Utiles de conta

Utiles de pajeria


aora_oji:xef

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Un sesaspara en Gaza pos du dias de combate intensa

14 novembre 2019

Un sesaspara entre Israel e militaristes en Gaza aveni aora, pos du dias de batalia la plu intensa en alga menses. Fontes misri e filastini dise ce la sesaspara ia comensa a 05:30 de ora local. Israel no ia comenta ofisial.

Tredes-du filastinis ia mori en la violentia, provocada cuando Israel ia mata un militariste xef. Israel dise ce plu ca dudes de la matadas filastini ia es militaristes.

Plu desuples de filastinis e israelis ia es ferida, longo fontes medical a ambos lados.

La militar israeli ia dise ce plu ca 400 rocetos ia es xutada a Israel par Djihad Muslim Filastini (DMF), un grupo militariste. Israel mesma ia esecuta ondas de atacas airal contra blancos sur cual lo dise ce los parteni a acel grupo.

La violentia ia comensa pos un ataca par Israel ante la leva de sol a martedi, en cual Baha Abu al-Ata, un comandor de la DMF, ia es matada. Israel dise ce el ia es culpable per multe rocetos lansada de Gaza, e ce el ia intende fa un ataca pos tempo multe corta.

La parte la plu matante de la du dias de batalia ia aveni en la note pasada, cuando un ataca airal contra un casa en Gaza sentral ia mata un familia de oto persones.

La departe de sania en Gaza, manejada par Hamas, la grupo militariste dominante en la teritorio, ia dise ce la mores inclui un fem e un enfante, e ce tota ia es nonmilitar.

La israelis dise ce la ataca ia mata un comandor DMF, ci los descrive como la xef de un unia rocetal.

Pos la institui de la sesaspara, Nickolay Mladenov, ambasador de la Nasiones Unida per la prosede de pas en Asia sude-ueste, ia comenta ce e la NU e Misre “ia labora forte per preveni ce la aumenta la plu perilosa en e sirca Gaza gida a gera”.

En un tuita, el ia recomenda ce ambos lados “mostra la autorestrinje masima e fa sua rol per preveni la versa de sangue”.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

La marea la plu alta en Venezia de 50 anios

13 novembre 2019

Partes de la site Venezia en Italia es inondada pos la marea la plu alta de plu ca 50 anios.

La acua ia culmina a 1,87 metres. On ia vide un marea plu alta a sola un ves pos la comensa de arcivos en 1923: la site ia esperia 1,94 metres de acua en 1966.

Fotos mostra acua pleninte locas popular de turisme e persones vadante longo la stradas.

La Plaza San Marco es un de la partes la plu basa de la site, e ia es entre la partes la plu grave afetada. Sua basilica ia es inondada a sola la ves ses en 1200 anios. Cuatro de esta veses ia aveni en la dudes anios pasada.

La maior de Venezia dise ce el va declara un state de desastre, avertinte ce la inonda va lasa un marca permanente.

Alga comersias ia es afetada, e on ia vide sejas e tables flotante estra caferias e restorantes. En botecas, laborores ia atenta move sua benes a via de la acua per preveni ce los deveni plu danada.

Multe turistes ia continua sua turi de la atraes en modo tan bon como posible. Un duple franses ia dise ce los ia debe nada, plu o min, pos la cade de alga de la plataformas de lenio locada en partes propensada a inondas.

A esta matina, on ia vide alga barcos encaliada.

On fa ja de 2003 un projeta per defende Venezia de inondas, ma esta ia es impedida par costas altinte, scandales e retardas. La intende es ce on construi alga portones flotante per proteje la site contra mareas alta.

Lo ia pluve forte en Italia ier, e on previde plu pluves per la dias veninte.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Cimri Sude Nova prepara per un dia desastrosa

12 novembre 2019

Un area vasta de la costa este de Australia, incluinte la rejion sirca Sydney, prepara se contra la menasa de focones savaje la plu grave en sua istoria.

Plu ca sincodes focones arde ja tra la stato Cimri Sude Nova, e on predise un situa “desastrosa” per la parte plu tarda de oji. La flamas va sperde rapida, perilinte vives, nurida par la temperatur alta e la ventas forte.

Sirca ses milion persones abita en la rejion afetada. On ia recomenda ce persones resta distante de la savana, e ce on parti de sua casa ante la grandi de la focones. Plu ca ses-sento scolas es cluida tra la stato.

