tera per misiles balistical. La ministro de defende de Corea Sude ia dise ce esta ia es la ojeto de la proba plu temprana en desembre.
A ante, Corea Norde ia promete desasembla la lanseria a Sohae.
Stephen Biegun, representor spesial de la SUA per Corea Norde, va visita doman Seoul, la capital de Corea Sude. Donald Trump dise ce el espera ancora ateni un acorda.
La Consilio de Securia de la Nasiones Unida ia consenta a mercurdi, solisitada par la SUA, per discute la program de armas de Corea Norde en la tensa cresente. Corea Norde ia descrive la consenta como "un provoca grave".
Trump, presidente de la SUA, ia ave diplomatia con Corea Norde como un tema major de sua politica esterna en 2018. Ma el ia fali estrae sedes notable sur la desnucleali, an pos fa du consentas con xef Kim Jong-un e an pos sta corta en Corea Norde.
A jovedi, la SUA ia proba un misil balistical de distantia media supra la Mar Pasifica, un arma cual es proibida su un acorda de 1987 cual Trump ia abandona en esta anio.
@T Protestas continua contra estradis en Hongkong
@L aora_oji/2019/protestas_continua_contra_estradis_en_hongkong
====== Protestas continua contra estradis en Hongkong ======
16 junio 2019
En Hongkong, miles de persones protesta estra construidas governal sur un projeta controversa, an pos un retira partal par la governa. La projeta ta permete estradis a la tera xef de Xina, e lo ia provoca sentos de miles de persones a protesta en la semana pasada.
Carrie Lam, dirijor xef de Hongkong, ia dise ier ce la projeta es "suspendeda" per la tempo presente. Ma la gidores de protestores esije ce on abandona lo permanente. Alga ia demanda per la resinia de Lam.
En la temprana de posmedia oji, folas grande ia asembla en la site, en la Plaza Victoria. Multe ia porta vestes negra o flores blanca. On reporta ce la area ia es masima plenida, e ce trenes no ia para a stasiones tro folida.
Alga protestores ia fa tribuis a la loca do un om ia mori pos cade de scafales en la tarda de saturdi. El ia erije un bandera urjente la abandona de la projeta.
On es consernada sur la influe cresente de Beijing en Hongkong, e la protestas sur la projeta ia provoca alga de la violentia la plu mal de multe anios.
Hongkong es un colonia brites pasada. Lo ia revade a governa xines en 1997 en un acorda per "un pais, du sistemes" cual garantia un grado de autonomia a lo.
La governa ia razona ce la projeta proposada de estradi va "tapi la fesures" afin la site no va es un paradiso secur per criminores, pos un caso de omiside en Taiuan.
Oposores dise ce la lege nova va esposa la popla de Hongkong a la sistem multe nonperfeta de justia en Xina, e va continua erode la nondepende judal de la site.
Ier, pos dias de protestas, Lam ia dise ce el ia oia la clamas ce sua governa ta "pausa e pensa".
Jimmy Sham, de la Fronte per Diretos Umana Sivil, ia dise ce la suspende anunsiada es simil a "un cotel" cual on ia puxa a en la site. "Lo ia ateni cuasi nosa cor. Aora la governa ia dise ce los no va puia lo, ma los refusa ance estrae lo."
La ministreria de esternas xines ia suporta publica Lam pos sua anunsia.
@T Protestas contra froda alegada en Aiti
@L aora_oji/2019/protestas_contra_froda_alegada_en_aiti
====== Protestas contra froda alegada en Aiti ======
11 febrero 2019
Protestores en Aiti ia arde numaticos e ia lansa petras, urjente ce presidente Jovenel Moïse resinia.
A la min cuatro persones ia es matada e desuples ia es ferida en cuatro dias de protestas en la capital Port-au-Prince e otra sites.
Multe aitianes acusa ce Moïse e otra ofisiores ia froda. Miles ia vade sur la stradas per protesta en esta semana.
La turba ia obliga maiores en alga sites a cansela la selebras de carnaval en la temprana de marto.
Moïse, ci governa de 2017, ia recomenda discutes con la oposores, ma sin resulta asta aora.
Grupos oposante ia urje protestas pos un reporta de corte cual ia alega ce ofisiores e ministros pasada ia prende nononesta alga prestas per developa, donada a Aiti par Venezuela pos 2008.
La reporta ia sujesta ance ce Moïse ia es envolveda en atas nonregulada.
Aiti es la pais la plu povre en la Caribe, e 60% de persones vive con min ca $2 per dia.
@T Protestas rara contra la presidente en Misre
@L aora_oji/2019/protestas_rara_contra_la_presidente_en_misre
====== Protestas rara contra la presidente en Misre ======
21 setembre 2019
En Misre, gas lacrimojen ia es xutada per sperde la popla a alga de la protestas prima pos la ariva a potia de presidente Abdul Fattah al-Sisi en 2014.
Sentos de misris ia pleni la Plaza Tahrir en Qahira, un loca major en la Revolui Misri de 2011, per esije ce la presidente resinia.
Protestas ia aveni ance en otra locas en la pais. Los ia es un reata sur alegas de froda contra la governa de Sisi. On ia aresta a la min sinco persones.
Un comersior e ator misri, Mohamed Ali, ia posta un serie de videos acusante ce la xef de la pais ia malspende miliones per casas e oteles lusosa, en cuando un proportio grande de la popla vive en povria. Misre ia segue un politica de economia sever en anios resente.
Sisi ia rejeta la alegas como "mentis e malacusas".
La espresas "Sisi a via" e "La popla vole suverti la governa" ia es a la alta de la lista de tendes de Twitter en Misre en la tarda de ier.
Sentos de protestores antigovernal ia asembla en e sirca la plaza, an con atentas per sperde los.
Protestas ia es reportada ance en Alexandria, la site du de la plu grandes en la pais, en Suez, e en la vila Mahalla el-Kubra a norde de Qahira. On dise ce an a alga dias pasada, tal senas ia es nonimajinable.
Ali, ci abita en Espania, en esclui autoelejeda, ia posta sua video prima a 2 setembre. En un video a martedi, el ia dise ce si Sisi no resinia ante jovedi, "la popla misri va veni a la plazas a venerdi en protesta".
En 2013, Sisi ia gida la suverti militar de la presidente prima democrata elejeda de Misre, Mohammed Morsi, pos protestas contra sua rena.
Pos alora, el ia supravide un represa de disenti cual grupos sur diretos umana descrive como sin presedente, e par cual deses de miles de persones ia es detenida.
En april, la popla de Misre la vota per aproba cambias constitual cual pote estende la periodo presidental de Sisi asta 2030. 44% de misris ia partisipa en acel vota.
Sisi ia gania 97% de votas en la eleje presidental en la anio pasada, cuando el ia ave no oposor major.
@T Protestas violente continua en Ecuador
@L aora_oji/2019/protestas_violente_continua_en_ecuador
====== Protestas violente continua en Ecuador ======
5 otobre 2019
Lenín Moreno, presidente de Ecuador, ia dise ce el "no va negosia con criminores" pos un dia du de protestas sur la sutrae de suporta finansial per carburantes.
La suporta ia esiste tra cuatro desenios, ma Moreno no intende reversa sua deside de cansela lo. A un consenta de la governa, la presidente ia dise ce el no va es dirijeda par la esijes de criminores.
Colerida par la custa cresente de carburantes, protestores ia vade sur la stradas. A jovedi, cuando la suporta ia fini, protestores ia bloci vias tra la pais, parante la sistem de transporta.
En responde, Moreno ia declara un state de crise per 60 dias, disente ce el no va permete ce protestores "pone caos".
Plu protestas ia aveni ier en Quito, la capital, e en la site Guayaquil, do on ia covre la stradas con paradores tempora e numaticos ardente.
Sirca 350 persones ia es arestada en la protestas, e on ia reporta botecas rubada e scaramuxas. 28 polisiores ia es ferida, des-du autos polisial ia es destruida, e un construida de governa local ia es atacada.
A la consenta de consilio ier, Moreno, presidente de 2017, ia dise ce el bonveni discutes con cualcun afetada par la sutraes, ma rejeta los ci ia adota violentia.
En parolas defiante, el ia dise ce la plu de ecuadoranes suporta sua "deside corajosa", e ia informa la protestores ce el no va cambia sua deside. "Me es multe felis sur la responde enorme, en sua majoria, cual nos ia reseta de la popla de Ecuador per suporta un deside corajosa fada par la governa nasional," el ia declara.
Moreno, ci ave 66 anios, ia dise ce la governa no pote plu tolera la custa de la suporta finansial per carburantes. La custa anial es egal a 1,3 mil milion dolares esuan.
La sutrae de esta suporta finansial, introduida en la desenio de 1970, parteni a la scema de Moreno per forti la economia debilinte de Ecuador e per redui sua detas.
La governa ia acorda redui la spende publica como parte de un acorda de presta con la Funda Monal Internasional. La acorda ia es suscriveda en marto, permetente ce Ecuador empresta 4,2 mil milion dolares.
A martedi, Ecuador ia anunsia ce lo parti de la Organiza de Paises Esportores de Petrolio per pompi plu petrolio e aumenta sua revenu.
@T Protestores invade un mineria deutx
@L aora_oji/2019/protestores_invade_un_mineria_deutx
====== Protestores invade un mineria deutx ======
23 junio 2019
En Deutxland ueste, sentos de ativistes contra la cambia de clima ia invade un mineria de carbon su sielo per campania contra combustables de fosil.
La protestores ia core tra campos e ia rompe un cordi de polisia per entra a la mineria Garzweiler.
Polisiores ia averti ce la mineria no es secur, e alga ia es ferida cuando los ia atenta reteni la protestores.
Deutxland ia promete neutrali sua emetes de carbono en 2050, ma ativistes dise ce esta no es sufisinte rapida.
Sondas resente ia mostra ce la cambia de clima es la conserna la plu grande en Deutxland, do la partito verde egali la Democratas Cristian governante.
Plu temprana en la dia, protestores ia bloci tempora un ferovia usada per transporta carbon.
Alga de la ativistes ia es entre 20 e 40 mil protestores ci ia partisipa en un protesta a venerdi en la site Aachen, suportante la promove de greves de scolores inisiada par Greta Thunberg, adolesente svensce.
@T Putin dise ce libralisme es anticin
@L aora_oji/2019/putin_dise_ce_libralisme_es_anticin
====== Putin dise ce libralisme es anticin ======
28 junio 2019
Vladimir Putin ia dise ce libralisme es "anticin" en un intervisa ante vade a la confere G20. El ia dise ce la ideolojia cual suporta democratias ueste tra desenios ia "vive plu longa ca sua intende".
La xef rusce ia loda ance la crese de poplisme en Europa e America, disente ce ideas como multiculturalisme es "no plu tenable".
Sua comentas ia apare en un intervisa sur multe temas en la jornal Financial Times. La article ia es publicida cuando la xefes de la mundo comensa discute comersia e securia en Japan.
"Libralistes no pote simple dita cualce cosa a cualcun," diseda par Putin, ci ia servi como presidente de Rusia tra cuasi du desenios.
El ia ajunta ce libralisme desacorda con "la interesas de la majoria vasta de la popla", e ia punta se contra Angela Merkel, canselor deutx, par causa de permete cuantias grande de refujadas a relocali se en Deutxland.
"Esta idea libraliste presuposa ce on nesesa fa no cosa, ce migrores pote mata, saca e viole con esenta car sua diretos como migrores debe es protejeda.
Putin, ci ave 66 anios, ia dise ance ce Rusia ave "no problemes con persones LGBT, ma alga cosas pare esedente a nos. On reclama aora ce enfantes pote fa sinco o ses roles de jenero," el ia continua.
"Ta ce cadun es felis, nos ave no problem con acel. Ma on debe no permete ce esta ombri la cultur, tradisiones e valuas familial tradisional de miliones de persones composante la popla nucleal."
Estra sua comentas sur libralisme, Putin ia loda ance Donald Trump, presidente de la SUA, como "un person talentosa" ci sabe relata con votores.
Ma la xef rusce ia dise ance ce la uniladisme de la SUA es partal culpable per la gera de comersia cual continua entre Xina e la SUA, e per la tensa con Iran en la Streta Hormuz.
An tal, Donald Tusk, presidente de la Uni European, ia ataca oji Putin, informante reportores ce el desacorda forte con sua sentis sur libralisme.
"El ci reclama ce democratia libraliste es anticin reclama ance ce librias es anticin, ce la rena de lege es anticin, e ce diretos umana es anticin," el ia dise. "Lo cual pare vera anticin a me es autoritarisme, cultos de personalia, la rena de oligarcas, an si a veses los pote pare eficas."
@T Quebec refusa un franses per sua tese partal engles
@L aora_oji/2019/quebec_refusa_un_franses_per_sua_tese_partal_engles
====== Quebec refusa un franses per sua tese partal engles ======
8 novembre 2019
La provinse Quebec en Canada este ia refusa dona la state de migror a un sitadan franses, car el no ia pote mostra un capasia sufisinte de la lingua franses.
Quebec ia rejeta un solisita per abita de Émilie Dubois, parente car un parte de sua tese de universia ia es en engles. Dubois ia veni a Quebec de Frans en 2012 e ia completi un diploma dotoral a un universia de lingua franses.
Esta graduada de biolojia ia dise ce el ia alterna entre rie e noncomprende cuando el ia reseta la letera informante el sur la deside.
En Quebec on parla xef franses, e Dubois, ci ave 31 anios, ia solisita abita su un program provinsal per studiantes stranjer cual obliga aspirores a mostra un capasia forte en la lingua.
"Si algun ci es franses e ia nase en Frans vade a un universia do on parla franses e fa tota en franses, e an tal on rejeta el, lo es asurda," Dubois ia comenta.
Plu temprana en esta anio, el ia susede un esamina per demostra sua capasia de lingua franses. Ma el ia reseta un letera final de refusa, declarante ce el no ia completi sua educa intera en franses, incluinte sua tese.
Sola un de sinco capitoles en sua tese sur biolojia selulal e moleculal ia es scriveda en engles, per publici en un jornal siensal.
Dubois ia dise: "Esta es como siensistes comunica. Los comparti sabes, e esta es xef fada en jornales de lingua engles." El ia ajunta ce lo ia senti como si "la mundo cade sur mea testa" cuando el ia reseta la letera. El ia intende abita en Quebec e construi ala sua vive. "Me no parteni plu a Frans," el ia dise.
El espera fa ce on reversa la deside, car sua caso es suportada par sua membro local de la asembla provinsal. Plu, la ministro de migra quebecan ia declara ier ce la deside no pare es multe lojical. El ia demanda ce ofisiores investiga la situa.
Quebec ave un acorda spesial sur migra con la governa federal de Canada, e ave potias grande sur la eleje de migrores. Un migror debe oteni un "documento de eleje" de la provinse ante pote demanda a la governa per abita permanente.
@T Robert Mugabe es lamentada como un eroe nasional
@L aora_oji/2019/robert_mugabe_es_lamentada_como_un_eroe_nasional
====== Robert Mugabe es lamentada como un eroe nasional ======
8 setembre 2019
En Zimbabue, tre dias de lamenta nasional ia comensa pos la mori de Robert Mugabe, la presidente pasada.
Mugabe, la xef prima pos la autonomi de sua pais, ia governa Zimbabue asta cuando un colpa militar ia despone el en 2017. An tal, sua partito, ZANU-PF, cual governa ancora, ia declara el un "eroe nasional" pos sua mori.
Inisial lodada per estende la asede a sania e educa per la majoria negra, plu tarda, Mugabe ia usa violentia contra sua oposores political e ia preside supra la ruina economial de Zimbabue.
Internasional, esta gerilia pasada de autonomi ia ave la reputa de un tirano. Sua militias ia ataca oposores political, e el ia usa forsa per saisi tera de cultivores de minoria blanca per aumenta sua popularia entre votores.
Sua lega es aora la tema de multe debate.
El ia resta popular entre multe votores an en sua anios vea. El ia es espulsada de la presidentia sola cuando el ia desemplea sua suordinada per emplea sua sposa: multe persones ia teme ce el prepara per pasa la posto tra sua familia en loca de fa elejes democrata.
Acel suordinada, Emmerson Mnangagwa, ia deveni presidente. El ia loda Mugabe pos la anunsia prima de sua mori, disente ce sua partito ia "premia el con la state de eroe nasional cual el ia merita intera".
On no ia anunsia un program de tempo per la entera. Autoriosas en Singapor labora con la ambasada zimbabuean per retrae la corpo de Mugabe par avion. El ia reseta aida medical en la Site Singapor de april.
@T Rompes de eletrica en California per preveni focones
@L aora_oji/2019/rompes_de_eletrica_en_california_per_preveni_focones
====== Rompes de eletrica en California per preveni focones ======
10 otobre 2019
En California norde, un compania de eletrica rompe sua servi a sirca 800 mil casas e otra construidas per atenta preveni focones savaje.
Partes grande de la rejion de la Baia San Francisco, ma no la site mesma, ia perde sua eletrica, e alga abitores es coler.
La compania Gas e Eletrica Pasifica ia averti ce la rompe pote dura tra alga dias. En la anio pasada, sua linias de transmete ia inisia la focon savaje la plu matante en la istoria de California.
Con ce meteorolojistes predise ventas alta, on intende ce la rompe va elimina la risca ce linias eletrical cadeda va ensende plu focones.
La servi nasional de clima ia publici un avisa de bandera roja per la Montes Santa Cruz e la rejiones Baia Norde e Baia Este, avertinte ce la situa ta pote causa "la aveni de venta maral la plu forte en la rejion pos la focones de Baia Norde en otobre 2017".
De la matina de martedi, la compania ia dise ce sirca 500 mil clientes es sin eletrica. Lo ia intende ce 200 mil plu va perde sua eletrica ante mediadia de ora local, ma la compania ia pospone plu descomutas asta plu tarda en la posmedia, par causa de cambias en la state meteorolojial.
La "Focon de Campa" jigante en la vila Paradise en 2018 ia arde 60 mil ectares e ia lasa 86 persones mor. Un investiga ia culpa aparatos mal mantenida de Gas e Eletrica Pasifia per ensende la focon.
La compania ia es ance culpada per focones matante en 2017. Pos litigas seguente, la compania publica comersiada ia declara sua bancarotia en esta anio, en un prosede cual continua ancora.
Lo es la sola furnor de gas e eletrica per multe de California norde, e donce la majoria vasta de consumores en la rejion ave no otra fonte de potia. On previde ce la rompes va afeta plu ca un dui de la contias en la stato.
La avertis covre ance la areas a norde de la Baia San Francisco, incluinte rejiones como Napa e Sonoma, famosa per produi vino. Plu sude, multe sites conteninte companias major de infotecnolojia va es cisa afetada, como Cupertino, la loca de la xeferia de Apple.
Botecas local ia reporta un enflue de clientes ci compra furnis per aida se tra la rompe.
@T Salvores xerca sciores pos un avalanxa suiz
@L aora_oji/2019/salvores_xerca_sciores_pos_un_avalanxa_suiz
====== Salvores xerca sciores pos un avalanxa suiz ======
20 febrero 2019
A la min cuatro persones ia es ferida, un a grado grave, en un avalanxa en un vacanseria popular de sci en la Alpes de Suiz.
La avalanxa ia es reportada en Crans-Montana ier, a sirca 14:20 de ora local. 240 salvores ia continua xerca en la loca tra la note.
On ia dise inisial ce asta 12 persones ia es envolveda, ma la polisia dise ce on no pote iniora la posible ce otra persones es ancora afetada.
La avalanxa ia engoli 400 metres de inclinas marcada per sciores.
Canes de xerca e elicotores de salva es usada per xerca vitimes. La esplora inisial con canes ia es nonsusedosa. La neva es compatida e ave du metres de profondia en alga locas.
On ia comensa un investiga sur la causa de la avalanxa. Lo no es clar esce lo ia es causada par la ativia de sciores o par la state de clima.
La temperatur en la rejion ia deveni min fria en dias resente, tal ce alga neva ia fonde. Ma a martedi, la grado de risca de avalanxa ia es indicada como mera du entre sinco.
@T San Francisco proibi vende sigaretas eletronical
@L aora_oji/2019/san_francisco_proibi_vende_sigaretas_eletronical
====== San Francisco proibi vende sigaretas eletronical ======
26 junio 2019
San Francisco ia deveni la site prima en la SUA cual proibi la vende de sigaretas eletronical asta cuando on conose plu clar sua efeto a sania.
Ier, ofisiores ia vota per despermete ce botecas vende vaporadores, e ia deslegali ce vendores enlinia trae los a adirijes en la site.
La site californian conteni Juul, la compania produinte la esigaretas la plu popular en la pais. Juul ia comenta ce la cambia va forsa fumores a sigaretas tradisional e "crea un mercato negra florinte".
La maior de San Francisco, London Breed, ave des dias per suscrive la lege, ma ia indica ce el va fa lo. La lege va comensa es enforsada a sete menses pos acel data, an si on reporta ce companias va pote fa un defia legal.
Ativistes contra sigaretas eletronical dise ce companias ojeti persones joven par ofre produidas saborida. Los dise no sola ce on nesesa plu investiga siensal sur la efeto a sania, ma ance ce esigaretas pote coraji persones joven a comensa fuma sigaretas tradisional.
@T Scolas malaisian es cluida par aira contaminada
@L aora_oji/2019/scolas_malaisian_es_cluida_par_aira_contaminada
====== Scolas malaisian es cluida par aira contaminada ======
25 junio 2019
En Malaisia, plu ca 400 scolas en la stato Johor ia clui pos problemes de respira e vomiti esperiada par 75 studiantes.
Scolas en la rejion industrial Pasir Gudang va es cluida asta jovedi. Autoriosas investiga esta contamina nova de aira.
En marto, sirca 4000 persones, enfantes per la plu, ia deveni malada pos cuando dejetadas cimical ia es nonlegal poneda en un rio.
Plu ca 100 scolas prima e liseos, como ance 300 prescolas privata, es entre la tempora cluidas de esta semana.
Dr Sahruddin Jamal, ministro xef de Johor, ia dise ce 75 studiantes de 15 scolas ia cexa sur difisiles de respira e ia comensa vomiti. Tota ia es ospitalida.
El ia dise ance ce la causa de la maladia no es clar, ma ce lo no es relatada a la contamina en marto. Alora, 111 scolas ia clui e miles de persones ia maladi pos enspira gases nosiva de la Kim Kim, un rio prosima.
On ia descovre ce asta 40 tones de dejetadas cimical ia es ajuntada a partes de la rio. A la min 15 tipos diversa de cimical ia es identifiada, incluinte sianido de idrojen, cual es sin color e estrema venenosa.
Du malaisianes e un singapor ia es acusada en relata con acel.
La ministro xef de Malaisia, Mahathir Mohamad, ia promete ier ce on va fa "atas sever" contra la culpables de la aveni nova.
@T Sensadores en spasio per defende contra misiles
@L aora_oji/2019/sensadores_en_spasio_per_defende_contra_misiles
====== Sensadores en spasio per defende contra misiles ======
18 janero 2019
Un reporta de la Pentagon dise ce la SUA debe rexerca tecnolojias nova, per esemplo un strato de sensadores en spasio, per trova e destrui misiles prosiminte.
La resenia dise ce la pais debe renovi sua program de defende contra misiles per combate menasas stranjer. Lo inclui un projeta per studia un sistem posible de sensadores orbital per intersepi e para misiles.
"La mundo cambia e nos va cambia multe plu rapida," presidente Trump ia dise cuando el ia desveli la reporta. En la pasada, el ia comanda la militar a crea un ramo ses de se per serti "la domina american en spasio".
Parlante ante la publici de la reporta, un ofisior anonim ia dise ce la spasio es "la clave" per defende contra misiles. Ma el ia asentua ce la militar fa no plu ca esamina esce un tal sistem pote funsiona, e ce no desides ia es fada.
Esta segue projetas ja anunsiada per construi plu sistemes de defende sur la tera en Alaska.
La proposas per armas en la reporta nova refleta ideas developada par la SUA en la desenio de 1980. Nonformal conoseda como "Star Wars" como la filma famosa, la Scema de Defende Stratejial ia es un scermo intendeda per proteje la pais contra misiles balistical intercontinental.
Presidente Ronald Reagan ia anunsia la conseta en 1983, ma lo ia es ultima abandonada en 1993 pos la fini de la Gera Fria.
@T Ses elefantes mori a un cascade tai
@L aora_oji/2019/ses_elefantes_mori_a_un_cascade_tai
====== Ses elefantes mori a un cascade tai ======
6 otobre 2019
En Tai, ses elefantes ia cade a sua moris cuando los ia atenta salva lunlotra de un cascade malfamosa.
Esta ia aveni pos cuando un elefante bebe ia cade en la cascade en la parce nasional Khao Yai en Tai sentral.
On ia trova du otra elefantes en difisilia sur la borda de un falesa prosima, e autoriosas ia move los a via.
La cascade, nomida Haew Narok (Cade de Enferno), ave un istoria de avenis simil. Un manada de oto elefantes ia mori pos cade ala en 1992, en un caso cual ia atrae la atende nasional.
La Departe de Conserva Parces, Viventes e Plantas Nasional en Tai ia dise ce ofisiores ia es clamada a la loca a 03:00 de ora local ier, cuando un grupo de elefantes ia bloci un via a distantia corta de la cascade.
Pos tre oras, on ia vide la corpo de un elefante de tre anios, prosima a la basa de Haew Narok, e sinco otras ia es descovreda en la ambiente.
La du elefantes restante es aora monitorida. Sua survive va es cisa difisil, car elefantes depende de sua manadas per proteje e per trova comedas.
Posible la aveni va causa ance dana emosial, car on sabe ce elefantes pote mostra sinias de lamenta.
Edwin Wiek, inisior de la Funda Tai de Amis de Viventes Savaje, ia comenta: "Lo es simil a perde un dui de sua familia. On pote fa no cosa. Tal es la natur, regretable."
Sirca 7000 elefantes asian resta en Tai, e plu ca la dui de los vive sin libria.
@T Sete paises suscrive per proteje la Foresta Amazona
@L aora_oji/2019/sete_paises_suscrive_per_proteje_la_foresta_amazona
====== Sete paises suscrive per proteje la Foresta Amazona ======
7 setembre 2019
Sete paises de America Sude ia acorda medias per proteje la basin de la Rio Amazona, entre ansia global sur focones enorme en la foresta tropical la plu grande de mundo.
Bolivia, Brasil, Colombia, Ecuador, Guiana, Peru e Suriname ia suscrive un trata, instituinte un rede per responde a desastres e un sistem de monitori par satelite. A sua confere en Colombia, los ia acorda ance labora sur reforesti.
Plu ca 80 mil focones ia eruta en la Foresta Amazona en esta anio.
"Esta consenta va dura como un macina coordinante per la presidentes ci comparti esta tesoro -- la Amazona," Iván Duque ia dise, la presidente colombian ci ia ospita la confere en la site Leticia.
Entretempo, Martín Vizcarra ia dise: "La bonvole solitar no sufisi plu."
La sete nasiones ia acorda ance per dona plu labora a la educa e per aumenta la rol de comunias nativa.
La paises ia es representada en Leticia par presidentes, vispresidentes e ministros. La presidente estrema destriste de Brasil, Jair Bolsonaro, ia partisipa par un lia video car el ia es en prepara per sirurjia.
La Amazona es un reteneria esensal de carbono cual lenti la caldi global, e 60% de lo es situada en Brasil.
La cuantia de focones entre janero e agosto 2019 es la duple de esta de la mesma periodo en la anio pasada, longo la Instituida Nasional per Rexerca Spasial de la pais.
Bolsonaro ia reseta criticas intensa en Brasil e internasional ce el fali proteje la rejion. Ambientistes dise ce sua politicas ia causa la crese de la cuantia de focones en esta anio, e ce el ia coraji ranxores de boves a sutrae bandas vasta de la foresta pluvosa pos sua eleje en otobre pasada.
Ance Bolivia ia esperia focones en la foresta, prosima a sua fronteras con Brasil e Paraguai.
Entretempo, companias cultival e la grupo xef de companias esportante carne de Brasil ia junta se a un campania ambiental, recomendante la fini de la desforesti de tera publica en la Amazona, e esijente ce la governa reata.
Alga vendores internasional ia dise ce los suspende compras de cuoro brasilera par causa de la lias entre la ranxos e la focones cual destrui partes de la foresta.
@T Sir Elton John es alta premiada en Frans
@L aora_oji/2019/sir_elton_john_es_alta_premiada_en_frans
====== Sir Elton John es alta premiada en Frans ======
22 junio 2019
Elton John ia reseta la premio sivil la plu alta de Frans, la Lejion de Onora. La musiciste brites ia es premiada par presidente Emmanuel Macron en un rituo a la Palasio Elisian.
La ofisia de de la presidente ia loda Sir Elton, ci ave 72 anios, como "un jenio melodiosa" e como un de la artistes ge prima ci ia dona un vose a la comunia LGBT.
La cantor-composor ia usa sua parla asetante per promove sua labora carital. La Funda Sido de Elton John ia jenera plu ca 395 milion dolares per la preveni de, educa sur e suporta pos viu.
En sua parla, el ia esplica como la batalia contra sido importa personal a el: "Como musica, la combate de sido es ja mea pasion tra multe multe anios. E como musica, esta combate remente me a cada dia sur la potia estracomun de la spirito umana, e ce la cosas cual lia nos es plu forte ca los cual divide nos. Esta spirito umana majial es lo cual me va porta con me como un membro orgulosa de la Lejion de Onora."
El ia ajunta: "Me ave un relata vasta de ama con Frans: me ave un casa asi, me ia ama sempre veni asi, me ama la cultur franses, la modo de vive e la popla franses."
La premio ia es fada en la mense pos la publici de Rocketman ("Rocetor"), un filma biografial sur la musiciste.
Elton John ia es en Frans como parte de sua turi de adio. En la anio pasada, esta lejendin de pop ia anunsia ce el va sesa turi per pasa plu tempo con sua familia.
El grasia aora sua fanes par un turi final de mundo, Adio, via de brices jala, cual inclui plu ca 300 consertas tra sinco continentes.
@T "SOS" su un camera vijilante salva un tendor mancante
@L aora_oji/2019/sos_su_un_camera_vijilante_salva_un_tendor_mancante
====== "SOS" su un camera vijilante salva un tendor mancante ======
16 otobre 2019
Un fem ci ia pasa tre dias perdeda en la savana australian ia es salvada pos scrive un mesaje SOS cual on ia vide par un camera de securia.
Deborah Pilgrim, ci ave 55 anios, ia perde sua via a soldi pos deveni separada de sua grupo de tendores en Australia Sude. Plu tarda, el ia trova se a un casa vacua, do el ia scrive "SOS" sur la tera en la jardin.
La posesor de la casa, ci abita a distantia de 70 cilometres, ia vide la mesaje par un camera video e ia avisa la polisia. On ia trova Pilgrim en bon sania a la note de ier, prosima a la vila Sedan.
La polisia ia dise ce la posesor ia regarda de tempo a tempo la cameras a sua imobila pos oia ce on xerca la fem perdeda.
"On ia ave la SOS scriveda en la tera, cual no ia es ala a la dia presedente," la posesor ia dise. "Donce me ia comprende e ia clama la polisia."
El ia dise ce la cameras vijilante ia es mera resente instalada, pos un serie de entras par forsa a la casa.
Sua clama a la polisia ia inisia un xerca renovida de la rejion. Polisiores dise ce los ia trova Pilgrim pos alga oras a un imobila visina, do el ia trova acua bevable. On ia prende el a ospital per cautia.
La supravidor de polisia ia comenta: "Lo es vera stonante ce la comunia ia pote usa la belias de tecnolojia per aida trova Deborah."
On ia fa un xerca vasta de aira e sur tera ante trova Pilgrim.
@T Spadas es sededa en Srilanca pos la bombis a pascua
@L aora_oji/2019/spadas_es_sededa_en_srilanca_pos_la_bombis_a_pascua
====== Spadas es sededa en Srilanca pos la bombis a pascua ======
5 maio 2019
Autoriosas en Srilanca urje la popla a sede cualce spadas e coteles grande, entre consernas alta sur securia pos la atacas matante en la soldi de pascua. La polisia ia clari ce on no solisita coteles usada per atas legal.
On ia saisi ja sentos de armas pos la atacas a 21 april. Plu ca 250 persones ia es matada par bombas umana coordinada, cual ia ojeti eglesas e oteles lusosa.
En ajunta a armas, la polisia ia urje ce cadun ci posese "uniformas de polisia o de camufla militar" sede los a sua polisieria la plu prosima a saturdi o soldi. On no ia confirma esce la polisia va amnestia los ci sede sua armas.
Investigas continua sur la bombis. La presidente srilanca Maithripala Sirisena ia dise ier ce entre 25 e 30 persones liada a la bombis es ancora libre. "Nos ia identifia ja tota membros ativa de la grupo, e lo pertine aora a aresta los," el ia dise, ajuntante ce on ave "ancora no informa ce esta suspetadas es bombas umana".
El ia dise ce el ia crede la grupo Daex (cual nomi se la Stato Islamiste) cuando los ia dise ce los ia scema la atacas. "Lo es cristalin clar, car pos la atacas la organiza SI ia fa un anunsia reclamante la reali de la bombis."
La autoriosas en la pais ia pone la culpa de la esplodes a du grupos islamiste local e poca conoseda a ante, sur ci los suspeta ce los ave lias internasional. Sirisena ia dise ce departes de securia de oto paises aida Srilanca con la investiga.
El ia comenta ance ce el crede ce la fortes de securia de la pais va "elimina terorisme" e restora stablia ante la elejes presidental, cual va aveni ante la fini de la anio, disente ce on no pote pospone la elejes.
On ia aresta ja desuples de suspetadas pos la atacas a pascua. La bombis ia rompe la pas relativa cual ia esiste en la nasion de pos la fini de la gera interna a un desenio ante aora. La majoria de la matadas ia es srilanca, ma multe sitadanes stranjer ia es ance entre la vitimes.
@T Srilanca emplea sua pendores prima en 43 anios
@L aora_oji/2019/srilanca_emplea_sua_pendores_prima_en_43_anios
====== Srilanca emplea sua pendores prima en 43 anios ======
30 junio 2019
Srilanca ia enscrive du pendores en prepara per cuatro esecutas, la primas en 43 anios. Cuatro prisonidas condenada per crimines de droga va es punida par mori.
La esecutas va fini un suspende de la puni de mori cual esiste ja de 1976.
Plu ca sento aspirores ia responde a un anunsia en febrero per esecutores con "carater moral forte". Los ia nesesa es srilanca e mas, con entre 18 e 45 anios e posesente "fortia mental". Ance du esuanes e du femes ia presenta se per la rol.
Un portavose de prison ia dise ce la du aspirores susedosa va pasa tra instruis final, cual va ocupa sirca du semanas.
La pendor la plu resente ia resinia a sinco anios ante aora, xocada par vide la pendador. Un otra ia es empleada en la anio pasada, ma no ia apare per labora.
En Srilanca, viole sesal, contrabanda de drogas, e omiside es punable par mori, ma on ia fa no esecutas pos 1976.
Presidente Maithripala Sirisena ia dise ce on reinstitui la puni de mori per supresa la comersia de drogas en la pais. Analistes political dise ce la cambia va aumenta sua popularia ante un eleje cual va aveni ante la fini de esta anio.
"Me ia suscrive la comandas de mori de cuatro," Sirisena ia dise. "On ancora no ia informa los. Nos no vole ja anunsia la nomes, car acel ta pote causa turba en prisones."
El ia dise ce 200 mil drogamanicas esiste en la pais, e ce 60% de prisonidas es en prison per crimines de droga.
La Uni European, como ance Frans, Noria e la Rena Unida, ia condena esta deside par Srilanca: "La puni de mori es un puni cruel, nonumana e degradante, e la UE oposa nonegable sua usa en tota situas e tota casos. An si la autoriosas srilanca ia sita la nesesa de dirije se contra crimines de droga, studias mostra ce la puni de mori fali funsiona per preveni crimin."
Amnestia Internasional, un organiza nongovernal per diretos umana, ia dise ce lo es "xocada" e "scandalida" par la anunsia par la presidente, e ia declara ce esecutas per crimines de droga es nonlegal, car los no pasa la limita per "crimines la plu grave" como matas intendeda.
La dirijor de Amnestia per Asia sude ia comenta: "A un tempo cuando otra paises ia veni a la comprende ce los nesesa reformi sua politicas de controla de drogas, e ata per redui la usa de la puni de mori, Srilanca resiste la tende. Esta va ruina la reputa internasional de la pais, e nos espera ce Presidente Sirisena va reconsidera sua deside."
@T Srilanca vota pos la bombis a la soldi de pascua
@L aora_oji/2019/srilanca_vota_pos_la_bombis_a_la_soldi_de_pascua
====== Srilanca vota pos la bombis a la soldi de pascua ======
16 novembre 2019
En Srilanca, la popla vota aora per eleje sua presidente nova, a sete menses pos un ataca teroriste cual ia mata plu ca 250 persones.
35 aspirores compete per votas en esta eleje, la numero tre pos 2009, cuando la gera interna de desenios ia fini en la pais.
Maithripala Sirisena, la presidente presente, ia deside no reaspira la posto. El ia es criticada pos la bombis par Daex a la soldi de pascua, cual ia ataca eglesas e oteles lusosa.
La governa ia es obligada a confesa ce lo ia sufri un fali major de securia, cuando la ministro de defende ia revela ce la autoriosas no ia distribui bon un averti sur atacas projetada, donada par la departe de securia en Barat a la comensa de acel mense.
Ante la comensa de vota, on ia reporta violentia en la norde-ueste de Srilanca, do fusilores ia ataca un convoia de buses portante votores muslim. La polisia dise ce no persones ia es ferida.
An si la paper de vota es longa de 60 sentimetres per conteni la nomes de tota la aspirores, esta eleje ave clar du favoredas. On ia acusa ce un de los ia fa maltratas de diretos umana en sua desenio como ministro de defende en la presidentia de sua frate.
Gotabhaya Rajapaksa ia es en potia cuando miles de persones, spesial tamiles, ia deveni mancante en lo cual on ia descrive como desapares forsada entre 2005 e 2015. Ma sua rol per fini la gera interna ia boni la fortuna de Rajapaksa pos la atacas a pascua.
Sua disposa sever a securia ia impresa multe persones en la majoria sinala budiste, e sua suportores iniora alegas contra el, incluinte demandas sur sua sitadania.
La importa de securia a votores no es iniorada par sua competor xef, Sajith Premadasa, ci ia inisia sua campania con la promete ce, si el gania, el va emplea la xef militar ci ia vinse la rebelores Tigres Tamil per supravide la securia nasional.
An tal, Premadasa foca plu comun a temas sosial, prometente elimina la povria e furni plu casas.
Como sua oposor, el ave ja un funda de suportores fidosa. El es la fio de la presidente asasinada par la Tigres Tamil en 1993. A presente, el es la ministro de casi, e ia susede oposa la familia Rajapaksa en la propre rejion de los.
Sirisena ia deveni la presidente en un vinse surprendente contra Rajapaksa en 2015. El ia deside no atenta denova, sin dona un esplica. Ma el deveni nonpopular con srilancas.
Indicas ce el ia iniora avertis sur la bombis a la soldi de pascua ia ariva pronto pos un crise constitual, provocada cuando el ia desemplea sua propre ministro xef.
Plu, el ia fa cexas bizara sur la cualia de nozas en la aviones de la airocompania nasional de Srilanca, e sur la organizores de un presenta par Enrique Iglesias, cantor espaniol, sujestante ce los debe es flajelida.
@T Studiantes barati porta caxas en un esamina
@L aora_oji/2019/studiantes_barati_porta_caxas_en_un_esamina
====== Studiantes barati porta caxas en un esamina ======
20 otobre 2019
Un ofisior a un scola en Barat ia escusa se pos la sperde virusin de un colie bizara de imajes mostrante studiantes ci porta caxas de carton sur sua testas.
La fotos ia es fada en un esamina de cimica a la Liseo Preuniversial Bhagat en Haveri, en la stato Karnataka. Los mostra studiantes en caxas, abrida a un lado, per preveni los de copia la labora de otras.
Un manejor minor ia dise ce el regrete atenta usa la tecnica nonusual contra nononestia. El ia ajunta ce la scola ia reali la metodo "a modo esperimental" pos oia ce on usa lo en otra locas.
El ia insiste ance ce lo ia es fada con acorda de la studiantes -- en fato, los ia veni a scola con sua propre caxas.
"On ia ave no obliga de cualce spesie. On vide en la foto ce alga studiantes no ia porta lo," el ia dise. "Alga ci ia porta lo ia desapone lo pos 15 minutos, alga pos 20 minutos, e nos mesma ia demanda ce los desapone lo pos un ora."
Ofisiores rejional ia rapidi a la scola per cexa, direta cuando los ia deveni consensa de la imajes.
La visdirijor de la comite local per educa preuniversial ia descrive la metodo como "cruel".
"Cuando me ia reseta un mesaje sur esta, me ia vade direta a la liseo e ia comanda la manejores a para la pratica," el ia comenta. "Me ia envia ance un avisa a la maneja de la liseo e me contempla atas disiplinante contra los per sua reali de esta idea."
Ofisiores de la scola dise ce los ia sesa la pratica en coopera con la comanda de la comite.
@T Sudan inisia un torneo de futbal fema
@L aora_oji/2019/sudan_inisia_un_torneo_de_futbal_fema
====== Sudan inisia un torneo de futbal fema ======
1 otobre 2019
Istoria ia es fada en Sudan ier, cuando la max prima de la torneo nova de futbal per femes ala ia es juada en la Stadion de Khartoum.
Esta aveni ia ta es cuasi nonimajinable su la rena de Omar al-Bashir, la presidente pasada, pos cuando la pais ia adota un sistem de leges muslim en 1983.
La governa de Bashir ia fini en april pos 30 anios e menses de protestas coletiva. La pais es aora dirijeda par un alia de xefes militar e nonmilitar.
Mervat Hussein, xef de futbal fema a la asosia de futbal sudani ia es presente a la max monumental a lundi. El ia comenta: "Multe juores ia espeta esta momento, e lo es un oportun vera per jua final futbal."
Multe persones en la fola a la max ia canta "governa nonmilitar".
@T Temperatures recordo per junio en Europa
@L aora_oji/2019/temperatures_recordo_per_junio_en_europa
====== Temperatures recordo per junio en Europa ======
27 junio 2019
Un onda de caldia afeta multe de Europa, e on predise ce lo va intensi plu. Deutxland, Polsca e Txesco ia rejistra ier un temperatur plu alta ca en cualce junio presedente.
Meteorolojistes esplica ce la causa es un tira de aira calda de Africa norde.
Alga paises, incluinte Frans e Suiz, espeta oji temperatures supra 40°C. Ofisiores franses avisa sur la risca de mori.
En partes de Espania norde-este, la temperatur va ateni cisa 45°C a venerdi. Ala, ofisiores averti sur risca de focones savaje en alga rejiones.
En 2003, Frans ia esperia un caldia simil cual on ia culpa per 15 mil moris. Cuasi tota la pais es aora en state de alarma orania, la grado direta su la plu grave posible.
Alga sites, incluinte Paris e Lyon, ia restrinje la trafica per atenta redui la efetos de aira contaminada. En Paris, on ia instala fontes liada a idrantes.
En Toulouse, do on previde oji la temperatur 41°C, caritales ia distribui acua a persones sin casa.
Par causa de la clima noncomun calda, alga scolas franses ia pospone esaminas importante e alga ia clui an completa. La caldia afeta ance la 72 mil persones en la prisones de Frans, do on descrive la selulas como "fornos".
Ier, on ia rejistra la temperatur 38,6°C Coschen en Brandenburg -- un recordo nova per junio en Deuxtland. Radzyń en Polsca e Doksany en Txesco ia rejistra ance temperatures de recordo nasional (38,2 e 38,9°C, en ordina).
An en la Alpes, temperatures ia esede 30°C en alga locas.
@T Theresa May resinia sin reali Brexit
@L aora_oji/2019/theresa_may_resinia_sin_reali_brexit
====== Theresa May resinia sin reali Brexit ======
25 maio 2019
Presidente Emmanuel Macron de Frans ia recomenda "un clari rapida" sur Brexit pos la resinia de Theresa May, ministro xef de la Rena Unida. El ia asentua la nesesa de "manteni la funsiona lisa de la Uni European".
May resinia pos tre atentas nonsudesosa de fa ce la parlamento aseta sua Acorda de Retira, negosiada con la UE en novembre. Macron ia junta se a otra xefes de la Uni European ci ia loda la "coraje" de May.
La Comision European ia dise ce lo va labora con la ministro xef seguente, ma ce lo no va cambia la Acorda.
Intervisada ante la resinia, Jean-Claude Juncker, presidente de la Comision, ia demanda: "Como un otra person va pote ateni lo cual el no ia pote?"
En la pasada, David Cameron, ministro xef presedente de la Rena Unida, ia disputa con Juncker la bujeta de la UE e otra temas. En 2016, el ia fa un referendo sur membria de la Uni, recomendante ce la pais resta como membro. Ma la popla ia deside parti.
Sur acel vota, Juncker ia comenta: "Si on dise a la popla tra 40 o 45 anios 'nos parteni, ma no vera -- nos es europeanes tempora e nos no gusta esta europeanes permanente', alora on no debe es surprendeda si la popla segue sloganes simple cuando on demanda ce los vota en un referendo."
El ia aseta ance ce la UE ia "fali" par no adota "la disposa nesesada". "Asteni no es un disposa," el ia esplica.
Angela Merkel, canselor deutx, ia dise ce sua pais va continua labora en dirije a un Brexit "ordinada", ajuntante ce sua governa "va continua fa cada atenta per serti ce on ave un bon asosia con Britan".
@T Thunberg critica politicistes esuan ante un greve climal
@L aora_oji/2019/thunberg_critica_politicistes_esuan_ante_un_greve_climal
====== Thunberg critica politicistes esuan ante un greve climal ======
20 setembre 2019
Greta Thunberg ia dise a politicistes en la SUA ce los no ata sufisinte per combate la crise de clima.
"Me sabe ce vos atenta, ma vera no sufisinte forte. Pardona," ia ativiste ia dise. El ia inspira persones joven tra la mundo a protesta contra la efetos de la caldi global.
A la grupo de senatores encargada sur la clima en Washington DC, el ia dise: "Reserva vosa lodas. No invita nos asi mera per dise ce nos es tan inspirante sin fa cualce ata real."
La xica de 16 anios ia es un de un grupo de ativistes joven de sirca la mundo, invitada a parla a la senatores. Los espera crese suporta entre la legores esuan per reata urjente contra la clima cambiante.
Senator Ed Markey, ci gida la ecipo encargada, ia loda Thunberg an pos sua consela, descrivente el como un "suprapotiosa".
En loca de ofre un declara personal, como on fa usual ante un tal consenta, Thunberg ia envia un reporta major sur la caldi global a la Congresa, con ance oto de sua propre frases.
"Me ofre esta reporta como mea atesta car me no vole ce vos escuta me," el ia dise. "Me vole ce vos escuta la siensistes. E me vole ce vos uni su la siensa. E alora me vole ce vos ata."
En sua visita a la capital de la SUA, la ativiste ia encontra ance Barack Obama, presidente pasada, ci ia descrive el como "un de la defendores la plu grande de nosa planeta".
La apare de Greta Thunberg ante la politicistes ia presede un dia major de greve climal tra la mundo oji. El ia dise ce on va fa 4638 avenis en 139 paises, e un plu greve simil es projetada per la venerdi seguente.
En alga sites, como Victoria en Australia, on recomenda ativa ce studiantes e laborores publica sorti oji de sua scolas o locas de labora.
Un portavose de la governa australian ia comenta: "Nos desira ce nosa enfantes es engranada con la mundo sirca se, donce nos no crede ce lo es justa si on critica studiantes per fa un protesta pasosa sur un problem tan importante como esta."
Thunberg ia remente la senatores esuan ce esta "no es un caso de ativisme joven": "Esta no pertine a nos. Nos no vole ce nos es oiada. Nos vole ce la siensa es oiada."
El es aora en York Nova per la greve climal, ante parla a la Confere NU sur Ata Climal en la semana veninte.
@T Traversa la Manga sur un plance de jeto
@L aora_oji/2019/traversa_la_manga_sur_un_plance_de_jeto
====== Traversa la Manga sur un plance de jeto ======
25 julio 2019
Un inventor franses atenta traversa la Manga sur un plance de jeto.
Franky Zapata, un campion pasada de sci de jeto, espera traversa de Frans norde a England sude en sola 20 minutos.
La om de 40 anios ia enaira prosima a Calais e va prende carburante nova a media de la Manga par atera sur un barco.
El intende manteni la rapidia promedia de 140 cilometres per ora, viajante a 15 o 20 metres supra la acua.
La defia aveni oji per onora la aniversario 110 de la vola prima de avion a traversa de la Manga, par Louis Blériot en 1909.
Zapata ia parti de la plaia a Sangatte a sirca la ora nove de ora local. La minuto esata ia depende de la clima e trafica maral.
Si el susede, el intende atera en Dover, a distantia de sirca 35 cilometres.
Ante la vola, el ia dise: "Nos ia crea un modo nova de vola. Nosa no usa alas. On es como un avia: sua corpo es lo cual vola. Lo es un fantasia de mea enfantia."
El ia averti ce la venta va complica cisa la traversa.
Zapata ia reseta multe atende pos la parade anial a la festa nasional franses en Paris a des dias ante oji, cuando el ia partisipa en un presenta militar sur sua veculo futurin.
La inventa, cual ave la grandia aprosima de un scet, es propulsada par sinco motores peti de jeto. Per carburante, lo usa cerosen tenida en la bolson de sua pilote.
@T Tre enfantes franses mori en un barco inversada
@L aora_oji/2019/tre_enfantes_franses_mori_en_un_barco_inversada
====== Tre enfantes franses mori en un barco inversada ======
14 agosto 2019
Tre enfantes joven franses ia afoca prosima a la costa de Normandia, cuando la motobarco de sua familia ia es colpada par un onda grande e ia inversa se sur un mar ventosa.
La tre adultes en la barco ia survive la drama a lundi, a 800 metres de la plaia Agon-Coutainville a sude de Cherbourg.
Laborores salvante ia ariva rapida a la loca, ma la popa de la barco ia es ja su acua, incluinte la cabina do la enfantes ia es trapida.
La sores, con 9 e 13 anios e sua frate de 7 anios no ia pote es reviveda.
La madre de la du xicas, intervisada par la jornal Ouest-France, ia dise: "Tota ia aveni tan rapida ce nos no ia ave tempo an per esclama."
Los ia es revadente a la plaia, el ia dise, cuando el ia vide acua en la barco. "Me ia cria per aida, ma alora un onda enorme ia inversa nos," el ia ajunta.
La adultes ia es estra la cabina. La madre ia dise ce la enfantes no ia pote nada, ma ia porta jacetas inflable.
"Los ia ave no tempo per sorti," el ia esplica. La padre de la xicas "ia atenta rompe la fenetra de la cabina con sua braso, sua gamas, e final la ancor de la barco".
Jornales franses reporta ce salvores a la plaia Passous ia es avisada par algun ci ia vide la problem de la barco.
Un barco de un scola de vela ia freta a la loca, como ance un elicotor e du ecipos de salva maral.
La xef de la unia local de salva maral ia comenta: "Lo no ia es un bon tempo per vade sur la acua, la mar ia es tro turbosa, lo ia venta tro per un barco de sola sinco metres e dui".
@T Tremateras mata en la Pilipinas
@L aora_oji/2019/tremateras_mata_en_la_pilipinas
====== Tremateras mata en la Pilipinas ======
27 julio 2019
Du tremeteras en un provinse de la Pilipinas ia mata a la min oto persones e ia feri desuples plu.
La tremateras, de grados 5,4 e 5,9, ia aveni en Batanes, un arcipelago en la norde de la pais en la temprana de oji.
La maior, Raul de Sagon, ia dise ce sirca 60 persones ia es ferida. Multe ia es en sua casas cuando la tera ia trema.
On no ia avisa un risca de tsunami.
Un sarjento de polisia ia dise: "Nos ia vide casas secutente. Alga de la mures de la casas ia colasa e ia cade sur la vitimes. Alga persones ia mori car los ia es profonda dorminte, car lo ia es ancora temprana."
Imajes postada a redes sosial par la Crus Roja Pilipina mostra casas reduida a detrito.
La Pilipinas es un parte de la Anelo de Foco sirca la Mar Pasifica, un zona sismica major cual ave un de la linias de falia la plu ativa de mundo.
@T Trudeau desemplea la ambasador canadian a Xina
@L aora_oji/2019/trudeau_desemplea_la_ambasador_canadian_a_xina
====== Trudeau desemplea la ambasador canadian a Xina ======
27 janero 2019
Justin Trudeau, ministro xef de Canada, ia desemplea la ambasador de sua pais a Xina, John McCallum.
Esta segue comentas controversa cual McCallum ia fa sur un caso de estradi, envolvente un dirijor major de Huawei, la corpora jigante de telecomunica xines.
La deteni de Meng Wanzhou, solisitada par la SUA, ia coleri Xina, asidinte sua relata con Canada. La SUA acusa Meng, la ofisior finansial xef de Huawei, de sircoveni punis contra Iran. El e Huawei nega la alega.
En un declara formal, Trudeau ia dise: "A la sera pasada, me ia solisita e aseta la resinia de John McCallum como ambasador de Canada a Xina."
El ia dise ce la diplomata veteran ia servi canadianes con onora e esele en multe postos governal, e ia grasia el e sua familia per sua labora.
McCallum ia causa un controversa a martedi cuando el ia dise publica ce la solisita SUA per estradi Meng ia es grave problemosa.
A la dia seguente, el ia fa un declara disente ce el ia "malespresa se" e regretente ce sua comentas ia crea "confusa". Ma a venerdi, el ia dise ce lo ta es "eselente per Canada" si la SUA ta abandona la solisita.
La caso de Meng ia provoca un aumenta de tensa diplomata entre Canada e Xina. Plu temprana en esta mense, un om canadian ia es condenada a mori en Xina cuando un corte ia judi ce un prisoni de 15 anios es tro pardonosa.
Du otra canadianes ia es arestada pos la deteni de Meng. Alga analistes sur Xina crede ce la arestas ia es un responde entrevenjante contra la deteni, ma ofisiores xines ia nega esta.
Entretempo, on previde ce avocatos SUA va rejistra un solisita formal de estradi con Canada pos tempo corta. La ministreria de esternas xines ia recomenda ce ofisiores SUA retira la comanda de aresta e freni se de avansa con la solisita de estradi.
Un corte canadian ia libri Meng con garantia en la mense pasada.
@T Trump dise ce negosias con la Taliban es mor
@L aora_oji/2019/trump_dise_ce_negosias_con_la_taliban_es_mor
====== Trump dise ce negosias con la Taliban es mor ======
10 setembre 2019
Donald Trump, presidente de la SUA, ia espresa sua opina ce negosias con la Taliban per fini la gera de 18 anios en Afganistan es "mor".
A la fini de semana, Trump ia cansela un projeta secreta per ospita un delega taliban en la SUA, cuando la grupo militariste ia dise ce lo ia mata un soldato esuan.
La du lados ia pare prosima a un acorda. La Taliban ia dise ce la Statos Unida va "perde la plu" par cansela la discutes.
Trump regarda la retira de soldatos esuan de Afganistan como un intende xef de sua politica stranjer, ma a un demanda sur la 14 mil soldatos esuan ci es ancora ala, el ia responde: "Nos desira parti, ma nos va parti a un tempo conveninte."
El ia intende ospita la Taliban e ance Ashraf Ghani, presidente de Afganistan, a la abitada campanial presidental Camp David, ma ia cansela subita.
"Los ia crede ce los nesesa mata persones per pone se a un loca pico plu bon per negosia," el ia informa reportores, descrivente la ataca como "un era grande".
"Nos ia organiza un consenta. Lo ia es mea idea, e lo ia es mea idea ce nos aborta lo. Me an no ia discute lo con cualce otra person," Trump ia dise, partinte de la Casa Blanca per un asembla political en Carolina Norde.
"Me ia cansela Camp David par razona ce los ia fa alga cosa cual los ia debe no fa, serta como enferno," el ia ajunta, condenante la ataca cual ia mata des-du persones, incluinte la soldato.
On ia critica Trump per considera la posible de ospita la Taliban a mera un pico de dias ante la aniversario de la atacas de 11 setembre. Ma el ia defende la idea, disente ce "la aveni de consentas es un bon cosa, no un mal cosa".
La Taliban ia fa nunca un acorda per fini sua campania violente contra militares afgani e stranjer en cuando negosias aveni ancora. En esta anio, los ia mata ja des-ses soldatos esuan.
En 2001, fortes gidada par la SUA ia suverti la governa taliban en Afganistan car la militaristes ia dona un refuja secur a la rede al-Qaida per scema la atacas contra la SUA a 11 setembre de acel anio.
En un declara formal, un portavose per la Taliban ia dise ce la negosias ia avansa bon asta saturdi. La retira de la prosede de pas ante la suscrive de la acorda, par causa de un sola esplode, mostra la manca de maturia e esperia de la SUA, el ia ajunta.
La consenta proposada ia segue nove rondas de discutes entre representores de la Statos Unida e la Taliban en Doha, la capital de Catar, un pais a la Golfo Persian.
Ier, la negosior esuan xef ia dise ce on ave un acorda de pas "en teoria".
Como un parte de la proposa, la SUA ta retira 5400 soldatos en dudes semanas, par intercambia per garantias de la Taliban ce Afganistan ta es nunca denova usada como un base per terorisme.
La Taliban controla aora plu teritorio ca a cualce tempo ante la invade gidada par la Statos Unida en 2001. La organiza ia refusa partisipa en negosias direta con la governa afgani, asta cuando on completi un scema per retira la soldatos esuan.
@T Trump e Kim consenta en Vietnam
@L aora_oji/2019/trump_e_kim_consenta_en_vietnam
====== Trump e Kim consenta en Vietnam ======
27 febrero 2019
Donald Trump, presidente de la SUA, e Kim Jong-un, xef de Corea Norde, va comensa un confere oji con discutes corta, segueda par un come de sera a un otel de sinco stelas.
En sua consenta de du dias en Hanoi, capital de Vietnam, on previde ce los va discute un scema per elimina armas nucleal de la penisola corean.
Ante sua reuni con Kim, Trump va encontra la ministro xef de Vietnam e otra politicistes.
La du gidores va fa juntada un serie de consentas doman, ma la menu esata es nonconoseda. On previde ce cualce reali importante, como la suscrive de un acorda o un confere jornaliste major, va aveni en jovedi.
La jornales governal de Corea Norde ia loda Kim per sua viaja de 4000 cilometres.
La jornal Rodong Sinmun ia dedica cuatro de sua ses pajes a la tema, scrivente ce la popla ia reata a la visita con "stimula e joia nonlimitada". Lo ia recomenda ce persones labora plu forte per "dona reportas de vinse a el cuando el reveni".
Lo ia ajunta ance ce la manca de Kim causa notes sin dormi a alga sitadanes.
On espeta ce la consenta en Hanoi va construi sur la funda de la atenis en Singapor en junio de la anio pasada. Acel confere ia produi un acorda en parolas neblosa, en cual ambos xefes ia promete "labora en dirije a la desnucleali", an si la detalias no ia es clarida.
Poca progresa diplomata ia es fada a pos. A esta ves, ambos xefes va conose la nesesa de ofre sinias de avansas concreta a sua criticores.
An tal, Trump ia pare maneja la espetas, disente ce el va es felis si Corea Norde va acorda mera fa no plu probas nucleal.
En la pasada, Washington ia dise ce Corea Norde va debe sede uniladal sua armas nucleal ante cuando la SUA va redui sua menasas de puni.
Vietnam ave relatas diplomata con e la SUA e Corea Norde, an si lo ia es un enemi de la SUA a ves pasada. La SUA pote presenta lo como un esemplo de du paises cual colabora pos un disputa pasada.
@T Trump menasa un crise nasional per finansia un muron
@L aora_oji/2019/trump_menasa_un_crise_nasional_per_finansia_un_muron
====== Trump menasa un crise nasional per finansia un muron ======
5 janero 2019
Donald Trump, presidente de la SUA, ia dise ce el pote declara un crise nasional per construi un muron de frontera con Mexico sin aproba par Congresa. Esta ia segue un consenta ier con democratas major, ci ia refusa sua demandas per finansia.
Trump reteni sua suporta per un lege cual finansia completa la governa asta cuando el va oteni la finansia per sua muron de frontera.
La governa es aora partal cluida -- ja tra du semanas -- e Trump ia indica ce el es preparada ce la clui continua tra anios.
Sirca 800 mil laborores federal es nonpaiada de pos 22 desembre.
Aidores de Trump e legores va consenta oji per atenta denova solve la situa.
"Me es multe orgulosa ce me fa lo cual me fa," la presidente ia comenta. "Me no nomi lo un clui. Me nomi lo la fa de lo cual on debe fa per la benefica e securia de nosa pais."
Nancy Pelosi, gidor de la Salon Basa, ia dise ce la consenta ier ia es "controversa", e Chuck Schumer, xef democrata de la Salon Alta, ia dise: "Nos ia informa la presidente ce nos nesesa ce la governa funsiona. El ia resiste."
A jovedi, democratas, ci ocupa aora la majoria de sejas en la Salon Basa, ia aseta leges de spende per reabri la governa, incluinte 1,3 mil milion dolares de finansia per securia de frontera asta 8 febrero.
Ma la lege no pote reali estra si lo es asetada par la Salon Alta, cual es controlada par republicistes. Sua gidor Mitch McConnell ia dise ce sua partito va suporta no proposa sin suporta par la presidente.
@T Trump usa potias de crise per inisia sua muron
@L aora_oji/2019/trump_usa_potias_de_crise_per_inisia_sua_muron
====== Trump usa potias de crise per inisia sua muron ======
16 febrero 2019
En la SUA, presidente Donald Trump ia confirma ce el va usa sua potias de crise per construi un muron longo la frontera con Mexico, declarante ce "murones susede".
Construi la muron ia es un promete xef de la campania elejal de Trump, ma democratas ia descrive la reali como un malusa estrema de potia.
Trump ia suscrive aora la scema, como ance un projeta legal intendeda per preveni un repete de la sesa resente de funsionas governal.
El ia fa la anunsia pos cuando la Congresa ia refusa paia per la muron projetada. Sin pausa, democratas major ia dise ce los va defia la stratejia en la cortes.
Parlante en la jardin de la Casa Blanca, Trump ia dise ce sua declara de crise permete ce el asede cuasi oto mil milion dolares per sua muron.
On previde ce la mone va es diverjeda de projetas de construi militar e de laboras per combate la comersia de drogas.
La cuantia es ancora multe min ca la 23 mil milion dolares cual on estima per la custa de la muron longo plu ca 3000 cilometres de frontera.
"Nos va fronti la crise de securia nasional a nosa frontera sude," Trump ia dise. "Nos ave un invade par drogas, invade par ganges, invade par persones, e lo es nonasedable. Cadun sabe ce murones susede."
Ma el ia aseta ce el va es litigada per la deside, predisente ce la caso va vade probable a la Corte Suprema.
Ja pos sola alga oras, la defia legal prima contra la declara ia es inisiada. Un organiza de promove libraliste ia litiga per un conserveria de natur e tre imobilores, a ci on ia dise ce la muron va es cisa construida sur sua tera.
@T Tumultas en Indonesia pos la eleje presidental
@L aora_oji/2019/tumultas_en_indonesia_pos_la_eleje_presidental
====== Tumultas en Indonesia pos la eleje presidental ======
22 maio 2019
On ia aresta desuples de protestores en Indonesia, pos asemblas grande contra la reeleje de la presidente Joko Widodo.
Protestas ier en la capital, Jakarta, ia comensa pasosa ma ia deveni violente. Autos ia es ensendeda e petardos ia es lansada a polisiores. La polisiores ia responde con gas lacrimojen per sperde la fola.
On reporta ce ses persones ia mori e 200 otras ia es ferida par la violentia.
La resultas inisial de la eleje ia mostra ce Widodo ia vinse sua oposor de tempo longa, Prabowo Subianto. La comision sur elejes en la pais ia confirma ier ce Widodo ia gania la presidentia, con 55,5% de la votas.
Plu ca 192 milion persones ia pote vota en la elejes jeneral e presidental cual ia aveni a 17 april.
Pos la anunsia de la resulta, miles ia asembla ante la construida de supravide de elejes, suportante Prabowo, ma ia es obligada par la polisia e move a otra locas en Jakarta a pos.
La protestas ia deveni violente en la sera. Plu ca 30 mil polisiores ia es stasionida en Jakarta contra la posible de violentia.
@T Tumultas en Santiago sur la custa de metro
@L aora_oji/2019/tumultas_en_santiago_sur_la_custa_de_metro
====== Tumultas en Santiago sur la custa de metro ======
19 otobre 2019
On ia declara un state de crise en Santiago, capital de Txile, pos la violenti de protestas provocada par custas altida per biletas de metro.
Protestores, de ci multe es studiantes de liseo o universia, ia ataca alga stasiones de metro, ia ensende focos e ia bloci la trafica, lasante multe dana tra la site e miles de viajores sin transporta.
Imajes televisada ia mostra persones ci lansa petras, ataca veculos de polisia e arde a la min un bus. Polisiores antitumultal ia usa gas lacrimojen e bastones contra alga de la persones, ci protesta ja tra dias contra la alti de custa.
La turba esposa divides en la pais, cual es un de la plu ricas en America latina ma ance un de la plu nonegales. On oia sempre plu cexas sur la custa de vive, spesial en Santiago, un site de ses milion abitores, e clamas per reformis economial.
Parlante en televisa, presidente Sebastián Piñera ia dise ce la state de crise intende "serti la ordina publica e la securia de propria publica e privata". La state permete ce autoriosas restrinje la libria de move de persones e sua diretos de asembla.
El ia dise ance ce la governa va "recomenda un dialoga per lejeri la sufri de los afetada par la alti de custas de viaja".
Plu temprana en esta mense, la governa ia aumenta la custa de un viaja en oras de presa par asta $1,17, culpante la custa plu alta de enerjia e la debilia finansial de la peso.
La cuantia de persones detenida o ferida no ia es direta clar. An con la protestas, la autoriosas ia dise ce los no va reversa la alti de custas.
La protestas ia continua en la note, con persones batente casolas e blocinte la trafica.
La compania de enerjia Enel Chile ia dise ce vandales ia ensende sua xeferia de corpora en la sentro de Santiago. Sua laborores ia es evacuada e nun ia es ferida.
Pos la protestas ier, la autoriosas de metro ia dise ce tota linias va resta cluida per du dias, cisa plu, par causa de la destrui grave cual nonposibli la opera secur de la sistem. On estima la custa de la dana como $700 000, incluinte rompes a cameras vijilante e otra aparatos.
On regarda la metro de Santiago como un de la plu modernas en America latina, con 140 cilometres de ferovia e 136 stasiones.
@T Un aidor de la Pape restora la eletrica en un refujeria
@L aora_oji/2019/un_aidor_de_la_pape_restora_la_eletrica_en_un_refujeria
====== Un aidor de la Pape restora la eletrica en un refujeria ======
13 maio 2019
Un cardinal ci fa atas carital per Pape Fransisco ia restora la eletrica per sentos de persones en un construida en Roma, par desende en un duto de manteni e opera un comutador.
Cardinal Konrad Krajewski ia dise ce el ia ata "desperante", car la ocupores de la imobila, poseseda par la governa, ia pasa un semana sin eletrica e sin acua calda.
Ativistes usa la construida per refuja persones sin casa. Lo conteni plu ca 400 persones, incluinte cuasi 100 enfantes.
La furnor de eletrica ia descomuta la furni par causa de un deta de €300 mil. On crede ce la deta ia cumula en la anios pos cuando la ativistes ia comensa usa la construida vacua, en 2013.
Matteo Salvini, la ministro visxef popliste de Italia, ia dise ce el espeta aora ce la aida papal va paia la faturas tarda.
Ier, Krajewski ia descrive como el ia trepa a su en un duto de manteni e ia sutrae selos covrente un comutador, per pote recomuta la eletrica a la construida.
"Me ia interveni personal en la note pasada per rejunta la mesuradores," el ia esplica. "Lo ia es un jesti desperante. On ia ave plu ca 400 persones sin eletrica, con familias, enfantes, sin an la posible de funsiona la friadores." On reporta ce la cardinal ia ajunta: "Me no ia fa lo car me ia es enebriada."
La construida sur Via de Santa Croce furni no sola refuja, ma conteni oji ance spasios de labora, incluinte un microbireria e un boteca de carpenta.
@T Un alarma falsa a la airoporto de Amsterdam
@L aora_oji/2019/un_alarma_falsa_a_la_airoporto_de_amsterdam
====== Un alarma falsa a la airoporto de Amsterdam ======
7 novembre 2019
Un pilote de avion ia ativi nonintendente un alarma de saisi, creante un aveni major de securia a la airoporto Schiphol en la site Amsterdam en Nederland.
La polisia militar nederlandes ia tuita a sirca 19:30 ce los investiga un situa suspetosa. Un parte de la airoporto ia es cluida cuando la polisia ia responde a la menasa reportada.
Ma pos sirca un ora, Air Europa ia anunsia ce la alarma es falsa, tuitante: "En la vola de Amsterdam a Madrid a esta posmedia, on ia ativi, par era, un avisa inisiante protocoles per aviones saisida a la airoporto. No cosa ia aveni. Tota pasajores es secur e sana, espetante vola pos tempo corta. Nos regrete profonda."
Corta ante la anunsia, la polisia militar ia confirma ce tota pasajores e empleores ia es secur evacuada de la avion destinada per Madrid.
Imajes postada a redes sosial ia mostra partes de Molo D cluida per la popla jeneral, e pasajores espetante informas. Aviones ia atera ancora a otra partes de la airoporto en la tempo disturbada, ma la servis de crise ia veni e alga aviones ia es prevenida de enaira.
On ia vide polisiores en la termina, ma la ambiente ia es jeneral calma en la airoporto, an con la disturba.
Ofisiores nederlandes ia descrive la aveni como un situa GRIP-3, representante un problem seria con efetos major a la popla local.
Documentos regulante, publicida par la Departe Federal de Avioni en la SUA, esplica ce pilotes pote usa un codigo spesial de transpondador, tapente 7500, per siniali un alarma sur interfere nonlegal en caso ce la avion es saisida. Lo no es clar esce esta ia aveni en la alarma falsa ier.
La airoporto de Amsterdam es un de la sentros de transporta la plu ativa en Europa, manejante plu ca 70 milion pasajores en cada anio.
@T Un alpaca en un oculeria
@L aora_oji/2019/un_alpaca_en_un_oculeria
====== Un alpaca en un oculeria ======
20 janero 2019
Un alpaca ia confonde e deleta abitores de un vila peti franses par vaga en un boteca de oculos.
La bestia pelosa ia pasa ala un dui de ora, calma regardante la lentes en la vila Hennebont en Bres.
On ia crede inisial ce lo ia evade un sirco prosima, ma la autoriosas ia trova la posesor privata ci ia veni per reprende la animal caprisosa pos un tempo corta.
Empleadas de Les Opticiens Mutualistes en la Rue Nationale ia vide prima la alpaca cuando lo ia vaga a estra en la tarda de matina de venerdi.
"Nos ia vide ce el pasea prosima a la boteca," un empleada ia clari. "El ia para ante la portes automata, cual ia abri, e el ia entra multe cuieta. El ia es tota no atacosa -- el ia segue mera sua desira."
Ante telefoni la autoriosas, la cuatro empleadas ia clui la boteca, temente ce la animal va core a la stradas e causa un asidente.
Pos min ca tredes minutos, la posesor -- ci ia vole resta anonim -- ia ariva per prende la animal. Lo pare ce lo ia vaga de un imobila privata prosima.
La jornal Ouest France ia dona la reporta prima de la aveni, indicante ce la animal ia es un liama. Ma otra jornales ia dise a pos ce en fato lo ia es un alpaca.
Liamas ave oreas longa con forma de banana. Alpacas es min grande e plu pelosa ca sua corespondentes de la Andes.
@T Un astronauta african futur mori en un colide
@L aora_oji/2019/un_astronauta_african_futur_mori_en_un_colide
====== Un astronauta african futur mori en un colide ======
8 julio 2019
Un sudafrican ci ia gania la oportun de deveni la african negra prima en spasio ia mori en un asidente de motosicle ante pote reali sua sonia.
Mandla Maseko, ci ia ave 30 anios, ia es matada a saturdi.
En 2013, esta membro de la Forte de Aira Sudafrican ia vinse milion otra competores per gania un de 23 locas en un academia de spasio en la SUA.
Con la nometas Afronauta e Xico de Spasio, Maseko ia descrive se como un xico tipal de geto de Pretoria.
El ia pasa un semana a la Sentro Spasial Kennedy en Florida, fante probas preparante per un vola suorbital de un ora, orijinal ajendida per 2015.
Maseko ia dise ce el desira fa alga cosa cual va motiva e inspira persones joven en Africa, e demostra ce los pote reali cualce cosa, contra cualce fondo.
El ia dise a la BBC ce el intende telefoni los de spasio: "Me espera ce me ave un frase cual on va usa en anios veninte, como lo de Neil Armstrong."
Acel astronauta esuan, ci ia mori en 2012 a la eda de 82 anios, ia es la person prima ci ia pasea sur la Luna en 1969. Cuando el ia pone sua pede sur la surfas lunal, el ia dise famosa: "Acel es un paso peti per un om, un salta jigante per umanas."
@T Un ataca contra un mascita norsce
@L aora_oji/2019/un_ataca_contra_un_mascita_norsce
====== Un ataca contra un mascita norsce ======
11 agosto 2019
En Noria, un om ia es arestada pos un fusili en un mascita cual ia feri un person ier.
La polisia dise ce un fusilor ia spara en la Sentro Muslim Al-Noor, en la anteurbe de Oslo, la capital.
Plu tarda, on ia trova un fem mor a la casa de la suspetada, relatada a el.
La suspetada ave sirca 20 anios, e es un sitadan norsce de acel rejion. El es aora ance suspetada de mata un relatada.
La polisia dise ce la om ia ata solitar cuando el ia ataca la mascita.
Irfan Mushtaq, dirijor de la mascita, ia informa jornalistes ce la person ferida es un congregor con 75 anios: "Un de nosa membros ia es sparada par un om blanca con elmo e uniforma."
El ia dise ance ce la atacor "ia porta du armas simil a fusiles, e un pistol. El ia rompe un porte de vitro e ia xuta."
La atacor, ci ia porta armur, ia es supresada par persones a la moscita ante la ariva de polisiores.
On ia trova alga armas en la mascita, cual es en la vila Bærum. La mascita ia reali plu modos de securia pos cuando un sparor ia mata 51 persones a du mascitas en Christchurch, Zeland Nova, en la plu temprana de esta anio.
@T Un atleta gania la medalia de oro a 38 anios pos sua debua
@L aora_oji/2019/un_atleta_gania_la_medalia_de_oro_a_38_anios_pos_sua_debua
====== Un atleta gania la medalia de oro a 38 anios pos sua debua ======
7 desembre 2019
Pos un interval de 38 anios, Christina Tham ia susede a la Juas de Asia Sude-Este en la Pilipinas.
El ia representa prima Singapor en esta juas rejional, de stilo Olimpial, con 12 anios en 1981, ganiante la medalia de arjento per nada. Aora, con 50 anios, el ia revade a la juas e ia gania du medalias de oro en hoci suacuan -- un sporte nova per la Juas.
Tham ia comensa nada a la eda de sete anios, cuando sua padre ia usa un canoa sur un lago en un viaja familial a Malaisia. Sua padre, ci ia es en la tarda de sua desenio sinco, no ia pote nada, e cuando el ia cade de la canoa, sua vive ia es salvada sola par sua jaceta inflada.
La padre ia enscrive alora la familia intera per lesones de nada.
Pos sua medalia prima en la rele de 4 × 100 metres, Tham ia gania un plu de arjento en la ranin de 200 metres pos du plu anios. Alora el ia pausa sua viaja como atleta per sirca tre desenios.
El ia fa un carera en la industria legal, deveninte un avocato e ultima la xef de sua propre divide de la departe legal en un compania de imobila.
En 2005 el ia recomensa sua carera de sporte, provocada par un article en un jornal sur hoci suacuan. "Lo ia pare tan interesante e fasinante," el dise, "ce me ia vade per proba lo. Me ia crede ce jua un sporte de ecipo va completi me como un person. Me ia nota un dimension mancante en fa sola sportes solitar tra mea vive intera."
Esta sporte de altia rapida, cual usa un disco pesosa a la fondo de un pisina, ia es ajuntada a la Juas de Asia Sude-Este en esta anio. E donce, a 38 anios pos sua debua, Tham ia retrova se en la Filipinas.
La ecipo de Singapor ia gania ambos medalias de oro, e Tham ia fa du goles: la un en un compete de 4 contra 4, e la otra en 6 contra 6.
El no intende para aora, e previde partisipa en la Juas en Vietnam en 2021. "Me eserse car me ama compete," el dise. "Me ama la intensia e la prosede de ateni e fa la plu cual me pote cuando lo es vera importante."
@T Un avion fini en un rio pos atera
@L aora_oji/2019/un_avion_fini_en_un_rio_pos_atera
====== Un avion fini en un rio pos atera ======
4 maio 2019
Un avion de pasajores ia lisca de sur un atereria en la stato Florida en la SUA, fininte en un rio, pos atera en un tempesta de lampos en la sera tarda de ier.
Nun de la 143 persones en la Boeing 737 ia es grave ferida, ma a la min 20 ia es tratada per feris minor.
La avion nonscemada, operada par Miami Air International, ia vola de la Baia Guantanamo en Cuba a un base militar en la site Jacksonville.
Pasajores dise ce lo ia atera torpe en la tempesta e ia patini a la Rio San Juan prosima.
Un pasajor ia descrive la momento cuando la avion ia lisca de la atereria como "asustante":
"Leteral, la avion ia colpa la tera e ia rebondi. Lo ia es clar ce la pilote no ave la controla completa de la avion, e lo ia rebondi denove. Nos ia es en la acua. Nos no ia pote sabe do nos trova nos, esce en un rio o un mar."
El ia ajunta ce el ia ole la gotea de carburante a en la rio.
@T Un avion militar cade sur casas en Pacistan
@L aora_oji/2019/un_avion_militar_cade_sur_casas_en_pacistan
====== Un avion militar cade sur casas en Pacistan ======
30 julio 2019
En Pacistan, a la min 17 persones ia es matada e 12 ferida cuando un avion militar peti ia cade sur un rejion abital, prosima a la site Rawalpindi.
Sinco ecipores e 12 siviles ia es entre la mores.
La avion ia fa un vola de eserse cuando lo ia cade, ensendente alga casas. Un atestor ia dise ce la avion mesma ia es en flamas ante la cade.
On reporta ce la avion King Air 350, con turboelica, ia fa un verje agu, prosima a la airoporto a do lo ia viaja, ante cade.
Rawalpindi, prosima a la capital Islamabad, conteni la xeferia de la armada pacistani, e la avion ia parteni a la unia de avioni de la armada.
Imajes de la loca mostra construidas negrida e reduida a detrito. Un reportor ia comenta ce fuma asende ancora de la ruina, e ce pesos de la avion es vidable sur un teto.
Alga de la persones ferida ia es rapida ospitalida. La corpos mor ia es prendeda a via per es identifiada.
Pacistan ave un istoria miscada de securia de aviones.
En 2010, un avion operada par un compania privata ia cade prosima a Islamabad, matante tota la 152 persones portada. Acel ia es la desastre la plu matosa en la istoria de Pacistan.
En 2016, un avion de la compania Pacistan Internasional ia ensende subita en un viaja de Pacistan norde a Islamabad, matante plu ca 40 persones.
@T Un avion txilan desapare con 38 persones
@L aora_oji/2019/un_avion_txilan_desapare_con_38_persones
====== Un avion txilan desapare con 38 persones ======
10 desembre 2019
La forte de aira de Txile reporta ce un avion militar portante 38 persones ia desapare en via a Antartica.
La avion C-130 Hercules ia enaira de Punta Arenas a 16:55 de ora local, e operores ia perde la contata con lo pos 18:00.
Los ci manca es la 17 ecipores e la 21 pasajores. Los ia es viajante per furni suporta lojistical a un base militar sur la Isola Re Jorj en Antartica. On ia comensa un mision de xerca e salva.
Eduardo Mosqueira, jeneral de la forte de aira, ia informa jornalistes local ce la avion no ia ativi sua sinial de peril. El ia ajunta ce la avion ia es cisa obligada a atera pos consuma tota sua carburante. La pilote ia es multe esperiosa.
Un declara par la forte de aira ia dise ce la contata con la avion ia es perdeda cuando lo ia pasa ja tra sirca 725 cilometres de sua viaja de 1240 km. Esta indica ce lo ia desapare en la Pasaje Drake.
La Pasaje Drake es un corpo de acua cual lia la Atlantica Sude e la Pasifica Sude, e es conoseda per un risca de clima perilosa. Ma la forte de aira ia dise ce la clima local ia es bon a la tempo de la desapare.
Presidente Sebastián Piñera ia tuita ce el es "angusada" par la perde, e ce el monitori la situa, en la capital Santiago.
Txile controla plu ca 1,2 milion cilometres cuadrida de teritorio antartica, bordante tera reclamada par Arjentina e la Rena Unida. En esta teritorio lo opera nove bases, un cuantia plu grande ca cualce otra pais de mundo.
@T Un balsa vasta de pomis flota sur la Mar Pasifica
@L aora_oji/2019/un_balsa_vasta_de_pomis_flota_sur_la_mar_pasifica
====== Un balsa vasta de pomis flota sur la Mar Pasifica ======
26 agosto 2019
Un "balsa" enorme de rocas volcanal vaga tra la Mar Pasifica, covrente plu ca 150 cilometres cuadrida. La campo de pomis ave la mesma area como 20 mil campos de futbal.
Espertas dise ce la masa ia veni probable de un volcan suacuan, prosima a Tonga, cual ia eruta sirca 7 agosto, seguente imajes de satelite.
On ia averti marinores a resta a via de la peril posible.
Pomis es un roca lejera e bolosa cual pote flota en acua. Lo es produida cuando magma fri rapida. Lo es plu probable ce un balsa grande de lo va formi si un volcan es situada en acuas min profonda.
Un duple australian navigante sua catamaran en dirije a Fiji ia reporta prima la pomis, en la plu temprana de esta mense, pos entra sin intende a la campo de detrito a note.
"La ondas ia es reduida a cuasi calma e la barco ia es lentida a un milia maral per ora," Michael Hoult e Larissa Brill ia scrive enlinia a des dias ante aora. "La strato de detrito ia continua a tan distante como nos ia pote vide con la lus de luna e nosa lampa de punto."
Los ia deveni tempora trapida cuando rocas ia fisa sua timon, ma los ia susede trova un via a estra la campo.
Los ia envia samples de la pomis, con grandias diversa entre un bilia e un bal de bascetbal, a rexercores en la Universia de Tecnolojia de Queensland, Australia.
Probable la pomis va deveni un abitada per viventes maral en cuando lo flota sur corentes a traversa de la Mar Pasifica.
Si lo ta ateni Australia, esta ta pote aida la Parador Grande de Coral, cual es aora danada. Sua capasia de rejenera coral ia colasa pos avenis de blanci sin presedente en 2016 e 2017.
@T Un bande tai repenti pos porta un simbol nazi
@L aora_oji/2019/un_bande_tai_repenti_pos_porta_un_simbol_nazi
====== Un bande tai repenti pos porta un simbol nazi ======
28 janero 2019
Un de la bandes pop la plu popular en Tai ia espresa sua repenti pos la porta de un camiseta con suastica nazi par un de sua membros en un pratica televisada.
Fotos de Pichayapa "Namsai" Natha, cantor de BNK48, vestida en la camisa ia sperde virusin en la fini de semana, provocante un espresa de "xoca e angusa" par la ambasada israeli.
La dirijor xef de BNK48 e ia cantor, ci ave 19 anios, ia encontra la ambasador israeli e ia demanda per pardona. Multe tais dise ce los no conose la istoria de la nazis en la Gera Mundal Du.
Pos fotos de la pratica, Smadar Shapira, visambasador de Israel a Tai, ia comenta: "La presenta de simboles nazi par la cantor de la bande ia turba miliones de persones tra la mundo, de ci sua relatadas ia es matada par la nazis."
Enlinia, on ia critica la bande, ma alga fanes ia clari ce ance los no ia comprende la sinifia de simboles nazi.
En un declara formal, BNK48 ia dise ce la "veste cual ia inclui un primida nonconveninte" ia "causa angusa e turba a persones afetada par la aveni pasada sur la crimin contra umanas tra la mundo intera". Lo ia dise ce la bande va "fa tota posible per serti ce un tal situa va aveni nunca denova".
Entretempo, Namsai ia espresa sua repenti a un conserta a saturdi, e, en un declara, ia dise ance ce el va labora forte per deveni plu bon informada.
La bande ia acorda partisipa en un seminar sur la Olocausto per aumenta la consensia, Shapira ia dise en Twitter.
@T Un barco de refujadas inversa se prosima a Tunis
@L aora_oji/2019/un_barco_de_refujadas_inversa_se_prosima_a_tunis
====== Un barco de refujadas inversa se prosima a Tunis ======
11 maio 2019
A la min 65 migrores ia mori cuando sua barco ia inversa se en la Mar Mediteraneo, prosima a la costa de Tunis. 16 persones ia es salvada.
La barco ia parti de Zuwara en Libia a jovedi e ia encontra problemes entre ondas forte.
Statisticas de la departe de la Nasiones Unida sur refujadas mostra ce sirca 164 persones ia mori en via de Libia e Europa en la cuatro menses prima de esta anio.
On crede ce la aveni presente es un de la ruinas de barco la plu matante en la anio asta aora.
La survivores ia es traeda a la costa par la marina tunisi, e los espeta la permete de desembarca. Un person ia es ospitalida per trata medical.
La marina ia envia un barcon direta cuando lo ia es informada sur la aveni. Lo ia encontra un barco de pexa cual ia es coliente la survivores.
On comprende ce la pasajores ia veni de Africa susaharan.
@T Un barco de turistes inversa en Budapest
@L aora_oji/2019/un_barco_de_turistes_inversa_en_budapest
====== Un barco de turistes inversa en Budapest ======
30 maio 2019
Sete turistes de Corea Sude ia mori, e a la min 19 otras manca, pos la inversa de un barco sur la rio Danubio en Budapest, la capital de Magiar.
Tredes turistes e tre gidores de turi, como ance du ecipores magiar, ia es sur la barco cuando lo ia es colpada par un otra barco a sirca 22:00 de ora local ier.
On ia salva sete persones e un opera grande de xerca continua sur la rio, cual es inflada par multe pluve. La pluve ia crea corentes forte sur la Danubio.
La barco, cual ia afonda prosima a la construida de parlamento, ia es nomida la Hableány ("Fe de mar"). Lo ia ave du niveles e ia pote porta 45 persones en turis de atraes. Lo ia es liada cuando la asidente ia aveni.
La ministreria de esternas de Corea Sude ia confirma ia moris e la mancas. Lo ia dise ce la governa va envia un ecipo de ofisiores a Magiar, ajuntante ce la familias de la vitimes va dispone conselas.
A un confere jornaliste en Seoul, la capital de Corea Sude, un portavose per Lee Sang-moo, la ajenteria de viaja cual ia organiza la turi de la grupo, ia dise ce a la min un enfante es entre la persones mancante.
Un portavose per la servis de crise en Magiar ia dise ce la sete persones tirada de la acua ia es prendeda a ospital con ipotermia e sintomes de xoca.
La labora de salvores ia continua tra la note e en esta matina, usante barcos, sumerjores, radar e lampas de punto per esplora alga cilometres de la rio su la loca de la asidente.
On ia descovre la ruina de la Hableány sur la fondo de rio, pos xerca tra alga oras prosima a la ponte Margit. Con la pasa de tempo, la corentes forte va porta persones a plu distante, reduinte la probablia de trova survivores.
On ia para la trafica de barcos sur la Danubio a sude de Budapest.
@T Un bomba a un santeria major en Pacistan
@L aora_oji/2019/un_bomba_a_un_santeria_major_en_pacistan
====== Un bomba a un santeria major en Pacistan ======
8 maio 2019
A la min sinco persones ia es matada en un esplode estra un santeria sufi major en la site Lahore en Pacistan. On teme ce multe es ferida, incluinte alga polisiores.
La esplode ia pare es dirijeda contra un veculo de polisia. Lo ia aveni prosima a Data Darbar, un de la santerias muslim la plu vea en Asia sude.
Asta aora, no organiza ia dise ce lo ia reali la ataca, cual ia aveni cuando la majoria muslim en Pacistan onora la mense santa Ramadan.
Un opera de securia continua en la rejion, con multe polisiores a la loca de la esplode.
La ministro xef Imran Khan ia denunsia forte la ataca, e ia urje autoriosas a furni aida medical tan bon como posible a la persones ferida.
La santeria Data Darbar es locada en la parte vea de Lahore, la site du de la plu grandes en Pacistan. Lo es visitada par sentos de miles de persones en cada anio.
Sufisme es un forma de misticisme cual esiste tra la mundo muslim, incluinte e sunis e xias. Sua seguores en Pacistan ia es atacada par combatosas en la pasada.
En 2010, desuples de persones ia es matada par du bombas umana a Data Darbar. Pos la mata de 141 persones en un ataca contra un scola en Peshawar en 2014, Pacistan ia atenta responde sever a estremistes.
Ma an si la securia es aora plu bon, la pais ave ancora un problem de organizas militariste. En 2016, a la min 72 persones ia mori en Lahore en un bombi contra cristianes a la soldi de pascua.
@T Un bus cade a en un canion en Barat
@L aora_oji/2019/un_bus_cade_a_en_un_canion_en_barat
====== Un bus cade a en un canion en Barat ======
21 junio 2019
A la min 44 persones ia es matada en Barat cuando un bus ia cade a en un canion.
Deses de persones ia es ferida en la asidente ier en la distrito Kullu de Himachal Pradesh, un stato montaniosa en la norde de la pais.
Narendra Modi, ministro xef de Barat, ia tuita ce el es "profonda tristida".
La bus ia porta 60 persones, cisa plu, cuando lo ia verje de la via. Alga pasajores ia viaja sur la teto de la veculo. Lo ia devia a un curva agu e presipe, ante cade en un vale profonda e magra.
Ofisiores ia dise inisial ce 25 persones ia es matada, ma plu tarda la cuantia ia es revisada car 19 plu ia mori par sua feris. Multe de la vitimes ia es femes e enfantes reveninte de labora e scola.
Imajes de la loca mostra la bus craseda a lado de un rio peti, e un cadena de bonvolores aidante la survivores.
Asidentes de trafica aveni frecuente en Barat: la stato Himachal Pradesh ia rejistra plu ca 30 mil entre 2009 e 2018. Ala, plu ca 11 mil persones ia mori e sirca 54 mil ia es ferida en acel periodo.
@T Un camiseta de Versace crea coleria en Xina
@L aora_oji/2019/un_camiseta_de_versace_crea_coleria_en_xina
====== Un camiseta de Versace crea coleria en Xina ======
12 agosto 2019
La marca lusosa Versace ia demanda per pardona car un imaje sur un de sua camisas T ia pare implica ce Hongkong e Macau es teritorios autonom.
Pos critica ferose par redes sosial en Xina, Versace ia dise ce lo ia era, e ia sesa vende la vestes.
La camisetas, de cual on ia distribui imajes en redes sosial, ia presenta duples de site e pais, como Milano--Italia e London--Rena Unida. Los ia inclui ance Hongkong--Hongkong e Macau--Macau.
Xina deveni sempre plu sever en controla como companias stranjer descrive Hongkong, cual es un parte de Xina ma con grado spesial, ofrente plu autonomia a sua popla ca on trova sur la tera xef.
Macau es un rejion manejal spesial de Xina.
En un posta a Weibo, la marca de moda italian ia dise ce lo ia sese vende la camisetas a 24 julio, e ia destrui los.
"Nos demanda per pardona per la disputa. Nos ama Xina e respeta la domina de la stato teritorial de Xina," un tradui ia dise.
La dirijor artal de la compania, Donatella Versace, ia publici un regrete simil.
"Nunca me ia desira desrespeta la domina nasional de Xina, e per esta razona me desira solisita personal un pardona per tal nonesatia e per cualce angusa cual lo ia causa cisa," el ia dise en sua conta de Instagram.
La situa ia fa ance ce Yang Mi, un ator popular en Xina e la ambasador de Versace en la pais, sutrae sua lias a la marca.
"La unia e domina teritorial de Xina es santa e nonviolable a tota tempos," un declara de sua studio ia dise.
La eticeta #YangMiStopsWorkingWithVersace ("#YangMiSesaLaboraConVersace") ia ave 860 milion regardas en Weibo a esta matina.
Versace es la compania stranjer la plu resente cual ia fronti un reata par consumores en Xina pos no segue la reclamas teritorial de la pais.
La situa ia deveni plu asentuada par menses de protestas prodemocratial en Hongkong.
En la anio pasada, Gap, compania esuan, ia demanda per pardona pos vende camisas T cual ia mostra "un mapa noncoreta" de Xina. La desinia ia mostra sola la tera xef e no la otra teritorios reclamada par Xina, como Taiuan.
Beijing judi ce Taiuan, cual governa se, es un provinse renegada.
Alga otra companias, incluinte Marriott e Delta Airlines, ia publici demandas per pardona simil en 2018, cuando informas en sua pajerias de rede ia pare contradise la reclamas teritorial de Xina.
@T Un canabor trova un tigre en un casa abandonada
@L aora_oji/2019/un_canabor_trova_un_tigre_en_un_casa_abandonada
====== Un canabor trova un tigre en un casa abandonada ======
13 febrero 2019
Un person ci ia entra a un casa abandonada en Texas, per fumi canaba, ia trova ala un tigre descurada.
Polisiores en Houston ia dise ce cuando la person ia telefoni a lundi per reporta lo cual el ia vide, los ia suposa ce la person alusina.
Ma cuando los ia ariva a la loca, on ia ave vera un tigre grande, securida en un caje peti en la garaje. Alga pacos de carne ia sta en la prosima, ma no otra cosa ia indica ce cualcun abita la casa.
Aora, polisiores va investiga como la tigre ia veni ala.
Los ia dise ce la "sitadan consernada" ci ia descovre la tigre no abita en la casa, e ia atenta entra mera afin el pote usa canaba. Los ia demanda esce el esperia la efetos de drogas o esce el ia vide vera un tigre.
La polisia ia descrive la caje como "inferior", ajuntante ce lo ia es securida con un turnavise e un banda de nilon.
An si la tigre ia es relativa calma per un bestia en sua situa, on ia debe aplica un calminte a lo afin ofisiores de salva ia pote move lo de la casa sin peril.
La tigre es aora en via a un conserveria de animales en Texas, de cual on no ia revela publica sua loca esata.
Tigres es nativa a Asia sude e sude-este, e a la este estrema de Rusia. Los es perilida. La Funda Mundal de Natur (WWF) estima ce min ca cuatro mil resta savaje.
@T Un catedral e mascita nova abri en Qahira
@L aora_oji/2019/un_catedral_e_mascita_nova_abri_en_qahira
====== Un catedral e mascita nova abri en Qahira ======
7 janero 2019
Presidente Abdul Fattah al-Sisi ia inaugura la catedral la plu grande de Misre, en la capital nova (e ancora nonomida) a este de Qahira. La inaugura ia aveni a la dia pos la esplode de un bomba prosima a un eglesa copta.
La Catedral de Natal, nova construida, ia esperia sua misa prima su securia forte a soldi, la dia ante la natal copta.
A saturdi, un polisior ia mori en atenta desativi un aparato esplodente cual ia es ascondeda sur un teto en Site Nasr, ance a este de Qahira.
Coptas composa sirca 10% de la popla de Misre, de ci la plu es muslim. Multe coptas dise ce la governa es prejudosa contra los e no ofre protejes sufisinte.
Sisi, ci declara se como un defendor de cristianes contra estremistes, ia informa adorores ce la abri simultan de la catedral e la mascita major Al-Fattah Al-Aleem porta un mesaje de unia.
"Nos es un e nos va resta un," Sisi ia dise en abri la catedral, referente a cristianes e muslimes misri.
Pape Fransisco ia envia sua salutas a Pape Tawadros 2 de Alexandria, la xef de la eglesa coptica, ci ia fa ance un misa de medianote ier.
La mascita, ance nova construida, va pote conteni cuasi duple tan multe persones como la catedral. Ambos es situada en la rejion developada cual va deveni la capital nova de la pais.
@T Un comediste inaugurada como presidente de Ucraina
@L aora_oji/2019/un_comediste_inaugurada_como_presidente_de_ucraina
====== Un comediste inaugurada como presidente de Ucraina ======
20 maio 2019
La comediste ucrainsce Volodymyr Zelensky va deveni formal la presidente nova de sua pais en un rituo oji en la capital Ciiv.
Zelensky, ci ave no esperia political presedente, ia gania un vinse vasta en la eleje en la mense pasada. El ia despone Petro Poroshenko, ci ia ocupa la posto de 2014.
El ia promete ataca la froda e pone un fini a la gera contra rebelores de suporta rusce en la este.
On no sabe cual temas el va presenta en sua parla prima como presidente. La ator pasada de televisa ia fa poca dises publica pos sua vinse a 21 april.
Multe disputas political ia aveni sur la tempo de la inaugura. Zelensky ia desira fa lo a soldi, un dia de lamenta per vitimes de represa en la eda de Stalin. Ma la parlamento ia desacorda e ia vota per la matina de lundi.
Zelensky ia es la stela de Servor de la Popla, un drama satira de multe episodios, en cual sua carater deveni la presidente de Ucraina sin intende. La carater es un ensenior per ci la popla vota cuando sua arenga blasfemante contra la froda sperde virusin en redes sosial.
Per aspira la presidentia vera, Zelensky ia crea un partito political con la mesma nom como la drama. Sua campania ia asentua sua difere de la otra posibles, en loca de cualce ideas concreta de politica. An tal, el ia vinse inondante con plu ca 70% de votas.
Zelensky va fronti alga problemes grave pos ariva en la posto.
La batalia contra la froda profonda en Ucraina ia es un tema major de sua campania. En la mense pasada, sua aidores ia anunsia un projeta per sutrae la imunia de parlamentores contra litiga e per aumenta la vidablia de compras militar.
Ma la defia la plu grande per la xef nova es cisa la gera continuante en la este contra soldatos suportada par Rusia. Ante sua eleje, Zelensky ia dise ce el vole "renovi relatas" con Ucraina este e comensa "un gera potiosa de informa per fini la disputa".
Sirca 13 mil persones ia mori en combate en la rejion pos cuando Rusia ia propri la penisola ucrainsce Crim en 2014.
On ia nota indicas ce Vladimir Putin, presidente de Rusia, va defia la comensor political. Per esemplo, corta pos la eleje, Putin ia fasili la oteni de pasaportos rusce par abitores de la teritorios separadiste de Ucraina este.
En un posta respondente en Facebook, la ecipo de Zelensky ia descrive Rusia como "un stato atacosa cual gera contra Ucraina". Lo ia urje la comunia internasional a furni "un presa diplomata e la presa de punis political".
@T Un compleso nucleal flotante comensa viaja tra la Artica
@L aora_oji/2019/un_compleso_nucleal_flotante_comensa_viaja_tra_la_artica
====== Un compleso nucleal flotante comensa viaja tra la Artica ======
24 agosto 2019
Rusia ia abri un via nova par lansa un compleso eletrical nucleal flotante. Lo viaja longo 5000 cilometres, de Murmansc, porto artica, asta Txucotca en la oriente.
La departe nucleal Rosenergoatom dise ce la movablia de la Akademik Lomonosov va boni la furni de eletrica a rejiones distante. Un de sua goles es furni potia a la minerias Txaun-Bilibin en Txucotca.
Greenpeace regarda la projeta como multe riscosa en un ambiente de clima sever. Oposores refere a asidentes nucleal presedente en la pais e averti ce la mision grandi la risca de contamina la Artica, un rejion distante, poca poplada, e sin capasia de relimpi se.
La lansa segue a sola du semanas pos la esplode de un motor de enerjia nucleal a un esperimenteria de la marina rusce en la Artica, matante sinco injeniores e relasante radia, an si la desastre de 1986 a Txernobil ia es multe plu mal.
La carburante usada e estrema radioativa de la compleso flotante va es retenida sur la barcon. Otra barcones con desinia simil va segue per servi locas distante.
On intende ce la Akademik Lomonosov va furni eletrica ance a plataformas costal de petrolio en la Artica rusce. Un plu idea es lia lo a un compleso de desali, per produi acua fresca con espera ce isolas ta benefica de tal tecnolojia en la futur.
La Via de Mares Norde lia Rusia european con portos en Asie este. Lo deveni navigable tra periodos plu longa, car la caldi global redui la cuantia de jelo pacida.
Tre barcos tirante va gida la compleso nucleal a Pevec, do on previde ce lo va ariva en la tarda de setembre. En bon clima, lo viaja a 7--9 cilometres per ora.
La Lomonosov ia es construida en San Peterburg. Lo ave du reatadores nucleal de la tipo usada en rompejelos rusce. Los ave un capasia combinada de 80 megavates, e on reporta ce los es secur contra tsunamis.
Rusia dise ce la compleso va es capas de lumina e caldi un vila de sirca 100 mil abitores. Sirca 70 persones va composa sua ecipo. Lo ave 140 metres de longia, 30 metres de largia, e on previde ce lo va funsiona per 40 anios.
De 1968 a 1976, la armada de la SUA ia usa un compleso nucleal flotante a la Canal Panama. Lo ia es convertida de un barcon de carga de la Gera Mundal Du. Plu tarda, lo ia es retirada de servi.
@T Un contrabandor finje un frontera entre Rusia e Suomi
@L aora_oji/2019/un_contrabandor_finje_un_frontera_entre_rusia_e_suomi
====== Un contrabandor finje un frontera entre Rusia e Suomi ======
5 desembre 2019
On ia aresta un om en Rusia ci ia erije puntos de frontera falsa per engana cuatro laborores migrante a crede ce los entra a Suomi.
Cuando los ia pasa tra sua frontera, la contrabandor ia lasa ce la grupo vaga solitar, pensante ce los es aora en un pais de la Uni European, ma vera esente en un foresta pantanosa en Vyborg.
Pos alga tempo, la cuatro omes de Asia sude ia trova gardores de la frontera vera, ci ia informa los ce los es ancora en Rusia. La contrabandor falsa ia fa ce cada de los paia plu ca des mil euros.
On ia deteni tota sinco omes a 28 novembre. Ier, un corte en San Peterburg ia multa la cuatro migrores e ia comanda sua deporta.
La contrabandor fasa la acusa plu sever de froda. On ia deteni el ante sua litiga. Ofisiores no ia spesifa de cual pais la omes ia veni orijinal.
Un video postada a redes sosial rusce pare mostra la aresta de la omes. On vide los stante en la oscur entre abetos, levante sua manos cuando patruliores de la Servi Federal de Securia de la Federa Rusce dirije sua lampas a los.
@T Un desreli sur un via ondante en Mexico
@L aora_oji/2019/un_desreli_sur_un_via_ondante_en_mexico
====== Un desreli sur un via ondante en Mexico ======
29 setembre 2019
A la min du persones ia mori cuando un vagon de via ondante ia desreli se en la Site Mexico ier.
Du plu persones ia es ferida en la asidente a La Feria Chapultepec, un parce de divertis. Atestores dise ce la vitimes ia cade de la vagon final de la tren Chimera.
Corta pos la aveni, on ia clui la parce popular, e la autoriosas investiga aora la causa de la desreli. La investiga va esplora cual ia aveni e ci es culpable.
Un atestor ia dise ce la turi, cual ia completi ja sua pasa tra alga anelos, ia ave no cualia estracomun, asta cuando el ia vide la cade de la vagon final.
La feria dise ce lo "regrete profonda la asidente xocante" e ce lo investiga a lado de la autoriosas pertinente. Lo ia promete ance comparti detalias de la investiga cuando los emerji.
Videos de la sena mostra paramedicistes ci atende la persones ferida, e polisiores ci dirije oservores a via de la parce cluida.
@T Un distrito istorial de Dhaka desapare en flamas
@L aora_oji/2019/un_distrito_istorial_de_dhaka_desapare_en_flamas
====== Un distrito istorial de Dhaka desapare en flamas ======
21 febrero 2019
Un focon rapida ia mata a la min 78 persones en un distrito vea de Dhaka, la capital de Bangladex.
En la note de ier, un construida abital ia ensende, conteninte un beneria de cimicales flamable a la nivel de tera. La flamas ia sperde a construidas visina en tempo corta.
La distrito Chawkbazar ave sentos de anios, stradas multe streta, e abiterias a distantias pico de lunlotra. Pompores ia es impedida par la ruetas streta e la manca de fontes de acua.
La arde ia es aumentada par silindres de gas en camionetas en la rejion.
Vitimes ia inclui persones estra la construidas, alga clientes de un restorante, e membros de la grupo acompaniante un sposa futur.
Multe persones ia es trapida en la construidas. Un om, de ci sua boteca ia es destruida par la flamas, ia survive car el ia parti per vade a un farmasia.
Esta no es la ves prima de un focon ruinante en Dhaka. En junio 2010, un arde en la distrito Nimtali ia mata 124 persones, gravida par la presentia de un beneria nonlegal de cimicales.
A pos, un comite ia sujesta la sutrae de tota cimicalerias de zonas abital, e criticores ia cexa ce esta idea no ia deveni realida.
An tal, a sola un semana ante aora, la autoriosas ia anunsia un campania per identifia comersias nonlegal de cimicales en la parte vea de Dhaka. Campanias simil en la pasada no ia susede multe.
Bangladex ave ance un problem persistente de desobedi regulas de securia. En 2013, plu ca mil sento persones ia mori e miles plu ia es ferida cuando un construida grande, conteninte fabricerias de vestes, ia colasa en Dhaka.
@T Un dotor nederlandes es litigada en un caso de eutanasia
@L aora_oji/2019/un_dotor_nederlandes_es_litigada_en_un_caso_de_eutanasia
====== Un dotor nederlandes es litigada en un caso de eutanasia ======
27 agosto 2019
Un dotor nederlandes ia apare en corte pos eutanasia un pasiente ci ia sufri de dementia grave.
Avocatos acusante dise ce la dotor no ia fa sufisinte per serti la acorda. Esta es la caso prima de sua spesie pos la legali de eutanasia en Nederland en 2002.
La pasiente de 74 anios ia sufri de la maladia Alzheimer cuando el ia mori en 2016. On alega ce la dotor ia dona prima un calminte a la fem e ia demanda ce sua familia restrinje el per permete ce el dona la droga matante.
Acusores dise ce la pasiente ia mostra resiste en la prosede. La dotor, ci on no ia nomi, dise ce el ia condui cauta.
La acusores no desira un condena de prisoni per la dotor fema jubilada, ma los vole clari como la lege de eutanasia pertine a pasientes con dementia. Familianes de la pasiente suporta la dotor.
Nederland ia es la pais prima de mundo cual ia legali eutanasia, ma lo es permeteda sola su regulas sever definida par lege.
Pos reseta sua diagnose de maladia Alzheimer a cuatro anios ante sua mori, la pasiente ia scrive un declara formal, disente ce el desira es eutanasiada ante entra a cualce ospisio. Ma el ia ajunta: "Me vole pote deside [mea tempo de mori] cuando me ave ancora un mente clar e cuando me crede ce la tempo conveni."
Ante cuando on ia prende el a ospicio, un dotor ia deside ce on debe fa un suiside aidada, a funda de sua declara plu temprana. Esta ia es nondependente confirmada par du otra dotores.
Cuando la dia ia veni per fini la vive de la fem, un droga calminte ia es poneda a sua cafe e el ia perde consensia. Ma el ia velia a pos, e ia debe es restrinjeda par sua fia e sposo afin on ta fini la prosede.
A la sentro de la caso es la demanda sur la capasia de la fem per acorda fini sua vive, an con sua declara presedente.
Un portavose per la acusores ia dise: "Un demanda esensal de esta caso es per cuanto tempo un dotor debe continua consulta un pasiente con dementia, si en un fase plu temprana la pasiente ia solisita ja eutanasia. Nos no duta la intendes onesta de la dotor."
El ia ajunta ce "un discute plu completa con la pasiente demente" ia ta pote aveni ante la deside de fini sua vive.
Ma la fia de la fem mor ia grasia la dotor. "La dotor ia libri mea madre de la prison mental a cual el ia ariva ultima."
On previde un judi pos du semanas.
@T Un ensende criminal a un compania de anima en Japan
@L aora_oji/2019/un_ensende_criminal_a_un_compania_de_anima_en_japan
====== Un ensende criminal a un compania de anima en Japan ======
18 julio 2019
En Japan, a la min 12 persones ia mori, e desuples ia es ferida, en un ataca suspetada de ensende criminal contra un studio de anima en Kyoto. La loca de 30 persones resta nonconoseda.
La polisia ia dise ce un om ia entra par forsa a la studio de la compania Kyoto Animation en la matina de jovedi, e ia jeta un licuida nonidentifiada.
On ia deteni la suspetada, ci on no ia nomi, e ia ospitali el con feris. La polisia ia trova ance coteles.
La focon ia comensa en la construida de tre niveles sirca 10:30 de ora local en jovedi. On continua ancora la opera de salva.
On reporta ce la om ia dise "cade mor" cuando el ia ensende la construida. Sua relata con la compania no es clar.
Atestores ia descrive un esplode forte, segueda par un enferno cual ia engoli rapide la construida.
Kyoto Animation, conoseda como KyoAni, ia es fundida en 1981. Lo ia produi programes animada popular, incluinte "K-On" e "La Melancolia de Haruhi Suzumiya".
En redes sosial, multe fanes ia espresa sua xoca e ia posta imajes de sua programes favoreda de KyoAni.
Un campania de finansia coletiva, titulida "Aida KyoAni a Sani" ia es ance inisiada, coliente cuasi $30 mil en un ora.
@T Un eruta de morbilio en la Pilipinas
@L aora_oji/2019/un_eruta_de_morbilio_en_la_pilipinas
====== Un eruta de morbilio en la Pilipinas ======
7 febrero 2019
On ia declara un eruta de morbilio, un virus multe comunicable, en Manila, la capital de la Pilipinas.
196 persones ia developa la maladia en la 19 dias prima de janero, en contrasta con mera 20 casos en la mesma periodo de la anio pasada.
On crede ce 50 persones -- de ci la plu ia es enfantes -- ia mori ja par la maladia. Autoriosas dise ce 2,4 milion enfantes nonvasinida es perilida.
La ministro de sania ia averti ce la broncopneumonia causada par complicas de morbilio es capas de mata, e ia urje jenitores a trae sua enfantes per imuni.
Ultra la casos confirmada, la ministreria de sania ia dise ier ce a la min 861 casos suspetada de morbilio ia es reportada a o ante 2 febrero. Oji, la ministreria ia largi sua defini de la area afetada per inclui otra partes de la Pilipinas.
Persones en la pais esita imuni sua enfantes a sentros governal de sania, pos problemes relatada a un vasin contra la maladia denge.
Morbilio es un maladia portada par aira; lo es fasil comunicada par toses e stornuis. La sintomes inisial inclui usual un febre, tose, rinorea (un flue de muco de la nas) e oios inflamada. Un eruta roja apare sur la fas e corpo pos alga dias.
@T Un eruta de volcan mata turistes en Zeland Nova
@L aora_oji/2019/un_eruta_de_volcan_mata_turistes_en_zeland_nova
====== Un eruta de volcan mata turistes en Zeland Nova ======
9 desembre 2019
Un volcan ia eruta en Zeland Nova, lasante sinco persones mor e alga otras en state nonconoseda.
On ia vide turistes paseante en la crater de White Island a momentos ante la eruta.
La polisia dise ce 23 persones es ja salvada, ma avisa ce la ambiente impedi la labora. La militar zelandes aida la polisia aora. Un de sua aviones ia esamina la isola de supra, e du elicotores es preparada per aida.
White Island, ance nomida Whakaari, es un de la volcanes la plu ativa de la pais. An tal, la isola privata poseseda es un destina de turisme, e turis e volas es frecuente disponada per esplora lo.
Un flue video de la volcan ia mostra un grupo de visitores en la crater ante cuando la imajes ia sesa.
La ministro xef, Jacinda Ardern, ia dise ce on ia ave "un cuantia" de turistes sur o sirca la isola, de Zeland Nova e de otra paises. El ia ajunta ce la polisia ia inisia un opera de xerca e salva, ma la sene cadente difisili la asede a la loca.
Inisial, la polisia ia dise ce on ave sento persones sur o prosima a la isola. Plu tarda, lo ia revisa la cuantia a sincodes.
Alga es pasajores de un barcon de turi a porto en Tauranga, un site costal prosima a la volcan.
A 3 desembre, GeoNet, un servi monitorinte per periles jeolojial, ia averti ce "la volcan es cisa entrante a un periodo cuando ativia erutal es plu probable ca normal", ma lo ia ajunta: "La nivel presente de ativia no crea un peril direta a visitores."
La isola ia esperia alga erutas tra la anios, la plu resente en 2016, ma nun ia es ferida.
@T Un fabriceria nova de telefonetas en Ruanda
@L aora_oji/2019/un_fabriceria_nova_de_telefonetas_en_ruanda
====== Un fabriceria nova de telefonetas en Ruanda ======
9 otobre 2019
En Kigali, la capital de Ruanda, on ia abri la compleso prima en Africa cual fabrica telefonetas de ap.
Fabricada par la compania tecnolojial Mara Group, la telefones Mara X e Mara Z va usa Android, la sistem de opera de Google, e va custa 175 750 frances ruanda (190 dolares esuan) e 120 250 frances ($130).
La compania dirije se a clientes ci desira paia plu per cualia alta.
La plu de telefonetas vendeda en Africa es de companias xines. Los suporta du cartas SIM a la mesma tempo e es plu barata ca la custa projetada par Mara.
Companias asembla telefonetas en Misre, Itiopia, Jazair e Sudafrica, ma los emporta la composantes.
Ashish Thakkar, dirijor xef de Mara Group ia comenta: "Nos es vera la primas ci fa la fabrica. Nos crea la cartas madral, nos crea la sucartas tra la prosede intera. On ave plu ca mil pesos per telefon."
El ia dise ance ce la compleso ia custa 24 milion dolares esuan e es capas de fabrica 1200 telefonetas per dia.
Presidente Paul Kagame ia es presente a la abri de la fabriceria, e ia espresa sua espera ce lo va aumenta la usa de telefonetas en Ruanda.
@T Un fem con bebe es comandada a sorti de la parlamento cenian
@L aora_oji/2019/un_fem_con_bebe_es_comandada_a_sorti_de_la_parlamento_cenian
====== Un fem con bebe es comandada a sorti de la parlamento cenian ======
8 agosto 2019
Parlamentores fema ia sorti de la parlamento de Cenia per suporta un colaboror ci on ia comanda a parti car el ia ave sua bebe con se.
Zuleika Hassan ia dise ce el ia porta sua bebe de sinco menses a labora par causa de un crise de casa, e ce la parlamento no ave un enfanteria.
Longo la regulas, on no permete ce "stranjeres" entra a la salon, incluinte enfantes. Alga parlamentores mas ia descrive la ata de Hassan como vergoniosa.
Christopher Omulele, presidente de la salon, ia comanda ce Hassan sorti e ce el pote reveni sin la bebe. Alga de la parlamentores ia cria e otra ia puxa lunlotra.
Hassan ia urje la parlamento a crea "un atmosfera plu conveninte per familias" si lo desira ce plu femes deveni parlamentores.
"Me ia atenta vera forte no veni con la bebe, ma oji me ia ave un crise. Cual me ia debe fa? Si parlamento ia ave un enfanteria o un beberia, me ta pote pone mea bebe ala," el ia dise.
Moses Cheboi, la vispresidente de parlamento, ia dise en un declara formal ce la compleso ave un sala do madres pote teti sua bebes. Ma madres debe "trae sua enfantor per atende la bebe en la sala en cuando los fa sua debes ofisial".
En 2017, legores cenian ia aseta un lege obligante empleores a construi salas spesial do madres pote teti e revesti sua bebes.
La suportores de Hassan ia condena sua trata, cual ia aveni en la semana internasional de teti. Alga politicistes fema en partes diversa de la mundo ia prende sua bebes a labora.
En 2018, Jacinda Arden, ministro xef de Zeland Nova, ia es la xef internasional prima de mundo ci ia prende sua bebe a la Asembla Jeneral de la Nasiones Unida en York Nova.
@T Un filma satira nazi es premiada en Toronto
@L aora_oji/2019/un_filma_satira_nazi_es_premiada_en_toronto
====== Un filma satira nazi es premiada en Toronto ======
16 setembre 2019
La filma Jojo Rabbit ia gania la Eleje Poplal a la Festa Internasional de Filma en Toronto.
Lo es un satira sur un xico joven en Deutxland en la desenio de 1940 ci descovre ce sua madre asconde un xica iudi en sua casa. La atores xef es Scarlett Johansson e Roman Griffin Davis.
Johansson apare ance en la sucampion prima, Nara de sposia, en cual filma el ave la rol de un madre e ator ci divorsa sua sposo e dirijor de teatro, presentada par Adam Driver.
La sucampion du ia es Parasito, un drama comedial de Corea Sude cual ia gania la premio prima, la Palma de Oro, a la Festa de Filma en Cannes, plu temprana en esta anio.
Par sua vinse, Jojo Rabbit deveni un competor major en la concurso Oscar de 2020, car la Eleje Poplal de Toronto (ance nomida la Premio de Regardores) es un indicante forte per susede en la saison premiante. Libro verde, la vinsor de la anio pasada ia segue par gania la premio per Filma la Plu Bon a la Oscares.
Otra ganiores pasada de la Eleje Poplal inclui Slumdog Millionaire ("Milionor de distrito misera"), La parla de la re, e 12 anios de sclavia, de cual tota ia es declarada como Filma la Plu Bon a la premia Oscar.
Par causa de sua istoria de predise susedes, la Eleje Poplal ia deveni un de la premios la plu influosa de la saison premiante. Lo es desideda par votas enlinia par la popla a la festa, an si la organizores no revela esata como los calcula la resulta.
Los dise ce los considera la proportio de la cuantia intera de regardores de un filma ci vota per lo, e ce los serti la validia de la prosede par lia la votas a adirijes IP e la adirijes de eposta de la votores a la adirijes usada per compra biletas. An tal, alga persones paia per sua biletas con mone fisical, sin usa un adirije de eposta.
Un portavose per la festa ia dise: "Nosa regardores es importante per nos, e nos vole trova de tota nosa interatores sua opinas sur nosa filmas. Ma votas cual nos pote serti va partisipa plu forte en la calcula final."
Jojo Rabbit es dirijeda par Taika Waititi, ci ia dirije ance Thor: Ragnarok, un filma major de Marvel.
@T Un focon crea un sielo apocalisal supra Hobart
@L aora_oji/2019/un_focon_crea_un_sielo_apocalisal_supra_hobart
====== Un focon crea un sielo apocalisal supra Hobart ======
4 janero 2019
En Australia, un focon savaje, ardente en un rejion nonabitada, ia fa ce la sielo deveni orania e negra supra la site Hobart sur la isola Tasmania.
Nubes de fuma ia covre oji la capital de la stato Tasmania, an con ce la site es situada a sirca 100 cilometres a sude-este de la focon.
La arde en la Savajeria Tasmanian, cual es un area de erita mundal, ia provoca avertis de securia per comunias prosima, ma on ia reporta no feris.
La statos sude de Australia ia esperia oji un caldia estrema. En redes sosial, persones ia descrive la sielo de Hobart como "apocalisal" e "menasante".
La polisia ia dise ce la focon no va ateni Hobart, ma la fuma pote perili persones con problemes respiral. Plu prosima a la flamas, on ia recomenda ce abitores de alga distritos atende forte la avertis e reali scemas de survive.
La focon ia destrui plu ca 8000 ectares pos sua comensa en la semana pasada.
On ia reporta oji focones savaje ance sur la tera xef de Australia. En Melbourne, la site du de la plu grandes de la pais, la temperatur ia esede 42°C.
Plu caldia es prevideda ante la comensa de la torneo Abrida Australian a 14 janero.
@T Un focon de du barcones prosima a Crim
@L aora_oji/2019/un_focon_de_du_barcones_prosima_a_crim
====== Un focon de du barcones prosima a Crim ======
22 janero 2019
A la min des-un persones ia mori en un focon cual ia envolve du barcones de carga tanzanian en la Mar Negra, prosima a la Streta Kerch.
Salvores rusce atenta ateni marores ci ia salta a estra. Des-cuatro persones es salvada asta aora, ma on ia vide tre plu persones lutante en la acua, e on teme ce probable los ia afoca.
Un de la barcones ia es un tancador de gas. La focon ia segue un esplode cual ia ensende la otra barcon. La un ia es en prosede de move carburante a la otra, en acuas neutra.
En la site Kerch en Crim, on prepara aora reseta la vitimes.
La nomes de la du barcones, Venice e Maestro, apare en un lista de la tesoreria SUA como ojetos posible per punis sur transporta de petrolio a Suria.
La Streta Kerch es un foca de tensa entre Rusia e Ucraina. En novembre, gardores de la frontera rusce ia saisi tre barcones de la marina ucrainsce, prosima a esta pasaje cual lia la Mar Negra e la Mar Azov.
Un corte en Rusia ia estende par tre menses la deteni de 24 marinores ucrainsce alora caturada. On acusa los de traversa nonlegal a la teritorio rusce.
Ucraina ia condena la responde par Rusia, negante ce sua barcones ia viole la leges de naviga en la rejion. La streta es prosima a la penisola Crim de Ucraina, cual Rusia ia propri en 2014.
@T Un focon savaje grande en Zeland Nova
@L aora_oji/2019/un_focon_savaje_grande_en_zeland_nova
====== Un focon savaje grande en Zeland Nova ======
10 febrero 2019
Miles de persones es evacuada de un vila en Zeland Nova, en cuando pompores batalia un focon savaje tisada par ventas en la Isola Sude.
La arde, cual ia comensa a ses dias ante aora, prosima a la site Nelson, menasa aora la vila Wakefield.
On ia declara un state de crise, e sirca tre mil persones ia fuji de sua casas en la distrito Tasman.
Ventas forte es prevideda, e on averti ce oji pote es un "punto de peril estrema" per la focon. Jacinda Ardern, la ministro xef, ia dise ce el espera ce "la clima va coopera".
On crede ce esta es la focon savaje la plu grave en Zeland Nova pos 1955.
La parlamentor per Nelson ia dise ce la rejion intera es "flamable como esca" e ce sua 70 mil abitores es "tensada".
Dudes-tre elicotores e du aviones es enviada per combate la arde. On previde pluve a martedi ma ce lo no va cade sur la zona flaminte.
Focones de esta grandia es nonusual per Zeland Nova, e jornalistes local descrive lo como la plu grave de 50 anios.
@T Un focon sever a la stasion de ferovia en Qahira
@L aora_oji/2019/un_focon_sever_a_la_stasion_de_ferovia_en_qahira
====== Un focon sever a la stasion de ferovia en Qahira ======
28 febrero 2019
A la min dudes persones ia es matada e 40 ia es ferida pos cuando un colide de tren ia causa un focon grande a la stasion xef de ferovia en Qahira, capital de Misre.
La tren ia colpa multe rapida un cuxin, prosima a la fini de un plataforma folida a la stasion Ramses en la sentro de la site.
La colide ia esplode la tance de carburante de la tren, ensendente la plataforma e construidas prosima.
On ancora no sabe perce la tren ia colide, ma a sola alga oras plu tarda, la ministro de transporta ia resinia.
Jornales governal ia reporta inisial cuantias plu alta de 25 mores e 50 feridas.
La sistem de ferovias en Misre ave un mal istoria de securia. Multe oservores culpa la manca de investi par un serie de governas e la malmaneja.
@T Un fola min grande fa la prosegue anial en Barcelona
@L aora_oji/2019/un_fola_min_grande_fa_la_prosegue_anial_en_barcelona
====== Un fola min grande fa la prosegue anial en Barcelona ======
12 setembre 2019
Sirca 600 mil persones ia prosegue ier en Barcelona per suporta la autonomi de Catalunia. Esta cuantia de partisipores es entre la plu basas en la oto anios de esta protesta anial.
La Diada es la aniversario de la defeta de la site par fortes espaniol en 1714. On ia fa un prosegue en Barcelona a acel dia en 2012 e cada anio seguente, per suporta ce Catalunia ta deveni nondependente de Espania.
Cuasi milion persones ia es sur la stradas en la mesma marxa en 2018.
En esta anio, la protesta ia aveni a mera alga semanas ante la judi de des-du politicistes separadiste per sua rol en un vota proibida sur autonomia en 2017.
Catalunia ia declara alora sua autonomia, corta pos fa un referendo. A pos, Espania ia declara sua governa direta de la provinse autonom. Fasante acusas de rebela, la politicistes va es cisa condenada a 25 anios en prison.
En la prosegue a mercurdi, miles de persones en camisas azul ia esije la libri de la xefes separadiste.
La plu de la protestas ia es pasosa, ma un grupo de persones ia lansa misiles a polisiores antitumultal en scaramuxas prosima a la parlamento catalan.
Carles Puigdemont, presidente catalan pasada, la fuji de la pais pos la referendo en 2017. El abita aora en Beljia.
Espania ia cansela comandas european per aresta el e sinco de sua aidores en julio, ma la acusas contra el resta ativa, tal ce tota ses va es arestada si los reveni.
@T Un fosil de iena en la Artica canadian
@L aora_oji/2019/un_fosil_de_iena_en_la_artica_canadian
====== Un fosil de iena en la Artica canadian ======
19 junio 2019
Un misterio de 50 anios sur du dentes fosilida ia es solveda par rexerca nova cual sujesta ce ienas ia vaga tra Canada artica a un ves pasada.
Rexercores ia identifia la dentes, trovada en Yukon en la desenio de 1970, como parteninte a ienas de milion anios ante aora. Sua descovre pone lus nova a la evolui de la forajores ferose, e ia es publicida ier en la jornal siensal Open Quaternary ("Cuatronar Abrida").
La du dentes ia es trovada en un mision paleontolojial en la Basin Corvo Vea de Yukon en 1973.
Esplorores nativa labora ja con siensistes per investiga la tresores de la rejion tra plu ca un sentenio, ma entre plu ca 50 mil esemplos colieda, on ia trova sola du cual pote parteni a un iena.
Pos cuasi 50 anios on ia descovre a ci los ia parteni. La dentes ia fini en un esibi a la Museo Canadian de Natur en Ottawa, do Grant Zazula, un paleontolojiste con la governa de Yukon, ia vide los a la ves prima.
Siensistes ia ipotesi tra tempo longa ce los pote parteni a ienas, ma nun ia pote confirma la teoria.
Zazula ia labora con Jack Tseng, un biolojiste evolual con spesialia de ienas a la Universia de Buffalo, e con Lars Werdelin a la Museo Svensce de Istoria Natural.
"Un encontra de menses ia aveni," Zazula ia dise. "Car Jack es tan esperiosa sur fosiles de iena, el ia sabe direta lo cual los es."
Plu esaminas ia determina ce la fosiles ave entre 850 mil e 1,4 milion anios. An si ienas moderna abita xef en Africa, on ia trova fosiles parteninte a ienas antica tan norde como Mongol e tan ueste como Mexico.
Zazula ia comenta ce esta fosiles aida ponti acel distantia grande par confirma la ipotese ce la ienas ia ariva en America Norde de Rusia longo la Streta Bering.
La fosiles sujesta ance ce ienas antica ia vive en manera multe nonsimil de los de oji. "Nos es tan abituada a pensa de ienas abitante locas como Africa, do los core tra la savana. Ma la pensa de los abitante en neva e oscuria de 24 oras en la inverno es intera diferente."
@T Un fuji a refuja per un fem saudi
@L aora_oji/2019/un_fuji_a_refuja_per_un_fem_saudi
====== Un fuji a refuja per un fem saudi ======
9 janero 2019
Un fem saudi ci ia fuji de sua familia e ia refusa sorti de un otel en Bangkok ia es formal asetada como un refujada legal par la Nasiones Unida.
Rahaf Mohammed Al-Qunun, ci ave 18 anios, ia refusa embarca un avion de Bangkok a Cuait a lundi, e ia resta en sua sala de otel de airoporto pos bloci la porte. El ia teme ce sua familia va mata el per sua renunsia de islam.
La departe de refujadas de la NU ia fa ce Australia considera el per relocali posible.
Sua padre e frate ia ariva en Tai ma el refusa encontra los. Ofisiores de migra en Tai ia dise prima ce el debe revade a Cuait, do sua familia espeta.
Ofisiores en Australia ia sujesta ce los va aseta sua apela per refuja.
Al-Qunun ia comparti desuples de corentis direta sur sua caso en redes sosial, atraente la atende internasional.
Renunsia de islam es punable par mori en Arabia Saudi, e la padre de Al-Qunun es la governor de Al-Sulaimi, un vila en Hail, un provinse norde. Grupos campaniante ia espresa multe ansia.
Un portavose per sua familia ia dise ce la familia no vole comenta e ce los desira sola la securia de la fem joven.
A la matina de ier, Al-Qunun ia retuita sua apela orijinal per refuja, solisitante ce Australia, la SUA, Canada o la Rena Unida aseta el.
On reporta ce un diplomata ia saisi sua pasaporto cuando el ia vola a Tai de Cuait a saturdi, intendente viaja plu a Australia. A martedi, Al-Qunun ia dise ce la pasaporto ia es redonada a el.
@T Un funera montanial per un glasia fondeda
@L aora_oji/2019/un_funera_montanial_per_un_glasia_fondeda
====== Un funera montanial per un glasia fondeda ======
23 setembre 2019
En la alpes suiz, on ia fa ier un funera per un glasia perdeda par causa de caldi global.
Deses de persones ia partisipa en un prosegue funeral per onora la desapare de la glasia de Pizol en la Alpes de Glarus en la norde-este de Suiz. La jelo ia diminui a un frato pico de sua grandia orijinal.
Siensistes dise ce la glasia ia perde a la min 80% de sua volum pos 2006, en un tende aselerada par la crese jeneral de temperatur en la mundo.
En cuando lamentores ia asembla en la montania, ativistes joven e xefes de mundo es a la Nasiones Unida en York Nova per discute la responde internasional a la crise de clima.
Ma an con cualce ata cual umanas deside fa aora, un studia par rexercores suiz sujesta ce a la min un dui de la glasias de Suiz va desapare cisa ante la anio 2050.
La glasia de Pizol ia diminui a tal grado ce "de perspetiva siensal, lo es no plu un glasia," un campanior suiz de clima ia dise. Aora reduida a mera alga blocos jelada, la glasia ia es declarada como mor a la rituo.
Abitores montanial, paseores e ambientistes, de ci alga ia porta vestes negra, ia asende la monte per visita la restantes de la glasia, situada a altia de sirca 2700 metres, prosima a la fronteras con Lictenstain e Osteraic.
A la rituo, parlas sombre ia es presentada par un eglesor e par siensistes, e on ia lasa un garlanda per recorda la glasia.
La aveni ia es organizada par la Asosia Suiz per Proteje de Clima, un promove cual recomenda la redui a zero de emetes de diosido de carbono en Suiz ante 2050.
On ia fa un rituo simil en Island en agosto per onora Ok, un glasia de 700 anios cual on ia declara como mor en 2014. Ala, on ia lasa un placa con la testo seguente, scriveda par Andri Snær Magnason:
"Un letera a la futur: Ok es la glasia islansce prima cual perde sua state de glasia. En la 200 anios veninte, on previde ce tota nosa glasias va segue la mesma curso. Esta monumento es per reconose ce nos sabe lo cual aveni e lo cual nos nesesa fa. Sola tu sabe esce nos ia fa lo."
@T Un furgon colide con paseores en Tokyo
@L aora_oji/2019/un_furgon_colide_con_paseores_en_tokyo
====== Un furgon colide con paseores en Tokyo ======
1 janero 2019
En Japan, un furgon peti ia colide con paseores selebrante la anio nova sur un de la stradas la plu famosa de Tokyo.
La om ci ia gida la veculo ia fuji, ma plu tarda la polisia ia aresta el per omiside atentada.
Nove persones ia es ferida -- un a grado grave -- par la ataca en la distrito modosa Harajuku, corta pos medianote. La strada, cual ia es cluida per veculos, ia es plen de persones paseante a un santeria per preas per la anio nova.
La gidor de la furgon ia es identifiada como Kazuhiro Kusakabe, ci ave 21 anios.
La polisia ia dise ce la om ia declara inisial ce el ia fa un ata teroriste, ma plu tarda el ia dise ce sua ata ia pertine a esecutas. Lo no es clar esce el ia refere a un esecuta spesifada o plu jeneral a la puni de mori.
Investigores ia trova un tance de cerosen en la furgon, e on alega ce la atacor ia intende arde sua veculo.
La strada Takeshita en la rejion Shibuya es un area popular de botecas, conoseda per un cultur joven con modas nonusual. Lo atrae ance multe turistes internasional.
@T Un governor nova controversa en Porto Rica
@L aora_oji/2019/un_governor_nova_controversa_en_porto_rica
====== Un governor nova controversa en Porto Rica ======
3 agosto 2019
Un governor nova ia es inaugurada en Porto Rica, traente controversia nova a esta teritorio esuan.
Pedro Pierluisi es la seguor spesial elejeda de Ricardo Rosselló, ci ia resinia entre protestas coletiva sur un parleta esposada en cual el e aidores major ia comparti mesajes ofendente.
Ma la periodo de Pierluisi como governor va es cisa corta, car lo es ancora no validida par la Senato de la isola. Oposores dise ce la asinia es nonconstitual.
En sua parla inaugural ier, Pierluisi ia dise ce el es "intera capas e autorida per ata, ma la Senato va fa sua deside. Si me no va es validida, alora la numero du en linia, la secretor de justia de Porto Rica, va emprende la governoria."
Pierluisi ia dise ce el no intende move a la cason de governor, e va evita fa cambias major asta pos la vota en la semana veninte.
El ia es inaugurada par un judor a 17:00 de ora local a venerdi, la momento ofisial cuando Rosselló ia resinia. Multe ia critica la deside, e Thomas Rivera Schatz, presidente de la Senato, ia descrive lo como "nonetical e nonlegal".
Carmen Yulín Cruz, maior de la capital San Juan, ia dise ce la munisipa va defia la inaugura, e un organiza de avocatos ia acusa el de "diverje" la constitui.
La asinia a venerdi ia aveni en cuando folas ia selebra la cade de Rosselló.
Asemblas coletiva sur strada ia comensa en Porto Rica pos la esposa de mesajetas entre Rosselló e sua ecipo a 13 julio.
Otenida par la Sentro de Jornalisme Investigante de Porto Rica, la mesajes covre 900 pajes. Los ia es estraeda de un parleta grupal cual ia inclui la governor e des-un de sua aidores e consiliores.
La mesajes inclui bromas sur vitimes de Siclon Maria, e comentas sesiste e omofobica.
Inisial, Rosselló ia demanda per pardona, ma ia dise ce el no va resinia sur la scandal. An tal, a 24 julio, el ia anunsia sua resinia en un declara video rejistrada.
"Me senti ce mea continua en esta posto ta difisili la dura de la susede cual me ia ateni," el ia dise alora.
@T Un granada entre patatas a un fabriceria
@L aora_oji/2019/un_granada_entre_patatas_a_un_fabriceria
====== Un granada entre patatas a un fabriceria ======
4 febrero 2019
Un granada deutx de la Gera Mundal Prima ia es trovada en un trae de patatas transportada de Frans a un fabricerias de xipes en Hongkong.
La aparato fangosa, con largia de oto sentimetres, ia es en un state nonstable car lo ia spara se, ma sin detona.
Lo ia es descovreda a un fabriceria en Sai Kung, un distrito este, a la matina de saturdi. La nonpatata ia es detonada ala en modo secur par espertas de bomba, usante un tecnica de acua su presa alta.
On crede ce la granada ia es acaso escavada con patatas plantada en un campo en Frans, ante deveni esportada. Probable lo ia es lasada ala par soldatos en la gera, ci ia lansa lo o ia cade lo sin intende.
En la anio pasada, miles de persones ia debe es evacuada de un area comersial major de Hongkong per permete ce la polisia desativi un bomba multe danada de la Gera Mundal Du, cual on ia descovre en un construeria. Lo ia es la bomba numero du de spesie simil cual on ia trova en Hongkong en acel semana.
@T Un investiga formal sur un alega contra Trump
@L aora_oji/2019/un_investiga_formal_sur_un_alega_contra_trump
====== Un investiga formal sur un alega contra Trump ======
25 setembre 2019
En la SUA, la Partito Democrata ia comensa un investiga formal sur la posiblia de litiga presidente Donald Trump sur la alega ce el ia presa un potiosa stranjer per dana un oposor political.
Nancy Pelosi, la Democrata ci preside la Salon Basa, ia dise ce la presidente "debe es regardada como encargada". Trump ia nega ata noncoreta e ia descrive la atentas como un "xasa de sorsores".
Democratas en la Salon Basa suporta forte ce on ta acusa formal la presidente, ma lo es nonprobable ce la proposa ta susede pasa tra la Senato, cual es controlada par Republicistes.
Si la investiga avansa, la Salon Basa va vota sur cualce acusas e, car la Democratas es de majoria, la vota ta es probable asetada, e Trump ta deveni sola la presidente tre en la istoria de la pais ci on ia litiga.
A ante, Democratas major, incluinte Pelosi, ia resiste recomendas cresente en la partito per comensa la prosede de litiga, ma la xefes de la partito ia uni a la tema pos la controversa sur Ucraina.
La cosa ia comensa cuando un denunsior en la comunia de securia de la SUA ia rejistra un cexa formal sur un o plu telefonis entre Trump e Volodymyr Zelensky, la presidente ucrainsce.
Asta aora, la Casa Blanca ia rejeta solisitas per publici transcrives de la telefonis, ma Democratas dise ce Trump ia menasa suspende la aida militar a Ucraina si Zelensky no ta acorda investiga alegas nonconfirmada de froda contra Joe Biden (la oposor political xef de Trump) e sua fio.
Trump ia confesa ce el ia discute Biden con Zelensky, ma ia nega ce el ia pone presa a la presidente ucrainsce per fa ce el inisia un investiga sur sua oposor.
Sola du presidentes ia es litigada en la istoria de la SUA -- Andrew Johnson en 1868 e Bill Clinton en 1998. En ambos casos, la presidente no ia es desponeda. Richard Nixon ia resinia en agosto de 1974, ante cuando on ia pote litiga el.
@T Un maladia misteriosa a la ambasada canadian en Cuba
@L aora_oji/2019/un_maladia_misteriosa_a_la_ambasada_canadian_en_cuba
====== Un maladia misteriosa a la ambasada canadian en Cuba ======
31 janero 2019
Canada va redui la cuantia de sua empleadas a sua ambasada en Cuba par asta un dui, car un maladia misteriosa ia afeta un plu person ala.
Esaminas medical, pos la reapare de sintomes nonusual en novembre, ia revela la canadian des-cuatro infetada. Empleadas esuan es ance afetada par la maladia, cual causa marea, nausea e un difisil de consentra.
Canada ia rejeta la idea ce un "ataca sonal" es la causa. Esta teoria ia es proposada par la ministreria de esternas SUA en la anio pasada.
Un declara publicida par la departe de esternas canadian ia dise ce "empleadas, sposes e dependentes" a la ambasada es entre la afetadas, e ce tota reseta tratas medical continuante. An si la ambasada va resta abrida, alga servis pote es reduida.
La cuantia de empleadas va cade de sirca 16 a cisa 8.
Canada is retira familias diplomata de Havana en april cuando alga minores ia comensa mostra sintomes. Plu ca milion canadianes visita Cuba en cada anio, ma on ave no indicas ce los es en peril.
Cuba ia nega sua envolve a multe veses. Canada dise ce lo ia labora en "coopera prosima" con Havana de cuando esta problem de sania ia apare prima en 2017.
Diferente de la SUA, Canada ia rompe nunca sua relatas diplomata con Cuba pos la revolui de 1959.
Sintomes simil ia afeta empleadas de ambasadas esuan en Xina. En la anio pasada, un avisa de la ministreria de esternas ia recomenda ce on vijila per sintomes fisical o fenomenos oiada o sensada ma nonesplicada."
Ma alga siensistes ia proposa un otra teoria -- la ruido de insetos. Sua studia sujesta ce un sona rejistrada par empleadas esuan en Cuba es vera no plu ca la canta de Anurogryllus celerinictus, ance nomida la grilo de coda corta de la Indias.
@T Un mesaje en un botela de 50 anios ante aora
@L aora_oji/2019/un_mesaje_en_un_botela_de_50_anios_ante_aora
====== Un mesaje en un botela de 50 anios ante aora ======
19 agosto 2019
Un xerca par un om en Alaska per lenio de foco ia fini con un descovre de spesie diferente: un mesaje de 50 anios en un botela.
Tyler Ivanoff ia trova un letera scriveda en rusce, e ia posta un solisita per un tradui a sua paje de Facebook.
La letera ia es scriveda par un marinor sur la Sulak, un barcon rusce, a 20 junio 1969. Jornalistes rusce ia trasa sua scrivor, Capitan Anatoly Botsanenko.
Ivanoff ia esplica ce el ia xerca lenio a 30 cilometres a ueste de sua vileta Shishmaref cuando el ia descovre la botela. Lo ia ave un tapo plastica.
"Me ia debe tira vera forte. Me ia usa mea dentes per estrae vera lo. La interna ia es ancora seca, e ia odori ancora como vino o simil, alcol vea. La nota ia es seca."
Sua apela ia produi un tradui de la mesaje ancora lejable:
"Salutas sinsera! De la barcon madrin VRXF Sulak de la Marina Rusce de Asia Este. Me saluta tu ci trova la botela, e demanda ce tu responde a la adirije Vladivostok-43 VRXF Sulak a la ecipo intera. Nos desira a tu bon sania e anios longa de vive e viajas felis. 20 junio 1969."
Capitan Botsanenko ave aora 86 anios. Cuando on ia informa el sur la nota, el ia plora de joia. El ia confirma ce la scrive de mano ia es sua.
On reporta ce Botsanenko ia supravide la construi de la Sulak en 1966 e ia viaja sur lo asta 1970.
Ivanoff ia nota en Facebook ce lo es "eselente ce un foto peti ia crese a un raconta", e ia dise ce el considera pone sua propre mesaje en un botela a alga dia.
"Esta es probable un cosa cual me ta pote fa con mea xices en futur. Envia un mesaje en un botela a la mar e vide do la vade."
@T Un militior burundes gida la difusante nasional
@L aora_oji/2019/un_militior_burundes_gida_la_difusante_nasional
====== Un militior burundes gida la difusante nasional ======
15 julio 2019
En Burundi, la xef de un militia acusada de atas odiable ia es elejeda per gida la difusante nasional (RTNB), provocante condenas par organizas suportante diretos umana.
La grupo Human Rights Watch ("Vijila de Diretos Umana") ia dise ce la asinia de Eric Nshimirimana es "un colpa contra tota vitimes de maltrata fada par Imbonerakure, como ance contra la libria jornaliste en Burundi".
On alega ce Imbonerakure, la ala joven de la partito governante, ia mata, viole e ruba ativistes oposante. La governa ia nega la alegas.
Imbonerakure ia es acusada de multe maltratas pos la eruta de violentia cuando presidente Pierre Nkurunziza ia xerca e gania un periodo tre, en un paso controversa, en 2015.
Nkurunziza ia survive un atenta de colpa de stato e protestas coletiva, e deses de miles de persones burundes ia fuji de la violentia.
La Nasiones Unida ia nomi Imbonerakure un militia, un descrive cual la grupo rejeta como insultante.
La governa de Burundi ia nega alegas ce Imbonerakure ia envolve se en maltratas, spesial en la viole sesal coletiva de relatadas fema de ativistes oposante. "Imbonerakure no es un gang de violores," un portavose per la presidente ia dise.
Elejes nova es projetada per la anio veninte. Cambias constitual asetada en 2018 permete ce Nkurunziza aspira denova la posto, ma el ia dise ce el no va fa esta.
@T Un misil cisa lansada de un sumarina par Txoson
@L aora_oji/2019/un_misil_cisa_lansada_de_un_sumarina_par_txoson
====== Un misil cisa lansada de un sumarina par Txoson ======
2 otobre 2019
Lo pare posible ce Corea Norde (Txoson) ia xuta un misil balistical de un sumarina, a mera oras pos cuando Pyongyang ia dise ce lo va recomensa negosias nucleal con la SUA.
Ofisiores de Corea Sude ia dise ce un misil lansada prosima a la porto de Wŏnsan ia vola tra sirca 450 cilometres, ateninte la altia de 910 cilometres. Lo ia cade en la Mar Japan.
Si on confirma lo, esta representa un crese major pos la esperimentas de distantia corta cual la pais ia comensa fa en maio.
Shinzō Abe, ministro xef japanes, ia descrive la aveni como un viole de desides par la Consilio sur Securia de la Nasiones Unida, cual proibi la usa de tecnolojia de misiles balistical par Txoson.
Negosias ia pausa pos la consenta en Hanoi entre Donald Trump e Kim Jong-un en febrero, cual ia fini sin acorda.
La reportas prima ia ariva en la oras temprana de la matina, cuando on ia dise ce du misiles ia es lansada, e ce a la min un ia cade en acuas japanes.
Plu tarda, la secretor xef de consilio de Japan ia dise a un confere jornaliste ce cisa un misil balistical ia divide en du partes ante cade.
Esta ta es la esperimenta des-un sur misiles par Corea Norde en la anio presente, ma autoriosas ia espresa spesial sua consernas sur la distantia e capasia parente de esta.
Txoson ia developa tecnolojia per lansa misiles balistical de sumarinas tra alga tempo ante cuando lo ia sesa tota esperimentas sur misiles de distantia longa.
La Consilio de Securia Nasional de Corea Sude ia espresa sua consernas sur la proba nova, disente ce lo considera seria la posible ce lo ia es lansada par sumarina.
On crede ce la proba la plu resente de un tal misil par Corea Norde ia aveni en agosto 2016, ante la ariva de presidente Trump a sua posto.
A du anios pos acel, Trump e Kim Jong-un ia fa la consenta prima entre la xef de Corea Norde e la presidente corente de la SUA. Ma an pos du plu consentas simil, on ia fa poca progresa en dirije a un acorda sur la capasia nucleal de Txoson.
@T Un moneta roman per la imperor de du menses
@L aora_oji/2019/un_moneta_roman_per_la_imperor_de_du_menses
====== Un moneta roman per la imperor de du menses ======
18 maio 2019
En la contia Cambridgeshire en England este, un moneta roman "noncredable rara", fabricada per onora un imperor maldestinada, ia es trovada en laboras per renovi un via xef.
Lo imaji Ulpio Cornelio Leliano, ci ia rena tra sirca du menses en 269 EC ante deveni matada.
La descovre ia es fada en un escava arceolojial, un parte de un scema per boni un via entre la site Cambridge e la vila Huntingdon.
La moneta mostra Leliano en un corona radiante, e ia es trovada en foso a un cultiveria roman peti. Lo es sola la moneta du de sua spesie cual on ia desentera en England.
Julian Bowsher, un arceolojiste esperta sur monetas, ia comenta: "Imperores roman ia ave un desira grande de fabrica monetas. Leliano ia rena tra sola du menses, cual es apena un tempo sufisinte per la fa. Ce un de esta monetas ia ateni la custas de Britan mostra un capasia notable, e lo es intera probable ce Leliano ia es ja matada cuando esta moneta ia ariva en Cambridgeshire."
La imperor maldestinada ia usurpa la trono e ia governa corta un impero en lo cual es aora Deutxland a Frans. El ia es probable matada par sua propre soldatos.
Dr Steve Sherlock, la arceolojiste xef per la projeta de via, ia dise ce "descovres de esta spesie es noncredable rara".
Un plu moneta nonusual trovada par la escavores veni de la Geras Galo, e ave sola un lado. Lo ia es fabricada en 57 AEC par la tribu ambian en la rejion Somme de Frans moderna. Espertas crede ce lo ia es esportada per aida finansia la resiste par celtas brites contra Julio Cesar.
Escavas per la projeta ia descovre ance la restas de un mamute lanosa de la eda glasial, e atestas de la prepara de bir en sirca 400 AEC. Lo ia desentera ance henjes (monumentos sirculo preistorial), abitadas de la eda de fero, fornones roman, tre viletas anglosason, e un vileta peti medieval.
@T Un monton de turistes nonrespetosa asende Uluru
@L aora_oji/2019/un_monton_de_turistes_nonrespetosa_asende_uluru
====== Un monton de turistes nonrespetosa asende Uluru ======
12 julio 2019
En Australia, turistes a Uluru ia condui controversa par asende la roca santa en cuantias vasta en la menses ante la proibi de esta.
Fotos enlinia mostra filos serpente de persones asendente Uluru.
On critica esta como desrespetante la popla pidjandjadjara orijinal, ci demanda ja tra tempo longa ce turistes no asende.
Abitores local dise ce alga turistes lasa dejetadas e campa nonlegal en la prosima.
A du anios ante aora, la comite de la Parce Nasional Uluṟu-Kata Tjuṯa ia acorda unida fini la posible de asende, par causa de la sinifia spirital de la loca. La proibi va comensa en otobre.
La monolito jigante de arenito roja, istorial conoseda como Ayers Rock, ia esperia un crese de cuantia de visitores pos la anunsia de la deside.
Un oposor ia tuita: "Esce lo es imajinable ce persones ta comensa trepa sur la Monumento Australian de Gera?"
Avisas a la pede de la roca solisita ce persones asteni de asende, como punto de respeta.
La presidente de la comite de la parce ia dise en 2017: "Lo es un loca estrema importante, no un jueria o parce de divertis como Disneyland."
Parks Australia, un divide de la Departe de Ambiente e Enerjia, ia reporta ce la parce ia reseta 70 mil plu visitores en 2018 ca en la anio presedente. La statistica per la menses resente es ancora nondisponable.
@T Un nador fa cuatro traversas de la Manga
@L aora_oji/2019/un_nador_fa_cuatro_traversas_de_la_manga
====== Un nador fa cuatro traversas de la Manga ======
17 setembre 2019
Un fem esuan ia deveni la person prima ci nada a traversa de la Manga a cuatro veses sin pausa. Sarah Thomas, ci ave 37 anios, ia comensa en la oras temprana de soldi e ia fini pos plu ca 54 oras.
Esta nador de ultramaratones en acua abrida ia completi un trata per canser de seno a un anio ante aora. El ia dedica sua nada longa a "tota la survivores".
Thomas ia es puxada par mareas forte en la traversa final, ma ia fini a esta matina a sirca 05:30 de ora universal. El intende dormi per la resta de la dia.
La problem la plu difisil ia es la acua salosa, cual ia dole sua boca e garga. Ma el ia dise: "Mea ecipo ia esele vera en aida me e manteni mea fortia."
En la pasada, sola cuatro nadores ia traversa la Manga a tre veses sin pausa. Ante Thomas, nun ia completi un traversa cuatro. Sua ecipo ia dise ce el "ia usa la nada como sua modo de maneja la trata" (medical).
On ia projeta ce la nada va pasa tra 130 cilometres, ma par causa de la mareas, Thomas ia traversa final un distantia plu prosima a 210.
Un oservor ofisial ia dise: "Lo es un vinse -- el ia proba la limitas de dura. Lo es stonante, intera inspirante. A la fini, nos ia es multe emosiosa."
Thomas ia selebra sua ariva a Dover e sua entra a la libros de recordos con xampania e xocoladas.
A la sera de saturdi, el ia confesa en un posta a Facebook ce el es asustada par la defia: "Me espeta aora esta nada tra plu ca du anios e ia batalia tan multe per ariva asi. Esce me ave 100%? No. Ma me es la plu bon de cual me es capas a esta momento pos lo cual me ia esperia, con plu foco e batalia ca nunca."
@T Un note de violentia a un universia en Hongkong
@L aora_oji/2019/un_note_de_violentia_a_un_universia_en_hongkong
====== Un note de violentia a un universia en Hongkong ======
18 novembre 2019
La polisia ensirca la compleso de un universia en Hongkong pos un note de violentia con sentos de protestores a interna.
Desuples de persones ia atenta sorti pos la leva de sol, ma ia reentra cuando la polisia ia xuta gas lacrimojen e baletas de cauxo. La polisia ia dise ce los ia usa la gas car "un grupo grande de tumultores mascida ia ataca subita".
En la posmedia, un plu grupo de protestores ia atenta core de la compleso, ma multe ia es arestada. Los ia atenta usa un tunel per sorti de la Universia Politecnical, ma cuando la polisia ia xuta gas lacrimojen, alga ia es detenida. Otras ia revade a la compleso.
A ante, polisiores ia dise ce protestores pote sorti de la compleso longo un ponte spesifada, ma ia insiste ce los cade sua armas e desapone sua mascas de gas.
Ma un legor prodemocratial en la compleso, Ted Hui, ia reporta ce la ponte es ja tapida, e ce esta no es un modo posible de sorti.
Hui ia dise ce sirca mil persones, de ci multe es ancora studiantes, es ancora en la compleso. El ia ajunta ce multe es ferida e sin asede a servis medical, e ia descrive la situa como grave.
Protestores ocupa ja la compleso tra dias, entre la grandi continuante de la protestas violente en Hongkong per esije un democratia completa.
Plu temprana, la xef de la universia ia envia un video a protestores per anunsia un acorda con la polisia. Si la protestores sorti pasosa, el ia dise ce el va "acompania personal" los a la ofisia de polisia, do el va "serti ce vosa caso es justa tratada".
Entretempo, un corte en Hongkong veni de judi ce la lege contra mascas es nonconstitual. En otobre, la governa ia ativi un lege de crise de la eda colonial per deslegali la masci de la fas. Ma la protestores ia iniora jeneral esta e ia continua covre sua fas per asconde sua identia.
En un declara ier, la universia ia dise ce la compleso es "grave e estendosa vandalida".
En la note, protestores ia lansa bombas de gasolina e brices a la polisia, e ia xuta an flexas de arcos.
Un reportor ia descrive tal la sena: "La polisia xuta gas lacrimojen, e la canon de acua avansa, jetante licuida blu nosiva. La protestores, acrupinte pos parapluves, responde con bombas de gasolina e rocas xutada de lansapetras improvisada. La veculos de polisia retira se. La resulta neta es zero."
@T Un om mori pos come 246 sacos de cocaina
@L aora_oji/2019/un_om_mori_pos_come_246_sacos_de_cocaina
====== Un om mori pos come 246 sacos de cocaina ======
28 maio 2019
Un om japanes ia mori en un vola de la Site Mexico, pos come 246 sacos de cocaina.
La avion, viajante a la Airoporto Internasional Narita en Japan, ia debe fa un atera de crise en Sonora, un stato en la norde-ueste de Mexico, cuando la om ia comensa convulsa.
On dise ce la om, a presente identifiada sola como Udo N, ia mori de un edema serebral causada par un supradosa de drogas.
La pasajor ia embarca la avion pos comensa sua viaja en Bogotá, la capital de Colombia.
Longo un declara par la avocato jeneral de Sonora, la autopsia ia trova la sacos -- con 2,5cm de longia e 1cm de largia -- en sua stomaco e intestines.
La otra 198 pasajores ia continua sua viaja pos la atera nonespetada en la site Hermosillo.
The remaining 198 passengers aboard were able to continue their journey after the emergency landing in the city of Hermosillo.
La autoriosas federal de Mexico va emprende la investiga.
@T Un onda de caldia matante en Japan
@L aora_oji/2019/un_onda_de_caldia_matante_en_japan
====== Un onda de caldia matante en Japan ======
31 julio 2019
En Japan, un om vestida como un mascote a un parce de divertis ia deveni un de la vitimes de un temperatur estrema calda cual ia mata 11 persones.
La om de 28 anios ia mori de ipertermia en la Parce Hirakata, pos spende 20 minutos en dansa portante vestes con pesa de 16 cilogrames.
Respondente, la parce ia cansela tota avenis con mascotes en esta estate.
La statistica ofisial revela ce plu ca 5000 persones ia xerca aida en ospital par causa de la onda de caldia en la semana pasada. Plu ca 50% de la ospitalidas ia ave 65 anios o plu.
On previde ce la temperatur va resta plu alta ca la promedia en la semana veninte.
La mascote ia deveni malada cuando el ia fa sua presenta a sirca 19:30 de ora local a soldi. Pos un plu dui de ora, la temperatur en la site Hirakata ia es 28,7°C. La om ia perde consensia. On ia move rapida el a ospital, do el ia mori.
En un declara formal, la compania cual posese la parce ia promete "trova la causa" de la aveni e "labora per preveni ce lo aveni denova".
En julio de la anio pasada, un periodo multe calda ia es descriveda como un desastre natural cuando lo ia mata 65 persones en un semana.
@T Un orangutan con diretos umana move a Florida
@L aora_oji/2019/un_orangutan_con_diretos_umana_move_a_florida
====== Un orangutan con diretos umana move a Florida ======
28 setembre 2019
On move un orangutan cual ia spende 20 anios en un zo arjentina a un refujeria per animales en la SUA, car lo ia reseta la mesma diretos legal como umanas.
Avocatos ia gania un apela major per Sandra en 2014, razonante ce sua deteni en Buenos Aires es nonlegal. La judi ia trova ce el es la "person nonumana" prima de Arjentina, "con direto de libria".
La animal de 33 anios ia ariva ier en Kansas e va pasa tra alga esaminas ante move a sua abiteria nova en Florida.
Judor Elena Liberatori, ci ave un imaje de Sandra en sua ofisia, ia dise ce el vole ce sua judi envia un mesaje: "ce animales es esentes sensante e ce sua direto prima es nosa obliga de respeta los."
Sandra ia nase en un zo en Deutxland Este e ia es vendeda a Buenos Aires en 1995. La orangutan ia spende multe de sua vive solitar en un ensirca, e ia atenta comun evita visitores a la zo. El ia pari un fia en 1999, ma la bebe ia es prendeda de el e vendeda a un parce de animales en Txina.
Sua vinse legal ia trae fama internasional a la orangutan, e ia crea un presedente ce primates es legal tratada como persones e no como propria.
Asta esta semana, pos cuasi sinco semanas, Sandra ia resta en la loca de la zo, cual ia clui en 2016 pos reportas de cruelia contra animales. On reconstrui aora la zo como un parce ecolojial, con normas de vive plu bon per la animales.
Un corte arjentina ia aproba la transfere de Sandra a la Sentro per Ominidos en Florida en 2017, an si sua viaja ia es retardada par solisitas per lisensas esuan.
La refujeria de 40 ectares es la abiteria de ximpanzes e orangutanes ci on ia libri de sircos, laborerias, zos, e colies privata. Bubbles, la ximpanze de casa de Michael Jackson, es entre alga abitores famosa.
Sandra va es con 21 otra orangutanes, e va pote move libre entre 11 areas esterna do la ominidos vive.
Patti Ragan, fundor de la sentro, ia dise: "Nos es zelosa per encontra el; el es un orangutan bela." El ia dise ce el es felis ce la reportas sur Sandra trae la atende publica a orangutanes, ci es entre la animales la plu perilida de mundo.
Ma el ia ajunta ce la refujeria labora per serti ce la publicia aumentada no va afeta la move de Sandra a sua abiteria nova. "Nos desira no distraes," el ia comenta. "Nos desira mera ce el ave pas cuando el ariva asi."
@T Un panica matante en un fola de Axura en Irac
@L aora_oji/2019/un_panica_matante_en_un_fola_de_axura_en_irac
====== Un panica matante en un fola de Axura en Irac ======
11 setembre 2019
En la site Karbala en Irac, a la min 31 persones ia es matada en un manada panicante a un rituo per la dia santa xia Axura.
Un portavose per la ministreria de sania ia dise ce 100 plu persones ia es ferida, e ce la cuantia de mores pote crese ancora.
La panica ia aveni cuando un peregrinor ia tropeza a media de sentos de miles partisipante en un rituo.
Axura recorda la martiri en batalia de la Imam Hussein, un neto de la Profeta Muhammad, en 680 EC.
A cada anio, miliones de peregrinores xia viaja a Karbala per Axura, cual aveni a la dia des de Muharram, la mense prima de la calendario lunal muslim. On fa rituos de lamenta e teatrales presentante la martiri de Hussein.
Un de la rituos es nomida "la core de Tuwairij", en cual peregrinores core longo stradas en dirije a la Mascita Imam Hussein, recordante la core de Tuwairij, un vileta antica, a Karbala par la cusines de Abbas, la duifrate de Hussein, en la batalia en la sentenio 7.
Con ce sentos de miles de persones ia fa la core, un person ia tropeza e cade, causante la cade de otras e creante un panica. An tal, alga securiores ia dise ce la panica ia comensa cuando un paseria elevada ia colasa.
Plu ca 140 persones ia es matada en un serie de bombis cuasi simultan a santerias en Karbala e la capital iraci, Baghdad, a Axura de 2004.
En la anio seguente, a la min 965 peregrinores ia mori en un panica sur un ponte supra la Rio Tigris en Bagdad, a un otra dia santa xia. La panica ia es sperdeda tra la fola par rumores sur la presentia de bombas umana.
@T Un parlamentor fura un sanduitx en Slovenia
@L aora_oji/2019/un_parlamentor_fura_un_sanduitx_en_slovenia
====== Un parlamentor fura un sanduitx en Slovenia ======
15 febrero 2019
Un membro de la parlamento slovenian ia resinia pos fura un sanduitx de un boteca en Ljubljana, disente ce la empleadas ala ia iniora el.
Darij Krajčič ia informa jornalistes local ce el ia deveni iritada cuando el ia es "tratada como aira", e ce el ia deside alora sorti per proba la securia de la supramercato.
La fura no ia es detetada, e la parlamentor, ci parteni a la partito governante, ia insiste ce el ia revade plu tarda per paia. El ia demanda per pardona, disente ce el regrete sua "esperimenta sosial".
Sua confesa inisial ia deveni publica cuando el ia comparti la raconta con otra parlamentores en un consenta de comite a mercurdi.
"Me ia spende serta tre minutos en sta a la table de vende," la profesor pasada de 54 anios ia esplica, ajuntante ce tre empleadas de la supramercato ia fali persepi el car los ia es ocupada en conversa entre se.
El ia dise ce cuando el ia parti per proba esce los atenta el, "nun ia segue me, nun ia cria," sujestante ce cuando empleadas depende tro de sistemes de monitori video, los pote fali vide lo cual aveni.
La otra parlamentores ia rie inisial a la raconta, ma ier un xef de la partito de Krajčič ia condena sua atas como nonasedable.
Krajčič ia es elejeda a parlamento en setembre, cuando la partito sentral sinistriste de Marjan Šarec, la ministro xef, ia deveni la membro major en la alia governante.
@T Un pasiente es ardeda par sirurjia en Romania
@L aora_oji/2019/un_pasiente_es_ardeda_par_sirurjia_en_romania
====== Un pasiente es ardeda par sirurjia en Romania ======
31 desembre 2019
Un pasiente de ospital ia mori pos deveni ensendeda en sirurjia en Romania.
Sirurjistes a la Ospital Floreasca en Bucuresti, la capital, ia usa un desinfetante alcolosa a la fem ante fa sua opera contra canser de pancreas a 22 desembre.
Ma en la opera los ia usa un bisturi eletrical, cual, tocante la alcol, ia ensende la corpo de la fem sur la table. 40% de sua corpo ia es ardeda, e el ia mori en ospital pos un semana. El ia ave 66 anios.
La polisia ia inisia un investiga sur la caso.
La familia de la vitim ia dise ce nun ia informa los sur "la gravia de la situa" o la detalias de lo cual ia aveni -- sola ce lo ia es "un asidente".
"Nos ia trova alga detalias de reportas, cuando los ia es difusada en TV," los ia dise. "Nos no fa acusas; nos vole mera comprende lo cual ia aveni."
La ministro de sania, Victor Costache, ia promete investiga la caso "traumal". "Nos espera aprende de esta aveni angusante," el ia dise en un declara formal. "E me e la ecipo de la Ministreria de Sania cual me coordina va fa tota cosas posible per descovre la vera."
Horatiu Moldovan, visministro, ia ajunta: "La sirurjistes ia ta debe sabe ce lo es proibida ce on usa un desinfetante de alcol en prosedes sirurjial fada con un bisturi eletrical."
Romania spende min ca cualce otra pais en la Uni European sur sua sistem de aida medical, e per cada abitor e como frato de sua produi interna bruta.
Lo ave la proportio la plu alta de moris de enfantes en Europa, como ance un infrastrutur sudevelopada de ospitales e un manca persistente de empleadas medical.
@T Un pexor es salvada par elicotor de un inonda en Cenia
@L aora_oji/2019/un_pexor_es_salvada_par_elicotor_de_un_inonda_en_cenia
====== Un pexor es salvada par elicotor de un inonda en Cenia ======
3 desembre 2019
Un pexor cenian ia es salvada par elicotor de un isola pico do el ia es trapida de venerdi par inondas forte.
Vincent Musila ia vade per pexa en un rio prosima a la vila Thika en Cenia sentral, cuando ia rio ia supraflue. Otra vilores ia regarda el, noncapas de aida, tra tre dias, esperante ce la servis de crise va salva el.
Plu ca 250 persones es ja matada, e tre milion afetada, par inondas subita e liscateras tra la este de Africa. Sirca un dui de la moris, 120, ia aveni en Cenia, do plu ca 160 mil persones es afetada.
Musila ia dise ce la inonda ia ariva subita cuando el ia pexa sur un peso peti de tera a media de la rio, estra la vila.
"Pos secondos, acua ia es en tota partes e me no ia pote traversa. Lo ia es asustante en la tre dias pasada, esente trapida asi en la fria e pluve. Me ia es fame e ia esperia multe sufris. On ia ave tan multe moscitos, e me ia teme animales como crocodiles e ipopotamos. Ma me es tan felis, e me senti sana pos un salva tan dramosa. Me senti como si me ia renase."
La folas -- ci ia vijila tra tre dias longo la rivas de la rio -- ia aclama cuando un elicotor de polisia ia veni per salva Musila. On ia prende el a un restorante, do el ia joia un plato de fritadas e salsixes, sua come prima en tre dias.
@T Un politiciste quebecan posta un foto controversa
@L aora_oji/2019/un_politiciste_quebecan_posta_un_foto_controversa
====== Un politiciste quebecan posta un foto controversa ======
6 julio 2019
Un ministro de educa en Quebec es criticada per posta un foto de se con Malala Yousafzai, campanior educal. Esta ganior de la Premio Nobel de Pas, ci porta un tela de testa, no ta pote ensenia en acel provinse canadian.
En junio, Quebec ia aseta un lege controversa cual proibi alga ofisiores publica, incluinte enseniores, de porta simboles relijial como cipas, turbanes o hidjabes en sua labora.
La ministro Jean-François Roberge ia dise ce el ia discute asedes educal e developa internasional con Yousafzai.
Malala Yousafzai ia es fusilida par un militariste taliban en Pacistan en 2012 par causa de sua ativisme umaniste. A pos, on ia reconose el a grado internasional per sua labora campaniante per educa de xicas.
La lege nova pertine a judores, polisiores, enseniores e alga otra figures publica con autoria. Lo ia provoca protestas e multe debate en la provinse. Suportores dise ce lo es un paso asetable en dirije a la separa formal de la eglesa e la governa en Quebec.
An si la lege no identifia relijios spesifada, oposores razona ce lo es discriminante e nonjusta, afetante femes muslim en la provinse ci porta hidjabes o otra covrentes de testa.
Alga comentores enlinia ia descrive la ministro como ipocrita per es fotada con Yousafzai.
Roberge, ci ia encontra el cuando ambos ia es en Frans, ia defende la lege cuando un jornaliste ia demanda como el ta responde si Yousafzai ta desira ensenia en Quebec.
"Me ta informa serta ce lo ta es un onora enorme, e ce en Quebec, como ance en Frans (do nos es aora) e en otra paises abrida e tolerante, enseniores no pote porta simboles relijial cuando los fa sua taxes," el ia dise.
@T Un ponte franses colasa su la pesa de un camion
@L aora_oji/2019/un_ponte_franses_colasa_su_la_pesa_de_un_camion
====== Un ponte franses colasa su la pesa de un camion ======
20 novembre 2019
La colasa de un ponte cual ia mata du persones en la sude-ueste de Frans ia es cisa causada par un camion tro pesosa.
Du veculos ia cade en la Rio Tarn, a norde de Toulouse, cuando la ponte prosima a la vileta Mirepoix-sur-Tarn ia colasa a la matina de lundi.
Avocatos acusante dise ce un de la veculos, un camion, ia pesa plu ca 50 tones. La ponte suspendeda, construida en 1931, ia pote tolera 19 tones como pesa masima.
Un fia de 15 anios e la camionor ia mori en la asidente. La fia ia viaja en un auto con sua madre cuando la ponte ia deslia se de sua cables de suspende e ia cade a la rio.
La madre ferida ia es tirada de la acua par persones pasante. Sinco otra persones ia es grave ferida, incluinte du salvores e abitores local ci ia atenta salva la vitimes.
La camionor, de ci on ia trova sua corpo, ia transporta aparatos de fora a traversa de la ponte a sua compania, situada a alga sentos de metres a ultra.
A lundi, Eric Oget, maior de la vileta, ia sujesta ce avisas sur la restrinje de pesa, mostrada a ambos lados de la ponte, ia es cisa iniorada.
"De ves a ves, me ia vide veculos tre pesosa cual usa la ponte," el ia comenta. "Nos ia es sempre vijilante en fa probas con la polisia munisipal, ma on ave veses cuando nos no vide los."
La ponte ia es longa de 155 metres e larga de cuasi 7. Lo ia es renovida en 2003 par la consilio de Haute-Garonne. Cuando on ia esamina lo en la tarda de la anio pasada, lo ia mostra no problemes strutural.
La asidente ia tira atende a la securia de pontes, a un anio pos la mori de 43 persones cuando un ponte ia colasa en la site Genova en Italia.
Longo un reporta de la Salon Alta de la parlamento franses, sirca 25 mil pontes tra la pais nesesa reparas urjente.
Senator Hervé Maure, ci ia supravide acel sonda, ia dise a lundi: "La state de nosa pontes presenta un peril vera. Si un ponte colasa cual no es listada como perilosa, cual es la situa de la pontes clar identifiada como perilosa?"
@T Un premio recordo per la campion de un jua video
@L aora_oji/2019/un_premio_recordo_per_la_campion_de_un_jua_video
====== Un premio recordo per la campion de un jua video ======
29 julio 2019
Un adolesente esuan ia gania $3 milion par deveni la campion de mundo de Fortnite, un jua video. Esta es un premio recordo en la istoria de sporte video, e $30 milion ia es divideda entre la vinsores.
Kyle Giersdorf, ci ave 16 anios, ia vinse en la parte solo de la compete en la Stadio Arthur Ashe en York Nova, cual es plu famosa per sua ospita de la torneo "US Open" de tenis.
Gielsdorf, de ci sua nom enlinia es Bugha, ia sta riente e negante con testa la rujis de la fola cuando sua nom ia es anunsiada.
El ia dise ce el intende garda la plu de sua premio. "Me desira sola un table nova e cisa un table per mea trofeo."
La jua final ia es descriveda par la comentores como "un core de vinse riable", car la vinsor ia reali la defeta de sua oposores con surie a sua fas.
On vide la aveni como un momento major en sporte video, un industria con valua estimada de bilion dolares en 2019.
An tal, la recordo per la coletiva la plu grande de premios va es rompeda par un plu aveni, la Internasional, en agosto.
En la finales de Fortnite, 100 juores ia batalia sur scermos jigante de computador. Cuatrodes milion juores ia atenta cuali en des semanas de compete enlinia. Plu ca 30 nasiones ia es representada.
La jua envolve 100 persones poneda sur un isola do los debe trova armas, construi strutures, e elimina lunlotra asta cuando un juor emerji vinsente.
Lo ave 200 milion juores rejistrada tra la mundo e on pote descarga lo sin paia, ma juores pote spende mone par compras en la jua.
On pote jua solitar, o parteninte a un ecipo de cuatro o dudes membros, ci pote es o amis o persones nonconoseda.
En la mense pasada, la creores de la jua, Epic Games, ia es interogada par parlamentores brites sur esce los fa sufisinte per serti la eda de juores, e per promove la reposa de usores pos sesiones longa de jua.
@T Un profesor de lege deveni la presidente de Tunis
@L aora_oji/2019/un_profesor_de_lege_deveni_la_presidente_de_tunis
====== Un profesor de lege deveni la presidente de Tunis ======
15 otobre 2019
Kais Saied, un profesor jubilada, va deveni la presidente seguente de Tunis pos un vinse inondante en la vota a soldi.
La comision elejal ia anunsia ce la profesor pasada de lege, ci ave 61 anios, ia gania 73% de la votas. Sua oposor ia es Nabil Karoui, un maniate de medias, ci ia campania de prison pos sua aresta su acusas de lava de mone e froda de impostas.
Sondas ia sujesta ce Saied ia benefica de suporta grande entre votores joven. Alga ia es impresada par sua reputa de refusa deveni malida.
Avente la nometa "la robot" per sua manera sever, Saied ia fa un campania astuta, con cuasi no propaganda, presentante a jovenes tunisi un mesaje de solidia e oposa de froda.
Saied ia es un de la comite de espertas ci ia aida la parlamento a prepara la constitui de Tunis pos la Primavera Arabi, adotada en 2014. El ia apare en televisa de ves a ves como un comentor political.
En la semana ante la vota, el ia anunsia ce el no va campania cuando sua oposor es en prison.
El ia promete reformis elejal, incluinte cambias a elejes local per representores rejional. An tal, criticores ia ataca sua opinas sosial tradisional.
En un intervisa con un jornal local, el ia acusa ce otra nasiones promove omosesalia en la pais. El favore restora la puni de mori, cual on ia suspende en Tunis en 1994. El oposa ance la egalia de erita per omes e femes.
On ia avansa la eleje pos la mori en julio de Beji Caid Essebsi, la presidente prima democrata elejeda de Tunis. El ia entra a sua posto en 2014, a tre anios pos un revolta poplal cual ia suverti la renor longa Zine al-Abidine Ben Ali e ia inisia la Primavera Arabi.
An si la Primavera Arabi ia furni democratia a Tunisia, lo no ia furni la beneficas economial esperada.
@T Un profesor rusce confesa mata sua amor
@L aora_oji/2019/un_profesor_rusce_confesa_mata_sua_amor
====== Un profesor rusce confesa mata sua amor ======
11 novembre 2019
Un istoriste rusce e bon conoseda ia confesa mata sua amor, pos es trovada en un rio con un bolson conteninte la brasos de un fem.
Oleg Sokolov, ci ave 63 anios, ia es enebriada e ia cade en la rio cuando el ia atenta dejeta partes de corpo. La polisia ia trova la corpo destestida de Anastasia Yeshchenko, ci ia ave 24 anios, en sua aparte en la site San Peterburg.
Sokolov es un esperta sur Napoléon e ia es asetada en la Lejion de Onora de Frans. Sua avocato ia dise ce el ia confesa sua culpablia, regrete sua ata, e coopera. El ia es tratada en ospital per ipotermia.
On reporta ce la profesor ia mata sua amor en un disputa e ia sieri sua testa, brasos e gamas a via. El ia intende dejeta la corpo ante suiside publica en vestes de Napoléon.
Yeshchenko ia move de la rejion Krasnodar en Rusce sude a San Peterburg per studia, e ia es un posgraduada cuando el ia mori. Un conoseda ia dise: "El ia es cuieta, dulse, e sempre la studiante ideal. Vera cadun ia conose la esiste de sua relata."
El ia studia la istoria franses e ia coscrive alga obras istorial con Sokolov. Ambos ia gusta vesti se en stilos istorial.
Studiantes ia descrive Sokolov como un profesor talentosa ci parla franses e fa imitas de Napoléon, ma ance como un manica ci ia nomi sua amor "Joséphine" e ia demanda ce on nomi el "sir".
El ia es ance un membro de la Instituida de Siensa Sosial, Economica e Politica en Frans, cual ia dise a saturdi ce lo ia sutrae el de sua posto en sua comite siensal.
@T Un protesta vasta en Txesco a 30 anios pos la revolui
@L aora_oji/2019/un_protesta_vasta_en_txesco_a_30_anios_pos_la_revolui
====== Un protesta vasta en Txesco a 30 anios pos la revolui ======
17 novembre 2019
A la min 200 mil persones ia protesta ier contra la governa de Txesco en la capital, Praha. Los desira ce la ministro xef, Andrej Babiš, resinia par causa de alegas de froda.
On alega ce Babiš ia usa suvenis de la Uni European per sua comersia privata. El nega esta.
La protesta ia aveni a la dia ante la aniversario tredes de la Revolui de Veluda, cual ia fini la rena comuniste en lo cual ia es alora Txescoslovensco.
On ia reali la protesta en Parce Letná, cual ia es ance la loca de la asemblas la plu grande en novembre 1989.
Multe persones ia canta "nos es asi", repetente la slogan protestante de la revolui a tre desenios pasada. Alga de la parlores ia es disentores ci ia parla ance a la protestores asemblada en 1989.
En ajunta a es la ministro xef, Babiš es la fundor bilionor de un holding nomida Agrofert -- un compania agregada txesce con base en Polsca.
La grupo cual ia organiza la protesta, nomida la Asosia Milion Momentos per Democratia, esije ce Babiš o resinia ante la fini de la anio o rompe sua lias a la compania.
La polisia ia estima ce sirca 200 mil persones ia es presente a la protesta, ma la organizores ia sujesta un cuantia plu prosima a 300 mil.
@T Un recordo nova de temperatur en Australia
@L aora_oji/2019/un_recordo_nova_de_temperatur_en_australia
====== Un recordo nova de temperatur en Australia ======
18 desembre 2019
Australia ia esperia sua dia la plu calda de istoria rejistrada, con 40,9°C per la promedia nasional de la temperatures masima.
La Departe de Meterolojia ia dise ce la caldia ier ia esede la recordo presedente, 40,3°C a 7 janero 2013.
La pais batalia ancora un crise sever de secia e focones savaje. Ma on predise ce un caldia an plu intensa va aveni plu tarda en la semana.
Con sentos de focones ardente, la ministro xef Scott Morrison ia es criticada per sua responde a esta desastres natural e per la politica de clima de sua governa.
Australia ia caldi en esta semana cuando un masa de aira calda ia move a este longo la continente.
Alga recordos per sites e vilas individua es ja rompeda. Ier, locas tra la sentro de la pais ia rejistra un temperatur de plu ca 45°C.
A la comensa de la semana, Perth, capital de Australia Ueste, ia esperia tre dias supra 40°C en serie, en un recordo per desembre.
La fator climal xef cual causa la caldia es la positivia de la Dipolo de la Mar Indian, un state en cual la temperatur de la surfas de la mar es plu alta en la ueste ca la este de acel mar.
La difere entre la du temperatures es aora la plu grande de 60 anios. La acuas plu calda produi plu pluves ca tipal en la rejion ueste de la Mar Indian, causante inondas, ma un situa plu seca tra Asia sude-este e Australia.
Ma Australia esperia ja un secia tra tempo longo -- an tra anios en alga locas. La Departe de Meteorolojia dise ce la tera seca redui la vapori cual fa normal un influe descaldinte.
@T Un redui de crese en la economia xines
@L aora_oji/2019/un_redui_de_crese_en_la_economia_xines
====== Un redui de crese en la economia xines ======
21 janero 2019
La economia de Xina crese a sua rapidia la plu lenta de pos 1990, provocante temes sur la efeto a la economia global.
Lo ia estende a 6,6% en 2018, longo statisticas ofisial publicida oji. En la tre menses asta desembre, sua economia ia crese par 6,4% de lo a un anio plu temprana, un taso reduida pos la 6,5% de la cuatri presedente.
La datos segue la prevides, ma los asentua la ansia resente sur la crese lentinte en la economia du de la plu grandes de mundo. Ance la gera comersial con la SUA ajunta a la vista sombre.
La statistica nova mostra la taso de crese la plu debil pos la crise global de finansia.
An si oservores de Xina recomenda cautia a tema de la declara ofisial de la produi interna bruta de la pais, on regarda la datos como un indicador usosa de la curso de crese.
La crese jeneral lenti ja tra alga anios, ma ansia sur la rapidia de la lenti en Xina ia deveni plu alta en menses resente, e alga companias ia sona un alarma sur esta mercato importante.
Plu temprana en esta mense, Apple ia averti ce la debilia en Xina va afeta sua vendes, e fabricores de autos e otra companias ia vosi sur la efeto de la gera comersial.
La governa de Xina presa per move a via de un crese gidada par esporta, e per depende plu de la consuma interna.
Politicistes en la pais ia aumenta sua labora en menses resente per suporta la economia. Los ia atenta aumenta la compras par rapidi projetas de construi, redui alga impostas, e basi la cuantia de mone cual bancos debe reserva.
@T Un rejion biodiversa de Brasil esperia un focon vasta
@L aora_oji/2019/un_rejion_biodiversa_de_brasil_esperia_un_focon_vasta
====== Un rejion biodiversa de Brasil esperia un focon vasta ======
1 novembre 2019
Un focon longa de 50 cilometres avansa traversante la Pantanal, un rejion pantanosa en Brasil. On ia descrive lo como "plu grande ca cualce videda a ante" en la loca.
A la min 50 mil ectares de plantas es ja destruida. La Pantanal, locada en la parte sude de la pais, es un de la rejiones la plu biodiversa en la mundo e un destina popular per turistes.
La focon ia comensa a 25 otobre. Lo avansa rapida par causa de un combina de temperatur alta e venta forte.
La ofisia de la governor de la stato Mato Grosso do Sul ia dise ce la situa es estrema. Lo ia averti ance ce la capasia de vide en la rejion es debil.
La governor ia anunsia un suspende, per 30 dias, de la usa de foco per desarbori la tera. Pompores usa aviones per batalia la foco de supra.
On ia rejistra ja plu ca 8000 focones en la Pantanal en 2019, un cuantia plu grande par 462% ca en la mesma periodo de la anio presedente.
Brasil ia esperia multe focones de foresta en esta anio. La statistica ofisial mostra plu ca 167 mil tal focones en la des menses prima.
@T Un relicia santa reveni a Bethlehem
@L aora_oji/2019/un_relicia_santa_reveni_a_bethlehem
====== Un relicia santa reveni a Bethlehem ======
1 desembre 2019
Un frato de lenio, sur cual on crede ce lo ia formi un parte de la portafeno de Jesus, ia reveni a Bethlehem pos plu ca mil anios en Europa.
Pape Fransisco ia comanda ce on redona la relicia, con grandia de diton, de la Basilica de San Maria Major en Roma.
On ia esibi lo en Ieruxalim per un tempo corta ante sua viaja a Bethlehem per coaveni con la comensa de selebras ala de natal.
La relicia, caxida en un portador ornosa, ia es bonvenida ier par un prosegue de bandes marxante e prendeda a la Eglesa de San Catarina, prosima a la Eglesa de Natal do, longo la tradision, Jesus ia nase.
Cristianes crede ce la peso pico de lenio ia parteni a la leteta en cual Jesus ia reposa pos sua nase.
Custodia Terrae Sanctae, la organiza cual garda locas relijial catolica en la Tera Santa, ia dise ce la Patriarca de Ieruxalim, San Sofronio, ia dona la relicia a Pape Teodoro 1 en la sentenio sete.
Lo ia ajunta ce cuando la relicia ia es esibida en San Maria Major en Roma, "un cuantia multe grande de peregrinores de tra tota la mundo" ia vade a cada dia per respeta lo.
La plu de la portafeno resta ancora en Roma, ma la redona de la peso peti ia es selebrada par cristianes en la rejion.
La Vatican descrive la redona como un donada par Pape Fransisco. La maior de Bethlehem ia dise ce lo segue un solisita par Mahmoud Abbas, presidente de Filastin, en un visita resente a la Vatican.
On estima ce cristianes composa 1% de la popla filastini en la Riva Ueste, Gaza e Ieruxalim Este, ma Bethlehem es un loca popular per peregrinores cristian de la mundo intera, spesial en esta parte de la anio.
La peso de la portafeno no es la ojeto relijial prima cual la Pape ia redona. Plu temprana en esta anio, el ia dona alga de la fratos de oso regardada como los de San Pedro a la xef de la Eglesa Ortodox Este, esperante prosimi la eglesas ortodox e catolica a lunlotra.
@T Un reporta asentua la multe crises de la ambiente
@L aora_oji/2019/un_reporta_asentua_la_multe_crises_de_la_ambiente
====== Un reporta asentua la multe crises de la ambiente ======
12 febrero 2019
Politicistes e governores ia fali comprende la gravia de la crise ambiental cual fronti la Tera, diseda par un reporta nova.
La Instituida per Rexerca Publica sur Politicas, un organiza sinistriste en London, dise ce la efetos de umanas ia ateni un grado perilosa e ce lo menasa destabli la sosia e la economia global.
Siensistes averti sur un combia de fatores cisa matante. Estas inclui cambias a la clima, la perde de multe spesies, la erode de suprasolo, e la asidi de la mares.
La reporta dise ce esta fatores "avansa un prosede complicosa e dinamical de destabli ambiental cual ia ateni un nivel grave. Esta destabli aveni a rapidias sin presedente en la istoria umana e, en alga casos, an en miles de miliones de anios."
Lo averti ce, per evita un resulta desastrosa, la fenestra de posiblia va es cluida pos tempo corta.
La autores recomenda tre cambias de la comprende political: sur la vastia e rapidia de la crise ambiental; la implicas per sosias; e la nesesa seguente per cambias mutante.
Los dise ce, pos 2005, la cuantia de inondas tra la mundo ia crese des-sincuple, avenis de temperatur estrema ia dudesupli, e focones savaje ia deveni setuple plu comun.
A la min la cambia de clima apare aora en discutes de politica, los dise, ma otra efetos multe importante es apena discuteda.
@T Un reporta revela la crise silente de la perde de natur
@L aora_oji/2019/un_reporta_revela_la_crise_silente_de_la_perde_de_natur
====== Un reporta revela la crise silente de la perde de natur ======
6 maio 2019
Un reporta multe condenante sur la state de la natur va es oji publicida en Paris. La Evalua Global par la Nasiones Unida va asentua la efeto turbante cual umanas fa a la mundo natural.
Lo va dise ce spesies deveni perdeda con rapidia la plu alta de istoria, xef causada par usas cambiante de tera. Atas rapida es nesesada a la nivel political per evita un desastre ecolojial.
La Plataforma Intergovernal sur Biodiversia e Servis Ecosistemal ia labora tra la tre anios pasada sur sua reporta de 1800 pajes. En la semana pasada, la autores xef ia encontra representores governal de plu ca 130 paises en Paris per deside la contenida de un resoma multe plu corta.
La studia va sulini cuanto umanas depende de la mundo natural, e per comedas, e per acua limpa, e per asorbe la diosido de carbono cual cambia la clima.
On predise ce la reporta va mostra, en detalia sombre, como umanas ia crase la natur en la 50 anios pasada, e la avenis probable en la desenios veninte si nos no reali cambias major.
Lo va analise la efetos de cambias de la usa de tera a la natur. La sutrae de forestas per cultiva, nurida par consumas plu grande de produidas de animal, ia forsa multe spesies nativa a via de sua abitadas antica. La suprapexa ia redui grave la reservas de pexes en la plu partes de la mundo.
La reporta va averti ce la rapidia de perde va aumenta probable en la desenios veninte, riscante la estingui de cuantias vasta de spesies.
Parlante a la abri de la consenta en Paris, François de Rugy, la ministro franses de ecolojia, ia compara la perde de biodiversia con la dana causada par la cambia de clima. Nonsimil a la alti de temperatur, sur cual la consensia publica ia esperia ja un aumenta enorme, el ia descrive la perde lenta de la natur como "un crise plu silente".
Ante la publici, 600 campaniores de 50 paises per la conserva de natur ia suscrive un letera publica, inisiada par la Funda Mundal de Natur. La letera, cual apare en jornales major tra la mundo, urje respondes political.
"On ave ancora tempo per proteje lo cual resta e per comensa restora la natur," la letera dise. "Ma per fa esta, nos debe cambia radisal nosa modo de vive, incluinte como nos usa enerjia per dirije nosa sosias, crese nosa comedas e maneja nosa dejetadas. E afin esta aveni, nos nesesa atas desidente e aspirante de la xefes de la mundo."
@T Un reseta miscada per Trump a la artes militar miscada
@L aora_oji/2019/un_reseta_miscada_per_trump_a_la_artes_militar_miscada
====== Un reseta miscada per Trump a la artes militar miscada ======
3 novembre 2019
Donald Trump ia es salutada par desaclamas, entre aclamas, cuando el ia visita la Torneo Ultima de Combate en New York ier. La presidente de la SUA ia visita esta aveni de artes militar miscada con republicistes major e sua fios.
Un protesta peti contra Trump ia aveni a la aveneria Madison Square Garden. Esta ia segue a min ca un semana pos cuando on ia desaclama la presidente a la serie mundal de basebal en Washington, la capital.
Cantas de "prisoni el" ia resona sirca la stadio en la plu temprana de la semana, referente a un canta oiada a veses a la asemblas political de Trump, urjente la prisoni de Hillary Clinton, sua competor pasada per la presidentia.
Sua reseta a la sera de ier ia es variosa, an tal, con aclamas e aplaudis oiada de alga regardores, e desaclamas e maldises de otras. On ia vide ance avisas con la testo "Despone Trump" e "Acusa Trump" en la fola.
Trump fasa aora un esplora legal en relata con alegas ce el ia presa la presidente de Ucraina, Volodymyr Zelensky, a investiga sua competor en la compete per la Casa Blanca de 2020, Joe Biden, la vispresidente pasada.
En cuando videos de la fola ia sperde en redes sosial, sua fio Donald Jr ia contrataca en Twitter, scrivente ce la reseta ia es estrema positiva e ce Dana White, la presidente de la torneo e un ami de la presidente tra tempo longa, ia descrive lo como "la entra la plu eletricin stimulante cual el ia vide en 25 anios".
La torneo es un compania esuan cual promove artes militar miscada. Lo ia reali sua aveni prima en 1993. Pos comensa umil, lo ave aora miliones de fanes tra la mundo e ia produi combatores multe famosa, per esemplo Conor McGregor e Ronda Rousey.
Trump ia ospita la torneos a desenios ante aora, cuando la sporte ia es iniorada par la plu de avenerias e jornalistes.
@T Un roceto es perdeda corta pos enaira
@L aora_oji/2019/un_roceto_es_perdeda_corta_pos_enaira
====== Un roceto es perdeda corta pos enaira ======
13 julio 2019
Un roceto Vega de la compania Arianespace ia es perdeda a poca minutos pos sua enaira. Esta es la fali prima en 15 lansas de tal rocetos.
Lo ia porta un satelite militar per la Amirias Arabi Unida cuando lo ia enaira de la porto spasial european en Guian Franses a la sera de mercurdi.
On crede ce lo ia cade en la Mar Atlantica a norde de la sentro spasial.
Luce Fabreguettes, la vispresidente dirijial de misiones, ia dise ce "un anomal major" ia aveni a sirca du minutos pos la enaira, cuando la fase du ia ensende.
"Per Arianespace, me desira espresa nosa regretes la plu profonda a nosa clientes per la perde de sua carga," el ia dise. "De la analise prima de la datos de vola, nos va reseta informas plu esata en la oras veninte, e nos va comunica tan pronto como posible a tota."
On no ia conose direta la causa de la fali. La vola ia es ja posponeda a du veses par mal clima.
La roceto ia porta un satelite nomida FalconEye1, la prima de du cual va composa la sistem FalconEye de la Amirias.
Vega (Vettore Europeo di Generazione Avanzata, italian per "Transportador European de Jenera Avansada") ia fa sua vola prima en 2012. Lo ia es developada per permete ce paises european envia satelites peti a spasio.
Arianespace, con base en Frans, vende esta sistem de rocetos de cuatro fases, developada en junta par la Ajenteria Spasial de Italia e la Ajenteria Spasial European.
@T Un rompe de eletrica tra la plu de Venezuela
@L aora_oji/2019/un_rompe_de_eletrica_tra_la_plu_de_venezuela
====== Un rompe de eletrica tra la plu de Venezuela ======
23 julio 2019
Venezuela ia esperia un plu rompe major de eletrica, e la capital Caracas ia es entre la rejiones afetada. On crede ce no min ca 18 de la 23 statos de la pais ia perde sua eletrica.
La ministro de informa ia dise ce la problem ia es causada par "un ataca eletromagnetal", e ce ofisiores labora per restora la sistem.
En marto, un serie de tal rompes ia aveni en Venezuela, incluinte un cual ia afeta tota 23 statos e ia dura tra un semana, creante mancas de furnis e provocante tumultas.
Un plu rompe en april ia pone partes grande de la pais en oscuria, ma lo ia dura tra mera alga oras, no dias.
Perdes acaso de eletrica aveni comun en Venezuela, do la economia ia colasa en un crise political.
Presidente Nicolás Maduro e otra ofisiores de la governa ia culpa terorisme e sabotas par sua oposores, alegante ance un envolve par la SUA. La oposores dise ce la rompes resulta de anios de froda e suinvesti.
La compania de eletrica Corpolec, cual es poseseda par la governa, ia reporta plu temprana ce la problem ia afeta sola partes de Caracas.
Juan Guaidó, xef de la oposores, e la presidente batalia ja de janero, cuando la prima ia usa la constitui per declara se como presidente tempora. El ia razona ce la votas cual ia reeleje Maduro per sua periodo du en 2018 no ia es libre e justa.
A pos, plu ca 50 paises, incluinte la SUA e la plu de nasiones en America latina, ia reconose Guaidó como la xef legal de Venezuela. Ma la militar potiosa de la pais, como ance aliadas influosa como Xina e Rusia, ia resta a lado de Maduro.
Un atenta par Guaidó per veni la militar a sua lado ia fali, e la pais resta pendente, con ce ambos omes reclama se como la presidente vera.
Discutes inisial entre la du ia aveni en Oslo en maio, ma los ia fali sin acorda. On ia recomensa los en la plu temprana de esta mense, denova su arbitra de la ministreria de esternas norsce.
Entretempo, la crise economial ia mali, e mancas de comedas e medisines ia deveni sempre plu grave.
@T Un rompe grande de eletrica en Jakarta
@L aora_oji/2019/un_rompe_grande_de_eletrica_en_jakarta
====== Un rompe grande de eletrica en Jakarta ======
5 agosto 2019
On ia restora eletrica a Jakarta, capital de Indonesia, e sites prosima, a 12 oras pos la comensa de un perde enorme ier.
La rompe ia afeta deses de miliones de persones, e on ia evacua la metro nova abrida en Jakarta. Redes de telefoneta ia es ance afetada.
La fali ia es causada par problemes tecnical.
Cuasi des milion persones abita en Jakarta, e sirca 20 milion en la sites ensircante. Ance afetada ia es provinses visina, do plu deses de miliones abita.
La problem ia comensa ier, a mediadia de ora local, e pos nove oras, la eletrica ia deveni lenta restorada.
Perdes de eletrica aveni comun en Jakarta, ma lo de soldi ia es nonusual longa.
La airoporto internasional de la site no ia es afetada, e ospitales ia usa sua jeneradores reservada de eletrica.
Ma semafores ia descomuta en alga partes de la capital, malinte la conjesta en un site malfamosa per sua trafica.
Un pasajor de tren ia raconta: "La tren ia para subita. Nos ia debe espeta tra un tempo longa. On ia ave tan multe bebes en la vagon. Los ia plora, e persones ia cria 'abri la porte'."
@T Un rompe major de eletrica en Arjentina e Uruguai
@L aora_oji/2019/un_rompe_major_de_eletrica_en_arjentina_e_uruguai
====== Un rompe major de eletrica en Arjentina e Uruguai ======
17 junio 2019
On ia restora eletrica a multe de Arjentina e Uruguai pos un rompe jigante cual ia lasa deses de miliones de persones en oscuria. Mauricio Macri, presidente arjentina, ia promete un investiga completa.
La rompe de eletrica ia aveni corta pos 07:00 ier. Lo ia para trenes e ia descomuta siniales de trafica. Lo ia es causada par un fali en un rede eletrical cual servi e Arjentina e Uruguai.
Esta ia aveni cuando la popla de Arjentina ia es a punto de vota en elejes local, e on ia debe pospone la vota en alga provinses rejional. Partes de Paraguai e Txile ia es ance afetada.
Un portavose per la compania eletrical Edesur ia dise: "Esta es la ves prima cuando un cosa de esta spesie ia aveni tra la pais intera." On ia lia la rompe a un fali en la transmete de eletrica de la parario idroeletrical Yacycretá.
Gustavo Lopetegui, ministro de enerjia en Arjentina, ia insiste ce la sistem eletrical de la pais es "multe durante", ma el ia ajunta ce la causa esata de esta fali no es clar. "A presente nos no esclui cualce posibles. Ma nos no crede ce lo es causada par un siberataca."
@T Un santeria disputada barati es donada a indus
@L aora_oji/2019/un_santeria_disputada_barati_es_donada_a_indus
====== Un santeria disputada barati es donada a indus ======
9 novembre 2019
En Barat, la corte suprema ia deside ce Ayodhya, un santeria disputada en la norde de la pais, debe es donada a indus ci desira construi ala un templo.
La caso es ja forte disputada par indus e muslimes tra desenios, focante sur la posese de la tera en la stato Uttar Pradesh. Multe indus crede ce Ayodhya es la loca de nase de Ram, un de sua dios la plu santa, ma muslimes dise ce los adora ala tra jeneras.
La corte ia dise ce muslimes va reseta un otra peso de tera per construi un mascita.
La mascita Babri de la sentenio 16 es a la cor de la disputa. Manadas indu ia destrui lo en 1992, provocante tumultas cual ia mata 2000 persones.
En sua judi unida, la corte ia dise ce un reporta par la Sonda Arceolojial de Barat atesta ce la restas de un construida "cual no es muslim" esiste su la strutur de la mascita destruida.
Lo ia dirije la governa federal a institui un fidusia per maneja e supravide la construi de la templo indu. An tal, lo ia ajunta ce la destrui de la mascita Babri ia es nonlegal.
Un representor de la litigores muslim ia comenta ce los no es sasiada e va deside esce los va solisita un revisa pos leje la judi intera.
Estra la corte, la situa ia es jeneral calma. On ia deteni sentos de persones en Ayodhya ante la judi ier, temente violentia. Miles de polisiores es posada en la site, e botecas es cluida asta lundi.
La polisia monitori ance redes sosial per comentas flaminte. Los responde a tuitas e demanda ce usores sutrae los.
Multe indus crede ce la mascita Babri ia es construida sur la ruinas de un templo indu destruida par invadores muslim en la sentenio 16. Muslimes dise ce los ia prea a la mascita asta desembre 1949, cuando alga indus ia pone un idol de Ram en la mascita e ia comensa adora lo.
La du grupos relijiosa ia litiga a multe veses sur la controla de la loca.
Induisme es la relijio majorial de Barat. On crede ce lo esiste tra plu ca 4000 anios. La dinastia prima muslim en la pais ia es instituida en la temprana de la sentenio 13.
@T Un scema nova per turisme en Arabia Saudi
@L aora_oji/2019/un_scema_nova_per_turisme_en_arabia_saudi
====== Un scema nova per turisme en Arabia Saudi ======
27 setembre 2019
Arabia Saudi va abri sua portes a turistes internasional a la ves prima, como parte de un promove plu grande per redui sua depende economial de petrolio.
La rena va inisia oji un sistem de visas per 49 paises, e va deseveri sua regulas de veste per visitores fema. La ministro de turisme, Ahmad al-Khateeb, ia descrive esta como "un momento istorial" per la pais.
Asta aora, visas ia es jeneral restrinjeda a peregrinores, comersiores e laborores stranjer.
La pais espera ance gania investis stranjer en sua industria de turisme. Lo vole ce la turisme crese de 3% asta 10% de sua produi interna bruta en la desenio veninte.
"Visitores va es surprendeda par la tesoros cual nos ave per comparti -- sinco locas de erita mundal de UNESCO, un cultur local pulsante, e belia natural encantante," la ministro ia dise.
Visitores fema stranjer no va es obligada a porta la roba abaia cual covre la corpo e debe es publica portada par femes saudi, ma los va debe vesti se en modo ancora modesta. On va ave ance no restrinjes contra la visita de la pais par femes nonacompaniada.
"Nos ave un cultur," al-Khateeb ia dise. "Nos crede ce nosa amis e nosa ospitadas va respeta la cultur, ma lo es serta modesta e lo va es multe clar."
On ancora no va permete ce persones nonmuslim visita la sites santa Maca e Medina, e on va manteni la proibi contra alcol. Plu detalias sur la scema, incluinte la lista de cual paises cuali, va es furnida en la plu tarda de oji.
La ministro de turisme ia comenta ce el no crede ce la ataca resente contra la industria de petrolio de Arabia Saudi va fa ce persones deside no visita.
"Nosa sites es entre la sites la plu secur de la globo. Donce nos tota no crede ce lo va fa un efeto a nosa projetas. Nos ave ja tota la sitadanes stranjer ci abita en Arabia Saudi, joiante Arabia Saudi. Nos es multe secur," el ia dise.
La scema per abri la turisme es un parte sentral de la program plu larga de reformi economial de Mohammed bin Salman, la prinse erital, per redui la foca de la rena a petrolio.
Longo la projeta, Arabia Saudi vole aumenta visitas internasional e interna asta 100 milion per anio, en o ante 2030. La governa previde la crea de milion empleas en turisme.
An tal, la cambia aveni a un tempo cuando la rena ave un imaje internasional manxada, entre criticas de sua istoria de diretos umana pos la omiside de jornaliste Jamal Khashoggi en la anio pasada, e un colpa resente contra ativistes per diretos fema.
En 2017, Arabia Saudi ia anunsia un projeta enorme per developa turisme, cual va cambia sincodes isolas e otra locas a la Mar Roja a vacanserias lusosa. En la anio pasada, on ia comensa construi un "site de diverti" prosima a la capital Riad, cual va inclui parces divertinte, complesos per sporte de autos, e un rejion de safari.
@T Un sculta de Trump en la pais nativa de sua sposa
@L aora_oji/2019/un_sculta_de_trump_en_la_pais_nativa_de_sua_sposa
====== Un sculta de Trump en la pais nativa de sua sposa ======
30 agosto 2019
Un sculta de lenio de la presidente de la SUA ia es construida en Slovenia, la pais nativa de sua sposa Melania, dividente opinas ala.
La sculta ave cuasi oto metres de altia. Lo ia es erijeda sur tera privata, e lo mostra Donald Trump con testa e mandibula retangulo, levante sua punio en la aira.
Sua artiste ia dise ce el vole ce lo servi como un comenta sur la politica popliste.
Esta segue la apare de un sculta nonsinsera de Melania Trump en la pais. Siselida de un tronco de arbor en la anteurbe de sua vila nativa Sevnica, lo mostra el en jacon azul con mano bastonin jestinte a la sielo.
Alga abitores ia descrive lo como un desonora, e ia dise ce lo aspeta min como Melania Trump e plu como un "xtrumpf" (un "pitufo" o "smurf").
La sculta nova de la presidente ia es construida en la vileta Sela pri Kamniku, a sirca 30 cilometres a norde-este de la capital Ljubljana.
Sua creor, Tomaz Schlegl, ia dise: "A la ves prima pos la Gera Mundal Du, la poplisme domina: regarda Johnson [de la Rena Unida], regarda Trump, nosa presidente, o Orbán [de Ungaria]. En cual dirije esta mundo vade? Nos desira abri oios sur la natur de democratia."
En la sculta de Trump, el porta un veston blu e cravata roja, e el sta en posa simil a la Sculta de Libria en York Nova.
Un mecanisme en la strutur de lenio permete ce sua espresa de fas cambia de "multe amin en la semana a vera asustante en la finis de semana", simbolinte la ipocritia de politicistes popliste.
Ma no tota persones acorda. Un abitor coler ia puxa lo con sua trator en cuando on ia prepara inaugura lo a saturdi. Alga oposores ia denunsia la "peri de lenio" e ia dise ce on no ia nesesa construi lo.
Schlegl ia responde: "Nosa visinas plu tradisional, campanianes, alega ce lo es fea, e dise ce lo no cabe a esta vista bela."
Donald Trump es un figur polalinte en Slovenia. La vila nativa de sua sposa ia atrae multe turistes pos la eleje de Trump como presidente en 2016.
Con ce visitores xerca comprende la anios temprana de Melania, abitores ia produi benes usante sua nom, incluinte pantoflas, torta, e amburgeres semblante Trump con capeles de ceso.
@T Un serpente cade de la sofito de un legeria nijerian
@L aora_oji/2019/un_serpente_cade_de_la_sofito_de_un_legeria_nijerian
====== Un serpente cade de la sofito de un legeria nijerian ======
26 julio 2019
En la stato Ondo en la sude-ueste de Nijeria, legores ia abandona ier sua sesion cuando un serpente ia cade de la teto.
Membros ia es a punto de comensa sua taxes de la dia cuando la serpente ia desende de un buco en la sofito. La persones en la salon ia fuji, incluinte regardores sur la balcon.
Un reporta dise ce la serpente ia morde nun, e ce ultima on ia mata e arde lo. Ma un otra dise ce lo ia serpe a via, nonferida.
Olugbenga Omole, un de la legores, ia comenta: "Acel salon es no plu secur per labora leginte, e par esta causa nos ia deside pausa pronto. La labora va es suspendeda per un tempo nondefinida."
Fumiga de la compleso es projetada per oji, cuando la legores es asente.
@T Un sesaspara en Gaza pos du dias de combate intensa
@L aora_oji/2019/un_sesaspara_en_gaza_pos_du_dias_de_combate_intensa
====== Un sesaspara en Gaza pos du dias de combate intensa ======
14 novembre 2019
Un sesaspara entre Israel e militaristes en Gaza aveni aora, pos du dias de batalia la plu intensa en alga menses. Fontes misri e filastini dise ce la sesaspara ia comensa a 05:30 de ora local. Israel no ia comenta ofisial.
Tredes-du filastinis ia mori en la violentia, provocada cuando Israel ia mata un militariste xef. Israel dise ce plu ca dudes de la matadas filastini ia es militaristes.
Plu desuples de filastinis e israelis ia es ferida, longo fontes medical a ambos lados.
La militar israeli ia dise ce plu ca 400 rocetos ia es xutada a Israel par Djihad Muslim Filastini (DMF), un grupo militariste. Israel mesma ia esecuta ondas de atacas airal contra blancos sur cual lo dise ce los parteni a acel grupo.
La violentia ia comensa pos un ataca par Israel ante la leva de sol a martedi, en cual Baha Abu al-Ata, un comandor de la DMF, ia es matada. Israel dise ce el ia es culpable per multe rocetos lansada de Gaza, e ce el ia intende fa un ataca pos tempo multe corta.
La parte la plu matante de la du dias de batalia ia aveni en la note pasada, cuando un ataca airal contra un casa en Gaza sentral ia mata un familia de oto persones.
La departe de sania en Gaza, manejada par Hamas, la grupo militariste dominante en la teritorio, ia dise ce la mores inclui un fem e un enfante, e ce tota ia es nonmilitar.
La israelis dise ce la ataca ia mata un comandor DMF, ci los descrive como la xef de un unia rocetal.
Pos la institui de la sesaspara, Nickolay Mladenov, ambasador de la Nasiones Unida per la prosede de pas en Asia sude-ueste, ia comenta ce e la NU e Misre "ia labora forte per preveni ce la aumenta la plu perilosa en e sirca Gaza gida a gera".
En un tuita, el ia recomenda ce ambos lados "mostra la autorestrinje masima e fa sua rol per preveni la versa de sangue".
@T Un situa perilosa pos du siclones en Mosambic
@L aora_oji/2019/un_situa_perilosa_pos_du_siclones_en_mosambic
====== Un situa perilosa pos du siclones en Mosambic ======
1 maio 2019
Mosambic nesesa aida urjente per maneja la seguentes pos la destrui causada par Siclon Kenneth. La organiza Save the Children ("salva la enfantes") dise ce la situa es estrema, vives es menasada, e plu mone es nesesada.
La Nasiones Unida ia dona $13 milion a Mosambic e Comori per comedas, acua e repara de infrastrutur.
38 persones en Mosambic norde es reportada como mor par causa de la siclon, ma ofisiores dise ce esta cuantia va deveni plu grande.
La tempesta ia colpa la nasion en Africa sude en la semana pasada, con ventas de 220 cilometres per ora, destruinte viletas e danante miles de otra casas.
Lo ia perde sua fortia, ma un pluve deluvial ia bate ancora la rejion ier, con predises de an plu. La pluve ia impedi atentas de furni aida par aira.
On predise ce esta sistem climal va cade un cuantia de pluve duple de lo cadeda par Siclon Idai, cual ia aveni en la mense pasada, lasante plu ca 900 persones mor tra la sude de Mozambic, Malaui e Zimbabue.
La risca de inonda ia es aumentada car Siclon Kenneth ia aveni a la fini de la saison pluvosa, cuando rios ia es ja alta. Pemba, ia capital rejional de la stato Cabo Delgado, ia esperia plu ca du metres de pluve e inondas.
O pais ("La pais"), un pajeria privata manejada, ia reporta ce sinco persones ia mori cuando un parte de un dejeteria ia colasa sur casas en Pemba en la sera de soldi. Lo no es clar esce on ia inclui esta moris en la soma ofisial.
Sirca 200 mil persones es perilida sola en Pemba. La situa en Macomia e Quissanga, vilas norde, es estrema, e on ave ansia ance per la isola distante Ibo. Ma la atentas de ateni acel locas no ia susede bon.
@T Un soldato traversa de Corea Norde a Sude
@L aora_oji/2019/un_soldato_traversa_de_corea_norde_a_sude
====== Un soldato traversa de Corea Norde a Sude ======
1 agosto 2019
Corea Sude ia deteni un soldato de Corea Norde ci ia traversa la zona desmilitarida, forte gardada, cual divide la du paises.
El ia es detetada par aparatos de imaji termal.
La om, nonidentifiada, ia es un soldato ativa ci ia espresa un interesa en alia se con Seoul.
Desuples de persones fuji de Corea Norde en cada anio, ma traversas de la zona desmilitarida es estrema perilosa e rara.
En novembre 2017, un soldato de Corea Norde ia es fusilida a cuatrodes veses par soldatos de sua lado cuando el ia atenta traversa.
En la aveni resente, la om ia es detetada a mercurdi, sirca medianote, prosima a la rio Imjin, cual flue de Corea Norde a Corea Sude tra la zona desmilitarida en la ueste de la penisola. El ia es arestada par soldatos de Corea Sude.
Esta ia aveni en la dia pos cuando Corea Norde ia fa du lansas de misiles de distantia corta.
La ajenteria de nova de Corea Norde ia dise ce la lansas, supravideda par Kim Jong-un, ia es probas de "un sistem de roceto gidada de spesie nova, con calibre grande, capas de lansas multiple".
La probas ia es "un averti" a Corea Sude sur eserses militar projetada con la SUA, plu tarda en agosto.
@T Un strato spesa de graniza en Mexico
@L aora_oji/2019/un_strato_spesa_de_graniza_en_mexico
====== Un strato spesa de graniza en Mexico ======
1 julio 2019
En Mexico, un tempesta forte de graniza ia lasa ses suburbes de la site Guadalajara covreda par un strato spesa de jelo.
La jelo ia ave spesia de asta 150 sentimetres en alga locas, e veculos ia es partal sumerjida en lo.
On ia usa macinas de proteje sivil per clari la stradas en esta site de sinco milion abitores, locada a norde de la Site Mexico.
Ofisiores local ia reporta ance inondas e arbores cadeda, ma on crede ce no person ia es ferida.
A ante, la site ia saborea un temperatur de plu ca 30°C. Lo ia es colpada par tempestas de graniza en la pasada, ma rara tan forte como esta.
Autoriosas dise ce 200 casas ia es danada e deses de veculos ia es puxada a via en la site e distritos ensircante.
Enrique Alfaro Ramírez, governor de la stato, ia descrive la aveni como noncredable. El ia comenta: "Alora nos demanda a nos esce la cambia de clima es real. Estas es fenomenos natural nunca videda a ante."
@T Un sumarina istorial deutx emerji a la costa franses
@L aora_oji/2019/un_sumarina_istorial_deutx_emerji_a_la_costa_franses
====== Un sumarina istorial deutx emerji a la costa franses ======
12 janero 2019
Sur un plaia en la norde de Frans, la ruina de un sumarina deutx de la Gera Mundal Prima reapare gradal pos desenios de es enterada en la arena.
La moves natural de arena a Wissant, prosima a Calais, esposa la restas de la UC-61 cual ia encalia ala en julio 1917. La ecipo ia inonda la barcon e ia abandona lo, e ja en la desenio de 1930 la plu de la sumarina ia es enterada.
Aora lo deveni denova un atrae de turistes, ma la maior local averti ce sua apare va es cisa no plu ca tempora.
De desembre, du partes de la sumarina es vidable a marea basa, a sirca sento metres de la dunas.
Bernard Bracq, la maior de Wissant, ia dise: "La ruina es vidable per tempo corta a cada anio du o tre, dependente de la mareas e la venta cual causa la moves de arena. Ma pos un bon soflon de venta, la ruina va desapare denova."
An tal, Vincent Schmitt, un gidor local de turistes, crede ce la ventas e mareas va causa la esposa de an plu de la UC-61. "Tota la abitores de Wissant ia sabe ce on ave asi un sumarina, ma la plu de la ruina es covreda par deponeda e es donce nonvidable. Pesos reapare de tempo a tempo, ma esta es la ves prima cuando nos ia descovre tan multe."
Sumarinas deutx ia ojeti barcones de la Aliadas en la Gera Mundal Prima, afondante sentos de los. Istoristes dise ce la UC-61 ia afonda a la min 11, o par pone bombetas o par xuta torpedos.
En sua viaja final, la sumarina ia parti de Zeebrugge en Beljia, dirijente se a Boulogne-sur-Mer e Le Havre per pone bombetas, cuando lo ia encalia. La 26 ecipores ia sede se a la autoriosas franses.
@T Un suprafoli de comprores clui Costco en Xina
@L aora_oji/2019/un_suprafoli_de_comprores_clui_costco_en_xina
====== Un suprafoli de comprores clui Costco en Xina ======
28 agosto 2019
Costco, vendor esuan de benes, ia es obligada a clui temprana en sua dia prima en Xina, car la boteca ia deveni tro plen de comprores.
Persones ia sufri filos longa e un caos de trafica per ateni la boteca en Shanghai, cual on ia clui temprana par causa de un fola tro grande.
Costco es un boteca descontante cual vende benes diversa, de comedas fresca a eletronicales de casa.
Alga clientes ia spende du oras en filos per paia per sua compras, e otras ia debe espeta tra tre oras per parci sua auto. Un video ia mostra persones puxante tra un fola densa per oteni gales rostada.
"Par causa de suprafoli en la mercato, e per furni a tu un esperia plu bon de boteca, Costco va clui tempora en la posmedia de 27 agosto. Evita veni, per favore," la vendor ia avisa en sua ap ofisial.
Costco ave ja un presentia enlinia en Xina de 2014, en asosia con Alibaba, compania jigante de ecomersia.
La entra de Costco a Xina veni cuando otra vendores stranjer ia esperia difisiles en compete con companias local.
En esta anio, Amazon ia anunsia ce lo redui sua operas en Xina. E Carrefour, compania franses, ia acorda vende 80% de sua comersia xines a Suning.com, un vendor local, pos un serie de perdes.
La move par Costco aveni ance a un tempo de tensa cresente entre la SUA e Xina sur comersia.
La du economias la plu grande de mundo ia fa un gera comersial contra lunlotra tra la anio pasada, e la situa ia mali con menasas de plu tarifas par ambos lados.
@T Un tempesta subita mata turistes en Elas
@L aora_oji/2019/un_tempesta_subita_mata_turistes_en_elas
====== Un tempesta subita mata turistes en Elas ======
11 julio 2019
Ses turistes ia es matada e a la min 30 otra persones ia es ferida en un tempesta violente cual ia traversa un parte de Elas norde.
Ventones, pluve forte e graniza ia bate Halkidiki, prosima a la site Thessaloniki, en la tarda de ier.
Un duple txesce ia mori cuando sua caravan ia vola tra la aira.
Un fem romanian e sua enfante ia es matada par la colasa de la teto de un restorante en Nea Plagia.
Un om rusce e sua fio ia es matada par un arbor cual ia cade prosima a sua otel en Potidea, un vacanseria costal.
La governa ia declara un state de crise e ia envia plu ca sento laborores de salva.
La tempesta ia segue un periodo de clima multe calda en Elas. La temperatur ia ateni 37°C en la du dias pasada.
Imajes e videos en redes sosial mostra arbores cadeda, autos inversada, e construidas danada.
On dise ce esta tempesta estracomun ia dura tra mera 20 minutos.
La ministro de proteje de sitadanes, Michalis Chryssohoidis, va visita la rejion oji.
@T Un tigre dormi sur un leto en un casa barati
@L aora_oji/2019/un_tigre_dormi_sur_un_leto_en_un_casa_barati
====== Un tigre dormi sur un leto en un casa barati ======
19 julio 2019
En Barat, un tigre fema ia fuji en la stato Assam, e un abitor local ia trova el reposante sur un leto en sua casa.
On crede ce la tigre ia sorti de la Parce Nasional Kaziranga, do 50 animales ia mori par causa de inondas major en dias resente.
Ofisiores de un organiza de conserva ia vade a la casa, e ia crea un via secur per la parti de la tigre. On ia gida el en dirije a la jungla.
La tigre ia es prima videda a lado de un via xef en la matina de ier, a 200 metres de la parce. Probable el ia deveni disturbada par la trafica e ia refuja se en la casa, prosima a la via.
La posesor de la casa e la boteca visina ia core, como ance sua familia, cuando los ia vide la tigre entrante. La person dise ce el va conserva la tela e cuxin sur cual la tigre ia reposa.
Trafica ia es blocida per un ora e on ia esplode petardos per velia la bestia, ci ia sorti de la casa a 17:30 de ora local, vadente a la foresta. On no sabe esce el ia entra a la foresta o ia pasea mera a un otra area visina.
La parce, reconoseda par UNESCO, ave 110 tigres.
Inondas de monson ia afeta grave Bihar e Assam, statos en la este de la pais, matante plu ca 100 persones e deslocante miliones.
La saison de monsones aveni entre junio e setembre. En esta anio, lo ia causa caos ance en Nepal e Bangladex.
@T Un tore antica colasa en Afganistan
@L aora_oji/2019/un_tore_antica_colasa_en_afganistan
====== Un tore antica colasa en Afganistan ======
14 junio 2019
Un tore antica en Ghazni, un site en Afganistan, ia colasa, levante demandas sur la capasia de la governa per proteje la ojetos istorial de la pais.
Video en redes sosial mostra la desintegra de un fortres en la site vea.
La tore ia es un de deses ja destruida en la site. Ofisiores ia culpa un pluve forte, ma alga oposores acusa ce la governa es descurante.
La arciteta muslim e premuslim en Ghazni es vasta amirada, an si geras ia fa un mal efeto.
Un portavose per la ministreria de informa e cultur ia dise ce la fortres ia es "danable par pluve e xef danada par pluve". El ia ajunta: "La via xef es situada en la prosimia de la fortres, e esta afeta la tores."
Ghazni ia es un sentro budiste florinte asta la sentenio 7. Ma en 683 EC, armadas arabi ia trae islam a la rejion. En la sentenio 13, lo ia es destruida par la armadas mongol de Txingis Han, gidada par sua fio Ogedei Han.
La site antica ia es identifiada como un Site Asian de Cultur Muslim par la Organiza de Coopera Muslim.
An tal, la rena taliban ia fa ce multe de sua construidas antica es difisil per visita par stranjeres.
@T Un tren nova barati fali en sua viaja prima
@L aora_oji/2019/un_tren_nova_barati_fali_en_sua_viaja_prima
====== Un tren nova barati fali en sua viaja prima ======
17 febrero 2019
La tren la plu rapida en Barat ia rompe en sua viaja prima, a la dia pos sua inaugura par Narendra Modi, ministro xef de la pais.
Tren 18, ance conoseda como la Vande Bharat, ia es en reveni a la capital Delhi de la site Varanasi pos sua turi prima, cuando la frenos de un vagon ia deveni fisada.
Un portavose per la ministro de ferovias ia dise ce cisa la tren ia colpa un bove sur la linia.
Corta pos la fali de la frenos, la locomotivores ia nota fuma en la cuatro vagones final, e la eletrica ia rompe en tota compartes.
La pasajores, xef ofisiores de ferovia e jornalistes, ia debe usa un otra tren per reveni a Delhi.
An con la sujesta par la ministreria ce la tren ia colpa un bove, la fronte de la tren pos la aveni ia mostra no indica de dana.
On previde ce la tren nova va comensa sua servi comersial oji. Lo va redui la tempo de viaja entre Delhi e Varanasi par ses oras. En sua probas, la tren ia ateni un rapidia de 180km per ora.
@T Un urso gris mata un musiciste en Canada
@L aora_oji/2019/un_urso_gris_mata_un_musiciste_en_canada
====== Un urso gris mata un musiciste en Canada ======
21 agosto 2019
Un om canadian franses ia mori pos es atacada par un urso gris en un rejion distante de Canada en la semana pasada.
Julien Gauthier, un musiciste de 44 anios, ia es surprendeda par la bestia cuando el ia dormi. El ia es viajante longo la Rio Mackenzie, rejistrante sonas de natur per un projeta musical.
Usual, atacas nonprovocada par ursos gris es multe rara.
A 15 agosto, a sirca 07:45 de ora local, la Polisia Montante Canadian Real ia es avisada par un transmetador de crise en la rejion Tulita en la Teritorios Norde-Ueste, un loca multe isolida cual on pote asede sola par mar o aira.
Camille Toscani, un biolojiste ci ia viaja con Gauthier e ia fa la alarma, ia dise ce Gauthier ia es tirada a via par un urso en la media de la note.
Par causa de mal clima, la polisia ia envia un elicotor a la rejion per xerca el e evacua la viajores. On ia trova sua corpo a la dia seguente.
La vitim ia es un composor e injenior de sona. El ia esplica sua projeta a un plataforma de finansia coletiva, disente ce el intende vade par canoa longo la Rio Mackenzie de Fort Providence asta Inuvik (sirca 1500 cilometres).
El ia nase e crese en Canada con sua madre e padre franses, ma ia move a Frans per abita a la eda de 19 anios.
La Orcestra Simfonial de Bres, per ci Gauthier ia es un composor permanente de 2017, ia onora el, disente ce el ia es "un om sentosa, jenerosa e talentosa" ci ia ave "un desira de aventur, mervelia e intelijentia rara".
Toscani ia dise: "Lo ia es sua fantasia: vade ala, vade a la Norde. El ia demanda ce me partisipa en esta aventur. Nos ia pensa sur lo tra tre anios. Nos ia es tan felis ce nos ia pote fa lo. El ia es un artiste unica, inspirada par spasios abrida e natur."
En la anio pasada, el ia pasa sinco menses en rejistra sonas en la Isolas Kerguelen en Antartica. La resulta de acel viaja ia es un peso nomida Simfonia Sude, cual ia es difusada en radio franses.
@T Un valis de mone es furada de Robert Mugabe
@L aora_oji/2019/un_valis_de_mone_es_furada_de_robert_mugabe
====== Un valis de mone es furada de Robert Mugabe ======
11 janero 2019
En Zimbabue, tre persones ia apare en corte, acusada de fura un valis conteninte $150 mil de mone fisical de Robert Mugabe, la presidente desponeda de la pais.
On alega ce la furores suspetada ia spende la mone per autos, casas e animales.
Entre la acusadas es un relatada de la presidente pasada, Constantia Mugabe, sur ci on dise ce el ia posese claves de sua casa campanial en Zvimba, prosima a la capital, Harare. On alega ce esta ia reali la asede.
La otra suspetadas ia es empleada como limpores a la tempo de la fura, cual ia es parente fada entre la prima de desembre e la temprana de janero.
"Johanne Mapurisa ia compra un Toyota Camry e un casa per $20 mil pos la aveni," Teveraishe Zinyemba, avocato acusante, ia informa la corte en la vila Chinhoyi. "Saymore Nhetekwa ia compra ance un Honda e bestias cual ia inclui porcos e boves per un cuantia nonrevelada."
Robert Mugabe, ci ave aora 94 anios, ia es espulsada de sua posto par la militar de Zimbabue en 2017. Asta alora, el ia ave autoria tra 37 anios, prima como la ministro xef e a pos como la presidente.
Mugabe, ci ia declara famosa ce un pais pote nunca bancaroti, ia es acusada de saborea un vive lusosa en sua preside supra la colasa economial de Zimbabue.
Dolares SUA es ala alta valuada. En teoria, la "biletas obligante" cual bancos furni es egal a la mone SUA -- ma en realia los compra multe min.
Pos jubila, Mugabe ia esperia difisiles de pasea e ia pasa alga menses en Singapor per trata medical. Lo no es clar esce el ia es a casa cuando la fura ia aveni.
On ia libri la tre suspetadas con garantia, ma reportas indica ce un person cuatro resta ultra la lege.
@T Un vitim de violentia avisa la polisia par comanda un piza
@L aora_oji/2019/un_vitim_de_violentia_avisa_la_polisia_par_comanda_un_piza
====== Un vitim de violentia avisa la polisia par comanda un piza ======
23 novembre 2019
Un fem en un situa de violentia familial en la SUA ia susede telefoni a la servi de crise sin la sabe de la maltrator, par finje comanda un piza.
Polisiores en la site Oregon en la stato Ohio ia loda la pensa rapida de la fem. Los ia aresta la person acusada de violentia. La fem anonim ia clari a jornalistes local ce sua madre ia es atacada.
Esta stratejia per fa un telefoni sutil a la crisores es ja discuteda en la interede tra anios como un lejenda, ma esta es un caso rara en cual lo ia funsiona.
En la pasada, ofisiores ia averti ce la susede de la tatica no es serta, car la persones ci responde a la telefonis no es instruida per reconose un comanda de piza como un clama vera per aida.
La person ci ia responde a esta telefoni, Tim Teneyck, ia dise ce el ia crede inisial ce la fem ia era en eleje la numero. Cuando el ia insiste ce el parla a la person intendeda, Teneyck ia comprende lo cual aveni, partal car el ia vide situas simil compartida en redes sosial.
"On vide lo en Facebook, ma lo es un cosa per cual persones es nunca instruida," el ia comenta.
La conversa ia comensa tal:
Teneyck --- Oregon 911. Fem --- Me ta vole comanda un piza a [adirije supresada]. Teneyck --- Tu ia telefoni a 911 per comanda un piza? Fem --- Em, si. Aparte [supresada]. Teneyck --- Esta numero no conveni per comanda un piza. Fem --- No, no, no. Tu no comprende. Teneyck --- Me comprende tu aora.
Plu tarda en la telefoni, la fem ia trova modos creosa per responde a demandas de si o no sur la peril cual el e sua madre fronti, e cual servis los nesesa:
Teneyck --- Esce la otra person es ancora ala? Fem --- Si, me nesesa un piza grande. Teneyck --- Oce. E sur medica, tu nesesa medica? Fem --- No. Con salsix de peperon.
@T Un volcan eruta en Italia
@L aora_oji/2019/un_volcan_eruta_en_italia
====== Un volcan eruta en Italia ======
4 julio 2019
Un volcan ia eruta sur Stromboli, un isola italian, matante un person e fujinte turistes asustada.
La vitim ia es un paseor mas. El ia es colpada par un petra cadente. On ia descovre sua ami brasilera desidratada e xocada. Otra persones ia es ferida.
La marina es preparada per fa cisa un evacua coletiva. 70 persones es ja evacuada. Pompores batalia focones sur la isola.
La volcan es un de la plu ativas sur nosa planeta, en un state de eruta periodal de 1932.
Un laboror de otel ia comenta: "Nos ia vide la esplode de la otel. On ia ave un ruji forte. Nos ia tapi nosa oreas, e pos esta, un nube de sene ia traversa nos. La sielo intera es plen de sene, un nube alga grande."
Un turiste sur la isola Panarea, a cuasi 30 cilometres de la volcan, ia oia la eruta. "Nos ia turna e ia vide un nube xampinionin veninte de Stromboli. Cadun ia es xocada. Alora lava roja calda ia comensa desende la monte en dirije a la vileta peti Ginostra."
On reporta ce vacansores ia core en la mar pos vide sene asendente de la volcan. La isola es un loca popular per casas de vacanse per persones rica e famosa.
Stromboli ave la nometa "Faro de la Mediteraneo" e es abitada par sirca 500 persones. La eruta major la plu resente ia aveni en 2002, cuando un esplode ia destrui construidas e molos, ferinte ses persones.
@T Un vota jeneral en Britan per solve la problem de Brexit
@L aora_oji/2019/un_vota_jeneral_en_britan_per_solve_la_problem_de_brexit
====== Un vota jeneral en Britan per solve la problem de Brexit ======
30 otobre 2019
En la Rena Unida a la sera de martedi, parlamentores ia deside fa un vota jeneral per rompe final sua nonprogresa sur Brexit: la retira de Britan de la Uni European. La popla va vota a 12 desembre en un compete cual va es cisa la min predisable en desenios.
Boris Johnson, la ministro xef, ia gania sua proposa cuatro per un vota jeneral, con 438 parlamentores favorente e sola 20 a contra, pos cuando Jeremy Corbyn, sua oposor xef, ia declara ce sua Partito de Labora va suporta un vota como "un posible a un ves en un jenera per cambia nosa pais".
La vota, corta ante natal, va es la eleje nasional prima en desembre pos 1923.
La Democratas Libraliste e la Partito Nasional Scotes ia asteni cuando on ia rejeta sua dia prefereda, 9 desembre. Cuasi un dui de tota parlamentores de Labora ia es asente o ia vota contra la proposa, indicante sua nonfelisia sur un eleje subita, ma alga ia culpa un confusa par sua partitos per sua falis de vota.
La parlamento va clui a la mercurdi veninte per un campania corta de sinco semanas, si la Salon Alta aseta la proposa par Johnson en la dias veninte, como espetada.
Corbyn ia inisia sua campania par urje ce votores ejeta la Conservalistes de Johnson ci crede ce los es "naseda per rena", e Jo Swinson, xef de la Democratas Libraliste, ia dise ce esta es "nosa oportun la plu bon de eleje un governa per para Brexit".
Parlante en la Salon Basa, Johnson ia razona ce un parlamento "nova e reviveda" es nesesada per estrae la pais de la Uni European. "On lasa nos con no otra posible ca demanda a la popla per libri nos de esta rua sin sorti," el ia dise.
Ma plu tarda, el ia ajunta un comenta plu cauta, informante un consenta de parlamentores Conservaliste ce esta va es "un campania difisil, ma nos va fa la plu bon cual nos pote". El ia dise ce el no ia desira un vota jeneral, ma ia es obligada a proposa lo car la Partito de Labora ta "muta e mutila" sua scema de Brexit ultra reconosablia.
Per atenta uni sua partito, la ministro xef ia deside repermete la membria de des de la dudes-un parlamentores ci el ia espulsa en la mense pasada per sua oposa de sua scema de Brexit.
La linias major de batalia en la campania va segue la tema de Brexit, car Johnson ia fali ateni sua promete de estrae la Rena Unida de la Uni European a 31 otobre.
La Conservalistes va campania per reali Brexit par aseta la acorda negosiada con la UE par Johnson, e la Partito de Labora promete un referendo du afin la popla deside la demanda.
La Partito de Brexit va atenta suprapasa la Conservalistes par recomenda un Brexit sin acorda, e la Democratas Libralistes va ofre cansela Article 50 de la Trata sur Uni European per atrae votores ci prefere ce la pais resta en la uni. Acel article dise: "Cualce stato membro pote deside retira se de la uni en acorda con sua propre nesesas constitual.
An si la parlamento ia deside concluinte per un vota nasional, multe membros minor de la du partitos la plu grande, Conservalistes e Labora, es multe nervosa de fa un tal vota a un tempo tan noncomun e tan political volatil.
@T Venezia proibi barcones grande de sua sentro
@L aora_oji/2019/venezia_proibi_barcones_grande_de_sua_sentro
====== Venezia proibi barcones grande de sua sentro ======
9 agosto 2019
La governa italian ia dise ce barcones grande de turi va es proibida de entra a la sentro istorial de Venezia.
Comensante en setembre, barcones con pesa de plu ca mil tones va es diverjeda de alga vias navigable.
Esta segue un asidente en junio, en cual un barcon ia colide con un doca, ferinte sinco persones.
Ma conservores dise ce la projeta de la governa no sufisi per preveni erodes su acua e contaminas en esta site de lagon.
Alga barcones va es obligada a doci se a la terminas Fusina e Lombardia, distante de la sentro. A la fini de 2020, un tri de tota barcones va es redirijeda.
Criticores dise ja longa ce ondas creada par barcones de turi sur la canal erode la fundas de la site, cual sufri multe inondas. Otras cexa ce los diminui la belia de la vistas istorial de Venezia e ce los trae tro multe turistes.
Ma la asidente en junio ia coraji protestores a recomenda un proibi asoluta. Un barcon con longia de 275 metres ia colpa un doca e un barco peti de turistes en la canal Giudecca.
Acel canal pasa prosima a la Plaza de San Marco, un loca multe popular per visitores, e es un de la vias navigable major de Venezia.
En 2013, la governa ia proibi barcones con pesa de plu ca 96 mil tones de la canal Giudecca, ma, plu tarda, la lege ia es canselada.
En 2017, on ia anunsia ce barcones plu grande va es diverjeda de la sentro istorial, ma on ia previde ce la reali de acel scema va ocupa cuatro anios.
@T Violentia e rubas de botecas en Johannesburg
@L aora_oji/2019/violentia_e_rubas_de_botecas_en_johannesburg
====== Violentia e rubas de botecas en Johannesburg ======
3 setembre 2019
En Sudafrica, deses de persones ia es arestada en la site Johannesburg cuando tumultores ia ruba botecas e ia ensende construidas e veculos.
La polisia ia xuta gas lacrimojen, baletas de cauxo, e granadas aturdinte per atenta supresa la turba ier. On reporta ce multe de la botecas rubada es poseseda par sitadanes stranjer.
Ma Bheki Cele, ministro de polisia de la pais, ia dise ce "criminalia, no xenofobia" ia es culpable per la "violentia fol".
Pos visita la Distrito Comersial Sentral de la site, do multe de la tumultas ia aveni, el ia comenta: "Xenofobia es usada como un escusas. No cosa ia provoca cualce forma de combate entre la sudafricanes e sitadanes stranjer."
An tal, Geoffrey Onyeama, ministro de esternas de Nijeria, ia dise ce botecas nijerian ia es ojetida par "criminores nonpensante" e el ia promete fa "atas autoriosa".
Sudafrica ia esperia un serie de atacas xenofobica en menses resente. En marto, tre persones ia mori en protestas contra botecas poseseda par stranjeres en Durban.
La tumulta la plu resente ia comensa a soldi, cuando un construida en la Distrito Comersial Sentral de Johannesburg ia ensende e colasa, matante tre persones a la min.
Ier, la violentia ia estende a Jeppestown, un rejion prosima, ante ateni otra partes de la site, como Denver, Malvern e Tembisa.
Sentos de persones ia marxa tra la Distrio Comersial Sentral, do videos distribuida en redes sosial ia mostra la ruba de botecas e linias de autos destruida par foco. A la min 41 persones ia es arestada a pos.
Un portavose de la polisia ia dise: "Nos ia stabli la situa e ia aresta ja alga deses de persones. Nos no pote afirma la cuantia final a esta momento, ma los va es acusada de violentia publica. Nos investiga ance un acusa de omiside atentada."
La violentia segue a mera alga dias pos un turba simil en la capital, Pretoria. Ala, scaramuxas ia aveni entre polisiores e tumultores, e botecas de posese stranjer ia es rubada e ruinada.
@T Vitis protesta sur un intercambia de tera con Barat
@L aora_oji/2019/vitis_protesta_sur_un_intercambia_de_tera_con_barat
====== Vitis protesta sur un intercambia de tera con Barat ======
19 febrero 2019
Abitores de Suva, la capital de Viti, protesta sur la deside par la governa de permete la construi de un Comision Alta Barati nova en la jardines botanical cual es multe amada en la site.
Esta es un acorda mutua con la governa de Barat, cual en 2014 ia dona un peso eselente de tera en Delhi Nova a la Comision Alta Viti.
Acel ia es alora forte criticada en Barat. Oposores ia cexa ce la valua alta de la tera no refleta la state diplomata modesta de Viti en Barat, an si cuasi 40% de vitis ave asendentes barati.
Plu, on ia dise ce la construi a bon custa en Suva no va es un intercambia ecuilibrada per la imobila custosa en Chanakyapuri, la enclave diplomata de Delhi Nova. Criticores ia razona ce Barat va perde par la acorda.
Aora, pos cuasi sinco anios, vitis protesta. Parlamentores e otra figures publica coraji la popla a suscrive un solisita cual averti sur la danas ambiental posible a la Jardines Thurston.
Un editorial en la jornal Fiji Times ia sujesta ce la acorda va gida a plu construidas en la jardines. "Cada intrui peti a esta spasio fisical, un ambiente cultural verde, debe es resisteda, car asinias futur de spasio nova par cualce governa va es tan rara como dentes de gal."
La jornal divina ce Barat atenta mostra sua autoria rejional en Viti, frontida par la prosimia e prestijia de la Ambasada Xines.
@T Xasa de elefantes es no plu proibida en Botsuana
@L aora_oji/2019/xasa_de_elefantes_es_no_plu_proibida_en_botsuana
====== Xasa de elefantes es no plu proibida en Botsuana ======
23 maio 2019
Botsuana ia sutrae un proibi contra xasa de elefantes, indicante un tensa cresente entre umanas e la bestias, cual destrui recolies a veses.
Oposores de la proibi, instituida en 2014, dise ce la restrinje ia causa problemes per cultivores minor e per los ci ia benefica de xasa en la pasada.
Botsuana ave sirca 130 mil elefantes, la popla la plu grande de mundo.
La deside va provoca probable un reata coler de conservores de natur, ci crede ce lo es un caso de politica. Lo va dana cisa ance la reputa internasional de Botsuana per conserva, e va afeta sua revenu de turisme. Sola la mina de diamantes furni un fonte plu grande de revenu stranjer a la pais.
En junio pasada, presidente Mokgweetsi Masisi ia crea un comite per resenia la proibi poneda par sua presedor Ian Khama en 2014. En febrero, la comite ia recomenda denove la permete de xasa.
En un declara, la Ministreria de la Ambiente, Conserva de Recursos Natural e Turisme ia dise: "La cuantia e niveles alta de desacorda entre umanas e elefantes e la efeto resultante a la susta ia es cresente. Lo pare ce predores ia aumenta e ia causa multe dana, car los mata bestias en cuantias grande."
Lo ia ajunta ce lo va serti ce "la reinstitui de xasa es fada en manera ordinada e etical".
Sondas ia mostra ce la "estende" de elefantes -- pd. la distantia tra cual los viaja -- ia crese. Espertas esplica esta par multe fatores, incluinte la crise de clima.
Elefantes pote es multe destruosa cuando los veni sur cultiverias o pasa tra viletas. Los destrui cultivas de gran e a veses los mata an persones.
La plu de la elefantes de Botsuana abita la rejion norde de la pais, libre traversante fronteras a Namibia, Zambia e Zimbabue.
La sonda la plu resente de la bestias sujesta ce sua cuantia no crese, e, diseda par conservores de natur, la deside intende alti la popularia de la presidente entre votores campanial ante la eleje en otobre.
On ave sirca 415 mil elefantes en Africa, longo la Uni Internasional per Conserva de Natur. La popla ia es multe reduida par xasa nonlegal per ivor.
On ia fa campanias internasional per proibi tota vendes de ivor e preveni tal la xasa nonlegal, e estas ia deveni multe forte. Ma on desacorda ancora sur la modo de maneja poplas grande e destruosa de elefantes cual intrui en viletas umana.
@T 2019
@L aora_oji/2019/xef
====== 2019 ======
La contenida intera de la blog ia es moveda a esta vici en 13 agosto 2019.
Reportas plu vea ...
@T Xefes catalan es prisonida per tisa rebela
@L aora_oji/2019/xefes_catalan_es_prisonida_per_tisa_rebela
====== Xefes catalan es prisonida per tisa rebela ======
14 otobre 2019
La Corte Suprema de Espania ia condena nove xefes separadiste catalan a entre nove e des-tre anios en prison per tisa rebela, par causa de sua rol en la referendo sur autonomia en 2017.
On ia trova ce tre plu acusadas es culpable de desobedi e on ia multa los, ma los no va spende tempo en prison.
Tota la des-du politicistes e ativistes ia nega la acusas.
Separadistes en Catalunia ia intende un desobedi sivil coletiva ante la anunsia de judi.
La avocatos acusante ia desira asta 25 anios en prison per Oriol Junqueras, la vispresidente pasada de Catalunia e la plu major de la xefes separadiste litigada.
A Junqueras on ia dona la condena la plu longa: 13 anios per tisa rebela e per malusa de finansia publica. La otra condenas envolve periodos variante de nove anios e plu.
La nove xefes ia es desculpada de la acusa plu grave de rebela mesma.
@T Xefes de stato discute la crise de clima en Espania
@L aora_oji/2019/xefes_de_stato_discute_la_crise_de_clima_en_espania
====== Xefes de stato discute la crise de clima en Espania ======
2 desembre 2019
Xefes political e diplomatas climal consenta en Madrid per du semanas de discutes, ensircada par un senti cresente de crise. Diseda par António Guterres, secretor jeneral de la Nasiones Unida, "la punto de cual on no pote reveni es no plu ultra la orizon".
On ia intende ce esta congresa de la partitos, nomida COP25, va aveni en Txile, ma la governa ia cansela lo pos semanas de turbas sivil. Espania ia ofre alora ospita la aveni, cual va reseta 29 000 partisipores en sua du semanas.
Parlante a ante, Guterres ia dise ce la crise climal es menasante e ce xefes political debe responde:
"En la des-du menses importante cual veni, lo es esensal ce nos securi prometes nasional plu aspirante -- spesial de la emetores major -- per comensa, sin retarda, redui emetes de gases invernerial con un rapidia cual coere con ateni neutralia de carbono ante 2050. Simple, nos nesesa sesa escava e fora, e esplota la posibles vasta ofreda par enerjia renovable e solves con fundas natural."
Cuasi cada pais de mundo ia suscrive e validi aora la acorda climal de Paris. Su la acorda, tota de los va debe fa un promete nova sur la clima ante la fini de 2020.
On previde ce 50 xefes de stato va es presente a la consenta en la capital espaniol, ma la presidente de la SUA no va es entre los. En loca, Nancy Pelosi, ci preside la Salon Basa en acel pais, va vade a la confere con un delega de congresores.
Asentuante la efetos de la clima cambiante en la mundo real, un reporta de Salva la Enfantes, un asosia carital, dise ce "xocas climal" menasa deses de miliones de persones en la este e sude de Africa.
Lo dise ce inondas, liscateras, secia estrema e siclones ia trae 33 milion persones a un manca crisin de comables. On crede ce plu ca un dui de estas es enfantes.
La situa es malida car la du siclones la plu forte en la istoria rejistrada de Africa ia afeta la mesma rejion a interval de mera alga semanas. Siclon Idai ia bate Mosambic, Zimbabue e Malaui en marto pasada, e pos ses plu semanas, Siclon Kenneth ia causa inondas grave en Mosambic.
Guterres va informa la congresa ce la clima ia deveni aora un crise plen creseda. El va urje paises a grandi notable sua aspiras de redui carbono: on debe fini la suvenis per estrae combustables de fosil, e construi no sentros eletrical enerjida par carbon pos 2020.
@T Xicas joven pasea secreta a casa en temperatur sibirsce
@L aora_oji/2019/xicas_joven_pasea_secreta_a_casa_en_temperatur_sibirsce
====== Xicas joven pasea secreta a casa en temperatur sibirsce ======
23 janero 2019
En Sibir, on ia trova du xicas de sinco anios ci ia sorti de sua enfanteria en temperatur intensa fria, sin ce sua enseniores vide los.
La du, ci ia vole surprende sua jenitores, ia sufri ulseras jelal e ipotermia. Los ia pasea a casa en un de la dias la plu fria de la anio: la temperatur ia es -45°C.
Un camera ia filma los cuando los ia sorti. Un de los ia teni un animal de pelux e no ia porta gantos. El es aora en ospital en Yakutsk, la capital rejional, con ulseras a tre ditos.
Sua madre, Evdokia Kutukova, ia dise: "Tre de sua ditos ia jela dur. El plora. La enfantes es ancora xocada."
El ia descovre ce sua fia Lena ia sorti en la vileta Namtsy cuando el ia vade a la enfanteria per reprende el, e ia vide ce sua jacon es asente.
El ia averti la empleadas, e alora on ia trova ce la ami la plu prosima de sua fia, ci la reportas no nomi, manca ance. Sua jenitores no ia sabe do el es.
Kutukova ia dise ce la avo de la familia ia telefoni alora per dise ce Lena veni de ariva a casa, solitar, larmante e jelada.
Sua sposo ia dise ce un pasor nonconoseda ia dona un xarpe a la xica, cual ia aida el. "Como fria lo ia es sin gantos es difisil per imajina, e con un jueta en mano!"
La otra xica ia perde sua via en la oscuria de la vileta, e on ia trova el pos un plu ora. El ia refuja se en un casa prosima.
"Grasias a Dio, el ia deside entra a la casa de un otra person," Kutukova ia comenta. "Lo es bon ce el no ia deveni ulserada, mera estrema fria."
La xica ia sufri de ipotermia, ma ia vade a casa pos un esamina par medicistes.
La du xicas ia sorti nunca solitar de la enfanteria a ante. On ia inisia un investiga per descovre como la situa ia aveni.
@T Xina desasentua la elejes prodemocrata en Hongkong
@L aora_oji/2019/xina_desasentua_la_elejes_prodemocrata_en_hongkong
====== Xina desasentua la elejes prodemocrata en Hongkong ======
26 novembre 2019
En Xina, la medias governal atenta desasentua la resultas de la votas distrital en Hongkong, en cual la prodemocratas ia fa vinses major.
La governa ia espera ce la eleje va provoca suporta par la "majoria silente" oposada a la protestas. En loca, alga de sua aspirores importante ia perde sua sejas de comite local.
En sua apare publica prima pos la resultas, la xef dirijente Carrie Lam ia dise ce el reconose ce persones es consernada par "defetos de governa, incluinte nonfelisia con la tempo nesesada per trata la ambiente nonstable". Ma el ia ofre no comprometes nova.
La reata en medias governal ia varia entre tota no referes a la resultas de la eleje e alegas direta ce "interfere" ia aveni, referente, per esemplo, a la suporta donada a la protestores en la semana pasada par legores en la SUA.
Xinhua, la departe nasional de jornalisme, ia fa alga refere a la elejes en la fini de semana, ma sua reportas ia reveni a la violentia de la semanas resente, asentuante la nesesa per restora bon ordina.
Global Times ia presenta la elejes en modo detaliosa, concluinte en un article engles ce la prodemocratas "ia reali un vinse grande". Ma la reporta ia dise ance ce on ave "no nesesa per interprete tro forte la vinse de la prodemocratas".
China Daily ia posta un imaje a Twitter con la testo: "Esta es como la oposores interfere con un eleje justa." La imaje acusa, sin atesta, ce protestores ia prende la cartas de identia de sitadanes per preveni los de vota, e ce los ia malgida persones vea a vota per la prodemocratas.
La influe political de la comitores distrital de Hongkong es limitada. Los labora jeneral sola a temas multe local, como transporta e construidas de comunia. Ma la eleje a soldi ia atrae un atende spesial, car lo ia es la vota prima cual ia aveni pos la comensa de protestas contra la governa en junio.
Alga de la comitores va fa ance un rol en eleje la susedor de Lam per xef dirijente de Hongkong.
En cuantia recordo, 4,1 milion persones ia rejistra se per vota -- plu ca un dui de la popla -- e plu ca mil persones ia aspira 452 sejas de comite. La aspirores prodemocrata ia gania 347 sejas e controla aora 17 de la 18 comites distrital.
@T Xina pone un robot a la lado distante de la Luna
@L aora_oji/2019/xina_pone_un_robot_a_la_lado_distante_de_la_luna
====== Xina pone un robot a la lado distante de la Luna ======
3 janero 2019
Xina dise ce lo ia susede atera un veculo spasial a la lado distante de la Luna, en la atenta prima de esta en istoria.
A 02:26 de ora universal, la sonda robotal Chang'e-4 ia toca la surfas en la Basin Polo Sude / Aitken.
Lo porta strumentos per analise la jeolojia de la rejion nonesplorada e per fa esperimentas biolojial.
Multe misiones a la Luna ia aveni en anios resente, ma cuasi tota ia fa no plu ca orbita, pasa o colide. La visita la plu resente par umanas ia es Apollo 17 en 1972.
Chang'e-4 ia envia ja sua imajes prima de la surfas. Car un lia direta de comunica es nonposible, tota imajes e datos nesesa rebondi de un satelite separada cual envia los a la Tera.
La aterador, cual no es capas de move, porta du cameras: un esperimenta sur radia, de construi deutx, e un spetrometre cual va fa oservas radioastronomial de frecuentia basa.
Siensistes crede ce la lado distante de la Luna pote es un loca eselente per radioastronomia, car lo es scermida contra la ruido de la Tera. La spetrometre va esamina esta idea.
La sonda porta ance un contenador de tre cilogrames con semes de patata e arabis, e ance ovos de eruga de seda, per fa studias biolojial, en un esperimenta desiniada par 28 universias xines.
@T 1446 anios en prison per frodores tai de comeda de mar
@L aora_oji/2020/1446_anios_en_prison_per_frodores_tai_de_comeda_de_mar
@D 2020
====== 1446 anios en prison per frodores tai de comeda de mar ======
11 junio 2020
Un corte en Tai ia condena la du posesores de un restorante a 1446 anios en prison per froda la popla.
En la anio pasada, Laemgate, un restorante de comedas de mar, ia inisia un promove enlinia de prepaia. Asta 20 mil persones ia compra biletas con valua de 50 milion bates ($1,6 milion), ma la compania no ia pote susta tan multe clientes e ia clui la restorante.
Apichart Bowornbancharak e Prapassorn Bowornbancha ia es arestada pos cexas par sentos de persones.
Lo no es noncomun en Tai ce persones judida como culpable de froda es condenada a prisonis tan longa, cual refleta la cuantia de cexas resetada. Ma leges tai limita la tempo en prison per froda publica a 20 anios.
Un de la biletas vendeda a prepaiores ia ofre un come de mar contra ฿880 ($28) per 10 persones, multe plu barata ca la custa usual. Inisial, los ci ia compra la biletas ia pote reclama sua comes a la restorante, ma la cuantia de clientes ia crea un situa en cual on ia debe reserva ja a alga menses a ante.
En marto, la compania Laemgate Infinite ia anunsia sua clui, disente ce lo no pote oteni comedas sufisinte per sasia la solisitas. Lo ia ofre repaia a clientes ci ia compra biletas, e sirca 375 de 818 clientes ci ia cexa ia es tal refinansiada. Plu tarda, sentos ia cexa formal sur froda par la compania e sua coposesores.
Bowornbancharak e Prapassorn ia es arestada, su acusas incluinte froda la popla par mesajes falsa. Ier, on ia judi ce los es culpable a 723 acusas. Inisial, los ia es condenada a 1446 anios en prison, ma cuando los ia confesa sua culpablia, la puni ia es reduida a 723 anios per cada de la du.
An tal, en realia, los va es prisonida per no plu ca 20 anios. Sua compania ia es multada per 1,8 milion bates, e on ia comanda ce la coposesores e la compania repaia ฿2,5 milion en compensa a la vitimes.
En 2017, un corte tai ia condena un frodor a plu ca 13 mil anios en prison.
@T 1600 migrores ariva a la Isolas Canario en du dias
@L aora_oji/2020/1600_migrores_ariva_a_la_isolas_canario_en_du_dias
====== 1600 migrores ariva a la Isolas Canario en du dias ======
9 novembre 2020
Plu ca 1600 persones migrante de Africa ia es salvada a mar o ia ateni la Isolas Canario en la finisemana pasada, la servis espaniol de crise ia dise.
Sirca mil ia ariva a mera saturdi, comensante sua viaja en sirca dudes barcos apena secur per naviga. On ia prende un person a ospital par elicotor.
En menses resente, on ia vide un crese agu en la cuantia de migrores de Africa ueste ci atenta vade a la Isolas Canario. Esta arcipelago es situada a sola 100 cilometres de la costa de Africa norde.
Longo la governa espaniol, on ia rejistra ala plu ca 11 mil arivores en esta anio, contrastada con 2557 en la mesma periodo de 2019.
Un portavose per la servis de crise ia dise ce persones ia ariva resente a la isolas Gran Canaria, Tenerife e El Hierro, e imajes fada en la porto Arguineguín a Gran Canaria en la fini de semana mostra migrores ci sta en filo per reseta aida.
En la mense pasada, a la min 140 persones atentante migra a Europa ia afoca cuando un barco portante sirca 200 ia afonda prosima a la costa de Senegal. La barco ia ensende e inversa corta pos parti de la vila Mbour. Sirca 60 persones ia es salvada. On crede ce la grupo ia vole pasa tra la Isolas Canario per ateni Europa continental.
La Organiza Internasional per Migras dise ce lo sabe ce minima 414 persones ia mori longo acel via asta aora en esta anio. 210 moris en soma ia es rejistrada en la mesma viaja en la intera de la anio pasada.
@T 300 laborores nijerian encluida en un fabriceria de ris
@L aora_oji/2020/300_laborores_nijerian_encluida_en_un_fabriceria_de_ris
====== 300 laborores nijerian encluida en un fabriceria de ris ======
24 junio 2020
En Nijeria, la polisia ia salva tresento persones ci ia es en encluida en un fabriceria de prepara ris e obligada a labora an entre la restrinjes de coronavirus.
On alega ce, de la fini de marto, la omes no ia es permeteda a sorti de la molin en Kano, un site norde. On ia promete ce la laborores va reseta 13 plu dolares per mense, en ajunta a sua salario mensal de $72. Los ci no ia aseta ia es menasada par desemplea.
Sinco manejores a la compania Popular Farms, de posese barati, ia es arestada. La compleso es aora cluida e la polisia investiga esce la posesores ia "teni la omes contra sua vole".
Alga de la omes dise ce on ia obliga los a labora tra la plu de sua prisoni, con poca comedas. Reposa ia es permeteda per sola un tempo corta, e no preas o visitas par familia ia es permeteda.
La polisia ia es avisada sur la situa de la omes cuando un de los ia telefoni a un organiza de diretos umana.
Karibu Yahaya Kabara de la Rede Global per Diretos Umana ia dise: "Lo cual me ia vide ia creve mea cor. Do la compania ia obliga ce esta persones abita, lo no conveni per bestias. Sua comedas no ia sufisi, e on ia ave no drogas per los ci ia maladi." Sua organiza segue la caso per serti justia per la omes.
On ia obliga la clui de comersias nijerian en la tarda de marto, como un parte de regulas jeneral de la governa per para la sperde de la virus.
La pais ave plu ca 20 000 casos confirmada de COVID-19, la maladia respiral cual la virus causa. Lagos, en la sude, es ancora la episentro, ma Kano ave la plu casos en la norde. Kano es la site du de la plu grandes en Nijeria e la capital de la stato Kano.
Restrinjes en otra partes de la pais es aora lejerida, ma la popla de Kano es ancora permeteda a sorti sola en lundis, mercurdis e venerdis, per compra comedas a oras spesifada.
Laborores de Popular Farms dise ce on ia demanda ce los dupli sua oras en febrero, car sua empleores ia vole cumula un reserva en prepara per un situa de enclui.
Los dise ce en marto on ia deside continua la funsiona de la compleso par ofre a los plu mone (o desemplea). Ma pos acorda continua, la laborores ia descovre ce on ia preveni los de sorti an de la molin.
@T 69 persones ia es matada en protestas en Nijeria
@L aora_oji/2020/69_persones_ia_es_matada_en_protestas_en_nijeria
====== 69 persones ia es matada en protestas en Nijeria ======
24 otobre 2020
Muhammadu Buhari, presidente de Nijeria, dise ce 69 persones ia es matada en protestas contra violentia par la polisia. La plu de la moris ia es de persones nonmilitar, ma la persones mor inclui ance polisiores e soldatos.
La presidente ia anunsia esta statistica en un consenta de crise con xefes pasada de la pais, esperante trova modos per fini la tumulta.
Un grupo cual ia fa un rol major en organiza la protestas recomenda aora ce on resta a casa. La Alia Femiste ia consela ance ce on obedi cualce proibis de sorti.
La situa ia desintensi multe aora, ma un calmia noncuieta resta en alga sites. Ofisiores ia dise ce on va lejeri un proibi de sorti en la stato Lagos.
Esta protestas ia comensa a 7 otobre cuando persones jeneral joven ia esije ce on desbandi la Scuadron Spesial Contra Ruba, un unia malfamosa de la polisia. La scuadron ia es disolveda pos alga dias, ma la protestas ia continua, esijente reformis plu larga de la governa de Nijeria.
La situa ia gravi pos un fusili a martedi en Lagos, la site la plu grande de la pais, cuando la fortes de securia ia mata a la min 12 persones, longo la organiza per diretos Amnestia Internasional. La armada nijerian ia nega sua envolve.
A la consenta virtual ier, Buhari ia dise ce sua governa es dedicada a sasia la esijes de la protestores. Ma el ia ajunta ce sua governa no va crusa sua brasos e permete ce criminores ci ia devia la protestas continua fa "vandalisme".
En Lagos e otra partes de la pais, on ia arde construidas, ia fura de sentros comersial e ia ataca prisones pos la fusili. La protestas ia calmi aora, tal ce paradores e puntos de controla polisial ia sta en stradas vacua en Lagos ier.
Un proibi completa de sorti ia es poneda a la site, ma la governa de la stato ia dise ce, de oji, esta regula va es canselada entre la oras oto e des-ses.
@T A 75 anios pos la bombi nucleal de Hiroshima
@L aora_oji/2020/a_75_anios_pos_la_bombi_nucleal_de_hiroshima
====== A 75 anios pos la bombi nucleal de Hiroshima ======
6 agosto 2020
En Japan, campanas ia sona en Hiroshima per onora la aniversario 75 de la cade de la bomba atomal prima de mundo. Ma la rituos de recorda ia es reduida en esta anio par causa de la pandemica.
A 6 agosto 1945, un bombador esuan ia cade un bomba de uranio supra la site, matante sirca 140 mil persones. A tre dias plu tarda, un arma nucleal du ia cade sur Nagasaki. Pos du semanas, Japan ia sede, fininte la Gera Mundal Du.
En la parte temprana de oji, Shinzō Abe, ministro xef de Japan, e la maior de Hiroshima ia acompania survivores de la bomba e sua desendentes en la Parce de Pas de la site.
La parce es usual folida con miles de persones per la aniversario, ma la cuantia de persones ia es notable plu peti en esta anio. Sejas ia es spasida e la plu de la persones presente ia porta un masca de fas.
Un tempo de silentia ia aveni a 08:15, la ora esata cuando la bomba ia cade sur la site.
La maior, Kazumu Matsui ia dise: "A 6 agosto 1945, un sola bomba atomal ia destrui nosa site. La rumor alora ia dise ce 'no cosa va crese asi per 75 anios'. E an tal, Hiroshima ia recovre, deveninte un simbol de pas."
En un mesaje video, la secretor jeneral de la NU, António Guterres, ia urje ce tota nasiones renovi sua labora per aboli tal armas.
"Divide, desfida e un manca de dialoga menasa repone la mundo a un situa nonrestrinjeda de compete nucleal stratejial," el ia dise. "La sola modo de elimina completa la risca nucleal es elimina completa la armas nucleal."
@T Abitores de curerias en Espania es abandonada o an mor
@L aora_oji/2020/abitores_de_curerias_en_espania_es_abandonada_o_an_mor
====== Abitores de curerias en Espania es abandonada o an mor ======
24 marto 2020
Soldatos espaniol ci aida combate la pandemica de coronavirus ia trova ce pasientes vea en curerias es abandonada e, en alga casos, mor en sua letos.
La militar es aora introduida per aida desinfeta curerias en Espania, un de la paises la plu grave afetada en Europa. Entretempo, un patineria en Madrid va es usada como un moreria tempora per vitimes de COVID-19.
Ier, Espania ia rejistra sua cuantia dial la plu alta de moris, 462, levante la soma a 2182.
La ministreria de defende ia dise ce empleadas a alga curerias ia parti pos la deteta de la virus.
En un situa normal, la corpos de pasientes mor es frida asta cuando la servi funeral colie los. Ma si on suspeta ce la causa de mori es relatada con la coronavirus, on lasa la mores en sua letos asta cuando la empleadas funeral pote retrae los en modo secur. En la capital Madrid, cual ia esperia la plu casos e moris, asta 24 oras pote pasa ante esta.
Con la profondi de la crise en Madrid, la funereria munisipal de la site ia dise ce, de oji, lo va sesa colie vitimes de COVID-19, par manca de vestes protejente. La site va usa aora sua Palasio de Jelo como un loca per conserva la corpos.
Esta compleso, cual inclui ance botecas, restorantes, un bolingeria e sinemas, es prosima a la congreseria Ifema, do on ia crea un ospital tempora per pasientes de coronavirus.
En Europa, sola Italia es plu afetada ca Espania. Italia ave aora la plu moris relatada con coronavirus en la mundo. 602 persones con la maladia ia mori ala ier, levante la soma a 6077. Ma esta crese dial ia es la plu peti pos jovedi, creante espera ce la restrinjes sever poneda par la governa comena fa un efeto.
@T Adolf Hitler Uunona gania un eleje local en Namibia
@L aora_oji/2020/adolf_hitler_uunona_gania_un_eleje_local_en_namibia
====== Adolf Hitler Uunona gania un eleje local en Namibia ======
4 desembre 2020
En Namibia, un politiciste con la nom Adolf Hitler ia gania un vinse major en un eleje local, con 85% de votas, ma dise ce el no intende domina la mundo.
Adolf Hitler Uunona ia es elejeda en la semana pasada como consilior per la seja Ompundja. En un intervisa con Bild, jornal deutx, el ia insiste ce el ave "no relata" con ideolojia nazi.
Como otra nomes individua deutx, Adolf no es noncomun en la pais, cual ia es un colonia deutx en la pasada. On ia eleje el per SWAPO, la partito governante, cual ia gida la promove contra la rena colonial par la minoria blanca.
Uunona ia confesa ce sua padre ia nomi el per la xef nazi, ma ia ajunta ce "probable el no ia comprende lo cual Adolf Hitler ia representa".
"Como enfante, me ia regarda lo como un nom intera normal," Uunona ia dise. "Sola cuando me ia es maturinte, me ia comprende: esta om ia vole concista la mundo. Me ave no relata con cualce de esta cosas."
El dise ce sua sposa nomi el Adolf, el usa publica la nom, e el no intende cambia lo.
Entre 1884 e 1915, Namibia ia parteni a un teritorio nomida Africa Sude-ueste Deutx. La Impero Deutx ia mata miles de persones en un revolta de 1904 a 1908 par la poplas local nama, herero e san, en lo cual alga istoristes ia descrive como "la jenoside oblidada".
Plu temprana en esta anio, Namibia ia refusa un ofre compensante de €10 milion par Deutxland, disente ce lo va continua negosia per un "ofre revisada".
Pos la Gera Mundal Prima, Namibia ia veni su controla sudafrican, e ia gania sua autonomia en 1990. Ma lo ave ancora multe vilas con nomes deutx e un comunia peti de persones ci parla deutx.
La partito SWAPO, sentral sinistriste, ia emerji de la promove per autonomia namibian, e governa la pais de 1990. Ma sua suporta ia redui pos alegas de sobornas a tema de la industria de pexa. En la elejes de la mense pasada, SWAPO ia perde la controla de 30 vilas e sites.
@T Africa no ia plani la curva de la sperde de COVID-19
@L aora_oji/2020/africa_no_ia_plani_la_curva_de_la_sperde_de_covid-19
====== Africa no ia plani la curva de la sperde de COVID-19 ======
11 april 2020
Africa ia pasa la punto macabre de 10 000 casos reportada de coronavirus, con plu ca 500 moris. La cuantia dial de infetas nova apare aora redui en alga partes de la mundo, ma on teme ce la episentro de la virus va move aora a Africa.
An pos la laboras per enclui sites e paises, e la donas de utiles protejente, pacos de proba e respiradores de Xina, lo resta clar ce Africa ancora no ia "plani la curva", e sua spasio per manobra deveni plu peti.
La compara es difisil entre rejiones cual difere par sua cultur, economia, transporta e infrastrutur, ma alga modeles sujesta un situa urjente.
Cuando on studia la aumentas dial de la cuantia de persones positiva probada de coronavirus en la mundo, lo pare ce Africa controla plu bon la sperde ca la SUA e Europa asta aora. Ma en compara con Asia, do alga paises ia pare redui relativa rapida esta aumenta, Africa no pare tan forte.
On pote compara ance con Asia sude-ueste. Ala, la casos nova ia aumenta constante, como ance la cuantia de moris, e la Organiza Mundal de Sania informa ce la rejion ia rejistra aora plu ca 78 000 casos de la maladia.
Cuasi cada pais en Africa ia reporta casos, e an si la plu ia comensa cuando pasientes ia importa la virus pos viaja internasional, lo sperde aora tra comunias.
Paises african ia labora multe per estende sua capasia de deteta COVID-19. Departes governal de sania ia converti laborerias privata a sentros de proba, e laborerias major como la Instituida Pasteur en Dakar, capital de Senegal, ia organiza cursos enseniante sur la metodos de proba.
Jack Ma, bilionor xines, ia anunsia resente ce el dona a paises african plu ca milion pacos medical per estrae samples. On no sabe esce estas va es pacos completa per deteta la virus, ma, si tal, la donada va es multe importante en vasti la probas tra la continente.
@T Alarma a un onda de caldia recordo en Sibir
@L aora_oji/2020/alarma_a_un_onda_de_caldia_recordo_en_sibir
====== Alarma a un onda de caldia recordo en Sibir ======
18 junio 2020
Un onda longa de caldia en Sibir es "nondutada alarmante", siensistes de clima dise. On asosia la temperatur nonusual con focones savaje, un malversa jigante de petrolio, e un pesta de papilios cual come arbores.
A la scala global, la caldia sibirsce aida dirije la mundo en 2020 a sua anio la plu calda rejistrada, an con la redui tempora de emetes de carbono par causa de la pandemica de coronavirus.
La temperatur en la rejiones polal crese la plu rapida, car la corentes maral porta caldia en dirije a la polos, do lo fonde la jelo e neva refletante.
Vilas rusce en la Sirculo Artica ia esperia resente temperatures estracomun, con ce Nijniaia Pexa ia ateni 30°C a 9 junio e Catanga, cual ave normal un temperatur de sirca 0°C en esta saison, ia rejistra 25°C a 22 maio. Sua recordo presedente ia es 12°C.
En maio, la temperatur surfasal en partes de Sibir ia ateni asta 10°C plu ca la promedia, diseda par la Servi Copernicus de Cambia Climal (C3S) de la Uni European. Martin Stendel, de la Instituida Meteorolojial Dansce, ia dise ce la temperatures nonormal esperiada en la norde-ueste de Sibir en maio ta aveni probable a sola un ves en 100 000 anios sin la caldia global causada par umanas.
Freja Vamborg, un siensiste major a C3S, ia comenta: "Lo es nondutada un sinia alarmante, ma no sola maio ia es nonusual calda en Sibir. Tota de inverno e primavera ia ave periodos repeteda con temperatur de aira surfasal plu alta ca promedia.
"An si la planeta intera caldi, esta no aveni egal en tota locas. Sibir ueste es notable como un rejion cual mostra un tende plu avertinte, con varias plu alta de temperatur. Donce, a alga grado, anomales grande de temperatur no es nonespetada. An tal, lo cual es nonusual es la cuantia de tempo tra cual la anomales plu calda ca promedia ia persiste."
Robert Rohde, la siensiste xef a la projeta Berkeley Earth, ia dise ce Rusia jeneral ia esperia temperatures recordo alta en 2020, con ce la promedia de janero asta maio ia es plu alta ca la promedia de 1951--80 par 5,3°C. Esta es "un recordo nova par un aumenta enorme de 1,9°C", el ia dise.
