AORA OJI

Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

La suizes vota sur proibi pestisides sinteseda

13 junio 2021

Sitadanes suiz vota oji en un referendo pos cual, cisa, sua nasion va deveni sola la pais du de mundo cual proibi pestisides sinteseda.

Un stratejia proposada ta fini suvenis a cultivores ci usa tal pestisides. Un otra ta pone un proibi completa de los pos des anios.

Suportores indica la cuantia disturbante de pestisides en la acua e la dana aveninte a plantas, animales e insetos. Ma cultivores suiz averti ce multe de los no va pote continua opera su la proposas.

Pestisides es sustantias cimical o biolojial, usada per controla pestes.

On vota oji ance sur otra sujestas: un lege contra terorisme, un imposta nova contra combustables de fosil, e finansia en la crise de covid.

La sistem de democratia direta en Suiz sinifia ce tota desides major ala es fada par votas de la popla. Promovores nesesa mera colie 100 mil suscrives per serti un referendo nasional.

Si on va aproba lo, la stratejia contra pestisides sinteseda va ave un efeto multe plu profonda ca lo de la poca vilas e rejiones de mundo cual ia proibi ja estas.

Lo va ave ance un sinifia global plu grande ca la proibi introduida par Butan en 2013, car en Suiz on trova Syngenta, la fabricor la plu grande de pestisides en la mundo.

Ambos stratejias proposada es vasta suportada par urbanes joven.

Ma cultivores suiz dise ce los opera ja su regulas la plu sever de Europa. En la dudes anios pasada, los ia vide un redui de sua emplea e revenu, e aora los es coler.

“On trova multe persones, spesial en la sites, ci ave an no idea sur la sinifia de cultiva,” Martin Haab ia dise, presidente de la Asosia de Cultivores de Zürich. “Donce, se los ave du tomates en sua jardin ante la fenetra, los crede ce los comprende cultiva e los sabe como on cultiva organica.”

La promove per cultivores en Suiz es forte, e la sondas la plu resente sujesta ce lo va vinse par un marjin pico.

Ma an si la votores rejeta oji la proibi, esta debate ia es tan intensa ce lo no va vade a via. Cadun acorda ce on debe proteje la ambiente pur de esta pais. La desacorda es mera sur la modo.

La G7 revela sua projeta contra pandemicas futur

12 junio 2021

La xefes de la G7 va dedica sua recursos a labora per serti ce on va revide nunca la ruina umana e economial causada par un pandemica como covid.

En la dia du de sua confere en la rejion Cerno en la sude-ueste de England, los va publici un declara cual presenta un serie de medias per reali esta. Un de la intendes es redui la tempo nesesada per developa vasines a min ca sento dias.

La G7 (Grupo de Sete) es un organizada composada de la sete “economias avansada” la plu grande de mundo: Canada, Deutxland, Frans, Italia, Japan, la Rena Unida e la Statos Unida. Du politicistes xef de la UE es ance presente a la confere.

Ier, Boris Johnson, ministro xef de la Rena Unida, ia abri la asembla con un promete per combate la nonegalia global.

Johnson, ci ospita esta confere de tre dias en Baia Carbis, un vileta de vacanse a borda de la mar, ia dise ce lo es esensal ce on aprende de la “eras” de la crise finansial de 2008 e batalia contra la “sicatris” de nonegalia.

La xefes G7 va presenta la Declara de Baia Carbis pos un sesion spesial oji. Otra pasos concreta va es boni la redes global de monitori medical e la capasia per seguensa jenomes, e suporta la reformi e forti de la Organiza de Sania Mundal.

Johnson ia promete ce la RU va dona plu ca 100 milion vasines de covid a paises plu povre en la des-du menses veninte, e Biden ia promete 500 milion dosas de vasines Pfizer a 92 paises de revenu basa e media e a la Uni African.

Alga asosias carital e promovores ia critica la estende de la projeta de la Rena Unida, en cual 5 milion dosas va es distribuida ante la fini de setembre, 25 milion ante la fini de esta anio, e la restantes en 2022.

