AORA OJI

Novas de la mundo, simple reportada en elefen
2021 · 2020 · 2019 · 2018 · 2017 · 2016 · 2015 · 2014 · 2013

Biden reversa la politicas de Trump

21 janero 2021

Joe Biden, presidente nova de la SUA, ia comensa desfa alga de la politicas de Donald Trump, a mera oras pos sua inaugura.

En sua atas inisial como presidente 45, el ia suscrive des-sinco comandas dirijal, de cual la prima ia es per aumenta la responde federal a la crise de coronavirus. Otra comandas ia reversa la disposa de la governa de Trump sur cambias climal e migras.

Biden ia comensa labora ier en la Ofisia Oval pos deveni induida en la parte plu temprana de la dia a la Capitolio en Washington. La rituo ia es nonsimil a tota pasadas par causa de restrinjes contra covid, e poca persones ia es presente per oserva la juras.

Trump, ci ancora no ia sede formal la presidentia, ia iniora la aveni – e donce ance la tradision longa ce presidentes vea regarda la inaugura de la nova. Presente, an tal, ia es Barack Obama, su ci Biden ia servi tra oto anios como vispresidente, Bill Clinton e George W Bush, como ance Mike Pence, vispresidente de Trump.

“Democratia ia susede,” Biden ia dise pos pronunsia la jura presidental. Espresante un mesaje de unia pos la anios turbosa de Trump, el ia promete es un presidente “per tota esuanes”, incluinte los ci ia vota contra el.

Ante la inaugura de Biden, Kamala Harris ia es induida como vispresidente de la pais. El es la fem prima, e la person negra o indoamerican, ci ocupa esta posto.

On ia ave securia plu forte ca normal per la rituo a la Capitolio, pos la ataca a la construida par suportores violente protestante a 6 janero.

Aora, un regula esiste ce on debe porta un masca e distanti sosial se en tota construidas de la governa federal. Un ofisia nova va es instituida per coordina la responde a la pandemica, e la SUA va para la prosede, inisiada par la governa de Trump, de retira se de la Organiza Mundal de Sania.

Biden ia promete ce la batalia contra la clima cambiante va es un conserna major de sua governa. El ia revoca ance la permete presidental donada a un projeta controversa per un tubon de petrolio, nomida Keystone XL, cual ambientistes e organizas de americanes nativa oposa ja tra plu ca un desenio.

Sur la campo de migra, Biden ia cansela la declara par la governa de Trump cual ia aida finansia la construi de un mur longo la frontera mexican, e ia fini un proibi contra viaja de alga paises de majoria muslim.

Otra de sua comandas trata egalia de raza e jenero.

On trova un depinta furada en un armario

20 janero 2021

On ia descovre un depinta con eda de 500 anios en un aparte en Italia e ia redona lo a sua museo, do la empleadas no ia sabe ce lo ia es an furada.

La copia de Salvator Mundi (Salvor de la Mundo) ia es trovada en un armario en un sala de dormi en Napoli a saturdi. La orijinal ia es probable depintada par Leonardo da Vinci, e la copia par un de sua studiantes.

La polisia ia dise ce la posesor de la aparte es arestada, suspetada de reseta benes furada. El ave 36 anios.

La obra parteni usual a la colie Museo Doma de la eglesa San Domingo Major en la site. Ma ofisiores no ia sabe ce on ia fura lo car “la sala do on teni la depinta no ia es abrida en tre menses” par causa de la pandemica.

Car nun ia reporta sua desapare, lo no es clar cuando la arte ia es prendeda, ma la museo ia dise ce lo ia es en sua posese a tempo tan resente como janero pasada.

Polisiores investiga la detalias de la fura, ma on ia ave no indica de entra par forsa a la museo. La avocato Giovanni Melillo ia comenta: “Lo es credable ce la fura ia es encargada par un organiza laborante en la comersia internasional de arte.”

