AORA OJI

Novas de la mundo, simple reportada en elefen

La presidente de Bolivia sede sua posiblia de reeleje

18 setembre 2020

Jeanine Áñez, la presidente tempora de Bolivia, ia abandona sua aspira en la eleje presidental cual va aveni a 18 otobre. El ia dise ce el no vole divide la votas e vide tal la reveni a potia de la partito sosialiste MAS de Evo Morales, presidente pasada.

La aspiror de MAS, Luis Arce, vinse ja en la sondas de opina, e Áñez ia ocupa la loca cuatro.

Áñez ia es induida en la anio pasada pos la resinia de Morales, ci ia parti alora de la pais entre alegas de froda elejal. Morales, ci abita presente en Arjentina, ia dise plu tarda ce el ia es espulsada en modo obligada par la polisia e la militar.

Morales ia servi como presidente bolivian tra cuasi 14 anios, de 2006 a 2019, pos gania tre elejes en serie.

En un mesaje video, Áñez ia dise: “Oji me pone a lado mea aspira de la presidentia de Bolivia, per benefica la democratia.”

El ia esplica ce el ia deside abandona la corsa par causa de “la risca ce la vota va es divideda entre aspirores variosa, e ce la resulta de acel divide va es ce MAS fini vinsente”.

“Si nos no uni, Morales va reveni. Si nos no uni, la democratia perde,” el ia ajunta, sin revela cual aspiror el va suporta aora.

Un sonda, publicida en la plu temprana de esta semana, ia sujesta ce Luis Arce es capas de vinse en la ronda prima de la eleje.

La gida par Áñez ia es controversa de la comensa. La suportores de Morales dise ce Áñez ia deveni presidente pos la despone de Morales par un colpa militar, e ce Morales ave la direto de continua como la presidente.

Multe prisonidas evade un prison en Uganda

17 setembre 2020

Plu ca 200 prisonidas ia evade un prison en la norde-este de Uganda. La vila local es pausada en cuando la fortes de securia atenta trova los.

On reporta ce la prisonidas ia mata un soldato pos sorti de la compleso en Moroto. A pos, los ia parti en dirije a la montania.

La armada e ofisiores de la prison xasa la evadores, ci ia prende con se 15 fusiles e muni. Un portavose per la armada ia dise ce du prisonidas es ja caturada e du es matada.

Lo pare ce, per evita es detetada, la prisonidas ia desapone sua uniformas jala e fasil reconosable, e ia core nuda a la montania.

La prison es construida sur la pedes de Monte Moroto, a la borda de la vila. Reportas local dise ce la situa ia para la comersia normal en la urbe.

Moroto es la vila la plu grande en Karamoja, un rejion ajitada con un istoria de fura de boves e violentia de fusil.

En la temprana de la desenio de 2000, un program governal de desarma ia prende fusiles a via de persones nonmilitar, ma scaramuxas entre comunias diferente ia aveni ancora de ves a ves.

On trova un gas asosiada con la vive en la nubes de Venus

16 setembre 2020

Indicas de un gas malodorosa cual flota tra la nubes de Venus es cisa emetes de microbios airal.

Astronomistes ia deteta fosfina a altia de 50 cilometres en la atmosfera de la planeta, e ia identifia no prosede, otra ca la vive, cual pote esplica sua presentia.

La descovre abri la posible ce la vive ia esiste a ves pasada sur la mundo visina de la Tera, e ce alga restantes de lo ia survive en la aira cuando la planeta ia esperia un caldi global estrema cual ia cambia lo a un enferno.

Tra du mil milion anios, Venus ia ave un clima moderada, con un mar. Ma oji, un atmosfera densa de diosido de carbono covre un surfas cuasi sin acua do la temperatur esede 450°C. La nubes en la sielo conteni gotas de un licuida de cual 90% es asida sulfurica.

La situa sur Venus es tan profonda nonplasente ce multe siensistes crede ce la planeta es mor. Los suspeta ce la fosfina veni de prosedes plu comun ca venusanes flotante.

Jane Greaves, la astronomiste a la Universia de Cardiff en Cimri ci ia gida la ecipo ci ia fa la descovre, ia acorda: “Completa xocante es dise ce la vive pote survive ensircada par tan multe asida sulfurica. Ma tota la modos jeolojial e fotocimical a cual nos pote pensa es multe tro nonproduosa per crea la fosfina cual nos vide.”

Sur la Tera, la gas fosfina es relasada par microbios en ambientes sin osijen, como la deponedas de lagos e la internas de animales. Otra modos de produi lo es tan estrema – la ventres de Jupiter e Saturno – ce sur planetas rocosa, on regarda fosfina como un indicador de la vive.

