LETERATUR
Testos orijinal · Cantas traduida · Dramas traduida · Naras traduida · Poesias traduida · Sitas traduida · Testos diversa

Santa o pecor

par Guido Crufio

Xux! Me es serta ce me oia un vose, xuxante en mea orea
Lo pare tan vera real, ce me senti un poca marea
Cisa me imajina lo, natural, acel debe es vera
Me serta no crede ce me ia fa un era
No! On ave la vose denova, lo dise “No fa lo” vera cuieta
Ma, ci es tu, instrui a me, me senti alga noncuieta
Me pote deside per mea mesma, me no vole vanta
An con tota, serta me no es un santa!
Me prende un videta, me vide algun ala
Un om peti e sant’-aspetante, sta sur mea spala!
El ave aletas peti sur sua dorso, acel me pote atesta
E un areola ronda briliante, flotante supra sua testa.
Cual plu me oia, esce lo es un otra vose?
Si! Esta, como la prima, me serta no conose
Lo dise a me en un modo fea e savaje
“Fa esata como me dise, escuta mea mesaje”
Cual me ta fa, me no sabe, cual vose es coreta?
Esce me ta resiste tenta, mea testa es como un jireta!
Me prende un videta, me vide algun ala
Un om peti e coler-aspetante, sta sur mea otra spala!
Sur sua testa senta du peti cornos puntida
E pos el on ave un coda protendente roja colorida.
Tu vide, sur un spala me ave un diablo, sur la otra me ave un santa
La du de los babela en mea oreas per los ideas implanta
Me sabe ce me ta fa cual la santa dise, acel es la bon cosa
Ma es plu divertinte, apena a cada dia, fa cual la diablo proposa
Esce me ta escuta la diablo e fa cual el spesifa?
O esce me ta escuta la santa como me sabe me ta fa?
Un eleje tan difisil, me trova mea mente divideda
Ai! In tan dilema, me no es completa desideda!
Santa o pecor?
Cual tu ta fa, cara lejor?

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 23 marto 2024 (17:15 UTC).