AORA OJI

Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Deutxland deside ci va segue Merkel

26 setembre 2021

La stradas de Berlin ospita oji la maraton anial, ma un corsa plu grande aveni tra Deutxland intera. La compete per segue Angela Merkel como canselor es estrema streta en cuando la popla deutx vota en elejes parlamental.

En un atenta final de gania votas, Merkel ia apare con Armin Laschet a un asembla ier en Aachen, do Laschet ia nase. La sonda final de opinas sujesta ce los pote reali un vinse nonprobable.

La premio es la gida de la economia la plu potiosa en Europa, e plu ca 60 milion deutxes con plu ca 18 es permeteda a vota. La voterias ia abri a 08:00 de ora local, e un indica clar de la resulta va apare cuando on sesa vota a 18:00.

Esta eleje nonpredisable ia pare finida asta un partisipa par Merkel, de ci sua carera a la apico de politica deutx es aora cuasi completida, pos 16 anios en la posto.

“Lo es vera importante, ci ave la potia,” el ia averti en la 48 oras ante la vota. Sua mesaje ia es ce Deutxland nesesa stablia, sua jovenes nesesa un futur, e Laschet es el ci va furni estas.

Tra menses la sondas ia penduli. Inisial, la Uni Deutx Cristian conservaliste e sua partito relatada baieres ia domina, e a un punto la Verdes ia es a la loca prima, ma plu tarda on ia vide un surje de suporta per la Democratas Sosial su Olaf Scholz.

De la tre aspirores competente per deveni canselor, Scholz es el ci ia stimula la plu la votores. Como viscanselor de Merkel, el es plu fasil videda como figur de continua ca sua oposor conservaliste. Ma an si el vinse, el va nesesa probable es suportada par du otra partitos per formi un alia.

La cambia de clima es presente la tema la plu grande per votores deutx, e sola a un ves pasada la Verdes ia reseta plu ca 10% de votas en un eleje federal.

Ma sua aspiror per la posto suprema, Annalena Baerbock, ia perde suporta en la estate, an pos inondas grave cual ia mata a la min 190 persones e ia destrui multe en du de la statos la plu poplada.

Un gangster es matada en un corte barati

25 setembre 2021

Du omes finjente avocatos ia mata un gangster malfamosa en un sala de justia en Delhi, capital de Barat.

Los ia spara a Jitender Maan Gogi en la juderia en Rohini, do un caso ia es oiada contra el. Ofisiores dise ce la polisia ia contrabatalia, matante la du omes. On suspeta ce un gang competente ia scemi la ataca.

Gogi ia es en la lista de la persones la plu xercada par la polisia de Delhi, e ance acusada en otra statos a tema de deses de casos incluinte omiside, secuestra e froda.

La aveni ia leva demandas sur la securia de la cortes de Delhi. Un politiciste major ia dise ce lo mostra un fali grave de projeta la securia.

Gogi ia es arestada en Delhi en marto de la anio pasada, acusada de omiside e estorse.

El ia es un blanco de multe ganges par causa de sua asende rapida tra la mundo criminal. Longo reportas, sua carera de crimines ia comensa cuando el ia es adolesente, inisial envolvente secuestras de autos e otra furas.

Plu tarda, el ia es un suspetada major en multe matas de profil alta, incluinte lo de un cantor popular en la stato Haryana.

Puigdemont es arestada en Sardinia

24 setembre 2021

Carles Puigdemont, la xef espulsada de la separadistes catalan, es detenida en Italia par un comanda espaniol de aresta.

Espania acusa el de rebela pos un referendo per autonomia en 2017 cual la cortes ia judi como nonlegal. A acel tempo, el ia es la presidente de Catalunia ma el ia fuji a Beljia pos la vota. Ala el abita e servi como un membro de la Parlamento European.

La polisia ia espeta el a la airoporto Alghero en Sardinia, e el va apare en corte en la oras veninte. Un judor en Sardinia va deside esce el debe es librida o estradida. Puigdemont ia viaja a la isola mediteranean per un festa de folclor catalan.

La referendo en 2017 ia provoca la crise political la plu profonda en Espania en desenios, cuando la parlamento rejional catalan ia declara sua autonomia ma Madrid ia pone sua governa direta a esta parte norde-este de Espania.

