AORA OJI

Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

La mori de Johnny Ventura, cantor de merenge

1 agosto 2021

Johnny Ventura, cantor dominican famosa, ia mori de un ataca de cor con 81 anios.

Ventura, de ci sua carera ia estende tra ses desenios, ia deveni multe conoseda pos formi un orcestra de merenge e salsa. On ia vide esta bande como un de la grupos la plu importante en la istoria musical de la Republica Dominican.

Merenge, cual ave influes african e espaniol, es e un jenero de musical e un stilo de dansa en duple.

Luis Abinader, presidente de esta pais caribe, ia declara tre dias de dol pos la mori de Ventura. El ia dise ance ce la cantor, nometada “la Cavalo Grande”, va reseta onoras militar.

Longo un reporta de la ospital cual ia trata el, Ventura ia colasa cuando el ia come a mediadia en Santiago de los Caballeros, un site en la norde. El no ia responde a atentas de revive el.

La artiste ia fa plu ca sento albumes de musica en sua carera longa, e ia aseta ses Premios Grammy Latina. A pos, el ia segue un via political, deveninte la maior de la capital Santo Domingo.

Ventura, naseda con la nom Juan de Dios Ventura Soriano a 8 marto 1940, ia es sposida tra plu ca 50 anios e ia ave sete enfantes.

La ministreria dominican de cultur ia tuita: “Nos senti la dole cual inonda sua familia en esta tempo difisil. Sua erita va vive per sempre en sua cantas e la cultur dominican.”

Rusia preveni cubanes de entra a la UE sur materases

31 julio 2021

Tre cubanes ci ia atenta usa materases inflable per traversa un de la rios de frontera european la plu delicata va es aora deportada de Rusia.

Gardores rusce ia catura los cuando los ia atenta pasa a Esti e la Uni European. La cubanes ia espera viaja a Espania, do la fia de un de los abita.

Turistes de Cuba nesesa sola sua pasaportos per visita Rusia, ma los no pote entra legal a la UE sin visa.

En la 60 anios pasada, deses de miles de persones ia atenta fuji de Cuba en la Caribe, ma plu usual los dirije se a la SUA, viajante par barco o barcon, tipal su risca personal grande.

La tre persones caturada sur la rio Narva en Rusia ia es detenida en un sentro per migrores prosima a San Peterburg. On ia multa los e ia comanda sua deporta.

La gardores de frontera ia dona poca detalias de la tre, disente sola ce los es sitadanes de Cuba, naseda en 1968, 1970 e 1992. Los ia projeta sua traversa pos studia atendosa la tereno local e oteni la materases. On ia trova sacos de posesedas e paperes de identia con los.

Cuba ia es un colonia espaniol asta 1898, e Espania ave ja longa un comunia cuban.

De ves a ves pasada, migrores ia proba traversa la Narva de Rusia. En 2018, un om ci ia declara se como misri ia es salvada de afoca par gardores esti cuando el ia atenta nada tra la rio.

La relatas de Rusia con Esti, cual ia parteni a la URSS asta 1991, es tensada tra tempo longa. Esti es un membro de OTAN, cual manteni ala soldatos per preveni atas militar par Rusia.

La militares va enforsa isoli en Sydney

30 julio 2021

Australia ia posti sentos de soldatos a Sydney per aida enforsa regulas de isoli contra covid. Un aveni de la varia delta cual ia comensa ala en junio ia produi ja cuasi 3000 infetas e ia causa nove moris.

Soldatos de la Forte de Defende Australian va es instruida en la finisemana, ante comensa patrulias nonarmada a lundi. Ma multe persones demanda esce la interveni militar es nesesada, descrivente lo como tro.

La isoli, cual va continua asta 28 agosto a la min, proibi persones de sorti de sua casa, estra per razonas esensal como eserse, compra de comedas e cura per otras.

Ma an pos sinco semanas de restrinjes, la infetas en la site la plu grande de la pais es ancora sperdente. Ofisiores ia rejistra 170 casos nova oji.

Soldatos va junta se a la polisia en locas con multe casos de la virus per serti ce cadun segue la regulas, cual inclui un limita de viaja de 10 cilometres. Informa furnida par ofisiores de sania indica ce la virus sperde xef par moves permeteda.

David Elliott, ministro per polisia de Cimri Sude Nova, ia dise ce esta va aida car un minoria peti de la abitores de Sydney opina ce “la regulas no pertine a los”.

La Alia de Avocatos Australian, un organiza de diretos sivil, ia dise ce la posti es “un usa preocupante” de la armada en un democratia libraliste.