Tre persones ia mori e plu ca sento sincodes imobilas ia es destruida pos la intensi de la crise a venerdi. Ma la autoriosas dise ce los fronti aora lo cual ta pote es “la semana de focones savaje la plu perilosa cual esta nasion ia vide nunca”.

Espertas compara la predise per oji a la Saturdi Negra de 2009 en la stato Victoria, cuando tal focones ia mata 173 persones.

Esta es la ves prima cuando on ia avisa sur focones de grado “desastrosa” tra la rejion jeneral de Sydney e en la partes a sua norde e sude. Esta grado, la plu alta, ia es introduida pos la esperia de 2009.

A 15:00 de ora local, on ia publici ja 11 avisas de crise, avertinte persones ce sua vives es direta perilida. Ma la xefes de la pompores ia averti ce la situa la plu mal ancora no ia ariva, con temperatur prediseda de 37°C en alga partes e la posiblia de cambias tarda de la dirije de la venta.

Tre mil pompores batalia un fronte cual estende tra mil cilometres longo la costa norde de Cimri Sude Nova. La pompores es aumentada par ecipos de otra statos e de Zeland Nova, como ance par la Forte de Defende Australian.

Ofisiores dise ce la grandia de alga focones esede sento mil ectares. Brasas de la focones grande pote causa plu ensendes tan distante como tredes cilometres.

La saison de focones en Australia ia deveni plu longa e intensa par causa de cambias a la clima.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Un profesor rusce confesa mata sua amor

11 novembre 2019

Un istoriste rusce e bon conoseda ia confesa mata sua amor, pos es trovada en un rio con un bolson conteninte la brasos de un fem.

Oleg Sokolov, ci ave 63 anios, ia es enebriada e ia cade en la rio cuando el ia atenta dejeta partes de corpo. La polisia ia trova la corpo destestida de Anastasia Yeshchenko, ci ia ave 24 anios, en sua aparte en la site San Peterburg.

Sokolov es un esperta sur Napoléon e ia es asetada en la Lejion de Onora de Frans. Sua avocato ia dise ce el ia confesa sua culpablia, regrete sua ata, e coopera. El ia es tratada en ospital per ipotermia.

On reporta ce la profesor ia mata sua amor en un disputa e ia sieri sua testa, brasos e gamas a via. El ia intende dejeta la corpo ante suiside publica en vestes de Napoléon.

Yeshchenko ia move de la rejion Krasnodar en Rusce sude a San Peterburg per studia, e ia es un posgraduada cuando el ia mori. Un conoseda ia dise: “El ia es cuieta, dulse, e sempre la studiante ideal. Vera cadun ia conose la esiste de sua relata.”

El ia studia la istoria franses e ia coscrive alga obras istorial con Sokolov. Ambos ia gusta vesti se en stilos istorial.

Studiantes ia descrive Sokolov como un profesor talentosa ci parla franses e fa imitas de Napoléon, ma ance como un manica ci ia nomi sua amor “Joséphine” e ia demanda ce on nomi el “sir”.

El ia es ance un membro de la Instituida de Siensa Sosial, Economica e Politica en Frans, cual ia dise a saturdi ce lo ia sutrae el de sua posto en sua comite siensal.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Coleria sur la deteni de un jornaliste nijerian

10 novembre 2019

La departe governal de securia de Nijeria dise ce lo deteni ancora la jornaliste Omoyele Sowore, ci es acusada de tradi, an pos cuando on ia libri el con garantia, car no person ia veni per reprende el.

Ma Sahara Reporters, la pajeria de novas fundida par Sowore, dise ce on ia preveni ce sua avocatos asede el cuando los ia atenta prende el de prison en Abuja.

Sowore ia es detenida en Lagos en agosto, pos recomenda un revolui. El ia es un aspiror per la presidentia a la eleje en febrero pasada. Sua aresta ia provoca coleria publica contra la departe de securia, DSS.

Un ativiste e jornaliste ci abita usual en la SUA, el ia es acusada de tradi, lava de mone, e trasa dijital pos alegas ce el ia comparti informas falsa e insultante sur presidente Muhamadu Buhari, ci ia gania un periodo du en la eleje.

El ia recomenda un revolui pos dise ce la eleje en esta anio no ia es credable.

A 2 agosto, el ia tuita: “Tota cual es nesesada per un #Revolui es ce la opresadas eleje un data cual los desira per libra, no controlada par la aproba de la opresor.”

A la dia seguente, el ia envia un plu tuita: “DSS invade la casa de Sowore.”