La obra mostra Cristo con un mano levada e la otra teninte un sfera de vitro. On no sabe serta ci ia depinta lo, ma alga espertas crede ce lo ia es creada par Giacomo Alibrandi, un studiante de Leonardo, en la temprana de la sentenio 16.

Ajuntante a la misterio, on disputa ance esce la depinta orijinal es vera par Leonardo da Vinci. El ia mori en 1519, e min ca dudes de sua depintas esiste ancora.

On ia atenta restora la Salvator Mundi orijinal. Sua funda de lenio de nozo ia es descriveda como “tunelida par vermes” e lo pare ce a alga tempo lo ia es divideda a du partes. Laboras per restora lo ia lasa marcas de raspa.

Esta no ia turba comprores, an tal, car la depinta ia es subastada per 450 milion dolares esuan, cuantia recordo, en 2017. La compror nonidentifiada ia partisipa en un compete par telefon cual ia continua tra cuasi 20 minutos.

La OMS averti sur un fali moral desastrosa

19 janero 2021

La xef de la Organiza Mundal de Sania (OMS) ia dise ce la mundo fasa un “fali moral desastrosa” par causa de politicas nonjusta per vasines de covid.

Tedros Adhanom Ghebreyesus ia dise ce lo no es justa ce persones joven e sana en nasiones rica es injetada ante persones riscada en paises plu povre. El ia esplica ce plu ca 39 milion dosas de vasin es ja donada en 49 paises rica, ma un nasion povre ia ave sola 25 dosas.

Entretempo, on ia critica e la OMS e Xina sur sua responde a covid. Un comite nondependente, encargada par la OMS, ia dise ce esta organiza autoriosa de la Nasiones Unida ia ta debe declara plu temprana un crise internasional. La comite ia reproxa ance Xina sur la tardia de sua responde.

Asta aora, Xina, Barat, Rusia, la Rena Unida e la Statos Unida ia developa vasines de covid. Otras es produida par ecipos multinasional, como la vasin Pfixer esuan-deutx. Cuasi tota esta nasiones ia organiza per distribui prima a sua propre poplas.

Tedros ia dise ce la metodo de “me la prima” va es ruinante car lo va alti la custas e va promove la cumula de compradas. “Ultima,” el ia ajunta, “esta atas va fa no plu ca longi la pandemica, la restrinjes nesesada par conteni lo, e la sufri umana e economial.”

El ia recomenda un dedica completa a Covax, la projeta global de comparti vasines, cual on intende comensa en febrero.

Plu ca 180 paises ia junta se a esta stratejia, cual vole uni la paises como un sola bloco con plu potia per negosia con companias de medisin. La vasini en 92 paises, de cual tota ave revenu basa o media, va es finansiada par donores.

Un nota veni de escavores xines trapida

18 janero 2021

En Xina, 12 escavores es ancora vivente pos deveni trapida su tera par un esplode en un mineria de oro.

La laborores ia susede envia un nota a la ecipo salvante a sete dias pos la asidente. La fortuna de des otra escavores ci manca pos la esplode resta nonclar.

Asidentes en minerias xines no es rara. Los es comun causada par regulas de securia mal enforsada.

La 22 ia es trapida a la mineria Hushan prosima a Yantai en la provinse Shandong en Xina este a 10 janero, cuando un esplode ia dana la sorti e la sistem de comunica. La mineria ia es ancora en curso de deveni construida.

Como reportada par jornalisme governal, la salvores ia susede contata alga de la escavores tra un duto streta.

Pos sensa tiras a cordones cual los ia basi a su la tera, la ecipo ia envia comedas, medisin, paper e lapises a en la buco.

Longo un nota retraeda de la duto, 12 persones vive en la parte media de la escaveria, ma on no sabe la state de la otra des.

On reporta ce on fora ance alga otra posos de salva, esperante ce la laborores pote es evacuada. On crede ce los es situada a sirca 600 metres de la entra.