En un proba inisial, Greaves ia oserva Venus par la telescopio James Clerk Maxwell en Hawaii en 2017. El ia persepi la sinial de fosfina en studia sua datos a la fini de un dia de labora en desembre 2018. En la anio seguente, el ia usa la telescopio Alma en Txile per confirma la presentia de esta gas en la nubes alta de la planeta.

La plu de la fosfina, sirca dudes moleculas per mil milion, apare a latitudes media de Venus, con zero a la polos. Calculas par la rexercores ia elimina la cimica conoseda, mostrante ce volcanes, lampo e micrometeorites no ta crea fosfina en proportio tan grande.

Sara Seager, un siensiste planetal a MIT en la SUA, ipotese un sicle de vive en cual microbios venusan cade de la nubes, seci, e deveni repuxada a altias plu temperada par corentes en la atmosfera.

Un tomba asosiada con un seta violente en Panama

15 setembre 2020

Polisiores en Panama investiga un tomba coletiva, sur cual los crede ce lo conteni la restantes de persones matada par un seta relijial.

Ofisiores supravide la estrae de la restantes sceletal de esta loca en la rejion Ngäbe-Buglé en la norde-ueste distante, do multe persones de desende nativa abita.

En janero on ia trova un otra tomba conteninte sete corpos. La vitimes ia es asosiada con un seta sur cual on crede ce lo fa esorsis violente.

La investigores ia debe pasa des oras en pasea tra montania per ateni la loca, cual es en la parte norde de Ngäbe Buglé, prosima a un rio, a 350 cilometres a ueste de la Site Panama, la capital.

On no pote distingui la seso o an la cuantia de persones en la tomba nova. Tota la restantes ia es enviada a un moreria en la provinse Chiriquí per es forense esaminada.

Plu temprana en esta semana, la polisia ia aresta la xef alegada de la seta Lus Nova de Dio, en pertine a la trova de la tomba prima. Esta tomba ia conteni la restantes de un fem ensinta, sinco de sua enfantes e un adolesente.

On ia descovre lo pos cuando tre viletanes caturada par la grupo ia evade e ia fuji a un ospital. Alora, polisiores ia invade la comunia e ia reporta ce en un eglesa tempora, los ia trova un fem nuda, matxetes e otra coteles, e un capra ritual sacrifiada.

La seta ia ataca viletanes local, realinte esorsis violente cual envolve bates e torturas. Sinco persones tenida par la grupo ia es librida.

Un crese recordo dial en casos global de coronavirus

14 setembre 2020

La Organiza Mundal de Sania ia rejistra un crese recordo dial en la cuantia de infetas nova de coronavirus: 307 930 ia es reportada en 24 oras. La recordo presedente ia aveni a 6 setembre.

La ajenteria ia dise ce la cuantia de moris ia crese par 5500, levante la soma global a 917 417. La altis la plu grande ia es en Barat, la SUA e Brasil.

En la mundo intera, on ia ave aora plu ca 28 milion casos confirmada, de cual un dui ia es en la Americas.

Barat ave la cuantia du la plu grande de casos confirmada, seguente la SUA. Lo ia reporta resente cuasi du milion casos de COVID-19 per agosto, la cuantia mensal la plu alta de mundo pos la comensa de la pandemica. Per promedia, la pais ia esperia 64 mil casos per dia, e la cuantia de moris ia esede 1000 a cada dia pos la comensa de setembre.

Brasil ia rejistra ja plu ca cuatro milion casos, la cuantia tre de mundo. Sua cuantia de moris, sirca 131 mil, es la plu alta en America Latina.

La SUA ia rejistra cuasi un cuatri de la casos de coronavirus en la mundo: plu ca ses milion. Sua cuantia dial de casos ia aumenta en julio, ma ia cade a pos. Con plu ca 194 mil, la SUA ave la cuantia la plu alta de moris rejistrada en la mundo.

Paises tra Europa reporta ance ce sua cuantias dial de casos crese, e on teme un reforti de la virus. Governas ia obliga encluis local en la rejiones la plu grave afetada, e on ia apela denova ce la popla debe porta covrefases e segue la regulas de distanti sosial.

Otra paises cual ia vide un reapare de la coronavirus inclui Peru, Israel, Corea Sude e Australia.

Ier, la polisia australian en la stato Victoria ia aresta plu ca 70 protestores ci ia desobedi la comanda de resta a casa. Sirca 250 persones ia partisipa en esta protesta en la site Melbourne, cual ia es promoveda par grupos en redes sosial ci distribui teorias de conspira sur la pandemica.

La ministro xef de Zeland Nova, Jacinda Ardern, ia anunsia oji ce sua pais va sutrae sua restrinjes, con eseta de en Auckland, sua site la plu grande, a 21 setembre. Zeland Nova ia susede eselente conteni la virus, ma on ia pone restrinjes en Auckland pos descovre alga infetas nova en agosto.