Pos la fuji de Puigdemont e du de sua ministros, Espania ia prisoni nove otra xefes catalan como rebelores per sua rol en la vota separadiste. Los ia es pardonada par Pedro Sánchez, ministro xef espaniol, en junio.

Madrid ia fali en sua atenta legal de estradi Puigdemont e sua du colegas, e los ia es elejeda a la Parlamento European en 2019. Como parlamentor european, Puigdemont ia ave imunia contra litiga, ma la Parlamento ia vota per desprende esta de el en marto. El ia apela, e en un judi inisial en julio, la corte jeneral de la UE ia dise ce el es a no risca direta de aresta.

La corte sarda fasa a la min du demandas: esce la solisita espaniol per estradi es valida, e esce judores italian ave la potia nesesada per un caso sur cual la corte suprema de la UE ancora no ia dona sua judi?

Somalia mostra filmas a la ves prima en 30 anios

23 setembre 2021

Somalia ia fa sua presenta publica prima de sinematografia en 30 anios, su securia forte, ma creante esperas de un revive cultural en esta pais turbada.

La presenta ia aveni ier en la capital Mogadishu, en la Teatro Nasional de Somalia, usada como un base militar en la gera interna, cuando la usa de sinemas ia sesa completa.

Sinemafilicas ia regarda du filmas corta par Ibrahim CM, dirijor somali. Un bileta ia custa des dolares.

Construida en 1967, la teatro ia es videda como un propulsante major per la developa cultural de Somalia en la desenios de 1970 e 1980.

Lo ia es cluida en 1991, a la comensa de la gera interna, e ia deveni usada como un base per comandores militar ci ia batalia per controla la site. Per resulta, lo ia cade a un malstate gastada.

Plu tarda, la teatro ia reabri en 2012 pos reparas par la Mision de la Uni African en Somalia (AMISOM), ma ia es rapida esplodeda par militaristes de al-Shabaab, grupo islamiste, ci ia opina ce filmas e divertis direta presentada es moral dejenerada.

Cavalores esuan forsa migrores aitian a revade

22 setembre 2021

En la SUA, un investiga es inisiada par imajes cual pare mostra polisiores de frontera sur cavalos ci forsa migrores a revade a un rio.

La fotos e videos, vasta distribuida en redes sosial, mostra la cavalores usante sua redines como flajelos contra la migrores e movente los en dirije a la Rio Grande en Texas. Aitianes ia traversa la frontera per trova comables per sua familias e ia es blocida par la cavalos.

Alejandro Mayorkas, ministro de securia interna, dise ce sua departe va investiga alegas de maltrata. El ia dise ce la polisiores ia atenta maneja la traversores de la rio.

Sirca 13 mil migrores, xef aitian, ia asembla en un campa tempora su un ponte cual lia Del Rio en Texas a Ciudad Acuña en Mexico.

Jen Psaki, portavose de la Casa Blanca, ia dise ce la imajes es difisil per regarda: “Me ia vide alga de la metraje. Me no ave la contesto plen. Me no pote imajina en cual contesto acel ta conveni. Ma me no ave detalias ajuntada, e serta me no crede ce cualcun vidente acel metraje ta opina ce lo es asetable o conveninte.”

Alga usores de redes sosial ia dise ce la imajes remente a la violentia videda en la eda de sclavia en la SUA.

La fotografiste Paul Ratje, ci ia fa la fotos, ia dise: “Alga de la migrores ia comensa core per atenta sircoveni la cavalores, e un de la polisiores ia saisi la aitian en la imaje a la camisa, e final el ia pivote el en cuando la cavalo ia trota en sirculo.”

Ratje dise ce el no crede ce acel om ia es ferida. Corta a pos, la cavalores “ia calmi a grado, e los ia comensa lasa ce persones entra”.

Raul Ortiz, xef de la Patrulia de Frontera Esuan, ia dise ce on investiga la aveni per serti ce on no ia ave un responde “nonasetable” par sua ofisiores. El ia ajunta ce los opera en un ambiente difisil, atentante distingui migrores e contrabandores.

La ajenteria de la Nasiones Unida per refujadas ia indica ce lo monitori espulsas par la SUA a Aiti, ajuntante ce lo es esensal ce persones ci teme es persegueda pote refuja se.

La governa esuan ia reporta un aumenta de migrores arivante a la frontera con Mexico en esta anio. La cuantia de persones ala detenida en julio ia esede 200 mil a la ves prima en 21 anios, longo datos governal.