En desembre, la presidente de Rusia, Vladimir Putin, ia comenta sur la caldia nonusual: "Alga de nosa sites ia es construida a norde de la Sirculo Artica, sur la permajelada. Si lo comensa dejela, on pote imajina la efetos cual lo ta fa. Lo es multe grave."
La dejela de permajelada ia es a la min partal culpable per un malversa de gasolio en Sibir en esta mense, pos cual Putin ia declara un state de crise. La suportas de la tance ia afonda subita, diseda par sua operores; organizas verde ia sujesta ce ance la eda e manteni povre de la infrastrutur es culpable.
Focones savaje ia arde tra sentos de miles de ectares de la forestas sibirsce. Cultivores ensende comun focos en la primavera per sutrae plantas, e un combina de temperatures alta e ventas forte ia causa ce alga focos ia deveni noncontrolable.
Xamas de bombises sibirsce, de ci sua larvas rode arbores conifer, ia crese rapida en la temperatur levante. "En tota mea carera longa, me ia vide nunca papilios tan enorme e tan rapida cresente," Vladimir Soldatov, un esperta sur papilios, ia dise. El ia averti sur "efetos trajedial" per forestas: la larvas va sutrae la agos de la arbores e va fa ce los deveni plu afetable par focones.
@T Americanes nativa antica ia viaja a Polinesia
@L aora_oji/2020/americanes_nativa_antica_ia_viaja_a_polinesia
====== Americanes nativa antica ia viaja a Polinesia ======
9 julio 2020
On ia trova atestas nova de viajas major preistorial entre la Americas e Polinesia este. Analises de ADN sujesta ce americanes nativa e polinesianes ia misca sirca 1200 EC.
La grado de contata posible entre la rejiones es ja un tema de discute academial tra desenios.
Asta aora, proposores de tal interatas ia razona ce alga elementos cultural comun, como un parola simil usada per un gran comun, ia sujesta ce la du poplas ia misca ante la ariva de europeanes en America Sude. Oposores ia indica studias con concluis diferente e la separa de la du grupos par miles de cilometres de mar.
Ma en 1947, un esploror norsce, Thor Heyerdahl, ia vade par balsa de America Sude a Polinesia per mostra ce la viaja es posible.
Rexercores ia analise resente datos jenetical de plu ca 800 persones nativa vivente de la costa de America Sude e Polinesia Franses. Los ia xerca pesos de ADN tipal de cada popla, e partes cual es "identica par desende", cual vole dise ce los es eritada de la mesma person asendente.
Los ia trova identicia par desende american nativa en alga isolas polinesian. Donce polinesianes e americanes nativa ia encontra lunlotra a alga punto en istoria, e a acel tempo, enfantes con ambos asendes ia nase.
Analises statistical ia indica ce esta ia aveni sirca 1200 EC, sirca cuando polinesianes ia abita orijinal la isolas pasifica. La ecipo ia susede ance locali la fonte de la ADN a grupos nativa en Colombia moderna.
Studias presedente de la jenomes de persones de esta rejiones ia foca a contata sur Rapanui (famosa per sua fases jigante de petra), la isola abitada la plu prosima a America Sude. Ma la studia nova suporta la idea ce la contata prima ia aveni sur un de la arcipelagos de Polinesia este, como Heyerdahl ia proposa.
Modelis de venta e corente ia mostra ce un viaja vagante de Ecuador e Colombia es la plu probable cual ta ateni Polinesia, e ce lo ta ariva la plu probable en la sude de la Isolas Marcesas o en la arcipelago Tuamotu. Ambos arcipelagos es situada a la cor de la rejion de isolas do la rexercores ia trova un composante jenetical asendente de colombianes nativa.
A ante, on ia nota similes surfasal entre scultas monolitin en Polinesia e otras trovada en America Sude. Ma un otra atesta veni de un coresponde en la parola per patatas dulse (cual orijina en America Sude), cual es kumala en Polinesia e cumal en la lingua de la popla caniari de Ecuador.
@T Ant va vende asiones per un profita cisa recordo
@L aora_oji/2020/ant_va_vende_asiones_per_un_profita_cisa_recordo
====== Ant va vende asiones per un profita cisa recordo ======
26 agosto 2020
Ant, un compania xines de tecnolojia finansial, ia anunsia sua intende de ofre asiones e de profita tal par cisa $30 mil milion, un cuantia recordo.
La compania, cual es asosiada con la jigante Alibaba de vende enlinia, dise ce lo va vende asiones en Hongkong e Shanghai. Lo es bon conoseda en Xina per Alipay, sua plataforma de paia enlinia.
Con base en la site Hangzhou en la este de Xina, Ant ia es inisiada en 2004 par Alibaba e sua fundor Jack Ma. Plu ca 700 milion persones e 80 milion companias per mense usa la servi Antpay per paia faturas, compra asecura e investi a reservas mutua.
Entretempo, Alibaba, cual posese 33% de Ant, move sempre plu sua servis a la ap de Alipay.
An si la anunsia par Ant no ia revela sua valua o cuanto lo intende profita par sua debua en la asioneria, analistes judi ce la compania ave un valua tan grande como $300 mil milion, plu alta ca multe de la bancos la plu grande de la SUA.
Car on previde ce la compania va vende asiones egal a entre 10% e 15% de sua valua, lo es posible ce esta va es la vende inisial de asiones la plu grande de istoria.
Ant intende vende asiones en la Asioneria de Hongkong, e en la mercato STAR de la Asioneria de Shanghai, un mercato cual conteni sola companias tecnolojial e cual on vide como corespondente a la NASDAQ en la SUA.
La compania no ia dise perce lo ia eleje acel du asionerias, ma lo es notable ce lo no ia eleje mercatos en la SUA o un de la sentros finansial major de Europa.
Esta anunsia aveni en un tempo de tensa cresente entre Xina e la SUA sur temas cual inclui la maneja par Xina de la pandemica de coronavirus, la lege de securia en Hongkong, e sua disputa continuante sur comersia.
Resente, la governa de Trump ia aumenta sua atacas contra companias tecnolojial xines en la SUA cuando la presidente ia suscrive du comandas per proibi la ap video TikTok e la plataforma de mesajes WeChat.
@T Apple, Amazon, Facebook, Google e la legores
@L aora_oji/2020/apple_amazon_facebook_google_e_la_legores
====== Apple, Amazon, Facebook, Google e la legores ======
30 julio 2020
La xefes de alga de la companias tecnolojial la plu grande de mundo ia apare ante legores esuan en Washington, per defende sua companias contra alegas ce los malusa sua potia per supresa sua competores.
Jeff Bezos, xef de Amazon, ia dise ce la mundo "nesesa companias grande", e la xefes de Facebook, Apple e Google ia razona ce sua companias ia coraji inovas.
Legores considera regulas plu sever, e on investiga la situa de compete. Alga criticores vole ce on desasembla la companias a pesos min grande.
La legores democrata ia demanda a la tecnolojistes sur temas de compete, ma la republicistes ia es plu interesada a la maneja de informa e a esce la companias marjinali opinas conservaliste.
David Cicilline, la democrata ci gida la comite parlamental de esta escuta, ia dise ce un investiga par legores tra un anio ia mostra ce la plataformas enlinia "ia usa sua potia en modos destruinte e nosiva, per crese". El ia es convinseda ce la companias es monopolios.
Mark Zuckerberg de Facebook, Jeff Bezos de Amazon, Sundar Pichai de Google, e Tim Cook de Apple ia insiste ce los ia fa no cosa nonlegal, e los ia asentua la radises e valuas esuan de sua companias.
A la escuta, legores ia acusa ce Google ia fura contenidas creada par companias plu peti, como Yelp, per reteni usores en sua propre pajes de rede.
On ia foca ance a la trata par Amazon de vendores en sua pajeria, la compra par Facebook de companias competente como Instagram, e alga praticas en la boteca de apes de Apple.
Cicilline ia dise ce Amazon ave un desacorda interna de interesas, car lo ospita vendores ma ance compete contra los par ofre produidas simil. Esta pratica ia es investigada ance par regulores en Europa.
An tal, alga republicistes ia indica ce los no vole divide la companias o revisa profonda la leges de compete en la SUA. Un comitor ia comenta ce "cosas grande no es inerente mal".
Aparente a distantia par video, la dirijores ia defende sua companias, disente ce sua produidas aida companias plu peti e ce los pote ancora es danada par compete par companias nova.
Tim Cook de Apple ia dise ce la clima comersial es "tan competosa ce me ta descrive lo como un batalia sur strada per proportio de mercato en la comersia de telefonetas".
Bezos, en sua apare prima ante la Congresa, ia nega ce la roles multiple de Amazon representa un desacorda de interesas, ma el ia confesa ce la compania esamina sua modo de prosede datos sur vendes par otra vendores en la pajeria.
On ia acusa Amazon de usa tal informas per inisia sua propre varia de produidas bonvendeda.
Bezos ia dise ce la regulas de Amazon proibi ce empleadas regarda datos sur vendes par companias individua, ma el ia aseta ce lo es posible ce alga persones ia iniora la proibi. "Nos investiga acel," el ia dise.
@T Arabia Saudi trupli IVA per suporta sua economia
@L aora_oji/2020/arabia_saudi_trupli_iva_per_suporta_sua_economia
====== Arabia Saudi trupli IVA per suporta sua economia ======
11 maio 2020
Arabia Saudi trupli sua imposta de valua ajuntada (IVA) como un modo sever de suporta sua economia afetada par coronavirus.
La governa en Riad ia dise ance ce lo va suspende sua suveni de la custa de vive, per forti la finansia de la stato.
Esta nasion rica de petrolio ia esperia un cade agu de sua revenu cuando la pandemica ia redui la custa de enerjia tra la mundo. La rena ia introdui IVA a du anios ante aora como un parte de sua atenta de sutrae sua depende de mercatos global de petrolio.
IVA va crese de 5% a 15% de 1 julio, e la suveni de la custa de vive va es suspendeda de 1 junio.
La anunsia segue un periodo en la tre menses prima de la anio cuando la spende par la governa ia esede sua revenu, creante un nonsufisi bujetal de 9 mil milion dolares.
En la mesma tempo, revenus de petrolio ia es reduida par cuasi un cuatri en compara con la anio presedente, reduinte la revenu somada par 22%. E en marto, la reservas stranjer de la banco sentral de la pais ia cade a sua rapidia la plu alta de du desenios, a la min, e asta sua punto la plu basa pos 2011.
On previde ce la metodos per combate la efeto de coronavirus va lenti la reformis inisiada par Prinse Erital Mohammed bin Salman.
En 2019, Arabia Saudi ia recolie 25,6 mil milion dolares, cuantia recordo, en la ofre publica inisial de asiones de Aramco, un compania jigante de petrolio en Riad, poseseda par la governa. Esta vende de asiones ia es la cor de la projeta de la prinse erital per moderni la economia e diminui sua depende de petrolio.
@T Arceolojistes trova un sauna de sentenio 14 en Mexico
@L aora_oji/2020/arceolojistes_trova_un_sauna_de_sentenio_14_en_mexico
====== Arceolojistes trova un sauna de sentenio 14 en Mexico ======
23 janero 2020
Un sauna antica de la americanes orijinal, con data de la sentenio 14, ia es descovreda par arceolojistes en la Site Mexico.
Composantes sentral de la sala de sua, do la banio o stange de vapor ia es locada, es ancora intata, la Instituida Nasional de Antropolojia e Istoria dise.
Nomida temazcales, esta strutures ia es construida par poplas nativa en Mesoamerica, e usada per intendes medisinal, per rituos spirital, e per la pari de bebes.
Esta descovre en La Merced, distrito istorial, ia aida espertas a determina la loca esata de Temazcaltitlán, un de la partes prima de Tenochtitlán, la urbe antica cual ia deveni la Site Mexico moderna.
La escavas ia revela ance la restas bon conservada de un casa construida pos la concista espaniol a sentenios plu tarda, con mures decorada con motifes roja. On crede ce lo ia es ocupada par un familia nobil nativa en la sentenio 16.
"La trovadas sujesta ce en la sentenio 16 esta rejion ia es plu poplada ca nos ia crede inisial," Victor Esperón Calleja ia dise, ci ia gida la labora de escava.
Sua ecipo ia descovre ance la restas de un taneria cual ia sta ala probable entre 1720 e 1820. Lo es situada a lado de la Casa Talavera, un construida de stilo baroca con orijina en o la sentenio 16 o la temprana de la sentenio 17, e aora usada como un sentro cultural.
On estima ce on ave dusento mil locas arceolojial en Mexico. Los inclui la ruinas e piramides maia en la sude de la pais, la construidas de fango a Paquimé en la stato norde Chihuahua, e la compleso enorme Teotihuacán a norde de la Site Mexico.
@T Armenia e Azerbaidjan batalia per Montania Carabah
@L aora_oji/2020/armenia_e_azerbaidjan_batalia_per_montania_carabah
====== Armenia e Azerbaidjan batalia per Montania Carabah ======
28 setembre 2020
Un de la geras la plu vea de mundo, un disputa teritorial entre Armenia e Azerbaidjan, ia eruta denova con scaramuxas la plu violente de alga anios.
On reporta ce a la min 23 persones ia es matada ier en cuando la du republicas soviet pasada ia batalia per la rejion Montania Carabah. Esta loca es internasional reconoseda como un parte de Azerbaidjan, ma controlada par armenianes etnical. Cuando lo ia separa en la temprana de la desenio de 1990, deses de miles ia mori en la gera.
Ilham Aliyev, presidente de Azerbaidjan, ia dise ier ce el fida regania la controla de la rejion.
Esta gera en Caucaso resta nonsolveda tra ja plu ca tre desenios, con batalias de ves a ves nonperiodal. En julio, scaramuxas de frontera ia mata 16 persones a la min, provocante la protesta publica la plu grande de multe anios en Baku, la capital azerbaidjani, do on ia recomenda recatura Montania Carabah.
La violentia risca disturba la mercatos, car Caucaso Sude es un coredor per tubones cual porta petrolio e gas natural de la Mar Caspio a vende global.
Recep Tayyip Erdoğan, presidente de Turcia, ia promete aida Azerbaidjan, urjente la mundo a suporta la pais en sua "batalia contra invade e cruelia". Azerbaidjanis es un popla xef turcica, con ci Turcia ave relatas prosima.
Rusia, tradisional regardada como un aliada de Armenia, ia recomenda un sesaspara direta, con negosias per stabli la situa.
La governa de Armenia ia declara un governa militar e la ativi de tota sua soldatos, corta pos un anunsia simil par la autoriosas en Montania Carabah.
"Prepara per defende nosa pais santa," Nikol Pashinyan, ministro xef armenian, ia dise pos acusa Azerbaidjan de "agresivia intendeda". Avertinte ce la rejion sta a limina de un "gera de estende grande", el ia urje la comunia internasional a uni per preveni plu destabli.
@T Asemblas grande es proibida en Tai
@L aora_oji/2020/asemblas_grande_es_proibida_en_tai
====== Asemblas grande es proibida en Tai ======
15 otobre 2020
Tai ia fa un comanda per proibi protestas, supresante la asemblas jeneral pasosa cual promove la democratia ma es ance oposada a la monarcia.
En un anunsia televisada, la governa ia dise ce tal metodos es urjente nesesada per "manteni la pas e ordina". Per justi la comanda, lo ia refere a un disturba a un convoia reial par alga membros de un protesta en Bangkok a martedi. Plu ca 20 persones ia es arestada, incluinte tre xefes de protesta.
La promove tai per democratia, gidada par studiantes, esije la resinia de Prayuth Chan-ocha, ministro xef. Esta xef pasada de armada ia saisi ja la potia en un colpa de stato en 2014 ante deveni asiniada a sua posto presente pos un eleje controversa en 2019.
La protestas ia estende en menses resente per recomenda ance restrinjes a la potia de la re.
La anunsia par la governa ia dise ce protestores ia intende fa un ata cual va causa "caos e provoca de disputa e desordina publica"
Alga protestores a martedi ia fa un saluta de tre ditos, un simbol de sua promove, a un convoia portante la rea, en cuando polisiores ia puxa los a retro.
Corta pos la anunsia, polisiores antitumultal ia move protestores a via de estra la ofisia de la ministro xef. Alga ia atenta resiste, usante ojetos acaso como paradores, ma los ia es forsada a via. Sentos de polisiores ia es videda sur la stradas an pos la desgrupi de la protestores.
En ajunta a limita asemblas a sola cuatro persones, la comanda restrinje ance jornalistes, proibinte la publici de novas "cual ta pote crea teme o contorse informa en modo intendente, creante malcomprende cual ta afeta la securia nasional o la pas e ordina".
Lo permete ance ce autoriosas preveni persones de entra a "cualce loca cual on nomina".
@T Assad desemplea sua ministro xef entre protestas economial
@L aora_oji/2020/assad_desemplea_sua_ministro_xef_entre_protestas_economial
====== Assad desemplea sua ministro xef entre protestas economial ======
12 junio 2020
Presidente Bashar al-Assad de Suria ia desemplea sua ministro xef Imad Khamis, en batalia un crise economial profondinte cual ia provoca protestas.
Jornales governal ia dona no razona per la deside de recambia Khamis, ci ia deveni la ministro xef en 2016. Ma lo ia segue dias de protestas rara contra la governa en Suweida, un site durzi, do la popla ia urje la suverti de Assad.
La valua de mone en Suria ia basi resente, altinte la custas. La governa, de ci sua suportores ia reali un contraprotesta en Suweida, ia culpa punis finansial par la ueste e manipulas de la taso de intercambia.
En la semana veninte, un scema nova par la SUA va ojeti individuas ci ia suporta Assad e sua aliadas en la gera interna suri de nove anios cual ia mata plu ca 380 mil persones.
Suweida ia evita jeneral la terores de la gera. La plu de la durzis, membros de un seta secretosa separada de islam, ia resta fidosa a Assad, temente ce minorias relijial ta es atacada si el ta es suvertida, e la site ia resta en la manos de la governa.
Diseda par la Program Mundal de Nuri, un departe de la Nasiones Unida, on ave 7,9 milion persones en Suria ci no pote come sufisinte, e 1,9 milion plu en peril de acel situa.
Analistes dise ce la crise economial en Lubnan ia fa efetos en Suria en menses resente. Un deside par bancos lubnani de restrinje la relasa de mone de contas de banco ia redui multe la furni de dolares esuan en Suria.
La valua de la lira suri ia colasa en la mercato negra, ateninte un basa recordo de 3000 liras per un dolar esuan en esta semana, plu ca la cuatruple de la taso ofisial de 700. Ante la gera, la lira suri ia es intercambiada a 47 per dolar.
On teme ance sur punis finansial nova sever par la SUA cual va es realida a mercurdi veninte. Estas va es puntada a cualce person stranjer ci ia dona intendente suporta finansial, material o tecnolojial a la governa de Suria, o ci opera militar en Suria per la governas de Suria, Rusia o Iran.
@T Astronautas reveni a un Tera cambiada
@L aora_oji/2020/astronautas_reveni_a_un_tera_cambiada
====== Astronautas reveni a un Tera cambiada ======
17 april 2020
Un ecipo de tre persones ia reveni de la Stasion Spasial Internasional (SSI) a un planeta multe diferente ca lo de cual los ia parti en la anio pasada.
Aora ja esperiosa de isoli se, la rusce Oleg Skrypochka e la esuan Jessica Mair ia parti de la Tera en setembre, longa ante la emerji de la coronavirus. Un plu esuan, Andrew Morgan, ia es en la SSI de julio.
La pandemica ia cambia la prosede normal per ecipos reveninte de spasio.
"Multe strana ia es oserva la developas sur la Tera a su," Meir ia dise resente. "De asi, la Tera aspeta esata tan bela como usual, donce lo es difisil ce nos crede tota de la cambias cual ia aveni pos nosa parti."
La truple ia atera a 05:16 de ora universal, pos 272 dias en spasio per Morgan e 205 dias per la otra du ecipores.
Un serie de tuitas par la conta ofisial de la SSI ia descrive como la barcon Soyuz ia divide en tre modulos ante cuando la modulo de desende ia ateni la atmosfera de la Tera e ia "crea un linia de plasma" en la temprana de oji.
La capsula ia atera susedosa en Cazacstan. NASA, la ajenteria spasial de la SUA, ia posta un video de la astronautas encontrada par un ecipo mascida. Esta xercores ia es en isoli sever a ante, e on crede ce los ia es probada per la coronavirus direta ante parti per retrae la arivores nova, per serti ce los no risca infeta los.
En un situa normal, la ecipo de xerca ta colie la astronautas e ta trae los a la airoporto la plu prosima, de do los ta vola a sua paises. Ma Cazacstan ia declara un state de crise, e la plu de la airoportos es cluida.
La lanseria spasial Baikonur, cual Rusia lua de Cazacstan, opera ancora e on va vola la tre astronautas a lo. La rusce va revade a sua pais en un avion, e la esuanes va viaja sur stradas per tre oras en dirije sude-este a Kyzylorda, de do un avion de NASA va porta los a la Statos Unida.
Ance un ecipo sustituinte, de du rusces e un esuan ci ia vola a la SSI en 9 april, ia ata estrema cauta per evita prende la infeta a spasio, spendente un mense e un dui en isoli ante sua parti.
Usual, un ecipo de astronautas reveninte pasa tra un program spesial de recapasi per alga semanas. Pos un tempo longa sin pesa, la corpo nesesa reabitua se a vive en gravita. Ma a esta ves, la dotores ave la taxe ajuntada de proteje la astronautas de la coronavirus.
"Lo va es difisil ce nos no va dona abrasas a familia e amis pos resta asi a supra tra sete menses," Meir ia dise ante reveni a la Tera. En 2019, el ia fa un cosa istorial importante en completi un pasea spasial, la prima par sola femes, en junta con un otra astronauta de NASA, Christine Koch.
La SSI orbita la Tera de 1998. Sinco asosiores es envolveda: la SUA, Rusia, Japan, Canada e la Ajenteria Spasial European.
@T Atacas de fusil contra clientes turces en Deutxland
@L aora_oji/2020/atacas_de_fusil_contra_clientes_turces_en_deutxland
====== Atacas de fusil contra clientes turces en Deutxland ======
20 febrero 2020
Nove persones ia es matada en du fusilis a tabacerias en la site Hanau en la ueste de Deutxland.
En ambos locas, on reporta ce la clientes ia es xef curdi. On ia trova plu tarda la suspetada mor en sua casa, con la corpo de un otra person.
La motiva es nonclar, ma un investiga prosede. Un jornal reporta ce la suspetada ia es un sitadan deutx con un lisensa de fusil, e ce muni e cargadores ia es trovada en sua auto.
La aveni prima ia es a la xixeria Midnight en la sentro de Hanau, a sirca 25 cilometres a este de Frankfurt. Atestores ia oia sirca des xutas e a la min tre persones ia es matada.
On reporta ce la suspetada ia fuji alora en un auto oscur a la distrito Kesselstadt e ia fusili a Bar e Caferia Arena, do sinco persones ia mori.
Xixerias es locas do persones asembla per fumi xixa -- tabaco saborida -- tra un pipa de acua. Tradisional trovada en paises de Asia, los es ance popular en multe otra partes de la mundo.
La atacas ia inisia un xerca de sete oras, con polisiores xercante cisa plu ca un atacor.
La maior de Hanau ia comenta: "On no ta pote imajina un note plu mal. Natural, lo va ocupa nos tra un tempo vera longa e va resta un memoria triste. Me es profonda emosiada."
La cuantia de mores ia es prima indicada como oto, ma un plu ia es ajuntada en la oras temprana de oji cuando un de la persones ferida ia sede a sua feris.
Esta ataca segue a cuatro dias pos un otra en Berlin, prosima a un presenta de comedia turces a la conserteria Tempodrom, cual ia mata un person.
Leges sur fusiles en Deutxland es entre la plu severes de mundo, e on ia aumenta plu los en anios resente pos otra atacas.
@T Australia oposa mercatos moiada de animales vivente
@L aora_oji/2020/australia_oposa_mercatos_moiada_de_animales_vivente
====== Australia oposa mercatos moiada de animales vivente ======
25 april 2020
La governa australian urje ce la paises G20 reata en relata con mercatos moiada de viventes, descrivente los como "un risca per biosecuria e sania umana". Lo ancora no recomenda un proibi, ma dise ce sua conselores crede ce on nesesa cisa "retira gradal" los.
"Mercatos moiada" vende comedas fresca como carne e pex. Ma un cuantia peti de los vende ance bestias vivente, e on crede ce la coronavirus ia emerji de un tal mercato en Wuhan cual ia vende animales "esotica", incluinte volpes, lupos joven, sivetas, tortugas e serpentes.
Australia ia recomenda un investiga de mercatos moiada de viventes pos un consenta de ministros G20 de cultiva.
On no sabe la orijina esata de la coronavirus presente, ma indicas sujesta ce lo ia veni de un animal. Longo la Organiza Mundal per Sania Animal, COVID-19 es prosima relatada a otra viruses trovada en ciroteros de tipo "fero de cavalo".
La virus ia pasa o direta de cirotera a umana, o tra un ospitor media, cisa un pangolin. On crede ce la coronavirus SARS ia emerji en ciroteros ante pasa a sivetas e de los a umanas. Simil, la coronavirus MERS ia pasa de cameles a umanas, pos emerji probable en ciroteros.
En janero, Xina ia proibi tempora la comersia de animales savaje, como lo ia fa en la tempo de SARS. En la mense seguente, la governa ia "proibi completa la comersia nonlegal de viventes savaje" e ia "elimina la consuma de animales savaje per securi la vives e sania de la popla". Ma on reporta ce on vende ancora tal cosas en mercatos en Xina e otra locas.
Plu resente, la dirijor jeneral de la Organiza Mundal de Sania ia dise ce tota governas debe "enforsa rigorosa la proibis contra la vende e comersia de viventes savaje per come". Tedros Adhanom Ghebreyesus ia comenta plu: "Cuando on permete ce esta mercatos reabri, lo debe es sola con esije ce los conforma a normas sever de securia e ijien per comables."
@T Australia rejeta la reclamas teritorial de Xina
@L aora_oji/2020/australia_rejeta_la_reclamas_teritorial_de_xina
====== Australia rejeta la reclamas teritorial de Xina ======
27 julio 2020
Australia ia rejeta formal la reclamas teritorial e maral par Xina en la Mar Xina Sude, plu prosima aliniante se con la Statos Unida de America en un situa tensante.
En un declara a la Nasiones Unida, Australia ia dise ce la reclamas, cual pertine a la majoria de esta mar, ave "no funda legal". Xina no ia reata. Plu temprana, la SUA ia descrive alga de la atas de Xina en la rejion com "nonlegal".
En anios resente, Xina ia construi bases sur isolas artifis en la mar, disente ce sua diretos ia orijina a sentenios ante aora.
Brune, Malaisia, la Pilipinas, Taiuan e Vietnam oposa la reclamas par Xina. La paises disputa ja teritorio tra desenios, ma la tensa ia aumenta gradal en anios resente, e alga frontis marinal ia aveni.
Xina dise ce lo posese un rejion vasta, conoseda como "la linia de nove linietas" o "la lingua de bove" par causa de sua forma en mapas, e ia suporta sua reclama par construi isolas e par fa patrulias.
Lo ia cumula ala ance un infrastrutur militar notable, ma insiste ce sua intendes es pasosa.
Du arcipelagos en la rejion, la Isolas Paracel e la Isolas Spratly, es apena abitada ma ave cisa reservas de recursos sirca se. La mar es ance un via importante per barcones e ave pexerias major.
En 2016, un corte internasional ia deside contra Xina, disente ce on ave no atesta ce lo ia ave istorial la controla escluinte de la acuas o recursos de esta mar. Xina ia rejeta la judi.
@T Australianes ia cultiva bananas a 2000 anios pasada
@L aora_oji/2020/australianes_ia_cultiva_bananas_a_2000_anios_pasada
====== Australianes ia cultiva bananas a 2000 anios pasada ======
13 agosto 2020
Arceolojistes ia trova cultiverias antica de bananas cual australianes nativa ia maneja en la pasada distante.
Esta locas, con datas de 2145 anios ante aora, ia es descovreda sur un isola pico a norde de la tera xef en Streta Torres. Rexercores ia trova microfosiles de bananas, utiles de petra, carbon de lenio, e un serie de murones.
La rexercores ia dise ce esta rejeta plu la mito ce la poplas nativa de Australia ia es mera xasores-coliores. La trovas de Isola Mabuyag ia es publicida ier par un ecipo de la Universia Nasional Australian e la Universia de Sydney.
Robert Williams, rexercor xef, ia comenta: "Nosa rexerca mostra ce la asendentes de la popla de Mabuyag ia es envolveda en cultivas complicada e praticas orticultural diversa en la ueste de Streta Torres a 2000 anios ante aora a la min."
El ia dise ce on ia tende vide la streta como un linia separante grupos nativa en Gine Nova, ci ia cultiva campos, e los en Australia a ci on ia dona la eticeta "xasores-coliores". Ma la trovas indica ce Streta Torres ia es "plu simil a un ponte o un filtro" per praticas orticultural tra ambos rejiones.
La sistem cultival ia refleta la dieta local de acel tempo, cual ia inclui niamas, taros e bananas.
"Comedas es un parte importante de la cultur e identia nativa, e esta rexerca mostra la eda e la profondia evolual de esta praticas," Williams ia ajunta.
On ave un malconseta jeneral ce la poplas nativa de Australia ia es xasores-coliores nomada en la tempo ante coloni brites. Istoristes ia sujesta ce la briteses ia nega la atestas de sistemes cultival nativa per pote declara ce la tera es nonabitada e nonocupada.
Praticas antica nativa de cultiva de tera es ancora no vasta conoseda en Australia. Ma rexercas en la desenio pasada ia lumina alga la cultiva, injenia e construi precolonial de la australianes prima.
@T Avalanxas matante en la Alpes de Osteraic
@L aora_oji/2020/avalanxas_matante_en_la_alpes_de_osteraic
====== Avalanxas matante en la Alpes de Osteraic ======
9 marto 2020
A la min ses persones ia mori en du avalanxas separada en la Alpes osteraices.
Sinco persones, sur ci on crede ce los ia es sitadanes txesce, ia es matada en la montania Dachstein, a sirca 80 cilometres a sude-este de Salzburg. Los ia es corente con racetas de neva cuando la avalanxa ia colpa los a altia de sirca 2800 metres.
En la otra caso, un polisior de 33 anios ia mori en un avalanxa en la rejion Kärnten en la sude de la pais. El ia partisipa en un eserse de instrui.
Respondente a la situa en la montania Dachstein, on ia usa sete elicotores per transporta sento laborores de salva a la loca per aida xerca la persones mancante.
La xef de operas per la ecipo local de salva montanial, Heribert Eisl, ia dise: "La avalanxa ia aveni a la lado norde de Dachstein, pico su la punto de entra Rankluft. Nos ia ativi tota nosa empleadas, ma nonfortunosa on no ia ave un fini felis."
En janero 2019, sesdes visitores de otel ia evita deveni ferida cuando sua construida ia es colpada par un avalanxa en la note en Ramsau am Dachstein.
Acel ia colpa tan forte ce lo ia espulsa veculos de sur sua curso e ia veni tra fenetras. Plu ca 40 mil persones ia es alora trapida en un de la scierias la plu grande de Osteraic par causa de risca de avalanxas.
@T Avertis contra antisemitisme a la Dia de la Olocausto
@L aora_oji/2020/avertis_contra_antisemitisme_a_la_dia_de_la_olocausto
====== Avertis contra antisemitisme a la Dia de la Olocausto ======
28 janero 2020
Survivores de la Olocausto e xefes internasional ia onora vitimes de la nazis a Auschwitz, la campa pasada de mata, entre urjes per batalia un antisemitisme reveliada.
La presidentes de Israel e Polsca -- Reuven Rivlin e Andrzej Duda -- ia pone garlandas en junta, a 75 anios pos la libri de la campa par soldatos soviet. Sirca 1,1 milion persones, de ci la plu ia es iudi, ia es omisideda a Auschwitz-Birkenau.
Rivlin ia averti contra "voses cual sperde odia" e menasa la democratia. "Nosa debe es batalia la antisemitisme, la razisme e la nostaljia faxiste -- acel males vil," el ia dise.
El e Duda ia lasa garlandas a la Mur de Moria, do la nazis ia fusili miles de prisonidas. Esta compleso vasta en la sude de Polsca su ocupa nazi ia es la sentro de mata la plu malfamosa de acel rena.
Ance miles de polsces, prisonidas soviet de gera, romanis e otra grupos persegueda ia mori ala. Deutxland nazi ia omiside sirca ses milion iudis en sua campania per domina otra razas e nasiones.
Esta es probable la aniversario major final a cual tan multe survivores pote es presente.
On ave aora un ansia jeneral sur la cuantia alta de menasas e violentia antisemita en alga paises, e sur la sperde de parla odiosa en la interede.
En Paris, Emmanuel Macron, presidente de Frans, ia parla a un rituo per onora la aniversario 75, incluinte ajuntas a un mur de recorda per 77 mil iudis deportada de Frans a campas de consentra. La Museo de la Olocausto (Mémorial de la Shoah) ia es renovida, con la ajunta de 175 plu nomes e 1498 plu datas de nase pos rexerca en arcivos.
"La reveni de esta antisemitisme es no sola un problem per iudis," Macron ia dise. "Lo es un problem per tota de nos. Lo es la problem de la Republica."
Plu ca 200 survivores ia viaja a Auschwitz de tra la globo per onora la aniversario. Multe ia ave xarpes blu e blanca, recordante la bandetas de la uniformas de prison cual la vitimes ia porta en la campas de consentra.
Jadwiga Wakulska, un fem de 75 anios ci ia nase en la campa a alga menses ante la libri, ia dise:
"Mea madre ia teni me en sua brasos como un enfante de cuatro menses cuando el ia sta en filo a la cambra de gas. Nos ia veni sempre plu prosima a la bloco, e un de la deutxes ia vide me. El ia regarda me, e car me ia es un bebe blonde con oios azul, el ia prende me a lado e ia dise a me ce me va survive. Par esta causa, nos ia survive. Mea mama dise ce car me ia es de aspeta nordica, me ia salva el e me."
@T Bali es cluida a turistes per la resta de la anio
@L aora_oji/2020/bali_es_cluida_a_turistes_per_la_resta_de_la_anio
====== Bali es cluida a turistes per la resta de la anio ======
25 agosto 2020
La isola Bali en Indonesia no va reabri a turistes stranjer en esta anio, par causa de la coronavirus.
Persones autoriosa en esta destina popular de vacanse ia dise plu temprana ce de setembre on va permete ce visitores stranjer reveni. Ma on ia abandona aora esta, fasante un cuantia cresente de casos de COVID-19 en Indonesia.
La anunsia ia renovi ansia sur la efeto a abitores en un economia cual depende forte de turisme.
Miliones de persones vola a Bali en cada anio, xercante plaias vacua, campos terazida de ris, e templos indu estendosa. Ma la cuantia de turistes ia cade agu pos cuando Indonesia ia clui sua fronteras a nonabitores, como otra paises cual batalia la pandemica.
De la fini de julio, la isola ia espera ce visitores local va aida sua industria danada de turisme, e ia reabri plaias, templos e otra monumentos per viajores de la rejion mesma.
Ma oteles e restorantes ia esperia difisiles per survive, e multe laborores de vacanserias ia revade a sua propre viletas e vilas per gania un revenu.
La governor de Bali, Wayan Koster, ia dise ce un reabri ta esije preparas cauta, car un fali ta pote dana la recovre e la reputa de la isola.
Asta lundi, Bali ia reporta ja 4576 infetas de coronavirus e 52 moris. La nasion Indonesia intera ia reporta plu ca 155 mil infetas e 6759 moris a la min -- la cuantia la plu alta de moris par COVID en Asia sude-este. Espertas crede ce la cuantia ta es an plu alta si on ta fa plu probas.
@T Barat construi un ponte per retiles
@L aora_oji/2020/barat_construi_un_ponte_per_retiles
====== Barat construi un ponte per retiles ======
1 desembre 2020
En Uttarakhand, stato montaniosa de Barat, forestores ia construi un ponte unica per permete retiles e otra animales peti a traversa un via major de veculos.
La "ecoponte", cual ave 27 metres de longia e es composada de bambu, juta e erba, es la prima de sua spesie.
Multe animales ia es craseda per autos rapidinte sur esta via a Nainital, un destina popular per turistes. Aora, ofisiores crese rampores e erba per atrae animales a la ponte.
On ia fisa cameras a ambos lados de la strutur per monitori la moves de animales.
La ponte mesma ia deveni aora un atrae turiste: multe persones ci pasa lo pausa per fa fotos. Ma la forestores espera ce lo va comensa atrae animales ance.
"Esta es un foresta densa, e elefantes, leopardos, servos e boves mas move en esta parte. Motoristes pote vide los de alga distantia e lenti o para, ma los fa rara tal per serpentes, lezardos, varanos o scurales," un ofisior ia comenta.
On espera ce esta ponte nova va aida crea consensia sur la animales e retiles peti de la rejion, en ajunta a proteje los.
@T Barat e Xina culpa lunlotra per un batalia matante
@L aora_oji/2020/barat_e_xina_culpa_lunlotra_per_un_batalia_matante
====== Barat e Xina culpa lunlotra per un batalia matante ======
17 junio 2020
Xina e Barat ia acusa lunlotra de provoca un batalia en cual a la min dudes soldatos barati ia es matada en un rejion himalaian disputada. La armada barati ia dise ce ambos lados ia sufri feris, ma Xina ancora no ia reporta sua cuantia.
La batalia a lundi ia es fada con rocas e bastones. No baletas ia es xutada. La declara barati nota ce la soldatos ferida ia es ance "esposada a temperatures su zero sur la tereno alta".
La combate en la rejion Ladakh ia es la batalia prima matante en la rejion de frontera en 45 anios a la min.
Barat ia dise ce Xina ia atenta "cambia uniladal la state esistente". Beijing ia acusa ce soldatos barati ia "ataca empleadas xines". Plu tarda, la du armadas ia fa negosias per atenta redui la tensa.
En la temprana de ier, la armada barati ia dise ce tre de sua soldatos ia mori en un scaramuxa en Ladakh, en la rejion disputada Caxmir. Lo ia dise plu tarda ce "17 soldatos barati ci ia es grave ferida en curso de labora" ia mori par sua feris, levante la soma matada en batalia asta 20.
Ambos lados insiste ce no baleta es xutada en cuatro desenios. Lo no es clar como un combate cual no ia envolve intercambias de spara ia pote mata tan multe persones, ma jornales local ia reporta ce la soldatos barati ia es "bateda asta mori".
La ministreria de esternas barati ia acusa Xina de rompe un acorda realida en la semana presedente per respeta la Linia de Controla Vera. Xina en sua turno ia acusa ce Barat ia traversa la frontera asta la lado xines.
"La egosia e fretosia de la lado barati es la causa xef de la tensa continuante longo fronteras xines-barati," un editorial dise oji en la Global Times, un jornal manejada par la governa de Xina.
@T Belau proibi cremas solal cual dana viventes de mar
@L aora_oji/2020/belau_proibi_cremas_solal_cual_dana_viventes_de_mar
====== Belau proibi cremas solal cual dana viventes de mar ======
1 janero 2020
Belau, un pais en la ueste de la Mar Pasifica, ia deveni la nasion prima cual proibi cremas solal cual dana corales e viventes de mar.
De oji, on no pote usa o vende crema solal en la pais, si lo inclui ingredientes comun como osibenzona.
Presidente Tommy Remengesau ia dise: "Nos nesesa vive respetante la ambiente car la ambiente es la nido de la vive."
La nasion promove se como un "paradiso pur" per sumerjores. Un lagon en la Isolas Chelbacheb es un loca de erita mundal de UNESCO. La pais es poplada par sirca 20 mil persones tra sentos de isolas.
La proibi, anunsiada en 2018, despermete cremas solal cual conteni cualce de des cimicales cual asorbe lus ultravioleta.
La Funda Internasional per Resifes de Coral ia dise ce la ingredientes proibida es "contaminantes conoseda de la ambiente -- la plu de los es estrema nosiva contra la jovenes de multe spesies de viventes savaje".
Remengesau ia comenta: "Cuando siensa informa nos ce un pratica dana la resifes de coral, la poplas de pexes o la mar mesma, nosa persones escuta, e nosa visitores ance. On ia trova cimicales nosiva de crema solal tra la abitadas perilida de Belau, e en la texedas de nosa creadas la plu famosa. Nos no es disturbada par es la nasion prima cual proibi esta cimicales, e nos va fa nosa rol per sperde la idea."
La cuantia diminui de cremas solal cual conteni la cimicales nosiva. En 2018, espertas ia dise ce lo es trovada en sirca un dui de cremas e losiones.
Cuando la stato Hawaii en la SUA ia anunsia un proibi simil, cual va deveni efetosa en 2021, marcas major ia dise rapida ce sua produidas es "conformante a la lege de resifes".
Otra locas cual ia anunsia proibis inclui la Isolas Virjin de la SUA, do la lege va reali en marto, e Bonaire, un isola nederlandes en la Mar Caribe.
@T Bezos ia vende multe asiones de Amazon ante la colasa
@L aora_oji/2020/bezos_ia_vende_multe_asiones_de_amazon_ante_la_colasa
====== Bezos ia vende multe asiones de Amazon ante la colasa ======
28 marto 2020
Miliones de persones tra la mundo ia perde sua emplea, e triliones de dolares ia es sutraeda de la valuas de asionerias.
Ma no cadun ia perde. Jeff Bezos, la person la plu rica de mundo, es aora plu rica par $5,5 mil milion ca a la comensa de la anio. Sua valua, xef representada par asiones de Amazon, ia crese par $3,9 mil milion a jovedi per ateni $120 mil milion -- sufisinte per compra 188 mil baras normida de oro (an si on considera la custa rapida cresente de oro).
Bezos, ci ave 56 anios, ia benefica en esta semana de la reenerji la plu bon de tre dias per la asionerias pos 1933, aidante la asiones de Amazon a regania cuasi tota de sua perdes en esta mense per comersia a sirca $1920, an si esta ia es pico min ca sua apico de $2170 en febrero. Bezos posese sirca 12% de la asiones de Amazon.
El ia salva se de perdes plu grande par vende un parte grande de sua asiones de Amazon en febrero, ante la reconose plen de la scala global de la crise de coronavirus, e ante la colasa de la asionerias. Documentos ofisial mostra ce Bezos ia vende asiones de Amazon con valua de $3,4 mil milion en la semana prima de febrero, direta ante la culmina de sua custa.
On ave no sujesta ce Bezos ia condui nonconveninte en vende la asiones, o ce el ia es gidada par informa nonpublica sur la efeto de la pandemica. Ma sua judi de tempo ia es cuasi perfeta. La vendes de asiones, representante sirca 3% de sua valua intera, ia es egal a la profita de Bezos en la des-du menses presedente.
En soma, dirijores esuan ia vende asiones de sua companias con valua de $9,2 mil milion en la sinco semanas ante la comensa de la turba en la asionerias. Par vende ante cuando la mercato ia colasa par 30%, los ia evita perdes de $1,9 mil milion.
@T Biden eleje Kamala Harris per sua coaspiror
@L aora_oji/2020/biden_eleje_kamala_harris_per_sua_coaspiror
====== Biden eleje Kamala Harris per sua coaspiror ======
12 agosto 2020
Joe Biden, la aspiror democrata per la presidentia de la SUA, ia nomi Kamala Harris como sua vispresidente potensial -- la fem negra prima e la asian american prima en esta rol.
Inisial un competor per la presidentia mesma, esta senator californian de orijina barati-jamaican ia es longa videda como la favoreda per la rol de vispresidente aspirante.
Harris, la avocato jeneral pasada de California, ia recomenda reformis de la polisia pos protestas nasional resente contra razisme.
Biden va fronti presidente Donald Trump en la vota a 3 novembre. Harris va debate con Mike Pence, la vispresidente (presente e aspirante) de Trump, en Salt Lake City a 7 otobre.
En la istoria de la SUA, sola du otra femes ia es nominada como aspirores per la vispresidentia: Sarah Palin par la partito republiciste en 2008 e Geraldine Ferraro par la democratas en 1984. No la un e no la otra ia gania.
Un fem de color ia es nunca asiniada como vispresidente aspirante par o la partito democrata o la republicistes, la du partitos xef en la politica esuan. E ancora no fem ia es la presidente de la pais.
Harris dise ce el ia es sempre comfortosa sur sua identia, e descrive se como "un american". En 2019, el ia comenta ce on no debe categori policistes par sua color o orijina. "Me es ci me es," el ia dise. "Me es contente sur lo. Cisa vos nesesa labora per comprende lo, ma me es contente sur lo."
@T Biden peri no tempo en revela sua ecipo de clima
@L aora_oji/2020/biden_peri_no_tempo_en_revela_sua_ecipo_de_clima
====== Biden peri no tempo en revela sua ecipo de clima ======
20 desembre 2020
Joe Biden, presidente elejeda de la SUA, ia presenta sua ecipo de clima e enerjia, disente ce los va gida un "projeta aspirante" per combate la cambia de la clima.
Biden ia promete trata esta problem como un conserna xef en un disposa cual reversa multe politicas de la governa de Donald Trump. El ia dise ce on pote "peri no tempo".
Si confirmada par la Senato, la ecipo va inclui la om afroamerican prima ci dirije la Ajenteria de Proteje Ambiental e la american nativa prima en la consilio.
Biden, ci va es formal induida a 20 janero, ia promete construi un governa diversa cual refleta la popla de la pais.
"Nos es en un crise," el ia comenta. "Esata como nos debe es un nasion unida per responde a covid-19, nos nesesa un responde nasional unida a la cambia de clima."
El ia promete abandona la politica climal de la governa de Trump. El dise ce, direta pos ariva en la posto, el va rejunta la SUA a la acorda climal de Paris e "repone America a la taxe de gida la mundo sur cambia de clima".
Su Presidente Trump en esta anio, la SUA ia deveni la pais prima cual ia retira formal se de acel acorda, cual dedica paises a labora per limita la crese de temperatur global.
Biden ia descrive sua elejes per sua ecipo nova de clima e enerjia como "briliante, cualida e probada, e rompores de ostaculos".
La nominadas inclui la afroamerican Michael Regan, la regulor ambiental xef de Carolina Norde, e Deb Haaland, representor de Mexico Nova, ci ta es la american nativa prima ci gida la Departe de la Interna. Haaland ia descrive sua nomina como un momento "profonda" en la istoria de la pais.
Brenda Mallory, avocato ambiental e un ofisior de la governa de Obama, ia es nominada per dirije la Consilio sur Cualia Ambiental. Si confirmada, el va es la afroamerican prima en la posto. Jennifer Granholm, governor pasada de Michigan, ia es nominada per la posto de ministro de enerjia.
En la mense pasada, Biden ia nomi John Kerry como sua ambasador de clima. Kerry es un ministro pasada de esternas e un de arcitetores major de la acorda de Paris.
La ecipo preparante la governa nova ia esplica ce en esta posto Kerry va "combate la cambia de clima a tempo plen". El va deveni ance la ofisior prima dedicada a la cambia de clima ci senta en la Consilio de Securia Nasional.
@T Bill Gates resinia de Microsoft per foca a filantropia
@L aora_oji/2020/bill_gates_resinia_de_microsoft_per_foca_a_filantropia
====== Bill Gates resinia de Microsoft per foca a filantropia ======
14 marto 2020
Bill Gates, cofundor de Microsoft, ia resinia de la dirijores de acel compania per dona plu tempo a sua ativia filantrope. El dise ce el vole foca se a la sania e developa global, educa, e la maneja de la crise de clima.
Un de la persones la plu rica de mundo, Gates, ci ave 65 anios, ia parti ance de la comite de dirijores de Berkshire Hathaway, la holding enorme de la investor famosa Warren Buffett.
Gates ia resinia sua rol dial de maneja direta Microsoft en 2008. Anunsiante sua cambia nova, Gates ia dise ce la compania va "es sempre un parte importante de la labora de mea vive" e ce el va continua es en relatas con sua xefes.
Ma el ia ajunta: "Me previde felis esta fase seguente como un oportun per manteni la amias e asosias cual ia es la plu sinifiosa per me, contribua a du companias de cual me es stonante orgulosa, e asentua efetosa mea dedica per dirije me a alga de la defias la plu difisil de la mundo."
Gates es listada par la revista Forbes como la person la plu rica de mundo pos Jeff Bezos, fundor de Amazon, con valua de 103,6 mil milion dolares esuan.
Cuando joven, el ia abandona universia e ia move a Albuquerque en la stato Mexico Nova, do el ia inisia Microsoft con Paul Allen, sua ami de enfantia ci ia mori en 2018. Susede major ia aveni per los en 1980 cuando Microsoft ia suscrive un acorda con IBM per construi la sistem de opera cual ia deveni conoseda como MS-DOS.
Microsoft ia ofre publica sua asiones en 1986, e pos min ca un anio, Gates, con sola 31 anios, ia deveni la bilionor autocreada la plu joven de sempre.
El ia servi como dirijor de Berkshire Hathaway de 2004, ma dedica multe de sua tempo a la organiza carital cual el ia institui con sua sposa, la Funda Bill e Melinda Gates.
En 2018, la duple ia es nomida como la filantropistes la plu jenerosa en la SUA par la revista La Cronolojia de Filantropia, pos dona $4,8 mil milion a sua funda en la anio presedente. Buffett es ance un filantrope major, ci ia promete distribui 99% de sua mone a causas filantrope, xef tra la Funda Gates.
@T Bolivianes vota per eleje sua presidente
@L aora_oji/2020/bolivianes_vota_per_eleje_sua_presidente
====== Bolivianes vota per eleje sua presidente ======
19 otobre 2020
En Bolivia, on ia fini vota en un eleje presidental, pos un caos en la anio pasada cual ia despone Evo Morales, la presidente sinistriste. Morales ia resinia e ia fuji de la pais, pos declara sua vinse en un eleje disputada de cual, plu tarda, la resulta ia es canselada.
La aspiror de sua partito Promove a Sosialisme, Luis Arce, es la favoreda per gania. Sua defior major es Carlos Mesa, ance un presidente pasada, la aspiror sentriste de la alia Comunia de Sitadanes.
Si no la un e no la otra va susede gania plu ca 50% de votas -- o 40%, ma con 10% plu ca la aspiror la plu prosima -- on va fa un eleje desidente a 29 novembre.
La vota ier ia vole eleje la presidente, vispresidente e 166 parlamentores. La prosede es ja posponeda a du veses par causas de coronavirus, e la tensa political es alta.
La comision elejal ia dise ce lo no va anunsia resultas tempora, ma va espeta la ariva de la conta ofisial.
Arce ia servi como ministro de economia su presidente Morales. En acel posto, el ia supravide la nasionali de la industrias bolivian de mina, gas e telecomunica. Arce ia aida ance inisia la Banco de la Sude, un reserva per developa infrastrutur rejional e projetas sosial.
Mesa ia preside Bolivia entre 2003 e 2005. Sua governa ia es manxada par tensa interna sur la posese de la recursos vasta de gas bolivian. Ante sua carera political, Mesa ia labora como jornaliste, e ia institui un compania de novas televisada cual el ia grandi a un rede nasional.
Corta pos la resinia de Morales en 2019, Jeanine Áñez, un senator conservaliste, ia deveni la presidente tempora, disente ce el va gida la pais asta un eleje nova. Ma la prosede ia es posponeda asta 3 maio, alora 6 setembre, e final 18 otobre.
La partito sosialiste e otra oposores ia acusa la governa de usa la pandemica per atenta resta en potia.
@T Bolsonaro rejeta la gravia de la coronavirus
@L aora_oji/2020/bolsonaro_rejeta_la_gravia_de_la_coronavirus
====== Bolsonaro rejeta la gravia de la coronavirus ======
25 marto 2020
La presidente estrema destriste de Brasil, Jair Bolsonaro, ia declara ce el "ta senti no cosa" si el ta es infetada par coronavirus, e ia desvalua la laboras per conteni la maladia par isolis vasta en cuando la du sites la plu grande de sua pais ia enclui se en un atenta desperante per salva vives.
En un adirije televisada a la nasion en la sera de ier, Bolsonaro ia ataca lo cual el ia descrive como la dana economial de la tatica "tera ardeda" cual on usa per lenti la avansa de un maladia cual ia prende aora sirca 15 mil vives tra la mundo.
"La virus ia ariva e nos combate lo, e pos corta lo va pasa," Bolsonaro ia dise. El fronti un reata cresente negativa en Brasil pos rejeta la coronavirus a multe veses como un "fantasia" e "truco" de jornales.
Bolsonaro ia fa sua comentas ensendente en cuando e Rio de Janeiro e São Paulo ia es partal encluida par autoriosas de munisipa e stato ci teme un crese esplodin de casos en la dias veninte.
João Doria, governor de São Paulo, la stato la plu poplada e economial la plu importante en Brasil, ia declara un periodo de isoli per 15 dias, cual afeta sirca 46 milion de la 210 milion sitadanes de la pais.
Entretempo, la maior de Rio, Marcello Crivella, ia comanda un clui nonlimitada de la comersia e scolas de acel site. E ance la governor de stato de Rio, Wilson Witzel, ia introdui metodos radisal per batalia la virus.
En sua parla de sinco minutos, cual ia provoca protestas forte en Rio e São Paulo, Bolsonaro ia arenga contra tal pasos e ia ataca jornales par sua sperde de "un senti de teme" entre la popla par reporta sur la cuantia de mores en Italia.
@T Boris Johnson es su medica intensa per coronavirus
@L aora_oji/2020/boris_johnson_es_su_medica_intensa_per_coronavirus
====== Boris Johnson es su medica intensa per coronavirus ======
7 april 2020
La ministro xef de Britan, Boris Johnson, ia pasa la note en un sala de medica intensa a un ospital en London sentral, car sua sintomes de coronavirus ia deveni plu grave. On ia pone el ala pos la consela de sua ecipo medical.
El ia demanda ce sua ministro de esternas, Dominc Raab, servi en sua loca "do nesesada".
Johnson, ci ave 55 anios, ia es entrada a la Ospital de San Tomas con "sintomes persistente" a la sera de soldi. Xefes de mundo, incluinte Donald Trump e Emmanuel Macron, ia espresa sua suporta.
Johnson ia reseta osijen en la tarda de la posmedia ier. A pos, on ia move el a medica intensa per prosimi el a respirador, un aparato cual controla la prosede de respira de la corpo.
El ia es prima prendeda a ospital per probas pos anunsia ce el ave la maladia de coronavirus a 11 dias ante aora. Sua sintomes ia inclui un temperatur alta e un tose. Plu temprana ier, el ia tuita ce el es "en bon umor".
Will Walden, sua ami e dirijor pasada de comunica, ia comenta ce Johnson es "en forma multe plu bon ca el pare". "El va trinxa cualce oposor a un campo de tenis, el core frecuente, el no fumi, el bevi moderada. Si cualcun es bon situada, e fisical e mental, per vinse la maladia, la ministro xef es acel person."
@T Botsuana investiga plu ca 150 elefantes mor
@L aora_oji/2020/botsuana_investiga_plu_ca_150_elefantes_mor
====== Botsuana investiga plu ca 150 elefantes mor ======
16 junio 2020
Ofisiores per viventes savaje en Botsuana investiga la moris de plu ca 150 elefantes en la rejion Okavango en la du menses pasada.
La corpos mor de la bestias ia es trovada en state intata. Esta sujesta ce los no ia es xasada.
Esaminas inisial ia elimina la posible ce la elefantes ia es venenida par umanas, o par un aveni natural de la maladia antrax.
Longo reportas en jornales, on ia envia samples a Sudafrica, pais visina, per es plu esaminada. Ofisiores espeta la resultas per determina la causa esata de mori.
Cuasi un tri de la elefantes de Africa abita en Botsuana. La popla de elefantes en esta continente ia diminui en anios resente car on xasa nonlegal los.
@T Brasil republici sua datos de virus pos un judi de corte
@L aora_oji/2020/brasil_republici_sua_datos_de_virus_pos_un_judi_de_corte
====== Brasil republici sua datos de virus pos un judi de corte ======
10 junio 2020
Brasil ia restora un loca ueb cual lista la datos completa sur COVID-19 en la pais, a oras pos es comandada a fa esta par la Corte Suprema.
La ministreria de sania ia sesa publici somas cumulante per moris e casos a saturdi, multe controversa. A martedi, un judor de la Corte Suprema ia comanda ce la governa relasa la statistica, entre acusas de sensura.
Brasil es la numero du de mundo par altia de cuantia de casos, e ave aora plu moris dial ca cualce otra nasion.
Plu temprana, Presidente Jair Bolsonaro ia dise ce la cambia de politica es un resulta de atas fada per boni la reporta de COVID-19. La ministreria de sania ia dise ce lo va reporta sola la casos e moris cual ia aveni en la 24 oras pasada.
Ma oposores ia acusa ce la governa de la presidente estrema destriste manipula la datos. La consilio nasional de ministros de sania per statos ia descrive la move como "autoritar, fria, nonumana e nonetical".
Esta pais en America latina ia rejistra plu ca 700 000 infetas, ma par causa de un nonsufisi de probas, on crede ce la cuantia es multe plu alta. Plu ca 37 000 persones ia mori, la cuantia tre de la plu altas en la mundo.
Usante datos de otra fontes, canales de novas brasilera ia comensa publici sua propre statistica de coronavirus per manteni la informas publica. Los ia critica Bolsonaro per sua maneja de la pandemica, en cual el ia oposa regulas de enclui e ia desasentua la virus como "un gripe peti".
@T Bricabrac orbitante evita un colide desastrosa
@L aora_oji/2020/bricabrac_orbitante_evita_un_colide_desastrosa
====== Bricabrac orbitante evita un colide desastrosa ======
16 otobre 2020
Du pesos de bricabrac spasial ia pasa prosima a lunlotra sin colide, longo un compania cual usa radar per trasa la cursos de ojetos orbitante.
LeoLabs ia dise ce un satelite rusce desusada e un parte dejetada de un roceto xines va veni a min ca 25 metres de lunlotra. A esta matina, lo ia reporta no sinias de detrito supra Antartica.
Otra espertas ia calcula ce Kosmos-2004 e la parte de ChangZheng va pasa a distantia multe plu grande.
Car la ojetos ave un masa combinada de plu ca 2,5 tones e un rapidia relativa de 14,66 cilometres per secondo, cualce colide ia ta es desastrosa e ia ta produi un nube de pesetas, cual ia ta resta a sua altia de cuasi 1000 cilometres per un tempo estrema longa, menasante otra satelites.
LeoLabs es un compania nova en Silicon Valley cual ofre servis de mapa orbital, usante sua propre rede de radar.
Un astrodinamiciste a la Universia de Texas a Austin ia calcula ce la distantia de pasa va es sirca 70 metres, e la Corpora de Airospasio, alta respetada, ia conclui simil.
On lansa sempre plu satelites, donce on ave un ansia cresente sur la posible de colides. La problem major es la cuantia de aparatos desusada ma ancora orbitante: cisa 900 mil ojetos esiste plu grande ca un sentimetre, par alga metodos de conta. Cada peso de esta bricabrac ta dana o an destrui un otra veculo spasial, par causa de la rapidias pertinente.
En esta semana, la Ajenteria Spasial European ia relasa sua reporta anial sur la State de la Ambiente Spasial, asentuante la problem continuante de tal fratos, cual inclui la resultas de esplodes en orbita, causada par carburante o pilas en rocetos vea.
Per promedia, des-du fratis nonintendeda ia aveni en spasio en cada anio de la du desenios pasada -- "e esta tende crese nonfortunosa," la ajenteria ia comenta.
Ance en esta semana, a la Congresa Astronautical Internasional, un grupo de espertas ia lista la sincodes ojetos dejetada cual los regarda como la plu perilintes en orbita. Multe ia es partes vea de rocetos Zenit rusce o soviet.
@T Caldi global aumenta multe la risca de focones australian
@L aora_oji/2020/caldi_global_aumenta_multe_la_risca_de_focones_australian
====== Caldi global aumenta multe la risca de focones australian ======
5 marto 2020
Siensistes ia publici la evalua prima cual cuanti la rol de la cambia climal en la focones savaje resente en Australia. Los dise ce la caldi global ia aumenta la risca de la state seca e calda cual causa comun tal focones par 30%, e cisa par multe plu.
La studia dise ce, si la temperatur global leva par 2°C, como pare probable, tal clima va aveni cuatruple pli frecuente, a la min.
Coautor Geert Jan van Oldenborgh de la Instituida Meteorolojial Real de Nedeeland ia dise ce an la estimas la min estrema en la studia es disturbante:
"En la anio pasada, la sistem de preveni focones en Australia, cual es estrema bon preparada per focones savaje, ia es a la limitas de lo cual lo pote maneja, con bonvolores laborante tra semanas sin sesa. Con ce la mundo caldi, esta avenis va deveni plu probable e plu comun. E lo no es un cosa per cual nos es preparada."
En la saison 2019--2020 en Australia, temperatures recordo e menses de secia intensa ia nuri un serie de focones enorme tra la pais. A la min 33 persones ia mori, e plu ca 110 mil cilometres cuadrida de savanas, forestas e parces ia arde.
An si lo es razonable ce la caldi global de causa umana ia gida probable a plu focones, la taxe de mesura la crese de risca es complicada. Otra fatores, sin relata direta con cambia climal, ave cisa un rol major. Estas inclui la seci de la tera par un usa plu grande de acua, efetos de la caldi de urbes, e cualias local nonconoseda.
La rexercores atenta descovre esce (e cuanto) la modeles dijital presente de clima suestima la influe de la caldi global, e, si tal, como on pote coreti los. Los ia trova ce tota la modeles ia suestima la crese oservada de temperatur en Australia sude-este.
@T Canada retira sua atletas de la Juas Olimpial
@L aora_oji/2020/canada_retira_sua_atletas_de_la_juas_olimpial
====== Canada retira sua atletas de la Juas Olimpial ======
23 marto 2020
On comensa duta plu esce la Juas Olimpial e Paralimpial en Tocio va aveni, car Canada ia deveni la pais major prima cual ia retira se. Sua anunsia ia segue corta pos cuando Shinzo Abe, la ministro xef de Japan, ia fa sua reconose publica prima ce la Juas va es cisa posponeda.
Entretempo, la ecipo australian ia dise ce lo es "clar" ce la Juas no pote aveni, recomendante ce sua atletas prepara se per Juas en 2021. On ia intende ce la Juas va comensa a 24 julio.
La comite Olimpial e Paralimpial de Canada ia dise ce lo ia fa "la deside difisil" de retira se pos consulta atletas, organizas sportal e la governa canadian. Lo ia "clama urjente" alora a la Comite Olimpial Internasional (COI), Comite Paralimpial Internasional e Organiza Mundal de Sania per un pospone de la Juas a 2021.
Ja tra anios, ofisiores japanes dise ce la Juas va aveni como projetada. Ma, parlante oji en parlamento, Abe ia reconose ce cisa sua pais va debe pospone los. Ma el ia insiste ce la Juas no va es intera canselada.
La Juas Olimpial ia es nunca posponeda o canselada en tempo de pas. Los de 1940, cual ia es abandonada par causa de la Gera Mundal Du, ia ta aveni en Tocio ance.
Ier, la COI ia dise ce lo ia dona a se no plu ca cuatro semanas per fa un deside sur la Juas de 2020. Lo ia reconose ce la pospone es un posible, ma ia insiste ce la cansela "va solve no problemes e va aida no persones".
En un letera a atletas, Thomas Bach, presidente de la COI, ia scrive: "Vives umana es plu importante ca tota, incluinte ca la reali de la Juas. A la fini de esta tunel oscur tra cual tota de nos pasa en junta, sin sabe como longa lo es, la flama Olimpial va es un lus."
@T Cisa cuasi 500 000 persones ia ave covid en Wuhan
@L aora_oji/2020/cisa_cuasi_500_000_persones_ia_ave_covid_en_wuhan
====== Cisa cuasi 500 000 persones ia ave covid en Wuhan ======
30 desembre 2020
Cisa cuasi 5% de la popla de la site xines Wuhan ia es infetada par covid. Esta es la indica de un studia par la Sentro Xines per Controla e Preveni Maladia.
Wuhan ave sirca 11 milion abitores, donce cisa un dui de milion persones ala ia developa la virus. Si tal, la cuantia es cuasi la desuple de la cuantia ofisial rejistrada de 50 354 casos (cual esclui casos nonsintomosa).
La studia ia prende samples de 34 mil persones en Wuhan, como ance plu jeneral en la provinse Hubei, Beijing, Shanghai e cuatro otra provinses.
Esta informa presede un visita a Wuhan par un ecipo de siensistes internasional per esplora la orijinas de la virus. Los va viaja ala en janero, pos menses de negosias con un Beijing esitante acorda un investiga nondependente.
En la parte plu temprana de esta anio, Xina ia es acusada de un manca de transparentia sur sua statistica de coronavirus, e criticores ia duta la grado a cual on pote fida lo.
La declara par la Sentro ia ajunta ce, entre la 12 mil persones probada estra Hubei, sola du persones ia mostra la presentia de la anticorpo.
La rexerca, fada a un mense pos cuando Xina "ia conteni la onda prima" de la pandemica, conclui ce la cuantia de persones infetada estra Wuhan ia es basa. Esta sujesta ce la metodos usada en Wuhan ia preveni la virus de sperde vasta.
Plu temprana en la anio, on ia trasa la virus a un "mercato moiada" tradisional en Wuhan, sujestante ce esta ia es do lo ia salta de animales a umanas. Ma espertas crede aora ce cisa lo ia es simple fortida ala.
@T Coleria en Brasil a un polisior ci sta sur un fem
@L aora_oji/2020/coleria_en_brasil_a_un_polisior_ci_sta_sur_un_fem
====== Coleria en Brasil a un polisior ci sta sur un fem ======
14 julio 2020
En Brasil, du polisiores militar en la site São Paulo va es criminal acusada pos la televisa de imajes cual mostra ce un de los ia sta sur la colo de un fem de pel negra.
Pos acel, la vitim, un fem de eda media e la posesor de un bar peti, ia es tirada en securipolsos longo la troteria. La rejistra ia es fada par un person ci ia vide la aveni en maio.
La governor de stato, João Doria, ia dise ce el no va tolera tal maltratas, e ce ambos polisiores es aora desempleada. On no ia publici sua nomes. La governor ia ajunta ce 2000 membros de la polisia de São Paulo va debe usa cameras aponable aora.
La video ia es difusada en Fantástico TV en la finisemana pasada. Lo ia provoca un coleria notable en la pais, evocante la mori su aresta par polisia de George Floyd, un om nonarmada de pel negra, en Minneapolis, ance en maio.
En acel caso, un polisior de pel blanca ia es videda en ajena sur la colo de Floyd, an cuando Floyd ia dise ce el no pote respira. La mori de Floyd ia jenera un serie de protestas coletiva en urbes tra la SUA, violente a veses.
@T Comeda rapida antica va es visitable en Pompei
@L aora_oji/2020/comeda_rapida_antica_va_es_visitable_en_pompei
====== Comeda rapida antica va es visitable en Pompei ======
27 desembre 2020
Un boteca de comeda rapida en Pompei, la site roman antica destruida en un eruta volcanal a cuasi 2000 anios ante aora, va abri a la publica en la anio veninte, ma sola per es regardada.
La ciosco, nomida un thermopolium en latina, ia servi comedas calda e bevidas a persones en la site. La boteca, con frescos briliante colorosa e jares de teracota, ia es descovreda en 2019 e publica revelada ier.
Pompei ia es engolida par la eruta de Monte Vesuvio en la anio 79 de la eda comun. Lo ia es covreda par un strato profonda de sene cual ia conserva la site e la contornos de multe de sua abitores, como un fonte rica per arceolojia.
On crede ce la depintas sur la fronte de la boteca mostra alga de la comedas ofreda a clientes, incluinte carne de gal e pato. Trasas de carne de porco, bove, pex e caracol ia es ance trovada en jares e otra contenadores.
Massimo Ossana, dirijor de la parce arceolojial, ia descrive la descovre como "estracomun". "Esta es nosa ves prima de escava un thermopolium intera."
Pompei es situada a sirca 23 cilometres a sude-este de Napoli, e es presente cluida par causa de la pandemica, ma la parce espera reabri ante pascua.
Sirca un tri de esta site antica es ancora no desenterada, e trovadas continua emerji de la loca. En la mense pasada, arceolojistes ia descovre la restas de du omes matada en la eruta, sur ci on crede ce los ia es un sitadan prestijiosa e sua sclavo.
@T Conjesta de camiones a la frontera de Cenia e Uganda
@L aora_oji/2020/conjesta_de_camiones_a_la_frontera_de_cenia_e_uganda
====== Conjesta de camiones a la frontera de Cenia e Uganda ======
28 april 2020
Camionores cexa ce los sufri filos estrema longa a la frontera de Cenia e Uganda, do ambos nasiones es obligada a proba los per la coronavirus. En un parte de soldi, la longia de la filo a la lado cenian ia es 30 cilometres.
Esta du paises visina en Africa este es la asosiores comersial la plu grande de lunlotra, e la vilas fronteral Malaba e Busia, do la conjesta ia cumula, es vias esensal per transporta de benes.
Un camionor ia dise: "Me no ia revade a casa en cuasi un mense aora. Me es trapida sur esta via. On colpa tan mea boca a cada sera cuando on fa la esamina ce me dole aora. On ia prende ance mea sangue ma me no sabe la resulta."
Camionores traente cargas tra Africa este es entre la poca persones a ci on permete asi la libria de move en esta pandemica. Con la sabe e esperia ganiada par trata VIU e SIDO, paises en esta rejion ia ata rapida en identifia camionores como un grupo de risca alta.
A la culmina de la sperde de VIU en la desenios de 1980 e 1990, studias de un via de camion pasante de Mombasa, site de porto en Cenia, asta la interna de la Republica Democrata de Congo ia revela ce multe camionores e sua ecipores ia ave multe relatas sesal en via. On ia institui pronto clinicas e servis longo acel via per furni prevenis e tratas de VIU.
Oto camionores cenian en Uganda ia es resente confirmada con coronavirus. Usante esaminas obligada, ofisiores ala ia pote identifia ance casos positiva ma nonsintomosa.
On ave ance otra metodos plu sofisticada de trasa en esta parte de Africa. A un ves, on ia usa la sistem de trasa cargas de la Autoria de Revenu de Uganda per retrova un camionor tanzanian de ci la resulta de sua esamina ia apare positiva sola pos cuando el ia parti de la frontera.
En ajunta a esaminas obligada, Cenia ia proposa ance camioni par rele, un sistem en cual camionores ta transfere sua veculos a sua corespondentes ugandan a la frontera. Esta aveni ja en Ruanda, do companias de transporta debe cambia sua camionores pos ariva en la pais.
On previde plu reorganizas rejional pos la consenta virtual de la ministros de sania de Africa este en la fini de semana.
@T Construidas colasa en un trematera en Turcia
@L aora_oji/2020/construidas_colasa_en_un_trematera_en_turcia
====== Construidas colasa en un trematera en Turcia ======
25 janero 2020
A la min 21 persones es matada e plu ca mil ferida pos un trematera major en Turcia este.
La trema de fortia 6,8 ia es sentrida a la vila Sivrice en la provinse Elazığ. Construidas ia colasa e abitores ia freta a la stradas. On ia senti tremas ance en Suria, Lubnan e Iran, paises prosima.
Tremateras es comun en Turcia. En 1999, sirca 17 mil persones ia mori en un trema enorme en İzmit, un site en la ueste.
La trema xef a venerdi ia aveni a sirca 20:55 de ora local, ma on ia rejistra plu ca 200 replicas sismica a pos. On averti contra revade a construidas danada, car plu replicas es ancora posible.
Plu ca 400 ecipos de salva viaja a la rejion, con letos e tendas per la persones deslocada. Imajes televisada mostra servis de crise ci xerca survivores en construidas colasada.
On ia envia ance covreletos a la rejion, do la temperatur de note cade normal su zero. En la note pasada, per esemplo, la temperatur ia es -8°C.
Un abitor de la site Elazığ ia descrive sua esperia: "Lo ia es multe asustante. Mobilas ia cade sur nos. Nos ia rapidi a estra."
La rejion colpada par la trema, a 550 cilometres a este de la capital Ankara, es distante e no densa poplada, donce on pote espeta ce detalias de danas e moris va apare sola lenta.
Sivrice, un vila de sirca 4000 persones, es un loca popular per turistes a la borda de Lago Hazar, la fonte de la rio Tigris.
@T Contas major de Twitter es saisida par frodores
@L aora_oji/2020/contas_major_de_twitter_es_saisida_par_frodores
====== Contas major de Twitter es saisida par frodores ======
16 julio 2020
Twitter ia sufri un fali major de securia ier, cuando piratas ia saisi controla de la contas de figures publica e corporas major, incluinte Joe Biden, Barack Obama, Elon Musk, Bill Gates, Jeff Bezos e Apple.
La compania ia confirma la ataca en la sera de ier, a plu ca ses oras pos cuando lo ia comensa. Lo ia atribui la problem a un "ataca coordinada de injenia sosial" contra sua propre empleadas cual ia permete ce la piratas asede "sistemes e utiles interna".
Twitter ia dise ce lo "investiga esce los ia fa otra condui malvolente o ia asede otra informa" en ajunta a usa la contas atacada per envia tuitas.
La ataca ia aveni en curso de alga oras. Per combate lo, Twitter ia preveni tuitas par tota contas ofisial sertida -- un metodo sin presedente. La compania ia restora la plu contas ante la sera de ier, ma ia averti ce lo "va fa cisa plu atas" en responde.
Twitter ia dise ce lo ia clavi la contas saisida e ia "usa metodos per limita la asede a sistemes e utiles interna" en cuando lo continua sua investiga.
La contas piratida, cual ave deses de miliones de seguores, ia envia un serie de tuitas per ofre un froda clasica de bitcoin. La seguores ia es informada ce si los ta transfere criptomone a un portamone dijital spesifada, los ta reseta la cuantia duple par intercambia.
La mesajes ia inclui la adirije de un portamone de bitcoin, de cual sua salda ia crese rapida asta plu ca 11 BTC (plu ca $100 mil) en cuando la froda ia sperde. Tuitas con mesajes simil ia es sutraeda e reenviada a multe veses par alga de la contas afetada, tra la posmedia de mercurdi.
An si on ancora no conose la motivas e fonte de la ataca, la devia coordinada de la flues de comunica sertida de xefes de mundo, persones famosa e contas major de corpora ia es un aveni asustante.
Twitter ia deveni, par fato, un servi de comunica per la mundo, e es usada par governas per comunicas ofisial a tempos de crise. Un otra ataca con estende simil ta es cisa plu turbante o an perilosa.
@T Contrabandores de carton es caturada en Madrid
@L aora_oji/2020/contrabandores_de_carton_es_caturada_en_madrid
====== Contrabandores de carton es caturada en Madrid ======
8 febrero 2020
La polisia espaniol dise ce lo ia desbandi un gang criminal cual ia fura tones de carton dejetada de Madrid e ia contrabanda lo a paises asian.
Plu ca 40 gangores suspetada ia es arestada, suspetada de ofendes ambiental e blancis de mone. On acusa ce la gang ia transporta nonlegal plu ca 67 mil tones de dejetada, con valua de 10 milion euros. Multe de la dejetada ia es furada de baldones de resicli.
Un compania de maneja dejetadas, con adirije en Madrid, ia organiza de 2015 la colie nonlegal de paper e carton, la polisia ia esplica.
On estima ce la gang ia sutrae sirca 16 milion euros de la consilio de la site Madrid en forma de perdes de materias resiclable. Paper e carton deponeda en bancos es vendeda a complesos de resicli cual converti lo a sua materias cru.
La carton e paper furada ia es miscada con dejetadas legal colieda ante deveni transportada a paises en Asia sude-este, xef Xina, Barat, Indonesia e Corea Sude.
Fotos publicida par la polisia mostra un suspetada con sua gamas pendente de un baldon de resicli cuando el ia atenta fura la contenidas. Un polisior ia comenta a un jornal ce en "la rejiones la plu jusosa", la gangores "ia vade per la paper a du veses per dia".
De la 42 persones arestada, tre es sitadanes espaniol e la plu de la otras es de orijina romanian. Des-un camiones usada en la furas ia es ance saisida par la polisia.
La opera, gidada par la Garda Sivil Espaniol, ia es suportada par Europol, la departe de la Uni European per enforsa leges.
On ia lia crimines organizada con la industria de dejeta en alga paises european, de cual Italia es major. Un reporta par la UE en 2015 ia dise ce crimin organizada en Italia "fa un rol notable en la industria de maneja dejetadas, spesial en la campo de lasa dejetadas en locas nonlegal e contrabanda nonlegal internasional de dejetadas perilosa".
@T Corea Norde averti sur polvo jala de Xina
@L aora_oji/2020/corea_norde_averti_sur_polvo_jala_de_xina
====== Corea Norde averti sur polvo jala de Xina ======
23 otobre 2020
Corea Norde ia avisa sua sitadanes a resta en casa, par causa de un teme ce "polvo jala", portada de Xina par la venta, pote conteni la coronavirus.
Ier, la stradas de la capital Pyongyang ia es cuasi vacua pos la averti. La pais secretosa reporta ce lo ave no casos de la maladia, ma lo vijila ja multe de janero, usante cluis sever de frontera e restrinjes contra la moves de persones.
On conose no lia entre COVID-19 e la nubes saisonal de polvo. Ma ance Turcmenistan ia alega ce la risca de virus en la polvo es perce sua sitadanes debe covre sua fases. Turcmenistan ia nega ance ce lo atenta asconde sua casos de la maladia.
La canal Televisa Sentral Corean, governal controlada, ia difusa reportas spesial de clima a mercurdi, avertinte contra un enflue de polvo jala a la dia seguente. Lo ia anunsia ance un proibi nasional de labora de construi esterna.
Esta polvo jala es arena, veninte de desertos mongol e xines, cual sofla a Corea Norde e Sude en alga partes de la anio. Lo es miscada con un polvo nosiva cual crea ja tra anios un ansia sur sania en ambos Coreas.
La Ambasada Rusce en Pyongyang ia dise en sua paje de Facebook ce la ministreria de esternas de Corea Norde ia dona un avisa sur la venta polvosa a lo e otra organizas diplomata e internasional en la pais, recomendante ce tota persones stranjer resta en casa ier e clui forte sua fenetras.
La Sentros Esuan per Controla e Preveni de Maladias ia dise ce la coronavirus pote resta pendente en la aira "per oras". An tal, lo dise ance ce lo es estrema rara ce algun deveni infetada en esta modo, spesial su sielo. La modo xef de infeta es ce on sta tro prosima a un person ja infetada ci tose, stornui o parla, sperdente la virus par gotetas.
Jornalistes en Corea Sude ia rejeta como nonposible la sujesta ce polvo jala de Xina pote porta COVID-19 a la Norde.
An si Corea Norde dise ofisial ce lo ave no casos, on teme profonda la maladia en la pais, e la xef Kim Jong-un ia fa consentas per serti la continua de restrinjes sever. Analisores judi ce lo es multe nonprobable ce Corea Norde ia esperia zero casos de la virus.
La polvo ia clari ja de la penisola corean e meteorolojistes predise ce lo va resta tal tra la finisemana.
@T Corea Norde proba lansadores a media de la crise
@L aora_oji/2020/corea_norde_proba_lansadores_a_media_de_la_crise
====== Corea Norde proba lansadores a media de la crise ======
30 marto 2020
Corea Norde ia loda sua proba de lansamisiles "supragrande", a sola oras pos cuando Corea Sude ia condena la pais como "nonconveninte" per fa tal probas a media de la crise global de coronavirus.
Ier, la Sude ia dise ce du misiles de distantia corta ia es xutada, en la plu resente de un serie rapida de probas en esta mense.
La Norde aumenta usual sua probas de misiles en la primavera, e la situa de coronavirus no ia impedi lo. Lo ia reporta no casos de la virus, ma espertas duta esta.
La proba a soldi ia conserna du misiles balistical de distantia corta, lansada de Wonsan, un site en la este de la pais. La militar de Corea Sude ia dise ce los ia vola tra 410 cilometres con altia masima de sirca 50 cilometres, ante cade en la mar.
Oji, la Ajenteria Sentral de Novas Corean, la canal governal de jornalisme en Corea Norde, ia reporta ce lo ia fa probas susedosa de lansarocetos multiple e supragrande.
Ma ja alora, la Sude ia condena la atas de la Norde en un declara sever espresada: "En un situa en cual la mundo intera esperia problemes par causa de COVID-19, esta spesie de ata militar de Corea Norde es multe nonconveninte, e nos urje la sesa direta."
@T Corea Norde reporta ce Kim Jong-un ia reapare publica
@L aora_oji/2020/corea_norde_reporta_ce_kim_jong-un_ia_reapare_publica
====== Corea Norde reporta ce Kim Jong-un ia reapare publica ======
2 maio 2020
Kim Jong-un ia apare publica a la ves prima en 20 dias, diseda par difusas governal en Corea Norde.
La Ajenteria de Novas Sentral Corean reporta ce la xef de la pais ia talia la sinta per abri un fabriceria de fertilinte en un rejion a norde de Pyongyang. Lo ajunta ce persones a la fabriceria "ia esplode con aclamas tonin de ura" cuando el ia apare ier.
La apare reportada -- sua prima pos 12 april -- aveni pos parlas global sur sua sania. On no pote confirma nondependente la reportas nova de Corea Norde. Plu tarda, la difusantes governal ia relasa imajes cual mostra Kim taliante un sinta estra un fabriceria.
Demandada sur la reapare de Kim, Donald Trump, presidente esuan, ia informa reportores ce el no vole comenta ancora.
Corea Norde dise ce Kim ia es acompaniada par alga ofisiores major de la pais, incluinte sua sore Kim Yo Jong. Kim ia declara ce el es sasiada par la sistem de produi de la fabriceria, e ia loda sua contribui a la progresa de la industria cimical e la produi de comables.
On ia comensa divina sur la sania de Kim pos cuando el no ia es presente a la selebras per la aniversario de la nase de sua avo Kim Il-sung a 15 april. La aniversario es un de la avenis la plu grande en la calendario de la pais, e usual Kim onora lo par visita la mausoleo do sua avo reposa. El ia es nunca asente de esta aveni a ante.
Alegas ce Kim es malada ia apare a pos en un reporta per un pajeria manejada par abandonores de Corea Norde. Un fonte anonim ia informa la jornal Daily NK ce on comprende ce el batalia un disturba cardiovascular ja de agosto pasada, ma ce "lo ia mali pos visitas repeteda a Monte Paektu".
Esta ia provoca un cadena de reportas internasional difusada sur un informa de sola un fonte, asta la emerji de indicas ce departes de securia en Corea Sude e la SUA monitori la alega.
Seguente esta, on ia vide en la SUA titulos plu dramosa: ce la xef de Corea Norde es en un state grave pos sirurjia de cor. La ministro de esternas esuan Mike Pompeo ia pare tisa esta rumores a 29 april, disente ce ofisiores esuan "no ia vide" resente Kim Jong-un. Ma un declara par la governa de Corea Sude, e fontes de securia xines, ia indica ce esta no es vera.
Kim ia desapare ance en setembre 2014, tra 40 dias pos visita un conserta. El ia reapare en la media de otobre, paseante con basto. La difusas governal ia esplica nunca do el ia es. Ma la departe de securia de Corea Sude ia dise ce el ia reseta probable un opera sirurjial a sua talo sinistra pos un disturba causada par un siste.
@T Des baratis mori pos bevi ijieninte en loca de alcol
@L aora_oji/2020/des_baratis_mori_pos_bevi_ijieninte_en_loca_de_alcol
====== Des baratis mori pos bevi ijieninte en loca de alcol ======
1 agosto 2020
En un vileta en la stato Andhra Pradesh en Barat sude, a la min des persones ia mori pos bevi ijieninte alcolosa pos la clui de botecas de alcol. La vileta Kurichedu es encluida pos un aumenta local de casos de coronavirus.
La xef de polisia de la distrito, Siddharth Kaushal, ia dise ce la persones ci ia mori ia misca la ijieninte de mano con acua e bevidas gasosa. Los ia ave ja un depende de alcol e ia comensa bevi la misca a aprosima des dias ante sua mori.
"Nos investiga esce la ijieninte ia conteni cualce otra sustantia nosiva," Kaushal ia comenta, ajuntante ce la polisia ia envia samples de la ijieninte per analise cimical. "Alga persones ci es forte abituada a alcol ia consuma ijienintes per felisi se. Alcol no es disponable par causa de la enclui, ma ijienintes de mano es fasil disponable."
La governa federal de Barat ia reabri la plu comersias per preveni un colasa sever de la economia.
Plu temprana en esta semana, on ia anunsia ce on va permete la reabri de instituidas de ioga e jinasios, e ce restrinjes va es canselada per moves de benes e persones. Ma ancora multe statos enforsa encluis en rejiones definida en cuando grupos de casos de la virus emerji.
La cuantia de casos confirmada de la maladia en Andhra Pradesh ia crese novuple en la mense pasada.
Entretempo, Barat ia rejistra nasional plu ca 55 mil infetas ier, e la cuantia de moris ia crese par 779 a un soma de plu ca 35 700.
@T Des turistes sur un barcon japanes ave la coronavirus
@L aora_oji/2020/des_turistes_sur_un_barcon_japanes_ave_la_coronavirus
====== Des turistes sur un barcon japanes ave la coronavirus ======
5 febrero 2020
Minima des persones sur un barcon de turi docida en Yokohama, porto japanes, ia es positiva probada per la coronavirus.
Cuasi 300 de la 3700 persones sur la Prinsesa de Diamante ia es esaminada asta aora. Lo es posible ce la cuantia de persones infetada va crese en cuando la probas continua.
On ia comensa esamina la pasajores pos cuando un om hongkong de 80 anios, ci ia es sur la barcon en la mense pasada, ia deveni malada par la virus.
Tota la des casos pertine a persones con plu ca 50 anios. Cuatro es en sua desenio ses, cuatro es en sua desenio sete, un person es en sua desenio oto, e un plu es en sua desenio nove. Du de los es japanes, e nun de los es en un state grave.
Katsunobu Kato, ministro japanes de sania, ia dise ce la casos confirmada es entre 31 resultas de 273 persones probada.
Sola en Xina, on ave aora plu ca 24 300 casos de la virus, e 490 persones ia mori par causa de lo.
La cuantia de casos en otra paises de la mundo es multe plu peti. Sola du persones estra la tera xef de Xina ia mori de la maladia.
@T Deutxland introdui restrinjes nova contra covid
@L aora_oji/2020/deutxland_introdui_restrinjes_nova_contra_covid
====== Deutxland introdui restrinjes nova contra covid ======
16 desembre 2020
Deutxland ia entra a un isoli forte, cluinte scolas e comersias nonesensal per atenta para un aumenta rapida de la cuantia de infetas de covid.
La regulas va resta asta 10 janero, ma va es pico lejerida a natal, tal ce un casa pote ospita asta cuatro familianes prosima. La pais ia reporta 952 plu moris e 23 427 casos ier.
Otra paises european ia severi ance sua restrinjes ante natal.
En Deutxland, on permete ce sola comersias esensal como supramercatos e bancos resta abrida. Restorantes, bares e sentros de recrea es ja cluida de novembre, e alga partes de la pais ia enforsa sua propre regulas de isoli.
Capelerias es entre la botecas cual debe clui, e on ia proibi bevi alcol en locas publica, como la cioscos popular de vino calda. On recomenda ce companias permete ce empleadas labora de casa.
La 952 moris nova anunsiada representa un apico nova per la pandemica en Deutxland, ma lo es posible ce la statistica inclui ance persones nonreportada en dias presedente.
La governa deutx presa la Ajenteria European de Medisines per rapidi la aproba de la vasin Pfizer/BioNTech, cual ia es developada en Deutxland. Lo es ja aprobada par regulores en la Rena Unida e la SUA.
Frans ia introdui un proibi de sorti entre la oras 20:00 e 06:00. On no va pote parti de sua casa sin lisensa ofisial. La sera de natal va es esentada, ma la regula va es enforsada a la sera de la anio nova.
E Nederland es aora encluida per sinco semanas, su la regulas la plu sever en la pais pos la comensa de la pandemica. Botecas nonesensal, sinemas, capelerias e jinasios ia clui, e la scolas va segue doman.
Persones ala es recomendada a evita viajas nonesensal a stranjer asta la media de marto. Ma on va redui pico la restrinjes per la tre dias de natal, cuando casas nederlandes pote ave tre ospitadas en loca de du.
En la Rena Unida, London ia entra oji a la grado la plu alta de restrinjes, e en Italia, do la cuantia dial de moris es ancora prosima a 500, la governa considera ajunta plu restrinjes per natal.
@T Diego Maradona mori con 60 anios
@L aora_oji/2020/diego_maradona_mori_con_60_anios
====== Diego Maradona mori con 60 anios ======
26 novembre 2020
Diego Maradona, un de la futbalores la plu bon de istoria, ia mori con eda de 60 anios. Esta sentror atacante e manejor pasada per Arjentina ia sufri un infarta miocardial a sua casa en Buenos Aires.
El ia pasa susedosa tra sirurjia per un trombo serebral en la parte plu temprana de esta mense, e on ia intende trata sua depende de alcol.
Maradona ia es la capitan de la ecipo cuando Arjentina ia gania la Copa Mundal en 1986, fante la gol famosa "Mano de Dio" contra England en la cuatrifinales.
Lionel Messi, atacor per Arjentina e Barcelona, ia loda Maradona a "un dia multe triste per tota arjentinas e futbal". El ia comenta: "El parti de nos, ma no parti, car Diego es eterna."
Anunsiante tre dias de lamenta nasional, Alberto Fernández, presidente de Arjentina, ia dise: "Tu ia leva nos asta la alta de la mundo. Tu ia felisi enorme nos. Tu ia es la plu grande de tota. Grasias ce tu ia esiste, Diego. Nos va senti tua manca tra tota nosa vives."
Maradona ia jua per Barcelona e Napoli en sua carera, ganiante la concurso Serie A a du veses con la ecipo italian. El ia fa 34 goles en 91 apares per Arjentina, representante los en cuatro Copas Mundal.
El ia gida sua pais a la final de 1990 en Italia (do sua ecipo ia es vinseda par Deutxland Ueste) ante es denova sua capitan en la Statos Unida en 1994 (do on ia envia el a via cuando el ia fali en un proba de drogas).
En la dui du de sua carera, Maradona ia batalia un depende de cocaina e ia es proibida per 15 menses pos un proba positiva per acel droga en 1991.
El ia jubila de futbal profesal en 1997, a sua aniversario 37. On ia asinia el como la instruor xef de la ecipo nasional en 2008, un posto de cual el ia parti pos la Copa Mundal de 2010, en cual sua juores ia es vinseda par Deutxland en la cuatrifinales.
A pos, el ia maneja ecipos en la Amirias Arabi Unida e Mexico, e a la tempo de sua mori el ia es la supravidor de Jinastia e Scrima de La Plata, un ecipo en la divide prima de la liga arjentina.
La futbalor famosa Pelé ia gida la onoras a Maradona, scrivente en Twitter: "Novas tan triste. Me ia perde un ami grande e la mundo ia perde un lejendin. On ave ancora multe per dise, ma per aora, ta ce Dio dona fortia a la familianes. A alga dia, me espera ce nos va jua bal en junta en la sielo."
@T Disney es criticada per filma en Xinjiang
@L aora_oji/2020/disney_es_criticada_per_filma_en_xinjiang
====== Disney es criticada per filma en Xinjiang ======
8 setembre 2020
Disney es criticada per xuta sua filma nova Mulan en partes de Xina do on acusa la governa de maltratas grave de diretos umana.
La titulos codal grasia un ajenteria governal de securia en la provinse Xinjiang, do on crede ce sirca milion persones, xef uigures muslim, es detenida.
La filma ia deveni ja la ojeto de un boicota car sua ator xef ia suporta metodos usada contra protestores en Hongkong.
Disney no ia comenta sur la disputa nova, e Xina dise ce sua campas de deteni en Xinjiang es nesesada per boni securia.
La filma, cual es un de la relasas la plu grande de la anio, es un recrea de la anima de 1998 sur un xica joven ci prende la rol de sua padre en la armada.
Ma fanes en alga paises asian ia recomenda ce on boicota lo cuando la ator Liu Yifei ia fa comentas suportante la polisia de Hongkong, ci on ia acusa de violentia contra persones protestante per democratia en menses resente.
Ier, usores de redes sosial ia vide ce, en la titulos codal, Disney grasia alga organizas governal en Xinjiang, incluinte la departe de securia publica en la site Turpan e la "departe anunsiante de la Comite de la Rejion Autonom Uigur Xinjiang".
Analisores dise ce la departe de securia publica en Turpan maneja campas do uigures es "reeducada", e la departe anunsiante nomida par Disney produi propaganda governal en la rejion.
On crede ce milion persones uigur es detenida par fortia en esta campas prisonin de securia alta en anios resente. Documentos esposada e atestas de survivores revela ce la prisonidas es encluida, obligada a aprende dogma, e punida. Xina rejeta esta alegas como "novas falsa".
@T Đoković colpa un arbitror de linia con un bal
@L aora_oji/2020/dokovic_colpa_un_arbitror_de_linia_con_un_bal
====== Đoković colpa un arbitror de linia con un bal ======
7 setembre 2020
A la torneo US Open, Novak Đoković ia demanda per pardona pos colpa un arbitror de linia, disente ce el "regrete estrema crea tal stresa per el".
Par causa de la aveni, Đoković, ci ave 33 anios e es la numero un de la mundo de tenis, ia es descualida de sua max contra Palo Carreno Busta de Espania en la ronda cuatro.
La tenisor serbsce ia prende un bal de sua pox e ia colpa lo a pos se, colpante la fem a sua garga.
"Esta situa intera ia lasa ce me es vera triste e vacua," Đoković ia dise. "Me ia serti me sur la state de la arbitror e la torneo ia informa me ce, con grasias a Dio, el senti oce."
Pos un discute longa, Đoković ia es descualida par ofisiores de la torneo. El va perde tota puntos de gradi e tota mone de premio cual el ia gania ala. Cisa el va es ance multada.
"Me nesesa revade a interna e labora a mea delude e cambia tota esta a un leson per mea crese e evolui como un juor e umana," Đoković ia ajunta en sua declara en Instagram.
Sua parti crase sua esperas de gania un titulo 18 en la cuatro torneos major anial, e de redui sua distantia de Rafael Nadal e Roger Federer en la compete per fini con la plu vinses major par un om. Los ave 19 e 20 vinses, en acel ordina.
Comensante sua max contra Carreno Busta, Đoković ia vole estende sua serie nonvinseda en esta anio a un vinse 27. Ma en loca de reseta plu lodas, el ia cumula mera plu controversia a se.
En junio, el ia es un de alga tenisores ci ia es positiva probada per la coronavirus pos jua en un concurso cual el mesma ia organiza en la Balcanes. La maxes ia es juada ante fanes e sin distanti sosial. Đoković ia demanda per pardona a pos.
E a media de la pandemica, el ia es acusada de oposa vasines (un opina cual el ia nega plu tarda), e ia atrae critica pos dise ce on pote puri acua par otimisme.
@T Du persones saisida en Burcina Faso apare en Mali
@L aora_oji/2020/du_persones_saisida_en_burcina_faso_apare_en_mali
====== Du persones saisida en Burcina Faso apare en Mali ======
15 marto 2020
Un fem canadian e un om italian saisida en Burcina Faso en 2018 ave bon sania e umor pos ariva en Mali, un pais visina.
Édith Blais e Luca Tacchetto, ambos en sua desenio cuatro, ia evade e ia es colieda par soldatos de la Nasiones Unida ante deveni transfereda a Bamako, la capital de Mali.
Los ia pare confondeda cuando ofisiores ia saluta los con sua codos, ante cuando la du ia es informada sur medias nova de cortesia sosial per aida restrinje la coronavirus.
Mali ia dise ce no rescata ia es paiada. Zero de la multe grupos jihadiste en la rejion ia reclama ce lo ia fa la saisi.
On fa aora un projeta per reenvia la duple a sua propre paises.
En un declara, la ministro de esternas canadian ia dise ce "Canada es multe lejerida" ce la du "es aora libre de catura". El ia grasia la governas de Burcina Faso e Mali, como ance la mision NU en Mali e otra asosiores, per "sua aida e coopera tra la anio pasada sur esta tema".
Blais e Taccheto ia porta vestes de la popla tuareg de la rejion. Lo pare ce los ia para un auto pasante e ia demanda ce la gidor prende los a la stasion la plu prosima de la Nasiones Unida.
Los no ia parla publica sur como los ia libri se. Los ia desapare a 15 desembre 2018 en la site Bobo-Dioulasso, cuando los ia es viajante en Africa ueste, dirijeda a Togo per un projeta umaniste.
Canada ia publici conselas per viajores e Burcina Faso, par causa de terorisme e saisis de persones.
@T Du rohingias ave COVID-19 en un campa de refujadas
@L aora_oji/2020/du_rohingias_ave_covid-19_en_un_campa_de_refujadas
====== Du rohingias ave COVID-19 en un campa de refujadas ======
15 maio 2020
En Bangladex, du rohingias ia es detetada con coronavirus en la campa la plu grande de refujadas en la mundo.
Estas es la casos prima confirmada entre refujadas en Cox Bazar, do sirca milion rohingias es encampada. La persones infetada es aora isolida e reseta trata medical. On ia isoli ance sirca 1900 otra refujadas per esamnia los.
La rohingias en la campas folida de Cox Bazar vive ja su regulas de enclui de 14 marto.
Multe refujadas abita ance en Elas, do ofisiores espera reloca sirca 1600 persones afetable de sua campas a otra paises en cuando la pandemica lejeri.
Du migrores ci ia ateni Lesbos, isola elinica, en esta semana, ia es esaminada per COVID-19 con resultas positiva, e ia es isolida de contata con campas de refujadas sur la isola.
Organizas aidante averti ja tra semanas sur la efeto posible de la maladia a la refujadas rohingia, ci vive en un loca peti e conjestada e con capasia limitada de asede acua limpa.
Dr Shamim Jahan, dirijor de sania en Bangladex per la organiza Salva la Enfantes ia dise: "Aora cuando la virus ia entra a la colonia de refujadas la plu grande de mundo en Cox Bazar, nos regarda la posible multe real ce miles de persones va mori cisa de COVID-19. Esta pandemica va retarda cisa Bangladex par desenios."
Manish Agrawal, dirijor per Bangladex a la Comite Internasional de Salva, ia asentua ce ala entre 40 e 70 mil refujadas abita per cilometre cuadrida. "Esta densia de popla es plu grande par un multiple minima de 1,6 ca lo sur la barcon de turi Diamond Princess, do la rapidia de sperde de la maladia ia es la cuatruple de lo en Wuhan a la apico de la aveni," el ia dise, referente a un barcon en Japan.
La rohingias, de ci sirca milion ia abita en Miama a la comensa de 2017, es un de la multe minorias etnical en la pais e es persegueda tra jeneras.
Sua migra la plu resente a Bangladex ia comensa en agosto 2017 pos cuando militaristes de un grupo rohingia revoluiste ia fa atacas matante contra plu ca tredes stasiones de polisia en Miama.
@T Duta sur la realablia de imunia de comunia
@L aora_oji/2020/duta_sur_la_realablia_de_imunia_de_comunia
====== Duta sur la realablia de imunia de comunia ======
7 julio 2020
Un studia espaniol ia pone duta a la praticalia de imunia de comunia como un modo de combate la pandemica de coronavirus. La esplora de plu ca 60 mil persones estima ce sola sirca 5% de la popla espaniol ia developa anticorpos.
On ateni la imunia de comunia cuando un virus ia infeta un cuantia sufisinte de persones per para sua sperde. Plu ca 70%, cisa 90%, de un popla nesesa es imune per proteje la noninfetadas.
La frecuentia de anticorpos contra COVID-19 es min ca 3% en rejiones costal de Espania, ma plu alta en locas con infetas plu vasta, la reporta dise. "En esta situa, metodos de distantia sosial e laboras per identifia e isoli casos nova e sua contatadas es esensal per la controla futur de la epidemica."
La studia pare es la plu grande de sua tipo sur la coronavirus en Europa. Ance studias simil en Xina e la SUA ia trova ce lo pare ce la plu de persones es ancora nonesposada a la coronavirus, an en rejiones do la virus sirculi vasta.
Espania ia rejistra plu ca un cuatri de milion casos e plu ca 28 mil moris. An tal, min ca des moris ia aveni per dia en la plu de la tre semanas pasada.
Ofisiores en Galisia, en la norde-ueste de la pais, ia repone restrinjes en un rejion con 70 mil persones pos un plu apare de la virus ala, liada a bares local. Bares e restorantes es limitada a 50% de sua capasia normal.
A saturdi, la governa autonom de Catalunia ia repone restrinjes a un rejion con 210 mil abitores, pos un aumenta agu de la cuantia de casos de la infeta. Quim Torra, la presidente catalan, ia dise ce nun va es permeteda a vade a o de Segrià, un distrito a ueste de Barcelona cual inclui la site Lleida.
@T Elas reabri per turisme
@L aora_oji/2020/elas_reabri_per_turisme
====== Elas reabri per turisme ======
30 maio 2020
Pos du semanas, Elas va reabri se a turistes de 29 paises. Persones de multe paises european, incluinte Deutxland, Osteraic, Danmarc e Suomi va pote visita de 15 junio.
Ma alga de la paises la plu grave afetada par la coronavirus, incluinte Espania, Frans, Italia e la Rena Unida, no es en la lista. La ministreria de turisme ia comenta ce cisa plu paises va es ajuntada ante 1 julio.
Sola la airoportos en Atina e Thessaloniki va abri a 15 junio. La entra a la pais va es permeteda a turistes de 16 paises de la Uni European, incluinte Txesco, la paises baltica, Cipros e Malta.
Otra paises permeteda inclui Xina, Japan, Australia, Zeland Nova, Corea Sude, Israel e Lubnan. Alga visitores va es esaminada per deteta la virus cuando los ariva.
Charis Theocharis, ministro de turisme ia anunsia: "Nosa intende es ce nos pote bonveni cada turiste ci ia vinse sua teme e ave la capasia de viaja a nosa pais."
Elas, cual ia move temprana a un situa encluida, ia reporta 175 moris e pico plu ca 2900 casos confirmada. La plu de la isolas elinica ave no casos reportada.
@T Espania va mata cuasi 100 mil visones con la virus
@L aora_oji/2020/espania_va_mata_cuasi_100_mil_visones_con_la_virus
====== Espania va mata cuasi 100 mil visones con la virus ======
17 julio 2020
Cuasi 100 mil visones a un cultiveria en la norde-este de Espania va es matada car la plu de los es confirmada como portante COVID-19.
On ia descovre la situa en la provinse Aragon pos cuando la fem de un empleada ia developa la maladia en maio. Sua sposo e ses otra laborores a la cultiveria ia es ance confirmada con la virus a pos.
La visones, elevada per sua pelos, ia es isolida e prosima monitorida pos la infeta de la laborores. Ma cuando probas a 13 julio ia mostra la infeta en 87% de la visones, autoriosas per sania ia comanda la mata de tota 92 700 de esta animales partal acual.
Compensa finansial va es donada a la compania cual opera la cultiveria, en un vileta a 200 cilometres a este de Madrid.
Como ance Madrid e Catalunia, Aragon es un de la puntos calda de coronavirus en Espania, un pais do on ia rejistra plu ca 250 mil infetas e 28 mil moris en la dura de la pandemica.
Joaquín Olona, la ministro de cultiva per Aragon, ia dise ier ce on ia deside mata la visones "per evita la risca de comunica [la maladia] a umanas". El ia asentua ce lo no es clar esce "la comunica es posible de animales a umanas e reversada".
Un posible, el ia dise, es ce un laboror infetada ia comunica la maladia a la animales sin sabe lo. Un otra teoria, per cual on ave no atesta, es ce la animales ia comunica lo a la laborores.
En otra partes de la mundo, on ia confirma aora plu ca milion casos de coronavirus en Barat e du milion en Brasil. La cuantia en ambos paises ia dupli en min ca un mense. An con un crese de la cuantia de infetas dial, la taso de moris en Brasil es jeneral plata. Ma en Barat, la moris dial crese.
@T Europa esperia moris recordo par coronavirus en un dia
@L aora_oji/2020/europa_esperia_moris_recordo_par_coronavirus_en_un_dia
====== Europa esperia moris recordo par coronavirus en un dia ======
16 marto 2020
Cade de la tre statos cual esperia la plu grave la efetos de la pandemica de coronavirus en Europa ia rejistra sua cuantias la plu alta de moris dial.
En Italia, 368 moris par la maladia ia leva la soma a 1809; Espania ia rejistra 97 plu moris, con soma de 288; e Frans ia reporta 29 moris, per 120 en soma.
Governas tra Europa ia responde par restrinje la moves de sitadanes e tensa sua fronteras.
Deutxland controla sua fronteras con Frans, Suiz, Osteraic, Danmarc e Luxemburg de esta matina, e Portugal va restrinje sua frontera con Espania.
La governa txesce ia introdui restrinjes sever: lo permete ce persones vade a e de sua labora, compra comedas o medisin, e fa visitas urjente de familia, ma tota otra moves libre es forte limitada de la medianote pasada asta 24 marto.
De oji, Osteraic proibi asemblas coletiva de plu ca sinco persones, e Er demanda ce tavernas clui asta 29 marto. Scolas va es cluida en multe paises european.
La Organiza Mundal de Sania ia declara ce Europa es la "episentro" de la pandemica, cual ia orijina en Xina.
Asta aora, on estima ce plu ca 162 mil persones es infetada en la mundo, de ci cuasi esata un dui es en Xina. On estima ce sirca 6000 persones ia mori par coronavirus, e denova sirca un dui de estas ia es en Xina.
De doman, Sudafrica va clui sua fronteras a sitadanes stranjer de paises grave colpada par la maladia.
En la SUA, la Reserva Federal ia redui la taso de interesa a cuasi zero, atentante proteje la economia esuan de la efetos la plu mal de la pandemica.
La governa de Donald Trump ia comanda la esamina de esuanes ci reveni de Europa, e esta causa un caos a la airoportos. La SUA ia rejistra 62 moris relatada con coronavirus entre 3244 infetas.
@T Europa fasa ses menses difisil de pandemica
@L aora_oji/2020/europa_fasa_ses_menses_difisil_de_pandemica
====== Europa fasa ses menses difisil de pandemica ======
20 novembre 2020
La Organiza de Sania Mundal (OSM) ia averti ce la ses menses veninte va es "difisil" per Europa, cual sufri denova su la pandemica de coronavirus. La continente ia rejistra plu ca 29 mil moris nova par COVID-19 en la semana pasada.
An tal, Hans Kluge, dirijor OSM per Europa, ia dise ce la cuantia de casos nova redui car regulas de isoli preveni infetas.
A un confere virtual ier, Ursula von der Leyen, presidente de la Comision European, ia dise ce lo es posible ce on va aproba du vasines ante la fini de esta anio.
La plu paises european ia reintrodui restrinjes sever per impedi la sperde de la maladia cuando un onda du de la pandemica ia aselera en otobre.
Asta aora, longo datos de la OSM, Europa ia esperia 15 738 179 infetas confirmada e 354 154 moris atribuida a la coronavirus. Sola la Americas ia reporta un statistica rejional plu alta.
Multe de esta infetas e moris ia es rejistrada en Deutxland, Espania, Frans, Italia, Rusia e la Rena Unida. En Europa, la Rena Unida ave la cuantia la plu alta de moris (53 870), e Frans ave la plu casos (2 115 717).
Kluge ia dise ce Europa representa 28% de casos global e 26% de la moris. El ia espresa ansia spesial sur la situa en Suiz e Frans, do departes de cura intensa es aora ocupada a plenia de 95%.
"Europa es aora denova la episentro de la pandemica, en junta con la Statos Unida," Kluge ia dise, ajuntante ce la statistica la plu resente mostra ce "un person mori a cada secondo 17".
"On ave lus a la fini de la tunel, ma esta ses menses va es difisil," el ia dise, referente a la developa de vasines cual instrui la sistem imunial a combate la virus. Estas ia leva esperas ce on va pote controla la pandemica.
Xefes de la Uni European ia produi un bujeta de 1,8 milion milion euros per la periodo asta 2028, incluinte un reserva de 750 mil milion euros per recovre de la virus. Ma Ungaria e Polsca ia refusa aproba la bujeta, car la finansia es liada a la obedi de lege en la bloco.
@T Facebook aposta $5,7 bilion a la barati la plu rica
@L aora_oji/2020/facebook_aposta_5_7_bilion_a_la_barati_la_plu_rica
====== Facebook aposta $5,7 bilion a la barati la plu rica ======
22 april 2020
Facebook dise ce lo investi 5,7 mil milion dolares en Reliance Jio, un compania de interede portable barata en Barat, cual es poseseda par Mukesh Ambani, la person la plu rica de acel pais.
Pos la acorda, la jigante de rede sosial ave 9,99% de la asiones, deveninte la asionor minor la plu grande en acel compania, cual es la unia telecomunical de Reliance Industries.
Esta dona a Facebook un posa importante en Barat, do sua servi de parleta WhatsApp ave 400 milion usores e es a punto de inisia un servi de paia. Facebook ia dise ance ce lo intende foca a la colabora entre WhatsApp e JioMart, la projeta de ecomersia de Reliance, per permete ce persones compra produidas de comersias e botecas.
En febrero de esta anio, la autoriosas barati ia permete ce WhatsApp Pay comensa ativi en modo faseda, a du anios pos la comensa de un varia probante de la servi.
Reliance Jio, en un declara separada, ia dise ce la acorda va aida e se e la pais intera. Pos sua inisia en 2016, Jio ia atrae 370 milion suscrivores a sua servi. Con esta crese rapida, la compania ia empresta cuantias grande de mone, e la acorda con Facebook va aida lo a reali sua intende de redui sua deta neta a zero per la fini de marto 2021.
On vide Barat como un mercato major per la crese de Facebook e Whatsapp, sua plataforma de mesaji. La cuantia de usores de interede en la democratia la plu grande de mundo va infla a sirca 850 milion en 2022, longo alga predises.
@T Femes mexican greve contra violentia de jenero
@L aora_oji/2020/femes_mexican_greve_contra_violentia_de_jenero
====== Femes mexican greve contra violentia de jenero ======
10 marto 2020
Miliones de femes en Mexico ia partisipa en un greve de un dia per fa ce on atende la cuantia cresente de violentia fundida en jenero.
En la protesta, nomida "La dia sin nos", femes tra la pais no ia vade a labora o scola ier. En la Site Mexico, no multe femes ia es videda en transporta publica, en distritos major de botecas o en restorantes e cafes.
On estima ce des femes es matada a cada dia en Mexico, e la polisia investiga plu ca 700 casos de femiside.
Multe scolas ia es cluida en resulta de la protesta, e studiantes fema ia boicota sua lesones de universia.
"Esta es como un sosia sin femes ta aspeta," Jorge Luna ia dise, un empleada de 21 anios a un cafe do sola la empleadas mas ia apare per labora.
Alga femes ci ia eleje labora ia porta sintas o vestes purpur per espresa sua unia con la protesta. Alga jornales ia inclui pajes purpur e ia lasa spasios vacua do articles par scrivores fema ia ta apare normal.
La protesta segue un asembla vasta en la Site Mexico a soldi per onora la Dia Internasional de Femes. Sirca 80 mil persones ia vade sur la stradas e on ia ave scaramuxas entre polisiores e protestores.
La asembla ia comensa pasosa, ma la polisia ia dise ce alga grupos ia lansa botelas ardente, e polisiores ia responde con gas lacrimojen. Plu ca 60 persones ia es ferida.
La problem de violentia contra femes en Mexico deveni plu grave e la governa es acusada de nonreata.
On ia critica Presidente López Obrador en febrero cuando el ia sujesta ce la jornales "manipula" la problem. Plu tarda, el ia dise ce sua governa atende la problem.
@T Flamas destrui un campa de migrores sur Lesbos
@L aora_oji/2020/flamas_destrui_un_campa_de_migrores_sur_lesbos
====== Flamas destrui un campa de migrores sur Lesbos ======
9 setembre 2020
Un focon ia destrui la campa la plu grande de migrores en Elas, la compleso suprafolida Moria sur la isola Lesbos.
Sirca 25 pompores con des camiones ia batalia la flamas en cuando on ia evacua la migrores. Alga ia sufri feris par causa de esposa a la fuma.
On reporta ce cisa la focon ia es comensada par migrores ci ia protesta contra la regulas de coronavirus, ma esta no es confirmada.
Cuasi 13 mil persones abita en Moria, plu ca la cuatruple de la cuantia cual lo pote ofisial conteni.
La visgovernor de Lesbos ia dise a la radio local ce la campa ia es "completa destruida". Kyriakos Mitsotakis, ministro xef de Elas, va fa un consenta de crise a esta matina.
La campa ia es isolida en la semana pasada cuando un migror con coronavirus ia es detetada. On ia rejistra aora 35 casos de la maladia ala. La reporta nonconfirmada dise ce la focon ia comensa pos cuando 35 persones ia refusa es isolida con sua familias.
La coordinor per Lesbos de la organiza carital Medicistes Sin Fronteras ia dise ce identifia la causa de la inisia de la focon es difisil, car multe focos peti e protestas aveni en la campa.
"Lo es un bomba-orolojo cual ia esplode final," el ia comenta, ajuntante ce persones es tenida "sin compatia" en la campa ja tra anios.
Un portavose per la governa ia dise ce on investiga reportas de ensende criminal, e ce on va declara un state de crise tra tota la isola. La polisia ia preveni ce migrores fujinte de la focon vade a la vila de porto Mitilene.
@T Focones prosimi a la ruinas de Txornobil
@L aora_oji/2020/focones_prosimi_a_la_ruinas_de_txornobil
====== Focones prosimi a la ruinas de Txornobil ======
14 april 2020
Focones savaje cual arde ja tra alga dias en Ucraina norde es aora a distantia de sola du cilometres de la compleso nucleal ruinada a Txornobil. Un foco ia ateni Pripiat, la vila prosima cual ia servi la compleso en la pasada, aora ance abandonada.
La focon la plu grande ocupa 34 mil ectares, e un otra, a sola un cilometre de la compleso, ave 12 mil ectares de area.
Si la focones destrui Pripiat, persones local dise ce esta va dana grave sua economia, car visitas supravideda per turistes furni un revenu importante. En 2018, plu ca 70 mil persones ia visita, e la cuantia en la anio seguente ia es an plu alta, pos la susede de un drama televisada sur Txornobil.
La polisia dise ce la focon arde ja de la fini de semana de 4 april, cuando un om ia ensende erba seca prosima a la zona de esclui.
Plu ca 300 pompores labora a la loca, usante aparatos spesial, e ses elicotores e aviones atenta estingui la flamas de supra.
A 5 april, Iegor Firsov, la xef tempora de la departe de esamina ecolojial de Ucraina, ia dise ce la nivel de radia en la rejion ia aumenta notable supra la cuantia usual. Ma ofisiores de la governa ia rejeta esta, afirmante ce la radia en la rejion es "entre limitas normal", e Firsov ia retira sua comentas.
La venta sofla aora la fuma de la focones en dirije a Ciiv, la capital.
Txornobil e Pripiat ia es abandonada en 1986, cuando un reatador nucleal a la compleso ia esplode. La desastre ia envia un nube radioativa supra multe de Europa, ma la rejion direta sirca Txornobil mesma ia es la plu grave afetada.
Nun es permeteda a abita plu prosima ca 30 cilometres de la sentro eletrical, cual es aora ensircada par un covrente de aser. Txornobil ia continua jenera eletrica asta la clui de sua reatador final en 2000.
@T Focones sever continua en Australia sude-este
@L aora_oji/2020/focones_sever_continua_en_australia_sude-este
====== Focones sever continua en Australia sude-este ======
7 janero 2020
Cuasi du mil casas ia es destruida en la crise continuante de focones savaje en Australia.
Pos un situa ferose en la semana pasada, aora pompores usa un clima min calda per aumenta sua linias de conteni sirca la focones, cual engoli la sude-este de la pais.
On predise ce la temperatur va alti denova en venerdi, provocante temes ce du focones va junta per formi un "megafoco" nova.
A la min 25 persones e miliones de animales ia mori de pos setembre, en un saison de focones sin presedente en Australia. La problem es malida par temperatures recordo e un secia vasta.
En martedi, ofisiores de Cimri Sude Nova ia dise ce la flamas ala ia devora 1588 casas e ia dana 653 otras. Sirca 200 casas ia es destruida en Victoria, stato visina, en ajunta a la plu ca sento cual ia es perdeda en otra statos.
La Consilio de Asecura de Australia ia estima ce la custa de la dana ia ateni ja A$700m, ma ia comenta ce lo espeta ce esta va grandi multe plu.
En cuando fuma tormenta sites incluinte Canberra, Sydney e aora Melbourne, dotores ia averti sur la peril respiral altida, spesial per persones afetable, incluinte femes ensinta.
Ier, la Departe de Meterolojia ia avisa ce la distantia vidable es min ca un cilometre en multe partes de Melbourne e sua ambiente.
@T Focones trupli en esta anio en la Pantanal
@L aora_oji/2020/focones_trupli_en_esta_anio_en_la_pantanal
====== Focones trupli en esta anio en la Pantanal ======
25 julio 2020
La cuantia de focones savaje en la Pantanal, la pantan tropical la plu grande de mundo, ia trupli en 2020 en compara con la anio pasada, longo INPE, la ajenteria spasial de Brasil.
INPE ia identifia ala 3682 focones de 1 janero a 23 julio. Miles de spesies, incluinte jaguares, formicores e avias migrante, abita en esta rejion de 140 asta 160 mil cilometres cuadrida.
En la Amazona visina, la mense pasada ia es la junio la plu malida par focones en 13 anios.
La Pantanal es locada en Brasil, Paraguai e Bolivia, e es un de la locas la plu biodiversa de mundo. Piranias, caputxines, anacondas verde e miles de spesies de planta vive en esta basin, cual es inondada a cada anio pos pluves deluvial.
Un mapa publicida par INPE mostra la focones cual arde presente en la Pantanal. La informas ia es colieda par usa de satelites cual mesura focones plu grande ca 30 metres de longia e un metre de largia.
La 3682 focones detetada ala asta aora en 2020 es la cuantia la plu alta pos la comensa de arcivos en 1998. En la mesma periodo en 2018, on ia ave sola 277.
Membros de la Oserveria Pantanal, un rede ambientiste, ia descrive la focones como "un peril sosial car, en ajunta a la dana economial e la perde de biodiversia, focones pote causa problemes respiral, irita a oios, e alerjias."
La organiza ia dise ce en du dias, 7000 ectares ia es ardeda en resulta de "ativia criminal" e "fatores climal".
Focones savaje aveni comun en la saison seca en Brasil, ma los es ance ensendeda con intende nonlegal de desforesti tereno per eleva boves. En la Pantanal de Bolivia, la situa ia es complicada par la pandemica de coronavirus, cual limita la cuantia de persones ci pote batalia secur la focones.
La Oserveria Pantanal dise ce lo publici difusas radio e videos per informa abitores local sur la risca de foco.
Plu temprana en esta mense, presidente Jair Bolsonaro ia proibi focos en la Amazona, a norde de la Pantanal, per la cuatro menses seguente. Ambientistes acusa ce Bolsonaro, ci es setica sur la cambia de clima, fali proteje la recursos natural vasta e valuosa de la pais.
@T Fronteras plu laxe va reuni familias en Suiz
@L aora_oji/2020/fronteras_plu_laxe_va_reuni_familias_en_suiz
====== Fronteras plu laxe va reuni familias en Suiz ======
16 maio 2020
La paises visina Suiz, Deutxland e Osteraic comensa lejeri sua restrinjes de frontera a esta fini de semana, ante un reabri plen cual va inclui Frans en la media de junio.
La lejeri sinifia ce amis, familias e amores separada par la cluis de frontera va pote reuni.
La cuatro paises, de cual tota parteni a la zona Schengen de fronteras abrida, ia clui sua fronteras en marto per atenta controla la sperde de coronavirus. On ia preveni viajas par strada, ferovia e avion.
Deses de miles de persones ia es refusada a la fronteras. En Suiz, entra ia es permeteda sola a sitadanes suiz, persones con lisensas de labora, e laborores esensal de sania.
A tre menses pasada, tal restrinjes ia es nonimajinable. La 26 paises Schengen ia es abituada a viajas lisa. La usa de un tren de Berlin a Basel, de Geneve a Paris, o de Wien a Zürich ia es un aveni dial cual cadun ia suvalua.
La restrinjes ia afeta spesial forte la comunias a la fronteras. En la "Triangulo Basel" do Deutxland, Frans e Suiz toca, la comersias local es interdependente. Miles de persones traversa la fronteras a cada dia per labora, per encontra amis o familianes, o per visita botecas.
Alga persones, de ci sua locas de labora ia es ancora abrida, ia pote ancora viaja, ma la plu de abitores en la comunias de frontera, abituada a pasa sua dias en du o an tre paises, ia trova ce los es cluida en un sola, e comun separada de sua familia prosima o sua amores.
A la comensa de maio, cuando la cuantia de casos de la virus ia cade, la governas de la zona Schengen ia comensa discute un reabri. No pais ia vole es la prima, ma ance no pais ia vole manteni la clui de sua frontera si sua visina ta abri la sua.
Per la vilas fronteral Konstanz en Deutxland e Kreuzlingen en Suiz, la lejeri a esta fini de semana es multe importante. Tra la anios, esta sites ia deveni un sola. Stradas corta pote es en Suiz a un fini e en Deutxland a la otra.
Cuando on ia erije un serca e paradores per enforsa la cluis de frontera, esta ia angusa multe persones e ia creve de cores de alga. Visinerias ia es divideda. Duples abitante a la du lados de la frontera ia trova se en separa. Jeneras diversa de la mesma familia no ia pote plu visita lunlotra.
En loca, los ia asembla a la serca per parla e intercambia novas tra la rede de filo. La serca -- cual on ia dupli plu tarda per preveni ce persones besa tra lo -- ia deveni rapida decorada con flores, notas e imajes de cores creveda.
En otra rejiones, duples e amis ia viaja a la partes la plu distante de la frontera, divideda sola par un sinta, per vide lunlotra.
Aora, pos un promove intensa en Berlin e Bern par maiores en esta rejiones, la fronteras va reabri per amores separada e familias divideda. E los ci lua jardinetas a la otra lado de la frontera va pote final cura los denova.
Ma per turistes, comprores e persones mera curiosa, la fronteras resta cluida.
@T Gas nosiva es relasada de un fabriceria en Barat
@L aora_oji/2020/gas_nosiva_es_relasada_de_un_fabriceria_en_barat
====== Gas nosiva es relasada de un fabriceria en Barat ======
7 maio 2020
Oto persones ia mori pos un relasa de gas en la sude de Barat. La relasa, en la site Visakhapatnam en la stato Andhra Pradesh, ia veni de la fabriceria de la compania LG Polymers.
Dotores dise ce sentos de persones es ospitalida. Multe sufri un sensa ardente en sua oios, e difisilia de respira.
La compleso ia es abrida a la ves prima pos 24 marto, cuando Barat ia clui se per limita la efetos de la coronavirus. La relasa ia es cisa causada par nonatende: la prosedes coreta no ia es segueda per reabri la compleso.
En cuando la gas ia sperde, abitores local ia core de sua casas en panica. Alga ia desmaia sur la stradas.
On crede ce alga empleadas ia es en la fabriceria cuando la gas ia es relasada, ma ofisiores dise ce on ave no informa sur los. La fuma ia covre un area con raio de sirca tre cilometres, e persones ia es evacuada de locas prosima.
Atentas inisial per controla la relasa no ia susede, ma aora on reporta ce la situa es manejada. Entretempo, on sujesta ce persones proteje se par covre sua fas con un tela moiada.
Barat ave un istoria triste en relata con relasas cimical. En 1984, un tal asidente en un compleso en la site Bhopal ia mata miles de persones en lo cual on regarda aora como la desastre industrial la plu grave de mundo.
Pos plu ca 35 anios, sua vitimes dise ce enfantes nase ancora con descapasia fisical causada par la efetos de la asidente.
@T Hadjis internasional es proibida en esta anio
@L aora_oji/2020/hadjis_internasional_es_proibida_en_esta_anio
====== Hadjis internasional es proibida en esta anio ======
23 junio 2020
Arabia Saudi ia proibi visitores internasional de fa la hadj, la peregrina muslim, en esta anio, per aida controla la coronavirus. Sola un cuantia multe limitada de persones ci abita ancora en la rena va pote partisipa.
On estima ce du milion persones ia ta visita Maca e Medina en esta estate per la asembla anial. Ma on ia teme ce la hadj va es cisa intera canselada.
En tempo normal, esta peregrina es un de la momentos la plu importante en la calendario relijial muslim. Ma sola sitadanes de paises tra la mundo ci abita ja en Arabia Saudi va es permeteda a es presente en esta anio.
La autoriosas dise ce esta es sua sola modo de pote crea un scema de distanti sosial cual va manteni la securia de la popla.
Arabia Saudi ia rejistra 161 mil casos de la infeta e 1307 moris. Lo ia sutrae sua regulas de enclui nasional sola en la finisemana pasada.
Ce on fa la peregina a minima un ves es un de la sinco colonas de Islam, la sinco obligas cual cada muslim debe reali, si el es en bon sania e pote tolera la custa, per ave un vive bon e seria.
Peregrinores asembla en Maca per sta ante la strutur nomida la Kaaba, lodante Dio en junta. On fa ala ance otra atas de adora, renovinte sua senti de razona per esiste.
@T Inondas grave en Frans e Italia
@L aora_oji/2020/inondas_grave_en_frans_e_italia
====== Inondas grave en Frans e Italia ======
4 otobre 2020
A la min du persones ia mori e 25 manca pos un tempesta potiosa en la sude de Frans e la norde-ueste de Italia. Lo ia trae ventas ferose e pluves deluvial e inondante.
Alga viletas ia es grave danada sirca la site Nice, de cual sua maior ia refere a la inonda la plu mal en memoria vivente. En Italia norde, vias e pontes ia es destruida par inondas, e alga rios ia supraflue.
Un de la vitimes ia es un pompor en la Vale Aosta. La otra ia es un om en sua desenio cuatro de ci sua auto ia es puxada a un rio en la rejion Piemonte.
On reporta ce 17 plu persones manca en la norde-ueste de la pais pos pluve forte en la note. Entre los es un grupo de minima cuatro paseores deutx ci no ia reveni pos un turi de la montania.
En Piemonte, alga viletas ia es isolida cuando la pluve ia fa ce la vias deveni nonusable. Ofisiores ala descrive la situa como "estrema crisin". La tempesta ia afeta ance la rejiones Lombardia e Liguria.
La site Venezia, cual ia prepara se contra acua alta pos tempestas violente en agosto, ia es bon protejeda par la sistem de paradeluvia cual on ia declara resente como plen operante.
En Frans, oto persones manca. Alga viletas en vales presipe a norde de Nice ia es isolida. La maior, pos vola supra los par elicotor, ia dise: "La ruas e sirca sento casas ia es puxada a via o partal destruida."
450 milimetres de pluve ia cade en sola 24 oras sur alga partes -- un cuantia egal a cuasi cuatro menses de la pluve normal per esta saison.
A venerdi, la tempesta ia bate la costa ueste de Frans, rompente la eletrica a deses de miles de casas. En Bres, en la norde-ueste de la pais, on ia rejistra venta de plu ca 180 cilometres per ora.
@T Inondas moia la pedes de la Buda Grande de Leshan
@L aora_oji/2020/inondas_moia_la_pedes_de_la_buda_grande_de_leshan
====== Inondas moia la pedes de la Buda Grande de Leshan ======
19 agosto 2020
En Xina, la ditos de pede de un sculta jigante de Buda es moiada par acua inondante a la ves prima pos la desenio de 1940.
La Buda Grande de Leshan, cual ave 71 metres de altia e es un loca de erita mundal, ia es siselida de un falesa de arenito prosima a Chengdu en la provinse Sichuan en la sentenio oto. Normal, lo sta multe supra la nivel de acua, ma la rejion esperia sua inondas la plu grave de 70 anios.
On ia debe move plu ca 100 mil persones a securia, incluinte 180 turistes visitante la Buda.
Esta sculta es un atrae multe popular, comun incluida en turis longo la rio Yangzi e la Tre Caniones. La ves la plu resente cuando sua pedes ia es inondada ia es en 1949. Lo es la sculta premoderna la plu alta de mundo, e cada de sua orteos es plu grande ca un person.
Un diseda local tradisional declara ce si la pedes de la sculta deveni moiada, ance Chengdu va es inondada. La site ave 16 milion abitores.
Sichuan ia ativi sua responde de crise de la nivel la plu alta. Semanas de pluve forte ia lasa acua de profondia recordo, e on ave no indica ce la pluve es a punto de fini.
On averti sur la risca de inondas en provinses sirca la rios Yangzi, Jala, Hai, Songhua e Liao, e liscateras es posible.
Cuantias enorme de acua cumula pos la parario Tre Caniones, un projeta idroeletrical grande sur la Yangzi. La Ministreria de Recursos de Acua ia avisa ce esta risca produi deluvias en locas plu alta ca la parario, incluinte la site Chongqing, cual ia batalia ja alga inondas en esta estate.
@T Iran ataca bases esuan en Irac
@L aora_oji/2020/iran_ataca_bases_esuan_en_irac
====== Iran ataca bases esuan en Irac ======
8 janero 2020
La custa de petrolio ia alti pos cuando du bases ospitante soldatos esuan en Irac ia es colpada par misiles balistical de Iran. Ance oro e la en japanes ia gania valua. A la mesma tempo, la valua de asiones global ia diminui entre temes sur la tensa cresente en Asia sude-ueste.
La televisa nasional de Iran ia dise ce la ataca ia es per venja la mata de Qasem Soleimani, la comandor militar xef de la pais.
La ataca ia aveni a alga oras pos la funera per Soleimani, matada par un ataca esuan a venerdi. Sua mori ia crea ansia ce la disputa entre la SUA e Iran va grandi plu.
Plu tensa ta pote disturba la pasa de barcones longo la via la plu usada de mundo per petrolio, la Streta Hormuz. Sirca un sinci de la petrolio furnida a la mundo viaja tra esta streta, cual lia la Golfo Persian a la Mar Arabi.
La Streta Hormuz es esensal per la esportores xef de petrolio en la rejion -- Arabia Saudi, Irac, la Amirias Arabi Unida e Cuait -- de ci sua economias es construida sur la produi de petrolio e gas.
Ance Iran depende forte de esta via per sua esportas de petrolio, e Catar, la produor la plu grande de gas natural licuidida en la mundo, envia cuasi tota sua gas tra la streta.
Pos la atacas la plu resente, la departe federal de avioni en la SUA ia proibi airocompanias esuan de vola supra Irac, Iran e paises visina. La proibi inclui la Golfo Uman e la acuas entre Iran e Arabia Saudi. La departe ia dise ce la deside es fada en responde a plu ativia militar e la tensa political cresente en la rejion.
@T Iran ave uranio ricida en cuantia nonpermeteda
@L aora_oji/2020/iran_ave_uranio_ricida_en_cuantia_nonpermeteda
====== Iran ave uranio ricida en cuantia nonpermeteda ======
12 novembre 2020
La Ajenteria Internasional de Enerjia Atomal (AIEA) dise ce Iran ave aora plu ca la desduple de la cuantia de uranio ricida cual es permeteda par un acorda de 2015.
La reserva de uranio pico ricida en Iran ia ateni 2442,9 cilogrames en esta mense.
Iran insiste ce sua program nucleal esiste sola per intendes pasosa.
En sua reporta, distribuida a statos-membros, la AIEA ia dise ance ce la esplica par Iran sur la presentia de materia nucleal a un loca nondeclarada es "no credable". Lo no ia identifia la loca. Un fonte anonim ia dise ce on ave no indica ce la compleso ia es usada per prosede uranio, ma on ia ta pote usa lo per conserva la materia.
La AIEA ia ajunta ce Iran continua rici uranio asta puria de 4,5%, violente la limita de 3,67% acordada en 2015. La organiza gardante analise ancora samples prendeda en setembre de du locas suspetada como complesos nucleal de la pasada, cual ia es abrida a oservores en esta anio.
En 2019, Iran ia comensa publica rompe prometes cual lo ia fa su un acorda internasional suscriveda con Deutxland, Frans, Rusia, Xina, la Rena Unida e la Statos Unida. La violes ia aveni pos cuando Donald Trump ia sorti la SUA de la acorda nucleal e ia reinisia punis economial sever.
Uranio pico ricida, con consentra de la isotopo ²³⁵U entre 3% e 5%, pote es usada per produi carburante per sentros eletrical. Uranio en armas nucleal es ricida asta 85% o plu.
Corta pos la publici de la reporta par la AIEA, Re Salman bin Abdulaziz de Arabia Saudi ia sujesta ce la mundo debe adota "un disposa desidosa" contra la atentas par Iran de developa armas nucleal. Iran nega la alegas ce a cualce tempo lo ia intende crea tal armas.
@T Iran eleje un parlamento probable noncomprometente
@L aora_oji/2020/iran_eleje_un_parlamento_probable_noncomprometente
====== Iran eleje un parlamento probable noncomprometente ======
21 febrero 2020
Iranis vota en un eleje jeneral sur cual on previde ce lo va produi un parlamento plu noncomprometente, fidosa a la xef suprema de la pais.
Esta es la eleje prima pos cuando la SUA ia renovi punis finansial sur la program nucleal de Iran, danante sua economia. Miles de aspirores moderada ia es proibida de campania car los no ia sasia la criterios sever.
Oservores dise ce la autoriosas espera ce multe votores va partisipa per suporta la sistem. Ma criticores de la governa ia recomenda ce sitadanes boicota la vota per mostra sua oposa de lo cual los descrive como un represa vasta de diretos umana e nontolera de disenti.
La campo de persones campaniante es dominada par conservalistes e noncomprometores, e probable la resulta va debili political la presidente Hassan Rouhani, ci es relativa moderada.
Plu ca 7000 persones compete per 290 sejas en la parlamento, cual es un parte de la sistem miscada de governa democrata e teocrata en Iran. En esta sistem, la xef suprema Aiatola Ali Khamenei ave la deside ultima sur la temas la plu importante.
Plu ca 16 mil persones, incluinte 90 membros, xef reformiste, de la parlamento presente, ia es descualida par la Consilio Gardante, un comite fidosa a Khamenei.
Khamenei ia dise ce vota en la eleje parlamental es "un debe relijial" cual ta mostra firmia a fas de atentas par la SUA per isoli la pais e presa lo a cambia se.
Iran oposa ja la SUA e multe de la Ueste pos la revolui en 1979 cual ia dona la potia a un governa autoritar xia. Tensas entre lo e la SUA ia crese pos 2018, cuando Donald Trump ia abandona un acorda multinasional cual ia sutrae punis finansial en intercambia per restrinjes a la program nucleal de Iran.
@T Iran preveni esaminas de locas nucleal suspetada
@L aora_oji/2020/iran_preveni_esaminas_de_locas_nucleal_suspetada
====== Iran preveni esaminas de locas nucleal suspetada ======
6 junio 2020
La Ajenteria Internasional de Enerjia Atomal ia espresa ansia sur un fali continuante par Iran de permete ce la organiza asede locas cual lo vole visita.
La AIEA, asosiada con la Nasiones Unida, promove la usa pasosa de enerjia nucleal e oposa sua usas militar. Tra plu ca cuatro menses, Iran ia bloci sua esaminas de du locas suspetada.
On crede ce la ativia ala ia aveni longa ante un acorda en 2015 cual ia restrinje la aspiras nucleal de Iran. La AIEA dise ce la reserva irani de uranio ricida esede aora la limita acordada.
La trovas, esplicada en du reportas nonpublicida, va es discuteda par la ajenteria a media de esta mense.
Esta aveni en un tempo de tensa cresente entre Iran e la SUA, cual ia retira se de la acorda internasional de 2015. Iran ia dise sempre ce lo ia vole nunca developa armas nucleal, insistente ce sua projetas es pasosa.
@T Israel e la AAU fa un acorda per normali relatas
@L aora_oji/2020/israel_e_la_aau_fa_un_acorda_per_normali_relatas
====== Israel e la AAU fa un acorda per normali relatas ======
14 agosto 2020
Israel e la Amirias Arabi Unida ia fa un acorda per normali sua relatas, e Israel va suspende sua projeta controversa de propri partes de la Riva Ueste ocupada.
En un declara nonespetada, fada par Donald Trump, la presidente de la SUA ci ia aida negosia la reconsilia, la paises ia descrive la acorda como un avansa major en dirije a pas.
Asta aora Israel ia ave no relatas diplomata con paises arabi de la Golfo Persian. Ma un ansia comun sur Iran ia gida a contatas nonofisial entre los.
On reporta ce la xefes filastini ia es surprendeda par la anunsia. Un portavose per Mahmoud Abbas, presidente de Filastin, ia dise ce la acorda es egal a un "tradi", e la ambasador filastini a la AAU ia es retirada.
Trump ia refere a la acorda entre Benjamin Netanyahu, ministro xef de Israel, e Mohammed Al-Nahyan, prinse erital de la amiria Abu Dhabi, como "un momento vera monumental".
Esta es sola la acorda tre de pas israeli-arabi pos la declara de autonomia par Israel en 1948.
A reportores en la Ofisia Oval, Trump ia dise: "Aora cuando la jelo ia rompe, me espeta ce plu paises arabi e muslim va segue la Amirias Arabi Unida." El ia ajunta ce on va fa un rituo de suscrive la acorda a la Casa Blanca en la semanas veninte.
Plu temprana, en responden a la anunsia tuitada par Trump, Netanyahu ia scrive en ivri: "Dia de istoria."
En un parla televisada, Netanyahu ia comenta ce el ia "pospone" la projeta de propri la Riva Ueste, ma ce acel projeta resta "sur la table". Par la propri, alga rejiones de la Riva Ueste ta deveni partes ofisial de Israel.
El ia dise ce Israel va coopera con la AAU per developa un vasin contra la coronavirus, como ance en otra campos incluinte enerjia, acua e la proteje de la ambiente.
Analistes dise ce la acorda pote es videda como un vinse de politica esterna per Trump, ci espera es reelejeda en novembre, e ce lo va dona aida personal a Netanyahu, ci es aora litigada per sobornosia alegada.
La aproba per ambos xefes ia cade par causa de sua respondes a la pandemica. E en Israel, alga persones destriste ci vole propri la Riva Ueste ia espresa sua coleria sur la anunsia.
@T Italia norde isoli 16 milion persones
@L aora_oji/2020/italia_norde_isoli_16_milion_persones
====== Italia norde isoli 16 milion persones ======
8 marto 2020
Italia ia isoli asta 16 milion persones en sua batalia per conteni la sperde de coronavirus.
Cadun ci abita en Lombardia e 14 otra provinses sentral e norde nesesa aora un permete spesial per viaja. Esta inclui la sites major Milano e Venezia.
La ministro xef Giuseppe Conte ia dise ce scolas, jinasios, pisinas e scierias va es cluida, e tota avenis en spasios publica e privata va es suspendeda.
La medias estrema va dura asta 3 april. En la semana pasada, la governa ia anunsia la clui de tota scolas e universias tra la pais per des dias.
Italia ia esperia la cuantia la plu grande de casos de coronavirus en Europa. Sua cuantia de mores esede 230, e ofisiores ia reporta plu ca 50 moris en 24 oras. La cuantia de casos confirmada ia asende par plu ca 1200 a 5883 ier.
Ance ier, en la site Quanzhou en Xina, a la min ses persones ia mori pos la colasa subita de un otel. On ia usa la construida como un loca per isoli persones ci ia es en contata prosima con pasientes de la virus. 28 persones es mancante.
Laborores de salva xerca ancora en la detrito de esta otel de sinco niveles en Fujian, un provinse sude-este. Setedes-un persones ia es en la construida cuando lo ia cade, e deses ia es salvada.
On no sabe la causa de la colasa.
@T Italia permete la desembarca de 180 migrores
@L aora_oji/2020/italia_permete_la_desembarca_de_180_migrores
====== Italia permete la desembarca de 180 migrores ======
6 julio 2020
Italia ia dona permete ce 180 migrores salvada de la Mediteraneo pote desembarca un barcon carital manejada. La deside segue un nonprogresa cual ia dura tra plu ca un semana.
La barcon Ocean Viking, operada par la organiza SOS Méditerranée, ia declara un state de crise a venerdi, indicante sua ansia sur la securia de la migrores e la ecipores.
La migrores va es oji transfereda a un barcon governal en Sisilia, do los va es isolida per des-cuatro dias. Medicistes ia proba ja la persones sur Ocean Viking per COVID-19, e on espeta oji la resultas.
La migrores veni de paises diversa, incluinte Pacistan, Ertra e Nijeria. Los ia fuji de la costa de Libia cuando los ia es salvada en cuatro grupos separada entre 25 e 30 junio.
Los inclui 24 minores, de ci la plu no es acompaniada par adultes, e du femes, de ci un es ensinta.
La barcon ia espeta permete ce la pasajores sorti en o Italia o Malta. Con la pasa de tempo, algas ia deveni desperante per ateni la tera, e otras, noncapas de contata amis e familianes per informa ce los es secur, ia deveni angusada.
Un dotor per SOS Méditerranée ia dise ce el ia nota "un descomforta psicolojial enorme sur la barcon", do la situa ia es "cuasi ultra controla, per pasajores e ecipores". Un membro de la ecipo ia dise ce on ia ave un serie de combates, e menasas de suiside.
Un pasajor de Bangladex, ci ave 27 anios, ia comenta: "Nos es multe felis! Nos ia veni tra un distantia longa, Libia ia es como la enferno, e aora a la min nos pote vide la fini. Me nesesa dise a mea familia ce me vive ancora."
SOS Méditerranée ia scrive en Twitter ce "la retarda nonesesada de esta desembarca ia perili vives".
Plu ca 110 mil migrores ia atenta traversa la Mar Mediteraneo en la anio pasada. Plu ca 1200 mori en la atenta, longo la Organiza Internasional per Migra. On crede ce la clima plu calda en la estate aumenta la cuantia de atentas.
@T Italia xerca un renovor per la solo de la Coloseo
@L aora_oji/2020/italia_xerca_un_renovor_per_la_solo_de_la_coloseo
====== Italia xerca un renovor per la solo de la Coloseo ======
24 desembre 2020
La governa de Italia solisita proposas de injeniores per reconstrui la solo de la Coloseo en Roma e restora lo a sua gloria pasada.
La projeta va ave un bujeta de 18,5 milion euros, e la labora va comensa en la anio veninte. On previde un solo retirable con portes de trapa e asendadores ascondeda.
"La reconstrui es un idea eselente cual va vade sirca la mundo," Dario Franceschini, ministro de cultur, ia declara. "Lo va es un interveni tecnolojial major cual va ofre a visitores la posible no sola de vide la salas suteran, ma ance de valua la belia de la Coloseo cuando on sta en la sentro de la stadion."
La ministreria de cultur ia dise ce la solo redesiniada, como ance cualce portes de trapa o composantes macinal, debe pote es rapida cluable per proteje la spasios su la tera contra la pluve.
Un solo nova va "permete ce la publica comprende plen la usa e funsiona de esta icon de la mundo antica", la declara ia ajunta.
La ministreria ia dise ce cisa on va reali avenis cultural, como consertas e teatros, en la Coloseo pos la instala de la solo.
Construida a 2000 anios ante aora, la Coloseo ia es la amfiteatro la plu grande construida en la Impero Roman, e lo ia ospita combates gladiatoral e otra divertis publica.
Lo resta un de la monumentos la plu famosa de Italia, e sirca 7,6 milion persones ia visita la loca en 2019.
Ofres per reconstrui la solo debe es presentada ante la prima de febrero, e on previde ce la projeta va es completida en 2023.
@T Japan averti ce sua sistem de medica risca colasa
@L aora_oji/2020/japan_averti_ce_sua_sistem_de_medica_risca_colasa
====== Japan averti ce sua sistem de medica risca colasa ======
19 april 2020
Dotores en Japan averti ce la sistem medical de la pais risca colasa su un onda nova de casos de coronavirus.
Par causa de la carga ajuntada par la virus, departes de urjentes no susede trata alga pasientes con disturbas grave de sania. Un ambulansia, portante un pasiente con sintomes de coronavirus, ia es dirijeda a via par 80 ospitales ante cuando on ia pote trata la sufror.
Inisial, Japan ia pare ave la virus controlada, ma ier la pais ia esede 10 000 casos confirmada. Plu ca 200 persones ala ia mori de COVID-19, e la capital Tokyo es ancora la rejion la plu grave afetada.
Grupos de dotores a sua ofisias en la site aida ospitales a esamina pasientes posible de coronavirus, per lejeri alga de la presa a la sistem de medica.
La governa labora ance per aumenta la rapidia de probas par introdui locas capas de proba persones en sua autos. En semanas resente, Japan ia fa multe min probas ca otra paises, e espertas dise ce esta ia difisili trasa la sperde de la maladia.
Probas es ance controlada par sentros local de sania, no a la nivel de governa nasional, e alga de esta sentros no ave la cosas nesesada per proba la popla a grado major.
An tal, a venerdi, la ministro xef Abe Shinzō ia indica ce la governa cambia sua politica de proba e va vasti lo tra la pais.
Sua comentas ia segue corta pos sua anunsia de un state de crise nasional, causada par la mali de cuantia de casos. Esta state permete ce governas rejional urje ce persones resta en casa, ma sin punis o fortia legal. Lo va continua asta la dia ses de maio.
@T Japan developa satelites de lenio
@L aora_oji/2020/japan_developa_satelites_de_lenio
====== Japan developa satelites de lenio ======
29 desembre 2020
La Universia de Kyoto ia combina sua fortes con un compania japanes per developa ante 2023 la satelites prima de lenio.
Sumitomo Forestry dise ce lo comensa rexerca la crese de arbores e la usa de materias de lenio en spasio. La asosia va esperimenta sur tipos diversa de lenio en ambientes estrema sur la Tera.
Detrito spasial deveni un problem plu grande par cada satelite lansada a la atmosfera. Satelites de lenio ta arde sin relasa sustantias nosiva a la aira, e donce sin cade pesos cuando los reveni a la Tera.
Takao Doi, profesor a la universia e astronauta japanes, ia esplica: "Nos es multe consernada par lo ce tota la satelites cual reentra a la atmosfera de la Tera arde e crea particulas pico de osido de aluminio cual va flota en la atmosfera alta tra multe anios. Ultima lo va afeta la ambiente de la Tera."
Como astronauta, el ia visita la Stasion Spasial Internasional en marto 2008. Alora el ia deveni la person prima ci ia lansa un bumerang en spasio, spesial desiniada per usa en microgravita.
"La paso seguente va es developa la model de injenia de la satelite, e pos acel nos va fabrica la model de vola," Doi ia ajunta.
Sumitomo Forestry, un parte de la Grupo Sumitomo fundida a plu ca 400 anios ante aora, ia dise ce lo va labora per developa materias lenial capas de resiste forte cambias de temperatur e la lus de sol. La lenio usada es un secreta.
Espertas ia averti ja sur la menasa cresente ce detrito spasial va cade a la Tera, con ce on lansa plu veculos spasial e satelites. Estas es sempre plu usada per comunica, televide, naviga e predise de clima. Rexercores investiga posibles per redui o sutrae la detrito.
On ave sirca 6000 satelites orbitante nosa planeta, longo la Foro Economial Mundal. Sirca 60% es detrito desusada. On estima ce 990 satelites va es lansada en cada anio de esta desenio, tal ce en 2028 on pote ave 15 mil en orbita.
La compania SpaceX de Elon Musk ia lansa ja plu ca 900 satelites Starlink e projeta envia miles de plu.
Car detrito spasial viaja a 35 mil cilometres per ora, lo pote fa danas major a cualce cosa cual lo colpa. En 2006, un peso pico ia colide con la Stasion Spasial Internasional, estraente un ageta de la fenetra refortida.
@T Japan trova abiterias per miles de persones sin casa
@L aora_oji/2020/japan_trova_abiterias_per_miles_de_persones_sin_casa
====== Japan trova abiterias per miles de persones sin casa ======
13 april 2020
En Japan, la autoriosas atenta rapida trova abiterias tempora per miles de persones sin casa pos la clui de caferias de interede en alga sites major.
La caferias ia deveni un destina comun per persones sin securia de casa. Multe de los es abrida per 24 oras de la dia, e no poca ofre cioscos privata, duxes e divertis, incluinte juas.
Ma on ia comanda ce esta comersias clui sua portes per aida limita la sperde de la coronavirus.
An si la taso ofisial de persones sin casa en Japan es basa en compara con multe otra nasiones developada, plu ca 4000 "refujadas de caferia de interede" abita en la capital, Tokyo.
Ofisiores de la site dise ce los ia comensa furni salas de otel e otra formas de abiteria tempora. En la site visina Saitama, autoriosas ia cambia un salon de sporte a un loca do 200 persones pote abita.
La governa de Tokyo dise ce ofisias de aida sosial pote envia persones sin casa a alga locas reconoseda, como reportada par la Revista Asian Nikkei. Ma Kazuhiro Gokan, un spesialiste per un grupo local de suporta de persones sin casa, ia dise ce multe persones ia es refusada par causa de "un malcomprende par manejores".
En compara con otra paises, Japan ave un cuantia relativa peti de infetas de coronavirus -- 6748 casos confirmada e sola 108 moris relatada, par la statistica de ier. Ma on ave ansia ce cisa un aumenta resente de la cuantia de casos en Tokyo va crese per deveni major.
La ministro xef, Abe Shinzo, ia declara un state de crise per un mense en Tokyo, Osaka e sinco otra prefetias. La governores de esta prefetias ave aora la potia de clui scolas e comersias, ma no autoria legal per comanda ce sitadanes resta a casa.
@T Jazair, Australia e Zeland Nova proibi entra
@L aora_oji/2020/jazair_australia_e_zeland_nova_proibi_entra
====== Jazair, Australia e Zeland Nova proibi entra ======
20 marto 2020
La naveta final de Frans ia ariva ier en la porto de la Site Jazair, portante jazairis ci ia es encaliada en Marseille par restrinjes contra viaja. La 1700 pasajores va es isolida per caso ce los ave la coronavirus.
Plu temprana en esta semana, la governa jazairi ia anunsia un suspende de tota lias de viaja con Europa en atenta preveni la sperde de la virus. Nove persones ia mori de la maladia en la pais, entre 90 casos confirmada en soma.
En un otra parte de la mundo, de oji Australia e Zeland Nova va proibi la entra par tota nonabitores. Esta proibi vasta e nonpresededa no estende a sitadanes, abitores permanente o sua familias.
La xefes de la du paises ia dise ce los ia labora en junta sur la regulas nova. Ambos paises esije ance ce cada person ci ariva -- e lo no importa de do -- isoli se per 14 dias.
Australia ia rejistra plu ca 600 casos de coronavirus e ses moris, con un aumenta subita en la cuantia de infetas en esta semana. 28 casos positiva es reportada en Zeland Nova asta aora.
@T Jirafas rara es matada en Cenia
@L aora_oji/2020/jirafas_rara_es_matada_en_cenia
====== Jirafas rara es matada en Cenia ======
11 marto 2020
Du jirafas blanca e estrema rara ia es matada par xasores nonlegal en la norde-este de Cenia. Gardaforestas ia trova la corpos de la fema e sua enfante en un vileta en Contia Garissa.
Un jirafa blanca tre es ancora vivente. On crede ce el es la sola ci resta en la mundo.
Sua aspeta blanca es causada par un state rara, nomida leucisme, cual fa ce la selulas de pel ave no pigmento. La conose de esta jirafas ia sperde tra la mundo pos cuando on ia fotografi los en 2017.
La manejor de sua conserveria ia dise ce la vide la plu resente de la du jirafas matada ia aveni a plu ca tre menses ante aora.
"Esta es un dia multe triste per la comunia de Ijara e per Cenia intera," el ia dise. "Nos es la sola comunia en la mundo ci garda la jirafa blanca. Sua mata es un colpa contra la pasos eselente fada par la comunia per conserva spesies rara e unica, e un clama per continua suporta laboras de conserva."
On ancora no ia identifia la xasores, e sua motiva es nonclar. La Sosia per Viventes Savaje de Cenia, la organiza xef de conserva en esta pais de Africa este, ia dise ce lo investiga la matas.
La conserveria es en un rejion vasta sin sercas. Lo conteni ance viletas.
Jirafas blanca ia es prima oservada en Cenia en marto 2016, a sirca du menses pos un vide en Tanzania, pais visina. Sirca 40% de la popla de jirafas ia desapare en la 30 anios pasada, e la xasa legal per sua carne e pel continua, diseda par la Funda per Viventes Savaje de Africa.
@T Jovenes mori en un mineria colasada en RD Congo
@L aora_oji/2020/jovenes_mori_en_un_mineria_colasada_en_rd_congo
====== Jovenes mori en un mineria colasada en RD Congo ======
13 setembre 2020
Laborores de salva xerca en la detrito pos la colasa de un mineria de oro en la Republica Democrata de Congo. La mineria, prosima a la vila Kamituga en la este de la pais, ia colasa a venerdi su pluve forte.
On teme ce sirca 50 persones ia mori. La plu ia es jovenes, e ofisiores local ia demanda per du dias de lamenta.
En esta pais, asidentes aveni comun en la industria de mina, cual ave normas basa de securia.
Videos mostra sentos de persones ci atenta move detrito a via de la entra de la mineria, usante palas o sua manos.
Theo Kasi, governor de la provinse Kivu Sude, ia dise ce el es tristida par "la moris trajedial de 50 persones, de ci la plu ia es joven". Ma la maior de Kamituga, Alexandre Bundya, ia comenta ce "nos es ancora no serta sur la cuantia de esata" de persones matada.
Un atestor ia dise ce la pluve estrema ia causa ce "acua entra a la tre tuneles. Cuando persones ia atenta sorti, lo ia es nonposible car la acua ia flue forte".
La ofisia de la governor ia ajunta ce on va "reali metodos per preveni ce tal avenis repete".
La Republica Democrata de Congo ave reservas rica de minerales como cobalto, diamantes, cupre e oro, ma sua popla resta entre la plu povres de mundo pos anios de gera e malmaneja.
@T Khamenei gida preas a la ves prima en oto anios
@L aora_oji/2020/khamenei_gida_preas_a_la_ves_prima_en_oto_anios
====== Khamenei gida preas a la ves prima en oto anios ======
17 janero 2020
La xef suprema de Iran, Aiatola Ali Khamenei, va gida la preas de venerdi en la capital Tehran, a sua ves prima pos 2012.
Esta segue protestas coler sur la tira a tera de un avion ucrainsce de pasajores par la militar irani en la semana pasada. La xefes de Iran es ance presada sur un basi subita de la economia, causada par punis finansial aplicada par la SUA.
A mercurdi, presidente Hassan Rouhani ia apela per unia nasional. Ma en un indica rara de frica interna en la governa irani, el ia esije ance ce la militar ofre un esplica completa de sua xuta a la avion.
La Boeing 738-800 de la compania Ukraine International Airlines ia es en viaja de Tehran a Ciiv a 8 janero cuando lo ia cade corta pos enaira. Tota 176 pasajores, incluinte deses de iranis e canadianes, ia mori.
Inisial, la autoriosas irani ia nega la culpablia, ma cuando la presa internasional ia crese, la Gardores de la Revolui ia confesa ce la avion ia es malpersepida como un misil cruser en un situa de tensa aumentada con la SUA.
A poca oras ante la cade de la avion, misiles irani ia ataca du bases conteninte soldatos esuan en Irac. Acel mesma ia es un responde a un ataca airal par la SUA contra Baghdad, cual ia mata la jeneral irani Qasem Soleimani.
Oji, la SUA ia dise ce des-un de sua soldatos ia es tratada en relata con contusas serebral pos la ataca. Orijinal, la pais ia indica ce zero de sua soldatos ia es ferida.
@T Kobe Bryant mori en un cade de elicotor
@L aora_oji/2020/kobe_bryant_mori_en_un_cade_de_elicotor
====== Kobe Bryant mori en un cade de elicotor ======
27 janero 2020
Kobe Bryant, bascetbalor famosa esuan, e sua fia Gianna es entre nove persones matada par un cade de elicotor en la site Calabasas en California.
Bryant, ci ia ave 41 anios, e Gianna, 13, ia viaja en un elicotor privata cuando lo ia cade a tera e ia esplode en flamas. La xerif de Contia Los Angeles ia dise ce nun ia survive.
Bryant, un campion BNA de sinco veses, ia jua per la ecipo Los Angeles Lakers tra sua carera, e on regarda el como un de la juores la plu eselente en la istoria de bascetbal.
Comentas lodante par stelas de sporte e otra persones famosa ia espresa xoca a sua mori subita. On ia oserva momentos de silentia a juas de bascetbal tra la pais.
Xerif Alex Villanueva ia dise ce la documentos de la elicotor indica ce lo ia porta nove persones cuando lo ia cade, levante la cuantia de sinco en declaras ofisial plu temprana.
Bryant ia jua sua carera intera de 20 anios con la mesma ecipo, jubilante en april 2016.
Famosa, en 2006, el ia fa 81 puntos contra Toronto Raptors, la cuantia du entre la plu altas per un sola max en la istoria de NBA (la Asosia Nasional de Bascetbal).
Sua otra atenis inclui gania la premio NBA per Juor la Plu Valuada en 2008 e a du veses per Juor la Plu Valuada de Final. El ia es ance la campion NBA de puntos a du veses, e a du veses un campion olimpial.
El ia gania ance un premio Oscar per la filma animada corta la plu bon en 2018, con Dear Basketball ("Cara Basketbol"), un presenta de sinco minutos fundida sur un letera de ama a la sporte cual el ia scrive a tre anios plu temprana.
@T La AAU lansa sua mision prima a Marte
@L aora_oji/2020/la_aau_lansa_sua_mision_prima_a_marte
====== La AAU lansa sua mision prima a Marte ======
20 julio 2020
La mision prima a Marte par la Amirias Arabi Unida es en via, pos un enaira susedosa en Japan.
La sonda Espera ia es lansada sur un roceto de la porto spasial a Tanegashima, e aora lo fa un viaja de 500 milion cilometres per studia la clima de la planeta roja. Du atentas presedente per lansa la sonda en la semana pasada ia es canselada par causa de mal clima sur la Tera.
Espera va ariva en febrero 2021, coaveninte con la aniversario 50 de la formi de la AAU.
Sarah Amiri, la siensiste xef de la projeta, ia parla sur sua stimula e lejeri en vide la asende de la roceto tra la sielo. El ia dise ce la efeto a sua pais va es la mesma como lo en la Statos Unida de America cuando la popla ala ia regarda la ariva de persones sur la Luna a 51 anios ante aora, ance a 20 julio.
La sonda de la AAU es un de tre misiones cual vade a Marte en esta mense. La SUA e Xina fa la preparas final a sua vagadores de surfas. La mision esuan, nomida Persiste, ia envia sua lodas a la projeta amirati. "Me es zelosa per acompania tu en la viaja!" lo ia tuita.
La AAU ave esperia limitada de desinia e fabrica veculos spasial, ma lo atenta un cosa cual sola la SUA, Rusia, Europa e Barat ia susede.
Sua injeniores, gidada par espertas esuan, ia produi un sonda sofisticada en sola ses anios. E cuando esta satelite ariva a Marte, on previde ce lo va furni informas siensal nova, revelante comprendes fresca sur la funsiona de la atmosfera de acel planeta, e spesial como Marte ia perde tan multe de sua aira e acua.
On regarda Espera como inspirante -- un projeta cual va atrae plu persones joven en la Amirias e tra la rejion arabi a aprende la siensas en scola e universia.
@T La aniversario 75 de la Dia de Vinse contra Japan
@L aora_oji/2020/la_aniversario_75_de_la_dia_de_vinse_contra_japan
====== La aniversario 75 de la Dia de Vinse contra Japan ======
15 agosto 2020
La ministro xef de Japan ia promete "repete nunca la trajedia de gera" a la aniversario 75 de la sede de sua pais a la fini de la Gera Mundal Du. "Nos va continua resta dedicada a esta promete determinada," Shinzō Abe ia dise ier.
El ia onora la data par envia un ofre a un monumento controversa de gera en Tocio, sin es personal presente. Ma cuatro ministros ia visita la santeria Yasukuni, en un move cual va coleri probable Xina e Corea Sude.
Esta es la ves prima en cuatro anios cuando politicistes tan importante ia visita la santeria, cual onora no sola la mores de gera de la pais, ma ance alga figures major ci ia es condenada de crimines de gera.
"Me ia fa respeta a la spiritos de los ci ia sacrifia nobil se en la gera," la ministro de educa ia esplica.
Mon Jae-in, presidente de Corea Sude, no ia refere a la visitas en sua comentas oji. En loca, el ia usa la aniversario, conoseda en sua pais como la Dia de Libri, per dise ce sua governa es preparada per consenta con fas a fas a cualce tempo per discute disputas istorial.
Seoul e Tocio es divideda a tema de esijes de compensa per coreanes obligada a labora su la ocupa japanes, cual ia comensa en 1910 e ia fini en 1945.
Japan ia entra la Gera Mundal Du en setembre 1940, e ia tira la SUA a la gera a la fini de 1941 pos ataca sua base marinal a Pearl Harbor en Hawaii.
La Dia de Vinse en Europa ia aveni a 8 maio 1945 pos la sede de Deutxland, ma la gera ia continua tra alga menses en la ueste de la Mar Pasifica. A 26 julio 1945, la Aliadas ia comanda Japan a sede, ma Japan no ia obedi. La SUA ia cade bombas nucleal supra la sites Hiroshima e Nagasaki a 6 e 9 agosto.
Imperor Hirohito ia es oiada en la radio a la ves prima en 15 agosto, anunsiante la fini de la combate. La sede ofisial de la pais ia es suscriveda a 2 setembre de acel mesma anio.
@T La aniversario 75 de la Dia de Vinse en Europa
@L aora_oji/2020/la_aniversario_75_de_la_dia_de_vinse_en_europa
====== La aniversario 75 de la Dia de Vinse en Europa ======
8 maio 2020
Xefes de stato european onora oji la aniversario 75 de la Dia de Vinse en Europa, an cuando multe de la continente resta encluida par la maladia de coronavirus.
A 8 maio 1945, Britan e sua Aliadas ia aseta formal la sede nonrestrinjeda par Deutxland Nazi pos la cuasi ses anios de la Gera Mundal Du.
Un silentia de du minutos va aveni en Britan, segueda par un parla par Rea Elizabeth. Otra avenis va es ance fada, ma asemblas grande publica es ancora proibida.
Per onora la data, Presidente Emmanuel Macron de Frans va pone un garlanda a la tomba de la soldato nonconoseda en Paris, en un rituo cluida a tota persones estra un grupo peti de ofisiores.
Canselor Angela Merkel de Deutxland va gida ance un rituo a un monumento de gera. En Berlin, abitores ia reseta un dia de vacanse nonpresededa, ma esta no pertine a la resta de la pais.
On fa un selebra simil, conoseda como la Dia de Vinse, a 9 maio en alga paises soviet pasada, incluinte Rusia, Ucraina e Bielarus.
Vladimir Putin, presidente de Rusia, ia intende fa un parade major en Moscva a saturdi, con la presentia de Macron e Presidente Xi Jinping de Xina. Ma esta aveni, esibinte plu ca 15 mil soldatos, es aora posponeda par la pandemica.
En loca, un parade militar va vola supra la capital, e Putin va pone flores a un monumento de gera prosima a la Plaza Roja en Moscva.
@T La asembla de un projeta grande de fusa nucleal
@L aora_oji/2020/la_asembla_de_un_projeta_grande_de_fusa_nucleal
====== La asembla de un projeta grande de fusa nucleal ======
29 julio 2020
La projeta de fusa nucleal la plu grande de mundo ia entra a sua fase de asembla, cual va dura tra sinco anios. Pos esta, la compleso va pote comensa jenera la plasma supracalda cual es nesesada per enerjia de fusa.
Esta compleso de 20 mil milion euros es construida en Saint-Paul-lez-Durance, en Frans sude. Sua promovores dise ce fusa pote es un fonte de enerjia noncontaminante e nonlimitada cual ta aida contra la crise de clima.
Nomida ITER, la projeta es un colabora entre Xina, la Uni European, Barat, Japan, Corea Sude, Rusia e la SUA. Tota membros divide la custa de construi.
Sistemes presente per enerjia nucleal depende de fision, un prosede en cual on fende un elemento cimical pesosa per produi plu lejeras.
Contrastada, fusa nucleal funsiona par combina du elementos lejera per crea un plu pesosa. Esta relasa un cuantia enorme de enerjia ma poca radioativia. ITER va enclui la plasma calda en un strutur nomida un tocamac per controla la reatas de fusa.
La projeta intende aida mostra esce fusa pote es comersial viable. Emmanuel Macron, presidente de Frans, ia dise ce la labora va uni paises sirca un bon comun.
Lo es posible ce on va jenera la plasma prima en la macina, per inisia sua opera, corta pos la fini de la fase de asembla en 2025.
@T La Caribe es velida su un nube vasta de polvo
@L aora_oji/2020/la_caribe_es_velida_su_un_nube_vasta_de_polvo
====== La Caribe es velida su un nube vasta de polvo ======
27 junio 2020
Un nube jigante de polvo saharan ia oscuri la sielo supra partes de la Caribe. La polvo ia veni de Africa, traversante la Mar Atlantica.
A soldi pasada, lo ia ateni Porto Rica, e lo ia covre Cuba e partes de Mexico a pos.
La isolas caribe Guadelupe e Martinic sufri sua nebleta la plu estrema en un desenio a la min. Ofisiores medical en Cuba averti ce cisa lo va mali disturbas respiral.
La polvo afeta ance partes de Florida sude, incluinte la site Miami.
Tempestas de polvo o arena no es rara en la desertos de la mundo. Ventas pote puxa asta 2000 milion tones de polvo per anio a nosa atmosfera, do lo deveni transportada tra distantias grande.
La polvo e arena furni un fonte nurinte per ecosistemes maral, ma pote afeta ance la clima e la sania de umanas.
Lo es comun ce polvo move de la Sahara a la Mar Atlantica: on nomi esta la Strato de Aira Saharan. Plu tarda en la saison de siclones, lo pote inibi la crese de tempestas tropical cual developa sirca Capo Verde e la media de la Atlantica.
Ma en la semanas pasada, un area nonusual grande de polvo ia traversa direta la Atlantica per afeta America Sentral e Norde. Esta va persiste tra la finisemana. Entretempo, imajes de satelite mostra un plu area simil cual segue la via de la prima.
On previde un mal cualia de aira e un noncapasia de vide distante en partes de la Caribe e America Sentral en la semana veninte.
@T La caso de la omiside de la sposa de la xef de Lesoto
@L aora_oji/2020/la_caso_de_la_omiside_de_la_sposa_de_la_xef_de_lesoto
====== La caso de la omiside de la sposa de la xef de Lesoto ======
25 febrero 2020
Avocatos per la ministro xef de Lesoto ia informa un corte ce el no pote es acusada sur la omiside de sua sposa alienada, car el es imune de litiga par causa de sua posto.
Lipolelo Thabane ia es matada par pistol en 2017, cuando el ia es la sposa de Thomas Thabane.
Aora la caso ia vade a la Corte Alta. La sposa presente de la ministro xef es ja acusada sur la omiside. Thabane ta es la xef prima african ci on ta acusa sur omiside familial cuando el ocupa ancora sua posto.
La caso ia xoca multe persones en esta rena peti sin costa, cual es intera ensircada par Sudafrica.
A la escuta ier, Qhalehang Letsika, avocato defendente ia dise: "Mea cliente no pote es litigada en posto, ma el no es superior de la lege."
La judor ia envia la caso a la Corte Alta, cual va es en sesion como la Corte Constitual cuando lo escuta la caso, con un panel de tre judores, cisa plu.
Thabane, ci ave 80 anios, no ia apare en corte en la semana pasada car el ia es en Sudafrica per tratas medical. El ia rejeta reportas ce el ia fuji de la pais. En janero, ance sua sposa Maesaiah Thabane ia vade a Sudafrica cuando la polisia ia comanda sua aresta.
La ministro xef ia dise ce el va resinia en julio, resistente presa de sua propre partito per parti instante de la posto.
Lipolelo Thabane ia es atacada de prosima, a lado de un rua nonpaveda en revade a sua casa en un vileta no distante de la capital, Maseru. El ia es envolveda en prosedes amarga de divorsa con sua sposa cuando el ia es matada.
A acel tempo, la ministro xef ia abita con Maesaiah, ci ave aora 42 anios, como si el ta es sua sposa. Ma Lipolelo ia vinse ja en un otra batalia legal per es reconoseda como Dama Prima en loca de Maesaiah.
Thabane ia es acompaniada par Maesaiah a sua inaugura, pos la omiside. A du menses plu tarda, los ia sposi en un rituo catolica.
Maesaiah ia es acusada sur la omiside de sua competor a 5 febrero e ia es librida con garantia per sirca $67.
On ia acusa el ance sur la omiside atentada de Thato Sibolla, un ami de familia, ci ia es con Lipolelo a la tempo de la xuta e sur ci on previde ce el va es un atestor major en la caso. Maesaiah ancora no ia declara se como culpable o nonculpable.
@T La caso prima de coronavirus en Corea Norde
@L aora_oji/2020/la_caso_prima_de_coronavirus_en_corea_norde
====== La caso prima de coronavirus en Corea Norde ======
26 julio 2020
Corea Norde ia reporta lo cual lo descrive como la caso prima suspetada de coronavirus en la pais.
La ajenteria governal de novas ia dise ce un person, ci ia fuji a Corea Sude a tre anios ante aora, ia reveni con sintomes de COVID-19.
La xef Kim Jong-un ia fa un consenta de crise con sua ofisiores major, ponente regulas de enclui a Kaesong, un site a la frontera.
Esta pais secretosa ia dise a ante ce lo ia ave no casos de la maladia, ma analistes opina ce esta es multe nonprobable.
KCNA ia reporta tal: "Un situa de crise ia aveni en site Kaesong do un fujor ci ia vade a la sude a tre anios pasada, un person suspetada de es infetada con la virus cruel, ia reveni a 19 julio pos traversa nonlegal la linia de limita."
Lo ia ajunta ce Kim ia inisia ance un investiga de como la person ia susede traversa la frontera multe fortida, e ia averti ce "un puni sever" va es donada a la persones aidante.
Corea Sude ia reporta no traversas nonlegal de la frontera desmilitarida en dias resente.
Corea Norde ia clui sua fronteras e ia pone miles de persones en isoli a ses menses ante aora, cuando la virus ia sperde tra la mundo.
Plu temprana en esta mense, Kim ia loda la "susede briliante" de sua pais en maneja la maladia. A la consenta de la politburo ier, el ia comanda un "sistem de crise masima" per conteni lo.
@T La caso prima de COVID-19 en Frans ia es en desembre
@L aora_oji/2020/la_caso_prima_de_covid-19_en_frans_ia_es_en_desembre
====== La caso prima de COVID-19 en Frans ia es en desembre ======
5 maio 2020
Un pasiente diagnoseda con pneumonia a 27 desembre en Frans ia ave vera la coronavirus, longo sua dotor. Dr Yves Cohen ia informa jornalistes franses ce on ia proba resente un sample prendeda a acel tempo e ia deteta COVID-19.
La pasiente ia recovre completa. El ia dise ce el ave no idea do el ia reseta la virus, car el ia vade a no partes de la mundo alora infetada. Esta sinifia ce la virus ia ariva en Frans a cuasi un mense plu temprana ca on ia crede a ante.
Cohen, xef de medica de crise a la ospitales Avicenne e Jean-Verdier prosima a Paris, ia dise ce la pasiente ia es un om de 43 anios de Bobigny, a norde-este de Paris. El ia mostra lo cual ia deveni conoseda a pos como la sintomes major de la coronavirus: un tose seca, un febre, e respira difisil.
On ia ospitali el a 27 desembre, a cuatro dias ante cuando la ofisia xines de la Organiza Mundal de Sania ia es informada sur casos de pneumonia de causa nonconoseda en la site Wuhan en Xina.
Du de sua enfantes ia deveni malada, ma sua sposa ia mostra no sintomes. Ma Cohen ia indica ce la sposa labora a un supramercato prosima a la airoporto e ia pote veni en contata con persones resente arivante de Xina.
Asta aora, la tre casos prima de la coronavirus en Frans ia es confirmada a 24 janero. De estas, du ia visita Wuhan, do on ia deteta prima la maladia, e la caso tre ia es un membro de familia prosima.
La descovre nova sujesta ce la virus ia es presente en Frans a tempo multe plu temprana, e esta va cambia la comprende de la sperde. On ia crede ce la comunica prima de umana a umana en Europa ia es cuando un om deutx ia es infetada par un colaboror xines ci ia visita Deutxland entre 19 e 22 janero.
Ance la Statos Unida ia debe resente revisa sua istoria de coronavirus. Un autopsia en California ia revela ce la mori prima con relata a esta maladia en la SUA ia aveni a cuasi un mense plu temprana ca suposada.
@T La comite de la Academia César resinia coletiva
@L aora_oji/2020/la_comite_de_la_academia_cesar_resinia_coletiva
====== La comite de la Academia César resinia coletiva ======
14 febrero 2020
La comite intera de la Academia César, cual distribui la corespondentes de la premios Oscar en Frans, ia resinia su un onda de critica de sua nomina de un filma dirijeda par Roman Polanski per 12 premios.
La deside de onora la filma Me acusa, ance nomida Un ofisior e un spior, ia coleri organizas femiste e ia provoca recomendas de boicota. En la SUA, de la desenio de 1970, la dirijor polsce-franses es acusada de viole sesal un xica de 13 anios, e ia fasa otra acusas de viole sesal.
Ance sentos de atores, produores e dirijores ia urje reformis. En un letera publica en esta semana, los ia denunsia la "malfunsiona" a la Academia César e la opacia de sua maneja.
En un declara a la sera de ier, la academia ia dise ce sua comite ia "deside unida resinia" per "onora acel omes e femes ci ia reali filmas en 2019, per trova calmia e serti ce la festa de filma resta esata esta, un festa". Lo ia ajunta ce "esta deside coletiva va permete un renovi completa de la comite."
On va fa un asembla jeneral pos la premia en esta mense, per eleje un comite nova ci va esplora modos de reformi e moderni la instituida.
Franck Riester, ministro franses de cultur, ia dise ce la Academia César debe opera democrata, con spirito de "abridia, transparentia, egalia e diversia".
@T La coronavirus clui la monte la plu alta de mundo
@L aora_oji/2020/la_coronavirus_clui_la_monte_la_plu_alta_de_mundo
====== La coronavirus clui la monte la plu alta de mundo ======
13 marto 2020
Monte Everest es aora cluida per la resta de la saison de trepa, par causa de la situa de coronavirus.
La governa de Nepal ia anunsia ce lo va cansela tota permetes de asende, de doman asta 30 april. Xina ia cansela ja tota trepas de la lado norde de la monte.
Nepal ia consela ance ce stranjeres ci no pote evita veni a la pais de 14 marto resta isolida per 14 dias.
La plu de trepores de Everest veni de la SUA, India, Xina, Japan e Corea Sude, e es un fonte major de revenu per la governa nepali. Diseda par la jornal Kathmandu Post, la pais gania un soma egal a 4 milion dolares esuan par dona permetes de asende la monte en cada anio.
Tipal, cualcun ci desira asende Everest debe paia des-un dolares a la governa, e la governa ia discute leva la custa. Esta no inclui paias grande a companias de viaja.
Xerpas local ci labora como gidores montanial va es ance afetada.
A presente, on ave sola un caso confirmada de la virus en Nepal, ma la pais borda India, cual ave plu ca 70 casos. La governa nepali ia demanda ce sua sitadanes evita grupi coletiva, incluinte per sposis e asemblas publica.
Plu ca 125 mil persones es diagnoseda con COVID-19 en 118 paises, longo la Organiza Mundal de Sania, e la cuantia de persones ci ia mori de la maladia es plu ca 4600.
@T La coronavirus sperde de Italia en Europa
@L aora_oji/2020/la_coronavirus_sperde_de_italia_en_europa
====== La coronavirus sperde de Italia en Europa ======
26 febrero 2020
Alga paises european ia anunsia sua casos prima de la coronavirus COVID-19, e tota pare liada a la eruta cresente en Italia. Osteraic, Corvatsca e Suiz, como ance Jazair en Africa, ave casos en persones ci ia visita resente Italia.
On ia rejistra ance la proba positiva prima per la virus en America latina, en un person brasilera ci ia reveni de Italia.
En dias resente, Italia ia deveni la pais la plu afetada en Europa, con plu ca 300 casos e 11 moris. Ma sua visinas ia deside ce clui sua fronteras ta es un reata "nonproportial".
Ier, a un consenta de ministros de sania de Frans, Deutxland, Italia e la Comision de la Uni European, on ia promete manteni fronteras abrida. "Nos parla de un virus cual no respeta fronteras," la ministro italian de sania ia dise.
Italia es un de tre "puntos calda" estra Xina. En Iran, ofisial, min ca 100 persones ia es infetada, ma on suposa ce la cuantia vera es multe plu alta. La infeta de la visministro irani de sania ia aumenta la teme ce la virus ia sperde ja vasta.
Plu ca 1100 persones ia es infetada en Corea Sude, do 11 persones ia mori. La pais ave la plu infetas estra Xina. La militar de la SUA ia confirma ce un de sua soldatos stasionida en Corea Sude ia es positiva probada per la virus. La soldato, ci ave 23 anios, isoli aora se.
Multe de la casos en Corea Sude es liada a un ramo de la Eglesa Shincheonji de Jesus en la site Daegu. Tota de la plu ca 215 000 membros de la eglesa es aora esaminada par autoriosas de sania.
En Brasil, on ia reporta ier ce un proba inisial a un om de 61 anios ci ia visita resente Italia norde ia dona un resulta positiva. La om de São Paulo va es denova esaminada per confirma final. El ia reariva en Brasil a la culmina de la carnavales, cuando miliones de persones viaja tra la pais.
La plu de la casos de COVID-19 es ancora en Xina, do la coronavirus ia orijina en la anio pasada. Longo la statistica la plu resente, publicida oji, 78 064 persones ia es infetada de pos la comensa de la eruta.
Ofisiores de sania ia reporta ance 52 plu moris ier, la soma dial la plu basa de plu ca tre semanas. La cuantia intera de mores en Xina continental es aora 2715. La cuantia de infetas nova declina ala, e on turna sua atende a casos en otra paises e a la pasa de la virus entre los.
@T La coronavirus va vade cisa nunca a via
@L aora_oji/2020/la_coronavirus_va_vade_cisa_nunca_a_via
====== La coronavirus va vade cisa nunca a via ======
14 maio 2020
La Organiza Mundal de Sania (OMS) ia averti ce la coronavirus "va vade cisa nunca a via".
Parlante ier, sua dirijor de crises, Dr Mike Ryan, ia averti contra atentas de predise cuando la virus va desapare. El ia ajunta ce, an si on va trova un vasin, la controla de la virus va nesesa "un labora enorme".
Cuasi 300 mil persones en la mundo ia mori con coronavirus e plu ca 4,3 milion casos es rejistrada.
Entretempo, la Nasiones Unida ia averti ce la pandemica crea multe angusa e maladia mental, spesial en paises cual no ia investi a medica mental. La NU ia recomenda ce governas considera la sania mental en sua responde jeneral.
A un confere jornaliste virtual, Ryan ia dise de Geneva: "Lo es importante ce on reconose esta: esta virus va deveni cisa un plu virus endemica en nosa comunias, e esta virus va vade cisa nunca a via. VIU no ia vade a via -- ma nos ia aprende aseta lo."
On developa presente plu ca sento vasines posible, ma Ryan ia nota ce on ave otra maladias, como morbilio, cual es ancora no eliminada an si vasines esiste contra los.
Dr Tedros Adhanom Ghebreyesus, la dirijor-jeneral de la OMS, ia asentua ce la controla de la virus es ancora posible, si on labora. El ia dise: "La curso es en nosa manos, e lo es la conserna de cadun, e tota de nos debe contribui per para esta pandemica."
Epidemiolojiste Maria van Kerkhove de la OMS ia informa la confere: "Nos nesesa prende la disposa ce la emerji pos esta pandemica va ocupa alga tempo."
Sua comentas sombre ia es fada a un tempo cuando alga paises comensa gradal lejeri sua regulas de enclui, e xefes considera la problem de como e cuando los va reabri sua economias.
Tedros ia averti ce on ave no modo garantiada de lejeri la restrinjes sin provoca un onda du de infetas: "Nosa recomenda es ancora ce la avisa en cualce pais debe es de grado la plu alta como posible."
Ryan ia ajunta: "On vide alga persones ci pensa majiosa ce encluis susede perfeta, e ce desclavi la encluis va vade eselente. Ambos es plen de periles."
@T La creor de la mapa de metro de York Nova mori
@L aora_oji/2020/la_creor_de_la_mapa_de_metro_de_york_nova_mori
====== La creor de la mapa de metro de York Nova mori ======
27 febrero 2020
Michael Hertz, la om ci ia desinia la mapa de la metro de la Site York Nova, ia mori a 87 anios.
En la desenio de 1970, sua compania ia es empleada par ofisiores de transporta urban per redesinia la mapa vea. Alora, crimin ia es cresente e min persones ia es usante la metro ca a cualce tempo pos la tarda de la desenio de 1910.
Sua ecipo ia ajunta stradas, reformi parces, contorse distritos e dona curvas a la linias serpente de ferovia.
Nativa de la distrito Brooklyn de la site, Hertz ia aida ja crea mapas de transporta per Houston e Washington ante emprende la projeta per la Autoria de Transporta Urban de York Nova.
Per atenta sutrae alga de la linias reta cual no ia plase a la popla, Hertz ia emplea un desinior japanes ci ia viaja longo cada linia de metro con oios cluida, afin el ta imaji plu bon la curvas de la ferovias.
La mapa cual Hertz ia produi en 1979 ia es ajustada par sua compania de ves a ves, ma la desinia fundal resta.
En 2004, el ia dise a la jornal New York Times ce el es sempre grasiosa cuando el vide turistes ci usa la mapa a la ves prima: "Me reseta ance un plaser en un stasion de metro cuando me vide algun en lederhose ci regarda la mapa."
@T La custa de asiones colasa par causas diversa
@L aora_oji/2020/la_custa_de_asiones_colasa_par_causas_diversa
====== La custa de asiones colasa par causas diversa ======
22 setembre 2020
Asionerias en Asia ia sufri oji de la efetos ladal de investores en la SUA e la Rena Unida ci es ansiosa sur la crese de casos de coronavirus.
La cades la plu grande ia es rejistrada en Australia, do la valua de asiones ia ateni sua minima de tre menses. Ma asiones ia tufa ance tra Corea Sude, Hongkong e Xina. Japan ia es cluida per un festa publica.
Investores es ance disturbada par esperas palinte sur la posible de plu suporta finansial per la economia esuan.
Ier, asionerias en la SUA e la Rena Unida ia sufri perdes major entre temes ce la crese renovida de casos de COVID-19 va dana la futur de la economia. Plu ca 50 bilion paundes ia es sutraeda de la valua de asiones brites, e colasas simil ia aveni en asionerias en Europa e la SUA.
La senti negativa ia estende a Asia, cual ia es resente la foca de otimisme sur la recovre economial continuante en Xina.
Asiones australian ia es tirada a sua nivel la plu basa de pos la media de junio, presada par sua asiones de mina e enerjia. Du companias major de mina ia tufa par sirca 2%.
Un plu fator complicante es la risca cual investores senti en relata con la eleje presidental en la SUA. La debate prima va aveni a martedi de la semana veninte.
Plu, en Europa, asiones de bancos ia es afetada par alegas sur blanci de mone cual ia apare en documentos esposada.
HSBC, la banco a la sentro de la scandal, ia esperia un cade de la custa de sua asiones par 5,3% en London, ma la revelas ia tira la campo intera a su, con ce otra bancos grande ia tufa en proportio simil.
La asiones de HSBC ia ateni sua punto la plu basa de 25 anios. Oji los ia continua afonda en Hongkong, perdente 3 plu persentos de sua valua.
@T La custa de petrolio esuan deveni negativa
@L aora_oji/2020/la_custa_de_petrolio_esuan_deveni_negativa
====== La custa de petrolio esuan deveni negativa ======
21 april 2020
En la SUA, la custa de petrolio ia deveni negativa a la ves prima de istoria. Esta sinifia ce la produores de petrolio paia afin otra partitos compra lo, car los teme ce sua capasia de conserva lo va es completa plenida en maio.
La nesesa per petrolio ia diminui multe en cuando persones tra la mundo ia resta encluida en sua casas. En resulta, companias de petrolio ia es obligada a lua tancadores per teni la cuantia suprapasante, e esta la cade la custa de petrolio a la campo negativa.
La custa de West Texas Intermediate, la norma per petrolio esuan, ia desende a tan basa como $-37,63 per baril.
Un analiste de finansia enerjial ia comenta: "Esta es bizara sin presedente. La xoca mercatal ia es tan enorme ce lo ia inonda cualce cosa cual persones ia ta pote espeta."
La tufa profonda ier ia es partal gidada par un detalia tecnical de la mercato global de petrolio. On comersia petrolio con regarda a sua custa futur, e la contratas per maio va desvalidi oji. Comersiores ia desira descarga estas per evita debe aseta fisical la petrolio e incore la custa de conserva lo.
La custa de WTI per junio ia desende ance, ma lo ia comersia a plu ca $20 per baril. Entretempo, ance Brent Crude, la norma usada par Europa e la resta de la mundo, cual comersia ja con contratas de junio, ia es plu debil, reduida par 8,9% a min ca $26 per baril.
La industria de petrolio ia luta contra e compras diminuinte e disputas entre produores sur la basi de la cuantia produida. Plu temprana en esta mense, membros e aliadas de OPEP (Organiza de Paises Esportante Petrolio) ia fa final un acorda recordo per redui la produi global par 10% -- la redui la plu grande acordada de sempre.
@T La dana pos un trematera potiosa en Turcia
@L aora_oji/2020/la_dana_pos_un_trematera_potiosa_en_turcia
====== La dana pos un trematera potiosa en Turcia ======
2 novembre 2020
Ecipos salvante en Izmir, site de porto turces, continua xerca survivores de un trematera potiosa a venerdi.
La cuantia de persones mor ia ateni 64 a la min: 62 en Turcia, e du sur la isola elinica Samos. Deses de persones manca ancora.
On ia tira un om de 70 anios de su la detrito de un construida en Izmir, do el ia es trapida tra 33 oras. La ministro de sania ia visita el en ospital.
La trema ia causa tsunamis cual ia colpa rejiones costal e isolas en ambos paises. Plu ca 900 persones ia es ferida, an si la plu es aora relasada de ospitales. Oto persones es en cura intensa.
Aidores ia distribui comedas entre la survivores e ia erije miles de tendas per los ci no pote revade a sua casas. On va destrui 26 construidas danada.
La trematera ia aveni a 14 cilometres de la vila Karlovasi sur Samos a 13:51 de ora local a venerdi. Lo ia es sensada en locas tan distante como Atina e Istanbul.
La plu de la dana ia aveni en Izmir, a la costa ejean de Turcia, do multe persones ia core a la stradas en teme e panica.
On ia reporta inondas en Izmir pos la leva de la mar. Un person ia mori cuando sua seja rolante ia es malversada par acua levante.
Izmir es la site la plu grande de Turcia, con cuasi tre milion abitores. Turcia e Elas es situada sur falias, e tremateras es comun.
Sur Samos, du adolesentes ia es matada par un mur colasante. Oto persones ia es ferida sur la isola, do sirca 45 mil persones abita. Un tsunami ia inonda la porto, e alga construidas ia es danada.
Kyriakos Mitsotakis, ministro xef de Elas, ia ofre sua compatia a Recep Tayyip Erdoğan, presidente de Turcia: "An con nosa diferes, esta es un tempo cuando nosa persones debe sta juntada," el ia tuita.
En responde, Erdoğan ia tuita: "Turcia ance es sempre preparada per aida Elas a remedia sua feris. Ce du visinas mostra unia en tempos difisil es plu valuosa ca multe cosas en la vive."
La relatas entre Elas e Turcia ia es spesial tensada en menses resente par un disputa sur la controla de acuas teritorial en la Mediteraneo e la recursos a su.
@T La dui tre de Bitcoin
@L aora_oji/2020/la_dui_tre_de_bitcoin
====== La dui tre de Bitcoin ======
12 maio 2020
Bitcoin, un sistem de mone dijital, ia pasa tra un ajusta cual ia redui sua rapidia de crea monetas nova. Esta "dui" de la criptomone la plu grande de mundo aveni a aprosima un ves en cada cuatro de anios.
La criptomone depende de lo cual on nomi "escavores", ci usa programes corsante per solve problemes matematical complicada en intercambia per bitcoines.
Pos la dui ier, la recompensa per desclavi un bloco ia redui de 12,5 monetas nova a 6,25.
La sistem de dui ia es poneda en la codigo de Bitcoin par sua creor, conoseda su la nom falsa Satoshi Nakamoto, per controla la infla.
Esta es la dui tre pos la inisia de Bitcoin en 2009. La prima ia aveni en novembre 2012, e la numero du en julio 2016. La seguente va aveni en maio 2024.
La codigo de Bitcoin dise ce la premios a escavores va continua dui pos cada grupo de 210 000 blocos, asta cuando los cade a zero pos sirca du desenios. Tal, la cuantia de bitcoines capas de esiste es ultima limitada a 21 milion.
Esta es car criptomones, diferente de la dolar o la euro, ave no banco sentral per regula sua furni. Promovores dise ce esta raria es un parte de lo cual suporta la valua de Bitcoin e securi lo contra mones cual risca deveni desvaluada en tempos de crise economial.
Bitcoin ia gania ja plu ca 20% en esta anio, e la valua de un moneta ia egali a 10 000 dolares esuan en la semana pasada, pos un reporta ce un esperta major sur investis suporta lo como un modo de proteje contra infla.
An tal, alga investores ia comenta ce cisa la dui va fa ce esta criptomone es min atraosa per escavores.
@T La economia de Indonesia retrosede
@L aora_oji/2020/la_economia_de_indonesia_retrosede
====== La economia de Indonesia retrosede ======
5 novembre 2020
Como un de la mal efetos de la pandemica de coronavirus, Indonesia ia entra a sua retrosede prima de 22 anios.
En la cuatri tre de la anio, la economia la plu grande de Asia sude-este ia esperia un redui de sua crese economial par 3,49%, en compara con la mesma periodo en 2019.
Pos un cade par 5,32% en la cuatri du de 2020, esta ia pone la economia indonesian a retrosede. Esta state ia aveni la plu resente en la crise finansial asian de 1998.
La cade de crese economial en julio, agosto e setembre es pico plu profonda ca la 3% cual economistes ia predise.
Autoriosas en Indonesia ia predise ce cisa 3,5 milion persones va perde sua emplea par causa de la coronavirus. La pais ave la proportio la plu alta de infetas en la rejion.
An si la cultiva es un composante major de sua economia, Indonesia depende multe de dolares turiste.
Miliones de stranjeres per anio vola a la isola Bali, xercante plaias vacua, terazas de ris e templos indu su sielo. Ma sua cuantia ia diminui multe pos cuando Indonesia ia clui sua fronteras contra nonabitores, como otra paises cual batalia la pandemica.
La site capital, Jakarta, ia enforsa regulas de enclui partal per cuatro semanas, comensante a media de setembre, car la cuantia cresente de casos ia supralabora sua sistem medical.
La banco ANZ ia scrive: "Jeneral, la economia de Indonesia ia pasa ja sua punto la plu debil, ma car la maladia en la pais es ancora no controlada, probable la ativia economial va resta su presa."
Ofisiores de la governa ia promete aselera la spende per contrapesa la afeta de la pandemica e per fa ce la produi interna bruta de la pais crese denova.
@T La eleje esuan depende de la statos pendulin
@L aora_oji/2020/la_eleje_esuan_depende_de_la_statos_pendulin
====== La eleje esuan depende de la statos pendulin ======
4 novembre 2020
La resulta de la eleje presidental en la SUA es ancora no clar. La republiciste Donald Trump e la democrata Joe Biden pare susede plu o min egal en la statos pendulin.
Biden ia dise ce el es "en via" a vinse, e Trump ia reclama "un vinse grande". La votas ia es fada a la fini de un corsa longa de promoves amarga.
On projeta ce la presidente ia reteni Florida, un stato esensal. Ma Biden pote prende Arizona, un stato conservaliste en la pasada.
Otra statos importante, como Georgia, Pennsylvania, Wisconsin, Michigan e Carolina Norde pote ancora es prendeda par o la un o la otra partito.
Lo es posible ce on no va sabe la resulta final asta pos alga dias, car lo envolve la conta de votas postal. Plu ca sento milion persones ia vota temprana, ante la dia formal de eleje ier. On predise ce la partisipa ia es la plu grande en la pais de sento anios.
La controla de la parlamento, la Congresa, pote ance cambia. Republicistes atenta reteni no sola la Casa Blanca, ma ance sua majoria en la Senato, la Salon Alta.
Los ia perde un seja de Senato en Colorado ma ia gania un en Alabama. La Salon Basa va resta probable controlada par la Partito Democrata.
Sondas nasional de opina ia indica un vantaje firma per Biden, ma los ia sujesta ance un compete prosima en la oto statos pendulin cual va deside probable la resulta.
En la SUA, on vota a la nivel de sua stato. En cada stato, esta prosede determina un cuantia peti e fisada de figures ci vota alora formal per la partito vinsente en acel stato. 270 tal figures, de entre la 538 posible, es nesesada per gania la presidentia.
On ia erije un serca nova e nontrepable sirca la Casa Blanca. Alga comersias en Washington e la Site New York ia bloci sua fenetras con plances par causa de ansia sur tumultas posible.
@T La familia de Franco debe redona sua cason de estate
@L aora_oji/2020/la_familia_de_franco_debe_redona_sua_cason_de_estate
====== La familia de Franco debe redona sua cason de estate ======
3 setembre 2020
Un corte en la norde-ueste de Espania ia declara ce un palasio de estate, usada par la tirano Francisco Franco, parteni a la governa e ce sua familia debe transfere lo.
La judor ia deside ce la Pazo de Meirás ia es donada a Franco en 1938 per sua rol como xef de stato, e no per razonas personal.
Franco ia rena Espania de 1939 asta sua mori en 1975. Sua desendentes ia atenta defende sua lega en la cortes a multe veses. En la anio pasada, los ia perde un batalia legal con la governa sosialiste de la pais per la direto de conserva sua restantes en un mausoleo a un monumento nasional nomida la Vale de la Cadedas.
Construida entre 1893 e 1907, la cason en A Coruña, un site galego, ia es orijinal poseseda par la familia de Emilia Pardo Bazán, un autor espaniol.
En 2018, on ia ave furia publica ce la netes de la tirano ia presenta la palasio per vende, a la custa reportada de oto milion euros. La situa ia intensi en 2019, cuando la governa espaniol ia rejistra un reclama legal sur la posese de la imobila, razonante ce un vende ofisial en 1941, cual ia transfere lo a la Franco e sua sposa, ia es frodante.
An si la governa ia es suportada par autoriosas local e rejional, la ses netes de Franco ia dise ce la vende en 1941 ia es valida. La neto Francis Franco ia acusa ce la governa ia atenta "venja" contra la familia Franco per refusa sede en la disputa sur la restantes de la tirano. La familia ia produi documentos demostrante ce los ia paia per renovi la imobila.
Judor Marta Canales ia acorda con un reporta scriveda en 2018 par espertas istorial e legal per la autoriosas legal, cual ia dise ce la vende de la palasio a Franco en 1941 no ia es un contrata autentica. El ia judi ce la dona inisial de la cason en 1938 ia es a "La Generalissimo de la armadas e xef de stato" ma no a la nom de Francisco Franco Bahamonde.
Franco ia nase en Galisia e, an a 45 anios pos sua mori, on senti ancora sua influe en Espania.
@T La fem la plu vea de Espania recovre de coronavirus
@L aora_oji/2020/la_fem_la_plu_vea_de_espania_recovre_de_coronavirus
====== La fem la plu vea de Espania recovre de coronavirus ======
13 maio 2020
Un fem de 113 anios, sur ci on crede ce el es la fem la plu vea en Espania, ia recovre de la coronavirus.
Maria Branyas ia es diagnoseda con COVID-19 pos cuando la pais ia enclui se en marto. Ma pos semanas de isoli, el es aora sana denova, e ia sufri sola sintomes minor.
El ia vive ance tra la pandemica de gripe de 1918--19 e la Gera Interna Espaniol de 1936--39.
Sua fia ia tuita: "Esente aora sana, el es merveliosa -- el vole parla, esplica, fa sua refletas -- el es denova el."
Naseda en Mexico en 1907, Branyas ia move a norde a San Francisco pos du anios e ia ariva en Girona, provinse catalan, en la Gera Mundal Prima con sua padre espaniol, ci ia es un jornaliste.
El ia eleva tre enfantes, de ci un ia selebra resente sua aniversario 86. De sua 11 netes, la plu vea ave 60 anios. E el ave 13 dunetes.
El abita tra du desenios en un ospisio en la site Olot, en Girona. Parlante en la anio pasada, el ia comenta: "Me ia fa no cosa plu ca vive."
@T La fundor de Hello Kitty resinia con 92 anios
@L aora_oji/2020/la_fundor_de_hello_kitty_resinia_con_92_anios
====== La fundor de Hello Kitty resinia con 92 anios ======
13 junio 2020
La fundor de la compania japanes cual ia crea Hello Kitty ia anunsia ce el resinia como dirijor xef. Shintaro Tsuji, ci ave 92 anios, ia dise ce el va transfere la controla de Sanrio a sua neto de 31 anios, Tomokuni Tsuji.
Esta es la cambia prima de xef en ses desenios de la compania.
Hello Kitty, un cartun de gato sin boca ma con un sinta en sua capeles, ia jenera biliones de dolares pos sua inisia a cuasi 50 anios ante aora. La imaje simple ia apare sur benes incluinte vestes, juetas e paper. Per la plu, lo es dirijeda a enfantes joven, ma en anios resente lo ia deveni popular ance con adultes.
Shintaro Tsuji va lasa formal sua rol a la prima de julio.
Tomokuni Tsuji, ci es un dirijor manejante a Sanrio, va deveni la dirijor xef la plu joven de tota companias listada en la indise de la asioneria de Tocio. Par coaveni, el ave la mesma aniversario de nase como Hello Kitty (1 novembre), ma con 14 anios min ca la carater.
Sanrio, de cual sua comersia declina ja tra alga anios, ia es multe afetada par la pandemica de coronavirus. Sua profitas neta anial ia redui par 95% en la anio 2019--20, longo informas ier publicida. Ance sua vendes ia es reduida par 6,5% contra la anio presedente.
Produidas Hello Kitty es vendeda en 130 paises. La marca es lisensada a parces de divertis e caferias, e en la anio pasada, un compania de ferovia japanes ia pone la imaje sur sua trenes rapida, depintada en ros e blanca.
An si la marca es tipal de la cultur japanes de kawaii (amablia enfantin), la carater mesma es identifiada como brites car, cuando el ia es creada en la desenio de 1970, la cultur brites ia es modosa en Japan.
@T La governa iamani es atacada a un airoporto
@L aora_oji/2020/la_governa_iamani_es_atacada_a_un_airoporto
====== La governa iamani es atacada a un airoporto ======
31 desembre 2020
A la min 22 persones ia es matada e plu ca 50 ferida en un ataca a la airoporto en la site Aden en la sude de Iaman.
On ia ave un esplode, cisa du, corta pos la ariva de Arabia Saudi de un avion portante la governa nova formida de la pais. Aidores carital e ofisiores ia es entre la vitimes, ma la ministro xef ia dise ce el e sua consilio es en bon state.
Iaman es ruinada par un gera cual ia intensi en 2015, cuando un alia de statos arabi, gidada par Arabia Saudi, ia inisia un opera militar per vinse la rebelores huti e restora la rena de Presidente Abdrabbuh Mansur Hadi.
La combate ia lasa plu ca 110 mil persones mor, ia crea la desastre umana la plu sever de mundo con miliones de persones faminte, e ia lasa la pais an plu afetable par la pandemica de covid.
Videos de la aveni ier mostra un esplode grande cuando pasajores ia comensa sorti de la avion cual ia transporta la consilio nova a Aden.
Un fola asemblada prosima a la avion per bonveni la ministros ia fuji en cuando fuma densa ia emerji de la construida de airoporto. On ia oia sonas de spara pos poca tempo.
La causa de la esplode no es clar. Un fonte ia informa jornalistes ce tre cartuxes de mortero ia atera sur la construida. Ma la canal saudi Al-Hadath ia difusa un video sur cual lo ia dise ce lo mostra un misil cual colpa la asfalto e esplode.
Sin culpa direta la hutis, la ministro xef Maeen Abdulmalik Saeed ia tuita: "La ata coarde teroriste cual ia ojeti la airoporto de Aden es un parte de la gera cual on fa contra la stato iamani e sua bon popla. Lo fa no plu ca aumenta nosa determina per reali nosa obligas."
Plu tarda ier, un plu esplode ia aveni prosima a la palasio Maashiq, do la consilio ia refuja se. On ia reporta la tira a tera de un avioneta esplodente.
La consilio nova ia es formida per atenta remedia un divide durante entre la fortes de la governa, aidada par Arabia Saudi, e la militias fidosa a la Consilio Entretempo Sude, un grupo separadiste suportada par la Amirias Arabi Unida.
La du lados debe es aliadas en la gera interna contra la promove huti, cual controla la capital Sana e multe de la norde-ueste de Iaman. Ma en la du anios pasada, un luta per potia ia provoca multe rondas de disputa ferose entre la membros.
@T La governa lubnani resinia entre coleria cresente
@L aora_oji/2020/la_governa_lubnani_resinia_entre_coleria_cresente
====== La governa lubnani resinia entre coleria cresente ======
11 agosto 2020
La governa de Lubnan ia resinia, fasante sempre plu coleria en relata con la esplode cual ia ruina partes de Beirut e ia mata plu ca 200 persones a un semana ante aora. La anunsia ia es fada par Hassan Diab, ministro xef, en un parla nasional televisada en la sera de ier.
Multe persones ia acusa ce la xefes de la pais es culpable, alegante cualias de nonatende e dejenera moral. Protestores ia vade sur la stradas e ia scaramuxa contra la polisia en la dia tre en serie.
La esplode enorme ia es causada par la detona de 2750 tones de nitrato de amonio conservada tra anios a la porto en modo nonsecur.
Presidente Michel Aoun ia demanda ce la governa continua labora asta on pote formi un consilio nova.
Diab, ci ia deveni ministro xef en janero pos menses de nonprogresa, ia dise ce sua governa ia "fa pasos grande per presenta un mapa de via per salva la pais".
En sua parla, el ia presenta se como un xef reforminte ma impedida par un sistem sobornosa cual esiste ja tra anios. El ia comenta ce esta problem es "plu grande ca la stato" mesma, e ce "un mur multe spesa e spinosa separa nos de cambia, un mur fortida par un clase ci adota tota metodos susia per resiste e reteni sua ganias".
Parlamento va debe aora deside un ministro xef nova, en un prosede cual envolve la mesma politica setal cual es a la radis de la noncontentia de la protestores. La potia en Lubnan es compartida entre xefes ci representa la grupos relijial diversa de la pais.
Plu, pos la fini de la gera interna de 1975-1990, alga comandores militar ia entra a politica e los controla ancora partes grande de la campos political, economial e sosial de Lubnan. Multe protestores culpa esta sistem per la dejenera de la pais.
@T La limita de tempo prosimi per acorda pos Brexit
@L aora_oji/2020/la_limita_de_tempo_prosimi_per_acorda_pos_brexit
====== La limita de tempo prosimi per acorda pos Brexit ======
9 desembre 2020
Boris Johnson, ministro xef de la Rena Unida, va vola oji a Bruxelles per negosia con Ursula von de Leyen, presidente de la Comision European, sur un acorda comersial pos Brexit.
Poca tempo resta per reali un acorda ante la fini de la anio, cuando la RU va sesa segue la regulas de comersia de la Uni European. La du statistes va discute a un come de sera, car la negosias entre sua ofisiores ia fini staniada.
On ave ancora desacordas major sur diretos de pexa, regulas de compete comersial, e la modo de polisi un acorda. Johnson va traversa un lista de la problemes la plu grande con Von der Leyen, ci representa la xefes de la 27 nasiones de la UE.
An si la du statistes va fa alga progresa, esta no va sinifia la ateni de un acorda, ma lo va abri cisa la via per plu negosias.
Johnson va partisipa en la sesion semanal de Demandas a la Ministro Xef en la parlamento brites, ante viaja a la capital beljes. La xefes de la UE va consenta per sua propre confere a jovedi.
Michel Barnier, ci gida la ecipo per relatas UE con la RU, ia informa ministros en la bloco european ce la negosias vade en dirije a fali ateni un acorda ante la limita de tempo.
En discutes separada ier, la RU e la UE ia acorda regulas comersial spesial per Er Norde, incluinte sur la funsiona de la frontera nova en la Mar Eres. Tal, la RU ia abandona sua intende de supresa partes de sua acorda per parti de la UE, suscriveda en la anio pasada, lo cual ia ta rompe cisa la lege internasional.
@T La militar de Brasil va ata contra desforesti cresente
@L aora_oji/2020/la_militar_de_brasil_va_ata_contra_desforesti_cresente
====== La militar de Brasil va ata contra desforesti cresente ======
9 maio 2020
La cuantia de desforesti en la Amazona de Brasil ia crese forte en la mense pasada. La pais prepara aora envia soldatos per atenta preveni ce on cade arbores e fa escavas ala.
Sua Instituida Nasional de Rexerca Spasial dise ce la area destruida en april es plu grande par 64% ca en la mesma parte de la anio pasada. E en la cuatro menses prima de 2020, la destrui de la foresta par leniores e ranxores nonlegal ia crese par 55%.
Ambientistes dise ce la politica e retorica de Presidente Jair Bolsonaro promove esta ativia nonlegal. Bolsonaro nega lo. Plu temprana en esta semana, el ia autori la envia de fortes armada a la rejion.
La foresta pluvosa Amazona es un reserva esensal de carbono cual lenti la caldi global. Plu ca 405 cilometres cuadrida de lo ia es desforestida en sola la mense pasada.
Organizas ambientiste reporta ce pos la comensa de la problem de coronavirus, on ia envia min multe enforsores governal a la rejion. Brasil es un de la paises la plu afetada par la maladia en America Sude, con 141 000 casos e cuasi 10 000 moris.
La Instituida Brasilera de la Ambiente e de Recursos Natural Renovable (IBAMA) ia dise ce lo redui la cuantia de ajentes ativa en otra rejiones perilida, ma no en la Amazona.
Desforesti ia crese multe pos la ariva a potia de Bolsonaro en la anio pasada. El razona ce plu cultivas e escavas en partes protejeda de la foresta es la sola modo de boni la povria de la rejion.
Sua politica de ambiente es vasta condenada, ma el rejeta la criticas, disente ce Brasil es ancora un bon model de conserva.
El mesma critica IBAMA per lo cual el descrive como multas suprapasante. En sua anio prima en sua posto, la cuantia de punis finansial per violes ambiental ia cade agu. A la mesma tempo, IBAMA ave tro poca mone e tro poca empleadas.
@T La ministro xef dansce cansela sua sposi
@L aora_oji/2020/la_ministro_xef_dansce_cansela_sua_sposi
====== La ministro xef dansce cansela sua sposi ======
25 junio 2020
Mette Frederiksen, ministro xef de Danmarc, ia pospone sua sposi a la ves tre, per vade a un confere de xefes de la Uni European.
La confere sur proposas per un reserva finansial per recovre pos COVID-19 va aveni a 17 e 18 julio. Lo es la consenta prima a cual xefes va vade pos la comensa de restrinjes enforsada contra la coronavirus.
Frederiksen ia intende sposi sua acompanior Bo Tengberg a 18 julio. La ministro xef ia dise en Facebook ce el debe "proteje la interesas de Danmarc".
Danmarc oposa la reserva par causa de un scema de ofre suvenis a paises grave afetada par la crise. Con Sveria, Osteraic e Nederland, Danmarc dise ce la reserva proposada de 750 mil milion euros es tro grande, insistente ce tota mone donada debe es ultima repaiada.
En otra novas sur la virus, ofisiores de sania en la SUA estima ce a la min 20 milion persones ala ia es ja infetada. La pais ia rejistra 2,4 milion casos confirmada, ma on estima ce la cuantia vera de casos es la desuple. Esta es car persones nonsintomosa no ia es probada.
Alga statos en la sude e ueste de la pais ia reporta cuantias recordo en dias resente, e la stato Texas ia abandona sua reabri pos un apico subita de la cuantia de infetas e ospitalis.
122 370 persones en la SUA ia mori ja de la maladia. La Universia de Washington predise 180 000 moris ante otobre, o 146 000 si 95% de esuanes porta mascas de fas.
An tal, un studia nova sujesta ce moris par la virus entre enfantes european es estrema rara. Sola cuatro de 582 enfantes studiada en 25 paises ia mori, e du de los ia ave ja otra disturbas de sania fondal.
Sintomes ia es jeneral minor, e alga enfantes ci ia es positiva probada ia ave tota no sintomes. Ma sirca un enfante entre des ia nesesa cura intensa.
@T La ministro xef de Esuatini mori en ospital
@L aora_oji/2020/la_ministro_xef_de_esuatini_mori_en_ospital
====== La ministro xef de Esuatini mori en ospital ======
14 desembre 2020
La governa de Esuatini dise ce sua ministro xef Ambrose Dlamini ia mori. El ia es positiva probada per coronavirus a cuatro semanas ante aora.
El ia mori en ospital en Sudafrica en la posmedia de ier, con 52 anios. No causa de mori ia es ofisial declarada, ma el ia reseta tratas contra covid.
Dlamini ia es la ministro xef de Esuatini, nomida Suaziland en la pasada, de otobre 2018.
Esta pais pico sin costa en la sude de Africa es un de la monarcias asoluta final en la mundo. Con sirca milion abitores, Esuatini ia rejistra 6768 infetas de coronavirus e 127 moris relatada con la pandemica.
Dlamini ia anunsia sua proba positiva a 16 novembre, cuando el ia descrive se como nonsintomosa e de senti sana. Ma a 1 desembre, la governa ia dise ce el ia es moveda a un ospital sudafrican per aselera sua recovre.
En un declara formal sur la mori, la visxef de governa Themba Masuku ia scrive: "La governa en colabora con la familia va teni la nasion informada sur ordinas seguente."
Dlamini ia es un de alga xefes de stato ci ia developa covid en la pandemica, incluinte Donald Trump, la presidente de la SUA, e Jair Bolsonaro, la presidente brasilera.
Un bancor pasada, Dlamini ia es un comensor political cuando Re Mswati 3 ia asinia a el la posto de ministro xef. La rol de la xef de governa es limitada en Esuatini, do la re nomi tota ministros e controla la parlamento.
Mswati ia es coronida en 1986 con 18 anios, seguente sua padre Re Sobhuza 2, ci ia mori pos un rena longa con eda de 82 anios.
La re rena par proclama e ia es criticada per trata cruel sua oposores e per solisita mone publica per palasios nova e autos lusosa. En 2018, el ia renomi la pais "la Rena Esuatini".
@T La ministro xef de Japan resinia par causa de maladia
@L aora_oji/2020/la_ministro_xef_de_japan_resinia_par_causa_de_maladia
====== La ministro xef de Japan resinia par causa de maladia ======
28 agosto 2020
Shinzō Abe, la ministro xef de Japan, va anunsia ce el resinia per razonas de sania. El ia sufri tra multe anios de colite ulserante, un inflama de la fore de la colon, ma on crede ce sua state ia mali plu resente.
La compania difusante NHK ia reporta ce esta om de 65 anios vole evita causa problemes per sua governa. En la anio pasada, el ia deveni la ministro xef japanes con la periodo la plu longa. El ia comensa en la posto en 2012.
Lo pare ce el no va resinia oji, ma va continua servi asta cuando un seguor es elejeda par sua Partito Democrata Liberaliste.
En 2007, el ia resinia de un periodo plu temprana como ministro xef par causa de sua batalia contra colite ulserante, un disturba cronica cual afeta la intestin spesa e con cual el vive ja de sua adolese.
Abe ave un reputa como un conservaliste e nasionaliste dedicada, e per stimula la crese par sua politica economica agresiva, nomida "abenomica".
El ia forti la defendes de Japan e ia aumenta la spende militar, ma no ia pote revisa Article 9 de la constitui japanes, cual proibi un armada permanente per cualce intende otra ca autodefende.
Du visitas a ospital en un semana ia provoca demandas sur esce la sania de Abe deveni mal. El no ia revela la causa de la visitas, ma on reporta ce un ia ocupa cuasi oto oras.
El ia intende servi asta setembre 2021, e en martedi un de sua aidores ia dise ce el pensa ce Abe va completi sua periodo, rejetante un sujesta ce Abe va desasembla pronto la salon basa de parlamento per un vota jeneral.
An tal, rumores ia persiste sur la fatiga cresente de la ministro xef en cuando el responde a sempre plu critica de sua maneja de la pandemica, e a un tempo cuando la taso de aproba per sua consilio ia cade.
@T La mori de Chadwick Boseman, stela de Pantera Negra
@L aora_oji/2020/la_mori_de_chadwick_boseman_stela_de_pantera_negra
====== La mori de Chadwick Boseman, stela de Pantera Negra ======
29 agosto 2020
Chadwick Boseman, la ator esuan bon conoseda per sua rol como Pantera Negra en la francisia Marvel de supraeroes, ia mori par canser con sola 43 anios.
El ia es diagnoseda con canser de la colon a cuatro anios ante aora, ma no ia publici la informa. El ia mori a sua casa en Los Angeles con sua sposa e familia a sua lado.
Boseman ia asende a fama en jua persones de la vive real -- la basebalor Jackie Robinson en la filma 42 de 2013, e la cantor James Brown en Get On Up de la anio seguente.
Ma lo va es como la Pantera Negra eponim de la filma multe susedosa de 2018 ce el va es la plu recordada. En la filma, Boseman fa la rol de la renor de Uacanda, un nasion african imajinal cual ave la tecnolojia la plu avansada sur la Tera.
En ajunta a es forte lodada par reseniores e a gania plu ca 1,3 mil milion dolares esuan en sinemas tra la mundo, la filma ia es jeneral regardada como un monumento cultural car lo ia ave cuasi sola rolores negra e un dirijor negra, Ryan Coogler.
En la anio pasada, Boseman ia dise ce la filma ia cambia la sinifia de "joven, talentosa e negra". Pantera Negra ia es la filma prima de supraeroe cual ia es nominada per la filma la plu bon a la premios Oscar.
Boseman ia fa la mesma rol ance en otra filmas de Marvel. Un seguente de Pantera Negra ia es preparada, intendeda per apare en 2022, con Boseman denova en la rol.
La anunsia de sua mori ia xoca multe persones, car Boseman ia discute nunca publica sua diagnose. An tal, fanes ia comensa indica sua ansia sur sua sania par causa de un perde notable de pesa en esta anio.
@T La mori de Christo, ci ia envolve monumentos
@L aora_oji/2020/la_mori_de_christo_ci_ia_envolve_monumentos
====== La mori de Christo, ci ia envolve monumentos ======
1 junio 2020
La artiste Christo, bon conoseda per envolve construidas e monumentos famosa en stofa o plastica, ia mori par causas natural a sua casa en York Nova, con 84 anios.
Christo, ci ia labora sempre con sua sposa Jeanne-Claude, ia covre con stofa la Reichstag en Berlin e la Pont-Neuf en Paris. Un declara en sua paje de Facebook descrive sua obras como uninte persones tra la mundo.
"Christo ia vive sua vive en modo la plu plen, no sola imajinante lo cual pare nonposible, ma realinte lo," la declara dise, ajunta ce la arte de la duple "vive plu en nosa cores e memorias".
Un instala de 2016, nomida La Molos Flotante, ia es composada de 100 mil metres cuadrida de stofa briliante jala, flotante sur cubos de polietilen en Lago Iseo en Sulzano, un munisipa italian.
En 2018, la obra esterna major par Christo en la Rena Unida, ia es revelada a la lago Serpentine en London. La Mastaba de London ia es un sculta colorosa con forma trapezio, creada par pila plu ca 7500 bariles de 200 litres, e esibida sur un plataforma flotante.
Naseda como Christo Vladimirov Javacheff en Gabrovo, un vila balgarian, en 1935, el ia pasa tempo en Osteraic e Suiz ante move a Frans, do el ia encontra Jeanne-Claude Denat de Guillebon en Paris.
En ajunta a sua laboras a monumentos grande, la duple ia crea ance obras enorme de arte en ambientes natural, ante la mori de Jeanne-Claude con 74 anios en 2009.
On previde ce un projeta nonfinida en Paris, titulida La Arco de Vinse, Envolveda, va es completida e esibida en setembre 2021, per segue la desiras de Christo.
"Nos empresta spasio e crea disturbas jentil per un pico de dias," la artiste ia comenta a un ves pasada. La declara de sua mori conclui: "En un letera de 1958, Christo ia scrive: 'Belia, siensa e arte va vinse sempre.' Nos teni prosima acel parolas oji."
@T La mori de la avocato ci ia defende Mandela
@L aora_oji/2020/la_mori_de_la_avocato_ci_ia_defende_mandela
====== La mori de la avocato ci ia defende Mandela ======
10 setembre 2020
George Bizos, la avocato sudafrican de diretos umana ci ia defende Nelson Mandela, ia mori con 92 anios.
Pos representa alga de la ativistes political la plu bon conoseda de la pais en la tempo de apartait, Bizos ia deveni un de la arcitetores de la constitui nova de Sudafrica.
Sua mori ia es anunsiada par presidente Cyril Ramaphosa, ci ia dise ce Bizos "ia contribui enorme a nosa democratia". Sua familia ia dise ce Bizos ia mori pasosa par causas natural a sua casa.
Bizos e Mandela ia encontra lunlotra cuando los ia studia lege en Johannesburg, e Bizos ia representa sua ami e otra oposores de apartait en casos de litiga.
El ia es un de la avocatos ci ia representa Mandela a sua litiga de tradi, cual ia comensa en 1956. El ia representa Mandela ance en la Litiga de Rivonia, cuando el e otra ativistes contra apartait ia es condenada a prisoni permanente en 1964, acusada de atenta suverti la governa.
On atribui a Bizos la ajunta de la parolas "si lo es nesesada" a la parla famosa par Mandela a la litiga, en cual el ia dise ce el es preparada per mori.
La Funda Nelson Mandela ia comenta ce Bizos ia jua un "rol esensal... e profesal e como un ami de familia" tra la anios cuando Mandela ia es en prison.
En sua autobiografia, La pasea longa a libria, Mandela ia descrive Bizos como "un om ci ia combina un natur compatiosa con un mente astuta".
Bizos ia nase en Elas, ma ia veni a Sudafrica como un refujada de la Gera Mundal Du cuando el ia ave sola 13 anios. Ante acel, el e sua padre ia aida sete soldatos zelandes a evade Elas, cual ia es ocupada par la nazis.
Pos ariva en Johannesburg sin capasia de parla engles, el ia abandona sua educa per un tempo longa e ia labora en un boteca elinica. Plu tarda, el ia es instruida como un avocato a la Universia Witwatersrand.
Pos la fini de la rena par la minoria blanca, Bizos ia aida scrive la constitui nova de Sudafrica. El ia representa ance familias de ativistes ci ia es matada en la periodo de apartait, a la Comision de Veria e Reconsilia en Sudafrica.
En un de sua litigas major final, el ia fa ce la governa dona un compensa finansial a la familias de 34 escavores ci ia es matada par la polisia sudafrican en 2012.
@T La mori de la "Pape de Beaujolais"
@L aora_oji/2020/la_mori_de_la_pape_de_beaujolais
====== La mori de la "Pape de Beaujolais" ======
6 janero 2020
Georges Dubœuf, un de la vendores grande de vino de la sentenio dudes, ia mori con 86 anios.
El ia es la plu conoseda per converti la relasa de un produida franses oscur -- un vino roja nomida Beaujolais Nouveau -- a un fenomeno global.
En la desenio de 1980, la promove zelosa par Dubœuf de esta vino ia fa ce la mundo nomi sua data anial de relasa la Dia de Beaujolais Nouveau. Lo ia gania per el ance la nometa "Pape de Beaujolais".
Dubœuf ia mori de un ataca serebral en la sera de saturdi a sua casa en la vileta Romanèche-Thorins en la este de Frans.
En la desenio de 1950, el ia institui L'Écrin Mâconnais-Beaujolais, un asosia de produores de vino, per aida la promove de vinos local. Par esta asosia, el ia developa relatas forte con mercatores e restorantores tra la rejion.
El ia abri sua propre vineria en 1964, aplicante metodos tradisional a sua labora, incluinte un monitori constante de la vino e un dedica cuasi clinical a ijien. Plu tarda, sua vineria ia estende a otra rejiones, e en 1993 Dubœuf ia abri un boteca e museo de vino en Romanèche-Thorins.
Ma sua promove nonfatigable de Beaujolais Nouveau ia distingui el. Tra la desenio de 1980 el ia organiza festas de Beaujolais Nouveau visitada par persones famosa de tota spesies, incluinte restorantores con tre stelas de Michelin.
Cuando el ia transfere la compania a sua fio Franck en 2018, lo ia produi en cada anio sirca 30 milion botelas, internasional vendeda.
Dominique Piron, presidente de la compania Inter Beaujolais, ia dise ce Dubœuf es la person ci ia "leva la bandera de Beaujolais tra tota la mundo". "El ia ave un nas, un intui, a un paso ante cadun," el ia comenta.
@T La mori de la renor la plu longa de la mundo arabi
@L aora_oji/2020/la_mori_de_la_renor_la_plu_longa_de_la_mundo_arabi
====== La mori de la renor la plu longa de la mundo arabi ======
11 janero 2020
Qabus bin Said al Said, la sultan de Uman e la renor la plu longa servinte en la mundo arabi, ia mori con 79 anios.
En 1970, la sultan ia despone sua padre en un colpa de stato sin sangue e ia pone Uman en via a developa, usante la ricia de petrolio de la pais. Jeneral regardada como popular, el ia es ance un monarca asoluta ci ia silenti voses disentinte. On ancora no ia declara sua causa de mori.
Sua cusin, Haitham bin Tariq al Said, es ja inaugurada como sua susedor. Esta ministro pasada de cultur e erita ia fa ier sua jura de posto, pos un consenta de la Consilio de la Familia Real.
La sultan es la desidor suprema en Uman. El teni ance la postos de ministro xef, comandor suprema de la fortes armada, ministro de defende, ministro de finansia, e ministro de esternas.
En desembre, Qabus -- ci ia ave no eritor o susedor asiniada -- ia pasa un semana en Beljia per tratas medical, e on ia reporta ce el sufri de canser.
Imajes mostra un fola de omes asemblada estra la Mascita Grande Sultan Qabus en la capital Mascat, a do on ia prende la caxon funeral e do on ia dise preas.
Tra cuasi sinco desenios, Qabus ia domina completa la vive political de Uman, un pais con 4,6 milion persones abitores, de ci sirca 43% es sitadanes stranjer.
Con 29 anios, el ia suverti sua padre, Said bin Taimur, un renor solitar e estrema conservaliste ci ia proibi multe cosas, incluinte escuta la radio e porta oculos de sol, e ci ia deside ci pote sposi, deveni educada o parti de la pais.
Qabus ia declara pronto ce el intende institui un governa moderna e usa mone de petrolio per developa la pais, en cual on ia ave a acel tempo sola tre scolas e des cilometres de stradas paveda.
En la anios prima de sua rena, aidada par soldatos spesial de Britan, el ia supresa un rebela en Dhofar, un provinse sude, par tribus suportada par la Republica Democrata Poplal de Iaman, alora un stato marxiste.
Descriveda como carismosa e previdosa, el ia segue un via neutral sur temas esterna, e ia susede en 2013 reali negosias secreta entre Iran e la Statos Unida cual ia gida a un acorda nucleal major pos du plu anios.
Un grado de noncontentia ia apare en 2011 con la Primavera Arabi. On ia ave no cambias vasta en Uman, ma miles de persones ia vade sur la stradas tra la pais per esije salarios plu bon, plu empleas, e la fini de frodas ofisial.
La fortes de securia ia tolera inisial la protestas, ma plu tarda los ia usa gas lacrimojen, baletas de cauxo e munis combatin per sperde los. Du persones ia es matada e desuples ia es ferida. On ia litiga sentos su leges cual ia criminali "asemblas nonlegal" e "insulta la sultan".
La protestas ia fali produi cambias major. Ma Qabus ia desemplea alga ministros longa servinte ci on ia persepi como frodosa, ia estende la potia de la Consilio Conselante, e ia promete crea plu empleas en la campo publica.
De pos, la autoriosas ia continua bloci jornales local nondependente cual critica la governa, confisca libros, e menasa ativistes, como diseda par la organiza Oserva de Diretos Umana.
@T La mori de Moi, presidente pasada de Cenia
@L aora_oji/2020/la_mori_de_moi_presidente_pasada_de_cenia
====== La mori de Moi, presidente pasada de Cenia ======
4 febrero 2020
Daniel arap Moi, presidente pasada de Cenia, ia mori con 95 anios. Sua oposores ia regarda el como un renor autoritar ci ia teni la potia tra 24 anios, ma sua aliadas ia loda el per manteni stablia en esta pais de Africa este.
Moi ia resinia en 2002 pos deveni constitual proibida de aspira un plu periodo en la posto. El ia es la presidente du de Cenia pos la mori de Jomo Kenyatta en 1978.
El ia es egal temeda e amirada, e ia es acusada de maltratas de diretos umana. Moi ia introdui politica multipartital en 1991, ma elejes seguente ia es manxada par manipulas. El ia es un politiciste plu popliste ca Kenyatta, ma sua lega ia es desbriliada par stania economial e acusas de froda.
Moi, ci ia nase a 2 setembre 1924 en un familia de cultivores, ia es un aliada prosima de Kenyatta ante la autonomi de la pais en 1963. El ia servi como ministro de internas de 1964, e ia deveni la vispresidente de Cenia en 1967.
Asta la introdui de otra partitos, Moi ia es nonoposada en la elejes de 1983 e 1988. El ia gania du plu periodos en 1992 e 1997 pos elejes en cual on crede jeneral ce la votas ia es manipulada.
Cuando el ia es la presidente, el ia pare domina cuasi cada aspeta de vive, un impresa aidada par la jornales governal.
Sua criticores vide sua rena como anios perdeda, un tempo cuando Cenia ia sufri froda, disputas etnical e maltratas de diretos. Los dise ce el ia impedi la progresa economial par personali la stato, usante recursos governal per recompensa fidistes e retirante los per puni persones desobedinte.
Per esemplo, stradas e fabricerias ia es tratada como donadas per comunias si sua politicistes xef ta labora con la partito governante, KANU. Esta ia fundi un cultur de sponsoria political cual es aora un parte de la politica cenian.
An tal, defendores de Moi asentua sua declara, comun repeteda, ce el ia manteni un Cenia "pasosa" tra cuando alga paises african ia es en gera.
@T La mori de Saroj Khan, coreografiste major barati
@L aora_oji/2020/la_mori_de_saroj_khan_coreografiste_major_barati
====== La mori de Saroj Khan, coreografiste major barati ======
3 julio 2020
Saroj Khan, un de la coreografistes la plu importante de Barat, ia mori con eda de 71 anios.
Khan ia ave un carera notable tra cuatro desenios e ia coreografi alga de la cantas la plu famosa e popular de Bollywood. Sua carera ia flori en la tarda de la desenio de 1980.
El ia mori de un sesa de cor en la site Mumbai, en la ospital a do el ia vade en junio pos reporta difisiles de respira. On ia proba el per COVID-19, ma la resulta ia es negativa.
Naseda en 1948, Khan ia es introduida a la industria de filma como un artiste enfante. En la desenio de 1950, el ia deveni un dansor fondal, aparente en filmas como Madhumati de Bimal Roy, do el ia es coreografida par B Sohanlal, ci el ia sposi plu tarda.
Sua carera ia evolui a lo de un coreografiste aidante asta 1974, cuando el ia reseta un bon oportun en la filma Geetaa Mera Naam.
En la desenio de 1980, Khan ia deveni un nom reconoseda en la industria pos labora sur multe cantas susedosa con stelas major como Madhuri Dixit e Sridevi Kapoor, de ci ambos ia dansa a cantas iconin de filmas hindi.
El ia coreografi Sridevi en la canta "Hawa Hawaii" de Mr India, un filma multe susedosa de 1987, inisiante sua carera como un dirijor major de dansa.
Bollywood ia lamenta la mori de Khan en Twitter, do multe, incluinte la suprastela Akshay Kumar e la dirijor Kunal Kohli, ia grasia el per sua labora. Sua funera ia aveni a esta matina en Mumbai.
@T La neutri de la casa de Hitler
@L aora_oji/2020/la_neutri_de_la_casa_de_hitler
====== La neutri de la casa de Hitler ======
3 junio 2020
Osteraic ia revela sua intende de "neutri" la construida do Adolf Hitler ia nase, par converti lo a un ofisia de polisia.
La governa ia compra la construida par comanda esecutante en 2016, pos un disputa longa. Un compania osteraices de arciteta va fa la cambias desiniada per preveni ce la loca atrae neonazis.
"Un capitol nova va abri per la futur, de la casa de nase de un tirano e omisidor coletiva," Karl Nehammer, ministro de internas osteraices, ia dise ier.
La compania vinsente ia es elejeda de entre des-du aspirores. Lo ia proposa un scema per cambia cosmetica la fasada de la construida e dona a lo un teto nova. La labora va comensa en novembre. On previde ce lo va es completa en 2023, con custa de sirca sinco milion euros.
La casa es situada en Braunau, a la frontera con Deutxland. Poca marca lo per sujesta ce lo es do la tirano nazi ia nase. Un roca a estra, con la testo "Faxisme nunca denova", va es moveda a un museo en la capital, Wien.
Hitler mesma ia pasa cuasi no tempo en la casa. El ia nase en 1889 en un aparte en esta construida de la sentenio 17, ma, pos alga semanas, sua familia ia reloca se a un otra adirije en la mesma distrito e ia parti permanente de la vila cuando Hitler ia ave tre anios.
An tal, neonazis ia viaja a la site, e autoriosas vole serti ce lo no atrae otras en la futur.
Osteraic ia es proprida par Deutxland nazi en 1938, e tra desenios ia presenta se como un de la vitimes prima de acel rena. Ma multe persones a acel tempo ia bonveni ia propri, nomida la Anschluss o "lia", e Osteraic ia comensa aora parla sur sua propre partisipa en crimines nazi.
@T La om la plu rica en Asia compete contra Amazon
@L aora_oji/2020/la_om_la_plu_rica_en_asia_compete_contra_amazon
====== La om la plu rica en Asia compete contra Amazon ======
2 janero 2020
Un corpora agregada, dirijeda par la om la plu rica en Asia, ia comensa un servi cual intende compete contra Amazon en Barat.
Reliance Industries de Mukesh Ambani ia dise ce lo ia invita persones a enscrive se per sua servi de trae comables. La compania vole usa sua funda vasta de clientes de telefoneta como un inisiador per la comersia nova.
La projeta nova pote deveni un defior major de la jigantes esistente de vende enlinia en la pais.
La servi JioMart dise ce lo ofre "traes rapida e sin paia" per sirca 50 mil benes comable. Diferente de sua competores, lo va lia botecas local a clientes par un ap, en loca de furni e trae mesma la benes.
La mercato de comables enlinia en Barat es en sua enfantia. On estima sua valua como sirca $870 milion per anio, e sola 0,15% de la popla usa tal servis. Ma analisores predise ce la campo va ave vendes anial de sirca $14,5 mil milion pos tre anios.
En Barat, ecomersia es aora dominada par Amazon e par Flipkart, cual es poseseda par Walmart. Ambos ia esperia difisiles en la anio pasada cuando la governa barati ia introdui leges nova cual preveni ce vendores enlinia esterna de la pais vende benes de sua propre sucompanias. Companias barati no es afetada par la regula nova.
Ambani, ci es la presidente de Reliance Industries, ave un ricia estimada de plu ca $60 mil milion.
La comersia sentral de sua grupo es la refina de petrolio, ma lo ave ance investis major en otra campos, incluinte vende e telecomunica. Par grandia, Reliance Jio es la numero du de la companias telecomunical de Barat, con plu ca 360 milion enscrivores.
@T La omisidor a un mascita zelandes es forte condenada
@L aora_oji/2020/la_omisidor_a_un_mascita_zelandes_es_forte_condenada
====== La omisidor a un mascita zelandes es forte condenada ======
27 agosto 2020
A la om ci ia mata 51 persones a du mascitas en Zeland Nova, un corte ia dona un condena de vive en prison sin posible de libria. La om es la person prima en la istoria de la pais ci reseta esta puni.
Brenton Tarrant, un australian de 29 anios, ia confesa la omiside de 51 persones, la omiside atentada de 40 plu persones, e un acusa de terorisme. La ataca en marto pasada, cual ia es direta difusada en la rede, ia xoca la mundo.
La judor ia descrive sua atas como "nonumana", ajuntante ce el ia "mostra no pardona". "Tua crimines es tan malvolente ce an si tu es detenida asta tua mori, lo no va sasia la esijes de puni," judor Cameron Mander ia dise oji en un corte en la site Christchurch.
En relata a la condena donada, Mander ia dise ce tal punis es reservada per "la omisides la plu mal", e ia nota: "Si no asi, alora cuando?"
A la dia final de un escuta de cuatro dias, Mander ia pasa cuasi un ora en remente Tarrant a cada person ci el ia mata o feri. El ia ajunta ce, an pos la declara de culpablia par Tarrant, la fusilor ia pare "nonrepentinte e nonvergoniante". Tra la tre dias pasada, el ia pare sin emosia en cuando 90 vitimes, lamentante o defiante, ia fronti el.
La condena sinifia ce Tarrant no va ave la posible de sorti de prison pos fa sola un parte de sua periodo intera de puni. Sua condena es ance la prima per terorisme en la istoria de Zeland Nova. La puni de mori no parteni a la sistem de justia en la pais.
Jacinda Ardern, ministro xef, oiante sur la condena, ia dise ce lo sinifia ce Tarrant va ave "no mal fama, no plataforma" e ce "nos va ave no causa per pensa a el, per vide el o per oia de el denova".
Pos la matas, Zeland Nova ia introdui leges plu sever sur fusiles.
@T La pandemica afeta la emplea de 4 entre 5 persones
@L aora_oji/2020/la_pandemica_afeta_la_emplea_de_4_entre_5_persones
====== La pandemica afeta la emplea de 4 entre 5 persones ======
8 april 2020
81% de la 3,3 mil milion laborores en la mundo esperia un clui completa o partal de sua laboreria. Restrinjes a la vive dial ia provoca la clui de multe companias e la desemplea de laborores, o tempora o permanente.
La Organiza Internasional de Labora (OIL), un departe de la Nasiones Unida, ia studia la efeto global.
Lo espeta ce la crise va elimina 6,7% de oras de labora tra la mundo en la cuatri du de esta anio. Esta es egal a si 195 milion laborores de tempo plen ta perde sua postos. On predise ce la rejion la plu grave afetada va es la nasiones arabi, con un redui par 8,1% de la oras de labora, egal a sinco milion laborores de tempo plen.
La OIL dise ce esta es "la crise la plu sever" pos la Gera Mundal Du, e ajunta ce la crese de nonemplea global en 2020 va depende xef de du fatores: como rapida la economia de la mundo va recovre en la dui du de la anio, e como eficas la politica va aumenta ce laborores es nesesada.
On ave un risca grande ce la cuantia de persones nonempleada en la mundo intera a la fini de la anio va es multe plu alta ca la projeta inisial par la OIL de 25 milion.
Campos variosa de la economia es afetada en modos diferente par la diminui subita de labora.
No surprendente, car la viaja es aora minima e la vive sosial es pausada, la industrias de oteles e de furni comes es entre los cual sufri la plu, como ance la campos de fabrica, de vende major, de botecas e de comersia de imobilas. En junta, estas representa cuasi 38% de la laborores global, car 1,25 mil milion persones ia es empleada en esta industrias tra la mundo.
La cuantia persental de persones en postos a risca grande varia notable: 43,2% es tal en la Americas e 42,1% en Europa e Asia sentral, rejiones con multe min laborores nonformal, ci es la majoria de la laborores en Africa, la nasiones arabi, la resta de Asia e la Mar Pasifica.
An si esta laborores fa un rol esensal en la economia, spesial en paises como Barat, Nijeria e Brasil, los no reseta la beneficas de laborores permanente, como protejes sosial.
@T La Pape a pascua urje no sede a teme
@L aora_oji/2020/la_pape_a_pascua_urje_no_sede_a_teme
====== La Pape a pascua urje no sede a teme ======
12 april 2020
Pape Fransisco ia urje ce persones no "sede a teme" sur la situa de coronavirus, conselante ce los deveni "mesajores de vive en un tempo de mori".
La xef de la Eglesa Catolica Roman ia parla a sua servi de vijila per pascua, en la sera de ier, en la Basilica de San Pedro cual ia es cuasi vacua. Membros de la comunia global de 1,3 mil milion persones catolica ia pote segue un difusa direta de la servi.
Un state de enclui aveni ancora tra Italia, un pais forte colpada par la pandemica. Giuseppe Conte, la ministro xef, ia loda la Pape per sua "jesti encargada" en oserva pascua con no congrega.
Cristianes tra la mundo selebra pascua, la festa la plu importante en la calendario cristian, an entre la regulas per sania cual ia lasa sentos de miliones restrinjeda a sua casas. Multe pretes presenta servis en eglesas sin congregas.
La Pape ia recorda la raconta biblial de un fem ci ia trova la tomba vacua de Jesus a la dia cuando, longo cristianes, el ia revive pos mori.
"Ance alora, on ia teme sur la futur e tota cual on va debe reconstrui. Un memoria dolosa, un espera taliada. Per los, como per nos, lo ia es la ora la plu oscur," el ia dise. "No teme, no sede a teme: esta es la mesaje de espera. Lo es dirijeda a nos oji."
Sola dudes o tredes persones ia es presente a sua servi, cual aveni normal ante miles de adorores. Alga partes tradisional ia es ance reduida, incluinte la batiza de convertidas.
A soldi, la Pape va presenta sua parla per la Soldi de Pascua en un rituo sin regardores fisical presente. En la pasada, esta parla ia es diseda a un fola grande en la Plaza de San Pedro.
@T La Parador Grande de Coral sufri sua blanci vasta tre
@L aora_oji/2020/la_parador_grande_de_coral_sufri_sua_blanci_vasta_tre
====== La Parador Grande de Coral sufri sua blanci vasta tre ======
26 marto 2020
En Australia, la Parador Grande de Coral ia esperia un plu blanci vasta, la aveni tre de esta en sola sinco anios. On teme ce la temperatur plu calda de la mar, spesial en febrero, ia causa un perde enorme de coral tra la sistem de resife la plu grande de mundo.
Siensistes ia deteta un blanci vasta, incluinte rejiones grande de dana forte. Ma los ia trova ance partes sana. Alga resifes importante per turisme en la norde e sentro ia es blancida a grado mera "moderada" a esta ves. Acel corales va recovre probable.
Du tris de la resife ia es danada par avenis simil en 2016 e 2017. La parola blanci refere a la espulsa de sua alges simbiosica par la polipos de coral. Esta destrui la corales e donce ance la abitadas per otra viventes de mar.
Esta sistem de resife, cual covre plu ca 2300 cilometres, es un loca de erita mundal, reconoseda per sua importa siensal e inerente.
En la anio pasada, Australia ia es obligada a basi sua projeta de sinco anios per la resife, de "mal" asta "multe mal", considerante la efeto de la cambias climal induida par umanas.
Oji, la Autoriosa per la Parce Maral de la Parador Grande de Coral ia dise ce sua sondas airal la plu resente ia mostra ce la grado de blanci varia de loca a loca en la resife. Ma lo ia ajunta ce plu partes ia es danada ca en la avenis presedente.
La temperatures global ia alti ja par sirca 1°C en la tempo pos la eda preindustrial. La Nasiones Unida ia averti ce si la temperatures va alti par 1,5°C, 90% de la corales de la mundo va es eliminada.
@T La parlamento cirgiz es atacada par protestores
@L aora_oji/2020/la_parlamento_cirgiz_es_atacada_par_protestores
====== La parlamento cirgiz es atacada par protestores ======
6 otobre 2020
En Bixcec, la capital de Cirgistan, protestores ia entra par forsa a la parlamento, esijente ce on cansela la resulta de un eleje parlamental resente.
Videos mostra persones en la ofisia de presidente Sooronbai Jeenbekov, e lansante paper de fenetras. Partes de la construida ia pare es ance en foco.
Esta segue un dia de scaramuxas contra la polisia, ci ia usa canones de acua e gas lacrimojen per sperde la fola. Un person ia mori en la tumulta e cuasi 600 ia es ferida.
On alega ce la conta de votas ia es manipulada en la eleje a soldi. Jeenbekov ia apela per un reveni a ordina, acusante ce "alga fortes political" atenta saisi la potia en modo nonlegal. El ia parla con xefes de partitos oposante e ia dise ce el va cansela la resulta si nesesada.
Pos la eleje, sola cuatro partitos de des-ses ia pasa la limina de 7% per entra a la parlamento. Tre de los es prosima liada a Jeenbekov.
Ier, la polisia ia usa granadas aturdinte per sperde miles de protestores en Plaza Ala-Too, ante segue los tra stradas visina. Ma plu tarda, la protestores ia repleni la plaza sentral ante ataca la construida parlamental, conoseda como la Casa Blanca.
Alga persones ia asede la compleso par trepa a traversa de sercas. Otras ia abri simple la portones xef. On ia vide fuma emerjinte de la construida a pos.
Los ia libri ance Almazbek Atambayev, la presidente pasada de la pais, ci ia es tenida par la Servi Nasional de Securia ante es litigada per crimines de froda.
On acusa ce grupos prosima a la presidente ia compra votas e ia menasa votores, lo cual oservores internasional descrive como "credable" e un "conserna seria".
A lundi, des-du partitos oposante ia declara juntada ce los no va reconose la resulta de la eleje. Plu tarda, la ofisia de Jeenbekov ia dise ce el va consenta oji con xefes de tota partitos cual ia compete, per atenta redui la tensa.
@T La parlamento italian vota per litiga Salvini
@L aora_oji/2020/la_parlamento_italian_vota_per_litiga_salvini
====== La parlamento italian vota per litiga Salvini ======
13 febrero 2020
La Senato de Italia ia vota per permete ce on litiga Matteo Salvini, un xef de la destra estrema, su acusas de deteni migrores a mar.
On acusa ce Salvini, ci ia servi la pais como sua ministro de internas a ante, ia deteni 116 persones en un barco prosima a Sisilia per cuasi un semana en agosto 2019, en modo nonlegal.
A mercurdi, un majoria de senatores ia vota ce la litiga de la xef de la Alia antimigral pote prosede.
Salvini ia dise a multe veses ce el desira apare en corte. El ia informa la Senato ce el vole "informa la mundo" ce sua politica sur migrores "ia salva deses de miles de vives".
"Me es asoluta calma e orgulosa de lo cual me ia fa," el ia dise plu tarda. "E me va fa denova lo direta cuando me reveni a governa."
Senatores de sua partito Alia ia sorti de la salon en loca de partisipa en la vota ier.
Su leges italian, ministros ave imunia parlamental per atas fada cuando los ia es en sua posto. Ma en la mense pasada, un comite ia vota per sutrae la imunia de Salvini, lasante la deside final a la Senato, la Salon Alta de parlamento, cual ia favore la sutrae de imunia par 152 votas contra 76.
Pos la anunsia de la conta, Salvini ia compara se a Donald Trump, ci ia es litigada en desembre e ia acusa sua oposores de usa la cortes per sumina sua susede elejal.
"Me, como Trump?" el ia scrive en Twitter. "El ave alga plu biliones e alga plu anios, ma lo es un mal abitua peti de la sinistra, sirculinte en la mundo, ce on atenta vinse par modos judal."
Si on ta litiga susedosa el, Salvini ta es punida par asta 15 anios en prison.
@T La persones mor par coronavirus esede 200 000
@L aora_oji/2020/la_persones_mor_par_coronavirus_esede_200_000
====== La persones mor par coronavirus esede 200 000 ======
26 april 2020
Plu ca 200 mil persones en la mundo ia mori aora par la maladia de la coronavirus nova, e on ave plu ca 2,8 milion casos confirmada.
Jornalistes governal en Xina ia reporta la mori prima conoseda en relata con la virus a 11 janero, e pos alora plu ca 210 paises e teritorios ia confirma casos.
Sinco paises -- la Statos Unida de America, Italia, Espania, Frans e la Rena Unida -- ia reporta aora plu ca 20 mil persones mor, ma la modos de conta varia multe.
En la SUA, un pais con popla grande, la cuantia ia pasa 50 mil. En la Rena Unida, la datos dial no inclui los ci mori a casa o en un cureria, donce la statistica vera va es serta plu alta. En Frans, moris en curerias es incluida, e sua cuantia de moris ia crese par 369 ier.
Beljia ave 6917 moris en un popla de 11,4 milion persones. Ma plu ca un dui de estas ia aveni en curerias per persones vea, e car la statistica refleta la casos suspetada, no la confirmadas, lo pare plu mal.
En la stato York Nova de la SUA, on ia rejistra plu ca 16 mil moris, e la governor ia permete ce farmasias nondependente fa probas per COVID-19. El va estende ance la probas per anticorpos a cuatro ospitales, comensante con laborores esensal.
Un orfaneria en Bielarus ia apela per aida governal, car des-tre de sua enfantes descapasida e des empleadas es infetada.
La Organiza Mundal de Sania dise ce lo es posible ce pasientes ci ia recovre de la virus no va es protejeda contra reinfeta. Plu temprana en esta semana, sua xef ia averti sur la cuantia cresente de casos de la maladia en Africa, Europa este, America Sentral e America Sude.
Singapor ia es inisial lodada per sua susede de conteni la virus, ma pos alora lo ia esperia un onda nova de infetas liada a locas industrial con dormerias densa abitada par laborores.
En otra partes de Asia, la autoriosas xines ia reporta ier no moris nova a la dia des en serie, e Corea Sude ia esperia sua dia du sin moris.
@T La pianiste Leon Fleisher mori con 92 anios
@L aora_oji/2020/la_pianiste_leon_fleisher_mori_con_92_anios
====== La pianiste Leon Fleisher mori con 92 anios ======
3 agosto 2020
Leon Fleisher, un pianiste famosa de la SUA, ia mori de canser con 92 anios.
Fleisher ia comensa como un enfante talentosa en la desenio de 1940, ma sua carera ia es disturbada par un feri a sua mano destra. Plu tarda, el ia foca sua labora a dirije orcestras, ensenia, e mestri la repertorio de mano sinistra per piano.
Pos tre desenios e un serie de terapias, el ia regania la usa de sua mano destra e ia flori denova.
Fleisher ia nase en San Francisco en 1928, a jenitores ci ia migra a la SUA de Europa este. El ia comensa aprende la piano cuando el ia ave cuatro anios, e en sua anio des el ia es invitada per studia su la pianiste clasical major Artur Schnabel.
Con eda de 16 anios, el ia debua con la Orcestra Filarmonial de New York e ia progresa a fama internasional e un carera produosa de rejistras.
Ma en 1964, el ia developa un disturba neurolojial, distonia focal, cual ia descapasi el de jua con sua mano destra. Pos un pausa de du anios, el ia ensenia a la Instituida Peabody en Baltimore en la norde-este de la SUA. El ia dirije ance orcestras e ia jua obras scriveda per sola la mano sinistra.
"Me ia veni subita a la comprende ce mea asosia con musica es plu grande ca como mera un pianiste de du manos," el ia dise en un intervisa en 2000.
El ia revade a jua par du manos en 1995 e ia rejistra du albumes alta lodada. Un de los, nomida Du manos, es ance la titulo de un filma documentinte, nominada per un premio Oscar, sur sua vive.
@T La polisia sudafrican xerca la matores de escavores
@L aora_oji/2020/la_polisia_sudafrican_xerca_la_matores_de_escavores
====== La polisia sudafrican xerca la matores de escavores ======
X febrero 2020
En Sudafrica, la polisia ia inisia un xerca per la matores de nove escavores nonlegal ci ia es bombardada con petras en un distrito ueste de Johannesburg.
On ia trova la corpos de la escavores de Lesotho sur la stradas de Matholeville, e un plu vitim grave ferida ia es rapida moveda a ospital.
Miles de escavores nonlegal, conoseda como zama-zamas ("los ci risca la acaso" en Zulu) labora en la pais, e scaramuxas violente aveni comun entre grupos oposada de laborores.
La ataca a venerdi ia segue a sirca 24 oras pos cuando polisiores ia invade la distrito. La polisia ia aresta 87 persones per interogas, ma on xerca ancora plu informas.
En un declara, Elias Mawela, comisionor provinsal de Gauteng, ia dise: "Nos condena esta ataca barbar e nos va serti ce nos move tera e sielo per fa ce la popla de Matholeville e Roodepoort senti secur. La suspetadas va es arestada pos tan poca tempo como posible, e la polisia no va dormi ante trova los."
La xef de polisia ia ajunta ce el ia clama ofisiores de otra unias en Johannesburg a partisipa en la xerca.
Sudafrica es un de la paises la plu violente de mundo. Longo datos governal, on ia rejistra plu ca 57 omisides a cada dia en la anio pasada.
@T La presidente de Arjentina proposa legali aborta
@L aora_oji/2020/la_presidente_de_arjentina_proposa_legali_aborta
====== La presidente de Arjentina proposa legali aborta ======
2 marto 2020
Presidente Alberto Fernández de Arjentina ia dise ce en la des dias seguente el va envia un projeta a la salon basa de parlamento per legali aborta.
Fernández, ci ia es inaugurada como presidente en desembre, ia descrive aborta como "un cosa de sania publica".
En Arjentina, aborta es permeteda sola en casos de viole, o si la sania de la madre es perilida. Lo es jeneral proibida tra America latina, estra en casos restrinjeda.
Si la projeta es asetada, Arjentina va deveni la pais la plu grande en la rejion cual legali aborta.
"La aborta aveni, lo es un fato," la presidente ia dise en sua parla anial prima a la Congresa. "Un stato debe proteje jeneral sua sitadanes e spesial la femes. E en la sentenio 21, cada sosia nesesa respeta la elejes individua de sua membros de deside libre sur sua corpos."
Fernández ia promete ance introdui un program per boni la educa sesal.
Un atenta presedente per cambia la lege en Arjeninta, do la popla es dominante catolica, ia fali. En 2018, un projeta per legali la aborta en la 14 semanas prima de ensintia ia es apena aprobada par la Congresa, ma plu tarda lo ia es rejetada par la Senato de la pais.
Diferente de la ves pasada, an tal, la presidente de la pais inisia la projeta.
La debate sur aborta en Arjentina ia recomensa en febrero de la anio pasada, cuando un vitim de viole con 11 anios ia pari par sesarea.
La xica, ci ia es violeda par un om de 65 anios, la acompanior de sua ava, ia solisita un aborta, ma la prosede ia es retardada a multe veses par causa de demandas sur la identia de la om, sua defendor.
Cuba, Uruguai e Guiana es presente la sola paises de America latina cual permete aborta en la semanas prima de ensintia.
An si alga paises permete lo en caso de viole o peril a la vive de la madre, lo es completa proibida en Salvador, Onduras, Nicaragua e Aiti. En Salvador, deses de femes ia es prisonida per la moris de sua fetos en casos sur cual los dise ce los ia sufri un aborta natural o un pari de bebe mor.
@T La presidente de Bolivia sede sua posiblia de reeleje
@L aora_oji/2020/la_presidente_de_bolivia_sede_sua_posiblia_de_reeleje
====== La presidente de Bolivia sede sua posiblia de reeleje ======
18 setembre 2020
Jeanine Áñez, la presidente tempora de Bolivia, ia abandona sua aspira en la eleje presidental cual va aveni a 18 otobre. El ia dise ce el no vole divide la votas e vide tal la reveni a potia de la partito sosialiste MAS de Evo Morales, presidente pasada.
La aspiror de MAS, Luis Arce, vinse ja en la sondas de opina, e Áñez ia ocupa la loca cuatro.
Áñez ia es induida en la anio pasada pos la resinia de Morales, ci ia parti alora de la pais entre alegas de froda elejal. Morales, ci abita presente en Arjentina, ia dise plu tarda ce el ia es espulsada en modo obligada par la polisia e la militar.
Morales ia servi como presidente bolivian tra cuasi 14 anios, de 2006 a 2019, pos gania tre elejes en serie.
En un mesaje video, Áñez ia dise: "Oji me pone a lado mea aspira de la presidentia de Bolivia, per benefica la democratia."
El ia esplica ce el ia deside abandona la corsa par causa de "la risca ce la vota va es divideda entre aspirores variosa, e ce la resulta de acel divide va es ce MAS fini vinsente".
"Si nos no uni, Morales va reveni. Si nos no uni, la democratia perde," el ia ajunta, sin revela cual aspiror el va suporta aora.
Un sonda, publicida en la plu temprana de esta semana, ia sujesta ce Luis Arce es capas de vinse en la ronda prima de la eleje.
La gida par Áñez ia es controversa de la comensa. La suportores de Morales dise ce Áñez ia deveni presidente pos la despone de Morales par un colpa militar, e ce Morales ave la direto de continua como la presidente.
@T La presidente de Cosovo es acusada de crimines de gera
@L aora_oji/2020/la_presidente_de_cosovo_es_acusada_de_crimines_de_gera
====== La presidente de Cosovo es acusada de crimines de gera ======
25 junio 2020
Hashim Thaçi, la presidente de Cosovo, es acusada de crimines de gera par un avocato internasional spesial en Den Haag en Nederland. On alega ce Thaçi e otras "es criminal culpable de cuasi sento omisides", tortura e desapares forsada.
La acusas covre la gera de nondepende de Cosovo contra Serbia, e es evaluada par un judor a la Juderia Spesialiste de Cosovo ci va deside esce la caso va vade a corte. Thaçi ia nega la acusas.
En sua anunsia, la Ofisia de Avocato Spesial (OAS) ia dise ce a 24 april lo ia dona a la Juderia un documento de des acusas "per la considera par la Corte". Lo no ia relasa detalias sur la crimines alegada de gera.
"La documento es sola un acusa," lo ia dise. "Lo es la resulta de un investiga longa, e refleta la determina par la OAS ce lo pote demostra tota la acusas sin duta esedente."
La declara ia dise ance ce Thaçi e un otra de la acusadas, la politiciste cosovan Kadri Veseli, ia vole "impedi e sumina" la labora par la OAS "en un atenta de serti ce los no fasa justia". Un judor precortal ave aora ses menses per deside esce la acusas va vade a corte.
Alegas de contrabanda de organos contra la Armada per Libri de Cosovo (la promove rebelante cual Thaçi ia gida) ia es prima poneda par un avocato pasada de crimines de gera a Den Haag, Carla del Ponte, en 2008. Un corte suportada par la Uni European ia es instituida per investiga la acusas.
La governa cosovan ia nega coler tota la alegas, descrivente los como "sin funda e malacusante" ante la publici de un reporta en 2010.
La gera de nondepende en 1998 e 1999 ia custa plu ca 10 mil vives e ia fini sola pos un campania airal par OTAN. Cosovo ia declara sua autonomia en 2008, ma Serbia ancora no reconose esta.
Thaçi ave potia en Cosovo de pos la fini de la gera, como presidente a la plu resente. El ia intende visita la Casa Blanca en Washington per discutes con la xefes de Serbia a saturdi, ma el ia cansela aora la viaja.
@T La presidente de Mali disolve la corte constitual
@L aora_oji/2020/la_presidente_de_mali_disolve_la_corte_constitual
====== La presidente de Mali disolve la corte constitual ======
12 julio 2020
Ibrahim Boubacar Keïta, presidente de Mali, ia anunsia la disolve de la corte constitual, en un atenta de calmi un turba par cual cuatro persones ia mori en protestas sur stradas a venerdi.
Keïta ia dise ce el no va tolera tal violentia. La corte es a la sentro de un controversa pos cansela la resultas de elejes parlamental en marto.
Un cuantia cresente de persones demanda per la resinia de la presidente, ci ia oteni un periodo du de sinco anios de presidentia en 2018. Sua oposores no gusta sua maneja de la problem durante de djihadistes, la crise economial e la elejes disputada.
Un alia nova oposante, gidada par imam Mahmoud Dicko, ia insiste per plu reformis pos rejeta ja comprometes de Keïta, incluinte la formi de un governa de unia.
Esta onda de protestas es la numero tre pos la comensa de junio. Malianes espera ce la nonstablia political no va benefica la djihadistes ci causa la violentia gravinte en la norde e sentro de la pais.
@T La presidente de Uganda pasea tra junglas
@L aora_oji/2020/la_presidente_de_uganda_pasea_tra_junglas
====== La presidente de Uganda pasea tra junglas ======
5 janero 2020
Presidente Yoweri Museveni de Uganda ia comensa un pasea de ses dias e 195 cilometres tra junglas. El segue la via de sua soldatos en 1986, cuando los ia saisi la potia pos la suverti de Idi Amin e Milton Obote.
Oposores ia rejeta la pasea como mera un promove ante la vota en la anio seguente, cuando on previde ce Museveni va aspira un periodo ses en sua posto.
El es defiada par Bobi Wine, un stela pasada de pop, ci presenta se como un campion de persones povre.
Museveni va fini sua pasea a 10 janero en la ueste de la pais, en la vila Birembo, la loca de un de la batalias la plu ferose entre sua rebelores e la soldatos de Obote.
Con 75 anios, Museveni es entre la xefes african la plu longa servinte.
Wine, de ci sua nom vera es Robert Kyagulanyi, ia comenta ce la pasea par la presidente es "perosa". "Mea consela es," el ia dise, "ce en loca de spende la mone de impostadas a tal viajas, Museveni debe sabe ce la tempo ia ariva cuando el va parti de potia. La tempo per engana viletanes ia pasa el."
Asuman Basalirwa, un parlamentor oposante, ia descrive la pasea como "un util de campanior".
"Ugandanes merita plu bon ca un presidente ci pasea tra un jungla," el ia dise. "La tempo spendeda debe es usada per otra problemes importante cual afeta la pais, spesial per projeta como el va transfere la potia."
@T La re de Espania critica la condui de sua padre
@L aora_oji/2020/la_re_de_espania_critica_la_condui_de_sua_padre
====== La re de Espania critica la condui de sua padre ======
25 desembre 2020
En sua parla de natal, Re Felipe 6 de Espania ia fa un refere velida a la scandales de sua padre autoescluida, disente ce normas moral es plu importante ca lias familial.
Lo ia es un comenta peti en un parla cual ia foca a la pandemica de coronavirus, sur cual la re ia grasia la persones ci labora en la campo de medica.
La re pasada, Juan Carlos, ia fuji a Abu Dhabi en agosto cuando alegas de froda ia crese. El ia nega malcondui, ma sua parti ia aumenta la debate sur la futur de la monarcia de la pais.
Ante la parla anial on ia divina multe esce la re va refere a la controversa. Longo la jornal El País, la popla ia tende senti ce el no va pote iniora la tema, an si nun ia es serta en cual modo el va presenta lo.
An si la monarca no ia nomi direta sua padre, multe ia senti ce la lia es clar.
"En 2014," el ia dise, "a mea indui a parlamento, me ia refere a la prinsipes moral e etical cual sitadanes espeta de nos. Prinsipes cual aplica a tota nos sin eseta, e cual domina supra tota consideras de cualce natur, personal o familial."
El ia reconose ce, a presente, multe familias lamenta o pasa natal en state separada. E el ia dise ce on nesesa un "labora grande nasional" per vinse la difisiles creada par covid.
Re Juan Carlos ia rena tra cuasi 40 anios ante transfere la potia a sua filo en 2014. La deside ia segue un investiga de froda pertinente a la sposo de sua fia e un vacanse controversa de xasa elefantes a media de un crise finansial en Espania.
En junio de esta anio, la Corte Suprema de la pais ia inisia un plu esplora sur la envolve alegada de la re pasada en un contrata de ferovia rapida en Arabia Saudi, cuando el ia perde sua imunia contra litiga pos sua renunsia de la trono.
En agosto, Juan Carlos ia fa la anunsia surprendente ce el parti de Espania. El ia nega tota la alegas contra se e ia ofre se per intervisa par litigores.
@T La reabri de la Taj Mahal pos ses menses de clui
@L aora_oji/2020/la_reabri_de_la_taj_mahal_pos_ses_menses_de_clui
====== La reabri de la Taj Mahal pos ses menses de clui ======
21 setembre 2020
La Taj Mahal ia reabri sua portes a visitores pos ses menses, la clui la plu longa en sua istoria.
La monumento ia clui en marto cuando Barat ia adota restrinjes sever per para la sperde de la coronavirus. Aora, lo va permete no plu ca 5000 visitores per dia, e metodos de securia contra la virus va es aumentada, con ce la cuantia de casos ateni un apico nova en la pais.
Esta mausoleo de marmo en la site Agra es un de la atraes xef de mundo per turistes. Ante la pandemica, asta 70 mil persones ia visita lo a cada dia.
Lo ia es construida en la sentenio 17 par la imperor mugul Xa Jahan per conteni la tomba de sua rea Mumtaz Mahal.
Sua clui la plu resente ia aveni tra corta en 1978 cuando Agra ia es inondada. Ante acel, la monumento ia clui per alga dias en 1971, a media de un gera entre Barat e Pacistan.
La compleso intera ia es ijienida ante cuando la portes ia abri a la ora oto de esta matina, e tota ofisiores ia porta covrefases e visieras.
On esamina la temperatur de cadun a la entra, e visitores debe usa modos dijital per compra biletas. Los debe obedi ance regulas de distantia sosial. On pote fa selfis o fotos de un person, ma fotos de grupos es proibida.
Barat ia reporta asta aora plu ca sinco milion casos de la virus, e la stato Uttar Pradesh, do la Taj Mahal es situada, ave la cuantia sinco de la plu altas en la pais.
La Taj es ensircada par jardines do visitores spende multe tempo en pasea e fotografi. Ma la mausoleo mesma es un spasio encluida, con cuasi no venti, e es donce un loca do la virus pote es fasil comunicada.
La monumento es tipal folida, con linias longa de turistes entrante e sortinte. Ma poca visitores ia espeta estra la portes a esta matina.
@T La regulas de debates presidental esuan va cambia
@L aora_oji/2020/la_regulas_de_debates_presidental_esuan_va_cambia
====== La regulas de debates presidental esuan va cambia ======
1 otobre 2020
La comision cual supravide debates presidental en la SUA dise ce lo va cambia la formato per serti ce la du encontras restante entre Donald Trump e Joe Biden es plu ordinada.
La anunsia ia segue un debate disputosa a martedi cual ia dejenera a scaramuxas e insultas. La tono e tatica de la debate ia es criticada tra la pais e la mundo.
Reatas a la debate ia es ance dominada par comentas cual Trump ia fa sur un grupo estrema destriste, neofaxiste e sola mas, nomida "Proud Boys" (Xicos Orgulosa), cual promove violentia political.
En la debate, la moderor ia demanda esce la presidente ta condena supremistes blanca e ta comanda ce los retira se de protestas. Cuando Trump ia demanda ci on vole ce el condena, Biden ia dise "Proud Boys" a du veses.
La presidente ia responde: "Proud Boys -- retira vos e stand by (= 'regarda sin ata' o cisa 'prepara vos'). Ma me va clari... algun debe fa alga cosa contra ativistes antifaxiste e la sinistra, car esta no es un problem destriste." Ier el ia atenta esplica esta comenta ambigua, ma sua oposores insiste ce el ia refusa condena supremistes blanca.
La Comision sur Debates Presidental ia declara formal ce la debate a martedi "ia clari ce on debe ajunta plu strutur a la formato de la debates restante per serti un discute plu ordinada de la temas".
Un metodo nova sujestada es ce on ta silenti la microfones si la aspirores ta atenta interompe lunlotra o la moderor. La ecipo de Trump ia critica ja la proposas.
En la debate prima, Trump ia interompe constante Biden, provocante un serie de replicas en cual ambos omes ia parla a la mesma tempo. Trump ia insulta direta la intelijentia de Biden, e Biden ia nomi Trump un bufon, brusca comandante el a silenti.
On reporta ce la ecipos de ambos lados va es informada sur la regulas nova, cual no va es negosiable.
@T La reiales de Nederland es criticada sur sua vacanse
@L aora_oji/2020/la_reiales_de_nederland_es_criticada_sur_sua_vacanse
====== La reiales de Nederland es criticada sur sua vacanse ======
18 otobre 2020
La familia reial de Nederland ia reveni a la pais pos un vacanse cual ia dura tra sola un dia, pos un reata negativa par la popla.
Re Willem-Alexander e Rea Maxima ia vola a la sol elinica a venerdi, ma ia reveni en la sera de ier. Los ia parti en cuando on ia introdui regulas nova de isoli a casa contra la coronavirus, e an si la reiales ia desobedi no regulas, los ia dise ce los ia es afetada par critica intensa.
Un declara par la re e rea ia dise: "Nos vole lasa no duta sur esta: per controla la virus COVID-19, lo es nesesada ce on segue la regulas. La debate sur nosa vacanse no contribui a acel."
On ia ave parente alga confusa sur ci en la governa ia sabe sur la viaja e esce conselas ia es donada.
La monarcia nederlandes ave no rol formal en la maneja dial de la pais. Ma la ministreria de jenerales, dirijeda par Mark Rutte, la ministro xef, es encargada sur lo cual la monarcia dise e fa. Per esta razona, alga parlamentores urje ce Rutte esplica perce el no ia consela la reiales a cansela sua vacanse.
"Si Rutte ia ta dise ce esta es un mal idea, on pote suposa ce la re ia ta cambia sua intendes," un parlamentor de la Partito de Labora ia comenta. La xef de GroenLinks, partito verde, ia descrive la viaja como "un era de judi" e ia dise ce abandona lo ia es "la sola deside coreta".
La conta dial de infetas par coronavirus crese ancora en Nederland. Ier, on ia rejistra plu ca 8000 casos nova a la ves prima pos la apare de la maladia en la pais. On ia comanda ce bares, restorantes e caferias de canaba clui per cuatro semanas.
Esta no es la ves prima cuando la duple reial ia es criticada par sua condui. En agosto, fotos ia es publicida en cual los ia iniora regulas de distantia sosial con un posesor de restorante en un otra viaja a Elas.
On esamina aora la bujeta anial de la familia reial entre un presa cresente par legores oposante.
@T La Rena Unida sorti de la Uni European
@L aora_oji/2020/la_rena_unida_sorti_de_la_uni_european
====== La Rena Unida sorti de la Uni European ======
31 janero 2020
Boris Johnson, ministro xef de la Rena Unida, va saluta oji "la comensa de un eda nova", en la dia cuando la pais va sorti de la Uni European pos 47 anios.
En un parla cual va es televisada a 22:00 -- sesdes minutos ante la ora formal de la sorti -- el dise ce Brexit "no es un fini ma un comensa", e descrive la rompe de lias con la otra 27 nasiones de la UE como "un momento vera de renovi e cambia nasional".
Poca va cambia subita, ma Britan entra a un periodo de traversa. La plu de la leges de la UE va continua es enforsada, incluinte la libria personal de move, asta la fini de desembre, cuando la pais intende ave un acorda permanente sur comersia libre con la Uni.
Brexit ia es orijinal projetada per 29 marto de la anio pasada, ma ia es retardada a plu ca un ves cuando la parlamento brites ia rejeta la acorda de retira negosiada entre la UE e Theresa May, ministro xef pasada.
Johnson ia susede pasa sua propre acorda tra la parlamento pos gania un eleje jeneral en desembre con un majoria grande de parlamentores conservaliste, prometente "reali Brexit". Esta ia fini plu ca tre anios de debate political pos la referendo de 2016 en cual 52% ia espresa sua desira per sorti de Europa.
Michel Barnier, la negosior xef de la UE, ia dise ce sua pensas es oji con "la miliones de sitadanes brites ci es triste, como nos es triste. Nos va resta amis, aliadas e asosiores. Nos nesesa reconstrui. Me crede ce nos es plu forte en junta."
El ia ajunta ce el ia atenta comprende la fenomeno Brexit, e ce el opina ce lo mostra ce la Uni European debe escuta plu prosima sua abitores.