La situa ia afeta xef laborores esensal e grupos familial grande en la suburbes plu povre e etnical diversa en la ueste e sude-ueste de la site. Oposores dise ce esta rejiones ia fasa ja metodos “ojetida” de polisi, e asentua ce la restrinjes ala es plu sever ca en la resta de Sydney.

“Nosa persones es un de la grupos demografial la plu povre, e ja a ante, los ia senti maltratada e marjinalida,” Steve Christou, maior local, ia comenta. “Los no pote paia sua ipoteca, sua lua e sua comedas, o labora. Aora, la apare de la armada per enforsa isoli sur la stradas va es un problem enorme a esta persones.”

Otras ia recomenda ce la governa aumenta sua promove de vasines e sua servis de suporta per la comunias afetada.

La taso de vasini en Australia, sola 17% de la popla adulte, resta un de la plu basas entre la paises en la Organiza per Coopera e Developa Economial.

Un cambia major de politica sur covid en Tanzania

29 julio 2021

En Tanzania, la popla es aora corajida a es vasinida contra covid, pos un cambia major de politica en un de la paises la plu poplada de Africa.

La presidente nova, Samia Suluhu Hassan, ia inisia la promove. El ia recambia John Magufuli, ci ia desasentua la gravia de la virus, recomendante preas en loca de vasines e mascas.

Pos cuando Magufuli ia mori en marto par causa de un disturba de cor, Suluhu ia institui un grupo dedicada a la problem de coronavirus.

Ofisial, esta pais de 58 milion persones ia rejistra 858 casos de covid e 29 moris par causa de lo, ma on teme ce la cuantias vera es plu alta. La Organiza de Sania Mundal ia averti resente sur un aumenta de casos tra Africa.

En la finisemana, Tanzania ia reseta pico plu ca milion dosas de la vasin de Johnson & Johnson, par la scema global Covax cual aida paises plu povre a combate la virus.

Suluhu ia es vasinida ier, disente: “Nos no es un isola e esta es perce aora nos comensa vasini.” El ia recomenda ce tota tanzanianes prende la vasin e ia ajunta ce la pais va reseta plu dosas.

El ia clari ce el ia reseta vasines plural ja de sua enfantia e ia aseta la vasin presente car el sabe ce lo es nonperilinte.

Un parte de Tanzania ia vasini ja sua popla – la isolas partal autonom de Zanzibar ia comensa sua propre promove a sirca du semanas ante aora, usante la vasin xines Sinovac.

La governa tanzanian ia proibi ance asemblas nonesesada per preveni la sperde de la virus.

Cuando Magufuli ia mori, on ia oia rumores ce el mesma ia es afetada par covid. El ia adota la opina ce Tanzania no nesesa vasines contra la virus, nominte los “perilosa” e promovente alga remedias natural – vapor erbal, eserse, bon comedas – cual espertas internasional de sania rejeta.

Indicante cuanto la politica ia cambia, la ministro de sania Dorothy Gwajima ia descrive la promove nova como “monumentin” e ia recomenda forte ce persones reseta la vasin, disente ce la governa projeta vasini a la min 60% de persones.

An tal, la disposa publica a la maladia pare ancora multe reposada, con ce la plu de persones vade sin mascas.

Un camion colide con un bus de laborores en Barat

28 julio 2021

A la min 18 laborores migrante ia mori cuando un camion ia colide con sua bus en Uttar Pradesh, stato de Barat norde.

Sua viaja de 1300 cilometres de Haryana a Bihar, sua stato de orijina, ia es cortida cuando la bus ia fali en la distrito Barabanki.

Alga de la laborores ia es ancora en la bus e otras ia dormi a lado de lo cuando la asidente ia aveni en la oras temprana de oji.

La supravidor de polisia en Barabanki ia dise ce alga de la pasajores ia deside dormi estra la veculo en ce la busor ia xerca un maciniste per repara lo.

“Lo es un aveni nonfortunosa,” el ia comenta. “La bus ia fali probable car lo ia ave sirca 140 pasajores cuando sua capasia ia es mera 65. Nos aida la familias.”

El ia dise ance ce la bus ia ave no fenetras car lo ia usa un frescador. Esta ia obliga alga pasajores a sorti e dormi sur la via.

A la min 30 persones, de ci alga es grave ferida, ia es ospitalida en Barabanki.

Narendra Modi, ministro xef, ia tuita sua compatia e ia anunsia 200 mil rupis como compensa per la familias de la persones matada e 50 mil rupis per la feridas.

Persones de Bihar vade comun a statos plu rica como Haryana e Delhi per trova labora. Tal laborores migrante tende usa trenes e buses, un modo de transporta con custa basa en Barata, per revade a casa cuando sua labora pausa.