En desembre de la anio pasada, 23 escavores ia mori en Xina pos un gotea de monosido de carbono a un escaveria de carbon.

16 laborores ia es matada en setembre a un otra escaveria en la anteurbe de Chongqing cuando un banda transportante ia arde, produinte un cuantia grande de monosido de carbono.

E en desembre 2019, un esplode a un mineria de carbon en la provinse Guizhou en Xina sude-ueste ia mata a la min 14 persones.

Un volcan crea un nube de sene supra Djava

17 janero 2021

Continuante un semana estrema mal per Indonesia, Monte Semeru ia eruta, versante sene e fuma a plu ca sinco cilometres supra Djava, la isola la plu densa poplada de la pais.

On ia dona no comandas per evacua e no persones es reportada como ferida. Imajes ia mostra un nube grande de sene dominante casas.

Un ofisior local ia dise: “La viletas Sumber Mujur e Curah Kobokan es situada en la curso de la nubes calda.”

La Ajenteria Nasional de Modera Desastres ia averti viletanes ci abita sur la monte a vijila contra flues de fango nomida “lava fria” cual pote aveni si pluve forte combina con materia volcanal.

La monte, con altia de 3676 metres, ia eruta a sirca 17:24 de ora local ier.

Ance conoseda como “La Monte Grande”, Semeru es la volcan la plu alta sur Djava e un de la plu ativas. Lo es ance un de la destinas la plu popular per paseamanicas visitante.

La volcan ia eruta en desembre, cuando sirca 550 persones ia es evacuada.

En la semana pasada, Indonesia ia sufri multe liscateras, un trematera matante sur Sulauesi, e la perde de un avion portante 62 persones.

Museveni vinse en Uganda entre alegas par sua oposor

16 janero 2021

En Uganda, resultas inisial mostra ce Yoweri Museveni, ja presidente de tempo longa, es clar vinsente en la eleje per cual la popla ia vota a jovedi.

La comision elejal de la pais ia rejeta alegas par Boni Wine, aspiror oposante e stela pasada de pop, ce la votas ia es nonlegal manipulada. Ma oservores dise ce la fida a la conta ia es danada par un rompe de interede tra tre dias.

On previde la confirma oji de la resulta final.

Deses de persones ia es matada en violentia ante la eleje. Politicistes oposante ia acusa la governa de molesta ance.

Museveni, ci teni ja la potia tra 35 anios, espera un periodo ses en la posto. Esta om de 76 anios dise ce el representa stablia.

A contra, Bobi Wine, la nom teatral de Robert Kyagulanyi, ave 38 anios e dise ce el representa la jenera plu joven en un de la paises la plu joven de mundo, do la eda media es 16.

Ier, en cuando la resultas ia apare, Wine ia dise ce soldatos ugandan ia ensirca e penetra sua casa. “Zero de esta intruores militar parla a nos,” el ia dise en Twitter. “Nos ave un problem grave.”

Ma un portavose per la governa ia acusa el de “drami” la aveni “per solisita compatia”: “Bobi Wine a esta momento es un person multe importante. La stato Uganda debe serti ce el es secur.”

Longo la resultas entretempo de du tris de voterias, Museveni ia gania asta aora 62% de votas, en compara con 30% per Wine.

La xef de la comision de eleje, Simon Byabakama, ia dise ce la vota ia aveni pasosa, e ia recomenda ce Wine, ci ia dise ce alga de sua ajentes elejal ia es arestada a jovedi, publici la indicas suportante sua alegas de mal pratica.

La oposor crede ce on usa la rompe de interede per preveni comunica e per sumina la sistem de vota. En ajunta a la noncapasia de es enlinia, persones ia esperia difisiles en envia mesajetas.

La comision elejal dise ce sola du voterias en la pais ia reporta problemes major, e la prosede de vota ia es canselada en acel locas.

On ave aora securia forte en la capital, Kampala, con soldatos e polisiores patruliante.