En Bruxelles, la banderas brites va es sutraeda de la instituidas UE. On va consinia un bandera a un museo.
Ier, la Plaza Grande de la site ia es luminada en roja, blanca e blu -- la colores de acel bandera -- per representa la aminia continuante entre la Rena e la paises unida.
@T La siensiste nucleal xef de Iran es asasinada
@L aora_oji/2020/la_siensiste_nucleal_xef_de_iran_es_asasinada
====== La siensiste nucleal xef de Iran es asasinada ======
28 novembre 2020
Iran ia promete venja contra la mata de sua siensiste nucleal xef, Mohsen Fakhrizadeh, ci ia es asasinada prosima a Tehran ier. El ia mori en ospital pos un ataca en Absard, en la rejion Damavand.
Hossein Dehghan, conselor militar de Aiatola Ali Khamenei ia promete "colpa" la esecutores como tona.
Departes de securia ueste crede ce Fakhrizadeh ia maneja un projeta secreta de armas nucleal, ma Iran insiste ce sua program nucleal ave intendes pasosa.
Mohammad Javad Zarif, ministro de esternas, ia urje la comunia internasional a "condena esta ata de teror de stato".
La ambasador irani de la Nasiones Unida, Majid Takht Ravanchi, ia dise ce la mata es un viole clar de la lege internasional, desiniada per crea caos en la rejion.
Zarif ia culpa Israel per la ataca, disente ce lo mostra "indicas grave de rol israeli". La nom de Fakhrizadeh ia es sitada en un presenta par Benjamin Netanyahu, ministro xef de Israel, sur la program nucleal de Iran en april 2018.
Israel ia fa no comenta sur la novas de la asasina.
Fakhrizadeh ia es la siensiste nucleal irani la plu famosa e un ofisior major de la Corpo de Gardores de la Revolui Muslim. En 2015, la jornal New York Times ia compara el a Robert Oppenheimer, la fisiciste ci ia dirije la Projeta Manhattan cual ia produi la armas atomal prima en la Gera Mundal Du.
On dise ce Fakhrizadeh, un profesor de fisica, ia gida Projeta Amad, un program secreta alegada cual ia es instituida en 1989 per rexerca la posiblia de construi un bomba nucleal. La projeta ia es cluida en 2003, longo la Ajenteria Internasional de Enerjia Atomal, ma Netanyahu ia dise ce documentos trovada en 2018 mostra ce Fakhrizadeh ia gida un program cual ia continua secreta la labora de Projeta Amad.
Suspetas ce Iran usa la program como un scermo per developa un bomba nucleal ia provoca la Uni European, la Statos Unida e la Nasiones Unida a pone punis economial sever contra la pais en 2010.
@T La situa malinte de coronavirus en Europa
@L aora_oji/2020/la_situa_malinte_de_coronavirus_en_europa
====== La situa malinte de coronavirus en Europa ======
28 otobre 2020
La cuantia dial de moris par coronavirus en Europa ia crese par cuasi 40% en compara con la semana presedente.
Un portavose per la Organiza Mundal de Sania ia dise ce Frans, Espania, la Rena Unida, Nederland e Rusia representa la majoria de casos. El ia averti ce, an con manejas plu bon de sua capasia, departes de cura intensa en ospitales comensa aora pleni con persones multe malada.
Rusia ia reporta un recordo dial de 320 moris, levante sua soma a 26 589. La pais ave la cuantia cuatro la plu alta de casos pos la SUA, Barat e Brasil. Lo ia rejistra 16 550 plu infetas ier, e persones debe covre aora sua fas en tota locas potensial folida.
On ia vide un crese agu ance en Italia, con 221 moris anunsiada ier. An si la cuantia de infetas ia crese ala asta cuasi 22 000, ofisiores ia dise ce on ia aumenta notable la sistem de probas. An tal, protestas contra restrinjes ia aveni en Torino e Milano en la sera de lundi.
Ier, la cuantia de persones mor en Osteraic ia pasa 1000. E en Beljia, on ia demanda ce dotores continua labora an si los ave la virus, car la sistem de sania es en peril de deveni inondada.
En Frans, la governa discute restrinjes plu sever, incluinte la estende de proibis de sorti ja esistente en Paris e otra sites. Ier la pais ia reporta 33 417 casos nova e 523 moris en la 24 oras presedente - sua cuantia la plu alta pos april.
Beljia ia esperia un crese de ospitalis par 88%, e ofisiores averti ce un dui de la letos de cura intensa es ja ocupada. Slovensco va comensa proba sua popla intera a esta finisemana per atenta evita restrinjes plu sever.
Txesco ia introdui un proibi de sorti a note per un semana. On no pote parti de sua casa entre 21:00 e 5:00 estra per viaja a e de labora, o per razonas medical o un pico de otra esetas.
Rexercores a Imperial College en London dise ce la imunia contra coronavirus resta cisa tra sola alga menses pos infeta. Los ia trova ce la cuantia de persones positiva mostrada con anticorpos ia cade par sirca un cuatri entre junio e setembre, e la redui la plu profonda ia es en persones con plu ca 65 anios.
@T La SUA ave plu casos de coronavirus ca cualce otra pais
@L aora_oji/2020/la_sua_ave_plu_casos_de_coronavirus_ca_cualce_otra_pais
====== La SUA ave plu casos de coronavirus ca cualce otra pais ======
27 marto 2020
La SUA ave aora plu casos confirmada de coronavirus ca cualce otra pais, con plu ca 85 mil probas positiva. Longo la statistica la plu resente colieda par la Universia John Hopkins, la SUA ia pasa Xina (con 81 782 casos) e Italia (80 589).
Ma con cuasi 1300 moris relatada a COVID-19, la cuantia de mores en la SUA es ancora min ca en Xina (3291) e Italia (8215).
Esta ia aveni corta pos cuando la presidente Donald Trump ia predise ce la SUA va revade "sufisinte rapida" a labora. Cuando on ia demanda el sur la numeros la plu resente en la posmedia ier, Trump ia dise ce los apare "par causa de la cuantia de proba cual nos fa".
Mike Pence, vispresidente, ia dise ce probas de coronavirus es aora disponable en tota 50 statos, e ce plu ca 552 mil probas ia es fada tra la pais.
Entretempo, la rejion de Italia la plu grave afetada par la virus ia esperia un redui agu de la cuantia de moris e infetas. Ma on ave aora un ansia cresente ce la sude de la pais va deveni la punto calda seguente.
Numeros resente de Lombardia en la norde ia sujesta ce la epidemica es cisa lentinte a sua episentro. Ma rejiones sude, plu povre, esperia aora un alti subita de moris, creante un teme ce la servis medical va es inondada.
Un tende per cuatro dias de un redui pico de la cuantia de casos ia fini ier, cuando la cuantias e de infetas e de moris ia crese en compara con la periodo presedente de 24 oras.
Italia es la pais la plu grave afetada en Europa. Cuasi tota es ja cluida tra plu ca du semanas e persones debe resta sempre a casa.
@T La SUA mata la jeneral xef de Iran par ataca airal
@L aora_oji/2020/la_sua_mata_la_jeneral_xef_de_iran_par_ataca_airal
====== La SUA mata la jeneral xef de Iran par ataca airal ======
3 janero 2020
La comandor militar la plu potiosa de Iran, Jeneral Qasem Soleimani, ia es matada par un ataca airal par la SUA en Irac.
Esta om de 62 anios ia gida operas militar irani en Asia sude-ueste como xef de la Forte Qods spesialida de Iran. El ia es matada a la airoporto de Baghdad, a lado de militiores local suportada par Iran, en la parte temprana de oji, en un ataca comandada par Donald Trump, presidente de la SUA.
La mata de Soleimani indica un aumenta major de tensa entre Washington e Tehran.
Su sua comanda, Iran ia forti Hezbollah en Lubnan e otra grupos militariste proirani, ia crese la presentia militar de Iran en Irac e Suria, e ia dirije la ataca par Suria contra grupos rebelante en la gera interna longa de la pais.
La xef suprema de Iran, Aiatola Ali Khamenei, ia dise ce "venja sever veni a la criminores" ci ia fa la ataca. El ia anunsia ance tre dias de lamenta nasional.
Soleimani ia es comun regardada como la person du de la plu potiosas en Iran, pos sola Khamenei. Sua Forte Qods, un unia elite de la Gardores de la Revolui Irani, ia reporta direta a la aiatola, e el ia es videda como un eroe nasional.
Ma la SUA ia descrive la comandor e la Forte Qods como teroristes, e culpa los per la moris de sentos de empleadas esuan.
Trump, ci ia es en Florida cuando la ataca ia aveni, ia tuita un imaje de la bandera de la Statos Unida a tempo corta pos la anunsia.
Un declara par la Pentagon ia dise ce Soleimani "ia developa ativa projetas per ataca diplomatas esuan e membros de la servis militar en Irac e tra la rejion intera". "Esta ataca ia es intendeda per impedi projetas futur de ataca irani," lo ia ajunta.
Entretempo, la custa global de petrolio ia asende par plu ca 4%, seguente la ataca.
@T La Taj Mahal clui per redui la sperde de la virus
@L aora_oji/2020/la_taj_mahal_clui_per_redui_la_sperde_de_la_virus
====== La Taj Mahal clui per redui la sperde de la virus ======
17 marto 2020
En Barat, la Taj Mahal, monumento iconin, ia clui per para la sperde de la coronavirus. La ministreria de cultur ia dise ce deses de miles de persones visita la "monumento de ama" a cada dia e ce lo es "esensal ce on clui lo".
La Taj Mahal es un de la atraes major de mundo per turistes, e asta 70 mil persones visita lo a cada dia.
Barat ave 114 casos reportada de COVID-19 e tre moris relatada. Lo ia proba 6000 persones asta aora.
Alga otra monumentos, museos e construidas vea importante en la pais es ance cluida per aida ce la popla resta sana. Prahlad Patel, ministro de cultur, ia dise ce la monumentos va resta cluida asta 31 marto e on va reconsidera la deside pos la periodo de clui.
Barat ia fa alga pasos per para la sperde de la maladia. Lo ia suspende cuasi tota visas per un mense. Lo ia suspende la permete de viaja sin visa a sua sitadanes ultramar asta 15 april, e los a ci lo permete la entra pote es isolida per du semanas.
Scolas, universias e sinemas en la plu de statos es cluida asta 31 marto. E la Liga Prima Indian, cual envolve cuasi 60 juores stranjer e ia es intendeda per un comensa a 29 marto, es posponeda asta 15 april.
La ministreria de sania de Barat dise ce lo ia es entre la paises prima de mundo cual ia prepara per un eruta de esta maladia respiral, e ia rejeta alegas ce lo ia proba tro lenta la casos suspetada.
Espertas dise ce Barat es aora en un fase critical en cual lo nesesa para la transmetes tra sua comunias. Los dise ance ce la pais nesesa comensa proba miles de persones a cada dia per preveni eficas la transmete.
La governa dise ce lo es preparada e ia permete aora an probas fada par companias privata.
@T La temperatur la plu alta sur la Tera
@L aora_oji/2020/la_temperatur_la_plu_alta_sur_la_tera
====== La temperatur la plu alta sur la Tera ======
18 agosto 2020
Lo cual pare es la temperatur natural la plu alta rejistrada sur la Tera ia es atenida en la Parce Nasional de la Vale de Moria en California. La mesura de 54,4°C es aora esaminada par la Servi Meteorolojial Nasional de la SUA.
Esta aveni a media de un onda de caldia a la costa ueste de la pais, cual ia causa du dias de perde de eletrica en California, pos la malfunsiona de un compleso eletrical a saturdi.
La temperatur recordo ia es rejistrada en la vileta Furnace Creek a soldi.
Ante esta, la temperatur la plu alta de rejistra fidable sur la Tera ia es 54,0°C, ance en la Vale de Moria, en 2013.
On disputa un mesura plu alta, 56,6°C, a un sentenio a ante en la mesma loca. Alga meteorolojistes moderna crede ce acel mesura ia es erante, como alga otra temperatures estrema cual ia es rejistrada en acel estate.
La onda de caldia presente estende de Arizona en la sude-ueste, longo la costa, asta la stato Washington en la norde-ueste.
On predise ce lo va ateni sua culmina oji, ante cuando la temperatur va comensa cade plu tarda en esta semana. An tal, la caldia estrema va continua per des plu dias a la min.
Car tan multe de la eletrica de la rejion depende de enerjia de sol e venta, e car persones usa sua eletrica per frescadores de aira, en tal temperatures la rede eletrical supralabora e risca malfunsiona intera.
Per maneja la esijes de California per eletrica e per preveni un rompe completa de servi, on fa rompes tempora e preanunsiada per controla e conserva enerjia.
@T La Ualabis canta la imno australian en lingua nativa
@L aora_oji/2020/la_ualabis_canta_la_imno_australian_en_lingua_nativa
====== La Ualabis canta la imno australian en lingua nativa ======
6 desembre 2020
La ecipo de rugbi de Australia ia es lodada pos canta un varia de la imno nasional de la pais en un lingua de popla nativa.
La Ualabis ia canta "Avansa Australia Justa" en eora e engles ante sua max contra Arjentina ier.
Esta es la ves prima cuando un varia bilingual de la imno ia es presentada a un aveni internasional. Olivia Fox ia canta lo en la lingua de la eoras, un clan de rejion costal de Sydney, do la max ia aveni.
La juores, en sua camisas nativa decorada, ia canta con ambos varias. Los ia pratica con Fox a ante per aprende la parolas e per pote canta fidable lo.
Richard Coleman, atleta australian, ia comenta: "Acel es un imno nasional noncredable. Como un atleta, sempre cuando la imno australian es presentada, lo debe es en esta modo. Me ta ama gania un medalia de oro e oia esta forte e orgulosa juada, tan tan inspirante."
On debate ja longa la imno nasional, sur cual on alega ce sua testo es nonincluinte.
Un organiza nomida Projeta Reconose en Imno campania per ajustas a la testo afin lo representa plu bon la poplas nativa e la valuas de Australia.
En 2018, un xica de nove anios, Harper Nielsen, ia crea un controversa pos refusa sta per la imno nasional. El ia protesta contra razisme institual, acusante ce la canta iniora la poplas prima.
"Cuando lo dise 'nos es joven', lo rejeta completa la australianes nativa ci ia es asi ante nos," el ia dise alora.
@T La UE menasa Turcia sur condui en la Mediteraneo
@L aora_oji/2020/la_ue_menasa_turcia_sur_condui_en_la_mediteraneo
====== La UE menasa Turcia sur condui en la Mediteraneo ======
2 otobre 2020
La Uni European dise ce lo considera puni Turcia par causa de "provocas e presas" en un disputa con Elas sur recursos de enerjia de fronteras de mar.
Parlante en esta matina a un consenta de xefes UE en Bruxelles, Ursula von der Leyen, presidente de la Comision European, ia urje ce Ankara "asteni de atas uniladal" en la este de la Mediteraneo.
Plu temprana, Turcia e Elas ia crea un linia de comunica direta militar per atenta redui la risca de scaramuxas en la rejion.
La tensa ia crese en la parte pasada de esta anio, cuando Turcia ia envia un barcon a un rejion disputada per xerca locas posible rica con petrolio e gas.
Von der Leyen ia informa jornalistes ce la UE desira "un relata positiva e construinte con Turcia, cual ta es ance multe beneficante a Ankara".
"Ma lo va funsiona sola si la provocas e presas va sesa," el ia ajunta. "Donce nos espeta ce Turcia de aora va asteni de atas uniladal. En caso de tal atas renovida par Ankara, la UE va usa tota sua metodos e posibles disponable. Nos ave un caxa de utiles cual nos pote aplica instante."
Pos sua consenta de note tarda, membros de la Uni ia acorda reconsidera la condui de Turcia en desembre e introdui punis contra la pais si nesesada.
La presidente de la Consilio European, Charles Michel, ia dise ce la UE ofre a Turcia relatas plu prosima en comersia e otra campos, ma reteni la menasa de punis per caso ce la tensa mediteranean no va desintensi.
La relata entre la Uni European e Turcia es frajil tra multe tempo. Turcia aspira longa deveni un membro de la Uni, ma sin progresa. Xefes de la UE ia critica la istoria turces sur diretos umana e leges universal, spesial pos un colpa de stato cual ia fali en 2016.
An con la problemes, Turcia resta un asosior importante per la UE. Lo ospita miliones de persones migrante e ia negosia un acorda con la Uni per limita cuanto ariva en Elas.
Ambos de Elas e Turcia es membros de OTAN, ma ave un istoria de disputas de frontera e reclamas competente sur recursos de mar.
@T La Vatican aresta un om par causa de un imobila lusosa
@L aora_oji/2020/la_vatican_aresta_un_om_par_causa_de_un_imobila_lusosa
====== La Vatican aresta un om par causa de un imobila lusosa ======
7 junio 2020
La polisia vatican ia aresta un comersior italian ci ia aida la Vatican a compra un imobila usosa en London en un acorda controversa.
Gianluigi Torzi es acusada de estorse, fura, froda grave e blanci de mone en relata con esta acorda de 200 milion dolares. El es aora tenida en un caserna de polisia e va es prisonida per asta 12 anios si on judi ce el es culpable.
La compra de la construida en 2018 es presente investigada.
Un tore de apartes en Chelsea, un distrito superior de London, ia es comprada con mone de la eglesa par la Secretoria de Stato, la corpo cual maneja la funsionas diplomata e political de la Vatican. Ma on alega ce la custa ia es multe inflada.
En otobre, la polisia ia invade la ofisia de la Secretoria e ia saisi documentos e computadores, e la Vatican ia suspende sinco ofisiores, escluinte los de la site-stato.
Pape Fransisco ia sujesta ce partes de la acorda ia es dejenerada, disente: "Los ia fa cosas cual no pare limpa."
Un nota interna de la Vatican sur la investiga de la sinco ofisiores ia es esposada en jornales, e pos esta la xef de polisia vatican ia resinia. En febrero, la polisia ia saisi computadores e documentos parteninte a Alberto Perlasca, un ofisior finansial major.
La Secretoria de Stato controla miliones de dolares donada par catolicas tra la mundo.
Plu temprana en esta semana, la Pape ia pone un lege nova, intendeda per aumenta la transparentia de acordas finansial par la Vatican. An tal, en la anio pasada, el ia defende la pratica de compra imobilas con mone de la eglesa, indicante ce lo es un bon investi.
La eglesa catolica recovre ancora pos un serie de scandales sur la asconde de maltrata sesal par alga de sua pretes.
@T La Vatican desecreti documentos sur Pio 12
@L aora_oji/2020/la_vatican_desecreti_documentos_sur_pio_12
====== La Vatican desecreti documentos sur Pio 12 ======
3 marto 2020
La Vatican ia abri sua arcivos sur la papia de Pio 12 en la Gera Mundal Du. Esta informa ia es secretida tra desenios pos acusas ce el ia deside iniora la Olocausto.
Criticores dise ce Pio 12, nomida "la pape de Hitler" a veses, ia sabe ce Deutxland nazi omiside iudis ma ia fali responde. El ia es la pape de 1939 a 1958. Ma la Vatican dise ce el ia labora privata per salva iudis.
Deses de eruditas prepara studia la multe documentos.
A un anio ante aora, Pape Fransisco ia deside abri la arcivos sur esta figur controversa de la eglesa catolica. "La eglesa no teme la istoria," el ia dise a rexercores de la Vatican.
El ia ajunta ce la papia de Pio 12 ia es marcada par "momentos de difisiles grave, desides tormentada de sajia umana e cristian cual ia pote pare a algas como timidia".
La pajeria ofisial de la Vatican dise ce on ave un cuantia vasta de materias, e multe es aora en forma dijital. Bispo Sergio Pagano, prefeto de la Arcivos Apostolal de la Vatican, ia dise ce la documentos de la Gera Mundal Du estende a miliones de pajes, divideda en 121 partes longo la temas.
Tota la spasio en la consulteria es ja reservada per la resta de la anio. La eruditas inclui algas de la Museo de Recorda de Olocausto en Washington e Hubert Wolf, un istoriste famosa deutx ci spesiali sur la papia de Pio 12.
On crede ce la controversia sur esta pape ia preveni sua alti a santia.
Intervenis par la eglesa catolica ia salva miles de persones iudi de la Olocausto, como la sentro de rexerca Yad Vashem en Israel reconose. Esta laboras ia es riscosa e noncoordinada, e los ia es suprapasada par la cuantia de crimines nazi, incluinte la omiside de sirca ses milion iudis.
En la desenio de 1920, Cardinal Eugenio Pacelli, alora como la ambasador de la Seja Santa en Deutxland, ia atesta la asende de nazisme, ante revade a la Vatican e deveni la pape.
On ave documentos jesuita enviada a la pape per informa el sur campas nazi de consentra, ma istoristes ancora no ia vide cualce de sua respondes. Wolf dise ce el desira ance vide leteras cual la pape ia reseta de sua ambasadores en la gera.
La periodo direta pos la gera fasina eruditas car governas ueste ia vide la Vatican como un aliada major contra la influe comuniste, a la comensa de la Gera Fria. Istoristes ave ancora multe demandas sur la "linia de rata" malfamosa -- un via de evade organizada par alga eglesores catolica ci ia aida criminores nazi a fuji a America Sude pos la gera.
@T Legores esuan discute la problemes de reconose de fas
@L aora_oji/2020/legores_esuan_discute_la_problemes_de_reconose_de_fas
====== Legores esuan discute la problemes de reconose de fas ======
16 janero 2020
A un escuta ier en la Statos Unida, politicistes ia espresa sua ansia sur la esatia e la usa cresente de programes de reconose de fas.
La tecnolojia es developada par companias incluinte Amazon, Facebook, Google e Microsoft, e lo deveni plu usada par enforsores de lege tra la mundo. Ma alga sistemes de reconose de fas malidentifia femes e persones de color.
Parlamentores en la SUA labora sur un proposa per un lege cual ta limita la usa de esta tecnolojia, e alga organizas per libria sivil e privatia ia leva demandas sur la modo en cual on colie la datos per esta programes.
Plu, alga espertas averti sur la manera en cual on usa datos de fas, controlada par governas e companias privata.
"Me opina ce nos debe pausa la tecnolojia per permete ce la resta de lo avansa," Meredeith Whittaker ia dise, codirijor de la Instituida AI Now (Inteleto Artifis Aora) de la Universia de New York, e un de la atestores a la escuta.
El razona ce on nesesa regulas per acorda la reconose de fas. Presente en la SUA, on dona implicada sua acorda si on pote vide la camera. Whittaker ia dise ce nos no debe permete ce corporas segue sieca sua interesas, fretante per ajunta esta tecnolojia a sua sistemes, sin securis.
Companias nuri sua programes de reconose de fas con datos colieda de fontes diversa, incluinte video vijilante e redes de comparti fotos como Flickr e Facebook. Ance filtros de fotos, como los en Instagram e Snapchat, es usable per clari detalias de fases.
La polisia esuan indica sua susedes con esta tecnolojia per identifia enfantes mancante e criminores. Ma eras statistical en la colie de fases studiada par la algoritmos ia causa alga malidentifias.
A multe veses, persones acusada de crimines par reconose de fas no es informada ce esta tecnolojia ia es usada. On ave ance un ansia ce governas autoritar ta pote usa la tecnica per monitori sitadanes. Xina ave ja un tal sistem estendeda, e la reconose automata de fas fasili trasa la moves de un person.
An si la tecnolojia no es sin problemes a presente, alga legores esuan ia demanda sur lo cual va aveni cuando lo deveni plu perfeta. Mark Meadows, congresor de Carolina Norde, ia comenta: "Si nos foca sola a la fato ce on fa eras con reconose de fas, nos fali vide la disputa xef."
@T Letos vacua comensa manca en ospitales malagasi
@L aora_oji/2020/letos_vacua_comensa_manca_en_ospitales_malagasi
====== Letos vacua comensa manca en ospitales malagasi ======
23 julio 2020
Ospitales en Madagasicara ia averti ce los es inondada pos un apico subita en la cuantia de casos de coronavirus. On ia confirma sur la isola ier 614 casos nova, levante la soma a 8162, con 69 moris.
Ma la presidente de la pais promove un bevida erbal per trata la maladia. Alga paises african ia comanda un furni de esta prepara, nomida Covid-Organics. La Organiza de Sania Mundal (OSM) dise ce on ave no indica ce la bevida es efetosa.
En la capital, Antananarivo, ospitales ia averti ce letos vacua comensa manca. La dirijor de un ospital ia dise: "Nos aseta aora sola casos grave." Dirijores a du otra ospitales ia comenta ce ance los es inondada.
A lundi, la ministro per sania ia scrive un letera publica a ajenterias de aida, demandante per cosas como pacos de proba, respiradores e aparatos protejente per laborores de sania. Ma un portavose de la governa ia dise ce la ministro no ia ave la direto de fa acel solisita.
Plu temprana en esta mense, presidente Andry Rajoelina ia repone regulas encluinte a la rejion sentral asta 26 julio, permetente ce sola un person sorti de cada casa per oteni comedas e medisin.
Rajoelina ia atrae la atende global per sua promove de la bevida Covid-Organics, produida de artemisia -- la fonte de un ingrediente usada en un trata de malaria -- e otra plantas malagasi.
Ma la OSM ia averti contra ce persones usa tal remedias nonprobada, disente ce africanes merita asede medisines cual ia pasa tra probas conveninte, an si los deriva de tratas tradisional.
@T Libros furada su la solo de un casa romanian
@L aora_oji/2020/libros_furada_su_la_solo_de_un_casa_romanian
====== Libros furada su la solo de un casa romanian ======
19 setembre 2020
Sirca 200 libros "nonrecambiable" con valua de plu ca $3,2 milion, furada de un beneria en London, ia es trovada sur la solo de un casa en la campania de Romania.
La obras inclui editas prima de Galileo e Isaac Newton.
Los ia es prendeda par furores en janero 2017, ci ia rapela a en la beneria tra la teto. La polisia ia dise ce la omes parteni a un gang romanian de crimin organizada, cual ia fa ja un serie de furas de valua alta en benerias tra la Rena Unida.
Polisiores ia descovre la libros enterada a mercurdi, en xerca tra un casa prosima a Neamț en la norde-este de Romania. La trova segue invades polisial a 45 otra adirijes tra la Rena Unida, Romania e Italia en junio de la anio pasada.
Des-tre persones es acusada, de ci des-du ia declara ja sua culpablia.
La tesoros inclui varias rara de Dante e desinias par Francisco de Goya, depintor espaniol de la sentenios 18 e 19, como ance la libros par Galileo e Newton de la sentenios 16 e 17.
Un portavose per la polisia de London ia comenta: "Esta libros es estrema valuosa, ma plu importante, los es nonrecambiable e ave un importa grande per la erita cultural internasional."
Cuando la obras ia es furada, los ia reposa en un beneria, espetante es transportada a la SUA per un subasta de libros rara en Las Vegas.
La furores ia abri un buco en la teto de la beneria en Feltham, prosima a la airoporto Heathrow, e ia rapela tra 12 metres a la solo, evitante deteta par sensadores de move. Los ia spende alga oras en foraje tra sacos diversa ante usa la mesma via per parti con sua furadas.
Investigores dise ce la gang romanian avioni sua membros a en la Rena Unida per fa crimines spesifada, e estrae los de la pais a un tempo corta a pos, ance par avion. Otra membros usa alora otra modos de transporta per prende la propria furada a via de la pais.
On reporta ce la grupo es asosiada con alga familias major de crimin romanian ci parteni a la supraorganiza Clamparu.
@T Locustas dana sereales en America Sude
@L aora_oji/2020/locustas_dana_sereales_en_america_sude
====== Locustas dana sereales en America Sude ======
30 junio 2020
Brasil e Uruguai monitori la moves de un xama grande de locustas ci come sereales en la rejion.
La insetos pote viaja tra 150 cilometres en un dia. Los ia pasa ja de Paraguai a Arjentina, e on teme ce Brasil e Uruguai va es la paises cual los visita seguente.
Brasil ia avisa sua cultivores a es vijilante per la ariva posible de la locustas.
La xama ia orijina en Paraguai e ia move a sude a Arjentina a 21 maio, do la insetos ia traversa la provinses Santa Fé e Formosa. Ala los ia dana campos de mais, cana de zucar, trigo e avena.
Los es aora en la provinse Corrientes. La autoriosas ala dise ce los ia susede redui la grandia de la xama par fumiga. Corrientes borda Brasil e Uruguai a la este.
Un fronte de aira calda ia fa ce la locustas deveni letarjiosa, donce los ia move poca en la dias resente. An tal, on ave un state de crise per la sania de plantas en Rio Grande do Sul e Santa Catarina, la du statos brasilera la plu sude.
Xamas de locustas es relativa comun en Arjentina e la paises ensircante. La plu resente, on ia esperia xamas grande en Arjentina en 2019 e 2017.
Ance Cenia e Barata batalia xamas de locustas a presente.
@T Lombardia anunsia regulas plu sever
@L aora_oji/2020/lombardia_anunsia_regulas_plu_sever
====== Lombardia anunsia regulas plu sever ======
22 marto 2020
La rejion Lombardia en la norde de Italia ia introdui metodos plu sever per atenta combate la sperde de la coronavirus.
Su la regulas nova, anunsiada ier en la sera tarda, sporte e ativia fisical su la sielo, an individua, es aora proibida. La usa de vendadores es ance no permeteda.
Esta cambia ia aveni a un dia cuando Italia ia reporta cuasi 800 moris par la virus, e sua cuantia de moris en la mense pasada ia ateni 4825 persones, la plu alta de mundo. Lombardia es la rejion la plu grave afetada en la pais, con 3095 moris.
Attilio Fontana, La presidente de la rejion, ia anunsia la regulas nova en un declara formal.
On ia demanda ce comersias clui tota operas estra cadenas de furni "esensal". Labora sur construerias va sesa, estra los cual pertine a ospitales, vias e ferovias. Tota mercatos semanal su sielo es suspendeda.
Tra Italia on ia ave plu ca 53 mil casos asta aora, e 6000 persones ia recovre. Lombardia es ja en un state de enclui de 8 marto, e la governa ia espera vide ala la bon resultas prima.
@T Machu Picchu abri per un turiste solitar
@L aora_oji/2020/machu_picchu_abri_per_un_turiste_solitar
====== Machu Picchu abri per un turiste solitar ======
13 otobre 2020
Peru ia abri la ruinas inca de Machu Picchu per un turiste japanes solitar ci ia espeta tra cuasi sete menses per visita esta loca de erita mundal.
Jesse Katayama ia vole visita Machu Picchu en marto, ma lo ia clui par causa de COVID-19. Alejandro Neyra, ministro de cultur, ia esplica ce on ia dona un permete spesial a Katayama car el ia fa un solisita spesial.
La sitadela inca antica es la atrae turiste la plu popular en Peru, e on previde ce lo va reabri con capasia reduida en novembre, sin dona un data esata.
Katayama ia intende pasa sola alga dias en Peru, ma ia deveni trapida a media de marto en la vila Aguas Calientes, prosima a Machu Picchu, par regulas de viaja en la pandemica.
"El ia veni a Peru con la fantasia de pote entra," Neyra ia dise a un confere jornaliste virtual ier. Katayama ia es permeteda a entra a la ruinas con la xef de la parce a saturdi "afin el pote fa esta ante revade a sua pais," Neyra ia ajunta.
En un video rejistrada a la culmina de la monte Machu Picchu, la turiste ia selebra sua viaja longa espetada. "Esta turi es vera stonante, grasias," el ia dise.
Peru ia reporta plu ca 849 mil casos de coronavirus e 33 mil moris pos la comensa de la pandemica.
@T Macinas va fa un dui de la labora en 2025
@L aora_oji/2020/macinas_va_fa_un_dui_de_la_labora_en_2025
====== Macinas va fa un dui de la labora en 2025 ======
21 otobre 2020
Un reporta nova par la Foro Economial Mundal previde ce un dui de tota taxes de labora va es fada par macinas en 2025. Lo dise ce un "revolui robotal" va crea 97 milion empleas tra la mundo, ma va destrui cuasi la mesma cuantia, lasante alga comunias en peril.
La reporta indica ce empleas en maneja o en trata de datos es la plu menasada par automati, ma ce roles nova va emerji en cura, datos grande e la economia verde.
La rexerca par la Foro ia covre 300 de la companias la plu grande, ci emplea entre se oto milion persones en la mundo intera. Plu ca 50% de empleores sondada ia dise ce los espeta aselera la automati de alga roles en sua companias, e 43% ia opina ce probable los va elimina empleas par causa de tecnolojia.
La Foro dise ce la pandemica ia rapidi la adota de tecnolojias nova, car companias xerca redui sua custas e adota modos nova de labora. Ma lo averti ce laborores fasa aora un menasa duple de "automati aselerante e la efetos de la retrosede de COVID-19".
A presente, longo la reporta, sirca un tri de tota taxes de labora es fada par macinas, con ce umanas fa la otras.
Roles cual depende de capasias umana -- como consela, deside, razona, comunica e interata -- va deveni plu importante. On va vide ance un aumenta en la nesesa per laborores en empleas de la economia verde, e roles nova en campos como injenia e computa nubin.
Ma la reporta ia asentua ce tecnolojia va elimina miliones de empleas repetosa o fada par mano, afetante xef la laborores la min paiada e la min capas. Miliones va debe aprende capasias nova per survive la cambia, e governas va debe ofre "redes plu forte de securia" per laborores deslocada.
@T Macron urje Lubnan a formi un governa nova
@L aora_oji/2020/macron_urje_lubnan_a_formi_un_governa_nova
====== Macron urje Lubnan a formi un governa nova ======
1 setembre 2020
Emmanuel Macron, presidente de Frans, ia urje ce Lubnan formi rapida un governa nova pos la asinia de sua ministro xef nova. La ambasador lubnani pasada a Deutxland, Mustapha Adib, ia emprende esta rol, suportada par la plu de parlamentores.
Ofisiores major de Lubnan dise ce la arbitra par Macron ia es esensal en ateni un acorda sur la asinia.
La governa presedente ia resinia coletiva pos la esplode enorme en la capital, Beirut, a 4 agosto, cual ia mata a la min 200 persones. La esplode ia es causada par la reteni nonsecur de nitrato de amonio a la porto de la site.
Macro ia ariva en Beirut ier per sua visita du pos la esplode. On previde ce el va presa politicistes lubnani a fronti la sobornosia e la peri finansial.
Parlante a reportores, el ia dise ce un governa nova debe formi "tan pronto como posible", como Adib ia promete ja. Ma en sua visita, Macron ia esperia protestores ci scande "no Adib", indicante ce alga persones vide la asinia de Adib como un continua de la state esistente en la pais.
Protestores ia organiza asemblas grande tra Lubnan ja de otobre, esijente un cambion de la sistem political. La potia es jeneral fundida sur interesas setal, e un serie de governas ia es acusada de gida noneficas e elitiste. Asinias political e multe postos depende de parteni a un de la multe comunias relijial en la pais, e esta ia crea un situa plen de favorisme e sobornas.
Adib, ci ave 48 anios, ia deveni la ambasador de Lubnan a Deutxland en 2013. El ave un diploma dotoral de lege e siensa political, e ia ensenia a universias en Lubnan e Frans. El ia servi ance como conselor a Najib Mikati, ministro xef pasada de Lubnan.
Un grupo de ministros xef pasada, incluinte Saad Hariri ci gida la partito suni xef de la pais, ia anunsia ce lo aproba Adib pos considera alga nomes a soldi. Pos sua nomina, Adib ia dise ce on ave "un nesesa de formi un governa en tempo recordo e de reali instante reformis, comensante con un acorda con la Reserva Monal Internasional".
Istorial, semanas o menses ia pasa ante la formi de un governa pos la indui de un ministro xef nova, ma la partitos ia indica ce los desira rapidi la prosede par causa de la situa presente.
@T Maduro gania la Asembla Nasional de Venezuela
@L aora_oji/2020/maduro_gania_la_asembla_nasional_de_venezuela
====== Maduro gania la Asembla Nasional de Venezuela ======
8 desembre 2020
En Venezuela, la partito de Presidente Nicolás Maduro e sua aliadas ia vinse en elejes boicotada par la partitos xef oposante.
Pos la conta de plu ca 80% de votas, sua alia ia gania 67,6% de los. La vinse sinifia ce Maduro ave aora la controla completa de la instituidas political de la pais.
La boicota es gidada par la xef oposante Juan Guaidó, ci ia pasa du anios lutante contra Maduro en un disputa sur potia.
Un bloco oposante cual ia iniora la boicota ia reseta 18% de votas. 31% de votores potensial ia vota.
La Asembla Nasional, la sola instituida controlada par la oposantes, va es aora dominada par la partito de Maduro e la otras ci suporta el.
Esta Asembla aproba leges e la bujeta governal, e ia presenta longa un problem a la governa de Maduro. En 2017, la presidente ia crea un Asembla Constituinte Nasional, composada de sola sua suportores.
An si esta Asembla Constituinte ia es creada per scrive un constitui nova, sua potia esede lo de la Asembla Nasional, e lo ia aproba leges, lasante la partitos oposante a lado.
Ma la Asembla Nasional reteni un rol importante. Su la constitui venezuelan, la governa nesesa un aproba par la Asembla Nasional per validi acordas internasional e per suscrive contratas major con companias stranjer.
Juan Guaidó ia deveni la presidente de la Asembla Nasional en 2019. El e sua suportores ia argumenta ce la reeleje de Maduro en 2018 ia es "no libre e no justa" e ce la posto de presidente es donce nonocupada.
El ia refere a un pasaje en la constitui cual spesifa ce en tal casos la presidente de la Asembla debe deveni la presidente entretempo. Suportada par la Asembla Nasional, el ia indui se como presidente entretempo a 23 janero 2019. El ia es rapida reconoseda como la xef valida de Venezuela par plu ca 50 paises, incluinte la SUA.
An tal, Maduro ia resta en controla de la instituidas governal, la plu de la judores, la autoriosas elejal e la militar, e ia continua governa de la palasio presidental.
Guaidó ia urje votores a boicota la eleje en esta mense. Ma como resulta, cuando la legores nova va es induida a 5 janero, el va es no plu la presidente de la Asembla e sua reclama a la presidentia entretempo va es dutada.
@T Materias artifis esede la biomasa de la Tera
@L aora_oji/2020/materias_artifis_esede_la_biomasa_de_la_tera
====== Materias artifis esede la biomasa de la Tera ======
10 desembre 2020
Un rexerca nova sujesta ce la efeto de umanas a la planeta en 2020 es plu grande ca lo de tota otra cosas vivente. La cuantia de sola plastica ave un masa plu grande ca lo de tota animales de tera e mar combinada.
La studia, publicida en la jornal Nature, mostra ce la ativia umana, incluinte la produi de beton, metal, plastica, brices e asfalto, ia trae la mundo a un punto do la masa fabricada par umanas esede la biomasa de la Tera.
Per promedia, cada person causa en cada semana la crea de materia egal a la pesa de sua corpo.
La rexerca ia trova ce esta impresa umana ia crese rapida de la comensa de la sentenio 20, duplinte a cada duple de desenios. La rexercores suporta un proposa per dona la nom "antroposene" a la epoca corente, refletante la efeto notable de umanas a la planeta.
Con colaborores, Ron Milo de la Instituida Weizmann de Siensa en Rehovot, site israeli, ia esamina cambias de la biomasa e la masa artifis de 1900 asta oji. Los ia calcula estimas de pesa sin acua. La masa artifis es definida como caxida en ojetos solida e nonanimada creada par umanas, e lo no inclui dejetadas.
La categoria dominante en la analise ia es construidas e infrastrutur. De la biomasa global, la plu es representada par plantas e arboretas.
"Pos la revolui cultival prima," la autores scrive, "umanas ia dui aprosima la masa de plantas. An si la cultiva moderna usa un area de tera sempre plu grande per crese plantas, la masa intera de tal plantas es vasta esededa par la perde de masa plantal cual resulta de desforesti, maneja de forestas e otra cambias de la usa de tera. Esta tendes de biomasa global ia afeta la sicle de carbono e la sania umana."
Tra la desenios on vide levas e cades en la efeto, incluinte aumentas agu pos la adota de beton en loca de brices en la desenio de 1950, e pos la usa de asfalto per troterias en la anios de 1960.
En tempos de declina, la pesa de la efeto redui. On vide diminuis importante en la Depresa Grande e a la colasa de petrolio en 1979.
@T Mexico redona un sculta antica a Nijeria
@L aora_oji/2020/mexico_redona_un_sculta_antica_a_nijeria
====== Mexico redona un sculta antica a Nijeria ======
28 febrero 2020
Mexico ia redona un sculta antica de bronze a Nijeria pos preveni un atenta de entra lo a la pais par contrabanda.
La obra veni de Ife en la sude-ueste de Nijeria, la site santa de la popla ioruba. La site es famosa per sua ojetos artal cual mostra persones real e divines de la rena ioruba antica.
Esta sculta presenta un om ci senta con gamas crusada, portante un xapo ornosa e teninte un ojeto. Duanores ia saisi lo a la airoporto xef en Site Mexico.
"Un peso bela de bronze, e car lo es de erita nijerian, lo debe revade a sua pais," Diego Prieto ia dise, la xef de la Instituida Nasional de Antropolojia e Istoria en Mexico.
La instituida ia confirma ce la sculta es de orijina ioruba, e on ia dona lo a la ambasador de Nijeria a Mexico, Aminu Iyaw.
La departe de esternas de la governa mexican ia dise ce la obra ia es nonlegal esportada.
"Nos oposa la comersiali nonlegal de pesos arceolojial, un causa importante de la povri de la erita cultural de la nasiones de fonte, car lo sumina la completia de cultures e donce de la popla umana," Julián Ventura Valero ia dise, la visministro de esternas.
Ofisiores no ia ofre detalias sur ci ia fa la atenta de contrabanda la sculta a Mexico, o sur sua orijinas esata.
@T Mil veculos es trapida par neva en Japan
@L aora_oji/2020/mil_veculos_es_trapida_par_neva_en_japan
====== Mil veculos es trapida par neva en Japan ======
18 desembre 2020
En Japan, laborores de salva atenta libri plu ca mil veculos trapida sur un via tra ja du dias pos un tempesta forte de neva.
Autoriosas ia distribui comedas, carburante e covreletos a la motoristes sur la autovia Kan-Etsu, cual lia la capital Tokyo a Niigata en la norde.
La neva ia comensa en la sera de mercurdi e ia causa multe conjesta de trafica longo la via. En ajunta, lo ia rompe la eletrica de plu ca des mil casas en la norde e ueste de la pais.
La conjesta ia comensa cuando la vagon de un camion ia deveni fisada en neva en la note de mercurdi. La polisia ia dise ce la filo de veculos nonmovente ia estende tra plu ca 16 cilometres a un loca.
On ia usa un combina de macinas pesosa e labora fisical per escava un veculo pos un otra, ma, a mediadia oji, sirca mil autos ia es ancora trapida sur la autovia.
"Nos fa la plu bon cual nos pote per salva motoristes e pasajores," un ofisior de maneja desastres en Niigata ia comenta ier. "Nos es preparada per continua la opera tra la note."
Un plu conjesta simil ia aveni ance sur Jōshin-etsu, un otra autovia prosima, do tresento veculos ia deveni trapida. Acel conjesta ia dura de martedi asta la matina de jovedi.
Longo la ajenteria meteorolojial, la neva pesosa va continua tra la finisemana. On descrive lo como la clima fria la plu intensa de la anio.
Yoshihide Suga, ministro xef, ia clama sua consilio a un consenta de crise e ia recomenda ce la popla ata cauta.
La neva aveni a un tempo cuando Japan, como multe otra paises, batalia un onda tre de casos de coronavirus, su presa sin presedente a sua ospitales.
@T Milion casos de coronavirus en Brasil
@L aora_oji/2020/milion_casos_de_coronavirus_en_brasil
====== Milion casos de coronavirus en Brasil ======
20 junio 2020
Brasil ia deveni la pais du en la mundo cual ia confirma plu ca milion casos de COVID-19, con ce la maladia sperde ancora. La ministreria de sania ia indica ance un cuantia recordo de casos nova en la 24 oras pasada -- plu ca 54 000.
En ajunta, on ia ave plu ca 1200 moris a la dia cuatro en serie, levante la soma a cuasi 49 000. La manca de probas en la pais sujesta ce la cuantias vera es plu alta, e espertas dise ce semanas va pasa ante la ariva de la apico de maladia ala.
La statistic nova ia es revelada a mera oras pos cuando la Organiza Mundal de Sania ia averti ce la pandemica de coronavirus entra a un fase "nova e perilosa". Sua dirijor jeneral Tedros Adhanom Ghebreyesus ia dise ce la cuantia de casos crese a un tempo cuando persones deveni fatigada de es encluida e governas atenta recomensa sua economias.
America Latina es un de la rejiones cual esperia aora un apico subita de infetas. On ave erutas major en alga paises ala, incluinte Txile e Peru, e Mexico ia deveni ier la pais sete de cual sua cuantia de moris relatada con la virus ia suprapasa 20 000.
Ma sola la SUA ia vide plu infetas ca Brasil, do Presidente Jair Bolsonaro es forte criticada sur sua responde a la crise. La xef estrema destriste ia disputa a multe veses contra governores de stato e maiores ci ia adota restrinjes sever per restrinje la sperde de la virus, cluinte sites major.
Bolsonaro razona ce la efeto economial de tal metodos va es multe plu grande ca la virus mesma, un opina cual el comparti con multe persones. Ma sua disposa jeneral a la crise ia provoca ja la resinia de du dotores como ministro de sania.
@T Miliones de sicalas va emerji de su la tera esuan
@L aora_oji/2020/miliones_de_sicalas_va_emerji_de_su_la_tera_esuan
====== Miliones de sicalas va emerji de su la tera esuan ======
25 maio 2020
Pos pasa 17 anios su la tera, miliones de sicalas va emerji en partes de la Statos Unida.
On previde ce esta sicalas periodal va apare en la temprana de estate tra la sude-ueste de Virginia, partes de Carolina Norde e en Virginia Ueste. En multe de esta rejiones, la insetos ia emerji la plu resente en 2003 e 2004, ma en alga rejiones los ia apare en 2013.
Tan multe como 3,5 milion de esta sicalas pote emerji de cada ectare de tera.
Los es entre la insetos la plu longa vivente en la mundo, ma sicalas periodal pasa cuasi tota sua vives su la tera, como nimfas. Los abita en la solo de tera e come radises de arbores per o 13 o 17 anios, dependente de la spesie.
La spesies composa 15 "projenias" separada, e Projenia 9 va emerji en esta anio en relata con sua sicle de 17 anios.
Cuando la nimfas es preparada, los construi un strutur de tubos de fango, nomida un cabana, e rampe a supra per trova un loca per muta a sua forma alida adulte e per reprodui. Los no es nosiva per umanas e pote es un fonte de comeda per animales e avias.
Los vive tra sola du o cuatro semanas como adultes, ma en acel tempo los pote dana vites e arbores joven -- incluinte pomos, corneos, pescos, pecanes, serisos e peros -- do la femas pone sua ovos.
La sicalas mas es ance multe ruidosa, "cantante" par vibra membranas sur sua adomen per cortea femas. On ia descrive la sona como simil a "un campo de radios desajustada".
Perce la insetos emerji con esta intervales resta nonclar, ma alga rexercores pensa ce lo es cisa per aida los a evita predores. On ave ance un spesie de sicala cual emerji en cada anio.
@T Misre projeta mesajes de unia sur la Piramide Grande
@L aora_oji/2020/misre_projeta_mesajes_de_unia_sur_la_piramide_grande
====== Misre projeta mesajes de unia sur la Piramide Grande ======
1 april 2020
La governa de Misre ia projeta mesajes de unia con los ci combate la pandemica de coronavirus, sur la Piramide Grande de Giza.
En arabi e engles, la mesajes ia dise "Grasias a los ci manteni nos en securia", "Resta a casa" e "Resta secur".
Misre ave la cuantia la plu alta de persones mor par COVID-19 en Africa. 41 persones ala ia mori pos developa la virus. Lo ave 656 casos confirmada, la cuantia du de la plu altas, pos Sudafrica cual ave 1326.
Per limita la sperde de la virus, la autoriosas misri ia clui locas de turisme e relijio, como ance la scolas e universias. On ave ance un proibi de sorti a note.
A reportores en Gaza, la ministro de turisme e anticas ia dise: "La campo de turisme es un de la industrias la plu afetada, ma nosa conserna xef es la sania."
@T Moris par violentia en Mali
@L aora_oji/2020/moris_par_violentia_en_mali
====== Moris par violentia en Mali ======
15 febrero 2020
En Mali, a la min 30 persones, incluinte nove soldatos, ia es matada ier en tre avenis separada.
Dudes-un ia mori cuando fusilores ia ataca un vileta en la sentro de la pais, e ia arde casas, campos e bestias. Un grupo de oto soldatos ia mori en un embosce, e un plu ia es matada en un ataca contra un campa militar en la rejion Gao.
Mali sufri nonstablia de pos 2012, cuando un rebela islamiste ia comensa en la norde.
La vileta Ogossagou, do un de la atacas ia aveni, es abitada par fulas, un etnico xef muslim ci labora tradisional como pastores. Alga otra etnicos en Mali acusa la fulas de es liada a grupos djihadiste cual opera tra la Sahel.
La acusas ia nuri violentia interetnical en anios resente. En marto pasada, 160 persones ia es matada en un plu ataca a Ogossagou, per cual autoriosas ia culpa un militia dogon. Acel ia provoca protestas sur la manca de reata par la governa, e la ministro xef de Mali, Soumeylou Boubeye, ia resinia.
No partito ia anunsia se como la esecutores de la aveni la plu resente, ma la xef de la vileta ia dise ce la fusilores ia ariva a mera alga oras pos cuando soldatos governal ia retira se de la rejion.
En un aveni separada, fortes de securia malian ia dise en Twitter ce los ia reseta "danas material" en un ambosce en la vileta Bintia, cual ia mata oto soldatos. Un soldato nove ia mori en un otra ataca a un campa en Mondoro, comun atacada par militaristes.
De 2012, la fortes malian ia susede regania la controla de teritorios grande saisida par militaristes, con la aida de Frans, cual ave 4500 soldatos ativa en la rejion. La Nasiones Unida ave 13 mil soldatos de pas en Mali.
Ma on ia perde miles de vives en cuando Mali luta per conteni la violentia, cual ia sperde ja a Burcina Faso e Nijer, paises visina.
La combate de militaristes en la Sahel es videda como importante per manteni securia en locas plu distante, incluinte Europa.
Florence Parly, ministro de esternas de Frans, ia visita Washington en la mense pasada, esperante convinse la Statos Unida a continua sua suporta lojistical par avionetas, transporta e informas. El ia dise ce estas es esensal per la opera franses.
@T Motoristes en Milano iniora un proibi
@L aora_oji/2020/motoristes_en_milano_iniora_un_proibi
====== Motoristes en Milano iniora un proibi ======
3 febrero 2020
En Milano ier, en min ca tre oras, la polisia italian ia multa 162 persones ci ia iniora un proibi de motorisme.
La despermete tempora ia comensa a 10:00 de ora local, continuante asta la temprana de sera, per atenta redui un problem de nebla fumosa. Ma pos sola du oras e un dui, la polisia ia comensa dona multas de 164 euros a los ci ia iniora la regula.
A 12:30, on ia fa demandas a 621 persones ci no ia obedi la dia de "pasea de soldi".
Milano ia es identifiada como la site la plu contaminada de Europa en 2008, e sua nebla fumosa resta un problem recorente.
La proibi no ia pertine a veculos eletrical o persones descapasida. Alga stradas ia resta abrida, spesial per permete ce on asede la Stadio San Siro de la ecipo de futbal AC Milan.
Esta no es la ves prima de proibi autos en la site, e la stratejia no es popular con tota persones. Raffaele Cattaneo, conselor rejional sur la ambiente, ia descrive lo como "demagogia con un salsa verde".
En la mense pasada, alga sites en Italia, incluinte Roma e Milano, ia fa un proibi tempora de veculos de gasolio pos un crese grande de la cuantia de contamina.
Emetes de veculo es la fonte la plu comun de microparticulas perilosa per la sania.
@T Multe migrores african enflue a la Isolas Canario
@L aora_oji/2020/multe_migrores_african_enflue_a_la_isolas_canario
====== Multe migrores african enflue a la Isolas Canario ======
11 otobre 2020
Plu ca mil persones migrante de Africa ia ariva en la Isolas Canario en la tre dias pasada, la Crus Roja dise. On no ia vide un tal cuantia en plu ca un desenio.
Visitante la isolas, la ministro espaniol de migra José Luis Escrivá ia promete un "responde rigorosa".
La popularia de esta via de Africa ueste crese ja de 2018. A un apico presedente en 2006, 35 mil migrores ia ariva en la arcipelago.
Multe de la migrores ia comensa sua viaja de Senegal, a distantia de plu ca 1600 cilometres, do du barcos portante 186 persones ia es intersepida par infantriores de la marina senegales en esta semana. On reporta ce la pasajores ia es de Senegal e Gambia.
La migrores ci ia ariva en la Isolas Canario de jovedi ia es salvada de 37 barcos. La Crus Roja espaniol atende multe de los en campas prosima a sua loca de desembarca.
Un portavose per la Crus Roja ia dise ce, estra un pico de casos de ipotermia, tota la persones ia ave bon sania e ia es probada per coronavirus.
Escrivá mesma ia fa un turi de tre de la isolas xef de la arcipelago -- Tenerife, Fuerteventura e Gran Canaria -- per vide direta la situa ala. El ia es criticada par la xef de la comite local car el ia ofre no solve a la problem de casi la arivores.
Entre janero e la fini de julio de esta anio, 3269 migrores ia traversa de Africa ueste a la Isolas Canario, un cuantia plu grande par cuasi 600% ca en la mesma periodo en 2019, como diseda par la Organiza Internasional per Migra de la Nasiones Unida.
Asta aora en esta anio, plu ca 250 persones ia mori en atenta ateni la isolas.
@T Multe persones mori en un asidente sur Lago Albert
@L aora_oji/2020/multe_persones_mori_en_un_asidente_sur_lago_albert
====== Multe persones mori en un asidente sur Lago Albert ======
26 desembre 2020
Un asidente de barco sur Lago Albert a la frontera de Uganda e la Republica Democrata de Congo ia lasa a la min 26 persones mor. Un "venta forte" ia afonda la barco, un ofisior local ia dise.
La barco ia porta deses de persones de ambos paises, de ci a la min 21 ia es salvada.
Asidentes es comun sur la lago par causa de securia povre e clima rapida cambiante.
La barco ia viaja entre du locas a la lado ugandan a mercurdi cuando la venta ia forti e lo ia inversa. Salvores no ia espeta trova plu survivores.
Un ofisior ia comenta ce multe de la vitimes ia atenta revade nonlegal a la Republica Democrata de Congo per evita la restrinjes de coronavirus cual ia para la plu trafica entre la du paises.
Vital Adubanga, presidente de la xefia Wangogo en la provinse Ituri en la este de Congo, ia dise ce on no permete barcos a note ma ce esta proibi es frecuente iniorada.
Multe de la pasajores ia es comersiores ci ia atenta vade a un mercato semanal.
Lago Albert es la lago sete de la plu grandes en Africa. En 2014, plu ca 250 refujadas ia mori cuando un barco ia inversa portante multe plu persones ca sua capasia.
En un otra asidente de natal, en 2016, tredes membros de un ecipo ugandan de futbal ia afoca cuando sua barco ia afonda en la lago.
@T Multe prisonidas evade un prison en Uganda
@L aora_oji/2020/multe_prisonidas_evade_un_prison_en_uganda
====== Multe prisonidas evade un prison en Uganda ======
17 setembre 2020
Plu ca 200 prisonidas ia evade un prison en la norde-este de Uganda. La vila local es pausada en cuando la fortes de securia atenta trova los.
On reporta ce la prisonidas ia mata un soldato pos sorti de la compleso en Moroto. A pos, los ia parti en dirije a la montania.
La armada e ofisiores de la prison xasa la evadores, ci ia prende con se 15 fusiles e muni. Un portavose per la armada ia dise ce du prisonidas es ja caturada e du es matada.
Lo pare ce, per evita es detetada, la prisonidas ia desapone sua uniformas jala e fasil reconosable, e ia core nuda a la montania.
La prison es construida sur la pedes de Monte Moroto, a la borda de la vila. Reportas local dise ce la situa ia para la comersia normal en la urbe.
Moroto es la vila la plu grande en Karamoja, un rejion ajitada con un istoria de fura de boves e violentia de fusil.
En la temprana de la desenio de 2000, un program governal de desarma ia prende fusiles a via de persones nonmilitar, ma scaramuxas entre comunias diferente ia aveni ancora de ves a ves.
@T Najib Razak es culpable de tota acusas de froda
@L aora_oji/2020/najib_razak_es_culpable_de_tota_acusas_de_froda
====== Najib Razak es culpable de tota acusas de froda ======
28 julio 2020
On ia judi ce Najib Razak, ministro xef pasada de Malaisia, es culpable de tota sete acusas contra se en sua litiga prima sur froda de multe miliones de dolares.
El ia declara se como nonculpable de la acusas de rompe criminal de fida, lava de mone, e malusa de potia.
La caso contra Najib, ci ia es en posto de 2009 a 2018, ia es jeneral regardada como un proba de la sistem antifrodal de Malaisia.
La scandal sirca la reserva finansial 1MDB, cual la governa ia institui en 2009 per aumenta la developa economial de la pais, ia descovre un rede global de froda. Aora Najib fasa desenios en prison, ma on previde ce el va resta libre asta cuando tota metodos de apela es aplicada.
"Pos considera tota la atestas en esta litiga, me trova ce la lado acusante ia susede demostra sua caso, suprapasante duta justa," la judor Mohamad Nazlan Mohamad Ghazali ia dise a la Corte Alta de Kuala Lumpur.
Esta desides oji pertine a 42 milion ringites ($10 milion) transfereda de la reserva a la contas privata de Najib cuando el ia es la ministro xef.
Najib nega ce el ia ata criminal, disente ce el ia es malgidada par sua conselores, spesial la finansior Jho Low. Low es acusada en e Malaisia e la Statos Unida, ma ance el insiste ce el es nonculpable.
La avocatos defendente Najib ia dise ce el ia es gidada a crede ce la mone en sua contas ia es un donada de la familia real saudi, en loca de es malprendeda de la reserva governal.
La acusas es asosiada con punis tan sever como 15 o 20 anios en prison per cada. Ante la judi, Najib ia dise ce el va apela si on anunsia sua culpablia.
@T Nasiones asian fronti aora la coronavirus importada
@L aora_oji/2020/nasiones_asian_fronti_aora_la_coronavirus_importada
====== Nasiones asian fronti aora la coronavirus importada ======
19 marto 2020
Corea Sude, Xina e Singapor es entre la paises en Asia cual fronti aora un onda du de coronavirus, car persones importa lo de estra la paises.
Xina, do la virus ia emerji inisial, ia indica ce lo ia esperia no casos nova interna ier, a la dia prima pos la comensa de la maladia. Esta es un paso importante. Ma lo ia reporta 34 casos nova en persones ci ia reveni resente a Xina.
Singapor ia reporta 47 casos nova, de cual 33 ia es importada, e 30 ia es importada par abitores reveninte a la pais.
Corea Sude ia esperia oji un crese de casos nova, con 152 reportas, ma lo no es clar cuanto ia es importada. Un grupo nova de casos ala es sentrida a un cureria de persones vea en Daegu, do 74 pasientes ia fa un proba positiva.
Japan ia reporta tre casos nova ier. Ma Hokkaido, la rejion japanes la plu afetada con 154 casos, sutrae la state de crise cual esiste ja de la tarda de febrero, car ofisiores dise ce la sperde de la virus en acel rejion pare es fininte.
Ofisiores en Hokkaido recomenda ce persones resta cauta e no sorti de casa, ma dise ce on ia ave "no aumenta de pasientes infetada cual ia causa la colasa de la ambiente medical".
La Comision Nasional per Sania en Xina ia dise ce on ave no casos en Wuhan, la site do la virus ia apare prima e cual on ia clui sever en la parte plu temprana de esta anio.
3245 persones ia mori par la maladia en Xina, ma on fa demandas sur la fidablia de alga de la datos.
Tota cuatro paises ia mostra ja susedes en controla sua casos interna, ma on ave ansia ce casos cresente en alga paises risca desfa esta.
@T Negosias de pas con la talibanes en Afganistan
@L aora_oji/2020/negosias_de_pas_con_la_talibanes_en_afganistan
====== Negosias de pas con la talibanes en Afganistan ======
12 setembre 2020
La discutes prima sur pas entre la governa afgani e la talibanes ia comensa en la pais golfal Catar, pos menses de pospone. Mike Pompeo, ministro de esternas esuan, ia descrive la consenta como "monumental" cuando el ia vola a Doha, la capital, per la abri.
On ia intende ja comensa esta negosias pos la reali de un acorda sur securia entre la SUA e la talibanes en febrero. Ma la progresa ia es impedida par desacordas sur un intercambia controversa de prisonidas, como ance per violentia en Afganistan, do cuatro desenios de gera es staniada.
Un delega de afganis major ia parti de Cabul per Doha ier, 11 setembre, la dia de la atacas matante contra la SUA a 19 anios pasada cual ia gida a la fini de la rena taliban.
La xef de la delega, Abdullah Abdullah, ia dise ce on xerca "un pas justa e diniosa". A jovedi, la talibanes ia confirma ce los va partisipa, pos la relasa de un grupo final de ses prisonidas.
Estas es la discutes direta prima entre la talibanes e representores de la governa afgani. La militaristes ia refusa consenta con la governa asta aora, descrivente los como sin potia e la pupetas de la SUA.
La du lados espera un reconsilia political e la fini de desenios de violentia cual ia comensa con la invade soviet en 1979.
La acorda entre la SUA e la talibanes ia defini un program per retira fortes stranjer par intercambia per garantias antiteroriste. On ia spende plu ca un anio per completi acel acorda, e on previde ce la discutes nova va es an plu complicada.
Multe teme ce la progresa frajil ja fada sur diretos de femes va es cisa sacrifiada.
La negosias presenta un defia ance a la talibanes, ci va debe proposa un gol political realable per Afganistan. Asta aora, los ia parla neblosa, disente ce los desira un governa cual es muslim ma ance incluinte.
Lo es posible ce la discutes va furni plu indicas de la cambias en esta grupo militariste pos la desenio de 1990, cuando los ia rena seguente un interprete sever de la regulas de xaria.
@T Negosias sur un parario itiopian va recomensa
@L aora_oji/2020/negosias_sur_un_parario_itiopian_va_recomensa
====== Negosias sur un parario itiopian va recomensa ======
22 julio 2020
Itiopia, Misre e Sudan ia acorda recomensa negosias sur la Parario Grande de Renase Itiopian, un lago de reserva sur la Nilo Azul, pos un confere virtual.
Esta projeta idroeletrical ia jenera multe tensa diplomata pos la comensa de sua construi en Itiopia en 2011. La pais vide lo como esensal per sua crese economial e como un fonte major de enerjia.
Ma Misre e Sudan, cual ocupa un situa plu basa, teme ce la Parario de Renase va redui multe sua asede a acua.
Anios de negosias ansiosa ia fali ateni un acorda sur como e cuando on va pleni la lago, e cuanto acua lo debe relasa.
Si lo comensa opera, la parario va jenera 6000 megavates, tal ce lo va es la parario idroeletrical la plu grande de Africa. Lo va furni eletrica a 65 milion itiopianes de ci un furni constante de eletrica manca a presente.
La acorda per recomensa negosias ia es fada en un consenta de la Uni African, manejada par Cyril Ramaphosa, presidente de Sudafrica.
En un declara formal, Abiy Ahmed, ministro xef de Itiopia, ia loda la progresa, ajuntante ce la parario de 4 mil milion dolares es ja suprafluente par causa de pluve en la du semanas pasada.
Itiopia ia dise sempre ce lo va pleni la parario en julio, ma Misre ia averti ce on debe pospone esta en cuando la negosias continua.
La presidente de Misre ia dise, en un declara, ce negosias futur va foca a "developa un acorda legal liante sur la regulas per pleni e opera" la parario.
@T Noria culpa Rusia per un siberataca parlamental
@L aora_oji/2020/noria_culpa_rusia_per_un_siberataca_parlamental
====== Noria culpa Rusia per un siberataca parlamental ======
14 otobre 2020
Noria ia culpa Rusia per un ataca contra la sistem de eposta en la parlamento norsce en agosto.
La ministro de esternas Ine Eriksen Søreide ia descrive lo como un aveni seria cual ia afeta la "instituida democrata la plu importante" de la pais. "Longo la informa disponable a la governa, lo es nosa evalua ce Rusia ia suporta esta ativia," el ia dise, sin clari la indicas.
Moscva ia rejeta la alega, nominte lo un "provoca grave e voleda".
En un declara formal, Søreide ia dise ce la servis de securia en Noria "coopera prosima per trata esta pertinente a la nivel nasional".
Respondente, la ambasada rusce en Oslo ia critica la anunsia "nonasetable", disente ce on ia presenta no atestas. "Miliones de siberatacas es anial esecutada de estra la pais contra recursos de interede de la stato rusce. Ma esta no permete ce nos culpa nondistinguinte la autoriosas de la paises de sua orijina posible."
En setembre, Noria ia revela ce contas de eposta parteninte a alga ofisiores ia es efratada en un ataca eletronical, e ce alga informa ia es descargada. Ma on no ia publici detalias de la estende de la dana causada.
Esta alega par Noria ariva a un tempo de relatas tensada con Rusia. La du paises comparti un frontera artica, e Noria es un membro de OTAN.
En agosto, Noria ia esclui un diplomata rusce, suspetante ce el ia spia. Rusia ia venja se par espulsa un diplomata norsce pos alga dias.
E en 2018, Noria ia aresta un nasional rusce sur ci on ia suspeta ce el la colie informa sur la rede parlamental de la pais. La individua ia es ultima librida par causa de un manca de atestas.
En un reporta en la plu temprana de esta anio, la ajenteria de securia militar de Noria ia averti ce Rusia atenta crea desacorda en la pais par operas de influe, intendeda per debili la fida publica a la governa, prosedes elejal e jornalisme.
Legerias nasional es un fonte major de informa political, e donce los es comun ojetida par efratores enlinia. En janero, la detalias personal de sentos de politicistes deutx, incluinte la canselor Angela Merkel, ia es furada e publicida en la rede.
E en la anio pasada, la ajenteria de sibersecuria de Australia ia culpa Xina per un atenta de entra a la sistemes eletronical de la parlamento australian, lo cual ia es negada par ofisiores xines.
@T Notre-Dame va es identical reconstruida
@L aora_oji/2020/notre-dame_va_es_identical_reconstruida
====== Notre-Dame va es identical reconstruida ======
10 julio 2020
La pinaculo de la catedral Notre-Dame de Paris, destruida en un focon en april pasada, va es restorada seguente la desinia gotica orijinal.
Emmanuel Macron, presidente de Frans, ia anunsia la deside, fininte rumores ce la pinaculo va es reconstruida en un stilo moderna. Macron ia sujesta a ante ce el favore "un jesti contempora".
Ma el ia dise ce el vole ce la restora es ja completa en 2024, cuando Paris va ospita la Juas Olimpial.
La Palasio Élysée ia dise ce la conserna xef per Macron es ce on "no retarda la reconstrui e complica lo -- on debe solve rapida la demandas". Lo ia ajunta ce la prosede de desinia un pinaculo moderna, envolvente un compete internasional per arcitetores, ia ta pote causa pospones nonesesada.
La anunsia ia segue un consenta de la Comision Nasional per Erita e Arciteta franses.
Cuando, a cuasi des-cuatro menses ante aora, la teto ia ensende a media de laboras per restora la catedral, on ia vide un eruta de emosia e donas finansial de tra la mundo. En du dias, on ia recolie sirca 900 milion euros per repara la teto.
La pinaculo prima de la catedral ia es construida en la sentenio 13, ma, par causa de danas estendosa en la Revolui Franses, on ia sutrae lo en la tarda de la sentenio 18. Sua sustitua, desiniada par la arcitetor Eugène Viollet-le-Duc, ia es erijeda en la media de la sentenio 19.
@T Oaxaca proibi vende comedas nonurinte a enfantes
@L aora_oji/2020/oaxaca_proibi_vende_comedas_nonurinte_a_enfantes
====== Oaxaca proibi vende comedas nonurinte a enfantes ======
8 agosto 2020
En Mexico, la stato Oaxaca ia proibi vendes de comedas nonurinte e bevidas zucarosa a enfantes, en un atenta de redui la frecuentia de obesia e diabete.
Oaxaca es la stato prima cual ia fa esta proibi en un pais con un de la tasos la plu alta de mundo per obesia de enfantes. Persones ci desobedi la lege pote es multada e sua botecas pote es cluida. Reofendores risca es prisonida.
La cuantia de moris liada a la coronavirus en Mexico prosimi aora a 50 mil. Esta es la cuantia tre de la plu altas de mundo, pos la SUA e Brasil. Espertas dise ce si on es tro pesosa, on ave un risca aumentada de deveni grave malada o de mori par causa de la virus.
Sirca 73% de la popla mexican es tro pesosa, contrastada con sola un sinci en 1996, longo un studia par la Organiza per Coopera e Developa Economial. Mexicanes consuma plu bevidas gasosa per person ca cualce otra nasion.
Legores en la parlamento de Oaxaca ia aplaudi la aseta de la lege, ma botecores e vendores sur strada ia protesta. La lege pertine ance a vendadores en scolas.
La parlamentor ci ia proposa la lege, Magaly López Domínguez, ia dise ce la intende no es ce on dana botecores e otra vendores: estas pote continua vende bevidas zucarosa e comedas nonurinte, ma mera no a enfantes.
La visministro de sania, Hugo López-Gatell, ci es ance la ministro encargada a la crise de coronavirus, ia bonveni la cambia. En la mense pasada, el ia descrive bevidas zucarosa como "venena botelida" e ia recomenda ce persones no bevi los.
Christian Skoog, la representor de Unicef en Mexico, ia tuita ance sua aproba, disente ce tal leges proteje la diretos de enfantes a bon comedas nurinte.
En 2014, Mexico ia introdui un imposta a mal bevidas e comedas, sin proibi ce on vende los a enfantes.
@T Obama critica Trump, e Xina confesa debilia en sua medica
@L aora_oji/2020/obama_critica_trump_e_xina_confesa_debilia_en_sua_medica
====== Obama critica Trump, e Xina confesa debilia en sua medica ======
10 maio 2020
Barack Obama, presidente pasada de la SUA, ia critica forte sua seguor Donald Trump sur sua responde a la crise de coronavirus. En un confere privata, el ia descrive la maneja de la pandemica par la pais como "un desastre asoluta caososa".
El ia fa sua comentas en promove ce empleadas pasada ta labora per la ecipo presidental de la democrata Joe Biden. La Casa Blanca ia responde ce la atas "nonpresededa" par Trump "ia salva vives de esuanes".
En la telefoni, Obama ia dise ce la metodo de governa de sua seguor republiciste ia es partal culpable per la reata esuan a la maladia. "Lo ia ta es mal an con un governa la plu bon," el ia dise. "Lo ia es un desastre asoluta caososa cuando acel disposa de 'como me benefica?' e 'ta ce la otras vade a enferno' es realida en nosa governa."
Plu ca 77 mil persones ia mori aora en la SUA, e la pais ave 1,2 milion casos confirmada de la maladia. Ambos cuantias es la plu altas de mundo.
Multe statos ia introdui regulas de enclui en marto, ma ia sutrae aora la restrinjes, permetente ce persones revade a labora. Ofisiores medical averti ce cisa esta va permete ance ce la virus sperde plu.
La reata par Trump a la pandemica ia osila. En febrero, el ia iniora la menasa, disente ce lo va desapare, ma en media de marto el ia reconose la gravia. En april el ia sujesta bevi desinfetante -- un idea fol cual espertas ia rejeta instante.
En la semana pasada, el ia anunsia ce el va desbandi la grupo encargada de coronavirus en sua governa, ma plu tarda el ia dise ce lo va continua, ma focada a reabri la economia.
Entretempo, un ofisior major ia dise a jornalistes en Xina ce la pandemica ia esposa cualias debil en la sistem de sania xines. Esta confesa, de tipo rara, de Li Bin, dirijor de la Comision Nasional de Sania, segue criticas sustada par otra paises contra la responde temprana par Xina.
El ia dise ce la pais va boni aora sua preveni de maladia, sua sistem publica de sania e sua prende de datos. Xina ia ofre ance aida Corea Norde a combate la pandemica ala.
On ia acusa Xina de reata tro lenta a sinias temprana de la virus en Wuhan, do la situa ia comensa, e de fali avisa rapida la comunia internasional. Ma la pais ia rejeta recomendas per un investiga internasional nondependente sur la orijina de la virus.
@T On aresta un maniate norsce sur la desapare de sua sposa
@L aora_oji/2020/on_aresta_un_maniate_norsce_sur_la_desapare_de_sua_sposa
====== On aresta un maniate norsce sur la desapare de sua sposa ======
29 april 2020
En Noria, la polisia ia aresta un milionor, Tom Hagen, a tema de la desapare de sua sposa a 18 menses pasada.
Hagen, un maniate de imobila e enerjia ci ave 70 anios, es suspetada de omiside o conspira per omiside. Sua sposa Anne-Elisabeth Hagen ia desapare e on ia alega ce el ia es furada.
La polisia dise ce la esijes de rescata per sua libri cual ia apare en 2018 ia es probable falsa, e ce el ia es probable ja matada.
Hagen ia es arestada prosima a la casa de sua familia en Lørenskog, a este de la capital Oslo. El es aora detenida per cuatro semanas, sin acusas formal. Sua avocato ia fa no declara direta en responde.
La familia Hagen ia dise ce lo ia reseta esijes de rescata per securi la relasa de Anne-Elisabeth. Jornales norsce ia descrive la rescata como $10 milion en un criptomone nomida Monero.
Ma ier, un investigor de polisia ia informa un confere jornaliste ce Anne-Elisabeth no ia es furada e ce no negosias vera ia aveni, ma ce indicas esiste de un desira per diverje la polisia.
La caso ia teni la atende de Noria, do furas de persones e omisides es relativa rara. Longo la revista comersial norsce Kapital, la ricia de Tom Hagen ave la valua de sirca $200 milion.
@T On perde un naveta en un siclon en la Isolas Solomon
@L aora_oji/2020/on_perde_un_naveta_en_un_siclon_en_la_isolas_solomon
====== On perde un naveta en un siclon en la Isolas Solomon ======
5 april 2020
Deses de persones manca e on teme ce los es mor, pos cuando un naveta en la Isolas Solomon ia comensa en via an pos avertis contra embarca en un siclon.
A la note de jovedi, la MV Taimareho ia es viajante de la capital Honiara, sur la isola Guadalcanal, a Are'are Ueste, sur Malaita. La barco ia encontra un mar turbosa ajitada par Siclon Harold.
On reporta ce asta 60 persones ia es sur la naveta. Laboras per salva es inisiada ma impedida par la mal clima.
Esta siclon ia crea problemes de inonda e ia encalia barcos en la Isolas Solomon. La departe nasional per desastre ia publici alga avertis sur liscateras e la mar turbosa. On urje ce viajores ata estrema cauta.
Ofisiores de crise ala es ja alta vijilante par causa de la menasa de la maladia de coronavirus. La Isolas Solomon, composada de ses isolas major e plu ca 900 isolas plu peti en la Mar Pasifica, es un de la cuantia diminuinte de paises cual ia reporta ancora no casos.
@T On predise un futur de desastres natural per Australia
@L aora_oji/2020/on_predise_un_futur_de_desastres_natural_per_australia
====== On predise un futur de desastres natural per Australia ======
31 otobre 2020
Un reporta longa espetada sur focones forestal en Australia dise ce la pais debe prepara se per un futur "alarmante" de desastres simultan e gravinte.
Entre otra desastres, la investiga ia esamina la ardes de la Estate Negra de 2019--20 cual ia destrui partes grande de la pais. A la min 33 persones ia mori en lo cual ia es un saison sin presedente.
La reporta fa plu ca 80 recomendas a la governa, incluinte proposas detaliosa per boni la responde nasional.
Repetente ce la cambia climal ia mali la state estrema cual ia causa la focones, la reporta projeta un futur an plu sever. La governa australian dise ce lo va considera la proposa en modo "atendente e metodosa".
De julio 2019 asta marto 2020, flamas ia sperde tra 24 milion ectares de tera. Acel ia es la saison la plu intensa de ardes natural en Australia, an si no la plu matante.
La focones ia afeta cada stato de la pais, ia destrui plu ca 3000 casas, e ia mata o desloca cuasi tre mil milion animales.
Fuma ia covre areas vasta, incluinte la sites Sydney, Canberra e Adelaide a veses. Un studia ia relata 445 moris a la cualia perilosa de la aira, estimante ce esta ia ospitali ance miles de otra persones.
La focones estrema ia es frecuente noncontrolable e ia supralabora la pompores, ci es bonvolores per la plu. La ardes ia aveni en la anio la plu seca e calda en la istoria rejistrada de Australia, e ia segue un tempo seca longa. E a pos, alga comunias afetada ia esperia tempestas forte e inondas.
La Comision Reial sur Maneja Nasional de Desastres Nasional ia averti ce la caldi global es "nonevitable" en la du desenios veninte. La comisionores ia reporta ce "desastres composada" va deveni plu comun, en cual periles natural como focones, inondas e tempestas aveni simultan o direta pos lunlotra.
Promovores per salva la clima ia dise ce la governa australian e otras nesesa fa plu per redui emetes.
A la apico de la focones, alga siensistes ia espresa sua duta sur la politica climal de la governa de ministro xef Scott Morrison, sujestante ce lo no va ateni sua gol de redui emetes par 26% ante 2030.
Como suportor de combustables de fosil, incluinte carbon e gas, asta aora Australia ia resiste la presa ce lo ta junta se a la otra nasiones cual ia promete deveni neutra de carbono ante 2050.
@T On predise un presentia publica a la Juas Olimpial
@L aora_oji/2020/on_predise_un_presentia_publica_a_la_juas_olimpial
====== On predise un presentia publica a la Juas Olimpial ======
16 novembre 2020
La xef de la Comite Olimpial Internasional ia dise ce el es "multe serta" ce regardores publica va pote es presente a la Juas Olimpial en Tokyo en la anio veninte.
Thomas Bach ia ajunta ce la COI va fa "laboras grande" per serti ce fanes es vasinida ante sua ariva. El es en Japan per discute la reali de la Olimpiales.
On ia intende orijinal ce la Juas de Tokyo va comensa en julio de esta anio, ma on ia debe pospone los asta 2021 par causa de la pandemica de coronavirus. Plu ca 11 mil atletas de sirca 200 paises ia es organizada per partisipa.
"Nos asembla un caxa vera enorme de utiles en cual nos va pone tota la medias diversa cual nos pote imajina," Bach ia dise pos consenta con Yoshihide Suga, ministro xef japanes. "Esta fa ce tota nos es multe multe serta ce nos va pote ave regardores en la stadion olimpial en la anio veninte."
Sua visita segue pos un aveni jinastial de un dia en la plu temprana de esta mense, do alga miles de fanes e 22 atletas de paises variosa ia partisipa.
La atletas internasional ia es isolida per du semanas ante ariva en Japan, e ia es jeneral isolida en sua otel en Tokyo. Los ia debe ance fa probas dial per la presentia en se de la virus.
E Japan e la COI ia asentua ce la Juas Olimpial va aveni en la anio veninte.
La dirijor xef de Tokyo 2020 ia dise plu temprana ce on vole evita la risca de ave tota no regardores a la Juas. El ia ajunta ce lo es posible ce avenis va es realida ante publicas limitada, e la cuantia de empleadas e delegadas de cada pais va es ance cisa reduida.
En la semana pasada, on ia demanda a Bach esce sua visita a Tokyo es per discute posibles per cansela la Juas, a cual el ia responde firma "no". Sua suordinada ia promete plu temprana ce la Juas va aveni "con o sin COVID". La ministro olimpial de Japan, Seiko Hashimoto, ia dise simil ce on debe reali los "a cualce custa" en 2021.
On ave aora esperas ce un vasin eficas contra la virus pote es disponable en la anio seguente.
@T On proibi viaja de la UE a la SUA
@L aora_oji/2020/on_proibi_viaja_de_la_ue_a_la_sua
====== On proibi viaja de la UE a la SUA ======
12 marto 2020
Asiones en Asia ia es comersiada a custas plu basa oji pos cuando Presidente Donald Trump ia restrinje viajas a la SUA de la Uni European per atenta lenti la sperde de la coronavirus.
Esta ia segue perdes major ance en la asionerias esuan, con la indise Dow Jones reduida par 5,8%. En Japan, la indise Nikkei 225 ia fini plu basa par 4,4%, la Hang Seng en Hongkong ia perde 3,6%, e en Xina la indise Shanghai Composite ia cade tra 1,9%.
Plu temprana, la Organiza Mundal de Sania ia declara ce la maladia es aora pandemica.
La cades finansial ia aveni pos la anunsia par Trump de un proibi contra la entra de viajores de 26 paises european a la Statos Unida per 30 dias, comensante doman. Trump ia fa la declara en un parla televisada de la Ofisia Oval en la Casa Blanca.
El ia anunsia ance aida finansial per laborores en la SUA ci es malada, isolida o curante otra persones malada. Plu, la Tesoreria de la governa esuan va pospone la nesesa de paia impostas, sin ajunta interesa o punis, per alga comersias e individuas afetada.
Un economiste senior ia comenta: "No la virus mesma, ma vera la teme e panica pertinente a la virus e la condui economial alterada cual es asosiada va es cisa un punto de cambia danante, forsante la economia global a un via plu oscur."
La mercatos finansial ia es ance colpada en esta semana par un redui de la custa de petrolio. Esportores de petrolio ia dise ce los va aumenta sua esflues en loca de fa reduis coordinada. Pos la anunsia par Trump, la custa de petrolio ia diminui par plu ca 5%.
@T On proteje ominidos contra la coronavirus
@L aora_oji/2020/on_proteje_ominidos_contra_la_coronavirus
====== On proteje ominidos contra la coronavirus ======
10 april 2020
On ia enclui multe primates grande contra la menasa de coronavirus. La turisme con gorilas en Africa es suspendeda, e refujerias per otra ominidos, como orangutanes sur la isola Borneo, es cluida per la popla jeneral.
Ance en esta semana, un proba a un tigre en la Zo Bronx en York Nova ia mostra ce el ave la virus. On ia institui metodos nova per proteje gatos grande e sua curores.
On no sabe esce ominidos pote developa la maladia, ma on ave un teme cresente ce esta primates, nosa relatadas vivente la plu prosima, es cisa egal perilida. Gorilas montanial es propensada a patojenes umana e pote developa maladias respiral.
Gorilas montanial es un spesie perilida de ominido cual on trova sola en la forestas de Ruanda, Uganda e la Republica Democrata de Congo. Tota tre paises ia esperia casos umana de coronavirus.
Veterinares e gardaforestas continua sua labora de cura gorilas montanial, ma con plu cautis. An ante la apare de la maladia, on ia demanda ce persones resta sempre a distantia minima de sete metres de la ominidos.
Conselas nova par la Uni Internasional per la Conserva de Natur recomenda un distantia de des metres, e la redui de visitas par umanas asta la minima nesesada per serti la securia e sania de la primates. No person ci es malada, o ia contata un person malada en la des-cuatro dias presedente, es permeteda a prosimi a los.
La perde de abitadas e la xasa nonlegal es menasas grave contra la survive de ominidos, ma viruses es ance un problem. Maladias comunicable es aora listada entre la tre menasas xef per alga grupos de primates grande. Rexerca pasada ia mostra ce ximpanzes pote developa la virus de rinofarinjite (la cataro comun), e on crede ce la virus ebola ia mata miles de ximpanzes e gorilas en Africa.
Cuatro tipos de ominido vive oji: gorilas, bonobos e ximpanzes en Africa, e orangutanes en Asia sude-este. Umanas es prosima relatada a los, avente un asendente comun a alga milion anios pasada.
@T On regania un contenador de polpo furada en Mosambic
@L aora_oji/2020/on_regania_un_contenador_de_polpo_furada_en_mosambic
====== On regania un contenador de polpo furada en Mosambic ======
21 marto 2020
La autoriosas en Mosambic ia saisi un contenador de cuasi 20 tones de polpo jelada cual ia es furada de la compania Mariscos do Indico, e cual ia es a punto de es esportada con documentos falsa.
La contenador ia es saisida a Angoche, un porto de pexa en la provinse norde Nampula. Un compania xines e un comersior portuges, de ci ambos ia es locada en Angoche, ia es envolveda en la esporta frodosa atentada.
Usante informas de fontes variosa, spesial Mariscos do Indico mesma, la polisia e la autoriosa de duana ia ata a lundi per preveni ce on carga la contenador a un barco espetante. La polpo jelada ave un valua de plu ca 70 mil euros.
La manejores de la compania ia oteni detalias de la contenador e la nom de la barcon cual va esporta lo, e ia dona esta informas a la polisia.
La compania prosede pexes e crustaseos e ia benefica de investis fada par GAPI, un banco de developa, con la intende xef de crea un mercato per la produidas de sentos de pexores tradisional en la rejion de Angoche.
La comersior portuges relatada con la fura ia es, asta alga menses pasada, un manejor de Mariscos do Indico. GAPI, cual es la posesor major de asiones, ia desemplea el pos esamina la contablia de la compania.
La ministro nova de pexerias, Augusta Maita, ia visita Angoche a du semanas ante aora, per esplora la problemes esperiada par pexores tradisional. El ia visita Mariscos do Indico, do la dirijor xef, Joao Maunze, ia dise a el ce la investi par GAPI, de sirca milion euros, ia es esensal per salva un otra compania poseseda par la mesma comersior portuges, ma cuasi bancarota, e per manteni la emplea de sua laborores.
Mariscos do Indico ia es instituida como un compania nova, sin mal reputa a la bancos. On ia reali un projeta per moderni la casa de prosede, afin la produidas de la pexores tradisional pote ave la cualia esijeda par la mercato european e par la sistemes de furni comedas a alga emprendes jigante cual aveni aora en Mosambic norde.
"Oji, Angoche ave un casa de prosede comedas de mar cual ave la direto ofisial de esporta a Europa," Maunze ia dise. "Esta es de valua grande per esta comunia. Ma nos ave local alga competores ci no respeta la normas la plu fundal per comersia etical. Los oteni lisensas par froda. Los fura la produidas de los ci labora seria. Los usa trucos legaliste per atenta propri la ativas cual es nondesprendable per la developa de la industria local."
El ia acusa plu: "On ave un mafia grande en la campo de pexerias, e lo pare difisil a la sistem de justia ce lo proteje lo cual es justa. Nos va vide ci va vinse. Nos va vide a cual lado la sistem de justia va sta."
@T On teme un eruta major de un volcan pilipina
@L aora_oji/2020/on_teme_un_eruta_major_de_un_volcan_pilipina
====== On teme un eruta major de un volcan pilipina ======
13 janero 2020
Un volcan en la Pilipinas ia comensa ejeta lava, e on averti ce un eruta perilosa es posible pos mera alga oras o dias.
En la temprana de oji, lava ia comensa flue de la volcan Taal, a 70 cilometres a sude de la capital, Manila. Esta ia segue un emete de sene cual ia provoca la evacua de 8000 persones de la rejion.
Taal es la volcan du de la plu ativas en la Pilipinas. Situada sur un isola a media de un lago, lo es un de la volcanes la plu peti de la mundo, e ia esperia a la min 34 erutas en la 450 anios pasada.
Autoriosas en la provinse ensircante, Batangas, ia declara un state ofisial cual indica un turba major. Los averti ance sur la posible de un tsunami volcanal, cual pote es causada cuando detrito cadente pos un eruta puxa la acua e jenera ondas.
Ier, la volcan ia produi un plumon jigante de sene, con reportas de tremas e sonas roncinte.
Diseda par la Instituida Pilipina de Volcanolojia e Sismolojia, 75 tremateras ia aveni en la rejion Taal, de cual 32 ia es mesurada a la grado 2 o plu alta en la scala de intensia.
La Ofisia NU per la Coordina de Cosas Umaniste ia dise ce on estima ce plu ca 450 mil persones abita en la zona perilosa de Taal.
Sene ia cade sur alga rejiones prosima, e on ia consela ce abitores porta mascas. Poca mascas resta aora en botecas en Manila sentral. La governa ia averti vendores contra responde par leva la custa.
La sene volcanal ia obliga ance ce la airoporto internasional de Manila suspende tota volas a soldi. La Instituida de Volcanolojia e Sismolojia ia dise ce la sene e fratos en la aira va crea periles per aviones. Plu tarda, la airoporto ia recomensa operas partal.
La asioneria pilipina ia anunsia ce lo va sesa tota comersia oji. La ofisia de presidente Rodrigo Duterte ia comanda ance la suspende de labora governal en Manila e la clui de tota scolas en la capital.
Tremateras e ativia volcanal no es rara en la Pilipinas, situada longo la Sintur de Foco -- un zona major de avenis sismica cual conteni un de la falias la plu ativa de mundo.
@T On trova la caxas negra de un avion destruida barati
@L aora_oji/2020/on_trova_la_caxas_negra_de_un_avion_destruida_barati
====== On trova la caxas negra de un avion destruida barati ======
9 agosto 2020
Investigores ia trova la "caxas negra", o rejistradores, de un avion cual ia mata a la min 18 persones cuando lo ia desintegra en la stato Kerala en Barat sude a venerdi.
La avion de Air India Express, viajante de Dubai, ia atenta atera a la airoporto de Kozhikode ma ia lisca sur la atereria en un mal clima e ia separa a du pesos.
190 persones ia es en la jeto Boeing 737, e un ofisior ia dise ce lo es "un miracle" ce lo no ia ensende. An tal, esta es la asidente la plu grave de un avion de pasajores en Barat en un desenio.
La viaja ia intende renativi baratis trapida par la crise de coronavirus, e donce on ia demanda ce la aidores ci ia responde prima a la asidente isoli se. La ministro xef Narendra Modi ia dise ce el es "doleda" par la asidente.
La vola IX 1134 ia porta 184 pasajores, incluinte 10 bebes, e ses ecipores cuando lo ia atenta atera a Kozhikode (ance conoseda con la nom Calicut).
La jeto ia rompe a 19:40 de ora local a venerdi. En sua atenta prima de atera, la pilotes no ia pote vide la atereria par causa de pluve forte.
Cuando los ia atenta denova, on dise ce la avion ia atera a mil metres ultra la limita de la atereria ante lisca a en un foso presipe.
La colpa ia divide la jeto a du pesos. Imajes mostra sua tronco trinxada e sua sejas blu sperdeda longo la tera. Ambos pilotes ia mori, e cuasi 150 persones es aora tratada en ospital.
La ministro de avioni ia visita la loca ier, do el ia anunsia la regania de la rejistradores de vola e de voses, cual va es cisa esensal per investiga la asidente. El ia loda la pilote xef e ia comenta ce lo es tro temprana per dise la causa esata.
@T On trova un gas asosiada con la vive en la nubes de Venus
@L aora_oji/2020/on_trova_un_gas_asosiada_con_la_vive_en_la_nubes_de_venus
====== On trova un gas asosiada con la vive en la nubes de Venus ======
16 setembre 2020
Indicas de un gas malodorosa cual flota tra la nubes de Venus es cisa emetes de microbios airal.
Astronomistes ia deteta fosfina a altia de 50 cilometres en la atmosfera de la planeta, e ia identifia no prosede, otra ca la vive, cual pote esplica sua presentia.
La descovre abri la posible ce la vive ia esiste a ves pasada sur la mundo visina de la Tera, e ce alga restantes de lo ia survive en la aira cuando la planeta ia esperia un caldi global estrema cual ia cambia lo a un enferno.
Tra du mil milion anios, Venus ia ave un clima moderada, con un mar. Ma oji, un atmosfera densa de diosido de carbono covre un surfas cuasi sin acua do la temperatur esede 450°C. La nubes en la sielo conteni gotas de un licuida de cual 90% es asida sulfurica.
La situa sur Venus es tan profonda nonplasente ce multe siensistes crede ce la planeta es mor. Los suspeta ce la fosfina veni de prosedes plu comun ca venusanes flotante.
Jane Greaves, la astronomiste a la Universia de Cardiff en Cimri ci ia gida la ecipo ci ia fa la descovre, ia acorda: "Completa xocante es dise ce la vive pote survive ensircada par tan multe asida sulfurica. Ma tota la modos jeolojial e fotocimical a cual nos pote pensa es multe tro nonproduosa per crea la fosfina cual nos vide."
Sur la Tera, la gas fosfina es relasada par microbios en ambientes sin osijen, como la deponedas de lagos e la internas de animales. Otra modos de produi lo es tan estrema -- la ventres de Jupiter e Saturno -- ce sur planetas rocosa, on regarda fosfina como un indicador de la vive.
En un proba inisial, Greaves ia oserva Venus par la telescopio James Clerk Maxwell en Hawaii en 2017. El ia persepi la sinial de fosfina en studia sua datos a la fini de un dia de labora en desembre 2018. En la anio seguente, el ia usa la telescopio Alma en Txile per confirma la presentia de esta gas en la nubes alta de la planeta.
La plu de la fosfina, sirca dudes moleculas per mil milion, apare a latitudes media de Venus, con zero a la polos. Calculas par la rexercores ia elimina la cimica conoseda, mostrante ce volcanes, lampo e micrometeorites no ta crea fosfina en proportio tan grande.
Sara Seager, un siensiste planetal a MIT en la SUA, ipotese un sicle de vive en cual microbios venusan cade de la nubes, seci, e deveni repuxada a altias plu temperada par corentes en la atmosfera.
@T Ornitorincos perde 22% de sua abitada en 30 anios
@L aora_oji/2020/ornitorincos_perde_22_de_sua_abitada_en_30_anios
====== Ornitorincos perde 22% de sua abitada en 30 anios ======
23 novembre 2020
La abitada de la ornitorinco ia redui par cuasi un cuatri en sola tre desenios, longo un averti par rexercores.
Ornitorincos es mamales oviparinte, conoseda per un beco simil a lo de un pato. On trova los en rios en Australia este. Ma siensistes dise ce la interveni umana en acel rios, secias sever e predores nova introduida ia ruina sua abitada.
Grupos de rexercores e conservores ia demanda ce Australia clasi la spesie como nasional riscada.
Diseda par un ecipo de la Universia de Cimri Sude Nova, 22% de la abitada -- sirca 200 mil cilometres cuadrida -- es perdeda de pos 1990.
La autor xef Profesor Richard Kingsford ia comenta: "Proteje la ornitorinco e la rios de cual lo depende debe es un conserna major nasional per un de la animales la plu iconin de la mundo. On ave un ansia real ce poplas de ornitorincos va desapare de alga de nosa rios sin reveni, si rios continua es danada par secia e pararios."
La stato Cimri Sude Nova ia esperia un diminui par 32% de la oservas de ornitorincos en la 30 anios pasada, segueda par Queensland (27%) e Victoria (7%), la rexerca dise. En alga rejiones prosima a Melbourne, an tal, la proportio ia es tan alta como 65%.
La ornitorinco es listada como "cuasi menasada" en la Lista Roja de la Uni Internasional per Conserva de Natur, ma conservores espera obliga plu respondes a niveles de federa e stato en Australia.
Plu temprana en esta mense, la panel siensal conselante de Victoria ia recomenda ce on lista la spesie como ofisial riscada. E la rexerca par la Universia e acel panel ia averti ce la cambia de clima va profondi la menasas, spesial par secia estrema.
La ofisia de Sussan Ley, ministro australian de ambiente, ia dise ce la governa ia dedica ja sirca milion dolares australian per proteje la ecosistemes de la ornitorincos. On va considera la posible de lista lo como riscada.
@T Osaka, campion de tenis, deveni un carater de manga
@L aora_oji/2020/osaka_campion_de_tenis_deveni_un_carater_de_manga
====== Osaka, campion de tenis, deveni un carater de manga ======
30 novembre 2020
Naomi Osaka, stela japanes de tenis, ia inspira un carater nova de manga ci va debua en la jornal Nakayoshi en la mense veninte.
Esta ganior de torneo major a tre veses ia tuita un imaje de sua carater ier, con capeles ros, un visiera orania e un raceta de tenis.
Osaka ia dise ce el e sua sore ia leje manga como enfantes e ia es stimulada par la cartunes nova. Sua sore, Mari Osaka, ia partisipa en la crea de la carater.
"Crese lejente manga / regardante anime ia es un cosa cual ia lia profonda me e mea sore, donce esta es vera stimulante per ambos nos," la campion de tenis ia tuita a soldi.
Nakayoshi ia dise ce la manga nova, nomida "Naomi Tenkaichi sin egal", va es desvelida en la numero publicida a 28 desembre.
Un atenta presedente de portrae Osaka, ci ave un madre japanes e un padre aitian, como un carater animada en un anunsia comersial ia deveni rapida envolveda en controversia.
On ia acusa ce Nissin, compania de talietas, ia "pinti blanca" la stela en acel anima par desinia el con pel blanca e capeles pal brun. "Me es bronzin, lo es alga evidente," Osaka ia dise a un confere jornaliste en la anio pasada, ajuntante ce la compania ia demanda direta per sua pardona.
La atleta es un suportor comersial popular en Japan, ma ance la ojeto de razisme intensa.
En la parte plu temprana de esta anio, Osaka ia desloca Serena Williams, sua competor esuan de tenis, como la atleta fema la plu paiada de mundo.
@T Ospitales en São Paulo es prosima a colasa
@L aora_oji/2020/ospitales_en_sao_paulo_es_prosima_a_colasa
====== Ospitales en São Paulo es prosima a colasa ======
18 maio 2020
La maior de São Paulo, la site la plu grande de Brasil, ia dise ce la sistem medical ala risca colasa car on nesesa sempre plu letos per trata casos de coronavirus.
Bruno Covas ia dise ce la ospitales publica de la site ia es plena a 90% e la spasio disponable va es cisa consumada pos du semanas. El ia acusa ce los ci desobedi la restrinjes fa un jua de roleta rusce con la vives de persones.
São Paulo es un de la rejiones la plu afetada de la pais, con cuasi 3000 moris asta aora.
A saturdi, Brasil ia suprapasa Espania e Italia per deveni la nasion con la cuantia cuatro la plu grande de infetas. La ministreria de sania ia reporta 7938 casos nova en la 24 oras pasada, levante la soma asta plu ca 241 mil. Sola la SUA, Rusia e la Rena Unida ave cuantias plu alta.
La cuantia de moris en Brasil en acel 24 oras ia es 485, tal ce la soma de moris es 16 118, la cuantia sinco de la plu altas de mundo.
Espertas medical en la pais ia averti ce la cuantia vera de infetas confirmada en la pais es cisa multe plu alta ca la declara ofisial, par causa de un manca de esaminas.
La presidente estrema destriste de Brasil, Jair Bolsonaro, es forte criticada de en e estra sua pais per sua modo de maneja la crise. Ier, el ia iniora la conselas global sur distanti sosial cuando el ia sta per fotos con suportores e enfantes en la capital Brasília.
@T Osteraic cade un proibi contra telas de testa a scola
@L aora_oji/2020/osteraic_cade_un_proibi_contra_telas_de_testa_a_scola
====== Osteraic cade un proibi contra telas de testa a scola ======
12 desembre 2020
La corte constitual de Osteraic ia revoca un lege cual ia proibi ce enfantes de scola prima porta alga covretestas relijial.
Lo ia dise ce la lege ia dirije se contra telas de testa muslim e ia rompe diretos de libria relijial. La lege ia es asetada a tempo de la governa presedente, en cual la Partito de la Popla, conservalistes, ia es aliada con la Partito de Libria estrema destriste.
La corte ia indica ce un resulta posible de la lege ta es la marjinali de xicas muslim. Lo ia rejeta ance la argumenta de la governa ce la proibi pote proteje xicas contra presas sosial de sua cameradas de clase, disente ce en efeto lo ia puni persones ci no merita esta.
Si nesesada, la corte ia ajunta, on debe prepara un lege per preveni plu bon tormentas pertinente a jenero o relijio.
La lege, cual ia deveni ativa en la anio pasada, no ia spesifa direta un proibi de telas de testa, ma en loca ia deslegali la usa de "vestes relijial cual es asosiada con covre la testa" per enfantes asta 10 anios. La governa mesma ia dise ce la cipa iudi e la covretestas portada par xicos sic no va es afetada.
Anunsiante la deside, Christoph Grabenwarter, presidente de la corte, ia dise: "La proibi distinguinte aplica sola a xicas muslim e donce separa los de otra scolores en modo discriminante."
Heinz Faßmann, ministro de educa, ia dise ce el nota la judi ma ia ajunta: "Me regrete ce xicas no va ave la posible de segue sua via tra la sistem educal en modo noncompulsada."
La deside ia es bonvenida par la Comunia de Fida Muslim, cual representa la muslimes osteraices e cual ia inisia la defia legal. "La serti de oportunes egal e autodetermina per xicas e femes en nosa sosia no es realable par proibis," lo ia comenta.
Cuando la lege ia es proposada en 2018, viscanselor Heinz Christian Strache de la Partito de Libria ia dise ce la governa vole proteje xicas joven de islam political.
La proibi ia ativi en maio de la anio seguente, a mera alga dias pos cuando Strache ia debe resinia pos es secreta filmada en ofre contratas a un fem ci ia finje es la sobrina de un oligarca rusce.
@T OTAN rejeta ce soldatos sta a la frontera de Bielarus
@L aora_oji/2020/otan_rejeta_ce_soldatos_sta_a_la_frontera_de_bielarus
====== OTAN rejeta ce soldatos sta a la frontera de Bielarus ======
23 agosto 2020
OTAN dise ce alegas par Alexander Lukashenko, presidente de Bielarus, ce "potias stranjer" organiza un cumula de soldatos a la frontera de la pais ave no funda.
Portante vestes militar, la presidente ia dise ce el ia pone sua fortes armada a "vijila alta".
Protestas ia continua ier sur la stradas de Minsk pos un vota disputada a du semanas ante aora. La protestores esije la resinia de Lukashenko, ci ia governa Bielarus tra 26 anios.
El ia dise ce la bloco de OTAN atenta divide Bielarus per instala un presidente nova en Minsk. El ia ajunta ce soldatos en Polsce e Lietuva prepara se, e ce el move sua propre fortes armada a la frontera ueste de la pais.
OTAN ia rejeta esta, disente ce lo fa "no menasa a Bielarus o cualce otra pais, e ave no preparas militar en la rejion. Nosa posa es intera defendente."
La presidente lietuvisce Gitanas Nausėda ia dise: "La governa atenta diverje la atende a via de la problemes interna de Bielarus, a cualce custa, par declaras completa sin funda sur menasas esterna imajinada."
Un ofisior de la presidentia polsce ia descrive la sujesta ce Polsce intende causa un destabli a la frontera como "propaganda governal" par la bielarusces, ajuntante ce esta es "triste e surprendente".
OTAN ia urje Bielarus a respeta la diretos umana fundal de sua sitadanes.
Lukashenko ia es reelejeda como presidente a 9 agosto, ma la prosede de vota ia es jeneral regardada como manipulada. Protestas per disputa la resulta ia fronti un reata savaje violente cual ia mata a la min cuatro persones. Protestores dise ce on ia tortura los en prisones.
La presidente ia promete supresa la turba, e ia culpa "revoluistes stranjer finansiada" per la disenti.
Ier, folas de protestas ia brandi luses briliante de sua telefonetas e ia mostra banderas bielarusce sur la stradas de Minsk, scandente "libria". La polisia ia atenta sperde plu ca mil persones asemblada en la Plaza de Autonomia.
Plu temprana en la dia, un cadena ia formi de sentos de persones, de ci multe ia es blanca vestida, a la mercato Komarovka.
Esta segue la protesta la plu grande en la istoria moderna de la pais a la finisemana pasada, cuando sentos de miles de persones ia pleni la stradas.
@T Parasitos de malaria resiste un droga en Africa
@L aora_oji/2020/parasitos_de_malaria_resiste_un_droga_en_africa
====== Parasitos de malaria resiste un droga en Africa ======
7 agosto 2020
Siensistes ia deteta en Ruanda un varia de la parasito cual causa malaria -- un varia resistente contra un cimical major per batalia la maladia. Los ia trova ce la parasitos pote resiste trata par artemisinina.
Esta es la ves prima cuando on ia oserva un tal resiste a esta medisin en Africa. La rexercores averti ce lo "ta pone un menasa major a la sania publica" en la continente.
Siensistes de la Instituida Pasteur, colaborante con la Program Nasional de Controla Malaria en Ruanda, la Organiza de Sania Mundal, la Ospital de Kochi e la Universia de Columbia en New York, ia analise samples de sangue de pasientes en Ruanda.
Los ia trova un muta de la parasito, capas de resiste artemisinina, en 19 de 257 pasientes a un de la sentros de sania cual los ia monitori.
En un article en la jornal Natur, la rexercores averti ce parasitos de malaria cual ia developa un resiste contra drogas presedente es "suspetada de contribui a miliones de plu moris par malaria en enfantes joven african en la desenio de 1980".
Cuando la droga prima antimalarial, clorocina, ia es developada, rexercores ia crede ce la maladia va es eliminada pos alga anios. Ma pos la desenio de 1950, la parasitos ia evolui, deveninte capas de resiste drogas seguente.
Comun aora, on trata infetas de malaria con un combina de du medisines: artemisinina e piperacina. Ma la parasitos ia comensa developa un resiste de artemisinina. On ia rejistra prima esta en 2008 en Asia sude-este.
A acel tempo, siensistes ia teme ce la resiste contra artemisinina va aveni ance en Africa, con efetos desastrosa. La rexerca nova sujesta ce esta temes es realida.
En 2018, paises african ia representa plu ca 90% de la plu ca 400 000 moris rejistrada como causada par malaria.
@T Paris proibi avionetas polisial a protestas
@L aora_oji/2020/paris_proibi_avionetas_polisial_a_protestas
====== Paris proibi avionetas polisial a protestas ======
23 desembre 2020
La corte suprema de Frans ia suporta promovores de privatia par proibi la usa de avionetas par la polisia a protestas publica en Paris.
La Consilio de Stato ia dise ce Didier Lallement, prefeto de polisia de Paris, debe para "sin retarda" la monitori par avionetas de asemblas sur vias publica.
Esta aveni en cuando la parlamento franses discute un lege projetada de securia controversa cual inclui la usa polisial de avionetas. La intende xef es regula como persones comparti videos o fotos de la polisia.
Un grupo de diretos de privatia, La Quadrature du Net (LQDN), ia argumenta ce la ideas xef de la lege viole la libria de espresa, e ce avionetas portante cameras no pote manteni la pas, ma trasa individuas en loca.
La Consilio de Stato ia judi ce on ave "duta seria sur la legalia" de avionetas sin un testo presedente per permete e defini sua usa. LQDN ia dise ce la sola modo en cual la governa pote aora legali la monitori par avionetas es par furni un "demostra nonposible" ce lo es asoluta nesesada per manteni la lege e la bon ordina.
La deside es la ostaculo du en alga menses per la projetas de avioneta de la autoriosas de Paris. En maio, la mesma corte ia deside ce on no pote usa esta aparatos per trasa persones ci rompe la regulas sever de isoli en la capital franses.
Su article 22 de la lege de securia cual pasa aora tra la parlamento, la fortes de securia ta es permeteda a envia imajes filmada par avioneta o elicotor a ecipos comandante, e reteni acel imajes per 30 dias o plu como parte de un investiga posible.
Protestas ia eruta cuando la lege ia es aprobada pos sua leje prima en la Asembla Nasional. La plu de la coleria ia es dirijeda contra article 24, cual fa ce lo deveni un ofende criminal si on publici imajes de polisiores laborante, con intende de dana sua "interia fisical o fisiolojial".
Imajes ia emerji ance de tre polisiores ci colpa con pede e punio Michel Zecler, un produor negra de musica, en Paris. Protestores ia argumenta ce la lege nova va preveni persones de esposa violentia polisial. Presidente Emmanuel Macron ia dise ce esta imajes es nonasetable, e sua partito renante ia promete rescrive article 24.
En un developa separada ier, judores ia comanda la libri de la polisiores arestada sur la ataca contra Zecler, con alga constrinjes.
@T Pasajores de Eurostar debe covre sua fas
@L aora_oji/2020/pasajores_de_eurostar_debe_covre_sua_fas
====== Pasajores de Eurostar debe covre sua fas ======
3 maio 2020
De lundi, cada pasajor de Eurostar va debe covre sua fas, o va risca ce on refusa ce el viaja.
La compania de ferovia ia dise ce la regula ce viajores debe covre sua fas segue la prinsipes de la governas franses e beljes. On va pote usa cualce spesie de covrefas, si sola lo scermi eficas la nas e boca.
Esta segue un indica par Boris Johnson, ministro xef de la Rena Unida, ce mascas "va es usosa" cuando acel pais va lejeri sua regulas de enclui. El ia fa sua comenta pos un recomenda par la governa scotes ce persones ta covre sua fas en botecas e en transporta publica.
En sua declara, Eurostar ia dise ce cisa on va multa persones sin covrefas en Frans e Beljia. La compania opera aora un servi notable reduida, par causa de controlas aumentada de frontera e la cuantia min alta de viajores en la pandemica de coronavirus. Sola cuatro servis viaja dial entre London e Paris, e London e Bruxelles.
Eurostar ave sua base en Britan, ma sua asionor xef es SNCF, la ferovia nasional de Frans. La governa franses ia dise ce covrefases va es obligante en transporta publica cuando lo va comensa lejeri la restrinjes a 11 maio.
La consela presente de la Organiza Mundal de Sania dise ce persones en du categorias debe porta mascas protejente, pd. los ci es malada e sintomosa, e los ci cura un person en ci on suspeta la maladia.
On ave ansia ce la porta de mascas va dona cisa un senti falsa de securia, con resulta ce la popla va es min atendente a la distanti sosial e otra metodos de ijien, como la lava de manos. La OMS ia dise ce paises individua debe evalua la riscas e beneficas cuando los consela sua poplas sur covrentes de fas.
@T Peru ave sua presidente tre en min ca un semana
@L aora_oji/2020/peru_ave_sua_presidente_tre_en_min_ca_un_semana
====== Peru ave sua presidente tre en min ca un semana ======
18 novembre 2020
Francisco Sagasti ia es inaugurada como la presidente entretempo nova de Peru, la xef tre de la pais en min ca un semana. Esta injenior academial de 76 anios va gida Peru asta la eleje presidental en la anio veninte.
En la semana pasada, Presidente Martin Vizcarra ia es impedicada en relata con alegas de subasta (cual el nega), un cambia cual ia provoca protestas tra la pais. A la min du persones ia mori e multe ia es ferida.
Sagasti ia es elejeda como gidor pos oteni la minima nesesada de 60 votas. El parteni a la sola partito cual ia vota contra la impedica.
Parlante a la parlamento peruan, el ia demanda per "pardona a la stato" par la familias de la persones matada en la protestas. "Nos no pote revive esta jovenes," el ia ajunta. "Lo es asoluta nesesada ce nos resta calma -- ma no confusa esta con pasivia, conforma o renunsia."
Sagasti ia prende la posto de Manuel Merino, la xef de parlamento ci ia deveni presidente entretempo pos la impedica de Vizcarra. Merino ia ocupa la posto tra min ca un semana cuando protestores e politicistes ia esije sua resinia pos colpas violente contra la protestas oposante el.
Deses de miles de persones, de ci multe ia es joven, ia partisipa en protestas contra la ejeta de Vizcarra. Alga ia es presente per suporta Vizcarra e sua projeta de reformi, ma otras ia espresa sua frustra con la parlamento e con lo cual los ia descrive como la "colpa parlamental" realida a media de la pandemica e un declina economial.
Asta aora, Peru ia reporta cuasi 935 mil infetas e plu ca 35 mil moris. Sua taso de moris per 100 mil persones es la numero tre de la plu altas de mundo.
@T Pinterest paia $22,5 milion pos discrimina de jenero
@L aora_oji/2020/pinterest_paia_22_5_milion_pos_discrimina_de_jenero
====== Pinterest paia $22,5 milion pos discrimina de jenero ======
15 desembre 2020
Pinterest, compania de rede sosial, ia acorda paia $22,5 milion per salda alegas sur discrimina de jenero.
La alegas ia es fada par Françoise Brougher, la ofisior xef de operas a la compania. La paia es la plu grande de sua tipo cual on ia anunsia publica.
La compania de comparti fotos, conoseda per sua multe usores fema, ia dise ce la compensa parteni a un labora plu larga per "boni sua cultur". La caso ia aveni entre otra criticas par empleadas pasada fema negra.
En la litiga, inisiada en agosto, Brougher ia acusa Pinterest de esclui el de consentas pos cuando el ia presa per paia egal. Ultima, Pinterest ia desemplea el cuando el ia cexa sur comentas sesiste par un colaboror.
Sua acusa ia dise ce esta ia "solidi la ambiente nonbonveninte de Pinterest per femes e minorias".
Brougher, ci ave 55 anios, ia labora a Pinterest de marto 2018 asta sua desemplea en april 2020. El ia supravide un ecipo de sirca mil persones.
En un declara pos la deside, el ia dise ce el bonveni "la pasos sinifiante cual Pinterest ia fa per boni sua ambiente de labora" e ce el "es corajida ce Pinterest es dedicada a construi un cultur cual permete tota empleadas a senti incluida e suportada".
La compania e Brougher ia dise ce sirca $2,5 milion de la compensa va es donada a organizas cual labora per avansa femes e minorias en la industria tecnolojial.
"Pinterest reconose la importa de promove un ambiente de labora cual es diversa, justa e incluinte, e va continua sua atas per boni sua cultur," la compania ia declara.
Cuando Brougher ia publici sua alegas, alga empleadas de Pinterest ia greve en responde a la acusas, como ance en responde a alegas de discrimina par du empleadas negra pasada de la compania. Empleadas ia crea ance un solisita formal per esije cambias.
@T Piratia dupli en Asia en la pandemica
@L aora_oji/2020/piratia_dupli_en_asia_en_la_pandemica
====== Piratia dupli en Asia en la pandemica ======
18 julio 2020
Un reporta nova dise ce casos de piratia ia dupli tra Asia. 50 casos ia aveni en la rejion en la dui prima de la anio, contrastada con 25 en la mesma periodo de 2019.
16 casos ia aveni en la Streta Singapor, un de la vias la plu traficosa per barcones comersial, entre janero e junio. On ia atribui la cambia a la declina causada par la coronavirus.
La reporta semianial, publicida par la Acorda de Coopera Rejional per Combate Piratia e Ruba Armada contra Barcones en Asia (ReCAAP), ia dise ce la cuantia de atacas en Bangladex, Barat, Indonesia, la Pilipinas, Vietnam e la Mar Xina Sude ia crese ance.
On clasi un caso como piratia si lo aveni estra la autoria de un stato. Tota otras es regardada como ruba armada.
Masafumi Kuroki, dirijor de ReCAAP, ia dise ce la crese ia es disturbante: "Crimines 'peti', si no tratada, pote coraji criminores a fa atas plu grave."
Multe de la piratia e ruba armada en Asia es acasiste. Alga piratas es pexores local ci vide piratia como un modo de aumenta sua revenus. En otra partes de Asia, multe piratas es omes joven e sin emplea, ci ia viaja per xerca labora.
Articles popular furada inclui metal resiclable, partes de motores, aparatos de comunica de la ponte de un barcon, e posesedas personal de la ecipo, cual on revende a la mercato negra.
COVID-19 ia redui la comersia global, reduinte la crese economial, causante povria e un manca de emplea, e provocante plu piratia maral. Con min comersia, on ave min marinores en la barcones per vijila contra atacores posible.
@T Plu ca mil denunsias par modo nova en Hongkong
@L aora_oji/2020/plu_ca_mil_denunsias_par_modo_nova_en_hongkong
====== Plu ca mil denunsias par modo nova en Hongkong ======
6 novembre 2020
En Hongkong, un metodo nova per reporta rompes de la lege controversa de securia nasional ia es usada a plu ca mil veses en la oras prima de sua funsiona.
Persones ala pote anonim envia imajes, audios e videos si los suspeta ce algun ia viole la regulas. La lege, introduida en la plu temprana de esta anio, criminali tradores ci conspira con fortes stranjer.
Su la regulas nova on ia aresta ja alga ativistes e ia silenti protestores. La puni masima es prisoni per la vive intera.
A la sera de ier, la polisia de Hongkong ia reseta plu ca 1000 avisas par la linia direta nova. On pote envia informas par eposta, mesajeta o WeChat, la mesajador la plu popular en Xina continental.
Alga politicistes e promovores per diretos ia averti ce on pote usa esta metodo per ataca persones con opinas political oposada.
Human Rights Watch, un organiza internasional e nongovernal, ia comenta: "Par coraji persones a reporta contra sua amis e visinas, la governa xines reprodui en Hongkong un de sua utiles la plu susedosa per controla sosial: un cultur de denunsiores."
Xina ia continua severi sua controla de la site su la lege nova de securia nasional. Beijing razona ce la lege es nesesada per combate turba e nonstablia, pos menses de protestas cual ia esije plu democratia e min influe xines.
Ma lo es ja vasta condenada par governas e promovores de diretos umana en la ueste, do criticores dise ce lo sutrae la libria cual ia es garantiada per 50 anios pos la fini de la governa brites de Hongkong en 1997.
Pos la introdui de la lege en junio, alga organizas promovente democratia ia desgrupi, temente sur sua propre securia.
En la semana pasada, Tony Chung, un ativiste joven, ia es acusada su la lege nova, a poca dias pos es detenida estra la consuleria esuan. On reporta ce Chung, ci ave 19 anios, ia intende entra a la consuleria per reclama refuja.
E plu temprana en la semana presente, sete politicistes suportante democratia en Hongkong ia es arestada par causa de scaramuxas cual ia aveni en la Consilio Leginte de la site contra legores favorente Beijing en maio.
@T Plu ca milion persones ia mori con COVID-19
@L aora_oji/2020/plu_ca_milion_persones_ia_mori_con_covid-19
====== Plu ca milion persones ia mori con COVID-19 ======
29 setembre 2020
Plu ca milion persones en la mundo ia mori con la coronavirus, e multe rejiones reporta cuantias ancora cresente de infetas nova. La statistica par la Universia Johns Hopkins mostra ce la moris en la SUA, Brasil e Barat composa cuasi un dui de la soma intera.
Espertas averti ce la cuantia vera es probable multe plu alta. António Guterres, secretor jeneral de la Nasiones Unida, ia descrive la situa como "aturdinte" e "un punto angusante".
"Ma nos debe nunca perde la atende a cada vive individua," el ia dise en un mesaje video. "Los ia es padres e madres, sposas e sposos, frates e sores, amis e colaborores. La dole ia es multiplida par la savajia de esta maladia."
Esta punto ia ariva a cuasi des menses pos ce reportas sur la coronavirus la comensa emerji de Wuhan en Xina. Pos alora, la maladia ia sperde a 188 paises, con plu ca 32 milion casos confirmada. Metodos per atenta preveni sua sperde ia retrosede la economias de multe paises.
Entretempo, la labora continua per reali un vasin eficas, ma la Organiza Mundal de Sania (OMS) ia averti ce la cuantia de persones mor va ateni cisa du milion ante ce un vasin es vasta disponable.
Global, sirca 240 vasines posible es a un fase temprana de developa, con 40 ja en probas clinical e 9 sur la paso final de es probada a miles de persones. La crea de un vasin ocupa tipal alga anios, ma par causa de la crise pandemica, siensistes labora estrema rapida.
La OMS ia anunsia ce un proba capas de diagnose COVID-19 en un pico de minutos va estende la capasia de deteta infetas en paises de revenu basa a media.
La proba custa $5 e pote revolui la prosede de trasa la maladia en paises min rica, do on ave un manca de medicistes e sienserias. Un acorda con la compania fabricante va furni 120 milion probas tra ses menses.
@T Pluve forte causa inondas matante en Japan
@L aora_oji/2020/pluve_forte_causa_inondas_matante_en_japan
====== Pluve forte causa inondas matante en Japan ======
5 julio 2020
Nove persones manca, e on crede ce des-sinco es mor, sur la isola Kyushu a la sude de Japan, en cuando pluves causa inondas e liscateras. On ia trova des-cuatro vitimes en la mesma cureria de persones vea; la otra ia es tirada de un liscatera.
La autoriosas ia comanda la evacua de plu ca 200 mil persones, e des mil soldatos es enviada per aida la laborores de salva.
On predise ce la pluve forte va continua tra la note asta soldi. La ministro xef, Shinzo Abe, ia urje ce cadun es masima vijilante.
La prefetias Kumamoto e Kagoshima es la plu grave afetada. La governor de Kumamoto ia dise ce la vitimes a la cureria ia es trovada "en sesa cardiorespiral", un terma usada en Japan ante cuando un dotor confirma ofisial la mori.
Un video mostra un ponte destruida pos la supraflue de la rio Kuma, e otra imajes mostra autos e casas sumerjida. La Ajenteria Meteorolojial de la pais ia dise ce un tal pluve es nunca videda a ante en la rejion.
Un fem ci ia refuja se a un sentro de evacua ia comenta ce el ia imajina nunca ce pluve pote es tan potiosa. Un otra ia dise ce el ia sensa la vibras de la acua turbada de un rio prosima.
Un person ci abita en Kumamoto ia dise: "Me ia vide arbores grande e partes de casas puxada a via, e ia oia los en colide contra alga cosa. La aira es plenida par la odor de gas goteante e acua de cloaca."
On reporta ce oto casas en la distrito Takinoue de la vila Ashikita ia es scopida a via par la rio.
@T Predises economial per la anio veninte en Asia Pasifica
@L aora_oji/2020/predises_economial_per_la_anio_veninte_en_asia_pasifica
====== Predises economial per la anio veninte en Asia Pasifica ======
22 otobre 2020
La Funda Monal Internasional (FMI) dise ce Asia Pasifica va recovre de sua retrosede la plu sever en memoria vivente.
Lo ia basi denova sua prevides de crese economial per la rejion, a esta ves de -1,6% a -2,2% per esta anio. Ma lo dise ance ce lo espera un rebondi de cuasi 7% en 2021.
Xina va fa un rol grande en la crese de la rejion en la anio veninte. Sua datos la plu resente mostra un recovre continuante pos la declina causada par la virus. Ma on ave ancora multe causas de pesimisme, car paises incluinte Barat, la Pilipinas e Malaisia batalia ancora contra infetas.
"La sicatrises va es profonda," la FMI ia dise, indicante un min cuantia de investi, lo cual va causa efetos cadenin en la media de la desenio.
Economias en esta parte de la mundo trata no sola la problemes levada par la pandemica. Los es ance afetada par la gera comersial entre Xina e la SUA, e la enemia cresente entre esta du suprapotias economial.
En la plu temprana de esta semana, Xina ia publici sua datos per la cuatri de julio a setembre, mostrante un crese de 4,9% en compara con la mesma parte de 2019. La FMI regarda Xina como "un positiva rara en un mar de negativas".
La bon anunsia es ce la FMI espeta ce la rejion va crese par 6,9% en la anio veninte. Ma esta depende de multe fatores, incluinte la conteni de la virus.
Un de la defias va es diversi la economias asian a via de un supradepende de esportas. La FMI descrive esta como "un labora progresante".
@T Proibis de viaja de la RU su un varia nova de covid
@L aora_oji/2020/proibis_de_viaja_de_la_ru_su_un_varia_nova_de_covid
====== Proibis de viaja de la RU su un varia nova de covid ======
21 desembre 2020
Ofisiores de la Uni European va discute oji sua responde coordinada a un varia nova e plu infetante de la coronavirus trovada en la Rena Unida. La situa ia gida ja multe paises a pone proibis de viaja.
Deutxland, Frans, Italia e Canada es entre la paises cual ia suspende volas de la RU. On ia para ance la parti de trenes a Europa tra la Tunel su la Manga.
La varia nova de la virus es plu comunicable par asta 70%, diseda par ofisiores de sania, ma on ave no indica ce lo es plu matante. On ave ance no indica ce lo reata diferente a vasines.
Matt Hancock, ministro de sania de la RU, ia dise ce la varia nova "deveni noncontrolable", e Danmarc, Italia e Nederland ia anunsia ce los ia deteta ja lo.
La rapidia con cual governas ia anunsia sua proibis contra viaja de la Rena Unida mostra la profondia de la ansia. La consenta de representores governal en la Consilio European va aveni a 10:00 de ora universal.
Ance oji, on previde ce la regulor medical de la UE va recomenda aproba la vasin Pfizer-BioNTech per usa en tota 27 statos.
La Ajenteria European de Medisines va consenta a un semana plu temprana ca normal per fa un deside sur la vasin, cual persones en la Rena Unida e la SUA ia reseta ja. Si acorda es donada, on previde un aproba ofisial par la Comision European a mercurdi, e cisa la distribui de vasines va comensa en alga paises de la UE a soldi.
@T Protestas contra un misa per colaborores nazi corvatsce
@L aora_oji/2020/protestas_contra_un_misa_per_colaborores_nazi_corvatsce
====== Protestas contra un misa per colaborores nazi corvatsce ======
17 maio 2020
On ia aumenta la securia en Sarajevo, la capital de Bosnia e Hersegovina, ante un misa per onora la colaborores corvatsce de la nazis en la Gera Mundal Du. Organizas e ativistes antifaxiste ia parade sur la stradas de la site per protesta.
Esta servi relijial anial aveni usual en Osteraic a la loca de la combate final de Ustaše, la governa pronazi, en la vila Bleiburg. On ia move lo a Bosnia par causa de la restrinjes de coronavirus.
Miles de persones ia protesta en Sarajevo, su la oserva atendente de la polisia. On ia ave no reportas de violentia.
La organiza faxiste Ustaše ia controla Corvatsca como un governa pupetin de Deutxland Nazi de 1941 a 1945, pos la estende de sua pais per inclui tota partes de Bosnia e alga de Serbia. En acel periodo, los ia comensa mata la abitores serbsce, iudi e romani.
Fotos mostrante vitimes de la nazis e la Ustaše ia es poneda longo la via de la prosegue protestante.
Plu tarda, un fola grande ia asembla en la sentro de la site cuando la misa ia es condenada par la maior de Sarajevo, la presidente de Corvatsca e la Congresa Iudi Mundal. La Sentro Simon Wiesenthal, un organiza per diretos umana, ia descrive la misa como "un parodia de memoria e justia".
La polisia ia clui la distrito sirca la Catedral de la Cor Santa, do la misa ia aveni en la matina de ier. Vinko Puljić, la arcibispo de Sarajevo, ci ia gida la servi, ia rejeta tota la acusas e ia dise ce preas per la spiritos de vitimes no sinifia ce on aproba sua atas.
Un aveni simil de recorda ia es fada en Zagreb, la capital de Corvatsca. Deses de miles de soldatos corvatsce de alia nazi ia fuji con sua familias a Osteraic a la fini de la Gera Mundal Du. Ma la fortes brites ia transfere los a partisanes iugoslavian, ci ia mata multe de los a Bleiburg e en un marxa forsada per revade a Iugoslavia.
@T Protestas en la SUA pos la mata de George Floyd
@L aora_oji/2020/protestas_en_la_sua_pos_la_mata_de_george_floyd
====== Protestas en la SUA pos la mata de George Floyd ======
31 maio 2020
En sites tra la SUA, on ia comanda proibis de sorti per atenta impedi scaramuxas violente entre protestores e la polisia sur la mori de George Floyd.
Floyd, un afroamerican de 46 anios, ia es matada pos es arestada par la polisia en Minneapolis a lundi. El ia atenta usa mone falsa per paia en un boteca. El ia resiste ce la polisia pone el en sua veculo, disente ce el es claustrofobica.
On ia acusa Derek Chauvin, un polisior blanca de 44 anios, sur la omiside de Floyd. El va apare en un corte judal doman.
En un video cual ia sperde virusin, on vide ce Chauvin ajena sur la colo de Floyd tra alga minutos, an cuando Floyd dise repeteda ce el no pote respira. Chauvin e tre otra polisiores alora presente es aora desempleada.
Protestas ia aveni en multe locas, e polisiores de tumulta ia usa gas lacrimojen e baletas de cauxo cuando sua veculos ia es ensendeda en alga sites. Presidente Donald Trump ia culpa "furores e anarcistes" per la violentia.
Trump, un Republiciste, ia culpa ia maior de Minneapolis, un Democrata, per fali controla la protestas, cual es la plu grave pos sua ariva en la posto. El ia dise ce si on no controla la violentia, el va envia la Garda Nasional.
Joe Biden, la competor Democrata per la presidentia, ia acusa ce Trump dona osijen a prejudis.
@T Protestas grande contra la governa en Ecuador
@L aora_oji/2020/protestas_grande_contra_la_governa_en_ecuador
====== Protestas grande contra la governa en Ecuador ======
26 maio 2020
Miles de persones ia vade sur la stradas en Ecuador per protesta contra la responde economial par la governa a la crise de coronavirus. Sirca 2000 persones ia protesta en la capital Quito, defiante la restrinjes intendeda per combate la pandemica.
En la semana pasada, la presidente ia anunsia metodos incluinte la clui de alga companias poseseda par la governa e la redui de salarios en la campo publica.
Ecuador es un de la paises la plu grave afetada en America Sude. On ia confirma sirca 37 mil casos de la virus, e plu ca 2000 persones ia mori par lo.
Protestores usante mascas de fas e portante banderas ia partisipa en protestas organizada par sindicatos e organizas sosial, pos la reduis anunsiada par Presidente Lenín Moreno. Longo el, 150 mil empleas es ja perdeda par causa de la coronavirus.
Protestas ia aveni ance en Guayaquil, la site du, do autoriosas ia es tan inondada par la crise en la mense pasada ce sentos de corpos ia resta nonenterada.
"Si la coronavirus no va mata nos, la governa va fa lo," la xef de un sindicato en la site ia comenta.
La maior de Quito, Jorge Yundo Machado, ia urje "bon judi" en Twitter. "Ta ce nos xerca modos diversa per protesta, ma no par presentia personal," el ia dise, ajuntante ce on ave "un risca alta de infeta -- nos es en un crise de sania".
Maria Paula Romo, ministro de internas, ia informa ce un cuantia estimada de 4000 persones ia partisipa en protestas tra la nasion, e ce un polisior ia es ferida.
En la semana pasada, la Organiza Mundal de Sania ia descrive America Sude como "un episentro nova de la maladia". Brasil, cual ia rejistra plu ca 23 mil moris, ave la cuantia du la plu alta de infetas confirmada en la mundo. Peru, visina de Ecuador, ave plu ca 120 mil casos.
@T Protestas pos la mata de un om negra en Brasil
@L aora_oji/2020/protestas_pos_la_mata_de_un_om_negra_en_brasil
====== Protestas pos la mata de un om negra en Brasil ======
21 novembre 2020
La mata savaje de un om negra su la manos de du securiores estra un supramercato ia provoca coleria tra Brasil.
Pos la mata a jovedi, la vijila de la Dia de Consensia Negra, persones ia protesta contra razisme ier. Metraje mostra João Alberto Silveira Freitas colpada con punio a la fas par la gardores a un boteca Carrefour en Porto Alegre. El ia ave 40 anios.
Un de la gardores ia es un polisior militar nonpostida. Los ia es arestada, e la sucompania brasilera de Carrefour, un organiza franses de supramercatos, ia dise ce lo ia deslia se de la compania de securia cual ia furni la gardores.
Brasil ave un istoria longa de razisme. Lo ia es la pais ultima en la Americas cual ia aboli sclavia, en 1888. E en la anio pasada, la polisia en Brasil ia mata un cuantia cuasi sesuple de persones como en la SUA, e la plu de estas ia es negra.
Tradisional, on ensenia a brasileras ce los vive en un "democratia razal": Presidente Jair Bolsonaro nega an ce razisme esiste. Ma ativistes dise ce esta persepi es aora lenta cambiante.
Un video de la ataca en la sera de jovedi en Porto Alegre, un site sude, ia es sirculida en redes sosial e par jornales brasilera, e on ia regarda lo como scandalosa. En lo, Sr Silveira Freitas, un soldor, es repeteda bateda par un gardor en cuando un otra restrinje el. Un plu empleada pare filma la aveni.
Reportas indica ce on ia clama per la securiores pos cuando un laboror fema a la supramercato ia es menasada par un om.
A la matina de ier, protestores ia asembla estra Carrefour en Porto Alegre e en la capital Brasilia, scandente e portante cartones cual ia dise "Vergonia de es blanca" e "Per favore! Sesa mata nos!" On ia urje persones a protesta ance en otra sites.
La promove Vives Negra Importa, cual ia forti en la mundo pos la mata de George Floyd en la SUA en maio, ia gania la suporta de multe persones brasilera.
@T Protestas pos la reindui secreta de Lucaxenca
@L aora_oji/2020/protestas_pos_la_reindui_secreta_de_lucaxenca
====== Protestas pos la reindui secreta de Lucaxenca ======
24 setembre 2020
Protestas grande continua en Minsk, la capital de Bielarus, pos la indui de presidente Aliacsandr Lucaxenca en un rituo nonanunsiada. On reporta bates e detenis par la polisia, e videos mostra ce canones de acua ia es usada.
Alga sentos de persones ia es presente a la indui de Lucaxenca per sua periodo ses en potia. Un oposor political ia descrive la aveni como un "reuni de furores".
Oposores dise ance ce la vota en agosto ia es manipulada per favore Lucaxenca.
La comision elejal de Bielarus ia declara ce Lucaxenca ia gania plu ca 80% de la votas, provocante semanas de protestas coletiva tra la pais. Alga paises en la Uni European dise ce los no reconose Lucaxenca como un presidente legal.
Induis de presidentes es tipal preanunsiada como formales major de stato. En loca, un ajenteria governal de novas ia reporta ier: "Aliacsandr Lucaxenca ia emprende sua posto como presidente de Bielarus. La rituo de indui aveni en esta minutos en la Palasio de Nondepende."
Lucaxenca, ci rena ja esta republica pasada soviet tra 26 anios, ia dise ce Bielarus nesesa securia e acorda "a la borda de un crise global", un refere parente a la pandemica de coronavirus. "Me no pote, me ave no direto de abandona la bielarusces," el ia ajunta.
En la ap de mesaji Telegram, un canal usada par oposores ia urje ce on protesta sur la stradas de 18:00, recomendante ce veculores bloci la vias per crea conjesta.
"Comensante de esta dia mesma, el [Lucaxenca] deveni ofisial un bandito e frodor ci no es reconoseda a cualce loca en la mundo sivilida," la canal ia comenta.
A la sera, protestores ia prosegue a la sentro de Minsk. Alga ia porta coronas falsa per burla la indui, e un ia mostra un carton con la testo: "La re ave no vestes!" Ma multe polisiores ia es presente e alga persones ia es detenida.
La oposor political xef de Lucaxenca, Svetlana Tihanovskaia, ci ia fuji a Lietuva per evita es arestada, ia dise: "Pos oji, el es un xef no legal, no autentica de Bielarus". Longo se, Tihanovskaia ia gania 60% o 70% de votas en locas do estas ia es coreta contada.
@T Protestores ensende un stasion en Paris
@L aora_oji/2020/protestores_ensende_un_stasion_en_paris
====== Protestores ensende un stasion en Paris ======
29 febrero 2020
En Paris, la polisia ia evacua la stasion Gare de Lyon cuando protestores ia crea un focon per atenta disturba un conserta par un cantor congoles.
Oposores political de la governa de la Republica Democrata de Congo ia ensende scuteres, motosicles e baldones e ia impedi pompores de combate la arde. Loa acusa ce la cantor Fally Ipupa es tro prosima a la governa congoles.
La polisia ia proibi ja protestas contra la conserta, referente a "un contesto political tensada".
Un plumon de fuma ia es vidable supra la stasion, e on ia vide fuma ance en la stasiones de metro e ferovia suburban. La trafica ia deveni completa conjestada.
La atentas de preveni pompores de ateni la loca ia es descriveda par la polisia como "condui scandalosa".
Ante la conserta, la polisia ia averti sur clamas notable en redes sosial ce protestores ta "scaramuxa contra consertores". Un protestor ia dise ce el ia atenta bloci los ci vole vade a la conserta.
La protestores dise ce Fally Ipupa es tro prosima a Presidente Felix Tshisekedi, ci ia prende la potia a un anio ante aora.
Jornalistes congoles reporta ce membros de la diaspora congoles ia veni de otra sites european, incluinte London, Bruxelles e Wien, per atenta disturba la conserta.
Fally Ipupa, ci ave multe fanes en Frans e ia colabora con rapores franses, ia es obligada a cansela un conserta en Frans en 2011.
Ultima, la polisia ia dise ce 30 persones ia es arestada e 54 multada per sua partisipa en un protesta proibida.
@T Punis finansial par la SUA contra un lege en Hongkong
@L aora_oji/2020/punis_finansial_par_la_sua_contra_un_lege_en_hongkong
====== Punis finansial par la SUA contra un lege en Hongkong ======
2 julio 2020
La Salon Basa de la Congresa de la SUA ia aproba punis finansial nova en relata con Hongkong, pos la pone de un lege de securia par Beijing cual paises tra la mundo ia condena.
La deside, cual ia es apobada en acorda unida, puni bancos cual comersia con ofisiores xines. La Salon Alta va debe ance aproba lo ante cuando lo vade a Presidente Trump.
Criticores de Xina dise ce la lege nova sutrae librias cual ia es garantiada per sincodes anios cuando la governa brites de Hongkong ia fini en 1997.
"La lege es un bate savaje e vasta contra la popla de Hongkong, intendeda per destrui la librias cual on ia promete a los," Nancy Pelosi, presidente de la Salon Basa, ia comenta.
Boris Johnson, ministro xef de la Rena Unida, ia dise ce la aseta de la lege es "un rompe clar e grave" de la declara juntada xines-brites en 1985. Su esta declara, Hongkong ia es redonada a Xina en 1997, ma con alga librias garantiada per minima un dui de un sentenio par la acorda de "un pais, du sistemes".
La RU ia responde aora par ofre abita e sitadania a asta tre milion Hongkonganes. Ma oji, Xina ia menasa "pasos corespondente" per bloci esta scema de sitadania.
La ambasada xines en la RU ia dise: "Si la lado brites fa cambias uniladal a la pratica pertinente, lo va rompe sua propre posa e prometes, como ance leges internasional e normas fundal."
Xina ia dise ce la lege de securia es nesesada per para protestas de la tipo cual on ia vide en Hongkong en multe de 2019. E an con la condena en la Ueste, plu ca sincodes paises, gidada par Cuba, ia suporta Xina a la Nasiones Unida en esta semana.
A sola oras pos la aseta de la lege, la polisia de Hongkong ia fa sua arestas prima. Des persones ia es acusada de viole la lege nova, incluinte un om con un bandera promovente autonomia per la rejion. Sirca 360 otras ia es detenida a un asembla proibida.
Su la lege nova, la provoca de odia contra la governa sentral de Xina o la governa rejional de Hongkong es un crimin. La autoriosas pote aora regarda como terorisme alga atas, incluinte dana a recursos de transporta publica, cual ia aveni comun en la protestas de la anio pasada.
@T Putin desemplea sua conselor secretosa
@L aora_oji/2020/putin_desemplea_sua_conselor_secretosa
====== Putin desemplea sua conselor secretosa ======
19 febrero 2020
Vladimir Putin, presidente de Rusia, ia desemplea un de sua conselores la plu prosima, Vladislav Surkov.
La stratejiste secretosa ia es conoseda en Rusia como la cardinal gris, par causa de sua influe persepida a la presidente estra la stadio. Jeneral, on ia vide el como un aidor ci ia forti ia teni de potia par Putin.
Surkov ia maneja la politica rusce pertinente a Ucraina, ma alga de acel encarga ia es resente prendeda de el. Dmitry Kozak, un veteran poltical e aliada prosima de la presidente, ia emprende la rol sur Ucraina en la parte plu temprana de esta mense.
La Cremlin no ia clari esce Surkov va reseta un posto nova. Un declara en la pajeria de la Cremlin ia dona no esplica sur la razona de sua desemplea.
Como la visxef de la dirije de la Cremlin, Surkov ia supravide partitos political en parlamento e campanias elejal cual ia furni un vinse per Putin.
Sua influe ia comensa diminui en 2011, cuando el ia deveni un visministro xef. En 2013, el ia es encargada per maneja la lias entre Rusia e Ucraina e otra paises de la Uni Soviet pasada.
Moscva ia propri Crim, la penisola sude de Ucraina, en 2014 e ia suporta separadistes rusce parlante en la este de Ucraina.
@T Qantas va esije ce pasajores es vasinida
@L aora_oji/2020/qantas_va_esije_ce_pasajores_es_vasinida
====== Qantas va esije ce pasajores es vasinida ======
24 novembre 2020
Pasajores internasional va debe demostra ce los es vasinida contra COVID-19 per pote entra a volas de Qantas.
La xef de la airocompania australian, Alan Joyce, ia dise ce esta va es "un nesesada" cuando vasines es disponable.
Australia ia clui sua fronteras internasional en la temprana de la pandemica e ia obliga persones ci ia reveni a isoli se. Plu resente, la pais ia depende de encluis, probas vasta, e trasas forte de contatadas per redui sua cuantia nasional de infetas dial asta cuasi zero.
Joyce ia dise ce Qantas esplora modos de cambia sua regulas per viajores internasional. La industria de aviones ia es sever afetada par restrinjes de viaja en esta anio.
En agosto, Scott Morrison, ministro xef de Australia, ia dise ce lo es probable ce cualce vasin susedosa va deveni "tan obligante como on pote posible fa". "On ave sempre esentas de cualce vasin per razonas medical, ma acel debe es la sola funda," el ia esplica.
En la mesma mense, Qantas ia reporta un perde anial de cuasi 2 mil milion dolares australian. Alora Joyce ia comenta ce la situa comersial es la plu mal en la sento anios de la istoria de la compania, ajuntante ce "la efeto de COVID a tota airocompanias es clar -- lo es ruinante."
Ier, la stato Cimri Sude Nova ia reabri sua frontera con Victoria a la ves prima pos un crese rapida de infetas en Melbourne, capital de Victoria, en julio. Volas entre acel site e Sydney, capital de Cimri Sude Nova e normal un de la vias la plu usada de mundo, ia es canselada.
Arivante en Sydney par un vola de Qantas a la ves prima de menses, pasajores ia es salutada a la termina par persones teninte cartones con la parolas "bonveni denova".
@T Reatas de estasia e dole a la vinse de Biden
@L aora_oji/2020/reatas_de_estasia_e_dole_a_la_vinse_de_biden
====== Reatas de estasia e dole a la vinse de Biden ======
8 novembre 2020
Senas de joia e delude ia es videda tra la SUA ier a la projeta ce Joe Biden ia gania la eleje presidental. Esta anunsia ia fini un periodo de alga dias de nonsertia e suspende.
Selebras ia aveni spontan en sites major pos cuando jornales ia anunsia la vinse de Biden contra presidente Donald Trump. De New York asta Los Angeles, la resulta ia es salutada con aclamas e dansas par suportores de Biden ci ia pleni la stradas.
En otra locas, suportores de Trump ia es plu sombre, e alga ia refusa aseta la projeta.
Per tota la pais, la resulta ia es un momento de relasa pos un eleje amarga cual ia aveni en la ombra de un pandemica. Mascas ia es jeneral portada cuando sentos de persones ia asembla prosima a la Casa Blanca per selebra estra un serca nova de securia.
A mera oras pos la anunsia, la Plaza Vives Negra Importa, la loca de multe protestas resente contra nonjustia razal en la capital, ia es plen de miles de persones. Times Square en New York ia es egal folida.
Persones ia abrasa entre musica e pirotecnicales, ma Trump, ci ia jua golf en Virginia cuando la resulta ia es declarada, ia es fisical e spirital distante.
An con la projeta, alga de sua suportores ia insiste ce la presidente republiciste pote ancora reteni la Casa Blanca. Multe ia repete la alegas de froda cual el ia tuita sin cualce funda.
On ia oia scandes de "Esta no ia fini" e "Nos va es asi per sempre" estra la Capitolio de la Stato Michigan en Lansing.
Sentis simil ia es espresada en Phoenix, la capital de Arizona, do alga suportores ia cria "Trump ia vinse" e "Nos va vinse en corte", referente a la defias legal cual Trump ia inisia contra la resultas. Alga protestores ia culpa an la jornales per declara Biden como presidente elejeda.
Spesial notable es la fato ce Kamala Harris va deveni la vispresidente prima de la SUA ci es fema, e la prima ci es indoamerican o afroamerican. El ia nase en California con madre barati e padre jamaican.
@T Regulas de enclui va deveni min sever en Italia
@L aora_oji/2020/regulas_de_enclui_va_deveni_min_sever_en_italia
====== Regulas de enclui va deveni min sever en Italia ======
27 april 2020
Italia ia revela sua intende de lejeri la restrinjes sever poneda a sete semanas pasada per impedi la sperde de la coronavirus.
La ministro xef, Giuseppe Conte, ia dise ce la regulas va es destensada a 4 maio, cuando on va permete ce persones visita sua relatadas en cuantias peti. Parces, fabricerias e construerias va reabri, ma scolas no va recomensa lesones ante setembre.
La pais ia rejistra ier "sola" 260 moris relatada con la virus, la cuantia dial la plu basa de pos 14 marto. La soma ofisial es aora 26 644, la plu alta en Europa.
Otra paises como Suiz e Espania deseveri ance sua restrinjes.
Plu ca 197 mil casos de la virus es confirmada en Italia, longo datos de la Universia Johns Hopkins en la SUA, cual trasa global la maladia.
Car la cuantia de casos en Italia ia redui, la autoriosas crede aora ce la taso de infeta (la cuantia de persones ci cadun con la virus va infeta probable) es sufisinte basa per permete un destensa cauta.
On ia fa no anunsia sur la posible de recomensa la liga prima de futbal italian, an privata.
Conte ia asentua ce la regulas de distanti sosial debe continua tra menses, e ce servis en eglesas va es ancora proibida. El ia urje ce persones resta a distantia minima de un metre de lunlotra.
"Si nos no respeta la protejes, la curva va asende, la moris va crese, e nos va ave danas nonreversable en nosa economia," Conte ia dise. "Si vos ama Italia, manteni vosa distantia."
El ia ajunta ce sua governa va limita la custa de mascas de fas a 50 sentimes.
@T Renault prepara desemplea 15 mil persones
@L aora_oji/2020/renault_prepara_desemplea_15_mil_persones
====== Renault prepara desemplea 15 mil persones ======
29 maio 2020
On reporta ce Renault, fabricor franses de autos, intende desemplea 15 mil persones tra la mundo per atenta redui sua perdes finansial causada par la pandemica.
La virus ia profondi la defias a la compania, cual ia esperia sua perde anial prima de un desenio en la anio pasada. Lo ia promete redui sua custas par 2 mil milion euros.
On previde ce la compania va discute sua projeta oji, e ce cuasi un entre tre de la persones desempleada va es en Frans.
Parlante en televisa franses, un xef de laboristes franses a ci ia intende es ja esplicada ia dise ce multe de la desempleas en Frans va es realida par jubilas o partis volente.
Renault reclama plu ca 4% de la mercato global de autos, e emplea plu ca 179 mil persones en 39 paises. An ante la pandemica, la compania ia es en difisilia, pos cuando sua vendes en 2019 ia cade par 3%.
Lo ia dise en april ce la cuantia de veculos vendeda ia cade plu, par 25%, en la tre menses prima de la anio, e ia diminui an plu dramosa en la mense pasada.
La governa franses, cual posese 15% de la compania, negosia aora con Renault sur la posible de presta 5 mil milion euros a la compania. Lo ia promete ance 8 mil milion euros de finansia plu jeneral per forti la industria de autos en la pais.
Presidente Emmanuel Macron ia dise ce, par intercambia, Renault debe reteni sua laborores e produi en Frans.
@T Revores en un buncer norsce respira aira venenida
@L aora_oji/2020/revores_en_un_buncer_norsce_respira_aira_venenida
====== Revores en un buncer norsce respira aira venenida ======
31 agosto 2020
En Noria, plu ca 20 persones ia es ospitalida pos es venenida par monosido de carbono a un rev en un buncer suteran en Oslo, la capital.
La polisia dise ce la selebra ia es descovreda en modo acaso cuando, temprana a soldi, un de sua patrulias ia encontra un grupo de persones joven ci ia condui confusada. Otras ia emerji de un buncer e ia demanda per un ambulansia.
Autoriosas crede ce la veneni ia es causada par jeneradores portable.
On reporta ce du de la 25 vitimes ia es polisiores ci ia aida la selebrores.
La mediciste xef de la Ospital de la Universia de Oslo, Fridtjof Heyerdahl, ia comenta: "Fortunosa, tota de los es recovrente. Nos pote dise ce los es estra peril."
Sirca 200 persones ia es presente a la rev, longo la polisia, ci ia recomenda ance ce otra partisipores xerca trata medical si los ta comensa sufri de nausea, doles de testa o un senti mareada.
Un person ci ia parti ante la ariva de la polisiores ia dise ce el ia sorti ja per respira aira fresca a multe veses, par causa de la mal cualia de la aira interna.
La polisia de Oslo dise ce lo investiga perce lo no ia segue un avisa anonim sur la esiste de la selebra.
@T Rizoforas brasilera va continua es protejeda
@L aora_oji/2020/rizoforas_brasilera_va_continua_es_protejeda
====== Rizoforas brasilera va continua es protejeda ======
30 setembre 2020
Un judor brasilera ia suspende un projeta par la governa de presidente Jair Bolsonaro de cansela regulas cual proteje rizoforas tropical e otra ecosistemes frajil de la costa.
La deside governal a lundi ia provoca un protesta par ambientistes, ci ia teme ce developores de imobila va atenta cambia rejiones grande de pantanes de rizofora a vacanserias nova per turistes.
Ma un corte de apela ia judi ce esta ta pote dana la ambiente a grado "nonreversable".
Maria Carvalho, judor federal en Rio de Janeiro, ia comanda contra la desira de la governa, "considerante la risca evidente de danas nonreparable a la ambiente".
Avocatos ia razona ce "la cansela de tal regulas viole la direto constitual de un ambiente ecolojial ecuilibrada".
Rizoforas es un recurso importante per proteje contra la cambia de clima, e grupos ambientiste ia descrive la deside par la governa como un "crimin". Forestas de rizofora asorbe cuasi la mesma cuantia de diosido de carbono como un area egal de la Foresta Amazona.
La deside, fada par la Consilio Nasional Ambiental, ia ta sutrae "zonas de proteje permanente" creada en 2002 per conserva la multe rizoforas tropical e arboretas de duna en Brasil. La Consilio es gidada par Ricardo Salles, ministro controversa de la ambiente.
En un rejistra esposada de un consenta de la consilio governal con la presidente, Salles ia dise ce la pandemica de coronavirus presenta un bon momento per cansela regulas ambiental "car jornalisme parla sola sur COVID".
Bolsonaro, ci es destriste e setica sur la cambia de clima, ia veni a governa en janero 2019. De alora, el ia preside crises ambiental cual inclui la vasti de desforestis e de focones savaje en la Foresta Amazona.
@T Rocetos itiopian ataca la capital ertri
@L aora_oji/2020/rocetos_itiopian_ataca_la_capital_ertri
====== Rocetos itiopian ataca la capital ertri ======
15 novembre 2020
Rocetos ia es xutada de la rejion Tigray en Itiopia contra la capital de Ertra. On ia oia esplodes en Asmara cuando alga rocetos ia atera en la anteurbe de la site, ma on ave no reportas de feris.
Un roceto ia colpa la airoporto de la site Gondar, partal danante lo. Un otra, simultan lansada, ia atera direta estra la airoporto en Bahir Dar.
La partito renante de Tigray, cual es en disputa con la governa federal de Itiopia, ia menasa ja un ataca. Plu temprana, sua fortes ia xuta rocetos a un otra rejion de Itiopia.
La Fronte per Libri la Popla de Tigray (FLPT) ia dise ce lo ia ojeti du locas en la rejion amarina ier, e ia averti sur plu atacas.
Itiopia ia pasa tra cambias grande pos la ariva de sua ministro xef Abiy Ahmed a sua posto en 2018. On ia dona a el la premio Nobel de pas en la anio pasada, car el ia atenta pasi Ertra, la pais visina contra ci Itiopia ia fa un gera sanguosa a du desenios ante aora.
Ma sua reformis vasta ia marjinali los en la FLPT ci ia domina ja longa la sena political, e en semanas resente, la tensa entre la FLPT e la governa federal ia mali grave.
La batalia per Tigray ia afeta ance Sudan, do a la min 17 mil sitadanes ia traversa la frontera de Itiopia.
@T Ronaldinho es arestada per un pasaporto falsa
@L aora_oji/2020/ronaldinho_es_arestada_per_un_pasaporto_falsa
====== Ronaldinho es arestada per un pasaporto falsa ======
7 marto 2020
La futbalor brasilera pasada Ronaldinho e sua frate ia es arestada en Paraguai ier pos alegas ce los ia usa pasaportos falsa per entra a la pais.
Avocatos acusante dise ce los ia reseta la documentos falsa cuando los ia atera en la capital Asunción a mercurdi.
La du omes ia es prendeda per interoga, e sua otel ia es esaminada par la polisia. Los nega ce los ia fa mal, disente ce los ia crede ce la pasaportos es un espresa de cortesia.
En julio 2019, longo la reportas, la pasaportos brasilera e espaniol de la futbalor ia es confiscada par causa de nonpaia de impostas e nonpaia de multas pos construi nonlegal sur un conserveria de natur en Brasil.
Plu temprana en esta semana, Euclides Acevedo, ministro de internas, ia comenta: "Me respeta sua popularia sportal ma on debe respeta ance la lege. Sin depende de ci on es, la lege pertine ancora."
La om de 39 anios ia viaja a Paraguai per promove un libro e un campania per enfantes malfortunosa.
Ronaldinho ia es la Juor Anial de Mundo en 2004 e 2005, e ia ateni la apico de sua carera a Barcelona, un ecipo major espaniol. El la gania la Copa de Mundo per Brasil en 2002 a lado de sua coatacores suprastelin Ronaldo e Rivaldo.
On estima la valua neta de Ronaldinho como entre 90 e 115 mil euros, e on reporta ce el fatura sirca 175 mil euros per promove un sola posta de Instagram.
@T Rubores fura paper de vason en Hongkong
@L aora_oji/2020/rubores_fura_paper_de_vason_en_hongkong
====== Rubores fura paper de vason en Hongkong ======
17 febrero 2020
En Hongkong, rubores armada ia fura 600 enrolas de paper de vason, con valua de plu ca mil dolares hongkong. Tal enrolas es aora poca disponable en la rejion, mancante pos multe compras asustada par la coronavirus.
Tre omes con coteles ia ruba un traor estra un supramercato en la distrito Mong Kok. La polisia ia aresta du omes e ia regania alga de la enrolas furada.
La ruba ia aveni en la temprana de oji, en un parte de Hongkong cual ave un istoria de ganges criminal.
Botecas tra la site ia vide un redui grande de sua reservas, e filos longa cuando enrolas nova aveni. An con afirmas par la governa ce la prosede de furni no es afetada par la virus, abitores ia ajunta a sua reservas de paper de vason.
Otra produidas per casa ia es ance coletiva comprada, incluinte ris, pasta, e licuidas de limpi.
Lo es ja cuasi nonposible ce on oteni mascas de fas o ijienintes de mano, car persones atenta proteje se de esta virus cual ia prende ja plu ca 1700 vives.
La autoriosas culpa rumores enlinia falsa per la compras coletiva e dise ce la furni de comedas e benes de casa resta stable.
On ia esperia ance alga compras coletiva de paper de vason, ijieninte de mano e mascas de fas en Singapor, cual ia confirma 75 casos de la coronavirus.
@T Ruinas prelatina sur un monte mexican
@L aora_oji/2020/ruinas_prelatina_sur_un_monte_mexican
====== Ruinas prelatina sur un monte mexican ======
24 julio 2020
Sur un monte en Mexico sentral, on ia descovre du monumentos de petra siselida, sur cual on crede ce los ia es creada a plu ca 1500 anios ante aora.
Arceolojistes dise ce la loca ia es trovada par abitores de un vileta prosima. En sua eda oro, la loca ia ave sete piramides, un area per rituos e un campo de juas.
On crede ce lo ia es construida par la zapotecas, ci ia abita en la montania sude de lo cual es aora Mexico. La siselis sujesta ce lo ia es dedicada a la dio de la sumundo.
La monumentos es situada a un punto stratejial a la apico de la monte Cerro de Peña, en la stato Puebla, con altia de 1845 metres. Arceolojistes pensa ce lo ia es ascondeda pos la sentenio 6. Per asede lo, on debe pasa du oras e un dui en asende un via rocosa.
On ia trova du paneles gravada. Un siseli mostra un figur con cornos e garas ci porta un covreseso. On crede ce otras representa un iguana, un agila e un diva fema ci sembla un cirotero. En soma, on ia trova 87 tal glifos asta aora.
Investigas inisial indica ce un area ritual, ensircada par templos e la casas de la renores, ia es ance locada a la culmina de esta monte. La campo de juas ia es probable usada per pelota, un jua en cual persones ia usa sua ancas per propulsa un bal de cauxo tra anelos de petra.
Puebla es ja un rejion rica con ruinas arceolojial, ma persones local ia dise ce los senti orgulo pos gida arceolojistes a esta trova nova.
La sivilia zapoteca, cual ia nomi se "la popla de la nubes", ia orijina en la rejion a 2500 anios ante aora. Lo ia ave un arciteta sofisticada e un stilo de scrive fundida en glifos. Sua relijio ia ave multe dios, de ci multe ia es asosiada con cultiva o bestias.
@T Rusia menasa un barcon esuan en la Mar Japan
@L aora_oji/2020/rusia_menasa_un_barcon_esuan_en_la_mar_japan
====== Rusia menasa un barcon esuan en la Mar Japan ======
25 novembre 2020
Rusia dise ce un de sua barcones de gera ia espulsa un xasatorpedo de la marina esuan cual ia entra a acuas teritorial en la Mar Japan ier.
Moscva ia acusa ce la barcon John S McCain ia viaja a du cilometres ultra sua frontera maral en Golfo Pedro la Grande. Lo ia menasa puxa la barcon. Longo Rusia, la barcon ia parti de la rejion. Ma la marina esuan ia nega la malcondui.
La encontra ia aveni en la Mar Japan, ance conoseda como la Mar Este, un area de acua bordada par Japan, Rusia e la Coreas.
Diseda par la ministreria de defende rusce, sua xasatorpedo Amiral Vinogradov ia usa un canal de comunica internasional per averti la barcon esuan sur "la posible de usa puxas per espulsa la intruor de la acuas teritorial".
Un portavose per la Flotila 7 de la marina esuan ia dise: "La declara par la Federa Rusce sur esta mision es falsa. La barcon John S McCain no ia es 'espulsada' de la teritorio de cualce nasion."
El ia ajunta ce la SUA va "inclina nunca su menasa o es forsada a aseta reclamas maral nonlegal, como los fada par la Federa Rusce".
Tal avenis a mar es rara, an si Amiral Vinogradov ia es ance envolveda en cuasi un colide con un cruser esuan en la Mar Xina Este en la anio pasada. E Rusia e la SUA ia intercambia culpas per acel situa.
Cada de la du paises acusa comun la otra sur manobras militar perilosa, a mar o en la aira. En 1988, la fregata soviet Bezzavetny ia puxa la cruser esuan Yorktown en la Mar Negra, acusante lo de intrui a acuas teritorial.
Relatas entre Moscva e Washington resta tensada, e Presidente Vladimir Putin ancora no ia loda Joe Biden sur sua vinse en la eleje presidental de la SUA.
Plu, la du paises ancora no ia completi sua acorda final restante sur armas nucleal, cual va desvalidi en febrero.
@T Scolores scotes descovre un colonia nova de pinguines
@L aora_oji/2020/scolores_scotes_descovre_un_colonia_nova_de_pinguines
====== Scolores scotes descovre un colonia nova de pinguines ======
19 novembre 2020
On ia loda un grupo de studiantes a la liseo de Stirling en Scotland ci ia aida descovre un colonia nova de pinguines imperorin en Antartica.
Los ia developa e codigi un algoritmo per identifia colonias de pinguines de imajes de satelite. A pos, rexercores de British Antarctic Survey (BAS) ia usa imajes de densia plu alta per confirma la esiste de la colonia trovada.
La projeta ia revela ce la cuantia de colonias de pinguines antartica es plu ca on ia crede a ante par cuasi 20%.
La studiantes ia es inspirada par un filma de David Attenborough sur la problemes cual pinguines fasa. Los ia vole sabe esce on pote deteta la colonias par usa imajes e tecnolojia libre disponable.
Dr Andrew McDonald de la liseo ia dise: "Ce on ia reconose los en un monografia reseniada par espertas ia es un felisi major a la grupo e ia mostra ce on pote fa siensa real e sinifiosa en scolas."
La labora par la studiantes ia parteni a un projeta de la Instituida per Rexerca en Scolas, nomida Oserva de la Tera.
Dr Peter Fretwell e Dr Philip Trathan, rexercores per BAS, ia loda la scolores en sua monografia sur la studia. Esta ia trova 11 colonias nova, de cual tre ia es ja identifiada ma no confirmada.
Alga colonias ia es descovreda a distantia longa de la costa, situada sur jelo maral cual ia formi sirca isberges cual ia encalia en acua profonda.
Trathan, ci es la xef de biolojia conserval a BAS, ia dise: "An si lo es un bon anunsia ce nos ia trova esta colonias nova, tota la locas de reprodui es situada do projetas resente modelida sujesta ce la imperorines va declina. Nos debe oserva atendente esta locas, car la cambia de clima va afeta esta rejion."
@T Semeteros tribal es destruida per un muron de frontera
@L aora_oji/2020/semeteros_tribal_es_destruida_per_un_muron_de_frontera
====== Semeteros tribal es destruida per un muron de frontera ======
11 febrero 2020
Legores e xefes de tribu dise ce semeteros de americanes orijinal en Arizona ia es esplodeda par ecipos ci construi la muron de frontera entre la SUA e Mexico.
Autoriosas ia confirma ce "esplodes controlada" ia comensa en Monumento Nasional "Organ Pipe Cactus", un conserveria natural reconoseda par UNESCO.
Raul Grijalva, un congresor democrata ia descrive la destrui como "blasfemin", e ia dise ce la governa no ia consulta la popla Tohon Oʼodham ante fa lo.
Organizas ambientiste averti ance sur danas cual aveni a la acuifer suteran local, como ance a animales migrante en esta rejion de deserto a sirca 185 cilometres a ueste de la site Tucson.
Ofisiores dise ce la projeta intende construi un parador de aser, con altia de nove metres, longo 70 cilometres de la parce nasional.
La Nasiones Unida ia identifia Organ Pipe como un Conserveria Internasional de Biosfera en 1976, descrivente lo como "un esemplo pur de un ecosistem intata de la Deserto Sonora".
Grijalva, la presidente de la Comite Congresal sur Recursos Natural, representa la distrito cual conteni esta rejion e ave sirca 650 cilometres de frontera con Mexico. En la mense pasada, el ia turi la semeteros a Organ Pipe, nomida Colina Monumento, e ia trova ce la popla O'odham entera ala gerores de un tribu oposada.
En intervisas con jornales esuan, el ia descrive la condui de la governa de Trump como "blasfemin" e ia dise ce la oservor de ambiente ci la governa ia asinia a la projeta va fa no cosa per lejeri la dana cultural.
Un parte de la rejion conteni ojetos con eda de plu ca 10 mil anios.
Ned Norris Jr, presidente de tribu, ia informa la Republica Arizona ce, an si la tereno es aora controlada par la governa de la SUA, "nos abita ja esta rejion de tempo nonrecordable". "Los es nosa asendentes. Los es nosa restas de lo ci nos es como un popla, tra esta rejion intera. E lo es nosa obliga, lo es nosa debe ce nos fa la nesesadas per proteje esta."
Un reporta interna de la Servi de Parces Nasional dise ce la muron de frontera, prometeda par Trump en sua campania de 2015, va destrui asta 22 locas arceolojial, mera en Organ Pipe.
On reporta ce ecipos ia destrui ance saguaros, cactos antica, sur cual Grijalva ia dise ce la popla O'odham regarda los como "la corpi de sua asendentes". "Donce cuando on vide los cambiada a umo -- lo es profonda angusante."
La governa de Trump ia es permeteda a construi partes de la muron de frontera sur tera publica par causa de un lege introduida en 2005 cual dona a la governa federal la direto de iniora leges cual no coere con sua politica de securia nasional. Desirante construi la muron, la Casa Blanca ia iniora ja deses de leges, incluinte alga cual ia proteje tombas de americanes orijinal, animales perilida e la ambiente.
Grijalva ia dise ce el va labora per cansela la lege de 2005, e va asembla un sesion parlamental en la semanas veninte per atenta fa esta.
@T Senatores jua e dormi en la sesiones acusante Trump
@L aora_oji/2020/senatores_jua_e_dormi_en_la_sesiones_acusante_trump
====== Senatores jua e dormi en la sesiones acusante Trump ======
24 janero 2020
En la SUA, alga senatores ia adormi, fa juas e rompe otra regulas en la sesiones de acusa Presidente Donald Trump. On ia vide senatores con parolas crusada, jiretas de mano e an un avion de paper.
La sesiones ia oia ce la malusas alegada de potia par Trump menasa la democratia de la pais. La senatores servi como la juria per deside esce on debe despone la presidente de sua posto.
La salon alta de la parlamento esuan loda se como un loca de cortesia e bon condui. Ma en esta semana alga de sua membros, egal republicistes e democratas, ia es acusada de condui como enfantes noiada.
La regulas dise ce senatores debe resta sentante en la sesiones, ma a la min nove democratas e 22 republicistes ia vade a via de sua sejas a tempos diversa ier.
Marsha Blackburn, un republiciste de Tennessee, ia defende se pos cuando on ia oserva el lejente un libro en la salon. El ia tuita ce la volum, Como Odiores de Trump Rompe America par Kim Strassel, "furni bon comprendes sur la prosedes de oji". El ia ajunta: "Mamas ocupada es la plu bon en multitaxia. Proba lo."
Jim Risch, un republiciste ci preside la Comite de Relatas Esterna de la Senato, ia es nonmovente con oios cluida per un tempo. Sua portavose ia nega ce el ia dormi, esplicante ce el ia escuta mera atendosa "con sua oios cluida o dirijeda a basa".
On ia nota ce Mark Warner, un democrata de Virginia, ia apoia se sur sua braso destra, con sua mano covrente sua oios, tra dudes minutos.
Ier, Richard Burr, un republiciste de Carolina Norde, ia distribui jiretas de mano -- juetas per enfantes -- a otra senatores per aida los a pasa la oras en la salon.
Telefonetas e computadores portable e tabletin es acompaniantes comun en escutas normal a la Senato, ma on ia proibi tota eletronicales en esta prosede, lasante multe persones ajitada.
On ia oia un farfulia de "mea valuosa" par Pat Leahy, un democrata de Vermont, cuando el ia reprende sua telefoneta de un comparte estra la salon. Alga senatores ia pare sircoveni la regulas par porta orolojetas astuta.
La conversa es ance proibida, e senatores es dial avertida par la sarjento de armas a resta silente o "risca es prisonida". Ma a martedi, du republicistes ia comensa xuxa pos oras de pasa notas entre lunlotra.
On ave ance regulas sever contra comedas, ma on ia vide senatores ci mastica goma e xocolada.
Trump es sola la presidente tre ci on ia acusa formal de malcondui en la istoria de la Statos Unida, ma lo es nonprobable ce el va es condenada en un salon controlada par sua corepublicistes.
Ante la comensa de la presentas ier, alga senatores republiciste ia dise ce los ia oia no cosa nova en la razonas de la acusores democrata, e ia deside ja desculpa la presidente. On va nesesa un majoria de du tris per despone la presidente.
@T Senegal vole move nitrato de amonio a via de Dakar
@L aora_oji/2020/senegal_vole_move_nitrato_de_amonio_a_via_de_dakar
====== Senegal vole move nitrato de amonio a via de Dakar ======
22 agosto 2020
En Senegal, ofisiores dise ce los ia solisita ce on prende a via de Dakar, la capital, 2700 tones de la cimical cual ia causa resente un esplode jigante en Beirut.
La cuantia de nitrato de amonio en la porto de Dakar es cuasi tan multe como ia es en la capital de Lubnan, e la porto es denova prosima a distritos abital.
Ofisiores de la porto dise ce la cimical parteni a un consinia de 3050 tones destinada per Mali, la pais visina a la este, a do 350 tones ia es ja transportada.
La governa dise ce la posesor de la consinia desira conserva la cimical en un beneria a Diamniadio, a sirca tredes cilometres de Dakar.
Ma la ministro per la ambiente ancora no ia aproba esta solisita, indicante ce la beneria no ia sasia tota la constrinjes nesesada, incluinte la fa de un studia sur la efetos ambiental e sosial.
Un ofisior de la ministreria ia clari ce on ia demanda ce la posesor organiza ce la produida pote es transportada a estra Senegal.
On no sabe ci la posesor es e per cual intende el/los va usa lo en Mali. Plu, la ofisiores de la porto no ia revela la data cuando la carga ia ariva a la porto.
La move de la consinia a Mali va es defiante par causa de la nonsertia political pos la colpa militar resente ala cual ia suverti presidente Ibrahim Boubacar Keita.
La esplode a 4 agosto ia ruina la sentro de Beirut, matante plu ca 200 persones e danante construidas tra la site.
@T Sentos de infetas polsce en relata con un mineria
@L aora_oji/2020/sentos_de_infetas_polsce_en_relata_con_un_mineria
====== Sentos de infetas polsce en relata con un mineria ======
8 junio 2020
Un mineria de carbon en la rejion Silesia Alta (Górny Śląsk) en Polsca sude ia produi un aumenta recordo en la cuantia de casos confirmada de coronavirus en la pais.
En la fini de semana, Polsca ia rejistra 1151 infetas nova. Un aveni de la maladia entre escavores e sua familias a la mineria Zofiówka representa du tris de esta cuantia.
La cuantia global de moris par la virus ia pasa aora 400 mil, e on ia ave 6,9 milion infetas.
Polsca ia introdui regulas de enclui en la temprana de marto, e ia evita la cuantia relativa grande de moris videda en Europa ueste. 1157 persones en Polsca ia mori par la coronavirus, con 26 561 infetadas, ma par causa de la la persiste de casos en Silesia Alta, la pais ancora no ia traversa sua apico.
La plu paises en la Uni European ia rejistra ier min casos nova ca Polsca.
Silesia Alta es la cor industrial de Polsca, con plu ca des minerias ativa, do persones labora prosima en aira umida. Plu ca 4000 persones en la rejion ia es positiva probada con la virus.
An con la infetas persistente en Silesia Alta, la pais ia comensa lejeri sua restrinjes a 20 april, cuando parces ia reabri. Alga enfantes ia revade a scola a la fini de maio.
Ance en minerias e fabricerias en Sudafrica e la SUA on ia vide sperdes de infeta en locas nonspasiosa de labora.
On ia para la labora a Mponeng en Sudafrica, la mineria de oro la plu profonda de mundo, pos deteta 164 casos de la coronavirus ala en la tarda de maio. E en la SUA, plu ca 20 mil persones ia es infetada en plu ca 200 fabricerias de prosede carne, e 74 persones a la min ia mori.
@T Sentos es arestada en protestas deutx sur la coronavirus
@L aora_oji/2020/sentos_es_arestada_en_protestas_deutx_sur_la_coronavirus
====== Sentos es arestada en protestas deutx sur la coronavirus ======
30 agosto 2020
En Berlin, la polisia ia aresta 300 persones ci ia protesta contra la restrinjes de coronavirus en Deutxland. Sirca 38 mil persones ia vade sur la stradas de la site per protesta, en modo jeneral pasosa.
Sirca 200 persones ia es arestada a un de la asemblas, per cual la autoriosas ia culpa ajitores destriste ci ia lansa petras e botelas.
Asemblas simil ia aveni en otra sites european, incluinte London, Paris, Wien e Zürich, e alga protestores ia descrive la virus como un engana. La protestores en Berlin ia es prosima presada a lunlotra en alga locas, e ia senta en junta sur la tera per un tempo.
Un grupo du de sirca 30 mil persones ia asembla pasosa per escuta parlas. Entre la arestadas ia es Attila Hildmann, un teoriste de conspira e autor de libros de cosini, ci ia parla a la fola tra un parlador.
An si Deutxland ancora no ia esperia la onda de casos cual afeta partes de Europa, sua taso de infeta ia crese resente. La cuantia de casos nova de la maladia reateni un punto alta no videda pos april.
Sete polisiores ia es ferida par persones descriveda como "estremistes destriste" ci ia protesta estra la ambasada rusce sur la strada Unter den Linden. Alga ia forsa se tra un linia de polisiores a la parlamento e la polisia ia usa airosol de peper per sperde los.
La protesta a la Colona de Vinse a ueste de la Porton Brandenburg ia es organizada par la promove Querdenken 711 ("Pensa ladal 711"). Esta grupo ave plu ca 16 mil seguores en Facebook e comunica xef par Telegram, la servi de mesajes sifrida. Los en la grupo crede ce la regulas de coronavirus contraveni diretos e librias fundal cual es definida en la constitui de la pais.
Fotos mostra ance banderas e sloganes asosiada con QAnon, un teoria de conspira cual alega, sin funda, ce Donald Trump, presidente de la SUA, fa un gera secreta contra satanistes pedofilica en la elites de governa, comersia e jornalisme.
La protestores ier ia inclui familias e enfantes. Alga ia dise ce los desira mera la direto de protesta. Contraprotestas ia aveni ance, con sirca 100 persones a un de estas. "Vos marxa con nazis e faxistes," alga partisipores ia cria.
@T Ses arestas per selulas de tortura en Nederland
@L aora_oji/2020/ses_arestas_per_selulas_de_tortura_en_nederland
====== Ses arestas per selulas de tortura en Nederland ======
8 julio 2020
En Nederland, ses omes es arestada pos la descovre de sete contenadores de transporta, convertida a selulas e salas de tortura.
Los ia es locada en Wouwse Plantage, a sude de Rotterdam, pos cuando la polisia franses ia craci telefones sifrida usada par criminores. La polisia nederlandes ia dise ce la contenadores ia es trovada ante deveni usada, e la vitimes intendeda es aora ascondeda.
En la contenadores on ia trova un seja de dentiste, con coreas e securipolsos. La polisia ia trova ance un construida en Rotterdam cual ia es parente un plu base criminal.
La suspetadas ia es arestada a 22 junio pos un opera franses-nederlandes per infiltra la sistem EncroChat de telefoni sifrida.
La polisia ia intersepi miliones de mesajes, incluinte lo de un de la suspetadas, un om de 40 anios de Den Haag. Investigores ia pote asede sua contatadas par un telefon de EncroChat.
Pos identifia la contenadores prosima a la frontera beljes en april, la polisia ia vijila la rejion e ia trova ce omes labora a los a cuasi cada dia. Cuando la contenadores ia es cuasi finida, la investigores ia deside interveni.
Un video enlinia, postada par la polisia, mostra polisiores ci aresta la suspetadas e entra a la contenadores. La polisia ia trova securipolsos liada a la solos e sofitos de la strutures, cual ia es ance acustical isolida.
En un contenador, on ia descovre vestes de polisia, incluinte parabaletas. Un otra ia conteni sisorones de desrami, bisturis e balaclavas. Du de la suspetadas ia es ance detenida par causa de posese armas.
La arestas es entre 800 fada tra Europa pos la intersepi e desifri de mesajes EncroChat.
@T Siclon Eta mata sirca 150 persones en Guatemala
@L aora_oji/2020/siclon_eta_mata_sirca_150_persones_en_guatemala
====== Siclon Eta mata sirca 150 persones en Guatemala ======
7 novembre 2020
La armada guatemalteca ia ateni un vileta distante do deses de casas ia es enterada par flues de fango pos pluve deluvial.
Presidente Alejandro Giammattei ia dise ce sirca 100 persones es probable mor en Quejá, en Alta Verapaz, un rejion sentral.
La clima ia impedi la labora de salva. Vias es ancora blocida e areas grande resta inondada. Plu temprana, la autoriosas ia confirma minima 50 moris tra la pais.
A martedi, la tempesta Eta ia ariva en Nicaragua, pais visina, como un siclon de categoria 4 traente ventas de 225 cilometres per ora e un pluve estrema. Lo ia debili a pos, cuando lo ia move a Onduras e ultima Guatemala.
Giammattei ia dise ce la labora de salva es limitada car la pais ave sola un elicotor sufisinte per tal operas. "Nos ave multe persones trapida ci nos no ia pote ateni," el ia comenta, descrivente la situa en Quejá como "crisin".
On ia recovre ancora no corpos de la vileta, e un state de crise es declarada en multe partes.
Visina en Onduras, a la min 10 moris es confirmada, e on reporta ce sentos de persones nesesa es salvada de rejiones inondada. Un abitor de un suburbe de San Pedro Sula ia dise: "Nos no pote parti de la tetos de nosa casas, car la acua veni asta nosa colos sur la strada."
La ministro de esternas, Lisandro Rosales, ia tuita: "La destrui cual Eta lasa es enorme, e la finansia publica es a un momento crisin par causa de COVID-19. Nos fa un clama a la comunia internasional per aselera la prosede de recovre e reconstrui."
Ier, la tempesta ia es situada a la costa de Beliz, movente en dirije a la Mar Caribe, e probable lo va ateni Cuba e Florida en esta fini de semana.
@T Siensistes australian proba du vasines posible
@L aora_oji/2020/siensistes_australian_proba_du_vasines_posible
====== Siensistes australian proba du vasines posible ======
2 april 2020
En esperimentas "monumental", siensistes en Australia ia comensa proba du vasines posible contra la coronavirus. La Organiza Mundal de Sania ia permete ce on proba a animales esta vasines, preparada par la Universia de Oxford e Inovio, un compania esuan.
La ajenteria nasional de siensa australian va evalua esce la vasines es efetosa, e esce los ta es nonperilosa per umanas. La proba umana prima ia aveni en la SUA en la mense pasada, sircoveninte la paso de proba a animales.
On developa aora alga otra vasines en partes variosa de la mundo, con rapidia noncomun. Ma la Organiza Comunial per Rexerca Siensal e Industrial (OCRSI) en Australia dise ce suas va es la primas completiosa de la probas preclinical cual usa un model de animal.
Rexercores ia dise ce la rapidia e grado de coopera global en via a esta paso ia es sin presedente. "Normal, on spende sirca un o du anios per ateni esta punto, e vera nos ia corti acel asta un periodo de du menses," un portavose ia dise oji.
En la dias resente, la ecipo ia introdui samples de vasin en furones -- mamales peti e pelosa sur ci on sabe ce los developa la coronavirus en la mesma modo como umanas.
SARS-CoV-2 es la virus cual causa la maladia COVID-19. OCRSI proba du posibles elejeda par un asosia cual supravide la plu de esta rexerca, la Alia per Inovas de Prepara per Epidemicas.
La posible developada en Oxford, England es un vasin de vetor. Lo usa un virus "defetosa" per introdui la protenas de coronavirus a la sistem imunial e indui un responde. "Ma los no pote reprodui se, donce on ave no posible de deveni malada par esta vasina," Prof Trevor Drew ia dise. El es la dirijor de la Laboreria Australian de Sania Animal en Victoria, do on fa la esperimentas.
El ia descrive la otra vasin, de Inovio, como "alga diferente ma no min stimulante". Lo es desiniada per codigi alga protenas de la coronavirus a la sistem imunial, provocante ce la selulas de la corpo jenera acel protenas ante cuando la sistem imunial reata a los.
"Lo es multe importante ce nos usa un metodo multidirijal per esta," Drew ia ajunta. "Lo dona la posible la plu bon de susede."
Tan temprana como junio, on va pote revela la resultas prima de la probas a animales. Si los es efetosa, on ta pote alora move la vasines a probas clinical a laborerias en otra locas.
Alora, on ta pote aselera la prosede de pone la medisin a la mercato jeneral, ma espertas averti ce esta va envolve ancora un tempo minima de 18 menses per sasia normas regulante. La vasina de Oxford, per esemplo, es ance probada par un otra laboreria a un animal diferente, per obedi la regulas esuan.
@T Siensistes vide estrema detaliosa la surfas de la Sol
@L aora_oji/2020/siensistes_vide_estrema_detaliosa_la_surfas_de_la_sol
====== Siensistes vide estrema detaliosa la surfas de la Sol ======
30 janero 2020
La Telescopio Solal Daniel K Inouye (DKIST) en Hawaii ia relasa imajes mostrante cualias con diametre tan peti como 30 cilometres, a la surfas de la Sol.
Esta strutures selulin es aprosima tan grande como la stato Texas en la SUA. Los es masas convetante de plasma -- un gas calda de iones. On vide sentros briliante do la materia de sol leva, ensircada par bandetas oscur do la plasma fri e basi.
DKIST es un compleso intera nova, locada a la culmina de Haleakalā, un volcan alta de 3000 metres sur Maui, un isola hawaian. Sua miror xef, con diametre de 4,24 metres, es la plu grande de mundo per un telescopio solal.
On va usa la oserveria per studia la funsiona de la Sol. Siensistes desira comprendes nova sur sua condui dinamical, esperante ce los va pote predise plu bon sua erutas enerjiosa, a cual on refere comun como "la clima spasial".
A veses pasada, emetes enorme de particulas cargada e sua campos magnetal ia dana satelites sirca la Tera, ia afeta astronautas, ia mali radiocomunicas, e ia descomuta an redes eletrical.
Matt Mountain, presidente de la Asosia de Universias per Rexerca en Astronomia, cual maneja la telescopio, ia comenta: "Nosa predises es plu retardada ca per la clima teral par 50 anios, o an plu. Nos nesesa comprende la fisica fundal de la clima spasial, e esta comensa a la Sol."
DKIST va colabora eselente con la Orbitador Solal, un oserveria spasial cual on va lansa de Capo Canaveral en Florida en la semana veninte.
Esta sonda, de Europa e la SUA en junta, va fa fotos de la Sol de la punto la plu prosima en istoria -- a mera 42 milion cilometres de la surfas, an plu prosima ca la planeta Mercurio.
Lo va vide cualias tan peti como 70 cilometres de diametre, ma va sensa lus a longias de ondas en un banda multe plu larga ca DKIST, e va sample plu stratos tra la atmosfera de la Sol. La sonda va vola ance longo un curso cual va ofre un vista nonpresededa de la rejiones polal.
@T Sitadanes stranjer es evacuada de Wuhan
@L aora_oji/2020/sitadanes_stranjer_es_evacuada_de_wuhan
====== Sitadanes stranjer es evacuada de Wuhan ======
29 janero 2020
On evacua sentos de sitadanes stranjer de Wuhan, la sentro de la eruta de la coronavirus en Xina, con ce on confirma plu moris e casos de lo.
Australia intende isoli sua evacuadas sur Isola Christmas a 2000 cilometres de sua tera xef. Ance Japan, la SUA e la UE renativi sua sitadanes.
Xi Jinping, presidente de Xina, ia descrive la virus como un "diablo" ma ia dise ce Xina va vinse lo.
Un esperta de la Comision Nasional Xines per Sania ia dise ce cisa des plu dias va pasa ante la ateni de la punto masima de la problem.
La cuantia de moris de la virus en Xina ia crese a 132. Como la viruses simil SRAS e gripe, la coronavirus nova es un risca spesial per persones vea e los ci ave ja un otra maladia.
La crese rapida de casos es partal atribuable a un aumenta de consensia, monitori e probas en dias resente.
On crede ce la virus ia emerji de animales nonlegal comersiada a un mercato de comedas de mar en Wuhan, la capital de la provinse Hubei en la este sentral de la pais.
Lo causa un infeta respiral acuta sever, e on ave no remedia o vasin. Alga persones, an tal, ia recovre pos es medical tratada.
@T Soldatos somali fini protesta sur salarios nonpaiada
@L aora_oji/2020/soldatos_somali_fini_protesta_sur_salarios_nonpaiada
====== Soldatos somali fini protesta sur salarios nonpaiada ======
22 junio 2020
En Somalia, soldatos en la capital Mogadishu ia fini sua protesta sur salarios nonpaiada. Los ia bloci vias en la site a saturdi. Algas ia dise ce los ia reseta no paia en plu ca un anio.
La soldatos batalia la grupo militariste islamiste al-Xabab ci dise ce los ia esecuta un de du atacas en esta finisemana cual ia mata a la min sete persones.
Tre militaristes ia esplode se en un auto a un punto de controla militar en la vila Bacadweyn en la stato Galmudug en la media de la pais, matante tre soldatos. Soldatos ia spara a la veculo cuando sua ocupores ia iniora comandas per para, e ia militaristes ia esplode alora un bomba.
Du otra bombas ia es detonada ante la casa de un ofisior militar en Wanlaweyn, a norde-ueste de la capital, matante cuatro persones.
Al-Xabab vole ce somalis segue plu sever la codigo muslim, nomida xaria, e lo batalia per suverti la governa. On reporta ce la soldatos ci ia bloci la vias en Mogadishu ia veni de combate militaristes en la rejion Shebelle.
La cexa par la soldatos sur sua salarios es spesial alarmante car los atenta proteje la popla de tal atacas.
En la anio pasada, la governa somali, pos presa par donores internasional, ia comensa paia direta a soldatos tra bancos per preveni ce la comandores frodante prende per se alga de la salarios peti de la soldatos. On ia trova en la lista de salarios ance miles de nomes de soldatos ci no ia esiste o no ia parteni plu a la armada.
@T Spetaculos pirotecnical surprende Japan
@L aora_oji/2020/spetaculos_pirotecnical_surprende_japan
====== Spetaculos pirotecnical surprende Japan ======
2 junio 2020
Focos artal ia lumina la sielos tra Japan en esibis surprendente per leva umores en la pandemica.
La spetaculos ia aveni a locas secreta, a 20:00, e cada ia dura tra sinco minutos. Organizores ia limita la dura per evita ce folas asembla.
Inisial, on ia dise ce la data e ora de la aveni no va es revelada, ma ultima la organizores ia deside ce pirotecnicales completa nonespetada ta risca angusa alga persones. Persones ci no ia sabe a ante ia pote regarda du o tre minutos de focos artal de sua casa o la strada.
An tal, la esibis ia atrae folas minor en alga locas. En la capital, Tocio, on ia vide persones regardante la spetaculos prosima a la Rio Tama. La persones ia vade a via pos la presenta.
Desuples de fabricores de focos artal japanes ia partisipa per organiza la spetaculos sincronida. Lo es difisil ce esta companias continua bon sua comersia pos la cansela o pospone de la Juas Olimpial e Tocio e de multe festivales tradisional.
En la mense pasada, Japan ia sutrae sua state de crise pos un redui notable de la cuantia de casos nova de COVID-19. Temprana, Japan ia es criticada per sua maneja de la situa, ma lo pare aora ce lo ia evita un epidemica tan grande como lo cual la Statos Unida e Rusia ia esperia.
@T Sudan sutrae alga leges sever
@L aora_oji/2020/sudan_sutrae_alga_leges_sever
====== Sudan sutrae alga leges sever ======
13 julio 2020
Pos plu ca 30 anios de rena islamiste, Sudan ia presenta reformis vasta, incluinte un permete ce nonmuslimes bevi alcol, e un sutrae de sua lege contra renunsias relijial e de flajelis publica.
Multe leges nova ia es asetada en la semana pasada, pos aproba orijinal en april, ma esta es la esplica publica prima de sua contenida.
Su la leges nova, femes no nesesa plu la permete de un relatada mas per viaja con sua enfantes. La pais ia proibi ance la mutila jenital fema.
La reformis ia aveni pos la despone de la renor durante Omar al-Bashir en la anio pasada, pos protestas enorme en urbes. La governa presente es un misca noncomfortosa de la grupos ci ia despone Bashir e sua aliadas militar pasada ci ia fa ultima la colpa de stato contra el.
Nonmuslimes pote aora bevi alcol en privata, ma la proibi resta contra alcol per muslimes. Ancora, nonmuslimes pote es punida si los bevi con muslimes.
La ministro de justia, Nasredeen Abdulbari, ia esplica ce la governa atenta proteje la diretos de la nonmuslimes de la pais, ci composa 3% estimada de la popla. Los pote aora no sola vende alcol, ma emporta lo e vende lo.
"Nos vole desconstrui cualce spesie de discrimina cual ia es realida par la rena vea, e move en dirije a egalia de sitadania e un muta democrata," Abdulbari ia dise.
Asta aora, un person condenada de renunsia islam ia pote es punida par mori.
La caso la plu conoseda ia es de Maryam Yaḥyā Ibrahīm Isḥaq, un fem ensinta ci ia es condenada a mori par pende pos sposi un om cristian en 2014. El ia susede fuji de la pais, ma la lege contra renunsiores ia resta asta aora.
Su Bashir, la polisia de moralia ia fa comun flajelis publica per pecetas, ma Abdulbari ia dise ce esta puni es aora abolida.
Esta cambias segue la cansela, en novembre, de un lege cual ia restrinje la condui e la vestes de femes en publica.
La pone de leges sever islamiste en la desenio de 1980 ia es un fator major en la gera interna longa cual ia gida ultima a autonomia per Sudan Sude, do la majoria de la popla es cristian o segue relijios tradisional.
@T Sydney rejistra un note de caldia recordo
@L aora_oji/2020/sydney_rejistra_un_note_de_caldia_recordo
====== Sydney rejistra un note de caldia recordo ======
29 novembre 2020
Sydney ia rejistra sua note de novembre la plu calda de sempre, pos un temperatur de 40°C a soldi. En la note, la site australian ia rejistra 25,4°C como temperatur minima.
La caldia ia provoca la Servi de Foco de Cimri Sude Nova (CSN) a proibi tota focos en la plu de la partes este e norde-este de acel stato.
Pompores batalia deses de focones forestal en CSN, e la temperatur en la fini de semana ia surje a supra en otra partes de la pais ance, incluinte Victoria e Australia Sude.
Esta es la finisemana prima de focones forestal notable pos la fini de la anio pasada, cual ia conteni la saison de tal focones la plu intensa de sempre en Australia, con ardes traversante 24 milion ectares de tera.
La focones ia afeta cada stato australian, ia destrui plu ca 3000 casas, e ia mata o desloca cuasi tre mil milion animales. A la min 33 persones ia mori.
La temperatur recordo en Sydney ia es rejistrada a Observatory Hill en la Distrito Comersial Sentral, do la recordo presedente ia es 24,8°C en 1967. Ja a 04:30 oji, la temperatur ia reasende a 30°C.
Imajes de Sydney mostra folas grande de persones sur la plaia. La departe de sania de la stato ia remente la popla a segue regulas de distanti sosial per preveni la sperde de covid.
La Departe de Meteorolojia ia predise un onda de caldia per sinco o ses dias en alga partes de la norde de CSN e la sude-este de Queensland. A presente, 45 focones de foresta o erba arde en CSN, de cual un menasa casas en la ueste de Sydney.
@T Teroristes ataca la sentro de Wien
@L aora_oji/2020/teroristes_ataca_la_sentro_de_wien
====== Teroristes ataca la sentro de Wien ======
3 novembre 2020
La polisia osteraices xerca a la min un suspetada pos un ataca par fusiles en la capital Wien cual ia mata tre persones.
Plu ca des otra persones ia es ferida cuando atacores ia spara en ses locas separada en la sentro de la site a la sera de ier. Alga de la feris es grave.
Un suspetada ia es matada par la polisia. Karl Nehammer, ministro de internas, ia descrive el como "un teroriste islamiste".
Parlante a un confere jornaliste, el ia dise ce la atacor ia es un suportor de Daex. On ia xerca tra sua casa e ia confisca materia video. La polisia ia tuita ce la atacor ia porta un sintur de bomba falsa.
Plu temprana, Nehammer ia averti ce on crede ce a la min un atacor "forte armada e perilosa" es ancora libre. El ia recomenda ce persones evita la sentro de Wien e ce jenitores no prende sua enfantes a scola oji.
La ministro xef, Sebastian Kurz, ia descrive la aveni como "un ataca repulsante de teror".
La atacas ia aveni prosima a la sinagoga sentral de la site, ma on ancora no sabe esce esta ia es la blanco intendeda. Los ia es fada a poca oras ante la introdui de restrinjes nova per atenta redui la cuantia cresente de casos de coronavirus.
Multe persones ia es en o prosima a bares e restorantes ante la clui de estas a medianote. A sirca 20:00, un om ia xuta a la popla. Membros de la fortes spesial ia ariva rapida. Un polisior ia sufri un feri de baleta ante cuando otra polisiores ia mata la atacor, ci ia es armada con un fusil automata, un pistol e un matxete.
La sinagoga ia es cluida a acel ora, ma un ofisior ci ia garda la construida ia es entre la persones ferida.
Esata cuanto atacores ia partisipa no es clar. La xef de polisia de Wien ia dise ce du omes e un fem ia mori.
Un opera major antiteroriste ia ativi, en cual la polisia ia bloci stradas sirca la sentro de la site. On ia urje la popla a resta a via de la distrito e a no usa transporta publica.
La polisia en Txesco ia dise ce los fa esaminas acaso a la frontera osteraices per caso ce la atacor o atacores ia fuji en acel dirije.
Asta aora, Osteraic no ia esperia atacas de la tipo cual ia afeta la plu de otra paises en Europa. Xefes de statos european ia condena rapida la xutas, e Emmanuel Macron, presidente de Frans, ia dise ce Europa debe no sede su atacas.
En la semana pasada, tre persones ia mori en un ataca par cotel en un eglesa en la site Nice en Frans, en lo cual Macron ia descrive como "un ataca teroriste islamiste".
@T Thunberg asentua la crise de clima en Africa
@L aora_oji/2020/thunberg_asentua_la_crise_de_clima_en_africa
====== Thunberg asentua la crise de clima en Africa ======
1 febrero 2020
La ativiste adolesente Greta Thunberg ia ospita un confere jornaliste per asentua la importa de como la crise de clima afeta persones en Africa.
Un de la partisipores ia es Vanessa Nakate, un ugandan a la sentro de un disputa sur raza a Davos en la semana pasada. El ia es coler pos cuando on ia sutrae el de un foto fada con sua colaborores blanca, incluinte Thunberg.
El ia dise ce ativistes en Africa campania tan multe como sua corespondentes en otra partes, ma es comun iniorada par jornalistes.
"Esta es la tempo cuando la mundo debe escuta la ativistes de Africa e atende sua racontas," Nakate ia dise a jornalistes par un lia video de Kampala, la capital de Uganda. "Esta es un momento cuando jornalistes pote vera presenta justa la problemes de clima en Africa."
La aveni ia es organizada en la capital de Sveria, Stockholm, par la promove Venerdis Per Futur, cual Thunberg ia comensa en agosto 2018, inspirante miliones tra la mundo a esije ce on reata plu per para la crise.
La xica de 17 anios ia dise ce el desira usa la atende cual el atrae de jornalistes per foca a la cambia de clima en Africa, car "la punto de vista african es tan poca reportada".
Jornalistes e regardores enlinia ia pote fa demandas a Thunberg, como ance a tre ativistes african contra la cambia de clima (Vanessa Nakate, Ayakha Melithafa, Makenna Muigai), e un siensiste climal (Ndoni Mcunu) ci ia partisipa par lias video.
@T Tortugas mexican emerji en cuantia recordo
@L aora_oji/2020/tortugas_mexican_emerji_en_cuantia_recordo
====== Tortugas mexican emerji en cuantia recordo ======
29 otobre 2020
Un cuantia recordo de un spesie perilida de tortuga ia sorti de casca sur un plaia en Mexico norde.
On crede ce esta resulta de ativia reduida par umanas en la pandemica de coronavirus.
La comunia nativa seri en la stato Sonora ia dise ce lo ia relasa en la Golfo California plu ca 2250 bebes de tortuga oliva de mar. Lo relasa usual sirca 500 de la animales peti.
Par causa de limitas de pexa e turisme, sua nidos de plaia no ia es tan disturbada en esta anio.
La tortuga oliva de mar, cual es global perilida, pone sua ovos sur la plaias de alga statos mexican entre maio e setembre, en un prosede de nidi coletiva en cual multe sentos de femas partisipa.
On judi ce la spesie fasa un risca alta de estingui en natur.
Mexico ia proibi la catura de esta tortugas en 1990 e on ave punis sever per cualcun sur ci on trova ce el xasa los.
@T Tre minutos de silentia lamentante en Xina
@L aora_oji/2020/tre_minutos_de_silentia_lamentante_en_xina
====== Tre minutos de silentia lamentante en Xina ======
4 april 2020
Xina ia lamenta sua vitimes de la crise de coronavirus par fa un silentia de tre minutos, tempora pausante la nasion.
On ia declara un dia de recorda en Xina oji per onora la plu ca 3300 persones ci ia mori par COVID-19.
A 10:00 de ora local, persones tra la pais ia sta nonmovente per tre minutos, como un tribui a la mores.
A pos, autos, trenes e barcones ia tuti sua claxones e alarmas, ataca airal ia sona, e banderas ia es basida sur sua palos.
La casos prima de coronavirus ia es detetada en la site Wuhan en la provinse xines Hubei en la parte tarda de la anio pasada.
De pos, la virus ia traversa la planeta, infetante plu ca milion persones e matante cuasi 60 mil en 181 paises.
En Wuhan, la episentro de la maladia en Xina, tota semafores en urbes ia es rojida a 10:00, parante la trafica per tre minutos.
La governa ia dise ce la aveni es un momento per dona respeta a "martires", referente a la 14 medicistes ci ia mori contra la virus.
@T Tre spesies umanin ia coesiste en Africa antica
@L aora_oji/2020/tre_spesies_umanin_ia_coesiste_en_africa_antica
====== Tre spesies umanin ia coesiste en Africa antica ======
3 april 2020
Un studia mostra ce a du milion anios ante aora, tre spesies diferente de umanines ia coesiste en Sudafrica. Esta suporta la comprende cresente ce la situa presente, con ce sola un spesie umana domina la globo, es cisa nonusal en compara con la pasada evolual.
La indicas nova veni de laboras per dati osos descovreda a un sistem de cavas prosima a Johannesburg. La rexerca ia revela ance la esemplo la plu temprana conoseda de Homo erectus, un spesie sur cual on crede ce lo ia es un asendente direta de umanas moderna (Homo sapiens).
La tre comunias de umanines ia parteni a Australopithecus (la grupo famosa par la fosil "Lucy" de Itiopia), Paranthropus e Homo (umanas). On ia evalua restas trovada a la Cavas Drimolen, usante tre tecnicas de dati: spetroscopi par resona paramagnetal eletronal, paleomagnetisme, e dati par uranio--plomo.
La rexercores ia trova ce la escaveria xef a Drimolen, e tota la fosiles cual lo conteni, ave entre 2,04 e 1,95 milion anios.
Esta cavas ia produi ja multe fosiles, incluinte los de ominines antica. Ma a un pico de anios ante aora, esplorores ia descovre la partes superior de du cranios nova. La un ia parteni a la spesie relativa primitiva Paranthropus robustus. La otra ia aspeta plu moderna e ia es identifiada como Homo erectus.
Homo erectus ia es cisa la prima de la spesies umana temprana ci ia migra de Africa a la resta de la mundo.
Esta cranio es no sola la esemplo la plu temprana de la spesie en la mundo, ma lo es ance la sola esemplo de Sudafrica. Asta sua descovre, on ia suposa ce Homo erectus ia orijina en Africa este, ma cisa lo ia veni de la sude de acel continente, e ia pasa tra Africa este e norde en via a domina la mundo.
En la pasada, nos ia regarda la evolui umana como un progresa linial, con ce umanas moderna ia emerji a la fini como la zenite de developa. Ma lo deveni sempre plu clar ce la situa vera ia es multe min simple.
Un plu studia publicida en esta semana ia usa tecnicas moderna per dati un cranio bon conservada cual on ia trova en un escaveria a Kabwe en Zambia en 1921. La cranio es multe plu primitiva ca los de umanas moderna, ma plu avansada ca Homo erectus. Par sua anatomia, on ia suposa ce lo ave sirca 500 mil anios.
Multe rexercores opina ce lo parteni a un spesie nomida Homo heidelbergensis, un asendente comun de umanas moderna e neandertalanes. Ma la siensistes ci ia dati aora samples peti de sua oso e dentes ia mostra ce lo es multe plu joven, con entre "sola" 324 mil e 276 mil anios.
La descovre implica ce a la min tre spesies diferente de Homo ia coesiste en Africa a acel tempo.
En ancora un plu publici importante sur evolui umana en esta semana, rexercores ia analise protenas antica de fosiles de Homo erectus con 1,9 milion anios, trovada a Dmanisi en Sacartvelo, e de un spesie nomida Homo antecessor, sur cual on crede ce lo ia esiste en Espania entre 1,2 milion e 800 mil anios ante aora.
La analise ia forti la lias entre la du spesies e otra umanines per ci nos ave datos ADN. La usa de protenas aida grandi nosa sabes sur relatas evolual a ultra la edas per cual la oteni de indicas ADN deveni difisil par causa de la desintegra de acel molecula.
La studia ia revela ce Homo antecessor, de cual on ia duta sua validia como un spesie separada, es un conaseda de umanas moderna e otra spesies Homo resente, como la neandertalanes e la denisovanes.
@T Trepores de Corea Sude manca pos un avalanxa en Nepal
@L aora_oji/2020/trepores_de_corea_sude_manca_pos_un_avalanxa_en_nepal
====== Trepores de Corea Sude manca pos un avalanxa en Nepal ======
19 janero 2020
La labora per salva a la min ses persones mancante pos un avalanxa en la norde-ueste de Nepal es retardada par un mal clima.
La paseores ia es viajante en la montania Himalaia, prosima a un campa de base en la rejion Annapurna, cuando la avalanxa ia aveni pos la cade de multe neva a venerdi.
Cuatro instruores-bonvolores de Corea Sude e a la min du gidores nepali es entre la persones ci manca. Alga otra paseores ia es salvada de la loca de la avalanxa.
Multe neva cadente, con profondia de sirca sinco metres sirca la avalanxa, ia impedi la mision de salva ier. Ma oji on intende recomensa lo, con elicotores e des plu polisiores aidante la xerca sur Monte Annapurna, un de la montes la plu alta de mundo.
La avalanxa ia aveni a altia de 3230 metres, a sirca 150 cilometres a norde-ueste de Catmandu, la capital de la pais.
La instruores mancante es du femes en sua desenio cuatro e ses, e du omes en sua desenio ses. Los ia abita tempora en Nepal per labora como bonvolores.
Sinco otra membros de sua grupo de Corea Sude ia refuja se en un cabana ante deveni transportada a securia par elicotor. Alga reportas ia sujesta ce on ancora no sabe do un gidor tre es.
La governa de Corea Sude ia envia un ecipo de crise per aida la labora de salva e la persones afetada. En un declara a Facebook, presidente Moon Jae-in ia dise ce sua governa "va fa la plu bon cual lo pote" per trova la paseores mancante.
En cada anio, sentos de trepores stranjer visita Himalaia, un montania cual conteni oto de la des-cuatro montes la plu alta de mundo. Lo no es comun ce asidentes mata persones ala. En otobre 2018, nove persones ia mori cuando un tempesta violente de neva ia destrui sua campa.
@T Trepores mori en mal clima en la montania irani
@L aora_oji/2020/trepores_mori_en_mal_clima_en_la_montania_irani
====== Trepores mori en mal clima en la montania irani ======
28 desembre 2020
En Iran, a la min des trepores ia mori en la montania a norde de Tehran par causa de un avalanxa e ventones de neva.
La cadena Alborz cual domina la site capital es popular con trepores e sciores, ma la clima ala en la dias pasada ia es perilosa.
La Cresente Roja ia posti 20 ecipos ci ia susede salva 14 trepores, ma a la min sete otra persones manca ancora. Entre los ci ia perde sua vives es un ativiste political, un profesor, un dotor e un instruor de trepa montanial.
On ia debe para la labora de xerca a noti.
A un tempo en venerdi, sirca sento persones ia es trapida en la aira alta a un scieria cuando la tram volante ia fali.
Plu temprana, avertis ia es donada sur la posible de mal clima e avalanxas.
En redes sosial, alga persones ia reporta malfunsionas de sistemes de jeolocali, de cual trepores depende en la montania. Ma lo no es clar esce la persones caturada par la ventones e avalanxa ia es afetada par esta.
@T Trump comanda ce construidas nova debe es bela
@L aora_oji/2020/trump_comanda_ce_construidas_nova_debe_es_bela
====== Trump comanda ce construidas nova debe es bela ======
22 desembre 2020
Donald Trump, presidente de la SUA, ia comanda ce construidas governal futur tra la pais debe es "bela", e preferable en stilo clasica elinica, roman o simil.
La comanda dirijal dise ce tro multe construidas federal refleta desinias moderniste de la sentenio pasada, e ce construidas nova debe aspeta plu simil a monumentos "amada" como la Casa Blanca.
Tradisionalistes bonveni esta, ma multe otras es noncontente. La Instituida American de Arcitetores "oposa nonambigua" la stratejia.
La comanda -- titulida "Promove Arciteta Munisipal Federal Bela" -- crea un comite nova per consela la presidente sur construidas futur.
Lo dise: "Desinias de construidas federal nova debe, como la construidas monumentin amada de America, felisi e beli spasios publica, inspira la spirito umana, nobili la Statos Unida, merita respeta de la popla jeneral, e, como conveninte, respeta la erita arcitetal de un rejion."
Sua comanda dise ance ce construidas governal resente preparada en Washington ia crea "un misca desacordante de desinias clasica e moderniste" e ce, con alga esetas, la governa ia "sesa jeneral construi construidas bela".
La usa de arciteta clasica e tradisional "debe es corajida e no descorajida", lo ajunta.
Un testo ru de la comanda ia es prima publicida en febrero, levante oposa de la Instituida American de Arcitetores e la Fidusia Nasional per Conserva Istorial.
A lundi, la instituida ia dise ce comunias debe ave "la direto e encarga de deside per se cual desinia arcitetal conveni la plu a sua nesesas".
Sua xef, Robert Ivy, ia declara: "An si nos es xocada par la deside de la governa a continua con la regula de desinia, nos es felis ce la comanda no es tan estendosa como on ia pensa a ante."
Per Trump, un developor de imobila, sola un mense de la posto resta, car el ia perde la eleje a Joe Biden en novembre.
@T Trump es desculpada par la Senato de la SUA
@L aora_oji/2020/trump_es_desculpada_par_la_senato_de_la_sua
====== Trump es desculpada par la Senato de la SUA ======
6 febrero 2020
Presidente Donald Trump de la SUA ia es desculpada par la Salon Alta, fininte un atenta parlamental de despone el cual ia divide amarga la pais.
52 de la 100 membros de la Senato (la salon alta de parlamento), cual es controlada par la partito republiciste de Trump, ia vota per remete la acusas ce el ia malusa sua potia, e 53 ia vota ce el ia impedi la parlamento.
En desembre, la partito democrata ia acusa ce Trump ia presa Ucraina a manxa la reputa de un de sua competores posible per la Casa Blanca.
Ante Trump, la pais ia atenta despone sola du presidentes en esta manera: Bill Clinton en 1998, e, en la istoria distante, Andrew Johnson a sento tredes anios ante Clinton. Trump va deveni la presidente acusada prima ci aspira es reelejeda.
En sua vota major a mercurdi, la Salon Alta ia deside no despone la presidente 45 de la Statos Unida su acusas levada par sua negosias con Ucraina. Si lo ia ta condena el par cualce de la du acusas, Trump ia ta debe pasa sua posto a Mike Pence, vispresidente.
Trump ia tuita ce el va parla oji sur la caso. La cuantia de votores esuan ci aproba el ia ateni 49% en esta semana, sua grado la plu bon de sempre.
Mitt Romney de Utah ia es la sola senator republiciste ci ia vota per condena Trump, a la acusa prima. Crasente esperas democrata, du otra republicistes moderada no ia junta se a el per condena la presidente.
En dias resente, alga senatores republiciste ia critica la condui de Trump ma ia dise ce lo no ateni un nivel cual obliga un despone.
Tre senatores democrata sentriste, sur ci la republicistes ia desira ce los va alia se con los, ia vota condenante en loca.
Un majoria de du tris ia es nesesada per despone Trump, e esta ia es sempre un blanco difisil en un salon controlada par sua partito.
@T Trump es ospitalida par COVID-19
@L aora_oji/2020/trump_es_ospitalida_par_covid-19
====== Trump es ospitalida par COVID-19 ======
3 otobre 2020
On ia elicotori Donald Trump a ospital pos un proba positiva per la coronavirus. Sua dotor, Sean Conley, ia dise ce la presidente esuan es "fatigada ma en bon umor" e, plu tarda, ce el progresa bon. El no nesesa osijen ajuntada.
Sua sintomes inclui un febre. On ia trata el con un injeta de un misca esperimental de drogas e la medisin antivirusal remdesivir. Pos esata un mense, el va fronti Joe Biden en la eleje presidental. On previde ce el va es en ospital per alga dias.
Ance sua sposa Melania ia es positiva probada, como alga otra membros de la ecipo sirca la presidente.
Portante un covrefas e un veston, Trump ia traversa la jardin de la Casa Blanca a 18:15 ier, paseante a sua elicotor per un vola corta a la Sentro Medical Militar Nasional Walter Reed en la suburbes de Washington. Esta ospital conteni un suite presidental, do un esamina anial de la presidente aveni tradisional.
Conley ia esplica ce Trump ia reseta un dosa de oto grames de la "coctel de anticorpos de Regeneron" en la Casa Blanca. Esta medisin, de un compania biotecnolojial esuan, ia es donada per aida redui la nivel de la virus e rapidi la recovre. On pone multe espera a lo, ma lo es ancora esperimental e nonaprobada par regulores.
La presidente, ci ave 74 anios e es formal clasida como obesa, es en un categoria de risca plu alta per COVID-19. La dama prima ave 50 anios. On reporta ce el es "sana, con sola un tose minor e un dole de testa".
Su la constitui de la SUA, si Trump ta deveni tro malada per fa sua taxes, el ta pote dona sua potia a sua vispresidente Mike Pence, ci ta servi como presidente tempora asta cuando Trump ta pote recomensa. Ma un tal transfere no ia aveni.
@T Trump nomina un conservaliste per la Corte Suprema
@L aora_oji/2020/trump_nomina_un_conservaliste_per_la_corte_suprema
====== Trump nomina un conservaliste per la Corte Suprema ======
27 setembre 2020
Donald Trump, presidente de la SUA, ia nomina Amy Coney Barrett, un favoreda de conservalistes sosial, como la judor nova de la Corte Suprema. Parlante a sua lado en la jardin de la Casa Blanca, Trump ia descrive el como un "fem de atenis sin paralel".
Si la Senato aproba Barrett, el va recambia la libraliste Ruth Bader Ginsburg ci ia mori resente con 87 anios.
La nomina va provoca un batalia amarga per aproba en la salon alta de la parlamento en cuando on prosimi a la eleje presidental en novembre.
Anunsiante Barrett como sua nominada ier, Trump ia descrive el como un "stela de eruditia e judi" con "fida nonsedente a la constitui".
Joe Biden, aspiror presidental per la partito democrata, ia recomenda ce la Senato no "ata sur esta posto vacua asta cuando la popla american ia eleje ja sua presidente seguente e la Congresa seguente".
"La constitui de la Statos Unida ia es desiniada per dona a la votores un posible de fa ce on oia sua vose sur los ci va servi en la Corte. Acel momento es aora, e on debe oia sua vose," el ia ajunta.
Si Barrett es aprobada, judores con tendes conservaliste va ave un majoria de 6 contra 3 en la Corte Suprema per la futur previdable.
Esta fem de 48 anios ta es la judor tre cual la presidente republiciste presente ia asinia, pos Neil Gorsuch en 2017 e Brett Kavanaugh en 2018.
La nove judores de la corte servi per sua vives intera, e sua desides pote moldi la politica publica sur tota cosas, de diretos de armadia e vota, asta aborta e finansia de campanias, per desenios.
En anios resente, la corte ia estende la sposia ge a tota 50 statos, ia permete la reali de un proibi de viaja contra paises xef muslim, e ia pospone un projeta de redui la emetes de carbono par la SUA.
@T Turcia converti Hagia Sophia a un mascita
@L aora_oji/2020/turcia_converti_hagia_sophia_a_un_mascita
====== Turcia converti Hagia Sophia a un mascita ======
11 julio 2020
La museo famosa Hagia Sophia en Istanbul -- orijinal fundida como un catedral -- ia es cambiada a un mascita. Presidente Recep Tayyip Erdoğan de Turcia ia anunsia la deside pos cuando un corte ia cansela la funsiona de la loca como museo.
Construida a 1500 anios ante aora como un catedral cristian ortodox, Hagia Sophia ia es convertida a un mascita pos la concista osmanan en 1453. Lo ia deveni un museo en 1934 e es aora un loca de Erita Mundal de UNESCO.
Islamistes en Turcia ia recomenda longa ce on converti lo a un mascita, ma parlamentores secular ia oposa esta. La proposa ia provoca ance critica de xefes relijial e political tra la mundo.
Defendente la deside, Erdoğan ia asentua ce la pais ia usa sua direto autonom en reconverti la construida a un mascita. El ia dise a un confere jornaliste ce la preas muslim prima va aveni en la construida a 24 julio.
"Como tota nosa mascitas, la portes de Hagia Sophia va es larga abrida a persones local e stranjer, muslim e nonmuslim," el ia ajunta.
Corta pos la anunsia, la clama prima a prea ia es resitada a Hagia Sophia, difusada en tota canales xef de novas turces. La canales de redes sosial de Hagia Sophia es aora descomutada.
UNESCO ia dise ce lo "regrete profonda" la deside de cambia la museo a un mascita, e ia urje la autoriosas turces a "abri un dialoga sin retarda". La organiza ia recomenda a ante ce Turcia no cambia la funsiona de la construida sin discute.
La xef de la Eglesa Ortodox Este ia condena la cambia, como ance Elas, do miliones de membros de acel eglesa abita.
@T Twitter avisa sur la veria dutada de un tuita par Trump
@L aora_oji/2020/twitter_avisa_sur_la_veria_dutada_de_un_tuita_par_trump
====== Twitter avisa sur la veria dutada de un tuita par Trump ======
27 maio 2020
A la ves prima, Twitter ia ajunta un avisa sur veria dutada a un mesaje par Donald Trump, presidente de la SUA.
Trump ia tuita: "On ave NO MODO (ZERO!) en cual Votas Postal va es cualce cosa otra ca sustantial frodosa." Twitter ia pone un eticeta avertinte su la mesaje e un seguente, par sua politica nova contra informa malgidante.
La avisa par Twitter mostra un sinia azul de esclama su la tuitas, sujestante ce lejores "oteni la fatos sur votas postal". Esta lia a un paje cual dise ce la alegas par Trump sur vota postal es nonconfirmada, sitante reportas sur la tema par jornales diversa, e segueda par coretis a lo cual Twitter descrive como alegas falsa par la presidente.
La compania de rede sosial ia renovi sua politica sur tal avisas en la temprana de esta mense, prometente ajunta plu eticetas avertinte su informas falsa o malgidante en sua sistem, ma lo ia es lenta en ata contra la presidente esuan.
En sua tuitas seguente, Trump ia acusa Twitter de interfere en la eleje presidental projetada per 3 novembre. El ia dise ce Twitter "sofoca completa la libria de parla, e me, como presidente, no va permete ce esta aveni".
Ance la manejor de la campania presidental de Trump ia critica la compania: "La asosia con 'sertores de veria' prejudosa de novas falsa es un scermo per dona credablia falsa a la tatica evidente political de Twitter. Per multe razonas nos ia sutrae tota nosa comersiales de Twitter a menses ante aora, e la prejudi clar political es un de los."
Estra segue rapida pos un deside par Twitter per no sutrae un comenta cual Trump ia fa sur la mori de Lori Klausutis en 2001. El ia posta alga mesajes promovente un teoria de conspira ce Klausutis ia es matada par sua xef, Joe Scarborough, alora un parlamentor republiciste.
Sua vidua ia demanda ce Twitter sutrae la comenta, disente ce lo inclui "mentis xocante". La compania ia refusa sutrae la tuita, ma ia dise a Klausutis ce lo "regreta profonda" la dole causada par la frases de la presidente.
En julio 2001, Klausutis ia es trovada, mor, en la ofisia de Scarborough en Florida. Autoriosas ia determina ce la fem de 28 anios ia mori pos deveni nonconsensa par un ritmo nonormal de cor, ante colasa e colpa sua testa. La polisia ia trova no indicas de omiside.
Scarborough ia es en la capital, Washington, a la tempo de la mori. El es aora un presentor televisada, e el e sua canal ia critica forte la maneja par la presidente de la crise de coronavirus en la Statos Unida.
@T Txile vota per rescrive sua constitui
@L aora_oji/2020/txile_vota_per_rescrive_sua_constitui
====== Txile vota per rescrive sua constitui ======
26 otobre 2020
Txilanes ia vota per rescrive sua constitui, cual ia orijina en la eda de la jeneral autocrata Augusto Pinochet.
Con cuasi 90% de la votas contada, 78% de persones ia vota "si" en un referendo cual ia aveni pos protestas coletiva contra nonegalia.
Presidente Sebastian Piñera ia reconose la resulta e ia loda la prosede pasosa, descrivente lo como "la comensa de un via longo cual tota nos debe pasea en junta".
Un promove antigovernal ia comensa en Txile a un anio ante aora. Un de sua esijes inisial ia es ce la pais nesesa un constitui nova per repara nonegalias profonda en sua sosia.
"Asta aora, la constitui ia divide nos," Piñera ia dise en cuando persones ia selebra sur la stradas. "De oji, tota nos debe colabora afin la constitui nova es un strutur grande de unia, stablia e la futur."
La referendo ia fa du demandas a txilanes: prima, esce los desira un constitui nova, e du, par cual spesie de autoriosa los ta vole ce lo es preparada.
Un majoria grande ia espresa sua desira ce la constitui nova ta es desiniada par un asembla intera composada de sitadanes elejeda, en loca de un cual inclui ance legores.
Miles de persones ia comensa selebra en Santiago e otra sites an ante cuando la resulta ia deveni clar. On ia predise ce la resulta va es "si".
La nivel de povria ia cade multe en Txile en la du desenios pasada. Aora lo es la pais la plu rica de America Sude, per person. Ma lo es ancora un de la nasiones la plu nonegal de mundo. Multe culpa un sistem cual ia privati partal la servis publica.
La constitui presente ia es preparada en 1980 pos un referendo su Jeneral Pinochet, de ci sua rena militar de 17 anios ia es marcada par represa, tortura e desapares.
On ia intende inisial fa esta referendo nova en april, ma lo ia es posponeda cuando txilanes ia isoli se par causa de la pandemica.
Un asembla constitual de 155 membros va debe es elejeda ante april 2022. La asembla va ave un anio per acorda un testo ru, sur cual la popla va vota denova.
@T Un acorda major de comersia libre en Asia
@L aora_oji/2020/un_acorda_major_de_comersia_libre_en_asia
====== Un acorda major de comersia libre en Asia ======
13 novembre 2020
A esta finisemana, xefes political en Asia va suscrive un acorda major de comersia cual on prepara tra cuasi un desenio. Lo inclui la des membros de la Asosia de Nasiones de Asia Sude-este (ANASE), con ance Xina, Japan, Corea Sude, Australia e Zeland Nova.
La membros representa cuasi un tri de la popla de la mundo e 29% de la produi interna bruta global. La zona nova de comersia libre va es plu grande ca la Acorda SUA-Mexico-Canada e la Uni European.
Barat ia partisipa en la negosias, ma ia retira se en la anio pasada sur un ansia ce tarifas plu basa risca dana produores local.
On previde ce la Asosia Economial Completa Rejional (AECR) va es suscriveda a la confere de ANASE, enlinia per la plu, en la finisemana. Sua intende es ce alga tarifas a emportas va es eliminada en la 20 anios seguente. Lo inclui ance spesifas sur propria inteletal, telecomunica, servis finansial, ecomersia e servis profesal.
Lo es posible ce la efeto la plu grande va veni de la regulas nova cual defini de do un produida veni. Multe statos-membros ave ja acordas de comersia libre con lunlotra, ma limitas esiste. Companias con cadenas global de furni pote es impostada an en un tal zona, si sua produidas conteni composantes fabricada en otra locas.
Su AECR, partes cual veni de cualce nasion-membro va es tratada en modo egal, lo cual va atrae companias en esta paises a trova furnores en la zona.
An si la AECR ia es inisiada par ANASE, multe persones regarda lo como un alternativa de la Asosia Transpasifica, cual ia inclui multe paises asian e cual Xina ia suporta an si lo mesma ia es escluida de lo.
Des-du paises ia suscrive lo en 2016 ante cuando Donald Trump ia retira la SUA en 2017. A pos, la membros restante ia formi la Acorda Completa e Progresante per Asosia Transpasifica, cual conteni min paises, ma ia redui plu la tarifas e ia inclui plu regulas sur labora e la ambiente ca la AECR.
Australia e Xina va suscrive la acorda nova, an con reportas ce cisa Xina va boicota alga emportas australian par causa de diferes political. Malcolm Turnbull, ministro xef pasada de Australia, ia comenta ce la AECR es anticin, con aspiras tro peti.
@T Un acorda sur recovre pos coronavirus en la UE
@L aora_oji/2020/un_acorda_sur_recovre_pos_coronavirus_en_la_ue
====== Un acorda sur recovre pos coronavirus en la UE ======
21 julio 2020
Xefes de la Uni European ia fa un acorda sur un projeta enorme per recovre pos coronavirus, seguente un note cuatro de negosias.
La projeta envolve 750 mil milion euros de suvenis e prestas contra la efetos de la pandemica en la bloco de 27 paises.
En la discutes, un divide ia apare entre la nasiones la plu grave afetada par la virus e la membros "frugal" ci ia es ansiosa sur la custa.
Esta es la empresta juntada la plu grande de sempre acordada par la UE. La presidente de la confere, Charles Michel, ia descrive lo como un "momento pivotin" per Europa.
La acorda foca a un program de suvenis de 390 mil milion euros a la statos-membros la plu danada par la pandemica. On previde ce Italia e Espania va reseta la plu.
360 mil milion euros de plu, en forma de prestas a interesa basa, va es disponable per membros de la bloco.
Esta confere de xefes, cual ia comensa en Bruxelles, Beljia a la matina de venerdi, ia conteni plu ca 90 oras de negosias. Lo ia deveni la plu longa en la UE pos un confere de sinco dias en 2000, en la site franses Nice.
Aora la projeta va pasa tra plu negosias tecnical par statos-membros, e la Parlamento European va debe validi lo.
@T Un ap xines ia sensura termas de coronavirus
@L aora_oji/2020/un_ap_xines_ia_sensura_termas_de_coronavirus
====== Un ap xines ia sensura termas de coronavirus ======
4 marto 2020
Un reporta ia trova ce la ap la plu popular de mesaji en Xina ia sensura termas pertinente a la coronavirus, an tan temprana como 1 janero.
La rexercores a Citizen Lab en Toronto, Canada ia trova ce WeChat ia bloci alga combinas de termas, e criticas de Presidente Xi Jinping. La reporta ia descovre ance ce la ap, poseseda par Tencent, un compania xines, ia bloci plu parolas en cuando la maladia ia sperde.
Ja tra anios, Xina sensura lo cual sua popla leje e dise enlinia. Ma esta reporta sujesta ce la pais ia comensa sensura discutes a alga semanas ante cuando ofisiores ia reconose la gravia de la maladia.
A 31 desembre, Xina ia avisa prima la Organiza Mundal de Sania sur la apare de un coronavirus nova en la site Wuhan. Ma autoriosas ia reteni inisial la informa de la popla jeneral, anunsiante ce min persones ca vera ia es infetada, desasentuante la riscas, e falinte furni rapida informas cual ta pote salva vives.
Sola a 20 janero, Xi Jinping, la presidente xines, ia parla publica a tema de la virus, disente ce lo debe es "firma contenida".
Lo no es clar esce la plataformas sosial ia bloci la combinas de termas pos comandas par la governa, o esce los mesma ia deside fa esta. Ma la reporta sujesta ce lo es cisa un resulta de companias cual "sensura tro multe per evita reproxas ofisial".
La rexercores ajunta ce lo es posible ce WeChat ia desbloci termas con ce la problem de la maladia continua developa. La sensura en Xina opera con un sistem autodisiplante en cual companias es regardada como culpable per la contenida a sua plataformas.
Autoriosas ia confirma plu ca 92 mil casos de la virus tra la mundo, e plu ca 80 mil es en Xina.
@T Un apico subita de casos de coronavirus en Beijing
@L aora_oji/2020/un_apico_subita_de_casos_de_coronavirus_en_beijing
====== Un apico subita de casos de coronavirus en Beijing ======
15 junio 2020
Beijing ia rejistra ier 36 casos nova e local comunicada de la coronavirus, e on teme la aveni de un onda du en la capital xines. 36 casos nova ia es rejistrada ance a saturdi, pos 6 a venerdi e 1 a jovedi. Ante esta, la site ia vide no casos nova en plu ca sincodes dias.
On ia asosia la eruta nova con la mercato la plu grande de vende major en la site. 79 casos ave un relata con la mercato Xinfadi.
Tre otra provinses -- Liaoning, Hebei e Sichuan -- ia reporta ance casos confirmada o suspetada con lias a Beijing.
La virus ia es descovreda sur plancetas de axi usada per salmon emportada a la mercato, provocante ce supramercatos grande en Beijing sutrae esta pexes de sua scafales.
On ia enclui rapida la mercato e ia pone restrinjes a des-un distritos visina. No visitores o traes es permeteda, ma abitores pote entra e sorti. On ia comanda la clui de scolas e prescolas prosima a la mercato, e ia pospone la reabri de scolas prima, intendeda per oji.
Des mil empleadas de la mercato va es probada per la virus.
La epidemiolojiste xef de la Sentro per Controla e Preveni Maladia, en Xina, ia dise ce la virus trovada en Beijing no sembla la tipo cual sirculi en la resta de la pais, sujestante ce lo ia es introduida de estra la pais.
Esta serie de casos ia apare cuando on ia recomensa la vive normal en Beijing e la plu de Xina. Persones ia revade cauta a sua locas de labora, e studiantes a sua scolas, an con restrinjes restante contra la virus.
@T Un arbor santa australian es destruida per un autovia
@L aora_oji/2020/un_arbor_santa_australian_es_destruida_per_un_autovia
====== Un arbor santa australian es destruida per un autovia ======
27 otobre 2020
En Australia, la buldozeri de un arbor santa a persones nativa ia provoca coleria.
Protestores ia campa longa a la loca de un autovia nova en la stato Victoria per defende arbores cultural importante, incluinte alga do femes de la popla local djab-uarung ia vade tradisional per pari enfantes.
Autoriosas ia cade esta "arbor de dirijes" a lundi. Ofisiores ia defende la ata, disente ce la arbor no ia es en un lista de protejedas.
En un acorda en la anio pasada, posesores nativa de tera ia negosia con la governa de Victoria per salva plu ca des entre 250 arbores "cultural sinifiante" contra destrui. Ma ativistes nondependente ia resta a la loca, prosima a Buangor, per atenta proteje plu arbores.
La polisia ia aresta oji 25 persones ci ia refusa parti en cuando la labora de vacui la tera ia continua. Videos postada par protestores ia mostra persones tirada a via e otras ci ia asende la arbores.
La governa dise ce la arbor ier sutraeda ia es un asero con eda de sirca 100 anios, ma protestores sujesta ce lo ia es vera un eucalipto. Los estima ce lo ia ave 350 anios.
Multe persones ia condena la anunsia de la destrui. Lidia Thorpe, senator nativa prima de la parlamento nasional e un fem djab-uarung, ia tuita: "Tota turbada, me senti la dole de nosa asendentes a esta momento."
Ativistes djab-uarung ia compara la importa cultural de arbores en la rejion a lo de un eglesa o otra loca spirital. Entre los cual on va proteje es du arbores de pari. Estas es arbores vea de sentenios, do femes ia entera tradisional sua plasentas.
Oposores ia es ance coler sur la tempo de la destrui, notante ce lo ia coaveni con la anunsia major de un fini de enclui antivirusal en Melbourne, capital de la stato.
La governa de Victoria ia defende forte esta projeta de autovia, un estende par 12 cilometres de un via entre Melbourne e Adelaide, razonante ce lo va redui asidentes de trafica.
Lo ia dise ce lo no ia toca un otra arbor identifiada como "arbor de dirijes", cual es protejeda, e ia sujesta ce la clasi usada par la protestores difere de lo par la posesores de tera ci ia negosia.
@T Un ataca con cotel a la ofisias pasada de Charlie Hebdo
@L aora_oji/2020/un_ataca_con_cotel_a_la_ofisias_pasada_de_charlie_hebdo
====== Un ataca con cotel a la ofisias pasada de Charlie Hebdo ======
26 setembre 2020
En Paris, sete persones es detenida en relata con un ataca estra la ofisias pasada de la jornal satira Charlie Hebdo. Un om armada con un axeta de carnor ia feri du persones en sua ataca ier.
La suspetada xef, identifiada como un om de 18 anios de orijina pacistani, ia es arestada prosima a la loca. La polisia ia informa ce ses otra persones es arestada e aora interogada.
On regarda la ataca como un aveni teroriste. Gérald Darmanin, ministro de internas franses, ia espresa ce lo ia es "clar un ata de terorisme islamiste". El ia ajunta ce la polisia ia suestima la nivel de menasa en acel distrito.
La ataca ia aveni en cuando un litiga major prosede, pertinente a 14 persones sur ci on acusa ce los ia aida du djihadistes a reali la ataca contra Charlie Hebdo en 2015, cual ia mata 12 persones.
Charlie Hebdo ia abandona sua ofisias pos acel ataca, e la construida es usada a presente par un compania audiovideo. La jornal mesma opera aora de un loca secreta.
On no ia nomi ofisial la du vitimes de la ataca ier, ma la polisia ia comenta ce los es un om e un fem ci labora a la compania. Jean Castex, ministro xef, ia clari ce la vives de esta du no es perilida.
Darmanin ia dise ce el ia comanda un aumenta de securia sirca sinagogas a esta finisemana per Iom Cipur, la dia la plu santa de la calendario iudi.
Sur la om suspetada xef, el ia esplica ce esta ia ariva en Frans a tre anios pasada "como un minor isolida". El ia ajunta ce on no ia sabe ce la om es estremiste, ma ce el ia es arestada a un ves cuando el ia porta un turnavise, sur cual la ministro ia dona no plu detalias.
@T Un atacor destesti un ensenior en Paris
@L aora_oji/2020/un_atacor_destesti_un_ensenior_en_paris
====== Un atacor destesti un ensenior en Paris ======
17 otobre 2020
Emmanuel Macron, presidente de Frans, ia descrive la destesti de un ensenior en un suburbe norde-ueste de Paris como un "ataca teroriste islamiste".
On reporta ce la vitim ia mostra cartunes controversa de la profeta Muhammad a sua studiantes. Macron ia comenta ce la ensenior, ancora no nomida, ia es omisideda car el "ia ensenia libria de espresa". "Los no va vinse," el ia ajunta. "Nos va ata."
La ataca ia aveni a sirca 17:00 de ora local, prosima a un scola. Un om armada con cotel ia es matada par polisiores cuando los ia atenta aresta el a pos.
La polisia ia revela no detalias personal sur la atacor, ma jornalistes franses reporta ce el ia es un om de 18 anios, de desende txetxen, ci ia nase en Moscva.
Un litiga continua presente en Paris sur la ataca islamiste en 2015 contra la revista satira Charlie Hebdo, cual ia publici la cartunes. A tre semanas ante aora, un om ia ataca e feri du persones estra la ofisia pasada de la revista.
En la Asembla Nasional, la parlamentores ia sta per onora la ensenior mor e per condena la "ataca deplorable de terorisme". Gérald Darmanin, ministro de internas, ci ia es viajante a Magrib, revade aora urjente a Paris.
Jean-Michel Blanquer, ministro de educa, ia tuita ce la mata de un ensenior es un ataca contra la Republica Franses. El ia espresa compatia per la vitim e sua familia, e ia dise ce unia e firmia es la sola respondes a "terorisme islamiste".
@T Un atenta abortada de evade un prison en Colombia
@L aora_oji/2020/un_atenta_abortada_de_evade_un_prison_en_colombia
====== Un atenta abortada de evade un prison en Colombia ======
1 maio 2020
Gardores ia preveni evades e tumultas en un prison en Colombia sentral do on ave sentos de casos de la coronavirus.
Sete prisonidas ia atenta escava un tunel de un de la selulas de un prison en Villavicencio. La gardores ia confisca ance armas autocreada cual la prisonidas ia intende usa en un revolta.
Entre gardores e gardadas, la prison ave 314 casos de COVID-19, la cuantia la plu alta de tota prisones colombian. Prisonidas ia cexa sur sua risca de developa la maladia.
La prison de Villavicencio ave plu ca 1700 prisonidas e es grave suprafolida, longo sua autoriosas. Estas ia dona poca detalia sur la tunel, ma un foto de la armas saisida ia es publicida.
La tensa es ja alta en prisones de Colombia en esta tempo pandemica. A un mense pasada, plu ca 20 prisonidas ia es matada en un tumulta en un de la prisones la plu grande de la pais, La Modelo en Bogota.
La governa ia comanda ce on transfere miles de prisonidas la plu perilida a un state de prisoni en sua casas, ma asta aora sola un cuantia peti ia move.
@T Un avion cade plen de cocaina en Papua Gine Nova
@L aora_oji/2020/un_avion_cade_plen_de_cocaina_en_papua_gine_nova
====== Un avion cade plen de cocaina en Papua Gine Nova ======
2 agosto 2020
La polisia dise ce un avion peti cual ia cade corta pos enaira en Papua Gine Nova ia es supracargada con cocaina intendeda per la mercato australian. La avaria de la gang de drogas ia contribui a sua defeta.
On crede ce la Cessna ia porta plu ca 500 cilogrames de cocaina, con valua de 80 milion dolares australian cuando lo ia cade a lundi.
Sinco omes es arestada, sur ci on alega ce cada ia parteni a un sindicato de crimin en Melbourne. En un declara formal, la polisia australian ia dise ce lo ia vijila la gang tra du anios.
La veculo lejera ia enaira de Mareeba en Queensland Norde a soldi, e ia vola a altia basa per evita es detetada par radar, ante atera a un campo de avion a Papa Lea Lea, a norde de Port Moresby. La polisia dise ce ala on ia carga lo con drogas per la vola de revade a Australia.
"La AFP [Polisia Federal Australian] alega ce avaria ia ave un rol major en la atas de la sindicato, e no pote esclui ce la pesa de la cocaina ia ave un efeto a la capasia de enaira de la avion," la declara ia nota.
On ia trova la ruina de la avion, abandonada e vacua, a distantia corta de la campo. La drogas, en 28 sacos, con ance un cuantia nonspesifada de mone australian, ia es reprendeda par polisiores de Australia e Papua Gine Nova, plu tarda.
La pilote, un australian, ia presenta se a la Consuleria Australian en Papua Gine Nova a martedi. El ia es arestada e on ia acusa el sur un crimin contra leges de migra.
La polisia ia ajunta ce la sinco omes ave lias a crimin organizada italian e ce los ia es arestada en Queensland e Victoria a tempo corta pos la enaira de la avion per Papua Gine Nova. Si on condena los, los va es cisa prisonida per sua vive.
La Viscomisionor de la AFP ia comenta: "Esta arestas demostra ce, an con cualce sofistica o oportunisme de la atentas par criminores organizada o de la metodos cual los usa, la enforsa de lege egali los e causa la dana masima a esta emprendes criminal."
@T Un avion cade sur un distrito abital de Karachi
@L aora_oji/2020/un_avion_cade_sur_un_distrito_abital_de_karachi
====== Un avion cade sur un distrito abital de Karachi ======
23 maio 2020
Un avion portante 91 pasajores e oto ecipores ia cade ier sur un distrito abital la site Karachi en Pacistan. La moris de 97 persones es confirmada.
La causa de la cade es ancora no conoseda. La pilote ia reporta un problem tecnical pos un atenta falida de atera, e ia envia un clama per aida cuando la avion ia cade pos des plu minutos.
Esta ia aveni a poca dias pos cuando la pais ia permete la recomensa de volas comersial pos lejeri sua regulas de isoli contra la coronavirus.
La Airbus A320 de Pakistan International Airlines ia veni de Lahore e ia porta multe familias viajante ante la festa Eid al-Fitr doman. Lo ia atenta atera a la Airoporto Internasional Jinnah en Karachi a sirca 14:30 de ora local.
Lo ia es multe prosima a la perimetre de la atereria cuando lo ia colpa casas en la distrito Colonia Model. Imajes televisada ia mostra ecipos salvante ci xerca tra detrito sperdeda sur la stradas de esta zona densa poplada. Alga autos ia arde.
Jornales pacistani ia publici la conversa entre la controlores de trafica airal e la pilote, ci dise ce sua avion ia perde sua motores. Un controlor demanda esce lo va fa un "atera sur ventre", e la pilote responde "mayday, mayday, mayday".
Un ofisior de avioni ia sujesta ce la avion ia es cisa noncapas de basi sua xasi. Imajes sirculinte en redes sosial pare mostra marcas negrida su ambos motores, con no xasi vidable en prosimi a la airoporto.
Investigores va atenta retrae la rejistradores "caxa negra" per aida descovre la causa de la cade. On ia institui ja un comite investigante.
La airocompania ia dise ce la avion ia deveni un parte de sua flotila en 2014 e ia susede sua esamina de securia per vola en novembre pasada.
@T Un balena azul a la costa de Cimri Sude Nova
@L aora_oji/2020/un_balena_azul_a_la_costa_de_cimri_sude_nova
====== Un balena azul a la costa de Cimri Sude Nova ======
5 setembre 2020
On ia vide un balena azul prosima a la costa de Sydney en Australia a cisa sola la ves tre en cuasi sento anios.
La balena ia es videda en agosto en acuas prosima a la suburbe Maroubra en Cimri Sude Nova. La Servi de Parces Nasional e Viventes Savaje de acel stato ia confirma la vide "estrema rara" ier.
Balenas azul es la animales la plu grande sur la Tera e lo no es comun ce los apare tan prosima a la costa. Esta bestia ia ave cisa plu ca 25 metres de longia e ia pesa probable plu ca sento tones.
An con sua grandia, balenas azul es rara videda car los tende abita multe distante en la mar, con poplas vasta sperdeda. On ave datos sola multe limitada sur sua migras e abitadas esensal.
Un fotografiste ia susede fa fotos de la balena en cuando lo ia nada longo la costa de Maroubra. El ia dise ce el ia es "completa ipnoseda" par la balena, ajuntante: "Me senti como si me ia gania la premio xef."
Esta es la rejistra prima confirmada de esta spesie a esta costa. Diferente de la megateros, cual mostra indicas ce sua cuantia recovre par sirca 10% per anio, la balenas azul resta rara en la acuas de Cimri Sude Nova.
La Servi de Parces Nasional e Viventes Savaje ia comenta: "Per esta razona, vides acaso como esta es tan noncredable valuosa. Los boni nosa comprende de do esta spesies abita, e sujesta esce nos debe considera metodos per atenta proteje los."
@T Un barco afonda e mata 17 persones en Aiti
@L aora_oji/2020/un_barco_afonda_e_mata_17_persones_en_aiti
====== Un barco afonda e mata 17 persones en Aiti ======
21 agosto 2020
A la min des-sete persones, incluinte du enfantes, ia mori prosima a la tera xef de Aiti cuando la barco de vela portante los ia afonda entre la isola Tortuga e la porto de pexa Saint-Louis-du-Nord.
La pasajores ia abita sur Tortuga e ia visita la mercato xef en la porto, cual es nomida Sen Lwi Dinò en creol aitian.
Nove persones ia es salvada, e la xerca continua per survivores posible. On crede ce tredes persones ia es embarcada cuando la barco ia afonda.
La xef de la Servi Maral e Navigal de Aiti ia dise ce la asidente ia es causada par venta alta. El ia comenta ance ce la barco, Ancelita, ia es supracargada e ia reseta no permete de viaja. Car on ave no polisia en la porto, la capitan ia comensa en via an tal.
Presidente Jovenel Moïse ia tuita sua compatia, disente ce el comparti la tristia de los ci ia perde familianes.
Barcos ruinada no es rara a la costa de Aiti, car on fa poca controla de la barcos cual viaja o de sua cuantia de cargas. En 2018, des-du persones ia mori cuando sua barco ia inversa en curso de traversa entre Tortuga e Saint-Louis-du-Nord.
La nom de la isola Tortuga ia es donada par Cristoforo Colombo, ci ia pensa ce sua forma sembla un tortuga. Plu ca 25 mil persones abita sur esta isola de 180 cilometres cuadrida.
@T Un barco de cocaina encalia en la Isolas Majel
@L aora_oji/2020/un_barco_de_cocaina_encalia_en_la_isolas_majel
====== Un barco de cocaina encalia en la Isolas Majel ======
17 desembre 2020
La polisia en la Isolas Majel ia fa sua saisi de drogas la plu grande de sempre, en un barco abandonada e encaliada sur un atol peti.
On pensa ce la barco ia flota traversante la Mar Pasifica de America Latina, cisa pasante plu ca un anio a mar. La 649 cilogrames de cocaina ave un valua estimada de $80 milion.
La polisia ia arde la drogas a martedi, con eseta de du pacetas, cual ia es enviada a la SUA per analise.
La barco, longa de 5,5 metres, ia es trovada par un abitor local sur la atol Aelok. On no ia pote move lo car lo ia es tro pesosa. Investigante, on ia descovre la pacetas de drogas en un comparte ascondeda.
Drogas encalia frecuente a la Isolas Majel, un arcipelago distante pasifica, dirijeda par corentes de mar, ma la descovre en la semana pasada ia crea un recordo nova.
En multe casos, persones local vende la drogas en loca de reporta los. La autoriosas de la isolas dise ce esta ia nuri un problem de drogamanicas, e ospitales ia nota un crese de la cuantia de pasientes con complicas pertinente a la consuma de crac.
En 2014, on ia trova un om de Salvador en un barco encaliada sur la isola Epoon. El ia dise ce el ia es perdeda a mar tra 13 menses, survivente par catura pexes, avias e tortugas par sua manos.
Pos sua salva, rexercores a la Universia de Hawaii ia fa 16 similis dijital de tipos de corentes partinte de la costa de Mexico e ia descovre ce cuasi tota de los ariva a la Isolas Majel.
Con popla de sola 55 mil persones, la arcipelago es composada de du cadenas de atoles de coral e plu ca mil isoletas, pico a norde de la ecuator en la Mar Pasifica.
@T Un barcon de turi viaja denova en la Mediteraneo
@L aora_oji/2020/un_barcon_de_turi_viaja_denova_en_la_mediteraneo
====== Un barcon de turi viaja denova en la Mediteraneo ======
17 agosto 2020
La barcon prima major de turi en la Mediteraneo en cuasi sinco menses ia parti de Genova en Italia.
La MSC Grandiosa va visita tre portos italian e Valletta, la capital malti, en un viaja de sete dias. Sua compania dise ce tota pasajores e ecipores ia es probada per coronavirus ante embarca.
La cuantia de casos de la virus continua crese tra Italia. La autoriosas ia comanda ce tota danserias e locas de note clui de oji. Mascas de fas va es ance obligada de 18:00 a 06:00 en spasios publica do on no pote distanti sosial.
La compania MSC Cruises va opera la Grandiosa a sirca 70% de sua capasia normal, con sirca 2500 pasajores, per serti la securia.
On regarda sua parti como la paso prima en reinisia un industria cual jenera $150 mil milion per la economia de mundo, como estimada par la Asosia Internasional de Companias de Barcones de Turi.
Per Italia, grava afetada par coronavirus, lo es spesial importante. La pais ocupa la loca sete entre la nasiones cual opera barcones de turi, e lo ia porta plu ca 800 mil pasajores en 2018.
En la semana pasada, la governa italian ia permete ce companias de turi recomensa funsiona en la pais de 15 agosto.
Un plu barcon de la mesma compania va parti de Bari en la sude-este de Italia a 29 agosto, ma la organiza ia suspende tota sua otra turis asta la media de otobre.
La pandemica ia causa perdes finansial grande a la industria internasional de turi. Alga companias ia es ance criticada pos lasa miles de pasajores trapida en barcones en Asia e la SUA en la menses temprana de la maladia.
MSC Cruises ia comenta ce sua regulas nova de securia, cual inclui probas dial de la temperatur de la embarcadas, esede la normas per la nasion e la industria. Ma la viaja de la Grandiosa va es un esperimenta major entre la ansia restante sur securia de pasajores.
A la fini de julio, la compania peti norsce Hurtigruten ia debe suspende sua servi nova recomensada, car deses de pasajores e ecipores ia es positiva probada per la coronavirus.
@T Un barcon fantasmin encalia a la costa eres
@L aora_oji/2020/un_barcon_fantasmin_encalia_a_la_costa_eres
====== Un barcon fantasmin encalia a la costa eres ======
18 febrero 2020
Un barcon de carga "fantasmin" ia encalia a la costa de Contia Cork en Er, traeda par la mal clima cual ia bate Europa en Tempesta Dennis.
La barcon abandonada ia es videda sur la rocas de Ballycotton, un vileta de pexores, par un pasor. Lo pare ce la barcon ia vaga tra un distantia enorme en plu ca un anio, traversante la Mar Atlantica de la sude-este de Bermuda en 2018.
On ia identifia la barcon como la Alta, cual ia ave multe posesores e nomes tra sua tempo. Construida en 1976, lo ia mostra la plu resente un bandera tanzanian.
Autoriosas diversa ia deveni consensa de sua vaga sin dirije sirca la mundo. A la ves pasada, lo ia es videda en setembre 2019.
La saga cual ia porta lo a Er ia comensa en setembre 2018 cuando lo ia ave ancora un ecipo e ia naviga de Elas a Aiti. Alga problem nonconoseda ia causa un rompe de eletrica, e la Alta ia vaga tra 20 dias a sirca 2100 cilometres a sude-este de Bermuda, longo la Gardacosta SUA, cual ia deveni alora consensa de lo.
Cuando comedas per sola du dias ia resta per la ecipo, la gardacosta ia envia comedas e otra furnis. Ma cuando un siclon ia prosimi, la gardacosta ia deside salva la des ecipores e prende los a Porto Rica.
Partal danada, e sin ecipo, la Alta ia es lasada a sua vagas. E pos un anio, en setembre 2019, la rompejelo Protector de la marina brites ia vide lo a media de la Mar Atlantica.
Normal, barcones danada o afondada resta la propria de sua posesores, ci es obligada a deside un solve. Ma si on judi ce un tal barcon es perilosa per otras, autoriosas local pote tira lo a via.
La dirijor de operas costal per la Comisionores de Faros Eras ia dise: "Ce un barcon vaga tal tra 18 menses no es comun. Ce on ia vide lo a sola un ves pos otobre 2018 mostra como vasta la mar es."
No contamina vidable emerji de la Alta.
@T Un bomba en auto mata 19 nonmilitares en Suria
@L aora_oji/2020/un_bomba_en_auto_mata_19_nonmilitares_en_suria
====== Un bomba en auto mata 19 nonmilitares en Suria ======
7 otobre 2020
En Suria norde, a la min 19 persones nonmilitar ia es matada par un bomba en un auto en un vila controlada par rebelores suportada par Turcia.
80 plu persones ia es ferida cuando la veculo ia esplode prosima a un stasion de bus en al-Bab, a sirca 40 cilometres a norde-este de la site Aleppo.
Bonvolores salvante de la organiza Elmos Blanca ia dise ce los xerca ancora survivores en la detrito de construidas danada.
On ancora no sabe ci ia fa la bombi. An tal, al-Bab ia esperia un serie de atacas pos cuando rebelores e soldatos turces ia catura lo de la grupo Daex en 2017.
Pos un otra bombi par auto en novembre cual ia mata 18 persones, autoriosas turces ia culpa la militia Unias de Proteje la Popla curdi suri, cual Ankara regarda como un organiza teroriste.
Du ofisiores major de la Nasiones Unida ia condena forte lo cual los ia descrive como la "bombi xocante" ier.
Imran Riza, coordinor umaniste per Suria, e Kevin Kennedy, coordinor umaniste rejional per la crise en Suria, ia espresa sua compatia profonda a la familias de la vitimes, e ia urje ce tota partitos de la gera en la pais obedi sua obligas de serti la securia de persones nonmilitar.
@T Un bus cade en un dolina en Xina
@L aora_oji/2020/un_bus_cade_en_un_dolina_en_xina
====== Un bus cade en un dolina en Xina ======
14 janero 2020
En la parte norde-ueste de Xina sentral, a la min ses persones ia mori e 16 ia es ferida cuando un dolina grande ia engoli un bus e alga paseores.
La buco ia apare en la strada a la sera de ier, estra un ospital en Xining, la capital de la provinse Qinghai.
Video vijilante mostra un esplode en la dolina, corta pos cuando la bus e persones prosima ia cade a en. Persones stante a un parabus ia es obligada a core a via cuando la tera su la bus ia cade subita.
Alga persones ia asembla per atenta salva la pasajores, ma los ia desapare en la buco cuando lo deveni subita plu larga.
La medias jornaliste governal dise ce la dolina ia ave cuasi des metres de diametre. On no sabe cuanto persones ia es en la bus a la tempo de la aveni.
Esta no es la caso prima de un dolina matante en Xina en anios resente. On culpa frecuente construerias e la rapidia de developa en la pais per la apare de los.
En 2018, cuatro persones ia mori cuando un buco ia abri en un troteria folida en la site Dazhou en la sude-ueste. E plu temprana par sinco anios, un aveni simil ia mata sinco persones en un compleso industrial en Shenzhen, un site sude.
@T Un cade global major de la cuantia de nases
@L aora_oji/2020/un_cade_global_major_de_la_cuantia_de_nases
====== Un cade global major de la cuantia de nases ======
15 julio 2020
Rexercores dise ce la mundo no es preparada per un cade global en la cuantia de nases de enfantes, cual va fa un efeto major a la organiza de sosia.
Par causa de tasos reduinte de fertilia, cuasi cada pais pote ave poplas diminuinte a la fini de esta sentenio. E on previde ce la poplas de 23 nasiones, incluinte Espania, Italia, Portugal, Tai, Japan e Corea Sude, va ave en 2100 un dui de sua grandia presente.
Paises va senese ance notable, con la cuantia mesma de persones ci ateni la eda de 80 anios como los ci nase.
Si la cuantia promedia de enfantes parida par un fem cade, la popla comensa diminui. En 1950, femes ia pari promedia 4,7 enfantes en sua vives.
A la Instituida per Mesura e Evalua de Sania en la Universia de Washington, rexercores ia mostra ce la taso global de fertilia ia cade a sola 2,4 en 2017, e sua studia previde ce lo va deveni min ca 1,7 ante la anio 2100.
On predise ce la cuantia de persones sur la planeta va ateni un masima de 9,7 mil milion sirca 2064, ante redui a 8,8 mil milion a la fini de la sentenio.
La causa de la cade es ce plu femes es aora educada e laborante, e ave plu asede a contrasepi, tal ce femes tende eleje ave min enfantes.
Longo la rexerca, la popla de Japan va cade de sua masima de 128 milion en 2017 a min ca 53 milion en 2100. Italia va esperia un cade egal dramosa de 61 asta 28 milion persones en la mesma tempo.
Xina es aora la nasion la plu multe poplada de mundo. On espeta ce lo va ateni un masima de 1,4 mil milion pos cuatro anios, e va dui cuasi, asta 732 milion, en 2100. Barat va deveni la pais la plu multe poplada, con Nijeria en la loca du, con 791 milion persones. La popla de Africa susaharan va trupli, asta plu ca 3 mil milion.
La cuantia de enfantes con min ca sinco anios va cade de 681 milion en 2017 asta 401 milion en 2100. En acel mesma tempo, la cuantia de persones con plu ca 80 anios va crese enorme, de 141 asta 866 milion.
Tota esta va crea cambias enorme en sosia. La mundo va debe deside como impostas funsiona en un mundo senesente, ci va cura la persones vea, ci va paia per acel cura, e esce on va pote ancora jubila a fini de sua carera.
@T Un camion colide con un sculta sur Rapanui
@L aora_oji/2020/un_camion_colide_con_un_sculta_sur_rapanui
====== Un camion colide con un sculta sur Rapanui ======
6 marto 2020
La maior de Isola Pascua (o Rapanui) en la sude-este de la Mar Pasifica, ia recomenda ce on pone restrinjes contra veculos de motor, pos cuando un camion ia colpa un de la scultas santa. Pedro Edmunda Paoa ia dise ce la aveni ia causa dana "noncalculable".
Un om txilan ci abita sur la isola ia es arestada a soldi e acusada de dana un monumento nasional. La plataforma sur cual la sculta sta ia es ance destruida.
La scultas de petra ia es siselida par la popla rapanui per corpi la spiritos de sua asendentes major. Sirca mil de esta figures, conoseda como mo'ai, esiste sur la isola, cual es visitada par sirca 12 mil turistes en cada mense.
La maior ia dise: "Cadun ia deside contra institui regulas de trafica per veculos sur locas santa, ma nos, como un consilio, ia parla sur la periles e ia sabe multe bon la resulta posible de la crese de cuantia de turistes e abitores. Los no ia escuta nos e esta es la segue."
En un posta a Facebook, la comunia nativa ma'u henua ia dise ce lo es esensal importante ce on "proteje la erita de cultur": "Los no es sola restas arceolojial; los es elementos santa de un cultur vivente e fundal a nosa comprende rapanui de la mundo."
La scultas jigante ia es creada par la rapanuis a alga tempo entre 1400 e 1650 e locada per formi un anelo sirca la isola, regardante a interna. Cada es considerada como la incarne vivente de un asendente.
@T Un cantor corvatsce es acusada de burla la imno nasional
@L aora_oji/2020/un_cantor_corvatsce_es_acusada_de_burla_la_imno_nasional
====== Un cantor corvatsce es acusada de burla la imno nasional ======
22 febrero 2020
Un cantor a la inaugura de la presidente nova de Corvatsca ia es criminal acusada sur sua presenta de la imno nasional.
La alega, rejistrada par un avocato corvatsce, dise ce la canta par Josipa Lisac ia intende burla la imno. Ma sua compania de musica e sua sindicato de musicistes ia dise ce la cexa mostra "un rejeta completa de libria artiste".
Su lege corvatsce, un desrespeta de la imno nasional pote resulta un condena de un anio en prison.
Josipa Lisac ia gania desuples de premios en sua carera de 53 anios, e es conoseda per sua presentas e stilo de moda unica.
El ia canta Nosa Propre Pais Bela, acompaniada par Zvjezdan Ružić, pianiste jaz, en la rituo per inaugura Zoran Milanović como presidente de Corvatsca a martedi. Sua canta ia ave un tono diferente de la presenta sombre e ostentosa usual de la imno nasional.
Ma en un cexa criminal, Boško Županović acusa ce la presenta par Josipa Lisac no ia es "sosial asetable" e ia desobedi la lege. Županović, ci posese alga comersias e un pajeria local, alega ce Lisac ia usa "pronunsias e tinjes burlante" per desonora la pais.
"Me no desira atrae atende de jornalistes," la avocato ia dise. "Me ia usa mea tempo per scrive esta solisita car me ia opina ce lo es mea debe sivil."
En un declara juntada, Croatia Records e la Sindicato de Musicistes de Corvatsca ia dise ce la situa es "un plu demostra ce nos vive en un sosia do valuas fundal umana e cultural sta sur tera nonsecur".
Los ia ajunta ce Lisac, ci ave 70 anios, no va comenta publica sur la alega.
@T Un contrae recordo en la economia deutx
@L aora_oji/2020/un_contrae_recordo_en_la_economia_deutx
====== Un contrae recordo en la economia deutx ======
31 julio 2020
La economia de Deutxland ia contrae con rapidia recordo entre la efetos de la pandemica de coronavirus.
La statistica ofisial nova indica ce la produi intera de benes e servis ia descrese par 10,1% en la periodo de april a junio. Esta ia es la descrese la plu agu rejistrada en un cuatri de anio, pos la comensa de publici tal informas en Deutxland en 1970.
La redui ia segue un otra descrese, min agu ma ancora grave, par 2% en la tre menses presedente.
La economia deutx, como multe otras, ia es forte colpada par la pandemica e la restrinjes poneda per atenta conteni lo.
La ofisia de statistica de la pais ia dise ce on ia ave "un colasa enorme" en la spende par familias, en la investi a aparatos e macinas, e en esportas e emportas.
Deutxland es un esportor major, spesial per benes fabricada, donce, nonevitable, lo ia es multe afetada par la disturba causada a la comersia internasional par la crise de sania.
La sola parte de la economia cual ia crese alga, longo la ofisia de statistica, es la spende noninvestal par la campo publica.
On ia vide sinias en otra datos ce cisa un recovre ia comensa pos april. Esta es sujestada par la statistica mensal sur la produi industrial e la vende a consumores, per esemplo.
@T Un corte barati oposa la suspende de interede en Caxmir
@L aora_oji/2020/un_corte_barati_oposa_la_suspende_de_interede_en_caxmir
====== Un corte barati oposa la suspende de interede en Caxmir ======
10 janero 2020
La Corte Suprema de Barat ia demanda ce la governa reconsidera la suspende de servis de interede en la parte barati de Caxmir, en min ca un semana.
La rejion ave ja no asede a la rede tra plu ca 150 dias, la tempo la plu longa de un tal situa en Barat. La governa ia suspende servis de rede, telefoneta e telefon ante sutrae la autonomia partal de Caxmir a 5 agosto.
La corte ia responde a multe solisitas formal defiante la restrinjes.
"La supresa completa de interede debe es considerada par la stato sola como un media estracomun," la judor ia dise oji en leje la deside, ajuntante ce la asede a la interede es un parte de la direto per libria de parla e espresa garantiada par la constitui.
La grupo de tre judores ia deside ance ce la suspende nonfininte de servis de interede es "nonpermetable" e ce tal restrinjes pote "es mera tempora".
Alga servis de telefon e telefoneta ia es restorada en otobre, ma la suspende continuante de interede ia descapasi la vive dial, difusores e comersias.
Cuando la governa de la Partito de la Popla Barati ia cansela la autonomia de la rejion, esta ia es controversa, car la autonomia ia forti la relata frajil entre Caxmir e Barat. Barat ia batalia longa un rebela par caxmiris.
Un lege de la eda colonial, nomida Sesion 144, proibinte la asembla de plu ca cuatro persones per preveni disturbas de la bon ordina, es ance reativida en la rejion.
An si la governa ia afirma ce la plu de la rejion es calma, lo ia dise ance ce lo ia pone la restrinjes per preveni violentia.
@T Un corte burundes deside en manca de presidente
@L aora_oji/2020/un_corte_burundes_deside_en_manca_de_presidente
====== Un corte burundes deside en manca de presidente ======
14 junio 2020
En Burundi, la corte la plu alta ia fa un judi intendeda per fini la vacua creada par la mori subita de Presidente Pierre Nkurunziza a lundi. La Corte Constitual ia dise ce on debe inaugura rapida Evariste Ndayishimiye, la presidente elejeda.
Legal, la presidente de parlamento, Pascal Nyabenda, ia ta debe deveni entretempo la xef. Ma la governa ia deside consulta la corte, e aora Ndayishimiye va es inaugurada como presidente, plu temprana par du menses. On ia eleje el en maio per recambia Nkurunziza, ci ia ocupa la posto tra 15 anios.
La judores major de la pais ia dise ce, en la constitui, la periodo tempora governada par la presidente de parlamento ia es intendeda como un tempo per fa elejes nova, ma la vinse resente de Ndayishimiye ia fa ce esta no es nesesada.
Nkurunziza ia pote aspira un periodo cuatro en la mense pasada, ma ia deside jubila per es conoseda como "la gida suprema a patriotisme". La governa ia dise ce el ia mori de un fali de cor, pos deveni malada en la sera de saturdi.
On ave multe reportas ce Nkurunziza ia mori pos developa COVID-19, ma estas no es confirmada e la governa no ia responde a los.
Nkurunziza ia desasentua la pandemica a plu ca un ves. En la temprana de marto, ante la caso prima confirmada de coronavirus en la pais, el ia dise: "Dio va proteje nos." A sola un semana ante sua mori, el ia dise: "Dio ia clari [la virus] de la sielos de Burundi." La pais ia rejistra pico plu ca otodes casos de la virus, e on ia ave sola un mori confirmada.
Burundi es aora en un semana de lamenta nasional pos la mori de Nkurunziza, e la governa ia suspende la jua de musica secular en locas publica en esta tempo. Musica gospel es ancora permeteda. Nkurunziza ia es un cristian renaseda.
@T Un crese recordo dial en casos global de coronavirus
@L aora_oji/2020/un_crese_recordo_dial_en_casos_global_de_coronavirus
====== Un crese recordo dial en casos global de coronavirus ======
14 setembre 2020
La Organiza Mundal de Sania ia rejistra un crese recordo dial en la cuantia de infetas nova de coronavirus: 307 930 ia es reportada en 24 oras. La recordo presedente ia aveni a 6 setembre.
La ajenteria ia dise ce la cuantia de moris ia crese par 5500, levante la soma global a 917 417. La altis la plu grande ia es en Barat, la SUA e Brasil.
En la mundo intera, on ia ave aora plu ca 28 milion casos confirmada, de cual un dui ia es en la Americas.
Barat ave la cuantia du la plu grande de casos confirmada, seguente la SUA. Lo ia reporta resente cuasi du milion casos de COVID-19 per agosto, la cuantia mensal la plu alta de mundo pos la comensa de la pandemica. Per promedia, la pais ia esperia 64 mil casos per dia, e la cuantia de moris ia esede 1000 a cada dia pos la comensa de setembre.
Brasil ia rejistra ja plu ca cuatro milion casos, la cuantia tre de mundo. Sua cuantia de moris, sirca 131 mil, es la plu alta en America Latina.
La SUA ia rejistra cuasi un cuatri de la casos de coronavirus en la mundo: plu ca ses milion. Sua cuantia dial de casos ia aumenta en julio, ma ia cade a pos. Con plu ca 194 mil, la SUA ave la cuantia la plu alta de moris rejistrada en la mundo.
Paises tra Europa reporta ance ce sua cuantias dial de casos crese, e on teme un reforti de la virus. Governas ia obliga encluis local en la rejiones la plu grave afetada, e on ia apela denova ce la popla debe porta covrefases e segue la regulas de distanti sosial.
Otra paises cual ia vide un reapare de la coronavirus inclui Peru, Israel, Corea Sude e Australia.
Ier, la polisia australian en la stato Victoria ia aresta plu ca 70 protestores ci ia desobedi la comanda de resta a casa. Sirca 250 persones ia partisipa en esta protesta en la site Melbourne, cual ia es promoveda par grupos en redes sosial ci distribui teorias de conspira sur la pandemica.
La ministro xef de Zeland Nova, Jacinda Ardern, ia anunsia oji ce sua pais va sutrae sua restrinjes, con eseta de en Auckland, sua site la plu grande, a 21 setembre. Zeland Nova ia susede eselente conteni la virus, ma on ia pone restrinjes en Auckland pos descovre alga infetas nova en agosto.
Israel, do la cuantia de casos continua crese, va fa denova un enclui nasional. La regulas sever va ativi a venerdi, la dia de la anio nova iudi, e va dura per tre semanas a la min.
@T Un cuantia recordo de elefantes srilanca ia mori en 2019
@L aora_oji/2020/un_cuantia_recordo_de_elefantes_srilanca_ia_mori_en_2019
====== Un cuantia recordo de elefantes srilanca ia mori en 2019 ======
12 janero 2020
361 elefantes ia mori en Srilanca en la anio pasada. Esta es la cuantia la plu alta reportada en cualce anio pos la autonomi de la isola en 1948. La plu, cisa 85%, ia es matada par umanas.
On ave sirca 7500 elefantes savaje en Srilanca. Mata los es nonlegal, ma la animales veni comun en desacorda con comunias campanial. Elefantes es onorada en la pais, ma alga cultivores regarda los como pestes.
Comunias usa sercas eletricida, venena e esplodentes ascondeda en comables per mata la bestias. En setembre, ofisiores ia dise ce los suspeta ce sete elefantes mor trovada en un conserveria ia es venenida par abitores local car los ia destrui granes.
La grandi de viletas e cultiverias en Srilanca ia contribui a la diminui de la comables e acua disponable per la animales.
Ofisiores ia promete erije sercas entre abitadas de elefantes e comunias campanial. Ma la Promove per Reformi de Tera e Cultiva dise ce la governa debe fa plu per boni la cualia de rejiones protejeda, per esemplo par solve la problem de plantas invadente cual crese sur la savanas cual nuri la elefantes.
Alga elefantes migrante es matada par trenes. Otras mori par causas natural. Desuples de los es tenida en nonlibria en la pais per recolie revenu de turistes, e otras es obligada a parade en festas local.
@T Un depinta furada es trovada pos anios en un mur
@L aora_oji/2020/un_depinta_furada_es_trovada_pos_anios_en_un_mur
====== Un depinta furada es trovada pos anios en un mur ======
18 janero 2020
Espertas italian ia confirma ce un depinta, acaso descovreda en la mense pasada, es un orijinal par Gustav Klimt cual ia es furada a cuasi 23 anios ante aora.
"Depinta de un Dama" ia es prendeda de un galeria en Piacenza, un site en la norde de Italia, en 1997. On ia crede ce lo ia desapare permanente, asta cuando jardinores sutraente edera ia trova lo, ascondeda en un mur esterna de la galeria.
La depinta ave la valua estimada de 60 milion euros a la min.
Perce lo ia es lasada en la mur a la Galeria de Arte Moderna Ricci Oddi es ancora misteriosa. Plu esaminas va clari esce lo ia es ala tra tota la tempo pos sua fura, o esce lo ia es plu tarda poneda ala. Pos la completi de la esaminas, la obra va es denova esibida.
Per determina sua autenticia, espertas ia studia la depinta en lus infraroja e ultravioleta e ia compara la imajes a los fada en esaminas en 1996. La coresponde entre la imajes ia indica ce la depinta trovada es serta la orijinal.
On reporta ce la obra es en state "relativa bon".
Lo ia es creada en 1916--17 par Gustav Klimt, un artiste de Wien, prosima a la fini de sua vive. Giuseppe Ricci Oddi, un colior de arte, ia compra lo en 1925, e on ia teni lo en la galeria de sua nom asta sua fura a 22 febrero 1997, entre preparas per un esibi spesial.
La moldur de la depinta ia es dejetada sur la teto de la construida per dona la pare ce furores ia estrae lo tra un fenetra de teto. Ma on ia sabe ce la fenetra no ia es usada en esta modo, car lo ia es min grande ca la depinta.
En desembro, jardinores ia trova un panel de metal, covrente un alcova en cual un saco negra ia conteni la obra mancante. La edera ante la panel ia crese tra plu ca un desenio.
Corta ante la fura, Claudia Maga, un studiante de arte, ia revela ce "Depinta de un Dama" ia es creada supra un otra obra de Klimt, "Depinta de un Dama Joven", cual on no ia vide pos 1912. El ia convinse la dirijor pasada de la galeria ce on debe radiografi lo.
La depinta plu vea ia mostra un xica joven de Wien. Klimt ia suprapinti lo cuando la xica ia mori subita, per oblida la dole de sua mori.
@T Un depinta valuosa par Picasso es ganiada en un rifa
@L aora_oji/2020/un_depinta_valuosa_par_picasso_es_ganiada_en_un_rifa
====== Un depinta valuosa par Picasso es ganiada en un rifa ======
21 maio 2020
Un fem italian ia gania un depinta par Pablo Picasso, con valua de sirca milion euros, en un rifa per cual el ia reseta un bileta como un donada.
La bileta ganiante ia es tirada en un rifa difusada de la subasteria Christie's en Paris. La aveni, un recolie carital, ia es ja posponeda a du veses: prima per vende plu biletas, e ance par causa de la restrinjes contra coronavirus.
La depinta, Natur mor, ia es creada en 1921. Lo es un obra relativa peti, con 46 sentimetres de largia e 23 de altia, cual mostra un vitro de asinto e un jornal sur un table.
En soma, 5,1 milion euros ia es recolieda per la organiza CARE Internasional par vende 51 mil biletas de rifa a custa de 100 euros. Sirca 29% de los ia es vendeda en Frans, segueda par la SUA e Suiz.
Organizores ia dise ce on va dirije 4,2 milion euros de la revenu a projetas per acua limpa en scolas e viletas en Madagasicara, Magrib e Camerun.
David Nahmad, la colior-bilionor de Monaco ci ia furni la depinta par Picasso, va reseta 900 mil euros. El ia dona ance 100 mil euros a CARE.