La Coreas restora un linia de comunica entre se

27 julio 2021

Corea Norde e Sude ia restora un linia direta de comunica cual Pyongyang ia clui en junio pasada.

Longo un declara par la ofisia presidental de la Sude, la xefes de ambos paises ia acorda reconstrui la fida e boni sua relatas. Los ia intercambia alga ja leteras personal pos april.

Corea Norde ia clui la linia en junio 2020 cuando relatas ia amargi pos un confere falida entre la du paises. Corta a pos, Corea Norde ia esplode un ofisia de frontera cual ia es construida per boni la comunica.

Representores de ambos lados ia spende tre minutos en parla par telefon, longo la Ministreria de Uni de Corea Sude. La ministreria ia ajunta ce on va fa un plu telefoni a la posmedia de oji, e a cada dia de aora.

La relatas entre la paises ia boni en 2018 cuando Moon Jae-in, presiente de la Sude, e Kim Jong-un, xef de la Norde, ia consenta a tre veses. Ma esta ia colasa rapida pos la consenta du nonsusedosa entre Kim e Donald Trump, alora presidente de la SUA.

La tensa ia profondi plu tarda, cuando grupos de disentores ci ia fuji a la Sude ia envia propaganda tra la frontera. Ultima, Corea Norde ia abandona tota lias de comunica militar e political, incluinte la linia direta entre sua xefes.

La du paises resta tecnical gerante, car la Gera Corean de 1950 a 1953 ia fini con un sesaspara en loca de un acorda de pas.

La presidente de Tunis ata per calmi protestas

26 julio 2021

La presidente de Tunis ia desemplea la ministro xef e ia suspende la parlamento, pos protestas violente tra la pais.

Ier, miles de protestores contra la malmaneja de covid par la governa ia pleni la stradas e ia combate la polisia.

Fortes de securia ia impedi la asede a parlamento e a stradas sirca Bolevar Habib Bourguiba, la sentro de protestas antigovernal en la revolui tunisi de 2011.

Presidente Kais Saied ia anunsia ce el va prende potia con aida de un ministro xef nova, disente ce el intende calmi la pais. Ma sua oposores ia descrive sua ata como un colpa de stato.

Pos un consenta de crise sur securia ier, Saied ia dise en un parla televisada: “Nos ia fa tre desides … asta cuando la pas sosial va reveni a Tunis e asta cuando nos va salva la stato.”

Protestores ia aclama selebrante a la desemplea de Hichem Mechichi, ministro xef. Saied ia acompania la folas en la site capital Tunis.

La polisia ia aresta persones ance en otra sites. En Touzeur, alga persones ia invade la ofisias de la partito governante, rompente computadores e ensendente la construida. La partito ia culpa “ganges criminal” ci atenta “semi caos e destrui”.

Saied ia promete responde a plu violentia par fortia militar. El ia dise ance ce la constitui permete ce el suspende la parlamento si lo es “prosima a peril”.

A des anios ante aora, la revolui tunisi ia introdui democratia e ia inisia la revoltas de la Primavera Arabi tra la rejion. Ma la esperas ce esta va crea plu empleas no ia es realida.

Pos un desenio, Tunis batalia un crise economial profonda e un de la situas la plu grave de coronavirus en Africa. Mechichi ia desemplea la ministro de sania en la semana pasada, ma esta no ia lejeri multe la coleria de la popla.

Afganistan atenta para la avansa de la talibanes

25 julio 2021

La governa afgani ia pone un proibi de sorti tra cuasi tota la pais ier, atentante preveni la talibanes de invade sites. Estra la capital Kabul e du otra provinses, no moves va es permeteda entre 22:00 e 04:00.

La combate entre la talibanes e la soldatos governal ia gravi en la du menses pasada en ce fortes internasional retira se de Afganistan.

On estima ce la organiza militariste ia catura ja asta un dui de la teritorio intera. Lo ia ata rapida pos la retira de la SUA, reprendente traversas de frontera e otra terenos campanial. La talibanes ia saisi ance vias esensal per atenta rompe modos de furni. Sua soldatos ia prosimi a alga sites major, ma ancora no ia susede catura un.

“Per controla violentia e limita la moves taliban, un proibi de sorti a note es introduida en 31 provinses,” la ministreria de internas ia declara, ajuntante ce Kabul, Panjshir e Nangarhar es esentada.

Con ce la talibanes continua avansa, combate ferose ia aveni en esta semana en la anteurbe de la site Kandahar. Respondente, la SUA ia fa atacas airal contra postos militariste en la rejion a jovedi. Ma car operas esuan en Afganistan va fini ofisial a 31 agosto, on ave ansia sur la menses seguente.

