AORA OJI
Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Un debate longa ante la vota sur la prosede de Rousseff

12 maio 2016

La Senato de Brasil debate esce presidente Dilma Rousseff debe es judal prosededa per malcondui.

La majoria de la senatores ia dise ja ce los va vota contra la presidente. Si la vota plu tarda confirma esta, Rousseff va es automata suspendeda de sua posto.

On acusa el de manipula finansias en modo nonlegal per asconde la difere cresente entre revenu e spende governal, ante sua reeleje en 2014. El nega esta.

Rousseff ia fa un apela final a la Corte Suprema per para la ata, ma on ia refusa lo.

Un debate longa es aveninte ante la vota. La sesion de la Senato ia abri a cuasi 18 oras ante aora.

On ave 81 senatores en la Senato, la Salon alta. Setedes-un ia rejistra se per partisipa en la debate, e cadun reseta 15 minutos per sua parla. On no va fa la vota eletronical asta cuando cadun ia parla, sirca 06:00 de ora local (09:00 global).

La sesion ia es multe min pasionosa ca lo en la Salon basa a 17 april, en cual un majoria forte de la 513 legores ia vota per la prosede judal.

La membros de la Salon basa ia sita razonas diversa per sua desides. Multe ia dise ce los fa lo “per mea familia”, “per Dio”, o simple “per la pais”.

A 03:55 de ora local, 60 senatores ia parla. Un majoria de 42 de estas ia suporta la prosede e 18 ia rejeta lo. Min ca des senatores resta per parla.

En la Senato, la razonas donada per la prosede es xef economial. Multe ia culpa Rousseff per la situa estrema mal de la economia de la pais. Brasil sufri sua retrosede la plu mal de 10 anios; la nonemplea ia ateni 9% en 2015; e la infla es la plu alta de 12 anios.

Los ci ia presenta razonas contra la prosede judal ia dise ce lo sembla un colpa de stato, e ce lo es un produida de odia e venja.

Fernando Collor de Mello, un presidente pasada ci mesma ia fronti un prosede judal en 1992, ia fa un parla longa sur lo cual el ia descrive como la nonjustia fada contra el, ma no ia indica clar como el intende vota sur Rousseff.

Si la vota oposa Rousseff, la vispresidente Michel Temer va sustitui per el tra la periodo de la prosede.

Rousseff ia promete batalia asta la fini. “Me no va resinia. Esta ia entra nunca a mea mente,” el ia dise en un parla a martedi.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 10 novembre 2021 (17:34 UTC).