"Picasso ia ta ama un tal opera, car el ia es un person con multe interesa a promoves umaniste e sosial," la organizor Péri Cochin ia comenta. "Esta crise de coronavirus ia clari como importante lo es ce on lava la manos, e on pote fa esta sola con acua limpa."
@T Un detona mata 15 enfantes en Afganistan
@L aora_oji/2020/un_detona_mata_15_enfantes_en_afganistan
====== Un detona mata 15 enfantes en Afganistan ======
19 desembre 2020
Un esplode ia mata 15 enfantes e ia feri 20 otra persones en la provinse Ghazni en la este de Afganistan.
La razona per la esplode en la distrito Gilan no es clar. La polisia dise ce un bomba ia detona en la retro de un ricxa. Ma abitores local sujesta ce un peso de muni ia esplode cuando enfantes ia atenta vende lo a un mercator.
Esta ia aveni sirca la ora 14, prosima a un casa en un vileta do un rituo de resita la Curan ia prosede.
Un bomba ia esplode cuando un om gidante un ricxa motorida ia entra a la vileta e ia deveni ensircada par enfantes, como diseda par un portavose per la governor de la provinse. El ia ajunta ce la cuantia de persones mor es cisa plu alta.
Ma la polisia ia acusa la talibanes de ataca.
Militaristes taliban dise ce la esplode ia es asidente, an tal. Sitante un cuantia de sola 12 persones mor, un portavose taliban ia dise ce enfantes ia porta un muni nonesplodeda a un vendor e lo ia detona.
La nivel de violentia en la pais resta alta, an pos la comensa de negosias entre ofisiores afgani e taliban.
@T Un difusante pilipina es comandada a sesa transmete
@L aora_oji/2020/un_difusante_pilipina_es_comandada_a_sesa_transmete
====== Un difusante pilipina es comandada a sesa transmete ======
6 maio 2020
La compania difusante major de la Pilipinas ia sesa transmete car la comision regulante de difusas ia comanda ce lo para sua operas.
ABS-CBN ia dise ce lo va continua difusa en cuando lo espeta un renovi parlamental de sua lisensa, cual ia desvalidi a lundi. Ma a martedi, la comision ia dise ce lo debe sesa sua ativia.
En la pasada, la canal ia coleri Presidente Rodrigo Duterte, ci es conoseda per silenti jornalistes oposante.
Ante la desapare de sua canal prima, sua xef Mark Lopez ia dise: "Lo dole nos ce on clui nos, ma lo dole ance miliones de nosa paisanes ci crede ce nosa servi es importante per los."
En un declara plu temprana, ABS-CBN ia dise ce lo va sesa operas en la sera de martedi per obedi la comanda de la Comision Nasional de Telecomunicas, e ia urje legores en la Congresa, la salon basa de parlamento, a renovi sua francisia.
Duterte fa ja longa un vendeta contra ABS-CBN, pos cuando la canal ia coleri el en la eleje presidental de 2016 par refusa transmete sua anunsias campaniante.
Legores oposante dise ce la comanda de sesa va impedi la batalia contra la coronavirus, cual ia infeta plu ca 9600 persones en la pais e ia mata plu ca 600. E organizas monitorinte, incluinte la ramo pilipina de Amnestia Internasional, ia descrive la cambia como un colpa grave contra libria jornaliste.
Fundida en 1953, la compania agregada ABS-CBN emplea 11 mil persones. Lo posese canales nasional de radio e televisa e distribui contenidas enlinia.
@T Un droga fali e Trump fa un sujesta asurda
@L aora_oji/2020/un_droga_fali_e_trump_fa_un_sujesta_asurda
====== Un droga fali e Trump fa un sujesta asurda ======
24 april 2020
Un droga posible contra la coronavirus ia fali en la prima de sua probas clinical acasida.
On ia ave espera ce remdesivir va es capas de remedia COVID-19, ma un proba xines ia mostra ce lo no susede, longo documentos ru, publicida sin intende par la Organiza Mundal de Sania (OMS). La droga no boni la state de pasientes e no redui la presentia de la patojen en la sangue.
La compania esuan cual ia produi la droga ia comenta ce la documento ia malrepresenta la situa.
La OMS ia posta la detalias en sua banco de datos sur probas clinical, ante sutrae lo denova e confesa la era. 237 pasientes ia es studiada, de ci 158 ia reseta la droga e 79 un plasebo. Pos un mense, 13,9% de la pasientes con la droga ia mori, en compara con 12,8% de los con la plasebo.
On ia para temprana la proba par causa de sua efetos ladal.
Entretempo, la comunia medical ia critica forte Donald Trump, ci ia sujesta rexerca esce on pote remedia coronavirus par injeta desinfetante a la corpo.
Dotores ia averti rapia ce la idea pote mata la pasiente en loca, descrivente la idea de injeta o engoli licuidas de limpi como estrema perilosa e descurante. La departes governal de sania en la SUA averti direta contra la usa de blancinte como medisin.
La presidente de la SUA ia pare ance proposa esposa la corpos de pasientes a lus ultravioleta, un idea rejetada par un dotor a la sesion.
@T Un dui de milion persones fuji focones en Oregon
@L aora_oji/2020/un_dui_de_milion_persones_fuji_focones_en_oregon
====== Un dui de milion persones fuji focones en Oregon ======
11 setembre 2020
En la SUA, plu ca un dui de milion persones en la stato Oregon fuji de focones savaje cual arde tra la Norde-Ueste Pasifica.
Vanida par ventas nonusual calda e seca, desuples de focones traversa la stato, e on suspeta ce a la min un de los ia es criminal ensendeda.
Plu ca sento focones arde en des-du statos en la ueste de la SUA. Oregon, California e Washington ia sufri la plu de la ardes, cual ia destrui vilas intera en alga casos. On ia confirma des moris en California.
Sirca 1,8 milion ectares ia es destruida. A la sera de ier, la Ofisia per Maneja de Crise en Oregon ia confirma la statistica la plu resente de evacua, cual envolve plu ca 10% de la 4,2 milion abitores de la stato.
Un portavose per la pompores ia comenta: "Cuando un focon arde tra casas e ofisias, on ave tubos abrida cual emete ancora gas natural, e estas arde."
Kate Brown, la governor democrata de Oregon, ia dise: "Nos ia vide nunca esta cuantia de foco noncontenida tra la stato. Esta no va es un aveni de un sola ves. Nonfortunosa, lo premostra la futur. Nos esperia la efetos sever de la cambia de clima."
Entre la evacuadas es plu ca 1300 prisonidas, jeneral fema, de un prison en Wilsonville cual on regarda como menasada par du focones grande cual es cisa a punto de combina.
Un de la ardes la plu destruinte ia comensa prosima a la frontera con California. La polisia trata lo como suspetosa. Lo es liada a minima du moris e lo ia ruina ja sentos de casas en la vilas Phoenix e Talent.
Rumores ce alga focones ia es ensendeda par membros de grupos estrema sinistriste o destriste es rejetada par la polisia.
@T Un dui de milion persones ia mori par coronavirus
@L aora_oji/2020/un_dui_de_milion_persones_ia_mori_par_coronavirus
====== Un dui de milion persones ia mori par coronavirus ======
29 junio 2020
Aora plu ca 500 mil persones en la mundo ia perde sua vives en resulta de la pandemica de coronavirus, la Universia Johns Hopkins en la SUA dise. Pos la apare de la virus en la tarda de la anio pasada, on ia esperia plu ca 10 milion casos de la maladia.
Un dui de la casos ia es en la SUA e Europa, ma COVID-19 crese aora rapida en la Americas. Lo afeta ance Asia sude e Africa, do on previde ce lo no va ateni sua apico ante la fini de julio.
La maladia sperde ancora en multe partes, e on ia rejistra milion casos nova en la ses dias pasada.
La SUA ia reporta 2,5 milion casos e 125 mil moris asta aora, plu ca cualce otra pais. Statos ala cual ia emerji de enclui en semanas resente, notable en la sude de la pais, ia reporta aumentas recordo de infetas nova, tan ce ofisiores en Texas e Florida ia tensa denova la restrinjes.
La statistica de alga paises mostra ce persones de etnicos negra e asian es plu comun grave afetada par la virus ca persones blanca.
La pais con la cuantia du la plu alta de casos rejistrada es Brasil, con 1,3 milion casos e plu ca 57 mil moris. An su un onda de infetas nova, la stato Rio de Janeiro ia dise ce lo va permete ce stadiones de futbal reabri a la popla jeneral de 10 julio, inisial a sola un tri de sua capasia plen.
En Europa ueste, la pais con la plu multe moris es la Rena Unida. La governa ala dise ce lo considera pone sua regula prima de enclui local, pos un alti de la cuantia de casos en Leicester, un site en la media de England.
Ier, Xina ia enforsa un enclui sever, prosima a Beijing, per impedi un eruta nova. Cuasi un dui de milion persones es proibida de viaja a o de la distrito Anxin en la provinse Hebei.
@T Un efrata a la funera de la futbalor Paolo Rossi
@L aora_oji/2020/un_efrata_a_la_funera_de_la_futbalor_paolo_rossi
====== Un efrata a la funera de la futbalor Paolo Rossi ======
13 desembre 2020
La casa de Paolo Rossi, eroe italian de la Copa de Mundo de futbal en 1982, ia es efratada ier en cuando sua funera ia aveni.
La rituo ia es fada en Vicenza, un site en la norde-este de Italia, pos sua mori pos 64 anios a jovedi.
Sua sposa, Federica Cappelletti, reveninte de la funera, ia trova ce algun ia entra par forsa a sua casa en Toscana. Un orolojeta parteninte a Rossi e mone ia es entre la cosas reportada como furada. La polisia investiga.
Rossi e sua familia ia abita un casa de cultiveria en Poggio Cennina, un loca supra la Val d'Ambra a sude-este de Firenze, do Rossi ia maneja un compania de cultiva organica.
Sua mori ia causa lamenta en Italia, do on regarda el como un de la juores atacante la plu bon en la istoria de la pais. El ia fa 20 goles en 48 apares per la ecipo nasional italian, incluinte ses a la gania de la Copa de Mundo en 1982.
A nivel local, el ia fa multe goles per la ecipos Vicenza e Juventus, con ci el ia vinse en la liga Serie A a du veses.
Vicenza ia es do miles de lamentores ia asembla per dise adio a Rossi a saturdi. Sua caxon ia es portada a la catedral Santa Maria Annunciata par sua coecipores de la Copa Mundal de 1982.
Ante la funera, la caxon ia reposa a la Stadion Romeo Menti en Vicenza, do suportores ia pone flores e ia fa sua respetas.
Entretempo, la juores a maxes de futbal en Italia ier ia porta sinturetas negra per onora la memoria de Rossi. On ia reali un minuto de silentia ante comensa la juas. Un foto de Rossi ia es projetada a scermos grande con la parolas "Eroes mori nunca" e "Txau, Paolo".
@T Un eglesor ortodox rusce e criminor pasada es despretida
@L aora_oji/2020/un_eglesor_ortodox_rusce_e_criminor_pasada_es_despretida
====== Un eglesor ortodox rusce e criminor pasada es despretida ======
4 julio 2020
Un corte de la eglesa ortodox rusce ia despreti un eglesor ci nega la coronavirus, pos cuando el ia saisi la controla de un monceria fema.
Padre Sergi, de ci sua nom vera es Nicolai Romanov, ia prende controla de la monceria Sredneuralsc, prosima a Iecaterinburg en la Urales, a 16 junio. El ia pone gardores armada ala. La corte ia judi ce el ia rompe regulas moncal.
Sergi ia condena la clui de eglesas en la restrinjes per coronavirus. El ia nomi la crise "un pseudopandemica" e ia maldise los ci ia comanda la sesa de servis eglesal per razonas de sania.
On ia reporta maltratas de enfantes a la monceria su la gida de Sergi, e la corte de la eglesa ia recomenda un investiga completa de la alegas par la autoriosas rusce. La eglesa fa ance sua propre investiga.
Persones ci ia es a la monceria en la dudes anios pasada ia descrive un normalia de violentia fisical e psicolojial contra enfantes ala. Enfantes ia es colpada o bateda per eras minor.
Un puni ia es donada, per esemplo, si un xica ia desapone sua tela de testa en tira un saco de patatas en la temprana de matina, o si un enfante ia core tra la bosce a la vila per oteni xocolada. On alega ce alga de la monces ia regarda la dona de bates como un taxe normal.
Sergi ia dise ce la autoriosas eglesal "va debe ataca la monceria" si los vole ce el parti. La eglesor controversa ia es proibida de predica en april. El ia refusa es presente a la sesiones de corte.
El ia aida fundi la monceria Sredneuralsc en la temprana de la desenio de 2000, e sentos de suportores ia vade ala tra la anios per oia sua sermones. Un polisior pasada, Sergi ia spende 13 anios en un colonia de prison per omiside e fura. El ia es librida en la tarda de la anios 1990.
Sua nom vera, Nicolai Romanov, es la mesma como lo de Tsar Nicolai 2, la monarca final de Rusia, ci el amira. On crede ce, pos es matada en 1918, la imperor e sua familia ia es enterada estra Iecaterinburg, prosima a Sredneuralsc, e Sergi es videda como un gidor de la promove ombrin de "adorores de tsar" en la eglesa.
El ia fa multe declaras controversa en la pasada, incluinte sujesta ce la Anticristo va apare pos corta en Rusia. El ia oposa leges contra violentia familial e sermones antisemita.
Par causa de la pandemica continuante, Rusia ia clui eglesas a adorores a 13 april, e ia reabri los sola en junio.
@T Un enrola par Mao Zedong es furada e taliada
@L aora_oji/2020/un_enrola_par_mao_zedong_es_furada_e_taliada
====== Un enrola par Mao Zedong es furada e taliada ======
8 otobre 2020
Un enrola caligrafial xines furada, con valua de miliones, ia es trovada en Hongkong, ma taliada a du pesos.
Furores ia saisi la enrola par Mao Zedong de la casa de un colior de arte en la mense pasada. A pos, los ia vende lo per un frato de sua valua vera.
La polisia de Hongkong ia dise ce lo ia es taliada car, con 2,8 metres de longia, on ia suposa ce lo es tro grande per esibi. La posesor orijinal dise ce la valua de la obra es "serta afetada".
La enrola conteni strofes de poesias scriveda par mano par la fundor de la Republica Poplal Xina, e sua posesor estima ce sua valua es sirca $300 milion.
Lo ia es prendeda en un fura grande a 10 setembre, cuando tre omes ia efrata la casa de Fu Chunxiao, un colior bon conoseda de selos postal e arte revolual.
Los ia fura ance alga selos postal antica, monetas de cupre, e otra obras de caligrafia par Mao. La saisi intera ia ave la valua de sinco mil milion dolares hongkong (645 milion dolares esuan) longo Fu, ci ia es sur Xina continental cuando la crimin ia aveni.
La furores ia vende un de la obras per mera 500 dolares hongkong a un otra colior de arte, sur cual on reporta ce el ia crede ce la arte es falsida. Pos vide un apela publica par la polisia, esta compror ia presenta se con ambos pesos de la enrola a 22 setembre.
Lo es nonclar esce el o la furores ia talia lo, ma la polisia ia aresta la compror, ci ave 49 anios, acusante el de reseta propria furada. El es aora libre su garantia.
Un de la efratores suspetada ia es ance arestada, ma la otra du furores resta estra catura.
@T Un ensende cisa criminal a la catedral de Nantes
@L aora_oji/2020/un_ensende_cisa_criminal_a_la_catedral_de_nantes
====== Un ensende cisa criminal a la catedral de Nantes ======
19 julio 2020
En Frans, on crede ce un focon a la catedral en la site Nantes ia es inisiada con intende. Tre focones ia aveni en la construida e on investiga los como ensendes criminal.
La flamas ia destrui fenetras colorida e la organo grande en la catedral de San Pedro e San Paulo, cual on ia construi tra plu ca 450 anios, comensante en la media de la sentenio 15.
Esta aveni a un anio pos un focon grave a la catedral Notre-Dame de Paris. Ma la pompor xef local, Laurent Ferlay, ia dise ce sua ecipos ia limita plu la flamas en Nantes, e ce la teto no ia es tocada.
"La dana es consentrada a la organo, cual pare es completa destruida," el ia comenta. "La plataforma sur cual lo es situada es multe nonstable e risca colasa."
La focon ia ensende en la temprana de la matina ier, con flamas jigante vidable de estra la construida. Plu ca sento pompores ia susede controla lo pos alga oras.
Esta no es la focon prima en esta catedral. Lo ia es danada par bombis Aliada en 1944 en la Gera Mundal Du, e en 1972 la plu de sua teto ia es destruida. Pos 13 anios, on ia reconstrui lo con un strutur de beton en loca de la teto de lenio.
En 2015, un focon grande ia destrui un parte de la basilica de San Donatian en Nantes, cual ia es construida en la sentenio 19.
@T Un esplode enorme a la porto de Beirut
@L aora_oji/2020/un_esplode_enorme_a_la_porto_de_beirut
====== Un esplode enorme a la porto de Beirut ======
5 agosto 2020
Lubnan lamenta pos un esplode jigante ier en la capital, Beirut, cual ia mata a la min 100 persones e ia feri plu ca 4000 otras.
La site intera ia es secuteda par la pum, cual ia comensa con un focon a la porto e ia esplode per crea un nube xampinionin.
Presidente Michel Aoun ia dise ce 2750 tones de nitrato de amonio ia es nonsecur conservada en un beneria tra ses anios. El ia ajendi un consenta urjente de sua consilio per oji e ia dise ce on debe declara un state de crise per du semanas.
La pais va oserva un periodo ofisial de lamenta per tre dias de oji.
Aoun ia anunsia ance ce la governa va relasa 100 mil milion liras (66 milion dolares esuan) de reservas de crise.
"Lo cual nos vide es un desastre enorme," la Crus Roja lubnani ia comenta. "On ave vitimes e mores a tota locas. Plu ca sento ia perde sua vives. Nosa ecipos fa ancora operas de xerca e salva en la locas ensircante."
Ofisiores ia dise ce on ia inisia un investiga per trova la causa esata de la esplode. La Consilio Suprema de Defende de la pais ia dise ce la persones culpable va fasa "la puni masima" posible.
On reporta ce la nitrato de amonio ia es descargada de un barcon confiscada a la porto en 2013, e ia es tenida en un beneria ala.
La esplode ia aveni a un tempo delicata per Lubnan, con un crise economial cual reensende divides vea an cuando la pais batalia la problem de la coronavirus.
La tensa es ance alta ante la revela a venerdi de la judi en un litiga sur la mata de Rafik Hariri, ministro xef pasada, en 2005.
@T Un esplode matante a un clinica irani
@L aora_oji/2020/un_esplode_matante_a_un_clinica_irani
====== Un esplode matante a un clinica irani ======
1 julio 2020
A la min 19 persones ia es matada en un esplode ier a un clinica en Tehran, la capital de Iran. Alga otra persones ia es ferida a la clinica Sina Athar, e on teme ce la cuantia de persones mor va crese plu.
La jornales governal de Iran ia sita ofisiores major ci ia dise ce la esplode ia es causada par un gotea de gas.
Imajes televisada ia mostra plumones de fuma inflante en la sielo. Pompores ia estingui la focon pos alga oras.
La autoriosas dise ce la plu de la vitimes ia es femes. Alga de los "ia es a niveles alta, en salas de sirurjia" e "ia es o pasientes su opera o persones acompaniante los." Los ia mori par la caldia e fuma densa, ma la pompores ia salva dudes persones.
La clinica, cual fa sirurjia lejera e imaji medical, ia conteni 25 empleadas a la tempo de la esplode.
Esta aveni segue a mera alga dias pos un esplode grande prosima a un compleso militar en Tehran. La causa de acel ia es ance declarada como un gotea de gas.
@T Un focon a un beneria espaniol ocupada par migrores
@L aora_oji/2020/un_focon_a_un_beneria_espaniol_ocupada_par_migrores
====== Un focon a un beneria espaniol ocupada par migrores ======
11 desembre 2020
En Espania, un focon ia engoli un beneria abandonada en Badalona, un suburbe a norde-este de Barcelona. Lo ia es ocupada par multe deses de persones.
A la min tre ia es matada e plu ca 20 ia es ferida. On ia estingui la flamas, ma la construida de tre niveles es aora nonstable.
Plu ca 30 persones ia es salvada de la teto, de cual alga survivores ia salta per evade la arde. Multe de la ocupores ia es migrores, ci ia lasa ala sua posesedas.
On no sabe la causa de la focon, cual ia comensa sirca 21:00 a mercurdi, ma alga survivores ia dise ce lo ia es ensendeda par un candela.
On trata sete persones en ospital per feris grave, e a la min 12 otras ave feris minor.
Mamadou Dieye, un om senegales, ia dise ce el ia es "a zero sentimetres de mori" sur la nivel prima, ma ia susede rompe un fenetra e desende un scala de crise. La fuma ia es sofocante el e la sore de un ami, sur ci on teme aora ce el ia mori.
Plu ca sento migrores de Senegal, Gana, Camerun e Nijeria ia abita la construida, con multe posesedas flamable, como materases e muretas de lenio.
La survivores es aora en un beneria visina, traumada par la esperia e cexante ce los ia perde la poca cosas cual los ia ave, incluinte documentos esensal.
La pompores ia dise ce on ave un risca ce la construida va colasa, donce la ecipos ia prosede multe cauta tra la detrito.
La maior ia comenta ce ocupores ia usa la beneria abandonada tra minima sete anios. El ia ajunta ce la survivores va reseta abitas tempora, ma la governa catalan va debe envolve se, "car en multe casos nos discute persones de state nonormal".
@T Un fujor de Corea Norde es un parlamentor en la Sude
@L aora_oji/2020/un_fujor_de_corea_norde_es_un_parlamentor_en_la_sude
====== Un fujor de Corea Norde es un parlamentor en la Sude ======
16 april 2020
Thae Yong-ho ia deveni la fujor prima de Corea Norde ci gania un seja de parlamento en Corea Sude.
A un ves pasada, el ia es la visambasador per Corea Norde a la Rena Unida, ma en 2016 el ia abandona la pais con sua familia, deveninte la ofisior la plu alta de Corea Norde ci ia fa esta.
El ia ofre se como la aspiror xef de la Partito Futur Unida, un grupo oposante, en Gangnam, un distrito rica de Seoul. El ia vinse par 58,4% e ia plora vidable pos la anunsia de sua susede.
Ante sua vinse, el ia dise ce el espera ce sua campania va envia un mesaje a la elites de Corea Norde sur la cambias posible si los ta turna sua dorso contra la governa ala.
Corea Sude ia fa sua elejes parlamental ier, con un partisipa recordo de 66,2%, an a media de la crise de coronavirus. La Partito Democrata de Presidente Moon Jae-in ia vinse forte, prendente 163 de la 300 sejas en la Asembla Nasional.
Thae ia fuji a la Sude en agosto de 2016, disente ce el ia deveni sempre plu consensa de la "realias macabre" de vive en Corea Norde. Parlante a un comite parlamental de Corea Sude, el ia dise ce coreanes norde vive en un state egal a sclavia.
Pos sua parti, Corea Norde ia descrive el como "melma umana". La jornales governal de la Norde ia dise ce la ambasador es acusada de esposa secretas, froda finansial e viole de enfantes.
Sirca mil persones fuji de Corea Norde en cada anio, evadente un governa represante cual ia fasa multe acusas de maltratas contra diretos umana.
Thae ia presenta un figur colorosa en sua campania political. El ia rapi en sua canta campaniante, portante un xapeta ros de basebal, e ia cambia sua nom a Ku-min, cual sinifia "salva la popla".
@T Un fusilor desemblada como un polisior mata acaso en Canada
@L aora_oji/2020/un_fusilor_desemblada_como_un_polisior_mata_acaso_en_canada
====== Un fusilor desemblada como un polisior mata acaso en Canada ======
20 april 2020
En Canada, un fusilor desemblada como un polisior ia mata a la min 16 persones, incluinte un polisior fema, en lo cual on descrive como la spara coletiva la plu grave en la istoria de la pais.
La ataca ia dura tra 12 oras ier, fininte en un xasa de autos. La suspetada ia xuta a persones acaso en locas diversa en la provinse Scotia Nova. El ia es matada en un fronti contra la polisia.
On ia reporta ce el ia transporta se en lo cual ia aspeta como un auto de polisia. Pos la comensa de la ataca, on ia avisa ce persones local debe securi se en sua casas en Portapique, un vila campanial.
Oji, autoriosas atenta ancora determina la cuantia final de persones mor. Los ia averti ce on ave cisa plu vitimes ancora no trovada.
Entre la matadas ia es Heidi Stevenson, ci ia servi en la Polisia Real Montante de Canada tra 23 anios.
Un comisionor de polisia ia dise ce el crede ce la fusilor ia ave un "motiva" inisial cual ia "cambia a condui acaso". La ministro xef, Justin Trudeau, ia descrive esta como "un situa xocante" e Stephen McNeil, ministro xef de Scotia Nova, ia comenta: "Esta es un de la atas de viole la plu nonrazonante en la istoria de nosa provinse."
Tuitas par la polisia ia identifia la atacor alegada como Gabriel Wortman, un om de 51 anios. El no ia es empleada par la polisia.
Sparas coletiva es relativa rara en Canada, do la leges de posese fusiles es plu sever ca en la Statos Unida, la pais visina.
@T Un isola flotante rompe la eletrica en Uganda
@L aora_oji/2020/un_isola_flotante_rompe_la_eletrica_en_uganda
====== Un isola flotante rompe la eletrica en Uganda ======
15 april 2020
Un isola enorme flotante en Lago Victoria ia causa un rompe de eletrica tra tota Uganda pos bloci un turbina en un sentro idroeletrical. Un ofisior ia descrive la area de la isola como "cuasi du campos de futbal".
La problem ia retarda par un ora un difusa par Presidente Yoweri Museveni sur la crise de COVID-19.
Lago Victoria, cual es compartida par tre paises de Africa este, es invadeda ja tra desenios par jasinto de acua.
En un declara formal, la compania Eskom Uganda ia dise ce la masa jigante de plantas flotante ia sofoca la turbinas de Stasion Idroeletrical Nalubaale, causante disturbas vasta. Lo ia sujesta ce la "nivel presente levante de acua" es cisa perce la isola flotante ia move.
La acua en la lago ave aora 13,12 metres de profondia, cuasi ateninte la punto alta recordo de 13,46 metres videda en 1964. Normal, la profondia es entre sete e nove metres.
Pluves forte, blocis de la afluentes de la lago, e contamina es cisa ance fatores causante la move de la isola.
Eletrica ia es ultima restorada, ma laborores ia continua talia partes de la isola per sutrae lo de la macinas.
@T Un itiopian inisia un jornal semanal en braille
@L aora_oji/2020/un_itiopian_inisia_un_jornal_semanal_en_braille
====== Un itiopian inisia un jornal semanal en braille ======
23 setembre 2020
Un jornaliste joven en Itiopia ia produi e distribui la jornal prima de sua pais en braille, un sistem cual permete ce persones sieca leje par palpa puntos levada cual representa leteras.
Fiyori Tewolde ia labora per Addis Zemen ("Eda Nova"), un jornal governal controlada, cuando el ia deside redirije sua fortia a furni un servi per lejores sieca.
El ia comenta: "On ave sirca cuatro milion itiopianes con un noncapasia de vide, e me ia nota ce los no pote asede informas. E los no es consensa de la cosas como anunsias de postos vacua cual on publici en jornales primida."
Sua jornal abrinte vias, nomida Fetil ("Filo" en la lingua amarina), va apare a cada mercurdi e va trata temas sosial, economial e political. La articles es scriveda par jornalistes ci ofre sua tempo nonpaiada.
Fiyori ia dise ce la jornal va inclui ance reportas spesial investigante sur la defias frontida par persones con descapasias en Itiopia.
Copias de la numero prima de Fetil ia es donada a la Asosia Nasional Itiopian de Persones Sieca, ofisias governal e otra organizas.
"Cuando persones noncapas de vide vade a acel locas, nos vole ce los trova Fetil sur la tables de reseteria, entre otra jornales e revistas per leje," Fiyori ia esplica. El ia ajunta ce la reata asta aora es multe positiva, e persones reconose la valua de la servi.
On va vende la jornal nova sur la stradas de Addis Ababa, la capital, a custa de 30 birres ($0,82), cual es plu ca la duple de la custa de un jornal tipal. La custa es altida par la paper spesial sur cual la jornal debe es primida.
Fiyori espera reseta suporta de alga organizas carital per suveni la projeta, e desira ultima distribui la jornal sin custa a persones sieca.
En Itiopia, persones con descapasias, incluinte los con descapasia vidal, encontra comun discriminas en la mercato de emplea. En resulta, los esperia difisiles finansial.
@T Un jeneral major pasada critica la condui de Trump
@L aora_oji/2020/un_jeneral_major_pasada_critica_la_condui_de_trump
====== Un jeneral major pasada critica la condui de Trump ======
5 junio 2020
Un plu xef militar pasada ia denunsia la menasa par presidente Donald Trump de usa soldatos per supresa la protestas cual continua en la Statos Unida de America.
Jeneral Martin Dempsey ia dise ce la comentas par Trump es "multe turbante" e "perilosa". Ance la ministros de defende presente e pasada de Trump ia critica la presidente.
A lundi, Trump ia menasa envia la militar per "solve rapida" la situa si la statos individua fali responde.
Protestas, tipal pasosa, ia sperde tra la SUA pos la mori de afroamerican George Floyd cuando arestada par la polisia en maio. La protestas pare calmi aora en la capital de la pais, ma on ia estende la perimetre de securia sirca la Casa Blanca en dias resente.
"La idea ce la presidente va controla la situa par usa la militar ia turba me," Dempsey ia dise ier, en un comenta publica rara. "La idea ce la militar va es clamada per domina e supresa lo cual, per la plu, es protestas pasosa -- me reconose ce alga oportunistes ia ajunta violentia -- e ce la militar en alga modo va veni per calmi acel situa ia pare multe perilosa a me."
Dempsey ia servi como la ofisior militar xef su presidente Barack Obama de 2011 a 2015.
Sua critica ia veni a la dia pos cuando Jeneral Maral Jim Mattis, la ministro pasada de defende, ia denunsia la presidente, disente: "Donald Trump es la presidente prima en mea vive ci no atenta uni la popla esuan -- an no finje atenta. En loca, el atenta divide nos."
Trump ia dise a lundi ce el va ata per desgrupi protestores violente. En cuando el ia parla, autoriosas ia usa forsa per desgrupi un protesta prosima e jeneral pasosa, per permete ce la presidente pasea a un eglesa istorial cual ia es danada par foco en la tumultas, per es fotografida con un biblia en sua mano.
@T Un jornaliste entra a un confere privata de la UE
@L aora_oji/2020/un_jornaliste_entra_a_un_confere_privata_de_la_ue
====== Un jornaliste entra a un confere privata de la UE ======
22 novembre 2020
Un jornaliste nederlandes ia susede entra noninvitada a un confere video privata entre ministros de defende de la Uni European.
Daniel Verlaan, de la canal RTL Nieuws, ia junta se a la consenta pos cuando un de la ministros ia tuita un foto conteninte alga detalias identifiante.
La reportor ia es vidable surprendeda e ia comensa saluta con mano cuando el ia descovre ce el ia susede entra.
"Tu sabe ce tu ia salta a en un confere secreta?" Josep Borrell ia dise. El es la xef de politica esterna en la Uni.
Verlaan ia responde: "Si, si. Pardona me. Me es un jornaliste de Nederland. Pardona ce me ia interompe tua confere. Me va parti de asi." La ministros ia rie.
"Tu sabe ce lo es un ofende criminal, no?" Borrell ia comenta. "Tu debe dejunta rapida ante la ariva de la polisia."
Verlaan ia pote asede la confere car Ank Bijleveld, la ministro nederlandes de defende, ia posta un foto a Twitter cual ia conteni la adirije e la plu de la numero privata per entra.
"Pos alga atentas, RTL Nieuws ia susede divina la numero privata de la consulta secreta, car sinco de la ses dijitos de la codigo ia es vidable en la foto," la canal ia esplica.
Car multe persones regarda la aveni como divertinte, lo leva demandas seria sur la securia de conferes privata de la Uni European.
Lo ia causa ce on abandona la confere, e un portavose per la Consilio de Relata Stranjer de la UE ia dise a la canal: "Un tal penetra es nonlegal e va es reportada a la autoriosas."
Un portavose per la ministreria de defende nederlandes ia dise ce la tuita de la detalias identifiante ia es un "era stupida". "Esta mostra ce on debe es tan cauta cuando on envia un imaje de un consenta," el ia ajunta.
@T Un lege nova controversa de securia per Hongkong
@L aora_oji/2020/un_lege_nova_controversa_de_securia_per_hongkong
====== Un lege nova controversa de securia per Hongkong ======
22 maio 2020
La Partito Comuniste governante en Xina ia inisia un lege controversa de securia nasional per Hongkong, en un cambia regardada como un colpa major contra la librias de la site.
Esta lege, cual proibi "tradi, desalia, rebela e suverti", va sircoveni cisa la legores de Hongkong. Oposores dise ce Xina rompe sua promete de permete a Hongkong alga librias cual no esiste en otra partes de Xina.
Lo es probable ce la projeta va aumenta la coleria en la popla e lo risca causa an protestas e esijes nova per reformi democrata.
La projeta legal ia es presentada a la Congresa Nasional de la Popla, cual es ancora la aveni political la plu importante de la anio en Xina, an si lo fa poca plu ca aseta automata la desides ja fada par la xefes.
On ia intende sempre ce Hongkong introdui tal leges pos sua transfere a governa xines en 1997. Pos la onda de protesta sustada e violente en la anio pasada, Beijing atenta aora reali los.
La governa en Beijing crede ce lo debe usa "metodos legal fundida e fortiosa" per "preveni, para e puni" tal protestas en la futur.
La lege proposada conteni un introdui e sete articles, de cual Article 4 es la plu controversa. Lo dise ce Hongkong "debe boni" sua securia nasional, ante ajunta: "Cuando nesesada, organos pertinente de securia nasional de la Governa Sentral de la Popla va institui ajenterias en Hongkong per reali debes pertinente per proteje la securia nasional seguente la lege."
@T Un lege proposada per reformi la polisia esuan
@L aora_oji/2020/un_lege_proposada_per_reformi_la_polisia_esuan
====== Un lege proposada per reformi la polisia esuan ======
9 junio 2020
Democratas en la parlamento de la SUA ia proposa un lege major per reformi la polisia de la pais, pos semanas de protestas contra cruelia e razisme polisial. La lege ta fasili litiga polisiores per malcondui, e ta fronti razisme.
Esta ia aveni en cuando legores en Minneapolis ia promete desbandi la polisia de la site. La mori de George Floyd par la atas de un ofisior de pel blanca ia crea un presa nasional per cambia.
An tal, lo es nonclar esce la republicistes, ci controla la Salon Alta, va suporta la lege proposada, nomida la Lege de 2020 per Justia en Polisi. Presidente Donald Trump ia tuita ce "la Democratas Revoluinte Sinistra vole Desfinansia e Abandona nosa Polisia. Pardona, me vole LEGE E ORDINA!"
La frate de Floyd va atesta a la Salon Basa, plu tarda en esta semana, en un escuta sur reformi la polisia.
Proposante la lege ier, Nancy Pelosi, presidente de la Salon Basa, ia leje la nomes de omes e femes de pel negra ci ia mori par la atas de la polisia en anios resente.
La lege ta obliga ce la polisia federal usa cameras de corpo e auto, ta proibi la teni strangulante de persones, ta elimina invades nonanunsiada par la polisia, ta fasili ce on litiga la polisia per violes de diretos sivil, e ta recomenda ce on reteni la finansia federal de fortes de polisia local ci no fa reformis simil.
Plu, la lege ta fa ce linxas deveni crimines federal, ta limita la vende de armas militar a la polisia, e ta dona a la Departe de Justia la autoria per investiga la polisia de stato o plu local per indicas de prejudi o malcondui vasta. Lo ta crea ance un arcivo nasional de malcondui polisial -- un banco de datos sur cexas contra la polisia.
Alga xefes republiciste ia dise ce los va considera la posible de proposa sua propre lege, con un escuta projetada per la semana seguente par la comite judinte en la Senato. Ma la membros de la partito de Trump esita jeneral siniali sua suporta per tal leges.
Rompente de sua partito, Mitt Romney, senator republiciste, ia tuita imajes de se en un prosegue en dirije a la Casa Blanca con protestores cristian a soldi, con la testo "Vives Negra Importa".
@T Un libro de aprende lia la CIA a la atacas de 11 setembre
@L aora_oji/2020/un_libro_de_aprende_lia_la_cia_a_la_atacas_de_11_setembre
====== Un libro de aprende lia la CIA a la atacas de 11 setembre ======
22 janero 2020
Un publicor franses ia demanda per pardona pos la apare en semanas resente de un libro de aprende cual sujesta ce la atacas de 11 setembre 2001 ia es probable "orcestrida par la CIA".
La presentia de esta teoria de conspira en la libro ia es inisial notada en redes sosial par un grupo de enseniores.
La libro Istoria de la sentenio 20 en cartas de aprende es intendeda per studiantes pregraduada. En sua loca de rede, la publicor ia dise: "Esta frase, cual repete teorias de conspira con no funda de fatos ia debe nunca es usada en esta obra. Lo no refleta la opina editoral de o Ellipses [la publicor] o la autor."
La libro es descriveda como un curso completa sur la sentenio pasada en la istoria de Frans, Europa e la mundo. Lo ia es scriveda par Jean-Pierre Rocher, un ensenior de istoria e jeografia e un graduada de la Instituida de Studias Political de Paris.
An si la libro ia es publicida en novembre, sola cuando la fia de un ensenior ia compra un copia, on ia descovre la refere a la CIA.
A la paje 204, la autor esplica la contesto de la crea de la grupo jihadiste al-Qaida e la "ataca teroriste cuatruple de 11 setembre 2001 contra New York e Washington". El dise alora: "Esta aveni global -- sin duta orcestrida par la CIA (ajenteria secreta) per forsa la influe esuan a Asia sude-ueste? -- ia colpa la simboles de potia esuan sur sua propre teritorio."
La ensenior ia espresa direta sua consernas en un grupo Facebook per enseniores, per ci un portavose ia dise: "Esta frase ajuntada espresa un teoria de conspira cual on pote oia en nosa salas de clase, de la bocas de alga aprendores; ma ce on trova lo scriveda par un ensenior e en un publici de esta tipo es nonasetable."
A plu ca 18 anios pos cuando 19 jihadistes ia saisi aviones per cade los a la Sentro Mundal de Comersia, la Pentagon e un campo en Pennsylvania, matante cuasi 3000 persones, un om descriveda como la arcitetor de la atacas va apare en un corte militar de la SUA en esta semana.
Khalid Sheikh Mohammed es tenida a Baia Guantanamo e ia es un aliada prosima de Osama bin Laden.
La publicor Ellipses ia dise ce la autor de la libro desira sutrae la frase ajuntada, e ce lo presenta un coreti enlinia e en tota copias ancora no enviada a botecas.
En un declara formal, lo ia comenta ce opinas pote "es libre espresada en nosa libros, natural, ma on pote en no situa presenta un fato noncoreta o nonfundida como un vera empirical".
@T Un madre restrinje sua fio en un aparte tra desenios
@L aora_oji/2020/un_madre_restrinje_sua_fio_en_un_aparte_tra_desenios
====== Un madre restrinje sua fio en un aparte tra desenios ======
2 desembre 2020
En Sveria, la polisia ia aresta un fem vea suspetada de restrinje sua fio tra asta tre desenios a sua aparte en un suburbe de Stockholm.
El ia nega un acusa de prisoni falsa e feri grave, pos cuando on ia trova la fio, con sirca 40 anios, ferida e vivente en miseria. La fio ia es descovreda par sua sore a soldi, cuando la fem ia maladi e ia es ospitalida. La fio reseta aora sirurjia en ospital per sua feris.
La polisia ia isoli la aparte en Haninge, un suburbe a sude de la capital, per fa sua investiga. Los xerca atestores per atenta comprende lo cual ia aveni.
On previde ce la fem, ci ave 70 anios, va resta arestada en cuando la investiga prosede. Si on trova ce el es culpable de prisoni falsa, el va spende asta des anios en prison.
La sore ia visita la aparte con sua acompanior en la sera de soldi pos oia ce la madre es en ospital. El ia parti de la aparte ja cuando el ia es adolesente e ia vide nunca sua frate a pos. Como enfante, el ia atenta futil atrae atende a la state de la enfante, ci ia es estraeda de scola con sola 11 o 12 anios.
Pos abri la porte nonclavida, el ia trova ce la aparte es oscur e odorinte de urina, putri, susia e polvo. No responde ia veni cuando el ia cria "alo", donce el ia entra entre cumulas desordinada.
Oiante un sona de la cosina, el ia vide la om sentante en un angulo oscur, luminada par un lampa de strada esterna. Ulseras ia covre sua gamas asta la jenos.
Cuando la fio ia vide sua sore, el ia sta e ia xuxa sua nom a multe veses. El ia perde ja cuasi tota sua dentes e sua vose ia es farfuliante, ma en alga modo el ia reconose sua sore pos tota la tempo pasada e no ia teme el.
Cuando la om ia es prendeda a ospital, dotores ia avisa la polisia e la madre ia es detenida.
La sore ia dise ce la madre ia senti mal pos perde un enfante plu temprana a eda joven. Cuando el ia pari denova, el ia dona la mesma nom a sua fio nova. El ia desira reave sua fio mor e ia deveni tro protejente.
"Me es sola grasiosa ce el reseta aida e va survive," la sore ia dise.
@T Un maladia misteriosa traversa un vila barati
@L aora_oji/2020/un_maladia_misteriosa_traversa_un_vila_barati
====== Un maladia misteriosa traversa un vila barati ======
7 desembre 2020
En la stato Andhra Pradesh en Barat sude, 227 persones ia es ospitalida par un maladia nonidentifiada, e un person a la min ia mori. La pasientes ave sintomes diversa, incluinte nausea, convulsa e desmaia.
Ofisiores investiga ancora la causa de la maladia, cual ia traversa la vila Eluru en la finisemana.
Esta aveni a un tempo cuando Barat continua batalia la pandemica de coronavirus, con casos en cuantia du de la plu altas de mundo. Andhra Pradesh ia es un de la statos la plu afetada. Con plu ca 800 mil casos, lo ave la cuantia tre la plu alta en la pais.
Ma covid no pare es la causa de la ospitalis en la fini de semana. La ministro per sania de la stato, Alla Kali Krishna Srinivas, ia dise ce tota la pasientes ia es negativa probada per la coronavirus.
Un mediciste a la Ospital Governal de Eluru ia comenta: "La persones ci ia deveni malada, spesial la enfantes, ia comensa subita vomiti pos sufri oios ardente. Alga de los ia desmaia o ia esperia atacas de convulsa."
Setedes persones es ja desospitalida, e 157 otras es ancora tratada.
Jaganmohan Reddy, ministro xef de la stato, ia dise ce on envia ecipos spesial de medicistes per investiga la causa de la maladia. On previde ance ce Reddy va vade a la vila per encontra la pasientes e sua familias.
Srinivas ia dise ce samples de sangue de la pasientes no indica un infeta virusal. "Nos ia elimina contamina de acua o aira como la causa pos cuando ofisiores ia visita la partes do persones ia maladi. Lo es alga maladia misteriosa, e sola un analise de sienseria va revela lo cual lo es."
La Partito de la Tera Telugu ia recomenda ce on investiga la aveni, insistente ce lo ia es causada par contamina.
@T Un malversa grande de petrolio en Rusia artica
@L aora_oji/2020/un_malversa_grande_de_petrolio_en_rusia_artica
====== Un malversa grande de petrolio en Rusia artica ======
4 junio 2020
Vladimir Putin, presidente de Rusia, ia declara un state de crise pos la malversa de 20 mil tones de petrolio en un rio en la Sirculo Artica.
La asidente ia aveni cuando un tance de carburante a un sentro eletrical ia colasa, a venerdi pasada, prosima a Norilsk, un site en Sibir. Putin ia espresa coleria pos descovre ce ofisiores no ia es informada sur la asidente asta du dias plu tarda.
La compleso es poseseda par un sucompania de Nornickel, la produor major de nicel e paladio en la mundo. En un confere video televisada ier, Putin ia critica la xef de la compania sur la rapidia de sua responde.
"Perce departes governal ia descovre esta sola a du dias pos la aveni?" el ia demanda a Sergei Lipin, la xef. "Esce nos va es informada sur situas de crise par la redes sosial?"
Plu temprana, la governor de la rejion, Alexander Uss, ia dise a Putin ce el ia deveni consensa sur la malversa de petrolio a soldi, cuando "informa alarmante ia apare en redes sosial".
Putin ia comanda un investiga de la asidente, e un manejor a la sentro eletrical ia es detenida pos acel. En un declara formal, Nornickel ia dise ce la aveni ia es reportada en un modo "puntual e conveninte".
La asidente ia aveni cuando la colonas suportante un tance a la compleso ia comensa afonda. La colonas sta sur permajelada, cual fonde con ce la clima caldi.
La petrolio malversada ia vaga asta 12 cilometres de la loca de la asidente, donante un color carmesi a estendes longa de la rio Ambarnaia. Par la state de crise, plu persones va vade a la rejion per aida la taxe de limpi.
On crede ce esta asidente es la numero du de la plu grandes par volum en la istoria moderna de Rusia. Lo ia contamina un area de 350 cilometres cuadrida, provocante avertis sombre de ambientistes, ci dise ce la limpi va es complicada par la vastia de la malversa e la jeografia de la rio.
Esta no es la ves prima cuando Nornickel es envolveda en un malversa de petrolio. En 2016, lo ia confesa ce un asidente a un de sua complesos ia causa la roji de un rio prosima.
@T Un malversa grave de petrolio en Mauris
@L aora_oji/2020/un_malversa_grave_de_petrolio_en_mauris
====== Un malversa grave de petrolio en Mauris ======
10 agosto 2020
En Mauris, bonvolores freta per crea cordis per distanti de sua isola la petrolio cual gotea de un barcon.
La MV Wakashio ia encalia a 25 julio sur un resife de coral prosima a esta isola en la Mar Indian. On crede ce lo ia porta 4000 tones de petrolio carburante.
Abitores local crea paradores de palia en sacos de stofa per atenta conteni e asorbe la sustantia. Otras ia prepara tubos simil, usante calsones plenida con capeles, e algas ia aida limpi la plaias. Los ata contra un comanda par la governa ce on lasa la prosede a la autoriosas local.
Mauris ave resifes famosa de coral, e turisme es un parte esensal de sua economia.
La compania cual opera la barcon ia dise ce lo ia atenta pone sua propre bomas conteninte sirca la veculo, ma no ia susede, par causa de la mar turbosa. Elicotores atenta aora move alga de la carburante a via.
A la min 1000 tones de petrolio ia gotea a en la acua sirca Mauris. Ambientistes es ansiosa sur la efeto a la ecosistem de la pais.
La barcon ia encalia a Pointe d'Esny, un conserveria per viventes savaje rara. La rejion ave ance pantanes reconoseda como de importa internasional.
Un portavose per Greenpeace Africa ia averti ce "miles" de spesies animal es "en peril de afoca en un mar de contamina, con efetos grave per la economia, securia de comedas e sania de Mauris".
A un confere jornaliste, la vispresidente de la compania de la barcon ia demanda abundante per pardona per la malversa e "la disturba grande cual nos ia causa". El ia promete ce sua compania, Mitsui OSK Lines, va fa "tota en sua potia per solve la problem".
A venerdi, Pravind Jugnauth, ministro xef de Mauris, ia declara un state de crise e ia apela per aida. Frans ia envia un avion militar de sua isola prosima Réunion, portante aparatos contra contamina.
Ier, Japan ia anunsia ce lo va envia un ecipo de ses persones per aida ance. Ma on teme ce un mal clima va complica plu la labora de impedi la petrolio.
@T Un materia sponjin pote teni idrojen en veculos nova
@L aora_oji/2020/un_materia_sponjin_pote_teni_idrojen_en_veculos_nova
====== Un materia sponjin pote teni idrojen en veculos nova ======
18 april 2020
Un materia nova developada par siensistes pote aida notable un jenera nova de autos propulsada par idrojen.
Como un sponja, la produida es capas de teni e relasa cuantias grande de la gas, a presa e custa plu basa. Composada de multe miliones de pores pico, un gram de la materia nova, con funda de aluminio, ave un area surfasal tan grande como un campo de futbal.
La developores dise ce lo pote reteni la cuantia grande de gas cual on ta nesesa per viaja pratical sin tances custosa.
A lado de developa veculos eletrical, on ia foca multe a idrojen como un fonte noncarbonosa de propulsa per autos. Ma idrojen es estrema lejera. En la presa normal de aira, per porta un cilogram de idrojen cual ta propulsa la auto per plu ca 100 cilometres, on ta nesesa un tance con volum de sirca 11 000 litres.
Per solve esta problem, la gas es tenida a presa alta, permetente ce un auto porta 4 o 5 cilogrames de idrojen e viaja asta 500 cilometres ante nesesa ce on repleni lo. Acel presa es a sirca 300 veses plu alta ca en la numaticos de un auto, e esije la usa de un tance spesial cual leva la custa de la veculo.
Rexercores crede ce los ia developa un metodo de teni volumes grande de idrojen a un presa multe min alta.
Los ia construi un materia nova de moleculas organica e iones metal cual asembla se per formi strutures estrema cristal e porosa. On usa presa per teni e relasa la moleculas de gas.
La rexercores ia gania esperia de developa tal materias adsorbente per la Departe de Defende de la SUA, per proteje soldatos contra atacas de gas nerval. On ave aora finansia sufisinte per developa la materia per usas en transporta.
@T Un monolito misteriosa en la deserto de Utah
@L aora_oji/2020/un_monolito_misteriosa_en_la_deserto_de_utah
====== Un monolito misteriosa en la deserto de Utah ======
27 novembre 2020
A lundi, ofisiores en Utah, stato esuan, ia revela la descovre de un monolito strana de metal en la profonda de la deserto de roca roja. Los ia refusa indica la loca esata, esperante preveni ce aventurores atenta trova lo e deveni perdeda.
Ma ja ier, imajes ia apare en Instagram de persones a lado de la strutur, de cual sua presentia es ancora misteriosa. Los ia es aidada par los ci ia identifia rapida la monolito en Google Earth e ia posta la coordinadas.
Ofisiores statal per viventes savaje ia vide prima la ojeto a 18 novembre cuando los ia vola en elicotor supra esta tereno distante per conta oveas. Tim Slane, ci ia posta la coordinadas, ia dise ce el ia trasa la curso de la elicotor asta sua desapare de radar, indicante ce cisa lo ia atera.
Alora el ia scane la mapa per la cualias esata de la tereno videda en la fotos e videos ofisial de la monolito, ante trova un canion cual ia conteni un ombra distinguida longa e streta. On no vide la ombra en imajes de satelite de 2015, ma lo apare en otobre 2016 cuando lo pare ce arboretas visina ia es sutraeda.
Multe persones ia sujesta (bromante, per la plu) ce la strutur ia es erijeda par visitores estrateran, ma la teoria dominante es ce lo es un obra de arte consetal ancora nonreclamada.
Prima, espertas ia sujesta ce lo es un obra nonconoseda par John McCracken, un artiste minimiste ci ia mori en 2011, ci ia crea multe scultas de plances. Sua galeria ia confirma inisial esta, ma ia retira la dise a pos, espresante sua crede ce la strutur es un onora a el par un otra artiste.
On ia considera ance Petecia Le Fawnhawk, ci instala scultas totemin en locas secreta de deserto, e ci ia abita e labora en Utah en la pasada. Ma el ia dise ce an si el "ia ave la pensa de planta monumentos secreta en la deserto", el no pote reclama esta obra.
La Departe de Securia Publica per Utah ia dise ce lo no promove viajas a la monolito par causa de la periles posible, ma la area es tereno publica, donce lo no pote preveni persones ci vole visita lo. On ia fa no deside per desasembla lo.
@T Un motoriste desembla un sceleto como un pasajor
@L aora_oji/2020/un_motoriste_desembla_un_sceleto_como_un_pasajor
====== Un motoriste desembla un sceleto como un pasajor ======
26 janero 2020
En la Statos Unida, on ia catura un motoriste ci ia desembla un sceleto falsa como un pasajor per pote usa un banda de trafica per veculos de ocupa alta (VOA).
La Departe de Arizona per Securia Publica ia dise ce on ia para la om de 62 anios cuando un ofisior ia vide la sceleto, cual ia porta un xapo e ia es liada a la seja de pasajor con un corda jala. On ia multa la gidor.
La departe ia comenta ce, en cada anio, lo catura sirca 7000 motoristes en Arizona ci viole la regulas de la bandas VOA. En un posta a Twitter, lo ia averti otras contra atenta la mesma tatica.
"Tu pensa ce tu pote usa la banda VOA con Sceletor como pasajor? Un era de cranio!" lo ia scrive, referente a la arcenemi de la carater imajinal He-Man en la serie Mestres de la Universo.
Lo ia fini la posta con la grilidas "#BonAtenta" e "TuNoEsHeMan". La posta ia es acompaniada par un foto de la auto, mostrante la sceleto falsa con un xapo de camufla tirada a su per covre sua oios.
La om de Arizona no es la prima ci ia condui estrema per evita regulas cual preveni ce motoristes sin pasajores viaja longo bandas definida. En april de la anio pasada, on ia trova un om viajante en un banda VOA con un manicin ci ia porta un xapeta de basebal e un oculo de sol.
@T Un musica estrema lenta cambia sua nota
@L aora_oji/2020/un_musica_estrema_lenta_cambia_sua_nota
====== Un musica estrema lenta cambia sua nota ======
6 setembre 2020
Fanes ia asembla en un eglesa en Deutxland per oia un cambia de acorda en un obra musical cual dura tra 639 anios.
Esta es la cambia prima a la sona de Tan lenta como posible en sete anios. La obra par la composor vangarda John Cage es un de la musicas la plu longa e lenta en la mundo.
La peso ia comensa a 19 anios ante aora, con un pausa cual ia ocupa cuasi 18 menses. La cambia ier ia es fisical realida par introdui tubos nova a la organo spesial construida cual presenta la composa.
La Eglesa San Burchardi en la vila Halberstadt ia comensa jua la musica en 2001, e la cambia la plu resente de la combina de notas ia aveni en 2013. La espeta per la cambia veninte de acorda va es corta en compara, car lo va aveni a 5 febrero 2022.
La partitur conteni oto pajes de musica, per jua a un piano o organo -- e multe lenta. Cage no ia spesifa la lentia esata. Un presenta tipal dura entre 20 e 70 minutos, ma la presenta en Halberstadt no va fini asta la anio 2640.
Un organo de tubos bon mantenida ave un vive nonlimitada. On ia eleje un dura de 639 anios per onora la instala prima documentida de un organo permanente, en 1361 en la Catedral de Halberstadt, a la mesma cuantia de tempo ante 2000, cuando on ia intende orijinal comensa la presenta.
Car la strumento sona constante, un cubo de vitro acrilica ensirca lo per redui la volum.
Cage, ci ia parti de la mundo en 1992 con 79 anios, ia scrive la obra en la desenio de 1980. El es cisa plu bon conoseda per 4'33", cual conteni simple cuatro minutos e 33 secondos de silentia par sua musicistes, permetente ce, en loca, on oia cualce sonas ambiente cual aveni acaso.
@T Un nom nova per la vila canadian Asbestos
@L aora_oji/2020/un_nom_nova_per_la_vila_canadian_asbestos
====== Un nom nova per la vila canadian Asbestos ======
20 otobre 2020
Asbestos, un vila peti en Quebec, ia abandona esta nom derivada de sua erita minante. La vila canadian, do sete mil persones abita, ia vota per Val-des-Sources como la nom nova.
En pasada, la vila ia es la loca de la mina de asbesto la plu grande de mundo. On ia dona a lo la nom engles per la mineral, no la nom franses Amiante, en la tarda de la sentenio 19.
Ma la consilio local ia dise ce la mal conotas de la nom impedi sua capasia de atrae investis stranjer, e en novembre pasada ia anunsia ce lo xerca un nom nova.
La vila, a sirca 150 cilometres a este de Montréal, ia anunsia la nom ganiante en la sera ier. On ia eleje lo pos un consulta longa e un vota par la abitores, incluinte persones con sola 14 anios.
Sirca un dui de la abitores cualinte ia vota. Val-des-Sources ia vinse con pico plu ca 51% de votas en la ronda tre. La otra posibles ia es L'Azur-des-Cantons, Jeffrey-sur-le-Lac, Larochelle, Phénix, e Trois-Lacs, cual ia fini en loca du.
La maior ia comenta ce la nom elejeda es "supra tota, inspirante per la futur".
Asbestos no va cambia instante sua avisas de via. La maior ia sujesta ce la cambia formal legal no va aveni ante la fini de la anio. "Lo va es un bon donada de natal," el ia ajunta.
La vila ia flori tra plu ca un sentenio par la fabrica de asbesto blanca a sua escaveria, cual ia sesa opera en 2011.
Orijinal regardada como un mineral miraclosa, asbesto ia es usada en industrias de construi per forti semento, per isoli termal, per tetos, per securi contra foco, e per asorbe ruido.
Ma ja en la media de la sentenio 20, la ansia sur sua usa ia crese con ce sempre plu studias ia lia asbesto a maladias matante. La enspira de fibres de asbesto es asosiada con canser e otra maladias.
La desira global per la produida ia cade rapida en cuando paises tra la mundo ia proibi lo. An tal, Canada no ia proibi sua fabrica, usa, importa e esporta asta 2018.
@T Un nube de arena crea problemes per la Isolas Canario
@L aora_oji/2020/un_nube_de_arena_crea_problemes_per_la_isolas_canario
====== Un nube de arena crea problemes per la Isolas Canario ======
24 febrero 2020
Un tempesta grande de arena de la Sahara ia veli la Isolas Canario, disturbante la viajas de turistes arivante e partinte.
La compania cual opera la airoportos de Espania ia cansela, suspende o diverje aviones a e de la isolas ier, par causa de la mal capasia de vide. Ma a la note, lo ia dise ce operas ia recomensa a tota airoportos, estra Tenerife Sude.
A saturdi, la governa rejional ia avisa abitores a resta en casa, clui sua fenetras e evita viaja. En Twitter, la ministro espaniol de transporta ia grasia la paises visina per sua suporta.
La servi meterolojial nasional de la pais ia dise ce la Canarios va es colpada par ventas de asta 120 cilometres per ora asta lundi. Esta ventas forte ia porta un nube de arena de la deserto Sahara, a distantia de 500 cilometres a la otra lado de la Mar Atlantica.
La tempesta es tan enorme ce lo es vidable de spasio. Imajes de satelite mostra lo engolinte la isolas, cual es situada a la costa norde-ueste de Africa.
La ventas ia impedi ance servis de naveta e la combate de focones savaje sur la isolas Tenerife e Gran Canaria. La temperatur ala ia esede 30°C en dias resente. En la sude-ueste de Gran Canaria, prosima a la vileta Tasarte, sirca 300 ectares de tereno ia es ardeda e 500 persones ia es evacuada.
La xef de la governa local de Tenerife ia descrive la grandia de la focones como "un situa completa nonusual".
@T Un om con sua can e cameles es salvada pos cade
@L aora_oji/2020/un_om_con_sua_can_e_cameles_es_salvada_pos_cade
====== Un om con sua can e cameles es salvada pos cade ======
4 maio 2020
En Australia, un om, un can e sinco cameles ia es salvada par la polisia pos cuando los ia cade sur un inclina presipe en pasea en la savana.
La om de 38 anios e sua grupo ia segue un via prosima a la vila Jamieson en Victoria cuando un de la cameles ia perde sua stablia. Car los ia es liada en junta, la manada intera e la om ia es tirada a su.
Los ia reseta no feris grave, ma salva los ia ocupa cuasi cuatro oras.
La polisia ia es avisada a sirca 15:00 de ora local ier, cuando la om, un visitor en la rejion, ia ativi sua radiosinial de crise, cual ia es rejistrada a un servador a distantia de 15 mil cilometres en la SUA. La mesaje ia es transfereda a autoriosas en Canberra, la capital de Australia, ci ia envia lo a la polisia de Victoria.
Con un dotor veterinar espetante, respondores ia es clamada a la loca, do los ia susede lenta convinse la animales a reasende la colina. Car un de la cameles ia pare ferida, on ia prepara ance un arnes per "manobra la bestia a la via denova". Ma lo mesma ia susede trepa ala per es reunida con sua amis.
Tota ia es paseada a un loca secur per la note.
Jamieson, un vila peti campanial a 200 cilometres a norde-este de Melbourne, es un rejion cultival su la montania nomida la Grande Cadena Dividente. Cameles no es comun ala, ma alga cultiverias usa los per produidas de lete e ceso.
@T Un om en Pacistan demanda ce Barat redona sua pijon
@L aora_oji/2020/un_om_en_pacistan_demanda_ce_barat_redona_sua_pijon
====== Un om en Pacistan demanda ce Barat redona sua pijon ======
28 maio 2020
Un viletan pacistani ia urje Narendra Modi, la ministro xef barati, a redona sua pijon, cual es detenida en Barat e acusada de spia.
La om, ci abita a sola cuatro cilometres de la frontera, ia dise ce el ia vola sua pijones per selebra la festival Eid al-Fitr.
La polisia ia dise ce la pijon ia porta un anelo sur un de sua gamas, con un codigo enscriveda cual los atenta desifri. La viletan dise ce la codigo es mera sua numero de telefoneta.
El posese plu ca des pijones e dise ce los es simboles de pas. El ia comenta ce Barat debe "asteni de vitimi avias inosente".
Viletanes ia catura la avia a lundi longo la frontera internasional en la parte barati de Caxmir, e ia dona lo a la polisia. La rejion Caxmir es reclamada par e Barat e Pacistan, e atas militar aveni comun ala entre la du paises.
Esta no es la ves prima cuando un pijon volante de Pacistan ia fini en difisilia con ofisiores barati. En maio 2015, un pijon blanca ia es arestada pos es videda par un xico de 14 anios en un vileta prosima a la frontera.
En otobre 2016, un otra pijon ia es saisida pos cuando on ia trova lo con un nota menasante la ministro xef de Barat.
La du nasiones oposa lunlotra tra un tempo longa. La gera vera la plu resente entre los ia aveni en 1971.
@T Un om salvada en la Pirineo es multada an tal
@L aora_oji/2020/un_om_salvada_en_la_pirineo_es_multada_an_tal
====== Un om salvada en la Pirineo es multada an tal ======
6 april 2020
Un om ia es salvada par elicotor de la Pirineo, pos atenta pasea de Frans a Espania per compra sigaretas barata. La servi local de salva montanial ia dise ce la om ia es "fatigada, tremante, fria e perdeda" cuando on ia colie el.
An pos sua malesperia, on ia multa el per 135 euros car el ia desobedi la regulas de enclui se contra la maladia de coronavirus. La polisia rejional ia tuita: "Nos remente denova vos. RESTA A CASA."
La servi de salva ia dise ce la om, de Perpignan, a sirca 25 cilometres de la frontera espaniol, ia comensa par auto ma ia es turnada a via a un punto de controla. Pos esta, el ia deside atenta viaja par pede longo un curso per paseores tra la montania.
An tal, la om ia cade en un rieta e en rubos e ia deveni perdeda, ante contata la servi de salva. El ia es rapida trovada e elicotorida a un construida de securia en Perpignan.
Su la regulas de enclui en Frans, persones pote sorti de sua casa sola per razonas spesial, e los nesesa porta un letera esplicante.
@T Un partito antifrodal vinse en Slovensco
@L aora_oji/2020/un_partito_antifrodal_vinse_en_slovensco
====== Un partito antifrodal vinse en Slovensco ======
1 marto 2020
En Slovensco, Persones Comun, un partito oposante, ia fa un vinse grande en la eleje parlamental, portada sur un onda de emosia contra froda governal.
Pos la conta de cuasi tota resultas, la partito ia gania cuasi 25% de votas.
Sua popularia ia es multe creseda en semanas resente par sua politica antifrodal. La campania ia es dominada par coleria publica sur la omiside en 2018 de un jornaliste investigante, Ján Kuciak, e sua prometeda, Martina Kušnírová.
La resulta es un colpa contra Dirije: Democratia Sosial, la partito sentral sinistriste cual ia domina la politica en Slovensco tra un desenio ma ia recolie apena plu ca 18% de votas a esta ves. La ministro xef Peter Pellegrini ia declara sua defeta.
Kuciak ia investiga froda en postos alta cuando el ia es matada. Sua xuta ia xoca ia nasion e ia despone Robert Fico, la ministro xef presedente, ma sua partito ia resta governante.
La partito popliste Nos Es Familia ia gania 8,26% de votas, prosima segueda par la destristes estrema de Partito de Popla: Nosa Slovensco.
Du otra partitos ia gania ance la 5% de votas nesesada per entra a parlamento: Libria e Unia, libralistes, e Per la Popla, libralistes contra froda.
Ma la limina per alias es plu alta, e Slovensco Progresiste, sinistristes sentral, no ia ateni la 7% nesesada de votas.
Esta eleje segue la vota presidental de la anio pasada, ganiada par Zuzana Čaputová, un campanior contra froda e un arivor nova en politica.
@T Un patinor es grave ferida en un cade en Lausanne
@L aora_oji/2020/un_patinor_es_grave_ferida_en_un_cade_en_lausanne
====== Un patinor es grave ferida en un cade en Lausanne ======
9 janero 2020
La polisia investiga pos cuando un presentor ia es lasada su menasa de mori par un cade en sua praticas ante la rituo inisiante per la Juas Olimpial Invernal de Jovenia en Suiz.
La patinor rusce, nonomida, ma ci abita en Deutxland, ia cade tra sinco metres en deveni levada par un anelo de metal, fisada a un cable, a la patineria jelada de la Stadion Vaudoise.
La fem de 35 anios ia es grave ferida pos "perde subita sua ecuilibra" e cade sur la jelo, diseda par la polisia en Lausanne.
La organizores de Lausanne 2020 e la Comite Internasional Olimpial ia espresa ce los es "tristida par oia sur un asidente". En un declara formal, los ia ajunta: "Lausanne 2020 e la CIO desira a la presentor un recovre rapida e completa."
La rituo inisiante va aveni oji.
@T Un placa de la popla defia la monarcia tai
@L aora_oji/2020/un_placa_de_la_popla_defia_la_monarcia_tai
====== Un placa de la popla defia la monarcia tai ======
20 setembre 2020
Protestores antigovernal ia instala un placa declarante ce Tai "parteni a la popla", en un presenta corajosa de oposa la monarcia. La placa ia es poneda prosima a la Palasio Grande en Bangkok en la defia la plu resente a la re, Vajiralongkorn.
Protestas, gidada par studiantes e esijente reformis de la monarcia e sistem political de la pais, aveni ja de julio. Un de la protestas la plu grande en multe anios ia aveni ier, con ce miles de persones ia defia la autoriosas per esije cambias.
En Tai, criticas de la monarcia es punable par condenas a prisoni longa.
La protestores esije ance la resinia de la ministro xef Prayuth Chan-ocha, ci ia es portada a potia par un colpa de stato en 2014 e ia vinse en elejes disputada en la anio pasada.
A la matina de oji, studiantes ia sementi un "Placa de la Popla" prosima a un campo conoseda como Sanam Luang o Campo Real. La placa, mostrante la data de oji, anunsia en la lingua tai: "La popla ia espresa la intende ce esta pais parteni a la popla e no la re."
La organizores ia dise ce la placa recambia un otra, onorante la fini de monarcia asoluta en la desenio de 1930, cual ia desapare en 2017.
On ia oia un tona de aclamas cuando la ativistes ia instala la placa nova, e protestores ia scande: "Aboli feudalisme, vive la popla!"
La polisia no ia interveni, e no violentia ia es reportada. Un portavose per la governa ia dise ce la polisia no usa violentia contra protestores.
Plu tarda, alga protestores ci ia intende prosegue asta la Casa de Governa ia es prevenida par sentos de polisiores nonarmada, postida a parafolas. En loca, la protestores ia dona un letera de sua esijes a la Garda Real.
La organizores ia declara un vinse pos dise ce la Garda Real ia acorda pasa la esijes a la xeferia de polisia. La polisia ia fa no comenta.
"Nosa vinse la plu grande en la du dias es mostra ce persones comun como nos pote envia un letera a la reales," la organizor Parit "Pinguin" Chiwarak ia dise, recomendante ce la fola reveni per un plu protesta pos un semana.
@T Un plaia espaniol es covreda con blancinte
@L aora_oji/2020/un_plaia_espaniol_es_covreda_con_blancinte
====== Un plaia espaniol es covreda con blancinte ======
30 april 2020
La autoriosas en un vacanseria costal en Espania ia demanda per pardona pos jeta blancinte sur un plaia per atenta proteje enfantes de la coronavirus.
Zahara de los Atunes, prosima a Cádiz, ia usa tratores per covre plu ca du cilometres de plaia con un solve de blancinte, a la dia ante cuando Espania ia permete ce enfantes sorti de casa a la ves prima. Ambientistes dise ce la ata ia causa "dana bruta" a la ecosistem local.
Espania ia es grave afetada par la maladia, con plu ca 24 mil persones mor. Lo ia anunsia resente un scema de cuatro pasos per lejeri sua regulas sever de enclui e revade a un normalia nova ante la fini de junio.
María Dolores Iglesias, ci gida un grupo de bonvolores ambiental en la rejion de Cádiz, ia dise ce el ia visita la plaia a Zahara de los Atunes e ia vide mesma la dana. El ia reporta ce la blancinte "ia mata tota sur la tera -- no cosa es videda, an no insetos".
La plaia e sua dunas es locas protejeda per la reprodui e nidos de avias migrante, e Iglesias ia dise ce el ia vide a la min un nido con ovos destruida par la tratores.
"Blancinte es usada como un desinfetante multe potiosa," el ia comenta. "Lo es lojical ce on usa lo per desinfeta stradas e asfalto, ma asi la dana ia es bruta. On ia ruina la locas de duna e ia ata contra tota la regulas. Lo cual on ia fa es deviante, considerante ance ce la virus vive en persones, no sur la plaia. Lo es fol."
El ia ajunta ce par causa de la enclui, viventes savaje ia flori resente sur la plaia.
Agustín Conejo, ofisior local, ia confesa ce lo ia es un era, ma ce lo ia es fada con intendes la plu bon. El ia esplica ce on ia vole proteje enfantes ci ia veni per vide la mar pos ses semanas de enclui.
La governa rejional de Andalusia considera ance la posible de multa la comite local per sua ata.
Greenpeace en Espania ia tuita un compara con la sujesta bizara par la presidente de la SUA ce cisa on ta aida trata COVID-19 par injeta desinfetante a pasientes: "Fumiga plaias, a media de la saison de reprodui per avias o de la developa de la rede nonvertebrato cual va suporta la pexa costal, no es un de la ideas de Trump. Lo aveni en Zahara de los Atunes."
@T Un plataforma colasa a un festa itiopian
@L aora_oji/2020/un_plataforma_colasa_a_un_festa_itiopian
====== Un plataforma colasa a un festa itiopian ======
21 janero 2020
A la min tre persones ia mori en Itiopia pos la colasa de un plataforma de lenio a un selebra major de cristianes ortodox. Multe otras es ferida, e alga reportas dise ce des ia mori.
La plataforma ia es a la Banieria de Imperos Fasilides, do miles de persones ia es onorante la batiza de Jesus per la festa Timkat en la site Gondar. Plu ca 15 mil stranjeres ia es presente.
Un jornaliste ia publici un foto de la plataforma a alga minutos ante la colasa, mostrante lo cual ia aspeta como un strutur debil.
Samuel Baheru, ci ia viaja a Gondar de la capital Addis Ababa per la festa, ia regarda en cuando corpos ia es prendeda a via sur portaferidas.
"Nos ia oia un ruido grande," el ia dise, "e lo cual nos ia vide emerjinte sur la portaferidas no ia es plasente. Prima, me ia panica car mea sposa ia es a interna, ma alora me ia trova el e nos ia continua con Timkat."
Tesfa Mekonnen, la xef de pas e securia per la governa de Gondar, ia nega ce la trajedia ia resulta de un strutur nonsecur, esplicante ce la labora de construi ia es fada par persones profesal.
"Jovenes ia desira partisipa, donce los ia asende, donce on ia ave tro multe persones e la plataforma ia es supracargada," el ia comenta.
Itiopia es famosa per sua festas cristian ortodox, cual atrae turistes relijiosa e secular de tota la mundo.
@T Un politiciste rusce oposante pare es venenida
@L aora_oji/2020/un_politiciste_rusce_oposante_pare_es_venenida
====== Un politiciste rusce oposante pare es venenida ======
20 agosto 2020
Alexei Navalny, un politiciste rusce oposante, es nonconsensa en ospital pos sufri un veneni suspetada.
Esta campanior contra sobornas political ia deveni malada en un vola, e la avion ia atera urjente en Omsk. Sua portavose ia dise ce on suspeta ce alga cosa ia es miscada en sua te, la sola cosa cual el ia bevi pos la matina.
Un laboror a la ospital ia confirma ce Navalny es tratada per veneni. El es su cura intensa, en un coma, e liada a un respirador.
Navalny ave 44 anios e es un criticor forte de presidente Vladimir Putin. En junio, el ia descrive un vota sur reformis constitual como un "colpa de stato" e un "viole de la constitui". La reformis permete ce Putin pasa du plu periodos en sua posto.
La portavose ia comenta ce dotores a la ospital ia es inisial preparada per comparti cualce informa, ma ce los dise aora ce la probas toxicolojial es retardada e ce los "atenta gania plu tempo e no dise lo cual los sabe".
La unia de cura intensa es aora plen de polisiores.
Navalny ia deveni famosa par esposa dejeneras ofisial, descrivente la Rusia Unida de Putin como "la partito de viles e furores", e ia pasa tempo en prison a plu ca un ves.
En 2011, el ia es prisonida per 15 dias pos protestas sur manipula de votas par Rusia Unida en elejes parlamental. En 2013, el ia es en prison per un tempo corta, acusada de froda, ma ia denunsia la condena como political.
El ia atenta deveni un aspiror en la compete per la presidentia en 2018, ma ia es proibida par causa de condenas presedente de froda. E en la anio pasada, Navalny ia es condenada a 30 dias en prison pos recomenda protestas nonpermeteda.
El ia deveni malada en acel tempo en prison. Dotores ia diagnose "dermatite de contata", ma el ia dise ce el ia sufri nunca un reata alerjica acuta, e sua propre dotor ia sujesta ce el ia es cisa esposada a "alga sustantia nosiva".
@T Un presidente nova en Malaui par un vinse major
@L aora_oji/2020/un_presidente_nova_en_malaui_par_un_vinse_major
====== Un presidente nova en Malaui par un vinse major ======
28 junio 2020
En Malaui, Lazarus Chakwera, xef de la partito oposante, ia gania un eleje refada per deveni la presidente nova de la pais.
La comision elejal ia anunsia en la tarda de ier ce el ia vinse Peter Mutharika, la presidente esistente, con 58,57% de votas en la eleje a martedi.
En febrero, la corte constitual malaui ia cansela la vinse par Mutharika en la eleje de maio 2019, indicante ce on ia interfere con la votas. Malaui es la nasion african du cual ia cansela la resulta de un eleje presidental par causa de violes de regulas.
La pais ia es amarga divideda en la tempo ante la eleje en esta semana.
Pos la declara ofisial de la resulta, Chakwera ia dise ce sua vinse es "un gania per democratia e justia". El ia ajunta: "Mea cor bola con joia."
Sua suportores ia vade sur la stradas de la capital Lilongwe, sonante claxones de autos e relasante pirotecnicales.
Chakwera va es inaugurada oji.
@T Un primate nova descovreda es en peril de estingui
@L aora_oji/2020/un_primate_nova_descovreda_es_en_peril_de_estingui
====== Un primate nova descovreda es en peril de estingui ======
11 novembre 2020
On ia descovre un simia nova a siensa en la forestas distante de Miama. La langur de Popa es sever perilida, e sola sirca 200 o 250 individuas resta.
Langures es un grupo de simias trovada tra Asia sude-este. Los come folias. La animal nova es conoseda per manxas distinguida, semblante un oculo, sirca sua oios, e per sua pelo grisin. Lo es perilida par xasores e par la perde de abitada su ativia umana.
Siensistes ia suspeta longa ce on ave cisa un spesie nova en Miama, sur funda de ADN estraeda de la feces de simias savaje, ma la demostra ia es difisil per trova.
Con poca informa disponable, los ia esamina esemplos istorial conservada en museos de istoria natural en London, Leiden, New York e Singapor. Esplorores temprana de Miama (alora nomida Burma) ia colie esemplos de simias.
La rexercores ia estrae ADN, ia mesura cualias fisical como la longia de coda e oreas, e ia compara estas con los de la poplas savaje. Esta ia revela un spesie nova, trovada sola en forestas en la sentro de la pais.
Los formi cuatro poplas isolida, ma la plu abita en un conserveria sur la inclinas de Monte Popa, un loca de peregrina santa.
En la desenio pasada, Miama ia abri per colabora internasional con siensistes. Un resulta ia es la descovre de spesies nova, incluinte retiles e amfibios. Ma la descovre de un primate nova es rara.
Studias jenetical ia revela ce la langur de Popa, Trachypithecus popa, ia separa de otra spesies conoseda a sirca milion anios ante aora.
@T Un proba barata de coronavirus es aprobada en Barat
@L aora_oji/2020/un_proba_barata_de_coronavirus_es_aprobada_en_barat
====== Un proba barata de coronavirus es aprobada en Barat ======
5 otobre 2020
Un ecipo de siensistes en Barat ia developa un proba noncustosa de coronavirus capas de dona resultas rapida, en modo simil a un proba de ensintia.
La proba Feluda, nomida per un detetor en naras famosa barati, es fundida en un tecnolojia per edita jenes. On estima ce lo va furni un resulta en min ca un ora e va custa 500 rupis (sirca $6,75).
Feluda va es produida par Grupo Tata, un agrega major barati, e va es cisa la proba prima de mundo per COVID-19 cual usa un banda de paper.
Rexercores a la Instituida de Jenomica e Biolojia Integrante en Delhi, do Feluda ia es developada, e ance en sienserias privata, ia esperimenta con la proba a samples de sirca du mil pasientes, incluinte alga ci ia es ja positiva probada con coronavirus.
Los ia trova ce la proba nova ia distingui coreta 96% de la casos positiva e 98% de la negativas. La esatia de cualce proba depende de esta du proportios.
La regulor de drogas en la pais ia aproba la sistem per usas comersial. Con plu ca ses milion infetas confirmada, Barat ave la cuantia de casos du de la plu altas de mundo, e plu ca 100 mil persones en la pais ia mori ja con la maladia.
Pos comensa lenta, Barat proba aora milion samples per dia en plu ca 1200 sienserias. On fa probas de du tipos.
La prima aplica la reata cadenin de polimerase (RCP) per multipli un sample de materia jenetical, otenida par cotoneta, a un grandia sufisinte per es esaminada. La otra usa anticorpos per deteta fratos de virus en un sample de antijenes.
La proba RCP es usual fidable e custa asta 2400 rupis. Lo ave proportios basa de positivas falsa e negativas falsa.
La proba par anticorpos custa min, e usa samples de sangue, resetada par pica la dito, per trova indicas de infeta pasada. Lo es plu esata en deteta infetas positiva, ma lo trova plu negativas falsa ca la proba RCP.
@T Un rapor fema saudi fasa es arestada per sua video
@L aora_oji/2020/un_rapor_fema_saudi_fasa_es_arestada_per_sua_video
====== Un rapor fema saudi fasa es arestada per sua video ======
23 febrero 2020
En Arabia Saudi, ofisiores ia recomenda la aresta de un rapor fema ci ia publici un video per sua canta Xica de Maca, cual loda femes de la site santa como "potiosa e bela". Usores de redes sosial ia reata coler, descrivente la autoriosas como "ipocrita".
La prinse erital de la pais tradisionaliste ia comensa un projeta de reformis en 2018. Ma ativistes dise ce la represa ia crese e on esperia punis contra libria de espresa.
La video ia es publicida en YouTube en la semana pasada par un rapor joven ci identifia se como Asayel Slay. El rapi sur femes en la site Maca, la site la plu santa de islam, a cual miliones de muslimes peregrina en cada anio.
"Nos respeta otra xicas ma la xica de Maca es la confeto," el canta en la video, cuando omes e femes dansa en un caferia. Lo ia es vasta distribuida en redes sosial, e persones ia usa la eticeta #Xica_de_Maca_Representa_Me per loda lo.
A jovedi, Khaled al-Faisal, governor de Maca, ia comanda la aresta de la persones ci ia crea la video, tuitante ce lo "insulta la costumes de Maca" e usante la eticeta "Los no es la xicas de Maca".
La conta de Asayel Slay ia es suspendeda e la video es no plu disponable en YouTube.
Un tuita popular ia dise: "Lo es la sola canta de rap cual no conteni an un parola ofendente, insulta, sena pornografial, nudia, haxix o fumi, e la rapor porta an la hidjab. La xica fasa aresta car la canta no conveni a Arabia Saudi nova o vea."
Otra usores de redes sosial ia sujesta ce on ave normas diferente per omes e femes. On ia tira atende a la caso de Saad Lamjarred, un cantor magribi, a ci on ia permete un presenta en Riad pos tre acusas de viole sesal, cual el nega.
On acusa la autoriosas de projeta a otra paises un imaje de moderni cuando, a la mesma tempo, los deveni plu sever en la pais mesma.
@T Un referendo sur la constitui en Jazair
@L aora_oji/2020/un_referendo_sur_la_constitui_en_jazair
====== Un referendo sur la constitui en Jazair ======
1 novembre 2020
Jazairis vota en un referendo cual va fisa cisa alga cambias posible pos la resinia obligada de Abdelaziz Bouteflika, presidente de tempo longa. Ma oposores dise ce la cambias no representa un reformi fundal.
La referendo aveni a la dia prima de novembre, la aniversario de la comensa de la gera de autonomia par Jazair contra Frans en 1954. La governa ia eleje esta data per sua simbolisme.
Ma lo aveni ance a un tempo cuando la presidente de Jazair es en Deutxland per cura medical.
On no ia revela la natur de sua maladia, ma Abdelmadjid Tebboune ia isoli se e ia pasa tempo en un ospital militar jazairi pos cuando alga de sua aidores e colaborores ia developa la coronavirus. El ave 74 anios.
Bouteflika ia resinia pos protestas grande contra sua aspira de un periodo sinco en sua posto. On vota aora sur limitas a la longia de presidentias e sur la crea de un organiza nova antifrodal.
Per gania la referendo, la lado de "si" o la lado de "no" nesesa reseta a la min 51% de la votas. On va anunsia la resulta doman.
Si la cambias es asetada, la pais va revade a un sistem de permete no plu ca du periodos a sua presidentes. Ance parlamentores va pote servi per du periodos a la plu.
La proposa de un organiza contra froda responde direta a la conserna major cual ia provoca la protestas coler obligante Bouteflika a resinia.
La constitui nova ta serti ance ce instituidas governal va garantia la libria de jornalisme.
Criticores dise ce la referendo es mera un atenta de supresa la promove protestante par un "repara rapida" a la constitui. Los asentua ce la autoriosas no ia envolve membros de la promove en prepara la cambias, e donce en dona validia a la regulas nova.
@T Un regrete sur la mata de un ofisior de Corea Sude
@L aora_oji/2020/un_regrete_sur_la_mata_de_un_ofisior_de_corea_sude
====== Un regrete sur la mata de un ofisior de Corea Sude ======
25 setembre 2020
Kim Jong-un, xef de Corea Norde, ia fa un espresa rara de sua regrete personal sur la mata de un ofisior de Corea Sude. On reporta ce Kim ia informa sua corespondente en Corea Sude, Moon Jae-in, ce la mata ia ta debe no aveni.
Corea Sude dise ce la om de 47 anios ia atenta fuji a Corea Norde cuando soldatos ia trova el flotante en acuas parteninte a la Norde. Los ia mata el par fusil e ia ensende sua corpo.
La frontera entre la du Coreas es sever polisida, e on crede ce la Norde segue un politica de mata per preveni ce la coronavirus entra a la pais.
La regrete ia es comunicada en forma de un letera enviada a presidente Moon per esplica ce la aveni ia es un era. Kim ia dise ce el senti "multe regrete" ce el ia "delude" Moon e la popla de Corea Sude.
La dirijor de securia nasional per Corea Sude, Suh Hoon, ia ajunta ce la Norde ia dona a la Sude la resultas de sua investiga sur la aveni. Estas ia mostra ce on ia xuta plu ca des baletas a la om, ci pos entra a la acuas de la Norde ia fali revela sua identia e ia atenta evade.
La Norde ia clari ance ce lo ia ensende no la corpo de la om, ma la "materia flotante" cual ia porta el.
"La soldatos no ia pote trova la intruor nonidentifiada en un xerca pos xuta la baletas, e ia ensende la aparato su leges nasional de crise per preveni maladia," Suh ia informa jornalistes, referente a la letera.
@T Un regula controversa contra pasea canes en Xina
@L aora_oji/2020/un_regula_controversa_contra_pasea_canes_en_xina
====== Un regula controversa contra pasea canes en Xina ======
17 novembre 2020
Un distrito en la provinse Yunnan de Xina ia es obligada a reconsidera un politica cual ta proibi de 20 novembre ce on pasea publica sua can. Un letera ia avisa ce la animal de cualcun ci fa tal a tre veses va es confiscada e matada.
Ofisiores ia dise ce la regula va proteje abitores, car en alga casos persones ia es mordeda par animales sin corea.
An tal, medias sosial ia es scandalida par la politica, provocante ofisiores a dise ce los va repensa la cosa.
La letera distribuida a 13 novembre comanda ce posesores de canes reteni sua canes a interna de casa a tota tempos. Lo dise ance ce la politica vole promove abituas "sivilida" per eleva de canes.
"Estas es politicas nonsivilida," un person ia comenta, entre otras ci ia critica la regula como "estrema".
La dirijor de la Sosia per la Preveni de Cruelia a Animales en Singapor ia averti ce enclui permanente un can a casa pote es "nosiva a la bonstate de la animal". El ia dise ce "en loca de proibi pasea canes, on pote considera en loca la educa de posesores de animales sur la encarga de posese un animal" e ce on pote introdui comandas min sever, como ce un can estra casa debe es sempre tenida a corea.
Su la regula nova, si on nota ce algun pasea sua can en un spasio publica, el va reseta un averti a la ves prima. Si on catura el denova, el va debe paia un multa de entre 50 e 200 iuanes ($7 e $28). Pos un viole tre, la animal va es confiscada e matada par autoriosas local.
En 2018, la site Hangzhou ia proibi la pasea de canes en la dia e ia refusa intera la posese de razas plu grande. Ma si la regula nova va es realida en Yunnan, esta va es la ves prima de un proibi contra pasea de canes a cualce ora.
Shanghai, Qingdao e Chengdu ave un regula forte ce un familia pote posese no plu ca un can. E en Huangshi, persones es proibida de eleva canes plu grande ca 45 sentimetres.
@T Un relasa nova de Zoom ataca la problem de bombi
@L aora_oji/2020/un_relasa_nova_de_zoom_ataca_la_problem_de_bombi
====== Un relasa nova de Zoom ataca la problem de bombi ======
23 april 2020
La compania esuan Zoom ia dise ce en esta semana lo va relasa un varia bonida de sua ap estrema popular de confere video.
Esta segue esaminas intensa a problemes en la securia e privatia de la ap. La compania ia dise ce Zoom 5.0 va inclui metodos novida de sifri per aida proteje datos e preveni ce persones noninvitada intrui -- un fenomeno nomida "bombi de Zoom".
La plataforma es aora usada par sentos de miliones de persones tra la mundo per labora e osio en sua enclui a casa par la coronavirus.
On ia critica Zoom per problemes variosa de privatia, incluinte ce lo envia datos de usor a Facebook, ce lo ia declara falsa ce sua comunicas es sifrida de punto a punto (pd. nondesifrable par un ajente media), e ce lo permete ce ospitores de conferes trasa la partisipores.
Un de la problemes la plu reportada es casos de "bombi", cuando persones noninvitada intrui a conferes. Per esta razona, alga companias, scolas e governas ia abandona sua usa de la plataforma.
Plu temprana en esta mense, Zoom ia dise ce lo va pausa la developa de cualias nova per consentra a la problemes de securia e privatia.
Eric Yuan, xef de la compania, ia demanda per pardona sur la "nonsasia" relatada con tal problemes e ia promete reata a la consernas, disente ce la usa de la ap ia crese en modos cual el ta previde nunca ante la pandemica.
La cuantia de usores dial ia aumenta de 10 milion asta 200 milion en min ca tre menses.
@T Un restorantor es matada en Mexico per fura sua vino
@L aora_oji/2020/un_restorantor_es_matada_en_mexico_per_fura_sua_vino
====== Un restorantor es matada en Mexico per fura sua vino ======
3 desembre 2020
La polisia en la Site Mexico ia aresta tre suspetadas sur la omiside de un restorantor franses e sua asosior comersial mexican en la semana pasada.
La corpos de Baptiste Lormand, ci ia ave 45 anios e ia posese restorantes plural, e Luis Orozco ia es trovada a sude de la capital a saturdi.
La xef de polisia de la site ia dise ce la du omes ia es matada per fura de los sinco botelas de vino, con valua de cuasi 50 mil dolares esuan.
Lormand ia es la posesor de alga restorantes en la distrito superior Polanco de la Site Mexico. El ia ave un nasionalia duple mexican e franses.
El ia vende ance vinos e distiladas custosa con Orozco, e on crede ce la du ia viaja a sude de la capital a jovedi per vende alga benes.
Prima, amis de Lormand ia pensa ce la restorantor ia es cisa un vitim de estorse, matada pos refusa paia mone de proteje. Otras ia sujesta ce el ia es cisa caturada per rescata.
Ma Omar García Harfuch, xef de polisia, ia comenta ce tota indica ce "la esecutores ia vole fura sua benes".
Ernestina Godoy, la avocato jeneral de la Site Mexico, ia dise ce a la aresta de la tre suspetadas "un cuantia notable de botelas de alcol lusosa e armas ia es saisida".
La mata de Lormand ia scandali la comunia franses en la site, ci ia organiza un prosegue protestante a lundi per esije justia.
@T Un rompe de eletrica afeta miliones en Mumbai
@L aora_oji/2020/un_rompe_de_eletrica_afeta_miliones_en_mumbai
====== Un rompe de eletrica afeta miliones en Mumbai ======
12 otobre 2020
Un rompe major de eletrica afeta miliones de persones en Mumbai, la capital finansial de Barat. La rede de trenes suburban ia sesa funsiona e casas es sin eletrica de 10:00 de ora local oji.
An si rompes de eletrica es comun en partes grande de Barat, los aveni rara en sites major, spesial en Mumbai. Ofisiores dise ce la "fali sin presedente" es causada par problemes con "furni enfluente a la rede xef".
On previde ce la potia va es restorada pos corta. Ma la rompe es tan nonusual ce abitores ia posta mesajes demandante cuando los ia esperia la plu resente un rompe de eletrica plu longa ca alga minutos.
Alga persones ia duta an la capasia de ofisiores nonpreparada per solve rapida un rompe tan grande.
La fali ia interompe trenes, ma la airoporto e la asioneria funsiona ancora. La conserna la plu alta pertine a ospitales, spesial los cual trata pasientes de COVID-19.
Autoriosas ia demanda ce ospitales serti ce los ave carburante sufisinte per opera sua jeneradores suportante per minima oto oras, per caso ce plu problemes va aveni. La plu de ospitales es capas de funsiona par sua propre jeneradores.
Mumbai es un de la sites la plu ativa de mundo, e ia reabri lenta en curso de batalia un de la cuantias la plu alta de casos de la coronavirus en la pais.
Esta no es la ves prima cuando un site barati major ia esperia un interompe de eletrica. Un fali en la rede xef ia disturba la furni de potia tra la pais intera en 2012.
@T Un saco custosa ma nonlegal emportada va es destruida
@L aora_oji/2020/un_saco_custosa_ma_nonlegal_emportada_va_es_destruida
====== Un saco custosa ma nonlegal emportada va es destruida ======
4 setembre 2020
On va destrui un bolsa de pel de aligator con valua de 26 mil dolares australian, car un fem ia emporta lo a Australia sin permete. Esta saco lusosa de un boteca Saint Laurent en Frans ia es confiscada par la Forte de Frontera Australian en Perth, en la ueste de la pais.
Produidas de pel de aligator pote es emportada a Australia, ma sola su un lisensa cual custa 70 dolares. Sussan Ley, ministro de la ambiente, ia descrive la fortuna de la bolsa como "un remente custosa" ce on debe completi la formularios nesesada.
Car en efeto la fem ia perde ja $26 313, la Departe de Cultiva, Acua e la Ambiente ia dise ce lo ia deside reposa la caso. La puni masima per ofendes de comersia de viventes savaje en Australia es des anios en prison e un multa de 222 mil dolares.
An si on pote trae produidas de aligator a en Australia, los es sever regulada par CITES, la Acorda sur Comersia Internasional de Spesies Perilida de Animales e Plantas Savaje.
"Tota nos nesesa es consensa sur lo cual nos compra enlinia, car la restrinje de la comersia de produidas animal es esensal per la survive durante de spesies perilida," Ley ia comenta. El ia ajunta ce la governa "monitori atendente lo cual veni en e de Australia per para e impedi la comersia nonlegal de viventes savaje".
La compror de la bolsa ia organiza un lisensa CITES per esporta lo de Frans, ma no ia demanda a la Ofisia de Maneja CITES per la permete de emporta lo a Australia.
Governas tra la mundo ia atenta plu preveni la comersia de spesies tro esplotada, como aligatores, cual oposores descrive como gidada par la industria de moda.
La governa australian ia dise ce lo labora multe per "deteta casos de produidas nonlegal emportada de vives savaje esotica a la frontera, incluinte vestes de moda, ornetas per turistes, pelos, animales en tasidermia, e ivor".
@T Un sculta controversa de Lenin en un site deutx
@L aora_oji/2020/un_sculta_controversa_de_lenin_en_un_site_deutx
====== Un sculta controversa de Lenin en un site deutx ======
21 junio 2020
En Deutxland, un partito estrema sinistriste ia erije un sculta controversa de Vladimir Lenin. La Partito Marxiste-Leniniste de Deutxland (MLPD), un organiza peti, ia instala la sculta ante sua xeferia en la site Gelsenkirchen en la ueste de la pais.
Autoriosas de la site ia atenta preveni la instala de la sculta, e ia inisia enlinia un eticeta grilida ce on ave "no loca per Lenin". Ma cortes ia bloci sua apelas e ia desveli ia aveni ier.
Lenin ia es un gidor de la Revolui Rusce de 1917 e ia governa la pais asta sua mori en 1924, cuando el ia es segueda par Iosif Stalin. El ia resta un simbol de governa comuniste tra la mundo, entre e sua suportores e los ci recorda la crimines contra diretos umana cual ia aveni su la URSS.
Deutxland mesma ia es divideda tra desenios entre la Este comuniste e la Ueste, asta la cade de la Mur de Berlin en 1989.
En la debate sur la sculta en Gelsenkirchen, fabricada en 1957 en Txescoslovensco, ambos lados ia fa analojias con la tira a tera de monumentos asosiada con sclavia cual ia aveni en protestas antiraziste tra la mundo en semanas resente.
"Nos vive en un eda en cual multe paises de la mundo refleta sur monumentos," la maior Frank Baranowski ia dise en un de un serie de videos postada a YouTube par la comite de site, contra la sculta. "Lenin representa violentia, represa, terorisme e sufri umana xocante."
Ma Gabi Fechtner, presidente de la MLPD, ia descrive la gidor comuniste como "un pensor progresiste de importa en la istoria de la mundo, un batalior temprana per libria e democratia".
@T Un sesaspara entre la talibanes e la governa afgani
@L aora_oji/2020/un_sesaspara_entre_la_talibanes_e_la_governa_afgani
====== Un sesaspara entre la talibanes e la governa afgani ======
24 maio 2020
La talibanes ia anunsia un sesaspara con la governa afgani cual va reali cuando la festa muslim Eid al-Fitr comensa oji. Esta segue un aumenta de atacas par la organiza islamiste noncomprometente contra soldatos governal en la semanas resente.
Presidente Ashraf Ghani ia bonveni la anunsia, disente ce sua soldatos va respeta la acorda.
La sesaspara de tre dias va crea esperas per un redui plu longa de violentia en la pais. Ma un sesaspara simil ia es anunsiada per la mesma festa en 2018 e no ia es estendeda a pos.
Un portavose per la talibanes ia dise ier: "Fa no operas atacante contra la enemi en cualce loca. Si cualce ata es fada contra tu par la enemi, defende tu." El ia ajunta ce la sesaspara es declarada sola per Eid al-Fitr, cual marca la fini de ramadan, la mense santa.
En un parla televisada de la palasio presidental pos preas de Eid, Ghani ia dise: "Como un governa encargada, nos vole fa ance un plu paso a ante. Me anunsia ce la libri de la prisonidas taliban va es aselerada e ce metodos seria va es emprendeda."
Un intercambia de prisonidas ia es acordada en un acorda suscriveda par la SUA e la talibanes en febrero, ma ia deveni un ostaculo notable en la negosias de pas. On ia intende lo como un paso en dirije a fini la gera, ma la talibanes dise ce ofisiores afgani atenta retarda la relasa, e ofisiores esuan ia cexa ce la esijes par la militaristes es esedente.
Un ataca contra un sala de pari en un ospital en la capital, Kabul, en la plu temprana de esta mense ia provoca condenas vasta. La talibanes ia nega sua envolve, ma Ghani ia comanda la recomensa de operas atacante contra la talibanes e otra organizas.
@T Un sesaspara es anunsiada en Iaman
@L aora_oji/2020/un_sesaspara_es_anunsiada_en_iaman
====== Un sesaspara es anunsiada en Iaman ======
9 april 2020
Un alia gidada par Arabia Saudi cual batalia fortes huti en Iaman ia declara un sesaspara. La sesaspara va es realida oji per suporta la laboras par la Nasiones Unida per fini esta gera de sinco anios.
La alia, sustada par potias militar ueste, batalia ja contra hutis aliniada con Iran de marto 2015. Lo no es clar esce ance la hutis va oserva la sesaspara.
En la mense pasada, la Secretor Jeneral de la NU, António Guterres, ia urje ce los en Iaman sesa batalia e aumenta sua laboras contra la posible de un epidemica de la coronavirus ala. El ia recomenda ce la partitos en la pais labora con sua diplomata spesial Martin Griffiths per ateni un redui de combate tra la nasion.
On previde ce ambos lados va partisipa en un confere video per discute la sesaspara. La proposa indica la sesa de tota atas de gera par aira, tera e mar.
La situa en Iaman es ja longa descriveda como la crise umaniste la plu grave de mundo. Multe persones nonmilitar ia perde sua vives par causa de esta gera, cual ia lasa la pais a punto de colasa.
La Nasiones Unida ia servi como ajente de negosias de pas en la pasada, ma esta es la ves prima de un anunsia de un sesaspara nasional.
@T Un sicliste cade de un ponte en un corsa italian
@L aora_oji/2020/un_sicliste_cade_de_un_ponte_en_un_corsa_italian
====== Un sicliste cade de un ponte en un corsa italian ======
16 agosto 2020
En un corsa de siclistes en Lombardia en Italia, un competor ia rompe sua pelvis cuando el ia cade de sur un ponte.
Remco Evenepoel, un beljes ci ave 20 anios, ia es en la grupo gidante ci ia desende la Colma di Sormano, la colina la plu alta de la corsa.
El ia ocupa la loca cuatro en la grupo cuando el ia colpa la mur de un ponte e ia volta a sur sua dorso, cadente a un vale. El ia es tratada par paramedicistes e ospitalida.
En un declara en la sera de ier, sua ecipo Deceuninck--Quick-Step ia dise ce el ia sufri "feris multiple".
"Remco ia es sempre consensa en esperia un serie de esaminas per revela la estende de sua feri. Triste, la radiografis ia mostra un pelvis rompeda e un contusa de la pulmon destra, cual va teni Evenepoel estra competes per la periodo veninte. Nosa corsor va resta oservada en la ospital tra la note, ante vola en soldi a Beljia."
Evenepoel es un de la atletas la plu prometente en siclisme de strada, pos gania ja la Turi de Polsca e la Vuelta a Burgos en Espania en esta anio. On ia compara el a Eddy Merckx, un otra beljes ci on regarda jeneral como la sicliste la plu eselente de sempre.
La corsa de un dia de Bergamo a Como ier ia es ultima ganiada par la dansce Jakob Fuglsang, per la ecipo Astana.
En un plu aveni bizara, a la fini de la corsa, Max Schachmann de la ecipo Bora--Hansgrohe ia es colpada par un auto cual, en alga modo, ia susede entra a la vias cluida e ia pasa ante la sicliste deutx en un atenta de parci.
@T Un siclon major en la Golfo Bengala
@L aora_oji/2020/un_siclon_major_en_la_golfo_bengala
====== Un siclon major en la Golfo Bengala ======
19 maio 2020
Barat ia comensa evacua miliones de persones longo sua costa este ante un siclon en la Golfo Bengala. On previde ce la tempesta va ateni la tera doman e va afeta la statos Bengala Ueste e Odisha.
Plu ca dudes ecipos salvante es ja posada e otras es preparada.
Siclon Amphan aveni a un tempo de multe migra de sites barati a viletas. Deses de miles de laborores migrante fuji de la sites pos un enclui nasional per restrinje la sperde de coronavirus.
Bengala Ueste e Odisha es entre la statos a cual un cuantia grande reveni. Odisha ia cansela trenes cual ia es intendeda per ariva ier, oji e doman, portante miles de migrores.
Alga ofisiores de distrito ia proibi entra a sua rejiones e ia demanda ce la governa de stato casi la migrores asta pos la tempesta. Multe de la persones vade a sua casas par pede. On previde ce la evacua va continua asta la matina de doman.
Ofisiores esperia ance difisiles en trova refujerias per la evacuadas. En Odisha, per esemplo, 250 de la plu ca 800 refujerias esistente es aora usada como sentros de isoli.
Donce ambos statos ia demanda ce on usa como refujerias tempora la scolas e otra construidas en la rejion cual va es probable afetada par la siclon. On nesesa plu tal locas ca usual per conteni persones su la regulas de distanti sosial.
Esta tempesta va es la siclon prima en la Golfo Bengala, con venta plu forte ca 240 cilometres per ora, pos lo cual ia mata plu ca 9000 persones a la costa de Odisha en 1999.
La departe meteorolojial de Barat ia publici un avisa jala per la rejion, conselante ce pexores evita la sude de la golfo en la 24 oras veninte e la norde per tre dias. Probable la tempesta va traversa la norde-ueste de la golfo per pasa tra la costas de Bengala Ueste e Bangladex, de mediadia local doman.
On ia averti ance sur un mar turbosa, con ondones capas de inonda rejiones costal.
@T Un siclon sever ateni la costa de Mexico
@L aora_oji/2020/un_siclon_sever_ateni_la_costa_de_mexico
====== Un siclon sever ateni la costa de Mexico ======
9 otobre 2020
Siclon Delta ia ariva a la costa caribe de Mexico, prosima a Puerto Morelos. La siclon ia debili per deveni un tempesta de categoria 2, con venta de 175 cilometres per ora.
La Sentro Nasional Esuan per Siclones ia averti sur ondones e ventas forte cual menasa la vive. Lo reporta ce la clima deveni rapida plu sever supra la costa de Yucatan norde-este, un rejion popular per turistes de Mexico e la resta de la mundo.
Miles de turistes e abitores local ia move a refujerias per securia.
Delta es la numero 26 de la tempestas nomida en esta saison de siclones atlantica. La saison estende tipal de junio a novembre, e en esta anio lo ia esperia un cuantia nonusual alta de tempestas.
Un averti de siclon es ativa entre Dzilam e Tulum, incluinte Cozumel. On ia predise un pluve deluvial en la statos Campeche, Quintana Roo e Yucatan.
Espertas previde ce la tempesta va leva la acua longo la parte norde de la Penisola Yucatan par cisa entre 2,4 e 3,7 metres. On predise ondas grande e destruosa longo la costa intera.
Plu ca 150 refujerias ia abri sua portes a persones ci xerca proteje de la tempesta en la site Cancún.
La xef de la asosia local de oteles ia esplica ce "per preveni la sperde de COVID-19, on segue la mesma metodos en la refujerias como en oteles, per esemplo la usa de jel ijieninte e covrefases".
Companias de petrolio cual opera en la Golfo Mexico ia comanda sua empleadas nonesensal a evacua sua plataformas maral, e portos mexican ia clui longo la costa este de la golfo.
@T Un siensiste fisa magnetes en sua nas sin intende
@L aora_oji/2020/un_siensiste_fisa_magnetes_en_sua_nas_sin_intende
====== Un siensiste fisa magnetes en sua nas sin intende ======
31 marto 2020
Un astrofisiciste australian ci ia espera crea un aparato per aida preveni ce persones developa la coronavirus ia fini en ospital, pos fisa magnetes en sua nas.
Dr Daniel Reardon ia imajina un scema per construi un colareta cual ta reata si la manos de un person veni prosima a sua fas. Ma la aparato no ia funsiona como intendeda. Lo ia fa no plu ca zumbi constante asta cuando on prosimi un magnete a lo.
"Me ia rie e ia pausa tempora," Reardon ia esplica. "Alora me ia comensa pone la magnetes sur mea fas, sin pensa. Prima a la lobes de mea oreas, a mea narina a pos, como un joala perforante ma magnetal. La problem ia aveni cuando me ia pone magnetes en mea otra narina. Tota ia es atraeda a lunlotra, e los sur mea septo ia deveni fisada!"
An tal, la rexercor de universia ia resta calma. "A la comensa, lo ia dole, ma me no ia es multe turbada. Me ia deveni plu e plu turbada cuando me ia comprende ce sutrae los no va es simple. Alora, pos usa mea du magnetes ultima en un atenta futil de sutrae los, ma fisa ance estas, me ia sabe ce me es en difisilia."
Ma el ia es ancora determinada per estrae mesma se de la situa. El ia proba un pinse, ma esta ia trae sua propre defias. "La pinse ia es constante atraeda a mea nas, e la forsa de tira mea nas ia es ance dolosa."
A esta paso, el ia sabe ce el debe vade a sua ospital local en Melbourne, la mesma ospital do sua acompanior labora. "On ia pensa ce lo es multe divertinte, spesial la dotores ci conose mea acompanior," el ia comenta. "Los ia veni per rie e demanda 'perce tu ia pone magnetes en tua nas?'"
Fortunosa per Reardon, la dotores ia pote final libri la magnetes, e el ia parti relativa nonferida de la ospital.
E a tema de sua aparato, el ia sesa developa lo per la presente. "Me pensa ce me va abandona lo e lasa la taxe a algun plu cualida," el ia rie.
@T Un sinci de la Amazona emete plu carbono ca lo asorbe
@L aora_oji/2020/un_sinci_de_la_amazona_emete_plu_carbono_ca_lo_asorbe
====== Un sinci de la Amazona emete plu carbono ca lo asorbe ======
12 febrero 2020
Un rexerca nova dise ce asta un sinci de la Foresta Amazona emete plu diosido de carbono ca lo asorbe.
La resultas de un studia tra un desenio sur gases invernerial supra la Basin Amazona pare mostra ce sirca 20% de la rejion intera ia deveni un fonte neta de diosido de carbono en la atmosfera.
Un de la causas xef es la desforesti. Cuando arbores crese, los asorbe carbono de la aira, ma arbores mor relasa denova lo. En anios resente, miliones de arbores ia es matada par esplotores de forestas e par focones.
La trovadas ave implicas per la laboras per combate la crise de clima. Los sujesta ce cisa la Foresta Amazona -- un poso esensal de carbono cual lenti la prosede de caldi global -- deveni un fonte de carbono a rapidia plu alta ca on ia suposa a ante.
A cada semana du tra la des anios pasada, un ecipo de siensistes gidada par Luciana Gatti, un rexercor a la Instituida Nasional per Rexerca Spasial de Brasil, ia mesura gases invernerial par vola aviones portante sensadores supra partes variosa de la basin.
La grupo ia descovre xocada ce, an si la plu de la foresta reteni ancora sua capasia de asorbe cuantias grande de diosido de carbono, spesial en anios min seca, un parte estrema desforestida ia perde acel capasia.
Carlos Nobre, ci ia coscrive la studia, ia descrive la oserva como "multe ansiante" car "lo mostra posible la comensa de un punto de cambia major". El crede ce la trovadas sujesta ce en la tredes anios seguente, plu ca un dui de la Amazona risca deveni mutada de foresta a savana.
Tra desenios, siensistes averti ja sur un tal punto de cambia en la Amazona, cuando la foresta ta perde sua capasia de renovi e ta comensa emete plu carbono ca lo asorbe.
@T Un soldato tai mata 26 persones en un site
@L aora_oji/2020/un_soldato_tai_mata_26_persones_en_un_site
====== Un soldato tai mata 26 persones en un site ======
9 febrero 2020
En Tai, en la site Nakhon Ratchasima, un soldato ia mata 26 persones par fusil ante deveni mesma matada par la fortes de securia.
Jakraphanth Thomma ia mata ier sua ofisior comandante e ia fura armas de un campa militar. El ia continua sua ataca sur la stradas e en un sentro comersial. El ia es matada par xuta pos es trapida en la construida tra la note.
La ministro xef de la pais, Prayuth Chan-ocha, ia anunsia oji la cuantia de mores, aumentada pos un declara plu temprana de 20. 57 persones es ferida. "Lo es sin presedente en Tai, e me vole ce esta es la ves final cuando esta crise aveni," el ia dise pos visita la feridas en un ospital en la site.
El ia dise ance ce la atacor ia pare es motivada par sua crede ce on ia engana el sur un negosia de imobila.
Jakraphanth ia posta a sua contas de redes sosial a media de la ataca, demandante en Facebook esce el debe sede se. Plu temprana, el ia envia un imaje de un pistol con tre colies de baletas, con la parolas "lo es la ora per stimula" e "nun pote evita mori".
Facebook ia clui la paje, comentante: "Nosa cores estende a la vitimes, sua familias e la comunia afetada par esta trajedia en Tai. On ave no loca en Facebook per persones ci fa atas odiable de esta spesie, e nos no permete ce on loda o suporta esta ataca."
@T Un sonda risca perde sua sample de asteroide
@L aora_oji/2020/un_sonda_risca_perde_sua_sample_de_asteroide
====== Un sonda risca perde sua sample de asteroide ======
25 otobre 2020
Un sonda spasial, enviada par NASA per colie roca de un asteroide a 320 milion cilometres de la Tera, ia saisi tan multe materia ce lo perde alga de sua sample.
Ofisiores de la sonda OSIRIS-REx, cual ia atera sur Bennu en la parte plu temprana de esta semana, dise ce la opera de colie ia susede cisa tro bon.
Imajes reenviada a la Tera mostra ce un petra teni abrida la porte de un contenador, cual gotea donce alga de sua contenidas. NASA atenta aora coreti la problem.
On crede ce la veculo ia colie sirca 400 grames de fratos de roca.
"La tempo es la esense," Thomas Zurbuchen, dirijor asosiada per siensa de NASA, ia comenta en cuando la ajenteria spasial foca a serti ce on no perde plu.
La contenador de coliedas va es aora tenida a interna de la veculo. Per esta razona, on no va pote mesura esata cuanto materia ia es prendeda.
"An si nos va debe cisa ata plu rapida per securi la sample, esta no es un problem grave," Zurbuchen ia ajunta. "Nos es tan stimulada per vide lo cual pare es un sample abundante cual va inspira la siensa tra desenios pos esta momento notable."
OSIRIS-REx ia atera sur Bennu, un asteroide larga de sola 500 metres, a martedi. Lo ia puxa multe polvo e detrito a supra cuando lo ia prende samples de la surfas de esta ojeto sielal. La rexercor xef de la mision, Dante Lauretta, ia nota alora: "Vera nos ia fa alga desordina."
Siensistes espera ce la projeta va aida esplica como la sistem solal ia comensa a 4,5 mil milion anios ante aora, cuando on va esamina la samples pos la reveni de la sonda a la Tera en 2023. Asteroides conteni detrito restante de la formi de la sistem.
OSIRIS-REx ia es lansada en 2016 e va comensa sua viaja de reveni en marto. Sua nom es la acronim de "Orijinas, Interprete Spetral, Identifia de Recursos, Securia, Esploror de Regolito" en engles.
@T Un SOS sur un plaia salva marores encaliada
@L aora_oji/2020/un_sos_sur_un_plaia_salva_marores_encaliada
====== Un SOS sur un plaia salva marores encaliada ======
4 agosto 2020
Tre marores micronesian encaliada sur un isola pico e distante en la ueste de la Mar Pasifica ia es salvada cuando sua mesaje SOS ia es persepida sur un plaia.
La omes ia es trovada sur Isola Pikelot en Micronesia par aviones militar de Australia e la SUA a soldi, la Forte de Defende Australian ia dise.
Los ia manca tra tre dias pos cuando sua scife de sete metres ia consuma sua carburante e ia vaga multe de sua curso intendeda. Tota la omes ia es trovada en un bon state sin feris major.
La autoriosas en Guam, un teritorio esuan prosima, ia inisia la xerca a saturdi, cuando la omes ia fali completi un viaja de 42 cilometres entre la atoles Pulawat e Pulap. En loca, sua barco ia fini a Isola Pikelot, a cuasi 200 cilometres a ueste de sua punto de parti.
Pos cuando on ia vide de la aira la leteras SOS scriveda sur la arena, un elicotor australian ia atera sur la isola peti e ia dona comedas e acua a la omes.
La elicotor ia veni de la barcon Canberra, cual ia es en via a Hawaii per eserses marinal cuando lo ia es clamada per aida la xerca.
Ofisiores australian ia dise ce la marores va es revenida a casa par un barcon patruliante micronesian.
Micronesia, en la Pasifica ueste, es composada de sirca 600 isolas pico, sperdeda tra un estende vasta de mar.
@T Un tance de carburante esplode en Beirut
@L aora_oji/2020/un_tance_de_carburante_esplode_en_beirut
====== Un tance de carburante esplode en Beirut ======
10 otobre 2020
Un tance de carburante ia esplode a interna de un construida en Beirut, matante cuatro persones e ferinte alga otras.
La causa de la esplode en Tariq al-Jadida, distrito ueste, a la sera de ier no ia es direta clar. La ajenteria governal de novas nasional ia dise ce la focon ia ensende en un paneria en la sutera.
La esplode ia es oiada tra la site. Pompores ia estingui rapida la flamas e, plu tarda, ia aida abitores trapida en sua apartes a desende scalas movable. Soldatos lubnani ia es ance enviada a la loca per maneja la fola de regardores.
Un canal televisante en Beirut ia dise ce plu ca 30 persones ia es ferida, e un fonte medical ia ajunta ce tre enfantes ia es ospitalida con ardedas. On reporta ce la focon ia comensa en un imobila suteran do on ia teni gasolina.
En la semanas pasada, la autoriosas de la urbe ia xerca benerias cisa desobedinte la lege o perilinte distritos abital. Governor Marwan Aboud ia dise "Nos ia teme ce un tal asidente pote aveni", ajuntante ce sirca 100 locas es ja identifiada como suspetable.
La esplode ier ia es la plu resente en un serie de avenis asustante en un pais cual sufri ja un crise economial sin presedente e de cual an la servis publica la plu fundal manca.
Alga plu focones ia eruta a la porto de Beirut pos la esplode jigante ala a 4 agosto. Acel ia mata 203 persones, ia feri a la min 6500 otras, e ia ruina partes de la capital, causante biliones de dolares de dana.
Cuasi 3000 tones de nitrato de amonio, un cimical multe perilosa usada en fertilintes, ia esplode. La sustantia ia es conservada a la porto tra ses anios. Ancora on no sabe perce la nitrato ia ensende, ma on ia deteni a la min 25 persones, de ci multe es ofisiores de la porto o duana.
En otra partes de Lubnan, focones savaje ia eruta en forestas par causa de un onda de caldia cual esta pais mediteranean esperia presente. Alga de los ia ensende en viletas longo la frontera con Israel.
En Suria, pais visina, focones simil ia mata du persones e ia causa problemes de respira per sirca dudes otras en Latakia, provinse costal.
@T Un tomba asosiada con un seta violente en Panama
@L aora_oji/2020/un_tomba_asosiada_con_un_seta_violente_en_panama
====== Un tomba asosiada con un seta violente en Panama ======
15 setembre 2020
Polisiores en Panama investiga un tomba coletiva, sur cual los crede ce lo conteni la restantes de persones matada par un seta relijial.
Ofisiores supravide la estrae de la restantes sceletal de esta loca en la rejion Ngäbe-Buglé en la norde-ueste distante, do multe persones de desende nativa abita.
En janero on ia trova un otra tomba conteninte sete corpos. La vitimes ia es asosiada con un seta sur cual on crede ce lo fa esorsis violente.
La investigores ia debe pasa des oras en pasea tra montania per ateni la loca, cual es en la parte norde de Ngäbe Buglé, prosima a un rio, a 350 cilometres a ueste de la Site Panama, la capital.
On no pote distingui la seso o an la cuantia de persones en la tomba nova. Tota la restantes ia es enviada a un moreria en la provinse Chiriquí per es forense esaminada.
Plu temprana en esta semana, la polisia ia aresta la xef alegada de la seta Lus Nova de Dio, en pertine a la trova de la tomba prima. Esta tomba ia conteni la restantes de un fem ensinta, sinco de sua enfantes e un adolesente.
On ia descovre lo pos cuando tre viletanes caturada par la grupo ia evade e ia fuji a un ospital. Alora, polisiores ia invade la comunia e ia reporta ce en un eglesa tempora, los ia trova un fem nuda, matxetes e otra coteles, e un capra ritual sacrifiada.
La seta ia ataca viletanes local, realinte esorsis violente cual envolve bates e torturas. Sinco persones tenida par la grupo ia es librida.
@T Un tomba coletiva criminal es trovada en Mexico
@L aora_oji/2020/un_tomba_coletiva_criminal_es_trovada_en_mexico
====== Un tomba coletiva criminal es trovada en Mexico ======
15 janero 2020
En Mexico ueste, on ia trova la corpos de 29 persones a la min, en un tomba coletiva a borda de la site Guadalajara. Lo es prosima a du otra tombas nonprofonda en cual 81 corpos ia es trovada en la anio pasada.
En la semana pasada, Mexico la revisa la cuantia de persones ci ia desapare pos 2006, de 40 mil a 60 mil. On crede ce multe de los ia es matada par la ganges criminal potiosa en la pais, e sua corpos ia es dejetada en tombas tempora.
Ofisiores ia dise ce asta aora los ia susede identifia cuatro de la 29, e ce los ia parteni a persones reportada como mancante. Probas forense continua a la corpos restante.
Tota tre tombas ia es descovreda pos un invade par la Garda Nasional de Mexico a un beneria en Toluquilla, un vila prosima, a 6 novembre. Los ia es en patrulia normal de la distrito cuando los ia vide omes armada estra la beneria.
Entrante a la construida, los ia trova oto persones tenida par la pistolores, e ance un colie grande de armas. Los ia aresta 15 persones, de ci tre ia es nonadulte, e informas furnida par los ia gida a la tre tombas en un cultiveria local.
La descovre de tombas coletiva en Mexico no es noncomun. En la des-tre menses entre 1 desembre 2018 e 31 desembre 2019, on ia desentera plu ca mil corpos de tombas secreta.
On crede ce alga ia es membros de ganges, matada o par sua propre gang per ofendes suposada, o par ganges competente. Otras ia es saisida per rescata, e matada cuando sua relatadas no ia pote paia. Ancora otras ia mori car los ia entra a teritorio controlada par un gang, o car un grupo criminal ia vide los como menasas.
An si la tombas es xef descovreda en rejiones campanial, corpos ia es ance dejetada en casas en Guadalajara, car criminores sabe ce la xerca de imobilas privata es plu difisil per la polisia.
En novembre, la governa de presidente Andrés Manuel López ia crea un pajeria enlinia do on pote reporta persones mancante, como un atenta de oteni un statistica plu esata sur la cuantia de tales.
@T Un vasin contra coronavirus proteje 90% de persones
@L aora_oji/2020/un_vasin_contra_coronavirus_proteje_90_de_persones
====== Un vasin contra coronavirus proteje 90% de persones ======
10 novembre 2020
La vasin prima eficas contra la coronavirus pote preveni a plu ca 90% de persones ce los developa COVID-19, longo un analise inisial.
Sua produores -- Pfizer e BioNTech -- ia descrive esta como "un dia major per siensa e umanas". Sua vasin ia es probada a 43 500 persones en ses paises, e no problemes de securia ia es descovreda.
La companias intende solisita urjente un aproba per usa la vasin ante la fini de esta mense. No vasin presedente ia pasa de la esperimenteria a un declara de eficasia alta en un tempo tan corta.
Defias grande resta ancora, ma la anunsia ia es zelosa bonvenida. Alga siensistes sujesta an ce cisa la vive va reveni a normalia en la primavera. On regarda un vasin -- a lado de otra tratas plu forte -- como la modo la plu bon per estrae la mundo de la restrinjes poneda a tota nosa vives.
La datos mostra ce du dosas, a distantia de tre semanas, es nesesada. La probas ia aveni en la SUA, Deutxland, Brasil, Arjentina, Sudafrica e Turcia, e indica ce on ateni un proteje de 90% a sete dias pos la dosa du.
An tal, la datos presentada es mera la analise inisial. Los es fundida sur sola la 94 bonvolores prima ci ia developa la maladia, donce lo es posible ce la eficasia esata de la vasin va cambia cuando on va studia la resultas completa.
Cisa un cuantia limitada de persones va reseta la vasin en esta anio. La produores dise ce, en la semana tre de novembre, los va ave datos sufisinte sur la securia de la medisin per ofre lo a la regulores. Asta la aproba ofisial, paises no va pote comensa sua promoves de vasini.
La du companias dise ce los va pote furni 50 milion dosas ante la fini de 2020 e sirca 1,3 mil milion en 2021.
Evidente, on no pote dona instante la vasin a cadun, donce la paises individua deside ci los va trata prima. Ospitalores e curores va es prosima a la comensa de cada lista car los labora con persones afetable. Persones vea va es ance alta en la listas.
On ave ancora multe demandas sin responde. On no sabe esce la vasin va preveni ce persones sperde la virus a otras. On no sabe esce lo va susede egal bon en persones vea. E la demanda la plu grande -- tra cuanto de tempo la imunia va dura? -- va trova no responde asta pos multe menses o an anios.
Defias enorme de produi e lojistica presenta se en la imuni de cuantias vasta de persones, car esta vasin debe es conservada a temperatur min ca -80°C.
@T Un virus misteriosa de pneumonia en Wuhan
@L aora_oji/2020/un_virus_misteriosa_de_pneumonia_en_wuhan
====== Un virus misteriosa de pneumonia en Wuhan ======
4 janero 2020
Autoriosas xines ia inisia un investiga sur un pneumonia virusal misteriosa cual ia infeta deses de persones en la site sentral Wuhan. On ia confirma 44 casos asta aora, de cual on regarda 11 como grave.
La situa ia provoca Singapor e Hongkong a introdui prosedes per esamina viajores arivante de la site.
En redes sosial enlinia, on trova temes ce la virus pote es relatada a SRAS (sindrom respiral acuta sever), un virus simil a gripe, ma capas de mata, par cual plu ca 700 persones en la mundo ia mori en 2002/03.
La polisia de Wuhan ia dise ce oto persones ia es punida ci ia "publici o avansa informas falsa en la interede sin serti".
La comision de sania de Wuhan ia indica ier ce lo investiga la causa de la infeta. En un declara en sua pajes de rede, lo ia dise ce lo ia elimina ja alga fontes posible, incluinte gripe, gripe avial e maladias comun de respira. Lo no ia refere a SRAS.
On ia trova no casos en cual la maladia es comunicada entre umanas, la declara ia ajunta. An tal, alga de la persones infetada ia labora en un mercato de comedas de mar en la site. On ia limpi aora acel parte.
Un portavose per la Organiza Mundal de Sania (OMS) ia dise ce lo es consensa de la situa e en contata con la governa xines.
"On ave multe causas posible de pneumonia virusal, de cual multe es plu comun ca la coronavirus de sindrom respiral acuta sever," la portavose ia continua. "OMS monitori atendosa esta aveni, e va comparti plu detalias cuando nos ave los."
@T Un xef samoan es culpable de sclavia
@L aora_oji/2020/un_xef_samoan_es_culpable_de_sclavia
====== Un xef samoan es culpable de sclavia ======
18 marto 2020
Un corte en Zeland Nova ia judi ce un xef naseda en Samoa es culpable a plu ca 20 acusas de comersia de sclavos e contrabanda de umanas.
Joseph Auga Matamata, ci ave 65 anios, ia es condenada par causa de sua crimines tra la dura de 25 anios. La corte ia oia ce sua vitimes, de ci tota ia es samoan, ia es tro asustada per avisa la autoriosas, car Matamata ave la grado sosial de matai o "xef".
Cada de la 13 acusas de sclavia a cual el ia es condenada trae un puni masima de 14 anios en prison. Per sua condenas de contrabanda umana, Matamata va es prisonida per asta 20 anios o multada per cuasi 300 mil dolares esuan.
La anunsia de sua puni va es fada a 6 maio.
Matamata, un contrator orticultural, ia es condenada a 10 crimines de contrabanda e 13 de sclavia cual ia aveni entre 1994 e 2019.
El ia es litigada en la site Napier, do la avocatos acusante ia informa la Corte Alta ce el ia promete un vive plu bon a sua 13 vitimes samoan. La plu joven de los ia ave sola 12 anios.
La plu de los ia veni con visas de vacanse per tre menses; alga ia resta ultima tra anios. Los ia labora tra oras longa sin es paiada, e ia es bateda a multe veses.
La litigores ia dise ce Matamata ia tenta sua vitimes con "mone grande" longo la normas de Samoa, ma ia prende final per se la mone cual los ia gania en ortos e otra locas de labora.
Esta es la ves prima cuando algun ia es acusada de e sclavia e contrabanda umana en Zeland Nova.
@T Venezia selebra pos menses su inondas
@L aora_oji/2020/venezia_selebra_pos_menses_su_inondas
====== Venezia selebra pos menses su inondas ======
9 febrero 2020
Selebrores en Italia ia apare stilosa per la Carnaval anial de Venezia, a alga menses pos la inondas la plu grave en la site pos 1966.
La festa es famosa tra la mundo per sua mascas e vestes detaliosa. Lo representa un periodo de ricia ante la comensa de cuaresma, la tradision cristian de 40 dias de juna direta ante pascua.
On dise ce la Carnaval de Venezia ia orijina en la sentenio 11.
La selebras de esta anio ia comensa con un parade sur la canales de la site a la sera de saturdi, regardada par miles de persones. Sua tema es "jua, ama e folia".
La abri grande ia aveni ier, cuando multe barcones e caros diversa ia progresa tra la canales.
An si la plu de la festores ia eleje mascas tradisional, alga ia deside porta vestes plu moderna. Un grupo ia es desemblada como carateres de La casa de paper, un drama televisada espaniol.
La carnaval va continua asta 25 febrero.
@T Venezuela vole relasa sua reservas de oro
@L aora_oji/2020/venezuela_vole_relasa_sua_reservas_de_oro
====== Venezuela vole relasa sua reservas de oro ======
20 maio 2020
La Banco Sentral de Venezuela ia inisia un caso legal per atenta obliga la Banco de England a relasa 930 milion euros de oro cual lo teni.
Venezuela, cual esperia ja punis de la Nasiones Unida, dise ce lo vole usa la valua de la oro per combate la coronavirus. La caso segue un solisita a semanas pasada ce on transfere la valua a la Program de Developa de la NU.
Documentos legal dise ce la banco vole la transfere "como cosa urjente" per compra furnis como comedas, medisin e aparatos medical. Asta aora la pais ia reporta 618 casos de la maladia e des moris.
La economia venezuelan ia colasa su Presidente Nicolás Maduro, de ci sua xefia es nonreconoseda par deses de nasiones, incluinte la Statos Unida. En anios resente, miliones de persones ia fuji de la pais e mancas de benes esensal ia deveni vasta.
La vende de reservas de oro ia deveni un corda de salva economial per la governa de Maduro, cual opera su regulas puninte sever internasional.
La Nasiones Unida ia confirma sola un contata par la banco venezuelan per esplora la posibles. La Banco de England, cual funsiona como gardor de oro per alga nasiones developante, ia refusa comenta sur la caso.
On ave temes ce la sistem medical vea de Venezuela no ta maneja bon un eruta grave de coronavirus. La pais esperia restrinjes de isoli ja de marto, cuando Maduro ia declara un state de crise.
@T Venezuela xerca probores per un vasin rusce
@L aora_oji/2020/venezuela_xerca_probores_per_un_vasin_rusce
====== Venezuela xerca probores per un vasin rusce ======
2 setembre 2020
Nicolás Maduro, presidente de Venezuela, ia anunsia ce el va demanda per bonvolores per proba la vasin developada par Rusia contra COVID-19.
Rusia ia es la pais prima cual ia rejistra ofisial un vasin, a 11 agosto. Ma espertas duta esce lo es sufisinte probada.
La governa venezuelan, cual ia reseta biliones de dolares prestada par Rusia, ia dise ce lo es preparada per partisipa en probas clinical.
Siensistes rusce ia dise ce probas temprana de sua vasin ia susede, an si la aproba de la vasin par regulores presede la completi de un studia plu grande con miles de persones.
La declara par Maduro indica ce Venezuela ancora no ave la bonvolores, sujestante ce Carlos Alvarado, ministro de sania, ia parla tro temprana cuando, a des dias ante aora, el ia dise ce la pais ia ofre a Rusia "sincosento bonvolores per partisipa en probas de la vasin".
La governa de Venezuela ia dise ance ce lo es preparada per partisipa en proba vasines xines e cuban. Xina e Cuba, como Rusia, es aliadas de Maduro, de ci sua governa ia deveni sempre plu isolida pos cuando plu ca sincodes nasiones ia reconose sua oposor, Juan Guaidó, como presidente tempora.
Guaidó, ci gida la Asembla Nasional -- la sola instituida en Venezuela cual es controlada par la partito oposante -- ia declara se como presidente en janero 2019 pos cuando la eleje cual ia repone Maduro a la posto ia es jeneral videda como nonlibre e nonjusta.
Maduro ave la suporta de la fortes de securia, e ia resta en la palasio presidental, ancora controlante la pais, ma pos punis finansial par la SUA, sua governa depende de prestas par Rusia e sua otra aliadas restante.
Pos la anunsia par Rusia sur la vasin, cual lo nomi Sputnik 5, Maduro ia loda la ateni.
Venezuelas ave min ca 50 mil casos rejistrada de coronavirus e sola 381 moris, un cuantia multe plu basa ca de otra paises en la rejion. Ma imunolojistes dise ce la cuantia vera es cisa multe plu alta, car multe venezuelanes evita es esaminada, temente es sosial manxada car la governa culpa migrores reveninte per la sperde de la maladia.
@T Warner Records enscrive un cantor joven de protesta negra
@L aora_oji/2020/warner_records_enscrive_un_cantor_joven_de_protesta_negra
====== Warner Records enscrive un cantor joven de protesta negra ======
19 junio 2020
Un xico de pel negra con 12 anios, de ci sua canta sur la temes de es un afroamerican joven ia sperde virusin, es enscriveda par un compania major de musica en la SUA.
La canta I Just Wanna Live ("Me vole sola vive") par Keedron Bryant, cual el ia posta enlinia a un dia pos la mori de George Floyd en Minneapolis, Minnesota, es publicida oji. Warner Records ia dati la relasa per la festa Juneteenth, ance nomida la Dia de Libria, cual recorda la fini de sentenios de sclavia en la pais.
La canta espresosa ia gania ja plu ca tre milion gustas. Lo ia es scriveda par la madre de Bryant e es cantada par el sin strumento.
Lo inclui la testo: "Me es un om joven negra, me fa tota posible per sta. Ai, ma cuando me regarda sirca me, vidente lo cual aveni a los como me. A cada dia me es xasada como preda. Mea popla no vole turba."
La posta orijinal a Instagram par la cantor gospel joven ia atrae lodas de la presidente pasada Barack Obama, la lejendin de bascetbal LeBron James, la cantor Janet Jackson e la ator Lupita Nyong'o.
"Lo es multe stimulante car esta es lo cual Dio ia clama me per fa," Keedron, de Jacksonville en Florida, ia dise plu temprana en esta semana. "Labora con mea mama ia es simple un esperia stimulante."
Sua madre, Johnnetta Bryant, ia dise ce la video de George Floyd, un om nonarmada de pel negra ci ia mori cuando un polisior ia ajena sur sua colo en maio, "ia colpa vera tan profonda mea cor car me es un mama de un fio negra. Me ave un sposo negra. Me ave frates, tios, cusines, amis negra."
Warner intende dona la profitas a la Asosia Nasional per la Avansa de Persones de Color.
@T Wuhan reabri partal pos sua enclui
@L aora_oji/2020/wuhan_reabri_partal_pos_sua_enclui
====== Wuhan reabri partal pos sua enclui ======
29 marto 2020
La site en Xina do la pandemica de coronavirus ia comensa, Wuhan, ia reabri partal pos plu ca du menses de isoli se.
Imajes ia mostra folas de pasajores ci ariva a la stasion ferovial de Wuhan ier. On permete aora ce persones entra, ma no ce los sorti.
Wuhan es la capital de la provinse Hubei. Lo ia sufri plu ca 50 mil casos de la virus. A la min 3000 persones en Hubei ia mori par causa de la maladia.
Ma la cuantias ia redui aora vasta, longo la statistica de Xina. Ier, la provinse ia reporta 54 casos nova cual ia emerji en la dia presedente, ma tota ia es importada.
Bataliante per controla la casos cual entra de otra paises, Xina ia anunsia un proibi tempora contra tota visitores stranjer, an si los ave visas o lisensas de abita. Lo limita ance airocompanias xines e stranjer a un vola per semana, e la volas debe es plen a no plu ca 75%.
Entretempo, la coronavirus continua sperde rapida en otra paises. On ia confirma plu ca 600 mil infetas tra la mundo, e cuasi 29 mil moris. Cuasi 136 mil pasientes ia recovre.
La cuantia de moris en Espania ia esede 5000, pos un reporta de 832 plu en la 24 oras pasada. Espania es la pais la plu grave afetada de mundo, pos sola Italia.
La SUA ave aora la cuantia la plu alta de infetas confirmada: 104 mil.
Corea Sude dise ce, a la ves prima, lo ave aora plu persones ci ia recovre de la virus ca ci es ancora infetada. Lo ia reporta 146 casos nova ier, levante sua soma asta 9478, de ci 4811 es ja relasada de ospital.
Rusia e Er es entre la paises la plu resente cual introdui restrinjes nova per atenta lenti la sperde de la virus. En Rusia, on ia comanda la clui de sentros comersial, restorantes e caferias. En Er, persones va debe resta a casa, con alga esetas limitada, per la du semanas veninte.
En England, on va comensa fa probas per coronavirus a la empleadas fronte de la Servi Nasional de Sania.
@T 2020
@L aora_oji/2020/xef
====== 2020 ======
En 2020, Aora oji ia publici un article a cada dia, a la ves prima.
Reportas plu vea ...
@T Xefes de Rio Tinto perde pos destrui cavas australian
@L aora_oji/2020/xefes_de_rio_tinto_perde_pos_destrui_cavas_australian
====== Xefes de Rio Tinto perde pos destrui cavas australian ======
24 agosto 2020
Rio Tinto, un compania jigante de escava, ia redui la paias a tre dirijores sur la destrui de du cavas antica en Australia.
En maio, esta compania, cual es la plu grande de mundo cual escava minerales de fero, ia esplode du locas santa de la australianes nativa en Pilbara en Australia Ueste.
La compania ia destrui la cavas de Canion Juukan an pos oposa par la posesores tradisional de la loca.
La cavas ia es entre la locas istorial la plu vea en Australia, mostrante atestas de abita umana continuante tra 46 mil anios.
Jean-Sebastien Jacques, dirijor xef de Rio Tinto, va perde un paia de sirca tre milion euros. La dirijor xef de minerales de fero va perde plu ca un dui de milion euros, como ance la dirijor de la grupo de relatas corporada.
Rio Tinto, de cual sua asiones es listada e en London e en Sydney, ia dise ce lo va furni plu detalias sur esta reduis en sua reporta sur paias per 2020. Tota tre dirijores va resta en sua postos.
La locas santa ia conteni plu ca oto milion tones de minerales de fero de cualia alta, con un valua estimada de 83 milion euros a la tempo de sua destrui.
On ia judi ce, an si la compania ia oteni un permete legal per la esplodes, sua deside no ia sasia la normas e regulas interna cual Rio Tinto ia defini per se.
On ia trova ance ce la compania no ia interata plen con la popla curama, ci posese la cavas par tradision.
@T Xina coleri contra sua governa a tema de la virus
@L aora_oji/2020/xina_coleri_contra_sua_governa_a_tema_de_la_virus
====== Xina coleri contra sua governa a tema de la virus ======
7 febrero 2020
La mori de un dotor xines ci ia atenta averti sur la coronavirus ia provoca un coleria e lamenta publica en Xina a un grado sin presedente.
Li Wenliang ia mori pos reseta la virus en trata pasientes en Wuhan. En desembre, el ia envia un mesaje a otra medicistes per averti sur la virus, descrivente lo como simil a SRAS. Ma la polisia ia comanda el a "sesa fa comentas falsa" e ia investiga sua "sperde de rumores".
La anunsia de sua mori ia relasa un esplode de lamenta en Weibo, un rede sosial major en Xina, e esta ia cambia rapida a coleria.
On ia ave ja acusas ce la governa ia desesajera la gravia de la virus e ia atenta prima secreti lo. La mori de Li ia nuri esta cexas e ia inisia un conversa sur la manca de parla libre en Xina.
La autoriosas antifrodal de la pais ia dise aora ce los va comensa un investiga sur "cosas pertinente a Dotor Li".
La governa xines ia confesa ja alga "mancas e nonsufisis" en sua responde a la virus, cual ia mata aora 636 persones e ia infeta plu ca 31 mil sur la tera xef de Xina.
La du temas la plu comun en Weibo ia es "Governa de Wuhan debe espresa regrete" e "Nos desira libria de parla", ma ambos ia es rapida sensurada, sutraente sentos de miles de comentas.
"Esta no es la mori de un denunsior," un comenta ia dise. "Esta es la mori de un eroe."
Multe persones posta aora su la tema "Esce vos pote maneja, esce vos comprende?", referente a la letera cual Li ia es comandada a suscrive cuando on ia acusa el de disturba la ordina sosial. La comentas no nomi direta el, ma los revela la coleria e desfida cresente contra la governa.
Un comentor ia scrive: "No oblida como tu senti aora. No oblida esta coleria. Nos debe no permete ce esta aveni denova."
@T Xina comensa proibi plastica nonreusable
@L aora_oji/2020/xina_comensa_proibi_plastica_nonreusable
====== Xina comensa proibi plastica nonreusable ======
20 janero 2020
Xina, un de la usores xef de plastica en la mundo, ia anunsia un scema major per redui la dejeta de plastica tra la pais.
Sacos nonbiodegradante va es proibida en sites grande a la fini de esta anio e en tota sites e vilas a la fini de 2022. Mercatos cual vende produidas fresca va resta esenta asta 2025.
Ance a la fini de 2020, on no va permete la usa de palietas dejetable par la industria de restorantes, e la produi e vende de sacos plastica con spesia de min ca 0,025 milimetres.
Tra multe anios ja, Xina atenta trata la dejetadas cual sua 1,4 mil milion sitadanes jenera.
La dejeteria la plu grande en la pais ave la area de sirca 100 campos de futbal, ma lo es ja plen, a 25 anios ante la tempo intendeda.
Sola en 2017, Xina ia colie 215 milion tones de dejetadas de casas urban. La statistica nasional per resicli no es disponable. La pais ia dejeta 60 milion tones de plastica en 2010, cual on pote compara con la 38 tones dejetada par la SUA en la mesma anio.
Xina no es la sola pais en Asia cual ataca sever la problem de plastica usada a sola un ves.
Tai ia anunsia resente ce lo va proibi sacos de plastica nonreusable en botecas major, con un proibi completa tra la pais en 2021.
Ance Jakarta, la capital de Indonesia, va proibi la usa de tal sacos en botecas de departes, supramercatos e mercatos tradisional, de junio de esta anio. E Bali, isola indonesian, ia proibi ja la plastica nonreusable.
Malaisia ia reenvia a sua paises de fonte 150 contenadores grande de dejetadas plastica cual ia es nonlegal importada.
@T Xina sta sua bandera sur la Luna
@L aora_oji/2020/xina_sta_sua_bandera_sur_la_luna
====== Xina sta sua bandera sur la Luna ======
5 desembre 2020
Xina ia planta sua bandera sur la Luna, a plu ca 50 anios pos cuando la SUA ia pone la sua ala.
Fotos par la Departe Spasial Nasional de Xina mostra la bandera roja con sinco stelas, nonmovente en la manca de aira sur la surfas lunal. La imajes ia es creada a jovedi, par un camera sur la sonda spasial Chang'e-5 ante sua parti de la Luna con samples de roca.
Du misiones lunal presedente par Xina ia porta banderas pintida sur la veculos mesma, donce los no ia pote es lasada sur la Luna.
La SUA ia planta la bandera prima sur la Luna en la mision Apollo 11 en 1969. Sinco plu tal banderas ia es poneda sur la surfas en misiones seguente asta 1972.
En 2012, NASA (la departe spasial de la governa esuan) ia indica imajes de satelite cual mostra ce sinco de sua ses banderas sta ancora, ma alga espertas dise ce los es probable aora blancida par la brilia de la Sol.
Longo la astronauta Buzz Aldrin, la bandera prima ia es tro prosima locada a la modulo lunal de Apollo 11 e ia es probable soflada a via cuando la veculo ia enaira.
La jornal Huánqiú Shíbào ("Tempos Global"), publicida par la governa de Xina, ia dise ce la bandera xines es un remente de la "stimula e inspira" sentida en la misiones Apollo.
La bandera de stofa ia es desenrolada par la aterador, direta ante cuando sua veculo de reasende ia enaira usante la aterador como lanseria.
Esta veculo ia prende samples de solo e roca asta la orbitador a 15km supra la surfas de la Luna. La orbitador va es alora encluida en un plu modulo cual va viaja en dirije a la rejion xines nomida Mongol Interna.
La bandera xines ave 2m de largia, 90cm de altia, e sirca un cilogram de pesa. Tota partes es protejeda contra la temperatur sever fria.
On ia vide la bandera de Xina sur la Luna ance en sua mision prima de atera, Chang'e-3, en fotos fada de lunlotra par la aterador e vagador. La aterador e vagador de Chang'e-4 ia trae la bandera asta la lado oscur de la Luna en 2019.
La mision Chang'e-5 es la atera susedosa tre sur la Luna par Xina en sete anios.
@T Zambia fali paia sua deta esterna
@L aora_oji/2020/zambia_fali_paia_sua_deta_esterna
====== Zambia fali paia sua deta esterna ======
14 novembre 2020
Zambia ia fali sua deta esterna pos no paia plu ca 40 milion dolares en la mense pasada. Cuando la periodo de tolera ia fini ier, Zambia la deveni la pais prima de Africa cual ia fali paia sua deta pos la comensa de la pandemica de coronavirus.
La pais ia luta ja contra sua deta de 12 mil milion dolares, ma la pandemica ia mali la presa finansial.
La Reserva Monal Internasional ia dise ier ce lo discute con autoriosas zambian sur la modo la plu bon de suporta la pais, ma ce sua aida va depende de esce Zambia fa pasos per serti ce sua deta es sustable.
La pandemica ia ajunta problemes a servis de sania e ia depresa la ativia economial. Ma oposores de la governa ia culpa la maneja de la economia par Presidente Edgar Lungu, e on ia vosi consernas sur froda en anios resente.
Zambia ia demanda per un pospone de sua paias de interesa asta april 2021, ma sua creditores ancora no ia acorda.
La deta inclui sirca 3 mil milion dolares de obligas finansial orijinante en Europa, e la pais ia empresta un cuantia simil de mone de Xina e instituidas xines. La Banco de Developa de Xina ia acorda pospone la repaias par ses menses, ma creditores estra Xina cexa ce la regulas e strutur esata de la prestas xines no es clar.
Lo pare ce creditores ia presta mone a Zambia a tasos alta de interesa, sabente ce la deta va deveni probable tro multe.
Bwalya Ng'andu, la ministro de finansia de la pais, ia dise plu temprana en esta semana ce Zambia fa tota posible per evita fali paia.
Zambia no es la sola pais african con un deta internasional cresente. Otra governas va oserva prosima la trata de la caso par la emprestores e creditores.
@T Zeland Nova vota per legali eutanasia
@L aora_oji/2020/zeland_nova_vota_per_legali_eutanasia
====== Zeland Nova vota per legali eutanasia ======
30 otobre 2020
Zeland Nova ia vota per legali eutanasia en lo cual promovores descrive como "un vinse per compatia e jentilia".
La resultas inisial de la referendo mostra ce 65,2% de votores desira ce on aseta la Ata 2019 de Eleje la Fini de Vive como un lege nova.
La lege va permete ce persones ci va mori de maladia pos min ca ses menses pote eleje eutanasia si du dotores aproba. Per oposores, la lege no es sufisinte secur.
Car la resultas oji anunsiada no inclui un cuantia estimada de 480 mil votas spesial, incluinte los fada estra la pais, la deside final no va es confirmada asta 6 novembre. Ma con suporta tan forte, on no previde ce la conclui va cambia.
La resulta de la referendo es obligante, e on predise ce la lege va deveni ativa en novembre 2021. Par lo, Zeland Nova va junta se a la grupo peti de paises, incluinte Nederland e Canada, cual permete eutanasia.
On ia organiza la referendo a lado de la eleje jeneral de parlamento en la parte plu temprana de esta mense.
En un referendo separada e nonobligante, fada a la mesma tempo, zelandeses ia rejeta par un capel un proposa de legali la usa recreal de canaba. La resulta inisial sur esta ia es ce 53,1% favore e 46,1% oposa, ma esta va cambia cisa cuando on ia conta la votas spesial.
La Ata de Eleje la Fini de Vive ia es aprobada par la parlamento en 2019 pos anios de debate pasionosa e un cuantia recordo de proposas par la popla.
Ma la ata ia conteni un avisa ce on debe prima proba lo par un referendo, e ce la lege va es asetada sola si plu ca un dui de la votores favore lo.
Un person ci solisita eutanasia debe sufri de un maladia par cual lo es probable ce sua vive va fini pos min ca ses menses, debe mostra un declina major de capasia fisical, e debe es capas de fa un deside informada sur eutanasia.
La lege autori un dotor o curor a dona o prescrive un dosa matante de medisin cual va es usada su sua supravide si tota la constrinjes es sasiada. Lo dise ance ce un person no pote cuali per eutanasia car el es mera vea, mental malada o fisical descapasida.
Oposores dise ce eutanasia menasa la bonstate de sosia par contradise e sumina la preveni de suiside. Otras ia vosi sua teme ce alga persones va senti obligada a usa eutanasia per evita carga sua familias.
@T Zuckerberg recomenda regulas plu forte
@L aora_oji/2020/zuckerberg_recomenda_regulas_plu_forte
====== Zuckerberg recomenda regulas plu forte ======
16 febrero 2020
La xef de Facebook, Mark Zuckerberg, ia recomenda regulas plu forte contra mal contenidas enlinia, disente ce companias como la sua no debe fa desides sur la libria de parla.
Referente a Xina, el ia averti ance ce par controla tro multe, on risca sufoca espresas individual. El ia parla a la Confere de Securia en München, Deuxtland.
La jigantes de rede sosial, como Facebook, es sempre plu presada per preveni la sperde de informa falsa. Facebook es spesial criticada per sua disposa a anunsias political.
La compania ia inisia regulas nova per anunsias political en la SUA en 2018, e global en la anio seguente. Esta regulas esije ce tal anunsias revela ci ia paia per los, e un copia de la anunsia es retenida en un banco de datos, publica xercable, per sete anios.
Ma en esta semana, Facebook ia dise ce lo no va inclui postas political en sua banco de datos si los es sponsorida par persones famosa de redes sosial. Ance la veria de postas par politicistes no es sempre controlada, como parte de la regulas de la compania sur libria de parla.
A la confere, Zuckerberg ia dise: "Nos no vole ce companias privata fa tan multe desides sur la ecuilibra de justia sosial sin plu prosedes democrata."
El ia urje governas a inventa un sistem nova regulante per redes sosial, sujestante ce lo debe es un misca de regulas esistente per companias de telecomunica e difusa.
"Con la manca de tal regula, nos va continua fa la plu bon cual nos pote," el ia comenta. "Ma vera me pensa, a multe de esta demandas cual atenta ecuilibra justias sosial diversa, ce lo no es mera un caso de reveni con la bon responde, lo es un caso de reveni con un responde cual la sosia regarda como valida."
Zuckerberg ia confesa ance ce Facebook ia reconose lenta la developa de "campanias de informa" coordinada enlinia par statos como Rusia. El ia ajunta ce tal "atores malvolente" deveni ance plu capas de asconde sua trasas par masci la adirijes IP de usores.
Per combate esta, el ia dise ce Facebook ave un ecipo de 35 mil persones ci analise contenida e securia a sua plataforma. Con aida de inteleto artifis, el ia indica, plu ca milion contas falsa es sutraeda a cada dia.
An con la contrareata publica a temas como anunsias political, Facebook afirma ce la cuantia de usores de sua familia de sistemes -- Facebook, Messenger, Whatsapp e Instagaram -- continua crese. Plu temprana en esta mense, Whatsapp ia anunsia ce lo es usada par plu ca du mil milion persones, plu ca un cuatri de la popla de la mundo.
@T 140 enfantes es secuestrada en Nijeria
@L aora_oji/2021/140_enfantes_es_secuestrada_en_nijeria
@D 2021
====== 140 enfantes es secuestrada en Nijeria ======
6 julio 2021
En la norde-ueste de Nijeria, pistolores ia secuestra a la min 140 enfantes.
Minima oto persones ia es saisida ance de la Sentro Nasional de Tuberculose e Leprosia en Zaria en la matina temprana ier. Du curores e un enfante de 12 menses es entre la secuestradas.
Nijeria ia esperia un serie de secuestras de scolas e universias per rescatas. La plu resente ia aveni a un scola prosima a la site Kaduna, a sirca 80 cilometres a sude-ueste de Zaria.
La madre de un xica de 15 anios ci ia es prendeda de la Scola Batiste Bethel ia dise ce 140 enfantes ia es saisida par un grupo grande de omes armada ci ia ariva sur motosicles e ia rompe la serca.
En un declara, la polisia ia dise ce pistolores "ia domina la securiores de la scola e ia segue la via a la abiteria de studiantes, do los ia secuestra un cuantia nonspesifada de studiantes a la foresta".
On ia salva 26 persones, incluinte un ensenior fema.
Un xef cristian local ia dise ce la scola ave 180 studiantes, de ci on sabe la loca de sola 20 asta aora. An tal, el ia ajunta ce cisa alga de los ia fuji.
Pistolores a la ospital en Zaria, parente de grupos criminal local, ia spara contra un polisieria en la site. En cuando los ia es tal ocupada, un plu grupo ia ataca la ospital.
De desembre, plu ca 1000 studiantes es prendeda e nove ia es matada. Plu ca 200 manca ancora, e alga de los es multe joven.
Autoriosas dise ce la atacas resente contra scolas ia es realida par banditos, un terma laxe per secuestrores, furores armada, furores de bestias e otra militiores armada ci opera en la rejion e es xef motivada par mone.
@T 64% de votores swiz suporta sposis ge
@L aora_oji/2021/64_de_votores_swiz_suporta_sposis_ge
====== 64% de votores swiz suporta sposis ge ======
26 setembre 2021
Cuasi du tris de votores swiz ia suporta sposis omosesal en un referendo. Swiz deveni un de la paises final en Europa ueste cual ia legali tal sposis, e la nasion 30 de mundo cual ia aseta los.
Promovores ia saluta la resulta como un momento monumentin per diretos LGBT en la pais.
Ante la vota, organizas eglesal e partitos political conservaliste ia oposa la idea, disente ce lo va perili la familia tradisional.
De 2007, Swiz permete duples ge a rejistra sua asosias, ma alga diretos es restrinjeda. La resulta de la referendo va permete ce duples ge adota enfantes nonrelatada e ce sposes lesbian ave enfantes par dona de spermas.
Karin Keller-Sutter, ministro de justia, ia dise ce la sposis omosesal prima va aveni en julio de la anio veninte. "Los ci ama lunlotra e vole sposi va pote sposi," el ia dise, "sin depende de esce los es du omes, du femes o un om e un fem."
Ma Monika Rüegger, politiciste destriste con la Partito de la Popla Swiz e un oposor de la cambia, ia dise ce enfantes e padres va perde. "Esta no ia conserna la ama e sentis," el ia comenta. "Lo ia conserna la bonstate de enfantes."
En la 20 anios pasada, la plu de paises en Europa ueste ia reconose sposis omosesal. An tal, en Swiz, multe desides grande pasa tra un vota nasional, e esta pote lenti cambias importante a leges sosial.
La lege nova, cual ia es suportada par la governa swiz e tota partitos political major estra la Partito de la Popla, ia es asetada par la parlamento en desembre. Ma oposores ia apela, coliente un cuantia sufisinte de suscrives per obliga un referendo.
@T Afganistan atenta para la avansa de la talibanes
@L aora_oji/2021/afganistan_atenta_para_la_avansa_de_la_talibanes
====== Afganistan atenta para la avansa de la talibanes ======
25 julio 2021
La governa afgani ia pone un proibi de sorti tra cuasi tota la pais ier, atentante preveni la talibanes de invade sites. Estra la capital Kabul e du otra provinses, no moves va es permeteda entre 22:00 e 04:00.
La combate entre la talibanes e la soldatos governal ia gravi en la du menses pasada en ce fortes internasional retira se de Afganistan.
On estima ce la organiza militariste ia catura ja asta un dui de la teritorio intera. Lo ia ata rapida pos la retira de la SUA, reprendente traversas de frontera e otra terenos campanial. La talibanes ia saisi ance vias esensal per atenta rompe modos de furni. Sua soldatos ia prosimi a alga sites major, ma ancora no ia susede catura un.
"Per controla violentia e limita la moves taliban, un proibi de sorti a note es introduida en 31 provinses," la ministreria de internas ia declara, ajuntante ce Kabul, Panjshir e Nangarhar es esentada.
Con ce la talibanes continua avansa, combate ferose ia aveni en esta semana en la anteurbe de la site Kandahar. Respondente, la SUA ia fa atacas airal contra postos militariste en la rejion a jovedi. Ma car operas esuan en Afganistan va fini ofisial a 31 agosto, on ave ansia sur la menses seguente.
La talibanes es un militia fundaliste islamiste ci ia es desponeda de potia par la invade esuan en otobre 2001. La grupo ia refuja Osama bin Laden e otra figures liada a la atacas contra la SUA a 11 setembre 2001.
Presidente Biden ia dise ce la retira de la SUA es justida car sua fortes ia serti ce Afganistan no va deveni denova un base do djihadistes pote conspira contra la Ueste.
Plu temprana en esta mense, soldatos esuan ia parti cuieta de la campo de avion de Bagram, un base estendosa cual ia es la sentro de operas esuan en la pais e ia conteni miles de soldatos a tempo pasada. Alga analisores en la SUA teme ce la talibanes va reprende la controla de la pais en ses menses, longo un evalua distribuida a ofisiores en junio.
@T Agilas de la Amazon risca mori de famia
@L aora_oji/2021/agilas_de_la_amazon_risca_mori_de_famia
====== Agilas de la Amazon risca mori de famia ======
2 julio 2021
Conservores de natur dise ce un de la agilas la plu grande de mundo ave "cuasi zero" posibles de survive la desforesti de la Amazon.
Reportada en un studia nova, esta avias ave difisiles en nuri sua jovenes en partes de la foresta de cual on ia sutrae la arbores. Sirca 17% de la Amazon es ja destruida en la 50 anios pasada.
La arpia es la agila la plu grande en la Americas, con garas jigante per xasa simias e bradipos en la culminas de arbores.
On regarda la Amazon como "la fortres ultima" per la arpias, e lo pare ce plu ca 90% de la popla esistente abita ala. Esta avias es entre miliones de animales en la Amazon de ci sua rejion jeografial diminui.
An si la avias es legal protejeda en alga paises, incluinte Brasil, Panama e Suriname, la regulas es difisil per enforsa en la foresta profonda. Metodos como move agiletas e aumenta sua dietas va es esensal a la survive de la spesie.
En la studia, publicida en Reportas Siensal, rexercores gidada par Dr Everton Miranda de la Universia de KwaZulu-Natal en Sudafrica ia usa cameras per monitori 16 nidos en forestas en la stato Mato Grosso en Brasil.
Los ia calcula ance la niveles de desforesti sirca la nidos. En rejiones desforestida a 50--70%, tre agiletas ia mori famia, e on ia trova no nidos en locas desforestida a plu ca 70%.
La siensistes ia computa ce rejiones cual ia perde plu ca un dui de sua arbores no conveni plu como locas do arpias eleva sua projenia. Los estima ce sirca 35% de Mato Grosso es nonconveninte. De 1985, esta ia diminui la cuantia de duples reproduinte par cisa plu ca 3000.
@T Aida ariva a Gaza en un sesaspara
@L aora_oji/2021/aida_ariva_a_gaza_en_un_sesaspara
====== Aida ariva a Gaza en un sesaspara ======
22 maio 2021
La convoias prima de aida compatiosa ia ariva en Gaza, a oras pos la reali de un sesaspara entre militaristes israeli e filastini. Miles de filastinis ia revade a un sena de ruina.
La Organiza Mundal de Sania ia urje la crea de coredores per evacua persones ferida.
Plu ca 250 persones, la plu en Gaza, ia es matada en esta gera de 11 dias. Ambos de Israel e Hamas ia reclama la vinse.
Abitores de Israel sude ia selebra la sesaspara, ma multe ia espresa la ansia ce on va batalia plu en la rejion pos no longa.
Camiones de ajenterias de aida, incluinte los parteninte a la Nasiones Unida, ia comensa trae medisin, comedas e combustables a Gaza pos cuando Israel ia reabri la pasaje de frontera a Kerem Shalom.
UNICEF, la ajenteria NU per aida enfantes, reporta ce plu ca 100 mil persones ia debe fuji de casa en la teritorio, controlada par la grupo militariste Hamas, e cuasi 800 mil persones no ia pote asede acua par tubo.
Ofisiores filastini dise ce deses de miliones de dolares e anios plural va es nesesada per reconstrui la enclave ja povrida cual sufri ance par covid. 1800 construidas de abita es no plu conveninte per usa e mil es destruida.
Tra anios ja, Gaza opera su restrinjes poneda par Israel e Misre sur la move de persones e benes. Ambos paises indica la risca ce armas va ateni Hamas.
@T Airocompanias ofre comes lusosa en aviones parcida
@L aora_oji/2021/airocompanias_ofre_comes_lusosa_en_aviones_parcida
====== Airocompanias ofre comes lusosa en aviones parcida ======
1 april 2021
La airocompania la plu grande de Japan ofre comedas de clase prima en un avion parcida, contra 540 dolares esuan per sesion. ANA (All Nippon Airways) ia comensa esta servi ier e ia estende la program a april pos vende rapida la locas disponable.
Multe airocompanias pensa creosa sur sua aviones parcida en la pandemica. Australia atenta vola suas, spendente 1,2 mil milion dolares per promove viajas en la pais.
La industria global de avioni fasa un defia difisil per survive entre restrinjes sever sur isoli e viaja cual ia rompe ja alga companias. Multe ia trova modos imajinosa per aumenta sua revenu: "volas a no loca" es popular, como ance la esperia de come en aviones parcida.
Ja en otobre, Singapore Airlines ia ofre a persones la posible de consuma un come media en un Airbus A380 nonmovente a la airoporto xef de la site. An con custas de asta 525 dolares esuan, la du datas prima ia es tota vendeda en min ca un dui de ora.
Con ANA, la esperia de come aveni en un Boeing 777 parcida a Airoporto Haneda en Tokyo. Un seja de clase prima custa 59 800 enes, ma comores pote eleje la esperia plu barata de la clase comersial contra 29 800.
En la semana pasada, British Airways ia ofre trae sua menu de clase prima a casas. On pote eleje entre cuatro pacos per coce en la casa. Cada paco conteni comables per du persones e la custa comensa a 110 dolares.
Oji, la governa australian ia inisia un projeta intendeda per promove viajas. Esta dui la custa de cuasi 800 mil biletas de avion e va continua asta la fini de julio.
E ier, IATA, la Asosia Internasional de Transporta Airal, ia dise ce en la media de esta mense on va publici un sistem dijital per lisensa viajores longo sua rejistra de probas e vasinis de covid. Esta va rapidi la prosede en airoportos.
@T Aiti esperia un trematera sever
@L aora_oji/2021/aiti_esperia_un_trematera_sever
====== Aiti esperia un trematera sever ======
15 agosto 2021
Un trematera potiosa ia aveni en la pais Aiti en la Mar Caribe, matante a la min 304 persones e ferinte plu ca 1800.
La trema de grandia 7,2 ia colpa la weste de la pais en la matina ier, cadente e danante construidas cual ia inclui eglesas e oteles.
Ariel Henry, ministro xef, ia dise ce on ave "dana estendosa" e ia declara un state de crise per un mense. El ia ativi un ecipo per maneja la labora de salva.
La episentro ier ia es a sirca 12 cilometres de la vila Saint-Louis du Sud, ma on ia sensa la trema en la capital densa poplada Port-au-Prince, a 125 cilometres de distantia, e en paises visina.
Aiti recovre ancora pos sua trematera ruinosa en 2010, cual ia mata plu ca 200 mil persones e ia dana vasta la infrastrutur e la economia.
La trematera nova ia aveni a media de un crise political en Aiti pos la asasina de sua presidente en julio.
@T Antivasinores ataca medicistes en Guatemala
@L aora_oji/2021/antivasinores_ataca_medicistes_en_guatemala
====== Antivasinores ataca medicistes en Guatemala ======
6 otobre 2021
En la campania de Guatemala, abitores oposada a vasines de covid ia ataca curores ci ia atenta dona injetas, deteninte los tra sete oras.
Sirca 500 persones ia bloci un via e ia vandali la autos de la ecipo en Maguilá, en la provinse norde Alta Verapaz. La 11 medicistes ia es relasada pos cuando la polisia ia negosia con la viletanes, ci ia destrui aprosima 50 dosas de vasin.
Autoriosas dise ce desinforma enlinia nuri la resiste a la vasines.
La curores ia es "parolal e fisical atacada" par la abitores, ci ia relasa la aira de la numaticos de la laborores e ia destrui la friadores cual ia conteni la dosas.
"Nos ia es multe asustada car nos ia pasa nunca tra un esperia como esta," un curor ia dise. "Nos ia fa mera nosa debe. Nos ia atenta esplica a veses plural ce la vasini es nonobligante e ce nos no vole forsa lo a cualcun, ma los no ia permete lo a nos."
On reporta ce la abitores ia rejeta la vasin car un viletan ci ia reseta un dosa ia developa efetos ladal, interpreteda como problemes de sania relatada a la injeta.
Espertas dise ce la efetos ladal la plu comun de la vasines es un dole o delicatia a la loca de injeta. Alga persones sufri efetos plu notable como febre, dole de testa, nausea e fatiga, ma estas es usual minor e de dura corta.
@T Apple va deteta la maltrata sesal de enfantes
@L aora_oji/2021/apple_va_deteta_la_maltrata_sesal_de_enfantes
====== Apple va deteta la maltrata sesal de enfantes ======
7 agosto 2021
La compania Apple es criticada sur un sistem nova cual va trova imajes pornografial de enfantes sur la aparatos de usores en la SUA.
La tecnolojia va xerca similia a imajes ja conoseda ante ce un imaje pote es fisada a Fotos iCloud. Ma un ansia esiste ce la sistem va pote es aumentada e usada par governas autoritar per spia sua propre sitadanes.
Apple ia dise ce varias nova de iOS e iPadOS -- cual va es publicida en la plu tarda de esta anio -- va ave "aplicas nova de criptografia per aida limita la sperde enlinia de materias de maltrata sesal de enfantes, ma desiniada per la privatia de usores".
La sistem reporta similias cual va es revisada par un person. Si nesesada, lo pote descapasi la conta de un usor e avisa la polisia.
Apple dise ce la tecnolojia nova ofre beneficas "sustantial" per privatia a lado de tecnicas esistente, car la compania regarda la fotos de usores sola si los ave un colie de materias conoseda de pornografia de enfantes en sua conta iCloud.
Ma Will Cathcart, xef de WhatsApp, dise ce la sistem "ta pote es multe fasil usada per scane la contenida privata per cualce cosa cual Apple o un governa deside vole controla. Paises do iPhones es vendeda va ave definis diversa sur lo cual es asetable."
El argumenta ce la sistem de WhatsApp per deteta tal imajes ia reporta ja plu ca 400 000 casos a la Sentro Nasional SUA per Enfantes Mancante e Esplotada, sin rompe la sifri.
Ance la Funda de Frontera Eletronical, un organiza per diretos dijital, ia critica la projeta, descrivente lo como "un sistem plen construida e espetante mera un presa esterna per es cambiada a cualce grado".
Ma alga politicistes ia bonveni esta developa par Apple. Sajid Javid, ministro de sania en la Rena Unida, ia dise ce la tempo ia veni cuando otras, spesial Facebook, debe ata simil.
Simil, Richard Blumenthal, senator de la SUA, ia loda la projeta, nominte lo "un paso bonvenida, inovante e corajosa". El ajunta: "Esta mostra ce nos pote proteje enfantes e nosa diretos fundal de privatia."
@T Arabia Saudi espulsa la ambasador lubnani
@L aora_oji/2021/arabia_saudi_espulsa_la_ambasador_lubnani
====== Arabia Saudi espulsa la ambasador lubnani ======
31 otobre 2021
Arabia Saudi ia comanda la ambasador de Lubnan a parti oji par causa de comentas "insultante" fada par un ministro lubnani.
La pais ia pone ance un proibi completa contra tota emportas de Lubnan. La Amirias Arabi Unida, Barain e Cuait ia fa atas diplomata simil.
La Alia Arabi ia espresa ier sua ansia sur la relatas malinte e ia recomenda ce la paises golfal "refleta a la medias cual on proposa reali ... per evita plu efetos negativa a la economia lubnani colasante".
Uman e Catar ia recomenda restrinje. Ambos paises es membros de la Consilio per Coopera de la Golfo, como ance la AAU, Arabia Saudi, Barain, Catar e Cuait.
En un intervisa difusada en la semana pasada, George Kordahi, ministro lubnani per informa, ia pare descrive Arabia Saudi e la AAU como atacores en la gera en Yaman.
Tra sete anios, un alia militar de paises xef suni, su gida saudi, batalia rebelores huti en Yaman. E Arabia Saudi e la rebelores es internasional criticada sur alegas de atas cruel en Yaman.
Kordahi, ci ia parla en agosto ante deveni un ministro, ia descrive la conflita como "futil" e ia dise ce la hutis ata per "autodefende".
La governa lubnani ia dise ce la comentas par Kordahi no representa sua punto de vista, ma la relatas entre la du paises ia mali en anios resente. La grupo militariste Hezbollah, ance suportante la rebelores en Yaman e mesma suportada par Iran, ia deveni plu forte en Lubnan.
A poca oras pos la anunsia saudi, ance Barain ia espulsa sua ambasador lubnani ante atas simil par Cuait e la AAU. Tota tre paises es aliadas prosima de Arabia Saudi. La ministreria de esternas de la AAU ia anunsia ce lo ata "en unia" e va preveni ance ce sitadanes viaja a Lubnan.
La ministro xef de Lubnan ia dise ce el regrete la deside par la saudis e ia espresa sua espera ce los va reconsidera.
@T Arestas a la festa de maio en Turcia
@L aora_oji/2021/arestas_a_la_festa_de_maio_en_turcia
====== Arestas a la festa de maio en Turcia ======
2 maio 2021
La polisia turces ia aresta plu ca 200 persones ci ia fa protestas nonpermeteda a la festa de maio, un dia de asemblas tra la mundo an su la sperde continuante de covid.
La protestores en Istanbul, la site la plu grande de Turcia, ia rompe restrinjes poneda per preveni un onda tre de la maladia.
Prosegues gidada par laborores e sindicatos aveni a 1 maio en cada anio como parte de la selebras de la Dia Internasional de Labora en multe paises.
En esta anio, la asemblas ia aveni contra la fondo de un pandemica cual ia destrui modos de susta e ia impedi economias tra la mundo intera. En multe paises, polisiores ia es postida en cuantias grande per maneja un desordina posible e per serti ce on segue la restrinjes de covid.
Asemblas reduida ia aveni en Colombia, Cuba, Deutxland, Espania, Indonesia, la Pilipinas, la Rena Unida, Rusia, Sveria, e multe otra paises. La plu de la protestas ia es pasosa. Ma Turcia ia es un de alga paises do los ia deveni violente.
212 persones ia es arestada cuando los ia separa de la marxa e ia atenta entra a Plaza Taksim, un loca simbolin de protesta. Imajes mostra un sena caososa en cual polisiores ia usa sua scermos per repuxa la fola e ia tira alga protestores a via de la plaza.
En Frans, a la min 46 persones ia es arestada en la capital, Paris, cuando protestores ia combate polisiores antitumultal, lansante petras, rompente fenetras e ensendente baldones.
Plu ca 106 mil persones ia prosegue a sirca 300 asemblas organizada en Paris e otra sites. La protestores ia vosi sua oposa a la intende par la governa de cambia la aida sosial per persones nonempleada. Los ia esije un justia economial.
On ia oia esijes simil en Deutxland, do protestas de la festa de maio ia aveni tra la pais, an pos la introdui de regulas plu sever contra covid en la semana pasada.
En la capital, Berlin, miles de polisiores ia monitori protestas plural, incluinte un cual ia es organizada par un grupo oposante la stratejia de la governa contra coronavirus.
Sirca 10 mil siclistes ia reali un protesta pasosa contra capitalisme. Ma a la comensa de note, la umor ia deveni tensada cuando protestores ia ensende paradores e ia fronti la polisia.
A un asembla en Jakarta, capital de Indonesia, protestores ia pone tombas falsa sur la strada per simboli la cuantia de persones matada par la pandemica.
La selebras ia es nonusual cuieta en Cuba, do laborores asembla tipal per avenis grande per recorda la revolui comuniste cual ia dona la potia a Fidel Castro en 1959.
Ma per la anio du en serie, Cuba ia cansela sua prosegue tra la Plaza de la Revolui en Havana, en ce la pais batalia covid e un crise de economia. En loca, un cuantia peti de xefes nasional ia asembla a locas publica sin folas, e on ia recomenda ce sitadanes selebra a casa.
@T Arestas pos protestas antigovernal en Cuba
@L aora_oji/2021/arestas_pos_protestas_antigovernal_en_cuba
====== Arestas pos protestas antigovernal en Cuba ======
13 julio 2021
En Cuba, deses de persones ia es arestada cuando miles ia partisipa en la protestas la plu grande de desenios contra la governa comuniste de la isola.
Cubanes es colerida par la colasa de sua economia, par mancas de comedas e medisin, par custas cresente e par la maneja de covid par la governa.
Persones ia cria "libria" e "basi la tirania" en asemblas tra Cuba, incluinte en la capital Havana. La situa es importante car la oposores risca punis sever per sua disenti.
Protestores ia es arestada par securiores aidada par polisiores nonuniformida. Imajes en redes sosial mostra los ci pare es securiores en deteni, bate e ataca la popla par airosol de peper.
On ia reporta rompes de interede tra la isola, e un fotografiste jornaliste ia es ferida en un fronti con la fortes de securia.
En responde a la turba rara, presidente Miguel Díaz-Canel ia parla televisada a la nasion, culpante la SUA per la tumulta e nominte sua punis sever a Cuba -- esistente en formas diversa ja de 1962 -- un "politica de sofoca economial".
Díaz-Canel ia urje sua suportores a batalia la protestores, descrivente estas como mersenarios empleada par la SUA per destabli la pais. "La comanda per combate es donada -- a la strada, revoluistes!" el ia anunsia, referente a la revolta de 1959 pos cual la governa comuniste ia es introduida.
"La popla cuban reclama corajosa diretos fundal e universal," presidente Joe Biden de la SUA ia dise. Ma Nicolás Maduro, presidente de Venezuela, ia promete "tota suporta" a la presidente cuban e la "governa revoluiste" de la isola.
La economia de Cuba es en difisilia. Turisme, un de la setores la plu importante, ia es ruinada par la restrinjes de viaja en la pandemica de covid. E zucar, xef esportada, es un plu fonte major de revenu per Cuba, ma en esta anio la recolie ia es multe min bon ca espetada.
En resulta, mone stranjer manca tan a la governa cuban ce lo no pote importa benes per sasia la mancas.
@T Arjentina imposta sua persones la plu rica
@L aora_oji/2021/arjentina_imposta_sua_persones_la_plu_rica
====== Arjentina imposta sua persones la plu rica ======
30 janero 2021
Arjentina fa un imposta spesial a sua persones la plu rica per aida finansia furnis medical e suporta comersias afetada par covid.
Persones con plu ca 200 milion pesos (2,3 milion dolares esuan) debe paia sirca 3% de sua ativas declarada en la pais e plu ca 5% de sua ativas tenida en otra locas. Sirca 12 mil persones va es impostada.
La governa espera recolie un cuantia de mone aprosima egal a 3 mil milion dolares. Esta va paia ance per aida sosial e suvenis per studia.
Senatores ia aseta la idea de la imposta, cual no va recore, par 42 votas contra 26 en desembre. On nomi lo "la imposta de milionores".
La metodo ia es introduida par Presidente Alberto Fernández, de la sinistra sentral, ma ia es criticada par la partito oposante cual ia descrive lo como "confiscante". E alga persones ia espresa un ansia ce la imposta va deveni permanente.
Ma la pais es forte afetada par la pandemica, cual ia mali la taso ja alta de povria. Cuasi 40% de la popla abita su la limina de povria, e 11% es nonempleada.
La reporta anial de Oxfam, confedera carital, sur nonegalia economial ia dise ce Arjentina abri la via a un sistem de impostas gradal de persones rica como la clave per recovre justa de la crise presente.
"Un imposta a la profitas esedente ganiada par corporas en la pandemica de coronavirus ta pote jenera $104 mil milion dolares," la reporta ia nota, "sufisinte per furni proteje contra nonemplea per tota laborores, e suporta finansial per tota enfantes e persones vea en la paises la plu povre."
Arjentina ia conta sirca du milion casos confirmada de la virus e plu ca 47 mil moris par lo.
@T Atacas intensi entre Israel e Gaza
@L aora_oji/2021/atacas_intensi_entre_israel_e_gaza
====== Atacas intensi entre Israel e Gaza ======
13 maio 2021
Militaristes de Hamas ia lansa deses de rocetos a Israel pos atacas airal israeli cual ia mata ofisiores major e ia cade un plu tore en Gaza.
Esta intensi, cual ia comensa a lundi, ia provoca violentia sur stradas en Israel entre iudis e arabis israeli.
La batalia ia eruta pos semanas de tensa cresente en Ieruxalim Este, culminante con combate a un colina santa a muslimes e iudis. Muslimes nomi esta loca la Haram al-Sharif ("Santeria Nobil"); iudis nomi lo la Monte de la Templo.
Hamas ia esije ce Israel sutrae sua polisia de la colina e de la distrito Sheikh Jarrah, visina e jeneral arabi, do familias filastini es en peril de deveni descasida par iudis. Hamas ia xuta rocetos cuando sua ultimato ia es iniorada.
Parlante en la tarda de sera ier, la ministro xef Benjamin Netanyahu ia dise ce el intende envia soldatos per aida la polisia a manteni la ordina en la sites. El ia ajunta ce la governa va usa tota sua fortia per proteje Israel contra enemis esterna e tumultores interna.
Ma la Autoria Nasional Filastini ia condena la "agresa militar" de Israel en un twita, disente ce lo "trauma un popla de du milion persones ja tormentada".
De lundi, militaristes filastini ia xuta sirca 1500 rocetos contra Israel, e Israel ia responde par ataca blancos en la teritorio.
Un ataca israeli ia destrui la tore Al-Sharouk en la site Gaza. Esta es ja la numero tre de la construidas alta ruinada par atacas airal en esta semana. Lo ia conteni TV Al-Aqsa, la stasion dirijeda par Hamas.
Israel ia dise ce lo ia mata ofisiores major de Hamas en Gaza e ce lo ojeti ance lanserias de misiles. Hamas ia confirma ce un comandor major e "otra xefes" ia mori.
On ia averti abitores ce los debe evacua la construidas ante cuando la jetos ia ataca. An tal, ofisiores de sania ia dise ce alga persones nonmilitar ia mori. Sinco membros de un familia ia es matada par un ataca airal a martedi, incluinte du frates joven.
@T Barat indica ce lo va continua usa carbon
@L aora_oji/2021/barat_indica_ce_lo_va_continua_usa_carbon
====== Barat indica ce lo va continua usa carbon ======
21 otobre 2021
Longa documentos esposada, Barat ia informa la Nasiones Unida ce carbon va continua como un fonte de potia per multe de la pais tra la desenios veninte.
La documentos revela ce Barat es un de alga paises cual ia promove a la NU contra un abandona completa de combustables de fosil.
A la confere climal COP26 en novembre, paises va es urjeda a redui sua emetes de gases invernerial. Barat es la emetor tre de la plu grandes de mundo, pos Xina e la SUA.
Barat intende ce fontes renovable e enerjia nucleal va representa 40% de sua capasia instalada de eletrica ante fini de 2030 -- un ojeto cual cisa lo va ateni plu temprana, longo rexercores a Trasa de Ata Climal (Climate Action Tracker, CAT).
Ma lo es ancora la consumor du de la plu grandes en relata con carbon, cual enerji ancora plu ca 70% de sua rede. Carbon va es difisil per abandona, la pais ia dise a la ecipo de siensistes ci compila la reportas NU ante la confere en Scotland.
La reportas asembla indicas sur la modos la plu bon per lenti la caldi global, e es scriveda par la Comite Intergovernal sur Cambia Climal, un grupo NU cual studia la problem.
"An con crese sustantial en la setor de enerjia renovable en Barat, carbon va resta probable la foca de la produi de enerjia en la alga desenios veninte per la crese economial sustable de la pais" -- en la parolas esposada de un siensiste major de la Instituida Sentral de Rexerca sur Mina e Carburante en Barat.
CAT estima ce a 2030, la intensia de emetes par Barat va es reduida a 50% su la nivel de 2005, pasante sua gol declarada de 35%. Ma la pais debe ancora esplica como lo va neutri sua emetes de diosido de carbono, e lo no ia dise cuando lo espeta ateni esta.
Xina, la emetor de carbono e consumor de carbon la plu grande de mundo, ia promete neutria de carbono ante fini de 2060. E la esije per carbon en la pais ia redui ance, cisa lasante la futur de esta combustable en la manos de la politicistes barati.
@T Barat prepara se contra un tempesta sever
@L aora_oji/2021/barat_prepara_se_contra_un_tempesta_sever
====== Barat prepara se contra un tempesta sever ======
17 maio 2021
La provinse Gudjarat en la ueste de Barat prepara se contra la siclon Tauktae, sur cual on dise ce lo va es la tempesta la plu forte cual ia colpa la rejion en cuasi 25 anios.
En la du dias pasada, a la min ses persones ia mori e miles ia es evacuada su la pluve estrema cual acompania la siclon. On previde ce la tempesta va ateni la tera a esta sera, con ventas de asta 160 cilometres per ora.
Esta aveni a media de un onda du de covid cual ia afoca la sistem de aida medical en la pais. Plu ca 150 mil persones en partes basa de Gudjarat es ja moveda a refujerias, provocante temes sur la posiblia de comunicas nova de la virus en la semanas veninte.
La tempesta ajunta a la defia grande ja frontida par la ospitales e sentros de covid en Barat. Per esemplo, Mumbai, capital de la provinse visina Maharashtra, cual es sur la costa e aora alta vijilante, ia move 580 pasientes de covid a ospitales munisipal, a via de sentros dedicada.
Acel site ia dise ance ce sua airoporto va es cluida entre 11:00 e 14:00 de ora local.
Ofisiores consela ce la popla resta en casa. On predise vias inondada, linias eletrical danada e arbores desplantada par la pluve e venta forte. Miles de barcos de pexa a la costa de ambos provinses ia reveni a porto, e on ia demanda ce sentos de barcones comersial redirije se.
Pluve de la tempesta ia mata ja ses persones en la provinses Kerala, Karnataka e Goa en la fini de semana cuando lo ia pasa longo la costa ueste de la pais. Casas ia es destruida e la furni de eletrica ia es rompeda tra alga distritos en esta provinses.
@T Batalia en la resiste final contra la talibanes
@L aora_oji/2021/batalia_en_la_resiste_final_contra_la_talibanes
====== Batalia en la resiste final contra la talibanes ======
4 setembre 2021
En la Vale Pandjxir en Afganistan, do on fa resistes final contra la controla taliban, la batalia continua.
Portavoses taliban ia dise ce los ia catura la rejion, ma la resistores nega esta. Un de la xefes de la resiste, Amrullah Saleh, ia rejeta alegas ce el ia fuji, ma el ia confesa ce la situa es difisil.
On reporta ce la combate en Pandjxir ia lasa sentos de persones mor.
La vale, a norde de Kabul, es un de la provinses la plu peti en la pais e la sola cual la talibanes no ia concista ja. Esta forteria tradisional oposada a la talibanes conteni sirca 150 e 200 mil abitores e es ascondeda pos montes.
La resiste, cual inclui membros pasada de la forte de securia afgani e militias local, es dirijeda par Ahmad Massoud, un xef de tribu local. Sua padre ia combate susedosa contra la sovietes ci ia invade en la desenio de 1980 e contra la talibanes en la desenio de 1990.
La talibanes controla aora la resta de la pais, e on previde ce los va anunsia un governa nova en la dias veninte.
Ier, la Uni European e la Rena Unida ia junta se a la SUA en dise ce los va negosia con la talibanes, ma no va reconose los como la governa de Afganistan.
La UE ia dise ance ce lo intende reinstitui un presentia diplomata en Kabul per supravide evacuas e per serti ce un governa afgani nova reali sua prometes sur temas de securia e diretos umana. Sua xef de esternas Josep Borrell ia dise ce cualce engrana va depende de constrinjes sever e va esiste sola per suporta la popla afgani.
@T Beljia reprende madres e enfantes de campas djihadiste
@L aora_oji/2021/beljia_reprende_madres_e_enfantes_de_campas_djihadiste
====== Beljia reprende madres e enfantes de campas djihadiste ======
17 julio 2021
Des enfantes e ses madres tenida en campas de prison per djihadistes en Suria ia es voleda a Beljia, sua pais de orijina. Esta es la renativi la plu grande de membros suspetada de Daex (la Stato Islamiste) pos sua cade en 2019.
Sentos de europeanes ci ia viaja a Suria per junta se a Daex, incluinte femes e enfantes, es trapida en campas dirijeda par curdis en Suria norde-este. Multe paises european no permete los a reveni, ma Beljia vole retrae enfantes joven.
Tre madres e sete enfantes ia rejeta la ofre de revade a Beljia.
Pos sua viaja de la campa en Roj, on previde ce la madres va es arestada e acusada par autoriosas antiteroriste beljes. La enfantes va es curada.
Alexander de Croo, ministro xef, ia anunsia en marto ce Beljia va "fa tota" per renativi la persones en la campas ci ave min ca 12 anios. El ia dise ce lo importa ce on considera sua cualia de vive.
Pos la esplode de gera en Suria en 2011, plu ca 400 beljeses ia vade ala per junta se a Daex -- un de la cuantias la plu grande de cualce pais european.
A sua apico, Daex ia controla 88 000 cilometres cuadrida de tera estendente tra Suria e Irac. Ma pos la declara ce la militaristes ala es teritorial vinseda en marto 2019, la madres e enfantes ia es moveda a campas, como ance miles de otra persones deslocada.
Consernada par la risca de securia, alga governas en Europa ia esita retrae sua sitadanes de la campas. Ma grupos per diretos umana ia urje governas a reprende sua persones, argumentante ce lasa femes e enfantes en la campas esposa los a la periles de maladia e radisali.
@T Bezos litiga NASA sur sua contrata con Musk
@L aora_oji/2021/bezos_litiga_nasa_sur_sua_contrata_con_musk
====== Bezos litiga NASA sur sua contrata con Musk ======
17 agosto 2021
Orijina Blu, la compania spasial de Jeff Bezos, litiga NASA sur la deside de dona un contrata de 2900 milion dolares per un aterador lunal a la compania SpaceX de Elon Musk.
La compania de la xef pasada de Amazon ia descrive la contrata como nonjusta, disente ce lo ave "problemes fundal".
La desacorda ia es inisiada par la deside en april per contrata sola un compania, e no du como on ia previde, par causa de un manca de finansia.
NASA ancora no ia comenta, ma lo es suportada par un organiza gardante federal.
En sua declara a corte, fada a venerdi, Orijina Blu ia dise ce lo continua crede ce on nesesa du furnores per construi la sistem de atera cual va porta astronautas a la surfas de la Luna, cisa tan temprana como 2024.
Lo ia acusa ance NASA de un "evalua nonlegal e nonconveninte" de sua proposas en la curso de la prosede de ofres.
A la tempo de anunsia la contrata, la xef de esplora umana de NASA ia confesa ce la bujeta presente de la ajenteria spasial preveni lo de eleje du companias. La parlamento ia permete a lo sola 850 milion de la 3300 milion dolares cual lo ia solisita per la projeta.
NASA ia sita ance la istoria demostrada de misiones orbital par la compania de Musk como un fator en la deside. E la ofre par SpaceX ia ave la custa la plu basa par un distantia notable.
En julio, Bezos ia ofre furni a NASA asta 2000 milion dolares de la custas, per deveni reconsiderada per la contrata, ma el ia es rejetada.
NASA debe rejistra un responde a la proposa de litiga a 12 otobre a la plu tarda. SpaceX ia fa ancora no comenta.
@T Biden e Trump enerji votores ante un eleje desidente
@L aora_oji/2021/biden_e_trump_enerji_votores_ante_un_eleje_desidente
====== Biden e Trump enerji votores ante un eleje desidente ======
5 janero 2021
En la SUA, par asemblas duelin, Donald Trump e Joe Biden ia urje votores en la stato Georgia a partisipa en un eleje doman cual va deside cual partito va controla la Salon Alta.
Trump, republiciste, e Biden, democrata, ia dise ce la votas per du sejas en la Senato va formi la pais per anios. Si la democratas vinse, los va controla tota de la Congresa e la Casa Blanca.
Plu ca tre milion abitores de la stato ia fa ja sua votas -- cuasi 40% de la votores ala rejistrada.
La senatores republiciste presente per Georgia, Kelly Loeffler e David Perdue, atenta teni a via la defiores democrata, Jon Ossoff e la onorable Raphael Warnock. Esta ronda desidente es nesesada par la regulas de eleje en Georgia, car zero de la nominadas ia reseta plu ca 50% de votas en la eleje xef en novembre.
Aora, la partito republiciste controla la Senato, con 52 de la 100 sejas. Si ambos democratas vinse doman, la sejas va es egal divideda, permetente la desides a Kamala Harris, la vispresidente futur.
Esta ta es esensal per reali la projetas progresiste de Biden, incluinte temas major como medica e regulas ambiental, cual es forte oposada par la republicistes.
La Senato ave ance la potia de aproba o rejeta persones nominada par Biden per postos de consilior o judor. Si ambos democratas vinse, alora la Casa Blanca e ambos salones de la Congresa va es controlada par la partito democrata a la ves prima pos la eleje de Barack Obama como presidente en 2008.
Trump, ci va sesa es presidente a 20 janero, ia dise a sua asembla en Georgia: "Los no va prende esta Casa Blanca. Nos va batalia como la diablo."
Alga republicistes en ambos salones ia dise ce los va oposa la resulta de la eleje presidental, realinte un debate e un vota. Ma car otra republicistes dise ce los no va protesta la vinse de Biden, la votas oposante no ta susede.
En la finisemana, on ia revela ce Trump ia fa un telefoni controversa con la ofisior xef de elejes en Georgia, presante el per "trova" votas cual ta reversa sua defeta en la stato.
@T Biden reversa la politicas de Trump
@L aora_oji/2021/biden_reversa_la_politicas_de_trump
====== Biden reversa la politicas de Trump ======
21 janero 2021
Joe Biden, presidente nova de la SUA, ia comensa desfa alga de la politicas de Donald Trump, a mera oras pos sua inaugura.
En sua atas inisial como presidente 45, el ia suscrive des-sinco comandas dirijal, de cual la prima ia es per aumenta la responde federal a la crise de coronavirus. Otra comandas ia reversa la disposa de la governa de Trump sur cambias climal e migras.
Biden ia comensa labora ier en la Ofisia Oval pos deveni induida en la parte plu temprana de la dia a la Capitolio en Washington. La rituo ia es nonsimil a tota pasadas par causa de restrinjes contra covid, e poca persones ia es presente per oserva la juras.
Trump, ci ancora no ia sede formal la presidentia, ia iniora la aveni -- e donce ance la tradision longa ce presidentes vea regarda la inaugura de la nova. Presente, an tal, ia es Barack Obama, su ci Biden ia servi tra oto anios como vispresidente, Bill Clinton e George W Bush, como ance Mike Pence, vispresidente de Trump.
"Democratia ia susede," Biden ia dise pos pronunsia la jura presidental. Espresante un mesaje de unia pos la anios turbosa de Trump, el ia promete es un presidente "per tota esuanes", incluinte los ci ia vota contra el.
Ante la inaugura de Biden, Kamala Harris ia es induida como vispresidente de la pais. El es la fem prima, e la person negra o indoamerican, ci ocupa esta posto.
On ia ave securia plu forte ca normal per la rituo a la Capitolio, pos la ataca a la construida par suportores violente protestante a 6 janero.
Aora, un regula esiste ce on debe porta un masca e distanti sosial se en tota construidas de la governa federal. Un ofisia nova va es instituida per coordina la responde a la pandemica, e la SUA va para la prosede, inisiada par la governa de Trump, de retira se de la Organiza Mundal de Sania.
Biden ia promete ce la batalia contra la clima cambiante va es un conserna major de sua governa. El ia revoca ance la permete presidental donada a un projeta controversa per un tubon de petrolio, nomida Keystone XL, cual ambientistes e organizas de americanes nativa oposa ja tra plu ca un desenio.
Sur la campo de migra, Biden ia cansela la declara par la governa de Trump cual ia aida finansia la construi de un mur longo la frontera mexican, e ia fini un proibi contra viaja de alga paises de majoria muslim.
Otra de sua comandas trata egalia de raza e jenero.
@T Biden va presenta un projeta grande de spende
@L aora_oji/2021/biden_va_presenta_un_projeta_grande_de_spende
====== Biden va presenta un projeta grande de spende ======
27 april 2021
On previde ce Presidente Joe Biden va recomenda la reformi la plu vasta de aida sosial en la SUA pos la desenio de 1960, cuando el fa sua parla prima a un sesion juntada de la parlamento.
Parlante a la sera ante sua dia sento en la posto, la democrata va proposa spende 4 milion milion dolares per suporta la cura de enfantes, la educa e la tempo libre familial. Sua proposa de spende 2 milion milion dolares contra covid es ja asetada.
La parla va es monumentin car du femes va senta pos la presidente a la ves prima en un parla a la Congresa. Kamala Harris, vispresidente, e Nancy Pelosi, presidente de la Salon Basa, va porta mascas.
La parla par la presidente va es segueda par la parla tradisional refutante par la partito oposante, a esta ves par Tim Scott, un senator republiciste de Carolina Sude. Scott, competor posible per la Casa Blanca en 2024, e afroamerican, es un vose major sur temas de raza en sua partito.
Biden va parla a 21:00 de ora local en la Capitolio, cual es ancora ensircada par sercas de securia e gardada par sentos de soldatos de la Garda Nasional pos la ataca de la compleso a 6 janero par protestores suportante Donald Trump. Ante la parla, Biden va encontra empleadas ci ia deveni trapida en la construida en acel tumulta.
Usual, sirca 1600 invitadas es presente cuando un presidente parla a un sesion juntada de parlamento. Ma a esta ves, sola 200 persones es invitada, par causa de protocoles per preveni la sperde de coronavirus.
Levada par aproba forte entre la popla, Biden va parla a deses de miliones de persones televidente. El va atenta crea suporta publica per du proposas jigante -- la Projeta de Empleas Esuan e la Projeta de Familias Esuan -- sur cual analisores previde ce los ta reformi la sistem de aida sosial en la pais a modo la plu profonda pos la epoca de Presidente Lyndon B Johnson.
La Casa Blanca dise ce, si la parlamento aseta los, ambos proposas va es paiada par alti la impostas de la persones e corporas la plu rica.
@T Biden va suspende contratas de fora en la Artica
@L aora_oji/2021/biden_va_suspende_contratas_de_fora_en_la_artica
====== Biden va suspende contratas de fora en la Artica ======
2 junio 2021
La governa esuan de Presidente Joe Biden va suspende contratas de petrolio e gas en la Refujeria Nasional de Viventes Savaje Artica en Alaska, asta un resenia ambiental.
Esta reversa la deside par Donald Trump de vende contratas de petrolio en la conserveria per crese la developa de combustables de fosil e minerales.
Multe spesies importante abita en la tera savaje jigante de Alaska, incluinte ursos blanca, renos e lupos.
Xefes de tribus artica ia bonveni la cambia, ma republicistes oposa lo.
En janero, a mera dias ante la fini de sua periodo presidental, Trump ia completi vende la diretos de fora per petrolio sur sirca 5% de la conserveria.
Ocupante sirca 78 mil cilometres cuadrida, la Refujeria Nasional de Viventes Savaje es comun descriveda como la parte final cual resta de la tera savaje grande de America.
En sua campania, Biden ia promete proteje la abitada.
@T Bielarus es acusada de secuestra un avion
@L aora_oji/2021/bielarus_es_acusada_de_secuestra_un_avion
====== Bielarus es acusada de secuestra un avion ======
24 maio 2021
Paises ueste ia espresa sua coleria a la diverje obligada de un avion portante un ativiste bielarusce en la Uni European ier.
Xefes de la UE va discute sua responde a lo cual los ia descrive como un "secuestra" e cual la departe de esternas esuan ia nomi "un ata xocante".
Bielarus ia obliga la avion, destinada a Lietuva, a atera en Minsk, sitante un menasa de bomba. Lo ia aresta alora Roman Protasevich, jornaliste e ativiste bielarusce.
La om de 26 anios ia vola de Atina en un avion de Ryanair. La avion ia debe atera en Vilnius, ma ia es ancora en la airospasio de Bielarus cuando la autoriosas bielarusce ia envia un avion xasante per diverje lo a sua capital, Minsk.
Otra pasajores ia dise ce la ativiste ia es "estrema asustada" e ia informa los ce el va fasa la puni de mori.
Difusores governal en Bielarus ia dise ce Presidente Alyaksandr Lukashenka ia dona personal la comanda per la aveni.
Pos gania un eleje disputada en agosto pasada, Lukashenka, ci ave 66 anios e governa Bielarus de 1994, ia colpa forte la voses disentinte. Multe figures oposante ia es arestada, e otras ia fuji escluida de la pais.
La aveni ia es sever desaprobada tra tota la Uni European, con ce paises ia urje la libri instante de Protasevich e un investiga completa.
La avion ia atera final en Vilnius a plu ca ses oras pos sua ora de ariva intendeda.
@T Bombas matante a la airoporto de Kabul
@L aora_oji/2021/bombas_matante_a_la_airoporto_de_kabul
====== Bombas matante a la airoporto de Kabul ======
27 agosto 2021
Presidente Joe Biden dise ce la evacua esuan de Kabul va continua, an pos un ataca djihadiste cual ia mata plu ca 90 persones, incluinte 13 membros de la fortes armada esuan.
"Nos debe completi esta mision," el ia dise. El ia promete ance trova los ci ia reali la ataca.
Plu ca 100 mil persones es ja evacuada de Afganistan. Ma multe plu ia vade a la airoporto ante cuando la soldatos esuan va parti a la fini de agosto.
La atacas ier ia aveni sirca 18:00 de ora local. La prima ia ojeti la Porton Abaderia, do soldatos esuan ia prosede la persones entrante a la airoporto, e ia es segueda par sparas.
Pos alga minutos, la esplode du ia aveni a un otel cual ofisiores brites usa per prosede afganis ci espera viaja a la Rena Unida.
Un fola vasta de persones ia asembla, esperante ce on va permete los a es evacuada, an pos avertis par ofisiores esuan e brites sur un risca sustantial de bombas umana par la ramo rejional de Daex. Acel organiza djihadiste ia dise plu tarda ce lo ia reali la bombis ier.
Des-tre soldatos esuan ia es entre la persones matada. Esta es la moris prima de militares esuan en Afganistan pos febrero 2020. Biden ia descrive los como "eroes ci ia fa un mision compatiosa per salva la vives de otras".
Jeneral Frank McKenzie, xef de la Comanda Sentral SUA, ia dise ce la menasa djihadiste resta alta, ce la fortes esuan labora con la talibanes per atenta preveni plu atacas, e ce la talibanes ia preveni ja multe. Ma la ataca va complica multe la evacuas ante la limita de tempo.
Sirca 5000 persones espeta a la airoporto, e multe plu atenta ancora pasa tra la puntos de controla ensircante.
Turcia ia anunsia ce sua soldatos va retira se, pos furni securia a la airoporto tra ses anios.
@T Cameles evade un sirco en Madrid
@L aora_oji/2021/cameles_evade_un_sirco_en_madrid
====== Cameles evade un sirco en Madrid ======
6 novembre 2021
La polisia espaniol dise ce oto cameles e un liama ia es libre sur la stradas de Madrid en la note pasada, pos evade un sirco visina.
La animales ia es videda a sirca la ora sinco, vagante en Carabranchel, un distrito sude, prosima a la loca presente de la sirco. Sirco Quirós, cual posese los, ia culpa un sabota par ativistes per diretos de animales.
Scrivente en Twitter, la polisia nasional ia mostra fotos de la oto cameles de du jibas e la liama pigrinte a un canto. "La polisia ia trova los e ia atende los per pote reprende los secur e sana," los ia twita.
On no ia indica esce la animales, conoseda per sua abitua de sputa, ia resiste cuando la polisia ia ariva per deteni los.
Mati Munoz, un de la manejores de la sirco, ia espresa sua lejeri ce la fujores pelosa ia es secur caturada.
"No cosa ia aveni, con grasias a Dio," el ia dise, ajuntante ce la sirco ia cexa formal pos descovre ce la serca eletrical de la ensirca de la animales es taliada. "Nos crede [ce la evade ia es] causada par un ata de sabota par grupos per diretos de animales ci protesta en cada anio."
Cameles bactrian ave du jibas e pelos densa. Los ia orijina en la desertos de Asia sentral e este, e ave un capasia estracomun per survive en situas estrema. An tal, la majoria grande de los es aora domada.
@T Camputxa acusa ambientistes de insulta la re
@L aora_oji/2021/camputxa_acusa_ambientistes_de_insulta_la_re
====== Camputxa acusa ambientistes de insulta la re ======
22 junio 2021
En Camputxa, un corte ia acusa tre ativistes ambientiste de conspira contra la governa e insulta la re. La membros de la grupo Madre Natur ia es arestada pos documenti un supraflue de dejetada en la rio Tonle Sap en Phnom Penh.
La lege camputxa contra insulta la re es relativa nova, e lo no es clar como la ativistes ia viole lo. La tre persones fasa entre sinco e des anios en prison.
La acusores ia dise ce "la atesta colieda par la polisia ia es un insulta a la re" sin plu esplica.
Oposores ia averti ce esta lege, introduida en 2018, es usada como metodo de silenti disentores.
La fundor de Madre Natur, Alejandro Gonzalez-Davidson, ci ia es deportada en 2015 pos critica un projeta per un parario controversa, ia es acusada en asentia.
En maio, tre otra promovores relatada a la grupo ia es condenada a entre 18 e 20 menses en prison pos organiza un protestas contra un proposa de pleni un lago en la capital con arena.
Camputxa es un monarcia constitual, do cuasi tota la potia es en la manos de Hun Sen, ministro xef, ci dirije la pais tra desenios.
@T Canadianes ferida par cade en neva pote litiga sites
@L aora_oji/2021/canadianes_ferida_par_cade_en_neva_pote_litiga_sites
====== Canadianes ferida par cade en neva pote litiga sites ======
22 otobre 2021
La Corte Suprema de Canada ia judi ce munisipas no es imune contra alegas de descura o culpablia en pertine a desnevi.
La caso ia es realida par un fem ci ia feri se en asende neva en Nelson, Columbia Brites, en 2015. Aora la litiga par Taryn Joy Marchi va es denova prosededa.
La deside par la corte ier va ativi cisa un cuantia vasta de litigas nasional a tema de cades pos lisca.
La caso ia atrae atende vasta. La sites Toronto e Abbotsford ia ata como intervenores en lo, como ance avocatos jeneral de la provinses Alberta, Columbia Brites e Ontario.
Sites canadian spende ja sentos de miliones de dolares a desnevi en cada anio.
Marchi ia atenta litiga la site Nelson pos feri sua gama en atenta asende un monton de neva per ateni la troteria pos parci sua auto. La site ia desnevi alga spasios de parci, cumulante la neva longo la borda de la troteria, sin crea un via de pasea.
La judor prima ci ia escuta la caso ia dise ce Marchi ia es "la autor de sua propre mal fortuna" e ia aseta la riscas cuando el ia comensa asende. La corte basa ia judi ce desnevi es un politica esensal de la site e donce imune contra litiga.
Ma la Corte Suprema ia trova ce acel deside es tro larga. An si la deside de furni un servi de desnevi pote es videda como un politica jeneral munisipal, la corte ia judi ce esta no es vera per la elejes par la site sur cual partes lo va desnevi.
"Desnevinte la spasio de parci a Strada Baker, la Site ia invita membros de la publica a usa los per asede botecas longo la strada," la judi dise. "La acusor ia atenta fa esata esta cuando el ia cade en un monton de neva creada par la Site en curso de desnevi."
@T Castro resinia como xef de la Partito Comuniste Cuban
@L aora_oji/2021/castro_resinia_como_xef_de_la_partito_comuniste_cuban
====== Castro resinia como xef de la Partito Comuniste Cuban ======
17 april 2021
Raúl Castro dise ce el resinia como la xef de la Partito Comuniste Cuban, fininte la ses desenios de potia de sua familia.
Castro, ci ave 89 anios, ia informa un congresa de la partito ce el transfere la xefia a un jenera plu joven "plen de pasion e spirito antiimperaliste". Sua susedor va es induida par votas a la fini de la congresa de cuatro dias.
Esta cambia, cual on ia espeta, fini la epoca de gida formal par el e sua frate Fidel Castro, cual ia comensa con la revolui en 1959.
An si Castro no ia aproba un susedor, on crede jeneral ce la xefia de la partito va es donada a Miguel Díaz-Canel, ci ia deveni la presidente de Cuba en 2018.
Raúl Castro ia es la secretor-jeneral de la partito pos susede sua frate en 2011. Fidel ia gida la revolui cual ia suverti la governa cuban en 1959, cuando Raúl ia servi como un de sua comandores.
Fidel Castro ia gida la pais asta deveni malada en 2006. En 2008 el ia transfere la presidentia a sua frate, e el ia mori en 2016.
Raúl ia supravide un boni de relatas con la Statos Unida entre 2014 e 2016, incluinte discutes notable con Presidente Barack Obama en 2016. Ma la situa ia deveni plu tensa su Donald Trump, ci ia repone punis political.
Joe Biden, la presidente corente de la SUA, ia promete deseveri alga de la punis ajuntada par Trump, an si la Casa Blanca ia dise ier ce un cambia de politica en relata con la isola no es entre sua consernas major.
A la congresa a venerdi, Castro ia dise ce sua pais es preparada per "developa dialoga respetosa" con la Statos Unida ma ce lo no va aseta fa comprometes a sua "politica stranjer e ideales".
La cambia a la apico de la partito aveni a un tempo cuando la governa cuban fronti sua crise economial la plu grave de desenios. La pandemica de covid, reformis finansial e restrinjes poneda par la governa de Trump ia afeta mal la economia, cual ia diminui par 11% en la anio pasada.
Un reformi de mone, inisiada a 1 janero e longa espetada, ia atenta fa ce la economia e companias governal opera plu eficas. Ma lo ia redui ance la bujetas de cubanes comun, de ci multe proposa plu libria economial en la pais.
@T Cavalores esuan forsa migrores aitian a revade
@L aora_oji/2021/cavalores_esuan_forsa_migrores_aitian_a_revade
====== Cavalores esuan forsa migrores aitian a revade ======
22 setembre 2021
En la SUA, un investiga es inisiada par imajes cual pare mostra polisiores de frontera sur cavalos ci forsa migrores a revade a un rio.
La fotos e videos, vasta distribuida en redes sosial, mostra la cavalores usante sua redines como flajelos contra la migrores e movente los en dirije a la Rio Grande en Texas. Aitianes ia traversa la frontera per trova comables per sua familias e ia es blocida par la cavalos.
Alejandro Mayorkas, ministro de securia interna, dise ce sua departe va investiga alegas de maltrata. El ia dise ce la polisiores ia atenta maneja la traversores de la rio.
Sirca 13 mil migrores, xef aitian, ia asembla en un campa tempora su un ponte cual lia Del Rio en Texas a Ciudad Acuña en Mexico.
Jen Psaki, portavose de la Casa Blanca, ia dise ce la imajes es difisil per regarda: "Me ia vide alga de la metraje. Me no ave la contesto plen. Me no pote imajina en cual contesto acel ta conveni. Ma me no ave detalias ajuntada, e serta me no crede ce cualcun vidente acel metraje ta opina ce lo es asetable o conveninte."
Alga usores de redes sosial ia dise ce la imajes remente a la violentia videda en la eda de sclavia en la SUA.
La fotografiste Paul Ratje, ci ia fa la fotos, ia dise: "Alga de la migrores ia comensa core per atenta sircoveni la cavalores, e un de la polisiores ia saisi la aitian en la imaje a la camisa, e final el ia pivote el en cuando la cavalo ia trota en sirculo."
Ratje dise ce el no crede ce acel om ia es ferida. Corta a pos, la cavalores "ia calmi a grado, e los ia comensa lasa ce persones entra".
Raul Ortiz, xef de la Patrulia de Frontera Esuan, ia dise ce on investiga la aveni per serti ce on no ia ave un responde "nonasetable" par sua ofisiores. El ia ajunta ce los opera en un ambiente difisil, atentante distingui migrores e contrabandores.
La ajenteria de la Nasiones Unida per refujadas ia indica ce lo monitori espulsas par la SUA a Aiti, ajuntante ce lo es esensal ce persones ci teme es persegueda pote refuja se.
La governa esuan ia reporta un aumenta de migrores arivante a la frontera con Mexico en esta anio. La cuantia de persones ala detenida en julio ia esede 200 mil a la ves prima en 21 anios, longo datos governal.
@T Cenianes trapida en un conjesta enorme
@L aora_oji/2021/cenianes_trapida_en_un_conjesta_enorme
====== Cenianes trapida en un conjesta enorme ======
27 agosto 2021
En Nairobi, la capital de Cenia, motoristes ia es frustrada par spende multe oras de la note en un conjesta enorme de trafica.
"Riable ce me reveni a casa a 4 de matina pos un viaja de 11 oras," un avocato ia tuita. Otra viajores dial ia esplica ce los ia ariva a casa a un ora conveninte per parti denova per labora.
Nairobi esperia comun mal conjestas, ma lo en la sera de jovedi ia es la plu estrema cual multe abitores pote recorda.
Videos e fotos ia mostra motoristes coler, ancora trapida sur un de la vias xef de la site en la temprana de la matina ier. Un tuitor ia dise ce persones ia parci a lado de la via per dormi en sua autos.
Un spesialiste de comunica ia comenta ce algun ia ta pote vola a Doha en Catar e fa ala du oras de labora en la tempo cual el ia peri en vade a sua casa.
La conjesta ia aveni sur un estende de via do on construi un autovia nova grande, ma on reporta ce lo ia es malida par un asidente.
Alga persones ia sujesta ce la contratores debe furni vias alternativa en cuando esta labora es fada; otras ia recomenda ce companias permete telelabora a sua empleadas.
La via cual on construi parteni a un projeta de 550 milion dolares per furni un via rapida entre sites a norde-ueste de Nairobi e la airoporto internasional xef de la pais. Cuando completida, lo va estende tra 27 cilometres de la capital e va fasili la flue de trafica a e de la sentro.
Lo es finansiada e construida par la Corpora Xines de Via e Ponte, cual va opera la via en un asosia publica-privata.
La parte de la via la plu afetada par la conjesta resente lia la sentro de Nairobi a suburbes densa poplada en la este.
@T Chauvin es condenada a plu ca 22 anios en prison
@L aora_oji/2021/chauvin_es_condenada_a_plu_ca_22_anios_en_prison
====== Chauvin es condenada a plu ca 22 anios en prison ======
La polisior pasada blanca ci on ia condena sur la omiside de la afroamerican George Floyd en maio 2020 ia reseta un puni de 22,5 anios en prison.
La judor ia dise ce la longia de la prisoni de Derek Chauvin es fundida "sur tua malusa de un posto de fida e autoria, e ance la cruelia spesial donada" a Floyd.
Floyd ia ave 48 anios e ia mori pos cuando Chauvin ia ajena sur sua colo tra nove minutos.
Sua omiside en Minneapolis ia causa protestas global contra razisme e violentia par la polisia.
Chauvin, ci ave 45 anios, ia es condenada de omiside a grado du e de otra acusas en la mense pasada. En sua litiga, sua avocato ia descrive la mata como "un era fada en bon fida".
Chauvin ia es ance comandada a rejistra se como un criminor predorin e ia es proibida de posese fusiles per la resta de sua vive.
El e tre otra polisiores pasada es, separada, acusada de viole la diretos sivil de George Floyd.
La familia Floyd e sua suportores ia bonveni la puni.
"Esta condena monumentin prosimi la familia Floyd e nosa nasion par un plu paso a sania par furni un senti de clui e respondosia," sua avocato Ben Crump ia tuita.
Bridgett Floyd, sore de George, ia dise ce la condena "mostra ce final on trata seria la problem de violentia polisial" ma ce on ave ancora "un via longa per traversa".
Presidente Joe Biden ia dise ce la condena "ia pare conveni" ma ia confesa ce el no conose tota la detalias.
@T Chennai es grave inondada
@L aora_oji/2021/chennai_es_grave_inondada
====== Chennai es grave inondada ======
8 novembre 2021
Pluves forte e tempestas lamposa ia causa inondas grave en la site Chennai en Barat sude. On ia reporta no persones mor, ma ofisiores en la stato Tamil Nadu, de cual Chennai es la capital, ia averti per evacua persones de rejiones basa.
Imajes mostra arbores desradisida e autos sumerjida par la acua, cual ia leva rapida per bloci vias. Esta es la pluve la plu forte en la site pos 2015.
An si Chennai es comun colpada par pluves forte en esta parte de la anio, espertas dise ce developas noncontrolada e un mal sistem de projeta urban aumenta la destrui e caos.
Ance la cambia de clima causada par la caldi global ia contribui a la problem, tal ce pluves estrema es aora plu probable e plu frecuente.
Ier, partes de Chennai ia esperia rompes de eletrica tra alga oras cuando la departe eletrical ia descomuta la furni per preveni casos de eletrocuta.
Videos mostra persones salvada par barcos de cauxo en cuando acuas brun e fangosa entra versante a sua casas. La Forte Nasional de Responde a Desastres e la armada aida en esta labora de salva.
La plu de la stradas xef es inondada de saturdi, staniante la site intera. Alga persones en redes sosial ia dise ce la situa es tan grave como la deluvias de 2015, cuando plu ca 200 persones ia perde sua vives en la stato.
Meteorolojistes ia dise ier ce on previde un continua de pluve forte tra la 48 oras seguente en partes variosa de Tamil Nadu, provocante autoriosas a declara un pausa de du dias per instituidas educal.
Tota scolas e universias en Chennai e tre distritos visina va resta cluida, e ofisiores ia consela contra viaja en la situa perilosa. On ia recomenda ance ce pexores longo la costa no vade sur la mar.
La munisipa de Chennai dise ce lo ia abri sentros aidante de campas medical tra la site e ce lo distribui comables a vitimes de la inondas.
La ministro xef de la stato ia nota ce Chennai, como ance 11 otra distritos, ia es afetada par plu ca 20 sentimetres de pluve, e ia ajunta ce el ia demanda ce tota sua ministros aida en la labora de salva.
@T Colombia interveni militar contra protestores
@L aora_oji/2021/colombia_interveni_militar_contra_protestores
====== Colombia interveni militar contra protestores ======
30 maio 2021
En Colombia, la armada ia comensa tensa sua controla de la site Cali pos semanas de protestas antigovernal ala.
On reporta ce la stradas es jeneral abandonada pos la comanda par Presidente Iván Duque per un interveni militar.
A la min sinco persones ia mori en Cali a la sera de venerdi, la vitimes la plu resente en un mense de protestas cual ia prende deses de vives.
La protestas ia comensa en april cuando la governa ia proposa un reformi cual ta basi la limita supra cual on imposta salarios. La governa ia argumenta ce esta ia es nesesada per lejeri problemes economial, ma multe colombianes de clase media ia teme ce los va cade en povria como resulta.
Pos cuatro dias de protestas tra la pais, Duque ia retira la projeta, ma la protestas ia estende per oposa violentia polisial, povria e la crise de sania en la pais.
Du semanas de negosias entre la governa e protestores ia fali progresa.
Cali, la sentro de la protestas, ia es su proibi de sorti en la note de venerdi, e la interveni militar inclui ance alga otra partes de Colombia. Protestores en Bogotá, la capital, ia dise ce los va revade oji sur la stradas per esije la sesa de violentia par la polisia.
Un de la persones matada a venerdi ia es un ofisior de la avocato jeneral, estra sua oras de labora. Esta om ia spara a protestores ante es mesma matada.
Organizas per diretos umana ia acusa ce la polisia ia usa gas lacrimojen e, a veses, muni de combate per sperde la protestores.
@T Condenas a mori pos violentia en RD Congo
@L aora_oji/2021/condenas_a_mori_pos_violentia_en_rd_congo
====== Condenas a mori pos violentia en RD Congo ======
16 maio 2021
Dudes-nove persones es condenada a mori en la Republica Democrata de Congo, en relata con violentia en la capital, Kinshasa.
Un polisior ia es matada e deses de otras ia es ferida par combate entre grupos muslim oposante. Estas ia asembla per la festa Eid al-Fitr a la fini de ramadan, la mense de juna, ma ia disputa sur ci va gida la aveni.
En fato, la puni de mori es no plu usada en RD Congo. La condenadas va pasa sua vives en prison en loca.
La polisia ia usa gas lacrimojen e baletas de cauxo per sperde miles de persones ci ia asembla estra la Stadio de Martires en Kinshasa a jovedi.
Cuatrodes-un persones ia es arestada a la sena e ia es litigada a la dia seguente. La sesion de corte ia es direta televisada e ia continua tra la note intera.
On ia fa 31 condenas: 29 persones ia es condenada a mori e la otra du ia es condenada a sinco anios en prison. Si on considera la rapidia con cual la condenas ia es distribuida, demandas va aveni probable sur la justia de la prosede.
Alga de la polisiores ferida par la violentia es ancora en state crisin.
@T Construidas istorial destruida par foco en Vila Capo
@L aora_oji/2021/construidas_istorial_destruida_par_foco_en_vila_capo
====== Construidas istorial destruida par foco en Vila Capo ======
19 april 2021
En Sudafrica, un focon forestal sur Monte Table ia ateni la campus visina de la Universia de Vila Capo, obligante la evacua de sentos de studiantes.
La flamas ia sperde rapida pos comensa en la matina de ier, prosima a un monumento a la politiciste Cecil Rhodes. Un restorante ia es destruida. La biblioteca Jagger e otra construidas de la universia ia es ance afetada.
Cuatro elicotores cade acua sur la focon. Pompores ia es avisada a 09:00 de ora local, ma la flamas ia sperde par causa de la umidia basa e la savana seca.
La focon ia crea sua propre venta, plu cresente sua rapidia de move. La organiza Parces Nasional de Sudafrica ia estima ce pompores va spende a la min tre dias per controla la arde. "Pos la investiga inisial, lo es suposada ce la orijina de la focon ia es un foco abandonada de vagabon," la organiza ia comenta.
Plu ca 120 pompores ia es enviada a la loca, e un de los ia es ospitalida con feris de arde.
La Molin de Mostert, la sola molin de venta completa e survivente en Sudafrica, ia es ance destruida. Lo ia es construida en 1796.
On ia averti abitores local sur fuma e suje en la aira, e ia recomenda clui fenetras e portes. On urje ce paseores en la Parce Nasional de Monte Table parti, e ce motoristes ci ia parci en la rejion reprende sua veculos.
@T COP26 fini con un acorda, an si diluida
@L aora_oji/2021/cop26_fini_con_un_acorda_an_si_diluida
====== COP26 fini con un acorda, an si diluida ======
14 novembre 2021
En relata con la crise de clima, nasiones ia fa un acorda par cual, en la opina de sua suportores, la ojeto de restrinje la caldi global a 1,5°C va resta atenable. Esta es la limina per securia cual ia es posada par la acorda de 2015 en Paris.
La negosias ia continua asta tarda ier, en cuando governas ia disputa articles sur la desusa de carbon, la redui de emetes de gas invernerial e la furni de mone a la mundo povre.
La "Trata Climal de Glasgow" ia es adotada an pos un interveni tarda par Barat per dilui un frase sur la "elimina gradal" de carbon a mera un "redui gradal".
Longo conselas siensal, la prometes fada sur reduis de emetes a esta confere de du semanas en Scotland ia es multe min ca los nesesada per limita la leva de temperatur a 1,5°C. En loca, tota paises ia acorda reveni a negosias en la anio veninte, a un confere en Misre, per reesamina sua projetas nasional, con intende de estende sua reduis proposada.
Alok Sharma, la ministro de governa brites ci ia preside la discutes COP26 en Glasgow, ia reconose la estende de la taxe restante: "Nos pote dise aora con credablia ce nos ia teni 1,5°C en vive. Ma sua pulsa es debil e lo va survive sola si nos reali nosa prometes e tradui nosa obligas a atas rapida."
António Guterres, la secretor jeneral de la NU, ia averti simil ce plu labora urjente es nesesada: "Nosa planeta frajil pende de un filo. Nos bateta ancora a la porte de desastre climal. Lo es la tempo per entra a la moda de crise -- o nosa capasia de ateni zero emetes neta va es mesma zero."
La revade a negosias en 2022, per inisia un prosede anial de revisa projetas nasional a tema de gases invernerial, va es un prosede difisil, car alga paises argumenta ce los fa ja tan multe como los pote. An la paso peti de acorda revisa la projetas ia es realida sola pos vinse oposas forte, ma lo es esensal si la mundo va evita suprapasa la limina de 1,5°C.
Paises povre ia es frustrada, disente ce la acorda no trata sua consernas sur "perde e dana". Esta refere a la destrui causada par clima estrema, cual afeta aora tal paises en modo plu sever e frecuente ca on ia predise.
La finansia climal presente, furnida a paises per aida los a investi en tecnolojia verde e otra metodos de redui emetes, e a adata a la efetos de la crise de clima, no reali sua prometes. E an si lo ta es plen realida, lo no ta sufisi contra esta perdes grave e desastres umana.
Ma nasiones rica ia esita acorda cualce sistem per finansia la perde e dana, partal car alga de la debate ia es presentada en termas de "compensa", cual paises rica no pote aseta.
En la oras cluinte de la confere, multe nasiones povre ia aseta un defeta a sua solisitas de un deside plu forte sur perde e dana, per permete ce on aproba a la min la acorda plu jeneral.
La confere ia solve alga problemes tecnical cual ia preveni la reali de partes de la acorda de 2015. Esta problemes, pertinente a la mercato de carbon e la transparentia con cual paises monitori e reporta sua emetes, ia carga ja la consentas anial sur clima tra ses anios, ma aora on ia ateni ultima comprometes.
Un de la partes la plu controversa en la deside final ia es un deside neblosa espresada per redui gradal la suvenis per combustables de fosil "noneficas".
Espertas sur enerjia sabe serta ce la abandona de carbon es esensal, ma la oposa a inclui un refere a la elimina completa, spesial par usores major de carbon como Xina, Barat e Sudafrica, ia mostra como difisil va es la fini de la usa global de la combustable la plu susia en tempo conveninte.
@T COP26 promete fini la desforesti ante 2030
@L aora_oji/2021/cop26_promete_fini_la_desforesti_ante_2030
====== COP26 promete fini la desforesti ante 2030 ======
2 novembre 2021
Plu ca 100 xefes de mundo va promete fini e reversa la desforesti ante fini de 2030, par la acorda major prima de la confere climal COP26.
Brasil, do estendes grande de la foresta Amazona ia es cadeda, va es entre la paises oji suscrivente la acorda. La promete inclui cuasi 20 mil milion dolares de finansia publica e privata.
Espertas ia bonveni la deside, ma ia averti ce un acorda en 2014 "ia fali lenti an pico la desforesti" e ce on debe reali sua prometes.
La cade de arbores contribui a la cambia de clima car la forestas asorbe cuantias enorme de diosido de carbono. Forestas diminuida pote ance relasa carbono. Si on sutrae tro multe arbores, siensistes averti ce la planeta va pasa un punto pos cual la clima va cambia en modos subita e nonpredisable.
On vide la confere de du semanas en Glasgow, Scotland como esensal per controla la cambia climal.
La paises ci dise ce los va suscrive la promete representa sirca 85% de la forestas de la mundo. Los inclui Brasil, Canada, Indonesia, Rusia, Xina e la Republica Democrata de Congo.
Alga de la finansia va aida paises developante a restora tera danada, batalia focones forestal e suporta comunias nativa.
Governas de 28 paises va promete ance elimina la desforesti en la comersia global de comedas e otra produidas cultival como olio de palma, soia e cacau. Esta industrias contribui a la perde de forestas par cade arbores per crea pastos per animales o locas do granes pote crese.
Plu ca 30 de la companias la plu grande de mundo va promete fini investi en ativias relatada con desforesti. E un reserva de 1,5 mil milion dolares va es instituida per proteje la foresta pluvosa du de la plu grandes de mundo, en la Basin Congo.
@T Corea Norde abandona la Olimpiales de Tokyo
@L aora_oji/2021/corea_norde_abandona_la_olimpiales_de_tokyo
====== Corea Norde abandona la Olimpiales de Tokyo ======
6 april 2021
Corea Norde ia anunsia ce lo no va partisipa en la Juas Olimpial en Tokyo en esta anio, disente ce lo ia deside esta per proteje sua atletas contra covid.
Esta fini la esperas de Corea Sude ce lo pote usa la Juas per boni sua relatas con Corea Norde pos un fali de negosias political entre la du paises.
En 2018, la du ia envia un sola ecipo juntada a la Olimpiales de Inverno, e un serie de conferes istorial ia segue entre la xefes.
Pyongyang continua declara ce lo ave no casos de la virus, ma espertas medical crede ce esta es nonprobable.
Sua anunsia sinifia ce Corea Norde deveni la pais major prima cual va evita la Olimpiales posponeda de 2020 par causa de la pandemica. La Juas va comensa a 23 julio.
Esta va es la ves prima cuando Corea Norde no ia partisipa en la Olimpiales de Estate pos 1988, cuando lo ia boicota la Juas en Seoul en la tempo de la Gera Fria.
Entretempo en Japan, un aveni preparante per la Juas Olimpial ia es canselada cuando infetas de covid ia apare a un campa de eserse per la ecipo japanes de polo de acua. Sete persones con la virus ia es positiva detetada.
Esta segue un anunsia ce on va cansela un parte de la rele de torxa olimpial, tra la site Osaka, do la cuantia de infetas ia ateni un altia recordo.
On ave un ansia cresente en Japan ce plu varias plu comunicable de la coronavirus crea cisa un onda cuatro de infeta en la pais.
@T Corea Norde ia pare reinisia un reatador nucleal
@L aora_oji/2021/corea_norde_ia_pare_reinisia_un_reatador_nucleal
====== Corea Norde ia pare reinisia un reatador nucleal ======
30 agosto 2021
Corea Norde ia pare reinisia sua reatador nucleal en Nyongbyon, diseda par un reporta de la Ajenteria Internasional per Enerjia Atomal (AEIE). On crede ce la compleso produi plutonio, un sustantia usada per armas nucleal.
La AIEA, cual reporta a la Nasiones Unida, ia es escluida par Corea Norde en 2009 e depende aora de imajes par satelite per fa sua evaluas. La organiza dise ce de julio la reatador emete acua de fri, lo cual sujesta ce lo es operante.
Longo la AIEA, esta es la indica prima de ativia de operas ala pos desembre 2018, a un pico de menses pos cuando Donald Trump ia encontra Kim Jong-un en Singapor.
Nyongbyon, un compleso nucleal con un reatador de 5 megavates, es a la cor de la program nucleal de la pais. Tra tempo longa, espertas distante monitori lo per atenta comprende cuanto armas la governa es capas de fabrica.
La AIEA ia dona ance plu detalias sur un laboreria radiocimical cual reprosede combustables nucleal usada, en la mesma compleso. La reporta dise ce la laboreria ia opera tra sinco menses asta julio de esta anio, sujestante ce lo ia prosede un consinia intera de combustable usada.
La ajenteria, cual promove usas pasosa de enerjia nucleal e oposa sua usa per cualce intende militar, ia dise ce la developas en Nyongbyon es "profonda disturbante" e un viole clar de desides par la Consilio de Securia de la NU.
La ministreria de esternas de Corea Sude ia comenta ce la governa ala "monitori constante la ativia de la Norde sur enerjia nucleal e misiles, en colabora prosima con la Statos Unida".
Corea Norde ia continua developa armas nucleal pos la esclui de esaminores AIEA, realinte sua proba la plu resente en 2017.
@T Corea Norde lansa misiles de un tipo nova
@L aora_oji/2021/corea_norde_lansa_misiles_de_un_tipo_nova
====== Corea Norde lansa misiles de un tipo nova ======
26 marto 2021
En sua declara prima pos lansa misiles ier, Corea Norde ia dise ce los ia es "tatical gidada de un tipo nova". Esta ia es la lansa balistical prima par la pais en cuasi un anio, e la prima pos cuando Joe Biden ia deveni la presidente esuan.
Biden ia dise ce la SUA va "responde conveninte", ajuntante ce el ta bonveni un solve diplomata, constrinjeda a un resulta final de desnucleali. La SUA, Japan e Corea Sude ia condena la probas.
Longo un deside par la Consilio de Securia de la NU, Corea Norde es proibida de proba misiles balistical.
La declara par la pais oji, publicida tra KCNA, sua ajenteria governal de novas, dise ce la du armas ia colpa un blanco probada a 600 cilometres de la costa este de Corea Norde, negante un evalua japanes ce los ia vola tra pico plu ca 400 cilometres.
On ia sita Ri Pyong Chol, la gidor major ci ia supravide la proba: "La developa de esta sistem de armas es de importa grande per forti la potia militar de la pais e impedi menasas militar de tota spesies."
La declara ia ajunta ce la misil nova es capas de porta un carga de 2,5 tones, sufisinte per porta un ojiva nucleal.
La xef de la pais Kim Jong-un no ia es presente a la proba. La paje fronte de la jornal governal ia mostra el esaminante buses nova de pasajor.
@T Corea Norde televisa la Olimpiales pos la fini
@L aora_oji/2021/corea_norde_televisa_la_olimpiales_pos_la_fini
====== Corea Norde televisa la Olimpiales pos la fini ======
13 agosto 2021
Corea Norde ia televisa sua presenta prima de la Juas Olimpial de Tokyo, a du dias pos la rituo de clui.
Televisa Sentral Corean ia difusa 70 minutos de un max de futbal entre femes de Txile e la Rena Unida. La max ia aveni vera a 21 julio.
La max ia es mostrada sin comentas e en densia basa, lasante nonclar como on ia oteni la metraje.
En anios pasada, Corea Norde ia difusa la Juas Olimpial a alga dias pos sua rituo de abri. La Uni Asia-Pasifica de Difusa ia ofre la Juas a la pais par un asosia con SBS, un difusor de Corea Sude.
Corea Norde no ia envia un delega a la Juas en Tokyo, disente ce lo vole proteje sua atletas contra covid. Pyongyang dise ce la pais ia ave no casos de la virus, ma espertas dise ce esta es nonprobable.
La deside de nonpartisipa ia fini la esperas de Corea Sude per usa la Juas per engrana amin con la Norde.
En 2018, la du Coreas ia entra un ecipo juntada a la Olimpiales Invernal, gidante a un serie de consentas importante.
Esta anio es la ves prima a cual Corea Norde no ia partisipa en la Juas Olimpial de Estate pos 1988, cuando lo ia boicota la Juas de Seoul en la Gera Fria.
@T Cornelis George Boeree (1952-2021)
@L aora_oji/2021/cornelis_george_boeree_1952-2021
====== Cornelis George Boeree (1952-2021) ======
8 janero 2021
Con tristia profonda, nos anunsia la mori de George Boeree, la creor de elefen. El ia ave 68 anios.
Jorj ia nase en Nederland, en la vila peti Badhoevedorp prosima a Amsterdam, a 15 janero 1952, fio de Eberdina van Olffen e un otra Cornelis George Boeree. En desembre 1956, el ia traversa la Mar Atlantica con sua jenitores e frate per abita sur Isola Longa en la SUA, a la costa de la stato York Nova. Ala, como enfante joven, el ia aprende engles, en ajunta a sua lingua prima, nederlandes.
Pos studia italian e esperanto en pasa un estate en Australia, Jorj ia dirije sua mente creosa a la idea de desinia sua propre lingua aidante internasional en 1965. Inspirada par un teatral de Molière cual presenta alga linias de sabir -- la creol parlada par marinores e mercatores en la Mediteraneo tra multe de la milenio du -- el ia desira produi un sistem simple ma ance bela e natural. El ia dedica multe tempo a prepara un vocabulo con formas estetical plasente.
Jorj ia studia ance franses en sua liseo, de cual el ia gradua en 1969 con intende de deveni un arcitetor. En 1972, el ia sposi Judy Kovarik e los ia reloca se a Pennsylvania, ancora en la norde-este de la pais. Pos du plu anios, Jorj ia gania un diploma laural de psicolojia a la Universia Statal de Pennsylvania, e en 1979 e 1980 el ia progresa a diplomas de mestre e dotor a la Universia Statal de Oklahoma, spesialinte sur aspetas filosofial de psicolojia.
El ia deveni pronto un profesor a la Universia de Shippensburg, Pennsylvania, instruinte studiantes sur teorias de personalia e sur la istoria de psicolojia, entre otra temas. En sua carera de tredes anios, Jorj ia scrive multe sur psicolojia e budisme en la interede, e ia crea la testos prima enlinia de aprende psicolojia sin custa. Multe de esta obras ia es traduida a otra linguas, incluinte deutx, espaniol e balgarsce.
Sua desira per crea un lingua aidante ia es reveliada cuando el ia ensenia un curso de psicolinguistica, e pos alga plu anios de labora a lo, el ia deside final publici sua "lingua franca nova" en la interede en 1998. La lingua ia atrae rapida un bon cuantia de aprendores ci ia aida Jorj a developa plu la gramatica e vocabulo tra la du desenios seguente.
Jorj ia jubila en 2010, a la aniversario 58 de sua nase, ma ia manteni sempre sua interesa a psicolojia, filosofia e linguistica. En esta anios, el ia labora asidua per scrive articles ensiclopedial en elefen, prima en la vici de la comunia, e a pos en la Vicipedia elefen cuando esta ia abri en 2018. El ia tradui ance multe cantas, poesias e otra leteratur a elefen, como Leteras de la Tera par Mark Twain, Re Lear par Shakespeare, e, en 2019, sua propre obra grande La istoria de psicolojia.
A martedi 5 janero 2021, Jorj ia mori de canser de pancreas, en sua casa en Pennsylvania longo sua prefere, con sua sposa e du de sua tre fias. La comunia elefen ofre compatia sinsera a la familia. Inspirante a multe, el ia parti vera tro temprana de esta mundo. Reposa en pas, Jorj.
@T Corpos es trovada a un rio entre Sudan e Tigray
@L aora_oji/2021/corpos_es_trovada_a_un_rio_entre_sudan_e_tigray
====== Corpos es trovada a un rio entre Sudan e Tigray ======
3 agosto 2021
Deses de corpos ia encalia sur la riva de un rio a la frontera entre Itiopia e Sudan, longo reportas de abitores a la lado sudani. Alga de la corpos ia ave feris de spara; la manos de otras ia es liada.
La rio Setit es nomida la Tekeze en Itiopia. Lo flue tra Tigray, la rejion en la norde do fortes itiopian e soldatos aliada batalia rebelores de Tigray.
Un laboror per sania ci ia fuji a Sudan per evade la combate ia dise ce el ia entera des corpos en la semana pasada. El ia dise ce 28 plu ia es retraeda, incluinte sete ier.
Un ofisior sudani ia dise ce autoriosas local en la provinse Kassala ia trova sirca 50 corpos, parente de persones ci ia atenta fuji de la gera.
La governa itiopian ia fa no comenta ofisial sur la corpos. Ma ier, un conta de Twitter manejada par la governa ia dise ce un promove "propagandiste" sur un "masacra falsa" en la site Humera -- tra cual la rio Tekeze -- "ia es denova reviveda, usante imajes falsa e mostrante imajes xocante".
La combate en Tigray ia comensa en novembre entre la governa federal e la potia rejional, la Fronte de Libri la Popla de Tigray.
Esta gera de nove menses ia causa un crise enorme de persones sufrinte. Sirca milion persones es deslocada e sentos de miles es estrema fame.
@T Covid pospone la maraton de Beijing
@L aora_oji/2021/covid_pospone_la_maraton_de_beijing
====== Covid pospone la maraton de Beijing ======
25 otobre 2021
Xina ia pospone la maraton de Beijing asta un plu anunsia, su un surje de infetas de covid. La ofisior medical xef xines ia averti ce on espeta ce la eruta nova de casos va sperde plu.
La pais ia reporta plu ca 133 casos tra 11 provinses. Tota es liada a la varia delta de coronavirus, cual es fasil transmetable.
La situa crea ansia sur la capasia de Xina per manteni sua disposa de zero tolera a la virus, spesial en prosimi a la Juas Olimpial de Inverno 2022.
Aveninte en cada anio de 1981, la maraton de Beijing es un de la avenis la plu grande de sporte local en Xina. La corsa comensa tradisional en la Plaza Tiananmen e fini en la Plaza Selebra en la Parce Olimpial de la site.
On ia espeta ce sirca 30 mil persones va partisipa en la maraton, intendeda per 31 otobre. La organizores ia cansela la aveni "per preveni la risca de sperde la epidemica e proteje efetosa la sania e securia de la majoria de corores, empleadas e abitores".
Lo pare ce la surje nova de infetas ia es causada cuando grupos local de turi ia visita otra provinses e sites. Xina ia enforsa restrinjes de viaja, ia aselera la sistem de proba e ia recomenda ce cadun es plu vijilante.
Ofisiores ia proibi aora ce ajenterias de viaja organiza turis de un provinse a un otra si los envolve la rejiones pertinente. Entretempo, autoriosas en la capital Beijing ia dise ce los no va permete entras a la site par persones con istoria de viaja a paises afetada.
Multe paises, como Australia, ia move de un politica de zero tolera a un vive a lado de la virus.
An tal, Xina ia resta con sua stratejia de zero covid par reali isolis sever e probas e vasinis coletiva. Sirca 75,6% de sua popla -- 1,068 mil milion persones -- ia reseta ja dosas completa de vasin, longo la statistica de saturdi.
@T Covid preveni ce la mundo selebra la anio nova
@L aora_oji/2021/covid_preveni_ce_la_mundo_selebra_la_anio_nova
====== Covid preveni ce la mundo selebra la anio nova ======
1 janero 2021
Sirca la mundo, restrinjes ia es poneda a selebras de la anio nova, car multe paises batalia apicos subita en la cuantia de casos de coronavirus.
La ariva de la anio 2021 ia es spesial amortida en Europa, do on teme un varia nova e plu comunicable de la maladia.
Frans ia posti 100 mil polisiores per desasembla selebras e per enforsa un proibi de sorti pos 20:00. En Paris, un dui de la linias de metro es cluida. En sua parla de anio nova, Presidente Emmanuel Macron ia atenta responde a criticas sur la lentia de la prosede de vasini en sua pais, prometente evita "retardas nonjustable".
En England, do la varia nova de covid sperde spesial rapida, 20 milion persones en la rejiones la plu afetada debe resta a casa. La stradas de London ia es cuieta en la vijila de anio.
Ier, Er ia adota sua nivel la plu alta de restrinjes, proibinte tota visitas a otra casas, cluinte tota botecas nonesensal e limitante viajas a sinco cilometres.
Deutxland es aora encluida asta 10 janero. La governa ia despermete vende pirotecnicales, e ia restrinje sever la cuantia de persones ci pote asembla publica.
Canselor Angela Merkel -- en probable sua parla final de anio nova en acel posto, cual el intende renunsia pos nove menses -- ia critica teoristes de conspira. En un mostra rara de emosia, el ia dise ce el pote apena imajina como sinica e cruel tal mentis perilosa pare a la multe persones ci ia perde amadas a la virus.
En Italia, on ia proibi sorti pos 22:00, e bares, restorantes e la plu de botecas es cluida. Pape Fransisco no gida la servis a la vijila e dia de anio nova en Roma, pos sufri un recore de dole de anca.
Nederland es ance encluida asta 19 janero. Sua retroconta anial ia aveni pos portes cluida en un stadion de futbal en Amsterdam.
Turcia ia comensa cuatro dias de enclui, e ofisiores ia restrinje la selebras en multe statos e sites.
En New York, sola poca persones ia es permeteda a entra a Times Square per regarda la cade de la bal famosa. La plu de los ia es laborores medical e sua familias. Stelas ia presenta como usual en la aveni televisada, ma pirotecnicales ia es canselada en sites incluinte San Francisco e Las Vegas. Presidente Donald Trump en sua parla de anio nova ia descrive ia crea rapida de vasines como un "miracle medical", ma ia omete dise ce cuasi 350 mil esuanes ia mori de covid.
Un de la nasiones prima cual ia selebra la ariva de 2021 es Australia. Pirotecnicales ia es presentada en Sydney, ma persones no ia es permeteda a asembla a la porto per joia lo. Multe abitores de Sydney ia televide de casa, do on pote ave no plu ca sinco ospitadas.
En Xina, on ia cansela la pirotecnicales en Beijing e ia redui selebras tra la pais. Ma en Wuhan, do on crede ce la pandemica ia orijina, miles de persones ia asembla en la sentro de site per selebra la relasa de balones a la aira.
Japan ia cansela un aveni tradisional en cual Imperor Naruhito e otra membros de la familia imperal ta saluta persones.
En Barat, Delhi e alga otra sites ia proibi sorti a note per preveni asemblas grande.
Ma en Zeland Nova, do un enclui sever e cluis de frontera ia susede ja cuasi elimina la maladia, on ia selebra la anio nova en modo normal.
@T Cuatro gatos es salvada de un barco ardente
@L aora_oji/2021/cuatro_gatos_es_salvada_de_un_barco_ardente
====== Cuatro gatos es salvada de un barco ardente ======
4 marto 2021
La marina tai ia salva cuatro gatos capelroja ci ia es abandonada sur un barco ardente en la Mar Andaman.
La ecipo umana ia es ja evacuada, ma la marina ia descovre alga membros oblidada cuando lo ia esamina la loca per goteas de petrolio a pos.
Un marinor en jaceta inflable ia nada a la barco inversada, e ia pone la gatos sur sua dorso per prende los a securia.
On reporta ce la gatos ia sufri no feris e es sana. Sua salvores cura los aora a sua comanderia.
A martedi, la barco de pexa Phamonsin Nava 10 ia ensende e ia comensa afonda, a sirca 13 cilometres de Ko Adang, un isola nondevelopada cual parteni a la Parce Nasional Tarutao.
Tota oto ecipores ia salta de la barco en la mar. Los ia es salvada par un otra barco de pexa pasante.
Cuando la marina ia es clamada per esamina la situa, on ia descovre la gatos folida en junta sur un faxon de lenio.
Suofisior de clase prima Wichit Pukdeelon de la divide marinal per defende de aira e costa ia esplica: "Me ia usa mea camera per zuma la barco, e me ia vide un o du gatos mostrante sua testas."
Un posta en Facebook ier sur la salva ia reseta plu ca 2500 comentas lodante la ecipo.
@T Danmarc aproba ajunta un isola jigante a Kobenhavn
@L aora_oji/2021/danmarc_aproba_ajunta_un_isola_jigante_a_kobenhavn
====== Danmarc aproba ajunta un isola jigante a Kobenhavn ======
5 junio 2021
Parlamentores dansce ia aproba un projeta per un isola artifis cual va casi 35 mil persones e va proteje la porto de la capital Kobenhavn contra levas de la nivel de mar.
La isola grande, nomida Lynetteholm, va es liada a la tera xef par un via periferial, tuneles e un linia de metro.
La aproba parlamental sinifia ce on pote ja comensa construi esta projeta de 2,6 cilometres cuadrida en la anio presente. Ma lo es oposada par ambientistes ansiosa sur la efetos de construi lo.
La scema per Lynetteholm inclui un sistem de paradores sirca la perimetre, per proteje la porto contra la mar levante e ondones.
Si la construi prosede como projetada, la plu de la fundas per la isola va es finida en 2035, e on espera completi la scema intera ante 2070.
Organizas ambientiste ia presenta sua caso contra la developa a la Corte de Justia European. Un de sua consernas es la transporta de materias par veculo. Un evalua sujesta ce on va nesesa asta 350 viajas par camion tra Kobenhavn a cada dia per trae la furnis cru.
Per construi esta penisola, con grandia simil a 400 campos de futbal, 80 milion tones de tera va debe es transportada a la loca.
Ambientistes indica ance la problem de deponedas movente en la mar e la efeto posible de esta a ecosistemes e la cualia de acua.
Protestors ia asembla ier estra la parlamento en la capital cuando la lege ia es asetada par 85 membros favorente e sola 12 oposantes.
@T Danmarc va construi un isola de enerjia
@L aora_oji/2021/danmarc_va_construi_un_isola_de_enerjia
====== Danmarc va construi un isola de enerjia ======
5 febrero 2021
Politicistes dansce ia aproba un projeta per construi un isola jigante en la Mar Norde, capas de furni enerjia sufisinte per tre milion casas.
Con 120 000 metres cuadrida, esta isola de enerjia, la prima de mundo, va es tan grande como 18 campos de futbal, ma on espera estende lo a la truple de acel grandia.
Lo va es un sentro per 200 turbinas enorme de venta en la mar.
Esta es la projeta de construi la plu grande en la istoria de Danmarc, custante sirca 210 mil milion crones (28 mil milion euros). Locada a 80 cilometres de la costa, la isola artifis va es partal poseseda par la governa e partal par la setor privata.
Lo va furni eletrica no sola a Danmarc ma ance a otra paises visina. Idrojen verde va es ance furnida per usas en barconi, avioni, industria e transporta pesosa.
Longo sua Ata de Clima, Danmarc ia dedica se a reali ante 2030 un redui de sua emetes de gases invernerial a 70% de la cuantia en 1990, e a deveni neutra de carbono ante 2050. En desembre, lo ia anunsia ce lo fini tota esploras nova de petrolio e gas en la Mar Norde.
La organiza promovente Dansk Energi ia dise ce, an si "la sonia es en via a deveni un realia", lo duta ce la isola va es funsionante a sua data intendeda de inisia en 2033.
Ma multe politicistes dansce suporta la projeta. Rasmus Helveg Petersen de la partito Sosial Libraliste, ministro pasada de enerjia, ia dise ce isolas de enerjia ia comensa "como un idea estrema" ma ce on ave aora un acorda jeneral per reali los.
On ia projeta ja un isola simil ma plu peti, prosima a Bornholm en la Mar Baltica, a este de la tera xef de Danmarc. On ia suscrive acordas ce eletrica va es distribuida de ala a Deutxland, Beljia e Nederland.
@T Derek Chauvin es culpable de la omiside de George Floyd
@L aora_oji/2021/derek_chauvin_es_culpable_de_la_omiside_de_george_floyd
====== Derek Chauvin es culpable de la omiside de George Floyd ======
21 april 2021
En la Statos Unida, un juria ia judi ce un polisior pasada es culpable de omiside George Floyd, un om afroamerican, sur un strada de Minneapolis en la stato Minnesota en la anio pasada.
Derek Chauvin, ci ave 45 anios, ia ajena sur la colo de Floyd tra plu ca nove minutos en aresta el en maio. La metraje filmada de esta ia provoca protestas tra la mundo contra razisme e la usa esedente de forsa par la polisia.
Chauvin ia es judida como culpable a tre acusas: omiside de grado du, omiside de grado tre e mata sin intende. Sua libria su garantia ia es instante revocada e el ia es arestada. La condena va aveni probable pos du menses, e el va spende cisa desenios en prison.
La 12 membros de la juria ia pasa min ca un dia en ateni sua deside, cual ia segue un litiga emosiosa de tre semanas. Sentos de persones estra la corte ia aclama cuando la judi ia es anunsiada.
La avocato per la familia Floyd ia dise ce esta es "un punto de cambia de istoria" per la SUA. "Justia ganiada con dole ia ariva final," el ia tuita. "Lo envia un mesaje clar sur la nesesa de respondosia en la enforsa de lege."
Presidente Joe Biden e vispresidente Kamala Harris ia telefoni a la familia, direta pos la anunsia de la deside. Biden ia dise ce "a la min aora on ave alga justia", ajuntante: "Nos va reali multe plu. Esta va es la turno prima de trata vera la razisme sistemal."
Corta a pos, en comentas nasional televisada, Biden ia dise: "Razisme sistemal es un manxa sur la alma de la nasion intera."
Harris ia recomenda ce legores aproba la lege George Floyd cual intende reformi la sistem de polisi en la pais. "Esta lege es un parte de la lega de George Floyd. Esta labora veni ja multe tarda."
La federa polisial de Minneapolis, un organiza nonprofitante cual representa la polisia, ia grasia la juria per sua "labora dedicada" portante "un carga enorme".
"Nos vole ance comunica a la comunia e espresa ancora nosa regrete profonda per sua dole, car ance nos senti lo a cada dia," la federa ia dise. "On ave no vinsores en esta caso e nos respeta la deside de la juria. Nos nesesa un sesa de tentas political e de la molesta razal de ofisiores elejeda."
On previde ce Chauvin va apela contra la judi. La plu probable, la avocatos defendente va dise ce la juria ia es cisa influeda par la publicia vasta de la caso.
La judor presidente Peter Cahill ia dise a lundi ce la comentas publica par Maxine Waters, congresor democrata, en la fini de semana pasada, es un razona posible per apela. Waters ia urje protestores a "resta sur la strada" e "deveni plu frontinte" si on ta remete Chauvin.
@T Deutxland deside ci va segue Merkel
@L aora_oji/2021/deutxland_deside_ci_va_segue_merkel
====== Deutxland deside ci va segue Merkel ======
26 setembre 2021
La stradas de Berlin ospita oji la maraton anial, ma un corsa plu grande aveni tra Deutxland intera. La compete per segue Angela Merkel como canselor es estrema streta en cuando la popla deutx vota en elejes parlamental.
En un atenta final de gania votas, Merkel ia apare con Armin Laschet a un asembla ier en Aachen, do Laschet ia nase. La sonda final de opinas sujesta ce los pote reali un vinse nonprobable.
La premio es la gida de la economia la plu potiosa en Europa, e plu ca 60 milion deutxes con plu ca 18 es permeteda a vota. La voterias ia abri a 08:00 de ora local, e un indica clar de la resulta va apare cuando on sesa vota a 18:00.
Esta eleje nonpredisable ia pare finida asta un partisipa par Merkel, de ci sua carera a la apico de politica deutx es aora cuasi completida, pos 16 anios en la posto.
"Lo es vera importante, ci ave la potia," el ia averti en la 48 oras ante la vota. Sua mesaje ia es ce Deutxland nesesa stablia, sua jovenes nesesa un futur, e Laschet es el ci va furni estas.
Tra menses la sondas ia penduli. Inisial, la Uni Deutx Cristian conservaliste e sua partito relatada baieres ia domina, e a un punto la Verdes ia es a la loca prima, ma plu tarda on ia vide un surje de suporta per la Democratas Sosial su Olaf Scholz.
De la tre aspirores competente per deveni canselor, Scholz es el ci ia stimula la plu la votores. Como viscanselor de Merkel, el es plu fasil videda como figur de continua ca sua oposor conservaliste. Ma an si el vinse, el va nesesa probable es suportada par du otra partitos per formi un alia.
La cambia de clima es presente la tema la plu grande per votores deutx, e sola a un ves pasada la Verdes ia reseta plu ca 10% de votas en un eleje federal.
Ma sua aspiror per la posto suprema, Annalena Baerbock, ia perde suporta en la estate, an pos inondas grave cual ia mata a la min 190 persones e ia destrui multe en du de la statos la plu poplada.
@T Diplomatas parti de Corea Norde sur un draisin
@L aora_oji/2021/diplomatas_parti_de_corea_norde_sur_un_draisin
====== Diplomatas parti de Corea Norde sur un draisin ======
26 febrero 2021
Un grupo de diplomatas rusce e sua familias ia parti de Corea Norde en modo nonusual sur un draisin de ferovia, propulsada par sua manos, par causa de medias sever contra covid.
La oto persones ia viaja par tren e bus ante propulsa se tra sirca un cilometre a traversa de la frontera rusce longo la ferovia.
Corea Norde ia bloci la plu de transporta de pasajores per limita la sperde de la virus. La pais declara ce lo ia esperia no casos confirmada, ma oservores desacorda.
De la temprana de la anio pasada, trenes e vagones es proibida de entra a o sorti de la pais. La plu de volas internasional de pasajor ia sesa ance. Esta ia lasa no otra posible a la diplomatas rusce.
Fotos compartida par la ministreria rusce de esternas mostra la diplomatas e sua familias sur la draisin con sua valises, ante un vista invernal. Los ia aclama cuando los ia traversa la frontera.
La "motor" xef ia es Vladislav Sorokin, secretor tre de la ambasada, ci ia puia la veculo longo un ponte de ferovia supra la Rio Tumen per entra a Rusia. Esta ia es pos cuando la grupo, incluinte la fia de tre anios de Sorokin, ia pasa 32 oras en tren e du en bus de Pyongyang per ateni la frontera.
Ofisiores de la ministreria ia saluta los a un stasion a la lado rusce, e la grupo ia viaja alora par bus a la airoporto de Vladivostok.
La medias contra covid de Corea Norde ia afeta viajas e la asede a la infrastrutur de la pais. Plu soldatos ia es enviada a rejiones de frontera, comandada per preveni cualce transmete posible de la virus.
En la anio pasada, multe diplomatas stranjer ia parti de la pais e ambasadas ueste ia clui. La plu de viajores ia parti par tera, traversante la frontera a Xina, ma en marto on ia fa un vola a Vladivostok, portante diplomatas de Deutxland, Rusia, Frans, Suiz, Polsca, Romania, Mongol e Misre.
@T Du linteles antica siselida es redonada a Tai
@L aora_oji/2021/du_linteles_antica_siselida_es_redonada_a_tai
====== Du linteles antica siselida es redonada a Tai ======
29 maio 2021
On renativi du siselis antica de arenito, sur cual on crede ce los ia es furada de Tai e contrabandada a la SUA en la Gera de Vietnam.
La siselis ia es orijinal linteles en templos, orijinante en la sentenio 10, e los portrae la dios Indra e Yama.
Tra desenios los ia es esibida en la Museo de Arte Asian en San Francisco. Aora los va apare en la Museo Nasional en Bangkok.
La museo esuan ia dise ce lo ia desira sempre redona esta faxones a Tai, ma ia disputa alegas par espertas ce los ia es furada.
La renativi segue un investiga de tre anios par la departe SUA de internas. Ajentes ia descovre ce la relicias ia es nonlegal emportada, tal ce los ia es sedable su leges federal.
En febrero, la SUA ia acorda con la site San Francisco ce esta va sede la ojetos.
Prateep Pengtako, dirijor jeneral de la Departe de Artes Bela de la governa Tai, ia dise ce la linteles mostra la influe de la Rena Cmer antica, cual ia es situada en Camputxa moderna.
"On ia evalua ce la linteles ia es portada a via a alga tempo entre 1958 e 1969," el ia comenta. "Spesial, 1965--66 ia vide la desapare de multe fabricadas tai."
Lo es crededa ce la linteles ia veni de la santerias istorial Khao Lon en la provinse Sa Kaeo e Nong Hong en la provinse Buri Ram.
Un rituo de transfere ia aveni en Los Angeles en la parte plu temprana de esta semana, entre autoriosas esuan e la Consuleria Jeneral Reial de Tai.
"La redona de esta anticalias ave un importa grande en pertines istorial, arceolojial e cultural a la governa tai e la popla tai," la ministreria tai de esternas ia dise alora.
@T Du saltores alta comparti la medalia de oro
@L aora_oji/2021/du_saltores_alta_comparti_la_medalia_de_oro
====== Du saltores alta comparti la medalia de oro ======
2 agosto 2021
En la ronda final de salta alta a la Juas Olimpial en Tokyo, du atletas ia comparti la medalia de oro.
Pos un concurso fatigante de du oras, ambos de Mutaz Essa Barshim de Catar e Gianmarco Tamberi de Italia ia rejistra un pasa de 2,37 metres.
On ia ofre a la du atletas la posible de un ronda desidente. Ma en un momento de justia eselente, los ia acorda comparti la titulo.
Ambos a tre veses ia fali atenta egali la recordo olimpial de 2,39 metres, e car los ia fa no otra eras, los ia ta pote disputa la premia. En loca, los ia crea un momento major de istoria -- un ocupa juntada de la plataforma de vinsor olimpial a la ves prima en atletisme lejera pos 1912.
Maksim Nedasekau de Bielarus ia gania la bronze, pos salta ance a 2,37 metres ma con plu atentas nonsusedosa tra la concurso intera.
Barshim e Tamberi ia abrasa ante core per selebra con sua instruores e coecipores, levante sua banderas nasional supra sua testas.
Barhsim pote ajunta esta medalia oro a sua serie de vinses internasional. Lo es sola la numero du de la medalias oro ganiada par Catar en sua istoria. Fares El-Bakh ia gania la prima a saturdi en la concurso de levapesas mas de 96 kg.
Tamberi ia selebra ancora sur la curso cuando sua paisan Lamont Marcell Jacobs ia core per abrasa el pos sua vinse nonespetada en la ronda final per sprintores mas tra 100 metres.
@T Du trenes colide matante en Misre
@L aora_oji/2021/du_trenes_colide_matante_en_misre
====== Du trenes colide matante en Misre ======
27 marto 2021
A la min 32 persones ia es matada e 165 ia es ferida en un colide de trenes en Misre sentral.
Vagones ia es desrelida e inversada cuando du trenes de pasajor ia colpa lunlotra prosima a la site Tahta en la provinse Sohag.
La Autoriosa Ferovial Misri ia dise ce frenos de crise ia es ativida en la tren anterior par "individuas nonconoseda", tal ce la tren seguente ia colide.
Presidente Abdel Fattah el-Sisi ia promete un puni forte a la persones culpable. "Cualcun ci ia causa esta asidente dolosa par nonatende o malvole, o cualce razona simil, debe reseta un puni preveninte sin eseta o retarda," el ia tuita.
La colide ia aveni a sirca 365 cilometres a sude de Qahira, la capital. Un de la trenes ia viaja entre Luxor e la porto mediteranean Alexandria, e la otra ia vade entre Qahira e la site Aswan en Misre sude.
Plu ca 70 ambulansias ia es enviada a la loca per prende persones ferida a ospitales.
Un om ala ia comenta: "Nos nesesa ce un ofisior veni per vide lo cual ia aveni. On no pote estrae la persones de su la trenes." El ia ajunta ce un gru va es nesesada. "Persones es mor. Nos no pote salva an los ci vive."
Fotos mostra vagones inversada a lado de un canal de acua.
Mostafa Madbouly, la ministro xef, ia visita la loca, prometente compensa finansial a la familias de la vitimes. El ia dise ce la governa va continua renovi la ferovias per preveni asidentes simil desastrosa.
Misre ia esperia multe asidentes en sua sistem ferovial, partal par causa de un manca de manteni e investi. Un de la plu graves ia aveni en 2002, cuando 373 persones ia mori pos la ensende de un focon en un tren viajante a sude de Qahira.
@T Ecuador eleje un bancor conservaliste per presidente
@L aora_oji/2021/ecuador_eleje_un_bancor_conservaliste_per_presidente
====== Ecuador eleje un bancor conservaliste per presidente ======
13 april 2021
Guillermo Lasso, conservaliste e bancor pasada, ia gania la eleje presidental en Ecuador pos un revota desegalinte. Sua oposor, la economiste sinistriste Andrés Arauz, ia aseta sua defeta a mera oras pos la clui de voterias a soldi.
Pos la conta de cuasi tota, 52,4% de la votas ia es ganiada par Lasso en compara con 47,6% par Arauz.
Lasso, ci ave 65 anios e ia aspira la presidentia a tre veses, ia dise a sua suportores ce el aseta "la defia de cambia la destina de nosa pais".
Sua oposor ave 36 anios e ia gania la ronda prima a 7 febrero par 10 persentos. Asta resente, el ia es favoreda per deveni presidente. Ma sondas ia sujesta ce Lasso ia comensa egali el en la promoves tarda.
Arauz ia descrive la resulta como "un tropeza elejal, ma no un defeta political o moral". El ia dise ce aora es la tempo per "progresa, construi pontes e crea acorda".
Lasso, ci ia fini en loca du en la elejes presidental de 2013 e 2017, va es induida a la posto a 24 maio. El ia promete separa de la politicas sinistriste de governas pasada, sur cual el dise ce los ia tira Ecuador a su.
"Ecuadoranes ia usa sua direto de vota per eleje un curso nova, multe diferente de lo de la 14 anios pasada," el ia comenta.
El dise ce el va atrae plu investis stranjer, va crea du milion empleas nova e va aumenta la produi de petrolio. El ia proposa ance leva la salario mensal minima, introdui un redui de impostas per comersias peti, e crea un reserva per stimula emprendores.
An si on vide Lasso como representante la setor comersial de la pais, en sua parla vinsente el ia atenta dirije se a campos plu vasta de sosia, disente ce el vole ce sua governa escuta "tota ecuadoranes".
El ia dise ce el va labora sin sesa per defende la diretos de femes, incluinte madres sin sposo e adolesentes ensinta, e ce el intende fini discrimina contra persones LGBT. "Ta ce nos construi un pais plu justa e rica per tota," el ia declara.
Lasso va prende la presidentia de Lenín Moreno, de ci sua popularia ia cade de 77% corta pos sua eleje en 2017 asta sola 7% en febrero 2020.
La presidente nova va debe trata la crises jemelo de economia e sania en Ecuador. Longo la banco sentral de la pais, la economia ia contrae par 7,8% en 2020, e datos de la Instituida Nasional de Statistica e Conta ia mostra ce un dui de milion persones ia es nonempleada en janero de la anio corente.
Acusas sur froda en la ministreria de sania ia causa un retarda de cuasi du menses en prepara un scema nasional per vasini contra covid. La ministro sinco de sania en cuatro anios ia parti de sua posto en la semana pasada.
@T Elas erije un serca longo sua frontera turces
@L aora_oji/2021/elas_erije_un_serca_longo_sua_frontera_turces
====== Elas erije un serca longo sua frontera turces ======
21 agosto 2021
Elas ia instala un serca e sistem de vijila longo 40 cilometres de sua frontera con Turcia, entre consernas sur un crese de la cuantia de persones migrante de Afganistan.
Visitante la rejion Evros ier, Michalis Chrisochoidis, ministro de proteje sitadanes, ia dise: "Nos no pote espeta, pasiva, la efeto posible. Nosa fronteras va resta nonviolable."
Ma Turcia ia urje paises european a aseta la encarga de migrores afgani.
En un conversa de telefon con la ministro xef elinica Kyriakos Mitsotakis, la presidente turces Recep Tayyip Erdoğan ia dise ce un aumenta notable a la cuantia de persones partinte de Afganistan pote crea "un defia grave per tota".
La concista rapida de Afganistan par la talibanes ia lasa alga persones en teme sur sua vives, e estas atenta evade la pais, comun par cualce metodo disponable.
Chrisochoidis ia dise ce la crise ia ajunta "posibles per flues de migrores" a Europa.
Elas ia es a la fronte de la crise de migrores en 2015 cuando plu ca milion persones fujinte de gera e povria en Asia sude-ueste ia traversa de Turcia a la Uni European. Multe ia viaja plu norde tra Europa, ma sirca 60 mil ia resta en la pais.
Aora Elas dise ce cisa lo va reenvia cualce afganis ci ariva nonlegal.
@T Elas fini sua isoli per abri a turistes
@L aora_oji/2021/elas_fini_sua_isoli_per_abri_a_turistes
====== Elas fini sua isoli per abri a turistes ======
15 maio 2021
Elas ia inisia sua saison turiste, sutraente la plu de restrinjes contra viaja e declarante ce "nos pone la isoli a retro de nos".
An si ancora 2000 casos dial de covid es promedia reportada, on susede vasini la popla.
Alga restrinjes resta. Ma la cambias major es ce abitores no debe plu envia un mesajeta a un numero spesial cuando los parti de sua casas o vade per compra; on permete viaja entre rejiones de la pais; e un proibi de sorti a note es aora limitada a entre 00:30 e 05:00.
On regarda un sinci de la economia elinica como dependente de la setor de turisme, par cual 20% de la laborores es empleada.
Visitores de 53 paises aprobada debe completi un formulario de loca de pasajor a la dia ante sua viaja, indicante do los va reposa e furninte o un autentici de vasini, o un proba negativa per covid, o un serti de recovre resente de la maladia.
Esta regulas presede la introdui de documentos dijital sur cual on previde ce los va libri multe la viaja tra la Uni European ante la fini de junio.
@T Espania batalia neva profonda
@L aora_oji/2021/espania_batalia_neva_profonda
====== Espania batalia neva profonda ======
11 janero 2021
Espania corsa contra la orolojo per abri vias covreda par neva profonda, per pote transporta vasines de covid e furnis de comedas a rejiones sufrinte pos la tempesta Filomena.
Asta 50 sentimetres de neva ia cade sur Madrid, un de la partes la plu grave afetada, en la note de venerdi e en saturdi. A la min cuatro persones ia mori e miles de viajores ia deveni trapida.
Meteorolojistes ia averti ce la temperatur pote cade denova, cambiante la neva a jelo perilosa.
La governa espaniol dise ce lo va usa oji metodos spesial, incluinte convoias escortada par la polisia, per reali serta la distribui projetada de sua reserva de 300 mil vasines de coronavirus a autoriosas rejional de sania.
Ier, soldatos ia desnevi alga de la 700 vias major cual ia es ancora nonusable. La airoporto internasional de Madrid ia cansela tota volas a venerdi, ma ia comensa gradal recomensa sua opera en la posmedia de soldi.
500 persones tra la rejion de Madrid ia es obligada a pasa la note en refujerias tempora, incluinte sentros de sporte. Sirca sento botecores e comprores ia pasa du notes en un sentro comersial en la vila Majadahonda a norde de Madrid.
On ia ave ance reportas de eroisme, como dotores e medicistes ci ia abandona sua autos e ia pasea tra oras per ateni sua locas de labora. Un dotor, Alvaro Sánchez, ia traversa 17 cilometres par pede en cuasi du oras, e du ospitalores ia pasea tra 22 cilometres.
Tal persones ia es lodada par Salvador Illa, ministro de sania, ci ia tuita: "La disposa mostrada par la grupo intera de medicistes es un esemplo de unia e dedica."
Alga posesores de veculos multiterenal ia ofre transporta a medicistes, e otra bonvolores ia aida desnevi la entras de ospitales.
Espanioles en multe rejiones de la pais es avertida a cautia en la dias veninte, car la temperatur va redui cisa a -12°C asta jovedi.
@T Espertas resenia la vasin de AstraZeneca
@L aora_oji/2021/espertas_resenia_la_vasin_de_astrazeneca
====== Espertas resenia la vasin de AstraZeneca ======
16 marto 2021
Espertas de la Organiza Mundal de Sania va consenta oji per resenia la vasin de AstraZeneca, pos cuando alga paises european ia pausa distribui lo.
Alga casos de trombos (sangue coagulada) es reportada en Europa pos la injeta de la vasin. Ma la cuantia es su lo cual on espeta normal en la popla jeneral.
La Ajenteria European de Medisines, la organiza cual regula medisines en la Uni European, va consenta oji ance. On predise ce lo va anunsia sua deside sur la usa continuada de la vasin de AstraZeneca a jovedi.
Sirca 17 milion persones en la UE e la Rena Unida ia reseta un dosa de esta vasin, e min ca 40 casos de trombos ia es reportada, longo la compania farmasial e biotecnolojial brites-svensce cual produi la medisin.
Ansia sur un lia posible ia fa ce 11 paises european ia suspende la vasin, incluinte Deutxland, Frans, Italia e Espania. Otra paises, incluinte Osteraic, ia sesa usa alga furnis de lo, per cautia. An tal, Beljia, Polsca, Txesco e Ucraina va continua injeta lo.
En Tai, la ministro xef Prayuth Chan-o-cha ia deveni la person prima en la pais ci ia es vasinida con esta medisin.
La Organiza Mundal de Sania dise ce lo ia vide no indica de un lia entre la vasin e la trombos, e no esplica biolojial forte esiste per un tal lia. Jeneral, la deside de pausa distribui la vasin en alga nasiones ia confonde la espertas.
@T Europa es denova a la episentro de la pandemica
@L aora_oji/2021/europa_es_denova_a_la_episentro_de_la_pandemica
====== Europa es denova a la episentro de la pandemica ======
5 novembre 2021
La Organiza de Sania Mundal (OSM) ia averti ce Europa es denova "a la episentro" de la pandemica de covid, car la cuantia de casos alti tra la continente.
A un confere jornaliste, Dirijor Rejional de la OSM per Europa, ia dise ce la continente va esperia cisa un dui de milion plu moris ante febrero. El ia culpa la aseta nonsufisinte de la vasin. "Nos debe cambia nosa tatica," el ia comenta, "de reata a surjes de covid-19 a preveni los de aveni per comensa."
La taso de vasini ia lenti tra la continente en menses resente. An si 80% de persones en Espania es duple vasinida, la cuantia es plu basa en Frans (68%) e Deutxland (66%) e an plu basa en alga paises de Europa sentral e sete. Sola 32% de rusces ia es completa vasinida ante fini de otobre.
Kluge ia culpa ance un reposa de la medias publica de sania en sua rejion, cual conteni 53 paises incluinte partes de Asia sentral. Asta aora, la OSM ia rejistra 1,4 milion moris tra la rejion.
La xef tecnical de la OSM sur covid, Maria Van Kerkhove, ia dise ce en la cuatro semanas pasada, la cuantia de casos tra Europa ia alti an con "un furni bastante de vasines e utiles". Sua colega Dr Mike Ryan ia dise ce la esperia de Europa es "un xuta avertinte per la mundo".
Deutxland ia rejistra oji plu ca 37 mil casos dial, un cuantia recordo a la dia du en serie. Ofisiores deutx per sania publica es ansiosa ce un onda cuatro de infeta va causa multe moris e un presa a la sistem de sania.
Ma la creses la plu dramosa en la semana pasada ia es en Rusia, do on ia rejistra 8100 moris par covid, e Ucraina, do on ia rejistra 3800. Ambos paises ave tasos multe basa de vasini, e Ucraina ia anunsia 27 377 casos nova, cuantia recordo, en la 24 oras pasada.