Un ospital colasa pos un trematera en Indonesia

15 janero 2021

En Indonesia, laborores de salva xerca tra la detrito de un ospital partal colasada pos un trematera sur la isola Sulauesi. A la min 30 persones ia mori.

La trema de grado 6,2 a esta matina ia segue a poca oras pos un otra plu peti. Sentos de persones ia es ferida e miles ia es deslocada.

Jornales local reporta ce ses pasientes e sua familias ia es trapida cuando partes de la ospital Mitra Manakarra en la vila Mamuju ia colasa.

Tremas ia es esperiada tra sirca sete secondos a sirca 01:00 de ora local oji.

On ia dona no averti de tsunami, ma miles de persones ia fuji de sua casas a locas plu secur. La autoriosas indica ce replicas forte pote segue la du tremas major e ce on ave ancora un risca ce estas va causa un tsunami.

La construidas grave danada inclui casas, du oteles, la ofisia de la governor e un sentro comersial.

Indonesia es propensada a tremateras car lo es situada a la Sintur de Foco, un zona de multe tremas e erutas volcanal a la borda de la Mar Pasifica.

La xef de Twitter sur la proibi de Trump

14 janero 2021

Jack Dorsey, xef de Twitter, ia dise ce la suspende permanente de la conta de Donald Trump, presidente de la SUA, ia es la ata coreta. Ma el ia espresa tristia sur lo cual el ia descrive como “la situa estracomun e nondefendable” de la proibi.

El ia dise ance ce la situa representa partal un fali par Twitter, cual no ia ata sufisinte per coraji “conversa sana” sur sua plataformas.

Twitter ia es e lodada e criticada per suspende la conta de Trump. La canselor deutx Angela Merkel e la presidente mexican Andrés Manuel López Obrador ia fa comentas contra lo, an si los no es aliadas de la presidente partinte.

La proibi ia es realida pos la tuitas par Trump pos la tumulta a la Capitolio en la semana pasada. En un mesaje longa, Dorsey ia dise ce el no selebra la proibi e no senti orgulo a lo. El ia repete ce la sutrae ia aveni pos “un averti clar” a Trump.

“Nos ia fa un deside con la informa la plu bon cual nos ia ave, fundida sur menasas a securia fisical e en e estra Twitter,” Dorsey ia scrive.

El ia aseta ance ce la proibi va fa un efeto a la interede abrida e libre. “La nesesa de esta atas frati la conversa publica. Los divide nos. E los crea un presedente cual pare a me perilosa.”

El ia refere ance a la critica ce sola poca xefes tecnolojial fa desides sur la demanda de ci ave e ci no ave un vose en la rede, e a acusas de sensura. “Un compania cual fa un deside comersial per modera se difere de un governa cual sutrae asede, ma pote pare multe simil,” Dorsey ia dise.

Sur la deside de sutrae alga usores e tuitas, alga persones critica ce lo viole la direto de parla libre. An tal, la jigantes de tecnolojia razona jeneral ce car los es companias privata e no representores de la governa, la lege no pertine cuando los modera sua plataformas.

A lundi, un portavose de Merkel ia dise ce la canselor opina ce la proibi de Trump es “problemosa”. E López Obrador ia comenta: “Me no gusta ce cualcun es sensurada.”

Joe Biden, presidente elejeda esuan, ia dise ce el vole ce companias como Facebook e Twitter fa plu per sutrae parla odiosa e novas falsa. El ia indica ja ce el vole revoca Sesion 230, un lege cual proteje companias de rede sosial contra litiga sur lo cual persones ia posta.

La scandal de instituidas de madre e bebe en Er

13 janero 2021

La governa eres va demanda per pardona pos un investiga cual ia trova un “nivel xocante de moris de enfantes” en sua instituidas de madre e bebe.

Esta locas ia es creada en la sentenios 19 e 20 per casi femes e xicas ci ia ensinti estra sposia. Sirca 9000 enfantes ia mori en la 18 casas investigada.