Trudeau aposta e gania un periodo tre

21 setembre 2021

Justin Trudeau ia gania un periodo tre como ministro xef de Canada, car sua Partito Libraliste va reseta la plu votas en un eleje subita anunsiada. El ia descrive la resulta como “autoria clar” per trae la pais tra la pandemica.

En ce resultas ia ariva ancora en la tarda de ier, Trudeau ia es en curso a un plu governa de minoria. Esta sinifia ce el va debe denova colabora con otra partitos per aproba leges.

Parlante en Montréal a esta matina, Trudeau ia reconose ce la deside de reali un eleje temprana ia es profonda nonpopular: “Me oia vos cuando vos dise ce vos vole revade a la cosas cual vos ama, sin preocupa sur la pandemica o la eleje.”

Resultas inisial ia indica ce sua libralistes ia gania ja o va gania probable 156 sejas, min ca la 170 nesesada per un majoria parlamental. La oposores xef, la Partito Conservaliste de Erin O’Toole ia gania 121. La resulta es jeneral un repete de la situa pos la eleje en 2019.

La ajenteria nondependente cual supravide la prosede ia averti a ante ce la serti de alga resultas va ocupa dias, car on debe conta la votas postada.

En anunsia la eleje en agosto, la ministro xef ia aposta, esperante ce la responde governal a la pandemica va aumenta la potia de sua partito en parlamento. Ma la partitos oposante ia freta per acusa el de un “projeta de vania” a media de un onda cuatro de coronavirus.

Un volcan eruta sur la isola La Palma

20 setembre 2021

La ministro xef de Espania, Pedro Sánchez, ia ariva a La Palma en la Isolas Canaria, do un eruta volcanal ia causa la evacua de 5000 persones.

Imajes airal mostra lava de la volcan Cumbre Vieja versante a su e destruinte alga casas.

Sanchez ia dise ce la autoriosas oserva atendente per caso ce la lava va ensende focones. La garda militar e sivil ia es enviada per aida.

Esta volcan ia eruta la plu resente a 50 anios ante aora. Lo es situada en la sude de la isola La Palma, do sirca 80 mil persones abita.

Jonas Perze, un gidor local de turistes, ia dise ce el senti ancora tremas de la eruta. “Ma aora,” el ia ajunta, “la cosa la plu stonante cual me ia esperia nunca es la ruido veninte de la volcan – lo sona como la enaira de dudes jetos xasante e lo es estrema forte, lo es stonante.”

On ia fa comandas de evacua obligada a cuatro viletas, incluinte El Paso e Los Llanos de Aridane, e refujerias tempora ia es instituida. Asta aora, on ia reporta no feris o moris.

A la sera ier, Ángel Víctor Torres, presidente de la Isola Canaria, ia dise: “Lo no es previdable ce otra persones va debe es evacuada.” El ia nota ce la lava move lenta en dirije a la costa.

Sanchez ia pospone sua parti per la Asembla Jeneral de la Nasiones Unida en New York per consenta con Torres per discute la responde par la servis de crise a la eruta.

“Tota aveni como projetada, e donce la conserna xef es garantia la securia de la sitadanes de La Palma ci ta pote es afetada como resulta de esta eruta,” Sanchez ia dise ier.

La Palma ia es alta vijilante pos rejistra plu ca 22 mil tremas sirca la volcan en un semana.

La Canarias, un arcipelago de sete isolas a lado de Africa norde-ueste, ia rejistra sua eruta volcanal la plu resente en 2011, su la mar prosima a la isola El Hierro. Cumbre Vieja ia eruta en 1949 e 1971.

Israel recatura evadores filastini

19 setembre 2021

La armada israeli dise ce lo ia recatura la du membros final de un grupo de ses omes filastini ci ia tuneli de un prison de securia alta a cuasi du semanas ante aora.

La duple, de ci ambos parteni a un organiza militariste, ia es arestada pos es ensircada par fortes de securia en la site Jenin de la Riva Ueste. La otra cuatro ia es caturada en la semana pasada.

On inisia un investiga sur la caso, cual ia provoca selebras entre filastinis.

Scaramuxas ia aveni entre soldatos israeli e protestores filastini en Jenin en la temprana de oji, ma la polisia israeli ia dise ce la du evadores ia es recaturada sin resiste.