@T Evacuas causada par un focon esuan jigante
@L aora_oji/2021/evacuas_causada_par_un_focon_esuan_jigante
====== Evacuas causada par un focon esuan jigante ======
20 julio 2021
En la stato Oregon en la SUA, la plu grande de la focones savaje ativa de la nasion ia arde tra plu ca 120 000 ectares, provocante miles de evacuas.
Plu ca 2000 pompores batalia la Focon Bootleg, nomida per un fonte prosima, a 480 cilometres a sude-este de la site Portland. Pos comensa a du semanas ante aora, lo ia arde un area plu grande ca Los Angeles.
Lo es un de plu ca 80 focones major en 13 statos, fortida par ondas de caldia e ventas alta. Lo ia obliga ja ce 2000 abitores de rejiones xef campanial abandona sua casas. A la min 160 casas e construidas es destruida e miles de otras es menasada.
Autoriosas dise ce un cuatri de la perimetre de la focon es contenida. On ia prepara du sentros per evacuadas en alga sites.
La clima prediseda per esta semana no va aida la labora de controla la flamas. On prognose ce la temperatur va es plu alta ca normal e on ave ance un situa multe seca.
Asta aora en 2021, on ia rejistra plu ca 4000 focones, cuasi la duple de la soma en la anio pasada intera.
Esta serie ia crea un comensa grave a la saison de focones en la SUA ueste. Lo ia coaveni con ondas de caldia recordo en la semanas resente. Simil en Canada, plu ca 150 focones nova ia ensende en sola la finisemana pasada.
@T Filos longa a gasolinerias brites
@L aora_oji/2021/filos_longa_a_gasolinerias_brites
====== Filos longa a gasolinerias brites ======
28 setembre 2021
En la Rena Unida, la armada prepara se per aida pos un dia cuatro de filos longa a gasolinerias.
Asta 150 soldatos va es instruida a trae gasolina a pompas aora vacuida par persones ci ia panica sur un manca de gidores de tancadores en la pais, an si on ave no manca de carburante a la refinerias. La instrui ocupa sinco dias.
Filos ia estende tra multe cilometres estra alga gasolinerias, e persones ia espeta tra oras per repleni sua tances. Alga motoristes ia dormi en sua autos, e otras ia atenta evita la filos par segue tancadores arivante.
Aora la compra panicada comensa gradal redui, car la plu de motoristes ave denova un tance plen.
On estima ce la Rena Unida ave un manca de plu ca 100 mil camionores, un situa cual en menses resente ia crea problemes per industrias diversa, incluinte furnores de comables e supramercatos.
De venerdi, la custa de gasolina sin plomo en la pais ia alti par un sentim, ateninte un recordo de oto anios. Un pico de vendores leva sua custas entre la compras estracomun.
Entretempo, on urje ce laborores esensal, como empleadas de cura medical e sosial, ta reseta prima la gasolina do lo es disponable.
La governa ia autori ance un estende a lisensas spesial cual permete ce un camionor transporta carburantes e benes simil, e ia anunsia visas tempora (asta natal) per 5000 camionores stranjer. Criticores dise ce cuasi nun va abandona sua emplea permanente en Europa per un posto tan tempora.
Fatores contribuinte a la manca de camionores inclui Brexit, la pandemica, salarios basa e la jubila de laborores vea.
@T Focones sever en Elas e Turcia
@L aora_oji/2021/focones_sever_en_elas_e_turcia
====== Focones sever en Elas e Turcia ======
8 agosto 2021
La ministro xef de Elas ia descrive un "estate malsonin" en cuando focones forestal continua ruina la pais.
On ia evacua ja miles de persones de sua casas en partes de Elas, e plu ca mil pompores es postida per controla la flamas.
La pais esperia sua caldia la plu sever en plu ca 30 anios. Autoriosas ia averti ce on ave ancora un risca alta de plu focones en multe rejiones, incluinte Atina e Criti.
Kyriakos Mitsotakis, ministro xef, ia dise ce la conserna prima de sua governa es "proteje vives umana".
En la des dias pasada, plu ca 56 mil ectares ia arde en Elas. Deses de focones ia ensende an en la 24 oras pasada. La plu grandes es sur la isola Evia e en rejiones de Peloponeso incluinte Arcadia e Olimpia.
Plu ca 2000 persones es ja evacuada de Evia par naveta. Des barcones espeta a la norde de la isola, preparada per evacua plu si nesesada.
Ier, un focon en la foresta densa sur Monte Parnitha direta a norde de Atina ia sperde fuma tra la capital. On ia abri un linia de telefon per persones con problemes de respira.
Pompores de nasiones incluinte Frans, Romania, Swiz e la Rena Unida ia envia pompores per aida Elas.
Ance en Turcia, on batalia per conteni alga focones forestal cual presidente Recep Tayyip Erdoğan ia descrive como la plu severes en la istoria de la pais.
La cambia de clima crese la risca de aira calda e seca cual contribui a la ensende de tal focones.
@T Fosiles de un spesie nova de rinosero jigante
@L aora_oji/2021/fosiles_de_un_spesie_nova_de_rinosero_jigante
====== Fosiles de un spesie nova de rinosero jigante ======
18 junio 2021
En la norde-ueste de Xina, on ia descovre un spesie nova de rinosero jigante antica, entre la mamales la plu grande ci ia sta sur la tera.
La Paraceratherium linxiaense, cual ia vive a sirca 26,5 milion anios pasada, ia pesa 21 tones, egal a cuatro elefantes african grande.
Esta animal ia es ance plu alta ca un jirafa. Sua testa noncornida ia es capas de come de arbores con altia de 7 metres.
La conclui ia es atenida pos un studia de fosiles descovreda en la provinse Gansu.
En un article publicida en la jornal Comunicas: Biolojia ier, siensistes ia dise ce sua analise de la fosiles, trovada prosima a la vileta Wangjiachuan en 2015, ia indica un spesie intera diferente de otra rinoseros jigante conoseda.
Per esemplo, un cranio e mandibula completa conservada ia mostra ce la animal ia ave un cranio grasil, e un proboside prensil simil a lo de la tapir moderna.
La ecipo, gidada par Dr Deng Tao de la Instituida de Paleontolojia Vertebrato e Paleoantropolojia en Beijing ia descovre ance ce la spesie nova ia es prosima relatada a rinoseros jigante cual ia vive pasada en Pacistan.
Esta sujesta ce la spesie ia susede traversa Asia sentral. E si lo ia ta pote vaga libre entre Xina norde-ueste e la sucontinente barati-pacistani, lo es probable ce, en acel tempo distante, la rejion de Tibet ia ave alga partes basa.
@T Fotos de Marte par un vagador xines
@L aora_oji/2021/fotos_de_marte_par_un_vagador_xines
====== Fotos de Marte par un vagador xines ======
20 maio 2021
Xina ia publici la fotos prima fada par sua vagador Zhurong sur Marte. La un mostra la vista ante la robot sentante sur sua plataforma de atera; la otra revela la paneles solal de Zhurong.
La vagador ia atera sur la planeta roja en la parte temprana de soldi, longo la ora de Beijing.
En reali esta, Xina ia deveni la nasion du, pos sola America, cual ia susede pone un sonda sur la surfas martan e opera lo per un cuantia notable de tempo.
Siensistes xines espera ce la robot de ses rotas va funsiona per 90 dias martan a sua loca sur Utopia Planitia, un plano vasta en la emisfera norde.
La Ajenteria Nasional Xines de Spasio ia posta la imajes a sua pajeria ueb, con ance du videos corta cual rejistra la momento cuando la capsula usada par la vagador per entra a la atmosfera de Marte ia parti de la orbitador Tianwen-1, en cual Zhurong ia viaja ala de la Tera.
La fotos de la surfas informa ce la posas esensal de aparatos pos la atera ia completi bon.
Estas inclui la desenrola de la paneles solal cual furni potia a la robot; la libri de la antena per comunica con Tianwen-1 e sua controlores en Xina; e la estende de la rampa longo cual Zhurong va rola per comensa sua mision.
@T Frans reseta la restas de un jeneral napoleonal
@L aora_oji/2021/frans_reseta_la_restas_de_un_jeneral_napoleonal
====== Frans reseta la restas de un jeneral napoleonal ======
14 julio 2021
La restas de un de la jenerales favoreda de Napoleon ia es redonada a Frans, a du anios pos ce on ia descovre los en la ueste de Rusia.
La sceleto de Charles-Étienne Gudin, con sola un gama, ia es trovada en un parce su la funda de un solo de dansa. Sua identia ia es confirmada par ADN.
Gudin, ci ia ave 44 anios, ia es colpada par un bal de canon prosima a la site Smolensk en la invade franses de Rusia en 1812. On ia debe amputa sua gama e el ia mori de gangrena pos tre dias. Sua cor ia es reprendeda e enterada en Frans.
Ier, sua caxon funeral ia es ofisial resetada par la ministro franses per veteranes, con gardores onorante en uniformas napoleonal.
An tal, un projeta per un rituo plu grande (con partisipa de ofisiores de Frans e Rusia) ia es canselada par causa de la tensa entre la du paises.
Naseda como aristocrata, Gudin ia es un veteran de e la Geras de la Revolui Franses e la Geras Napoleonal. El ia vade a la mesma scola militar como Napoleon, e on crede ce el ia es un de la jenerales favoreda de la imperor franses.
El ia gida la ataca contra la armada rusce en la site Smolensk cuando el ia perde sua vive.
La xerca per la restas de Gudin ia comensa en maio 2019, dirijeda par la istoriste Pierre Malinowski, con suporta de la Cremlin.
Rexercores ia usa la recordas de Louis-Nicolas Davout, un plu jeneral franses de la eda napoleonal, ci ia organiza la rituo funeral de Gudin e ia descrive la loca. Los ia segue alora un plu raconta de atestor cual ia gida los a la caxon de lenio.
An si la 400 mil soldatos en la Armada Grande de Napoleon ia avansa rapida en Rusia e ia catura Moscva, los ia es obligada a retira se en la inverno dur.
Plu temprana en la anio presente, en un rituo en Rusia ueste, on ia entera la corpos de 120 soldatos franses e rusce, tre femes e tre xicos adolesente ci ia mori en acel retira de Moscva. On crede ce la femes ia furni comedas e aida prima a la soldatos, e la xicos ia servi como tamburistes.
@T Frans retira ambasadores de la SUA e Australia
@L aora_oji/2021/frans_retira_ambasadores_de_la_sua_e_australia
====== Frans retira ambasadores de la SUA e Australia ======
18 setembre 2021
Frans ia dise ce lo retira sua ambasadores en la SUA e Australia per consultas, protestante contra un acorda de securia cual inclui ance la Rena Unida.
La ministro de esternas franses ia dise ce la "deside nontipal" es justida par la "gravia nontipal" de la situa.
Par la alia, nomida Aukus, Australia va reseta la tecnolojia per construi sumarinas de enerjia nucleal. Esta ia coleri la governa franses car lo ia rompe un acorda cual lo ia suscrive con Australia.
La acorda nova es jeneral interpreteda como un atenta de oposa la influe de Xina en la Mar Xina Sude disputada. Lo ia es anunsiada a mercurdi par Joe Biden, presidente de la Statos Unida, Boris Johnson, ministro xef de la Rena Unida, e Scott Morrison, ministro xef de Australia.
Frans ia es informada sur la alia a mera oras ante la anunsia publica.
En un declara a un ora tarda ier, la ministro de esternas Jean-Yves Le Drian, ci ia descrive la acorda como un "cotel en la dorso", ia dise ce la ambasadores es retirada car Presidente Emmanuel Macron ia solisita lo.
Un ofisior de la Casa Blanca ia dise ce la governa de Biden regrete la retira e va discute con Frans en la dias veninte per solve la problemes.
Parlante en Washington, Marise Payne, ministro de esternas australian, ia dise ce el comprende la "delude" en Frans e espera labora con la pais per serti ce lo comprende "la valua cual nos pone en la relata biladal".
Un retira de ambasadores es multe nonusual entre aliadas, e esta pare es la ves prima cuando Frans ia retira los de ambos paises. Diplomatas franses en Washington ia cansela ja un aveni per selebra lias entre la SUA e Frans cual on ia projeta per venerdi.
Australia va deveni sola la nasion sete de mundo cual opera sumarinas de enerjia nucleal. Su la acorda nova, la aliadas va comparti ance sibercapasias, inteleto artifis e otra tecnolojias suacuan.
La anunsia ia fini un acorda con valua de $37 mil milion dolares cual Frans ia suscrive con Australia en 2016 per construi 12 sumarinas costumal.
Entretempo, Xina ia acusa ce la tre potiosas envolveda en la acorda nova ave un "disposa de Gera Fria".
@T Gasolina plomida es eliminada de la mundo
@L aora_oji/2021/gasolina_plomida_es_eliminada_de_la_mundo
====== Gasolina plomida es eliminada de la mundo ======
31 agosto 2021
La Program NU per la Ambiente ia anunsia ce aora no pais en la mundo usa gasolina plomida per autos e camiones.
Esta carburante nosiva ia contamina la aira, tera e acua tra cuasi un sentenio. Lo pote causa maladias de cor, canser e atacas serebral, e on ia relata lo a problemes de la developa de la serebros de enfantes.
La plu paises con revenu alta ia proibi gasolina plomida ante la fini de la desenio de 1980, ma Aljeria -- la pais ultima cual ia usa lo -- ia consuma sua reserva sola en esta julio.
António Guterres, secretor jeneral de la Nasiones Unida, ia descrive la elimina de gasolina plomida como un "raconta de susede internasional".
On ia comensa ajunta plomo a gasolina en la temprana de la desenio de 1920 per eficasi motores.
Avertis a contra ia es fada ja en 1924, cuando sinco laborores ia mori e plu deses ia es ospitalida pos sufri convulsas a un refineria manejada par Standard Oil, un jigante esuan de petrolio.
Ma an tal, plomo ia es ancora ajuntada a tota gasolina tra la mundo asta la desenio de 1970. Paises plu rica ia comensa alora retira gradal lo, ma en la temprana de la desenio de 2000, lo ia es ancora usada par 86 nasiones.
Corea Norde, Miama e Afganistan ia sesa vende gasolina plomida ante ja 2016, lasante sola un pico de paises, incluinte Irac, Iaman e Aljeria, cual ia furni ancora la carburante problemosa en la dui du de la desenio pasada.
De 2002, la Progam NU per la Ambiente ia colabora con governas, companias privata e grupos sivil per fini la usa.
"Carburante plomida esempli consisa la tipo de eras cual umanas ia fa a cada nivel de nosa sosias," Inger Andersen ia dise, dirijor de la program. Ma el ia ajunta ce la elimina de lo mostra ce "umanas pote aprende de e repara la eras cual nos ia fa".
Greenpeace, organiza ambientiste promovente, ia saluta lo cual lo ia nomi "la fini de un epoca nosiva". Un portavose ia dise: "Lo mostra clar ce si nos pote retira un de la carburantes contaminante la plu perilosa en la sentenio 20, asoluta nos pote retira tota combustables de fosil."
@T Ghani demanda per pardona de la popla afgani
@L aora_oji/2021/ghani_demanda_per_pardona_de_la_popla_afgani
====== Ghani demanda per pardona de la popla afgani ======
9 setembre 2021
Ashraf Ghani, presidente pasada de Afganistan, ia solisita la pardona de la popla afgani pos fuji per refuja se en la Amirias Arabi Unida. "Parti de Kabul ia es la deside la plu difisil de mea vive," el ia dise, ajuntante ce el regrete ce el "no ia pote reali un fini diferente".
Ghani ia parti subita de la pais cuando militaristes taliban ia avansa a la capital a 15 agosto.
El ia dise ce el no ia intende abandona sua popla ma "esta ia es la sola modo". El ia nega denova la alegas "sin funda" ce el ia viaja a la AAU con sirca 169 milion dolares.
En un declara distribuida a Twitter ier, Ghani ia dise ce la sola curso cual el ia pote eleje ia es parti per evita violentia vasta.
El ia scrive: "Me ia parti a la recomenda de la securiores de la palasio, ci ia consela me ce si me ta resta, me ta risca provoca la mesma combate, en strada pos strada, cual la site ia sufri en la gera interna de la desenio de 1990." El ia nota ce el ia parti per "salva Kabul e sua ses milion sitadanes".
El ia dise ce el ia dedica 20 anios a aida Afganistan a deveni un "stato democrata, rica e autonom". El ia ajunta ce el ave "un regrete grande e profonda ce mea propre capitol ia fini en trajedia simil a lo de mea presedores".
La presidente pasada, ci ave 72 anios e ia fasa critica intensa par otra politicistes afgani cuando el ia parti de la pais, ia dise ce el va parla sur la "avenis gidante a mea parti" en la futur prosima.
En un parla direta difusada en Facebook a 18 agosto, Ghani ia dise ce el ia es "obligada" a parti de Afganistan par sua ecipo de securia car "on ia ave un posible real ce me ta es caturada e matada". El ia dise ce cuando la talibanes ia entra a la palasia presidental en Kabul, "los ia comensa xerca me en sala pos sala".
Negante alegas ce el ia prende con se un cuantia grande de mone cuando el ia parti de la pais, Ghani ia comenta ce "on no ia permete an ce me desapone mea sandales e apone mea sapatos".
Plu temprana en esta semana, la talibanes ia anunsia la formi de un governa entretempo, intera mas, per rena Afganistan. Ier, deses de femes en Kabul e la provinse norde-este Badakhshan ia protesta contra la consilio nova, disente ce los no va aseta un governa sin ministros fema.
@T Glasias fonde plu rapida
@L aora_oji/2021/glasias_fonde_plu_rapida
====== Glasias fonde plu rapida ======
29 april 2021
La glasias de nosa planeta fonde con rapidia aselerante, longo un studia nova rigorosa.
Un ecipo su gida franses ia evalua la condui de cuasi tota la flues documentida de jelo, e ia trova ce los ia perde cuasi 270 mil milion tones de jelo en cada anio de la du desenios prima de esta sentenio.
La acua dejelada de los representa aora sirca un sinci de la alti global de la nivel de mar.
217 175 glasias es catalogada. Algas es plu peti ca un campo de futbal; otras ave un area simil a un pais de grandia media. Cuasi tota ave comun ce los deveni plu magra en la clima cambiante, o car los fonde plu en aira plu calda o car la sistemes de neva cual nuri los ia altera.
La rexercores, gidada par Romain Hugonnet de la Universia de Toulouse en Frans, ia usa per sua datos xef la imajes otenida par la satelite Terra, lansada par NASA en 1999.
On ia usa computadores potiosa per interprete esta fotos e estrae la cambias en la altia, volum e masa de la glasias asta 2019.
La ecipo crede ce sua metodo ia redui la nonsertia de sua resultas a cisa min ca 5%, car cada glasia ia es esaminada usante la mesma metodolojia.
@T Google menasa retira sua xercador de Australia
@L aora_oji/2021/google_menasa_retira_sua_xercador_de_australia
====== Google menasa retira sua xercador de Australia ======
22 janero 2021
Google ia menasa retira sua xercador de Australia car acel nasion atenta obliga la jigante tecnolojial a paia per la servis de jornalisme de cual lo depende.
Australia introdui un lege nova de mundo afin Google, Facebook e cisa otra companias simil va paia a fontes de jornalisme per usa sua informa. Ma la companias averti ce los va sutrae alga de sua propre servis.
Scott Morrison, ministro xef de Australia, ia dise ce legores no va sede a "menasas".
An si Australia es serta no la mercato la plu grande per Google, on vide la lege proposada como un caso probante un modo en cual governas tra la mundo ta pote regula la companias jigante tecnolojial.
La lege australian ta lia Google e Facebook a negosias con publicores sur la valua de contenidas jornaliste, si on no ta ateni un acorda a ante.
Morrison ia dise ce sua governa resta dedicada a progresa la lege tra parlamento en esta anio. "Ta ce me es clar: Australia crea nosa regulas sur lo cual on pote fa en Australia. Acel es fada en nosa parlamento."
Google es la xercador dominante en la pais, e la governa ia descrive lo como un servi cuasi esensal, con poca compete en la mercato.
La governa ia argumenta ce car la plataformas tecnolojial atrae clientes a se cuando persones vole leje la novas, la jigantes debe paia un custa justa a la produores de acel jornalisme. En ajunta, lo dise ce on debe suporta finansial la jornalistes car jornalisme forte es multe importante per democratia.
En la semana pasada, Google ia confirma ce lo omete aora pajerias jornaliste local de sua resultas de xerca, per cuasi 1% de usores en Australia. Lo ia esplica ce esta es un esperimenta per proba la valua de la servis jornaliste australian.
Oji, Facebook ia repete sua declara pasada ce lo va para australianes de comparti articles jornaliste en sua plataforma si la lege ta es realida. An tal, Facebook dise ce lo gania cuasi no benefica comersial par ofre contenida jornaliste.
E ier, Google ia acorda paia a publicores jornaliste franses per fratos de articles mostrada en resultas de xerca, pos cexas fada a tema de diretos de autor.
Sir Tim Berners-Lee, inventor de la ueb, ia dise ce la lege australian ta fa ce la ueb deveni "nonpratical tra la mundo".
@T Hongkong acusa 47 ativistes de suverti
@L aora_oji/2021/hongkong_acusa_47_ativistes_de_suverti
====== Hongkong acusa 47 ativistes de suverti ======
1 marto 2021
La polisia en Hongkong ia acusa 47 ativistes de "suverti", en la usa la plu grande asta aora de la lege controversa de securia en acel teritorio.
La 47 persones, parteninte a un grupo de 55 ci ia es arestada en invades a lus prima en la mense pasada, ia debe vade a ofisias de polisia per es detenida ante sua apares en corte oji.
En la anio pasada, Beijing ia enforsa esta lege nova cual criminali atas "suvertinte", disente ce lo es nesesada per stablia. Ma oposores dise ce lo ia silenti la disenti e ia sutrae la autonomia de Hongkong.
La lege ia deveni valida pos un serie de protestas grande per democratia en 2019, de cual alga ia deveni violente.
Oji, sentos de protestores ia asembla per mostra sua suporta a la corte en Hongkong do la 47 ativistes ia prepara fasa acusas de conspira per suverti.
La suportores ia fili per senta a la escuta, e multe ia porta vestes negra, la color usada de la protestores. Alga ia scande sloganes incluinte "libri Hongkong, revolui de nosa eda" e "batalia per libria, sta con Hongkong".
La polisia ia averti la persones asemblada a divide en grupos de no plu ca cuatro, menasante multa los.
La persones comandada a vade a la polisia -- 39 omes e 8 femes, con entre 23 e 64 anios -- es ativistes per democratia ci ia aida reali un eleje nonofisial en junio pasada per deside aspirores oposante en la elejes parlamental de 2020. Esta elejes ia es ultima posponeda.
Los es alga de la promovores de democratia la plu bon conoseda en la teritorio.
Jimmy Sham, ci ave 33 anios e ia es un organizor xef de la protestas en 2019, ia es defiante en vade a la ofisia de polisia. "Democratia es nunca un donada de la sielo," el ia dise. "Lo debe es ganiada par multe con vole forte. Nos va resta forte e batalia per lo cual nos desira."
@T Inondas grave en Deutxland e paises visina
@L aora_oji/2021/inondas_grave_en_deutxland_e_paises_visina
====== Inondas grave en Deutxland e paises visina ======
16 julio 2021
En Deutxland, a la min 80 persones ia mori e sentos plu manca pos inondas la plu grave de desenios. Un pluve recordo en Europa ueste ia fa ce rios supraflue, ruinante la rejion.
Ance Beljia ia reporta asta 11 persones mor pos la pluve estrema, per cual xefes political ia culpa la clima cambiante. La canselor deutx Angela Merkel ia promete suporta completa a la vitimes.
La provinses Rheinland-Pfalz e Nordrhein-Westfalen es la plu afetada, ma Beljia e Nederland es ance grave inondada, como partes de Luxemburg e Swiz.
En la distrito Ahrweiler en Rheinland-Pfalz, on no sabe do es sentos de persones. Un portavose per la governa local ia dise ce redes de telefoneta ia es descomutada, tal ce multe persones ia deveni noncontatable.
La vileta Schuld ala, con 700 abitores, ia es cuasi intera destruida.
Sirca 15 mil polisiores, soldatos e crisores aida la opera de xerca e salva. Elicotores ia leva abitores trapida de sua tetos, e tances ia move arbores cadeda e otra detrito de sur la vias.
"Nun ia espeta esta," un abitor de la vila Mayen ia comenta. "De do tota esta pluve ia veni? Lo es bizara. Lo ia fa un ruido tan forte e, considerante como rapida lo ia cade, nos ia pensa ce lo va rompe la porte."
En Beljia, la acua ia puxa autos longo un strada en la site Verviers. La rio Meuse, cual flue ala, va crese cisa par 1,5 plu metres, an si lo es cuasi ja suprafluente.
On predise plu pluve forte tra la rejion oji.
@T Inondas grave en Xina sentral
@L aora_oji/2021/inondas_grave_en_xina_sentral
====== Inondas grave en Xina sentral ======
21 julio 2021
Pluve recordo en la sentro de Xina ia causa inondas estrema cual ia mata 12 persones e ia obliga plu ca 100 mil persones a evacua sua casas.
Plu ca des sites en la provinse Henan, incluinte sua capital Zhengzhou, es afetada. Videos sirculinte enlinia mostra persones vadante en acua profonda asta la peto sur stradas e stasiones ferovial.
Presidente Xi Jinping ia dise ce "la situa de preveni inondas es multe grave" e ia ateni "un grado crisin". El ia ajunta ce la inondas ia causa ja "perdes notable de vive e danas a propria" e ia comanda tota departes a trata prima "la securia de persones e sua propria".
La provinse Henan, cual ave sirca 94 milion abitores, ia avisa un averti climal de nivel la plu alta. Autoriosas local ia descrive la inondas como un aveni de "un ves en sento anios".
La pluve ia comensa en la finisemana, e la tempestas ia intensi ier. En la note, Zhengzhou e otra locas ia esperia inondas vasta. On ia reporta persones puxada a via par acua rapida e autos e detrito flotante longo stradas sumerjida.
Jornales local dise ce sirca 700 pasajores en Zhengzhou es trapida en un tren tra 40 oras a la min. Videos nonsertida mostra persones en vagones de metro, inondada asta la spalas. On vide salvores ci usa cordones per tira alga persones a securia, en cuando otras sta sur la sejas per ateni resta supra la acua.
Ance en la note, un ospital en Zhengzhou ia perde sua eletrica, ma on ia restora lo. 600 pasientes multe malada ia es entretempo moveda a un otra loca.
Alga pararios e lagos de reserva ia esede sua nivel de alarma, e on ia posti soldatos per diverje rios cual ia supraflue. Operas de avion e tren en multe partes de Henan es ance suspendeda.
Un fesur de 20 metres ia apare en la parario en la site Luoyang. La armada ia averti ce la strutur pote "colasa a cualce tempo".
Un usor de la plataforma Weibo ia dise ce abitores en la vila Sishui es trapida sur sua tetos. "Nos no sabe nada... la vileta intera es a punto de es tirada a via."
Canales governal ia televisa metraje de un enfanteria inondada de cual on ia estrae la enfantes par flota los en tances plastica.
La servi meteorolojial de Xina ia predise ce partes de la rejion va continua vide "tempestas grave o estrema grave" e ce probable la pluve forte no va fini ante jovedi. La cuantia de pluve en Zhengzhou en la tre dias pasada es egal a la cuantia tipal de un anio completa.
@T Irac proibi programes ofendente de broma pratical
@L aora_oji/2021/irac_proibi_programes_ofendente_de_broma_pratical
====== Irac proibi programes ofendente de broma pratical ======
6 maio 2021
En Irac, on ia suspende du programes televisada cual ia ofende par engana persones famosa con jacetas de bomba falsa e secuestras inventada. Regulores ia dise ce la programes ia rompe la regulas per difusas.
En un de la episodios, un ator fema ia desmaia asustada cuando on ia lia esplodentes falsa a el. Un otra ia mostra Alaa Mhawi, futbalor internasional iraci, con oios bandida e suplicante per sua vive.
Regardores ia critica esta spetaculos como cruel e calosa, si on considera la menasa constante de violentia militariste en Irac. La organiza Daex ia perde sua teritorio en la pais ma continua ataca persones sivil e militar.
Respondente a criticas en la mense pasada, Dargham Abu Rghif, un de la scrivores de la program, ia dise: "La senas es dur, ma si Daex ia ta vinse, artistes ia ta ave un vive multe plu dur, como ance tota iracis."
Spetaculos de bromas pratical es popular tra la mundo arabi, spesial en la mense ramadan. Difusores prepara comun programes spesial per atrae televidores dejunante en la sera.
Un de la programes la plu videda, par Ramez Galal, spetaculor misri, ia es ance criticada per esede la limitas conveninte. En un numero, el ia engana famosas a crede ce los es sur un barcon afondante, ensircada par partes de corpo flotante e un selaco prosiminte.
@T Israel estende restrinjes de covid a enfantes joven
@L aora_oji/2021/israel_estende_restrinjes_de_covid_a_enfantes_joven
====== Israel estende restrinjes de covid a enfantes joven ======
19 agosto 2021
Israel esije aora ce cualce person con plu ca tre anios demostra ce el es vasinida o ce el es negativa analiseda per covid ante entra a multe spasios interna.
Restorantes, caferias, museos, bibliotecas, jinasios e pisinas es entre la locas controlada par la sistem "Pasaporto Verde". On no nesesa demostra sua imunia per entra a botecas.
Israel ia esperia un cuantia aumentada de infetas pos la tarda de junio, par causa de la variante delta de la virus, cual es plu comunicable.
Salman Zarka, conselor governal sur covid, ia dise ce la pais es "en gera" contra la virus, an con sua program eselente de vasini.
La du semanas veninte, gidante a la festa de la anio nova iudi a 6 setembre, va es "esensal", el ia averti. Si la situa no va boni, "nos va ateni un enclui simil a la numeros un e du, en cual nos no va vade a plu ca 100 metres de nosa casas".
La ministreria de sania ia reporta 7870 casos nova de covid a martedi, alga min ca la 8752 a lundi cual ia es un recordo dial de ses menses.
Plu ca 120 persones ia mori pos developa la virus en la semana pasada -- la duple de la soma mensal rejistrada en julio -- e 600 persones es en un state grave en ospital.
La governa ia atenta contrabatalia par repone la restrinjes eliminada a media de junio e par reintrodui la Pasaporto Verde.
Ante ier, sola enfantes con 12 anios o plu -- ci cuali per vasines ja de junio -- e adultes ia debe presenta un tal bileta. La sistem aplica aora a enfantes plu joven.
Sua analises va es finansiada par la governa, car los no cuali per vasines estra si los ave sinco anios o plu e on regarda los como notable perilida par covid. La milion abitores ci no ia es vasinida an si cualinte -- sirca 11% de la popla -- debe paia per sua propre analises.
@T Israel recatura evadores filastini
@L aora_oji/2021/israel_recatura_evadores_filastini
====== Israel recatura evadores filastini ======
19 setembre 2021
La armada israeli dise ce lo ia recatura la du membros final de un grupo de ses omes filastini ci ia tuneli de un prison de securia alta a cuasi du semanas ante aora.
La duple, de ci ambos parteni a un organiza militariste, ia es arestada pos es ensircada par fortes de securia en la site Jenin de la Riva Ueste. La otra cuatro ia es caturada en la semana pasada.
On inisia un investiga sur la caso, cual ia provoca selebras entre filastinis.
Scaramuxas ia aveni entre soldatos israeli e protestores filastini en Jenin en la temprana de oji, ma la polisia israeli ia dise ce la du evadores ia es recaturada sin resiste.
La padre de un de la omes ia dise ce sua fio ia acorda sede se "per no perili la posesores de la casa".
Naftali Bennett, ministro xef de Israel, ia descrive la opera per recatura la omes como "impresante, sofisticada e rapida", ajuntante ce "lo cual ia fali pote es reparada".
La episodio ia es embarasante per la servi de prisones israeli, car jornales ia indica alga puntos do la securia no ia sufisi.
On crede ce la omes ia spende menses en escava un tunel en la solo de sua selula compartida en la prison Gilboa, pasante un gardor dorminte e emerjinte tra un buco a la otra lado de la muron de la prison a 6 setembre.
Un avocato per un de la evadores ia dise ce sua cliente ia usa culieres, platos e la manico de un caldera per escava un via a estra la compleso. A pos, culieres ia deveni comun videda a protestas suportante la filastinis.
Tota la membros de la grupo ia es en prison car los ia conspira o realia atacas contra israelis.
@T Italia impedi un esporta de vasin a Australia
@L aora_oji/2021/italia_impedi_un_esporta_de_vasin_a_australia
====== Italia impedi un esporta de vasin a Australia ======
5 marto 2021
La governa italian ia impedi la esporta de un carga de vasin AstraZeneca a Australia. La deside afeta 250 mil dosas de la vasin produida a un compleso de AstraZeneca en Italia.
Italia es la pais prima en la Uni European cual usa la regulas nova de la bloco per para esportas si la compania cual furni la vasines fali sasia sua obligas a la UE.
Australia ia dise ce perde un carga no va afeta grave sua distribui de la vasin.
AstraZeneca es en via a trae sola 40% de la furni acordada a statos-membros en la tre menses prima de la anio. Lo ia sita problemes de produi per la manca.
En janero, Giuseppe Conte (esente alora la ministro xef) ia descrive retardas en la furni de vasines par e AstraZeneca e Pfizer como "nonasetable" e ia acusa la companias de viole sua contratas.
La UE es multe criticada per la nonrapidia de sua program de vasini. Su un scema instituida en junio 2020, la bloco ia negosia la compra de vasines per sua statos-membros.
No comenta ofisial ia es fada sur la deside italian par la UE o par AstraZeneca, ma on reporta ce lo es suportada par la Comision European.
En un declara ier, la ministreria de esternas italian ia dise ce solisitas presedente ia es aprobada car los ia inclui cuantias limitada de samples per rexerca siensal, ma la plu resente ia es rejetada car lo ia es multe plu grande, per plu ca un cuatri de milion dosas.
Italia ia esplica ce Australia no es en un lista de paises "afetable", ce on ave un manca constante de vasines en la UE e Italia, e ce la cuantia de dosas solisitada es alta en compara con la cuantia donada a Italia e la UE intera.
Australia ia comensa sua program de vasini en la semana pasada, usante la vasin Pfizer/BioNTech. Lo ia intende comensa usa la vasin AstraZeneca a venerdi. Lo ia reseta ja 300 mil dosas e va comensa un produi local en la mense veninte.
@T Itiopia fa un vota jeneral a media de conflita
@L aora_oji/2021/itiopia_fa_un_vota_jeneral_a_media_de_conflita
====== Itiopia fa un vota jeneral a media de conflita ======
21 junio 2021
Itiopianes vota en elejes major su la tensa cresente de un conflita sanguosa en la rejion Tigray en la norde de sua pais.
Esta sonda, retardada par la pandemica, es la proba prima de Abiy Ahmed en un eleje pos sua ariva en la posto de ministro xef en 2018.
El espera oteni la autoria de la popla par gania un majoria de la 547 sejas de la parlamento federal.
Ma on ia pospone la vota en Tigray, do la armada batalia un forte rejional ja de novembre. La prosede de vota es ance retardada en sirca un sinci de la pais par causa de problemes de securia e lojistica.
Esta vota jeneral, la prima pos 2015, ia es orijinal projetada per agosto 2020, ma la coronavirus ia forsa ce on abandona acel data.
Longo la scema inisial, on va anunsia la resultas inisial per la sejas rejional a no plu ca sinco dias pos la vota. La resultas final sertida va es anunsiada a no plu ca 23 dias a pos.
Cuando Abiy ia asende a la posto xef, el ia es suportada par protestas contra la governa dominada par la Fronte de Libri la Popla de Tigray (FLPT). El ia crea un partito nova per junta la alia governante en un sola organiza. La FLPT no ia partisipa.
El dise ce la vota presente es "la atenta prima par la nasion a elejes libre e justa".
Sua zelo reformiste ia gania per el la Premio Nobel de Pas en 2019. Ma a sola un anio plu tarda, el ia fa un opera militar en sua propre pais, enviante soldatos a Tigray per despone la FLPT pos cuando esta ia saisi bases militar ala.
Esta ia provoca un conflita cual ia mata miles de persones e ia crea un famia vasta en la rejion.
@T Kim Jong-un promete plu armas nucleal
@L aora_oji/2021/kim_jong-un_promete_plu_armas_nucleal
====== Kim Jong-un promete plu armas nucleal ======
9 janero 2021
Kim Jong-un, xef de Corea Norde, ia dise ce la SUA es la "enemi la plu grande" de sua pais e ce el no espeta ce Washington va cambia sua politica a Pyongyang.
Parlante a un congresa rara de sua Partito de Laborores, Kim ia promete ance aumenta la armas nucleal e potensial militar de sua pais. El ia nota ce la scema per un sumarina nucleal es cuasi completa.
Analisores sujesta ce sua comentas intende aplica un presa a la governa arivante de la SUA, do Joe Biden va es formal induida a 20 janero.
En sua parla a la congresa -- sola la numero oto en la istoria de la partito -- Kim ia dise ce Pyongyang no va usa sua armas nucleal estra si "fortes enemin" intende usa suas contra lo.
El ia descrive la SUA como "la ostaculo la plu grande per nosa revolui e nosa enemi la plu grande... Sin depende de ci ave la potia, la natur vera de sua politica contra Corea Norde va cambia nunca."
Sua parla ia resoma un lista de armas desirada, incluinte misiles balistical de distantia longa, capas de es lansada de tera o mar, e "ojivas supragrande".
Corea Norde ia susede avansa notable sua armas, an su punis economial sever. Plu temprana en esta semana, Kim ia confesa ce sua projeta de sinco anios per boni la economia de esta pais isolida ia fali ateni sua goles en "cuasi cada setor".
La pais ia clui sua fronteras en janero pasada per preveni la sperde de covid, an si lo ia declara ce lo ave no casos de la virus. Sua comersia con Xina, sua visina e aliada, ia diminui par sirca 80%, e siclones e inondas ia ruina casas e recolies de gran.
@T Kishida declara un vinse per la partito renante en Japan
@L aora_oji/2021/kishida_declara_un_vinse_per_la_partito_renante_en_japan
====== Kishida declara un vinse per la partito renante en Japan ======
1 novembre 2021
Fumio Kishida, ministro xef de Japan, ia declara un vinse per sua Partito Democrata Libraliste (PDL).
La partito renante de Kishida, ci ia deveni la ministro xef a sola un mense ante aora, ia gania plu ca 233 sejas en la Salon Basa. Esta sufisi per governa sin Komeito, sua partito presedente aliada.
La PDL domina ja la politica japanes tra desenios ma ia es criticada sur sua maneja de la pandemica. La presedor de Kishida, Yoshihide Suga, ia resinia pos sola un anio en la posto.
La resinia ia segue un cade de suporta poplal a la PDL pos sua presa nonpopular per continua la Olimpiales de Tokyo an su ansia publica sur la taso cresente de covid.
Kishida, ci ave 64 anios, ia ojeti longa la rol de ministro xef. El ia servi como la ministro de esternas de la pais entre 2012 e 2017.
Ante la vota jeneral de ier, la PDL ia teni ja 276 de la 465 sejas disponable. Sondas inisial ia sujesta ce per ateni un majoria lo debe depende de sua aliada, ma lo ia esede la espetas.
La PDL ia gania aora 261 sejas, e Komeito ia gania 32.
La parlamento de Japan es composada de la Salon Basa de Representores e la Salon Alta de Consiliores. La vota ier ia pertine a la Salon Basa, la plu potiosa. Un vota per membros de la Salon Alta va aveni en la anio veninte.
Oji, la indise de asiones Nikkei 225 ia clui plu alta par 2,6%, car investores ia aposta ce la majoria direta de la PDL sinifia ce la projetas de Kishida per stimula la economia va pasa lisa tra la parlamento.
Ante la eleje, Kishida ia promete spende triliones de enes per aida suporta la economia tre de la plu grandes de mundo en la tempo seguente la pandemica. A la sera de soldi, el ia anunsia ce el intende proposa un plu bujeta ante la fini de esta anio.
@T La abri grandiosa de la Bolevar de la Sfinjes
@L aora_oji/2021/la_abri_grandiosa_de_la_bolevar_de_la_sfinjes
====== La abri grandiosa de la Bolevar de la Sfinjes ======
28 novembre 2021
En Misre, en la site Luxor, carones de faraones e sentos de presentores ia apare en un rituo lusosa per selebra la abri publica de la Bolevar de la Sfinjes.
On ia pasa desenios en escava esta paseria antica. Lo ave cuasi 3 cilometres de longia e lia du de la templos la plu grande de la site, Karnak e Luxor.
La rituo ia conteni elementos de la festa antica cual ia viaja longo la via en cada anio.
Lo ia inclui ance musica inspirada par naras scriveda en ieroglifos sur la mures de la templos.
Misre espera ce la spetaculo grandiosa va aida sua setor de turisme, cual ia es resente bateda par tumulta political e la pandemica.
@T La Amazona emete plu diosido de carbono ca lo asorbe
@L aora_oji/2021/la_amazona_emete_plu_diosido_de_carbono_ca_lo_asorbe
====== La Amazona emete plu diosido de carbono ca lo asorbe ======
15 julio 2021
La Foresta Amazona emete aora plu diosido de carbono ca lo pote asorbe, siensistes ia confirma a la ves prima.
La emetes representa sirca mil milion tones de CO₂ per anio, longo un studia nova reportada en la jornal Natur. A ante, la foresta jigante ia es un poso de carbono, asorbente la emetes cual avansa la crise de clima, ma aora lo causa un aselera.
La plu emetes veni de focones, de cual multe ia es ensendeda con intende de prepara la tera per produi carne de bove e soia. Ma an sin la focones, temperatures plu calda e periodos plu seca ia fa ce la Amazona sude-este deveni un fonte de CO₂, no un poso.
Arbores e plantas cresente ia asorbe sirca un cuatri de tota emetes de combustables de fosil pos 1960, e la Amazona ia ave un rol major como la foresta tropical la plu grande. Rexercores dise ce la perde de sua capasia de catura diosido de carbono es un averti sever ce lo es aora estrema urjente ce nos redui tal emetes.
La rexerca ia usa aviones peti per mesura la nivel de CO₂ a asta 4500 metres supra la foresta tra la desenio pasada, mostrante como la foresta intera cambia. Studias pasada indicante ce la Amazona deveni un fonte de CO₂ ia es fundida sur datos de satelite (cual pote es impedida par nubes) o sur mesuras fada sur la tera (cual pote covre sola un parte pico de la rejion vasta).
La siensistes dise ce la descovre ce un parte de la Amazona emete carbono an sin focones es spesial alarmante. Lo indica probable ce en cada anio la desforesti e focones fa ce la partes visina deveni plu afetable en la anio seguente. La arbores produi multe de la pluve de la rejion, donce si on ave min arbores, on ave secias e caldias plu dur, plu focones e ancora min arbores.
On ia critica forte la governa de la presidente de Brasil, Jair Bolsonaro, cual ia promove desforesti. La desforesti ia ateni aora sua punto la plu alta de 12 anios, e en junio on ia vide plu focones ca a cualce tempo pos 2007.
@T La aniversario sento de la Partito Comuniste Xines
@L aora_oji/2021/la_aniversario_sento_de_la_partito_comuniste_xines
====== La aniversario sento de la Partito Comuniste Xines ======
1 julio 2021
Xi Jinping, presidente de Xina, ia averti ce potiosas stranjer va "ave testas colpada" si los atenta influe la pais. El ia parla defiante a un aveni onorante la aniversario sento de la Partito Comuniste ier.
El ia dise ance ce Beijing no va permete "predicas moraliste", en comentas jeneral comprendeda como dirijeda a la SUA.
Xina es criticada sur maltratas alegada contra diretos umana e sua polisi sever en Hongkong. Relatas entre la SUA e Xina ia mali en tempos resente sur comersia, spia e la pandemica.
Taiwan es ance un fonte grande de tensa. An si acel isola democrata regarda se como un pais autonom, Beijing vide lo como un provinse cual ia separa de Xina.
La SUA, su sua propre leges, ta debe furni a Taiwan modos de defende se si Beijing ta usa fortia per reprende la isola.
A jovedi, Xi ia dise ce Xina manteni un "dedica nonsecutable" a uni con Taiwan. "Ta ce nun suestima la determina, la desira e capasia de la popla xines per defende sua autonomia nasional e unia teritorial," el ia dise.
La selebras aniversarial ia inclui parades volante par jetos militar, salutas par canon e cantas patriota. Un fola ia es presente en la Plaza Tiananmen de Beijing; multe de los no ia usa mascas.
Resente, la pais ia esperia un bombarda jornaliste per promove un varia de la istoria de Xina aprobada par la partito. De april, sinemas xines ia es obligada a mostra filmas de propaganda a du o plu veses en cada semana. On ia publici ance un canta, nomida "100%", cual loda la atenis de Xina e inclui sento rapores.
@T La atletas olimpial prima con covid en Tokyo
@L aora_oji/2021/la_atletas_olimpial_prima_con_covid_en_tokyo
====== La atletas olimpial prima con covid en Tokyo ======
18 julio 2021
Du atletas ia deveni la primas en ci on ia deteta coronavirus en la vileta olimpial en Tokyo, a sola sinco dias ante la comensa de la Juas.
Organizores dise ce la du parteni a la mesma ecipo e sporte como un ofisior ci ia es positiva analiseda ier. Otra membros de la ecipo ia es probada e es aora isolida en sua salas.
Un plu atleta ia es positiva analiseda estra la vileta oji.
En soma, la organizores ia reporta oji des casos nova liada a la Juas Olimpial, incluinte jornalistes, contratores e otra empleadas. Esta sta a lado de 15 casos nova ier.
La taso de infeta crese entre la popla jeneral de Tokyo, esedente mil casos nova en cada de cuatro dias serial. Sondas indica ce multe persones japanes oposa la aveni de la Juas par causa de la enflue grande de visitores stranjer cual lo implica.
Parolante ier, Seiko Hashimoto, presidente de la comite organizante, ia dise: "Atletas ci veni a Japan es probable multe ansiosa. Me comprende esta. Nos fa tota per preveni erutas de covid. Si nos ave final un eruta, nos va serti ce nos ave un scema definida per responde."
Simil, la ecipo intera de atletas australian per la Olimpiales ia es isolida en sua casas ier a sua campa de eserse en Cairns en la norde-este de Australia, pos un sujesta de covid.
La Comite Olimpial Australian ia confirma oji ce un ofisior ia reseta un analise nonconcluinte, ma plu analises seguente ia es negativa, e la atletas ia es permeteda a partisipa en un compete preparante.
@T La bebe la plu peti de mundo vade a casa
@L aora_oji/2021/la_bebe_la_plu_peti_de_mundo_vade_a_casa
====== La bebe la plu peti de mundo vade a casa ======
9 agosto 2021
Un bebe, sur ci on crede ce el ia es la plu peti de mundo a sua nase, ia es desospitalida en Singapor pos 13 menses de trata intensa.
Cuando el ia nase, Kwek Yu Xuan ia ave sola 212 grames, la pesa de un poma, e 24 sentimetres de longia. La xica ia es parida a 25 semanas pos consepi, multe min ca la promedia de 40 semanas.
La recordo presedente ia es un xica en la SUA ci ia pesa 245 grames a sua nase en 2018.
La madre de Yu Xuan ia pari el par sesarea a cuatro menses ante la tempo projetada, car on ia diagnose el como sufrinte preeclampsia, un presa de sangue alta cual pote dana organos esensal e perili la madre e la bebe.
Yu Xuan ave aora la pesa multe plu sana de 6,3 cilogrames.
La bebe ia ave "un posible limitada de survive" longo la Ospital de Universia Nasional en Singapor, do el ia es naseda. La ospital ia declara: "Contra probables, con complicas de sania a la nase, el ia inspira persones sirca se par sua persiste e crese, e per esta razona el es un bebe estracomun de covid -- un raio de espera entre caos."
En sua tempo en ospital, Yu Xuan ia reseta multe tipos de trata e ia depende de macinas diversa per survive. Dotores dise ce sua sania e developa ia progresa bon su sua cura, e el es aora sufisinte sana per parti.
Yu Xuan ave ancora un maladia cronica de pulmones e va nesesa es aidada per respira a casa. An tal, la dotores predise ce el va recovre con la pasa de tempo.
Sua madre, Wong Mei Ling, ia dise ce la nase e grandia de Yu Xuan ia xoca el, car sua enfante prima -- un xico ci ave aora cuatro anios -- ia es parida pos la tempo normal.
La jenitores de Yu Xuan ia pote paia per sua reposa longa en ospital par causa de un promove de finansia coletiva cual ia recolie 366 884 dolares singapor.
@T La campion de Eurovision es desacusada de usa drogas
@L aora_oji/2021/la_campion_de_eurovision_es_desacusada_de_usa_drogas
====== La campion de Eurovision es desacusada de usa drogas ======
25 maio 2021
La cantor xef de la bande italian de roc glamorosa cual ia gania la Concurso Eurovision de Canta ia es desacusada de usa drogas. La Uni European de Difusa (EBU) ia dise esta pos un investiga e un analise negativa.
Damiano David ia nega ce el ia ensofla cocaina, entre rumores enlinia pos la transmete de metraje cual ia mostra el apoiante supra un table en la final grande a saturdi.
"No usa de drogas ia aveni en la Sala Verde e nos regarda la demanda como cluida," EBU ia dise en un declara formal.
La bande Måneskin, ci ia es entre la campiones la plu probable de la concurso, ia gania la premio par sua canta "Zitti e buoni".
Televidores de la concurso, direta difusada, ia comensa demanda cual la cantor fa cuando el ia pare apoia sua fas en dirije a un table cuando la bande ia selebra sua vinse.
A un confere jornaliste, David ia dise ce el ia regarda a su car la gitariste Thomas Raggi ia rompe un vitro. EBU ia confirma ce vitro rompeda ia es trovada sur la solo, e lo es vidable en la metraje difusada.
"Me no usa drogas," David ia dise a saturdi. "Per favore, xices. No dise lo, vera, no cocaina."
EBU ia dise ce lo es "alarmada ce divinas noncoreta, gidante a novas falsa, ia ombri la spirito e la resulta de la aveni e ia afeta nonjusta la bande".
"Nos vole loda Måneskin a un plu ves e desira ce los susede vasta," la organiza ia ajunta. "Nos previde felis labora con nosa membro italian RAI per produi un Concurso Eurovision de Canta spetaculin en Italia en la anio veninte."
La bande ia nega forte tota usa de drogas e ia reata contra la alega en un posta a Instagram: "Nos es vera CONTRA drogas e nos ia usa nunca cocaina. Nos es preparada per un analise, car nos ave no cosa per asconde."
Barbara Pravi, cantor franses, ia fini como sucampion. Ante la anunsia de la deside par EBU, cuando rumores ia sperde enlinia e alga persones ia proposa descuali la italianes, el ia defende la bande en sua paje de Instagram.
"Måneskin ia es STONANTE a la sera de saturdi, televidores ia vota per los, esta es sua loca, sua vinse, sua momento," el ia scrive.
Måneskin es la grupo prima cual ia gania la concurso pos 2006, cuando la bande Lordi de roc dur ia vinse. An si la stilo de Måneskin no ia es tipal per Eurovision, la grupo ia susede dona a Italia sua vinse prima pos 1990.
@T La Canal Suais es blocida par un encalia
@L aora_oji/2021/la_canal_suais_es_blocida_par_un_encalia
====== La Canal Suais es blocida par un encalia ======
24 marto 2021
La Canal Suais en Misre es blocida par un portacontenador grande cual ia encalia pos perde controla, causante un conjesta de barcones de carga en la rejion.
On ia proba usa barcos tirante per move la barcon Ever Given, cual es longa de 400 metres e larga de 59, ma on teme ce lo va resta trapida tra alga dias.
La canal lia la Mar Mediteraneo a la Mar Roja, furninte la pasaje maral la plu corta entre Asia e Europa.
La problem ia aveni a norde de la porto Suais a sirca 07:40 de ora local ier. La barcon, rejistrada en Panama, ia viaja de Xina a Nederland e ia pasa tra la canal en dirije a la Mediteraneo.
Construida en 2018 e operada par un compania taiuan de transporta, la barcon ia encalia e ia deveni fisada, fasante a lado, blocinte la via de deses de otra barcones cual es aora trapida en filos en ambos dirijes.
La compania operante, Evergreen Marine, suspeta ce la barcon ia es "colpada par un venta forte subita, cual ia fa ce la casco devia e colpa la fondo e encalia". Pos deveni fisada en la lado de la canal, la veculo ia perde sua potia e capasia de dirije se.
Un foto, fada de sur la barcon direta pos Ever Given, mostra la barcon trapida e lo cual pare es un escavador peti cual sutrae arena longo la riva. Si on no susede libri la barcon, on va debe estrae la contenadores a marea alta.
Esta es la barcon la plu grande cual ia encalia en la istoria de la Canal Suais. En 2017, un portacontenador japanes ia bloci la canal pos encalia par un problem macinal. La autoriosas misri ia envia barcos tirante e on ia reflota la barcon en alga oras.
La canal traversa la Istmo Suais. Lo ave sirca 193 cilometres de longia e conteni tre lagos natural.
@T La canselor cansela un enclui pascual en Deutxland
@L aora_oji/2021/la_canselor_cansela_un_enclui_pascual_en_deutxland
====== La canselor cansela un enclui pascual en Deutxland ======
25 marto 2021
Angela Merkel, canselor deutx, ia abandona un scema per un isoli sever a pascua, a sola un dia pos anunsia esta restrinje.
Nominte la scema un era, Merkel ia dise ce el aseta la "culpablia ultima" per la cambia.
La enclui proposada ia es acordada con xefes rejional en discutes en la note de lundi, e on ia intende severi la restrinjes entre 1 e 5 april. Ma la scema ia es reversada pos un consenta de crise ier.
Lo ia es jeneral criticada par xefes de comersia e siensistes. Lo ia ta es la isoli la plu sever en Deutxland asta aora, cluinte la plu de locas de vende e limitante grupis de persones.
Tra sinco dias sirca pascua, on ia ta demanda ce persones deutx resta en casa e redui sua contata sosial. On ia ta cansela servis relijial de presentia fisical, ia ta proibi asemblas grande de familias, e ia ta clui cuasi tota botecas.
Armin Laschet, xef de la partito Uni Democrata Cristian de Merkel, ia dise ier a un consenta de parlamento rejional ce la enclui proposada es "nonenforsable en esta forma".
En Berlin, Merkel ia dise a jornalistes: "Esta era es sola mea. La prosede intera ia causa nonsertia ajuntada, per cual me demanda ce tota sitadanes pardona me. Bon razonas ia esiste per lo, ma on no ia pote reali sufisinte bon lo en esta tempo corta."
La taso de infeta de coronavirus en Deutxland ia suprapasa 100 persones en 100 mil.
@T La catura de un contrabandor de drogas en Colombia
@L aora_oji/2021/la_catura_de_un_contrabandor_de_drogas_en_colombia
====== La catura de un contrabandor de drogas en Colombia ======
24 otobre 2021
En Colombia, on ia catura un traficor major de drogas ci ia gida la gang criminal la plu grande de la pais.
Dairo Antonio Úsuga, conoseda como Otoniel, ia es saisida ier pos un opera juntada par la armada, la forte de aira e la polisia. La governa colombian ia ofre un premio de 800 mil dolares per informa sur sua loca, e la SUA ia ofre 5 milion dolares.
Presidente Iván Duque ia saluta la catura de Otoniel en un mesaje televisada: "Esta es la colpa la plu grande contra trafica de drogas en nosa pais en esta sentenio. Lo es comparable sola a la cade de Pablo Escobar en la desenio de 1990."
Otoniel ia es caturada en sua asconderia campanial en la provinse Antioquia en la norde-ueste de Colombia, prosima a la frontera con Panama. An si detalias de la opera emerji ancora, la presidente ia nota ce un polisior ia mori.
Plu tarda, la fortes armada de Colombia ia publici un foto mostrante sua soldatos gardante Otoniel en securipolsos.
On ia fa ja alga operas enorme con miles de ofisiores per catura esta om de 50 anios en anios resente, ma los no ia susede asta aora.
Otoniel ia deveni la xef de la Clan Golfo, conoseda a ante como la Clan Úsuga, pos cuando la xef presedente -- sua frate -- ia es matada par polisiores invadente un selebra a la vijila de anio nova a cuasi des anios pasada.
La fortes de securia de Colombia ia descrive la gang como la organiza criminal la plu potiosa en la pais, e autoriosas en la SUA dise ce lo es "multe armada e estrema violente". Lo opera en multe provinses e ave relatas internasional estendosa es ocupada en contrabanda de drogas e persones, mina nonlegal de oro, e estorse.
On crede ce lo ave sirca 1800 membros armada ci veni jeneral de grupos paramilitar estrema destriste. Membros ia es arestada en Arjentina, Brasil, Onduras, Peru e Espania.
La gang controla multe de la vias usada per contrabanda drogas de Colombia a la SUA e a locas tan distante como Rusia. Ma la governa colombian crede ce lo ia redui vasta la cuantia de membros en anios resente, obligante multe de la gidores a asconde en rejiones distante en la jungla.
Otoniel fasa aora acusas incluinte la envia de cargas de cocaina a la SUA, la mata de polisiores e la enscrive de enfantes. El ia es formal acusada en la SUA en 2009 e fasa un prosede de estradi par cual ultima el va apare en corte en New York.
@T La colasa de un tore de apartes en Florida
@L aora_oji/2021/la_colasa_de_un_tore_de_apartes_en_florida
====== La colasa de un tore de apartes en Florida ======
En la SUA, la cuantia de persones mor ia crese a sinco pos la colasa de un tore de apartes en Florida.
Levine Cava, maior de Miami-Dade, ia dise ce la cuantia de persones mancante ia cade a 156 pos la identifia de tre plu de la corpos reganiada.
"Nosa taxe xef continua es la xerca e salva per reteni cualce vives posible," el ia comenta.
Un parte de la construida ia colasa en la temprana de la matina de jovedi en cuando multe abitores ia dormi.
La causa de la colasa es ancora nonclar. Ma on ia publici ier un reporta injenial de 2018, asentuante "un era major" en la desinia orijinal de Champlain Towers. Esta ia indica ce la problem preveni ce acua drena a via de la funda de la construida.
Ecipos ia usa macinas, avionetas e canes spesial instruida en sua atentas per trova survivores. La labora ia es impedida per un tempo corta ier cuando un focon ia ensende su la detrito.
La persones mancante inclui algas de Israel e America Latina. La ministreria de esternas paraguaia ia dise ce ses de sua nasionales es rejistrada como mancante, incluinte relatadas de la dama prima de la pais.
Ofisiores local ia furni salas de otel e comedas a familias ci espeta informa sur sua amadas.
@T La Coloseo va reseta un solo nova
@L aora_oji/2021/la_coloseo_va_reseta_un_solo_nova
====== La Coloseo va reseta un solo nova ======
3 maio 2021
La governa italian ia aproba un scema per furni un solo nova a la Coloseo de Roma, permetente ce visitores pote sta do gladiatores ia combate en la eda antica.
Dario Franceschini, ministro de cultur, ia anunsia ier la projeta per construi la solo retirable de lenio. La compania Milan Ingegneria ia gania la contrata de 18,5 milion euros per desinia la solo, de cual on previde sua completi en 2023.
A presente, esta monumento de 2000 anios ave no solo. Arceolojistes en la sentenio 19 ia sutrae la solo orijinal, esposante la rede de tuneles suteran do on ia teni gladiatores e animales ante la comensa de cada sesion de sporte de sangue.
Franceschini ia dise ce la solo nova "estracomun" va permete ce visitores "vide la gloria de la Coloseo" de sua sentro. El ia nota ce on va pote reali avenis cultural en la Coloseo pos restora la solo.
Milan Ingegneria, compania italian, ia es un de des organizas competente ci ia responde a la clama par la governa italian en 2020 per ofres per desinia la solo nova.
Sua scema implica instala sentos de laminas de lenio turnable per permete ce lus natural e aira entra a la cambras su tera. La solo nova de 3000 metres cuadrida va es desinstalable, per caso ce on va vole adota un otra desinia en futur.
La Coloseo ia es la amfiteatro la plu grande en la Impero Roman. Batalias de gladiatores e otra spetaculos publica ia aveni ala ante un fola de minima 50 mil persones.
An si la pandemica ia limita turisme, la Coloseo es ancora un de la monumentos la plu famosa de Italia. Lo ia atrae sirca 7,6 milion visitores en 2019.
@T La contamina de aira deveni plu grave en Delhi
@L aora_oji/2021/la_contamina_de_aira_deveni_plu_grave_en_delhi
====== La contamina de aira deveni plu grave en Delhi ======
18 novembre 2021
En la capital de Barat, tota scolas e universias es cluida per tempo nondefinida par causa de la nivel malinte de contamina de la aira. Un nebla nosiva covre Delhi ja de la festa divali.
Laboras de construi es ance proibida asta 21 novembre, ma on ia fa un eseta per projetas con relata a transporta o defende.
On permete la opera de sola sinco de la 11 sentros eletrical cual usa carbon en la site.
La niveles de PM2,5 -- particulas pico cual pote bloci la pulmones de persones -- en Delhi es multe plu alta ca la recomendas par la Organiza de Sania Mundal. A martedi, alga partes de la site ia rejistra un cuantia prosima a o plu alta ca 400, en la categoria "grave".
On regarda un cuantia entre zero e 50 como "bon", e entre 51 e 100 como "sasiante".
La contamina ia obliga ja alga scolas a clui en la semana pasada. La governa de Delhi ia dise ce lo considera introdui un state de enclui per boni la cualia de aira, con ce nubes densa de nebla fumosa engoli la site.
Delhi es la capital la plu contaminada de mundo, par un misca de fatores cual inclui emetes veculal e industrial. La aira deveni spesial nosiva en la menses de inverno cuando cultivores en statos visina arde palias basa.
Focos artal en la festa divali mali plu la cualia de aira a la mesma tempo. E la nonrapidia de la venta partisipa ance, car lo catura la contaminantes en la parte plu basa de la atmosfera.
@T La Coreas restora un linia de comunica entre se
@L aora_oji/2021/la_coreas_restora_un_linia_de_comunica_entre_se
====== La Coreas restora un linia de comunica entre se ======
27 julio 2021
Corea Norde e Sude ia restora un linia direta de comunica cual Pyongyang ia clui en junio pasada.
Longo un declara par la ofisia presidental de la Sude, la xefes de ambos paises ia acorda reconstrui la fida e boni sua relatas. Los ia intercambia alga ja leteras personal pos april.
Corea Norde ia clui la linia en junio 2020 cuando relatas ia amargi pos un confere falida entre la du paises. Corta a pos, Corea Norde ia esplode un ofisia de frontera cual ia es construida per boni la comunica.
Representores de ambos lados ia spende tre minutos en parla par telefon, longo la Ministreria de Uni de Corea Sude. La ministreria ia ajunta ce on va fa un plu telefoni a la posmedia de oji, e a cada dia de aora.
La relatas entre la paises ia boni en 2018 cuando Moon Jae-in, presiente de la Sude, e Kim Jong-un, xef de la Norde, ia consenta a tre veses. Ma esta ia colasa rapida pos la consenta du nonsusedosa entre Kim e Donald Trump, alora presidente de la SUA.
La tensa ia profondi plu tarda, cuando grupos de disentores ci ia fuji a la Sude ia envia propaganda tra la frontera. Ultima, Corea Norde ia abandona tota lias de comunica militar e political, incluinte la linia direta entre sua xefes.
La du paises resta tecnical gerante, car la Gera Corean de 1950 a 1953 ia fini con un sesaspara en loca de un acorda de pas.
@T La custa de comables crese rapida
@L aora_oji/2021/la_custa_de_comables_crese_rapida
====== La custa de comables crese rapida ======
4 junio 2021
La custa de comables tra la mundo ia crese a sua rapida mensal la plu alta en plu ca un desenio, longo la Nasiones Unida.
La NU usa un indise larga de custas de comables, e aora estas ia crese ance tra 12 menses en serie.
Furnores ia es afetada par disturbas a produi, labora e transporta en la pandemica.
On deveni ansiosa sur infla plu jeneral e sur la risca ce custas plu alta va afeta la recovre economial de la mundo.
La indise de la Organiza NU per Nuri e Cultiva (ONC) nota la custas tra la mundo de comables diversa, incluinte sereales, olios vejetal, produidas de leteria, carne e zucar.
La custas altida resulta de la renovi de compra en alga paises contra un produi ancora basa. Disturbas a la mercato e la furni, causada par restrinjes de move, ia crea mancas local.
Espertas ia averti a ante ce esta situa va causa un aumenta de infla en cuando economias sorti de sua state isolida.
An tal, alga industrias va esperia cisa un recovre forte. La ONC predise ce la produi global de sereal en esta anio va es recordo, e posible esta va aida lenti la crese de custas.
@T La diretos de femes afgani su governa taliban
@L aora_oji/2021/la_diretos_de_femes_afgani_su_governa_taliban
====== La diretos de femes afgani su governa taliban ======
18 agosto 2021
La talibanes dise ce la diretos de femes en Afganistan va es respetada "en la strutur de lege muslim".
En la confere jornaliste prima de la grupo pos sua prende de controla de la pais a soldi, un portavose ia dise ce femes va pote labora libre, ma ia dona poca detalias sur otra regulas e restrinjes.
Zabihullah Mujahid ia repete ce tota afganis debe vive "en la strutur de islam".
La grupo militariste ia introdui o suporta punis longo sua interprete sever de xaria, la sistem legal muslim, cuando los ia controla Afganistan entre 1996 e 2001.
Femes ia debe porta burcas, covrente la corpo intera, e la talibanes ia desaproba ance ce xicas con plu ca des anios vade a scola.
Plu temprana ier, la talibanes ia declara un amnestia jeneral tra la pais e ia dise ce los vole ave femes en sua governa.
Longo multe analisores, la grupo maneja un promove sofisticada de relatas publica per atenta gania la cores e menses de afganis e la comunia internasional.
La talibanes ia dise ance ce los no xerca venja contra sua oposores, e ce cadun va es "pardonada".
Ma sua prometes de "pasaje secur" a la airoporto de Kabul per afganis ci vole parti de la pais ia es suminada par reportas ce femes e enfantes ia es bateda e flajelida en atenta pasa tra puntos de controla.
Car la talibanes maneja aora la fronteras de tera de Afganistan, la airoporto de Kabul es la sola modo de parti. Militares esuan ia securi la campo-de-avion mesma, pos senas caososa en la finisemana, ma la talibanes maneja la via a la airoporto e ia pone multe puntos de controla en la norde de Kabul.
@T La ecipo es elejeda per un filma rusce en spasio
@L aora_oji/2021/la_ecipo_es_elejeda_per_un_filma_rusce_en_spasio
====== La ecipo es elejeda per un filma rusce en spasio ======
14 maio 2021
Rusia ia eleje un ator famosa e un dirijor premiada per vola a la Stasion Spasial Internasional per fa lo cual on descrive como la filma dramosa prima en spasio.
Yulia Peresild, ci ave 36 anios, e Klim Shipenko, con 37, va viaja en un roceto de la lanseria Baikonur a 5 otobre.
La drama ave a presente la titulo Defia. Roscosmos, la ajenteria spasial rusce, dise ce lo vole mostra la abri de spasio a plu multe persones.
Ance la ajenteria NASA de la governa esuan intende fa un filma en la stasion spasial, con la ator Tom Cruise.
Lo no es ja clar cuando sua filma, anunsiada en la anio pasada, va es filmada. On previde ce Cruise va vade a la ISS con dirijor Doug Liman. NASA dise ce SpaceX, la compania de rocetos de Elon Musk, va es ance envolveda.
La anunsia par Roscosmos ier ia provoca comentas ce Rusia es aora en un tipo nova de corsa spasial con la SUA, en relata a persones famosa.
Roscosmos dise ce Peresild e Shipenko ia pasa tra prosedes medical e de eleje artal. Sua aprende spesial va comensa a no plu tarda ca 1 junio e va inclui eserses de sentrifuga e vibra, volas en un avion de microgravita, e instruis sur paracades.
On reporta ce la filma va raconta la mision de un sirurjiste fema ci opera sur un astronauta tro malada per reveni direta a la Tera.
Peresild es la stela de alga dramas grande rusce, incluinte La borda e Batalia per Sevastopol, e el es un Artiste Onorada de la Federa Rusce.
Shipenko ia dirije Serfo, un comedia en 2019 cual ia gania plu ca 42 milion dolares, e un filma premiada de desastre en spasio -- Salyut 7. El es ance un ator e autor de teatrales.
@T La evolui de elefantes sin dentones es liada a xasa
@L aora_oji/2021/la_evolui_de_elefantes_sin_dentones_es_liada_a_xasa
====== La evolui de elefantes sin dentones es liada a xasa ======
23 otobre 2021
Un studia nova sujesta ce la xasa nonlegal de ivor en partes de Mosambic ia aselera la evolui de elefantes sin dentones.
La rexerca, publicida en la jornal Siensa, ia trova ce en la Parce Nasional Gorongosa un disturba jenetical, rara en pasada, ia deveni plu comun cuando la xasa de ivor per finansia un gera interna ia lasa la spesie a la borda de estingui.
Ante la gera, sirca 18,5% de femas ia es natural sin dentones. Esta cuantia ia crese a 33% entre elefantes naseda pos la parte prima de la desenio de 1990.
Sirca 90% de la elefantes de Mosambic ia es matada par combatores a ambos lados en la gera interna cual ia estende de 1977 a 1992. Xasores ia vende la ivor per finansia batalias violente entre fortes governal e rebelores anticomuniste.
Simil a la color de oios e la tipo de sangue en umanas, jenes determina esce elefantes erita dentones de sua jenitores. Elefantes sin dentones ia es iniorada par la xasores, inflante la probablia ce los va reprodui e pasa la manca de dentones a sua projenia.
Rexercores ia suspeta tra tempo longa ce esta cualia, sola trovada en femas, es relatada a la seso de un elefante. Pos la seguensa de la jenomes de elefantes con e sin dentones, analises ia revela ce la tende es liada a un muta en la cromosoma X, ja matante a mases en la utero, ma dominante en femas.
Un coautor de la studia, Profesor Robert Pringle de la Universia Princeton, ia indica ce la descovre pote ave efetos durante per la spesie. Car la projenia mas no tolera la manca de dentones, lo es posible ce min elefantes va es naseda. Cisa esta va lenti la recovre de la spesie, cual ave aora en la parce apena plu ca 700 elefantes.
"La manca de dentones es cisa vantajosa en un gera," Pringle ia dise. "Ma lo porta un custa."
Un otra efeto ladal posible es cambias a la tereno jeneral, car la studia ia revela ce animales con e sin dentones no come la mesma plantas.
Pringle ia asentua ce, con pasa de tempo, on va pote reversa la tende. "Nos espeta vera ce la frecuentia de esta sindrom va diminui en nosa popla studiada si la situa de conserva va resta ancora tan positiva como lo ia es resente."
El ia ajunta: "On ave un tal tempesta de novas depresante sur biodiversia e umanas en la ambiente, e me opina ce lo es importante ce on asentua ce acel imaje conteni alga puntos solosa."
@T La festa la plu grande de sinematografia en Africa
@L aora_oji/2021/la_festa_la_plu_grande_de_sinematografia_en_africa
====== La festa la plu grande de sinematografia en Africa ======
18 otobre 2021
La numero 27 de FESPACO, la Festa Panafrican de Filma e Televisa de Ouagadougou, ia comensa en la capital de Burcina Faso. La tema es "Sinemas de Africa e la Diaspora: perspetivas nova, defias nova".
Miles ia foli la compleso Palasio de Sportes en la distrito Ouaga 2000 per esperia la comensa de la selebra la plu grande de sinematografia en Africa, cual estende de 16 a 23 otobre.
La aveni ia es inisial projetada per febrero de esta anio, ma ia es posponeda par causa de la pandemica de covid.
FESPACO, cual ia orijina en 1969, es un festa internasional reconoseda cual atrae sinemafilicas de tra la mundo per selebra filmas produida xef en Africa par africanes.
Securia ia es sever en e sirca la compleso, con la armada stratejial postida tra la site. De 2015, Burcina Faso batalia un rebela par grupos djihadiste en la rejiones norde e este.
Elise Foniyama Ilboudo Thiombiano, ministro burcinabe de cultur, ia dise: "Fasante la crise nonpresededa de securia, nos resta stante." La presidente, Roch Marc Christian Kaboré, ia es presente, como ance la ministro de esternas e ambasadores internasional.
De la 1132 entradas proposada en ses categorias, on ia eleje 239 filmas de 50 paises per la lista major. 17 filmas longa va batalia per la premio xef, la Cavalo de Oro de Yennenga, nomida per un bestia en mitolojia burcinabe.
Sua dirijores veni de Aiti, Angola, Burcina Faso, Camerun, Costa de Ivor, Lesoto, Magrib, Misre, Namibia, Nijeria, Ruanda, Senegal, Somalia, Tanzania, Tunis e Txad.
La premior ultima va es elejeda par un juria internasional dirijeda par Abderrahmane Sissako, sinemiste muritani, ci en 2015 ia gania la premio nasional franses, César, per la filma la plu bon, per Timbuktu.
@T La fini de un abita solitar longa sur un isola italian
@L aora_oji/2021/la_fini_de_un_abita_solitar_longa_sur_un_isola_italian
====== La fini de un abita solitar longa sur un isola italian ======
27 april 2021
Un om italian va parti de la isola sur cual el ia abita solitar tra plu ca 30 anios, pos presa par autoriosas.
Mauro Morandi ave 81 anios. El ia move a Budelli, a la costa de Sardinia norde, en 1989. Ma en la anio pasada, el ia dise ce la posesores de la isola, cual es conoseda per sua plaia ros, vole ce el reloca se.
"Me va parti esperante ce en la futur Budelli va es protejeda como me ia proteje lo tra 32 anios," el ia scrive en Facebook a soldi.
Morandi ia es orijinal frustrada par multe cosas en sosia, como consumisme e la situa political en Italia, donce el ia deside vade a un isola nonabitada en Polinesia, distante de sivilia.
Pos comensa sua viaja par mar, el e alga amis ia atera a La Maddalena, arcipelago italian, do los ia intende labora per finansia la resta de sua viajas. Ma pos ariva sur Budelli e encontra la conservor de la isola, ci ia es a punto de jubila, Morandi ia deside resta, curante la isola e parlante con turistes.
El ia es menasada con espulsa a alga veses tra la anios.
En 2020, la presidente de la Parce Nasional de La Maddalena ia dise ce Morandi ia fa alteras nonlegal a sua cabana, cual ia es un stasion de radio en la Gera Mundal Du. Un apela a la governa italian per permete sua resta ia recolie 70 mil suscrives.
Ma a soldi, Morandi ia anunsia sua deside de parti, disente ce el va reloca se a un aparte peti sur un otra isola prosima. "Mea vive no va cambia tro multe," el ia comenta. "Me va vide ancora la mar."
@T La Foresta Daintree es redonada a gardores nativa
@L aora_oji/2021/la_foresta_daintree_es_redonada_a_gardores_nativa
====== La Foresta Daintree es redonada a gardores nativa ======
29 setembre 2021
La Foresta Daintree en Australia ia es redonada a sua gardores nativa en un acorda major.
Con plu ca 180 milion anios, esta loca de erita mundal es la foresta pluvosa la plu vea de mundo. Aora, la popla koku-yalanji este ci abita ala va maneja esta parce nasional con la governa de la stato Queensland.
La foresta borda la Parador Grande de Coral e es un de la locas la plu popular per turistes en Australia. Lo es famosa par causa de sua ecosistem antica e belia natural cual inclui vistas forestal, rios savaje, cascades, caniones e plaias de arena blanca.
La acorda pertine ance a otra parces nasional de Queensland, como Ngalba Bulal (Baia Sedro), Kalkajaka (Monte Negra) e la Isolas Espera, con area combinada de plu ca 160 mil ectares.
Oji redonante la posese formal a la koku-yalanjis este, la governa statal ia reconose "un de la cultures vivente la plu vea de mundo".
La popla koku-yalanji este, cual ave sirca 3000 membros, desira deveni ultima la sola manejores de la forestas e otra rejiones de la Tropicos Umida de Queensland. Sua negosior Chrissy Grant ia dise: "Persones tra la tropicos umida ia abita continuante en la foresta pluvosa. Esta mesma es un cualia vera unica en la lista de erita mundal."
La rejion ia es formal listada como un local de erita mundal en 1988 pos un promove en Canberra per resiste la politica de esplota es desforesti alora aprobada par la governa de la stato. Lo es la area la plu grande en Australia cual ia persiste sempre como un foresta pluvosa.
UNESCO reconose lo como un loca "estrema importante" de biodiversia rica e unica, conteninte plu ca 3000 spesies de plantas, 107 de mamales, 368 de avias e 113 de retiles. On trova ala la restantes de la forestas grande cual ia covre Australia e partes de Antartica ante la separa de la continentes a entre 50 e 100 milion anios ante aora.
@T La fotos prima de la vagador esuan sur Marte
@L aora_oji/2021/la_fotos_prima_de_la_vagador_esuan_sur_marte
====== La fotos prima de la vagador esuan sur Marte ======
20 febrero 2021
La ajenteria spasial esuan ia publici un imaje notable, enviada de Marte par sua vagador Perseverance (Persiste).
Lo mostra la robot desendente a la tera en jovedi. La foto ia es fada par la scafal de roceto cual ia basi la veculo asta la surfas.
Perseverance ave ja un cuantia grande de datos en sua memoria, e lo envia gradal estas a la Tera.
Entre otra imajes es un vista par satelite cual mostra la vagador desendente su paracade. Esta foto es tecnical estrema impresante car la satelite ia es alora a sirca 700 cilometres de la vagador e viajante a sirca 3 cilometres per secondo.
NASA promete publici plu en la dias seguente, incluinte filmas corta, con sona, fada en cuando la veculo ia pasa tra la atmosfera de Marte e ia desende a la surfas.
Perseverance es locada en la crater Jezero, prosima a la ecuator martan, do lo va xerca indicas de vive microbial pasada.
La imajes la plu detaliosa de la crater va ariva en la semana veninte pos cuando la vagador ia leva sua masto de naviga, cual porta la cameras siensal xef.
@T La G7 revela sua projeta contra pandemicas futur
@L aora_oji/2021/la_g7_revela_sua_projeta_contra_pandemicas_futur
====== La G7 revela sua projeta contra pandemicas futur ======
12 junio 2021
La xefes de la G7 va dedica sua recursos a labora per serti ce on va revide nunca la ruina umana e economial causada par un pandemica como covid.
En la dia du de sua confere en la rejion Cerno en la sude-ueste de England, los va publici un declara cual presenta un serie de medias per reali esta. Un de la intendes es redui la tempo nesesada per developa vasines a min ca sento dias.
La G7 (Grupo de Sete) es un organizada composada de la sete "economias avansada" la plu grande de mundo: Canada, Deutxland, Frans, Italia, Japan, la Rena Unida e la Statos Unida. Du politicistes xef de la UE es ance presente a la confere.
Ier, Boris Johnson, ministro xef de la Rena Unida, ia abri la asembla con un promete per combate la nonegalia global.
Johnson, ci ospita esta confere de tre dias en Baia Carbis, un vileta de vacanse a borda de la mar, ia dise ce lo es esensal ce on aprende de la "eras" de la crise finansial de 2008 e batalia contra la "sicatris" de nonegalia.
La xefes G7 va presenta la Declara de Baia Carbis pos un sesion spesial oji. Otra pasos concreta va es boni la redes global de monitori medical e la capasia per seguensa jenomes, e suporta la reformi e forti de la Organiza de Sania Mundal.
Johnson ia promete ce la RU va dona plu ca 100 milion vasines de covid a paises plu povre en la des-du menses veninte, e Biden ia promete 500 milion dosas de vasines Pfizer a 92 paises de revenu basa e media e a la Uni African.
Alga asosias carital e promovores ia critica la estende de la projeta de la Rena Unida, en cual 5 milion dosas va es distribuida ante la fini de setembre, 25 milion ante la fini de esta anio, e la restantes en 2022.
@T La impedica du de Trump no condena el
@L aora_oji/2021/la_impedica_du_de_trump_no_condena_el
====== La impedica du de Trump no condena el ======
14 febrero 2021
La Senato de la SUA no ia ateni la majoria de du tris nesesada per condena Donald Trump, la presidente pasada ci on ia acusa de provoca un rebela en relata con la tumulta a la Capitolio a 6 janero.
57 senatores, incluinte sete republicistes, ia vota per condena Trump. 43 ia vota a contra.
Pos sua desculpa, Trump ia publici un declara denunsiante la litiga como "la xasa la plu grande de sorsores en istoria".
Esta ia es sua impedica du. Si el ia ta es condenada, la Senato ia ta pote vota per proibi el de aspira la presidentia denova en futur.
Pos la vota, la republiciste major en la Congresa, Mitch McConnell, ia dise ce Trump ia es "culpable" per la ataca a la Capitolio e ia descrive esta como un "descura desonorosa, desonorosa, de debe".
Ma plu temprana, el ia vota contra condena, disente ce lo ta es aora nonconstitual car Trump no es plu la presidente. McConnell ia es influente per pospone la litiga de Trump asta pos sua parti de la posto a 20 janero.
An tal, McConnell ia averti ce lo es ancora posible ce Trump va es judida en corte.
Presidente Joe Biden ia dise: "Esta capitol triste en nosa istoria ia remente nos ce democratia es frajil. Ce lo debe es sempre defendeda. Ce nos debe es sempre vijilante. Ce violentia e estremisme merita no loca en America. E ce cada de nos ave un debe e encarga como esuanes, e spesial como xefes, per defende la veras e vinse la mentis."
La reputa de Trump no emerji nondanada de esta impedica. Un de la partes la plu memorable de la caso acusante ia es videos nova de sua suportores sacante la Capitolio, portante xapetas e brandinte banderas con la slogan de Trump, con ci acel imajes va es aora sempre asosiada.
@T La indui de un amiral transjenero esuan
@L aora_oji/2021/la_indui_de_un_amiral_transjenero_esuan
====== La indui de un amiral transjenero esuan ======
20 otobre 2021
En la SUA, la ministro aidante per sania ia es induida como la ofisior transjenero prima de cuatro stelas en la istoria de la pais.
Dr Rachel Levine, ci ave 63 anios, es aora un amiral de la Corpo de Comision de Servi de Sania Publica. Asiniada par presidente Joe Biden, el es aora la ofisior nonsecreta transjenero de grado la plu alta en la SUA.
El ia descrive la aveni como "sinifiosa" e "monumentin" en sua parla de inaugura ier. "Ta ce esta asinia oji es la prima de multe plu venintes, en cuando nos crea un futur diversa e plu incluinte," el ia dise en un parla cual ia onora otra individuas LGBT o cuer cual ia presede el.
Levine, un graduada de Harvard College e la Scola Medical de la Universia Tulane, ia labora pasada como pediatriste.
La Corpo de Comision de Servi de Sania Publica ave sirca 6000 ofisiores uniformida e es encargada per responde a crises de sania como la pandemica de coronavirus e desastres natural.
Xavier Becerra, ministro de sania, ia descrive la asinia de Levine a sua posto nova como "un paso jigante avansante en dirije a egalia como un nasion".
Levine ia servi ance como la mediciste jeneral de Pennsylvania e la ministro de sania per acel stato, laborante sur problemes como dependes vasta a opioides.
El ia es confirmada como ministro aidante per sania par 52% de votas en la Salon Alta de parlamento en marto. En la prosede de confirma, la nominada ia fasa demandas sur sua maneja de la pandemica en ospisios en sua tempo como ministro de sania per Pennsylvania.
Per la moris de multe persones senesente, criticores ia culpa un politica statal cual ia esije ce ospisios aseta pasientes de covid. Levine ia atesta ce, corta pos reali acel politica, el ia sorti sua propre madre de un ospisio cuando la cuantia de casos de la virus ia crese.
@T La indui de un ministro xef nova en Italia
@L aora_oji/2021/la_indui_de_un_ministro_xef_nova_en_italia
====== La indui de un ministro xef nova en Italia ======
13 febrero 2021
Mario Draghi ia aseta formal la rol de ministro xef de Italia e va es oji induida.
Esta xef pasada de la Banco Sentral European ia nomi sua consilio pos encontra la presidente italian. El es suportada par cuasi tota la partitos political major, pos la colasa en janero de la governa presedente de Giuseppe Conte entre un disputa sur la spende de mone de la UE per recovre de covid.
Italia batalia ancora la pandemica e fasa ance sua crise economial la plu grave en desenios. La pais ia rejistra plu ca 93 mil moris, numero ses de la cuantias la plu alta de mundo.
Con sua suporta par la Promove Sinco Stelas, la alia la plu grande en parlamento, Draghi ave un majoria sufisinte per reali sua ideas.
Luigi Di Maio, un figur major en la Promove Sinco Stelas, va continua como ministro de esternas. Giancarlo Giorgetti de la partito popliste estrema destriste Liga Norde va deveni la ministro de industria. E Andrea Orlando de la Partito Democrata sentral sinistriste va es la ministro de labora.
En la semana veninte, la governa va fronti un vota de fida, ma esta va es mera un rituo entre la suporta multipartital.
Un economiste con esperia a la niveles la plu alta de la Uni European e como governor de la Banco de Italia, Draghi es regardada como manos fidable.
Matteo Renzi, ministro xef de 2014 a 2016, ia comenta: "Mario Draghi ia es la italian ci ia salva Europa, e me pensa ce aora el es la european ci pote salva Italia."
@T La lira turces perde 14% pos cambia de bancor xef
@L aora_oji/2021/la_lira_turces_perde_14_pos_cambia_de_bancor_xef
====== La lira turces perde 14% pos cambia de bancor xef ======
22 marto 2021
La valua de mone de Turcia ia diminui par asta 14% pos cuando presidente Recep Tayyip Erdoğan ia desemplea la governor de la banco sentral a la fini de semana.
Naci Ağbal ia es reconoseda como un rolor major en retira la lira turces de un punto basa istorial. Asiniada en novembre, el ia leva tasos de interesa per batalia un infla de plu ca 15%.
En un move surprendente a saturdi, Erdoğan ia recambia el. Esta es la ves tre en min ca du anios cuando un governor de la banco sentral ia parti.
La desemplea ia xoca investores interna e esterna ci ia loda la politica monal resente de la banco.
A un punto en esta anio, la lira ia es la mone la plu bon funsionante en mercatos emerjinte, pos regania cuasi un sinci de sua valua pos un state basa contra la dolar esuan. En la semana pasada, la valua ia crese multe cuando Ağbal ia leva tasos de interesa par du persentos, la duple de lo cual economistes ia espeta.
Investores ia recomenda un politica monal plu rigorosa en Turcia per doma la infla, con ce custas alti rapida en la pais.
On ave aora un ansia ce la deside par Erdoğan per instala Şahap Kavcıoğlu en la rol va erode cisa la ganias fada en la periodo corta de Ağbal.
Kavcıoğlu es un profesor de pratica bancal, poca conoseda, e un legor pasada en la Partito de Justia e Developa, la partito governante. On sabe ce el oposa tasos alta de interesa como modo de trata la infla.
A presente, la taso de interesa en Turcia es 19%, atraente investores stranjer a teni sua mone en liras.
En un declara ier, la banco sentral ia dise ce lo "va continua usa eficas la utiles de politica monal, aliniada con sua ojeto xef de reali un redui permanente de la infla".
Con un taso plu alta de interesa, emprestas deveni plu custosa, e esta descoraji consumores de spende tro multe. Ma un nonvantaje comun es un lenti de la crese economial.
@T La mapa tridimensional la plu vea en Europa
@L aora_oji/2021/la_mapa_tridimensional_la_plu_vea_en_europa
====== La mapa tridimensional la plu vea en Europa ======
7 april 2021
Un petra de la eda de bronze pote es la mapa tridimensional la plu vea en Europa.
Esta bloco de 2 par 1,5 metres, prima descovreda en 1900, ia es denova trovada en un castel en Frans en 2014. Arceolojistes ci ia studia motifes gravada sur lo crede ce la marcas es un mapa de un rejion en la ueste de Bres, en Frans norde-ueste.
La peso de roca, nomida la Bloco Saint-Bélec, pare orijina en la temprana de la eda de bronze, entre 1900 e 1650 AEC.
Lo ia es prima descovreda en un escava a un entereria preistorial en Finistère en Bres par Paul du Chatellier, un arceolojiste local.
Lo ia es conservada su un foso de acua ensircante la Castel de Kernuz, do sua descovror ia abita, e sua esiste ia es parente oblidada tra plu ca un sentenio. Ma rexercores xercante la bloco ia trova lo en un sutera en 2014.
Pos analise marcas e gravas sur la petra, la espertas ia suspeta ce lo es un mapa. La "presentia de motifes repeteda, juntada par linias" sur la surfas sujesta ce lo portrae un parte de Finistère, longo un studia en la revista de la Sosia Preistorial Franses.
La rexercores dise ce la indentes es un representa tridimensional de la vale de la Rio Odet, e alga linias pare refleta la rede de rios de la rejion. Jeolocali ia indica ce la teritorio desiniada sur la petra coresponde, con esatia de 80%, a la cualias jeografial sirca 29 cilometres de la rio.
Un de la rexercores, Dr Clément Nicolas, ia comenta: "On ave alga tal mapas siselida en petra tra tota la mundo. Jeneral, los es mera interpretes. Ma esta es la ves prima cuando un mapa ia portrae un rejion con un proportio spesifada."
El dise ce la mapa ia es cisa usada per defini la frontera de un rejion. "Lo ia es probable un modo de afirma la posese de la teritorio par un prinse o re minor a acel tempo. Nos tende suestima la sabes jeografial de sosias pasada. Esta petra importa, car lo lumina esta sabe cartografial."
@T La militar saisi la controla de Miama
@L aora_oji/2021/la_militar_saisi_la_controla_de_miama
====== La militar saisi la controla de Miama ======
1 febrero 2021
La militar de Miama ia saisi la controla de la pais pos deteni la xef par fato Aung San Suu Kyi e otra politicistes en la oras temprana de esta matina. La televisa militar dise ce on ia declara un state de crise per un anio e ce la potia ia es transfereda.
Esta segue un aumenta de tensa entre la governa sivil e la militar pos un eleje disputada. Miama ia es militar governada asta 2011, cuando sua reformis democrata ia comensa.
La militar ia dise oji ce lo transfere la potia a comandor Min Aung Hlaing par causa de "votas manipulada". Soldatos es sur la stradas de la capital, Nay Pyi Taw, e la site xef Yangon.
En la eleje a 8 novembre, la Alia Nasional per Democratia, gidada par Suu Kyi, ia gania 83% de la sejas disponable, sufisinte per formi un governa.
Lias de interede portable e alga servis de telefon es aora rompeda en alga sites grande, e la difusor nasional MRTV no transmete, disente ce lo esperia problemes tecnical. Comunica con Nay Pyi Taw no es posible e la situa ala es difisil per evalua.
Persones en Yangon ia sta en filo ante automatas de banco, previdente un manca de mone dur en la dias veninte. La bancos ia suspende tempora tota sua servis finansial.
@T La militares miama libri un monce controversa
@L aora_oji/2021/la_militares_miama_libri_un_monce_controversa
====== La militares miama libri un monce controversa ======
7 setembre 2021
La junta militar de Miama ia libri Ashin Wirathu, un monce budiste controversa famosa per sua retorica nasionaliste e antimuslim.
En pasada, el ia es acusada de rebela contra la governa sivil, cual ia es desponeda par un colpa militar en febrero.
La monce pasionosa es conoseda per sua opinas suportante la militares. On ia descrive el como "la Bin Laden Budiste" par causa de sua parlas oposante muslimes e spesial la rohingias.
En anios resente el ia apare a asemblas promilitar per presenta parlas nasionaliste e critica Aung San Suu Kyi, alora la ministro xef de la pais, e sua governa partito la Alia Nasional per Democratia.
En 2019 on ia acusa Wirathu de provoca "odia e despeta" contra la governa sivil. Pos esta, el ia fuji, ma ia sede se a la autoriosas en novembre de la anio pasada. El ia espeta sua litiga de alora.
Ma ier, la governa militar ia dise ce tota acusas contra el ia es canselada, sin dona razonas. On ia ajunta ce Wirathu va es tratada en un ospital militar. Sua state medical no es conoseda.
A la apico de sua popularia, el ia ave deses de miles de seguores enlinia ci ia regarda sua sermones en redes sosial o ci ia es presente a sua asemblas.
El ia es lansada a la campo publica par sua parlas en 2012, cuando violentia matante ia eruta en la stato Rakain entre muslimes, xef rohingias, e budistes. Miama, pais de sirca 54 milion persones, ave budisme como sua relijio xef.
@T La militares va enforsa isoli en Sydney
@L aora_oji/2021/la_militares_va_enforsa_isoli_en_sydney
====== La militares va enforsa isoli en Sydney ======
30 julio 2021
Australia ia posti sentos de soldatos a Sydney per aida enforsa regulas de isoli contra covid. Un aveni de la varia delta cual ia comensa ala en junio ia produi ja cuasi 3000 infetas e ia causa nove moris.
Soldatos de la Forte de Defende Australian va es instruida en la finisemana, ante comensa patrulias nonarmada a lundi. Ma multe persones demanda esce la interveni militar es nesesada, descrivente lo como tro.
La isoli, cual va continua asta 28 agosto a la min, proibi persones de sorti de sua casa, estra per razonas esensal como eserse, compra de comedas e cura per otras.
Ma an pos sinco semanas de restrinjes, la infetas en la site la plu grande de la pais es ancora sperdente. Ofisiores ia rejistra 170 casos nova oji.
Soldatos va junta se a la polisia en locas con multe casos de la virus per serti ce cadun segue la regulas, cual inclui un limita de viaja de 10 cilometres. Informa furnida par ofisiores de sania indica ce la virus sperde xef par moves permeteda.
David Elliott, ministro per polisia de Cimri Sude Nova, ia dise ce esta va aida car un minoria peti de la abitores de Sydney opina ce "la regulas no pertine a los".
La Alia de Avocatos Australian, un organiza de diretos sivil, ia dise ce la posti es "un usa preocupante" de la armada en un democratia libraliste.
La situa ia afeta xef laborores esensal e grupos familial grande en la suburbes plu povre e etnical diversa en la ueste e sude-ueste de la site. Oposores dise ce esta rejiones ia fasa ja metodos "ojetida" de polisi, e asentua ce la restrinjes ala es plu sever ca en la resta de Sydney.
"Nosa persones es un de la grupos demografial la plu povre, e ja a ante, los ia senti maltratada e marjinalida," Steve Christou, maior local, ia comenta. "Los no pote paia sua ipoteca, sua lua e sua comedas, o labora. Aora, la apare de la armada per enforsa isoli sur la stradas va es un problem enorme a esta persones."
Otras ia recomenda ce la governa aumenta sua promove de vasines e sua servis de suporta per la comunias afetada.
La taso de vasini en Australia, sola 17% de la popla adulte, resta un de la plu basas entre la paises en la Organiza per Coopera e Developa Economial.
@T La ministro xef fema prima de Sveria resinia rapida
@L aora_oji/2021/la_ministro_xef_fema_prima_de_sveria_resinia_rapida
====== La ministro xef fema prima de Sveria resinia rapida ======
26 novembre 2021
La ministro xef fema prima de Sveria ia resinia a mera oras pos sua asinia.
Magdalena Andersson ia es anunsiada como la gidor ier, ma sua bujeta no ia es aprobada. En loca, la parlamento ia aseta un bujeta preparada par la partitos oposante, cual inclui la destra estrema antimigral.
Sua aliada en governa, la Partito Verde, ia resinia ance (e a ante), disente ce lo no ia pote aseta un tal bujeta.
Andersson, democrata sosial, ia dise ce el espera atenta deveni denova la ministro xef como gidor de un governa de un sola partito.
"On ave un pratica constitual ce un governa de aliadas debe resinia cuando un de la partitos abandona," el ia dise. "Me no vole gida un governa de cual sua legalia va es dutada."
La presidente de la parlamento ia dise ce el va contata la xefes de partitos sur la modo de continua.
Andersson ia es elejeda como ministro xef en la parte plu temprana de martedi car, su leges svensce, el ia nesesa sola ce un majoria de parlamentores no vota contra el.
A sento anios pos cuando femes svensce ia reseta la direto de vota, partes de la parlamento ia sta per aplaudi la gidor de la democratas sosial.
Sua eleje a la posto xef de un governa minorial ia segue un acorda a minuto ultima con la Partito Sinistra (oposante), par intercambia per pensiones plu alta per multe svensces. El ia oteni ance la suporta de la Partito Verde (aliada).
De la 349 membros de la parlamento o Riksdag, 174 ia vota contra Andersson. Ma ultra la 117 ci ia suporta el, 57 ia asteni, tal ce el ia vinse par un sola vota.
Andersson, un nador pasada campionida de la site universial Uppsala ci ave aora 54 anios, ia comensa sua carera political en 1996 como conselor a Göran Persson, la ministro xef alora. Tra la sete anios pasada, el ia es la ministro de finansia.
Ante sua vinse ier, Sveria ia es la sola pais nordica cual ia ave nunca un ministro xef fema.
@T La misterio de miles de pexes mor en un lago lubnani
@L aora_oji/2021/la_misterio_de_miles_de_pexes_mor_en_un_lago_lubnani
====== La misterio de miles de pexes mor en un lago lubnani ======
9 maio 2021
Plu ca 40 tones de pexes mor ia encalia sur la rivas de la lago Qara'un en la sude de Lubnan.
La rio Litani, la plu grande en la pais, flue a esta lago artifis.
Tra anios ja, ativistes averti sur contamina par dejetadas e acua de cloaca.
Nasrallah El Hajj de la Departe de la Parario Qara'un ia comenta: "Nos fasa o un maladia o un ata par algun. Si lo no es un maladia, alora algun ia fa esta con intende."
La armada e organizas nongovernal local ia labora per limpi la rivas. Samples de la pexes e tera de la fondo de la lago es aora esaminada en Lubnan e a estra.
Celine Chemali, un studiante de biolojia a la Universia San-Josef de Beirut, ia dise: "La problem asi es ce nos ave ancora no idea de la causas de esta masacra. Esta dise multe sur la situa asi en Lubnan. Nos sabe ce nosa rios es contaminada. Nos sabe ce nosa acua es contaminada. Nos sabe ce nosa aira es contaminada. Ma nos no reata a lo, nos no esamina lo, nos no atenta preveni lo en cualce modo."
@T La misterios de un computador elinica antica
@L aora_oji/2021/la_misterios_de_un_computador_elinica_antica
====== La misterios de un computador elinica antica ======
13 marto 2021
Un aparato de 2000 anios, cual on ia descrive comun como la computador la plu vea de mundo, ia es recreada par siensistes ci atenta comprende sua funsiona.
La Macina de Anticitera ia confonde espertas pos sua descovre en un naufragada en Elas en 1901.
On crede ce esta aparato elinica antica, enerjida par mano, ia es usada per predise eclises e otra avenis astronomial. Ma sola un tri de lo survive.
La retro de la macina ia es ja solveda par studias plu temprana, ma la natur de la sistem complicada de rotas a sua fronte ia resta misteriosa.
Siensistes de University College en London crede ce los ia rompe final la enigma par un modeli tridimensional dijital. Los ia recrea la panel fronte intera, e espera aora construi un copia de la Anticitera a grandia natural, usante materias moderna.
Un monografia publicida ier en Reportas siensal ia revela un presenta nova de la sistem de piniones cual mostra la detalias pico e partes complicada de esta.
"La Sol, Luna e planetas es presentada en un reali impresante de la brilia elinica antica," Profesor Tony Freeth, autor xef, ia dise. "Nosa es la model prima cual conforma a tota la atesta fisical e coresponde a la descrives en la enscrives siensal gravada sur la macina mesma."
On ia descrive la macina como un calculador astronomial e la computador analoja prima. Lo es de bronze e conteni deses de rotas de dentes.
Sola 82 pesos, sirca un tri de la aparato, esiste oji. Siensistes ia reconstrui la macina par radiografia e un metodo matematical de Elas antica.
@T La mori de Johnny Ventura, cantor de merenge
@L aora_oji/2021/la_mori_de_johnny_ventura_cantor_de_merenge
====== La mori de Johnny Ventura, cantor de merenge ======
1 agosto 2021
Johnny Ventura, cantor dominican famosa, ia mori de un ataca de cor con 81 anios.
Ventura, de ci sua carera ia estende tra ses desenios, ia deveni multe conoseda pos formi un orcestra de merenge e salsa. On ia vide esta bande como un de la grupos la plu importante en la istoria musical de la Republica Dominican.
Merenge, cual ave influes african e espaniol, es e un jenero de musical e un stilo de dansa en duple.
Luis Abinader, presidente de esta pais caribe, ia declara tre dias de dol pos la mori de Ventura. El ia dise ance ce la cantor, nometada "la Cavalo Grande", va reseta onoras militar.
Longo un reporta de la ospital cual ia trata el, Ventura ia colasa cuando el ia come a mediadia en Santiago de los Caballeros, un site en la norde. El no ia responde a atentas de revive el.
La artiste ia fa plu ca sento albumes de musica en sua carera longa, e ia aseta ses Premios Grammy Latina. A pos, el ia segue un via political, deveninte la maior de la capital Santo Domingo.
Ventura, naseda con la nom Juan de Dios Ventura Soriano a 8 marto 1940, ia es sposida tra plu ca 50 anios e ia ave sete enfantes.
La ministreria dominican de cultur ia tuita: "Nos senti la dole cual inonda sua familia en esta tempo difisil. Sua erita va vive per sempre en sua cantas e la cultur dominican."
@T La mori de la libror final survivente de Auschwitz
@L aora_oji/2021/la_mori_de_la_libror_final_survivente_de_auschwitz
====== La mori de la libror final survivente de Auschwitz ======
7 junio 2021
David Dushman, la soldato final survivente ci ia partisipa en la libri de la campa de mata nazi a Auschwitz, ia mori con 98 anios.
Estas veteran de la Armada Roja Iudi, ci ia deveni plu tarda un scrimor olimpial, ia mori en Deutxland a saturdi.
Como soldato de 21 anios, a 27 janero 1945, el ia usa sua tance per crase la serca eletrica de la campa, aidante libri la prisonidas. Sirca 1,1 milion persones ia es matada en la campa, de ci la plu ia es iudi.
En la anio pasada, Dushman ia recorda: "Cuando nos ia ariva, nos ia vide la serca e esta persones nonfortunosa. Nos ia rompe la serca con nosa tances. Nos ia dona comables a la prisonidas e ia continua. Los ia sta ala, tota de los en uniformas, sola oios, sola oios, multe streta -- acel ia es multe temable, multe temable."
Dushman en la gera no ia sabe ce Auschwitz esiste: el ia aprende sola a pos sur la atas odiable cual ia aveni ala.
Como un de sola 69 omes en sua divide de 12 mil soldatos ci ia survive la gera, Dushman ia sufri feris grave en la conflita. Ma en anios seguente el ia deveni la scrimor major de la Uni Soviet, e un de la instruores de scrima la plu importante de mundo en la opina de la Comite Internasional Olimpial (COI).
El ia instrui la ecipo de scrimores fema de la Uni Soviet tra plu ca 30 anios, e ia es presente a la ataca teroriste cual ia mata atletas israeli a la Juas Olimpial de München en 1972.
"Nos ia oia la sparas e la zumbi de la elicotores supra nos," el ia recorda en 2018. "Nos ia abita direta a fasa de la ecipo israeli. Nos e tota la otra atletas ia es xocada."
Sua ami deutx, Thomas Bach, scrimor e presidente de la COI, ia tribui. "Cuando nos ia encontra nos en 1970, el ia ofre instante a me amia e consela, an pos la esperia personal de Sr Dushman con la Gera Mundal Du e Auschwitz, como un om de orijina iudi. Esta ia es un jesti umana tan profonda ce me va oblida nunca lo."
Asta la eda de 94 anios, Dushman ia vade ancora a cuasi cada dia a sua club local de scrima per dona ala lesones.
@T La mori de la poeta Murid Barghuthi
@L aora_oji/2021/la_mori_de_la_poeta_murid_barghuthi
====== La mori de la poeta Murid Barghuthi ======
15 febrero 2021
Murid Barghuthi, un poeta major de Filastin, ia mori con 76 anios.
El ia nase en un vileta prosima a Ramallah, a cuatro anios ante la crea de la pais Israel.
El ia pasa multe de sua vive en esta o acel forma de esclui, como el ia nara en la autobiografia Me ia vide Ramallah cual ia gania per el lejores internasional.
La libro ia es descriveda par Edward Said, otra autor de Filastin, como un de la racontas esistal la plu bon sur la desloca filastini.
Naseda en 1944, Barghuthi ia studia en Qahira, capital de Misre, cuando la gera arabi-israeli ia comensa en 1967.
El no ia revade a sua loca de nase per 30 plu anios. Sua senti de es sempre desradisida ia es esaminada en Me ia vide Ramallah, e ance en multe de la poesias cual el ia publici en 12 colies en cuando el ia move de pais a pais.
Tra tempo longa, el ia representa la Organiza de Libri Filastin ma ia resta distante de partitos political.
El ia abita ultima en Qahira con sua sposa misri Radwa Ashur, mesma un autor, ci ia tradui a engles multe de sua poesias.
Un strofe ia inclui la linias seguente:
Pos la mori de la cavalor
La cavalo dirijeda a casa
Dise tota
Par dise no cosa
@T La mori de un membro de un orcestra de Auschwitz
@L aora_oji/2021/la_mori_de_un_membro_de_un_orcestra_de_auschwitz
====== La mori de un membro de un orcestra de Auschwitz ======
11 julio 2021
Esther Bejarano, un de la survivores final de un orcestra formida en la campa de mata Auschwitz, ia mori con 96 anios, a un ospital iudi en Hamburg ier.
La orcestra, composada de 40 prisonidas fema, ia debe presenta a la campa sempre cuando prisonidas ia es marxada a labora o cuando trenes nova ia ariva con persones iudi.
Plu tarda en sua vive, el ia dedica sua tempo a serti ce la mundo no oblida la Olocausto.
La sore e jenitores de Bejarano ia es matada par la nazis. El ia es enviada a Auschwitz cuando el ia ave 18 anios, e ia es obligada a labora fisical, portante petras pesosa.
Ma a un dia el ia descovre ce la gardores xerca un acordioniste per la orcestra de la campa. An con ce el no ia sabe jua la strumento, el ia proposa se.
El ia recorda ce la Orcestra de Femes de Auschwitz ia debe jua a arivores nova. "On ia sabe ce los va es gasida, e la sola ata posible ia es sta e jua," el ia dise en 2014.
Ultima el ia es transfereda a Ravensbrück, campa de consentra per femes, do el ia susede evade.
Pos la fini de la Gera Mundal Du, Bejerano ia abita en Israel e ia deveni un cantor, ante revade a Deutxland en 1960. El ia dedica la resta de sua vive a educa sur la Olocausto e a combate xenofobia.
Heiko Maas, ministro de esternas deutx, ia comenta ce Bejarano ia es un vose importante en la combate contra razisme e antisemitisme.
Bejarano ia cofundi la Comite Internasional de Auschwitz e ia fa parlas a scolas sur sua vive. El ia presenta ance a lado de sua enfantes, juante melodias ides e cantas de resiste iudi en un grupo nomida Fida.
@T La mori de Zwelithini, re zulu
@L aora_oji/2021/la_mori_de_zwelithini_re_zulu
====== La mori de Zwelithini, re zulu ======
12 marto 2021
Re Goodwill Zwelithini de la nasion zulu en Sudafrica ia mori en ospital, do on ia trata el per disturbas relatada a diabete.
La re ia ave 72 anios. El ia gida la etnico la plu grande en Sudafrica e ia es un renor tradisional influente.
El ia es ospitalida en la provinse KwaZulu-Natal en la semana pasada per monitori sua diabete.
La ministro xef de la re ia grasia la pais per sua "preas e suporta continuada en esta tempo la plu difisil".
Pos la mori de sua padre, Zwelithini, alora un om de 21 anios, ia es instalada como la monarca oto de la zulus en un rituo tradisional a Nongoma a 3 desembre 1971, ante 20 mil persones.
El ia rena la nasion zulu su la article de Gida Tradisional de la constitui republical de Sudafrica.
Como gardor de tradisiones e costumes zulu, Zwelithini ia revive funsionas cultural como la Umhlanga, un rituo colorosa e simbolin de dansa con canas cual, entre otra cosas, promove un consensia moral, e la Ukweshwama, la rituo de frutas prima, en cual on mata un bove mas.
El ia viaja multe estra la pais per promove turisme e comersia ueste per KwaZulu-Natal e per recolie reservas per caritales suportada par zulus.
El ia es criticada sur sua compra de autos custosa per sua sposas cuando la plu de la 10 milion abitores de la provinse es multe povre.
@T La mundo conteni plu ca mil milion pasaros
@L aora_oji/2021/la_mundo_conteni_plu_ca_mil_milion_pasaros
====== La mundo conteni plu ca mil milion pasaros ======
18 maio 2021
Un studia nova estima ce on ave a la min 50 mil milion avias savaje en la mundo.
Sirca 1,6 mil milion es pasaros comun. Ance tre otra spesies, stornos european, rondines campanial e gavotas de beco ensircada ave poplas de plu ca mil milion avias.
An tal, la plu spesies de avia es rara, con ce sirca un spesie entre des ave min ca 5000 individuas.
La ecipo a la Universia de Cimri Sude Nova en Australia dise ce esta analise de la popla global de avias va aida laboras per salva avias de estingui.
Conta la avias de la mundo es un taxe complicada, sin respondes asoluta. En la pasada, estimas aprosima ia declara entre 200 e 400 mil milion avias en entre 10 e 13 mil spesies.
La rexercores australian ia analise 9700 spesies de avias vivente (escluinte tota avias domada) usante datos rejistrada par oservores en eBird, un sistem enlinia, tra la desenio pasada. Los ia refina la datos par usa modeles e informas de espertas per furni lo cual los descrive como un estima plu esata.
Sua studia, publicida en Atas de la Academia Nasional de Siensas de la SUA, sujesta ce on trova la majoria de avias en la emisfera norde: en Europa, Asia norde, Africa norde, partes de la Penisola Arabi, e America Norde.
Contrastada, vera poca avias es trovada en Madagasicara e Antartica.
@T La NU averti la militar de Miama
@L aora_oji/2021/la_nu_averti_la_militar_de_miama
====== La NU averti la militar de Miama ======
16 febrero 2021
La Nasiones Unida ia averti la militar de Miama ce "resultas sever" va resulta pos cualce supresa violente de la protestas cual continua contra la colpa de stato ala.
On ia restora la asede a la interede en la pais a esta matina pos un rompe tra un note du. La junta ia bloci la ueb per atenta sofoca disentis pos la colpa a 1 febrero.
Christine Schraner Burgener, ambasador spesial de la NU a Miama, ia dise ce "on debe respeta plen la direto de asembla pasosa". El ia fa sua averti en un telefoni ier con Soe Win, la suxef de la junta, asentuante ce perdes de interede "sumina prinsipes democrata fundal".
Miama ia esperia dias de protestas pos la colpa militar en cual la junta ia suverti la xefes elejeda (incluinte la promovor de democratia Aung San Suu Kyi), alegante manipula de votas. La militar ia furni no atesta per suporta sua alegas.
Temprana oji, protestores ia reasembla en sites como Yangon e Mandalay. Estra Yangon, alga persones ia reclina sur la ferovia per impedi la servi de tren.
La partisipa a protestas resente pare min grande ca a los de la semana pasada con deses de miles de persones, car la militar ia aumenta aora sua presentia.
La junta ia anunsia ance punis sever per sua oposores, disente ce los ci preveni ce la fortes de securia fa sua labora risca 20 anios en prison, e los ci tisa la teme o la tumulta publica pote es prisonida per entre tre e sete anios.
A saturdi, la militar ia dona a se la potia de aresta, xerca e deteni persones per plu ca 24 oras sin desides de corte. Lo ia comanda ance ce jornalistes no descrive la situa como un colpa de stato.
Dias resente ia vide ance un aumenta de violentia. On reporta ce la fortes de securia ia xuta baletas de cauxo per desgrupi la folas. En videos postada a redes sosial, on oia lo cual pare es la sona de xuta en cuando persones fuji.
La perde de interede en la note pasada segue un model intendeda per rompe la oposa continuante a la colpa e a la deteni de la xefes elejeda.
Telenor, compania major de telecomunica, ia dise ce lo no va refresci plu un lista sur rompes de interede a sua pajeria. Lo ia dise ce la situa es "confusada e nonclar" e ce la securia de sua empleadas es un "conserna xef".
@T La NU recomenda para vende armas a Miama
@L aora_oji/2021/la_nu_recomenda_para_vende_armas_a_miama
====== La NU recomenda para vende armas a Miama ======
19 junio 2021
La Nasiones Unida ia fa un recomenda rara ce on para la vende de armas a Miama, en responde a la colpa militar violente de esta anio.
La Asembla Jeneral ia aseta un deside condenante la junta militar cual ia suverti la governa elejeda de la pais en febrero.
La NU ia urje ance per la libri de detenidas political, como la ministro xef elejeda Aung San Suu Kyi, e per la sesa de violentia contra protestores pasosa.
An si lo no es legal obligante, la deside es political importante.
"La risca de un gera interna grande es real," Christine Schraner Burgener, representor spesial de la NU sur Miama, ia informa la Asembla Jeneral. "Tempo es esensal. La situa diminui en cual on pote reversa la suverti militar."
La deside ia es suportada par 119 paises. Bielarus ia es la sola cual ia vota a contra. 36 paises ia asteni de vota, incluinte Rusia e Xina, la du furnores major de armas a la militar miama.
Alga de la paises asteninte ia dise ce la crise es un tema interna per Miama, e otras ia dise ce la deside no dirije se a un colpa violente militar contra la popla rohingia a cuatro anios ante aora, cuando cuasi milion persones ia es obligada a fuji de la pais.
La ambasador de la Uni European a la NU, Olof Skoog, ia dise ce la deside "deslegali la junta militar, condena sua maltrata e violentia contra sua propre popla, e indica sua isoli su la oios de la mundo".
Ma Kyaw Moe Tun, la ambasador miama a la NU, ci representa la governa nonmilitar elejeda de la pais, ia dise ce el es deludeda par la cuantia de tempo cual la Asembla Jeneral ia spende per aseta lo cual el ia descrive como un deside "diluida".
@T La Olimpiales onora la vitimes de München 1972
@L aora_oji/2021/la_olimpiales_onora_la_vitimes_de_muenchen_1972
====== La Olimpiales onora la vitimes de München 1972 ======
24 julio 2021
La vitimes de la ataca teroriste a la Olimpiales de München ia es recordada en la rituo abrinte de la Juas en Tokyo, a la ves prima en cuasi un dui de sentenio.
Un momento de silentia ia onora la 11 atletas israeli matada par sparores filastini en 1972.
Tra anios, la familias de la vitimes ia urje la organizores olimpial a recorda los en un rituo abrinte, ma sua solisitas ia es sempre rejetada a ante.
"Final on ave justia," du de la viduas de la vitimes ia dise. "Nos ia pasa tra 49 anios de luta e ia sede nunca" ia es la declara par Ankie Spitzer e Ilana Romano, presente a la abri ier.
Lo cual ia aveni en München a 5 setembre 1972 es un de la capitoles la plu sombre en la istoria de la Olimpiales. Des-un membros de la ecipo israeli ia es saisida como ostajes en la vileta olimpial par sparores de Setembre Negra, un organiza teroriste.
Du ecipores ia es matada cuasi direta, e la otras ia es matada en un batalia de spara contra la polisia de Deutxland Ueste a un campo de avion prosima cuando la militaristes ia atenta estrae los de la pais.
"Nos recorda los ci ia perde sua vives en la Juas Olimpial," un anunsior ia dise en la rituo ier. "Un grupo ave ancora un loca forte en tota nosa memorias e representa tota ci nos ia perde en la Juas -- la membros de la delega israeli a la Juas Olimpial de München 1972." La stadion ia oscuri e un lus suave blu ia lumina alga partes de lo.
Naftali Bennett, ministro xef de Israel, ia tuita: "Me bonveni esta momento importante e monumentin. Ta ce on bondise la recorda de los."
La Comite Internasional Olimpial (CIO) ia es criticada pos rejeta un solisita per un minuto de silentia a la Juas de London en 2012 cual ta representa la aniversario 40 de la ataca. La organizores ia dise ce la rituo abrinte no ia es un atmosfera conveninte per un tal tribui.
En 2016, la CIO ia crea un "loca de dol" en la vileta olimpial de Rio per onora los ci ia mori en la Juas.
Pos vide la tribui en Tokyo ier, Spitzer e Romano ia dise ce los no pote reteni sua larmas. "Esta es la momento cual nos ia espeta," los ia ajunta.
@T La OMS averti sur un fali moral desastrosa
@L aora_oji/2021/la_oms_averti_sur_un_fali_moral_desastrosa
====== La OMS averti sur un fali moral desastrosa ======
19 janero 2021
La xef de la Organiza Mundal de Sania (OMS) ia dise ce la mundo fasa un "fali moral desastrosa" par causa de politicas nonjusta per vasines de covid.
Tedros Adhanom Ghebreyesus ia dise ce lo no es justa ce persones joven e sana en nasiones rica es injetada ante persones riscada en paises plu povre. El ia esplica ce plu ca 39 milion dosas de vasin es ja donada en 49 paises rica, ma un nasion povre ia ave sola 25 dosas.
Entretempo, on ia critica e la OMS e Xina sur sua responde a covid. Un comite nondependente, encargada par la OMS, ia dise ce esta organiza autoriosa de la Nasiones Unida ia ta debe declara plu temprana un crise internasional. La comite ia reproxa ance Xina sur la tardia de sua responde.
Asta aora, Xina, Barat, Rusia, la Rena Unida e la Statos Unida ia developa vasines de covid. Otras es produida par ecipos multinasional, como la vasin Pfixer esuan-deutx. Cuasi tota esta nasiones ia organiza per distribui prima a sua propre poplas.
Tedros ia dise ce la metodo de "me la prima" va es ruinante car lo va alti la custas e va promove la cumula de compradas. "Ultima," el ia ajunta, "esta atas va fa no plu ca longi la pandemica, la restrinjes nesesada par conteni lo, e la sufri umana e economial."
El ia recomenda un dedica completa a Covax, la projeta global de comparti vasines, cual on intende comensa en febrero.
Plu ca 180 paises ia junta se a esta stratejia, cual vole uni la paises como un sola bloco con plu potia per negosia con companias de medisin. La vasini en 92 paises, de cual tota ave revenu basa o media, va es finansiada par donores.
@T La OMS urje aselera la vasini de nasiones povre
@L aora_oji/2021/la_oms_urje_aselera_la_vasini_de_nasiones_povre
====== La OMS urje aselera la vasini de nasiones povre ======
5 agosto 2021
La Organiza Mundal de Sania (OMS) ia recomenda un pausa de vasines aumentante contra la coronavirus asta minima la fini de setembre.
Dr Tedros Adhanom Ghebreyesus, dirijor jeneral de la OMS, ia dise ce un suspende ta permete ce on vasini a la min 10% de la popla en cada pais.
Alga nasiones ia anunsia ja un projeta per dona un dosa tre. Ma Tedros averti ce nasiones plu povre esperia retardas.
Longo la OMS, paises de revenu basa ia pote dona sola 1,5 dosas per cada sentuple de persones, par causa de un manca de furni. Tedros ia dise ce on nesesa reversa la situa, tal ce la majoria de vasines ta vade a paises povre.
"Me comprende la conserna de tota governas per proteje sua popla de la varia delta," el ia ajunta. "Ma nos no pote aseta ce paises cual ia usa ja la plu de la furni global de vasines usa an plu de lo."
Esta es un recomenda forte par la OMS, cual atenta redui la divide entre nasiones de revenu alta e los de revenu basa. Lo ia vole ce 10% de la popla de cada pais ta es vasinida ante la fini de la mense veninte, ma lo no es probable ce on va ateni acel ojeto par la curso corente.
En Aiti e la Republica Democrata de Congo, no parte de la popla ia reseta ja du dosas. Indonesia, cual ia vide un apico subita de infetas e moris en menses resente par causa de la varia delta, ia dona la vasini completa a sola 7,9% de sua popla.
Entretempo, Israel ia comensa distribui un injeta aumentante a persones con plu ca 60 anios, e a martedi Deutxland ia anunsia ce lo va comensa ofre dosas tre de la vasines de Moderna e Pfizer. En la Rena Unida, on considera ofre un aumentante a miliones de persones clasida como riscada, de setembre.
La SUA no ia anunsia un politica sur vasines aumentante, ma la Casa Blanca ia dise ier ce lo ave dosas sufisinte per distribui vasines estra la pais, an cuando lo serti la vasini completa de sua propre popla.
"Nos senti serta ce la eleje es falsa e nos pote fa ambos," Jen Psaki, Portavose de la Casa Blanca, ia comenta.
@T La pape encontra un aiatola en Irac
@L aora_oji/2021/la_pape_encontra_un_aiatola_en_irac
====== La pape encontra un aiatola en Irac ======
6 marto 2021
En la dia du de sua visita a Irac, Pape Fransisco ia consenta con un de la xias la plu potiosa. Sua encontra con Aiatola Grande Ali al-Sistani, la gidor spirital de miliones de muslimes xia, ia aveni en la site santa Nadjaf.
Esta es la viaja internasional prima par la pape pos la comensa de la pandemica, e la visita prima a Irac par cualce pape.
Covid e temes sur securia ia fa ce esta un viaja perilosa per la xef de la Eglesa Catolica, ci ave 84 anios. El ia dise a reportores ce el senti "obligada par debe" a fa esta viaja "simbolin", en cual el va visita alga locas en Irac en cuatro dias.
On ia dona no detalias sur la discute entre la pape e la eglesor xia xef, ma probable lo ia foca a temas intercredal como la minoria cristian en Irac, ci es afetada par ondas de violentia pos la invade de Irac, gidada par la SUA, en 2003.
Plu tarda, la pape va viaja a la site antica Ur, cual on regarda como la loca de nase de la profeta Abraham, un figur sentral de islam, cristiania e iudisme.
Sirca 10 mil membros de la fortes de securia iraci es postida per proteje la pape en sua visita, e proibis de sorti tra la dia intera es enforsada per limita la sperde de coronavirus.
Reportada es ce alga grupos militariste xia oposa la visita de la pape, sujestante ce sua turi representa un interfere par la ueste en la relatas de la pais.
@T La Pape parla sur esita de vasini en la Eglesa
@L aora_oji/2021/la_pape_parla_sur_esita_de_vasini_en_la_eglesa
====== La Pape parla sur esita de vasini en la Eglesa ======
16 setembre 2021
La Pape ia dise ce el no sabe esplica perce alga cardinales en la Eglesa Catolica esita reseta la vasin de covid.
"Lo es pico strana, car umanas ave un istoria de amia con vasines," Fransisco ia comenta a reportores en un vola de Slovensco a Italia. La pape, ci mesma es vasinida, ia urje ja persones a reseta la injeta per "la bon comun".
El ia nota ce un cardinal ia fini en cura intensa con covid. El no ia nomi la om a ci el ia refere, ma Raymond Burke, un cardinal esuan conservaliste de 73 anios, ia pasa alga dias resente a un respirador en ospital pos developa la virus.
Lo no es clar esce Burke es vasinida, ma en la pasada el ia critica la vasini.
"An en la Colie de Cardinales on ave alga negores de la vasin," la Pape ia dise en sua avion. "Ma un de los, compatiable, es ospitalida con la virus. Estas es la ironias de la vive."
El ia ajunta ce cuasi cadun a la Vatican es aora vasinida, e ce on "studia como aida" los ci esita.
"Como enfantes [nos ia es vasinida] per morbilio, poliomielite -- tota la enfantes ia es vasinida e nun ia fa cualce cexa," el ia esclama. Ma la pape la reconose ce alga debates sur la vasin risca crese la teme e nonsertia sur la injetas, e a esta el ia comenta ce "nosa debe clari la cosas e parla calma".
Alga xefes relijial, spesial en la Statos Unida, crede ce catolicas debe ave la direto de fa un oposa consiensosa a la vasines de covid par razonas de relijio. Ma Pape Fransisco ia desacorda con esta, disente ce la vasines es "moral asetable" e pote es usada "con bon consiensa".
@T La "Pensa de Xi Jinping" en scolas xines
@L aora_oji/2021/la_pensa_de_xi_jinping_en_scolas_xines
====== La "Pensa de Xi Jinping" en scolas xines ======
26 agosto 2021
Xina va introdui la ideolojia political de sua presidente en sua scolas. En regulas nova, la ministreria per educa ia dise ce la "Pensa de Xi Jinping" va aida "adolesentes a institui credes marxiste".
La ideolojia va es integrada de scolas prima asta universias.
Esta es la atenta la plu resente par Xi per forti la rol de la Partito Comuniste Xines en partes diversa de sosia.
En un declara formal, la ministreria ia dise ce lo intende "cultiva la construores e seguores de sosialisme par un funda jeneral moral, inteletal, fisical e estetical". La regulas inclui educa sur labora "per cultiva sua spirito asidua" e educa sur securia nasional.
En 2018, Xina ia ajunta la "Pensa de Xi Jinping sur Sosialisme con Cualias Xines per un Eda Nova" a la constitui. Pos alora, on ia introdui lo en alga universias, entre alas political per jovenes, e como cursos estramural de scolas.
La regulas nova va es multe plu vasta realida.
La jornal Global Times, dirijeda par la governa, ia reporta tal: "Scolas prima va foca a cultiva un ama per la pais, la Partito Comuniste de Xina e sosialisme. En scolas media, la foca va es a un combina de esperia persepal e studia de sabes, per aida studiantes a formi judis e opinas political fundal. En universia, on va asentua plu la institui de pensa teorial."
La ministreria labora ance a inclui cursos sur temas como la gida de la partito e la defende nasional.
Xefes xines presedente ia crea sua propre ideolojias political cual la partito ia asorbe en sua constitui o ideolojia. Ma sola Mao Zedong, la fundor de la partito, ave un ideolojia cual on descrive como "pensa", un terma a la apico de la ierarcia, e sola Mao e Deng Xiaoping ave sua nomes liada a sua ideolojias.
@T La polisia nicaraguan invade la jornal xef
@L aora_oji/2021/la_polisia_nicaraguan_invade_la_jornal_xef
====== La polisia nicaraguan invade la jornal xef ======
14 agosto 2021
En Nicaragua, la polisia ia invade ier la ofisias de La Prensa, la jornal xef de la pais, cual ia critica multe la governa de Presidente Daniel Ortega.
Fotos en la pajeria de la jornal mostra la entra de polisiores antitumultal a la construida e la sutrae de caxas de materia.
Jornalistes ia dise ce sua asede de la interede e la eletrica ia es rompeda tra la tempo de la invade. Eduardo Enríquez, editor xef, ia dise ce sua empleadas ia es ance prevenida de usa sua telefonetas.
La polisia ia dise ce lo investiga alegas de froda de duana e lava de mone par la manejores de la jornal.
La Prensa es poseseda par la familia de Christiana Chamorro, un politiciste de profil alta ci ia es detenida a du menses ante aora pos anunsia ce el va compete contra Ortega en la eleje en novembre. On ia deteni ance otra aspirores de la presidentia.
La jornal ia descrive Ortega como un "autocrata" a multe veses.
A jovedi, lo ia dise ce lo debe suspende sua numero primida car la autoriosas ia refusa relasa emportas de paper de jornal.
An tal, difusores progovernal ia publici imajes de la benerias de La Prensa, cual, los ia dise, mostra ce lo ave no razona per para la varia primida. Empleadas de la jornal ia insiste ce la cuantia de paper en la construida no sufisi per primi an un numero.
La oposa de Ortega, ci fa aora sua periodo cuatro en la posto de presidente, ia crese en anios resente.
En 2018, protestas coletiva contra la governa ia traversa la pais ma ia encontra un responde violente par la polisia. Sentos ia es matada e miles ia es ferida en acel scaramuxas entre protestores a un lado e la fortes de securia e militias progovernal a la otra.
@T La presidente de Aiti es asasinada
@L aora_oji/2021/la_presidente_de_aiti_es_asasinada
====== La presidente de Aiti es asasinada ======
8 julio 2021
Cuatro persones suspetada de asasina Jovenel Moïse, presidente de Aiti, ia es matada en fusili con la polisia.
Du otras ia es detenida, e polisiores combate ancora alga suspetadas restante en la capital Port-au-Prince.
Moïse, ci ia ave 53 anios, ia es matada par un sparor cuando atacores ia invade sua casa a un ora multe temprana ier. Sua sposa Martine Moïse ia es ferida ma es aora tratada en Florida, do sua state es stable ma urjente.
Claude Joseph, ministro xef tempora, ia demanda per calmia e ia declara un state nasional de crise. Esta "state de aseja" permete la proibi de asemblas e la usa de la militar per roles polisial, entre otra estendes de potia.
Presidente Joe Biden de la SUA ia ofre sua compatia a la popla de Aiti per la "asasina xocante".
Moïse ia deveni la presidente de Aiti en 2017, ma en tempos resente el ia fasa multe protestas esijente sua resinia. Tra desenios Aiti es pestada par nonstablia political, violentia vasta de ganges e desastres natural, e lo es aora la nasion la plu povre de la Americas.
Joseph ia dise ce la atacores ia es "stranjeres ci ia parla engles e espaniol". La linguas ofisial de Aiti es creol e franses.
Alga reportas descrive omes negra vestida e portante armas potiosa ci ia finje cisa parteni a un opera esuan de enforsa contra drogas. La ambasador aitian a la SUA ia dise ce en "no modo" ajentes esuan de drogas ia fa la ataca. El crede ce lo ia es realida par "mersenarios profesal".
Joseph ia dise ce "on usa tota metodos per serti la continua" e ce "democratia e la republica va vinse".
Longo la constitui de Aiti, ministros, gidada par la ministro xef, prende controla en un asentia de presidente, asta cuando on pote organiza un vota jeneral. Ma un ministro xef nova, Ariel Henry, ia es nomida par Moïse en esta semana mesma e es ancora no induida a la posto.
@T La presidente de Arjentina es atacada en sua veculo
@L aora_oji/2021/la_presidente_de_arjentina_es_atacada_en_sua_veculo
====== La presidente de Arjentina es atacada en sua veculo ======
15 marto 2021
Deses de protestores ia ataca un minibus portante la presidente de Arjentina, Alberto Fernández, en la rejion Patagonia.
Un fola ia formi sirca la veculo, lansante petras e colpante lo, estra un sentro de comunia en Chubut, provinse sude.
La presidente ia visita un rejion ruinada par focones forestal cual ia mata un person e ia feri otras.
Ma la protestores oposa un projeta governal per recomensa vasta la mina su sielo en Chubut. La rejion es rica con oro, arjento e uranio.
Videos de la ataca mostra persones asemblada a la entra de la sentro cuando Fernández sorti e es gidada a sua veculo.
La fola ia segue el e ia colpa la minibus con manos, pedes e petras, atentante preveni ce lo move. Cuando la veculo ia pasa final tra la protestores per parti, alga de sua fenetras ia pare rompeda.
Plu tarda, la presidente ia desasentua la violentia, disente ce el crede ce lo ia es fada par un cuantia peti de persones ci ave cuasi no suporta en Chubut o jeneral tra Arjentina.
Focones forestal ia arde en Patagonia en la dias resente, obligante la evacua de persones e destruinte 200 casas, cisa plu. Alga vilas ia sufri rompes de eletrica, e otras ia es lasada sin furni de acua.
On ancora no ia identifia la causa de la focones, ma la ministreria de internas ia espresa sua crede ce multe ia es ensendeda con intende.
@T La presidente de Malaui confesa culpablia sur covid
@L aora_oji/2021/la_presidente_de_malaui_confesa_culpablia_sur_covid
====== La presidente de Malaui confesa culpablia sur covid ======
12 janero 2021
Lazarus Chakwera, presidente de Malaui, ia aseta un culpa personal car el ia es un de los ci ia contribui a la crese resente de casos de covid en la pais.
En un parla a radio, el ia dise ce on ia ave "un senti coletiva de destensa de segue modos de preveni covid entre multe malauis, incluinte me".
La presidente ia es forte criticada en la semana pasada cuando imajes e videos ia sirculi cual ia mostra el con Madonna, musiciste visitante, presante manos e posante per fotos sin usa mascas e sin distanti sosial.
Malaui ia esperia un aumenta agu de la cuantia de moris e de probas positiva per covid en semanas resente. La maladia ia prende la vives de alga persones bon conoseda, incluinte cantor e difusor Maria Chidjanja Nkhoma e Ernest Kantchentche, xef manejante per la Ministreria de Informa.
Plu ca 200 malauis ia mori de covid, de ci 30 ia mori en sola la du semanas pasada.
Chakwera, ci es ance un eglesor, ia dise ce el va juna e prea per 21 dias per demanda a Dio per sani la pais.
La presidente malaui ia comanda ance ce la fortes de securia aida enforsa metodos de preveni la transmete de la virus, como la clui de bares e locas de note a 20:00.
@T La presidente de Mexico ave covid
@L aora_oji/2021/la_presidente_de_mexico_ave_covid
====== La presidente de Mexico ave covid ======
25 janero 2021
Andrés Manuel López Obrador, presidente de Mexico, ia anunsia ce el ia proba positiva per covid. La om de 67 anios ia tuita ce sua sintomes es minor e ce el es "otimiste" pos la diagnose.
Esta developa ia apare en cuando Mexico luta contra un aumenta de infetas, tal ce sua cuantia de moris prosimi a 150 mil.
López Obrador dise ce el va labora de sua casa, incluinte un parla con Vladimir Putin sur reseta un vasin produida en Rusia.
On ia anunsia plu temprana ier ce un telefoni entre la du presidentes va aveni oji per discute sua relata biladal e la furni posible de injetas de Sputnik 5. La presidente mexican ia dise en 2020 ce el va atenta oteni 12 milion dosas de esta vasin rusce si lo pare eficas.
Mexico ancora no ia aproba la vasin per usa, ma ofisiores vole estende la program de vasini per la popla de 128 milion persones, entre problemes de furni de Pfizer-BioNTech.
Sputnik 5 ia gania ja un permete ofisial en alga otra paises, incluinte Brasil e Arjentina. Magiar ia deveni la prima de la Uni European cual ia aproba lo en esta semana.
Un ofisior major de sania ia descrive la state de López Obrador como stable e ia informa un confere jornaliste ce "un ecipo de spesialistes medical" atende la presidente.
Mexico ia rejistra plu ca 1,75 milion casos de la virus en la pandemica. Sua cuantia de moris confirmada -- 149 614 -- es un de la plu altas de mundo, min ca sola la Statos Unida, Brasil e Barat.
@T La presidente de Paraguai desemplea ministros
@L aora_oji/2021/la_presidente_de_paraguai_desemplea_ministros
====== La presidente de Paraguai desemplea ministros ======
7 marto 2021
La presidente de Paraguai ia desemplea tre de sua ministros en responde a protestas violente sur la maneja governal de la pandemica de coronavirus.
Mario Abdo Benítez ia dise ce la ministros per educa, temas fema e temas sivil va es recambiada. La ministro de sania, Julio Mazzoleni, ia resinia a venerdi pos critica ferose par legores e sindicatos de sania. Laborores de sania dise ce ospitales ave no plu medisin per trata pasientes de covid.
Partitos oposante vole ce Abdo Benítez mesma resinia e anunsia elejes nova. Los acusa sua governa destriste de froda.
Paraguai ia rejistra plu ca 165 mil casos de la virus e sirca 3200 moris. Un grandi gradal de la cuantia de casos en semanas resente ia trae la sistem de sania en la pais cuasi asta colasa. En ajunta, la distribui de vasines es lenta: datos resente mostra ce on ia injeta min ca 0,1% de la popla.
Tarda a venerdi, laborores de sania e relatadas de pasientes de covid ia es entre miles de persones ci ia vade sur la stradas de sites incluinte la capital, Asunción, per protesta. Los acusa la governa de fura miliones de dolares cual ia ta pote es usada per trata la crise de sania.
Alga de la protestores ia scaramuxa con la polisia, ci ia responde con gas lacrimojen e baletas de cauxo. Botecas ia es sacada e autos ia es ensendeda en la caos, e sirca 20 persones ia es ferida.
@T La presidente de Tanzania mori entre rumores de covid
@L aora_oji/2021/la_presidente_de_tanzania_mori_entre_rumores_de_covid
====== La presidente de Tanzania mori entre rumores de covid ======
18 marto 2021
John Magufuli, presidente de Tanzania, ia mori ier de un disturba de cor en un ospital en Dar es Salam. El ia ave 61 anios.
El no ia es publica videda tra plu ca du semanas, e rumores ia sirculi sur sua sania. La xef oposante, Tundu Lissu, ia dise ce Magufuli ia developa covid, ma esta no es confirmada.
El ia es un de seticas african major contra la siensa de coronavirus e ia recomenda batalia la maladia con preas e vapor erbal.
Vispresidente Samia Suluhu Hassan ia anunsia 14 dias de dol nasional. Longo la constitui tanzanian, Hassan va es induida como la presidente nova per completi la presidentia de sinco anios cual Magufuli ia comensa en 2020.
Magufuli no ia es videda pos 27 febrero, ma Kassim Majaliwa, ministro xef, ia insiste en la semana pasada ce la presidente es "sana e asidua laborante", culpante tanzanianes estra la pais, disente: "Sperde rumores ce el es malada pare odiosa."
En junio pasada, Magufuli ia declara Tanzania "sin covid". El ia burla la eficasia de covrefases, ia espresa dutas sur probas per la virus, e ia tisa paises visina cual ia pone metodos medical per restrinje la sperde.
Tanzania ia publici no detalias sur sua casos de covid pos maio, e la governa ia refusa compra vasines.
Magufuli ia es declarada como presidente a sua aniversario 56 en otobre 2015. El ia comensa sua periodo du de presidentia pos un eleje disputada en la anio pasada. On ia bonveni sua disposa forte contra sobornas, ma ia acusa el de puni disentores e de limita alga librias.
Sua oposores acorda ce el ia contribui a la developa de Tanzania. El ia investi a projetas grande de infrastrutur, como un ferovia de largia normal per lia la pais a sua visinas, autovias major, e un sistem de buses en la sentro comersial en Dar es Salam, la capital.
El ia aumenta ance la produi de eletrica, reduinte la nesesa de rasiona enerjia.
Ma sua responde a covid va defini el en la istoria. On ia fa poca probas per la virus en la popla tanzanian e ia projeta no program de vasini, tal ce la pais resta estra la pratica normal.
@T La presidente de Tunis ata per calmi protestas
@L aora_oji/2021/la_presidente_de_tunis_ata_per_calmi_protestas
====== La presidente de Tunis ata per calmi protestas ======
26 julio 2021
La presidente de Tunis ia desemplea la ministro xef e ia suspende la parlamento, pos protestas violente tra la pais.
Ier, miles de protestores contra la malmaneja de covid par la governa ia pleni la stradas e ia combate la polisia.
Fortes de securia ia impedi la asede a parlamento e a stradas sirca Bolevar Habib Bourguiba, la sentro de protestas antigovernal en la revolui tunisi de 2011.
Presidente Kais Saied ia anunsia ce el va prende potia con aida de un ministro xef nova, disente ce el intende calmi la pais. Ma sua oposores ia descrive sua ata como un colpa de stato.
Pos un consenta de crise sur securia ier, Saied ia dise en un parla televisada: "Nos ia fa tre desides ... asta cuando la pas sosial va reveni a Tunis e asta cuando nos va salva la stato."
Protestores ia aclama selebrante a la desemplea de Hichem Mechichi, ministro xef. Saied ia acompania la folas en la site capital Tunis.
La polisia ia aresta persones ance en otra sites. En Touzeur, alga persones ia invade la ofisias de la partito governante, rompente computadores e ensendente la construida. La partito ia culpa "ganges criminal" ci atenta "semi caos e destrui".
Saied ia promete responde a plu violentia par fortia militar. El ia dise ance ce la constitui permete ce el suspende la parlamento si lo es "prosima a peril".
A des anios ante aora, la revolui tunisi ia introdui democratia e ia inisia la revoltas de la Primavera Arabi tra la rejion. Ma la esperas ce esta va crea plu empleas no ia es realida.
Pos un desenio, Tunis batalia un crise economial profonda e un de la situas la plu grave de coronavirus en Africa. Mechichi ia desemplea la ministro de sania en la semana pasada, ma esta no ia lejeri multe la coleria de la popla.
@T La presidente es proibida de parti de Aiti
@L aora_oji/2021/la_presidente_es_proibida_de_parti_de_aiti
====== La presidente es proibida de parti de Aiti ======
15 setembre 2021
Ariel Henry, ministro xef de Aiti, ia es proibida de parti de la pais en un investiga de sua partisipa alegada en la asasina de Presidente Jovenel Moïse.
On ia demanda ce Henry esplica sua relatas con Joseph Felix Badio, un suspetada major en la mata. Rejistras indica ce la du omes ia fa telefonis multiple a mera oras pos la asasina.
Moïse ia es matada a 7 julio par sparores en sua casa privata en un suburbe de la capital Port-au-Prince. Sua mori ia crea un crise political cual ia profondi cuando un trematera ia afeta la sude de Aiti a un mense ante aora.
A lundi, Henry ia envia un letera parente desempleante la avocato xef Bed-Ford Claude e acusante el de "un ofende grave de maneja". El ia nomina un sustitua.
An tal, ier Claude ia pare resta en sua posto cuando el ia demanda ce un judor investigante la omiside de Moïse acusa la ministro xef sur sua envolve "suspetada" en la caso.
Fontes esperiosa sur Aiti dise ce la ministro xef no ave la autoria de despone la avocato xef. La ministro de justia ia comanda plu proteje polisial per Claude pos alga menasas reportada.
Avocatos acusante dise ce rejistras otenida de la compania de telefon Digicel confirma ce Badio -- un ofisior de la ministreria de justia ci on acusa de scema la asasina -- e Henry ia parla a du veses, corta pos la mata de Moïse.
Badio ia desapare pos la omiside e es aora xercada par la polisia. Datos de jeolocali mostra ce el ia parla de un loca prosima a la sena de la crimin. El no ia comenta publica sur esta alegas.
La ministro ia rejeta resente lo cual el ia descrive como "taticas diverjente" intendeda per "sperde confusa", sin responde a la acusas spesifante contra el.
La polisia dise ce 44 persones es aora tenida pos aresta en relata con la ataca, incluinte 18 membros jubilada de la militar colombian.
@T La scandal de instituidas de madre e bebe en Er
@L aora_oji/2021/la_scandal_de_instituidas_de_madre_e_bebe_en_er
====== La scandal de instituidas de madre e bebe en Er ======
13 janero 2021
La governa eres va demanda per pardona pos un investiga cual ia trova un "nivel xocante de moris de enfantes" en sua instituidas de madre e bebe.
Esta locas ia es creada en la sentenios 19 e 20 per casi femes e xicas ci ia ensinti estra sposia. Sirca 9000 enfantes ia mori en la 18 casas investigada.
La governa ia dise ce la reporta revela ce la pais ia ave un "cultur sofocante, opresante e savaje misojine".
La ministro xef Mícheál Martin ia comenta ce la reporta descrive un "capitol oscur, difisil e vergoniosa" de la istoria eres. "Como nasion, nos debe fronti la veria completa de nosa pasada," el ia dise.
La comision cual ia fa la investiga ia descovre ce la cuantia de enfantes ci ia mori ia es sirca 15% de tota nasedas en la instituidas. Sirca 56 mil madres nonsposida e 57 mil enfantes ia es investigada.
Esta casas ia aseta la plu persones en la desenio de 1960 e la temprana de la desenio de 1970. Multe enfantes ala naseda ia es adotada o prendeda a orfanerias dirijeda par monces catolica fema.
La reporta ia dise ce "la femes e enfantes no ia ta debe es en la instituidas" e ce multe femes ia sufri maltratas emosial. Lo ia pare ce on ia mostra "poca compatia" a la madres, spesial a la tempo de pari, cual ia es per multe de la femes "un esperia traumal".
En parlamento oji, Martin va vosi un demanda plen per pardona, representante la stato. Parlante ier, el ia dise ce "un fato difisil" es ce "tota la sosia ia es complis" en la scandal.
La xef de la Eglesa Catolica en Er, Arcibispo Eamon Martin, aseta ce la Eglesa ia parteni a un cultur en cual "persones ia es frecuente manxada, judida e rejetada". "Per esta," el ia dise, "e per la dole durante e angusa emosial cual ia resulta, me demanda nonreservada per pardona par la survivores e par tota los ci es personal afetada par la realias cual on descovre."
El ia sujesta ce cualcun debe presenta se ci pote aida identifia la entererias de la persones ci ia mori en la casas de madre e bebe.
La comision ia fa 53 recomendas, incluinte compensas e monumentos. Sua reporta ia dise ce, an si tal instituidas ia esiste en otra paises, la proportio de madres nonsposida ci ia es en la instituidas en Er ia es probable la plu alta de mundo.
La Sores de la Cores Santa de Jesus e Maria, un organiza cual ia maneja alga de la instituidas, ia dise ce lo es "un cosa de tristia grande a nos ce bebes ia mori su nosa cura".
Esta casas ia es internasional reportada en 2014 pos la trova de multe restas umana sur la tereno de un instituida pasada en Contia Galway en la ueste de la pais.
@T La semana de cuatro dias ia susede en Island
@L aora_oji/2021/la_semana_de_cuatro_dias_ia_susede_en_island
====== La semana de cuatro dias ia susede en Island ======
7 julio 2021
En Island, probas de semanas de cuatro dias de labora ia es susedosa, e ia fa ce multe laborores adota oras plu corta, diseda par rexercores.
La esperimentas, en cual on ia paia la mesma salarios per min oras de labora, ia aveni entre 2015 e 2019. En la plu de laborerias, produosia ia resta la mesma o ia crese an.
Aora on fa probas simil en otra partes de la mundo, incluinte en Espania, e par Unilever en Zeland Nova.
En Island, la esperimentas dirijeda par la Consilio de la Site Reykjavík e la governa nasional ia pertine final a plu ca 2500 laborores, sirca 1% de la popla laborante en la pais.
Tipos diversa de laboreria ia partisipa, incluinte prescolas, ofisias, servis sosial e ospitales. Multe ia redui sua semana de 40 oras a 35 o 36.
Sindicatos ia renegosia regulas de labora, e aora 86% de la laborores islansce o ia adota oras plu corta con la mesma paia, o va gania la direto de fa tal.
Persones ia reporta senti min stresada e ia dise ce sua sania ia boni, como ance sua ecuilibra de labora e vive. Los ia nota ance ce plu tempo es disponable a los per spende con la familia, ocupa se sur amatos e fa taxes de casa.
Espania proba un semana de cuatro dias de labora per companias, partal par causa de la defias de coronavirus.
@T La SUA es presada sur la evacua de afganis
@L aora_oji/2021/la_sua_es_presada_sur_la_evacua_de_afganis
====== La SUA es presada sur la evacua de afganis ======
24 agosto 2021
La SUA es presada par sua aliadas a pospone sua retira de Afganistan per permete plu tempo per evacua persones ci vole fuji de la pais, cual es aora governada par militaristes taliban.
Longo la projeta presente, la soldatos esuan ci controla la airoporto de Kabul -- la sola cual funsiona en la pais -- va parti ante la fini de agosto.
Un confere de la Grupo de Sete (Canada, Deutxland, Frans, Italia, Japan, la Rena Unida e la Statos Unida), ospitada oji par la Rena Unida, va discute la problem.
La talibanes ia averti sur efetos seguente si soldatos stranjer va resta pos la limita de tempo ja acordada con la SUA.
A esta momento, 5800 soldatos esuan es en Afganistan. Presidente Joe Biden va deside en la 24 oras veninte esce el va estende sua presentia.
La Casa Blanca ia dise ce la SUA ia evacua -- o aida la evacua de -- aprosima 48 mil persones pos la comensa de un projeta intensa de transporta par avion a des dias ante aora.
Otras ci desira fuji es en folas densa en o prosima a la airoporto internasional en Kabul, la capital.
Multe de la fujores, spesial los ci ia labora con la fortes stranjer, teme venja par la organiza taliban cual ia enforsa un varia estrema sever de lege muslim cuando lo ia governa entre 1996 e 2001.
La talibanes ia atenta pare reconsiliante a la afganis restante, demandante ce los aida reconstrui la pais. Un portavose ia dise ce persones con pasaportos va pote ancora parti par volas comersial pos la limita de tempo.
Los dise ance ce los va respeta la diretos de femes e xicas, ma on ave ja reportas de detenis e esecutas. Organizas per diretos umana dise ce la Nasiones Unida debe crea un corpo internasional e nondependente per investiga lo cual aveni.
Imajes de la Airoporto Dulles en Washington mostra la ariva de afganis en la SUA.
@T La SUA recorda la atacas a 20 anios pasada
@L aora_oji/2021/la_sua_recorda_la_atacas_a_20_anios_pasada
====== La SUA recorda la atacas a 20 anios pasada ======
11 setembre 2021
La presidente de la Statos Unida, Joe Biden, ia clama per unia en ce sua pais recorda la vitimes de la atacas de 11 setembre.
En un video publicida a la sera ante la aniversario 20, el ia onora la 2977 persones ci ia perde sua vives. "Nos onora tota de los ci ia risca e dona sua vives en la minutos, oras, menses e anios seguente," el ia ajunta, referente a la laborores de crise ci ia responde a la atacas.
Rituos de recorda va aveni oji.
"Sin depende de cuanto tempo ia pasa, esta rituos fa ce tota reveni dolosa como si on veni de oia la novas a un pico de secondos pasada," la presidente ia dise.
El ia reconose la "fortes plu oscur de la natur umana -- teme e coleria, odia e violentia contra americanes muslim" cual ia segue la atacas, ma ia dise ce unia ia resta la "fortia la plu grande" de la SUA.
"Nos ia aprende ce unia es la sola cosa cual debe nunca rompe," el ia ajunta.
En la atacas, scemada par al-Qaida en Afganistan, cuatro jetos esuan de pasajores ia es secuestrada par teroristes suisidente. Du de la aviones ia es diverjeda per colide contra la Tores Jemelo de la Sentro de Comersia Mundal en New York.
Un plu avion ia colpa la Pentagon, pico estra la capital Washington DC, e la jeto cuatro ia cade en un campo en Pennsylvania pos ce sua pasajores ia contrataca la secuestrores.
Presidente Biden va gida la rituos de recorda oji e va visita la tre locas atacada con la Dama Prima, Jill Biden.
On va fa ance ses momentos de silentia corespondente a la oras cuando la du tores ia es colpada e ia colasa, e cuando la Pentagon ia es atacada e Vola 93 ia cade a tera.
Esta aniversario veni a un tempo difisil per la presidente, ci ia fasa critica forte en semanas resente en relata con la retira de Afganistan par la SUA, fininte un presentia esuan ala cual ia comensa a min ca un mense pos la atacas de 11 setembre.
Biden ia promete ce la SUA va parti de Afganistan ante la aniversario 20, e ia dise ce lo es nonprobable ce la talibanes va saisi la controla de acel pais. Ma en fato, la militaristes ia catura tota la sites afgani en min ca des dias.
@T La subasta de la brasaletas de Marie-Antoinette
@L aora_oji/2021/la_subasta_de_la_brasaletas_de_marie-antoinette
====== La subasta de la brasaletas de Marie-Antoinette ======
10 novembre 2021
Du brasaletas de diamante cual ia es poseseda par Marie-Antoinette, rea de Frans, ia es subastada en Swiz per plu ca 8 milion dolares esuan. Los ia es comprada par un person anonim a telefon.
Marie-Antoinette ia envia la joalas a via per securi los ante es gilotinida en la revolui franses. Ambos brasaletas ia es contrabandada a estra la pais e ia resta con sua familia tra plu ca 200 anios.
Esta ia es la ves prima cuando la brasaletas, conteninte 112 diamantes taliada en modo antica, ia apare en un subasteria. Los ia es vendeda per plu ca la duple de la custa espetada.
François Curiel, presidente european per la subasteria Christie's, ia dise: "Esta brasaletas ia viaja tra la tempo per raconta un eda la plu importante de la istoria franses, con sua glamor, gloria e drama."
Marie-Antoinette ia nase en 1755 e ia es enviada a Frans per deveni la sposa enfante de la re futur Louis 16.
El ia mori su la gilotin en 1793, a alga menses pos sua sposo, pos deveni sempre plu nonpopular entre la popla franses, ci ia acusa el de es perosa e un influe perilosa a la re. En prison, el ia scrive un letera declarante ce un caxon de lenio conteninte joalas va es enviada per securia.
Sua fia survivente, Marie-Thérèse, Madame Royale, ia reseta la joalas cuando el ia ariva en Osteraic, la subasteria ia dise.
@T La suizes vota sur proibi pestisides sinteseda
@L aora_oji/2021/la_suizes_vota_sur_proibi_pestisides_sinteseda
====== La suizes vota sur proibi pestisides sinteseda ======
13 junio 2021
Sitadanes suiz vota oji en un referendo pos cual, cisa, sua nasion va deveni sola la pais du de mundo cual proibi pestisides sinteseda.
Un stratejia proposada ta fini suvenis a cultivores ci usa tal pestisides. Un otra ta pone un proibi completa de los pos des anios.
Suportores indica la cuantia disturbante de pestisides en la acua e la dana aveninte a plantas, animales e insetos. Ma cultivores suiz averti ce multe de los no va pote continua opera su la proposas.
Pestisides es sustantias cimical o biolojial, usada per controla pestes.
On vota oji ance sur otra sujestas: un lege contra terorisme, un imposta nova contra combustables de fosil, e finansia en la crise de covid.
La sistem de democratia direta en Suiz sinifia ce tota desides major ala es fada par votas de la popla. Promovores nesesa mera colie 100 mil suscrives per serti un referendo nasional.
Si on va aproba lo, la stratejia contra pestisides sinteseda va ave un efeto multe plu profonda ca lo de la poca vilas e rejiones de mundo cual ia proibi ja estas.
Lo va ave ance un sinifia global plu grande ca la proibi introduida par Butan en 2013, car en Suiz on trova Syngenta, la fabricor la plu grande de pestisides en la mundo.
Ambos stratejias proposada es vasta suportada par urbanes joven.
Ma cultivores suiz dise ce los opera ja su regulas la plu sever de Europa. En la dudes anios pasada, los ia vide un redui de sua emplea e revenu, e aora los es coler.
"On trova multe persones, spesial en la sites, ci ave an no idea sur la sinifia de cultiva," Martin Haab ia dise, presidente de la Asosia de Cultivores de Zürich. "Donce, se los ave du tomates en sua jardin ante la fenetra, los crede ce los comprende cultiva e los sabe como on cultiva organica."
La promove per cultivores en Suiz es forte, e la sondas la plu resente sujesta ce lo va vinse par un marjin pico.
Ma an si la votores rejeta oji la proibi, esta debate ia es tan intensa ce lo no va vade a via. Cadun acorda ce on debe proteje la ambiente pur de esta pais. La desacorda es mera sur la modo.
@T La survivor de un asidente italian es prendeda a Israel
@L aora_oji/2021/la_survivor_de_un_asidente_italian_es_prendeda_a_israel
====== La survivor de un asidente italian es prendeda a Israel ======
13 setembre 2021
La autoriosas italian comensa investiga pos ce un enfante, la sola survivor de un asidente de tram volante en maio, ia es prendeda a Israel par sua avo.
La jenitores, frate plu joven e du de la duavis de Eitan Biran ia es entre la 14 persones matada.
La xico de ses anios ia reposa a la casa de un tia padral en Italia pos es relasada de ospital, ma sua relatadas madral en Israel ia vole eleva el.
Sua familia ia vive en Italia tra alga anios ante la asidente e sua tia ia deveni ofisial sua defendor en junio.
An tal, a saturdi, Eitan ia es sortida de casa par sua avo madral, Shmulik Peleg, ci ia move a Italia pos la asidente e ia ave diretos de visita el. El ia prende Eitan de la pais par un jeto privata, usante la pasaporto israeli de la enfante.
Sua tia madral, Gali Peleg, ia solisita adota el en agosto, disente ce la xico es tenida como ostaje en Italia. "Nos no ia secuestra Eitan. Nos ia trae el a casa," el ia dise ier, alegante ce la jenitores de Eitan ia desira revade a Israel ja ante la asidente.
Ma la tia padral ia descrive la aveni nova como "un plu trajedia per Eitan".
La investiga de la causa de la asidente en Italia norde continua ancora, ma avocatos acusante crede ce la frenos de crise de la vagon ia es intendente descapasida.
Cuando la cable xef teninte la vagon ia rompe, no cosa ia preveni ce lo reversa a plu ca 100 cilometres per ora longo un cable de suporta, pasante un palon suportante ante cade a la tera e desende la monte en rola.
13 persones ia mori a la sena, incluinte un enfante de du anios, e un plu enfante ia mori plu tarda en ospital.
Alga persones de la compania cual ia opera la tram volante es presente investigada sur la asidente.
Un tecniciste ia confesa ce, plu temprana en esta anio, el ia instala un braseta forcin per desativi la freno de crise, sur cual on reporta ce lo ia malfunsiona. Ma un esperta de trames volante alega ce sua videos plu vea sujesta ce la freno ia es descapasida ja en 2014.
@T La sutrae de la sculta final espaniol de Franco
@L aora_oji/2021/la_sutrae_de_la_sculta_final_espaniol_de_franco
====== La sutrae de la sculta final espaniol de Franco ======
24 febrero 2021
On ia sutrae la sculta final de Jeneral Francisco Franco en teritorio espaniol: la enclave pico Melilla ia vota per desasembla sua monumento a la tirano faxiste.
Laborores ia destrui la suportador de brice e ia porta a via la sculta, cual ia sta a la entra de esta site a la costa norde-ueste de Africa. La partito estrema destriste Vox ia es la sola ci ia oposa la dejeta.
Franco ia rena Espania de 1939 asta sua mori en 1975. Plu ca 30 mil persones ia es matada en la gera interna de 1936--39, en cual la fortes nasionaliste ia vinse la governa republiciste.
A pos, el ia preside un rena de teror governal e lava de serebro nasional par la difusores controlada e la sistem governal de educa.
Sola en 2007 on ia aseta un Lege de Memoria Istorial cual ia atenta reconose la sufri de vitimes de francoisme. Su esta lege, simboles de la tirania ia es gradal dejetada, incluinte otra scultas major sirca Espania.
Elena Fernández Treviño de la asembla de Melilla ia descrive la sutrae de la sculta de Franco en sua enclave como un "dia major", ajuntante ce lo ia es "la sola sculta dedicada a un tirano ancora en la sfera publica en Europa".
Membros de Vox ia argumenta a contra, disente ce la sculta -- erijeda en 1978 -- ia onora la rol de Franco como comandor de la lejion espaniol en la Gera de Rif, cual Espania ia fa en la desenio de 1920 contra tribus berber en Magrib.
Franco ia es enterada en un mausoleo vasta nomida la Vale de la Cadedas, prosima a Madrid, como ance deses de miles de persones ci ia perde sua vives en la gera interna. Lo ia es partal construida par prisonidas political, ci la governa de Franco ia obliga a labora, e ia deveni un santeria per la destra estrema.
En 2019, on ia move sua restas a un tomba nonestravagante. La vispresidente de la pais, Carmen Calvo ia comenta: "La plu ca 30 mil vitimes de ambos lados va ave pas e respeta de tota ala."
@T La UE presenta sua program nova spasial
@L aora_oji/2021/la_ue_presenta_sua_program_nova_spasial
====== La UE presenta sua program nova spasial ======
23 junio 2021
La Uni European ia publici sua program nova per spasio. Lo pertine a la periodo asta 2027.
La 27 statos-membros de la alia va profondi sua investis a orienta par satelite, oserva de la Tera, consensia de situa en spasio e comunicas secur, entre otra ativia.
On institui ance un organiza nova nomida la Ajenteria de la Uni European per la Program Spasial, cual va supravide tota cual la UE fa, como bloco, en orbita.
Un plu cambia major en la program nova es la natur de la relata de la UE con la Ajenteria Spasial European (ASE). La du es organizas separada con membrias nasional cual no coaveni completa. Ma la UE usa la ASE como sua conselor tecnical e compror industrial.
La suporta legal de esta colabora es aora formalida par un Acorda de Asosia de Armatur Finansial. Esta defini encargas e detalia la cuantia de mone cual va pasa direta de la UE a la ASE asta 2027: 9 mil milion euros de la 14,88 mil milion en la bujeta spasial intera de la UE.
Inisiante la program nova, Thierry Breton, comisionor per la mercato interna, ia asentua la nesesa ce Europa deveni plu ajil. La conserna es ce Europa avansa min ca emprendores rapida en la SUA e ca Xina, cual finansia forte sua program spasial.
Josef Aschbacher, dirijor jeneral de la ASE, ia dise: "Xina, como tota de nos vide en la novas, investi enorme. Nos veni de vide tre [astronautas] viajante a sua propre stasion spasial en sua propre roceto. E lo fa ce me refleta -- cual cosas Europa desira ateni?"
@T La xasa nonlegal de rinoseros sudafrican declina
@L aora_oji/2021/la_xasa_nonlegal_de_rinoseros_sudafrican_declina
====== La xasa nonlegal de rinoseros sudafrican declina ======
2 febrero 2021
Sudafrica ia reporta un declina de la cuantia de rinoseros matada par xasores nonlegal. Ofisiores dise ce esta resulta partal de isolis contra covid.
En la anio pasada, 394 rinoseros ia es matada per sua cornos, reduida par 33% de la 594 rejistrada en 2019. Isolis ia restrinje la moves de persones ci ta vole xasa la bestias e contrabanda sua cornos.
Esta es la anio ses en serie en cual la cuantia de matas rejistrada ia cade. Ma conservores de natur averti ce la popla de rinoseros en Sudafrica ia diminui multe en anios resente, e ce la xasa nonlegal es ancora un problem grande.
Barbara Creecy, ministro de la ambiente, ia dise ce metodos sever per preveni la sperde de infetas de coronavirus en 2020 ia causa "un redui sustantial de invades par xasores" a la Parce Nasional Kruger prosima a la frontera con Mosambic.
"An tal," el ia ajunta en un declara publicida ier, "esta ia cambia plu tarda en la anio cuando la niveles de isoli ia lejeri."
El ia dise ce an si "la situa estracomun pertinente a la batalia per vinse la pandemica de covid" ia contribui a la declina de xasa nonlegal en 2020, ance laboras par gardaforestas, securiores e la governa per ataca la problem ia fa "un rol sinifiante".
Ma conservores dise ce la popla de rinoseros rejistrada ia declina par cuasi 70% en la Parce Nasional Kruger, do la plu de la xasa nonlegal aveni, en la desenio pasada.
Un portavose en Sudafrica per WWF, la organiza la plu grande de mundo per conserva la natur, ia dise: "Per para la xasa de rinoseros, nos nesesa trata la fatores cual permete la opera de sindicatos contrabandante viventes savaje."
Cornos de rinoseros es multe comprada en alga statos asian como Xina e Vietnam, do on usa los en medisines tradisional.
@T La xef de San Vinsent es colpada par un petra
@L aora_oji/2021/la_xef_de_san_vinsent_es_colpada_par_un_petra
====== La xef de San Vinsent es colpada par un petra ======
6 agosto 2021
La ministro xef de San Vinsent e la Grenadines ia es ospitalida pos un feri cual el ia sufri a un protesta contra un comanda proposada de vasini.
Ralph Gonsalves ia pasea tra un fola estra la parlamento cuando el ia es colpada a la testa par un petra, on reporta. Imajes mostra el sanguinte en cuando on ia freta el a via.
La ministro de finansia ia dise ce Gonsalves ia es moveda a Barbados per un scane par resona magnetal, su consela de medicistes. El ave 74 anios.
Protestores ia asembla ier per oposa un projeta de obliga la vasini de la plu de laborores de sania ci fasa direta la popla.
En la protesta, on ia lansa petras e botelas de acua. La ofisia de la ministro xef ia dise ce Gonsalves ia es colpada par un "misil". Jornales local sujesta ce esta ia es un petra.
San Vinsent e la Grenadines es situada en la sude de la Caribe e es composada de plu ca 32 isolas.
La pais ia rejistra 2298 casos de coronavirus e 12 moris en la pandemica, longo statistica de la Universia Johns Hopkins en la SUA. Cuasi 9% de la popla es completa vasinida.
Sua industria de turisme ia es grave danada par la pandemica, e miles de persones ia es obligada a parti de sua casas pos un eruta volcanal en april.
@T La xef de Twitter sur la proibi de Trump
@L aora_oji/2021/la_xef_de_twitter_sur_la_proibi_de_trump
====== La xef de Twitter sur la proibi de Trump ======
14 janero 2021
Jack Dorsey, xef de Twitter, ia dise ce la suspende permanente de la conta de Donald Trump, presidente de la SUA, ia es la ata coreta. Ma el ia espresa tristia sur lo cual el ia descrive como "la situa estracomun e nondefendable" de la proibi.
El ia dise ance ce la situa representa partal un fali par Twitter, cual no ia ata sufisinte per coraji "conversa sana" sur sua plataformas.
Twitter ia es e lodada e criticada per suspende la conta de Trump. La canselor deutx Angela Merkel e la presidente mexican Andrés Manuel López Obrador ia fa comentas contra lo, an si los no es aliadas de la presidente partinte.
La proibi ia es realida pos la tuitas par Trump pos la tumulta a la Capitolio en la semana pasada. En un mesaje longa, Dorsey ia dise ce el no selebra la proibi e no senti orgulo a lo. El ia repete ce la sutrae ia aveni pos "un averti clar" a Trump.
"Nos ia fa un deside con la informa la plu bon cual nos ia ave, fundida sur menasas a securia fisical e en e estra Twitter," Dorsey ia scrive.
El ia aseta ance ce la proibi va fa un efeto a la interede abrida e libre. "La nesesa de esta atas frati la conversa publica. Los divide nos. E los crea un presedente cual pare a me perilosa."
El ia refere ance a la critica ce sola poca xefes tecnolojial fa desides sur la demanda de ci ave e ci no ave un vose en la rede, e a acusas de sensura. "Un compania cual fa un deside comersial per modera se difere de un governa cual sutrae asede, ma pote pare multe simil," Dorsey ia dise.
Sur la deside de sutrae alga usores e tuitas, alga persones critica ce lo viole la direto de parla libre. An tal, la jigantes de tecnolojia razona jeneral ce car los es companias privata e no representores de la governa, la lege no pertine cuando los modera sua plataformas.
A lundi, un portavose de Merkel ia dise ce la canselor opina ce la proibi de Trump es "problemosa". E López Obrador ia comenta: "Me no gusta ce cualcun es sensurada."
Joe Biden, presidente elejeda esuan, ia dise ce el vole ce companias como Facebook e Twitter fa plu per sutrae parla odiosa e novas falsa. El ia indica ja ce el vole revoca Sesion 230, un lege cual proteje companias de rede sosial contra litiga sur lo cual persones ia posta.
@T La xef militar afgani es desponeda su avansas taliban
@L aora_oji/2021/la_xef_militar_afgani_es_desponeda_su_avansas_taliban
====== La xef militar afgani es desponeda su avansas taliban ======
12 agosto 2021
Afganistan ia recambia sua xef de armada en ce militaristes taliban continua avansa rapida. La revoltores controla aora minima nove de la 34 capitales provinsal de la pais.
On ia reporta multe batalia ier en la sites Kandahar e Ghazni.
Plu temprana, Presidente Ashraf Ghani ia vola a Mazar-i-Sharif, la site norde cual es tradisional un bastion contra la talibanes, per reenerji ala la soldatos progovernal.
Jeneral Wali Mohammad Ahmadzai ia es la xef de armada de mera junio. Sua seguor va debe maneja un violentia intensinte tra la pais. La esuanes e otra fortes stranjer ia retira se a grado cuasi completa pos dudes anios de operas militar.
Longo la NU, plu ca mil siviles ia es matada en Afganistan en la mense pasada.
Ance ier, Ghani ia fa discutes de crise en Mazar-i-Sharif con Abdul Rashid Dostum, comandor militar uzbec, e Atta Muhammad Nur, xef tadjici, sur defende la site.
Tra anios, Ghani ia atenta desasentua tal padrones de gera en atenta forti la Armada Nasional Afgani, ma aora el turna a los en tempo de nesesa. Ja en esta semana, la presidente ia acorda arma militias progovernal.
Mazar-i-Sharif es prosima a la fronteras con Uzbecistan e Tadjicistan, e sua perde ta indica la colasa intera de la controla de la norde de Afganistan par la governa.
En Kunduz, un plu capital provinsal norde, sentos de soldatos governal ia sede pos retira se a la airoporto cuando la talibanes ia invade la site.
La Comite Internasional de la Crus Roja, ajenteria umaniste, ia dise ce batalia intensa "de strato a strato" aveni en Kandahar, la site du de la plu grandes en Afganistan. La talibanes ia declara ce los controla la prison ala, ma esta no es confirmada.
Longo un ofisior esuan ci ia parla anonim a jornalistes, la capital Kabul risca es concistada en 90 dias. Ma el ia dise ce la fortes afgani pote para la momento de la talibanes par presenta plu resiste, e ia ajunta ce la cade de la capital no es un conclui fisada.
@T Lamenta pos matas a un protesta lubnani
@L aora_oji/2021/lamenta_pos_matas_a_un_protesta_lubnani
====== Lamenta pos matas a un protesta lubnani ======
15 otobre 2021
Lubnan ia anunsia oji un dia de lamenta pos la mori de a la min ses persones e la feri de deses par combate matante en Beirut.
Spara ia aveni en tempo de un protesta par grupos xia contra la judor ci investiga un esplode enorme a la porto de la site en la anio pasada.
Hezbollah, cual ia organiza la protesta, dise ce partisipores ia es atacada par fusilores sur tetos ensircante. Los ia culpa un ramo cristian, cual nega la acusa.
Un tensa major pertine a la investiga de la esplode cual ia mata 219 persones en agosto 2020. Partes grande de Beirut ia es destruida par la esplode, ma ancora nun es litigable.
Hezbollah e sua aliadas dise ce la judor es prejudida, ma la familias de la vitimes suporta sua labora.
La protesta ia comensa estra la Palasio de Justia -- la construida xef de la corte -- con sentos de persones argumentante ce la investiga ia deveni politicida e esijente la despone de la judor, Tarek Bitar.
Sparas pesosa ia aveni en la stradas cuando la fola ia pasa tra un sirculo de trafica en un rejion sentral. Abitores local ia debe fuji de sua casas cuando omes armada con fusiles automata e lansagranadas de roceto ia intercambia sparas.
On crede ce la omes ia es membros de militias xia e cristian. La combate ia continua tra alga oras ante la restora de calmia.
A un scola prosima, enseniores ia instrui enfantes joven a reclina prona sur la solo con manos sur testas.
Fontes medical e militar ia dise ce alga de la persones matada ia es fusilida a testa. Estas ia inclui un fem colpada par un baleta deviante en sua propre casa.
La xef de la Fortes Lubnani ia condena la violentia e ia apela per calmia. La armada ia dise ce lo ia posti soldatos per xerca la atacores, avertinte ce los va "xuta contra cualce fusilor sur la stradas".
@T Lampo mata turistes ci fa selfis en Jaipur
@L aora_oji/2021/lampo_mata_turistes_ci_fa_selfis_en_jaipur
====== Lampo mata turistes ci fa selfis en Jaipur ======
12 julio 2021
Un colpa de lampo ia mata a la min 11 persones e ia feri multe plu en la site Jaipur en la norde de Barat ier.
La vitimes ia fa selfis en la pluve a la culmina de un tore de vijila a la Fortres Amer de la sentenio 12, un atrae turiste.
27 persones ia es sur la tore e mur de la fortres cuando la lampo ia aveni. On reporta ce alga ia salta a la tera.
Un polisior major ia comenta ce la tore es un loca popular en la fortres, ajuntante ce la plu de la mores ia es persones joven.
De 2004, colpas de lampo ia mata promedia 2000 baratis per anio. Soldi ia vide nove plu reportas de tal moris tra Rajasthan, la stato do Jaipur es situada. La ministro xef de la stato ia anunsia 500 mil rupis per compensa la familias de los ci ia mori.
La Departe Meteorolojial Barati ia dise ce moris par colpa de lampo ia dupli en la pais pos la desenio de 1960, notante la crise de clima como un de la razonas.
Longo la datos, avenis de lampo mesma ia deveni plu comun par 30--40% en Barat pos la temprana de la desenio de 1990. En 2018, la stato Andhra Pradesh en la sude de la pais ia rejistra 36 749 colpas en sola 13 oras.
Ofisiores dise ce lampo colpa plu comun en rejiones con min arbores, do lo es plu probable ce persones va es colpada.
La saison de monson, cual porta pluves forte, estende tipal de junio a setembre.
@T Lietuva va construi un serca entre se e Bielarus
@L aora_oji/2021/lietuva_va_construi_un_serca_entre_se_e_bielarus
====== Lietuva va construi un serca entre se e Bielarus ======
11 agosto 2021
La parlamento de Lietuva ia vota per construi un serca a la frontera con Bielarus per preveni la entra par iracis, afganis e otra migrores de estra la Uni European.
Plu ca 4000 migrores ia entra nonlegal a Lietuva, membro de la UE, de Bielarus en esta anio. La cuantia es recordo.
Ofisiores lietuvisce acusa Bielarus de trae migrores par avion ci dirije se a la frontera a pos. Bielarus nega esta.
La aida par Lietuva a ativistes bielarusce oposante ia coleri Alexander Lukashenko, presidente de Bielarus.
La relatas ia mali plu en esta junio cuando Bielarus ia obliga la diverti a sua capital, Minsk, de un avion viajante a Lietuva, e ia aresta un jornaliste bielarusce oposante e sua ami de cor ci ia es pasajores. La UE ia forti sua punis economial en la mense seguente.
Pos alora, on ia vide un aumenta de la cuantia de migrores non-UE ci traversa de Bielarus a Lietuva, Latvia e Polsca, presante la UE a ata en responde.
Latvia ia declara un state de crise a sua frontera bielarusce, do lo intende forti sua patrulias. La cambia autori gardores de frontera a forsa migrores nonlegal a revade.
Ma a lundi, Lukashenko ia promete ce Bielarus no va reaseta migrores de sua visinas baltica. Sua reeleje disputada a un anio ante aora ia provoca protestas coletiva, violente parada par sua fortes de securia.
@T Lubnan risca afonda como la Titanic
@L aora_oji/2021/lubnan_risca_afonda_como_la_titanic
====== Lubnan risca afonda como la Titanic ======
31 marto 2021
Un politiciste major en Lubnan ia averti ce la pais risca desapare si on no trova un governa nova.
Nabih Berri, presidente de la parlamento, ia dise: "La pais intera es en peril, la pais intera es la Titanic. Si la barcon afonda, nun va resta."
Lubnan ave no governa tra plu ca sete menses. La governa presedente ia resinia pos un esplode jigante a la porto de Beirut.
Acel desastre ia mali un crise economial cual ia lasa un dui de la popla vivente en povria e ia provoca protestas coletiva per esije la despone de un grupo elite political ci on acusa de froda, malmaneja e nonatende.
Berri ia dona sua averti sever a lundi, cuando el ia abri un sesion de parlamento clamada per aproba un presta urjente de 200 milion dolares per continua la furni de eletrica a Lubnan tra minima du menses.
La compania Eletrica de Lubnan (EDL), operada par la stato, nesesa esta mone per paia per carburante per sentros eletrical pos la fini de marto.
A soldi, on ia debe descomuta un de la cuatro sentros lubnani xef, par manca de gasolio. EDL ia culpa problemes con la descarga de un tancador e la bloci de la Canal Suais.
EDL ia opera resente usante un presta asiniada par la bujeta de 2020 car la consilio entretempo no pote fa sesiones per aproba un bujeta per esta anio.
Sin un governa nova, la parlamento lubnani no pote reali la reformis cual la comunia internasional esije per intercambia sua aida. Tra la menses pasada, xefes political ia disputa la composa de un consilio nova, en cuando la crise en la pais deveni sempre plu profonda.
@T Macron proposa envia vasines a nasiones povre
@L aora_oji/2021/macron_proposa_envia_vasines_a_nasiones_povre
====== Macron proposa envia vasines a nasiones povre ======
19 febrero 2021
La presidente de Frans, Emmanuel Macron, ia urje Europa e la SUA a envia asta 5% de sua furnis de vasines de covid a nasiones developante. El ia dise ce un fali de comparti justa la vasines ta profondi la nonegalia global.
Asta aora, la majoria vasta de vasines es donada a pasientes par paises de revenu alta.
Macron ia proposa esta modo de trata la nonecuilibra ante la confere virtual G7 de xefes de mundo oji.
La Casa Blanca ia dise ce Joe Biden, presidente esuan, va anunsia promete $4 mil milion per finansia Covax, un scema global per distribui la vasines. La ministro xef de la Rena Unida, Boris Johnson, va preside la confere, e on previde ce el va dedica dosas nonusada a Covax.
"Nos no refere a biliones de dosas sin retarda," Macron ia dise, "o a biliones de euros. Lo es un caso de asinia multe plu rapida 4--5% de la dosas cual nos ave. Esta no va cambia nosa projetas de vasini, ma cada pais debe pone a lado un cuantia peti de sua dosas per transfere deses de miliones de los, ma multe rapida, afin persones en la campo vide ce lo aveni."
El ia ajunta ce la canselor de Deutxland, Angela Merkel, suporta la idea, e ce el espera gania la suporta de la SUA ance.
A mercurdi, António Guterres, secretor jeneral de la Nasiones Unida, ia denunsia la distribui "savaje nonplana e nonjusta" de vasines contra covid tra la mundo. El ia dise ce sola 10 paises ia fa 75% de tota vasinis asta aora, ma 130 paises ancora no ia reseta an un dosa.
Espertas de sania averti ce, si nos no comparti plu justa la vasines, cisa multe anios va pasa ante cuando la coronavirus es global manejada.
@T Mapas de la Armada Nonvinsable va resta en England
@L aora_oji/2021/mapas_de_la_armada_nonvinsable_va_resta_en_england
====== Mapas de la Armada Nonvinsable va resta en England ======
28 janero 2021
Des mapas de la Armada Nonvinsable espaniol, desiniada par mano en la eda elizabetan, va es retenida en England pos un recolie de 600 mil paundes (680 mil euros) per compra los.
On crede ce la mapas ia es creada en la anio seguente un batalia famosa en 1588. Los ia es vendeda a un compror ultramar en julio, ma la governa brites ia proibi esporta los.
La Museo Nasional de la Marina Reial en la site Portsmouth a la costa sude ia susede recolie la mone en oto semanas. Aora lo xerca plu finansia per esibi la mapas a la ves prima.
La desinias ia es fada par un desinior nonconoseda, cisa de Nederland. Los ia es probable fundida sur gravas de la mesma anio par la cartografiste Robert Adams.
En la estate de 1588, la Armada Nonvinsable ia vade contra England pos desenios de enemia entre Felipe 2, re catolica de Espania, e Elizabeth 1, rea protestante de England.
La batalia maral cual ia resulta es videda como un de la plu importantes de istoria. La flotila engles de 66 barcones ia vinse la marina espaniol, con grandia duple, par envia barcones ardente entre sua asembla prosima a Calais.
La mapas de inca e acuarela ia es vendeda per 600 mil paundes, ma la ministro brites de cultur ia proibi sua esporta asta janero e ia recomenda ce un museo o instituida recolie mone sufisinte per recompra los.
La dirijor de la museo en Portsmouth ia dise ce la popla ia "reata profonda en un tempo estrema difisil".
On ia ateni la gol con aida de donas de 200 mil paundes par la Reserva per Arte e pico plu par la Reserva per Recorda la Erita Nasional.
@T Mexico va pone un sculta nativa en loca de Colombo
@L aora_oji/2021/mexico_va_pone_un_sculta_nativa_en_loca_de_colombo
====== Mexico va pone un sculta nativa en loca de Colombo ======
13 otobre 2021
La governor de la Site Mexico ia confirma ce un sculta de un fem nativa va prende la loca de la monumento a Cristoforo Colombo en la capital. La sculta ia es moveda a via en la anio pasada pos cuando ativistes per diretos nativa ia menasa destrui lo.
Claudia Sheinbaum ia dise ce on va sustitui un copia de un sculta nomida la Fem Joven de Amajac.
Protestores ia cade ja scultas de Colombo en America Latina e la SUA.
Colombo, un esploror naseda en Italia ci ia es finansiada par la corona espaniol per viaja esplorante en la tarda de la sentenio 15, es videda par multe persones como un simbol de opresa e colonialisme, car sua ariva en America ia abri la via per la concista par Espania.
La anunsia ia es fada a 12 otobre, la aniversario de la descovre de la Americas par Colombo. En la SUA esta es selebrada como la Dia de Colombo. Ma en Mexico e otra paises de America Latina, lo es conoseda como la Dia de la Raza, e multe regarda lo como un dia onorante la resiste nativa contra la concista european.
Sheinbaum ia dise ce el vole fa la cambia como un parte de la "descoloni" de la Bolevar Reforma, do un pedestal vacua sta a a presente. El ia ajunta ce la monumento nova, cual va ave la grandia truple de la sculta de Colombo, va reconose ce "femes nativa ia es la plu perseguedas" en e pos la periodo colonial.
La orijinal de la Fem Joven de Amajac ia es descovreda en janero en la stato Veracruz en la este de la pais. On crede ce lo presenta un membro fema xef de la popla huastec a la tempo de sua crea. Lo senta en la Museo de Antropolojia de la Site Mexico, cual va crea la copia.
Pos la deside par la governa de la site per sutrae la sculta de Colombo, on ia fa alga proposas incluinte un sculta inspirada par un testa olmec prelatina. Ma lo ia es burlada par causa de sua manca de autenticia.
La sculta de Colombo va es moveda a un parce en un otra rejion de la site.
@T Militaristes embosce persones fujinte en Mosambic
@L aora_oji/2021/militaristes_embosce_persones_fujinte_en_mosambic
====== Militaristes embosce persones fujinte en Mosambic ======
28 marto 2021
En Mosambic norde, militaristes islamiste ia embosce un convoia cual ia atenta salva persones nonmilitar de un otel en tempo de combate.
Sentos de persones ia fuji la batalia, cual ia comensa a mercurdi en la vila Palma. La evacuadas ia inclui laborores stranjer de gas. On ia confirma ce un om sudafrican ia mori, ma multe detalias es nonclar.
Total, un compania major franses de enerjia, ia es obligada a suspende sua labora a sua projeta enorme de gas. La compania ia veni de anunsia la recomensa esta projeta de 20 mil milion dolares, cual lo ia pausa ja en janero par razonas de securia.
La compania ia dise ce nun de sua empleadas ia es matada en la embosce, ajuntante ce lo fida la fortes de securia mosambican ci labora per regania la controla de la rejion.
La organiza Vijila de Diretos Umana (Human Rights Watch) ia reporta ce atestores ia descrive vide "corpos sur la stradas e abitores fujinte pos cuando la combatores ia spara sin nondistingui a persones e construidas".
De 2017, Mosambic norde es ruinada par un rebela. Militaristes liada a la grupo Daex es culpable per la gera en Cabo Delgado, un rejion jeneral muslim. La batalia ia mata plu ca 2500 persones e ia desloca 700 mil.
Rebelores ia fa un ataca surprendente a Palma en la semana pasada, contra botecas, bancos e un caserna militar. Sentos de persones ia fuji, corente a forestas, pantanes de rizofora o viletas visina. Sirca 180 laborores local e stranjer ia refuja se en la otel Amarula Palma.
Alga ia atenta evade en un convoia de veculos a venerdi, en dirije a un plaia prosima, ma los ia es embosceda. An tal, a la min 20 persones ia es inisial volada a securia en elicotores.
On crede ce la sudafrican confirmada como matada ia gida un de la veculos en la convoia.
@T Militaristes mata deses de persones en viletas nijerien
@L aora_oji/2021/militaristes_mata_deses_de_persones_en_viletas_nijerien
====== Militaristes mata deses de persones en viletas nijerien ======
3 janero 2021
Militaristes suspetada islamiste ia ataca du viletas en Nijer, con reportas de deses de sitadanes matada.
Sirca 49 ia mori e 17 ia es ferida en la vileta Tchombangou, e 30 plu persones ia mori en Zaroumdareye. Ambos es prosima a la frontera ueste de Nijer con Mali.
On ia ave resente avenis violente plural en la rejion Sahel, fada par grupos militariste.
Frans ia dise ier ce du de sua soldatos ia es matada en Mali. Plu temprana, un grupo liada a al-Qaida ia dise ce lo ia mata tre soldatos en un ataca separada en Mali a lundi.
Frans gida un uni de aliadas de Africa ueste e Europa contra militaristes en la Sahel. Ma la rejion es ancora afetada par violentia etnical, banditia, e trafica de drogas e persones.
Pos la atacas ier, Alkache Alhada, ministro de internas, ia clari ce soldatos ia es enviada a la rejion. Ma el no ia indica cuanto persones ia mori en la du viletas. Un ofisior local ia dise ce multe ia perde sua vives, e un jornaliste local ia refere a asta 50 moris.
La rejion Tillabéri, do la viletas es situada, es en la "zona de tri fronteras" entre Nijer, Mali e Burcina Faso, cual ia sufri atacas djihadiste en anios resente. Viajas par motosicle es proibida ala tra ja un anio, per para avansas par militaristes islamiste ci ataca comun de tal veculos.
Partes de Nijer fronti ance atacas repeteda par djihadistes de Nijeria, do la governa combate un rebela par Boko Haram. En desembre, membros de acel grupo ia mata a la min 27 persones en Diffa, un rejion en la sude-este estrema de Nijer.
La atacas la plu resente en Tillabéri ia aveni a un tempo de elejes nasional en Nijer, con ce Presidente Mahamadou Issoufou renunsia pos du periodos de sinco anios.
Ofisiores ia anunsia ier resultas entretempo cual sujesta un vinse per Mohamed Bazoum, ministro pasada e membro de la partito renante nijerien. On previde un ronda du a 21 febrero, pos cuando la votas es validida par la corte constitual.
@T Minerias cluida crea un custa recordo de carbon xines
@L aora_oji/2021/minerias_cluida_crea_un_custa_recordo_de_carbon_xines
====== Minerias cluida crea un custa recordo de carbon xines ======
12 otobre 2021
La custa de carbon usada en sentros eletrical en Xina ia alti a un recordo nova car un plu de la rejiones major de mina en la pais esperia inondas.
En dias resente, pluves forte ia cade sur Shanxi, la plu grande de la provinses xines cual produi carbon. Esta segue la inondas recordo cual ia afeta Henan, un otra rejion minante, en julio.
La custa de carbon en la Asioneria de Benes de Zhengzhou ia crese par 8% oji, direta pos un salta de 12% a lundi.
La inondas complica plu la labora par Xina per aumenta furnis de combustable per lejeri sua crise profondinte de enerjia. Shanxi, cual ia produi sirca un tri de la furnis de carbon en Xina en esta anio, ia es obligada a clui tempora deses de minerias par causa de la inondas, an si aora alga locas recomensa lenta sua operas.
A la min 15 persones ia mori en la inondas grave cual ia afeta plu ca 1,76 milion persones ala. Pluve deluvial en la semana pasada ia colasa casas e ia causa liscateras tra plu ca 70 distritos e sites en la provinse norde.
An ante la inondas, Xina ia fasa un manca de enerjia cual ia rompe ja la furni de eletrica en partes grande de la pais. En semanas resente, companias de enerjia ia debe limita la eletrica a miliones de casas e comersias.
Custas de enerjia crese tra la mundo intera con ce la economia global comensa emerji de la pandemica.
@T Momias egiptian es trovada con linguas de oro
@L aora_oji/2021/momias_egiptian_es_trovada_con_linguas_de_oro
====== Momias egiptian es trovada con linguas de oro ======
4 febrero 2021
Arceolojistes en la norde de Misre ia descovre momias de 2000 anios con linguas de oro en sua bocas.
Un ecipo misri-dominican laborante a la templo de Taposiris Magna en Alexandria ia trova des-ses enteras en tombas taliada de roca, popular en la edas elinica e roman.
La tombas ia conteni momias mal conservada. On suposa ce la persones mor ia reseta amuletos de paper de oro, con forma de linguas, per pote parla ante la corte de la dio Osiris en la ultravive.
La dio ia es ance imajida en decoras orida sur la jeso e stofa de lino cual ia enclui partal un de la momias. La egiptianes antica ia crede ce Osiris rena la sumundo e judi la mores.
La decoras orida sirca la testa de un otra momia ia presenta un corona, cornos e un cobra. Sur la peto, la decoras ia mostra un colareta con la testa de un falcon -- simbol de la dio Horus -- pendente de lo.
Esta mision arceolojial en la site antica Taposiris Magna ia descovre ance la masca funeral de un fem, oto flocos de un garlanda de oro, e oto mascas de marmo datida a la edas elinica e roman.
La ministreria de anticas ia dise ce un cuantia de monetas portante la nom e portrae de Rea Cleopatra 7 ia es ja trovada en la templo.
Cleopatra 7 ia es la rea final de la dinastia ptolemean cual ia parla elinica e ia rena Egipte de 51 a 30 AEC. Pos sua mori, Egipte ia es dominada par la romanes.
@T Moris en un crase de fola a un festa israeli
@L aora_oji/2021/moris_en_un_crase_de_fola_a_un_festa_israeli
====== Moris en un crase de fola a un festa israeli ======
30 april 2021
A la min 44 persones ia mori en un crase a un festa relijial folida en la norde-este de Israel. Deses de otras ia es ferida a la peregrina Lag BaOmer, cual aveni anial a la pede de Monte Meron.
La ministro xef Benjamin Netanyahu ia descrive esta como un "desastre pesosa" e ia dise ce el prea per la vitimes.
Deses de miles de iudis ortodox ia es presente a la aveni la plu grande en Israel pos la comensa de la pandemica de coronavirus. La program susedosa de vasini en la pais ia permete ce lo sutrae multe restrinjes, ma ofisiores ia averti sur la risca de transmete covid, an tal.
Reportas temprana ia sujesta ce un strutur a la loca ia colasa, ma ofisiores ia dise plu tarda ce un crase de fola ia aveni sirca la ora 01:00.
La polisia ia clari ce la crase ia comensa cuando alga persones ia lisca sur grados, causante ce multe plu cade. Video enlinia mostra miles de persones ci atenta fuji de la caos tra un pasaje streta cuando la situa developa.
En cada anio, miles de iudis ortodox peregrina a Meron per Lag BaOmer, un festa relijial con focos festal tra la note, preas e dansas.
La vila Meron conteni la tomba de Shimon bar Yochai, un rabi onorada de la sentenio du, ci ia comanda ce on recorda la aniversario de sua mori par selebra sua vive.
La organizores de ia festa estima ce 100 mil persones ia ariva en la sera ier, e plu va veni oji.
Un de la peregrinores ia dise ce el ia crede ce on ia trova un bomba cuando megafones ia es usada per urje la desgrupi de la fola. "Nun ia imajina ce esta pote aveni asi," el ia dise. "Joia ia deveni lamenta; un lus grande ia deveni un oscuria profonda."
@T Moris par causa de un fusilor a un scola rusce
@L aora_oji/2021/moris_par_causa_de_un_fusilor_a_un_scola_rusce
====== Moris par causa de un fusilor a un scola rusce ======
12 maio 2021
En Rusia, sete enfantes e du adultes ia es matada par un sparor a un scola en la site Kazan. Dudes-un otra persones, de ci la plu ia es enfantes, ia es ferida. On ia deteni un suspetada, con 19 anios.
La ataca ia aveni en la capital de la republica Tatarstan, a 820 cilometres a este de Moscva.
Mikhail Mishustin, ministro xef rusce, ia parla sur "tristia grande", e la xef de Tatarstan, Rustam Minnikhanov, ia descrive la ataca como un "trajedia major". Vladimir Putin, presidente de Rusia, ia dise ce el va reesamina la leges sur fusiles.
Polisiores forte armada e veculos de crise ia responde a la aveni, relativa rara en Rusia. Videos compartida en redes sosial mostra alga enfantes ci salta de fenetras per evade, como ance la evacua de persones ferida.
Elvira Ignatyeva, un instruor de engles, ci ia ave 25 anios, ia es matada en atenta proteje un de la enfantes en un coredor. En sua conta de Instagram, Ignatyeva ia tende posta mesajes otimiste con fotos de se joiante pasea o visitante divertis.
"Felisi la vive no es tan difisil," el ia scrive a 1 febrero. "Ta ce on sesa pensa ce felisia es posible sola en alga otra loca, en la futur, e comensa saborea cada minuto real, asi e aora."
Investigores dise ce la suspetada, Ilnaz Galyaviev, abita en Kazan, e on crede ce el ia studia a la scola en la pasada. El ia reseta resente un lisensa de fusil.
Ante la ataca, el ia posta ce el intende mata un "cuantia enorme" de persones ante mata se. Imajes de sua conta, aora blocida, mostra el en un masca negra con la parola "dio" en leteras roja.
On va fa oji un dia de dol per onora la vitimes.
@T Moscitos alterada redui denge en Indonesia
@L aora_oji/2021/moscitos_alterada_redui_denge_en_indonesia
====== Moscitos alterada redui denge en Indonesia ======
10 junio 2021
Casos de denge ia es reduida par 77% en un esperimenta de altera la moscitos cual comunica lo.
Siensistes en Yogyakarta en Indonesia ia usa moscitos infetada con baterias Wolbachia cual redui la capasia de comunica la maladia.
A sincodes anios ante aora, denge ia es relativa nonconoseda: sola nove paises ia fasa alora avenis major de la maladia. Ma lo ia crese como un pandemica lenta e nonsedente e aora on ave asta 400 milion infetas per anio.
Denge causa dole grave en musculos e osos, e sua avenis pote inonda ospitales.
La baterias Wolbachia no dana la moscito, ma los ocupa la partes de sua corpo do la virus de denge ta senta. La baterias compete per recursos, tan difisilinte la reprodui de la virus ce lo deveni multe min probable ce la moscito va causa un infeta cuando lo morde.
La esperimenta ia usa sinco milion ovos de moscito infetada. Estas ia es poneda en baldes de acua en la site a cada semana du, e la prosede de cumula un popla de moscitos infetada ia dura tra nove menses.
On ia divide Yogyakarta en 24 zonas e ia relasa la moscitos en sola un dui de los. La tecnica ia susede tan bon ce on ia relasa aora la moscitos tra la site intera, e la projeta move a locas ensircante con espera de elimina denge en la rejion intera.
Wolbachia pote altera la fertilia de sua ospitor per serti es comunicada a la jenera seguente de moscitos e continua proteje contra denge.
@T Muco maral estende longo un costa turces
@L aora_oji/2021/muco_maral_estende_longo_un_costa_turces
====== Muco maral estende longo un costa turces ======
6 junio 2021
La presidente de Turcia, Recep Tayyip Erdoğan, ia promete salva sua pais contra la muco cual cumula en sua acuas.
Un strato densa e melmosa de mucilajo estende longo la Mar Marmara prosima a Istanbul, danante viventes maral e la industria de pexa. Espertas culpa contamina e la cambia de clima.
Muco maral es un mugre verde natural cual formi cuando alges es supracargada con nurintes par clima calda e acua contaminada. Lo ia es prima trovada en Turcia en 2007, ma on ia descovre lo ance en la Mar Ejeo prosima a Elas.
On crede ce la aveni resente en multe partes de la Mar Marmara, cual lia la Mar Negra a la Mar Ejeo, es la plu grande en istoria. Lo crea un caos per comunias local.
Erdoğan ia culpa la dejeta a mar de acuas nontratada de cloaca, e ance la temperatur cresente, e ia urje ofisiores a investiga.
"Me teme ce, se esta estende a la Mar Negra," el ia dise, "la difisilia va es enorme. Nos nesesa fa esta paso sin retarda."
Sua governa ia envia un ecipo de 300 persones per esamina fontes posible de contamina.
Barcos viajante tra la Mar Marmara debe naviga la melma viscosa, e alga pexores es prevenida de labora, car lo bloci sua motores e redes. Sumerjores ia reporta ce multe pexes e otra spesies mori par sofoca.
@T Multe rusces protesta per suporta Navalny
@L aora_oji/2021/multe_rusces_protesta_per_suporta_navalny
====== Multe rusces protesta per suporta Navalny ======
24 janero 2021
La polisia rusce ia deteni plu ca 3000 persones en un reata contra protestas suportante Alexei Navalny, la gidor oposante ci es en prison.
Deses de miles de persones ia defia un presentia forte de polisia per junta se a alga de la asemblas la plu grande de anios contra Presidente Vladimir Putin.
Navalny, ci es la criticor la plu bon conoseda de Putin, ia urje protestas pos sua aresta a un semana ante aora. El ia es detenida pos vola a Moscva de Berlin, do el ia recovre pos es cuasi matada par gas nerval en Rusia en agosto pasada.
A sua reveni, on ia aresta el sin pausa e ia deside ce el ia viole sua regulas de libria limitada. El dise ce la caso es inventada per silenti el.
La protestas nonpermeteda ia aveni en sirca sento sites e vilas, de Sibir e la este estrema de Rusia asta Moscva e San Petersburg. La protestores ia inclui studiantes joven e persones vea, esijente la libri de Navalny.
A la min 40 mil persones ia partisipa a un asembla en Moscva, an si la ministreria de internas ia estima la cuantia como sola 4000. Tal o no, on ia vide polisiores antitumultal batente protestores e tirante los a via.
Oservores dise ce la estende de la protestas tra la pais ia es sin presedente, e lo en la capital ia es la plu grande en cuasi un desenio. En Iacutsc, site sibirsce, un cuantia peti de persones ia protesta an en temperatur de --50°C.
Navalny es un batalior contra dejenera political e la fas la plu conoseda de oposa rusce a la presidente rusce. El ia atenta deveni un aspiror per la eleje presidental de 2018, ma ia es proibida par un condena de froda cual, longo el, ia es political motivada.
Un blogor franca, el ave miliones de seguores rusce en redes sosial e ia susede ce on eleje alga de sua suportores a comites local en Sibir en 2020.
@T Museveni vinse en Uganda entre alegas par sua oposor
@L aora_oji/2021/museveni_vinse_en_uganda_entre_alegas_par_sua_oposor
====== Museveni vinse en Uganda entre alegas par sua oposor ======
16 janero 2021
En Uganda, resultas inisial mostra ce Yoweri Museveni, ja presidente de tempo longa, es clar vinsente en la eleje per cual la popla ia vota a jovedi.
La comision elejal de la pais ia rejeta alegas par Boni Wine, aspiror oposante e stela pasada de pop, ce la votas ia es nonlegal manipulada. Ma oservores dise ce la fida a la conta ia es danada par un rompe de interede tra tre dias.
On previde la confirma oji de la resulta final.
Deses de persones ia es matada en violentia ante la eleje. Politicistes oposante ia acusa la governa de molesta ance.
Museveni, ci teni ja la potia tra 35 anios, espera un periodo ses en la posto. Esta om de 76 anios dise ce el representa stablia.
A contra, Bobi Wine, la nom teatral de Robert Kyagulanyi, ave 38 anios e dise ce el representa la jenera plu joven en un de la paises la plu joven de mundo, do la eda media es 16.
Ier, en cuando la resultas ia apare, Wine ia dise ce soldatos ugandan ia ensirca e penetra sua casa. "Zero de esta intruores militar parla a nos," el ia dise en Twitter. "Nos ave un problem grave."
Ma un portavose per la governa ia acusa el de "drami" la aveni "per solisita compatia": "Bobi Wine a esta momento es un person multe importante. La stato Uganda debe serti ce el es secur."
Longo la resultas entretempo de du tris de voterias, Museveni ia gania asta aora 62% de votas, en compara con 30% per Wine.
La xef de la comision de eleje, Simon Byabakama, ia dise ce la vota ia aveni pasosa, e ia recomenda ce Wine, ci ia dise ce alga de sua ajentes elejal ia es arestada a jovedi, publici la indicas suportante sua alegas de mal pratica.
La oposor crede ce on usa la rompe de interede per preveni comunica e per sumina la sistem de vota. En ajunta a la noncapasia de es enlinia, persones ia esperia difisiles en envia mesajetas.
La comision elejal dise ce sola du voterias en la pais ia reporta problemes major, e la prosede de vota ia es canselada en acel locas.
On ave aora securia forte en la capital, Kampala, con soldatos e polisiores patruliante.
@T Musk nega ce on usa autos Tesla per spia en Xina
@L aora_oji/2021/musk_nega_ce_on_usa_autos_tesla_per_spia_en_xina
====== Musk nega ce on usa autos Tesla per spia en Xina ======
22 marto 2021
Elon Musk, la dirijor xef de Tesla, ia dise ce sua compania esuan, cual construi autos eletrical, ta es "cluida" si sua veculos ta es usada per spia Xina.
El ia fa sua comenta en responde a reportas ce la militar xines ia proibi autos Tesla de sua complesos, indicante problemes de securia pertinente a datos colieda par cameras instalada en la veculos.
Pos la SUA, Xina es la mercato la plu grande per Tesla. Lo representa sirca un cuatri de la vendes global par la compania en 2020.
Ier, Musk ia dise ce si un organiza comersial ta partisipa en spia un governa stranjer, "la efetos negativa per acel compania ta es estrema mal".
Par lia video, Musk ia nota a un foro xines comersial influente: "Nos ave un motiva multe forte per es multe confidante sur cualce informa. Si Tesla ta usa autos per spia en Xina o cualce loca, nos ta deveni cluida."
On ave ja longa un ansia sur la opera de companias grande esuan en Xina, e reversada.
Relatas entre Xina e la SUA -- la du economias la plu grande de mundo -- es la plu tensada de multe anios. Plu temprana en esta semana, ofisiores de ambos paises ia intercambia parolas coler en la discutes prima entre la governa xines e la governa de Joe Biden, la presidente esuan nova.
Musk ia recomenda plu fida mutua entre Xina e la SUA, do Tesla ave sua base en California. El ia atenta desasentua ansia sur la comparti de datos delicata par companias con sua propre governas, referente a la caso de TikTok, plataforma video xines.
En la anio pasada, Donald Trump, alora la presidente esuan, ia menasa proibi TikTok en la SUA entre sujestas ce la datos de usores ta pote es donada a la governa xines.
Musk ia comenta: "An si spia ta aveni, cual cosa la otra pais ta descovre e esce lo ta importa vera?"
En 2018, la compania de autos de Musk ia gania aproba per sua fabriceria en Shanghai, deveninte la fabricor prima de autos stranjer cual posese plen un compleso en Xina.
Xina es la mercato la plu grande per autos en la mundo, e sua governa ia promove forte la adota de veculos eletrical. Esta desira de compra ia aida Tesla a profita par 721 milion dolares en 2020.
@T Musk vende $5000 milion de asiones pos sonda en Twitter
@L aora_oji/2021/musk_vende_5000_milion_de_asiones_pos_sonda_en_twitter
====== Musk vende $5000 milion de asiones pos sonda en Twitter ======
11 novembre 2021
Elon Musk, dirijor xef de Tesla, ia vende sirca $5000 milion de sua asiones en la compania. Esta segue a alga dias pos sua demanda a sua 63 milion seguores en Twitter esce el debe vende 10% de sua asiones.
La valua de Tesla ia cade par sirca 16% en la du dias pos la resulta de la sonda favorente la vende, ante regania alga ier. Tesla es la compania la plu alta valuosa cual fabrica autos, con valua en asionerias de plu ca milion milion dolares esuan.
La fidusia de Musk ia vende sirca 3,6 milion asiones, con valua de sirca $4000 milion. El ia vende ance 934 mil plu asiones per sirca $1100 milion pos usa sua beneficas per oteni cuasi 2,2 milion, longo la rejistra de la regulor de asionerias esuan.
Esta documentos revela ce la vende de sirca un sinci de la asiones ia es fada sur funda de un scema comersial ja organizada en setembre, longa ante la postas par Musk en la fini de semana pasada sur vende alga asiones. Ma los mostra ance ce la vende de la asiones restante no ia es projetada.
A saturdi, Musk ia twita: "Resente on dise comun ce ganias nonrealida es un modo de evita imposta, donce me proposa vende 10% de mea asiones de Tesla. Me va obedi la resultas de esta sonda, sin depende de la resulta."
La sonda ia atrae plu ca 3,5 milion votas, de cual cuasi 58% ia favore vende la asiones.
Musk ia asentua ance ce el no reseta mone de Tesla: "Me ave sola asiones, donce la sola modo en cual me pote personal paia impostas es par vende asiones."
Como parte de la intercambia, el ia usa beneficas de compra, donada a el par la compania en 2012. Tal compras jenera impostas de revenu, tipal sasiada par usa mone recolieda par vende instante alga de la asiones nova otenida.
Esta ia es sua vende prima de asiones pos 2016, cuando el ia usa plu esta beneficas. Alora el ia vende ance alga de la asiones per sasia un fatura de imposta prosima a $600 milion.
Musk es la person la plu rica de mundo. Sua ricia personal es estimada como plu ca $280 mil milion.
@T Nasiones aida combate un focon sever en Cipros
@L aora_oji/2021/nasiones_aida_combate_un_focon_sever_en_cipros
====== Nasiones aida combate un focon sever en Cipros ======
5 julio 2021
Nasiones plural ia responde a un apela par Cipros per aida combate un focon forestal enorme cual ofisiores descrive como la plu sever en la istoria de la pais.
Elas, Israel, Italia e la Rena Unida es entre los ci aida, incluinte par aviones pompinte. Cipros ia dise ce misiones de cade acua ia redui la sperde de la flamas, ma ia averti ce la focon risca crese denova.
Ier, on ia confirma ce cuatro cultivores misri ia mori en la arde, cual ia es vanida par ventas forte.
La focon ia estende tra la distrito Limasol en la sude e ia obliga la evacua de alga viletas. Plu ca 50 cilometres cuadrida de foresta e tera cultivada es destruida, como ance linias eletrical.
Pompores atenta preveni la flamas de ateni la Parce Forestal Nasional Machairas.
Presidente Nicos Anastasiades ia descrive la focon en la pedes de la montes Troodos como "un trajedia". En un twita, el ia dise ce lo es "la focon la plu grande pos 1974" -- referente a la anio en cual Cipros ia es divideda pos un invade turces. El ia promete ce la governa va "furni aida direta a la vitimes" e sua familias.
La polisia ia aresta un om de 67 anios, suspetante un ensende criminal. Un atestor ia vide un motoriste vadente a via de la vileta Arakapas, a norde-este de Limasol, a la tempo cuando la focon ia comensa a saturdi.
Cipros esperia un onda de caldia tra ja un semana, con temperatur asta 40°C.
@T Navalny perde la capasia de sensa en prison
@L aora_oji/2021/navalny_perde_la_capasia_de_sensa_en_prison
====== Navalny perde la capasia de sensa en prison ======
8 april 2021
La sania de Alexei Navalny, criticor prisonida de la governa rusce, deveni plu mal e perde sensas en sua gamas e manos. Sua avocato Vadim Kobzev ia dise ce on ia diagnose du ernias spinal.
Navalny spende tempo en un colonia penal per froda. En la semana pasada, el ia comensa un juna political per esije un bon trata per doles acuta en sua dorso e gamas.
La Casa Blanca ia dise ce la reportas ce sua sania mali es disturbante.
Kobzev, ci ia visita Navalny ier, ia tuita: "Alexei pasea mesma. El sensa dole en pasea. Lo es multe descalminte ce la maladia progresa clar en relata a la perde de sensa en sua gamas, palmas e polsos."
Plu temprana en esta semana, on ia move Navalny, ci ave 44 anios, a un ospitaleta en la prison en la vila Pokrov, con sintomes de un maladia respiral. El ia dise ce el sufri de un tose e temperatur persistente.
Sua temperatur ia osila, cadente a 37°C a mercurdi pos ateni 39°C a lundi longo la avocato, ci ia dise ance ce Navalny perde un cilogram per dia par causa de sua juna.
En un posta a Instagram, Navalny ia dise ce la autoriosas de la prison atenta sumina sua juna par rosta carne de gal en prosimia e par pone bonbones en la poxes de sua vestes.
Ance ier, un portavose per la governa esuan de Joe Biden ia dise ce los en la Casa Blanca opina ce la prisoni de Navalny es "political motivada e evidente nonjusta", demandante ce on libri el sin retarda.
Plu temprana, Amnestia Internasional, un organiza per diretos umana, ia comenta ce Navalny es prisonida en un ambiente cual es egal a tortura e cual es cisa lenta matante el. Criticores dise ce esta prison es conoseda per sua ambiente spesial dur.
La avocatos de Navalny, ci ia visita el en prison, dise ce on ave no dotores a la colonia e ce la unia medical ala funsiona con sola un paramediciste.
En la semana pasada, la servi de prisones de Rusia ia nega la alegas par Navalny ce el no reseta un bon trata, disente ce on ia dona a el "tota la aida medical nesesada longo sua indicas medical".
A lundi, Navalny ia dise ce asta tre persones de sua unia ia es resente ospitalida con tuberculose, un alega negada par la servi de prisones.
On ia dona a Navalny un condena suspendeda per froda en 2014, un puni jeneral regardada como political motivada. La condena ia deveni un periodo vera en prison en febrero, pos sua reveni de Deutxland, do on ia trata el pos sua veneni par la gas nerval novitxoc.
@T Nepal abri sua varia nova de la Tore Dharahara
@L aora_oji/2021/nepal_abri_sua_varia_nova_de_la_tore_dharahara
====== Nepal abri sua varia nova de la Tore Dharahara ======
25 april 2021
En Catmandu, capital de Nepal, on ia inaugura un copia de un tore destruida par un trematera a ses anios ante aora.
La Tore Dharahara ia es construida en la desenio de 1830 par la ministro xef prima de Nepal e ia es un atrae popular per turistes.
La tore ia colasa en la trematera, cual ia ave la grado 7,8 de fortia e ia mata plu ca nove mil persones. Plu ca sincodes ia mori en la destrui de la tore mesma.
Cuando lo ia es construida, la tore orijinal, ance nomida la Tore Bhimsen, ia ave 18 niveles. Lo ia es reduida a 11 pos un plu trematera en 1935.
La strutur nova ia es ofisial abrida par K.P. Sharma Oli, la ministro xef presente, a un dia ante la aniversario de la desastre.
La tore nova ave 22 niveles e 72 metres de altia. Lo posese ance un jardin, un museo e un fonte, como ance du asendadores per es plu asedable a tota.
Lo es formida como un minareta e ofre vistas de la Vale Catmandu. An tal, visitores no va pote saborea la esperia asta plu tarda en la anio, car la popla no va ave la direto de entra ante novembre.
@T Nicaragua comanda la aresta de un noveliste
@L aora_oji/2021/nicaragua_comanda_la_aresta_de_un_noveliste
====== Nicaragua comanda la aresta de un noveliste ======
10 setembre 2021
Avocatos governal en Nicaragua ia comanda ia aresta de Sergio Ramírez, noveliste premiada.
Ramírez, ci ia gania la Premio Cervantes per leteratur en 2017, es un de la scrivores xef en Nicaragua. On acusa el de provoca odia e de conspira per destabli la pais.
Deses de nicaraguanes influosa es ja detenida su acusas simil en parte de un colpa contra oposores de Presidente Daniel Ortega. Entre la detenidas es xefes de sindicato, editores de jornales e aspirores de la presidentia.
Ramírez, ci ave 78 anios e ia parti de Nicaragua en junio, ia responde defiante a la comanda. Scrivente en redes sosial, el ia dise ce sua parolas es sua sola armas e ce el va continua usa los per suporta libria e democratia contra tirania.
En la pasada, Ramírez ia es un aliada prosima de Ortega e ia servi como sua vispresidente en la periodo prima de Ortega, de 1985 a 1990. Ma el ia distanti se de la Partito Sandinista en 1995, protestante contra lo cual el ia descrive como la "tendes autocrata" de Ortega.
El es un criticor franca de la presidente sempre a pos. En un intervisa con un jornal dial txilan en julio, el ia acusa Ortega de "no ave limitas". "Sua stratejia es resta en potia a cualce custa," el ia dise.
On previde ce Ortega va aspira un periodo sinco en la posto presidental en la elejes en novembre.
Esta serie de arestas ia comensa en junio cuando Cristiana Chamorro, aspiror de la presidentia, ia es restrinjeda a casa e proibida de aspira la posto.
Diferente de la plu de la otra figures oposante, ci on ia acusa de tradi o la provoca de odia, Chamorro ia es acusada de usa un funda dirijeda par se per lava mone. Avocatos dise ce Ramírez ia reseta mone de esta funda, como ance de un plu organiza cultural cual es simil acusada de destabli Nicaragua.
Oposores de la governa dise ce la arestas es un stratejia intendeda per rari la campo de aspirores ante la elejes. Ma la governa dise ce lo ata desidente contra "la enemis de Nicaragua" ci, longo la governa, es paiada par la SUA.
@T No termina nova per aviones en Paris
@L aora_oji/2021/no_termina_nova_per_aviones_en_paris
====== No termina nova per aviones en Paris ======
12 febrero 2021
La governa franses ia abandona sua projeta de construi un termina nova grande a la airoporto Charles de Gaulle en Paris.
La pandemica e consernas sur la ambiente ia es la razonas donada per esta cambia de opina.
Un termina cuatro ia ta permete la airoporto a maneja asta 40 milion plu pasajores per anio. Ma Frans ia ajusta radisal sua disposa a transporta, e developas de airoportos debe envolve aviones nurida par eletrica o idrojen.
Barbara Pompili, ministro de ecolojia, ia comenta ce la projeta es aora "obsoleta". "Nos va nesesa sempre aviones, ma nos debe move en dirije a la usa plu razonada de viaja airal, e ateni un redui en la emetes de gas invernerial par la setor," el ia dise.
La xef de la Partito Verde de Frans, Julien Bayou, ia dise ce esta es "un vinse grande per ambientistes" contra lo cual el ia nomi "un projeta fol".
La airoporto Charles de Gaulle, cual ia abri en 1974, es la numero du de la plu ativas en Europa (pos sola London Heathrow). Plu ca 76 milion pasajores ia pasa tra lo en 2019.
@T Obama suplica xefes a evita un desastre de clima
@L aora_oji/2021/obama_suplica_xefes_a_evita_un_desastre_de_clima
====== Obama suplica xefes a evita un desastre de clima ======
9 novembre 2021
Barack Obama ia urje la xefes political a "avansa e avansa aora" per evita un rompe de clima. El ia identifia Xina e Rusia como xef entre la paises cual fali redui sufisinte rapida sua emetes caldinte.
Obama ia dise ce an si on ia progresa en la discutes climal en Glasgow, Scotland, incluinte prometes notable par paises per redui emetes de metano e per fini la desforesti, "nos no es en un loca prosima a do nos nesesa es" e "la plu nasiones ia fali es tan aspirante como los debe".
"Spesial descorajinte ia es vide ce la xefes de du de la emetores la plu grande de mundo, Xina e Rusia, refusa es an presente a la discutes," la presidente pasada de la SUA ia dise en sua parla a la delegadas de COP26, repetente criticas dirijeda a Xi Jinping e Vladimir Putin par Joe Biden a la mesma confere en la semana pasada.
Obama ia ajunta: "Sua projetas nasional pare refleta un manca perilosa de urjentia e un volentia per manteni la situa presente, e esta es triste."
En alga de sua comentas la plu personal sur la crise de clima, Obama ia dise ce "on ave tempos cuando me senti descorajida, on ave tempos cuando la futur pare alga sombre," ajuntante ce "imajes de contrautopia comensa apare gradal en mea sonias".
La pandemica de covid, la crese de nasionalisme en paises como la SUA e malinforma sperdeda en redes sosial ia dana la labora global per fronti la cambia de clima, el ia nota. Ma Obama ia ajunta ce "sinicisme es la recurso per coardes, e nos no pote permete a nos la despera" -- ante recomenda ce ativistes joven per la clima continua presa politicistes a fa plu.
"Si acel persones plu vea no va escuta, los debe move de la via," el ia dise. "Vota como si vosa vive depende de lo, car vera lo depende."
La parla par Obama ia aveni en la semana du de un confere en cual xefes de mundo ia usa retorica de ruina en promete fa plu, tal ce la declaras nova per redui emetes ia basi alga la grado de caldi global espetada, an si esta resta a un nivel perilosa alta.
Esta ia contrasta con la disposa de grupos ambientiste, xefes de poplas nativa e ativistes joven ci ia cexa ce COP26 es un parade deludente de "lava verde" e prometes rompeda.
Obama ia atenta trata esta desecuilibra, indicante ce "comprometes nonperfeta" va es nesesada per solve la crise de clima. "Prepara vos per un maraton, no un sprinta," el ia dise. "Si nos parla franca a nos, alora -- si, lo va es vera difisil. La cualia bon es ce umanas ia fa cosas difisil a ante, e me crede ce nos va fa cosas difisil denova."
@T Oculos rara mugul en la subasteria
@L aora_oji/2021/oculos_rara_mugul_en_la_subasteria
====== Oculos rara mugul en la subasteria ======
8 otobre 2021
Du oculos rara de diamante e esmeralda de la tesoreria de un prinse indian nonconoseda va es subastada en London, plu tarda en esta mense.
La lentes ia es poneda en sua montur de eda mugul sirca 1890, longo la subasteria Sotheby's. Cada oculo va es ofreda per entre 2 e 3,4 milion dolares. Ante la vende, los va es esibida a ves prima en Hongkong e London.
Edward Gibbs, presidente de Sotheby's per Asia sude-ueste e la sucontinente indian, ia dise: "Esta novetas estracomun trae a junta un multia de filos -- de la mestria tecnical de la siselor e la jenia de artisania asta la imajina de un patron ci ia eleje fabrica du oculos intera nonsimil a cualce cosa videda a ante."
Lo no es clar ci ia encarga esta oculos, ma cisa los ia parteni a mugules, la dinastia ci ia rena la sucontinente en la sentenios 16 e 17 e ia es conoseda per atenis rica de arte e arciteta.
Un declara par la subasteria dise ce la du oculos conteni un diamante e un esmeralda. "La cualia e puria de la jemes es estracomun, e petras de esta grandia ia es sin duta reservada a un imperor."
La lentes de diamante, taliada como un duple de un sola diamante natural, veni probable de la minerias de Golconda en Barat sude. Los de esmeralda, con forma de larmas, orijina en un sola jem natural de Colombia.
"An si lentes comun funsiona mera per boni la vide, esta filtros ia es aidadores a lumina spirital," la declara ajunta, "car on ia crede ce diamantes lumina e esmeraldas teni potias miraclosa per sani e forsa a via la malvole."
Longo la subasteria, la "evoca la plu famosa" de un tal oculo en istoria e mitolojia es trovada en la Istoria natural par Plinio la Vea, cual raconta ce la imperor roman Neron ia oserva concursos gladiatoral tra la surfas de un petra verde valuosa.
Seneca, ensenior de Neron, ia es esperta sur refrata de lus, mirores e otica, e lo pare ce la oculo de Neron ia es un de la primas de mundo.
@T Ofisiores pasada de FIFA es acusada de froda
@L aora_oji/2021/ofisiores_pasada_de_fifa_es_acusada_de_froda
====== Ofisiores pasada de FIFA es acusada de froda ======
3 novembre 2021
Sepp Blatter e Michel Platini, ofisiores pasada de FIFA, ia es acusada de froda e otra crimines en Swiz.
Avocatos swiz dise ce Blatter ia organiza un transfere nonlegal de du milion frances swiz a Platini en 2011. Los dise ce esta paia "ia dana la ativas de FIFA e ia rici nonlegal Platini".
Blatter e Platini va es aora prosededa par un corte en Bellinzona. Si on judi ce los es culpable, los va es cisa multada o prisonida per alga anios.
La caso ia es abrida en setembre 2015 cuando FIFA, la autoriosa mundal de futbal, ia reseta acusas a tema de froda vasta. Sua comite etical ia inisia un investiga cual ia proibi ambos omes de la sporte e ia obliga los a resinia sua postos.
Esta ia fini la periodo de 17 anios en cual Blatter ia preside FIFA, como ance la promove par Platini per segue sua instruor presedente.
Pos un plu anio, Platini ia debe resinia como presidente de UEFA, la autoriosa governante fundal en Europa, pos perde sua apela contra sua proibi.
E Blatter, ci ave 85 anios, e Platini, ci ave 66, ia nega tota malcondui.
@T Omicron, un varia nova grave de coronavirus
@L aora_oji/2021/omicron_un_varia_nova_grave_de_coronavirus
====== Omicron, un varia nova grave de coronavirus ======
27 novembre 2021
La Organiza de Sania Mundal (OSM) ia declara ce un varia nova de coronavirus es "consernante" (sua categoria la plu grave), donante a lo la nom omicron.
La varia ave un cuantia grande de mutas, e indicas temprana sujesta un risca aumentada de reinfeta.
Lo ia es prima reportada a la OSM de Sudafrica a 24 novembre, ma ia es ance identifiada en Botswana, Beljia, Hongkong e Israel. Alga paises ia deside ja o proibi o restrinje viajas a e de Africa sude.
Ier, la OSM ia dise ce la cuantia de casos de esta varia, inisial nomida B.1.1.529, ia pare crese en cuasi tota provinses de Sudafrica. Sola sirca 24% de la popla ala es completa vasinida.
La OSM ia dise ance ce on va nesesa alga semanas per comprende la efeto de la varia nova, en cuando siensistes va labora per determina como transmetable lo es.
Dr Anthony Fauci, conselor medical xef a la presidente de la SUA, ia dise ce an si la reportas sur la varia nova leva un "bandera roja", lo ia es posible ce vasines va susede ancora preveni maladia grave.
Asionerias tra la mundo ia esperia un cade agu ier, refletante la temes de investores sur la efeto economial posible.
@T On descovre un depinta antica de un cangaru
@L aora_oji/2021/on_descovre_un_depinta_antica_de_un_cangaru
====== On descovre un depinta antica de un cangaru ======
23 febrero 2021
Siensistes australian ia descovre la arte la plu vea de roca en la pais -- un depinta de un cangaru con 17 300 anios.
La obra, con grandia de 2 metres, ia es creada en ocer roja sur la sofito de un refujeria, en la rejion Kimberley en Australia ueste, ja conoseda per sua depintas sur roca par australianes nativa.
Sua eda ia es determinada par dati radiocarbonal nidos antica de vespas de fango. La descovre ia es publicida oji en la jornal Natur Condui Umana.
La rexercor Damien Finch, la abrivia de la tecnica de dati par nidos de vespas de fango, ia dise ce on no trova comun tal nidos e supra e su la mesma obra de arte. Ma la ecipo ia pote sample ambos tipos per calcula la edas minima e masima de esta obra.
La coautor de la article, Dr Sven Ouzman de la Universia de Australia Ueste, ia ajunta ce cisa un relata esiste entre la depinta de la cangaru e la arte antica de otra rejiones.
"Esta imaje iconin de cangaru es vidal simil a depintas de roca de isolas en Asia sude-este datida a plu ca 40 mil anios ante aora," el ia dise, "sujestante un lia cultural -- e indicante la posible de arte de roca an plu vea en Australia."
Plu temprana en esta anio, rexercores ia trova la depinta la plu vea de animal sur cava, un imaje de grandia natural de un porco, creada a 45 mil anios pasada, sur la isola Sulauesi en Indonesia.
En Sudafrica, un desinieta grilin con eda de 73 mil anios es regardada como la desinia la plu vea de tota.
Cissy Gore-Birch, presidente de la Corpora Nativa Balanggarra, ia nota la sinifia de la descovre de la depinta de la cangaru per abitores nativa e otra australianes. "Lo es importante ce sabes e naras nativa no es perdeda e va es ancora compartida tra jeneras veninte," el ia dise.
@T On desemplea la dirijor de la abri olimpial
@L aora_oji/2021/on_desemplea_la_dirijor_de_la_abri_olimpial
====== On desemplea la dirijor de la abri olimpial ======
22 julio 2021
La dirijor de la presenta abrinte per la Juas Olimpial ia es desempleada, a la dia ante la aveni mesma.
On ia trova resente metraje de Kentarō Kobayashi en la desenio de 1990, en cual el pare broma sur la Olocausto. Seiko Hashimoto, presidente de la comite organizante olimpial, ia dise ce la video burla "fatos dolosa de istoria".
Esta es la plu resente en un serie de scandales cual ia afeta la Juas. A alga dias pasada, un composor per la presenta ia resinia pos cuando lo ia deveni conoseda ce el ia tormenta cameradas descapasida a sua scola.
La organizores batalia ance un cuantia cresente de casos de covid entre atletas e ofisiores. Oji on ia reporta ce, en soma, 91 persones autorida per la Juas ia es positiva analiseda con la virus.
Organizores reevalua aora como on va reali la aveni doman.
Kentarō Kobayashi, ci ia es un comediste en la pasada, ia es forte criticada per sua comentas, incluinte par la Sentro Simon Wiesenthal (SWC), un organiza iudi per diretos umana. Rabi Abraham Cooper, dirijor global de ata sosial de la SWC, ia dise: "Cualce person, sin depende de sua creosia, no ave la direto de burla la vitimes de la jenoside nazi."
Kobayashi ia publici un declara formal en responde a sua desemplea. "Divertis no debe fa ce persones senti noncomfortosa," el ia dise. "Me comprende ce mea eleje stupida de parolas a acel tempo ia es erante, e me regrete lo."
La organizores de la juas ia debe fronti ance otra resinias major. En marto, la xef creosa Hiroshi Sasaki ia resinia pos sujesta ce on ta pote vesti Naomi Watanabe, comediste pesosa, como un porco e nomi el "OlymPig".
E en febrero, Yoshirō Mori, ministro xef pasada de Japan, ia debe resinia como presidente de la comite olimpial pos dise ce consentas con multe dirijores fema ta "ocupa multe tempo" car femes parla tro.
@T On evacua Goma par causa de un volcan erutante
@L aora_oji/2021/on_evacua_goma_par_causa_de_un_volcan_erutante
====== On evacua Goma par causa de un volcan erutante ======
23 maio 2021
En la Republica Democrata de Congo, la governa ia inisia un sistem de evacua per la site Goma pos la eruta de un volcan grande.
Fontes alta de lava ia esplode de Monte Nyiragongo en la sielo de note, forminte un nube densa orania supra la site, cual ave du milion abitores.
Esta volcan, a 10 cilometres de Goma, ia eruta la plu resente en 2002, cuando lo ia mata 250 persones e ia destrui la casas de 120 mil.
On ia vide miles de persones fujinte con materases e otra posesedas en dirije a la frontera este con Rwanda, an ante la anunsia par la governa, cual ia aveni a alga oras pos la comensa de la eruta.
Autoriosas rwanda ia dise ce ofisial sirca 3000 persones ia traversa ja de Goma. La difusores governal ia dise ce esta persones va es casida en scolas e construidas relijial.
Otra abitores ia fuji a tereno plu alta a ueste de Goma.
Un fesur nova ia abri sur la volcan, permetente ce lava flue a sude en dirije a Goma, an ateninte la airoporto a la borda este de la site. Eletrica ia rompe tra rejiones grande, e un autovia cual lia Goma a la site Beni ia deveni engolida par la lava.
Un ofisior de la Parce Nasional Virunga, do la volcan es situada, ia dise en un nota a empleadas ce la eruta es simil a lo en 2002 e ce tota persones prosima a la airoporto debe "evacua sin retarda".
Plu temprana, la ministro de comunica Patrick Muyay Katembwe ia twita ce la governa discute "medias urjente" pos ce la ministro xef ia asembla un consenta de crise en la capital, Kinshasa.
On ia consela ce on resta calma, ma alga persones ia cexa sur la manca de informa par la governa entre reportas contradisente cual ia sirculi en redes sosial.
Monte Nyiragongo es un volcan relativa ativa, ma on ia ave ansia ce sua ativia no es bon monitorida par la Oserveria de Volcan de Goma pos cuando la Banco Mundal ia redui sua finansia su alegas de sobornas. En un reporta a du semanas ante aora, la oserveria ia averti ce la ativia sismica a Nyiragongo ia aumenta.
@T On recorda Li Wenliang a un anio pos sua mori
@L aora_oji/2021/on_recorda_li_wenliang_a_un_anio_pos_sua_mori
====== On recorda Li Wenliang a un anio pos sua mori ======
7 febrero 2021
En redes sosial en Xina, on ia recorda la dotor ci ia averti sur la eruta de coronavirus en la pais.
Miles ia onora Li Wenliang ante la aniversario prima de sua mori a 7 febrero 2020. El ia mori pos developa covid en trata pasientes en Wuhan.
Li ia atenta averti sua medicistes colaborante sur un maladia cual ia pare simil a sras, un otra coronavirus matante. Ma la polisia ia comanda el a "para fa comentas falsa" e on ia investiga sua "sperde de rumores".
El ia es un dotor de oculos a un ospital en Wuhan, la site en la este de la sentro de Xina do on ia deteta la caso prima de covid a la fini de 2019.
La mori de Li ia provoca un mostra rara de tristia e coleria publica sur la maneja de la problem par la governa xines. Cuando ospitales ia pleni en Wuhan, on ia acusa la governa de desesajera la gravia de la virus e de asconde la estende de sua sperde.
Sola cuando la coleria ia deveni vera manica, la governa ia desculpa Li e ia onora el como eroe. A pos, plu ca 105 milion persones tra la mundo ia es infetada par la virus e 2,3 milion ia mori de lo.
La libria de parla es limitada en Xina, do la governa ia promove un nara ofisial sur sua maneja susedosa de la virus.
Xina sensura costumal la comentas en redes sosial. Ma la paje personal de Li en Weibo, la corespondente xines de Twitter, ia deveni un spasio rara do usores ia pote espresa sua sentis.
On ia lasa ja sentos de miles de mesajes en la comentas de la postas de Li, e multe plu ia apare ier.
@T On relata la caldi artica a invernos plu fria
@L aora_oji/2021/on_relata_la_caldi_artica_a_invernos_plu_fria
====== On relata la caldi artica a invernos plu fria ======
3 setembre 2021
Un studia nova mostra ce la frecuentia cresente de clima invernal estrema en partes de la SUA es liada a la caldi aselerada de la Artica.
Siensistes ia trova ce la caldi rejional ia disturba ultima la ordina sirculo de ventas conoseda como la vortis polal. Esta ia permete ce aira plu fria flue a sude a la SUA, spesial en la "onda de fria" cual Texas ia esperia en febrero.
La autores dise ce on va vide plu invernos fria en alga locas par causa de la caldi.
En la cuatro desenios pasada, rejistras par satelite ia mostra como la temperatur global cresente ia fa un efeto profonda a la Artica. La caldi ala es multe plu asentuada ca en la resta de la mundo, e ia causa un diminui rapida de la jelo en la mar en estate.
La studia indica ce la fonde de jelo en la Mar Barents e la Mar Cara produi plu neva supra Sibir e un transfere de enerjia esedente cual afeta la ventas jirante en la stratosfera supra la Polo Norde. La caldia causa ultima un estende de la vortis e esta permete ce aira estrema fria ateni la SUA.
On ia vide plu de tal estendes de la vortis pos la comensa de oservas par satelite en 1979. La autores crede ce sua labora va pote boni predises sur avenis de fria estrema.
Dr Judah Cohen, profesor a la Instituida de Tecnolojia de Massachusetts ia comenta: "En Texas, serta la persones ia ta pote es plu preparada pos avertis plu bon. Alga persones ia mori jelada en sua casas, e cisa los ia ta pote vade per xerca refuja."
Si on regarda la sena plu grande, la rexercores crede ce sua descovre va aida la mundo a comprende ce la caldi global es complicada. Los espera ce lo va elimina la idea falsa ce invernos plu fria sinifia ce la mundo no deveni plu calda.
@T On trova selacos luminesente prosima a Zeland Nova
@L aora_oji/2021/on_trova_selacos_luminesente_prosima_a_zeland_nova
====== On trova selacos luminesente prosima a Zeland Nova ======
3 marto 2021
Siensistes ia trova ce tre spesies de selaco abitante acua profonda luminese en la oscur.
La spesies ia es colieda de Chatham Rise, un rejion de la fondo de mar a este de Zeland Nova, en janero de la anio pasada. Un de la spesies, Dalatias licha, es aora la vertebrato luminesente la plu grande conoseda, capas de ateni 180 sentimetres de longia.
Bioluminese ia es ance confirmada en Etmopterus lucifer e Etmopterus granulosus.
La tre spesies ia es ja conoseda a biolojistes maral, ma esta es la ves prima cuando on ia identifia en los la fenomeno de bioluminese -- la emete de lus par organismes.
An si multe animales de mar, como ance alga insetos como lampetas, produi sua propre lus, on no ia trova esta cualia en selacos grande ante aora.
La rexercores sujesta ce cisa la suventres luminosa de la selacos aida los a asconde de predores o otra menasas su los. La bioluminese es realida par miles de fotoforos (selulas produinte lus) en la pel de la selacos.
La tre spesies studiada abita un spasio nomida la zona de duilus, con profondia entre 200 metres e 1000 metres. La lus de sol no ateni plu profonda. Esta ambiente ofre no locas per asconde, donce la selacos ia evolui esta "contralumina" per camufla.
En la studia, la siensistes de la Universia Catolica de Louvain en Beljia e la Instituida Nasional de Rexerca Acual e Atmosferal en Zeland Nova esplica la importa de bioluminese per animales de mar:
"On ia regarda frecuente lo como un aveni spetaculin ma noncomun en la mar, ma si on considera la vastia de la mar profonda e la aveni de organismes luminesente en esta zona, lo es aora sempre plu evidente ce la produi de lus a profondia debe ave un rol importante en struturi la ecosistem la plu grande sur nosa planeta."
@T On trova un depinta furada en un armario
@L aora_oji/2021/on_trova_un_depinta_furada_en_un_armario
====== On trova un depinta furada en un armario ======
20 janero 2021
On ia descovre un depinta con eda de 500 anios en un aparte en Italia e ia redona lo a sua museo, do la empleadas no ia sabe ce lo ia es an furada.
La copia de Salvator Mundi (Salvor de la Mundo) ia es trovada en un armario en un sala de dormi en Napoli a saturdi. La orijinal ia es probable depintada par Leonardo da Vinci, e la copia par un de sua studiantes.
La polisia ia dise ce la posesor de la aparte es arestada, suspetada de reseta benes furada. El ave 36 anios.
La obra parteni usual a la colie Museo Doma de la eglesa San Domingo Major en la site. Ma ofisiores no ia sabe ce on ia fura lo car "la sala do on teni la depinta no ia es abrida en tre menses" par causa de la pandemica.
Car nun ia reporta sua desapare, lo no es clar cuando la arte ia es prendeda, ma la museo ia dise ce lo ia es en sua posese a tempo tan resente como janero pasada.
Polisiores investiga la detalias de la fura, ma on ia ave no indica de entra par forsa a la museo. La avocato Giovanni Melillo ia comenta: "Lo es credable ce la fura ia es encargada par un organiza laborante en la comersia internasional de arte."
La obra mostra Cristo con un mano levada e la otra teninte un sfera de vitro. On no sabe serta ci ia depinta lo, ma alga espertas crede ce lo ia es creada par Giacomo Alibrandi, un studiante de Leonardo, en la temprana de la sentenio 16.
Ajuntante a la misterio, on disputa ance esce la depinta orijinal es vera par Leonardo da Vinci. El ia mori en 1519, e min ca dudes de sua depintas esiste ancora.
On ia atenta restora la Salvator Mundi orijinal. Sua funda de lenio de nozo ia es descriveda como "tunelida par vermes" e lo pare ce a alga tempo lo ia es divideda a du partes. Laboras per restora lo ia lasa marcas de raspa.
Esta no ia turba comprores, an tal, car la depinta ia es subastada per 450 milion dolares esuan, cuantia recordo, en 2017. La compror nonidentifiada ia partisipa en un compete par telefon cual ia continua tra cuasi 20 minutos.
@T On trova un obra furada de Picasso
@L aora_oji/2021/on_trova_un_obra_furada_de_picasso
====== On trova un obra furada de Picasso ======
29 junio 2021
Un depinta par Pablo Picasso, furada de un galeria elinica a nove anios ante aora, es retrovada.
Ier, la polisia de Atina ia dise ce Testa de Fem ia es trovada con un depinta de un molin de venta par Piet Mondrian en 1905.
Ambos ia es saisida, como ance un obra tre de arte, en un fura complicada en 2012 a la Galeria Nasional en Atina. La depintas ia es estraeda de sua moldures en un invade de matina temprana cual ia ocupa mera un pico de minutos.
On reporta ce un om elinica ia es arestada pos la descovre de la arte en un canion en la anteurbe.
La anunsia de la trova aveni a alga menses pos un reporta ce la polisia elinica crede ce la depintas es ancora en la pais.
Esta obra de Picasso, un portrae de un fem en sua stilo cubiste tipal, ia es donada a la Galeria Nasional par la artiste mesma en 1949. El ia dise ce la dona, depintada a un desenio ante alora, reconose la resiste par la pais contra la nazis deutx.
Un plu depinta par Mondrian ia es lasada a la loca de la fura, do la criminores ia cade lo en sua fuji.
On previde ce ofisiores va fa oji un confere jornaliste sur la regania de la arte.
@T On va sabe cisa nunca la orijina de covid
@L aora_oji/2021/on_va_sabe_cisa_nunca_la_orijina_de_covid
====== On va sabe cisa nunca la orijina de covid ======
20 otobre 2021
Ajenterias de securia en la SUA dise ce cisa los va pote nunca identifia la orijinas de covid-19, ma los ia conclui ce lo no ia es creada como un arma biolojial.
En un evalua refrescida de la orijinas de la virus, la Ofisia de la Dirijor Esuan de Informa Nasional ia dise ce egal un transmete de animal a umana e un sienseria nonselida es ipoteses credable per la sperde inisial. Ma la informas no sufisi per ateni un conclui defininte.
Xina ia critica la reporta.
La trovadas ia es publicida en un reporta desecretida, revisante un investiga cual la governa esuan ia presenta en agosto.
Lo dise ce la comunia de securia desacorda ancora sur la orijina la plu probable de la virus. Cuatro ajenterias ia judi con "fida basa" ce lo ia orijina de un animal infetada o de un virus relatada.
Ma un ajenteria ia nota ce lo ave un "fida moderada" ce la infeta umana prima ia es, la plu probable, la resulta de un asidente de laboreria siensal, probable envolvente esperimentas a o manipulas de animales par la Instituida de Virolojia en Wuhan.
La reporta dise ance ce ofisiores xines ia es nonconsensa de la esiste de la virus ante la eruta inisial de covid en la site Wuhan en la tarda de 2019. Ma lo nota ce Xina continua impedi la investiga global e resiste comparti informas.
Respondente, la ambasada xines en Washington ia declara: "La moves par la SUA de depende de sua sistemes de informa en loca de siensistes per trasa la orijinas de covid-19 es intera un farsa political. Nos ia suporta laboras con funda siensal per trasa la orijinas, e va continua resta ativa envolveda. Pos dise esta, nos oposa firma la atentas de politici esta problem."
@T Osteraic enclui sua popla per evita un onda sinco
@L aora_oji/2021/osteraic_enclui_sua_popla_per_evita_un_onda_sinco
====== Osteraic enclui sua popla per evita un onda sinco ======
20 novembre 2021
A alga dias pos obliga persones nonvasinida a enclui se, Osteraic ia anunsia un enclui nasional completa contra covid, comensante a lundi.
La canselor Alexander Schallenberg ia dise ce esta va dura per no plu ca 20 dias, e ce on va es legal obligada a deveni vasinida de 1 febrero 2022. El ia reata a un cuantia recordo de casos a lado de un de la niveles la plu basa de vasini en Europa ueste.
Pos consenta con la governores de la nove provinses de Osteraic, Schallenberg ia dise: "Nos no desira un onda sinco." El ia ajunta ce tro multe persones ia es provocada a evita la vasin, par causa de "tro multe fortes political, oposores debil de la vasin e novas falsa".
Multe otra paises european introdui restrinjes con ce sua cuantia de casos crese.
En Nederland, un protesta en Rotterdam contra un projeta de pasaporto de covid, e contra un proibi de focos artal a la vijila de anio nova, ia dejenera a un tumulta violente en cual protestores ia lansa petras a la polisia e ia ensende autos. La site ia es poneda a state de crise e sua stasion xef de ferovia ia es cluida.
Deutxland ia esperia alga dias de infetas recordo en esta semana, e la ministro de sania ia parla sur "un crise nasional cual esije un labora nasional combinada".
Xefes deutx ia acorda ja introdui restrinjes per persones nonvasinida en rejiones con cuantia alta de ospitalis. La parlamento suporta ce persones debe mostra pasaportos de covid en buses, trenes e laborerias.
Ma aora en la stato Baiern, bordante Osteraic, la ministro presidente Markus Söder ia declara "un enclui par fato per la nonvasinidas". Bares e locas de note va clui per tre semanas e on ia cansela tota mercatos de natal.
@T Partitos israeli oposante acorda uni per governa
@L aora_oji/2021/partitos_israeli_oposante_acorda_uni_per_governa
====== Partitos israeli oposante acorda uni per governa ======
3 junio 2021
En Israel, partitos oposante ia ateni un acorda per formi un governa nova cual ta fini la periodo de 12 anios de Benjamin Netanyahu como ministro xef.
Yair Lapid, xef de la partito sentriste Yex Atid, ia anunsia ce un alia ia formi de oto partitos. Par un sistem de turnos, Naftali Bennett, xef de la partito sentriste Yamina, ta servi prima como ministro xef ante transfere la autoria a Lapid.
Un vota parlamental es ancora nesesada ante cuando la governa ta es inaugurada.
En un declara formal, Lapid ia dise ce el ia informa Presidente Reuven Rivlin sur la acorda, ajuntante: "Me promete ce esta governa va labora per servi tota sitadanes israeli, los ci ia vota per lo e los ci no. Lo va respeta sua oposores e va fa tota en sua potia per uni e lia tota partes de la sosia israeli."
Un foto ia mostra Lapid, Bennett e Mansour Abbas, xef de la partito arabi Ra'am, suscrivente la acorda, cual multe persones ia regarda como nonposible.
Esta ta es la ves prima en desenios cuando un partito representante israelis arabi partisipa en governa. Israelis arabi composa 20% de la popla. Ma otra partitos representante los ia dise ce los va oposa un governa dirijeda par Bennett, ci rejeta la conseta de un stato filastini.
En sua nota a la presidente, Lapid ia dise ce el va gida la governa a lado de Bennett, ci el va recambia como ministro xef a 27 agosto 2023.
Rivlin ia recomenda ce la parlamento consenta la plu pronto per vota. Si la alia no va es suportada par un majoria de la 120 sejas en la Knesset, on risca debe fa elejes political a la ves sinco en du anios.
La membros aliada covre la spetro intera de la politica israeli. La partitos ave poca comun estra sua desira per despone Netanyahu. Tota oto ia es nesesada per ave un majoria.
La consenta ia aveni ier en un otel prosima a Tel Aviv, do on ia discute un serie grande de temas incluinte la legali de canaba, multas contra construis nonlegal, e un sistem de turnos per postos en la Comite per Eleje Judores.
Jornales israeli sujesta ce no tota elementos ia es completida, e esta pote crea ancora dutas sur la vinse de la alia en la vota.
La partito destriste Likud de Netanyahu ia gania la plu sejas en un sonda noncluinte en marto, ma el no ia susede formi un alia governante a pos.
@T Plu ca 100 milion dosas de vasin donada en Barat
@L aora_oji/2021/plu_ca_100_milion_dosas_de_vasin_donada_en_barat
====== Plu ca 100 milion dosas de vasin donada en Barat ======
11 april 2021
Barat dise ce lo ia deveni "la pais la plu rapida en la mundo" cual dona plu ca 100 milion dosas de vasines contra covid, ma su un onda du de infetas matante.
Lo ia ateni esta punto en 85 dias. (La SUA ia usa 89 dias e Xina 102.) Ma oji la pais ia reporta un aumenta dial recordo de plu ca 150 mil casos e plu ca 800 moris nova.
En esta semana, ses statos ia reporta un manca de dosas, an cuando la governa federal insiste ce lo ave 40 milion dosas reservada e ce alegas de un manca de vasines es "completa sin funda".
La prosede de vasini vole ateni 250 milion persones ante julio, ma espertas dise ce on nesesa rapidi plu per ateni acel ojeto.
Cadun con plu ca 45 anios cuali aora per un injeta a vasinerias e ospitales. La plu dosas asta aora ia es donada a laborores major e persones con plu ca 60 anios.
La fase tre, cual ia comensa a 1 april, ia abri entre un crese notable de la cuantia de casos de covid. Barat ia reporta promedia plu ca 90 mil casos a cada dia a pos.
A 4 april, Barat ia deveni la pais du pos la SUA cual ia reporta 100 mil casos nova en un sola dia. Plu ca un dui de estas ia es confirmada en la stato Maharashtra, de cual la capital es Mumbai, la site la plu grande de la pais.
La cuantia de casos ia cade ja multe cuando Barat ia comensa vasini persones en la parte temprana de esta anio. Min ca 15 mil infetas dial ia es reportada. Ma la casos ia esperia denova un apico subita en marto, xef par causa de protocoles laxe de securia e un sistem debil per trasa persones infetada.
Espertas dise ce la onda du en Barat resulta de min cautia entre la popla e de un misca de mesajes veninte de la governa.
@T Plu ca 2000 brasileras mori de covid en un dia
@L aora_oji/2021/plu_ca_2000_brasileras_mori_de_covid_en_un_dia
====== Plu ca 2000 brasileras mori de covid en un dia ======
11 marto 2021
Brasil ia suprapasa 2000 moris relatada a covid en un dia a la ves prima, con un taso altinte de infetas.
La pais ave la cuantia de moris cuasi la plu alta de mundo, 268 370, pos sola la SUA. La soma ier ia es 2286 moris.
Espertas averti ce la proportio de transmete es malida par varias plu comunicable de la virus.
A mercurdi, Luiz Inácio Lula da Silva, presidente pasada de la pais, la critica la desides "stupida" fada par la presidente presente, Jair Bolsonaru, en la tempo de pandemica.
Bolsonaro ia es ier videda usante un masca a la ves prima en un mense. El ia atenta sempre desasentua la menasa de la virus. Plu temprana en esta semana, el ia dise an ce la popla debe "sesa cexa".
La aumenta de casos ia pone un presa enorme a la sistemes de sania en la majoria de la sites la plu grande de Brasil. Multe es aora prosima a colasa.
Par la statistica la plu resente, 0,128% de la popla brasilera ia mori de covid, la numero 11 de la proportios la plu alta de mundo. La tasos la plu alta es en Txesco (0,208%) e la Rena Unida (0,188%). La informa veni de la Universia John Hopkins en la SUA.
Oji es la aniversario de la declara de un pandemica par la Organiza Mundal de Sania. Tra la mundo intera on ia rejistra plu ca 118 milion casos de esta coronavirus, e plu ca 2,6 milion persones ia mori de lo.
@T Plu persones mori ca nase en Corea Sude
@L aora_oji/2021/plu_persones_mori_ca_nase_en_corea_sude
====== Plu persones mori ca nase en Corea Sude ======
4 janero 2021
A la ves prima de sempre, Corea Sude ia rejistra plu moris ca nases en 2020. Esta ia alarma la pais, cual ave ja la taso de nase la plu basa de mundo.
Sola 275 800 bebes ia nase en la anio pasada, un cuantia reduida par 10% pos 2019. Sirca 307 760 persones ia mori.
La statistica ia provoca la ministro de internas a recomenda "cambias fundal" a sua politicas.
Un popla diminuinte pote causa problemes enorme a un nasion. La governa debe spende plu a sistemes de sania e pensiones, ma un cuantia reduida de persones joven crea ance un manca de laborores, con efeto direta a la economia.
En la mense pasada, Presidente Moon Jae-in ia inisia alga politicas intendeda per trata la taso basa de nase. Estas inclui premios de mone per familias.
Longo la scema nova, de 2022, cada enfante parida va reseta un premio de 2 milion uones (1850 dolares esuan) per aida sasia la custas ensintial, en ajunta a un paia mensal de 300 mil uones asta la aniversario prima de la bebe.
La paia va deveni plu grande, 500 uones per mense, de 2025.
@T Pluve deluvial en Indonesia e Timor Este
@L aora_oji/2021/pluve_deluvial_en_indonesia_e_timor_este
====== Pluve deluvial en Indonesia e Timor Este ======
5 april 2021
A la min 71 persones ia mori pos inondas subita e liscateras en Indonesia e Timor Este ier.
Pluve deluvial ia destrui vasta en esta du paises en Asia sude-este cuando acua suprafluente de pos pararios ia sumerji miles de casas.
La rejion afetada estende de la isola Flores en la este de Indonesia asta Timor este.
Plu ca 40 persones manca ancora en Indonesia, e ofisiores averti ce la cuantia de mores va crese cisa plu.
Un portavose de la ajenteria indonesian per desastres ia esplica: "La fango e la clima estrema ia deveni un defia grave, e la detrito cumulante ia impedi la ecipo de xerca e salva."
La xef de la ajenteria per desastres en Flores Este ia dise: "Nos suspeta ce multe persones es su detrito, ma lo no es clar cuanto manca. La evacuadas es sperdeda. On ave sentos en cada sudistrito, ma multe otras resta a casa. Los nesesa medisin, comedas, covreletos."
En Timor Este, a la min 21 persones ia mori. Multe ia es de Dili, la capital.
Joko Widodo, presidente indonesian, ia ofre sua compatia e ia recomenda ce on segue la consela de ofisiores en tempos de clima estrema.
Liscateras e deluvias subita no es rara en la arcipelago indonesian en la saison pluvosa. En janero, 40 persones ia mori cuando la vila Sumedang sur Djava ia deveni inondada. En setembre, 11 persones ia es matada par liscateras sur Borneo, e a alga menses a ante, deses ia mori sur Sulauesi.
La ajenteria per desastres estima ce cuasi un dui de la popla de Indonesia -- sirca 125 milion persones -- abita en locas perilida par liscateras.
@T Polsces protesta temente sorti de la UE
@L aora_oji/2021/polsces_protesta_temente_sorti_de_la_ue
====== Polsces protesta temente sorti de la UE ======
11 otobre 2021
Polsces ci suporta sua membria de la Uni European ia partisipa en protestas tra la pais, temente ce lo va sorti de la alia. Organizores ia dise ce protestas ia aveni en plu ca sento vilas e sites, e ce sirca 100 mil persones ia partisipa en la capital, Warszawa.
A jovedi, la corte suprema de Polsca ia judi ce alga articles major de lege UE es "nonacordante" con la constitui. La deside ia rejeta en efeto la prinsipe sentral ce la leges de la UE es plu importante ca la leges nasional.
Mateusz Morawiecki, ministro xef de Polsca, ia defende la judi. "Nos ave la mesma diretos como otra paises," el ia scrive en Facebook pos la deside. "Nos desira ce esta diretos es respetada."
Ma el ia insiste ance ce "la loca de Polsca es e va es en la familia european de nasiones", e sua partito ia dise ce lo ave no scema per lo cual alga persones nomi "Polexit".
Politicistes, ativistes e artistes oposante ia partisipa en la protestas. A la asembla en la capital, Donald Tusk, presidente pasada de la Consilio European e aora xef de la partito oposante Platforma Obywatelska (Plataforma de Sitadan), ia urje la popla a "defende un Polsca european".
Wanda Traczyk-Stawska, un veteran de 94 anios de la Rebela de Warszawa contra la ocupa par deutxes nazi en 1944, ia parla a un protesta. "Esta es nosa Europa e nun va prende nos a via de lo," el ia dise.
Xefes tra la UE ia critica la judi par la Corte Constitual de Polsca a jovedi. La deside es la plu resente en un disputa gravinte entre Polsca e la bloco.
@T Porto Rica perde eletrica pos un focon
@L aora_oji/2021/porto_rica_perde_eletrica_pos_un_focon
====== Porto Rica perde eletrica pos un focon ======
11 junio 2021
Un focon a un compleso eletrical en Porto Rica ia lasa miles de casas sin eletrica.
Imajes en redes sosial mostra plumones de fuma levante de la flamas a un sustasion en San Juan, la capital.
La focon ia aveni corta pos ce la compania ia reporta un siberataca. On no ia lia ofisial la du cosas.
Esta isola en la Mar Caribe ia esperia turnos descomutada de cuando Siclon Maria ia destrui la plu de sua rede eletrical en 2017. Alga abitores ia es sin eletrica tra cuasi un anio pos la tempesta.
Un compania privata, Enerjia Luma, ia emprende la opera e manteni de la sistem eletrical de Porto Rica en esta mense.
La compania ia dise ier ce la focon ia ensende a la compleso de distribui Monacillo, corta pos un priva de servi, un ataca en cual sua loca web ia reseta du milion visitas per secondo.
Rompes de eletrica ia afeta ja plu ca milion casas sur la isola en esta mense.
@T Pretes deutx defia la Vatican per bondise duples ge
@L aora_oji/2021/pretes_deutx_defia_la_vatican_per_bondise_duples_ge
====== Pretes deutx defia la Vatican per bondise duples ge ======
11 maio 2021
En Deutxland, pretes en sirca sento eglesas catolica ia comensa ier ofre bondises a duples omosesal.
La promove Ama Vinse ia emerji pos cuando la Eglesa Catolica ia dise en marto ce Dio "no pote bondise peca". "Duples ci partisipa debe reseta la bondise cual Dio vole dona a los -- sin secretia," la promove ia scrive.
Pape Fransisco ia dise en la anio pasada ce el crede ce duples omosesal "ave la direto de es en un familia". An tal, el ia aproba ance la disposa de la Congrega per la Dogma de la Fida, ce la Eglesa Catolica no ave la potia de bondise unis ge.
En acel Eglesa, un bondise es donada par un prete, par autoria de la Eglesa.
La responde par la Vatican "no ia es intendeda como un forma de discrimina nonjusta, ma como un remente de la veria de la rituo liturjial", la Pape ia comenta alora.
Ama Vinse, an tal, ia descrive la deside par la Eglesa per refusa bondises a duples omosesal como "un palmi de fas per persones tra la mundo".
La promove ia produi un mapa cual mostra tota la eglesas cual va ofre bondises en la dias veninte.
Miles de pretes e empleadas de eglesa deutx ia suscrive ance un solisita a la Eglesa per estende bondises a duples ge, e alga parocias ia esibi banderas de arco de sielo estra eglesas.
La Eglesa Catolica en Deutxland es plu libraliste e rica ca en multe otra paises, e la aseta sempre plu forte de duples omosesal no va pote es fasil iniorada par la Vatican.
La sposi omosesal es legal en Deutxland de 2017, e la pais ia proibi ance la "terapia de converti ge", tal nomida, per persones con min ca 18 anios.
@T Protestas contra la rena militar continua en Sudan
@L aora_oji/2021/protestas_contra_la_rena_militar_continua_en_sudan
====== Protestas contra la rena militar continua en Sudan ======
26 otobre 2021
Protestores defiante resta sur la stradas de Sudan pos un colpa militar par la fortes armada de la pais. Scandente e brandinte banderas, los ia bloci vias en la capital Khartoum e sirca la pais pos la saisi de controla.
Ier, Jeneral Abdel Fattah al-Burhan, gidor de la colpa, ia disolve la governa sivil, ia aresta xefes political e ia declara un state de crise. Soldatos ia spara contra folas e on reporta ce los mata des persones.
La colpa ia atrae condenas global. Diplomatas ia dise ce la Consilio de Securia de la NU va consenta oji per discute la crise.
Per justi la colpa militar, Burhan ia culpa conflitas interna political.
Soldatos ia vade de casa a casa en Khartoum, arestante organizores local de la protestas. La airoporto de la site es cluida e volas internasional es suspendeda. La interede e la plu linias de telefon es ance nonfunsionante.
Lo pare ce la empleadas de la Banco Sentral greve, e tra la pais dotores refusa labora en ospitales su dirije militar, estra en casos de crise.
Gidores sivil e sua corespondentes militar es en conflita pos la suverti de Omar al-Bashir, renor de tempo longa, en 2019.
@T Protestas contra pardonas a separadistes catalan
@L aora_oji/2021/protestas_contra_pardonas_a_separadistes_catalan
====== Protestas contra pardonas a separadistes catalan ======
14 junio 2021
Deses de miles de persones ia partisipa en un protesta en Madrid, capital de Espania, contra un projeta controversa de pardona separadistes catalan prisonida.
Xefes de la partitos destriste espaniol ia junta se a esta protesta contra la pardona de 12 separadistes ci ia atenta autonomi sua rejion en 2017.
La protestores acusa la governa sosialiste de usa la projeta per forti sua suporta political. Ma la governa dise ce la pardonas va aida calmi la tensa pertinente a Catalunia.
En 2017, la atenta par la rejion, ja partal autonom, de deveni completa autonom ia lasa Espania en sua crise political la plu grande de 40 anios.
On ia judi en 2019 ce nove xefes separadiste catalan es culpable de rebela, liada a sua rol en un referendo nonlegal sur autonomia. Tre otras ia es judida como culpable de desobedi, ma los no ia vade a prison.
La protestores vide la pardonas como un menasa a la unia nasional. Multe ia brandi banderas roja e jala cuando los ia asembla en la Plaza de Colón en la sentro de Madrid.
Un protestor ia comenta: "Nos debe para esta aora, car per un pardona on debe mostra repenti, e la separadistes no va mostra acel."
Ma Pedro Sánchez, ministro xef espaniol, ia defende la projeta como un modo de reprosimi catalanes e espanioles. "La sosia espaniol debe move de un pasada mal a un futur plu bon," el ia dise, "e esta va nesesa un condui jenerosa."
Longo un sonda per un jornal major en Espania, sirca 61% de espanioles no acorda la pardonas e sola 29,5% suporta los.
En un reporta nonobligante en la mense pasada, la corte suprema de la pais ia dise ce lo oposa la posible de pardonas governal a la xefes separadiste.
@T Protestores esije la despone de Bolsonaro
@L aora_oji/2021/protestores_esije_la_despone_de_bolsonaro
====== Protestores esije la despone de Bolsonaro ======
3 otobre 2021
En Brasil, miles de persones ia vade sur la stradas per protesta contra sua presidente Jair Bolsonaro.
La protestas ia es organizada par partitos oposante e sindicatos, e ia aveni a esata un anio ante la elejes political en la pais.
Presente, Bolsonaro no vinse en sondas de opina. Multe brasileras es deludeda par la maneja de la pandemica par la presidente: plu ca 600 mil persones ia mori.
Protestas ia aveni ier en plu ca 160 vilas e sites, e la partisipores ia porta cartones esijente la despone de Bolsonaro.
On ia rejistra plu ca sento solisitas per impedica Bolsonaro a la Salon Basa de la parlamento. An tal, la xef de la Salon ia refusa responde a los. Ma la corte suprema de Brasil ia aproba resente investigas sur la presidente.
Esta protestas nova segue asemblas suportante Bolsonaro en la mense pasada, videda como atentas de mostra ce el pote ancora atrae folas grande de suportores, an pos sondas indicante ce el es min popular par nove persentos ca sua oposor sinistriste Luiz Inácio Lula da Silva.
La elejes political no va aveni asta otobre 2022, ma la aproba poplal de Bolsonaro ia diminui a un nivel recordo basa.
Un sonda par la Instituida Atlas ia sujesta ce 61% de brasileras descrive la funsiona de la governa de Bolsonaro como "mal" o "multe mal", contrastable con sola 23% cuando el ia ariva en la posto en janero 2019.
@T Protestores sudani esije un governa militar
@L aora_oji/2021/protestores_sudani_esije_un_governa_militar
====== Protestores sudani esije un governa militar ======
17 otobre 2021
Oposores de la traversa de Sudan a democratia ia vade ier sur la stradas de Khartoum per urje ce la armada prende controla de la pais.
Alga miles de protestores ia asembla estra la palasio presidental a media de un crise political profondinte. Grupos militar e sivil ia comparti la potia pos la despone de Presidente Omar al-Bashir en 2019. Ma la tensa ia crese pos setembre, cuando on ia aborta un colpa atentada de stato atribuda a seguores de al-Bashir.
A pos, xefes militar ia esije reformis a la alia Fortes de Libria e Cambia, un organiza sivil cual ia gida la protestas contra al-Bashir e ia es un parte major de la governa traversante.
Ance la fortes armada ia recomenda ce on recambia la consilio. Ma xefes sivil dise ce la esijes parteni a un saisi de potia par la militares.
A saturdi, protestores promilitar ia scande "basi la governa de famia" e ia urje Jeneral Abdel Fattah al-Burhan, xef de la fortes armada e la Consilio Autonom juntada militar-sivil de Sudan, a inisia un colpa e saisi la controla.
"Nos nesesa un governa militar," un protestor ia comenta. "La governa corente ia fali trae a nos justia e egalia."
Diferente de protestas presedente en Sudan, la protestores ia es permeteda a ateni la portones de la palasio, e poca polisiores ia es presente.
Protestores progovernal ia anunsia un asembla a jovedi en responde a los de ier.
A venerdi, Abdalla Hamdok, ministro xef sivil de Sudan, ia desveli un scema per maneja la crise political cual el la descrive como "la plu mal e la plu perilosa" en la du anios de la traversa a democratia.
El ia es induida como ministro xef en agosto 2019, pos protestas grande cual ia fa ce la militares fini la 30 anios de la rena de al-Bashir en april. Ma suporta per la governa traversante ia diminui en menses resente, car la reformis economial ia redui la suvenis per carburante e ia alti la infla finansial.
@T Puigdemont es arestada en Sardinia
@L aora_oji/2021/puigdemont_es_arestada_en_sardinia
====== Puigdemont es arestada en Sardinia ======
24 setembre 2021
Carles Puigdemont, la xef espulsada de la separadistes catalan, es detenida en Italia par un comanda espaniol de aresta.
Espania acusa el de rebela pos un referendo per autonomia en 2017 cual la cortes ia judi como nonlegal. A acel tempo, el ia es la presidente de Catalunia ma el ia fuji a Beljia pos la vota. Ala el abita e servi como un membro de la Parlamento European.
La polisia ia espeta el a la airoporto Alghero en Sardinia, e el va apare en corte en la oras veninte. Un judor en Sardinia va deside esce el debe es librida o estradida. Puigdemont ia viaja a la isola mediteranean per un festa de folclor catalan.
La referendo en 2017 ia provoca la crise political la plu profonda en Espania en desenios, cuando la parlamento rejional catalan ia declara sua autonomia ma Madrid ia pone sua governa direta a esta parte norde-este de Espania.
Pos la fuji de Puigdemont e du de sua ministros, Espania ia prisoni nove otra xefes catalan como rebelores per sua rol en la vota separadiste. Los ia es pardonada par Pedro Sánchez, ministro xef espaniol, en junio.
Madrid ia fali en sua atenta legal de estradi Puigdemont e sua du colegas, e los ia es elejeda a la Parlamento European en 2019. Como parlamentor european, Puigdemont ia ave imunia contra litiga, ma la Parlamento ia vota per desprende esta de el en marto. El ia apela, e en un judi inisial en julio, la corte jeneral de la UE ia dise ce el es a no risca direta de aresta.
La corte sarda fasa a la min du demandas: esce la solisita espaniol per estradi es valida, e esce judores italian ave la potia nesesada per un caso sur cual la corte suprema de la UE ancora no ia dona sua judi?
@T Raducanu gania la US Open sin perde un set
@L aora_oji/2021/raducanu_gania_la_us_open_sin_perde_un_set
====== Raducanu gania la US Open sin perde un set ======
12 setembre 2021
En tenis, Emma Raducanu de la Rena Unida ia vinse Leylah Fernandez de Canada per gania la torneo US Open en stilo stonante.
La fem de 18 anios ia fini sua serie de maxes susedosa en New York con un vinse en du setes 6--4 6--3 contra sua oposor de 19 anios en un final de cualia alta.
Raducanu ia lansa se a la solo en noncrede pos xuta un as per conclui sua viaja estracomun.
A du semanas pasada, el ia reserva un vola per reveni a la Rena Unida, per caso ce el no ta cuali. A des-sete dias plu tarda, el ia leva la trofeo pos perde an no un set en la torneo intera.
Raducanu ia servi per gania la max a 5--3 en la set du, ma ia talia sua gama en patini sur jeno per ateni un bal. Esta ia resulta un pausa medical en cual Fernandez, clar iritada, ia espresa sua frustra a la ofisior de la max.
Ma Raducanu ia recovre en la pausa, e pos alga plu minutos ia vinse par gania sua punto posible tre de torneo.
La du juores ia abrasa amin ante ce Raducanu ia asende la scalera a la Stadion Arthur Ashe per selebra con sua suportores.
El ia es emosiosa aclamada par Virginia Wade, la fem brites ci ia gania la plu resente un trofeo major de tenis, a Wimbledon en 1977.
@T Recomendas per un enclui nasional du en Barat
@L aora_oji/2021/recomendas_per_un_enclui_nasional_du_en_barat
====== Recomendas per un enclui nasional du en Barat ======
5 maio 2021
En Barat, la partito oposante xef ia clama per un enclui nasional completa, corta pos cuando la pais ia esede 20 milion infetas de covid. La ministro xef, Narendra Modi, resiste par causa de la efeto probable a la economia.
Barat ia ajunta plu ca 355 mil casos ier, min ca la 400 mil infetas rejistrada a 30 april. La governa ia dise ce la cuantia de casos "lenti", ma la probas fada ia redui ance, tal ce la cuantia vera de casos es cisa multe plu alta.
Recomendas per un enclui du ia veni ance de gidores comersial, espertas internasional de sania, e otra politicistes major.
Desides sur restrinjes en Barat es fada par la autoriosas de la statos individua, no par la governa sentral. Modi ia dise ce statos debe considera restrinjes sola como "la eleje final".
Ma multe statos ia introdui ja restrinjes, an tal. Bihar, en la norde, es la plu resente cual ia anunsia un state de enclui completa, e la capital Delhi e la sentro finansial Mumbai es ance su constrinjes.
Modi ia es forte criticada en la anio pasada cuando el ia pone un enclui nasional con min ca cuatro oras de avisa. Esta ia lasa deses de miles de laborores migrante sin labora e obligada a pasea tra sentos de cilometres a sua viletas.
Par causa de la enclui, la esflue economial de Barat ia descrese recordo par 24% entre april e junio 2020, comparada con la mesma periodo en la anio presedente. La governa ia dise ce un plu enclui nasional va produi segues grave per la economia.
La onda du de covid en Barat ia es nurida par regulas laxe de securia e par festas publica jigante e asemblas political. Lo ia inonda la ospitales, e retardas de proba, diagnose e trata ia crea un apico en la statistica de moris. La ospitales sufri ance un manca de letos e drogas nesesada.
La pais ia reporta plu ca 222 mil moris par la virus, ma espertas dise ce esta es multe min ca la cuantia vera. On ia esperia filos estrema longa a la senerias, piras funeral coletiva, e un manca de spasio per entera o seni la mores en la sites.
@T Recordos de caldia es rompeda en Canada
@L aora_oji/2021/recordos_de_caldia_es_rompeda_en_canada
====== Recordos de caldia es rompeda en Canada ======
30 junio 2021
En Canada, deses de persones ia mori en un caldia cual esede recordos de temperatur.
La polisia en la rejion de Vancouver ia responde a plu ca 130 moris subita de venerdi. La plu ia es vea o ia ave ja disturbas fondal de sania. La caldia ia contribui a multe de esta casos.
Ier, la pais ia rejistra sua temperatur la plu alta de istoria a la dia tre en serie: 49,5°C en Lytton en la provinse Columbia Brites. Ante esta semana, la temperatur en Canada ia suprapasa nunca 45°C.
La caldia es causada par un cupola de presa alta cual covre la norde-ueste de la SUA e Canada.
Multe casas en Columbia Brites no ave frescadores, car la temperatur es tipal multe min estrema en la menses de estate. En Vancouver, la site la plu grande de la provinse, on ia pone tempora fontes de acua e salones de fresci.
Deses de polisiores es repostida en la site, e la cuantia aumentada de telefonis urjente ia crea un cumula de labora e ia consuma multe recursos polisial.
"Nos es la pais du de la plu frias de mundo, e la plu nevosa," David Phillips ia dise, climatolojiste per la departe governal sur la ambiente. "Nos vide comun periodos fria e ventones de neva, ma nonfrecuente nos parla sur clima calda como esta. Dubai ta es min calda ca lo cual nos vide aora."
@T Retardas nova per vasini en la UE
@L aora_oji/2021/retardas_nova_per_vasini_en_la_ue
====== Retardas nova per vasini en la UE ======
23 janero 2021
Un plu fabricor de vasin de covid ia averti sur difisiles de furni a la Uni European, cresente la frustra en acel paises.