La governa ia dise ce la reporta revela ce la pais ia ave un “cultur sofocante, opresante e savaje misojine”.

La ministro xef Mícheál Martin ia comenta ce la reporta descrive un “capitol oscur, difisil e vergoniosa” de la istoria eres. “Como nasion, nos debe fronti la veria completa de nosa pasada,” el ia dise.

La comision cual ia fa la investiga ia descovre ce la cuantia de enfantes ci ia mori ia es sirca 15% de tota nasedas en la instituidas. Sirca 56 mil madres nonsposida e 57 mil enfantes ia es investigada.

Esta casas ia aseta la plu persones en la desenio de 1960 e la temprana de la desenio de 1970. Multe enfantes ala naseda ia es adotada o prendeda a orfanerias dirijeda par monces catolica fema.

La reporta ia dise ce “la femes e enfantes no ia ta debe es en la instituidas” e ce multe femes ia sufri maltratas emosial. Lo ia pare ce on ia mostra “poca compatia” a la madres, spesial a la tempo de pari, cual ia es per multe de la femes “un esperia traumal”.

En parlamento oji, Martin va vosi un demanda plen per pardona, representante la stato. Parlante ier, el ia dise ce “un fato difisil” es ce “tota la sosia ia es complis” en la scandal.

La xef de la Eglesa Catolica en Er, Arcibispo Eamon Martin, aseta ce la Eglesa ia parteni a un cultur en cual “persones ia es frecuente manxada, judida e rejetada”. “Per esta,” el ia dise, “e per la dole durante e angusa emosial cual ia resulta, me demanda nonreservada per pardona par la survivores e par tota los ci es personal afetada par la realias cual on descovre.”

El ia sujesta ce cualcun debe presenta se ci pote aida identifia la entererias de la persones ci ia mori en la casas de madre e bebe.

La comision ia fa 53 recomendas, incluinte compensas e monumentos. Sua reporta ia dise ce, an si tal instituidas ia esiste en otra paises, la proportio de madres nonsposida ci ia es en la instituidas en Er ia es probable la plu alta de mundo.

La Sores de la Cores Santa de Jesus e Maria, un organiza cual ia maneja alga de la instituidas, ia dise ce lo es “un cosa de tristia grande a nos ce bebes ia mori su nosa cura”.

Esta casas ia es internasional reportada en 2014 pos la trova de multe restas umana sur la tereno de un instituida pasada en Contia Galway en la ueste de la pais.

La presidente de Malaui confesa culpablia sur covid

12 janero 2021

Lazarus Chakwera, presidente de Malaui, ia aseta un culpa personal car el ia es un de los ci ia contribui a la crese resente de casos de covid en la pais.

En un parla a radio, el ia dise ce on ia ave “un senti coletiva de destensa de segue modos de preveni covid entre multe malauis, incluinte me”.

La presidente ia es forte criticada en la semana pasada cuando imajes e videos ia sirculi cual ia mostra el con Madonna, musiciste visitante, presante manos e posante per fotos sin usa mascas e sin distanti sosial.

Malaui ia esperia un aumenta agu de la cuantia de moris e de probas positiva per covid en semanas resente. La maladia ia prende la vives de alga persones bon conoseda, incluinte cantor e difusor Maria Chidjanja Nkhoma e Ernest Kantchentche, xef manejante per la Ministreria de Informa.

Plu ca 200 malauis ia mori de covid, de ci 30 ia mori en sola la du semanas pasada.

Chakwera, ci es ance un eglesor, ia dise ce el va juna e prea per 21 dias per demanda a Dio per sani la pais.

La presidente malaui ia comanda ance ce la fortes de securia aida enforsa metodos de preveni la transmete de la virus, como la clui de bares e locas de note a 20:00.

Reportas plu vea …

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 21 janero 2021 (08:23 UTC).