COP26 fini con un acorda, an si diluida

En relata con la crise de clima, nasiones ia fa un acorda par cual, en la opina de sua suportores, la ojeto de restrinje la caldi global a 1,5°C va resta atenable. Esta es la limina per securia cual ia es posada par la acorda de 2015 en Paris.

La negosias ia continua asta tarda ier, en cuando governas ia disputa articles sur la desusa de carbon, la redui de emetes de gas invernerial e la furni de mone a la mundo povre.

La “Trata Climal de Glasgow” ia es adotada an pos un interveni tarda par Barat per dilui un frase sur la “elimina gradal” de carbon a mera un “redui gradal”.

Longo conselas siensal, la prometes fada sur reduis de emetes a esta confere de du semanas en Scotland ia es multe min ca los nesesada per limita la leva de temperatur a 1,5°C. En loca, tota paises ia acorda reveni a negosias en la anio veninte, a un confere en Misre, per reesamina sua projetas nasional, con intende de estende sua reduis proposada.

Alok Sharma, la ministro de governa brites ci ia preside la discutes COP26 en Glasgow, ia reconose la estende de la taxe restante: “Nos pote dise aora con credablia ce nos ia teni 1,5°C en vive. Ma sua pulsa es debil e lo va survive sola si nos reali nosa prometes e tradui nosa obligas a atas rapida.”

António Guterres, la secretor jeneral de la NU, ia averti simil ce plu labora urjente es nesesada: “Nosa planeta frajil pende de un filo. Nos bateta ancora a la porte de desastre climal. Lo es la tempo per entra a la moda de crise – o nosa capasia de ateni zero emetes neta va es mesma zero.”

La revade a negosias en 2022, per inisia un prosede anial de revisa projetas nasional a tema de gases invernerial, va es un prosede difisil, car alga paises argumenta ce los fa ja tan multe como los pote. An la paso peti de acorda revisa la projetas ia es realida sola pos vinse oposas forte, ma lo es esensal si la mundo va evita suprapasa la limina de 1,5°C.

Paises povre ia es frustrada, disente ce la acorda no trata sua consernas sur “perde e dana”. Esta refere a la destrui causada par clima estrema, cual afeta aora tal paises en modo plu sever e frecuente ca on ia predise.

La finansia climal presente, furnida a paises per aida los a investi en tecnolojia verde e otra metodos de redui emetes, e a adata a la efetos de la crise de clima, no reali sua prometes. E an si lo ta es plen realida, lo no ta sufisi contra esta perdes grave e desastres umana.

Ma nasiones rica ia esita acorda cualce sistem per finansia la perde e dana, partal car alga de la debate ia es presentada en termas de “compensa”, cual paises rica no pote aseta.

En la oras cluinte de la confere, multe nasiones povre ia aseta un defeta a sua solisitas de un deside plu forte sur perde e dana, per permete ce on aproba a la min la acorda plu jeneral.

La confere ia solve alga problemes tecnical cual ia preveni la reali de partes de la acorda de 2015. Esta problemes, pertinente a la mercato de carbon e la transparentia con cual paises monitori e reporta sua emetes, ia carga ja la consentas anial sur clima tra ses anios, ma aora on ia ateni ultima comprometes.

Un de la partes la plu controversa en la deside final ia es un deside neblosa espresada per redui gradal la suvenis per combustables de fosil “noneficas”.

Espertas sur enerjia sabe serta ce la abandona de carbon es esensal, ma la oposa a inclui un refere a la elimina completa, spesial par usores major de carbon como Xina, Barat e Sudafrica, ia mostra como difisil va es la fini de la usa global de la combustable la plu susia en tempo conveninte.