Porto Rica perde eletrica pos un focon

11 junio 2021

Un focon a un compleso eletrical en Porto Rica ia lasa miles de casas sin eletrica.

Imajes en redes sosial mostra plumones de fuma levante de la flamas a un sustasion en San Juan, la capital.

La focon ia aveni corta pos ce la compania ia reporta un siberataca. On no ia lia ofisial la du cosas.

Esta isola en la Mar Caribe ia esperia turnos descomutada de cuando Siclon Maria ia destrui la plu de sua rede eletrical en 2017. Alga abitores ia es sin eletrica tra cuasi un anio pos la tempesta.

Un compania privata, Enerjia Luma, ia emprende la opera e manteni de la sistem eletrical de Porto Rica en esta mense.

La compania ia dise ier ce la focon ia ensende a la compleso de distribui Monacillo, corta pos un priva de servi, un ataca en cual sua loca web ia reseta du milion visitas per secondo.

Rompes de eletrica ia afeta ja plu ca milion casas sur la isola en esta mense.

Moscitos alterada redui denge en Indonesia

10 junio 2021

Casos de denge ia es reduida par 77% en un esperimenta de altera la moscitos cual comunica lo.

Siensistes en Yogyakarta en Indonesia ia usa moscitos infetada con baterias Wolbachia cual redui la capasia de comunica la maladia.

A sincodes anios ante aora, denge ia es relativa nonconoseda: sola nove paises ia fasa alora avenis major de la maladia. Ma lo ia crese como un pandemica lenta e nonsedente e aora on ave asta 400 milion infetas per anio.

Denge causa dole grave en musculos e osos, e sua avenis pote inonda ospitales.

La baterias Wolbachia no dana la moscito, ma los ocupa la partes de sua corpo do la virus de denge ta senta. La baterias compete per recursos, tan difisilinte la reprodui de la virus ce lo deveni multe min probable ce la moscito va causa un infeta cuando lo morde.

La esperimenta ia usa sinco milion ovos de moscito infetada. Estas ia es poneda en baldes de acua en la site a cada semana du, e la prosede de cumula un popla de moscitos infetada ia dura tra nove menses.

On ia divide Yogyakarta en 24 zonas e ia relasa la moscitos en sola un dui de los. La tecnica ia susede tan bon ce on ia relasa aora la moscitos tra la site intera, e la projeta move a locas ensircante con espera de elimina denge en la rejion intera.

Wolbachia pote altera la fertilia de sua ospitor per serti es comunicada a la jenera seguente de moscitos e continua proteje contra denge.

Rusia cexa sur la camisas de futbalores ucrainsce

9 junio 2021

La Uni de Futbal Rusce ia envia un letera a UEFA, la organiza governante de futbal european, cexante sur lo cual lo descrive como la camisas “political” de Ucraina per Euro 2020.

Lo argumenta ce esta “vade contra la prinsipes fundal” de UEFA.

La camisa ave un mapa cual mostra Crim como un parte de Ucraina. Rusia ia propri la penisola crimsce de Ucraina en 2014 e regarda lo como parteninte a sua teritorio, an si esta es internasional rejetada.

La xef de la Asosia de Futbal Ucrainsce, Andriy Pavelko, ia revela la vestes en un video a sua paje de Facebook a soldi, a poca dias ante la comensa de la Torneo European.

La fronte de la camisas jala, e de la camisas blu per maxes esterna, mostra la contorno de Ucraina como un linia blanca, incluinte Crim e la rejiones este Donetsk e Luhansk, cual es partal saisida par separadistes prorusce.

Un slogan a la dorso dise “Gloria a Ucraina!” e un otra, “Gloria a eroes!” es coseda a interna de la colar de la camisa.

La sloganes es aora usada como salutas ofisial militar en Ucraina, e ia es clamas uninte per la protestores ci ia despone Viktor Yanukovych, presidente prorusce, en 2014.

“Nos crede ce la silueta de Ucraina va dona fortia a la juores car los va batalia per tota de Ucraina,” Pavelko ia comenta.