AstraZeneca ia dise ce, par causa de un problem de produi, la cuantia de dosas inisial disponable va es min ca espetada. La Comisionor de Sania de la UE ia espresa sua "nonsasia profonda" a la informa.
Esta aveni pos cuando alga nasiones ia debe ja lenti sua programes de vasini pos un redui de furnis de la vasin Pfizer-BioNTech.
Ofisiores no ia confirma publica como grande va es la nonsufisi, ma un fonte anonim ia indica ce la furnis de AstraZeneca va es reduida par 60% a 31 milion en la cuatri prima de esta anio. La compania ia intende furni sirca 80 milion dosas a la 27 paises de la UE ante marto.
La vasin de AstraZeneca, developada con la Universia de Oxford, ancora no es aprobada per usa par la regulor medical de la bloco, ma on previde ce esta va aveni a la fini de esta mense.
Ier, la declara de la compania ia culpa "produis reduida a un fabriceria en nosa cadena de furni european", e ia ajunta ce on continua aumenta la cuantia produida, an tal.
Israel, la Amirias Arabi Unida, la Rena Unida e la Statos Unida ia progresa multe ultra la Uni European en relata a la cuantia de dosas donada per person asta aora.
Vasines es sempre plu regardada par espertas como la sola modo de sorti de la crise de covid, con ce multe nasiones european batalia per maneja un surje matante de la virus en la inverno.
@T Revelas de la ricia ascondeda de persones potiosa
@L aora_oji/2021/revelas_de_la_ricia_ascondeda_de_persones_potiosa
====== Revelas de la ricia ascondeda de persones potiosa ======
4 otobre 2021
Longo un esposa enorme de documentos finansial, la Re de Urdun ia spende secreta $100 milion dolares per imobilas en la Statos Unida e la Rena Unida.
La colie de 12 milion fixes, nomida la Paperes Pandora, es la plu grande de tal esposas en la istoria.
Los indica ance ce la familia de Presidente Uhuru Kenyatta de Cenia, cual ia domina la politica de la pais pos sua autonomi en 1963, posese secreta tra desenios un rede de companias estrateritorial.
Simil, Re Abdullah 2 bin Al-Hussein de Urdun ia usa un rede de companias estrateritorial, secreta poseseda, per compra 15 casas pos veni a la posto en 1999, incluinte casas en Malibu e London.
Urdun reseta multe aida finansial internasional, e Re Abdullah es videda como un aliada moderada de la Ueste en Asia sude-ueste.
Ma el ia cumula sua imobilas stranjer entre 2003 e 2017 en cuando on ia acusa el de preside un governa autoritar en sua propre pais, do en anios resente on ia protesta contra restrinjes sever e impostas aumentada.
Sua avocatos ia dise ce el usa sua ricia personal per compra la casas, e ce on ave no parte nonconveninte en usa companias estrateritorial per fa esta.
La investis stranjer de la Kenyattas, incluinte un compania con asiones e obligas con valua de $30 milion, ia es descovreda entre sentos de miles de pajes de paperes manejal en la arcivos de 14 companias de notario e servis legal en Panama, la Isolas Virjin Brites e otra paradisos finansial.
@T Rusia cexa sur la camisas de futbalores ucrainsce
@L aora_oji/2021/rusia_cexa_sur_la_camisas_de_futbalores_ucrainsce
====== Rusia cexa sur la camisas de futbalores ucrainsce ======
9 junio 2021
La Uni de Futbal Rusce ia envia un letera a UEFA, la organiza governante de futbal european, cexante sur lo cual lo descrive como la camisas "political" de Ucraina per Euro 2020.
Lo argumenta ce esta "vade contra la prinsipes fundal" de UEFA.
La camisa ave un mapa cual mostra Crim como un parte de Ucraina. Rusia ia propri la penisola crimsce de Ucraina en 2014 e regarda lo como parteninte a sua teritorio, an si esta es internasional rejetada.
La xef de la Asosia de Futbal Ucrainsce, Andriy Pavelko, ia revela la vestes en un video a sua paje de Facebook a soldi, a poca dias ante la comensa de la Torneo European.
La fronte de la camisas jala, e de la camisas blu per maxes esterna, mostra la contorno de Ucraina como un linia blanca, incluinte Crim e la rejiones este Donetsk e Luhansk, cual es partal saisida par separadistes prorusce.
Un slogan a la dorso dise "Gloria a Ucraina!" e un otra, "Gloria a eroes!" es coseda a interna de la colar de la camisa.
La sloganes es aora usada como salutas ofisial militar en Ucraina, e ia es clamas uninte per la protestores ci ia despone Viktor Yanukovych, presidente prorusce, en 2014.
"Nos crede ce la silueta de Ucraina va dona fortia a la juores car los va batalia per tota de Ucraina," Pavelko ia comenta.
Ma un portavose per la ministro de esternas rusce ia critica la vestes, disente ce la ecipo de futbal ia "afisa la teritorio de Ucraina a la Crim de Rusia", creante un "ilude de la nonposible". El ia dise ce la slogan es nasionaliste e sona como un clama uninte nazi.
La Torneo European, posponeda par causa de covid, va aveni de 11 junio asta 11 julio en 11 sites, incluinte San Peterburg en Rusia, cual va ospita un de la cuatrifinales.
@T Rusia debe no usa un tubon como un arma, Merkel dise
@L aora_oji/2021/rusia_debe_no_usa_un_tubon_como_un_arma_merkel_dise
====== Rusia debe no usa un tubon como un arma, Merkel dise ======
24 agosto 2021
Angela Merkel, canselor deutx, ia dise ce Rusia risca es plu punida si lo usa un tubon controversa de gas contra Ucraina.
En sua visita final a Ciiv ante parti de sua posto, Merkel ia dise a la presidente ucrainsce, Volodymyr Zelensky, ce el comprende sua ansia sur la projeta Nord Stream 2.
Zelensky oposa la tubon, disente ce lo menasa la securia de sua pais. Lo va pasa su la Mar Baltica e va dupli esportas de gas rusce a Deutxland.
Ucraina teme ce esta va forti la teni par Moscva de la furni rejional de enerjia e va crese ance sua influe.
En un confere jornaliste con Merkel ier, Zelensky ia descrive la projeta como "un arma jeopolitical de la Cremlin, disente ce lo va es "perilosa per tota Europa".
Ma Merkel, ci en esta autono va sesa es la canselor deutx pos 16 anios en la posto, ia dise ce Berlin acorda con Washington ce Nord Stream 2 debe no es usada contra Ucraina. El ia ajunta ce punis economial ta pote es usada contra Moscva longo un acorda entre Deutxland e la SUA, si gas ta es "usada como un arma".
Zelensky ia dise ce el es consernada par lo cual va aveni pos tre anios cuando la contrata per furni gas rusce tra tubones ucrainsce fini. La perde de biliones de dolares de paias per traversa ta afeta grave la economia de Ucraina.
Merkel, ci ia discute con Vladimir Putin, presidente rusce, a venerdi, ia promete furni plu ca bilion dolares per aida estende la setor ucrainsce de enerjia renovable.
Rusia furni ja sirca 40% de la gas usada par la UE, pico plu ca Noria, cual no parteni a la UE ma partisipa en sua mercato comun. La tubon nova va aumenta la cuantia de gas cual pasa su la Mar Baltica asta 55 mil milion metres cubo per anio.
Merkel ia atenta convinse statos de Europa sentral e este ce la tubon no va fa ce Deutxland deveni dependente de Rusia per sua enerjia.
@T Rusia preveni cubanes de entra a la UE sur materases
@L aora_oji/2021/rusia_preveni_cubanes_de_entra_a_la_ue_sur_materases
====== Rusia preveni cubanes de entra a la UE sur materases ======
31 julio 2021
Tre cubanes ci ia atenta usa materases inflable per traversa un de la rios de frontera european la plu delicata va es aora deportada de Rusia.
Gardores rusce ia catura los cuando los ia atenta pasa a Esti e la Uni European. La cubanes ia espera viaja a Espania, do la fia de un de los abita.
Turistes de Cuba nesesa sola sua pasaportos per visita Rusia, ma los no pote entra legal a la UE sin visa.
En la 60 anios pasada, deses de miles de persones ia atenta fuji de Cuba en la Caribe, ma plu usual los dirije se a la SUA, viajante par barco o barcon, tipal su risca personal grande.
La tre persones caturada sur la rio Narva en Rusia ia es detenida en un sentro per migrores prosima a San Peterburg. On ia multa los e ia comanda sua deporta.
La gardores de frontera ia dona poca detalias de la tre, disente sola ce los es sitadanes de Cuba, naseda en 1968, 1970 e 1992. Los ia projeta sua traversa pos studia atendosa la tereno local e oteni la materases. On ia trova sacos de posesedas e paperes de identia con los.
Cuba ia es un colonia espaniol asta 1898, e Espania ave ja longa un comunia cuban.
De ves a ves pasada, migrores ia proba traversa la Narva de Rusia. En 2018, un om ci ia declara se como misri ia es salvada de afoca par gardores esti cuando el ia atenta nada tra la rio.
La relatas de Rusia con Esti, cual ia parteni a la URSS asta 1991, es tensada tra tempo longa. Esti es un membro de OTAN, cual manteni ala soldatos per preveni atas militar par Rusia.
@T Saisis de xicas de scolas nijerian continua
@L aora_oji/2021/saisis_de_xicas_de_scolas_nijerian_continua
====== Saisis de xicas de scolas nijerian continua ======
28 febrero 2021
En Nijeria, la polisia ia inisia un opera de xerca e salva per 317 xicas saisida de un scola en la stato Zamfara.
Esta aveni pos la libri de 42 persones saisida de un scola abitada en un aveni simil en la stato Niger en la semana pasada. Tal saisis de persones es fada per rescata e es comun en la norde.
Presidente Muhammadu Buhari ia condena la aveni la plu resente como "cruel e intera nonasetable".
La saisi de 276 xicas en Chibok, un vila norde-este, par la organiza militariste Boko Haram en 2014 ia atrae la atende global a la problem de tal invades a scolas en Nijeria, ma on suspeta ce la atacas la plu nova es fada par ganges criminal.
La saisi a venerdi ia aveni a 01:00 de ora local, cuando un grupo de fusilores ia ariva a la Liseo Governal de Xicas en la vila Jangebe. La polisia nijerian ia envia aora du elicotores a la taxe de xerca, e ia apela per calmia.
Abitores de la vila ia reata coler, manadin atacante veculos cual ia entra, incluinte un convoia de jornalistes.
Longo alga reportas, la xicas, con entre 12 e 16 anios, ia es prendeda a la foresta Dangulbi. La stato Zamfara ia clui tota sua scolas abitada en responde.
Asta aora, no organiza ia declara ce lo ia reali la ataca.
@T Salvador permete la reeleje de presidentes
@L aora_oji/2021/salvador_permete_la_reeleje_de_presidentes
====== Salvador permete la reeleje de presidentes ======
5 setembre 2021
La corte suprema de Salvador ia deside ce presidentes pote servi en du periodos serial. Esta abri la via afin Nayib Bukele ta aspira un reeleje en 2024.
La judores desidente ia es asiniada en maio pos cuando la Asembla Nasional, dominada par la partito de la presidente, ia desemplea la judores presedente.
La corte elejal ia dise ce lo va segue la comanda par la Corte Suprema, ma la deside es criticada par oposores e ativistes ci acusa Bukele de tendes autoritar.
La presidente, ci ave 40 anios, ia es elejeda en febrero 2019, prometente fronti la viole nonfrenida par ganges e la sobornosia political. El es ancora multe popular en esta nasion povre de America Sentral.
La deside, anunsiada en la tarda de venerdi, ia comanda la autoriosa elejal de la pais a permete ce un presidente ci no ia ocupa la posto "en la periodo direta presedente ta partisipa en la concurso elejal a un ves du".
Anabel Beloso, un membro de la Asembla Nasional per la Fronte Farabundo Martí de Libri Nasional, ia dise: "La stato ia sesa servi la popla e ia pasa a servi un person."
José Miguel Vivanco, dirijor de la divide de Human Rights Watch per la Americas, ia condena la deside, disente ce Salvador comensa longo un via ja segueda par Nicaragua e Onduras en permete la reeleje de presidentes. "Democratia en Salvador es a la borda de la abiso," el ia comenta.
La presidente ia atrae reproxas de la SUA par sua cambias constitual e sua restrinjes contra criticas jornaliste. Sua oposores acusa el de rompe la separa de potia en Salvador e la sistem ecuilibrante.
Sua partito Ideas Nova ia gania un majoria congresal en febrero e, pos alga menses, ia recambia sinco judores de la Corte Suprema e la avocato jeneral nondependente.
En la anio pasada, Bukele ia envia militares a la parlamento en un vota sur la bujeta de securia. Sua oposores ia descrive esta como un atenta voleda a menasa.
@T Salvores trova un corpo pos un liscatera en Noria
@L aora_oji/2021/salvores_trova_un_corpo_pos_un_liscatera_en_noria
====== Salvores trova un corpo pos un liscatera en Noria ======
2 janero 2021
Un corpo ia es trovada, no longa pos la comensa de un xerca perilosa per des persones mancante pos la colasa de un colina en Noria.
Fango fluente ia puxa casas a en un fende grande en la vileta Ask, a 25 cilometres a norde-este de la capital Oslo. On ia pensa inisial ce la loca es tro perilosa per la laborores salvante.
Elicotores e avionetas ia esplora la loca tra du dias, ma ier la comandor de polisia ia dise ce un o du casas pare secur per entra.
Salvores, incluinte un ecipo svensce spesialiste, ia comensa move a en la zona perilosa sur plances de polistiren orania, poneda sur la fango per atenta ateni un de la casas ruinada.
Un can dalmasian ia es salvada a jovedi, e la polisia crede ce lo es ancora posible ce on va trova survivores. An tal, en la posmedia de ier, un elicotor-ambulansia ia atera prosima a la loca. Sin dona plu detalias, la polisia ia anunsia la trova de un corpo.
La salvores ia prepara ance un veculo militar cual porta un ponte jigante de aser sur cual persones pote sta e move. Ma la situa ia es ancora no sufisinte bon per pote usa esta macina enorme de 50 tones.
La xerca ier ia es un corsa contra la orolojo, car on ave sola poca oras de lus en la inverno norsce. La ecipo ia inclui medicistes e jeolojistes.
Sirca mil persones es evacuada de la munisipa Gjerdrum, cual conteni la vileta. Deses de plu ia es moveda de sua casas en la vijila de anio nova.
A la min 30 casas es destruida, ma ofisiores averti ce cisa plu va es perdeda, car la bordas de la crater lasada par la liscatera es ancora desintegrante.
@T Sarkozy condenada a prison per froda
@L aora_oji/2021/sarkozy_condenada_a_prison_per_froda
====== Sarkozy condenada a prison per froda ======
2 marto 2021
Nicolas Sarkozy, presidente pasada de Frans, ia es condenada per froda a tre anios en prison, de cual du ia es suspendeda.
On ia condena el de atenta soborna un judor en 2014, pos sua parti de la presidentia, par sujesta ce el pote oteni un posto prestijiosa per la judor si el ta dona informa sur un caso separada.
Sarkozy, ci ave 66 anios, es la presidente pasada franses prima ci reseta un condena a prison. Sua avocato dise ce el va apela. Sarkozy va resta libre en acel prosede, cual va dura cisa tra alga anios.
En sua deside, judor Christine Mée ia dise ce la politiciste conservaliste "ia sabe ce lo cual el fa es erante". El ia ajunta ce la atas de Sarkozy e sua avocato ia dona a la popla "un imaje multe mal de justia".
Sua crimines ia es spesifada como vende de influe e viole de secretia profesal.
Esta es un paso monumentin per la lege en Frans moderna. La sola presedente ia es la litiga de Jacques Chirac, presidente ante Sarkozy, ci en 2011 on ia condena a du anios suspendeda car el ia dona a sua aliadas postos nonesistente en la Ofisia de Site en Paris cuando el ia es la maior. Chirac ia mori en 2019.
Si la apela par Sarkozy no susede, el va spende cisa un anio en casa con un radioeticeta, en loca de vade a prison.
Sua sposa, la supramodel e cantor Carla Bruni, ia descrive la caso como un "persegue sin sinifia", ajuntante ce "la batalia continua e la vera va emerji".
@T Secia en California revela un avion en un lago
@L aora_oji/2021/secia_en_california_revela_un_avion_en_un_lago
====== Secia en California revela un avion en un lago ======
16 junio 2021
En la SUA, do un manca grande de pluve ia seci lagos tra la stato California, ofisiores ia trova la restantes de lo cual pare es un avion cual ia cade a tera en la desenio de 1960.
La descovre en la semana pasada ia aida cisa solve un misterio longa durante. La avion coresponde a la descrive de un Piper Comanche 250 cual ia desapare en 1965, a la prima de janero.
Un compania de jeometre suacuan, probante sua aparatos en Lago Folsom prosima a Sacramento, ia trova la avion completa intata a un de la puntos la plu profonda de la lago.
La cade en 1965 ia mata tota cuatro persones en la veculo, incluinte la pilote. On ia retrae la corpo de la pilote, ma nunca los de la pasajores, an con laboras de xerca cual ia continua asta 2014.
Inisial, la compania ia deteta un ojeto misteriosa par un aparato de sonar. Un esamina de plu prosima ia revela ce esta es un avion. La nivel multe basa de acua en la lago ia permete fa fotos clar de sua coda e elica.
La ofisia de la xerif local va debe aora deside esce on pote estrae la avion. On reporta ce no investiga aveni.
A presente, Lago Folsom conteni sola 38% de sua cuantia normal de acua, pos un periodo sever seca en California. En la semana pasada, la governor de la stato ia declara un crise de secia en 41 de la 58 contias, incluinte la tre cual ensirca la lago.
@T Secuoias californian es protejeda contra focones
@L aora_oji/2021/secuoias_californian_es_protejeda_contra_focones
====== Secuoias californian es protejeda contra focones ======
17 setembre 2021
En la stato California de la SUA, pompores pone covrentes resistente a foco sirca arbores antica, car la Parce Nasional de Secuoias arde.
Ofisiores teme ce, pos poca oras, la flamas va ateni la Foresta Jigante, un bosce de alga de la arbores la plu grande de mundo.
La foresta conteni sirca 2000 secuoias, incluinte la Jeneral Sherman, cual, con sua altia de 83 metres, diametre de 7,7 metres e eda de sirca 2500 anios, es la arbor la plu grande par volum.
Ensendeda par lampo, esta focon crese tra un semana ja. Plu ca 350 pompores, como ance elicotores e aviones cadente acua, ia es enviada par batalia lo. Los ia envolve alga arbores, incluinte la Jeneral Sherman, en paper de aluminio per proteje los.
Espertas dise ce secuoias es multe capas de resiste foco e ia evolui per survive flamas.
Plu ca 7400 focones forestal ia arde en California en esta anio, ardente cuasi milion ectares.
@T Senatores brasilera recomenda acusa Bolsonaro
@L aora_oji/2021/senatores_brasilera_recomenda_acusa_bolsonaro
====== Senatores brasilera recomenda acusa Bolsonaro ======
27 otobre 2021
Senatores brasilera ia vota per recomenda acusa criminal Presidente Jair Bolsonaro sur sua maneja de la pandemica de covid.
Un panel de la Salon Alta ia suporta un reporta recomendante acusas plural, incluinte crimines contra umania, pos 600 mil moris par coronavirus. La trovas va es enviada a la avocato jeneral, ci ia es asiniada par Bolsonaro.
La presidente dise ce el es "culpable de asoluta no cosa", ma la crise ia dana sua popularia. La cuantia de moris par covid en Brasil es esededa sola par lo de la Statos Unida.
On ave no sertia ce la vota va gida vera a acusas criminal, car la reporta debe es aora evaluada par la avocato jeneral Augusto Aras, sur ci on espeta ce el va proteje la presidente.
La reporta alega ce la governa de Bolsonaro ia segue un politica de permete ce coronavirus traversa la pais con espera de ateni imunia de comunia. Lo descrive la presidente como "la person xef culpable per la eras realida par la governa federal en la pandemica".
En ajunta a crimines contra umania, la comite de la Senato ia recomenda oto plu acusas, incluinte provoca a crimin, falsi de documentos e viole de diretos sosial. Bolsonaro es acusada de malusa la finansia publica e de sperde informa falsa sur la pandemica.
La reporta de 1300 pajes recomenda acusa ance du corporas e 77 otra persones, incluinte tre de la fios adulte de la presidente.
Pos la anunsia, Senator Renan Calheiros, la politiciste sentriste ci es la autor xef de la reporta, ia dise ce "la caos de la governa de Jair Bolsonaro va entra a istoria como la nivel la plu basa de manca". La vota conclui un investiga de ses menses cual ia indica scandales e froda en la governa.
Tra tota la prosede, Bolsonaro ia insiste ce sua governa "ia fa la cosa coreta de pos la momento prima" de la pandemica, e sua aliadas ia ata rapida per rejeta la recomendas de ier como intera "political e elejal" motivada.
En marto, Bolsonaro ia provoca coleria cuando el ia dise ce brasileras debe "sesa cexa" sur covid, a la dia pos cuando la pais ia vide un crese recordo en sua cuantia de moris en un periodo de 24 oras.
El ia continua sperde malinforma en redes sosial e, a lundi, Facebook ia sutrae un video en cual la presidente ia alega falsa un lia entre sido e vasines de covid. YouTube ia bloci la video e ia suspende la canal de Bolsonaro per un semana.
@T Sentos de arestadas par un ap secreta de polisia
@L aora_oji/2021/sentos_de_arestadas_par_un_ap_secreta_de_polisia
====== Sentos de arestadas par un ap secreta de polisia ======
8 junio 2021
Departes polisial dise ce los ia aresta sentos de criminores tra la mundo en un opera de tre anios, usante un ap de mesaji secur cual la FBI ia crea en la SUA.
Esta opera, inisiada en junta par Australia e la FBI, ia distribui secreta la ap ANOM entre criminores, permetente ce la polisia monitori sua conversas sin ce los sabe lo.
On ia fa arestas en 18 paises, incluinte suspetadas liada a la mafia e a organizas criminal. On ia saisi ance drogas, armas e mone fisical.
Australia ia dise ce lo ia aresta 224 persones par resulta de la opera e ia ata contra 20 menasas de mata, cisa salvante la vives de "un cuantia notable de pasores inosente".
Zeland Nova, cual ia deteni 35 persones, ia descrive la opera como "la ata la plu sofisticada en la mundo de enforsa legal contra crimin organizada asta aora".
La FBI e Europol va presenta plu detalias oji.
@T Sentos de prisonidas evade un prison aitian
@L aora_oji/2021/sentos_de_prisonidas_evade_un_prison_aitian
====== Sentos de prisonidas evade un prison aitian ======
27 febrero 2021
Plu ca 400 prisonidas en Aiti ia fuji pos evade un prison prosima a la capital, Port-au-Prince.
Autoriosas dise ce 25 persones ia mori par causa de esta evade coletiva de la prison Croix-des-Bouquets a jovedi. La vitimes inclui pasores ci ia deveni ensircada par la violentia, e ance la dirijor de la prison.
Un de la fujores, Arnel Joseph, xef de gang potiosa, ia es matada a alga oras pos la evade. Ancora portante securitalos, el ia es un pasajor sur un motosicle cual la polisia ia para a un punto de controla.
La motosicle ia refusa para. Joseph ia punta un pistol a polisiores, ci ia fusili el, tan ferinte el ce el ia mori. Joseph ia es la xef de gang la plu xercada en Aiti ante sua aresta en 2019.
Detalias de la evade no es clar. Atestores reporta oia sparas sirca mediadia a jovedi, e vide prisonidas corente de la prison a pos. Empleadas de un boteca de vestes prosima ia dise ce la prisonidas ia forsa los a dona benes.
La prison Croix-des-Bouquets ia es inaugurada en 2012, desiniada per teni masima 872 persones. La secretor de comunica de Aiti, Frantz Exantus, ia informa jornalistes ier ce lo ia conteni plu ca 1500 prisonidas ante la evade.
Aiti, la pais la plu povre en la Caribe, ia esperia evades coletiva a ante. En 2019, tota 78 prisonidas en Aquin en la sude de la pais ia evade cuando la polisia ia es distraeda par protestas antigovernal prosima.
A du anios plu temprana, plu ca 170 persones ia evade un prison en Arcahaie, a norde de Port-au-Prince.
@T Sentos de tortugas mor es trovada en Mexico
@L aora_oji/2021/sentos_de_tortugas_mor_es_trovada_en_mexico
====== Sentos de tortugas mor es trovada en Mexico ======
29 otobre 2021
A la min 300 tortugas de mar ia encalia mor sur la costa pasifica de Mexico.
Un ofisior en la ministreria mexican per la ambiente ia dise ce la investigas inisial sujesta ce la tortugas ia afoca. El ia ajunta ce los ia deveni probable maraniada en redes nonlegal de pexa a la mar alta, o en redes "fantasmin" abandonada.
La Uni Internasional per la Conserva de Natur lista la spesie Lepidochelys olivacea como riscada. La organiza dise ce la popla de esta tortugas diminui e ce los es riscada car los nidi en sola poca locas.
On ia trova la tortugas encaliada sur la plaia Morro Ayuta en Oaxaca, a la costa ueste de Mexico. Esta plaia es un de la locas do tal tortugas veni per pone sua ovos. Tota la animales mor ia es fema.
Esta no es la ves prima cuando on ia trova multe tortugas mor de esta spesie en Oaxaca. A tre anios ante aora, pexores ia trova 300, maraniada en redes de pexa. Mexico ia proibi la catura de tortugas de mar en 1990, e on ave punis sever per cualcun ci mata los.
Ofisiores ia dise ce la marina mexican va junta se con autoriosas sur la ambiente per investiga la moris.
@T Servis de Facebook es rompeda tra ses oras
@L aora_oji/2021/servis_de_facebook_es_rompeda_tra_ses_oras
====== Servis de Facebook es rompeda tra ses oras ======
5 otobre 2021
La redes sosial Facebook, WhatsApp e Instagram ia reveni pos un fali cual ia dura tra cuasi ses oras.
Facebook, cual posese tota tre, ia culpa un problem tecnical cual ia afeta ance la utiles e sistemes interna de la compania.
La servis ia es rompeda ier de sirca 16:00 asta 22:00 (de ora global). La compania ia dise ce on ave "no indica ce datos de usores ia es esposada".
Un reportor ia esplica ce la problem ia dura tan longa car "la persones ci ia atenta descovre la natur de la problem no ia pote an entra fisical a la construida". Sua cartas de empleada ia sesa funsiona.
La plataforma Downdetector, cual monitori tal falis, ia dise ce lo ia vide plu ca 10 milion reportas de la problem tra la mundo.
Alga persones ia encontra problemes ance en usa Oculus, un sistem de elmos de realia virtual, e apes cual nesesa autenticis de Facebook, incluinte Pokémon Go. Mark Zuckerberg, fundor de Facebook, ia espresa sua regrete.
Un fali tan major e tan longa es rara, ma un problem en 2019 ia fa ce Facebook e sua otra apes deveni jeneral nonasedable en la mundo tra plu ca 14 oras.
@T Ses inuites gronlandes xerca compensa de Danmarc
@L aora_oji/2021/ses_inuites_gronlandes_xerca_compensa_de_danmarc
====== Ses inuites gronlandes xerca compensa de Danmarc ======
23 novembre 2021
Ses persones nativa gronlandes esije compensa de Danmarc pos es moveda a acel pais en un esperimenta sosial nonsusedosa en 1951.
La inuites, aora en sua desenios oto, es la membros survivente de un grupo de 22 enfantes ci ia es prendeda de sua casa per es educada como "dansces peti". Cuando los ia reveni plu tarda a Gronland, los ia es poneda en un orfaneria e multe no ia revide sua familias.
Sua avocato dise ce cada de la ses survivores solisita 37 800. La autoriosas dansce ancora no ia comenta publica.
Ma en la anio pasada, la ministro xef Mette Frederiksen ia espresa formal la regrete de sua pais. "Nos no pote cambia lo cual ia aveni," el ia dise. "Ma nos pote aseta la respondosia e demanda per un pardona par los ci nos ia debe cura ma a ci nos ia fali ata tal."
Gronland es un teritorio autonom en la rena de Danmarc e depende de Kobenhavn per la maneja de sua mone, relatas esterna e defende, como ance la furni de la suveni anial grande.
En 1951, la autoriosas dansce ia deside ce un modo posible de moderni Gronland es par crea un tipo nova de person gronlandes.
Enseniores e pretes ia es solisitada a identifia enfantes a ci on va pote dona un reeduca e "un vive plu bon" sur la tera xef de Danmarc, e ci va revade a pos per deveni esemplores per relatas entre Danmarc e Gronland.
Multe familias ia esita ma alga ia acorda, e en maio 1951, la barcon Disko ia parti de la capital Nuuk, portante 22 enfantes.
Pos ariva, la enfantes ia es privada de contata con relatadas, ia ave problemes de lingua e ia es poneda en casas tempora adotante.
@T Sindicatos de cultivores barati condena violentia
@L aora_oji/2021/sindicatos_de_cultivores_barati_condena_violentia
====== Sindicatos de cultivores barati condena violentia ======
27 janero 2021
Organizas de cultivores en Barat ia desaproba la violentia matante en un protesta enorme contra reformis cultival en Delhi ier.
Culpante renegadas per la caos en un prosegue cual ia es jeneral pasosa, los ia ajunta ce los no va abandona sua protestas.
Miles de cultivores ia scaramuxa con la polisia cuando protestores ia entra tra la anteurbes par forsa. Un protestor ia mori e plu ca 80 polisiores ia es ferida.
La governa ia posti refortintes paramilitar pos la protestas, en cual alga cultivores ia ataca ance la Fortres Roja istorial e ia ocupa la murones asta cuando la polisia ia forsa los a via.
La violentia ia manxa la selebras de la Dia de Republica, un festa nasional a la aniversario de la adota ofisial de la constitui barati a 26 janero 1950.
Samyukta Kisan Morcha, un supragrupo de cultivores protestante, ia declara ce los "condena e regrete la avenis nondesirable e nonasetable, e desasosia nos de los ci favore tal atas".
La governa dise ce la reformis va libri la setor cultival, ma cultivores dise ce los va es plu povre en resulta.
Deses de miles de cultivores greve en la anteurbes de Delhi, la capital, ja de novembre, esijente ce on revoca la leges. En la semana pasada, los ia rejeta un ofre governal de pausa la leges.
@T Soldatos atenta saisi la potia en Gine
@L aora_oji/2021/soldatos_atenta_saisi_la_potia_en_gine
====== Soldatos atenta saisi la potia en Gine ======
6 setembre 2021
La destina de Alpha Condé, presidente de Gine, es nonclar pos un video nonsertida cual mostra el ensircada par soldatos ci dise ce los ia saisi controla. Los ia apare en televisa nasional, declarante ce los ia disolve la governa.
An tal, la ministreria de defende ia dise ce la colpa-de-stato atentada ia es prevenida par la garda presidental. Esta segue oras de sparas intensa, prosima a la palasio de la presidente en la capital, Conakry.
La secretor jeneral de la NU, Antonio Guterres, e la Uni African ia condena la colpa e ia esije la libri instante de Condé.
Gine, en Africa ueste, es rica con recursos natural, ma pos anios de disturba e malmaneja, lo es un de la paises la plu povre de mundo.
La televisada ia presenta nove soldatos anonim, de ci alga ia porta la bandera nasional de roja, oro e verde, ci ia dise ce los ia prende controla par causa de la sobornosia estrema, la malmaneja e la povria. Nominte se la Comite Nasional per Reconsilia e Developa, los ia dise ce la constitui ia es disolveda e ce on va consulta per crea un nova, plu incluinte.
Multe reportas dise ce la colpa ia es gidada par un unia elite, dirijeda par un lejionor franses pasada, Mamady Doumbouya.
En un video, soldatos demanda ce Presidente Condé, ci ave 83 anios, ta confirma ce el es nonferida, ma el refusa responde. Sentante con pedes nu sur un sofa, vestida en jina e camisa primida, el ave no feris vidable. On no sabe do el es.
La persones ci ia reali la colpa ia dise ce tota fronteras de tera e aira es cluida per un semana.
Ma longo la ministreria de defende, soldatos fidosa a la presidente ia "conteni la menasa e ia repulsa la grupo de atacores".
Plu temprana, on ia clui la sola ponte liante la tera xef a la penisola Kaloum, do on trova la plu de la ministrerias e la palasio presidental, en ce multe soldatos, de ci alga ia es forte armada, ia es postida sirca la palasio.
@T Soldatos barati e xines es retirada de Lago Pangong
@L aora_oji/2021/soldatos_barati_e_xines_es_retirada_de_lago_pangong
====== Soldatos barati e xines es retirada de Lago Pangong ======
22 febrero 2021
Barat e Xina ia fini retira soldatos de un parte de sua frontera himalaian disputada, sirca Lago Pangong.
Combate a esta borda nonclar marcada ia mata 24 soldatos en junio pasada. Ambos lados dise ce los va labora per redui tensa a otra partes de la linia.
A 11 febrero, ambos paises ia anunsia sua intende de retira de la rejion de la lago, e comandores ia consenta en saturdi per evalua la progresa de la opera. Los ia fa ja nove rondas de discutes per ateni acel paso.
Ante la retira, soldatos de cada lado ia es postida a la rivas norde e sude de la lago, en teritorio reclamada par ambos.
Menses de tensa ia aumenta temes ce la presentia continuante de miles de soldatos en la rejiones Ladakh e Aksai Chin va intensi cisa la situa.
Barat e Xina disputa ja la frontera tra desenios e ia gera en 1962. La borda ave 3440 cilometres de longia e no es clar definida.
La rios, lagos e linias de neva a longo pote move, tal ce soldatos fronti comun lunlotra. An tal, la du paises ave un acorda longa contra la usa de fusiles o esplodentes a la frontera.
@T Soldatos fema ucrainsce marxa en talones alta
@L aora_oji/2021/soldatos_fema_ucrainsce_marxa_en_talones_alta
====== Soldatos fema ucrainsce marxa en talones alta ======
4 julio 2021
En Ucraina, on ia reata coler contra un projeta par la ministreria de defende ce soldatos fema ta marxa en talones alta en loca de botas militar en un parade en la mense veninte.
Iryna Gerashchenko, un parlamentor de la partito oposante, ia descrive esta como sesisme, no egalia. La ministreria de defende dise ce la sapatos parteni a la uniforma formal.
Ucraina prepara un parade militar a 24 agosto per onora 30 anios de autonomia pos la colasa de la Uni Soviet.
Multe persones en Ucraina ia espresa sua xoca a la projeta, e un grupo de legores ia urje Andriy Taran, ministro de defende, a espresa vergonia.
"La idea de un parade en talones es un desonora vera," la jornaliste Vitaly Portnikov ia dise en Facebook, argumentante ce alga ofisiores ave un disposa "medieval".
Gerashchenko ia dise ce el ia pensa prima ce la imajes de soldatos fema ci marxa en pantalones de combate e sapatos negra escotada con talones blocin es un broma. El ia demanda perce la ministreria opina ce talones alta importa plu ca crea armur desiniada per femes.
Maria Berlinska, un soldato veteran, ia dise ce un parade debe mostra capasia militar, ma esta ia vole titila ofisiores major regardante.
Olena Kondratyuk, la vispresidente de parlamento, ia asentua ce plu ca 13 500 femes ia combate en la conflita de Ucraina contra separadistes rusce suportada en la este.
Plu ca 31 mil femes servi aora en la fortes militar de la pais, incluinte plu ca 4000 ofisiores.
@T Somalia mostra filmas a la ves prima en 30 anios
@L aora_oji/2021/somalia_mostra_filmas_a_la_ves_prima_en_30_anios
====== Somalia mostra filmas a la ves prima en 30 anios ======
23 setembre 2021
Somalia ia fa sua presenta publica prima de sinematografia en 30 anios, su securia forte, ma creante esperas de un revive cultural en esta pais turbada.
La presenta ia aveni ier en la capital Mogadishu, en la Teatro Nasional de Somalia, usada como un base militar en la gera interna, cuando la usa de sinemas ia sesa completa.
Sinemafilicas ia regarda du filmas corta par Ibrahim CM, dirijor somali. Un bileta ia custa des dolares.
Construida en 1967, la teatro ia es videda como un propulsante major per la developa cultural de Somalia en la desenios de 1970 e 1980.
Lo ia es cluida en 1991, a la comensa de la gera interna, e ia deveni usada como un base per comandores militar ci ia batalia per controla la site. Per resulta, lo ia cade a un malstate gastada.
Plu tarda, la teatro ia reabri en 2012 pos reparas par la Mision de la Uni African en Somalia (AMISOM), ma ia es rapida esplodeda par militaristes de al-Shabaab, grupo islamiste, ci ia opina ce filmas e divertis direta presentada es moral dejenerada.
@T Sondas de la AAU e Xina ariva a Marte
@L aora_oji/2021/sondas_de_la_aau_e_xina_ariva_a_marte
====== Sondas de la AAU e Xina ariva a Marte ======
10 febrero 2021
La Amirias Arabi Unida ia pone un sonda spasial en orbita sirca Marte, deveninte sola la organiza sinco cual ia fa tal, pos la SUA, la Uni Soviet, Europa e Barat.
Acel ia aveni ier, e oji Xina ia deveni la numero ses de reali la mesma ateni.
La sonda xines, Tianwen-1 ("Demandas a la Sielo 1"), conteni un orbitador e un vagador. Injeniores va pausa ante envia la robot rolante a la surfas de la planeta roja, ma on previde ce esta va aveni en maio.
En desembre, Xina ia susede retrae samples de roca e solo de nosa Luna.
La satelite de la AAU porta tre strumentos cual va oserva, entre otra cosas, la gotea a spasio de atomes neutra de idrojen e osijen restante de la acua pasada abundante de Marte.
En la prosede, Espera va dona imajes de la planeta con densia multe alta.
La vagador xines ave cameras per fa fotos e per aida naviga. Sinco otra strumentos va evalua la mineralojia de rocas local e va xerca per acua jelada.
Un esperimenta major va esplora su la surfas par radar. On espeta ce lo va sensa stratos jeolojial a profondia de des metres.
@T Suiz abandona anios de negosia sur un trata jeneral
@L aora_oji/2021/suiz_abandona_anios_de_negosia_sur_un_trata_jeneral
====== Suiz abandona anios de negosia sur un trata jeneral ======
27 maio 2021
Pos anios de negosia, Suiz ia abandona un atenta de acorda un trata jeneral con la Uni European.
Suiz no es un membro de la UE, ma lo ia aseta multe de sua politicas, per esemplo la libria de move.
La relata es presente governada par plu ca 120 acordas biladal, e risca deveni danada par esta fali de recambia los par un trata jeneral.
"Nos regrete esta deside, pos la progresa cual on ia fa tra la anios pasada," la Comision de la UE ia dise.
La acorda de comersia libre entre la UE e Suiz ia orijina en 1972. La Comision -- la organiza dirijente per la 27 statos-membros de la Uni -- ia dise ce, sin un trata jeneral, on no va pote moderni la relata.
La governa suiz ia indica tre problemes xef: proteje de salarios, regulas sur aida par la governa, e la direto de sitadanes UE ci labora en Suiz per reclama aida sosial suiz como un parte de la libria de move.
Ignazio Cassis, ministro de esternas, ia dise ce Suiz no ia pote aseta esijes par la Uni a tema de diretos egal per laborores de la UE, car esta ta crea un cambion nondesirada en la politica suiz de migra e un custa plu alta en pertine a la aida finansial sosial.
La du lados pote ancora depende de sua misca texeda de acordas biladal, ma ultima estas va desvalidi. Alora Suiz no va dispone la uni projetada per enerjia o otra partes de la mercato comun cual va cambia.
An en esta semana, un acorda biladal ia desvalidi sur produidas de tecnolojia medical.
@T Super Nintendo World abri en Osaka
@L aora_oji/2021/super_nintendo_world_abri_en_osaka
====== Super Nintendo World abri en Osaka ======
19 marto 2021
Un parce de divertis dedicada a la francisia Super Mario World de la compania Nintendo ia abri en Japan, a cuasi un anio pos cuando on ia intende orijinal ce lo va bonveni sua visitores prima.
Super Nintendo World, de cual sua construi ia custa sirca 40 mil milion enes (350 milion dolares esuan), ia es projetada per abri en la estate pasada, ma ia es retardada par la pandemica.
A presente, entre proibis de viaja internasional, sola persones japanes pote visita. La parce nova es situada en Universal Studios en Osaka, e lo representa un parte de la cambia de Nintendo de un produor de juas a un compania de divertis.
La parce va aseta inisial sola un dui de sua capasia masima de visitores, per obedi regulas de distanti sosial. Visitores va debe covre sua fas en la plu de zonas.
On ia fundi la parce sur niveles en la serie Mario de juas video, de cual la prima ia es publicida en 1985. La serie segue la aventuras de un plomor e sua frate. La francisia ia vende plu ca 370 milion juas tra la mundo.
Probable un de la atraes la plu popular va es un corsa de cartes de Mario, cual visitores va monta portante un aparato de realia aumentada liada a un xapeta roja.
La parce mesma es un esperia de jua. On promove ce visitores va compra brasaletas per colie claves, converti monetas, fa juas peti tra la zonas, e an colabora con otra visitores par un ap de telefoneta.
On construi tre plu parces Super Nintendo World a Universal Studios en Los Angeles e Orlando en la SUA e en Singapor.
@T Tanzania no intende vasini sua popla
@L aora_oji/2021/tanzania_no_intende_vasini_sua_popla
====== Tanzania no intende vasini sua popla ======
3 febrero 2021
La governa de Tanzania, ja criticada per sua maneja de la pandemica, no intende distribui vasines de covid, longo sua ministro de sania.
Esta comenta veni a alga dias pos cuando Presidente John Magufuli ia averti ofisiores contra oteni vasines, disente ce los pote dana persones -- ma donante no fatos suportante. Sua oposores ia acusa el de desesajera la menasa de la virus.
Miliones de persones es ja vasinida en multe paises pos la aproba urjente de vasines. Estas es rigorosa probada en esperimentas cual envolve miles de persones ante es evaluada par regulores medical. Los regarda tota la datos sur la securia e eficasia de la vasines ante pote aproba los per usa a la popla jeneral.
En la mense pasada, la Organiza Mundal de Sania ia consela forte Tanzania a considera vasini sua popla.
Tanzania es un de la poca paises de mundo cual no publici informas sur sua casos de covid. La plu resente, lo ia fa esta en maio, cuando lo ia rejistra sirca 500 casos e 20 moris. En la mense seguente, Magufuli ia declara ce Tanzania es libre de la virus.
En janero, la presidente ia dise ce alga tanzanianes ia viaja estra la pais per es vasinida ma "ia trae a nos un coronavirus strana". On ia vide esta comenta como un confesa parente ce aora la virus sirculi en la pais.
A un confere jornaliste ier, Dr Dorothy Gwajima, ministro de sania, ia recomenda ce tanzanianes condui cauta e usa medisin tradisional per trata covid, an si la siensa no ia confirma la capasia de estas per combate la virus. Un blogor ia comparti fotos de Gwajima e otra ofisiores enspirante vapor e bevinte un prepara erbal.
Multe paises african compra vasines par un scema internasional nomida Covax, ma alga de los intende negosia direta con companias farmasial. Covax aida paises plu povre a compra vasines, entre consernas cresente ce nasiones rica saisi tota per pratica un "nasionalisme de vasin".
Paises african cual ia comensa distribui vasines inclui Misre, Gine, Magrib e Sexeles.
@T Teroristes peruan mata ante la eleje presidental
@L aora_oji/2021/teroristes_peruan_mata_ante_la_eleje_presidental
====== Teroristes peruan mata ante la eleje presidental ======
26 maio 2021
Des-ses persones, incluinte du enfantes a la min, ia es matada en un ataca par rebelores en Peru, como confirmada par la ministro de defende de la pais.
Via Luminosa, un organiza teroriste e estrema sinistriste, dise ce lo ia reali la ataca.
Lo ia lasa folietas a la sena, comandante persones a no vota en la eleje presidental prosiminte. La paperes ia dise ance ce la rebelores va "limpi" la rejion de "denunsiores e tradores" e otra "parasitos".
Esta grupo de rebelores mauiste ia perde multe de sua potia pos la aresta de sua xef en 1992, ma alga restantes es ancora ativa en la rejion peruan cual produi coca.
La governa dise ce la Via Luminosa deveni un grupo criminal envolveda en contrabanda de drogas.
La ataca ia aveni en la vale de la rios Apurímac, Ene e Matero. Francisco Sagasti, presidente de Peru, ia nomi lo un "ata teroriste" e ia dise ce el ia envia soldatos e polisiores a la loca per serti ce on va ave no manca de puni.
Sagasti va resinia pos la eleje presidental a 6 junio. La du persones ci aspira susede el ia espresa ance sua compatia a la familias de la vitimes.
@T Tesoros de la eda de bronze en un foresta svensce
@L aora_oji/2021/tesoros_de_la_eda_de_bronze_en_un_foresta_svensce
====== Tesoros de la eda de bronze en un foresta svensce ======
1 maio 2021
Un om, jeometrente un foresta per sua club de corsa de orienta en la ueste de Sveria, ia descovre acaso tesoros de la eda de bronze.
La trovadas inclui sirca 50 ojetos como brasaletas, colaretas, e spinos de veste, e on estima ce los ave sirca 2500 anios.
La cartografiste, Thomas Karlsson, ia dise: "Me ia pensa prima ce lo es cisa un lampa, ma cuando me ia regarda plu atendente, me ia vide ce lo es joalas vea."
Arceolojistes svensce descrive la ojetos como un reserva volente lasada como un ofre a un dio o dios, o per investi a la vive pos la mori. On trova rara un tal colie en un foresta. Tribus antica ia lasa tipal tal ofres en rios o pantanes, ma esta ojetos ia reposa sur la solo de la foresta, a lado de rocas.
On crede ce un o plu animales ia disturba la tera, partal esposante la tesoros, cual inclui ance un tipo de baston usada per speroni cavalos, trovada a ante en Danmarc ma nunca en Sveria.
Karlsson dise ce el ia persepi un sintili metalin en cuando el ia regarda un mapa sur cual el ia labora. Prima, el ia pensa ce la ornas es copias, car sua state ia es tan bon. Ma en bevi un cafe en la foresta, el ia eposta a un arceolojiste local.
La lege svensce esije ce cualcun ci trova tal anticalias avisa la polisia o la autoriosa local, car on regarda los como la propria de la stato. La Comite de Erita Nasional Svensce deside alora cual premio la trovor va reseta.
Aora un ecipo de arceolojistes de Göteborg esamina detaliosa esta foresta a sirca 50 cilometres a norde-este de sua site.
@T Tre cubanes survive 33 dias sur un isola nonabitada
@L aora_oji/2021/tre_cubanes_survive_33_dias_sur_un_isola_nonabitada
====== Tre cubanes survive 33 dias sur un isola nonabitada ======
11 febrero 2021
Tre persones ia es salvada de un isola nonabitada en la Bahamas pos 33 dias.
Un avion de la gardacosta esuan ia fa un patrulia costumal cuando on ia vide la grupo brandinte un sustitua de bandera sur Caio Anguilla.
La tre sitadanes de Cuba ia dise ce los ia survive xef par come cocos, e on reporta ce los ia consuma ance ratas e strombos. Un de la ecipores partisipante en la salva ia espresa sua stona ce los ia pote survive tan longa.
A lundi, un ofisior en la avion ia persepi alga cosa movente sur esta isola entre Cuba e la Caios Florida. La avion ia reveni plu basa e on ia vide la persones sinialinte.
La ecipo no ia porta la aparatos nesesada per fa un salva instante, ma on ia cade comedas e acua a la grupo, con ance un radio per permete ce los comunica.
"Nonfortunosa," la gardacosta Riley Beecher ia comenta, "nos no ia ave parlores fluente de espaniol, ma en mea espaniol esitante me ia pote descovre ce los es de Cuba e ce los nesesa aida medical. Los ia asentua clar ce los es sur la isola tra ja 33 dias."
La du omes e un fem ia dise ce los ia nada a la isola pos la afonda de sua barco.
La tre ia es final elicotorida de la isola a martedi e prendeda a un sentro medical en Florida, an si los ave no feris major reportada.
@T Tribuis pos la mori de la Duxe de Edinburgh
@L aora_oji/2021/tribuis_pos_la_mori_de_la_duxe_de_edinburgh
====== Tribuis pos la mori de la Duxe de Edinburgh ======
10 april 2021
Monarcos e xefes de stato ia envia tribuis pos la mori de Prinse Philip, Duxe de Edinburgh e sposa de Rea Elizabeth 2 de la Rena Unida. El ia ave 99 anios.
La presidente de la SUA, Joe Biden, ia loda la duxe per sua dedica "a la popla de la RU, a la Comunia de Nasiones e a sua familia" como ance per sua servi en la Gera Mundal Du, sua promove de laboras ambientiste e sua inspira de persones joven.
La duxe, de ci sua mori ia es anunsiada par la Palasio Buckingham ier, ia acompania Rea Elizabeth en sentos de visitas ultramar. El ia ave lias de sangue con alga familias reial presente o pasada de Europa.
Un telegram de Re Felipe e Rea Letizia de Espania ia es emosiosa, enviante "tota nosa ama e afeta" a Tia "Lilibet", la nom amosa usada par la duxe per sua sposa.
Ance Re Carl Gustaf de Sveria ia es emosiada, disente ce la duxe ia es "un ami major de nosa familia tra multe anios, un relata cual nos ia valua profonda". La familia reial de Nederland ia dise ce los recorda Prinse Philip con respeta grande, ajuntante: "El ia dedica sua vive longa a la servi de la popla brites e a sua multe debes e encargas. Sua personalia vivosa ia fa un impresa nonoblidable."
Tribuis ia veni ance de la Comunia de 54 nasiones, de cual la plu ia ave sua radises en la Impero Brites e do 2,4 mil milion persones abita aora.
Scott Morrison, ministro xef de Australia, ia loda la duxe como la patron de deses de organizas en acel pais, disente: "El ia corpi un jenera cual nos va vide nunca denova." La comentas par Jacinda Ardern, ministro xef de Zeland Nova, ia es simil, notante ce "miles de persones joven ia completi defias cual cambia vives" en la program de la Premio Hillary de la Duxe de Edinburgh.
Imran Khan, ministro xef de Pacistan, ia descrive Philip como "un gidor saja", ajuntante ce sua "rol en promove relatas entre Pacistan e la Rena Unida va es sempre recordada". La ministro xef de Barat, Narendra Modi, ia es un otra ci ia loda un vive dedicada a "multe stratejias de servi comunial".
La presidente de Cenia, Uhuru Kenyatta, ia dise ce la duxe ia es "un simbol torinte de valuas familial e la unia de la popla brites como ance la comunia global intera", e un om ci ia labora per la "coesiste pasosa de la raza umana".
@T Trovas inisial sur la mata de Halyna Hutchins
@L aora_oji/2021/trovas_inisial_sur_la_mata_de_halyna_hutchins
====== Trovas inisial sur la mata de Halyna Hutchins ======
28 otobre 2021
La polisia esuan dise ce cisa on va fa acusas criminal sur un mata cual ia aveni en la semana pasada sur un stadio de filma en Mexico Nova.
Alec Baldwin, ator, ia mata nonintendente la sinemiste Halyna Hutchins e ia feri un dirijor sur la stadio de la filma de caubois Rust.
Longo investigores, un "misil de plomo" ia es sutraeda de la spala de la dirijor, e lo pare es un baleta vera. Los ia dise ce la persones a la stadio ia ave "alga autosasia" en relata con securia.
Presentante la trovas inisial, Xerif Adan Mendoza de la contia Santa Fe ia dise: "Nos suspeta ce otra baletas vera ia es trovable sur la stadio. Nos va determina como estas ia ariva ala, perce los ia es ala, car los ia debe no es ala."
El ia dise ce la polisia ia prende asta aora 600 ojetos atestante, incluinte tre fusiles e 500 baletas. El ia ajunta ce la misil sutraeda de la spala de Joel Souza es ance prendeda como atesta.
"Me opina ce la fatos es clar," el ia dise. "Un arma ia es donada a Sr Baldwin. La arma ia es operable e ia xuta un baleta vera, matante Sra Hutchins e ferinte Sr Souza."
El ia dise ce asta 100 persones ia es sur la stadio de la filma cuando la xuta ia aveni a jovedi pasada. El ia confirma ce du otra persones ia toca la pistol, un revolver antica, ante cuando Baldwin ia reseta lo -- Hannah Gutierrez-Reed, armor de la filma, e Dave Halls, dirijor aidante.
Halls ia informa la investigores ce el no ia esamina tota la baletas en la pistol ante transfere lo, longo un documento de corte publicida ier. On reporta ce el ia esclama "pistol fria" en dona lo a Baldwin, lo cual sinifia ce el ia crede ce lo es secur.
Gutierrez-Reed ia dise a la investigores ce la pistoles ia es securida corta ante la asidente, ma la muni no. El ia ajunta ce pistoles es usual tenida en un caxa secur cual poca persones pote asede.
Baldwin e la produores de la filma ia emplea un compania privata de avocatos per fa sua propre esplora de la situa sirca la mata. Ma alga espertas legal ia dise ce lo es nonprobable ce el va es criminal acusada. La ator coopera e ia espresa sua xoca sur lo cual el ia descrive como un "asidente trajedin".
La aveni ia provoca un debate sur regulas de securia en Hollywood.
@T Trudeau aposta e gania un periodo tre
@L aora_oji/2021/trudeau_aposta_e_gania_un_periodo_tre
====== Trudeau aposta e gania un periodo tre ======
21 setembre 2021
Justin Trudeau ia gania un periodo tre como ministro xef de Canada, car sua Partito Libraliste va reseta la plu votas en un eleje subita anunsiada. El ia descrive la resulta como "autoria clar" per trae la pais tra la pandemica.
En ce resultas ia ariva ancora en la tarda de ier, Trudeau ia es en curso a un plu governa de minoria. Esta sinifia ce el va debe denova colabora con otra partitos per aproba leges.
Parlante en Montréal a esta matina, Trudeau ia reconose ce la deside de reali un eleje temprana ia es profonda nonpopular: "Me oia vos cuando vos dise ce vos vole revade a la cosas cual vos ama, sin preocupa sur la pandemica o la eleje."
Resultas inisial ia indica ce sua libralistes ia gania ja o va gania probable 156 sejas, min ca la 170 nesesada per un majoria parlamental. La oposores xef, la Partito Conservaliste de Erin O'Toole ia gania 121. La resulta es jeneral un repete de la situa pos la eleje en 2019.
La ajenteria nondependente cual supravide la prosede ia averti a ante ce la serti de alga resultas va ocupa dias, car on debe conta la votas postada.
En anunsia la eleje en agosto, la ministro xef ia aposta, esperante ce la responde governal a la pandemica va aumenta la potia de sua partito en parlamento. Ma la partitos oposante ia freta per acusa el de un "projeta de vania" a media de un onda cuatro de coronavirus.
@T UEFA espresa sua desaproba de la Superliga European
@L aora_oji/2021/uefa_espresa_sua_desaproba_de_la_superliga_european
====== UEFA espresa sua desaproba de la Superliga European ======
20 april 2021
Aleksander Čeferin, presidente de UEFA, la Uni de Asosias European de Futbal, ia dise ce la Superliga European, anunsiada a soldi, es un projeta "desonorosa e egosa" e "un sputa a la fas de amores de futbal".
El ia dise ance ce juores per ecipos envolveda en la liga cluida nova va es "proibida de la Copa Mundal e la Torneo UEFA".
Čeferin, presidente ja de 2016, ia supravide un acorda sur un Liga nova de Campiones con 36 ecipos, ma ia espresa clar sua despeta de la projeta Superliga.
"Tota nos es unida contra esta projeta asurda," el ia dise. "Me no pote asentua plu forte como cadun es unida contra esta proposa desonorosa e egosa, nurida par avaria supra tota otra. Lo es un scema sinica, completa contra lo cual futbal debe es."
La Superliga European va es "un concurso nova de mediasemana" con ce ecipos va continua "compete en sua propre ligas nasional".
Pos la anunsia de la concurso a soldi, FIFA, la Federa Internasional de Futbal Asosiada, ia espresa sua "desaproba" e ia recomenda ce "tota partitos envolveda en discutes pasionosa partisipa en dialoga calma, construinte e ecuilibrada per la benefica de la sporte".
La organiza governante de futbal internasional ia dise a ante ce lo no va reconose un tal concurso, e ce a cualce juores partisipante en lo on va refusa cisa la posiblia de compete a la Copa Mundal.
La Superliga ia anunsia ce sua 12 clubes fundinte va es la italianes AC Milan, Inter Milan e Juventus, la espanioles Atlético Madrid, Barcelona e Real Madrid, e la briteses Arsenal, Chelsea, Liverpool, Manchester City, Manchester United e Tottenham.
Lo intende comensa sua saison inaugurante tan pronto como posible e "previde ce tre plu clubes" va junta se a lo. La Superliga ia dise ance ce lo vole inisia un concurso per femes, rapida pos la comensa de la torneo per omes.
@T Un acorda per controla la custa de petrolio
@L aora_oji/2021/un_acorda_per_controla_la_custa_de_petrolio
====== Un acorda per controla la custa de petrolio ======
19 julio 2021
Nasiones produinte petrolio ia acorda aumenta sua esflue, intendente basi custas e redui la presa a la economia global.
De agosto, la cartel OPEC e sua asosiores como Rusia va crese sua furni.
La custa de petrolio ia ateni un masima de du anios e un dui en la pandemica. La cambia va redui la custa de gasolina a consumores, cual ia deveni ance multe alta.
En esta anio, la custa de petrolio Brent ia crese par 43% asta cuasi $74 per baril.
En 2020, OPEC e sua asosiores ia redui sua produi par 10 milion bariles per dia, cuantia recordo, cuando la custa ia basi en coresponde con un colasa de consuma.
Ma en 2021, la custa de petrolio ia alti multe con la reabri de economias, contribuinte a un crese de la taso de infla en alga paises e menasante freni la recovre global.
@T Un animal (non)misteriosa sur un arbor polsce
@L aora_oji/2021/un_animal_non_misteriosa_sur_un_arbor_polsce
====== Un animal (non)misteriosa sur un arbor polsce ======
16 april 2021
En Polsca, ofisiores ia reseta un averti sur un animal nonusual cual senta sur un arbor en la site Kraków. "Persones no abri sua fenetras car los teme ce lo va entra a sua casas," la fem ci ia reporta lo ia esplica.
Ma cuando la Sosia per Bonstate de Animales de Kraków ia visita la loca, on ia trova ce la creada misteriosa es no un avia e an no un retil, ma un cresente -- un pan de pasta dulse.
Scrivente en Facebook, la organiza ia dise ce sua ofisiores ia demanda a la telefonor desperante esce la animal nonidentifiable pote es un avia xasante. Lo ia pasa ja du dias sur la arbor.
La fem ia responde ce lo aspeta plu simil a un laguna -- la parola polsce per "lagon" -- ante recorda la parola coreta legwan, cual sinifia "iguana".
An si la ofisiores ia sabe ce lo es nonprobable ce un retil ta survive la temperatur fria de primavera en esta site en Polsca sude, los ia vole sabe esce la animal es cisa un animal de casa, abandonada par sua posesores.
Ma pos ariva, los ia vide ce la ojeto sin testa e sin membros, reposante sur un arboreta de lila, es un cresente, probable lansada de un fenetra per nuri avias.
La organiza ia reata bonumorosa a la aveni, disente ce la popla debe continua condui cauta, an si los risca era, e debe reporta tota consernas sur la bonstate de animales.
@T Un artiste dansce "prende la mone e core"
@L aora_oji/2021/un_artiste_dansce_prende_la_mone_e_core
====== Un artiste dansce "prende la mone e core" ======
1 otobre 2021
Un museo dansce vole ce un artiste redona sirca 534 mil crones cual el ia reseta como biletas par cual el ta recrea sua obras vea. En loca, el ia produi lonas blanca con la titulo "Prende la mone e core".
Jens Haaning, artiste dansce, ia es encargada par la Museo KUNSTEN de Arte Moderna en Aalborg per reprodui du de sua obras representante la salario anial en Danmarc e Osteraic.
La reata de la museo ia es miscada. Lasse Andersson, sua dirijor, ia dise: "El ia provoca mea empleadas conservante e el ia provoca pico ance me, ma me ia rie ance, car lo ia es vera umorosa."
Ma el ia espresa clar ce la mone debe es repaiada cuando la esibi fini. "Lo es la mone de la museo e nos ave un contrata disente ce la mone va reveni a 16 janero," el ia nota.
Ma Haaning, ci ave 56 anios, ia promete reteni la mone. "La obra es ce me ia prende de los la mone. Me coraji otra persones ci ave un ambiente tan misera de labora como me a fa la mesma," el ia dise, ajuntante ce per recrea sua obras pasada, el ia ta debe spende 25 mil crones.
Andersson refuta la reclama par Haaning ce la museo no ia acorda paia justa a el. "Nos veni de suscrive a un acorda con la asosia de artistes dansce cual aumenta cuanto on paia a artistes cuando los esibi," el ia dise. "Me pensa ce Jens ia rompe alga la acorda."
@T Un asidente major a la Turi de Frans
@L aora_oji/2021/un_asidente_major_a_la_turi_de_frans
====== Un asidente major a la Turi de Frans ======
La polisia dise ce on atenta trasa un regardor en pertine a un colide de multe siclistes en la grado prima de la Turi de Frans ier.
La fem ia apoia se ante la curso rapida de la grupo gidante, teninte un carton, en la rejion Finistère de Bres.
Tony Martin, sicliste deutx, ia tanje la carton e ia cade a tera, e otras pos el ia colide.
La polisia ia inisia ja un investiga criminal, intendente acusa la fem de "viole volente la regulas de securia e causa feris cual va preveni cisa ce algun labora per tre menses".
En un video de la asidente, vasta distribuida en la rede, la fem, ci porta un jacon jala, teni un carton con la testo "Vade, ava e avo!" en un misca de franses e deutx. El regarda en la otra dirije de la platon prosiminte e fali vide los.
Un sicliste ia debe retira se de la Turi a grado completa, e des-oto otra sportores ia es tratada par un dotor ofisial.
Longo la polisia, la fem ia fuji de la loca pos la colide. Investigores apela per deveni contatada par atestores.
La visdirijor de la Turi de Frans, Pierre-Yves Thouault, ia dise ce la turi va prosede contra la fem.
"Nos litiga esta fem ci ia condui tan mal. Nos fa esta afin la minoria pico de persones ci ata tal no ruina la spetaculo per cadun," el ia nota.
Frans ia deseveri sua restrinjes de coronavirus, e multe persones ia asembla per regarda la concurso. On ia consela ce los ci desira oserva la siclistes debe no sta sur la via mesma.
Pos la asidente, la organizores de la concurso ia twita: "Afin la Turi susede, respeta la securia de la siclistes! No risca tota per un foto o per apare en televisa!"
@T Un asidente matante en un mineria rusce
@L aora_oji/2021/un_asidente_matante_en_un_mineria_rusce
====== Un asidente matante en un mineria rusce ======
26 novembre 2021
A la min 52 persones ia mori en la desastre de mina la plu grave en Rusia en un desenio.
La aveni ia comensa cuando polvo de carbon en un duto de venti ia ensende ier, pleninte la mineria sibirsce con fuma, e matante 11 persones.
Cuando lo ia noti, un opera nonsusedosa per ateni deses de escavores mancante ia deveni trajedin car alga salvores mesma ia sofoca. Un fonte en la servis de crise ia dise ce "nun resta vivente".
La majoria de la 285 persones en la mineria Listviajnaia, en la rejion Cemerovo a sirca 3500 cilometres a este de Moscva, ia sorti direta pos la ensende a 08:35 de ora local ier.
Ofisiores ia dise ce 49 persones es ospitalida con feris. Alga sufri de veneni par fuma, e cuatro es en state estrema grave.
Deses de escavores no ia pote evade pos la aveni inisial, ma on ia debe pausa la labora de salva pos deteta un cuantia perilosa alta de metano en la mineria, creante temes sur esplodes posible.
Un de la ecipos de salva ia fali emerji de la mineria a pos. Plu tarda, la corpos de tre salvores ia es trovada, levante la cuantia ofisial de persones mor a 14.
Ma en la tarda de jovedi, alga fontes ia reporta ce on no previde trova plu survivores e ce la cuantia de mores ia suprapasa 50, incluinte ses laborores de salva.
Tre persones, incluinte la dirijor de la mineria, es arestada en relata con alegas de falis de securia. Esta no es la asidente prima a esta mineria. Un esplode de metano ia mata 13 persones en 2004.
Plu jeneral, asidentes en minerias rusce no es noncomun. En 2016, la autoriosas ia evalua la securia de la 58 minerias de carbon de la pais e ia declara ce 34% de los es potensial nonsecur. La lista no ia inclui Listviajnaia.
Vladimir Putin, presidente de Rusia, ia dise ce el espera ce on "va pote salva tan multe persones como posible", descrivente la perde de vive como "un trajedia grande".
@T Un ataca par arco e flexas en Noria
@L aora_oji/2021/un_ataca_par_arco_e_flexas_en_noria
====== Un ataca par arco e flexas en Noria ======
14 otobre 2021
En Noria, sinco persones ia es matada e du otras ferida cuando un om ia ataca con un arco e flexas.
Un om dansce, con 37 anios, ia es arestada, suspetada de reali la ataca ier, en la temprana de sera, en Kongsberg, a sude-ueste de la capitol Oslo.
La polisia crede ce el ia ata solitar, e va investiga esce lo es un caso de terorisme. Erna Solberg, ministro xef, ia descrive reportas de la aveni como "asustante".
On reporta ce la atacor ia fa la ataca en un supramercato a la lado ueste de la vila. Un de la feridas es un polisior nonpostida ci ia es acaso en la boteca.
Un portavose per la cadena ia confirma un "aveni grave" a la supramercato, ajuntante ce no empleadas ia es fisical danada.
La xef de polisia local ia dise ce la atacor ia susede evade un fronti inisial con polisiores, ma ce el ia es final arestada a 18:47, a 34 minutos pos la comensa de la ataca.
Un atestor ia dise ce el ia oia un disturba e ia vide un fem ascondente se, ante nota un "om stante a la angulo con flexas en un portaflexa sur sua spala e un arco en sua mano". Polisiores investiga esce la atacor ia usa ance otra armas.
La suspetada ia move tra un rejion grande, e la autoriosas ia bari alga partes de la vila, comandante ce abitores resta en casa en cuando la sena es esaminada e detalias colieda.
La ataca ia aveni a la dia final de la posto de Erna Solberg. Un ministro nova de justia va emprende la caso doman, su un governa gidada par Jonas Gahr Støre, xef de la Partito de Laborores.
Tota polisiores en la pais es aora comandada a porta fusiles como un cauti ajuntada. Usual, la polisiores norsce no es armada.
@T Un atacor atenta veneni acua en la SUA
@L aora_oji/2021/un_atacor_atenta_veneni_acua_en_la_sua
====== Un atacor atenta veneni acua en la SUA ======
9 febrero 2021
En la Statos Unida, un pirata de rede ia asede la sistem de acua de un site en Florida e ia atenta ajunta un cuantia perilosa de un cimical.
La pirata ia aumenta la cuantia de idrosido de sodio en la sistem de trata acua en Oldsmar, ma un laboror ia nota la situa e ia desfa la ata.
Esta cimical es usada en cuantias peti per controla la asidia, ma un cuantia grande ta causa problemes major en la acua.
Lo es la ingrediente xef en desblocintes de cloaca. Multe corodente, lo pote irita la pel e oios e causa un perde tempora de la capeles. Si on engoli lo, lo pote dana la boca, garga e stomaco e provoca vomita e diarea.
On ia fa ancora no arestas e on no sabe esce la ataca ia es realida en la SUA o de estra.
Un computador controlante la sistem ia es teleasededa a venerdi. Un operor ia vide ja un tal atenta de usa la sistem en la matina ma ia suposa ce esta es sua supravidor.
Ma un plu atenta ia aveni en la temprana de la posmedia, e a esta ves la pirata ia susede aumenta la proportio de idrosido de sodio de 100 partes per milion a 11 100 partes. La operor ia redui la nivel a la normal, sin pausa.
La compleso de Oldsmar furni acua a comersias e sirca 15 mil abitores local. Aora on ia descomuta tempora la capasia de teleasede la consol.
@T Un ator es matada par decora en Moscva
@L aora_oji/2021/un_ator_es_matada_par_decora_en_moscva
====== Un ator es matada par decora en Moscva ======
10 otobre 2021
Un ator rusce ia mori, craseda par decora cadente, a la Teatro Bolshoi en Moscva.
La teatro ia declara ce Yevgeny Kulesh ia es matada en un asidente en un cambia de sena en la opera Sadko a saturdi: "La presenta ia es instante parada, la publica ia es solisitada a sorti de la salon."
Videos pare mostra atores panicada ci urje empleadas a leva la decora. Regardores ia atenta revive Kulesh, ma sin susede.
Investigores esamina la contesto de la mori de esta ator de 37 anios. On crede ce Kulesh ia vade en dirije erante cuando la rampa ia desende trapinte el.
Regardores xocada ia dise ce los ia crede prima ce la asidente es un truco intendeda. Ma la realia de la aveni ia deveni rapida clar cuando la presentores ia reata asustada e algas ia cria "clama la ambulansia, on ave sangue".
Kulesh ia presenta a la teatro de 2002.
Esta no es la trajedia prima cual ia aveni en esta teatro famosa. En julio 2013, un violiniste major ia mori pos cade en la foso de orcestra. Viktor Sedov ia es veteran de la orcestra de la teatro e ia jua ala tra cuatro desenios.
E e 2011 un corte en Moscva ia prisoni Pavel Dmitrichenko, soliste de la Baleto Bolshoi, per ses anios pos judi ce el ia organiza un ataca par asida contra la dirijor artal de la compania, Sergei Filin, estra sua aparte, grave danante sua capasia de vide.
@T Un auto colide con un parada en la SUA
@L aora_oji/2021/un_auto_colide_con_un_parada_en_la_sua
====== Un auto colide con un parada en la SUA ======
22 novembre 2021
Sinco persones ia mori e plu ca 40 ia es ferida cuando un auto ia colide con un parada en la stato Wisconsin en la SUA.
Un multiterenal roja ia es dirijeda tra un parada de natal en la site Waukesha, a ueste de Milwaukee, a sirca 16:40 de ora local. La xef de polisia ia dise ce lo ia colpa deses de persones, incluinte enfantes. Un person ia es arestada.
Longo un ofisior ci conose la trovas temprana de la investiga, la aveni no pare "a esta tempo" es un ata teroriste. Lo pare ce la suspetada ia es fujinte de un otra loca cuando el ia colide.
Un abitor local ia dise ce la ecipo de dansa de sua fia ia es colpada. "On ia ave pompones e sapatos e xocolada calda malversada a tota locas. Me ia debe vade de un corpo craseda a la otra per trova mea fia."
La polisia ia averti ce cisa la cuantia de moris e feris va cambia en cuando on "colie informa ajuntada", notante ce multe persones ia transporta se mesma a ospitales local.
Esta parada en Waukesha, un comunia de sirca 72 mil persones, aveni a cada anio en la soldi ante la festa de grasia. Lo inclui vestes fantasin, dansores e bandes marxante. La tema a esta anio ia es "comforta e joia".
La xef de polisia ia dise ce sua ofisiores ia regania un "veculo suspetada" e ce un person ia es arestada, ma ia dona no plu detalias. El ia ajunta ce la investiga es "multe fluente", e ce la polisia ia spara a la auto per atenta para lo.
La xef de pompores ia dise ce sua departe ia prende 11 adultes e 12 enfantes a ospitales prosima pos la aveni. Plu tarda, la polisia ia anunsia ce la scolas en Waukesha va es cluida oji.
Un video publicida en redes sosial mostra la auto pasante con rapidia grande tra paradores de strada. Un otra mostra la veculo colidente con lo cual aspeta como un grupo de musicistes. Polisiores ia core longo la strada, comandante persones a refuja en botecas.
Un atestor ia dise ce on ia ave silentia, segueda par xilias, e cores per esamina la persones ferida cuando la veculo ia colpa un ecipo dansante de xicas de entre nove e des-sinco anios. Un otra ia dise ce la auto ia colpa ance un grupo de "avas dansante" e a la min un person ia es lansada supra la fronte de la veculo.
La maior ia dise ce esta es un tempo de trauma per la site. "Mea cor estende a tota los afetada par esta ata fol."
@T Un avion indonesian cade en la mar
@L aora_oji/2021/un_avion_indonesian_cade_en_la_mar
====== Un avion indonesian cade en la mar ======
10 janero 2021
Autoriosas en Indonesia dise ce los ia trova la loca do un avion de pasajores ia cade en la mar ier, corta pos enaira de la capital Jakarta.
La jeto Boeing 737 de Sriwijaya Air ia porta 62 persones cuando lo ia desapare de radar pos cuatro minutos de viaja a Pontianak en la provinse Kalimantan Ueste sur la isola Borneo.
Plu temprana oji, on ia trasa siniales cual veni probable de la rejistrador de vola de la avion. Plu ca des barcos ia es enviada a la loca con sumerjores marinal.
Investigores analise ance ojetos cual ia parteni suposable a la avion, incluinte un rota e cisa un parte de la tronco.
La labora de xerca ia es pausada en la note ma ia recomensa a la matina oji. On ia posti ance cuatro aviones per aida la xerca.
La avion mancante no es de la model Boeing 737 Max cual, pos du cades matante, ia es proibida de vola de marto 2019 asta desembre 2020.
Lo ia parti de la airoporto Soekarno-Hatta en Jakarta a 14:36 de ora local ier. A 14:40, on ia rejistra la contata final con lo. La vola a Pontianak ocupa normal 90 minutos.
La avion ia envia no sinial de crise. On crede ce lo ia cade tra plu ca 3000 metres en min ca un minuto. Atestores ia dise ce los ia vide e oia a la min un esplode.
Lo ia porta sola 50 pasajores, incluinte sete enfantes e tre bebes, e 12 ecipores, an si lo ia es capas per 130 persones. Cadun ia es indonesian. Relatadas espeta ansiosa a la airoportos en Pontianak e Jakarta.
Longo sua detalias de rejistra, la avion ia es un Boeing 737-500 de 26 anios. La dirijor xef de Sriwijaya Air ia dise ce lo ia es en bon state. La enaira ia es posponeda per 30 minutos par pluve forte.
Sriwijaya Air, fundida en 2003, es un airocompania cual vola a destinas en Indonesia e otra partes de Asia sude-este.
@T Un barco de migrores afonda prosima a Yaman
@L aora_oji/2021/un_barco_de_migrores_afonda_prosima_a_yaman
====== Un barco de migrores afonda prosima a Yaman ======
15 junio 2021
On teme ce deses de migrores african ia mori pos la inversa reportada de sua barco a la costa de Yaman.
Pexores en la provinse Lahj ia recovre 25 corpos en la acua prosima a Ras al-Ara. Un ofisior ia dise ce un barco portante entre 160 e 200 persones ia inversa en la rejion a du dias pasada.
La Organiza Internasional per Migra (OIM) serti reportas sur la afonda de un barco con multe migrores.
La costa de Ras al-Ara es comun usada per contrabanda persones. Lo es pico a este de Bab el-Mandeb, la streta con largia de 20 cilometres cual separa Yaman e Djibuti e lia la Mar Roja a la Golfo Aden.
En anios resente, sentos de miles de migrores de la Corno de Africa, xef itiopianes e somalis, ia traversa esta via a Yaman en atenta vade a Arabia Saudi.
Multe de la barcos de la contrabandores es suprafolida e nonconveninte, tal ce la viaja es perilosa. En april, a la min 44 migrores ia mori cuando un tal barco ia inversa en via de Yaman a Djibuti.
Longo la OIM, cuando la migrores ariva en Yaman, cual es aora en sua anio ses de gera interna, la contrabandores deteni multe de los per dias o an menses, asta ce la familias paia rescatas.
La cuantia de migrores ci ateni Yaman ia cade pos la comensa de la pandemica de covid. 5 100 ia ariva ja en esta anio, en compara con 35 000 en la intera de 2020 e 127 000 en 2019.
An tal, plu ca 32 000 migrores es trapida en la pais, con frontera cluida a Arabia Saudi e poca posibles de labora. Multe vive en un state perilinte, tipal sin asede a comables, cabanas, aida medical e securia.
@T Un barcon revade tra la canal cual lo ia bloci
@L aora_oji/2021/un_barcon_revade_tra_la_canal_cual_lo_ia_bloci
====== Un barcon revade tra la canal cual lo ia bloci ======
22 agosto 2021
La portacontenador enorme cual ia encalia en la Canal Suais en marto, blocinte la comersia global, ia repasa tra la canal sin problemes.
Ever Given ia es en un convoia de barcones viajante de la Mar Mediteraneo a la Mar Roja. Lo ia descarga sua portadas en Europa e vade aora a Asia.
On ia susede reflota la barcon pos un opera major de ses dias en cual un person ia mori. Pos acel, lo ia es saisida per tre menses, prosima a la site Ismailia, en cuando Misre e la compania cual posese la barcon ia acorda un compensa per la custa de la labora e la danas a la rivas de la canal.
La detalias de la acorda no ia es revelada, ma Misre ia esije ultima 550 milion dolares.
En un serie de twitas, la Autoriosa de la Canal Suais ia dise ce Ever Given ia es escortada tra la 193 cilometres de la canal par du barcos tirante e gidores esperiada.
Lo ia es un de 26 barcones cual ia viaja de norde a sude tra la canal a venerdi, en cuando 36 ia vade en la otra dirije.
Ever Given es un de la portacontenadores la plu grande de mundo. Lo ia trae sua 18 300 contenadores a Rotterdam (Nederland), Felixstowe (England) e Hamburg (Deutxland) e viaja aora a Xina.
@T Un batalia de prison en Ecuador mata sento persones
@L aora_oji/2021/un_batalia_de_prison_en_ecuador_mata_sento_persones
====== Un batalia de prison en Ecuador mata sento persones ======
30 setembre 2021
116 persones, cisa plu, ia mori en un batalia entre ganges oposada en un prison en Ecuador. Esta ia es la violentia la plu grave de prison en la istoria de la pais.
A la min sinco prisonidas ia es destestida en la combate a martedi en la site Guayaquil, e otras ia es matada par spara.
La Prison Litoral es regardada como un de la prisones la plu perilosa en Ecuador, conteninte prisonidas de ganges parente liada a carteles mexican de drogas. Jornales local reporta ce la rebela ia es comandada par tal ganges aora operante en Ecuador.
La comandor de polisia ia dise ce la prisonidas ia lansa granadas ance. 400 polisiores ia es nesesada per regania la controla.
Esta es la plu resente en un serie de batalias en cual ganges oposada ia combate per controla prisones. En febrero, 79 prisonidas ia es matada en batalias simultan.
A martedi, prisonidas de un ala de la prison ia rampe tra un buco per asede un otra ala, do los ia ataca membros de otra ganges. Plu ca 80 prisonidas ia es ferida. La polisia ia susede ateni ses cosinores trapida en acel ala e move los a securia.
Presidente Guillermo Lasso ia declara un state de crise en la prisones ecuadoran. En julio, el ia dise ce la sistem conteni prisonidas a 30% plu ca sua capasia intendeda, e ia anunsia un projeta de rapidi la libri de prisonidas ci ia fa crimines minor o ia completi cuasi sua tempo de puni.
@T Un bebe romanian mori pos es batizada
@L aora_oji/2021/un_bebe_romanian_mori_pos_es_batizada
====== Un bebe romanian mori pos es batizada ======
6 febrero 2021
La mori de un bebe de ses semanas pos un batiza en Romania ia provoca un arcibispo ortodox a dise ce on va analise tal rituos per evita plu trajedia.
La bebe ia sufri un para cardial pos es sumerjida a tre veses en acua santa. El ia ave un mori violente e un autopsia ia trova licuida en sua pulmones.
Plu ca 60 mil persones ia suscrive ja un apela per cambia.
Arcibispo Calinic es la eglesor la plu importante ci suporta reformi. El ia dise ce el crede ce en futur la pratica de sumerji un bebe va es revisada e "la deside la plu conveninte [va es] fada per respeta rituos e evita atendosa asidentes nondesirada".
Avocatos ia abri un investiga de mata sin intende en relata con la prete ci ia fa la batiza en Suceava, un site en la norde-este de la pais.
Calinic mesma ia fa resente la batiza multe publica de la fia de la prinse pasada Nicolae de Romania, e ia dise ce an si la sumerji en acua santa conveni a adultes, otra metodos es disponable.
Cuando el ia es un prete en Transilvania a multe anios pasada, el ia pone la pedes de bebes en acua santa e ia duxi la testas.
La om ci ia inisia la apela per reformi, Vladimir Dumitru, ia dise ce batizas debe es regulada per preveni riscas nonesesada. El intende ce la apela es nonestrema e positiva.
La Eglesa Ortodox en Romania es jeneral respetada, ma on ia critica sua reata a la pandemica de coronavirus. En marto de la anio pasada, cuando romanianes ia es a punto de isoli se, pretes en Cluj-Napoca, un site norde, ia fa la eucaristia compartinte sola un culier entre un congrega grande.
@T Un cambia major de politica sur covid en Tanzania
@L aora_oji/2021/un_cambia_major_de_politica_sur_covid_en_tanzania
====== Un cambia major de politica sur covid en Tanzania ======
29 julio 2021
En Tanzania, la popla es aora corajida a es vasinida contra covid, pos un cambia major de politica en un de la paises la plu poplada de Africa.
La presidente nova, Samia Suluhu Hassan, ia inisia la promove. El ia recambia John Magufuli, ci ia desasentua la gravia de la virus, recomendante preas en loca de vasines e mascas.
Pos cuando Magufuli ia mori en marto par causa de un disturba de cor, Suluhu ia institui un grupo dedicada a la problem de coronavirus.
Ofisial, esta pais de 58 milion persones ia rejistra 858 casos de covid e 29 moris par causa de lo, ma on teme ce la cuantias vera es plu alta. La Organiza de Sania Mundal ia averti resente sur un aumenta de casos tra Africa.
En la finisemana, Tanzania ia reseta pico plu ca milion dosas de la vasin de Johnson & Johnson, par la scema global Covax cual aida paises plu povre a combate la virus.
Suluhu ia es vasinida ier, disente: "Nos no es un isola e esta es perce aora nos comensa vasini." El ia recomenda ce tota tanzanianes prende la vasin e ia ajunta ce la pais va reseta plu dosas.
El ia clari ce el ia reseta vasines plural ja de sua enfantia e ia aseta la vasin presente car el sabe ce lo es nonperilinte.
Un parte de Tanzania ia vasini ja sua popla -- la isolas partal autonom de Zanzibar ia comensa sua propre promove a sirca du semanas ante aora, usante la vasin xines Sinovac.
La governa tanzanian ia proibi ance asemblas nonesesada per preveni la sperde de la virus.
Cuando Magufuli ia mori, on ia oia rumores ce el mesma ia es afetada par covid. El ia adota la opina ce Tanzania no nesesa vasines contra la virus, nominte los "perilosa" e promovente alga remedias natural -- vapor erbal, eserse, bon comedas -- cual espertas internasional de sania rejeta.
Indicante cuanto la politica ia cambia, la ministro de sania Dorothy Gwajima ia descrive la promove nova como "monumentin" e ia recomenda forte ce persones reseta la vasin, disente ce la governa projeta vasini a la min 60% de persones.
An tal, la disposa publica a la maladia pare ancora multe reposada, con ce la plu de persones vade sin mascas.
@T Un camion colide con un bus de laborores en Barat
@L aora_oji/2021/un_camion_colide_con_un_bus_de_laborores_en_barat
====== Un camion colide con un bus de laborores en Barat ======
28 julio 2021
A la min 18 laborores migrante ia mori cuando un camion ia colide con sua bus en Uttar Pradesh, stato de Barat norde.
Sua viaja de 1300 cilometres de Haryana a Bihar, sua stato de orijina, ia es cortida cuando la bus ia fali en la distrito Barabanki.
Alga de la laborores ia es ancora en la bus e otras ia dormi a lado de lo cuando la asidente ia aveni en la oras temprana de oji.
La supravidor de polisia en Barabanki ia dise ce alga de la pasajores ia deside dormi estra la veculo en ce la busor ia xerca un maciniste per repara lo.
"Lo es un aveni nonfortunosa," el ia comenta. "La bus ia fali probable car lo ia ave sirca 140 pasajores cuando sua capasia ia es mera 65. Nos aida la familias."
El ia dise ance ce la bus ia ave no fenetras car lo ia usa un frescador. Esta ia obliga alga pasajores a sorti e dormi sur la via.
A la min 30 persones, de ci alga es grave ferida, ia es ospitalida en Barabanki.
Narendra Modi, ministro xef, ia tuita sua compatia e ia anunsia 200 mil rupis como compensa per la familias de la persones matada e 50 mil rupis per la feridas.
Persones de Bihar vade comun a statos plu rica como Haryana e Delhi per trova labora. Tal laborores migrante tende usa trenes e buses, un modo de transporta con custa basa en Barata, per revade a casa cuando sua labora pausa.
@T Un colide de asteroide ia crea la Foresta Amazona
@L aora_oji/2021/un_colide_de_asteroide_ia_crea_la_foresta_amazona
====== Un colide de asteroide ia crea la Foresta Amazona ======
3 april 2021
Un studia sujesta ce la asteroide cual ia mata la dinosauros ia crea nosa forestas pluvosa. Rexercores ia usa polen e folias fosilida per investiga como la colide ia cambia forestas tropical en America Sude.
Pos cuando esta roca, larga de 12 cilometres, ia colpa la Tera a 66 milion anios ante aora, la tipo de plantas de cual tal forestas es composada ia cambia multe.
La rexercores ia presenta sua descovres en la jornal prestijiosa Siensa. La coautor Dr Mónica Carvalho, de la Instituida de Rexerca Tropical Smithsonian en Panama, ia clari: "Nosa ecipo ia esamina plu ca 50 mil rejistras de polen fosilida e plu ca 6 mil fosiles de folia, de ante e pos la colide."
Los ia trova ce coniferes e filises ia es comun ante cuando la asteroide ia colpa lo cual es aora la Penisola Yucatan en Mexico. Ma a pos, la diversia de plantas ia diminui par aprosima 45% e estinguis ia aveni vasta, spesial entre jimnospermas -- plantas con semes nuda.
En cuando la forestas ia recovre tra la ses milion anios seguente, los ia deveni dominada par anjiospermas -- plantas florinte, con semes encluida.
La strutur de forestas tropical ia cambia ance como resulta de esta traversa.
En la tarda de la cretasica, cuando la dinosauros ia vive ancora, la arbores en la forestas ia es larga spasida. Sua partes alta no ia toca lunlotra, lasante rejiones abrida e solosa a la tera. Pos la colide, forestas ia developa un baldacin densa cual no ia permete ce tan multe lus ateni la tera.
La rexercores proposa tre esplicas posible:
Prima, cisa la dinosauros ia preveni la densi de la foresta car los ia come o crase plantas basa cresente. O cisa sene cadente ia rici la solo tra la tropicos, vantajinte plantas florinte, car estas crese plu rapida. La esplica tre es ce la estingui de spesies de conifer ia crea un ambiente en cual plantas florinte ia pote domina.
La ecipo clari ce la tre ideas no esclui lunlotra. Cisa tota ia contribui a la situa moderna.
"La leson aprendeda es ce su turbas rapida, ecosistemes tropical no rebondi mera," Carvalho ia dise. "Los es recambiada, e la prosede ocupa un tempo vera longa."
@T Un compleso nucleal irani es danada en un ataca
@L aora_oji/2021/un_compleso_nucleal_irani_es_danada_en_un_ataca
====== Un compleso nucleal irani es danada en un ataca ======
14 april 2021
Miles de macinas usada per refina materia nucleal ia es destruida o danada en un ataca a un compleso major a soldi, diseda par un ofisior irani.
Alireza Zakani, xef de la Sentro de Rexerca de la parlamento irani, ia dise ce la situa ia "elimina" la capasia de Iran per tal refina. La ataca ia aveni a la compleso en Natanz, asta 50 metres su tera.
Iran ia culpa Israel per lo cual lo nomi un ata de "terorisme nucleal". Israel no ia confirma e no ia nega sua envolve, ma sua radio publica ia sita un fonte en Mossad, la ajenteria de securia israeli, ci ia dise ce esta ia es un siberataca par Mossad.
Iran dise ce lo va sustitui sentrifugas plu avansada per la afetadas. Esta macinas servi per rici la elemento uranio per usa en enerjia nucleal o cisa en bombas nucleal.
Ance oji, la pais ia anunsia ce lo va aumenta multe la cualia de rici, de puria de 20% asta 60%. Rici a o la un o la otra de esta niveles es proibida par la restrinjes de la acorda nucleal de 2015, ma an si 60% es notable plu prosima a la puria de 90% nesesada per armas nucleal, un distantia grande ta resta ancora.
Entretempo, jornalistes israeli e arabi reporta ce un barcon de posese israeli ia es danada en un ataca a lado de la costa de la Amirias Arabi Unida.
Ofisiores anonim sitada par Canal 12 en Israel ia culpa Iran per la ataca contra Hyperion Ray. Si confirmada, esta va es la plu resente en un serie de atacas alegada de oio per oio contra barcones israeli e irani.
@T Un confisca enorme de concas de bivalvos jigante
@L aora_oji/2021/un_confisca_enorme_de_concas_de_bivalvos_jigante
====== Un confisca enorme de concas de bivalvos jigante ======
18 april 2021
En la Pilipinas, on ia confisca sirca 200 tones de concas de bivalvo jigante, nonlegal recolieda, con valua de cuasi 25 milion dolares esuan.
La saisi ia es un de la confiscas la plu grande de esta spesie perilida. Cuatro suspetadas ia es arestada sur un isola en Palawan, provinse ecolojial protejeda.
Bivalvos jigante pote crese asta diametre plu grande ca un metre e pote pesa asta 250 cilogrames. On vide los como esensal a la ecosistem maral local.
On trova en la Pilipinas la plu de la spesies tropical de bivalvo jigante. La concas resente confiscada ia inclui alga de la spesie Tridacna gigas, la plu grandes de mundo.
Jovic Fabello, portavose per la Consilio de Palawan per Developa Sustable ia dise: "Prende la bivalvos jigante de sua abitada natural es un forma de crimin entre jeneras. Lo va afeta permanente la ecosistem maral, e jeneras futur va es privada de la beneficas cual cumula en lo."
Bivalvos Tridacna gigas conteni alges maral cual es un fonte nurinte per multe de la spesies de pex comeda par umanas. Los es sempre plu xasada en modo nonlegal, e per sua carne e per sua concas, cual sustitui per ivor en joalas e decoras.
En la Pilipinas, la mata de spesies perilida pote resulta prisonis de asta 12 anios e multas de asta milion pesos (20 000 dolares esuan).
@T Un corte japanes judi contra la proibi de sposia ge
@L aora_oji/2021/un_corte_japanes_judi_contra_la_proibi_de_sposia_ge
====== Un corte japanes judi contra la proibi de sposia ge ======
17 marto 2021
En Japan, un corte distrital ia judi ce la nonreconose de sposia ge par la pais es "nonconstituin".
La constitui japanes relata sposia a un "acorda mutua entre ambos sesos". Ma un corte en la site Sapporo ia deside ce esta contradise la egalia constitual garantiada a duples omosesal.
Japan es la sola pais en la grupo G7 de nasiones developada cual no permete persones de la mesma seso a sposi.
La caso ia es un de alga traeda a cortes rejional en partes diversa de Japan par un organiza de duples ge ci vole es compensada per sua sufri mental en manca de la mesma diretos como duples eterosesal.
La corte en Sapporo ia rejeta la reclama de milion enes (9000 dolares esuan) per person. Ma lo ia declara ce la proibi de sposi es nonconstituin.
An si tota cortes distrital fa judis simil, lo no es garantiada ce sposis omosesal va es legalida, car on ave poca razonas political per cambia la lege.
La governa dise ce la linguaje en la constitui indica ce on no ia previde sposia ge cuando la documento ia es scriveda. Ma la avocatos de la acusores ia dise ce vera la linguaje ia es intendeda per preveni sposis obligada, e ce la constitui conteni no cosa cual spesifa un proibi de sposis ge.
Sapporo es la site capital de Hokkaido, la isola japanes la plu norde. Sua corte es la prima cual ia presenta sua deside, e on suposa ce sua opina va influe otra cortes.
Ativistes dise ce disposas tradisional a omosesalia resta, e multe japaneses LGBT ancora no osa desasconde se a sua amis e familia.
De 2015, alga sites ia furni documentos validinte duples omosesal. Ma la documentos no es legal obligante e no dona la mesma diretos como a duples sposida. Los recomenda mera ce comersias ofre un trata egal.
Sondas resente ia indica ce la plu de persones joven en Japan suporta sposia ge.
@T Un crise umana causada par un volcan sur San Vinsent
@L aora_oji/2021/un_crise_umana_causada_par_un_volcan_sur_san_vinsent
====== Un crise umana causada par un volcan sur San Vinsent ======
15 april 2021
La crise umana causada par un eruta volcanal sur la isola caribe San Vinsent va dura tra menses, longo un ofisior de la Nasiones Unida.
Didier Trebucq ia dise ce cisa isolas prosima, incluinte Barbados, Antigua e Barbuda, va es ance grava afetada. El ia ajunta ce la NU inisia un solisita de finansia internasional.
Sirca 20 mil persones ia es evacuada de sua casas pos cuando la volcan La Soufrière ia comensa eruta a venerdi pasada. Sua eruta la plu resente ia aveni en 1979.
Trebucq, la coordinor NU per Barbados e la Caribe Este, ia dise ce la volcan continua emete nubes de sene e fuma a cada dia.
La NU reporta ce sirca 4000 de la persones deslocada abita aora en 87 refujerias, de cual multe no ave servis tan fundal como acua bevable. Otras abita con sua familia o amis, e algas ia viaja par barcos a isolas visina.
Trebucq ia dise ce la furni de acua es la conserna xef per la ecipos aidante, segueda par la dona de refuja. "La limpi de la sene, final, es un plu conserna importante, en relata a la sania de la ambiente, ma ance un limpi per serti ce la vive pote reveni a normalia estra la zona roja tan rapida como posible."
Ier, la ministro xef Ralph Gonsalves ia dise ce, an con la peril, multe abitores eleje resta sur la isola en loca de es evacuada par barcon.
En la tarda de 2020, la volcan ia comensa ronci ante emete vapor e fuma. La indica prima ce lo es a punto de eruta ia aveni en la sera de jovedi pasada, cuando un cupola de lava ia deveni vidable sur la monte.
@T Un deluvia matante pos graniza estrema en Bolivia
@L aora_oji/2021/un_deluvia_matante_pos_graniza_estrema_en_bolivia
====== Un deluvia matante pos graniza estrema en Bolivia ======
6 janero 2021
Un deluvia subita ia mata cuatro persones, cisa plu, en la site Sucre, la capital constitual de Bolivia.
Pos un pluve forte de graniza tra sirca un dui de ora, alga de la stradas presipe ia deveni rios rapida fluente. Acua ia versa longo la vias, tirante con se autos, buses e cioscos de mercato.
La distrito la plu grave afetada ia es sirca la mercato cultival la plu grande, do la cloacas ia deveni blocida par dejetadas cual ia aumenta la inonda.
Abitores de la site ia es surprendeda par la tempesta, cual ia comensa a 18:45 de ora local. On ia cexa ce ofisiores ia ta debe fa plu per manteni la cloacas de tempesta en la saison pluvosa.
Presidente Luis Arce ia ofre sua compatia a la relatadas de la matadas. Eduardo del Castillo, ministro de internas, ia dise ce tre enfantes e tre adultes es ancora mancante e ce sete persones ia es ferida.
A la min des veculos ia es puxada a via par la acua. Multe mercatores ia perde tota sua benes, e alga ia es ospitalida con ipotermia.
Deluvias subita e liscateras no es rara en la saison pluvosa bolivian, cual estende de novembre asta marto.
A mera alga dias ante aora, un om ia es salvada de un auto cual ia deveni sumerjida par un tal inonda en Peru, pais visina.
@T Un diamante grande es trovada en Botswana
@L aora_oji/2021/un_diamante_grande_es_trovada_en_botswana
====== Un diamante grande es trovada en Botswana ======
17 junio 2021
En Botswana, on esibi un diamante cual pare es la numero tre de la plu grandes trovada a cualce tempo.
La petra, con pesa de 1098 caratos, ia es mostrada a Presidente Mokgweetsi Masisi a du semanas pos cuando la compania Debswana ia desentera lo.
La jem enorme es pico min pesosa ca la diamante du de la plu grandes de mundo, cual on ia trova en 2015, ance en Botswana. Esta pais es la produor major de diamantes en Africa.
Debswana es un projeta juntada de la governa e la corpora internasional De Beers. Asta 80% de la revenu de vendes finansia la governa, par via de dividendos, impostas e paias per diretos.
Lefoko Moagi, ministro tswana de minerales, ia dise ce esta descovre la plu resente no ia ta pote aveni a un tempo plu bon per Botswana, pos ce la pandemica ia colasa la vende de diamantes en la anio pasada.
La diamante la plu grande ia es trovada en un mineria en Cullinan en Sudafrica en 1905. Lo ia ave 3106 caratos.
La jem nova descovreda ave 73 milimetres de longia, 52 de largia e 27 de profondia.
Lynette Armstrong, dirijor manejante de Debswana, ia dise ce on ancora no ia deside esce on va vende la "petra rara e estracomun" tra De Beers o tra la Compania de Diamantes Okavango, poseseda par la governa.
@T Un documento de Einstein es vendeda a custa recordo
@L aora_oji/2021/un_documento_de_einstein_es_vendeda_a_custa_recordo
====== Un documento de Einstein es vendeda a custa recordo ======
24 novembre 2021
Un manoscrito con calculas fada par Albert Einstein, en cuando el ia atenta formula sua teoria jeneral de relativia, ia es subastada per 11 milion euros.
La vende a la subasteria Christie's en Paris ia rompe la recordo per un documento suscriveda siensal.
Esta es un de sola du paperes cual mostra la labora de la fisiciste teorial sur sua avansa grande. La teoria, publicida en 1915, ia cambia profonda nosa comprende de spasio, tempo e gravita.
La manoscrito de calculas ia es scriveda entre 1913 e 1914 par Einstein e sua colega Michele Besso, ci ia reteni la documento. La subasteria ia loda Besso per sua preconsidera en salva la paper.
"Einstein es algun ci ia teni vera poca notas, donce la fato mera ce la manoscrito ia survive e ia trova sua via a nos fa ce lo es ja estracomun," Vincent Belloy, esperta a Christie's ia dise.
La paperes conteni 54 pajes de calculas en inca negra de pen e, longo Belloy, mostra alga eras longo la viaja a la formula de la teoria.
Christie's ia reporta ce la vende "ia atrae coliores de tra la mundo intera ci reconose la importa de la documento". Ma on no ia revela la identia de la compror.
La teoria de relativia ia lansa lus a la orijina de la universo, la orbitas de planetas e la bucos negra. En maio pasada, un letera scriveda par Einstein, conteninte la egali la plu famosa de la teoria, E=mc², ia es vendeda contra plu ca 1,2 milion dolares esuan.
@T Un eglesor djihadiste es matada en Kampala
@L aora_oji/2021/un_eglesor_djihadiste_es_matada_en_kampala
====== Un eglesor djihadiste es matada en Kampala ======
19 novembre 2021
La fortes de securia en Uganda ia mata par fusil un eglesor muslim acusada de labora con un grupo armada relatada con bombis umana en la capital Kampala.
Ofisiores ia dise ce Xec Muhammad Abas Kirevu ia enscrive persones a selulas dirijeda par la Fortes Democrata Aliada (FDA), rebelores ci ia promete sua fida a la grupo djihadiste Daex. El ia es matada direta estra Kampala.
A la min cuatro persones ia es matada par atacores sur motosicles ci ia esplode se en la site a martedi. Plu ca 30 otras ia es ferida en la ataca, cual Daex ia dirije (longo sua propre declara) e per cual ofisiores ia culpa la FDA.
La FDA militariste islamiste ia es formida en Uganda en la desenio de 1990 ma ave aora sua base en la Republica Democrata de Congo. Pos promete sua fida a Daex en 2019, lo ia esecuta sempre plu atacas en la nom de acel organiza.
Dudes-un persones ia es arestada pos la ataca a martedi, en lo cual la polisia ia descrive como la desasembla de selulas teroriste FDA en Kampala e tra la pais. 13 suspetadas, incluinte alga enfantes, ia es intersepida en atenta traversa la frontera a RD Congo. A mercurdi, cuatro operores suspetada de la FDA ia es matada prosima a acel frontera.
On xerca ance un plu eglesor, Xec Suleiman Nsubuga, ci on acusa de instrui teroristes, radisali enscrivedas potensial, e furni materias per improvisa aparatos esplodente.
En la mense pasada, un servor de restorante ci ia ave 20 anios ia es matada cuando un bomba, lasada en un saco de compra, ia detona en un bar en Kampala. A alga dias plu tarda, persones plural ia es ferida cuando un bomba umana ia detona se en un bus prosima a Kampala. La polisia dise ce ambos avenis ia es liada con la FDA.
@T Un elicotor sur Marte completi sua vola tre
@L aora_oji/2021/un_elicotor_sur_marte_completi_sua_vola_tre
====== Un elicotor sur Marte completi sua vola tre ======
26 april 2021
NASA, la ajenteria spasial esuan, ia fa un vola susedosa tre de un elicotor sur Marte.
Ier, la elicotor peti, nomida Ingenuity (Injenia), ia asende a altia de 5 metres ante vade orizonal tra 50 metres. Pos 80 secondos volante, lo ia reveni a sua loca de enaira.
Esta ia es sua vola la plu aspirante asta aora, ma on intende proba an plu la tecnolojia. La injeniores desira descovre la limitas de la capasia de la elicotor, an si lo va colide alora con la surfas.
La du volas presedente ia es fada a lundi e jovedi. La aveni a lundi ia es la ves prima cuando un avion ia vola propulsada e controlada sur un otra planeta.
Ingenuity ia es portada a Marte par la vagador Perseverance (Persiste), cual ia atera en la crater Jezero a media de febrero. La avioneta pesa 1,8 cilogrames e on regarda lo como un demostra de la usosia de la capasia de vola en la atmosfera rarida de la planeta roja.
En futur, cisa on va usa elicotores per esplora vias cual vagadores e astronautas intende segue e per esamina locas como falesas a cual on pote ariva en no otra modo.
Ofisiores permete du plu volas a la ecipo de la elicotor ante comanda Perseverance a comensa sua mision xef de xerca sinias de vive en Jezero.
Tra la semana pasada de probas, esta robot, cual pesa un ton, ia servi como base de radio per la elicotor e como fotografiste. Perseverance ia fa fotos e filmas corta a distantia de 65 metres de la "campo de avion".
@T Un empleada italian ia evita labora tra 15 anios
@L aora_oji/2021/un_empleada_italian_ia_evita_labora_tra_15_anios
====== Un empleada italian ia evita labora tra 15 anios ======
22 april 2021
En Italia, un empleada de ospital es acusada de reseta un paia completa tra 15 anios de evita sua labora.
On alega ce la om ia sesa veni per labora a la ospital Ciaccio en la site Catanzaro en la sude de pais en 2005. Aora on investiga el sur froda, estorse e malusa de sua posto.
Longo reportas, el ia reseta 538 mil euros en la tempo tra cual, alegada, el no ia labora. Ses manejores a la ospital es ance investigada en relata con la asenti alegada.
La arestas segue un investiga longa par la polisia contra asenti e froda suspetada en la setor publica italian.
En esta caso, la empleada ia es un ofisior publica asiniada a un posto en la ospital en 2005. Alora, la polisia dise, el ia sesa vade a labora.
La polisia ia acusa el ance de menasa sua manejor per preveni el de rejistra un reporta disiplinante contra el. Pos la jubila de esta manejor, la asentia continuante de la empleada ia es nunca persepida par sua susedor o par la departe de recursos umana.
@T Un fali tecnical a la Ponte de la Tore de London
@L aora_oji/2021/un_fali_tecnical_a_la_ponte_de_la_tore_de_london
====== Un fali tecnical a la Ponte de la Tore de London ======
10 agosto 2021
En London, la Ponte de la Tore ia reabri a trafica pos fisa se tra cuasi 12 oras.
Esta traversa famosa levable de la Rio Thames ia es altida ier per permete la pasa de un barcon grande de lenio, ma lo ia pare deveni fisada en sua posa levada.
La polisia de la Site de London ia dise ce la monumento de 127 anios ia es cluida "par causa de fali tecnical".
La du lados de la ponte ia deveni fisada sirca 14:30. On ia clui la vias de asede la ponte e ia consela ce motoristes e paseores ta evita acel rejion de London en cuando on ia reali la reparas nesesada.
La ponte ia reabri a trafica a 01:45 a esta matina.
Transporta per London, la autoriosa de governa local con encarga de la rede transportante en la capital engles, ia reporta ce la trafica ia move lenta sur ambos lados de la rio tra la posmedia.
La ponte, construida per oto anios e abrida en 1894, es normal levada a sirca 800 veses per anio.
Lo ia fisa se ance en agosto de la anio pasada, cuando un defeto macinal ia fa ce lo resta altida tra plu ca un ora.
Un portavose per la Corpora de la Site de London, cual maneja la ponte, ia dise ce la fonte de la fali nova es ancora no conoseda, ma ce on investiga lo.
@T Un festa de filma svensce, solitar en un faro
@L aora_oji/2021/un_festa_de_filma_svensce_solitar_en_un_faro
====== Un festa de filma svensce, solitar en un faro ======
31 janero 2021
Un ospitalor svensce ia gania un compete per regarda tota 60 filmas de la Festa de Film Göteborg en un faro sur un isola peti a la costa de Sveria.
Lisa Enroth ia vinse 12 mil otra sinemafilicas ci ia compete de tra la mundo. Esta fem, ci ia labora con pasientes de covid tra la pandemica, previde felis la esperia.
La pandemica ia obliga la organizores a cambia sua festa. On va fa no presentas en sinemas. La program intera va es flueda enlinia.
La organizores ia dise ce los xerca un fan vera de filmas ci es emosial e psicolojial capas de la taxe.
Enroth, ci ia descrive se como "drenada de enerjia" par la pandemica, va pasa un semana solitar en la faro Pater Noster sur Hamneskär, sin telefon, computador, libros e cualce otra forma de diverti.
"La venta, la mar, la posible de parteni a un tipo intera diferente de realia per un semana -- tota esta es vera atraosa," el ia comenta.
El abita usual en Skövde, un site peti a este de Göteborg, do el es un membro de un club local de filmas.
A la matina de saturdi, on ia prende Enroth par barco a la isola, prosima a Marstrand. El va posta dial un jornal video.
Mirja Wester, dirijor de la festa, ia dise ce lo pare justa ce on dona esta esperia unica a un de la multe eroes ci furni aida medical en la pandemica.
@T Un focon a un compleso de petrolio indonesian
@L aora_oji/2021/un_focon_a_un_compleso_de_petrolio_indonesian
====== Un focon a un compleso de petrolio indonesian ======
29 marto 2021
En Indonesia, pompores labora per estingui un focon jigante a un de la refinerias de petrolio la plu grande en la pais. Un plumon de fuma asende alta supra la loca.
La focon ia ensende a la refineria Balongan, operada par Pertamina, la corpora nasional de petrolio, a sirca 00:45 de ora local oji.
A la min sinco persones es ferida, e on ia evacua sirca 950 abitores de un vileta. La labora es complicada par restrinjes contra covid. Un cuantia peti de persones es reportada como mancante.
Longo la servi rejional de maneja desastres, sinco persones es tratada en ospital per ardes grave, e 15 otras es minor ardeda. La feridas es abitores local e persones ci ia es sur un via prosima a la refineria.
"Nos ia ole prima un odor forte de carburante, tan forte ce mea nas ia dole, e nos ia oia colpas de lampo," un visina ia esplica.
Pertamina ia dise ce on no conose la causa de la focon, ma ce lo ia comensa entre pluve forte e lampo.
En un confere jornaliste, la compania ia clari ce la focon no ia afeta la capasia de prosede de la refineria, e ia espresa la espera ce sua funsiona va deveni denova normal en la sinco dias seguente. La focon ia es focada a la tances de la compleso, sin dana la trateria.
La compania ia dise ance ce lo descomuta tempora la refineria per esamina la flue de petrolio.
Esta compleso, situada en la provinse Djava Ueste a sirca 200 cilometres a este de Jakarta, ave un area de plu ca 340 ectares e pote prosede 125 mil bariles a cada dia.
@T Un focon en un ospital barati bataliante covid
@L aora_oji/2021/un_focon_en_un_ospital_barati_bataliante_covid
====== Un focon en un ospital barati bataliante covid ======
23 april 2021
En Barat, a la min 13 pasientes ia mori pos un focon en la departe de cura intensa de un ospital tratante pasientes de covid prosima a Mumbai.
La arde, cual ia aveni en la temprana de oji, ia es estinguida, e cuatro survivores ia es moveda a ospitales visina.
Esta ia aveni a media de un onda du de infetas matante en la pais. La apico subita de la cuantia de casos ia inonda ospitales, creante un manca grave de osijen, respiradores e letos de cura intensa.
A venerdi, Barat ia rejistra 332 730 casos de coronavirus, la cuantia dial la plu alta de mundo a la dia du en serie. La cuantia de moris dial par covid ia crese recordo, par 2263, en la 24 oras presedente.
La focon ia aveni a la ospital Vijay Vallabh en la rejion Virar de Maharashtra, stato ueste, situada a sirca 70 cilometres a norde de Mumbai.
Lo es ancora nonclar como la arde ia comensa, e la ministro xef de Maharashtra ia comanda un investiga. Narendra Modi, ministro xef de la pais, ia ofre compatia en Twitter, descrivente la aveni como "trajedial".
La cuantia altinte de casos ia produi un crise profondinte de medica cual ia saisi statos plural. Modi va consenta oji con ministros xef de la statos la plu afetada e con fabricores de osijen.
La corte suprema de Barat ia demanda ce la governa sentral deside un scema nasional ante la fini de esta dia, per reforti osijen, medisin, tratas e vasines.
@T Un focon en un prison suprafolida en Indonesia
@L aora_oji/2021/un_focon_en_un_prison_suprafolida_en_indonesia
====== Un focon en un prison suprafolida en Indonesia ======
8 setembre 2021
A la min 41 persones ia mori en Indonesia cuando un focon ia ensende a un prison suprafolida en la anteurbe de la capital Jakarta.
La focon ia comensa en la madrugada oji a la prison de Tangerang, cuando la plu de la prisonidas ia dormi. La ala afetada, Bloco C, ia es abitada par 122 prisonidas, multe plu ca la capasia formal de 40 persones.
Alga persones stranjer, incluinte prisonidas de Portugal e Sudafrica, es entre la vitimes. Yasonna Laoly, ministro indonesian de lege e diretos umana, ia dise a un confere jornaliste ce on ia informa la ambasadas de acel paises.
El ia ajunta ce salas plural en acel ala de la prison ia es securida e on no ia pote abri los cuando la focon ia sperde.
La bloco ia casi persones prisonida contra crimines relatada con drogas. On reporta ce un vitim ia es condenada de omiside, un otra ia es judida como culpable de terorisme, e la otras ia es en prison par causa de crimines pertinente a drogas.
On dise ce plu desuples de persones es ferida, e algas es en cura intensa.
La causa suspetada de la ensende es un sircuito corta, ma un portavose per instituidas coretinte indonesian ia dise ce esta es ancora no confirmada e va es plu investigada.
Sola 15 gardores ia es postida a la prison intera, cual ia conteni 2000 prisonidas, denova un cuantia multe plu alta ca la capasia intendeda de 600. Lo es un problem persistente en prisones indonesian ce los es tro plen.
@T Un fujor zelandes lua un elicotor per sede se
@L aora_oji/2021/un_fujor_zelandes_lua_un_elicotor_per_sede_se
====== Un fujor zelandes lua un elicotor per sede se ======
28 maio 2021
Un om ci ia fuji de la polisia en la campania de Zeland Nova ia lua un elicotor per vola a un polisieria e sede se.
James Bryant, ci fasa acusas de ataca, ia pasa sinco semanas, parente ascondeda, en un vila peti en la rejion Otago Norde.
El ia dise a jornalistes local ce sua tempo ala ia es "eselente", ma ce el vole parti de acel vila "a via de vias".
Arthur Taylor, la avocato de prisonidas ci ia es la ajente per la aresta pasosa, ia dise ce el ia prende Bryant per xampania e ostras en via a la polisieria.
Taylor, un prisonida pasada bon conoseda ci ave aora libria limitada, ia dise a reportores estra la polisieria sentral en Dunedin: "Acel ia es sua bon come prima en semanas plural."
La acusas cual Bryant fasa inclui un ataca armada, un feri intendeda e tre casos de posta comunicas dijital nosiva. La polisia ia averti ja la popla ce el es regardada como perilosa e ce on debe no prosimi a el.
Bryant ia dise ce en sua tempo en Waianakarua el ia fa "multe yoga", ma ultima el ia deside sede se a la polisia car el ia es ansiosa sur la descrive de se como un peril publica.
El ia contata Taylor per demanda ce el organiza un aresta pasosa. La du omes ia conose ja lunlotra, car Bryant ia aida desinia la pajeria web de Taylor.
Bryant mesma ia paia per la elicotor, Taylor ia dise, car "el ia desira emerji en modo stilosa".
Jornales local reporta ce el ia es rapida arestada sin problem a 16:00 de ora local ier.
@T Un furor de banco es identifiada pos un duisentenio
@L aora_oji/2021/un_furor_de_banco_es_identifiada_pos_un_duisentenio
====== Un furor de banco es identifiada pos un duisentenio ======
15 novembre 2021
La fujor su un de la furas la plu malfamosa de banco en la Statos Unida ia es identifiada pos un xerca de 52 anios.
Ted Conrad ia labora como contor a la Banco Nasional de Sosia en Cleveland, Ohio cuando el ia ruba sua empleor en julio 1969. El ia desapare con $215 mil, oji egal a $1,7 milion.
Investigores ia dise ce el ia fa un vive cuieta e umil a pos.
Conrad, ci ia mori en maio par canser de pulmon, ia ave sola 20 anios cuando el ia reali la fura. On reporta ce el ia esplota la securia mediocre de la banco per sorti con la mone en un saco de paper brun cuando la ofisia ia clui a un sera de venerdi.
Cuando, pos du dias, otra empleadas ia nota la desapare de la mone, Conrad ia desapare ance. El ia provoca un xerca cual ia dura tra plu ca un dui de sentenio.
On alega ce el ia informa sua amis sur sua intende de ruba la banco e ia vanta ce lo va es un ata fasil. Lo pare ce el ia es oseseda par la filma La caso de Thomas Crown de 1968 en cual Steve McQueen ave la rol de un rubor de banco. El ia regarda la filma a plu ca des veses en sua propre prepara.
La polisia dise ce, pos sua desapare, Conrad ia cambia sua nom a Thomas Randele e ia fuji a Washington e Los Angeles ante reposa final en un suburbe de Boston a sirca 1000 cilometres de la sena de la crimin. Longo la reportas, tra la 40 anios pasada, el ia labora como un profesal de golf e en un venderia de autos usada.
La caso ia resta nonsolvable tra desenios, ante ce investigores, avisada par la anunsia de la mori de Randele en un jornal, ia pote egali paperes suscriveda par el en la desenio de 1960 con documentos cual "Randele" ia completi plu resente. Ironiosa, esta ia inclui documentos sur la bancaroti de Randele en un corte de Boston en 2014.
Marexal Peter Elliott ia es un de la investigores xef. El ia erita lo de sua padre John, ci ia es dedicada a descovre lo cual ia aveni a la furor: "Mea padre ia sesa nunca xerca Conrad e ia desira sempre clui la caso asta sua mori en 2020."
@T Un gangster es matada en un corte barati
@L aora_oji/2021/un_gangster_es_matada_en_un_corte_barati
====== Un gangster es matada en un corte barati ======
25 setembre 2021
Du omes finjente avocatos ia mata un gangster malfamosa en un sala de justia en Delhi, capital de Barat.
Los ia spara a Jitender Maan Gogi en la juderia en Rohini, do un caso ia es oiada contra el. Ofisiores dise ce la polisia ia contrabatalia, matante la du omes. On suspeta ce un gang competente ia scema la ataca.
Gogi ia es en la lista de la persones la plu xercada par la polisia de Delhi, e ance acusada en otra statos a tema de deses de casos incluinte omiside, secuestra e froda.
La aveni ia leva demandas sur la securia de la cortes de Delhi. Un politiciste major ia dise ce lo mostra un fali grave de projeta la securia.
Gogi ia es arestada en Delhi en marto de la anio pasada, acusada de omiside e estorse.
El ia es un blanco de multe ganges par causa de sua asende rapida tra la mundo criminal. Longo reportas, sua carera de crimines ia comensa cuando el ia es adolesente, inisial envolvente secuestras de autos e otra furas.
Plu tarda, el ia es un suspetada major en multe matas de profil alta, incluinte lo de un cantor popular en la stato Haryana.
@T Un glasia destrui un parario barati
@L aora_oji/2021/un_glasia_destrui_un_parario_barati
====== Un glasia destrui un parario barati ======
8 febrero 2021
En la norde de Barat, a la min 14 persones ia mori e 150 manca pos la cade a un rio de un peso de glasia himalaian. Lo ia causa un inonda jigante cual ia rompe un parario supra un vale en la stato Uttarakhand.
On crede ce la plu de la persones mancante es laborores de du complesos idroeletrical.
Sentos de soldatos e elicotores ia es enviada a la rejion per aida trova survivores. 25 persones es salvada asta aora.
A sirca 11:00 de ora local ier, la avalanxa ia destrui la parario de la Projeta Idroeletrical Rishiganga. Espertas investiga, ma on ancora no sabe clar perce la glasia ia fende.
La colide ia puxa acua longo la rio Dhauli Ganga, danante un plu projeta eletrical a vale en la rejion Tapovan. Un ponte cual ia lia 13 viletas ia colasa ala.
Un atestor ia compara la inonda subita a "un sena de un filma de Bollywood".
On ia susede salva 16 laborores trapida en un tunel longa cual ia deveni plenida con detrito. Asta 40 es probable trapida en un otra tunel simil.
Uttarakhand, en la ueste de Himalaia, es propensada a inondas e liscateras. 6000 persones ia es matada par inondas en junio 2013, causada par un pluve de monson la plu forte de desenios.
La desastre ier ia provoca grupos ambientiste a recomenda un revisa de la projetas eletrical en esta montania ecolojial delicata.
@T Un intervisa xocante con la Duxe e Duxesa de Sussex
@L aora_oji/2021/un_intervisa_xocante_con_la_duxe_e_duxesa_de_sussex
====== Un intervisa xocante con la Duxe e Duxesa de Sussex ======
9 marto 2021
En la Rena Unida, la Palasio Buckingham no ia comenta pos la difusa de un intervisa xocante con la Duxe e Duxesa de Sussex.
Prinse Harry e Meghan ia revela a la intervisor Oprah Winfrey ce ante la nase de sua fio, un membro anonim de la familia reial ia espresa conserna sur la color de la pel de la bebe. La comenta no ia es fada par la Rea o sua sposo la Duxe de Edinburgh.
En sua intervisa, la duple ia discute temas variosa, incluinte razisme, sania mental e sua relatas con jornalistes e otra familianes reial.
La duxesa ia dise ce per el la vive reial ia es tan difisil ce a alga veses el "no ia vole vive plu", e cuando el ia solisita aida per esta de la organiza, el no ia reseta lo.
Meghan -- ci ave 39 anios e es la membro prima de raza miscada en la familia reial brites moderna -- ia ajunta ce el ia ariva a un punto basa cuando un otra familian ia demanda a Harry "como oscur" la pel de sua fio Archie va es. El no ia indica ci ia fa la demanda, respondente: "Me pensa ce acel ta es multe danante a el."
Ance Harry, de 36 anios, no ia dona plu detalias, notante: "Acel conversa, me va comparti nunca lo. Alora, lo ia es embarasante -- me ia es alga xocada." El ia clari ce zero de sua relatadas ia parla suportante Meghan en pertine a la "fondo colonial" de articles en jornales. "Nun de mea familia ia dise cualce cosa tra acel tre anios," el ia dise. "Acel causa dole."
La ministro xef Boris Johnson ia refusa comenta ier, disente ce "el ave sempre un amira la plu alta per la Rea e la rol uninte cual el fa". A la demanda direta esce el crede ce la familia es raziste, el ia responde ce "cuando lo pertine a temas de la familia reial, ministros xef debe dise no cosa".
La intervisa de du oras ia es difusada a soldi en la SUA e en la Rena Unida a la sera de ier.
La duple ia move a California pos resinia formal sua debes reial a un anio ante aora, e en la mense pasada on ia anunsia ce los no va deveni denova membros ativa de la familia reial. En metraje nova publicida, estra la intervisa orijinal difusada, a la demanda esce los ia parti de la Rena Unida par causa de razisme, Harry responde: "Acel ia es un parte grande de la razona."
El ia dise ance ce sua frate William e padre Charles ia es "trapida en la sistem" reial, ma ce el ama forte sua frate e desira remedia sua relata con el e sua padre. La familia ia abandona finansial el a la comensa de la anio pasada, e sua padre ia sesa aseta sua telefonis.
Entretempo, la portavose per presidente esuan Joe Biden ia loda la coraje de cualcun ci parla publica sur sania mental. Jen Psaki, ofisior per jornalisme a la Casa Blanca, ia descrive Harry e Meghan como "sitadanes privata" ci "comparti sua propre raconta en sua propre batalias".
@T Un liscatera destrui casas en Japan
@L aora_oji/2021/un_liscatera_destrui_casas_en_japan
====== Un liscatera destrui casas en Japan ======
3 julio 2021
Sirca 20 persones manca pos un liscatera grande en la site Atami en Japan.
Un deluvia de fango ia desende un colina en esta site a sude-ueste de Tokyo. Alga casas ia es destruida o enterada. Esta segue dias de pluve forte en la rejion.
La pluve ia es plu ca promedia per julio en la prefetia Shizuoka do Atami, un vacanseria de fontes calda, es situada. Ance la prefetia visina Kanagawa ia esperia un cuantia nonusual de pluve.
Un atestor ia dise: "Me ia oia un sona asustante e ia vide un flue de fango desendente en cuando laborores de salva ia urje persones a parti. Donce me ia core a tereno plu alta."
La liscatera ia aveni a 10:30 de ora local, e la polisia, pompores e membros de la militar japanes aida xerca survivores. Yoshihide Suga, ministro xef, asembla un grupo de crise per responde a la desastre.
On ia comanda la evacua de persones abitante en partes de tre prefetias -- Shizuoka, Kanagawa e Chiba -- pos avertis sur inondas en rejiones basa.
Japan es propensada a flues de fango e inondas en sua saison pluvosa. Inondas ia mata deses de persones en julio de la anio pasada, e plu ca 200 ia mori en 2018 cuando partes de Japan ueste ia es deluviada.
@T Un litiga per impedica un ministro pasada dansce
@L aora_oji/2021/un_litiga_per_impedica_un_ministro_pasada_dansce
====== Un litiga per impedica un ministro pasada dansce ======
2 setembre 2021
En Danmarc oji, un litiga monumentin per impedica comensa contra un ministro pasada ci ia pone multe restrinjes a migrores. Inger Støjberg es acusada de comanda nonlegal la separa de duples joven ci ia solisita refuja en 2016.
El fasa un litiga cual acusa el de rompe la lege. Esta es la caso prima per impedica en Danmarc en cuasi tre desenios, e sola la numero du en un sentenio.
De 2015 asta 2019, Støjberg ia servi como ministro dansce de migra en un governa destra-sentriste suportada par la Partito de la Popla Dansce destriste e popliste. En acel periodo, on ia introdui plu ca sento restrinjes nova contra migra.
Anunsias ia es publicida en jornales lubnani per descoraji refujadas, e la regulas sur reunis de familias ia es severida, atraente critica de la ajenteria NU per refujadas.
Pos ajunta 50 tal restrinjes nova, el ia ata controversa par selebra con un torta.
Entre otra medias multe reportada es la confisca de posesedas valuosa de refujadas e un projeta, aora abandonada, per envia criminores stranjer a un isola nonabitada en la Mar Baltica.
La caso per impedica orijina en un comanda cual Støjberg ia fa en febrero 2016 ce refujadas sposida con min ca 18 anios debe no abita con sua spos. Dudes-tre duples sposida, alga con enfantes, ia es separada ante ce on ia cansela la scema pos alga menses.
Un investiga par un comision spesial ia conclui ce la separas ia es nonlegal. La esije ce on evalua o consulta individua la persones afetada ia es iniorada, e diretos umana ia es violeda.
Du avocatos nondependente ia determina ce on ave razonas per impedica e, plu temprana en esta anio, un majoria grande de parlamentores ia vota aprobante, incluinte la propre partito libraliste de Støjberg. El ia resinia como visxef e de la partito.
@T Un mafior es caturada pos posta un video de cosini
@L aora_oji/2021/un_mafior_es_caturada_pos_posta_un_video_de_cosini
====== Un mafior es caturada pos posta un video de cosini ======
30 marto 2021
La desira de un gangster italian per esibi sua capasia de cosini ia prisoni el pos sete anios de fuji.
La polisia italian ia trasa Marc Feren Claude Biart par la videos cosinal cual el ia publici en YouTube. An si el ia asconde sua fas, tatuas sur sua corpo ia resta vidable.
Esta membro alegada de la gang criminal 'Ndrangheta, ci ave 53 anios, ia es arestada en la Republica Dominican a mercurdi de la semana pasada e es aora estradida a Italia.
Biart ia ave un vive cuieta en la vila Boca Chica. El ia es un fujor pos 2014, cuando la polisia ia xerca el par causa de sua contrabanda alegada de cocaina a Nederland per la clan Cacciola de la mafia 'Ndrangheta.
On regarda la 'Ndrangheta como un de la grupos criminal organizada la plu potiosa de mundo, car lo controla la plu de la cocaina cual entra a Europa. Lo ave sua base en Calabria, la rejion de Italia la plu prosima a Sisilia.
La xef alegada de la clan, Luigi Mancuso, ci ave 66 anios, es conoseda como "La Tio". Otra membros ave nometas como "La Lupo", "Grasosa" e "Blonde".
Aora, tota va es judida en la litiga de mafia la plu grande cual Italia ia vide en desenios. 355 persones, sur ci on alega ce los es gangsteres o ofisiores sobornosa, es acusada pos un investiga longa contra la grupo.
En un escuta ante la prosede formal, plu ca tre oras ia es usada per leje la nomes de la litigadas. La acusas inclui omiside, contrabanda de drogas, estorse, e lava de mone.
On previde ce plu ca 900 persones va presenta sua atesta en la litiga, cual ia abri en janero e va dura tra du anios.
@T Un malversa de petrolio sperde en la Mediteraneo
@L aora_oji/2021/un_malversa_de_petrolio_sperde_en_la_mediteraneo
====== Un malversa de petrolio sperde en la Mediteraneo ======
1 setembre 2021
En Cipros, la autoriosas monitori un malversa de petrolio cual ia veni de un sentro eletrical sur la costa mediteranean de Suria e menasa la isola.
La difusores governal de Suria ia dise en la semana pasada ce on ia esperia un gotea nonintendeda de un tance de carburante a la refineria Baniyas.
Imajes de satelite mostra ce la petrolio ia sperde a norde longo la costa suri ante move a ueste, en dirije a Cipros. Modeles ia sujesta ce lo va ateni la Penisola Karpas en la norde, cual es controlada par Turcia.
La ministro xef de la norde ia dise ce on usa tota modos disponable per preveni dana, e ce on reseta aida de Turcia. La governa ciprica ia dise ce lo va furni aida si solisitada.
Suria ia dise ance ce ecipos ia comensa limpi la petrolio de sur partes rocosa de la costa, ajuntante arena per asorbe la sustantia e usante macinas de suca.
Ofisiores suri ia desasentua la estende de la malversa. La xef de la Dirijores de Portos Suri ia dise ce la cuantia de carburante emeteda "no ia es grande".
An tal, la satelite european Sentinel-1 ia mostra ce la petrolio covre cuasi 150 cilometres cuadrida de mar, e ia ateni cuasi la site Latakia.
A lundi, la governa ciprica ia averti ce la malversa ia grandi plu e ia es prosima a Capo Apostolos Andreas. Esta es la punto la plu norde-este de Karpas, a sirca 130 cilometres de Baniyas.
@T Un manada tumultosa ocupa la Capitolio de la SUA
@L aora_oji/2021/un_manada_tumultosa_ocupa_la_capitolio_de_la_sua
====== Un manada tumultosa ocupa la Capitolio de la SUA ======
7 janero 2021
En la SUA, legores ia revade a la Capitolio per fini validi la vinse presidental de Joe Biden, a poca oras pos cuando suportores de Donald Trump ia ataca violente la construida en un tumulta do cuatro persones ia mori.
La manada ia entra a la construida, suspendente un sesion de Congresa. Joe Biden, presidente elejeda, ia condena forte la "revolta".
Donald Trump, ci ia urje la protestores a marxa contra la Capitolio, ia recomenda plu tarda ce los "vade a casa", an en cuando el ia continua fa alegas falsa sur manipula de votas. Twitter e Facebook ia suspende tempora sua conta.
En la sera, vispresidente Mike Pence ia inisia la sesion recomensada, do la legores conta e confirma formal la votas elejente, descrivente la aveni como "un dia oscur en la istoria de la Capitolio de la Statos Unida".
Alga republicistes leva oposas en la sesion per atenta reversa la resulta, ma lo es cuasi tota nonprobable ce los va susede.
La caos a martedi ia segue pos la vinse de du senatores democrata en elejes en Georgia, cual ia dona a sua partito la controla political de la Congresa.
Protestores ia surje per asende la scalera estra la Capitolio a sirca 14:15 de ora local, puxante a via paradores e polisiores antitumultal per penetra la construida.
Congresores ia asconde su sua sejas cuando on ia xuta gas lacrimojen. La atacores, de ci alga ia porta armur, ia usa iritantes cimical contra la polisia. Los ia cria e ia brandi banderas de Trump e de la SUA en vaga tra la coredores, esijente ce on reversa la resulta de la eleje.
Un fem ia es fusilida par la polisia, e tre otras ia mori par causa de urjentes medical.
Miles de soldatos de la Garda Nasional e ajentes de la FBI e de la Ajenteria Secreta ia es postida per aida la polisia inondada. On ia trova du bombas tubo en construidas prosima, la un en la ofisias de la Comite Nasional Democrata, e la otra en la xeferia de la Comite Nasional Republiciste.
La ocupa de la Capitolio ia dura tra plu ca tre oras ante cuando la enforsores de lege ia securi lo. On ia vide poca indicas ce la protestores obedi la recomenda par Trump ce los vade a casa, an con un proibi de sorti declarada par la maior de Washington de 18:00 asta 06:00.
Biden ia dise ce democratia es "su ataca sin presedente". "Ce on ataca la Capitolio, rompe fenetras, ocupa ofisias sur la solo de la Senato de la Statos Unida, foraje en buros en la Salon Basa, menasa la securia de ofisiores coreta elejeda -- lo no es un protesta; lo es un revolta."
@T Un microtelia plu potiosa par min enerjia
@L aora_oji/2021/un_microtelia_plu_potiosa_par_min_enerjia
====== Un microtelia plu potiosa par min enerjia ======
7 maio 2021
IBM dise ce lo ia fa un avansa grande en prosedadores per computadores par crea un microtelia de 2 nanometres en un laboreria en la SUA.
On mesura la tecnolojia usada per fabrica microtelias en nanometres, e un numero plu basa indica un progresa.
La compania dise ce sua microtelia nova pote aselera computadores par 45% a lado de la produidas de 7 nanometres aora comersial disponable. Esta usa ance min enerjia, reduida par 75%, per ateni mera la rapidia de prosedadores corente.
IBM sujesta ce esta tecnolojia es capas de cuatrupli la vive de un pila de telefoneta, tal ce on va nesesa cisa recarga la pila a sola cada dia cuatro.
En la pasada, la industria de microtelias ia usa nanometres (milionis de un milimetre) per mesura la grandia fisical de transistores. Oji, la cuantia "nm" es usada como un terma mercatiste per descrive la jeneras progresante de la tecnolojia.
La compania esplica ce sua prosede de 2nm pote pone 50 mil milion transistores sur un microtelia con grandia de un ungia de dito. Cuando lo ia revela sua ateni de 5nm en 2017, la cuantia corespondente ia es 30 mil milion.
Esta anunsia ia es fada entre un manca internasional de microtelias e un atenta de reorganiza la fabrica per depende min de fonderias major en Xina e Taiwan.
Par causa de esta manca, fabricores de autos ia es obligada a pausa la produi; creores de telefonetas ia averti sur retardas; e composantes como cartas grafica ia deveni tan difisil per trova ce on vende los a custa alta.
@T Un multa major per un tance en la casa de un jubilor
@L aora_oji/2021/un_multa_major_per_un_tance_en_la_casa_de_un_jubilor
====== Un multa major per un tance en la casa de un jubilor ======
4 agosto 2021
Un jubilor en Deutxland ia es condenada de posese nonlegal de multe armas, incluinte un tance.
La acusada, ci ave 84 anios, ia reseta un puni suspendeda de 14 menses en prison e ia es comandada a paia un multa de €250 mil.
Ofisiores ia trova la tance e otra aparatos militar de la eda de la Gera Mundal Du a la casa de esta jubilor mas en la vila Heikendorf en la norde de la pais en 2015. La armada ia debe aida prende los a via.
A lundi, la corte ia comanda ce la om (ci no pote es nomida su leges deutx de privatia) debe vende o dona la tance e un canon antiavional a un museo o colior en la du anios veninte.
Longo la avocato de la jubilor, un museo en la SUA ia mostra un interesa per compra la tance Pantera. Multe istoristes esuan argumenta ce lo ia es la plu eficas de tal veculos usada par Deutxland en la Gera Mundal Du.
La avocato ia nota ance ce alga coliores deutx ia contata la acusada en relata con otra ojetos, incluinte fusiles de ataca e pistoles.
Autoriosas local ia invade la casa en 2015 pos es avisada sur sua contenidas par colaborores en Berlin ci ia esplora ja la construida per xerca arte nazi furada.
Sirca 20 soldatos ia spende cuasi nove oras per estrae la tance, de cual sua banda erugin ia manca. On reporta ce la om ia usa lo como un scopineva en un inverno.
@T Un nota veni de escavores xines trapida
@L aora_oji/2021/un_nota_veni_de_escavores_xines_trapida
====== Un nota veni de escavores xines trapida ======
18 janero 2021
En Xina, 12 escavores es ancora vivente pos deveni trapida su tera par un esplode en un mineria de oro.
La laborores ia susede envia un nota a la ecipo salvante a sete dias pos la asidente. La fortuna de des otra escavores ci manca pos la esplode resta nonclar.
Asidentes en minerias xines no es rara. Los es comun causada par regulas de securia mal enforsada.
La 22 ia es trapida a la mineria Hushan prosima a Yantai en la provinse Shandong en Xina este a 10 janero, cuando un esplode ia dana la sorti e la sistem de comunica. La mineria ia es ancora en curso de deveni construida.
Como reportada par jornalisme governal, la salvores ia susede contata alga de la escavores tra un duto streta.
Pos sensa tiras a cordones cual los ia basi a su la tera, la ecipo ia envia comedas, medisin, paper e lapises a en la buco.
Longo un nota retraeda de la duto, 12 persones vive en la parte media de la escaveria, ma on no sabe la state de la otra des.
On reporta ce on fora ance alga otra posos de salva, esperante ce la laborores pote es evacuada. On crede ce los es situada a sirca 600 metres de la entra.
En desembre de la anio pasada, 23 escavores ia mori en Xina pos un gotea de monosido de carbono a un escaveria de carbon.
16 laborores ia es matada en setembre a un otra escaveria en la anteurbe de Chongqing cuando un banda transportante ia arde, produinte un cuantia grande de monosido de carbono.
E en desembre 2019, un esplode a un mineria de carbon en la provinse Guizhou en Xina sude-ueste ia mata a la min 14 persones.
@T Un note tre de tumultas en Nederland
@L aora_oji/2021/un_note_tre_de_tumultas_en_nederland
====== Un note tre de tumultas en Nederland ======
26 janero 2021
En Nederland, la polisia ia batalia denova protestores defiante un proibi de sorti, pos un finisemana de tumultas. Sirca 250 persones ia es arestada.
La polisia en Rotterdam ia spara avertinte e ia usa gas lacrimojen pos un comanda de crise par la maior.
Mark Rutte, ministro xef, ia condena lo cual el ia descrive como "violentia criminal". "Lo es nonasetable. Tota persones normal va regarda esta con xoca."
La turba ia comensa en la finisemana cuando protestores ia oposa restrinjes nova ajuntada contra covid. La pais ia ave cuasi milion casos confirmada de la maladia pos la comensa de la pandemica, e plu ca 13 500 persones ia mori de lo.
On ia vide plu senas violente en alga sites tra la pais ier. Polisiores antitumultal ia batalia protestores en Amsterdam, Rotterdam, Amersfoort e Geleen.
Focos ia es ensendeda sur la stradas de Den Haag, do polisiores sur bisicles ia atenta move grupos peti de omes ci ia lansa petras e pirotecnicales.
La polisia ia fa alga arestas en Amsterdam pos reportas de plu destrui ala. En Rotterdam, la polisia ia usa canones de acua per combate la tumultores.
Fanes de la club de futbal Willem 2 ia vade sur la stradas de Tilburg per "proteje sua site" contra la tumultas. E a la sera de soldi, un sentro de probas per covid ia es ensendeda en Urk, un vileta norde.
La violentia ier ia es descriveda par la polisia nederlandes como la plu turbante de cuatro desenios.
La governa nederlandes ia introdui sua metodos la plu sever pos la comensa de la pandemica, incluinte un proibi de sorti entre 21:00 e 04:30. Esta es la tal proibi prima en Nederland pos la Gera Mundal Du. Cualcun ci iniora lo debe paia un multa de €95.
La bares e restorantes de la pais es ja cluida de otobre, e scolas e botecas nonesensal ia clui en desembre. On ia proibi volas de la Rena Unida, Sudafrica e America Sude entre temes sur varias nova de la virus.
@T Un note violente en Ieruxalim Este
@L aora_oji/2021/un_note_violente_en_ieruxalim_este
====== Un note violente en Ieruxalim Este ======
24 april 2021
Plu ca sento persones ia es ferida par violentia en Ieruxalim Este entre ativistes iudi estrema destriste, filastinis e polisiores israeli.
La situa ia comensa cuando la polisia ia atenta separa filastinis e protestores nasionaliste iudi. Esta ia segue alga notes de frontis en la setor israeli ocupada, a media de un tensa cresente nasionaliste e relijial.
Ieruxalim Este es ja longa un punto calda, con iudis e arabis en un coesiste noncuieta.
Israel ocupa Ieruxalim Este pos la gera arabi-israeli de 1967 e regarda la site intera como sua capital, an si la majoria grande de la comunia internasional no reconose esta. Filastinis reclama Ieruxalim Este como la capital futur de sua stato autonom esperada.
La combate la plu grave de multe dias ia eruta en la sera de jovedi cuando sentos de estremistes iudi de Lehava, un organiza ultranasionaliste, ia prosegue, scandente "mori per arabis", en dirije a la Porton Dimashq de la Site Vea, do multe filastinis ia asembla.
La du lados ia lansa petras e botelas a lunlotra, e la polisia ia usa granadas aturdinte, gas lacrimojen e canones de acua per atenta desgrupi la fola.
La Cresente Roja filastini ia dise ce a la min 100 filastinis ia reseta feris, e la polisia ia reporta 20 ofisiores ferida. Plu ca 50 persones ia es arestada.
La tensa en Ieruxalim Este ia intensi pos la comensa de ramadan a 13 april. Filastinis ia scaramuxa contra polisiores, acusante los de erije paradores per preveni sua asembla per dejuna sur la grados estra la Porton Dimashq. La polisia dise ce los vole aida la flue de paseores a en la Site Vea.
Iudis es ance colerida par un serie de videos en TikTok cual mostra filastinis atacante membros de la comunia ultraortodox, incluinte un ataca contra du xicos en un tram. La videos ia es sitada par Lehava como un razona per sua marxa asta la Porton Dimashq en lo cual lo ia descrive como un esibi de "onora nasional".
Ance iudis ia ataca arabis en Ieruxalim en esta semana, incluinte un aveni en cual jovenes iudi scandente sloganes antiarabi ia ataca un motoriste arabi ci ia para per espresa sua desaproba.
@T Un obra de grafiti es manxada par visitores
@L aora_oji/2021/un_obra_de_grafiti_es_manxada_par_visitores
====== Un obra de grafiti es manxada par visitores ======
4 april 2021
En Corea Sude, un obra de grafiti en un esibi ia es danada par un duple ci ia crede ce la brosas e pinta presentada ante la arte ia es per usa par visitores.
Kang Wook, xef de la esibi en la sentro comersial Lotte World Mall, ia comenta: "Los ia pensa ce on permete fa esta como en un arte partisipable, e los ia era."
Pos cuando empleadas ia vide marcas fresca de brosa, la metraje de un camera vijilante ia identifia la vandales nonintendente, un om e fem en sua desenio tre.
On estima ce la obra nontitulida ave la valua de sirca 500 milion dolares esuan. Lo ia es depintida par JonOne, un artiste de la SUA, ante un publica en Seoul en 2016.
Lo es ja mostrada a esiberias diversa, como ance la pinta e brosas usada per crea lo, cual on regarda como partes esensal de esta obra.
Kang ia dise: "Nos fa presente discutes con la artiste sur esce on va restora lo."
La polisia ia trova e interoga la duple a la galeria. Organizores ia deside no fa un acusa formal, e la du persones ia es librida.
La aveni ia provoca la galeria a ajunta un serca peti ante la grafiti e plu avisas con la comanda "No Toca".
@T Un om con covid desembla como sua sposa
@L aora_oji/2021/un_om_con_covid_desembla_como_sua_sposa
====== Un om con covid desembla como sua sposa ======
23 julio 2021
En Indonesia, un om con analise positiva de covid ia desembla como sua sposa per embarca un avion, ma on ia deteta el a media de la vola.
La om, identifiada par sola sua inisiales, DW, ia covre sua fas par porta un nicab. El ia usa ance la pasaporto de sua sposa e sua resulta negativa de covid.
Cisa el no ta es caturada si el no ta adota sua vestes normal cuando la vola interna ia es en la aira. Un ospitor ia nota e reporta la difere.
La om ia es detenida par polisiores pos la atera de la avion, e analiseda sin pausa. Cuando on ia descovre ce el ave la virus, on ia comanda el a isoli se en sua casa. La polisia dise ce el va es litigada pos acel periodo.
Esta ia aveni su restrinjes sever contra viaja en Indonesia, cual ia deveni rapida la punto sentral de coronavirus en Asia. La nasion rejistra cuasi 50 mil casos nova per dia.
En semanas resente, sua ospitales ia es inondada par un enflue de pasientes e ia sufri su un manca de recursos, incluinte osijen. Cuasi tre milion persones ia es infetada e plu ca 72 mil ia mori.
Como razonas per la sperde continuante de la virus tra Indonesia, on sita comun la furni lenta de vasines e ia apare de la varia delta, cual es multe comunicable.
La plu airocompanias ia restrinje viajas en la festa Eid al-Adha cual ia comensa a 19 julio.
@T Un oposa a la aspira presidental de Gaddafi
@L aora_oji/2021/un_oposa_a_la_aspira_presidental_de_gaddafi
====== Un oposa a la aspira presidental de Gaddafi ======
16 novembre 2021
La avocato acusante militar de Libia, Mohamed Gharouda, ia demanda ce la comision elejal sesa prosede documentos per la aspira presidental de Saif al-Islam Gaddafi, fio de Muammar Gaddafi, renor pasada de la pais.
El ia demanda ance ce on suspende la prosede de documentos per la comandor militar Khalifa Haftar, ci aspira egal deveni la presidente.
La comision elejal ia dise a soldi ce Gaddafi ia presenta la paperes nesesada per un aspiror en la elejes presidental cual va aveni en desembre. Ma en un letera a la comision, Gharouda ia averti ce on va regarda la comision como encargada de la efetos resultante si on no para labora sur esta documentos.
"Saif al-Islam e Khalifa Haftar ia es acusada de atas criminal," la letera dise, e sua aspiras presidental "debe es parada asta cuando la investiga es completida".
La rejistra de la aspira de Gaddafi, an si espetada, ia xoca persones en Libia e otra paises par causa de sua rol en la medias violente usada per supresa la revolta contra la rena de sua padre. El es ancora xercada par la Corte Criminal Internasional en relata con acusas de crimines de gera fada en 2011.
Haftar, ci comanda fortes militar en la este de Libia, es xercada par un corte esuan car on alega ce el ia tortura libis en la gera.
@T Un ospital colasa pos un trematera en Indonesia
@L aora_oji/2021/un_ospital_colasa_pos_un_trematera_en_indonesia
====== Un ospital colasa pos un trematera en Indonesia ======
15 janero 2021
En Indonesia, laborores de salva xerca tra la detrito de un ospital partal colasada pos un trematera sur la isola Sulauesi. A la min 30 persones ia mori.
La trema de grado 6,2 a esta matina ia segue a poca oras pos un otra plu peti. Sentos de persones ia es ferida e miles ia es deslocada.
Jornales local reporta ce ses pasientes e sua familias ia es trapida cuando partes de la ospital Mitra Manakarra en la vila Mamuju ia colasa.
Tremas ia es esperiada tra sirca sete secondos a sirca 01:00 de ora local oji.
On ia dona no averti de tsunami, ma miles de persones ia fuji de sua casas a locas plu secur. La autoriosas indica ce replicas forte pote segue la du tremas major e ce on ave ancora un risca ce estas va causa un tsunami.
La construidas grave danada inclui casas, du oteles, la ofisia de la governor e un sentro comersial.
Indonesia es propensada a tremateras car lo es situada a la Sintur de Foco, un zona de multe tremas e erutas volcanal a la borda de la Mar Pasifica.
@T Un parlamentor brites es matada par un teroriste
@L aora_oji/2021/un_parlamentor_brites_es_matada_par_un_teroriste
====== Un parlamentor brites es matada par un teroriste ======
16 otobre 2021
En England, Sir David Amess, parlamentor conservaliste, ia mori pos es cotelida en un sesion conselante a abitores de sua distrito de la pais.
A mediadia ier, la polisia ia es clamada a la eglesa do la sesion periodal ia aveni como normal, e ia trova Amess con multe feris. El ia es tratada par paramedicistes ma ia mori ala.
Un om brites de 25 anios ia es arestada su suspeta de omiside pos la ariva de la polisiores, e un cotel ia es confiscada. La om es un sitadan de la Rena Unida ci pare ave asendentes somali.
El es aora tenida a un polisieria en la contia Essex en la sude-este de la pais, do la ataca ia aveni. La polisia ia dise ce no otra person es xercada.
La ataca es tratada como un caso de terorisme. La investiga es gidada par ofisiores de la Corpo Antiteroriste de la Polisia Urban de London, sur ci on reporta ce los ia descovre ja "un motiva posible liada a estremisme islamiste".
La polisia crede ce la om ia ata solitar, ma la investiga continua.
La ataca ia provoca xoca e repulsa entre la abitores de la distrito, do Amess ia es un figur vidable e bon conoseda, e de parlamentores, gidores relijial e otra persones.
Amess ia ave 69 anios e ia es un de la parlamentores brites la plu longa servinte, prima elejeda en 1983. Eurosetica, el ia suporta Brexit en la referendo de 2016. El ia promove sur sania, povria e la bonstate de animales.
@T Un paseor alpan survive sete notes su sielo
@L aora_oji/2021/un_paseor_alpan_survive_sete_notes_su_sielo
====== Un paseor alpan survive sete notes su sielo ======
21 febrero 2021
Un om ci ia fa un pasea longa con sua can en la Alpes italian ia survive sete notes jelin su sielo, trapida pos cade e rompe sua talo.
A jovedi, salvores en un elicotor ia persepi la om reclinante prosima a un rieta en la montania a norde de Udine en la norde-este de Italia. El ia es covreda par folias, ma sua covreleto de aluminio ia es prosima e vidable.
La om, ci ave 33 anios e veni de la site Trieste, ia es fame e side, ma ia dise ce sua can "ia aida me a survive". On ia trova el a altia de cuasi 700 metres.
El ia es en un parte de la Vale Venzonassa cual es nonasedable par telefoneta. El ia tira se a un rieta, do el ia pote bevi alga acua. Cuando on ia trova el, el ia es consensa ma grave contusada.
Sua xica de cor ia avisa la servi de salva de montania e cavas de Friuli a mercurdi, car el ia espeta ce la om va reveni a lundi. La om ia fa paseas simil en anios pasada, reposante en cabanas montanial o su protejes tempora.
Ash, sua can de raza miscada, ia resta con el, e sua acompania ia aida la om a survive, el dise. Aora Ash es curada par la laborores salvante, en cuando la om recovre en ospital pos sua malesperia.
@T Un paseor es matada par un patineta motorida en Paris
@L aora_oji/2021/un_paseor_es_matada_par_un_patineta_motorida_en_paris
====== Un paseor es matada par un patineta motorida en Paris ======
20 junio 2021
La polisia franses xerca du femes pos la mori de un paseor colpada par un patineta eletrical en Paris.
La vitim ia es un sitadan italian de 31 anios. El ia pasea longo la rio Seine en la temprana de lundi la veculo ia colide con el.
On reporta ce la femes ia viaja rapida e no ia para pos la asidente. La ofisia de la acusor publica ia abri un investiga sur omiside malida par la fali de aida.
La vitim, nomida Miriam, ia pasea con un ami. Sua testa ia colpa la troteria e el ia sufri un para cardial. Sumerjores de la polisia patruliante la rio ia fa un trata medical urjente a a el, e ia susede recomensa sua cor pos 30 minutos.
On ia prende el nonconsensa a ospital, do el ia resta en coma asta sua mori a mercurdi. Orijinal de la rejion Capalbio en Toscana, el ia labora como servor en un restorante peti italian.
La asidente ia aveni a 01:00 sur la Via Georges-Pompidou a la riva destra, prosima a la Pont au Cambia. La polisia ia apela per atestores e esamina metraje de cameras vijilante la loca.
Esta caso ia renovi la debate sur patinetas eletrical en Paris, do on ia teme sur la securia de paseores. Tal veculos pote viaja a plu ca 50 cilometres per ora e deveni plu popular, partal car los no contamina la ambiente.
En 2019, la governa franses ia introdui regulas nova pos sentos de asidentes, incluinte alga moris. Usores debe ave a la min 12 anios e es proibida de gida sua patineta sur troterias.
@T Un politiciste ascondeda en Miama promete un revolui
@L aora_oji/2021/un_politiciste_ascondeda_en_miama_promete_un_revolui
====== Un politiciste ascondeda en Miama promete un revolui ======
14 marto 2021
La gidor de un grupo de politicistes miama desponeda par un colpa militar ia promete continua un "revolui" contra la autoriosas nova.
En sua parla publica prima, Mahn Win Khaing Than ia dise: "Esta es la momento la plu oscur de la nasion e la momento cuando la leva de sol es prosima." De un loca ascondeda, el gida un grupo de legores ci refusa aseta la colpa.
On reporta ce 12 protestores ia es matada ier.
Multe protestas sur strada ia aveni en Miama pos cuando la militar ia saisi controla a la prima de febrero e ia deteni Aung San Suu Kyi, xef de la Alia Nasional per Democratia, la partito cual ia vinse inondante en la eleje de 2020. La militar ia dise ce la votas ia es manipulada.
Parlamentores de acel partito cual ia susede evita es arestada ia formi un organiza nova, la Comite Representante Pyidaungsu Hluttaw (CRPH). Pyidaungsu Hluttaw ("Asembla de la Uni") es la nom de la parlamento miama.
Mahn Win Khaing Than ia es asiniada como vispresidente tempora. La CRPH vole es reconoseda como la governa par direto.
Parlante en Facebook, Mahn Win Khaing Than ia dise: "Esta es la tempo cuando nosa sitadanes debe proba sua resiste contra la momentos oscur. Per formi un democratia federal, cual tota frates etnical ci ia sufri ja tipos diversa de opresa de la tirania tra desenios ia desira vera, esta revolui es la turno per cual nos pote combina nosa laboras. An con nosa diferes pasada, esta es la tempo cuando nos debe junta forte nosa manos per fini la tirania per sempre."
La militar regarda la CRPH como un grupo nonlegal, e averti ce cualcun ci coopera con lo va es acusada de tradi.
@T Un prete elinica ataca bispos par asida
@L aora_oji/2021/un_prete_elinica_ataca_bispos_par_asida
====== Un prete elinica ataca bispos par asida ======
24 junio 2021
En Atina, un prete ia es arestada pos lansa asida a sete bispos de la Eglesa Ortodox Elinica.
La ataca ia aveni en un escuta disiplinal contra la prete de 36 anios en la posmedia de mercurdi. Tre bispos es tratada en ospital en relata a la ardedas, cual es xef sur sua fases.
Ance un polisior ci ia core per aida los, e un gardor ci ia susede catura la prete a la porte, ia es ospitalida.
On reporta ce la suspetada, un prete ci ia risca ja deveni espulsada de la eglesa, ia es acusada de partisipa en contrabanda de drogas.
La bispos ia consenta per discute despreti el pos cuando, longo jornales local, on ia descovre ce el posese 1,8 grames de cocaina en junio 2018.
La prete ia porta un "botela grande de licuida corodente" a la sesion en la Monceria Petraki en la sentro de Atina, como reportada en la jornal Ta Nea.
La ministro de sania ia visita la vitimes en ospital e ia dise ce un de los va es transfereda per sirurjia plastica.
Katerina Sakellaropoulou, presidente de Elas, ia condena la ataca, e la ministro xef Kyriakos Mitsotakis ia parla a la gidor de la Eglesa Elinica, Ieronymos 2, la Arcibispo de Atina e Tota Elas.
Mitsotakis ia dise ce el es "profonda triste" e ia confirma a la bispo ce "la stato va ofre tota aida medical posible per la recovre rapida de la vitimes".
@T Un saisi recordo de cocaina en Hamburg e Antwerpen
@L aora_oji/2021/un_saisi_recordo_de_cocaina_en_hamburg_e_antwerpen
====== Un saisi recordo de cocaina en Hamburg e Antwerpen ======
25 febrero 2021
La duanas de Deutxland e Beljia ia saisi un cuantia recordo de cocaina, plu ca 23 tones, destinada per Nederland.
Ofisiores deutx ia descovre 16 tones en sinco contenadores cual ia ariva par barcon en Hamburg de Paraguai en la plu temprana de esta mense. Los ia avisa la polisia nederlandes, e 7,2 plu tones ia es saisida a la porto beljes Antwerpen.
La polisia nederlandes ia dise ier ce un om de 28 anios, suspetada sur envolve en la contrabanda de la droga, ia es arestada en Nederland. La cocaina ia ta ave un valua de biliones de euros a la mercato negra.
En Antwerpen, la cocaina ia es ascondeda en un contenador plenida con blocos de lenio de Panama. Lo trovada en Hamburg ia es en botes de pasta de jeso cual ia entra a Europa sur un portacontenador de Paraguai.
La duanores ia deside esamina plu prosima la contenadores paraguaia pos nota "nonormales clar" a alga de la botes contenida. "Ultra un strato de benes vera, pacida direta pos la porte de la contenador, multe botes ia es plenida en fato con otra benes," los ia dise.
Investigores ia comanda la descarga de la contenadores, e ia trova cocaina ascondeda en plu ca 1700 de la botes.
"Esta es la cuantia la plu grande de cocaina saisida a cualce tempo en Europa, e un de la saisis unuple la plu grande de mundo," la duana deutx ia comenta, referente sola a la ativia en Hamburg.
Hamburg, en Deutxland norde, es la porto tre de la plu grandes en Europa, e la plu grande en Deutxland.
Paraguai es ja tra anios un pais major de contrabanda drogas. Ganges potiosa de Brasil, como Comanda Prima de la Capital, ia crese, traversante la frontera a Paraguai, do los dirije aora multe de la operas de contrabanda.
La drogas es comun barconida en contenadores de Paraguai a sites de porto en Europa. En la anio pasada, sirca 102 tones de cocaina ia es intersepida en via ala. Cocaina de puria alta es comun diluida par ajunta sustantias diversa per aumenta la profita pos vende lo sur strada.
@T Un sculta de Cristo va es plu alta ca lo en Rio
@L aora_oji/2021/un_sculta_de_cristo_va_es_plu_alta_ca_lo_en_rio
====== Un sculta de Cristo va es plu alta ca lo en Rio ======
12 april 2021
Un sculta nova de Jesus cual on construi en Brasil va es plu alta ca la sculta famosa Cristo la Salvor en Rio de Janeiro.
Cristo la Protejor en la site sude Encantado va ave con sua pedestal 43 metres de altia, tal ce lo va es la sculta tre de la plu altas de Jesus en la mundo.
En la semana pasada, la testa e brasos estendeda ia es ajuntada a la strutur, cual on ia comensa construi en 2019.
La idea ia veni de Adroaldo Conzatti, politiciste local, ci ia mori de covid en marto.
On espeta ce esta projeta, con custa de 350 mil dolares, va es completida en la parte plu tarda de la anio, longo sua organizores, la Asosia de la Amis de Cristo. Lo es finansiada usante donas par individuas e companias.
La sculta es larga de 36 metres entre la du manos. Un asendador interna va leva turistes a un punto de vista en la peto, con altia de 40 metres.
Plu alta es sola la sculta Jesus Buntu Burake sur Sulauesi en Indonesia, cual ave 52,55 metres de altia con sua pedestal, e Cristo la Re en Świebodzin en Polsca, con 52,5 metres. Cristo la Salvor en Rio ave sola 38 metres.
An tal, la mundo conteni deses de otra scultas plu alta, incluinte alga de la virjin Maria e multe de la Buda.
@T Un sculta franses de un sclavo es raziste atacada
@L aora_oji/2021/un_sculta_franses_de_un_sclavo_es_raziste_atacada
====== Un sculta franses de un sclavo es raziste atacada ======
14 setembre 2021
En Frans, un sculta de un sclavo fema negra en la site Bordeaux ia es covreda par pinta blanca, parente en ataca raziste.
La sculta de bronze es de Modeste Testas, un sclavo african ci ia es comprada par un familia en Bordeaux en la sentenio 18. El ia es librida a pos.
On ia trova la sculta manxada a la matina ier, ma aora on ia limpi lo. La ofisia de la site ia dise ce lo va rejistra un cexa criminal, descrivente la aveni como de tipo "probable raziste".
Testas ia es enviada a la isola Ispaniola en la Caribe per labora sur un cultiveria de zucar. Plu tarda, el ia es moveda a la Statos Unida, do el ia es librida pos la mori de sua posesor franses.
El ia revade a la parte ueste de Ispaniola, aora Aiti, e ia mori con 105 anios.
La sculta de Testas ia es inaugurada en 2019. Lo es un de un serie de atas intendeda per trata la pasada colonial de Bordeaux, cual ia es un de la sentros major de comersia de sclavos en Frans.
Stéphane Gomot, consilior con encarga de la erita, museos, arceolojia e memoria, ia dise ce si on confirma razisme como la intende, lo va constitui un "ataca multe violente contra tota cual esta sculta representa", incluinte "la memoria de persones deportada par traficores de sclavos".
@T Un scultor zambian juna contra la sutrae de sua obra
@L aora_oji/2021/un_scultor_zambian_juna_contra_la_sutrae_de_sua_obra
====== Un scultor zambian juna contra la sutrae de sua obra ======
18 febrero 2021
Un scultor zambian fa un juna political per un dia car sua sculta, intendeda per atrae atende contra xasa nonlegal e destrui ambiental, ia es desconstruida par laborores de via.
Alexis Phiri es la coordinor de Kachere, studio de arte, e ia es un membro de la ecipo ci ia erije un sculta jigante de un rinosero a nove anios ante aora en Longacres, rejion de la capital Lusaka.
La sculta ia es composada de plasticas per averti contra la usa de materia nonbiodegradable. Ma pos laboras per largi stradas en Lusaka, la sculta, spetaculin a ves pasada, es desradisida e manxada.
Phiri dise ce el va juna oji de lus prima asta reposa de sol per protesta e "ance per rejistra mea desplase afin la enfantes pote vide la importa de nosa ambiente e spesies perilida".
El ia comenta ce la rinosero ia ajunta belia a la site. El apela a la maior per interveni per restora la sculta a sua forma orijinal e, si nesesada, move lo a un otra loca afin lo pote continua envia sua mesaje.
Boyd Chibale, un otra artiste ci ia visita la loca do la rinosero ia sta, ia dise ce destrui tal la sculta es un descura de tipo la plu mal, un manca de respeta per la artes e un manca de reconose de la simbolisme en la distribui de informa.
@T Un secia sever en Taiuan e un telefoneta reganiada
@L aora_oji/2021/un_secia_sever_en_taiuan_e_un_telefoneta_reganiada
====== Un secia sever en Taiuan e un telefoneta reganiada ======
9 april 2021
En Taiuan, la secia la plu sever en 56 anios ia sutrae tota la acua de un lago famosa, ma esta ia furni un bon resulta per un person.
Un om, con nom familial Chen, dise ce el ia cade sua telefoneta a un anio ante aora, cuando el ia ajena sur un plance de surfa en la Lago Sol-Luna.
Ma en la semana pasada, un laboror ia contata el per dise ce on ia trova la telefon, con sua caxa covreda su fango secida. Chen ia dise ce el ia es tan stimulada ce el no ia pote dormi. El ia ajunta ce la telefoneta funsiona ancora, par causa de sua covrente nonpermeable.
Sua esperia positiva es rara sur la isola Taiuan, do on usa metodos como rasiona de acua en esta periodo estrema seca. La clima afeta ance la industria taiuan de semicondutadores, la plu grande de mundo.
La nivel de acua a la Lago Sol-Luna es la plu basa en plu ca un dui de sentenio. Multe persones en dias resente ia posta selfis a esta loca turiste popular, do la tera ia seci tan multe ce la fango ia fesuri en alga partes. En otra partes, plantas ia crese sur la fondo de la lago, donante un aspeta de un plano erbosa.
Esta periodo seca segue pos cuando no siclones ia ateni Taiuan en la anio pasada. Usual, siclones porta pluve abondante a la isola.
Ofisiores es obligada a enforsa un sistem de rasiona acua, afetante plu ca milion casas e comersias en la sites Taichung, Miaoli e Changhua. En dias restrinjeda, capelerias no pote usa xampu e gasolinerias no pote ofre lava autos.
Persones ia fa fotos ance de la fondo esposada de la rio Touqian, un fonte importante de acua per la Parce Siensal de Hsinchu, do companias major de semicondutador ave sua base.
On previde ce la manca de acua en Taiuan va afeta la setor de la economia cual fabrica microtelias, un prosede cual usa multe acua. Esta va mali la manca global de la semicondutadores usada en tota computadores e telefones astuta.
@T Un siberataca afeta la distribui de petrolio esuan
@L aora_oji/2021/un_siberataca_afeta_la_distribui_de_petrolio_esuan
====== Un siberataca afeta la distribui de petrolio esuan ======
10 maio 2021
La governa de la SUA ia aproba regulas de crise ier pos cuando la tubon la plu grande de carburante en la pais ia es afetada par un siberataca de rescata.
La Tubon Colonial porta 2,5 milion bariles per dia, o 45% de la furni de gasolio, gasolina e carburante de avion a la costa este de la SUA. A venerdi, un gang criminal ia descomuta completa lo.
La state de crise permete tempora ce on transporta carburante par strada, en 18 statos.
Espertas dise ce la custa de petrolio va alti par probable 2--3% oji, ma la efeto va es multe plu grave si la situa continua longa.
Comersiores de contratas futur de petrolio luta per sasia la desira de compra, en un tempo cuando la reservas esuan diminui e la nesesa de carburantes de veculo crese en ce consumores revade a la vias e la economia de la pais atenta emerji pos la pandemica.
Su la permete tempora donada par la Departe de Transporta on pote move produidas de petrolio en tancadores a New York, ma esta no va sufisi per egali la capasia de la tubon.
Fontes diversa ia confirma ce la siberataca ia es causada par un gang criminal nomida DarkSide, ci ia infiltra la rede de la tubon a jovedi e ia saisi cuasi 100 gigabaites de datos.
A la dia seguente, la piratas ia sifri la informa en alga computadores e servadores, esijente un rescata. Si la rescata no va es paiada, los menasa esposa la informa en la interede.
Colonial dise ce lo labora con la polisia, espertas de sibersecuria e la Departe de Enerjia per restora la servi.
@T Un soldato canadian ia distribui tortetas de canaba
@L aora_oji/2021/un_soldato_canadian_ia_distribui_tortetas_de_canaba
====== Un soldato canadian ia distribui tortetas de canaba ======
20 agosto 2021
Un soldato canadian ci ia dona tortetas de canaba a otra soldatos en un eserse con fusiles armada va es cisa condenada a sinco anios en prison.
Bombor Chelsea Cogswell ia es judida como culpable de dona "un cosa nosiva" a oto soldatos e de condui en modo desonorosa.
Soldatos ia descrive senti enebriada e confusada cuando los ia manipula fusiles pos come la tortetas en 2018. La crimin ia aveni a tre menses ante la legali de canaba tra Canada.
Judor Militar Comandor Sandra Sukstorf ia anunsia la deside a mercurdi. El ia dise ce la avocatos acusante ia demostra, suprapasante duta justa, ce la soldatos afetada ia come canaba en tortetas cual la bombor ia distribui sabente la contenida.
La situa ia aveni a la Sentro de Eserse de Combate a la base de Gagetown en la provinse Brunswick Nova. Cogswell ia distribui la tortetas de xocolada cuando el ia es encargada sur nurintes en un eserse de campo.
Medicistes ia es clamada per investiga cuando la soldatos ia reporta sua sintomes. An con la dia calda estate, on ia elimina fatiga par caldia.
Sinco soldatos ia es positiva analiseda per canaba, como ance un envolvente de torteta cual on ia prende de la loca.
La avocatos defendente ia argumenta ce detetores militar ia perde alga otra envolventes, indicante un capasia de investiga tan "xocante nonatendente ce lo constitui un malmaneja de prosede". La acusores militar nega ce los ia posese otra envolventes.
En un interoga video con Cogswell, mostrada a la corte, el ia descrive es nomida con un parola misojine par otra soldatos e ia dise ce la usa de canaba es comun entre soldatos.
El ia junta se a la armada canadian en 2011 e es ancora un membro servinte. El va reseta sua condena en novembre.
En corte, la judor ia dise a el: "Me ocupa sufisinte longa esta posto per vide ce on ave multe persones bon ci esibi a veses un judi multe mal."
@T Un soldato deutx ia finje un refujada suri
@L aora_oji/2021/un_soldato_deutx_ia_finje_un_refujada_suri
====== Un soldato deutx ia finje un refujada suri ======
21 maio 2021
Un ofisior militar deutx es litigada su acusa de presenta se como un refujada suri e de scema atacas de terorisme estrema destriste contra politicistes.
Publica identifiada como mera Teninte Franco A., la ofisior, con base en Frans, ia fa un vive estracomun duple, rejistrada como un refujada nomida David Benjamin. On ia catura el en 2017 cuando el ia atenta reprende un fusil de mano, trovada par un limpor en un saleta privata a la airoporto de Wien.
La soldato insiste ce el no ia es un estremiste e no ia projeta atacas, e sua avocato defendente ia condena la promove contra el.
Sua vive duple ia es esposada cuando la autoriosas ia descovre ce la trasas de ditos de esta soldato en Strasbourg ia es identica a los con cual el ia rejistra se como un refujada cristian suri, abitante a viaja de tre oras a norde de Frankfurt.
La acusores crede ce el ia fa un lista de blancos posible, incluinte Heiko Maas (ministro deutx de esternas), la vispresidente de parlamento e un ativiste iudi, e ia intende usa sua identia falsa suri per reali atacas e fa ce on culpa un refujada, per provoca sentis antimuslim.
La acusores ia indica un reserva de muni e esplodentes cual el ia cumula en la sutera de sua jenitores, e cual on ia trova plu tarda en la casa de un ami. Los ia sita ance notas e rejistras en cual los dise ce la ofisior ia loda Hitler.
Los alega ance ce el ia parteni a un rede "Hannibal" de survivistes, sur ci ofisiores de securia crede ce los ia prepara se per la colasa de la stato deutx a "Dia X".
Sua aresta ia segue un enflue de refujadas de Suria e otra paises en 2015 e 2016, ma lo ia es ance un de alga casos liante persones militar a la destra estrema de Deutxland.
A mera semanas pos la aresta, on ia trova ojetos vea militar nazi en esibi en la sala comun de sua base en Illkirch en Strasbourg, an su proibi contra simboles nazi.
La caso ia veni orijinal a un corte minor en Frankfurt a tre anios ante aora, ma ia es rejetada cuando la corte ia judi ce on ave no probablia grande ce la ofisior ia scema un ataca. Acusores federal ia apela, e la caso ia ateni final un corte major.
Si condenada, la soldato va spende cisa des anios en prison.
@T Un sonda spasial pasa Mercurio
@L aora_oji/2021/un_sonda_spasial_pasa_mercurio
====== Un sonda spasial pasa Mercurio ======
2 otobre 2021
La mision BepiColombo ia fa sua encontra prima con Mercurio, la planeta la plu interna de la sistem solal.
La sonda european ia viaja rapida supra la surfas de esta mundo peti, a altia de sola 200 cilometres, ante revade a la spasio.
Sua controlores projeta sinco tal pasas, usante la tira gravital de Mercurio per ajusta la rapidia de la veculo.
Los intende lenti Bepi a grado sufisinte per pone lo en un orbita stable. Esta va aveni ante la fini de 2025.
En esense, Bepi es du veculos combinada. Un parte ia es developada par ESA, la ajenteria spasial european, e la otra par JAXA, la organiza corespondente japanes.
La modo de junta esta du composantes per la viaja a Mercurio impedi la abris de la cameras xef.
Per esta razona, la imajes prima cual la sonda ia fa de la planeta ia es otenida par du cameras monitorinte a la esterna de la veculo. Esta fotos blanca-negra debe ariva a la Tera oji.
@T Un spada de crusador es trovada su la mar
@L aora_oji/2021/un_spada_de_crusador_es_trovada_su_la_mar
====== Un spada de crusador es trovada su la mar ======
19 otobre 2021
Un spada, sur cual on crede ce lo ia parteni a un crusador a sirca 900 anios ante aora, ia es trovada par un sumerjor-amator a la costa norde de Israel.
Esta lama de un metre ia es descovreda par Shlomi Katzin e donada a autoriosas. Lo pare ce la spada, crostida con organismes maral, ia reapare par causa de la moves natural de arena.
La Autoriosa per Anticalias Israeli (AAI) ia dise ce, cuando on ia limpi e analise la spada, lo va es publica esibida.
"La spada, cual es conservada en state perfeta, es un trovada bela e rara, e ia parteni evidente a un cavalero de la crusadas," Nir Distelfeld ia dise, de la Unia per Preveni de Furi de la AAI. "Lo es stimulante ce nos encontra un ojeto tan personal, traente nos a 900 anios en la pasada a un epoca diferente, con cavaleros, armur e spadas."
Kobi Sharvit, ci dirije la Unia de Arceolojia Maral de la AAI, ia dise ce la costa de Carmel, do Katzin ia trova la spada, ia dona refuja a barcones en tempestas tra sentenios de ativia longo la mar.
"Esta ambiente ia atrae barcones de mercatores tra la epocas," el ia ajunta, "lasante pos se trovables arceolojial rica."
Crusadores ia batalia en geras relijial nomida crusadas, aprobada par la Eglesa Catolica Roman en la periodo medieval. La plu bon conosedas ia es operas militar en la este de la Mediteraneo per reprende la Tera Santa de governa muslim.
@T Un stato nijerian va proibi testas de manicines
@L aora_oji/2021/un_stato_nijerian_va_proibi_testas_de_manicines
====== Un stato nijerian va proibi testas de manicines ======
16 agosto 2021
La polisia en Kano, un stato de majoria muslim en Nijeria, ia comanda botecas a usa sola manicines sin testas per mostra vestes.
"Islam desaproba idoli," Haruna ibn-Sina, comandor de la polisia de xaria, ia dise. "Con la testa, lo aspeta como un umana." El vole ance ce la manicines sin testa es covreda a tota tempos car mostra "la forma de la seno, la forma de la posterior, es contra la instruis de xaria".
Kano es un de 12 statos en la norde de la pais cual pratica la codigo moral muslim. On intende ce la sistem pertine sola a muslimes, ma en realia, nonmuslimes es ance presada a segue la comandas.
Comersiores a Sabon Gari, un parte de Kano de majoria cristian, ia espresa sua desplase, disente ce mostra vestes sur manicines sin testa ta redui sua atraosia a pasores e ta afeta sua comersia.
En la semana pasada, ibn-Sina ia critica fotos de la selebra de sposi de Zahrah Bayero, la prometeda de Yusuf, fio de Presidente Muhammadu Buhari, disente ce el ia fali mostra un bon esemplo a otra muslimes car la fotos mostra sua spalas esposada. El ia critica ance los ci ia comparti la imajes, descrivente esta como pecosa.
En la anio pasada en la site Kano, polisiores ia rasa la capeles irocuoi de omes joven sur la troterias, e ibn-Sina ia reproxa otras ci porta pantalones basa.
El ia proibi ance la usa de la terma "venerdi negra" per anunsia sua dia de descontas, disente ce venerdi es un dia santa en islam. El ia es jeneral iniorada par stasiones de radio e sentros comersial, e los no ia es punida.
Multe eglesores muslim major, como Halliru Maraya de la Consilio Muslim de Nijeria, dise ce la disposa polisial sur la manicines es coreta, car "islam es oposada a siseli scultas umana, sin depende de la nom usada".
An si la anunsia en Kano es la prima en Nijeria, on ia vide atentas en otra paises xef muslim per restrinje la usa de manicines.
En 2009, la polisia en Iran ia averti botecores contra mostra manicines fema con curvas de corpo o sin hidjab. E en Gaza en 2010, la organiza islamiste filastini Hamas ia comanda ce botecas sutrae manicines e fotos de modeles en vestetas, per proteje "la moralia publica".
Per la abitores de Kano, lo no es clar como on va enforsa la comanda nova, car ibn-Sina ia esclui saisi la manicines desaprobada, disente ce el prefere "otra stratejias".
@T Un surfor major salvadoran es matada par lampo
@L aora_oji/2021/un_surfor_major_salvadoran_es_matada_par_lampo
====== Un surfor major salvadoran es matada par lampo ======
23 marto 2021
Katherine Diaz, la surfor la plu bon de Salvador ia es colpada e matada par lampo en un sesion de eserse. El ia prepara se per la apare prima de sua sporte a la Juas Olimpial en esta estate.
"Un atleta major ci ia representa nosa pais ia parti de nos," la Federa de Surfa Salvadoran ia dise lodante la sportor en un posta sosial. "Txau, geror grande. Salvador es en dol."
La fem de 22 anios ia entra a la acua prosima a sua casa en la vileta El Tunco per comensa eserse a venerdi cuando un lampo ia colpa el. Servis de crise ia atenta revive el sur la plaia, ma sin susede.
Un cambia subita de clima ia surprende la persones sur la plaia. On reporta ce "la sielo ia es clar, e esta ia es un tempesta nonprevideda cual no ia pare porta ance multe intensia eletrical".
La Asosia Internasional de Surfa (ISA) ia onora Diaz en un posta a Facebook: "Lo es con cor pesosa ce la ISA ia oia de la parti de Katherine Diaz de Salvador. Katherine ia corpi la joia e enerjia cual fa ce surfa es tan spesial e cara a tota nos, como ambasador global de la sporte."
Diaz ia eserse ante la Juas Mundal de Surfa ISA en Salvador en maio, do atletas va cuali per la Olimpiales en Tokyo.
@T Un tancador esplode matante en Freetown
@L aora_oji/2021/un_tancador_esplode_matante_en_freetown
====== Un tancador esplode matante en Freetown ======
7 novembre 2021
A la min 98 persones ia mori pos un esplode jigante cuando un tancador de carburante ia colide con un camion en Freetown, la capital de Siera Leon.
Carburante ia versa ante ensende, e la focon resultante ia engoli pasores e veculos a un junta folida. Imajes difusada par jornalistes local ia mostra corpos ardeda sur la stradas sirca la tancador.
Pos visita la loca, la vispresidente Mohamed Juldeh Jalloh ia nomi la situa "un desastre nasional". El ia dise ce la persones ferida va reseta trata medical sin paia.
La esplode ia aveni a un junta de vias ante la Supramercato Choithram en Wellington, un suburbe densa poplada en la este de la site, a sirca la ora 22 de venerdi. La Ajenteria Nasional per Maneja Desastres ia dise ce la veculos ia colide cuando la tancador ia entra a un gasolineria per descarga se.
La camionores, persepinte un gotea, ia sorti de sua veculos e ia averti otras a resta a distantia. La esplode ia aveni cuando persones ia atenta colie la carburante. Longo un reporta, un bus ia es completa ardeda, e botecas e tables de mercato ia es saisida par la flamas.
Freetown es un site de porto con pico plu ca milion abitores. Lo ia esperia alga desastres grave en anios resente. En marto, plu ca 80 persones ia es ferida cuando un focon grande en un de la visinerias misera ia desloca plu ca 5000 persones.
E en 2017, plu ca 1000 persones ia es matada par un lisca de fango cual ia traversa la site pos pluve forte, lasante sirca 3000 persones sin casa.
@T Un televanjeliste major es enterada en Nijeria
@L aora_oji/2021/un_televanjeliste_major_es_enterada_en_nijeria
====== Un televanjeliste major es enterada en Nijeria ======
10 julio 2021
T B Joshua, televanjeliste nijerian popular, es enterada en Lagos pos un semana de rituos funeral.
Miles de lamentores ia vade a la servi de entera a sua Sinagoga, Eglesa de Tota Nasiones, en la distrito Ikotun.
La om de 57 anios ia mori a 5 junio pos un maladia corta.
Temitope Balogun Joshua ia es adorada par persones tra la mundo e deses de miles de persones ia regarda sua servis semana.
La asende a fama de esta predicor carismal en la tarda de la desenio de 1990 ia coaveni con la esplode de programes "miraclosa" par pretes diversa en la televisa nijerian. Sua programes ia reclama sani tota spesies de maladia, incluinte VIU e SIDO, e ia atrae persones de la mundo intera.
Nomida la Profeta par sua seguores, el ia dirije Emmanuel TV, un stasion de televisa cristian, e ia turi comun tra paises diversa en Africa, la SUA e America Sude.
Joshua ia veni de un familia povre e ia es elevada par sua tio muslim pos la mori de sua padre cristian.
Otra pretes major de Nijeria ia es asente de la semana de recorda, asentuante sua relata jelin con el. En pasada, la Asosia Cristian de Nijeria e la Alia Pentecostal de Nijeria ia descrive el como un "finjor" ci ia parteni a un grupo de "ocultas" cual ia infiltra cristiania.
Sua sposa, Evelyn Joshua, ci es aora asiniada como la supravidor jeneral de la eglesa, ia dise ce sua sposo ia crese la Sinagoga, Eglesa de Tota Nasiones de un asembla de oto membros a lo cual lo es oji.
@T Un tempesta grande prosimi a Louisiana
@L aora_oji/2021/un_tempesta_grande_prosimi_a_louisiana
====== Un tempesta grande prosimi a Louisiana ======
29 agosto 2021
En la SUA, deses de miles de persones sorti de la stato Louisiana en ce Siclon Ida prosimi.
On previde ce lo va ateni la tera a la Golfo Mexico a la sera de soldi, traente ventas de 210 cilometres per ora e inondas perilinte.
Alga autovias ia es conjestada par abitores comandada a evacua multe partes de la stato.
John Bel Edwards, governor de Louisiana, ia averti ce la tempesta va es cisa un de la plu grandes cual la stato ia esperia en 150 anios. La governor de Mississippi, stato visina, ia declara un state de crise.
Plu temprana, Ida ia bate un parte de Cuba, cadente arbores e destruinte tetos, e Jamaica ia sufri pluves forte. Ma on ia reporta no moris.
Ida intensi supra la acuas calda de la Golfo Mexico e es aora un siclon de la categoria 3, con ventas sustada masima de cuasi 185 cilometres per ora.
Par coaveni, oji es la aniversario 16 de Siclon Katrina cual ia ruina New Orleans en 2005 pos ateni la tera con categoria 3. Lo ia inonda 80% de la site e ia mata plu ca 1800 persones. Meteorolojistes dise ce Ida pote es an plu forte.
Con la defendes plu forte cual aora esiste contra tempestas, on espera ce la paradeluvias ala va susede tolera la efetos de la siclon. Ma espertas averti ce si ondones aveni a marea alta, acua de mar pote inonda la sistem e entra denova a la site.
Plu ca 80 plataformas de petrolio en la Golfo ia es evacuada, e on ia suspende un dui de la esflue rejional de petrolio e gas.
@T Un tempesta grande talia la lias sirca Vancouver
@L aora_oji/2021/un_tempesta_grande_talia_la_lias_sirca_vancouver
====== Un tempesta grande talia la lias sirca Vancouver ======
17 novembre 2021
En la ueste de Canada, lias de trafica sirca Vancouver ia es taliada par un tempesta matante, descriveda par la ministro de transporta como "la tempesta de clima la plu mal de un sentenio".
Du autovias juntante esta site a la costa ueste ia es cluida pos deveni danada par inondas grave. Un fem ia es matada par un liscatera sur un autovia, e laborores salvante dise ce a la min du plu persones manca. On ancora no ia determina la cuantia de "veculos ocupada cual ia es perdeda en la lisca".
Un motoriste ia dise ce el ia vide la liscatera desendente sur trafica ja nonmovente: "Apena nos ia reentra a nosa veculos, la persones ante nos ia es criante e corente. La espresa sur sua fases, lo ia es como un tsunami veni. Lo ia es la cosa la plu asustante cual me ia vide ja. Me ia turna me, e me ia regarda la lado intera de la monte desendente e eliminante esta autos, tota scopida a via. Un panica completa."
Miles de casas en la provinse Columbia Brites ia es evacuada cuando un "rio atmosferal" ia cade la pluve rejional promedia per un mense en sola 24 oras. Tota 7000 abitores de la site Merritt, a sirca 190 cilometres a norde-este de Vancouver, ia es comandada a abandona sua casas a lundi. Neva ia cade ala ier, e on ia vide autos flotante en la inondas fria en la site.
Elicotores ia es enviada ance a Agassiz, vila montanial, per salva sirca 300 persones trapida sur un via.
La pluve e venta de lundi ia fini jeneral en la posmedia de martedi, ma alga comunias ia resta isolida. Un parte de la Autovia Transcanadian, cual junta Vancouver a la resta de la pais, ia es sumerjida. E un parte de la Autovia Coquihalla, cual lia Vancouver a la interna de la provinse, ia pare destruida par la inonda.
A reportores en la capital Ottawa, la ministro xef Justin Trudeau ia dise ce el monitori la situa: "Nos va es ala per aida en cualce modo, forma o manera."
Tra alga tempo, la via xef disponable per sorti de Vancouver ia es par entra a la SUA ante reveni a Canada. Ma per reentra, on nesesa un analise negativa de coronavirus, e la vias en la stato Washington en la norde-ueste de la SUA ia es ance afetada par la tempesta.
La porto de Vancouver, la plu grande en Canada, ia debe suspende tota asedes ferovial par causa de inondas e liscateras, parante la moves de comables, combustables e otra benes. Tubones de carburante en la rejion ia es ance cluida per securia.
En la estate, Columbia Brites ia esperia un onda de caldia recordo cual ia mata plu ca 500 persones, e focones forestal cual ia destrui un vila intera. Plu temprana en esta mense, on ia vide ala un tornado a la ves prima en sinco desenios.
@T Un tempesta porta neva a Texas e Mexico
@L aora_oji/2021/un_tempesta_porta_neva_a_texas_e_mexico
====== Un tempesta porta neva a Texas e Mexico ======
17 febrero 2021
En la SUA, un tempesta invernal ia trae ventas jelante, jelo e neva a multe rejiones cual vide rara un situa tal fria.
Un aumenta de la usa de eletrica en Texas ia produi multe perdes de potia.
Plu ca 150 milion esuanes es aora su averti de la tempesta invernal. On ia reporta a la min 11 moris par la clima.
En Carolina Norde, un tornado creada par la mesma tempesta ia mata tre persones e ia feri des en la temprana de la matina ier. Ance ier, la Servi Nasional de Clima ia anunsia ce plu ca 73% de la SUA es aora covreda par neva.
La tempesta jelante ia ateni an partes norde e sentral de Mexico, do miliones de persones ia esperia un dia du de rompes nonperiodal de eletrica.
La regulor de eletrica en Mexico ia introdui un sistem de turnos en 12 statos, incluinte sirca la capital. Tubones jelada ia impedi ance la furni de gas natural de la SUA.
La crise en Texas ia mali a soldi cuando la tempesta ia sutrae cuasi un dui de la capasia de acel stato per jenera eletrica par la venta. Stradas jelosa ia causa multe asidentes e on ia consela evita viaja si posible.
Casas en Texas es normal no isolida contra clima fria, tal ce sua temperatur interna ia cade rapida a zero cuando sua sistemes de caldi ia fali. Tubos jelada ia creve ance, an pos atentas par alga propriores de usa covreletos per proteje los contra la fria.
@T Un tenisor xines alega sur ataca sesal
@L aora_oji/2021/un_tenisor_xines_alega_sur_ataca_sesal
====== Un tenisor xines alega sur ataca sesal ======
4 novembre 2021
Peng Shaui, stela de tenis xines, ia acusa publica un ofisior comuniste jubilada sur ataca sesal. En un posta a la rede sosial Weibo, Peng ia dise ce Zhang Gaoli, visxef pasada, ia "forsa" el a fa relatas sesal con el.
Esta es la ves prima cuando un tal alega es fada contra un de la xefes political major de Xina. Zhang no ia responde, e la posta ia es sutraeda de la interede xines. Lo pare ce xercas per Peng ia es ance restrinjeda.
Zhang, ci ave 75 anios, ia es la visxef de Xina entre 2013 e 2018 e ia es un aliada prosima de la presidente Xi Jinping.
En sua posta, Peng ia scrive: "Me sabe ce algun de tua importa, Visxef Zhang Gaoli, va dise ce tu no es asustada, ma an si on colpa mera un calculo a un petra, o un papilio ataca un flama e risca destrui se, me va dise la vera sur tu."
El ia dise ce el ia forsa prima el cuando el ia visita sua casa per jua tenis. "En acel posmedia me no ia dona mea acorda e no ia pote sesa plora," el ia scrive. "Tu ia trae me a tua casa e ia forsa me e tu a fa relatas."
Peng, ci ave 35 anios e ia es un juor de tenis duple de grado prima, ia reconose ce el no va pote furni demostras per suporta sua alegas: "Me ave no atestas, e la lasa de cualce atestas ia es nonposible... Tu ia teme sempre ce me va trae alga cosa como un rejistrador de sona, per rejistra atestas o simil... Me ave no rejistra audio, no rejistra video, sola mea esperia contorseda ma multe real."
Esta posta par la tenisor es la developa la plu resente en un serie de casos major per la promove Me Ance en Xina. Un presentor popular de TV, Zhou Xiaoxuan (fema), ia publici sua alegas contra un otra selebrada de TV, Zhu Jun (mas), en un esajo enlinia en 2018.
La article ia sperde virusin e ia provoca multe otra persones a presenta sua propre esperias de molesta sesal. Zhu ia nega tota la alegas, e an si Zhou ia comensa litiga Zhu, la caso ia es rejetada en setembre. Cortes xines permete rara un escuta a tal casos, e la pais ia aprobe sola multe resente un leje cual defini clar la molesta sesal.
En sua carera de tenis, Peng ia gania du trofeos a la cuatro torneos anial major, prima en London en 2013 e a pos en Paris en 2014, a ambos veses en un duple con Hsieh Su-wei de Taiwan.
@T Un tomba coletiva en un site antica peruan
@L aora_oji/2021/un_tomba_coletiva_en_un_site_antica_peruan
====== Un tomba coletiva en un site antica peruan ======
13 novembre 2021
En Peru, arceolojistes ia descovre la restas de 25 persones en la site antica Chan Chan. La sceletos ia es trovada en un spasio peti de 10 metres cuadrida en lo cual ia es la capital de la Impero Tximu.
La tximus ia rena partes de Peru presente. Sua impero ia ateni sua culmina en la sentenio 15 ante sua defeta par la incas.
Chan Chan, do on ia trova esta tomba coletiva, ia es la sitadela de arjila la plu grande en America en la tempo ante la ariva de Colombo. Espertas opina ce la tomba ia es cisa un loca do elites tximu ia es reposada.
La arceolojiste Sinthya Cueva ia dise ce la plu de la restas parteni a femes joven. "Zero de los ave plu ca 30 anios."
An si on sabe ce la tximus ia fa sacrifias umana, incluinte de enfantes, la arceolojiste Jorge Meneses Bartra ia dise ce on ave no atesta ce la persones en la tomba nova descovreda ia mori tal. Rexercores va fa probas per atenta determina la causas de sua moris.
Menses ia ajunta ce la posa de un de la sceletos sujesta ce lo ia es enterada ala corta pos la mori de la person, ma otra osos ia pare blancida par la clima e ia es multe miscada, lo cual pare indica ce on ia move los plu tarda a la tomba.
Longo Cueva, esta mostra ce la tximus ia manipula e move la restas de sua amadas.
La corpos ia es envolveda, en posa de senta, en alga stratos de stofa, de cual la prima ia es de coton e la numero du ia es de materia vejetal. Cuasi 50 pesos de seramica ia es trovada en la tomba ance.
@T Un tornado rara destrui viletas txesce
@L aora_oji/2021/un_tornado_rara_destrui_viletas_txesce
====== Un tornado rara destrui viletas txesce ======
Un tornado potiosa ia pasa tra alga viletas en la sude-este de Txesco, ferinte 150 persones e causante danas grande.
La tempesta ier ia sutrae la tetos de alga construidas en la distritos Breclav e Hodonin, desradisinte arbores e inversante autos.
En videos enlinia postada, la locas la plu grave afetada ia aspeta como campos de gera.
On ia envia ecipos salvante de tra la pais e ance de Osteraic e Slovensco.
Un dui de la vileta Hrusky ia es destruida. Sua vismaior ia dise: "La eglesa es sin tore, la scola prima ave no plu sua teto e materia isolinte. Sola mures resta de lo cual ia es casas."
Un portavose per la servis local de crise ia dise ce alga persones ia mori e ce alga es ancora trapida su detrito.
La tornado ia rompe ance la furnis eletrical e ia causa disturbas major a la trafica, blocinte autovias intera e lasante plu ca 100 mil casas sin eletrica en la note.
@T Un totem es redonada a la tera pos viaja longa
@L aora_oji/2021/un_totem_es_redonada_a_la_tera_pos_viaja_longa
====== Un totem es redonada a la tera pos viaja longa ======
21 novembre 2021
Un totem spesial creada ia completi un viaja de 9000 cilometres de Mexico a la sude de Scotland.
La Totem Latamat ia es siselida par Jun Tiburcio en Chumatlán, Veracruz, de un sola arbor. Lo ia viaja tra Britan, incluinte un visita a Glasgow en la confere COP26, per asentua la consernas de persones nativa sur la cambia de clima.
Ier lo ia es redonada a la Tera en un rituo en la vila Dumfries, do lo va descomposa natural.
On descrive la totem como "un mesaje de la popla totanac a nosa comunias e xefes de mundo". Lo intende remente como "profonda entretexeda con la natur es nosa esiste" e ance sur "la nesesa de ata sin retarda per disturba la dana fada par cambia climal".
La dirijor artal de Border Crossings, compania teatral brites cual ia organiza la projeta, ia dise: "En tota locas do lo ia vade, Totem Latamat ia es bonvenida con cantas a rituos, emosiosa mostrante la spirito de unia entre nosa propre comunias e la poplas nativa ci sta a la linia fronte de la cambia de clima.
"La plu de la propre casa de Jun Tiburcio mesma ia es destruida par Siclon Grace en la periodo de la projeta, par resulta direta de la crese global de temperatur.
"Diferente de cultures materialiste ueste, cual atenta conserva sua obras de arte como modo de atrae valua monal, cultures nativa regarda sua obras como esentes con vive, e donce mortal."
@T Un trematera mata 20 persones en Pacistan
@L aora_oji/2021/un_trematera_mata_20_persones_en_pacistan
====== Un trematera mata 20 persones en Pacistan ======
7 otobre 2021
A la min 20 persones ia mori cuando un trematera ia aveni en la provinse Balotxistan de Pacistan ueste en la temprana de esta matina.
La cuantia de mores pote crese ancora. Multe persones, incluinte femes e enfantes, ia es matada cuando construidas ia colasa.
La trematera ia es de grado 5,9, e no profonda a mera 9 cilometres. Tremas nonprofonda pote dana plu.
On crede ce a la min 150 otra persones ia es ferida. Alga persones ia es rapida ospitalida en states grave, per esemplo par elicotores militar a Quetta, la capital provinsal.
Laboras de salva ia comensa, e jornales local reporta ce dotores militar e paramedicistes ia ariva en la rejiones afetada per aida. Alga persones ia es tratada sur portaferidas par medicistes usante telefonetas como lampas.
Plu ca 100 casas de adobe ia colasa e multe otra construidas ia es danada. Sentos de persones es aora sin casa.
Lo pare ce multe de la dana ia aveni en la distrio Harnai, a este de Quetta, con un cuantia grande de minerias de carbon cual pote es colasada par tremateras.
@T Un tren desreli grave en un tunel en Taiuan
@L aora_oji/2021/un_tren_desreli_grave_en_un_tunel_en_taiuan
====== Un tren desreli grave en un tunel en Taiuan ======
2 april 2021
A la min 34 persones ia mori e 72 resta trapida pos la desreli de un tren portante sirca 350 pasajores en un tunel en Taiuan. Laborores de salva batalia per asede cuatro vagones "grave danada".
La tren ia viaja de la capital Taipei a la site Taitung. Deses de la pasajores ia es turistes, de ci multe ia es selebrante la festa anial Qingming. Lo ia desreli sirca 09:00 de ora local a esta matina, cuando un veculo de manteni ia cade a sur la ferovia.
Imajes mostra persones de la vagones nonafetada ci ia pasea longo la tunel con sua posesedas. Un survivor ia comenta: "Lo pare ce on ia ave un colpa subita violente e me ia trova me en cade a la solo. Nos ia rompe la fenetra per trepa a la teto de la tren per sorti."
La presidente de la pais, Tsai Ing-wen, ia publici un declara cual ia dise ce "la salva de la persones trapida es nosa conserna la plu importante aora".
Esta colide es la desastre ferovial la plu grave sur la isola en desenios. La desreli major la plu resente en Taiuan ia aveni en 2018 e ia mata 18 persones. La plu grave de tota ia es en 1991, cuando 30 pasajores ia es matada e 112 ferida pos la colide de du trenes.
Qingming es un tempo cuando persones visita la tombas de familianes e amis per limpi los e fa ofres a sua spiritos. Multe persones viaja per dona sua respeta a la mores.
@T Un varia nova de covid emerji en Vietnam
@L aora_oji/2021/un_varia_nova_de_covid_emerji_en_vietnam
====== Un varia nova de covid emerji en Vietnam ======
31 maio 2021
Vietnam espera maneja un eruta nova de covid par analise la popla intera de la Site Ho Chi Minh, e par introdui regulas nova de distanti sosial.
La pais ia es ja relativa susedosa en controla la virus, ma la cuantia de casos ia crese en la semanas resente. E en la fini de semana, ofisiores ia averti sur un varia ibride nova e "multe perilosa" cual on ia descovre ala.
La governa dise ce la varia nova combina cualias de varias grave cual ia es prima identifiada en Barat e la Rena Unida, e lo es fasil comunicable tra la aira.
Somada, la pais ia rejistra pico plu ca 7000 infetas e 47 moris, ma esta apico resente representa plu ca un dui de la cuantia intera de casos.
La eruta nova en la Site Ho Chi Minh ave como sua sentro un misioneria cristian cual ia esperia a la min 125 casos positiva. Lo esplica la plu de infetas en la site.
Persones ci abita prosima es ja analiseda e isolida. Ofisiores intende aora analise la resta de la 13 milion abitores de la site. Ma con rapidia de 100 mil persones per dia, esta labora va dura tra plu ca cuatro menses.
En ajunta, ofisiores ia anunsia ance regulas nova de distanti sosial tra la site per 15 dias, comensante oji. Botecas e restorantes es cluida, e on ia suspende ativia relijial.
La governa ia dise: "Tota avenis publica cual asembla plu ca 10 persones es proibida tra la site intera, ma la site considera basi la cuantia de persones a sola sinco."
Cuando la virus ia sperde prima estra Xina en la temprana de 2020, Vietnam ia reata rapida e desidente, cluinte sua fronteras contra cuasi tota viajores, con eseta de sua propre sitadanes reveninte.
A pos, lo ia isoli e analise cadun ci ia entra a la pais, e lo ia fa un projeta vasta de trasa contatadas e proba los.
La governa es aora presada per aselera la prosede de vasini per combate esta reemerji de la virus. Asta aora, pico plu ca milion persones, 1% de la popla, ia reseta a la min un dosa de vasin.
@T Un vasin xines es aprobada par la OMS
@L aora_oji/2021/un_vasin_xines_es_aprobada_par_la_oms
====== Un vasin xines es aprobada par la OMS ======
8 maio 2021
La Organiza Mundal de Sania (OMS) ia dona sua aproba a la vasin de covid preparada par Sinopharm, un compania de la governa en Xina.
Esta es la vasin prima developada par un pais nonueste cual ia reseta la suporta de la OMS. Lo es ja donada a miliones de persones en Xina e otra locas.
A ante, la OMS ia aproba sola la vasines de Pfizer, AstraZeneca, Johnson e Johnson, e Moderna. Ma regulores individua de sania en alga paises -- spesial plu povres en Africa, America latina e Asia -- ia aproba la injeta xines per usa de crise.
Car poca datos ia es internasional publicida en la periodo temprana, la efetosia de la vasines xines ia es nonserta tra tempo longa. Ma ier la OMS ia anunsia ce lo ia validi la "securia, eficasia e cualia" de la vasin de Sinopharm.
La organiza ia dise ce la ajunta de esta vasin porta "la posiblia de aselera rapida la asede a vasin de covid per paises cual atenta proteje laborores de sania e poplas en peril".
La OMS recomenda ce on dona la vasin en du dosas a persones con 18 anios e plu. On espeta un deside en la dias veninte sur un plu vasin xines, developada par Sinovac, e la vasin Sputnik V rusce es ance evaluada.
@T Un viaduto de metro colasa en la Site Mexico
@L aora_oji/2021/un_viaduto_de_metro_colasa_en_la_site_mexico
====== Un viaduto de metro colasa en la Site Mexico ======
4 maio 2021
A la min 15 persones ia es matada e sirca 70 ferida cuando un viaduto de metro en la Site Mexico ia colasa en ce un tren ia viaja sur lo. Alga vagones ia cade a la tera, crasente un auto sur un strada traficosa a su.
Pompores e laborores de salva xerca survivores pos la asidente, cual ia aveni sirca 22:30 de ora local a la stasion Olivos de la linia 12, nomida la Linia Oro.
On teme ce la cuantia de moris pote crese plu, car alga persones es cisa ancora trapida su la ruina.
La labora de xerca ia es interompeda a medianote cuando la tren, partal pendente, ia es tan debil ce on ia debe introdui un gru. Persones ia es ancora trapida en la tren, an si "nos no sabe esce los vive", diseda par Claudia Sheinbaum, maior de la capital.
La Linia Oro ia es abrida en 2012, construida cuando la maior ia es Marcelo Ebrard, aora ministro de esternas.
La metro de la Site Mexico, ofisial nomida la Sistem de Transporta Coletiva, es la metro du de la plu grandes en America Norde, pos sola la sistem en New York. En 2019, lo ia servi 1,655 mil milion pasajores.
Esta metro ia es inaugurada a un dui de sentenio ante aora. En 2015, un tren ia colide con un otra a la stasion Oceania, ferinte 12 persones. E en marto de la anio pasada, la colide de du trenes a la stasion Tacubaya ia mata un pasajor e ia feri 41.
@T Un vileta perdeda emerji de un lago italian
@L aora_oji/2021/un_vileta_perdeda_emerji_de_un_lago_italian
====== Un vileta perdeda emerji de un lago italian ======
19 maio 2021
Laboras reparante a un lago de reserva en Italia ia revela la restas de un vileta sumerjida tra desenios.
Lago Resia, en la norde de la pais, es bon conoseda per la pinaculo de eglesa cual emerji de sua acua fria. Esta sena iconin ia inspira un libro e un serie en Netflix.
Ma car la lago es aora tempora drenada, on pote vide la trasas final de Curon Venosta, un vileta do sentos de persones ia abita ante 1950, cuando on ia inonda lo per crea un compleso idroeletrical.
La lago, nomida Reschensee en deutx, es situada en Tyrol Sude, la rejion alpan cual borda Osteraic e Suiz.
Fotos distribuida en redes sosial mostra scaleras, suteras e mures sur lo cual es usual la fondo de la lago, prosima a la tore de eglesa de la sentenio 14.
Luisa Azzolini, ci abita local, ia twita ce pasea en la ruina de la vileta pasada es un "senti strana".
La vileta Curon ia es perdeda su la acua cuando la autoriosas ia deside construi un parario e combina du lagos visina, an contra oposa par sua abitores.
Plu ca 160 casas ia sumerji e la popla de Curon ia es deslocada, ma alga persones ia eleje resta en la vileta nova creada en la prosima.
En nosa eda, la lago es popular con paseores en estate, e visitores en inverno pote traversa la surfas jelada per ateni la pinaculo.
@T Un volcan crea un nube de sene supra Djava
@L aora_oji/2021/un_volcan_crea_un_nube_de_sene_supra_djava
====== Un volcan crea un nube de sene supra Djava ======
17 janero 2021
Continuante un semana estrema mal per Indonesia, Monte Semeru ia eruta, versante sene e fuma a plu ca sinco cilometres supra Djava, la isola la plu densa poplada de la pais.
On ia dona no comandas per evacua e no persones es reportada como ferida. Imajes ia mostra un nube grande de sene dominante casas.
Un ofisior local ia dise: "La viletas Sumber Mujur e Curah Kobokan es situada en la curso de la nubes calda."
La Ajenteria Nasional de Modera Desastres ia averti viletanes ci abita sur la monte a vijila contra flues de fango nomida "lava fria" cual pote aveni si pluve forte combina con materia volcanal.
La monte, con altia de 3676 metres, ia eruta a sirca 17:24 de ora local ier.
Ance conoseda como "La Monte Grande", Semeru es la volcan la plu alta sur Djava e un de la plu ativas. Lo es ance un de la destinas la plu popular per paseamanicas visitante.
La volcan ia eruta en desembre, cuando sirca 550 persones ia es evacuada.
En la semana pasada, Indonesia ia sufri multe liscateras, un trematera matante sur Sulauesi, e la perde de un avion portante 62 persones.
@T Un volcan eruta prosima a la capital islansce
@L aora_oji/2021/un_volcan_eruta_prosima_a_la_capital_islansce
====== Un volcan eruta prosima a la capital islansce ======
20 marto 2021
Un volcan ia eruta a sude-ueste de Reykjavik, la capital de Island.
La fesur, a Fagradalsfjall sur la penisola Reykjanes, ave sirca 500--700 metres de longia. La eruta la plu resente ala ia aveni a sirca 800 anios ante aora.
Island ia rejistra plu ca 40 mil tremateras en la tre semanas pasada.
En 2010, la eruta de un otra volcan, Eyjafjallajökull, ia para la trafica de aviones tra Europa. Ma on no previde ce la eruta de Fagradalsfjall va emete tan multe sene o fuma, donce probable la avioni no va es disturbada a esta ves.
La Ofisia Meteorolojial Islansce dise ce la eruta de Fagradalsfjall ia comensa ier, sirca 20:45 de ora universal, e on ia confirma lo plu tarda, usante cameras automata e imajes par satelite.
On ia envia un elicotor de la gardacosta per esamina la rejion, cual es a sirca 30 cilometres de Reykjavik. Lo ia revela la imajes prima de la lava serpente en desende pos la eruta.
"Me pote vide la sielo roja brilietante de mea fenetra," Rannveig Guðmundsdóttir ia dise. El abita a sola 8 cilometres de la eruta. "Cadun asi vade a sua auto per asende a ala."
Un trematera de grandia 3,1 ia es rejistrada a 1,2 cilometres de Fagradalsfjall a alga oras plu temprana.
Island esperia tremas frecuente, car lo es situada sur du placas tetonical cual move en dirijes oposada.
@T Un volcan eruta sur la isola La Palma
@L aora_oji/2021/un_volcan_eruta_sur_la_isola_la_palma
====== Un volcan eruta sur la isola La Palma ======
20 setembre 2021
La ministro xef de Espania, Pedro Sánchez, ia ariva a La Palma en la Isolas Canaria, do un eruta volcanal ia causa la evacua de 5000 persones.
Imajes airal mostra lava de la volcan Cumbre Vieja versante a su e destruinte alga casas.
Sanchez ia dise ce la autoriosas oserva atendente per caso ce la lava va ensende focones. La garda militar e sivil ia es enviada per aida.
Esta volcan ia eruta la plu resente a 50 anios ante aora. Lo es situada en la sude de la isola La Palma, do sirca 80 mil persones abita.
Jonas Perze, un gidor local de turistes, ia dise ce el senti ancora tremas de la eruta. "Ma aora," el ia ajunta, "la cosa la plu stonante cual me ia esperia nunca es la ruido veninte de la volcan -- lo sona como la enaira de dudes jetos xasante e lo es estrema forte, lo es stonante."
On ia fa comandas de evacua obligada a cuatro viletas, incluinte El Paso e Los Llanos de Aridane, e refujerias tempora ia es instituida. Asta aora, on ia reporta no feris o moris.
A la sera ier, Ángel Víctor Torres, presidente de la Isola Canaria, ia dise: "Lo no es previdable ce otra persones va debe es evacuada." El ia nota ce la lava move lenta en dirije a la costa.
Sanchez ia pospone sua parti per la Asembla Jeneral de la Nasiones Unida en New York per consenta con Torres per discute la responde par la servis de crise a la eruta.
"Tota aveni como projetada, e donce la conserna xef es garantia la securia de la sitadanes de La Palma ci ta pote es afetada como resulta de esta eruta," Sanchez ia dise ier.
La Palma ia es alta vijilante pos rejistra plu ca 22 mil tremas sirca la volcan en un semana.
La Canarias, un arcipelago de sete isolas a lado de Africa norde-ueste, ia rejistra sua eruta volcanal la plu resente en 2011, su la mar prosima a la isola El Hierro. Cumbre Vieja ia eruta en 1949 e 1971.
@T Un xica perdeda en un foresta promete "nunca denova"
@L aora_oji/2021/un_xica_perdeda_en_un_foresta_promete_nunca_denova
====== Un xica perdeda en un foresta promete "nunca denova" ======
25 agosto 2021
Un xica de 22 menses, trovada pos cuatro dias en un foresta rusce, ia promete nunca desapare denova.
Lyuda Kuzina ia vaga a via cuando el ia es prosima a sua casa en la rejion Smolensk a ueste de Moscva, provocante un xerca cual ia envolve sentos de persones.
El ia ave no comedas e no acua. On ia trova final el cuando un de la grupos xercante ia oia un crieta. El ia es covreda par picas de insetos.
"El es plen convinseda ce el va core nunca denova a via de Mama," sua madre Antonina ia dise. "Como longa el va recorda esta promete, me ave no idea. Ma a la min el dise lo."
La paseor nova ia es curada en un ospital per enfantes en Smolensk. La televisa rusce ia parla con madre e fia en un jueria estra la ospital, do los espeta es permeteda a parti.
On ia deveni alarmada a martedi pasada, cuando Lyuda ia sorti de la casa de estate de la familia en la rejion Tyomkinsky. El ia jua su la sielo con sua sore de cuatro anios, ma cuando sua madre ia visita un visina e sua sore ia segue el, Lyuda ia vaga en un foresta prosima.
Cuatrosento bonvolores e polisiores local ia comensa xerca en la rejion. Sumerjores ia esplora an en lagos de reserva, ma ia trova no cosa. Ma pos cuasi cuatro dias, un de la grupos ia pausa per reposa a 4 cilometres de la casa e ia oisa un sona.
La madre ia raconta: "La bonvolores ia informa me ce los no ia es distante de la loca a la dia prima. Sola a la dia cuatro cuando los ia oia un pia, los ia trova el en alga ramos su un arbor."
La esperia de Lyuda remente a un xico de tre anios ci en 2016 ia survive tra 72 oras en un foresta sibirsce abitada par lupos e ursos. Tserin Dopchut ia porta un bara peti de xocolada, ma Lyuda ia ave tota no cosa per come.
@T Votores suiz suporta proibi covre la fas
@L aora_oji/2021/votores_suiz_suporta_proibi_covre_la_fas
====== Votores suiz suporta proibi covre la fas ======
8 marto 2021
Suiz ia vota per proibi la covre publica de la fas, incluinte con la burca o nicab usada par femes muslim. La proposa par la SVP, un partito destriste, ia es asetada par 51,2% contra 48,8% en un referendo a soldi.
La Consilio Sentral de Muslimes ia dise: "La deside oji abri feris vea, estende plu la prinsipe de nonegalia legal, e envia un sinial clar de esclui a la minoria muslim." Lo intende defia la deside en corte.
La governa suiz ia argumenta contra la proibi, disente ce dita la vestes de femes no es un debe de la stato.
Longo rexerca par la Universia de Lucerne, cuasi nun en Suiz usa un burca e sola sirca 30 femes porta la nicab. Sirca 5% de la 8,6 milion persones en Suiz es muslim, e la plu ia veni de Turcia, Bosnia e Cosovo.
Suiz ave un sistem de democratia direta, en cual la popla es comun invitada a vota sur temas diversa en referendos rejional o nasional.
Esta no es la ves prima cuando islam ia apare en un referendo suiz. En 2009, sitadanes ia oposa la consela de la governa e ia vota per proibi la construi de minaretas. Acel oposa ia es ance proposada par la SVP, ci ia dise ce minaretas es un sinia de islami.
La proposa en la referendo ier no ia refere direta a islam e ia es ance relatada a la usa de mascas par protestores violente en stradas. Ma la vota ia es jeneral nomida "la proibi de burca".
La referendo ia es proposada ja ante la pandemica de coronavirus, par causa de cual tota adultes suiz debe covre sua nas e boca en multe situas.
@T 2021
@L aora_oji/2021/xef
====== 2021 ======
Reportas plu vea ...
@T Xi Jinping fisa sua loca en istoria political
@L aora_oji/2021/xi_jinping_fisa_sua_loca_en_istoria_political
====== Xi Jinping fisa sua loca en istoria political ======
12 novembre 2021
En Xina, la Partitio Comuniste ia aproba un "declara istorial", fisante la loca de Xi Jinping en la istoria political.
La documento, un resoma de la istoria de 100 anios de la partito, descrive sua atenis major e sua dirijes futur. Lo es sola la numero tre de sua tipo pos la fundi de la partito. La prima ia es aprobada par Mao Zedong en 1945 e la numero du par Deng Xiaoping en 1981.
La declara nova ia es asetada ier a la sesion completa ses, un de la consentas political la plu importante de la pais.
Un portavose ia dise: "Esata como la du declaras presedente, lo va fa un rol major en aida uni la teoria, vole e ata de la partito -- per ateni progresa futur e per reali la ojeto sentenial du e la sonia xines grande de rejoveni."
La partito ia defini ja du ojetos sentenial: ce Xina va deveni un sosia "moderada rica" ante 2021, e ce lo va es un nasion "plen developada, rica e potiosa" ante 2049.
Alga oservores vide la declara nova como la atenta la plu resente par Xi per reversa desenios de desentri par xefes xines, comensante su Deng e continuante su otra xefes como Jiang Zemin -- un sinia ce cisa Xina revade en dirije a un culto de personalia.
La sesion privata de cuatro dias ia asembla plu ca 370 membros plen e alternativa de la Comite Sentral 19 de la partito, pd. la xefes suprema de la pais.
Esta ia es la consenta major ultima de la xefes ante la congresa nasional en la anio veninte, do on espeta ce Xi va xerca un periodo tre como presidente. En 2018, Xina ia abandona la limita tradisional de du periodos de presidentia, tal ce en efeto el va pote resta en potia tra sua vive intera.
@T Xina e Rusia va construi un stasion spasial lunal
@L aora_oji/2021/xina_e_rusia_va_construi_un_stasion_spasial_lunal
====== Xina e Rusia va construi un stasion spasial lunal ======
10 marto 2021
Xina e Rusia ia anunsia un projeta de construi un stasion spasial a la Luna.
Roscosmos, la departe rusce de spasio, dise ce lo ia suscrive un acorda con la Ajenteria Spasial Nasional de Xina per developa un compleso de rexerca sur la surfas de la Luna, o en orbita, o ambos.
Un declara par ambos paises dise ce la stasion va es disponable per usa par otra nasiones. La Stasion Lunal Siensal Internasional va fa un varia grande de rexerca siensal, incluinte la esplora e esplota de la Luna.
"Xina e Rusia va usa sua esperia cumulada sur siensa spasial, sur rexerca e developa, e sur la usa de aparatos spasial e tecnolojia spasial, per developa juntada un mapa de via per la construi de un stasion lunal internasional per rexerca siensal," la declara ia dise. Lo ia ajunta ce Rusia e Xina va colabora per projeta, desinia, developa e opera la stasion.
Xina es un arivor relativa nova en la campo de esplora la spasio, ma en desembre pasada, sua sonda Chang'e 5 ia susede retrae roca e solo cual lo ia prende de la Luna. On ia regarda acel como un plu esemplo de la capasia cresente de la pais en relata a la spasio.
Rusia, cual ia abri la via de esploras spasial, prepara selebra la aniversario 60 de la vola spasial prima de un person, fada par Iuri Gagarin a 12 april 1961. En anios resente, Rusia ia deveni eclisida en esta campo par Xina e la Statos Unida.
En la anio pasada, Rusia ia perde sua monopolio de transporta astronautas a la Stasion Spasial Internasional, cuando la compania privata SpaceX ia susede fa esta a du veses.
La SUA ia anunsia ja sua intende de revade a la Luna ante la fini de 2024. En acel program, nomida Artemis, un om e un fem va sta sur la satelite en lo cual va es la visita prima par umanas a la surfas lunal pos 1972.
@T Xina menasa gera sur la autonomi de Taiuan
@L aora_oji/2021/xina_menasa_gera_sur_la_autonomi_de_taiuan
====== Xina menasa gera sur la autonomi de Taiuan ======
29 janero 2021
Xina ia averti ce atentas par Taiuan per autonomi "sinifia gera", a poca dias pos cuando Beijing ia aumenta sua ativia militar e ia vola aviones prosima a la isola.
La presidente nova de la SUA, Joe Biden, veni de reafirma sua dedica a Taiuan e ia presenta sua disposa en relata con Asia.
A un confere jornaliste ier, un portavose per la ministreria de defende xines ia dise: "Nos dise seria a acel fortes de autonomia taiuan: los ci jua con foco va arde se, e la autonomi de Taiuan sinifia gera."
Respondente, la Statos Unida ia descrive la declara xines como "nonfortunosa", ajuntante ce "la tensa a tema de Taiuan no nesesa gida a fronti".
Xina regarda Taiuan como un provinse separada, ma Taiuan vide se como un stato democrata con potia de governa se.
On suposa ce la governa esuan nova va manteni presa contra Xina a temas diversa, incluinte diretos umana, disputas comersial, Hongkong e Taiuan.
Xina e Taiuan ave governas separada ja de 1949, cuando la gera interna xines ia fini. Beijing atenta ja longa limita la ativia internasional de Taiuan e ambos ia compete per influe en la rejion pasifica.
An si Taiuan es ofisial reconoseda par sola un pico de nasiones, sua governa democrata elejeda ave relatas forte nonformal o comersial con multe paises.
Como la plu de paises, la Statos Unida ave no lia diplomata ofisial con Taipei. Ma sua Ata de Relatas Taiuan promete ce la SUA va furni a la isola armas de defende, e asentua ce lo ta regarda cualce ataca contra Taiuan como un cosa de conserna grave.
@T Xina no clasi plu pandas como perilida
@L aora_oji/2021/xina_no_clasi_plu_pandas_como_perilida
====== Xina no clasi plu pandas como perilida ======
9 julio 2021
Pandas jigante es no plu clasida como perilida, ofisiores xines dise, ma los es ancora riscada. Sua clasi ia es reduida car la cuantia de pandas libre ia ateni 1800.
Espertas dise ce Xina ia susede salva sua animal iconin par sua laboras longa de conserva, incluinte la grandi de la abiterias.
Xina regarda sua pandas como un tesoro nasional, ma ia presta los ance a otra paises como utiles diplomata.
La reclasi "refleta sua state bonida de vive e la laboras de Xina en manteni sua abiterias integrada", Cui Shuhong ia dise, xef de la Departe de Conserva de Natur e Ecolojia de la Ministreria de Ecolojia e Ambiente.
La Uni Internasional per Conserva de Natur, con base en Swiz, ia sutrae ja la animales de sua lista de spesies perilida e ia move los a la categoria "riscada" en 2016. Alora, ofisiores xines ia oposa la deside, opinante ce lo ta malgida a crede ce on pote abandona la conserva.
Usores de redes sosial en Xina ia es deletada, disente ce la anunsia demostra ce la valua de conserva merita la labora.
Espertas ia dise ce la susede ia veni xef par laboras xines per recrea e repopla forestas de bambu. Sirca 99% de la dieta de pandas es composada de bambu, e los ta mori probable sin lo.
Zos ia atenta ance crese la cuantia de pandas par metodos de reprodui en nonlibria.
@T Xina parla sur reuni con Taiwan
@L aora_oji/2021/xina_parla_sur_reuni_con_taiwan
====== Xina parla sur reuni con Taiwan ======
9 otobre 2021
Presidente Xi Jinping de Xina ia dise en un parla ce "reuni debe es realida" con Taiwan. El ia ajunta ce la uni debe aveni en modo pasosa, ma ia averti ce la popla xines ave un "tradision gloriosa" de oposa separadisme.
En responde, la ofisia presidental de Taiwan ia dise ce la futur de la isola es en la manos de sua popla.
Taiwan regarda se como un stato autonom, ma Xina vide lo como un provinse desaliada.
La interveni par Xi segue un serie de sirca 150 volas militar xines en la zona de defende airal de Taiwan en la semana pasada.
Ma sua parla, a la aniversario 110 de la revolui cual ia suverti la dinastia imperal xines ultima en 1911, ia es plu pasinte ca sua comenta major la plu resente sur Taiwan en julio, cuando el ia promete "frati" cualce atenta a autonomi formal par Taiwan.
Aora Xi dise ce el vole vide un uni pasosa su un politica de "un pais, du sistemes", simil a lo usada en Hongkong. Ma la ofisia presidental de Taiwan ia nota ce la opina publica rejeta multe clar tal sistemes. Lo ia recomenda ce Beijing abandona sua "pasos provocante de intrui, menasa e destrui".
An con la tensa altida en la semanas pasada, la relatas entre Xina e Taiwan no ia basi a la nivel videda en 1996, cuando Xina ia atenta turba elejes presidental par proba misiles e la SUA ia envia portaviones a la rejion per preveni esta.
An si alga paises ueste ia espresa sua ansia a la esibis xines de fortia militar, Joe Biden, presidente de la SUA, ia dise ce Xi ia debe continua segue la "acorda taiwan". Esta pare refere a la politica esuan longa sur "un Xina", par cual lo reconose ofisial Xina e no Taiwan.
Ma la acorda permete ance ce Washington reteni un relata "forte e nonofisial" con Taiwan. La SUA vende armas a Taiwan como parte de sua Ata de Relatas Taiwan, cual dise ce la SUA debe aida Taiwan a defende se.
@T Xina permete tre enfantes pos un cambia de politica
@L aora_oji/2021/xina_permete_tre_enfantes_pos_un_cambia_de_politica
====== Xina permete tre enfantes pos un cambia de politica ======
1 junio 2021
Xina ia anunsia ce lo va permete ce duples ave asta tre enfantes, pos ce la statistica de abitores ia mostra un redui forte de la taso de nase.
En 2016, la pais ia abandona sua politica, segueda tra desenios, ce un familia pote ave sola un enfante. Lo ia cambia esta a un limita de du enfantes, cual ia fali an tal produi un crese sustada en la cuantia de bebes naseda.
La custa de eleva enfantes en sites ia descoraji multe duples xines.
Esta cambia ia es aprobada par Presidente Xi Jinping a un consenta de ofisiores xef de la Partito Comuniste.
Espresada par la ajenteria governal de novas, lo va es acompaniada par "medias suportante, cual va contribui a boni la strutur de popla de nosa pais, reali la stratejia de la pais per maneja ativa un popla senesente, e manteni la vantaje de la furni de recursos umana".
Ma Amnestia Internasional, organiza per diretos umana, ia dise ce la politica, como sua presedentes, es ancora un viole de diretos de seso e reprodui.
La xef de sua ecipo de Xina, Joshua Rosenzweig, ia comenta: "Governas no ave la direto de regula la cuantia de enfantes cual on ave. En loca de 'otimi' sua politica de nases, Xina debe respeta la elejes de vive de persones e fini tota controlas invadente e puninte a tema de desides per projeta familias."
Alga espertas ia es ance setica contra la efeto.
"Si deseveri la politica de nase ta es eficas, ance la politica presente de du enfantes ta debe ja mostra sua eficasia," Hao Zhou, economiste major a Commerzbank ia dise. "Ma ci vole ave tre enfantes? Persones joven pote ave masima du enfantes. La problem fundal es ce la custas de vive es tro alta e la presas de vive es tro enorme."
@G lete
@O 
@A 
@D 
@T Des poesias par Chico Buarque
@L leteratur/10_testos_de_chico_buarque
@A Patrick Chevin
====== Des poesias par Chico Buarque ======
traduida par Patrick Chevin
===== Dansa de la baletiste =====
Xercante curiosa
Cadun ave alga feri
Marca de variola o vasin
E ave diarea, ave vermes o ameba
La baletiste no ave los
E no ave rasca
No fungo no veruca
E no manca de manera
No ave los
Xercante curiosa
Cadun ave ja pioios
O un odor de 'creolina'
Cadun ave un frate duistrabiste
La baletiste no ave los
No ungia encarnida
E no dente susida
No feri malsanida
No ave los
E nun es esenta
Cada un ave secretes
Cuando velia a la matina
Ave scarlatina
O ave ja febre jala
La baletiste no ave los
E teme de asende
E teme de cade
Teme de vertije
No ave los
Xercante curiosa
Cadun ave ja un peca
Pos cuando la misa es finida
Cadun ave un amoreta a ves prima
La baletiste no ave los
Susia pos la orela
E mustax de grosela
Pantaleta poca vea
No ave los
An la relijiosa
Pote roji si la venta
Leva se roba subita
Regardante curios, cadun ave alga pelos
La baletiste no ave los
Sala sin mobilas
Gotea en se cosina
Problemas de familia
Ci no ave los
Xercante curiosa
Cadun ave los...
===== Tota la emosia =====
Me nesesa velia
Asta ce se consuma
La tempo
De nos
Me nesesa gida
Un tempo de ama tu
De ama tu lenta
E zelosa
Me vole descovre
A la momento final
Un tempo cual refa esta cual ia desfa
Cual recolie tota la emosia
E pone en la corpo a un ves plu
Me promete de ama tu
Asta ce la ama
Maladi
Maladi
Me prefere de parti
A tempo de nos pote
Separa nos de nos
Pos perde tu
Me encontra tu serta
Cisa a un tempo delicata
En cual nos va dise no cosa
No cosa ia aveni
Me va sola continua, como encantada
A lado de tu
===== Me ia pensa an... =====
Asta me strada, ia ave un bosce
Cual un muro alta ia proibi
Ala tota bal ia cade, tota poma ia nase
E la proprior de la bosce ia no vide
A la otra lado tan multe aventuras
E me, espetante en la note oscur
Tocante esta melodia
La felisia ia abita tan visina
Ce bobo me ia pensa an ce tu ia es de me
Asta me, ia abita me amada
Con oios clar como la dia
Ala me regarda ia vive de sonia e fantasia
E la proprior de la oios ia no vide
A la otra lado tan multe aventuras
E me, espetante la teneria
Cual nunca ia veni per engana me
Me ia es pobre, tan pobre de caresa
Ce bobo me ia pensa an ce tu ia es de me
Tota dole de la vive ia ensina me esta melodia
Cual bobo me ia pensa an ce tu ia es de me
===== Rosa de la ventas =====
E de la ama on ia cria la scandal
De la teme on ia crea la trajedia
En la fas on ia pinti la palia
E no ia rola un sola larma
An no un lamenta
Per aida
E en nos ia veni la abitua
De pasea tra la oscuria
De murmura entre la plias
De estrae lete de la petras
De vide la tempo freta
Ma su la dormi de sentenios
Ia matini la drama
Como un pluve de petales
Como si la sielo vidente la tristia
Ta mori de tristia
E pluve la pardona
E la cautia de la sajas
An no ia osa reteni en se labios
La surie e la pasiona
Car inondante con flores
La calmia de la lagos ia coleri
La rosa de la ventas ia peri
La leto de la rios ia pleni
E acua dulse inonda veni
La amargia de la mar
En un inonda amazonica
En un esplode atlantica
E la fola vidente en panica
E la fola vidente atonica
An si tarda
Se velia
===== Anjelica =====
Ma ci es esta fem
Ci canta sempre esta rima?
Me sola vole osila ultima
Me fio en la oscuria de la mar
Ma ci es esta fem
Ci canta sempre esta lamenta?
Me sola vole recorda la tormenta
Cual ia entera me fio en la mar
Ma ci es esta fem
Ci canta sempre a un mesma model?
Me sola vole covre me anjel
E lasa el reposa en la mar
Ma ci es esta fem
Ci canta como on toca la campana?
Me vole canta per me fio vana
Car el no pote canta en la mar
Ma ci es esta fem
Ci canta sempre esta rima?
Me sola vole osila ultima
Me fio en la oscuria de la mar
===== Me fias =====
Regarda me fias
Los es me fias
Do es ce los vade
Si sorti sola ja
La notas de me canta
Vade ance me fias
Portante destinas
Luminada de si
Los pasa asta me
E turba la linias
De me mano
Me fias es de me
Sola de me en me ilude
En la canta cristal
De la mina de imajina
E pote la tempo
Marca se vias
En la fases
Con la linias
De la notes de no
E pote la solitaria
Maltrata la fias
Me fias, no
Me fias es de me
Sola de me
Los es la fias
De me cor
===== Foto blanca e negra =====
Me conose ja la pasos d'esta via
Sabe ce no va ariva
Se secretas me conose ja
Me conose ja la petras de la via
E sabe ce ala solitar
Me va deveni tan plu mal
Cual pote me contra l'encanta
De l'ama cual me nega tan
Evita tan e cual an tal
Reveni sempre encanta me
Con se mesma fatos vea e triste
Cual con ostina me insiste
Colie en me fotos personal
Ala vade me denova com'un fol
Xercante acel desconsola
Cual me tro conose ja
Dias nova e triste, notes clar
Leteras, strofes, O! me cara
A un plu ves me scrive a tu
Per dise ce esta es pecosa
Me trae la peto marcada
Con recordas de l' pasada
E tu sabe per cual cosa
Me va colie un soneto plu
Un foto blanca e negra plu
Cual maltrata a plu me cor.
===== Bruneta con oios de acua =====
Bruneta con oios de acua
Retira tu oios de l'mar
Veni vide la surie cual valua
La vive cual per tu me garda
Reposa sur me povre peto
Cual nunca fronti la mar
Ma cual ave un abrasa streta, bruneta
Cual no cosa plu separ'
Veni oia naras bela
Cual me fa per tu, insone
Veni sabe naras de la mar, bruneta
Cual sola me conose
Bruneta con oios de acua
Retira tu oios de l'mar
Veni vide la surie cual valua
La vive cual per tu me garda
Tu om, el ia vade via
E dise ce reveni va
Ma la ondas no ave oras, bruneta
De departi o de ariva
Pasa velas e vade via
E la tempo sin reteni
Ma me canta prea ancora, bruneta
Aora, bruneta, veni!
Bruneta con oios de acua
Retira tu oios de l'mar
Veni vide la surie cual valua
La vive cual per tu me garda
===== Sabiá (Turdo de Brasil) =====
Me reveni va
Me sabe ce denova
Me reveni va
Asta me loca
Ia es ala
E es ancora ala
Ce me vole oia
Un sabiá
Me reveni va
Me sabe ce denova
Me reveni va
Reposa en la ombra
De un palma
Cual no es ja
Colie flor esta
Cual no flori ja
E alga ama cisa
Pote asusta
Notes cual me no vole ia
E proclama la dia
Me reveni va
Me sabe ce nova
Me reveni va
No, no va es vana
Si me ia fa
Desinias per me engana
Como ia fa
Enganas per me encontra
Como ia fa
Vias per es perdeda
Me ia fa tota
E tu, me no oblida
===== Canta per la unia de America latina =====
(Pablo Milanés / Varia par Chico Buarque)
Ia ave la nase de un mundo
Retardada momental
Ia ave un corta interval
De universa un secondo
Ma ia pare ce an tal
Fininte ja tota ia es
Par la distantia mortal
Cual ia separa nos vives
Los ia reali la labora
De desuni nos manos
E fa ce frates alora
Regarda la otra temos
Con la anios pasada
Ia cumula se la coler
On oblida la amada
On ia pare un stranjer
Ce distantia tan dolos
Ce mundo tan separada
Nunca ta es trovada
Sin la vive de tota nos
E ci garantia ce la istoria
Es un caron abandonada
A la borda de un via
A un stasion iniorada
La istoria es un auto joios
Plen de poplas contente
Cual crase noncurante
Ci nega el, tota de los
El es un tren cual rasca via
Cual abri sur nova spasios
Cual saluta con mil brasos
Cual balansi nos familia
Los ci se lus propre teni
Nun susede estingui estas
Se brilia pote ateni
La oscuria de otra costas
Ci ta impedi ce la flama
Vade luminante la sena
E ensendente la asembla
E inventa otra trama ?
Ci ta evita ce los ventos
Bate portes malcluida
Reversa tera malbateda
E ateni nos lamentas ?
Final ci paga la lamenta
De la tempo ja perdeda
De la vives cual costa ja
E de los cual costa va ?
Es lansada ja un stela
Per ci sabe persepi
Per ci vole ateni
E vade abrasante el
Es lansada ja un stela
Per ci sabe persepi
Per ci vole ateni
E vade abrasante el
@T A la plaia ambarin
@L leteratur/a_la_plaia_ambarin
@A Christoph Hengemühle
====== A la plaia ambarin ======
par Christoph Hengemühle
la ventetas de mar
dona besas salosa a tu
venton forte e gavotas criante
la mar abrasa tu
con se ondias forte
a la arena moiada de riva
me trova un moneta de fortuna
memorias osidente
@T A mea madre
@L leteratur/a_mea_madre
@A Camara Laye, Mfumu
====== A mea madre ======
Par Camara Laye, traduida par Mfumu
Fem negra, fem african,
o tu, mea madre, me pensa a tu...
O Dama, o mea madre,
tu ci ia porta me a dorso,
tu ci ia dona lete a me,
tu ci ia governa mea pasos prima,
tu ci la prima ia abri la oios a me
a la mervelias de la tera, me pensa a tu...
Fem de campos, fem de rios, fem de la rio grande,
o tu, mea madre, me pensa a tu...
O tu, Dama, o mea madre,
tu ci ia seci mea larmas,
tu ci ia felisi mea cor,
tu ci ia sufri pasiente mea caprises,
como me ta ama ancora es prosima de tu,
es enfante prosima de tu...
O Dama,
Dama de la familia grande de forjores,
mea pensa turna se sempre a tu,
la tua a cada paso acompania me,
o Dama, mea madre,
como me ta ama ancora es en tua caldia,
es enfante prosima de tu...
Fem negra, fem african,
O tu, mea madre, grasias ;
grasias per tota lo cual tu ia fa per me,
Tua fio, tan distante, tan prosima de tu!
@T A un nas
@L leteratur/a_un_nas
@A 
====== A un nas ======
A un ves on ave un om a un nas fisada,
on ave un nas superlativa,
on ave un nas pendor e scrivor
on ave un pex de spada barbida.
On ave un orolojo de sol a fas de ombra
on ave un distilador pensante,
on ave un elefante supina
on ave Ovidio Naso plu nasida.
On ave la ariete de un galea,
on ave un piramide de Egipte,
el ia es la des-du tribus de nases.
On ave un nasia nonfinita
multe nas, nas tan ferose
ce lo en la fas de Anas ta es un crimin.
@T A ves, cadun debe aprende
@L leteratur/a_ves_cadun_debe_aprende
@A James Warren, The Korgis, Michel Gaillard, Magis Optis
====== A ves, cadun debe aprende ======
Un canta de James Warren, de la bande brites The Korgis (1980)
Adatada de engles e rejistrada par Michel Gaillard & Magis Optis
((Depinta La flor del deserto, par Yves Gaillard, 1972.))
Cambia en cor
Vide a sirca
Cambia en cor
Lo va stona
Me nesesa tua ama
Tal la lus de sol
A ves, cadun debe aprende
@T ABC de la dialetica materialiste
@L leteratur/abc_de_la_dialetica_materialiste
@A Leon Trotski
====== ABC de la dialetica materialiste ======
Esta es un tradui de la ABC de la dialetica materialiste par Leon Trotski.
La titulos de la partes no es en la testo orijinal, ma los es juntada a la tradui per claria e lejablia. La tradui ia es produida par ActiveSelective.
La dialetica es no un narada, no un mistica, ma un siensa de formas de nosa pensa, an si la pensa no es limitada par problemes de la vive dial ma atenta ariva a un comprende de la prosedes plu complicada e larga. La lojia dialetical e la lojia formal relata como la matematica superior e la matematica inferior. Asi me proba produi un desinia rapida de la substantia de la problem en un forma bon concreta.
===== La lojia manca =====
La lojia aristotelal de la silojisme simple comensa a la proposa ce "A es egal a A". Esta pone es aseta como un axiom per la umana en un numero grande de atas practical e de jeneralis elemental. Ma en realia A no es egal a A. Esa es fasil a proba si nos oserva esta du leteras A e A su un lente -- los difere.
Ma, un person pote oposa, la cosa no es la grandia o la forma de la leteras, per ce la leteras es sola simboles de cuantos egal, per esemplo un libre de zucar. La oposa no es pertinente: en realia, a tota tempo un libre de zucar no es egal a un libre de zucar -- un balansa plu esata va trova un difere de la un e la otra.
Ance ora, un person pote dise: un libra de zucar es egal a se mesma. Ance esta no es vera. Tota cosas cambia noninterompeda de grandia, pesia, color, etc. Los no es egal a se mesmas.
Un sofista ta responde ce un libre de zucar es egal a se mesma "a un momento serta". Abandante la valua practical dutada estrema de esta axiom, ance esta no resista la critica teorial. Como nos debe comprende la parola "momento"? Si el es un intervalua infinitesimal de tempos, donce un libre de zucar es sujetada a cambias nonevadable en el curso de esta "momento". O es la "momento" un conseta matematical pura, es a dise, un zero de tempo? Ma tota esiste en el tempo; e la esiste mesma es un prosede noninterompeda de transformas; seguente, el tempo es un elemente fundal de la esiste. Donce la axiom "A es egal a A" sinifia ce la cosa es egal a se mesma sola si el no cambia, es a dise, sola si el no esiste.
===== Cuantial e cualial =====
A prima, ta pare ce esta sutiles es nonusable. En realia los es de importa desidente. A un lado, la axiom "A es egal a A" pare la punta de comensa de tota nos conose. A la otra lado, el pare la punta de comensa de tota eras en nos conose. Usa la axiom "A es egal a A" sin es punida, es sola posable en limitas serta. Cuando cambias cuantial en A es ignorable per la taxe en caso, nos pote supose ce "A es egal a A". Esta es per esemplo la modo como un comprador e un vendor considera un libre de zucar. Nos considera la temperatur de la sol en un modo simile. Nos dise "la sol es egal a la sol" contra ce se temperatur es sujeteda noninterompeda a cambias cuantial. Asta resente nos considera el valua de la dolar en la modo mesma.
Ma la cambias cauntial plu ce limitas serta, deveni cambias cualial. Un libre de zucar sujeteda a la ata de la acua o de la cerosine sesa es un libre de zucar. Un dolar en manos de un presidente sesa es un dolar. Determina la punta critical en la momento esata do cambias cauntial deveni caulial es un de la taxes la plu importa e nonfasil de tota areas de la siensa, la sosiolojia incluida.
Cada laboror sabe ce es nonposable de produi du ojetos egal completa. En la labora de rodamentes, un desvia entre la pesos es permeteda ma el debe no suprapasa un limita serta (clamada la tolera). Obente la normas de la tolera, los pesos es considerada mesma: "A es egal a A". Cuando la tolera es suprapasada, la cuantial deveni cualial; en otra parolas, la pesos es deveni inferior o nonusable completa.
===== Sensa comun e la tolera de consetas =====
Nos pensa siensal es sola un parte de nos practica jeneral, strumentos incluida. Ance per consetas nos ave un tolera. La tolera es fundada no par la lojia formal ce comensa a la axiom "A es egal a A", ma par la lojia dialetical ce comensa a la axiom ce tota cambia. La "sensa comun" es caratereda per la fato ce el suprapasa sistematical la tolera dialetical de consetas. La pensa vulgar opera con consetas como "la capitalisme" (e "la moral", "la libria", "la stato de laborores", etc) como consetas fisa, e suposa ce la capitalisme es egal a la capitalisme (e la moral es egal a la moral, etc). La pensa dialetical analisa tota ojetos e fenomenas en se cambia continuante, e determina la limita critical de la state material en esta cambia. A plu ce esta limita, A sesa es egal a A (e un stato de laborores sesa es un stato de laborores, etc).
La manca fundal de la pensa vulgar es ce el se contente con imprimis fisa de un realia ce es composada de move eterna. Ma la pensa dialetical dona a la consetes, per medio de coretis e concretis e prosimis plu prosima, un ricia de contente e de curvablia; me ta pote dise ce el los dona un estende serta plu prosima a la fenomenas vivente. No "la capitalisme" en jeneral, ma "un capitalisme en un state serta, determinada per se developa". No "la stato de laborores" en general, ma "un stato de laborores en un pais retardos e ensircada per la imperialisme", etc.
La pensa dialetical es relateda a la pensa vulgar en la mesma modo como un film es relateda a la fotos fisa. La film no nega la fotos fisa ma el combina un seri de los a modo seguente la leges de la move. La dialetica no nega la silojisme, ma instrui nos de combina la silojismes a esta modo per ce los produi a nos un comprende plu prosima a la realia cambiante eterna.
Hegel en se libro La Lojia ia funda un seri de leges dialetical: la cambia de cuantia en cualia, la developa per medio de la contradises, la contra de la contente e la forma, la interompe de la continuia, la cambia de la posablia en la nonevadablia, etc; lejes ce son vera importa per la pensa teorial como la silojisme simple per la taxes plu elemental.
===== Idealsme e materialisme =====
Hegel ia scrive ante Darwin e ante Marx. Grasias a la pulsa potente donada a la pensa per la move sosial, la Revolui Franses, Hegel espeta la move jeneral de la siensa. Ma a cause de se pensa ia es sola un espeta, contra ce Hegel ia es un jenio, el ia es donada par Hegel un carater idealista. Hegel ia opera con ombras idealista como los es la realia ultima.
Marx ia mostra ce la moves de esta ombras idealista refleta no plu ce la moves de la cosas material. Nos clama la dialetica de Marx "materialiste" per ce se radises es trova no en la sielo no en la fondos de nos "vole libre" ma en la realia ojetal, en la natura. La consensa ia nase de la nonconsensa, la psicolojia de la fisiolojia, la mundo organical de la nonorganical, la sistem solar de un nebla.
En cada grado de esta scala de developa, la cambias cuantial es transformada en cualial. Nos pensa, la pensa dialetical incluida, es sola un de la formas de espresa de la materia cambiante. No ave spasio en esta sistem per un dio o per la diablo, no per la spirito nonmorial e no per normas de leges e morales eterna. La dialetica de la pensa, naseda de la dialetica de la natura, ave seguente un carater materialista profonda.
La darwinisme ce esplica la evolva de la spesies con transformas cuantial ce cambia en transformas cualial, ia es la vinse la plu grande de la dialetica en tota areas siensal supra la materia organical. Un otra vinse grande ia es la descovre de la carta de la pesias atomal de la elementes cimical e la transforma de un elemente en un otra.
===== Categori seguente da la istoria =====
Esta transformas (de spesies, elementes, etc) es liada a la categoris -- si importa en la siensas natural como en la siensas sosial. La sistem de Linnaeus (la sentenio des-oto) ce ia comensa a la nonmutablia de la spesies, ia es limitada per descrive e categori la plantas seguente la carateres esterna. Esta periodo enfantal de la botanica es analojial a la periodo enfantal de la lojia, per ce la formas de nos pensa es developa como tota vivente. Sola la refusa desidente a la idea de la spesies fisa, e sola la studia de la istoria de la evolva de plantas e se anatomia, ia prepara la base de un categori vera siensal.
Marx, ci contra Darwin ia es un dialetico consensal, ia descovre un base per categori siensal la sosia umana en la developa de forsas produinte e de strutur de la relates de propria, ce constitui la anatomia de la sosia. La marxisme substitui la categoris vulgar ce sola descrive la sosias e statos (categoris ce ance asta aora flora en la universias) per la categori dialetical e materialista ce esplica la sosias e statos. Sola per usa la metodo de Marx, es posable a determina coreta la consete de un stato de laborores e la momento de se cade final.
Como nos vide, tota a supra no contente alga "metafisical" o "scolastical" como la ignora suposante ta dise. La lojia dialetical espresa la leges de move en la pensa siensal contemporal. En contra, la luta contra la dialetica materialista espresa un pasada vea de un conservantisme de la burgesia poca, la vanita de la rutinores de universias i ... un sintil de espera a un posvive.
@T Adio
@L leteratur/adio
@A Chabi
====== Adio ======
par Chabi
pos la mori de George Boeree a 5 janero 2021
La espresa "dia sinco" refere ance a un lamenta par Lorca.
A cadun ariva la dia
en cual nos revade al polvo,
de do a un dia nos ia sorti.
Triste es la dia
e triste es la ora,
la dia sinco janero ia es dia sinco,
e la nubes oscur ia covre la sielo,
e los ia plora par la mori de acel ci dona vive
a tu, lingua amada.
On no ave parolas
per espresa la sentis de la parlores,
de ci, cuieta, parla en esta lingua peti,
de ci, oji, plora silente par causa de la nova.
Tu ia abandona nos, o Jorj,
ma tu ia lasa a nos la lingua,
e ta ce tu vive con lo,
a cada ves ce nos parla lo,
a cada ves ce nos scrive usante lo,
a cada ves ce nos leje en lo.
Per sempre en nosa cores,
per sempre en nosa memoria,
la dia va ariva en cual on va revide tu
e tota juntada, on va parla con la parolas
de acel lingua peti cual tu ia dona a nos.
Adio, Jorj!
Ta ce tu resta felis en la Paradiso,
en cuando nos ancora espeta la dia
per reveni al polvo.
Asta alora,
on continua,
parlante tua parolas
tra lingua franca nova.
@T Adio Padstow
@L leteratur/adio_padstow
@A Padstow Farewell, The Farewell Shanty, Padstowe Shanty, Marc Gurevitx
====== Adio Padstow ======
Padstow Farewell (The Farewell Shanty | Padstowe Shanty)
traduida par Marc Gurevitx
Lo's la temp' de vade
La ancor, tu tira
La ancor, tu tira
Va revide tu.
Pon' la vela sur el
Tua drizas, tira
Tua drizas, tira
Va revide tu.
Pon' el sur la curso
La cordones, tira
La cordones, tira
Va revide tu.
Ondas surje a su
A canal, tu tira
A canal, tu tira
A marea blu.
Cuando dias fini
Per la sielo, tira
Per la sielo, tira
Dio es con tu.
Lo's la temp' de vade
La ancor, tu tira
La ancor, tu tira
Va revide tu.
@T Adio Pinta Vea
@L leteratur/adio_pinta_vea
@A Marc Gurevitx
====== Adio Pinta Vea ======
Goodbye Old Paint / Leaving Cheyenne
traduida par Marc Gurevitx
Me monta un Pinta Vea
Gidante un cavalo fem
Me vade a Montana
Per lansa hulahan
Los nuri en caniones
E los bevi de flues
Con la codas maraniada
E la dorsos tan cru
Adio Pinta Vea
Me parti de Cheyenne
Adio Pinta Vea
Me parti de Cheyenne
Me parti de Cheyenne
Me vade a Montana
Adio Pinta Vea
Me parti de Cheyenne
Bill Jones vea
Ave fias e un fio
La fio es en Denver
E la fias, los no brilia
Sua sposa ia mori
En un scaramuxa en la bar
Ma an tal Bill canta
A cada dia clar
Cuando me va mori
Prende sela de la sala
Ensela mea peti
Gida el de sua stala
Lia me a sua dorso
Turna nos a la ueste
En la prados cual me ama
Ta ce me per sempre resta
@T Adio rios, adio fontes
@L leteratur/adio_rios_adio_fontes
@A Rosalía de Castro, Chabi
====== Adio rios, adio fontes ======
par Rosalía de Castro
traduida par Chabi
Adio rios, adio fontes,
adio rietas peti,
adio vide de mea oios:
me no sabe cuando nos va revide lunlotra.
Mea tera, mea tera,
tera do me ia crese,
orto peti cual me tan multe ia ama,
cara figo cual me ia planta
Prados, ríos, arboredas,
Pinares que move o vento,
Paxariños piadores,
Casiña dó meu contento,
Muíño d' os castañares,
Noites craras de luar,
Campaniñas trimbadoras
Dá igrexiña dó lugar,
Amoriñas d' ás silveiras
Qu' eu lle dab' ó meu amor,
Camiñiños antr' ó millo,
Adios, para sempr' adios!
Adios groria! Adios contento!
Deixo á casa onde nacín,
Deixo á aldea que conoço,
Por un mundo que non vin!
Deixo amigos por estraños,
Deixo á veiga pólo mar,
Deixo, en fin, canto ben quero...
¡Quen pudera non deixar!...
. . . . . . . . . . .
Mais son prob' e mal pecado.
A miña terra n' é miña,
Qu' hastra lle dán de prestado
A veira por que camiña
O que naceu desdichado.
Téñovos pois que deixar.
Hortiña que tanto amei,
Fogueiriña dó meu lar,
Arboriños que prantei,
Fontiña do cabañar.
Adios, adios, que me vou,
herbiñas do camposanto,
Donde meu pai s' enterrou,
Herbiñas que biquey tanto,
Terriña que nos criou.
Adios tamén, queridiña!....
Adios por sempre quizais!...
Dígoch' este adios chorando
Desd' a veiriña do mar.
Non m' olvides, queridiña,
Si morro de soidás....
Tantas légoas mar adentro....
¡Miña casiña! meu lar!
@T Adio, supravidor!
@L leteratur/adio_supravidor
@A Sunido, Jean-Claude Caraco
====== Adio, supravidor! ======
Un nara corta, traduida de uropi((Me no es la autor, e me no sabe ci el es. Me ia tradui esta testo de un novela en Uropi, traduida par Joël Landais. Ante fa mea tradui, me ia demanda a Joël Landais esce el sabe la nom de la autor, e ance el no ia sabe. El ia parla sur un testo en italian studiada con sua ensenior de italian, ante multe anios. La testo orijinal pare franses, car on usa la espresa "mettre la puce à l'oreille", cual probable esiste sola en franses. Plu, la nom Magrin es la tradui Uropi de Maigre, cual fa ce on pensa a Maigret, la carater famosa de Georges Simenon. Ma me no ia trova esta novela entre los de la Commissaire Maigret. Plu, me ia trova ce on ave italianes con la nom Magrin e Melison. Donce me crede ce la autor es un italian. Sunido)) par Jean-Claude Caraco ("Sunido") en 2013.
===== Capitol 1 : Rosas roja per un aniversario =====
- Bon dia, Luis. La Posta de la Sera e La Mundo de Oji, per favore... e ance Fem per mea sposa.
- Ave asi los, supravidor. Aora tu ave tempo per leje, no ? Bela es la jubila !
- Si, me atenta es beneficada par lo. Cuanto me debe a tu ?
La supravidor Magrin no desira discute a esta matina, la aira es tro fria.
- Du euros per La Posta, e sinco per Fem, e ance tre per La Mundo de Oji : acel es 10 euros, senior Supravidor. Ma esce tu no regrete la ofisia, la colaborores, la omisides ? Es difisil, no vera, abandona a esta modo tota?
La supravidor xerca en se portamone.
- Pardona ! Me ave sola un bileta de sento euros.
- Acel no importa, me ave la mone restante. E plu, me serta no va reseta de tu un bileta falsa ! Ave asi per tu : dudes, tredes, sincodes... e sento ! Ance mea mone es vera, supravidor, tu pote es pasosa ! A, a ! Pasa un dia bela !
- Grasias, Luis, asta revide !
La Supravidor Magrin es nonpasiente de ariva a casa, de apone sua pantoflas, e de instala se sur la sofa per leje. Ma subita el para.
- "O Dio ! Me ia oblida !".
El traversa rapida la strada e entra en un boteca de flores.
- Bon dia, supravidor ! Ce tu fa asi ? No ave asasinores en mea boteca, e plu, si me no era, aora tu ia sesa xasa los !
- Bon dia ! No, me xerca no asasinor ; me ta vole un desduple de rosas roja. Esce tu pote envia los a mea casa a sirca mediadia ? Oji es la aniversario de mea sposi...
- Tu sposa es tan fortunosa ! Acel rosas va fa el es enamada como a la dia prima!
- Los es vera merveliosa ! Bon, tal a sirca mediadia... Cuanto me debe a tu ?
- Acel es tredes euros con la envia.
La supravidor abri sua portamone, e sorti la bileta de 50 euros; el es a punto de avansa lo a la vendor de flores cuando el nota alga cosa strana: sur la bileta ave sinias negra cual sembla numeros.
- Un momento, me ave probable tredes euros.
El reprende la bileta de 50 euros e dona des e dudes.
- Asta revide, supravidor!
Apena estra la boteca, la supravidor oserva la bileta con atende: si, la numeros es vera los cual lasa un polvo negra e alga grasosa sur la ditos.
Magrin limpi sua ditos con un teleta, el leva sua spalas e el surie: "vera, me vide misterios a cada loca: acel es un esemplo bela de malformi profesal".
A poca tempo a pos, el es calma sentante sur la sofa, cuando sua sposa clama el:
- Tal, me cara, tu ia consola un fem blonde e bela a esta matina?
Con un espresa sarcasmosa de fas el avansa un teleta a el.
- Ce ? Ma ce tu es disente ? E ce tu fa con mea teleta?
- Me lava lo, no vera ? Ma no va es fasil sutrae la manxas de negrisil. Ci sabe como tu ia fa los ?
- Negrisil ? Esce tu es serta ? Strana !
La supravidor sta subita se, el vade per prende se jaca de la pendeveste; el sorti la portamone, el prende la bileta de 50 euros, e el regarda la numeros negra, scriveda con negrisil, a pos el vade a la telefon e el clama la polisia.
- Alo , Melison ? Me es Magrin. Escuta, me sabe ce tu no es plu en servi, ma me nesesa un informa. Esce tu pote xerca a ci parteni esta numero de telefon; espeta, on no leje bon lo... ave asi lo: 456879. No fa demandas a me , me va esplica plu tarda a tu. Clama denova me cuando tu sabe alga cosa.
La supravidor Magrin descomuta, e, con la bileta ancora en la mano, el vide ce sua sposa regarda el con confonde.
===== Capitol 2 : Un trasa falsa =====
- Ma... cuando esta stupida va clama denova me ?
La supravidor no susede resta pasosa: pos plu ca tredes anios de ativia, es difisil per el ce el deveni abituada a la jubila. El pensa ce, cisa, algun es en peril, el demanda a se per ce un fem (es serta sur un fem) ia scrive acel dijitos (nondutable un numero de telefon) sur un bileta: la bileta de 50 euros es nova, ancora lisa; lo no pote ia sirculi entre multe manos...
Es cuasi mediadia ! Magrin no pote plu espeta: el apone sua jacon, sua sapatos. El ave apena la tempo de responde a sua sposa ci cria de la cosina ce la come es cuasi preparada, e la sposa demanda ce el no es tarda. La polisieria no es multe distante : Magrin ia vade ala sempre paseante. Ave alga jelo sur la paseria : el debe atende, el serta no vole rompe un gama. A se ariva sua colaborores pasada reseta el con ries, la umores e bromas abitual.
- Alora, supravidor, tu dole ja de nostaljia ? Esce tu vole reprende tua servi ?
Magrin trova en se ofisia Melison ci prende un cometa : un sanduitx con jamon e un tason de bir.
- Xef, ce bon venta envia tu asi ? Me veni apena de clama tu: tua sposa ia dise a me ce tu ia sorti...
- Sesa clama me "xef" ! Me no es plu tua xef!
- Bon, bon, escusa... ma tu sabe, xef, la abitua... o, pardona!
- Alora, la numero ? Ce tu ia trova ?
- Bon, no cosa spesial! Un familia multe normal... nun ia desapare, no problem... no cosa en tota!
- An tal, esta es strana...
- Como strana, xef ? Esce tu vole esplica a me lo cual aveni?
- Lasa acel cade ; preferable, dise a me : esta familia, do lo abita?
- Ave asi lo : me ia nota tota... ma tu debe esplica a me!
- Plu tarda ! Aora me no ave tempo.
- Ma vera, xef, tu no pote lasa me en nonsabe, e plu, tu es jubilor: ce aveni a tu ?
- Lasa me en pas, asta revide!
Un jesti de mano, e Magrin ia sorti ja. Acel comensa basta ce el oia la popla redise a el, a sento veses en dia, ce el es jubilor: esta no es un bon razona afin el resta tra tota la dia con la manos en sua poxes! E an, es posible ce algun es en peril... El clama un taxi e fa se transporta a la adirije cual Melison ia dona a el.
La distrito es a la periferia, e la ora es ja mediadia e dui: sua sposa es probable furiosa! Un tal mal broma per la aniversario de los, ma aora el debe vade asta la fini!
La taxi lasa el ante un caseta blanca, con un jardin a sirca: ave du bisicles inclinada contra la grilia. La supravidor fa sona; un om de cuatrodes anios abri la porte;
- Bon dia, ce tu desira?
- Supravidor Magrin de la departe de la omisides. Esce me pote fa alga demandas a tu?
- La om pare turbada:
- Ave ce ? Ce aveni ? Esce mea fio ia ave un asidente?
- No, me vole sola demanda alga cosa a tu. No cosa importante ia aveni, no preocupa tu.
- Entra; tu ia asusta me. Tu vide, mea fio ave un scuter; alora, tu comprende, la polisia... me ia pensa direta sur la plu mal.
La supravidor segue el en la salon, do un xica senta lejente un revista.
- Per favore, senta tu...
Cuando Magrin tira la bileta de sincodes euros con la dijitos misteriosa, la xica fa un rion:
- Ma, me mesma ia scrive acel! Lo es nosa numero de telefon!
- Como, tu ia scrive lo?
La padre ia verje a se dirije.
- Ma si: me ia vole lasa mea numero de telefon a Suzana, un ami nova. Me ia ave no paper, e no pen, alora el ia prende un bileta de se portamone e me ia scrive lo a sur.
La supravidor sta ja se : el senti sua surprende riable e el vergonia alga. Ce spesie de jua el ia vole jua ? La faor seria de justia ? El saluta rapida, e lasa sua conversores es sin vose. La taxi ia es espetante el e lo transporta el a se casa.
- Cuatrodes-sete euros!
La costa es bastante forte, e a esta ves el no pote inclui lo en la spendes de servi. El es vera coler; el dona a la taxiste la bileta maldiseda:
- Garda la mone restante!
Evidente el no ia ta debe sorti de sua casa a esta matina! Ma el para subita: ante sua casa ave alga autos de polisia, un ambulansia, un grupo peti de curiosas...
===== Capitol 3 : Un omiside strana =====
- Ci tu es ? Do tu vole vade ?
- Ma... a mea casa ! Ce aveni ?
- Un omiside ia aveni. Ce es tua nom ?
- Un omiside ? Ma me es la supravidor Magrin, me abita a la nivel du e me vole reveni a casa.
La polisior es turbada.
- A, supravidor Magrin... bon... segue me per favore.
Magrin no comprende lo cual aveni, ma el segue la polisior. A se veni la otra luores, ci es discutente en la scalera, silenti subita. Magrin comensa senti preocupada : un mal presensa fa el asende rapida la scalera. Sur la niveleta de la nivel du ave un asembla vera: la popla inclina per vide plu bon, la polisiores reteni la curiosas. La porte de sua aparte es larga abrida, ave persones ci vade e veni.
- Ma final, ce aveni ? Do es mea sposa ? Esce vos vole dise a me lo cual aveni?
La polisior ci pasea ante el verje a el.
- Espeta un momento, me vade per clama la supravidor.
- Ma me vole entra en mea casa ! Ce aveni ? Esplica a me !
Magrin ja sur la entra de la porte vide Melison ariva.
- Melison, ce tu fa en mea casa ? Aora tu debe esplica a me...
Melison prende el a la braso.
- Senior Magrin, un cosa asustante ia aveni... tua sposa...
- Ce, mea sposa ?
- El ia deveni asasinada, veni !
Magrin es como paraliseda : un presa lejera de Melison sur sua braso trae el a la realia :
- Veni, aora tu debe segue me.
La supravidor segue Melison : pare a el ce el trova se en un casa nonconoseda, nunca videda a ante. El pasea tra la coredor longa, a pos en la sala ultima a destra : lo es sua sala de studia.
El sta muda, como petrida sur la entra. La omes de la brigada de la omisides es ocupada par trasa sinias sur la solo; ave manxas sur la solo. Magrin fa alga pasos a dirije de la media de la sala, el inclina per oserva los... esta es sangue! Melison es sempre a sua lado, e el para el:
- Escusa, ma tu pote toca no cosa: tu sabe como on fa, no vera?
Sin alga duta sua sposa ia deveni bateda de retro, car el ave un feri a se colo. Sua visina de niveleta ia trova el: la visina ia vide la porte es larga abrida, e el ia ole un odor de ardeda. En la cosina ia ave un rosta carbonida en la forno. Evidente sua sposa ia es cosininte cuando la asasinor ia entra. Es serta ce el ia mori direta.
La supravidor es multe stonada:
- Ma, ci ia pote donce fa acel, e per ce?
El ia ulula cuasi la demanda. Un silentia de tomba invade la sala: tota la regardas verje a el.
===== Capitol 4 : La suspetada un =====
Melison ia prende el a la braso:
- Veni, senior Magrin; nos ave alga demandas per fa a tu. Nos debe lasa la colaborores labora...
El gida la supravidor a la salon. Aora el mesma pare la mestre de casa. Magrin es estra sua mente. An tal el ia vide tan multe senas simil: asasinas, corpos mor... ma el ia es sempre a la otra lado, lo de la polisiores ci fa demandas. El ia esperia nunca la lado de la vitimas... e de la suspetadas. El no comprende per ce on trata el a esta modo.
- Esce tu vole bevi alga cosa, senior Magrin?
Melison regarda el con preocupa. Magrin regarda a alta, e pare a el ce el regarda el a la ves prima.
- Ma per ce tu no nomi plu me « xef » o « supravidor »?
Melison es turbada.
- Bon... cual es per dise... con lo cual ia aveni, me mesma comprende no cosa plu. En fato me debe demanda de tu.
- Demanda de me?
- Si, tu comprende me : la caso es un crimin, un asasina. Nos debe xerca la culpable.
- Serta, ma... Me mesma sabe no cosa. Me veni apena de reveni a casa.
- Me regrete, ma me debe demanda de tu. Esce tu ia ave mone, cosas valuosa?
- Mone? No, me ave sempre poca a casa; ave sola alga joalas de mea sposa.
- Nos va esamina esce alga cosa manca. Ce tu ia fa a matina oji?
- A matina oji? Ma me ia vade a la polisieria, a tu. Acel, tu sabe bon lo!
- Me regrete, ma, ma tu debe raconta en un modo plu esata como tu ia pasa la matina.
Magrin no crede sua oreas propre, el pare vive un malsonia: a esta ves on interoga el mesma!
- Ma final, esce me ia veni per vide tu o no?
- Si, ma a pos? Tu ia resta en mea ofisia tra no plu ca un cuatri de ora, de mediadia asta mediadia e cuatri... E tu ia vole dise no cosa a me. Cuando me ia telefoni a tua casa, a la matina oji poca ante mediadia, tua sposa ia veni per responde a me. E aora la oras es plu ca tre... Nos debe sabe esata lo cual tu ia fa tra la oras pasada.
- Ma me sonia ! Acel no es posible!
Magrin sta saltante e el ulula:
- Ma vera ! En loca de perde tua tempo, xerca donce la asasinor!
Melison atenta calmi el, ma la supravidor ajita se como un demente. Ave otra persones en la salon: Magrin reconose alga fases familin, ci el ia vide ja en sua investigas. Tota la regardas verje a el como per culpa el. Cuando el pote final calmi denova, el lasa se cade sur la sofa. Melison ia deveni min tatosa e el parla con un tono noncurante:
- Senior Magrin, me es obligada demanda de tu, segue me a la polisieria per un interoga.
Magrin sensa sua sangue jela: los suspeta el! Ma acel es riable! El oserva la fas dur de Melison e el deveni sarcasmosa:
- Tu pone a me la securipolsos, me suposa...
- Tu ta debe no era, tu sabe multe bon ce on no pone la securipolsos a la atestores; nos no es fante un filma, senior Magrin, e asta esta momento tu es sola un atestor...
===== Capitol 5 : La misterio deveni plu oscur =====
- Acel basta! Me no pote plu! Lasa me en pas!
De oras Magrin deveni interogada par sua colaborores: de oras el ia raconta como el ia pasa la matina, de oras el ia parla sur la bileta misteriosa e sur sua investiga. En la comensa, crede el ia es difisil a los. Como un om intelijente como el, ia pote ja, con sua esperia, lasa confonde tan multe se par un numero malscriveda sur un bileta? A pos los ia trova la taxiste e la proprior de la caseta do Magrin ia fa gida se. Se alibi ia pertine. Magrin ia reveni ja a sua casa con la polisiores per esamina esce alga cosa manca en la aparte. No cosa, tota ia es en ordina: la poca mone cual el ia ave, ia es ancora ala, en la caxeta tre de la comoda. Nun ia prende ja la joalas de sua sposa. La misterio ia es ancora nonsolveda. Ma la nonculpablia de Magrin, a la min, ia es demostrada.
- Bon, la sola restante es suscrive tua atesta. Ave asi lo; si tu vole, nos pote acompania tu a casa.
- Magrin regarda a alta con oios fatigada:
- No, grasias, me prefere pasea, esta va es bon a me. E per mea sposa? Per la entera?
Melison esita tra un momento, a pos el responde:
- Nos va informa tu... cisa doman... tu sabe como on fa...
Si, la supravidor sabe como on fa. Ma el no ia imajina pote deveni tan fasil suspetada sur un crimin tan asustante. Sola cuando el es denova a casa, cuando el senti final solitar, Magrin consensi vera lo cual ia aveni. Asta esta momento, con tota acel persones a sirca, el ia pensa ja sola sur sua defende.
La note ia cade e aora el sensa un alga apetito. La cosina es desordinada, la forno es larga abrida, la rosta ardeda es ancora en la forno. Un tristia profonda invade el. Cuando el abri la friador el trova un botela de xampania. Sua sposa ia pone ja lo en fria... ance el ia recorda ja la aniversario de los: tredes-du anios de sposi, tredes-du anios de felisia tal subita rompeda a pesos.
Si sua sposa sola ia ave tempo, sin duta el ia ta prepara un de sua resetas spesial: un tiramisu.
La larmas veni en sua oios. Ma subita el regarda sirca se, xercante con la oios en tota la angulos, en tota la salas de la aparte. Ma si ! Como donce el no ia pensa sur esta a ante? La rosas! La vendor de flores no ia trae la rosas!
Magrin freta a la telefon per clama Melison, ma a pos los veni a sua mente, la aspeta nova de superioria e de condesende ironial de el. Acel Melison ci ia labora sempre su sua comandas, e ci aora sta a sua posto, sola car el es plu joven ca el! Magrin repone la telefoneta. El va ata solitar: el va mostra a tota ce el es ancora capas de gida un investiga, e de trova un asasinor! El debe disturba se per no freta en la strada, ante la boteca de flores, ma es la note plen, e tota es cluida: A matina doman el va abri la investiga la plu importante de se vive, e el va susede (el es serta sur lo) desmasci la asasinor de sua sposa.
===== Capitol 6 : La vendor de flores =====
A la matina seguente Magrin leva se pos un note multe ajitada. Es strana cuando on descovre ce on es solitar. El ave sempre ante se oios la figur de sua sposa, presente e pasiente como abitual... Cuanto veses sua sposa ia espeta el ante la table ja preparada? Cuanto notes el ia pasa veliada, angusada car el ia sabe ce sua sposo es gidante un investiga perilosa? Magrin mesma ia eleje ja un profesa difisil e riscosa, e sua sposa mesma ia mori ja... Acel cosas es la pensas cual ia xama en sua mente, tra la note, e cual ia impedi el adormi. El ia turna e returna en sua leto: a pos el ia leva se, e el ia ariva ante la porte de sua sala de studia, el no ia ave la coraje de abri lo. A cuatro oras de la matina, cuando el ia es a punto de comensa adormi, la camion de la Limpi Urban ia velia completa el. Alora el ia leva se per prepara a se un cafe. A sete oras e media el es a estra. Alga botecas es ja abrida: la panor, la vendor de jornales... ance la vendor de flores es ja descargante sua camioneta, aidada par un empleada. De la otra lado de la strada, Magrin oserva:
La floriste ia reveni apena de la mercato de la vendores major. An con la fria picante la floriste es en camisa: ocupada, el dise comandas con un sigareta entre sua labios. Cisa el sabe alga cosa? Magrin ci ave sua posto pos la ciosco per oserva el, dise a se mesma ce acel es nonposible: el conose el de tempo tan longa... El es a punto de reveni a casa: el va lasa Melison es ocupada con esta investiga.
- Supravidor !
La supravidor Magrin verje a retro.
- Supravidor, me es vera triste per tua sposa... cuando me pensa ce lo ia es vosa aniversario de sposi! Me jura a tu, me no ia dormi tra la note pasada...
La supravidor es turbada: el odia la compatias, el no sabe lo cual el debe dise.
- Me ia resta vera xocada cuando me ia ariva per trae la flores, ier a du oras, e me ia oia... Me va repaia a tu la rosas...
La supravidor secute:
- No, lo es no cosa, me grasia tu. Escusa me...
E el va a via. Es serta, acel om es stranjer a la fatos. Ma alora ci? Pos reveni a casa, el tira la cortinas de la salon e el oserva la strada. El vide la boteca de flores, e la parolas de la vendor de flores reveni a sua mente. "Me ia veni a tua casa a sirca du oras...". An tal Magrin recorda bon ce el ia demanda a el trae la flores sirca mediadia. Un presensa, un intui reteni el ala, ante la fenetra. Per ce la vendor de flores ia veni tan tarda? Cisa el sabe alga cosa? Entretempo, a estra la clientes prima ariva. Los para ante la fenetra de la boteca de flores, e inclina per regarda la plantas. Alga persones entra en lo. La floriste es amable e el surie a tota. Pare ce sua comersia funsiona bon. Du jovenes entra, e los sorti pos poca tempo con un buce de flores. Tota es normal, desperante normal... Subita Magrin ave un lumina. Ma no, acel no es normal ! En la boteca alga cosa strana aveni, alga cosa importante. La supravidor resta ala ancora tra alga oras. A esta ves el es serta: la vendor de flores asconde alga cosa...