Israel, do la cuantia de casos continua crese, va fa denova un enclui nasional. La regulas sever va ativi a venerdi, la dia de la anio nova iudi, e va dura per tre semanas a la min.

Jovenes mori en un mineria colasada en RD Congo

13 setembre 2020

Laborores de salva xerca en la detrito pos la colasa de un mineria de oro en la Republica Democrata de Congo. La mineria, prosima a la vila Kamituga en la este de la pais, ia colasa a venerdi su pluve forte.

On teme ce sirca 50 persones ia mori. La plu ia es jovenes, e ofisiores local ia demanda per du dias de lamenta.

En esta pais, asidentes aveni comun en la industria de mina, cual ave normas basa de securia.

Videos mostra sentos de persones ci atenta move detrito a via de la entra de la mineria, usante palas o sua manos.

Theo Kasi, governor de la provinse Kivu Sude, ia dise ce el es tristida par “la moris trajedial de 50 persones, de ci la plu ia es joven”. Ma la maior de Kamituga, Alexandre Bundya, ia comenta ce “nos es ancora no serta sur la cuantia de esata” de persones matada.

Un atestor ia dise ce la pluve estrema ia causa ce “acua entra a la tre tuneles. Cuando persones ia atenta sorti, lo ia es nonposible car la acua ia flue forte”.

La ofisia de la governor ia ajunta ce on va “reali metodos per preveni ce tal avenis repete”.

La Republica Democrata de Congo ave reservas rica de minerales como cobalto, diamantes, cupre e oro, ma sua popla resta entre la plu povres de mundo pos anios de gera e malmaneja.

Negosias de pas con la talibanes en Afganistan

12 setembre 2020

La discutes prima sur pas entre la governa afgani e la talibanes ia comensa en la pais golfal Catar, pos menses de pospone. Mike Pompeo, ministro de esternas esuan, ia descrive la consenta como “monumental” cuando el ia vola a Doha, la capital, per la abri.

On ia intende ja comensa esta negosias pos la reali de un acorda sur securia entre la SUA e la talibanes en febrero. Ma la progresa ia es impedida par desacordas sur un intercambia controversa de prisonidas, como ance per violentia en Afganistan, do cuatro desenios de gera es staniada.

Un delega de afganis major ia parti de Cabul per Doha ier, 11 setembre, la dia de la atacas matante contra la SUA a 19 anios pasada cual ia gida a la fini de la rena taliban.

La xef de la delega, Abdullah Abdullah, ia dise ce on xerca “un pas justa e diniosa”. A jovedi, la talibanes ia confirma ce los va partisipa, pos la relasa de un grupo final de ses prisonidas.

Estas es la discutes direta prima entre la talibanes e representores de la governa afgani. La militaristes ia refusa consenta con la governa asta aora, descrivente los como sin potia e la pupetas de la SUA.

La du lados espera un reconsilia political e la fini de desenios de violentia cual ia comensa con la invade soviet en 1979.

La acorda entre la SUA e la talibanes ia defini un program per retira fortes stranjer par intercambia per garantias antiteroriste. On ia spende plu ca un anio per completi acel acorda, e on previde ce la discutes nova va es an plu complicada.

Multe teme ce la progresa frajil ja fada sur diretos de femes va es cisa sacrifiada.

La negosias presenta un defia ance a la talibanes, ci va debe proposa un gol political realable per Afganistan. Asta aora, los ia parla neblosa, disente ce los desira un governa cual es muslim ma ance incluinte.

Lo es posible ce la discutes va furni plu indicas de la cambias en esta grupo militariste pos la desenio de 1990, cuando los ia rena seguente un interprete sever de la regulas de xaria.

Un dui de milion persones fuji focones en Oregon

11 setembre 2020

En la SUA, plu ca un dui de milion persones en la stato Oregon fuji de focones savaje cual arde tra la Norde-Ueste Pasifica.

Vanida par ventas nonusual calda e seca, desuples de focones traversa la stato, e on suspeta ce a la min un de los ia es criminal ensendeda.

Plu ca sento focones arde en des-du statos en la ueste de la SUA. Oregon, California e Washington ia sufri la plu de la ardes, cual ia destrui vilas intera en alga casos. On ia confirma des moris en California.

Sirca 1,8 milion ectares ia es destruida. A la sera de ier, la Ofisia per Maneja de Crise en Oregon ia confirma la statistica la plu resente de evacua, cual envolve plu ca 10% de la 4,2 milion abitores de la stato.

Un portavose per la pompores ia comenta: “Cuando un focon arde tra casas e ofisias, on ave tubos abrida cual emete ancora gas natural, e estas arde.”

Kate Brown, la governor democrata de Oregon, ia dise: “Nos ia vide nunca esta cuantia de foco noncontenida tra la stato. Esta no va es un aveni de un sola ves. Nonfortunosa, lo premostra la futur. Nos esperia la efetos sever de la cambia de clima.”