Esta es la ves du a cual on ia dona libria a Sowore con garantia ma sin relasa ultima el.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Un santeria disputada barati es donada a indus

9 novembre 2019

En Barat, la corte suprema ia deside ce Ayodhya, un santeria disputada en la norde de la pais, debe es donada a indus ci desira construi ala un templo.

La caso es ja forte disputada par indus e muslimes tra desenios, focante sur la posese de la tera en la stato Uttar Pradesh. Multe indus crede ce Ayodhya es la loca de nase de Ram, un de sua dios la plu santa, ma muslimes dise ce los adora ala tra jeneras.

La corte ia dise ce muslimes va reseta un otra peso de tera per construi un mascita.

La mascita Babri de la sentenio 16 es a la cor de la disputa. Manadas indu ia destrui lo en 1992, provocante tumultas cual ia mata 2000 persones.

En sua judi unida, la corte ia dise ce un reporta par la Sonda Arceolojial de Barat atesta ce la restas de un construida “cual no es muslim” esiste su la strutur de la mascita destruida.

Lo ia dirije la governa federal a institui un fidusia per maneja e supravide la construi de la templo indu. An tal, lo ia ajunta ce la destrui de la mascita Babri ia es nonlegal.

Un representor de la litigores muslim ia comenta ce los no es sasiada e va deside esce los va solisita un revisa pos leje la judi intera.

Estra la corte, la situa ia es jeneral calma. On ia deteni sentos de persones en Ayodhya ante la judi ier, temente violentia. Miles de polisiores es posada en la site, e botecas es cluida asta lundi.

La polisia monitori ance redes sosial per comentas flaminte. Los responde a tuitas e demanda ce usores sutrae los.

Multe indus crede ce la mascita Babri ia es construida sur la ruinas de un templo indu destruida par invadores muslim en la sentenio 16. Muslimes dise ce los ia prea a la mascita asta desembre 1949, cuando alga indus ia pone un idol de Ram en la mascita e ia comensa adora lo.

La du grupos relijiosa ia litiga a multe veses sur la controla de la loca.

Induisme es la relijio majorial de Barat. On crede ce lo esiste tra plu ca 4000 anios. La dinastia prima muslim en la pais ia es instituida en la temprana de la sentenio 13.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Quebec refusa un franses per sua tese partal engles

8 novembre 2019

La provinse Quebec en Canada este ia refusa dona la state de migror a un sitadan franses, car el no ia pote mostra un capasia sufisinte de la lingua franses.

Quebec ia rejeta un solisita per abita de Émilie Dubois, parente car un parte de sua tese de universia ia es en engles. Dubois ia veni a Quebec de Frans en 2012 e ia completi un diploma dotoral a un universia de lingua franses.

Esta graduada de biolojia ia dise ce el ia alterna entre rie e noncomprende cuando el ia reseta la letera informante el sur la deside.

En Quebec on parla xef franses, e Dubois, ci ave 31 anios, ia solisita abita su un program provinsal per studiantes stranjer cual obliga aspirores a mostra un capasia forte en la lingua.

“Si algun ci es franses e ia nase en Frans vade a un universia do on parla franses e fa tota en franses, e an tal on rejeta el, lo es asurda,” Dubois ia comenta.

Plu temprana en esta anio, el ia susede un esamina per demostra sua capasia de lingua franses. Ma el ia reseta un letera final de refusa, declarante ce el no ia completi sua educa intera en franses, incluinte sua tese.

Sola un de sinco capitoles en sua tese sur biolojia selulal e moleculal ia es scriveda en engles, per publici en un jornal siensal.

Dubois ia dise: “Esta es como siensistes comunica. Los comparti sabes, e esta es xef fada en jornales de lingua engles.” El ia ajunta ce lo ia senti como si “la mundo cade sur mea testa” cuando el ia reseta la letera. El ia intende abita en Quebec e construi ala sua vive. “Me no parteni plu a Frans,” el ia dise.

El espera fa ce on reversa la deside, car sua caso es suportada par sua membro local de la asembla provinsal. Plu, la ministro de migra quebecan ia declara ier ce la deside no pare es multe lojical. El ia demanda ce ofisiores investiga la situa.

Quebec ave un acorda spesial sur migra con la governa federal de Canada, e ave potias grande sur la eleje de migrores. Un migror debe oteni un “documento de eleje” de la provinse ante pote demanda a la governa per abita permanente.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

Un alarma falsa a la airoporto de Amsterdam

7 novembre 2019

Un pilote de avion ia ativi nonintendente un alarma de saisi, creante un aveni major de securia a la airoporto Schiphol en la site Amsterdam en Nederland.