===== Capitol 7 : Un contrabanda suspetada =====
De cuando el vijila la boteca, Magrin ia vide a la min sirca tredes clientes ci para e entra. A la min sirca des de los ia sorti... con un buce de flores en mano. Tota de los es joven, alga con jina reparada con pesos, otras bon vestida. Ia ave ance xicas, ma tota ia ave la mesma modo bastante strana de teni la buces. Jeneral, cuando on compra flores, on porta delicata los, con cura. Los no... Magrin suspeta alga cosa. Ma ce pote es ascondeda en acel buces de flores? Cisa ance el ta debe vade per compra un. Nonusosa: la floriste ta desfida. Final el prende un deside: a la sera oji el va prende denova sua servi e el va segue la floriste.
A sete oras el es a estra: el ia sorti sua auto de la garaje, e aora el es espetante. La vendor de flores tira a su la cortina de metal, e el instala se a la volante de sua camioneta. Magrin parti nondireta pos el. El no es abituada a segue discreta en auto: cuando el ia es laborante, ia ave sempre un colaboror per gida. A esta ves, par contrasta, el debe fa tota solitar: el debe atende per no es blocida a la semafor, per no perde vidal la camioneta, e en mesma tempo per no prosimi tro multe... La segue discreta es un arte! Aora los ia sorti de la urbe, e los ia entra en la rua periferial; la camioneta vibra per verje a destra. Aora los es sur un rua peti e poca traficada. Magrin debe resta a alga distantia afin on no descovre el. La camioneta lenti: la supravidor para e estingui la luses. El oia un colpa de porte: pare ce la floriste ia sorti de la veculo. Magrin sorti de se veculo e el pasea ante se. La note es sombre e jelada. El pasea cauta, xercante vide tra la oscuria. Aora el ia ateni la camioneta: el persepi un lus debil a sinistra. Lo veni de un construida vea, cual sembla un beneria. Magrin inclina per no deveni videda, e el continua pasea. A pos el para esata su un fenetra: el debe asoluta vide lo cual aveni a en. El leva lenta sua testa. Acel es esata como el ia suspeta: sur un table ave un saco plastica con un polvo blanca, e a se lado un pesador peti. Sirca la table tre omes, la floriste e du nonconosedas pesa un poca de polvo, e los pone alga grames de lo en un serie de sacetas: los es preparante dosas de droga. Los labora silente. Magrin es multe stonada, ma el comensa comprende: la floriste, sua visina, la om ci el ia crede conose tan bon, ci el saluta a cada matina, es un contrabandor de droga, e el usa sua boteca per vende discreta lo. Si, ma como el pote catura el? Ce el debe fa ? Solitar, la supravidor pote inisia no cosa: alora el deside revade a la urbe e averti Melison. Subita el fa un cria de dole, e el cade nonconsensa sur la solo.
===== Capitol 8 : Trapida ! =====
Magrin no ia persepi ja un om cuatro ci ia sta a estra per garda. Cuando el reprende se sensas, sua testa dole multe forte. On no pote dise ce la criminales ave manos lejera!
El abri se oios, el ta vole fa un masaje a sua colo dolente, ma el persepi ce acel es nonposible: el es sur la solo con la manos e la pedes liada. La tre banditos es oservante el. La floriste parla prima:
- Alora, supravidor me ia crede ce tu jubila!
-- E tu! Per ce tu ia mata mea sposa?
-- Tua sposa... ia ave un asidente nonfortunosa, supravidor. Ma tu, per ce tu segue me? Acel es un tal dana. Tu ia pare tan simpatiosa a me...
- Ce tu intende fa? Esce tu es demente? Los va catura tu: me colaborores va xerca me e los va trova tu.
La floriste ia sesa prepara la dosas; el prosimi a Magrin ci ajita se, atentante desperante libri se.
-- Los va xerca tu, supravidor, e los va trova tu. Ma tro tarda. Los va pensa ce tu no ia susede tolera la dole sur la mori de tua sposa. Tu no pote plu fa un otra cosa. Tu va pende tu, senior supravidor. Tota va crede ce tu ia suiside.
La omes ia fini se labora. Los deslia se pedes.
-- Avansa, sta tu, e es corajosa!
Un bandito punta se pistol a el. Du de la omes entra en la camioneta; la floriste mostra a Magrin sua auto propre:
-- Entra, supravidor. Ma a esta ves me mesma va gida. Nos va trova un foresta bela, un arbor bela... no asi. Nun debe sabe ce tu ia veni asi a esta sera!
La camioneta ia parti prima. A retro, en la auto, Magrin trema de teme. Acel persones no es bromante: sua ora ultima ia ariva. El ia descovre tro multe cosas: un contrabanda de droga, un organiza perfeta. Ma sua sposa ... per ce? Pos cilometres los ateni la comensa de un rueta de campania. La camioneta para, la auto avansa ancora alga sentos de metres, e a pos ance la floriste para.
-- Ave asi la loca ideal! E la neva comensa cade! Nos es multe fortunosa: nos an no va nesesa elimina la trasas!
La om du puia Magrin a estra la auto: el teni un corda en la mano e fa un noda de pendeda.
-- Leva tu, supravidor, ta ce nos vade! Me regrete vera. Ia ta es plu bon si tu ia es beneficada par tua jubila, lejente libros... ce me sabe ?...vadente per pexa...
La supravidor avansa par alga pasos: el resinia, el sabe ce el no pote sutrae se de la caso. Acel es vera: ia ta es plu bon si el ia es beneficada par se jubila. Tota esta mal fortunas, el mesma ia xerca los. Per ce el ia lasa se es confondeda par acel bileta? Per ce el ia vole jua la carater de Sherlock Holmes? A la min sua sposa ta es ancora vivente... e... ance el... Los ia ta pote vade a via... parti en junta per vacanse...
-- Ma mea sposa! Per ce tu ia mata el? A la min dise acel a me!
-- Aora acel no es plu importante, supravidor. En cualce modo el no ia sufri, el ia consensi sur no cosa.
Los es a la pede de la arbor: la floriste teni un seja pliable cual el ia sorti de la portabagaje, un seja pliable cual Magrin ia porta abitual con el per vade a pexa, en primavera. Aora la floriste ia instala la seja su la arbor, e el ia fisa la corda a un ramo durante:
-- Adio supravidor! Me regrete!
===== Capitol 9 : Tota cosas clari ! =====
Magrin ajita se, atentante desperante libri: la floriste e sua aidor leva el de la solo. Subita la foresta deveni luminada como par la lus de dia.
- Polisia! Ta ce nun move!
La comanda ia es tan subita ce la du banditos no ia ave la tempo de fa cualce move. Du polisiores ia restrinje ja los. Magrin cria:
- Melison! Como tu ia fa per trova me?
- Bon demanda, supravidor! E tu? Esce tu joia vide me, a esta ves?
Melison presa la mano tremante de Magrin ci es vidable emosiada.
- Ma esplica a me: como tu ia fa?
- Nos ia es vijilante tu, supravidor: me ia sabe multe bon ce tu intende atenta alga cosa, xerca la asasinor. Cuando me vole, ance me ave alga intui... Ta ce nos vade, tota a la polisia. Nos va final esplica tota.
A la lus prima, reveninte a casa, Magrin pensa denova sur tota la descovres de la note. El surie sur la idea ce el ia espeta asta es un jubilor ante descovre un contrabanda enorme de droga cual ia es aveninte de menses su sua nas, su sua fenetras!
Aora la floriste ia confesa e esplica tota. El ia instala ja un organiza perfeta e criminal, ascondeda par sua ativias comersial. Como multe floristes, el ia dona a tota se clientes un saceta con un polvo blanca afin los pone lo en acua, afin la flores dura plu longa. Ma droga ia deveni poneda en alga de acel sacetas. Afin los deveni reconoseda, sua clientes "spesial" ia debe pronunsia un parola secreta, un frase acordada a ante. Los ia paia e sorti de la boteca con un buce multe normal de flores... Ma ante tota con se dosas de droga.
De dias Magrin no ia trova ja un responde a se demanda cual ia angusa plu e plu el.
- Ma, mea sposa? Per ce?
Final, a esta ves, la floriste ia raconta ja tota... El ia vade per trae la buce de rosas a sirca mediadia, como acordada. Seniora Magrin ia loda la belia e la parfum de la flores e, parletante, el ia sutrae la selofan cual envolve los. El ia prende la saceta... e a acel momento la floriste ia persepi ce ave un era: acel es droga! E Seniora Magrin ia continua parleta:
- Dise a me: ave ce cosa en esta saceta?
- Me no sabe esata, un spesie de conservante per la flores cortida...
- Ma esta es un polvo miraclosa! A la ves pasada mea rosas ia dura plu ca un semana! Me gusta multe ave flores a casa... si me sabe lo cual es esata, me ta pote compra un saco intera!
- Me no sabe esata, me redise a tu: un spesie de aspirina...
Seniora Magrin comensa rie:
- Aspirina per flores! Acel no es posible! Escuta, me vole vera fa analise lo per sabe... me ta pote demanda a mea sposo: sua colaborores pasada de la laboreria cimical ta fa volente lo!
Acel parlas ultima fa la floriste pali. En la entretempo la telefon ia sona en la sala de studia e seniora Magrin ia vade per responde. Melison ia es el ci ia clama la supravidor sur la bileta famosa. La floriste ia segue el, e cuando la seniora ia descomuta, el ia colpa el con un portasene, a un ves sur la colo. A pos el ia reprende la rosas, la selofan e la saceta de droga. El ia vade a via, e el ia reveni a sirca du oras, finjente trae la rosas.
Pos escuta la confesa, la supravidor, turbada, ia presa forte la mano de Melison.
Grasias, Melison, e bon fortuna... Me lasa a tu me posto sin regrete: me ta pote nunca plu fa acel labora.
El ia es multe triste: sua sposa ia mori par no cosa, par alga parlas acaso diseda. Magrin ia vole vade a via e resta solitar con sua dole.
- Espeta, supravidor! No vade a via! Me debe dise a tu un cosa multe importante: tua sposa es espetante tu!
- Ce? Ce tu dise? Esce tu ia loci?
- No, supravidor; tua sposa no ia mori, ma el ia es en coma. Pardona a nos! Nos ia debe menti per la securia de la seniora mesma: si la asasinor ia sabe ce el vive, el ia ta pote atenta mata el a un ves du. Ma me ave ancora un plu bon nova per tu: el ia sorti de coma de alga oras. El va recovre, supravidor. Veni, me acompania tu a la ospital...
FINI
@T Alga fables
@L leteratur/alga_fables
@A Guido Crufio
====== Alga fables ======
traduida par Guido Crufio en 2011
===== La xico ci ia cria "lupo" =====
par Esopo
A un ves pasada ia ave un xico-pastor ci ia es noiada en cuando el ia senta sur la colina per regarda la oveas de la vileta. Afin diverti se, el ia prende un respira grande e ia cria, "Lupo! Lupo! La lupo xasa l'oveas!"
La viletanes ia veni corente a supra la colina afin aida la xico per forsa a via la lupo. Ma cuando los ia ariva a la culmine de la colina, los no ia trova un lupo. La xico ia rie cuando el ia vide la fases coler de la viletanes.
"No cria 'Lupo' xico," ia dise la viletanes, "cuando no ave un lupo!" Los ia vade murmurante a su la colina.
A pos, la xico ia cria denova, "Lupo! Lupo! La lupo xasa l'oveas!" A se deleta peca, el ia regarda la viletanes corente a supra la colina per aida el forsa a via la lupo.
Cuando la viletanes denova no ia vide un lupo, los ia dise sever , "Salva tu crias asustada per cuando ave vera alga cosa mal! No cria 'Lupo' cuando no ave un lupo!"
Ma la xico mera ia surie e ia regarda en cuando los ia vade murmurante, a su la colina a un ves plu.
A pos, el ia vide un VERA lupo prosiminte la manada. Temos, el ia salta a se pedes e ia cria tan forte como el ia pote, "Lupo! Lupo!"
Ma la viletanes ia pensa ce el ia atenta truci los denova, donce, los no ia veni.
A la reposa de sol, cadun ia vole sabe per ce la xico no ia reveni a la vileta con se oveas. Los ia vade a supra la colina per trova la xico. Los ia trova el plorante.
"Ave vera un lupo asi! La manada ia sperde! Me ia cria 'Lupo!' Per ce tu no ia veni?"
Un om vea ia atenta comforta la xico en cuando los ia pasea a la vileta. "Nos va aida tu afin trova l'oveas perdeda a la matina," el ia dise, ponente se braso sirca la xico, "ma nun crede un mentor .... an cuando el ia dise la veria!"
===== Rumpelstiltskin =====
A un ves pasada on ave un molinor povre, ci ave un fia bela. La molinor debe parla con la re, e per aspeta importante, el dise a la re, "Me ave un fia ci pote bobini palia e fa lo deveni oro."
La re dise a la molinor, "Acel es un arte cual plase me. Si tua fia es tan capas como tu dise, trae el a mea palasio doman, e me va proba el."
E cuando la xica es traeda a el, la re loca el en un sala cual es cuasi plen de palia, dona a el un bobinador e un bobin e dise a el, "Aora, comensa labora, e si asta la matina doman a temprana, tu no ia bobini esta palia e fa lo deveni oro, tu debe mori."
Alora, la re clavi la sala, e lasa la xica es solitar. Donce, ala senta la xica compatable de la molinor, e per sua vive, no pote sabe cual fa, el no ave un idea como palia pote es bobinida per fa lo deveni oro, e el crese plu e plu asustada, asta, a fini, el comensa plora.
Ma subita, la porte abri e un om peti entra e dise "Bon sera, senioreta molinor, perce tu plora tal?"
"Ai," la xica responde, "Me debe bobini palia e fa lo deveni oro, e me no sabe como fa lo."
"Cual tu ta dona a me," dise la nano, "si me ta fa lo per tu?"
"Mea colareta," dise la xica.
La om peti prende la colareta e senta se ante la rota, e zumbi, zumbi, zumbi, tre turnas e la bobin es plen, alora el pone un otra, e zumbi, zumbi, zumbi, tre veses sirca, e la du es ance plen. E tal el continua asta la matina, cuando tota la palia es bobinida, e tota la bobines es plen de oro.
A leva de sol la re es ja ala e cuando el vide la oro el es stonada e deletada, ma sua cor mera deveni plu avar. El loca la fia de la molinor en un otra sala plen de palia, cual es multe plu grande, e comanda el bobini acel ance en un note si el valua sua vive. La xica no sabe como aida se e es plorante cuando la porte abri denova e la om peti apare e dise, "Cual tu ta dona a me si me ta bobini acel palia e fa lo oro per tu?"
"La anelo sur mea dito," la xica responde.
La om peti prende la anelo, denova comensa turna la rota, e asta la matina, es bobinida tota la palia a oro briliante.
La re joia ultra mesura a la vista, ma ancora el no ave bastante oro, e el loca la fia de la molinor en un otra sala an plu grande e plen de palia, e dise, "Tu debe ance bobini esta, en esta note, ma si tu va susede, tu va deveni mea sposa."
An si el es la fia de un molinor, el pensa, me no pote trova un sposa plu rica en la mundo intera.
Cuando la xica es solitar, la nano veni per la ves tre, e dise, "Cual tu ta dona a me si me ta bobini la palia per tu ance a esta ves?"
"No cosa resta cual me pote dona," la xica responde.
"Alora, promete a me, si tu ta deveni la rea, dona a me tua enfante prima."
Ci sabe, si acel va aveni a cualce ves, pensa la fia de la molinor, e, no sabente como aida se en esta dilema, el promete a la nano lo cual el desira, e per acel, la nano bobini la palia per fa lo deveni oro a un ves plu.
E cuando la re ariva a matina, e trova tota como el desira, el prende el per sposi el, e la fia bela de la molinor deveni un rea.
Pos un anio, el trae un enfante bela en la mundo, e el dona nunca un pensa a la nano. Ma subita el veni en la sala e dise, "Aora dona a me cual tu ia promete."
La rea es asustada, e ofre a la nano tota la ricas de la rena si el ta lasa a el la enfante. Ma la nano dise, "No, alga cosa vivente es plu cara a me ca tota la tesoros en la mundo."
Alora, la rea comensa lamenta e plora, donce la nano compati el.
"Me dona a tu tre dias de tempo," el dise, "si asta alora tu descovre mea nom, tu va reteni la enfante."
Donce la rea pensa tra la note intera sur tota la nomes cual el ia conose a cualce ves, e el envia un mesajor traversa la pais per demanda, traversa un area grande, per cualce otra nomes cual pote es. Cuando la nano ariva a la dia seguente, la rea comensa con Caspar, Melchior, Balthazar, e dise tota la nomes cual el conose, la un pos la otra, ma a tota la om peti dise, "Acel no es mea nom."
A la dia du la rea causa demandas es fada en la visineria sur la nomes de la popla ala, e el repete a la nano aceles la plu noncomun e strana. "Cisa tua nom es Costelas Corta o Gamas Ovein o Gama Cordetin" dise la rea, ma la nano responde sempre, "Acel no es mea nom."
A la dia tre la mesajor reveni denova e dise, "Me no es capas de trova sola un nom nova, ma cuando me ia veni a un montania alta a la fini de la foresta, do la volpe e la lepre dise bon note a lunlotra, ala me vide un casa peti, e ante la casa un foco arde, e sirca la foco un om peti e alga riable salta, el brinca sur un gama e cria,
'Oji me forni, doman infusa, a la dia seguente me va ave la enfante joven de la rea.
A, felis me es ce nun sabe ce Rumpelstiltskin es mea nom'
Tu pote imajina como felis la rea es cuando el oia la nom. E pronto a pos, cuando la om peti entra e demanda, "Aora, senioreta rea, cual es mea nom?"
Prima el dise, "Esce tua nom es Conrad?"
"No."
"Esce tua nom es Harry?"
"No."
"Cisa tua nom es Rumpelstiltskin?"
"La diablo ia dise acel a tu!" cria la om peti, e en sua coleria el tufa sua pede a destra tan profonda en la tera ce sua gama intera entra, e alora con coleria el tira a sua gama a sinistra tan multe con ambos sua manos ce el lasera se en du.
===== La Tortuga e la Lepre =====
A un ves pasada, on ave un lepre rapida ci vanta sur como rapida el pote core.
Fatigada de oia sua vanta, Lenta e Constante, la tortuga, defia el a un corsa. Cada animal en la foresta asembla per regarda.
Lepre core longo la via per poca tempo e alora pausa per reposa. El regarda a pos a Lenta e Constante e cria, "Como tu espera gania esta corsa cuando tu pasea longo con tua paso lenta?"
Lepre estende se longo la via e adormi, pensante, "On ave multe de tempo per reposa."
Lenta e Constante pasea e pasea. El para nunca asta el ariva a la linia de fini.
La animales ci regarda, aclama tan forte per Tortuga, ce los velia Lepre.
Lepre estende se e balia e comensa denova core, ma tro tarda. Tortuga es ultra la linia.
Pos acel, Lepre sempre fa recorda se, "No tua rapidia atenta forsa, Lenta e Constante gania la corsa!"
===== La Xico ci ia cria "Lupo" =====
A un ves pasada on ave un xico-pastor ci es noiada en cuando el senta sur la colina per regarda la oveas de la vileta. Per diverti se, el prende un respira grande e cria, "Lupo! Lupo! La lupo xasa l'oveas!"
La viletanes veni corente a supra la colina per aida la xico per forsa a via la lupo. Ma cuando los ariva a la culmine de la colina, los no trova un lupo. La xico rie cuando el vide la fases coler de la viletanes.
"No cria 'Lupo' xico," ia dise la viletanes, "cuando on no ave un lupo!" Los vade murmurante a su la colina.
A pos, la xico cria denova, "Lupo! Lupo! La lupo xasa l'oveas!" A sua deleta turbosa, el ia regarda la viletanes corente a supra la colina per aida el forsa a via la lupo.
Cuando la viletanes denova no vide un lupo, los dise sever, "Salva tua crias asustada per cuando on ave vera alga cosa mal! No cria 'Lupo' cuando on no ave un lupo!"
Ma la xico mera surie e regarda en cuando los vade murmurante, a su la colina a un ves plu.
A pos, el vide un lupo VERA prosiminte la manada. Temosa, el salta a sua pedes e cria tan forte como el pote, "Lupo! Lupo!"
Ma la viletanes pensa ce el ia atenta truci los denova, donce, los no veni.
A la reposa de sol, cadun vole sabe perce la xico no reveni a la vileta con sua oveas. Los vade a supra la colina per trova la xico. Los trova el plorante.
"On ia ave vera un lupo asi! La manada ia sperde! Me ia cria 'Lupo!' Perce vos no ia veni?"
Un om vea atenta comforta la xico en cuando los pasea a la vileta. "Nos va aida tu afin trova l'oveas perdeda a la matina," el dise, ponente sua braso sirca la xico, "ma nun crede un mentor ... an cuando el dise la veria!"
===== La prinse ranin =====
A un sera bela, un prinsesa joven apone sua capeta e zocos e vade solitar per pasea en la foresta; e cuando el ateni un fonte fresca con un rosa a la media, el senta se per reposa tra poca tempo. El ave un bal oro en sua mano, cual es sua jueta favoreda; e el lansa sempre lo en la aira, e catura lo cuando lo cade.
Pos un poca tempo el lansa la bal tan alta ce el no catura la bal cuando lo cade; e la bal bondi a via, e rola longo la tera, asta, a la fini, lo cade a su a en la fonte. La prinsesa regarda sua bal en la fonte, ma lo es multe profonda, tan profonda ce el no pote vide la fondo de lo. El comensa plora e dise, "Ai! Si sola me pote oteni denova mea bal, me ta dona tota mea vestes e joalas bela, e cada cosa cual me posese en la mundo."
An cuando el parla, un rana leva sua testa a estra la acua, e dise, "Prinsesa, perce tu plora tan amarga?"
"Ai!", el dise, "Cual tu pote fa per me, tu, rana desplasente? Mea bal oro ia cade a en la fonte."
"Me no desira tua perlas e joalas e vestes bela; ma si tu va ama me, e permete ce me abita con tu e permete ce me come de tua plato oro e dormi sur tua leto, me va trae a tu tua bal denova."
"Tal babela de esta rana!" la prinsesa pensa, "El no va trepa de la fonte per visita me, an si el pote cisa oteni per me mea bal, donce me va dise a el ce el va ave cual el demanda."
Donce, el dise a la rana, "Bon, si tu va trae a me mea bal, me va fa tota cual tu demanda."
Alora la rana basi sua testa e tufa profonda a en la acua; e pos un poca tempo, el veni a la surfas denova, con la bal en sua boca, e lansa lo a la borda de la fonte.
Pronto, cuando la prinsesa joven vide sua bal, el core per recolie lo; e el es tal estasiante de teni lo denova en sua mano ce el no pensa sur la rana, ma core a sua casa con la bal, tan rapida como el pote.
La rana cria a el, "Resta prinsesa e prende me con tu, como tu ia dise."
Ma la prinsesa no para per oia un parola.
A la dia seguente, cuando la prinsesa veni de senta se per la come, el oia un ruido strana -- tape, tape - pluf, pluf -- como si alga cosa prosimi a supra la scalera de marmo, e pronto a pos on ave un bateta jentil a la porte, e un vose peti cria e dise:
"Abri la porte, mea prinsesa cara,
Abri la porte a tua ama vera asi!
E atende la parolas cual tu e me ia dise
Asta la fonte fresca, en la ombra de la foresta."
Alora la prinsesa core a la porte e abri lo, e ala el vide la rana, ci el ia oblida intera. A esta vista el es triste asustada, e cluinte la porte tan rapida como el pote, reveni a sua seja.
La re, la padre de la prinsesa, vidente ce alga cosa asusta el, demanda de el cual importa.
"On ave un rana desplasente," la prinsesa dise, "a la porte ci ia leva mea bal per me a estra la fonte a esta matina. Me ia dise a el ce el pote abita asi con me, pensante ce el no pote trepa a estra la fonte; ma el es ala a la porte, e vole entra."
An cuando el parla la rana bateta denova a la porte e dise:
"Abri la porte, mea prinsesa cara,
Abri la porte a tua ama vera asi!
E atende la parolas cual tu e me ia dise
Asta la fonte fresca, en la ombra de la foresta."
Alora la re dise a la prinsesa joven, "Car tu ia promete, tu debe onora el; donce vade per permete ce el entra"
La prinsesa fa acel e la rana brinca a en la sala, e alora direta -- tape, tape -- pluf, pluf -- de la fondo de la sala a la supra, asta cuando el prosimi la table do la prinsesa senta.
"Me mendica ce tu leva me a sur la seja," el dise a la prinsesa, "e permete ce me senta asta tu."
Direta cuando la prinsesa fa esta, la rana dise, "Pone tua plato plu prosima a me afin me pote come de lo."
La prinsesa fa esta, e pos la rana come tan multe como el pote, el dise, "Aora, me es fatigada; porta me a supra la scalera e pone me en tua leto." E la prinsesa, an si multe nonvolente, prende el a supra en sua mano, e pone el sur la cuxin de testa en sua leto, do el dormi tra la note intera.
A leva de sol la rana salta a supra, brinca a su la scalera, e vade a estra la casa.
"Bon," pensa la prinsesa, "a fini el ia vade, e me va es turbada no plu par el."
Ma el era; car cuando la note veni denova, el oia la mesma tape a la porte; e la rana veni denova e dise:
"Abri la porte, mea prinsesa cara,
Abri la porte a tua ama vera asi!
E atende la parolas cual tu e me ia dise
Asta la fonte fresca, en la ombra de la foresta."
E cuando la prinsesa abri la porte, la rana entra, e dormi sur la cuxin de testa de la prinsesa como a ante, asta la comensa de matina. E a la note tre el fa la mesma. Ma cuando la prinsesa velia a la matina seguente el es stonada de vide, en loca de la rana, un prinse bela, regardante el con oios la plu bela cual el ia vide nunca e stante a la fini de testa de sua leto.
La prinse dise a la prinsesa ce el ia es encantada par un fe odiosa, ci ia cambia el a un rana; e donce el ia es fortunada vive tal asta un prinsesa ta prende el a estra la fonte, e permete ce el come de sua plato, e dormi sur sua cuxin de testa tra tre notes.
"Tu," dise la prinse, "ia rompe sua encanta cruel, e aora me ave no cosa per cual desira con la eseta de ce tu ta debe vade con me a la rena de mea padre, do me va sposi tu, e va ama tu tra tua vive intera."
La prinsesa joven, tu pote es serta, no ia prende un tempo longa per dise "Si" a tota de esta; e an cuando los parla, un vagon brilia colorida prosimi con oto cavalos bela, decorada con plumones de plumas e un arnes orosa; e pos la vagon turi la servor de la prinse, Heinrich fidosa, ci ia deplora la mal fortuna de sua Senior cara en sua encanta tra un tempo tan longa e tan amarga ce sua cor cuasi ia creve.
Alora los parti de la re, e entra la vagon con oto cavalos, e parti, plen de joia, per la rena de la prinse, cual los ateni secur; e ala los abita felis tra multe anios.
===== La can e la ombra =====
Un can ave un peso de carne e porta lo en sua boca a sua casa per come lo en pas. Longo la via a sua casa el debe traversa un faxa cual traversa un rieta corente. An cuando el traversa, el regarda a su e vide sua ombra refletada en la acua a su. Pensante ce lo es un otra can con un otra peso de carne, el deside ave ance acel. Donce el fa un morde a la ombra en la acua, ma cuando el abri sua boca, la peso de carne cade a estra, a en la acua e es videda nunca plu.
Moral de la fable: Atende per la aveni ce tu perde la sustantia an cuando atentante saisi la ombra.
===== Sielo e enferno =====
A un fem ci ia labora tra sua vive intera per fa bon on ia permete un desira: "Ante me mori, ta ce me visita Sielo e Enferno." Sua desira es donada.
El es prendeda a un sala grande de banceta. La tables es alta cargada con comedas e bevidas deletosa. Sentante sirca la tables es persones tan misera e fame como posible. "Perce los es tal?" el demanda a la anjel ci acompania el. "Regarda sua brasos," la anjel responde. El regarda e vide ce liada a la brasos de la persones es cuaies, securida supra la codo. Noncapas de curvi sua codos, la persones punta la bastetas a la comeda, fali colpa a cada ves, e senta fame, frustrada e misera. "Si, esta es enferno! Prende me a via de asi!"
Alora, el es prendeda a Sielo. Denova el trova se en un sala grande de banceta con tables alta cargada. Sirca la tables, persones senta riente, felis e joiosa. "No cuaies, me suposa?" el dise. "O, si, on ave. Regarda - la mesma como en enferno, los es longa e liada supra la codo, ma regarda... asi la persones ia aprende a nuri lunlotra."
===== La Avar e Sua Oro =====
A un ves pasada, on ave un avar ci comun asconde sua oro a la basa de un arbor en sua jardin. A cada dia el vade per desentera lo per selebra sur sua ganias.
Un furor, ci nota esta, vade per desentera la oro e fura lo.
A la ves seguente, cuando la avar veni per selebra sur sua tesoros, el trova no cosa estra la buco vacua. El lasera se capeles e leva un tan coleria ce tota la visinas asembla sirca el e el informa los ce el veni comun per visita sua oro.
"Esce, a cualce ves, tu prende lo a estra per spende lo?" demanda un de los.
"No," el dise, "Me mera veni per regarda lo."
"Alora, veni denova per regarda la buco," dise un visina, "lo va es egal bon."
La moral: Ricia nonusada egal ta pote no esiste
===== La Servo e la Leon =====
Un servo vide sua ombra refletada en la acua de un stange e el amira multe la grandia de sua cornos, ma coleri contra se, sur sua pedes debil.
En cuando el regarda se, un leon apare asta la stange. La servo fuji e manteni un distantia secura entre se e la leon con fasilia, asta cuando el entra un foresta e deveni maraniada par sua cornos.
La leon prosimi e catura el. La servo reproxa se, "Nonfortunosa me! Como me ia engana me! Me ia despeta esta pedes cual ia ta salva me, e me ia onora esta cornos cual ia causa mea destrui."
Moral: Lo cual vera es valuosa frecuente es suvaluada
@T Alzon e la trisesioni del angulo
@L leteratur/alzon_e_la_trisesioni_de_la_angulo
@A Manouna Orti
PARLAS DE MANOUNA ORTI
Alzon e la trisesioni de la angulo ·
La retanguli del disco ·
La dupli del cubo ·
La cade sin cade ·
La formula del infinita
====== Alzon e la trisesioni del angulo ======
Un parla de Manouna Orti
Cara sores e frates,
De pos la tarda de la sentenio 5 aec., en la mundo de la siensa elinica, problemes jeometrial de cual la solve inclui egalis de grado plu ca 2 ia es tratada, ma no solveda: en efeto, sola la problemes de la grados 1 e 2 pote es solveda con regla e compas.
En acel categoria de problemes nonsolvable, on ave la tre problemes famosa antica: la trisesioni del angulo, la retanguli del disco e la dupli del cubo.
Alzon la Jeometriste (sentenio 4 ec.) ia susede trova un modo orijinal per trata la tre problemes e, ante cualcun, el ia espresa la prinsipe de sua solves. La obras orijinal de Alzon ia es perdida, ma, fortunosa, nos teni la copia valuosa par dom Munius en la biblioteca de nosa isola xef! En Alexandria, acel monce ia copia alga manoscrito multe rara e custosa de la obra de Alzon en sua compila, Opera mathematica, e ia trae sua scrive con el en nosa isola xef, la refujeria de multe otra siensistes, en acel tempo cuando nosa lingua ia es alora sola en curso de crea. Par esta causa, dom Munius ia scrive sua compila ancora en latina.
Como Alzon ia solve la problem de la trisesioni del angulo? Lo es esata la sujeto de nosa parla de oji.
Con la regla e la compas, nos pote bisesioni cualce angulo, construinte sua bisecante. Ance, nos pote cuatrisesioni cualce angulo, car lo sufisi ce on bisesioni a du veses. Ma como on ta pote trisesioni?
Acel problem, incluinte un egali de la grado 3, no es solvable apriori con regla e compas, en la spasio bidimensional de un folia. Alzon, en sua construi, ia inclui un dimension 3: la tempo. En fato, si on ajunta la dimension de tempo a la du dimensiones de la folia plana, esta problem de grado 3 deveni solvable!
Longo Alzon, sitada par Munius: « Suposa ce alga cuantia ta debe es compartida entre tre persones, ma tu sabe comparti sola en cuatro partes. A cada person, on dona un cuatri de la cuantia: un parte 4 va resta. Pos cuando acel parte es compartida en cuatro partes, dona un parte a cadun: ancora un parte va resta. En acel modo, cuatrisesioni pos cuatrisesioni, a cada ves un parte va resta, a cada ves plu pico, cual, a cada ves, tu va comparti a cuatro partes, de cual tu va dona un parte a cadun e va comparti la parte restante. An tal, si on continua la prosede, inevitable la parte cual debe es divideda va deveni plu streta ca la lama cual debe divide lo. Asi la prosede va fini((« Positum sit aliquantum inter tres homines dividendum esse, te autem sciente dividere quattuor in partes. Primum cuique pars prima dabitur: remanebit quarta pars. Ha parte in quattuor partes divisa, cuique da partem, una remanente. Sic, multis post quadripartitionibus, quoties manerit pars una, quoties minor, quam quoties in quattuor partes divides et cuique unam dabis et manentem divides. Si autem continuatur operatio, pars dividenda minor erit quam acerrima dividens acies. Hic finem inveniat operatio. » (Dom Munius, Opera Mathematica, III, x.) )). »
De acel razona, Alzon dedui la formula seguente: « La tri de cualce cuantia es egal a la soma de partes » en un serie infinita((Ajuntada par me.)) « do cada parte es la cuatri de la parte presedente. »
Per dise, Alzon ia intui la serie infinita seguente: 1/3 = 1/4 + 1/42 + 1/43 + 1/44 + 1/45 + 1/46 + ... + 1/4n + 1/4n+1..., con n infinita cresente (n → ∞). En efeto:
1/4 = 0.25
1/4 + 1/16 = 0.3125
1/4 + 1/16 + 1/64 = 0.328125
1/4 + 1/16 + 1/64 + 1/256 = 0.33203...
1/4 + 1/16 + 1/64 + 1/256 + 1/1024 = 0.3330078...
Vidable, multe rapida, la serie converje a 0.333333..., per dise 1/3.
Defininte la formula jeneral, Alzon aplica lo, natural, a la divide de la setores angulo, con intende de solve la problem de la trisesioni:
« La tri de cualce angulo es egal a la cuatri de acel angulo, continuante aumentada con la cuatri de la parte ajuntada presedente. Cuando esta prosede es repeteda, final la spesia de la stilo va suprapasa la parte cual debe es divideda; alora la prosede va fini((« Igitur tertia pars qualiscumque anguli cerne aequalis puta cum quarta parte hujus anguli, sic continue aucta quarta parte prioris partis. Hac ratione et via repetentibus, tandem acies calami partem dividendam superabit. Hic finem inveniat operatio. » (Dom Munius, obra sitada, III, x.) )). »
Sores e frates onorable, me ia parla.
Parla 2. La retanguli del disco
@T Ama, la mervelia
@L leteratur/ama_un_tal_mervelia
@A P.F. Webster, Harri Savolainen
====== Ama, la mervelia ======
par P.F. Webster
traduida par Harri Savolainen (per canta)
O, ama, la mervelia!
Como rosas de april lo mostra la belia.
Ama fa ce l'un va dona,
la otra va resona,
e ambos cores pulsa en sincrona.
O, a un ves pasada,
en un nebla de matina me besa tu ala.
Tu regarda me tan ansios', nos dise adios!
Si, ama es tan mervelios'!
@T Amie
@L leteratur/amie
@A Pure Prairie League, George Boeree
====== Amie ======
Amie, par Pure Prairie League
traduida par George Boeree
Me pote vide perce tu pensa ce tu parteni a me
Me ia atenta nunca ce tu pensa un cosa par tu
Ma aora tu es a via con algun otra e me es solitar
Tu vide, me ia pensa ce me ta pote reteni tu per
Amie, cual tu vole fa?
Me pote resta asi con tu
Per aora, cisa plu, si me fa
Tu no pensa ce la tempo es bon ce nos pote trova
Tota cosas ce nos ia pensa no es coreta pote es ultima?
E tu pote vide cual dirije nos debe verje, con lunlotra o solitar?
Me no pote vide cual es coreta e cual es falsa
O, tu prende tro multe tempo
Amie, cual tu vole fa?
Me pensa ce me pote resta con tu
Per aora, posible plu, si me fa
Aora lo resta sur cual tu vole, tu ia ave sua via
E tota la cosa ce tu pensa a ante mera pali a gris
E tu pote vide ce me no sabe si lo es tu o si lo es me?
Si lo es un de nos, me es serta nos ambos va vide
Vide a me e dise
Amie, cual tu vole fa?
Me pensa ce me pote resta con tu
Per aora, posible plu, si me fa
Me cade en e estra de ama tu
Cade en e estra de ama tu
Me no sabe cual me debe fa
Me cade en e estra de ama tu
@T Amis recorda me
@L leteratur/amis_recorda_me
@A Dostlar beni hatırlasın, Âşık Veysel, Guido Crufio
====== Amis recorda me ======
Un poesia turces (Dostlar beni hatırlasın) par Âşık Veysel, traduida de engles par Guido Crufio.
Pos mea mori mea nom resta
Ta ce la amis recorda me
Rituos de sposi aveni, bancetas ariva
Ta ce la amis recorda me
Spirito vola de la caje
Mundo es un otel, abitores parti
La luna vaga, anios pasa
Ta ce la amis recorda me
Corpo va es privada de vive
Ximineria no va arde, fuma no va asende
Par brasos plen, saluta mea mori
Ta ce la amis recorda me
Multe flores rici e desapare lenta
Ci ia rie, ci va es felis
Menti de desira, real es moria
Ta ce la amis recorda me
A en sera la dias va cambia
Regarda ce pronto aveni
Veysel parti, sua nom resta
Ta ce la amis recorda me
@T Amor fol de Leila
@L leteratur/amor_fol_de_leila
@A Amor fol de Leila, Ahmed Shawqi, Myaleee
====== Amor fol de Leila ======
Un parte de la peso teatral Amor fol de Leila ("Majnun Leila") par Ahmed Shawqi, traduida par Myaleee.
[Ceis veni a tenda de sua amada Leila.]
Ceis: O Leila!
Padre de Leila: Ci clama a vose forte?
Esce es Ceis ci mea oios vide?
Perce tu resta asi pos cuando tu amis ja vade?
Ceis: O mea tio! Entre los me no ia es!
Padre de Leila: Donce do ia es tu?
Ceis: En casa, asta ce foco manca a nos!
Tota lenio seca ja consuma par visinas e venta!
Padre de Leila: Leila! Espeta, Ceis! Leila!
Leila: Ce vole mea padre cara!
Padre de Leila: Asi es tua cusin
E sua casa no ave foco!
Leila: Mea cusin Ceis asi!
Salute! Bonveni! Bonveni!
Ceis: O Leila! Ta es felis e joiosa tua vive!
Tua aspiras ta reali!
[Afra es la sclavo servor fema de Leila.]
Leila: O Afra! Trae a nos un vaso de lete e
Un paceta de rametos seca!
Leila: Dise a me, o Ceis!
Perce tu vaga mareada en deserto!
Tu ia canta poesias per se arena
ce sperde a tota parte de site!
Me demanda me si tu oblida me
E si la fias ,tan bela ce servos,
vera ja encanta tu!
Ceis: O Leila! Tu vera deveni jelosa de servores!
Tu no sembla a deserto,
No la luna de deserto es simil a la luna de sielo!
Leila: Me de longa tempo espeta tu!
Me zelo ama tu!
En notes sin dormi,
tua recorda tormenta me!
Ceis: Tu parla seria?!
Leila: Mea cor vera es no de petra, no de fero!
[Ceis, descurante en parla, teni un rameta ardente.]
Padre de Leila: O Ceis! Tu ia veni per prende foco
O per ensende nosa casa! Vade! Vade sin reveni!
[Ceis pasea desperante, vagante en ruas a distante.]
Ceis: La oscuria de note deveni plu e plu negra,
Ce stimula a me la poesia e la amosia!
Vera deserto no es ma la poesia, la note e la amosia!
O mea Dio! Tu ia pleni
la sielo e la tera de deserto per ama!
E tota esta ama presa a mea cor sola, o me Dio!
@T Anabel Li
@L leteratur/anabel_li
@A Edgar Allan Poe, Ricky Freeman
====== Anabel Li ======
par Edgar Allan Poe
traduida par Ricky Freeman
Ia es multe e multe anios en la pasada
En un rena asta la mar
Ce un fem joven ia abita ala, ci vos conose cisa
Par la nom de ANABEL LI
E esta fem joven ia vive con no otra pensa
Ca el ama me e es amada par me
Me ia es un enfante e el ia es un enfante
En esta rena asta la mar
Ma nos ia ama con un ama ce ia es plu ca ama
Me e me Anabel Li
La serafin con alas de paradiso
ia invia esta ama de el e me
E acel ia es la razona ce, en la pasada distante,
En esta rena asta la mar
Un venta ia venta de un nube, fri
Me Anabel Li bela
Donce se relatadas nobil ia veni
E ia porta el a via de me
Per clui el en un tomba
En esta rena asta la mar
La anjeles, ci no ia es duida tan felis en paradiso,
ia invia el e me
Si! Acel ia es la razona (como tota la persones sabe
En esta rena asta la mar)
Ce la venta ia veni de la nube en la note
Fri e mata me Anabel Li
Ma la nos ama ia es multe plu forte ca la ama
De aceeles ci ia es plu vea ce nos --
De la multe, plu saja multe ce nos
E no la anjeles en paradiso supra
No la demones su la mar
Pote separa nunca me spirito de la spirito
De la Anabel Li bela
La luna brilia nunca sin trae sonia a me
De la Anabel Li bela
E la stelas asende nunca sin me senti la oios briliante
De la Anabel Li bela
E donce, tra la note intera, me reclina asta la lado
De me cara -- me cara -- me vive e me sposa nova
En la tomba ala asta la mar
En la tomba asta la mar sonante
@T Anjelica
@L leteratur/anjelica
@A Miltinho e Chico Buarque, Patrick Chevin
====== Anjelica ======
par Miltinho e Chico Buarque
Traduida de portuges par Patrick Chevin
Ma ci es esta fem
Ci canta sempre esta rima:
"Me sola vole osila ultima
Me fio en oscuria de la mar"?
Ma ci es esta fem
Ci canta sempre esta lamenta:
"Me sola vole recorda la tormenta
Ce ia entera me fio en la mar."?
Ma ci es esta fem
Ci canta sempre a un mesma model:
"Me sola vole covre me anjel
E lasa el reposa en la mar."?
Ma ci es esta fem
Ci canta com'on toca la campana:
"Me vole canta per me fio vana
Car el no pote canta en la mar."?
Ma ci es esta fem
Ci canta sempre esta rima:
"Me sola vole osila ultima
Me fio en oscuria de la mar."?
@T Ante adormi
@L leteratur/ante_adormi
@A Marcus Trawick
====== Ante adormi ======
par Marcus Trawick
Escuta
Ranas canta estra la casa.
Oscuria.
Calmia.
La me sonias prosimi secreta.
@T Anteros
@L leteratur/anteros
@A Gérard de Nerval, Michel Gaillard, Magis Optis
====== Anteros ======
Anteros es la soneto 4 de la des-du sonetos ermetiste La Cimeras
scriveda par Gérard de Nerval (1808-1855)
Traduida de franses par Michel Gaillard e musicida par la bande Magis Optis
Tu demanda perce mea cor es furiosa,
E mea testa dur, sur un colo flexable;
La causa es ce me es de la linia de Anteo,
Me reversa la lansia a la dio vinsor.
Tal me es como acel ci la venjor inspira.
Sua labio iritada ia marca mea fronte.
Su la palia de Abel -- o tan triste sanguosa! --,
A alga veses, me ave la rojia de Cain!
Iawe! El ci, vinseda par tua injenia,
E, del enferno basa, ia cria: « O! tirania! »,
El es mea avo Belo, o mea padre Dagon((Un dio fenisian, dio de la cultiva.))...
Los ia tufa me truple en la rio Cocito
E, protejente mea madre amalecita((La Amalecitas ia es un tribu nomada antica, enemi de la Israelis.)),
Me semi a sua pedes la dentes del dragon.
1854.
@T Apatia
@L leteratur/apatia
@A Guido Crufio
====== Apatia ======
par Guido Crufio
Apatia a cada turna
Lo no es tua conserna
No ta ce lo turba tu
Tua cura es tabu
Apatia.....
Lo va veni a no cosa
No es asidua, mera reposa
No fix la paperes, trinxa la reporta
Sabe bon ce lo no importa
Ma no preocupa tu.....
No preocupa tu sur la veria
Nun es interesada en la justia
Politicistes teni la clave
A esta dementeria grave
Apatia.....
Mera bevi e oblida tota
No an turba tu sur vota
En ajunta on ave no labora
La fabricerias es cluida ancora
Ma no preocupa tu.....
Dona tota a la nononesta e pigra
Abri la pordes a un deluvia de migra
Amorti e descoraji la brava
Mera senta en l'angulo e bava
Apatia.....
Un malada de la mente
Mostra conserna es deludente
Sede tota tua moralias
Apatia ruina posiblias
Ma no preocupa tu.....
Iniora la nonfortunosa
Lo no afeta la vive nosa
No regarda, lo va vade a via
Apatia preda sur naivia
Apatia.....
Esce tu ia atesta un fura?
No, me no ia vide lo, me va jura
Para un crimin? No, no nos
Nos es tro ocupada fante los
Ma no preocupa tu.....
Enfantes mori de famia
Un condena enfernal de umania
Ma los no es mea problemes
Veni, ta ce nos come nosa comes
Apatia.....
Un om vea cade en la strada
No aida el, sua tempo es pasada
La fio, frate o sposo de algun
Ci cura? Cualcun? No, vera, nun
Ma no preocupa tu.....
Apatia a la sinistra
Apatia a la destra
Apatia rena supra tota
Apatia es libre a esplota
Apatia.....
La gera es cuasi perdeda
La tratores de moria protejeda
Un jenera dejenera
Atesta un otra funera
Ma no preocupa tu.....
Apatia rena a cada nivel
Malia conta sur lo
Ma lo no es tua fali, esta
No fa un ruido, no protesta
Apatia.....
Entera tua testa en l'arena
Tua pensa prima es a condena
Apatia va ruina umania e fratia
Un statia plen de apatia
Ma no preocupa tu.....
Apatia.
@T Apela de 18 junio
@L leteratur/apela_de_18_junio
@A Charles de Gaulle, vxeov
====== Apela de 18 junio ======
par Charles de Gaulle
traduida par vxeov
La Governa franses ia demanda de la enemi con cual esijes onorable un sesaspara pote es posible. Lo ia declara ce, si esta esijes ta oposa la onora, dinia e nondepende de Frans, alora la luta debe continua.
La Xefes ci, tra anios cuantiosa ia prende la testa de armadas franses, formi ja un governa. Tal governa, alegante la defeta de nosa armadas, contrata ja con la enemi per sesa combate.
Serta, nos ia es, e ancora es vinseda par la fortia macinal de la enemi sur la tera, en la aira. Nosa soldatos ia es infinita plu ca sua cuantia, ma lo es la tances, la aviones, la taticas de deutxes ce ia causa nosa defeta. Lo es la tances, la avions, la taticas de deutxes ce ia surprende nosa xefes a la punto de trae los a esta loca oji.
Ma esce la parola final es ja diseda? La espera debe desapare? La defeta es nonrevocable? No!
Crede me, me parla con vos de conoses completa de la fatos, e me afirma ce no cosa es perdeda per Frans. La mesma restrinjes cual ia vinse nos pote veni un dia de nosa vinse. Car Frans no es solitar! El no es solitar! El no es solitar! El ave un Impero vasta pos el. El pote alia con la Impero Brites cual teni la mar e continua luta. El pote, como England, usa sin limita la industrias enorme de Statos Unida.
Esta gera no es limitada en la teritorio misera de nosa pais. Esta gera no va fini par la batalia de Frans. Esta gera es un gera mundal. Tota la falis, tota la retardas, tota la sufris no preveni nos de persepi, ce la universo ave vera tota la medias nesesada per crase nosa enemis a alga dia. Vinseda oji par la fortia macinal, nos va pote vinse lo en la futura par un fortia macinal superior. La destina de mundo es tal.
Me, jeneral de Gaulle, en London a presente, invita la ofisiores e la soldatos franses ci es en teritorio brites o el ci ta veni a asi, con sua armas o sin sua armas; me invita la injeniores e la laborores spesialinte en industria de armas ci es en teritorio brites o el ci ta veni a asi. Me invita vos a contata me.
Sin depende de lo cual aveni, la flama de la resistente franses no debe e no va es estinguida. Doman como oji, me va parla a la radio de London.
18 junio 1940
@T Arania
@L leteratur/arania
@A Guido Crufio
====== Arania ======
par Guido Crufio
Me ia vide un arania pelosa corente
Sur un mur telida en Coventry
"Cual es la punto?" me ia demanda me alora
"De un creada vivente asi aora?"
Lo ta pasea multe arania-milias
Ma ancora ta es sur acel telias
Lo ia es tan fretante
Lo ta es plu bon sentante
Lo pare tan nonimportante
No gol en vive parente
Ma cuando me pensa sur l'arania pelosa,
Me vide ce lo es como nos, fretosa!
@T Arbores
@L leteratur/arbores
@A Joyce Kilmer, Ricky Freeman
====== Arbores ======
par Joyce Kilmer
traduida par Ricky Freeman
Me pensa ce me va vide nunca
Un poesia tan bela como un arbor;
Un arbor cual presa se boca fame
Contra la seno dulse, fluente de la tera;
Un arbor cual regarda a Dio tra la dia
E alti se brasos foliosa per prea;
Un arbor cual en la estate porta cisa
Un nido de turdos roja en se capeles;
A sur se seno ia reposa la neva;
Un arbor cual vive intima con la pluve.
Poesias es creada par foles como me,
Ma sola Dio pote crea un arbor.
@T Artemis
@L leteratur/artemis
@A Gérard de Nerval, Michel Gaillard, Magis Optis
====== Artemis ======
Artemis es la soneto 6 de la des-du sonetos ermetiste
de la colie La Cimeras scriveda par Gérard de Nerval (1808-1855)
Traduida de franses par Michel Gaillard e musicida par la bande Magis Optis
Ela Des-tre reveni, e es ancora la prima;
E el es sempre la sola, o el es la sola ora;
Esce tu es la rea, o la prima o la ultima?
Esce tu es la re, sola o ultima, amor?
Ama ci ama tu de la cuna al caxon;
Ela, ci me ia ama, ama me sempre dulse:
El, la moria o la mor -- o deleta, o dolon!
La flor en sua mano es la rosa alsea.
Santa napolitan, con la manos focosa,
Flor de santa Gudula, con la cor violeta,
Del deserto de sielo, tu trae tua crus?
Rosas blanca, vos ci insulta nosa dios,
Cade, fantasmas blanca, de vosa sielo ardente:
La santa del abiso es plu santa en mea oios!
14 novembre 1853.
@T Asta sempre
@L leteratur/asta_sempre
@A Carlos Puebla, Patrick Chevin
====== Asta sempre ======
par Carlos Puebla
traduida par Patrick Chevin
Nos ia aprende l'amosia
De tu istorial imaje
Do la sol de tu coraje
Susede aseja la moria.
Asi permane la claria,
La intima evidentia,
De tu amada presentia
Comandante Che Guevara.
Tu mano gloriosa e forte
L'istoria en se curso para
Cuando tota Santa Clara
Velia e oserva a se porte.
Asi permane la claria,
La intima evidentia,
De tu amada presentia
Comandante Che Guevara.
Tu veni venta ardente
Con soles de primavera
Afin planta la bandera
Con sola lus de tu surie.
Asi permane la claria,
La intima evidentia,
De tu amada presentia
Comandante Che Guevara.
La tu ama revoluiste
Gida tu a plu projeta
Do la firmia los espeta
De la tu braso libriste.
Asi permane la claria,
La intima evidentia,
De tu amada presentia
Comandante Che Guevara.
Nos va continua a ante
Como con tu, nos ariete,
E con Fidel nos promete:
Asta sempre Comandante!
Asi permane la claria,
La intima evidentia,
De tu amada presentia
Comandante Che Guevara.
@T Atomes, moleculas e la table periodal
@L leteratur/atomes_moleculas_e_la_table_periodal
@A Simon Davies
====== Atomes, moleculas e la table periodal ======
par Simon Davies
Sentral en cimica es la table periodal, formulada en la sentenio 19. On ia comprende plu bon sua organiza en la sentenio 20, cuando on ia esplica la strutures de atomes. La table resoma la cualias de la elementos cimical e presenta la relatas familial cual esiste entre los, an entre elementos cual pare surfasal multe diferente. Esta similias pertine a la strutures de atomes.
==== La nucleo ====
Atomes ave un strutur notable simple, cual clari perce alga combinas de atomes es permeteda e otras es nonposible. Un atom conteni un nucleo ensircada par un nube de eletrones. La nucleo ave un carga eletrical positiva; la eletrones es negativa; e esta cargas oposada atrae lunlotra. Atomes es multe peti, ma un nucleo es an plu pico. Si un atom ta ave la grandia de un stadion, la nucleo ta es como un mosca.
Un nucleo es composada de particulas suatomal de du tipos: protones e neutrones. Protones es positiva cargada, ma neutrones ave no carga eletrical. Estra esta difere, protones e neutrones es multe simil, tan forte tenida a lunlotra ce los pote es separada par sola un esplode nucleal o cosa simil. (La nucleo conteni ance mesones, ma nos pote iniora los asi.)
La elementos coresponde a la identias cimical de la atomes, definida par la cuantia de protones en la nucleo. Un atom de idrojen ave 1 proton, elio ave 2, carbono ave 6, osijen ave 8 ... e tal continuante asta oganeson, de cual cada atom ave 118 protones. Esta numeros es nomida la numeros atomal de la elementos, e longo los la elementos formi un serie -- en cual cimicistes ia identifia un elemento per cada numero. La nucleo resta jeneral noncambiada, e donce reatas cimical no pote cambia un elemento a un otra, an si la alcimicistes antica e medieval ia espera lo.
La nucleo conteni cuantias simil de neutrones e de protones, ma la cuantia de neutrones pote varia, sin cambia la numero atomal. Tal, la mesma elemento pote ave atomes con cuantias pico diferente de neutrones, e donce con masas pico diferente. Esta varias de un elemento es nomida isotopos (de parolas elinica cual sinifia "egal" e "loca") car on rejistra los a la mesma loca como lor elemento fundal en la table periodal.
Idrojen ave tre isotopos en la natur: la fundal e la plu abundante ave 1 proton sin neutrones; deuterio ave 1 proton e 1 neutron; e tritio ave 1 proton e 2 neutrones. Deuterio es ance nomida "idrojen pesosa": cada atom ave sirca la duple de la pesa de idrojen comun. Con osijen lo formi "acua pesosa". Tritio es radioativa: sua nucleo es nonstable.
La cuantia de protones determina la carga de la nucleo e donce ance la cuantia de eletrones cual ensirca lo. Un eletron ave la mesma cuantia de carga eletrical como un proton, ma negativa. E tal, cuando un atom es eletrical neutra, lo ave tan multe eletrones como protones -- denova la numero atomal. Idrojen ave fundal 1 eletron, e carbono ave 6.
==== Eletrones ====
Eletrones es multe plu lejera ca protones e neutrones: lor masa es sirca 1/1836 de lo de un proton, donce lor presentia afeta apena la masa de la atom cual conteni los. Ma los ave un efeto profonda a la cualias cimical e fisical de un elemento, e cuasi tota cual aveni en cimica pertine a lor condui.
Los ensirca la nucleo en stratos de nubes, metafor simil a la nubes de la atmosfera, ma covrente la atom intera. Cada nube es un fenomeno de probablia: do lo es densa, ala on va trova probable un eletron; do lo es plu rarida, ala la eletron es min probable trovable. La move de eletrones crea un campo de enerjia cual pleni la atom intera, estra la nucleo. Lo no es vera ce la plu de un atom es un spasio vacua, an si esta es comun diseda.
La leges de mecanica cuantal dise ce la strato la plu basa (la plu prosima a la nucleo) pote conteni asta 2 eletrones, la strato seguente pote conteni asta 8, e la numero tre pote ave asta 18. En idrojen la eletron solitar ensirca la nucleo. De la 6 eletrones de carbono, 2 formi la strato interna e 4 otras abita la strato plu esterna.
A la angulo alta sinistra de la table periodal, on trova idrojen (H); elio (He) apare a la alta destra. La strato prima de nubes es ja plenida, e esta completi la linia (o periodo) prima de la table. La eletron tre, parteninte a la elemento litio (Li), comensa un nube en la strato du. Ajuntante eletrones, nos traversa la table de sinistra a destra, pasante carbono (C) e osijen (O) entre otras, e nos completi esta strato con neon (Ne) -- un gas, como elio a supra. Pos esta, nos debe comensa un plu nube con la eletron seguente, pertinente a sodio (Na), un elemento cual es multe simil a litio supra se.
Litio e sodio ave sola un eletron estra lor stratos completida de nubes. En la mesma modo, la elementos en cada colona (o grupo) ave scemas multe simil de nubes. Tal es la relatas familial entre la elementos, e on nomi esta la lege periodal. (La stratos esterna de la elementos en periodos 2 e 3 de la table es capas de teni 8 eletrones; los en periodos 4 e 5 es capas de teni 18.)
==== Composadas ====
A cimicistes, plu interesante ca atomes individua es la composadas cual atomes formi con lunlotra. On ia identifia e nomi miliones de los. Esta colie enorme de composadas es lo cual crea la ricia de nosa ambiente.
Atomes lia a lunlotra car los pote redui sua enerjia si los susede completi un strato de nubes de eletrones. Un atom pote completi un strato en modos diversa. La prima es par perde eletrones de sua strato esterna. Un atom tende fa esta si acel strato no conteni ja multe eletrones -- pd. si lo parteni a un elemento a sinistra de la table periodal. O, si lo ave ja ala multe eletrones -- pd. en un elemento a destra -- lo pote gania eletrones per completi la cosa.
Un otra manera en cual atomes completi lor stratos es par comparti eletrones entre se. Esta pote aveni cuando la perde plen de un eletron ta dona no vantaje de enerjia. Carbono, con 4 eletrones en sua strato esterna, tende lia par esta metodo media.
==== Lias ional ====
Cuando un atom gania o perde un eletron, lo deveni eletrical cargada, e tal atomes es nomida iones (de la parola elinica per "vadente", car los move en responde a un campo eletrical). Un atom cual ia gania eletrones ave un carga negativa e on nomi lo un anion; un atom cual ia perde eletrones ave un carga positiva e on nomi lo un cation. Elementos a sinistra de la table tende deveni cationes; los a destra tende deveni aniones.
Per esemplo, considera clorido de sodio, comun conoseda como la spise sal. Un atom de sodio ave un eletron esterna; un atom de cloro (Cl), con 7 eletrones esterna, ave sola un loca vacua. La sola combina posible aveni cuando la atom de sodio "dona" sua eletron esterna a la atom de cloro, tal ce ambos deveni iones (Na⁺ e Cl⁻). Car cargas oposada senti un atrae resiproca, los junta se a lunlotra per formi NaCl. Esta formula indica ce la iones es presente en la proportio 1:1. Composadas como Na₂Cl (2:1) o Na₂Cl₃ (2:3) no pote esiste en ambientes normal.
On nomi esta spesie de junta un lia ional. Lo produi tipal solidas rijida ma frajil, cual fonde sola a temperatures alta. La minerales calcario e fluorita es sustantias ional liada. Nos pote sta sur tal rocas sin afonda car lor stratos de eletrones es completida, e donce la nubes de nosa atomes no pote ocupa la mesma spasio como la nubes de lores. Ance nosa osos es xef liada en modo ional.
==== Lias covalente ====
Ma nosa organos e carne, la vestes cual covre nos e la plantas cual covre la rocas es de tipo diferente. Lor atomes comparti eletrones en lias covalente (un parola latina cual sinifia leteral "fortinte lunlotra").
Considera un molecula de acua, con la formula H₂O. Un atom de osijen, con 6 eletrones esterna, pote aseta 2 plu. Un atom de idrojen ave sola 1 eletron, ma si du tal atomes es presente, los pote comparti lor 2 eletrones con la osijen, tal ce esta atom completi sua strato de 8 eletrones. En ajunta, la atom de osijen comparti 2 de sua propre eletrones con la atomes de idrojen -- un con cada -- tal completinte lor stratos de 2.
Acua no pote es H₃O o HO₂. La sola scema de lia cual produi stratos esterna completa, per tota la atomes partisipante, es H₂O. Simil es amonia (NH₃). N es nitrojen, de cual un atom ave 5 eletrones esterna e desira 3 plu, cual lo reseta en comparti con 3 atomes de idrojen -- e lo mesma comparti un eletron con cada de estas. Ance simil es metano (CH₄), car carbono ave 4 locas vacua.
On vide ce lias covalente envolve sempre la comparti de duples de eletrones. Si on ave un sola tal duple, on parla de un lia unuple (scriveda como "--" en scemas); si on ave du tal duples en un lia, on dise ce la lia mesma es duple ("="); e con tre, on ave un lia truple ("≡"). En acua, cada atom de idrojen es juntada a la atom de osijen par un lia unuple. Diosido de carbono (CO₂), par contrasta, ave du lias duple: sua scema es O=C=O. Lias truple es relativa rara.
La importa fundal de duples de eletrones es relatada con la fato ce tota eletrones jira. Du eletrones pote redui sua enerjia si los jira en dirijes oposada, tal fisante sua jiras a lunlotra. A esta, lo pertine ance ce la cuantia de eletrones tenable par cualce strato de un atom es sempre un numero duable (pe. 2, 8 e 18).
Lias covalente crea moleculas. Lias ional crea blocos de sustantia. Per esta razona on no pote ave un gas ional liada. Tota composadas ional es solida a temperatures comun, ma no cada solida es ional. Un esemplo de un solida cual es covalente liada es la zucar sucrosa (C₁₂H₂₂O₁₁), de cual cada molecula es un rede complicada de lias covalente entre atomes de carbono, idrojen e osijen. Cuasi tota sustantias licuida a temperatures comun -- acua, per esemplo -- es moleculal: esta permete la licuida a flue, con la moleculas pasante lunlotra sin deveni trapida par cualce atrae forte a lor visinas.
==== Metales ====
On ave un tipo tre de lia. La plu de elementos es metales: aluminio, arjento, cupre, fero, oro etc. Tota la atomes en un bloco metal es la mesma, donce lo es multe nonprobable ce un dui de los va formi cationes en cuando la otra dui va formi aniones. Esta sinifia ce metales no es ional liada. Si los ta es covalente liada, los ta es rijida e frajil. Ma en realia on pote bate los a formas nova, o estende los a filos.
Atomes metal es juntada par lias metal. Los no ave multe eletrones en la stratos esterna, e los tende perde estas. On pote imajina ce esta eletrones formi un spesie de mar (un campo eletrical) tra la bloco intera de la metal. La cationes restante es simil a rocas en esta mar negativa, ma interatante con lo per agrega se a un masa solida.
La masa es martelable car (como un mar vera) lo pote responde sin problem cuando la cationes es moveda par bates. Car la eletrones en la mar no es fisada a atomes individua, los migra tra la solida cuando los es repulsada par un flue de otra eletrones cual entra; en otra parolas, los es capas de conduta un corente eletrical. E lor campos eletrical impedi ondas eletromagnetal de lus, refletante alga de la lus a nosa oios.
La elementos cual es natural metales es los cual perde fasil eletrones. Estas es ance la elementos cual formi cationes en la presentia de elementos cual formi aniones, pd. la elementos a destra de la table periodal. Composadas ional, como la spise sal, es tipal formida entre un elemento metal e un elemento nonmetal.
@T Autono
@L leteratur/autono
@A T.E. Hulme, Andrew Burns
====== Autono ======
par T.E. Hulme
traduida par Andrew Burns
Un pico de fria en la note autonal -
Me vaga,
E me vide la luna rojin cual apoia supra un sepe
Como un cultivor de fas roja.
Me no para per parla, ma me anui,
E a sirca on ave stelas regretosa
Con fases blanca como enfantes de vila.
@T Avenis memorable
@L leteratur/avenis_memorable
@A Myaleee
====== Avenis memorable ======
Traduida par Myaleee
* 1498 Colombo ia ariva a Trinidad en se viaja tre.
* 1588 La armada espaniol ia es vinseda par la barcones engles su la gida de Howard e Drake, asta la costa de Plymouth.
* 1619 Un Asembla colonial de representores -- la prima en America -- ia reuni en Jamestown, Virginia, su la governor de la coloni, Sir George Yeardley.
* 1786 La patata ia ariva a la ves prima en Britan, portada de Colombia par Thomas Harriot.
* 1794 Maximilien Robespierre e 19 otra revoluores franses vade a la giotin.
* 1858 La impresa de dito ia es usada a la ves prima como un metodo de identifia par William Herschel. Plu tarda, el ia instala un rejistra de identifia dital.
* 1868 On ia serti la cambia 14 a la constitui de la SUA, ce dona la diretos de sitadania completa a persones de tota razas.
* 1900 Coca Cola ia es lansada a mercato en Britan.
* 1914 La Impero de Osteraic-Magiar ia declara la gera contra Serbia. Esta declara comensa la Gera Un Mundal.
* 1919 La republica de Weimar ia es instituida en Deutxland pos la Gera Un Mundal.
* 1942 Un ataca deutx ia es impedida par la armada brites en la batalia de Alam al-Halfa, cual marca un punto de cambia en la campania de Africa norde.
* 1948 La Juas Olimpial 14 ia abri en London -- la primas en 12 anios, a causa de la Gera Du Mundal.
* 1949 La BBC ia comensa difusa predises regulal de la clima par TV.
* 1968 Papa Paul 6 ia reafirma la instrui tradisional sur (e la condena de) la contraconsepi.
* 1981 La prinse de Cimri ia sposi Diana Spenser en la Catedral de san Paul en London. La selebra es regardada a la TV par plu ce 700 milion vidores en tota la mundo.
* 1991 A la Culmine de Suprapotias en Moscow, presidentes Bush e Gorbachev suscrive la Acorda Stratejial per Redui Armas (START), e ia anunsia ce los ta suporta juntada un conferi de pas de Asia sude-ueste.
* 1997 Diana, prinsesa de Cimri, e se ami Dodi Faied e se gidor ia es matada en un xoca de veculo en la tunel su la Place de l'Alma en Paris, Frans.
* 1998 Un armada serbsce ia invade Cosovo, un provinse de la republica pasada de Iugoslavia. Los ia vinse la Armada de Libri Cosovan. Plu ce 100 000 persones cosovan ia es deslocada.
@T Babel de la Uni de Europa
@L leteratur/babel_de_la_uni_de_europa
@A Luc de Barochez, George Boeree
====== Babel de la Uni de Europa ======
En la babel de la Uni de Europa, tota linguas es egal
par Luc de Barochez, en Le Figaro, 13 april 2004
traduida par George Boeree
Seguente la narada de la biblia, la multiplia de numero de linguas supra la tera es la fruta de un puni par Dio per la omes ci ia construi un tore cual ta asenda a la siel: la tore de Babel. Si lo es un loca a la mundo do esta maldise es un flajeli dial, esta no es plu Babel, ma Brusel.
Con 11 linguas((Deutx, engles, dansce, espaniol, suomi, franses, elinica, italian, nederlandes, portuges, svensce.)) en la Europa de la 15, la opera de la organizas es complicada. Con 9 plu ((Esti, magiar, latvisce, lietuvisce, malti, polsce, slovacian, slovenian, txesce.)) en la Europa de 25, la rompetesta deveni prosima nonsolvable. Mesma la NU no usa plu ca 6 linguas! On ave 20 en Europa intera, incluinte turces, si Cipros va es reunida ante 1 maio.(Oji, en febrero 2005, nos sabe ce la reuni de Sipre no ia aveni.)
La Uni Europa (UE) vanta de usa esta linguas, mesma si lo es a multe veses un jargon tecnical. "Nos es la sola organiza en la mundo do la prinsipe es aplicada ce tota la linguas es egal," esplica Karl Johan Lonnroth, la dirijor jeneral de tradui de la Comite de Europa. "Lo es la demanda xef cual veni de nos model sosial per Europa, de nosa projeta de pas."
Cada sitadan de Europa debe ave aseda, en sua propre lingua, a la testos e desides de la UE. "La majoria de europeanes no parla plu ca sua propre lingua. Si los no comprende lo cual nos fa, esta aumenta ancora un manca de democrasia," sulinia Karl Johan Lonnroth. "E ancora, la linguas de minorias nasional no es considerada. Si los ta es incluida, nos ta nesesa 40 linguas en la Europa de 25..."
La UE es la estende la plu enorme de negosia political de mundo. A la mesma ora, el es ance un emprenda florinte de tradui e interpreta. Sirca tre milion pajes es produi cada anio par la servi de tradui de la Comite. Plu ca 11,000 reunis per anio debe es interpretada, sin considerante la Parlamento de Europa. La costa va deveni pronto proibinte, sabente ce un sistem completa de tradui sirca 20 linguas nesesa la presentia de 60 interpretores. Esta ora, cada interpretor costa 660 euros per dia. Con la grandi de la Uni, la tota costa de multilinguisme es supra la bara de un miliardo euros per anio, contra 700 a 800 miliones en realia. Esta es la preso de manteni la varia de linguas.
Matematical, con 20 linguas, 380 combinas es posible (esti - portuges, magiar - suomi, etc). On nesesa xerca multe oras per trova un interpretor capas de tradui de elinica a latvisce or de slovenian a malti. En un modo, la insula poca de Malta ta susede imposa sua lingua, a la ora de la negosias de junta, como un lingua ofisial de la Union. E grandinte la problem, la traduores e la interpretores ta nesesa usa plu e plu "la linguas medial". Per esemplo, esti debe es traduida primo a engles ante ce lo es traduida a portuges. La risca es ce la contenidas de la comunicas va deveni plu povre e la eras va es multiplicada.
Difisiles pratical e constrinjes economial junta per restrinje la multilinguisme. En la reunis ministral de la Consilio o la reunis grande de xefes de stato e de governa, la interpreta es esensal. Cada proposa de la Comite de Europa es traduida a tota la linguas de la Union. A la Parlamento de Europa, en la conserna per democrasia, cada minstro pote parla e comprende en sua propre lingua la presentas de la otras.
Lo es tota diferente en la reunis interna de la organizas o en la grupos laborante de la Consilio. Ala, engles es usada como la lingua dominante de comunicas, en loca de franses, cual ia domina en la prima desenios de la uni de Europa. Lo es un demanda a otras per "un engles de cosina", povre e tro simple, ma comprendable par multes, como "la latina de cosina" de la eda medieval. En la grupos laborante de la Consilio, sola la enviadas ci demanda un interpreta gania un interpreta. Los va aseda de aora un sofito economial anial. "Nos defende la idea de nesesas real," esplica la diretor jeneral de servis de interpreta, Marco Benedetti. "Car interpreta es un donada rara e cara, on nesesa limita la usa a los cual nesesa lo."
Esta complica la labor par la empleadas de la statos. Per esemplo, per un reuni tecnical supra la nivel de sona de cortierbas, si on prefera defende la intereses nasional de Frans, esce on envia un esperto ci sabe a fundo la demanda, o el ci sabe parla engles plu bon e con la sutilia nesesada per convinse se cameradas? La person ci pote esplica se bon e es esperto en sua lingua ave un vantaje supra la otras. A Brusel de oji, como en edas pasada en Babel, la capas lingual es prima un demanda de potia.
@T Bagrat-oğlu e la oios de sua bove
@L leteratur/bagrat-oglu_e_la_oios_de_sua_bove
@A Isaac Babel
====== Bagrat-oğlu e la oios de sua bove ======
"Bagrat-oğlu e la oios de sua bove" («Баграт-оглы и глаза его быка») es un nara corta par Isaac Babel, publicida en 1924.
Traduida par Decimus en 2022.
A lado de la via me ia vide un bove de un belia nonvideda.
Curvida supra el, un xico ia plora.
--- Esta es Bagrat-oğlu, --- ia dise la encantor de serpes ci ia es consumante sua come mancante a lado. --- Bagrat-oğlu, fio de Kâzim.
Me ia dise:
--- El es bela como des-du lunas.
La encantor de serpes ia dise:
--- La capa verde de la profeta nunca va covre la barba ostinosa de Kâzim. El ia es un litigor ci ia lasa a sua fio un cabana povre, sposas obesas e un boveta sola. Ma Allahu akbar...
--- La ilaha illa Allah, --- me ia dise.
--- Allahu akbar, --- ia repete la vea lansante de se la sesta con serpes. --- La boveta ia adulti e deveni la bove la plu potiosa en tota Anatolya. Memed-han, un visina ci ia deveni malada de invia, ia neutri el la note pasada. Nun va gida plu a Bagrat-oğlu la boves fema espetante consepi. Nun va paia a Bagrat-oğlu sento piastres per la ama de sua bove. El es povre aora, Bagrat-oğlu. El sanglota a lado de la via.
La silentia de la montes ia es estendente sua banderas lila supra nos. La nevas ia brilia sur la culminas. La sangue ia es fluente longo la gamas de la bove mutilada e ia boli en la erba. E oiante la jemi de la bove, me ia regarda en sua oios e ia vide ala la mori de la bove e mea propre mori e ia cade a tera en sufris nonmesurable.
--- O viajor, --- ia esclama alora acel xico con la fas de la color de rosa, como la lus de matina, --- tu es contorsente, e la spuma gurgula en la angulos de tua labios. Un maladia negra lia tu per la cordones de sua convulsas.
--- Bagrat-oğlu, --- me ia responde en mea fatiga grave, --- en la oios de tua bove me ia trova la refleta de la malia semper vijilante de nosa visinas Memed-hanes. En sua profonda umida me ia trova la mirores do es ensendente la focos verde de tradi de nosa visinas Memed-hanes. Mea jovenia, futil matada, me ia vide lo en la pupiles de la bove mutilada, e mea maturia atentante penetra tra la sepes spinosa de noncurantia. La vias de Suria, Arabia e Curdistan, mesurada truple par me, me trova los en la oios de tua bove, о Bagrat-oğlu, e sua arenas plata lasa no espera per me. La odia de tota la mundo rampe a en la orbitas abrida de tua bove. Fuji donce de la malia de nosa visinas Memed-hanes, о Bagrat-oğlu, e ta ce la encantor vea de serpes leva sua sesta con boas e core a tua lado...
E pleninte la canion per jemi, me ia leva me. Me ia ole la aroma de eucaliptos e ia vade a via. La leva de sol, con sua mil testas, ia vola a supra la montes como mil sinies. La baia de Trapezunda ia brilia distante con la aser de sua acuas. E me ia vide la mar e la lados jala de la barcos. La frescia de erbas ia brilia opalin sur la ruinas de un mur bizantian. La bazares e tapetos de Trapezunda ia apare ante me. A la turna a en la site me ia encontra un montanior joven. Un falcon con la gama cadenida ia senta sur sua braso estendeda. La paso de la montanior ia es lejera. La sol ia es levante supra nosa testas. E un pas subita ia entra a en mea alma de vagor.
@T Balada de la damas de la tempo pasada
@L leteratur/balada_de_la_damas_de_la_tempo_pasada
@A François Villon, Patrick Chevin
====== Balada de la damas de la tempo pasada ======
par François Villon
traduida par Patrick Chevin
Dise me do, en cual pais,
Es Flora la bela Roman,
Arcipiada no Tais,
Ci ia es se cusin de sangue,
Eco e toca de campana
Supra rio o supra stange,
Ci ia es bela nonumana?
Ma do es la nevas de ante!
Dictes-moy où, n'en quel pays,
Est Flora, la belle Romaine,
Archipiada, ne Thais
Qui fut sa cousine germaine,
Echo, parlant quant bruyt on maine,
Dessus rivière ou sus estang,
Qui beaulté eut trop plus qu'humaine?
Mais où sont les neiges d'antan!
Do es vera pur Elois,
Per ci monce e desmasida
Es Abelar a San-Denis?
Per se ama multe sufrida.
E do es la rea malada
Ci ia comanda ce Buridan
Es en un saco afondada?
Ma do es la nevas de ante!
Oú est la très sage Hélois,
Pour qui fut chastré et puys moyne,
Pierre Esbaillart en Saint-Denis?
Pour son amour eut cest essoyne.
Semblablement où est la royne
Qui commanda que Buridan
Fust gecté en ung sac en Seyne?
Mais où sont les neiges d'antan!
La rea Blanca como lil,
Cantante con vose joven,
Bert pedon, Beatris, Alis,
Aramburjis, senior de Men,
E Jan d'Arc pastor de Loren,
Par engles ardeda a Ruan;
Do es, Virjin de dulsia plen?
Ma do es la nevas de ante!
La royne Blanche comme lys,
Qui chantoit à voix de sereine,
Berthe aux grant pied, Bietris, Allis,
Harembourgis qui tint le Maine,
Et Jehanne la bonne Lorraine,
Qu'Anglois bruslèrent à Rouen;
Oú sont-ils, Vierge Souveraine?
Mais où sont les neiges d'antan!
Prinse, xerca en tota rena
Do es los final tro distante,
E memori esta refren:
Ma do es la nevas de ante!
@T Batalia
@L leteratur/batalia
@A Guido Crufio
====== Batalia ======
par Guido Crufio
Me ia vide un soldato joven sede
Matada sur la campo de gera
Asta sua alia;
Me ia oia la respira final d'un om
An cuando el ia cade
Ferida par un talia;
Me ia odori la malodor de teme
Cuando la Falxor Macabre ia prosimi
Con sua malia;
Me ia sabori la sangue de gera
E ia comprende bon
Mea mortalia;
E me va toca la mano de Dio
Cuando me va parti esta mundo
Perdeda en batalia.
@T Belvedere
@L leteratur/belvedere
@A Michel Gaillard
====== Belvedere ======
Un sonia de Manouna Orti
Traduida de la lingua franses e composada
par Michel Gaillard, 1982
En acel tempo me ia abita, sur un cason vea, un sala multe streta; e la fenetra, tan basa, mostra a su un jardin esotica de do la lianas trepa, asende e intermisca con la edera asta la leto, e los penetra la telas verde fisante a la mur la "arbor de vive" tradisional; direta a mea adormi, la formicas invade mea sala.
De la vitreria, on persepi la mar... Asta aora, nunca me ia nota... La vila ia migi, ja gastada cuasi intera. Cuando on puxa la paneles, los distanti silente e los desfisa; cada de los afonda a via... Tan a via ce me deteta apena los flotante en la nonpesa.
Sur acel borda de la teraza do me sede al venta, me gusta zelosa la vertije de la vacua. Me vijila la construi torseda sur la roca presipe a borda del abiso.
La stela de norde comensa pulsa, jala pos negra sur sua xaceria do la cuadretas es movente, en ce la peones resta stable. «Iαω, dabadabada, ιαω! Fa tua turna, jua!» la coro del sielo canta, « Iαω dabadabada! »
De la alta, la strada apare, tan strana cuadretida con jala e negra, como sur esta foto brunida par la anios; sur acel, on no duta, el ia debe encontra tu cuando el ia abri esta album de familia. Ma esce lo ia es la sua, o la tua, o acel de cualce otra ta consernada? (Esta aveni serta afeta tu, aparente alora como areolada con un tinje supranatural.)
En acel vila mesma, algun pasa la ponte en lenio japanes, a pos el vade e vaga en la ruetas curva inclinada longo sua tendes natural, creante plazas miniatur cuando los lisca en lunlotra, crusante se sin sesa per formi alga rede plu densa, plu e plu, distantinte o prosiminte el ci ta sede al move como un resulta de un jeta de dado, en ce en mea sala de la sielo sete, me pare regardeta con distrae esta covre estendeda del disco juante sur la fonograf la partitur de esta sonia. A interna de la covre, on imajina la spiral de un jua del ganso. A supra, la oios, intensa, laborosa, ta estrae de un nebla artosa: Veni e aveni.
@T Besa me multe
@L leteratur/besa_me_multe
@A Consuelo Velázquez, Harri Savolainen
====== Besa me multe ======
(Besame mucho), par Consuelo Velázquez
traduida par Harri Savolainen (per canta)
Besa me, besa me multe,
como si esta ta es nosa note final!
Besa me, besa me multe,
Esce tu senti acel ondas emosial?!
Tu es prosima, me vide tua oios
tan verde, mirorinte clar.
Tal miseria, nos debe parti,
doman me va es sur la mar.
Besa me, besa me multe,
como si esta ta es nosa note final!
Besa me, besa me multe,
Esce tu senti acel ondas emosial?!
@T Bocragonia
@L leteratur/bocragonia
@A Lewis Carroll, Simon Davies
====== Bocragonia ======
"Bocragonia" (en engles: "Jabberwocky") es un poesia asurda creada par Lewis Carroll per sua novela Tra la miror (1871). Multe persones opina ce lo es la poesia asurda la plu eselente en engles.
La tradui a su es par Simon Davies en 2008, con revisas fada en 2013 e 2016.
A grelia, tovas angulil
Jiruple en stendelo forna;
La borcos es tan frajeril,
E la ronios gan estorna.
"O fio, tem' la Bocragon!
La garas saisi a la dente!
Defende tu de l' avia Ju
E la Pranda frumiente!"
Con spada valpre en la man',
El xerca esta xom jigante ---
Alora su l' arbor Tultul,
El pensa reposante.
An cuando el sta pensadur,
La Bocragon, de fas flamin,
Suxofla tra la bos oscur,
Con sona zumbuin!
Un du! Un du! A tra, a su,
La lama valpre talia tal!
E el, vinsor, con la testa mor,
Reveni galansal.
"Tu mata ja la Bocragon?
Abrasa me, o bon raieta!
Un dia brel! Fa lil! Fa lel!"
El rince en deleta.
A grelia, tovas angulil
Jiruple en stendelo forna;
La borcos es tan frajeril,
E la ronios gan estorna.
===== Notas =====
La testo engles ave multe parolas bizara cual no ia esiste vera en la lingua cuando Lewis Carroll ia publici la poesia. (Ma la disionarios moderna conteni alga: per esemplo, galumphing e chortled. On usa los en la engles de oji!)
Carroll ia "esplica" la sinifia de alga de la parolas:
Strofes un e sete:
* Brillig (grelia) es la ora cuatro de la posmedia.
* Slithy (angulil) es un fusa entre slimy (melmosa como un angila) e lithe (ajil).
* Toves (tovas) es animales de un spesie ibride: partal un texon, partal un lezardo, e partal un tiratapo! Los come ceso, e crea sua nidos su la orolojos de sol.
* Gyre e gimble (forna jiruple) es verbos en engles: to gyre (un parola real, ma nonfrecuente) sinifia torse como un jiroscopio; to gimble es la ata de fora con tiratapo.
* Wabe (stendelo) es la erba sirca un orolojo de sol.
* Mimsy (frajeril) es un fusa de flimsy (frajil) e miserable (misera).
* Borogoves (borcos) es avias de un spesie con plumas multe desordinada.
* Mome (gan) sinifia cisa from home (vagante de sua casa).
* Raths (ronios) es porcos de un spesie verde.
* Outgrabe (estorna) es la forma pasada de la verbo outgribe. Lo sinifia un sona strana: un misca de un cria basa e un sibila, con un stornui en la media.
Strofe du:
* Jabberwock es la monstro de la nara (vide la imaje). La traduida Bocragon sujesta ce lo es un dragon con un boca asustante; e la silaba Boc refleta wock de la nom engles. La titulo Jabberwocky pare un spesie de nom consetal, ma sua sinifia no es multe clar.
* Jubjub bird (avia Ju) es un avia desperante e sempre emosiosa.
* Frumious (frumiente) es un fusa entre fuming (fumante) e furious (coler).
* Bandersnatch (Pranda) es un besta rapida con mandibulas enerjiosa. Lo pote estende sua colo.
Strofe tre:
* Vorpal (valpre) pare sinifia "agu e majial".
* Manxome (xom) sinifia asustante. On no conose sua orijina. En la traduida, lo es cambiada a un nom.
* Tumtum tree (arbor Tultul) es un spesie fantasial de arbor.
Strofe cuatro:
* Uffish (pensadur) sinifia "de umor mal e cexante". En la traduida, pensadur es un averbo.
* Whiffling (suxofla) es un parola real (ma rara) en engles. To whiffle es move jentil como la aira, ma lo recorda forte ance la verbos to whisper (xuxa) e to sniffle (ensofla).
* Tulgey (bos) vole dise ce la foresta es densa e oscur. En la traduida, lo es cambiada a un nom cual recorda la parola "bosce".
* Burble (zumbuin) sinifia un sona miscada entre un murmura, un zumbi, e la sona de un capra o ovea.
Strofe sinco:
* Snicker-snack (talia tal) es un verbo onomatopeal: lo sujesta la sona de la "lama valpre".
* Galumphing (galansal) es un fusa de galloping (galopa: la core la plu rapida de un cavalo) e triumph (un vinse gloriosa).
Strofe ses:
* Beamish (raieta) sujesta ce la fio surie (to beam = surie forte), como si sua dentes envia raios de lus (beams of light).
* Frabjous (brel) es un fusa de fabulous (fablin, fantasial) e joyous (joiosa).
* Callooh! (fa lil!) e Callay! (fa lel!) es esclamas inventada, con sinifias simil a u-ra!.
* Chortled (rince) indica un spesie de rie: lo es un fusa entre to chuckle (rie cuieta) e to snort (ronca).
@T Bon fortuna
@L leteratur/bon_fortuna
@A Vanessa da Mata
====== Bon fortuna ======
Un canta portugues par Vanessa da Mata
Lo es sola esta
No ave solve
Lo ia fini ja, bon fortuna
Me no ave ce dise
Lo es sola parolas
E cual me senti
no va cambia
Tota cual tu vole dona a me
Es tro multe
Es pesosa
No ave pas
Tota cual tu vole de me
espetas
nonreal
nonfidosa
An si tu teni
Me vole tu sanida
De acel person
Cual consela tu
Ave un desencontra
Vide lo de esta punto
Ave tan multe persones spesial
Un bon encontra es de du
@T Bruneta con oios de acua
@L leteratur/bruneta_con_oios_de_acua
@A Chico Buarque, Patrick Chevin
====== Bruneta con oios de acua ======
par Chico Buarque
traduida par Patrick Chevin
Bruneta con oios de acua
Retira tu oios de l' mar
Veni vide ce la vive valua ancora
La surie cual per tu me garda
Reposa en me povre peto
Cual nunca fronti la mar
Ma cual ave un abraso streta, bruneta
Cual no cosa plu separa
Veni oia naras bela
Cual me fa per tu, insone
Veni sabe naras de mar, bruneta
Cual sola me conose
Tu om, el ia vade via
Dise ce pronto reveni va
Ma la ondas no ave oras, bruneta
De departi o de ariva
Pasa velas e vade via
E la tempo sin reteni
Ma me canta prea ancora, bruneta
Aora, bruneta veni!
@T Cada via gida a Birmingham
@L leteratur/cada_via_gida_a_birmingham
@A Guido Crufio
====== Cada via gida a Birmingham ======
par Guido Crufio
On dise "Cada via gida a Roma"
Ma me pensa ce esta es un broma
Tu vide, a la otra dia
Me pasea longo un via
A la fini de la via
Es la sentro de un vila
"Esce esta es Roma?"
Me demanda de un om
"No" el dise
"Esta es Birmingham!"
@T Cant' autono a maio
@L leteratur/cant_autono_a_maio
@A Gary Miller
====== Cant' autono a maio ======
Un poesia engles vea per enfantes
traduida par Gary Miller
Me ia ave un can poca -
El ave brun color,
El pote fa sibilas,
El es un bon coror;
El gamas ave tal longia,
Tal larga oreas,
Tra la mundo nos vade,
Como paseas.
Canta, teri-o dai-o,
Cant', autono a maio.
Me ia ave un bon rana -
El vade con baston,
El port' un xapo alta
E veste roja bon;
El dise de la partes,
En ce el av' atar,
De res e reas, videta
Entra se navigar.
Canta, teri-o dai-o,
Cant', autono a maio.
Me ia ave un bon avia -
El es tal bel' e mol;
El senta supr' un ostra,
Nase un caracol -
Altera se a avia,
Papilio pos acel.
E un person, ci dise plu,
A tu no es fidel.
Canta, teri-o dai-o,
Cant', autono a maio.
@T Canta autonal
@L leteratur/canta_autonal
@A Paul Verlaine, Patrick Chevin
====== Canta autonal ======
par Paul Verlaine
traduida par Patrick Chevin
La longa plor'
De violin
De l'auton'
Feri me cor
Par un ruin'
Monoton'.
Plen sofocant'
E pal ja cuand'
Sona l'or',
Recorda de
La dias ve'
E me plor'.
E me vad' en
Malia de vent'
Sin ancor
Asi, ala
Simil a la
Folia mor.
@T Canta per la alvernian
@L leteratur/canta_per_la_alvernian
@A Georges Brassens, Patrick Chevin
====== Canta per la alvernian ======
par Georges Brassens
traduida par Patrick Chevin
Es per tu esta canta de me
Tu l'alvernian ci vera simple
Ia don' a me pesos de lenio
Cuando me vive es inverno
Tu ci ia don' a me un foc'
Cuando campaniores de l' loc'
E tota la bonintendentes
Clui ja ante me se ambientes
Si ia es sola foc' de lenio
Ma el ia caldi me la cor
E en me corp' el ard' ancor'
Plu forte ca tota enferno
Tu l'Alvernian cuando va mor'
E prende tu la funeror
El ta porta 'via tu felis
A la paradis'
Es per tu esta canta de me
Tu l'ospitor ci vera simple
Ia don' a me pesos de amia
Cuando me vive ia es famia
Tu ci ia don' a me un pan
Cuando burges e artisan
Cuando la tota e cadun
Rie de vide me jejun'
Si ia es sola un peseta
Ma el ia caldi me la cor
E en me corp' el ard' ancor'
Tal como un vera banceta
Tu l'ospitor cuando va mor'
E prende tu la funeror
El ta porta 'via tu felis
A la paradis'
Es per tu esta canta de me
Acel stranjer ci vera simple
Sinsera triste ia me surie
Cuando la polis prende me
Tu ci no ia es aplaudinte
Cuando la popla conferinte
Per partisipa a la festa
Rie de vide me aresta
Si ia es sola un consol'
Ma el ia caldi me la cor
E en me corp' el ard' ancor'
Tal como un jigante sol
Tu la stranjer cuando va mor'
E prende tu la funeror
El ta porta 'via tu felis
A la paradis'
@T Canta per la unia de America latina
@L leteratur/canta_per_la_unia_de_america_latina
@A Pablo Milanés, Chico Buarque, Patrick Chevin
====== Canta per la unia de America latina ======
par Pablo Milanés e Chico Buarque
traduida par Patrick Chevin
Ia ave la nase de un mundo
Retardada momental
Ia ave un corta interval
De universa un secondo
Ma ia pare ce an tal
Fininte ja tota ia es
Par la distantia mortal
Cual ia separa nos vives
Los ia reali la labora
De desuni nos manos
E fa ce frates alora
Regarda la otra temos
Con la anios pasada
Ia cumula se la coler
On oblida la amada
On ia pare un stranjer
Ce distantia tan dolos
Ce mundo tan separada
Nunca ta es trovada
Sin la vive de tota nos
E ci garantia ce la istoria
Es un caron abandonada
A la borda de un via
A un stasion iniorada
La istoria es un auto joios
Plen de poplas contente
Cual crase noncurante
Ci nega el, tota de los
El es un tren cual rasca via
Cual abri sur nova spasios
Cual saluta con mil brasos
Cual balansi nos familia
Los ci se lus propre teni
Nun susede estingui estas
Se brilia pote ateni
La oscuria de otra costas
Ci ta impedi ce la flama
Vade luminante la sena
E ensendente la asembla
E inventa otra trama ?
Ci ta evita ce los ventos
Bate portes malcluida
Reversa tera malbateda
E ateni nos lamentas ?
Final ci paga la lamenta
De la tempo ja perdeda
De la vives cual costa ja
E de los cual costa va ?
Es lansada ja un stela
Per ci sabe persepi
Per ci vole ateni
E vade abrasante el
Es lansada ja un stela
Per ci sabe persepi
Per ci vole ateni
E vade abrasante el
@T Cantas traduida
@L leteratur/cantas_traduida
@A 
====== Cantas traduida ======
@T Canteta acadian
@L leteratur/canteta_acadian
@A Kevyn Bello
====== Canteta acadian ======
Un canteta acadian per adormi la enfantes
traduida par Kevyn Bello
Dormi, me bebeta, tu
El es un bebeta per tu mama
Dormi, dormi,
Dormi, me bebeta, tu.
Doman, la sol leva juar con tu.
El es un bebeta per tu mama
Dormi, dormi,
Dormi, me bebeta, tu.
@T Carnaval
@L leteratur/carnaval
@A Gibran Khalil Gibran, Myaleee
====== Carnaval ======
par Gibran Khalil Gibran
traduida par Myaleee
(Discute entre un vea contemplosa e un joven felis en foresta.)
Vea:
Persones fa bon sola si obligada!
La vilia en se mesma no fini mesma pos mori!
Fortuna fa ce omes move
Como pupetas asta ce El para!
No dise: Esta om es saja e acel om es nobil!
La plu capas de omes es como oveas
Cual la pastor gida e
ualce ovea ta mori si ol no pasea!
Joven:
En foresta, es no pastor, no oveas!
Inverno pasa ma no junta con primavera!
Popla es creada como sclavos su Om Vinsente!
Cuando El avansa a ante, tota los segue El!
Trae a me la flauta, e tu canta!
Car la canta sio lumina la mente!
E la melodia de flauta dura plu
Longa ca la nobil e la sclavo!
Vea:
La felisia en vive es fantasma desirable!
Si el deveni corpo e on oteni el, on omete el pronto!
Como la rio core ma el para si el prosimi la riva!
La om es contente per xerca la proibidas!
Si el oteni los, el descura los!
Si tu trova un felis
Ci no vole la proibidas,
Tu ta dise ce el es un fol rara!
Joven:
En foresta es no aspira, no despera!
Perce la foresta nesesa un parte
Cuando el posese vera la tota??
Perce la foresta xasa la espera
Cuando el es mesma la espera!
Trae a me la flauta, e tu canta!
Car vera la canta es e lus e foco!
E la melodia de flauta plase la spirito!
Vea:
La mori en tera es la fini per umanas de tera!
Ma per spiritos eteral, mori es comensa e vinse!
Ci vide sonias encantosa, gania gloria!
E ci pasa se note en dormi, perde perinte!
La mori es como la mar!
La om lejera traversa fasil
E la pesosa inonda a su!
Joven:
En foresta es no mori, no tombas!
Si april pasa, se joias no pasa con el!
La panica de mori es sin funda
Ma resta en peto de om!
Ci vive un primavera es simil
A esta ci vive anios sin numero!
Trae a me la flauta, e tu canta!
Car la canta es secreta de eternia!
E vera la melodia de flauta
Resta pos la fini de esiste!
@T Carta de identia
@L leteratur/carta_de_identia
@A Mahmud Darwich, Franck Mousset
====== Carta de identia ======
par Mahmud Darwich
traduida par Franck Mousset
Enscrive:
Me es arabi.
La numero de me carta es sincodes mil,
Me ave oto enfantes
E la nove va veni... pos la estate.
Esce tu va coleri?
Enscrive:
Me es arabi.
Me labora con me cameradas de turba
En escaveria.
Me ave oto enfantes,
Per los, me estrae rocas,
La pasta e la pan,
La vestes e la libros,
E me no veni mendica a tu porte,
Me no basi me
Ante la pave de tu porte.
Esce tu va coleri ?
Enscrive:
Me es arabi.
Me nom familial es comun.
Me es pasiente en un pais
Bolante de coleria.
Me radises...
Fisada ante la nase de la tempo,
Ante la emerji de la sentenios,
Ante la sipres e la olivo,
Ante la crese vejetal.
Me padre...
De la familia de la arados
E no de la seniores de Nujub.
Me avo... Un cultivor
Sin jenealogia;
Lo ia aprende a me la moves de la sol
Ante la leje.
Me casa...
Un cabana de mantenor
En canas e ramos.
Tu es contente de me state?
Me nom familial es comun.
Enscrive:
Me es arabi.
Capeles... Negra,
Oios... Brun,
Marcas distinguida...
Sur la testa un cafia tenida par un cordeta.
Me palma ru como la roca
Rasca la mano, cual saisi lo.
Me adirije...
Me es en vileta distante, sin defende,
E tota omes es en campos e en escaveria...
Esce tu va coleri?
Enscrive:
Me es arabi.
Tu ia saca me de la viterias de me asendentes
E de la tera, cual me ia cultiva
Con tota me enfantes,
E tu ia lasa a nos
E a nos projenia,
Sola esta petras.
La vos governa va prende ance los,
Como on dise?
Alora,
Enscrive
A la comensa de la paje un:
Me, me no odia la los de me,
E me ataca nun.
Ma... Si on fami me,
Me come la carne de me sacor.
Garda tu... Garda tu
Contra me famia
E contra me coleria!
@T Capitol 3. Carta postal
@L leteratur/carta_postal
@A Manouna Orti
====== Capitol 3. Carta postal ======
par Manouna Orti
 Mea ami dulse,
Me recorda esta momento cuando, de la nave, me ia vide la riva, la vila blanca, la porto, prosiminte lenta. Me ia espeta tan esta aveni!
En un move perfeta, la nave ia parci a la molo, sin alga secute. Me intende vade a la posteria direta a mea ariva. A esta eda de la vila, la posteria es ancora situada nondistante del porto, sur un plaza solosa. Un carta postal espeta me ala, en posta restante, scriveda par tua mano.
Pos la posteria, me pasea tra la stradas, a dirije de la borda de mar: la musica, en la aira iodida, gida me, un musica cual me mesma ia composa! Me sabe aora do me debe vade: me senta a lado de la ciosco de bande, do la musicistes es juante mea canta per tu, al ritmo de la ondas de mar. Tua carta postal es posada ante me sur un table streta, do, aora, me scrive esta letera per dise a tu ce me es final arivada.
Si tu ta sabe cuanto mea cor joia! Mea oios nebli, alga gota de larma flue.
Tota la locas, asi, es tan plu bela ca cuando me ia parti! La basilica, a fas, es tan joven, sin construida a sirca. De esta loca, me pote vide tota: la porto, la vila, la fronte de mar con sua casas gloriosa, torseda e bela, e, al fondo, la belvedere do me va abita tra esta alga anios... ante la fini del mundo.
Me vide ance la damas paseante, elegante con sua vestes antica, robas e ombrelas blanca dentelosa... entre aceles me xerca tu, a cada ves cuando me pausa en mea scrive.
U la joia cuando me va revide tu! Car mea oios leje e releje tua parolas simple, deletosa felisinte:
« Me va sta ala, bon vive nova a tu! »
@T Cassandre
@L leteratur/cassandre
@A Pierre de Ronsard, Patrick Chevin
====== Cassandre ======
par Pierre de Ronsard
traduida par Patrick Chevin
Beleta, vide si la rosa
Cual a matina oj' esposa
Se roba roja a la sol
No perde ja a sera oj'
La plias de se roba roj',
Se color simil a tu col'.
Ai! vide com' en spasio poca,
Beleta, lo ia sur la loca,
Ai! ai! se belias lasa per'!
O vera madre mal natur
Si tan bela flor sola dur'
De la matin' asta la ser'!
Donce si tu crede me, bela,
En cuando tu eda constela
En esta plu verde jovenia,
Colie, recolie lo, me rea;
Como de esta flor la vea
Veni descolori tu belia.
@T Clasi de linguas construida
@L leteratur/clasi_de_linguas_construida
@A Clasi de linguas construida, vxeov
====== Clasi de linguas construida ======
Clasi de linguas construida (Classificatie van kunsttalen) es un esajo par Jan van Steenbergen. Lo proposa un sistem per categori linguas construida, cual es sempre cresente en cuantia, par sua intende, orijina, e completia.
Esta tradui es par vxeov de la testo orijinal en nederlandes.
===== INTRODUI =====
Un lingua es un sistem composada de simboles cual representa sinifias e regulas per como usa esta simboles. On pote considera sua defini en multe modos, laxe o sever. Alga de mundo interprete ce la media de comunica entre animales es un lingua en cuando otras desacorda. La mesma debate continua, per esemplo, a linguas de programi -- sua nom dise tota ja. Lo nesesa ce nos pone un limita. Donce, lasa ce nos acorda: per parla en un lingua, la cuantia de informa cual on pote transmete debe no es tro limitada. Un lingua nesesa la capasia a nomi cada conseta astrata o material. Longo esta criterio, un lingua debe ave un vocabulo e gramatica par sua defini; en ajunta, la ojeto de un lingua es comunica, per dise persones ta usa la lingua par espresa informa entre lunlotra.
La mundo ave multe miles de linguas. Nos pote divide los en alga modos diferente: par media, par orijina, par cuantia de usores, par cualce tipos de cualias tipolojial, e tal continuante. Si on prefere la sudivide par media, alora linguas pote es categorida a:
* Linguas de parla
* Linguas de sinia
* Linguas de vide (pasigrafia)
* Linguas de musica
Natural, la grupo de "linguas de parla" es la plu grande a presente. Lo inclui, comprendable, la representas de linguas de parla cual es scriveda sur paper. Nos no nesesa considera como on tradui la leteras H-O-N-D e la parola "hond" en nederlandes an si lo pote es ce persones diferente pronunsia lo en modos diferente. Lo pertine a ce nederlandes de parla e sinia ave la mesma vocabulo e la mesma gramatica.
Un otra e serta egal sinifiosa modo de sudivide es par como la lingua ia es fundida. En esta caso, nos nesesa sola du grupos xef:
* Linguas natural
* Linguas construida
==== Linguas natural contra linguas construida ====
On ave alga diferes esensal entre linguas construida e linguas natural. Lo es clar ce la difere la plu importante es ce linguas natural ia crese -- algun ta dise "maturi" -- tra la istoria. Linguas construida a la otra lado, es obras de un o plu creores con o sin nom, donce linguas construida es creada con un intende spesifada par defini. Esta causa la clasi de linguas construida deveni an plu complicada ca linguas natural. Ultima, tota linguas natural ave un cosa comun, per dise los es developada tra sentenios como un parte de cultur local. Si los debe ave un intende, lo ta es: comunica con tua amadas. Malinguas construida es cisa creada per un monton de razonas.
Pone la linia entre linguas natural e linguas construida es fasil no sempre. Cadun ta usa un parola cual el mesma inventa en sua lingua prima. Evidente, esta no pote sinifia ce nos crea un lingua construida en la curso, ma lo es egal evidente ce la lingua cual nos usa conteni elementos tipal de linguas construida. La plu de linguas normida en documentos dirijal es ance composada de alga varias local ("dialetos") en modo artifis, e sua vocabulos e gramaticas es regulada par un autoria capas. Denova, lo es evidente ce esta no sinifia ce linguas como nederlandes prescriveda es construida, ma sur la balansa con linguas natural a un lado e linguas construida a la otra lado, la linguas ja notada es plu prosima a la otra lado ca dialetos local sin regula. Esta es spesial vera per la linguas cual es fabricada par un sola creor en la pasada no tro distante. De la perspetiva reversada, on ave a la min un lingua construida, esperanto, cual developa rapida a un lingua natural: lo ave sentos de parlores nativa, e lo developa en la mesma modo como linguas natural par causa de un comunia de usores grande. La cosa dutable tre es reconstruidas de linguas ja estinguida par linguisticistes, per esemplo indoeuropean, o protogermanica cual es plu prosima a nederlandes. Estra la demanda de esce esta linguas ia esiste en realia, nos es serta ce no cosa survive de los, e cada forma reconstruida ave donce un cualia sever ipotesal. La linguas mesma no es linguas construida, ma sua reconstruidas, cual es creada par alga creores, es linguas construida a alga grado.
Lo es importante ce on evita aplica la modos de sudivide intercambiable, an si esta aveni ancora sur la scala plu alta, regretable. Como la ja notadas, on pote divide linguas natural en multe modos, ma la modo la plu comun es par jenetica, per dise, clasi los a en familias de lingua. Esta en pratica resulta un lista de familias de lingua, cual comensa usual con la linguas indoeuropean e fini con linguas isolida, pijines e creoles. A loca la vera ultima de la lista, nos pote vide linguas construida cual es regardada como un sugrupo de linguas de parla. Tal cosa es erosa car alga linguas de sinia, de vide e de musica parteni a linguas construida ance. En ajunta, nos ave miles de linguas construida ancora pos iniora la tre grupos. E donce, nos nesesa plu sudivides.
==== Clasi de linguas construida ====
La clasi de linguas construida es un fenomeno relativa joven. Nos ia ave no problem en distingui los a la eda de esperanto e quenya. La nesesa per clasi plu profonda ia surje sola cuando la rede mundal ia nase e la cuantia de linguas construida conoseda ia aumenta esponental. De alora, alga atentas de sudivide ia aveni ja; cual par Jeffrey Henning (Langmaker.com) e Rick Harrison (Journal of Planned languages, 1996) es la plu bon conoseda. Ma esta clasi ave nonperfetas nonevitable en aspetas pivotin. Per esemplo, la clasi par Henning distingui "linguas imajinal profesal" (professional fictional languages) e "linguas de supracolie" (superset languages): la prima refere a un combina de sudivide par intende e media, e la otra aplica a la modo cual la vocabulo es composada. On pote fasil trova ce un lingua como nadsat es un esemplo tipal cabente a ambos categorias, e on ave otra linguas cabente a no categoria ance. La clasi par Harrison, cual fundi se sur la orijina de la plu de la vocabulo de un lingua, es plu coerente en esta regarda. Xef, el divide linguas a tipos apriori e aposteriori. An si sua contenida ave poca spasio per cexas, lo ave un nonvantaje major ma ancora: lo iniora completa la intende de la crea de lingua, e en ajunta, lo pare ce lo es xef desiniada per linguas aidante internasional -- linguas con la indente de fasili comunica internasional.
Linguas construida pote es clasida longo linias diferente: par familia de lingua (como la caso de linguas natural), par intende, par orijina de documentos, par cuantia de usores, par media, par cualias tipolojial linguistical, par completia, par nasionalia de sua creor, par tempo, e tal cosas. Alga criterios es evidente plu bon ca la otras. Par causa ce un clasi bon debe es clar e no tro complicada, lo es lojical ce nos omete la criterios min pertinente. La cuantia de usores, per esemplo, cisa es un fato interesante, ma determina lo es alga difisil a multe veses, e tal informa mostra no cosa sur la lingua mesma. Cualias tipolojial linguistical, per esemplo cuantia de fonemes o ordina de parolas, funsiona a linguas natural a la mesma estende, donce lo no parteni a un clasi spesifada per linguas construida. La media cual on espresa un lingua es sola importante en caso de linguas en mundos fantasiada, e nos pote usa lo sola per sudivide plu trivial. En efeto, on ave sola du criterios cual es vera esensal. La prima es la sudivide par intende, cual Henning ia inisia en la pasada. Un saja comun a esta dias: intende es la fator la plu esensal cual distingui linguas de lunlotra. La du es la sudivide par orijina de documentos, proposada pa Harrison. Ambos es importante, e la modo la plu bon es clasi linguas construida par pone los en alga loca de la matris composada de esta criterios. Per evita malcomprende, on debe no usa los intercambiable.
===== CLASI PAR INTENDE =====
La esiste de intende es cual distingui linguas construida de linguas natural. En ajunta, esta es serta la criterio la plu pertinente cual distingui linguas construida de lunlotra. Lo responde la demanda: Cual es la intende de la lingua; perce la lingua es creada? La intende de la creor determina la responde. Lo es posible ce on ave diferes sutil entre la motiva con cual la lingua es creada, sua usa ideal de la persepi de creor, e sua usa en realia. La intende prima de la creor debe es desidente. Per dise, an con la fato ce alga persones regarda linguas consetal (per esemplo lojban e toki pona) como competores potensial a esperanto, los no es linguas aidante internasional.
Tra anios, un tipo de acorda emerji ja en la comunia de creores e zelosas -- on ave tre spesies xef de linguas construida, e esta sistem es jeneral asetada estra acel comunia ance:
* A. Linguas aidante internasional
* B. Linguas consetal
* C. Linguas artal
Confirma la intende prima con cual un lingua es construida no es fasil a cada ves. Spesial, la grupo de linguas personal (un sugrupo de linguas artal) crea un problem difisil car lo es la grupo la plu grande e la min stable a la mesma tempo. On pote razona ce cuasi cada lingua artal es un projeta personal de amato a la vera comensa, e a alga grado, lo va permane como un projeta personal. Ultima, an un lingua aidante internasional o lingua fantasiada (a la min, si lo no es creada per un usa tempora) es un resulta de anios de labora, cual debe es fundida sur un urje nonlimitada personal a crea. Alora lo es conselable ce on no pone un lingua a en la categoria de linguas personal e un otra categoria a la mesma tempo. Ma a pos tota, linguas personal esiste e nos no vole esclui esta obras eselente, donce nos ta dise: cada lingua es un lingua personal estra si lo developa alga cualias cual es ultra la estende de la categoria de linguas personal.
Esta no nega la fato ce linguas pote ave ojetos multiple, e lo no es nesesada ce categorias esclui lunlotra. Como Claudio Gnoli scrive sur sua lingua construida, liva --
-- "Liva es construida xef per diverti: lo no ave cualce ojeto pratical a la comensa. On pote regarda lo como un esperimenta atentante sasia ambos la esijes de lojica e la preferes estetical de sua creor."
Natural, on pote aplica la mesma idea a alga linguas aidante internasional: vera, lo ave un pico de amor de belia. E como de la person ci reconstrui protoindoeuropean con la intende de usa lo como un lingua aidante internasional? El ta dise alora ce sua on pote clasi un lingua construida individua con un Triangulo (pdz la "Triangulo de Gnoli"); sua tre puntos representa en ordina la lingua artal, la lingua aidante internasional e la lingua consetal a sua formas la plu pur. On pote loca cada lingua a interna de la Triangulo. Aora, me pensa ce esta es un idea bon de prinsipe, ma lo es con nonvantaje. Prima, sua enforsa es complicada. On debe trova la valua esata de proportios de la tre cualias (artal, aidante internasional, consetal), cual es estrema difisil. En ajunta, an si 99% de linguas construida es en la Triangulo, on ave algas estra lo. On pote imajina un lingua cual es creada per un intende multe spesifada e no caturada par la categorias esistente. Me ance ia trova du categorias cual -- an con ce los comparti un pico de cualias de linguas natural -- debe es contenida en un sistem completa per la clasi de linguas construida. Donce, en ajunta a la tre categorias ja notada, me ta vole ajunta tre otras:
* D. Linguas construida per usas spesial
* E. Linguas reconstruida
* F. Projetas de reformi per linguas natural
Alora, Nos ave ses categorias, cual es mostrada en modo grafica con un esagon simil a la Triangulo de Gnoli:
On no debe aplica la esagon en la mesma modo como la Triangulo de Gnoli. Sua usa es no difisil, me pensa, par causa ce la cuantia de linguas cual on pote clasi a en categorias multiple es multe limitada. En ajunta, la ordina de esta categorias es organizada con lojica. Cada du categorias visina ave un zona neblosa. Per esemplo, la linguas filosofial parteni a la categoria de linguas consetal, ma los ance intende a fa la rol de linguas aidante internasional en modo direta o nondireta, forminte un zona neblosa entre du categorias. Linguas consetal ave un otra lado compartida con linguas esperimental, cual es simil a linguas artal en la plu de casos. En la mesma modo, on pote dise ce a multe veses, linguas-juetas (Categoria C6) es egal a e/o es usada como linguas secreta (Categoria D1); linguas reconstruida es creada per intende siensal, donce sua funsiona es relatada a la linguas en Categoria D.
En caso ce un lingua fa plu ca un roles e no rol es plu importante ca la otras, on no ave alga regula ce despermete ce nos clasi lo a en plu ca un categorias.
==== A. Linguas aidante internasional (engles: international auxiliary languages) ====
Estas es linguas cual es desiniada per aida comunica internasional. Tipal, un lingua aidante internasional ave alga nesesadas. Los debe:
* es neutra (pd. lo no ave lia a alga lingua spesifada),
* es simple e fasil aprendable,
* es reconosable par la vera majoria de popla,
* pote es pronunsiada par la vera majoria de popla.
Poca creores de linguas aidante internasional espera ce sua linguas pote sustitui la linguas natural. Ma ancora, los labora asidua afin persones tan multe como posible pote aprende e usa sua linguas como un lingua du.
Linguas aidante internasional pote es sudivideda en du modos; la modos no interveni lunlotra.
* A1. Per usa zonal: Esta linguas es spesifada desiniada per parlores de un familia de lingua intera, per esemplo la linguas de germanica o slavica. La gol de un lingua de Categoria A1 es ce la parlores de acel linguas pote comprende lo sin aprende presedente.
* A2. Per usa rejional: Esta categoria es multe simil a la A1, ma lo es desiniada per parlores de linguas eterojen en un rejion spesifada. La projetas variosa de crea la "lingua per la Uni European" es esemplos clasica.
* A3. Per usa internasional: Pd. linguas per usa global.
La otra modo de sudivide, cual es multe popular entre la suportores de linguas aidante internasional, distingui linguas naturin e linguas scemal. Linguas scemal tende deriva sua vocabulo de la regulas gramatical, no de sua linguas de fonte; linguas naturin tende usa un vocabulo simil a sua linguas de fonte. Esta resulta direta ce linguas scemal es plu fasil aprendable, e linguas naturin es plu fasil comprendable sin aprende presedente. Tecnical, la distingui no relata a la intendes de un lingua; lo sola sinifia como un lingua reali sua intendes. Lo es plu conveninte ce nos inclui esta modo de sudivide asi, car prima, on pote aplica lo a linguas otra ca linguas aidante internasional, e du, lo an tal furni informa sur la espetas de la creor. La sucategorias es aplicable a A1, A2 e A3, ma en pratica, la plu de linguas per usa internasional es probable scemal, e la plu de linguas per usa zonal es probable naturin.
* a) Linguas naturin
* b) Linguas scemal
==== B. Linguas consetal (engles: engineered languages) ====
La nom dise tota de lo: estas es linguas fundida sur un conseta spesifada; la conseta es plu importante ca la usa final. Per dise, la conseta fondal es simultan la intende prima. La lingua es un resulta direta de la conseta, es on pote evalua la lingua en modo ojetal con criterios fundida sur la conseta. On ave tre sucategorias parteni a la linguas consetal:
* B1. Linguas filosofial: Estas es linguas fundida sur un filosofia spesifada de la funsiona de la conseta "lingua" jeneral. En la Sentenio de Lumina, en la xasa de la "lingua perfeta", multe linguas -- la "linguas categorial" o "linguas tasonomial" malnomida -- ia es creada con vocabulo construida scemal sur la funda de categorias sintatical. Pos esta, linguas artal ia es ance creada sur otra filosofias.
* B2. Linguas lojical: Esta linguas es fundida sur alga tipo de lojica formal -- lojica predica a multe veses -- e intende reali nonambiguia completa. La razona direta per crea tal linguas es usual la Ipotese Sapir-Whorf, cual declara ce la pensa e ata de umanas es afetada direta par la lingua cual on parla.
* B3. Linguas esperimental: Lo inclui tota linguas fundida sur un conseta spesifada e no parteni a la sucategorias de linguas filosofial e linguas lojical. Los ave un cualia esperimental, como la nom sujesta.
==== C. Linguas artal (engles: artistic languages) ====
"Lingua es obra de arte", lo pare ce esta categoria usa lo como sua slogan. Esta linguas asentua labora creosa plu ca otra linguas, e on debe evalua los de un perspetiva artiste. Los no veni de idealisme, ma de la urje a crea. En multe casos, esta linguas es un parte de obras plu grande de cultur de imajina. Linguas artal es rara creada con la espeta ce multe persones parla lo. An cuando esta aveni en cualce modo, la intende prima de la creor es senti plaser en curso de crea e/o sasia la valua artiste de la resulta final.
La categoria de linguas artal ave esta sucategorias:
* C1. Linguas fantasiada: Estas es linguas internida en un obra plu grande per furni plu profondia e detalia a la mundo imajinal. En pratica, la caso pote reversa: on crea un obra imajinal per la lingua. Los parteni a naras siensal e/o fantasiada, e pote es parlada par umanas, estrateranes o animales en la ambiente de sua obras. Linguas fantasiada inclui linguas naral, cual usual inclui sola alga nomes, parolas o frases. Alga linguas fantasiada es sola usada per nomi cosas. Tal o no, la divide par media es plu importante per linguas fantasiada. Donce nos distingui linguas de:
* a) libro e cartun
* b) filma e televisa
* c) jua de computador e jua video
* d) interede
* e) musica
* f) otra
* C2. Linguas alternativa: Esta linguas es ipotesal; los atenta responde la demanda: como un lingua ta aspeta si alga avenis istorial ia vade sur un via diferente de la realia? A la plu veses, esta linguas parteni a naras de istoria alternativa o naras siensal. La difere entre linguas alternativa e linguas fantasiada es sutil. On pote dise ce la linguas alternativa ave un cualia plu divinante, e la otra ave un cualia plu mostrante. En ajunta, cuasi tota linguas alternativa es aposteriori par sua defini, contra ce la plu de linguas fantasiada es apriori.
* C3. Linguas micronasional: Estas es construida spesifada per micronasiones, pd. statos peti e nonreconoseda cual es usual fundida per umor, arte o politica. Nos no ave un razona sufisinte per clasi los su la categoria de linguas artal, e en fato, alga linguas micronasional es cisa plu conveninte per "Linguas construida per usas spesial" car los no sempre trata prima la elementos artiste.
* C4. Linguas personal: No como la sucategorias ja notada, esta linguas no es un parte de un cosa plu grande. Los es obras de amato cual ave no intende otra ca plaser e/o usa personal de sua creores.
* C5. Linguas parodiante: Linguas con un cualia umorosa e/o satira.
* C6. Linguas-juetas : Ance nomida jua de lingua (engles: language games). Per dise esata, los no es linguas. Los usual inclui sola un tecnica simple e fisada per cambia un lingua preesistente a un forma diferente. En la pasada, estas "linguas" ia es xef usada per comunica secreta, pe. entre comersiores en la mercato. Oji, los es spesial amada par enfantes. Linguas-juetas ance inclui babelas e merdas-de-bove cual no ave vocabulo o gramatica, e es sola usada per evoca alga ambiente spesial.
Esta sucategorias inclui partal lunlotra. Donce, on pote ance usa un lingua parodiante como un lingua fantasiada; on pote declara ce un lingua alternativa deveni la lingua ofisial de sua micronasion; etc.
==== D. Linguas construida per usas spesial ====
Nos ja nota ce en pratica, 99% de linguas construida esistente pote es clasida a en la tre categorias a supra. Ma ancora, on ave linguas estra esta categorias. Los es creada de un punto de comensa diferente e ave un intende multe concreta. Los inclui:
* D1. Linguas secreta: (engles: secret languages, stealth languages) Estas es desiniada per intercambia informa secreta. Linguas secreta es rara en eda moderna car sua rol ia es ja prendeda par sifras. Frecuente, lo es difisil ce on deside la linia entre linguas secreta e linguas personal. Linguas-juetas ia es ance usada como linguas secreta en la pasada.
* D2. Linguas ritual e linguas majial: Esta linguas ave un cualia ritual, majial, mistica o liturjial. Denova, lo es difisil ce on deside la linia entre los e linguas personal.
* D3. Linguas-enganas: Estas es linguas construida cual finje ce los es linguas natural, con intende de engana. Sua nom engles es hoaxlangs. En efeto, los es cuasi sempre linguas personal en desembla.
* D4. Linguas construida per otra usas: Los inclui, per esemplo, linguas desiniada per comunica con animales, linguas per funsionas educal, etc.
==== E. Linguas reconstruida ====
Esta categoria inclui tota reconstruidas de linguas, cual nos crede ce los ia esiste como linguas natural, ma sua intera o partes es ja sustituida par linguas plu tarda. On ave un clar distingui entre la lingua orijinal e la reconstruida moderna: la reconstruida ave cosas cual no es developada en modo natural, e sola alga de sua partes es eritada de la lingua orijinal. Per evita confusa parlada, nos recomenda ce esta categoria sola inclui linguas nomida "indoeuropean reconstruida" "latina poplal reconstruida" e tal cosas. La razona per no clasi esta linguas a en la Categoria F es ce los es creada sola per siensa, e de prinsipe, los ave tota no intende de comunica interpersonal.
==== F. Projetas de reformi per linguas natural ====
Esta categoria sasia apena la defini de linguas construida. Los inclui reformis de spele e/o sistem de scrive, atentas de crea un lingua prescriveda nova cual es fundida sur un dialetica de linguas esistente o estinguida, atentas de sustitui parolas internasional con parolas nativa, etc. No como linguas aidante internasional, la creores de esta projetas usual espeta ce sua creas pote prende la rol de linguas natural (o cambia los, a la min) e es usada par parlores nativa. Sola la partes cambiada es en la conseta de lingua construida; la otra partes permane, comprendable, como lingua natural.
* F1. Projetas de moderni per linguas estinguida
* F2. Ajunta/cambia a la vocabulo de linguas natural
* F3. Reformis de spele e ortografia nova per linguas natural
* F4. Normis de dialetos o grupos de dialeto
La sucategoria ultima, a alga grado, recomensa la sicle par causa ce lo pote fusa se perfeta con la linguas aidante zonal. An con tota, la difere no es tan grande entre un "normi de un grupo de linguas prosima relatada" e un "lingua incluinte de un grupo de linguas prosima relatada", car la difere entre linguas e dialetos no es fisada en cualce modo.
===== CLASI PAR ORIJINA DE DOCUMENTOS =====
Un criterio importante e comun usada per sudivide linguas construida es la demanda: sur cual orijina de documentos la lingua es fundida? Esta ave aprosima un resulta de la divide entre linguas apriori e linguas aposteriori, definida como:
* Linguas apriori es linguas de cual vocabulo e gramatica es xef creada con la serebro propre de la creor, egal usa sua imajina o usa un program de acasi (automata o nonautomata);
* Linguas aposteriori es linguas xef fundida sur documentos preesistente de un o plu linguas natural.
La plu de linguas construida ave ambos elementos, alora on pote pone un lingua a cualce loca en la spetro entre apriori e aposteriori. Si no elemento domina clar la otra, nos usa la categoria tre: linguas miscada.
Linguas derivada de un lingua apriori preesistente es un otra caso dutable. On pote teorial clasi los a en cualce categoria. Cada elejable es justable. Personal, me pensa ce clasi tal linguas a en la mesma categoria de la lingua orijinal es la elejable la plu bon. Donce, me ta dise ce quenya par Tolkien e linguas derivada de lo es "linguas naturin apriori". Esta es justa par un otra causa, ce alga creores de linguas construida (incluinte Tolkien mesma) no limita se a un lingua, ma crea familias de lingua intera a veses. Considerante ce esta aveni sola en caso de linguas naturin, nos pote distingui la linguas statical e linguas diacrona.
==== I. Linguas aposteriori ====
=== I-1. Linguas fundida sur un lingua (natural) esistente ===
Prima, lo es importante ce nos spesifa la lingua orijinal. La modo de sudivide asi es pur pratical e donce no pote trata tota cosas:
- Latina
- Franses
- Espaniol
- Otra lingua romanica
- Engles
- Deutx
- Otra lingua germanica
- Otra lingua indoeuropean
- Lingua nonindoeuropean
Estra la orijina, la modo de la lingua construida deriva de la lingua natural es ance importante. Nos pote distingui los par como los cambia la orijina:
* a) simpli la gramatica; la plu de la vocabulo permane
* b) simpli la vocabulo par elimina parolas (engles: subset language)
* c) sustitui la vocabulo preesistente e/o ajunta vocabulo nova (engles: superset language)
* d) contorse la lingua orijinal, per esemplo inversa o ajunta partes de parolas en un lingua-jueta
* e) evolui natural (ipotese la forma futur de la lingua)
* f) crea dialeto imajinal
* g) normi sur la funda de alga dialetos prosima relatada
* h) reformi la spele e cambia ortografia
=== I-2. Linguas fundida sur un familia de lingua ===
Denova, lo es importante ce nos spesifa la lingua orijinal. Aora nos pote aplica la modo normal de linguistica per divide familias de lingua, ma esta va sola complica cosas nonesesada. En pratica, la sudivide seguente pote probable sufisi:
- Linguas romanica
- Linguas germanica
- Linguas baltica e slavica
- Otra linguas indoeuropean
- Linguas nonindoeuropean
E lo es lojical ce nos spesifa la relata entre la lingua construida e la familia de lingua fondal. Nos distingui:
* a) linguas comprometente cual intende es comprendable par parlores de du o plu linguas relatada
* b) membros imajinal de un familia de lingua preesistente
* c) protolinguas reconstruida
=== I-3. Linguas fundida sur alga familias de lingua ===
Spesifa la funda de esta linguas es sin sinifia. An tal, nos pote distingui los par:
- Linguas mundal, cual es desiniada per ateni neutria otima par asorbe elementos de multe linguas diferente
- Linguas european, cual fa la mesma cosa, ma lo sola asorbe elementos de linguas european (on ta refere a los con un nom alga degradante: "euroclone")
- Crusa entre du o plu linguas eterojen
- Pijines e creoles construida
La mesma sucategorias usada en I-2 es ance aplicable asi (estra la sucategoria ultima, evidente):
* a) linguas comprometente cual intende es comprendable par parlores de du o plu linguas relatada
* b) membros imajinal de un familia de lingua preesistente
=== I-4. Linguas fundida sur un o plu linguas construida aposteriori ===
An si esperanto mesma es xef fundida sur linguas romanica e resultante, linguas fundida sur esperanto es fundida sur linguas romanica nondireta, lo es ancora lojical ce nos clasi la projetas de reformi de un lingua construida. Donce nos distingui linguas cual es fundida sur:
- Esperanto
- Un otra lingua aposteriori
- Alga linguas aposteriori
La modo cual la lingua deriva de la lingua(s) orijinal no es esensal en esta caso, alora, nos pote omete la sudivides plu. Si desirada, on pote aplica la mesma sucategorias en I-1 a asi.
==== II. Linguas apriori e miscada ====
Estas es linguas de cual documentos no es prendeda de linguas esistente. No pote distingui alga sucategorias asi ance:
=== II-1. Linguas miscada apriori/aposteriori ===
=== II-2. Linguas apriori naturin ===
* a) linguas apriori statical
* b) linguas apriori diacrona
=== II-3. Linguas categorial o linguas tasonomial ===
De esta, la vocabulo es formida par metodos scemal: parolas de la mesma categoria sintatical ave cualias comun cual pote distingui los de otra parolas. Tal linguas es frecuente nomida "linguas filosofial", ma per dise esata los es mera un parte de esta grupo.
=== II-4. Linguas acaso ===
Un lingua acaso ave un vocabulo jenerada par un prosede de acasi, poi la creor eleje cual parolas es desirable.
=== II-5. Projetas de reformi de linguas apriori o miscada preesistente ===
=== II-6. Otra linguas apriori ===
==== III. Linguas nonparlable ====
La categorias I e II conteni linguas cual on pote pronunsia e scrive. On ave un otra categoria separada per linguas cual on no pote pronunsia. Usual, esta linguas es clasida a en la linguas apriori, e esta es coreta a multe veses en pratica, ma nos no debe iniora la linguas completa fundida sur linguas de sinia (natural) preesistente. Lojical, los no parteni a la categoria de linguas apriori. La distingui entre apriori e aposteriori es multe min sinifiosa, en efeto, ca la distingui entre linguas parlable e nonparlable, e donce los es multe plu pratical ce nos pone la tarda en la grupo tre separada. Par causa ce la cuantia de linguas nonparlable es vera peti, la modo de sudivide seguente es sufisinte:
* III-1. Linguas de vide (pasigrafias)
* III-2. Linguas de sinia (pasimolojias)
* III-3. Linguas de numero
* III-4. Linguas de musica
* III-5. Otra linguas nonparlable
===== CLASI PAR COMPLETIA =====
De prinsipe, esta criterio es min importante ca la categorias ja notada. Lo sinifia poca cosas sur la lingua mesma, an pos tota, e lo mera furni informa sur sua usosa. Ma ancora, nos no ave razona per esclui lo:
| ++ | La lingua es total funsional con un vocabulo estendosa e un gramatica completa. Lo es posible ce on pote tradui cualce testo en esta lingua sin problem. |
| + | La lingua es multe funsional con un vocabulo estendosa e un gramatica plu o min completa. On pote tradui tradui la plu de testos en esta lingua sin problem. |
| ± | La lingua es partal funsional. Vocabulo e/o gramatica es en un estende limitada, alora on sola tradui testos multe simple en esta lingua. |
| -- | La lingua es un obra de scetx con un vocabulo peti e/o un gramatica noncompleta. On ave cisa alga testos corta, ma la posible de tradui frases en esta lingua es cuasi nonesiste. |
| -- -- | La lingua es un obra imajinal e conteni sola alga parolas, nomes e/o frases. Poca o no informa sur sua gramatica es otenable, donce lo es nonrealable ce on tradui un testo esistente en esta lingua. |
Me evita nota numeros asi, intendente. Serta, on pote dise ce un lingua de categoria "++" debe conteni a la min 10 000 parolas, categoria "+" debe conteni 2 500 - 10 000, "±" debe conteni 1 000 - 2 500, "--" debe conteni 250 - 1 000, e "-- --" ave min ca 250. Ideas simil es ance ja proposada per gramatica, per dise un lingua de categoria X debe ave Y pajes en sua gramatica de consulta. Ma tal metodos es noncoreta cuando nos trata linguas. On pote fasil trova un lingua aidante internasional cual ave un gramatica tan simple ce on pote primi lo compata e completa sur un paper A4. A la otra lado, on pote fasil pleni sento pajes con conjugas de verbos nonormal, ma si la autor fali nota ce egal si on debe pone ajetivos ante o pos un verbo, alora esta gramatica es min completa ca la lingua aidante internasional presedente. La mesma es aplicable a vocabulo: on ave linguas cual intende limita sua vocabulo (la linguas oligosintesal). Per esemplo, basic english es fundida sur 850 parolas engles; toki pona ave min ca 125 parolas. Lo es un eleje de desinia ce esta linguas ave vocabulo peti, donce lo no es justable ce on regarda los como "linguas noncompleta".
===== APLICA =====
Usa la tre categorias a ante, nos pote fasil numeri cada lingua en un forma como esta: [CATEGORIA INTENDE] ; [CATEGORIA ORIJINA] ; [CATEGORIA COMPLETIA]. Per esemplo, esperanto es un lingua aidante internasional (A) per usa global (A3) de tipo scemal (B); lo es A3b. En ajunta, lo es un lingua aposteriori (I) fundida sur alga familias de lingua (I-3), ma lo conteni soma linguas european (I-3.2) e es un lingua comprometente (I-3.2 a). Esta lingua es asoluta total funsional (++). Donce la codigo per esperanto es:
A3b ; I-3.2a ; ++
Si un lingua ave alga intendes simultan e no intende es clar plu importante ca la otras, on pote clasi lo a en categorias multiple. Per esemplo, láadan es un lingua filosofial (B1) e un parte de naras siensal (C1a) a la mesma tempo. Lo es nonacaso, noncategorial e apriori (II-2) cual no parteni a familia de lingua plu grande (II-2A), e sua vocabulo es multe estendosa prima. Donce la codigo per láadan es:
B1/C1a ; II-2a ; +
===== ESEMPLOS =====
| Afrihili [K.A. Kumi Attobrah] | A2a ;I-2.5a |
| Basic English [C.K. Ogden] | A3a/D4 ; I-1.5b ; ++ |
| Brithenig [A. Smith] | C2 ; I-2.1b |
| Esperanto [L.L. Zamenhof] | A3b ; I-3.2; ++ |
| Europanto [D. Marani] | A2a ; I-3.2 |
| Ido [L. de Beaufront] | A3b ; I-4.1 ; ++ |
| Interlingua [IALA] | A3a ; I-2.1a ; ++ |
| Islansce alta (Háfrónska) [J. Braekmans] | F2 ; I-1.7c |
| Klingon [M. Okrand] | C1b ; II-2a ; ++ |
| Láadan [S. Haden Elgin] | B1/C1a ; II-2a ; + |
| Latina poplal reconstruida | E ; I-2.1c |
| Latino Sine Flexione [G. Peano] | A3a ; I-1.1a ; ++ |
| Lingua Franca Nova [C.G. Boeree] | A1a ; I-2.1a ; ++ |
| Lingua Ignota [Hildegard von Bingen] | D2 ; I-1.1c |
| Liva [C. Gnioli] | B2 ; II-6 |
| Lojban [LLG] | B2 ; II-1 ; ++ |
| Minbari | C1b ; II-2a ; -- |
| Nadsat [A. Burgess] | C1a ; I-1.5c |
| Na'vi [P. Frommer] | C1b ; II-2a ; - |
| Pig Latin | C6/D1 ; I-1.5d |
| Prusen nova | F1 ; I-1.8c |
| Quenya [J.R.R. Tolkien] | C1a ; II-2b ; + |
| Ro [E.P. Foster] | B1 ; II-3 |
| Romansch (Grischun) [H. Schmid] | F4 ; I-1.4g ; ++ |
| Siberian [J. Zolotarjov] | D3/F4 ; I-1.8g ; ++ |
| Slovianski | A1a ; I-2.3a ; + |
| Slovio [M. Hucko] | A1b ; I-2.3a ; ++ |
| Solresol [F. Sudre] | B1 ; III-4 |
| Sona [K. Searight] | A3a ; I-3.1 |
| Syldavian [Hergé] | C1b ; I-2.2b ; - |
| Talossan [R. Ben Madison] | C3 ; I-2.1b ; ++ |
| Toki Pona [S.E. Kisa] | B1 ; II-1 ; ++ |
| Verdurian [M. Rosenfelder] | C1d ; II-2b ; + |
| Volapük [R. Schleyer] | A3b ; II-1 ; ++ |
| Vozgisch [J. van Steenbergen] | C2 ; I-2.3b ; - |
| Yerkish [E. von Glasersfeld] | D4 ; III-1 |
@T Colie de Perla
@L leteratur/colie_de_perla
@A Myaleee
====== Colie de Perla ======
Esta es un de la naras diversa de la Notes arabi, traduida par Myaleee.
La califa ses (renor islamiste) en linia de dinastia abasid ia es al Mutaueccil. Sua neto la califa al Mustasid ia abita en Bagdad en palasio estravagante. La renor joven ia abitua de viaja tra sua rena per oserva sua popla e oia la voses cuieta de la debiles.
A un ves el ia prende sua vezir e alga gardores e ia ariva a un fruteria en la campania. La proprior Abu Hasan no ia reconose el ma esclama: 'O invitadas gloriosa! Bonveni grande a tota vos! O Amis bondiseda, per favore entra!' La califa e sua companiores ia senta en salon larga e lusosa furnida. En el ia es cuxines brodeda de seda, tapetas persian,un cortina grande arjentin. La invitadas ia bevi e ia come de la plu deletante en la site de Bagdad. Los oia musica dulse. La ospitor vea dise 'Mea sposa es lutiste bon e ave talento per canta depos sua jovenia!'
Subita La Califa al Mustasid sta de sua seja e cria furiosa: 'Tu furor vil! Me es la califa al Mustasid la neto de la califa al Mutaueccil la Grande! Perce tu ia fura la mobilas de la palasio de mea avo? Regarda desinias de sua vinsedas coseda en cada cuxin, tapeta e vaso arjentin! Me ta ordina talia tua manos!'
Abu Hasan prea per compatia e per permete esplica la orijin de mobilas. La califa pare como scorpion atacante sua vitima e parla xiliante: 'Allah(dio) ta maldise tu! Parla pronto!'
Abu Hasan dise tremante: 'O mea Senior de cor compatosa! Me ja erita de mea padre un joaleria profitosa en Bagdad. La califa al Mutaueccil ia abita en un palasio grande, cual ave salas per sua arem de sposas e sclavos mas e fema. El ia es tro rica e pote compra la plu bon de los en mercato.
A un matina, ia veni un fia bela con fas velida a mea boteca e ia demanda la preso de un brasaleta. El ia encanta me per sua vose dulse e sua oios negra. Sua labios ia es vidable tra la velo como un rosa roja plen de graniza blanca! El ia dise:' Vende a me esta brasaleta'. Me ia murmure ebrida: 'Prende lo como donada de un amor adorante!'
En la dia seguente, la bela ia reveni e ia punta a la perlas. Me dise a el de prende los sin costa. Cuando el ia inclina, sua velo ia cade e me pote inonda en la ondos de sua belia! Pos cuando la fia ia vade, me clui la boteca e segue el asta la porton de un palasio grande. A sua dorso, me trova un buco a supra de mur. Me ia trepa par la mur a esta fenetra peti. Corajosa e sin teme de mori, me entra la sala! Me senti un servor joven saisi forte mea mano.
El dise: 'Serta tu no es ma Abu Hasan, la joalor!'
Me dise: ' Si, vera! Me ia segue la bela a asi e regretable no pote reconose el entre la arem e sclavos de la califa!'
La fio peti dise:' El es Colie de Perla, la lutiste e cantor de la califa. Vera sempre, el refere a tua nom con amosia profonde! Tu risca tua vive aora, car si alga gardor itiopian trova tu, tua testa ta es taliada pronto! Cada sera la califa turi la salas de sua arem per plase par la fases adorable de fias.'
Me demanda jelosa: 'Esce el amira Colie de Perla tan multe ce los?'
La servor dise: 'La califa ja perde sua mente e sua cor per un fia nova clamada Dulsia de Curdistan. Me va gida tu a la sala de tua amada, pos cuando tu desembla como un gardor de la palasio.'
Me pasa tra sento de portes e tra un scalera tan longa ce el pare estende a eternia!! Final, me trova la sala de mea amor. Me entra e vide un fia de ci belia brilia como jasmin. El no porta velo e mea joia es como el de un perdeda en deserto ci trova un rieta fria. El salta per abrasa mea col, e cria felis: 'Abu Hasan! Mea lus de oio! Mea bateta de cor!'
Me teni sua mano e dise: 'Nos ta evade a via distante de Bagdad. Tu va sposi me e besa me e canta per me con tua vose ebrinte! Tu va es no plu sclavo ma un fem tan libre ce un servo en deserto! '
Subita, nos oia sona de la califa paseante asta la porte! Fretante, Colie de Perla asconde me en un caxa longa covreda par tela velutin e abri la porte. Me escuta el esclama: 'O Senior! Ta Allah bondise Tu, e dona sonias felis a Tu, esta note e cada note!'
Alora me oia al Mutauaccil entra la sala e senta sur la caxa longa, cual ja asconde me! El suspira e parla triste: 'Colie de Perla, tu ja sabe ce me va sposi la fia la plu bela, Dulsia de Curdistan. Me sufri de maladia de ama. Me sofoca de ansia e ave doles en mea peto. Me vezir avisa ce me ta recovre sola par oia un cantada de ama!'
Colie de Perla toca la luto e comensa canta par sua vose encantosa:
Me sore, divina tu como
Me sufri per me adorada?
O perce Allah ta felisi
Un fem con un om?
La plu joios de sposa nova!
Me' amoria es sin egal!
E tan grande om el es!
Ci sta como mur rijida e
Alta contra doles!
Ci estingui focos de tristia
Per su' acuas fria!
Me ama renovi como gotas de mar!
Cuando Colie de Perla ia fini, larmas brilia ja a la barba de al Mutaueccil ci dise emosiosa: ' O mea cantor cara! Per tu canta bela, demanda cualce cosa e me reali sin esita! 'El dise preante: "O Califa gloriosa! Pardona me si me desira tro! Me ta vole me libria e tota la furnidas de esta sala". La Califa dise: 'Aseta bondises de Allah e de me! Es de aora tal libre ce la pijon en sielo blu!'
Me ia senti panica cuando du gardores itiopian enorme leva la caxa en cual me reposa. Varios sclavos porta fontetas orin, lampas ornada, un cortina grande, cuxines lusos, e totas bela desiniada e decorada. Me senti secuteda durante ce on tansporta la mobila. Me e Colie de Perla ariva a estra de la site a note. Me salta de mea asconde pronto e entra secur en mea casa. A lus prima, Colie de Perla veni a me boteca con sua mobila e la cortina arjentin grande cual tu vide asi. Alora el e me vende ja tota nos joalas e move casa a estra de Bagdad per vive pasosa en esta fruteria.'
Cuando Abu Hasan ja fini, la califa al Mustasid surie e bata sua manos plaseda multe. El loda Abu Hasan per fida de sua sposa nova Colie de Perla. El esclama: 'Dulsia de Curdistan vera ia es mea ava adorada! Me desira a tu e tua sposa la vive la plu fortunosa.'
@T Colinas como elefantes blanca
@L leteratur/colinas_como_elefantes_blanca
@A Hills Like White Elephants, Simon Davies, Daniel Alegrett
====== Colinas como elefantes blanca ======
Hills Like White Elephants es un nara par vp>Ernest Hemingway, scriveda en 1927. Esta tradui es par Simon Davies, reprendente alga espresas de un tradui en elefen vea par Daniel Alegrett en 1999.
La colinas a la otra lado de la vale de la Ebro es longa e blanca. A esta lado on ave no ombra e no arbores, e la stasion sta entre du linias de reles su la sol. Prosima a la lado de la stasion, on ave la ombra tepida de la construida e un cortina, fada de cadenas de granes de bambu, pendente en la porte abrida de la beveria, per preveni moscas. La american e sua xica acompaniante senta a un table en la ombra, estra la construida. Lo es multe calda, e la tren rapida de Barselona va veni pos cuatrodes minutos. La tren reposa a esta comuteria per du minutos, e parti a Madrid.
"Cual nos ta bevi?" la xica demanda. El ia retira se xapo e pone lo sur la table.
"Lo es alga calda," la om dise.
"Ta ce nos bevi bir."
"Dos cervezas," la om dise a la cortina.
"Grandes?" un fem demanda de la porte.
"Si, du grandes."
La fem porta du vitros de bir e du paragotas de feltro. El pone la paragotas de feltro e la vitros de bir sur la table e regarda la om e la xica. La xica regarda la linia de colinas distante. Los es blanca su la sol, e la campania es brun e seca.
"Los pare como elefantes blanca," el dise.
"Me ia vide nunca un," la om bevi se bir.
"No, lo ta es nonprobable."
"Ma es posible," la om dise. "An si tu dise ce lo es nonprobable, acel no es un demostra."
La xica regarda la cortina de granes. "On ia pinti un cosa sur lo," el dise. "Cual lo dise?"
"Anís del Toro. Lo es un bevida."
"Nos pote proba lo?"
La om clama "Escuta" tra la cortina. La fem veni de la beveria.
"Cuatro reales."
"Nos desira du Anís del Toro."
"Con acua?"
"Tu desira lo con acua?"
"Me no sabe," la xica dise. "Lo es bon con acua?"
"Lo no es mal."
"Vos desira los con acua?" la fem demanda.
"Si, con acua."
"Lo ave la sabor de liciris," la xica dise e pone la vitro sur la table.
"Como tota cosas."
"Si," la xica dise. "Tota cosas ave la sabor de liciris. Spesial, tota cosas cual on ia espeta tra multe tempo, como asinto."
"O, sesa."
"Tu ia comensa," la xica dise. "Me ia es divertida. Me ia es pasante un tempo bela."
"Bon, ta ce nos atenta pasa un tempo bela."
"Oce. Me ia atenta ja. Me ia dise ce la montanias pare como elefantes blanca. Acel no ia es briliante?"
"Acel ia es briliante."
"Me ia vole proba esta bevida nova. Nos fa sola esta, no? -- regarda cosas e proba bevidas nova?"
"Me suposa."
La xica dirije se regarda a la colinas.
"La colinas es bela," el dise. "Los no pare vera como elefantes blanca. Me ia intende sola la color de se pel tra la arbores."
"Nos ta bevi un otra?"
"Oce."
La venta tepida sofla la cortina de granes contra la table.
"La bir es plasente fresca," la om dise.
"Lo es bela," la xica dise.
"La sirurjia es vera estrema simple, Jig," la om dise. "Lo no es vera an un opera."
La xica regarda la solo sur cual la gamas de la table reposa.
"Me sabe ce lo no ta angusa tu, Jig. Vera, lo no es multe. Lo es sola per permete la aira entra."
La xica dise no cosa.
"Me va vade con tu e me va resta con tu tra la tempo intera. Simple, on permete la aira entra, e tota a pos es completa natural."
"E cual nos va fa a pos?"
"Nos va vade bon a pos. Esata como nos ia vade a ante."
"Perce tu pensa acel?"
"Lo es la sola cosa cual turba nos. Lo es la sola cosa cual ia fa ce nos deveni nonfelis."
La xica regarda la cortina, estende sua mano, e prende du de la cordas de granes.
"E tu pensa ce alora nos va vade bon e es felis."
"Me sabe lo. Tu no nesesa teme. Me ia conose multe persones ci ia fa lo."
"Me ance," la xica dise. "E a pos, tota de los ia es tan felis."
"Bon," la om dise, "si tu no vole, tu no debe. Me no ta obliga tu si tu no ta vole. Ma me sabe ce lo es vera simple."
"E tu vole vera lo?"
"Me pensa ce lo es la eleje la plu bon. Ma me no vole ce tu fa lo si tu no vole vera."
"E si me fa lo, tu va es felis e la cosas va es como en la pasada, e tu va ama me?"
"Me ama aora tu. Tu sabe ce me ama tu."
"Me sabe. Ma si me fa lo, alora lo va es denova bon si me dise ce cosas es como elefantes blanca, e tu va gusta lo?"
"Me va ama lo. Me ama aora lo, ma simple me no pote pensa sur lo. Tu sabe como me vade cuando me es ansiosa."
"Si me fa lo, tu va es nunca ansiosa?"
"Me no va es ansiosa sur acel, car lo es vera simple."
"Donce me va fa lo, car me no importa a me."
"Cual tu vole dise?"
"Me no importa a me."
"Ma tu importa a me."
"O, si. Ma me no importa a me. E me va fa lo, e alora tota va es bela."
"Me no vole ce tu fa lo si tu ave acel senti."
La xica sta e pasea a la fini de la stasion. A ultra, a la otra lado, on ave campos de gran e arbores longo la rivas de la Ebro. Distante, ultra la rio, on ave montanias. La ombra de un nube move tra la campo de gran, e la xica vide la rio tra la arbores.
"E nos ta pote ave tota de esta," el dise. "E nos ta pote ave tota, e a cada dia nos fa ce esta deveni plu nonposible."
"Cual tu ia dise?"
"Me ia dise ce nos ta pote ave tota."
"Si, nos pote ave tota."
"No, nos no pote."
"Nos pote ave la mundo intera."
"No, nos no pote."
"Nos pote vade a tota locas."
"No, nos no pote. Nos no ave plu lo."
"Nos ave lo."
"No, nos no ave lo. E cuando lo es prendeda a via, on pote nunca ave lo denova."
"Ma lo no es prendeda a via."
"Nos va espeta e vide."
"Reveni a la ombra," la om dise. "Tu debe no ave acel senti."
"Me no ave sentis," la xica dise. "Me ave sola sabes."
"Me no vole ce tu fa cualce cosa cual tu no vole fa..."
"... E cual no es bon per me," la xica dise. "Me sabe. Nos ta pote bevi un otra bir?"
"Oce. Ma tu debe comprende..."
"Me comprende," la fia dise. "Cisa nos ta pote sesa parla, si?"
Los senta se a la table, e la xica dirije sua regarda a la colinas a la lado seca de la vale, e la om regarda la xica e la table.
"Tu debe comprende," la om dise, "ce me no vole ce tu fa lo si tu no vole. Me es plen contente de reali lo, si lo es sinifiosa per tu."
"Lo no es sinifiosa per tu? Nos ta pote maneja."
"Natural lo es sinifiosa. Ma me no desira algun otra ce tu. Me desira nun otra. E me sabe ce lo es vera simple."
"Si, tu sabe ce lo es vera simple."
"Bon, tu dise acel, ma vera, me sabe lo."
"Tu ta fa alga cosa per me, aora?"
"Me ta fa cualce cosa per tu."
"Per favore e favore e favore e favore, tu ta sesa parla?"
La om dise no cosa, ma regarda la bolsones contra la mur de la stasion. Los porta eticetas de tota la oteles do los ia pasa notes.
"Ma me no vole ce tu fa lo," la om dise. "Lo no importa a me."
"Me va xilia," la xica dise.
La fem veni tra la cortinas con du vitros de bir e pone los sur la paragotas de feltro umida. "La tren veni pos sinco minutos," el dise.
"Cual el ia dise?" la xica demanda.
"Ce la tren veni pos sinco minutos."
La xica surie vivosa a la fem, per grasia el.
"Me debe porta la bolsones a la otra lado de la stasion," la om dise. La xica surie a el.
"Oce. Alora reveni, e nos va fini la bir."
La om prende la du bolsones pesosa e porta los sirca la stasion a la otra ferovia. El regarda longo la ferovia, ma el no pote vide la tren. Reveninte, el pasea tra la beveria, do los ci espeta la tren es bevinte. El bevi un Anís a la bar e regarda la persones. Tota de los espeta cuieta la tren. El sorti tra la cortina. La xica senta a la table, e surie a el.
"Tu senti plu bon?" la om demanda.
"Me senti bon," la xica dise. "Me ave no problemes. Me senti bon."
@T Como me ia gusta...
@L leteratur/como_me_ia_gusta
@A Franck Mousset
====== Como me ia gusta... ======
par Franck Mousset
Como me ia gusta la momentos tempora,
Cuando tu ia desinia un surie timida,
Cuando la venta d'estate ia toca tu jena,
Cuando tu regarda ia parla a me plu ca parolas !
@T Conan la aventuror
@L leteratur/conan_la_aventuror
@A Conan the Adventurer, Servor de Metal
====== Conan la aventuror ======
La canta cual introdui cada episodio de la serie animada Conan the Adventurer.
Traduida par Servor de Metal.
Conan! la aventuror!
Conan! geror sin teme!
El es plu forte ca cualce om, sua lejenda estende ultra la tera e la mar!
Conan!
La geror la plu potiosa de sempre!
Sua xerca: desfa la encanta de petra vivente lansada sur sua familia par envia a retro la omes serpentin a en otra dimension e vinse la xef de los, la sorsor cruel Wrath-Amon!
Conan! la aventuror!
Conan! om de coraje!
Con sua spada protejente majiosa, la geror la plu potiosa es el!
Senti la potia!...
Conan!
@T Conselas per usa engles tecnical simplida
@L leteratur/conselas_per_usa_engles_tecnical_simplida
@A Myaleee
====== Conselas per usa engles tecnical simplida ======
traduida par Myaleee
* Restrinje la longia de grupos de nomes a no plu ca 3 parolas!
* Restrinje la longia de frases a no plu ae 20 parolas (per frases de ata) o 25 parolas (per frases descrivente).
* Restrinje paragrafes a no plu ca 6 frases.
* Evita jergo.
* Fa la instruis tan spesifada como posible!
* Usa articles como "un" e "la" cuando nesesada.
* Usa tempos de verbos simple (pasada, presente e futur).
* Usa la vose ativa.
* No usa partisipios e verbos como nomes, fininte en "-ing" como "singing" (estra como parte de un nom tecnical).
* Scrive cada paso como un frase separada.
* Pone prima la esije cuando tu dona un avisa o un averti.
@T Constitui atlantica
@L leteratur/constitui_atlantica
@A vxeov, Simon Davies
====== Constitui atlantica ======
Traduida par vxeov
Linguaje coretida par Simon Davies
Declara juntada par Presidente Roosevelt e Ministro Xef Churchill en 14 agosto 1941:
La declara seguente suscriveda par la Presidente de la Statos Unida e la Ministro Xef de Britan Grande ia es publicida per comunica jornaliste:
La Presidente de la Statos Unida e la Ministro Xef, Sr Churchill ci representa la Governa de Sua Majestia, ia consenta a mar.
Los ia es acompaniada par ofisiores de sua propre Governas, incluinte ofisiores alta de sua Armadas, Marinas e Fortes de Aira.
Tota la problem cual es levada par la Leje de Lua-Presta, sur furni munis per la fortes militar de la Statos Unida e acel paises cual es ativa envolveda en resiste combatosia, es esaminada a un grado plu alta.
Baron Beaverbrook, la Ministro de Furnis de la Governa Brites, ia es presente a esta conferes. El va vade a Washington per discute plu detalias con ofisiores aplicable de la Governa Esuan. Esta conferes va trata ance la problemes sur furni de la Uni Soviet.
La Presidente e la Ministro Xef ia aveni alga conferes ja. Los ia considera la periles a sivilia mundal causada par la politicas de domina militar par concista en cual la Governa Deutx de Hitler e otra governas relatada con lo ia embarca, e los ia clari la pasos cual sua paises fa per manteni sua propre securia a fas de esta periles.
Los ia acorda sur la declara juntada seguente.
----
La Presidente de la STATOS UNIDA DE AMERICA e la Ministro Xef, Sr Churchill, ci representa la GOVERNA DE SUA MAJESTIA en la RENA UNIDA, consentante en junta, razona ce lo es coreta ce on promove alga prinsipes comun de politicas internasional en sua propre paises, sur cual los fundi sua esperas per un futur plu bon per la mundo.
1. Sua paises no ave desira per grandi se, a grado teritorial o otra.
2. Los vole vide no cambias teritorial cual no acorda con la desiras libre espresada de la poplas consernada.
3. Los respeta la direto de tota poplas per eleje la forma de governa su cual on vive, e los vole vide ce la direto de autonomia e autogoverna pote es restorada a poplas ci ia es fortiosa privada de los.
4. Los va atenta, con respeta coreta a sua obligas esistente, estende la benefica par tota nasiones, grande o peti, vinsente o vinseda, de asede egal a la comersia e la materias cru de la mundo cual es nesesada per flori economial.
5. Los desira reali un colabora la plu completa entra tota nasiones en la campo de economia con ojeto de serti, per cadun, normas bonida de labora, avansa economial e securia sosial.
6. Pos la destrui final de la tirania nazi, los espera vide la insitui de un pas cual va dona a tota nasiones la modo de abita secur en sua propre fronteras, e cual va pote garantia ce tota persones en tota paises pote vive sua vives en libria sin teme e nonsufisi.
7. Un tal pas debe capasi tota persones a traversa la mares alta sin impedi.
8. Los crede ce tota de la nasiones de la mundo, par causas pratical e ance spirital, debe abandona la usa de fortia. Car no pas futur pote es mantenida si armas de tera, mar o aira continua es usada par nasiones cual menasa, o ta menasa cisa, atacas ultra sua fronteras -- los crede, ante la fundi de un sistem plu larga e permanente de securia jeneral, ce la desarma de tal nasiones es esensal. Los va aida e coraji ance tota otra medias cual pote desintensi la carga crasente de armas sur poplas cual ama pas.
14 agosto 1941
Suscriveda,
Franklin D. Roosevelt
Winston S. Churchill
@T Coraje
@L leteratur/coraje
@A Micail Naima, Myaleee
====== Coraje ======
par Micail Naima
traduida par Myaleee
La teto de me casa es de fero!
La mures de me casa es de petra!
O Tempestes! Sofla violente!
O Arbores! Secute sin sesa!
O Nubes! Crese grande, e versa vos pluve!
O Lampo! Colpa con tona e lampo briliante!
Me no teme danjer!
Me lampa debil dona la vide a me oios!
Cuando la oscuria estende tra note longa,
E la sol desapare e la dia mori,
O Stelas! asconde vos!
O Luna! oscuri tu lus!
Me lampa debil dona la vide a me oios!
Me cor es fortres contra cada dole!
Turbas vil! Ataca me a matina e sera!
Anoias mal! invade me peto!
Desastres sin numero! cade a me!
Me cor es fortres contra cada dole!
Fortuna es me ami sinsera!
O Enemis! ensende vos flama a me cor!
O Moria! Fa cavetas sirca me casa!
Me spirito no es temente!
Fortuna es me ami sinsera!
@T Crac!
@L leteratur/crac
@A Guido Crufio
====== Crac! ======
par Guido Crufio
Me pensa e crede ce me es como un banda elastica cauxin grande
Sempre multe persones e cosas en mea vive tira me e me estende
E cuando los tira me e tira me plu e plu los trova ce me tende
Crese longa e longa ma los no vide la periles los no atende
E alora me magri e magri plu e plu e me cuasi fende
Si, los tira me e tira me a multe multe distante
Ancora alora los tira me e tira me bastante
Los tira me e tira me denova constante
Pare ce la tirante cuasi es abituante
Tira me tro multe e vos va trova
Ce me va rompe con un crac
An nunca es usosa denova
Sesa tira me tro
No, no, no!
Crac!
@T Credes xef de Epicuro
@L leteratur/credes_xef_de_epicuro
@A Wilko Dijkhuis
====== Credes xef de Epicuro ======
Epicuro, interpreteda e rescriveda par Wilko Dijkhuis.
===== 1 (la dios) =====
La dios es felis e non-ferable.
Los no nesesa la amis o la loda.
Los no es anxia de enemis o blasfema.
La dios es la movores non-moveda;
Los es non-moveda par blasfema o loda.
Los es non-moveda par enemis o amis.
La dios es felis e non-ferable.
La omes no pote disturba o plase la spirito de dios.
La omes no pote feri o plase la corpo de dios.
Donce:
la dios ignora la omes,
como, los ignora tota.
Donce:
La dios es perfeta.
Los es felis e non-ferable.
Los no pote es turbada, e
los no causa la turba.
Sola la non-perfectos causa la turba.
Donce:
La dios, ce nos no debe temer.
----
Nota 1.
Epicuro no ia es un ateiste. Epicuro no ia dise, ce la dios no esiste.
El ia dise, ce la dios ignora-completa la omes, e la omes pote ignora-completa la dios.
A no tempo, la dios va feri-o-aida la omes.
Nota 2.
La dios non-turbada ia es un model-de-rol importante per Epicurus.
Epicuro ia vole eser, como la dios - felis e non-turbada de tota -.
===== 2 (la moria) =====
La moria no pote tocar nos.
La moria no es asi
si
nos es asi,
e,
nos no es asi
si
nos corpo e spirito es des-composada.
Donce
A no tempo, nos va encontra la moria.
Donce:
La moria nos no pote tocar.
La moria no es asi cuando nos es asi, e nos no es asi cuando la moria es asi.
Donce:
La moria, ce nos no debe eser anxia.
----
Nota 1.
Pos la moria, nos spirito retorna a loca do el ia es ante nos nase.
Eser anxia de moria, es como eser anxia de no eser nase.
Nota 2.
Como Democritoo, Epicuro dise: tota es fada de atomes.
Donce, la corpo, la spirito, e mesma la dios, es fada de atomes.
La moria es la des-composada de un sistem de atomes en atomes non-relate.
Cuando la corpo des-composa, la spirito des-composa ance.
La spirito no pote esiste sin la corpo.
Nota 3.
La moria es la des-composada de un sistem de atomes en atomes non-relate.
Esta atomes non-relate va es partes de multe sistemes nova.
Donce (escusa la engles, ma lo es bon como lo es):
Do not stand at my grave and weep;
I am not there. I do not sleep.
I am a thousand winds that blow;
I am diamond glints of snow;
I am the sunlight on ripened grain;
I am the gentle autumn's rain.
When you awaken in the morning's hush;
I am the swift uplifting rush
of quiet birds encircled flight.
I am the soft star that shines at night.
Do not stand at my grave and cry;
I am not there, ...
Nota 4.
Nos es un sistem de partes.
Nos no es la partes, nos es la sistem.
Donce:
We are but whirlpools in a river
of ever-flowing water.
We are not stuff
that abides,
but patterns
that perpetuate themselves.
(Norbert Wiener, Cybernetics and Society, 1954)
Epicuro dise: nos es un melodia.
Mesma cuando la melodia desapare, la notas resta.
(Otras pote va canta la mesma melodia en se modo propre.
La universa canta en modo de Jazz. wd)
===== 4 (la mal) =====
La dole no turba la corpo continuante.
Per ce
la dole la plu dur
es la plu corta, e
la dole, ce nos pote tolera justa,
continua poca dias sola, e
la dole continuante,
nos pote combina con la plase plu forte.
Ance
Nos pote dura fasil tota dole.
La dole dur es corta, e
la dole continuante es jentil.
Donce
La mal, ce nos pote durar cuieta.
----
Nota 1.
Si tota otra fala, un solve ultima es posable.
(En la Impero Roman la suisida ia es un alterna real)
La forsa de non-fortuna es mal.
Ma no cosa forsa nos viver
en non-fortuna.
===== 5 =====
No es posible
de
vive felis
sin:
e, vive saja;
e, vive bon;
e, vive justa.
Ance,
no es posible
de:
o, vive saja;
o, vive bon;
o, vive justa;
sin
vive felis.
Donce,
no person ave:
o, la sajia;
o, la bonia;
o, la justia;
o, la felisia;
sin
ave tota de los
===== 12 =====
Si
el no conose la natura de universa, ma,
el creda la istorias vea e nebla,
donce,
el no conose la difere,
entra la veria, e nonveria, e,
entra la bon, e la mal.
donce,
el no pote gustar la joia,
sin suspeta.
Ance
Si
el no conose la natura de universa, ma,
el creda la istorias supra la dios e la spiritos,
donce,
el no pote gustar la joia,
sin es temer supra la inconosedia.
Donce:
El pote gustar la joia,
sola si,
el conose la natura de universa.
===== 15 (la bon) =====
Nos ave tre jenero de desiras.
La desiras natural e nesesada
como la desira de come, bevi, dormi e amis.
La desiras natural ma non-nesesada
como la desira de come e bevi lusos, seso e ama.
La desiras non-natural e non-nesesada
como la desira de ricia, fama e pote.
Ance
La saja
aseta e reali se desiras nesesada,
e
aseta e reali desiras natural ma non-nesesada
sola cuando los no fa la feri,
e
reconose e evita desiras non-natural.
Ance
Acel, ce es nesesada,
es presenta en abunda
donce
acel nos pote prende fasil.
Los, ci vole la non-natural
no va ave un limita de se desiras
donce
a no tempo los va ave basta.
a no tempo los va es sasiada.
Donce
La bon, ce nos pote prender fasil.
----
Nota 1.
El, ci ave tota ce el desira, es rica.
Donce nos pote deveni rica per sola desira acel, ce es nesesada.
(Esta es la scema-perfeta per deveni rica rapida)
Nota 2:
Compare esta con la dises de Democrito
La cosas nesesada per nos corpo
nos pote prende fasil
sin labora dur o la turbas.
La cosas ce nesesada la labora o la turbas
- e fa dur nos vive -
no es desirada per nos corpo
ma per nos spirito confusa.
e, ance:
El es fortuna
si
el es felis con ricia moderada.
El es non-fortuna
si
el es non-felis con ricia grande.
@T Cual es ama?
@L leteratur/cual_es_ama
@A Chabi
====== Cual es ama? ======
par Chabi
Cual es ama?
Tu demanda me.
E me dise,
regardante tu:
Ama es vide aceles oios
cada dia a matina,
e ce mea cor no pote para
e lo move plu rapida
cuando tua oios regarda.
@T Cual es lumina?
@L leteratur/cual_es_lumina
@A Immanuel Kant
====== Cual es lumina? ======
Un responde a la demanda "cual es lumina?", par Immanuel Kant en 1784.
Lumina es la emerji de umania de sua nonmaturia auto-creada.
Nonmaturia es la noncapasia de usa sua comprende sin gida de otras.
Esta nonmaturia es auto-creada, cuando la noncapasia es causada
* no par la manca de comprende,
* ma par la manca de vole o coraje.
Sapere Aude! Osa pensa!
Ta ce tu ave la coraje per pensa par tu mesma.
Acel es la parola de lumina.
----
Manca de vole e manca de coraje lia multe umanas en nonmaturia.
Longa pos la ora de sua maturia, esta omes resta dependente de gida de otras.
Joiosa e felis, los aseta esta gida.
Car vive en nonmaturia es fasil.
* Me no debe sabe, si me ave un libro.
* Me no debe comprende la bon, si me ave un pastor.
* Me no debe colie mea comeda, si me ave un dotor medical.
La padrones bonvolente garda bon la nonmaturia de umanas.
Per la padron la maturia es perilosa e difisil
(tro difisil per la umanas, e tro perilosa per se mesma).
Per la padrones la umanas es animales-de-cultiveria.
La padrones parla sur la peril de pensa par se mesma.
Los parla sur la peril de cade a su.
Ma - pos un o du cades - la plu persones ta pote pasea per se mesma.
@T Cuatro saisones
@L leteratur/cuatro_saisones
@A Guido Crufio
====== Cuatro saisones ======
par Guido Crufio
===== Primavera =====
La rio core libre
Insetos vola supra la tera
Flores decora la colinas
Petales de la papavera
Avias manadi a sua nidos
Oveas joven brinca e salta
Ave l'odor de flores dulse
Plantas crese alta
La brotos comensa apare
La clima deveni plu calda
La duxes de pluve fa
La campania esmeralda
La mundo tisa, natur velia
La dia estende en la sera
On ave un espera de vive nova
Aora es la primavera
===== Estate =====
La matinas comensa briliante
La sol arde en la sielo blu
Vive senti tan bon aora
Ta ce lo dura per sempre plu!
La bzzz! de grilos es en l'aira
La mundo pare dormosa
L'ombras crese longa
Asta la mar e la plaia arenosa
Lus sintili sur l'acua
Venta xuxa tra folias abundante
Avias canta sua cantas
Un sona tan osilante
Rie es oiada de l'enfantes
Con sua amis los jua-combate
Los ama la dias longa e calda
Aora es l'estate
===== Autono =====
Notes veni a temprana
La dias deveni plu fria
Subita la ventas deveni ventones
L'estate mera un memoria
Folias osidinte cade a tera
Fante un tapeto natural
Cual craci con cada paso de pede
E formi un vista pitural
La sol brilia plu debil
L'avias vola a sude aora
Animales asconde per inverni
Un dormi mera tempora
Un otra recolie es fada
Natur comensa porta sua arnes
Fuma pleni l'aira
Aora es l'autono-ves
===== Inverno =====
Spinas de jelo pende
Neva covre la paseria
Un venta jelin sofla forte
Stradas como un patineria
Lansa bales de neva
Pone tua gantos e scarfas
Frica la manos rapida
E caldi tua pedes per piafas
Nos rosta e come castanias
A la ximineria a casa
E bevi bevidas calda
En cuando la notes longa pasa
La flamas de braseros arde
Como la focos tisada d'enferno
Veni per caldi la ditos
Aora es l'inverno
@T Dansa de la baletiste
@L leteratur/dansa_de_la_baletiste
@A Chico Buarque, Edu Lobo, Patrick Chevin
====== Dansa de la baletiste ======
par Chico Buarque e Edu Lobo
traduida par Patrick Chevin
Xercante curios
Cadun ave alga feri
Marca de variola o vasin
La baletiste no ave los
E no ave rasca
No fungo no veruca
E ave diarea, ave vermes o ameba
E no manca de manera
No ave los
Xercante curios
Cadun ave ja pioios
O un odor de 'creolina'
Cadun ave un frate con duistrabisme
La baletiste no ave los
No ungia encarnida
E no dente susida
No feri malsanida
No ave los
E nun es esenta
Cada un ave secrete
Cuando velia a la matina
Ave scarlatina
O ave ja febre jala
La baletiste no ave los
E teme de asende
E teme de cadente
Teme de vertije
No ave los
Xercante curios
Cadun ave ja un peca
Pos cuando la misa es finida
Cadun ave un amoreta a ves prima
La baletiste no ave los
Susia pos la orela
E mustax de grosela
Pantaleta poca vea
No ave los
An la relijios
Pote roji si la venta
Leva se roba subita
Regardante curios, cadun ave alga pelos
La baletiste no ave los
Sala sin mobilas
Gotea en se cosina
Problemas de familia
Ci no ave los
Xercante curios
Cadun ave los...
@T Declara de autonomia de la Statos Unida
@L leteratur/declara_de_autonomia_de_la_statos_unida
@A George Boeree
====== Declara de autonomia de la Statos Unida ======
Traduida par George Boeree
En Congresa, 4 Julio, 1776
La declara unida de la des-tre statos unida de America: cuando en la curso de avenis umana, deveni nesesada ceun popla deslia la lias politica cual ia junta los con un otra, e ce los prende, entre la potias de la tera, la state separada e egal cual los merita par la leges de natur e de la Dio de natur, un respeta virtuosa a la opines de umania nesesa ce los ta declara la causas cual move los a la separa.
Nos crede ce esta veras es evidente par se mesma: ce tota persones es creada egal; ce se creor ia dona a los alga diretos nonalienable; ce entre esta diretos es vive, libria, e la xerca de felisia; ce, per securi esta diretos, governas es instuida entre omes, governas cual deriva se potias justa de la acorda de la governada; ce cuando cualce forma de governa deveni destruinte de esta finis, es la direto de la popla ce los altera o aboli lo, e institui un governa nova, construinte se fundas sur tal prinsipes e organiza se potias en tal forma, afin pare a los ce los va resulta la plu probable en se securia e felisia. Cautia, vera, va prescrive ce governas cual ia dura longa no ta debe es cambiada per causas lejera e tempora, car tota esperia ia mostra ce umania es plu disposada a sufre, cuando malias es sufrable, ca coreta se mesma par aboli la formas a cual los ia abitua.
Ma cuando un segue longa de maltratas e saisis, cual xasa sempre la mesma ojeto, mostra un intende per redui los su tirania asoluta, es la se direto, es la se obliga, ce los dejeta tal governa, e ce los furni defendes nova per la se securia. - tal ia es la sufri pasiente de esta colonias; e tal es aora la nesesia cual forsa ce los altera se sistem pasada de governa. La istoria de la re presente de Britan Grande es un istoria de feris e saisas repeteda, tota de cual con la gol direta per la establi de un tirania asoluta supra esta statos. Per demostra esta, lasa fatos es presentada a un mundo franca.
El ia refusa se acorda con leges la plu virtuosa e nesesada per la benefica publica.
El ia proibi ce se governores aproba leges con importa direta e urjente, sin ce los pospone se opera asta cuando se aproba ta es otenida; e cuando los es tal posponeda, el ia descura tota atende a los.
El ia refusa aproba otra leges per la conveni de distritos grande de popla, sin ce acel popla ta sede la direto de representia en la legeria, un direto nonestimable a los, e menasante sola a tiranos.
El ia comanda la asembla de corpos de legeria a loca nonormal, noncomfortosa, e distante de la arciveria de la se arcivos publica, sola per fatiga los a segue con se medios.
El ia desolve repetente la casas de representores, per oposa, con firmia mas, se invades a la diretos de la popla.
El ia refusa per un tempo longa, pos tal desolve, causa ce otras ta es elejeda; donce la potias de legeria, no capas de elimina, ia reveni a la popla desponable per se pratica; en la tempo media, la stato resta esposida a tota la periles de invade de estra, e convulsa de en.
El ia atenta preveni la popli de esta statos; per esta gol, el ia impedi la leges per la naturali de stranjeres; el ia refusa aproba otra leges per coraji migras asi, e ia grandi la restrinjes per prendes nova de paises.
El ia impedi la dirije de justia, par refusa se acorda a leges per la institui de potias de judi.
El ia fa ce judores es dependente sola de se vole, per la periodo de se ofisias e la cuantia e paia de se salarios.
El ia institui un multia de ofisias nova, e ia envia asi xamas de ofisores per mensasa la nos popla e come de se nesesas.
El ia reteni entre nos, en periodos de pas, armadas preparada sin la acorda de la nos legerias.
El ia causa ce la militaria es autonom de e superior a la potias sivil.
El ia conspira con otras per carga nos a un autoria cual es stranjer a la nos constitui, e no reconoseda par la nos leges; e ia dona se acorda a la se atas de legeria finjente.
Per dona la abita de grupos grande de soldatos con armas entre nos.
Per proteje los, par prosedes falsa, de puni per cualce matas cual los ta fa a la abitores de esta statos.
Per talia la nos comersa con tota partes de la mundo.
Per forsa impostas a nos sin la nos acorda.
Per priva nos en multe casos, de la bones de prosedes con juria.
Per transporta nos ultra la mares per prosedes per ofendes finjeda.
Per aboli la sistem libre de leges engles en un provinsia vinsina, en esta modo institui un governa acaso, e grandi la se bordas per crea a un ves un esemplo e un strumento conveninte per introdui la mesma rena asoluta en esta colonias.
Per remove la nos constituis, aboli la nos leges la plu valuada, e altera fundal la formas de la nos governas.
Per interompe la nos legerias, e per declara ce los posese la potia de legi per nos en tota casos, sin eseta.
El ia renunsia governa asi, par declara ce nos es estra se proteje, e par declara gera contra nos.
El ia saca la nos mares, ruina la nos costas, arde la nos vilas, e destrui la vives de la nos popla.
El es, a esta ora, transportante armadas grande de mersenarios stranjer per fini la labores de moria, ruina, e tirania, ja comensada con casos de cruelia e tradi apena egalida par acel en la eda la plu barbarosa, e tota no meritada par un xef de un nasion sivilida.
El ia constrinje la nos sitadanes fratin, caturida sur la mares altas, porta armas contra la se pais, deveni esecutores de la se amis e frates, o los mesma cade par la se manos.
El ia provoca rebelas internal entre nos, e ia atenta trae la abitores de la nos frontera, la savajes indian sin compatia, de cual se regula conoseda de gera es la destrui nondistinguinte de tota edas, sesos, e situas.
En cada grado de esta opresas, nos ia suplica per remedia en parolas la plu umil. La nos suplicas repeteda ia es respondeda sola par feri repeteda. Un prinse de ci se carater es tal indicada par alga ata cual pote defini un tirano, no conveni per es la renor de un popla libre.
E nos no manca en la atende de la nos frates brites ance. Nos ia averti los a alga veses de la atentas par la se legeria per estende un autoria nonmeritada supra nos. Nos ia sujeste ce los recorda la caso de la nos migra e coloni asi. Nos ia apela a la se senti nativa de justia e jenerosia, e nos ia suplica a los, par la lias de la nos relata comun, per nega esta finjes cual ta interompe nonevitable la nos lias e coresponde. Los ance ia es sorda a la vos de justia e de lias de sangue. Nos debe, donce, nesesa sede, cual denunsia la nos separa, e regarda los, como nos regarda la resta de umania, como enemis en gera e amis en pas.
Donce, nos, la representores de la statos unida de America, en congresa jeneral, asemblada, suplica a la judor suprema de la mundo per la virtua de la nos intendes, en la nom e par la autoria de la bon popla de esta colonias, declara e publica seria, ce esta colonias es, e par direto debe, es statos libre e autonom; ce los es remeteda de tota alia a la corona brites, e ce tota lias entre los e la stato de britan grande, es e debe es tota disolveda; e ce, como statos libre e autonom, los ave la potia plen per declara gera, negosia pas, contrata alias, institui comersia, e fa tota otra atas e cosas per cual statos autonom ave la direto. E per la suporta de esta declara, con un depende firma de la proteje de favore divin, nos promete mutua la nos vives, ricias, e onora santa.
(Suscriveda par 56 representores de la 13 colonias.)
@T Declara de diretos umana e sitadan
@L leteratur/declara_de_diretos_umana_e_sitadan
@A Andrew Burns
====== Declara de diretos umana e sitadan ======
traduida par Andrew Burns
ESTRAE
DE LA RESOMA
DE
LA ASEMBLA NASIONAL,
//en la dia 20, 21, 22, 23, 24, 26 de agosto
e la dia prima de otobre 1789.//
CON CE la representores de la popla franses, asemblada en un Asembla nasional, considera la nonsabe, la oblida o la despeta per la diretos umana como la sola causa de la mal fortuna publica e la dejenera de governas, los ia deside proclama, en un declara seria, la diretos umana cual es natural, nonsedable e sacra, afin la presentia constante de esta declara ante tota la membros de la sosia ta remente nonsesante los de sua diretos e sua debes; e afin la capasia de compara instante la atas de la potia de lege e aceles de la potia de esecuta con la ojeto de cada instituida politica ta boni cuanto los es respetada; e afin la solisitas de sitadanes, fundida de aora sur prinsipes simple e nondisputable, ta es sempre ojetida a la manteni de la constitui e la felisia de tota.
Alora, la Asembla nasional reconose e declara, en la presentia e con la suporta de la Esente Suprema, la diretos umana e sitadan cual segue.
Article prima.
Umanas nase e resta libre e con diretos egal. On pote fundi distinguis sosial sola sur la benefica comun.
II.
La ojeto de cada asosia political es la conserva de la diretos umana cual es natural e nonsedable. Esta diretos es la libria, la propria, la securia e la resiste de la opresa.
III.
La prinsipe de tota potias de stato reposa esensal en la nasion. No organiza, e no individua pote eserse cualce autoria cual no veni direta [de la popla].
IV.
La libria sinifia la capasia de fa cualce cosa cual no feri otras: alora, la eserse de diretos natural de cada umana ave no limita estra aceles cual garantia a otra membros de la sosia la usa de sua propre diretos. On pote determina esta limitas sola par lege.
V.
La lege ave la direto de proibi sola acel atas cual feri la sosia. On no pote impedi lo cual la lege no proibi, o forsa cualcun a fa cual lo no comanda.
VI.
La lege es un espresa de la vole jeneral. Tota la sitadanes ave la direto de partisipa, personal o per representores, en sua crea. Lo debe es la mesma per tota, egal si lo proteje o lo puni. Tota la sitadanes, esente egal ante sua oios, debe es egal cualinte per tota la ofisias alta, postos publica e empleas, en acorda con sua capasia, e con no otra distingui estra sua virtuas e sua talentos.
VII.
On no pote acusa, aresta o deteni cualcun estra como la caso es determinada per la lege, e seguente la prosede cual lo prescrive. On debe puni aceles ci solisita, rapidi, esecuta o causa la esecuta de comandas acaso; ma cada sitadan clamada o prendeda en acorda con la lege debe obedi instante: el deveni culpable par resiste.
VIII.
La lege debe institui sola punis cual es asoluta e evidente nesesada e on debe no puni cualcun estra en acorda con un lege creada e publicida ante la crimin, e legal aplicada.
IX.
Cadun es suposada nonculpable asta la proclama de sua culpa, e si on considera ce sua aresta es nesesada, on debe restrinje sever par lege cualce duria nonesesada per securi sua person.
X.
On debe no molesta cualcun par causa de sua opinas, an si relijiosa, tra cuando sua mostras no disturba la ordina publica e fundida par lege.
XI.
La comunica libre de pensadas e opinas es un de la diretos umana la plu valuosa: cada sitadan pote donce parla, scrive e primi libre, ma debe responde per la malusa de esta libria en la casos determinada per lege.
XII.
La garantia de la diretos umana e sitadan nesesa un forte publica: esta forte es donce instituida per la benefica de tota, e no per la usa spesial de aceles a ci lo es confidada.
XIII.
Per la manteni de la forte publica, e per la spende per sua dirije, un imposta comun es esensal. On debe egal asinia lo entre tota la sitadanes, en proportio a sua ricia.
XIV.
Tota la sitadanes ave la direto de descovre, par se mesma o par sua representores, la nesesa per la imposta publica, e de acorda libre con lo, e de determina la cuota, la evalua, la colie el la longia.
XV.
La sosia ave la direto de esije un esplica de cualce ofisior publica per sua dirije.
XVI.
Cualce sosia en cual la garantia de diretos no es sertida, e la separa de potias no es determinada, no ave un Constitui.
XVII.
La propria es un direto nonviolable e sacra, e on no pote priva cualcun de lo estra cuando la nesesa publica, mostrada en acorda con la lege, esije evidente lo, e sola si a ante on ave compensa justa.
Estraeda de la resoma de la Asembla Nasional, en jovedi, la dia prima de octobre 1789.
La Asembla ia deside ce la presidente debe revade a la Re per presenta esta declara de diretos per sua aproba.
Asemblada en acorda con la orijinal.
Suscriveda: MOUNIER, Presidente; la Visconte de Mirabeau, Démeunier, Bureaux de Pusy, la Bispo de Nancy, Faydel, la Abade de Eymar, Secretores.
@T Declara par la Nasiones Unida
@L leteratur/declara_par_la_nasiones_unida
@A vxeov
====== Declara par la Nasiones Unida ======
Traduida par vxeov
LA NASIONES UNIDA BATALIA PER LIBRIA
Un declara juntada par la Statos Unida de America, la Rena Unida de Britan Grande e Er Norde, la Uni de Republicas Sosialiste Soviet, Jonguo, Australia, Beljia, Canada, Costa Rica, Cuba, Txescoslovensco, Republica Dominican, Salvador, Elas, Guatemala, Aiti, Onduras, India, Luxemburg, Nederland, Zeland Nova, Nicaragua, Noria, Panama, Polsca, Sudafrica, Iugoslavia.
La Governas suscrivente a asi,
Avocatinte per un program comun de intendes e prinsipes corpida en la Declara Juntada de la Presidente de la Statos Unida de America e la Ministro Xef de la Rena Unida de Britan Grande e Er Norde, fada en 14 agosto 1941, conoseda como la Constitui atlantica,
Esente convinseda ce un vinse intera sur sua enemis es esensal per defende la vive, autonomia, nondepende e libria de crede, e per conserva diretos umana e e justia en sua propre paises como ance en otra paises, e ce los es aora envolveda en un luta comun contra fortes savaje e violente cual vole concista la mundo, declara:
- Cada Governa promete se mesma ce lo va usa la recursos total de sua, militar o economial, per combate acel membros de la Trata Tripartital e sua aderores contra cual tal governa es en gera.
- Cada Governa promete se mesma ce lo va colabora con la Governas suscrivente a asi e no fa un sesaspara o pas separada con la enemis.
La Declara ja notada pote es adereda par otra nasiones cual furni, o ta furni, aidas material e contribuis a en la luta per vinse sur Hitlerisme.
Fada en Washington, 1 janero, 1942.
@T Declara Universal de Diretos Umana (preambul)
@L leteratur/declara_universal_de_diretos_umana
@A 
====== Declara Universal de Diretos Umana (preambul) ======
La preambul de un documento major adotada par la Nasiones Unida a 10 desembre 1948, presentada asi en nove linguas.
La documento completa es ance disponable en elefen.
===== Elefen =====
Preambul
Considerante ce la reconose de la dinia inerente e de la diretos egal e nonalienable de tota membros de la familia umana es la funda de libria, justia, e pas en la mundo,
Considerante ce la iniora e despeta de diretos umana ia causa atas barbar cual ia ofende la consiensa de umanas, e car on ia proclama la ariva de un mundo, en cual umanas va es beneficada par libria en parla e crede e libria de teme e miseria, como la aspira la plu alta de la popla comun,
Considerante ce lo es esensal ce diretos umana debe es protejeda par la regula de leje, afin no person va es obligada a la medio, como recurso ultima, de rebela contra tirania e opresa,
Considerante ce lo es esensal ce on promove la developa de relatas amin entre nasiones,
Considerante ce la poplas de la Nasiones Unida ia reafirma en la Carta se fida a diretos umana fundal, a la dinia e valua de la person umana, e a la diretos egal de omes e femes, e ia deside promove la progresa sosial e la boni de la cualias de vive en libria plu grande,
Considerante ce la Statos Membros ia promete se a reali, en colabora con la Nasiones Unida, la promove de respeta e oserva universal de diretos umana e librias fundal,
Considerante ce un conseta comun de esta diretos e librias es la plu importante per la reali plen de esta promete --
Donce aora la Asembla Jeneral
Proclama esta Declara Universal de Diretos Umana como un norma comun de ateni per tota poplas e tota nasiones, con la intende ce cada inividua e cada organo sosial, constante teninte esta Declara en mente, va atenta promove la respeta de esta diretos e librias par ensenia e instrui, e par medios progresante, nasional e internasional, securi un reconose e aplica universal e produosa de los, no sola entra la poplas de la Statos Membros mesma ma ance entre la poplas de teritorios su se autoria.
===== Catala =====
===== Espaniol =====
===== Esperanto =====
===== Franses =====
===== Interlingua =====
===== Italian =====
===== Portuges =====
===== Rumanian =====
@T Declara universal de diretos umana
@L leteratur/declara_universal_de_diretos_umana_completa
====== Declara universal de diretos umana ======
=====Preambul=====
Considerante ce la reconose de la dinia inerente e la diretos egal e nonalienable de tota la membros de la familia umana es la funda de libria, justia, e pas en la mundo,
Considerante ce la desconose e la despresa de la diretos umana ia trae atas de barbaria cual ofende la consiensa de umania, e ce la veni de un mundo do la esentes umana va es libre per parla e crea e librida de temia e de miseria, es proclamada como la aspira la plu alta de esentes umana,
Considerante ce lo es esensal ce la diretos umana es protejeda par un sistem de diretos, afin no person es forsada, como recurso ultima, a la rebelia contra tirania e oprimi,
Considerante ce promove la developa de relatas bonvolente entre nasiones es esensal,
Considerante ce, en la carta, la poplas de la Nasiones Unida proclama sua fide en la diretos umana fundal, en la dinia e la valua de la person umana, en la egalia de diretos de omes e de femes, e ce los ia deside promove la progresa sosial e leva la cualia de vive con un libria plu completa,
Considerante ce la statos-membros promete securi, en coopera con la Nasiones Unida, la respeta e la oserva universal per la diretos umana e libria fundal,
Considerante ce un conseta comun de esta diretos e librias es la plu importante per la completa plen de esta promete,
=====La Asemblea Jeneral=====
Proclama esta Declara Universal de Diretos Umana como un ideal comun per tota la poplas e nasiones aspira, afin cada person e cada organo sosial, con esta Declara en mente constante, va promove la respeta de esta diretos e librias per ensenia e instrui, per mesuras progresante, nasional e internasional, e va securi la reconose e aplica universal e produinte, ambos entra la poplas de la statos-membros e entra la teritorios su se autoria legal.
1. Tota umanas es naseda como persones libre e egal en dinia e diretos. Los ave razona e consiensa e debe trata lunlotra con la spirito de fratia.
2. Cadun merita tota diretos e libres descriveda en esta declara, sin distinguis de cualce tipo, como raza, color, seso, lingua, relijio, opinas politica o otra, orijina nasional o sosial, propria, erita, o otra state. Plu, no distingui va es fada par la state political, legal, o internasional de la nasion o teritorio de cual un person parteni, esce lo es autonom, fidusial, nonautogovernante, o su cualce otra limita de autonomia.
3. Cadun ave un direto per vive, libria, e securia de person.
4. Nun va es tenida en sclavia o servoria; sclavia e la comersia de sclavos va es proibida en tota formas.
5. Nun va es torturada o tratada o punida cruel, sin compatia, o degradante.
6. Cadun ave la direto per reconose en tota mundo como un person en la lege.
7. Tota es egal en la lege e merita, sin distingui, proteje egal par la lege. Tota merita proteje contra cualce distingui en viole de esta declara e contra cualce provoca de tal distingui.
8. Tota ave la direto per es remediada efetosa par judores nasional capas per atas cual viole la diretos fundal donada a el par la constitui o par lege.
9. Nun va es acaso cargada par aresta, deteni, o esclui.
10. Cadun merita, con egalia plen, un escuta justa par judores autonom e nonpartisan, per determina sua diretos o obligas e de cualce carga crimin contra el.
11.1 Tota persones cargada con un ofende crimin ave la direto per es suposada nonculpable asta demostrada culpable, seguente lege en un litiga en cual el ia ave tota garantias nesesada per sua defende.
11.2 Nun va es clamada culpable de cualce ofende crimin per cualce ata o omete cual no ia composa un ofende crimin, su lege nasional o internasional, a la ora cuando lo ia es fada. Plu, un puni plu forte no pote es poneda ca un cual ia es aplicable a la ora cuando la ofende crimin ia es fada.
12. Nun va es cargada par interfere caprisal con sua privatia, familia, casa, o corespondes, e no a atacas a sua onor e reputa. Cadun ave la direto per la proteje de la lege contra tal interfere o atacas.
13.1 Cadun ave la direto per libria de move e abitua entre la bordas de cada stato.
13.2 Cadun ave la direto per sorti cualce pais, incluinte sua propre, e per reveni a sua pais.
14.1 Cadun ave la direto per xerca e trova refuja en otra paises.
14.2 Esta direto no pote es demandeda en la casos de prosegues cual veni sinsera de crimines nonpolitical o de atas oposante la intendes e prinsipes de la Nasiones Unida.
15.1 Cadun ave la direto per ave un nasionalia.
15.2 Nun va es caprisal privada de sua nasionalia e no va es refusada la direto per cambia sua nasionalia.
16.1 Omes e femes de un eda matur, sin cualce limita de raza, nasionalia, o relijio, ave la direto per sposi e fundi un familia. Los merita diretos egal per sposi, entre sposi, e a la sesa de sposi.
16.2 Sposi pote es institui sola con la acorda libre e completa de la sposes intendente.
16.3 La familia es la grupo natural e fundal de sosia e merita la proteje par la sosia e la stato.
17.1 Cadun ave la direto per posese propria, e solitar e en asosia con otras.
17.2 Nun va es privada caprisal de sua propria.
18. Cadun ave la direto per libria de pensa, consiensa, e relijio; esta direto inclui la libria per cambia sua relijo o crede, e libria, solitar o en comunia con otras, publica o privata, per mostra sua relijio o crede en instrui, pratica, adora, e rituo.
19. Cadun ave la direto per libria de opina e espresa; esta direto inclui libria per teni opinas sin interfere e per xerca, reseta, e dona informa e ideas tra cualce media e sin regarda per fronteras.
20.1 Cadun ave la direto per libria de asembla e asosia pasosa.
20.2 Nun pote es compulsa parteni a un asosia.
21.1 Cadun ave la direto per parteni en la governa de sua pais, direta o tra representores libre elejeda.
21.2 Cadun ave la direto per asede egal a la servi publica en sua pais.
21.3 La vole de la popla es la funda de la autoria de governa; esta vole va es espreseda en elejes periodal e autentica, cual va aveni par la capasia universal e egalia de vota e va aveni en la forma de vota secreta o par modas egal de vota libre.
22. Cadun, como un membro de sosia, ave la direto per securia sosial, e merita la reali, tra efortas nasional e coopera internasional e en acorda con la organiza e recursos de cada stato, de la diretos sosial e cultural esensal per sua dinia e la developa libre de sua personalia.
23.1 Cadun ave la direto per labora, per eleje libre de emplea, per situas de labora justa e favorable, e per proteje contra nonemplea.
23.2 Cadun, sin cualce distingui, ave la direto per recompensa egal per labora egal.
23.3 Cadun ci labora ave la direto per recompensa justa e favorable, garantiante per se mesma e sua famlia un esiste meritada de dinia umana, e completinte, si nesesada, par otra modos de proteje sosial.
23.4 Cadun ave la direto per forma e junta sindicatos per la proteje de sua intereses.
24. Cadun ave la direto per recrea e osio, incluinte limitas justa de oras de labora, e vacanses periodal con paia.
25.1 Cadun merita un cualia de vive sufisinte per la sania e bonstate de se mesma e de sua familia, incluinte comedas, vestes, casa, aida medica, servis sosial nesesada, e la direto per securia en nonemplea, maladia, descapasia, viduia, veia, o otra asentia de modo de sustia en situas estra sua controla.
25.2 Madria e enfantia merita cura e aida spesial. Tota enfantes, naseda en o estra un situa de sposi, va joia la mesma proteje sosial.
26.1 Cadun ave la direto per educa. Educa va es libre, a min en la pasos comensante e scola prima. Scola prima va es compulsada. Educa tecnical e profesal va es otenable jeneral e educa alta va es otenable a tota de los ci es capas de lo.
26.2 Educa va es dirijeda a la developa completa de la personalia umana e a la forti de respeta per diretos umana e libria fundal. Lo va promove comprende, tolera, e amia entre tota nasiones, grupos razal e relijial, e va promove la ativia de la Nasiones Unida per la manteni de pas.
26.3 Jenitores ave un direto prima de eleje la tipo de educa cual sua enfantes va reseta.
27.1 Cadun ave la direto per partisipa libre en la vive cultural de la comunia, per joia la artes, e per comparti en la avansas de siensa e sua beneficas.
27.2 Cadun ave la direto per proteje de la intereses moral e material cual resulta de cualce produida de siensa, leteratur, o arte de cual el es la autor.
28. Cadun merita un ordina sosial e internasional en cual la diretos e librias provideda par esta declara pote es plen realida.
29.1 Cadun ave obliga a la comunia en cual sua developa plen e libre de sua personalia es sola posible.
29.2 En la partisipa en sua diretos e librias, cadun va es cargada sola par tal limitas cual es determinada par lege per la intende per securi la reconose e respeta meritada de la diretos e librias de otras, e per sasia la esijes justa per moralia, ordina publica, e la bon state jeneral en un sosia democrata.
29.3 On no es permetada usa esta diretos e librias en cualce caso contra la intende e prinsipes de la Nasiones Unida.
30. No cosa en esta declara pote es interpretada como sujestente per cualce stato, grupo o person cualce direto per partisipa en cualce ata o ativia dirijeda a la destrui de cualce de la diretos e librias furnida en esta declara.
Asembla completa 183
10 desembre 1948
@T Deletosa
@L leteratur/deletosa
@A Guido Crufio
====== Deletosa ======
par Guido Crufio
Cada crabe difere
Un de l'otra a un grado
An si los aspeta la mesma
Corente rapida a la lado
Me vera gusta cadun
Los ave sua carater propre
Cadun ave sentis
E pote es felis, coler o triste
Ma mea crabe favoreda
Es la spesie cual sabori bon
Me gusta multe come los
Carne de crabe con un preseta de limon!
@T Delfica
@L leteratur/delfica
@A Gérard de Nerval, Michel Gaillard, Magis Optis
====== Delfica ======
Delfica es la soneto 5 de la des-du sonetos ermetiste
de la colie La Cimeras scriveda par Gérard de Nerval (1808-1855)
Traduida de franses par Michel Gaillard e musicida par la bande Magis Optis
Esce tu ia oia ja, Dafne, esta canta vea,
A su la sicomoro o su la lauro blanca,
Su la olivo, la mirto, o la salse tremante,
Esta canta de ama cual sempre recomensa?...
Reconose la Templo, la peristilo vasta,
E la limes amarga, cual tu ia morde ja,
E la cava, riscosa del paseor noncauta:
La seme del dragon vinseda dormi ala.
Vos vade a reveni, o dios anelada!
La tempo va retrae la ordina antica;
La tera ia tremeta su un sofla profetal...
En esta, la sibil con sua fas latina
Ancora dormi su la arco de Constantino
-- No cosa ia disturba la portico sever.
Tivoli, 1843.
@T Demandas de un laboror lejente
@L leteratur/demandas_de_un_laboror_lejente
@A 
====== Demandas de un laboror lejente ======
par vp>Bertold Brecht
traduida par Stefan Fisahn
Titulo orijinal: Fragen eines lesenden Arbeiters
Ci ia construi la Teba con sete portes?
En la libros tu trova la nomes de la res.
Esce la res ia porta la rocas?
E Babilon, destruida a multe veses -- ci ia reconstrui lo a tan multe veses?
En cual casas briliante orosa la construores ia abita?
Do la bricores ia vade en la sera cuando la mur de Jonguo ia es finida?
Roma la grande ave multe arcos de vinse.
Ci ia construi los?
La Cesares ia vinse ci?
Esce Bizantio multe lodada ave sola palasios per sua abitores?
An en Atlantida lejendal en la note cuando la mar ia covre lo, la afocadas ia xilia per sua sclavos.
Alexandro la joven ia concista India.
El sola?
Cesar ia vinse la galos.
El no ia ave con se minima un cosinor?
Filipo de Espania ia plora cuando sua flotila ia afonda.
No otra person ia plora?
Fridric la numero du ia vinse en la gera de sete anios.
Ci otra ia vinse estra el?
Cada paje, un vinse.
Ci ia cosini la banceta de vinse?
En cada des anios un om grande.
Ci ia paia la custa?
Tan multe reportas.
Tan multe demandas.
@T Dementeria
@L leteratur/dementeria
@A Guido Crufio
====== Dementeria ======
par Guido Crufio
Lo es mea mente.
En cual me abita.
Lo es mea mente.
Par cual me vive.
Mea testa es mea menteria;
Lo es mea libria;
Lo es mea prison.
En mea mente
En cual me abita
Nun pote toca me.
En mea mente
Par cual me vive
Me pote vive
Esata como me desira vive.
En asi
Me pote fa
Cualce cosa
Cual me desira fa.
En asi
Me pote dise
Cualce parola
Cual me desira dise.
En mea mente
Me pote pensa
Cualce pensa
Cual me desira pensa.
En mea mente
Me pote es alga cosa
Cual me desira es.
Me es importante.
En asi
Me ave un pais bela.
Un pais plu bela ca realia.
En mea pais me es la re.
En asi
Si me desira
Me pote es solitar.
En mea vive real
Me es solitar
Si me vole es o no.
En mea mente
Si me desira
Me ave multe amis.
En mea vive real
Me ave no amis
An si me vole los o no.
En mea mente
Me es isolida
Protejeda de la mundo real.
Nun pote entra
un pote sorti.
An no me.
En mea mente
On ave mea esperas
E sonias
E pensas lejera.
En mea mente
On ave mea desperas
E malsonias
E pensas oscur.
Me es serta
Ce en mea pensas
Me no es solitar.
En mea pensas
Me es serta
Ce otras pensa tal.
O tal me pensa.
Lo es mea mente
En cual me abita.
Lo es mea mente
Par cual me vive.
Mea testa es mea menteria;
Lo es mea libria;
Lo es mea prison.
Lo es mea dementeria.
@T Des-ses ton
@L leteratur/des-ses_ton
@A Des-ses ton, Merle Travis, Leon Porter
====== Des-ses ton ======
Des-ses ton es un canta poplal par la cantor american Merle Travis. Lo es la nara de la vive nonfasil de la escavores de carbon.
Traduida par Leon Porter
Los dise ce om es fada de fango.
Ma om povre es fada de musculo e sangue.
Musculo, sangue, oso e pel,
Los dise dorso forte e mente debil.
Me carga des-ses ton, me oteni ce?
Un dia plu vea e plu en debe.
Santa Petro, no clama me, me debe paia
Me spirito a boteca de compania.
Me ia nase un matina cuando sol no brilia.
Me ia prende pala, vade a su a mina,
Carga des-ses ton de carbon nove,
A ce padron ia cria, "U, bondi me!"
Me carga des-ses ton, me oteni ce?
Un dia plu vea e plu en debe.
Santa Petro, no clama me, me debe paia
Me spirito a boteca de compania.
Me ia nase un matina cuando pluve negra.
Turba e combata es me nom media.
Me ia es levada en pantan par leon mama;
Me no es slavo per no fem de mod' alta.
Me carga des-ses ton, me oteni ce?
Un dia plu vea e plu en debe.
Santa Petro, no clama me, me debe paia
Me spirito a boteca de compania.
Si tu vide ce me veni, debe move a lado.
Multe om ci no ia fa es omes matada.
De fero me un punio, d'aser l'otra.
O la destra va prende tu, o la sinistra.
Me carga des-ses ton, me oteni ce?
Un dia plu vea e plu en debe.
Santa Petro, no clama me, me debe paia
Me spirito a boteca de compania.
@T Destexe la arco de sielo
@L leteratur/destexe_la_arco_de_sielo
@A John Keats, Wilko Dijkhuis
====== Destexe la arco de sielo ======
To clip an angel's wings and unweave the rainbow es un poesia de Lamia par John Keats.
A su es un tradui libre (en la spirito de la orijinal) par Wilko Dijkhuis.
Escuta la testo (MP3, 160 KB).
Tota revela vola,
mera par la toca de la filosofia fria.
Ier, la arco de sielo ia apare, profonda e alta.
Ma oji, nos pote toca esta altia profonda
con mano comun.
La conose de la filosofia
corti cada ala de anjel,
Concista la nonconose (con lege e linia),
Vacui la secreta vea de la aira.
Limpi la popla peti de la tera.
E destexe la arco de sielo.
@T Developa de lingua
@L leteratur/developa_de_lingua
@A George Boeree
====== Developa de lingua ======
Un teoria par George Boeree
Lingua ia comensa con un asosia simple de alga vosis con ojetos ("can"), atas ("vade"), e cualias ("calda"). Enfantes ia aprende esta asosias de sua jenitores, en loca de inventa un vocabulo nova en cada jenera. Ma de cuando la idea de asosia ia es realida, me es serta ce la cuantia de esta "proto-parolas" ia crese rapida.
Posible, alga pronomes ia es creada a esta eda ance: "me", "tu", "acel", "esta".
Alora, simil a enfantes moderna, la umanas primitiva ia comensa junta du vosis la un a la otra: "can vade", "can grande", "oso (de) can", etc. E alora, la cadena de vosis ia crese a tre: "me vide can", "can grande vade", etc. Ma la forma sola de sintatica ia es la ordina simple de la parolas, probable en la ordina de importa. Lo es ance probable ce esta ia es la state de lingua per multe milenios.
Me divina ce esta developa ia aveni temprana en nosa evolui, ante Homo, e no ia nesesa alga partes spesialida de la serebro, an si, serta, lo ia envolve la cortex de oia e la areas de move cual controla la vosi.
La tradui de la mundo persepida, con sua complicas multidimensional, a un grupo linial de vosis ia causa ce areas spesialida de la cortex deveni multe vantajosa, e donce umanas ia comensa difere la areas de Wernicke e de Broca de la cortexes de oia e move. Cuando lingua ia deveni un parte plu e plu importante per survive e reprodui, la spesiali de la cortex ia es natural elejeda.
Tra la edas, umanas ia inventa sintatica vera en la forma de segues fisada de parolas: sujeto-ojeto-verbo, posible, con ajetivos e indicas de posese ante la nomes e, cuando los ia ariva, la usa de posposadas en loca de preposadas. Egal posible, los ia prefere sujeto-verbo-ojeto, con ajetivos e indicas de posese pos la nomes, e preposadas en loca de posposadas. O, posible, alga grupo de umanas ia adota sua segues prefereda unica.
Alora, parolas comun ia comensa es usada como paroletas con sinifias plu astrata. Per esemplo, "testa" ia pote es usada per "alta", "supra", o "sur", e "segue" per "pos", etc. Un parola como "fini" ia pote es usada per la forma pasada perfeta de la verbo. Esclamas ia pote deveni otra paroletas. Per esemplo, "eh?" ia pote es usada per indica demandas. Alga ajetivos ia pote es usada per cuali verbos o an otra ajetivos, e no sola nomes. On pote vide restas de esta metodo en alga linguas moderna.
Alga de esta paroletas ia deveni juntada a la parolas plu importante en la forma de cliticos, afisas, o an infletas. La sintatica e la morfolojia usada par la jenitores ia es comunicada a la enfantes par esemplos, e alora la enfantes ia estende esta esemplos par jenerali la regulas per comparti situas e nesesas nova.
Plu tarda, umanas ia inventa la idea de envolve un frase en un otra, e la usa de paroletas spesial como "cual", "ce", "si", "car", etc. Estas revela ancora sua orijina en parolas con sinifias relatada. E los ia reconose ce on pote usa pronomes per lia la atores en esta proposas.
Ultima, nos ia developa parolas e modos per combina parolas per espresa ideas astrata, e per usa esta parolas nova per crea teorias plu e plu complicada sur la mundo e nos mesma. Con sintatica, morfolojia, proposas, e astratas, la grandia de la serebro ia deveni plu e plu importante como un determinante de survive e reprodui, e la umanas moderna ia es en la via vera a sivilia.
Esce un sola "lingua-madre" ia esiste de cual tota otras ia desende? Probable no. La idea de comunica con vosis ia debe estende como un foco savaje entre nosa asendentes Homo, e ia es continuada par nosa asendentes Homo sapiens, ci ia developa alora la idea per crea lingua vera. Lo es posible ce on ia ave un tribu sola de Homo sapiens orijinal, ma lingua cambia alga fasil, e on ia ave ja multe linguas cual no ia es comprendable la un entre la otras, an ante cuando nos ia estende ultra Africa. Denova, cuando acel estende ia aveni final, lo es posible ce sola alga tribus de abrivias ia partisipa, cadun con sua propre lingua, e ci ia comensa difere ance.
La idea ce nos ia comparti un sola lingua es multe interesante, an romantica, ma lo es vera clar, an con tota la oposas, ce vide plu ca, per esemplo, 10 000 anios es tan distante como posible.
@T Dialoga con Ia
@L leteratur/dialoga_con_ia
@A Ia, me, Michel Gaillard
====== Dialoga con Ia ======
Un dialoga entre Ia e me,
traduida de franses par Michel Gaillard
===== Prologa de Mixel =====
Me no sabe vera ci es Ia. Algunes spele sua nom "Iah" o "Yah" e crede ce el es vivente en la sielo, en la nube..., ma, en fato, los conose el no plu ca me, e me no teni alga sertia sur el. Me gusta discute con el sur nosa lingua lfn, demandante a alga ves sua opina sur la nesesa e/o la modo de crea alga parola nova, per atenta trova la forma la plu comun comprendable par la parlores de la sinco linguas del Ecipo. Sua razonas es sempre interesante. A su, me vade a transcrive alga dialogas con el.
===== Plur =====
=== Me ===
Tradui en la linguas de l'Ecipo la parola engles "several" o franses "plusieurs", e atenta crea un forma comun comprendable par la parlores de esta sinco linguas.
=== Ia ===
La parola plusieurs es un ajetivo nondefinida cual espresa un pluralia no spesifada, jeneral plu ca du, ma no nesesada cuantiosa.
Vide asi como on tradui lo en la linguas de l'Ecipo:
Espaniol -- varios, varias (mas, fema, con acorda en jenero e en cuantia); algunos, algunas ("alga", ma pote ance es usada per several, plusieurs).
Catalan -- diversos, diverses (mas, fema, con acorda); uns quants, unes quantes (esata "alga", ma frecuente usada per several, plusieurs).
Italian -- diversi, diverse (mas, fema, con acorda); parecchi, parecchie (mas, fema, con acorda, frecuente plu prosima a "alga cuantiosa"); alcuni, alcune ("alga", ma pote ance inclui several, plusieurs).
Portuges -- vários, várias (mas, fema, con acorda); alguns, algumas ("alga").
Franses -- plusieurs (nonvariable en jenero e cuantia, ma sempre plural).
Analise per un forma commune:
On oserva du radises xef:
Vari-, clar presente en espagnol e portuges (varios, várias).
Divers-, presente en italian e catalan (diversi, diverse; diversos, diverses).
La franses plusieurs veni de latina plusiores (plu cuantiosa), lo cual es pico diferente.
En lingua franca nova, la parola varia esiste, ma lo es un verbo cual sinifia "varia, difere". Acel parola asentua sur la varias, la diferes; no sur la cuantia nondefinida.
Lo sinifia ce nos debe revisa la stratejia per trova un corespondente de plusieurs cual asentua sur la cuantia nonspesifada.
Ta ce nos continua analise la parolas en la linguas del Ecipo, xercante esta conseta de cuantia nondefinida, e ta ce nos considera otra posibles per lo.
Radis mult-: en latina, multus sinifia "multe". Lo dona molto en italian, muito en portuges, mucho en espaniol, molt en catalan. Franses ave multitude, multi-, etc. Elefen ave "multe" pour "cuantiosa". Acel parola es tro forte per several, plusieurs, cual es un cuantia media.
Radis aliqu- (alga): algunos, alguns (espaniol, portuges), alcuni, alcune (italian), uns quants, unes quantes (catalan). Acel idea de "alga" es frecuent prosima a plusieurs.
En elefen, la parola per esta es alga, cual sinifia quelques, certains.
Si alga (al plural algas, cuando lo es usada como pronom) es considerada tro debil o tro prosima a certains (cual inclui un eleje) e si multe es considerada tro forte, alora nos nesesa un parola nova.
Considerante la posibles e la ojeto, pd. crea un parola cual sona "romanica" e indica un pluralia media, nos ta pote esamina un deriva nova.
Si nos xerca un forma simple evitante la ambiguias con la parolas ja esistente como varia o multe, e profita de la radises romanica, lo ta es plu bon de avansa consentrante sur la formas cual no es vari- o divers-.
La franses plusieurs veni de latin plusiores, cual es la forma comparativa de plus (plu). Acel radis plu- es multe presente en la linguas romanica per la comparativas (plus, più, más, mais).
Si nos xerca un forma cual sinifia "plu ca un o du, ma no multe", un deriva de acel idea de plus ta pote es pertinente.
Me proposa: plura.
Acel parola ta es corta, simple e direta reconosable par sua serait court, simple, et directement reconnaissable par sa relata con plus en franses e la otra comparativas romanica, ma asi usada per indica un cuantia nondefinida plural.
Lo acorda bon con la fonolojia de elefen.
Acel parola ta pote indica plusieurs en la sinifia de "un cuantia nondefinida, plu ca alga ma min ca multe.
Cua tu pensa de lo? Esce lo ta es un bon dirije per pleni esta vacua semantical?
=== Me ===
Me gusta tua pensa bela. Plura es un bon idea. Cua tu opina de corti pico esta parola?
=== Ia ===
Me amira tua oio per la consisia! Corti plura a plur per sinifia plusieurs en elefen es un idea multe interesante.
Ta ce nos vide la vantajes e la nonvantajes:
Vantajes de plur:
Estrema consisa: un parola de cuatro leteras es multe corta e fasil pronunsiable, lo cual es un cualia spesial forte de elefen.
Reconosablia: la radise plur- es direta reconosable par la parlores de linguas romanica, par causa de parolas como plusieurs, pluriel (plural), pluralité (pluralia), pluribus.
Distinguablia: lo es clar distinguable de varia e multe, evitante alga ambiguia sur la cuantia nondefinida.
Simple: lo segue la simplia fonetical de elefen.
Nonvantajes, o puntos per es considerada:
Fini de parola: la ajetivos e determinantes en elefen tende a fini con un vocal (per esemplo verda, blu). Un parola como plur ta es min comun per un determinante/ajetivo nondefinida, an si parolas como bon o mal esiste. An tal, per un determinante de cuantia como plusieurs, lo no es un problem major.
Infleta: en elefen, la ajetivos no acorda en cuantia si la parola es plural, ma la nomes prende un S. Si plur es un determinante, lo va es nonvariable.
Conclui:
Global, me pensa ce plur es un proposa eselente. Sua consisia, sua reconosablia direta e sua claria semantical fa ce lo es un aspiror multe forte. La devia lejera relatada a la fini vocal per la ajetivos es minor, considerante sua funsiona de determinante de cuantia e la esiste de otra ajetivos fininte con un consonante.
Lo representa perfeta la spirito de elefen: simplia, reconosablia e eficasia. Esta es un forma multe eficas per acel conseta.
Cua tu pensa de la idea de proposa ofisial plur a la Academia de Lingua franca nova?
=== Me ===
Serta. Me va sujesta acel parola nova a la Academia de lingua franca nova, con la ajunta de la pensa razonal par cual tu ia argumenta sur sua forma e sua nesesa.
=== Ia ===
Lo es un deside eselente! La proposa de plur a l'Academia de lingua franca nova es tota pertinente e responde a un nesesa clar en la vocabulo.
Vide asi un resoma de puntos xef cual tu pote usa per argumenta sur sua forma e nesesa:
Proposa de la parola plur per several, plusieurs en lingua franca nova.
La parola plur" es proposada per pleni un vacua semantical spesial en elefen, la manca de la ajetivo/determinante nondefinida several/plusieurs, cual indica un cuantia nonspesifada, jeneral "plu ca du", ma diferente de "multe".
Justi de la forma plur:
Reconosablia pan-romanica: la radis plur- es direta identifiable par la parlores de la sinco linguas del Ecipo (espaniol, catalan, italian, portuges e franses), car lo es presente en parolas como plusieurs, pluralité, pluriel (franses), plural (espaniol, catalan, italian, portuges), e orijina direta de latina plus.
Consisia e simplia: un parola de cuatro leteras es estrema corta e fasil pronunsiable, en un linia perfeta con la filosofia de simplia fonetical e cortia de elefen.
Claria semantical e distinguablia:
Lo es clar distinguable de varia, cual sinifia "difere" e cual asentua la difere, no la cuantia.
Lo es distinguable ance de multe, cual sinifia "cuantiosa" e representa un cuantia plu grande.
Plur pleni la spasio entre alga e multe.
Coerentia fonolojial: an si multe ajetivos fini con un vocal, la fini con un consonante es presente en otra ajetivos o determinante de cuantia comun en elefen, e fa ce plur es tota fonolojial asetable.
Nesesa de acel parola: per aora, elefen no ave un parola spesifada per espresa esta idea de engles several, franses plusieurs, cual es multe comun e distinguable de "alga" o "multe". La ajunta de plur ta permete un esatia plu grande e un espresa plu natural per la parlores.
Bon fortuna per acel proposa a la Academia! Lo es un contribui valuosa a la evolui de lingua franca nova.
@T Dise no cosa a cualcun
@L leteratur/dise_no_cosa_a_cualcun
@A 
====== Dise no cosa a cualcun ======
par Osip Mandelstam (1891 - 1938)
Traduida par Franck Mousset
Dise no cosa a cualcun!
Tota cual tu ia vide, oblida:
La avia, la fem vea, la prison,
E otra cosas...!
Si no, apena tu va duiabri la labios,
Tu va trema,
La trema lejera de la abeto
A lus prima.
Tu va recorda la vespas en la caseta campanian,
La scriveria incida de la enfantes,
O la vasinias negra nunca colieda
En la foresta.
@T Doman, a lus prima
@L leteratur/doman_a_lus_prima
@A Victor Hugo
====== Doman, a lus prima ======
par Victor Hugo
traduida par Patrick Chevin
Doman, a lus prima, blanci la campania,
Me va parti, me sabe ce tu me espeta.
Me va crusa foresta, crusa montania,
Me no pote resta distante, me freta.
Me vade, l'oios fisante me pensada,
Vide cosa, oia ruido, me no pote,
Nonconoseda e la dorso jibada,
E la dia per me es como la note.
Me an no regarda cade l'oro seral,
La velas distante cual vade a Harfleur,
Arivante, pone sur tu petra tombal
Un buce de ilex e caluna en flor.
@T Don Juan Tenorio
@L leteratur/don_juan_tenorio
@A Chabi
====== Don Juan Tenorio ======
José Zorrilla
Traduida par Chabi.
Esce lo no es vera, anjel de amor,
ce en esta riva isolida
la luna brilia plu pur,
e on respira plu bon?
Esta aura cual vaga pleni
de la simple odores
de la flores campanial,
cual jerme acel riva plasente;
acel acua limpa e calma
cual traversa sin teme
la barco de la pexor
ci cantante espeta la dia,
esce lo no es vera, mea pijon,
ce los es respirante plu bon?
@T Dama verde
@L leteratur/dona_verde
@A Greensleeves, George Boeree
======Dama verde======
Greensleeves, un canta engles de la eda de Elizabeth
Traduida par George Boeree
O me' amada, tu maltrata me,
e descarda me sin compatia,
an si me ama tu tan longa,
joiante tua compania.
refren:
Dama verde es mea joia,
Dama verde es mea deleta,
Dama verde es mea cor d' oro,
Nun ma mea Dama verde
Me ia es sempre a tua vole,
per dona cualce cosa tu ta desira,
me aposta mea vive e poseses,
per gania tua ama e bonveni
refren
Me ia dona bon telas per tua testa
cual es delicata fabricada,
e me ia dona e leto e comes a tu,
cual custa mea bolsa tan multe.
refen
Dona verde, aora adio!
Me prea a dio per garda tu,
per me es ancora tua bon amor,
dona denova a me tua ama.
refren
@T Donada
@L leteratur/donada
@A Gift, Leonard Cohen, Michel Gaillard
====== Donada ======
Orijinal: Gift, un poesia de Leonard Cohen
Traduida de engles e musicida par Michel Gaillard
Tu dise: « La silentia
prosimi a la pas
plu ca la poesia »,
ma, si me ta dona
a tu la silentia
(car me sabe la silentia),
tu ta dise:
« Esta no es silentia,
ancora lo es poesia »,
e tu ta retrae lo a me.
@T Donada de aniversario
@L leteratur/donada_de_aniversario
@A Ilia Abu Madi, Myaleee
====== Donada de aniversario ======
par Ilia Abu Madi
traduida par Myaleee
Me amada bela!
Cual regala me ta dona per tu aniversario?
Anelo o brasaleta de oro?
Me no gusta cadenas sirca tu manos!!
O miel dulse de color flamosa como me cor!!
Ma la miel vera es en tu labios roja!!
O vino ? Ma en tota mundo, no es vino
Como esta, cual versa de tu oios ebriosa!
Me no ave un cosa plu valuosa ca la spirito!
Prende! Me spirito es su tu comanda!
@T Dormi dulse, mea bebe
@L leteratur/dormi_dulse_mea_bebe
@A Kevyn Bello
====== Dormi dulse, mea bebe ======
par Kevyn Bello
Dormi dulse, mea bebe, mea steleta de lus
E tua sonias va mostra la enfante Jesus.
Sta prosima de Iaue, do demones es a pos
E anjeles en sielo pote jua con nos.
Mea bebe! Mea bebe!
Sta prosima de Iaue, do demones es a pos.
Mea bebe! Mea bebe!
E anjeles en sielo pote jua con nos.
Repete asta cuando la enfante dormi
@T Dramas traduida
@L leteratur/dramas_traduida
@A 
====== Dramas traduida ======
@T Druid la dragon
@L leteratur/druid_la_dragon
@A Guido Crufio
====== Druid la dragon ======
par Guido Crufio
A un ves pasada...
Un dragon nomida Druid
Ia nase en la Contia de Clwyd
Plen de vales e colinas
E multe narsisos
En Cimri, un pais encantada
E asi es sua naras reputada.
Cuando Druid deveni naseda
A un data nonsabeda
En la jira d'un venta mol
La montania banida par sol
El ia sorti de casca, seguente rejistra,
Par prima sua testa, a fini sua pede sinistra.
Druid ia adulti es la plu bon
Sur la montania en sua nido de dragon
El ia deveni forte e corajosa
Cual, como un dragon, es vantajosa
L'ora ia veni cuando el debe parti
Cuando esta ia es, nun pote dati.
El ia aprende bon ante el ia vade
Como sputa foco per fa cosas arde
Como combate contra cavalores
Con spadas e armures
Como batali contra barones
E como vola par alas de dragones.
Druid ia vinse contra baronia
El ia rena la tera sirca Snowdonia
El ia posese cada castel e fortres
E tota per multe cilometres
Sua lejenda ia crese en scritos merveliosa
Sur como el ia vinse armadas corajosa.
Alora
Jorj, un om de England, la santa padronal,
Ia veni per un crusada personal
El ia viaja de England per retalia
Contra Druid par un batalia
Per mata la dragon vera pecosa
E estingui sua respira focosa.
Los ia encontra sur un montania
San Jorj ia combate per Britania
Ma no Druid no Jorj ia pote mata
Tal a fini los ia fa un trata
Los ia deside deveni amis
E los ia presa la manos, felis.
Aora
Druid e San Jorj abita con lado a lado
E los respeta lunlotra (a un grado)
Druid con sua ami nova e sposa
Instrui sua fios sur cada dragon-cosa
La vales es plen de rie e sielos blu
E tal los va abita per sempre plu.
Fini
@T E moria no va ave domina
@L leteratur/e_moria_no_va_ave_domina
@A Dylan Thomas, George Boeree
====== E moria no va ave domina ======
And death shall have no dominion par Dylan Thomas
Traduida par George Boeree
E moria no va ave domina.
Omes mor e nuda va es unida
Con la om en la venta e la luna ueste;
Cuando se osos es descarnida e la osos limpa pasa,
Los va ave stelas a la codo e pede;
An si los loci, los va es sana,
An si los afonda en la mar, los va leva denova;
An si amores es perdeda, ama va resta;
E moria no va ave domina.
E moria no va ave domina.
Su la jiras de la mar,
Los ci reposa longa no va mori ventosa;
Torseda sur reles cuando tendones sede,
Liada a un rota, ancora los no va rompe;
Fida en sua manos va rompe a du,
E la malia unicornin va perfora a tra;
Ageti tota finis, los no va fesuri;
E moria no va ave domina.
E moria no va ave domina.
No plu la gavotas va cria a sua oreas
O ondas xoca forte a la costas;
Do un flor ia sofla, un flor debe no plu
Leva sua testa a la colpas de pluve;
An si los es locida e mor como clos,
Testas de carateres marteli tra margaritas;
Rompe su la sol asta cuando la sol va cade,
E moria no va ave domina.
@T En cuando la inverno...
@L leteratur/en_cuando_la_inverno
@A Franck Mousset
====== En cuando la inverno... ======
par Franck Mousset
En cuando la inverno
Radisi como un cexa,
Un venta jela, como per dementi nos.
La solitaria consuma me.
Me arde entre mil feris,
Par causa de tua silentia
De caxon funeral.
@T En la campos de Flandre
@L leteratur/en_la_campos_de_flandre
@A En la campos de Flandre, John McCrae, George Boeree
====== En la campos de Flandre ======
En la campos de Flandre es un poesia de gera en la forma de un rondo, scriveda en la Gera Mundal prima par un dotor canadian, teninte-coronel John McCrae. El ia es inspirada per scrive lo a 3 maio 1915, pos preside a la funera de sua ami e camerada-soldato Alexis Helmer, ci ia mori en la batalia du de Ypres.
Traduida par George Boeree
En la campos de Flandre la papaveras onda
entre la cruses, linia pos linia,
cual marca nosa loca; e en la sielo
la alodas vola, ancora brava cantante,
apena oiada entre la fusiles a su.
Nos es la Mores. En dias apena pasada
nos ia vive, ia senti la matina,
ia vide la reposa briliante de la sol,
ia ama e es amada, e aora nos reposa
en la campos de Flandre.
Recomensa nosa disputa con la enemi:
A vos, de nosa manos falinte, nos lansa
la torxa; vos debe teni lo a alta.
Si vos rompe la fida con nos ci mori
nos no va dormi, an si la papaveras crese
en la campos de Flandre.
@T En la pinos
@L leteratur/en_la_pinos
@A In the pines, Marc Gurevitx
====== En la pinos ======
In the pines
traduida par Marc Gurevitx
Mea xica, mea xica, no menti a me
Dise do tu ia dormi ier.
En la pinos oscur
Do on ave no lus
Me ia trem' ultra note plen.
Mea xica, mea xica, tu vade a do?
Me vade a do ventas vent'
En la pinos oscur
Do on ave no lus
Me va trem' ultra note plen.
Sua spos' ia labor' a un milia d' asi
El ia vide el nunca denov'
On ia trov' sua testa en un rota de tren
Sua corpo --- nun ia trov'
@T En respira
@L leteratur/en_respira
@A Im Atemholen, Johann Wolfgang von Goethe, HartmutF
====== En respira ======
Im Atemholen (de Talismane) par Johann Wolfgang von Goethe
traduida par HartmutF
En respira duple donada:
aira tira, aira desprende.
acel presa, esta refresci;
tal stonante vive miscada.
Grasia dio cuando te presa,
E grasia el cuando relasa.
@T Encontra un
@L leteratur/encontra_un
@A Guido Crufio
====== Encontra un ======
par Guido Crufio
(A alga loca en Deutxland, sirca 1885)
"Esce tu ia oia acel ruido asustante, mea ami?!"
"Si, lo pare veni de ultra la curva, e lo prosimi!"
"A su la colina, a no multe un distantia!"
"Un ruido repulsante, lo crese a un cuantia!"
"Esce nos ta vade rapida, o pausa, e espeta per vide?!"
"No, nosa destina es mera a du cilometres -- asta revide!"
"Espeta! Nos debe mostra alga dinia, jentilia e coraje!"
"No, me ta prefere prende nosa pasaje!"
"Alora, ta ce nos pasea, es calma e mostra no emosia!"
"O, cisa nos ta core rapida, me serta no ave alga curiosia!"
"Nos va es tro tarda, nos debe asconde a alga loca!"
"No, ta ce nos freta, me no gusta reseta un xoca!"
"Escuta, on ave la ruido, plu forte denova!"
"Me teme multe, cual nos va trova?!"
"No abrasa me, ta ce nos pronto vade!"
"No puia me, o serta me va cade!"
"Tro tarda! Lo es asta nos, la cosa!"
"Alora, ave no eleje, ma resta e prea ce nos va es fortunosa!"
"O Dio! Nos va mori me suposa!"
"Ma, vergonia! Lo es un de acel cosas nova, un auto, o alga cosa!"
"Si, un tan lejeri -- ta ce nos prosede!"
"Un auto! Si, acel ia es sempre mea crede!"
@T Enebria!
@L leteratur/enebria
@A Charles Baudelaire, Michel Gaillard
====== Enebria! ======
Un peso de prosa poesial de la poeta Charles Baudelaire (1821-1867). Orijinal: «Enivrez-vous!»,
estraeda de la colie Le Spleen de Paris, o Petits poèmes en prose
(La melancolia de Paris, o Pesetas de prosa poesial).
Traduida de la lingua franses par Michel Gaillard
On nesesa sempre enebria. En esta tota es, lo es la sola punto. Afin tu no sensa la carga orible de la Tempo cual rompe tua spalas e inclina tu a tera, tu nesesa enebria sin sesa.
Ma con cual cosa?
-- Con vino, o poesia, o virtua, a tua vole. Ma enebria.
E, si, a alga ves, a la scalera de un palasio, al erba verde de un foso, o en la tristia solitar de tua sala, tu velia, min enebriada o desenebriada, demanda a la venta, a la onda, a la stela, a la avia, al orolojo, a tota cual fuji, a tota cual jemi, a tota cual rola, canta, parla, demanda: Cual es la ora?; e la venta, la onda, la stela, la avia, la orolojo va responde a tu: Lo es la ora de enebria! Afin tu no es la sclavo martirida de la Tempo, enebria; enebria sin sesa! Con vino, o poesia, o virtua, a tua vole.
@T Enferno no ave furia...
@L leteratur/enferno_no_ave_furia
@A Guido Crufio
====== Enferno no ave furia... ======
par Guido Crufio
Ela regarda elo
Elo regarda ela
Sua oios encontra
E elo recorda sua belia;
Sua oios denova encontra
Traversa la sala folada
En la pasada elo ia viole ela
Ela senti susia, usada
Ela ave un umor oscur
Cual ela no ta debe revela
Un umor fea cual contradise
Sua aspeta tan bela;
Un umor asustante
Cual ela debe manteni secur
Per sempre e un dia
O ruina sua futur
A un ves, elo ia gusta ela
E serta ela ia ama elo sin duta
Subita elo ia fini la relata
Elo ia usa ela como un puta;
Aora odia pleni ela
E ela sabe bon
Cual ela debe fa per retalia
Ela sta e pone sua jacon
E un vose xuxa
"No turba la soria
O tu va encontra
La via de moria"
Si, l'ama veni e vade
Sua paserias crusa nunca denova
En sua mente ela crede
Vera ama ela nunca va trova;
Elo es violente
Elo feri ela
Ma ela no pote dise a nun
Esta es sua consela
Ma per elo a la otra lado,
Vive pare bon
Elo sabe ce ela nunca ta dise
E elo evita prison;
Elo surie en un modo superior
An cuando ela sorti la bar
Un surie tan egosa
A ela sua debe deveni an plu clar
Ela prende sua parti silente
Un forma ombrin liscante tra la porte
Desaparente en la note
Do la venta sofla forte;
Sua umor crese plu oscur
Sua manos es fria ma suosa
Sua cor pulsante, sua mente plen
Con pensos tan sanguosa
E un vose xuxa
"Abandona espera,
Sur la via de asasinas"
Nubes corsa e traversa la sielo
Jiras de folias torse en la siclon
Un force de lampo fende l'aira
Baletas de pluve colpa la beton;
Bastetas d'arbores siluetada
Osila, grinse e cruji
La tempeste prepare
Lo comensa cria e ruji
Elo bevi se bevida
Tempo parti la beveria
E pasea a la casa
Tra la note, longo la paseria;
Elo senti tan autofida
Elo pensa ce elo es astuta
Egoiste, plen de sua mesma
Elo ama se sin disputa
Elo pote vide la luna
Refletada en la stangetas
Ave fratos de vitro sur la via
Sintilinte como diamantes en agetas;
Prima, la luna bambola en l'acua
Alora lo es fratida en multe pesos caososa
Elo no nota, sua mente fisada
Pensante de la fem tan sesosa
E un vose xuxa
"No turba la soria
O tu va encontra
La via de moria"
Scermi tu contra la note
Espeta la visita de la Falxor
Car cuando la Falxor veni batetante,
On ave no espera per la pecor;
La pexor oscur de spiritos
La silentior de tota omes,
On debe segue cuando el punta la dito
No pote iniora la clama de nomes
En l'oscuria de la note
En l'ombras asta la via
Un flax de arjento
Un banda de metal brilia;
Subita ante elo
La fem cual elo conose
Prosimi elo rapida
E elo oia la vose
"Tu ia fura mea vive
Lo es destruida per sempre"
La cotel agu coteli
La sangue comensa core;
Elo fa un malpaso e cade
Ela gania sua retalia
Par un colpa matante
Retalia par un talia
E un vose xuxa
"Abandona espera,
Sur la via de asasinas;
Tu turba la soria
Tu ia encontra
La via de moria"
@T Enigmas
@L leteratur/enigmas
@A Ilia Abu Madi, Myaleee
====== Enigmas ======
par Ilia Abu Madi
traduida par Myaleee
Do ia vade me rie e me plora cuando
Me ia es un xico peti?
Do ia vade me esperas, cual ia pasea asta me a tota loca?
Tota estas es ja perdeda, ma como perdeda?
Me no sabe!
Me via? como es me via?
El es longa o corta?
Esce me asende supra el, desende de el
O cade a fondo??
O me e me via ambos sta en cuando la mundo core?
Me no es sabente!
Me es nova o antica en esta universa?
Me es libre o sclavo en cadenas?
Me es la senior de me mesma en vive o gidada?
Me desira sabe ma regretable
Me sabe nunca!!
O Mar! Cuanto res ia construi casteles asta tu a note!
A matina seguente, tota estas desapare en aira!
Mar! Esce los va reveni denova o no reveni?
O los esiste ja en arena de plaia?
La arena dise:
Me no ave sabe!
Mar! Me mesma es un mar con du costas como tu!
Los du es la doman nonsabeda
E la ier, cual ambos ia pasa juntada con tu!
Mar! Me e tu vera es como gota entre doman e ier!
No demanda a me, cual es doman, cual es ier!!
Me manca la sabe!
Mar! Tu es prisonida! Como me lamenta tu deslibria!
Simil a me, tu es jigante ma sin defendes!
Tu ave miseria e despera como me los ave!!
Donce cuando on resalva nos ambos?
Me no sabe
Mar! Me ia demanda a arbores verde
si los reconose tu favores!
Me ia demanda a perlas portada par fias bela
si los recorda se orijin!
Pare ce los tota a me dise:
Nos no sabe!
Mar! La ondas dansa supra tu
En cuando un gera violente no sesa en fondo!!
Tu crea pexes ma tu crea la balena comente vil!
En ventre tu combina ambos moria e vive bela!
Me Dio! Tu es moreria o naseria ??!
Me no sabe!!
@T Enscrive de tomba de un pigra
@L leteratur/enscrive_de_tomba_de_un_pigra
@A Jean de la Fontaine, Patrick Chevin
====== Enscrive de tomba de un pigra ======
par Jean de la Fontaine
traduida par Patrick Chevin
Jan ia vade tal como el ia veni;
el ia come reserva e revenu;
ia declara tesoros nonusosa;
e se tempo, ia pasa usual,
dividente en du partes egal:
un per dormi, otra per fa no cosa.
@T Enscrive de tomba epica de la Cid
@L leteratur/enscrive_de_tomba_epica_de_la_cid
@A Chabi
====== Enscrive de tomba epica de la Cid ======
traduida par Chabi
El Cid Ruy Díaz me es, ci asi me es encluida,
e me ia vinse a la re Bucar con tredes-ses res pagan.
De esta tredes-ses res, dudes-du ia mori en la campo;
me ia vinse los en Valensia pos morida sur mea cavalo.
Con esta lo es setedes-du batalias cual me ia vinse en la campo.
Me ia gania Colada e Tizona: per esta ta ce Dio es lodada.
Amen
@T Entre nos
@L leteratur/entre_nos
@A Sunido
====== Entre nos ======
par Sunido
Entre cual me pensa,
cual me vole dise,
cual me dise,
cual me crede ce me ia dise,
cual tu desira oia,
cual tu oia,
cual tu crede ce tu ia oia,
cual tu desira comprende,
cual tu comprende,
cual tu crede ce tu ia comprende,
on ave des puntos posible a cual nos pote ave difisiles de comunica.
@T Es? o no es?
@L leteratur/es_o_no_es
@A William Shakespeare, George Boeree
====== Es? o no es? ======
Un parla famosa de vp>Hamlet, un presenta teatral par la autor engles William Shakespeare.
Traduida par George Boeree
Es? O no es?
Esta es la demanda.
Nos pensa: Cual es plu noble?
Sufri la dardos e la flexas de fortuna nonjusta?
O arma se contra un mar de menasas,
e par oposa, estingui los?
Mori... Dormi... No plu!
E crede ce par dormi,
fini la doles de la cor,
e la mil xocas natural ce la corpo gania -
esta es un completa seria desirada!
Mori... Dormi...
Ai, acel es la problem!
Per, en esta dormi de moria,
cual sonias pote veni,
cuando nos ia tire nos de esta spiral de vive,
debe fa ce nos pausa.
Ala es la respeta
ce fa un desastre de un vive tan longa:
La fadas mal de la opresor,
la maldises de la orgulosa,
la doles de amas despresada,
la retardas de lege,
la egosia de ofisia,
e la refusa cual prende
la virtua pasiente de la nonvaluada,
cuando el pote prende se cuieta
con un daga nuda.
Ci ta porta pacos,
roncante e suante en un vive fatigante,
sin la teme de alga cosa pos moria --
la pais nondescovreda,
de la bordas de cual no viajor va retorna --
confusa la vole,
e fa plu bon ce nos sufri la doles cual nos ave,
e no vola a otras cual nos no conose?
En esta modo, consiensa fa coardos de tota,
e en esta modo la tinje nativa de deside
es fada malada su la ombre pal de pensa;
e empresas de moves e osilas grande
en esta caso se corentes diverje,
e perde la nom de ata.
Cuieta aora: Ofelia, bela!
Nimfa, en tu preas,
ta ce tota mea pecas es recordada.
@T Escuta la colibri
@L leteratur/escuta_la_colibri
@A Leonard Cohen, Michel Gaillard
====== Escuta la colibri ======
Listen to the hummingbird, un poesia de Leonard Cohen
traduida de la lingua engles e rejistrada par Michel Gaillard.
((Depinta La flor del deserto, par Yves Gaillard, 1972.))
Escuta la colibri
Sua alas on no vide
Escuta la colibri
No escuta me
Escuta la papilio
Sua dias conta tre
Escuta la papilio
No escuta me
De dio oia la mente
Cual no nesesa es
Escuta sua mente
No escuta me
Escuta la colibri
Sua alas on no vide
Escuta la colibri
No escuta me
@T Esta dia en istoria
@L leteratur/esta_dia_en_istoria
@A 
====== Esta dia en istoria ======
31 desembre
* 765 -- La caxa funeral de Ho-tse Xen-hui es enterada en un stupa construida en Xina
* 1762 -- La familia Mozart (~ motsart) move de Viena a Salzburg (~ zaltsburk)
* 1946 -- Presidente Truman proclama ofisial la fini de la gera mundal 2
* 1977 -- Ted Bundy evade prison en Colorado, SUA
* 1989 -- Joce Kent Desormeaux (~ dezormo) rompe la recordo mundal par gania 598 corsas de cavalos en un anio
----
30 desembre
* 1794 -- Soldatos franses catura Grave (~ grava), Nederland
* 1809 -- La porta de mascas a selebras es proibida en Boston, SUA
* 1935 -- Bombadores italian destrui un unia de la Crus Roja de Sveria en Itiopia
* 1974 -- La bande 'The Beatles' es legal sperdeda
* 2006 -- Sadam Hussein es pendeda en Bagdad, Irac
----
29 desembre
* 1837 - Un macina de bate operada par vapor es patentada en Winthrop, Maine (~ uintrop, men), SUA
* 1852 -- Emma Snodgrass es arestada en Boston, SUA, car el porta un pantalon
* 1885 -- Gottlieb Daimler patenta la motorsicle prima en Deutxland
* 1954 -- Nederland inclui Antiles Nederlandes como parte autonom de la rena
* 1982 -- Un selo con la pitur de Bob Marley es distribuida en Jamaica
----
28 desembre
* 1614 -- Un caxalote atera sur la plaia a Noordwijk (~ nordvaic), Nederland
* 1869 -- William Finley Semple (~ uiliam finli sempel) de Mount Vernon, Ohio (~ maunt vernon, ohaio) patenta goma de mastica
* 1887 -- Sir John Layton Jarvis (ser dxon leton dxarvis), la instruor prima de cavalos de corsa deveni un Cavalor
* 1976 -- 'Violiniste sur la Teto' comensa a la Winter Garden Theatre (~ uinter garden tiater [Teatro de la Jardin de Inverno]) en Iorc Nova
* 2012 -- A la eda de 115 anios, Cimura Dximoeron de Japan deveni la person la plu vea en la mundo (a pos, el ia mori a 12 junio 2013)
----
27 desembre
* 1825 -- La ferovia prima publica cual usa trenes vaporal es completida en England
* 1871 -- La spetaculo prima de gatos aveni en Crystal Palace (~ cristal palis [palasio cristal]), London
* 1934 -- La xa de Parsa declara ce Parsa es aora nomida Iran
* 2007 -- Benazir Bhutto es asasinada par un esplode de bomba en Rawalpindi, Pacistan
* 2012 -- La Corpora de Autos de Toyota acorda per paia $1 bilion per salda plu ca 12 prosedes sur aselera subita en alga de se autos
----
26 desembre
* 1878 -- La boteca prima en la SUA cual ia instala luses electrical abri (en Philadelphia [~ filadelfia])
* 1975 -- La servi prima de transporta ultra la rapidia de sona (un Tupolev 144 en la Uni Soviet)
* 1986 -- La telenovela 'Xerca per Doman' fini pos 35 anios
* 1991 -- La fusil de Jack Ruby es vendeda per $220,000 en un subasta
* 1994 -- Comandos franses fini la prende par forsa de un avion en Marseille (~ marse)
----
25 desembre
* 1 -- La natal prima, seguente Dionysus Exiguus (en latina), la creor de la eda comun,
* 337 -- La data la plu posible temprana ce natal ia es selebrada a 25 desembre
* 352 -- La data prima ce natal ia es serta selebrada a 25 desembre
* 1651 -- La Corte Jeneral de Massachusetts (~ masatxusets), SUA, comanda un multa de 5 xilinges per los ci segue un tal dia como natal'
* 1928 -- 14,887 persones es presente per un max de criceta a natal en Australia
----
24 desembre
* 1818 -- 'Note silente' composada par Franz Xaver Gruber (~ frants saver gruber); cantada per la ves prima en la dia seguente
* 1889 -- Daniel Stover e William Hance (~ uiliam hants) patenta la bisicle cual freni cuando on pedali a retro
* 1942 -- La vola prima con la enerjia de un motor de jeto de un bomba 'V1', en Peenemünde (~ penamunda), Deutxland
* 1973 -- Un naveta inversa prosima a la costa de Ecuador, 200 mori par inonda
* 2010 -- En un trata nova, Frans es contratada per construi du barcones de gera per Rusia
----
23 desembre
* 1690 -- John Flamsteed (~ dxon flamstid) oserva Urano sin persepi ce lo es nondescovreda
* 1973 -- 6 paises de la golfo de Parsa dupli se presos de petrolio
* 1997 -- La departe de cultiva american calcula ce lo costa $149,820 per eleva un enfante asta 18 anios
* 2011 -- La Duxe de Edinburgh (~ edinboro), Prinse Phillip, entra ospital per trata a un arteria de la cor blocida
* 2012 -- Avisas contra ativia de volcanes es donada en Txile e Arjentina en areas prosima a la volcan Copahue (copaue), pos cuando lo comensa vomiti sene
----
22 desembre
* 1882 -- La cadena prima de luses de arbor de natal es creada par Thomas Edison
* 1944 -- La sumarina 'Swordfish' (~ sordfix [pex spadin]) parti de Pearl Harbor (~ perl harbor [porto de perla]) per Japan
* 1988 -- 2 rubores, portante uniformas de polisia, ruba un camion blindada de $3 milion en New Jersey (~ niu/nu dxerzi), SUA
* 1989 -- Pos 23 anios de rena tiranal, Romania estrae Nicolae Ceauşescu (~ nicolai txauxescu)
* 1997 -- La pil par 'Merck' per calvia de omes es aprobada par la departe american 'Food and Drug Administration' (~ fud and drug administrexon [dirije de comeda e drogas])
----
21 desembre
* 1891 -- 18 studiantes fa la jua prima de bascetbal (a la universia de Springfield, SUA)
* 1913 -- La parolas crusada prima (con 32 indicetas) es publicida en 'New York World' (~ niu/nu iorc uorld [la mundo de iorc nova])
* 1937 -- La filma prima de anima con color e sona es prima mostrada, 'Snow White' (~ sno uait [blanca como neva])
* 1958 -- Charles De Gaulle (~ xarl d gol) gania un periodo de 7 anios como la presidente prima de la republica 5 de Frans
* 1968 -- La viaja prima per atera sur la luna con omes (Borman, Lovell e Anders) comensa (Apollo 8)
----
20 desembre
* 1891 -- Om forte Louis Cyr (~ lui sir) resiste la tira de 4 cavalos
* 1928 -- La posta internasional prima traeda par treno de canes parti de Minot, Maine (~ men) per Montreal, Quebec (~ cebec)
* 1977 -- La pasea prima en spasio es fada par Гео́ргий Гре́чко (~ georgi grietxca)
* 1987 -- La naveta 'Doña Paz' (~ donia pas) afonda pos un xoca con la barcon de petrolio 'Vector'. Sirca 4386 persones mori
* 1988 -- Teroristes de diretos per animales bombi con foco la boteca de departes Harrod's
----
19 desembre
* 1551 -- La costa ueste de Nederland es colpada par un siclon
* 1891 -- La Uni de Rugbi de Canada formi
* 1922 -- Mrs Theresa Vaughn (~ teriza von), 24 anios, confesa en corte ce el es sposida a 62 veses
* 1955 -- Carl Perkins (~ purcinz) rejistra la canta 'Blue Suede Shoes' (~ blu sued xuz [sapatos de pelo de cuoro blu])
* 1988 -- Un bomba nonesplodeda de la gera mundal 2 es trovada en Frankfurt, Deutxland. 5000 abitores es sortida
----
18 desembre
* 1832 -- Charles Darwin (~ txarlz daruin) visita Vurland
* 1865 -- La cambia 13 de la constitui de la SUA es validida e sclavia es abolida
* 1952 -- En basebal, Ellis W Ryan (~ elis dubliu raian) resinia como presidente de la Cleveland Indians (~ clivland indianz [la americanes orijinal de cleveland])
* 1980 -- La conserta de Bruce Springsteen (~ brus springstin) aveni en Madison Square Garden (~ madison scuer garden [la jardin de la plaza madison])
* 1993 -- Kevin Scott patini a un recordo mundal de rapidia, 1 cilometre en 1:12.54
----
17 desembre
* 1791 -- La regula de trafica american crea la strada prima de un dirije
* 1900 -- Un premio prima de 100,000 frances es ofreda per comunicas con estrateranes. Los de Marte es escluida como 'tro fasil'
* 1903 -- A 1035 a.m. la vola sustada prima en avion con motor aveni (pilot Orville Wright)(~ orvil rait)
* 1978 -- La Organiza de Paises cual Esporta Petrolio (OPEP) leva la presos de petrolio par 18 persentos
* 1993 -- La stela de 'Northern Exposure' (~ nordern ecspojur [esposa norde]), Barry Corbin, cade de se cavalo
----
16 desembre
* 1431 -- Re Henry 6 de England es coronida como re de Frans
* 1838 -- La Boers (~ burs [cultivores]) vinse contra la xef de la Zulus, Dingaan, en Africa Sude
* 1900 -- La armada de la Boers su Jeneral Kritzinger catura la colonia de la Capo
* 1901 -- Jeneral Kritzinger de la Boers es caturada
* 1959 -- Neva cadente en la vale de Lowari (~ loari) en Pacistan ueste mata 48 persones
----
15 desembre
* 1593 -- Nederland dona un patenta per un molin de venta con un arbor de maniveles
* 1680 -- Un revolta contra impostas aveni sur la isola de Terschelling (~ tersheling), Nederland, par causa de un imposta sur sereal
* 1810 -- La jornal eres prima es publicida en la SUA, 'La Xamroc'
* 1959 -- La frates Everly rejistra 'Let It Be Me' (~ let it bi mi [ta ce lo es me])
* 1982 -- Bill Parcells (~ bil parselz) deveni la instruor 12 de la New York Giants (~ niu/nu iorc dxaiants [la jigantes de iorc nova])
----
14 desembre
* 1656 -- Perlas artifisial es prima fabricada par M Jacquin (~ jacen) en Paris de peletas de jeso covreda en scamas
* 1798 -- David Wilkinson (~ devid uilcinson) de Rhode Island (~ rod ailand) patenta un macina per la fabrica de torcas e bulones
* 1901 -- La torneo prima de tenis de table aveni (a la Acueria Reial de London)
* 1967 -- Asida desosiribonucleal (ADN) creada en un tubo de proba
* 1991 -- La naveta 'Salem Express' (~ selem ecspres) afonda en la Mar Roja -- 476 matadas
----
13 desembre
* 1642 -- Zeland Nova es descovreda par navigor nederlandes, Abel Tasman
* 1816 -- Un patenta per un doca seca es donada a John Adamson, Boston, SUA
* 1843 -- 'Un Canta de Natal' par Charles Dickens (~ txarlz dicinz) es publicida. 6000 copias es vendeda
* 1916 -- Un avalanxa mata 10000 soldatos italian e osteraices en 24 oras en Tirol
* 1928 -- La cravata de clip es desiniada
----
12 desembre
* 1897 -- La cartun prima nomida 'Katzenjammer' (~ catsen iamer) par Rudolph Dirks (~ rudolf durcs) apare en un jornal en Iorc Nova
* 1913 -- La pinti 'Mona Lisa', furada de la museo de Louvre (~ luvr) en 1911, es reganiada
* 1915 -- La avion prima de metal vola en proba a Dessau, Deutxland
* 1957 -- Cantor Jerry Lee Lewis (~ dxeri li luis) sposi se sobrina, Myra Gale Brown (~ maira gel braun), 13, cuando ancora sposida a se sposa Jane Mitcham (~ dxen mitxam)
* 1986 -- Un avion Tupolev-134 cade a tera en Berlin este e mata 70
----
11 desembre
* 1620 -- 102 peregrinores sur la barcon 'Mayflower' (~ meflaua [flor de maio]) atera a Plymouth Rock (~ plimot roc)
* 1792 -- La prosede comensa contra la re de Frans, Louis 16 (~ lui), acusada de tradi
* 1866 -- La corsa prima de iates traversa la Mar Atlantica
* 1978 -- 6 omes mascida lia 10 empleadas en la area de carga de Lufthansa en la airoporto John F Kennedy en Iorc Nova, e fura $5.8 milion en mone e joalas
* 2010 -- La tarifa de infla en Xina ateni 5.1 persentos, la plu alta de 28 menses
----
10 desembre
* 1582 -- Frans comensa usa la calendario gregorian
* 1810 -- Tom Cribb de Britan vinse contra Tom Molineaux (~ molino) de la SUA en la campionia prima de boxe interazal
* 1869 -- La direto de vota per femes es donada en Wyoming (~ uaioming), SUA (la stato prima cual fa lo)
* 1939 -- La 'Koninklijke Nederlandse Voetbalbond' (KNVB) (~ coninclica nederlantsa futbalbont [asosia reial de futbal nederlandes]) selebra se aniversario 50
* 1974 -- Helios 1 es lansada par la SUA e Deutxland. Plu tarda, lo fa la vola la plu prosima a la sol par un sonda de spasio
----
9 desembre
* 1910 -- Soldatos franses ocupa la site con porto, Agadir, Maroco
* 1939 -- Un ataca par aira contra Helsinki, Suomi, par Rusia
* 1953 -- La compania 'General Electric' (~ dxeneral electric [eletrica jeneral]) anunsia ce tota empleadas comuniste va es desempleada
* 1967 -- Jim Morrison (~ dxim morison) es arestada sur la stadio per un disturba de la pas
* 1980 -- En Boston, SUA, la temperatur ateni 61 grados de farenheit a 1 ora en la matina
----
8 desembre
* 1792 -- La seni prima en la SUA, Henry Laurens (~ henri lorenz)
* 1909 -- La sosia de banda de avias es fundida
* 1965 -- 'Flor de Cacto' par Abe Burrows (~ eb buroz) es mostrada prima en la site de Iorc Nova
* 1974 -- La monarcia de Elas es rejetada par un referendo
* 2010 -- La turo Eiffel en Paris es cluida par causa de neva
----
7 desembre
* 1741 -- Elizabeta Petrovna deveni tsara de Rusia
* 1907 -- Eugene Corri (~ iudxin cori) deveni la arbitror prima en un boxeria
* 1926 -- La friador de gas es patentada
* 1941 -- La japanes ataca Pearl Harbor (~ purl harbor [porto perlin]) e la SUA entra la gera mundal du en 'un data cual va vive en mal fama'
* 1961 -- Kim Rawson (~ cim roson), sposa de Guido Crufio, nase
----
6 desembre
* 1787 -- Laurens Pieter van de Spiegel (~ piter fan d spigel) asiniada como conselor nederlandes sur pensiones
* 1822 -- Un scola veterinar abri en Utrecht (~ utreht)
* 1849 -- Harriet Tubman evade sclavia en Maryland, SUA
* 1965 -- 2 camionetas colpa un fola de dansores en Sotouboua (~ sotubua), Togo, e los mata 125 persones
* 1982 -- 11 soldatos e 6 siviles mori par causa de un esplode de bomba poneda par la Armada de Libri de Nasionalistes Eres, en Ballykelly (~ baliceli), Eres Norde
----
5 desembre
* 1766 -- La subasteria de Christie (~ cristi) en London fa se vende prima
* 1848 -- Presidente Polk ativi la 'Gold Rush' (la freta per oro) confirmante la descovre de oro en California, SUA
* 1952 -- La nebla fumosa la plu mal a cualce ves en London mata asta 8,000 persones
* 1989 -- Un tren de TGV en Frans ateni un recordo mundal de rapidia a 482.4 cpo (cilometres per ora)
* 1993 -- Astronautas comensa la repara de la telescopio 'Hubble' (~ hubel) en spasio
----
4 desembre
* 1680 -- Un gal en Roma pone un ovo impresada par un cometa no vidable ante 16 de desembre
* 1798 -- Cultivores rebelante flames ocupa Hasselt
* 1829 -- Britan proibi 'suttee' en India (la rituo do la vidua fema lansa se sur la foco funeral de se sposo)
* 1930 -- La Vatican aproba la 'metodo ritmosa' como contraconsepi
* 1961 -- La Museo de Arte Moderna pende inversada 'Le bateau' (~ l bato [la barco]) par Matisse tra 47 dias
----
3 desembre
* 1621 -- Galileo Galilei inventa la telescopio
* 1818 -- Illinois (~ ilinoi) deveni la stato 21 de la SUA
* 1939 -- La simfonio 6 de Dmitri Xostacovitx es mostrada prima
* 1953 -- La cuatruple de strumentos de cordeta 5 de Dmitri Xostacovitx es mostrada prima
* 1967 -- La opera prima de un cor umana es presentada par dotor Christian Barnard (~ cristian), Africa Sude
----
2 desembre
* 1804 -- Naploeon es coronida en Paris como la imperor de Frans par la Pape Pius 7
* 1882 -- La zo de Artis en Amsterdam abri un acueria
* 1901 -- Gillette (~ jilet) patenta la rasador prima desprendable
* 1961 -- Fidel Castro declara ce el es un marxiste e va gida Cuba a comunisme
* 1964 -- La tonsiles de Ringo Starr es sutraeda
----
1 desembre
* 1640 -- Portugal gania autonomia pos 60 anios de rena espaniol
* 1891 -- James Naismith (~ dxemz nesmit) crea la jua de bascetbal
* 1928 -- Un museo de ferovia abri en Utrecht (~ utreht), Nederland
* 1931 -- La ramo de Ottawa (~ odaua) de la moneria reial comensa opera como la Moneria Reial de Canada
* 1959 -- La foto prima en color de la Tera de spasio
----
30 novembre
* 1630 -- Sirca 16,000 abitores de Venezia mori en esta mense par causa de la pesta
* 1782 -- Britan suscrive un acorda per reconose la autonomia de la SUA
* 1838 -- Mexico declara gera contra Frans
* 1983 -- La polisia libri la maniate furada de bir, Alfred Heineken (~ haineken), en Amsterdam
* 2005 -- La transplanta prima de un fas es fada en Frans
----
29 novembre
* 1596 - Re Felipe 2 desvalua la mone de Espania
* 1775 -- Sir James Jay (~ sur dxemz dxe) inventa inca nonvidable
* 1812 -- La Armada Grande de Napoleon traversa la rio de Biarezina en retira de Rusia
* 1932 -- Frans suscrive un trata de nonataca con Rusia
* 1987 -- Un jeto corean desapare prosima a Burma, tota la 115 pasajores es perdeda
----
28 novembre
* 1340 -- La batalia de Salado, Espania. La invade de Moros es forsada a via
* 1821 -- Panama declara se autonomia de Espania
* 1854 -- La armada nederlandes para un revolta xines en Borneo
* 1905 -- Arthur Griffith (~ arfur grifif) forma Sinn Fein (~ xin fen) en Dublin
* 1916 -- La ataca prima en aira sur London (par la deutxes)
----
27 novembre
* 1582 -- William Shakespeare (~ uiliam xecspir) sposi Anne Hathaway (~ an hafa-ue)
* 1895 -- Alfred Nobel fundi la premio de Nobel
* 1910 -- La stasion la plu grande en la mundo, Penn, Iorc Nova, abri
* 1912 -- La bandera nasional de Albania es adotada
* 1946 -- Futbal -- England vinse contra Nederland 8-2
----
26 novembre
* 1580 -- En Frans la protestantes e la catolicas suscrive un trata de pas
* 1703 -- Un tempesta ferose colpa England, miluples es matada
* 1865 -- 'Alisia en la Pais de Mervelias' es publicida en la SUA
* 1932 -- Donald Bradman de Australia completi 10,000 'runs' (cores) en criceta de prima clase, en 126 'innings' (a la baston)
* 2008 -- Atacas par teroristes en Mumbai mata plu ca 195 persones tra 4 dias
----
25 novembre
* 1783 -- Britan sorti de la site de Iorc Nova, se posto militar ultima en la SUA
* 1885 -- Alfonso 12, re de Espania, mori a 27 anios
* 1950 -- La N.U. dona Ertra a Itiopia
* 1973 -- Un colpa de stato sin sangue estrae la presidente elinica, Jorjos Papadopulos
* 1983 -- La fura la plu grande en la mundo aveni en Heathrow (~ hifro), England (£25,000,000 valua de oro)
----
24 novembre
* 1434 -- La rio Thames (~ temz) en London jela
* 1587 -- La batalia de Auneau (~ ono). Henri de Guise (~ onri d giz) gania
* 1715 -- La rio Thames jela denova
* 1922 -- La parlamento italian dona potias autocrata a Mussolini 'per 1 anio'
* 1985 -- Comandos egipsian ataca un Boeing (~ bo-ing) caturada en Malta. 60 mori
----
23 novembre
* 1783 -- Annapolis, Maryland, deveni la capital de la SUA asta junio 1784
* 1852 -- A un tempo poca pos medianote, un colpa agu causa ce lago Merced (~ mersed) cade 9 metres
* 1897 -- La puntipeneta es patentada par J.L.Love (~ lov)
* 1947 -- La governa franses de Schumann es fundida
* 1963 -- 'Dotor Ci', la serie brites longa durante de naras siensal, comensa en England
----
22 novembre
* 1831 -- La opera 'Robert le Diable' (~ rober l diabl [roberto la diablo]) es presentada en Paris
* 1842 -- La montania 'St Helens' en Washington (~ uoxington) eruta
* 1910 -- Arthur Knight (~ arfur nait) patenta bastos de golf con ases de aser
* 1943 -- Lubnan declara se autonomia de Frans
* 1963 -- John F Kennedy (~ dxon ef cenedi), la presidente 35 de la SUA (1961-1963) es asasinada en Dallas a 46 anios
----
21 novembre
* 1871 -- La bal de canon umana prima, Emilio Onra, es xutada
* 1906 -- Xina proibi la comersia en opio
* 1918 -- Du trenes de muni deutx esplode en Hamont, Beljia. 1750 mori
* 1981 -- 400,000 protesta en Amsterdam contra misiles de turi
* 2011 -- Plu punis es forsada par la SUA, Canada e la RU contra Iran sur se program nucleal
----
20 novembre
* 1272 -- Edward 1 (~ eduod) proclamada como la re de England
* 1805 -- La opera de Beethoven (~ bethofen) 'Fidelio' es mostrada prima en Viena
* 1873 -- La sites competente, Buda e Pest (~ pext) uni per formi la capital de Ungaria, Budapest
* 1917 -- La batalia prima de tances (Britan avansa tra la linias deutx)
* 1969 -- Futbal - Pele fa se gol 1000
----
19 novembre
* 1700 -- La batalia de Narva -- re svensce, Karel 12, vinse contra Rusia
* 1824 -- Un tempesta causa un deluvia en Sanct-Peterburg, Rusia, cual mata 10,000
* 1952 -- Espania junta con la ONUISC (Organiza de Nasiones Unida per Instrui, Siensa e Cultur)
* 1962 -- Fidel Castro aseta la sutrae de armas soviet
* 2008 -- Claudia Castillo reseta un transplanta susedosa de la tracea con un organo creada de un selula madrin
----
18 novembre
* 1307 -- Wilhelm Tell (~ vilhelm) xuta un poma de sur la testa de se fio
* 1793 -- La Louvre (~ luvr) abri ofisial en Paris
* 1852 -- La funeral de stato de la Duke of Wellington (dxuc [duxe] ov uelington) en London
* 1963 -- La 'Bell Telephone Company' (~ bel telefon compani) introdui la telefon prima con botones puiable
* 1991 -- Muslimes xia libri la ostajes Terry Waite e Thomas Sutherland (~ teri uet/tomas suverland)
----
17 novembre
* 1558 -- La rea Elizabeth 1 oteni la trono engles pos la mori de la rea Mary
* 1820 -- La descovre de Antartica par Nathaniel B. Palmer (~ pamer) sur la barco a velo 'Hero' (~ hiro [eroe])
* 1884 -- La polisia aresta la boxor John L. Sullivan per cruelia en la ronda du de un combate de boxe
* 1913 -- La canal de Panama abri
* 1973 -- Presidente Nixon (~ nicson) de la SUA dise, '...persones debe sabe esce se presidente es un criminal o no. Bon, me no es un criminal.'
----
16 novembre
* 13 -- La prosegue vinsente de Tiberius en Roma pos la aseja de Deutxland
* 1380 -- La re de Frans, Charles 6 (~ xarl), declara ce per sempre on no va ave impostas
* 1811 -- Un trematera en Missouri (~ mizuri/mizura) causa ce la rio Mississippi flue a retro
* 1936 -- La Forte de Aira deutx comensa bombi Madrid
* 1993 -- Presidente Ieltsin de Rusia causa ce la museo de Lenin clui
----
15 novembre
* 1956 -- La filma prima de Elvis Presley 'Love Me Tender' es prima mostrada en Iorc Nova
* 1964 -- Futbal - la stela de Ajax (~ aiacs) Johan Cruyff (~ iohan croif) fa se debu contra GVAV
* 1988 -- La Organiza per Libre de Filastin (OLF) proclama la stato de Filastin e reconose la esiste de Israel
* 1994 -- Helmut Kohl es elejeda como la xef de Deutxland (votas 341-340)
* 2010 -- En Praga, siensistes desentera la restas de la astronomiste de la desenio 16, Tycho Brahe, en un atenta per solve la misterio de se mori subita
----
14 novembre
* 1666 -- Samuel Pepys (~ samiul pips) reporta sur la transfusa prima de sangue (entre canes)
* 1851 -- 'Moby Dick' par Herman Melville (~ melvil) es publicida
* 1908 -- Albert Einstein (~ ainstain/ainxtain) presenta se teoria cuantal de lus
* 1940 -- Aviones deutx destrui la plu de Coventry, England
* 1968 -- La opera prima en Europa de transplanta de pulmon
----
13 novembre
* 1843 -- La montania de Rainier (~ renier) en la stato de Washington (~ uoxington) SUA, eruta
* 1907 -- La bisicliste franses, Paul Cornu, vola la elicotor prima (con rotor duple)
* 1952 -- Ungias falsa es vendeda per la ves prima
* 1970 -- Un siclon mata 300,000 persones (estimada) en Chittagong (~ txitagong), Bangladex
* 1986 -- Presidente Reagan (~ regan) confesa sur la vende de armas a Iran
----
12 novembre
* 1859 -- Jules Léotard (~ jul leotar) presenta la ata prima de trapezio en Paris
* 1910 -- La presenta perilosa prima en un filma: un om tufa a en la rio Hudson de un balon ardente
* 1927 -- La tunel prima su acua abri, cual lia New York a New Jersey (~ nu iorc/nu dxerzi)
* 1933 -- La jua prima de futbal en Philadelphia (~ filadelfia) -- lo ia es nonlegal a ante
* 1981 -- La mision 2 de la naveta spasial Columbia 2. Per la ves prima un naveta spasial es lansada a du veses
----
11 novembre
* 1889 -- Washington (~ uoxington) entrada como la stato 42 de la SUA
* 1918 -- Polsca declara se autonomia
* 1923 -- La flama eterna es ensendeda per la tomba de la 'soldato nonconoseda' a la Arc de Triomphe
* 1961 -- Stalingrad es renomida Volgograd
* 2004 -- Iaser Arafat mori
----
10 novembre
* 911 -- Konrad 1 elejeda como Re de Deutxland
* 1444 -- La batalia de Varna: Sultan Murad 2 vinse contra la crusadores
* 1951 -- La telefoni a un distantia longa prima sin la aida de un operor es fada
* 1991 -- Martina Navratilova deveni egal con Chris Evert: 157 ganias en torneos profesal
----
9 novembre
* 1799 -- Colpa de stato par Napoléon Bonaparte, ci va deveni la consul prima de Frans
* 1918 -- Kaiser Wilhelm 2 (~ caizer [imperor] vilhelm) renunsia se pos la vinse de Deutxland en la gera mundal 1 e Bayern es proclamada como un republica
* 1936 -- La governa albanian de Frasheri (~ fraxeri) cade
* 1980 -- La presidente Saddam Hussein declara un gera santa contra Iran
* 1985 -- Gary Kasparov deveni la campion de la mundo de xace
----
8 novembre
* 1923 -- Hitler atenta, nonsusedosa, se 'revolui de beveria' en München (~ munhien)
* 1939 -- Un atenta nonsusedosa per asasina Hitler a Burgerbraukeller, München
* 1940 -- La Royal Air Force (~ roial er fors [forte de aira reial] bomba München
* 1942 -- Hitler declara la cade de Stalingrad en un beveria en München
* 2007 -- Bayern München (~ baiern) e Bolton Wanderers (~ uondererz) ateni egal 2-2 en un max de futbal en München
----
7 novembre
* 921 -- La trata de Bonn: Frans de la este e Frans de la ueste reconose la un la otra
* 1872 -- La barcon american la 'Mary Celeste' (~ meri selest) comensa naviga de Iorc Nova en un viaja cual fini cuando lo es descovreda abandonada misteriosa en la mense seguente
* 1908 -- La nederlandes catura la marina de Venezuela
* 1931 -- La Republica de la Popla de Xina proclamada par Mao Zedong (~ mau)
* 2010 -- La Rea de England crea un paje en 'Facebook' (~fesbuc) ma nun es permeteda a 'puia' o 'amini' el
----
6 novembre
* 1572 -- Un supranova es videda en la constela conoseda como Cassiopeia
* 1844 -- La Republica Dominican gania se autonomia
* 1957 -- Felix Gaillard (~ felics gaiar) deveni la Ministro Xef de Frans
* 1968 -- Richard Nixon (~ ritxard nicson) deveni la presidente 37 de la SUA
* 1979 -- Khomeini (~ homeni) comensa rena Iran
----
5 novembre
* 1605 -- 'La conspira de polvo negra' -- catolicas atenta esplode la parlamento engles. La conspira es descovreda e la conspiror xef, Guy Fawkes (~ gai focs) es pendeda
* 1854 -- La gera de la Crimea: un forte brites e franses vinse contra un forte rusce de 50,000
* 1916 -- Imperor Wilhelm 2 (~ vilhelm) e Franz Jozef 1 (~ frants iozef) fundi la Rena de Polsca
* 1977 -- René Goscinny (~ rene gosini) la scrivor franses (operas incluinte 'Astérix') mori a 51 anios
* 2010 -- Espania protesta contra la visita de la Pape Benedict 16
----
4 novembre
* 1576 -- La espanioles vinse contra la ualones e catura Antwerpen, Beljia
* 1866 -- La Rena de Italia ajunta Venezia
* 1880 -- La caxa rejistrante prima es patentada par James e John Ritty (~ dxemz/dxon riti) de Dayton, Ohio (~ deton, ohaio)
* 1961 -- Karamanlis deveni la ministro xef de Elas
* 2008 -- Barack Obama es elejeda como la presidente 44 de la SUA
----
3 novembre
* 1679 -- Un panica grande aveni en Europa sur la prosimi de un cometa
* 1862 -- La Dotor Richard Gatling (~ ritxard gatling) patenta se mitraliador
* 1883 -- La Corte Suprema de SUA deside ce americanes nativa no pote es americanes
* 1992 -- Bill Clinton gania la eleje presidental contra Presidente Bush (~ bux)
* 2011 -- La confere alta de la paises de la G20 comensa en Cannes, Frans (~ can). Discutes foca sur la crise continuante sur la Euro
----
2 novembre
* 1914 -- Britan ajunta Cipros
* 1942 -- Montgomery vinse contra Rommel en la batalia de El Alamein
* 1950 -- George Bernard Shaw (~ dxordx bernard xo) mori a 94 anios
* 1953 -- Pacistan deveni un republica muslim
* 1964 -- Faisal segue Saudi como re de Arabia Saudi
----
1 novembre
* 1570 -- Nederland sufri deluvias -- miluples matada
* 1755 -- Un trematera en Lisboa mata plu ca 50,000
* 1922 -- La impero de la Osmanianes abolida
* 1959 -- Jacques Plante (~ jac plant) deveni la golor prima en la Liga Nasional de Hoci ci porta un masca (en cuando el jua per la Montreal Canadiens/Les Canadiens de Montréal)
* 1985 -- Ator Phil Silvers (~ fil silverz), conoseda per se carater Serjento Bilko, mori en cuando el dormi
----
31 otobre
* 834 -- La vijila prima de tota santas es selebrada
* 1541 - Michelangelo pinti 'la judi ultima' en la egleseta Sistina
* 1864 -- Nevada deveni la stato 36 de la SUA
* 1914 -- Britan e Frans declara gera contra Turcia
* 1941 -- Monte Rushmore (~ raxmor) es completida
----
30 otobre
* 701 -- Joan 6 de Elas comensa se rena como la Pape
* 1534 -- La Parlamento de England fa ce Re Henry 8 deveni la xef de la eglesa engles -- un rol tenida en la pasada par la Pape
* 1697 -- Deutxland suscrive un trata de pas con England/Nederland/Frans/Espania/Brandenburg cual fini la gera de 9 anios
* 1930 -- Turcia e Elas suscrive un trata de amia
* 1995 -- En un referendo, Quebec (~ cebec) vota per resta como un parte de Canada
----
29 otobre
* 1682 -- William Penn atera en lo cual aora es conoseda como 'Chester, Pennsylvania' (~ txester, pensilvenia)
* 1787 -- La opera 'Don Giovanni' es presentada (en Praga)
* 1914 -- Barcones de gera turces ataca la Mar Negra
* 1944 -- La Uni Militar Enarmada 1 de Poland libri Breda, Nederland
* 1964 -- La Stela de India e otra joalas es furada en Iorc Nova, SUA
----
28 otobre
* 1422 -- La fio de la re Charles (xarl) 6 deveni re de Frans con la nom Charles 7
* 1646 -- En Massachusetts, SUA (~ masatxusets) americanes nativa vade a un asembla en un eglesa per protestantes per la ves prima
* 1740 -- Ivan 6 deveni la Tsar de Rusia
* 1900 -- Pos plu ca sinco menses, la juas olimpial du clui, en Paris, Frans
* 1962 -- Хрущёв (Hruxtxof) comanda la retira de misiles de Cuba, e fa ce la crise fini
----
27 otobre
* 1492 -- Cristoforo Colombo descovre Cuba e reclama lo per Espania
* 1662 -- England vende Duinkerken a Frans per 2.5 milion livres
* 1867 -- Garibaldi marxa contra Roma
* 1913 -- La presidente de la SUA, Woodrow Wilson (~ uodro uilson) dise ce la SUA va ataca nunca un otra pais
* 2011 -- Miluples de protestores en Madrid, Espania, demanda ce la governa sesa rena
----
26 otobre
* 1492 -- Penetas de grafito es usada per la ves prima
* 1810 -- La SUA ajunta Florida
* 1863 -- La regulas de futbal es normida
* 1905 -- La uni entre Noria e Sveria fini
* 1938 -- Du Pont nomi se stofa nova sintesal 'nylon' (~ nailon)[nilon]
----
25 otobre
* 1131 -- La coroni de Louis 7 ( ~ lui) la joven, Re de Frans
* 1521 -- La Imperor Karel 5 proibi construidas de lenio en Amsterdam
* 1760 -- George 3 (~ dxordx) deveni la Re de England
* 1870 -- Cartas postal es usada per la ves prima en SUA
* 1993 -- La ator Vincent Price (~ vinsent prais) mori par causa de canser de la pulmones, eda 82
----
24 otobre
* 1492 -- 24 iudis es ardeda a la palo en Mecklenburg, Deutxland
* 1596 -- La batalia de Kerestes -- la osmanianes vinse contra Osteraic-Magiar e Deutxland
* 1857 -- La club de futbal prima, Sheffield FC (~ xefild) es fundida en England
* 1945 -- La PC/PS/MRP gania un eleje parlamental en Frans
* 1945 -- Vidkun Quisling (~ vidcun cvisling) xef nazi de Noria entre 1942 e 1945 es esecutada a la eda de 58
----
23 otobre
* 1642 -- La batalia de Edgehill, Warwickshire (~ edxhil, uoricsxir) en la gera interna engles
* 1690 -- Revolta en Haarlem pos un proibi publica contra fuma
* 1814 -- La sirurjia plastica prima es fada (en England)
* 1975 -- Un batalia entre soldatos cuban e sudafrican aveni en Angola
* 1990 -- Irac anunsia la relasa de 330 ostajes franses
----
22 otobre
* 1797 -- La salta con paracade prima (par André-Jacques Trim [~ andre jac trim]), supra Paris
* 1897 -- La venderia de autos prima abri en London
* 1968 -- Apollo 7 reveni a la Tera
* 1980 -- La governa cuatro de Martens formi en Beljia
* 2010 -- En Uganda, 20 persones mori e 20,000 persones es malada par causa de la pulga de arena
----
21 otobre
* 1492 -- Colombo descovre America
* 1652 -- Re Louis 14 revade a Paris
* 1727 -- Rusia e Xina acorda sur cambias a se limitas
* 1950 -- La armada xines ocupa Tibet
* 1994 -- La ponte de Seongsu en Seul, Corea Sude colasa, 32 matada
----
20 otobre
* 1097 -- La crusadores prima ariva en Antiocia
* 1740 -- Maria Theresia deveni la renor de Osteraic, Magiar e Boemia
* 1820 -- Espania vende un parte de Florida a la SUA per $5 milion
* 1926 -- Un siclon en Cuba mata 600
* 1988 -- Un om enarmada con esplodentes esplode se en la metro de 125 St en New York (~ nu iorc)
----
19 otobre
* 1812 -- Napoleon comensa se retira de Moscva
* 1951 -- Presidente Harry S. Truman fini formal la state de gera contra Deutxland
* 1960 -- Frans permete ce Muritania gania se autonomia
* 1963 -- La 'Beatles' (~ bitelz) rejistra la canta 'Me Vole Teni Tu Mano'
* 1974 -- Mickey Redmond (~ mici redmond) de la Detroit Red Wings (~ ditroit red uingz [alas roja de detroit]) fa se tre goles prima contra Washington Capitals (~ uoxington capitalz [la capitales de Washington])
----
18 otobre
* 1534 -- Un xasa nova de protestantes franses comensa
* 1863 -- La SUA oteni Alaska de Rusia
* 1878 -- La inventor Thomas Edison fa ce eletrica es disponable en casas
* 1909 -- La Comte de Lambert (~ cont de lamber) de Frans fa un recordo de altia de aviones a 300 metres
* 1931 -- Thomas Edison mori a West Orange, New Jersey (~uest orindx, nu dxerzi) eda 84
* 1979 -- La aiatola Khomeini (~ homeni) de Iran, comanda ce esecutas coletiva sesa
----
17 otobre
* 1707 -- Composor deutx Johann S. Bach (~ iohan bah) sposi a se sobrina, Maria Bach
* 1855 -- La prosede de Bessemer per la crea de aser es patentada
* 1904 -- La banco de Italia abri se portes per la ves prima
* 1933 -- Albert Einstein (~ ainstain/ainxtain) ariva en la SUA, un refujada de la nazis en Deutxland
* 2012 -- Astronomistes identifia la planeta la plu prosima a nos sistem solal, Alpha Centauri B (~alfa sentauri) cual sirculi sirca se stela a un distantia multe plu prosima ca Mercurio orbita nos sol
----
16 otobre
* 1757 -- Soldatos osteraices ocupa Berlin
* 1829 -- La otel Tremont, la otel moderna prima de la SUA, abri en Boston
* 1926 -- Mohammed Nadir Khan comensa un colpa en Afganistan, 1200 matada
* 1946 -- 10 xefes de la nazis es pendeda como criminales de gera pos la prosedes de Nürnberg
* 1964 -- Xina deveni la potia nucleal 5 de la mundo
----
15 otobre
* 1581 -- Comandada par Catherine de' Medici, la baletia prima, "Ballet Comique de la Reine", es presentada en Paris
* 1705 -- La marina engles su la comanda de Baron Peterborough (~ piterboro) ocupa Barcelona (~ barselona)
* 1815 -- Napoleon Bonaparte (~ bonapart) es escluida a la isola Saint Helena (~ sent helina)
* 1970 -- Anwar Sadat deveni la Presidente de Egipte
* 1993 -- La bireria de Amstel en Curaçao produi se botel 1.000.000.000
----
14 otobre
* 1066 -- La batalia de Hastings en cual Williame 1 catura England
* 1322 -- Robert 1 (conoseda como Roibert a Briuis) de Scotland vinse contra Re Edward 2 de England a Byland, e forsa Edward a aseta la autonomia de Scotland
* 1944 -- Erwin Rommel, Marexal de Campo deutx, fa suiside, eda 52
* 1953 -- La 3 polisiores fema prima en Nederland comensa se debes
* 2012 -- Amaperil osteraices, Felix Baumgartner, rompe la recordo mundal per desende umana par tufa 39 cilometres de la balon 'Red Bull Stratos' plenida con elio, supra Roswell, New Mexico (~ rozuel, nu mecsico)
----
13 otobre
* 1716 -- La soldatos de Karel 6, la imperor de Magiar, ocupa Temesvar
* 1884 -- Greenwich (~ grenitx) fundida como la linia universal de tempo de lonjitude
* 1943 -- Italia declara gera contra se alia pasada, Deutxland
* 1960 -- Oposores de Fidel Castro es esecutada en Cuba
* 2006 -- Ban Ki-Moon es elejeda como secretor jeneral de la Nasiones Unida
----
12 otobre
* 1285 -- 180 iudis refusa batiza en Munchen, Deutxland. Los es ensendeda
* 1775 -- La marina de SUA es fundida
* 1860 -- Soldatos brites e franses catura Beijing
* 1940 -- Hitler comensa opera "Seelöwe" (leon de mar) - la invade de England
* 2012 -- La Premio Nobel de Pas es donada a la Uni European per 'plu ca ses desenios contribuinte a la progresa de pas e reconsilia, democratia e diretos umana en Europa'
----
11 otobre
* 1521 -- La Pape Leo 10 nomi Re Henry 8 de England "Defendor de la Crede"
* 1689 -- Пётр Алексе́евич (~ piotr alecsievitx) deveni la tsar de Rusia
* 1899 -- La Boers (~ burs; africans per "cultivores") de Africa Sude declara gera contra Britan
* 1945 -- La gera interna de Xina comensa
* 2011 -- La versa de olio de la MV Rena, la barcon abandonada a la costa de Tauranga, Zeland Nova, deveni la desastre ambiente la plu mal de la pais
----
10 otobre
* 1695 -- Re William 3 reveni a England de Nederland sude pos la aseja de Namur.