Entre la evacuadas es plu ca 1300 prisonidas, jeneral fema, de un prison en Wilsonville cual on regarda como menasada par du focones grande cual es cisa a punto de combina.

Un de la ardes la plu destruinte ia comensa prosima a la frontera con California. La polisia trata lo como suspetosa. Lo es liada a minima du moris e lo ia ruina ja sentos de casas en la vilas Phoenix e Talent.

Rumores ce alga focones ia es ensendeda par membros de grupos estrema sinistriste o destriste es rejetada par la polisia.

La mori de la avocato ci ia defende Mandela

10 setembre 2020

George Bizos, la avocato sudafrican de diretos umana ci ia defende Nelson Mandela, ia mori con 92 anios.

Pos representa alga de la ativistes political la plu bon conoseda de la pais en la tempo de apartait, Bizos ia deveni un de la arcitetores de la constitui nova de Sudafrica.

Sua mori ia es anunsiada par presidente Cyril Ramaphosa, ci ia dise ce Bizos “ia contribui enorme a nosa democratia”. Sua familia ia dise ce Bizos ia mori pasosa par causas natural a sua casa.

Bizos e Mandela ia encontra lunlotra cuando los ia studia lege en Johannesburg, e Bizos ia representa sua ami e otra oposores de apartait en casos de litiga.

El ia es un de la avocatos ci ia representa Mandela a sua litiga de tradi, cual ia comensa en 1956. El ia representa Mandela ance en la Litiga de Rivonia, cuando el e otra ativistes contra apartait ia es condenada a prisoni permanente en 1964, acusada de atenta suverti la governa.

On atribui a Bizos la ajunta de la parolas “si lo es nesesada” a la parla famosa par Mandela a la litiga, en cual el ia dise ce el es preparada per mori.

La Funda Nelson Mandela ia comenta ce Bizos ia jua un “rol esensal… e profesal e como un ami de familia” tra la anios cuando Mandela ia es en prison.

En sua autobiografia, La pasea longa a libria, Mandela ia descrive Bizos como “un om ci ia combina un natur compatiosa con un mente astuta”.

Bizos ia nase en Elas, ma ia veni a Sudafrica como un refujada de la Gera Mundal Du cuando el ia ave sola 13 anios. Ante acel, el e sua padre ia aida sete soldatos zelandes a evade Elas, cual ia es ocupada par la nazis.

Pos ariva en Johannesburg sin capasia de parla engles, el ia abandona sua educa per un tempo longa e ia labora en un boteca elinica. Plu tarda, el ia es instruida como un avocato a la Universia Witwatersrand.

Pos la fini de la rena par la minoria blanca, Bizos ia aida scrive la constitui nova de Sudafrica. El ia representa ance familias de ativistes ci ia es matada en la periodo de apartait, a la Comision de Veria e Reconsilia en Sudafrica.

En un de sua litigas major final, el ia fa ce la governa dona un compensa finansial a la familias de 34 escavores ci ia es matada par la polisia sudafrican en 2012.

Flamas destrui un campa de migrores sur Lesbos

9 setembre 2020

Un focon ia destrui la campa la plu grande de migrores en Elas, la compleso suprafolida Moria sur la isola Lesbos.

Sirca 25 pompores con des camiones ia batalia la flamas en cuando on ia evacua la migrores. Alga ia sufri feris par causa de esposa a la fuma.

On reporta ce cisa la focon ia es comensada par migrores ci ia protesta contra la regulas de coronavirus, ma esta no es confirmada.

Cuasi 13 mil persones abita en Moria, plu ca la cuatruple de la cuantia cual lo pote ofisial conteni.

La visgovernor de Lesbos ia dise a la radio local ce la campa ia es “completa destruida”. Kyriakos Mitsotakis, ministro xef de Elas, va fa un consenta de crise a esta matina.

La campa ia es isolida en la semana pasada cuando un migror con coronavirus ia es detetada. On ia rejistra aora 35 casos de la maladia ala. La reporta nonconfirmada dise ce la focon ia comensa pos cuando 35 persones ia refusa es isolida con sua familias.

La coordinor per Lesbos de la organiza carital Medicistes Sin Fronteras ia dise ce identifia la causa de la inisia de la focon es difisil, car multe focos peti e protestas aveni en la campa.

“Lo es un bomba-orolojo cual ia esplode final,” el ia comenta, ajuntante ce persones es tenida “sin compatia” en la campa ja tra anios.

Un portavose per la governa ia dise ce on investiga reportas de ensende criminal, e ce on va declara un state de crise tra tota la isola. La polisia ia preveni ce migrores fujinte de la focon vade a la vila de porto Mitilene.

Reportas plu vea …

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 18 setembre 2020 (07:29 UTC).