Ma un portavose per la ministro de esternas rusce ia critica la vestes, disente ce la ecipo de futbal ia “afisa la teritorio de Ucraina a la Crim de Rusia”, creante un “ilude de la nonposible”. El ia dise ce la slogan es nasionaliste e sona como un clama uninte nazi.

La Torneo European, posponeda par causa de covid, va aveni de 11 junio asta 11 julio en 11 sites, incluinte San Peterburg en Rusia, cual va ospita un de la cuatrifinales.

Sentos de arestadas par un ap secreta de polisia

8 junio 2021

Departes polisial dise ce los ia aresta sentos de criminores tra la mundo en un opera de tre anios, usante un ap de mesaji secur cual la FBI ia crea en la SUA.

Esta opera, inisiada en junta par Australia e la FBI, ia distribui secreta la ap ANOM entre criminores, permetente ce la polisia monitori sua conversas sin ce los sabe lo.

On ia fa arestas en 18 paises, incluinte suspetadas liada a la mafia e a organizas criminal. On ia saisi ance drogas, armas e mone fisical.

Australia ia dise ce lo ia aresta 224 persones par resulta de la opera e ia ata contra 20 menasas de mata, cisa salvante la vives de “un cuantia notable de pasores inosente”.

Zeland Nova, cual ia deteni 35 persones, ia descrive la opera como “la ata la plu sofisticada en la mundo de enforsa legal contra crimin organizada asta aora”.

La FBI e Europol va presenta plu detalias oji.

La mori de la libror final survivente de Auschwitz

7 junio 2021

David Dushman, la soldato final survivente ci ia partisipa en la libri de la campa de mata nazi a Auschwitz, ia mori con 98 anios.

Estas veteran de la Armada Roja Iudi, ci ia deveni plu tarda un scrimor olimpial, ia mori en Deutxland a saturdi.

Como soldato de 21 anios, a 27 janero 1945, el ia usa sua tance per crase la serca eletrica de la campa, aidante libri la prisonidas. Sirca 1,1 milion persones ia es matada en la campa, de ci la plu ia es iudi.

En la anio pasada, Dushman ia recorda: “Cuando nos ia ariva, nos ia vide la serca e esta persones nonfortunosa. Nos ia rompe la serca con nosa tances. Nos ia dona comables a la prisonidas e ia continua. Los ia sta ala, tota de los en uniformas, sola oios, sola oios, multe streta – acel ia es multe temable, multe temable.”

Dushman en la gera no ia sabe ce Auschwitz esiste: el ia aprende sola a pos sur la atas odiable cual ia aveni ala.

Como un de sola 69 omes en sua divide de 12 mil soldatos ci ia survive la gera, Dushman ia sufri feris grave en la conflita. Ma en anios seguente el ia deveni la scrimor major de la Uni Soviet, e un de la instruores de scrima la plu importante de mundo en la opina de la Comite Internasional Olimpial (COI).

El ia instrui la ecipo de scrimores fema de la Uni Soviet tra plu ca 30 anios, e ia es presente a la ataca teroriste cual ia mata atletas israeli a la Juas Olimpial de München en 1972.

“Nos ia oia la sparas e la zumbi de la elicotores supra nos,” el ia recorda en 2018. “Nos ia abita direta a fasa de la ecipo israeli. Nos e tota la otra atletas ia es xocada.”

Sua ami deutx, Thomas Bach, scrimor e presidente de la COI, ia tribui. “Cuando nos ia encontra nos en 1970, el ia ofre instante a me amia e consela, an pos la esperia personal de Sr Dushman con la Gera Mundal Du e Auschwitz, como un om de orijina iudi. Esta ia es un jesti umana tan profonda ce me va oblida nunca lo.”

Asta la eda de 94 anios, Dushman ia vade ancora a cuasi cada dia a sua club local de scrima per dona ala lesones.

Muco maral estende longo un costa turces

6 junio 2021

La presidente de Turcia, Recep Tayyip Erdoğan, ia promete salva sua pais contra la muco cual cumula en sua acuas.