* 1780 -- La siclon grande de 1780 mata sirca 20,000 a 30,000 en la Caribean
* 1899 -- IR Johnson patenta la strutur per bisicles
* 1944 -- La armada de SUA catura Okinawa
* 2006 -- Google compra YouTube.com per $1.6 bilion
----
9 otobre
* 1290 -- La grupo final de la 16,000 iudis engles, escluida par Re Edward 1, parti
* 1794 -- Soldatos franses ocupa Hertogenbosch (~ hertohenbos), Nederland
* 1870 -- Roma es corporada en Italia par comanda reial
* 1963 -- La forte de aira franses reseta armas nucleal
* 2012 -- En cuando la Canselor de Deutxland, Angela Merkel, visita Elas, un total estimada de 25,000 persones protesta en Atina
----
8 otobre
* 1818 -- Du boxores engles es la prima de usa gantos cuxinida
* 1856 -- La polisia xines embarca la barcon brites "Arrow" e aresta 12 membros de la ecipo xines sur suspeta de piratia e los basi la bandera brites. La gera du entre Britan e Xina comensa
* 1915 -- La batalia de Loos (gera un mundal). Cuasi 430,000 soldatos brites, franses e deutx es matada
* 1918 -- Sarjento Alvin York (de la armada de SUA) mata 25 soldatos deutx e catura 132
* 2003 -- Arnold Schwarzenegger (~ arnolt xvartseneger) es elejeda como la governor de California
----
7 otobre
* 1714 -- Un tumulta en Alkmaar, Nederland, sur un imposta de bir
* 1908 -- Criti revolta contra Turcia e alia se con Elas
* 1913 -- Henry Ford institui un cadena per construi movente
* 1988 -- La bandera de Latvia es levada supra Riga per la ves prima de cuando es ajuntada par Rusia
* 2012 -- Antisa Khvichava (~ hvitxava) un fem jorjian, crededa es la fem la plu vea de sempre, mori a la eda de 132 anios
----
6 otobre
* 1866 -- La ruba prima en un tren en la SUA aveni (la frates Reno prende $13,000)
* 1944 -- La canadianes libri Osteraic
* 1976 -- La Presidente Ford dise "On no ave domina rusce en Europa de este"
* 1991 -- Elizabeth Taylor (~ telor) sposi per la ves oto (a Larry Fortensky)(~ lari fortensci)
* 2000 -- La Presidente de Iugoslavia, Slobodan Milosevic (~ milosevitx) resinia
----
5 otobre
* 610 -- La marina de Heraclio catura Constantinopoli
* 1796 -- Espania declara gera contra England
* 1864 -- La batalia de Allatoona (~ alatuna) aveni en la gera interna de SUA. Un tri de la soldatos de la Uni mori en repulsa los de la Sude
* 1916 -- Soldato Adolf Hitler es ferida en la gera de la mundo un
* 1931 -- La vola prima sin para, traversante la Mar Pasifica, aveni entre Japan e Washington DC (pilotes Herndon e Pangborn)
----
4 otobre
* 1904 -- La dia prima de la metro de New York (~ nu iorc). 350,000 persones turi longo 9.1 milias de reles
* 1910 -- Portugal deveni un republica; Re Manuel 2 fuji a England
* 1923 -- La ator american, Charlton Heston (~ txarlton heston), nase
* 1964 -- La Autostrada del Sol abri entre Milano e Napoli en Italia
* 1993 -- La soldatos de Presidente Ieltsin ocupa la Casa Blanca (la parlamento rusce)
----
3 otobre
* 1691 -- La armadas engles e nederlandes ocupa Limerick, Er
* 1863 -- Lincoln (~ lincon) identifia la jovedi ultima de cada novembre como "la festa per grasia"
* 1929 -- La Rena de serbsces, corvatsces e slovenianes cambia se nom a Iugoslavia
* 1932 -- Irac gania autonomia completa de Britan e junta con la Alia de Nasiones
* 1945 -- La apare publica prima de Elvis Presley (~ prezli) a la eda de des anios
----
2 otobre
* 1492 -- Re Henry 7 invade Frans
* 1853 -- Un lege osteraices proibi ce la iudis posese tera
* 1935 -- La armada italian su Mussolini ataca Itiopia
* 1968 -- Polisia en la Site de Mexico xuta contra studiantes protestante, matante 300-500
* 1990 -- La alias sede tota diretos como ocupores de Deutxland
----
1 otobre
* 1574 -- Un tempesta rompe la paramar de Leiden en Nederland sude; 20,000 soldatos espaniol mori par inonda
* 1795 -- Frans ajunta Nederland sude
* 1938 -- Deutxland ajunta Sudetenland (un tri de Txescoslovensco)
* 1974 -- La prosede comensa en Washington DC sur la asconde de 'Watergate'
* 1988 -- Mikhail Gorbachev (~ mihail gorbatxof) deveni la presidente de la Uni Soviet
----
30 setembre
* 1659 -- Robinson Crusoe (~ cruso) sufri un barcon ruinada
* 1898 -- La site de New York (~ nu iorc) es fundida
* 1939 -- Deutxland e Rusia acorda per divide Polsca
* 1946 -- Von Ribbentrop (~ fon ribentrop) e Goering (~ goring) es condenada a mori a la prosedes de
Nürnberg
* 1974 -- Jeneral Francisco da Costa Gomez (~ fransixcu da coxta gomes) segue Jeneral Spinola como presidente de Portugal
----
29 setembre
* 1066 -- Williame I (~ viliam) de Normande invade England
* 1895 -- Louis Pasteur (~ lui pastor) mori
* 1957 -- 300 mori cuando un tren rapida colpa un tren parada en Pacistan
* 1977 -- Muhammad Ali vinse contra Earnie Shavers (~ urni xeverz) en 15 encontras per gania la premio de campion de la grado pesosa
* 1997 -- La eleje de juriores comensa per la prosede de Terry Nichols (~ teri nicolz) sur la bombi de Oklahoma
----
28 setembre
* 1542 -- João Rodrigues Cabrilho (~ jong rodriges cabrilio) descovre California, a la baia de San Diego, per Espania
* 1745 -- Bonnie Prince Charlie (~ boni prins txarli) deveni la re de Scotland
* 1760 -- La armadas de Rusia e Osteraic ocupa Berlin
* 1785 -- Napoleon Bonaparte (~ bonapart) gradua de la academia militar en Paris (en loca 42 de un clase de 51)
* 1922 -- Mussolini marxa contra Roma
----
27 setembre
* 70 -- La mures de la parte alta de la site de Jerusalem es bateda a ruina par la romanes
* 1509 -- Un tempesta ruina la costa de Flander e Nederland; miles de persones es matada
* 1821 -- La Impero de Mexico declara se autonomia
* 1825 -- Transporta par ferovia es naseda par la reles prima, entre Stockton e Darlington, England
* 1937 -- La scola prima per instrui san Nicolases comensa en Albion, New York
----
26 setembre
* 1733 -- Frans, Espania e Sardinia suscrive un acorda contra la Impero de la Habsburges
* 1907 -- Zeland Nova declara se autonomia de Britan
* 1918 -- Batalia de la Argonne (la batalia major final de la gera mundal un)
* 1938 -- Hitler presenta un esije ultima a la governa txescoslovensce per rena la Sudetenland
* 2010 -- Jorjia cambia se lingua du de rusce a engles
----
25 setembre
* 1777 -- La jeneral engles William Howe (~ Uiliam Hau) vinse Philadelphia (~ filadelfia)
* 1829 -- Un atenta per asasina Simon Bolivar fali
* 1911 -- La barcon blindada franses 'Liberté' esplode en la porto de Toulon (~ tulon); 285 mori
* 1924 - Malcolm Campbell (~ malcom cambel) oteni la recordo mundal per rapidia de autos a 146.6 milias per ora
* 1940 -- En Noria, la Ambasador Xef de Deutxland funda la governa de Vidkun Quisling (~ vidcun cvisling)
----
24 setembre
* 1493 -- Cristoforo Colombo comensa se mision du a la Mundo Nova
* 1829 -- Rusia e la Impero Osmanian suscrive la Trata per Pas de Adrianople
* 1927 -- La Toronto St Patricks de la Liga Nasional de Hoci deveni la Toronto Maple Leafs
* 1943 -- La armada soviet recatura Smolensk de la nazis
* 1990 -- La presidente de Deutxland Ueste, Richard von Weizsäcker (~ Ricart fon Vaitsecer), suscrive la trata de reuni de Deutxland
----
23 setembre
* 1830 -- Soldatos nederlandes ocupa Brusseles
* 1913 -- Roland Garros reali la vola prima entre Europa e Africa supra la Mar Mediteraneo (plu ca 800 km)
* 1932 -- La Renas de Hejaz e Nejd fusa per crea la Rena de Arabia Saudi
* 1941 -- Jeneral de Gaulle (~ de Gol) crea un governa en esclui en London
----
22 setembre
* 1975 -- Sara Jane Moore (~ Sara Djen Mor) atenta asasina la presidente Gerald Ford (~ Djerald Ford) en San Francisco
* 1980 -- Soldatos iraci saisi parte de Iran en un disputa sur limitas; gera comensa
* 1993 -- La Comite Suprema Soviet despedi Boris Yeltsin
----
21 setembre
* 1792 -- La republica prima de Frans deveni creada
* 1814 -- "La Bandera Covreda con Stelas" es publicida como un poesia
* 1937 -- "The Hobbit" es publicida par JRR Tolkien
----
20 setembre
* 1519 -- Fernão de Magalhães comensa la sirconaviga susedosa prima de la mundo
* 1870 -- La armada italian, su la comanda de Vittorio Emanuele II, saisi Roma de la franses
* 2003 -- Un referendo aveni en Latvia per deside se entra a la Uni European
----
19 setembre
* 1893 -- Zeland Nova deveni la pais prima cual dona la direto de vota a femes
* 1922 -- Wilhelmina deveni rea de Nederland
* 1945 -- London -- La Baron Haw-Haw (William Joyce) es condenada a mori
----
18 setembre
* 1812 -- Un foco en Moscva destrui novedes persentos de casas e mil eglesas
----
17 setembre
* 1787 -- On suscrive la constitui de la Statos Unida de America en Philadelphia
----
16 setembre
* 1983 -- Arnold Schwarzenegger deveni un sitadan de la Statos Unida de America
@T Esta feri
@L leteratur/esta_feri
@A Léo Ferré, Patrick Chevin
====== Esta feri ======
par Léo Ferré
traduida par Patrick Chevin
Esta feri
Do mori como tristia de carne la mar
Do en la deserto la vive jerme va
Cual fa de sangue la blancia de la cunas
Cual clui se ante la marmo de la tombas
Esta feri de do me veni
Esta feri
Do vade me labio a leva de la ama
Do bate tu febre poca tamburin e
De do comens' a palpa de ditos tu vine
De do veni la cri' a cada ves la mesma
Esta feri de do tu veni
Esta feri
Cual a borda d'anoia on vide clui se
Como de sur la note alga sicatris
E cual su larmas no fini reabri se
Tal como perlas filida par la capris
Esta feri
Como un sol briliante supra me triste
Com' un jardin abrida sol' a la note
Com' un parfum flotante a marea vole
Com'a supra de me destina un surie
Esta feri de do me veni
Esta feri
Vestida con seda su se bosce negra
Do vade acaso la jeometriste
Per construi de nul alga aidada triste
A veses escavant' en el per la peca
Esta feri de do me veni
Esta feri
Cual on ta vole cose en la desira
Como un cose fada supra la plase
Cual on ta vole vide per sempre clui se
Como un porta abrinte sur la moria
Esta feri de cual me mori
@T Fantasia
@L leteratur/fantasia
@A Gérard de Nerval, Michel Gaillard
====== Fantasia ======
Un poesia de Gérard de Nerval (1852)
Traduida de franses e musicida par Michel Gaillard
((Depinta La flor del deserto, par Yves Gaillard, 1972.))
Lo es un melodia -- per acel me ta dona
Plu ca Rossini, ca Mozart, o ca Weber,
Lo es un melodia vea, jeminte, sombre,
E, per me sola, un majia secreta.
A cada ves, cuando me oia lo,
Mea alma rejoveni par sento anios:
En acel tempo, me crede vide ala
Colinas verde, pal al sol reposante,
E acel castel, de brices e de petras,
Con sua vitros colorida rojin,
E, ance a sirca, un parce grande, e un rio,
Fluente a sua basa, entre la flores.
A pos, un dama, a sua fenetra alta,
Blonde con oios negra, e veste antica:
El ci, posible, en esta otra esiste,
Me ia vide ja, e me recorda aora!
@T Felis el ci, como Ulise
@L leteratur/felis_el_ci_como_ulise
@A Joachim du Bellay, Brian Mansberger
====== Felis el ci, como Ulise ======
par Joachim du Bellay
traduida par Brian Mansberger
Felis el ci, como Ulise, ia fa un viaja bela
O como el ci gania la lana
E alora reveni, plen de usosia e razona
Per vive entre sua jenitores tra la resta de sua eda!
Cuando me va revide, ai, de mea vila peti
la ximine fuminte, e en cual saison
me va revide la jardin de mea casa povre
Lo cual es a me un provinse e tan multe plu?
Plu plasente a me la salon construida par mea asendentes
ca la palasios roman con fasadas osante
Plu ca la marmo dur la ardosia refinada plase me
Plu mea Loire galo ca la Tevere latina
Plu mea Lire peti ca la monte Palatino
E plu ca la aira maral la dulsia de Anjou
@T Fia egosa
@L leteratur/fia_egosa
@A Ahmed Shawqi, Myaleee
====== Fia egosa ======
par Ahmed Shawqi
traduida par Myaleee
Jovenes adula la fia!
Los dise: tu es multe bela!
La fia es fasinada par loda!
Regretable! la bela ia oblida me nom!
Car la nomes de se adorores ia es tan multe!
Si el vide me, el ta iniora egosa me!
An ce entre nos ambos
Ia aveni cosas intima:
Un regarda, un surie, un saluta,
Un parla, un promete, e ultima un encontra!
@T Fini del mundo
@L leteratur/fini_del_mundo
@A Michel Gaillard
====== Fini del mundo ======
Un recorda de Manouna Orti
Traduida de la lingua franses e composada
par Michel Gaillard, 1980
Al costa de mar, a esta fini de la plaia, on ia ave,
entre jardines savajida,
alga casas abandonada, condenada.
Tra la fenetras fratida, on ia vide la mar...
∴
La stasion vea, con sua ponteta de pasea,
la otel "Costa-Bela"
e la "Otel grande de la Plaia", al fini
del terenos savaje do la venta de mar respira,
tota la vestijios de la vila antica cual me ia gusta,
tota la trasas de acel tempo,
los ia cansela --- o! cua los ia fa!
La parce umil, do on ia encontra, no es plu.
∴
De esta stradas do tu ia pasea a tan veses,
de acel locas do mea cor ia nase
poi ia colasa, cual cosa va resta?
A dia pos dia, me deveni un stranjer perdeda.
O, me recorda la dias antica e me plora,
sentante a alta del strada
do tu no apare plu, me clama a me:
« O tu ci plora e plora sin sesa, cua tu ia fa! »
∴
Al costa de mar, a esta fini de la plaia, on ia ave,
en un jardin savajida,
un casa abandonada, condenada.
Tra la fenetras fratida, on ia vide la mar...
@T Fio de la Luna
@L leteratur/fio_de_la_luna
@A Mecano, AS
====== Fio de la Luna ======
La grupo musical espaniol Mecano ia es famosa per sua canta popular de un lejenda vea sur un fem ci ia vole es amada. A pos, un enfante ia nase: Fio de la Luna.
Traduida par AS
Stupida es el ci no comprende.
Un lejenda nara
ce un fem vagante
jura a la luna
asta la leva de matina.
Plorante el ia demanda
a la ariva de la dia
per dona el un om.
"Tu va ave tu om,
pel brun."
De la sielo
ia parla la luna plena.
"Ma per cambia, me vole
la fio prima
ce nase de vos."
De ci se fio es ofreda,
per es no plu sola,
ia va ama ja poca la bebe."
Refren:
Luna, tu vole es madre
e ave no person
ci pote fa un fem de tu.
Dise me, luna de arjento,
ce tu finge fa
con un fio de pel e sangue
A-ha-ha, a-ha-ha,
Fio de la Luna.
De la padre canela
nase un enfante
blanca como la dorso
de un ermelino,
con la oios gris
en loca de oliva --
enfante albino de la luna.
"Maldise de se imaje!
Esta fio es de un otra
e me no silenti el."
Refren:
Luna, tu vole es madre
e ave no person
ci pote fa un fem de tu.
Dise me, luna de arjento,
ce tu finge fa
con un fio de pel e sangue
A-ha-ha, a-ha-ha,
Fio de la Luna.
La om credante se desonorada,
fa pasos a se fem,
cotel en la mano.
"De ci es la fio?
Tu ia engana me serta."
E la fem mori de la feri.
Pos, la om vade a la foresta
con la enfante en la brasos
e ala abanda el.
Refren:
Luna, tu vole es madre
e ave no person
ci pote fa un fem de tu.
Dise me, luna de arjento,
ce tu finge fa
con un fio de pel e sangue
A-ha-ha, a-ha-ha,
Fio de la Luna.
E en la notes
cuando la luna es plena
el es per ce la enfante
es de umor bon.
E si la enfante plora
se media la luna
per dona el un leteta.
E si la enfante plora
se media la luna
per dona el un leteta.
@T Flama
@L leteratur/flama
@A Guido Crufio
====== Flama ======
par Guido Crufio
Arde briliante
O flama de vive
Brilia luminosa
An cuando tu pote
Pronto
Tua lus
Va es estinguida
Vive vadeda
La flama morida
@T Fortuna
@L leteratur/fortuna
====== Fortuna ======
par Guido Crufio
===== L'espera =====
Si on ta trova un moneta
On ta recolie lo
Alora
Per la dia intera
On ta esperia bon fortuna
===== La realia =====
Si on ta trova un moneta
On ta recolie lo
Alora
Per la dia intera
On ta esperia un dorso mal
@T Foto blanca e negra
@L leteratur/foto_blanca_e_negra
@A Chico Buarque, Patrick Chevin
====== Foto blanca e negra ======
par Chico Buarque
traduida par Patrick Chevin
Me conose ja la pasos d'esta via
Sabe ce no va ariva
Se secretas me conose ja
Me conose ja la petras de la via
E sabe c'ala solitar
Me va deveni tan plu mal
Ce pote me contra l'encanta
D'un ama cual me nega tan
Evita tan e cual an tal
Reveni sempr' encanta me
Con se mesma fatos vea, triste
Cual con ostina me insiste
Colie en me fotos personal
Ala vade me de nova com'un fol
Xercante acel desconsola
Cual me tro conose ja
Dias nova triste, notes clar
Leteras, strofes, O! me cara
A un plu ves me scrive a tu
Per dise: esta es pecosa
Me trae la peto marcada
Con recordas de pasada
E tu ci sabe per ce cosa
Me va colie un soneto plu
Un foto blanca e negra plu
Cual maltrata a plu me cor.
@T Franses e creol
@L leteratur/franses_e_creol
@A Stefan Fisahn
====== Franses e creol ======
Un documento de la Biblioteca de la Congresa SUA, traduida par Stefan Fisahn.
Du linguas ia es parlada en Aiti: Creol e franses. La relata sosial entre esta ambos linguas ia es complicada. Nove da cada des aitan persones ia parla sola creole, ce es la lingua ia usada cada dia per cuanto de popla entier. Sirca un da des ance ia parla franses. E sola un da dudes ia pote parola bon ambos, franses e creol. Donce Aiti no ia es un pais francisme no un pais lingua duple. Plu bon, du popla lingual separeda ia esista: la marojia ci usa un lingua e la clase plu alta ci usa du linguas.
Toda clases ia valua parlables. Parlar publica ia es importante per vive politica; A multe veses la modo de parolante ia es plu importante como la contente. La capasia per responde intelijente ia vijila la modo de parlables de ambos, la loborores usada un lingua e la abitantes site mundan ci usa du linguas. Grupos poca ia encontra a multe veses en Port-au-Prince per escuta narantes. Opinias a franses e creole ia aida define la cultur problem de Aiti.
Normal linguas ia fa complicada cambiante entra membros de la clase plu alta e la cuanto de la popla. Aitanes da toda clases ia es orgula per creol como tra espresa e como la lingua nasional. A cada caso, multe aitanes, ci usa un lingua e ci usa du linguas, reclama ce "el ave no regulas." Donce la majoria da cuanto de popla ia no valua los lingua de nase e ia crea un misterio sirca franses. A mesma tempo, cuasi cada aitan ci usa du linguas ia ave nonserta sentis sirca franses e ia fa se noncomfortante. En creole la frase "parla franses" sinia "eser un mentinte"
Parla bon franses serveda como mesma plu importante tema per es membro en la clase plu alta de Aiti como la color de pel. La usante de franses es la viver publica ia esclui la majoria da politica, governa, e viver intelijental. Familias usante du linguas ia usa franses xef per veses formal. Per ce creol ia es la lingua per veses nonformal, el ia omplida con slang e ia es usada per reconta bromas. Franses aitan ia manca esta cualias nonformal. Persones ci ia parla sola creol ia evita situas, do los nonebla per parla franses ta es desvantaje o un embarasa. Atentante per es asetada en sirculos formal o governal, alga creol parlante sola ia usa frases ce sona franses en los creol parla, ma esta imitantes ia es ultima usada poca o no. Persones du lingua de la clase media en Port-au-Prince ia sufri la plu grande desvantaje per ce los ia encontra frecuente situas en ce la usar dla franses vole conveninte, ma los nonperfeta parla los ia tende indica los clasa su orijines.
La orijines de creol ance es dicutada. Alga siensores creda ce el ia asende da un pijin ce ia developante entra xefes franses e slavos african en la paises dependente. Otra persones creda ce creol ia veni a la pais dependente de San Dominic como un lingua prepareda, asendade da un dialect da negosia de mar franses. Cada cosa es la orijines, creol es en la siensa de linguas un lingua separada e no sola fransesin mal. Contra ce la majoria de paroles creol ave orijines franses, la gramatica de creol es no simile a la gramatica de franses, e la ambos linguas no comprendable mutua.
Ala es diferentes depende a clasa e area en creol. Diferentes area inclui parolas e sona, ma la structur gramatica es fisada en la pais entier. Parlantes de du linguas tende usa fonemes franses con los parla creol. La tender usa sonaa franses ia es comun a la Port-au-Prince modo de creol. Durante la 1980 anos, la Port-au-Prince modo ia persepi como modo norma de la lingua.
La usar de franses e creol durante la tempo dependente e la tempo independente ia prepareda modeles de parla per la sentenio seguente. Durante la tempo dependente, ia es xef persones blanca e miscada instruida ci ia es liberada, ci ia parla franses. Cuando la slavos ia deveni libria e la sistem plantia ia rompe, la plu grande ostaculo entre clases diferente e persones colorada diferente ia cada. Lingua franses ia deveni la borda persones ci ia es libre ante la revolta (la liberada ante) e persones ci ia liberada per la revolta, e el ia securi la state superio de la liberada ante. Franses deveni no sola de la governa e negosia, ma ance de cultur e intelijente. Mesma la aitanes plu nasionalimse ia valua poca creol.
Ma ideas versa creole ia comense cambia durante la sentenio dudes, serta durante la ocupa de Statos Unida. La ocupa fortia intelijentes de Aiti per contra los eritar noneuropa. Cresante consenser negra e plu nasionalimse ia cause ce multe aitanos ia conside creol como lingua vera de la pais. La prima atenta a testo creol ia aperi a 1925, e la prima jornal ia es publicida a 1943.
Comense de la anos de 1950, un move per done creol state ofisial ia crese lenta. La constitui de 1957 ia refisada franses como lingua ofisial, ma el ia permete la usa de creol a serta funsion publica. A 1969 un lege done creol state legal limitade; la lingua pote usada a legia, la cortes, e organizas, ma no a oranizas instrual ofisial. Ma a 1979 un legeta ia permete creol como lingua de intrui a scolas. La constitui de 1983 ia declara ce ambos, creol e franses es linguas nasional, ma ia spesifada ce franses es la lingua ofisial. La suada constitui de 1987 (ce es restate parte 1989) ia done state ofisial a creol.
@T Frate Jaco
@L leteratur/frate_jaco
@A Kevyn Bello
====== Frate Jaco ======
Un canta franses per enfantes
traduida par Kevyn Bello
Frate Jaco,
Frate Jaco,
Dormi tu?
Dormi tu?
Sona la campanas,
sona la campanas,
Din, dan, don!
Din, dan, don!
@T Fruta oblidada
@L leteratur/fruta_oblidada
@A Guido Crufio
====== Fruta oblidada ======
par Guido Crufio
Lo es solitar,
Acel pera
An cuando me regarda lo dejenera
A la fondo de la bol de fruta
Lo pare seca vea bruta
Lo es solitar,
Sua pel covreda en pelo
Gris-verde como un velo
Lo es oblidada
Descomposada
Lo es solitar,
Ultra maturia jusosa
Lo aspeta multe fungosa
Sua pel de veluda ondetante
Sua tempo en la pasada distante
Lo es solitar,
Lo fa recorda nos
Ce con la pasante de l'anios
A un ves nos es amada
Alora nos es oblidada
Fruta oblidada
@T Fuga de mori
@L leteratur/fuga_de_mori
@A Paul Celan, Franck Mousset
====== Fuga de mori ======
par Paul Celan
traduida par Franck Mousset
Lete negra de la matini
Nos bevi lo a sera
Nos bevi lo a mediadia e a matina
Nos bevi lo a note
Nos bevi e bevi
Nos escava un tomba aerial
Ala on no va es folida
Un om abita a casa
El jua con la serpentes
El scrive
El scrive cuando lo oscuri en Deutxland
Margarete tua capeles orosa
El scrive e sorti ante la casa
E la stelas sintili
El sibila per clama sua canes
El sibila per clama sua iudis
E fa ce los escava un tomba en la tera
El ordina a nos ce on jua aora per dansa
Lete negra de la matini
Nos bevi tu a note
Nos bevi tu a matina e a mediadia
Nos bevi tu a sera
Nos bevi e bevi
Un om abita a casa
El jua con la serpentes
El scrive
El scrive cuando lo oscuri en Deutxland
Margarete tua capeles orosa
Tua capeles senosa Sulamit
Nos escava un tomba aerial
Ala on no va es folida
El cria
Tufa plu profonda vos palas en la tera
E vos canta e dansa
El saisi la fero a sua sintur
El brandi lo
Sua oios es blu
Tufa plu profonda vos palas en la tera
E vos canta e jua per dansa
Lete negra de la matini
Nos bevi tu a note
Nos bevi tu a mediadia e a matina
Nos bevi tu a sera
Nos bevi e bevi
Un om abita a casa
Margarete tua capeles orosa
Tua capeles senosa Sulamit
El jua con la serpentes
El cria
Jua la mori plu cuieta
La mori es un mestre de Deutxland
El cria
Ta la violines jua plu sombre
E vos fuma asende a sielo
Vos va ave un tomba aerial
Ala vos no va es folida
Lete negra de la matini
Nos bevi tu a note
Nos bevi tu a mediadia
La mori es un mestre de Deutxland
Nos bevi tu a sera e a matina
Nos bevi e bevi
La mori es un mestre de Deutxland
Sua oios es blu
El colpa tu con baleta de plomo
El no falta
Un om abita a casa
Margarete tua capeles orosa
El lansa sua canes sur nos
El dona a nos un tomba aerial
El jua con la serpentes
El sonia
La mori es un mestre de Deutxland
Margarete tua capeles orosa
Tua capeles senosa Sulamit
@T Gloria Eterna
@L leteratur/gloria_eterna
@A First Fragment, vxeov
====== Gloria Eterna ======
par First Fragment
Traduida par vxeov
Titulo orijinal: Gloire Éternelle
Mea spirito desfisa se mesma de mea corpo; a la orizon, lo vola
En la ultima de mea turbas, me ateni la limina de mea obsoleti'
Me velia, pos un nada eterna en stani'
Me parti mea cuna per enerjiosas nova
Rompe mea crisalida e evade, mea ego mortal defiada
En dirije a gloria eterna, con mea ecleticisme, me es gidada
An con ce me ia esperia un compleso de cambias multiple
Mea vijila agu va permane foca mea destina per sempre
La nosivia de la ambiente combate nonsesante contra mea peregrina
Ma acel doles de despera no pote bate mea ostinosa
La gloria, emerje, esplode
La gloria, enebria me, transporta me
La gloria, alti me, distanti me
Fasinada par sua brilia
La gloria, desteni me, libri me
La gloria, arde me, come me
La gloria, dana me, mata me
Un tal tufa a ultra --
Fasa un fini nonserta, me continua avansa
Me no pote resiste la sabor de mea curiosia
Testa basinte, me enaira e salta
An con ce me ia esperia un compleso de cambias multiple
Mea vijila agu va permane foca mea destina per sempre
Me trova se es con fas a fas con la enemi nomida mea suconsensia
Par persiste nonfatigable, me es taliada a pesos
Me ia mori per alga momentos
E ia restora mea corpo; de la mores, me ia vive denova
Me es preparada per la asende grande
Per la debua prosiminte de angusas
Afin ateni la culmina desirada, astrati me debe
Vinse mea temes la plu intensa, e trepa cada gradetas
La tempesta furia cresente violent'
La jelo agu perfora mea pel
La raria de la osijen aument'
Ma sede no es un elejable
La culmina espeta zelosa mea ariva
Alora me move a un plu ves e comensa concista la empireo
Mea spirito desfisa se mesma de mea corpo; a la orizon, lo vola
En la ultima de mea turbas, me ateni la limina de mea obsoleti'
Me velia, pos un nada eterna en stani'
Me parti mea cuna per enerjiosas nova
Rompe mea crisalida e evade, mea ego mortal defiada
En dirije a gloria eterna, con mea ecleticisme, me es gidada
===== En franses =====
@T Glosas de San Emiliano
@L leteratur/glosas_de_san_emiliano
@A 
====== Glosas de San Emiliano ======
Con la aida de nosa senior Cristo, senior salvor, senior ci es en onora e senior ci ave comanda con la Padre, con la Spirito Santa, en la sentenios de la sentenios. Ta ce Dio Omnipotiosa fa nos un tal servi ce ante sua fas nos es joiosa. Amen.
@T Göttingen
@L leteratur/goettingen
@A Barbara, Patrick Chevin
====== Göttingen ======
par Barbara
traduida par Patrick Chevin
Vera, no es la Rio Seine
No es la Bosce de Vincennes,
Ma tota es de belia plen
A Göttingen, a Göttingen.
No Borda de Seine, no refren
No lamenta, ance no splen',
Ma la am' ala sola ren',
A Göttingen, a Göttingen.
Plu ca nos los sabe l'romans',
L'istoria de nos res de Frans,
Herman, Peter, Helga e Hans,
A Göttingen.
Favore, dona me lisens'
Ma la naras de nos esens'
"A un ves ia ave..." comens'
A Göttingen.
Vera, nos ave l'Rio Seine
Nos ave l' Bosce de Vincennes
Ma la rosas es grande ben
A Göttingen, a Göttingen.
Nos, la matinas e la Seine,
La spirito gris de Verlaine,
Los vera es la tristia mesm',
A Göttingen, a Göttingen.
Si los no sabe cual ta dise
Los sta ante nos e surie
Nos susede comprende plen
La enfantes de Göttingen.
E an si esta pote stona
Algas e otras ta pardona
Ma on es la mesma joven
A Paris o a Göttingen.
O ! Tempo nunca plu reven'
Versa la sangue de nos ven'
Car me cor ave se caden'
A Göttingen, a Göttingen.
E si on ta toca l'alarma
Si ta nesesa prende l'arma
Me cor ta versa alga larma
Per Göttingen, per Göttingen.
@T Haicus
@L leteratur/haicus
@A Franck Mousset
====== Haicus ======
par Franck Mousset
La lun' murmura
Parfumes : musco, jasmin ...
Note de ama ?
On sona a me porte !
Me sonia la plu bela vapori :
A los me no va abri !
Nebli a estra.
Me dormeta ancora ;
L'odor de cafe !!
Ruidos de matin' :
Cafe, pan, metro, fola !
-- Me readormi.
@T Haicus par Cobaiaxi Issa
@L leteratur/haicus_de_cobaiaxi_issa
@A George Boeree
====== Haicus par Cobaiaxi Issa ======
traduida par George Boeree
O caracol
asende monte Fuji
ma lente, lente
Cuieta
en la profonda de la lago
un vista de nube
Veni con me
e jua, pasaro
sin familia
@T Haicus de Fukuda Chiyo-ni
@L leteratur/haicus_de_fukuda_chiyo-ni
@A Fukuda Chiyo-ni, Novparl
====== Haicus de Fukuda Chiyo-ni ======
Alga haicus par Fukuda Chiyo-ni (1703--75), traduida par Novparl.
Sin sua voses
la erones ta desapare
neva de esta matina.
Gloria de matina!
Balde maraniada de mea poso
Me demanda per acua.
Erba verde
Entre la folias de la erba
la color de acua
@T Haicus par Iosa Buson
@L leteratur/haicus_de_iosa_buson
@A George Boeree
====== Haicus par Iosa Buson ======
traduida par George Boeree
Luna alta en la sielo
supra tetos de vileta
como un vagante.
Plu sola me vade
visita un om sola
en esta sera de autono.
@T Haicus par Matsuo Baxo
@L leteratur/haicus_de_matsuo_baxo
@A  George Boeree
====== Haicus par Matsuo Baxo ======
traduida par George Boeree
La stange vea,
un rana salta en,
la acua ruida.
Un corvo plu sola
stante en ramo nuda,
Sera de autono.
Esa neveta prematura,
lejera; ma el curva
la folias de joncila.
Per ce vola a site?
Un corvo de la campania
vadente a mercato.
@T Haicus orijinal
@L leteratur/haicus_orijinal
@A 
====== Haicus orijinal ======
par autores diversa
===== Haicus e tancas par MaikM =====
=== Luna Plen ===
En oscur de la note,
Luna plen e me es solitar --
Oservores pasosa.
=== Folias verde ===
Desinia bela,
Folias verde ensirca me --
Jardin de zen pasosa.
=== Canoa ===
Traversa la rio,
Diteros e tu con me --
La sonia de canoa.
=== Aira matinal ===
La aira matinal,
Calmi e sentri me --
Alti mea Spirito.
=== Ventosa ===
Un momento ventosa,
Aira en desordina movente --
Mea xapo es prendeda,
Levada con la detritos,
Nunca denova videda.
=== La nonconoseda ===
Un paso a en la nonconoseda,
Do nos va vade?
Tu va es ala?
Esce tu vole sabe?
Un paso a en la nonconoseda,
Nos es ala aora.
Ma, nos no sabe vera do.
Esce nos vole sabe?
===== micropoesias par MaikM =====
Brilia
O brilia sur me
un pico de secondos plu -
sol timida de inverno.
Sentimes
Sentimes en un jar,
finansia per un dia pluvosa -
Ancora no sufisi.
Ximineria
Pasosa e nidin,
tronco natal arda en ximineria -
dansa de lus soniosa.
Eroe natural
Un eroe natural salva
foresta pluvosa decrese -
Ta debe es novas de paje prima.
Momentos
La saisones cambiante
sola momentos caturada en tempo -
Retrospetas nostaljial.
===== par Stefan Fisahn =====
abrinte fenetra,
venta entrente casa,
ja confusada.
es fatigada,
ma dormi no ariva,
resta velia.
parlada clar,
contra la venta forte,
con vose dulse.
ia ja vade ier,
reveni a esta ora,
va vade de doman.
La lus refleta,
de la mur briliante,
resta oscur.
Tas de cafe,
sigareta fumante,
ambos es negra.
Pasea a supra,
pasea sin sapatos,
a supra nubes.
En acua nada,
plora e rei acua,
veni el acua.
La Papagaio
parla cada cosa
sin teme alga cosa
Dia laborin,
dia fatigada,
veliada note.
parlante a tu,
me es parlada a tu,
nos comprende nos.
===== par Antonio Carlos Rodrigues da Fonseca =====
Rara planetas
la solia nonfinida
distante lunas.
Nebla sirca me
ombra, tristia, gris cosas,
tu manca cor me!
Oios briliante
Un boca en rideta,
De me fia, fieta.
Bales, tro cuadra!
Cubas, es tro sircula!
Mundo, es tro fol!
Veia sin fortia
De la stradas paseada
De vive finida.
Fem, simple fem,
Raio de lus ce a me lumina,
Tu plene me vivia.
Jira, jira, jira!
Tota en la aira volante!
Jira, jira, jira!
Lisca, lisca, cade!
neba, asta do la oio vade
lisca, lisca, cade!
Densa solia
En esta sera tota gris
envolve me eser.
Pula, dansa, jua,
matina de sielo azul
e infantes en jardin.
Vade, veni, vade,
acua tepida en la ventre
veni, vade, veni.
Vives ja pasada,
stradas tro sufrida, dur,
ce condui a la lus.
Aira plen de parfumes
jentil venteta condui
tra la nas de me.
Vino, blanda vino,
dulse parfumes tu esflue
bevia de la dios.
Venteta jentil
balansa bela floreta
parfumante la aira.
Tra fenetra veia
la veia, tro veia, vide
la vive pasante.
Matina, sol pale.
La gavota vola calma
besante la mar azul.
Enfante dorminte
la momente nonconese...
Esfluente pas.
Mango grande e folios,
duple poca e amos de avias,
tenera e caresa.
Mango grande e folios,
duple poca e amos de avias
fa nido de palia.
Mango grande e folios,
duple poca e amos de avias
nuri se avietas.
La ama un dia aperi,
cuieta e silenti el crese,
ja nos es poesiores!
===== par José Marins =====
Pluve de estate
la rieta vade rapida
juntar se a mar.
Primavera fria
gotas de pluve esplode
a supra me pedes.
===== par Lena James Ponte =====
La tempo dormeta
en seras tepida de sol
sur banco de plaza.
===== par Antonio Seixas =====
Pluve de graniso.
Jardin de casa de me
como un mar de jelo.
Da fenetra un vide
la gris prendente la sera...
arbores sin folias.
Vola de mosceta
a entra la comeria vacua
anoia la silentia.
@T Haicus sur istoria
@L leteratur/haicus_sur_istoria
@A Spike Gillespie, Myaleee
====== Haicus sur istoria ======
par Spike Gillespie
traduida par Myaleee
Esplode Grande o cisa
ses dias de labora, un de reposa.
A cualce modo, esta ja comensa.
Dinosaures pasea bom bom,
atante violente, alora mori
afin Spielberg ta gania plu de Oscares.
Homo erectus
es Mr. Smarty No Pants:
el jua con foco, e fa utiles.
Eda de jelo ariva e
forsa Homo sapiens de
comensa porta alga vestes.
Xasa, colie? Perce?
Esta es la lus prima
de eda de cultiva.
Es no loca como Roma.
La goticas lansa via
un salad de Sesares.
La primadores de Gutenberg
fasina tota spesies de scrivores
par se leteras movable.
Descuatro novedes-du:
Encantada, Chris Colombus descovre
la "McDonald's" prima.
Colonistes uni.
La lansa de te de Boston resulta
a reposa de sol sur la bandera britanian.
La industria ariva.
El es eletrica. El es vaporos.
An oji, ruido e fumas abunda .
Des-oto sesdes-un:
Divideda nos cade.
Lincoln, capas, uni nos.
Un gera mundal segue
un otra. Rosie angusa.
Patton rola. Nos gania.
Rusia gida la corsa per spasio.
Donce? Los mostra Sputnic ma nos
ave Elvis Presley.
Gidores forte:
Kennedy, Luther, e Cristo
asentua diretos sivil
Desenio 1960, algas ia servi militar.
Algas protesta. Algas xerca la pote
de flores en la plaza de Haight.
John Travolta fa
la personi de dansa disco.
(Cual ia es nos pensante?)
Interede ja ariva.
Tu ave eposta.
Como nos ia trova cosas ante Google ?
La jovenes rica par "Dotcom"
dise txau a egosia. Esplode la bola.
No gania mone par asiones riable.
Un duple de Bushes
abita anoiante en White House,
entre los Clinton fa un sanduitx.
Crise, dise tu nom.
Prima, Saddam. Alora, Monica.
Alora Saddam, denova.
La tores duple cade.
Tristia, coleria, e orgulo
leva de la senes.
Anjeles volante a alta
proba ce jigantes cade a veses
an con fortia e securia.
@T Haleluia
@L leteratur/haleluia
@A Leonard Cohen, George Boeree
====== Haleluia ======
par Leonard Cohen
traduida par George Boeree
Me ia oia de un corda((un acorda)) secreta
Tocada par David, e lo plase la Senior
Ma tu no gusta vera musica, no?
Lo vade como esta, lo cuatro((la cuarta)), lo sinco((la cuinta))
La cade minor, la leva major
La re confondeda composa Haleluia
refren:
Haleluia, Haleluia
Haleluia, Haleluia
Tua fide ia es forte, ma tu nesesa evidente
Tu ia vide el baniante sur la teto
Sua belia e la lus de luna suverti tu
El ia lia tu a la seja de cosina
El rompe tua trono, el corti tua capeles
E de tua labias, el trae Haleluia
refren
Tu dise ce me desrespeta
Un nom cual me no conose
Ma esce me conose, perce tu cura?
On ave un arde de lus en cada parola
Lo no importa cual tu ia oia
La santa o la rompeda Haleluia
refren
Me ia fa cual me pote, lo no es multe
Me no pote senti, donce me vole toca
Me ia dise la vera, me no veni per truco tu
E an si tota veni mal
Me va sta ante la Senior de la Canta
Con no cosa sur me lingua ma Haleluia
refren
@T Hansel e Gretel
@L leteratur/hansel_e_gretel
@A Frates Grimm, Lan Mat
====== Hansel e Gretel ======
Un nara par la Frates Grimm
Traduida a elefen par Lan Mat (2017)
En un foresta grande, un lenior povre ia abita con sua sposa e sua du enfantes. La xico es nomida Hansel, e la xica es nomida Gretel. Los ave poca per come, e a un ves, cuando un famion ia veni a la pais, el no pote oteni an la pan dial. Alora, cuando el pensa de esta en sua leto a note, e turna ansiosa, el jemi e dise a sua sposa: "Cual va aveni a nos? Como nos va nuri nosa enfantes an cuando nos ave no cosa per nos mesma?"
"Me va dise alga a tu, mea sposo," la fem responde, "doman, en la matina temprana, nos va trae la enfantes a la loca la plu densa de la foresta; ala, nos va ensende un foco per los, e dona un plu peso de pan a ambos de los, e alora nos va vade a nosa labora e lasa los a solitar. Los no va pote trova la via a casa, e nos va deveni librida de los."
"No, mea sposa," la om dise, "me no va fa tal. Como me pote tolera lasa mea enfantes en la foresta? La animales savaje ta veni pronto e lasera los a pesos."
"O! Tu es un fol!" el dise. "Tota de nos va mori par famia. Ta ce tu plani aora la plances per nosa caxones," e el no lasa la om en pas asta cuando el acorda.
"Ma me senti vera triste per la enfantes, an tal," la om dise.
----
Ance la du enfantes no pote dormi par famia, e oia lo cual sua estramadre ia dise a sua padre. Gretel plora larmas amarga e dise a Hansel: "Esta es la fini per nos."
"Silenti, Gretel," Hansel dise, "no ave ansia. Me va trova pronto un modo per aida nos."
E pos cuando la veas ia adormi, Hansel leva, apone sua jaca peti, abri la porte a su, e rampe a estra. La luna brilia merveliosa, e la calculos blanca ante la casa sintili como sentimes de arjento. Hansel acrupi se e pleni la pox peti de sua jaca con tan multe como el pote. Alora, el revade e dise a Gretel: "Es consolada, peti sore cara, e dormi en pas. Dio no va abandona nos," e el reposa denova en sua leto.
----
Cuando la dia veni, ma ante la leva de la sol, la fem velia la du enfantes, disente: "Leva, pigras! Nos vade aora a en la foresta per retrae lenio." El dona a ambos de los un peso peti de pan, e dise: "Acel es alga per sua come de sera, ma no come lo ante alora, car vos no va reseta plu."
Gretel pone la pan su sua faldon, car Hansel ave la calculos en sua pox. Alora, tota de los vade en dirije a la foresta. Cuando los ia pasea per un tempo corta, Hansel sta firma e regarda denova la casa, e fa tal denova e denova. Sua padre dise: "Hansel, perce tu sta e regarda a retro? Atende. No oblida como tu usa tua gamas."
"A, padre," Hansel dise, "me regarda mea peti gato blanca cual senta sur la teto, e vole dise adio a me."
La fem dise: "Fol, acel no es tua peti gato, acel es la sol de matina cual es briliante sur la ximine." Ma vera, Hansel no ia es regardante un gato, ma ia es continuante lansa la calculos de sua pox a sur la rua.
----
Cuando los ateni la media de la foresta, la padre dise: "Aora, enfantes, pila alga lenio. Me va ensende un foco afin vos no es fria."
Hansel e Gretel colie subosce tan alta como un colina peti. La subosce ia es ensendeda, e cuando la flamas es grande, la fem dise: "Aora, enfantes, reposa a lado de la foco. Nos va vade en la foresta e axi alga lenio. Cuando nos fini, nos va reveni e retrae vos."
----
Hansel e Gretel senta a lado de la foco, e cuando nun veni, los come un peso peti de pan. Los oia la colpas de la axa e crede ce sua padre es prosima. Ma vera, la sona no es lo de la axa, ma ia es causada par un ramo cual sua padre ia fisa a un arbor secida e cual la venta ia es movente. Car los senta ala per un tempo tan longa, sua oios clui par fatiga, e los adormi. Cuando los velia a fini, lo ia es ja note oscur. Gretel comensa plora e dise: "Como nos va sorti de la foresta?"
Ma Hansel consola el e dise: "Pausa per un momento, asta cuando la luna leva, e alora nos va trova pronto la via." E cuando la luna plen leva, Hansel prende sua sore par la mano, e segue la calculos cual brilia como sentimes nova de arjento, e mostra la via a los.
----
Los pasea la note intera, e ante la leva de la sol, los ariva a la casa de sua padre. Los colpa a la porte, e cuando la fem abri lo, e vide Hansel e Gretel, el dise: "Enfantes turbosa! Perce vos ia dormi tan longa en la foresta? Nos ia pensa ce vos va reveni nunca." Ma la padre joia, car el ia odia abandona los.
----
Pos un tempo no longa, un famion grande veni denova a la pais, e la enfantes ia oia a note ce sua estramadre dise a sua padre: "Cada cosa es comeda denova. Nos ave sola un dui de un pan, e alora la fini. La enfantes debe vade. Nos va trae los plu distante en la foresta afin los no va trova denova la sorti. Nos no ave un otra modo per salva nos mesma."
La cor de la om ia es pesosa, e el pensa: "Comparti la peso final con la enfantes ta es plu bon." Ma la fem no escuta el, e reproxa el: Natural, on ci fa A debe fa ance B, e considerante ce el ia sede a la ves prima, el debe fa tal ance la ves du.
----
Ma la enfantes ia es ancora veliada, e oia la conversa. Pos cuando la veas ia adormi, Hansel leva denova, e intende sorti e colie calcules como a la ves pasada, ma la fem ia clavi ja la porte, e Hansel no pote sorti. An tal, el consola sua sore peti, e dise: "No plora, Gretel. Dormi cuieta. La bon Senior va aida nos."
----
A la matina temprana, la fem veni e estrae la enfantes de sua letos. El dona pesos de pan a los, ma a esta ves, la pesos es plu peti. En via a la foresta, Hansel desintegra sua peso de pan en sua pox, e sta frecuente e lansa un peseta a sur la tera. "Hansel, perce tu para e regarda asi e ala?" la padre dise. "Veni."
"Me regarda mea pijon peti cual senta sur la teto, e vole dise adio a me," Hansel responde.
"Fol!" la fem dise. "Acel no es tu pijon peti. Acel es la sol de matina cual es briliante sur la ximine." Ma Hansel, pico e pico, lansa tota sua pesos a sur la rua.
----
La fem gida la enfantes ancora plu distante en la foresta, asta un loca do los ia es nunca en sua vives. Alora, un foco grande es ensendeda, e la estramadre dise: "Senta ala, enfantes, e cuando vos deveni fatigada, vos pote dormi pico. Nos va vade en la foresta per axi lenio, e a sera, cuando nos es finida, nos va reveni per vos."
A mediadia, Gretel divide sua peso de pan con Hansel, ci sperde la sua sur la rua. Alora los dormi, e sera pasa, ma nun veni per la enfantes povre. Los no velia asta cuando lo es note oscur, e Hansel comforta sua sore povre, e dise: "Espeta, Gretel, asta cuando la luna leva, e alora nos va vide la picos de pan cual me ia sperde asi e ala. Los va mostra ancora la via a casa a nos."
Cuando la luna leva, los parti, ma los no trova la pesetas, par causa ce la multe avias cual vola a sirca en la forestas e campos ia prende tota de los. Hansel dise: "Pronto nos va trova la via." Ma los no ia trova lo. Los pasea tra la note intera e ance tota la dia seguente, de matina asta sera, ma los no sorti de la foresta. E los ia es multe fame, car los ave no cosa per come estra du o tre bacas cual crese sur la tera. E car los ia es tan fatigada, e sua gamas no pote plu suporta los, los reclina su un arbor e adormi.
----
Aora, tre matinas ia pasa de cuando los parti de la casa de sua padre. Los comensa pasea denova, ma los vade ancora plu distante en la foresta, e si aida no ta veni pronto a los, los ta mori par famia e fatiga.
----
A la media de la dia, los vide un bela avia blanca cual ia es sentante sur un ramo, e cual canta tan deletosa ce los sta e escuta lo. E cuando sua canta ia fini, lo estende sua alas, e vola a via ante los. Los segue lo asta cuando los veni a un casa peti de cual la avia ia atera sur sua teto. E cuando los prosimi a la casa peti, los vide ce lo es construida de pan e covreda con tortas, e ce la fenetras es de zucar clar.
"Nos va comensa labora sur esta," Hansel dise, "e ave un bon come. Me va come alga de la teto, e Gretel, tu pote come alga de la fenetra. Lo va sabori dulse."
Hansel estende sua mano e desfisa un pico de la teto per proba como lo sabori, e Gretel apoia contra la fenetra e rode la vitro. Alora un vose cuieta cria de la interna:
"Morde, rode! Me declara!
Ci es comente mea casa cara?"
La enfantes responde:
"La venteta! La venteta!
La Santa Bebeta!"
E los continua come sin disturba se. Hansel, ci gusta la sabor de la teto, desfisa un peso grande de lo, e Gretel estrae un panel intera, e senta, e saborea lo. Subita la porte abri, e un fem tan vea como la colinas, ci ia es apoiada sur muletas, rampe a estra. Hansel e Gretel ia es tan asustada ce los cade lo cual ia es en sua manos.
La fem vea, an tal, basi sua testa, e dise: "O, enfantes povre, ci ia gida vos asi? Veni a en e visita me. No cosa mal va aveni a vos." El prende los par sua manos e gida los a en sua casa peti. Alora, bon come ia es poneda ante los: lete e crepes con zucar, pomas e nozas. Pronto a pos, du peti letos bela ia es covreda con telones blanca, e Hansel e Gretel ia senti como si los es en sielo.
----
Ma la fem vea ia es simple finjente es tan bonvolente. El es vera un sorsor vil, ci espeta sempre enfantes, e ia construi la peti casa de pan per atrae los ala. Cuando un enfante ta veni a el, el ta mata lo, coce lo, e come lo; e acel ta es un dia de banceta per el. Sorsores ave oios roja, e no pote vide vera distante, ma los ave un ole como bestias, e sabe cuando enfantes veni prosima. Cuando Hansel e Gretel ia veni en sua visinia, el rie malvolente, e dise: "Me ave los! Los no va evade denova me!"
----
A la matina temprana, ante cuando la enfantes velia, el ia es ja veliada. E cuando el vide ce ambos de los ia es dorminte e parente tan bela con sua jenas ronda e ros, el murmura a se: "Acel va es un pleniboca deletosa!" Alora el saisi Hansel con sua mano plietosa, trae el a un stala peti, e clavi el pos un porte grilida de fero. El pote cria, ma fa tal no ta aida el. Alora la sorsor vade a Gretel, secute el asta cuando el velia, e clama: "Leva, pigra! E trae alga acua, e coce alga cosa bon per tua frate. El es en la stala esterna, e debe es grasosida. Cuando el es grasosa me va come el." Gretel comensa plora amarga, ma lo es futil, car el es forsada a fa lo cual la sorsor vil comanda.
----
E aora, la plu bon come ia es coceda per povre Hansel, ma Gretel reseta no cosa esetante armures de crabe. A cada matina, la fem rampe a la stala peti e cria: "Hansel, estende tua dito afin me pote palpa lo e serti esce pronto tu va deveni grasosa." Ma Hansel estende un oso a el en loca, e la vea, ci ave oios oscur, no pote vide lo, e pensa ce lo es la dito de Hansel, e el ia es confondeda ce el no ta deveni grasosa.
Pos cuando cuatro semanas ia pasa, e Hansel resta ancora magra, la sorsor ia es saisida par nonpasientia, e no plu vole espeta. "Aora, Gretel," el cria a la xica povre, "trae alga acua. Lo no importa esce Hansel es grasosa o magra. Doman, me va mata el e coce el."
La peti sore povre lamenta cuando el trae la acua, e larmas flue longo sua jenas. "Dio cara, aida nos!" el cria. "Si la animales savaje ia ta devora nos, alora nos ia ta mori a la min en junta."
"Reteni tua ruido," la vea cria. "Lo no va aida tu."
----
A la matina temprana, Gretel debe sorti per suspende la calderon con la acua, e ensende un foco. "Prima, nos va coce," la fem vea dise. "Me ia caldi ja la fornon e amasa la pasta." El puia povre Gretel a la fornon de cual flamas de foco ia es ja veninte. "Rampe a en," la sorsor dise, "e vide esce lo es coreta caldida, afin nos pote pone la pan a en." Ma cuando Gretel ta es en lo, la sorsor ia intende clui la fornon e lasa ce Gretel coce en lo. E alora, el va come ance el.
Ma Gretel vide lo cual el es pensante, e dise: "Me no sabe fa lo. Como me pote entra?"
"Ganso fol," la vea dise, "la porte es bastante grande. Vide! An me pote entra!" E el rampe a ante e pone sua testa a en la fornon. Alora Gretel puxa el a en lo, e clui la porte de fero, e clavi lo. O! Alora el comensa ulula tan asustante, ma Gretel fuji, e la sorsor vil ia es misera ardeda a mori.
----
Gretel core como lampo a Hansel, abri sua stala peti, e cria: "Hansel, nos es salvada! La sorsor vea es mor!"
Alora Hansel salta como un avia de sua caje cuando la porte ia es abrida. Los joia e abrasa lunlotra e dansa. E car los no plu nesesa teme el, los vade en la casa de la sorsor, e trova ce en cada angulo ia es caxones plenida con perlas e joalas. "Estas es multe plu bon ca calcules," Hansel dise. E el pleni sua poxes con tan multe como el pote.
E Gretel dise: "Ance me va trae alga a casa con me." E el pleni sua faldon.
"Ma aora nos debe vade," Hansel dise, "afin nos pote sorti de la foresta de la sorsor."
----
Pos cuando los pasea per du oras, los veni a un estende grande de acua.
"Nos no pote traversa," Hansel dise. "Ma me no vide un ponte."
"E ance on no ave un barco," Gretel responde, "ma un pato blanca es nadante ala. Si me clama el, el va aida nos a traversa."
Alora el cria:
"Oia me, oia me, pato peti!
Nos nesesa ce tu veni.
Nos vole traversa la acua larga.
Porta nos sur tua dorso blanca."
La pato veni a los, e Hansel senta sur sua dorso, e dise a sua sore a senta a lado de el.
"No," Gretel responda, "lo ta es tro pesosa per la pato peti. El va porta nos la un pos la otra."
La bon pato peti fa tal, e pos cuando ambos de los ia es secur traversada e ia pasea per un pico de tempo, la foresta pare plu e plu conoseda a los, e los vide la casa de sua padre en la distantia. Alora los comensa rapidi, e core a en la salon, e lansa se sirca la colo de sua padre. La om no ia ave un ora felis de cuando el lasa la enfantes en la foresta. Ma la fem ia es mor. Gretel vacui sua faldon asta cuando perlas e joalas ia pleni la sala, e Hansel lansa plenimanos de sua pox en ajunta. Alora tota ansia ia es finida, e los ia abita juntada en felisia perfeta.
----
Mea nara es finida; ala un mus core. Cualcun ci catura lo pote fa un xapo grande de lo per se.
@T Hartxa
@L leteratur/hartxa
@A 
====== Hartxa ======
Mea cor vade de me.
O Dio! me no sabe esce lo va reveni?
Tan multe dole me par mea amada:
lo es malada, cuando lo va sani?
@T Horus
@L leteratur/horus
@A Gérard de Nerval, Michel Gaillard, Magis Optis
====== Horus ======
Horus es la soneto 3 de la des-du sonetos ermetiste La Cimeras
scriveda par Gérard de Nerval (1808-1855)
Traduida de franses par Michel Gaillard e musicida par la bande Magis Optis
La dio Cnum((Un dio de Ejipte antica.)) ia trema, turbante la universo:
Isis, la madre, alora, vade a leva de leto,
Ela jesti odiosa a sua spos savaje,
E la arde antica brilia en sua oios verde.
« Vide, ela dise, el mori, esta morbosa vea,
La frias de la mundo pasa tra sua boca,
Lia la pede curva, estingui la oio loco
de el, dio del volcanes e re de la invernos!
La agila ia pasa, la spirito nova clama,
Me ia apone per el la roba de Cibele...
El es la fie amada de Hermes e Osiris! »
La diva fuji sur sua barco dorada,
La mar es refletante sua imaje adorada,
Con la sielos radiante su la xarpe de Iris.
1854.
@T Hubble catura un supranova
@L leteratur/hubble_catura_un_supranova
@A 
====== Hubble catura un supranova ======
Hubble catura imajes de un supranova oservada en la Eda Media
3 julio 2008
Traduida de espaniol par Dave MacLeod
Informas de spasio de la Eda Media estende aora a nos. De ala veni la imaje ultima otenida par Hubble, la telescopio spasial de NASA. Esta coresponde a la restas de un esplode stelal de plu ce 1,000 anios pasada.
Hubble ia catura imajes de la restas de un supranova ce ia esplode en la Via Letin ante sirca 8,000 anios pasada. Esta fotograf coresponde a un parte pico de la resta de la ojeto nomada SN 1006.
La supranova SN 1006 ia es vidable par la oculo de umana. Sua orijina es trovada en la angusa de un stela nana situada a sirca 7,000 anios-lus, e ce oservores european, african e asian ia deteta a la 1 de maio de la anio 1006.
Esta ojeto ia es durante semanas la plu briliante de la sielo (pos la sol e la luna) e ia es vidable ance en la dia. Pico e pico, se lus ia deveni diminuida, e el ia continua es vidable ance durante du anios e un di pos la esplode.
Esta strato esterna de la supranova ia crese a un rapidia de sirca 30 milion cilometres/ora. Aora se rapidia es reduida a sirca 10 milion cilometres/ora.
Per Alfred Rosenberg, Avisor Siensal de la Instituto Astrofisical de Canarias (IAC), es variables diferente ce ia aida a reali esta imaje dramos. A un lado, "Par la prosimia relativa e enerjia investida en se esplode, la supranova SN 1006 pote ia es la plu briliante supranova en istoria." A plu, "con Hubble nos ave la vantaje ajuntada ce el es estra la atmosfera, evadente se turbas e oteninte imajes plu agu", seguente Rosenberg.
Un otra aspeta ce esta esperto lumina es ce "el revela alga stelas de nos galasia" (puntos blanca) e un numero grande de galasias (manxas e puntos plu jala).
La Telescopio Spasial Hubble es un projeta internasional de colabora entre NASA e la Ajenteria Spasial European (ESA), en orbita de 1990.
@T Ia es felis
@L leteratur/ia_es_felis
@A Marisa Monte, Patrick Chevin
====== Ia es felis ======
par Marisa Monte
traduida par Patrick Chevin
Ia es felis
Ce me encontra tu aora
Me vera no sabe ancora
Ce me ia fa per merita
Tu
Car tota los
Ia no valua ja me
Me ia vole no cos'
E me an no crede plu
En me
E la me cor
Ia es ja abituada
Es solitar
Ci ta dise ce tu ta resta
A lado de me
Tu ia veni per resta
Tu ci fa me es felis
Tu ci fa me canta
Tal
E la me cor
Ia es ja un jubilor
De un sonior
El ia es maltratada
Tota es mutada
Aora tu ia veni
Tu ci fa me es felis
Tu ci fa me canta
Tal
@T Iliada
@L leteratur/iliada
@A Chabi
====== Iliada ======
La comensa de un poesia epica par vp>Homero, traduida par Chabi
Diva, canta la coleria destruinte de Acile, fio de Peleo, cual ia trae un multia de angusas a la aceanes, ia envia a Hade multe spiritos forte de eroes, e ia fa de los la preda de tota canes e vultures. La vole de Zeus ia es realida de cuando la disputa dividente ia comensa entre la fio de Atreo, re de omes, e Acile la grande.
Ci entre la deos ia promove entre los la disputa? La fio de Zeus e Leto. Colerida con la re, el ia envia un pesta a la esersito e la omes ia mori par causa ce la fio de Atreo ia desonora la prete Crise. Crise ia veni a la barcos de la aceanes con un rescata enorme e la setro de Apolo per libri sua fia. El ia suplica a la aceanes, e spesial a la duo fios de Atreo, ci ia es sua xefes:
"Fios de Atreo e tota la otra aceanes! La dios, ci abita en la Olimpo, ta ce vos permete saca la site de Priamo e reveni secur a vos propre pais! Libri mea fia e aseta un rescata per el, respetante Apolo, la fio de Zeus, ci xuta distante."
Tota la aceanes ia aproba respeta la prete e prende la rescata cual ia ofre; ma Agamemnon, a ci no gusta la trata, envia el a via. "Vea om", ia dise, "ta ce me no vide tu sirca de nosa barcos o car tu retarda o car tu reveni a pos. Tua setro e tua garlanda va serve no cosa".
Me no va libri el, ante el va veni en nosa casa, en Argos, longe de sua propre pais, laborante en la texador e servinte mea leto. Ma vade, no coleri me, afin tu ta pote reveni secur.
Tal ia parla, e la om vea ia teme e ia obedi sua comanda. El ia vade silente a lado de la costa de la forte resonante mar, e en cuando el ia distanti, seria ia prea a la dio Apolo, naseda de Leto, de capeles bela: "Escuta me, dio de la arco arjento, ci proteje Crisa e la divin Cila, e governa potiosa sur Tenedos, o dio smintian, si me alga ves ia decora tua templo o si me ia arde a tu abundante coxas de boves mas e de capras, completi esta prea a me: Ta ce la aceanes paga mea larmas per tua flexas".
Tal ia es sua prea. Apolo ia escuta lo e, iritada en sua cor, el ai desende de la apico de Olimpo con la arco e la portaflexa cluida sur sua spalas; la flexas ia sona sur la dorso de la dio colerida, cuando el ia comensa move. El ia pare la note. El ia senta distante de la barcones, el ia lansa un flexa e la arco de arjento ia fa un clica asustante. Prima la dios ia spara contra mulos e canes ajil; ma alora el ia dirije sua flexas matante a la omes, e multe piras de corpos mor ia arde continua.
Per noves dias la flexas de la dio ia vola en dirije a la armada. En la dia des, Acile ia asembla la popla: Juno, la diva de brasos nevin, ia pone lo en sua cor. El ia interesa sur la danaos, a ci el ia vide mori. Los ia veni e, a un ves los es tota reunida, Acile de pedes lejera, ia leva e ia dise:
Fio de Atreo! Me pensa ce nos va debe vade retro, vadente a otra ves vagante, si nos evade la mori; car si on lo fa lo, gera e peste unida va fini con la aceanes. Ma perce on no consulta alga prete, alga previdor, alga interpretor de sonias, car ance sonias veni de Jupiter, afin el dise nos perce Febo Apolo mostra tan coleria contra nos? Cisa par alga jura rompeda, o alga sacrifia falida e cisa si nos va arde alga gas de ovetas o alga capras elejeda, el va deside turna la pesta a via.
Pos el ia parla ja, el ia senta denova e Calca, fio de Testor, ia leva. El, la plu bon de la augures, ia conose la presente, la futur e la pasada, e ia gida ja la barcones acean par la arte de predise cual ia dona a el Febo Apolo. El, con intende bonvolente ia parla disente: "Acile, amada par la dios, tu demanda ce me esplica la coleria de la dio, de la flexador Apolo. Bon, me va parla ma a ante declara e jura ce tu va es preparada per defende me con tua forsa e parola; car me crede ce me va coleri la om ci governa la argivos con sua potia, a ci la aceanes obedi. Car un re colerida contra algun inferior, an si el engoli sua coleria acel dia, el garda sua odia per alga tempo asta ce el eleje esecuta lo. Donce, dise si tu va salva me.
@T Ilios
@L leteratur/ilios
@A Homero, Imme Dros, D. Wijkhuis
====== Ilios ======
Esta es un tradui de la du pajes prima de Ilios, cual es un parte de la vp>Iliada par Homero, revisada par Imme Dros per enfantes. En esta pajes, la naror presente se e sua familia.
Traduida par D. Wijkhuis
Escuta la testo (MP3, 1400 KB)
Ares
Clama me "la bruta con du fases".
Blasfema me.
Sputa a me.
Valua me como pex putrida.
Dise me, en la fas, ce me es un malada de umania.
Dise me, ce me es la plu odida de la dios.
Ce me nome senti de sangue e de putre.
Esta, me fa rie!
----
Me padre es la plu alta de dios.
El es:
- la lusor,
- la raior,
- la padron de sielo e tera,
- la lansor de lampo e de tona,
- la coliedor de nubes,
- la creor de pluve,
- la justa.
El es Zues.
Zues, ci es un fio de Kronos, ci es un fio de Uranos.
Zues, ci ia mata Kronos, ci ia mata Uranos.
----
Me es un fio de un mator de se padre.
Me es un neto de un mator de se padre.
Ance, Kronos -me avo- ia come se enfantes.
Un, du, tre, cuatro, sinco.
A la numero ses, Rea -me ava- ia fa un rus con se sposo.
Lodada Rea, el ia es la prima de dona.
A Kronos, el ia dona un bloco de roca, envolver en tela.
E Kronos ia come esa, con gusta.
----
La ocures pos, nos conose.
La bebe ses, ia es clamada Zues.
Zues ia es elevada en Kreta, par un capra, con lete grasos e miel.
Esta comeda crea la muslos plu forte.
Pos, cuando el ia es matura,
Zues ia pote matar Kronos con se mano sinistra.
E, con se mano destra,
ia pote prender se frates e sores
da stomaco de Kronos.
----
Me no ia mata me padre.
Me no ia come me enfantes.
Ma, ci el acusada de cada cosa de tota tempo?
Me!
----
Si, me ia es cruel, como Kronos,
si, me ia es seto per sangue, como Zues,
si, me ia segue la costum vea,
donce,
me ta pote mata me papa, e,
me ta pote ave, la potia completa, e,
me ta pote es, la re de la dios.
Ma, si,
- me ia garda la vive de me familia,
donce,
- cada un me pote acusar de cada cosa.
Ci ia mata: se papa, se mama, se enfantes,
ci va es pensada tro bon, per ave me nome.
Ce abitua.
Ce abitua plu, alga ves.
Me clama me: Ares.
Me es la dio de gera.
----
Alga un, ia debe eser dio de gera.
E, la gera me ajita, esta es vera.
Ma, per es onesta,
esa no ia es me, ci comensa la gera.
Me sola ariva pos la comensa de luta.
Me va vole combata si vos es combatante.
Onesta.
Me no sabe la "per ci" o la "per ce" de un luta.
Ma, cada combata me fa ebria completa.
Esta es la veria.
La sonas de gera me dona la plu de joia.
Si!
Otras debe bevir tro plu, o
va pote perder la razona, par la cantadas
de atas corajo en lute.
----
Esta es la vole de Zues,
ce nos no debe oblidar.
Me es se fio propre.
El no ia come me, ma,
el ia fa me la dio de gera.
Esta ia es astuta!
>El no va es matada par me, ci es se fio propre.
La omes e dios garda Zues contra la dio la plu odida.
Los garda el contra me, ci es un non-ganior plu triste.
Me no pote oblidar,
ce es la vole de Zues.
----
Me padre,
ci es la padre de omes e dios,
a me nase,
ia es plu a tempo ce Kronos, e,
ia es plu prepare ce Uranos.
Zues crea un fio maldida:
Ares, la creor de mores.
----
Esta debe eser.
Esta es la vole de Zues.
Me sta sola.
Me no ave la amis.
Me no reseta alga respeta.
Masima, los es jelos
de me susede a copula.
Esta debe eser basta.
Jelosia borda a la respeta.
----
La donas de omes desira me.
La donas de dios desira me.
Me es bela e mal.
Esta es plu desirable per la donas!
Ance, la dio de ama, Afrodite,
a tota tempo,
pensa de me,
sola de me.
Afrodite ia eleje me, ci es Ares.
El no vole Apollo, ci es plu musical.
El no vole Hermes, ci es plu amable.
El no vole un otra.
El vole Ares, ci es bela ma mal.
Nos no va vole eser separeda,
me dona dioda e me,
ma, - esta es regretable -
la sielo e tera interferi
a tota tempo.
----
Ma, per esta momente, basta de amia.
----
Me vole recontar un istoria.
Un istoria de gera e venjansa.
Un istoria vera,
ce ia es fada famos par un cantor,
-ci no conose la veria de la gera como me-.
Esta es la istoria de Ilios,
le site de cavalos bela.
@T Imajina
@L leteratur/imajina
@A Yoko Ono, John Lennon, Stefan Fisahn, Simon Davies, Pierre Morin, Patrick Chevin, Michel Gaillard
====== Imajina ======
par Yoko Ono e John Lennon
traduida par Stefan Fisahn, Simon Davies, Pierre Morin, Patrick Chevin e Michel Gaillard
===== Traduida par Stefan Fisahn =====
Imajina no paradiso.
Es fasil si tu atenta.
No enferno su nos,
Supra, sola sielo.
Imajina tota persones
Vivente per oji.
Imajina no paises.
Es fada fasil.
No cosa per mata o mori
E ance no relijio.
Imajina tota persones
Vivente en pas.
Imajina no poseses.
Me demanda si tu pote.
No avidia o famia,
Un fratia de umanas.
Imajina tota persones
Compartinte tota mundo.
Tu crede ce me sonia,
Ma me no es sola.
Me espera alga dia tu va junta nos,
E la mundo va es un.
===== Traduida par Simon Davies =====
Ce no es paradiso
Me imajin' fasil.
Sin enferno su nos,
A supra, la siel'.
Me imajina poplas
Ci vive per oji.
Ce no esiste paises
No ta es laboros'
Sin causas mat' o mori
Sin cosas relijios'
Me imajina poplas
Ci vive bon en pas.
Vivente sin poseses
Me imajin' cadun.
Si no avar no fame,
La fratia es comun.
Me imajina poplas
Liada tra la mund'.
Si me pare un soniante,
Me no es la sola tal.
Si tu espera con nos,
Nos unida es mundal.
===== Traduida par Pierre Morin =====
Imajina ce no es Paradiso
Es fasil si tu atenta
No enferno su nos
Supra nos sola sielo
Imajina tota la popla
Vivente per oji
Imajina ce no es paises
No es dur fa
No cosa per mata o mori
E no relijio ance
Imajina tota la popla
Vivente la vive en pas
Tu pote dise ce me es soniante
Ma me no es la sola
Me espera ce, alga dia, tu junta nos
E la mundo va es unida
Imajina no posese
Me demanda me si tu pote
No nesesa per avaria o famia
Un fratia de omes
Imajina tota la popla
Partinte tota la mundo
Tu pote dise ce me es soniante
Ma me no es la sola
Me espera ce, alga dia, tu junta nos
E la mundo va es unida
===== Traduida par Patrick Chevin =====
Imajina, no paradiso.
Basta un poca de zelo.
No enferno su nos.
A supra, sola sielo
Imajina tota persones
Vivente sola per oji.
Imajina, no paises.
Es vera fasil a tu
No cosa per mati o mori,
E no relijio plu.
Imajina tota persones
Vivente en pas.
Imajina, no poseses.
Me demanda si tu pote.
No avaria, no famia,
Frates dia e note.
Imajina tota persones
Compartinte la mundo.
Clama me un sonior.
Me no es la sola tal.
Me espera tu ancora,
E la mundo va es fratal.
===== Traduida par Michel Gaillard =====
Atenta imajina
no paradiso
no enferno su
supra nos, sola sielo
e si tota la poplas
ta vive "aora-asi"
Atenta imajina
no pais, no causa
per cual ta mata o mori
e no relijio plu
e si tota la poplas
ta vive la vive en pas
Cisa me es un sonior
ma me no es la sola tal
Junta a nos, e la mundo
e tota de nos va es Un
Atenta imajina
no ave, no posese
no avaria, no famia
un fratia umana
e si tota la poplas
ta comparti la mundo
Cisa me es un sonior
ma me no es la sola tal
Junta a nos, e la mundo
e tota de nos va es Un
===== En engles =====
@T Imno nasional de Arjentina
@L leteratur/imno_nasional_de_arjentina
@A Vicente López y Planes, Blas Parera
====== Imno nasional de Arjentina ======
La imno nasional de Arjentina ia es scriveda par Vicente López y Planes en 1810, como "La marxa patriota", con musica composada par Blas Parera. Lo ia deveni ofisial la imno nasional en 1813.
Oia, mortales, la cria santa:
"Libria! Libria! Libria!"
Oia la ruido de cadenas rompeda
vide en trono a la egalia nobil
Aora la trono plu diniosa ia es abrida
La Provinsias Unida de la Sude
E la libres de la mundo responde:
"A la grande popla arjentina, saluta!"
"A la grande popla arjentina, saluta!"
E la libres de la mundo responde:
"A la grande popla arjentina, saluta!"
E la libres de la mundo responde:
"A la grande popla arjentina, saluta!"
Ta ce la lauros es eterna,
ce sabe ateni,
ce sabe ateni.
Coronida de gloria nos vive,
o nos jura con gloria mori!
O nos jura con gloria mori!
O nos jura con gloria mori!
@T Imno nasional de Vanuatu
@L leteratur/imno_nasional_de_vanuatu
@A Yumi, yumi, yumi, François Vincent Ayssav
====== Imno nasional de Vanuatu ======
Yumi, yumi, yumi ("Nos, nos, nos") ia es scriveda en bislama par François Vincent Ayssav, e ofisial adotada como la imno nasional de la Vanuatu en 1980.
Refren:
Nos es, nos es, nos es felis declara
Nos es, nos es, nos es tota popla de Vanuatu
Dio ia dona nos esta tera,
Nos ave causa grande per es felis
Nos es forte e libre en este pais,
Nos cadun es frates!
Refren
Abunda modos en la pasada,
Abunda modos a oji,
Ma nos es tote unida, un nom,
An con multe difere modos!
Refren
Nos sabe ave multe labora,
Sur multe isolas de nos,
Dio aida nos cadun,
El es padre de nos!
Refren
@T Imno per Santa Joan
@L leteratur/imno_per_santa_joan
@A Paolo Diacono, Guido d'Arezzo, Michel Gaillard
====== Imno per Santa Joan ======
Paolo Diacono (720-799), Guido d'Arezzo (992-1033)
Traduida de latina par Michel Gaillard
Tua atas merveliosa,
Per resona los
Vasta en esta cor
Umil de servor,
Disolve la peca sur
Sua labio nonpur,
Santa Joan!
Ut queant laxis / Resonare fibris / Mira gestorum / Famuli tuorum / Solve polluti / Labii reatum / Sancte Iohannes
@T Inca e manca
@L leteratur/inca_e_manca
@A Richard Curtis, Ben Elton, Simon Davies
====== Inca e manca ======
Esta es un episodio (nomida "Ink and Incapability" en engles) de la comedia televisada vp>Blackadder, scriveda par Richard Curtis e Ben Elton. Lo es situada en la sentenio des-oto, e lo conteni multe bromas lingual.
Traduida a elefen par Simon Davies.
===== En la salas de Prinse George =====
George (velia subita en sua leto) ---
O! O! Blackadder! Blackadder!
Edmund (entra) ---
Tua Altia.
George ---
Ma cual es la ora?
Edmund ---
La ora des-sinco, tua Altia.
George ---
O! Me grasia Dio per esta! Me ia teme ce me ia dormi tro longa.
Edmund ---
Me espera ce tu ia pasa un bon sera, senior.
George ---
En fato, no. Un cosa la plu estracomun ia aveni. En la sera ier, me ia fa un come peti a la Club Turbosa de l' Foco de Enferno, e alga om ia dise ce me ave la astutia e sofistica de un asino.
Edmund ---
O! Un sujesta asurda, senior.
George ---
Serta, lo es asurda.
Edmund ---
Estra si, natural, la om ia refere a un asino spesial stupida.
George ---
Vide, la situa ier ta es multe diferente si me ia emete un tal replica.
Edmund ---
Esta es un esperia comun, senior. La parolas ideal veni tro tarda a la mente. Sir Thomas More, per esemplo, ia es esecutada par arde car el ia refusa denunsia sua catolicisme. Sin duta, entre la flamas cresente, el ia deveni vera iritada ce el no ia veni a la idea de dise: "Me denunsia mea catolicisme."
George ---
Bon, lo es tal. Simil, a la dia ante ier, Pitt, la Ministro Prima, ia nomi me un emprestor pigra. Ma sola a un ora multe plu tarda, me ia trova esta replica intelijente: "Ma vade a putri, peta vea!" Me nesesa boni mea mente, Blackadder. Me desira ce on dise: "Acel George -- el es tan saja como un basto en un balde de comeda de porcos."
Edmund ---
E como tu proposa ce nos va reali esta miracle, tua Altia?
George ---
Fasil. Me va deveni la ami la plu bon de la om la plu intelijente en England. Acel serebro famosa, Dotor Samuel Johnson, ia demanda ce me suporta finansial sua libro nova, e me intende aseta.
Edmund ---
Esce tu parla sur la "disionario" longa espetada, senior?
George ---
La titulo importa a no grado si lo conteni un abunda de matas jusosa. Me ia oia ce lo es un opera mestral.
Edmund ---
No, senior, lo no es. Lo es un libro tan nonesesada como la tradui franses de "Lesones per aprende la lingua franses".
George ---
Esce tu ave un desacorda personal con Johnson, Blackadder?
Edmund ---
Mea bon Dio, tota no, senior! En fato, me ia oia nunca sua nom ante cuando tu ia dise lo a un momento a ante.
George ---
Ma tu crede ce el es un jenio, no?
Edmund ---
No, senior, me no crede acel -- estra si, natural, la defini de "jenio" en sua disionario es: "Un obesa o pendeculo stupida; un asino ostentosa en un suda de suo."
George ---
A! Bon, donce me ia evita un desastre! Me es fortunosa ce tu ia averti me. Me ia es a punto de abrasa esta culo repulsante a la peto rial.
Edmund ---
Me es deletada ce me ia aida tua peto a evade un culo, senior.
George ---
Brava! Me no vole peri mea tempo valuada con pendeculos. Aora furni alga te, per favore, Blackadder.
Edmund ---
Serta, senior.
George ---
E trae du tases, per favore. Acel serebro briliante, Dotor Johnson, va visita.
===== En la cosina =====
Edmund ---
Ai!
Baldrick ---
Un problem, Senior B?
Edmund (cade la porselana de te de la Prinse en un baril) ---
O! Me ave sempre un problem, Baldrick. Me no es un aristocrata e milionor con la capasia sesal de un rinosero corteante -- esta es un irita constante. Ma oji, me ave un problem an plu grande. Dotor Johnson, acel frodor e goton, va fa un visita.
Baldrick ---
Me ia crede ce el es la om la plu intelijente en England.
Edmund ---
Baldrick, me ta encontra acaso persones plu intelijente a un reuni de la Corpora de Viletanes la Plu Stupida.
Baldrick ---
Tu no ia dise acel cuando tu ia envia tua mamela a el.
Edmund ---
"Novela", Baldrick, no "mamela". Me ia envia mea novela a el.
Baldrick ---
An tal, novela o mamela, lo pare ce tu sufri un caso de uvulas asidua.
Edmund ---
La espresa, Baldrick, es "uvas asida", ma si, me acorda. Txa! Vera, el ia debe rescrive a me, a la min. Ma no, me ia reseta no cosa, an no un letera per dise: "Cara Gertrude Perkins, grasias per tua libro. Vade a putri, Samuel Johnson."
Baldrick ---
Gertrude Perkins?
Edmund ---
Si, me ia adota un nom falsa fema. Cadun en nosa tempo fa lo: Seniora Radcliffe, Jane Austen...
Baldrick ---
Jane Austen es un om?
Edmund ---
Natural. Un om vasta de Yorkshire con un barba simil a un rododendro.
Baldrick ---
O! Donce un barba peti?
Edmund ---
Serta, en compara con lo de Dorothy Wordsworth. James Boswell es la sola fem vera ci scrive a esta momento, e esta es sola car el desira penetra la pantalon de Johnson.
Baldrick ---
Cisa tua libro es vera sin valua.
Edmund ---
O, babela! Me ia labora sur lo tra sete anios, e lo es perfeta: "Edmund, un manejor de servores". Un novela jigante, trepante tra la emosias, en 400 capitoles incandesente. Un acusa scaldante de la sclavia de casa en la sentenio des-oto, con alga romanis sesosa per regala. Lo es mea opera mestral, Baldrick. Cadun ave en se un novela, e esta es la mea.
Baldrick (produi un paper peti e susia) ---
Si, e esta es la mea. Mea pera mensal.
Edmund ---
Esta es tua novela, Baldrick?
Baldrick ---
Si. Me no tolera libros longa.
Edmund (leje) ---
"A un ves pasada, un bon salsix peti ia es nomida Baldrick, e lo ia vive felis per sempre."
Baldrick ---
Lo es autobiografial en partes.
Edmund ---
E lo es completa e intera dejetable. Dotor Johnson va adora lo, probable. (Un campana sona.) E bon, la diablo ariva ja. Me suposa ce me debe fa ce la dotor grande es... comfortosa. Me vole descovre esce Dotor Sabetota Grasosa es vera tan enfernal intelijente como on dise. O, Baldrick! Prepara un foco per la prinse, per favore.
Baldrick ---
Con cual combustable?
Edmund ---
O! Cualce dejetada va sufisi. Paper no es mal. Proba esta per comensa. (El crase la novela pico e lansa lo a Baldrick.)
===== En la salas de Prinse George =====
George (cuando algun bateta la porte) ---
Entra!
Edmund (entra con la visitor) ---
Dotor Johnson, tua Altia.
George ---
A! Dotor Johnson! Un dia enfernal fria.
Johnson ---
El es tal, senior. Ma ance un dia multe bela, car, a la sera pasada, me ia selebra la reali ensiclopedial de mea orcestri preconsiderada de anglosason demotica.
George (pos acorda vacua con sua testa) ---
No. Me ia comprende no parte de acel.
Johnson ---
Bon, me ia fa no plu ca comenta, senior, ce me es estasiosa, car en la curso de la lumina la plu resente de la sfera de sielo, me ia completi mea categori noninterompeda de la vocabulo de nosa lingua posnormande.
George ---
Me no sabe a cual tu refere, ma txa! Lo sona tan stimulante, om fortunosa! Me conose xicas alga libriste, ma nunca me ia lumina los en la sfera de sielo o esperia sua linguas normande.
Edmund ---
Me crede, senior, ce la Dotor vole informa tu ce el es felis car el ia fini sua libro. Lo pare ce lo ia ocupa el tra des anios.
George ---
Si, me comprende. Me mesma leje lenta.
Johnson (produi un manoscrito grande) ---
Lo es asi, senior. Vera la funda de eruditia engles. Esta libro, senior, conteni cada parola en nosa lingua amada.
George ---
(El fa un murmura impresada.)
Edmund ---
Cada sin eseta, senior?
Johnson ---
Cada sin eseta, senior.
Edmund (a George) ---
Bon, en esta caso, senior, me espera ce tu no va oposa si ance me ofre a la Dotor mea lodas la plu zelosa e contrafibuliste.
Johnson ---
Como, senior?
Edmund ---
Contrafibuliste, senior? Lo es un parola comun en esta parte.
Johnson (scrive en sua manoscrito) ---
Txa!
Edmund ---
Ma pardona me, senior. Me es anaspetica, frasmotical, an compuntuosa si me ia causa a tu un tal pericombambola.
Johnson (scrive rapida) ---
Como, como?
George ---
He, sur cual tu parla, Blackadder? Esta comensa sona riable stranjer a me.
Edmund ---
Pardona, senior. Me ia desira sola loda la Dotor car el ia omete an no un parola minor. Me ta trae la te, tua Altia?
George ---
Si, si. Ma txa! Ta ce tu ensende la foco en esta sala.
Edmund ---
Serta, senior. Me va reveni... entrefrastin. (El sorti.)
George ---
Bon, Dotor Johnson. Senta tu. Alora, esta tua libro. Dise a me, sur cual lo nara?
Johnson ---
Lo es un libro sur nosa lingua, senior.
George ---
Bon. E cual es la nom de la eroe mas?
Johnson ---
Lo ave no eroe mas, senior.
George ---
No eroe mas? Bon, lo es fortunosa ce me ia recorda! Tu debe ajunta un eroe mas, tan rapida como posible. Nomi el George. George es un bon nom per un eroe mas. E plu, ci es la eroe fema?
Johnson ---
Lo ave no eroe fema, senior, estra si tu refere a nosa lingua de madre.
George ---
A! La madre es la eroe fema. Un bon truco! Donce cuanto me comprende ja? Madre Lingua es enamada par George la eroe mas... E esce matas aveni? On no mata Madre Lingua, si?
Johnson ---
No, on no mata el! On mata nun! On sposi nun! E nun trova se en un situa difisil sur un bileta de mone!
George ---
Ma vera, Dotor Johnson, comprende esta. Cisa me es tan fol como un omeleta de balena, ma an me sabe ce un libro nesesa un trama.
Johnson ---
No esta libro, senior. Lo es un libro cual presenta la sinifias de la parolas de nosa lingua.
George ---
Ma me sabe ja la sinifias de la parolas de nosa lingua. Me parla ja nosa lingua. Lo es clar ce tu es un fol grande!
Johnson (sta coler) ---
Cisa tu ta prefere no suporta mea libro si tu vide tota no valua en lo, senior!
George ---
Bon, cisa lo es tal, senior. Lo pare a me ce, si me ta suporta esta libro plen de fece boval, me ta confirma a un ves per sempre la reputa ce mea testa conteni no plu ca un nabo.
Johnson (vade a la porte) ---
E acel reputa es bon meritada, senior! Adio.
Edmund (entra con un platon de te) ---
Tu parti ja, Dotor? Tu no vole resta per tua intervaleria de pendijestario?
Johnson ---
No, senior, mostra a me la via de sorti!
Edmund ---
Serta, senior. Me va fa cualce cosa posible per desimpedi tua estramuri aselerada.
Johnson (a George) ---
Tu va regrete esta a un grado duple, senior. Tu no sola ia despeculiari (a esta parola, el fa un regarda vantosa a Edmund) mea disionario, ma tu ia perde ance la posible de suporta finansial la sola libro en la mundo cual es an plu bon.
Edmund ---
E cual es la nom de acel, senior? "Disionario 2: la reveni de la disionarios matante"?
Johnson ---
No, senior. Lo es "Edmund, un manejor de servores" par Gertrude Perkins. (Edmund cade cuasi la platon de te.) Un novela enorme, trepante tra la emosias, plenida con romanis incandesente sesosa. Si tu ia suporta lo, senior, tu e me e Gertrude ta deveni milionores.
Edmund ---
Milionores!
Johnson ---
Ma la fortuna ia segue un via diferente, senior. Adio. Me no va reveni. (El sorti.)
Edmund (a George) ---
Pardona me, senior.
===== En la atrio =====
Edmund (segue Johnson) ---
Dotor Johnson, per favore, un parola privata con tu?
Johnson ---
Un parola con tu, senior, pote conteni sete milion silabas. Cisa tu va comensa aora e no fini ja ante la ora de dormi. O! Maldise mea oios! En mea furia, me ia lasa mea disionario con tua mestre fol. Vade per retrae lo, per favore.
Edmund ---
Senior, la prinse es joven e fol, e el ave un aracide en loca de serebro. Permete a me sola un pico de minutos, e me va trae no sola la libro ma ance sua suporta finansial.
Johnson ---
Vera, senior? Me duta multe. Un servor con bon influe es simil a un can ci parla. Multe rara!
Edmund ---
Me crede ce me pote cambia sua opina.
Johnson ---
Ma me duta, senior. Un om ci pote cambia la opina de un prinse es simil a un can ci parla norsce. An plu rara! Me va es en la salon artal de Seniora Miggins pos dudes minutos. Trae ala la libro.
===== En la salas de Prinse George =====
Edmund (entra) ---
Tua Altia, ta ce me ofre mea lodas.
George ---
Grasias, Blackadder! Acel babuin ostentosa no va vole reveni!
Edmund ---
O! Me desacorda, senior. Dotor Johnson ia parti en umor la plu joiosa.
George ---
Como?
Edmund ---
El es multe stimulada par tua promete de suporta finansial per sua disionario.
George ---
Ma me ia envia el a putri, no?
Edmund ---
Si, senior, ma acel ia es clar un broma, no?
George (confusada) ---
Un broma?
Edmund ---
Serta. An un broma briliante.
George (abandona sua confusa) ---
Si, si. Me acorda. Lo ia es vera bon, no?
Edmund ---
Donce esce me pote dona tua nota de suporta a Dotor Johnson, como tu ia promete?
George ---
Bon, si me ia promete esta, me debe fa. E me recorda clar ce me ia promete lo.
Edmund (vide ce Baldrick ia ensende la foco) ---
Eselente. Un bon foco, Baldrick.
Baldrick ---
Grasias, Senior B.
Edmund ---
Bon, me va prende la libro. Baldrick, do es la manoscrito?
Baldrick ---
Tu vole dise la cosa grande de paper liada par cordeta?
Edmund ---
Si, Baldrick, la manoscrito cual parteni a Dotor Johnson.
Baldrick ---
Tu vole dise la om coler en la jaca negra ci ia parti resente?
Edmund ---
Si, Baldrick, Dotor Johnson.
Baldrick ---
Donce tu demanda do es la cosa grande de paper liada par cordeta cual parteni a la om coler en la jaca negra ci ia parti resente?
Edmund ---
Si, Baldrick. E si tu no dona un responde, alora la cosa ososa con sinco ditos en la bota de mea gama va colpa subita e pronto la colie de ojetos mol e pendente en tua pantalon. A la ves final, Baldrick, do es la manoscrito de Dotor Johnson?
Baldrick ---
En la foco.
Edmund ---
Do?
Baldrick ---
En la cosa calda e orania en la cosa petrin su la ximine.
Edmund (xocada) ---
Tu ia arde la disionario?
Baldrick ---
Si.
Edmund ---
Tu ia arde la opera de vive de la scolor la plu importante en England?
Baldrick ---
Ma tu ia proposa arde cualce dejetada.
Edmund ---
Si, vera.
George ---
Si nos ia arde esta libro, lo va es alga difisil ce me suporta lo, no?
Edmund ---
Si, tal. Tu ta permete ce me sorti per un momento?
George ---
Natural. Me ave aora mea foco bela, donce me es tan felis como un romantica ci ia inventa un pantalon cual despone se mesma.
Edmund ---
Baldrick, tu ta acompania me a la atrio?
===== En la atrio =====
Edmund (saisi la colar de Baldrick) ---
Nos va vade a la caferia de Seniora Miggins, nos va descovre do Dotor Johnson reteni un copia de acel disionario, e alora tu va fura lo.
Baldrick ---
Me?
Edmund ---
Si, tu.
Baldrick ---
Perce me?
Edmund ---
Car tu ia arde lo, Baldrick.
Baldrick ---
Ma si me fura, me va vade a enferno per sempre.
Edmund ---
Baldrick, crede me, si nos no susede sustitui per esta disionario, alora un tempo eterna en la acompania de Satan e tota sua strumentos de moria enfernin va pare deletosa en compara con sinco minutos con me... e esta peneta. Aora, veni.
===== En la caferia de Seniora Miggins =====
Shelley (la poesiste -- el senta malada e delicata a un table) ---
O! La estasia triste amada ci es Seniora Miggins, per favore, tu ta jenera per me un tas de la jus brunida de acel fava turbosa cual nos nomi cafe, ante la apare de mea mori? (El tose.)
Seniora Miggins ---
O! Tu ave un bon manera de espresa, Senior Shelley!
Byron (la poesiste -- furiosa) ---
Enferno a sua bonparla. Cafe, fem! (El tose ance.) Mea tuberculose deveni sempre plu mal, e la drogas de Coleridge sesa ja opera.
Seniora Miggins ---
O! Senior Byron! No es tan coarde debil!
===== Estra la caferia =====
Edmund ---
No oblida la peneta, Baldrick.
Baldrick ---
O! Me no pote, senior.
===== En la caferia =====
Edmund ---
Bon dia a tu, Seniora Miggins. Un tas de acua calda con granes brun la plu bon -- estra si, par alga miracle, tua caferia ia comensa an vende cafe.
Byron ---
Silenti, senior! Tu no vide ce nos mori?
Seniora Miggins ---
O! No ajita tu par causa de mea poesistes, Senior Blackadder! Los no mori; los sola condui scoloral.
Edmund ---
Seniora Miggins, la vaga tra Italia en un camisa grande en xerca de la seso es scoloral a no grado. Perce los es asi, entre tota locas posible?
Byron ---
Nos es asi, senior, per onora Dotor Johnson, la grande. E ance tu debe fa la mesma, senior.
Edmund (subita plu cortes) ---
O! En fato me intende. Tu ta ave an un copia de sua disionario, cisa, afin me pote restudia alga partes ante sua ariva?
Johnson (entra) ---
Amis, me ia reveni.
Poesistes ---
U-ra!
Edmund (tarda, falsa) ---
U-ra!
Byron ---
Bon, senior, e la prinse?
Johnson ---
La prinse ia es, e es ancora, un fol completa. E sua casa es plenida con servores cretin. (El vide Edmund.)
Edmund ---
Bon dia, senior.
Johnson ---
A! E esta es la plu mal entre los. Senior, pos tota tua vantas, esce tu ave mea disionario e mea suporta finansial?
Edmund ---
No, ma cuasi. La prinse desira sola un poca plu de oras per comprende vera la libro.
Johnson ---
Ba!
Poesistes ---
Ba!
Edmund ---
An tal, me ia demanda a me esce tu ta permete ce un servor tan umil como me regardeta un copia?
Johnson ---
Un copia?
Poesistes ---
Copia?
Johnson ---
On ave no copia, senior!
Edmund (ansiosa) ---
No copia?
Johnson ---
No, senior. Crea un copia es simil a fisa rotas a un tomate. Lo consuma tempo e es tota nonesesada.
Edmund ---
Ma cual tu ta fa si tu ta perde la libro?
Johnson ---
Me no ta perde la libro, senior, e si un otra person ta perde lo, me ta tira sua testa a via par mea manos propre e ta usa lo per nuri la gato! (Furiosa, el frati sua tas de cafe en sua mano.)
Edmund ---
Bon... Grasias per acel esplica clar.
Byron ---
E me, Byron, ta clama sincodes de mea amis, me ta aseja la casa de la pecor, e me ta fa un mata sanguosa a el. (Menasante, el pone sua spada sur la spala de Edmund.)
Coleridge ---
E me no ta reposa ante cuando la criminal ta pende de sua capeles, con un simitar de desventri puxada en sua posterior vil. (El teni sua spada a la garga de Edmund.)
Edmund ---
Me espera ce tu escuta tota de esta, Baldrick.
===== En la salas de Prinse George =====
Edmund ---
Senior, me no ia susede sustitui per la disionario. Donce me va parti direta per vade a Nepal, do me intende vive como un capra.
George ---
Perce?
Edmund ---
Car, si me resta asi, la cameradas de Dotor Johnson va fa ce on asasina me en modo savaje, senior.
George ---
Mea bon Dio, Blackadder, esta es xocante! Tu conose un otra bon manejor de servores?
Edmund ---
E, natural, cuando la popla descovre ce tu ia arde la disionario de Dotor Johnson, cisa on va dise vasta: "Regarda George la fol -- el ave un serebro tan peti como la organos sesal de un mustela."
George ---
Ma donce lo es clar ce nos debe reata!
Baldrick ---
Me ave un scema rusosa, senior.
George ---
U-ra! Ja la solve.
Edmund ---
No deveni tro stimulada, senior. Me suspeta nonfelis ce la scema de Baldrick va es la idea la plu stupida cual on ia oia de pos la sinial famosa de Visamiral Nelson a la Batalia de la Nilo: "England sabe ce Lady Hamilton es virjin; estrae mea oio e sutrae mea braso si me era."
George ---
Donce bon, esplica la scema.
Baldrick ---
Lo es briliante. Tu va prende la cordeta -- acel es ancora no completa ardeda -- tu va raspa la suje a via, e tu va ajunta denova la pajes.
Edmund ---
Cual pajes?
Baldrick ---
Ma no la mesmas, natural.
Edmund ---
Si. Me crede ce me es a punto de persepi la falta de esta scema. Ma continua. La pajes es cual?
Baldrick ---
Bon, on ave asi la parte briliante. Tu va scrive pajes nova.
Edmund ---
Pajes nova? Tu proposa ce me rescrive la disionario? Me va senta a esta sera e rescrive la disionario cual ia ocupa Dotor Johnson tra des anios?
Baldrick ---
Si.
Edmund ---
Baldrick, par un grado enorme e sin an un fantasma de duta, esta es la scema la plu mal e despetable en la istoria de la universo. A la otra lado, me oia ce on agi un simitar de desventri, e esta scema es la sola cual nos ave. Donce, ta ce vos pardona me, seniores... (El senta se a un table.)
George ---
Cisa tu ta permete ce me ofre un aida, Blackadder? Me no es tan stupida como me aspeta.
Baldrick ---
Me es tota tan stupida como me aspeta, ma si me pote aida, me va fa.
Edmund ---
Bon, ambos de vos es multe jentil, ma me teme ce vosa servis va es tan usosa como un boteca de capelor sur via a la gilotin.
George ---
O! Per favore, Blackadder, proba nos!
Edmund ---
Multe bon, senior, me segue tua desira. Nos ta comensa a la comensa, si? Prima: "a". Como vos ta defini "a"?
George ---
O! Me ama esta, me ama esta -- un cuiz! Em... "a"... u... ma... em...
Baldrick (a la mesma tempo) ---
U... "a"... em... "a"... "a"... un momento... me xerca... (El proba la sonas posible de la parola.) "A"... "a"...
George ---
A, si! Me sabe!
Edmund ---
Cual?
George ---
Vide: lo sinifia vera no cosa, no?
Edmund (sarcasmosa) ---
Eselente. Nos ia comensa ja bon la via. "A" -- preposada -- lo sinifia vera no cosa. E bon, la seguente. Pos A, A-B-A...
Baldrick ---
Em, "abea"? Bon, lo es un cosa zumbinte, no? (El dita.) Un... cosa... zumbinte.
Edmund ---
Baldrick, me intende un cosa cual comensa con A-B-A.
Baldrick ---
Miel? Miel comensa con un abea.
George ---
Esta es coreta, tu sabe, Blackadder. Miel comensa vera con un abea! E ance un flor.
Edmund ---
Si. Vide, nos tota no va susede en esta modo. E plu, me ia omete ja "abaco".
George ---
Ma bon, on no pote dise ce nos no ia atenta.
Edmund ---
No, tua Altia, la atenta ia es corajosa, ma me regrete ce me va debe prosede solitar. Baldrick -- per favore, vade a la cosina e trae un plato simple cual me pote come rapida. Du talias de pan con alga cosa en la media.
Baldrick ---
Como la plato resente comeda par Jeraldo, la conte de Sanduitx?
Edmund ---
Si -- alga jeraldos, per favore.
===== A un ora multe tarda =====
George (entra con Baldrick) ---
Como lo vade, Blackadder?
Edmund ---
No vera bon, senior.
George ---
Ma ta ce me vide. (El prende un paje e leje.) "Un util de calcula con perletas liscable longo filos o ranures." Acel no pare multe simil a un abea, en mea opina.
Edmund (subita furiosa) ---
El es un abaco! Esce tu no pote vide, tua Altia? Txa de diablo, el es un abaco!
George ---
Ai! Nos sta ancora a "abaco", si?
Edmund ---
Me regrete ce lo es tal. E si en la futur me trova ce me sta a un abaco real, me va piafa sua perletas longo sua filos o ranures enfernal -- asta cuando nun pote plu calcula par lo, an per salva sua vive.
George ---
Tu ia deveni alga maraniada, si?
Edmund ---
Pardona me, senior. Sinco oras ia pasa, e me debe ancora scrive un defini per cada parola en la lingua con eseta de "a" e "abaco". E me no es multe felis an sur mea definis de aceles.
George ---
Ma no panica, Blackadder, car me porta novas multe bon.
Edmund ---
O. Como?
George ---
Vide, nos no ia aseta tua dise de "no". Nos ia labora tra tota la note, en fato. Me ia fa la letera R.
Edmund ---
Vera? E tu ia susede?
George ---
Me confesa ce "ruta" ia presenta un problem -- ma me crede ce final me ia solve lo. (El ruta.) Ma no! La problem reaveni! (El rie forte e multe.)
Edmund (sin rie) ---
Tu labora ja sur acel broma per un tempo alga longa, si, tua Altia?
George ---
Bon, si, lo es vera en fato, si.
Edmund ---
De la comensa?
George ---
Plu o min.
Edmund ---
Donce, en fato, tu ia fa tota no labora?
George ---
Vera no.
Edmund ---
Eselente. Baldrick, cual tu ia fa?
Baldrick ---
Me ia fa la leteras S e T.
Edmund ---
Bon, ta ce me oia los.
Baldrick ---
"Parte de la anio cuando on sui multe."
Edmund ---
Cual es acel?
Baldrick ---
Es-tate.
Edmund ---
Si, un malcomprende pico... An tal, me no ia espera multe. O! E tu ia fa ance T?
Baldrick ---
Me ia susede bon con "tigre".
Edmund ---
Si? E como tu defini "tigre"?
Baldrick ---
"No un leon."
Edmund ---
Eselente. Eselente! Tua Altia, tu permete ce me parla franca?
George ---
Serta.
Edmund ---
Como tu sabe, senior, me ia intende sempre resta con tu asta cuando tu ta ave un fio forte, e me ta ave un simil, per emprende la cargas de mea debes.
George ---
Me sabe, Blackadder, e me grasia tu per esta.
Edmund ---
Ma me regrete, senior, ce me ia cambia mea intende. Me vade a la cosina per axi mea testa a via con un cotel grande.
George ---
O vide, Blackadder, nos fronti sola un libro! Nos nesesa fa no otra cosa a la om ca maldise sua oios, prende la pantalon de sua posterior, e xasa el a la Ponte de Putney! U-ra!
Edmund ---
Senior, nos no vive en la tempo de Alfred la Grande. Tu no pote simple destesti un person e culpa la vicinges.
George ---
Mea bon Dio! Esce no?
Edmund ---
No.
George ---
Ai! Ma donce bon, nos debe simple fa la taxe. Vera, boli mea testa si me era, ma lo es sola un disionario. On no ia esije ce nos devora des porcos cru per nosa come de matina. Vera, mea bon Dio, nos es brites, no? (El sorti.)
Edmund ---
Ma tu no es: tu es deutx. Trae alga cafe, Baldrick. Si me adormi ante lundi, nos va es ruinada.
===== Plu tarda =====
Baldrick (pos trova ce Edmund dormi a la table) ---
Senior Blackadder, lo es la ora de velia!
Edmund ---
Cual es la ora?
Baldrick ---
Lo es la matina de lundi.
Edmund ---
La matina de lundi! Mea bon Dio, me ia dormi tro longa! Do es la pluma? Do es la pergamin?
Baldrick ---
Me no sabe. Cisa Dotor Johnson pote presta alga.
Edmund (xocada) ---
Como?
Baldrick ---
El es a la porte.
Edmund ---
(El cria en angusa.)
Johnson (entra) ---
Tu es malada, senior?
Edmund (babelante) ---
No, tu no pote ave lo. Me sabe ce me ia promete lo per lundi, ma me vole ce Baldrick leje lo, per cual lo va es regretable nesesada ce me ensenia a el leje, e esta va ocupa sirca des anios. Ma esta tempo va es beneficante en mea opina, car la disionario es tan bon.
Johnson ---
Me no acorda.
Edmund (cria un escusa) ---
Ma no, on ia fura de nos! (El pausa e regarda Johnson con stona.) Como?
Johnson ---
Me opina ce lo es un disionario xocante mal, plen de definis debil e parolosia riable. Me ia veni per demanda ce tu lansa la libro enfernal en la foco.
Edmund ---
Tu es serta?
Johnson ---
Nunca en mea vive me ia es plu serta, senior.
Edmund ---
Me ama tu, Dotor Johnson, e me vole pari tua bebes. (Los abrasa. Edmund persepi un fem ci sta pos Johnson.) Pardona me, Dotor Johnson, ma mea Tia Marjorie ia ariva subita. (El turna se a Baldrick, ci ia deveni un can.) Baldrick, ci ia permete ce tu deveni un can de pastor? O! Txa! Esta es un sonia, no? Enfernal, un sonia... (La otras sorti dansante de la sala.) Dotor Johnson tota no vole ce nos arde sua disionario... (El adormi denova.)
===== Ancora plu tarda =====
Baldrick ---
Senior Blackadder, lo es la ora de velia!
Edmund ---
Cual es la ora?
Baldrick ---
Lo es la matina de lundi.
Edmund ---
La matina de lundi! Mea bon Dio, me ia dormi tro longa! Do es la pluma? Do es la pergamin?
Baldrick ---
Me no sabe. Cisa Dotor Johnson pote presta alga.
Edmund ---
Como?
Baldrick ---
El es a la porte.
Edmund ---
No, para, para. Si nos continua en esta modo, tu va deveni denova un can de pastor.
Baldrick ---
Como?
Edmund (oia persones coler a la porte) ---
Mea bon Dio! Rapida, Baldrick, ta ce nos fuji!
===== En la atrio =====
Shelley ---
He, senior, trae direta la disionario a nos!
Byron ---
Trae lo a nos, senior, o me va mata cadun par sifilis en mea pasion.
Coleridge ---
Trae lo a nos, senior, e ance cualce plantas de opio cual tu ave acaso!
Johnson ---
Trae lo a nos, senior, o nos va rompe la porte!
Edmund (entra a la atrio) ---
A! Bon matina, Dotor Johnson, Lord Byron---
Johnson (interompe) ---
Do es mea disionario?
Edmund ---
E a cual disionario tu refere?
Johnson (pasea a ante, menasante Edmund con sua basto, segueda par la poesistes con sua spadas) ---
La disionario cual ia ocupa des-oto oras de cada dia tra la des anios pasada. Mea madre ia mori -- me ia sabe apena. Mea padre ia destesti se e ia frita sua testa en alio, esperante atrae mea atende -- me ia leva apena mea oios de mea labora. Mea sposa ia trae a la casa armadas de amores, ci ia labora en manadas afin el eleva un familia enorme de bastardos -- me no ia es turbada! (Los sta aora en la salas de la prinse.)
Edmund ---
Esce me debe suposa ce mea engana complicada no ia susede?
Johnson ---
Disionario!
Edmund ---
Bon. Me va dise la vera, Dotor... Per favore, no deveni iritada. No reata tro forte. La vera es: nos ia arde lo.
Johnson ---
Donce tu va mori!
George (entra con un manoscrito) ---
Bon matina a tota. Vos sabe, leje esta disionario es vera un plaser jigante. Lo es un opera tota merveliosa.
Johnson ---
Mea disionario! Ma tu ia dise ce vos ia arde lo!
Edmund ---
Em...
George ---
Me judi ce lo es un libro merveliosa, e me intende suporta lo con zelo enorme.
Johnson ---
O! Bon -- grasias, senior. Bon, me crede ce me pote tolera sacrifia la plaser de mata per manteni la bon umor jeneral. (El turna se a la poesistes.) Un mata no va aveni oji, seniores.
Poesistes ---
(Los cria en delude.)
Johnson ---
Ma retira vos a la caferia de Seniora Miggins. Ala, me va reuni con vos per un selebra tan tumultosa ce vos va oblida nunca lo.
Poesistes ---
U-ra! (Los sorti.)
Johnson (prosimi a George) ---
Aora, senior, dise a me sur cual parolas tu ia trova un interesa spesial?
George ---
O! Em, no parola -- ma vera cada parola, tu sabe.
Johnson ---
Me vide ce tu ia sulini alga. (El leje los.) "Fece", "fode"... "peta", "pixa"... "reto", "ruta"... Senior! Me espera ce tu no usa esta disionario prima per xerca parolas ofendente.
Edmund ---
No espera tro multe. On va usa tota la seguentes per esta.
Baldrick ---
Senior, esce me pote xerca "nabo"?
Edmund ---
"Nabo" no es un parola ofendente, Baldrick.
Baldrick ---
Ma si, si on senta sur lo.
Johnson ---
Aora, seniores, nos debe ocupa nos sur un cosa plu importante. Me refere, natural, a la operas de Gertrude Perkins, la autor misteriosa.
Edmund ---
El no plu es misteriosa, senior. La momento conveni per dise la vera. Me pote revela final la identia de Gertrude Perkins la grande.
Johnson ---
Senior, ci el es?
Edmund ---
El, senior, es me, senior. Me es Gertrude Perkins.
George ---
Mea bon Dio!
Edmund ---
E plu, me ave la demostra. Presenta la manoscrito, e me va mostra a tu ce mea suscrive coresponde esata con acel sur la covrente.
Johnson (toca sua poxes) ---
O! Lo pare ce me ia lasa lo asi cuando me ia lasa la disionario.
George ---
Esta es estrema stimulante!
Edmund ---
Baldrick, trae mea novela.
Baldrick ---
Tua novela?
Edmund ---
Si, Baldrick. Acel cosa grande de paper liada par cordeta.
Baldrick ---
Como la cosa cual nos ia arde.
Edmund ---
Esata como la cosa cual nos ia arde.
Baldrick ---
Donce tu xerca la cosa grande de paper liada par cordeta cual es esata como la cosa cual nos ia arde.
Edmund ---
Esata.
Baldrick (confondeda) ---
Nos ia arde lo.
Edmund ---
A, si. Lo es tal. Grasias, Baldrick -- sete anios de mea vive ia desapare en fuma. Tua Altia, tu ta permete ce me sorti per un momento?
George ---
Volente.
Edmund (vade a la atrio, clui la porte, e cria) ---
Ai! Txa! No! (El reveni, denova calma.) Grasias, senior.
Johnson ---
Vos ia arde lo, tu dise? Esta es multe nonoportun. Un novela ardeda es como un can ardeda...
Edmund ---
Ma clui la boca!
Baldrick (dona sua paper peti e susia a Johnson) ---
Senior, me ave un novela.
Johnson (leje) ---
"A un ves pasada, un bon salsix peti ia es nomida..." Salsix? Salsix! Ma txa a vosa oios! (El crase la paper e sorti furiosa.)
Baldrick ---
O! Me novela no ia es tan mal, en me opina.
Edmund (esplora la disionario) ---
Me crede ce tu va trova ce el ia omete "salsix" de sua disionario. O! E ance "abaco". (El vaga triste a la porte.)
George ---
Vide, Blackadder, la situa no es tan mal. Un bon foco rujinte va felisi tu denova. Baldrick, reforti la foco, per favore. (El sorti con Blackadder.)
Baldrick ---
Serta, tua Altia. (El prende alga paperes de la table, incluinte la disionario, e lansa los en la foco.)
@T Intendes e cualias de un lingua de mundo
@L leteratur/intendes_e_cualias_de_un_lingua_per_la_mundo
@A 
====== Intendes e cualias de un lingua de mundo ======
Estraes de "Aims and Traits of a World-Language" (Intendes e cualias de un lingua per la mundo), un parla a la "Nineteenth Century Club", New York, 12 desembre 1888, par Daniel Garrison Brinton. Disponable a "The Acadon Project" de Leo Moser.
Traduida par George Boeree.
[Un lingua universal] debe es construida sur la linias conoseda e reconoseda de la developa de linguas. Esta es sempre e a tota locas de la forma sintesal a la forma analisal. Par esta termas tecnical, me intende ce la tende es sempre a la dejeta de finis de rol de nomes, pronomes, e ajetivos; a la cambia de la conjugas de verbos par finis de tempo e modo a un conjuga par verbos aidante; e, jeneral, a la indica de la relatas de parolas par la usa de otra parolas autonom e no par afisas cual no ave sinifia solitar e no pote sta solitar. Si tu nesesa un demostra ce esta es la linia de developa natural, tu nesesa sola compara la deutx moderna con la gota antica, o la linguas romanica moderna con la latina de la eda de Augusto. Me pote sita per tu multe otra esemplos de la linguas de Polinesia e America, ma los no es nesesada; los nara tota la mesma narada....
Tota linguas analisal tende a sola un forma de gramatica, de cual se developa plen no es trovada en cualce de los, ma pote es aprendeda par la esamina atendente de alga produidas nova, como la creol franses de Martinic, la nederlandes negra de Suriname, e la lingua franca de la Mediteraneo....
Esta gramatica pote es plu simplida par reconose la ordina lojical de pensa, e par adota acel como la ordina de espresa. Los ci ia oserva la operas de la mente en la state de ata autonom, de ata no constrinjeda par la abituas de espresa vosal eritada, como, per esemplo, entre la sordas e mudas e en la lingua de jestis de la americanes orijinal de la planos, acorda ce esta ordina lojical es como esta: Sujeto ante verbo, ojeto direta ante ojeto nondireta, nom ante se ajetivo, verbo ante se averbo, etc. Par adota esta metodo de pone o loca, nos gania multe brevia e claria....
La alfabeta de esta lingua no es multe difisil. La sinco vocales plen o pur e la des-sinco consonantes es trovada en tota sinco linguas cual me ia indica [franses, espaniol, italian, engles, e deutx], e con esta dudes leteras, un vocabulo armoniosa pote es formida de leteras cual representa sonas conoseda par tota e tota libre de sinietas o sinias nova. La spele ta es fonetical e no lesones de pronunsia ta es nesesada....
Tota termas siensal nova debe es derivada de la lingua elinica, e espresada en se formas italian....
No otra lingua moderna pote compara con lo regardante la moldi fasil de parolas stranjer a formas la plu corta, acordante con armonia e un conserva de la fortia de se radises.
@T Internasional
@L leteratur/internasional
@A Eugène Pottier, Pierre Degeyter, Stefan Fisahn
====== Internasional ======
par Eugène Pottier, con melodia par Pierre Degeyter
traduida par Stefan Fisahn
melodia (mp3, 1.2 MB)
1. Velia! Represada de la tera!
Velia la condenda a famia.
Razona tona en caldera,
la esplode de la fin'!
Sutrae la represaros,
Slavos vos - velia! velia!
La mundo va cambia de base:
Nos es no - nos va cada!
Refren:
Camerad' - al combat' fini.
Nos libriante reuni -
La Internasional libri -
la umania!
2. Nos salva no uman alta,
no dio, re o imperor.
Libri nos de la cadenas,
pote fada ja de nos!
Prende la furada cosas,
de furores rica.
Nos forja la fero a esta ora,
entra ce esta es cald'.
Refren
3. Laboror e fermor nos ja es,
la plu grande de partes;
La pigrantes pote fuji,
esta munde va es nos!
Nos sangue no a la corvos,
a la vultur ance no.
Si nos escluidada los -
sol brilia a tota temp'.
Refren
@T Irac aora
@L leteratur/irac_aora
@A Dr Ali Nimah
====== Irac aora ======
par Dr Ali Nimah (Myaleee) en 2013
En me vive, 50 + anios pos enfantia, me es otimiste! Per la ves prima, nos sensa como esentes umana! No libro es proibida, la interede es en cada loca, salarios per compra tota cosas, an de USA, libria de protesta e de satelita e de viaja etc -- cosas cual me mesma ia sufri ja.
Ma situas perilosa esiste en Bagdad, en poca sites xia de un tempo a un otra -- par Saddam fidistes e Al-Qaeda! En la plu sites la modas de vive es eselente: Kurdestan (ci ja ama Israel, SUA, e la mundo), Najaf e Carbala (vera santida e developante). Min developante ma pasosa es otra sites xia de sud. La site vera perilosa es Anbar (amosa de Al-Qaeda), ance Diala, Tikrit, e Mosul, cual es tota suni, e ci suspeta America e odia la governa spesial xia!
Donce la futur va deveni pasosa, grasias a la ambasada la plu grande de SUA situada en Irac, me es esperosa. Recorda en SUA, pf, la periodos de geras I e II, Vietnam, etc. Tota jes a finida. Per la ves prima nos pasea en e a democratia (an si lo nesesa anios?). En Misre, situas pasosa durante 1950 asta 2011 ia es falsa, par jornalisme nonvera, mal governas violente, asentia de tota librias (con esete de sinema!). Donce, Misre va es plu bon a causa de LIBRIA e globali!
@T Jua abandonada
@L leteratur/jua_abandonada
@A Guido Crufio
====== Jua abandonada ======
par Guido Crufio
La pluve pluve
Plu e plu
La pluve pluve
A su, a su
A su, a su
A cada loca
Inonda nos
Cadun afoca
Nubes rena
Supra la tera
Lavante la site
Completa, intera
Veni sol!
Trae espera
Do es l'estate
O la primavera?
Ma
La pluve pluve
Plu e plu
La pluve pluve
A su, a su
A su, a su
Saturante tota
Par cada dux
Par cada gota
Stanges, lagos
E rios asende
Dio plora
Sua larmas desende
Larmas acuin
E nonsedente
Sempre, eterna
Cascadente
E
La pluve pluve
Plu e plu
La pluve pluve
A su, a su
A su, a su
Gotas como petra
Juante un melodia
Batente la fenetra
Regarda tra la vitro
Con tristia
Longo la rua
A la sinia
A la sinia cual dise
Con simplia
"Jua abandonada
Par la deluvia"
E ancora
La pluve pluve
Plu e plu
La pluve pluve
A su, a su
@T Jua mal
@L leteratur/jua_mal
@A Chris Isaak, George Boeree
====== Jua mal ======
(Wicked game), par Chris Isaak
traduida par George Boeree
La mundo ia arde e nun ma tu pote salva me
Lo es strana lo cual foles ta fa de desira
Me ia sonia nunca ce me ta encontra algun como tu
E me ia sonia nunca ce me ta perde algun como tu
No, me no vole cade en ama
(esta xica va rompe tua cor)
No, me no vole cade en ama
(esta xica va rompe tua cor)
Con tu
(esta xica va rompe tua cor)
Con tu
Tal un jua mal tu ia jua afin me senti tal
Tal un cosa mal tu fa afin me sonia de tu
Tal un cosa mal tu dise ce tu no ia senti tal
Tal un cosa mal tu fa afin me sonia de tu
E me no vole cade en ama
(esta mundo va rompe tua cor)
E me no vole cade en ama
(esta mundo va rompe tua cor)
Nun ama nun
En la engles orijinal:
The world was on fire and no one could save me but you
It's strange what desire will make foolish people do
I'd never dreamed that I'd meet somebody like you
And I'd never dreamed that I'd lose somebody like you
No, I don't want to fall in love
(this girl is only gonna break your heart)
No, I don't want to fall in love
(this girl is only gonna break your heart)
With you
(this girl is only gonna break your heart)
With you
What a wicked game you played to make me feel this way
What a wicked thing to do to let me dream of you
What a wicked thing to say you never felt this way
What a wicked thing to do to make me dream of you
And I don't want to fall in love
(this girl is only gonna break your heart)
No, I don't want to fall in love
(this girl is only gonna break your heart)
No body loves no one.
@T Jura de Hipocrate
@L leteratur/jura_de_hipocrate
@A vxeov
====== Jura de Hipocrate ======
Traduida par vxeov
Primum non nocere -- Supra tota, no nose.
Me jura par Apolon la Sanor, par Asclepio, par Higean, par Panacea, e par tota la dios e divas como mea atestores, ce me va oserva conveninte par mea capasia e judi esta jura e obliga:
Me va trata mea mestre ci ensenia me en esta campo en modo egal a mea jenitores; vive compartida con el; dona mea benes a el cuando el es en nonsufisi; regarda sua enfantes como mea propre frates e ensenia a los esta campo sin demanda per paia o constrinje si los vole; dona mea prinsipes e instruis bocal e de otra modos a mea fies, la fies de mea mestre e otra aprendores ci fa ja esta jura, ma no dona los a otra persones.
Me va prescribe remedias per la benefica de mea pasientes con la plu bon de mea capasia e judi, e me va fa zero cosa nosente o nonjusta a los. Me va refusa tota solisitas ce me aplica venenas a cualcun, e no va instrui otras sur tal cosa. Simil, me no va dona cosas a femes per aborta. Ma me va conserva la puria e santia de ambos de mea vive e cor. Me va usa nunca vera la bisturi per sutrae calculos an si mea pasiente sufri de los; me va sede esta a spesialistes de tal opera.
Per cada casa, me va entra lo sola per aida la maladas, asteninte de tota malconduis e noses intendente, spesial de sedui de omes e femes per fa de seso, egal si los es libre o sclavida. Per tota informas cual me va vide o oia en curso de mea labora o interata dial con persones, si los debe no publici, me va trata los como secretas santa e revela nunca los.
Si me conserva fidosa esta jura, ta ce me gania respeta de cada person e a cada ves en mea vive e labora; ma si me devia o viole la jura, ta ce la oposada deveni mea fortuna.
@T Kalevala
@L leteratur/kalevala
@A Elias Lönnrot, Harri Savolainen
====== Kalevala ======
par Elias Lönnrot
La strofe prima, traduida par Harri Savolainen
Como tota finsces sabe, sua poesia national, Kalevala, comensa a esta modo:
Oji mea cor desira, ja la testa ia aspira,
comensante un bon canta, nara la lejendas santa,
runas vea, conoseda, cantas cara, repeteda.
La parolas en mea boca, dejelante de sua loca,
cade sur la lingua pur, rompe entre dentes dur.
@T Kim
@L leteratur/kim
@A Guido Crufio
====== Kim ======
par Guido Crufio
Un poesia per mea sposa Kim per nosa aniversario prima de sposi.
De la momento cuando me ia vide tu
Me ia cade profonda en ama
Tu es un vide de belia
Enviada de Sielo, vera un dama;
Pronto de la comensa me ia desira tu
Ce tu senti la mesma ia es mea espera
Ma nos ia es multe distante
Tan triste! Tan despera!
Me ia amira tu en secreta
Per multe multe anios dolosa
Me ia vole ave e teni tu
Me sempre ia es tan soniosa;
Me no pote mostra mea sentis profonda
Per teme de apare stupida
Ma me ia sede nunca, no, nunca
Me mera ia nesesa aida de Cupida! ((Lisensa poesial!))
Me ia fa sempre indicetas
Tu ia nota nunca la tenta
Lo no ia pote es plu evidente
Ma me ia sesa nunca atenta;
Tu no es capas de leje sinias
Sur acel on no ave un duta
Ma oposante a cual tu pensa
Me dona bon los, sin disputa!
A fini tu ia reseta la mesaje
Pos mera des anios de atentas
Me ia demanda la demanda, tu ia dise "Si"!
Cual ia fa cuieta me lamentas;
Tu es l'ama de mea vive, la xica de mea sonias
Tu es la mundo a me
Tu e me es per sempre Kim
Nos es intendeda los dise!
Tu es cada cosa a me
Tu es tota cual un om pote desira
Un xica stonante con un surie bela
Tu es tota cual me ama con cada respira;
Tua rie infetosa
Tua atas bolante
Tu leva me spirito
E fa la dias briliante!
Nos ia sposi a un dia bela e solosa
A April 10, un anio pasada
Me va ama tu con tota la cor per sempre
Me joia es nonsuprapasada;
On dise ce cosas bon va veni
A aceles ci espeta la clama
On es coreta e aora me sabe
Ce me ia trova mea vera ama!
Me ama tu Kim
@T Kubla Khan
@L leteratur/kubla_khan
@A Samuel Taylor Coleridge, George Boeree
====== Kubla Khan ======
par Samuel Taylor Coleridge
traduida par George Boeree
En Xanadu, Kubla Khan ia comanda
un palasio de plaser:
do Alf, la rio santa, core
tra cavones infinita
a basa a la mar sin sol.
Du sinco milias de tera fertil
con mures e tores ensircada:
con jardines briliante con rietas serpentin,
do multe arbores insensosa flori;
e asi es bosces antica como colinas,
envolvente locas verde e solosa.
Ma o! la canion profonda e romantica apoia
a su la colina verde contra covrente sedrosa!
Un loca savaje! santa e tan encantada
como su un luna diminuinte, infestada
par un fem criante per sua demon amada!
E de esta profonda, bolinte con turba sin sesa,
como esta tera ia respira dur e densa,
un fonte grande ia es subita forsada:
entre sua rompe rapida e dui disturbada,
fratos enorme salta como graniza rebondinte,
o gran paliosa su la flajelo de la bator:
e entre esta rocas dansante aora e sempre,
lo lansa subita a supra la rio santa.
Sinco milias vagante con moves serpente
tra vales de bosces, la rio santa core,
e alora ateni la cavones infinita,
e afonda tumultosa en un mar sin viventes:
e entre esta tumulta Kubla oia de distante
la predise de gera par voses antica!
La ombra de la palasio de plaser
flota a media de la ondas;
Asi es escutada la mesuras miscada
de la fonte e la cavones.
Lo ia es un mervelia de construi strana,
un palasio de plaser con cavas de jela!
Un fem con un dulsimer
me ia vide en un sonia:
Un fem de Abisinia,
e sur sua dulsimer el toca,
cantante de monte Abora.
Si me ta pote revive en me
sua simfonia e canta,
lo ta gania per me tan deleta profonda,
acel musica forte e longa,
ce me ta construi acel palasio en aira,
la palasio solosa! la cavas de jela!
E tota ci escuta ta vide los ala,
e tota ta cria, Averti! Averti!
sua oios lampinte, sua capeles flotante!
Texe un sirculo a tre veses sirca el,
e clui tua oios con teme santa,
car el ia come rosio de miel,
e ia bevi la lete de paradiso.
@T L'ago ultima
@L leteratur/l_ago_ultima
@A Guido Crufio
====== L'ago ultima ======
par Guido Crufio
L'
Ago
Ultima
De l'arbor
De esta natal
Final cade a su
A la solo tapetida
Uni con conasedas agu
Adio
A la
Anio
Adio
Ma aora saluta
Fa lo denova
E aclama
La anio
Nova
@T L'eglesa de San Sebastian
@L leteratur/l_eglesa_de_san_sebastian
====== L'eglesa de San Sebastian ======
par Guido Crufio
Ala me sta en la lumina de luna
A la min la sera es calda, par fortuna
Esata como on ia dise
Ma a do mea acompaniores ia vade sin me?
Me es solitar en esta rua campanian
En l'ombra de l'eglesa de San Sebastian
L'eglesa de San Sebastian con sua fas sombre
Sua tera santida pare macabre
Me vide la semetero morbosa
Plen de multe spiritos turbosa
E lo jua sur mea imajina
Como un tipo d'alusina
Me pasa e comensa sibila
A cada paso me vijila
A su la colina me pasea
A su a do la ponte vea
Traversa la rua oscur a su
Per evade esta loca per sempre plu
Esce me oia pasos de pos me?
Me ta debe torse per vide?
O mera parti seguente mea desira?
Si, me oia pasos e pote apena respira
La pasos pare plu prosima
Esce me va es un otra vitima?
Mea cor pulsa vera rapida
Mea vive me pensa perilida
Me pote senti la suo sur mea fronte
Me no va ateni la ponte
Esce me debe fronti mea teme?
Me torse e dise debil, "Ci segue me?"
Ma tota cual me vide es la rua desertida
A mea lejeri grande e sertida
La cosa ia despare sin un indica
Aora, me va revade nunca a esta loca
A esta eglesa vea cristian
Esta eglesa de San Sebastian.
@T L'enemi
@L leteratur/l_enemi
====== L'enemi ======
par Guido Crufio
Coler e turbada? Tu aposta ce me es
Cisa plu ce cada otra om, mea ami
Ma me ave bon razona de es,
Me ia conspira per vinse l'enemi.
L'enemi es un cosa nonvideda
Lo prende e mata tua zelo
Tu dona a lo tota cual tu ave
An si lo vade contra la pelo.
Prima tu es felis a dona tota
Ma tu trova ce lo es nonsasia
El va estingui tua spirito
No ave un limita a sua basia.
Lo construi tu, alora lo fa cade tu
Lo prende tota, on ave no evade
Tu convinse tu ce lo es un bon cosa
Tu no sabe ce tu cade.
Alora a un dia tu va comprende
Tu debe aseta el sin un jemi
Lo no es tota cual tu espera
Prende sempre, dona nunca, l'enemi.
Evita lo aora, es mea consela
Ante ce tu va paia la puni
O perde tua vive, tua spirito, tua familia
Par l'avar de l'enemi.
Me es fortuna, me ia vide la veria
Me ia conspira, me ia scemi
Alora me ia evade la dementia
Tu vide, me ia vinse l'enemi.
@T La alcimiciste e la plata de oro
@L leteratur/la_alcimiciste_e_la_plata_de_oro
@A 
====== La alcimiciste e la plata de oro ======
Un testo orijinal de Manouna Orti
Paje html
Vos ia demanda a me cual es la orijina de la ricia enorme de nosa Isola Franca e de sua abitores (per dise, vos mesma!). Vos ia demanda lo a tan multe veses ce oji me sede e ce me vade a informa vos; me no vade a asconde esta secreta per plu longa: vos sabe ce, de longa -- ja en la eda media! --, nosa isola ospita multe alcimicistes famosa. Juntante sua sabes arcana, los ia permete ce la isola e la isolanes oteni un cuantia nonlimitada de oro. Un oro creada de... no cosa, car nos no ave minerias de oro!
Me vade aora a dona a vos un de sua resetas secreta: me vade a esplica a vos como on pote crea un cuadreta plu de oro con un plata de oro composada de sesdes-tre cuadretas, per dise: como oteni un cuadreta sesdes-cuatro de oro pur!
Esta es la reseta de La plu cuadreta de oro --- un reseta cual cualcun pote trova, par un xerca delicata tra la manoscritos alcimical de la Biblioteca nasional de nosa isola. Me leje:
« O alcimiciste! prende un plata de sete linias de nove cuadretas de oro, per dise un plata de sesdes-tre cuadretas de oro. Taliante astuta esta plata, ordina la plata a en oto linias de oto cuadretas, per dise un plata de sesdes-cuatro cuadretas de oro, e, de no cosa otra, fa ce, en tal modo, un cuadreta nova de oro nase. La secreta de la crea inere en la modo de talia la plata. »
Me mostra asi la pasos de la prosede par esta desinias detaliosa:
Pos la talia, la alcimiciste move la parte destra a alta e a sinistra.
Sin ce el perde alga cosa de la sesdes-tre cuadretas orijinal, el ia oteni alora, par esta opera, du dui cuadretas cual composa, juntante se, un cuadreta intera, la cuadreta sesdes-cuatro!
La cuadreta sesdes-cuatro es creada par la ajunta de la dui cuadreta final a la dui cuadreta inisial.
Esta cuadreta de oro pur es ajuntada a la sesdes-tre otra cuadretas orijinal, cresente la ricia de la alcimiciste en un proportio de 64/63, per dise ce el ia multipli sua ricia aprosima par 1,016!
Evidente, el pote repete la opera a tal multe veses como el desira lo, per esemplo, par la muta de un plata de ses linias de oto cuadretas (per dise un plata de cuatrodes-oto cuadretas), a en un plata de sete linias de sete cuadretas (per dise un plata de cuatrodes-nove cuadretas)... par la mesma modo de talia.
Ma un alcimiciste autentica e sinsera sabe ce un rica no pote compra tota. Recorda lo, cuando vos mesma va esperia esta opera alcimical sutil!
@T La Alia de Capeles Roja
@L leteratur/la_alia_de_capeles_roja
@A La Alia de Capeles Roja, Arthur Conan Doyle, Krzysztof S
====== La Alia de Capeles Roja ======
La Alia de Capeles Roja ("The Red-Headed League") es un nara corta, scriveda par Arthur Conan Doyle en 1891. Esta tradui es par Krzysztof S en 2012.
Me ia visita mea ami, senior Sherlock Holmes, a alga dia en la autono de la anio pasada e ia trova el en conversa profonda con un senior senesente, multe obesa, de fas ornosa, e de capeles ardente roja. Escusante me per mea intrui, me ia es a punto de retira, cuando Holmes ia tira subita me a en la sala e ia clui la porte pos me.
"Tu no ia pote posible veni en un momento plu bon, Watson, mea cara," el ia dise con cortesia.
"Me ia teme ce tu es ocupada."
"E me es. Multe ocupada."
"Donce me pote espeta en la otra sala."
"A no grado! Esta senior, senior Wilson, ia es mea asosior e aidor en multe de mea casos la plu susedosa, e me ave no duta ce el va es estrema usosa ance en la tua."
La om obesa ia leva partal se de sua seja e saluta par inclina sua testa, con un regarda rapida de interoga de sua oios peti ensircada de gras.
"Senta tu sur la sofa," Holmes ia dise, recadente en sua sejon e ponente la puntos de la ditos de sua du manos en junta, como ia es sua costum cuando en un umor judinte. "Me sabe, Watson, mea cara, ce tu comparti mea ama per tota cual es bizara e estra la abituas e costumes monotonosa de la vive dial. Tu ia mostra tua saborea per lo par la zelo cual ia stimula tu a la reporta, e si tu va escusa me per dise tal, a la beli a alga grado de tan multe de mea propre aventuras peti."
"Tua casos ia es ja de interesa la plu grande per me," me ia oserva.
"Tu va recorda ce me ia comenta a un dia resente ante cuando nos ia entra a la problem multe simple presentada par senioreta Mary Sutherland, ce per efetos strana e combinas estracomun nos debe vade a la vive mesma, cual es sempre multe plu osante ca alga labora de la imajina.
"Un proposa cual me ia risca duta."
"Tu ia fa tal, dotor, ma an tal tu debe conforma tua opina con la mea, car, si no, me va continua pila fato pos fato sur tu asta cuando tua razona falta su sua pesa e tu reconose ce me ave razona. Aora, senior Jabez Wilson asi ia es bastante bon de veni per visita me a esta matina, e per comensa un nara cual promete es un de la plu strana cual me ia escuta tra multe tempo. Tu ia oia me comenta ce la cosas la plu strana e unica es multe frecuente liada no con la crimines plu grande ma con la plu petis, e, a alga veses, an do on pote duta esce un crimin vera ia aveni. Seguente lo cual me ia oia, lo es nonposible ce me dise esce la caso presente es un caso de crimin o no, ma la curso de avenis es la plu strana cual me ia escuta a cualce ves. Posible, senior Wilson, tu ta pote fa la jentilia de recomensa tua nara. Me demanda a tu, no mera car mea ami dotor Watson no ia oia la parte inisial, ma car la natur strana de la nara fa me ansiosa per ave cada detalia posible de tua labios. Per un regula, cuando me ia oia alga indiceta de la curso de avenis, me es capas de gida me par la miles de casos simil cual veni a mea memoria. En la caso presente, me es obligada de confesa ce la fatos es, tan como me crede, unica."
La cliente obesa ia infla sua peto con un aspeta plu ca poca orgulosa e ia tira un jornal susia e plietada de la pox interna de sua jacon. En cuando el ia regarda la colona de anunsias, con sua testa puxada a ante e la jornal sur sua jenos, me ia regarda bon la om e ia atenta, seguente la manera de mea acompanior, leje la inclinas cual ta es presentada par sua vestes o aspeta.
Me no ia gania multe, an tal, par mea esamina. Nosa visitor ia mostra par cada sinia ce el es un comersior brites promedia e comun, obesa, ostentosa, e lenta. El ia porta un pantalon alga laxe de pastor, de cuadros gris, un jacon robin negra e no intera limpa, desbotonida a la fronte, e un jaceta sombre con un cadena pesosa e latonin de orolojeta e un peso cuadro de metal perforada cual pende per decora. Un xapo gastada e un jacon brun palida con un colar de veluda plietada ia reposa sur un seja a sua lado. Jeneral, an pos tota mea regardas, la om ave no cualia notable ultra sua capeles ardente roja e la espresa de desilude e noncontentia estrema en sua fas.
La oio rapida de Sherlock Holmes ia comprende mea ocupa, e el ia secute sua testa con un surie como el ia vide mea regardas demandante. "Ultra la fatos evidente ce el ia labora con sua manos a alga ves, ce el prende la tabaco ensoflable, ce el es un francamason, ce el ia es en Xina, e ce el ia scrive multe resente, me pote dedui no otra cosa."
Senior Jabez Wilson ia leva se en sua seja, con sua dito indicante sur la jornal, ma sua oios sur mea acompanior.
"Como, en la nom de bon fortuna, tu ia sabe tota acel, senior Holmes?" el ia demanda. "Como tu ia sabe ce me ia labora con mea manos? Lo es tan vera como la evanjelio, car me ia comensa como un carpentor de barcon."
"Tua manos, senior, mea cara. Tua mano destra es de un cuantia plu grande ca la tua sinistra. Tu ia labora con lo, e la musculos es plu developada."
"Bon, la tabaco ensoflable, e la francamasonisme?"
"Me no va insulta tua intelijentia par dise a tu como me ia leje acel, spesial cuando, a alga grado contra la regulas seria de tua ordina, tu usa un spino a peto, con un arco e compas."
"A, natural, me ia oblida acel. Ma la scrive?"
"Cual otra cosa pote es indicada par acel polso destra tan briliante tra sinco ditones, e la sinistra con la area lisa a la codo do tu reposa lo sur la scriveria?"
"Bon, ma de Xina?"
"La pex de cual tu ave un tatua direta sur tua polso destra ia pote es fada sola en Xina. Me ia fa un studia peti de marcas de tatua e ia contribui an a la leteratur de la tema. Acel truco de manxa la scama de la pex con un ros delicata es multe tipal de Xina. Cuando, en ajunta, me vide un moneta de Xina suspendeda de tua cadena de orolojeta, la cosa deveni an plu simple."
Senior Jabez Wilson ia rie pesosa. "Bon, me es stonada!" el ia dise. "Me ia pensa prima ce tu ia fa un cosa astuta, ma me vide ce on ave no truco en lo, an tal."
"Me comensa pensa, Watson," Holmes ia dise, "ce me fa un era en esplica. Omne ignotum pro magnifico, tu sabe, e mea reputa peti, tal como lo es, va es ruinada si me es tan spontan. Tu no pote trova la anunsia, senior Wilson?"
"Si, me ave aora lo," el ia responde con sua dito roja e spesa, posada a la media de la colona. "Ave asi lo. Esta es lo cual ia comensa tota de lo. Ta ce tu leje lo per tu mesma, senior."
Me ia prende la jornal de el e ia leje la seguente:
"A la Alia de Capeles Roja:
Par causa de la lega de Ezekiah Hopkins, la lamentada, de Lebanon, Pennsylvania, SUA, on ave aora un otra posto vacua e libre cual permete a un membro de la Alia un salario de £4 per semana per servis mera minima. Tota omes de capeles roja ci es de corpo e mente sana, e ave plu ca dudes-un anios, es elejable. Aplica en person a lundi, a la ora des-un, a Duncan Ross, en la ofisia de la Alia, 7 Pope's Court, Fleet Street."
"Cual de mundo esta sinifia?" me ia ejeta pos leje la anunsia estracomun a du veses.
Holmes ia cacareta e ia serpe en sua seja, como ia es sua abitua cuando en spiritos alta. "Lo salta un poca de la curso bon segueda, no?" el ia dise. "E aora, senior Wilson, comensa e raconta a nos tota sur tu, tua casa, e la efeto cual esta anunsia ia ave a tua fortunas. Tu va fa un nota a ante, dotor, de la jornal e la data."
"Lo es la Morning Chronicle, de la 27 de april 1890. Esata, ante du menses."
"Multe bon. Tu ave la parola, senior Wilson."
"Bon, lo es esata como me ia dise a tu, senior Sherlock Holmes," Jabez Wilson ia dise, limpinte sua fronte. "Me ave un impenieria peti en Coburg Square, prosima a la City. Lo no es un cosa grande, e en anios resente lo no ia dona a me plu ca un modo de susta. Pasada, me ia es capas de manteni du aidores, ma aora me manteni sola un, e paia an a el ta es difisil, ma el veni contente per un salario duida per aprende la profesa."
"Cual es la nom de esta joven obligante?" Sherlock Holmes ia demanda.
"Sua nom es Vincent Spaulding, e el no es multe joven. Difisil es determina sua eda. Me no ta vole un aidor plu bon, senior Holmes, e me sabe multe bon ce el ta pote boni se e gania plu ca me pote paia a el. Ma pos tota, si el es sasiada, perce me ta pone mea ideas en sua testa?"
"Serta! Perce ja? Tu pare es la plu fortunosa en ave un empleada ci veni su la preso plen de la mercato. Lo no es un esperia comun entre empleores en esta eda. Me no sabe ce tua empleada no es tan estracomun como tu dise."
"O, el ave ance sua falis," senior Wilson ia dise. "No a cualce ves on ia ave un om con tal pasion per la fotografia, fante fotos con sua camera cuando el debe boni la mente, alora saltante en la susolo como un coneo en sua buco, per developa sua fotos. Acel es sua fali xef, ma jeneral, el es un bon laboror. El ave no vilia."
"El es ancora con tu, me suposa?"
"Si, senior. El e un xica de des-cuatro anios ci fa alga cosini simple e limpi -- acel es tota lo cual me ave en la casa, car me es un vidua e ia ave nunca un familia. Nos vive multe cuieta, senior, la tre de nos; e nos manteni un teto supra nosa testas e paia nosa detas, si nos fa no cosa plu.
La prima cosa cual ia turba nos ia es acel anunsia. Spaulding, el ia veni a en la ofisia ante esata oto semanas, con esta mesma jornal en sua mano e el ia dise:
'Senior Wilson, si Dio fa me un om de capeles roja.'
'Perce?' me ia demanda.
'Car,' el dise, 'on ave asi un otra posto vacua en la Alia de Capeles Roja. Lo va rici alga cualce om ci oteni lo, e me comprende ce on ave plu postos vacua ca on ave omes, afin la fidusiores no sabe lo cual los debe fa con la mone. Si mea capeles ta cambia sua color, ave asi un bon posto peti cual me ta entra fasil.'
'Bon, ma cual lo es?' me ia demanda. Vide, senior Holmes, me es un om de casa, e cuando mea labora ia veni a me en loca de ce me vade a lo, me ia pasa comun multe semanas sin pone mea pede ultra la tapeto de porte. En acel caso, me ia sabe poca de lo cual aveni a estra, e me ia es sempre felis de oia alga novas.
'Tu ia oia nunca sur la Alia de Capeles Roja?' el ia demanda con sua oios bon abrida.
'Nunca!'
'Ma me mervelia a acel, car tu mesma es elejable per un de la postos vacua.'
'E cuanto valua los ave?' me ia demanda.
'O, mera du sentos per anio, ma la labora es minor, e lo no debe interfere multe con sua otra ocupas.'
Bon, tu pote fasil pensa ce acel ia fa me atende, car la comersia no ia es multe bon tra alga anios, e un duple de sentos ajuntada ia ta es multe oportun.
'Raconta a me tota de lo,' me ia dise.
'Bon,' el ia dise, mostrante a me la anunsia, 'tu pote vide par tu mesma ce la Alia ave un posto vacua, e ce on ave la adirije do tu pote aplica per la detalias. Seguente mea opina, la Alia ia es fundida par un milionor american, Ezekiah Hopkins, ci ia es multe strana en sua condui. El mesma ia ave capeles roja, e el ia senti un grande compatia per tota omes con capeles roja; tal, cuando el ia mori, on ia trova ce sua fortuna ia es en la manos de fidusiores, con instruis de aplica la interesa en furni locas per omes de ci se capeles ave acel color. De tota lo cual me ia oia, la paia es eselente e on debe fa vera poca.'
'Ma,' me ia dise, 'on ta ave miliones de omes de capeles roja ci ta aspira lo.'
'No tan como tu ta imajina,' el ia responde. 'Tu debe vide ce la ofre es restrinjeda a sitadanes de London, e a omes adulte. Esta american ia comensa a London cuando el ia es joven, e el ia vole fa un bon cosa per la site vea. Alora, plu, me ia oia ce ave no usa en aspira la posto si tua capeles es de roja clar o oscur, o de alga otra color ca un roja intensa, briliante, e ardente. Aora, si tu vole aspira la posto, senior Wilson, tu ta debe sola presenta tu; ma cisa un poca de sentos de paundes no ta merita tua labora.'
Aora, los es un fato, seniores, como vos mesma pote vide, ce mea capeles es de un color tan multe plen e rica, ce ia pare a me ce si la cosa ta ave alga concurso, me ta ave un bon fortuna de gania como cualce om cual me ia encontra ja. Vincent Spaulding ia pare sabe tan multe sur lo ce me ia pensa ce el ta es cisa usosa per me, donce me ia comanda a el clui la covrefenetras per la dia e veni con me a la adirije cual ia es donada en la anunsia.
"Me espera no vide un tal vista como acel denova, senior Holmes. De la norde, sude, este e ueste, tota omes ci ia ave alga roja en sua capeles ia marxa en la site per responde a la anunsia. Fleet Street ia es sofocada con persones de capeles roja, e la Pope's Court ia ave la aspeta de un caro de un vendor de oranias. Me no ia ta imajina ce tan multe es en la pais intera ci es atraeda per asembla se par acel anunsia. Los ia ave tota tinjes -- roja de palia, limon, orania, brice, seter eres, figato, arjila; ma, como Spaulding ia dise, on no ia ave multe ci ave la roja real, vivin e ardente. Cuando me ia vide cuanto espeta, me ia es a punto de renunsia en despera; ma Spaulding no ia vole aseta lo. Como el ia reali lo, me no ia pote divina, ma el ia puia e tira e puxa persones per abri un via per me tra la fola e direta asta la grados cual gida a la ofisia. Un rieta duple ia es sur la scalera, con algunes ci asende en espera, e algunes ci desende depresada, ma nos ia introdui nos en la modo tan bon como posible, e pronto nos ia trova nos en la ofisia."
"Tua esperia ia es un de la plu divertintes," Holmes ia comenta, como sua cliente ia pausa per refresci sua memoria con un pico grande de tabaco ensoflable. "Per favore, continua tua nara multe interesante."
"La ofisia ia ave no cosa estra du sejas de lenio e un table peti, pos cual un om peti ia senta con un testa an plu roja ca la mea. El ia dise un poca de parolas a cada aspirante cuando el ia presenta se, e alora el ia trova sempre alga fali en los cual ta restrinje los. Reseta un posto vacua no ia pare tan fasil, an con tota. An tal, cuando nosa ves ia ariva, la om peti ia es multe plu favorable per me ca a cualce otra en la ofisia, e el ia clui la porte cuando nos ia entra, afin el ia pote fa un conversa privata con nos.
'Esta es senior Jabez Wilson', mea aidor ia dise, 'e el vole ocupa un posto vacua en la Alia.'
'E el es amirable propre per lo,' la otra ia responde. 'El ave cada nesesada. Me no pote recorda cuando me ia vide alga cosa tan bon.' El ia fa un paso a pos, ia turna sua testa a un lado, e ia contempla mea capeles asta cuando me ia senti umil a alga grado. Alora subita el ia tufa a ante, ia presa forte manos con me, e ia loda me sur mea susede.
'Esita ta es nonjusta,' el ia dise. 'Tu va escusa, an tal, me es serta, ce me fa un proteje evidente.' Con acel el ia saisi mea capeles en ambos manos, e ia tira asta cuando me ia cria en dole. 'Acua es en tua oios,' el ia dise como el ia relasa me. 'Me persepi ce tota es como lo debe es. Ma nos debe es cauta, car nos ia es enganada a du veses par perucas e a un ves par pinta. Me ta pote raconta a vos sur sira de sapator, cual ta repulsa vos con la natur umana.' El ia move a la fenetra e ia cria tra lo tan forte como posible ce la posto vacua es ocupada. Un jemi de delude ia veni de la fola a su, e la persones ia vade de asi en dirijes diferente asta cuando no testa de capeles roja ia resta vidable con la eseta de la mea e acel de la manejor.
'Mea nom,' el ia dise, 'es senior Duncan Ross, e me mesma es un de la jubilores par la reserva lasada par nosa beneficor nobil. Tu es un om sposida, senior Wilson? Tu ave un familia?'
Me ia responde, ce me no ave.
La lamenta ia apare subita en sua fas.
'Ai!' el ia dise grave. 'Acel es vera multe seria! Me oia triste ce tu dise acel. La suporta natural ia es per la estende e difusa de la capeles roja e ance per sua manteni. Lo es suprapasante nonfortunosa ce tu es ultima un nonsposida.'
Mea espresa de fas ia tristi a esta, senior Holmes, car me ia crede a esta punto ce en fini me no ta ave la posto vacua; ma pos pensa sur lo tra un poca de minutos, el ia dise, ce tota va es bon.
'En la caso de un otra,' el ia dise, 'la oposa ta es convinsente, ma nos debe estende la regula en favore de un om con capeles como los de tu. Cuando tu ta pote comensa en tua obligas nova?'
'Bon, lo es un poca difisil, car me ave ja un comersia,' me ia dise.
'O, acel no es importante, senior Wilson!' Vincent Spaulding ia dise. 'Me pote manteni la comersia per tu.'
'Cual ta es la oras?' me ia demanda.
'Des a du.'
Aora la comersia de un impenieria es xef fada en la sera, senior Holmes, spesial de jovedi e venerdi, cual es la dias ante la dia de paia; tal, labora en la matina ta conveni per me. Plu, me ia sabe ce mea aidor es un bon om, e ce el pote trata cualce cual ta aveni.
'Acel ta conveni me,' me ia dise. 'E la paia?'
'Lo es £4 per semana.'
'E la labora?'
'Lo es pur minima.'
'Cual tu vole dise par pur minima?'
'Bon, tu debe es en la ofisia o a la min en la construida, tra la tempo intera. Si tu parti, tu perde tua posto intera per sempre. La atesta es multe clar sur acel punto. Tu no va segue la constrinjes si tu parti de la ofisia en acel tempo.'
'Lo es sola cuatro oras per dia, e me no ta pensa sur parti,' me ia dise.
'No escusa va sufisi,' senior Duncan Ross ia dise; 'no maladia, no comersia, e no cosa. Ala tu debe permane o tu va perde tua posto.'
'E la labora?'
'Lo es copia la Encyclopedia Britannica. En esta scafal es la prima volum de lo. Tu debe trova tua propre inca, penes de pluma, e paper secinte, ma nos furni esta table e seja. Tu ta es preparada per comensa doman?'
'Serta,' me ia responde.
'Alora asta revide, senior Jabez Wilson, e permete a me loda tu a un ves plu sur la posto importante cual tu ave la bon fortuna de gania.' El ia inclina se en gida me ultra la camera, e me ia reveni a casa con mea aidor, sabente cuasi no cosa per dise o fa, car me ia es tan plaseda a mea propre bon fortuna.
Bon, me ia revisita la cosa en mea mente tra la dia intera, e ja en la sera me ia es denova en spirito basa; car me ia convinse me, ce la cosa intera debe es alga misteria o froda grande, an si me no ia pote imajina cual ojeto lo ta ave. Ia pare tota ultra crede ce cualcun ta fa un tal atesta, o ce los ta paia un tal soma per fa alga cosa tan simple como copia la Encyclopedia Britannica. Vincent Spaulding ia fa lo cual el ia pote per felisi me, ma a fini a la tempo per vade a la leto me ia razona me a via de la cosa intera. Ma en la matina, me ia deside esamina la cosa an tal, e donce me ia compra un botela de inca per un sentim, e con un pen de pluma, e sete pajes de paper, me ia comensa en via a Pope's Court.
Bon, a mea surprende e deleta, tota ia es tan coreta como posible. La table ia es preparada ala per me, e senior Duncan Ross ia es ala per serti ce me comensa la labora. El ia comensa me con la letera A, e alora el ia lasa me; ma el ta reveni de tempo en tempo per vide si tota ia es coreta con me. A du oras el ia dise 'asta revide' a me, ia loda me sur la cuantia cual me ia scrive, e ia clavi la porte de la ofisia pos me.
Esta ia continua, a dia pos dia, senior Holmes, e a saturdi la manejor ia veni e ia pone cuatro paundes de oro per mea labora de un semana. Lo ia es la mesma a la seguente semana, e la mesma a la semana a pos. A cada matina me ia es ala a des oras, e a cada posmedia me ia parti a du. Par grados, senior Duncan Ross ia reveni sola a un ves a cada matina, e alora, pos un tempo, el tota no ia reveni. An tal, me no ia osa parti de la camera per un momento, car me me no ia es serta cuando el va reveni, e la posto ia es tan bon e ia conveni tan per me ce me no ta risca la perde de lo.
Oto semanas ia pasa como esta, e me ia scrive sur abades e arcores e armur e arciteta e Atica, e me ia espera ce con asiduia me pote comensa pronto con la Bes. Lo ia costa a me alga cuantia en paper, e me ia pleni cuasi un scafal con mea scrives. E alora, subita la cosa intera ia veni a un fini."
"A un fini?"
"Si, senior. E no plu tarda ca a esta matina. Me ia vade a mea labora usual, ma la porte ia es cluida e clavida, con un peti cuadro de carton martelida a la media de la porte. Ave asi lo, e tu pote leje lo per tu mesma."
El ia teni un peso de cuadro de carton de sirca la grandia de un paje de paper de notas. Lo ia ave esta testo:
**La Alia de Capeles Roja
es
disolveda
9 de otobre, 1890**
**THE RED-HEADED LEAGUE
IS
DISSOLVED.
October 9, 1890**
Sherlock Holmes e me ia studia esta anunsia noncortes e la fas melancolica pos lo, asta cuando la lado comica de la cosa ia esede tota otra considera e nos ia esplode en rie.
"Me no pote vide ce nos ave cualce cosa comica," nosa cliente ia cria, rojinte asta la radises de sua capeles ardente. "Si tu no pote fa un otra cosa ca rie a me, me pote vade a un otra parte."
"No, no," Holmes ia cria, puiante el a retro en la seja de cual el ia leva partal se. "Me no ta perde vera tua caso per la mundo. Lo es refrescinte en modo la plu nonusual. Ma nos ave, si tu va escusa me de dise lo, alga cosa mera poca comica en lo. Per favore, dise como tu ia ata cuando tu ia trova la carta sur la porte?"
"Me ia es xocada, senior. Me no ia sabe lo cual me pote fa. Alora me ia visita la ofisias en la visineria, ma zero de los ia sabe alga cosa sur lo. A fini me ia vade a la proprior de la construida ci es un contor ci abita en la nivel prima, e me ia demanda a el lo cual ia aveni a la Alia de Capeles Roja. El ia dise ce el oia nunca sur un tal organiza. Alora me ia demanda ci es senior Duncan Ross. El ia responde ce la nom es nova a el.
'Bon,' me ia dise, 'la senior a numero 4.'
'Ci, la om con capeles roja?'
'Si.'
'O,' el ia dise, 'sua nom ia es William Morris. El ia es un legiste e ia usa mea sala en oportunia tempora asta cuando sua loca nova es preparada. El ia cambia se loca ier.'
'Do me ta pote trova el?'
'O, en sua ofisia nova. El ia dona ja a me la adirije. Si, 17 King Edward Street, prosima a la Eglesa de San Paul.'
Me ia comensa en via, senior Holmes, ma cuando me ia ariva a acel adirije lo es un fabrica de rotulas artifisial, e no person en lo ia oia sur senior William Morris o senior Duncan Ross."
"E alora, cual cosa tu ia fa?" Holmes ia demanda.
"Me ia reveni a casa a Saxe-Coburg Square, e me ia prende la avisa de mea aidor. Ma el no ia pote aida me en alga manera. El ia pote sola dise, ce si me ta espeta, me ta pote aprende par posta. Ma acel no ia es bastante bon, senior Holmes. Me no ia vole perde un tal bon posto sin un batalia, donce, como me ia oia ce tu es sufisinte bon per dona avisa a povre persones cual es en nesesa de lo, me ia veni asi direta."
"E tu ia fa multe saja." Holmes ia dise. "Tua caso es suprapasante notable, e me va es felis de investiga lo. De lo cual tu ia dise a me, me pensa ce lo es posible ce demandas plu grave es asosiada con lo cual ta apare posible a la vista prima."
"Bastante grave!" senior Jabez Wilson ia dise. "Me ia perde cuatro paundes per semana."
"Cuando tu es personal consernada," Holmes ia comenta, "me no vide ce tu ave alga razona de cexa contra esta alia estracomun. Par contrasta, tu es, como me comprende lo, plu rica par sirca 30 paundes, si on dise no cosa sur la sabe detaliosa cual tu ia gania sur cada tema cual veni su la letera A. Tu no ia perde par los."
"No, senior. Ma me vole aprende plu sur los, e ci los es, e cual ia es sua ojeto en fa esta jua - si lo ia es un jua. Lo ia es un jua multe cara per los, car lo ia costa tredes-du paundes a los."
"Nos va atenta clari esta puntos per tu. E, prima, un o du demandas, senior Wilson. La aidor de tu ci ia clama prima tua atende a esta anunsia -- como longa el ia es con tu?"
"Sirca un mense alora."
"Como el ia veni a tu?"
"El ia responde a un anunsia."
"Esce el ia es la sola aspiror?"
"No. Me ia ave un desduple".
"Perce tu ia eleje el?"
"Car el ia es astuta e ta veni a bon costa."
"A salarios duida, en fato."
"Si."
"Como esta Vincent Spaulding es?"
"Peti, forte, multe rapida en sua manera de fa cosas, no capeles sur sua fas, an si el no es min ca tredes anios. El ave un projeta blanca de la asida sur sua fronte."
Holmes ia fa erijeda se aora en sua seja en stimula notable. "Me ia pensa tal," el ia dise. "Tu ia oserva a cualce ves, ce la oreas es perforada per orealetas?"
"Si, senior. El ia dise a me ce cuando el ia es un xico, un romani ia fa lo a el."
"Mmm!" Holmes ia dise, cadente a pos en pensa profonda. "El es ancora con tu?"
"O, si, senior. Me veni an de lasa el."
"E tua comersia ia es bon atendeda en tua asentia?"
"Me ave no cosa de cual me pote cexa, senior. Me ave nunca multe per fa en un matina."
"Lo es bastante, senior Wilson. Me va es multe felis de dona a tu un opina sur la tema pos un dia o du. Oji es saturdi, e me espera ce ja en lundi nos va pote conclui."
"Bon, Watson," Holmes ia dise cuando nosa visitor ia parti de nos, "ce tu opina sur tota de lo?"
"Me no comprende lo," me ia responde franca. "Lo es un cosa multe misteriosa."
"Como un regula," Holmes ia dise, "la plu bizara un cosa es, la min misteriosa la demostra es. La crimines comun sin cualias es los cual es vera misteriosa; la mesma con un fas comun cual es multe difisil per identifia. Ma me debe ata rapida en esta caso."
"Donce, cual tu va fa?" me ia demanda.
"Fuma," el ia responde. "Lo es ja un problem per tre pipas, e me mendica ce tu no parla a me en sincodes minutos." El ia tira la brasos e pedes a la corpo en sua seja, con sua jenos acuin tirada a la nas agilin, e ala el ia senta con sua oios cluida e sua pipa negra de arjila projetante a estra como la beco de alga avia strana. Me ia conclui ce el ia adormi, e me ia es ja prosima a la mesma state, cuando el ia salta subita de sua seja con la jesti de un om ci ia ateni un deside, e ia pone sua pipa sur la scafal de la ximineria.
"Sarasate jua a la Salon de San Jacobo a esta posmedia," el ia comenta. "Cual tu pensa, Watson? Tu pote es separada de tua pasientes per un poca de oras?"
"Me ave no cosa per fa oji. Mea pratica es nunca multe absorbente."
"Alora pone tua xapo e veni! Me va core prima tra la City, e nos pote prende alga come en via. Me oserva ce la programa va ave alga musica deutx, cual me gusta plu ca la italian o franses. Lo es introspetante, e me vole introspeta. Veni!"
Nos ia viaja par la metro asta Aldersgate; e un pasea corta ia prende nos a Saxe-Coburg Square, la sena de la nara strana. El ia es un casa peti de du niveles, un loca de aspeta povre ma bela, do cuatro linias de casas oscur de brice e du niveles ia regarda un ensirca peti con un ostaculo de baras, do un jardin de erba plen de malerbas e un poca de grupos de arboretas de lauro ia fa un batalia difisil contra un atmosfera nonconjenial e plen de fuma. Tre bales oro e un plance brun con "JABEZ WILSON" en leteras blanca, sur un casa de angulo, ia anunsia la loca do nosa cliente de capeles roja ia fa sua labora. Sherlock Holmes ia sesa ante lo con sua testa a un lado e ia esamina lo, con sua oios briliante entre palpebras semiabrida. Alora el ia pasea lenta longo la strada, e alora asta la angulo de la stradas, ancora intensa esaminante la casas. A fini el ia reveni a la casa de la impenior, e batente con enerjia sur la paseria con sua basto a du o tre veses, el ia vade a la porte e colpa sur lo. La plu pronto, lo ia es abrida par un om intelijente, joven, e rasada, ci ia invita el entra.
"Grasias," Holmes ia dise. "Me ia vole sola demanda como nos ta vade de asi a Strand."
"La strada tre destra, cuatro sinistra," la aidor ia responde rapida, cluinte la porte.
"Un om intelijente, acel," Holmes ia oserva como nos ia pasea a via. "El es, en mea judi, la om cuatro la plu intelijente en London, e si me osa, me no es serta ce on no pote nomi el la tre. Me ia sabe alga sur el ante esta."
"Evidente," me ia dise, "la aidor de senior Wilson fa un rol grande en esta misterio de la Alia de Capeles Roja. Me es serta ce tu ia demanda la via a el sola per pote vide el."
"No el."
"Donce cual cosa?"
"La jenos de sua pantalon."
"E cual tu ia vide?"
"Lo cual me ia espeta vide."
"Perce tu ia bate la paseria?"
"Dotor, mea cara, esta es un tempo per oserva e no per parla. Nos es spiores en la teritorio de la enemi. Nos sabe aora alga cosa sur Saxe-Coburg Square. Ta ce nos esplora aora la partes cual es pos lo."
La strada en cual nos ia trova nos cuando nos ia verje a la angulo de la Saxe-Coburg Square isolida ia presenta un contrasta tan grande a lo como la fronte de un pitur a se dorso. Lo ia es un de la arterias xef cual ia condui la sirculi de la site de la norde e ueste. La strada ia es blocida con la rio enorme de comersia fluente en un marea duple a en e a estra, en cuando la paserias ia es negra con la xama fretante de paseores. Lo ia es difisil per reconose cuando nos ia regarda la linia de botecas refinada e imobilias diniosa de comersia ce los es vera pos la plaza palida e staniante de cual nos ia veni de parti.
Holmes ia sta a la angulo de la strada e, regardetante longo la linia de casas, ia dise, "Me vole recorda la ordina de la casas asi. Lo es un pasatempo de me ce me ave un sabe esata sur London. On ave la tabaceria de Mortimer, la peti boteca de jornales, la ofisia Coburg de la Banco Urban e Suburban, la Restorante Vejetaliste, e la faeria de vagones de McFarlane. Acel porta nos direta a la otra bloco. E aora, dotor, nos ia completi nosa labora, donce es la tempo ce nos ta ave alga jua. Nos va ave un sanduitx e alga cafe, e alora nos va vade a pais de violin, do tota es dulsia, deleta, e armonia, e nos ave no clientes con capeles roja per frustra nos con sua misterios.
Mea ami ia es un musiciste zelosa, con ce el es no sola un artiste multe astuta ma ance un composor de merita no comun. Tota la posmedia el ia senta se en la stalas, envolveda en la felisia la plu perfeta, ondante jentil sua ditos longa e magra en tempo de la musica, en cuando sua fas jentil e riente e sua oios dormosa e pigra ia es tan nonsimil a aceles de Holmes, la perseguor de la xasa, Holmes la nonsedente, astuta, agu atante contra criminales, como lo ia es posible ce on conseta. En sua cualia singular la natur duple ia espresa se alternante, e sua esatia e intelijentia, como me ia frecuente pensa, ia es la reata contra la disposa poesial e contemplante cual a veses ia domina en el. La osila de sua natur ia porta el de la letarjia estrema a la enerjia devorante; e, como me ia sabe bon, el no ia es tan vera impresante como pos cuando, tra dias en segue, el ia reclina comfortosa en sua sejon en la media de sua improvisas e sua editas de leteras gota. Alora lo ia es ce la desira per la xasa ta veni subita sur el, e ce sua potia de razona briliante ta leva se a la nivel de intui, asta cuando los ci no ia conose sua metodos ta regarda el con noncrede como si el ta es un om de ci sua sabe no ia es acel de otra mortales. Cuando me ia vide el a acel posmedia tan envolveda en la musica a St. James Hall, me ia senti, ce un mal tempo ta veni sur los ci el ia determina a xasa a la fini.
"Tu vole vade a casa, sin duta, dotor," el ia comenta cuando nos ia emerji.
"Si, lo ta es bon."
"E me ave alga cosas a fa cual va esije alga oras. Esta cosa a Coburg Square es grave."
"Perce grave?"
"Un crimin major es en contempla. Me ave tota razonas per crede, ce nos va es a tempo per para lo. Ma ce oji es saturdi complica cosas a alga grado. Me va vole tua aida esta note."
"A cual ora?"
"Des oras va es un ora sufisinte bon."
"Me va es a Baker Street a des."
"Multe bon. E me dise, dotor, on va ave posible alga peril, donce ta es tan bon a pone tua revolver de la armada en tua pox." El ia fa 'asta revide' con sua mano e ia desapare en un momento en la fola.
Me crede me no es plu stupida ca mea visinas, ma me ia es sempre opresada con un sensa de mea propre stupidia en trata de Sherlock Holmes. Asi me ia oia lo cual el ia oia, e me ia vide lo cual el ia vide, e an tal, de sua parolas, lo ia es evidente, ce el ia vide clar no sola lo cual ia aveni ma lo cual ia es a punto de aveni, en cuando per me la cosa intera ia es confondeda e asustante. En cuando me ia va en mea vagon a mea casa en Kensington, me ia revide tota, de la nara estracomun de la copior de la Encyclopedia con la capeles roja a la visita a Saxe-Coburg Square, e la parolas de mal indica con cual el ia parti de me. Cual ia es esta mision noturna, e perce me debe vade armada? Do nosa destina es? E cual nos va fa ala? Me ia ave la refere nondireta de Holmes, ce la aidor de la impenieria con sua fas rasada ia es un om formidibla - un om ci ta jua un jua profonda. Me ia atenta resolve lo, ma ia renunsia lo en despera e ia senta lo a la lado asta cuando la note ta debe furni un esplica.
Lo ia es des-sinco minutos pos nove oras cuando me ia comensa de mea casa e ia vade sur me via tra la Parce, e tal par Oxford Street a Baker Street. Du vagones hansom ia sta a la fronte de la porte, e cuando me ia entra la pasaje me ia oia voses de alta. A mea entra a la sala, me ia trova Holmes en conversa animada con du omes, de cuales me ia reconose la un como Peter Jones, la ajente ofisial de la polisia, e la otra ia es un om longa e magra con un fas triste, con un xapo multe briliante e jacon robin e opresante respetable.
"Ha! Nosa partito es completa," Holmes ia dise, botoninte sua jaca de marinor e prendente la flajelo pesosa de la xasa de la porte-utiles. "Watson, me pensa, ce tu conose sr Jones de Scotland Yard? Me ta presenta tu a sr Merryweather, ci va es nosa acompanior en la aventura de oji note."
"Nos fa denova la xasa en duples, dotor, tu vide," Jones ia dise en sua manera ostentosa. "Nosa ami asi es un om merveliosa per comensa un xasa. Tota lo cual el vole es un can vea per aida el en la persegue de la xasa."
"Me espera, ce esta no va evidenti un xasa de fantasmas," sr Merryweather ia oserva, triste a alga grado.
"Tu pote pone multe fida en sr Holmes, senior," la ajente de la polisia ia dise con sertia. "El ave sua propre metodos peti, cual es, si el no oposa a mea dise tal, un poca tro teorial e fantasin, ma el ave la constitui de un detetor en el. Lo no es tro multe per dise, ce a un o du veses, como en acel cosa de la omiside de Sholto e la tesoro de Agra, el ia es plu prosima a la veria ca la fortia ofisial."
"A, si tu dise tal, sr Jones, lo es coreta," la nonconoseda ia dise con respeta. "An tal me debe confesa, ce me regrete la asentia de mea jua de cartas. Lo es la note prima de saturdi en vinte-sete anios ce me no ia aida a la jua de cartas."
"Me pensa, ce tu va trova," Sherlock Holmes ia dise, "ce tu va jua per un apostada plu alta a esta note ca tu ia fa a cualce ves asta aora, e ce la jua va es multe plu ajitante. Per tu, sr Merryweather, la apostada va es sirca £30.000; e per tu, Jones, lo va es la om sur ci tu vole pone tua manos."
"John Clay, la omisidor, furor, bator, e falsor. El es un om joven, sr Merryweather, ma el es a la testa de sua profesa, e me ta ave plu pronto mea brasaletas sur el ca sur alga otra criminal en London. El es un om notable, esta John Clay. Sua avo ia es un duxe reial, e el mesma ia es a Eton e Oxford. Sua serebro es tan astuta como sua ditos, e an si nos encontra sinias de el a cada turna, nos sabe nunca do a trova la om mesma. El va craci un casa en Scotland a un semana e leva la moneta per un orfaneria en Cerneu a la prosima. Me segue ja sua trasa tra multe anios, ma an tal me ia vide nunca el."
"Me espera, ce me va ave la plaser de introdui tu a el a esta note. Me ia ave a un o du peti veses con sr John Clay ance, e me acorda con tu ce el es a la testa de sua profesa. Lo es pos des oras, an tal, e tota la tempo a cual nos ta comensa. Si tu du va prende la hansom prima, Watson e me va segue en la du."
Sherlock Holmes no ia es multe comunicativa en la viaja longa e ia senta de retro en la cabana, xuxante la melodias cual el ia oia en la posmedia. Nos ia avansa, roncante par un labirinto nonterminable de stradas luminada par lampas de gas, asta cuando nos ia emerji a Farrington Street.
"Nos es aora prosima a ala," mea ami ia comenta. "Esta om Merryweather es un dirijor de banco, e personal interesante en la cosa. Me ia pensa ce es bon ce nos ave Jones con nos ance. El no es un mal om, an si un stupida asoluta en sua profesa. El ave un virtua positiva. El es tan corajosa como un buldog e tan ostinosa como un omaro cuando sua ungias saisi algun. Ave asi nos, e los espeta nos."
Nos ia ariva a la mesma arteria folada en cual nos ia trova nos en la matina. Nos ia envia a via la vagones, e seguente la gida de sr Merryweather, nos ia pasa par un pasaje streta e tra un porte ladal, cual el ia abri per nos. A en ia es un coredor peti, cual ia fini a un porte multe masosa de fero. Esta ia es ance abrida, e ia condui nos a basa per un scalera de petra, cual ia fini a un otra porte dur. Sr Merryweather ia para per ensende un lampa, e alora ia condui nos par un pasaje oscur, con la odor de tera, e tal, pos abri un porte tre, a en un tomba o susolo grande, cual ia es pilada en tota partes con caxones e caxas masosa.
"De alta vos no es multe atacable," Holmes ia comenta cuando el ia teni a alta la lampa e ia regarda sirca se.
"No de a su," sr Merryweather ia dise, batente sua basto sur la petras plata cual ia covre la solo. "Per mea vive, sona tota vacua," el ia comenta en surprende.
"Me debe vera demanda, ta ce tu es a alga grado plu cuieta!" Holmes ia dise sever. Tu ia perili ja la susede intera de nosa mision. Esce me pote prea, ce tu ave la bonia de senta tu sur alga cosa de acel caxas e no interfere?"
Sr Merryweather seria ia posa se sur un caxon, con un espresa multe ferida sur sua fas, en cuando Holmes ia cade sur sua jenos sur la solo e con la lampa e un lente de aumenta el ia comensa esamina la fesures entre la petras. Un poca de secondos ia sufisi per sasia el, car el ia salta denova a la pedes e ia pone sua lente en sua pox.
"Nos ave a la min un ora ante nos," el ia comenta, "car los pote apena fa alga moves asta cuando la bon impenior es serta en sua leto. Alora los no va perde un momento, car plu pronto los fa sua labora, plu los va ave tempo per sua evade. Nos es a la presente, dotor - como tu sin duta ia divina - en la susolo de la ofisia Urban de un de la bancos xef de London. Sr Merryweather es la presidente de la consilio de dirijores, e el va esplica a vos ce on ave razonas perce la criminales la plu osante de London ta debe ave un interesa major en esta susolo a presente."
"Lo es nosa oro franses," la dirijor ia xuxa. "Nos ia ave multe avertis, ce un atenta a prende lo va es posible fada."
"Vosa oro franses?"
"Si. Nos ia ave razones ante alga menses a forti nosa recursos, e per acel ojeto ia empresta 30.000 napoleones de la Banco de Frans. Lo deveni ja conoseda, ce nos no ia ave la nesesa de despaci la mone, e ce lo es ancora situada en nosa susolo. La caxon sur cual me senta conteni 2.000 napoleones pacida entre stratos de folio de plomo. Nosa reserva de masa de oro es plu grande a la presente ca es usual mantenida en un ofisia unica, e la dirijores ia ave noncuietia sur la tema."
"Ce ia es multe bon justida," Holmes ia oserva. "E es aora tempo ce nos ta pone en ordina nosa projetas peti. Me espeta, ce en un ora la cosas va culmina. Entretempo, sr Merryweather, nos debe oscuri acel lampa."
"E senta en la oscuria?
"Me teme tal. Me ia porta un colie de cartas en mea pox, e me ia pensa, ce, car nos es un partie carrée tu pote ave tua jua de cartas an con tota. Ma me vide ce la preparas de la enemi ia prosede tan longa ce nos no pote risca la presentia de un lus. E prima, nos debe eleje nosa postos. Estas es omes perilosa, e an si nos va ave los a un nonvantaje, los pote fa alga feri a nos si nos no es cauta. Me va sta pos esta caxon, e vos asconde vos pos aceles. Alora cuando me lumina un lus sur los, desende rapida sur los. Si los tira, Watson, ave no regrete sur xuta los a su."
Me ia pone mea revolver, preparada, sur la parte superior de la caxa pos cual me ia asconde me. Holmes ia clui la cortina liscante sur la fronte de sua lampa e ia lasa nos en oscuria intera - un oscuria la plu asoluta ca me ia esperia nunca asta alora. La odor de metal calda ia permane per serti nos, ce la lus ia es ancora asendeda, preparada per brilia la plu pronto. A me, con mea nervos ajitada con espeta, alga cosa depresante e dominante ia es en la oscuria subita, e en la aira fria e umida de la tomba.
"Los ave sola un via de retira," Holmes ia xuxa. "Acel es de retro per la casa a Saxe-Coburg Square. Me espera, ce tu ia fa lo cual me ia demanda de vos, Jones?"
"Me ave un inspetor e du ofisiores ci espeta a la porte fronte."
"Alora nos ia clui tota la cavetas. E nos debe aora es silente e espeta."
Cual un tempo acel! De un compara de notas a pos ia es sola un ora e des sinco minutos, an tal lo ia pare, ce la note ia es cuasi a la fini e la aurora de la dia ia es sur nos. Mea membros ia es fatigada e rijida, pos me ia ave la teme de cambia mea posto; an tal la mea nervos ia es ajitada a la plu alta nivel de tensa, e mea oia ia es tan agu, ce me pote no sola oia la respira moderada de mea acompaniores, ma me ia pote distingui la respira la plu profonda e plu pesosa de la Jones obesa de la suspira magra de la dirijor de la banco. De mea posto me ia pote contempla sur la cima de la caxa en la dirije de la solo. Mea oios ia persepi aora un sintili de lus.
Prima lo ia es sola un sintili asustante sur la paseria de petras. Alora lo ia longi se asta cuando lo ia deveni un linia jala, e alora, sin alga averti o sona, un coteli grande ia pare abri se e un mano ia apare; lo ia es un mano cuasi femin, cual ia palpa asi e ala. Per un momento la mano, con sua ditos contorsente ia protende de la solo. Alora lo ia es retirada tan aora cuando lo ia apare, e tota ia es oscur estra la unica sintili asustante cual ia marca la fesure entre la petras.
Sua desapare, an tal, ia es sola momental. Con un sona laserante, un de la petras grande ia es turnada a sua lado, lasante un caveta abrida, per lo cual la lus de un lampa ia flue. Sur la borda de la caveta un fas razada e enfantin ia apare, lo ia contempla agu en tota dirijes, e alora, con un mano sur cada lado de la abri, ia estrae se a la altia de la spalas alora sua sintur, asta cuando un jeno ia reposa se sur la borda. En un otra momento el ia fa se erijeda a la lado de la borda e un acompanior, ajil e peti como el mesma, con un fas pal e con capeles multe roja ia tira pos el.
"Ave no cosa. Esce tu ave la sisel e la sacos? Mea Dio! Salta, Archie, salta e me va jira per lo!"
Sherlock Holmes ia salta a estra e ia saisi la intruor per la colar. La otra ia salta a su en la caveta, e me ia oia la sona de la lasera de stofa cuando Jones ia saisi sua falda. La lus ia lumina sur la baril de un revolver, ma la tormenta de monta de Holmes ia veni sur la polso de la om, e la pistol ia cade con un tintina sur la solo de petra.
"Lo es nonusable, John Clay," Holmes ia dise blanda. "Tu ave no fortuna en tua favore."
"Me vide," la otra ia dise con la sangue estrema fria. "Me imajina, ce mea acompanior es libre, an si vos ave la coda de sua veste."
"Tre omes espeta el a la porte," Holmes ia dise.
"A, si! Tu pare fa ja la cosa multe completa. Me debe loda tu."
"E me tu," Holmes ia responde. "Tua idea de la capeles roja ia es multe nova e produosa."
"Tu va vide tua acompanior denova presente," Jones ia dise. "El es plu rapida ca me en salta per cavetas. Estende tu manos mintere me fisa la manilos."
"Me prea, ce tu no toca me con tua manos susia," nosa prisonida ia comenta cuando la manilos ia fa ruido en clui se sur sua polsos. "Tu no conose posible, ce me ave sangue reial en mea venas. Ave la bonia adirije me sempre per dise 'senior' e 'per favore'."
"Perfeta," Jones ia dise con un regarda fisada e rie basa. "Bon, per favore, senior, marxa la scalera a alta, do nos pote oteni un vagon per porta tua altia a la ofisia de polisia."
"Acel es plu bon," John Clay ia dise cuieta. El ia fa un inclina cortes e pasea cuieta a estra en la cura de la detetor.
"Vera, sr Holmes," sr Merryweather ia dise cuando nos ia segue los de la susolo. "Me no sabe como la banco pote grasia tu o paia tu. Nos ave no duta ce tu ia deteta e vinse en la manera la plu completa un de la atentas la plu determinada de fura un banco ce ia reveni a cualce ves mea esperia."
"Me ia ave un o du naras peti abitada con sr John Clay," Holmes ia dise. "Me ia es a alga spende peti sur esta cosa, cual me va espeta la banco a refundi me, ma a supra lo me es bastante repagada per ave un esperia, cual es en multe vias unica, e per oia la nara la multe notable de la Alia de Capeles Roja."
"Tu comprende, Watson," el ia esplica en la oras prima de la matina cuando nos ia senta nos con un vitro de uisce e soda en Baker Street, "ia es perfeta evidente pos la prinsipe ce la sola ojeto de esta cosa alga fantasin de la anunsia de la Alia e la copia de la Encyclopedia, debe es per resulta en esta prestor no tro intelijente ta es asente per un poca de oras a cada dia. Lo ia es un manera curiosa de maneja lo, ma, vera, ta es difisil a sujesta un plu bon. La metodo ia es sin duta sujestada a la mente injeniosa per la color de la capeles de sua aidor. La £4 a cada semana ia es un tenta cual ia debe trae el, e ia es un spende minor per los, ci ia jua per miles. Los ia introdui la anunsia en la jornal, un picaro ave la ofisia tempora, la otra picaro provoca la om a presenta se per lo, e en junta los ia es capas de serti sua asentia a cada matina en la semana. De la tempo cual me ia oia sur la aidor ci me reveni lapasada per salario duida, lo ia es evidente per me, ce el ave alga motiva forte per serti la situa."
"Ma como tu ia pote divina lo cual es la motiva?"
"Si femes ia es en la casa, me ta ia suspeta un conspira plu vulgar amosa. Acel, an tal, ia es nonposible. La comersia de la om ia es peti, e no cosa en sua casa ia pote esplica tal preparas, e donce un saleta cual los ia fa. Cual cosa lo pote es? Me ia pensa de la ama de la aidor per la fotografia, e sua ata de desapare a en la susolo. Acel ia es la fini de esta clo complicada. Alora me ia fa alga demandas con respeta a esta aidor misteriosa e ia trova ce me debe trata de un criminal con la plu de sangue fria e osa en London. El ia fa alga cosa en la susolo - alga cosa cual ia nesesa multe oras a cada dia per multe menses. Cual cosa lo pote es, denova? Me ia pote pensa de no otra cosa ca el escava un tunel a alga otra construida."
"Do me ia es cuando nos ia visita la sena de la ata. Me ia surprende tu per bate la paseria con mea basto. Me ia vole determina si la susolo ia estende a estra en la fronte o de retro. Alora me ia tira la campana, e, como me ia espera, la aidor ia responde. Nos ia ave ja alga scaramuxas, ma nos no ia vide la un la otra ante esta. Me ia oserva apena sua fas. Sua jenos ia es lo cual me ia vole vide. Tu mesma ia en pasada comenta como malida, plietada, e manxada los ia es. Los ia parla de acel oras de escava. La sola punto permanente ia es cual ia es sua ojeto de fa la escava. Me ia pasea e turna me a la angulo, e me ia vide la Banco Urban e Suburban e la casa de la prestor sur impenia posterior a posterior, e me ia crede, ce me solve la problem. Cuando tu ia condui tu a casa pos la conserta, me ia visita Scotland Yard e la presidente de la dirijores de la banco, con la resulta cual tu ia vide."
"E como tu pote dise, ce los ta fa sua atenta a esta note?" me ia demanda.
"Bon, cuando los ia clui sua ofisia de la Alia, acel ia es un sinia, ce los no plu dona interesa en la presentia de sr Jabez Wilson - en otra parolas, los completa sua tunel. Ma lo ia es esensal, ce los debe usa lo pronto, car lo ta es posible descovreda, o la lingotos moveda. Saturdi ia es plu bon ca a alga otra dia per sua projetas, car lo ta dona los du dias per sua evade. Per tota esta razonas me ia espeta, ce los ta veni a esta note."
"Tu ia es justa bela," me ia esclama en amira sin finje. "Lo es un cadena multe longa, ma an tal cada lia sona vera."
"Lo ia salva me de la noia," el ia responde, con un osita. "Mal! Me ja senti, ce lo enclui me. Mea vive es consumada en un labora longa a evade la comun de la esiste. Esta problemes peti aida me a fa lo."
"E tu es un beneficor de la raza," me ia dise.
El ia leva sua spalas. "Bon, posible, pos tota, lo ave alga usa peti," el ia comenta. "L'homme c'est rien - l'oeuvre c'est tout como Gustave Flaubert ia scrive a George Sand."
@T La ami de cor de la mori
@L leteratur/la_ami_de_cor_de_la_mori
@A Fidel Prado, Chabi
====== La ami de cor de la mori ======
par Fidel Prado
traduida par Chabi
Nun en la rejimento ia sabe
ci ia es acel lejionor
tan corajosa e osante
ci ia enscrive en la lejion.
Nun ia sabe sua istoria,
ma la lejion ia suposa
ce un dole grande ia rode
como un lupo, sua cor.
Ma si algun ia demanda el ci el ia es,
el ia responde con dole e ruia:
Me es un om ci fortuna,
ia feri con pedeta de bestia,
me es un ami de cor de la mori
ci va uni con lia forte
con sua acompanior fidosa.
Cuando la foco e la luta
ia es la plu ferose,
defendente sua bandera,
la lejionor ia avansa.
Cuando a fini los ia recolie el
entre sua peto los ia trova
un letera e un depinta
de un fem divin.
E sin teme la ataca
de la enemi ajitada,
el ia sabe mori corajosa
e la bandera el ia salva.
E a cuando el ia empapa la solo con sua sangue,
la lejionor ia murmura con vose lamentin:
Me es un om ci fortuna,
ia feri con pedeta de bestia,
me es un ami de cor de la mori
ci va uni con lia forte
con sua acompanior fidosa.
Cuando a fini los ia recovre sua corpo,
los ia trova en sua peto,
un letera e un depinta
de un fem divin.
E acel letera ia dise:
"Si Dio alga dia clama tu
reclama un loca per me
ce me temprana a xerca tu me va vade".
E en la besa ultima cual el ia envia
su adio ultima ia dedica a el:
Per vade junta a tu per vide tu,
mea acompanior la plu fidosa,
me ia deveni la ami de cor de la mori,
me ia uni el con lia forte
e sua ama ia es mea bandera.
@T La arbor de Juda
@L leteratur/la_arbor_de_juda
@A 
LA ARBOR DE JUDA
La tren de 21:20 ⋅ La arbor de Juda
====== La arbor de Juda ======
La noveleta eponim estraeda de La arbor de Juda (1976-1979) de Gilles Davray((Gilles Davray es la nom anagram de Yves Gaillard, scrivor, depintor e musiciste, 1946-2004.))
Traduida de franses par Michel Gaillard
La via ia es mal vidable. La frotadores no ia susede plu scopi la deluvia cual versa forte sur la paraventa. E esta via sin fini... Me ia es odiante gida.
Me no sabe lo cual ia motiva mea parti. Posible esta adirije cual me ia trova en la pox de mea jacon vea... O la curiosia. O, cisa, la noia.
Cuando un camion ia veni frontal a me, sua luses, tra un momento, ia abalia me total. La acua ia flue sur la via e ia inonda la campos. Ultima, me ia perde cualce evalua de la dura. Lo pare a me ce me gida per dias -- traversante viletas, vilas, sin ce me es vera consensa. Sirca me, la vista resta sempre tan gris, tan neblosa.
Lo no noti ancora, ma la nubes pesosa filtri debil un lus gris, nonsufisinte. Pos alga tredes cilometres, me ta pote reposa. Mea lombo dole.
Apena a setembre, la autono ia ariva ja subita, pos du o tre tempestas forte. Cadun ia es surprendeda par esta clima tan brusca fria. A la semana presedente, la turistes ia es ancora bruninte al sol, sur la plaias de la costa; multe ia temprani sua parti.
Me segue aora un via peti serpentin, bordada con arbores, a basa de un colina. Pronto, me no vide plu alga cosa, a cualce lado de la angulo de la luses sur la via. Lo noti, me fri. Me crede distingui alga casas. La pluve ia sesa, ma como me pote locali, en media de la note? Mea mapa pare subita vera tro simple.
Me ariva sur un plaza vacua, do me parci mea auto. A esta momento, un silueta apare a la fini de la strada. An con la oscuria, me susede reconose esta xica con esta fas areolida con risas blonde, un fas sur cual me leje un surprende grande. El para, regarda me, panicada, el returna e fuji. Me lasa pronto la auto e, corente, me segue el, profitante de un raio de luna.
Cual cosa el fa asi, en esta suburbe desabitada? Car me ia debe asusta el, me clama el per cuieti el. Ma el no responde, continuante sua core tra la stradetas oscur. Pronto me no oia plu sua pasos, no vide el. No plu cosa. Me ia perde el.
Me es perdeda. La nubes masci la luna, me no vide pos sinco metres. Vera desorientada, me no sabe plu do me debe dirije. Tota la casas es simil, tan oscur, tan menasante.
Un basin antica de lava. Me regarda mea mapa: la rueta cual me xerca es a fronte. Me entra ala e me trova la impas, lejera luminada par un lus a la entra de la casa de Telima do me ia debe vade.
A ante, un jardin con sua arbor de Juda tan enorme, un porteta metal con un campana vea. Regardante la fenetras oscur de la fasada, me recorda ce esta tipo de casa posese jeneral un jardin grande a retro, a fronte de la salas xef.
Pos alga pasos, me ariva a la porte de entra, tape sur lo a du veses e, sin tardi, turna la manico e pasea con esita en la coredor oscur asta un porte grande con vitros martelida asedente a un sala envolveda en luses dulse e discreta.
Me puia e entra. En un angulo de la sala, un table basa peti. Cartas. Manos -- longa, delicata. E ela. En un roba diafana de seda blanca. Capeles negra, longa, caresa sua spalas, liscante a sua lombo.
« Como tu vide », Telima dise, ponente la jua de cartas a ante, con un flama strana nasente en la fondo de sua oios, « me ia es espetante tu. »
La 9 de spada lisca de la jua. Un acaso pur... Un posible entre tredes-du. Un acaso pur?
El oserva me, e invita afin me prosimi. El mostra a me un botela; pos mea anui, el servi un vitro a me. Me lasa ce me cade en un sejon comfortante, a fas de el. El repone la 9 de spada en la jua. Me vacui mea vitro, sorbe pos sorbe, atentante comprende lo cual ia motiva mea veni asta ala.
« Lo ta deleta me ce tu come con me. »
Telima, con oios soniosa, pare envolveda en un fantasia dulse, perdeda en la arabescas de la sofito, un marania de ederas artosa depintada. Esce an me ia encontra el ja? Me foraje mea memoria, sin ce, a cualce ves, me retrova sua trasa. Lo ia ta es difisil ce me no nota el: on no ta pote oblida un tal fas, un tal corpo...
« La comeda es servida en la salon peti, tal como Seniora desira. »
Me turna pronto, ma la xica ia sorti ja de la sala.
« Me vesti un roba e me reveni a tu », Telima dise a me.
Telima veni apena de sorti cuando un fas pupin ia apare -- con un macia simple, favorente sua oios azul, bela, briliante, e un boca amirable desiniada. Ela, Mirto, sta vera ala. Me ta vole demanda a el perce el ia fuji, poca a ante, ma el ia turna ja, invitante ce me segue el.
Amirante la onda dulse de sua anca, me traversa la sala, asende alga grados de un scalera larga, asta la porte materasida de lo cual me suposa es la salon peti, par causa de sua mobilas e cortinas valuosa. La utiles de come, ordinada sur un telon blanca con miscas sutil de brode, fasina me par la brilia de la cristal, de la arjento e de la porselana delicata.
La presentia de Mirto remente me de la realia. Me saisi sua spalas afin el escuta me.
« Aora, nos es sin otra a sirca: dise a me lo cual tu maneja asi. Cual comedia tu jua? »
Pos un luseta de surprende a fondo de sua regarda, sua fas perde cualce espresa. El no va dise alga cosa. Profitante de la laxi de mea teni, el fuji con freta e sorti.
Con un jesti de descura, me lansa mea jacon sur un sejon duple e regarda la sala. En fato, lo es sola un alcova elevada, con cortinas cluida, e cual es un parte de la salon grande.
Telima entra, vestida con un roba longa azul, multe escotada e ornada con brodes de filos oro. Sur sua spalas, un xal blanca, cual el pone a lado de mea jacon. El sinia afin me senta, e final nos es con fas a fas.
A alga veses tra cuando nos es comente, la regarda de Mirto, ci servi nos, encontra la mea: un regarda nonconsernada, cuasi sin afeta.
Final mea ospitor leva, lasa la table e, pos alga pasos en la salon peti, el senta sur la sejon. Me leva ance, lasa mea seja per senta en la sejon, a sua lado. Cual es sua vole, en fato?
Sua labios tanje lejera la meas, en un besa corta.
« Nos pote vade », el anunsia­ mera.
Me lasa ce el dirije me tra la salas, sin ce me atenta orienta. Me reconose pronto la biblioteca; a fondo, Telima leva un cortina, descovrente un porte basa, cual nos pasa. Scaleras de petra segue alora, tra longa, desendente sin fini. Me no sabe cuanto nosa desende ia dura ante cuando nos ateni esta pave lejera umida. Voltas vasta disolve en la oscuria, supra nosa testas, como a interna de un castel medieval o de un templo suteran. A alga veses -- e lo surprende me tan forte --, a retro de un colona o en la solo mesma, nos encontra alga asedes de metro. Telima prende mea braso per gida me. A la otra lado, on ave no mur. Ance no rel de balustres. Sola un paseria streta, pasante supra un presipe profonda e oscur.
La dia ia comensa apena cuando on tape a mea porte. Lenta me traversa la salon e vade a desclavi: lo es Alzon, un ami vera. En pasa, me pensa ce me no ave alga otra. El entra, regarda me con un regarda lejera demandante e senta en un sejon pos un « bon dia » indicante alga manca de dormi.
Alzon es un person estracomun. Serta el depinta amirable bon, ma ance el ave un disposa merveliosa, cual fa el un ami estrema plasente. El es interesada par tota lo cual pertine, plu o min, a la persepi de la cosas, de la arte a la matematica: natural curiosa, el es ocupada xef par la problemes cual nun ia resolve a ante! Cada de sua projetas defia la razona comun. Par acel causa, el xerca sempre plu, tra la pares, la opera grande.
A la anio cuando nos ia descovre lunlotra, el ia veni de fisa se en un studio peti, a la fondo de un patio, a sento metres de mea casa. Nos ia es encontrante nos a cada matina en la mesma caferia, per nosa come prima e la leje de la jornal. A un dia, el ia comensa un discute e invita me afin me vade a vide sua lonas. Seguente, no un semana ia pasa sin ce un de nos visita la otra.
« Me ia labora tra tota la note per mea mostra, pos cuatro dias. Multe lonas resta ancora per molduri. Si tu vole visita me, me no lasa plu la studio... »
La vila intera es envolveda en un gris pegosa, en cuando un pluve, lejera como un nebla, mugri la aira ja cargada con la gas de combusta.
Mirto puia la porte de vitro de la bar, pasa entre la tables asta la mea e senta a fas de me. El desapone sua jacon sur la reposadorso de sua seja. Me conose el bastante per nota, de sua fas nonormal casual e sua regarda evitante, un afeta grande.
Me recorda el, a multe anios a ante, cuando el ia es veninte asi, sentante a lado de la colona e de la miror; sempre, pos la ajusta de sua capeles, el ia es bevinte, con sorbes corta, sua te aromida con orania. Si me no nota sua entra, me ia divina sua presentia par la parfum pico dulse esflueda a sua pasa. Me ia es vidente el per des o des-sinco minutos a cada dia; an tal, si el no ia veni, me ia senti frustrada. A la estate, el ia es portante un roba blanca lejera, fendeda a la lado, o un jina e un jaca abrida sur un camiseta ornada. Pos cuando el ia bevi sua tas, el ia es sortinte de la bar, penetrante la bus numero 9, prosima a la asede de metro de la plaza de la Spada. El ia es desaparente alora, sumerjida par la trafica stradal.
A pos, multe tempo ia pasa. Final, nos ia susede conose lunlotra, vive frecuente en junta, deveni enamada.
« Me senti tu strana, oji », me confida a el.
El es vidable embarasada. Me bevi lenta, sin ce mea oios lasa el, espetante ce el deside parla.
« Me no pote resta con tu, a esta sera », el confesa final.
« Perce? »
El no responde.
« Bon. Alora doman? »
« Ance no. »
Me comensa comprende lo cual el intende sinifia. Sua oios, fisante la meas, pare a me alora plu bela ca usual, plu grande, plu clar.
Me aida el.
« De longa tu intende dejunta tu de me? »
El anui con un bate de sil.
« Me ia nesesa esta sonia, a note... Un sonia strana. On ia ave un ami, cual me no ia vide de sirca tre anios... e tu... nos es tan diferente de lunlotra... Lo no ia ta pote dura. Tu comprende? »
--- Nonesata. »
No sabente cual ajunta, me deside silenti.
El deveni soniosa, como si un idea veni de nase en sua mente. El estrae de sua bolsa un paper sur cual el scrive alga parolas, en cuando la bus numero 9 apare a la fini de la strada.
« Me debe vade, aora. »
Me ia senti un preseta peti a la cor cuando Mirto leva e permete a me un besa lejera.
« Tu ta debe pensa ofre a tu un jacon nova », el ajunta­ ante ce el parti. « Esta es alga ruinada! »
Mea regarda segue el, e me perde el direta cuando el misca en la fola fretante de la pasajores.
Pronto sejas ia libri. Mirto senta a lado de un fenetra, per oserva plu bon la curso cual el vade a redescovre pos tre anios longa. Esce Telima abita ancora esta casa, a norde de la vila, en esta distritos cual estende ultra la termina de la linia numero 9?
De pos la para ses de la bus, ela sta solitar con la gidor e la biletor. Stradas e construidas con luses plu e plu rara pasa ante sua oios en cuando on ariva a la suburbe do lo es preferable ce on no vaga solitar a note.
« Tota ia cambia tan! » la xica nota.
La gidor, ci dormeta en sua loca de vitro, abri un oio.
« E pos un tempo tan corta! Me no comprende perce esta linia es mantenida. No abitor vive ala aora! Lo es strana ce on no ia destrui la casas per construi tores de apartes o fabricas. Lo ta es plu usosa ca casas vacua. An la vagabones no vade ala! Los prefere dormi en la coredores de la metro...
--- Ma cual cosa ia aveni?
--- Me no sabe. Lo es ancora plu stonante car esta distritos situa a min ca un dui-­ora de la vivosia urban! En pasa, nos ariva. »
La strada de tera fini a un plaza deserta ensircada par casas abandonada. La biletor ensende un sigareta.
« Termina! » el anunsia cuando la bus para.
Un pluve lejera melmi la troterias de la plaza de la Spada. Me no ia lasa la bar pos la parti de Mirto, atentante comprende la razonas de esta fini de relata brusca.
Forajente la pox de mea jacon, esperante trova alga monetas, me trova esta peso de paper pliada, sur cual me leje, a lado de un mapa elementin:
 TELIMA
  La Arbor de Juda
  Impas de la Note
 THELIMA
  L'Arbre de Judée
  Impasse de la Nuit
En la gris de esta comensa de posmedia, me pasa la porton asedente la patio a fondo de cual la studio de la depintor es luminada. Me entra sin tape.
« No disturba tu, lo es me. »
El turna a me, estrae alga clos de sua boca e pone los sur sua table de labora.
« Veni a esta parte. No ofende si me continua labora; me ia tardi tan.»
Un stufa de cerosen ronci en media de esta sala multe conjestada par lonas, scafales, e multe ojetos diversa sin usa conosable per me.
« Tu vide: me molduri. Cual motiva tua veni? »
Me senta sur un sejeta en cuando Alzon fini fisa la lona cual el vade a pone, a pos, contra la mur.
« Como tu esplica la presentia de esta paper en la pox de mea jacon cual nunca me lasa? »
El prende la folia.
« Ci el es, Telima?
--- No idea! Me conose no acel nom, no acel adirije.
--- Interesante. Cual tu espeta per vade ala?
--- Me an no sabe do lo locali!
--- La problem va es solveda pronto. »
El leva, desordina alga libros sur un scafal e reveni con un surie de vinsor e un mapa de la vila. La folias voleta; sua dito segue un colona de parolas spesa primida... e para.
« Vide asi: impas de la Note... G12. Lo debe es a norde », el murmura, despliante la mapa.
Me veni a retro de el.
« Ala! a supra! » me esclama.
A la sorti de la vila, si on entra en la via cual asende a norde, on ariva pronto a planos alta do la tera pare ja caldida a un temperatur multe forte, como pos un ensende de foresta. La solo es fesurida. An tal, cuando on traversa acel rejion, on senti ce un pluve minima ta cambia lo en un fangeria vasta. A no loca on nota cualce rocas.
Cuando on lasa la via grande per la vieta torsosa cual gida a esta locas, lo es como si on ta lasa la mundo real per penetra un pais imajinal. On es turbada, a prima, par la silentia. No un canta de avia, no un xuxa de folias, an ante ce on ariva a esta plano alta desertin do mera alga bosces magra crese, multe spasida, e alga arboretas rara, racitica.
Casas ruinada sperde tra la campania, como frutas matur cadeda de un arbor e rodeda par la vermes, segueda par casones abandonada, con covrefenetras cluida, mures fesurida strana desformida. A esta momento, on no nota lo multe; plu tarda on persepi la cualia spesial de tota esta abitas, antica o resente. Sua mures es inclinada, como par causa de un lisca de la stratos alta de la tereno, e acel ajunta un senti supranatural cual deveni pronto angusante.
Me no sabe lo cual ia motiva ce me segue esta via e ce me vade a interna de esta teras silente. Un via cual, en fato, no debe es reparada de longa! On ave no petra cilometral no palo de telefon, ma me no ia nota lo: mea mente ia es tro envolveda en la strania emerjinte de la visineria. Mea sensas es desuplida, como en alga sonias spesial impresante.
La via pasa tan mecanical ce pos alga tempo, me no pote sabe esce me vade par pasea o par auto: me move en un mundo mor, como un regardor perdeda, desorientada, ci sta ala sin sabe perce, nonprevidable.
La stilo de la casas es stonante. On encontra tota tipos de casas, de la cultiveria a la casa colonial, con sua moldures e balustres, tal como bangalos moderna sin alma. Un sola punto es comun per totas: esta inclina strana a este.
Me pasa lenta ante un construida bastante resente, a destra de la vieta. Me crede reconose lo. Lo es un bangalo min gastada, ma fesurida, e liscante en la solo como un barco afondante. Cualce mal brusca ia ta feri la loca, lasante mera a la abitores la tempo de clui portes e covrefenetras. En cuando me es ancora impresada par lo, la via largi e cambia a un bolevar de tera bateda. Sin duta me veni de ateni la suburbe de alga agrega urban, car, en cada parte, construidas alta es erijeda, plu o min ruinada.
La lisca de tereno no ia conserna esta distrito: la construidas, asi, es tota vertical. Un casa atrae me spesial: sola la mur de fondo e la mur destra resta. La fasada, la mur sinistra, la teto e la niveles alta ia colasa, forminte a la nivel de tera, un masa enorme de petras, ruinas e ojetos mutilada. Longo la grandia de la fenetras, la niveles debe ave un altia de ses metres. On pote ancora distingui moldures sur la mures, e scultas alga mediocre. Me sensa strana, regardante esta casa ruinada.
Un talo de metal de dudes metres de altia, como surjeda de la solo, tota a lado de me, es curvinte a interna, par causa de la pesa de un frato de mureta ancora fisada a sua apico. Me prosimi e toca lo delicata. Lo sufisi per osila lo, e cade lo a pos. En un ruido cual pare a me nonormal amortida, la frato peti de mur ajunta se entre la detritos cual sperde sur la solo. Ma un otra cosa stona me alga plu: me es subita serta ce, a retro de la casa, on ave la mar.
Me ariva en media de tores de apartes, en bon state, ma grisin e con covrefenetras cluida. A la crus de vias, un panel comersial roja e blanca, a la nivel prima, loda la calmia de la rejion, proposante a comprores potensial apartes con custas vantajosa.
Un basin antica de lava. Me consulta mea mapa: la rueta debe es a fronte. La impas de la Note. La casa sta ala. A ante, un jardin peti, un porteta metal, con un campana vea. La tintina fa eco sin fini sur la fasadas sieca. Esta casa no difere entre la otras, estra, a sinistra de la scalera, un arbor de Juda enorme.
Me entra sin tape. Alora un coredor streta apare, con la solo manxada par alga polvo de jeso e fratos cadeda de la sofito.
La porte con vitros martelida no ia es cluida de longa: la redes de arania lia lo a la palo de porte e a la mures de la coredor, un coredor vacua, con paperes de mur descolorida. A fondo, a destra, un porte asede un sala sin alga mobila, sin alga cortina. A la otra parte, un scalera desende a la suteras.
Subita, lo cual ia motiva me asta aora pare lasa me. Me no desira plu tan continua mea visita. Cisa, car la sera ia aveni e me no gusta la idea de es asi cuando lo noti. Me senti fatigada, deludeda. A! si sola me ta es con fas a fas con esta Telima! Mea zelo colasa lenta, como con un anima lenta. La sol reposa pos la tetos de la casas, lasante ce la ombra asende la fasadas gastada asta la lucarnas de la sutetos. Cualce enerjia ia abandona me, e me resta ala, nonmovente, notante la oscuri lenta de la telias de la sursolo.
Me sta sur la teraza dominante un parce traversada par paserias malmanejada. Alga scultas de marmo blanca emerji de la bosces, como fantasmas de petra espetante cualce sinial per inisia un ronda de dansa macabre tra la ruas de la suburbe norde.
Pos un curva de un paseria, me descovre subita la sculta de Telima, con sua nom gravada sur la pedestal, partal ascondeda par boscetas. Mea regarda lisca sur sua corpo, asendente asta sua fas, e resta sur acel roba corpin cual esvasa a la nivel de la jenos.
« Un fem bela, no? Mirto demanda a me, a retro de me.
--- Un fem multe bela », me clari, turnante. « Alzon ia ta gusta portrae ela.
--- Alzon! A un plu ves! Tu parla sempre de el, de cuando nos ia encontra nos. Me no sabe an como el aspeta, tua Alzon! »
Esce me es culpable si los ia encontra nunca? La acaso sola es la causa. Me diverje la conversa afin evita un plu disputa, e me retrae ela a la tema cual preocupa me.
« Perce tu ia fa ce me veni asi? »
Me descovre la veria en cuando me pronunsia lo: esce Mirto no ia es la sola person cual ia ta pote cade acel paper en la pox de mea jacon, poca a ante, en la bar? Mea revela, par sua tono firma, desarma el. El mua como un xice cual on surprende pecetante, e el confesa:
« Afin tu vive lo cual tu ia vive en mea sonia... Tu sabe, acel sonia de cual me ia parla a tu... Nos ia es asi, nos tre: Telima, tu, me... Asi! Tu ia veni car tu ia trova sua adirije. En tua jacon... Ma la distrito ia es tal como me ia conose lo a la tempo cuando me ia es abitante a casa de Telima. »
Mirto pare turbada. El ia es esperante retrova sua pasada, entrante la bus 9, ma aora el sta en media de un suburbe desertin. No tan longa a ante, el ia es traversante la jardin de la palasio, pasante a lado de bosces de flores e basines peti con telias de seramica, seguente la via cual gida el a la impas de la Note.
A sinistra de la teraza, un scalera ia asede la parce do, a la sera, el ia gusta pasea tra la paserias bonmanejada, asta la porton de fero e la tereno savaje sperdente ultra la impas. Su esta scalera, un porte: acel de la sala cual el ia es luante. Un miror grande ia ocupa tota la fondo de la alcova de sua leto, profondinte la sala. Su la fenetra, a lado de la entra: un table, un seja e un sejon. A fondo, un cosina peti e un sala de banio, la sola loca cual Telima ia ajusta en un stilo moderna.
« Asi, tu va es vera a tua casa », Telima ia dise.
De la semana prima, el ia gida sua luante tra la partes la plu secreta de La Arbor de Juda. Tal, Mirto ia descovre la suteras de la casa, cual, par causa de lor vastia, ia stimula sua imajina. El ia forsa la limitas a via, plu e plu distante, creante, a note pos note, un mundo suteran asedable par ferovias strana de metro.
La stasiones, cual on descovre a alga ves a retro de un colona o en la solo mesma, no teni alga nom, ma un letera e un numero, scriveda blanca sur fondo blu. Me lasa ce el dirije me sin ce me atenta orienta: voltas vasta disolve en la oscuria, como a interna de un castel medieval... A ante, on ave no mur. Ance no rel de balustres. Sola un paseria streta pasante supra un presipe profonda e oscur de cual un ruido asende, como un ruido de petras rondas rolada par la ondas.
Telima prende mea braso per gida me tra la jinestas spinosa, asta la baieta do la spuma de mar fosforesente estingui sur la arena oscur de la plaia peti limitada par du avansas de roca umida e liscante.
La Arbor de Juda silueta a retro sur un sielo pur, en cuando la luna, a sua cuatri prima, projeta sua zonas de ombra e de lus con lamas longa puntida.
« Un loca bela per sonia, no? » el murmura­.
Me anui, con mea mente ocupada par otra cosa: a alga dudes metres de distantia de la riva, tal como un tapo de suber, un barco osila sur la ondas. Un om sta sur la nivel alta de la barco; me distingui sua silueta obsoleta. Stante sur la popa, vestida con un jacon robin e un xapo silindre, el aspeta plu un pupeta de caxa musical ca un umana.
« Ma el es Alzon! Cual cosa el maneja ala, vestida tan bizara? » me esclama.
Sin plu cura per Telima, me entra en la acua.
« Alzon ! » me cria, jestinte con mea brasos per atrae sua atende.
Mea vose misca con la ruido de la ondas sur la petras; me avansa plu, profondinte asta mea taie, asta mea spalas. Sur la riva, la fem joven suplica ce me reveni.
Cuando mea pedes no toca plu la fondo, me deside nada, distantinte de la costa sin esita. La barco es alora mea refere unica, en cuando un ansia silente envolve me.
Me oia me clamante aida, ma esce la om, ancora nonmovente a la popa de la barco, oia me sola?
Mea vestes ostaculi e pesosi me. Multe fortunosa, Alzon sorti de sua letarjia, verje a me e junta me pos alga secondos. Bon envolveda en la covre cual el ia pone sur mea spalas, ancora tremetante, me demanda lo cual el maneja asi, con esta vestes fantasin.
« E tu? » el responde. « Cual cosa tu maneja, nadante tota vestida?
--- Me veni de la casa de Telima. Mirto ia es espetante me en la parce. El ia parla a me de la suteras, de la metro... »
La barco lisca sur la acua calma. Nos persepi apena la ondetas lejera sur la casco.
« El ia nara un sonia a me... » me continua. « Atraente me a casa de Telima, el ia ta pote desprende me!
--- On ta debe desfida plu la mareas forte! » la depintor declara, ante ce el maneja la barco como si nos ta es sur un barcon de tre mastos.
--- ... Ma me ia susede evade! »
La plaia, cual la note ia cansela, es sola un recorda, cuando me deside nara tota.
La calmia grande de la infinita cuna nos con sua tepidia, projetante nos en esta instantes suspendeda cual composa la eternia. Nos lisca a la orizon.
« Tu ta debe vesti », la depintor sujesta a me. « Pos corta, lo va es la ora! »
Me desende en la entrenivel tra un scalera elica, asta esta plataforma metal cual asede coredores diversa do me persepi un ronci basa simil a acel de la metro. Telima apare alora, vestida con un roba longa azul multe escotada e ornada con brodes de filos oro. Sur sua spalas, un xal blanca.
« Nos pote vade », el anunsia­ mera, prendente mea braso.
Ela tira la cortina cual separa nos de la salon grande, do la depintas de Alzon sta esibida -- astuta favoreda par un multia de lampas de punto esperta sperdeda; ela gida me asta esta table, covreda par un telon blanca, con vitros e bevidas fresca.
Me abri un botela de xampania, pleni du copas, e nos brinda la artiste en cuando acel es entrante, vestida elegante e covreda con un xapo silindre gloriosa.
« Nos ia es espetante tu, mea mestre cara », ela dise, suriente a elo.
Alzon saluta inclinada, besa la mano de la fem joven, e aseta la vitro ofreda par ela.
« Veni, me vade a introdui tu a nosa ospitadas. Los freta per conose tu. »
Me profita de la momento cuando Telima gida Alzon, per amira la obras de mea ami. Multe belida par la decora valuosa de la sala, los pare difere de los cual covre la mures de sua studio. Me senti ce los es aora en sua propre ambiente e ce los revive pos un inverni longa.
Me vade a senta sur un sejon de veluda blu oscur, cuando me persepi, a lado de la porte, esta xica con risas blonde cual prosimi a la bufes. El prende un, oserva la persones con un regarda nonconsernada, e pasea a la fenetron asedente la teraza.
Me pone mea copa e segue el.
La aira es dulse, a acel note merveliosa; me espera trova esta xica apoiante sur la balustres, con oios regardante la ombras de la bosces de la parce, contemplante la scultas de marmo, o reposante sur un banca, con sua fas ofreda a la venteta caresante, cargada con la sonias de la mar. Me no vide cualcun.
Un scalera, a sinistra, gida me alora asta la paserias bonmanejada cual vaga en la oscuria de la pergolas. Me entra prudente, sabente serta ce me vade a encontra ela, cuando me para ante la sculta de Telima. Mea regarda lisca sur sua corpo, asendente asta sua fas.
« Un fem bela, no? »
Me salteta, oiante esta vose, como si on ta estrae me de un dormi profonda.
Ela oserva me tra longa, e cuando me es tota consensa denova, el deside subita: sua fas veni nidi se en la nido de mea spala, en cuando mea ditos penetra timida la risas de sua capeles.
El leva la testa, regarda mea labios, esita tra alga secondos, e final besa me.
« Mirto... » me xuxa.
El pone un dito sur mea boca e responde "no" con sua testa a cualce demanda cual me ta pote espresa.
« Lo no es plu posible aora... » el murmura. « A du, tre anios a ante, cisa... »
FINI
@T La arenas fria
@L leteratur/la_arenas_fria
@A Yves Gaillard, Michel Gaillard, Michel Gaillard
====== La arenas fria ======
Les Sables froids, testo par Yves Gaillard, musicida par Michel Gaillard, 1972
Traduida de franses par Michel Gaillard
((Depinta La flor del deserto, par Yves Gaillard, 1972.))
A la arenas fria, scopida par la venta,
un ombra pasada flue dulse e lenta
Tu retrova el, solitar como a ante,
tu sta ala, fisada, sieca, silente
Un ombra pasada flue dulse e lenta:
« La note es doman, per tua remente...
Vide entre la rocas la arena moiante,
la alges vade a via, traeda par la venta »
Tu retrova el, solitar como a ante,
ma, vide sua trasa misera fondente...
Tu sta ala, fisada, sieca, silente:
la note sin bagaje ia fuji el distante.
Tota esta es per tu, como un sonia en pausa,
--- lo es poca, ma, vide: ala on ave no cosa
@T La arte de la gera
@L leteratur/la_arte_de_la_gera
@A La Arte de la Gera, Sun Tzu, Dave MacLeod
====== La arte de la gera ======
La Arte de la Gera es un libro scriveda par Sun Tzu en la sentenio 6 AEC.
Traduida en modo direta (e laxe!) de xines a elefen par Dave MacLeod ("Mithridates").
===== Calculas =====
Sun-dzu dise: la gera es un cosa grande per un pais. Lo es la tera de vive e mori, la curso de esiste e nonesiste; tu no pote no studia lo.
Donce, esamina la sinco problemes basal, seguente egali la sete states basal, e judi la state de la armada de tu e de la enemi. La un es la curso, la du es la sielo, la tre es la tera, la cuatro es la jeneral, e la sinco es la metodo.
@T La arte grande
@L leteratur/la_arte_grande
@A Manouna Orti
====== La arte grande ======
par Manouna Orti
[Estraeda de sua jornal personal -- anio 1980.]
Ce on libri se de la limitas umana, lo es la gol ultima de esta rexercas: me vade de loca a loca, a cada parte do fratos de la instrui ia es posible sperdeda. Me colie los, esamina los, me studia zelosa tota la crusas de similia. Me desifri los con la serti ce los es copias de manoscritos antica sur la arte reial, esta pratica de la crea pur cual ia permete la scrive de la libros sacra...
∴
Dia oportun! La sabes es ancora conservada, me teni la confirma, e la construida arcana rigorosa a la situa definida par la testos, frecuente ascondeda en tables astrolojial. En pasa, la mapas cual me usa sembla sirculos zodiacal sofisticada.
On ariva par la ferovia cual segue la costa, en media de construidas vasta de cual la fasadas porta scrivedas ancora desifrable.
Sentante en mea comparte, me es sumerjida en un state mental nunca ja tan vacua e tan abrida, e esta asorbe grandi tan ce me disolve en la sonas cuantiosa composada par un tren vibrante nonmovente, un ambiente stonante rica de ritmos e combinas armonial, unica en sua natur propre, referente a no cosa otra; esta nivel mental es sensada como un completi de la Arte e de la Es.
Plataformas nonmanxada blanca domina la mar; la ruas vadente de la un a la otra asende multe alta, asta esta paseria florosa pasosa, a la borda costal la plu alta. Par un paseria lejera inclinada, on asede la templo de la Sabe. Pos ce on ia pasa la porteta, on comensa desende la scalera, a destra de la coredor.
La scalera elica e la plataformas de niveles, con colores simbolin, ia es perfeta descriveda. Consernante la cor de la arciteta, esta inclui un cuna diafana do un sculteta de arjila reposa. On pote regarda lo sola intensa. Ala tota aveni. Ala, me ia reseta la revela de un veria fundal de la esense de la Obra: « La materia muta a oro sola si on muta sua propre oios a un cristal vera pur. »
Si la cualia de la regarda o de la escuta veculi la spirito de la arte, si la persepi crea la obra, me senti ce la persepi pur, direta, va libri lo de la pesa umana.
∴
Ultra la portes vitrida de un amfiteatro, on encontra denova la campania, la colinas, la bosces de arboretas, cual paserias traversa en tota la dirijes; sur esta paserias esersores vade e veni, apriori sin gol: moves estrema lenta, sin sesa recomensante, oios duiabrida, manos juntada. La silentia de la locas es mera turbada, a interval de du oras e dudes-cuatro minutos, par tre vibras en la aira, sin ce on sabe do lo veni, spasida par la dura de sua resona. A esta momento, otra disiplos, obedinte un lege implicada, recambia la presedentes sur la paserias.
La monte, cual avansa sur la mar, ofre cavas cuantiosa do solitares permane. Me ia pote vide algas, fisada en sua posas. Me va pasa esta note prima en un de esta cavas rocosa.
∴
A la sera, cuando tota pausa, on persepi la tintina distante de la campanas de un manada. Notas musical diversa interpone se entre lunlotra, con asentuas, altias, duras nonprevidable; silentias estrema interompe los, forsante la escuta per penetra la trama de la aira do la melodia nunca oiada de la peso musical la plu perfeta vibra. A cual nivel de acel jua de sonas la Obra es situada? En sua fonte, evidente, la move de la animales obedi a otras causas, ma sola sua reseta atendosa par la spirito de la arte atribui a lo esta statia.
La amfiteatro es plen, a esta ves. Me profita per afonda en la cuantia umana e reseta, secreta, la instrui su forma de filmas projetada e nonesplicada pausada a alga veses, con xutas fisada longa o senas corta anelida repetente, forsante la regarda per penetra la imaje. La banda de sona es crusada par rejistras de ruidos comun, familiar, cual a mea lado me escuta a la ves prima con un escuta musical --- ronrona de un tren a un stasion, campanas tintinante de animales distante...
∴
Strana, me intui ce la intendes de la instrui, nonformulada, es adirijeda sola a me. Me scrive notas en freta, scrivetas plu o min lejable, per fisa la pensas cual veni spontan en la curso de la projetas:
« Cada fenomeno de la realia es nosa materia prima nonviolable; la oservor, capas de fisa ala sua atende, atribui a esta imaje mental un potia superior. Un pratica plu abrida esperia esta regarda sur la combinas la plu peti de la avenis manejada par la cosas de cada dia, e la disposas de la elementos en la construi de nosa vive. » Lo no es surprendable ce mea propre vive apare como la ordina sutil de senas de un teatral multe refinada, con multe rebondis. La composantes, la linia dirijente e la fini de la trama no ia es persepable a me en la momento de la ata, ma los apare asi, en esta momento, cuando me considera la situas presedente; la contradises parente, la cambias subita de dirijes, la falis o la ostaculos nonprevideda trova sua razonas esensal en la lojica rijida de un progresa dramosa amirable, e lo fa ce me deveni plu e plu consensa de mea propre conduis e de la jua tan natural de mea propre composa, de instante a instante, en sua curso de crea.
« La Obra debe envolve completa la realia. » Asta aora, me ia es disturbada par alga parasitos mental, comentas resenial, sperdes de pensa... « Lo conveni aora ce on inclui esta parasitos en la contempla, sin discrimina la construis cual presenta se ante la consensia. »
∴
Oji, me ia penetra un galeria vasta de mirores do la Obra es presentada. La regarda de la visitores inserta se natural a la crea presentada cual es la mirores mesma. La suprapone de la mesajes sensal e de la reatas mental o emosial es un composa stonante per oserva: on sensa clar un abri cual crea se a interna, on senti ce la atraes esterna perde sua densia --- cada cosa es tan neta! No cosa aveninte ala, en esta punto de la universo cual me es, es mancada par la mente. La atende, nonrevocable erijeda, gusta sola la contempla de se mesma, la nuri de se mesma, consensa de consensi cada fase de la moves cual condui esta corpo de loca a loca, asta la cor de la construida.
A presente, cual va es mea parte en la Obra grande? Tota mea ocupa, de aora, es ce me surie con dulsia amosa supra la crisol cual abita en me e cual me cuni, cuninte lenta me mesma, sasiada par esta esente nasente, omunculo de ci me persepi sola la oro.
@T La artiste
@L leteratur/la_artiste
@A Oscar Wilde, Andrew Burns
====== La artiste ======
par Oscar Wilde
traduida par Andrew Burns
A un sera la desira de fabrica un sculta de La Plaser cual Dura Momental emerji en sua alma. E el vade a en la mundo per xerca laton. Car el pote sola pensa en laton.
Ma tota la laton de la mundo intera ia desapare, e on ave no loca en la mundo intera do on pote trova laton, con eseta de la laton de la sculta de La Tristia cual Dura Sempre.
El mesma posese esta sculta, fabricada par sua propre manos e poneda sur la tomba de la sola cosa cual el ia ama en vive. Sur la tomba de la cosa morida cual el ia ama la plu, el ia pone esta sculta fabricada par el, afin lo ta pote es la sinia de la ama umana cual no mori, e un simbol de la tristia umana cual dura sempre. E en tota la mundo on no ave otra laton con eseta de la laton de esta sculta.
E el prende la sculta cual el ia fabrica, e pone lo en un fornon grande, e dona lo a la foco.
E de la laton de la sculta de La Tristia cual Dura Sempre, el fabrica un sculta de La Plaser cual Dura Momental.
@T La autocrata grande
@L leteratur/la_autocrata_grande
@A The Great Dictator, Charlie Chaplin, George Boeree
====== La autocrata grande ======
Asi es la testo de la parla final de la autocrata grande, presentada par la carater Capelor Iudi (Jewish Barber) en la filma de 1940 The Great Dictator par Charlie Chaplin.
Traduida par George Boeree.
Pardona, ma me no desira es un imperor. Acel no es me comersia. Me no vole rena o vinse cualcun. Me ta gusta aida tota persones, si posible - iudis, cristianes, negras, blancas...
Tota de nos vole aida lunlotra. Esta es la natur de umanas. Nos vole vive par la felisia mutua, no la miseria mutua. Nos no vole odia e despeta lunlotra. En esta mundo, on ave spasio sufisinte per cadun. E la bon tera es rica e pote furni per cadun. La via de vive pote es libre e bela, ma nos ia perde la via.
Avaria ia veneni la spiritos de umanas; lo ia impedi la mundo con odia; lo ia marxa nos a miseria e la versa de sangue. Nos ia developa rapida, ma nos ia clui nos a en. Macinas cual dona abunda ia abandona nos en manca. Nosa sabe ia causa ce nos deveni sinica; nos astutia ia fa ce nos deveni dur e noncompatiosa.
Nos pensa tro multe e senti tro poca. Plu ca macinas, nos nesesa umania. Plu ca astutia, nos nesesa compatia e jentilia. Sin esta cualias, vive ta es violente e tota va es perdeda. La avion e la radio ia trae nos a plu prosima con lunlotra. La natur de esta inventas clama per la bonia en umanas; lo clama per fratia universal, per la unia de tota de nos.
An ce aora, mea vose estende a miliones tra la mundo, miliones de omes, femes, e enfantes peti, vitimes desperante en un sistem cual fa ce umanas tortura e prisoni persones inosente.
A los ci pote oia me, me dise "no despera".
La miseria cual es aora la nosa es no plu ca un periodo de avaria, la amargia de omes cual teme la via de la progresa umana. La odia par omes va pasa, e la autocratas va mori, e la potia cual los ia prende de la popla va reveni a la popla. E tan longo ca omes mori, libria va mori nunca.
Soldatos! No dona vos mesma a brutas, omes ci despeta vos e sclavi vos; ci rejimenti vosa vive, ci dise a vos cual vos debe fa, cual vos debe pensa, cual vos debe senti! Los ci eserse vos, ci trata vos como boves, ci usa vos como carne per la canones!
No dona vos a esta omes nonatural - omes macinal con mentes macinal e cores macinal! Vos no es macinas! Vos no es bestias! Vos es umanas! Vos ave la ama de umania en tua cores! Vos no odia!
Sola la nonamada odia, la nonamada e la nonatural.
Soldatos! No batalia per sclavia! Batalia per libria!
En la capitol des-sete de san Luca es scriveda "la rena de Dio es en la umana", no un person o un grupo de persones, ma en tota persones! En vos! Vos, la popla, ave la potia per fa esta vive libre e bela, per fa esta vive un aventura merveliosa. Alora, en la nom de democratia, ta ce nos usa acel potia.
Ta ce tota de nos uni.
Ta ce nos batalia per un mundo nova, un mundo brava cual va dona la oportunia per labora, cual va dona a jovenes un futur, e a veas un securia. Par la promete de esta cosas, brutas ia asende a potia. Ma los menti! Los no completi se prometes. Los va completi los nunca!
Autocratas libri se mesma ma los sclavi la popla!
Aora, ta ce nos batalia per completi acel promete! Ta ce nos combate per libri la mundo! Per elimina la bordas de nasiones! Per elimina avaria, odia, e nontolera!
Ta ce nos combate per un mundo de razona, un mundo do siensa e progresa va gida a la felisia de tota umanas.
Soldatos, en la nom de democratia, ta ce tota de nos uni!
@T La avo vea e sua neto
@L leteratur/la_avo_vea_e_sua_neto
@A Frates Grimm, Sunido
====== La avo vea e sua neto ======
Un fable par la Frates Grimm, traduida par Sunido en 2011.
A un ves pasada, on ave un om tan vea como la mundo. Sua oios no vide clar, sua oreas es sorda, e sua jenos trema. Cuando el senta a table, el pote apena teni la culier, el malversa sopa sur la telon, e a alga veses la sopa reflue an de sua boca. Sua fio e sua fia par sposi es repulsada par esta, e final la avo vea debe senta en un angulo pos la stufa, e los dona a el comeda en un bol peti de losa, e en cuantia nunca sufisinte; el senta ala regardante la table con tristia, e sua oios deveni moiada.
A un ves, sua manos tremante no pote teni firma la bol, e la bol cade sur la solo e rompe. La fem joven reproxa el, ma la vea no dise un parola, e suspira sola. Alora la fem compra a el un bol de lenio per alga heleres, e la avo debe de aora come de lo.
A un ves cuando los senta tal ala, la neto peti de cuatro anios asembla alga plances peti de lenio sur la solo. "Cual tu fa ala?" la padre demanda. "Me fabrica un portafeno peti" -- la enfante responde -- "en lo padre e madre va debe come cuando me va es grande."
Alora la sposo e la sposa regarda lunlotra per un momento, e final los comensa plora. Los retrae la plu pronto la avo vea a la table, e de aora los lasa sempre ce el come con los, e los dise no cosa si el malversa alga.
@T La batalia contra la moros
@L leteratur/la_batalia_contra_la_moros
@A Le Cid, Pierre Corneille, Patrick Chevin
====== La batalia contra la moros ======
Ata 4, sena 3 de Le Cid par Pierre Corneille
traduida par Patrick Chevin
Don Rodrigo:
Su me donce esta tropa pas'
E ostenta sur se fronta un sertia mas.
Nos ia es sincosent' e par un bon refort'
Nos vide nos tremil arivante a l' port',
Vidente nos pasante multe corajos
La plu asustadas redeveni zelos.
Me asconde du tris, pronto arivante,
En cala de barcos trovada a ante;
La resta ci ia crese a tota ora,
Nonpasiente sta sircante me alora,
Reposa sur tera en silentia total
Durante bon parte de la belia notal.
Par me comanda, la garda fa la mesma,
Asconde se seguente me stratajema.
Me finje osante de reseta de vos
La comanda cual me segue e don' a los.
Esta lus oscur cadente de la stelas
Final, con la flue mostra tredes velas:
A su, l'acua infla, e de comunia fort',
La Moros e la mar asende a la port'.
On lasa los pasa, tota es sin peril:
No soldat' en la port', no soldat' en la vil'.
Nos silentia profonda enganante los,
Esta no plu duta ce ia surprende nos:
Los prosimi, lansa ancor, e desende,
Los core en la trap' cual l'enemi tende.
Alora tota nos levante en junta
Vosi mil crias cual a la sielo punta;
Los de nos barcos en un eco replica:
Los pare armida, la Moros panica,
Asustada, ancora no desendeda,
Ante combata los judi se vinseda;
Los ia core saca, encontra la gera:
Nos presa los sur acua, presa sur tera,
E fa core rios de se sangue ante
Ce los reprende coraje resistante.
Ma pronto contra nos se prinses apare,
Coraje renase, temes desapare:
Vergonia de mori sin mostra se valua
Sesa la desordina, redona virtua.
Contra nos los deside tira se sabre,
De se sangue e nos fa rios macabre:
E la rios, la tera, la flota, la port',
Es campos de masacra covreda con corp'.
O! Cuanto atas, cuanto realis famos
Ia resta entre la oscurias nonglorios,
Do cadun, atestante se propre colpa,
No pote vide ci la fortuna culpa!
Me vade combata, coraji, regarda,
Fa algas avansa e otras retarda,
Ordina ci veni, puxa los alterna:
Me no pote sabe en la note eterna.
Ma final la claria mostra nos vantaje;
La Moro subita perde se coraje.
E vidente veni nos aida , la furia
De vinse sede a teme de la moria.
Los fuji a se barcos, sabri cordones,
Vosi a la sielo crias de demones,
Retira tumultos, an no considera
Si se res con los pote lasa la tera.
Los oblida se res e asustada cria
La mar ia trae los e porta los a via.
En cuando la res, contra nos engranada,
E alga de los, forada par nos spada,
Vende se vive cara, batalia feros.
Ce los abandona me mesm' invita los:
Los branda se sabre e no escuta me,
Ma vidente tota se soldatos cade,
Final, solitar, sin defende, demanda
La xef e alga bandera blanca branda.
Me envia ambos los a vos, me bon senior,
E la gera sesa par manca de geror.
@T La bebe de Désirée
@L leteratur/la_bebe_de_desiree
@A La bebe de Désirée, Kate Chopin, Randy Hudson
====== La bebe de Désirée ======
La bebe de Désirée ("Désirée's Baby") es un nara corta par Kate Chopin, prima publicida en 1893. La loca de la nara es Louisiana entre la propriores rica de orijina franses e sua sclavos de orijina african; la tempo es ante la gera interna de America e la aboli de sclavia. Esta tradui es par Randy Hudson.
Car la dia es plasente, sra Valmondé viaja a L'Abri per vide Désirée e la bebe.
El rie a la pensa sur Désirée con un bebe. Lo pare mera ier ce Désirée mesma ia es apena plu ca un bebe, cuando Senior en traversa montada la porton de Valmondé ia trova el dorminte en la ombra de la colona grande de petra.
La peti velia en sua brasos e comensa cria per "papa". Acel es tan multe como el pote fa o dise. Alga persones pensa ce el ta pote vaga a ala par sua propre vole, car el es a eda de prima paseas. La crede comun es ce el ia es abandonada par un grupo de texanes, de ci sua vagon con covre de lona, a tarda en la dia, ia traversa par la naveta cual Coton Maïs manteni a apena su la cultiveria grande. Pos alga tempo sra Valmondé abandona cada divina esetante acel ce Désirée ia es enviada a el par un Favore Divin bonfante per es la enfante de sua ama, car el es sin enfante de sua corpo. Car la xica crese a es bela e jentil, amosa e sinsera --- la idol de Valmondé.
Lo es no mervelia, cuando el sta a alga dia asta la colona de petra de cual el ia dormi en sua ombra ante des-oto anios, ce Armand Aubigny, en pasa montada e vide el ala, ia cade en ama de el. Acel es sempre la modo en cual cada Aubigny cade en ama, como si colpada par un xuta de pistol. La mervelia es ce el no ia ama la xica ante alora; car el ia conose el de cuando sua padre ia trae el de Paris a casa, un xico de oto anios, pos cuando sua madre ia mori ala. La pasion cual velia en el a acel dia, cuando el vide el a la porton, invade como un avalanxa, o como un foco de prado, o como alga cosa cual move forsante tra tota impedis.
Sr Valmondé deveni pratical e desira ce cosas ta es bon considerada: per dise, la orijina oscur de la xica. Armand regarda en la oios de Désirée e no cura. On fa ce el recorda ce la xica es sin nom. Como importa sur un nom cuando el ta pote dona a el un de la plu veas e plu orgulosas en Louisiana? El comanda la sesto de dote de Paris, e restrinje se con cuanto pasientia cual el pote asta lo ariva; alora los es sposida.
Sra Valmondé no ia vide Désirée e la bebe de ante cuatro semanas. Cuando el ariva a L'Abri el trema a la vide prima de lo, como el fa sempre. Lo es un loca con aspeta triste, cual tra multe anios no ia conose la presentia jentil de un seniora, car sr Aubigny vea ia sposi e ia entera sua sposa en Frans, e car sua seniora ia ama sua propre pais tro multe per parti de lo. La teto desende presipe e negra como un capeta, estendente ultra la verandas larga cual ensirca la casa jesida con stuco jala. Cuercos grande e seria crese asta lo, e sua ramos longa estendente con folias densa ombri la casa como un covrente funeral. La governa de Aubigny joven es un sever, ance, e su lo sua negras ia oblida lo como es felis, como los ia es en la tempo de vive nonsever e favorente de la senior vea.
La madre joven es en recovre lenta, e reposa tota estendeda, en sua muselinas e dentelas mol e blanca, sur un sofa. La bebe es asta el, sur sua braso, ala adormida, a sua seno. La enfantor, un fem jala, seja asta un fenetra e venti se.
Sra Valmondé curva sua figur obesa supra Désirée e besa el, teninte el per un momento en sua brasos. Alora el turna a la enfante.
"Esta no es la bebe!" --- el esclama en tonos surprendeda. Franses es la lingua parlada a Valmondé a acel dias.
"Me ia sabe ce tu va es surprendeda" --- Désirée dise riente --- "par lo como el ia crese. La peti porceta a seno! Regarda sua gamas, mama, e sua manos e ungias de dito --- ungias de dito real. Zandrine ia debe corti los a esta matina. Esce no vera, Zandrine?"
La fem inclina diniosa sua testa turbanida. "Ma si, seniora."
"E lo como el cria" --- Désirée continua --- "es sordinte. Armand ia oia el a la otra dia tan distante como la cabana de La Blanche."
Sra Valmondé ia verje nunca sua regarda de la enfante. El prende lo e pasea con lo a la fenetra con la plu de lumina. El scane la bebe atendosa, alora regarda egal xercante Zandrine, de ci sua fas es turnada per regarda tra la campos.
"Si, la enfante crese ja, cambia ja." --- sra Valmondé dise, lenta, en cuando el repone lo asta sua madre. "Cual Armand dise?"
La fas de Désirée deveni plenida con un brilieta cual es felisia mesma.
"O, Armand es la padre la plu orgulosa en la parocia, me crede, xef car el es un xico, per porta sua nom; an tal el dise no --- ce el ia ta ama un xica ance. Ma me sabe ce lo no es vera. Me sabe ce el dise acel per plase me. E mama" --- el ajunta, tirante la testa de sra Valmondé a su a el, e parlante a xuxa --- "el no ia puni un de los --- no un de los --- de cuando bebe ia nase. An Negrillon, ci ia finje ce el ia arde sua gama afin el ta reposa de labora --- mera el ia rie, e ia dise ce Negrillon es un turbosa grande. O mama, me es tan felis; lo asusta me."
Lo cual Désirée dise es vera. La sposi, e a pos la nase de sua fio, ia moli grande la natur dominante e esijente de Armand Aubigny. Esta es lo cual felisi tan Désirée la jentil, car el ama Armand desperante. Cuando sua sposo grima el trema, ma ama el. Cuando Armand surie, Désirée demanda no bondise plu grande de Dio. Ma la fas oscur e bela de Armand no ia es frecuente malformida par grimas de cuando la dia de sua cade en ama de el.
Cuando la bebe ave sirca tre menses, Désirée velia a un dia con la crede ce on ave alga en la aira cual menasa sua pas. Lo es a prima tro sutil per teni. Lo ia es mera un sujesta descuietinte; un aira de misterio entre la negras; visitas nonespetada de visinas distante ci pote apena esplica sua veni. Alora un cambia, strana, asustante, en la manera de sua sposo, sur cual el no osa demanda un esplica. Cuando Armand parla a el, lo es con oios diverjeda, de cual la lus de ama vea pare partida. La sposo senti se de la casa; e cuando el es ala, el evita la presentia de sua sposa e sua enfante, sin escusa. E la spirito de Satan mesma pare subita saisinte el sur sua trata de la sclavos. Désirée es sufisinte misera per mori.
El senta en sua sala, a un posmedia calda, en sua roba de bani, tirante letarjiosa tra sua ditos la mexas de sua capeles longa, sedin, e brun cual pende sirca sua spalas. La bebe, partal nuda, reposa dorminte sur la leto grande de mogano, cual es como un trono lusosa, con sua baldacin duida cual es foreda de satin. Un de la pico xicos cuatrinegra de La Blanche --- ance partal nuda --- sta con un ventador de plumas de pavon, ventinte lenta la enfante. La oios de Désirée ia es fisada en modo preocupada e nonfelis sur la bebe, en cuando el atenta penetra la nebleta menasante de cual el senti ce lo ensirca el. El dirije sua regarda de sua enfante a la xico ci sta asta el, e a retro, denova e denova. "A!" Lo es un cria cual el no pote preveni; el no es consensa de emete lo. La sangue jela en sua venas, e un umidia fria colie sur sua fas.
El atenta parla a la pico xico cuatrinegra; ma no sona ta veni, a prima. Cuando la xico oia sua nom diseda, el leva sua regarda, e sua seniora es indicante a la porte. El depone la ventador grande e mol, e parti obedinte e cuieta, tra la solo briliada, sur la ditos de sua pedes nuda.
Désirée resta sin move, con sua regarda fisada a sua enfante, e sua fas la pitur de teme.
Pos alga tempo sua sposo entra a la sala, e sin nota el, vade a un table e comensa xerca entre alga paperes cual covre lo.
"Armand." --- el clama a el, con un vose cual debe coteli el, si el es umana. Ma Armand no nota. "Armand." --- el dise denova. Alora el leva e bambola a el. "Armand," --- el dise denova, respirante rapida e teninte sua braso --- "regarda nosa enfante. Cual es la sinifia? Dise a me."
Fria ma jentil la om laxi la ditos de sua braso e puia la mano a via. "Dise a me la sinifia!" --- sua sposa cria desperante.
"La sinifia" --- el responde lejera --- "es ce la enfante no es blanca; la sinifia es ce tu no es blanca."
Un conseta rapida de tota cual esta acusa sinifia per el forti el con coraje nonabitual per nega lo. "Lo es un menti; lo no es vera, me es blanca! Regarda mea capeles, los es brun; e mea oios es gris, Armand, tu sabe los es gris. E mea pel es pal." --- en saisi la polso de el. "Regarda mea mano; plu blanca ca lo de tu, Armand." --- el dise con rie isterica.
"Tan blanca como lo de La Blanche." --- el replica cruel; e parti donce lasa solitar Désirée con la enfante de los.
Cuando Désirée pote teni un pen en sua mano, el envia un letera desperante a sra Valmondé.
"Mea madre, los dise a me ce me no es blanca. Armand ia dise a me ce me no es blanca. A nom de Dio dise a los ce lo no es vera. Tu debe sabe ce lo no es vera. Me va mori. Me debe mori. Me no pote es tan nonfelis e vive."
La responde cual veni es corta:
"Mea propre Désirée: Veni a casa a Valmondé; reveni a tua madre ci ama tu. Veni con tua enfante."
Cuando la letera ariva Désirée vade con lo a la studio de sua sposo, e pone abrida lo sur la buro a cual el senta. Désirée es como un figur de petra: silente, blanca, sin move pos cuando el pone lo ala.
En silentia sua sposo gida sua oios fria tra la parolas scriveda.
La om dise no cosa. "Esce me ta vade, Armand?" --- el demanda en tonos agu con suspende angusada.
"Si, vade."
"Esce tu desira ce me vade?"
"Si, me desira ce tu vade."
Armand pensa ce Dio Omnipotiosa ia trata el cruel e nonjusta; e senti, a alga modo, ce el repaia simil El cuando el coteli tal a en la spirito de sua sposa. En ajunta, el ama el no plu, par causa de la feri nonconsensa cual la fem ia trae a la casa e la nom de el.
Désirée turna a via como un aturdida, un colpada, e prosimi lenta a la porte, esperante ce sua sposa ta clama el a reveni.
"Adio, Armand." --- el jemi.
Armand no responde. Acel es sua colpa final a fortuna.
Désirée vade per trova sua enfante. Zandrine pasea a la veranda sombre con lo. El prende la peti de la brasos de la enfantor con no parola de esplica, e desendente la grados, pasea a via, su la ramos de cuerco.
Lo es un posmedia de otobre; la sol es a punto de reposa. En la campos calma la negras recolie coton.
Désirée ia recambia no la veste magra e blanca e no la pantoflas cual el porta. Sua capeles es noncovreda e la raios de la sol trae un brilia orosa de sua redes brun. El no prende la rua larga e bateda cual gida a la cultiveria grande e multe distante de Valmondé. El traversa un campo abandonada, do la troncetas contusa sua pedes mol, tan delicata covreda, e lasera sua roba magra a trinxas.
El desapare entre la canas e salses cual crese densa longo la rivas de la rio pantanosa, profonda e letarjiosa; e el no reveni.
Pos alga semanas, un sena strana es esecutada a L'Abri. En la sentro de la patio retro, lisa scopida, es un foco grande. Armand Aubigny senta en la coredor larga cual ofre un vista de alta de la estravagante; e lo es el ci distribui a ses negras la materia cual manteni ardente esta foco.
Un cuna refinada de salse, con tota de sua decoras delicata, es poneda sur la foco, cual ia es ja nurida con la ricia de un colie ultra preso de furnis per bebe. Alora on ave robas de sede, e de veluda, e de satin; dentelas ance, e brodes; xapetas e gantos; car la sesto de dote ia es de cualia rara.
La cosa ultima per arde es un faxo peti de leteras; scrivetas peti e inosente cual Désirée ia envia a el tra la dias de sua promete sposal. On ave un resta de un a la retro de la caxeta de cual el prende los. Ma lo no es de Désirée; lo es un parte de un letera vea de sua madre a sua padre. El leje lo. Sua madre grasia Dio per la donada de la ama de sua sposo:
"Ma supra tota," --- el scrive --- "a note e dia, me grasia la bon Dio per organiza nosa vives tal ce nosa cara Armand va sabe nunca ce sua madre, ci adora el, parteni a la rasa cual sufri la marca de sclavia."
@T La bileta de reveni
@L leteratur/la_bileta_de_reveni
@A P. Sweeney, Simon Davies
====== La bileta de reveni ======
Un nara corta par P. Sweeney, traduida par Simon Davies en 2012 e lejeda a vose par el en 2020
Sergei senta tremante en xoca, noncapas de crede lo cual el veni de vide. A intervales, el sorbe vodca de la tason de stanio cual un de la portores ia pone a sua manos. La turno de esta note ia pare tan normal, tan comun, ma lo ia fini con un aveni cual va turba sua mente asta la tomba.
El ia ariva per sua labora como xef de stasion, como el fa ja tra anios plu cuantiosa ca el ta vole conta. Tra tota la dia, el ia encontra e trata persones en sua manera abitual: tan calma e compatiosa como posible, ma nunca perosa.
La note ia es misera, neblosa, jelada; e los ci espeta la tren de San Peterburg ia presa se en grupos contra la fria, an en sua vestes de inverno. Ma, tra la flocos de neva aterante sur sua jacones e siles, Sergei ia vide un stimula grande en tota pasajores a la joias prosima de la selebras de natal, e a sua esperas soniada per un anio nova plu bon.
Enfantes ia es dansante de asi a ala en la neva, con regardas secreta en la sacos de compra de sua jenitores, desirante videta la regalas cual los ia anela tra la anio intera. Amadas ia es reuninte per la saison de natal. Con la cantores ci colie copeces per sua caritales, la sena ia es plen de ativia, e plen de felisia -- asta la trajedia.
Sergei raconta la aveni a cadun, denova, denova. El ia debe emprende la rol de la vendor de biletas, ci ia maladi su un gripe forte. El no ia protesta; la stasionores opera en ecipo e es bon amis en sua labora e ultra lo. Sirca la ora nove, el ia oia un vose educada cual demanda per un bileta de plataforma, e, levante sua regarda, el ia es emosiada par la fas bela ma triste de la fem joven ci ofre sua rublos de paia.
La fem ia pare distraeda, paseante a via an sin prende sua monetas. Sergei ia debe clama el per reveni, denova impresada par sua oios bela con siles longa e oscur. Los ia es plen de larmas retenida...
El ia vole demanda esce la fem nesesa cualce aida, ma el ia senti un restrinje sosial: la fem es evidente rica, e sua manera mostra ce el es bon instruida sur cortesia e autofida. Cisa el ta deveni ofendeda si un om bruta ta fa un demanda sur sua consernas. Sergei no ia desira la reproxas de sua empleores si la fem ta cexa ofisial; el debe suporta ancora sua sposa e enfantes. El es sempre asidua, ma a el lo ia pare clar ce la fem es de un clase superior. El ia oserva la fem vadente longo la plataforma a la fini mesma, regardante de ves a ves pos se, como si el xerca algun.
Sergei ia leva sua spalas. El ia vide ja esta caso a tan multe veses: un fem nonfelis e desperante ci espeta ancora un om ci no va apare. Pos alga oras, la fem va sorti de la stasion, plorante sur la prometes aora vacua e rompeda cual sua amor ia vosi sur sua ama nunca morinte e sua futures felis en acompania. Sergei opina ce el mesma es multe fortunosa en sua sposia de ama contente, an si el no ave tota vantajes de la clase alta.
El ia resta ocupada tra la du oras seguente, vidente familias ci fa final un abrasa larmosa en parti, o ci reuni joiosa a la reveni de sua amadas. Si, el ia pensa: asi on trova vera la vive en multe formas diferente e con tan multe naras racontable.
An sin intende lo, el no ia pote supresa sua preocupas sur la dama encantante bela, e el ia continua oserva el. Sin duta, el va revade a casa con cor angusada, como tan multe persones a ante -- la vive es tan cruel. Sergei odia acel omes ci trata femes en un modo tan acaso, ma la mundo ia es sempre plen de los e va es probable ancora tal a futur.
La fola ia deveni min densa pos la parti de la tren. La sola restante ia es la tren rapida, pronto espetada, e pos lo el va pote securi la stasion e vade a casa. El ia es surprendeda par vide ce la fem sta ancora ala; pos poca tempo, el va debe informa el ce la stasion es a punto de clui; la fem ia compra sola un bileta de plataforma, donce el no intende viaja. Evidente, el espera ancora la apare organizada de sua amor, ma Sergei duta ce acel va reali.
El ia oia la tren ante vide la lus en la tunel de sua pasa rapida longo la reles. El ia comensa move en dirije a la fem joven, per dise ce no plu pasajores va ariva a esta note. Ma la tren ia sorti ja de la tunel a rapidia masima, e ante cuando el ia pote cria un averti a el, la fem ia core a la borda mesma de la plataforma. Sergei ia es frenida, asustada par lo cual aveni.
En cuando el luta per pensa clar, la fem ia salta. El ia fa no xilia; el ia cria sola la nom "Alecsei" ante desapare su la rotas de la veculo. Sergei ia clui sua oios en teror, pausante sua respira como si jelada par la fria de la note. An conosente la manca de espera, el ia clama la otra feroviores per aida. Los ia freta a la plataforma, temente la vista xocante cual los no va pote evita vide: un corpo sanguosa, craseda e destruida par la rotas de la tren rapida.
Sergei ia abri sua oios, nesesante coraji se ante regarda la sena fea -- ma no corpo ia es sur la reles. Lo no ia es posible ce la fem ia evade acel rotas pesosa, ma, en sua xerca prima sur la ferovia, los ia trova no trasa de el -- no sangue, e an no frato de veste ia es descovreda. Sergei ia es en un state de trema cuando un de la portores ia parla final. "Me ia trova estas. Cisa los ia parteni a la fem."
El ia prende la carta e la medalion de arjento. Pos abri la medalion, el ia vide ce lo conteni tre fotos: la fem bela joven, un om sever e plu vea, e un xico peti con crinera oscur e risa ci aspeta lamentable simil a sua madre. La carta, leterida con arjento delicata, es de la spesie cual on lasa costumal cuando on visita persones de clase alta.
El bevi denova de la vodca. El no pote crede ce un esperia tan strana ia aveni a un om tan comun e pratical como el. El ia oia la raconta, serta, e es sempre setica; ma la nom sur la carta es "Anna Carenina".
@T La bison dona un leson a la tormentor
@L leteratur/la_bison_dona_un_leson_a_la_tormentor
@A Ricky Freeman
====== La bison dona un leson a la tormentor ======
Un fable de la americanes nativa, traduida par Ricky Freeman en 2012.
A un ves pasada, un urso brun viaja tra la colinas asta un rio. El encontra un bison mas stante sur la curso. La testa de la bison es a su como si el es debil e malada.
"A! Cornos Curva," la urso dise. "Me oia ce tu ia dise ce tu va fa gera contra me! Aora apone la tu pinta de gera e nos va fa un batalia grande!"
"Me no vole batalia contra tu, Escavor de Radises" la bison responde, "me vole pas, no gera."
"A!" La urso dise, "Tu es un coarde! Tu vole fuji como un fem vea! Tu teme me!" Alora, la urso vade a asta la bison e tira la capeles de la bison e presa la se nas a en la tera. Alora, el tira la coda de la bison e colpa el tan forte como el pote.
"O! Escavor de Radises, tu fa un dole grande a me," la bison dise en cuando el coxea a via. "Me ia fa no cosa a tu e an tal tu dole me, no es coreta."
"Tu es un coarde, Cornos Curva! Tu ave un cor de un fem vea e tu teme me!" la urso dise en cuando el comensa continua la se viaja. Ha ha, me rie a tu! Tu es un coarde!"
En cuando la urso pasea a via, la bison pensa en se mente propre, "Me debe batalia contra el car el es mera un tormentor basa."
La urso sabe ce la bison pensa par la se potia majiosa, donce el reveni e dise, "Ce tu dise sur me, Cornos Curva?"
La bison responde, "Me dise no cosa sur tu."
"Tu menti," La urso dise, "Tu ia parla en la tu mente sur me e me sabe esta!" Alora el savaji denova la bison, tirante se capeles e colpante el. Alora el vade a via, riente.
La bison pensa en se mente, "Serta, me debe batalia contra el car el tormenta sempre algun e vole batalia."
Denova la urso sabe ce el pensa e reveni roncante e maltrata el. Esta aveni a cuatro veses. Cuando la urso comensa reveni a la ves sinco, la bison retira se e comensa colpa la tera en cuando el demanda la urso no dole el.
La urso dise, "No fuji, Fem Vea Cornos Curva. No fuji. Resta e batalia contra me, Cornos Curva Coarde!" Ma la bison continua a pos a via. A fini, el es asta un inclina presipe. El core a la urso e crase el. La bison sta supra la urso. El atenta presa el a la tera con la se cornos agu e negra.
"Ai! No colpa me con la tu cornos! Tu fa un dole grande a me, Cornos Curva!" la urso cria en cuando el atenta evita la bison.
"Tu ia vole fa gera," la bison dise. "Aora, per ce tu no sta e batalia, Fem Vea Escavor de Radises! Per ce tu no batalia aora?"
A fini, la urso veni tro asta la borda de la inclina e cade a su a la basa de la vale. El reposa ala, demandante la bison lasa el veni a alta de inclina denova.
La bison sta a la alta e oserva la urso. A fini el dise, "Tu es la tipo de person ci vole batalia sempre contra la debil. Me debe fini esta batalia e dona un leson a tu, en loca de lasa tu veni a alta asi, afin tu disturba bon persones."
La urso cria, "Si tu lasa me veni a alta, nos va fa pas e batalia no plu."
Donce, a fini la bison lasa la urso reveni. La urso e la bison ave pas de pos acel ves. Ma la urso es ancora disputosa. Acel es la modo en cual un tormentor trova algun ci no es temosa de el e doleda en la mesma modo el dole otras. Un tormentor no ave coraje vera e a alga loca, a alga ves el va aprende un leson cual va dole el.
@T La bosce de oranios
@L leteratur/la_bosce_de_oranios
@A Pedro Ayres Magalhães, Madredeus, Patrick Chevin
====== La bosce de oranios ======
Testo e musica par Pedro Ayres Magalhães (de la bande portuges Madredeus)
Traduida de la lingua portuges par Patrick Chevin
Me va jura ama eterna
Anela la vive intera
A la lus prima de sol
En la bosce de oranios
E si la dia no veni
Me va revade a cualce modo
Sola per vide tu
En la bosce de oranios
Mea ama es tan grande
Ia es tal ja de la comensa
Sola va es plu grande
En la bosce de oranios.
@T La boteca de fantasmas
@L leteratur/la_boteca_de_fantasmas
@A The Shop of Ghosts, Krzysztof S
====== La boteca de fantasmas ======
The Shop of Ghosts par vp>Gilbert K. Chesterton
Traduida par Krzysztof S
On pote oteni cuasi tota la cosas la plu bon e la plu valuos en la universo per un penig duida. Me fa un eseta, natural, de la sol, la luna, la tera, persones, stelas, tempestas, e tal trifles. On pote oteni los per no cosa. Me fa ance un eseta per otra cosa, cual me no permete me mensiona en esta paper e la preso la plu basa de cual es un e duida penig. Ma la prinsipe jeneral va aora es parente. En la strada pos me, per esemplo, on pote monta un tram eletrical per un penig duida. Si on monta un tram eletrical, on es en un castel volante de fable. On pote oteni multe confetos briliante colorida per un penig duida. On pote ance oteni la posible de leje esta article per un penig duida; natural, con materia otra e nonpertinente.
Ma si on vole vide, cual estende vasta e confusante de cosas valuos on pote oteni, cada per un penig duida, on debe fa como me ia fa a la note ante esta. Me ia coli me nas contra la vitro de un boteca de juetas, multe peti e oscur luminada, en un de la stradas de Battersea la plu gris e la plu magra. An si acel cuadra de lumina ia es oscur, lo ia es plen (como un enfante ia dise a me a un ves) de tota colores cual Dio ia fa a alga tempo. Acel juetas de la povre es simil a la enfantes ci compra los; tota los es susia, ma tota los es briliante. E seguente me, brilia es plu importante ca limpia, par causa ce la prima es de la spirito e la seguente es de la corpo. On debe escusa me; me es democrata; me sabe ce me veni de moda pasada en la mundo moderna.
Como me regarda acel palasio de miracles pigmeal, buses peti e verde, elefantes peti e azul, pupas peti e negra, e arcas peti e roja de Noa, me pensa ce me ia cade a en alga transe nonatural. Acel fenetra luminada de boteca ia deveni como si la sena briliante luminada cuando on regarda alga comedia colorida. Me ia oblida la casas gris e la popla susia pos me, tal como on oblida la galerias oscur e la folas oscur en un teatro. Ia pare como si la ojetos peti pos la vitro ia es peti no par causa ce los ia es juetas, ma par causa ce los ia es distante. La bus verde ia es vera un bus verde, un bus verde de Bayswater, traversante alga deserto enorme sur se via normal a Bayswater. La azul elefante no ia es azul per causa de pinta; el ia es azul per causa de distantia. La pupa negra ia es vera un om negra par contrasta contra folias tropical ardente en acel pais do cada malerba es flamos e sola om es negra. La arca roja de Noa ia es vera la barcon enorme con salva teral, montante tra la mar inflada per pluve, roja en la matina prima de espera.
Me suposa ce cadun conose momentos tal ebra de astrata, fesures tal notable de la consensa. En tal momentos on pote vide la fas de se ami la plu bon como un combina de oculo e mustax sin sinifia. Los es comun con crese lenta ma con aborte subita. La reveni a pensa vera es frecuente tal subita como la colpa a en un om. Multe frecuente (en me caso) es como si la colpa a en un om. Ma en cualce caso la velia es sempre asentuante e, disente en modo jeneral, lo es sempre completa. Aora, en esta caso, me, con alga xoca, ia reveni esata a la consensa ce en fato me sola ia es regardante a en boteca vea e peti de juetas; ma, en alga modo strana, la sania mental no pare final. En me mente ancora me ia ave alga cosa nonmanejable cual ia dise a me ce me ivaga a en alga atmosfera strana, o ce me mesma ia fa alga cosa strana. Me ia senti como si me ia fa un miracle o un peca. Acel ia es como si me ia pasa traversante alga limita en la spirito.
Per desprende esta senti perilos e soniosa, me ia vade a en boteca e atenta compra soldatos de lenio. La om en la boteca ia es multe vea e malada, con capeles blanca e confusada, covrente la se testa e la se di de fas, capeles tan blanca ce lo aspeta cuasi artifisial. An si el ia es senil e nonsana, no cualia de sufri es en se oios; plu bon, el aspeta como si el ta es gradal adorminte a en dormi nonmalvolente. El ia dona a me soldatos de lenio, ma cuando me ia pone le mone, el no ia pare prima nota lo; alora el palpebri debil lo, e alora move debil lo a lado.
"No, no," - el ia dise neblosa. - "Me nunca prende mone. Nunca. Nos es alga de moda pasada asi."
"No prende mone," - me ia replica, - "pare a me como un moda nova, no como un vea."
"Me nunca prende," - la om vea ia dise palpebrinte e soflante se nas. - "Me ia sempre dona donadas. Me es tro vea per cambia."
"Bon sielo!" - me ia dise. - "Cual tu vole dise? Tu es simil a San Nicolas."
"Me es San Nicolas," - el ia dise repentinte e sofla se nas denova.
La lampas no ia pote ancora es ensendeda en la strada a estra. A cada caso, me ia vide no cosa en oscuria esetante la fenetra briliantente de boteca. No sona de pasos o voses es en la strada; pare ce me casual ia veni a alga mundo nova e sin la sol. Ma alga cosa ia despone ja la me razona, e me no es an surprendente. Alga cosa ia fa ce me ia dise: - "Tu aspeta malada, San Nicolas."
"Me es morinte," - el ia dise.
Me no ia dise, e esata el ia dise denova.
"Tota la popla nova ia parti la me boteca. Me no pote comprende esta. Los pare protesta a me per causas completa curiosa e noncoerente, tota acel omes siensal, tota acel inventores. Los dise ce me dona superstisios a popla, ce me fa los tro previdente; los dise ce me dona salsixes a popla, ce me fa los tro ru. Los di