La talibanes es un militia fundaliste islamiste ci ia es desponeda de potia par la invade esuan en otobre 2001. La grupo ia refuja Osama bin Laden e otra figures liada a la atacas contra la SUA a 11 setembre 2001.

Presidente Biden ia dise ce la retira de la SUA es justida car sua fortes ia serti ce Afganistan no va deveni denova un base do djihadistes pote conspira contra la Ueste.

Plu temprana en esta mense, soldatos esuan ia parti cuieta de la campo de avion de Bagram, un base estendosa cual ia es la sentro de operas esuan en la pais e ia conteni miles de soldatos a tempo pasada. Alga analisores en la SUA teme ce la talibanes va reprende la controla de la pais en ses menses, longo un evalua distribuida a ofisiores en junio.

La Olimpiales onora la vitimes de München 1972

24 julio 2021

La vitimes de la ataca teroriste a la Olimpiales de München ia es recordada en la rituo abrinte de la Juas en Tokyo, a la ves prima en cuasi un dui de sentenio.

Un momento de silentia ia onora la 11 atletas israeli matada par sparores filastini en 1972.

Tra anios, la familias de la vitimes ia urje la organizores olimpial a recorda los en un rituo abrinte, ma sua solisitas ia es sempre rejetada a ante.

“Final on ave justia,” du de la viduas de la vitimes ia dise. “Nos ia pasa tra 49 anios de luta e ia sede nunca” ia es la declara par Ankie Spitzer e Ilana Romano, presente a la abri ier.

Lo cual ia aveni en München a 5 setembre 1972 es un de la capitoles la plu sombre en la istoria de la Olimpiales. Des-un membros de la ecipo israeli ia es saisida como ostajes en la vileta olimpial par sparores de Setembre Negra, un organiza teroriste.

Du ecipores ia es matada cuasi direta, e la otras ia es matada en un batalia de spara contra la polisia de Deutxland Ueste a un campo de avion prosima cuando la militaristes ia atenta estrae los de la pais.

“Nos recorda los ci ia perde sua vives en la Juas Olimpial,” un anunsior ia dise en la rituo ier. “Un grupo ave ancora un loca forte en tota nosa memorias e representa tota ci nos ia perde en la Juas – la membros de la delega israeli a la Juas Olimpial de München 1972.” La stadion ia oscuri e un lus suave blu ia lumina alga partes de lo.

Naftali Bennett, ministro xef de Israel, ia tuita: “Me bonveni esta momento importante e monumentin. Ta ce on bondise la recorda de los.”

La Comite Internasional Olimpial (CIO) ia es criticada pos rejeta un solisita per un minuto de silentia a la Juas de London en 2012 cual ta representa la aniversario 40 de la ataca. La organizores ia dise ce la rituo abrinte no ia es un atmosfera conveninte per un tal tribui.

En 2016, la CIO ia crea un “loca de dol” en la vileta olimpial de Rio per onora los ci ia mori en la Juas.

Pos vide la tribui en Tokyo ier, Spitzer e Romano ia dise ce los no pote reteni sua larmas. “Esta es la momento cual nos ia espeta,” los ia ajunta.

Un om con covid desembla como sua sposa

23 julio 2021

En Indonesia, un om con analise positiva de covid ia desembla como sua sposa per embarca un avion, ma on ia deteta el a media de la vola.

La om, identifiada par sola sua inisiales, DW, ia covre sua fas par porta un nicab. El ia usa ance la pasaporto de sua sposa e sua resulta negativa de covid.

Cisa el no ta es caturada si el no ta adota sua vestes normal cuando la vola interna ia es en la aira. Un ospitor ia nota e reporta la difere.

La om ia es detenida par polisiores pos la atera de la avion, e analiseda sin pausa. Cuando on ia descovre ce el ave la virus, on ia comanda el a isoli se en sua casa. La polisia dise ce el va es litigada pos acel periodo.

Esta ia aveni su restrinjes sever contra viaja en Indonesia, cual ia deveni rapida la punto sentral de coronavirus en Asia. La nasion rejistra cuasi 50 mil casos nova per dia.

En semanas resente, sua ospitales ia es inondada par un enflue de pasientes e ia sufri su un manca de recursos, incluinte osijen. Cuasi tre milion persones ia es infetada e plu ca 72 mil ia mori.

Como razonas per la sperde continuante de la virus tra Indonesia, on sita comun la furni lenta de vasines e ia apare de la varia delta, cual es multe comunicable.

La plu airocompanias ia restrinje viajas en la festa Eid al-Adha cual ia comensa a 19 julio.

Reportas plu vea …

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 1 agosto 2021 (07:14 UTC).