Un strato densa e melmosa de mucilajo estende longo la Mar Marmara prosima a Istanbul, danante viventes maral e la industria de pexa. Espertas culpa contamina e la cambia de clima.

Muco maral es un mugre verde natural cual formi cuando alges es supracargada con nurintes par clima calda e acua contaminada. Lo ia es prima trovada en Turcia en 2007, ma on ia descovre lo ance en la Mar Ejeo prosima a Elas.

On crede ce la aveni resente en multe partes de la Mar Marmara, cual lia la Mar Negra a la Mar Ejeo, es la plu grande en istoria. Lo crea un caos per comunias local.

Erdoğan ia culpa la dejeta a mar de acuas nontratada de cloaca, e ance la temperatur cresente, e ia urje ofisiores a investiga.

“Me teme ce, se esta estende a la Mar Negra,” el ia dise, “la difisilia va es enorme. Nos nesesa fa esta paso sin retarda.”

Sua governa ia envia un ecipo de 300 persones per esamina fontes posible de contamina.

Barcos viajante tra la Mar Marmara debe naviga la melma viscosa, e alga pexores es prevenida de labora, car lo bloci sua motores e redes. Sumerjores ia reporta ce multe pexes e otra spesies mori par sofoca.

Danmarc aproba ajunta un isola jigante a Kobenhavn

5 junio 2021

Parlamentores dansce ia aproba un projeta per un isola artifis cual va casi 35 mil persones e va proteje la porto de la capital Kobenhavn contra levas de la nivel de mar.

La isola grande, nomida Lynetteholm, va es liada a la tera xef par un via periferial, tuneles e un linia de metro.

La aproba parlamental sinifia ce on pote ja comensa construi esta projeta de 2,6 cilometres cuadrida en la anio presente. Ma lo es oposada par ambientistes ansiosa sur la efetos de construi lo.

La scema per Lynetteholm inclui un sistem de paradores sirca la perimetre, per proteje la porto contra la mar levante e ondones.

Si la construi prosede como projetada, la plu de la fundas per la isola va es finida en 2035, e on espera completi la scema intera ante 2070.

Organizas ambientiste ia presenta sua caso contra la developa a la Corte de Justia European. Un de sua consernas es la transporta de materias par veculo. Un evalua sujesta ce on va nesesa asta 350 viajas par camion tra Kobenhavn a cada dia per trae la furnis cru.

Per construi esta penisola, con grandia simil a 400 campos de futbal, 80 milion tones de tera va debe es transportada a la loca.

Ambientistes indica ance la problem de deponedas movente en la mar e la efeto posible de esta a ecosistemes e la cualia de acua.

Protestors ia asembla ier estra la parlamento en la capital cuando la lege ia es asetada par 85 membros favorente e sola 12 oposantes.

La custa de comables crese rapida

4 junio 2021

La custa de comables tra la mundo ia crese a sua rapida mensal la plu alta en plu ca un desenio, longo la Nasiones Unida.

La NU usa un indise larga de custas de comables, e aora estas ia crese ance tra 12 menses en serie.

Furnores ia es afetada par disturbas a produi, labora e transporta en la pandemica.

On deveni ansiosa sur infla plu jeneral e sur la risca ce custas plu alta va afeta la recovre economial de la mundo.

La indise de la Organiza NU per Nuri e Cultiva (ONC) nota la custas tra la mundo de comables diversa, incluinte sereales, olios vejetal, produidas de leteria, carne e zucar.

La custas altida resulta de la renovi de compra en alga paises contra un produi ancora basa. Disturbas a la mercato e la furni, causada par restrinjes de move, ia crea mancas local.

Espertas ia averti a ante ce esta situa va causa un aumenta de infla en cuando economias sorti de sua state isolida.

An tal, alga industrias va esperia cisa un recovre forte. La ONC predise ce la produi global de sereal en esta anio va es recordo, e posible esta va aida lenti la crese de custas.

Reportas plu vea …

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 13 junio 2021 (06:53 UTC).