La polisia militar nederlandes ia tuita a sirca 19:30 ce los investiga un situa suspetosa. Un parte de la airoporto ia es cluida cuando la polisia ia responde a la menasa reportada.

Ma pos sirca un ora, Air Europa ia anunsia ce la alarma es falsa, tuitante: “En la vola de Amsterdam a Madrid a esta posmedia, on ia ativi, par era, un avisa inisiante protocoles per aviones saisida a la airoporto. No cosa ia aveni. Tota pasajores es secur e sana, espetante vola pos tempo corta. Nos regrete profonda.”

Corta ante la anunsia, la polisia militar ia confirma ce tota pasajores e empleores ia es secur evacuada de la avion destinada per Madrid.

Imajes postada a redes sosial ia mostra partes de Molo D cluida per la popla jeneral, e pasajores espetante informas. Aviones ia atera ancora a otra partes de la airoporto en la tempo disturbada, ma la servis de crise ia veni e alga aviones ia es prevenida de enaira.

On ia vide polisiores en la termina, ma la ambiente ia es jeneral calma en la airoporto, an con la disturba.

Ofisiores nederlandes ia descrive la aveni como un situa GRIP-3, representante un problem seria con efetos major a la popla local.

Documentos regulante, publicida par la Departe Federal de Avioni en la SUA, esplica ce pilotes pote usa un codigo spesial de transpondador, tapente 7500, per siniali un alarma sur interfere nonlegal en caso ce la avion es saisida. Lo no es clar esce esta ia aveni en la alarma falsa ier.

La airoporto de Amsterdam es un de la sentros de transporta la plu ativa en Europa, manejante plu ca 70 milion pasajores en cada anio.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

On catura un fem contrabandante oro en sua sapatos

6 novembre 2019

On ia deteni un fem ci ia atenta contrabanda oro en sua sapatos tra la frontera entre Rusia e Xina.

Usante un detetador de metales, duanores rusce ia descovre ce el ave oto discos de oro bandida a la fondos de sua pedes. En junta, la 1,9 cilogrames de oro ave un valua de plu ca sinco milion rublos.

La sitadan rusce ia pare “nervosa e suspetosa”, un portavose ia dise per la duana a un punto de frontera prosima a Txita en Sibir este. El ia “pone nonatural un pede ante la otra”, e esta ia crea suspeta en la duanores.

La fem ia porta la oro per un sitadan xines. Un investiga criminal es ja inisiada.

En esta anio, la autoriosas en la rejion Zabaicalsci-Crai ia catura persones diversa ci ia atenta contrabanda oro a Xina, incluinte un rusce ci ia atenta traversa la frontera con des baras de oro en sua sapatos de sporte.

La escava de oro es un comersia grande en Sibir, un pais rica con recursos. Ma en otobre, un parario ia colasa a un escaveria en la rejion Crasnoiarsc, matante a la min des-sinco persones.

AORA OJI
Novas de la mundo, simple reportada en elefen
2019 · 2018 · 2017 · 2016 · 2015 · 2014 · 2013

La SUA comensa retira se de la Acorda de Paris

5 novembre 2019

La Statos Unida de America ia comensa la prosede de retira se de la Acorda de Paris, avisante la Nasiones Unida de sua intende de sesa. Otra paises ia reata con espresas de regrete e delude.

La avisa inisia un prosede de un anio per retira de la acorda global sur cambia de clima, culminate a la dia pos la eleje presidental de 2020.

Frans e Japan ia gida condenas internasional de la retira.

La acorda ia uni 188 nasiones per combate la crise climal. Lo ia obliga la SUA e 187 otra paises a manteni la crese de temperatur global a min ca 2°C supra la situa preindustrial, e ia atenta limita la crese an plu a 1,5°C.

La deside de retira, fada par presidente Donald Trump, ia fa ce la SUA es la sola nonsuscrivor en la mundo. Lo ia provoca laboras a nivel alta par la Uni European per manteni la bon funsiona de la acorda.

An tal, sentos de governas, comersias e organizas local en la SUA ia junta se a la promove “Nos Es Ancora En” [la acorda], prometente redui emetes e move a enerjia renovable.

Michael Bloomberg, ambasador de clima a la Nasiones Unida e emprendor esuan, ia dise en un declara postada en la pajes de la promove ce el labora per tapi la buco finansial lasada par la retira de la governa de Trump, cual el ia descrive como “un renunsia de xefia”.

aora_oji/xef.txt · Editada: 2019/11/14 08:07 par Simon