La padre de un de la omes ia dise ce sua fio ia acorda sede se “per no perili la posesores de la casa”.

Naftali Bennett, ministro xef de Israel, ia descrive la opera per recatura la omes como “impresante, sofisticada e rapida”, ajuntante ce “lo cual ia fali pote es reparada”.

La episodio ia es embarasante per la servi de prisones israeli, car jornales ia indica alga puntos do la securia no ia sufisi.

On crede ce la omes ia spende menses en escava un tunel en la solo de sua selula compartida en la prison Gilboa, pasante un gardor dorminte e emerjinte tra un buco a la otra lado de la muron de la prison a 6 setembre.

Un avocato per un de la evadores ia dise ce sua cliente ia usa culieres, platos e la manico de un caldera per escava un via a estra la compleso. A pos, culieres ia deveni comun videda a protestas suportante la filastinis.

Tota la membros de la grupo ia es en prison car los ia conspira o realia atacas contra israelis.

Frans retira ambasadores de la SUA e Australia

18 setembre 2021

Frans ia dise ce lo retira sua ambasadores en la SUA e Australia per consultas, protestante contra un acorda de securia cual inclui ance la Rena Unida.

La ministro de esternas franses ia dise ce la “deside nontipal” es justida par la “gravia nontipal” de la situa.

Par la alia, nomida Aukus, Australia va reseta la tecnolojia per construi sumarinas de enerjia nucleal. Esta ia coleri la governa franses car lo ia rompe un acorda cual lo ia suscrive con Australia.

La acorda nova es jeneral interpreteda como un atenta de oposa la influe de Xina en la Mar Xina Sude disputada. Lo ia es anunsiada a mercurdi par Joe Biden, presidente de la Statos Unida, Boris Johnson, ministro xef de la Rena Unida, e Scott Morrison, ministro xef de Australia.

Frans ia es informada sur la alia a mera oras ante la anunsia publica.

En un declara a un ora tarda ier, la ministro de esternas Jean-Yves Le Drian, ci ia descrive la acorda como un “cotel en la dorso”, ia dise ce la ambasadores es retirada car Presidente Emmanuel Macron ia solisita lo.

Un ofisior de la Casa Blanca ia dise ce la governa de Biden regrete la retira e va discute con Frans en la dias veninte per solve la problemes.

Parlante en Washington, Marise Payne, ministro de esternas australian, ia dise ce el comprende la “delude” en Frans e espera labora con la pais per serti ce lo comprende “la valua cual nos pone en la relata biladal”.

Un retira de ambasadores es multe nonusual entre aliadas, e esta pare es la ves prima cuando Frans ia retira los de ambos paises. Diplomatas franses en Washington ia cansela ja un aveni per selebra lias entre la SUA e Frans cual on ia projeta per venerdi.

Australia va deveni sola la nasion sete de mundo cual opera sumarinas de enerjia nucleal. Su la acorda nova, la aliadas va comparti ance sibercapasias, inteleto artifis e otra tecnolojias suacuan.

La anunsia ia fini un acorda con valua de $37 mil milion dolares cual Frans ia suscrive con Australia en 2016 per construi 12 sumarinas costumal.

Entretempo, Xina ia acusa ce la tre potiosas envolveda en la acorda nova ave un “disposa de Gera Fria”.

Secuoias californian es protejeda contra focones

17 setembre 2021

En la stato California de la SUA, pompores pone covrentes resistente a foco sirca arbores antica, car la Parce Nasional de Secuoias arde.

Ofisiores teme ce, pos poca oras, la flamas va ateni la Foresta Jigante, un bosce de alga de la arbores la plu grande de mundo.

La foresta conteni sirca 2000 secuoias, incluinte la Jeneral Sherman, cual, con sua altia de 83 metres, diametre de 7,7 metres e eda de sirca 2500 anios, es la arbor la plu grande par volum.

Ensendeda par lampo, esta focon crese tra un semana ja. Plu ca 350 pompores, como ance elicotores e aviones cadente acua, ia es enviada par batalia lo. Los ia envolve alga arbores, incluinte la Jeneral Sherman, en paper de aluminio per proteje los.

Espertas dise ce secuoias es multe capas de resiste foco e ia evolui per survive flamas.

Plu ca 7400 focones forestal ia arde en California en esta anio, ardente cuasi milion ectares.

Reportas plu vea …

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 26 setembre 2021 (07:33 UTC).